𑁧𑁦. 𑀧𑀭𑀺𑀩𑁆𑀩𑀸𑀚𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁦. 𑀤𑀲𑀫𑁂 𑀅𑀪𑀺𑀜𑁆𑀜𑀸𑀢𑀸𑀢𑀺 𑀏𑀤𑀺𑀲𑁄 𑀘 𑀏𑀤𑀺𑀲𑁄 𑀘𑀸𑀢𑀺 𑀅𑀪𑀺𑀮𑀓𑁆𑀔𑀡𑀯𑀲𑁂𑀦 𑀜𑀸𑀢𑀸. 𑀢𑁂𑀦𑀸𑀳 ‘‘𑀜𑀸𑀢𑀸 𑀧𑀸𑀓𑀝𑀸’’𑀢𑀺. 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄𑀢𑀺 𑀏𑀢𑁆𑀣 𑀧𑀝𑀺𑀲𑀮𑁆𑀮𑀸𑀦𑀦𑁆𑀢𑀺 𑀢𑁂𑀳𑀺 𑀢𑁂𑀳𑀺 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀅𑀦𑁆𑀢𑁂𑀯𑀸𑀲𑀺𑀓𑀉𑀧𑀸𑀲𑀓𑀸𑀤𑀺𑀲𑀢𑁆𑀢𑁂𑀳𑀺 𑀘𑁂𑀯 𑀭𑀽𑀧𑀸𑀭𑀫𑁆𑀫𑀡𑀸𑀤𑀺𑀲𑀗𑁆𑀔𑀸𑀭𑁂𑀳𑀺 𑀘 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀅𑀧𑀲𑀓𑁆𑀓𑀺𑀢𑁆𑀯𑀸 𑀲𑀮𑁆𑀮𑀻𑀦𑀁 𑀦𑀺𑀮𑀻𑀬𑀦𑀁, 𑀏𑀓𑀻𑀪𑀸𑀯𑁄 𑀧𑀯𑀺𑀯𑁂𑀓𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑁄 𑀢𑀢𑁄 𑀯𑀼𑀝𑁆𑀞𑀺𑀢𑁄, 𑀲𑁄 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀦𑀸𑀫 𑀳𑁄𑀢𑀺. 𑀪𑀕𑀯𑀸 𑀧𑀦 𑀬𑀲𑁆𑀫𑀸 𑀧𑀝𑀺𑀲𑀮𑁆𑀮𑀸𑀦𑀸 𑀉𑀢𑁆𑀢𑀫𑀢𑁄 𑀨𑀮𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀲𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄𑀢𑀺 𑀨𑀮𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀺𑀢𑁄’’𑀢𑀺. 𑀯𑀢𑁆𑀣𑀼𑀓𑀸𑀫𑁂𑀲𑀽𑀢𑀺 𑀭𑀽𑀧𑀸𑀤𑀻𑀲𑀼 𑀓𑀺𑀮𑁂𑀲𑀓𑀸𑀫𑀲𑁆𑀲 𑀯𑀢𑁆𑀣𑀼𑀪𑀽𑀢𑁂𑀲𑀼 𑀓𑀸𑀫𑁂𑀲𑀼. 𑀩𑀳𑀮𑀭𑀸𑀕𑀦𑁆𑀢𑀺 𑀣𑀺𑀭𑀫𑀽𑀮𑀤𑀼𑀫𑁆𑀫𑁄𑀘𑀦𑀻𑀬𑀢𑀸𑀳𑀺 𑀅𑀚𑁆𑀛𑁄𑀲𑀸𑀦𑁂𑀦 𑀩𑀳𑀮𑀪𑀽𑀢𑀁 𑀓𑀺𑀮𑁂𑀲𑀓𑀸𑀫𑀁. 𑀲𑀓𑀸𑀭𑀡𑀸𑀢𑀺 𑀬𑁂𑀳𑀺 𑀓𑀸𑀭𑀡𑁂𑀳𑀺 𑀧𑀭𑁂𑀲𑀁 𑀯𑀸𑀤𑁂 𑀤𑁄𑀲𑀁 𑀤𑀲𑁆𑀲𑁂𑀦𑁆𑀢𑀺, 𑀢𑁂𑀳𑀺 𑀓𑀸𑀭𑀡𑁂𑀳𑀺 𑀲𑀓𑀸𑀭𑀡𑀸. 𑀦 𑀳𑀺 𑀮𑀓𑁆𑀔𑀡𑀬𑀼𑀢𑁆𑀢𑁂𑀦 𑀳𑁂𑀢𑀼𑀦𑀸 𑀯𑀺𑀦𑀸 𑀧𑀭𑀯𑀸𑀤𑁂𑀲𑀼 𑀤𑁄𑀲𑀁 𑀤𑀲𑁆𑀲𑁂𑀢𑀼𑀁 𑀲𑀓𑁆𑀓𑀸.

𑀏𑀯𑀫𑀸𑀤𑀻𑀢𑀺 𑀏𑀢𑁆𑀣 𑀆𑀤𑀺𑀲𑀤𑁆𑀤𑁂𑀦 ‘‘𑀦𑀢𑁆𑀣𑀺 𑀳𑁂𑀢𑀼 𑀦𑀢𑁆𑀣𑀺 𑀧𑀘𑁆𑀘𑀬𑁄 𑀲𑀢𑁆𑀢𑀸𑀦𑀁 𑀲𑀁𑀓𑀺𑀮𑁂𑀲𑀸𑀬𑀸’’𑀢𑀺 (𑀤𑀻. 𑀦𑀺. 𑁧.𑁧𑁬𑁮) 𑀏𑀯𑀫𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺, 𑀢𑀲𑁆𑀫𑀸 𑀏𑀯𑀫𑀸𑀤𑀺𑀯𑀸𑀤𑀺𑀦𑁄 𑀏𑀯𑀁 𑀳𑁂𑀢𑀼𑀧𑁆𑀧𑀝𑀺𑀓𑁆𑀔𑁂𑀧𑀯𑀸𑀤𑀺𑀦𑁄𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀦𑀢𑁆𑀣𑀺𑀓𑀤𑀺𑀝𑁆𑀞𑀺 𑀯𑀺𑀧𑀸𑀓𑀁 𑀧𑀝𑀺𑀩𑀸𑀳𑀢𑀺, 𑀅𑀓𑀺𑀭𑀺𑀬𑀤𑀺𑀝𑁆𑀞𑀺 𑀓𑀫𑁆𑀫𑀁 𑀧𑀝𑀺𑀩𑀸𑀳𑀢𑀺, 𑀅𑀳𑁂𑀢𑀼𑀓𑀤𑀺𑀝𑁆𑀞𑀺 𑀉𑀪𑀬𑀁 𑀧𑀝𑀺𑀩𑀸𑀳𑀢𑀺. 𑀢𑀢𑁆𑀣 𑀓𑀫𑁆𑀫𑀁 𑀧𑀝𑀺𑀩𑀸𑀳𑀦𑁆𑀢𑁂𑀦 𑀯𑀺𑀧𑀸𑀓𑁄 𑀧𑀝𑀺𑀩𑀸𑀳𑀺𑀢𑁄 𑀳𑁄𑀢𑀺, 𑀯𑀺𑀧𑀸𑀓𑀁 𑀧𑀝𑀺𑀩𑀸𑀳𑀦𑁆𑀢𑁂𑀦𑀧𑀺 𑀓𑀫𑁆𑀫𑀁 𑀧𑀝𑀺𑀩𑀸𑀳𑀺𑀢𑀁. 𑀇𑀢𑀺 𑀲𑀩𑁆𑀩𑁂𑀧𑁂𑀢𑁂 𑀅𑀢𑁆𑀣𑀢𑁄 𑀉𑀪𑀬𑀧𑀝𑀺𑀩𑀸𑀳𑀓𑀸 𑀅𑀳𑁂𑀢𑀼𑀯𑀸𑀤𑀸 𑀘𑁂𑀯 𑀅𑀓𑀺𑀭𑀺𑀬𑀯𑀸𑀤𑀸 𑀘 𑀦𑀢𑁆𑀣𑀺𑀓𑀯𑀸𑀤𑀸 𑀘 𑀳𑁄𑀦𑁆𑀢𑀺.

𑀑𑀓𑁆𑀓𑀦𑁆𑀢𑀦𑀺𑀬𑀫𑀸𑀢𑀺 𑀑𑀕𑀸𑀴𑁆𑀳𑀫𑀺𑀘𑁆𑀙𑀢𑁆𑀢𑀦𑀺𑀬𑀫𑀸. 𑀲𑀚𑁆𑀛𑀸𑀬𑀢𑀻𑀢𑀺 𑀢𑀁 𑀤𑀺𑀝𑁆𑀞𑀺𑀤𑀻𑀧𑀓𑀁 𑀕𑀦𑁆𑀣𑀁 𑀉𑀕𑁆𑀕𑀳𑁂𑀢𑁆𑀯𑀸 𑀧𑀞𑀢𑀺. 𑀯𑀻𑀫𑀁𑀲𑀢𑀻𑀢𑀺 𑀢𑀲𑁆𑀲 𑀅𑀢𑁆𑀣𑀁 𑀯𑀺𑀘𑀸𑀭𑁂𑀢𑀺. 𑀢𑀲𑁆𑀲𑀸𑀢𑀺𑀆𑀤𑀺 𑀯𑀻𑀫𑀁𑀲𑀦𑀸𑀓𑀸𑀭𑀤𑀲𑁆𑀲𑀦𑀁. 𑀢𑀲𑁆𑀫𑀺𑀁 𑀆𑀭𑀫𑁆𑀫𑀡𑁂𑀢𑀺 𑀬𑀣𑀸𑀧𑀭𑀺𑀓𑀧𑁆𑀧𑀺𑀢𑀳𑁂𑀢𑀼𑀧𑀘𑁆𑀘𑀬𑀸𑀪𑀸𑀯𑀸𑀤𑀺𑀓𑁂 𑀦𑀢𑁆𑀣𑀺 𑀳𑁂𑀢𑀽𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸𑀬 𑀮𑀤𑁆𑀥𑀺𑀬𑀸 𑀆𑀭𑀫𑁆𑀫𑀡𑁂. 𑀫𑀺𑀘𑁆𑀙𑀸𑀲𑀢𑀺 𑀲𑀦𑁆𑀢𑀺𑀝𑁆𑀞𑀢𑀻𑀢𑀺 ‘‘𑀦𑀢𑁆𑀣𑀺 𑀳𑁂𑀢𑀽’’𑀢𑀺𑀆𑀤𑀺𑀯𑀲𑁂𑀦 𑀅𑀦𑀼𑀲𑁆𑀲𑀯𑀽𑀧𑀮𑀤𑁆𑀥𑁂 𑀅𑀢𑁆𑀣𑁂 𑀢𑀤𑀸𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑀦𑁂𑀳𑀺 𑀲𑀯𑀺𑀕𑁆𑀕𑀳𑁂 𑀯𑀺𑀬 𑀲𑀭𑀽𑀧𑀢𑁄 𑀘𑀺𑀢𑁆𑀢𑀲𑁆𑀲 𑀧𑀘𑁆𑀘𑀼𑀧𑀝𑁆𑀞𑀺𑀢𑁂 𑀘𑀺𑀭𑀓𑀸𑀮𑀧𑀭𑀺𑀘𑀬𑁂𑀦 𑀏𑀯𑀫𑁂𑀢𑀦𑁆𑀢𑀺 𑀦𑀺𑀚𑁆𑀛𑀸𑀦𑀓𑁆𑀔𑀫𑀪𑀸𑀯𑀽𑀧𑀕𑀫𑀦𑁂𑀦 𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸 𑀢𑀣𑀸𑀕𑀳𑀺𑀢𑁂 𑀧𑀼𑀦𑀧𑁆𑀧𑀼𑀦𑀁 𑀢𑀣𑁂𑀯 𑀆𑀲𑁂𑀯𑀦𑁆𑀢𑀲𑁆𑀲 𑀩𑀳𑀼𑀮𑀻𑀓𑀭𑁄𑀦𑁆𑀢𑀲𑁆𑀲 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑁂𑀦 𑀲𑀫𑀸𑀦𑀻𑀬𑀫𑀸𑀦𑀸 𑀫𑀺𑀘𑁆𑀙𑀸𑀯𑀸𑀬𑀸𑀫𑁄𑀧𑀢𑁆𑀣𑀫𑁆𑀪𑀺𑀢𑀸 𑀅𑀢𑀁𑀲𑀪𑀸𑀯𑀁 𑀢𑀁𑀲𑀪𑀸𑀯𑀦𑁆𑀢𑀺 𑀕𑀡𑁆𑀳𑀦𑁆𑀢𑀻 𑀫𑀺𑀘𑁆𑀙𑀸𑀲𑀢𑀻𑀢𑀺 𑀮𑀤𑁆𑀥𑀦𑀸𑀫𑀸 𑀢𑀁𑀮𑀤𑁆𑀥𑀺𑀲𑀳𑀕𑀢𑀸 𑀢𑀡𑁆𑀳𑀸 𑀲𑀦𑁆𑀢𑀺𑀝𑁆𑀞𑀢𑀺. 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀳𑁄𑀢𑀻𑀢𑀺 𑀬𑀣𑀸𑀯𑀼𑀢𑁆𑀢𑀯𑀺𑀢𑀓𑁆𑀓𑀸𑀤𑀺𑀧𑀘𑁆𑀘𑀬𑀮𑀸𑀪𑁂𑀦 𑀢𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀅𑀯𑀝𑁆𑀞𑀺𑀢𑀢𑀸𑀬 𑀅𑀦𑁂𑀓𑀕𑁆𑀕𑀢𑀁 𑀧𑀳𑀸𑀬 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀅𑀧𑁆𑀧𑀺𑀢𑀁 𑀯𑀺𑀬 𑀳𑁄𑀢𑀺 𑀫𑀺𑀘𑁆𑀙𑀸𑀲𑀫𑀸𑀥𑀺𑀦𑀸. 𑀲𑁄𑀧𑀺 𑀳𑀺 𑀧𑀘𑁆𑀘𑀬𑀯𑀺𑀲𑁂𑀲𑁂𑀦 𑀮𑀤𑁆𑀥𑀪𑀸𑀯𑀦𑀸𑀩𑀮𑁄 𑀓𑀤𑀸𑀘𑀺 𑀲𑀫𑀸𑀥𑀸𑀦𑀧𑀝𑀺𑀭𑀽𑀧𑀓𑀺𑀘𑁆𑀘𑀓𑀭𑁄 𑀳𑁄𑀢𑀺𑀬𑁂𑀯 𑀧𑀳𑀭𑀡𑀯𑀺𑀚𑁆𑀛𑀦𑀸𑀤𑀻𑀲𑀼 𑀯𑀺𑀬𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀚𑀯𑀦𑀸𑀦𑀺 𑀚𑀯𑀦𑁆𑀢𑀻𑀢𑀺 𑀅𑀦𑁂𑀓𑀓𑁆𑀔𑀢𑁆𑀢𑀼𑀁 𑀢𑁂𑀦𑀸𑀓𑀸𑀭𑁂𑀦 𑀧𑀼𑀩𑁆𑀩𑀪𑀸𑀕𑀺𑀬𑁂𑀲𑀼 𑀚𑀯𑀦𑀯𑀸𑀭𑁂𑀲𑀼 𑀧𑀯𑀢𑁆𑀢𑁂𑀲𑀼 𑀲𑀩𑁆𑀩𑀧𑀘𑁆𑀙𑀺𑀫𑁂 𑀚𑀯𑀦𑀯𑀸𑀭𑁂 𑀲𑀢𑁆𑀢 𑀚𑀯𑀦𑀸𑀦𑀺 𑀚𑀯𑀦𑁆𑀢𑀺. 𑀧𑀞𑀫𑀚𑀯𑀦𑁂 𑀲𑀢𑁂𑀓𑀺𑀘𑁆𑀙𑁄 𑀳𑁄𑀢𑀺, 𑀢𑀣𑀸 𑀤𑀼𑀢𑀺𑀬𑀸𑀤𑀻𑀲𑀽𑀢𑀺 𑀥𑀫𑁆𑀫𑀲𑀪𑀸𑀯𑀤𑀲𑁆𑀲𑀦𑀫𑁂𑀢𑀁, 𑀦 𑀧𑀦 𑀢𑀲𑁆𑀫𑀺𑀁 𑀔𑀡𑁂 𑀢𑁂𑀲𑀁 𑀲𑀢𑁂𑀓𑀺𑀘𑁆𑀙𑀪𑀸𑀯𑀸𑀧𑀸𑀤𑀦𑀁 𑀓𑁂𑀦𑀘𑀺 𑀲𑀓𑁆𑀓𑀸 𑀓𑀸𑀢𑀼𑀁. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀢𑀻𑀲𑀼 𑀫𑀺𑀘𑁆𑀙𑀸𑀤𑀲𑁆𑀲𑀦𑁂𑀲𑀼. 𑀓𑁄𑀘𑀺 𑀏𑀓𑀁 𑀤𑀲𑁆𑀲𑀦𑀁 𑀑𑀓𑁆𑀓𑀫𑀢𑀻𑀢𑀺 𑀬𑀲𑁆𑀲 𑀏𑀓𑀲𑁆𑀫𑀺𑀁𑀬𑁂𑀯 𑀅𑀪𑀺𑀦𑀺𑀯𑁂𑀲𑁄 𑀆𑀲𑁂𑀯𑀦𑀸 𑀧𑀯𑀢𑁆𑀢𑀸, 𑀲𑁄 𑀏𑀓𑀁𑀬𑁂𑀯 𑀤𑀲𑁆𑀲𑀦𑀁 𑀑𑀓𑁆𑀓𑀫𑀢𑀺. 𑀬𑀲𑁆𑀲 𑀤𑁆𑀯𑀻𑀲𑀼 𑀢𑀻𑀲𑀼𑀧𑀺 𑀯𑀸 𑀅𑀪𑀺𑀦𑀺𑀯𑁂𑀲𑁄 𑀆𑀲𑁂𑀯𑀦𑀸 𑀧𑀯𑀢𑁆𑀢𑀸, 𑀲𑁄 𑀤𑁆𑀯𑁂 𑀢𑀻𑀡𑀺 𑀑𑀓𑁆𑀓𑀫𑀢𑀺. 𑀏𑀢𑁂𑀦 𑀬𑀸 𑀧𑀼𑀩𑁆𑀩𑁂 𑀉𑀪𑀬𑀧𑀝𑀺𑀩𑀸𑀳𑀺𑀓𑀢𑀸𑀫𑀼𑀔𑁂𑀦 𑀧𑀯𑀢𑁆𑀢𑀸 𑀅𑀢𑁆𑀣𑀲𑀺𑀤𑁆𑀥𑀸 𑀲𑀩𑁆𑀩𑀤𑀺𑀝𑁆𑀞𑀺𑀓𑀸, 𑀲𑀸 𑀧𑀼𑀩𑁆𑀩𑀪𑀸𑀕𑀺𑀬𑀸, 𑀫𑀺𑀘𑁆𑀙𑀸𑀦𑀺𑀬𑀸𑀫𑁄𑀓𑁆𑀓𑀦𑁆𑀢𑀺𑀬𑀸 𑀧𑀦 𑀬𑀣𑀸𑀲𑀓𑀁 𑀧𑀘𑁆𑀘𑀬𑀲𑀫𑀼𑀤𑀸𑀕𑀫𑀤𑀺𑀝𑁆𑀞𑀺𑀢𑁄 𑀪𑀺𑀦𑁆𑀦𑀸𑀭𑀫𑁆𑀫𑀡𑀸𑀦𑀁 𑀯𑀺𑀬 𑀯𑀺𑀲𑁂𑀲𑀸𑀥𑀺𑀕𑀫𑀸𑀦𑀁 𑀏𑀓𑀚𑁆𑀛𑀁 𑀅𑀦𑀼𑀧𑁆𑀧𑀢𑁆𑀢𑀺𑀬𑀸 𑀅𑀪𑀺𑀓𑀺𑀡𑁆𑀡𑀸 𑀏𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀏𑀓𑀲𑁆𑀫𑀺𑀁 𑀑𑀓𑁆𑀓𑀦𑁆𑀢𑁂𑀧𑀺 𑀤𑁆𑀯𑀻𑀲𑀼 𑀢𑀻𑀲𑀼 𑀑𑀓𑁆𑀓𑀦𑁆𑀢𑁂𑀲𑀼𑀧𑀺 𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄𑀯 𑀳𑁄𑀢𑀻𑀢𑀺 𑀇𑀫𑀺𑀦𑀸 𑀢𑀺𑀲𑁆𑀲𑀦𑁆𑀦𑀫𑁆𑀧𑀺 𑀤𑀺𑀝𑁆𑀞𑀻𑀦𑀁 𑀲𑀫𑀸𑀦𑀨𑀮𑀢𑀁 𑀲𑀫𑀸𑀦𑀩𑀮𑀜𑁆𑀘 𑀤𑀲𑁆𑀲𑁂𑀢𑀺. 𑀢𑀲𑁆𑀫𑀸 𑀢𑀺𑀲𑁆𑀲𑁄𑀧𑀺 𑀘𑁂𑀢𑀦𑀸 𑀏𑀓𑀲𑁆𑀲 𑀉𑀧𑁆𑀧𑀦𑁆𑀦𑀸 𑀅𑀜𑁆𑀜𑀫𑀜𑁆𑀜𑀁 𑀅𑀦𑀼𑀩𑀮𑀧𑁆𑀧𑀤𑀸𑀬𑀺𑀓𑀸 𑀳𑁄𑀦𑁆𑀢𑀺.

𑀓𑀺𑀁 𑀧𑀦𑁂𑀲 𑀏𑀢𑀲𑁆𑀫𑀺𑀜𑁆𑀜𑁂𑀯 𑀅𑀢𑁆𑀢𑀪𑀸𑀯𑁂 𑀦𑀺𑀬𑀢𑁄, 𑀉𑀤𑀸𑀳𑀼 𑀅𑀜𑁆𑀜𑀲𑁆𑀫𑀺𑀫𑁆𑀧𑀻𑀢𑀺? 𑀏𑀢𑀲𑁆𑀫𑀺𑀜𑁆𑀜𑁂𑀯 𑀦𑀺𑀬𑀢𑁄. 𑀅𑀓𑀼𑀲𑀮𑀜𑁆𑀳𑀺 𑀦𑀸𑀫𑁂𑀢𑀁 𑀅𑀩𑀮𑀁, 𑀦 𑀓𑀼𑀲𑀮𑀁 𑀯𑀺𑀬 𑀫𑀳𑀸𑀩𑀮𑀁. 𑀅𑀜𑁆𑀜𑀣𑀸 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑁄 𑀯𑀺𑀬 𑀅𑀘𑁆𑀘𑀦𑁆𑀢𑀺𑀓𑁄 𑀲𑀺𑀬𑀸, 𑀆𑀲𑁂𑀯𑀦𑀯𑀲𑁂𑀦 𑀧𑀦 𑀪𑀯𑀦𑁆𑀢𑀭𑁂𑀧𑀺 𑀢𑀁 𑀢𑀁 𑀤𑀺𑀝𑁆𑀞𑀺𑀁 𑀭𑁄𑀘𑁂𑀢𑀺𑀬𑁂𑀯. 𑀢𑁂𑀦𑁂𑀯𑀸𑀳 ‘‘𑀯𑀝𑁆𑀝𑀔𑀸𑀡𑀼𑀓𑁄 𑀦𑀸𑀫𑁂𑀲 𑀲𑀢𑁆𑀢𑁄’’𑀢𑀺. 𑀢𑀲𑁆𑀫𑀸 ‘‘𑀲𑀓𑀺𑀁 𑀦𑀺𑀫𑀼𑀕𑁆𑀕𑁄 𑀦𑀺𑀫𑀼𑀕𑁆𑀕𑁄 𑀏𑀯 𑀩𑀸𑀮𑁄’’𑀢𑀺 𑀯𑀺𑀬 𑀯𑀝𑁆𑀝𑀔𑀸𑀡𑀼𑀚𑁄𑀢𑀦𑀸, 𑀬𑀸𑀤𑀺𑀲𑁂𑀳𑀺 𑀧𑀦 𑀧𑀘𑁆𑀘𑀬𑁂𑀳𑀺 𑀅𑀬𑀁 𑀢𑀁 𑀤𑀲𑁆𑀲𑀦𑀁 𑀑𑀓𑁆𑀓𑀦𑁆𑀢𑁄 𑀧𑀼𑀦 𑀓𑀤𑀸𑀘𑀺 𑀫𑀺𑀘𑁆𑀙𑀢𑁆𑀢𑀦𑀺𑀬𑀸𑀫𑁄 𑀢𑀧𑁆𑀧𑀝𑀺𑀓𑁆𑀔𑁂𑀧𑀧𑀘𑁆𑀘𑀬𑁂 𑀧𑀝𑀺𑀘𑁆𑀘 𑀢𑀢𑁄 𑀲𑀻𑀲𑀼𑀓𑁆𑀔𑁂𑀧𑀦𑀫𑀲𑁆𑀲 𑀦 𑀳𑁄𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑁂𑀪𑀼𑀬𑁆𑀬𑁂𑀦𑀸’’𑀢𑀺. 𑀏𑀤𑀺𑀲𑀸𑀢𑀺 ‘‘𑀩𑀼𑀤𑁆𑀥𑀸𑀦𑀫𑁆𑀧𑀺 𑀅𑀢𑁂𑀓𑀺𑀘𑁆𑀙𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀲𑀤𑀺𑀲𑀸.

𑀅𑀢𑁆𑀢𑀦𑁄 𑀦𑀺𑀦𑁆𑀤𑀸𑀪𑀬𑁂𑀦𑀸𑀢𑀺 ‘‘𑀲𑀫𑁆𑀫𑀸 𑀤𑀺𑀝𑁆𑀞𑀺𑀜𑁆𑀘 𑀦𑀸𑀫 𑀢𑁂 𑀕𑀭𑀳𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀅𑀢𑁆𑀢𑀦𑁄 𑀉𑀧𑀭𑀺 𑀧𑀭𑁂𑀳𑀺 𑀯𑀢𑁆𑀢𑀩𑁆𑀩𑀦𑀺𑀦𑁆𑀤𑀸𑀪𑀬𑁂𑀦. 𑀖𑀝𑁆𑀝𑀦𑀪𑀬𑁂𑀦𑀸𑀢𑀺 𑀢𑀣𑀸 𑀧𑀭𑁂𑀲𑀁 𑀅𑀧𑀲𑀸𑀤𑀦𑀪𑀬𑁂𑀦. 𑀲𑀳𑀥𑀫𑁆𑀫𑁂𑀦 𑀧𑀭𑁂𑀦 𑀅𑀢𑁆𑀢𑀦𑁄 𑀉𑀧𑀭𑀺 𑀓𑀸𑀢𑀩𑁆𑀩𑀦𑀺𑀕𑁆𑀕𑀳𑁄 𑀉𑀧𑀸𑀭𑀫𑁆𑀪𑁄, 𑀢𑀢𑁄 𑀧𑀭𑀺𑀢𑁆𑀢𑀸𑀲𑁄 𑀉𑀧𑀸𑀭𑀫𑁆𑀪𑀪𑀬𑀁. 𑀢𑀁 𑀧𑀦 𑀅𑀢𑁆𑀣𑀢𑁄 𑀉𑀧𑀯𑀸𑀤𑀪𑀬𑀁 𑀳𑁄𑀢𑀻𑀢𑀺 𑀆𑀳 ‘‘𑀉𑀧𑀯𑀸𑀤𑀪𑀬𑁂𑀦𑀸’’𑀢𑀺. 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀲𑁂𑀦 𑀅𑀪𑀺𑀚𑁆𑀛𑀸 𑀯𑀺𑀦𑀬𑀢𑀺 𑀏𑀢𑁂𑀦𑀸𑀢𑀺 𑀅𑀪𑀺𑀚𑁆𑀛𑀸𑀯𑀺𑀦𑀬𑁄, 𑀅𑀭𑀳𑀢𑁆𑀢𑀨𑀮𑀁. 𑀢𑁂𑀦𑀸𑀳 ‘‘𑀅𑀪𑀺𑀚𑁆𑀛𑀸𑀯𑀺𑀦𑀬𑁄 𑀯𑀼𑀘𑁆𑀘𑀢𑀺 𑀅𑀭𑀳𑀢𑁆𑀢’’𑀦𑁆𑀢𑀺.

𑀧𑀭𑀺𑀩𑁆𑀩𑀸𑀚𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀉𑀭𑀼𑀯𑁂𑀮𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.