(𑁨𑁧) 𑁧. 𑀲𑀧𑁆𑀧𑀼𑀭𑀺𑀲𑀯𑀕𑁆𑀕𑁄

𑁧-𑁧𑁦. 𑀲𑀺𑀓𑁆𑀔𑀸𑀧𑀤𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁦𑁧-𑁨𑁧𑁦. 𑀧𑀜𑁆𑀘𑀫𑀲𑁆𑀲 𑀧𑀞𑀫𑁂 𑀅𑀲𑀧𑁆𑀧𑀼𑀭𑀺𑀲𑁄𑀢𑀺 𑀮𑀸𑀫𑀓𑀧𑀼𑀭𑀺𑀲𑁄. 𑀧𑀸𑀡𑀁 𑀅𑀢𑀺𑀧𑀸𑀢𑁂𑀢𑀻𑀢𑀺 𑀧𑀸𑀡𑀸𑀢𑀺𑀧𑀸𑀢𑀻. 𑀅𑀤𑀺𑀦𑁆𑀦𑀁 𑀆𑀤𑀺𑀬𑀢𑀻𑀢𑀺 𑀅𑀤𑀺𑀦𑁆𑀦𑀸𑀤𑀸𑀬𑀻. 𑀓𑀸𑀫𑁂𑀲𑀼 𑀫𑀺𑀘𑁆𑀙𑀸 𑀘𑀭𑀢𑀻𑀢𑀺 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀻. 𑀫𑀼𑀲𑀸 𑀯𑀤𑀢𑀻𑀢𑀺 𑀫𑀼𑀲𑀸𑀯𑀸𑀤𑀻. 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑁂 𑀢𑀺𑀝𑁆𑀞𑀢𑀻𑀢𑀺 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀬𑀻. 𑀧𑀸𑀡𑀸𑀢𑀺𑀧𑀸𑀢𑁂 𑀲𑀫𑀸𑀤𑀧𑁂𑀢𑀻𑀢𑀺 𑀬𑀣𑀸 𑀧𑀸𑀡𑀁 𑀅𑀢𑀺𑀧𑀸𑀢𑁂𑀢𑀺, 𑀢𑀣𑀸 𑀦𑀁 𑀢𑀢𑁆𑀣 𑀕𑀳𑀡𑀁 𑀕𑀡𑁆𑀳𑀸𑀧𑁂𑀢𑀺. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀬𑀲𑁆𑀫𑀸 𑀲𑀬𑀁𑀓𑀢𑁂𑀦 𑀘 𑀤𑀼𑀲𑁆𑀲𑀻𑀮𑁆𑀬𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀬𑀜𑁆𑀘 𑀲𑀫𑀸𑀤𑀧𑀺𑀢𑁂𑀦 𑀓𑀢𑀁, 𑀢𑀢𑁄 𑀉𑀧𑀟𑁆𑀠𑀲𑁆𑀲 𑀤𑀸𑀬𑀸𑀤𑁄, 𑀢𑀲𑁆𑀫𑀸 ‘‘𑀅𑀲𑀧𑁆𑀧𑀼𑀭𑀺𑀲𑁂𑀦 𑀅𑀲𑀧𑁆𑀧𑀼𑀭𑀺𑀲𑀢𑀭𑁄’’𑀢𑀺 𑀯𑀼𑀘𑁆𑀘𑀢𑀺. 𑀲𑀧𑁆𑀧𑀼𑀭𑀺𑀲𑁄𑀢𑀺 𑀉𑀢𑁆𑀢𑀫𑀧𑀼𑀭𑀺𑀲𑁄. 𑀲𑀧𑁆𑀧𑀼𑀭𑀺𑀲𑁂𑀦 𑀲𑀧𑁆𑀧𑀼𑀭𑀺𑀲𑀢𑀭𑁄𑀢𑀺 𑀅𑀢𑁆𑀢𑀦𑀸 𑀘 𑀓𑀢𑁂𑀦 𑀲𑀼𑀲𑀻𑀮𑁆𑀬𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀬𑀜𑁆𑀘 𑀲𑀫𑀸𑀤𑀧𑀺𑀢𑁄 𑀓𑀭𑁄𑀢𑀺, 𑀢𑀢𑁄 𑀉𑀧𑀟𑁆𑀠𑀲𑁆𑀲 𑀤𑀸𑀬𑀸𑀤𑀢𑁆𑀢𑀸 𑀉𑀢𑁆𑀢𑀫𑀧𑀼𑀭𑀺𑀲𑁂𑀦 𑀉𑀢𑁆𑀢𑀫𑀧𑀼𑀭𑀺𑀲𑀢𑀭𑁄. 𑀏𑀢𑁆𑀣 𑀘 𑀧𑀭𑁂𑀦 𑀓𑀢𑀁 𑀤𑀼𑀲𑁆𑀲𑀻𑀮𑁆𑀬𑀁 𑀲𑀼𑀲𑀻𑀮𑁆𑀬𑀁 𑀯𑀸 𑀆𑀡𑀢𑁆𑀢𑀺𑀬𑀸 𑀅𑀢𑁆𑀢𑀦𑀸 𑀘 𑀯𑀘𑀺𑀧𑁆𑀧𑀬𑁄𑀕𑁂𑀦 𑀓𑀢𑀦𑁆𑀢𑀺 𑀆𑀡𑀸𑀧𑀦𑀯𑀲𑁂𑀦 𑀧𑀲𑀼𑀢𑀧𑀸𑀧𑀲𑁆𑀲 𑀧𑀼𑀜𑁆𑀜𑀲𑁆𑀲 𑀯𑀸 𑀤𑀸𑀬𑀸𑀤𑁄 ‘‘𑀢𑀢𑁄 𑀉𑀧𑀟𑁆𑀠𑀲𑁆𑀲 𑀤𑀸𑀬𑀸𑀤𑁄’’𑀢𑀺 𑀯𑀼𑀢𑁆𑀢𑁄. 𑀤𑀼𑀢𑀺𑀬𑀸𑀤𑀻𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑀲𑀺𑀓𑁆𑀔𑀸𑀧𑀤𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀧𑁆𑀧𑀼𑀭𑀺𑀲𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨𑁧𑁧-𑁨𑁨𑁦. 𑀤𑀼𑀢𑀺𑀬𑁄 𑀧𑀭𑀺𑀲𑀸𑀯𑀕𑁆𑀕𑁄 𑀉𑀢𑁆𑀢𑀸𑀦𑀢𑁆𑀣𑁄𑀬𑁂𑀯.