𑁧. 𑀲𑀁𑀔𑀺𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁨. 𑀘𑀢𑀼𑀢𑁆𑀣𑀲𑁆𑀲 𑀧𑀞𑀫𑁂 𑀓𑀸𑀴𑀓𑀦𑁆𑀢𑀺 𑀫𑀮𑀻𑀦𑀁, 𑀘𑀺𑀢𑁆𑀢𑀲𑁆𑀲 𑀅𑀧𑁆𑀧𑀪𑀲𑁆𑀲𑀭𑀪𑀸𑀯𑀓𑀭𑀦𑁆𑀢𑀺 𑀅𑀢𑁆𑀣𑁄. 𑀢𑀁 𑀧𑀦𑁂𑀢𑁆𑀣 𑀓𑀫𑁆𑀫𑀧𑀣𑀧𑁆𑀧𑀢𑁆𑀢𑀫𑁂𑀯 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀤𑀲𑀅𑀓𑀼𑀲𑀮𑀓𑀫𑁆𑀫𑀧𑀣’’𑀦𑁆𑀢𑀺. 𑀓𑀡𑁆𑀳𑀸𑀪𑀺𑀚𑀸𑀢𑀺𑀳𑁂𑀢𑀼𑀢𑁄 𑀯𑀸 𑀓𑀡𑁆𑀳𑀁. 𑀢𑁂𑀦𑀸𑀳 ‘‘𑀓𑀡𑁆𑀳𑀯𑀺𑀧𑀸𑀓’’𑀦𑁆𑀢𑀺. 𑀅𑀧𑀸𑀬𑀽𑀧𑀧𑀢𑁆𑀢𑀺 𑀫𑀦𑀼𑀲𑁆𑀲𑁂𑀲𑀼 𑀘 𑀤𑁄𑀪𑀕𑁆𑀕𑀺𑀬𑀁 𑀓𑀡𑁆𑀳𑀯𑀺𑀧𑀸𑀓𑁄, 𑀬𑀁 𑀢𑀲𑁆𑀲 𑀢𑀫𑀪𑀸𑀯𑁄 𑀯𑀼𑀢𑁆𑀢𑁄. 𑀦𑀺𑀩𑁆𑀩𑀢𑁆𑀢𑀦𑀢𑁄𑀢𑀺 𑀦𑀺𑀩𑁆𑀩𑀢𑁆𑀢𑀸𑀧𑀦𑀢𑁄. 𑀧𑀡𑁆𑀟𑀭𑀓𑀦𑁆𑀢𑀺 𑀑𑀤𑀸𑀢𑀁, 𑀘𑀺𑀢𑁆𑀢𑀲𑁆𑀲 𑀧𑀪𑀲𑁆𑀲𑀭𑀪𑀸𑀯𑀓𑀭𑀦𑁆𑀢𑀺 𑀅𑀢𑁆𑀣𑁄. 𑀲𑀼𑀓𑁆𑀓𑀸𑀪𑀺𑀚𑀸𑀢𑀺𑀳𑁂𑀢𑀼𑀢𑁄 𑀯𑀸 𑀲𑀼𑀓𑁆𑀓𑀁. 𑀢𑁂𑀦𑀸𑀳 ‘‘𑀲𑀼𑀓𑁆𑀓𑀯𑀺𑀧𑀸𑀓’’𑀦𑁆𑀢𑀺. 𑀲𑀕𑁆𑀕𑀽𑀧𑀧𑀢𑁆𑀢𑀺 𑀫𑀦𑀼𑀲𑁆𑀲𑀲𑁄𑀪𑀕𑁆𑀕𑀺𑀬𑀜𑁆𑀘 𑀲𑀼𑀓𑁆𑀓𑀯𑀺𑀧𑀸𑀓𑁄, 𑀬𑀁 𑀢𑀲𑁆𑀲 𑀚𑁄𑀢𑀺𑀪𑀸𑀯𑁄 𑀯𑀼𑀢𑁆𑀢𑁄. 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁂𑀦 𑀧𑀦 ‘‘𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀦𑀢𑁄’’𑀢𑀺 𑀯𑀼𑀢𑁆𑀢𑀁, 𑀦𑀺𑀩𑁆𑀩𑀢𑁆𑀢𑀸𑀧𑀦𑀢𑁄𑀢𑀺 𑀅𑀢𑁆𑀣𑁄. 𑀫𑀺𑀲𑁆𑀲𑀓𑀓𑀫𑁆𑀫𑀦𑁆𑀢𑀺 𑀓𑀸𑀮𑁂𑀦 𑀓𑀡𑁆𑀳𑀁 𑀓𑀸𑀮𑁂𑀦 𑀲𑀼𑀓𑁆𑀓𑀦𑁆𑀢𑀺 𑀏𑀯𑀁 𑀫𑀺𑀲𑁆𑀲𑀓𑀯𑀲𑁂𑀦 𑀓𑀢𑀓𑀫𑁆𑀫𑀁. 𑀲𑀼𑀔𑀤𑀼𑀓𑁆𑀔𑀯𑀺𑀧𑀸𑀓𑀦𑁆𑀢𑀺 𑀯𑀢𑁆𑀯𑀸 𑀢𑀢𑁆𑀣 𑀲𑀼𑀔𑀤𑀼𑀓𑁆𑀔𑀸𑀦𑀁 𑀧𑀯𑀢𑁆𑀢𑀺𑀆𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 ‘‘𑀫𑀺𑀲𑁆𑀲𑀓𑀓𑀫𑁆𑀫𑀁 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑀫𑁆𑀫𑀲𑁆𑀲 𑀓𑀡𑁆𑀳𑀲𑀼𑀓𑁆𑀓𑀲𑀫𑀜𑁆𑀜𑀸 𑀓𑀡𑁆𑀳𑀲𑀼𑀓𑁆𑀓𑀸𑀪𑀺𑀚𑀸𑀢𑀺𑀳𑁂𑀢𑀼𑀢𑀸𑀬𑀸𑀢𑀺 𑀅𑀧𑀘𑀬𑀕𑀸𑀫𑀺𑀢𑀸𑀬 𑀢𑀤𑀼𑀪𑀬𑀯𑀺𑀤𑁆𑀥𑀁𑀲𑀓𑀲𑁆𑀲 𑀓𑀫𑁆𑀫𑀓𑁆𑀔𑀬𑀓𑀭𑀓𑀫𑁆𑀫𑀲𑁆𑀲 𑀇𑀥 𑀲𑀼𑀓𑁆𑀓𑀧𑀭𑀺𑀬𑀸𑀬𑁄𑀧𑀺 𑀇𑀘𑁆𑀙𑀺𑀢𑁄𑀢𑀺 𑀆𑀳 ‘‘𑀉𑀪𑀬…𑀧𑁂… 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄’’𑀢𑀺. 𑀢𑀢𑁆𑀣 𑀉𑀪𑀬𑀯𑀺𑀧𑀸𑀓𑀲𑁆𑀲𑀸𑀢𑀺 𑀬𑀣𑀸𑀥𑀺𑀕𑀢𑀲𑁆𑀲 𑀉𑀪𑀬𑀯𑀺𑀧𑀸𑀓𑀲𑁆𑀲. 𑀲𑀫𑁆𑀧𑀢𑁆𑀢𑀺𑀪𑀯𑀧𑀭𑀺𑀬𑀸𑀧𑀦𑁆𑀦𑁄 𑀳𑀺 𑀯𑀺𑀧𑀸𑀓𑁄 𑀇𑀥 𑀲𑀼𑀓𑁆𑀓𑀁 𑀲𑀼𑀓𑁆𑀓𑀯𑀺𑀧𑀸𑀓𑁄𑀢𑀺 𑀅𑀥𑀺𑀧𑁆𑀧𑁂𑀢𑁄, 𑀦 𑀅𑀘𑁆𑀘𑀦𑁆𑀢𑀧𑀭𑀺𑀲𑀼𑀤𑁆𑀥𑁄 𑀅𑀭𑀺𑀬𑀨𑀮𑀯𑀺𑀧𑀸𑀓𑁄.

𑀲𑀁𑀔𑀺𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.