𑁨. 𑀯𑀺𑀢𑁆𑀣𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁩. 𑀤𑀼𑀢𑀺𑀬𑁂 𑀲𑀩𑁆𑀬𑀸𑀩𑀚𑁆𑀛𑀦𑁆𑀢𑀺 𑀯𑀸 𑀲𑀤𑀼𑀓𑁆𑀔𑀁, 𑀅𑀢𑁆𑀢𑀦𑀸 𑀉𑀧𑁆𑀧𑀸𑀤𑁂𑀢𑀩𑁆𑀩𑁂𑀦 𑀤𑀼𑀓𑁆𑀔𑁂𑀦 𑀲𑀤𑀼𑀓𑁆𑀔𑀦𑁆𑀢𑀺 𑀅𑀢𑁆𑀣𑁄, 𑀤𑀼𑀓𑁆𑀔𑀲𑀁𑀯𑀢𑁆𑀢𑀦𑀺𑀓𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀸𑀬𑀲𑀗𑁆𑀔𑀸𑀭𑀸𑀤𑀻𑀲𑀼 𑀓𑀸𑀬𑀤𑁆𑀯𑀸𑀭𑁂 𑀕𑀳𑀡𑀸𑀤𑀺𑀯𑀲𑁂𑀦 𑀘𑁄𑀧𑀦𑀧𑁆𑀧𑀢𑁆𑀢𑀸 𑀤𑁆𑀯𑀸𑀤𑀲 𑀅𑀓𑀼𑀲𑀮𑀘𑁂𑀢𑀦𑀸 𑀅𑀩𑁆𑀬𑀸𑀩𑀚𑁆𑀛𑀓𑀸𑀬𑀲𑀗𑁆𑀔𑀸𑀭𑁄 𑀦𑀸𑀫. 𑀯𑀘𑀻𑀤𑁆𑀯𑀸𑀭𑁂 𑀳𑀦𑀼𑀲𑀁𑀘𑁄𑀧𑀦𑀯𑀲𑁂𑀦 𑀯𑀘𑀻𑀪𑁂𑀤𑀧𑁆𑀧𑀯𑀢𑁆𑀢𑀺𑀓𑀸 𑀢𑀸𑀬𑁂𑀯 𑀤𑁆𑀯𑀸𑀤𑀲 𑀯𑀘𑀻𑀲𑀗𑁆𑀔𑀸𑀭𑁄 𑀦𑀸𑀫. 𑀉𑀪𑀬𑀘𑁄𑀧𑀦𑀁 𑀅𑀧𑁆𑀧𑀢𑁆𑀯𑀸 𑀭𑀳𑁄 𑀘𑀺𑀦𑁆𑀢𑁂𑀦𑁆𑀢𑀲𑁆𑀲 𑀫𑀦𑁄𑀤𑁆𑀯𑀸𑀭𑁂 𑀧𑀯𑀢𑁆𑀢𑀸 𑀫𑀦𑁄𑀲𑀗𑁆𑀔𑀸𑀭𑁄 𑀦𑀸𑀫. 𑀇𑀢𑀺 𑀢𑀻𑀲𑀼𑀧𑀺 𑀤𑁆𑀯𑀸𑀭𑁂𑀲𑀼 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀪𑁂𑀤𑀸 𑀅𑀓𑀼𑀲𑀮𑀸 𑀘𑁂𑀢𑀦𑀸𑀯 𑀲𑀗𑁆𑀔𑀸𑀭𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀪𑀺𑀲𑀗𑁆𑀔𑀭𑁄𑀢𑀻𑀢𑀺 𑀆𑀬𑀽𑀳𑀢𑀺, 𑀢𑀁 𑀧𑀦 𑀆𑀬𑀽𑀳𑀦𑀁 𑀧𑀘𑁆𑀘𑀬𑀲𑀫𑀯𑀸𑀬𑀲𑀺𑀤𑁆𑀥𑀺𑀢𑁄 𑀲𑀗𑁆𑀓𑀟𑁆𑀠𑀺𑀢𑁆𑀯𑀸 𑀧𑀺𑀡𑁆𑀟𑀦𑀁 𑀯𑀺𑀬 𑀳𑁄𑀢𑀺. 𑀲𑀤𑀼𑀓𑁆𑀔𑀁 𑀮𑁄𑀓𑀦𑁆𑀢𑀺 𑀅𑀧𑀸𑀬𑀮𑁄𑀓𑀫𑀸𑀳. 𑀯𑀺𑀧𑀸𑀓𑀨𑀲𑁆𑀲𑀸𑀢𑀺 𑀨𑀲𑁆𑀲𑀲𑀻𑀲𑁂𑀦 𑀢𑀢𑁆𑀣 𑀯𑀺𑀧𑀸𑀓𑀧𑁆𑀧𑀯𑀢𑁆𑀢𑀫𑀸𑀳. 𑀯𑁂𑀫𑀸𑀦𑀺𑀓𑀧𑁂𑀢𑀸𑀢𑀺 𑀇𑀤𑀁 𑀩𑀸𑀳𑀼𑀮𑁆𑀮𑀢𑁄 𑀯𑀼𑀢𑁆𑀢𑀁, 𑀇𑀢𑀭𑁂𑀲𑀫𑁆𑀧𑀺 𑀯𑀺𑀦𑀺𑀧𑀸𑀢𑀺𑀓𑀸𑀦𑀁 𑀓𑀸𑀮𑁂𑀦 𑀲𑀼𑀔𑀁, 𑀓𑀸𑀮𑁂𑀦 𑀤𑀼𑀓𑁆𑀔𑀁 𑀳𑁄𑀢𑀺. 𑀢𑀲𑁆𑀲 𑀧𑀳𑀸𑀦𑀸𑀬𑀸𑀢𑀺 𑀢𑀲𑁆𑀲 𑀬𑀣𑀸𑀯𑀼𑀢𑁆𑀢𑀲𑁆𑀲 𑀓𑀫𑁆𑀫𑀲𑁆𑀲 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀸𑀧𑀸𑀤𑀦𑀸𑀬. 𑀬𑀸 𑀘𑁂𑀢𑀦𑀸𑀢𑀺 𑀬𑀸 𑀅𑀧𑀘𑀬𑀕𑀸𑀫𑀺𑀦𑀺𑀘𑁂𑀢𑀦𑀸. 𑀢𑁂𑀦𑁂𑀯𑀸𑀳 ‘‘𑀯𑀺𑀯𑀝𑁆𑀝𑀕𑀸𑀫𑀺𑀦𑀻 𑀫𑀕𑁆𑀕𑀘𑁂𑀢𑀦𑀸 𑀯𑁂𑀤𑀺𑀢𑀩𑁆𑀩𑀸’’𑀢𑀺.

𑀯𑀺𑀢𑁆𑀣𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.