(𑁨𑁦) 𑁫. 𑀫𑀳𑀸𑀯𑀕𑁆𑀕𑁄
𑁧. 𑀲𑁄𑀢𑀸𑀦𑀼𑀕𑀢𑀲𑀼𑀢𑁆𑀢𑀯𑀡𑁆𑀡𑀦𑀸
𑁧𑁯𑁧. 𑀧𑀜𑁆𑀘𑀫𑀲𑁆𑀲 𑀧𑀞𑀫𑁂 𑀲𑁄𑀢𑀸𑀦𑀼𑀕𑀢𑀸𑀦𑀦𑁆𑀢𑀺 𑀧𑀲𑀸𑀤𑀲𑁄𑀢𑀁 𑀅𑀦𑀼𑀕𑀦𑁆𑀢𑁆𑀯𑀸 𑀕𑀢𑀸𑀦𑀁, 𑀧𑀕𑀼𑀡𑀸𑀦𑀁 𑀯𑀸𑀘𑀼𑀕𑁆𑀕𑀢𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀏𑀯𑀁𑀪𑀽𑀢𑀸 𑀘 𑀧𑀲𑀸𑀤𑀲𑁄𑀢𑀁 𑀑𑀤𑀳𑀺𑀢𑁆𑀯𑀸 𑀜𑀸𑀡𑀲𑁄𑀢𑁂𑀦 𑀲𑀼𑀝𑁆𑀞𑀼 𑀯𑀯𑀢𑁆𑀣𑀧𑀺𑀢𑀸 𑀦𑀸𑀫 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀧𑀲𑀸𑀤𑀲𑁄𑀢’’𑀦𑁆𑀢𑀺𑀆𑀤𑀺. 𑀏𑀓𑀘𑁆𑀘𑀲𑁆𑀲 𑀳𑀺 𑀉𑀕𑁆𑀕𑀳𑀺𑀢𑀧𑀼𑀩𑁆𑀩𑀯𑀘𑀦𑀁 𑀢𑀁 𑀢𑀁 𑀧𑀕𑀼𑀡𑀁 𑀦𑀺𑀘𑁆𑀙𑀭𑀺𑀢𑀁 𑀲𑀼𑀝𑁆𑀞𑀼 𑀯𑀯𑀢𑁆𑀣𑀧𑀺𑀢𑀁 𑀦 𑀳𑁄𑀢𑀺. ‘‘𑀅𑀲𑀼𑀓𑀁 𑀲𑀼𑀢𑁆𑀢𑀁 𑀯𑀸 𑀚𑀸𑀢𑀓𑀁 𑀯𑀸 𑀓𑀣𑁂𑀳𑀻’’𑀢𑀺 𑀯𑀼𑀢𑁆𑀢𑁂 ‘‘𑀲𑀚𑁆𑀛𑀸𑀬𑀺𑀢𑁆𑀯𑀸 𑀲𑀁𑀲𑀦𑁆𑀤𑀺𑀢𑁆𑀯𑀸 𑀲𑀫𑀦𑀼𑀕𑁆𑀕𑀸𑀳𑀺𑀢𑁆𑀯𑀸 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀯𑀤𑀦𑁆𑀢𑀺. 𑀏𑀓𑀘𑁆𑀘𑀲𑁆𑀲 𑀢𑀁 𑀢𑀁 𑀧𑀕𑀼𑀡𑀁 𑀪𑀯𑀗𑁆𑀕𑀲𑁄𑀢𑀲𑀤𑀺𑀲𑀁 𑀳𑁄𑀢𑀺 ‘‘𑀅𑀲𑀼𑀓𑀁 𑀲𑀼𑀢𑁆𑀢𑀁 𑀯𑀸 𑀚𑀸𑀢𑀓𑀁 𑀯𑀸 𑀓𑀣𑁂𑀳𑀻’’𑀢𑀺 𑀯𑀼𑀢𑁆𑀢𑁂 𑀉𑀤𑁆𑀥𑀭𑀺𑀢𑁆𑀯𑀸 𑀢𑀫𑁂𑀯 𑀓𑀣𑁂𑀢𑀺. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁 ‘‘𑀜𑀸𑀡𑀲𑁄𑀢𑁂𑀦 𑀯𑀯𑀢𑁆𑀣𑀧𑀺𑀢𑀸𑀦’’𑀦𑁆𑀢𑀺. 𑀇𑀢𑁆𑀣𑀺𑀮𑀺𑀗𑁆𑀕𑀸𑀤𑀻𑀦𑀺 𑀢𑀻𑀡𑀺 𑀮𑀺𑀗𑁆𑀕𑀸𑀦𑀺. 𑀦𑀸𑀫𑀸𑀤𑀻𑀦𑀺 𑀘𑀢𑁆𑀢𑀸𑀭𑀺 𑀧𑀤𑀸𑀦𑀺. 𑀧𑀞𑀫𑀸𑀤𑀬𑁄 𑀲𑀢𑁆𑀢 𑀯𑀺𑀪𑀢𑁆𑀢𑀺𑀬𑁄.
𑀯𑀴𑀜𑁆𑀚𑁂𑀢𑀻𑀢𑀺 𑀧𑀸𑀴𑀺𑀁 𑀅𑀦𑀼𑀲𑀦𑁆𑀥𑀺𑀁 𑀧𑀼𑀩𑁆𑀩𑀸𑀧𑀭𑀯𑀲𑁂𑀦 𑀯𑀸𑀘𑀼𑀕𑁆𑀕𑀢𑀁 𑀓𑀭𑁄𑀦𑁆𑀢𑁄 𑀥𑀸𑀭𑁂𑀢𑀺. 𑀯𑀘𑀲𑀸 𑀧𑀭𑀺𑀘𑀺𑀢𑀸𑀢𑀺 𑀲𑀼𑀢𑁆𑀢𑀤𑀲𑀓𑀯𑀕𑁆𑀕𑀤𑀲𑀓𑀧𑀡𑁆𑀡𑀸𑀲𑀤𑀲𑀓𑀯𑀲𑁂𑀦 𑀯𑀸𑀘𑀸𑀬 𑀲𑀚𑁆𑀛𑀸𑀬𑀺𑀢𑀸, ‘‘𑀤𑀲𑀲𑀼𑀢𑁆𑀢𑀸𑀦𑀺 𑀕𑀢𑀸𑀦𑀺, 𑀤𑀲𑀯𑀕𑁆𑀕𑀸𑀦𑀺 𑀕𑀢𑀸𑀦𑀻’’𑀢𑀺𑀆𑀤𑀺𑀦𑀸 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀯𑀸𑀘𑀸𑀬 𑀲𑀚𑁆𑀛𑀸𑀬𑀺𑀢𑀸𑀢𑀺 𑀅𑀢𑁆𑀣𑁄. 𑀯𑀕𑁆𑀕𑀸𑀤𑀺𑀯𑀲𑁂𑀦 𑀳𑀺 𑀇𑀥 𑀯𑀘𑀲𑀸 𑀧𑀭𑀺𑀘𑀬𑁄 𑀅𑀥𑀺𑀧𑁆𑀧𑁂𑀢𑁄, 𑀦 𑀧𑀦 𑀲𑀼𑀢𑁆𑀢𑁂𑀓𑀤𑁂𑀲𑀲𑁆𑀲 𑀲𑀼𑀢𑁆𑀢𑀫𑀢𑁆𑀢𑀲𑁆𑀲 𑀯𑀘𑀲𑀸 𑀧𑀭𑀺𑀘𑀬𑁄. 𑀫𑀦𑀲𑀸 𑀅𑀦𑀼 𑀅𑀦𑀼 𑀧𑁂𑀓𑁆𑀔𑀺𑀢𑀸 𑀪𑀸𑀕𑀲𑁄 𑀦𑀺𑀚𑁆𑀛𑀸𑀬𑀺𑀢𑀸 𑀯𑀺𑀤𑀺𑀢𑀸 𑀫𑀦𑀼𑀲𑀸𑀦𑀼𑀧𑁂𑀓𑁆𑀔𑀺𑀢𑀸. 𑀬𑀲𑁆𑀲 𑀯𑀸𑀘𑀸𑀬 𑀲𑀚𑁆𑀛𑀸𑀬𑀺𑀢𑀁 𑀩𑀼𑀤𑁆𑀥𑀯𑀘𑀦𑀁 𑀫𑀦𑀲𑀸 𑀘𑀺𑀦𑁆𑀢𑁂𑀦𑁆𑀢𑀲𑁆𑀲 𑀢𑀢𑁆𑀣 𑀢𑀢𑁆𑀣 𑀧𑀸𑀓𑀝𑀁 𑀳𑁄𑀢𑀺, 𑀫𑀳𑀸𑀤𑀻𑀧𑀁 𑀚𑀸𑀮𑁂𑀢𑁆𑀯𑀸 𑀞𑀺𑀢𑀲𑁆𑀲 𑀭𑀽𑀧𑀕𑀢𑀁 𑀯𑀺𑀬 𑀯𑀺𑀪𑀽𑀢𑀁 𑀳𑀼𑀢𑁆𑀯𑀸 𑀧𑀜𑁆𑀜𑀸𑀬𑀢𑀺. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸𑀢𑀺 𑀦𑀺𑀚𑁆𑀚𑀝𑀁 𑀦𑀺𑀕𑁆𑀕𑀼𑀫𑁆𑀩𑀁 𑀓𑀢𑁆𑀯𑀸 𑀲𑀼𑀝𑁆𑀞𑀼 𑀬𑀸𑀣𑀸𑀯𑀢𑁄 𑀧𑀝𑀺𑀯𑀺𑀤𑁆𑀥𑀸. 𑀲𑁂𑀲𑀫𑁂𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.
𑀲𑁄𑀢𑀸𑀦𑀼𑀕𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.
𑁨. 𑀞𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸
𑁧𑁯𑁨. 𑀤𑀼𑀢𑀺𑀬𑁂 𑀲𑀁𑀯𑀸𑀲𑁂𑀦𑀸𑀢𑀺 𑀲𑀳𑀯𑀸𑀲𑁂𑀦. 𑀲𑀻𑀮𑀁 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 ‘‘𑀅𑀬𑀁 𑀲𑀼𑀲𑀻𑀮𑁄 𑀯𑀸 𑀤𑀼𑀲𑁆𑀲𑀻𑀮𑁄 𑀯𑀸’’𑀢𑀺 𑀲𑀳 𑀯𑀲𑀦𑁆𑀢𑁂𑀦 𑀉𑀧𑀲𑀗𑁆𑀓𑀫𑀦𑁆𑀢𑁂𑀦 𑀚𑀸𑀦𑀺𑀢𑀩𑁆𑀩𑁄. 𑀢𑀜𑁆𑀘 𑀔𑁄 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸, 𑀦 𑀇𑀢𑁆𑀢𑀭𑀦𑁆𑀢𑀺 𑀢𑀜𑁆𑀘 𑀲𑀻𑀮𑀁 𑀤𑀻𑀖𑁂𑀦 𑀓𑀸𑀮𑁂𑀦 𑀯𑁂𑀤𑀺𑀢𑀩𑁆𑀩𑀁, 𑀦 𑀇𑀢𑁆𑀢𑀭𑁂𑀦. 𑀤𑁆𑀯𑀻𑀳𑀢𑀻𑀳𑀜𑁆𑀳𑀺 𑀲𑀁𑀬𑀢𑀸𑀓𑀸𑀭𑁄 𑀘 𑀲𑀁𑀯𑀼𑀢𑀺𑀦𑁆𑀤𑁆𑀭𑀺𑀬𑀸𑀓𑀸𑀭𑁄 𑀘 𑀦 𑀲𑀓𑁆𑀓𑀸 𑀤𑀲𑁆𑀲𑁂𑀢𑀼𑀁. 𑀫𑀦𑀲𑀺 𑀓𑀭𑁄𑀢𑀸𑀢𑀺 𑀢𑀫𑁆𑀧𑀺 ‘‘𑀲𑀻𑀮𑀫𑀲𑁆𑀲 𑀧𑀭𑀺𑀕𑁆𑀕𑀳𑁂𑀲𑁆𑀲𑀸𑀫𑀻’’𑀢𑀺 𑀫𑀦𑀲𑀺𑀓𑀭𑁄𑀦𑁆𑀢𑁂𑀦 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁂𑀦𑁂𑀯 𑀲𑀓𑁆𑀓𑀸 𑀚𑀸𑀦𑀺𑀢𑀼𑀁, 𑀦 𑀇𑀢𑀭𑁂𑀦. 𑀧𑀜𑁆𑀜𑀯𑀢𑀸𑀢𑀺 𑀢𑀫𑁆𑀧𑀺 𑀲𑀧𑁆𑀧𑀜𑁆𑀜𑁂𑀦𑁂𑀯 𑀧𑀡𑁆𑀟𑀺𑀢𑁂𑀦. 𑀩𑀸𑀮𑁄 𑀳𑀺 𑀫𑀦𑀲𑀺𑀓𑀭𑁄𑀦𑁆𑀢𑁄𑀧𑀺 𑀚𑀸𑀦𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺.
𑀲𑀁𑀯𑁄𑀳𑀸𑀭𑁂𑀦𑀸𑀢𑀺 𑀅𑀧𑀭𑀸𑀧𑀭𑀁 𑀓𑀣𑀦𑁂𑀦.
‘‘𑀬𑁄 𑀳𑀺 𑀓𑁄𑀘𑀺 𑀫𑀦𑀼𑀲𑁆𑀲𑁂𑀲𑀼, 𑀯𑁄𑀳𑀸𑀭𑀁 𑀉𑀧𑀚𑀻𑀯𑀢𑀺;
𑀏𑀯𑀁 𑀯𑀸𑀲𑁂𑀝𑁆𑀞 𑀚𑀸𑀦𑀸𑀳𑀺, 𑀯𑀸𑀡𑀺𑀚𑁄 𑀲𑁄 𑀦 𑀩𑁆𑀭𑀸𑀳𑁆𑀫𑀡𑁄’’𑀢𑀺. (𑀫. 𑀦𑀺. 𑁨.𑁪𑁫𑁭; 𑀲𑀼. 𑀦𑀺. 𑁬𑁧𑁯) 𑁋
𑀏𑀢𑁆𑀣 𑀳𑀺 𑀩𑁆𑀬𑀯𑀳𑀸𑀭𑁄 𑀦𑀸𑀫. ‘‘𑀘𑀢𑁆𑀢𑀸𑀭𑁄 𑀅𑀭𑀺𑀬𑀯𑁄𑀳𑀸𑀭𑀸, 𑀘𑀢𑁆𑀢𑀸𑀭𑁄 𑀅𑀦𑀭𑀺𑀬𑀯𑁄𑀳𑀸𑀭𑀸’’𑀢𑀺 (𑀤𑀻. 𑀦𑀺. 𑁩.𑁩𑁧𑁩) 𑀏𑀢𑁆𑀣 𑀘𑁂𑀢𑀦𑀸. ‘‘𑀲𑀗𑁆𑀔𑀸 𑀲𑀫𑀜𑁆𑀜𑀸 𑀧𑀜𑁆𑀜𑀢𑁆𑀢𑀺 𑀯𑁄𑀳𑀸𑀭𑁄’’𑀢𑀺 (𑀥. 𑀲. 𑁧𑁩𑁧𑁩-𑁧𑁩𑁧𑁫; 𑀫𑀳𑀸𑀦𑀺. 𑁭𑁩) 𑀏𑀢𑁆𑀣 𑀧𑀜𑁆𑀜𑀢𑁆𑀢𑀺. ‘‘𑀯𑁄𑀳𑀸𑀭𑀫𑀢𑁆𑀢𑁂𑀦 𑀲𑁄 𑀯𑁄𑀳𑀭𑁂𑀬𑁆𑀬𑀸’’𑀢𑀺 (𑀲𑀁. 𑀦𑀺. 𑁧.𑁨𑁫) 𑀏𑀢𑁆𑀣 𑀓𑀣𑀸𑀯𑁄𑀳𑀸𑀭𑁄. 𑀇𑀥𑀸𑀧𑀺 𑀏𑀲𑁄𑀯 𑀅𑀥𑀺𑀧𑁆𑀧𑁂𑀢𑁄. 𑀏𑀓𑀘𑁆𑀘𑀲𑁆𑀲 𑀳𑀺 𑀲𑀫𑁆𑀫𑀼𑀔𑀸𑀓𑀣𑀸 𑀧𑀭𑀫𑁆𑀫𑀼𑀔𑀸𑀓𑀣𑀸𑀬 𑀦 𑀲𑀫𑁂𑀢𑀺 𑀧𑀭𑀫𑁆𑀫𑀼𑀔𑀸𑀓𑀣𑀸 𑀲𑀫𑁆𑀫𑀼𑀔𑀸𑀓𑀣𑀸𑀬. 𑀢𑀣𑀸 𑀧𑀼𑀭𑀺𑀫𑀓𑀣𑀸 𑀧𑀘𑁆𑀙𑀺𑀫𑀓𑀣𑀸𑀬, 𑀧𑀘𑁆𑀙𑀺𑀫𑀓𑀣𑀸 𑀘 𑀧𑀼𑀭𑀺𑀫𑀓𑀣𑀸𑀬. 𑀲𑁄 𑀓𑀣𑀦𑁂𑀦𑁂𑀯 𑀲𑀓𑁆𑀓𑀸 𑀚𑀸𑀦𑀺𑀢𑀼𑀁 ‘‘𑀅𑀲𑀼𑀘𑀺 𑀏𑀲𑁄 𑀧𑀼𑀕𑁆𑀕𑀮𑁄’’𑀢𑀺. 𑀲𑀼𑀘𑀺𑀲𑀻𑀮𑀲𑁆𑀲 𑀧𑀦 𑀧𑀼𑀭𑀺𑀫𑀁 𑀧𑀘𑁆𑀙𑀺𑀫𑁂𑀦, 𑀧𑀘𑁆𑀙𑀺𑀫𑀜𑁆𑀘 𑀧𑀼𑀭𑀺𑀫𑁂𑀦 𑀲𑀫𑁂𑀢𑀺. 𑀲𑀫𑁆𑀫𑀼𑀔𑀸𑀓𑀣𑀺𑀢𑀁 𑀧𑀭𑀫𑁆𑀫𑀼𑀔𑀸𑀓𑀣𑀺𑀢𑁂𑀦 𑀲𑀫𑁂𑀢𑀺, 𑀧𑀭𑀫𑁆𑀫𑀼𑀔𑀸𑀓𑀣𑀺𑀢𑀜𑁆𑀘 𑀲𑀫𑁆𑀫𑀼𑀔𑀸𑀓𑀣𑀺𑀢𑁂𑀦, 𑀢𑀲𑁆𑀫𑀸 𑀓𑀣𑀦𑁂𑀦 𑀲𑀓𑁆𑀓𑀸 𑀲𑀼𑀘𑀺𑀪𑀸𑀯𑁄 𑀚𑀸𑀦𑀺𑀢𑀼𑀦𑁆𑀢𑀺 𑀧𑀓𑀸𑀲𑁂𑀦𑁆𑀢𑁄 𑀏𑀯𑀫𑀸𑀳.
𑀣𑀸𑀫𑁄𑀢𑀺 𑀜𑀸𑀡𑀣𑀸𑀫𑁄. 𑀬𑀲𑁆𑀲 𑀳𑀺 𑀜𑀸𑀡𑀣𑀸𑀫𑁄 𑀦𑀢𑁆𑀣𑀺, 𑀲𑁄 𑀉𑀧𑁆𑀧𑀦𑁆𑀦𑁂𑀲𑀼 𑀉𑀧𑀤𑁆𑀤𑀯𑁂𑀲𑀼 𑀕𑀳𑁂𑀢𑀩𑁆𑀩𑀁 𑀕𑀳𑀡𑀁 𑀓𑀢𑁆𑀢𑀩𑁆𑀩𑀁 𑀓𑀺𑀘𑁆𑀘𑀁 𑀅𑀧𑀲𑁆𑀲𑀦𑁆𑀢𑁄 𑀅𑀤𑁆𑀯𑀸𑀭𑀓𑀖𑀭𑀁 𑀧𑀯𑀺𑀝𑁆𑀞𑁄 𑀯𑀺𑀬 𑀘𑀭𑀢𑀺. 𑀢𑁂𑀦𑀸𑀳 ‘‘𑀆𑀧𑀤𑀸𑀲𑀼, 𑀪𑀺𑀓𑁆𑀔𑀯𑁂, 𑀣𑀸𑀫𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺.
𑀲𑀸𑀓𑀘𑁆𑀙𑀸𑀬𑀸𑀢𑀺 𑀲𑀁𑀓𑀣𑀸𑀬. 𑀤𑀼𑀧𑁆𑀧𑀜𑁆𑀜𑀲𑁆𑀲 𑀳𑀺 𑀓𑀣𑀸 𑀉𑀤𑀓𑁂 𑀕𑁂𑀡𑁆𑀟𑀼 𑀯𑀺𑀬 𑀉𑀧𑁆𑀧𑀺𑀮𑀯𑀢𑀺. 𑀧𑀜𑁆𑀜𑀯𑀢𑁄 𑀓𑀣𑁂𑀦𑁆𑀢𑀲𑁆𑀲 𑀧𑀝𑀺𑀪𑀸𑀦𑀁 𑀅𑀦𑀦𑁆𑀢𑀁 𑀳𑁄𑀢𑀺. 𑀉𑀤𑀓𑀯𑀺𑀧𑁆𑀨𑀦𑁆𑀤𑀺𑀢𑁂𑀦𑁂𑀯 𑀳𑀺 𑀫𑀘𑁆𑀙𑁄 𑀔𑀼𑀤𑁆𑀤𑀓𑁄 𑀯𑀸 𑀫𑀳𑀦𑁆𑀢𑁄 𑀯𑀸𑀢𑀺 𑀜𑀸𑀬𑀢𑀺.
𑀜𑀸𑀢𑀺𑀯𑀺𑀦𑀸𑀲𑁄𑀢𑀺 𑀘𑁄𑀭𑀭𑁄𑀕𑀪𑀬𑀸𑀤𑀻𑀳𑀺 𑀜𑀸𑀢𑀻𑀦𑀁 𑀯𑀺𑀦𑀸𑀲𑁄. 𑀪𑁄𑀕𑀸𑀦𑀁 𑀩𑁆𑀬𑀲𑀦𑀁 𑀪𑁄𑀕𑀩𑁆𑀬𑀲𑀦𑀁, 𑀭𑀸𑀚𑀘𑁄𑀭𑀸𑀤𑀺𑀯𑀲𑁂𑀦 𑀪𑁄𑀕𑀯𑀺𑀦𑀸𑀲𑁄𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀤𑀼𑀢𑀺𑀬𑀧𑀤𑁂𑀧𑀺 𑀏𑀲𑁂𑀯 𑀦𑀬𑁄’’𑀢𑀺. 𑀧𑀜𑁆𑀳𑀼𑀫𑁆𑀫𑀕𑁆𑀕𑁄𑀢𑀺 𑀧𑀜𑁆𑀳𑀕𑀯𑁂𑀲𑀦𑀁, 𑀜𑀸𑀢𑀼𑀁 𑀇𑀘𑁆𑀙𑀺𑀢𑀲𑁆𑀲 𑀅𑀢𑁆𑀣𑀲𑁆𑀲 𑀯𑀻𑀫𑀁𑀲𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀢𑀧𑁆𑀧𑀓𑀦𑁆𑀢𑀺 𑀅𑀢𑀺𑀢𑁆𑀢𑀺𑀓𑀭𑀝𑁆𑀞𑁂𑀦 𑀅𑀢𑀧𑁆𑀧𑀓𑀁 𑀲𑀸𑀤𑀼𑀭𑀲𑀪𑁄𑀚𑀦𑀁 𑀯𑀺𑀬. 𑀲𑀡𑁆𑀳𑀦𑁆𑀢𑀺 𑀲𑀼𑀔𑀼𑀫𑀲𑀪𑀸𑀯𑀁.
𑀞𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.
𑁩. 𑀪𑀤𑁆𑀤𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸
𑁧𑁯𑁩. 𑀢𑀢𑀺𑀬𑁂 𑀓𑀭𑀡𑀲𑁆𑀲 𑀉𑀢𑁆𑀢𑀭𑀁 𑀓𑀺𑀭𑀺𑀬𑀁 𑀓𑀭𑀡𑀼𑀢𑁆𑀢𑀭𑀺𑀬𑀁, 𑀢𑀁 𑀮𑀓𑁆𑀔𑀡𑀁 𑀏𑀢𑀲𑁆𑀲𑀸𑀢𑀺 𑀓𑀭𑀡𑀼𑀢𑁆𑀢𑀭𑀺𑀬𑀮𑀓𑁆𑀔𑀡𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.
𑀪𑀤𑁆𑀤𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.
𑁪. 𑀲𑀸𑀫𑀼𑀕𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸
𑁧𑁯𑁪. 𑀘𑀢𑀼𑀢𑁆𑀣𑁂 𑀧𑀼𑀕𑁆𑀕𑀮𑀲𑁆𑀲 𑀧𑀸𑀭𑀺𑀲𑀼𑀤𑁆𑀥𑀺𑀬𑀸 𑀧𑀥𑀸𑀦𑀪𑀽𑀢𑀸𑀦𑀺 𑀯𑀸 𑀅𑀗𑁆𑀕𑀸𑀦𑀺 𑀧𑀸𑀭𑀺𑀲𑀼𑀤𑁆𑀥𑀺𑀧𑀥𑀸𑀦𑀺𑀬𑀗𑁆𑀕𑀸𑀦𑀺. 𑀲𑁂𑀲𑀫𑁂𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.
𑀲𑀸𑀫𑀼𑀕𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.
𑁫. 𑀯𑀧𑁆𑀧𑀲𑀼𑀢𑁆𑀢𑀯𑀡𑁆𑀡𑀦𑀸
𑁧𑁯𑁫. 𑀧𑀜𑁆𑀘𑀫𑁂 𑀧𑀺𑀳𑀺𑀢𑀢𑁆𑀢𑀸𑀢𑀺 𑀅𑀓𑀼𑀲𑀮𑀲𑁆𑀲 𑀧𑀯𑁂𑀲𑀦𑀤𑁆𑀯𑀸𑀭𑀁 𑀧𑀺𑀤𑀳𑀺𑀢𑁆𑀯𑀸 𑀞𑀺𑀢𑀢𑁆𑀢𑀸. 𑀓𑀸𑀬𑁂𑀦 𑀲𑀁𑀯𑀭𑀺𑀢𑀩𑁆𑀩𑀜𑁆𑀳𑀺 𑀅𑀧𑀺𑀳𑀺𑀢𑁂𑀦 𑀤𑁆𑀯𑀸𑀭𑁂𑀦 𑀧𑀯𑀢𑁆𑀢𑀦𑀓𑀁 𑀧𑀸𑀧𑀥𑀫𑁆𑀫𑀁 𑀲𑀁𑀯𑀭𑀺𑀢𑁆𑀯𑀸 𑀞𑀺𑀢𑁄 𑀓𑀸𑀬𑁂𑀦 𑀲𑀁𑀯𑀼𑀢𑁄 𑀦𑀸𑀫. 𑀔𑀬𑀯𑀺𑀭𑀸𑀕𑁂𑀦𑀸𑀢𑀺 𑀅𑀘𑁆𑀘𑀦𑁆𑀢𑀔𑀬𑀲𑀗𑁆𑀔𑀸𑀢𑁂𑀦 𑀯𑀺𑀭𑀚𑁆𑀚𑀦𑁂𑀦, 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑁂𑀦𑀸𑀢𑀺 𑀅𑀢𑁆𑀣𑁄. 𑀓𑀺𑀁 𑀯𑀺𑀚𑁆𑀚𑀸 𑀧𑀼𑀩𑁆𑀩𑁂 𑀉𑀧𑁆𑀧𑀦𑁆𑀦𑀸𑀢𑀺? 𑀉𑀪𑀬𑀫𑁂𑀢𑀁 𑀦 𑀯𑀢𑁆𑀢𑀩𑁆𑀩𑀁. 𑀧𑀳𑀸𑀦𑀸𑀪𑀺𑀲𑀫𑀬𑀪𑀸𑀯𑀦𑀸𑀪𑀺𑀲𑀫𑀬𑀸𑀦𑀁 𑀅𑀪𑀺𑀦𑁆𑀦𑀓𑀸𑀮𑀢𑁆𑀢𑀸 𑀧𑀤𑀻𑀧𑀼𑀚𑁆𑀚𑀮𑀦𑁂𑀦 𑀅𑀦𑁆𑀥𑀓𑀸𑀭𑀁 𑀯𑀺𑀬 𑀯𑀺𑀚𑁆𑀚𑀼𑀧𑁆𑀧𑀸𑀤𑁂𑀦 𑀅𑀯𑀺𑀚𑁆𑀚𑀸 𑀦𑀺𑀭𑀼𑀤𑁆𑀥𑀸𑀯 𑀳𑁄𑀢𑀺, 𑀯𑀢𑁆𑀢𑀩𑁆𑀩𑀁 𑀯𑀸 𑀳𑁂𑀢𑀼𑀨𑀮𑀢𑁆𑀢𑀫𑀼𑀧𑀘𑀸𑀭𑀯𑀲𑁂𑀦. 𑀬𑀣𑀸 𑀳𑀺 𑀧𑀤𑀻𑀧𑀼𑀚𑁆𑀚𑀮𑀦𑀳𑁂𑀢𑀼𑀓𑁄 𑀅𑀦𑁆𑀥𑀓𑀸𑀭𑀯𑀺𑀕𑀫𑁄, 𑀏𑀯𑀁 𑀯𑀺𑀚𑁆𑀚𑀼𑀧𑁆𑀧𑀸𑀤𑀳𑁂𑀢𑀼𑀓𑁄 𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑁄. 𑀳𑁂𑀢𑀼𑀨𑀮𑀥𑀫𑁆𑀫𑀸 𑀘 𑀲𑀫𑀸𑀦𑀓𑀸𑀮𑀸𑀧𑀺 𑀧𑀼𑀩𑁆𑀩𑀸𑀧𑀭𑀓𑀸𑀮𑀸 𑀯𑀺𑀬 𑀯𑁄𑀳𑀭𑀻𑀬𑀦𑁆𑀢𑀺 𑀬𑀣𑀸 ‘‘𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘 𑀭𑀽𑀧𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡’’𑀦𑁆𑀢𑀺 (𑀫. 𑀦𑀺. 𑁧.𑁪𑁦𑁦; 𑁩.𑁪𑁨𑁧, 𑁪𑁨𑁫, 𑁪𑁨𑁬; 𑀲𑀁. 𑀦𑀺. 𑁨.𑁪𑁩-𑁪𑁪; 𑁨.𑁪.𑁬𑁦; 𑀓𑀣𑀸. 𑁪𑁬𑁫, 𑁪𑁬𑁭) 𑀧𑀘𑁆𑀘𑀬𑀸𑀤𑀸𑀦𑀼𑀧𑁆𑀧𑀚𑁆𑀚𑀦𑀓𑀺𑀭𑀺𑀬𑀸. 𑀘𑀺𑀢𑁆𑀢𑀲𑁆𑀲 𑀓𑀸𑀬𑀲𑁆𑀲 𑀘 𑀯𑀺𑀳𑀦𑀦𑀢𑁄 𑀯𑀺𑀖𑀸𑀢𑁄, 𑀤𑀼𑀓𑁆𑀔𑀁. 𑀧𑀭𑀺𑀤𑀳𑀦𑀢𑁄 𑀧𑀭𑀺𑀴𑀸𑀳𑁄.
𑀦𑀺𑀘𑁆𑀘𑀯𑀺𑀳𑀸𑀭𑀸𑀢𑀺 𑀲𑀩𑁆𑀩𑀤𑀸 𑀧𑀯𑀢𑁆𑀢𑀦𑀓𑀯𑀺𑀳𑀸𑀭𑀸. 𑀞𑀧𑁂𑀢𑁆𑀯𑀸 𑀳𑀺 𑀲𑀫𑀸𑀧𑀢𑁆𑀢𑀺𑀯𑁂𑀮𑀁 𑀪𑀯𑀗𑁆𑀕𑀯𑁂𑀮𑀜𑁆𑀘 𑀔𑀻𑀡𑀸𑀲𑀯𑀸 𑀇𑀫𑀺𑀦𑀸 𑀙𑀴𑀗𑁆𑀕𑀼𑀧𑁂𑀓𑁆𑀔𑀸𑀯𑀺𑀳𑀸𑀭𑁂𑀦 𑀲𑀩𑁆𑀩𑀓𑀸𑀮𑀁 𑀯𑀺𑀳𑀭𑀦𑁆𑀢𑀺. 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀭𑀽𑀧𑀁 𑀤𑀺𑀲𑁆𑀯𑀸. 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸𑀢𑀺 𑀳𑀺 𑀦𑀺𑀲𑁆𑀲𑀬𑀯𑁄𑀳𑀸𑀭𑁂𑀦 𑀯𑀼𑀢𑁆𑀢𑀁. 𑀲𑀲𑀫𑁆𑀪𑀸𑀭𑀓𑀣𑀸 𑀳𑁂𑀲𑀸 𑀬𑀣𑀸 ‘‘𑀥𑀦𑀼𑀦𑀸 𑀯𑀺𑀚𑁆𑀛𑀢𑀻’’𑀢𑀺, 𑀢𑀲𑁆𑀫𑀸 𑀦𑀺𑀲𑁆𑀲𑀬𑀲𑀻𑀲𑁂𑀦 𑀦𑀺𑀲𑁆𑀲𑀺𑀢𑀲𑁆𑀲 𑀕𑀳𑀡𑀁 𑀤𑀝𑁆𑀞𑀩𑁆𑀩𑀁. 𑀭𑀸𑀕𑀯𑀲𑁂𑀦 𑀦 𑀲𑁄𑀫𑀦𑀲𑁆𑀲𑀚𑀸𑀢𑁄 𑀳𑁄𑀢𑀻𑀢𑀺 𑀕𑁂𑀳𑀲𑀺𑀢𑀧𑁂𑀫𑀯𑀲𑁂𑀦𑀧𑀺 𑀚𑀯𑀦𑀓𑁆𑀔𑀡𑁂 𑀲𑁄𑀫𑀦𑀲𑁆𑀲𑀚𑀸𑀢𑁄 𑀦 𑀳𑁄𑀢𑀺 𑀫𑀕𑁆𑀕𑁂𑀦 𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸, 𑀦 𑀤𑁄𑀫𑀦𑀲𑁆𑀲𑀚𑀸𑀢𑁄 𑀧𑀲𑀸𑀤𑀜𑁆𑀜𑀣𑀢𑁆𑀢𑀯𑀲𑁂𑀦𑀧𑀺. 𑀉𑀧𑁂𑀓𑁆𑀔𑀓𑁄 𑀫𑀚𑁆𑀛𑀢𑁆𑀢𑁄 𑀳𑀼𑀢𑁆𑀯𑀸 𑀯𑀺𑀳𑀭𑀢𑀻𑀢𑀺 𑀅𑀲𑀫𑀧𑁂𑀓𑁆𑀔𑀦𑁂𑀦 𑀫𑁄𑀳𑀁 𑀅𑀦𑀼𑀧𑁆𑀧𑀸𑀤𑁂𑀦𑁆𑀢𑁄 𑀜𑀸𑀡𑀼𑀧𑁂𑀓𑁆𑀔𑀸𑀯𑀲𑁂𑀦𑁂𑀯 𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑀢𑀺 𑀫𑀚𑁆𑀛𑀢𑁆𑀢𑁄. 𑀔𑀻𑀡𑀸𑀲𑀯𑁄 𑀳𑀺 𑀇𑀝𑁆𑀞𑁂𑀧𑀺 𑀅𑀦𑀺𑀝𑁆𑀞𑁂𑀧𑀺 𑀫𑀚𑁆𑀛𑀢𑁆𑀢𑁂𑀧𑀺 𑀆𑀭𑀫𑁆𑀫𑀡𑁂 𑀬𑁄 𑀅𑀲𑀫𑀧𑁂𑀓𑁆𑀔𑀦𑁂𑀦 𑀲𑀫𑀲𑀫𑀸 𑀅𑀬𑁄𑀦𑀺𑀲𑁄𑀕𑀳𑀡𑁂 𑀅𑀔𑀻𑀡𑀸𑀲𑀯𑀸𑀦𑀁 𑀫𑁄𑀳𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀅𑀦𑀼𑀧𑁆𑀧𑀸𑀤𑁂𑀦𑁆𑀢𑁄 𑀫𑀕𑁆𑀕𑁂𑀦𑁂𑀯 𑀢𑀲𑁆𑀲 𑀲𑀫𑀼𑀕𑁆𑀖𑀸𑀢𑀺𑀢𑀢𑁆𑀢𑀸 𑀜𑀸𑀡𑀼𑀧𑁂𑀓𑁆𑀔𑀸𑀯𑀲𑁂𑀦𑁂𑀯 𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑀢𑀺, 𑀅𑀬𑀜𑁆𑀘𑀲𑁆𑀲 𑀧𑀝𑀺𑀧𑀢𑁆𑀢𑀺 𑀲𑀢𑀺𑀯𑁂𑀧𑀼𑀮𑁆𑀮𑀧𑀢𑁆𑀢𑀺𑀬𑀸 𑀧𑀜𑁆𑀜𑀸𑀯𑁂𑀧𑀼𑀮𑁆𑀮𑀧𑀢𑁆𑀢𑀺𑀬𑀸 𑀘𑀸𑀢𑀺 𑀯𑀼𑀢𑁆𑀢𑀁 ‘‘𑀲𑀢𑀺𑀲𑀫𑁆𑀧𑀚𑀜𑁆𑀜𑀧𑀭𑀺𑀕𑁆𑀕𑀳𑀺𑀢𑀸𑀬𑀸’’𑀢𑀺.
𑀏𑀢𑁆𑀣 𑀘 ‘‘𑀙𑀲𑀼 𑀤𑁆𑀯𑀸𑀭𑁂𑀲𑀼 𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑀢𑀻’’𑀢𑀺 𑀇𑀫𑀺𑀦𑀸 𑀙𑀴𑀗𑁆𑀕𑀼𑀧𑁂𑀓𑁆𑀔𑀸 𑀓𑀣𑀺𑀢𑀸. ‘‘𑀲𑀫𑁆𑀧𑀚𑀸𑀦𑁄’’𑀢𑀺 𑀯𑀘𑀦𑀢𑁄 𑀧𑀦 𑀘𑀢𑁆𑀢𑀸𑀭𑀺 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀸𑀦𑀺 𑀮𑀩𑁆𑀪𑀦𑁆𑀢𑀺 𑀢𑁂𑀳𑀺 𑀯𑀺𑀦𑀸 𑀲𑀫𑁆𑀧𑀚𑀸𑀦𑀢𑀸𑀬 𑀅𑀲𑀫𑁆𑀪𑀯𑀢𑁄. ‘‘𑀲𑀢𑀢𑀯𑀺𑀳𑀸𑀭𑀸’’𑀢𑀺 𑀯𑀘𑀦𑀢𑁄 𑀅𑀝𑁆𑀞𑀧𑀺 𑀫𑀳𑀸𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀺 𑀮𑀩𑁆𑀪𑀦𑁆𑀢𑀺 𑀜𑀸𑀡𑀼𑀧𑁆𑀧𑀢𑁆𑀢𑀺𑀧𑀘𑁆𑀘𑀬𑀭𑀳𑀺𑀢𑀓𑀸𑀮𑁂𑀧𑀺 𑀧𑀯𑀢𑁆𑀢𑀺𑀚𑁄𑀢𑀦𑀢𑁄. ‘‘𑀅𑀭𑀚𑁆𑀚𑀦𑁆𑀢𑁄 𑀅𑀤𑀼𑀲𑁆𑀲𑀦𑁆𑀢𑁄’’𑀢𑀺 𑀯𑀘𑀦𑀢𑁄 𑀳𑀲𑀺𑀢𑀼𑀧𑁆𑀧𑀸𑀤𑀯𑁄𑀝𑁆𑀞𑀩𑁆𑀩𑀦𑁂𑀳𑀺 𑀲𑀤𑁆𑀥𑀺𑀁 𑀤𑀲 𑀘𑀺𑀢𑁆𑀢𑀸𑀦𑀺 𑀮𑀩𑁆𑀪𑀦𑁆𑀢𑀺. 𑀅𑀭𑀚𑁆𑀚𑀦𑀸𑀤𑀼𑀲𑁆𑀲𑀦𑀯𑀲𑁂𑀦 𑀧𑀯𑀢𑁆𑀢𑀺 𑀳𑀺 𑀢𑁂𑀲𑀫𑁆𑀧𑀺 𑀲𑀸𑀥𑀸𑀭𑀡𑀸𑀢𑀺. 𑀦𑀦𑀼 𑀘𑁂𑀢𑁆𑀣 ‘‘𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑀢𑀻’’𑀢𑀺 𑀙𑀴𑀗𑁆𑀕𑀼𑀧𑁂𑀓𑁆𑀔𑀸𑀯𑀲𑁂𑀦 𑀇𑀫𑁂𑀲𑀁 𑀲𑀢𑀢𑀯𑀺𑀳𑀸𑀭𑀸𑀦𑀁 𑀆𑀕𑀢𑀢𑁆𑀢𑀸 𑀲𑁄𑀫𑀦𑀲𑁆𑀲𑀁 𑀓𑀣𑀁 𑀮𑀩𑁆𑀪𑀢𑀻𑀢𑀺? 𑀆𑀲𑁂𑀯𑀦𑀢𑁄𑀢𑀺. 𑀓𑀺𑀜𑁆𑀘𑀸𑀧𑀺 𑀳𑀺 𑀔𑀻𑀡𑀸𑀲𑀯𑁄 𑀇𑀝𑁆𑀞𑀸𑀦𑀺𑀝𑁆𑀞𑁂𑀧𑀺 𑀆𑀭𑀫𑁆𑀫𑀡𑁂 𑀫𑀚𑁆𑀛𑀢𑁆𑀢𑁂 𑀯𑀺𑀬 𑀩𑀳𑀼𑀮𑀁 𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑀢𑀺 𑀅𑀢𑁆𑀢𑀦𑁄 𑀧𑀭𑀺𑀲𑀼𑀤𑁆𑀥𑀧𑁆𑀧𑀓𑀢𑀺𑀪𑀸𑀯𑀸𑀯𑀺𑀚𑀳𑀦𑀢𑁄, 𑀓𑀤𑀸𑀘𑀺 𑀧𑀦 𑀢𑀣𑀸 𑀘𑁂𑀢𑁄𑀪𑀺𑀲𑀗𑁆𑀔𑀸𑀭𑀪𑀸𑀯𑁂 𑀬𑀁 𑀢𑀁 𑀲𑀪𑀸𑀯𑀢𑁄 𑀇𑀝𑁆𑀞𑀁 𑀆𑀭𑀫𑁆𑀫𑀡𑀁, 𑀢𑀲𑁆𑀲 𑀬𑀸𑀣𑀸𑀯𑀢𑁄 𑀲𑀪𑀸𑀯𑀕𑁆𑀕𑀳𑀡𑀯𑀲𑁂𑀦𑀧𑀺 𑀅𑀭𑀳𑀢𑁄 𑀘𑀺𑀢𑁆𑀢𑀁 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑁂𑀯, 𑀢𑀜𑁆𑀘 𑀔𑁄 𑀧𑀼𑀩𑁆𑀩𑀸𑀲𑁂𑀯𑀦𑀯𑀲𑁂𑀦.
𑀓𑀸𑀬𑁄𑀢𑀺 (𑀲𑀁. 𑀦𑀺. 𑀝𑀻. 𑁨.𑁨.𑁫𑁧) 𑀧𑀜𑁆𑀘𑀤𑁆𑀯𑀸𑀭𑀓𑀸𑀬𑁄, 𑀲𑁄 𑀅𑀦𑁆𑀢𑁄 𑀅𑀯𑀲𑀸𑀦𑀁 𑀏𑀢𑀺𑀲𑁆𑀲𑀸𑀢𑀺 𑀓𑀸𑀬𑀦𑁆𑀢𑀺𑀓𑀸, 𑀢𑀁 𑀓𑀸𑀬𑀦𑁆𑀢𑀺𑀓𑀁. 𑀢𑁂𑀦𑀸𑀳 𑁋 ‘‘𑀬𑀸𑀯 𑀧𑀜𑁆𑀘𑀤𑁆𑀯𑀸𑀭𑀓𑀸𑀬𑁄 𑀧𑀯𑀢𑁆𑀢𑀢𑀺, 𑀢𑀸𑀯 𑀧𑀯𑀢𑁆𑀢’’𑀦𑁆𑀢𑀺. 𑀚𑀻𑀯𑀺𑀢𑀦𑁆𑀢𑀺𑀓𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀧𑀘𑁆𑀙𑀸 𑀉𑀧𑁆𑀧𑀚𑁆𑀚𑀺𑀢𑁆𑀯𑀸𑀢𑀺 𑀏𑀢𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀫𑀦𑁄𑀤𑁆𑀯𑀸𑀭𑀺𑀓𑀯𑁂𑀤𑀦𑀸𑀢𑁄 𑀧𑀘𑁆𑀙𑀸 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀢𑀢𑁄 𑀧𑀞𑀫𑀁 𑀦𑀺𑀭𑀼𑀚𑁆𑀛𑀢𑀺, 𑀢𑀢𑁄 𑀏𑀯 𑀅𑀢𑁆𑀣𑀲𑀺𑀤𑁆𑀥𑀫𑀢𑁆𑀣𑀁 𑀲𑀭𑀽𑀧𑁂𑀦𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀫𑀦𑁄𑀤𑁆𑀯𑀸𑀭𑀺𑀓𑀯𑁂𑀤𑀦𑀸 𑀧𑀞𑀫𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀧𑀘𑁆𑀙𑀸 𑀦𑀺𑀭𑀼𑀚𑁆𑀛𑀢𑀻’’𑀢𑀺 𑀯𑀼𑀢𑁆𑀢𑀁. 𑀇𑀤𑀸𑀦𑀺 𑀢𑀫𑁂𑀯 𑀲𑀗𑁆𑀔𑁂𑀧𑁂𑀦 𑀯𑀼𑀢𑁆𑀢𑀁 𑀯𑀺𑀯𑀭𑀺𑀢𑀼𑀁 ‘‘𑀲𑀸 𑀳𑀻’’𑀢𑀺𑀆𑀤𑀺𑀫𑀸𑀳. 𑀬𑀸𑀯 𑀢𑁂𑀢𑁆𑀢𑀺𑀁𑀲𑀯𑀲𑁆𑀲𑀸𑀦𑀺 𑀧𑀞𑀫𑀯𑀬𑁄. 𑀧𑀜𑁆𑀜𑀸𑀲𑀯𑀲𑁆𑀲𑀓𑀸𑀮𑁂𑀢𑀺 𑀧𑀞𑀫𑀯𑀬𑀢𑁄 𑀬𑀸𑀯 𑀧𑀜𑁆𑀜𑀸𑀲𑀯𑀲𑁆𑀲𑀓𑀸𑀮𑀸, 𑀢𑀸𑀯. 𑀞𑀺𑀢𑀸 𑀳𑁄𑀢𑀻𑀢𑀺 𑀯𑀟𑁆𑀠𑀺𑀳𑀸𑀦𑀺𑀬𑁄 𑀅𑀦𑀼𑀧𑀕𑀦𑁆𑀢𑁆𑀯𑀸 𑀲𑀫𑀭𑀽𑀧𑁂𑀦𑁂𑀯 𑀞𑀺𑀢𑀸 𑀳𑁄𑀢𑀺. 𑀫𑀦𑁆𑀤𑀸𑀢𑀺 𑀫𑀼𑀤𑀼𑀓𑀸 𑀅𑀢𑀺𑀔𑀺𑀡𑀸. 𑀢𑀤𑀸𑀢𑀺 𑀅𑀲𑀻𑀢𑀺𑀦𑀯𑀼𑀢𑀺𑀯𑀲𑁆𑀲𑀓𑀸𑀮𑁂 𑀯𑀤𑀦𑁆𑀢𑁂𑀧𑀺 𑀢𑀣𑀸𑀘𑀺𑀭𑀧𑀭𑀺𑀘𑀺𑀢𑁂𑀧𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀪𑀕𑁆𑀕𑀸𑀢𑀺 𑀢𑁂𑀚𑁄𑀪𑀕𑁆𑀕𑁂𑀦 𑀪𑀕𑁆𑀕𑀸 𑀤𑀼𑀩𑁆𑀩𑀡𑁆𑀡𑀸. 𑀳𑀤𑀬𑀓𑁄𑀝𑀺𑀁𑀬𑁂𑀯𑀸𑀢𑀺 𑀘𑀓𑁆𑀔𑀸𑀤𑀺𑀯𑀢𑁆𑀣𑀽𑀲𑀼 𑀅𑀧𑁆𑀧𑀯𑀢𑁆𑀢𑀺𑀢𑁆𑀯𑀸 𑀢𑁂𑀲𑀁 𑀆𑀤𑀺𑀅𑀦𑁆𑀢𑀓𑁄𑀝𑀺𑀪𑀽𑀢𑀁 𑀳𑀤𑀬𑀯𑀢𑁆𑀣𑀼𑀁𑀬𑁂𑀯. 𑀢𑀸𑀯𑀸𑀢𑀺 𑀬𑀸𑀯 𑀯𑁂𑀤𑀦𑀸 𑀯𑀢𑁆𑀢𑀢𑀺, 𑀢𑀸𑀯.
𑀯𑀸𑀧𑀺𑀬𑀸𑀢𑀺 𑀫𑀳𑀸𑀢𑀴𑀸𑀓𑁂𑀦. 𑀧𑀜𑁆𑀘𑀉𑀤𑀓𑀫𑀕𑁆𑀕𑀲𑀫𑁆𑀧𑀦𑁆𑀦𑀦𑁆𑀢𑀺 𑀧𑀜𑁆𑀘𑀳𑀺 𑀉𑀤𑀓𑀲𑁆𑀲 𑀧𑀯𑀺𑀲𑀦𑀦𑀺𑀓𑁆𑀔𑀫𑀦𑀫𑀕𑁆𑀕𑁂𑀳𑀺 𑀬𑀼𑀢𑁆𑀢𑀁. 𑀢𑀢𑁄 𑀢𑀢𑁄 𑀯𑀺𑀲𑁆𑀲𑀦𑁆𑀤𑀫𑀸𑀦𑀁 𑀲𑀩𑁆𑀩𑀲𑁄 𑀧𑀼𑀡𑁆𑀡𑀢𑁆𑀢𑀸. 𑀧𑀞𑀫𑀁 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂𑀢𑀺𑀆𑀤𑀺 𑀉𑀧𑀫𑀸𑀲𑀁𑀲𑀦𑁆𑀤𑀦𑀁. 𑀇𑀫𑀁 𑀯𑁂𑀤𑀦𑀁 𑀲𑀦𑁆𑀥𑀸𑀬𑀸𑀢𑀺 𑀇𑀫𑀁 𑀬𑀣𑀸𑀯𑀼𑀢𑁆𑀢𑀁 𑀧𑀭𑀺𑀬𑁄𑀲𑀸𑀦𑀧𑁆𑀧𑀢𑁆𑀢𑀁 𑀫𑀦𑁄𑀤𑁆𑀯𑀸𑀭𑀺𑀓𑀯𑁂𑀤𑀦𑀁 𑀲𑀦𑁆𑀥𑀸𑀬.
𑀓𑀸𑀬𑀲𑁆𑀲 𑀪𑁂𑀤𑀸𑀢𑀺 𑀅𑀢𑁆𑀢𑀪𑀸𑀯𑀲𑁆𑀲 𑀯𑀺𑀦𑀸𑀲𑀦𑀢𑁄. 𑀧𑀭𑀢𑁄 𑀅𑀕𑀦𑁆𑀢𑁆𑀯𑀸𑀢𑀺 𑀧𑀭𑀮𑁄𑀓𑀯𑀲𑁂𑀦 𑀅𑀕𑀦𑁆𑀢𑁆𑀯𑀸. 𑀯𑁂𑀤𑀦𑀸𑀦𑀁 𑀲𑀻𑀢𑀺𑀪𑀸𑀯𑁄 𑀦𑀸𑀫 𑀲𑀗𑁆𑀔𑀸𑀭𑀤𑀭𑀣𑀧𑀭𑀺𑀴𑀸𑀳𑀸𑀪𑀸𑀯𑁄. 𑀲𑁄 𑀧𑀦𑀸𑀬𑀁 𑀲𑀩𑁆𑀩𑀲𑁄 𑀅𑀧𑁆𑀧𑀯𑀢𑁆𑀢𑀺𑀯𑀲𑁂𑀦𑁂𑀯𑀸𑀢𑀺 𑀆𑀳 ‘‘𑀅𑀧𑁆𑀧𑀯𑀢𑁆𑀢𑀦𑀥𑀫𑁆𑀫𑀸𑀦𑀺 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺.
𑀅𑀢𑁆𑀢𑀪𑀸𑀯𑀁 𑀦𑀸𑀲𑁂𑀢𑀼𑀓𑀸𑀫𑀲𑁆𑀲 𑀤𑀴𑁆𑀳𑀁 𑀉𑀧𑁆𑀧𑀦𑁆𑀦𑀁 𑀲𑀁𑀯𑁂𑀕𑀜𑀸𑀡𑀁 𑀲𑀦𑁆𑀥𑀸𑀬𑀸𑀳 ‘‘𑀓𑀼𑀤𑀸𑀮𑁄 𑀯𑀺𑀬 𑀧𑀜𑁆𑀜𑀸’’𑀢𑀺. 𑀢𑀢𑁄 𑀦𑀺𑀩𑁆𑀩𑀢𑁆𑀢𑀺𑀢𑀚𑁆𑀛𑀸𑀦𑀲𑀫𑀸𑀥𑀺𑀁 𑀲𑀦𑁆𑀥𑀸𑀬 ‘‘𑀧𑀺𑀝𑀓𑀁 𑀯𑀺𑀬 𑀲𑀫𑀸𑀥𑀻’’𑀢𑀺. 𑀢𑀦𑁆𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑁂𑀢𑀩𑁆𑀩𑀯𑀺𑀧𑀲𑁆𑀲𑀦𑀸𑀭𑀫𑁆𑀪𑀜𑀸𑀡𑀁 𑀲𑀦𑁆𑀥𑀸𑀬 ‘‘𑀔𑀦𑀺𑀢𑁆𑀢𑀺 𑀯𑀺𑀬 𑀯𑀺𑀧𑀲𑁆𑀲𑀦𑀸’’𑀢𑀺 𑀘 𑀯𑀼𑀢𑁆𑀢𑀁. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.
𑀯𑀧𑁆𑀧𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.
𑁬. 𑀲𑀸𑀴𑁆𑀳𑀲𑀼𑀢𑁆𑀢𑀯𑀡𑁆𑀡𑀦𑀸
𑁧𑁯𑁬. 𑀙𑀝𑁆𑀞𑁂 𑀓𑀸𑀬𑀤𑀴𑁆𑀳𑀺𑀩𑀳𑀼𑀮𑀢𑀁 𑀢𑀧𑀢𑀻𑀢𑀺 𑀢𑀧𑁄, 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀯𑀲𑁂𑀦 𑀧𑀯𑀢𑁆𑀢𑀁 𑀯𑀻𑀭𑀺𑀬𑀁. 𑀢𑁂𑀦 𑀓𑀸𑀬𑀤𑀴𑁆𑀳𑀺𑀩𑀳𑀼𑀮𑀢𑀸𑀦𑀺𑀫𑀺𑀢𑁆𑀢𑀲𑁆𑀲 𑀧𑀸𑀧𑀲𑁆𑀲 𑀚𑀺𑀕𑀼𑀘𑁆𑀙𑀦𑀁 𑀯𑀺𑀭𑀚𑁆𑀚𑀦𑀁 𑀢𑀧𑁄𑀚𑀺𑀕𑀼𑀘𑁆𑀙𑀸𑀢𑀺 𑀆𑀳 ‘‘𑀤𑀼𑀓𑁆𑀓𑀭𑀓𑀸𑀭𑀺𑀓𑀲𑀗𑁆𑀔𑀸𑀢𑁂𑀦𑀸’’𑀢𑀺𑀆𑀤𑀺. 𑀢𑀧𑁄𑀚𑀺𑀕𑀼𑀘𑁆𑀙𑀯𑀸𑀤𑀸𑀢𑀺𑀆𑀤𑀻𑀲𑀼 𑀢𑀧𑁄𑀚𑀺𑀕𑀼𑀘𑁆𑀙𑀁 𑀯𑀤𑀦𑁆𑀢𑀺, 𑀫𑀦𑀲𑀸𑀧𑀺 𑀢𑀫𑁂𑀯 𑀲𑀸𑀭𑀢𑁄 𑀕𑀳𑁂𑀢𑁆𑀯𑀸 𑀯𑀺𑀘𑀭𑀦𑁆𑀢𑀺, 𑀓𑀸𑀬𑁂𑀦𑀧𑀺 𑀢𑀫𑁂𑀯 𑀅𑀮𑁆𑀮𑀻𑀦𑀸 𑀦𑀸𑀦𑀧𑁆𑀧𑀓𑀸𑀭𑀁 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀧𑀭𑀺𑀲𑀼𑀤𑁆𑀥𑀓𑀸𑀬𑀲𑀫𑀸𑀘𑀸𑀭𑀸𑀢𑀺 𑀅𑀧𑀭𑀺𑀲𑀼𑀤𑁆𑀥𑁂𑀦 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀦𑀸 𑀓𑀸𑀬𑀲𑀫𑀸𑀘𑀸𑀭𑁂𑀦 𑀲𑀫𑀦𑁆𑀦𑀸𑀕𑀢𑀸. 𑀅𑀧𑀭𑀺𑀲𑀼𑀤𑁆𑀥𑀯𑀘𑀻𑀲𑀫𑀸𑀘𑀸𑀭𑀸𑀢𑀺 𑀅𑀧𑀭𑀺𑀲𑀼𑀤𑁆𑀥𑁂𑀦 𑀫𑀼𑀲𑀸𑀯𑀸𑀤𑀸𑀤𑀺𑀦𑀸 𑀯𑀘𑀻𑀲𑀫𑀸𑀘𑀸𑀭𑁂𑀦 𑀲𑀫𑀦𑁆𑀦𑀸𑀕𑀢𑀸. 𑀅𑀧𑀭𑀺𑀲𑀼𑀤𑁆𑀥𑀫𑀦𑁄𑀲𑀫𑀸𑀘𑀸𑀭𑀸𑀢𑀺 𑀅𑀧𑀭𑀺𑀲𑀼𑀤𑁆𑀥𑁂𑀦 𑀅𑀪𑀺𑀚𑁆𑀛𑀸𑀤𑀺𑀦𑀸 𑀫𑀦𑁄𑀲𑀫𑀸𑀘𑀸𑀭𑁂𑀦 𑀲𑀫𑀦𑁆𑀦𑀸𑀕𑀢𑀸. 𑀓𑀸𑀫𑀁 𑀅𑀓𑀼𑀲𑀮𑀓𑀸𑀬𑀲𑀫𑀸𑀘𑀸𑀭𑀯𑀘𑀻𑀲𑀫𑀸𑀘𑀸𑀭𑀧𑁆𑀧𑀯𑀢𑁆𑀢𑀺𑀓𑀸𑀮𑁂𑀧𑀺 𑀅𑀪𑀺𑀚𑁆𑀛𑀸𑀤𑀬𑁄 𑀧𑀯𑀢𑁆𑀢𑀦𑁆𑀢𑀺𑀬𑁂𑀯, 𑀢𑀤𑀸 𑀧𑀦 𑀢𑁂 𑀘𑁂𑀢𑀦𑀸𑀧𑀓𑁆𑀔𑀺𑀓𑀸 𑀯𑀸 𑀅𑀩𑁆𑀩𑁄𑀳𑀸𑀭𑀺𑀓𑀸 𑀯𑀸𑀢𑀺, 𑀫𑀦𑁄𑀲𑀫𑀸𑀘𑀸𑀭𑀯𑀸𑀭𑁂 𑀏𑀯 𑀅𑀪𑀺𑀚𑁆𑀛𑀸𑀤𑀺𑀯𑀲𑁂𑀦 𑀬𑁄𑀚𑀦𑀸 𑀓𑀢𑀸. 𑀅𑀣 𑀯𑀸 𑀤𑁆𑀯𑀸𑀭𑀦𑁆𑀢𑀭𑁂 𑀧𑀯𑀢𑁆𑀢𑀸𑀦𑀁 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀁 𑀯𑀘𑀻𑀲𑀫𑀸𑀘𑀸𑀭𑀸𑀤𑀺𑀪𑀸𑀯𑀸𑀪𑀸𑀯𑁄 𑀯𑀺𑀬 𑀤𑁆𑀯𑀸𑀭𑀦𑁆𑀢𑀭𑁂 𑀧𑀯𑀢𑁆𑀢𑀸𑀦𑀫𑁆𑀧𑀺 𑀅𑀪𑀺𑀚𑁆𑀛𑀸𑀤𑀻𑀦𑀁 𑀓𑀸𑀬𑀲𑀫𑀸𑀘𑀸𑀭𑀸𑀤𑀺𑀪𑀸𑀯𑁄 𑀅𑀲𑀺𑀤𑁆𑀥𑁄, 𑀫𑀦𑁄𑀲𑀫𑀸𑀘𑀸𑀭𑀪𑀸𑀯𑁄 𑀏𑀯 𑀧𑀦 𑀲𑀺𑀤𑁆𑀥𑁄𑀢𑀺 𑀓𑀢𑁆𑀯𑀸 𑀫𑀦𑁄𑀲𑀫𑀸𑀘𑀸𑀭𑀯𑀸𑀭𑁂 𑀏𑀯 𑀅𑀪𑀺𑀚𑁆𑀛𑀸𑀤𑀬𑁄 𑀉𑀤𑁆𑀥𑀝𑀸. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑁋
‘‘𑀤𑁆𑀯𑀸𑀭𑁂 𑀘𑀭𑀦𑁆𑀢𑀺 𑀓𑀫𑁆𑀫𑀸𑀦𑀺, 𑀦 𑀤𑁆𑀯𑀸𑀭𑀸 𑀤𑁆𑀯𑀸𑀭𑀘𑀸𑀭𑀺𑀦𑁄;
𑀢𑀲𑁆𑀫𑀸 𑀤𑁆𑀯𑀸𑀭𑁂𑀳𑀺 𑀓𑀫𑁆𑀫𑀸𑀦𑀺, 𑀅𑀜𑁆𑀜𑀫𑀜𑁆𑀜𑀁 𑀯𑀯𑀢𑁆𑀣𑀺𑀢𑀸’’𑀢𑀺. (𑀥. 𑀲. 𑀅𑀝𑁆𑀞. 𑁧 𑀓𑀸𑀫𑀸𑀯𑀘𑀭𑀓𑀼𑀲𑀮𑀤𑁆𑀯𑀸𑀭𑀓𑀣𑀸);
𑀅𑀧𑀭𑀺𑀲𑀼𑀤𑁆𑀥𑀸𑀚𑀻𑀯𑀸𑀢𑀺 𑀅𑀧𑀭𑀺𑀲𑀼𑀤𑁆𑀥𑁂𑀦 𑀯𑁂𑀚𑁆𑀚𑀓𑀫𑁆𑀫𑀤𑀽𑀢𑀓𑀫𑁆𑀫𑀯𑀟𑁆𑀠𑀺𑀬𑁄𑀕𑀸𑀤𑀺𑀦𑀸 𑀏𑀓𑀯𑀻𑀲𑀢𑀺𑀅𑀦𑁂𑀲𑀦𑀸𑀪𑁂𑀤𑁂𑀦 𑀆𑀚𑀻𑀯𑁂𑀦 𑀲𑀫𑀦𑁆𑀦𑀸𑀕𑀢𑀸. 𑀇𑀤𑀜𑁆𑀘 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑀸𑀦𑀁𑀬𑁂𑀯 𑀯𑀲𑁂𑀦 𑀯𑀼𑀢𑁆𑀢𑀁, ‘‘𑀬𑁂𑀧𑀺 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸’’𑀢𑀺 𑀧𑀦 𑀯𑀘𑀦𑀢𑁄 𑀩𑀸𑀳𑀺𑀭𑀓𑀯𑀲𑁂𑀦 𑀕𑀳𑀝𑁆𑀞𑀯𑀲𑁂𑀦 𑀘 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀕𑀳𑀝𑁆𑀞𑀸𑀦𑀫𑁆𑀧𑀺 𑀳𑀺 𑀚𑀸𑀢𑀺𑀥𑀫𑁆𑀫𑀓𑀼𑀮𑀥𑀫𑁆𑀫𑀤𑁂𑀲𑀥𑀫𑁆𑀫𑀯𑀺𑀮𑁄𑀫𑀦𑀯𑀲𑁂𑀦 𑀅𑀜𑁆𑀜𑀣𑀸𑀧𑀺 𑀫𑀺𑀘𑁆𑀙𑀸𑀚𑀻𑀯𑁄 𑀮𑀩𑁆𑀪𑀢𑁂𑀯.
𑀜𑀸𑀡𑀤𑀲𑁆𑀲𑀦𑀸𑀬𑀸𑀢𑀺 𑀏𑀢𑁆𑀣 𑀜𑀸𑀡𑀤𑀲𑁆𑀲𑀦𑀦𑁆𑀢𑀺 𑀫𑀕𑁆𑀕𑀜𑀸𑀡𑀫𑁆𑀧𑀺 𑀯𑀼𑀘𑁆𑀘𑀢𑀺 𑀨𑀮𑀜𑀸𑀡𑀫𑁆𑀧𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀫𑁆𑀧𑀺 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀫𑁆𑀧𑀺 𑀯𑀺𑀧𑀲𑁆𑀲𑀦𑀸𑀜𑀸𑀡𑀫𑁆𑀧𑀺. ‘‘𑀓𑀺𑀁 𑀦𑀼 𑀔𑁄, 𑀆𑀯𑀼𑀲𑁄, 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀢𑁆𑀣𑀁 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀻’’𑀢𑀺 (𑀫. 𑀦𑀺. 𑁧.𑁨𑁫𑁭) 𑀳𑀺 𑀏𑀢𑁆𑀣 𑀫𑀕𑁆𑀕𑀜𑀸𑀡𑀁 ‘‘𑀜𑀸𑀡𑀤𑀲𑁆𑀲𑀦’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀅𑀬𑀫𑀜𑁆𑀜𑁄 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁄 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑁄 𑀅𑀥𑀺𑀕𑀢𑁄 𑀨𑀸𑀲𑀼𑀯𑀺𑀳𑀸𑀭𑁄’’𑀢𑀺 (𑀫. 𑀦𑀺. 𑁧.𑁩𑁨𑁮) 𑀏𑀢𑁆𑀣 𑀨𑀮𑀜𑀸𑀡𑀁. ‘‘𑀪𑀕𑀯𑀢𑁄𑀧𑀺 𑀔𑁄 𑀜𑀸𑀡𑀁 𑀉𑀤𑀧𑀸𑀤𑀺 𑀲𑀢𑁆𑀢𑀸𑀳𑀓𑀸𑀮𑀓𑀢𑁄 𑀆𑀴𑀸𑀭𑁄 𑀓𑀸𑀮𑀸𑀫𑁄’’𑀢𑀺 (𑀫𑀳𑀸𑀯. 𑁧𑁦) 𑀏𑀢𑁆𑀣 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁. ‘‘𑀜𑀸𑀡𑀜𑁆𑀘 𑀧𑀦 𑀫𑁂 𑀤𑀲𑁆𑀲𑀦𑀁 𑀉𑀤𑀧𑀸𑀤𑀺, 𑀅𑀓𑀼𑀧𑁆𑀧𑀸 𑀫𑁂 𑀯𑀺𑀫𑀼𑀢𑁆𑀢𑀺, 𑀅𑀬𑀫𑀦𑁆𑀢𑀺𑀫𑀸 𑀚𑀸𑀢𑀻’’𑀢𑀺 (𑀲𑀁. 𑀦𑀺. 𑁫.𑁧𑁦𑁮𑁧; 𑀫𑀳𑀸𑀯. 𑁧𑁬; 𑀧𑀝𑀺. 𑀫. 𑁨.𑁩𑁦) 𑀏𑀢𑁆𑀣 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁. ‘‘𑀜𑀸𑀡𑀤𑀲𑁆𑀲𑀦𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀻’’𑀢𑀺 (𑀤𑀻. 𑀦𑀺. 𑁧.𑁨𑁩𑁪-𑁨𑁩𑁫) 𑀏𑀢𑁆𑀣 𑀯𑀺𑀧𑀲𑁆𑀲𑀦𑀸𑀜𑀸𑀡𑀁. 𑀇𑀥 𑀧𑀦 𑀜𑀸𑀡𑀤𑀲𑁆𑀲𑀦𑀸𑀬𑀸𑀢𑀺 𑀫𑀕𑁆𑀕𑀜𑀸𑀡𑀁 ‘‘𑀜𑀸𑀡𑀤𑀲𑁆𑀲𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀫𑀕𑁆𑀕𑀜𑀸𑀡𑀲𑀗𑁆𑀔𑀸𑀢𑀸𑀬 𑀤𑀲𑁆𑀲𑀦𑀸𑀬𑀸’’𑀢𑀺. 𑀅𑀯𑀺𑀭𑀸𑀥𑀺𑀢𑀁 𑀯𑀺𑀚𑁆𑀛𑀢𑀻𑀢𑀺 𑀅𑀯𑀺𑀭𑀸𑀥𑀺𑀢𑀁 𑀓𑀢𑁆𑀯𑀸 𑀯𑀺𑀚𑁆𑀛𑀢𑀺. 𑀲𑁂𑀲𑀫𑁂𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.
𑀲𑀸𑀴𑁆𑀳𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.
𑁭. 𑀫𑀮𑁆𑀮𑀺𑀓𑀸𑀤𑁂𑀯𑀻𑀲𑀼𑀢𑁆𑀢𑀯𑀡𑁆𑀡𑀦𑀸
𑁧𑁯𑁭. 𑀲𑀢𑁆𑀢𑀫𑁂 𑀅𑀧𑁆𑀧𑁂𑀲𑀓𑁆𑀔𑀸𑀢𑀺 𑀅𑀧𑁆𑀧𑀸𑀦𑀼𑀪𑀸𑀯𑀸. 𑀲𑀸 𑀧𑀦 𑀅𑀧𑁆𑀧𑁂𑀲𑀓𑁆𑀔𑀢𑀸 𑀆𑀥𑀺𑀧𑀢𑁂𑀬𑁆𑀬𑀲𑀫𑁆𑀧𑀢𑁆𑀢𑀺𑀬𑀸 𑀧𑀭𑀺𑀯𑀸𑀭𑀲𑀫𑁆𑀧𑀢𑁆𑀢𑀺𑀬𑀸 𑀘 𑀅𑀪𑀸𑀯𑁂𑀦 𑀧𑀸𑀓𑀝𑀸 𑀳𑁄𑀢𑀺. 𑀢𑀢𑁆𑀣 𑀧𑀭𑀺𑀯𑀸𑀭𑀲𑀫𑁆𑀧𑀢𑁆𑀢𑀺𑀬𑀸 𑀅𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀧𑁆𑀧𑀧𑀭𑀺𑀯𑀸𑀭𑀸’’𑀢𑀺 𑀆𑀳. 𑀇𑀲𑁆𑀲𑀭𑀸𑀢𑀺 𑀆𑀥𑀺𑀧𑀢𑁂𑀬𑁆𑀬𑀲𑀁𑀯𑀢𑁆𑀢𑀦𑀓𑀫𑁆𑀫𑀩𑀮𑁂𑀦 𑀈𑀲𑀦𑀲𑀻𑀮𑀸. 𑀲𑀸 𑀧𑀦𑀲𑁆𑀲𑀸 𑀇𑀲𑁆𑀲𑀭𑀢𑀸 𑀯𑀺𑀪𑀯𑀲𑀫𑁆𑀧𑀢𑁆𑀢𑀺𑀧𑀘𑁆𑀘𑀬𑀸 𑀧𑀸𑀓𑀝𑀸 𑀚𑀸𑀢𑀸𑀢𑀺 𑀅𑀟𑁆𑀠𑀢𑀸𑀧𑀭𑀺𑀬𑀸𑀬𑀪𑀸𑀯𑁂𑀦 𑀯𑀤𑀦𑁆𑀢𑁄 ‘‘𑀅𑀟𑁆𑀠𑀸𑀢𑀺 𑀇𑀲𑁆𑀲𑀭𑀸’’𑀢𑀺 𑀆𑀳. 𑀫𑀳𑀦𑁆𑀢𑀁 𑀥𑀦𑀫𑁂𑀢𑀺𑀲𑁆𑀲𑀸 𑀪𑀽𑀫𑀺𑀕𑀢𑀜𑁆𑀘𑁂𑀯 𑀯𑀴𑀜𑁆𑀚𑀦𑀓𑀜𑁆𑀘𑀸𑀢𑀺 𑀫𑀳𑀤𑁆𑀥𑀦𑀸. 𑀇𑀥 𑀧𑀦 𑀯𑀴𑀜𑁆𑀚𑀦𑀓𑁂𑀦𑁂𑀯 𑀥𑀦𑁂𑀦 𑀫𑀳𑀤𑁆𑀥𑀦𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀴𑀜𑁆𑀚𑀦𑀓𑀥𑀦𑁂𑀦 𑀫𑀳𑀤𑁆𑀥𑀦𑀸’’𑀢𑀺 𑀆𑀳. 𑀈𑀲𑀢𑀻𑀢𑀺 𑀈𑀲𑀸, 𑀅𑀪𑀺𑀪𑀽𑀢𑀺 𑀅𑀢𑁆𑀣𑁄. 𑀫𑀳𑀢𑀻 𑀈𑀲𑀸 𑀫𑀳𑁂𑀲𑀸, 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀫𑀳𑁂𑀲𑀢𑀸𑀬 𑀧𑀦 𑀧𑀭𑁂𑀳𑀺 𑀫𑀳𑁂𑀲𑁄𑀢𑀺 𑀅𑀓𑁆𑀔𑀸𑀢𑀩𑁆𑀩𑀢𑀸𑀬 𑀫𑀳𑁂𑀲𑀓𑁆𑀔𑀸. 𑀬𑀲𑁆𑀫𑀸 𑀧𑀦 𑀲𑁄 𑀫𑀳𑁂𑀲𑀓𑁆𑀔𑀸𑀪𑀸𑀯𑁄 𑀆𑀥𑀺𑀧𑀢𑁂𑀬𑁆𑀬𑀧𑀭𑀺𑀯𑀸𑀭𑀲𑀫𑁆𑀧𑀢𑁆𑀢𑀺𑀬𑀸 𑀯𑀺𑀜𑁆𑀜𑀸𑀬𑀢𑀺, 𑀢𑀲𑁆𑀫𑀸 ‘‘𑀫𑀳𑀸𑀧𑀭𑀺𑀯𑀸𑀭𑀸’’𑀢𑀺 𑀯𑀼𑀢𑁆𑀢𑀁.
𑀲𑀡𑁆𑀞𑀸𑀦𑀧𑀸𑀭𑀺𑀧𑀽𑀭𑀺𑀬𑀸 𑀅𑀥𑀺𑀓𑀁 𑀭𑀽𑀧𑀫𑀲𑁆𑀲𑀸𑀢𑀺 𑀅𑀪𑀺𑀭𑀽𑀧𑀸. 𑀲𑀡𑁆𑀞𑀸𑀦𑀧𑀸𑀭𑀺𑀧𑀽𑀭𑀺𑀬𑀸𑀢𑀺 𑀘 𑀳𑀢𑁆𑀣𑀧𑀸𑀤𑀸𑀤𑀺𑀲𑀭𑀻𑀭𑀸𑀯𑀬𑀯𑀸𑀦𑀁 𑀲𑀼𑀲𑀡𑁆𑀞𑀺𑀢𑀢𑀸𑀬𑀸𑀢𑀺 𑀅𑀢𑁆𑀣𑁄. 𑀅𑀯𑀬𑀯𑀧𑀸𑀭𑀺𑀧𑀽𑀭𑀺𑀬𑀸 𑀳𑀺 𑀲𑀫𑀼𑀤𑀸𑀬𑀧𑀸𑀭𑀺𑀧𑀽𑀭𑀺𑀲𑀺𑀤𑁆𑀥𑀺. 𑀭𑀽𑀧𑀦𑁆𑀢𑀺 𑀘 𑀲𑀭𑀻𑀭𑀁 ‘‘𑀭𑀽𑀧𑀯𑀦𑁆𑀢𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬. 𑀤𑀲𑁆𑀲𑀦𑀬𑀼𑀢𑁆𑀢𑀸𑀢𑀺 𑀲𑀼𑀭𑀽𑀧𑀪𑀸𑀯𑁂𑀦 𑀧𑀲𑁆𑀲𑀺𑀢𑀩𑁆𑀩𑀬𑀼𑀢𑁆𑀢𑀸, 𑀤𑀺𑀲𑁆𑀲𑀫𑀸𑀦𑀸 𑀘𑀓𑁆𑀔𑀽𑀦𑀺 𑀧𑀺𑀬𑀸𑀬𑀢𑀻𑀢𑀺 𑀅𑀜𑁆𑀜𑀓𑀺𑀘𑁆𑀘𑀯𑀺𑀓𑁆𑀔𑁂𑀧𑀁 𑀳𑀺𑀢𑁆𑀯𑀸𑀧𑀺 𑀤𑀝𑁆𑀞𑀩𑁆𑀩𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀤𑀺𑀲𑁆𑀲𑀫𑀸𑀦𑀸𑀯 𑀲𑁄𑀫𑀦𑀲𑁆𑀲𑀯𑀲𑁂𑀦 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑀻𑀢𑀺 𑀧𑀸𑀲𑀸𑀤𑀺𑀓𑀸. 𑀢𑁂𑀦𑀸𑀳 ‘‘𑀤𑀲𑁆𑀲𑀦𑁂𑀦 𑀧𑀸𑀲𑀸𑀤𑀺𑀓𑀸’’𑀢𑀺. 𑀧𑁄𑀓𑁆𑀔𑀭𑀢𑀸𑀢𑀺 𑀯𑀼𑀘𑁆𑀘𑀢𑀺 𑀲𑀼𑀦𑁆𑀤𑀭𑀪𑀸𑀯𑁄, 𑀯𑀡𑁆𑀡𑀲𑁆𑀲 𑀧𑁄𑀓𑁆𑀔𑀭𑀢𑀸 𑀯𑀡𑁆𑀡𑀧𑁄𑀓𑁆𑀔𑀭𑀢𑀸, 𑀢𑀸𑀬 𑀯𑀡𑁆𑀡𑀲𑀫𑁆𑀧𑀢𑁆𑀢𑀺𑀬𑀸𑀢𑀺 𑀅𑀢𑁆𑀣𑁄. 𑀧𑁄𑀭𑀸𑀡𑀸 𑀧𑀦 𑀧𑁄𑀓𑁆𑀔𑀭𑀦𑁆𑀢𑀺 𑀲𑀭𑀻𑀭𑀁 𑀯𑀤𑀦𑁆𑀢𑀺, 𑀯𑀡𑁆𑀡𑀁 𑀯𑀡𑁆𑀡𑀫𑁂𑀯. 𑀢𑁂𑀲𑀁 𑀫𑀢𑁂𑀦 𑀯𑀡𑁆𑀡𑀜𑁆𑀘 𑀧𑁄𑀓𑁆𑀔𑀭𑀜𑁆𑀘 𑀯𑀡𑁆𑀡𑀧𑁄𑀓𑁆𑀔𑀭𑀸𑀦𑀺, 𑀢𑁂𑀲𑀁 𑀪𑀸𑀯𑁄 𑀯𑀡𑁆𑀡𑀧𑁄𑀓𑁆𑀔𑀭𑀢𑀸. 𑀇𑀢𑀺 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬𑀸𑀢𑀺 𑀉𑀢𑁆𑀢𑀫𑀧𑀭𑀺𑀲𑀼𑀤𑁆𑀥𑁂𑀦 𑀯𑀡𑁆𑀡𑁂𑀦 𑀘𑁂𑀯 𑀲𑀭𑀻𑀭𑀲𑀡𑁆𑀞𑀸𑀦𑀲𑀫𑁆𑀧𑀢𑁆𑀢𑀺𑀬𑀸 𑀘𑀸𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀢𑁂𑀦𑁂𑀯𑀸𑀳 ‘‘𑀯𑀡𑁆𑀡𑁂𑀦 𑀘𑁂𑀯 𑀲𑀭𑀻𑀭𑀲𑀡𑁆𑀞𑀸𑀦𑁂𑀦 𑀘𑀸’’𑀢𑀺. 𑀢𑀢𑁆𑀣 𑀯𑀡𑁆𑀡𑁂𑀦𑀸𑀢𑀺 𑀯𑀡𑁆𑀡𑀥𑀸𑀢𑀼𑀬𑀸. 𑀲𑀭𑀻𑀭𑀁 𑀦𑀸𑀫 𑀲𑀦𑁆𑀦𑀺𑀯𑁂𑀲𑀯𑀺𑀲𑀺𑀝𑁆𑀞𑁄 𑀓𑀭𑀘𑀭𑀡𑀕𑀻𑀯𑀸𑀲𑀻𑀲𑀸𑀤𑀺𑀅𑀯𑀬𑀯𑀲𑀫𑀼𑀤𑀸𑀬𑁄, 𑀲𑁄 𑀘 𑀲𑀡𑁆𑀞𑀸𑀦𑀫𑀼𑀔𑁂𑀦 𑀕𑀬𑁆𑀳𑀢𑀻𑀢𑀺 𑀆𑀳 ‘‘𑀲𑀭𑀻𑀭𑀲𑀡𑁆𑀞𑀸𑀦𑁂𑀦𑀸’’𑀢𑀺.
𑀅𑀪𑀺𑀲𑀚𑁆𑀚𑀢𑀻𑀢𑀺 𑀓𑀼𑀚𑁆𑀛𑀦𑀯𑀲𑁂𑀦𑁂𑀯 𑀓𑀼𑀝𑀺𑀮𑀓𑀡𑁆𑀝𑀓𑁄 𑀯𑀺𑀬 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀫𑀼𑀝𑁆𑀞𑀸𑀦𑁂 𑀫𑀓𑀭𑀤𑀦𑁆𑀢𑁄 𑀯𑀺𑀬 𑀮𑀕𑀢𑀺. 𑀬𑀜𑁆𑀳𑀺 𑀓𑁄𑀥𑀲𑁆𑀲 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀪𑀽𑀢𑁂 𑀆𑀭𑀫𑁆𑀫𑀡𑁂 𑀉𑀧𑀦𑀸𑀳𑀲𑁆𑀲 𑀧𑀘𑁆𑀘𑀬𑀪𑀽𑀢𑀁 𑀓𑀼𑀚𑁆𑀛𑀦𑀯𑀲𑁂𑀦 𑀅𑀪𑀺𑀲𑀚𑁆𑀚𑀦𑀁, 𑀢𑀁 𑀇𑀥𑀸𑀥𑀺𑀧𑁆𑀧𑁂𑀢𑀁, 𑀦 𑀮𑀼𑀩𑁆𑀪𑀦𑀯𑀲𑁂𑀦. 𑀓𑀼𑀧𑁆𑀧𑀢𑀻𑀢𑀺𑀆𑀤𑀻𑀲𑀼 𑀧𑀼𑀩𑁆𑀩𑀼𑀧𑁆𑀧𑀢𑁆𑀢𑀺 𑀓𑁄𑀧𑁄, 𑀢𑀢𑁄 𑀩𑀮𑀯𑀢𑀭𑁄 𑀩𑁆𑀬𑀸𑀧𑀸𑀤𑁄 𑀮𑀤𑁆𑀥𑀸𑀲𑁂𑀯𑀦𑀢𑀸𑀬 𑀘𑀺𑀢𑁆𑀢𑀲𑁆𑀲 𑀩𑁆𑀬𑀸𑀧𑀚𑁆𑀚𑀦𑀢𑁄. 𑀲𑀸𑀢𑀺𑀲𑀬𑀁 𑀮𑀤𑁆𑀥𑀸𑀲𑁂𑀯𑀦𑀢𑀸𑀬 𑀢𑀢𑁄 𑀩𑁆𑀬𑀸𑀧𑀸𑀤𑀢𑁄𑀧𑀺 𑀩𑀮𑀯𑀢𑀭𑀸 𑀧𑀘𑁆𑀘𑀢𑁆𑀣𑀺𑀓𑀪𑀸𑀯𑁂𑀦 𑀣𑀸𑀫𑀧𑁆𑀧𑀢𑁆𑀢𑀺 𑀧𑀢𑀺𑀢𑁆𑀣𑀺𑀬𑀦𑀸. 𑀅𑀦𑁆𑀦𑀁 𑀧𑀸𑀦𑀦𑁆𑀢𑀺𑀆𑀤𑀻𑀲𑀼 𑀅𑀤𑀻𑀬𑀢𑁄 𑀅𑀦𑁆𑀦𑀁, 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀜𑁆𑀘. 𑀧𑀸𑀢𑀩𑁆𑀬𑀢𑁄 𑀧𑀸𑀦𑀁, 𑀬𑀁𑀓𑀺𑀜𑁆𑀘𑀺 𑀧𑀸𑀦𑀁. 𑀯𑀲𑀺𑀢𑀩𑁆𑀩𑀢𑁄 𑀅𑀘𑁆𑀙𑀸𑀤𑁂𑀢𑀩𑁆𑀩𑀢𑁄 𑀯𑀢𑁆𑀣𑀁, 𑀦𑀺𑀯𑀸𑀲𑀦𑀧𑀸𑀯𑀼𑀭𑀡𑀁. 𑀬𑀦𑁆𑀢𑀺 𑀢𑁂𑀦𑀸𑀢𑀺 𑀬𑀸𑀦𑀁, 𑀙𑀢𑁆𑀢𑀼𑀧𑀸𑀳𑀦𑀯𑀬𑁆𑀳𑀲𑀺𑀯𑀺𑀓𑀸𑀤𑀺 𑀬𑀁𑀓𑀺𑀜𑁆𑀘𑀺 𑀕𑀫𑀦𑀧𑀘𑁆𑀘𑀬𑀁. 𑀙𑀢𑁆𑀢𑀫𑁆𑀧𑀺 𑀳𑀺 𑀯𑀲𑁆𑀲𑀸𑀢𑀧𑀤𑀼𑀓𑁆𑀔𑀦𑀺𑀯𑀸𑀭𑀡𑁂𑀦 𑀫𑀕𑁆𑀕𑀕𑀫𑀦𑀲𑀸𑀥𑀦𑀦𑁆𑀢𑀺 𑀓𑀢𑁆𑀯𑀸 ‘‘𑀬𑀸𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀫𑀸𑀮𑀦𑁆𑀢𑀺 𑀬𑀁𑀓𑀺𑀜𑁆𑀘𑀺 𑀲𑀼𑀫𑀦𑀫𑀸𑀮𑀸𑀤𑀺𑀧𑀼𑀧𑁆𑀨𑀁. 𑀕𑀦𑁆𑀥𑀦𑁆𑀢𑀺 𑀬𑀁𑀓𑀺𑀜𑁆𑀘𑀺 𑀘𑀦𑁆𑀤𑀦𑀸𑀤𑀺𑀯𑀺𑀮𑁂𑀧𑀦𑀁.
𑀫𑀮𑁆𑀮𑀺𑀓𑀸𑀤𑁂𑀯𑀻𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.
𑁮. 𑀅𑀢𑁆𑀢𑀦𑁆𑀢𑀧𑀲𑀼𑀢𑁆𑀢𑀯𑀡𑁆𑀡𑀦𑀸
𑁧𑁯𑁮. 𑀅𑀝𑁆𑀞𑀫𑁂 𑀆𑀳𑀺𑀢𑁄 𑀅𑀳𑀁𑀫𑀸𑀦𑁄 𑀏𑀢𑁆𑀣𑀸𑀢𑀺 𑀅𑀢𑁆𑀢𑀸, 𑀅𑀢𑁆𑀢𑀪𑀸𑀯𑁄. 𑀇𑀥 𑀧𑀦 𑀬𑁄 𑀧𑀭𑁄 𑀦 𑀳𑁄𑀢𑀺, 𑀲𑁄 𑀅𑀢𑁆𑀢𑀸, 𑀢𑀁 𑀅𑀢𑁆𑀢𑀸𑀦𑀁. 𑀧𑀭𑀦𑁆𑀢𑀺 𑀅𑀢𑁆𑀢𑀢𑁄 𑀅𑀜𑁆𑀜𑀁. 𑀤𑀺𑀝𑁆𑀞𑁂𑀢𑀺 𑀧𑀘𑁆𑀘𑀓𑁆𑀔𑀪𑀽𑀢𑁂. 𑀥𑀫𑁆𑀫𑁂𑀢𑀺 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀥𑀫𑁆𑀫𑁂. 𑀢𑀢𑁆𑀣 𑀳𑀺 𑀅𑀢𑁆𑀢𑀸 𑀪𑀯𑀢𑀺, 𑀅𑀢𑁆𑀢𑀲𑀜𑁆𑀜𑀸𑀤𑀺𑀝𑁆𑀞𑀺 𑀪𑀯𑀢𑀻𑀢𑀺 𑀅𑀢𑁆𑀢𑀪𑀸𑀯𑀲𑀫𑀜𑁆𑀜𑀸. 𑀢𑁂𑀦𑀸𑀳 ‘‘𑀤𑀺𑀝𑁆𑀞𑁂𑀯 𑀥𑀫𑁆𑀫𑁂𑀢𑀺 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂’’𑀢𑀺. 𑀙𑀸𑀢𑀁 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸 𑀚𑀺𑀖𑀘𑁆𑀙𑀸𑀳𑁂𑀢𑀼𑀢𑀸𑀬. 𑀅𑀦𑁆𑀢𑁄 𑀢𑀸𑀧𑀦𑀓𑀺𑀮𑁂𑀲𑀸𑀦𑀦𑁆𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀤𑀭𑀣𑀧𑀭𑀺𑀴𑀸𑀳𑀚𑀦𑀦𑁂𑀦 𑀲𑀦𑁆𑀢𑀸𑀧𑀦𑀓𑀺𑀮𑁂𑀲𑀸𑀦𑀁.
𑀧𑀭𑁂𑀲𑀁 𑀳𑀦𑀦𑀖𑀸𑀢𑀦𑀸𑀤𑀺𑀦𑀸 𑀭𑁄𑀤𑀸𑀧𑀦𑀢𑁄 𑀮𑀼𑀤𑁆𑀤𑁄. 𑀢𑀣𑀸 𑀯𑀺𑀖𑀸𑀢𑀓𑀪𑀸𑀯𑁂𑀦 𑀓𑀸𑀬𑀘𑀺𑀢𑁆𑀢𑀸𑀦𑀁 𑀯𑀺𑀤𑀸𑀮𑀦𑀢𑁄 𑀤𑀸𑀭𑀼𑀡𑁄. 𑀣𑀤𑁆𑀥𑀳𑀤𑀬𑁄 𑀓𑀓𑁆𑀔𑀴𑁄. 𑀩𑀦𑁆𑀥𑀦𑀸𑀕𑀸𑀭𑁂 𑀦𑀺𑀬𑀼𑀢𑁆𑀢𑁄 𑀩𑀦𑁆𑀥𑀦𑀸𑀕𑀸𑀭𑀺𑀓𑁄.
𑀔𑀢𑁆𑀢𑀺𑀬𑀸𑀪𑀺𑀲𑁂𑀓𑁂𑀦𑀸𑀢𑀺 𑀔𑀢𑁆𑀢𑀺𑀬𑀸𑀦𑀁 𑀓𑀸𑀢𑀩𑁆𑀩𑀅𑀪𑀺𑀲𑁂𑀓𑁂𑀦. 𑀲𑀦𑁆𑀣𑀸𑀕𑀸𑀭𑀦𑁆𑀢𑀺 𑀲𑀦𑁆𑀣𑀸𑀭𑀯𑀲𑁂𑀦 𑀓𑀢𑀁 𑀅𑀕𑀸𑀭𑀁 𑀬𑀜𑁆𑀜𑀸𑀕𑀸𑀭𑀁. 𑀲𑀧𑁆𑀧𑀺𑀢𑁂𑀮𑁂𑀦𑀸𑀢𑀺 𑀲𑀧𑁆𑀧𑀺𑀫𑀺𑀲𑁆𑀲𑁂𑀦 𑀢𑁂𑀮𑁂𑀦. 𑀬𑀫𑀓𑀲𑁆𑀦𑁂𑀳𑁂𑀦 𑀳𑀺 𑀏𑀲𑀸 𑀢𑀤𑀸 𑀓𑀸𑀬𑀁 𑀅𑀩𑁆𑀪𑀜𑁆𑀚𑀢𑀺. 𑀯𑀘𑁆𑀙𑀪𑀸𑀯𑀁 𑀢𑀭𑀺𑀢𑁆𑀯𑀸 𑀞𑀺𑀢𑁄 𑀯𑀘𑁆𑀙𑀢𑀭𑁄. 𑀧𑀭𑀺𑀓𑁆𑀔𑁂𑀧𑀓𑀭𑀡𑀢𑁆𑀣𑀸𑀬𑀸𑀢𑀺 𑀦𑀯𑀫𑀸𑀮𑀸𑀳𑀺 𑀲𑀤𑁆𑀥𑀺𑀁 𑀤𑀩𑁆𑀪𑁂𑀳𑀺 𑀯𑁂𑀤𑀺𑀬𑀸 𑀧𑀭𑀺𑀓𑁆𑀔𑀺𑀧𑀦𑀢𑁆𑀣𑀸𑀬. 𑀬𑀜𑁆𑀜𑀪𑀽𑀫𑀺𑀬𑀦𑁆𑀢𑀺 𑀅𑀯𑀲𑁂𑀲𑀬𑀜𑁆𑀜𑀝𑁆𑀞𑀸𑀦𑁂.
𑀤𑀽𑀭𑀲𑀫𑀼𑀲𑁆𑀲𑀸𑀭𑀺𑀢𑀫𑀸𑀦𑀲𑁆𑀲𑁂𑀯 𑀲𑀸𑀲𑀦𑁂 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺 𑀲𑀫𑁆𑀪𑀯𑀢𑀺, 𑀦 𑀫𑀸𑀦𑀚𑀸𑀢𑀺𑀓𑀲𑁆𑀲𑀸𑀢𑀺 𑀆𑀳 ‘‘𑀦𑀺𑀳𑀢𑀫𑀸𑀦𑀢𑁆𑀢𑀸’’𑀢𑀺. 𑀉𑀲𑁆𑀲𑀦𑁆𑀦𑀢𑁆𑀢𑀸𑀢𑀺 𑀩𑀳𑀼𑀪𑀸𑀯𑀢𑁄. 𑀪𑁄𑀕𑀸𑀭𑁄𑀕𑁆𑀬𑀸𑀤𑀺𑀯𑀢𑁆𑀣𑀼𑀓𑀸 𑀫𑀤𑀸 𑀲𑀼𑀧𑁆𑀧𑀳𑀺𑀬𑀸 𑀳𑁄𑀦𑁆𑀢𑀺 𑀦𑀺𑀫𑀺𑀢𑁆𑀢𑀲𑁆𑀲 𑀅𑀯𑀝𑁆𑀞𑀸𑀦𑀢𑁄, 𑀦 𑀢𑀣𑀸 𑀓𑀼𑀮𑀯𑀺𑀚𑁆𑀚𑀸𑀫𑀤𑀸𑀢𑀺 𑀔𑀢𑁆𑀢𑀺𑀬𑀩𑁆𑀭𑀸𑀳𑁆𑀫𑀡𑀓𑀼𑀮𑀸𑀦𑀁 𑀧𑀩𑁆𑀩𑀚𑀺𑀢𑀸𑀦𑀫𑁆𑀧𑀺 𑀚𑀸𑀢𑀺𑀯𑀺𑀚𑁆𑀚𑀸 𑀦𑀺𑀲𑁆𑀲𑀸𑀬 𑀫𑀸𑀦𑀚𑀧𑁆𑀧𑀦𑀁 𑀤𑀼𑀧𑁆𑀧𑀚𑀳𑀦𑁆𑀢𑀺 𑀆𑀳 ‘‘𑀬𑁂𑀪𑀼𑀬𑁆𑀬𑁂𑀦 𑀳𑀺…𑀧𑁂… 𑀫𑀸𑀦𑀁 𑀓𑀭𑁄𑀦𑁆𑀢𑀻’’𑀢𑀺. 𑀯𑀺𑀚𑀸𑀢𑀺𑀢𑀸𑀬𑀸𑀢𑀺 𑀦𑀺𑀳𑀻𑀦𑀚𑀸𑀢𑀺𑀢𑀸𑀬. 𑀧𑀢𑀺𑀝𑁆𑀞𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀻𑀢𑀺 𑀲𑀼𑀯𑀺𑀲𑀼𑀤𑁆𑀥𑀁 𑀓𑀢𑁆𑀯𑀸 𑀲𑀻𑀮𑀁 𑀭𑀓𑁆𑀔𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀲𑀻𑀮𑀯𑀲𑁂𑀦 𑀳𑀺 𑀲𑀸𑀲𑀦𑁂 𑀧𑀢𑀺𑀝𑁆𑀞𑀳𑀦𑁆𑀢𑀺. 𑀧𑀢𑀺𑀝𑁆𑀞𑀸𑀢𑀼𑀦𑁆𑀢𑀺 𑀯𑀸 𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑁂𑀦 𑀮𑁄𑀓𑀼𑀢𑁆𑀢𑀭𑀸𑀬 𑀧𑀢𑀺𑀝𑁆𑀞𑀸𑀬 𑀧𑀢𑀺𑀝𑁆𑀞𑀸𑀢𑀼𑀁. 𑀬𑁂𑀪𑀼𑀬𑁆𑀬𑁂𑀦 𑀳𑀺 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀸 𑀲𑀼𑀚𑀸𑀢𑀸𑀬𑁂𑀯 𑀳𑁄𑀦𑁆𑀢𑀺, 𑀦 𑀤𑀼𑀚𑁆𑀚𑀸𑀢𑀸.
𑀧𑀭𑀺𑀲𑀼𑀤𑁆𑀥𑀦𑁆𑀢𑀺 𑀭𑀸𑀕𑀸𑀤𑀻𑀦𑀁 𑀅𑀘𑁆𑀘𑀦𑁆𑀢𑀫𑁂𑀯 𑀧𑀳𑀸𑀦𑀤𑀻𑀧𑀦𑀢𑁄 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀢𑀸𑀬 𑀲𑀩𑁆𑀩𑀲𑁄 𑀯𑀺𑀲𑀼𑀤𑁆𑀥𑀁. 𑀲𑀤𑁆𑀥𑀁 𑀧𑀝𑀺𑀮𑀪𑀢𑀻𑀢𑀺 𑀧𑁄𑀣𑀼𑀚𑁆𑀚𑀦𑀺𑀓𑀲𑀤𑁆𑀥𑀸𑀯𑀲𑁂𑀦 𑀲𑀤𑁆𑀤𑀳𑀢𑀺. 𑀯𑀺𑀜𑁆𑀜𑀼𑀚𑀸𑀢𑀺𑀓𑀸𑀦𑀜𑁆𑀳𑀺 𑀥𑀫𑁆𑀫𑀲𑀫𑁆𑀧𑀢𑁆𑀢𑀺𑀕𑁆𑀕𑀳𑀡𑀧𑀼𑀩𑁆𑀩𑀺𑀓𑀸 𑀲𑀤𑁆𑀥𑀸𑀲𑀺𑀤𑁆𑀥𑀺 𑀥𑀫𑁆𑀫𑀧𑁆𑀧𑀫𑀸𑀡𑀥𑀫𑁆𑀫𑀧𑁆𑀧𑀲𑀦𑁆𑀦𑀪𑀸𑀯𑀢𑁄. 𑀚𑀸𑀬𑀫𑁆𑀧𑀢𑀺𑀓𑀸𑀢𑀺 𑀖𑀭𑀡𑀺𑀧𑀢𑀺𑀓𑀸. 𑀓𑀸𑀫𑀁 ‘‘𑀚𑀸𑀬𑀫𑁆𑀧𑀢𑀺𑀓𑀸’’𑀢𑀺 𑀯𑀼𑀢𑁆𑀢𑁂 𑀖𑀭𑀲𑀸𑀫𑀺𑀓𑀖𑀭𑀲𑀸𑀫𑀺𑀦𑀺𑀯𑀲𑁂𑀦 𑀤𑁆𑀯𑀺𑀦𑁆𑀦𑀁𑀬𑁂𑀯 𑀕𑀳𑀡𑀁 𑀯𑀺𑀜𑁆𑀜𑀸𑀬𑀢𑀺, 𑀬𑀲𑁆𑀲 𑀧𑀦 𑀧𑀼𑀭𑀺𑀲𑀲𑁆𑀲 𑀅𑀦𑁂𑀓𑀸 𑀧𑀚𑀸𑀧𑀢𑀺𑀬𑁄 𑀳𑁄𑀦𑁆𑀢𑀺, 𑀢𑀢𑁆𑀣 𑀓𑀺𑀁 𑀯𑀢𑁆𑀢𑀩𑁆𑀩𑀦𑁆𑀢𑀺 𑀏𑀓𑀸𑀬𑀧𑀺 𑀲𑀁𑀯𑀸𑀲𑁄 𑀲𑀫𑁆𑀩𑀸𑀥𑁄𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀤𑁆𑀯𑁂’’𑀢𑀺 𑀯𑀼𑀢𑁆𑀢𑀁. 𑀭𑀸𑀕𑀸𑀤𑀺𑀦𑀸 𑀲𑀓𑀺𑀜𑁆𑀘𑀦𑀝𑁆𑀞𑁂𑀦, 𑀔𑁂𑀢𑁆𑀢𑀯𑀢𑁆𑀣𑀼𑀆𑀤𑀺𑀦𑀸 𑀲𑀧𑀮𑀺𑀩𑁄𑀥𑀝𑁆𑀞𑁂𑀦 𑀭𑀸𑀕𑀭𑀚𑀸𑀤𑀻𑀦𑀁 𑀆𑀕𑀫𑀦𑀧𑀣𑀢𑀸𑀧𑀺 𑀉𑀧𑁆𑀧𑀚𑁆𑀚𑀦𑀝𑁆𑀞𑀸𑀦𑀢𑀸 𑀏𑀯𑀸𑀢𑀺 𑀤𑁆𑀯𑁂𑀧𑀺 𑀯𑀡𑁆𑀡𑀦𑀸 𑀏𑀓𑀢𑁆𑀣𑀸, 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀁. 𑀅𑀮𑀕𑁆𑀕𑀦𑀝𑁆𑀞𑁂𑀦𑀸𑀢𑀺 𑀅𑀲𑀚𑁆𑀚𑀦𑀝𑁆𑀞𑁂𑀦 𑀅𑀧𑁆𑀧𑀝𑀺𑀩𑀤𑁆𑀥𑀪𑀸𑀯𑁂𑀦. 𑀏𑀯𑀁 𑀅𑀓𑀼𑀲𑀮𑀓𑀼𑀲𑀮𑀧𑁆𑀧𑀯𑀢𑁆𑀢𑀻𑀦𑀁 𑀞𑀸𑀦𑀪𑀸𑀯𑁂𑀦 𑀖𑀭𑀸𑀯𑀸𑀲𑀧𑀩𑁆𑀩𑀚𑁆𑀚𑀸𑀦𑀁 𑀲𑀫𑁆𑀩𑀸𑀥𑀩𑁆𑀪𑁄𑀓𑀸𑀲𑀢𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀓𑀼𑀲𑀮𑀧𑁆𑀧𑀯𑀢𑁆𑀢𑀺𑀬𑀸𑀬𑁂𑀯 𑀅𑀝𑁆𑀞𑀸𑀦𑀝𑁆𑀞𑀸𑀦𑀪𑀸𑀯𑁂𑀦 𑀢𑁂𑀲𑀁 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.
𑀲𑀗𑁆𑀔𑁂𑀧𑀓𑀣𑀸𑀢𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀧𑀤𑀼𑀤𑁆𑀥𑀸𑀭𑀁 𑀅𑀓𑀢𑁆𑀯𑀸 𑀲𑀗𑁆𑀔𑁂𑀧𑀢𑁄 𑀅𑀢𑁆𑀣𑀯𑀡𑁆𑀡𑀦𑀸. 𑀏𑀓𑀫𑁆𑀧𑀺 𑀤𑀺𑀯𑀲𑀦𑁆𑀢𑀺 𑀏𑀓𑀤𑀺𑀯𑀲𑀫𑀢𑁆𑀢𑀫𑁆𑀧𑀺. 𑀅𑀔𑀡𑁆𑀟𑀁 𑀓𑀢𑁆𑀯𑀸𑀢𑀺 𑀤𑀼𑀓𑁆𑀓𑀝𑀫𑀢𑁆𑀢𑀲𑁆𑀲𑀧𑀺 𑀅𑀦𑀸𑀧𑀚𑁆𑀚𑀦𑁂𑀦 𑀅𑀔𑀡𑁆𑀟𑀺𑀢𑀁 𑀓𑀢𑁆𑀯𑀸. 𑀓𑀺𑀮𑁂𑀲𑀫𑀮𑁂𑀦 𑀅𑀫𑀮𑀺𑀦𑀦𑁆𑀢𑀺 𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑀸𑀤𑀺𑀯𑀲𑁂𑀦 𑀅𑀲𑀁𑀓𑀺𑀮𑀺𑀝𑁆𑀞𑀁 𑀓𑀢𑁆𑀯𑀸. 𑀧𑀭𑀺𑀤𑀳𑀺𑀢𑁆𑀯𑀸𑀢𑀺 𑀦𑀺𑀯𑀸𑀲𑁂𑀢𑁆𑀯𑀸 𑀘𑁂𑀯 𑀧𑀸𑀭𑀼𑀧𑀺𑀢𑁆𑀯𑀸 𑀘. 𑀅𑀕𑀸𑀭𑀯𑀸𑀲𑁄 𑀅𑀕𑀸𑀭𑀁 𑀉𑀢𑁆𑀢𑀭𑀧𑀤𑀮𑁄𑀧𑁂𑀦, 𑀢𑀲𑁆𑀲 𑀯𑀟𑁆𑀠𑀺𑀆𑀯𑀳𑀁 𑀅𑀕𑀸𑀭𑀲𑁆𑀲 𑀳𑀺𑀢𑀁.
𑀪𑁄𑀕𑀓𑁆𑀔𑀦𑁆𑀥𑁄𑀢𑀺 𑀪𑁄𑀕𑀭𑀸𑀲𑀺 𑀪𑁄𑀕𑀲𑀫𑀼𑀤𑀸𑀬𑁄. 𑀆𑀩𑀦𑁆𑀥𑀦𑀝𑁆𑀞𑁂𑀦𑀸𑀢𑀺 𑀧𑀼𑀢𑁆𑀢𑁄 𑀦𑀢𑁆𑀢𑀸𑀢𑀺𑀆𑀤𑀺𑀦𑀸 𑀧𑁂𑀫𑀯𑀲𑁂𑀦 𑀲𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀩𑀦𑁆𑀥𑀦𑀝𑁆𑀞𑁂𑀦. 𑀅𑀫𑁆𑀳𑀸𑀓𑀫𑁂𑀢𑁂𑀢𑀺 𑀜𑀸𑀬𑀦𑁆𑀢𑀻𑀢𑀺 𑀜𑀸𑀢𑀻, 𑀧𑀺𑀢𑀸𑀫𑀳𑀧𑀺𑀢𑀼𑀧𑀼𑀢𑁆𑀢𑀸𑀤𑀺𑀯𑀲𑁂𑀦 𑀧𑀭𑀺𑀯𑀢𑁆𑀢𑀦𑀝𑁆𑀞𑁂𑀦 𑀧𑀭𑀺𑀯𑀝𑁆𑀝𑁄. 𑀲𑀸𑀫𑀜𑁆𑀜𑀯𑀸𑀘𑀻𑀧𑀺 𑀲𑀺𑀓𑁆𑀔𑀸-𑀲𑀤𑁆𑀤𑁄 𑀆𑀚𑀻𑀯𑀲𑀤𑁆𑀤𑀲𑀦𑁆𑀦𑀺𑀥𑀸𑀦𑀢𑁄 𑀉𑀧𑀭𑀺𑀯𑀼𑀘𑁆𑀘𑀫𑀸𑀦𑀯𑀺𑀲𑁂𑀲𑀸𑀧𑁂𑀓𑁆𑀔𑀸𑀬 𑀘 𑀯𑀺𑀲𑁂𑀲𑀦𑀺𑀯𑀺𑀝𑁆𑀞𑁄𑀯 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀬𑀸 𑀪𑀺𑀓𑁆𑀔𑀽𑀦𑀁 𑀅𑀥𑀺𑀲𑀻𑀮𑀲𑀗𑁆𑀔𑀸𑀢𑀸 𑀲𑀺𑀓𑁆𑀔𑀸’’𑀢𑀺. 𑀲𑀺𑀓𑁆𑀔𑀺𑀢𑀩𑁆𑀩𑀝𑁆𑀞𑁂𑀦 𑀲𑀺𑀓𑁆𑀔𑀸, 𑀲𑀳 𑀆𑀚𑀻𑀯𑀦𑁆𑀢𑀺 𑀏𑀢𑁆𑀣𑀸𑀢𑀺 𑀲𑀸𑀚𑀻𑀯𑁄. 𑀲𑀺𑀓𑁆𑀔𑀦𑀪𑀸𑀯𑁂𑀦𑀸𑀢𑀺 𑀲𑀺𑀓𑁆𑀔𑀸𑀬 𑀲𑀸𑀚𑀻𑀯𑁂 𑀘 𑀲𑀺𑀓𑁆𑀔𑀦𑀪𑀸𑀯𑁂𑀦. 𑀲𑀺𑀓𑁆𑀔𑀁 𑀧𑀭𑀺𑀧𑀽𑀭𑁂𑀦𑁆𑀢𑁄𑀢𑀺 𑀲𑀻𑀮𑀲𑀁𑀯𑀭𑀁 𑀧𑀭𑀺𑀧𑀽𑀭𑁂𑀦𑁆𑀢𑁄. 𑀲𑀸𑀚𑀻𑀯𑀜𑁆𑀘 𑀅𑀯𑀻𑀢𑀺𑀓𑁆𑀓𑀫𑀦𑁆𑀢𑁄𑀢𑀺 ‘‘𑀦𑀸𑀫𑀓𑀸𑀬𑁄, 𑀧𑀤𑀓𑀸𑀬𑁄, 𑀦𑀺𑀭𑀼𑀢𑁆𑀢𑀺𑀓𑀸𑀬𑁄, 𑀩𑁆𑀬𑀜𑁆𑀚𑀦𑀓𑀸𑀬𑁄’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁩𑁯) 𑀯𑀼𑀢𑁆𑀢𑀁 𑀲𑀺𑀓𑁆𑀔𑀸𑀧𑀤𑀁 𑀪𑀕𑀯𑀢𑁄 𑀘 𑀯𑀘𑀦𑀁 𑀅𑀯𑀻𑀢𑀺𑀓𑁆𑀓𑀫𑀦𑁆𑀢𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀇𑀤𑀫𑁂𑀯 𑀘 ‘‘𑀲𑀺𑀓𑁆𑀔𑀦’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀢𑁆𑀣 𑀲𑀸𑀚𑀻𑀯𑀸𑀦𑀁 𑀅𑀯𑀻𑀢𑀺𑀓𑁆𑀓𑀫𑁄 𑀲𑀺𑀓𑁆𑀔𑀸𑀧𑀸𑀭𑀺𑀧𑀽𑀭𑀺𑀬𑀸 𑀧𑀘𑁆𑀘𑀬𑁄. 𑀢𑀢𑁄 𑀳𑀺 𑀬𑀸𑀯 𑀫𑀕𑁆𑀕𑀸 𑀲𑀺𑀓𑁆𑀔𑀸𑀧𑀸𑀭𑀺𑀧𑀽𑀭𑀻 𑀳𑁄𑀢𑀻𑀢𑀺.
𑀅𑀦𑀼𑀧𑁆𑀧𑀤𑀸𑀢𑀸𑀢𑀺 𑀅𑀦𑀼𑀩𑀮𑀧𑁆𑀧𑀤𑀸𑀢𑀸, 𑀅𑀦𑀼𑀯𑀢𑁆𑀢𑀦𑀯𑀲𑁂𑀦 𑀯𑀸 𑀧𑀤𑀸𑀢𑀸. 𑀓𑀲𑁆𑀲 𑀧𑀦 𑀅𑀦𑀼𑀯𑀢𑁆𑀢𑀦𑀁 𑀧𑀤𑀸𑀦𑀜𑁆𑀘𑀸𑀢𑀺? ‘‘𑀲𑀳𑀺𑀢𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀲𑀦𑁆𑀥𑀸𑀦𑀲𑁆𑀲𑀸𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀢𑁂𑀦𑀸𑀳 ‘‘𑀲𑀦𑁆𑀥𑀸𑀦𑀸𑀦𑀼𑀧𑁆𑀧𑀤𑀸𑀢𑀸’’𑀢𑀺. 𑀬𑀲𑁆𑀫𑀸 𑀧𑀦 𑀅𑀦𑀼𑀯𑀢𑁆𑀢𑀦𑀯𑀲𑁂𑀦 𑀲𑀦𑁆𑀥𑀸𑀦𑀲𑁆𑀲 𑀧𑀤𑀸𑀦𑀁 𑀆𑀥𑀸𑀦𑀁 𑀆𑀭𑀓𑁆𑀔𑀦𑀁 𑀯𑀸 𑀤𑀴𑁆𑀳𑀓𑀭𑀡𑀁 𑀳𑁄𑀢𑀺, 𑀢𑁂𑀦 𑀯𑀼𑀢𑁆𑀢𑀁 ‘‘𑀤𑁆𑀯𑁂 𑀚𑀦𑁂 𑀲𑀫𑀕𑁆𑀕𑁂 𑀤𑀺𑀲𑁆𑀯𑀸’’𑀢𑀺𑀆𑀤𑀺. 𑀆𑀭𑀫𑀦𑁆𑀢𑀺 𑀏𑀢𑁆𑀣𑀸𑀢𑀺 𑀆𑀭𑀸𑀫𑁄, 𑀭𑀫𑀺𑀢𑀩𑁆𑀩𑀝𑁆𑀞𑀸𑀦𑀁. 𑀬𑀲𑁆𑀫𑀸 𑀧𑀦 𑀆-𑀓𑀸𑀭𑁂𑀦 𑀯𑀺𑀦𑀸𑀧𑀺 𑀅𑀬𑀫𑀢𑁆𑀣𑁄 𑀮𑀩𑁆𑀪𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀲𑀫𑀕𑁆𑀕𑀭𑀸𑀫𑁄𑀢𑀺𑀧𑀺 𑀧𑀸𑀴𑀺, 𑀅𑀬𑀫𑁂𑀯𑀢𑁆𑀣𑁄’’𑀢𑀺.
𑀏𑀢𑁆𑀣𑀸𑀢𑀺 𑁋
‘‘𑀦𑁂𑀮𑀗𑁆𑀕𑁄 𑀲𑁂𑀢𑀧𑀘𑁆𑀙𑀸𑀤𑁄, 𑀏𑀓𑀸𑀭𑁄 𑀯𑀢𑁆𑀢𑀢𑀻 𑀭𑀣𑁄;
𑀅𑀦𑀻𑀖𑀁 𑀧𑀲𑁆𑀲 𑀆𑀬𑀦𑁆𑀢𑀁, 𑀙𑀺𑀦𑁆𑀦𑀲𑁄𑀢𑀁 𑀅𑀩𑀦𑁆𑀥𑀦’’𑀦𑁆𑀢𑀺. (𑀲𑀁. 𑀦𑀺. 𑁪.𑁩𑁪𑁭; 𑀉𑀤𑀸. 𑁬𑁫; 𑀧𑁂𑀝𑀓𑁄. 𑁨𑁫) 𑁋
𑀇𑀫𑀺𑀲𑁆𑀲𑀸 𑀕𑀸𑀣𑀸𑀬. 𑀲𑀻𑀮𑀜𑁆𑀳𑁂𑀢𑁆𑀣 𑀦𑁂𑀮𑀗𑁆𑀕𑀦𑁆𑀢𑀺 𑀯𑀼𑀢𑁆𑀢𑀁. 𑀢𑁂𑀦𑁂𑀯𑀸𑀳 𑁋 ‘‘𑀘𑀺𑀢𑁆𑀢𑁄 𑀕𑀳𑀧𑀢𑀺, 𑀦𑁂𑀮𑀗𑁆𑀕𑀦𑁆𑀢𑀺 𑀔𑁄, 𑀪𑀦𑁆𑀢𑁂, 𑀲𑀻𑀮𑀸𑀦𑀫𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺 (𑀲𑀁. 𑀦𑀺. 𑁪.𑁩𑁪𑁭). 𑀲𑀼𑀓𑀼𑀫𑀸𑀭𑀸𑀢𑀺 𑀅𑀧𑁆𑀨𑀭𑀼𑀲𑀢𑀸𑀬 𑀫𑀼𑀤𑀼𑀓𑀸. 𑀧𑀼𑀭𑀲𑁆𑀲 𑀏𑀲𑀸𑀢𑀺 𑀏𑀢𑁆𑀣 𑀧𑀼𑀭-𑀲𑀤𑁆𑀤𑁄 𑀢𑀦𑁆𑀦𑀺𑀯𑀸𑀲𑀺𑀯𑀸𑀘𑀓𑁄 𑀤𑀝𑁆𑀞𑀩𑁆𑀩𑁄 𑁋 ‘‘𑀕𑀸𑀫𑁄 𑀆𑀕𑀢𑁄’’𑀢𑀺𑀆𑀤𑀻𑀲𑀼 𑀯𑀺𑀬. 𑀢𑁂𑀦𑁂𑀯𑀸𑀳 ‘‘𑀦𑀕𑀭𑀯𑀸𑀲𑀻𑀦’’𑀦𑁆𑀢𑀺. 𑀫𑀦𑀁 𑀅𑀧𑁆𑀧𑀸𑀬𑀢𑀺 𑀯𑀟𑁆𑀠𑁂𑀢𑀻𑀢𑀺 𑀫𑀦𑀸𑀧𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀘𑀺𑀢𑁆𑀢𑀯𑀼𑀟𑁆𑀠𑀺𑀓𑀭𑀸’’𑀢𑀺.
𑀓𑀸𑀮𑀯𑀸𑀤𑀻𑀢𑀺𑀆𑀤𑀺 𑀲𑀫𑁆𑀨𑀧𑁆𑀧𑀮𑀸𑀧𑀸 𑀧𑀝𑀺𑀯𑀺𑀭𑀢𑀲𑁆𑀲 𑀧𑀝𑀺𑀧𑀢𑁆𑀢𑀺𑀤𑀲𑁆𑀲𑀦𑀁. 𑀅𑀢𑁆𑀣𑀲𑀁𑀳𑀺𑀢𑀸𑀧𑀺 𑀳𑀺 𑀯𑀸𑀘𑀸 𑀅𑀬𑀼𑀢𑁆𑀢𑀓𑀸𑀮𑀧𑁆𑀧𑀬𑁄𑀕𑁂𑀦 𑀅𑀢𑁆𑀣𑀸𑀯𑀳𑀸 𑀦 𑀲𑀺𑀬𑀸𑀢𑀺 𑀅𑀦𑀢𑁆𑀣𑀯𑀺𑀜𑁆𑀜𑀸𑀧𑀦𑀯𑀸𑀘𑀁 𑀅𑀦𑀼𑀮𑁄𑀫𑁂𑀢𑀺, 𑀢𑀲𑁆𑀫𑀸 𑀲𑀫𑁆𑀨𑀧𑁆𑀧𑀮𑀸𑀧𑀁 𑀧𑀚𑀳𑀦𑁆𑀢𑁂𑀦 𑀅𑀓𑀸𑀮𑀯𑀸𑀤𑀺𑀢𑀸 𑀧𑀭𑀺𑀳𑀭𑀺𑀢𑀩𑁆𑀩𑀸𑀢𑀺 𑀯𑀼𑀢𑁆𑀢𑀁 ‘‘𑀓𑀸𑀮𑀯𑀸𑀤𑀻’’𑀢𑀺. 𑀓𑀸𑀮𑁂𑀦 𑀯𑀤𑀦𑁆𑀢𑁂𑀦𑀧𑀺 𑀉𑀪𑀬𑀸𑀦𑀢𑁆𑀣𑀲𑀸𑀥𑀦𑀢𑁄 𑀅𑀪𑀽𑀢𑀁 𑀧𑀭𑀺𑀯𑀚𑁆𑀚𑁂𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀪𑀽𑀢𑀯𑀸𑀤𑀻’’𑀢𑀺. 𑀪𑀽𑀢𑀜𑁆𑀘 𑀯𑀤𑀦𑁆𑀢𑁂𑀦 𑀬𑀁 𑀇𑀥𑀮𑁄𑀓𑀧𑀭𑀮𑁄𑀓𑀳𑀺𑀢𑀲𑀫𑁆𑀧𑀸𑀤𑀓𑀁, 𑀢𑀤𑁂𑀯 𑀯𑀢𑁆𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀢𑁆𑀣𑀯𑀸𑀤𑀻’’𑀢𑀺 𑀯𑀼𑀢𑁆𑀢𑀁. 𑀅𑀢𑁆𑀣𑀁 𑀯𑀤𑀦𑁆𑀢𑁂𑀦𑀧𑀺 𑀮𑁄𑀓𑀺𑀬𑀥𑀫𑁆𑀫𑀲𑀦𑁆𑀦𑀺𑀲𑁆𑀲𑀺𑀢𑀫𑁂𑀯 𑀅𑀯𑀢𑁆𑀯𑀸 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀲𑀦𑁆𑀦𑀺𑀲𑁆𑀲𑀺𑀢𑀁 𑀓𑀢𑁆𑀯𑀸 𑀯𑀢𑁆𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀥𑀫𑁆𑀫𑀯𑀸𑀤𑀻’’𑀢𑀺 𑀯𑀼𑀢𑁆𑀢𑀁. 𑀬𑀣𑀸 𑀘 𑀅𑀢𑁆𑀣𑁄 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀲𑀦𑁆𑀦𑀺𑀲𑁆𑀲𑀺𑀢𑁄 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀯𑀺𑀦𑀬𑀯𑀸𑀤𑀻’’𑀢𑀺 𑀯𑀼𑀢𑁆𑀢𑀁. 𑀧𑀜𑁆𑀘𑀦𑁆𑀦𑀜𑁆𑀳𑀺 𑀲𑀁𑀯𑀭𑀯𑀺𑀦𑀬𑀸𑀦𑀁 𑀧𑀜𑁆𑀘𑀦𑁆𑀦𑀜𑁆𑀘 𑀧𑀳𑀸𑀦𑀯𑀺𑀦𑀬𑀸𑀦𑀁 𑀯𑀲𑁂𑀦 𑀯𑀼𑀘𑁆𑀘𑀫𑀸𑀦𑁄 𑀅𑀢𑁆𑀣𑁄 𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑀦𑀳𑁂𑀢𑀼𑀪𑀸𑀯𑀢𑁄 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀲𑀦𑁆𑀦𑀺𑀲𑁆𑀲𑀺𑀢𑁄 𑀳𑁄𑀢𑀻𑀢𑀺. 𑀏𑀯𑀁 𑀕𑀼𑀡𑀯𑀺𑀲𑁂𑀲𑀬𑀼𑀢𑁆𑀢𑁄𑀯 𑀅𑀢𑁆𑀣𑁄 𑀯𑀼𑀘𑁆𑀘𑀫𑀸𑀦𑁄 𑀤𑁂𑀲𑀦𑀸𑀓𑁄𑀲𑀮𑁆𑀮𑁂 𑀲𑀢𑀺 𑀲𑁄𑀪𑀢𑀺, 𑀓𑀺𑀘𑁆𑀘𑀓𑀭𑁄 𑀘 𑀳𑁄𑀢𑀺, 𑀦 𑀅𑀜𑁆𑀜𑀣𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀦𑀺𑀥𑀸𑀦𑀯𑀢𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸’’𑀢𑀺 𑀯𑀼𑀢𑁆𑀢𑀁. 𑀇𑀤𑀸𑀦𑀺 𑀢𑀁 𑀤𑁂𑀲𑀦𑀸𑀓𑁄𑀲𑀮𑁆𑀮𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀓𑀸𑀮𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀧𑀼𑀘𑁆𑀙𑀸𑀤𑀺𑀯𑀲𑁂𑀦 𑀳𑀺 𑀑𑀢𑀺𑀡𑁆𑀡𑀯𑀸𑀘𑀸𑀯𑀢𑁆𑀣𑀼𑀲𑁆𑀫𑀺𑀁 𑀏𑀓𑀁𑀲𑀸𑀤𑀺𑀩𑁆𑀬𑀸𑀓𑀭𑀡𑀯𑀺𑀪𑀸𑀕𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀞𑀧𑀦𑀸𑀳𑁂𑀢𑀽𑀤𑀸𑀳𑀭𑀡𑀲𑀦𑁆𑀤𑀲𑁆𑀲𑀦𑀸𑀤𑀺𑀁 𑀢𑀁𑀢𑀁𑀓𑀸𑀮𑀸𑀦𑀼𑀭𑀽𑀧𑀁 𑀯𑀺𑀪𑀸𑀯𑁂𑀦𑁆𑀢𑀺𑀬𑀸 𑀧𑀭𑀺𑀫𑀺𑀢𑀧𑀭𑀺𑀘𑁆𑀙𑀺𑀦𑁆𑀦𑀭𑀽𑀧𑀸𑀬 𑀯𑀺𑀧𑀼𑀮𑀢𑀭𑀕𑀫𑁆𑀪𑀻𑀭𑁄𑀤𑀸𑀭𑀧𑀭𑀫𑀢𑁆𑀣𑀯𑀺𑀢𑁆𑀣𑀸𑀭𑀲𑀗𑁆𑀕𑀸𑀳𑀺𑀓𑀸𑀬 𑀓𑀣𑀸𑀬 𑀜𑀸𑀡𑀩𑀮𑀸𑀦𑀼𑀭𑀽𑀧𑀁 𑀧𑀭𑁂 𑀬𑀸𑀣𑀸𑀯𑀢𑁄 𑀥𑀫𑁆𑀫𑁂 𑀧𑀢𑀺𑀝𑁆𑀞𑀸𑀧𑁂𑀦𑁆𑀢𑁄 ‘‘𑀤𑁂𑀲𑀦𑀸𑀓𑀼𑀲𑀮𑁄’’𑀢𑀺 𑀯𑀼𑀘𑁆𑀘𑀢𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.
𑀏𑀯𑀁 𑀧𑀝𑀺𑀧𑀸𑀝𑀺𑀬𑀸 𑀲𑀢𑁆𑀢 𑀫𑀽𑀮𑀲𑀺𑀓𑁆𑀔𑀸𑀧𑀤𑀸𑀦𑀺 𑀯𑀺𑀪𑀚𑀺𑀢𑁆𑀯𑀸 𑀅𑀪𑀺𑀚𑁆𑀛𑀸𑀤𑀺𑀧𑁆𑀧𑀳𑀸𑀦𑀁 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑁂𑀳𑀺 𑀯𑀺𑀪𑀸𑀯𑁂𑀢𑀼𑀁 𑀢𑀫𑁆𑀧𑀺 𑀦𑀻𑀳𑀭𑀺𑀢𑁆𑀯𑀸 𑀆𑀘𑀸𑀭𑀲𑀻𑀮𑀲𑁆𑀲𑁂𑀯 𑀯𑀺𑀪𑀚𑀦𑀯𑀲𑁂𑀦 𑀧𑀸𑀴𑀺 𑀧𑀯𑀢𑁆𑀢𑀸𑀢𑀺 𑀢𑀤𑀢𑁆𑀣𑀁 𑀯𑀺𑀯𑀭𑀺𑀢𑀼𑀁 ‘‘𑀩𑀻𑀚𑀕𑀸𑀫𑀪𑀽𑀢𑀕𑀸𑀫𑀲𑀫𑀸𑀭𑀫𑁆𑀪𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀩𑀻𑀚𑀸𑀦𑀁 𑀕𑀸𑀫𑁄 𑀲𑀫𑀽𑀳𑁄 𑀩𑀻𑀚𑀕𑀸𑀫𑁄. 𑀪𑀽𑀢𑀸𑀦𑀁 𑀚𑀸𑀢𑀸𑀦𑀁 𑀦𑀺𑀩𑁆𑀩𑀢𑁆𑀢𑀸𑀦𑀁 𑀭𑀼𑀓𑁆𑀔𑀕𑀘𑁆𑀙𑀮𑀢𑀸𑀤𑀻𑀦𑀁 𑀲𑀫𑀽𑀳𑁄 𑀪𑀽𑀢𑀕𑀸𑀫𑁄. 𑀦𑀦𑀼 𑀘 𑀭𑀼𑀓𑁆𑀔𑀸𑀤𑀬𑁄 𑀘𑀺𑀢𑁆𑀢𑀭𑀳𑀺𑀢𑀢𑀸𑀬 𑀦 𑀚𑀻𑀯𑀸, 𑀘𑀺𑀢𑁆𑀢𑀭𑀳𑀺𑀢𑀢𑀸 𑀘 𑀧𑀭𑀺𑀧𑁆𑀨𑀦𑁆𑀤𑀸𑀪𑀸𑀯𑀢𑁄 𑀙𑀺𑀦𑁆𑀦𑁂 𑀯𑀺𑀭𑀼𑀳𑀦𑀢𑁄 𑀯𑀺𑀲𑀤𑀺𑀲𑀚𑀸𑀢𑀺𑀪𑀸𑀯𑀢𑁄 𑀘𑀢𑀼𑀬𑁄𑀦𑀺𑀅𑀧𑀭𑀺𑀬𑀸𑀧𑀦𑁆𑀦𑀢𑁄 𑀘 𑀯𑁂𑀤𑀺𑀢𑀩𑁆𑀩𑀸, 𑀯𑀼𑀤𑁆𑀥𑀺 𑀧𑀦 𑀧𑀯𑀸𑀴𑀲𑀺𑀮𑀸𑀮𑀯𑀡𑀸𑀦𑀫𑁆𑀧𑀺 𑀯𑀺𑀚𑁆𑀚𑀢𑀻𑀢𑀺 𑀦 𑀢𑁂𑀲𑀁 𑀚𑀻𑀯𑀪𑀸𑀯𑁂 𑀓𑀸𑀭𑀡𑀁, 𑀯𑀺𑀲𑀬𑀕𑁆𑀕𑀳𑀡𑀜𑁆𑀘 𑀦𑁂𑀲𑀁 𑀧𑀭𑀺𑀓𑀧𑁆𑀧𑀦𑀸𑀫𑀢𑁆𑀢𑀁 𑀲𑀼𑀧𑀦𑀁 𑀯𑀺𑀬 𑀘𑀺𑀜𑁆𑀘𑀸𑀤𑀻𑀦𑀁, 𑀢𑀣𑀸 𑀤𑁄𑀳𑀴𑀸𑀤𑀬𑁄, 𑀅𑀣 𑀓𑀲𑁆𑀫𑀸 𑀩𑀻𑀚𑀕𑀸𑀫𑀪𑀽𑀢𑀕𑀸𑀫𑀲𑀫𑀸𑀭𑀫𑁆𑀪𑀸 𑀧𑀝𑀺𑀯𑀺𑀭𑀢𑀺 𑀇𑀘𑁆𑀙𑀺𑀢𑀸𑀢𑀺? 𑀲𑀫𑀡𑀲𑀸𑀭𑀼𑀧𑁆𑀧𑀢𑁄 𑀢𑀦𑁆𑀦𑀺𑀯𑀸𑀲𑀺𑀲𑀢𑁆𑀢𑀸𑀦𑀼𑀭𑀓𑁆𑀔𑀡𑀢𑁄 𑀘. 𑀢𑁂𑀦𑁂𑀯𑀸𑀳 𑁋 ‘‘𑀚𑀻𑀯𑀲𑀜𑁆𑀜𑀺𑀦𑁄 𑀳𑀺 𑀫𑁄𑀖𑀧𑀼𑀭𑀺𑀲 𑀫𑀦𑀼𑀲𑁆𑀲𑀸 𑀭𑀼𑀓𑁆𑀔𑀲𑁆𑀫𑀺’’𑀦𑁆𑀢𑀺𑀆𑀤𑀺 (𑀧𑀸𑀘𑀺. 𑁮𑁯).
𑀫𑀽𑀮𑀫𑁂𑀯 𑀩𑀻𑀚𑀁 𑀫𑀽𑀮𑀩𑀻𑀚𑀁, 𑀫𑀽𑀮𑀁 𑀩𑀻𑀚𑀁 𑀏𑀢𑀲𑁆𑀲𑀸𑀢𑀺𑀧𑀺 𑀫𑀽𑀮𑀩𑀻𑀚𑀁. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀨𑀴𑀼𑀩𑀻𑀚𑀦𑁆𑀢𑀺 𑀧𑀩𑁆𑀩𑀩𑀻𑀚𑀁. 𑀧𑀘𑁆𑀘𑀬𑀦𑁆𑀢𑀭𑀲𑀫𑀯𑀸𑀬𑁂 𑀲𑀤𑀺𑀲𑀨𑀮𑀼𑀧𑁆𑀧𑀢𑁆𑀢𑀺𑀬𑀸 𑀯𑀺𑀲𑁂𑀲𑀓𑀸𑀭𑀡𑀪𑀸𑀯𑀢𑁄 𑀯𑀺𑀭𑀼𑀳𑀦𑀲𑀫𑀢𑁆𑀣𑁂 𑀲𑀸𑀭𑀨𑀮𑁂 𑀦𑀺𑀭𑀼𑀴𑁆𑀳𑁄 𑀩𑀻𑀚-𑀲𑀤𑁆𑀤𑁄 𑀢𑀤𑀢𑁆𑀣𑀲𑀁𑀲𑀺𑀤𑁆𑀥𑀺𑀬𑀸 𑀫𑀽𑀮𑀸𑀤𑀻𑀲𑀼𑀧𑀺 𑀓𑁂𑀲𑀼𑀘𑀺 𑀧𑀯𑀢𑁆𑀢𑀢𑀻𑀢𑀺 𑀫𑀽𑀮𑀸𑀤𑀺𑀢𑁄 𑀦𑀺𑀯𑀢𑁆𑀢𑀦𑀢𑁆𑀣𑀁 𑀏𑀓𑁂𑀦 𑀩𑀻𑀚-𑀲𑀤𑁆𑀤𑁂𑀦 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀩𑀻𑀚𑀩𑀻𑀚’’𑀦𑁆𑀢𑀺 ‘‘𑀭𑀽𑀧𑀭𑀽𑀧𑀁, 𑀤𑀼𑀓𑁆𑀔𑀤𑀼𑀓𑁆𑀔’’𑀦𑁆𑀢𑀺 (𑀲𑀁. 𑀦𑀺. 𑁪.𑁩𑁨𑁭) 𑀘 𑀬𑀣𑀸. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀩𑀻𑀚𑀕𑀸𑀫𑀪𑀽𑀢𑀕𑀸𑀫𑀁 𑀉𑀤𑁆𑀥𑀭𑀺𑀢𑁆𑀯𑀸 𑀩𑀻𑀚𑀕𑀸𑀫𑁄 𑀏𑀯 𑀦𑀺𑀤𑁆𑀤𑀺𑀝𑁆𑀞𑁄𑀢𑀺? 𑀦 𑀔𑁄 𑀧𑀦𑁂𑀢𑀁 𑀏𑀯𑀁 𑀤𑀝𑁆𑀞𑀩𑁆𑀩𑀁, 𑀦𑀦𑀼 𑀅𑀯𑁄𑀘𑀼𑀫𑁆𑀳𑀸 ‘‘𑀫𑀽𑀮𑀫𑁂𑀯 𑀩𑀻𑀚𑀁 𑀫𑀽𑀮𑀩𑀻𑀚𑀁, 𑀫𑀽𑀮𑀁 𑀩𑀻𑀚𑀁 𑀏𑀢𑀲𑁆𑀲𑀸𑀢𑀺𑀧𑀺 𑀫𑀽𑀮𑀩𑀻𑀚’’𑀦𑁆𑀢𑀺. 𑀢𑀢𑁆𑀣 𑀧𑀼𑀭𑀺𑀫𑁂𑀦 𑀩𑀻𑀚𑀕𑀸𑀫𑁄 𑀦𑀺𑀤𑁆𑀤𑀺𑀝𑁆𑀞𑁄, 𑀤𑀼𑀢𑀺𑀬𑁂𑀦 𑀪𑀽𑀢𑀕𑀸𑀫𑁄. 𑀤𑀼𑀯𑀺𑀥𑁄𑀧𑁂𑀲 𑀫𑀽𑀮𑀩𑀻𑀚𑀜𑁆𑀘 𑀫𑀽𑀮𑀩𑀻𑀚𑀜𑁆𑀘 𑀫𑀽𑀮𑀩𑀻𑀚𑀦𑁆𑀢𑀺 𑀲𑀸𑀫𑀜𑁆𑀜𑀦𑀺𑀤𑁆𑀤𑁂𑀲𑁂𑀦, 𑀏𑀓𑀲𑁂𑀲𑀦𑀬𑁂𑀦 𑀯𑀸 𑀉𑀤𑁆𑀤𑀺𑀝𑁆𑀞𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀦𑁂𑀯𑀸𑀳 ‘‘𑀧𑀜𑁆𑀘𑀯𑀺𑀥𑀲𑁆𑀲𑀸’’𑀢𑀺𑀆𑀤𑀺. 𑀦𑀻𑀮𑀢𑀺𑀡𑀭𑀼𑀓𑁆𑀔𑀸𑀤𑀺𑀓𑀲𑁆𑀲𑀸𑀢𑀺 𑀅𑀮𑁆𑀮𑀢𑀺𑀡𑀲𑁆𑀲 𑀘𑁂𑀯 𑀅𑀮𑁆𑀮𑀭𑀼𑀓𑁆𑀔𑀸𑀤𑀺𑀓𑀲𑁆𑀲 𑀘. 𑀆𑀤𑀺-𑀲𑀤𑁆𑀤𑁂𑀦 𑀑𑀲𑀥𑀺𑀕𑀘𑁆𑀙𑀮𑀢𑀸𑀤𑀻𑀦𑀁 𑀲𑀗𑁆𑀕𑀳𑁄.
𑀏𑀓𑀁 𑀪𑀢𑁆𑀢𑀁 𑀏𑀓𑀪𑀢𑁆𑀢𑀁, 𑀢𑀁 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀏𑀓𑀪𑀢𑁆𑀢𑀺𑀓𑁄. 𑀲𑁄 𑀧𑀦 𑀭𑀢𑁆𑀢𑀺𑀪𑁄𑀚𑀦𑁂𑀦𑀧𑀺 𑀲𑀺𑀬𑀸𑀢𑀺 𑀢𑀦𑁆𑀦𑀺𑀯𑀢𑁆𑀢𑀦𑀢𑁆𑀣𑀁 𑀆𑀳 ‘‘𑀭𑀢𑁆𑀢𑀽𑀧𑀭𑀢𑁄’’𑀢𑀺. 𑀏𑀯𑀫𑁆𑀧𑀺 𑀅𑀧𑀭𑀡𑁆𑀳𑀪𑁄𑀚𑀻𑀧𑀺 𑀲𑀺𑀬𑀸 𑀏𑀓𑀪𑀢𑁆𑀢𑀺𑀓𑁄𑀢𑀺 𑀢𑀦𑁆𑀦𑀺𑀯𑀢𑁆𑀢𑀦𑀢𑁆𑀣𑀁 ‘‘𑀯𑀺𑀭𑀢𑁄 𑀯𑀺𑀓𑀸𑀮𑀪𑁄𑀚𑀦𑀸’’𑀢𑀺 𑀯𑀼𑀢𑁆𑀢𑀁. 𑀅𑀭𑀼𑀡𑀼𑀕𑁆𑀕𑀫𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀫𑀚𑁆𑀛𑀦𑁆𑀳𑀺𑀓𑀸 𑀅𑀬𑀁 𑀩𑀼𑀤𑁆𑀥𑀸𑀤𑀻𑀦𑀁 𑀅𑀭𑀺𑀬𑀸𑀦𑀁 𑀆𑀘𑀺𑀡𑁆𑀡𑀲𑀫𑀸𑀘𑀺𑀡𑁆𑀡𑁄 𑀪𑁄𑀚𑀦𑀲𑁆𑀲 𑀓𑀸𑀮𑁄 𑀦𑀸𑀫, 𑀢𑀤𑀜𑁆𑀜𑁄 𑀯𑀺𑀓𑀸𑀮𑁄. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀤𑀼𑀢𑀺𑀬𑀧𑀤𑁂𑀦 𑀭𑀢𑁆𑀢𑀺𑀪𑁄𑀚𑀦𑀲𑁆𑀲 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸 ‘‘𑀅𑀢𑀺𑀓𑁆𑀓𑀦𑁆𑀢𑁂 𑀫𑀚𑁆𑀛𑀦𑁆𑀳𑀺𑀓𑁂 𑀬𑀸𑀯 𑀲𑀽𑀭𑀺𑀬𑀢𑁆𑀣𑀗𑁆𑀕𑀫𑀦𑀸 𑀪𑁄𑀚𑀦𑀁 𑀯𑀺𑀓𑀸𑀮𑀪𑁄𑀚𑀦𑀁 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀁.
𑀤𑀸𑀭𑀼𑀫𑀸𑀲𑀓𑁄𑀢𑀺 𑀬𑁂 𑀯𑁄𑀳𑀸𑀭𑀁 𑀕𑀘𑁆𑀙𑀦𑁆𑀢𑀻𑀢𑀺 𑀇𑀢𑀺-𑀲𑀤𑁆𑀤𑁂𑀦 𑀏𑀯𑀁𑀧𑀓𑀸𑀭𑁂 𑀤𑀲𑁆𑀲𑁂𑀢𑀺. 𑀅𑀜𑁆𑀜𑁂𑀳𑀺 𑀕𑀸𑀳𑀸𑀧𑀦𑁂 𑀉𑀧𑀦𑀺𑀓𑁆𑀔𑀺𑀢𑁆𑀢𑀲𑀸𑀤𑀺𑀬𑀦𑁂 𑀘 𑀧𑀝𑀺𑀕𑁆𑀕𑀳𑀡𑀢𑁆𑀣𑁄 𑀮𑀩𑁆𑀪𑀢𑀻𑀢𑀺 ‘‘𑀦𑁂𑀯 𑀢𑀁 𑀉𑀕𑁆𑀕𑀡𑁆𑀳𑀸𑀢𑀺, 𑀦 𑀉𑀕𑁆𑀕𑀳𑀸𑀧𑁂𑀢𑀺, 𑀦 𑀉𑀧𑀦𑀺𑀓𑁆𑀔𑀺𑀢𑁆𑀢𑀁 𑀲𑀸𑀤𑀺𑀬𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀣 𑀯𑀸 𑀢𑀺𑀯𑀺𑀥𑀁 𑀧𑀝𑀺𑀕𑁆𑀕𑀳𑀡𑀁 𑀓𑀸𑀬𑁂𑀦, 𑀯𑀸𑀘𑀸𑀬, 𑀫𑀦𑀲𑀸𑀢𑀺. 𑀢𑀢𑁆𑀣 𑀓𑀸𑀬𑁂𑀦 𑀧𑀝𑀺𑀕𑁆𑀕𑀳𑀡𑀁 𑀉𑀕𑁆𑀕𑀡𑁆𑀳𑀦𑀁, 𑀯𑀸𑀘𑀸𑀬 𑀧𑀝𑀺𑀕𑁆𑀕𑀳𑀡𑀁 𑀉𑀕𑁆𑀕𑀳𑀸𑀧𑀦𑀁, 𑀫𑀦𑀲𑀸 𑀧𑀝𑀺𑀕𑁆𑀕𑀳𑀡𑀁 𑀲𑀸𑀤𑀺𑀬𑀦𑀦𑁆𑀢𑀺 𑀢𑀺𑀯𑀺𑀥𑀫𑁆𑀧𑀺 𑀧𑀝𑀺𑀕𑁆𑀕𑀳𑀡𑀁 𑀏𑀓𑀚𑁆𑀛𑀁 𑀕𑀳𑁂𑀢𑁆𑀯𑀸 𑀧𑀝𑀺𑀕𑁆𑀕𑀳𑀡𑀸𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀦𑁂𑀯 𑀢𑀁 𑀉𑀕𑁆𑀕𑀡𑁆𑀳𑀸𑀢𑀻’’𑀢𑀺𑀆𑀤𑀺. 𑀏𑀲 𑀦𑀬𑁄 𑀆𑀫𑀓𑀥𑀜𑁆𑀜𑀧𑀝𑀺𑀕𑁆𑀕𑀳𑀡𑀸𑀢𑀺𑀆𑀤𑀻𑀲𑀼𑀧𑀺. 𑀦𑀻𑀯𑀸𑀭𑀸𑀤𑀺𑀉𑀧𑀥𑀜𑁆𑀜𑀲𑁆𑀲 𑀲𑀸𑀮𑀺𑀆𑀤𑀺𑀫𑀽𑀮𑀥𑀜𑁆𑀜𑀦𑁆𑀢𑁄𑀕𑀥𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀲𑀢𑁆𑀢𑀯𑀺𑀥𑀲𑁆𑀲𑀸’’𑀢𑀺. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀯𑀲𑀸𑀦𑀺 𑀪𑁂𑀲𑀚𑁆𑀚𑀸𑀦𑀺 𑀅𑀘𑁆𑀙𑀯𑀲𑀁, 𑀫𑀘𑁆𑀙𑀯𑀲𑀁, 𑀲𑀼𑀲𑀼𑀓𑀸𑀯𑀲𑀁, 𑀲𑀽𑀓𑀭𑀯𑀲𑀁, 𑀕𑀤𑁆𑀭𑀪𑀯𑀲’’𑀦𑁆𑀢𑀺 (𑀫𑀳𑀸𑀯. 𑁨𑁬𑁨) 𑀯𑀼𑀢𑁆𑀢𑀢𑁆𑀢𑀸 𑀇𑀤𑀁 𑀑𑀤𑀺𑀲𑁆𑀲 𑀅𑀦𑀼𑀜𑁆𑀜𑀸𑀢𑀁 𑀦𑀸𑀫. 𑀢𑀲𑁆𑀲 𑀧𑀦 ‘‘𑀓𑀸𑀮𑁂 𑀧𑀝𑀺𑀕𑁆𑀕𑀳𑀺𑀢’’𑀦𑁆𑀢𑀺 (𑀫𑀳𑀸𑀯. 𑁨𑁬𑁨) 𑀯𑀼𑀢𑁆𑀢𑀢𑁆𑀢𑀸 𑀧𑀝𑀺𑀕𑁆𑀕𑀳𑀡𑀁 𑀯𑀝𑁆𑀝𑀢𑀺 𑀲𑀢𑀺 𑀧𑀘𑁆𑀘𑀬𑁂𑀢𑀺 𑀆𑀳 ‘‘𑀅𑀜𑁆𑀜𑀢𑁆𑀭 𑀑𑀤𑀺𑀲𑁆𑀲 𑀅𑀦𑀼𑀜𑁆𑀜𑀸𑀢𑀸’’𑀢𑀺.
𑀲𑀸𑀭𑀼𑀧𑁆𑀧𑁂𑀦 𑀯𑀜𑁆𑀘𑀦𑀁 𑀭𑀽𑀧𑀓𑀽𑀝𑀁, 𑀧𑀢𑀺𑀭𑀽𑀧𑁂𑀦 𑀯𑀜𑁆𑀘𑀦𑀸𑀢𑀺 𑀅𑀢𑁆𑀣𑁄. 𑀅𑀗𑁆𑀕𑁂𑀦 𑀅𑀢𑁆𑀢𑀦𑁄 𑀲𑀭𑀻𑀭𑀸𑀯𑀬𑀯𑁂𑀦 𑀯𑀜𑁆𑀘𑀦𑀁 𑀅𑀗𑁆𑀕𑀓𑀽𑀝𑀁. 𑀕𑀡𑁆𑀳𑀦𑀯𑀲𑁂𑀦 𑀯𑀜𑁆𑀘𑀦𑀁 𑀕𑀳𑀡𑀓𑀽𑀝𑀁. 𑀧𑀝𑀺𑀘𑁆𑀙𑀦𑁆𑀦𑀁 𑀓𑀢𑁆𑀯𑀸 𑀯𑀜𑁆𑀘𑀦𑀁 𑀧𑀝𑀺𑀘𑁆𑀙𑀦𑁆𑀦𑀓𑀽𑀝𑀁. 𑀅𑀓𑁆𑀓𑀫𑀢𑀻𑀢𑀺 𑀦𑀺𑀧𑁆𑀧𑀻𑀴𑁂𑀢𑀺, 𑀧𑀼𑀩𑁆𑀩𑀪𑀸𑀕𑁂 𑀅𑀓𑁆𑀓𑀫𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀳𑀤𑀬𑀦𑁆𑀢𑀺 𑀦𑀸𑀴𑀺𑀆𑀤𑀺𑀫𑀸𑀦𑀪𑀸𑀚𑀦𑀸𑀦𑀁 𑀅𑀩𑁆𑀪𑀦𑁆𑀢𑀭𑀁. 𑀢𑁂𑀮𑀸𑀤𑀻𑀦𑀁 𑀦𑀸𑀴𑀺𑀆𑀤𑀻𑀳𑀺 𑀫𑀺𑀦𑀦𑀓𑀸𑀮𑁂 𑀉𑀲𑁆𑀲𑀸𑀧𑀺𑀢𑀸 𑀲𑀺𑀔𑀸𑀬𑁂𑀯 𑀲𑀺𑀔𑀸𑀪𑁂𑀤𑁄, 𑀢𑀲𑁆𑀲𑀸 𑀳𑀸𑀧𑀦𑀁. 𑀓𑁂𑀘𑀻𑀢𑀺 𑀲𑀸𑀭𑀲𑀫𑀸𑀲𑀸𑀘𑀭𑀺𑀬𑀸 𑀉𑀢𑁆𑀢𑀭𑀯𑀺𑀳𑀸𑀭𑀯𑀸𑀲𑀺𑀦𑁄 𑀘.
𑀯𑀥𑁄𑀢𑀺 𑀫𑀼𑀝𑁆𑀞𑀺𑀧𑁆𑀧𑀳𑀸𑀭𑀓𑀲𑀸𑀢𑀸𑀴𑀦𑀸𑀤𑀻𑀳𑀺 𑀳𑀺𑀁𑀲𑀦𑀁, 𑀯𑀺𑀳𑁂𑀞𑀦𑀦𑁆𑀢𑀺 𑀅𑀢𑁆𑀣𑁄. 𑀯𑀺𑀳𑁂𑀞𑀦𑀢𑁆𑀣𑁄𑀧𑀺 𑀳𑀺 𑀯𑀥-𑀲𑀤𑁆𑀤𑁄 𑀤𑀺𑀲𑁆𑀲𑀢𑀺 ‘‘𑀅𑀢𑁆𑀢𑀸𑀦𑀁 𑀯𑀥𑀺𑀢𑁆𑀯𑀸 𑀯𑀥𑀺𑀢𑁆𑀯𑀸 𑀭𑁄𑀤𑀢𑀻’’𑀢𑀺𑀆𑀤𑀻𑀲𑀼. 𑀬𑀣𑀸 𑀳𑀺 𑀅𑀧𑀝𑀺𑀕𑁆𑀕𑀳𑀪𑀸𑀯𑀲𑀸𑀫𑀜𑁆𑀜𑁂 𑀲𑀢𑀺𑀧𑀺 𑀧𑀩𑁆𑀩𑀚𑀺𑀢𑁂𑀳𑀺 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀩𑁆𑀩𑀯𑀢𑁆𑀣𑀼𑀯𑀺𑀲𑁂𑀲𑀪𑀸𑀯𑀲𑀦𑁆𑀤𑀲𑁆𑀲𑀦𑀢𑁆𑀣𑀁 𑀇𑀢𑁆𑀣𑀺𑀓𑀼𑀫𑀸𑀭𑀺𑀤𑀸𑀲𑀺𑀤𑀸𑀲𑀸𑀤𑀬𑁄 𑀯𑀺𑀪𑀸𑀕𑁂𑀦 𑀯𑀼𑀢𑁆𑀢𑀸, 𑀏𑀯𑀁 𑀧𑀭𑀲𑁆𑀲𑀳𑀭𑀡𑀪𑀸𑀯𑀢𑁄 𑀅𑀤𑀺𑀦𑁆𑀦𑀸𑀤𑀸𑀦𑀪𑀸𑀯𑀲𑀸𑀫𑀜𑁆𑀜𑁂 𑀲𑀢𑀺𑀧𑀺 𑀢𑀼𑀮𑀸𑀓𑀽𑀝𑀸𑀤𑀬𑁄 𑀅𑀤𑀺𑀦𑁆𑀦𑀸𑀤𑀸𑀦𑀯𑀺𑀲𑁂𑀲𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀯𑀺𑀪𑀸𑀕𑁂𑀦 𑀯𑀼𑀢𑁆𑀢𑀸. 𑀦 𑀏𑀯𑀁 𑀧𑀸𑀡𑀸𑀢𑀺𑀧𑀸𑀢𑀧𑀭𑀺𑀬𑀸𑀬𑀲𑁆𑀲 𑀯𑀥𑀲𑁆𑀲 𑀧𑀼𑀦 𑀕𑀳𑀡𑁂 𑀧𑀬𑁄𑀚𑀦𑀁 𑀅𑀢𑁆𑀣𑀺, 𑀢𑀢𑁆𑀣 𑀲𑀬𑀁𑀓𑀸𑀭𑁄, 𑀇𑀥 𑀧𑀭𑀁𑀓𑀸𑀭𑁄𑀢𑀺 𑀘 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁 ‘‘𑀓𑀸𑀬𑀯𑀘𑀺𑀧𑁆𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀺𑀓𑀸 𑀘𑁂𑀢𑀦𑀸 𑀙𑀧𑁆𑀧𑀬𑁄𑀕𑀸’’𑀢𑀺 (𑀤𑀻. 𑀦𑀺. 𑀝𑀻. 𑁧.𑁧𑁦) 𑀯𑀘𑀦𑀢𑁄, 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑁄 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀬𑀼𑀢𑁆𑀢𑁄. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀯𑀥𑁄𑀢𑀺 𑀫𑀸𑀭𑀡’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀫𑁆𑀧𑀺 𑀧𑁄𑀣𑀦𑀫𑁂𑀯 𑀲𑀦𑁆𑀥𑀸𑀬𑀸𑀢𑀺 𑀘 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁 𑀫𑀸𑀭𑀡𑀲𑀤𑁆𑀤𑀲𑁆𑀲 𑀯𑀺𑀳𑀺𑀁𑀲𑀦𑁂𑀧𑀺 𑀤𑀺𑀲𑁆𑀲𑀦𑀢𑁄.
𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀸𑀦𑀁 𑀬𑀣𑀸𑀓𑁆𑀓𑀫𑀁 𑀓𑀸𑀬𑀓𑀼𑀘𑁆𑀙𑀺𑀧𑀭𑀺𑀳𑀭𑀡𑀫𑀢𑁆𑀢𑀚𑁄𑀢𑀦𑀸𑀬𑀁 𑀅𑀯𑀺𑀲𑁂𑀲𑀢𑁄 𑀅𑀝𑁆𑀞𑀦𑁆𑀦𑀁 𑀧𑀭𑀺𑀓𑁆𑀔𑀸𑀭𑀸𑀦𑀁 𑀢𑀧𑁆𑀧𑀬𑁄𑀚𑀦𑀢𑀸 𑀲𑀫𑁆𑀪𑀯𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑁂 𑀲𑀩𑁆𑀩𑁂𑀧𑀻’’𑀢𑀺𑀆𑀤𑀺𑀫𑀸𑀳. 𑀏𑀢𑁂𑀧𑀻𑀢𑀺 𑀦𑀯𑀧𑀭𑀺𑀓𑁆𑀔𑀸𑀭𑀺𑀓𑀸𑀤𑀬𑁄𑀧𑀺 𑀅𑀧𑁆𑀧𑀺𑀘𑁆𑀙𑀸 𑀘 𑀲𑀦𑁆𑀢𑀼𑀝𑁆𑀞𑀸 𑀘. 𑀦 𑀳𑀺 𑀢𑀢𑁆𑀢𑀓𑁂𑀦 𑀫𑀳𑀺𑀘𑁆𑀙𑀢𑀸 𑀅𑀲𑀦𑁆𑀢𑀼𑀝𑁆𑀞𑀺𑀢𑀸 𑀳𑁄𑀢𑀻𑀢𑀺.
𑀘𑀢𑀽𑀲𑀼 𑀤𑀺𑀲𑀸𑀲𑀼 𑀲𑀼𑀔𑀁 𑀯𑀺𑀳𑀭𑀢𑀺, 𑀢𑀢𑁄 𑀏𑀯 𑀲𑀼𑀔𑀯𑀺𑀳𑀸𑀭𑀝𑁆𑀞𑀸𑀦𑀪𑀽𑀢𑀸 𑀘𑀢𑀲𑁆𑀲𑁄 𑀤𑀺𑀲𑀸 𑀅𑀲𑁆𑀲 𑀲𑀦𑁆𑀢𑀻𑀢𑀺 𑀘𑀸𑀢𑀼𑀤𑁆𑀤𑀺𑀲𑁄. 𑀢𑀢𑁆𑀣 𑀘𑀸𑀬𑀁 𑀲𑀢𑁆𑀢𑁂 𑀯𑀸 𑀲𑀗𑁆𑀔𑀸𑀭𑁂 𑀯𑀸 𑀪𑀬𑁂𑀦 𑀦𑀧𑁆𑀧𑀝𑀺𑀳𑀜𑁆𑀜𑀢𑀻𑀢𑀺 𑀅𑀧𑁆𑀧𑀝𑀺𑀖𑁄. 𑀤𑁆𑀯𑀸𑀤𑀲𑀯𑀺𑀥𑀲𑁆𑀲 𑀲𑀦𑁆𑀢𑁄𑀲𑀲𑁆𑀲 𑀯𑀲𑁂𑀦 𑀲𑀦𑁆𑀢𑀼𑀲𑁆𑀲𑀦𑀢𑁄 𑀲𑀦𑁆𑀢𑀼𑀲𑁆𑀲𑀫𑀸𑀦𑁄. 𑀇𑀢𑀭𑀻𑀢𑀭𑁂𑀦𑀸𑀢𑀺 𑀉𑀘𑁆𑀘𑀸𑀯𑀘𑁂𑀦 𑀧𑀭𑀺𑀲𑁆𑀲𑀬𑀸𑀦𑀁 𑀩𑀸𑀳𑀺𑀭𑀸𑀦𑀁 𑀲𑀻𑀳𑀩𑁆𑀬𑀕𑁆𑀖𑀸𑀤𑀻𑀦𑀁, 𑀅𑀩𑁆𑀪𑀦𑁆𑀢𑀭𑀸𑀦𑀜𑁆𑀘 𑀓𑀸𑀫𑀘𑁆𑀙𑀦𑁆𑀤𑀸𑀤𑀻𑀦𑀁 𑀓𑀸𑀬𑀘𑀺𑀢𑁆𑀢𑀽𑀧𑀤𑁆𑀤𑀯𑀸𑀦𑀁 𑀅𑀪𑀺𑀪𑀯𑀦𑀢𑁄 𑀧𑀭𑀺𑀲𑁆𑀲𑀬𑀸𑀦𑀁 𑀲𑀳𑀺𑀢𑀸. 𑀩𑀦𑁆𑀥𑀦𑀪𑀸𑀯𑀓𑀭𑀪𑀬𑀸𑀪𑀸𑀯𑁂𑀦 𑀅𑀘𑁆𑀙𑀫𑁆𑀪𑀺. 𑀏𑀓𑁄 𑀅𑀲𑀳𑀸𑀬𑁄. 𑀢𑀢𑁄 𑀏𑀯 𑀔𑀕𑁆𑀕𑀫𑀺𑀕𑀲𑀺𑀗𑁆𑀕𑀲𑀤𑀺𑀲𑀢𑀸𑀬 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄 𑀘𑀭𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.
𑀙𑀺𑀦𑁆𑀦𑀧𑀓𑁆𑀔𑁄, 𑀅𑀲𑀜𑁆𑀚𑀸𑀢𑀧𑀓𑁆𑀔𑁄 𑀯𑀸 𑀲𑀓𑀼𑀡𑁄 𑀕𑀦𑁆𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀧𑀓𑁆𑀔𑀺-𑀲𑀤𑁆𑀤𑁂𑀦 𑀯𑀺𑀲𑁂𑀲𑁂𑀢𑁆𑀯𑀸 𑀲𑀓𑀼𑀡𑁄 𑀧𑀸𑀴𑀺𑀬𑀁 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀧𑀓𑁆𑀔𑀬𑀼𑀢𑁆𑀢𑁄 𑀲𑀓𑀼𑀡𑁄’’𑀢𑀺. 𑀬𑀲𑁆𑀲 𑀲𑀦𑁆𑀦𑀺𑀥𑀺𑀓𑀸𑀭𑀧𑀭𑀺𑀪𑁄𑀕𑁄 𑀓𑀺𑀜𑁆𑀘𑀺 𑀞𑀧𑁂𑀢𑀩𑁆𑀩𑀁 𑀲𑀸𑀧𑁂𑀓𑁆𑀔𑀸𑀞𑀧𑀦𑀜𑁆𑀘 𑀦𑀢𑁆𑀣𑀺, 𑀢𑀸𑀤𑀺𑀲𑁄 𑀅𑀬𑀁 𑀪𑀺𑀓𑁆𑀔𑀽𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄’’𑀢𑀺𑀆𑀤𑀺𑀫𑀸𑀳. 𑀅𑀭𑀺𑀬𑀦𑁆𑀢𑀺 𑀅𑀧𑁂𑀦𑁆𑀢𑀺 𑀢𑀢𑁄 𑀤𑁄𑀲𑀸, 𑀢𑁂𑀳𑀺 𑀯𑀸 𑀆𑀭𑀓𑀸𑀢𑀺 𑀅𑀭𑀺𑀬𑁄𑀢𑀺 𑀆𑀳 ‘‘𑀅𑀭𑀺𑀬𑁂𑀦𑀸𑀢𑀺 𑀦𑀺𑀤𑁆𑀤𑁄𑀲𑁂𑀦𑀸’’𑀢𑀺. 𑀅𑀚𑁆𑀛𑀢𑁆𑀢𑀦𑁆𑀢𑀺 𑀅𑀢𑁆𑀢𑀦𑀺. 𑀦𑀺𑀤𑁆𑀤𑁄𑀲𑀲𑀼𑀔𑀦𑁆𑀢𑀺 𑀦𑀺𑀭𑀸𑀫𑀺𑀲𑀲𑀼𑀔𑀁 𑀓𑀺𑀮𑁂𑀲𑀯𑀚𑁆𑀚𑀭𑀳𑀺𑀢𑀢𑁆𑀢𑀸.
𑀬𑀣𑀸𑀯𑀼𑀢𑁆𑀢𑁂 𑀲𑀻𑀮𑀲𑀁𑀯𑀭𑁂 𑀧𑀢𑀺𑀝𑁆𑀞𑀺𑀢𑀲𑁆𑀲𑁂𑀯 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄 𑀇𑀘𑁆𑀙𑀺𑀢𑀩𑁆𑀩𑁄 𑀢𑀤𑀥𑀺𑀝𑁆𑀞𑀸𑀦𑀢𑁄 𑀢𑀲𑁆𑀲 𑀘 𑀧𑀭𑀺𑀧𑀸𑀮𑀓𑀪𑀸𑀯𑀢𑁄𑀢𑀺 𑀯𑀼𑀢𑁆𑀢𑀁 ‘‘𑀲𑁄 𑀇𑀫𑀺𑀦𑀸 𑀅𑀭𑀺𑀬𑁂𑀦 𑀲𑀻𑀮𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀽’’𑀢𑀺. 𑀲𑁂𑀲𑀧𑀤𑁂𑀲𑀽𑀢𑀺 ‘‘𑀦 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻 𑀳𑁄𑀢𑀻’’𑀢𑀺𑀆𑀤𑀺𑀧𑀤𑁂𑀲𑀼. 𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀦 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻𑀢𑀺 𑀇𑀢𑁆𑀣𑀺𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑀁 𑀯𑀸 𑀲𑀼𑀪𑀦𑀺𑀫𑀺𑀢𑁆𑀢𑀸𑀤𑀺𑀓𑀁 𑀯𑀸 𑀓𑀺𑀮𑁂𑀲𑀯𑀢𑁆𑀣𑀼𑀪𑀽𑀢𑀁 𑀦𑀺𑀫𑀺𑀢𑁆𑀢𑀁 𑀦 𑀕𑀡𑁆𑀳𑀸𑀢𑀺, 𑀤𑀺𑀝𑁆𑀞𑀫𑀢𑁆𑀢𑁂𑀬𑁂𑀯 𑀲𑀡𑁆𑀞𑀸𑀢𑀺. 𑀦𑀸𑀦𑀼𑀩𑁆𑀬𑀜𑁆𑀚𑀦𑀕𑁆𑀕𑀸𑀳𑀻𑀢𑀺 𑀓𑀺𑀮𑁂𑀲𑀸𑀦𑀁 𑀅𑀦𑀼 𑀅𑀦𑀼 𑀩𑁆𑀬𑀜𑁆𑀚𑀦𑀢𑁄 𑀧𑀸𑀓𑀝𑀪𑀸𑀯𑀓𑀭𑀡𑀢𑁄 𑀅𑀦𑀼𑀩𑁆𑀬𑀜𑁆𑀚𑀦𑀦𑁆𑀢𑀺𑀮𑀤𑁆𑀥𑀯𑁄𑀳𑀸𑀭𑀁 𑀳𑀢𑁆𑀣𑀧𑀸𑀤𑀲𑀺𑀢𑀳𑀲𑀺𑀢𑀓𑀣𑀺𑀢𑀯𑀺𑀮𑁄𑀓𑀺𑀢𑀸𑀤𑀺𑀪𑁂𑀤𑀁 𑀆𑀓𑀸𑀭𑀁 𑀦 𑀕𑀡𑁆𑀳𑀸𑀢𑀺. 𑀬𑀁 𑀢𑀢𑁆𑀣 𑀪𑀽𑀢𑀁, 𑀢𑀤𑁂𑀯 𑀕𑀡𑁆𑀳𑀸𑀢𑀺. 𑀬𑀢𑁆𑀯𑀸𑀥𑀺𑀓𑀭𑀡𑀫𑁂𑀦𑀦𑁆𑀢𑀺𑀆𑀤𑀺𑀫𑁆𑀳𑀺 𑀬𑀁𑀓𑀸𑀭𑀡𑀸 𑀬𑀲𑁆𑀲 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀲𑀁𑀯𑀭𑀲𑁆𑀲 𑀳𑁂𑀢𑀼 𑀏𑀢𑀁 𑀧𑀼𑀕𑁆𑀕𑀮𑀁 𑀲𑀢𑀺𑀓𑀯𑀸𑀝𑁂𑀦 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀅𑀲𑀁𑀯𑀼𑀢𑀁 𑀅𑀧𑀺𑀳𑀺𑀢𑀘𑀓𑁆𑀔𑀼𑀤𑁆𑀯𑀸𑀭𑀁 𑀳𑀼𑀢𑁆𑀯𑀸 𑀯𑀺𑀳𑀭𑀦𑁆𑀢𑀁 𑀏𑀢𑁂 𑀅𑀪𑀺𑀚𑁆𑀛𑀸𑀤𑀬𑁄 𑀥𑀫𑁆𑀫𑀸 𑀅𑀦𑁆𑀯𑀲𑁆𑀲𑀯𑁂𑀬𑁆𑀬𑀼𑀁 𑀅𑀦𑀼𑀧𑁆𑀧𑀩𑀦𑁆𑀥𑁂𑀬𑁆𑀬𑀼𑀁. 𑀢𑀲𑁆𑀲 𑀲𑀁𑀯𑀭𑀸𑀬 𑀧𑀝𑀺𑀧𑀚𑁆𑀚𑀢𑀻𑀢𑀺 𑀢𑀲𑁆𑀲 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀲𑁆𑀲 𑀲𑀢𑀺𑀓𑀯𑀸𑀝𑁂𑀦 𑀧𑀺𑀤𑀳𑀦𑀢𑁆𑀣𑀸𑀬 𑀧𑀝𑀺𑀧𑀚𑁆𑀚𑀢𑀺. 𑀏𑀯𑀁 𑀧𑀝𑀺𑀧𑀚𑁆𑀚𑀦𑁆𑀢𑁄𑀬𑁂𑀯 𑀘 ‘‘𑀭𑀓𑁆𑀔𑀢𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑁂 𑀲𑀁𑀯𑀭𑀁 𑀆𑀧𑀚𑁆𑀚𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀢𑁆𑀯𑀸𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀯𑀫𑀺𑀤𑀁 𑀲𑀗𑁆𑀔𑁂𑀧𑀢𑁄 𑀭𑀽𑀧𑀸𑀤𑀻𑀲𑀼 𑀓𑀺𑀮𑁂𑀲𑀸𑀦𑀼𑀩𑀦𑁆𑀥𑀦𑀺𑀫𑀺𑀢𑁆𑀢𑀸𑀤𑀺𑀕𑁆𑀕𑀸𑀳𑀧𑀭𑀺𑀯𑀚𑁆𑀚𑀦𑀮𑀓𑁆𑀔𑀡𑀁 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀁 𑀲𑀻𑀮𑀁 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀲𑀁𑀯𑀡𑁆𑀡𑀦𑀸𑀲𑀼 (𑀯𑀺𑀲𑀼𑀤𑁆𑀥𑀺. 𑀫𑀳𑀸𑀝𑀻. 𑁧.𑁧𑁩) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀓𑀺𑀮𑁂𑀲𑁂𑀳𑀺 𑀅𑀦𑀯𑀲𑀺𑀢𑁆𑀢𑀲𑀼𑀔𑀦𑁆𑀢𑀺𑀆𑀤𑀻𑀲𑀼 𑀭𑀽𑀧𑀸𑀤𑀻𑀲𑀼 𑀦𑀺𑀫𑀺𑀢𑁆𑀢𑀸𑀤𑀺𑀕𑁆𑀕𑀸𑀳𑀧𑀭𑀺𑀯𑀚𑁆𑀚𑀦𑀮𑀓𑁆𑀔𑀡𑀢𑁆𑀢𑀸 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑁆𑀲 𑀓𑀺𑀮𑁂𑀲𑁂𑀳𑀺 𑀅𑀦𑀯𑀲𑀺𑀢𑁆𑀢𑀲𑀼𑀔𑀢𑀸 𑀅𑀯𑀺𑀓𑀺𑀡𑁆𑀡𑀲𑀼𑀔𑀢𑀸 𑀘𑀲𑁆𑀲 𑀯𑀼𑀢𑁆𑀢𑀸.
𑀅𑀪𑀺𑀓𑁆𑀓𑀫𑀦𑀁 𑀅𑀪𑀺𑀓𑁆𑀓𑀦𑁆𑀢𑁄, 𑀧𑀼𑀭𑀢𑁄 𑀕𑀫𑀦𑀁. 𑀧𑀝𑀺𑀓𑁆𑀓𑀫𑀦𑀁 𑀧𑀝𑀺𑀓𑁆𑀓𑀦𑁆𑀢𑁄, 𑀧𑀘𑁆𑀘𑀸𑀕𑀫𑀦𑀁. 𑀢𑀤𑀼𑀪𑀬𑀫𑁆𑀧𑀺 𑀘𑀢𑀽𑀲𑀼 𑀇𑀭𑀺𑀬𑀸𑀧𑀣𑁂𑀲𑀼 𑀮𑀩𑁆𑀪𑀢𑀺. 𑀕𑀫𑀦𑁂 𑀢𑀸𑀯 𑀧𑀼𑀭𑀢𑁄 𑀓𑀸𑀬𑀁 𑀅𑀪𑀺𑀳𑀭𑀦𑁆𑀢𑁄 𑀅𑀪𑀺𑀓𑁆𑀓𑀫𑀢𑀺 𑀦𑀸𑀫, 𑀧𑀝𑀺𑀦𑀺𑀯𑀢𑁆𑀢𑁂𑀦𑁆𑀢𑁄 𑀧𑀝𑀺𑀓𑁆𑀓𑀫𑀢𑀺 𑀦𑀸𑀫. 𑀞𑀸𑀦𑁂𑀧𑀺 𑀞𑀺𑀢𑀓𑁄𑀯 𑀓𑀸𑀬𑀁 𑀧𑀼𑀭𑀢𑁄 𑀑𑀡𑀫𑀦𑁆𑀢𑁄 𑀅𑀪𑀺𑀓𑁆𑀓𑀫𑀢𑀺 𑀦𑀸𑀫, 𑀧𑀘𑁆𑀙𑀢𑁄 𑀅𑀧𑀦𑀸𑀫𑁂𑀦𑁆𑀢𑁄 𑀧𑀝𑀺𑀓𑁆𑀓𑀫𑀢𑀺 𑀦𑀸𑀫. 𑀦𑀺𑀲𑀚𑁆𑀚𑀸𑀬𑀧𑀺 𑀦𑀺𑀲𑀺𑀦𑁆𑀦𑀓𑁄𑀯 𑀆𑀲𑀦𑀲𑁆𑀲 𑀧𑀼𑀭𑀺𑀫𑀅𑀗𑁆𑀕𑀸𑀪𑀺𑀫𑀼𑀔𑁄 𑀲𑀁𑀲𑀭𑀦𑁆𑀢𑁄 𑀅𑀪𑀺𑀓𑁆𑀓𑀫𑀢𑀺 𑀦𑀸𑀫, 𑀧𑀘𑁆𑀙𑀺𑀫𑀁 𑀅𑀗𑁆𑀕𑀧𑁆𑀧𑀤𑁂𑀲𑀁 𑀧𑀘𑁆𑀘𑀸𑀲𑀁𑀲𑀭𑀦𑁆𑀢𑁄 𑀧𑀝𑀺𑀓𑁆𑀓𑀫𑀢𑀺 𑀦𑀸𑀫. 𑀦𑀺𑀧𑀚𑁆𑀚𑀸𑀬𑀧𑀺 𑀏𑀲𑁂𑀯 𑀦𑀬𑁄.
𑀲𑀸𑀢𑁆𑀣𑀓𑀲𑀫𑁆𑀧𑀚𑀜𑁆𑀜𑀦𑁆𑀢𑀺𑀆𑀤𑀻𑀲𑀼 𑀲𑀫𑀦𑁆𑀢𑀢𑁄 𑀧𑀓𑀸𑀭𑁂𑀳𑀺, 𑀧𑀓𑀝𑁆𑀞𑀁 𑀯𑀸 𑀲𑀯𑀺𑀲𑁂𑀲𑀁 𑀚𑀸𑀦𑀸𑀢𑀻𑀢𑀺 𑀲𑀫𑁆𑀧𑀚𑀸𑀦𑁄, 𑀲𑀫𑁆𑀧𑀚𑀸𑀦𑀲𑁆𑀲 𑀪𑀸𑀯𑁄 𑀲𑀫𑁆𑀧𑀚𑀜𑁆𑀜𑀁, 𑀢𑀣𑀸𑀧𑀯𑀢𑁆𑀢𑀁 𑀜𑀸𑀡𑀁. 𑀥𑀫𑁆𑀫𑀢𑁄 𑀯𑀟𑁆𑀠𑀺𑀲𑀗𑁆𑀔𑀸𑀢𑁂𑀦 𑀲𑀳 𑀅𑀢𑁆𑀣𑁂𑀦 𑀯𑀢𑁆𑀢𑀢𑀻𑀢𑀺 𑀲𑀸𑀢𑁆𑀣𑀓𑀁, 𑀅𑀪𑀺𑀓𑁆𑀓𑀦𑁆𑀢𑀸𑀤𑀺𑀲𑀸𑀢𑁆𑀣𑀓𑀲𑁆𑀲 𑀲𑀫𑁆𑀧𑀚𑀜𑁆𑀜𑀁 𑀲𑀸𑀢𑁆𑀣𑀓𑀲𑀫𑁆𑀧𑀚𑀜𑁆𑀜𑀁. 𑀲𑀧𑁆𑀧𑀸𑀬𑀲𑁆𑀲 𑀅𑀢𑁆𑀢𑀦𑁄 𑀉𑀧𑀓𑀸𑀭𑀸𑀯𑀳𑀲𑁆𑀲 𑀲𑀫𑁆𑀧𑀚𑀜𑁆𑀜𑀁 𑀲𑀧𑁆𑀧𑀸𑀬𑀲𑀫𑁆𑀧𑀚𑀜𑁆𑀜𑀁. 𑀅𑀪𑀺𑀓𑁆𑀓𑀫𑀸𑀤𑀻𑀲𑀼 𑀪𑀺𑀓𑁆𑀔𑀸𑀘𑀸𑀭𑀕𑁄𑀘𑀭𑁂, 𑀅𑀜𑁆𑀜𑀢𑁆𑀣𑀸𑀧𑀺 𑀧𑀯𑀢𑁆𑀢𑁂𑀲𑀼 𑀅𑀯𑀺𑀚𑀳𑀺𑀢𑀓𑀫𑁆𑀫𑀝𑁆𑀞𑀸𑀦𑀲𑀗𑁆𑀔𑀸𑀢𑁂 𑀕𑁄𑀘𑀭𑁂 𑀲𑀫𑁆𑀧𑀚𑀜𑁆𑀜𑀁 𑀕𑁄𑀘𑀭𑀲𑀫𑁆𑀧𑀚𑀜𑁆𑀜𑀁. 𑀅𑀪𑀺𑀓𑁆𑀓𑀫𑀸𑀤𑀻𑀲𑀼 𑀅𑀲𑀫𑁆𑀫𑀼𑀬𑁆𑀳𑀦𑀫𑁂𑀯 𑀲𑀫𑁆𑀧𑀚𑀜𑁆𑀜𑀁 𑀅𑀲𑀫𑁆𑀫𑁄𑀳𑀲𑀫𑁆𑀧𑀚𑀜𑁆𑀜𑀁. 𑀢𑀢𑁆𑀣 (𑀤𑀻. 𑀦𑀺. 𑀅𑀝𑁆𑀞. 𑁧.𑁨𑁧𑁪; 𑀫. 𑀦𑀺. 𑀅𑀝𑁆𑀞. 𑁧.𑁧𑁦𑁯) 𑀅𑀪𑀺𑀓𑁆𑀓𑀫𑀦𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑁂 𑀘𑀺𑀢𑁆𑀢𑀯𑀲𑁂𑀦𑁂𑀯 𑀅𑀕𑀦𑁆𑀢𑁆𑀯𑀸 ‘‘𑀓𑀺𑀦𑁆𑀦𑀼 𑀫𑁂 𑀏𑀢𑁆𑀣 𑀕𑀢𑁂𑀦 𑀅𑀢𑁆𑀣𑁄 𑀅𑀢𑁆𑀣𑀺 𑀦𑀢𑁆𑀣𑀻’’𑀢𑀺 𑀅𑀢𑁆𑀣𑀸𑀦𑀢𑁆𑀣𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀅𑀢𑁆𑀣𑀧𑀭𑀺𑀕𑁆𑀕𑀳𑀡𑀁 𑀲𑀸𑀢𑁆𑀣𑀓𑀲𑀫𑁆𑀧𑀚𑀜𑁆𑀜𑀁. 𑀢𑀢𑁆𑀣 𑀘 𑀅𑀢𑁆𑀣𑁄𑀢𑀺 𑀘𑁂𑀢𑀺𑀬𑀤𑀲𑁆𑀲𑀦𑀩𑁄𑀥𑀺𑀤𑀲𑁆𑀲𑀦𑀲𑀗𑁆𑀖𑀤𑀲𑁆𑀲𑀦𑀣𑁂𑀭𑀤𑀲𑁆𑀲𑀦𑀅𑀲𑀼𑀪𑀤𑀲𑁆𑀲𑀦𑀸𑀤𑀺𑀯𑀲𑁂𑀦 𑀥𑀫𑁆𑀫𑀢𑁄 𑀯𑀟𑁆𑀠𑀺. 𑀘𑁂𑀢𑀺𑀬𑀁 𑀯𑀸 𑀩𑁄𑀥𑀺𑀁 𑀯𑀸 𑀤𑀺𑀲𑁆𑀯𑀸𑀧𑀺 𑀳𑀺 𑀩𑀼𑀤𑁆𑀥𑀸𑀭𑀫𑁆𑀫𑀡𑀁, 𑀲𑀗𑁆𑀖𑀤𑀲𑁆𑀲𑀦𑁂𑀦 𑀲𑀗𑁆𑀖𑀸𑀭𑀫𑁆𑀫𑀡𑀁 𑀧𑀻𑀢𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀢𑀤𑁂𑀯 𑀔𑀬𑀯𑀬𑀢𑁄 𑀲𑀫𑁆𑀫𑀲𑀦𑁆𑀢𑁄 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺. 𑀣𑁂𑀭𑁂 𑀤𑀺𑀲𑁆𑀯𑀸 𑀢𑁂𑀲𑀁 𑀑𑀯𑀸𑀤𑁂 𑀧𑀢𑀺𑀝𑁆𑀞𑀸𑀬 𑀅𑀲𑀼𑀪𑀁 𑀤𑀺𑀲𑁆𑀯𑀸 𑀢𑀢𑁆𑀣 𑀧𑀞𑀫𑀚𑁆𑀛𑀸𑀦𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀢𑀤𑁂𑀯 𑀔𑀬𑀯𑀬𑀢𑁄 𑀲𑀫𑁆𑀫𑀲𑀦𑁆𑀢𑁄 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀢𑀲𑁆𑀫𑀸 𑀏𑀢𑁂𑀲𑀁 𑀤𑀲𑁆𑀲𑀦𑀁 ‘‘𑀲𑀸𑀢𑁆𑀣𑀓’’𑀦𑁆𑀢𑀺 𑀯𑀼𑀢𑁆𑀢𑀁. 𑀓𑁂𑀘𑀺 𑀧𑀦 ‘‘𑀆𑀫𑀺𑀲𑀢𑁄𑀧𑀺 𑀯𑀟𑁆𑀠𑀺 𑀅𑀢𑁆𑀣𑁄𑀬𑁂𑀯 𑀢𑀁 𑀦𑀺𑀲𑁆𑀲𑀸𑀬 𑀩𑁆𑀭𑀳𑁆𑀫𑀘𑀭𑀺𑀬𑀸𑀦𑀼𑀕𑁆𑀕𑀳𑀸𑀬 𑀧𑀝𑀺𑀧𑀦𑁆𑀦𑀢𑁆𑀢𑀸’’𑀢𑀺 𑀯𑀤𑀦𑁆𑀢𑀺.
𑀢𑀲𑁆𑀫𑀺𑀁 𑀧𑀦 𑀕𑀫𑀦𑁂 𑀲𑀧𑁆𑀧𑀸𑀬𑀸𑀲𑀧𑁆𑀧𑀸𑀬𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀲𑀧𑁆𑀧𑀸𑀬𑀧𑀭𑀺𑀕𑁆𑀕𑀡𑁆𑀳𑀦𑀁 𑀲𑀧𑁆𑀧𑀸𑀬𑀲𑀫𑁆𑀧𑀚𑀜𑁆𑀜𑀁. 𑀲𑁂𑀬𑁆𑀬𑀣𑀺𑀤𑀁 𑁋 𑀘𑁂𑀢𑀺𑀬𑀤𑀲𑁆𑀲𑀦𑀁 𑀢𑀸𑀯 𑀲𑀸𑀢𑁆𑀣𑀁. 𑀲𑀘𑁂 𑀧𑀦 𑀘𑁂𑀢𑀺𑀬𑀲𑁆𑀲 𑀫𑀳𑀸𑀧𑀽𑀚𑀸𑀬 𑀤𑀲𑀤𑁆𑀯𑀸𑀤𑀲𑀬𑁄𑀚𑀦𑀦𑁆𑀢𑀭𑁂 𑀧𑀭𑀺𑀲𑀸 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀅𑀢𑁆𑀢𑀦𑁄 𑀯𑀺𑀪𑀯𑀸𑀦𑀼𑀭𑀽𑀧𑀁 𑀇𑀢𑁆𑀣𑀺𑀬𑁄𑀧𑀺 𑀧𑀼𑀭𑀺𑀲𑀸𑀧𑀺 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀸 𑀘𑀺𑀢𑁆𑀢𑀓𑀫𑁆𑀫𑀭𑀽𑀧𑀓𑀸𑀦𑀺 𑀯𑀺𑀬 𑀲𑀜𑁆𑀘𑀭𑀦𑁆𑀢𑀺. 𑀢𑀢𑁆𑀭 𑀘𑀲𑁆𑀲 𑀇𑀝𑁆𑀞𑁂 𑀆𑀭𑀫𑁆𑀫𑀡𑁂 𑀮𑁄𑀪𑁄, 𑀅𑀦𑀺𑀝𑁆𑀞𑁂 𑀧𑀝𑀺𑀖𑁄, 𑀅𑀲𑀫𑀧𑁂𑀓𑁆𑀔𑀦𑁂 𑀫𑁄𑀳𑁄 𑀉𑀧𑁆𑀧𑀚𑁆𑀚𑀢𑀺, 𑀓𑀸𑀬𑀲𑀁𑀲𑀕𑁆𑀕𑀸𑀧𑀢𑁆𑀢𑀺𑀁 𑀯𑀸 𑀆𑀧𑀚𑁆𑀚𑀢𑀺, 𑀚𑀻𑀯𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑀸𑀦𑀁 𑀯𑀸 𑀅𑀦𑁆𑀢𑀭𑀸𑀬𑁄 𑀳𑁄𑀢𑀺. 𑀏𑀯𑀁 𑀢𑀁 𑀞𑀸𑀦𑀁 𑀅𑀲𑀧𑁆𑀧𑀸𑀬𑀁 𑀳𑁄𑀢𑀺, 𑀯𑀼𑀢𑁆𑀢𑀧𑁆𑀧𑀓𑀸𑀭𑀅𑀦𑁆𑀢𑀭𑀸𑀬𑀸𑀪𑀸𑀯𑁂 𑀲𑀧𑁆𑀧𑀸𑀬𑀁. 𑀩𑁄𑀥𑀺𑀤𑀲𑁆𑀲𑀦𑁂𑀧𑀺 𑀏𑀲𑁂𑀯 𑀦𑀬𑁄. 𑀲𑀗𑁆𑀖𑀤𑀲𑁆𑀲𑀦𑀫𑁆𑀧𑀺 𑀲𑀸𑀢𑁆𑀣𑀁. 𑀲𑀘𑁂 𑀧𑀦 𑀅𑀦𑁆𑀢𑁄𑀕𑀸𑀫𑁂 𑀫𑀳𑀸𑀫𑀡𑁆𑀟𑀧𑀁 𑀓𑀸𑀭𑁂𑀢𑁆𑀯𑀸 𑀲𑀩𑁆𑀩𑀭𑀢𑁆𑀢𑀺𑀁 𑀥𑀫𑁆𑀫𑀲𑁆𑀲𑀯𑀦𑀁 𑀓𑀭𑁄𑀦𑁆𑀢𑁂𑀲𑀼 𑀫𑀦𑀼𑀲𑁆𑀲𑁂𑀲𑀼 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦𑁂𑀯 𑀚𑀦𑀲𑀦𑁆𑀦𑀺𑀧𑀸𑀢𑁄 𑀘𑁂𑀯 𑀅𑀦𑁆𑀢𑀭𑀸𑀬𑁄 𑀘 𑀳𑁄𑀢𑀺. 𑀏𑀯𑀁 𑀢𑀁 𑀞𑀸𑀦𑀁 𑀅𑀲𑀧𑁆𑀧𑀸𑀬𑀁, 𑀅𑀦𑁆𑀢𑀭𑀸𑀬𑀸𑀪𑀸𑀯𑁂 𑀲𑀧𑁆𑀧𑀸𑀬𑀁. 𑀫𑀳𑀸𑀧𑀭𑀺𑀲𑀸𑀧𑀭𑀺𑀯𑀸𑀭𑀸𑀦𑀁 𑀣𑁂𑀭𑀸𑀦𑀁 𑀤𑀲𑁆𑀲𑀦𑁂𑀧𑀺 𑀏𑀲𑁂𑀯 𑀦𑀬𑁄. 𑀅𑀲𑀼𑀪𑀤𑀲𑁆𑀲𑀦𑀫𑁆𑀧𑀺 𑀲𑀸𑀢𑁆𑀣𑀁 𑀫𑀕𑁆𑀕𑀨𑀮𑀸𑀥𑀺𑀕𑀫𑀳𑁂𑀢𑀼𑀪𑀸𑀯𑀢𑁄. 𑀤𑀦𑁆𑀢𑀓𑀝𑁆𑀞𑀢𑁆𑀣𑀸𑀬 𑀲𑀸𑀫𑀡𑁂𑀭𑀁 𑀕𑀳𑁂𑀢𑁆𑀯𑀸 𑀕𑀢𑀤𑀳𑀭𑀪𑀺𑀓𑁆𑀔𑀼𑀦𑁄 𑀯𑀢𑁆𑀣𑀼𑀧𑁂𑀢𑁆𑀣 𑀓𑀣𑁂𑀢𑀩𑁆𑀩𑀁. 𑀏𑀯𑀁 𑀲𑀸𑀢𑁆𑀣𑀫𑁆𑀧𑀺 𑀧𑀦𑁂𑀢𑀁 𑀧𑀼𑀭𑀺𑀲𑀲𑁆𑀲 𑀫𑀸𑀢𑀼𑀕𑀸𑀫𑀸𑀲𑀼𑀪𑀁 𑀅𑀲𑀧𑁆𑀧𑀸𑀬𑀁, 𑀫𑀸𑀢𑀼𑀕𑀸𑀫𑀲𑁆𑀲 𑀘 𑀧𑀼𑀭𑀺𑀲𑀸𑀲𑀼𑀪𑀁. 𑀲𑀪𑀸𑀕𑀫𑁂𑀯 𑀲𑀧𑁆𑀧𑀸𑀬𑀦𑁆𑀢𑀺 𑀏𑀯𑀁 𑀲𑀧𑁆𑀧𑀸𑀬𑀧𑀭𑀺𑀕𑁆𑀕𑀡𑁆𑀳𑀦𑀁 𑀲𑀧𑁆𑀧𑀸𑀬𑀲𑀫𑁆𑀧𑀚𑀜𑁆𑀜𑀁 𑀦𑀸𑀫.
𑀏𑀯𑀁 𑀧𑀭𑀺𑀕𑁆𑀕𑀳𑀺𑀢𑀲𑀸𑀢𑁆𑀣𑀓𑀲𑀧𑁆𑀧𑀸𑀬𑀲𑁆𑀲 𑀧𑀦 𑀅𑀝𑁆𑀞𑀢𑀺𑀁𑀲𑀸𑀬 𑀓𑀫𑁆𑀫𑀝𑁆𑀞𑀸𑀦𑁂𑀲𑀼 𑀅𑀢𑁆𑀢𑀦𑁄 𑀘𑀺𑀢𑁆𑀢𑀭𑀼𑀘𑀺𑀬𑀁 𑀓𑀫𑁆𑀫𑀝𑁆𑀞𑀸𑀦𑀲𑀗𑁆𑀔𑀸𑀢𑀁 𑀕𑁄𑀘𑀭𑀁 𑀉𑀕𑁆𑀕𑀳𑁂𑀢𑁆𑀯𑀸 𑀪𑀺𑀓𑁆𑀔𑀸𑀘𑀸𑀭𑀕𑁄𑀘𑀭𑁂 𑀢𑀁 𑀕𑀳𑁂𑀢𑁆𑀯𑀸𑀯 𑀕𑀫𑀦𑀁 𑀕𑁄𑀘𑀭𑀲𑀫𑁆𑀧𑀚𑀜𑁆𑀜𑀁 𑀦𑀸𑀫.
𑀅𑀪𑀺𑀓𑁆𑀓𑀫𑀸𑀤𑀻𑀲𑀼 𑀧𑀦 𑀅𑀲𑀫𑁆𑀫𑀼𑀬𑁆𑀳𑀦𑀁 𑀅𑀲𑀫𑁆𑀫𑁄𑀳𑀲𑀫𑁆𑀧𑀚𑀜𑁆𑀜𑀁. 𑀢𑀁 𑀏𑀯𑀁 𑀯𑁂𑀤𑀺𑀢𑀩𑁆𑀩𑀁 𑁋 𑀇𑀥 𑀪𑀺𑀓𑁆𑀔𑀼 𑀅𑀪𑀺𑀓𑁆𑀓𑀫𑀦𑁆𑀢𑁄 𑀯𑀸 𑀧𑀝𑀺𑀓𑁆𑀓𑀫𑀦𑁆𑀢𑁄 𑀯𑀸 𑀬𑀣𑀸 𑀅𑀦𑁆𑀥𑀧𑀼𑀣𑀼𑀚𑁆𑀚𑀦𑀸 𑀅𑀪𑀺𑀓𑁆𑀓𑀫𑀸𑀤𑀻𑀲𑀼 ‘‘𑀅𑀢𑁆𑀢𑀸 𑀅𑀪𑀺𑀓𑁆𑀓𑀫𑀢𑀺, 𑀅𑀢𑁆𑀢𑀦𑀸 𑀅𑀪𑀺𑀓𑁆𑀓𑀫𑁄 𑀦𑀺𑀩𑁆𑀩𑀢𑁆𑀢𑀺𑀢𑁄’’𑀢𑀺 𑀯𑀸, ‘‘𑀅𑀳𑀁 𑀅𑀪𑀺𑀓𑁆𑀓𑀫𑀸𑀫𑀺, 𑀫𑀬𑀸 𑀅𑀪𑀺𑀓𑁆𑀓𑀫𑁄 𑀦𑀺𑀩𑁆𑀩𑀢𑁆𑀢𑀺𑀢𑁄’’𑀢𑀺 𑀯𑀸 𑀲𑀫𑁆𑀫𑀼𑀬𑁆𑀳𑀦𑁆𑀢𑀺, 𑀢𑀣𑀸 𑀅𑀲𑀫𑁆𑀫𑀼𑀬𑁆𑀳𑀦𑁆𑀢𑁄 ‘‘𑀅𑀪𑀺𑀓𑁆𑀓𑀫𑀸𑀫𑀻’’𑀢𑀺 𑀘𑀺𑀢𑁆𑀢𑁂 𑀉𑀧𑁆𑀧𑀚𑁆𑀚𑀫𑀸𑀦𑁂 𑀢𑁂𑀦𑁂𑀯 𑀘𑀺𑀢𑁆𑀢𑁂𑀦 𑀲𑀤𑁆𑀥𑀺𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀯𑀸𑀬𑁄𑀥𑀸𑀢𑀼 𑀯𑀺𑀜𑁆𑀜𑀢𑁆𑀢𑀺𑀁 𑀚𑀦𑀬𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀇𑀢𑀺 𑀘𑀺𑀢𑁆𑀢𑀓𑀺𑀭𑀺𑀬𑀯𑀸𑀬𑁄𑀥𑀸𑀢𑀼𑀯𑀺𑀧𑁆𑀨𑀸𑀭𑀯𑀲𑁂𑀦 𑀅𑀬𑀁 𑀓𑀸𑀬𑀲𑀫𑁆𑀫𑀢𑁄 𑀅𑀝𑁆𑀞𑀺𑀲𑀗𑁆𑀖𑀸𑀝𑁄 𑀅𑀪𑀺𑀓𑁆𑀓𑀫𑀢𑀺, 𑀢𑀲𑁆𑀲𑁂𑀯𑀁 𑀅𑀪𑀺𑀓𑁆𑀓𑀫𑀢𑁄 𑀏𑀓𑁂𑀓𑀧𑀤𑀼𑀤𑁆𑀥𑀭𑀡𑁂 𑀧𑀣𑀯𑀻𑀥𑀸𑀢𑀼, 𑀆𑀧𑁄𑀥𑀸𑀢𑀽𑀢𑀺 𑀤𑁆𑀯𑁂 𑀥𑀸𑀢𑀼𑀬𑁄 𑀑𑀫𑀢𑁆𑀢𑀸 𑀳𑁄𑀦𑁆𑀢𑀺 𑀫𑀦𑁆𑀤𑀸, 𑀇𑀢𑀭𑀸 𑀤𑁆𑀯𑁂 𑀅𑀥𑀺𑀫𑀢𑁆𑀢𑀸 𑀳𑁄𑀦𑁆𑀢𑀺 𑀩𑀮𑀯𑀢𑀺𑀬𑁄. 𑀢𑀣𑀸 𑀅𑀢𑀺𑀳𑀭𑀡𑀯𑀻𑀢𑀺𑀳𑀭𑀡𑁂𑀲𑀼. 𑀯𑁄𑀲𑁆𑀲𑀚𑁆𑀚𑀦𑁂 𑀢𑁂𑀚𑁄𑀥𑀸𑀢𑀼, 𑀯𑀸𑀬𑁄𑀥𑀸𑀢𑀽𑀢𑀺 𑀤𑁆𑀯𑁂 𑀥𑀸𑀢𑀼𑀬𑁄 𑀑𑀫𑀢𑁆𑀢𑀸 𑀳𑁄𑀦𑁆𑀢𑀺 𑀫𑀦𑁆𑀤𑀸, 𑀇𑀢𑀭𑀸 𑀤𑁆𑀯𑁂 𑀅𑀥𑀺𑀫𑀢𑁆𑀢𑀸 𑀩𑀮𑀯𑀢𑀺𑀬𑁄. 𑀢𑀣𑀸 𑀲𑀦𑁆𑀦𑀺𑀓𑁆𑀔𑁂𑀧𑀦𑀲𑀦𑁆𑀦𑀺𑀭𑀼𑀫𑁆𑀪𑀦𑁂𑀲𑀼. 𑀢𑀢𑁆𑀣 𑀉𑀤𑁆𑀥𑀭𑀡𑁂 𑀧𑀯𑀢𑁆𑀢𑀸 𑀭𑀽𑀧𑀸𑀭𑀽𑀧𑀥𑀫𑁆𑀫𑀸 𑀅𑀢𑀺𑀳𑀭𑀡𑀁 𑀦 𑀧𑀸𑀧𑀼𑀡𑀦𑁆𑀢𑀺, 𑀢𑀣𑀸 𑀅𑀢𑀺𑀳𑀭𑀡𑁂 𑀧𑀯𑀢𑁆𑀢𑀸 𑀯𑀻𑀢𑀺𑀳𑀭𑀡𑀁, 𑀯𑀻𑀢𑀺𑀳𑀭𑀡𑁂 𑀧𑀯𑀢𑁆𑀢𑀸 𑀯𑁄𑀲𑁆𑀲𑀚𑁆𑀚𑀦𑀁, 𑀯𑁄𑀲𑁆𑀲𑀚𑁆𑀚𑀦𑁂 𑀧𑀯𑀢𑁆𑀢𑀸 𑀲𑀦𑁆𑀦𑀺𑀓𑁆𑀔𑁂𑀧𑀦𑀁, 𑀲𑀦𑁆𑀦𑀺𑀓𑁆𑀔𑁂𑀧𑀦𑁂 𑀧𑀯𑀢𑁆𑀢𑀸 𑀲𑀦𑁆𑀦𑀺𑀭𑀼𑀫𑁆𑀪𑀦𑀁 𑀦 𑀧𑀸𑀧𑀼𑀡𑀦𑁆𑀢𑀺. 𑀢𑀢𑁆𑀣 𑀢𑀢𑁆𑀣𑁂𑀯 𑀧𑀩𑁆𑀩𑀧𑀩𑁆𑀩𑀁 𑀲𑀦𑁆𑀦𑀺𑀲𑀦𑁆𑀥𑀺 𑀑𑀥𑀺𑀑𑀥𑀺 𑀳𑀼𑀢𑁆𑀯𑀸 𑀢𑀢𑁆𑀢𑀓𑀧𑀸𑀮𑁂 𑀧𑀓𑁆𑀔𑀺𑀢𑁆𑀢𑀢𑀺𑀮𑀁 𑀯𑀺𑀬 𑀧𑀝𑀧𑀝𑀸𑀬𑀦𑁆𑀢𑀸 𑀪𑀺𑀚𑁆𑀚𑀦𑁆𑀢𑀺. 𑀢𑀢𑁆𑀣 𑀓𑁄 𑀏𑀓𑁄 𑀅𑀪𑀺𑀓𑁆𑀓𑀫𑀢𑀺, 𑀓𑀲𑁆𑀲 𑀯𑀸 𑀏𑀓𑀲𑁆𑀲 𑀅𑀪𑀺𑀓𑁆𑀓𑀫𑀦𑀁? 𑀧𑀭𑀫𑀢𑁆𑀣𑀢𑁄 𑀳𑀺 𑀥𑀸𑀢𑀽𑀦𑀁𑀬𑁂𑀯 𑀕𑀫𑀦𑀁, 𑀥𑀸𑀢𑀽𑀦𑀁 𑀞𑀸𑀦𑀁, 𑀥𑀸𑀢𑀽𑀦𑀁 𑀦𑀺𑀲𑀚𑁆𑀚𑀦𑀁, 𑀥𑀸𑀢𑀽𑀦𑀁 𑀲𑀬𑀦𑀁. 𑀢𑀲𑁆𑀫𑀺𑀁 𑀢𑀲𑁆𑀫𑀺𑀜𑁆𑀳𑀺 𑀓𑁄𑀝𑁆𑀞𑀸𑀲𑁂 𑀲𑀤𑁆𑀥𑀺𑀁 𑀭𑀽𑀧𑁂𑀦 𑁋
‘‘𑀅𑀜𑁆𑀜𑀁 𑀉𑀧𑁆𑀧𑀚𑁆𑀚𑀢𑁂 𑀘𑀺𑀢𑁆𑀢𑀁, 𑀅𑀜𑁆𑀜𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀢𑀺;
𑀅𑀯𑀻𑀘𑀺𑀫𑀦𑀼𑀲𑀫𑁆𑀩𑀦𑁆𑀥𑁄, 𑀦𑀤𑀻𑀲𑁄𑀢𑁄𑀯 𑀯𑀢𑁆𑀢𑀢𑀻’’𑀢𑀺. (𑀤𑀻. 𑀦𑀺. 𑀅𑀝𑁆𑀞. 𑁧.𑁨𑁧𑁪; 𑀫. 𑀦𑀺. 𑀅𑀝𑁆𑀞. 𑁧.𑁧𑁦𑁯; 𑀲𑀁. 𑀦𑀺. 𑀅𑀝𑁆𑀞. 𑁩.𑁫.𑁩𑁬𑁮);
𑀏𑀯𑀁 𑀅𑀪𑀺𑀓𑁆𑀓𑀫𑀸𑀤𑀻𑀲𑀼 𑀅𑀲𑀫𑁆𑀫𑀼𑀬𑁆𑀳𑀦𑀁 𑀅𑀲𑀫𑁆𑀫𑁄𑀳𑀲𑀫𑁆𑀧𑀚𑀜𑁆𑀜𑀁 𑀦𑀸𑀫𑀸𑀢𑀺. 𑀧𑀘𑁆𑀘𑀬𑀲𑀫𑁆𑀧𑀢𑁆𑀢𑀺𑀦𑁆𑀢𑀺 𑀧𑀘𑁆𑀘𑀬𑀧𑀸𑀭𑀺𑀧𑀽𑀭𑀺𑀁. 𑀇𑀫𑁂 𑀘𑀢𑁆𑀢𑀸𑀭𑁄𑀢𑀺 𑀲𑀻𑀮𑀲𑀁𑀯𑀭𑁄, 𑀲𑀦𑁆𑀢𑁄𑀲𑁄, 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄, 𑀲𑀢𑀺𑀲𑀫𑁆𑀧𑀚𑀜𑁆𑀜𑀦𑁆𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀅𑀭𑀜𑁆𑀜𑀯𑀸𑀲𑀲𑁆𑀲 𑀲𑀫𑁆𑀪𑀸𑀭𑀸. 𑀯𑀢𑁆𑀢𑀩𑁆𑀩𑀢𑀁 𑀆𑀧𑀚𑁆𑀚𑀢𑀻𑀢𑀺 ‘‘𑀅𑀲𑀼𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀭𑀜𑁆𑀜𑁂 𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀁 𑀯𑀺𑀬 𑀯𑀦𑀘𑀭𑀓𑀸𑀦𑀁 𑀯𑀺𑀬 𑀘 𑀦𑀺𑀯𑀸𑀲𑀫𑀢𑁆𑀢𑀫𑁂𑀯, 𑀦 𑀅𑀭𑀜𑁆𑀜𑀯𑀸𑀲𑀸𑀦𑀼𑀘𑁆𑀙𑀯𑀺𑀓𑀸 𑀓𑀸𑀘𑀺 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀻’’𑀢𑀺 𑀅𑀧𑀯𑀸𑀤𑀯𑀲𑁂𑀦 𑀯𑀢𑁆𑀢𑀩𑁆𑀩𑀢𑀁, 𑀆𑀭𑀜𑁆𑀜𑀓𑁂𑀳𑀺 𑀯𑀸 𑀢𑀺𑀭𑀘𑁆𑀙𑀸𑀦𑀕𑀢𑁂𑀳𑀺 𑀯𑀦𑀘𑀭𑀓𑀯𑀺𑀲𑀪𑀸𑀕𑀚𑀦𑁂𑀳𑀺 𑀯𑀺𑀧𑁆𑀧𑀝𑀺𑀧𑀢𑁆𑀢𑀺𑀯𑀲𑁂𑀦 𑀯𑀢𑁆𑀣𑀩𑁆𑀩𑀢𑀁 𑀆𑀧𑀚𑁆𑀚𑀢𑀺. 𑀪𑁂𑀭𑀯𑀲𑀤𑁆𑀤𑀁 𑀲𑀸𑀯𑁂𑀦𑁆𑀢𑀺, 𑀢𑀸𑀯𑀢𑀸 𑀅𑀧𑀮𑀸𑀬𑀦𑁆𑀢𑀸𑀦𑀁 𑀳𑀢𑁆𑀣𑁂𑀳𑀺 𑀲𑀻𑀲𑀁…𑀧𑁂… 𑀓𑀭𑁄𑀦𑁆𑀢𑀺. 𑀓𑀸𑀴𑀓𑀲𑀤𑀺𑀲𑀢𑁆𑀢𑀸 𑀓𑀸𑀴𑀓𑀁, 𑀯𑀻𑀢𑀺𑀓𑁆𑀓𑀫𑀲𑀗𑁆𑀔𑀸𑀢𑀁 𑀣𑀼𑀮𑁆𑀮𑀯𑀚𑁆𑀚𑀁. 𑀢𑀺𑀮𑀓𑀲𑀤𑀺𑀲𑀢𑁆𑀢𑀸 𑀢𑀺𑀮𑀓𑀁, 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑀲𑀗𑁆𑀔𑀸𑀢𑀁 𑀅𑀡𑀼𑀫𑀢𑁆𑀢𑀯𑀚𑁆𑀚𑀁. 𑀢𑀦𑁆𑀢𑀺 𑀧𑀻𑀢𑀺𑀁. 𑀯𑀺𑀪𑀽𑀢𑀪𑀸𑀯𑁂𑀦 𑀉𑀧𑀝𑁆𑀞𑀸𑀦𑀢𑁄 𑀔𑀬𑀢𑁄 𑀲𑀫𑁆𑀫𑀲𑀦𑁆𑀢𑁄.
𑀯𑀺𑀯𑀺𑀢𑁆𑀢𑀦𑁆𑀢𑀺 𑀚𑀦𑀯𑀺𑀯𑀺𑀢𑁆𑀢𑀁. 𑀢𑁂𑀦𑀸𑀳 ‘‘𑀲𑀼𑀜𑁆𑀜’’𑀦𑁆𑀢𑀺. 𑀢𑀁 𑀧𑀦 𑀚𑀦𑀲𑀤𑁆𑀤𑀦𑀺𑀕𑁆𑀖𑁄𑀲𑀸𑀪𑀸𑀯𑁂𑀦 𑀯𑁂𑀤𑀺𑀢𑀩𑁆𑀩𑀁 𑀲𑀤𑁆𑀤𑀓𑀡𑁆𑀝𑀓𑀢𑁆𑀢𑀸 𑀛𑀸𑀦𑀲𑁆𑀲𑀸𑀢𑀺 𑀆𑀳 ‘‘𑀅𑀧𑁆𑀧𑀲𑀤𑁆𑀤𑀁 𑀅𑀧𑁆𑀧𑀦𑀺𑀕𑁆𑀖𑁄𑀲𑀦𑁆𑀢𑀺 𑀅𑀢𑁆𑀣𑁄’’𑀢𑀺. 𑀏𑀢𑀤𑁂𑀯𑀸𑀢𑀺 𑀦𑀺𑀲𑁆𑀲𑀤𑁆𑀤𑀢𑀁𑀬𑁂𑀯. 𑀯𑀺𑀳𑀸𑀭𑁄 𑀧𑀸𑀓𑀸𑀭𑀧𑀭𑀺𑀘𑁆𑀙𑀺𑀦𑁆𑀦𑁄 𑀲𑀓𑀮𑁄 𑀆𑀯𑀸𑀲𑁄. 𑀅𑀟𑁆𑀠𑀬𑁄𑀕𑁄 𑀤𑀻𑀖𑀧𑀸𑀲𑀸𑀤𑁄, ‘‘𑀕𑀭𑀼𑀴𑀲𑀡𑁆𑀞𑀸𑀦𑀧𑀸𑀲𑀸𑀤𑁄’’𑀢𑀺𑀧𑀺 𑀯𑀤𑀦𑁆𑀢𑀺. 𑀧𑀸𑀲𑀸𑀤𑁄 𑀘𑀢𑀼𑀭𑀲𑁆𑀲𑀧𑀸𑀲𑀸𑀤𑁄. 𑀳𑀫𑁆𑀫𑀺𑀬𑀁 𑀫𑀼𑀡𑁆𑀟𑀘𑁆𑀙𑀤𑀦𑀧𑀸𑀲𑀸𑀤𑁄. 𑀅𑀝𑁆𑀝𑁄 𑀧𑀝𑀺𑀭𑀸𑀚𑀽𑀦𑀁 𑀧𑀝𑀺𑀩𑀸𑀳𑀦𑀬𑁄𑀕𑁆𑀕𑁄 𑀘𑀢𑀼𑀧𑁆𑀧𑀜𑁆𑀘𑀪𑀽𑀫𑀓𑁄 𑀧𑀢𑀺𑀲𑁆𑀲𑀬𑀯𑀺𑀲𑁂𑀲𑁄. 𑀫𑀸𑀴𑁄 𑀏𑀓𑀓𑀽𑀝𑀲𑀗𑁆𑀕𑀳𑀺𑀢𑁄 𑀅𑀦𑁂𑀓𑀓𑁄𑀡𑀯𑀦𑁆𑀢𑁄 𑀧𑀢𑀺𑀲𑁆𑀲𑀬𑀯𑀺𑀲𑁂𑀲𑁄. 𑀅𑀧𑀭𑁄 𑀦𑀬𑁄 𑁋 𑀯𑀺𑀳𑀸𑀭𑁄 𑀦𑀸𑀫 𑀤𑀻𑀖𑀫𑀼𑀔𑀧𑀸𑀲𑀸𑀤𑁄. 𑀅𑀟𑁆𑀠𑀬𑁄𑀕𑁄 𑀏𑀓𑀧𑀲𑁆𑀲𑀘𑁆𑀙𑀤𑀦𑀓𑀲𑁂𑀦𑀸𑀲𑀦𑀁. 𑀢𑀲𑁆𑀲 𑀓𑀺𑀭 𑀏𑀓𑀧𑀲𑁆𑀲𑁂 𑀪𑀺𑀢𑁆𑀢𑀺 𑀉𑀘𑁆𑀘𑀢𑀭𑀸 𑀳𑁄𑀢𑀺, 𑀇𑀢𑀭𑀧𑀲𑁆𑀲𑁂 𑀦𑀻𑀘𑀸. 𑀏𑀢𑁂𑀦 𑀢𑀁 𑀏𑀓𑀧𑀲𑁆𑀲𑀘𑁆𑀙𑀤𑀦𑀓𑀁 𑀳𑁄𑀢𑀺. 𑀧𑀸𑀲𑀸𑀤𑁄 𑀦𑀸𑀫 𑀆𑀬𑀢𑀘𑀢𑀼𑀭𑀲𑁆𑀲𑀧𑀸𑀲𑀸𑀤𑁄. 𑀳𑀫𑁆𑀫𑀺𑀬𑀁 𑀫𑀼𑀡𑁆𑀟𑀘𑁆𑀙𑀤𑀦𑀁 𑀘𑀦𑁆𑀤𑀺𑀓𑀗𑁆𑀕𑀡𑀬𑀼𑀢𑁆𑀢𑀁. 𑀕𑀼𑀳𑀸 𑀦𑀸𑀫 𑀓𑁂𑀯𑀮𑀸 𑀧𑀩𑁆𑀩𑀢𑀕𑀼𑀳𑀸. 𑀮𑁂𑀡𑀁 𑀤𑁆𑀯𑀸𑀭𑀩𑀤𑁆𑀥𑀁 𑀧𑀩𑁆𑀪𑀸𑀭𑀁. 𑀫𑀡𑁆𑀟𑀧𑁄𑀢𑀺 𑀲𑀸𑀔𑀸𑀫𑀡𑁆𑀟𑀧𑁄. 𑀆𑀯𑀲𑀣𑀪𑀽𑀢𑀁 𑀲𑁂𑀦𑀸𑀲𑀦𑀁 𑀯𑀺𑀳𑀭𑀺𑀢𑀩𑁆𑀩𑀝𑁆𑀞𑁂𑀦 𑀯𑀺𑀳𑀸𑀭𑀲𑁂𑀦𑀸𑀲𑀦𑀁. 𑀫𑀲𑀸𑀭𑀓𑀸𑀤𑀺 𑀫𑀜𑁆𑀘𑀧𑀻𑀞𑀁 𑀢𑀢𑁆𑀣 𑀅𑀢𑁆𑀣𑀭𑀺𑀢𑀩𑁆𑀩𑀪𑀺𑀲𑀺 𑀉𑀧𑀥𑀸𑀦𑀜𑁆𑀘 𑀫𑀜𑁆𑀘𑀧𑀻𑀞𑀲𑀫𑁆𑀩𑀦𑁆𑀥𑀢𑁄 𑀫𑀜𑁆𑀘𑀧𑀻𑀞𑀲𑁂𑀦𑀸𑀲𑀦𑀁. 𑀘𑀺𑀫𑀺𑀮𑀺𑀓𑀸𑀤𑀺 𑀪𑀽𑀫𑀺𑀬𑀁 𑀲𑀦𑁆𑀣𑀭𑀺𑀢𑀩𑁆𑀩𑀢𑀸𑀬 𑀲𑀦𑁆𑀣𑀢𑀲𑁂𑀦𑀸𑀲𑀦𑀁. 𑀅𑀪𑀺𑀲𑀗𑁆𑀔𑀢𑀸𑀪𑀸𑀯𑀢𑁄 𑀓𑁂𑀯𑀮𑀁 𑀲𑀬𑀦𑀲𑁆𑀲 𑀦𑀺𑀲𑀚𑁆𑀚𑀸𑀬 𑀘 𑀑𑀓𑀸𑀲𑀪𑀽𑀢𑀁 𑀭𑀼𑀓𑁆𑀔𑀫𑀽𑀮𑀸𑀤𑀺 𑀧𑀝𑀺𑀓𑁆𑀓𑀫𑀺𑀢𑀩𑁆𑀩𑀝𑁆𑀞𑀸𑀦𑀁 𑀑𑀓𑀸𑀲𑀲𑁂𑀦𑀸𑀲𑀦𑀁. 𑀲𑁂𑀦𑀸𑀲𑀦𑀕𑁆𑀕𑀳𑀡𑁂𑀦 𑀕𑀳𑀺𑀢𑀫𑁂𑀯𑀸𑀢𑀺 ‘‘𑀯𑀺𑀯𑀺𑀢𑁆𑀢𑀁 𑀲𑁂𑀦𑀸𑀲𑀦’’𑀦𑁆𑀢𑀺 𑀇𑀫𑀺𑀦𑀸 𑀲𑁂𑀦𑀸𑀲𑀦𑀕𑁆𑀕𑀳𑀡𑁂𑀦 𑀕𑀳𑀺𑀢𑀫𑁂𑀯 𑀲𑀸𑀫𑀜𑁆𑀜𑀚𑁄𑀢𑀦𑀸𑀪𑀸𑀯𑀢𑁄.
𑀬𑀤𑀺 𑀏𑀯𑀁 𑀓𑀲𑁆𑀫𑀸 ‘‘𑀅𑀭𑀜𑁆𑀜’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀇𑀫𑀲𑁆𑀲 𑀧𑀦𑀸’’𑀢𑀺𑀆𑀤𑀺. 𑀪𑀺𑀓𑁆𑀔𑀼𑀦𑀻𑀦𑀁 𑀯𑀲𑁂𑀦 𑀆𑀕𑀢𑀦𑁆𑀢𑀺 𑀇𑀤𑀁 𑀯𑀺𑀦𑀬𑁂 𑀢𑀣𑀸 𑀆𑀕𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀅𑀪𑀺𑀥𑀫𑁆𑀫𑁂𑀧𑀺 (𑀯𑀺𑀪. 𑁫𑁨𑁯) 𑀧𑀦 ‘‘𑀅𑀭𑀜𑁆𑀜𑀦𑁆𑀢𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀳𑀺 𑀇𑀦𑁆𑀤𑀔𑀺𑀮𑀸 𑀲𑀩𑁆𑀩𑀫𑁂𑀢𑀁 𑀅𑀭𑀜𑁆𑀜’’𑀦𑁆𑀢𑀺 𑀆𑀕𑀢𑀫𑁂𑀯. 𑀢𑀢𑁆𑀣 𑀳𑀺 𑀬𑀁 𑀦 𑀕𑀸𑀫𑀧𑁆𑀧𑀤𑁂𑀲𑀦𑁆𑀢𑁄𑀕𑀥𑀁, 𑀢𑀁 𑀅𑀭𑀜𑁆𑀜𑀦𑁆𑀢𑀺 𑀦𑀺𑀧𑁆𑀧𑀭𑀺𑀬𑀸𑀬𑀯𑀲𑁂𑀦 𑀢𑀣𑀸 𑀯𑀼𑀢𑁆𑀢𑀁. 𑀥𑀼𑀢𑀗𑁆𑀕𑀦𑀺𑀤𑁆𑀤𑁂𑀲𑁂 (𑀯𑀺𑀲𑀼𑀤𑁆𑀥𑀺. 𑁧.𑁩𑁧) 𑀬𑀁 𑀯𑀼𑀢𑁆𑀢𑀁, 𑀢𑀁 𑀬𑀼𑀢𑁆𑀢𑀁, 𑀢𑀲𑁆𑀫𑀸 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦 𑀕𑀳𑁂𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀭𑀼𑀓𑁆𑀔𑀫𑀽𑀮𑀦𑁆𑀢𑀺 𑀭𑀼𑀓𑁆𑀔𑀲𑀫𑀻𑀧𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀬𑀸𑀯𑀢𑀸 𑀫𑀚𑁆𑀛𑀦𑁆𑀳𑀺𑀓𑁂 𑀓𑀸𑀮𑁂 𑀲𑀫𑀦𑁆𑀢𑀸 𑀙𑀸𑀬𑀸 𑀨𑀭𑀢𑀺, 𑀦𑀺𑀯𑀸𑀢𑁂 𑀧𑀡𑁆𑀡𑀸𑀦𑀺 𑀧𑀢𑀦𑁆𑀢𑀺, 𑀏𑀢𑁆𑀢𑀸𑀯𑀢𑀸 𑀭𑀼𑀓𑁆𑀔𑀫𑀽𑀮’’𑀦𑁆𑀢𑀺. 𑀲𑁂𑀮-𑀲𑀤𑁆𑀤𑁄 𑀅𑀯𑀺𑀲𑁂𑀲𑀢𑁄 𑀧𑀩𑁆𑀩𑀢𑀧𑀭𑀺𑀬𑀸𑀬𑁄𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀧𑀩𑁆𑀩𑀢𑀦𑁆𑀢𑀺 𑀲𑁂𑀮’’𑀦𑁆𑀢𑀺, 𑀦 𑀲𑀺𑀮𑀸𑀫𑀬𑀫𑁂𑀯. 𑀧𑀁𑀲𑀼𑀫𑀬𑀸𑀤𑀺𑀓𑁄 𑀳𑀺 𑀢𑀺𑀯𑀺𑀥𑁄𑀧𑀺 𑀧𑀩𑁆𑀩𑀢𑁄 𑀏𑀯𑀸𑀢𑀺. 𑀯𑀺𑀯𑀭𑀦𑁆𑀢𑀺 𑀤𑁆𑀯𑀺𑀦𑁆𑀦𑀁 𑀧𑀩𑁆𑀩𑀢𑀸𑀦𑀁 𑀫𑀺𑀣𑁄 𑀆𑀲𑀦𑁆𑀦𑀢𑀭𑁂 𑀞𑀺𑀢𑀸𑀦𑀁 𑀑𑀯𑀭𑀓𑀸𑀤𑀺𑀲𑀤𑀺𑀲𑀁 𑀯𑀺𑀯𑀭𑀁. 𑀏𑀓𑀲𑁆𑀫𑀺𑀁𑀬𑁂𑀯 𑀯𑀸 𑀧𑀩𑁆𑀩𑀢𑁂. 𑀉𑀫𑀗𑁆𑀕𑀲𑀤𑀺𑀲𑀦𑁆𑀢𑀺 𑀲𑀼𑀤𑀼𑀗𑁆𑀕𑀸𑀲𑀤𑀺𑀲𑀁. 𑀫𑀦𑀼𑀲𑁆𑀲𑀸𑀦𑀁 𑀅𑀦𑀼𑀧𑀘𑀸𑀭𑀝𑁆𑀞𑀸𑀦𑀦𑁆𑀢𑀺 𑀧𑀓𑀢𑀺𑀲𑀜𑁆𑀘𑀸𑀭𑀯𑀲𑁂𑀦 𑀫𑀦𑀼𑀲𑁆𑀲𑁂𑀳𑀺 𑀦 𑀲𑀜𑁆𑀘𑀭𑀺𑀢𑀩𑁆𑀩𑀝𑁆𑀞𑀸𑀦𑀁. 𑀆𑀤𑀺-𑀲𑀤𑁆𑀤𑁂𑀦 ‘‘𑀯𑀦𑀧𑀢𑁆𑀣𑀦𑁆𑀢𑀺 𑀯𑀦𑀲𑀡𑁆𑀟𑀸𑀦𑀫𑁂𑀢𑀁 𑀲𑁂𑀦𑀸𑀲𑀦𑀸𑀦𑀁 𑀅𑀥𑀺𑀯𑀘𑀦𑀁. 𑀯𑀦𑀧𑀢𑁆𑀣𑀦𑁆𑀢𑀺 𑀪𑀺𑀁𑀲𑀦𑀓𑀸𑀦𑀫𑁂𑀢𑀁. 𑀯𑀦𑀧𑀢𑁆𑀣𑀦𑁆𑀢𑀺 𑀲𑀮𑁄𑀫𑀳𑀁𑀲𑀸𑀦𑀫𑁂𑀢𑀁. 𑀯𑀦𑀧𑀢𑁆𑀣𑀦𑁆𑀢𑀺 𑀧𑀭𑀺𑀬𑀦𑁆𑀢𑀸𑀦𑀫𑁂𑀢𑀁. 𑀯𑀦𑀧𑀢𑁆𑀣𑀦𑁆𑀢𑀺 𑀦 𑀫𑀦𑀼𑀲𑁆𑀲𑀽𑀧𑀘𑀸𑀭𑀸𑀦𑀫𑁂𑀢𑀁 𑀲𑁂𑀦𑀸𑀲𑀦𑀸𑀦𑀁 𑀅𑀥𑀺𑀯𑀘𑀦’’𑀦𑁆𑀢𑀺 (𑀯𑀺𑀪. 𑁫𑁩𑁧) 𑀇𑀫𑀁 𑀧𑀸𑀴𑀺𑀧𑁆𑀧𑀤𑁂𑀲𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀘𑁆𑀙𑀦𑁆𑀦𑀦𑁆𑀢𑀺 𑀓𑁂𑀦𑀘𑀺 𑀙𑀤𑀦𑁂𑀦 𑀅𑀦𑁆𑀢𑀫𑀲𑁄 𑀭𑀼𑀓𑁆𑀔𑀲𑀸𑀔𑀸𑀬𑀧𑀺 𑀦 𑀙𑀸𑀤𑀺𑀢𑀁. 𑀦𑀺𑀓𑁆𑀓𑀟𑁆𑀠𑀺𑀢𑁆𑀯𑀸𑀢𑀺 𑀦𑀻𑀳𑀭𑀺𑀢𑁆𑀯𑀸. 𑀧𑀩𑁆𑀪𑀸𑀭𑀮𑁂𑀡𑀲𑀤𑀺𑀲𑁂𑀢𑀺 𑀧𑀩𑁆𑀪𑀸𑀭𑀲𑀤𑀺𑀲𑁂, 𑀮𑁂𑀡𑀲𑀤𑀺𑀲𑁂 𑀯𑀸.
𑀧𑀺𑀡𑁆𑀟𑀧𑀸𑀢𑀧𑀭𑀺𑀬𑁂𑀲𑀦𑀁 𑀧𑀺𑀡𑁆𑀟𑀧𑀸𑀢𑁄 𑀉𑀢𑁆𑀢𑀭𑀧𑀤𑀮𑁄𑀧𑁂𑀦𑀸𑀢𑀺 𑀆𑀳 ‘‘𑀧𑀺𑀡𑁆𑀟𑀧𑀸𑀢𑀧𑀭𑀺𑀬𑁂𑀲𑀦𑀢𑁄 𑀧𑀝𑀺𑀓𑁆𑀓𑀦𑁆𑀢𑁄’’𑀢𑀺. 𑀧𑀮𑁆𑀮𑀗𑁆𑀓𑀦𑁆𑀢𑀺 𑀏𑀢𑁆𑀣 𑀧𑀭𑀺-𑀲𑀤𑁆𑀤𑁄 𑀲𑀫𑀦𑁆𑀢𑀢𑁄𑀢𑀺 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂, 𑀢𑀲𑁆𑀫𑀸 𑀯𑀸𑀫𑁄𑀭𑀼𑀁 𑀤𑀓𑁆𑀔𑀺𑀡𑁄𑀭𑀼𑀜𑁆𑀘 𑀲𑀫𑀁 𑀞𑀧𑁂𑀢𑁆𑀯𑀸 𑀉𑀪𑁄 𑀧𑀸𑀤𑁂 𑀅𑀜𑁆𑀜𑀫𑀜𑁆𑀜𑀁 𑀲𑀫𑁆𑀩𑀦𑁆𑀥𑁂 𑀓𑀢𑁆𑀯𑀸 𑀦𑀺𑀲𑀚𑁆𑀚𑀸 𑀧𑀮𑁆𑀮𑀗𑁆𑀓𑀦𑁆𑀢𑀺 𑀆𑀳 ‘‘𑀲𑀫𑀦𑁆𑀢𑀢𑁄 𑀊𑀭𑀼𑀩𑀤𑁆𑀥𑀸𑀲𑀦’’𑀦𑁆𑀢𑀺. 𑀊𑀭𑀽𑀦𑀁 𑀩𑀦𑁆𑀥𑀦𑀯𑀲𑁂𑀦 𑀦𑀺𑀲𑀚𑁆𑀚𑀸 𑀧𑀮𑁆𑀮𑀗𑁆𑀓𑀁. 𑀆𑀪𑀼𑀚𑀺𑀢𑁆𑀯𑀸𑀢𑀺 𑀘 𑀬𑀣𑀸 𑀧𑀮𑁆𑀮𑀗𑁆𑀓𑀯𑀲𑁂𑀦 𑀦𑀺𑀲𑀚𑁆𑀚𑀸 𑀳𑁄𑀢𑀺, 𑀏𑀯𑀁 𑀉𑀪𑁄 𑀧𑀸𑀤𑁂 𑀆𑀪𑀼𑀚𑀺𑀢𑁂 𑀲𑀫𑀺𑀜𑁆𑀚𑀺𑀢𑁂 𑀓𑀢𑁆𑀯𑀸. 𑀢𑀁 𑀧𑀦 𑀉𑀪𑀺𑀦𑁆𑀦𑀁 𑀧𑀸𑀤𑀸𑀦𑀁 𑀢𑀣𑀸𑀲𑀫𑁆𑀩𑀦𑁆𑀥𑀢𑀸𑀓𑀭𑀡𑀦𑁆𑀢𑀺 𑀆𑀳 ‘‘𑀩𑀦𑁆𑀥𑀺𑀢𑁆𑀯𑀸’’𑀢𑀺. 𑀳𑁂𑀝𑁆𑀞𑀺𑀫𑀓𑀸𑀬𑀲𑁆𑀲 𑀅𑀦𑀼𑀚𑀼𑀓𑀁 𑀞𑀧𑀦𑀁 𑀦𑀺𑀲𑀚𑁆𑀚𑀸𑀯𑀘𑀦𑁂𑀦𑁂𑀯 𑀩𑁄𑀥𑀺𑀢𑀦𑁆𑀢𑀺 𑀉𑀚𑀼𑀁 𑀓𑀸𑀬𑀦𑁆𑀢𑀺 𑀏𑀢𑁆𑀣 𑀓𑀸𑀬-𑀲𑀤𑁆𑀤𑁄 𑀉𑀧𑀭𑀺𑀫𑀓𑀸𑀬𑀯𑀺𑀲𑀬𑁄𑀢𑀺 𑀆𑀳 ‘‘𑀉𑀧𑀭𑀺𑀫𑀲𑀭𑀻𑀭𑀁 𑀉𑀚𑀼𑀓𑀁 𑀞𑀧𑁂𑀢𑁆𑀯𑀸’’𑀢𑀺. 𑀢𑀁 𑀧𑀦 𑀉𑀚𑀼𑀓𑀁 𑀞𑀧𑀦𑀁 𑀲𑀭𑀽𑀧𑀢𑁄 𑀧𑀬𑁄𑀚𑀦𑀢𑁄 𑀘 𑀤𑀲𑁆𑀲𑁂𑀢𑀼𑀁 ‘‘𑀅𑀝𑁆𑀞𑀸𑀭𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦 𑀧𑀡𑀫𑀦𑁆𑀢𑀻𑀢𑀺 𑀦 𑀑𑀡𑀫𑀦𑁆𑀢𑀺. 𑀦 𑀧𑀭𑀺𑀧𑀢𑀢𑀻𑀢𑀺 𑀦 𑀯𑀺𑀕𑀘𑁆𑀙𑀢𑀺 𑀯𑀻𑀣𑀺𑀁 𑀦 𑀮𑀗𑁆𑀖𑁂𑀢𑀺, 𑀢𑀢𑁄 𑀏𑀯 𑀧𑀼𑀩𑁆𑀩𑁂𑀦𑀸𑀧𑀭𑀁 𑀯𑀺𑀲𑁂𑀲𑀲𑀫𑁆𑀧𑀢𑁆𑀢𑀺𑀬𑀸 𑀓𑀫𑁆𑀫𑀝𑁆𑀞𑀸𑀦𑀁 𑀯𑀼𑀤𑁆𑀥𑀺𑀁 𑀨𑀸𑀢𑀺𑀁 𑀕𑀘𑁆𑀙𑀢𑀺. 𑀧𑀭𑀺𑀫𑀼𑀔𑀦𑁆𑀢𑀺 𑀏𑀢𑁆𑀣 𑀧𑀭𑀺-𑀲𑀤𑁆𑀤𑁄 𑀅𑀪𑀺-𑀲𑀤𑁆𑀤𑁂𑀦 𑀲𑀫𑀸𑀦𑀢𑁆𑀣𑁄𑀢𑀺 𑀆𑀳 ‘‘𑀓𑀫𑁆𑀫𑀝𑁆𑀞𑀸𑀦𑀸𑀪𑀺𑀫𑀼𑀔’’𑀦𑁆𑀢𑀺, 𑀩𑀳𑀺𑀤𑁆𑀥𑀸 𑀧𑀼𑀣𑀼𑀢𑁆𑀢𑀸𑀭𑀫𑁆𑀫𑀡𑀢𑁄 𑀦𑀺𑀯𑀸𑀭𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁𑀬𑁂𑀯 𑀧𑀼𑀭𑀓𑁆𑀔𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀫𑀻𑀧𑀢𑁆𑀣𑁄 𑀯𑀸 𑀧𑀭𑀺-𑀲𑀤𑁆𑀤𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀼𑀔𑀲𑀫𑀻𑀧𑁂 𑀯𑀸 𑀓𑀢𑁆𑀯𑀸’’𑀢𑀺 𑀆𑀳. 𑀏𑀢𑁆𑀣 𑀘 𑀬𑀣𑀸 ‘‘𑀯𑀺𑀯𑀺𑀢𑁆𑀢𑀁 𑀲𑁂𑀦𑀸𑀲𑀦𑀁 𑀪𑀚𑀢𑀻’’𑀢𑀺𑀆𑀤𑀺𑀦𑀸 𑀪𑀸𑀯𑀦𑀸𑀦𑀼𑀭𑀽𑀧𑀁 𑀲𑁂𑀦𑀸𑀲𑀦𑀁 𑀤𑀲𑁆𑀲𑀺𑀢𑀁, 𑀏𑀯𑀁 𑀦𑀺𑀲𑀻𑀤𑀢𑀻𑀢𑀺 𑀇𑀫𑀺𑀦𑀸 𑀅𑀮𑀻𑀦𑀸𑀦𑀼𑀤𑁆𑀥𑀘𑁆𑀘𑀧𑀓𑁆𑀔𑀺𑀬𑁄 𑀲𑀦𑁆𑀢𑁄 𑀇𑀭𑀺𑀬𑀸𑀧𑀣𑁄 𑀤𑀲𑁆𑀲𑀺𑀢𑁄. ‘‘𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀦𑀺𑀲𑀚𑁆𑀚𑀸𑀬 𑀤𑀴𑁆𑀳𑀪𑀸𑀯𑁄. ‘‘𑀧𑀭𑀺𑀫𑀼𑀔𑀁 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀆𑀭𑀫𑁆𑀫𑀡𑀧𑀭𑀺𑀕𑁆𑀕𑀳𑀽𑀧𑀸𑀬𑁄.
𑀧𑀭𑀻𑀢𑀺 𑀧𑀭𑀺𑀕𑁆𑀕𑀳𑀝𑁆𑀞𑁄 ‘‘𑀧𑀭𑀺𑀡𑀸𑀬𑀺𑀓𑀸’’𑀢𑀺𑀆𑀤𑀻𑀲𑀼 (𑀥. 𑀲. 𑁧𑁬, 𑁨𑁦) 𑀯𑀺𑀬. 𑀫𑀼𑀔𑀦𑁆𑀢𑀺 𑀦𑀺𑀬𑁆𑀬𑀸𑀦𑀝𑁆𑀞𑁄 ‘‘𑀲𑀼𑀜𑁆𑀜𑀢𑀯𑀺𑀫𑁄𑀓𑁆𑀔𑀫𑀼𑀔’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬. 𑀧𑀝𑀺𑀧𑀓𑁆𑀔𑀢𑁄 𑀦𑀺𑀕𑁆𑀕𑀫𑀦𑀝𑁆𑀞𑁄 𑀳𑀺 𑀦𑀺𑀬𑁆𑀬𑀸𑀦𑀝𑁆𑀞𑁄, 𑀢𑀲𑁆𑀫𑀸 𑀧𑀭𑀺𑀕𑁆𑀕𑀳𑀺𑀢𑀦𑀺𑀬𑁆𑀬𑀸𑀦𑀁 𑀲𑀢𑀺𑀦𑁆𑀢𑀺 𑀲𑀩𑁆𑀩𑀣𑀸 𑀕𑀳𑀺𑀢𑀸𑀲𑀫𑁆𑀫𑁄𑀲𑀁 𑀧𑀭𑀺𑀘𑁆𑀘𑀢𑁆𑀢𑀲𑀫𑁆𑀫𑁄𑀲𑀁 𑀲𑀢𑀺𑀁 𑀓𑀢𑁆𑀯𑀸, 𑀧𑀭𑀫𑀲𑀢𑀺𑀦𑁂𑀧𑀓𑁆𑀓𑀁 𑀉𑀧𑀝𑁆𑀞𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄.
𑀅𑀪𑀺𑀚𑁆𑀛𑀸𑀬𑀢𑀺 𑀕𑀺𑀚𑁆𑀛𑀢𑀺 𑀅𑀪𑀺𑀓𑀗𑁆𑀔𑀢𑀺 𑀏𑀢𑀸𑀬𑀸𑀢𑀺 𑀅𑀪𑀺𑀚𑁆𑀛𑀸, 𑀮𑁄𑀪𑁄. 𑀮𑀼𑀚𑁆𑀚𑀦𑀝𑁆𑀞𑁂𑀦𑀸𑀢𑀺 𑀪𑀺𑀚𑁆𑀚𑀦𑀝𑁆𑀞𑁂𑀦, 𑀔𑀡𑁂 𑀔𑀡𑁂 𑀪𑀺𑀚𑁆𑀚𑀦𑀝𑁆𑀞𑁂𑀦𑀸𑀢𑀺 𑀅𑀢𑁆𑀣𑁄. 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦𑀸𑀢𑀺 𑀏𑀢𑁆𑀣 𑀯𑀺𑀓𑁆𑀔𑀫𑁆𑀪𑀦𑀁 𑀅𑀦𑀼𑀧𑁆𑀧𑀸𑀤𑀦𑀁 𑀅𑀧𑁆𑀧𑀯𑀢𑁆𑀢𑀦𑀁 𑀧𑀝𑀺𑀧𑀓𑁆𑀔𑁂𑀦 𑀲𑀼𑀧𑁆𑀧𑀳𑀻𑀦𑀢𑁆𑀢𑀸. 𑀧𑀳𑀻𑀦𑀢𑁆𑀢𑀸𑀢𑀺 𑀘 𑀧𑀳𑀻𑀦𑀲𑀤𑀺𑀲𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑀛𑀸𑀦𑀲𑁆𑀲 𑀅𑀦𑀥𑀺𑀕𑀢𑀢𑁆𑀢𑀸. 𑀢𑀣𑀸𑀧𑀺 𑀦𑀬𑀺𑀤𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀯𑀺𑀬 𑀲𑀪𑀸𑀯𑀢𑁄 𑀯𑀺𑀕𑀢𑀸𑀪𑀺𑀚𑁆𑀛𑀁, 𑀅𑀣 𑀔𑁄 𑀪𑀸𑀯𑀦𑀸𑀯𑀲𑁂𑀦. 𑀢𑁂𑀦𑀸𑀳 ‘‘𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑀤𑀺𑀲𑁂𑀦𑀸’’𑀢𑀺. 𑀏𑀲𑁂𑀯 𑀦𑀬𑁄𑀢𑀺 𑀬𑀣𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀲𑀪𑀸𑀯𑁂𑀦 𑀯𑀺𑀕𑀢𑀸𑀪𑀺𑀚𑁆𑀛𑀁 𑀅𑀩𑁆𑀬𑀸𑀧𑀦𑁆𑀦𑀜𑁆𑀘 𑀦 𑀪𑀸𑀯𑀦𑀸𑀬 𑀯𑀺𑀓𑁆𑀔𑀫𑁆𑀪𑀺𑀢𑀢𑁆𑀢𑀸, 𑀦 𑀏𑀯𑀫𑀺𑀤𑀁. 𑀇𑀤𑀁 𑀧𑀦 𑀘𑀺𑀢𑁆𑀢𑀁 𑀪𑀸𑀯𑀦𑀸𑀬 𑀧𑀭𑀺𑀲𑁄𑀥𑀺𑀢𑀢𑁆𑀢𑀸 𑀅𑀩𑁆𑀬𑀸𑀧𑀦𑁆𑀦𑀁 𑀯𑀺𑀕𑀢𑀣𑀺𑀦𑀫𑀺𑀤𑁆𑀥𑀁 𑀅𑀦𑀼𑀤𑁆𑀥𑀢𑀁 𑀦𑀺𑀩𑁆𑀩𑀺𑀘𑀺𑀓𑀺𑀘𑁆𑀙𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀧𑀼𑀭𑀺𑀫𑀧𑀓𑀢𑀺𑀦𑁆𑀢𑀺 𑀧𑀭𑀺𑀲𑀼𑀤𑁆𑀥𑀧𑀡𑁆𑀟𑀭𑀲𑀪𑀸𑀯𑀁. ‘‘𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀲𑁆𑀲 𑀅𑀓𑀮𑁆𑀬𑀢𑀸’’𑀢𑀺𑀆𑀤𑀺𑀦𑀸 (𑀥. 𑀲. 𑁧𑁧𑁬𑁨; 𑀯𑀺𑀪. 𑁫𑁪𑁬) 𑀣𑀺𑀦𑀲𑁆𑀲, ‘‘𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀓𑀸𑀬𑀲𑁆𑀲 𑀅𑀓𑀮𑁆𑀬𑀢𑀸’’𑀢𑀺𑀆𑀤𑀺𑀦𑀸 (𑀥. 𑀲. 𑁧𑁧𑁬𑁩; 𑀯𑀺𑀪. 𑁫𑁪𑁬) 𑀘 𑀫𑀺𑀤𑁆𑀥𑀲𑁆𑀲 𑀅𑀪𑀺𑀥𑀫𑁆𑀫𑁂 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀣𑀺𑀦𑀁 𑀘𑀺𑀢𑁆𑀢𑀕𑁂𑀮𑀜𑁆𑀜𑀁, 𑀫𑀺𑀤𑁆𑀥𑀁 𑀘𑁂𑀢𑀲𑀺𑀓𑀕𑁂𑀮𑀜𑁆𑀜’’𑀦𑁆𑀢𑀺. 𑀲𑀢𑀺𑀧𑀺 𑀳𑀺 𑀅𑀜𑁆𑀜𑀫𑀜𑁆𑀜𑀁 𑀅𑀯𑀺𑀧𑁆𑀧𑀬𑁄𑀕𑁂 𑀘𑀺𑀢𑁆𑀢𑀓𑀸𑀬𑀮𑀳𑀼𑀢𑀸𑀤𑀻𑀦𑀁 𑀯𑀺𑀬 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀬𑀣𑀸𑀓𑁆𑀓𑀫𑀁 𑀢𑀁𑀢𑀁𑀯𑀺𑀲𑁂𑀲𑀲𑁆𑀲 𑀬𑀸 𑀢𑁂𑀲𑀁 𑀅𑀓𑀮𑁆𑀬𑀢𑀸𑀤𑀻𑀦𑀁 𑀯𑀺𑀲𑁂𑀲𑀧𑀘𑁆𑀘𑀬𑀢𑀸, 𑀅𑀬𑀫𑁂𑀢𑁂𑀲𑀁 𑀲𑀪𑀸𑀯𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀆𑀮𑁄𑀓𑀲𑀜𑁆𑀜𑀻𑀢𑀺 𑀏𑀢𑁆𑀣 𑀅𑀢𑀺𑀲𑀬𑀢𑁆𑀢𑀯𑀺𑀲𑀺𑀝𑁆𑀞𑀅𑀢𑁆𑀣𑀺𑀅𑀢𑁆𑀣𑀸𑀯𑀩𑁄𑀥𑀓𑁄𑀬𑀫𑀻𑀓𑀸𑀭𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀭𑀢𑁆𑀢𑀺𑀫𑁆𑀧𑀺…𑀧𑁂… 𑀲𑀫𑀦𑁆𑀦𑀸𑀕𑀢𑁄’’𑀢𑀺. 𑀇𑀤𑀁 𑀉𑀪𑀬𑀦𑁆𑀢𑀺 𑀲𑀢𑀺𑀲𑀫𑁆𑀧𑀚𑀜𑁆𑀜𑀫𑀸𑀳.
𑀅𑀢𑀺𑀓𑁆𑀓𑀫𑀺𑀢𑁆𑀯𑀸𑀢𑀺 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀧𑀚𑀳𑀺𑀢𑁆𑀯𑀸. 𑀓𑀣𑀫𑀺𑀤𑀁 𑀓𑀣𑀫𑀺𑀤𑀦𑁆𑀢𑀺 𑀧𑀯𑀢𑁆𑀢𑀺𑀬𑀸 𑀓𑀣𑀁𑀓𑀣𑀸, 𑀯𑀺𑀘𑀺𑀓𑀺𑀘𑁆𑀙𑀸, 𑀲𑀸 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀓𑀣𑀁𑀓𑀣𑀻, 𑀦 𑀓𑀣𑀁𑀓𑀣𑀻𑀢𑀺 𑀅𑀓𑀣𑀁𑀓𑀣𑀻, 𑀦𑀺𑀩𑁆𑀩𑀺𑀘𑀺𑀓𑀺𑀘𑁆𑀙𑁄. 𑀮𑀓𑁆𑀔𑀡𑀸𑀤𑀺𑀪𑁂𑀤𑀢𑁄𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀧𑀘𑁆𑀘𑀬𑀧𑀭𑀺𑀳𑀸𑀦𑀧𑁆𑀧𑀳𑀸𑀬𑀓𑀸𑀤𑀻𑀦𑀫𑁆𑀧𑀺 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀢𑁂𑀧𑀺 𑀳𑀺 𑀧𑀪𑁂𑀤𑀢𑁄 𑀤𑀝𑁆𑀞𑀩𑁆𑀩𑀸𑀢𑀺. 𑀉𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀸𑀢𑁂𑀦𑁆𑀢𑀻𑀢𑀺 𑀏𑀢𑁆𑀣 𑀉𑀘𑁆𑀙𑀺𑀦𑁆𑀤𑀦𑀁 𑀧𑀸𑀢𑀦𑀜𑁆𑀘 𑀢𑀸𑀲𑀁 𑀧𑀜𑁆𑀜𑀸𑀦𑀁 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀉𑀧𑁆𑀧𑀚𑁆𑀚𑀺𑀢𑀼𑀁 𑀅𑀧𑁆𑀧𑀤𑀸𑀦𑀫𑁂𑀯. 𑀇𑀢𑀺 𑀫𑀳𑀕𑁆𑀕𑀢𑀸𑀦𑀼𑀢𑁆𑀢𑀭𑀧𑀜𑁆𑀜𑀸𑀦𑀁 𑀏𑀓𑀘𑁆𑀘𑀸𑀬 𑀘 𑀧𑀭𑀺𑀢𑁆𑀢𑀧𑀜𑁆𑀜𑀸𑀬 𑀅𑀦𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀽𑀢𑀸 𑀦𑀻𑀯𑀭𑀡𑀥𑀫𑁆𑀫𑀸 𑀇𑀢𑀭𑀸𑀬 𑀘 𑀲𑀫𑀢𑁆𑀣𑀢𑀁 𑀯𑀺𑀳𑀦𑀦𑁆𑀢𑀺𑀬𑁂𑀯𑀸𑀢𑀺 ‘‘𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑀸’’𑀢𑀺 𑀯𑀼𑀢𑁆𑀢𑀸. 𑀅𑀧𑁆𑀧𑁂𑀦𑁆𑀢𑁄𑀢𑀺 𑀦𑀺𑀕𑀫𑁂𑀦𑁆𑀢𑁄.
𑀅𑀢𑁆𑀢𑀦𑁆𑀢𑀧𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.
𑁯-𑁧𑁦. 𑀢𑀡𑁆𑀳𑀸𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸
𑁧𑁯𑁯-𑁨𑁦𑁦. 𑀦𑀯𑀫𑁂 𑀢𑀬𑁄 𑀪𑀯𑁂 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀞𑀺𑀢𑀁 ‘‘𑀅𑀚𑁆𑀛𑀢𑁆𑀢𑀺𑀓𑀲𑁆𑀲 𑀉𑀧𑀸𑀤𑀸𑀬 𑀅𑀝𑁆𑀞𑀸𑀭𑀲 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀁 𑀢𑀁 𑀢𑀁 𑀅𑀢𑁆𑀢𑀦𑁄 𑀓𑁄𑀝𑁆𑀞𑀸𑀲𑀪𑀽𑀢𑀁 𑀚𑀸𑀮𑀫𑁂𑀢𑀺𑀲𑁆𑀲𑀸 𑀅𑀢𑁆𑀣𑀻𑀢𑀺 𑀚𑀸𑀮𑀺𑀦𑀻. 𑀢𑁂𑀦𑀸𑀳 ‘‘𑀢𑀬𑁄 𑀯𑀸 𑀪𑀯𑁂’’𑀢𑀺𑀆𑀤𑀺. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀪𑀯𑁂, 𑀆𑀭𑀫𑁆𑀫𑀡𑁂 𑀯𑀸. 𑀅𑀧𑀺𑀘𑀸𑀢𑀺𑀆𑀤𑀺𑀦𑀸 𑀦𑀺𑀤𑁆𑀤𑁂𑀲𑀦𑀬𑁂𑀦 𑀯𑀺𑀲𑀢𑁆𑀢𑀺𑀓𑀸𑀧𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀦𑀺𑀤𑁆𑀤𑁂𑀲𑀧𑀸𑀴𑀺𑀬𑀸 𑀏𑀓𑀤𑁂𑀲𑀁 𑀤𑀲𑁆𑀲𑁂𑀢𑀺 ‘‘𑀯𑀺𑀲𑀫𑀽𑀮𑀸’’𑀢𑀺𑀆𑀤𑀺𑀦𑀸. 𑀅𑀬𑀜𑁆𑀳𑁂𑀢𑁆𑀣 𑀦𑀺𑀤𑁆𑀤𑁂𑀲𑀧𑀸𑀴𑀺 (𑀫𑀳𑀸𑀦𑀺. 𑁩; 𑀘𑀽𑀴𑀦𑀺. 𑀫𑁂𑀢𑁆𑀢𑀕𑀽𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄 𑁨𑁨, 𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁄 𑁧𑁨𑁪) 𑁋
‘‘𑀯𑀺𑀲𑀢𑁆𑀢𑀺𑀓𑀸𑀢𑀺 𑀓𑁂𑀦𑀝𑁆𑀞𑁂𑀦 𑀯𑀺𑀲𑀢𑁆𑀢𑀺𑀓𑀸? 𑀯𑀺𑀲𑀢𑀸𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀝𑀸𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀸𑀮𑀸𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀓𑁆𑀓𑀢𑀻𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀁𑀳𑀭𑀢𑀻𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀁𑀯𑀸𑀤𑀺𑀓𑀸𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀫𑀽𑀮𑀸𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀨𑀮𑀸𑀢𑀺 𑀯𑀺𑀲𑀢𑁆𑀢𑀺𑀓𑀸. 𑀯𑀺𑀲𑀧𑀭𑀺𑀪𑁄𑀕𑀸𑀢𑀺 𑀯𑀺𑀲𑀢𑁆𑀢𑀺𑀓𑀸. 𑀯𑀺𑀲𑀸𑀮𑀸 𑀯𑀸 𑀧𑀦 𑀲𑀸 𑀢𑀡𑁆𑀳𑀸 𑀭𑀽𑀧𑁂 𑀲𑀤𑁆𑀤𑁂 𑀕𑀦𑁆𑀥𑁂 𑀭𑀲𑁂 𑀨𑁄𑀝𑁆𑀞𑀩𑁆𑀩𑁂 𑀓𑀼𑀮𑁂 𑀕𑀡𑁂 𑀆𑀯𑀸𑀲𑁂 𑀮𑀸𑀪𑁂 𑀬𑀲𑁂 𑀧𑀲𑀁𑀲𑀸𑀬 𑀲𑀼𑀔𑁂 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂 𑀓𑀸𑀫𑀥𑀸𑀢𑀼𑀬𑀸 𑀭𑀽𑀧𑀥𑀸𑀢𑀼𑀬𑀸 𑀅𑀭𑀽𑀧𑀥𑀸𑀢𑀼𑀬𑀸 𑀓𑀸𑀫𑀪𑀯𑁂 𑀭𑀽𑀧𑀪𑀯𑁂 𑀅𑀭𑀽𑀧𑀪𑀯𑁂 𑀲𑀜𑁆𑀜𑀺𑀪𑀯𑁂 𑀅𑀲𑀜𑁆𑀜𑀺𑀪𑀯𑁂 𑀦𑁂𑀯𑀲𑀜𑁆𑀜𑀺𑀦𑀸𑀲𑀜𑁆𑀜𑀺𑀪𑀯𑁂 𑀏𑀓𑀯𑁄𑀓𑀸𑀭𑀪𑀯𑁂 𑀘𑀢𑀼𑀯𑁄𑀓𑀸𑀭𑀪𑀯𑁂 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀅𑀢𑀻𑀢𑁂 𑀅𑀦𑀸𑀕𑀢𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑀩𑁆𑀩𑁂𑀲𑀼 𑀯𑀺𑀲𑀝𑀸 𑀯𑀺𑀢𑁆𑀣𑀢𑀸𑀢𑀺 𑀯𑀺𑀲𑀢𑁆𑀢𑀺𑀓𑀸’’𑀢𑀺.
𑀢𑀢𑁆𑀣 (𑀫𑀳𑀸𑀦𑀺. 𑀅𑀝𑁆𑀞. 𑁩; 𑀲𑀁. 𑀦𑀺. 𑀝𑀻. 𑁧.𑁧.𑁧 𑀑𑀖𑀢𑀭𑀡𑀲𑀼𑀢𑁆𑀢𑀯𑀡𑁆𑀡𑀦𑀸) 𑀯𑀺𑀲𑀢𑀸𑀢𑀺 𑀯𑀺𑀢𑁆𑀣𑀢𑀸 𑀭𑀽𑀧𑀸𑀤𑀻𑀲𑀼 𑀢𑁂𑀪𑀽𑀫𑀓𑀥𑀫𑁆𑀫𑀩𑁆𑀬𑀸𑀧𑀦𑀯𑀲𑁂𑀦. 𑀯𑀺𑀲𑀝𑀸𑀢𑀺 𑀧𑀼𑀭𑀺𑀫𑀯𑀘𑀦𑀫𑁂𑀯 𑀢-𑀓𑀸𑀭𑀲𑁆𑀲 𑀝-𑀓𑀸𑀭𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀯𑀺𑀲𑀸𑀮𑀸𑀢𑀺 𑀯𑀺𑀧𑀼𑀮𑀸. 𑀯𑀺𑀲𑀓𑁆𑀓𑀢𑀻𑀢𑀺 𑀧𑀭𑀺𑀲𑀳𑀢𑀺. 𑀭𑀢𑁆𑀢𑁄 𑀳𑀺 𑀭𑀸𑀕𑀯𑀢𑁆𑀣𑀼𑀦𑀸 𑀧𑀭𑁂𑀦 𑀢𑀸𑀴𑀺𑀬𑀫𑀸𑀦𑁄𑀧𑀺 𑀲𑀳𑀢𑀺, 𑀯𑀺𑀧𑁆𑀨𑀦𑁆𑀤𑀦𑀁 𑀯𑀸 ‘‘𑀯𑀺𑀲𑀓𑁆𑀓𑀦’’𑀦𑁆𑀢𑀺 𑀯𑀤𑀦𑁆𑀢𑀺. 𑀯𑀺𑀲𑀁𑀳𑀭𑀢𑀻𑀢𑀺 𑀢𑀣𑀸 𑀢𑀣𑀸 𑀓𑀸𑀫𑁂𑀲𑀼 𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀦𑁆𑀢𑀻 𑀯𑀺𑀯𑀺𑀥𑁂𑀳𑀺 𑀆𑀓𑀸𑀭𑁂𑀳𑀺 𑀦𑁂𑀓𑁆𑀔𑀫𑁆𑀫𑀸𑀪𑀺𑀫𑀼𑀔𑀧𑁆𑀧𑀯𑀢𑁆𑀢𑀺𑀢𑁄 𑀘𑀺𑀢𑁆𑀢𑀁 𑀲𑀁𑀳𑀭𑀢𑀺 𑀲𑀁𑀔𑀺𑀧𑀢𑀺. 𑀯𑀺𑀲𑀁 𑀯𑀸 𑀤𑀼𑀓𑁆𑀔𑀁, 𑀢𑀁 𑀳𑀭𑀢𑀺 𑀉𑀧𑀦𑁂𑀢𑀻𑀢𑀺 𑀅𑀢𑁆𑀣𑁄. 𑀅𑀦𑀺𑀘𑁆𑀘𑀸𑀤𑀺𑀁 𑀦𑀺𑀘𑁆𑀘𑀸𑀤𑀺𑀢𑁄 𑀕𑀡𑁆𑀳𑀦𑁆𑀢𑀻 𑀯𑀺𑀲𑀁𑀯𑀸𑀤𑀺𑀓𑀸 𑀳𑁄𑀢𑀺. 𑀤𑀼𑀓𑁆𑀔𑀦𑀺𑀩𑁆𑀩𑀢𑁆𑀢𑀓𑀲𑁆𑀲 𑀓𑀫𑁆𑀫𑀲𑁆𑀲 𑀳𑁂𑀢𑀼𑀪𑀸𑀯𑀢𑁄 𑀯𑀺𑀲𑀫𑀽𑀮𑀸, 𑀯𑀺𑀲𑀁 𑀯𑀸 𑀤𑀼𑀓𑁆𑀔𑀤𑀼𑀓𑁆𑀔𑀸𑀤𑀺𑀪𑀽𑀢𑀸 𑀯𑁂𑀤𑀦𑀸 𑀫𑀽𑀮𑀁 𑀏𑀢𑀺𑀲𑁆𑀲𑀸𑀢𑀺 𑀯𑀺𑀲𑀫𑀽𑀮𑀸. 𑀤𑀼𑀓𑁆𑀔𑀲𑀫𑀼𑀤𑀬𑀢𑁆𑀢𑀸 𑀯𑀺𑀲𑀁 𑀨𑀮𑀁 𑀏𑀢𑀺𑀲𑁆𑀲𑀸𑀢𑀺 𑀯𑀺𑀲𑀨𑀮𑀸. 𑀢𑀡𑁆𑀳𑀸𑀬 𑀭𑀽𑀧𑀸𑀤𑀺𑀓𑀲𑁆𑀲 𑀤𑀼𑀓𑁆𑀔𑀲𑁆𑀲 𑀧𑀭𑀺𑀪𑁄𑀕𑁄 𑀳𑁄𑀢𑀺, 𑀦 𑀅𑀫𑀢𑀲𑁆𑀲𑀸𑀢𑀺 𑀲𑀸 𑀯𑀺𑀲𑀧𑀭𑀺𑀪𑁄𑀕𑀸 𑀯𑀼𑀢𑁆𑀢𑀸. 𑀲𑀩𑁆𑀩𑀢𑁆𑀣 𑀦𑀺𑀭𑀼𑀢𑁆𑀢𑀺𑀯𑀲𑁂𑀦 𑀧𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸. 𑀬𑁄 𑀧𑀦𑁂𑀢𑁆𑀣 𑀧𑀥𑀸𑀦𑁄 𑀅𑀢𑁆𑀣𑁄, 𑀢𑀁 𑀤𑀲𑁆𑀲𑁂𑀢𑀼𑀁 𑀧𑀼𑀦 ‘‘𑀯𑀺𑀲𑀝𑀸 𑀯𑀸 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.
𑀢𑀦𑁆𑀢𑀁 𑀯𑀼𑀘𑁆𑀘𑀢𑀺 (𑀤𑀻. 𑀦𑀺. 𑀝𑀻. 𑁨.𑁯𑁫 𑀅𑀧𑀲𑀸𑀤𑀦𑀸𑀯𑀡𑁆𑀡𑀦𑀸; 𑀲𑀁. 𑀦𑀺. 𑀝𑀻. 𑁨.𑁨.𑁬𑁦) 𑀯𑀢𑁆𑀣𑀯𑀺𑀦𑀦𑀢𑁆𑀣𑀁 𑀢𑀦𑁆𑀢𑀯𑀸𑀬𑁂𑀳𑀺 𑀤𑀡𑁆𑀟𑀓𑁂 𑀆𑀲𑀜𑁆𑀘𑀺𑀢𑁆𑀯𑀸 𑀧𑀲𑀸𑀭𑀺𑀢𑀲𑀼𑀢𑁆𑀢𑀯𑀝𑁆𑀝𑀺 ‘‘𑀢𑀦𑀻𑀬𑀢𑀻’’𑀢𑀺 𑀓𑀢𑁆𑀯𑀸, 𑀢𑀁 𑀧𑀦 𑀲𑀼𑀢𑁆𑀢𑀁 𑀲𑀦𑁆𑀢𑀸𑀦𑀸𑀓𑀼𑀮𑀢𑀸𑀬 𑀦𑀺𑀤𑀲𑁆𑀲𑀦𑀪𑀸𑀯𑁂𑀦 𑀆𑀓𑀼𑀮𑀫𑁂𑀯 𑀕𑀳𑀺𑀢𑀦𑁆𑀢𑀺 𑀆𑀳 ‘‘𑀢𑀦𑁆𑀢𑀁 𑀯𑀺𑀬 𑀆𑀓𑀼𑀮𑀚𑀸𑀢𑁄’’𑀢𑀺. 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀦𑀸𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀫𑀸𑀦𑁂𑀢𑀼𑀦𑁆𑀢𑀺 𑀧𑀼𑀩𑁆𑀩𑁂𑀦𑀸𑀧𑀭𑀁 𑀲𑀫𑀁 𑀓𑀢𑁆𑀯𑀸 𑀆𑀦𑁂𑀢𑀼𑀁, 𑀅𑀯𑀺𑀲𑀫𑀁 𑀉𑀚𑀼𑀁 𑀓𑀸𑀢𑀼𑀦𑁆𑀢𑀺 𑀅𑀢𑁆𑀣𑁄. 𑀢𑀦𑁆𑀢𑀫𑁂𑀯 𑀯𑀸 𑀆𑀓𑀼𑀮𑀁 𑀢𑀦𑁆𑀢𑀸𑀓𑀼𑀮𑀁, 𑀢𑀦𑁆𑀢𑀸𑀓𑀼𑀮𑀁 𑀯𑀺𑀬 𑀚𑀸𑀢𑁄 𑀪𑀽𑀢𑁄𑀢𑀺 𑀢𑀦𑁆𑀢𑀸𑀓𑀼𑀮𑀓𑀚𑀸𑀢𑁄. 𑀯𑀺𑀦𑀦𑀢𑁄 𑀕𑀼𑀮𑀸𑀢𑀺 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀮𑀤𑁆𑀥𑀦𑀸𑀫𑀲𑁆𑀲 𑀢𑀦𑁆𑀢𑀯𑀸𑀬𑀲𑁆𑀲 𑀕𑀼𑀡𑁆𑀞𑀺𑀓𑀁 𑀦𑀸𑀫 𑀆𑀓𑀼𑀮𑀪𑀸𑀯𑁂𑀦 𑀅𑀕𑁆𑀕𑀢𑁄 𑀯𑀸 𑀫𑀽𑀮𑀢𑁄 𑀯𑀸 𑀤𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯 𑀔𑀮𑀺𑀩𑀤𑁆𑀥𑀢𑀦𑁆𑀢𑀲𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀕𑀼𑀮𑀸𑀕𑀼𑀡𑁆𑀞𑀺𑀓𑀁 𑀯𑀼𑀘𑁆𑀘𑀢𑀺 𑀧𑁂𑀲𑀓𑀸𑀭𑀓𑀜𑁆𑀚𑀺𑀬𑀲𑀼𑀢𑁆𑀢’’𑀦𑁆𑀢𑀺.
𑀲𑀓𑀼𑀡𑀺𑀓𑀸𑀢𑀺 𑀧𑀝𑀧𑀤𑀲𑀓𑀼𑀡𑀺𑀓𑀸. 𑀲𑀸 𑀳𑀺 𑀭𑀼𑀓𑁆𑀔𑀲𑀸𑀔𑀸𑀲𑀼 𑀑𑀮𑀫𑁆𑀩𑀦𑀓𑀼𑀝𑀯𑀸 𑀳𑁄𑀢𑀺. 𑀢𑀜𑁆𑀳𑀺 𑀲𑀸 𑀓𑀼𑀝𑀯𑀁 𑀢𑀢𑁄 𑀢𑀢𑁄 𑀢𑀺𑀡𑀳𑀻𑀭𑀸𑀤𑀺𑀓𑁂 𑀆𑀦𑁂𑀢𑁆𑀯𑀸 𑀢𑀣𑀸 𑀯𑀺𑀦𑀢𑀺, 𑀬𑀣𑀸 𑀢𑁂 𑀧𑁂𑀲𑀓𑀸𑀭𑀓𑀜𑁆𑀚𑀺𑀬𑀲𑀼𑀢𑁆𑀢𑀁 𑀯𑀺𑀬 𑀅𑀕𑁆𑀕𑁂𑀦 𑀯𑀸 𑀅𑀕𑁆𑀕𑀁, 𑀫𑀽𑀮𑁂𑀦 𑀯𑀸 𑀫𑀽𑀮𑀁 𑀲𑀫𑀸𑀦𑁂𑀢𑀼𑀁 𑀯𑀺𑀯𑁂𑀘𑁂𑀢𑀼𑀁 𑀯𑀸 𑀦 𑀲𑀓𑁆𑀓𑀸. 𑀢𑁂𑀦𑀸𑀳 ‘‘𑀬𑀣𑀸’’𑀢𑀺𑀆𑀤𑀺. 𑀢𑀤𑀼𑀪𑀬𑀫𑁆𑀧𑀺 ‘‘𑀕𑀼𑀮𑀸𑀕𑀼𑀡𑁆𑀞𑀺𑀓’’𑀦𑁆𑀢𑀺 𑀯𑀼𑀢𑁆𑀢𑀁 𑀓𑀜𑁆𑀚𑀺𑀬𑀲𑀼𑀢𑁆𑀢𑀁 𑀓𑀼𑀮𑀸𑀯𑀓𑀜𑁆𑀘. 𑀧𑀼𑀭𑀺𑀫𑀦𑀬𑁂𑀦𑁂𑀯𑀸𑀢𑀺 ‘‘𑀏𑀯𑀫𑁂𑀯 𑀲𑀢𑁆𑀢𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀦𑀬𑁂𑀦𑁂𑀯. 𑀓𑀸𑀫𑀁 𑀫𑀼𑀜𑁆𑀚𑀧𑀩𑁆𑀩𑀚𑀢𑀺𑀡𑀸𑀦𑀺 𑀬𑀣𑀸𑀚𑀸𑀢𑀸𑀦𑀺𑀧𑀺 𑀤𑀻𑀖𑀪𑀸𑀯𑁂𑀦 𑀧𑀢𑀺𑀢𑁆𑀯𑀸 𑀅𑀭𑀜𑁆𑀜𑀝𑁆𑀞𑀸𑀦𑁂 𑀅𑀜𑁆𑀜𑀫𑀜𑁆𑀜𑀁 𑀯𑀺𑀦𑀦𑁆𑀥𑀺𑀢𑁆𑀯𑀸 𑀆𑀓𑀼𑀮𑀩𑁆𑀬𑀸𑀓𑀼𑀮𑀸𑀦𑀺 𑀳𑀼𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀺, 𑀢𑀸𑀦𑀺 𑀧𑀦 𑀦 𑀢𑀣𑀸 𑀤𑀼𑀩𑁆𑀩𑀺𑀯𑁂𑀘𑀺𑀬𑀸𑀦𑀺 𑀬𑀣𑀸 𑀭𑀚𑁆𑀚𑀼𑀪𑀽𑀢𑀸𑀦𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀢𑀸𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑁂𑀲𑀫𑁂𑀢𑁆𑀣 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯.
𑀅𑀧𑀸𑀬𑀸𑀢𑀺 𑀅𑀯𑀟𑁆𑀠𑀺𑀓𑀸, 𑀲𑀼𑀔𑁂𑀦, 𑀲𑀼𑀔𑀳𑁂𑀢𑀼𑀦𑀸 𑀯𑀸 𑀯𑀺𑀭𑀳𑀺𑀢𑀸𑀢𑀺 𑀅𑀢𑁆𑀣𑁄. 𑀤𑀼𑀓𑁆𑀔𑀲𑁆𑀲 𑀕𑀢𑀺𑀪𑀸𑀯𑀢𑁄𑀢𑀺 𑀆𑀧𑀸𑀬𑀺𑀓𑀲𑁆𑀲 𑀤𑀼𑀓𑁆𑀔𑀲𑁆𑀲 𑀧𑀯𑀢𑁆𑀢𑀺𑀝𑁆𑀞𑀸𑀦𑀪𑀸𑀯𑀢𑁄. 𑀲𑀼𑀔𑀲𑀫𑀼𑀲𑁆𑀲𑀬𑀢𑁄𑀢𑀺 𑀅𑀩𑁆𑀪𑀼𑀤𑀬𑀢𑁄. 𑀯𑀺𑀦𑀺𑀧𑀢𑀺𑀢𑀢𑁆𑀢𑀸𑀢𑀺 𑀯𑀺𑀭𑀽𑀧𑀁 𑀦𑀺𑀧𑀸𑀢𑀢𑁆𑀢𑀸, 𑀬𑀣𑀸 𑀢𑁂𑀦𑀢𑁆𑀢𑀪𑀸𑀯𑁂𑀦 𑀲𑀼𑀔𑀲𑀫𑀼𑀲𑁆𑀲𑀬𑁄 𑀦 𑀳𑁄𑀢𑀺, 𑀏𑀯𑀁 𑀦𑀺𑀧𑀢𑀺𑀢𑀢𑁆𑀢𑀸. 𑀇𑀢𑀭𑁄𑀢𑀺 𑀲𑀁𑀲𑀸𑀭𑁄. 𑀦𑀦𑀼 ‘‘𑀅𑀧𑀸𑀬’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁄𑀧𑀺 𑀲𑀁𑀲𑀸𑀭𑁄 𑀏𑀯𑀸𑀢𑀺? 𑀲𑀘𑁆𑀘𑀫𑁂𑀢𑀁, 𑀦𑀺𑀭𑀬𑀸𑀤𑀻𑀦𑀁 𑀧𑀦 𑀅𑀥𑀺𑀫𑀢𑁆𑀢𑀤𑀼𑀓𑁆𑀔𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀅𑀧𑀸𑀬𑀸𑀤𑀺𑀕𑁆𑀕𑀳𑀡𑀁. 𑀕𑁄𑀩𑀮𑀻𑀩𑀤𑁆𑀤𑀜𑀸𑀬𑁂𑀦𑀸𑀬𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.
𑀔𑀦𑁆𑀥𑀸𑀦𑀜𑁆𑀘 𑀧𑀝𑀺𑀧𑀸𑀝𑀻𑀢𑀺 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀳𑁂𑀢𑀼𑀨𑀮𑀪𑀸𑀯𑁂𑀦 𑀅𑀧𑀭𑀸𑀧𑀭𑀧𑁆𑀧𑀯𑀢𑁆𑀢𑀺. 𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀁 𑀯𑀢𑁆𑀢𑀫𑀸𑀦𑀸𑀢𑀺 𑀅𑀯𑀺𑀘𑁆𑀙𑁂𑀤𑁂𑀦 𑀯𑀢𑁆𑀢𑀫𑀸𑀦𑀸. 𑀢𑀁 𑀲𑀩𑁆𑀩𑀫𑁆𑀧𑀻𑀢𑀺 𑀢𑀁 ‘‘𑀅𑀧𑀸𑀬’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀁 𑀲𑀩𑁆𑀩𑀁 𑀅𑀧𑀸𑀬𑀤𑀼𑀓𑁆𑀔𑀜𑁆𑀘 𑀯𑀝𑁆𑀝𑀤𑀼𑀓𑁆𑀔𑀜𑁆𑀘. 𑀫𑀳𑀸𑀲𑀫𑀼𑀤𑁆𑀤𑁂 𑀯𑀸𑀢𑀓𑁆𑀔𑀺𑀢𑁆𑀢𑀸 𑀦𑀸𑀯𑀸 𑀯𑀺𑀬𑀸𑀢𑀺 𑀇𑀤𑀁 𑀧𑀭𑀺𑀩𑁆𑀪𑀫𑀦𑀝𑁆𑀞𑀸𑀦𑀲𑁆𑀲 𑀫𑀳𑀦𑁆𑀢𑀤𑀲𑁆𑀲𑀦𑀢𑁆𑀣𑀜𑁆𑀘𑁂𑀯 𑀧𑀭𑀺𑀩𑁆𑀪𑀫𑀦𑀲𑁆𑀲 𑀅𑀦𑀯𑀝𑁆𑀞𑀺𑀢𑀢𑀸𑀤𑀲𑁆𑀲𑀦𑀢𑁆𑀣𑀜𑁆𑀘 𑀉𑀧𑀫𑀸. 𑀬𑀦𑁆𑀢𑁂 𑀬𑀼𑀢𑁆𑀢𑀕𑁄𑀡𑁄 𑀯𑀺𑀬𑀸𑀢𑀺 𑀇𑀤𑀁 𑀧𑀦 𑀅𑀯𑀲𑀻𑀪𑀸𑀯𑀤𑀲𑁆𑀲𑀦𑀢𑁆𑀣𑀜𑁆𑀘𑁂𑀯 𑀤𑀼𑀧𑁆𑀧𑀫𑁄𑀓𑁆𑀔𑀪𑀸𑀯𑀤𑀲𑁆𑀲𑀦𑀢𑁆𑀣𑀜𑁆𑀘𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.
‘‘𑀲𑀫𑀽𑀳𑀕𑁆𑀕𑀸𑀳𑁄𑀢𑀺 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀻𑀦𑀁 𑀲𑀸𑀥𑀸𑀭𑀡𑀕𑁆𑀕𑀸𑀳𑁄’’𑀢𑀺 𑀯𑀤𑀦𑁆𑀢𑀺, ‘‘𑀇𑀢𑁆𑀣𑀁 𑀏𑀯𑀁 𑀅𑀜𑁆𑀜𑀣𑀸’’𑀢𑀺 𑀧𑀦 𑀯𑀺𑀲𑁂𑀲𑀁 𑀅𑀓𑀢𑁆𑀯𑀸 𑀕𑀳𑀡𑀁 𑀲𑀫𑀽𑀳𑀕𑁆𑀕𑀸𑀳𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀯𑀺𑀲𑁂𑀲𑀁 𑀅𑀓𑀢𑁆𑀯𑀸𑀢𑀺 𑀘 𑀅𑀦𑀼𑀧𑀦𑀺𑀥𑀸𑀦𑀁 𑀲𑀫𑀢𑁄 𑀅𑀲𑀫𑀢𑁄 𑀘 𑀉𑀧𑀦𑀺𑀥𑀸𑀦𑀦𑁆𑀢𑀺 𑀇𑀫𑀁 𑀯𑀺𑀪𑀸𑀕𑀁 𑀅𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀇𑀢𑁆𑀣𑀦𑁆𑀢𑀺 𑀳𑀺 𑀅𑀦𑀼𑀧𑀦𑀺𑀥𑀸𑀦𑀁 𑀓𑀣𑀺𑀢𑀁. 𑀏𑀯𑀁 𑀅𑀜𑁆𑀜𑀣𑀸𑀢𑀺 𑀧𑀦 𑀲𑀫𑀢𑁄 𑀅𑀲𑀫𑀢𑁄 𑀘 𑀉𑀧𑀦𑀺𑀥𑀸𑀦𑀁. 𑀅𑀜𑁆𑀜𑀁 𑀆𑀓𑀸𑀭𑀦𑁆𑀢𑀺 𑀧𑀭𑀲𑀦𑁆𑀢𑀸𑀦𑀕𑀢𑀁 𑀆𑀓𑀸𑀭𑀁.
𑀅𑀢𑁆𑀣𑀻𑀢𑀺 𑀲𑀤𑀸 𑀲𑀁𑀯𑀺𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀲𑀻𑀤𑀢𑀻𑀢𑀺 𑀦𑀲𑁆𑀲𑀢𑀺. 𑀲𑀁𑀲𑀬𑀧𑀭𑀺𑀯𑀺𑀢𑀓𑁆𑀓𑀯𑀲𑁂𑀦𑀸𑀢𑀺 ‘‘𑀓𑀺𑀁 𑀦𑀼 𑀔𑁄 𑀅𑀳𑀁 𑀲𑀺𑀬𑀁, 𑀦 𑀲𑀺𑀬’’𑀦𑁆𑀢𑀺 𑀏𑀯𑀁 𑀧𑀭𑀺𑀯𑀺𑀢𑀓𑁆𑀓𑀯𑀲𑁂𑀦. 𑀧𑀢𑁆𑀣𑀦𑀸𑀓𑀧𑁆𑀧𑀦𑀯𑀲𑁂𑀦𑀸𑀢𑀺 ‘‘𑀅𑀧𑀺 𑀦𑀸𑀫 𑀲𑀸𑀥𑀼 𑀧𑀦𑀸𑀳𑀁 𑀲𑀺𑀬’’𑀦𑁆𑀢𑀺 𑀏𑀯𑀁 𑀧𑀢𑁆𑀣𑀦𑀸𑀬 𑀓𑀧𑁆𑀧𑀦𑀯𑀲𑁂𑀦. 𑀲𑀼𑀤𑁆𑀥𑀲𑀻𑀲𑀸𑀢𑀺 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀻𑀦𑀁 𑀲𑀸𑀥𑀸𑀭𑀡𑀸 𑀲𑀻𑀲𑀸. ‘‘𑀇𑀢𑁆𑀣𑀁 𑀏𑀯𑀁 𑀅𑀜𑁆𑀜𑀣𑀸’’𑀢𑀺 𑀯𑀼𑀢𑁆𑀢𑀲𑁆𑀲 𑀯𑀺𑀲𑁂𑀲𑀲𑁆𑀲 𑀅𑀦𑀺𑀲𑁆𑀲𑀺𑀢𑀢𑁆𑀢𑀸 ‘‘𑀲𑀼𑀤𑁆𑀥𑀲𑀻𑀲𑀸’’𑀢𑀺 𑀯𑀼𑀢𑁆𑀢𑀸. 𑀢𑀢𑁆𑀣 𑀤𑀺𑀝𑁆𑀞𑀺𑀲𑀻𑀲𑁂𑀳𑀺 𑀤𑀺𑀝𑁆𑀞𑀺𑀬𑀸 𑀕𑀳𑀺𑀢𑀸𑀬 𑀢𑀤𑀯𑀺𑀦𑀸𑀪𑀸𑀯𑀺𑀦𑀻 𑀢𑀡𑁆𑀳𑀸 𑀤𑀲𑁆𑀲𑀺𑀢𑀸, 𑀘𑀢𑀽𑀳𑀺 𑀲𑀻𑀲𑁂𑀳𑀺 𑀤𑁆𑀯𑀸𑀤𑀲𑀳𑀺 𑀘 𑀲𑀻𑀲𑀫𑀽𑀮𑀓𑁂𑀳𑀺 𑀫𑀸𑀦𑀤𑀺𑀝𑁆𑀞𑀻𑀳𑀺 𑀅𑀬𑀫𑁂𑀯 𑀢𑀡𑁆𑀳𑀸 𑀤𑀲𑁆𑀲𑀺𑀢𑀸𑀢𑀺 𑀆𑀳 ‘‘𑀏𑀯𑀫𑁂𑀢𑁂…𑀧𑁂… 𑀢𑀡𑁆𑀳𑀸𑀯𑀺𑀘𑀭𑀺𑀢𑀥𑀫𑁆𑀫𑀸 𑀯𑁂𑀤𑀺𑀢𑀩𑁆𑀩𑀸’’𑀢𑀺. 𑀦𑀦𑀼 𑀘 𑀫𑀸𑀦𑀤𑀺𑀝𑁆𑀞𑀺𑀕𑁆𑀕𑀸𑀳𑁄𑀧𑀺 𑀇𑀥𑀸𑀥𑀺𑀧𑁆𑀧𑁂𑀢𑁄, 𑀬𑀢𑁄 ‘‘𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀯𑀲𑁂𑀦 𑀲𑀫𑀽𑀳𑀕𑁆𑀕𑀸𑀳𑁄’’𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀓𑀣𑀁 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀻𑀢𑀺 𑀇𑀤𑀁 𑀯𑀘𑀦𑀁? 𑀯𑀼𑀘𑁆𑀘𑀢𑁂 𑁋 𑀤𑀺𑀝𑁆𑀞𑀺𑀫𑀸𑀦𑁂𑀲𑀼𑀧𑀺 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀻𑀢𑀺 𑀯𑀘𑀦𑀁 𑀅𑀜𑁆𑀜𑀫𑀜𑁆𑀜𑀁 𑀯𑀺𑀧𑁆𑀧𑀬𑁄𑀕𑀻𑀦𑀁 𑀤𑀺𑀝𑁆𑀞𑀺𑀫𑀸𑀦𑀸𑀦𑀁 𑀢𑀡𑁆𑀳𑀸𑀬 𑀅𑀯𑀺𑀧𑁆𑀧𑀬𑁄𑀕𑀸𑀦𑀁 𑀢𑀁𑀫𑀽𑀮𑀓𑀢𑁆𑀢𑀸 𑀢𑀧𑁆𑀧𑀥𑀸𑀦𑀢𑀸𑀬 𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀤𑀲𑀫𑀁 𑀉𑀢𑁆𑀢𑀸𑀦𑀫𑁂𑀯.
𑀢𑀡𑁆𑀳𑀸𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.
𑀫𑀳𑀸𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.
𑀘𑀢𑀼𑀢𑁆𑀣𑀧𑀡𑁆𑀡𑀸𑀲𑀓𑀁 𑀦𑀺𑀝𑁆𑀞𑀺𑀢𑀁.