(𑁧𑁪) 𑁪. 𑀧𑀼𑀕𑁆𑀕𑀮𑀯𑀕𑁆𑀕𑁄

𑁧. 𑀲𑀁𑀬𑁄𑀚𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁧. 𑀘𑀢𑀼𑀢𑁆𑀣𑀲𑁆𑀲 𑀧𑀞𑀫𑁂 𑀉𑀧𑀧𑀢𑁆𑀢𑀺𑀧𑁆𑀧𑀝𑀺𑀮𑀸𑀪𑀁 𑀲𑀁𑀯𑀢𑁆𑀢𑀦𑀺𑀓𑀸𑀦𑀻𑀢𑀺 𑀉𑀧𑀧𑀢𑁆𑀢𑀺𑀧𑀝𑀺𑀮𑀸𑀪𑀺𑀬𑀸𑀦𑀺. 𑀪𑀯𑀧𑀝𑀺𑀮𑀸𑀪𑀺𑀬𑀸𑀦𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀬𑁂𑀳𑀻𑀢𑀺 𑀬𑁂𑀳𑀺 𑀲𑀁𑀬𑁄𑀚𑀦𑁂𑀳𑀺 𑀳𑁂𑀢𑀼𑀪𑀽𑀢𑁂𑀳𑀺, 𑀓𑀭𑀡𑀪𑀽𑀢𑁂𑀳𑀺 𑀯𑀸. 𑀦𑀦𑀼 𑀘 𑀲𑁄𑀢𑀸𑀧𑀦𑁆𑀦𑀲𑁆𑀲𑀧𑀺 𑀑𑀭𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀅𑀧𑁆𑀧𑀳𑀻𑀦𑀸𑀦𑀺, 𑀓𑀲𑁆𑀫𑀸 𑀧𑀦 𑀲𑀓𑀤𑀸𑀕𑀸𑀫𑀻𑀬𑁂𑀯 𑀇𑀥 𑀕𑀳𑀺𑀢𑁄𑀢𑀺 𑀆𑀳 ‘‘𑀲𑀓𑀤𑀸𑀕𑀸𑀫𑀺𑀲𑁆𑀲𑀸𑀢𑀺 𑀇𑀤𑀁 𑀅𑀧𑁆𑀧𑀳𑀻𑀦𑀲𑀁𑀬𑁄𑀚𑀦𑁂𑀲𑀼 𑀅𑀭𑀺𑀬𑁂𑀲𑀼 𑀉𑀢𑁆𑀢𑀫𑀓𑁄𑀝𑀺𑀬𑀸 𑀕𑀳𑀺𑀢’’𑀦𑁆𑀢𑀺. 𑀢𑀢𑁆𑀣 𑀅𑀧𑁆𑀧𑀳𑀻𑀦𑀲𑀁𑀬𑁄𑀚𑀦𑁂𑀲𑀽𑀢𑀺 𑀅𑀧𑁆𑀧𑀳𑀻𑀦𑀑𑀭𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑁂𑀲𑀼. 𑀉𑀢𑁆𑀢𑀫𑀓𑁄𑀝𑀺𑀬𑀸 𑀕𑀳𑀺𑀢𑀦𑁆𑀢𑀺 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁂𑀦 𑀕𑀳𑀺𑀢𑀁. 𑀲𑀓𑀤𑀸𑀕𑀸𑀫𑀺𑀢𑁄 𑀧𑀭𑀜𑁆𑀳𑀺 𑀅𑀧𑁆𑀧𑀳𑀻𑀦𑀑𑀭𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑁄 𑀅𑀭𑀺𑀬𑁄 𑀦𑀸𑀫 𑀦𑀢𑁆𑀣𑀺. 𑀦𑀦𑀼 𑀘 𑀲𑀓𑀤𑀸𑀕𑀸𑀫𑀺𑀲𑁆𑀲 𑀧𑀳𑀻𑀦𑀸𑀦𑀺𑀧𑀺 𑀑𑀭𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀅𑀢𑁆𑀣𑀺 𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀲𑀁𑀬𑁄𑀚𑀦𑀸𑀦𑀁 𑀧𑀳𑀻𑀦𑀢𑁆𑀢𑀸, 𑀢𑀲𑁆𑀫𑀸 ‘‘𑀑𑀭𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀅𑀧𑁆𑀧𑀳𑀻𑀦𑀸𑀦𑀻’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀑𑀭𑀫𑁆𑀪𑀸𑀕𑀺𑀬𑁂𑀲𑀼 𑀘 𑀅𑀧𑁆𑀧𑀳𑀻𑀦𑀁 𑀉𑀧𑀸𑀤𑀸𑀬𑀸’’𑀢𑀺𑀆𑀤𑀺. 𑀬𑀲𑁆𑀫𑀸 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀲𑀁𑀬𑁄𑀚𑀦𑀸𑀦𑀺 𑀲𑀓𑀤𑀸𑀕𑀸𑀫𑀺𑀲𑁆𑀲 𑀅𑀧𑁆𑀧𑀳𑀻𑀦𑀸𑀦𑀺, 𑀢𑀲𑁆𑀫𑀸 𑀢𑀸𑀦𑀺 𑀅𑀧𑁆𑀧𑀳𑀻𑀦𑀸𑀦𑀺 𑀉𑀧𑀸𑀤𑀸𑀬 ‘‘𑀑𑀭𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀅𑀧𑁆𑀧𑀳𑀻𑀦𑀸𑀦𑀻’’𑀢𑀺 𑀯𑀼𑀢𑁆𑀢𑀁, 𑀦 𑀲𑀩𑁆𑀩𑁂𑀲𑀁 𑀅𑀧𑁆𑀧𑀳𑀻𑀦𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀲𑀁𑀬𑁄𑀚𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀧𑀝𑀺𑀪𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁨. 𑀤𑀼𑀢𑀺𑀬𑁂 𑀧𑀝𑀺𑀪𑀸𑀦𑀁 𑀯𑀼𑀘𑁆𑀘𑀢𑀺 𑀜𑀸𑀡𑀫𑁆𑀧𑀺 𑀜𑀸𑀡𑀲𑁆𑀲 𑀉𑀧𑀝𑁆𑀞𑀺𑀢𑀯𑀘𑀦𑀫𑁆𑀧𑀺, 𑀢𑀁 𑀇𑀥 𑀅𑀥𑀺𑀧𑁆𑀧𑁂𑀢𑀁, 𑀅𑀢𑁆𑀣𑀬𑀼𑀢𑁆𑀢𑀁 𑀓𑀸𑀭𑀡𑀬𑀼𑀢𑁆𑀢𑀜𑁆𑀘 𑀧𑀝𑀺𑀪𑀸𑀦𑀫𑀲𑁆𑀲𑀸𑀢𑀺 𑀬𑀼𑀢𑁆𑀢𑀧𑁆𑀧𑀝𑀺𑀪𑀸𑀦𑁄. 𑀧𑀼𑀘𑁆𑀙𑀸𑀦𑀦𑁆𑀢𑀭𑀫𑁂𑀯 𑀲𑀻𑀖𑀁 𑀩𑁆𑀬𑀸𑀓𑀸𑀢𑀼𑀁 𑀅𑀲𑀫𑀢𑁆𑀣𑀢𑀸𑀬 𑀦𑁄𑀫𑀼𑀢𑁆𑀢𑀧𑁆𑀧𑀝𑀺𑀪𑀸𑀦𑀫𑀲𑁆𑀲𑀸𑀢𑀺 𑀦𑁄𑀫𑀼𑀢𑁆𑀢𑀧𑁆𑀧𑀝𑀺𑀪𑀸𑀦𑁄. 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀢𑁆𑀣 𑀧𑀦 𑀧𑀞𑀫𑁄 𑀓𑀜𑁆𑀘𑀺 𑀓𑀸𑀮𑀁 𑀯𑀻𑀫𑀁𑀲𑀺𑀢𑁆𑀯𑀸 𑀬𑀼𑀢𑁆𑀢𑀫𑁂𑀯 𑀧𑁂𑀓𑁆𑀔𑀢𑀺 𑀢𑀺𑀧𑀺𑀝𑀓𑀘𑀽𑀴𑀦𑀸𑀕𑀢𑁆𑀣𑁂𑀭𑁄 𑀯𑀺𑀬. 𑀲𑁄 𑀧𑀦 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀬𑀼𑀢𑁆𑀢𑀧𑁆𑀧𑀢𑁆𑀢𑀓𑀸𑀭𑀡𑀫𑁂𑀯 𑀓𑀣𑁂𑀢𑀺. 𑀤𑀼𑀢𑀺𑀬𑁄 𑀧𑀼𑀘𑁆𑀙𑀸𑀦𑀦𑁆𑀢𑀭𑀫𑁂𑀯 𑀬𑁂𑀦 𑀯𑀸 𑀢𑁂𑀦 𑀯𑀸 𑀯𑀘𑀦𑁂𑀦 𑀧𑀝𑀺𑀩𑀸𑀳𑀢𑀺, 𑀯𑀻𑀫𑀁𑀲𑀺𑀢𑁆𑀯𑀸𑀧𑀺 𑀘 𑀬𑀼𑀢𑁆𑀢𑀁 𑀦 𑀧𑀓𑁆𑀔𑁂𑀢𑀺 𑀘𑀢𑀼𑀦𑀺𑀓𑀸𑀬𑀺𑀓𑀧𑀺𑀡𑁆𑀟𑀢𑀺𑀲𑁆𑀲𑀢𑁆𑀣𑁂𑀭𑁄 𑀯𑀺𑀬. 𑀲𑁄 𑀧𑀦 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀧𑀜𑁆𑀳𑀧𑀭𑀺𑀬𑁄𑀲𑀸𑀦𑀫𑁆𑀧𑀺 𑀦𑀸𑀕𑀫𑁂𑀢𑀺, 𑀬𑀁 𑀯𑀸 𑀢𑀁 𑀯𑀸 𑀓𑀣𑁂𑀢𑀺𑀬𑁂𑀯, 𑀯𑀘𑀦𑀢𑁆𑀣𑀁 𑀧𑀦𑀲𑁆𑀲 𑀯𑀻𑀫𑀁𑀲𑀺𑀬𑀫𑀸𑀦𑀁 𑀓𑀢𑁆𑀣𑀘𑀺 𑀦 𑀮𑀕𑀢𑀺. 𑀢𑀢𑀺𑀬𑁄 𑀧𑀼𑀘𑁆𑀙𑀸𑀲𑀫𑀓𑀸𑀮𑀫𑁂𑀯 𑀬𑀼𑀢𑁆𑀢𑀁 𑀧𑁂𑀓𑁆𑀔𑀢𑀺, 𑀢𑀁𑀔𑀡𑀁𑀬𑁂𑀯 𑀘 𑀦𑀁 𑀩𑁆𑀬𑀸𑀓𑀭𑁄𑀢𑀺 𑀢𑀺𑀧𑀺𑀝𑀓𑀘𑀽𑀴𑀸𑀪𑀬𑀢𑁆𑀣𑁂𑀭𑁄 𑀯𑀺𑀬. 𑀲𑁄 𑀧𑀦 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀲𑀻𑀖𑀫𑁂𑀯 𑀓𑀣𑁂𑀢𑀺, 𑀬𑀼𑀢𑁆𑀢𑀧𑁆𑀧𑀢𑁆𑀢𑀓𑀸𑀭𑀡𑁄 𑀘 𑀳𑁄𑀢𑀺. 𑀘𑀢𑀼𑀢𑁆𑀣𑁄 𑀧𑀼𑀝𑁆𑀞𑁄 𑀲𑀫𑀸𑀦𑁄 𑀦𑁂𑀯 𑀬𑀼𑀢𑁆𑀢𑀁 𑀧𑁂𑀓𑁆𑀔𑀢𑀺, 𑀦 𑀬𑁂𑀦 𑀯𑀸 𑀢𑁂𑀦 𑀯𑀸 𑀧𑀝𑀺𑀩𑀸𑀳𑀺𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀺𑀩𑁆𑀩𑀦𑁆𑀥𑀓𑀸𑀭𑀦𑀺𑀫𑀼𑀕𑁆𑀕𑁄 𑀯𑀺𑀬 𑀳𑁄𑀢𑀺 𑀮𑀸𑀴𑀼𑀤𑀸𑀬𑀺𑀢𑁆𑀣𑁂𑀭𑁄 𑀯𑀺𑀬.

𑀧𑀝𑀺𑀪𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩-𑁪. 𑀉𑀕𑁆𑀖𑀝𑀺𑀢𑀜𑁆𑀜𑀽𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁩𑁩-𑁪. 𑀢𑀢𑀺𑀬𑁂 𑀉𑀕𑁆𑀖𑀝𑀺𑀢𑀜𑁆𑀜𑀽𑀢𑀺 𑀏𑀢𑁆𑀣 𑀉𑀕𑁆𑀖𑀝𑀦𑀁 𑀦𑀸𑀫 𑀜𑀸𑀡𑀼𑀕𑁆𑀖𑀝𑀦𑀁, 𑀜𑀸𑀡𑁂𑀦 𑀉𑀕𑁆𑀖𑀝𑀺𑀢𑀫𑀢𑁆𑀢𑁂𑀬𑁂𑀯 𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄. 𑀲𑀳 𑀉𑀤𑀸𑀳𑀝𑀯𑁂𑀮𑀸𑀬𑀸𑀢𑀺 𑀉𑀤𑀸𑀳𑀸𑀭𑁂 𑀉𑀤𑀸𑀳𑀝𑀫𑀢𑁆𑀢𑁂𑀬𑁂𑀯. 𑀥𑀫𑁆𑀫𑀸𑀪𑀺𑀲𑀫𑀬𑁄 𑀳𑁄𑀢𑀻𑀢𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑀲𑁆𑀲 𑀜𑀸𑀡𑁂𑀦 𑀲𑀤𑁆𑀥𑀺𑀁 𑀅𑀪𑀺𑀲𑀫𑀬𑁄. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 ‘‘𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺𑀆𑀤𑀺𑀦𑀸 (𑀯𑀺𑀪. 𑁩𑁫𑁫) 𑀦𑀬𑁂𑀦 𑀲𑀁𑀔𑀺𑀢𑁆𑀢𑁂𑀦 𑀫𑀸𑀢𑀺𑀓𑀸𑀬 𑀞𑀧𑀺𑀬𑀫𑀸𑀦𑀸𑀬 𑀤𑁂𑀲𑀦𑀸𑀦𑀼𑀲𑀸𑀭𑁂𑀦 𑀜𑀸𑀡𑀁 𑀧𑁂𑀲𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀕𑀡𑁆𑀳𑀺𑀢𑀼𑀁 𑀲𑀫𑀢𑁆𑀣𑁄 𑀧𑀼𑀕𑁆𑀕𑀮𑁄 ‘‘𑀉𑀕𑁆𑀖𑀝𑀺𑀢𑀜𑁆𑀜𑀽’’𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀧𑀜𑁆𑀘𑀺𑀢𑀁 𑀯𑀺𑀢𑁆𑀣𑀸𑀭𑀺𑀢𑀫𑁂𑀯 𑀅𑀢𑁆𑀣𑀁 𑀚𑀸𑀦𑀸𑀢𑀻𑀢𑀺 𑀯𑀺𑀧𑀜𑁆𑀘𑀺𑀢𑀜𑁆𑀜𑀽. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀲𑀁𑀔𑀺𑀢𑁆𑀢𑁂𑀦 𑀫𑀸𑀢𑀺𑀓𑀁 𑀞𑀧𑁂𑀢𑁆𑀯𑀸 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑁂 𑀪𑀸𑀚𑀺𑀬𑀫𑀸𑀦𑁂 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀢𑀼𑀁 𑀲𑀫𑀢𑁆𑀣𑁄 𑀧𑀼𑀕𑁆𑀕𑀮𑁄 ‘‘𑀯𑀺𑀧𑀜𑁆𑀘𑀺𑀢𑀜𑁆𑀜𑀽’’𑀢𑀺 𑀯𑀼𑀘𑁆𑀘𑀢𑀺. 𑀉𑀤𑁆𑀤𑁂𑀲𑀸𑀤𑀻𑀳𑀺 𑀦𑁂𑀢𑀩𑁆𑀩𑁄𑀢𑀺 𑀦𑁂𑀬𑁆𑀬𑁄. 𑀅𑀦𑀼𑀧𑀼𑀩𑁆𑀩𑁂𑀦 𑀥𑀫𑁆𑀫𑀸𑀪𑀺𑀲𑀫𑀬𑁄𑀢𑀺 𑀅𑀦𑀼𑀓𑁆𑀓𑀫𑁂𑀦 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺. 𑀩𑁆𑀬𑀜𑁆𑀚𑀦𑀧𑀤𑀫𑁂𑀯 𑀧𑀭𑀫𑀁 𑀅𑀲𑁆𑀲𑀸𑀢𑀺 𑀧𑀤𑀧𑀭𑀫𑁄. 𑀦 𑀢𑀸𑀬 𑀚𑀸𑀢𑀺𑀬𑀸 𑀥𑀫𑁆𑀫𑀸𑀪𑀺𑀲𑀫𑀬𑁄 𑀳𑁄𑀢𑀻𑀢𑀺 𑀢𑁂𑀦 𑀅𑀢𑁆𑀢𑀪𑀸𑀯𑁂𑀦 𑀛𑀸𑀦𑀁 𑀯𑀸 𑀯𑀺𑀧𑀲𑁆𑀲𑀦𑀁 𑀯𑀸 𑀫𑀕𑁆𑀕𑀁 𑀯𑀸 𑀨𑀮𑀁 𑀯𑀸 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀅𑀢𑁆𑀣𑁄. 𑀘𑀢𑀼𑀢𑁆𑀣𑀁 𑀉𑀢𑁆𑀢𑀸𑀦𑀫𑁂𑀯.

𑀉𑀕𑁆𑀖𑀝𑀺𑀢𑀜𑁆𑀜𑀽𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫-𑁮. 𑀲𑀸𑀯𑀚𑁆𑀚𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁩𑁫-𑁮. 𑀧𑀜𑁆𑀘𑀫𑁂 𑀲𑀸𑀯𑀚𑁆𑀚𑁄𑀢𑀺 𑀲𑀤𑁄𑀲𑁄. 𑀲𑀸𑀯𑀚𑁆𑀚𑁂𑀦 𑀓𑀸𑀬𑀓𑀫𑁆𑀫𑁂𑀦𑀸𑀢𑀺 𑀲𑀤𑁄𑀲𑁂𑀦 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀦𑀸 𑀓𑀸𑀬𑀓𑀫𑁆𑀫𑁂𑀦. 𑀇𑀢𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀧𑀼𑀕𑁆𑀕𑀮𑁄 𑀢𑀻𑀳𑀺 𑀤𑁆𑀯𑀸𑀭𑁂𑀳𑀺 𑀆𑀬𑀽𑀳𑀦𑀓𑀫𑁆𑀫𑀲𑁆𑀲 𑀲𑀤𑁄𑀲𑀢𑁆𑀢𑀸 𑀕𑀽𑀣𑀓𑀼𑀡𑀧𑀸𑀤𑀺𑀪𑀭𑀺𑀢𑁄 𑀧𑀤𑁂𑀲𑁄 𑀯𑀺𑀬 ‘‘𑀲𑀸𑀯𑀚𑁆𑀚𑁄’’𑀢𑀺 𑀯𑀼𑀘𑁆𑀘𑀢𑀺. 𑀲𑀸𑀯𑀚𑁆𑀚𑁂𑀦 𑀩𑀳𑀼𑀮𑀦𑁆𑀢𑀺 𑀬𑀲𑁆𑀲 𑀲𑀸𑀯𑀚𑁆𑀚𑀫𑁂𑀯 𑀓𑀸𑀬𑀓𑀫𑁆𑀫𑀁 𑀩𑀳𑀼𑀮𑀁 𑀳𑁄𑀢𑀺, 𑀅𑀧𑁆𑀧𑀁 𑀅𑀦𑀯𑀚𑁆𑀚𑀁. 𑀲𑁄 ‘‘𑀲𑀸𑀯𑀚𑁆𑀚𑁂𑀦 𑀩𑀳𑀼𑀮𑀁 𑀓𑀸𑀬𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄 𑀅𑀧𑁆𑀧𑀁 𑀅𑀦𑀯𑀚𑁆𑀚𑁂𑀦𑀸’’𑀢𑀺 𑀯𑀼𑀘𑁆𑀘𑀢𑀺. 𑀇𑀢𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀓𑁄 𑀧𑀦 𑀏𑀯𑀭𑀽𑀧𑁄 𑀳𑁄𑀢𑀻𑀢𑀺? 𑀬𑁄 𑀕𑀸𑀫𑀥𑀫𑁆𑀫𑀢𑀸𑀬 𑀯𑀸 𑀦𑀺𑀕𑀫𑀥𑀫𑁆𑀫𑀢𑀸𑀬 𑀯𑀸 𑀓𑀤𑀸𑀘𑀺 𑀓𑀭𑀳𑀘𑀺 𑀉𑀧𑁄𑀲𑀣𑀁 𑀲𑀫𑀸𑀤𑀺𑀬𑀢𑀺, 𑀲𑀻𑀮𑀸𑀦𑀺 𑀧𑀽𑀭𑁂𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀧𑀼𑀕𑁆𑀕𑀮𑁄 𑀢𑀻𑀳𑀺 𑀤𑁆𑀯𑀸𑀭𑁂𑀳𑀺 𑀆𑀬𑀽𑀳𑀦𑀓𑀫𑁆𑀫𑁂𑀲𑀼 𑀲𑀸𑀯𑀚𑁆𑀚𑀲𑁆𑀲𑁂𑀯 𑀩𑀳𑀼𑀮𑀢𑀸𑀬 𑀅𑀦𑀯𑀚𑁆𑀚𑀲𑁆𑀲 𑀅𑀧𑁆𑀧𑀢𑀸𑀬 ‘‘𑀯𑀚𑁆𑀚𑀩𑀳𑀼𑀮𑁄’’𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸 𑀳𑀺 𑀏𑀓𑀲𑁆𑀫𑀺𑀁 𑀧𑀤𑁂𑀲𑁂 𑀤𑀼𑀩𑁆𑀩𑀡𑁆𑀡𑀸𑀦𑀺 𑀤𑀼𑀕𑁆𑀕𑀦𑁆𑀥𑀸𑀦𑀺 𑀧𑀼𑀧𑁆𑀨𑀸𑀦𑀺 𑀭𑀸𑀲𑀺𑀓𑀢𑀸𑀦𑀲𑁆𑀲𑀼, 𑀢𑁂𑀲𑀁 𑀉𑀧𑀭𑀺 𑀢𑀳𑀁 𑀢𑀳𑀁 𑀅𑀥𑀺𑀫𑀼𑀢𑁆𑀢𑀓𑀯𑀲𑁆𑀲𑀺𑀓𑀧𑀸𑀝𑀮𑀸𑀦𑀺 𑀧𑀢𑀺𑀢𑀸𑀦𑀺 𑀪𑀯𑁂𑀬𑁆𑀬𑀼𑀁, 𑀏𑀯𑀭𑀽𑀧𑁄 𑀅𑀬𑀁 𑀧𑀼𑀕𑁆𑀕𑀮𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸 𑀧𑀦 𑀏𑀓𑀲𑁆𑀫𑀺𑀁 𑀧𑀤𑁂𑀲𑁂 𑀅𑀥𑀺𑀫𑀼𑀢𑁆𑀢𑀓𑀯𑀲𑁆𑀲𑀺𑀓𑀧𑀸𑀝𑀮𑀸𑀦𑀺 𑀭𑀸𑀲𑀺𑀓𑀢𑀸𑀦𑀲𑁆𑀲𑀼, 𑀢𑁂𑀲𑀁 𑀉𑀧𑀭𑀺 𑀢𑀳𑀁 𑀢𑀳𑀁 𑀤𑀼𑀕𑁆𑀕𑀦𑁆𑀥𑀸𑀦𑀺 𑀩𑀤𑀭𑀧𑀼𑀧𑁆𑀨𑀸𑀤𑀻𑀦𑀺 𑀧𑀢𑀺𑀢𑀸𑀦𑀺 𑀪𑀯𑁂𑀬𑁆𑀬𑀼𑀁. 𑀏𑀯𑀭𑀽𑀧𑁄 𑀢𑀢𑀺𑀬𑁄 𑀧𑀼𑀕𑁆𑀕𑀮𑁄 𑀯𑁂𑀤𑀺𑀢𑀩𑁆𑀩𑁄. 𑀘𑀢𑀼𑀢𑁆𑀣𑁄 𑀧𑀦 𑀢𑀻𑀳𑀺 𑀤𑁆𑀯𑀸𑀭𑁂𑀳𑀺 𑀆𑀬𑀽𑀳𑀦𑀓𑀫𑁆𑀫𑀲𑁆𑀲 𑀦𑀺𑀤𑁆𑀤𑁄𑀲𑀢𑁆𑀢𑀸 𑀘 𑀘𑀢𑀼𑀫𑀥𑀼𑀭𑀪𑀭𑀺𑀢𑀲𑀼𑀯𑀡𑁆𑀡𑀯𑀸𑀢𑀺 𑀯𑀺𑀬 𑀤𑀝𑁆𑀞𑀩𑁆𑀩𑁄. 𑀙𑀝𑁆𑀞𑀸𑀤𑀻𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑀲𑀸𑀯𑀚𑁆𑀚𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯-𑁧𑁦. 𑀥𑀫𑁆𑀫𑀓𑀣𑀺𑀓𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁩𑁯-𑁧𑁪𑁦. 𑀦𑀯𑀫𑁂 𑀅𑀧𑁆𑀧𑀜𑁆𑀘 𑀪𑀸𑀲𑀢𑀻𑀢𑀺 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀣𑁄𑀓𑀫𑁂𑀯 𑀓𑀣𑁂𑀢𑀺. 𑀅𑀲𑀳𑀺𑀢𑀜𑁆𑀘𑀸𑀢𑀺 𑀓𑀣𑁂𑀦𑁆𑀢𑁄 𑀘 𑀧𑀦 𑀦 𑀅𑀢𑁆𑀣𑀬𑀼𑀢𑁆𑀢𑀁 𑀓𑀸𑀮𑀬𑀼𑀢𑁆𑀢𑀁 𑀓𑀣𑁂𑀢𑀺. 𑀧𑀭𑀺𑀲𑀸 𑀘𑀲𑁆𑀲 𑀦 𑀓𑀼𑀲𑀮𑀸 𑀳𑁄𑀢𑀻𑀢𑀺 𑀲𑁄𑀢𑀼𑀁 𑀦𑀺𑀲𑀺𑀦𑁆𑀦𑀧𑀭𑀺𑀲𑀸 𑀘𑀲𑁆𑀲 𑀬𑀼𑀢𑁆𑀢𑀸𑀬𑀼𑀢𑁆𑀢𑀁 𑀓𑀸𑀭𑀡𑀸𑀓𑀸𑀭𑀡𑀁 𑀲𑀺𑀮𑀺𑀝𑁆𑀞𑀸𑀲𑀺𑀮𑀺𑀝𑁆𑀞𑀁 𑀦 𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀭𑀽𑀧𑁄𑀢𑀺 𑀅𑀬𑀁 𑀏𑀯𑀁𑀚𑀸𑀢𑀺𑀓𑁄 𑀩𑀸𑀮𑀥𑀫𑁆𑀫𑀓𑀣𑀺𑀓𑁄 𑀏𑀯𑀁𑀚𑀸𑀢𑀺𑀓𑀸𑀬 𑀩𑀸𑀮𑀧𑀭𑀺𑀲𑀸𑀬 𑀥𑀫𑁆𑀫𑀓𑀣𑀺𑀓𑁄𑀢𑁆𑀯𑁂𑀯 𑀦𑀸𑀫𑀁 𑀮𑀪𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀢𑁆𑀣 𑀘 𑀤𑁆𑀯𑁂𑀬𑁂𑀯 𑀚𑀦𑀸 𑀲𑀪𑀸𑀯𑀥𑀫𑁆𑀫𑀓𑀣𑀺𑀓𑀸, 𑀦 𑀇𑀢𑀭𑁂. 𑀇𑀢𑀭𑁂 𑀧𑀦 𑀥𑀫𑁆𑀫𑀓𑀣𑀺𑀓𑀸𑀦𑀁 𑀅𑀦𑁆𑀢𑁄 𑀧𑀯𑀺𑀝𑁆𑀞𑀢𑁆𑀢𑀸 𑀏𑀯𑀁 𑀯𑀼𑀢𑁆𑀢𑀸. 𑀤𑀲𑀫𑀁 𑀉𑀢𑁆𑀢𑀸𑀦𑀫𑁂𑀯.

𑀥𑀫𑁆𑀫𑀓𑀣𑀺𑀓𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀼𑀕𑁆𑀕𑀮𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.