(𑁧𑁩) 𑁩. 𑀪𑀬𑀯𑀕𑁆𑀕𑁄

𑁧. 𑀅𑀢𑁆𑀢𑀸𑀦𑀼𑀯𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁧. 𑀢𑀢𑀺𑀬𑀲𑁆𑀲 𑀧𑀞𑀫𑁂 𑀅𑀢𑁆𑀢𑀸𑀦𑀁 𑀅𑀦𑀼𑀯𑀤𑀦𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀦𑀓𑀪𑀬𑀦𑁆𑀢𑀺 𑀅𑀢𑁆𑀢𑀸𑀦𑀁 𑀅𑀦𑀼𑀯𑀤𑀦𑁆𑀢𑀲𑁆𑀲 𑀧𑀸𑀧𑀓𑀫𑁆𑀫𑀺𑀦𑁄 𑀉𑀧𑁆𑀧𑀚𑁆𑀚𑀦𑀓𑀪𑀬𑀁. 𑀤𑁆𑀯𑀢𑁆𑀢𑀺𑀁𑀲𑀓𑀫𑁆𑀫𑀓𑀸𑀭𑀡𑁂 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀦𑀓𑀪𑀬𑀦𑁆𑀢𑀺 𑀅𑀕𑀸𑀭𑀺𑀓𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁, 𑀅𑀦𑀕𑀸𑀭𑀺𑀓𑀸𑀦𑀁 𑀧𑀦 𑀯𑀺𑀦𑀬𑀤𑀡𑁆𑀟𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀦𑀓𑀪𑀬𑀫𑁆𑀧𑀺 𑀤𑀡𑁆𑀟𑀪𑀬𑀦𑁆𑀢𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀅𑀢𑁆𑀢𑀸𑀦𑀼𑀯𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀊𑀫𑀺𑀪𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁨. 𑀤𑀼𑀢𑀺𑀬𑁂 𑀓𑁄𑀥𑀽𑀧𑀸𑀬𑀸𑀲𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀦𑁆𑀢𑀺 𑀏𑀢𑁆𑀣 𑀓𑀼𑀚𑁆𑀛𑀦𑀝𑁆𑀞𑁂𑀦 𑀓𑁄𑀥𑁄, 𑀲𑁆𑀯𑁂𑀯 𑀘𑀺𑀢𑁆𑀢𑀲𑁆𑀲 𑀓𑀸𑀬𑀲𑁆𑀲 𑀘 𑀅𑀢𑀺𑀧𑁆𑀧𑀫𑀤𑁆𑀤𑀦𑀫𑀣𑀦𑀼𑀧𑁆𑀧𑀸𑀤𑀦𑁂𑀳𑀺 𑀤𑀴𑁆𑀳𑀆𑀬𑀸𑀲𑀝𑁆𑀞𑁂𑀦 𑀉𑀧𑀸𑀬𑀸𑀲𑁄. 𑀅𑀦𑁂𑀓𑀯𑀸𑀭𑀁 𑀧𑀯𑀢𑁆𑀢𑀺𑀢𑁆𑀯𑀸 𑀅𑀢𑁆𑀢𑀦𑀸 𑀲𑀫𑀯𑁂𑀢𑀁 𑀲𑀢𑁆𑀢𑀁 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑀼𑀁 𑀅𑀤𑀢𑁆𑀯𑀸 𑀊𑀫𑀺𑀲𑀤𑀺𑀲𑀢𑀸 𑀤𑀝𑁆𑀞𑀩𑁆𑀩𑀸. 𑀬𑀣𑀸 𑀳𑀺 𑀩𑀸𑀳𑀺𑀭𑀁 𑀉𑀤𑀓𑀁 𑀑𑀢𑀺𑀡𑁆𑀡𑁄 𑀊𑀫𑀻𑀲𑀼 𑀑𑀲𑀻𑀤𑀺𑀢𑁆𑀯𑀸 𑀫𑀭𑀢𑀺, 𑀏𑀯𑀁 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀓𑁄𑀥𑀽𑀧𑀸𑀬𑀸𑀲𑁂 𑀑𑀲𑀻𑀤𑀺𑀢𑁆𑀯𑀸 𑀯𑀺𑀩𑁆𑀪𑀫𑀢𑀺, 𑀢𑀲𑁆𑀫𑀸 𑀓𑁄𑀥𑀽𑀧𑀸𑀬𑀸𑀲𑁄 ‘‘𑀊𑀫𑀺𑀪𑀬’’𑀦𑁆𑀢𑀺 𑀯𑀼𑀢𑁆𑀢𑁄. 𑀑𑀤𑀭𑀺𑀓𑀢𑁆𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀦𑁆𑀢𑀺 𑀬𑀣𑀸 𑀳𑀺 𑀩𑀸𑀳𑀺𑀭𑀁 𑀉𑀤𑀓𑀁 𑀑𑀢𑀺𑀡𑁆𑀡𑁄 𑀓𑀼𑀫𑁆𑀪𑀻𑀮𑁂𑀦 𑀔𑀸𑀤𑀺𑀢𑁄 𑀫𑀭𑀢𑀺, 𑀏𑀯𑀁 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀑𑀤𑀭𑀺𑀓𑀢𑁆𑀢𑁂𑀦 𑀑𑀤𑀭𑀺𑀓𑀪𑀸𑀯𑁂𑀦 𑀆𑀫𑀺𑀲𑀕𑁂𑀥𑁂𑀦 𑀫𑀺𑀘𑁆𑀙𑀸𑀚𑀻𑀯𑁂𑀦 𑀚𑀻𑀯𑀺𑀓𑀓𑀧𑁆𑀧𑀦𑁂𑀦 𑀦𑀸𑀲𑀺𑀢𑀲𑀻𑀮𑀸𑀤𑀺𑀕𑀼𑀡𑀢𑀸𑀬 𑀔𑀸𑀤𑀺𑀢𑀥𑀫𑁆𑀫𑀲𑀭𑀻𑀭𑁄 𑀯𑀺𑀩𑁆𑀪𑀫𑀢𑀺, 𑀢𑀲𑁆𑀫𑀸 𑀑𑀤𑀭𑀺𑀓𑀢𑁆𑀢𑀁 ‘‘𑀓𑀼𑀫𑁆𑀪𑀻𑀮𑀪𑀬’’𑀦𑁆𑀢𑀺 𑀯𑀼𑀢𑁆𑀢𑀁.

𑀅𑀦𑀼𑀧𑀝𑁆𑀞𑀺𑀢𑀸𑀬 𑀲𑀢𑀺𑀬𑀸𑀢𑀺 𑀓𑀸𑀬𑀕𑀢𑀁 𑀲𑀢𑀺𑀁 𑀅𑀦𑀼𑀝𑁆𑀞𑀸𑀧𑁂𑀢𑁆𑀯𑀸. 𑀅𑀲𑀁𑀯𑀼𑀢𑁂𑀳𑀻𑀢𑀺 𑀅𑀧𑀺𑀳𑀺𑀢𑁂𑀳𑀺. 𑀧𑀜𑁆𑀘𑀦𑁆𑀦𑁂𑀢𑀁 𑀓𑀸𑀫𑀕𑀼𑀡𑀸𑀦𑀁 𑀅𑀥𑀺𑀯𑀘𑀦𑀦𑁆𑀢𑀺 𑀬𑀣𑀸 𑀳𑀺 𑀩𑀸𑀳𑀺𑀭𑀁 𑀉𑀤𑀓𑀁 𑀑𑀢𑀺𑀡𑁆𑀡𑁄 𑀆𑀯𑀝𑁆𑀝𑁂 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀫𑀭𑀢𑀺, 𑀏𑀯𑀁 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁄 𑀧𑀜𑁆𑀘𑀓𑀸𑀫𑀕𑀼𑀡𑀸𑀯𑀝𑁆𑀝𑁂 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀯𑀺𑀩𑁆𑀪𑀫𑀢𑀺. 𑀓𑀸𑀫𑀭𑀸𑀕𑀸𑀪𑀺𑀪𑀽𑀢𑁄 𑀳𑀺 𑀲𑀢𑁆𑀢𑁄 𑀇𑀢𑁄 𑀘 𑀏𑀢𑁆𑀢𑁄, 𑀏𑀢𑁆𑀢𑁄 𑀘 𑀇𑀢𑁄𑀢𑀺 𑀏𑀯𑀁 𑀫𑀦𑀸𑀧𑀺𑀬𑀭𑀽𑀧𑀸𑀤𑀺𑀯𑀺𑀲𑀬𑀲𑀗𑁆𑀔𑀸𑀢𑁂 𑀆𑀯𑀝𑁆𑀝𑁂 𑀅𑀢𑁆𑀢𑀸𑀦𑀁 𑀲𑀁𑀲𑀸𑀭𑁂𑀢𑁆𑀯𑀸 𑀬𑀣𑀸 𑀢𑀢𑁄 𑀩𑀳𑀺𑀪𑀽𑀢𑁂 𑀦𑁂𑀓𑁆𑀔𑀫𑁆𑀫𑁂 𑀘𑀺𑀢𑁆𑀢𑀫𑁆𑀧𑀺 𑀦 𑀉𑀧𑁆𑀧𑀸𑀤𑁂𑀢𑀺, 𑀏𑀯𑀁 𑀆𑀯𑀝𑁆𑀝𑁂𑀢𑁆𑀯𑀸 𑀩𑁆𑀬𑀲𑀦𑀸𑀧𑀸𑀤𑀦𑁂𑀦 𑀓𑀸𑀫𑀕𑀼𑀡𑀸𑀦𑀁 𑀆𑀯𑀝𑁆𑀝𑀲𑀤𑀺𑀲𑀢𑀸 𑀤𑀝𑁆𑀞𑀩𑁆𑀩𑀸.

𑀅𑀦𑀼𑀤𑁆𑀥𑀁𑀲𑁂𑀢𑀻𑀢𑀺 𑀓𑀺𑀮𑀫𑁂𑀢𑀺 𑀯𑀺𑀮𑁄𑀮𑀢𑀺. 𑀭𑀸𑀕𑀸𑀦𑀼𑀤𑁆𑀥𑀁𑀲𑀺𑀢𑁂𑀦𑀸𑀢𑀺 𑀭𑀸𑀕𑁂𑀦 𑀅𑀦𑀼𑀤𑁆𑀥𑀁𑀲𑀺𑀢𑁂𑀦. 𑀫𑀸𑀢𑀼𑀕𑀸𑀫𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀦𑁆𑀢𑀺. 𑀬𑀣𑀸 𑀳𑀺 𑀩𑀸𑀳𑀺𑀭𑀁 𑀉𑀤𑀓𑀁 𑀑𑀢𑀺𑀡𑁆𑀡𑁄 𑀘𑀡𑁆𑀟𑀫𑀘𑁆𑀙𑀁 𑀆𑀕𑀫𑁆𑀫 𑀮𑀤𑁆𑀥𑀧𑁆𑀧𑀳𑀸𑀭𑁄 𑀫𑀭𑀢𑀺, 𑀏𑀯𑀁 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀫𑀸𑀢𑀼𑀕𑀸𑀫𑀁 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀓𑀸𑀫𑀭𑀸𑀕𑁄 𑀯𑀺𑀩𑁆𑀪𑀫𑀢𑀺, 𑀢𑀲𑁆𑀫𑀸 𑀫𑀸𑀢𑀼𑀕𑀸𑀫𑁄 ‘‘𑀲𑀼𑀲𑀼𑀓𑀸𑀪𑀬’’𑀦𑁆𑀢𑀺 𑀯𑀼𑀢𑁆𑀢𑁄. 𑀫𑀸𑀢𑀼𑀕𑀸𑀫𑁄 𑀳𑀺 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀭𑀳𑀺𑀢𑀁 𑀅𑀥𑀻𑀭𑀧𑀼𑀭𑀺𑀲𑀁 𑀇𑀢𑁆𑀣𑀺𑀓𑀼𑀢𑁆𑀢𑀪𑀽𑀢𑁂𑀳𑀺 𑀅𑀢𑁆𑀢𑀦𑁄 𑀳𑀸𑀲𑀪𑀸𑀯𑀯𑀺𑀮𑀸𑀲𑁂𑀳𑀺 𑀅𑀪𑀺𑀪𑀼𑀬𑁆𑀬 𑀕𑀳𑁂𑀢𑁆𑀯𑀸 𑀥𑀻𑀭𑀚𑀸𑀢𑀺𑀓𑀫𑁆𑀧𑀺 𑀅𑀢𑁆𑀢𑀦𑁄 𑀭𑀽𑀧𑀸𑀤𑀻𑀳𑀺 𑀲𑀫𑁆𑀧𑀮𑁄𑀪𑀦𑀯𑀲𑁂𑀦 𑀅𑀦𑀯𑀲𑁂𑀲𑀁 𑀅𑀢𑁆𑀢𑀦𑁄 𑀉𑀧𑀓𑀸𑀭𑀥𑀫𑁆𑀫𑁂 𑀲𑀻𑀮𑀸𑀤𑀺𑀓𑁂 𑀲𑀫𑁆𑀧𑀸𑀤𑁂𑀢𑀼𑀁 𑀅𑀲𑀫𑀢𑁆𑀣𑀁 𑀓𑀭𑁄𑀦𑁆𑀢𑁄 𑀅𑀦𑀬𑀩𑁆𑀬𑀲𑀦𑀁 𑀧𑀸𑀧𑁂𑀢𑀺.

𑀇𑀫𑀸𑀦𑀺 𑀧𑀦 𑀘𑀢𑁆𑀢𑀸𑀭𑀺 𑀪𑀬𑀸𑀦𑀺 𑀪𑀸𑀬𑀺𑀢𑁆𑀯𑀸 𑀬𑀣𑀸 𑀉𑀤𑀓𑀁 𑀅𑀦𑁄𑀭𑁄𑀳𑀦𑁆𑀢𑀲𑁆𑀲 𑀉𑀤𑀓𑀁 𑀦𑀺𑀲𑁆𑀲𑀸𑀬 𑀉𑀤𑀓𑀧𑀺𑀧𑀸𑀲𑀸𑀯𑀺𑀦𑀬𑀦𑀁 𑀲𑀭𑀻𑀭𑀲𑀼𑀤𑁆𑀥𑀺𑀧𑀭𑀺𑀴𑀸𑀳𑀽𑀧𑀲𑀫𑁄 𑀓𑀸𑀬𑀉𑀢𑀼𑀕𑁆𑀕𑀸𑀳𑀸𑀧𑀦𑀦𑁆𑀢𑀺, 𑀏𑀯𑀫𑀸𑀤𑀺 𑀆𑀦𑀺𑀲𑀁𑀲𑁄 𑀦𑀢𑁆𑀣𑀺, 𑀏𑀯𑀫𑁂𑀯𑀁 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀪𑀬𑀸𑀦𑀺 𑀪𑀸𑀬𑀺𑀢𑁆𑀯𑀸 𑀲𑀸𑀲𑀦𑁂 𑀅𑀧𑀩𑁆𑀩𑀚𑀦𑁆𑀢𑀲𑁆𑀲𑀧𑀺 𑀇𑀫𑀁 𑀲𑀸𑀲𑀦𑀁 𑀦𑀺𑀲𑁆𑀲𑀸𑀬 𑀲𑀗𑁆𑀔𑁂𑀧𑀢𑁄 𑀯𑀝𑁆𑀝𑀤𑀼𑀓𑁆𑀔𑀽𑀧𑀲𑀫𑁄, 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀲𑀻𑀮𑀸𑀦𑀺𑀲𑀁𑀲𑀸𑀤𑀺𑀯𑀲𑁂𑀦 𑀅𑀦𑁂𑀓𑀯𑀺𑀥𑁄 𑀆𑀦𑀺𑀲𑀁𑀲𑁄 𑀦𑀢𑁆𑀣𑀺. 𑀬𑀣𑀸 𑀧𑀦 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀪𑀬𑀸𑀦𑀺 𑀅𑀪𑀸𑀬𑀺𑀢𑁆𑀯𑀸 𑀉𑀤𑀓𑀁 𑀑𑀭𑁄𑀳𑀦𑁆𑀢𑀲𑁆𑀲 𑀯𑀼𑀢𑁆𑀢𑀧𑁆𑀧𑀓𑀸𑀭𑁄 𑀆𑀦𑀺𑀲𑀁𑀲𑁄 𑀳𑁄𑀢𑀺, 𑀏𑀯𑀁 𑀇𑀫𑀸𑀦𑀺 𑀅𑀪𑀸𑀬𑀺𑀢𑁆𑀯𑀸 𑀲𑀸𑀲𑀦𑁂 𑀧𑀩𑁆𑀩𑀚𑀦𑁆𑀢𑀲𑁆𑀲𑀧𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁄 𑀆𑀦𑀺𑀲𑀁𑀲𑁄 𑀳𑁄𑀢𑀺. 𑀫𑀳𑀸𑀥𑀫𑁆𑀫𑀭𑀓𑁆𑀔𑀺𑀢𑀢𑁆𑀣𑁂𑀭𑁄 𑀧𑀦𑀸𑀳 ‘‘𑀘𑀢𑁆𑀢𑀸𑀭𑀺 𑀪𑀬𑀸𑀦𑀺 𑀪𑀸𑀬𑀺𑀢𑁆𑀯𑀸 𑀉𑀤𑀓𑀁 𑀅𑀦𑁄𑀢𑀭𑀦𑁆𑀢𑁄 𑀲𑁄𑀢𑀁 𑀙𑀺𑀦𑁆𑀤𑀺𑀢𑁆𑀯𑀸 𑀧𑀭𑀢𑀻𑀭𑀁 𑀧𑀸𑀧𑀼𑀡𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀪𑀸𑀬𑀺𑀢𑁆𑀯𑀸 𑀑𑀢𑀭𑀦𑁆𑀢𑁄 𑀲𑀓𑁆𑀓𑁄𑀢𑀺, 𑀏𑀯𑀫𑁂𑀯𑀁 𑀪𑀸𑀬𑀺𑀢𑁆𑀯𑀸 𑀲𑀸𑀲𑀦𑁂 𑀅𑀧𑀩𑁆𑀩𑀚𑀦𑁆𑀢𑁄𑀧𑀺 𑀢𑀡𑁆𑀳𑀸𑀲𑁄𑀢𑀁 𑀙𑀺𑀦𑁆𑀤𑀺𑀢𑁆𑀯𑀸 𑀦𑀺𑀩𑁆𑀩𑀸𑀦𑀧𑀸𑀭𑀁 𑀤𑀝𑁆𑀞𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀪𑀸𑀬𑀺𑀢𑁆𑀯𑀸 𑀧𑀩𑁆𑀩𑀚𑀦𑁆𑀢𑁄 𑀲𑀓𑁆𑀓𑁄𑀢𑀻’’𑀢𑀺.

𑀊𑀫𑀺𑀪𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀧𑀞𑀫𑀦𑀸𑀦𑀸𑀓𑀭𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁩. 𑀢𑀢𑀺𑀬𑁂 𑀩𑁆𑀭𑀳𑁆𑀫𑀓𑀸𑀬𑀺𑀓𑀸𑀦𑀁 𑀤𑁂𑀯𑀸𑀦𑀦𑁆𑀢𑀺 𑀏𑀢𑁆𑀣 𑀩𑁆𑀭𑀳𑁆𑀫𑀸𑀦𑀁 𑀓𑀸𑀬𑁄 𑀲𑀫𑀽𑀳𑁄𑀢𑀺 𑀩𑁆𑀭𑀳𑁆𑀫𑀓𑀸𑀬𑁄, 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀢𑀸𑀬 𑀢𑀢𑁆𑀣 𑀕𑀢𑀸𑀢𑀺 𑀩𑁆𑀭𑀳𑁆𑀫𑀓𑀸𑀬𑀺𑀓𑀸. 𑀏𑀢𑀸𑀬 𑀘 𑀲𑀩𑁆𑀩𑀲𑁆𑀲𑀧𑀺 𑀩𑁆𑀭𑀳𑁆𑀫𑀓𑀸𑀬𑀲𑁆𑀲 𑀲𑀫𑀜𑁆𑀜𑀸𑀬 𑀪𑀯𑀺𑀢𑀩𑁆𑀩𑀁. 𑀆𑀪𑀲𑁆𑀲𑀭𑀸𑀦𑀁 𑀤𑁂𑀯𑀸𑀦𑀦𑁆𑀢𑀺𑀆𑀤𑀺𑀦𑀸 𑀧𑀦 𑀤𑀼𑀢𑀺𑀬𑀚𑁆𑀛𑀸𑀦𑀪𑀽𑀫𑀺𑀓𑀸𑀤𑀻𑀦𑀁 𑀉𑀧𑀭𑀺 𑀕𑀳𑀺𑀢𑀢𑁆𑀢𑀸 𑀕𑁄𑀩𑀮𑀻𑀩𑀤𑁆𑀤𑀜𑁆𑀜𑀸𑀬𑁂𑀦 𑀢𑀤𑀯𑀲𑀺𑀝𑁆𑀞𑀸𑀦𑀁 𑀅𑀬𑀁 𑀲𑀫𑀜𑁆𑀜𑀸, 𑀢𑀲𑁆𑀫𑀸 ‘‘𑀩𑁆𑀭𑀳𑁆𑀫𑀓𑀸𑀬𑀺𑀓𑀸𑀦𑀁 𑀤𑁂𑀯𑀸𑀦’’𑀦𑁆𑀢𑀺 𑀧𑀞𑀫𑀚𑁆𑀛𑀸𑀦𑀪𑀽𑀫𑀺𑀓𑀸𑀦𑀁𑀬𑁂𑀯 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀲𑀳 𑀩𑁆𑀬𑀬𑀢𑀺 𑀕𑀘𑁆𑀙𑀢𑀻𑀢𑀺 𑀲𑀳𑀩𑁆𑀬𑁄, 𑀲𑀳𑀯𑀢𑁆𑀢𑀦𑀓𑁄. 𑀢𑀲𑁆𑀲 𑀪𑀸𑀯𑁄 𑀲𑀳𑀩𑁆𑀬𑀢𑀸, 𑀲𑀳𑀧𑀯𑀢𑁆𑀢𑀻𑀢𑀺 𑀆𑀳 ‘‘𑀲𑀳𑀪𑀸𑀯𑀁 𑀉𑀧𑀕𑀘𑁆𑀙𑀢𑀻’’𑀢𑀺. 𑀓𑀧𑁆𑀧𑁄 𑀆𑀬𑀼𑀧𑁆𑀧𑀫𑀸𑀡𑀦𑁆𑀢𑀺 𑀏𑀢𑁆𑀣 𑀬𑀤𑀺𑀧𑀺 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸𑀤𑀻𑀦𑀁 𑀆𑀬𑀼𑀦𑁄 𑀅𑀦𑁆𑀢𑀭𑀁 𑀅𑀢𑁆𑀣𑀺, 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁂𑀦 𑀧𑀦𑁂𑀢𑀁 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀞𑀫𑀚𑁆𑀛𑀸𑀦𑀁 𑀅𑀢𑁆𑀣𑀺 𑀳𑀻𑀦’’𑀦𑁆𑀢𑀺𑀆𑀤𑀺𑀫𑀸𑀳.

𑀤𑁆𑀯𑁂 𑀓𑀧𑁆𑀧𑀸 𑀆𑀬𑀼𑀧𑁆𑀧𑀫𑀸𑀡𑀦𑁆𑀢𑀺 𑀏𑀢𑁆𑀣 𑀧𑀦 𑀳𑀻𑀦𑀚𑁆𑀛𑀸𑀦𑁂𑀦 𑀦𑀺𑀩𑁆𑀩𑀢𑁆𑀢𑀸𑀦𑀁 𑀯𑀲𑁂𑀦 𑀅𑀬𑀁 𑀧𑀭𑀺𑀘𑁆𑀙𑁂𑀤𑁄 𑀓𑀢𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀤𑀼𑀢𑀺𑀬𑀚𑁆𑀛𑀸𑀦𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀢𑀺𑀯𑀺𑀥𑀁 𑀳𑁄𑀢𑀻’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀘𑀢𑁆𑀢𑀸𑀭𑁄 𑀓𑀧𑁆𑀧𑀸𑀢𑀺 𑀏𑀢𑁆𑀣 𑀧𑀦 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁂𑀦 𑀘𑀢𑀼𑀲𑀝𑁆𑀞𑀺 𑀓𑀧𑁆𑀧𑀸 𑀯𑀢𑁆𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀁 ‘𑀓𑀧𑁆𑀧𑁄 𑀤𑁆𑀯𑁂 𑀓𑀧𑁆𑀧𑀸’𑀢𑀺, 𑀓𑀫𑁆𑀧𑀺 𑀆𑀳𑀭𑀺𑀢𑁆𑀯𑀸 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀆𑀳. 𑀓𑀣𑀁 𑀧𑀦𑁂𑀢𑁆𑀣 𑀅𑀬𑀫𑀢𑁆𑀣𑁄 𑀮𑀩𑁆𑀪𑀢𑀻𑀢𑀺 𑀆𑀳 ‘‘𑀓𑀧𑁆𑀧𑁄𑀢𑀺 𑀘 𑀕𑀼𑀡𑀲𑁆𑀲𑀧𑀺 𑀦𑀸𑀫’’𑀦𑁆𑀢𑀺. 𑀢𑀢𑁆𑀣 𑀧𑀞𑀫𑀁 𑀯𑀼𑀢𑁆𑀢𑁄 𑀓𑀧𑁆𑀧𑁄, 𑀢𑀢𑁄 𑀏𑀓𑁂𑀦 𑀕𑀼𑀡𑁂𑀦, 𑀏𑀓𑀲𑁆𑀫𑀺𑀁 𑀯𑀸𑀭𑁂 𑀕𑀡𑀦𑀸𑀬𑀸𑀢𑀺 𑀅𑀢𑁆𑀣𑁄. 𑀤𑁆𑀯𑁂 𑀓𑀧𑁆𑀧𑀸 𑀳𑁄𑀦𑁆𑀢𑀻𑀢𑀺 𑀏𑀓𑀯𑀸𑀭𑀕𑀡𑀦𑀸𑀬 𑀓𑀧𑁆𑀧𑀲𑁆𑀲 𑀤𑁆𑀯𑀺𑀕𑀼𑀡𑀺𑀢𑀢𑁆𑀢𑀸 𑀤𑁆𑀯𑁂 𑀫𑀳𑀸𑀓𑀧𑁆𑀧𑀸 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀤𑀼𑀢𑀺𑀬𑁂𑀦𑀸𑀢𑀺 𑀤𑀼𑀢𑀺𑀬𑀯𑀸𑀭𑀕𑀡𑀦𑀸𑀬. 𑀘𑀢𑁆𑀢𑀸𑀭𑁄𑀢𑀺 𑀤𑀼𑀢𑀺𑀬𑀯𑀸𑀭𑀕𑀡𑀦𑀸𑀬 𑀤𑁆𑀯𑀻𑀲𑀼 𑀓𑀧𑁆𑀧𑁂𑀲𑀼 𑀤𑁆𑀯𑀺𑀕𑀼𑀡𑀺𑀢𑁂𑀲𑀼 𑀘𑀢𑁆𑀢𑀸𑀭𑁄 𑀫𑀳𑀸𑀓𑀧𑁆𑀧𑀸 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀧𑀼𑀦 𑀢𑁂 𑀘𑀢𑁆𑀢𑀸𑀭𑁄 𑀓𑀧𑁆𑀧𑀸𑀢𑀺 𑀯𑀼𑀢𑁆𑀢𑀦𑀬𑁂𑀦 𑀤𑁆𑀯𑁂 𑀯𑀸𑀭𑁂 𑀕𑀼𑀡𑁂𑀢𑁆𑀯𑀸 𑀬𑁂 𑀘𑀢𑁆𑀢𑀸𑀭𑁄 𑀓𑀧𑁆𑀧𑀸 𑀤𑀲𑁆𑀲𑀺𑀢𑀸, 𑀧𑀼𑀦 𑀢𑁂 𑀘𑀢𑁆𑀢𑀸𑀭𑁄 𑀓𑀧𑁆𑀧𑀸 𑀘𑀢𑀼𑀕𑁆𑀕𑀼𑀡𑀸 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀤𑁆𑀯𑁂 𑀯𑀸𑀭𑁂 𑀕𑀼𑀡𑁂𑀢𑁆𑀯𑀸 𑀬𑁂 𑀘𑀢𑁆𑀢𑀸𑀭𑁄 𑀓𑀧𑁆𑀧𑀸 𑀤𑀲𑁆𑀲𑀺𑀢𑀸, 𑀢𑁂𑀲𑀼 𑀘𑀢𑀼𑀓𑁆𑀔𑀢𑁆𑀢𑀼𑀁 𑀕𑀼𑀡𑀺𑀢𑁂𑀲𑀼 𑀘𑀢𑀼𑀲𑀝𑁆𑀞𑀺 𑀓𑀧𑁆𑀧𑀸 𑀲𑀫𑁆𑀧𑀚𑁆𑀚𑀦𑁆𑀢𑀻𑀢𑀺. 𑀢𑀣𑀸 𑀳𑀺 𑀘𑀢𑁆𑀢𑀸𑀭𑁄 𑀏𑀓𑀲𑁆𑀫𑀺𑀁 𑀯𑀸𑀭𑁂 𑀕𑀼𑀡𑀺𑀢𑀸 𑀅𑀝𑁆𑀞 𑀳𑁄𑀦𑁆𑀢𑀺, 𑀧𑀼𑀦 𑀢𑁂 𑀅𑀝𑁆𑀞 𑀤𑀼𑀢𑀺𑀬𑀯𑀸𑀭𑁂 𑀕𑀼𑀡𑀺𑀢𑀸 𑀲𑁄𑀴𑀲 𑀳𑁄𑀦𑁆𑀢𑀺, 𑀧𑀼𑀦 𑀢𑁂 𑀲𑁄𑀴𑀲 𑀢𑀢𑀺𑀬𑀯𑀸𑀭𑁂 𑀕𑀼𑀡𑀺𑀢𑀸 𑀤𑁆𑀯𑀢𑁆𑀢𑀺𑀁𑀲 𑀳𑁄𑀦𑁆𑀢𑀺, 𑀧𑀼𑀦 𑀢𑁂 𑀤𑁆𑀯𑀢𑁆𑀢𑀺𑀁𑀲 𑀘𑀢𑀼𑀢𑁆𑀣𑀯𑀸𑀭𑁂 𑀕𑀼𑀡𑀺𑀢𑀸 𑀘𑀢𑀼𑀲𑀝𑁆𑀞𑀺 𑀳𑁄𑀦𑁆𑀢𑀺. 𑀢𑁂𑀦𑁂𑀯𑀸𑀳 ‘‘𑀇𑀫𑁂𑀳𑀺 𑀘𑀢𑀽𑀳𑀺 𑀕𑀼𑀡𑁂𑀳𑀺 𑀕𑀼𑀡𑀺𑀢𑀸 𑀏𑀓𑁂𑀦 𑀕𑀼𑀡𑁂𑀦 𑀅𑀝𑁆𑀞 𑀳𑁄𑀦𑁆𑀢𑀻’’𑀢𑀺𑀆𑀤𑀺. 𑀏𑀢𑁆𑀣 𑀘 𑀳𑁂𑀝𑁆𑀞𑀸 𑀉𑀧𑁄𑀲𑀣𑀲𑀼𑀢𑁆𑀢𑁂 (𑀅. 𑀦𑀺. 𑁩.𑁭𑁧) 𑁋

‘‘𑀬𑀸𑀦𑀺 𑀫𑀸𑀦𑀼𑀲𑀓𑀸𑀦𑀺 𑀧𑀜𑁆𑀜𑀸𑀲 𑀯𑀲𑁆𑀲𑀸𑀦𑀺, 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 𑀤𑁂𑀯𑀸𑀦𑀁 𑀏𑀲𑁄 𑀏𑀓𑁄 𑀭𑀢𑁆𑀢𑀺𑀦𑁆𑀤𑀺𑀯𑁄’’𑀢𑀺 𑁋

𑀆𑀤𑀺𑀦𑀸 𑀓𑀸𑀫𑀸𑀯𑀘𑀭𑀤𑁂𑀯𑀸𑀦𑀫𑁂𑀯 𑀆𑀬𑀼𑀧𑁆𑀧𑀫𑀸𑀡𑀁 𑀤𑀲𑁆𑀲𑀺𑀢𑀁. 𑀳𑁂𑀝𑁆𑀞𑀸𑀬𑁂𑀯 𑁋

‘‘𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀢𑀬𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀲𑀩𑁆𑀩𑀲𑁄 𑀭𑀽𑀧𑀲𑀜𑁆𑀜𑀸𑀦𑀁 𑀲𑀫𑀢𑀺𑀓𑁆𑀓𑀫𑀸…𑀧𑁂… 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀽𑀧𑀕𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀺. 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀽𑀧𑀕𑀸𑀦𑀁, 𑀪𑀺𑀓𑁆𑀔𑀯𑁂, 𑀤𑁂𑀯𑀸𑀦𑀁 𑀯𑀻𑀲𑀢𑀺 𑀓𑀧𑁆𑀧𑀲𑀳𑀲𑁆𑀲𑀸𑀦𑀺 𑀆𑀬𑀼𑀧𑁆𑀧𑀫𑀸𑀡’’𑀦𑁆𑀢𑀺 (𑀅. 𑀦𑀺. 𑁩.𑁧𑁧𑁭) 𑁋

𑀆𑀤𑀺𑀦𑀸 𑀅𑀭𑀽𑀧𑀸𑀯𑀘𑀭𑀸𑀦𑀁𑀬𑁂𑀯 𑀆𑀬𑀼𑀧𑁆𑀧𑀫𑀸𑀡𑀁 𑀯𑀼𑀢𑁆𑀢𑀁. 𑀇𑀥 𑀧𑀦 𑀭𑀽𑀧𑀸𑀯𑀘𑀭𑀸𑀦𑀫𑁂𑀯 𑀆𑀬𑀼𑀧𑁆𑀧𑀫𑀸𑀡𑀁 𑀤𑀲𑁆𑀲𑀺𑀢𑀁. 𑀯𑀺𑀪𑀗𑁆𑀕𑀧𑀸𑀴𑀺𑀬𑀁 (𑀯𑀺𑀪. 𑁧𑁦𑁨𑁨) 𑀧𑀦 ‘‘𑀫𑀦𑀼𑀲𑁆𑀲𑀸𑀦𑀁 𑀓𑀺𑀢𑁆𑀢𑀓𑀁 𑀆𑀬𑀼𑀧𑁆𑀧𑀫𑀸𑀡𑀁, 𑀯𑀲𑁆𑀲𑀲𑀢𑀁 𑀅𑀧𑁆𑀧𑀁 𑀯𑀸 𑀪𑀺𑀬𑁆𑀬𑁄’’𑀢𑀺𑀆𑀤𑀺𑀦𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀜𑁆𑀘𑁂𑀯 𑀭𑀽𑀧𑀸𑀭𑀽𑀧𑀸𑀯𑀘𑀭𑀲𑀢𑁆𑀢𑀸𑀦𑀜𑁆𑀘 𑀆𑀬𑀼𑀧𑁆𑀧𑀫𑀸𑀡𑀁 𑀤𑀲𑁆𑀲𑀺𑀢𑀁.

𑀢𑀢𑁆𑀣 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀫𑀦𑀼𑀲𑁆𑀲𑀸𑀦𑀁 𑀤𑁂𑀯𑀸𑀦𑀜𑁆𑀘 𑀆𑀬𑀼𑀁 𑀧𑀭𑀺𑀘𑁆𑀙𑀺𑀦𑁆𑀤𑀫𑀸𑀦𑁂𑀦 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀪𑀼𑀫𑁆𑀫𑀤𑁂𑀯𑁂𑀲𑀼 𑀘 𑀆𑀬𑀼 𑀦 𑀧𑀭𑀺𑀘𑁆𑀙𑀺𑀦𑁆𑀦𑀁. 𑀢𑀁 𑀓𑀲𑁆𑀫𑀸𑀢𑀺? 𑀦𑀺𑀭𑀬𑁂 𑀢𑀸𑀯 𑀓𑀫𑁆𑀫𑀫𑁂𑀯 𑀧𑀫𑀸𑀡𑀁. 𑀬𑀸𑀯 𑀓𑀫𑁆𑀫𑀁 𑀦 𑀔𑀻𑀬𑀢𑀺, 𑀢𑀸𑀯 𑀧𑀘𑁆𑀘𑀦𑁆𑀢𑀺. 𑀢𑀣𑀸 𑀲𑁂𑀲𑀅𑀧𑀸𑀬𑁂𑀲𑀼. 𑀪𑀼𑀫𑁆𑀫𑀤𑁂𑀯𑀸𑀦𑀫𑁆𑀧𑀺 𑀓𑀫𑁆𑀫𑀫𑁂𑀯 𑀧𑀫𑀸𑀡𑀁. 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀸 𑀳𑀺 𑀓𑁂𑀘𑀺 𑀲𑀢𑁆𑀢𑀸𑀳𑀫𑀢𑁆𑀢𑀁 𑀢𑀺𑀝𑁆𑀞𑀦𑁆𑀢𑀺, 𑀓𑁂𑀘𑀺 𑀅𑀟𑁆𑀠𑀫𑀸𑀲𑀁, 𑀓𑀧𑁆𑀧𑀁 𑀢𑀺𑀝𑁆𑀞𑀫𑀸𑀦𑀸𑀧𑀺 𑀅𑀢𑁆𑀣𑀺𑀬𑁂𑀯. 𑀢𑀢𑁆𑀣 𑀫𑀦𑀼𑀲𑁆𑀲𑁂𑀲𑀼 𑀕𑀺𑀳𑀺𑀪𑀸𑀯𑁂 𑀞𑀺𑀢𑀸𑀬𑁂𑀯 𑀲𑁄𑀢𑀸𑀧𑀦𑁆𑀦𑀸𑀧𑀺 𑀳𑁄𑀦𑁆𑀢𑀺, 𑀲𑀓𑀤𑀸𑀕𑀸𑀫𑀺𑀨𑀮𑀁 𑀅𑀦𑀸𑀕𑀸𑀫𑀺𑀨𑀮𑀁 𑀅𑀭𑀳𑀢𑁆𑀢𑀫𑁆𑀧𑀺 𑀧𑀸𑀧𑀼𑀡𑀦𑁆𑀢𑀺, 𑀢𑁂𑀲𑀼 𑀲𑁄𑀢𑀸𑀧𑀦𑁆𑀦𑀸𑀤𑀬𑁄 𑀬𑀸𑀯𑀚𑀻𑀯𑀁 𑀢𑀺𑀝𑁆𑀞𑀦𑁆𑀢𑀺, 𑀔𑀻𑀡𑀸𑀲𑀯𑀸 𑀧𑀦 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑀺 𑀯𑀸 𑀧𑀩𑁆𑀩𑀚𑀦𑁆𑀢𑀺 𑀯𑀸. 𑀓𑀲𑁆𑀫𑀸? 𑀅𑀭𑀳𑀢𑁆𑀢𑀁 𑀦𑀸𑀫 𑀲𑁂𑀝𑁆𑀞𑀕𑀼𑀡𑀁, 𑀕𑀺𑀳𑀺𑀮𑀺𑀗𑁆𑀕𑀁 𑀳𑀻𑀦𑀁, 𑀢𑀁 𑀳𑀻𑀦𑀢𑀸𑀬 𑀉𑀢𑁆𑀢𑀫𑀁 𑀕𑀼𑀡𑀁 𑀥𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀲𑁆𑀫𑀸 𑀢𑁂 𑀧𑀭𑀺𑀦𑀺𑀩𑁆𑀩𑀸𑀢𑀼𑀓𑀸𑀫𑀸 𑀯𑀸 𑀳𑁄𑀦𑁆𑀢𑀺 𑀧𑀩𑁆𑀩𑀚𑀺𑀢𑀼𑀓𑀸𑀫𑀸 𑀯𑀸. 𑀪𑀼𑀫𑁆𑀫𑀤𑁂𑀯𑀸 𑀧𑀦 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸𑀧𑀺 𑀬𑀸𑀯𑀚𑀻𑀯𑀁 𑀢𑀺𑀝𑁆𑀞𑀦𑁆𑀢𑀺, 𑀙𑀲𑀼 𑀓𑀸𑀫𑀸𑀯𑀘𑀭𑁂𑀲𑀼 𑀤𑁂𑀯𑁂𑀲𑀼 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀺𑀦𑁄 𑀬𑀸𑀯𑀚𑀻𑀯𑀁 𑀢𑀺𑀝𑁆𑀞𑀦𑁆𑀢𑀺, 𑀅𑀦𑀸𑀕𑀸𑀫𑀺𑀦𑀸 𑀭𑀽𑀧𑀪𑀯𑀁 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺 𑀔𑀻𑀡𑀸𑀲𑀯𑁂𑀦 𑀧𑀭𑀺𑀦𑀺𑀩𑁆𑀩𑀸𑀢𑀼𑀁. 𑀓𑀲𑁆𑀫𑀸? 𑀦𑀺𑀮𑀻𑀬𑀦𑁄𑀓𑀸𑀲𑀲𑁆𑀲 𑀅𑀪𑀸𑀯𑀸. 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑁂𑀲𑀼 𑀲𑀩𑁆𑀩𑁂𑀧𑀺 𑀬𑀸𑀯𑀚𑀻𑀯𑀁 𑀢𑀺𑀝𑁆𑀞𑀦𑁆𑀢𑀺, 𑀢𑀢𑁆𑀣 𑀭𑀽𑀧𑀸𑀯𑀘𑀭𑁂 𑀦𑀺𑀩𑁆𑀩𑀢𑁆𑀢𑀸 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀺𑀦𑁄 𑀦 𑀧𑀼𑀦 𑀇𑀥𑀸𑀕𑀘𑁆𑀙𑀦𑁆𑀢𑀺, 𑀢𑀢𑁆𑀣𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑀺. 𑀏𑀢𑁂 𑀳𑀺 𑀛𑀸𑀦𑀅𑀦𑀸𑀕𑀸𑀫𑀺𑀦𑁄 𑀦𑀸𑀫.

𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀻𑀦𑀁 𑀧𑀦 𑀓𑀺𑀁 𑀦𑀺𑀬𑀫𑁂𑀢𑀺? 𑀧𑀕𑀼𑀡𑀚𑁆𑀛𑀸𑀦𑀁. 𑀬𑀤𑁂𑀯𑀲𑁆𑀲 𑀧𑀕𑀼𑀡𑀁 𑀳𑁄𑀢𑀺, 𑀢𑁂𑀦 𑀉𑀧𑀧𑀚𑁆𑀚𑀢𑀺. 𑀲𑀩𑁆𑀩𑁂𑀲𑀼 𑀧𑀕𑀼𑀡𑁂𑀲𑀼 𑀓𑀺𑀁 𑀦𑀺𑀬𑀫𑁂𑀢𑀺? 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺. 𑀏𑀓𑀁𑀲𑁂𑀦𑁂𑀯 𑀳𑀺 𑀲𑁄 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑁂 𑀉𑀧𑀧𑀚𑁆𑀚𑀢𑀺. 𑀦𑀯𑀲𑀼 𑀩𑁆𑀭𑀳𑁆𑀫𑀮𑁄𑀓𑁂𑀲𑀼 𑀦𑀺𑀩𑁆𑀩𑀢𑁆𑀢𑀅𑀭𑀺𑀬𑀲𑀸𑀯𑀓𑀸𑀦𑀁 𑀢𑀢𑁆𑀭𑀽𑀧𑀧𑀢𑁆𑀢𑀺𑀧𑀺 𑀉𑀧𑀭𑀽𑀧𑀧𑀢𑁆𑀢𑀺𑀧𑀺, 𑀦 𑀳𑁂𑀝𑁆𑀞𑀽𑀧𑀧𑀢𑁆𑀢𑀺. 𑀧𑀼𑀣𑀼𑀚𑁆𑀚𑀦𑀸𑀦𑀁 𑀧𑀦 𑀢𑀢𑁆𑀭𑀽𑀧𑀧𑀢𑁆𑀢𑀺𑀧𑀺 𑀳𑁄𑀢𑀺, 𑀉𑀧𑀭𑀽𑀧𑀧𑀢𑁆𑀢𑀺𑀧𑀺, 𑀳𑁂𑀝𑁆𑀞𑀽𑀧𑀧𑀢𑁆𑀢𑀺𑀧𑀺. 𑀧𑀜𑁆𑀘𑀲𑀼 𑀲𑀼𑀤𑁆𑀥𑀸𑀯𑀸𑀲𑁂𑀲𑀼 𑀘𑀢𑀽𑀲𑀼 𑀘 𑀅𑀭𑀽𑀧𑁂𑀲𑀼 𑀅𑀭𑀺𑀬𑀲𑀸𑀯𑀓𑀸𑀦𑀁 𑀢𑀢𑁆𑀭𑀽𑀧𑀧𑀢𑁆𑀢𑀺𑀧𑀺 𑀳𑁄𑀢𑀺 𑀉𑀧𑀭𑀽𑀧𑀧𑀢𑁆𑀢𑀺𑀧𑀺. 𑀧𑀞𑀫𑀚𑁆𑀛𑀸𑀦𑀪𑀽𑀫𑀺𑀬𑀁 𑀦𑀺𑀩𑁆𑀩𑀢𑁆𑀢𑁄 𑀅𑀦𑀸𑀕𑀸𑀫𑀻 𑀦𑀯 𑀩𑁆𑀭𑀳𑁆𑀫𑀮𑁄𑀓𑁂 𑀲𑁄𑀥𑁂𑀢𑁆𑀯𑀸 𑀫𑀢𑁆𑀣𑀓𑁂 𑀞𑀺𑀢𑁄 𑀧𑀭𑀺𑀦𑀺𑀩𑁆𑀩𑀸𑀢𑀺. 𑀯𑁂𑀳𑀧𑁆𑀨𑀮𑀁, 𑀅𑀓𑀦𑀺𑀝𑁆𑀞𑀁, 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀦𑁆𑀢𑀺 𑀇𑀫𑁂 𑀢𑀬𑁄 𑀤𑁂𑀯𑀮𑁄𑀓𑀸 𑀲𑁂𑀝𑁆𑀞𑀪𑀯𑀸 𑀦𑀸𑀫. 𑀇𑀫𑁂𑀲𑀼 𑀢𑀻𑀲𑀼 𑀞𑀸𑀦𑁂𑀲𑀼 𑀦𑀺𑀩𑁆𑀩𑀢𑁆𑀢𑀅𑀦𑀸𑀕𑀸𑀫𑀺𑀦𑁄 𑀦𑁂𑀯 𑀉𑀤𑁆𑀥𑀁 𑀕𑀘𑁆𑀙𑀦𑁆𑀢𑀺, 𑀦 𑀅𑀥𑁄, 𑀢𑀢𑁆𑀣 𑀢𑀢𑁆𑀣𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑀻𑀢𑀺 𑀇𑀤𑀁 𑀧𑀓𑀺𑀡𑁆𑀡𑀓𑀁 𑀯𑁂𑀤𑀺𑀢𑀩𑁆𑀩𑀁.

𑀧𑀞𑀫𑀦𑀸𑀦𑀸𑀓𑀭𑀡𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪-𑁬. 𑀤𑀼𑀢𑀺𑀬𑀦𑀸𑀦𑀸𑀓𑀭𑀡𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁨𑁪-𑁬. 𑀘𑀢𑀼𑀢𑁆𑀣𑁂 𑀢𑁂 𑀥𑀫𑁆𑀫𑁂𑀢𑀺 𑀢𑁂 ‘‘𑀭𑀽𑀧𑀕𑀢’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑁂 𑀭𑀽𑀧𑀸𑀤𑀬𑁄 𑀥𑀫𑁆𑀫𑁂. 𑀅𑀦𑀺𑀘𑁆𑀘𑀢𑁄𑀢𑀺 𑀇𑀫𑀺𑀦𑀸 𑀦𑀺𑀘𑁆𑀘𑀧𑁆𑀧𑀝𑀺𑀓𑁆𑀔𑁂𑀧𑀢𑁄 𑀢𑁂𑀲𑀁 𑀅𑀦𑀺𑀘𑁆𑀘𑀢𑀫𑀸𑀳, 𑀢𑀢𑁄 𑀏𑀯 𑀘 𑀉𑀤𑀬𑀯𑀬𑀯𑀦𑁆𑀢𑀢𑁄 𑀯𑀺𑀧𑀭𑀺𑀡𑀸𑀫𑀢𑁄 𑀢𑀸𑀯𑀓𑀸𑀮𑀺𑀓𑀢𑁄 𑀘 𑀢𑁂 𑀅𑀦𑀺𑀘𑁆𑀘𑀸𑀢𑀺 𑀚𑁄𑀢𑀺𑀢𑀁 𑀳𑁄𑀢𑀺. 𑀬𑀜𑁆𑀳𑀺 𑀦𑀺𑀩𑁆𑀩𑀢𑁆𑀢𑀁 𑀳𑁄𑀢𑀺, 𑀢𑀁 𑀉𑀤𑀬𑀯𑀬𑀧𑀭𑀺𑀘𑁆𑀙𑀺𑀦𑁆𑀦𑀁. 𑀚𑀭𑀸𑀬 𑀫𑀭𑀡𑁂𑀦 𑀘 𑀢𑀤𑁂𑀯 𑀯𑀺𑀧𑀭𑀻𑀢𑀁, 𑀇𑀢𑁆𑀢𑀭𑀓𑁆𑀔𑀡𑀫𑁂𑀯 𑀘 𑀳𑁄𑀢𑀻𑀢𑀺. 𑀤𑀼𑀓𑁆𑀔𑀢𑁄𑀢𑀺 𑀇𑀫𑀺𑀦𑀸 𑀲𑀼𑀔𑀧𑁆𑀧𑀝𑀺𑀓𑁆𑀔𑁂𑀧𑀢𑁄 𑀢𑁂𑀲𑀁 𑀤𑀼𑀓𑁆𑀔𑀢𑀫𑀸𑀳. 𑀢𑀢𑁄 𑀏𑀯 𑀘 𑀅𑀪𑀺𑀡𑁆𑀳𑀧𑁆𑀧𑀝𑀺𑀧𑀻𑀴𑀦𑀢𑁄 𑀤𑀼𑀓𑁆𑀔𑀯𑀢𑁆𑀣𑀼𑀢𑁄 𑀘 𑀢𑁂 𑀤𑀼𑀓𑁆𑀔𑀸𑀢𑀺 𑀚𑁄𑀢𑀺𑀢𑀁 𑀳𑁄𑀢𑀺. 𑀉𑀤𑀬𑀯𑀬𑀯𑀦𑁆𑀢𑀢𑀸𑀬 𑀳𑀺 𑀢𑁂 𑀅𑀪𑀺𑀡𑁆𑀳𑀧𑁆𑀧𑀝𑀺𑀧𑀻𑀴𑀦𑀢𑁄 𑀦𑀺𑀭𑀦𑁆𑀢𑀭𑀤𑀼𑀓𑁆𑀔𑀢𑀸𑀬 𑀤𑀼𑀓𑁆𑀔𑀲𑁆𑀲𑁂𑀯 𑀘 𑀅𑀥𑀺𑀝𑁆𑀞𑀸𑀦𑀪𑀽𑀢𑀸. 𑀧𑀘𑁆𑀘𑀬𑀬𑀸𑀧𑀦𑀻𑀬𑀢𑀸𑀬 𑀭𑁄𑀕𑀫𑀽𑀮𑀢𑀸𑀬 𑀘 𑀭𑁄𑀕𑀢𑁄. 𑀤𑀼𑀓𑁆𑀔𑀢𑀸𑀲𑀽𑀮𑀬𑁄𑀕𑀢𑁄 𑀓𑀺𑀮𑁂𑀲𑀸𑀲𑀼𑀘𑀺𑀧𑀕𑁆𑀖𑀭𑀡𑀢𑁄 𑀉𑀧𑁆𑀧𑀸𑀤𑀚𑀭𑀸𑀪𑀗𑁆𑀕𑁂𑀳𑀺 𑀉𑀤𑁆𑀥𑀼𑀫𑀸𑀢𑀧𑀭𑀺𑀧𑀓𑁆𑀓𑀧𑀪𑀺𑀦𑁆𑀦𑀢𑁄 𑀘 𑀕𑀡𑁆𑀟𑀢𑁄. 𑀧𑀻𑀴𑀸𑀚𑀦𑀦𑀢𑁄, 𑀅𑀦𑁆𑀢𑁄𑀢𑀼𑀤𑀦𑀢𑁄, 𑀤𑀼𑀦𑁆𑀦𑀻𑀳𑀭𑀡𑀢𑁄 𑀘 𑀲𑀮𑁆𑀮𑀢𑁄. 𑀅𑀯𑀟𑁆𑀠𑀺𑀆𑀯𑀳𑀦𑀢𑁄 𑀅𑀖𑀯𑀢𑁆𑀣𑀼𑀢𑁄 𑀘 𑀅𑀖𑀢𑁄. 𑀅𑀲𑁂𑀭𑀺𑀪𑀸𑀯𑀚𑀦𑀦𑀢𑁄 𑀆𑀩𑀸𑀥𑀧𑀤𑀝𑁆𑀞𑀸𑀦𑀢𑀸𑀬 𑀘 𑀆𑀩𑀸𑀥𑀢𑁄. 𑀅𑀯𑀲𑀯𑀢𑁆𑀢𑀦𑀢𑁄 𑀅𑀯𑀺𑀥𑁂𑀬𑁆𑀬𑀢𑀸𑀬 𑀘 𑀧𑀭𑀢𑁄. 𑀩𑁆𑀬𑀸𑀥𑀺𑀚𑀭𑀸𑀫𑀭𑀡𑁂𑀳𑀺 𑀧𑀮𑀼𑀚𑁆𑀚𑀦𑀻𑀬𑀢𑀸𑀬 𑀧𑀮𑁄𑀓𑀢𑁄. 𑀲𑀸𑀫𑀺𑀦𑀺𑀯𑀸𑀲𑀺𑀓𑀸𑀭𑀓𑀯𑁂𑀤𑀓𑀅𑀥𑀺𑀝𑁆𑀞𑀸𑀬𑀓𑀯𑀺𑀭𑀳𑀢𑁄 𑀲𑀼𑀜𑁆𑀜𑀢𑁄. 𑀅𑀢𑁆𑀢𑀧𑁆𑀧𑀝𑀺𑀓𑁆𑀔𑁂𑀧𑀝𑁆𑀞𑁂𑀦 𑀅𑀦𑀢𑁆𑀢𑀢𑁄. 𑀭𑀽𑀧𑀸𑀤𑀺𑀥𑀫𑁆𑀫𑀸 𑀳𑀺 𑀦 𑀏𑀢𑁆𑀣 𑀅𑀢𑁆𑀢𑀸 𑀅𑀢𑁆𑀣𑀻𑀢𑀺 𑀅𑀦𑀢𑁆𑀢𑀸. 𑀏𑀯𑀁 𑀲𑀬𑀫𑁆𑀧𑀺 𑀅𑀢𑁆𑀢𑀸 𑀦 𑀳𑁄𑀦𑁆𑀢𑀻𑀢𑀺 𑀅𑀦𑀢𑁆𑀢𑀸. 𑀢𑁂𑀦 𑀅𑀩𑁆𑀬𑀸𑀧𑀸𑀭𑀢𑁄 𑀦𑀺𑀭𑀻𑀳𑀢𑁄 𑀢𑀼𑀘𑁆𑀙𑀢𑁄 𑀅𑀦𑀢𑁆𑀢𑀸𑀢𑀺 𑀤𑀻𑀧𑀺𑀢𑀁 𑀳𑁄𑀢𑀺. 𑀮𑀓𑁆𑀔𑀡𑀢𑁆𑀢𑀬𑀫𑁂𑀯 𑀲𑀼𑀔𑀸𑀯𑀩𑁄𑀥𑀦𑀢𑁆𑀣𑀁 𑀏𑀓𑀸𑀤𑀲𑀳𑀺 𑀧𑀤𑁂𑀳𑀺 𑀯𑀺𑀪𑀚𑀺𑀢𑁆𑀯𑀸 𑀕𑀳𑀺𑀢𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀜𑁆𑀘𑀫𑀙𑀝𑁆𑀞𑀸𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑀤𑀼𑀢𑀺𑀬𑀦𑀸𑀦𑀸𑀓𑀭𑀡𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀧𑀞𑀫𑀢𑀣𑀸𑀕𑀢𑀅𑀘𑁆𑀙𑀭𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁭. 𑀲𑀢𑁆𑀢𑀫𑁂 𑀯𑀢𑁆𑀢𑀫𑀸𑀦𑀲𑀫𑀻𑀧𑁂 𑀯𑀢𑁆𑀢𑀫𑀸𑀦𑁂 𑀯𑀺𑀬 𑀯𑁄𑀳𑀭𑀺𑀢𑀩𑁆𑀩𑀦𑁆𑀢𑀺 ‘‘𑀑𑀓𑁆𑀓𑀫𑀢𑀻’’𑀢𑀺 𑀆𑀳 ‘‘𑀑𑀓𑁆𑀓𑀦𑁆𑀢𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄’’𑀢𑀺. 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀧𑀢𑁆𑀣𑀭𑀡𑁄 𑀲𑀫𑀼𑀚𑁆𑀚𑀮𑀪𑀸𑀯𑁂𑀦 𑀉𑀴𑀸𑀭𑁄. 𑀤𑁂𑀯𑀸𑀦𑀼𑀪𑀸𑀯𑀦𑁆𑀢𑀺 𑀤𑁂𑀯𑀸𑀦𑀁 𑀧𑀪𑀸𑀦𑀼𑀪𑀸𑀯𑀁. 𑀤𑁂𑀯𑀸𑀦𑀜𑁆𑀳𑀺 𑀧𑀪𑀁 𑀲𑁄 𑀑𑀪𑀸𑀲𑁄 𑀅𑀥𑀺𑀪𑀯𑀢𑀺, 𑀦 𑀤𑁂𑀯𑁂. 𑀢𑁂𑀦𑀸𑀳 ‘‘𑀤𑁂𑀯𑀸𑀦’’𑀦𑁆𑀢𑀺𑀆𑀤𑀺. 𑀭𑀼𑀓𑁆𑀔𑀕𑀘𑁆𑀙𑀸𑀤𑀺𑀦𑀸 𑀓𑁂𑀦𑀘𑀺 𑀦 𑀳𑀜𑁆𑀜𑀢𑀻𑀢𑀺 𑀅𑀖𑀸, 𑀅𑀲𑀫𑁆𑀩𑀸𑀥𑀸. 𑀢𑁂𑀦𑀸𑀳 ‘‘𑀦𑀺𑀘𑁆𑀘𑀯𑀺𑀯𑀭𑀸’’𑀢𑀺. 𑀅𑀲𑀁𑀯𑀼𑀢𑀸𑀢𑀺 𑀳𑁂𑀝𑁆𑀞𑀸 𑀉𑀧𑀭𑀺 𑀓𑁂𑀦𑀘𑀺 𑀅𑀧𑀺𑀳𑀺𑀢𑀸. 𑀢𑁂𑀦𑀸𑀳 ‘‘𑀳𑁂𑀝𑁆𑀞𑀸𑀧𑀺 𑀅𑀧𑁆𑀧𑀢𑀺𑀝𑁆𑀞𑀸’’𑀢𑀺. 𑀢𑀢𑁆𑀣 𑀧𑀺-𑀲𑀤𑁆𑀤𑁂𑀦 𑀬𑀣𑀸 𑀳𑁂𑀝𑁆𑀞𑀸 𑀉𑀤𑀓𑀲𑁆𑀲 𑀧𑀺𑀥𑀸𑀬𑀺𑀓𑀸 𑀲𑀦𑁆𑀥𑀸𑀭𑀺𑀓𑀸 𑀧𑀣𑀯𑀻 𑀦𑀢𑁆𑀣𑀺 𑀅𑀲𑀁𑀯𑀼𑀢𑀸 𑀮𑁄𑀓𑀦𑁆𑀢𑀭𑀺𑀓𑀸, 𑀏𑀯𑀁 𑀉𑀧𑀭𑀺𑀧𑀺 𑀘𑀓𑁆𑀓𑀯𑀸𑀴𑁂𑀲𑀼 𑀤𑁂𑀯𑀯𑀺𑀫𑀸𑀦𑀸𑀦𑀁 𑀅𑀪𑀸𑀯𑀢𑁄 𑀅𑀲𑀁𑀯𑀼𑀢𑀸 𑀅𑀧𑁆𑀧𑀢𑀺𑀝𑁆𑀞𑀸𑀢𑀺 𑀤𑀲𑁆𑀲𑁂𑀢𑀺. 𑀅𑀦𑁆𑀥𑀓𑀸𑀭𑁄 𑀏𑀢𑁆𑀣 𑀅𑀢𑁆𑀣𑀻𑀢𑀺 𑀅𑀦𑁆𑀥𑀓𑀸𑀭𑀸. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀦 𑀚𑀸𑀬𑀢𑀺 𑀆𑀮𑁄𑀓𑀲𑁆𑀲 𑀅𑀪𑀸𑀯𑀢𑁄, 𑀦 𑀘𑀓𑁆𑀔𑀼𑀦𑁄. 𑀢𑀣𑀸 𑀳𑀺 ‘‘𑀢𑁂𑀦𑁄𑀪𑀸𑀲𑁂𑀦 𑀅𑀜𑁆𑀜𑀫𑀜𑁆𑀜𑀁 𑀲𑀜𑁆𑀚𑀸𑀦𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀚𑀫𑁆𑀩𑀼𑀤𑀻𑀧𑁂 𑀞𑀺𑀢𑀫𑀚𑁆𑀛𑀦𑁆𑀳𑀺𑀓𑀯𑁂𑀮𑀸𑀬 𑀧𑀼𑀩𑁆𑀩𑀯𑀺𑀤𑁂𑀳𑀯𑀸𑀲𑀻𑀦𑀁 𑀅𑀢𑁆𑀣𑀗𑁆𑀕𑀫𑀯𑀲𑁂𑀦 𑀉𑀧𑀟𑁆𑀠𑀁 𑀲𑀽𑀭𑀺𑀬𑀫𑀡𑁆𑀟𑀮𑀁 𑀧𑀜𑁆𑀜𑀸𑀬𑀢𑀺, 𑀅𑀧𑀭𑀕𑁄𑀬𑀸𑀦𑀯𑀸𑀲𑀻𑀦𑀁 𑀉𑀕𑁆𑀕𑀫𑀦𑀯𑀲𑁂𑀦. 𑀏𑀯𑀁 𑀲𑁂𑀲𑀤𑀻𑀧𑁂𑀲𑀼𑀧𑀻𑀢𑀺 𑀆𑀳 ‘‘𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀢𑀻𑀲𑀼 𑀤𑀻𑀧𑁂𑀲𑀼 𑀧𑀜𑁆𑀜𑀸𑀬𑀦𑁆𑀢𑀻’’𑀢𑀺. 𑀇𑀢𑁄 𑀅𑀜𑁆𑀜𑀣𑀸 𑀤𑁆𑀯𑀻𑀲𑀼 𑀏𑀯 𑀤𑀻𑀧𑁂𑀲𑀼 𑀧𑀜𑁆𑀜𑀸𑀬𑀦𑁆𑀢𑀺. 𑀏𑀓𑁂𑀓𑀸𑀬 𑀤𑀺𑀲𑀸𑀬 𑀦𑀯𑀦𑀯𑀬𑁄𑀚𑀦𑀲𑀢𑀲𑀳𑀲𑁆𑀲𑀸𑀦𑀺 𑀅𑀦𑁆𑀥𑀓𑀸𑀭𑀯𑀺𑀥𑀫𑀦𑀫𑁆𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀤𑀝𑁆𑀞𑀩𑁆𑀩𑀁. 𑀧𑀪𑀸𑀬 𑀦𑀧𑁆𑀧𑀳𑁄𑀦𑁆𑀢𑀻𑀢𑀺 𑀅𑀢𑁆𑀢𑀦𑁄 𑀧𑀪𑀸𑀬 𑀑𑀪𑀸𑀲𑀺𑀢𑀼𑀁 𑀦𑀸𑀪𑀺𑀲𑀫𑁆𑀪𑀼𑀡𑀦𑁆𑀢𑀺. 𑀬𑀼𑀕𑀦𑁆𑀥𑀭𑀧𑀩𑁆𑀩𑀢𑀫𑀢𑁆𑀣𑀓𑀲𑀫𑀧𑁆𑀧𑀫𑀸𑀡𑁂 𑀆𑀓𑀸𑀲𑁂 𑀯𑀺𑀘𑀭𑀡𑀢𑁄 ‘‘𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀲𑁆𑀲 𑀯𑁂𑀫𑀚𑁆𑀛𑁂𑀦 𑀘𑀭𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁.

𑀩𑁆𑀬𑀸𑀯𑀝𑀸𑀢𑀺 𑀔𑀸𑀤𑀦𑀢𑁆𑀣𑀁 𑀕𑀡𑁆𑀳𑀺𑀢𑀼𑀁 𑀉𑀧𑀓𑁆𑀓𑀫𑀦𑁆𑀢𑀸. 𑀯𑀺𑀧𑀭𑀺𑀯𑀢𑁆𑀢𑀺𑀢𑁆𑀯𑀸𑀢𑀺 𑀯𑀺𑀯𑀝𑁆𑀝𑀺𑀢𑁆𑀯𑀸. 𑀙𑀺𑀚𑁆𑀚𑀺𑀢𑁆𑀯𑀸𑀢𑀺 𑀫𑀼𑀘𑁆𑀙𑀸𑀧𑀯𑀢𑁆𑀢𑀺𑀬𑀸 𑀞𑀺𑀢𑀝𑁆𑀞𑀸𑀦𑀢𑁄 𑀫𑀼𑀘𑁆𑀘𑀺𑀢𑁆𑀯𑀸, 𑀅𑀗𑁆𑀕𑀧𑀘𑁆𑀘𑀗𑁆𑀕𑀙𑁂𑀤𑀦𑀯𑀲𑁂𑀦 𑀯𑀸 𑀙𑀺𑀚𑁆𑀚𑀺𑀢𑁆𑀯𑀸. 𑀅𑀘𑁆𑀘𑀦𑁆𑀢𑀔𑀸𑀭𑁂𑀢𑀺 𑀆𑀢𑀧𑀲𑀦𑁆𑀢𑀧𑀸𑀪𑀸𑀯𑁂𑀦 𑀅𑀢𑀺𑀲𑀻𑀢𑀪𑀸𑀯𑀁 𑀲𑀦𑁆𑀥𑀸𑀬 𑀅𑀘𑁆𑀘𑀦𑁆𑀢𑀔𑀸𑀭𑀢𑀸 𑀯𑀼𑀢𑁆𑀢𑀸 𑀲𑀺𑀬𑀸. 𑀦 𑀳𑀺 𑀢𑀁 𑀓𑀧𑁆𑀧𑀲𑀡𑁆𑀞𑀸𑀦𑀉𑀤𑀓𑀁 𑀲𑀫𑁆𑀧𑀢𑁆𑀢𑀺𑀓𑀭𑀫𑀳𑀸𑀫𑁂𑀖𑀯𑀼𑀝𑁆𑀞𑀁 𑀧𑀣𑀯𑀺𑀲𑀦𑁆𑀥𑀸𑀭𑀓𑀁 𑀓𑀧𑁆𑀧𑀯𑀺𑀦𑀸𑀲𑀓𑀉𑀤𑀓𑀁 𑀯𑀺𑀬 𑀔𑀸𑀭𑀁 𑀪𑀯𑀺𑀢𑀼𑀫𑀭𑀳𑀢𑀺, 𑀢𑀣𑀸 𑀲𑀢𑀺 𑀧𑀣𑀯𑀻𑀧𑀺 𑀯𑀺𑀮𑀻𑀬𑁂𑀬𑁆𑀬, 𑀢𑁂𑀲𑀁 𑀯𑀸 𑀧𑀸𑀧𑀓𑀫𑁆𑀫𑀨𑀮𑁂𑀦 𑀧𑁂𑀢𑀸𑀦𑀁 𑀧𑀓𑀢𑀺𑀉𑀤𑀓𑀲𑁆𑀲 𑀧𑀼𑀩𑁆𑀩𑀔𑁂𑀴𑀪𑀸𑀯𑀸𑀧𑀢𑁆𑀢𑀺 𑀯𑀺𑀬 𑀢𑀲𑁆𑀲 𑀉𑀤𑀓𑀲𑁆𑀲 𑀔𑀸𑀭𑀪𑀸𑀯𑀸𑀧𑀢𑁆𑀢𑀺 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀘𑁆𑀘𑀦𑁆𑀢𑀔𑀸𑀭𑁂 𑀉𑀤𑀓𑁂’’𑀢𑀺.

𑀧𑀞𑀫𑀢𑀣𑀸𑀕𑀢𑀅𑀘𑁆𑀙𑀭𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀤𑀼𑀢𑀺𑀬𑀢𑀣𑀸𑀕𑀢𑀅𑀘𑁆𑀙𑀭𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁮. 𑀅𑀝𑁆𑀞𑀫𑁂 𑀆𑀮𑀻𑀬𑀦𑁆𑀢𑀺 𑀆𑀭𑀫𑀺𑀢𑀩𑁆𑀩𑀝𑁆𑀞𑁂𑀦 𑀲𑁂𑀯𑀻𑀬𑀦𑁆𑀢𑀻𑀢𑀺 𑀆𑀮𑀬𑀸, 𑀧𑀜𑁆𑀘 𑀓𑀸𑀫𑀕𑀼𑀡𑀸. 𑀆𑀭𑀫𑀦𑁆𑀢𑀻𑀢𑀺 𑀭𑀢𑀺𑀁 𑀯𑀺𑀦𑁆𑀤𑀦𑁆𑀢𑀺 𑀓𑀻𑀴𑀦𑁆𑀢𑀺 𑀮𑀴𑀦𑁆𑀢𑀺. 𑀆𑀮𑀻𑀬𑀦𑁆𑀢𑀺 𑀯𑀸 𑀅𑀮𑁆𑀮𑀻𑀬𑀦𑁆𑀢𑀸 𑀅𑀪𑀺𑀭𑀫𑀡𑀯𑀲𑁂𑀦 𑀲𑁂𑀯𑀦𑁆𑀢𑀻𑀢𑀺 𑀆𑀮𑀬𑀸, 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺. 𑀢𑁂𑀳𑀺 𑀆𑀮𑀬𑁂𑀳𑀺 𑀭𑀫𑀦𑁆𑀢𑀻𑀢𑀺 𑀆𑀮𑀬𑀸𑀭𑀸𑀫𑀸. 𑀬𑀣𑁂𑀯 𑀳𑀺 𑀲𑀼𑀲𑀚𑁆𑀚𑀺𑀢𑀁 𑀧𑀼𑀧𑁆𑀨𑀨𑀮𑀪𑀭𑀺𑀢𑀭𑀼𑀓𑁆𑀔𑀸𑀤𑀺𑀲𑀫𑁆𑀧𑀦𑁆𑀦𑀉𑀬𑁆𑀬𑀸𑀦𑀁 𑀧𑀯𑀺𑀝𑁆𑀞𑁄 𑀭𑀸𑀚𑀸 𑀢𑀸𑀬 𑀲𑀫𑁆𑀧𑀢𑁆𑀢𑀺𑀬𑀸 𑀭𑀫𑀢𑀺, 𑀲𑀫𑁆𑀫𑀼𑀤𑀺𑀢𑁄 𑀆𑀫𑁄𑀤𑀺𑀢𑀧𑁆𑀧𑀫𑁄𑀤𑀺𑀢𑁄 𑀳𑁄𑀢𑀺, 𑀦 𑀉𑀓𑁆𑀓𑀡𑁆𑀞𑁂𑀢𑀺, 𑀲𑀸𑀬𑀫𑁆𑀧𑀺 𑀦𑀺𑀓𑁆𑀔𑀫𑀺𑀢𑀼𑀁 𑀦 𑀇𑀘𑁆𑀙𑀢𑀺, 𑀏𑀯𑀫𑀺𑀫𑁂𑀳𑀺 𑀓𑀸𑀫𑀸𑀮𑀬𑀢𑀡𑁆𑀳𑀸𑀮𑀬𑁂𑀳𑀺 𑀲𑀢𑁆𑀢𑀸 𑀭𑀫𑀦𑁆𑀢𑀺, 𑀲𑀁𑀲𑀸𑀭𑀯𑀝𑁆𑀝𑁂 𑀧𑀫𑀼𑀤𑀺𑀢𑀸 𑀅𑀦𑀼𑀓𑁆𑀓𑀡𑁆𑀞𑀺𑀢𑀸 𑀯𑀲𑀦𑁆𑀢𑀺. 𑀢𑁂𑀦 𑀢𑁂𑀲𑀁 𑀪𑀕𑀯𑀸 𑀤𑀼𑀯𑀺𑀥𑀫𑁆𑀧𑀺 𑀆𑀮𑀬𑀁 𑀉𑀬𑁆𑀬𑀸𑀦𑀪𑀽𑀫𑀺𑀁 𑀯𑀺𑀬 𑀤𑀲𑁆𑀲𑁂𑀦𑁆𑀢𑁄 ‘‘𑀆𑀮𑀬𑀸𑀭𑀸𑀫𑀸’’𑀢𑀺𑀆𑀤𑀺𑀫𑀸𑀳. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑀤𑀼𑀢𑀺𑀬𑀢𑀣𑀸𑀕𑀢𑀅𑀘𑁆𑀙𑀭𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯-𑁧𑁦. 𑀆𑀦𑀦𑁆𑀤𑀅𑀘𑁆𑀙𑀭𑀺𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁨𑁯-𑁧𑁩𑁦. 𑀦𑀯𑀫𑁂 𑀧𑀝𑀺𑀲𑀦𑁆𑀣𑀸𑀭𑀥𑀫𑁆𑀫𑀦𑁆𑀢𑀺 𑀧𑀓𑀢𑀺𑀘𑀸𑀭𑀺𑀢𑁆𑀢𑀯𑀲𑁂𑀦 𑀯𑀼𑀢𑁆𑀢𑀁, 𑀉𑀧𑀕𑀢𑀸𑀦𑀁 𑀧𑀦 𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀦𑀜𑁆𑀘 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀯𑀲𑁂𑀦 𑀘𑁂𑀯 𑀘𑀺𑀢𑁆𑀢𑀭𑀼𑀘𑀺𑀯𑀲𑁂𑀦 𑀘 𑀬𑀣𑀸𑀓𑀸𑀮𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺𑀬𑁂𑀯, 𑀉𑀧𑀸𑀲𑀓𑀉𑀧𑀸𑀲𑀺𑀓𑀸𑀦𑀁 𑀧𑀦 𑀉𑀧𑀦𑀺𑀲𑀺𑀦𑁆𑀦𑀓𑀓𑀣𑀸𑀯𑀲𑁂𑀦. 𑀤𑀲𑀫𑀁 𑀉𑀢𑁆𑀢𑀸𑀦𑀫𑁂𑀯.

𑀆𑀦𑀦𑁆𑀤𑀅𑀘𑁆𑀙𑀭𑀺𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀪𑀬𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.