(𑁭) 𑁨. 𑀫𑀳𑀸𑀯𑀕𑁆𑀕𑁄

𑁧. 𑀢𑀺𑀢𑁆𑀣𑀸𑀬𑀢𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁨. 𑀤𑀼𑀢𑀺𑀬𑀲𑁆𑀲 𑀧𑀞𑀫𑁂 𑀢𑀺𑀢𑁆𑀣𑀁 𑀦𑀸𑀫 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀬𑁄 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑀲𑁆𑀲 𑀓𑀲𑁆𑀲𑀘𑀺 𑀤𑀺𑀝𑁆𑀞𑀺𑀯𑀺𑀧𑁆𑀨𑀦𑁆𑀤𑀺𑀢𑀲𑁆𑀲 𑀅𑀪𑀸𑀯𑀢𑁄. 𑀏𑀢𑁆𑀣 𑀳𑀺 𑀲𑀢𑁆𑀢𑀸 𑀢𑀭𑀦𑁆𑀢𑀺 𑀉𑀧𑁆𑀧𑀺𑀮𑀯𑀦𑁆𑀢𑀺 𑀉𑀫𑁆𑀫𑀼𑀚𑁆𑀚𑀦𑀺𑀫𑀼𑀚𑁆𑀚𑀁 𑀓𑀭𑁄𑀦𑁆𑀢𑀺, 𑀢𑀲𑁆𑀫𑀸 ‘‘𑀢𑀺𑀢𑁆𑀣’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀧𑀸𑀭𑀕𑀫𑀦𑀲𑀗𑁆𑀔𑀸𑀢𑀜𑁆𑀳𑀺 𑀢𑀭𑀡𑀁 𑀤𑀺𑀝𑁆𑀞𑀺𑀕𑀢𑀺𑀓𑀸𑀦𑀁 𑀦𑀢𑁆𑀣𑀺, 𑀢𑀢𑁆𑀣𑁂𑀯 𑀅𑀧𑀭𑀸𑀧𑀭𑀁 𑀦𑀺𑀫𑀼𑀚𑁆𑀚𑀦𑀼𑀫𑁆𑀫𑀼𑀚𑁆𑀚𑀦𑀯𑀲𑁂𑀦 𑀧𑀺𑀮𑀯𑀦𑀫𑁂𑀯 𑀢𑁂𑀲𑀁 𑀢𑀭𑀡𑀁 𑀦𑀸𑀫. 𑀉𑀧𑁆𑀧𑀸𑀤𑀓𑀸𑀢𑀺 𑀧𑀽𑀭𑀡𑀓𑀲𑁆𑀲𑀧𑀸𑀤𑀬𑁄. 𑀢𑀺𑀢𑁆𑀣𑁂 𑀚𑀸𑀢𑀸 𑀢𑀺𑀢𑁆𑀣𑀺𑀬𑀸, 𑀬𑀣𑀸𑀯𑀼𑀢𑁆𑀢𑀁 𑀯𑀸 𑀤𑀺𑀝𑁆𑀞𑀺𑀕𑀢𑀲𑀗𑁆𑀔𑀸𑀢𑀁 𑀢𑀺𑀢𑁆𑀣𑀁 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀢𑀺𑀢𑁆𑀣𑀺𑀓𑀸, 𑀢𑀺𑀢𑁆𑀣𑀺𑀓𑀸 𑀏𑀯 𑀢𑀺𑀢𑁆𑀣𑀺𑀬𑀸. 𑀫𑀦𑁄𑀭𑀫𑁂𑀢𑀺 𑀲𑀸𑀤𑀼𑀨𑀮𑀪𑀭𑀺𑀢𑀢𑀸𑀬 𑀅𑀪𑀬𑀤𑀺𑀲𑀢𑀸𑀬 𑀘 𑀫𑀦𑁄𑀭𑀫𑁂. 𑀇𑀫𑁂𑀲𑀼𑀬𑁂𑀯 𑀢𑀻𑀲𑀼 𑀞𑀸𑀦𑁂𑀲𑀽𑀢𑀺 𑀬𑀣𑀸𑀯𑀼𑀢𑁆𑀢𑁂𑀲𑀼 𑀢𑀺𑀢𑁆𑀣𑀸𑀬𑀢𑀦𑁂𑀲𑀼.

𑀬𑁄 𑀬𑀣𑀸 𑀚𑀸𑀦𑀸𑀢𑀺, 𑀢𑀲𑁆𑀲 𑀢𑀣𑀸 𑀯𑀼𑀘𑁆𑀘𑀢𑀻𑀢𑀺 𑀇𑀫𑀺𑀦𑀸 𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑀯𑀲𑁂𑀦 𑀢𑀣𑀸 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀧𑀼𑀕𑁆𑀕𑀮-𑀲𑀤𑁆𑀤𑁄 𑀘 𑀢𑀺𑀲𑁆𑀲𑀦𑁆𑀦𑀫𑁆𑀧𑀺 𑀧𑀓𑀢𑀻𑀦𑀁 𑀲𑀸𑀥𑀸𑀭𑀡𑁄, 𑀢𑀲𑁆𑀫𑀸 𑀧𑀼𑀭𑀺𑀲𑀕𑁆𑀕𑀳𑀡𑁂𑀦 𑀢𑀢𑁄 𑀯𑀺𑀲𑁂𑀲𑀦𑀁 𑀬𑀣𑀸 ‘‘𑀅𑀝𑁆𑀞 𑀧𑀼𑀭𑀺𑀲𑀧𑀼𑀕𑁆𑀕𑀮𑀸’’𑀢𑀺. 𑀧𑀝𑀺𑀲𑀁𑀯𑀺𑀤𑀺𑀢𑀁 𑀓𑀭𑁄𑀢𑀻𑀢𑀺 𑀓𑁂𑀯𑀮𑀁 𑀚𑀸𑀦𑀦𑀯𑀲𑁂𑀦 𑀯𑀺𑀤𑀺𑀢𑀁 𑀓𑀭𑁄𑀢𑀺. 𑀅𑀦𑀼𑀪𑀯𑀢𑀺 𑀯𑀸𑀢𑀺 𑀯𑀺𑀧𑀸𑀓𑀮𑀓𑁆𑀔𑀡𑀧𑁆𑀧𑀢𑁆𑀢𑀁 𑀅𑀦𑀼𑀪𑀯𑀢𑀺. 𑀧𑀼𑀩𑁆𑀩𑁂𑀓𑀢𑀳𑁂𑀢𑀽𑀢𑀺 𑀅𑀦𑁆𑀢𑁄𑀕𑀥𑀸𑀯𑀥𑀸𑀭𑀡𑀁 𑀧𑀤𑀦𑁆𑀢𑀺 𑀆𑀳 ‘‘𑀧𑀼𑀩𑁆𑀩𑁂𑀓𑀢𑀓𑀫𑁆𑀫𑀧𑀘𑁆𑀘𑀬𑁂𑀦𑁂𑀯𑀸’’𑀢𑀺. 𑀇𑀫𑀺𑀦𑀸𑀢𑀺 ‘‘𑀲𑀩𑁆𑀩𑀁 𑀢𑀁 𑀧𑀼𑀩𑁆𑀩𑁂𑀓𑀢𑀳𑁂𑀢𑀽’’𑀢𑀺 𑀇𑀫𑀺𑀦𑀸 𑀯𑀘𑀦𑁂𑀦. 𑀓𑀫𑁆𑀫𑀯𑁂𑀤𑀦𑀦𑁆𑀢𑀺 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀲𑀳𑀚𑀁 𑀯𑁂𑀤𑀦𑀁. 𑀓𑀺𑀭𑀺𑀬𑀯𑁂𑀤𑀦𑀦𑁆𑀢𑀺 ‘‘𑀦𑁂𑀯 𑀓𑀼𑀲𑀮𑀸𑀓𑀼𑀲𑀮𑀸 𑀦 𑀘 𑀓𑀫𑁆𑀫𑀯𑀺𑀧𑀸𑀓𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑀁 𑀓𑀺𑀭𑀺𑀬𑀘𑀺𑀢𑁆𑀢𑀲𑀳𑀚𑀁 𑀯𑁂𑀤𑀦𑀁. 𑀦 𑀓𑁂𑀯𑀮𑀜𑁆𑀘 𑀢𑁂 𑀓𑀫𑁆𑀫𑀓𑀺𑀭𑀺𑀬𑀯𑁂𑀤𑀦𑀸 𑀏𑀯 𑀧𑀝𑀺𑀓𑁆𑀔𑀺𑀧𑀦𑁆𑀢𑀺, 𑀅𑀣 𑀔𑁄 𑀲𑀸𑀲𑀦𑁂 𑀮𑁄𑀓𑁂 𑀘 𑀧𑀸𑀓𑀝𑁂 𑀯𑀸𑀢𑀸𑀩𑀸𑀥𑀸𑀤𑀺𑀭𑁄𑀕𑁂 𑀘 𑀧𑀝𑀺𑀓𑁆𑀔𑀺𑀧𑀦𑁆𑀢𑀺 𑀏𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑁂 𑀯𑀸 𑀇𑀫𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀢𑀺 𑀧𑀺𑀢𑁆𑀢𑀯𑀺𑀓𑀸𑀭𑀸𑀥𑀺𑀓𑀲𑀫𑁆𑀪𑀽𑀢𑀸. 𑀅𑀦𑀦𑁆𑀢𑀭𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀲𑀦𑁆𑀦𑀺𑀧𑀸𑀢𑀺𑀓𑀸𑀢𑀺 𑀧𑀺𑀢𑁆𑀢𑀸𑀤𑀻𑀦𑀁 𑀢𑀺𑀡𑁆𑀡𑀫𑁆𑀧𑀺 𑀯𑀺𑀓𑀸𑀭𑀸𑀦𑀁 𑀲𑀦𑁆𑀦𑀺𑀧𑀸𑀢𑀢𑁄 𑀚𑀸𑀢𑀸. 𑀉𑀢𑀼𑀧𑀭𑀺𑀡𑀸𑀫𑀚𑀸𑀢𑀺 𑀲𑀻𑀢𑀸𑀤𑀺𑀉𑀢𑀼𑀦𑁄 𑀯𑀺𑀧𑀭𑀺𑀡𑀸𑀫𑀢𑁄 𑀯𑀺𑀲𑀫𑀧𑀭𑀺𑀯𑀼𑀢𑁆𑀢𑀺𑀢𑁄 𑀚𑀸𑀢𑀸. 𑀯𑀺𑀲𑀫𑀧𑀭𑀺𑀳𑀸𑀭𑀚𑀸𑀢𑀺 𑀅𑀲𑀧𑁆𑀧𑀸𑀬𑀸𑀳𑀸𑀭𑀬𑁄𑀕𑀧𑀝𑀺𑀲𑁂𑀯𑀦𑀯𑀲𑁂𑀦 𑀓𑀸𑀬𑀲𑁆𑀲 𑀯𑀺𑀲𑀫𑀁 𑀧𑀭𑀺𑀳𑀭𑀡𑀢𑁄 𑀚𑀸𑀢𑀸. 𑀑𑀧𑀓𑁆𑀓𑀫𑀺𑀓𑀸𑀢𑀺 𑀉𑀧𑀓𑁆𑀓𑀫𑀢𑁄 𑀦𑀺𑀩𑁆𑀩𑀢𑁆𑀢𑀸. 𑀓𑀫𑁆𑀫𑀯𑀺𑀧𑀸𑀓𑀚𑀸𑀢𑀺 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀪𑀽𑀢𑀓𑁆𑀔𑀦𑁆𑀥𑀢𑁄 𑀚𑀸𑀢𑀸. 𑀯𑀺𑀭𑁄𑀥𑀺𑀧𑀘𑁆𑀘𑀬𑀲𑀫𑀼𑀝𑁆𑀞𑀸𑀦𑀸 𑀥𑀸𑀢𑀽𑀦𑀁 𑀯𑀺𑀓𑀸𑀭𑀸𑀯𑀢𑁆𑀣𑀸, 𑀢𑀧𑁆𑀧𑀘𑁆𑀘𑀬𑀸 𑀯𑀸 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀆𑀩𑀸𑀥𑀦𑀝𑁆𑀞𑁂𑀦 𑀆𑀩𑀸𑀥𑁄, 𑀲𑁄 𑀏𑀯 𑀭𑀼𑀚𑁆𑀚𑀦𑀝𑁆𑀞𑁂𑀦 𑀭𑁄𑀕𑁄. 𑀢𑀢𑁆𑀣 ‘‘𑀬𑁄 𑀬𑀸𑀧𑁆𑀬𑀮𑀓𑁆𑀔𑀡𑁄, 𑀲𑁄 𑀭𑁄𑀕𑁄, 𑀇𑀢𑀭𑁄 𑀆𑀩𑀸𑀥𑁄’’𑀢𑀺 𑀯𑀤𑀦𑁆𑀢𑀺. 𑀲𑀩𑁆𑀩𑁂𑀲𑀜𑁆𑀘 𑀦𑁂𑀲𑀁 𑀢𑀁𑀢𑀁𑀥𑀸𑀢𑀽𑀦𑀁 𑀯𑀺𑀲𑀫𑀁 𑀆𑀲𑀦𑁆𑀦𑀓𑀸𑀭𑀡𑀁, 𑀦 𑀢𑀣𑀸 𑀇𑀢𑀭𑀸𑀦𑀺. 𑀢𑀢𑁆𑀣𑀸𑀧𑀺 𑀘 𑀧𑀓𑁄𑀧𑀸𑀯𑀢𑁆𑀣𑀸 𑀥𑀸𑀢𑀼𑀬𑁄 𑀆𑀲𑀦𑁆𑀦𑀓𑀸𑀭𑀡𑀁, 𑀦 𑀢𑀣𑀸 𑀧𑀭𑀧𑀘𑁆𑀘𑀬𑀸𑀯𑀢𑁆𑀣𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀝𑁆𑀞𑀫𑀁𑀬𑁂𑀯 𑀓𑀫𑁆𑀫𑀯𑀺𑀧𑀸𑀓𑀚𑀁 𑀆𑀩𑀸𑀥𑀁 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀺 ‘‘𑀲𑀩𑁆𑀩𑀁 𑀢𑀁 𑀧𑀼𑀩𑁆𑀩𑁂𑀓𑀢𑀳𑁂𑀢𑀽’’𑀢𑀺 𑀯𑀺𑀧𑀮𑁆𑀮𑀸𑀲𑀕𑁆𑀕𑀸𑀳𑁂𑀦. ‘‘𑀧𑀼𑀩𑁆𑀩𑁂’’𑀢𑀺 𑀧𑀼𑀭𑀸𑀢𑀦𑀲𑁆𑀲𑁂𑀯 𑀓𑀫𑁆𑀫𑀲𑁆𑀲 𑀕𑀳𑀺𑀢𑀢𑁆𑀢𑀸 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀫𑁆𑀧𑀺 𑀢𑁂 𑀧𑀝𑀺𑀓𑁆𑀔𑀺𑀧𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀤𑁆𑀯𑁂 𑀧𑀝𑀺𑀩𑀸𑀳𑀺𑀢𑁆𑀯𑀸’’𑀢𑀺. 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀻𑀢𑀺 𑀅𑀦𑀼𑀚𑀸𑀦𑀦𑁆𑀢𑀺.

𑀅𑀢𑁆𑀢𑀦𑀸 𑀓𑀢𑀫𑀽𑀮𑀓𑁂𑀦𑀸𑀢𑀺 𑀲𑀸𑀳𑀢𑁆𑀣𑀺𑀓𑀓𑀫𑁆𑀫𑀳𑁂𑀢𑀼. 𑀆𑀡𑀢𑁆𑀢𑀺𑀫𑀽𑀮𑀓𑁂𑀦𑀸𑀢𑀺 𑀧𑀭𑀲𑁆𑀲 𑀆𑀡𑀸𑀧𑀦𑀯𑀲𑁂𑀦 𑀓𑀢𑀓𑀫𑁆𑀫𑀳𑁂𑀢𑀼. 𑀇𑀫𑀸𑀢𑀺 𑀢𑀺𑀲𑁆𑀲𑁄 𑀯𑁂𑀤𑀦𑀸. 𑀲𑀩𑁆𑀩𑁂 𑀧𑀝𑀺𑀩𑀸𑀳𑀦𑁆𑀢𑀻𑀢𑀺 𑀲𑀩𑁆𑀩𑁂 𑀭𑁄𑀕𑁂 𑀧𑀝𑀺𑀲𑁂𑀥𑁂𑀦𑁆𑀢𑀺 𑀲𑀩𑁆𑀩𑁂𑀲𑀫𑁆𑀧𑀺 𑀢𑁂𑀲𑀁 𑀏𑀓𑁂𑀦 𑀇𑀲𑁆𑀲𑀭𑁂𑀦𑁂𑀯 𑀦𑀺𑀫𑁆𑀫𑀺𑀢𑀢𑁆𑀢𑀸 𑀢𑀩𑁆𑀪𑀸𑀯𑀻𑀪𑀸𑀯𑀸𑀲𑀫𑁆𑀪𑀯𑀢𑁄. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀲𑀩𑁆𑀩𑀁 𑀧𑀝𑀺𑀩𑀸𑀳𑀦𑁆𑀢𑀻𑀢𑀺 𑀳𑁂𑀢𑀼𑀧𑀘𑁆𑀘𑀬𑀧𑀝𑀺𑀲𑁂𑀥𑀦𑀢𑁄 𑀲𑀩𑁆𑀩𑀁 𑀦𑀺𑀲𑁂𑀥𑁂𑀦𑁆𑀢𑀺.

𑀫𑀸𑀢𑀺𑀓𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀢𑀺𑀡𑁆𑀡𑀫𑁆𑀧𑀺 𑀯𑁂𑀤𑀸𑀦𑀁 𑀅𑀲𑀸𑀭𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀉𑀤𑁆𑀤𑁂𑀲𑀁 𑀓𑀢𑁆𑀯𑀸. 𑀢𑀦𑁆𑀢𑀺 𑀢𑀁 𑀫𑀸𑀢𑀺𑀓𑀁. 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀦𑁆𑀢𑀺 𑀤𑁄𑀲𑀤𑀲𑁆𑀲𑀦𑀯𑀲𑁂𑀦𑁂𑀯 𑀯𑀺𑀪𑀸𑀕𑀢𑁄 𑀤𑀲𑁆𑀲𑁂𑀢𑀼𑀁. 𑀮𑀤𑁆𑀥𑀺𑀧𑀢𑀺𑀝𑁆𑀞𑀸𑀧𑀦𑀢𑁆𑀣𑀦𑁆𑀢𑀺 𑀅𑀢𑁆𑀢𑀦𑁄 𑀮𑀤𑁆𑀥𑀺𑀬𑀸 𑀧𑀝𑀺𑀚𑀸𑀦𑀸𑀧𑀦𑀢𑁆𑀣𑀁. 𑀮𑀤𑁆𑀥𑀺𑀢𑁄 𑀮𑀤𑁆𑀥𑀺𑀁 𑀲𑀗𑁆𑀓𑀫𑀦𑁆𑀢𑀻𑀢𑀺 𑀫𑀽𑀮𑀮𑀤𑁆𑀥𑀺𑀢𑁄 𑀅𑀜𑁆𑀜𑀮𑀤𑁆𑀥𑀺𑀁 𑀉𑀧𑀕𑀘𑁆𑀙𑀦𑁆𑀢𑀺 𑀧𑀝𑀺𑀚𑀸𑀦𑀦𑁆𑀢𑀺. 𑀧𑀼𑀩𑁆𑀩𑁂𑀓𑀢𑀳𑁂𑀢𑀼𑀬𑁂𑀯 𑀧𑀝𑀺𑀲𑀁𑀯𑁂𑀤𑁂𑀢𑀻𑀢𑀺 𑀓𑀫𑁆𑀫𑀯𑁂𑀤𑀦𑀫𑁆𑀧𑀺 𑀯𑀺𑀧𑀸𑀓𑀯𑁂𑀤𑀦𑀁 𑀓𑀢𑁆𑀯𑀸 𑀯𑀤𑀦𑁆𑀢𑀺. 𑀤𑀺𑀝𑁆𑀞𑀺𑀕𑀢𑀺𑀓𑀸 𑀳𑀺 𑀩𑁆𑀬𑀸𑀫𑀽𑀴𑁆𑀳𑀘𑀺𑀢𑁆𑀢𑀸 𑀓𑀫𑁆𑀫𑀦𑁆𑀢𑀭𑀯𑀺𑀧𑀸𑀓𑀦𑁆𑀢𑀭𑀸𑀤𑀻𑀦𑀺 𑀆𑀮𑁄𑀴𑁂𑀦𑁆𑀢𑀺, 𑀅𑀲𑀗𑁆𑀓𑀭𑀢𑁄 𑀲𑀜𑁆𑀜𑀸𑀧𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀬𑀣𑀸 𑀘 𑀅𑀓𑀼𑀲𑀮𑀓𑀫𑁆𑀫𑁂, 𑀏𑀯𑀁 𑀓𑀼𑀲𑀮𑀓𑀫𑁆𑀫𑁂𑀧𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀏𑀯𑀁 𑀧𑀸𑀡𑀸𑀢𑀺𑀧𑀸𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀏𑀯𑀦𑁆𑀢𑀺 𑀬𑀣𑀸 𑀧𑀼𑀩𑁆𑀩𑁂𑀓𑀢𑀳𑁂𑀢𑀼 𑀏𑀯 𑀧𑀸𑀡𑀸𑀢𑀺𑀧𑀸𑀢𑀺𑀦𑁄 𑀦𑀸𑀫 𑀳𑁄𑀦𑁆𑀢𑀺, 𑀦 𑀇𑀤𑀸𑀦𑀺 𑀲𑀬𑀁𑀓𑀢𑀓𑀸𑀭𑀡𑀸, 𑀏𑀯𑀁 𑀧𑀸𑀡𑀸𑀢𑀺𑀧𑀸𑀢𑀸 𑀯𑀺𑀭𑀫𑀡𑀫𑁆𑀧𑀺 𑀧𑀼𑀩𑁆𑀩𑁂𑀓𑀢𑀳𑁂𑀢𑀼 𑀏𑀯𑀸𑀢𑀺 𑀯𑀺𑀘𑀸𑀭𑀺𑀬𑀫𑀸𑀦𑁄 𑀧𑀼𑀩𑁆𑀩𑁂𑀓𑀢𑀯𑀸𑀤𑁄 𑀅𑀓𑀺𑀭𑀺𑀬𑀯𑀸𑀤𑁄 𑀏𑀯 𑀲𑀫𑁆𑀧𑀚𑁆𑀚𑀢𑀺.

𑀓𑀢𑁆𑀢𑀼𑀓𑀫𑁆𑀬𑀢𑀸𑀙𑀦𑁆𑀤𑁄 𑀦 𑀢𑀡𑁆𑀳𑀸𑀙𑀦𑁆𑀤𑁄. 𑀓𑀢𑁆𑀢𑀼𑀓𑀫𑁆𑀬𑀢𑀸𑀢𑀺 𑀓𑀸𑀢𑀼𑀫𑀺𑀘𑁆𑀙𑀸. 𑀧𑀘𑁆𑀘𑀢𑁆𑀢𑀧𑀼𑀭𑀺𑀲𑀓𑀸𑀭𑁄𑀢𑀺 𑀢𑁂𑀦 𑀢𑁂𑀦 𑀧𑀼𑀭𑀺𑀲𑁂𑀦 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀦 𑀳𑁄𑀢𑀺 𑀧𑀼𑀩𑁆𑀩𑁂𑀓𑀢𑀳𑁂𑀢𑀼 𑀏𑀯 𑀲𑀺𑀚𑁆𑀛𑀦𑀢𑁄. 𑀉𑀪𑀬𑀫𑁆𑀧𑀺 𑀢𑀁 𑀏𑀲 𑀦 𑀮𑀩𑁆𑀪𑀢𑀻𑀢𑀺 𑀓𑀢𑁆𑀢𑀩𑁆𑀩𑀓𑀭𑀡𑀁 𑀲𑀼𑀘𑀭𑀺𑀢𑀧𑀽𑀭𑀡𑀁, 𑀅𑀓𑀢𑁆𑀢𑀩𑁆𑀩𑀅𑀓𑀭𑀡𑀁 𑀤𑀼𑀘𑁆𑀘𑀭𑀺𑀢𑀯𑀺𑀭𑀢𑀻𑀢𑀺 𑀇𑀤𑀁 𑀉𑀪𑀬𑀫𑁆𑀧𑀺 𑀏𑀲 𑀦 𑀮𑀪𑀢𑀺. 𑀲𑀫𑀡𑀸𑀧𑀺 𑀳𑀺 𑀧𑀼𑀩𑁆𑀩𑁂𑀓𑀢𑀓𑀸𑀭𑀡𑀸𑀬𑁂𑀯 𑀳𑁄𑀦𑁆𑀢𑀻𑀢𑀺 𑀧𑀼𑀩𑁆𑀩𑁂𑀓𑀢𑀓𑀸𑀭𑀡𑀸𑀬𑁂𑀯 𑀲𑀫𑀡𑀸𑀧𑀺 𑀳𑁄𑀦𑁆𑀢𑀺, 𑀦 𑀇𑀤𑀸𑀦𑀺 𑀲𑀁𑀯𑀭𑀲𑀫𑀸𑀤𑀸𑀦𑀸𑀤𑀺𑀦𑀸. 𑀅𑀲𑁆𑀲𑀫𑀡𑀸𑀧𑀺 𑀧𑀼𑀩𑁆𑀩𑁂𑀓𑀢𑀓𑀸𑀭𑀡𑀸𑀬𑁂𑀯𑀸𑀢𑀺 𑀧𑀼𑀩𑁆𑀩𑁂𑀓𑀢𑀓𑀸𑀭𑀡𑀸𑀬𑁂𑀯 𑀅𑀲𑁆𑀲𑀫𑀡𑀸𑀧𑀺 𑀳𑁄𑀦𑁆𑀢𑀺, 𑀦 𑀲𑀁𑀯𑀭𑀪𑁂𑀤𑁂𑀦.

𑀬𑀣𑀸 𑀧𑀼𑀩𑁆𑀩𑁂𑀓𑀢𑀯𑀸𑀤𑁂 𑀙𑀦𑁆𑀤𑀯𑀸𑀬𑀸𑀫𑀸𑀦𑀁 𑀅𑀲𑀫𑁆𑀪𑀯𑀢𑁄 𑀧𑀘𑁆𑀘𑀢𑁆𑀢𑀧𑀼𑀭𑀺𑀲𑀓𑀸𑀭𑀸𑀦𑀁 𑀅𑀪𑀸𑀯𑁄, 𑀏𑀯𑀁 𑀇𑀲𑁆𑀲𑀭𑀦𑀺𑀫𑁆𑀫𑀸𑀦𑀯𑀸𑀤𑁂𑀧𑀺 𑀇𑀲𑁆𑀲𑀭𑁂𑀦𑁂𑀯 𑀲𑀩𑁆𑀩𑀲𑁆𑀲 𑀦𑀺𑀫𑁆𑀫𑀺𑀢𑀪𑀸𑀯𑀸𑀦𑀼𑀚𑀸𑀦𑀦𑀢𑁄𑀢𑀺 𑀯𑀼𑀢𑁆𑀢𑀁 ‘‘𑀧𑀼𑀩𑁆𑀩𑁂𑀓𑀢𑀯𑀸𑀤𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄’’𑀢𑀺. 𑀏𑀲 𑀦𑀬𑁄 𑀅𑀳𑁂𑀢𑀼𑀓𑀯𑀸𑀤𑁂𑀧𑀻𑀢𑀺 𑀆𑀳 ‘‘𑀢𑀣𑀸 𑀅𑀳𑁂𑀢𑀼𑀓𑀯𑀸𑀤𑁂𑀧𑀻’’𑀢𑀺.

𑀇𑀫𑁂𑀲𑀦𑁆𑀢𑀺𑀆𑀤𑀺𑀦𑀸 𑀇𑀫𑁂𑀲𑀁 𑀢𑀺𑀢𑁆𑀣𑀸𑀬𑀢𑀦𑀸𑀦𑀁 𑀢𑀼𑀘𑁆𑀙𑀸𑀲𑀸𑀭𑀢𑀸𑀬 𑀣𑀼𑀲𑀓𑁄𑀝𑁆𑀝𑀦𑁂𑀦 𑀓𑀼𑀡𑁆𑀟𑀓𑀫𑀢𑁆𑀢𑀲𑁆𑀲𑀧𑀺 𑀅𑀮𑀸𑀪𑁄 𑀯𑀺𑀬 𑀧𑀭𑀫𑀢𑁆𑀣𑀮𑁂𑀲𑀲𑁆𑀲𑀧𑀺 𑀅𑀪𑀸𑀯𑁄, 𑀢𑀣𑀸 𑀔𑀚𑁆𑀚𑁄𑀧𑀦𑀓𑁄𑀪𑀸𑀲𑀢𑁄 𑀢𑁂𑀚𑀲𑁄 𑀨𑀼𑀮𑀺𑀗𑁆𑀕𑀫𑀢𑁆𑀢𑀲𑁆𑀲𑀧𑀺 𑀅𑀪𑀸𑀯𑁄 𑀯𑀺𑀬 𑀅𑀦𑁆𑀥𑀯𑁂𑀡𑀺𑀓𑀲𑁆𑀲𑀧𑀺 𑀫𑀕𑁆𑀕𑀲𑁆𑀲 𑀅𑀧𑁆𑀧𑀝𑀺𑀮𑀸𑀪𑁄 𑀯𑀺𑀬 𑀲𑀤𑁆𑀤𑀫𑀢𑁆𑀢𑀁 𑀦𑀺𑀲𑁆𑀲𑀸𑀬 𑀫𑀺𑀘𑁆𑀙𑀸𑀪𑀸𑀕𑁂𑀦 𑀯𑀺𑀧𑀮𑁆𑀮𑀢𑁆𑀣𑀢𑀸𑀬 𑀤𑀤𑁆𑀤𑀭𑀚𑀸𑀢𑀓𑁂 (𑀚𑀸. 𑁧.𑁨.𑁪𑁩-𑁪𑁩) 𑀲𑀲𑀓𑀲𑀤𑀺𑀲𑀢𑀸 𑀘 𑀯𑀺𑀪𑀸𑀯𑀺𑀢𑀸 𑀳𑁄𑀢𑀺. 𑀲𑀸𑀭𑀪𑀸𑀯𑀦𑁆𑀢𑀺 𑀲𑀻𑀮𑀲𑀸𑀭𑀸𑀤𑀺𑀲𑀫𑁆𑀧𑀢𑁆𑀢𑀺𑀬𑀸 𑀲𑀸𑀭𑀲𑀩𑁆𑀪𑀸𑀯𑀁. 𑀦𑀺𑀬𑁆𑀬𑀸𑀦𑀺𑀓𑀪𑀸𑀯𑀦𑁆𑀢𑀺 𑀏𑀓𑀦𑁆𑀢𑁂𑀦𑁂𑀯 𑀯𑀝𑁆𑀝𑀢𑁄 𑀦𑀺𑀬𑁆𑀬𑀸𑀦𑀸𑀯𑀳𑀪𑀸𑀯𑀁. 𑀅𑀦𑀺𑀕𑁆𑀕𑀳𑀺𑀢𑁄𑀢𑀺 𑀦 𑀦𑀺𑀕𑁆𑀕𑀳𑁂𑀢𑀩𑁆𑀩𑁄. 𑀢𑁂𑀦𑀸𑀳 ‘‘𑀦𑀺𑀕𑁆𑀕𑀳𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑁄’’𑀢𑀺. 𑀅𑀲𑀁𑀓𑀺𑀮𑀺𑀝𑁆𑀞𑁄𑀢𑀺 𑀲𑀁𑀓𑀺𑀮𑁂𑀲𑀯𑀺𑀭𑀳𑀺𑀢𑁄. 𑀢𑁂𑀦𑀸𑀳 ‘‘𑀦𑀺𑀓𑁆𑀓𑀺𑀮𑁂𑀲𑁄’’𑀢𑀺𑀆𑀤𑀺. 𑀅𑀦𑀼𑀧𑀯𑀚𑁆𑀚𑁄𑀢𑀺 𑀥𑀫𑁆𑀫𑀢𑁄 𑀦 𑀉𑀧𑀯𑀤𑀺𑀢𑀩𑁆𑀩𑁄. 𑀅𑀧𑁆𑀧𑀝𑀺𑀓𑀼𑀝𑁆𑀞𑁄 𑀦𑀸𑀫 𑀅𑀧𑁆𑀧𑀝𑀺𑀲𑁂𑀥𑀦𑀁 𑀯𑀸 𑀲𑀺𑀬𑀸 𑀅𑀦𑀓𑁆𑀓𑁄𑀲𑀦𑀁 𑀯𑀸𑀢𑀺 𑀢𑀤𑀼𑀪𑀬𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀧𑁆𑀧𑀝𑀺𑀩𑀸𑀳𑀺𑀢𑁄 𑀅𑀦𑀼𑀧𑀓𑁆𑀓𑀼𑀝𑁆𑀞𑁄’’𑀢𑀺 𑀆𑀳.

𑀢𑀲𑁆𑀲 𑀥𑀫𑁆𑀫𑀲𑁆𑀲𑀸𑀢𑀺 ‘‘𑀅𑀬𑀁 𑀔𑁄 𑀧𑀦, 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀦𑀸 𑀉𑀤𑁆𑀥𑀝𑀲𑁆𑀲 𑀥𑀫𑁆𑀫𑀲𑁆𑀲. 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑁆𑀯𑀸𑀢𑀺 𑀓𑀣𑁂𑀢𑀼𑀓𑀫𑁆𑀬𑀢𑀸𑀯𑀲𑁂𑀦 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑁆𑀯𑀸. 𑀬𑀣𑀸𑀧𑀝𑀺𑀧𑀸𑀝𑀺𑀬𑀸𑀢𑀺 𑀫𑀸𑀢𑀺𑀓𑀸𑀬 𑀬𑀣𑀸𑀦𑀺𑀓𑁆𑀔𑀺𑀢𑁆𑀢𑀧𑁆𑀧𑀝𑀺𑀧𑀸𑀝𑀺𑀬𑀸. 𑀥𑀸𑀢𑀼𑀬𑁄𑀢𑀺 𑀲𑀪𑀸𑀯𑀥𑀸𑀭𑀡𑀝𑁆𑀞𑁂𑀦 𑀥𑀸𑀢𑀼𑀬𑁄. 𑀢𑀸 𑀧𑀦 𑀬𑀲𑁆𑀫𑀸 𑀢𑀡𑁆𑀳𑀸𑀤𑀺𑀝𑁆𑀞𑀺𑀓𑀧𑁆𑀧𑀦𑀸𑀧𑀭𑀺𑀓𑀧𑁆𑀧𑀺𑀢𑀅𑀢𑁆𑀢𑀲𑀼𑀪𑀲𑀼𑀔𑀲𑀲𑁆𑀲𑀢𑀸𑀤𑀺𑀧𑀓𑀢𑀺𑀆𑀤𑀺𑀥𑀼𑀯𑀸𑀤𑀺𑀚𑀻𑀯𑀸𑀤𑀺𑀓𑀸𑀬𑀸𑀤𑀺𑀓𑀸 𑀯𑀺𑀬 𑀦 𑀇𑀘𑁆𑀙𑀸𑀲𑀪𑀸𑀯𑀸 𑀤𑀺𑀝𑁆𑀞𑀺𑀆𑀤𑀺𑀭𑀳𑀺𑀢𑁂𑀳𑀺 𑀯𑀺𑀫𑀼𑀘𑁆𑀘𑀫𑀸𑀦𑀉𑀤𑀼𑀫𑁆𑀩𑀭𑀧𑀼𑀧𑁆𑀨𑀸𑀤𑀺𑀮𑁄𑀓𑀯𑁄𑀳𑀸𑀭𑀯𑀢𑁆𑀣𑀽𑀦𑀺 𑀯𑀺𑀬 𑀘 𑀯𑀸𑀘𑀸𑀯𑀢𑁆𑀣𑀼𑀫𑀢𑁆𑀢𑀸, 𑀅𑀣 𑀔𑁄 𑀲𑀘𑁆𑀘𑀧𑀭𑀫𑀢𑁆𑀣𑀪𑀽𑀢𑀸𑀢𑀺 𑀆𑀳 ‘‘𑀲𑀪𑀸𑀯𑀸’’𑀢𑀺, 𑀲𑀘𑁆𑀘𑀲𑀪𑀸𑀯𑀸𑀢𑀺 𑀅𑀢𑁆𑀣𑁄. 𑀅𑀢𑁆𑀢𑀦𑁄 𑀲𑀪𑀸𑀯𑀁 𑀥𑀸𑀭𑁂𑀦𑁆𑀢𑀻𑀢𑀺 𑀳𑀺 𑀥𑀸𑀢𑀼𑀬𑁄. 𑀦𑀺𑀚𑁆𑀚𑀻𑀯𑀦𑀺𑀲𑁆𑀲𑀢𑁆𑀢𑀪𑀸𑀯𑀧𑁆𑀧𑀓𑀸𑀲𑀓𑁄𑀢𑀺 𑀩𑀸𑀳𑀺𑀭𑀧𑀭𑀺𑀓𑀧𑁆𑀧𑀺𑀢𑀚𑀻𑀯𑀸𑀪𑀸𑀯𑀧𑁆𑀧𑀓𑀸𑀲𑀓𑁄 𑀮𑁄𑀓𑀺𑀬𑀫𑀳𑀸𑀚𑀦𑀲𑀁𑀓𑀧𑁆𑀧𑀺𑀢𑀲𑀢𑁆𑀢𑀸𑀪𑀸𑀯𑀧𑁆𑀧𑀓𑀸𑀲𑀓𑁄 𑀘. 𑀆𑀓𑀭𑀝𑁆𑀞𑁂𑀦𑀸𑀢𑀺 𑀉𑀧𑁆𑀧𑀚𑁆𑀚𑀦𑀝𑁆𑀞𑀸𑀦𑀪𑀸𑀯𑁂𑀦. 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀫𑁆𑀧𑀺 𑀳𑀺 𑀆𑀓𑀭𑁄 𑀆𑀬𑀢𑀦𑀦𑁆𑀢𑀺 𑀯𑀼𑀘𑁆𑀘𑀢𑀺 𑀬𑀣𑀸 ‘‘𑀓𑀫𑁆𑀩𑁄𑀚𑁄 𑀅𑀲𑁆𑀲𑀸𑀦𑀁 𑀆𑀬𑀢𑀦’’𑀦𑁆𑀢𑀺. 𑀫𑀦𑁄𑀧𑀯𑀺𑀘𑀸𑀭𑀸𑀢𑀺 𑀢𑀁 𑀢𑀁 𑀆𑀭𑀫𑁆𑀫𑀡𑀁 𑀉𑀧𑁂𑀘𑁆𑀘 𑀫𑀦𑀲𑁄 𑀯𑀺𑀯𑀺𑀥𑀘𑀭𑀡𑀸𑀓𑀸𑀭𑁄. 𑀓𑁂𑀳𑀺 𑀓𑀢𑁆𑀣𑀸𑀢𑀺 𑀆𑀳 ‘‘𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀸𑀤𑁂𑀳𑀻’’𑀢𑀺𑀆𑀤𑀺. 𑀅𑀝𑁆𑀞𑀸𑀭𑀲𑀲𑀼 𑀞𑀸𑀦𑁂𑀲𑀽𑀢𑀺 𑀙 𑀲𑁄𑀫𑀦𑀲𑁆𑀲𑀝𑁆𑀞𑀸𑀦𑀺𑀬𑀸𑀦𑀺, 𑀙 𑀤𑁄𑀫𑀦𑀲𑁆𑀲𑀝𑁆𑀞𑀸𑀦𑀺𑀬𑀸𑀦𑀺, 𑀙 𑀉𑀧𑁂𑀓𑁆𑀔𑀸𑀝𑁆𑀞𑀸𑀦𑀺𑀬𑀸𑀦𑀻𑀢𑀺 𑀏𑀯𑀁 𑀅𑀝𑁆𑀞𑀸𑀭𑀲𑀲𑀼 𑀞𑀸𑀦𑁂𑀲𑀼.

𑀧𑀢𑀺𑀝𑁆𑀞𑀸𑀥𑀸𑀢𑀽𑀢𑀺 𑀲𑁂𑀲𑀪𑀽𑀢𑀢𑁆𑀢𑀬𑀲𑁆𑀲 𑀘𑁂𑀯 𑀲𑀩𑁆𑀩𑀽𑀧𑀸𑀤𑀸𑀭𑀽𑀧𑀸𑀦𑀜𑁆𑀘 𑀧𑀢𑀺𑀝𑁆𑀞𑀸𑀲𑀪𑀸𑀯𑀸 𑀥𑀸𑀢𑀼. 𑀇𑀫𑀺𑀦𑀸 𑀦𑀬𑁂𑀦 𑀆𑀩𑀦𑁆𑀥𑀦𑀥𑀸𑀢𑀽𑀢𑀺𑀆𑀤𑀻𑀲𑀼𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀧𑀺𑀘 𑀓𑀓𑁆𑀔𑀴𑀪𑀸𑀯𑀲𑀺𑀤𑁆𑀥𑁄 𑀲𑀳𑀚𑀸𑀢𑀥𑀫𑁆𑀫𑀸𑀦𑀁 𑀆𑀥𑀸𑀭𑀪𑀸𑀯𑁄 𑀧𑀢𑀺𑀝𑁆𑀞𑀸𑀪𑀸𑀯𑁄. 𑀤𑁆𑀭𑀯𑀪𑀸𑀯𑀲𑀺𑀤𑁆𑀥𑀁 𑀲𑀫𑁆𑀧𑀺𑀡𑁆𑀟𑀦𑀁 𑀆𑀩𑀦𑁆𑀥𑀦𑀁. 𑀉𑀡𑁆𑀳𑀪𑀸𑀯𑀲𑀺𑀤𑁆𑀥𑀁 𑀫𑀼𑀤𑀼𑀢𑀸𑀧𑀓𑁆𑀓𑀢𑀸𑀯𑀳𑀁 𑀧𑀭𑀺𑀧𑀸𑀘𑀦𑀁. 𑀣𑀤𑁆𑀥𑀪𑀸𑀯𑀸𑀯𑀳𑀁 𑀉𑀤𑁆𑀥𑀼𑀫𑀸𑀢𑀦𑀁 𑀯𑀺𑀢𑁆𑀣𑀫𑁆𑀪𑀦𑀁. 𑀭𑀽𑀧𑀯𑀺𑀯𑀺𑀢𑁆𑀢𑁄 𑀭𑀽𑀧𑀧𑀭𑀺𑀬𑀦𑁆𑀢𑁄 𑀆𑀓𑀸𑀲𑁄𑀢𑀺 𑀬𑁂𑀲𑀁 𑀲𑁄 𑀧𑀭𑀺𑀘𑁆𑀙𑁂𑀤𑁄, 𑀢𑁂𑀳𑀺 𑀲𑁄 𑀅𑀲𑀫𑁆𑀨𑀼𑀝𑁆𑀞𑁄𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀆𑀓𑀸𑀲𑀥𑀸𑀢𑀽𑀢𑀺 𑀅𑀲𑀫𑁆𑀨𑀼𑀝𑁆𑀞𑀥𑀸𑀢𑀽’’𑀢𑀺. 𑀲𑀜𑁆𑀚𑀸𑀦𑀦𑀯𑀺𑀥𑀼𑀭𑀸 𑀆𑀭𑀫𑁆𑀫𑀡𑀽𑀧𑀮𑀤𑁆𑀥𑀺 𑀯𑀺𑀚𑀸𑀦𑀦𑀥𑀸𑀢𑀼. 𑀯𑀺𑀢𑁆𑀣𑀸𑀭𑀢𑁄𑀧𑀺 𑀓𑀣𑁂𑀢𑀼𑀁 𑀯𑀝𑁆𑀝𑀢𑀺 𑀲𑀗𑁆𑀔𑁂𑀧𑀦𑁆𑀢𑁄𑀕𑀥𑀢𑁆𑀢𑀸 𑀯𑀺𑀢𑁆𑀣𑀸𑀭𑀲𑁆𑀲. 𑀲𑀗𑁆𑀔𑁂𑀧𑀢𑁄 𑀓𑀣𑁂𑀢𑀼𑀁 𑀦 𑀯𑀝𑁆𑀝𑀢𑀺 𑀓𑀣𑁂𑀢𑀩𑁆𑀩𑀲𑁆𑀲 𑀅𑀢𑁆𑀣𑀲𑁆𑀲 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀸𑀪𑀸𑀯𑀢𑁄. 𑀢𑁂𑀦𑀸𑀳 ‘‘𑀯𑀺𑀢𑁆𑀣𑀸𑀭𑀢𑁄𑀯 𑀯𑀝𑁆𑀝𑀢𑀻’’𑀢𑀺. 𑀉𑀪𑀬𑀣𑀸𑀢𑀺 𑀲𑀗𑁆𑀔𑁂𑀧𑀢𑁄 𑀯𑀺𑀢𑁆𑀣𑀸𑀭𑀢𑁄 𑀘.

𑀅𑀦𑀺𑀧𑁆𑀨𑀦𑁆𑀦𑀸𑀧𑀺 𑀆𑀓𑀸𑀲𑀥𑀸𑀢𑀼 𑀪𑀽𑀢𑀸𑀦𑀺 𑀉𑀧𑀸𑀤𑀸𑀬 𑀕𑀳𑁂𑀢𑀩𑁆𑀩𑀢𑀸𑀫𑀢𑁆𑀢𑁂𑀦 ‘‘𑀉𑀧𑀸𑀤𑀸𑀭𑀽𑀧’’𑀦𑁆𑀢𑁂𑀯 𑀯𑀼𑀘𑁆𑀘𑀢𑀺. 𑀤𑀺𑀝𑁆𑀞𑀸𑀦𑁂𑀯𑀸𑀢𑀺 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀸𑀦𑀺 𑀉𑀧𑀸𑀤𑀸𑀭𑀽𑀧𑀪𑀸𑀯𑀲𑀸𑀫𑀜𑁆𑀜𑀢𑁄. 𑀢𑁂𑀦 𑀲𑀳𑀚𑀸𑀢𑀸 𑀯𑁂𑀤𑀦𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀲𑀫𑀼𑀤𑀸𑀬𑁂 𑀧𑀯𑀢𑁆𑀢𑀯𑁄𑀳𑀸𑀭𑀲𑁆𑀲 𑀅𑀯𑀬𑀯𑁂𑀧𑀺 𑀤𑀺𑀲𑁆𑀲𑀦𑀢𑁄 𑀬𑀣𑀸 ‘‘𑀯𑀢𑁆𑀣𑁂𑀓𑀤𑁂𑀲𑁂 𑀤𑀟𑁆𑀠𑁂 𑀯𑀢𑁆𑀣𑀁 𑀤𑀟𑁆𑀠’’𑀦𑁆𑀢𑀺. ‘‘𑀨𑀲𑁆𑀲𑁄 𑀘 𑀘𑁂𑀢𑀦𑀸 𑀘 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄’’𑀢𑀺 𑀯𑀼𑀢𑁆𑀢𑀁 𑀫𑀳𑀸𑀪𑀽𑀫𑀓𑀢𑁆𑀢𑀸 𑀢𑁂𑀲𑀁 𑀢𑀧𑁆𑀧𑀥𑀸𑀦𑀢𑁆𑀢𑀸 𑀘 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀲𑁆𑀲. 𑀅𑀭𑀽𑀧𑀓𑁆𑀔𑀦𑁆𑀥𑀸 𑀦𑀸𑀫𑀁 𑀆𑀭𑀫𑁆𑀫𑀡𑀸𑀪𑀺𑀫𑀼𑀔𑀁 𑀦𑀫𑀦𑀢𑁄 𑀦𑀸𑀫𑀸𑀥𑀻𑀦𑀕𑁆𑀕𑀳𑀡𑀢𑁄 𑀘. 𑀭𑀽𑀧𑀓𑁆𑀔𑀦𑁆𑀥𑁄 𑀭𑀽𑀧𑀁 𑀧𑀭𑀺𑀩𑁆𑀬𑀢𑁆𑀢𑀁 𑀭𑀼𑀧𑁆𑀧𑀦𑀝𑁆𑀞𑁂𑀦. 𑀧𑀘𑁆𑀘𑀬𑀦𑁆𑀢𑀺 𑀦𑀺𑀲𑁆𑀲𑀬𑀪𑀽𑀢𑀁 𑀧𑀘𑁆𑀘𑀬𑀁. 𑀯𑀺𑀪𑀸𑀕𑁂𑀦 𑀤𑁆𑀯𑀸𑀘𑀢𑁆𑀢𑀸𑀮𑀻𑀲. 𑀏𑀓𑀸𑀲𑀻𑀢𑀺 𑀘𑀺𑀢𑁆𑀢𑀸𑀦𑀺 ‘‘𑀲𑀫𑁆𑀫𑀲𑀦𑀘𑀸𑀭𑁄𑀬’’𑀦𑁆𑀢𑀺 𑀓𑀢𑁆𑀯𑀸. 𑀅𑀦𑀼𑀓𑁆𑀓𑀫𑁂𑀦 𑀧𑀝𑀺𑀧𑀚𑁆𑀚𑀫𑀸𑀦𑁄𑀢𑀺 𑀏𑀯𑀁 𑀓𑀗𑁆𑀔𑀸𑀯𑀺𑀢𑀭𑀡𑀯𑀺𑀲𑀼𑀤𑁆𑀥𑀺𑀬𑀁 𑀞𑀺𑀢𑁄 𑀉𑀧𑀭𑀺𑀫𑁂𑀦 𑀢𑀺𑀲𑁆𑀲𑀦𑁆𑀦𑀁 𑀯𑀺𑀲𑀼𑀤𑁆𑀥𑀻𑀦𑀁 𑀲𑀫𑁆𑀧𑀸𑀤𑀦𑀯𑀲𑁂𑀦 𑀯𑀺𑀲𑀼𑀤𑁆𑀥𑀺𑀪𑀸𑀯𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀦𑁆𑀢𑁄.

𑀨𑀲𑁆𑀲𑀸𑀬𑀢𑀦𑀦𑁆𑀢𑀺 𑀨𑀲𑁆𑀲𑀲𑁆𑀲 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀁. 𑀲𑀼𑀯𑀡𑁆𑀡𑀸𑀤𑀻𑀦𑀦𑁆𑀢𑀺 𑀲𑀼𑀯𑀡𑁆𑀡𑀫𑀡𑀺𑀯𑀚𑀺𑀭𑀸𑀤𑀻𑀦𑀁. 𑀆𑀓𑀺𑀡𑁆𑀡𑀁 𑀯𑀺𑀬 𑀳𑀼𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀏𑀢𑁆𑀣𑀸𑀢𑀺 𑀆𑀓𑀭𑁄. 𑀬𑀣𑀸 𑀘𑀓𑁆𑀔𑀼 𑀯𑀺𑀧𑀸𑀓𑀨𑀲𑁆𑀲𑀲𑁆𑀲 𑀯𑀺𑀲𑁂𑀲𑀧𑀘𑁆𑀘𑀬𑁄, 𑀦 𑀢𑀣𑀸 𑀇𑀢𑀭𑁂𑀲𑀦𑁆𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀤𑁆𑀯𑁂 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀦𑀻’’𑀢𑀺𑀆𑀤𑀺. 𑀏𑀲 𑀦𑀬𑁄 𑀲𑁂𑀲𑀯𑀸𑀭𑁂𑀲𑀼𑀧𑀺. 𑀤𑁆𑀯𑀢𑁆𑀢𑀺𑀁𑀲𑀸𑀬 𑀯𑀺𑀧𑀸𑀓𑀨𑀲𑁆𑀲𑁂𑀲𑀼 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑀳𑀕𑀢𑀨𑀲𑁆𑀲𑁂 𑀞𑀧𑁂𑀢𑁆𑀯𑀸 𑀲𑁂𑀲𑀸 𑀤𑁆𑀯𑀸𑀯𑀻𑀲𑀢𑀺 𑀯𑀺𑀧𑀸𑀓𑀨𑀲𑁆𑀲𑀸 𑀯𑁂𑀤𑀺𑀢𑀩𑁆𑀩𑀸. 𑀤𑀺𑀝𑁆𑀞𑀫𑁂𑀯 𑀳𑁄𑀢𑀺 𑀢𑁂𑀦 𑀲𑀫𑀸𑀦𑀬𑁄𑀕𑀓𑁆𑀔𑀫𑀢𑁆𑀢𑀸. ‘‘𑀲𑀗𑁆𑀔𑁂𑀧𑀢𑁄 𑀢𑀸𑀯𑀸’’𑀢𑀺 𑀲𑀗𑁆𑀔𑁂𑀧𑀓𑀣𑀁 𑀆𑀭𑀪𑀺𑀢𑁆𑀯𑀸𑀧𑀺 𑀯𑀺𑀢𑁆𑀣𑀸𑀭𑀓𑀣𑀸𑀧𑁂𑀢𑁆𑀣 𑀯𑀼𑀢𑁆𑀢𑀦𑀬𑀢𑁆𑀢𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀸𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀳𑁂𑀝𑁆𑀞𑀸…𑀧𑁂… 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺.

𑀲𑁄𑀫𑀦𑀲𑁆𑀲𑀲𑁆𑀲 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀪𑀽𑀢𑀁 𑀲𑁄𑀫𑀦𑀲𑁆𑀲𑀝𑁆𑀞𑀸𑀦𑀺𑀬𑀁. 𑀢𑁂𑀦𑀸𑀳 ‘‘𑀲𑁄𑀫𑀦𑀲𑁆𑀲𑀲𑁆𑀲 𑀓𑀸𑀭𑀡𑀪𑀽𑀢’’𑀦𑁆𑀢𑀺. 𑀉𑀧𑀯𑀺𑀘𑀭𑀢𑀻𑀢𑀺 𑀉𑀧𑁂𑀘𑁆𑀘 𑀧𑀯𑀢𑁆𑀢𑀢𑀺. 𑀲𑀪𑀸𑀯𑀢𑁄 𑀲𑀗𑁆𑀓𑀧𑁆𑀧𑀢𑁄 𑀘 𑀲𑁄𑀫𑀦𑀲𑁆𑀲𑀸𑀤𑀺𑀉𑀧𑁆𑀧𑀢𑁆𑀢𑀺𑀳𑁂𑀢𑀼𑀓𑀸 𑀲𑁄𑀫𑀦𑀲𑁆𑀲𑀝𑁆𑀞𑀸𑀦𑀺𑀬𑀸𑀤𑀺𑀢𑀸𑀢𑀺 𑀆𑀳 ‘‘𑀇𑀝𑁆𑀞𑀁 𑀯𑀸 𑀳𑁄𑀢𑀽’’𑀢𑀺𑀆𑀤𑀺. 𑀘𑀢𑀼𑀢𑁆𑀣𑀁 𑀤𑀺𑀝𑁆𑀞𑀫𑁂𑀯 𑀳𑁄𑀢𑀺 𑀢𑀤𑀯𑀺𑀦𑀸𑀪𑀸𑀯𑀢𑁄.

𑀅𑀭𑀺𑀬𑀲𑀘𑁆𑀘𑀸𑀦𑀻𑀢𑀺 𑀧𑀼𑀭𑀺𑀫𑀧𑀤𑁂 𑀉𑀢𑁆𑀢𑀭𑀧𑀤𑀮𑁄𑀧𑁂𑀦𑀸𑀬𑀁 𑀦𑀺𑀤𑁆𑀤𑁂𑀲𑁄𑀢𑀺 𑀆𑀳 ‘‘𑀅𑀭𑀺𑀬𑀪𑀸𑀯𑀓𑀭𑀸𑀦𑀻’’𑀢𑀺𑀆𑀤𑀺. 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁨.𑁫𑁩𑁧) 𑀧𑀓𑀸𑀲𑀺𑀢𑀁, 𑀢𑀲𑁆𑀫𑀸 𑀦 𑀇𑀥 𑀧𑀓𑀸𑀲𑁂𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀼𑀔𑀸𑀯𑀩𑁄𑀥𑀦𑀢𑁆𑀣𑀦𑁆𑀢𑀺 𑀤𑁂𑀲𑀺𑀬𑀫𑀸𑀦𑀸𑀬 𑀯𑀝𑁆𑀝𑀓𑀣𑀸𑀬 𑀲𑀼𑀔𑁂𑀦 𑀅𑀯𑀩𑁄𑀥𑀦𑀢𑁆𑀣𑀁. 𑀢𑁂𑀦𑀸𑀳 ‘‘𑀬𑀲𑁆𑀲 𑀳𑀻’’𑀢𑀺𑀆𑀤𑀺. 𑀤𑁆𑀯𑀸𑀤𑀲𑀧𑀤𑀦𑁆𑀢𑀺 𑀅𑀯𑀺𑀚𑁆𑀚𑀸𑀤𑀻𑀳𑀺 𑀧𑀤𑁂𑀳𑀺 𑀤𑁆𑀯𑀸𑀤𑀲𑀧𑀤𑀁. 𑀧𑀘𑁆𑀘𑀬𑀯𑀝𑁆𑀝𑀦𑁆𑀢𑀺 𑀧𑀘𑁆𑀘𑀬𑀧𑁆𑀧𑀩𑀦𑁆𑀥𑀁. 𑀓𑀣𑁂𑀢𑀼𑀓𑀸𑀫𑁄 𑀳𑁄𑀢𑀺 𑀧𑀘𑁆𑀘𑀬𑀸𑀓𑀸𑀭𑀫𑀼𑀔𑁂𑀦 𑀲𑀘𑁆𑀘𑀸𑀦𑀺 𑀤𑀲𑁆𑀲𑁂𑀢𑀼𑀓𑀸𑀫𑀢𑀸𑀬. 𑀕𑀩𑁆𑀪𑀸𑀯𑀓𑁆𑀓𑀦𑁆𑀢𑀺𑀯𑀝𑁆𑀝𑀦𑁆𑀢𑀺 𑀕𑀩𑁆𑀪𑁄𑀓𑁆𑀓𑀦𑁆𑀢𑀺𑀫𑀼𑀔𑁂𑀦 𑀯𑀺𑀧𑀸𑀓𑀯𑀝𑁆𑀝𑀁 𑀤𑀲𑁆𑀲𑁂𑀢𑀺 ‘‘𑀕𑀩𑁆𑀪𑀲𑁆𑀲𑀸𑀯𑀓𑁆𑀓𑀦𑁆𑀢𑀺 𑀳𑁄𑀢𑀻’’𑀢𑀺𑀆𑀤𑀺𑀦𑀸. 𑀢𑀲𑁆𑀫𑀸 𑀧𑀦𑁂𑀢𑁆𑀣 𑀕𑀩𑁆𑀪𑀸𑀯𑀓𑁆𑀓𑀦𑁆𑀢𑀺𑀯𑀲𑁂𑀦𑁂𑀯 𑀯𑀝𑁆𑀝𑀁 𑀤𑀲𑁆𑀲𑀺𑀢𑀦𑁆𑀢𑀺 𑀆𑀳 ‘‘𑀕𑀩𑁆𑀪𑀸𑀯𑀓𑁆𑀓𑀦𑁆𑀢𑀺𑀯𑀝𑁆𑀝𑀲𑁆𑀫𑀺𑀁 𑀳𑀻’’𑀢𑀺𑀆𑀤𑀺. 𑀕𑀩𑁆𑀪𑀸𑀯𑀓𑁆𑀓𑀦𑁆𑀢𑀺𑀯𑀝𑁆𑀝𑀲𑁆𑀫𑀺𑀦𑁆𑀢𑀺 𑀫𑀸𑀢𑀼𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀦𑀯𑀲𑁂𑀦 𑀧𑀯𑀢𑁆𑀢𑀥𑀫𑁆𑀫𑀧𑁆𑀧𑀩𑀦𑁆𑀥𑁂. 𑀤𑀲𑁆𑀲𑀺𑀢𑁂𑀢𑀺 𑀤𑁂𑀲𑀦𑀸𑀯𑀲𑁂𑀦 𑀤𑀲𑁆𑀲𑀺𑀢𑁂. 𑀧𑀼𑀭𑀺𑀫𑀸 𑀤𑁆𑀯𑁂 𑀬𑁄𑀦𑀺𑀬𑁄 𑀇𑀢𑀭𑀸𑀳𑀺 𑀑𑀴𑀸𑀭𑀺𑀓𑀢𑀸𑀬 𑀧𑀭𑀺𑀩𑁆𑀬𑀢𑁆𑀢𑀢𑀭𑀸𑀢𑀺 𑀯𑀼𑀢𑁆𑀢𑀁 ‘‘𑀕𑀩𑁆𑀪𑀸𑀯𑀓𑁆𑀓𑀦𑁆𑀢𑀺…𑀧𑁂… 𑀅𑀯𑀩𑁄𑀥𑁂𑀢𑀼𑀫𑁆𑀧𑀻’’𑀢𑀺.

𑀧𑀘𑁆𑀘𑀬𑀫𑀢𑁆𑀢𑀦𑁆𑀢𑀺 𑀙𑀦𑁆𑀦𑀁 𑀥𑀸𑀢𑀽𑀦𑀁 𑀲𑀸𑀥𑀸𑀭𑀡𑀁 𑀧𑀘𑁆𑀘𑀬𑀪𑀸𑀯𑀫𑀢𑁆𑀢𑀁, 𑀦 𑀢𑁂𑀳𑀺 𑀪𑀸𑀕𑀲𑁄 𑀦𑀺𑀧𑁆𑀨𑀸𑀤𑀺𑀬𑀫𑀸𑀦𑀁 𑀧𑀘𑁆𑀘𑀬𑀯𑀺𑀲𑁂𑀲𑀁 ‘‘𑀓𑀼𑀢𑁄 𑀧𑀦𑁂𑀢𑀁 𑀙𑀦𑁆𑀦𑀁 𑀥𑀸𑀢𑀽𑀦’’𑀦𑁆𑀢𑀺 𑀅𑀯𑀺𑀪𑀸𑀕𑁂𑀦 𑀯𑀼𑀢𑁆𑀢𑀢𑁆𑀢𑀸. 𑀢𑁂𑀦𑀸𑀳 ‘‘𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺𑀆𑀤𑀺. 𑀦 𑀫𑀸𑀢𑀼 𑀦 𑀧𑀺𑀢𑀼 𑀢𑀸𑀲𑀁 𑀥𑀸𑀢𑀽𑀦𑀁 𑀇𑀫𑀲𑁆𑀲 𑀲𑀢𑁆𑀢𑀲𑁆𑀲 𑀩𑀸𑀳𑀺𑀭𑀪𑀸𑀯𑀢𑁄. 𑀕𑀩𑁆𑀪𑀲𑁆𑀲𑀸𑀢𑀺 𑀏𑀢𑁆𑀣 𑀕𑀩𑁆𑀪𑀢𑀺 𑀅𑀢𑁆𑀢𑀪𑀸𑀯𑀪𑀸𑀯𑁂𑀦 𑀯𑀢𑁆𑀢𑀢𑀻𑀢𑀺 𑀕𑀩𑁆𑀪𑁄, 𑀓𑀮𑀮𑀸𑀤𑀺𑀅𑀯𑀢𑁆𑀣𑁄 𑀥𑀫𑁆𑀫𑀧𑁆𑀧𑀩𑀦𑁆𑀥𑁄. 𑀢𑀦𑁆𑀦𑀺𑀲𑁆𑀲𑀺𑀢𑀢𑁆𑀢𑀸 𑀧𑀦 𑀲𑀢𑁆𑀢𑀲𑀦𑁆𑀢𑀸𑀦𑁄 𑀕𑀩𑁆𑀪𑁄𑀢𑀺 𑀯𑀼𑀢𑁆𑀢𑁄 𑀬𑀣𑀸 𑀫𑀜𑁆𑀘𑀦𑀺𑀲𑁆𑀲𑀺𑀢𑀸 ‘‘𑀫𑀜𑁆𑀘𑀸 𑀉𑀓𑁆𑀓𑀼𑀝𑁆𑀞𑀺𑀁 𑀓𑀭𑁄𑀦𑁆𑀢𑀻’’𑀢𑀺. 𑀢𑀦𑁆𑀦𑀺𑀲𑁆𑀲𑀬𑀪𑀸𑀯𑀢𑁄 𑀫𑀸𑀢𑀼𑀓𑀼𑀘𑁆𑀙𑀺 𑀕𑀩𑁆𑀪𑁄𑀢𑀺 𑀯𑀼𑀘𑁆𑀘𑀢𑀺 ‘‘𑀕𑀩𑁆𑀪𑁂 𑀯𑀲𑀢𑀺 𑀫𑀸𑀡𑀯𑁄’’𑀢𑀺𑀆𑀤𑀻𑀲𑀼 (𑀚𑀸. 𑁧.𑁧𑁫.𑁩𑁬𑁩). 𑀕𑀩𑁆𑀪𑁄 𑀯𑀺𑀬𑀸𑀢𑀺 𑀯𑀸 𑀕𑀩𑁆𑀪𑁄. 𑀬𑀣𑀸 𑀳𑀺 𑀦𑀺𑀯𑀸𑀲𑀝𑁆𑀞𑀸𑀦𑀢𑀸𑀬 𑀲𑀢𑁆𑀢𑀸𑀦𑀁 𑀑𑀯𑀭𑀓𑁄 ‘‘𑀕𑀩𑁆𑀪𑁄’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀕𑀩𑁆𑀪𑀲𑁂𑀬𑁆𑀬𑀓𑀸𑀦𑀁 𑀲𑀢𑁆𑀢𑀸𑀦𑀁 𑀬𑀸𑀯 𑀅𑀪𑀺𑀚𑀸𑀢𑀺 𑀦𑀺𑀯𑀸𑀲𑀝𑁆𑀞𑀸𑀦𑀢𑀸𑀬 𑀫𑀸𑀢𑀼𑀓𑀼𑀘𑁆𑀙𑀺 ‘‘𑀕𑀩𑁆𑀪𑁄’’𑀢𑀺 𑀯𑀼𑀘𑁆𑀘𑀢𑀺. 𑀇𑀥 𑀧𑀦 𑀧𑀞𑀫𑀁 𑀯𑀼𑀢𑁆𑀢𑀅𑀢𑁆𑀣𑁂𑀦𑁂𑀯 𑀕𑀩𑁆𑀪𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀦𑀸𑀳 ‘‘𑀕𑀩𑁆𑀪𑁄 𑀘 𑀦𑀸𑀫𑀸’’𑀢𑀺𑀆𑀤𑀺.

𑀦𑀺𑀭𑀢𑀺𑀅𑀢𑁆𑀣𑁂𑀦 𑀦𑀺𑀭𑀬𑁄 𑀘 𑀲𑁄 𑀬𑀣𑀸𑀯𑀼𑀢𑁆𑀢𑁂𑀦 𑀅𑀢𑁆𑀣𑁂𑀦 𑀕𑀩𑁆𑀪𑁄 𑀘𑀸𑀢𑀺 𑀦𑀺𑀭𑀬𑀕𑀩𑁆𑀪𑁄. 𑀏𑀲 𑀦𑀬𑁄 𑀲𑁂𑀲𑀧𑀤𑁂𑀲𑀼𑀧𑀺. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀤𑁂𑀯𑀫𑀦𑀼𑀚𑀸𑀤𑀬𑁄 𑀯𑀺𑀬 𑀉𑀤𑁆𑀥𑀁 𑀤𑀻𑀖𑀸 𑀅𑀳𑀼𑀢𑁆𑀯𑀸 𑀢𑀺𑀭𑀺𑀬𑀁 𑀅𑀜𑁆𑀘𑀺𑀢𑀸 𑀤𑀻𑀖𑀸𑀢𑀺 𑀢𑀺𑀭𑀘𑁆𑀙𑀸𑀦𑀸. 𑀢𑁂 𑀏𑀯 𑀔𑀦𑁆𑀥𑀓𑁄𑀝𑁆𑀞𑀸𑀲𑀪𑀸𑀯𑁂𑀦 𑀬𑁄𑀦𑀺 𑀘 𑀲𑁄 𑀯𑀼𑀢𑁆𑀢𑀦𑀬𑁂𑀦 𑀕𑀩𑁆𑀪𑁄 𑀘𑀸𑀢𑀺 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀕𑀩𑁆𑀪𑁄. 𑀧𑀓𑀝𑁆𑀞𑀢𑁄 𑀲𑀼𑀔𑀢𑁄 𑀅𑀧𑁂𑀢𑀁 𑀅𑀧𑀕𑀫𑁄 𑀧𑁂𑀢𑀪𑀸𑀯𑁄, 𑀢𑀁 𑀧𑀢𑁆𑀢𑀸𑀦𑀁 𑀯𑀺𑀲𑀬𑁄𑀢𑀺 𑀧𑁂𑀢𑁆𑀢𑀺𑀯𑀺𑀲𑀬𑁄, 𑀧𑁂𑀢𑀬𑁄𑀦𑀺. 𑀫𑀦𑀲𑁆𑀲 𑀉𑀲𑁆𑀲𑀦𑁆𑀦𑀢𑀸𑀬 𑀲𑀽𑀭𑀪𑀸𑀯𑀸𑀤𑀺𑀕𑀼𑀡𑁂𑀳𑀺 𑀉𑀧𑀘𑀺𑀢𑀫𑀸𑀦𑀲𑀢𑀸𑀬 𑀉𑀓𑁆𑀓𑀝𑁆𑀞𑀕𑀼𑀡𑀘𑀺𑀢𑁆𑀢𑀢𑀸𑀬 𑀫𑀦𑀼𑀲𑁆𑀲𑀸. 𑀤𑀺𑀩𑁆𑀩𑀦𑁆𑀢𑀺 𑀓𑀸𑀫𑀕𑀼𑀡𑀸𑀤𑀻𑀳𑀺 𑀓𑀻𑀴𑀦𑁆𑀢𑀺 𑀮𑀴𑀦𑁆𑀢𑀺 𑀚𑁄𑀢𑀦𑁆𑀢𑀻𑀢𑀺 𑀤𑁂𑀯𑀸. 𑀕𑀩𑁆𑀪𑀲𑀤𑁆𑀤𑁄 𑀯𑀼𑀢𑁆𑀢𑀦𑀬𑁄 𑀏𑀯. 𑀦𑀸𑀦𑀧𑁆𑀧𑀓𑀸𑀭𑁄𑀢𑀺 𑀬𑀣𑀸𑀯𑀼𑀢𑁆𑀢𑁂𑀦 𑀢𑀤𑀦𑀦𑁆𑀢𑀭𑀪𑁂𑀤𑁂𑀦 𑀘 𑀦𑀸𑀦𑀧𑁆𑀧𑀓𑀸𑀭𑀓𑁄. 𑀫𑀦𑀼𑀲𑁆𑀲𑀕𑀩𑁆𑀪𑁄 𑀅𑀥𑀺𑀧𑁆𑀧𑁂𑀢𑁄 𑀲𑀼𑀧𑀸𑀓𑀝𑀢𑀸𑀬 𑀧𑀘𑁆𑀘𑀓𑁆𑀔𑀪𑀸𑀯𑀢𑁄. 𑀑𑀓𑁆𑀓𑀦𑁆𑀢𑀺 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀫𑀺𑀢𑁆𑀯𑀸 𑀯𑀺𑀬 𑀉𑀧𑁆𑀧𑀢𑀺𑀢𑁆𑀯𑀸𑀢𑀺 𑀓𑀢𑁆𑀯𑀸. 𑀦𑀺𑀩𑁆𑀩𑀢𑁆𑀢𑀦𑀁 𑀦𑀺𑀩𑁆𑀩𑀢𑁆𑀢𑀺. 𑀧𑀸𑀢𑀼𑀪𑀸𑀯𑁄 𑀉𑀧𑁆𑀧𑀢𑁆𑀢𑀺𑀧𑁆𑀧𑀓𑀸𑀲𑀓𑁄 𑀘.

𑀲𑀦𑁆𑀦𑀺𑀧𑀸𑀢𑁄 𑀦𑀸𑀫 𑀅𑀯𑁂𑀓𑀮𑁆𑀮𑀚𑀸𑀢𑀺𑀳𑀻𑀦𑀯𑁂𑀓𑀮𑁆𑀮𑁂𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀇𑀥 𑀫𑀸𑀢𑀸𑀧𑀺𑀢𑀭𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀢𑁆𑀢𑀮𑁄𑀓𑁂. 𑀲𑀦𑁆𑀦𑀺𑀧𑀢𑀺𑀢𑀸𑀢𑀺 𑀲𑀫𑁄𑀥𑀸𑀦𑀪𑀸𑀯𑀢𑁄 𑀲𑀦𑁆𑀦𑀺𑀧𑀢𑀺𑀢𑀸 𑀲𑀫𑀸𑀕𑀢𑀸 𑀲𑀁𑀲𑀺𑀮𑀺𑀝𑁆𑀞𑀸. 𑀉𑀢𑀼𑀦𑀻𑀢𑀺 𑀉𑀢𑀼𑀫𑀢𑀻 𑀲𑀜𑁆𑀚𑀸𑀢𑀧𑀼𑀧𑁆𑀨𑀸. 𑀇𑀤𑀜𑁆𑀘 𑀉𑀢𑀼𑀲𑀫𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀮𑁄𑀓𑀲𑀫𑀜𑁆𑀜𑀸𑀓𑀭𑀚𑀲𑁆𑀲 𑀮𑀕𑁆𑀕𑀦𑀤𑀺𑀯𑀲𑀫𑀢𑁆𑀢𑀁. 𑀫𑀸𑀢𑀼𑀕𑀸𑀫𑀲𑁆𑀲 𑀳𑀺 𑀬𑀲𑁆𑀫𑀺𑀁 𑀕𑀩𑁆𑀪𑀸𑀲𑀳𑀲𑀜𑁆𑀜𑀺𑀢𑁂 𑀑𑀓𑀸𑀲𑁂 𑀤𑀸𑀭𑀓𑁄 𑀦𑀺𑀩𑁆𑀩𑀢𑁆𑀢𑀢𑀺, 𑀢𑀢𑁆𑀣 𑀫𑀳𑀢𑀻 𑀮𑁄𑀳𑀺𑀢𑀧𑀻𑀴𑀓𑀸 𑀲𑀡𑁆𑀞𑀳𑀺𑀢𑁆𑀯𑀸 𑀅𑀕𑁆𑀕𑀳𑀺𑀢𑀧𑀼𑀩𑁆𑀩𑀸 𑀏𑀯 𑀪𑀺𑀚𑁆𑀚𑀺𑀢𑁆𑀯𑀸 𑀧𑀕𑁆𑀖𑀭𑀢𑀺, 𑀯𑀢𑁆𑀣𑀼 𑀲𑀼𑀤𑁆𑀥𑀁 𑀳𑁄𑀢𑀺 𑀧𑀕𑁆𑀖𑀭𑀺𑀢𑀮𑁄𑀳𑀺𑀢𑀢𑁆𑀢𑀸 𑀅𑀦𑀸𑀫𑀬𑀢𑁆𑀢𑀸 𑀘. 𑀯𑀺𑀲𑀼𑀤𑁆𑀥𑁂 𑀯𑀢𑁆𑀣𑀼𑀫𑁆𑀳𑀺 𑀫𑀸𑀢𑀸𑀧𑀺𑀢𑀽𑀲𑀼 𑀏𑀓𑀯𑀸𑀭𑀁 𑀲𑀦𑁆𑀦𑀺𑀧𑀢𑀺𑀢𑁂𑀲𑀼 𑀬𑀸𑀯 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀔𑁂𑀢𑁆𑀢𑀫𑁂𑀯 𑀳𑁄𑀢𑀺. 𑀲𑀼𑀤𑁆𑀥𑀁 𑀯𑀢𑁆𑀣𑀼 𑀦𑀳𑀸𑀦𑀢𑁄 𑀧𑀭𑀫𑁆𑀧𑀺 𑀓𑀢𑀺𑀧𑀬𑀸𑀦𑀺 𑀤𑀺𑀯𑀲𑀸𑀦𑀺 𑀕𑀩𑁆𑀪𑀲𑀡𑁆𑀞𑀳𑀦𑀢𑀸𑀬 𑀔𑁂𑀢𑁆𑀢𑀫𑁂𑀯 𑀳𑁄𑀢𑀺 𑀧𑀭𑀺𑀢𑁆𑀢𑀲𑁆𑀲 𑀮𑁄𑀳𑀺𑀢𑀮𑁂𑀲𑀲𑁆𑀲 𑀯𑀺𑀚𑁆𑀚𑀫𑀸𑀦𑀢𑁆𑀢𑀸. 𑀢𑀲𑁆𑀫𑀺𑀁 𑀲𑀫𑀬𑁂 𑀳𑀢𑁆𑀣𑀕𑁆𑀕𑀸𑀳𑀯𑁂𑀡𑀺𑀕𑁆𑀕𑀸𑀳𑀸𑀤𑀺𑀦𑀸 𑀅𑀗𑁆𑀕𑀧𑀭𑀸𑀫𑀲𑀦𑁂𑀦𑀧𑀺 𑀤𑀸𑀭𑀓𑁄 𑀦𑀺𑀩𑁆𑀩𑀢𑁆𑀢𑀢𑀺𑀬𑁂𑀯. 𑀇𑀢𑁆𑀣𑀺𑀲𑀦𑁆𑀢𑀸𑀦𑁂𑀧𑀺 𑀳𑀺 𑀲𑀢𑁆𑀢𑀧𑀺 𑀥𑀸𑀢𑀽 𑀮𑀩𑁆𑀪𑀦𑁆𑀢𑁂𑀯. 𑀢𑀣𑀸 𑀳𑀺 𑀧𑀸𑀭𑀺𑀓𑀸𑀬 𑀦𑀸𑀪𑀺𑀧𑀭𑀸𑀫𑀲𑀦𑁂𑀦 𑀲𑀸𑀫𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲, 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸𑀬 𑀦𑀸𑀪𑀺𑀧𑀭𑀸𑀫𑀲𑀦𑁂𑀦 (𑀚𑀸. 𑀅𑀝𑁆𑀞. 𑁪.𑁧𑁫.𑀫𑀸𑀢𑀗𑁆𑀕𑀚𑀸𑀢𑀓𑀯𑀡𑁆𑀡𑀦𑀸; 𑀫. 𑀦𑀺. 𑀅𑀝𑁆𑀞. 𑁨.𑁬𑁫) 𑀫𑀡𑁆𑀟𑀩𑁆𑀬𑀲𑁆𑀲 𑀦𑀺𑀩𑁆𑀩𑀢𑁆𑀢𑀺 𑀅𑀳𑁄𑀲𑀺. 𑀕𑀦𑁆𑀥𑀦𑀢𑁄 𑀉𑀧𑁆𑀧𑀦𑁆𑀦𑀕𑀢𑀺𑀬𑀸 𑀦𑀺𑀫𑀺𑀢𑁆𑀢𑀽𑀧𑀝𑁆𑀞𑀸𑀦𑁂𑀦 𑀲𑀽𑀘𑀦𑀢𑁄 𑀤𑀻𑀧𑀦𑀢𑁄 𑀕𑀦𑁆𑀥𑁄𑀢𑀺 𑀮𑀤𑁆𑀥𑀦𑀸𑀫𑁂𑀦 𑀪𑀯𑀕𑀸𑀫𑀺𑀓𑀫𑁆𑀫𑀼𑀦𑀸 𑀅𑀩𑁆𑀩𑀢𑀺 𑀧𑀯𑀢𑁆𑀢𑀢𑀻𑀢𑀺 𑀕𑀦𑁆𑀥𑀩𑁆𑀩𑁄, 𑀢𑀢𑁆𑀣 𑀉𑀧𑁆𑀧𑀚𑁆𑀚𑀫𑀸𑀦𑀓𑀲𑀢𑁆𑀢𑁄. 𑀧𑀘𑁆𑀘𑀼𑀧𑀝𑁆𑀞𑀺𑀢𑁄 𑀳𑁄𑀢𑀻𑀢𑀺 𑀦 𑀫𑀸𑀢𑀸𑀧𑀺𑀢𑀽𑀦𑀁 𑀲𑀦𑁆𑀦𑀺𑀧𑀸𑀢𑀁 𑀑𑀮𑁄𑀓𑀬𑀫𑀸𑀦𑁄 𑀲𑀫𑀻𑀧𑁂 𑀞𑀺𑀢𑁄 𑀧𑀘𑁆𑀘𑀼𑀧𑀝𑁆𑀞𑀺𑀢𑁄 𑀦𑀸𑀫 𑀳𑁄𑀢𑀺, 𑀓𑀫𑁆𑀫𑀬𑀦𑁆𑀢𑀬𑀦𑁆𑀢𑀺𑀢𑁄 𑀧𑀦 𑀏𑀓𑁄 𑀲𑀢𑁆𑀢𑁄 𑀢𑀲𑁆𑀫𑀺𑀁 𑀑𑀓𑀸𑀲𑁂 𑀦𑀺𑀩𑁆𑀩𑀢𑁆𑀢𑀦𑀓𑁄 𑀳𑁄𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄. 𑀢𑀤𑀸 𑀳𑀺 𑀢𑀢𑁆𑀭𑀽𑀧𑀕𑀲𑀢𑁆𑀢𑁄 𑀢𑀢𑁆𑀭𑀽𑀧𑀧𑀢𑁆𑀢𑀺𑀆𑀯𑀳𑀦𑁆𑀢𑀓𑀫𑁆𑀫𑀲𑀗𑁆𑀔𑀸𑀢𑁂𑀦 𑀧𑁂𑀮𑁆𑀮𑀓𑀬𑀦𑁆𑀢𑁂𑀦 𑀢𑀣𑀢𑁆𑀣𑀸𑀬 𑀧𑁂𑀮𑁆𑀮𑀺𑀢𑁄 𑀉𑀧𑀦𑀻𑀢𑁄 𑀯𑀺𑀬 𑀳𑁄𑀢𑀺.

𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀦𑁆𑀢𑀺 𑀏𑀢𑁆𑀣 𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑀪𑀸𑀯𑁂𑀦 𑀕𑀳𑀺𑀢𑀢𑁆𑀢𑀸 ‘‘𑀢𑀬𑁄 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸’’𑀢𑀺 𑀯𑀼𑀢𑁆𑀢𑀁. 𑀇𑀥 𑀧𑀦 𑀯𑀺𑀜𑁆𑀜𑀸𑀡𑀁 𑀧𑀘𑁆𑀘𑀬𑀪𑀸𑀯𑁂𑀦 𑀅𑀕𑁆𑀕𑀳𑁂𑀢𑁆𑀯𑀸 𑀕𑀩𑁆𑀪𑁄𑀓𑁆𑀓𑀦𑁆𑀢𑀺𑀬𑀸 𑀏𑀯 𑀧𑀘𑁆𑀘𑀬𑀪𑀸𑀯𑁂𑀦 𑀕𑀳𑀺𑀢𑀢𑁆𑀢𑀸 ‘‘𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀫𑁆𑀧𑀺 𑀧𑀓𑁆𑀔𑀺𑀧𑀺𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀇𑀥 𑀧𑀦 𑀫𑀦𑀼𑀲𑁆𑀲𑀕𑀩𑁆𑀪𑀲𑁆𑀲 𑀑𑀓𑁆𑀓𑀦𑁆𑀢𑀺𑀬𑀸 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 ‘‘𑀕𑀩𑁆𑀪𑀲𑁂𑀬𑁆𑀬𑀓𑀸𑀦𑀁 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂’’𑀢𑀺 𑀯𑀼𑀢𑁆𑀢𑀁.

𑀢𑀡𑁆𑀳𑀸𑀬 𑀲𑀫𑀼𑀤𑀬𑀲𑀘𑁆𑀘𑀪𑀸𑀯𑁂𑀦 𑀕𑀳𑀺𑀢𑀢𑁆𑀢𑀸 ‘‘𑀞𑀧𑁂𑀢𑁆𑀯𑀸 𑀢𑀡𑁆𑀳’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀲𑁂𑀯 𑀧𑀪𑀸𑀯𑀺𑀓𑀸𑀢𑀺 𑀢𑀲𑁆𑀲𑁂𑀯 𑀬𑀣𑀸𑀯𑀼𑀢𑁆𑀢𑀲𑁆𑀲 𑀤𑀼𑀓𑁆𑀔𑀲𑀘𑁆𑀘𑀲𑁆𑀲 𑀉𑀧𑁆𑀧𑀸𑀤𑀺𑀓𑀸. 𑀤𑀼𑀓𑁆𑀔𑀦𑀺𑀭𑁄𑀥𑁄𑀢𑀺 𑀏𑀢𑁆𑀣 𑀤𑀼𑀓𑁆𑀔𑀕𑁆𑀕𑀳𑀡𑁂𑀦 𑀢𑀡𑁆𑀳𑀸𑀧𑀺 𑀕𑀳𑀺𑀢𑀸𑀢𑀺 𑀆𑀳 ‘‘𑀢𑁂𑀲𑀁 𑀤𑁆𑀯𑀺𑀦𑁆𑀦𑀫𑁆𑀧𑀺…𑀧𑁂… 𑀤𑀼𑀓𑁆𑀔𑀦𑀺𑀭𑁄𑀥𑁄’’𑀢𑀺. 𑀅𑀯𑀺𑀲𑁂𑀲𑁂𑀦 𑀳𑀺 𑀢𑁂𑀪𑀽𑀫𑀓𑀯𑀝𑁆𑀝𑀁 𑀇𑀥 𑀤𑀼𑀓𑁆𑀔𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁. 𑀅𑀣 𑀯𑀸 𑀤𑀼𑀓𑁆𑀔𑀲𑁆𑀲 𑀅𑀦𑀼𑀧𑁆𑀧𑀢𑁆𑀢𑀺𑀦𑀺𑀭𑁄𑀥𑁄 𑀢𑀩𑁆𑀪𑀸𑀯𑀺𑀓𑀸𑀬 𑀢𑀡𑁆𑀳𑀸𑀬 𑀅𑀦𑀼𑀧𑁆𑀧𑀢𑁆𑀢𑀺𑀦𑀺𑀭𑁄𑀥𑁂𑀦 𑀯𑀺𑀦𑀸 𑀦 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀢𑁂𑀲𑀁 𑀤𑁆𑀯𑀺𑀦𑁆𑀦𑀫𑁆𑀧𑀺…𑀧𑁂… 𑀤𑀼𑀓𑁆𑀔𑀦𑀺𑀭𑁄𑀥𑁄’’𑀢𑀺. 𑀅𑀦𑀼𑀧𑁆𑀧𑀢𑁆𑀢𑀺𑀦𑀺𑀭𑁄𑀥𑁄𑀢𑀺 𑀘 𑀅𑀦𑀼𑀧𑁆𑀧𑀢𑁆𑀢𑀺𑀦𑀺𑀭𑁄𑀥𑀦𑀺𑀫𑀺𑀢𑁆𑀢𑀁 𑀦𑀺𑀩𑁆𑀩𑀸𑀦𑀁 𑀤𑀲𑁆𑀲𑁂𑀢𑀺.

‘‘𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀯𑀸 𑀉𑀪𑀬𑀢𑁆𑀣 𑀧𑀸𑀴𑀺𑀬𑀸 𑀧𑀯𑀢𑁆𑀢𑀺𑀆𑀓𑀸𑀭𑀪𑁂𑀤𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀬𑀁 𑀧𑀦 𑀯𑀺𑀲𑁂𑀲𑁄’’𑀢𑀺 𑀆𑀳. 𑀢𑀢𑁆𑀣𑀸𑀢𑀺 𑀯𑀺𑀲𑀤𑁆𑀥𑀺𑀫𑀕𑁆𑀕𑁂. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂. 𑀅𑀯𑀺𑀚𑁆𑀚𑀸𑀬 𑀢𑁆𑀯𑁂𑀯𑀸𑀢𑀺 𑀅𑀯𑀺𑀚𑁆𑀚𑀸𑀬 𑀢𑀼 𑀏𑀯. 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸𑀢𑀺 𑀏𑀢𑁆𑀣 𑀅𑀘𑁆𑀘𑀦𑁆𑀢𑀫𑁂𑀯 𑀲𑀗𑁆𑀔𑀸𑀭𑁂 𑀯𑀺𑀭𑀚𑁆𑀚𑀢𑀺 𑀏𑀢𑁂𑀦𑀸𑀢𑀺 𑀯𑀺𑀭𑀸𑀕𑁄, 𑀫𑀕𑁆𑀕𑁄, 𑀢𑀲𑁆𑀫𑀸 𑀯𑀺𑀭𑀸𑀕𑀲𑀗𑁆𑀔𑀸𑀢𑁂𑀦 𑀫𑀕𑁆𑀕𑁂𑀦 𑀅𑀲𑁂𑀲𑀦𑀺𑀭𑁄𑀥𑀸 𑀅𑀲𑁂𑀲𑁂𑀢𑁆𑀯𑀸 𑀦𑀺𑀭𑁄𑀥𑀸 𑀲𑀫𑀼𑀘𑁆𑀙𑀺𑀦𑁆𑀤𑀦𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀲𑀓𑀮𑀲𑁆𑀲𑀸𑀢𑀺 𑀅𑀦𑀯𑀲𑁂𑀲𑀲𑁆𑀲. 𑀓𑁂𑀯𑀮𑀲𑁆𑀲𑀸𑀢𑀺 𑀯𑀸 𑀲𑀼𑀤𑁆𑀥𑀲𑁆𑀲, 𑀧𑀭𑀧𑀭𑀺𑀓𑀧𑁆𑀧𑀺𑀢𑀲𑀢𑁆𑀢𑀚𑀻𑀯𑀸𑀤𑀺𑀯𑀺𑀭𑀳𑀺𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀔𑀻𑀡𑀸𑀓𑀸𑀭𑁄𑀧𑀺 𑀯𑀼𑀘𑁆𑀘𑀢𑀺 ‘‘𑀦𑀺𑀭𑀼𑀚𑁆𑀛𑀦𑀁 𑀦𑀺𑀭𑁄𑀥𑁄’’𑀢𑀺 𑀇𑀫𑀺𑀦𑀸 𑀅𑀢𑁆𑀣𑁂𑀦. 𑀅𑀭𑀳𑀢𑁆𑀢𑀫𑁆𑀧𑀺 𑀦𑀺𑀭𑁄𑀥𑁄𑀢𑀺 𑀯𑀼𑀘𑁆𑀘𑀢𑀺 𑀦𑀺𑀭𑁄𑀥𑀦𑁆𑀢𑁂 𑀉𑀧𑁆𑀧𑀦𑁆𑀦𑀢𑁆𑀢𑀸. 𑀦𑀺𑀩𑁆𑀩𑀸𑀦𑀫𑁆𑀧𑀺 𑀦𑀺𑀭𑁄𑀥𑁄𑀢𑀺 𑀯𑀼𑀘𑁆𑀘𑀢𑀺 𑀅𑀯𑀺𑀚𑁆𑀚𑀸𑀤𑀻𑀦𑀁 𑀦𑀺𑀭𑁄𑀥𑀲𑁆𑀲 𑀦𑀺𑀫𑀺𑀢𑁆𑀢𑀪𑀸𑀯𑀢𑁄 𑀅𑀯𑀺𑀚𑁆𑀚𑀸𑀤𑀬𑁄 𑀦𑀺𑀭𑀼𑀚𑁆𑀛𑀦𑁆𑀢𑀺 𑀏𑀢𑁆𑀣𑀸𑀢𑀺 𑀦𑀺𑀭𑁄𑀥𑁄𑀢𑀺 𑀓𑀢𑁆𑀯𑀸. 𑀔𑀻𑀡𑀸𑀓𑀸𑀭𑀤𑀲𑁆𑀲𑀦𑀯𑀲𑁂𑀦𑀸𑀢𑀺 𑀅𑀯𑀺𑀚𑁆𑀚𑀸𑀤𑀻𑀦𑀁 𑀅𑀦𑀼𑀧𑁆𑀧𑀢𑁆𑀢𑀺𑀦𑀺𑀭𑁄𑀥𑁂𑀦 𑀦𑀺𑀭𑀼𑀚𑁆𑀛𑀦𑀸𑀓𑀸𑀭𑀤𑀲𑁆𑀲𑀦𑀯𑀲𑁂𑀦. 𑀦𑀺𑀩𑁆𑀩𑀸𑀦𑀫𑁂𑀯 𑀲𑀦𑁆𑀥𑀸𑀬, 𑀦 𑀧𑀦 𑀅𑀭𑀳𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀪𑀸𑀯𑀥𑀫𑁆𑀫𑀸𑀦𑀁 𑀦𑀺𑀕𑁆𑀕𑀳𑁄 𑀦𑀸𑀫 𑀬𑀣𑀸𑀯𑀼𑀢𑁆𑀢𑀥𑀫𑁆𑀫𑀧𑀭𑀺𑀘𑁆𑀙𑁂𑀤𑀢𑁄 𑀊𑀦𑀸𑀥𑀺𑀓𑀪𑀸𑀯𑀧𑁆𑀧𑀓𑀸𑀲𑀦𑁂𑀦 𑀅𑀢𑁆𑀢𑀲𑀪𑀸𑀯𑀯𑀺𑀪𑀸𑀯𑀦𑁂𑀦𑁂𑀯 𑀳𑁄𑀢𑀻𑀢𑀺 𑀆𑀳 ‘‘𑀦𑀺𑀕𑁆𑀕𑀡𑁆𑀳𑀦𑁆𑀢𑁄 𑀳𑀻’’𑀢𑀺𑀆𑀤𑀺.

𑀢𑀺𑀢𑁆𑀣𑀸𑀬𑀢𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀪𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁩. 𑀤𑀼𑀢𑀺𑀬𑁂 𑀧𑀭𑀺𑀢𑁆𑀢𑀸𑀢𑀼𑀁 𑀲𑀫𑀢𑁆𑀣𑀪𑀸𑀯𑁂𑀦𑀸𑀢𑀺 𑀉𑀧𑁆𑀧𑀦𑁆𑀦𑀪𑀬𑀢𑁄 𑀭𑀓𑁆𑀔𑀺𑀢𑀼𑀁 𑀲𑀫𑀢𑁆𑀣𑀪𑀸𑀯𑁂𑀦. 𑀦𑀢𑁆𑀣𑀺 𑀏𑀢𑁆𑀣 𑀫𑀸𑀢𑀸𑀧𑀼𑀢𑁆𑀢𑀁 𑀅𑀜𑁆𑀜𑀫𑀜𑁆𑀜𑀁 𑀢𑀸𑀬𑀺𑀢𑀼𑀁 𑀲𑀫𑀢𑁆𑀣𑀦𑁆𑀢𑀺 𑀅𑀫𑀸𑀢𑀸𑀧𑀼𑀢𑁆𑀢𑀸𑀦𑀺, 𑀢𑀸𑀦𑀺𑀬𑁂𑀯 𑀅𑀫𑀸𑀢𑀸𑀧𑀼𑀢𑁆𑀢𑀺𑀓𑀸𑀦𑀺. 𑀢𑁂𑀦𑀸𑀳 ‘‘𑀦𑀢𑁆𑀣𑀺 𑀏𑀢𑁆𑀣𑀸’’𑀢𑀺𑀆𑀤𑀺. 𑀬𑀦𑁆𑀢𑀺 𑀪𑀼𑀫𑁆𑀫𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀦𑁆𑀢𑀺 𑀆𑀳 ‘‘𑀬𑀲𑁆𑀫𑀺𑀁 𑀲𑀫𑀬𑁂’’𑀢𑀺. 𑀫𑀸𑀢𑀸𑀧𑀺 𑀧𑀼𑀢𑁆𑀢𑀁 𑀧𑀲𑁆𑀲𑀺𑀢𑀼𑀁 𑀦 𑀮𑀪𑀢𑀺, 𑀧𑀭𑀺𑀢𑁆𑀢𑀸𑀢𑀼𑀁 𑀦 𑀲𑀫𑀢𑁆𑀣𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀼𑀢𑁆𑀢𑁄𑀧𑀺 𑀫𑀸𑀢𑀭𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀘𑀺𑀢𑁆𑀢𑀼𑀢𑁆𑀭𑀸𑀲𑁄𑀬𑁂𑀯 𑀪𑀬𑀁 𑀘𑀺𑀢𑁆𑀢𑀼𑀢𑁆𑀭𑀸𑀲𑀪𑀬𑀁. 𑀇𑀫𑀺𑀦𑀸 𑀑𑀢𑁆𑀢𑀧𑁆𑀧𑀪𑀬𑀸𑀤𑀺𑀁 𑀦𑀺𑀯𑀢𑁆𑀢𑁂𑀢𑀺. 𑀅𑀝𑀯𑀺𑀕𑁆𑀕𑀳𑀡𑁂𑀦 𑀅𑀝𑀯𑀺𑀯𑀸𑀲𑀺𑀦𑁄 𑀯𑀼𑀢𑁆𑀢𑀸 ‘‘𑀲𑀩𑁆𑀩𑁄 𑀕𑀸𑀫𑁄 𑀆𑀕𑀢𑁄’’𑀢𑀺𑀆𑀤𑀻𑀲𑀼 𑀯𑀺𑀬𑀸𑀢𑀺 𑀆𑀳 ‘‘𑀅𑀝𑀯𑀻𑀢𑀺 𑀘𑁂𑀢𑁆𑀣 𑀅𑀝𑀯𑀺𑀯𑀸𑀲𑀺𑀦𑁄 𑀘𑁄𑀭𑀸 𑀯𑁂𑀤𑀺𑀢𑀩𑁆𑀩𑀸’’𑀢𑀺. 𑀏𑀢𑁂𑀢𑀺 𑀅𑀝𑀯𑀺𑀯𑀸𑀲𑀺𑀦𑁄 𑀘𑁄𑀭𑀸. 𑀏𑀢𑀁 𑀯𑀼𑀢𑁆𑀢𑀦𑁆𑀢𑀺 ‘‘𑀅𑀝𑀯𑀺𑀲𑀗𑁆𑀓𑁄𑀧𑁄’’𑀢𑀺 𑀇𑀤𑀁 𑀯𑀼𑀢𑁆𑀢𑀁. 𑀞𑀸𑀦𑀕𑀫𑀦𑀸𑀤𑀺𑀇𑀭𑀺𑀬𑀸𑀧𑀣𑀘𑀓𑁆𑀓𑀲𑀫𑀗𑁆𑀕𑀺𑀦𑁄 𑀇𑀭𑀺𑀬𑀸𑀧𑀣𑀘𑀓𑁆𑀓𑀲𑀫𑀸𑀭𑀼𑀴𑁆𑀳𑀸 𑀦𑀸𑀫 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀇𑀭𑀺𑀬𑀸𑀧𑀣𑀘𑀓𑁆𑀓𑀫𑁆𑀧𑀺 𑀯𑀝𑁆𑀝𑀢𑀻’’𑀢𑀺. 𑀇𑀭𑀺𑀬𑀸𑀧𑀣𑁄𑀬𑁂𑀯 𑀧𑀯𑀢𑁆𑀢𑀦𑀝𑁆𑀞𑁂𑀦 𑀘𑀓𑁆𑀓𑀦𑁆𑀢𑀺 𑀇𑀭𑀺𑀬𑀸𑀧𑀣𑀘𑀓𑁆𑀓𑀁.

𑀧𑀭𑀺𑀬𑀸𑀬𑀦𑁆𑀢𑀻𑀢𑀺 𑀧𑀭𑀺𑀢𑁄 𑀢𑁂𑀦 𑀢𑁂𑀦 𑀤𑀺𑀲𑀸𑀪𑀸𑀕𑁂𑀦 𑀕𑀘𑁆𑀙𑀦𑁆𑀢𑀺. 𑀢𑁂𑀦𑀸𑀳 ‘‘𑀇𑀢𑁄 𑀘𑀺𑀢𑁄 𑀘 𑀕𑀘𑁆𑀙𑀦𑁆𑀢𑀻’’𑀢𑀺. 𑀫𑀸𑀢𑀼𑀧𑁂𑀫𑁂𑀦 𑀕𑀦𑁆𑀢𑀼𑀁 𑀅𑀯𑀺𑀲𑀳𑀺𑀢𑁆𑀯𑀸 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀆𑀕𑀘𑁆𑀙𑀦𑁆𑀢𑀁. 𑀅𑀢𑁆𑀢𑀲𑀺𑀦𑁂𑀳𑀲𑁆𑀲 𑀩𑀮𑀯𑀪𑀸𑀯𑀢𑁄 𑀫𑀸𑀢𑀭𑀫𑁆𑀧𑀺 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 ‘‘𑀅𑀢𑁆𑀢𑀸𑀦𑀁𑀬𑁂𑀯 𑀭𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀕𑀘𑁆𑀙𑀦𑁆𑀢𑀁. 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀦𑀺𑀮𑀻𑀦𑀦𑁆𑀢𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀕𑀦𑁆𑀢𑁆𑀯𑀸 𑀏𑀓𑀲𑁆𑀫𑀺𑀁 𑀔𑁂𑀫𑁂 𑀧𑀤𑁂𑀲𑁂 𑀦𑀺𑀲𑀺𑀦𑁆𑀦𑀁. 𑀓𑀼𑀮𑁆𑀮𑁂 𑀯𑀸𑀢𑀺𑀆𑀤𑀻𑀲𑀼 𑀓𑀽𑀮𑀁 𑀧𑀭𑀢𑀻𑀭𑀁 𑀯𑀳𑀢𑀺 𑀧𑀸𑀧𑁂𑀢𑀻𑀳𑀺 𑀓𑀼𑀮𑁆𑀮𑁄, 𑀢𑀭𑀡𑀢𑁆𑀣𑀸𑀬 𑀯𑁂𑀴𑀼𑀦𑀴𑀸𑀤𑀻𑀳𑀺 𑀓𑀮𑀸𑀧𑀁 𑀓𑀢𑁆𑀯𑀸 𑀩𑀤𑁆𑀥𑁄. 𑀧𑀢𑁆𑀣𑀭𑀺𑀢𑁆𑀯𑀸 𑀩𑀤𑁆𑀥𑁄 𑀧𑀦 𑀉𑀴𑀼𑀫𑁆𑀧𑁄, 𑀘𑀸𑀝𑀺𑀆𑀤𑀺 𑀫𑀢𑁆𑀢𑀺𑀓𑀸𑀪𑀸𑀚𑀦𑀁. 𑀯𑀼𑀬𑁆𑀳𑀫𑀸𑀦𑀦𑁆𑀢𑀺 𑀉𑀤𑀓𑁄𑀖𑁂𑀦 𑀅𑀥𑁄𑀲𑁄𑀢𑀁 𑀦𑀻𑀬𑀫𑀸𑀦𑀁.

𑀬𑀣𑀸𑀯𑀼𑀢𑁆𑀢𑀸𑀦𑀺 𑀢𑀻𑀡𑀺 𑀪𑀬𑀸𑀦𑀺 𑀲𑀫𑀸𑀢𑀸𑀧𑀼𑀢𑁆𑀢𑀺𑀓𑀸𑀦𑀺𑀬𑁂𑀯 𑀅𑀲𑁆𑀲𑀼𑀢𑀯𑀢𑁄 𑀧𑀼𑀣𑀼𑀚𑁆𑀚𑀦𑀲𑁆𑀲 𑀯𑀲𑁂𑀦 𑀅𑀫𑀸𑀢𑀸𑀧𑀼𑀢𑁆𑀢𑀺𑀓𑀸𑀦𑀺 𑀤𑀲𑁆𑀲𑀺𑀢𑀸𑀦𑀻𑀢𑀺 𑀆𑀳 ‘‘𑀏𑀯𑀁 𑀧𑀭𑀺𑀬𑀸𑀬𑀢𑁄 𑀅𑀫𑀸𑀢𑀸𑀧𑀼𑀢𑁆𑀢𑀺𑀓𑀸𑀦𑀺 𑀪𑀬𑀸𑀦𑀺 𑀤𑀲𑁆𑀲𑁂𑀢𑁆𑀯𑀸’’𑀢𑀺.

𑀪𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀯𑁂𑀦𑀸𑀕𑀧𑀼𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁪. 𑀢𑀢𑀺𑀬𑁂 𑀏𑀯𑀁𑀦𑀸𑀫𑀓𑁂 𑀚𑀦𑀧𑀤𑁂𑀢𑀺 𑀬𑀢𑁆𑀣 𑀦𑀸𑀫𑀕𑁆𑀕𑀳𑀡𑁂𑀦 𑀓𑁄𑀲𑀮𑀲𑀤𑁆𑀤𑀲𑁆𑀲 𑀭𑀼𑀴𑁆𑀳𑀻𑀲𑀤𑁆𑀤𑀢𑀁 𑀤𑀲𑁆𑀲𑁂𑀢𑀺. 𑀢𑀣𑀸 𑀳𑀺 𑀓𑁄𑀲𑀮𑀸 𑀦𑀸𑀫 𑀚𑀸𑀦𑀧𑀤𑀺𑀦𑁄 𑀭𑀸𑀚𑀓𑀼𑀫𑀸𑀭𑀸, 𑀢𑁂𑀲𑀁 𑀦𑀺𑀯𑀸𑀲𑁄 𑀏𑀓𑁄𑀧𑀺 𑀚𑀦𑀧𑀤𑁄 𑀭𑀼𑀴𑁆𑀳𑀻𑀲𑀤𑁆𑀤𑁂𑀦 ‘‘𑀓𑁄𑀲𑀮𑀸’’𑀢𑀺 𑀯𑀼𑀘𑁆𑀘𑀢𑀺. 𑀅𑀓𑁆𑀔𑀭𑀘𑀺𑀦𑁆𑀢𑀓𑀸 𑀳𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀬𑀼𑀢𑁆𑀢𑁂 𑀯𑀺𑀬 𑀲𑀮𑀺𑀗𑁆𑀕𑀯𑀘𑀦𑀸𑀦𑀺 (𑀧𑀸𑀡𑀺𑀦𑀺 𑁧.𑁨.𑁫𑁧) 𑀇𑀘𑁆𑀙𑀦𑁆𑀢𑀺. 𑀅𑀬𑀫𑁂𑀢𑁆𑀣 𑀭𑀼𑀴𑁆𑀳𑀻 𑀬𑀣𑀸 𑀅𑀜𑁆𑀜𑀢𑁆𑀣𑀸𑀧𑀺 ‘‘𑀓𑀼𑀭𑀽𑀲𑀼 𑀯𑀺𑀳𑀭𑀢𑀺, 𑀅𑀗𑁆𑀕𑁂𑀲𑀼 𑀯𑀺𑀳𑀭𑀢𑀻’’𑀢𑀺 𑀘. 𑀢𑀩𑁆𑀩𑀺𑀲𑁂𑀲𑀦𑁂 𑀧𑀦 𑀚𑀦𑀧𑀤𑀲𑀤𑁆𑀤𑁂 𑀚𑀸𑀢𑀺𑀲𑀤𑁆𑀤𑁂 𑀏𑀓𑀯𑀘𑀦𑀫𑁂𑀯 𑀬𑀣𑀸 ‘‘𑀓𑁄𑀲𑀮𑁂𑀲𑀼 𑀚𑀦𑀧𑀤𑁂’’𑀢𑀺. 𑀘𑀸𑀭𑀺𑀓𑀦𑁆𑀢𑀺 𑀘𑀭𑀡𑀁. 𑀘𑀭𑀡𑀁 𑀯𑀸 𑀘𑀸𑀭𑁄, 𑀲𑁄 𑀏𑀯 𑀘𑀸𑀭𑀺𑀓𑀸. 𑀢𑀬𑀺𑀤𑀁 𑀫𑀕𑁆𑀕𑀕𑀫𑀦𑀁 𑀇𑀥𑀸𑀥𑀺𑀧𑁆𑀧𑁂𑀢𑀁, 𑀦 𑀘𑀼𑀡𑁆𑀡𑀺𑀓𑀕𑀫𑀦𑀫𑀢𑁆𑀢𑀦𑁆𑀢𑀺 𑀆𑀳 ‘‘𑀅𑀤𑁆𑀥𑀸𑀦𑀕𑀫𑀦𑀁 𑀕𑀘𑁆𑀙𑀦𑁆𑀢𑁄’’𑀢𑀺. 𑀢𑀁 𑀯𑀺𑀪𑀸𑀕𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀘𑀸𑀭𑀺𑀓𑀸 𑀘 𑀦𑀸𑀫𑁂𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀤𑀽𑀭𑁂𑀧𑀻𑀢𑀺 𑀤𑀽𑀭𑁂𑀧𑀺 𑀦𑀸𑀢𑀺𑀤𑀽𑀭𑁂𑀧𑀺. 𑀲𑀳𑀲𑀸 𑀕𑀫𑀦𑀦𑁆𑀢𑀺 𑀲𑀻𑀖𑀕𑀫𑀦𑀁. 𑀫𑀳𑀸𑀓𑀲𑁆𑀲𑀧𑀧𑀘𑁆𑀘𑀼𑀕𑁆𑀕𑀫𑀦𑀸𑀤𑀻𑀲𑀽𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀆𑀴𑀯𑀓𑀸𑀤𑀻𑀦𑀁 𑀅𑀢𑁆𑀣𑀸𑀬 𑀕𑀫𑀦𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀪𑀕𑀯𑀸 𑀳𑀺 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀁 𑀧𑀘𑁆𑀘𑀼𑀕𑁆𑀕𑀘𑁆𑀙𑀦𑁆𑀢𑁄 𑀫𑀼𑀳𑀼𑀢𑁆𑀢𑁂𑀦 𑀢𑀺𑀕𑀸𑀯𑀼𑀢𑀫𑀕𑁆𑀕𑀫𑀕𑀫𑀸𑀲𑀺. 𑀆𑀴𑀯𑀓𑀲𑁆𑀲𑀢𑁆𑀣𑀸𑀬 𑀢𑀺𑀁𑀲𑀬𑁄𑀚𑀦𑀁, 𑀢𑀣𑀸 𑀅𑀗𑁆𑀕𑀼𑀮𑀺𑀫𑀸𑀮𑀲𑁆𑀲, 𑀧𑀼𑀓𑁆𑀓𑀼𑀲𑀸𑀢𑀺𑀲𑁆𑀲 𑀧𑀦 𑀧𑀜𑁆𑀘𑀘𑀢𑁆𑀢𑀸𑀮𑀻𑀲𑀬𑁄𑀚𑀦𑀁, 𑀫𑀳𑀸𑀓𑀧𑁆𑀧𑀺𑀦𑀲𑁆𑀲 𑀯𑀻𑀲𑀬𑁄𑀚𑀦𑀲𑀢𑀁, 𑀥𑀦𑀺𑀬𑀲𑁆𑀲𑀢𑁆𑀣𑀸𑀬 𑀲𑀢𑁆𑀢 𑀬𑁄𑀚𑀦𑀲𑀢𑀸𑀦𑀺, 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 𑀯𑀦𑀯𑀸𑀲𑀺𑀲𑁆𑀲 𑀢𑀺𑀲𑁆𑀲𑀲𑀸𑀫𑀡𑁂𑀭𑀲𑁆𑀲 𑀢𑀺𑀕𑀸𑀯𑀼𑀢𑀸𑀥𑀺𑀓𑀁 𑀯𑀻𑀲𑀬𑁄𑀚𑀦𑀲𑀢𑀁 𑀅𑀕𑀫𑀸𑀲𑀺. 𑀇𑀫𑀁 𑀲𑀦𑁆𑀥𑀸𑀬𑀸𑀢𑀺 𑀇𑀫𑀁 𑀅𑀢𑀼𑀭𑀺𑀢𑀘𑀸𑀭𑀺𑀓𑀁 𑀲𑀦𑁆𑀥𑀸𑀬.

𑀉𑀧𑀮𑀪𑀺𑀁𑀲𑀽𑀢𑀺 𑀏𑀢𑁆𑀣 𑀲𑀯𑀦𑀯𑀲𑁂𑀦 𑀉𑀧𑀮𑀪𑀺𑀁𑀲𑀽𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑁄𑀢𑀤𑁆𑀯𑀸𑀭…𑀧𑁂… 𑀚𑀸𑀦𑀺𑀁𑀲𑀽’’𑀢𑀺 𑀆𑀳. 𑀲𑀩𑁆𑀩𑀫𑁆𑀧𑀺 𑀯𑀸𑀓𑁆𑀬𑀁 𑀅𑀯𑀥𑀸𑀭𑀡𑀨𑀮𑀢𑁆𑀢𑀸 𑀅𑀦𑁆𑀢𑁄𑀕𑀥𑀸𑀯𑀥𑀸𑀭𑀡𑀦𑁆𑀢𑀺 𑀆𑀳 ‘‘𑀧𑀤𑀧𑀽𑀭𑀡𑀫𑀢𑁆𑀢𑁂 𑀯𑀸 𑀦𑀺𑀧𑀸𑀢𑁄’’𑀢𑀺. 𑀅𑀯𑀥𑀸𑀭𑀡𑀢𑁆𑀣𑁂𑀦𑀸𑀢𑀺 𑀧𑀦 𑀇𑀫𑀺𑀦𑀸 𑀇𑀝𑁆𑀞𑀢𑁆𑀣𑀢𑁄𑀯𑀥𑀸𑀭𑀡𑀢𑁆𑀣𑀁 𑀔𑁄-𑀲𑀤𑁆𑀤𑀕𑁆𑀕𑀳𑀡𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀅𑀲𑁆𑀲𑁄𑀲𑀻𑀢𑀺 𑀧𑀤𑀁 𑀔𑁄-𑀲𑀤𑁆𑀤𑁂 𑀕𑀳𑀺𑀢𑁂 𑀢𑁂𑀦 𑀨𑀼𑀮𑁆𑀮𑀺𑀢𑀫𑀡𑁆𑀟𑀺𑀢𑀯𑀺𑀪𑀽𑀲𑀺𑀢𑀁 𑀯𑀺𑀬 𑀳𑁄𑀦𑁆𑀢𑀁 𑀧𑀽𑀭𑀺𑀢𑀁 𑀦𑀸𑀫 𑀳𑁄𑀢𑀺, 𑀢𑁂𑀦 𑀘 𑀧𑀼𑀭𑀺𑀫𑀧𑀘𑁆𑀙𑀺𑀫𑀧𑀤𑀸𑀦𑀺 𑀲𑀁𑀲𑀺𑀮𑀺𑀝𑁆𑀞𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺, 𑀦 𑀢𑀲𑁆𑀫𑀺𑀁 𑀅𑀕𑁆𑀕𑀳𑀺𑀢𑁂𑀢𑀺 𑀆𑀳 ‘‘𑀧𑀤𑀧𑀽𑀭𑀡𑁂𑀦 𑀩𑁆𑀬𑀜𑁆𑀚𑀦𑀲𑀺𑀮𑀺𑀝𑁆𑀞𑀢𑀸𑀫𑀢𑁆𑀢𑀫𑁂𑀯𑀸’’𑀢𑀺. 𑀫𑀢𑁆𑀢𑀲𑀤𑁆𑀤𑁄 𑀯𑀺𑀲𑁂𑀲𑀦𑀺𑀯𑀢𑁆𑀢𑀺𑀅𑀢𑁆𑀣𑁄. 𑀢𑁂𑀦𑀲𑁆𑀲 𑀅𑀦𑀢𑁆𑀣𑀦𑁆𑀢𑀭𑀤𑀻𑀧𑀦𑀢𑀸 𑀤𑀲𑁆𑀲𑀺𑀢𑀸 𑀳𑁄𑀢𑀺, 𑀏𑀯𑀲𑀤𑁆𑀤𑁂𑀦 𑀧𑀦 𑀩𑁆𑀬𑀜𑁆𑀚𑀦𑀲𑀺𑀮𑀺𑀝𑁆𑀞𑀢𑀸𑀬 𑀏𑀓𑀦𑁆𑀢𑀺𑀓𑀢𑀸.

𑀲𑀫𑀺𑀢𑀧𑀸𑀧𑀢𑁆𑀢𑀸𑀢𑀺 𑀅𑀘𑁆𑀘𑀦𑁆𑀢𑀁 𑀅𑀦𑀯𑀲𑁂𑀲𑀢𑁄 𑀲𑀯𑀸𑀲𑀦𑀁 𑀲𑀫𑀺𑀢𑀧𑀸𑀧𑀢𑁆𑀢𑀸. 𑀏𑀯𑀜𑁆𑀳𑀺 𑀩𑀸𑀳𑀺𑀭𑀓𑀯𑀻𑀢𑀭𑀸𑀕𑀲𑁂𑀓𑁆𑀔𑀸𑀲𑁂𑀓𑁆𑀔𑀧𑀸𑀧𑀲𑀫𑀦𑀢𑁄 𑀪𑀕𑀯𑀢𑁄 𑀧𑀸𑀧𑀲𑀫𑀦𑀁 𑀯𑀺𑀲𑁂𑀲𑀺𑀢𑀁 𑀳𑁄𑀢𑀺. 𑀢𑁂𑀦𑀲𑁆𑀲 𑀬𑀣𑀸𑀪𑀽𑀢𑀕𑀼𑀡𑀸𑀥𑀺𑀕𑀢𑀫𑁂𑀢𑀁 𑀦𑀸𑀫𑀁 𑀬𑀤𑀺𑀤𑀁 𑀲𑀫𑀡𑁄𑀢𑀺 𑀤𑀻𑀧𑁂𑀢𑀺. 𑀅𑀦𑁂𑀓𑀢𑁆𑀣𑀢𑁆𑀢𑀸 𑀦𑀺𑀧𑀸𑀢𑀸𑀦𑀁 𑀇𑀥 𑀅𑀦𑀼𑀲𑁆𑀲𑀯𑀢𑁆𑀣𑁄 𑀅𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀔𑀮𑀽𑀢𑀺 𑀅𑀦𑀼𑀲𑁆𑀲𑀯𑀢𑁆𑀣𑁂 𑀦𑀺𑀧𑀸𑀢𑁄’’𑀢𑀺. 𑀆𑀮𑀧𑀦𑀫𑀢𑁆𑀢𑀦𑁆𑀢𑀺 𑀧𑀺𑀬𑀸𑀮𑀸𑀧𑀯𑀘𑀦𑀫𑀢𑁆𑀢𑀁. 𑀧𑀺𑀬𑀲𑀫𑀼𑀤𑀸𑀳𑀸𑀭𑀸 𑀳𑁂𑀢𑁂 ‘‘𑀪𑁄’’𑀢𑀺 𑀯𑀸 ‘‘𑀆𑀯𑀼𑀲𑁄’’𑀢𑀺 𑀯𑀸 ‘‘𑀤𑁂𑀯𑀸𑀦𑀁 𑀧𑀺𑀬𑀸’’𑀢𑀺 𑀯𑀸. 𑀕𑁄𑀢𑁆𑀢𑀯𑀲𑁂𑀦𑀸𑀢𑀺 𑀏𑀢𑁆𑀣 𑀕𑀁 𑀢𑀸𑀬𑀢𑀻𑀢𑀺 𑀕𑁄𑀢𑁆𑀢𑀁. 𑀕𑁄𑀢𑀫𑁄𑀢𑀺 𑀳𑀺 𑀧𑀯𑀢𑁆𑀢𑀫𑀸𑀦𑀁 𑀯𑀘𑀦𑀁 𑀩𑀼𑀤𑁆𑀥𑀺𑀜𑁆𑀘 𑀢𑀸𑀬𑀢𑀺 𑀏𑀓𑀁𑀲𑀺𑀓𑀯𑀺𑀲𑀬𑀢𑀸𑀬 𑀭𑀓𑁆𑀔𑀢𑀻𑀢𑀺 𑀕𑁄𑀢𑁆𑀢𑀁. 𑀬𑀣𑀸 𑀳𑀺 𑀩𑀼𑀤𑁆𑀥𑀺 𑀆𑀭𑀫𑁆𑀫𑀡𑀪𑀽𑀢𑁂𑀦 𑀅𑀢𑁆𑀣𑁂𑀦 𑀯𑀺𑀦𑀸 𑀦 𑀯𑀢𑁆𑀢𑀢𑀺, 𑀢𑀣𑀸 𑀅𑀪𑀺𑀥𑀸𑀦𑀁 𑀅𑀪𑀺𑀥𑁂𑀬𑁆𑀬𑀪𑀽𑀢𑁂𑀦, 𑀢𑀲𑁆𑀫𑀸 𑀲𑁄 𑀕𑁄𑀢𑁆𑀢𑀲𑀗𑁆𑀔𑀸𑀢𑁄 𑀅𑀢𑁆𑀣𑁄 𑀢𑀸𑀦𑀺 𑀢𑀸𑀬𑀢𑀺 𑀭𑀓𑁆𑀔𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀓𑁄 𑀧𑀦 𑀲𑁄𑀢𑀺? 𑀅𑀜𑁆𑀜𑀓𑀼𑀮𑀧𑀭𑀫𑁆𑀧𑀭𑀸𑀲𑀸𑀥𑀸𑀭𑀡𑀁 𑀢𑀲𑁆𑀲 𑀓𑀼𑀮𑀲𑁆𑀲 𑀆𑀤𑀺𑀧𑀼𑀭𑀺𑀲𑀲𑀫𑀼𑀤𑀸𑀕𑀢𑀁 𑀢𑀁𑀓𑀼𑀮𑀧𑀭𑀺𑀬𑀸𑀧𑀦𑁆𑀦𑀲𑀸𑀥𑀸𑀭𑀡𑀁 𑀲𑀸𑀫𑀜𑁆𑀜𑀭𑀽𑀧𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀢𑁆𑀣 𑀘 𑀲𑀫𑀡𑁄𑀢𑀺 𑀇𑀫𑀺𑀦𑀸 𑀧𑀭𑀺𑀓𑁆𑀔𑀓𑀚𑀦𑁂𑀳𑀺 𑀪𑀕𑀯𑀢𑁄 𑀩𑀳𑀼𑀫𑀢𑀪𑀸𑀯𑁄 𑀤𑀲𑁆𑀲𑀺𑀢𑁄 𑀲𑀫𑀺𑀢𑀧𑀸𑀧𑀢𑀸𑀓𑀺𑀢𑁆𑀢𑀦𑀢𑁄. 𑀕𑁄𑀢𑀫𑁄𑀢𑀺 𑀇𑀫𑀺𑀦𑀸 𑀮𑁄𑀓𑀺𑀬𑀚𑀦𑁂𑀳𑀺 𑀉𑀘𑁆𑀘𑀸𑀓𑀼𑀮𑀲𑀫𑁆𑀪𑀽𑀢𑀢𑀸 𑀤𑀻𑀧𑀺𑀢𑀸 𑀢𑁂𑀦 𑀉𑀤𑀺𑀢𑁄𑀤𑀺𑀢𑀯𑀺𑀧𑀼𑀮𑀔𑀢𑁆𑀢𑀺𑀬𑀓𑀼𑀮𑀯𑀺𑀪𑀸𑀯𑀦𑀢𑁄. 𑀲𑀩𑁆𑀩𑀔𑀢𑁆𑀢𑀺𑀬𑀸𑀦𑀜𑁆𑀳𑀺 𑀆𑀤𑀺𑀪𑀽𑀢𑀫𑀳𑀸𑀲𑀫𑁆𑀫𑀢𑀫𑀳𑀸𑀭𑀸𑀚𑀢𑁄 𑀧𑀝𑁆𑀞𑀸𑀬 𑀅𑀲𑀫𑁆𑀪𑀺𑀦𑁆𑀦𑀁 𑀉𑀴𑀸𑀭𑀢𑀫𑀁 𑀲𑀓𑁆𑀬𑀭𑀸𑀚𑀓𑀼𑀮𑀁.

𑀓𑁂𑀦𑀘𑀺 𑀧𑀸𑀭𑀺𑀚𑀼𑀜𑁆𑀜𑁂𑀦𑀸𑀢𑀺 𑀜𑀸𑀢𑀺𑀧𑀸𑀭𑀺𑀚𑀼𑀜𑁆𑀜𑀪𑁄𑀕𑀧𑀸𑀭𑀺𑀚𑀼𑀜𑁆𑀜𑀸𑀤𑀺𑀦𑀸 𑀓𑁂𑀦𑀘𑀺𑀧𑀺 𑀧𑀸𑀭𑀺𑀚𑀼𑀜𑁆𑀜𑁂𑀦 𑀧𑀭𑀺𑀳𑀸𑀦𑀺𑀬𑀸 𑀅𑀦𑀪𑀺𑀪𑀽𑀢𑁄 𑀅𑀦𑀚𑁆𑀛𑁄𑀢𑁆𑀣𑀝𑁄. 𑀢𑀣𑀸 𑀳𑀺 𑀢𑀲𑁆𑀲 𑀓𑀼𑀮𑀲𑁆𑀲 𑀦 𑀓𑀺𑀜𑁆𑀘𑀺 𑀧𑀸𑀭𑀺𑀚𑀼𑀜𑁆𑀜𑀁 𑀮𑁄𑀓𑀦𑀸𑀣𑀲𑁆𑀲 𑀅𑀪𑀺𑀚𑀸𑀢𑀺𑀬𑀁, 𑀅𑀣 𑀔𑁄 𑀯𑀟𑁆𑀠𑀺𑀬𑁂𑀯. 𑀅𑀪𑀺𑀦𑀺𑀓𑁆𑀔𑀫𑀦𑁂 𑀘 𑀢𑀢𑁄𑀧𑀺 𑀲𑀫𑀺𑀤𑁆𑀥𑀢𑀫𑀪𑀸𑀯𑁄 𑀮𑁄𑀓𑁂 𑀧𑀸𑀓𑀝𑁄 𑀧𑀜𑁆𑀜𑀸𑀢𑁄𑀢𑀺. 𑀲𑀓𑁆𑀬𑀓𑀼𑀮𑀸 𑀧𑀩𑁆𑀩𑀚𑀺𑀢𑁄𑀢𑀺 𑀇𑀤𑀁 𑀯𑀘𑀦𑀁 𑀪𑀕𑀯𑀢𑁄 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑀪𑀸𑀯𑀤𑀻𑀧𑀦𑀁 𑀯𑀼𑀢𑁆𑀢𑀁 𑀫𑀳𑀦𑁆𑀢𑀁 𑀜𑀸𑀢𑀺𑀧𑀭𑀺𑀯𑀝𑁆𑀝𑀁 𑀫𑀳𑀦𑁆𑀢𑀜𑁆𑀘 𑀪𑁄𑀕𑀓𑁆𑀔𑀦𑁆𑀥𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑀪𑀸𑀯𑀲𑀺𑀤𑁆𑀥𑀺𑀢𑁄.

𑀇𑀢𑁆𑀣𑀫𑁆𑀪𑀽𑀢𑀸𑀔𑁆𑀬𑀸𑀦𑀢𑁆𑀣𑁂𑀢𑀺 𑀇𑀢𑁆𑀣𑀁 𑀏𑀯𑀁𑀧𑀓𑀸𑀭𑁄 𑀪𑀽𑀢𑁄 𑀚𑀸𑀢𑁄𑀢𑀺 𑀏𑀯𑀁 𑀓𑀣𑀦𑀢𑁆𑀣𑁂. 𑀉𑀧𑀬𑁄𑀕𑀯𑀘𑀦𑀦𑁆𑀢𑀺 ‘‘𑀅𑀩𑁆𑀪𑀼𑀕𑁆𑀕𑀢𑁄’’𑀢𑀺 𑀏𑀢𑁆𑀣 𑀅𑀪𑀺-𑀲𑀤𑁆𑀤𑁄 𑀇𑀢𑁆𑀣𑀫𑁆𑀪𑀽𑀢𑀸𑀔𑁆𑀬𑀸𑀦𑀢𑁆𑀣𑀚𑁄𑀢𑀓𑁄, 𑀢𑁂𑀦 𑀬𑁄𑀕𑀢𑁄 ‘‘𑀢𑀁 𑀔𑁄 𑀧𑀦 𑀪𑀯𑀦𑁆𑀢’’𑀦𑁆𑀢𑀺 𑀇𑀤𑀁 𑀲𑀸𑀫𑀺𑀅𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀁. 𑀢𑁂𑀦𑀸𑀳 ‘‘𑀢𑀲𑁆𑀲 𑀔𑁄 𑀧𑀦 𑀪𑁄𑀢𑁄 𑀕𑁄𑀢𑀫𑀲𑁆𑀲𑀸𑀢𑀺 𑀅𑀢𑁆𑀣𑁄’’𑀢𑀺. 𑀓𑀮𑁆𑀬𑀸𑀡𑀕𑀼𑀡𑀲𑀫𑀦𑁆𑀦𑀸𑀕𑀢𑁄𑀢𑀺 𑀓𑀮𑁆𑀬𑀸𑀡𑁂𑀳𑀺 𑀕𑀼𑀡𑁂𑀳𑀺 𑀬𑀼𑀢𑁆𑀢𑁄, 𑀢𑀦𑁆𑀦𑀺𑀲𑁆𑀲𑀺𑀢𑁄 𑀢𑀩𑁆𑀩𑀺𑀲𑀬𑀢𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑁂𑀝𑁆𑀞𑁄𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀓𑀺𑀢𑁆𑀢𑁂𑀢𑀩𑁆𑀩𑀢𑁄 𑀓𑀺𑀢𑁆𑀢𑀺, 𑀲𑀸 𑀏𑀯 𑀲𑀤𑁆𑀤𑀦𑀻𑀬𑀢𑁄 𑀲𑀤𑁆𑀤𑁄𑀢𑀺 𑀆𑀳 ‘‘𑀓𑀺𑀢𑁆𑀢𑀺𑀲𑀤𑁆𑀤𑁄𑀢𑀺 𑀓𑀺𑀢𑁆𑀢𑀺𑀬𑁂𑀯𑀸’’𑀢𑀺. 𑀅𑀪𑀺𑀢𑁆𑀣𑀯𑀦𑀯𑀲𑁂𑀦 𑀧𑀯𑀢𑁆𑀢𑁄 𑀲𑀤𑁆𑀤𑁄 𑀣𑀼𑀢𑀺𑀖𑁄𑀲𑁄. 𑀲𑀤𑁂𑀯𑀓𑀁 𑀮𑁄𑀓𑀁 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀉𑀕𑁆𑀕𑀢𑁄𑀢𑀺 𑀅𑀦𑀜𑁆𑀜𑀲𑀸𑀥𑀸𑀭𑀡𑁂 𑀕𑀼𑀡𑁂 𑀆𑀭𑀩𑁆𑀪 𑀧𑀯𑀢𑁆𑀢𑀢𑁆𑀢𑀸 𑀲𑀤𑁂𑀯𑀓𑀁 𑀮𑁄𑀓𑀁 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀅𑀪𑀺𑀪𑀯𑀺𑀢𑁆𑀯𑀸 𑀉𑀕𑁆𑀕𑀢𑁄.

𑀲𑁄 𑀪𑀕𑀯𑀸𑀢𑀺 𑀬𑁄 𑀲𑁄 𑀲𑀫𑀢𑀺𑀁𑀲 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀲𑀩𑁆𑀩𑀓𑀺𑀮𑁂𑀲𑁂 𑀪𑀜𑁆𑀚𑀺𑀢𑁆𑀯𑀸 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀤𑁂𑀯𑀸𑀦𑀁 𑀅𑀢𑀺𑀤𑁂𑀯𑁄 𑀲𑀓𑁆𑀓𑀸𑀦𑀁 𑀅𑀢𑀺𑀲𑀓𑁆𑀓𑁄 𑀩𑁆𑀭𑀳𑁆𑀫𑀸𑀦𑀁 𑀅𑀢𑀺𑀩𑁆𑀭𑀳𑁆𑀫𑀸 𑀮𑁄𑀓𑀦𑀸𑀣𑁄 𑀪𑀸𑀕𑁆𑀬𑀯𑀦𑁆𑀢𑀢𑀸𑀤𑀻𑀳𑀺 𑀓𑀸𑀭𑀡𑁂𑀳𑀺 𑀲𑀤𑁂𑀯𑀓𑁂 𑀮𑁄𑀓𑁂 ‘‘𑀪𑀕𑀯𑀸’’𑀢𑀺 𑀧𑀢𑁆𑀣𑀝𑀓𑀺𑀢𑁆𑀢𑀺𑀲𑀤𑁆𑀤𑁄, 𑀲𑁄 𑀪𑀕𑀯𑀸. ‘‘𑀪𑀕𑀯𑀸’’𑀢𑀺 𑀘 𑀇𑀤𑀁 𑀲𑀢𑁆𑀣𑀼 𑀦𑀸𑀫𑀓𑀺𑀢𑁆𑀢𑀦𑀁. 𑀢𑁂𑀦𑀸𑀳 𑀆𑀬𑀲𑁆𑀫𑀸 𑀥𑀫𑁆𑀫𑀲𑁂𑀦𑀸𑀧𑀢𑀺 ‘‘𑀪𑀕𑀯𑀸𑀢𑀺 𑀦𑁂𑀢𑀁 𑀦𑀸𑀫𑀁 𑀫𑀸𑀢𑀭𑀸 𑀓𑀢’’𑀦𑁆𑀢𑀺𑀆𑀤𑀺 (𑀫𑀳𑀸𑀦𑀺. 𑁮𑁪). 𑀧𑀭𑀢𑁄 𑀧𑀦 𑀪𑀕𑀯𑀸𑀢𑀺 𑀕𑀼𑀡𑀓𑀺𑀢𑁆𑀢𑀦𑀁. 𑀬𑀣𑀸 𑀓𑀫𑁆𑀫𑀝𑁆𑀞𑀸𑀦𑀺𑀓𑁂𑀦 ‘‘𑀅𑀭𑀳’’𑀦𑁆𑀢𑀺𑀆𑀤𑀻𑀲𑀼 𑀦𑀯𑀲𑀼 𑀞𑀸𑀦𑁂𑀲𑀼 𑀧𑀘𑁆𑀘𑁂𑀓𑀁 𑀇𑀢𑀺-𑀲𑀤𑁆𑀤𑀁 𑀬𑁄𑀚𑁂𑀢𑁆𑀯𑀸 𑀩𑀼𑀤𑁆𑀥𑀕𑀼𑀡𑀸 𑀅𑀦𑀼𑀲𑁆𑀲𑀭𑀺𑀬𑀦𑁆𑀢𑀺, 𑀏𑀯𑀁 𑀩𑀼𑀤𑁆𑀥𑀕𑀼𑀡𑀲𑀁𑀓𑀺𑀢𑁆𑀢𑀦𑁂𑀦𑀧𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀢𑀺𑀧𑀺 𑀅𑀭𑀳𑀁 𑀇𑀢𑀺𑀧𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄…𑀧𑁂… 𑀇𑀢𑀺𑀧𑀺 𑀪𑀕𑀯𑀸’’𑀢𑀺 𑀆𑀳. ‘‘𑀇𑀢𑀺𑀧𑁂𑀢𑀁 𑀪𑀽𑀢𑀁 𑀇𑀢𑀺𑀧𑁂𑀢𑀁 𑀢𑀘𑁆𑀙’’𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁬) 𑀯𑀺𑀬 𑀇𑀥 𑀇𑀢𑀺𑀲𑀤𑁆𑀤𑁄 𑀆𑀲𑀦𑁆𑀦𑀧𑀘𑁆𑀘𑀓𑁆𑀔𑀓𑀭𑀡𑀢𑁆𑀣𑁄, 𑀧𑀺-𑀲𑀤𑁆𑀤𑁄 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄, 𑀢𑁂𑀦 𑀘 𑀢𑁂𑀲𑀁 𑀕𑀼𑀡𑀸𑀦𑀁 𑀩𑀳𑀼𑀪𑀸𑀯𑁄 𑀤𑀻𑀧𑀺𑀢𑁄, 𑀢𑀸𑀦𑀺 𑀘 𑀲𑀁𑀓𑀺𑀢𑁆𑀢𑁂𑀦𑁆𑀢𑁂𑀦 𑀯𑀺𑀜𑁆𑀜𑀼𑀦𑀸 𑀘𑀺𑀢𑁆𑀢𑀲𑁆𑀲 𑀲𑀫𑁆𑀫𑀼𑀔𑀻𑀪𑀽𑀢𑀸𑀦𑁂𑀯 𑀓𑀢𑁆𑀯𑀸 𑀲𑀁𑀓𑀺𑀢𑁆𑀢𑁂𑀢𑀩𑁆𑀩𑀸𑀦𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀫𑀺𑀦𑀸 𑀘 𑀇𑀫𑀺𑀦𑀸 𑀘 𑀓𑀸𑀭𑀡𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺 𑀆𑀳. 𑀏𑀯𑀁 𑀦𑀺𑀭𑀽𑀧𑁂𑀢𑁆𑀯𑀸 𑀓𑀺𑀢𑁆𑀢𑁂𑀦𑁆𑀢𑁄 𑀬𑁄 𑀓𑀺𑀢𑁆𑀢𑁂𑀢𑀺, 𑀢𑀲𑁆𑀲 𑀪𑀕𑀯𑀢𑀺 𑀅𑀢𑀺𑀯𑀺𑀬 𑀅𑀪𑀺𑀧𑁆𑀧𑀲𑀸𑀤𑁄 𑀳𑁄𑀢𑀺.

𑀆𑀭𑀓𑀢𑁆𑀢𑀸𑀢𑀺 𑀲𑀼𑀯𑀺𑀤𑀽𑀭𑀢𑁆𑀢𑀸. 𑀅𑀭𑀻𑀦𑀦𑁆𑀢𑀺 𑀓𑀺𑀮𑁂𑀲𑀸𑀭𑀻𑀦𑀁. 𑀅𑀭𑀸𑀦𑀦𑁆𑀢𑀺 𑀲𑀁𑀲𑀸𑀭𑀘𑀓𑁆𑀓𑀲𑁆𑀲 𑀅𑀭𑀸𑀦𑀁. 𑀳𑀢𑀢𑁆𑀢𑀸𑀢𑀺 𑀯𑀺𑀤𑁆𑀥𑀁𑀲𑀺𑀢𑀢𑁆𑀢𑀸. 𑀧𑀘𑁆𑀘𑀬𑀸𑀤𑀻𑀦𑀦𑁆𑀢𑀺 𑀘𑀻𑀯𑀭𑀸𑀤𑀺𑀧𑀘𑁆𑀘𑀬𑀸𑀦𑀜𑁆𑀘𑁂𑀯 𑀧𑀽𑀚𑀸𑀯𑀺𑀲𑁂𑀲𑀸𑀦𑀜𑁆𑀘. 𑀢𑀢𑁄𑀢𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀢𑁄 (𑀯𑀺𑀲𑀼𑀤𑁆𑀥𑀺. 𑁧.𑁧𑁨𑁫-𑁧𑁨𑁭). 𑀬𑀣𑀸 𑀘 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀢𑁄, 𑀏𑀯𑀁 𑀢𑀁𑀲𑀁𑀯𑀡𑁆𑀡𑀦𑀸𑀢𑁄𑀧𑀺 𑀦𑁂𑀲𑀁 𑀯𑀺𑀢𑁆𑀣𑀸𑀭𑁄 𑀕𑀳𑁂𑀢𑀩𑁆𑀩𑁄.

𑀇𑀫𑀁 𑀮𑁄𑀓𑀦𑁆𑀢𑀺 𑀦𑀬𑀺𑀤𑀁 𑀫𑀳𑀸𑀚𑀦𑀲𑁆𑀲 𑀲𑀫𑁆𑀫𑀼𑀔𑀫𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀅𑀣 𑀔𑁄 𑀅𑀦𑀯𑀲𑁂𑀲𑀁 𑀧𑀭𑀺𑀬𑀸𑀤𑀸𑀬𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀤𑁂𑀯𑀓’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑀁 𑀦𑀺𑀤𑀲𑁆𑀲𑁂𑀢𑀻’’𑀢𑀺. 𑀧𑀚𑀸𑀢𑀢𑁆𑀢𑀸𑀢𑀺 𑀬𑀣𑀸𑀲𑀓𑀁 𑀓𑀫𑁆𑀫𑀓𑀺𑀮𑁂𑀲𑁂𑀳𑀺 𑀦𑀺𑀩𑁆𑀩𑀢𑁆𑀢𑀢𑁆𑀢𑀸. 𑀧𑀜𑁆𑀘𑀓𑀸𑀫𑀸𑀯𑀘𑀭𑀤𑁂𑀯𑀕𑁆𑀕𑀳𑀡𑀁 𑀧𑀸𑀭𑀺𑀲𑁂𑀲𑀦𑀬𑁂𑀦 𑀇𑀢𑀭𑁂𑀲𑀁 𑀧𑀤𑀦𑁆𑀢𑀭𑁂𑀦 𑀕𑀳𑀺𑀢𑀢𑁆𑀢𑀸. 𑀲𑀤𑁂𑀯𑀓𑀦𑁆𑀢𑀺 𑀘 𑀅𑀯𑀬𑀯𑁂𑀦 𑀯𑀺𑀕𑁆𑀕𑀳𑁄 𑀲𑀫𑀼𑀤𑀸𑀬𑁄 𑀲𑀫𑀸𑀲𑀢𑁆𑀣𑁄. 𑀙𑀝𑁆𑀞𑀓𑀸𑀫𑀸𑀯𑀘𑀭𑀤𑁂𑀯𑀕𑁆𑀕𑀳𑀡𑀁 𑀧𑀘𑁆𑀘𑀸𑀲𑀢𑁆𑀢𑀺𑀦𑀬𑁂𑀦. 𑀢𑀢𑁆𑀣 𑀳𑀺 𑀲𑁄 𑀚𑀸𑀢𑁄 𑀢𑀦𑁆𑀦𑀺𑀯𑀸𑀲𑀻 𑀘. 𑀲𑀩𑁆𑀭𑀳𑁆𑀫𑀓𑀯𑀘𑀦𑁂𑀦 𑀩𑁆𑀭𑀳𑁆𑀫𑀓𑀸𑀬𑀺𑀓𑀸𑀤𑀺𑀩𑁆𑀭𑀳𑁆𑀫𑀕𑁆𑀕𑀳𑀡𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀧𑀘𑁆𑀘𑀢𑁆𑀣𑀺𑀓𑀲𑀫𑀡𑀩𑁆𑀭𑀸𑀳𑁆𑀫𑀡𑀕𑁆𑀕𑀳𑀡𑀦𑁆𑀢𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀫𑁂𑀢𑀁 𑀅𑀧𑀘𑁆𑀘𑀢𑁆𑀣𑀺𑀓𑀸𑀦𑀁 𑀲𑀫𑀺𑀢𑀩𑀸𑀳𑀺𑀢𑀧𑀸𑀧𑀸𑀦𑀜𑁆𑀘 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀯𑀘𑀦𑁂𑀦 𑀕𑀳𑀺𑀢𑀢𑁆𑀢𑀸. 𑀓𑀸𑀫𑀁 ‘‘𑀲𑀤𑁂𑀯𑀓’’𑀦𑁆𑀢𑀺𑀆𑀤𑀺𑀯𑀺𑀲𑁂𑀲𑀦𑀸𑀦𑀁 𑀯𑀲𑁂𑀦 𑀲𑀢𑁆𑀢𑀯𑀺𑀲𑀬𑁄 𑀮𑁄𑀓𑀲𑀤𑁆𑀤𑁄𑀢𑀺 𑀯𑀺𑀜𑁆𑀜𑀸𑀬𑀢𑀺 𑀢𑀼𑀮𑁆𑀬𑀬𑁄𑀕𑀯𑀺𑀲𑀬𑀢𑁆𑀢𑀸 𑀢𑁂𑀲𑀁, ‘‘𑀲𑀮𑁄𑀫𑀓𑁄 𑀲𑀧𑀓𑁆𑀔𑀓𑁄’’𑀢𑀺𑀆𑀤𑀻𑀲𑀼 𑀧𑀦 𑀅𑀢𑀼𑀮𑁆𑀬𑀬𑁄𑀕𑁂𑀧𑀺 𑀅𑀬𑀁 𑀲𑀫𑀸𑀲𑁄 𑀮𑀩𑁆𑀪𑀢𑀻𑀢𑀺 𑀩𑁆𑀬𑀪𑀺𑀘𑀸𑀭𑀤𑀲𑁆𑀲𑀦𑀢𑁄 𑀧𑀚𑀸𑀕𑀳𑀡𑀦𑁆𑀢𑀺 𑀆𑀳 ‘‘𑀧𑀚𑀸𑀯𑀘𑀦𑁂𑀦 𑀲𑀢𑁆𑀢𑀮𑁄𑀓𑀕𑁆𑀕𑀳𑀡’’𑀦𑁆𑀢𑀺.

𑀅𑀭𑀽𑀧𑀺𑀦𑁄 𑀲𑀢𑁆𑀢𑀸 𑀅𑀢𑁆𑀢𑀦𑁄 𑀆𑀦𑁂𑀜𑁆𑀚𑀯𑀺𑀳𑀸𑀭𑁂𑀦 𑀯𑀺𑀳𑀭𑀦𑁆𑀢𑀸 𑀤𑀺𑀩𑁆𑀩𑀦𑁆𑀢𑀻𑀢𑀺 𑀤𑁂𑀯𑀸𑀢𑀺 𑀇𑀫𑀁 𑀦𑀺𑀩𑁆𑀩𑀘𑀦𑀁 𑀮𑀪𑀦𑁆𑀢𑀻𑀢𑀺 𑀆𑀳 ‘‘𑀲𑀤𑁂𑀯𑀓𑀕𑁆𑀕𑀳𑀡𑁂𑀦 𑀅𑀭𑀽𑀧𑀸𑀯𑀘𑀭𑀮𑁄𑀓𑁄 𑀕𑀳𑀺𑀢𑁄’’𑀢𑀺. 𑀢𑁂𑀦𑀸𑀳 ‘‘𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀽𑀧𑀕𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢’’𑀦𑁆𑀢𑀺 (𑀅. 𑀦𑀺. 𑁩.𑁧𑁧𑁭). 𑀲𑀫𑀸𑀭𑀓𑀕𑁆𑀕𑀳𑀡𑁂𑀦 𑀙𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑁄 𑀕𑀳𑀺𑀢𑁄 𑀢𑀲𑁆𑀲 𑀲𑀯𑀺𑀲𑁂𑀲𑀁 𑀫𑀸𑀭𑀲𑁆𑀲 𑀯𑀲𑁂 𑀯𑀢𑁆𑀢𑀦𑀢𑁄. 𑀲𑀩𑁆𑀭𑀳𑁆𑀫𑀓𑀕𑁆𑀕𑀳𑀡𑁂𑀦 𑀭𑀽𑀧𑀻𑀩𑁆𑀭𑀳𑁆𑀫𑀮𑁄𑀓𑁄 𑀕𑀳𑀺𑀢𑁄 𑀅𑀭𑀽𑀧𑀻𑀩𑁆𑀭𑀳𑁆𑀫𑀮𑁄𑀓𑀲𑁆𑀲 𑀕𑀳𑀺𑀢𑀢𑁆𑀢𑀸. 𑀘𑀢𑀼𑀧𑀭𑀺𑀲𑀯𑀲𑁂𑀦𑀸𑀢𑀺 𑀔𑀢𑁆𑀢𑀺𑀬𑀸𑀤𑀺𑀘𑀢𑀼𑀧𑀭𑀺𑀲𑀯𑀲𑁂𑀦. 𑀇𑀢𑀭𑀸 𑀧𑀦 𑀘𑀢𑀲𑁆𑀲𑁄 𑀧𑀭𑀺𑀲𑀸 𑀲𑀫𑀸𑀭𑀓𑀸𑀤𑀺𑀕𑁆𑀕𑀳𑀡𑁂𑀦 𑀕𑀳𑀺𑀢𑀸 𑀏𑀯𑀸𑀢𑀺. 𑀅𑀯𑀲𑁂𑀲𑀲𑀢𑁆𑀢𑀮𑁄𑀓𑁄 𑀦𑀸𑀕𑀕𑀭𑀼𑀴𑀸𑀤𑀺𑀪𑁂𑀤𑁄. 𑀢𑀻𑀳𑀸𑀓𑀸𑀭𑁂𑀳𑀻𑀢𑀺 𑀤𑁂𑀯𑀫𑀸𑀭𑀩𑁆𑀭𑀳𑁆𑀫𑀲𑀳𑀺𑀢𑀢𑀸𑀲𑀗𑁆𑀔𑀸𑀢𑁂𑀳𑀺 𑀢𑀻𑀳𑀺 𑀧𑀓𑀸𑀭𑁂𑀳𑀺. 𑀢𑀻𑀲𑀼 𑀧𑀤𑁂𑀲𑀽𑀢𑀺 ‘‘𑀲𑀤𑁂𑀯𑀓’’𑀦𑁆𑀢𑀺𑀆𑀤𑀻𑀲𑀼 𑀢𑀻𑀲𑀼 𑀧𑀤𑁂𑀲𑀼. 𑀢𑁂𑀦 𑀢𑁂𑀦𑀸𑀓𑀸𑀭𑁂𑀦𑀸𑀢𑀺 𑀲𑀤𑁂𑀯𑀓𑀢𑁆𑀢𑀸𑀤𑀺𑀦𑀸 𑀢𑁂𑀦 𑀢𑁂𑀦 𑀧𑀓𑀸𑀭𑁂𑀦. 𑀢𑁂𑀥𑀸𑀢𑀼𑀓𑀫𑁂𑀯 𑀧𑀭𑀺𑀬𑀸𑀤𑀺𑀦𑁆𑀦𑀦𑁆𑀢𑀺 𑀧𑁄𑀭𑀸𑀡𑀸 𑀆𑀳𑀽𑀢𑀺 𑀬𑁄𑀚𑀦𑀸.

𑀅𑀪𑀺𑀜𑁆𑀜𑀸𑀢𑀺 𑀬𑀓𑀸𑀭𑀮𑁄𑀧𑁂𑀦𑀸𑀬𑀁 𑀦𑀺𑀤𑁆𑀤𑁂𑀲𑁄, 𑀅𑀪𑀺𑀚𑀸𑀦𑀺𑀢𑁆𑀯𑀸𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄𑀢𑀺 𑀆𑀳 ‘‘𑀅𑀪𑀺𑀜𑁆𑀜𑀸𑀬 𑀅𑀥𑀺𑀓𑁂𑀦 𑀜𑀸𑀡𑁂𑀦 𑀜𑀢𑁆𑀯𑀸’’𑀢𑀺. 𑀅𑀦𑀼𑀫𑀸𑀦𑀸𑀤𑀺𑀧𑀝𑀺𑀓𑁆𑀔𑁂𑀧𑁄𑀢𑀺 𑀅𑀦𑀼𑀫𑀸𑀦𑀅𑀢𑁆𑀣𑀸𑀧𑀢𑁆𑀢𑀺𑀆𑀤𑀺𑀧𑁆𑀧𑀝𑀺𑀓𑁆𑀔𑁂𑀧𑁄 𑀏𑀓𑀧𑁆𑀧𑀫𑀸𑀡𑀢𑁆𑀢𑀸. 𑀲𑀩𑁆𑀩𑀢𑁆𑀣 𑀅𑀧𑁆𑀧𑀝𑀺𑀳𑀢𑀜𑀸𑀡𑀘𑀸𑀭𑀢𑀸𑀬 𑀳𑀺 𑀲𑀩𑁆𑀩𑀧𑀘𑁆𑀘𑀓𑁆𑀔𑀸 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄.

𑀅𑀦𑀼𑀢𑁆𑀢𑀭𑀁 𑀯𑀺𑀯𑁂𑀓𑀲𑀼𑀔𑀦𑁆𑀢𑀺 𑀨𑀮𑀲𑀫𑀸𑀧𑀢𑁆𑀢𑀺𑀲𑀼𑀔𑀁. 𑀢𑁂𑀦 𑀯𑀺𑀫𑀺𑀲𑁆𑀲𑀸𑀧𑀺 𑀓𑀤𑀸𑀘𑀺 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀸 𑀳𑁄𑀢𑀻𑀢𑀺 ‘‘𑀳𑀺𑀢𑁆𑀯𑀸𑀧𑀻’’𑀢𑀺 𑀧𑀺-𑀲𑀤𑁆𑀤𑀕𑁆𑀕𑀳𑀡𑀁. 𑀪𑀕𑀯𑀸 𑀳𑀺 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀬𑀲𑁆𑀫𑀺𑀁 𑀔𑀡𑁂 𑀧𑀭𑀺𑀲𑀸 𑀲𑀸𑀥𑀼𑀓𑀸𑀭𑀁 𑀯𑀸 𑀤𑁂𑀢𑀺, 𑀬𑀣𑀸𑀲𑀼𑀢𑀁 𑀯𑀸 𑀥𑀫𑁆𑀫𑀁 𑀧𑀘𑁆𑀘𑀯𑁂𑀓𑁆𑀔𑀢𑀺, 𑀢𑀁 𑀔𑀡𑀁 𑀧𑀼𑀩𑁆𑀩𑀪𑀸𑀕𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀢𑀺, 𑀬𑀣𑀸𑀧𑀭𑀺𑀘𑁆𑀙𑁂𑀤𑀜𑁆𑀘 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀞𑀺𑀢𑀝𑁆𑀞𑀸𑀦𑀢𑁄 𑀧𑀝𑁆𑀞𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀅𑀧𑁆𑀧𑀁 𑀯𑀸 𑀩𑀳𑀼𑀁 𑀯𑀸 𑀤𑁂𑀲𑁂𑀦𑁆𑀢𑁄𑀢𑀺 𑀉𑀕𑁆𑀖𑀝𑀺𑀢𑀜𑁆𑀜𑀼𑀲𑁆𑀲 𑀯𑀲𑁂𑀦 𑀅𑀧𑁆𑀧𑀁 𑀯𑀸, 𑀯𑀺𑀧𑀜𑁆𑀘𑀺𑀢𑀜𑁆𑀜𑀼𑀲𑁆𑀲 𑀦𑁂𑀬𑁆𑀬𑀲𑁆𑀲 𑀯𑀸 𑀯𑀲𑁂𑀦 𑀩𑀳𑀼𑀁 𑀯𑀸 𑀤𑁂𑀲𑁂𑀦𑁆𑀢𑁄. 𑀥𑀫𑁆𑀫𑀲𑁆𑀲 𑀓𑀮𑁆𑀬𑀸𑀡𑀢𑀸 𑀘 𑀦𑀺𑀬𑁆𑀬𑀸𑀦𑀺𑀓𑀢𑀸 𑀘 𑀲𑀩𑁆𑀩𑀲𑁄 𑀅𑀦𑀯𑀚𑁆𑀚𑀪𑀸𑀯𑁂𑀦𑁂𑀯𑀸𑀢𑀺 𑀆𑀳 ‘‘𑀅𑀦𑀯𑀚𑁆𑀚𑀫𑁂𑀯 𑀓𑀢𑁆𑀯𑀸’’𑀢𑀺.

𑀤𑁂𑀲𑀓𑀸𑀬𑀢𑁆𑀢𑁂𑀦 𑀆𑀡𑀸𑀤𑀺𑀯𑀺𑀥𑀺𑀦𑀸 𑀅𑀢𑀺𑀲𑀚𑁆𑀚𑀦𑀁 𑀧𑀩𑁄𑀥𑀦𑀁 𑀤𑁂𑀲𑀦𑀸𑀢𑀺 𑀲𑀸 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸𑀢𑀺 𑀆𑀳 ‘‘𑀤𑁂𑀲𑀦𑀸𑀬 𑀢𑀸𑀯 𑀘𑀸𑀢𑀼𑀧𑁆𑀧𑀤𑀺𑀓𑀕𑀸𑀣𑀸𑀬𑀧𑀻’’𑀢𑀺𑀆𑀤𑀺. 𑀦𑀺𑀤𑀸𑀦𑀦𑀺𑀕𑀫𑀸𑀦𑀺𑀧𑀺 𑀲𑀢𑁆𑀣𑀼 𑀤𑁂𑀲𑀦𑀸𑀬 𑀅𑀦𑀼𑀯𑀺𑀥𑀸𑀦𑀢𑁄 𑀢𑀤𑀦𑁆𑀢𑁄𑀕𑀥𑀸𑀦𑀺 𑀏𑀯𑀸𑀢𑀺 𑀆𑀳 ‘‘𑀦𑀺𑀤𑀸𑀦𑀁 𑀆𑀤𑀺, 𑀇𑀤𑀫𑀯𑁄𑀘𑀸𑀢𑀺 𑀧𑀭𑀺𑀬𑁄𑀲𑀸𑀦’’𑀦𑁆𑀢𑀺.

𑀲𑀸𑀲𑀺𑀢𑀩𑁆𑀩𑀧𑀼𑀕𑁆𑀕𑀮𑀕𑀢𑁂𑀦 𑀬𑀣𑀸𑀧𑀭𑀸𑀥𑀸𑀤𑀺𑀲𑀸𑀲𑀺𑀢𑀩𑁆𑀩𑀪𑀸𑀯𑁂𑀦 𑀅𑀦𑀼𑀲𑀸𑀲𑀦𑀁 𑀢𑀤𑀗𑁆𑀕𑀯𑀺𑀦𑀬𑀸𑀤𑀺𑀯𑀲𑁂𑀦 𑀯𑀺𑀦𑀬𑀦𑀁 𑀲𑀸𑀲𑀦𑀦𑁆𑀢𑀺 𑀢𑀁 𑀧𑀝𑀺𑀧𑀢𑁆𑀢𑀺𑀥𑀫𑁆𑀫𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀲𑀻𑀮𑀲𑀫𑀸𑀥𑀺𑀯𑀺𑀧𑀲𑁆𑀲𑀦𑀸’’𑀢𑀺𑀆𑀤𑀺. 𑀓𑀼𑀲𑀮𑀸𑀦𑀦𑁆𑀢𑀺 𑀅𑀦𑀯𑀚𑁆𑀚𑀥𑀫𑁆𑀫𑀸𑀦𑀁 𑀲𑀻𑀮𑀲𑀫𑀣𑀯𑀺𑀧𑀲𑁆𑀲𑀦𑀸𑀦𑀁 𑀲𑀻𑀮𑀤𑀺𑀝𑁆𑀞𑀻𑀦𑀜𑁆𑀘 𑀆𑀤𑀺𑀪𑀸𑀯𑁄 𑀢𑀁𑀫𑀽𑀮𑀺𑀓𑀢𑁆𑀢𑀸 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸𑀦𑀁. 𑀅𑀭𑀺𑀬𑀫𑀕𑁆𑀕𑀲𑁆𑀲 𑀅𑀦𑁆𑀢𑀤𑁆𑀯𑀬𑀯𑀺𑀕𑀫𑁂𑀦 𑀫𑀚𑁆𑀛𑀺𑀫𑀸𑀧𑀝𑀺𑀧𑀤𑀸𑀪𑀸𑀯𑁄 𑀯𑀺𑀬 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀆𑀭𑀩𑁆𑀪 𑀦𑀺𑀩𑁆𑀩𑀢𑁆𑀢𑀻𑀦𑀁 𑀯𑁂𑀫𑀚𑁆𑀛𑀢𑀸𑀧𑀺 𑀫𑀚𑁆𑀛𑀪𑀸𑀯𑁄𑀢𑀺 𑀯𑀼𑀢𑁆𑀢𑀁 ‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂…𑀧𑁂… 𑀫𑀚𑁆𑀛𑀺𑀫𑀁 𑀦𑀸𑀫𑀸’’𑀢𑀺. 𑀨𑀮𑀁 𑀧𑀭𑀺𑀬𑁄𑀲𑀸𑀦𑀁 𑀦𑀸𑀫 𑀲𑀉𑀧𑀸𑀤𑀺𑀲𑁂𑀲𑀢𑀸𑀯𑀲𑁂𑀦. 𑀦𑀺𑀩𑁆𑀩𑀸𑀦𑀁 𑀧𑀭𑀺𑀬𑁄𑀲𑀸𑀦𑀁 𑀦𑀸𑀫 𑀅𑀦𑀼𑀧𑀸𑀤𑀺𑀲𑁂𑀲𑀢𑀸𑀯𑀲𑁂𑀦. 𑀇𑀤𑀸𑀦𑀺 𑀢𑁂𑀲𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀲𑀸𑀲𑀦𑀲𑁆𑀲 𑀧𑀭𑀺𑀬𑁄𑀲𑀸𑀦𑀢𑀁 𑀆𑀕𑀫𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀢𑀲𑁆𑀫𑀸𑀢𑀺𑀳 𑀢𑁆𑀯’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦’’𑀦𑁆𑀢𑀺𑀆𑀤𑀺𑀯𑀘𑀦𑀢𑁄 𑀥𑀫𑁆𑀫𑀤𑁂𑀲𑀦𑀸𑀬 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀁 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀇𑀥…𑀧𑁂… 𑀅𑀥𑀺𑀧𑁆𑀧𑁂𑀢’’𑀦𑁆𑀢𑀺. 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀅𑀢𑁆𑀣𑁂 𑀓𑀣𑀸𑀯𑀥𑀺𑀲𑀤𑁆𑀤𑀧𑁆𑀧𑀩𑀦𑁆𑀥𑁄 𑀕𑀸𑀣𑀸𑀯𑀲𑁂𑀦 𑀲𑀼𑀢𑁆𑀢𑀯𑀲𑁂𑀦 𑀘 𑀯𑀯𑀢𑁆𑀣𑀺𑀢𑁄 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄, 𑀲𑁄 𑀇𑀥 𑀤𑁂𑀲𑀦𑀸𑀢𑀺 𑀯𑀼𑀢𑁆𑀢𑁄, 𑀢𑀲𑁆𑀲 𑀧𑀦 𑀅𑀢𑁆𑀣𑁄 𑀯𑀺𑀲𑁂𑀲𑀢𑁄 𑀲𑀻𑀮𑀸𑀤𑀺 𑀏𑀯𑀸𑀢𑀺 𑀆𑀳 ‘‘𑀪𑀕𑀯𑀸 𑀳𑀺 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄…𑀧𑁂… 𑀤𑀲𑁆𑀲𑁂𑀢𑀻’’𑀢𑀺. 𑀢𑀢𑁆𑀣 𑀲𑀻𑀮𑀁 𑀤𑀲𑁆𑀲𑁂𑀢𑁆𑀯𑀸𑀢𑀺 𑀲𑀻𑀮𑀕𑁆𑀕𑀳𑀡𑁂𑀦 𑀲𑀲𑀫𑁆𑀪𑀸𑀭𑀁 𑀲𑀻𑀮𑀁 𑀕𑀳𑀺𑀢𑀁, 𑀢𑀣𑀸 𑀫𑀕𑁆𑀕𑀕𑁆𑀕𑀳𑀡𑁂𑀦 𑀲𑀲𑀫𑁆𑀪𑀸𑀭𑁄 𑀫𑀕𑁆𑀕𑁄𑀢𑀺 𑀢𑀤𑀼𑀪𑀬𑀯𑀲𑁂𑀦 𑀅𑀦𑀯𑀲𑁂𑀲𑀢𑁄 𑀧𑀭𑀺𑀬𑀢𑁆𑀢𑀺𑀅𑀢𑁆𑀣𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀺. 𑀢𑁂𑀦𑀸𑀢𑀺 𑀲𑀻𑀮𑀸𑀤𑀺𑀤𑀲𑁆𑀲𑀦𑁂𑀦. 𑀅𑀢𑁆𑀣𑀯𑀲𑁂𑀦 𑀳𑀺 𑀇𑀥 𑀤𑁂𑀲𑀦𑀸𑀬 𑀆𑀤𑀺𑀓𑀮𑁆𑀬𑀸𑀡𑀸𑀤𑀺𑀪𑀸𑀯𑁄 𑀅𑀥𑀺𑀧𑁆𑀧𑁂𑀢𑁄. 𑀓𑀣𑀺𑀓𑀲𑀡𑁆𑀞𑀺𑀢𑀻𑀢𑀺 𑀓𑀣𑀺𑀓𑀲𑁆𑀲 𑀲𑀡𑁆𑀞𑀸𑀦𑀁 𑀓𑀣𑀦𑀯𑀲𑁂𑀦 𑀲𑀫𑀯𑀝𑁆𑀞𑀸𑀦𑀁.

𑀦 𑀲𑁄 𑀲𑀸𑀢𑁆𑀣𑀁 𑀤𑁂𑀲𑁂𑀢𑀺 𑀦𑀺𑀬𑁆𑀬𑀸𑀦𑀢𑁆𑀣𑀯𑀺𑀭𑀳𑀢𑁄 𑀢𑀲𑁆𑀲𑀸 𑀤𑁂𑀲𑀦𑀸𑀬. 𑀏𑀓𑀩𑁆𑀬𑀜𑁆𑀚𑀦𑀸𑀤𑀺𑀬𑀼𑀢𑁆𑀢𑀸 𑀯𑀸𑀢𑀺 𑀲𑀺𑀣𑀺𑀮𑀸𑀤𑀺𑀪𑁂𑀤𑁂𑀲𑀼 𑀩𑁆𑀬𑀜𑁆𑀚𑀦𑁂𑀲𑀼 𑀏𑀓𑀧𑁆𑀧𑀓𑀸𑀭𑁂𑀦𑁂𑀯 𑀤𑁆𑀯𑀺𑀧𑁆𑀧𑀓𑀸𑀭𑁂𑀦𑁂𑀯 𑀯𑀸 𑀩𑁆𑀬𑀜𑁆𑀚𑀦𑁂𑀦 𑀬𑀼𑀢𑁆𑀢𑀸 𑀤𑀫𑀺𑀴𑀪𑀸𑀲𑀸 𑀯𑀺𑀬. 𑀯𑀺𑀯𑀝𑀓𑀭𑀡𑀢𑀸𑀬 𑀑𑀝𑁆𑀞𑁂 𑀅𑀨𑀼𑀲𑀸𑀧𑁂𑀢𑁆𑀯𑀸 𑀉𑀘𑁆𑀘𑀸𑀭𑁂𑀢𑀩𑁆𑀩𑀢𑁄 𑀲𑀩𑁆𑀩𑀦𑀺𑀭𑁄𑀝𑁆𑀞𑀩𑁆𑀬𑀜𑁆𑀚𑀦𑀸 𑀯𑀸 𑀓𑀺𑀭𑀸𑀢𑀪𑀸𑀲𑀸 𑀯𑀺𑀬. 𑀲𑀩𑁆𑀩𑀲𑁆𑀲𑁂𑀯 𑀯𑀺𑀲𑁆𑀲𑀚𑁆𑀚𑀦𑀻𑀬𑀬𑀼𑀢𑁆𑀢𑀢𑀸𑀬 𑀲𑀩𑁆𑀩𑀯𑀺𑀲𑁆𑀲𑀝𑁆𑀞𑀩𑁆𑀬𑀜𑁆𑀚𑀦𑀸 𑀯𑀸 𑀬𑀯𑀦𑀪𑀸𑀲𑀸 𑀯𑀺𑀬. 𑀲𑀩𑁆𑀩𑀲𑁆𑀲𑁂𑀯 𑀲𑀸𑀦𑀼𑀲𑀸𑀭𑀢𑀸𑀬 𑀲𑀩𑁆𑀩𑀦𑀺𑀕𑁆𑀕𑀳𑀺𑀢𑀩𑁆𑀬𑀜𑁆𑀚𑀦𑀸 𑀯𑀸 𑀧𑀸𑀭𑀲𑀺𑀓𑀸𑀤𑀺𑀫𑀺𑀮𑀓𑁆𑀔𑀪𑀸𑀲𑀸 𑀯𑀺𑀬. 𑀲𑀩𑁆𑀩𑀸𑀧𑁂𑀲𑀸 𑀩𑁆𑀬𑀜𑁆𑀚𑀦𑁂𑀓𑀤𑁂𑀲𑀯𑀲𑁂𑀦𑁂𑀯 𑀧𑀯𑀢𑁆𑀢𑀺𑀬𑀸 𑀅𑀧𑀭𑀺𑀧𑀼𑀡𑁆𑀡𑀩𑁆𑀬𑀜𑁆𑀚𑀦𑀸𑀢𑀺 𑀓𑀢𑁆𑀯𑀸 ‘‘𑀅𑀩𑁆𑀬𑀜𑁆𑀚𑀦𑀸’’𑀢𑀺 𑀯𑀼𑀢𑁆𑀢𑀸.

𑀞𑀸𑀦𑀓𑀭𑀡𑀸𑀦𑀺 𑀲𑀺𑀣𑀺𑀮𑀸𑀦𑀺 𑀓𑀢𑁆𑀯𑀸 𑀉𑀘𑁆𑀘𑀸𑀭𑁂𑀢𑀩𑁆𑀩𑀁 𑀅𑀓𑁆𑀔𑀭𑀁 𑀧𑀜𑁆𑀘𑀲𑀼 𑀯𑀕𑁆𑀕𑁂𑀲𑀼 𑀧𑀞𑀫𑀢𑀢𑀺𑀬𑀦𑁆𑀢𑀺 𑀏𑀯𑀫𑀸𑀤𑀺 𑀲𑀺𑀣𑀺𑀮𑀁. 𑀢𑀸𑀦𑀺 𑀅𑀲𑀺𑀣𑀺𑀮𑀸𑀦𑀺 𑀓𑀢𑁆𑀯𑀸 𑀉𑀘𑁆𑀘𑀸𑀭𑁂𑀢𑀩𑁆𑀩𑀁 𑀅𑀓𑁆𑀔𑀭𑀁 𑀯𑀕𑁆𑀕𑁂𑀲𑀼 𑀤𑀼𑀢𑀺𑀬𑀘𑀢𑀼𑀢𑁆𑀣𑀦𑁆𑀢𑀺 𑀏𑀯𑀫𑀸𑀤𑀺 𑀥𑀦𑀺𑀢𑀁. 𑀤𑁆𑀯𑀺𑀫𑀢𑁆𑀢𑀓𑀸𑀮𑀁 𑀤𑀻𑀖𑀁. 𑀏𑀓𑀫𑀢𑁆𑀢𑀓𑀸𑀮𑀁 𑀭𑀲𑁆𑀲𑀁. 𑀢𑀤𑁂𑀯 𑀮𑀳𑀼𑀓𑀁 𑀮𑀳𑀼𑀓𑀫𑁂𑀯. 𑀲𑀁𑀬𑁄𑀕𑀧𑀭𑀁 𑀤𑀻𑀖𑀜𑁆𑀘 𑀕𑀭𑀼𑀓𑀁. 𑀞𑀸𑀦𑀓𑀭𑀡𑀸𑀦𑀺 𑀦𑀺𑀕𑁆𑀕𑀳𑁂𑀢𑁆𑀯𑀸 𑀉𑀘𑁆𑀘𑀸𑀭𑁂𑀢𑀩𑁆𑀩𑀁 𑀦𑀺𑀕𑁆𑀕𑀳𑀺𑀢𑀁. 𑀧𑀭𑁂𑀦 𑀲𑀫𑁆𑀩𑀦𑁆𑀥𑀁 𑀓𑀢𑁆𑀯𑀸 𑀉𑀘𑁆𑀘𑀸𑀭𑁂𑀢𑀩𑁆𑀩𑀁 𑀲𑀫𑁆𑀩𑀦𑁆𑀥𑀁. 𑀢𑀣𑀸 𑀦 𑀲𑀫𑁆𑀩𑀦𑁆𑀥𑀁 𑀯𑀯𑀢𑁆𑀣𑀺𑀢𑀁. 𑀞𑀸𑀦𑀓𑀭𑀡𑀸𑀦𑀺 𑀯𑀺𑀲𑁆𑀲𑀝𑁆𑀞𑀸𑀦𑀺 𑀓𑀢𑁆𑀯𑀸 𑀉𑀘𑁆𑀘𑀸𑀭𑁂𑀢𑀩𑁆𑀩𑀁 𑀯𑀺𑀫𑀼𑀢𑁆𑀢𑀁. 𑀤𑀲𑀥𑀸 𑀩𑁆𑀬𑀜𑁆𑀚𑀦𑀩𑀼𑀤𑁆𑀥𑀺𑀬𑀸 𑀧𑀪𑁂𑀤𑁄𑀢𑀺 𑀏𑀯𑀁 𑀲𑀺𑀣𑀺𑀮𑀸𑀤𑀺𑀯𑀲𑁂𑀦 𑀩𑁆𑀬𑀜𑁆𑀚𑀦𑀩𑀼𑀤𑁆𑀥𑀺𑀬𑀸 𑀅𑀓𑁆𑀔𑀭𑀼𑀧𑁆𑀧𑀸𑀤𑀓𑀘𑀺𑀢𑁆𑀢𑀲𑁆𑀲 𑀤𑀲𑀧𑁆𑀧𑀓𑀸𑀭𑁂𑀦 𑀧𑀪𑁂𑀤𑁄. 𑀲𑀩𑁆𑀩𑀸𑀦𑀺 𑀳𑀺 𑀅𑀓𑁆𑀔𑀭𑀸𑀦𑀺 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀺 𑀬𑀣𑀸𑀥𑀺𑀧𑁆𑀧𑁂𑀢𑀢𑁆𑀣𑀩𑁆𑀬𑀜𑁆𑀚𑀦𑀢𑁄 𑀩𑁆𑀬𑀜𑁆𑀚𑀦𑀸𑀦𑀺 𑀘.

𑀅𑀫𑀓𑁆𑀔𑁂𑀢𑁆𑀯𑀸𑀢𑀺 𑀅𑀫𑀺𑀮𑁂𑀘𑁆𑀙𑁂𑀢𑁆𑀯𑀸, 𑀅𑀯𑀺𑀦𑀸𑀲𑁂𑀢𑁆𑀯𑀸, 𑀅𑀳𑀸𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀪𑀕𑀯𑀸 𑀬𑀫𑀢𑁆𑀣𑀁 𑀜𑀸𑀧𑁂𑀢𑀼𑀁 𑀏𑀓𑀕𑀸𑀣𑀁 𑀏𑀓𑀯𑀸𑀓𑁆𑀬𑀫𑁆𑀧𑀺 𑀤𑁂𑀲𑁂𑀢𑀺, 𑀢𑀫𑀢𑁆𑀣𑀁 𑀢𑀸𑀬 𑀤𑁂𑀲𑀦𑀸𑀬 𑀧𑀭𑀺𑀫𑀡𑁆𑀟𑀮𑀧𑀤𑀩𑁆𑀬𑀜𑁆𑀚𑀦𑀸𑀬 𑀏𑀯 𑀤𑁂𑀲𑁂𑀢𑀻𑀢𑀺 𑀆𑀳 ‘‘𑀧𑀭𑀺𑀧𑀼𑀡𑁆𑀡𑀩𑁆𑀬𑀜𑁆𑀚𑀦𑀫𑁂𑀯 𑀓𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑀻’’𑀢𑀺. 𑀇𑀥 𑀓𑁂𑀯𑀮𑀲𑀤𑁆𑀤𑁄 𑀅𑀦𑀯𑀲𑁂𑀲𑀯𑀸𑀘𑀓𑁄, 𑀦 𑀅𑀯𑁄𑀫𑀺𑀲𑁆𑀲𑀢𑀸𑀤𑀺𑀯𑀸𑀘𑀓𑁄𑀢𑀺 𑀆𑀳 ‘‘𑀲𑀓𑀮𑀸𑀥𑀺𑀯𑀘𑀦’’𑀦𑁆𑀢𑀺. 𑀧𑀭𑀺𑀧𑀼𑀡𑁆𑀡𑀦𑁆𑀢𑀺 𑀲𑀩𑁆𑀩𑀲𑁄 𑀧𑀼𑀡𑁆𑀡𑀁. 𑀢𑀁 𑀧𑀦 𑀓𑀺𑀜𑁆𑀘𑀺 𑀊𑀦𑀁 𑀯𑀸 𑀅𑀥𑀺𑀓𑀁 𑀯𑀸 𑀦 𑀳𑁄𑀢𑀻𑀢𑀺 ‘‘𑀅𑀦𑀽𑀦𑀸𑀥𑀺𑀓𑀯𑀘𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀤𑀢𑁆𑀣𑀁 𑀤𑁂𑀲𑀺𑀢𑀁, 𑀢𑀲𑁆𑀲 𑀲𑀸𑀥𑀓𑀢𑁆𑀢𑀸 𑀅𑀦𑀽𑀦𑀢𑀸 𑀯𑁂𑀤𑀺𑀢𑀩𑁆𑀩𑀸, 𑀢𑀩𑁆𑀩𑀺𑀥𑀼𑀭𑀲𑁆𑀲 𑀧𑀦 𑀅𑀲𑀸𑀥𑀓𑀢𑁆𑀢𑀸 𑀅𑀦𑀥𑀺𑀓𑀢𑀸. 𑀲𑀓𑀮𑀦𑁆𑀢𑀺 𑀲𑀩𑁆𑀩𑀪𑀸𑀕𑀯𑀦𑁆𑀢𑀁. 𑀧𑀭𑀺𑀧𑀼𑀡𑁆𑀡𑀫𑁂𑀯𑀸𑀢𑀺 𑀲𑀩𑁆𑀩𑀲𑁄 𑀧𑀭𑀺𑀧𑀼𑀡𑁆𑀡𑀫𑁂𑀯. 𑀢𑁂𑀦𑀸𑀳 ‘‘𑀏𑀓𑀤𑁂𑀲𑀦𑀸𑀧𑀺 𑀅𑀧𑀭𑀺𑀧𑀼𑀡𑁆𑀡𑀸 𑀦𑀢𑁆𑀣𑀻’’𑀢𑀺. 𑀅𑀧𑀭𑀺𑀲𑀼𑀤𑁆𑀥𑀸 𑀤𑁂𑀲𑀦𑀸 𑀦𑀸𑀫 𑀳𑁄𑀢𑀺 𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑀢𑁆𑀢𑀸. 𑀮𑁄𑀓𑀸𑀫𑀺𑀲𑀁 𑀘𑀻𑀯𑀭𑀸𑀤𑀬𑁄 𑀧𑀘𑁆𑀘𑀬𑀸, 𑀢𑀢𑁆𑀣 𑀅𑀕𑀥𑀺𑀢𑀘𑀺𑀢𑁆𑀢𑀢𑀸𑀬 𑀮𑁄𑀓𑀸𑀫𑀺𑀲𑀦𑀺𑀭𑀧𑁂𑀓𑁆𑀔𑁄. 𑀳𑀺𑀢𑀨𑀭𑀡𑁂𑀦𑀸𑀢𑀺 𑀳𑀺𑀢𑀽𑀧𑀲𑀁𑀳𑀭𑀡𑁂𑀦. 𑀫𑁂𑀢𑁆𑀢𑀸𑀪𑀸𑀯𑀦𑀸𑀬 𑀫𑀼𑀤𑀼𑀳𑀤𑀬𑁄𑀢𑀺 𑀫𑁂𑀢𑁆𑀢𑀸𑀪𑀸𑀯𑀦𑀸𑀬 𑀓𑀭𑀼𑀡𑀸𑀬 𑀯𑀸 𑀫𑀼𑀤𑀼𑀳𑀤𑀬𑁄. 𑀉𑀮𑁆𑀮𑀼𑀫𑁆𑀧𑀦𑀲𑀪𑀸𑀯𑀲𑀡𑁆𑀞𑀺𑀢𑁂𑀦𑀸𑀢𑀺 𑀲𑀓𑀮𑀲𑀁𑀓𑀺𑀮𑁂𑀲𑀢𑁄 𑀯𑀝𑁆𑀝𑀤𑀼𑀓𑁆𑀔𑀢𑁄 𑀘 𑀉𑀤𑁆𑀥𑀭𑀡𑀸𑀓𑀸𑀭𑀸𑀯𑀝𑁆𑀞𑀺𑀢𑁂𑀦 𑀘𑀺𑀢𑁆𑀢𑁂𑀦, 𑀓𑀭𑀼𑀡𑀸𑀥𑀺𑀧𑁆𑀧𑀸𑀬𑁂𑀦𑀸𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀁 𑀲𑀓𑀮𑀁 𑀲𑀸𑀲𑀦𑀁 𑀇𑀥 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁, 𑀢𑀲𑁆𑀫𑀸. 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀇𑀫𑀺𑀦𑀸 𑀲𑀫𑀸𑀦𑀸𑀥𑀺𑀓𑀭𑀡𑀸𑀦𑀺 𑀲𑀩𑁆𑀩𑀧𑀤𑀸𑀦𑀺 𑀬𑁄𑀚𑁂𑀢𑁆𑀯𑀸 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺…𑀧𑁂… 𑀧𑀓𑀸𑀲𑁂𑀢𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄’’𑀢𑀺 𑀆𑀳.

𑀲𑀼𑀦𑁆𑀤𑀭𑀦𑁆𑀢𑀺 𑀪𑀤𑁆𑀤𑀓𑀁. 𑀪𑀤𑁆𑀤𑀓𑀢𑀸 𑀘 𑀧𑀲𑁆𑀲𑀦𑁆𑀢𑀲𑁆𑀲 𑀳𑀺𑀢𑀲𑀼𑀔𑀸𑀯𑀳𑀪𑀸𑀯𑁂𑀦 𑀯𑁂𑀤𑀺𑀢𑀩𑁆𑀩𑀸𑀢𑀺 𑀆𑀳 ‘‘𑀅𑀢𑁆𑀣𑀸𑀯𑀳𑀁 𑀲𑀼𑀔𑀸𑀯𑀳’’𑀦𑁆𑀢𑀺. 𑀢𑀢𑁆𑀣 𑀅𑀢𑁆𑀣𑀸𑀯𑀳𑀦𑁆𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀧𑀭𑀫𑀢𑁆𑀣𑀲𑀁𑀳𑀺𑀢𑀳𑀺𑀢𑀸𑀯𑀳𑀁. 𑀲𑀼𑀔𑀸𑀯𑀳𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀢𑀺𑀯𑀺𑀥𑀲𑀼𑀔𑀸𑀯𑀳𑀁. 𑀢𑀣𑀸𑀦𑀼𑀭𑀽𑀧𑀸𑀦𑀦𑁆𑀢𑀺 𑀢𑀸𑀤𑀺𑀲𑀸𑀦𑀁. 𑀬𑀸𑀤𑀺𑀲𑁂𑀳𑀺 𑀧𑀦 𑀕𑀼𑀡𑁂𑀳𑀺 𑀪𑀕𑀯𑀸 𑀲𑀫𑀦𑁆𑀦𑀸𑀕𑀢𑁄, 𑀢𑁂𑀳𑀺 𑀘𑀢𑀼𑀧𑁆𑀧𑀫𑀸𑀡𑀺𑀓𑀲𑁆𑀲 𑀮𑁄𑀓𑀲𑁆𑀲 𑀲𑀩𑁆𑀩𑀣𑀸𑀧𑀺 𑀅𑀘𑁆𑀘𑀦𑁆𑀢𑀧𑁆𑀧𑀲𑀸𑀤𑀦𑀻𑀬𑁄 𑀢𑁂𑀲𑀁 𑀬𑀣𑀸𑀪𑀽𑀢𑀲𑀪𑀸𑀯𑀢𑁆𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀣𑀸𑀭𑀽𑀧𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀣𑀸𑀪𑀽𑀢…𑀧𑁂… 𑀅𑀭𑀳𑀢𑀦𑁆𑀢𑀺 𑀇𑀫𑀺𑀦𑀸 𑀥𑀫𑁆𑀫𑀧𑁆𑀧𑀫𑀸𑀡𑀮𑀽𑀔𑀧𑁆𑀧𑀫𑀸𑀡𑀸𑀦𑀁 𑀲𑀢𑁆𑀢𑀸𑀦𑀁 𑀪𑀕𑀯𑀢𑁄 𑀧𑀲𑀸𑀤𑀸𑀯𑀳𑀢𑀸 𑀤𑀲𑁆𑀲𑀺𑀢𑀸, 𑀇𑀢𑀭𑁂𑀦 𑀇𑀢𑀭𑁂𑀲𑀁. 𑀤𑀲𑁆𑀲𑀦𑀫𑀢𑁆𑀢𑀫𑁆𑀧𑀺 𑀲𑀸𑀥𑀼 𑀳𑁄𑀢𑀻𑀢𑀺 𑀏𑀢𑁆𑀣 𑀓𑁄𑀲𑀺𑀬𑀯𑀢𑁆𑀣𑀼 𑀓𑀣𑁂𑀢𑀩𑁆𑀩𑀁. 𑀉𑀪𑀢𑁄𑀧𑀓𑁆𑀔𑀺𑀓𑀸𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀲𑀫𑁆𑀫𑀸𑀤𑀺𑀝𑁆𑀞𑀺𑀯𑀲𑁂𑀦 𑀉𑀪𑀬𑀧𑀓𑁆𑀔𑀺𑀓𑀸. 𑀓𑁂𑀭𑀸𑀝𑀺𑀓𑀸𑀢𑀺 𑀲𑀞𑀸.

𑀅𑀦𑁂𑀓𑀢𑁆𑀣𑀢𑁆𑀢𑀸 𑀦𑀺𑀧𑀸𑀢𑀸𑀦𑀁 𑀬𑀸𑀯𑀜𑁆𑀘𑀺𑀤𑀦𑁆𑀢𑀺 𑀦𑀺𑀧𑀸𑀢𑀲𑀫𑀼𑀤𑀸𑀬𑁄 𑀅𑀥𑀺𑀫𑀢𑁆𑀢𑀧𑁆𑀧𑀫𑀸𑀡𑀧𑀭𑀺𑀘𑁆𑀙𑁂𑀤𑀁 𑀤𑀻𑀧𑁂𑀢𑀻𑀢𑀺 𑀆𑀳 ‘‘𑀅𑀥𑀺𑀫𑀢𑁆𑀢𑀧𑁆𑀧𑀫𑀸𑀡𑀧𑀭𑀺𑀘𑁆𑀙𑁂𑀤𑀯𑀘𑀦𑀫𑁂𑀢’’𑀦𑁆𑀢𑀺. 𑀅𑀥𑀺𑀫𑀢𑁆𑀢𑀯𑀺𑀧𑁆𑀧𑀲𑀦𑁆𑀦𑀸𑀦𑀻𑀢𑀺 𑀅𑀥𑀺𑀓𑀧𑁆𑀧𑀫𑀸𑀡𑁂𑀦 𑀯𑀺𑀧𑁆𑀧𑀲𑀦𑁆𑀦𑀸𑀦𑀺. 𑀯𑀺𑀧𑁆𑀧𑀲𑀦𑁆𑀦𑀸𑀦𑀻𑀢𑀺 𑀘 𑀧𑀓𑀢𑀺𑀆𑀓𑀸𑀭𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀯𑀺𑀧𑁆𑀧𑀲𑀦𑁆𑀦𑀸𑀦𑀻𑀢𑀺 𑀅𑀢𑁆𑀣𑁄. 𑀦𑀦𑀼 𑀘 𑀘𑀓𑁆𑀔𑀸𑀤𑀻𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸 𑀓𑀣𑀁 𑀢𑁂𑀦 𑀢𑁂𑀲𑀁 𑀯𑀺𑀧𑁆𑀧𑀲𑀦𑁆𑀦𑀢𑀸 𑀯𑀺𑀜𑁆𑀜𑀸𑀬𑀢𑀻𑀢𑀺 𑀆𑀳 ‘‘𑀢𑀲𑁆𑀲 𑀳𑀻’’𑀢𑀺𑀆𑀤𑀺. 𑀢𑀲𑁆𑀲𑀸𑀢𑀺 𑀩𑁆𑀭𑀸𑀳𑁆𑀫𑀡𑀲𑁆𑀲. 𑀢𑁂𑀲𑀦𑁆𑀢𑀺 𑀘𑀓𑁆𑀔𑀸𑀤𑀻𑀦𑀁 𑀧𑀜𑁆𑀘𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁. 𑀏𑀯𑀫𑁆𑀧𑀺 𑀫𑀦𑀺𑀦𑁆𑀤𑁆𑀭𑀺𑀬𑁂𑀦 𑀧𑀢𑀺𑀝𑁆𑀞𑀺𑀢𑁄𑀓𑀸𑀲𑀲𑁆𑀲 𑀅𑀤𑀺𑀝𑁆𑀞𑀢𑁆𑀢𑀸 𑀓𑀣𑀁 𑀫𑀦𑀺𑀦𑁆𑀤𑁆𑀭𑀺𑀬𑀲𑁆𑀲 𑀯𑀺𑀧𑁆𑀧𑀲𑀦𑁆𑀦𑀢𑀸 𑀢𑁂𑀦 𑀯𑀺𑀜𑁆𑀜𑀸𑀬𑀢𑀻𑀢𑀺 𑀆𑀳 ‘‘𑀬𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺. 𑀦𑀬𑀕𑁆𑀕𑀸𑀳𑀧𑀜𑁆𑀜𑀸 𑀳𑁂𑀲𑀸 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲. 𑀫𑀦𑁂 𑀯𑀺𑀧𑁆𑀧𑀲𑀦𑁆𑀦𑁂𑀬𑁂𑀯 𑀳𑁄𑀢𑀺 𑀧𑀲𑀦𑁆𑀦𑀘𑀺𑀢𑁆𑀢𑀲𑀫𑀼𑀝𑁆𑀞𑀺𑀢𑀭𑀽𑀧𑀲𑀫𑁆𑀧𑀤𑀸𑀳𑀺 𑀏𑀯 𑀘𑀓𑁆𑀔𑀸𑀤𑀻𑀦𑀁 𑀧𑀢𑀺𑀝𑁆𑀞𑀺𑀢𑁄𑀓𑀸𑀲𑀲𑁆𑀲 𑀧𑀲𑀦𑁆𑀦𑀢𑀸𑀲𑀫𑁆𑀪𑀯𑀢𑁄.

𑀚𑀫𑁆𑀩𑁄𑀦𑀤𑀲𑀼𑀯𑀡𑁆𑀡𑀁 𑀭𑀢𑁆𑀢𑀯𑀡𑁆𑀡𑀫𑁂𑀯 𑀳𑁄𑀢𑀻𑀢𑀺 𑀆𑀳 ‘‘𑀲𑀼𑀭𑀢𑁆𑀢𑀯𑀡𑁆𑀡𑀲𑁆𑀲𑀸’’𑀢𑀺. 𑀚𑀫𑁆𑀩𑁄𑀦𑀤𑀲𑀼𑀯𑀡𑁆𑀡𑀲𑁆𑀲 𑀖𑀝𑀺𑀓𑀸𑀢𑀺 𑀚𑀫𑁆𑀩𑁄𑀦𑀤𑀲𑀼𑀯𑀡𑁆𑀡𑀧𑀺𑀡𑁆𑀟𑀁. 𑀇𑀫𑀺𑀦𑀸 𑀦𑁂𑀓𑁆𑀔𑀦𑁆𑀢𑀺 𑀦𑁂𑀓𑁆𑀔𑀧𑁆𑀧𑀫𑀸𑀡𑀚𑀫𑁆𑀩𑁄𑀦𑀤𑀲𑀼𑀯𑀡𑁆𑀡𑁂𑀦 𑀓𑀢𑀁 𑀅𑀓𑀢𑀪𑀡𑁆𑀟𑀁 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀦𑁂𑀓𑁆𑀔𑀦𑁆𑀢𑀺 𑀯𑀸 𑀅𑀢𑀺𑀭𑁂𑀓𑀧𑀜𑁆𑀘𑀲𑀼𑀯𑀡𑁆𑀡𑁂𑀦 𑀓𑀢𑀧𑀺𑀮𑀦𑁆𑀥𑀦𑀁 𑀓𑀢𑀪𑀡𑁆𑀟𑀁 𑀯𑀼𑀢𑁆𑀢𑀁. 𑀢𑀜𑁆𑀳𑀺 𑀖𑀝𑁆𑀝𑀦𑀫𑀚𑁆𑀚𑀦𑀓𑁆𑀔𑀫𑀁 𑀳𑁄𑀢𑀻𑀢𑀺. 𑀲𑀼𑀯𑀡𑁆𑀡𑀦𑁆𑀢𑀺 𑀘 𑀧𑀜𑁆𑀘𑀥𑀭𑀡𑀲𑁆𑀲 𑀲𑀫𑀜𑁆𑀜𑀸, 𑀢𑀲𑁆𑀫𑀸 𑀧𑀜𑁆𑀘𑀯𑀻𑀲𑀢𑀺𑀥𑀭𑀡𑀳𑀺𑀭𑀜𑁆𑀜𑀯𑀺𑀘𑀺𑀢𑀁 𑀆𑀪𑀭𑀡𑀁 𑀇𑀥 𑀦𑁂𑀓𑁆𑀔𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁. 𑀚𑀫𑁆𑀩𑁄𑀦𑀤𑀦𑁆𑀢𑀺 𑀫𑀳𑀸𑀚𑀫𑁆𑀩𑀼𑀲𑀸𑀔𑀸𑀬 𑀧𑀯𑀢𑁆𑀢𑀦𑀤𑀺𑀬𑀁 𑀦𑀺𑀩𑁆𑀩𑀢𑁆𑀢𑀁. 𑀢𑀁 𑀓𑀺𑀭 𑀭𑀢𑀦𑀁 𑀭𑀢𑁆𑀢𑀁. 𑀲𑀼𑀯𑀡𑁆𑀡𑀸𑀓𑀸𑀭𑁂 𑀫𑀳𑀸𑀚𑀫𑁆𑀩𑀼𑀨𑀮𑀭𑀲𑁂 𑀯𑀸 𑀧𑀣𑀯𑀺𑀬𑀁 𑀧𑀯𑀺𑀝𑁆𑀞𑁂 𑀲𑀼𑀯𑀡𑁆𑀡𑀗𑁆𑀓𑀼𑀭𑀸 𑀉𑀝𑁆𑀞𑀳𑀦𑁆𑀢𑀺, 𑀢𑁂𑀦 𑀲𑀼𑀯𑀡𑁆𑀡𑁂𑀦 𑀓𑀢𑀧𑀺𑀮𑀦𑁆𑀥𑀦𑀦𑁆𑀢𑀺𑀧𑀺 𑀅𑀢𑁆𑀣𑁄. 𑀲𑀼𑀧𑀭𑀺𑀓𑀫𑁆𑀫𑀓𑀢𑀦𑁆𑀢𑀺 𑀲𑀼𑀝𑁆𑀞𑀼 𑀓𑀢𑀧𑀭𑀺𑀓𑀫𑁆𑀫𑀁. 𑀲𑀫𑁆𑀧𑀳𑀝𑁆𑀞𑀦𑁆𑀢𑀺 𑀲𑀫𑁆𑀫𑀸 𑀧𑀳𑀝𑁆𑀞𑀁 𑀖𑀝𑁆𑀝𑀦𑀸𑀤𑀺𑀯𑀲𑁂𑀦 𑀲𑀼𑀓𑀢𑀧𑀭𑀺𑀓𑀫𑁆𑀫𑀁. 𑀢𑁂𑀦𑀸𑀳 ‘‘𑀲𑀼𑀯𑀡𑁆𑀡𑀓𑀸𑀭…𑀧𑁂… 𑀲𑀼𑀧𑀭𑀺𑀫𑀚𑁆𑀚𑀺𑀢𑀦𑁆𑀢𑀺 𑀅𑀢𑁆𑀣𑁄’’𑀢𑀺.

𑀯𑀸𑀴𑀭𑀽𑀧𑀸𑀦𑀻𑀢𑀺 𑀆𑀳𑀭𑀺𑀫𑀸𑀦𑀺 𑀯𑀸𑀴𑀭𑀽𑀧𑀸𑀦𑀺. ‘‘𑀅𑀓𑀧𑁆𑀧𑀺𑀬𑀭𑀽𑀧𑀸𑀓𑀼𑀮𑁄 𑀅𑀓𑀧𑁆𑀧𑀺𑀬𑀫𑀜𑁆𑀘𑁄 𑀧𑀮𑁆𑀮𑀗𑁆𑀓𑁄𑀢𑀺 𑀲𑀸𑀭𑀲𑀫𑀸𑀲𑁂. 𑀭𑀢𑀦𑀘𑀺𑀢𑁆𑀭𑀦𑁆𑀢𑀺 𑀪𑀺𑀢𑁆𑀢𑀺𑀘𑁆𑀙𑁂𑀤𑀸𑀤𑀺𑀯𑀲𑁂𑀦 𑀭𑀢𑀦𑀘𑀺𑀢𑁆𑀭𑀁. 𑀭𑀼𑀓𑁆𑀔𑀢𑀽𑀮𑀮𑀢𑀸𑀢𑀽𑀮𑀧𑁄𑀝𑀓𑀺𑀢𑀽𑀮𑀸𑀦𑀁 𑀯𑀲𑁂𑀦 𑀢𑀺𑀡𑁆𑀡𑀁 𑀢𑀽𑀮𑀸𑀦𑀁. 𑀉𑀤𑁆𑀤𑀮𑁄𑀫𑀺𑀬𑀁 𑀓𑁂𑀘𑀻𑀢𑀺 𑀲𑀸𑀭𑀲𑀫𑀸𑀲𑀸𑀘𑀭𑀺𑀬𑀸 𑀉𑀢𑁆𑀢𑀭𑀯𑀺𑀳𑀸𑀭𑀺𑀦𑁄 𑀘. 𑀢𑀣𑀸 𑀏𑀓𑀦𑁆𑀢𑀮𑁄𑀫𑀺𑀬𑀁. 𑀓𑁄𑀲𑁂𑀬𑁆𑀬𑀓𑀝𑁆𑀝𑀺𑀲𑁆𑀲𑀫𑀬𑀦𑁆𑀢𑀺 𑀓𑁄𑀲𑁂𑀬𑁆𑀬𑀓𑀲𑀝𑀫𑀬𑀁. 𑀅𑀚𑀺𑀦𑀘𑀫𑁆𑀫𑁂𑀳𑀻𑀢𑀺 𑀅𑀚𑀺𑀦𑀫𑀺𑀕𑀘𑀫𑁆𑀫𑁂𑀳𑀺. 𑀢𑀸𑀦𑀺 𑀓𑀺𑀭 𑀘𑀫𑁆𑀫𑀸𑀦𑀺 𑀲𑀼𑀔𑀼𑀫𑀢𑀭𑀸𑀦𑀺. 𑀢𑀲𑁆𑀫𑀸 𑀤𑀼𑀧𑀝𑁆𑀝𑀢𑀺𑀧𑀝𑁆𑀝𑀸𑀦𑀺 𑀓𑀢𑁆𑀯𑀸 𑀲𑀺𑀩𑁆𑀩𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀚𑀺𑀦𑀧𑁆𑀧𑀯𑁂𑀡𑀻’’𑀢𑀺𑀆𑀤𑀺.

𑀦𑀺𑀓𑀸𑀫𑀮𑀸𑀪𑀻𑀢𑀺 𑀬𑀣𑀺𑀘𑁆𑀙𑀺𑀢𑀮𑀸𑀪𑀻. 𑀢𑁂𑀦𑀸𑀳 ‘‘𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀮𑀸𑀪𑀻’’𑀢𑀺. 𑀯𑀺𑀧𑀼𑀮𑀮𑀸𑀪𑀻𑀢𑀺 𑀉𑀴𑀸𑀭𑀮𑀸𑀪𑀻. 𑀓𑀲𑀺𑀭𑀦𑁆𑀢𑀺 𑀳𑀺 𑀧𑀭𑀺𑀢𑁆𑀢𑀁 𑀯𑀼𑀘𑁆𑀘𑀢𑀺, 𑀢𑀧𑁆𑀧𑀝𑀺𑀓𑁆𑀔𑁂𑀧𑁂𑀦 𑀅𑀓𑀲𑀺𑀭𑀁 𑀉𑀴𑀸𑀭𑀁. 𑀢𑁂𑀦𑀸𑀳 ‘‘𑀫𑀳𑀦𑁆𑀢𑀮𑀸𑀪𑀻’’𑀢𑀺𑀆𑀤𑀺.

𑀮𑀤𑁆𑀥𑀸 𑀘 𑀦 𑀓𑀧𑁆𑀧𑀦𑁆𑀢𑀻𑀢𑀺 𑀲𑀸𑀫𑀜𑁆𑀜𑁂𑀦 𑀧𑀝𑀺𑀲𑀺𑀤𑁆𑀥𑀢𑁆𑀢𑀸 𑀲𑀩𑁆𑀩𑀣𑀸 𑀦 𑀓𑀧𑁆𑀧𑀢𑀻𑀢𑀺 𑀓𑀲𑁆𑀲𑀘𑀺 𑀆𑀲𑀗𑁆𑀓𑀸 𑀲𑀺𑀬𑀸, 𑀢𑀦𑁆𑀦𑀺𑀯𑀢𑁆𑀢𑀦𑀢𑁆𑀣𑀁 ‘‘𑀓𑀺𑀜𑁆𑀘𑀺 𑀓𑀺𑀜𑁆𑀘𑀺 𑀓𑀧𑁆𑀧𑀢𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀼𑀤𑁆𑀥𑀓𑁄𑀲𑁂𑀬𑁆𑀬𑀦𑁆𑀢𑀺 𑀭𑀢𑀦𑀧𑀭𑀺𑀲𑀺𑀩𑁆𑀩𑀦𑀭𑀳𑀺𑀢𑀁. 𑀏𑀢𑁆𑀣 𑀘 ‘‘𑀲𑀼𑀤𑁆𑀥𑀓𑁄𑀲𑁂𑀬𑁆𑀬𑀁 𑀧𑀦 𑀯𑀝𑁆𑀝𑀢𑀻’’𑀢𑀺 𑀯𑀺𑀦𑀬𑁂 (𑀫𑀳𑀸𑀯. 𑀅𑀝𑁆𑀞. 𑁨𑁫𑁪) 𑀯𑀼𑀢𑁆𑀢𑀢𑁆𑀢𑀸 𑀇𑀥𑀸𑀧𑀺 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁. 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀁 (𑀤𑀻. 𑀦𑀺. 𑀅𑀝𑁆𑀞. 𑁧.𑁧𑁫) 𑀧𑀦 ‘‘𑀞𑀧𑁂𑀢𑁆𑀯𑀸 𑀢𑀽𑀮𑀺𑀓𑀁 𑀲𑀩𑁆𑀩𑀸𑀦𑁂𑀯 𑀕𑁄𑀦𑀓𑀸𑀤𑀻𑀦𑀺 𑀭𑀢𑀦𑀧𑀭𑀺𑀲𑀺𑀩𑁆𑀩𑀺𑀢𑀸𑀦𑀺 𑀦 𑀯𑀝𑁆𑀝𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀞𑀧𑁂𑀢𑁆𑀯𑀸 𑀢𑀽𑀮𑀺𑀓’’𑀦𑁆𑀢𑀺 𑀏𑀢𑁂𑀦 𑀭𑀢𑀦𑀲𑀺𑀩𑁆𑀩𑀦𑀭𑀳𑀺𑀢𑀸𑀧𑀻 𑀢𑀽𑀮𑀺𑀓𑀸 𑀦 𑀯𑀝𑁆𑀝𑀢𑀻𑀢𑀺 𑀤𑀻𑀧𑁂𑀢𑀺. 𑀯𑀘𑀦𑀢𑁄𑀢𑀺 𑀏𑀢𑁂𑀦 𑀯𑀺𑀦𑀬𑁂 (𑀘𑀽𑀴𑀯. 𑁨𑁯𑁭) 𑀯𑀼𑀢𑁆𑀢𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀏𑀓𑁂𑀦 𑀯𑀺𑀥𑀸𑀦𑁂𑀦𑀸𑀢𑀺 𑀬𑀣𑀸𑀯𑀼𑀢𑁆𑀢𑀫𑁂𑀯 𑀯𑀺𑀥𑀸𑀦𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀪𑀕𑀯𑀢𑀸 ‘‘𑀮𑀤𑁆𑀥𑀸 𑀘 𑀦 𑀓𑀧𑁆𑀧𑀦𑁆𑀢𑀻’’𑀢𑀺 𑀲𑀸𑀫𑀜𑁆𑀜𑁂𑀦 𑀧𑀝𑀺𑀲𑁂𑀥𑁄 𑀓𑀢𑁄𑀢𑀺 𑀆𑀳 ‘‘𑀅𑀓𑀧𑁆𑀧𑀺𑀬𑀁 𑀧𑀦 𑀉𑀧𑀸𑀤𑀸𑀬𑀸’’𑀢𑀺𑀆𑀤𑀺.

𑀧𑀮𑁆𑀮𑀗𑁆𑀓𑀦𑁆𑀢𑀺 𑀏𑀢𑁆𑀣 𑀧𑀭𑀺-𑀲𑀤𑁆𑀤𑁄 𑀲𑀫𑀦𑁆𑀢𑀢𑁄𑀢𑀺 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂 𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀯𑀸𑀫𑀽𑀭𑀼𑀁 𑀤𑀓𑁆𑀔𑀺𑀡𑀽𑀭𑀼𑀜𑁆𑀘 𑀲𑀫𑀁 𑀞𑀧𑁂𑀢𑁆𑀯𑀸 𑀉𑀪𑁄 𑀧𑀸𑀤𑁂 𑀅𑀜𑁆𑀜𑀫𑀜𑁆𑀜𑀲𑀫𑁆𑀩𑀦𑁆𑀥𑁂 𑀓𑀢𑁆𑀯𑀸 𑀦𑀺𑀲𑀚𑁆𑀚𑀸 𑀧𑀮𑁆𑀮𑀗𑁆𑀓𑀦𑁆𑀢𑀺 𑀆𑀳 ‘‘𑀲𑀫𑀦𑁆𑀢𑀢𑁄 𑀊𑀭𑀼𑀩𑀤𑁆𑀥𑀸𑀲𑀦’’𑀦𑁆𑀢𑀺. 𑀊𑀭𑀽𑀦𑀁 𑀩𑀦𑁆𑀥𑀦𑀯𑀲𑁂𑀦 𑀦𑀺𑀲𑀚𑁆𑀚𑀸. 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸𑀢𑀺 𑀘 𑀬𑀣𑀸 𑀧𑀮𑁆𑀮𑀗𑁆𑀓𑀯𑀲𑁂𑀦 𑀦𑀺𑀲𑀚𑁆𑀚𑀸 𑀳𑁄𑀢𑀺, 𑀏𑀯𑀁 𑀉𑀪𑁄 𑀧𑀸𑀤𑁂 𑀆𑀪𑀼𑀚𑁂 𑀲𑀫𑀺𑀜𑁆𑀚𑀺𑀢𑁂 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑀁 𑀧𑀦 𑀉𑀪𑀺𑀦𑁆𑀦𑀁 𑀧𑀸𑀤𑀸𑀦𑀁 𑀢𑀣𑀸 𑀲𑀫𑁆𑀩𑀦𑁆𑀥𑀢𑀸𑀓𑀭𑀡𑀦𑁆𑀢𑀺 𑀆𑀳 ‘‘𑀩𑀦𑁆𑀥𑀺𑀢𑁆𑀯𑀸’’𑀢𑀺. 𑀉𑀚𑀼𑀁 𑀓𑀸𑀬𑀁 𑀧𑀡𑀺𑀥𑀸𑀬𑀸𑀢𑀺 𑀉𑀧𑀭𑀺𑀫𑀁 𑀲𑀭𑀻𑀭𑀁 𑀉𑀚𑀼𑀓𑀁 𑀞𑀧𑁂𑀢𑁆𑀯𑀸 𑀅𑀝𑁆𑀞𑀸𑀭𑀲 𑀧𑀺𑀝𑁆𑀞𑀺𑀓𑀡𑁆𑀝𑀓𑁂 𑀓𑁄𑀝𑀺𑀬𑀸 𑀓𑁄𑀝𑀺𑀁 𑀧𑀝𑀺𑀧𑀸𑀤𑁂𑀢𑁆𑀯𑀸. 𑀏𑀯𑀜𑁆𑀳𑀺 𑀦𑀺𑀲𑀺𑀦𑁆𑀦𑀲𑁆𑀲 𑀘𑀫𑁆𑀫𑀫𑀁𑀲𑀦𑁆𑀳𑀸𑀭𑀽𑀦𑀺 𑀦 𑀧𑀡𑀫𑀦𑁆𑀢𑀺. 𑀅𑀣𑀲𑁆𑀲 𑀬𑀸 𑀢𑁂𑀲𑀁 𑀧𑀡𑀫𑀦𑀧𑀘𑁆𑀘𑀬𑀸 𑀔𑀡𑁂 𑀔𑀡𑁂 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀢𑀸 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀸𑀲𑀼 𑀅𑀦𑀼𑀧𑁆𑀧𑀚𑁆𑀚𑀫𑀸𑀦𑀸𑀲𑀼 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀳𑁄𑀢𑀺, 𑀓𑀫𑁆𑀫𑀝𑁆𑀞𑀸𑀦𑀁 𑀦 𑀧𑀭𑀺𑀧𑀢𑀢𑀺, 𑀯𑀼𑀤𑁆𑀥𑀺𑀁 𑀨𑀸𑀢𑀺𑀁 𑀕𑀘𑁆𑀙𑀢𑀺. 𑀢𑁂𑀦𑀸𑀳 ‘‘𑀅𑀝𑁆𑀞𑀸𑀭𑀲 𑀧𑀺𑀝𑁆𑀞𑀺𑀓𑀡𑁆𑀝𑀓𑁂’’𑀢𑀺𑀆𑀤𑀺. 𑀉𑀚𑀼𑀁 𑀓𑀸𑀬𑀁 𑀞𑀧𑁂𑀢𑁆𑀯𑀸𑀢𑀺 𑀉𑀧𑀭𑀺𑀫𑀁 𑀓𑀸𑀬𑀁 𑀉𑀚𑀼𑀓𑀁 𑀞𑀧𑁂𑀢𑁆𑀯𑀸, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀳𑁂𑀝𑁆𑀞𑀺𑀫𑀓𑀸𑀬𑀲𑁆𑀲 𑀳𑀺 𑀅𑀦𑀼𑀚𑀼𑀓𑀝𑁆𑀞𑀧𑀦𑀁 𑀦𑀺𑀲𑀚𑁆𑀚𑀸𑀯𑀘𑀦𑁂𑀦𑁂𑀯 𑀩𑁄𑀥𑀺𑀢𑀦𑁆𑀢𑀺. 𑀉𑀚𑀼𑀁 𑀓𑀸𑀬𑀦𑁆𑀢𑀺 𑀏𑀢𑁆𑀣 𑀓𑀸𑀬-𑀲𑀤𑁆𑀤𑁄 𑀉𑀧𑀭𑀺𑀫𑀓𑀸𑀬𑀯𑀺𑀲𑀬𑁄.

𑀧𑀭𑀺𑀫𑀼𑀔𑀦𑁆𑀢𑀺 𑀏𑀢𑁆𑀣 𑀧𑀭𑀺-𑀲𑀤𑁆𑀤𑁄 𑀅𑀪𑀺𑀲𑀤𑁆𑀤𑁂𑀦 𑀲𑀫𑀸𑀦𑀢𑁆𑀣𑁄𑀢𑀺 𑀆𑀳 ‘‘𑀓𑀫𑁆𑀫𑀝𑁆𑀞𑀸𑀦𑀸𑀪𑀺𑀫𑀼𑀔’’𑀦𑁆𑀢𑀺, 𑀩𑀳𑀺𑀤𑁆𑀥𑀸 𑀧𑀼𑀣𑀼𑀢𑁆𑀢𑀸𑀭𑀫𑁆𑀫𑀡𑀢𑁄 𑀦𑀺𑀯𑀸𑀭𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁𑀬𑁂𑀯 𑀧𑀼𑀭𑀓𑁆𑀔𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀬𑀣𑀸 ‘‘𑀯𑀦𑀦𑁆𑀢𑀜𑁆𑀜𑁂𑀯 𑀧𑀯𑀺𑀲𑀸𑀫𑀻’’𑀢𑀺𑀆𑀤𑀺𑀦𑀸 𑀪𑀸𑀯𑀦𑀸𑀦𑀼𑀭𑀽𑀧𑀁 𑀲𑁂𑀦𑀸𑀲𑀦𑀁 𑀤𑀲𑁆𑀲𑀺𑀢𑀁, 𑀏𑀯𑀁 ‘‘𑀦𑀺𑀲𑀻𑀤𑀸𑀫𑀻’’𑀢𑀺 𑀇𑀫𑀺𑀦𑀸 𑀅𑀮𑀻𑀦𑀸𑀦𑀼𑀤𑁆𑀥𑀘𑁆𑀘𑀧𑀓𑁆𑀔𑀺𑀬𑁄 𑀲𑀦𑁆𑀢𑁄 𑀇𑀭𑀺𑀬𑀸𑀧𑀣𑁄 𑀤𑀲𑁆𑀲𑀺𑀢𑁄, ‘‘𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀦𑀺𑀲𑀚𑁆𑀚𑀸𑀬 𑀤𑀴𑁆𑀳𑀪𑀸𑀯𑁄, ‘‘𑀧𑀭𑀺𑀫𑀼𑀔𑀁 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀆𑀭𑀫𑁆𑀫𑀡𑀧𑀭𑀺𑀕𑁆𑀕𑀳𑀽𑀧𑀸𑀬𑁄. 𑀧𑀭𑀺𑀕𑁆𑀕𑀳𑀺𑀢𑀦𑀺𑀬𑁆𑀬𑀸𑀦𑀦𑁆𑀢𑀺 𑀲𑀩𑁆𑀩𑀣𑀸 𑀕𑀳𑀺𑀢𑀸𑀲𑀫𑁆𑀫𑁄𑀲𑀁 𑀧𑀭𑀺𑀘𑁆𑀘𑀢𑁆𑀢𑀲𑀫𑁆𑀫𑁄𑀲𑀁 𑀲𑀢𑀺𑀁 𑀓𑀢𑁆𑀯𑀸, 𑀧𑀭𑀫𑀲𑀢𑀺𑀦𑁂𑀧𑀓𑁆𑀓𑀁 𑀉𑀧𑀝𑁆𑀞𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀧𑀭𑀻𑀢𑀺 𑀧𑀭𑀺𑀕𑁆𑀕𑀳𑀝𑁆𑀞𑁄 ‘‘𑀧𑀭𑀺𑀡𑀸𑀬𑀺𑀓𑀸’’𑀢𑀺𑀆𑀤𑀻𑀲𑀼 (𑀥. 𑀲. 𑁧𑁬.𑁨𑁦) 𑀯𑀺𑀬. 𑀫𑀼𑀔𑀦𑁆𑀢𑀺 𑀦𑀺𑀬𑁆𑀬𑀸𑀦𑀝𑁆𑀞𑁄 ‘‘𑀲𑀼𑀜𑁆𑀜𑀢𑀯𑀺𑀫𑁄𑀓𑁆𑀔’’𑀦𑁆𑀢𑀺𑀆𑀤𑀻𑀲𑀼 (𑀧𑀝𑀺. 𑀫. 𑁧.𑁨𑁦𑁯-𑁨𑁧𑁦) 𑀯𑀺𑀬. 𑀧𑀝𑀺𑀧𑀓𑁆𑀔𑀢𑁄 𑀦𑀺𑀕𑁆𑀕𑀫𑀦𑀝𑁆𑀞𑁄 𑀳𑀺 𑀦𑀺𑀬𑁆𑀬𑀸𑀦𑀝𑁆𑀞𑁄.

𑀘𑀢𑁆𑀢𑀸𑀭𑀺 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀺 𑀤𑀺𑀩𑁆𑀩𑀪𑀸𑀯𑀸𑀯𑀳𑀢𑁆𑀢𑀸 𑀤𑀺𑀩𑁆𑀩𑀯𑀺𑀳𑀸𑀭𑀸 𑀦𑀸𑀫 𑀳𑁄𑀦𑁆𑀢𑀻𑀢𑀺 𑀢𑀤𑀸𑀲𑀦𑁆𑀦𑀧𑁆𑀧𑀯𑀢𑁆𑀢𑀘𑀗𑁆𑀓𑀫𑁄𑀧𑀺 𑀢𑀤𑀼𑀧𑀘𑀸𑀭𑀢𑁄 𑀤𑀺𑀩𑁆𑀩𑁄 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀘𑀢𑁆𑀢𑀸𑀭𑀺 𑀳𑀺 𑀭𑀽𑀧𑀚𑁆𑀛𑀸𑀦𑀸𑀦𑀻’’𑀢𑀺𑀆𑀤𑀺. 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀘𑀗𑁆𑀓𑀫𑀦𑁆𑀢𑀲𑁆𑀲𑀸𑀢𑀺 𑀇𑀤𑀜𑁆𑀘 𑀘𑀗𑁆𑀓𑀫𑀦𑁆𑀢𑀲𑁆𑀲 𑀅𑀦𑁆𑀢𑀭𑀦𑁆𑀢𑀭𑀸 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀉𑀝𑁆𑀞𑀸𑀬𑀼𑀝𑁆𑀞𑀸𑀬 𑀘𑀗𑁆𑀓𑀫𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀦 𑀳𑀺 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀅𑀯𑀼𑀝𑁆𑀞𑀺𑀢𑁂𑀦 𑀲𑀓𑁆𑀓𑀸 𑀘𑀗𑁆𑀓𑀫𑀺𑀢𑀼𑀁. 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀘𑀗𑁆𑀓𑀫𑀦𑁆𑀢𑀲𑁆𑀲𑀧𑀺 𑀘𑀗𑁆𑀓𑀫𑁄𑀢𑀺 𑀇𑀤𑀁 𑀧𑀦 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀳𑀺𑀢𑁆𑀯𑀸 𑀅𑀦𑁆𑀢𑀭𑀦𑁆𑀢𑀭𑀸 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀘𑀗𑁆𑀓𑀫𑀦𑁆𑀢𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑀁. 𑀤𑁆𑀯𑀻𑀲𑀼𑀯𑀺𑀳𑀸𑀭𑁂𑀲𑀽𑀢𑀺 𑀩𑁆𑀭𑀳𑁆𑀫𑀯𑀺𑀳𑀸𑀭𑁂, 𑀅𑀭𑀺𑀬𑀯𑀺𑀳𑀸𑀭𑁂 𑀘. 𑀫𑁂𑀢𑁆𑀢𑀸𑀛𑀸𑀦𑀸𑀤𑀬𑁄 𑀳𑀺𑀢𑀽𑀧𑀲𑀁𑀳𑀸𑀭𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀩𑁆𑀭𑀳𑁆𑀫𑀪𑀽𑀢𑀸 𑀲𑁂𑀝𑁆𑀞𑀪𑀽𑀢𑀸 𑀯𑀺𑀳𑀸𑀭𑀸𑀢𑀺 𑀩𑁆𑀭𑀳𑁆𑀫𑀯𑀺𑀳𑀸𑀭𑀸. 𑀅𑀦𑀜𑁆𑀜𑀲𑀸𑀥𑀸𑀭𑀡𑀢𑁆𑀢𑀸 𑀧𑀦 𑀅𑀭𑀺𑀬𑀸𑀦𑀁 𑀯𑀺𑀳𑀸𑀭𑀸𑀢𑀺 𑀅𑀭𑀺𑀬𑀯𑀺𑀳𑀸𑀭𑀸, 𑀘𑀢𑀲𑁆𑀲𑁄𑀧𑀺 𑀨𑀮𑀲𑀫𑀸𑀧𑀢𑁆𑀢𑀺𑀬𑁄. 𑀇𑀥 𑀧𑀦 𑀅𑀭𑀳𑀢𑁆𑀢𑀨𑀮𑀲𑀫𑀸𑀧𑀢𑁆𑀢𑀺𑀬𑁂𑀯 𑀆𑀕𑀢𑀸.

𑀧𑀘𑁆𑀘𑀯𑁂𑀓𑁆𑀔𑀡𑀸𑀬 𑀨𑀮𑀲𑀫𑀸𑀧𑀢𑁆𑀢𑀺 𑀓𑀣𑀺𑀢𑀸 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀺𑀢𑀲𑁆𑀲 𑀧𑀘𑁆𑀘𑀯𑁂𑀓𑁆𑀔𑀡𑀸𑀲𑀫𑁆𑀪𑀯𑀢𑁄. 𑀘𑀗𑁆𑀓𑀫𑀸𑀤𑀬𑁄𑀢𑀺 𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀦𑁆𑀦𑀲𑁆𑀲𑀧𑀺 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀺𑀢𑀲𑁆𑀲𑀧𑀺 𑀘𑀗𑁆𑀓𑀫𑀝𑁆𑀞𑀸𑀦𑀦𑀺𑀲𑀚𑁆𑀚𑀸𑀤𑀬𑁄. 𑀅𑀭𑀺𑀬𑀘𑀗𑁆𑀓𑀫𑀸𑀤𑀬𑁄 𑀳𑁄𑀦𑁆𑀢𑀺 𑀦 𑀧𑀦 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀯𑁂𑀦𑀸𑀕𑀧𑀼𑀭𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀲𑀭𑀪𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁫. 𑀘𑀢𑀼𑀢𑁆𑀣𑁂 𑀕𑀺𑀚𑁆𑀛𑀸 𑀏𑀢𑁆𑀣 𑀲𑀦𑁆𑀢𑀻𑀢𑀺 𑀕𑀺𑀚𑁆𑀛𑀁, 𑀓𑀽𑀝𑀁. 𑀢𑀁 𑀏𑀢𑀲𑁆𑀲𑀸𑀢𑀺 𑀕𑀺𑀚𑁆𑀛𑀓𑀽𑀝𑁄. 𑀕𑀺𑀚𑁆𑀛𑁄 𑀯𑀺𑀬𑀸𑀢𑀺 𑀯𑀸 𑀕𑀺𑀚𑁆𑀛𑀁, 𑀓𑀽𑀝𑀁. 𑀢𑀁 𑀏𑀢𑀲𑁆𑀲𑀸𑀢𑀺 𑀕𑀺𑀚𑁆𑀛𑀓𑀽𑀝𑁄, 𑀧𑀩𑁆𑀩𑀢𑁄. 𑀢𑀲𑁆𑀫𑀺𑀁 𑀕𑀺𑀚𑁆𑀛𑀓𑀽𑀝𑁂. 𑀢𑁂𑀦𑀸𑀳 ‘‘𑀕𑀺𑀚𑁆𑀛𑀸 𑀯𑀸’’𑀢𑀺𑀆𑀤𑀺. 𑀅𑀘𑀺𑀭𑀧𑀓𑁆𑀓𑀦𑁆𑀢𑁄𑀢𑀺 𑀏𑀢𑁆𑀣 𑀦 𑀤𑁂𑀲𑀦𑁆𑀢𑀭𑀧𑀓𑁆𑀓𑀫𑀦𑀁 𑀅𑀥𑀺𑀧𑁆𑀧𑁂𑀢𑀁, 𑀅𑀣 𑀔𑁄 𑀲𑀸𑀲𑀦𑀧𑀓𑁆𑀓𑀫𑀦𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸’’𑀢𑀺𑀆𑀤𑀺𑀫𑀸𑀳, 𑀢𑁂𑀦𑁂𑀯 𑀳𑀺 ‘‘𑀇𑀫𑀲𑁆𑀲𑀸 𑀥𑀫𑁆𑀫𑀯𑀺𑀦𑀬𑀸’’𑀢𑀺 𑀯𑀼𑀢𑁆𑀢𑀁. 𑀮𑀩𑁆𑀪𑀢𑀻𑀢𑀺 𑀮𑀸𑀪𑁄, 𑀘𑀢𑀼𑀦𑁆𑀦𑀁 𑀧𑀘𑁆𑀘𑀬𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀲𑀓𑁆𑀓𑀘𑁆𑀘𑀁 𑀓𑀸𑀢𑀩𑁆𑀩𑁄 𑀤𑀸𑀢𑀩𑁆𑀩𑁄𑀢𑀺 𑀲𑀓𑁆𑀓𑀸𑀭𑁄. 𑀧𑀘𑁆𑀘𑀬𑀸 𑀏𑀯 𑀳𑀺 𑀧𑀡𑀻𑀢𑀧𑀡𑀻𑀢𑀸 𑀲𑀼𑀦𑁆𑀤𑀭𑀲𑀼𑀦𑁆𑀤𑀭𑀸 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀓𑀢𑀸 𑀲𑀓𑁆𑀓𑀸𑀭𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀲𑀓𑁆𑀓𑀸𑀭𑁄𑀢𑀺 𑀯𑀸 𑀲𑀼𑀦𑁆𑀤𑀭𑀓𑀸𑀭𑁄, 𑀧𑀭𑁂𑀳𑀺 𑀅𑀢𑁆𑀢𑀦𑁄 𑀕𑀸𑀭𑀯𑀓𑀺𑀭𑀺𑀬𑀸 𑀧𑀼𑀧𑁆𑀨𑀸𑀤𑀻𑀳𑀺 𑀯𑀸 𑀧𑀽𑀚𑀸. 𑀮𑀸𑀪𑁄 𑀘 𑀲𑀓𑁆𑀓𑀸𑀭𑁄 𑀘 𑀮𑀸𑀪𑀲𑀓𑁆𑀓𑀸𑀭𑀸, 𑀢𑁂 𑀦𑀝𑁆𑀞𑀸 𑀧𑀳𑀻𑀦𑀸 𑀏𑀢𑁂𑀲𑀦𑁆𑀢𑀺 𑀦𑀝𑁆𑀞𑀮𑀸𑀪𑀲𑀓𑁆𑀓𑀸𑀭𑀸.

𑀫𑀳𑀸𑀮𑀸𑀪𑀲𑀓𑁆𑀓𑀸𑀭𑁄 𑀉𑀧𑁆𑀧𑀚𑁆𑀚𑀻𑀢𑀺 𑀢𑀤𑀸 𑀓𑀺𑀭 𑀪𑀕𑀯𑀢𑁄 𑀫𑀳𑀸𑀮𑀸𑀪𑀲𑀓𑁆𑀓𑀸𑀭𑁄 𑀉𑀧𑁆𑀧𑀚𑁆𑀚𑀺 𑀬𑀣𑀸 𑀢𑀁 𑀘𑀢𑁆𑀢𑀸𑀭𑁄 𑀅𑀲𑀗𑁆𑀔𑁂𑀬𑁆𑀬𑁂 𑀧𑀽𑀭𑀺𑀢𑀤𑀸𑀦𑀧𑀸𑀭𑀫𑀺𑀲𑀜𑁆𑀘𑀬𑀲𑁆𑀲. 𑀲𑀩𑁆𑀩𑀤𑀺𑀲𑀸𑀲𑀼 𑀳𑀺 𑀬𑀫𑀓𑀫𑀳𑀸𑀫𑁂𑀖𑁄 𑀯𑀼𑀝𑁆𑀞𑀳𑀺𑀢𑁆𑀯𑀸 𑀫𑀳𑁄𑀖𑁄 𑀯𑀺𑀬 𑀲𑀩𑁆𑀩𑀧𑀸𑀭𑀫𑀺𑀬𑁄 ‘‘𑀏𑀓𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀯𑀺𑀧𑀸𑀓𑀁 𑀤𑀲𑁆𑀲𑀸𑀫𑀸’’𑀢𑀺 𑀲𑀫𑁆𑀧𑀺𑀡𑁆𑀟𑀺𑀢𑀸 𑀯𑀺𑀬 𑀮𑀸𑀪𑀲𑀓𑁆𑀓𑀸𑀭𑀫𑀳𑁄𑀖𑀁 𑀦𑀺𑀩𑁆𑀩𑀢𑁆𑀢𑀬𑀺𑀁𑀲𑀼. 𑀢𑀢𑁄 𑀢𑀢𑁄 𑀅𑀦𑁆𑀦𑀧𑀸𑀦𑀬𑀸𑀦𑀯𑀢𑁆𑀣𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀸𑀤𑀺𑀳𑀢𑁆𑀣𑀸 𑀔𑀢𑁆𑀢𑀺𑀬𑀩𑁆𑀭𑀸𑀳𑁆𑀫𑀡𑀸𑀤𑀬𑁄 𑀆𑀕𑀦𑁆𑀢𑁆𑀯𑀸 ‘‘𑀓𑀳𑀁 𑀩𑀼𑀤𑁆𑀥𑁄, 𑀓𑀳𑀁 𑀪𑀕𑀯𑀸, 𑀓𑀳𑀁 𑀤𑁂𑀯𑀤𑁂𑀯𑁄 𑀦𑀭𑀸𑀲𑀪𑁄 𑀧𑀼𑀭𑀺𑀲𑀲𑀻𑀳𑁄’’𑀢𑀺 𑀪𑀕𑀯𑀦𑁆𑀢𑀁 𑀧𑀭𑀺𑀬𑁂𑀲𑀦𑁆𑀢𑀺, 𑀲𑀓𑀝𑀲𑀢𑁂𑀳𑀺𑀧𑀺 𑀧𑀘𑁆𑀘𑀬𑁂 𑀆𑀳𑀭𑀺𑀢𑁆𑀯𑀸 𑀑𑀓𑀸𑀲𑀁 𑀅𑀮𑀪𑀫𑀸𑀦𑀸 𑀲𑀫𑀦𑁆𑀢𑀸 𑀕𑀸𑀯𑀼𑀢𑀧𑁆𑀧𑀫𑀸𑀡𑀫𑁆𑀧𑀺 𑀲𑀓𑀝𑀥𑀼𑀭𑁂𑀦 𑀲𑀓𑀝𑀥𑀼𑀭𑀁 𑀆𑀳𑀘𑁆𑀘 𑀢𑀺𑀝𑁆𑀞𑀦𑁆𑀢𑀺 𑀘𑁂𑀯 𑀅𑀦𑀼𑀩𑀦𑁆𑀥𑀦𑁆𑀢𑀺 𑀘 𑀅𑀦𑁆𑀥𑀓𑀯𑀺𑀦𑁆𑀤𑀩𑁆𑀭𑀸𑀳𑁆𑀫𑀡𑁄 𑀯𑀺𑀬. 𑀬𑀣𑀸 𑀘 𑀪𑀕𑀯𑀢𑁄, 𑀏𑀯𑀁 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲𑀧𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀲𑀓𑁆𑀓𑀢𑁄 𑀳𑁄𑀢𑀺 𑀕𑀭𑀼𑀓𑀢𑁄 𑀫𑀸𑀦𑀺𑀢𑁄 𑀧𑀽𑀚𑀺𑀢𑁄 𑀅𑀧𑀘𑀺𑀢𑁄 𑀮𑀸𑀪𑀻 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀁, 𑀪𑀺𑀓𑁆𑀔𑀼𑀲𑀗𑁆𑀖𑁄𑀧𑀺 𑀲𑀓𑁆𑀓𑀢𑁄 𑀳𑁄𑀢𑀺…𑀧𑁂… 𑀧𑀭𑀺𑀓𑁆𑀔𑀸𑀭𑀸𑀦’’𑀦𑁆𑀢𑀺 (𑀉𑀤𑀸. 𑁩𑁮).

𑀢𑀣𑀸 𑁋

‘‘𑀬𑀸𑀯𑀢𑀸 𑀔𑁄 𑀧𑀦, 𑀘𑀼𑀦𑁆𑀤, 𑀏𑀢𑀭𑀳𑀺 𑀲𑀗𑁆𑀖𑁄 𑀯𑀸 𑀕𑀡𑁄 𑀯𑀸 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄, 𑀦𑀸𑀳𑀁, 𑀘𑀼𑀦𑁆𑀤, 𑀅𑀜𑁆𑀜𑀁 𑀏𑀓𑀁 𑀲𑀗𑁆𑀖𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺 𑀏𑀯𑀁𑀮𑀸𑀪𑀕𑁆𑀕𑀬𑀲𑀕𑁆𑀕𑀧𑁆𑀧𑀢𑁆𑀢𑀁 𑀬𑀣𑀭𑀺𑀯𑀸𑀬𑀁, 𑀘𑀼𑀦𑁆𑀤, 𑀪𑀺𑀓𑁆𑀔𑀼𑀲𑀗𑁆𑀖𑁄’’𑀢𑀺 (𑀤𑀻. 𑀦𑀺. 𑁩.𑁧𑁭𑁬).

𑀲𑁆𑀯𑀸𑀬𑀁 𑀪𑀕𑀯𑀢𑁄 𑀘 𑀲𑀗𑁆𑀖𑀲𑁆𑀲 𑀘 𑀉𑀧𑁆𑀧𑀦𑁆𑀦𑁄 𑀮𑀸𑀪𑀲𑀓𑁆𑀓𑀸𑀭𑁄 𑀏𑀓𑀢𑁄 𑀳𑀼𑀢𑁆𑀯𑀸 𑀤𑁆𑀯𑀺𑀦𑁆𑀦𑀁 𑀫𑀳𑀸𑀦𑀤𑀻𑀦𑀁 𑀉𑀤𑀓𑀁 𑀯𑀺𑀬 𑀅𑀧𑁆𑀧𑀫𑁂𑀬𑁆𑀬𑁄 𑀅𑀳𑁄𑀲𑀺, 𑀪𑀕𑀯𑀢𑁄 𑀧𑀦 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀉𑀧𑁆𑀧𑀦𑁆𑀦𑁄 𑀮𑀸𑀪𑀲𑀓𑁆𑀓𑀸𑀭𑁄 𑀥𑀫𑁆𑀫𑀲𑁆𑀲𑀧𑀺 𑀉𑀧𑁆𑀧𑀦𑁆𑀦𑁄𑀬𑁂𑀯. 𑀥𑀫𑁆𑀫𑀥𑀭𑀸𑀦𑀜𑁆𑀳𑀺 𑀓𑀢𑁄 𑀲𑀓𑁆𑀓𑀸𑀭𑁄 𑀥𑀫𑁆𑀫𑀲𑁆𑀲 𑀓𑀢𑁄 𑀦𑀸𑀫 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀫𑀳𑀸𑀮𑀸𑀪𑀲𑀓𑁆𑀓𑀸𑀭𑁄 𑀉𑀧𑁆𑀧𑀚𑁆𑀚𑀻’’𑀢𑀺.

𑀯𑀼𑀢𑁆𑀢𑀫𑀢𑁆𑀣𑀁 𑀧𑀸𑀴𑀺𑀬𑀸 𑀦𑀺𑀤𑀲𑁆𑀲𑁂𑀦𑁆𑀢𑁄 ‘‘𑀬𑀣𑀸𑀳𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀓𑁆𑀓𑀢𑁄𑀢𑀺 𑀲𑀓𑁆𑀓𑀸𑀭𑀧𑁆𑀧𑀢𑁆𑀢𑁄. 𑀬𑀲𑁆𑀲 𑀳𑀺 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀲𑀓𑁆𑀓𑀢𑁆𑀯𑀸 𑀲𑀼𑀅𑀪𑀺𑀲𑀗𑁆𑀔𑀢𑁂 𑀧𑀡𑀻𑀢𑀧𑀡𑀻𑀢𑁂 𑀉𑀧𑀦𑁂𑀢𑀺, 𑀲𑁄 𑀲𑀓𑁆𑀓𑀢𑁄. 𑀕𑀭𑀼𑀓𑀢𑁄𑀢𑀺 𑀕𑀭𑀼𑀪𑀸𑀯𑀳𑁂𑀢𑀽𑀦𑀁 𑀉𑀢𑁆𑀢𑀫𑀕𑀼𑀡𑀸𑀦𑀁 𑀫𑀢𑁆𑀣𑀓𑀧𑁆𑀧𑀢𑁆𑀢𑀺𑀬𑀸 𑀅𑀦𑀜𑁆𑀜𑀲𑀸𑀥𑀸𑀭𑀡𑁂𑀦 𑀕𑀭𑀼𑀓𑀸𑀭𑁂𑀦 𑀲𑀩𑁆𑀩𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀧𑀸𑀲𑀸𑀡𑀘𑁆𑀙𑀢𑁆𑀢𑀁 𑀯𑀺𑀬 𑀕𑀭𑀼𑀓𑀢𑁄. 𑀬𑀲𑁆𑀫𑀺𑀜𑁆𑀳𑀺 𑀕𑀭𑀼𑀪𑀸𑀯𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑁆𑀯𑀸 𑀧𑀘𑁆𑀘𑀬𑁂 𑀤𑁂𑀦𑁆𑀢𑀺, 𑀲𑁄 𑀕𑀭𑀼𑀓𑀢𑁄. 𑀫𑀸𑀦𑀺𑀢𑁄𑀢𑀺 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀫𑀸𑀦𑀺𑀢𑁄 𑀫𑀦𑁂𑀦 𑀧𑀺𑀬𑀸𑀬𑀺𑀢𑁄. 𑀢𑀸𑀬 𑀳𑀺 𑀯𑀺𑀜𑁆𑀜𑀽𑀦𑀁 𑀫𑀦𑀸𑀧𑀢𑀸. 𑀧𑀽𑀚𑀺𑀢𑁄𑀢𑀺 𑀫𑀸𑀦𑀦𑀸𑀤𑀺𑀧𑀽𑀚𑀸𑀬 𑀘𑁂𑀯 𑀘𑀢𑀼𑀧𑀘𑁆𑀘𑀬𑀧𑀽𑀚𑀸𑀬 𑀘 𑀧𑀽𑀚𑀺𑀢𑁄. 𑀬𑀲𑁆𑀲 𑀳𑀺 𑀲𑀩𑁆𑀩𑀫𑁂𑀢𑀁 𑀧𑀽𑀚𑀦𑀜𑁆𑀘 𑀓𑀭𑁄𑀦𑁆𑀢𑀺, 𑀲𑁄 𑀧𑀽𑀚𑀺𑀢𑁄. 𑀅𑀧𑀘𑀺𑀢𑁄𑀢𑀺 𑀦𑀻𑀘𑀯𑀼𑀢𑁆𑀢𑀺𑀓𑀭𑀡𑁂𑀦 𑀅𑀧𑀘𑀺𑀢𑁄. 𑀲𑀢𑁆𑀣𑀸𑀭𑀜𑁆𑀳𑀺 𑀤𑀺𑀲𑁆𑀯𑀸 𑀫𑀦𑀼𑀲𑁆𑀲𑀸 𑀳𑀢𑁆𑀣𑀺𑀓𑁆𑀔𑀦𑁆𑀥𑀸𑀤𑀻𑀳𑀺 𑀑𑀢𑀭𑀦𑁆𑀢𑀺, 𑀫𑀕𑁆𑀕𑀁 𑀤𑁂𑀦𑁆𑀢𑀺, 𑀅𑀁𑀲𑀓𑀽𑀝𑀢𑁄 𑀲𑀸𑀝𑀓𑀁 𑀅𑀧𑀦𑁂𑀦𑁆𑀢𑀺. 𑀆𑀲𑀦𑀢𑁄 𑀯𑀼𑀝𑁆𑀞𑀳𑀦𑁆𑀢𑀺, 𑀯𑀦𑁆𑀤𑀦𑁆𑀢𑀻𑀢𑀺 𑀏𑀯𑀁 𑀲𑁄 𑀢𑁂𑀳𑀺 𑀅𑀧𑀘𑀺𑀢𑁄 𑀦𑀸𑀫 𑀳𑁄𑀢𑀺.

𑀅𑀯𑀡𑁆𑀡𑀁 𑀧𑀢𑁆𑀣𑀭𑀺𑀢𑁆𑀯𑀸𑀢𑀺 𑀅𑀯𑀡𑁆𑀡𑀁 𑀢𑀢𑁆𑀣 𑀢𑀢𑁆𑀣 𑀲𑀁𑀓𑀺𑀢𑁆𑀢𑀦𑀯𑀲𑁂𑀦 𑀧𑀢𑁆𑀣𑀭𑀺𑀢𑁆𑀯𑀸. 𑀆𑀯𑀝𑁆𑀝𑀦𑀺𑀫𑀸𑀬𑀦𑁆𑀢𑀺 𑀆𑀯𑀝𑁆𑀝𑁂𑀢𑁆𑀯𑀸 𑀕𑀳𑀡𑀫𑀸𑀬𑀁. 𑀆𑀯𑀝𑁆𑀝𑁂𑀢𑀺 𑀧𑀼𑀭𑀺𑀫𑀸𑀓𑀸𑀭𑀢𑁄 𑀦𑀺𑀯𑀢𑁆𑀢𑁂𑀢𑀺 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑁂𑀢𑀺 𑀏𑀢𑀸𑀬𑀸𑀢𑀺 𑀆𑀯𑀝𑁆𑀝𑀦𑀻, 𑀫𑀸𑀬𑀸, 𑀢𑀁 𑀆𑀯𑀝𑁆𑀝𑀦𑀺𑀫𑀸𑀬𑀁 𑀑𑀲𑀸𑀭𑁂𑀢𑁆𑀯𑀸 𑀧𑀭𑀺𑀚𑀧𑁆𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀓𑁄𑀝𑀺𑀢𑁄 𑀧𑀝𑁆𑀞𑀸𑀬𑀸𑀢𑀺 𑀅𑀦𑁆𑀢𑀺𑀫𑀓𑁄𑀝𑀺𑀢𑁄 𑀧𑀝𑁆𑀞𑀸𑀬. 𑀣𑀤𑁆𑀥𑀓𑀸𑀬𑁂𑀦 𑀨𑀭𑀼𑀲𑀯𑀸𑀘𑀸𑀬 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀅𑀯𑀡𑁆𑀡𑀓𑀣𑀦𑀁 𑀅𑀦𑀢𑁆𑀣𑀸𑀯𑀳𑀢𑁆𑀢𑀸 𑀯𑀺𑀲𑀲𑀺𑀜𑁆𑀘𑀦𑀲𑀤𑀺𑀲𑀸 𑀳𑁄𑀢𑀻𑀢𑀺 𑀆𑀳 ‘‘𑀯𑀺𑀲𑀁 𑀲𑀺𑀜𑁆𑀘𑀺𑀢𑁆𑀯𑀸’’𑀢𑀺. 𑀅𑀜𑁆𑀜𑀸𑀢𑁄𑀢𑀺 𑀆𑀜𑀸𑀢𑁄. 𑀢𑁂𑀦𑀸𑀳 ‘‘𑀜𑀸𑀢𑁄’’𑀢𑀺𑀆𑀤𑀺.

𑀓𑀸𑀬𑀗𑁆𑀕𑀦𑁆𑀢𑀺 𑀓𑀸𑀬𑀫𑁂𑀯 𑀅𑀗𑁆𑀕𑀁, 𑀓𑀸𑀬𑀲𑁆𑀲 𑀯𑀸 𑀅𑀗𑁆𑀕𑀁, 𑀲𑀻𑀲𑀸𑀤𑀺. 𑀯𑀸𑀘𑀗𑁆𑀕𑀦𑁆𑀢𑀺 ‘‘𑀳𑁄𑀢𑀼, 𑀲𑀸𑀥𑀽’’𑀢𑀺 𑀏𑀯𑀫𑀸𑀤𑀺𑀯𑀸𑀘𑀸𑀬 𑀅𑀯𑀬𑀯𑀁. 𑀏𑀓𑀓𑁂𑀦𑀸𑀢𑀺 𑀅𑀲𑀳𑀸𑀬𑁂𑀦. 𑀇𑀫𑀲𑁆𑀲 𑀧𑀦𑀢𑁆𑀣𑀲𑁆𑀲𑀸𑀢𑀺 ‘‘𑀘𑀭𑀺𑀬𑀁 𑀘𑀭𑀡𑀓𑀸𑀮𑁂’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀲𑁆𑀲. 𑀬𑀢𑁄 𑀬𑀢𑁄 𑀕𑀭𑀼 𑀥𑀼𑀭𑀦𑁆𑀢𑀺 𑀬𑀲𑁆𑀫𑀺𑀁 𑀬𑀲𑁆𑀫𑀺𑀁 𑀞𑀸𑀦𑁂 𑀥𑀼𑀭𑀁 𑀕𑀭𑀼 𑀪𑀸𑀭𑀺𑀓𑀁 𑀳𑁄𑀢𑀺, 𑀅𑀜𑁆𑀜𑁂 𑀩𑀮𑀺𑀩𑀤𑁆𑀤𑀸 𑀉𑀓𑁆𑀔𑀺𑀧𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀬𑀢𑁄 𑀕𑀫𑁆𑀪𑀻𑀭𑀯𑀢𑁆𑀢𑀦𑀻𑀢𑀺 𑀯𑀢𑁆𑀢𑀦𑁆𑀢𑀺 𑀏𑀢𑁆𑀣𑀸𑀢𑀺 𑀯𑀢𑁆𑀢𑀦𑀻, 𑀤𑀼𑀫𑁆𑀫𑀕𑁆𑀕𑀲𑁆𑀲𑁂𑀢𑀁 𑀦𑀸𑀫𑀁, 𑀬𑀲𑁆𑀫𑀺𑀁 𑀞𑀸𑀦𑁂 𑀉𑀤𑀓𑀘𑀺𑀓𑁆𑀔𑀮𑁆𑀮𑀫𑀳𑀦𑁆𑀢𑀢𑀸𑀬 𑀯𑀸 𑀯𑀺𑀲𑀫𑀘𑁆𑀙𑀺𑀦𑁆𑀦𑀢𑀝𑀪𑀸𑀯𑁂𑀦 𑀯𑀸 𑀫𑀕𑁆𑀕𑁄 𑀕𑀫𑁆𑀪𑀻𑀭𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀢𑀤𑀸𑀲𑁆𑀲𑀼 𑀓𑀡𑁆𑀳𑀁 𑀬𑀼𑀜𑁆𑀚𑁂𑀦𑁆𑀢𑀻𑀢𑀺 𑀅𑀲𑁆𑀲𑀽𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀢𑀤𑀸 𑀓𑀡𑁆𑀳𑀁 𑀬𑀼𑀜𑁆𑀚𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀬𑀤𑀸 𑀥𑀼𑀭𑀜𑁆𑀘 𑀕𑀭𑀼 𑀳𑁄𑀢𑀺 𑀫𑀕𑁆𑀕𑁄 𑀘 𑀕𑀫𑁆𑀪𑀻𑀭𑁄, 𑀢𑀤𑀸 𑀅𑀜𑁆𑀜𑁂 𑀩𑀮𑀺𑀩𑀤𑁆𑀤𑁂 𑀅𑀧𑀦𑁂𑀢𑁆𑀯𑀸 𑀓𑀡𑁆𑀳𑀫𑁂𑀯 𑀬𑀼𑀜𑁆𑀚𑁂𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁆𑀯𑀸𑀲𑁆𑀲𑀼 𑀢𑀁 𑀯𑀳𑀢𑁂 𑀥𑀼𑀭𑀦𑁆𑀢𑀺 𑀏𑀢𑁆𑀣𑀧𑀺 𑀅𑀲𑁆𑀲𑀽𑀢𑀺 𑀦𑀺𑀧𑀸𑀢𑀫𑀢𑁆𑀢𑀫𑁂𑀯, 𑀲𑁄 𑀢𑀁 𑀥𑀼𑀭𑀁 𑀯𑀳𑀢𑀻𑀢𑀺 𑀅𑀢𑁆𑀣𑁄.

𑀕𑁂𑀳𑀯𑁂𑀢𑀦𑀦𑁆𑀢𑀺 𑀕𑁂𑀳𑁂 𑀦𑀺𑀯𑀼𑀝𑁆𑀞𑀪𑀸𑀯𑀳𑁂𑀢𑀼 𑀤𑀸𑀢𑀩𑁆𑀩𑀁. 𑀓𑀸𑀴𑀓𑁄 𑀦𑀸𑀫 𑀦𑀸𑀫𑁂𑀦𑀸𑀢𑀺 𑀅𑀜𑁆𑀚𑀦𑀯𑀡𑁆𑀡𑁄 𑀓𑀺𑀭𑁂𑀲, 𑀢𑁂𑀦𑀲𑁆𑀲 ‘‘𑀓𑀸𑀴𑀓𑁄’’𑀢𑀺 𑀦𑀸𑀫𑀁 𑀅𑀓𑀁𑀲𑀼. 𑀓𑀸𑀴𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀳𑀸𑀢𑀺 𑀓𑀸𑀴𑀓𑁄 𑀓𑀺𑀭 𑀏𑀓𑀤𑀺𑀯𑀲𑀁 𑀘𑀺𑀦𑁆𑀢𑁂𑀲𑀺 ‘‘𑀫𑀬𑁆𑀳𑀁 𑀫𑀸𑀢𑀸 𑀤𑀼𑀕𑁆𑀕𑀢𑀸 𑀫𑀁 𑀧𑀼𑀢𑁆𑀢𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀤𑀼𑀓𑁆𑀔𑁂𑀦 𑀧𑁄𑀲𑁂𑀢𑀺, 𑀬𑀁𑀦𑀽𑀦𑀸𑀳𑀁 𑀪𑀢𑀺𑀁 𑀓𑀢𑁆𑀯𑀸 𑀇𑀫𑀁 𑀤𑀼𑀕𑁆𑀕𑀢𑀪𑀸𑀯𑀢𑁄 𑀫𑁄𑀘𑁂𑀬𑁆𑀬’’𑀦𑁆𑀢𑀺. 𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀪𑀢𑀺𑀁 𑀉𑀧𑀥𑀸𑀭𑁂𑀦𑁆𑀢𑁄 𑀯𑀺𑀘𑀭𑀢𑀺. 𑀅𑀣 𑀢𑀲𑁆𑀫𑀺𑀁 𑀤𑀺𑀯𑀲𑁂 𑀕𑀸𑀫𑀕𑁄𑀭𑀽𑀧𑁂𑀳𑀺 𑀲𑀤𑁆𑀥𑀺𑀁 𑀢𑀢𑁆𑀣 𑀲𑀫𑀻𑀧𑁂 𑀘𑀭𑀢𑀺. 𑀲𑀢𑁆𑀣𑀯𑀸𑀳𑀧𑀼𑀢𑁆𑀢𑁄𑀧𑀺 𑀕𑁄𑀲𑀼𑀢𑁆𑀢𑀯𑀺𑀢𑁆𑀢𑀓𑁄, 𑀲𑁄 ‘‘𑀅𑀢𑁆𑀣𑀺 𑀦𑀼 𑀔𑁄 𑀏𑀢𑁂𑀲𑀁 𑀕𑀼𑀦𑁆𑀦𑀁 𑀅𑀦𑁆𑀢𑀭𑁂 𑀲𑀓𑀝𑀸𑀦𑀺 𑀉𑀢𑁆𑀢𑀸𑀭𑁂𑀢𑀼𑀁 𑀲𑀫𑀢𑁆𑀣𑁄 𑀉𑀲𑀪𑀸𑀚𑀸𑀦𑀻𑀬𑁄’’𑀢𑀺 𑀉𑀧𑀥𑀸𑀭𑀬𑀫𑀸𑀦𑁄 𑀩𑁄𑀥𑀺𑀲𑀢𑁆𑀢𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀆𑀚𑀸𑀦𑀻𑀬𑁄 𑀲𑀓𑁆𑀔𑀺𑀲𑁆𑀲𑀢𑀺 𑀫𑀬𑁆𑀳𑀁 𑀲𑀓𑀝𑀸𑀦𑀺 𑀉𑀢𑁆𑀢𑀸𑀭𑁂𑀢𑀼’’𑀦𑁆𑀢𑀺 𑀅𑀜𑁆𑀜𑀸𑀲𑀺. 𑀢𑁂𑀦 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀫𑀸𑀳. 𑀲𑁄 𑀅𑀜𑁆𑀜𑁂𑀲𑀁…𑀧𑁂… 𑀕𑁂𑀳𑀫𑁂𑀯 𑀅𑀕𑀫𑀸𑀲𑀻𑀢𑀺 𑀢𑀤𑀸 𑀓𑀺𑀭 𑀕𑀸𑀫𑀤𑀸𑀭𑀓𑀸 ‘‘𑀓𑀺𑀁 𑀦𑀸𑀫𑁂𑀢𑀁 𑀓𑀸𑀴𑀓𑀲𑁆𑀲 𑀕𑀮𑁂’’𑀢𑀺 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀘𑁆𑀙𑀦𑁆𑀢𑀺. 𑀲𑁄 𑀢𑁂 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀤𑀽𑀭𑀢𑁄𑀯 𑀧𑀮𑀸𑀧𑁂𑀦𑁆𑀢𑁄 𑀫𑀸𑀢𑀼 𑀲𑀦𑁆𑀢𑀺𑀓𑀁 𑀕𑀢𑁄. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁.

𑀲𑀸𑀬𑀦𑁆𑀳𑀲𑀫𑀬𑀦𑁆𑀢𑀺 𑀲𑀸𑀬𑀦𑁆𑀳𑀓𑀸𑀮𑁂. 𑀪𑀼𑀫𑁆𑀫𑀢𑁆𑀣𑁂 𑀏𑀢𑀁 𑀉𑀧𑀬𑁄𑀕𑀯𑀘𑀦𑀁. 𑀦 𑀳𑁂𑀢𑁆𑀣 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁄 𑀲𑀫𑁆𑀪𑀯𑀢𑀺. 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄𑀢𑀺 𑀏𑀢𑁆𑀣 𑀢𑁂𑀳𑀺 𑀢𑁂𑀳𑀺 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀅𑀦𑁆𑀢𑁂𑀯𑀸𑀲𑀺𑀓𑀉𑀧𑀸𑀲𑀓𑀉𑀧𑀸𑀲𑀺𑀓𑀸𑀤𑀺𑀲𑀢𑁆𑀢𑁂𑀳𑀺 𑀘𑁂𑀯 𑀭𑀽𑀧𑀸𑀭𑀫𑁆𑀫𑀡𑀸𑀤𑀺𑀲𑀗𑁆𑀔𑀸𑀭𑁂𑀳𑀺 𑀘 𑀧𑀝𑀺𑀦𑀺𑀯𑀢𑁆𑀢𑁂𑀢𑁆𑀯𑀸 𑀅𑀧𑀲𑀓𑁆𑀓𑀺𑀢𑁆𑀯𑀸 𑀦𑀺𑀮𑀻𑀬𑀦𑀁 𑀯𑀺𑀯𑁂𑀘𑀦𑀁 𑀓𑀸𑀬𑀘𑀺𑀢𑁆𑀢𑁂𑀳𑀺 𑀢𑀢𑁄 𑀯𑀺𑀯𑀺𑀢𑁆𑀢𑀢𑀸𑀬 𑀧𑀝𑀺𑀲𑀮𑁆𑀮𑀸𑀦𑀁 𑀓𑀸𑀬𑀯𑀺𑀯𑁂𑀓𑁄, 𑀘𑀺𑀢𑁆𑀢𑀯𑀺𑀯𑁂𑀓𑁄 𑀘. 𑀬𑁄 𑀢𑀢𑁄 𑀤𑀼𑀯𑀺𑀥𑀯𑀺𑀯𑁂𑀓𑀢𑁄 𑀯𑀼𑀝𑁆𑀞𑀺𑀢𑁄 𑀪𑀯𑀗𑁆𑀕𑀧𑁆𑀧𑀢𑁆𑀢𑀺𑀬𑀸 𑀲𑀩𑁆𑀭𑀳𑁆𑀫𑀘𑀸𑀭𑀻𑀳𑀺 𑀲𑀫𑀸𑀕𑀫𑁂𑀦 𑀘 𑀅𑀧𑁂𑀢𑁄. 𑀲𑁄 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀦𑀸𑀫 𑀳𑁄𑀢𑀺. 𑀅𑀬𑀁 𑀧𑀦 𑀬𑀲𑁆𑀫𑀸 𑀧𑀝𑀺𑀲𑀮𑁆𑀮𑀸𑀦𑀸𑀦𑀁 𑀉𑀢𑁆𑀢𑀫𑀢𑁄 𑀨𑀮𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀲𑀺, 𑀢𑀲𑁆𑀫𑀸 ‘‘𑀨𑀮𑀲𑀫𑀸𑀧𑀢𑁆𑀢𑀺𑀢𑁄’’𑀢𑀺 𑀯𑀼𑀢𑁆𑀢𑀁. 𑀓𑀸𑀬𑀲𑀓𑁆𑀔𑀺𑀦𑁄 𑀪𑀯𑀺𑀲𑁆𑀲𑀸𑀫𑀸𑀢𑀺 𑀦𑀸𑀫𑀓𑀸𑀬𑁂𑀦 𑀤𑁂𑀲𑀦𑀸𑀲𑀫𑁆𑀧𑀝𑀺𑀘𑁆𑀙𑀦𑀯𑀲𑁂𑀦 𑀲𑀓𑁆𑀔𑀺𑀪𑀽𑀢𑀸 𑀪𑀯𑀺𑀲𑁆𑀲𑀸𑀫. 𑀦𑀦𑀼 𑀘 ‘‘𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀻’’𑀢𑀺 𑀇𑀤𑀁 𑀓𑀲𑁆𑀫𑀸 𑀯𑀼𑀢𑁆𑀢𑀁. 𑀢𑀺𑀢𑁆𑀣𑀺𑀬𑀸 𑀳𑀺 𑀪𑀕𑀯𑀢𑁄 𑀧𑀝𑀺𑀧𑀓𑁆𑀔𑀸, 𑀢𑁂 𑀓𑀲𑁆𑀫𑀸 𑀢𑀲𑁆𑀲 𑀆𑀲𑀦𑀁 𑀧𑀜𑁆𑀜𑀸𑀧𑁂𑀦𑁆𑀢𑀻𑀢𑀺 𑀆𑀳 ‘‘𑀢𑀣𑀸𑀕𑀢𑁄 𑀳𑀻’’𑀢𑀺𑀆𑀤𑀺.

𑀯𑀺𑀕𑁆𑀕𑀸𑀳𑀺𑀓𑀓𑀣𑀦𑁆𑀢𑀺 𑀯𑀺𑀕𑁆𑀕𑀸𑀳𑀲𑀁𑀯𑀢𑁆𑀢𑀦𑀺𑀓𑀁 𑀲𑀸𑀭𑀫𑁆𑀪𑀓𑀣𑀁. 𑀆𑀬𑀸𑀘𑁂𑀬𑁆𑀬𑀸𑀲𑀻𑀢𑀺 𑀯𑀘𑀻𑀪𑁂𑀤𑀁 𑀓𑀢𑁆𑀯𑀸 𑀬𑀸𑀘𑁂𑀬𑁆𑀬𑀸𑀲𑀺. 𑀧𑀢𑁆𑀣𑁂𑀬𑁆𑀬𑀸𑀲𑀻𑀢𑀺 𑀫𑀦𑀲𑀸 𑀆𑀲𑀻𑀲𑁂𑀬𑁆𑀬𑀸𑀲𑀺. 𑀧𑀺𑀳𑁂𑀬𑁆𑀬𑀸𑀲𑀻𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀦𑀺𑀢𑁆𑀢𑁂𑀚𑀢𑀁 𑀆𑀧𑀦𑁆𑀦𑁄𑀢𑀺 𑀢𑁂𑀚𑀳𑀸𑀦𑀺𑀬𑀸 𑀦𑀺𑀢𑁆𑀢𑁂𑀚𑀪𑀸𑀯𑀁 𑀆𑀧𑀦𑁆𑀦𑁄, 𑀦𑀺𑀢𑁆𑀢𑁂𑀚𑀪𑀽𑀢𑁄𑀢𑀺 𑀅𑀢𑁆𑀣𑁄. 𑀢𑀢𑁄 𑀏𑀯 𑀪𑀺𑀓𑁆𑀔𑀼𑀆𑀤𑀬𑁄𑀧𑀺 𑀲𑀫𑁆𑀫𑀼𑀔𑀸 𑀑𑀮𑁄𑀓𑁂𑀢𑀼𑀁 𑀅𑀲𑀫𑀢𑁆𑀣𑀢𑀸𑀬 𑀧𑀢𑁆𑀢𑀓𑁆𑀔𑀦𑁆𑀥𑁄, 𑀧𑀢𑀺𑀢𑀓𑁆𑀔𑀦𑁆𑀥𑁄𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀑𑀦𑀢𑀕𑀻𑀯𑁄’’𑀢𑀺. 𑀤𑀲𑁆𑀲𑀺𑀢𑀥𑀫𑁆𑀫𑁂𑀲𑀽𑀢𑀺 𑀯𑀼𑀢𑁆𑀢𑀥𑀫𑁆𑀫𑁂𑀲𑀼. 𑀯𑀘𑀦𑀫𑀢𑁆𑀢𑀫𑁂𑀯 𑀳𑀺 𑀢𑁂𑀲𑀁, 𑀦 𑀧𑀦 𑀤𑀲𑁆𑀲𑀦𑀁 𑀢𑀸𑀤𑀺𑀲𑀲𑁆𑀲𑁂𑀯 𑀥𑀫𑁆𑀫𑀲𑁆𑀲 𑀅𑀪𑀸𑀯𑀢𑁄. 𑀪𑀕𑀯𑀢𑁄 𑀏𑀯 𑀯𑀸 ‘‘𑀇𑀫𑁂 𑀥𑀫𑁆𑀫𑀸 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀸’’𑀢𑀺 𑀧𑀭𑀲𑁆𑀲 𑀯𑀘𑀦𑀯𑀲𑁂𑀦 𑀤𑀲𑁆𑀲𑀺𑀢𑀥𑀫𑁆𑀫𑁂𑀲𑀼. 𑀧𑀝𑀺𑀘𑀭𑀺𑀲𑁆𑀲𑀢𑀻𑀢𑀺 𑀧𑀝𑀺𑀘𑁆𑀙𑀸𑀤𑀦𑀯𑀲𑁂 𑀘𑀭𑀺𑀲𑁆𑀲𑀢𑀺 𑀧𑀯𑀢𑁆𑀢𑀺𑀲𑁆𑀲𑀢𑀺, 𑀧𑀝𑀺𑀘𑁆𑀙𑀸𑀤𑀦𑀢𑁆𑀣𑁄 𑀏𑀯 𑀯𑀸 𑀘𑀭𑀢𑀺-𑀲𑀤𑁆𑀤𑁄 𑀅𑀦𑁂𑀓𑀢𑁆𑀣𑀢𑁆𑀢𑀸 𑀥𑀸𑀢𑀽𑀦𑀦𑁆𑀢𑀺 𑀆𑀳 ‘‘𑀧𑀝𑀺𑀘𑁆𑀙𑀸𑀤𑁂𑀲𑁆𑀲𑀢𑀻’’𑀢𑀺. 𑀅𑀜𑁆𑀜𑁂𑀦 𑀯𑀸 𑀅𑀜𑁆𑀜𑀦𑁆𑀢𑀺 𑀧𑀦 𑀧𑀝𑀺𑀘𑁆𑀙𑀸𑀤𑀦𑀸𑀓𑀸𑀭𑀤𑀲𑁆𑀲𑀦𑀦𑁆𑀢𑀺 𑀆𑀳 ‘‘𑀅𑀜𑁆𑀜𑁂𑀦 𑀯𑀸 𑀯𑀘𑀦𑁂𑀦𑀸’’𑀢𑀺𑀆𑀤𑀺.

𑀢𑀢𑁆𑀣 𑀅𑀜𑁆𑀜𑀁 𑀯𑀘𑀦𑀦𑁆𑀢𑀺 𑀬𑀁 𑀲𑀫𑀦𑀼𑀬𑀼𑀜𑁆𑀚𑀦𑁆𑀢𑁂𑀦 𑀪𑀕𑀯𑀢𑀸 𑀧𑀭𑀲𑁆𑀲 𑀤𑁄𑀲𑀯𑀺𑀪𑀸𑀯𑀦𑀁 𑀯𑀘𑀦𑀁 𑀯𑀼𑀢𑁆𑀢𑀁, 𑀢𑀁 𑀢𑀢𑁄 𑀅𑀜𑁆𑀜𑁂𑀦𑁂𑀯 𑀯𑀘𑀦𑁂𑀦 𑀧𑀝𑀺𑀘𑁆𑀙𑀸𑀤𑁂𑀢𑀺. ‘‘𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄𑀲𑀻’’𑀢𑀺 𑀘𑁄𑀤𑀓𑁂𑀦 𑀯𑀼𑀢𑁆𑀢𑀯𑀘𑀦𑀁 𑀯𑀺𑀬 ‘‘𑀓𑁄 𑀆𑀧𑀦𑁆𑀦𑁄, 𑀓𑀺𑀁 𑀆𑀧𑀦𑁆𑀦𑁄, 𑀓𑀺𑀲𑁆𑀫𑀺𑀁 𑀆𑀧𑀦𑁆𑀦𑁄, 𑀓𑀁 𑀪𑀡𑀣, 𑀓𑀺𑀁 𑀪𑀡𑀣𑀸’’𑀢𑀺𑀆𑀤𑀺𑀯𑀘𑀦𑁂𑀦 𑀅𑀜𑁆𑀜𑀁 𑀆𑀕𑀦𑁆𑀢𑀼𑀓𑀓𑀣𑀁 𑀆𑀳𑀭𑀦𑁆𑀢𑁄 ‘‘𑀢𑁆𑀯𑀁 𑀇𑀢𑁆𑀣𑀦𑁆𑀦𑀸𑀫𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄𑀲𑀻’’𑀢𑀺 𑀧𑀼𑀝𑁆𑀞𑁄 ‘‘𑀧𑀸𑀝𑀮𑀺𑀧𑀼𑀢𑁆𑀢𑀁 𑀕𑀢𑁄𑀫𑁆𑀳𑀻’’𑀢𑀺 𑀯𑀢𑁆𑀯𑀸 𑀧𑀼𑀦 ‘‘𑀦 𑀢𑀯 𑀧𑀸𑀝𑀮𑀺𑀧𑀼𑀢𑁆𑀢𑀕𑀫𑀦𑀁 𑀧𑀼𑀘𑁆𑀙𑀸𑀫, 𑀆𑀧𑀢𑁆𑀢𑀺𑀁 𑀧𑀼𑀘𑁆𑀙𑀸𑀫𑀸’’𑀢𑀺 𑀯𑀼𑀢𑁆𑀢𑁂 𑀢𑀢𑁄 𑀭𑀸𑀚𑀕𑀳𑀁 𑀕𑀢𑁄𑀫𑁆𑀳𑀺. 𑀭𑀸𑀚𑀕𑀳𑀁 𑀯𑀸 𑀬𑀸𑀳𑀺 𑀩𑁆𑀭𑀸𑀳𑁆𑀫𑀡𑀕𑁂𑀳𑀁 𑀯𑀸, 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄𑀲𑀻𑀢𑀺. ‘‘𑀢𑀢𑁆𑀣 𑀫𑁂 𑀲𑀽𑀓𑀭𑀫𑀁𑀲𑀁 𑀮𑀤𑁆𑀥’’𑀦𑁆𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑁄 𑀯𑀺𑀬 𑀲𑀫𑀦𑀼𑀬𑀼𑀜𑁆𑀚𑀓𑁂𑀦 𑀯𑀼𑀢𑁆𑀢𑀯𑀘𑀦𑀢𑁄 𑀅𑀜𑁆𑀜𑀁 𑀆𑀕𑀦𑁆𑀢𑀼𑀓𑀓𑀣𑀁 𑀆𑀳𑀭𑀦𑁆𑀢𑁄 𑀅𑀧𑀦𑀸𑀫𑁂𑀲𑁆𑀲𑀢𑀺, 𑀯𑀺𑀓𑁆𑀔𑁂𑀧𑀁 𑀕𑀫𑀬𑀺𑀲𑁆𑀲𑀢𑀺. 𑀅𑀧𑁆𑀧𑀢𑀻𑀢𑀸 𑀳𑁄𑀦𑁆𑀢𑀺 𑀢𑁂𑀦 𑀅𑀢𑀼𑀝𑁆𑀞𑀸 𑀅𑀲𑁄𑀫𑀦𑀲𑁆𑀲𑀺𑀓𑀸𑀢𑀺 𑀅𑀧𑀘𑁆𑀘𑀬𑁄, 𑀤𑁄𑀫𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀦𑁂𑀯 𑀅𑀢𑁆𑀢𑀦𑁄, 𑀦 𑀧𑀭𑁂𑀲𑀁 𑀳𑀺𑀢𑀁 𑀅𑀪𑀺𑀭𑀸𑀥𑀬𑀢𑀻𑀢𑀺 𑀅𑀦𑀪𑀺𑀭𑀤𑁆𑀥𑀺, 𑀤𑁄𑀫𑀦𑀲𑁆𑀲𑀫𑁂𑀯. 𑀢𑁂𑀦𑁂𑀯𑀸𑀳 ‘‘𑀅𑀧𑀘𑁆𑀘𑀬𑁂𑀦 𑀤𑁄𑀫𑀦𑀲𑁆𑀲𑀁 𑀯𑀼𑀢𑁆𑀢’’𑀦𑁆𑀢𑀺.

𑀬𑀲𑁆𑀲 𑀔𑁄 𑀧𑀦 𑀢𑁂 𑀅𑀢𑁆𑀣𑀸𑀬 𑀥𑀫𑁆𑀫𑁄 𑀤𑁂𑀲𑀺𑀢𑁄𑀢𑀺 𑀏𑀢𑁆𑀣 𑀥𑀫𑁆𑀫-𑀲𑀤𑁆𑀤𑁂𑀦 𑀘𑀢𑀼𑀲𑀘𑁆𑀘𑀥𑀫𑁆𑀫𑁄 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀬𑀲𑁆𑀲 𑀫𑀕𑁆𑀕𑀲𑁆𑀲 𑀯𑀸 𑀨𑀮𑀲𑁆𑀲 𑀯𑀸 𑀅𑀢𑁆𑀣𑀸𑀬𑀸’’𑀢𑀺. 𑀘𑀢𑀼𑀲𑀘𑁆𑀘𑀥𑀫𑁆𑀫𑁄 𑀳𑀺 𑀫𑀕𑁆𑀕𑀨𑀮𑀸𑀥𑀺𑀕𑀫𑀢𑁆𑀣𑀸𑀬 𑀤𑁂𑀲𑀻𑀬𑀢𑀺. 𑀦 𑀦𑀺𑀕𑁆𑀕𑀘𑁆𑀙𑀢𑀻𑀢𑀺 𑀦 𑀧𑀯𑀢𑁆𑀢𑁂𑀢𑀺. 𑀦𑀦𑁆𑀢𑀺 𑀦𑀁 𑀥𑀫𑁆𑀫𑀁. 𑀇𑀤𑀸𑀦𑀺 ‘‘𑀬𑀲𑁆𑀲 𑀔𑁄 𑀧𑀦 𑀢𑁂 𑀅𑀢𑁆𑀣𑀸𑀬 𑀥𑀫𑁆𑀫𑁄 𑀤𑁂𑀲𑀺𑀢𑁄’’𑀢𑀺 𑀏𑀢𑁆𑀣 𑀥𑀫𑁆𑀫-𑀲𑀤𑁆𑀤𑁂𑀦 𑀧𑀝𑀺𑀧𑀢𑁆𑀢𑀺𑀥𑀫𑁆𑀫𑁄 𑀤𑀲𑁆𑀲𑀺𑀢𑁄, 𑀦 𑀧𑀦 𑀘𑀢𑀼𑀲𑀘𑁆𑀘𑀥𑀫𑁆𑀫𑁄𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀅𑀢𑁆𑀣𑀯𑀺𑀓𑀧𑁆𑀧𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀣 𑀯𑀸’’𑀢𑀺𑀆𑀤𑀺𑀫𑀸𑀳. 𑀧𑀜𑁆𑀘 𑀥𑀫𑁆𑀫𑀸𑀢𑀺 𑀕𑀫𑁆𑀪𑀻𑀭𑀜𑀸𑀡𑀘𑀭𑀺𑀬𑀪𑀽𑀢𑀸𑀦𑀁 𑀔𑀦𑁆𑀥𑀸𑀤𑀻𑀦𑀁 𑀉𑀕𑁆𑀕𑀳𑀲𑀯𑀦𑀥𑀸𑀭𑀡𑀧𑀭𑀺𑀘𑀬𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂 𑀲𑀦𑁆𑀥𑀸𑀬𑀸𑀳. 𑀢𑀓𑁆𑀓𑀭𑀲𑁆𑀲 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀸𑀬𑀸𑀢𑀺 𑀏𑀢𑁆𑀣 𑀲𑀫𑁆𑀫𑀸𑀲𑀤𑁆𑀤𑁄 𑀉𑀪𑀬𑀢𑁆𑀣𑀸𑀧𑀺 𑀬𑁄𑀚𑁂𑀢𑀩𑁆𑀩𑁄 ‘‘𑀲𑀫𑁆𑀫𑀸 𑀢𑀓𑁆𑀓𑀭𑀲𑁆𑀲 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀸𑀬𑀸’’𑀢𑀺. 𑀬𑁄 𑀳𑀺 𑀲𑀫𑁆𑀫𑀸 𑀥𑀫𑁆𑀫𑀁 𑀧𑀝𑀺𑀧𑀚𑁆𑀚𑀢𑀺, 𑀢𑀲𑁆𑀲𑁂𑀯 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑁄 𑀳𑁄𑀢𑀻𑀢𑀺. 𑀬𑁄 𑀧𑀦 𑀯𑀼𑀢𑁆𑀢𑀦𑀬𑁂𑀦 𑀢𑀓𑁆𑀓𑀭𑁄, 𑀢𑀲𑁆𑀲 𑀦𑀺𑀬𑁆𑀬𑀸𑀦𑀁 𑀅𑀢𑁆𑀣𑀢𑁄 𑀥𑀫𑁆𑀫𑀲𑁆𑀲𑁂𑀯 𑀦𑀺𑀬𑁆𑀬𑀸𑀦𑀦𑁆𑀢𑀺 𑀢𑀧𑁆𑀧𑀝𑀺𑀓𑁆𑀔𑁂𑀧𑁂𑀦 ‘‘𑀲𑁄 𑀥𑀫𑁆𑀫𑁄…𑀧𑁂… 𑀦 𑀦𑀺𑀬𑁆𑀬𑀸𑀢𑀺 𑀦 𑀦𑀺𑀕𑁆𑀕𑀘𑁆𑀙𑀢𑀻’’𑀢𑀺 𑀆𑀳.

𑀬𑀤𑀺 𑀢𑀺𑀭𑀘𑁆𑀙𑀸𑀦𑀲𑀻𑀳𑀲𑁆𑀲 𑀦𑀸𑀤𑁄 𑀲𑀩𑁆𑀩𑀢𑀺𑀭𑀘𑁆𑀙𑀸𑀦𑀏𑀓𑀘𑁆𑀘𑀫𑀦𑀼𑀲𑁆𑀲𑀸𑀫𑀦𑀼𑀲𑁆𑀲𑀦𑀸𑀤𑀢𑁄 𑀲𑁂𑀝𑁆𑀞𑀢𑁆𑀢𑀸 𑀲𑁂𑀝𑁆𑀞𑀦𑀸𑀤𑁄, 𑀓𑀺𑀫𑀗𑁆𑀕𑀁 𑀧𑀦 𑀢𑀣𑀸𑀕𑀢𑀲𑀻𑀳𑀲𑁆𑀲 𑀦𑀸𑀤𑁄𑀢𑀺 𑀆𑀳 ‘‘𑀲𑀻𑀳𑀦𑀸𑀤𑀦𑁆𑀢𑀺 𑀲𑁂𑀝𑁆𑀞𑀦𑀸𑀤’’𑀦𑁆𑀢𑀺. 𑀬𑀤𑀺 𑀯𑀸 𑀢𑀺𑀭𑀘𑁆𑀙𑀸𑀦𑀲𑀻𑀳𑀦𑀸𑀤𑀲𑁆𑀲 𑀲𑁂𑀝𑁆𑀞𑀦𑀸𑀤𑀢𑀸 𑀦𑀺𑀩𑁆𑀪𑀬𑀢𑀸𑀬 𑀅𑀧𑁆𑀧𑀝𑀺𑀲𑀢𑁆𑀢𑀼𑀢𑀸𑀬 𑀇𑀘𑁆𑀙𑀺𑀢𑀸, 𑀢𑀣𑀸𑀕𑀢𑀲𑀻𑀳𑀦𑀸𑀤𑀲𑁆𑀲𑁂𑀯 𑀅𑀬𑀫𑀢𑁆𑀣𑁄 𑀲𑀸𑀢𑀺𑀲𑀬𑁄𑀢𑀺 𑀆𑀳 ‘‘𑀅𑀪𑀻𑀢𑀦𑀸𑀤𑀁 𑀅𑀧𑁆𑀧𑀝𑀺𑀦𑀸𑀤’’𑀦𑁆𑀢𑀺. ‘‘𑀅𑀝𑁆𑀞𑀸𑀦𑀫𑁂𑀢𑀁 𑀅𑀦𑀯𑀓𑀸𑀲𑁄’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁩.𑁧𑁨𑁯; 𑀅. 𑀦𑀺. 𑁧.𑁨𑁬𑁮-𑁨𑁭𑁧) 𑀳𑀺 𑀬𑁄 𑀅𑀢𑁆𑀣𑁄 𑀯𑀼𑀢𑁆𑀢𑁄, 𑀢𑀲𑁆𑀲 𑀪𑀽𑀢𑀢𑀸𑀬 𑀅𑀬𑀁 𑀦𑀸𑀤𑁄 𑀲𑁂𑀝𑁆𑀞𑀦𑀸𑀤𑁄 𑀦𑀸𑀫 𑀳𑁄𑀢𑀺 𑀉𑀢𑁆𑀢𑀫𑀦𑀸𑀤𑁄. 𑀪𑀽𑀢𑀢𑁆𑀣𑁄 𑀳𑀺 𑀉𑀢𑁆𑀢𑀫𑀢𑁆𑀣𑁄𑀢𑀺. 𑀇𑀫𑀫𑀢𑁆𑀣𑀁 𑀧𑀦 𑀯𑀤𑀦𑁆𑀢𑀲𑁆𑀲 𑀪𑀕𑀯𑀢𑁄 𑀅𑀜𑁆𑀜𑀢𑁄 𑀪𑀬𑀁 𑀯𑀸 𑀆𑀲𑀗𑁆𑀓𑀸 𑀯𑀸 𑀦𑀢𑁆𑀣𑀻𑀢𑀺 𑀅𑀪𑀻𑀢𑀦𑀸𑀤𑁄 𑀦𑀸𑀫 𑀳𑁄𑀢𑀺. 𑀅𑀪𑀽𑀢𑀜𑁆𑀳𑀺 𑀯𑀤𑀢𑁄 𑀓𑀼𑀢𑁄𑀘𑀺 𑀪𑀬𑀁 𑀯𑀸 𑀆𑀲𑀗𑁆𑀓𑀸 𑀯𑀸 𑀲𑀺𑀬𑀸, 𑀏𑀯𑀁 𑀧𑀦 𑀯𑀤𑀦𑁆𑀢𑀁 𑀪𑀕𑀯𑀦𑁆𑀢𑀁 𑀓𑁄𑀘𑀺 𑀉𑀝𑁆𑀞𑀳𑀺𑀢𑁆𑀯𑀸 𑀧𑀝𑀺𑀩𑀸𑀳𑀺𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀅𑀬𑀁 𑀦𑀸𑀤𑁄 𑀅𑀧𑁆𑀧𑀝𑀺𑀦𑀸𑀤𑁄 𑀦𑀸𑀫 𑀳𑁄𑀢𑀺.

𑀲𑀫𑀦𑁆𑀢𑀢𑁄 𑀦𑀺𑀕𑁆𑀕𑀡𑁆𑀳𑀦𑀯𑀲𑁂𑀦 𑀢𑁄𑀤𑀦𑀁 𑀯𑀺𑀚𑁆𑀛𑀦𑀁 𑀲𑀦𑁆𑀦𑀺𑀢𑁄𑀤𑀓𑀁, 𑀲𑀫𑁆𑀫𑀸 𑀯𑀸 𑀦𑀺𑀢𑀼𑀤𑀦𑁆𑀢𑀺 𑀧𑀻𑀴𑁂𑀦𑁆𑀢𑀺 𑀏𑀢𑁂𑀦𑀸𑀢𑀺 𑀲𑀦𑁆𑀦𑀺𑀢𑁄𑀤𑀓𑀁. 𑀯𑀸𑀘𑀸𑀬𑀸𑀢𑀺 𑀘 𑀧𑀘𑁆𑀘𑀢𑁆𑀢𑁂 𑀓𑀭𑀡𑀯𑀘𑀦𑀁. 𑀢𑁂𑀦𑀸𑀳 ‘‘𑀯𑀘𑀦𑀧𑀢𑁄𑀤𑁂𑀦𑀸’’𑀢𑀺. 𑀲𑀜𑁆𑀚𑀫𑁆𑀪𑀭𑀺𑀫𑀓𑀁𑀲𑀽𑀢𑀺 𑀲𑀫𑀦𑁆𑀢𑀢𑁄 𑀲𑀫𑁆𑀪𑀭𑀺𑀢𑀁 𑀅𑀓𑀁𑀲𑀼, 𑀲𑀩𑁆𑀩𑁂 𑀧𑀭𑀺𑀩𑁆𑀩𑀸𑀚𑀓𑀸 𑀯𑀸𑀘𑀸𑀢𑁄𑀤𑀦𑁂𑀳𑀺 𑀢𑀼𑀤𑀺𑀁𑀲𑀽𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀲𑀫𑁆𑀪𑀭𑀺𑀢𑀁…𑀧𑁂… 𑀯𑀺𑀚𑁆𑀛𑀺𑀁𑀲𑀽’’𑀢𑀺. 𑀲𑀺𑀗𑁆𑀕𑀸𑀮𑀓𑀁𑀬𑁂𑀯𑀸𑀢𑀺 𑀲𑀺𑀗𑁆𑀕𑀸𑀮𑀫𑁂𑀯, ‘‘𑀲𑁂𑀕𑀸𑀮𑀓𑀁𑀬𑁂𑀯𑀸’’𑀢𑀺𑀧𑀺 𑀧𑀸𑀞𑁄. 𑀢𑀲𑁆𑀲𑁂𑀯𑀸𑀢𑀺 𑀲𑀺𑀗𑁆𑀕𑀸𑀮𑀭𑀯𑀲𑁆𑀲𑁂𑀯. 𑀅𑀣 𑀯𑀸 𑀪𑁂𑀭𑀡𑁆𑀟𑀓𑀁𑀬𑁂𑀯𑀸𑀢𑀺 𑀪𑁂𑀤𑀡𑁆𑀟𑀲𑀓𑀼𑀡𑀺𑀲𑀤𑀺𑀲𑀁𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀪𑁂𑀤𑀡𑁆𑀟𑀁 𑀦𑀸𑀫 𑀏𑀓𑁄 𑀧𑀓𑁆𑀔𑀻 𑀤𑁆𑀯𑀺𑀫𑀼𑀔𑁄, 𑀢𑀲𑁆𑀲 𑀓𑀺𑀭 𑀲𑀤𑁆𑀤𑁄 𑀅𑀢𑀺𑀯𑀺𑀬 𑀯𑀺𑀭𑀽𑀧𑁄 𑀅𑀫𑀦𑀸𑀧𑁄. 𑀢𑁂𑀦𑀸𑀳 ‘‘𑀅𑀧𑀺𑀘 𑀪𑀺𑀦𑁆𑀦𑀲𑁆𑀲𑀭𑀁 𑀅𑀫𑀦𑀸𑀧𑀲𑀤𑁆𑀤𑀁 𑀦𑀤𑀢𑀻’’𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑀲𑀭𑀪𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀓𑁂𑀲𑀫𑀼𑀢𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁬. 𑀧𑀜𑁆𑀘𑀫𑁂 𑀓𑁂𑀲𑀫𑀼𑀢𑁆𑀢𑀁 𑀦𑀺𑀯𑀸𑀲𑁄 𑀏𑀢𑁂𑀲𑀦𑁆𑀢𑀺 𑀓𑁂𑀲𑀫𑀼𑀢𑁆𑀢𑀺𑀬𑀸𑀢𑀺 𑀆𑀳 ‘‘𑀓𑁂𑀲𑀫𑀼𑀢𑁆𑀢𑀦𑀺𑀕𑀫𑀯𑀸𑀲𑀺𑀦𑁄’’𑀢𑀺. 𑀅𑀝𑁆𑀞𑀯𑀺𑀥𑀧𑀸𑀦𑀓𑀸𑀦𑀻𑀢𑀺 𑀅𑀫𑁆𑀩𑀧𑀸𑀦𑀸𑀤𑀺𑀅𑀝𑁆𑀞𑀯𑀺𑀥𑀸𑀦𑀺 𑀧𑀸𑀦𑀸𑀦𑀺.

‘‘𑀫𑀸 𑀅𑀦𑀼𑀲𑁆𑀲𑀯𑁂𑀦𑀸’’𑀢𑀺𑀆𑀤𑀻𑀲𑀼 𑀧𑀦 𑀏𑀓𑁄 𑀤𑀳𑀭𑀓𑀸𑀮𑀢𑁄 𑀧𑀝𑁆𑀞𑀸𑀬 𑀏𑀯𑀁 𑀅𑀦𑀼𑀲𑁆𑀲𑀯𑁄 𑀅𑀢𑁆𑀣𑀺, 𑀏𑀯𑀁 𑀘𑀺𑀭𑀓𑀸𑀮𑀓𑀢𑀸𑀬 𑀅𑀦𑀼𑀲𑁆𑀲𑀼𑀢𑀺𑀬𑀸 𑀮𑀩𑁆𑀪𑀫𑀸𑀦𑀁 𑀓𑀣𑀫𑀺𑀤𑀁 𑀅𑀜𑁆𑀜𑀣𑀸 𑀲𑀺𑀬𑀸, 𑀢𑀲𑁆𑀫𑀸 𑀪𑀽𑀢𑀫𑁂𑀢𑀦𑁆𑀢𑀺 𑀅𑀦𑀼𑀲𑁆𑀲𑀯𑁂𑀦 𑀕𑀡𑁆𑀳𑀸𑀢𑀺, 𑀢𑀣𑀸 𑀕𑀳𑀡𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 ‘‘𑀫𑀸 𑀅𑀦𑀼𑀲𑁆𑀲𑀯𑁂𑀦𑀸’’𑀢𑀺 𑀆𑀳. 𑀅𑀦𑀼 𑀅𑀦𑀼 𑀲𑀯𑀦𑀁 𑀅𑀦𑀼𑀲𑁆𑀲𑀯𑁄. 𑀅𑀧𑀭𑁄 ‘‘𑀅𑀫𑁆𑀳𑀸𑀓𑀁 𑀧𑀺𑀢𑀼𑀧𑀺𑀢𑀸𑀫𑀳𑀸𑀤𑀺𑀯𑀼𑀤𑁆𑀥𑀸𑀦𑀁 𑀉𑀧𑀤𑁂𑀲𑀧𑀭𑀫𑁆𑀧𑀭𑀸𑀬 𑀇𑀤𑀫𑀸𑀪𑀢𑀁, 𑀏𑀯𑀁 𑀧𑀭𑀫𑁆𑀧𑀭𑀸𑀪𑀢𑀓𑀣𑀁 𑀦𑀸𑀫 𑀦 𑀅𑀜𑁆𑀜𑀣𑀸 𑀲𑀺𑀬𑀸, 𑀢𑀲𑁆𑀫𑀸 𑀪𑀽𑀢𑀫𑁂𑀢’’𑀦𑁆𑀢𑀺 𑀕𑀡𑁆𑀳𑀸𑀢𑀺, 𑀢𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 ‘‘𑀫𑀸 𑀧𑀭𑀫𑁆𑀧𑀭𑀸𑀬𑀸’’𑀢𑀺 𑀆𑀳. 𑀏𑀓𑁄 𑀓𑁂𑀦𑀘𑀺 𑀓𑀺𑀲𑁆𑀫𑀺𑀜𑁆𑀘𑀺 𑀯𑀼𑀢𑁆𑀢𑀫𑀢𑁆𑀢𑁂 ‘‘𑀏𑀯𑀁 𑀓𑀺𑀭 𑀏𑀢’’𑀦𑁆𑀢𑀺 𑀕𑀡𑁆𑀳𑀸𑀢𑀺, 𑀢𑀁 𑀦𑀺𑀲𑁂𑀥𑁂𑀦𑁆𑀢𑁄 ‘‘𑀫𑀸 𑀇𑀢𑀺𑀓𑀺𑀭𑀸𑀬𑀸’’𑀢𑀺 𑀆𑀳. 𑀧𑀺𑀝𑀓𑀁 𑀕𑀦𑁆𑀣𑁄 𑀲𑀫𑁆𑀧𑀤𑀻𑀬𑀢𑀺 𑀏𑀢𑀲𑁆𑀲𑀸𑀢𑀺 𑀧𑀺𑀝𑀓𑀲𑀫𑁆𑀧𑀤𑀸𑀦𑀁, 𑀕𑀦𑁆𑀣𑀲𑁆𑀲 𑀉𑀕𑁆𑀕𑀡𑁆𑀳𑀦𑀓𑁄. 𑀢𑁂𑀦 𑀧𑀺𑀝𑀓𑀉𑀕𑁆𑀕𑀡𑁆𑀳𑀦𑀓𑀪𑀸𑀯𑁂𑀦 𑀏𑀓𑀘𑁆𑀘𑁄 𑀢𑀸𑀤𑀺𑀲𑀁 𑀕𑀦𑁆𑀣𑀁 𑀧𑀕𑀼𑀡𑀁 𑀓𑀢𑁆𑀯𑀸 𑀢𑁂𑀦 𑀢𑀁 𑀲𑀫𑁂𑀦𑁆𑀢𑀁 𑀲𑀫𑁂𑀢𑀺, 𑀢𑀲𑁆𑀫𑀸 ‘‘𑀪𑀽𑀢𑀫𑁂𑀢’’𑀦𑁆𑀢𑀺 𑀕𑀡𑁆𑀳𑀸𑀢𑀺, 𑀢𑀁 𑀲𑀦𑁆𑀥𑀸𑀬𑁂𑀲 𑀧𑀝𑀺𑀓𑁆𑀔𑁂𑀧𑁄 ‘‘𑀫𑀸 𑀧𑀺𑀝𑀓𑀲𑀫𑁆𑀧𑀤𑀸𑀦𑁂𑀦𑀸’’𑀢𑀺, 𑀅𑀢𑁆𑀢𑀦𑁄 𑀉𑀕𑁆𑀕𑀳𑀕𑀦𑁆𑀣𑀲𑀫𑁆𑀧𑀢𑁆𑀢𑀺𑀬𑀸 𑀫𑀸 𑀕𑀡𑁆𑀳𑀺𑀢𑁆𑀣𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀫𑁂𑀢𑀦𑁆𑀢𑀺 𑀲𑀁𑀕𑀢𑀁.

𑀓𑁄𑀘𑀺 𑀓𑀜𑁆𑀘𑀺 𑀯𑀺𑀢𑀓𑁆𑀓𑁂𑀦𑁆𑀢𑁄 ‘‘𑀏𑀯𑀫𑁂𑀯 𑀢𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀓𑁂𑀯𑀮𑀁 𑀅𑀢𑁆𑀢𑀦𑁄 𑀲𑀗𑁆𑀓𑀧𑁆𑀧𑀯𑀲𑁂𑀦 ‘‘𑀪𑀽𑀢𑀫𑀺𑀤’’𑀦𑁆𑀢𑀺 𑀕𑀡𑁆𑀳𑀸𑀢𑀺, 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁 ‘‘𑀫𑀸 𑀢𑀓𑁆𑀓𑀳𑁂𑀢𑀽’’𑀢𑀺. 𑀅𑀜𑁆𑀜𑁄 ‘‘𑀇𑀫𑀸𑀬 𑀬𑀼𑀢𑁆𑀢𑀺𑀬𑀸 𑀪𑀽𑀢𑀫𑀺𑀤’’𑀦𑁆𑀢𑀺 𑀓𑁂𑀯𑀮𑀁 𑀅𑀦𑀼𑀫𑀸𑀦𑀢𑁄 𑀦𑀬𑀕𑁆𑀕𑀸𑀳𑁂𑀦 𑀕𑀡𑁆𑀳𑀸𑀢𑀺, 𑀢𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 ‘‘𑀫𑀸 𑀦𑀬𑀳𑁂𑀢𑀽’’𑀢𑀺 𑀆𑀳. 𑀓𑀲𑁆𑀲𑀘𑀺 ‘‘𑀏𑀯𑀫𑁂𑀢𑀁 𑀲𑀺𑀬𑀸’’𑀢𑀺 𑀧𑀭𑀺𑀓𑀧𑁆𑀧𑁂𑀦𑁆𑀢𑀲𑁆𑀲 𑀏𑀓𑀁 𑀓𑀸𑀭𑀡𑀁 𑀉𑀧𑀝𑁆𑀞𑀸𑀢𑀺, 𑀲𑁄 ‘‘𑀅𑀢𑁆𑀣𑁂𑀢’’𑀦𑁆𑀢𑀺 𑀅𑀢𑁆𑀢𑀦𑁄 𑀧𑀭𑀺𑀓𑀧𑁆𑀧𑀺𑀢𑀸𑀓𑀸𑀭𑁂𑀦 𑀕𑀡𑁆𑀳𑀸𑀢𑀺, 𑀢𑀁 𑀧𑀝𑀺𑀲𑁂𑀥𑁂𑀦𑁆𑀢𑁄 ‘‘𑀫𑀸 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑁂𑀦𑀸’’𑀢𑀺 𑀆𑀳. 𑀅𑀧𑀭𑀲𑁆𑀲 𑀘𑀺𑀦𑁆𑀢𑀬𑀢𑁄 𑀬𑀣𑀸𑀧𑀭𑀺𑀓𑀧𑁆𑀧𑀺𑀢𑀁 𑀓𑀜𑁆𑀘𑀺 𑀅𑀢𑁆𑀣𑀁 ‘‘𑀏𑀯𑀫𑁂𑀢𑀁 𑀦 𑀅𑀜𑁆𑀜𑀣𑀸’’𑀢𑀺 𑀅𑀪𑀺𑀦𑀺𑀯𑀺𑀲𑀦𑁆𑀢𑀲𑁆𑀲 𑀏𑀓𑀸 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺. 𑀬𑀸 𑀬𑀲𑁆𑀲 𑀢𑀁 𑀓𑀸𑀭𑀡𑀁 𑀦𑀺𑀚𑁆𑀛𑀸𑀬𑀦𑁆𑀢𑀲𑁆𑀲 𑀧𑀘𑁆𑀘𑀓𑁆𑀔𑀁 𑀯𑀺𑀬 𑀦𑀺𑀭𑀽𑀧𑁂𑀢𑁆𑀯𑀸 𑀘𑀺𑀦𑁆𑀢𑁂𑀦𑁆𑀢𑀲𑁆𑀲 𑀔𑀫𑀢𑀺. 𑀲𑁄 ‘‘𑀅𑀢𑁆𑀣𑁂𑀢’’𑀦𑁆𑀢𑀺 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸 𑀕𑀡𑁆𑀳𑀸𑀢𑀺, 𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀫𑀸 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸’’𑀢𑀺.

𑀅𑀓𑀼𑀲𑀮𑀯𑁂𑀭𑀲𑁆𑀲𑀸𑀢𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀧𑀜𑁆𑀘𑀯𑀺𑀥𑀁 𑀯𑁂𑀭𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀓𑁄𑀥𑁄 𑀦𑀸𑀫 𑀘𑁂𑀢𑀲𑁄 𑀤𑀼𑀓𑁆𑀔𑀦𑁆𑀢𑀺 𑀆𑀳 ‘‘𑀓𑁄𑀥𑀘𑀺𑀢𑁆𑀢𑀲𑁆𑀲 𑀅𑀪𑀸𑀯𑁂𑀦𑀸’’𑀢𑀺. 𑀓𑀺𑀮𑁂𑀲𑀲𑁆𑀲𑀸𑀢𑀺 𑀘𑀺𑀢𑁆𑀢𑀁 𑀯𑀺𑀩𑀸𑀥𑁂𑀦𑁆𑀢𑀲𑁆𑀲 𑀉𑀧𑀢𑀸𑀧𑁂𑀦𑁆𑀢𑀲𑁆𑀲 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀸𑀤𑀺𑀓𑀺𑀮𑁂𑀲𑀲𑁆𑀲. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑀓𑁂𑀲𑀫𑀼𑀢𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀲𑀸𑀴𑁆𑀳𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁭. 𑀙𑀝𑁆𑀞𑁂 𑀧𑀸𑀢𑁄 𑀅𑀲𑀺𑀢𑀩𑁆𑀩𑀪𑁄𑀚𑀦𑀁 𑀧𑀸𑀢𑀭𑀸𑀲𑀁, 𑀪𑀼𑀢𑁆𑀢𑀁 𑀧𑀸𑀢𑀭𑀸𑀲𑀁 𑀏𑀢𑁂𑀲𑀦𑁆𑀢𑀺 𑀪𑀼𑀢𑁆𑀢𑀧𑀸𑀢𑀭𑀸𑀲𑀸. 𑀤𑀸𑀲𑀸 𑀦𑀸𑀫 𑀅𑀦𑁆𑀢𑁄𑀚𑀸𑀢𑀸 𑀯𑀸 𑀥𑀦𑀓𑁆𑀓𑀻𑀢𑀸 𑀯𑀸 𑀓𑀭𑀫𑀭𑀸𑀦𑀻𑀢𑀸 𑀯𑀸 𑀲𑀬𑀁 𑀯𑀸 𑀤𑀸𑀲𑀩𑁆𑀬𑀁 𑀉𑀧𑀕𑀢𑀸. 𑀪𑀢𑁆𑀢𑀯𑁂𑀢𑀦𑀪𑀢𑀸 𑀓𑀫𑁆𑀫𑀓𑀸𑀭𑀸 𑀦𑀸𑀫.

𑀦𑀺𑀘𑁆𑀙𑀸𑀢𑁄𑀢𑀺 𑀏𑀢𑁆𑀣 𑀙𑀸𑀢𑀁 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸 𑀚𑀺𑀖𑀘𑁆𑀙𑀸𑀳𑁂𑀢𑀼𑀢𑀸𑀬, 𑀲𑀸 𑀅𑀲𑁆𑀲 𑀦𑀢𑁆𑀣𑀻𑀢𑀺 𑀦𑀺𑀘𑁆𑀙𑀸𑀢𑁄. 𑀢𑁂𑀦𑀸𑀳 ‘‘𑀦𑀺𑀢𑁆𑀢𑀡𑁆𑀳𑁄’’𑀢𑀺. 𑀅𑀩𑁆𑀪𑀦𑁆𑀢𑀭𑁂 𑀲𑀦𑁆𑀢𑀸𑀧𑀓𑀭𑀸𑀦𑀁 𑀓𑀺𑀮𑁂𑀲𑀸𑀦𑀦𑁆𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀤𑀭𑀣𑀧𑀭𑀺𑀴𑀸𑀳𑀚𑀦𑀦𑁂𑀦 𑀲𑀦𑁆𑀢𑀸𑀧𑀦𑀓𑀺𑀮𑁂𑀲𑀸𑀦𑀁. 𑀅𑀦𑁆𑀢𑁄𑀢𑀸𑀧𑀦𑀓𑀺𑀮𑁂𑀲𑀸𑀦𑀁 𑀅𑀪𑀸𑀯𑀸 𑀲𑀻𑀢𑁄 𑀲𑀻𑀢𑀮𑁄 𑀪𑀽𑀢𑁄 𑀚𑀸𑀢𑁄𑀢𑀺 𑀲𑀻𑀢𑀺𑀪𑀽𑀢𑁄. 𑀢𑁂𑀦𑀸𑀳 ‘‘𑀲𑀻𑀢𑀮𑀻𑀪𑀽𑀢𑁄’’𑀢𑀺. 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀲𑀼𑀔𑀸𑀦𑀺 𑀯𑀸 𑀧𑀝𑀺𑀲𑀁𑀯𑁂𑀤𑁂𑀢𑀻𑀢𑀺 𑀲𑀼𑀔𑀧𑁆𑀧𑀝𑀺𑀲𑀁𑀯𑁂𑀤𑀻. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀲𑀸𑀴𑁆𑀳𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀓𑀣𑀸𑀯𑀢𑁆𑀣𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁮. 𑀲𑀢𑁆𑀢𑀫𑁂 𑀓𑀣𑀸𑀯𑀢𑁆𑀣𑀽𑀦𑀻𑀢𑀺 𑀓𑀣𑀸𑀬 𑀧𑀯𑀢𑁆𑀢𑀺𑀝𑁆𑀞𑀸𑀦𑀸𑀦𑀺. 𑀬𑀲𑁆𑀫𑀸 𑀢𑁂𑀳𑀺 𑀯𑀺𑀦𑀸 𑀓𑀣𑀸 𑀦 𑀧𑀯𑀢𑁆𑀢𑀢𑀺, 𑀢𑀲𑁆𑀫𑀸 ‘‘𑀓𑀣𑀸𑀓𑀸𑀭𑀡𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀅𑀢𑀢𑀺 𑀲𑀢𑀢𑀺 𑀲𑀢𑀢𑀁 𑀕𑀘𑁆𑀙𑀢𑀺 𑀧𑀯𑀢𑁆𑀢𑀢𑀻𑀢𑀺 𑀅𑀤𑁆𑀥𑀸, 𑀓𑀸𑀮𑁄𑀢𑀺 𑀆𑀳 ‘‘𑀅𑀢𑀻𑀢𑀫𑀤𑁆𑀥𑀸𑀦𑀁 𑀦𑀸𑀫 𑀓𑀸𑀮𑁄𑀧𑀺 𑀯𑀢𑁆𑀢𑀢𑀻’’𑀢𑀺. 𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀫𑀢𑁆𑀢𑀢𑀸𑀬 𑀳𑀺 𑀧𑀭𑀫𑀢𑁆𑀣𑀢𑁄 𑀅𑀯𑀺𑀚𑁆𑀚𑀫𑀸𑀦𑁄𑀧𑀺 𑀓𑀸𑀮𑁄 𑀢𑀲𑁆𑀲𑁂𑀯 𑀥𑀫𑁆𑀫𑀲𑁆𑀲 𑀧𑀯𑀢𑁆𑀢𑀺𑀅𑀯𑀢𑁆𑀣𑀸𑀯𑀺𑀲𑁂𑀲𑀁 𑀉𑀧𑀸𑀤𑀸𑀬 𑀢𑁂𑀦𑁂𑀯 𑀯𑁄𑀳𑀸𑀭𑁂𑀦 𑀅𑀢𑀻𑀢𑁄𑀢𑀺𑀆𑀤𑀺𑀦𑀸 𑀯𑁄𑀳𑀭𑀻𑀬𑀢𑀺, 𑀅𑀢𑀻𑀢𑀸𑀤𑀺𑀪𑁂𑀤𑁄 𑀘 𑀦𑀸𑀫𑀸𑀬𑀁 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀥𑀫𑁆𑀫𑀸𑀦𑀁𑀬𑁂𑀯 𑀳𑁄𑀢𑀺, 𑀦 𑀓𑀸𑀮𑀲𑁆𑀲𑀸𑀢𑀺 𑀆𑀳 ‘‘𑀔𑀦𑁆𑀥𑀸𑀧𑀺 𑀯𑀢𑁆𑀢𑀦𑁆𑀢𑀻’’𑀢𑀺. 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀇𑀢𑀭𑁂𑀲𑀼 𑀤𑁆𑀯𑀻𑀲𑀼 𑀅𑀢𑀺𑀤𑀺𑀲𑀢𑀺 ‘‘𑀅𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄’’𑀢𑀺. 𑀅𑀢𑀻𑀢𑀫𑀤𑁆𑀥𑀸𑀦𑀦𑁆𑀢𑀺𑀆𑀤𑀻𑀲𑀼 𑀘 𑀤𑁆𑀯𑁂 𑀧𑀭𑀺𑀬𑀸𑀬𑀸 𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁄, 𑀅𑀪𑀺𑀥𑀫𑁆𑀫𑀧𑀭𑀺𑀬𑀸𑀬𑁄 𑀘. 𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦 𑀧𑀝𑀺𑀲𑀦𑁆𑀥𑀺𑀢𑁄 𑀧𑀼𑀩𑁆𑀩𑁂 𑀅𑀢𑀻𑀢𑁄 𑀅𑀤𑁆𑀥𑀸 𑀦𑀸𑀫, 𑀘𑀼𑀢𑀺𑀢𑁄 𑀧𑀘𑁆𑀙𑀸 𑀅𑀦𑀸𑀕𑀢𑁄 𑀅𑀤𑁆𑀥𑀸 𑀦𑀸𑀫, 𑀲𑀳 𑀘𑀼𑀢𑀺𑀧𑀝𑀺𑀲𑀦𑁆𑀥𑀻𑀢𑀺 𑀢𑀤𑀦𑁆𑀢𑀭𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀅𑀤𑁆𑀥𑀸 𑀦𑀸𑀫. 𑀅𑀪𑀺𑀥𑀫𑁆𑀫𑀧𑀭𑀺𑀬𑀸𑀬𑁂𑀦 𑀢𑀻𑀲𑀼 𑀔𑀡𑁂𑀲𑀼 𑀉𑀧𑁆𑀧𑀸𑀤𑀢𑁄 𑀧𑀼𑀩𑁆𑀩𑁂 𑀅𑀢𑀻𑀢𑁄 𑀅𑀤𑁆𑀥𑀸 𑀦𑀸𑀫, 𑀉𑀧𑁆𑀧𑀸𑀤𑀢𑁄 𑀉𑀤𑁆𑀥𑀁 𑀅𑀦𑀸𑀕𑀢𑁄 𑀅𑀤𑁆𑀥𑀸 𑀦𑀸𑀫, 𑀔𑀡𑀢𑁆𑀢𑀬𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀅𑀤𑁆𑀥𑀸 𑀦𑀸𑀫. 𑀢𑀢𑁆𑀣𑀸𑀬𑀁 𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸𑀢𑀺 𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦𑁂𑀯 𑀅𑀢𑀻𑀢𑀸𑀤𑀺𑀯𑀺𑀲𑀬𑀁 𑀓𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀢𑀻𑀢𑁂 𑀓𑀲𑁆𑀲𑀧𑁄 𑀦𑀸𑀫𑀸’’𑀢𑀺𑀆𑀤𑀺𑀫𑀸𑀳.

𑀏𑀓𑀁𑀲𑁂𑀦𑁂𑀯 𑀩𑁆𑀬𑀸𑀓𑀸𑀢𑀩𑁆𑀩𑁄 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑁄𑀢𑀺 𑀏𑀓𑀁𑀲𑀩𑁆𑀬𑀸𑀓𑀭𑀡𑀻𑀬𑁄. ‘‘𑀘𑀓𑁆𑀔𑀼 𑀅𑀦𑀺𑀘𑁆𑀘’’𑀦𑁆𑀢𑀺 𑀧𑀜𑁆𑀳𑁂 𑀉𑀢𑁆𑀢𑀭𑀧𑀤𑀸𑀯𑀥𑀸𑀭𑀡𑀁 𑀲𑀦𑁆𑀥𑀸𑀬 ‘‘𑀏𑀓𑀁𑀲𑁂𑀦𑁂𑀯 𑀩𑁆𑀬𑀸𑀓𑀸𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁 𑀦𑀺𑀘𑁆𑀘𑀢𑀸𑀬 𑀮𑁂𑀲𑀲𑁆𑀲𑀧𑀺 𑀢𑀢𑁆𑀣 𑀅𑀪𑀸𑀯𑀢𑁄, 𑀧𑀼𑀭𑀺𑀫𑀧𑀤𑀸𑀯𑀥𑀸𑀭𑀡𑁂 𑀧𑀦 𑀯𑀺𑀪𑀚𑁆𑀚𑀩𑁆𑀬𑀸𑀓𑀭𑀡𑀻𑀬𑀢𑀸𑀬. 𑀢𑁂𑀦𑀸𑀳 ‘‘𑀅𑀦𑀺𑀘𑁆𑀘𑀁 𑀦𑀸𑀫 𑀘𑀓𑁆𑀔𑀽𑀢𑀺 𑀧𑀼𑀝𑁆𑀞𑁂𑀦 𑀧𑀦𑀸’’𑀢𑀺𑀆𑀤𑀺. 𑀘𑀓𑁆𑀔𑀼𑀲𑁄𑀢𑁂 𑀯𑀺𑀲𑁂𑀲𑀢𑁆𑀣𑀲𑀸𑀫𑀜𑁆𑀜𑀢𑁆𑀣𑀸𑀦𑀁 𑀅𑀲𑀸𑀥𑀸𑀭𑀡𑀪𑀸𑀯𑀢𑁄 𑀤𑁆𑀯𑀺𑀦𑁆𑀦𑀁 𑀢𑁂𑀲𑀁 𑀲𑀤𑀺𑀲𑀘𑁄𑀤𑀦𑀸 𑀧𑀝𑀺𑀘𑁆𑀙𑀦𑁆𑀦𑀫𑀼𑀔𑁂𑀦𑁂𑀯 𑀩𑁆𑀬𑀸𑀓𑀭𑀡𑀻𑀬𑀸 𑀧𑀝𑀺𑀓𑁆𑀔𑁂𑀧𑀯𑀲𑁂𑀦 𑀅𑀦𑀼𑀜𑁆𑀜𑀸𑀢𑀯𑀲𑁂𑀦 𑀘 𑀯𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀢𑁄𑀢𑀺 𑀆𑀳 ‘‘𑀬𑀣𑀸 𑀘𑀓𑁆𑀔𑀼, 𑀢𑀣𑀸 𑀲𑁄𑀢𑀁…𑀧𑁂… 𑀅𑀬𑀁 𑀧𑀝𑀺𑀧𑀼𑀘𑁆𑀙𑀸𑀩𑁆𑀬𑀸𑀓𑀭𑀡𑀻𑀬𑁄 𑀧𑀜𑁆𑀳𑁄’’𑀢𑀺. 𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭𑀦𑁆𑀢𑀺 𑀚𑀻𑀯𑀲𑀭𑀻𑀭𑀸𑀦𑀁 𑀅𑀦𑀜𑁆𑀜𑀢𑀸𑀧𑀜𑁆𑀳𑁂 𑀬𑀲𑁆𑀲 𑀬𑁂𑀦 𑀅𑀦𑀜𑁆𑀜𑀢𑀸 𑀘𑁄𑀤𑀺𑀢𑀸, 𑀲𑁄 𑀏𑀯 𑀧𑀭𑀫𑀢𑁆𑀣𑀢𑁄 𑀦𑀼𑀧𑀮𑀩𑁆𑀪𑀢𑀻𑀢𑀺 𑀘 𑀛𑀸𑀦𑀢𑁆𑀢𑀬𑀲𑁆𑀲 𑀫𑁂𑀢𑁆𑀢𑁂𑀬𑁆𑀬𑀢𑀸𑀓𑀺𑀢𑁆𑀢𑀦𑀲𑀤𑀺𑀲𑁄𑀢𑀺 𑀅𑀩𑁆𑀬𑀸𑀓𑀸𑀢𑀩𑁆𑀩𑀢𑀸𑀬 𑀞𑀧𑀦𑀻𑀬𑁄 𑀯𑀼𑀢𑁆𑀢𑁄. 𑀏𑀯𑀭𑀽𑀧𑁄 𑀳𑀺 𑀧𑀜𑁆𑀳𑁄 𑀢𑀺𑀥𑀸 𑀅𑀯𑀺𑀲𑁆𑀲𑀚𑁆𑀚𑀦𑀻𑀬𑀢𑁆𑀢𑀸 𑀩𑁆𑀬𑀸𑀓𑀭𑀡𑀁 𑀅𑀓𑀢𑁆𑀯𑀸 𑀞𑀧𑁂𑀢𑀩𑁆𑀩𑁄.

𑀢𑀺𑀝𑁆𑀞𑀢𑀺 𑀏𑀢𑁆𑀣 𑀨𑀮𑀁 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬𑀸𑀢𑀺 𑀞𑀸𑀦𑀁, 𑀓𑀸𑀭𑀡𑀦𑁆𑀢𑀺 𑀆𑀳 ‘‘𑀓𑀸𑀭𑀡𑀸𑀓𑀸𑀭𑀡𑁂’’𑀢𑀺. 𑀬𑀼𑀢𑁆𑀢𑁂𑀦 𑀓𑀸𑀭𑀡𑁂𑀦𑀸𑀢𑀺 𑀅𑀦𑀼𑀭𑀽𑀧𑁂𑀦 𑀓𑀸𑀭𑀡𑁂𑀦. 𑀧𑀳𑁄𑀢𑀻𑀢𑀺 𑀦𑀺𑀕𑁆𑀕𑀡𑁆𑀳𑀺𑀢𑀼𑀁 𑀲𑀫𑀢𑁆𑀣𑁄 𑀳𑁄𑀢𑀺. 𑀲𑀲𑁆𑀲𑀢𑀯𑀸𑀤𑀺𑀪𑀸𑀯𑀫𑁂𑀯 𑀤𑀻𑀧𑁂𑀢𑀻𑀢𑀺 𑀅𑀢𑁆𑀢𑀦𑀸 𑀕𑀳𑀺𑀢𑁂 𑀉𑀘𑁆𑀙𑁂𑀤𑀯𑀸𑀤𑁂 𑀤𑁄𑀲𑀁 𑀤𑀺𑀲𑁆𑀯𑀸 𑀅𑀢𑁆𑀢𑀦𑁄𑀧𑀺 𑀲𑀲𑁆𑀲𑀢𑀯𑀸𑀤𑀺𑀪𑀸𑀯𑀫𑁂𑀯 𑀤𑀻𑀧𑁂𑀢𑀺. 𑀧𑀼𑀕𑁆𑀕𑀮𑀯𑀸𑀤𑀺𑀫𑁆𑀳𑀻𑀢𑀺 𑀇𑀫𑀺𑀦𑀸 𑀯𑀘𑁆𑀙𑀓𑀼𑀢𑁆𑀢𑀺𑀬𑀯𑀸𑀤𑀺𑀁 𑀤𑀲𑁆𑀲𑁂𑀢𑀺. 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑁂𑀳𑀺 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀸 𑀧𑀝𑀺𑀧𑀤𑀸 𑀧𑀜𑁆𑀳𑀧𑀼𑀘𑁆𑀙𑀦𑀓𑀸𑀦𑀁 𑀯𑀢𑁆𑀢𑀁.

𑀧𑀝𑀺𑀘𑀭𑀢𑀻𑀢𑀺 𑀧𑀝𑀺𑀘𑁆𑀙𑀸𑀤𑀦𑀯𑀲𑁂𑀦 𑀘𑀭𑀢𑀺 𑀧𑀯𑀢𑁆𑀢𑀢𑀺. 𑀧𑀝𑀺𑀘𑁆𑀙𑀸𑀤𑀦𑀢𑁆𑀣𑁄 𑀏𑀯 𑀯𑀸 𑀘𑀭𑀢𑀺𑀲𑀤𑁆𑀤𑁄 𑀅𑀦𑁂𑀓𑀢𑁆𑀣𑀢𑁆𑀢𑀸 𑀥𑀸𑀢𑀽𑀦𑀦𑁆𑀢𑀺 𑀆𑀳 ‘‘𑀧𑀝𑀺𑀘𑁆𑀙𑀸𑀤𑁂𑀢𑀻’’𑀢𑀺. 𑀅𑀜𑁆𑀜𑁂𑀦𑀜𑁆𑀜𑀦𑁆𑀢𑀺 𑀧𑀦 𑀧𑀝𑀺𑀘𑁆𑀙𑀸𑀤𑀦𑀸𑀓𑀸𑀭𑀤𑀲𑁆𑀲𑀦𑀦𑁆𑀢𑀺 𑀆𑀳 ‘‘𑀅𑀜𑁆𑀜𑁂𑀦 𑀯𑀘𑀦𑁂𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀅𑀜𑁆𑀜𑁂𑀦 𑀯𑀘𑀦𑁂𑀦𑀸𑀢𑀺 𑀬𑀁 𑀘𑁄𑀤𑀓𑁂𑀦 𑀘𑀼𑀤𑀺𑀢𑀓𑀲𑁆𑀲 𑀤𑁄𑀲𑀯𑀺𑀪𑀸𑀯𑀦𑀁 𑀯𑀘𑀦𑀁 𑀯𑀼𑀢𑁆𑀢𑀁, 𑀢𑀁 𑀢𑀢𑁄 𑀅𑀜𑁆𑀜𑁂𑀦 𑀯𑀘𑀦𑁂𑀦 𑀧𑀝𑀺𑀘𑁆𑀙𑀸𑀤𑁂𑀢𑀺. 𑀬𑁄 𑀳𑀺 ‘‘𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄𑀲𑀻’’𑀢𑀺 𑀯𑀼𑀢𑁆𑀢𑁂 ‘‘𑀓𑁄 𑀆𑀧𑀦𑁆𑀦𑁄, 𑀓𑀺𑀁 𑀆𑀧𑀦𑁆𑀦𑁄, 𑀓𑀺𑀲𑁆𑀫𑀺𑀁 𑀆𑀧𑀦𑁆𑀦𑁄, 𑀓𑀁 𑀪𑀡𑀣, 𑀓𑀺𑀁 𑀪𑀡𑀣𑀸’’𑀢𑀺 𑀯𑀤𑀢𑀺. ‘‘𑀏𑀯𑀭𑀽𑀧𑀁 𑀓𑀺𑀜𑁆𑀘𑀺 𑀢𑀬𑀸 𑀤𑀺𑀝𑁆𑀞’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀦 𑀲𑀼𑀡𑀸𑀫𑀻’’𑀢𑀺 𑀲𑁄𑀢𑀁 𑀯𑀸 𑀉𑀧𑀦𑁂𑀢𑀺, 𑀅𑀬𑀁 𑀅𑀜𑁆𑀜𑁂𑀦𑀜𑁆𑀜𑀁 𑀧𑀝𑀺𑀘𑀭𑀢𑀺 𑀦𑀸𑀫. ‘‘𑀓𑁄 𑀆𑀧𑀦𑁆𑀦𑁄’’𑀢𑀺𑀆𑀤𑀺𑀦𑀸 𑀳𑀺 𑀘𑁄𑀤𑀦𑀁 𑀅𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸𑀯 𑀯𑀺𑀓𑁆𑀔𑁂𑀧𑀸𑀧𑀚𑁆𑀚𑀦𑀁 𑀅𑀜𑁆𑀜𑁂𑀦𑀜𑁆𑀜𑀁 𑀧𑀝𑀺𑀘𑀭𑀡𑀁, 𑀩𑀳𑀺𑀤𑁆𑀥𑀸 𑀓𑀣𑀸𑀧𑀦𑀸𑀫𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄. 𑀢𑁂𑀦𑁂𑀯𑀸𑀳 ‘‘𑀆𑀕𑀦𑁆𑀢𑀼𑀓𑀓𑀣𑀁 𑀑𑀢𑀸𑀭𑁂𑀦𑁆𑀢𑁄’’𑀢𑀺𑀆𑀤𑀺. 𑀢𑀢𑁆𑀣 𑀅𑀧𑀦𑀸𑀫𑁂𑀢𑀻𑀢𑀺 𑀯𑀺𑀓𑁆𑀔𑁂𑀧𑁂𑀢𑀺. 𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀩𑀳𑀺𑀤𑁆𑀥𑀸𑀓𑀣𑀸𑀬 𑀅𑀧𑀦𑀸𑀫𑀦𑁂.

𑀉𑀧𑀦𑀺𑀲𑀻𑀤𑀢𑀺 𑀨𑀮𑀁 𑀏𑀢𑁆𑀣𑀸𑀢𑀺 𑀓𑀸𑀭𑀡𑀁 𑀉𑀧𑀦𑀺𑀲𑀸, 𑀉𑀧𑁂𑀘𑁆𑀘 𑀦𑀺𑀲𑁆𑀲𑀬𑀢𑀻𑀢𑀺 𑀯𑀸 𑀉𑀧𑀦𑀺𑀲𑀸, 𑀲𑀳 𑀉𑀧𑀦𑀺𑀲𑀸𑀬𑀸𑀢𑀺 𑀲𑀉𑀧𑀦𑀺𑀲𑁄𑀢𑀺 𑀆𑀳 ‘‘𑀲𑀉𑀧𑀦𑀺𑀲𑁆𑀲𑀬𑁄 𑀲𑀧𑀘𑁆𑀘𑀬𑁄’’𑀢𑀺.

𑀑𑀳𑀺𑀢𑀲𑁄𑀢𑁄𑀢𑀺 𑀅𑀦𑀜𑁆𑀜𑀯𑀺𑀳𑀺𑀢𑀢𑁆𑀢𑀸 𑀥𑀫𑁆𑀫𑀲𑁆𑀲𑀯𑀦𑀸𑀬 𑀅𑀧𑀦𑀸𑀫𑀺𑀢𑀲𑁄𑀢𑁄. 𑀢𑀢𑁄 𑀏𑀯 𑀢𑀤𑀢𑁆𑀣𑀁 𑀞𑀧𑀺𑀢𑀲𑁄𑀢𑁄. 𑀓𑀼𑀲𑀮𑀥𑀫𑁆𑀫𑀦𑁆𑀢𑀺 𑀅𑀭𑀺𑀬𑀫𑀕𑁆𑀕𑁄 𑀅𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀅𑀭𑀺𑀬𑀫𑀕𑁆𑀕’’𑀦𑁆𑀢𑀺.

𑀓𑀣𑀸𑀯𑀢𑁆𑀣𑀼𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀅𑀜𑁆𑀜𑀢𑀺𑀢𑁆𑀣𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁯. 𑀅𑀝𑁆𑀞𑀫𑁂 𑀪𑀕𑀯𑀸 𑀫𑀽𑀮𑀁 𑀓𑀸𑀭𑀡𑀁 𑀏𑀢𑁂𑀲𑀁 𑀬𑀸𑀣𑀸𑀯𑀢𑁄 𑀅𑀥𑀺𑀕𑀫𑀸𑀬𑀸𑀢𑀺 𑀪𑀕𑀯𑀁𑀫𑀽𑀮𑀓𑀸. 𑀢𑁂𑀦𑀸𑀳 ‘‘𑀪𑀕𑀯𑀦𑁆𑀢𑀜𑁆𑀳𑀺 𑀦𑀺𑀲𑁆𑀲𑀸𑀬 𑀫𑀬𑀁 𑀇𑀫𑁂 𑀥𑀫𑁆𑀫𑁂 𑀆𑀚𑀸𑀦𑀸𑀫 𑀧𑀝𑀺𑀯𑀺𑀚𑁆𑀛𑀸𑀫𑀸’’𑀢𑀺. 𑀅𑀫𑁆𑀳𑀸𑀓𑀁 𑀥𑀫𑁆𑀫𑀸𑀢𑀺 𑀢𑁂𑀳𑀺 𑀅𑀢𑁆𑀢𑀦𑀸 𑀅𑀥𑀺𑀕𑀦𑁆𑀢𑀩𑁆𑀩𑀢𑀸𑀬 𑀯𑀼𑀢𑁆𑀢𑀁. 𑀲𑁂𑀯𑀺𑀢𑀩𑁆𑀩𑀸𑀲𑁂𑀯𑀺𑀢𑀩𑁆𑀩𑀸𑀦𑀜𑁆𑀳𑀺 𑀬𑀸𑀣𑀸𑀯𑀢𑁄 𑀅𑀥𑀺𑀕𑀫𑀜𑁆𑀜𑀸𑀡𑀸𑀦𑀺 𑀅𑀥𑀺𑀕𑀘𑁆𑀙𑀦𑀓𑀲𑀫𑁆𑀩𑀦𑁆𑀥𑀻𑀦𑀺, 𑀢𑀸𑀦𑀺 𑀘 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀫𑀽𑀮𑀓𑀸𑀦𑀺 𑀅𑀦𑀜𑁆𑀜𑀯𑀺𑀲𑀬𑀢𑁆𑀢𑀸. 𑀢𑁂𑀦𑀸𑀳 ‘‘𑀧𑀼𑀩𑁆𑀩𑁂 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦𑀸’’𑀢𑀺𑀆𑀤𑀺. 𑀇𑀫𑁂 𑀥𑀫𑁆𑀫𑀸𑀢𑀺 𑀇𑀫𑁂 𑀜𑀸𑀡𑀥𑀫𑁆𑀫𑀸. 𑀆𑀚𑀸𑀦𑀸𑀫𑀸𑀢𑀺 𑀅𑀪𑀺𑀫𑀼𑀔𑀁 𑀧𑀘𑁆𑀘𑀓𑁆𑀔𑀢𑁄 𑀚𑀸𑀦𑀸𑀫. 𑀧𑀝𑀺𑀯𑀺𑀚𑁆𑀛𑀸𑀫𑀸𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁, 𑀅𑀥𑀺𑀕𑀘𑁆𑀙𑀸𑀫𑀸𑀢𑀺 𑀅𑀢𑁆𑀣𑁄. 𑀪𑀕𑀯𑀸 𑀦𑁂𑀢𑀸 𑀏𑀢𑁂𑀲𑀦𑁆𑀢𑀺 𑀪𑀕𑀯𑀁𑀦𑁂𑀢𑁆𑀢𑀺𑀓𑀸. 𑀦𑁂𑀢𑀸𑀢𑀺 𑀲𑁂𑀯𑀺𑀢𑀩𑁆𑀩𑀥𑀫𑁆𑀫𑁂 𑀯𑁂𑀦𑁂𑀬𑁆𑀬𑀲𑀦𑁆𑀢𑀸𑀦𑀁 𑀧𑀸𑀧𑁂𑀢𑀸. 𑀯𑀺𑀦𑁂𑀢𑀸𑀢𑀺 𑀅𑀲𑁂𑀯𑀺𑀢𑀩𑁆𑀩𑀥𑀫𑁆𑀫𑁂 𑀯𑁂𑀦𑁂𑀬𑁆𑀬𑀲𑀦𑁆𑀢𑀸𑀦𑀢𑁄 𑀅𑀧𑀦𑁂𑀢𑀸. 𑀢𑀤𑀗𑁆𑀕𑀯𑀺𑀦𑀬𑀸𑀤𑀺𑀯𑀲𑁂𑀦 𑀯𑀸 𑀯𑀺𑀦𑁂𑀢𑀸. 𑀅𑀣 𑀯𑀸 𑀬𑀣𑀸 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑁄 𑀳𑁄𑀢𑀺, 𑀏𑀯𑀁 𑀯𑀺𑀲𑁂𑀲𑀢𑁄 𑀦𑁂𑀢𑀸. 𑀅𑀦𑀼𑀦𑁂𑀢𑀸𑀢𑀺 ‘‘𑀇𑀫𑁂 𑀥𑀫𑁆𑀫𑀸 𑀲𑁂𑀯𑀺𑀢𑀩𑁆𑀩𑀸, 𑀇𑀫𑁂 𑀦 𑀲𑁂𑀯𑀺𑀢𑀩𑁆𑀩𑀸’’𑀢𑀺 𑀉𑀪𑀬𑀲𑀫𑁆𑀧𑀸𑀧𑀦𑀸𑀧𑀦𑀬𑀦𑀢𑁆𑀣𑀁 𑀧𑀜𑁆𑀜𑀸𑀧𑁂𑀢𑀸. 𑀢𑁂𑀦𑀸𑀳 ‘‘𑀬𑀣𑀸𑀲𑀪𑀸𑀯𑀢𑁄’’𑀢𑀺𑀆𑀤𑀺.

𑀧𑀝𑀺𑀲𑀭𑀦𑁆𑀢𑀺 𑀏𑀢𑁆𑀣𑀸𑀢𑀺 𑀧𑀝𑀺𑀲𑀭𑀡𑀁, 𑀪𑀕𑀯𑀸 𑀧𑀝𑀺𑀲𑀭𑀡𑀁 𑀏𑀢𑁂𑀲𑀦𑁆𑀢𑀺 𑀪𑀕𑀯𑀁𑀧𑀝𑀺𑀲𑀭𑀡𑀸. 𑀆𑀧𑀸𑀣𑀁 𑀉𑀧𑀕𑀘𑁆𑀙𑀦𑁆𑀢𑀸 𑀳𑀺 𑀪𑀕𑀯𑀸 𑀧𑀝𑀺𑀲𑀭𑀡𑀁 𑀲𑀫𑁄𑀲𑀭𑀡𑀝𑁆𑀞𑀸𑀦𑀁. 𑀢𑁂𑀦𑀸𑀳 ‘‘𑀘𑀢𑀼𑀪𑀽𑀫𑀓𑀥𑀫𑁆𑀫𑀸’’𑀢𑀺𑀆𑀤𑀺. 𑀧𑀝𑀺𑀲𑀭𑀢𑀺 𑀲𑀪𑀸𑀯𑀲𑀫𑁆𑀧𑀝𑀺𑀯𑁂𑀥𑀯𑀲𑁂𑀦 𑀧𑀘𑁆𑀘𑁂𑀓𑀁 𑀉𑀧𑀕𑀘𑁆𑀙𑀢𑀻𑀢𑀺 𑀯𑀸 𑀧𑀝𑀺𑀲𑀭𑀡𑀁, 𑀪𑀕𑀯𑀸 𑀧𑀝𑀺𑀲𑀭𑀡𑀁 𑀏𑀢𑁂𑀲𑀦𑁆𑀢𑀺 𑀪𑀕𑀯𑀁𑀧𑀝𑀺𑀲𑀭𑀡𑀸. 𑀧𑀝𑀺𑀲𑀭𑀢𑀺 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀯𑀸 𑀧𑀝𑀺𑀲𑀭𑀡𑀁, 𑀢𑀲𑁆𑀫𑀸 𑀧𑀝𑀺𑀯𑀺𑀚𑁆𑀛𑀦𑀯𑀲𑁂𑀦 𑀪𑀕𑀯𑀸 𑀧𑀝𑀺𑀲𑀭𑀡𑀁 𑀏𑀢𑁂𑀲𑀦𑁆𑀢𑀺 𑀪𑀕𑀯𑀁𑀧𑀝𑀺𑀲𑀭𑀡𑀸. 𑀢𑁂𑀦𑀸𑀳 ‘‘𑀅𑀧𑀺𑀘𑀸’’𑀢𑀺𑀆𑀤𑀺. 𑀧𑀝𑀺𑀯𑁂𑀥𑀯𑀲𑁂𑀦𑀸𑀢𑀺 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑀢𑀸𑀯𑀲𑁂𑀦. 𑀅𑀲𑀢𑀺𑀧𑀺 𑀫𑀼𑀔𑁂 𑀅𑀢𑁆𑀣𑀢𑁄 𑀏𑀯𑀁 𑀯𑀤𑀦𑁆𑀢𑁄 𑀯𑀺𑀬 𑀳𑁄𑀢𑀻𑀢𑀺 𑀆𑀳 ‘‘𑀨𑀲𑁆𑀲𑁄 𑀆𑀕𑀘𑁆𑀙𑀢𑀺 𑀅𑀳𑀁 𑀪𑀕𑀯𑀸 𑀓𑀺𑀦𑁆𑀦𑀸𑀫𑁄’’𑀢𑀺. 𑀨𑀲𑁆𑀲𑁄 𑀜𑀸𑀡𑀲𑁆𑀲 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑁄𑀬𑁂𑀯 𑀳𑀺 𑀅𑀢𑁆𑀢𑀦𑁄 ‘‘𑀅𑀳𑀁 𑀓𑀺𑀦𑁆𑀦𑀸𑀫𑁄’’𑀢𑀺 𑀦𑀸𑀫𑀁 𑀧𑀼𑀘𑁆𑀙𑀦𑁆𑀢𑁄 𑀯𑀺𑀬, 𑀪𑀕𑀯𑀸 𑀘𑀲𑁆𑀲 𑀦𑀸𑀫𑀁 𑀓𑀭𑁄𑀦𑁆𑀢𑁄 𑀯𑀺𑀬 𑀳𑁄𑀢𑀺.

𑀧𑀝𑀺𑀪𑀸𑀢𑀽𑀢𑀺 𑀏𑀢𑁆𑀣 𑀧𑀝𑀺𑀲𑀤𑁆𑀤𑀸𑀧𑁂𑀓𑁆𑀔𑀸𑀬 ‘‘𑀪𑀕𑀯𑀦𑁆𑀢’’𑀦𑁆𑀢𑀺 𑀉𑀧𑀬𑁄𑀕𑀯𑀘𑀦𑀁, 𑀅𑀢𑁆𑀣𑁄 𑀧𑀦 𑀲𑀸𑀫𑀺𑀯𑀘𑀦𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀪𑀕𑀯𑀢𑁄’’𑀢𑀺. 𑀧𑀝𑀺𑀪𑀸𑀢𑀽𑀢𑀺 𑀘 𑀪𑀸𑀕𑁄 𑀳𑁄𑀢𑀼. 𑀪𑀕𑀯𑀢𑁄 𑀳𑀺 𑀏𑀲 𑀪𑀸𑀕𑁄, 𑀬𑀤𑀺𑀤𑀁 𑀥𑀫𑁆𑀫𑀲𑁆𑀲 𑀤𑁂𑀲𑀦𑀸, 𑀅𑀫𑁆𑀳𑀸𑀓𑀁 𑀧𑀦 𑀪𑀸𑀕𑁄 𑀲𑀯𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀯𑀜𑁆𑀳𑀺 𑀲𑀤𑁆𑀤𑀮𑀓𑁆𑀔𑀡𑁂𑀦 𑀲𑀫𑁂𑀢𑀺. 𑀓𑁂𑀘𑀺 𑀧𑀦 𑀧𑀝𑀺𑀪𑀸𑀢𑀽𑀢𑀺 𑀧𑀤𑀲𑁆𑀲 𑀤𑀺𑀲𑁆𑀲𑀢𑀽𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺, 𑀜𑀸𑀡𑁂𑀦 𑀤𑀺𑀲𑁆𑀲𑀢𑀼, 𑀤𑁂𑀲𑀻𑀬𑀢𑀽𑀢𑀺 𑀯𑀸 𑀅𑀢𑁆𑀣𑁄. 𑀉𑀧𑀝𑁆𑀞𑀸𑀢𑀽𑀢𑀺 𑀜𑀸𑀡𑀲𑁆𑀲 𑀧𑀘𑁆𑀘𑀼𑀧𑀢𑀺𑀝𑁆𑀞𑀢𑀼. 𑀧𑀸𑀴𑀺𑀬𑀁 𑀓𑁄 𑀅𑀥𑀺𑀧𑁆𑀧𑀬𑀸𑀲𑁄𑀢𑀺 𑀏𑀢𑁆𑀣 𑀓𑁄 𑀅𑀥𑀺𑀓𑀧𑁆𑀧𑀬𑁄𑀕𑁄𑀢𑀺 𑀅𑀢𑁆𑀣𑁄.

𑀮𑁄𑀓𑀯𑀚𑁆𑀚𑀯𑀲𑁂𑀦𑀸𑀢𑀺 𑀮𑁄𑀓𑀺𑀬𑀚𑀦𑁂𑀳𑀺 𑀧𑀓𑀢𑀺𑀬𑀸 𑀕𑀭𑀳𑀺𑀢𑀩𑁆𑀩𑀯𑀚𑁆𑀚𑀯𑀲𑁂𑀦. 𑀯𑀺𑀧𑀸𑀓𑀯𑀚𑁆𑀚𑀯𑀲𑁂𑀦𑀸𑀢𑀺 𑀯𑀺𑀧𑀸𑀓𑀲𑁆𑀲 𑀅𑀧𑀸𑀬𑀲𑀁𑀯𑀢𑁆𑀢𑀦𑀺𑀓𑀯𑀚𑁆𑀚𑀯𑀲𑁂𑀦. 𑀓𑀣𑀦𑁆𑀢𑀺𑀆𑀤𑀺𑀦𑀸 𑀉𑀪𑀬𑀯𑀚𑁆𑀚𑀯𑀲𑁂𑀦𑀧𑀺 𑀅𑀧𑁆𑀧𑀲𑀸𑀯𑀚𑁆𑀚𑀢𑀸𑀬 𑀯𑀺𑀲𑀬𑀁 𑀤𑀲𑁆𑀲𑁂𑀢𑀺. 𑀲𑁂𑀲𑀫𑁂𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀅𑀜𑁆𑀜𑀢𑀺𑀢𑁆𑀣𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀅𑀓𑀼𑀲𑀮𑀫𑀽𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁦. 𑀦𑀯𑀫𑁂 𑀮𑀼𑀩𑁆𑀪𑀢𑀻𑀢𑀺 𑀮𑁄𑀪𑁄. 𑀤𑀼𑀲𑁆𑀲𑀢𑀻𑀢𑀺 𑀤𑁄𑀲𑁄. 𑀫𑀼𑀬𑁆𑀳𑀢𑀻𑀢𑀺 𑀫𑁄𑀳𑁄. 𑀮𑁄𑀪𑀸𑀤𑀻𑀦𑀺 𑀧𑀦𑁂𑀢𑀸𑀦𑀺 𑀅𑀲𑀳𑀚𑀸𑀢𑀸𑀦𑀁 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀁 𑀓𑁂𑀲𑀜𑁆𑀘𑀺 𑀅𑀓𑀼𑀲𑀮𑀸𑀦𑀁 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀝𑁆𑀞𑁂𑀦, 𑀲𑀳𑀚𑀸𑀢𑀸𑀦𑀁 𑀅𑀤𑀺𑀦𑁆𑀦𑀸𑀤𑀸𑀦𑀸𑀤𑀻𑀦𑀁 𑀓𑁂𑀲𑀜𑁆𑀘𑀺 𑀲𑀫𑁆𑀧𑀬𑀼𑀢𑁆𑀢𑀸 𑀳𑀼𑀢𑁆𑀯𑀸 𑀉𑀧𑁆𑀧𑀸𑀤𑀓𑀝𑁆𑀞𑁂𑀦, 𑀲𑀬𑀜𑁆𑀘 𑀅𑀓𑀼𑀲𑀮𑀸𑀦𑀻𑀢𑀺 𑀲𑀸𑀯𑀚𑁆𑀚𑀤𑀼𑀓𑁆𑀔𑀯𑀺𑀧𑀸𑀓𑀝𑁆𑀞𑁂𑀦𑀸𑀢𑀺 𑀆𑀳 ‘‘𑀅𑀓𑀼𑀲𑀮𑀸𑀦𑀁 𑀫𑀽𑀮𑀸𑀦𑀺, 𑀅𑀓𑀼𑀲𑀮𑀸𑀦𑀺 𑀘 𑀢𑀸𑀦𑀺 𑀫𑀽𑀮𑀸𑀦𑀻’’𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀭𑀢𑁆𑀢𑁄 𑀔𑁄, 𑀆𑀯𑀼𑀲𑁄, 𑀭𑀸𑀕𑁂𑀦 𑀅𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄 𑀧𑀸𑀡𑀫𑁆𑀧𑀺 𑀳𑀦𑀢𑀻’’𑀢𑀺𑀆𑀤𑀺. 𑀬𑀤𑀧𑀻𑀢𑀺 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀬𑁄𑀧𑀺, 𑀪𑀺𑀓𑁆𑀔𑀯𑁂, 𑀮𑁄𑀪𑁄’’𑀢𑀺. 𑀢𑀤𑀧𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄𑀢𑀺 𑀆𑀳 ‘‘𑀲𑁄𑀧𑀺 𑀅𑀓𑀼𑀲𑀮𑀫𑀽𑀮’’𑀦𑁆𑀢𑀺. 𑀯𑀺𑀦𑀸𑀧𑀺 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦 𑀅𑀢𑁆𑀣𑀬𑁄𑀚𑀦𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀓𑀼𑀲𑀮𑀫𑀽𑀮𑀁 𑀯𑀸’’𑀢𑀺𑀆𑀤𑀺𑀫𑀸𑀳. 𑀲𑀩𑁆𑀩𑀢𑁆𑀣𑀸𑀢𑀺 ‘‘𑀬𑀤𑀧𑀺, 𑀪𑀺𑀓𑁆𑀔𑀯𑁂, 𑀤𑁄𑀲𑁄, 𑀢𑀤𑀧𑀺 𑀅𑀓𑀼𑀲𑀮𑀫𑀽𑀮’’𑀦𑁆𑀢𑀺𑀆𑀤𑀻𑀲𑀼. 𑀅𑀪𑀺𑀲𑀗𑁆𑀔𑀭𑁄𑀢𑀻𑀢𑀺 𑀏𑀢𑁆𑀣 𑀆𑀬𑀽𑀳𑀢𑀻𑀢𑀺 𑀅𑀢𑁆𑀣𑀁 𑀯𑀢𑁆𑀯𑀸 𑀢𑀜𑁆𑀘 𑀆𑀬𑀽𑀳𑀦𑀁 𑀧𑀘𑁆𑀘𑀬𑀲𑀫𑀯𑀸𑀬𑀲𑀺𑀤𑁆𑀥𑀺𑀢𑁄 𑀲𑀫𑁆𑀧𑀺𑀡𑁆𑀟𑀦𑀁 𑀭𑀸𑀲𑀺𑀓𑀭𑀡𑀁 𑀯𑀺𑀬 𑀳𑁄𑀢𑀻𑀢𑀺 𑀆𑀳 ‘‘𑀲𑀫𑁆𑀧𑀺𑀡𑁆𑀟𑁂𑀢𑀺 𑀭𑀸𑀲𑀺𑀁 𑀓𑀭𑁄𑀢𑀻’’𑀢𑀺.

𑀧𑀸𑀴𑀺𑀬𑀁 ‘‘𑀯𑀥𑁂𑀦𑀸’’𑀢𑀺𑀆𑀤𑀻𑀲𑀼 𑀯𑀥𑁂𑀦𑀸𑀢𑀺 𑀫𑀸𑀭𑀡𑁂𑀦 𑀯𑀸 𑀧𑁄𑀣𑀦𑁂𑀦 𑀯𑀸. 𑀯𑀥𑀲𑀤𑁆𑀤𑁄 𑀳𑀺 𑀳𑀺𑀁𑀲𑀦𑀢𑁆𑀣𑁄 𑀯𑀺𑀳𑁂𑀞𑀦𑀢𑁆𑀣𑁄 𑀘 𑀳𑁄𑀢𑀺. 𑀩𑀦𑁆𑀥𑀦𑁂𑀦𑀸𑀢𑀺 𑀅𑀤𑁆𑀤𑀼𑀩𑀦𑁆𑀥𑀦𑀸𑀤𑀺𑀦𑀸. 𑀚𑀸𑀦𑀺𑀬𑀸𑀢𑀺 𑀥𑀦𑀚𑀸𑀦𑀺𑀬𑀸, ‘‘𑀲𑀢𑀁 𑀕𑀡𑁆𑀳𑀣, 𑀲𑀳𑀲𑁆𑀲𑀁 𑀕𑀡𑁆𑀳𑀣𑀸’’𑀢𑀺 𑀏𑀯𑀁 𑀧𑀯𑀢𑁆𑀢𑀺𑀢𑀤𑀡𑁆𑀟𑁂𑀦𑀸𑀢𑀺 𑀅𑀢𑁆𑀣𑁄. 𑀕𑀭𑀳𑀸𑀬𑀸𑀢𑀺 𑀧𑀜𑁆𑀘𑀲𑀺𑀔𑀫𑀼𑀡𑁆𑀟𑀓𑀓𑀭𑀡𑀁, 𑀕𑁄𑀫𑀬𑀲𑀺𑀜𑁆𑀘𑀦𑀁, 𑀕𑀻𑀯𑀸𑀬 𑀓𑀼𑀭𑀡𑁆𑀟𑀓𑀩𑀦𑁆𑀥𑀦𑀦𑁆𑀢𑀺 𑀏𑀯𑀫𑀸𑀤𑀻𑀦𑀺 𑀓𑀢𑁆𑀯𑀸 𑀕𑀭𑀳𑀧𑀸𑀧𑀦𑁂𑀦. 𑀢𑀢𑁆𑀣 𑀧𑀜𑁆𑀘𑀲𑀺𑀔𑀫𑀼𑀡𑁆𑀟𑀓𑀓𑀭𑀡𑀁 𑀦𑀸𑀫 𑀓𑀸𑀓𑀧𑀓𑁆𑀔𑀓𑀭𑀡𑀁. 𑀕𑁄𑀫𑀬𑀲𑀺𑀜𑁆𑀘𑀦𑀁 𑀲𑀻𑀲𑁂𑀦 𑀓𑀡𑁄𑀤𑀓𑀸𑀯𑀲𑁂𑀘𑀦𑀁. 𑀓𑀼𑀭𑀡𑁆𑀟𑀓𑀩𑀦𑁆𑀥𑀦𑀁 𑀕𑀤𑁆𑀤𑀼𑀮𑀩𑀦𑁆𑀥𑀦𑀁.

𑀓𑀸𑀮𑀲𑁆𑀫𑀺𑀁 𑀦 𑀯𑀤𑀢𑀻𑀢𑀺 𑀬𑀼𑀢𑁆𑀢𑀓𑀸𑀮𑁂 𑀦 𑀯𑀤𑀢𑀺, 𑀯𑀢𑁆𑀢𑀩𑁆𑀩𑀓𑀸𑀮𑀲𑁆𑀲 𑀧𑀼𑀩𑁆𑀩𑁂 𑀯𑀸 𑀧𑀘𑁆𑀙𑀸 𑀯𑀸 𑀅𑀬𑀼𑀢𑁆𑀢𑀓𑀸𑀮𑁂 𑀯𑀢𑁆𑀢𑀸 𑀳𑁄𑀢𑀺. 𑀅𑀪𑀽𑀢𑀯𑀸𑀤𑀻𑀢𑀺 𑀬𑀁 𑀦𑀢𑁆𑀣𑀺, 𑀢𑀲𑁆𑀲 𑀯𑀢𑁆𑀢𑀸. 𑀢𑁂𑀦𑀸𑀳 ‘‘𑀪𑀽𑀢𑀁 𑀦 𑀯𑀤𑀢𑀻’’𑀢𑀺. 𑀅𑀢𑁆𑀣𑀁 𑀦 𑀯𑀤𑀢𑀻𑀢𑀺 𑀓𑀸𑀭𑀡𑀁 𑀦 𑀯𑀤𑀢𑀺, 𑀅𑀓𑀸𑀭𑀡𑀦𑀺𑀲𑁆𑀲𑀺𑀢𑀁 𑀦𑀺𑀧𑁆𑀨𑀮𑀁 𑀯𑀢𑁆𑀢𑀸 𑀳𑁄𑀢𑀺. 𑀥𑀫𑁆𑀫𑀁 𑀦 𑀯𑀤𑀢𑀻𑀢𑀺 𑀲𑀪𑀸𑀯𑀁 𑀦 𑀯𑀤𑀢𑀺, 𑀅𑀲𑀪𑀸𑀯𑀁 𑀯𑀢𑁆𑀢𑀸 𑀅𑀬𑀣𑀸𑀯𑀸𑀤𑀻𑀢𑀺 𑀅𑀢𑁆𑀣𑁄. 𑀯𑀺𑀦𑀬𑀁 𑀦 𑀯𑀤𑀢𑀻𑀢𑀺 𑀲𑀁𑀯𑀭𑀯𑀺𑀦𑀬𑀁 𑀦 𑀯𑀤𑀢𑀺, 𑀦 𑀲𑀁𑀯𑀭𑀯𑀺𑀦𑀬𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀲𑁆𑀲 𑀯𑀢𑁆𑀢𑀸 𑀳𑁄𑀢𑀺, 𑀅𑀢𑁆𑀢𑀦𑁄 𑀲𑀼𑀡𑀦𑁆𑀢𑀲𑁆𑀲 𑀘 𑀦 𑀲𑀁𑀯𑀭𑀯𑀺𑀦𑀬𑀸𑀯𑀳𑀲𑁆𑀲 𑀯𑀢𑁆𑀢𑀸𑀢𑀺 𑀅𑀢𑁆𑀣𑁄.

𑀅𑀢𑀘𑁆𑀙𑀦𑁆𑀢𑀺 𑀅𑀪𑀽𑀢𑀢𑁆𑀣𑀁. 𑀢𑁂𑀦𑀸𑀳 ‘‘𑀇𑀢𑀭𑀁 𑀢𑀲𑁆𑀲𑁂𑀯 𑀯𑁂𑀯𑀘𑀦’’𑀦𑁆𑀢𑀺. 𑀅𑀣 𑀯𑀸 𑀅𑀪𑀽𑀢𑀦𑁆𑀢𑀺 𑀅𑀲𑀦𑁆𑀢𑀁 𑀅𑀯𑀺𑀚𑁆𑀚𑀫𑀸𑀦𑀁. 𑀅𑀢𑀘𑁆𑀙𑀦𑁆𑀢𑀺 𑀅𑀢𑀣𑀸𑀓𑀸𑀭𑀁.

𑀧𑀼𑀜𑁆𑀜𑀓𑀫𑁆𑀫𑀢𑁄 𑀏𑀢𑀺 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀬𑁄, 𑀯𑀟𑁆𑀠𑀺. 𑀢𑀧𑁆𑀧𑀝𑀺𑀓𑁆𑀔𑁂𑀧𑁂𑀦 𑀅𑀦𑀬𑁄, 𑀅𑀯𑀟𑁆𑀠𑀻𑀢𑀺 𑀆𑀳 ‘‘𑀅𑀦𑀬𑀁 𑀆𑀧𑀚𑁆𑀚𑀢𑀻𑀢𑀺 𑀅𑀯𑀟𑁆𑀠𑀺𑀁 𑀆𑀧𑀚𑁆𑀚𑀢𑀻’’𑀢𑀺. 𑀫𑀸𑀮𑀼𑀯𑀸𑀲𑀺𑀧𑀸𑀝𑀺𑀓𑀸 𑀦𑀸𑀫 𑀤𑀻𑀖𑀲𑀡𑁆𑀞𑀸𑀦𑀁 𑀫𑀸𑀮𑀼𑀯𑀸𑀧𑀓𑁆𑀓𑀁, 𑀫𑀸𑀮𑀼𑀯𑀸𑀨𑀮𑀧𑁄𑀝𑁆𑀞𑀮𑀺𑀓𑀸𑀢𑀺 𑀅𑀢𑁆𑀣𑁄. 𑀨𑀮𑀺𑀢𑀸𑀬𑀸𑀢𑀺 𑀆𑀢𑀧𑁂𑀦 𑀲𑀼𑀲𑁆𑀲𑀺𑀢𑁆𑀯𑀸 𑀪𑀺𑀦𑁆𑀦𑀸𑀬. 𑀯𑀝𑀭𑀼𑀓𑁆𑀔𑀸𑀤𑀻𑀦𑀁 𑀫𑀽𑀮𑁂𑀢𑀺 𑀯𑀝𑀭𑀼𑀓𑁆𑀔𑀸𑀤𑀻𑀦𑀁 𑀲𑀫𑀻𑀧𑁂. 𑀲𑀓𑀪𑀸𑀯𑁂𑀦 𑀲𑀡𑁆𑀞𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀻𑀢𑀺 𑀓𑀲𑁆𑀫𑀸 𑀦 𑀲𑀓𑁆𑀓𑁄𑀦𑁆𑀢𑀺? 𑀪𑀯𑀦𑀯𑀺𑀦𑀸𑀲𑀪𑀬𑀸. 𑀭𑀼𑀓𑁆𑀔𑀫𑀽𑀮𑁂 𑀧𑀢𑀺𑀢𑀫𑀸𑀮𑀼𑀯𑀸𑀩𑀻𑀚𑀢𑁄 𑀳𑀺 𑀮𑀢𑀸 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀭𑀼𑀓𑁆𑀔𑀁 𑀅𑀪𑀺𑀭𑀼𑀳𑀢𑀺. 𑀲𑀸 𑀫𑀳𑀸𑀧𑀢𑁆𑀢𑀸 𑀘𑁂𑀯 𑀩𑀳𑀼𑀧𑀢𑁆𑀢𑀸 𑀘 𑀫𑀳𑀸𑀓𑁄𑀮𑀺𑀭𑀧𑀢𑁆𑀢𑀲𑀡𑁆𑀞𑀸𑀦𑁂𑀳𑀺 𑀢𑀢𑁄 𑀘 𑀫𑀳𑀦𑁆𑀢𑀢𑀭𑁂𑀳𑀺 𑀲𑀸𑀔𑀸𑀯𑀺𑀝𑀧𑀦𑁆𑀢𑀭𑁂𑀳𑀺 𑀧𑀢𑁆𑀢𑁂𑀳𑀺 𑀲𑀫𑀦𑁆𑀦𑀸𑀕𑀢𑀸. 𑀅𑀣 𑀦𑀁 𑀭𑀼𑀓𑁆𑀔𑀁 𑀫𑀽𑀮𑀢𑁄 𑀧𑀝𑁆𑀞𑀸𑀬 𑀯𑀺𑀦𑀦𑁆𑀥𑀫𑀸𑀦𑀸 𑀲𑀩𑁆𑀩𑀯𑀺𑀝𑀧𑀸𑀦𑀺 𑀲𑀜𑁆𑀙𑀸𑀤𑁂𑀢𑁆𑀯𑀸 𑀫𑀳𑀦𑁆𑀢𑀁 𑀪𑀸𑀭𑀁 𑀚𑀦𑁂𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀲𑀸 𑀯𑀸𑀢𑁂 𑀯𑀸𑀬𑀦𑁆𑀢𑁂 𑀤𑁂𑀯𑁂 𑀯𑀸 𑀯𑀲𑁆𑀲𑀦𑁆𑀢𑁂 𑀑𑀖𑀦𑀳𑁂𑀝𑁆𑀞𑀸𑀕𑀢𑀸 𑀑𑀮𑀫𑁆𑀩𑀦𑀳𑁂𑀢𑀼𑀪𑀽𑀢𑀁 𑀖𑀦𑀪𑀸𑀯𑀁 𑀚𑀦𑁂𑀢𑁆𑀯𑀸 𑀢𑀲𑁆𑀲 𑀭𑀼𑀓𑁆𑀔𑀲𑁆𑀲 𑀲𑀩𑁆𑀩𑀲𑀸𑀔𑀁 𑀪𑀺𑀚𑁆𑀚𑀢𑀺, 𑀪𑀽𑀫𑀺𑀬𑀁 𑀦𑀺𑀧𑀸𑀢𑁂𑀢𑀺. 𑀢𑀢𑁄 𑀢𑀲𑁆𑀫𑀺𑀁 𑀭𑀼𑀓𑁆𑀔𑁂 𑀧𑀢𑀺𑀝𑁆𑀞𑀺𑀢𑀯𑀺𑀫𑀸𑀦𑀁 𑀪𑀺𑀚𑁆𑀚𑀢𑀺 𑀯𑀺𑀦𑀲𑁆𑀲𑀢𑀺. 𑀇𑀢𑀺 𑀢𑀸 𑀤𑁂𑀯𑀢𑀸𑀬𑁄 𑀪𑀯𑀦𑀯𑀺𑀦𑀸𑀲𑀪𑀬𑀸 𑀲𑀓𑀪𑀸𑀯𑁂𑀦 𑀲𑀡𑁆𑀞𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀏𑀢𑁆𑀣 𑀘 𑀬𑀁 𑀲𑀸𑀔𑀝𑁆𑀞𑀓𑀯𑀺𑀫𑀸𑀦𑀁 𑀳𑁄𑀢𑀺, 𑀢𑀁 𑀲𑀸𑀔𑀸𑀲𑀼 𑀪𑀺𑀚𑁆𑀚𑀫𑀸𑀦𑀸𑀲𑀼 𑀢𑀢𑁆𑀣 𑀢𑀢𑁆𑀣𑁂𑀯 𑀪𑀺𑀚𑁆𑀚𑀺𑀢𑁆𑀯𑀸 𑀲𑀩𑁆𑀩𑀲𑀸𑀔𑀸𑀲𑀼 𑀪𑀺𑀦𑁆𑀦𑀸𑀲𑀼 𑀲𑀩𑁆𑀩𑀁 𑀪𑀺𑀚𑁆𑀚𑀢𑀺, 𑀭𑀼𑀓𑁆𑀔𑀝𑁆𑀞𑀓𑀯𑀺𑀫𑀸𑀦𑀁 𑀧𑀦 𑀬𑀸𑀯 𑀭𑀼𑀓𑁆𑀔𑀲𑁆𑀲 𑀫𑀽𑀮𑀫𑀢𑁆𑀢𑀫𑁆𑀧𑀺 𑀢𑀺𑀝𑁆𑀞𑀢𑀺, 𑀢𑀸𑀯 𑀦 𑀦𑀲𑁆𑀲𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀢𑀢𑁆𑀣 𑀧𑀮𑀼𑀚𑁆𑀚𑀺𑀢𑁆𑀯𑀸𑀢𑀺 𑀢𑀢𑁆𑀣 𑀢𑀢𑁆𑀣 𑀪𑀺𑀚𑁆𑀚𑀺𑀢𑁆𑀯𑀸. 𑀲𑁂𑀲𑀫𑁂𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀅𑀓𑀼𑀲𑀮𑀫𑀽𑀮𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀉𑀧𑁄𑀲𑀣𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁧. 𑀤𑀲𑀫𑁂 𑀢𑀤𑀳𑀽𑀢𑀺 𑀏𑀢𑁆𑀣 𑀢𑀲𑁆𑀫𑀺𑀁 𑀅𑀳𑀦𑀻𑀢𑀺 𑀅𑀢𑁆𑀣𑁄𑀢𑀺 𑀆𑀳 ‘‘𑀢𑀲𑁆𑀫𑀺𑀁 𑀅𑀳𑀼 𑀉𑀧𑁄𑀲𑀣𑁂’’𑀢𑀺. 𑀉𑀧𑀯𑀲𑀦𑁆𑀢𑀺 𑀏𑀢𑁆𑀣𑀸𑀢𑀺 𑀉𑀧𑁄𑀲𑀣𑁄, 𑀉𑀧𑁄𑀲𑀣𑀤𑀺𑀯𑀲𑁄. 𑀉𑀧𑀯𑀲𑀦𑁆𑀢𑀻𑀢𑀺 𑀘 𑀲𑀻𑀮𑁂𑀦 𑀯𑀸 𑀅𑀦𑀲𑀦𑁂𑀦 𑀯𑀸 𑀔𑀻𑀭𑀲𑀸𑀬𑀦𑀸𑀤𑀺𑀯𑀺𑀥𑀺𑀦𑀸 𑀯𑀸 𑀉𑀧𑁂𑀢𑀸 𑀳𑀼𑀢𑁆𑀯𑀸 𑀯𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀉𑀧𑁄𑀲𑀣𑀤𑀺𑀯𑀲𑁂 𑀳𑀺 𑀲𑀸𑀲𑀦𑀺𑀓𑀸 𑀲𑀻𑀮𑁂𑀦, 𑀩𑀸𑀳𑀺𑀭𑀓𑀸 𑀲𑀩𑁆𑀩𑀲𑁄 𑀆𑀳𑀸𑀭𑀲𑁆𑀲 𑀅𑀪𑀼𑀜𑁆𑀚𑀦𑁂𑀦 𑀔𑀻𑀭𑀲𑀸𑀬𑀦𑀫𑀥𑀼𑀲𑀸𑀬𑀦𑀸𑀤𑀺𑀯𑀺𑀥𑀺𑀦𑀸 𑀯𑀸 𑀉𑀧𑁂𑀢𑀸 𑀳𑀼𑀢𑁆𑀯𑀸 𑀯𑀺𑀳𑀭𑀦𑁆𑀢𑀺. 𑀲𑁄 𑀧𑀦𑁂𑀲 𑀉𑀧𑁄𑀲𑀣𑀤𑀺𑀯𑀲𑁄 𑀅𑀝𑁆𑀞𑀫𑀺𑀘𑀸𑀢𑀼𑀤𑁆𑀤𑀲𑀺𑀧𑀦𑁆𑀦𑀭𑀲𑀺𑀪𑁂𑀤𑁂𑀦 𑀢𑀺𑀯𑀺𑀥𑁄, 𑀢𑀲𑁆𑀫𑀸 𑀲𑁂𑀲𑀤𑁆𑀯𑀬𑀦𑀺𑀯𑀸𑀭𑀡𑀢𑁆𑀣𑀁 ‘‘𑀧𑀦𑁆𑀦𑀭𑀲𑀺𑀓𑀉𑀧𑁄𑀲𑀣𑀤𑀺𑀯𑀲𑁂’’𑀢𑀺 𑀯𑀼𑀢𑁆𑀢𑀁. 𑀯𑀯𑀲𑁆𑀲𑀕𑁆𑀕𑀢𑁆𑀣𑁂𑀢𑀺 𑀯𑀘𑀲𑀸𑀬𑀢𑁆𑀣𑁂. 𑀤𑀺𑀯𑀲𑀤𑁆𑀤𑁄 𑀤𑀺𑀯𑀸𑀲𑀤𑁆𑀤𑁄 𑀯𑀺𑀬 𑀤𑀺𑀯𑀲𑀧𑀭𑀺𑀬𑀸𑀬𑁄, 𑀢𑀲𑁆𑀲 𑀯𑀺𑀲𑁂𑀲𑀦𑀪𑀸𑀯𑁂𑀦 𑀯𑀼𑀘𑁆𑀘𑀫𑀸𑀦𑁄 𑀤𑀺𑀯𑀸𑀲𑀤𑁆𑀤𑁄 𑀲𑀯𑀺𑀲𑁂𑀲𑁂𑀦 𑀤𑀻𑀧𑁂𑀢𑀻𑀢𑀺 𑀆𑀳 ‘‘𑀤𑀺𑀯𑀲𑀲𑁆𑀲 𑀤𑀺𑀯𑀸, 𑀫𑀚𑁆𑀛𑀦𑁆𑀳𑀺𑀓𑁂 𑀓𑀸𑀮𑁂𑀢𑀺 𑀅𑀢𑁆𑀣𑁄’’𑀢𑀺. 𑀧𑀝𑀺𑀘𑁆𑀙𑀸𑀧𑁂𑀢𑁆𑀯𑀸𑀢𑀺 𑀲𑀫𑁆𑀧𑀝𑀺𑀘𑁆𑀙𑀦𑀁 𑀓𑀸𑀭𑁂𑀢𑁆𑀯𑀸. 𑀯𑀺𑀧𑀸𑀓𑀨𑀮𑁂𑀦𑀸𑀢𑀺 𑀲𑀤𑀺𑀲𑀨𑀮𑁂𑀦. 𑀦 𑀫𑀳𑀧𑁆𑀨𑀮𑁄 𑀳𑁄𑀢𑀺 𑀫𑀦𑁄𑀤𑀼𑀘𑁆𑀘𑀭𑀺𑀢𑀤𑀼𑀲𑁆𑀲𑀻𑀮𑁆𑀬𑁂𑀦 𑀉𑀧𑀓𑁆𑀓𑀺𑀮𑀺𑀝𑁆𑀞𑀪𑀸𑀯𑀢𑁄. 𑀯𑀺𑀧𑀸𑀓𑀸𑀦𑀺𑀲𑀁𑀲𑁂𑀦𑀸𑀢𑀺 𑀉𑀤𑁆𑀭𑀬𑀨𑀮𑁂𑀦. 𑀯𑀺𑀧𑀸𑀓𑁄𑀪𑀸𑀲𑁂𑀦𑀸𑀢𑀺 𑀧𑀝𑀺𑀧𑀓𑁆𑀔𑀯𑀺𑀕𑀫𑀚𑀦𑀺𑀢𑁂𑀦 𑀲𑀪𑀸𑀯𑀲𑀗𑁆𑀔𑀸𑀢𑁂𑀦 𑀯𑀺𑀧𑀸𑀓𑁄𑀪𑀸𑀲𑁂𑀦. 𑀦 𑀫𑀳𑀸𑀑𑀪𑀸𑀲𑁄 𑀅𑀧𑀭𑀺𑀲𑀼𑀤𑁆𑀥𑀪𑀸𑀯𑀢𑁄. 𑀯𑀺𑀧𑀸𑀓𑀯𑀺𑀧𑁆𑀨𑀸𑀭𑀲𑁆𑀲𑀸𑀢𑀺 𑀯𑀺𑀧𑀸𑀓𑀯𑁂𑀧𑀼𑀮𑁆𑀮𑀲𑁆𑀲.

𑀦𑀸𑀳𑀁 𑀓𑁆𑀯𑀘𑀦𑀻𑀢𑀺𑀆𑀤𑀺𑀯𑀘𑀦𑀲𑁆𑀲 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀯𑀲𑁂𑀦 𑀧𑀯𑀢𑁆𑀢𑀢𑁆𑀢𑀸 ‘‘𑀇𑀤𑀁 𑀢𑀲𑁆𑀲 𑀫𑀼𑀲𑀸𑀯𑀸𑀤𑀲𑁆𑀫𑀺𑀁 𑀯𑀤𑀸𑀫𑀻’’𑀢𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑀁, 𑀘𑀢𑀼𑀓𑁄𑀝𑀺𑀓𑀲𑀼𑀜𑁆𑀜𑀢𑀸𑀤𑀲𑁆𑀲𑀦𑀯𑀲𑁂𑀦 𑀧𑀯𑀢𑁆𑀢𑀁 𑀧𑀦 𑀅𑀭𑀺𑀬𑀤𑀲𑁆𑀲𑀦𑀫𑁂𑀯𑀸𑀢𑀺 𑀦 𑀢𑀢𑁆𑀣 𑀫𑀼𑀲𑀸𑀯𑀸𑀤𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 ‘𑀦𑀸𑀳𑀁 𑀓𑁆𑀯𑀘𑀦𑀺, 𑀓𑀲𑁆𑀲𑀘𑀺 𑀓𑀺𑀜𑁆𑀘𑀦𑀢𑀲𑁆𑀫𑀺𑀁, 𑀦 𑀘 𑀫𑀫 𑀓𑁆𑀯𑀘𑀦𑀺, 𑀓𑀺𑀲𑁆𑀫𑀺𑀜𑁆𑀘𑀺 𑀓𑀺𑀜𑁆𑀘𑀦𑀢𑀢𑁆𑀣𑀻’’’𑀢𑀺𑀆𑀤𑀺 (𑀫. 𑀦𑀺. 𑁩.𑁭𑁦).

𑀏𑀢𑁆𑀣 𑀳𑀺 𑀘𑀢𑀼𑀓𑁄𑀝𑀺𑀓𑀲𑀼𑀜𑁆𑀜𑀢𑀸 𑀓𑀣𑀺𑀢𑀸. 𑀓𑀣𑀁? 𑀅𑀭𑀺𑀬𑁄 (𑀯𑀺𑀲𑀼𑀤𑁆𑀥𑀺. 𑁨.𑁭𑁬𑁦; 𑀫. 𑀦𑀺. 𑀅𑀝𑁆𑀞. 𑁩.𑁭𑁦) 𑀳𑀺 𑀦𑀸𑀳𑀁 𑀓𑁆𑀯𑀘𑀦𑀻𑀢𑀺 𑀓𑁆𑀯𑀘𑀺 𑀅𑀢𑁆𑀢𑀸𑀦𑀁 𑀦 𑀧𑀲𑁆𑀲𑀢𑀺, 𑀓𑀲𑁆𑀲𑀘𑀺 𑀓𑀺𑀜𑁆𑀘𑀦𑀢𑀲𑁆𑀫𑀺𑀦𑁆𑀢𑀺 𑀅𑀢𑁆𑀢𑀦𑁄 𑀅𑀢𑁆𑀢𑀸𑀦𑀁 𑀓𑀲𑁆𑀲𑀘𑀺 𑀧𑀭𑀲𑁆𑀲 𑀓𑀺𑀜𑁆𑀘𑀦𑀪𑀸𑀯𑁂 𑀉𑀧𑀦𑁂𑀢𑀩𑁆𑀩𑀁 𑀦 𑀧𑀲𑁆𑀲𑀢𑀺, 𑀪𑀸𑀢𑀺𑀝𑁆𑀞𑀸𑀦𑁂 𑀪𑀸𑀢𑀭𑀁, 𑀲𑀳𑀸𑀬𑀝𑁆𑀞𑀸𑀦𑁂 𑀲𑀳𑀸𑀬𑀁, 𑀧𑀭𑀺𑀓𑁆𑀔𑀸𑀭𑀝𑁆𑀞𑀸𑀦𑁂 𑀧𑀭𑀺𑀓𑁆𑀔𑀸𑀭𑀁 𑀫𑀜𑁆𑀜𑀺𑀢𑁆𑀯𑀸 𑀉𑀧𑀦𑁂𑀢𑀩𑁆𑀩𑀁 𑀦 𑀧𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀦 𑀘 𑀫𑀫 𑀓𑁆𑀯𑀘𑀦𑀻𑀢𑀺 𑀏𑀢𑁆𑀣 𑀫𑀫-𑀲𑀤𑁆𑀤𑀁 𑀢𑀸𑀯 𑀞𑀧𑁂𑀢𑁆𑀯𑀸 𑀓𑁆𑀯𑀘𑀦𑀺 𑀧𑀭𑀲𑁆𑀲 𑀘 𑀅𑀢𑁆𑀢𑀸𑀦𑀁 𑀓𑁆𑀯𑀘𑀺 𑀦 𑀧𑀲𑁆𑀲𑀢𑀻𑀢𑀺 𑀅𑀬𑀫𑀢𑁆𑀣𑁄. 𑀇𑀤𑀸𑀦𑀺 𑀫𑀫-𑀲𑀤𑁆𑀤𑀁 𑀆𑀳𑀭𑀺𑀢𑁆𑀯𑀸 ‘‘𑀫𑀫 𑀓𑀺𑀲𑁆𑀫𑀺𑀜𑁆𑀘𑀺 𑀓𑀺𑀜𑁆𑀘𑀦𑀢𑀢𑁆𑀣𑀻’’𑀢𑀺 𑀲𑁄 𑀧𑀭𑀲𑁆𑀲 𑀅𑀢𑁆𑀢𑀸𑀦𑀁 ‘‘𑀫𑀫 𑀓𑀺𑀲𑁆𑀫𑀺𑀜𑁆𑀘𑀺 𑀓𑀺𑀜𑁆𑀘𑀦𑀪𑀸𑀯𑁂𑀦 𑀅𑀢𑁆𑀣𑀻’’𑀢𑀺 𑀦 𑀧𑀲𑁆𑀲𑀢𑀺, 𑀅𑀢𑁆𑀢𑀦𑁄 𑀪𑀸𑀢𑀺𑀓𑀝𑁆𑀞𑀸𑀦𑁂 𑀪𑀸𑀢𑀭𑀁, 𑀲𑀳𑀸𑀬𑀝𑁆𑀞𑀸𑀦𑁂 𑀲𑀳𑀸𑀬𑀁, 𑀧𑀭𑀺𑀓𑁆𑀔𑀸𑀭𑀝𑁆𑀞𑀸𑀦𑁂 𑀧𑀭𑀺𑀓𑁆𑀔𑀸𑀭𑀦𑁆𑀢𑀺 𑀓𑀺𑀲𑁆𑀫𑀺𑀜𑁆𑀘𑀺 𑀞𑀸𑀦𑁂 𑀧𑀭𑀲𑁆𑀲 𑀅𑀢𑁆𑀢𑀸𑀦𑀁 𑀇𑀫𑀺𑀦𑀸 𑀓𑀺𑀜𑁆𑀘𑀦𑀪𑀸𑀯𑁂𑀦 𑀉𑀧𑀦𑁂𑀢𑀩𑁆𑀩𑀁 𑀦 𑀧𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀫𑀬𑀁 𑀬𑀲𑁆𑀫𑀸 𑀦𑁂𑀯 𑀓𑀢𑁆𑀣𑀘𑀺 𑀅𑀢𑁆𑀢𑀸𑀦𑀁 𑀧𑀲𑁆𑀲𑀢𑀺, 𑀦 𑀢𑀁 𑀧𑀭𑀲𑁆𑀲 𑀓𑀺𑀜𑁆𑀘𑀦𑀪𑀸𑀯𑁂 𑀉𑀧𑀦𑁂𑀢𑀩𑁆𑀩𑀁 𑀧𑀲𑁆𑀲𑀢𑀺. 𑀦 𑀓𑀢𑁆𑀣𑀘𑀺 𑀧𑀭𑀲𑁆𑀲 𑀅𑀢𑁆𑀢𑀸𑀦𑀁 𑀧𑀲𑁆𑀲𑀢𑀺, 𑀦 𑀧𑀭𑀲𑁆𑀲 𑀅𑀢𑁆𑀢𑀸𑀦𑀁 𑀅𑀢𑁆𑀢𑀦𑁄 𑀓𑀺𑀜𑁆𑀘𑀦𑀪𑀸𑀯𑁂 𑀉𑀧𑀦𑁂𑀢𑀩𑁆𑀩𑀁 𑀧𑀲𑁆𑀲𑀢𑀺, 𑀢𑀲𑁆𑀫𑀸 𑀅𑀬𑀁 𑀲𑀼𑀜𑁆𑀜𑀢𑀸 𑀘𑀢𑀼𑀓𑁄𑀝𑀺𑀓𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀬𑀲𑁆𑀫𑀸 𑀧𑀦 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸𑀦𑀁 𑀬𑀸𑀣𑀸𑀯𑀤𑀲𑁆𑀲𑀦𑀲𑁆𑀲 𑀅𑀲𑀫𑁆𑀪𑀯𑀢𑁄 𑀬𑀣𑀸𑀯𑀼𑀢𑁆𑀢𑀘𑀢𑀼𑀓𑁄𑀝𑀺𑀓𑀲𑀼𑀜𑁆𑀜𑀢𑀸𑀤𑀲𑁆𑀲𑀦𑀁 𑀦 𑀲𑀫𑁆𑀪𑀯𑀢𑀺, 𑀢𑀲𑁆𑀫𑀸 ‘‘𑀦𑀢𑁆𑀣𑀺 𑀫𑀸𑀢𑀸, 𑀦𑀢𑁆𑀣𑀺 𑀧𑀺𑀢𑀸’’𑀢𑀺𑀆𑀤𑀺𑀯𑀘𑀦𑀁 (𑀤𑀻. 𑀦𑀺. 𑁧.𑁧𑁭𑁧) 𑀯𑀺𑀬 𑀫𑀺𑀘𑁆𑀙𑀸𑀕𑀸𑀳𑀯𑀲𑁂𑀦 ‘‘𑀦𑀸𑀳𑀁 𑀓𑁆𑀯𑀘𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀬𑀼𑀢𑁆𑀢𑁄 𑀘𑁂𑀢𑁆𑀣 𑀫𑀼𑀲𑀸𑀯𑀸𑀤𑀲𑀫𑁆𑀪𑀯𑁄. 𑀓𑀢𑁆𑀣𑀘𑀻𑀢𑀺 𑀞𑀸𑀦𑁂, 𑀓𑀸𑀮𑁂 𑀯𑀸. 𑀅𑀣 ‘‘𑀦𑀺𑀧𑁆𑀨𑀮𑁄’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁. ‘‘𑀦 𑀫𑀳𑀧𑁆𑀨𑀮𑁄’’𑀢𑀺 𑀲𑀤𑁆𑀤𑁂𑀦 𑀳𑀺 𑀫𑀳𑀧𑁆𑀨𑀮𑀸𑀪𑀸𑀯𑁄𑀯 𑀚𑁄𑀢𑀺𑀢𑁄, 𑀦 𑀧𑀦 𑀲𑀩𑁆𑀩𑀣𑀸 𑀨𑀮𑀸𑀪𑀸𑀯𑁄𑀢𑀺 𑀆𑀳 ‘‘𑀩𑁆𑀬𑀜𑁆𑀚𑀦𑀫𑁂𑀯 𑀳𑀺 𑀏𑀢𑁆𑀣 𑀲𑀸𑀯𑀲𑁂𑀲’’𑀦𑁆𑀢𑀺𑀆𑀤𑀺. 𑀲𑁂𑀲𑀧𑀤𑁂𑀲𑀼𑀧𑀻𑀢𑀺 ‘‘𑀦 𑀫𑀳𑀸𑀦𑀺𑀲𑀁𑀲𑁄’’𑀢𑀺𑀆𑀤𑀻𑀲𑀼𑀧𑀺.

𑀅𑀝𑁆𑀞𑀳𑀺 𑀓𑀸𑀭𑀡𑁂𑀳𑀻𑀢𑀺 𑁋

‘‘𑀅𑀣 𑀔𑁄, 𑀪𑀦𑁆𑀢𑁂, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀪𑀕𑀯𑀢𑁄 𑀅𑀝𑁆𑀞 𑀬𑀣𑀸𑀪𑀼𑀘𑁆𑀘𑁂 𑀯𑀡𑁆𑀡𑁂 𑀧𑀬𑀺𑀭𑀼𑀤𑀸𑀳𑀸𑀲𑀺 𑁋 ‘𑀢𑀁 𑀓𑀺𑀁 𑀫𑀜𑁆𑀜𑀦𑁆𑀢𑀺, 𑀪𑁄𑀦𑁆𑀢𑁄 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸, 𑀬𑀸𑀯𑀜𑁆𑀘 𑀲𑁄 𑀪𑀕𑀯𑀸 𑀩𑀳𑀼𑀚𑀦𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁, 𑀏𑀯𑀁 𑀩𑀳𑀼𑀚𑀦𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑀁 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀇𑀫𑀺𑀦𑀸𑀧𑀗𑁆𑀕𑁂𑀦 𑀲𑀫𑀦𑁆𑀦𑀸𑀕𑀢𑀁 𑀲𑀢𑁆𑀣𑀸𑀭𑀁 𑀦𑁂𑀯 𑀅𑀢𑀻𑀢𑀁𑀲𑁂 𑀲𑀫𑀦𑀼𑀧𑀲𑁆𑀲𑀸𑀫𑀺, 𑀦 𑀧𑀦𑁂𑀢𑀭𑀳𑀺 𑀅𑀜𑁆𑀜𑀢𑁆𑀭 𑀢𑁂𑀦 𑀪𑀕𑀯𑀢𑀸’’𑀢𑀺 𑁋

𑀆𑀤𑀺𑀦𑀸 𑀫𑀳𑀸𑀕𑁄𑀯𑀺𑀦𑁆𑀤𑀲𑀼𑀢𑁆𑀢𑁂 (𑀤𑀻. 𑀦𑀺. 𑁨.𑁨𑁯𑁬) 𑀯𑀺𑀢𑁆𑀣𑀸𑀭𑀺𑀢𑁂𑀳𑀺 𑀩𑀳𑀼𑀚𑀦𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑀸𑀤𑀻𑀳𑀺 𑀩𑀼𑀤𑁆𑀥𑀸𑀦𑀼𑀪𑀸𑀯𑀤𑀻𑀧𑀓𑁂𑀳𑀺 𑀅𑀝𑁆𑀞𑀳𑀺 𑀓𑀸𑀭𑀡𑁂𑀳𑀺. 𑀅𑀣 ‘‘𑀦𑀯𑀳𑀺 𑀓𑀸𑀭𑀡𑁂𑀳𑀻’’𑀢𑀺 𑀅𑀯𑀢𑁆𑀯𑀸 ‘‘𑀅𑀝𑁆𑀞𑀳𑀺 𑀓𑀸𑀭𑀡𑁂𑀳𑀻’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀏𑀢𑁆𑀣 𑀳𑀺…𑀧𑁂… 𑀲𑀩𑁆𑀩𑁂 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸 𑀩𑀼𑀤𑁆𑀥𑀕𑀼𑀡𑀸 𑀲𑀗𑁆𑀕𑀳𑀺𑀢𑀸’’𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 ‘‘𑀇𑀢𑀺𑀧𑀺 𑀲𑁄 𑀪𑀕𑀯𑀸’’𑀢𑀺 𑀇𑀫𑀺𑀦𑀸 𑀯𑀘𑀦𑁂𑀦 𑀅𑀯𑀺𑀲𑁂𑀲𑀢𑁄 𑀲𑀩𑁆𑀩𑁂𑀧𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸 𑀩𑀼𑀤𑁆𑀥𑀕𑀼𑀡𑀸 𑀤𑀻𑀧𑀺𑀢𑀸, 𑀢𑀲𑁆𑀫𑀸 𑀢𑁂𑀦 𑀤𑀻𑀧𑀺𑀢𑀕𑀼𑀡𑁂 𑀲𑀦𑁆𑀥𑀸𑀬 ‘‘𑀅𑀝𑁆𑀞𑀳𑀺 𑀓𑀸𑀭𑀡𑁂𑀳𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺. 𑀅𑀭𑀳𑀦𑁆𑀢𑀺𑀆𑀤𑀻𑀳𑀺 𑀧𑀸𑀝𑀺𑀬𑁂𑀓𑁆𑀓𑀕𑀼𑀡𑀸𑀯 𑀦𑀺𑀤𑁆𑀤𑀺𑀝𑁆𑀞𑀸𑀢𑀺 𑀅𑀭𑀳𑀦𑁆𑀢𑀺𑀆𑀤𑀻𑀳𑀺 𑀏𑀓𑁂𑀓𑁂𑀳𑀺 𑀧𑀤𑁂𑀳𑀺 𑀏𑀓𑁂𑀓𑁂 𑀕𑀼𑀡𑀸𑀯 𑀦𑀺𑀤𑁆𑀤𑀺𑀝𑁆𑀞𑀸𑀢𑀺 𑀅𑀢𑁆𑀣𑁄.

𑀲𑀳𑀢𑀦𑁆𑀢𑀺𑀓𑀦𑁆𑀢𑀺 𑀧𑀸𑀴𑀺𑀥𑀫𑁆𑀫𑀲𑀳𑀺𑀢𑀁. 𑀧𑀼𑀭𑀺𑀫𑀦𑀬𑁂𑀦𑁂𑀯 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸𑀢𑀺 ‘‘𑀓𑀺𑀮𑀺𑀝𑁆𑀞𑀲𑁆𑀫𑀺𑀜𑁆𑀳𑀺 𑀓𑀸𑀬𑁂 𑀧𑀲𑀸𑀥𑀦𑀁 𑀧𑀲𑀸𑀥𑁂𑀢𑁆𑀯𑀸 𑀦𑀓𑁆𑀔𑀢𑁆𑀢𑀁 𑀓𑀻𑀴𑀫𑀸𑀦𑀸 𑀦 𑀲𑁄𑀪𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸𑀢𑀺 𑀅𑀢𑁆𑀣𑁄.

𑀲𑀗𑁆𑀖𑀲𑁆𑀲 𑀅𑀦𑀼𑀲𑁆𑀲𑀭𑀡𑀁 𑀦𑀸𑀫 𑀢𑀲𑁆𑀲 𑀕𑀼𑀡𑀸𑀦𑀼𑀲𑁆𑀲𑀭𑀡𑀫𑁂𑀯𑀸𑀢𑀺 𑀆𑀳 ‘‘𑀅𑀝𑁆𑀞𑀦𑁆𑀦𑀁 𑀅𑀭𑀺𑀬𑀧𑀼𑀕𑁆𑀕𑀮𑀸𑀦𑀁 𑀕𑀼𑀡𑁂 𑀅𑀦𑀼𑀲𑁆𑀲𑀭𑀢𑀻’’𑀢𑀺. 𑀤𑁆𑀯𑁂 𑀢𑀬𑁄 𑀯𑀸𑀭𑁂 𑀕𑀸𑀳𑀸𑀧𑀺𑀢𑀁 𑀉𑀲𑀼𑀫𑀦𑁆𑀢𑀺 𑀤𑁆𑀯𑁂 𑀢𑀬𑁄 𑀯𑀸𑀭𑁂 𑀉𑀤𑁆𑀥𑀦𑀁 𑀆𑀭𑁄𑀧𑁂𑀢𑁆𑀯𑀸 𑀲𑁂𑀤𑀦𑀯𑀲𑁂𑀦 𑀕𑀸𑀳𑀸𑀧𑀺𑀢𑀁 𑀉𑀲𑀼𑀫𑀁. 𑀧𑀼𑀭𑀺𑀫𑀦𑀬𑁂𑀦𑁂𑀯 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸𑀢𑀺 ‘‘𑀓𑀺𑀮𑀺𑀝𑁆𑀞𑀲𑁆𑀫𑀺𑀜𑁆𑀳𑀺 𑀯𑀢𑁆𑀣𑁂 𑀧𑀲𑀸𑀥𑀦𑀁 𑀧𑀲𑀸𑀥𑁂𑀢𑁆𑀯𑀸 𑀦𑀓𑁆𑀔𑀢𑁆𑀢𑀁 𑀓𑀻𑀴𑀫𑀸𑀦𑀸 𑀦 𑀲𑁄𑀪𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸.

𑀧𑀳𑀻𑀦𑀓𑀸𑀮𑀢𑁄 𑀧𑀝𑁆𑀞𑀸𑀬…𑀧𑁂… 𑀯𑀺𑀭𑀢𑀸𑀯𑀸𑀢𑀺 𑀏𑀢𑁂𑀦 𑀧𑀳𑀸𑀦𑀳𑁂𑀢𑀼𑀓𑀸 𑀇𑀥𑀸𑀥𑀺𑀧𑁆𑀧𑁂𑀢𑀸 𑀯𑀺𑀭𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀓𑀫𑁆𑀫𑀓𑁆𑀔𑀬𑀓𑀭𑀜𑀸𑀡𑁂𑀦 𑀳𑀺 𑀧𑀸𑀡𑀸𑀢𑀺𑀧𑀸𑀢𑀤𑀼𑀲𑁆𑀲𑀻𑀮𑁆𑀬𑀲𑁆𑀲 𑀧𑀳𑀻𑀦𑀢𑁆𑀢𑀸 𑀅𑀭𑀳𑀦𑁆𑀢𑁄 𑀅𑀘𑁆𑀘𑀦𑁆𑀢𑀫𑁂𑀯 𑀢𑀢𑁄 𑀧𑀝𑀺𑀯𑀺𑀭𑀢𑀸𑀢𑀺 𑀯𑀼𑀘𑁆𑀘𑀢𑀺 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀧𑀳𑀸𑀦𑀯𑀺𑀭𑀢𑀻𑀦𑀁 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀓𑀺𑀜𑁆𑀘𑀸𑀧𑀺 𑀧𑀳𑀸𑀦𑀯𑀺𑀭𑀫𑀡𑀸𑀦𑀁 𑀧𑀼𑀭𑀺𑀫𑀧𑀘𑁆𑀙𑀺𑀫𑀓𑀸𑀮𑀢𑀸 𑀦𑀢𑁆𑀣𑀺, 𑀫𑀕𑁆𑀕𑀥𑀫𑁆𑀫𑀸𑀦𑀁 𑀧𑀦 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀻𑀦𑀁 𑀲𑀫𑁆𑀫𑀸𑀯𑀸𑀘𑀸𑀤𑀻𑀦𑀜𑁆𑀘 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀸𑀯𑁂 𑀅𑀧𑁂𑀓𑁆𑀔𑀺𑀢𑁂 𑀲𑀳𑀚𑀸𑀢𑀸𑀦𑀫𑁆𑀧𑀺 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀸𑀯𑁂𑀦 𑀕𑀳𑀡𑀁 𑀧𑀼𑀭𑀺𑀫𑀧𑀘𑁆𑀙𑀺𑀫𑀪𑀸𑀯𑁂𑀦𑁂𑀯 𑀳𑁄𑀢𑀻𑀢𑀺, 𑀕𑀳𑀡𑀧𑁆𑀧𑀯𑀢𑁆𑀢𑀺𑀆𑀓𑀸𑀭𑀯𑀲𑁂𑀦 𑀧𑀘𑁆𑀘𑀬𑀪𑀽𑀢𑁂𑀲𑀼 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀻𑀲𑀼 𑀧𑀳𑀸𑀬𑀓𑀥𑀫𑁆𑀫𑁂𑀲𑀼 𑀧𑀳𑀸𑀦𑀓𑀺𑀭𑀺𑀬𑀸𑀬 𑀧𑀼𑀭𑀺𑀫𑀓𑀸𑀮𑀯𑁄𑀳𑀸𑀭𑁄, 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀲𑀼 𑀘 𑀯𑀺𑀭𑀢𑀻𑀲𑀼 𑀯𑀺𑀭𑀫𑀡𑀓𑀺𑀭𑀺𑀬𑀸𑀬 𑀅𑀧𑀭𑀓𑀸𑀮𑀯𑁄𑀳𑀸𑀭𑁄 𑀘 𑀳𑁄𑀢𑀻𑀢𑀺 𑀧𑀳𑀸𑀦𑀁 𑀯𑀸 𑀲𑀫𑀼𑀘𑁆𑀙𑁂𑀤𑀯𑀲𑁂𑀦, 𑀯𑀺𑀭𑀢𑀺 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑀸.

𑀅𑀣 𑀯𑀸 𑀧𑀸𑀡𑁄 𑀅𑀢𑀺𑀧𑀸𑀢𑀻𑀬𑀢𑀺 𑀏𑀢𑁂𑀦𑀸𑀢𑀺 𑀧𑀸𑀡𑀸𑀢𑀺𑀧𑀸𑀢𑁄, 𑀧𑀸𑀡𑀖𑀸𑀢𑀳𑁂𑀢𑀼𑀪𑀽𑀢𑁄 𑀥𑀫𑁆𑀫𑀲𑀫𑀽𑀳𑁄. 𑀓𑁄 𑀧𑀦 𑀲𑁄? 𑀅𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑀤𑁄𑀲𑀫𑁄𑀳𑀯𑀺𑀳𑀺𑀁𑀲𑀸𑀤𑀬𑁄 𑀓𑀺𑀮𑁂𑀲𑀸. 𑀢𑁂 𑀳𑀺 𑀅𑀭𑀳𑀦𑁆𑀢𑁄 𑀅𑀭𑀺𑀬𑀫𑀕𑁆𑀕𑁂𑀦 𑀧𑀳𑀸𑀬 𑀲𑀫𑀼𑀕𑁆𑀖𑀸𑀢𑁂𑀢𑁆𑀯𑀸 𑀧𑀸𑀡𑀸𑀢𑀺𑀧𑀸𑀢𑀤𑀼𑀲𑁆𑀲𑀻𑀮𑁆𑀬𑀢𑁄 𑀅𑀘𑁆𑀘𑀦𑁆𑀢𑀫𑁂𑀯 𑀧𑀝𑀺𑀯𑀺𑀭𑀢𑀸𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀓𑀺𑀮𑁂𑀲𑁂𑀲𑀼 𑀧𑀳𑀻𑀦𑁂𑀲𑀼 𑀓𑀺𑀮𑁂𑀲𑀦𑀺𑀫𑀺𑀢𑁆𑀢𑀲𑁆𑀲 𑀓𑀫𑁆𑀫𑀲𑁆𑀲 𑀅𑀦𑀼𑀧𑁆𑀧𑀚𑁆𑀚𑀦𑀢𑁄. 𑀅𑀤𑀺𑀦𑁆𑀦𑀸𑀤𑀸𑀦𑀁 𑀧𑀳𑀸𑀬𑀸𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀯𑀺𑀭𑀢𑀸𑀯𑀸𑀢𑀺 𑀅𑀯𑀥𑀸𑀭𑀡𑁂𑀦 𑀢𑀲𑁆𑀲𑀸 𑀯𑀺𑀭𑀢𑀺𑀬𑀸 𑀓𑀸𑀮𑀸𑀤𑀺𑀯𑀲𑁂𑀦 𑀅𑀧𑀭𑀺𑀬𑀦𑁆𑀢𑀢𑀁 𑀤𑀲𑁆𑀲𑁂𑀢𑀺. 𑀬𑀣𑀸 𑀳𑀺 𑀅𑀜𑁆𑀜𑁂 𑀲𑀫𑀸𑀤𑀺𑀦𑁆𑀦𑀯𑀺𑀭𑀢𑀺𑀓𑀸𑀧𑀺 𑀅𑀦𑀯𑀝𑁆𑀞𑀺𑀢𑀘𑀺𑀢𑁆𑀢𑀢𑀸𑀬 𑀮𑀸𑀪𑀚𑀻𑀯𑀺𑀢𑀸𑀤𑀺𑀳𑁂𑀢𑀼 𑀲𑀫𑀸𑀤𑀸𑀦𑀁 𑀪𑀺𑀦𑁆𑀤𑀦𑁆𑀢𑀺, 𑀦 𑀏𑀯𑀁 𑀅𑀭𑀳𑀦𑁆𑀢𑁄, 𑀅𑀭𑀳𑀦𑁆𑀢𑁄 𑀧𑀦 𑀲𑀩𑁆𑀩𑀲𑁄 𑀧𑀳𑀻𑀦𑀧𑀸𑀡𑀸𑀢𑀺𑀧𑀸𑀢𑀢𑁆𑀢𑀸 𑀅𑀘𑁆𑀘𑀦𑁆𑀢𑀯𑀺𑀭𑀢𑀸 𑀏𑀯𑀸𑀢𑀺.

𑀤𑀡𑁆𑀟𑀦𑀲𑀗𑁆𑀔𑀸𑀢𑀲𑁆𑀲 𑀧𑀭𑀯𑀺𑀳𑁂𑀞𑀦𑀲𑁆𑀲 𑀘 𑀧𑀭𑀺𑀯𑀚𑁆𑀚𑀦𑀪𑀸𑀯𑀤𑀻𑀧𑀦𑀢𑁆𑀣𑀁 𑀤𑀡𑁆𑀟𑀲𑀢𑁆𑀣𑀸𑀦𑀁 𑀦𑀺𑀓𑁆𑀔𑁂𑀧𑀯𑀘𑀦𑀦𑁆𑀢𑀺 𑀆𑀳 ‘‘𑀧𑀭𑀽𑀧𑀖𑀸𑀢𑀢𑁆𑀣𑀸𑀬𑀸’’𑀢𑀺𑀆𑀤𑀺. 𑀮𑀚𑁆𑀚𑀻𑀢𑀺 𑀏𑀢𑁆𑀣 𑀯𑀼𑀢𑁆𑀢𑀮𑀚𑁆𑀚𑀸𑀬 𑀑𑀢𑁆𑀢𑀧𑁆𑀧𑀫𑁆𑀧𑀺 𑀯𑀼𑀢𑁆𑀢𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀦 𑀳𑀺 𑀧𑀸𑀧𑀚𑀺𑀕𑀼𑀘𑁆𑀙𑀦𑀧𑀸𑀧𑀼𑀢𑁆𑀢𑀸𑀲𑀭𑀳𑀺𑀢𑀁, 𑀧𑀸𑀧𑀪𑀬𑀁 𑀯𑀸 𑀅𑀮𑀚𑁆𑀚𑀦𑀁 𑀅𑀢𑁆𑀣𑀻𑀢𑀺. 𑀥𑀫𑁆𑀫𑀕𑀭𑀼𑀢𑀸𑀬 𑀯𑀸 𑀅𑀭𑀳𑀦𑁆𑀢𑀸𑀦𑀁 𑀥𑀫𑁆𑀫𑀲𑁆𑀲 𑀘 𑀅𑀢𑁆𑀢𑀸 𑀥𑀻𑀦𑀢𑁆𑀢𑀸 𑀅𑀢𑁆𑀢𑀸𑀥𑀺𑀧𑀢𑀺𑀪𑀽𑀢𑀸 𑀮𑀚𑁆𑀚𑀸𑀯 𑀯𑀼𑀢𑁆𑀢𑀸, 𑀦 𑀧𑀦 𑀮𑁄𑀓𑀸𑀥𑀺𑀧𑀢𑀺 𑀑𑀢𑁆𑀢𑀧𑁆𑀧𑀁. ‘‘𑀤𑀬𑀁 𑀫𑁂𑀢𑁆𑀢𑀘𑀺𑀢𑁆𑀢𑀢𑀁 𑀆𑀧𑀦𑁆𑀦𑀸’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀤𑀬𑀸-𑀲𑀤𑁆𑀤𑁄 ‘‘𑀅𑀤𑀬𑀸𑀧𑀦𑁆𑀦𑁄’’𑀢𑀺𑀆𑀤𑀻𑀲𑀼 𑀓𑀭𑀼𑀡𑀸𑀬 𑀧𑀯𑀢𑁆𑀢𑀢𑀻𑀢𑀺? 𑀲𑀘𑁆𑀘𑀫𑁂𑀢𑀁, 𑀅𑀬𑀁 𑀧𑀦 𑀤𑀬𑀸-𑀲𑀤𑁆𑀤𑁄 𑀅𑀦𑀼𑀭𑀓𑁆𑀔𑀡𑀢𑁆𑀣𑀁 𑀅𑀦𑁆𑀢𑁄𑀦𑀻𑀢𑀁 𑀓𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑁄 𑀫𑁂𑀢𑁆𑀢𑀸𑀬 𑀓𑀭𑀼𑀡𑀸𑀬 𑀘 𑀧𑀯𑀢𑁆𑀢𑀢𑀻𑀢𑀺 𑀇𑀥 𑀫𑁂𑀢𑁆𑀢𑀸𑀬 𑀧𑀯𑀢𑁆𑀢𑀫𑀸𑀦𑁄 𑀯𑀼𑀢𑁆𑀢𑁄. 𑀫𑀺𑀚𑁆𑀚𑀢𑀺 𑀲𑀺𑀦𑀺𑀬𑁆𑀳𑀢𑀻𑀢𑀺 𑀫𑁂𑀢𑁆𑀢𑀸, 𑀫𑁂𑀢𑁆𑀢𑀸 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀫𑁂𑀢𑁆𑀢𑀁, 𑀫𑁂𑀢𑁆𑀢𑀁 𑀘𑀺𑀢𑁆𑀢𑀁 𑀏𑀢𑀲𑁆𑀲𑀸𑀢𑀺 𑀫𑁂𑀢𑁆𑀢𑀘𑀺𑀢𑁆𑀢𑁄, 𑀢𑀲𑁆𑀲 𑀪𑀸𑀯𑁄 𑀫𑁂𑀢𑁆𑀢𑀘𑀺𑀢𑁆𑀢𑀢𑀸, 𑀫𑁂𑀢𑁆𑀢𑀸𑀇𑀘𑁆𑀘𑁂𑀯 𑀅𑀢𑁆𑀣𑁄.

𑀲𑀩𑁆𑀩𑀧𑀸𑀡𑀪𑀽𑀢𑀳𑀺𑀢𑀸𑀦𑀼𑀓𑀫𑁆𑀧𑀻𑀢𑀺 𑀏𑀢𑁂𑀦 𑀢𑀲𑁆𑀲𑀸 𑀯𑀺𑀭𑀢𑀺𑀬𑀸 𑀧𑀯𑀢𑁆𑀢𑀯𑀲𑁂𑀦 𑀅𑀧𑀭𑀺𑀬𑀦𑁆𑀢𑀢𑀁 𑀤𑀲𑁆𑀲𑁂𑀢𑀺. 𑀧𑀸𑀡𑀪𑀽𑀢𑁂𑀢𑀺 𑀧𑀸𑀡𑀚𑀸𑀢𑁂. 𑀅𑀦𑀼𑀓𑀫𑁆𑀧𑀓𑀸𑀢𑀺 𑀓𑀭𑀼𑀡𑀸𑀬𑀦𑀓𑀸, 𑀬𑀲𑁆𑀫𑀸 𑀧𑀦 𑀫𑁂𑀢𑁆𑀢𑀸 𑀓𑀭𑀼𑀡𑀸𑀬 𑀯𑀺𑀲𑁂𑀲𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀢𑀸𑀬 𑀏𑀯 𑀤𑀬𑀸𑀧𑀦𑁆𑀦𑀢𑀸𑀬𑀸’’𑀢𑀺. 𑀏𑀯𑀁 𑀬𑁂𑀳𑀺 𑀥𑀫𑁆𑀫𑁂𑀳𑀺 𑀧𑀸𑀡𑀸𑀢𑀺𑀧𑀸𑀢𑀸 𑀯𑀺𑀭𑀢𑀺 𑀲𑀫𑁆𑀧𑀚𑁆𑀚𑀢𑀺, 𑀢𑁂𑀳𑀺 𑀮𑀚𑁆𑀚𑀸𑀫𑁂𑀢𑁆𑀢𑀸𑀓𑀭𑀼𑀡𑀸𑀥𑀫𑁆𑀫𑁂𑀳𑀺 𑀲𑀫𑀗𑁆𑀕𑀺𑀪𑀸𑀯𑁄 𑀤𑀲𑁆𑀲𑀺𑀢𑁄.

𑀧𑀭𑀧𑀭𑀺𑀕𑁆𑀕𑀳𑀺𑀢𑀲𑁆𑀲 𑀆𑀤𑀸𑀦𑀦𑁆𑀢𑀺 𑀧𑀭𑀲𑀦𑁆𑀢𑀓𑀲𑁆𑀲 𑀆𑀤𑀸𑀦𑀁. 𑀣𑁂𑀦𑁄 𑀯𑀼𑀘𑁆𑀘𑀢𑀺 𑀘𑁄𑀭𑁄, 𑀢𑀲𑁆𑀲 𑀪𑀸𑀯𑁄 𑀣𑁂𑀬𑁆𑀬𑀁, 𑀓𑀸𑀫𑀜𑁆𑀘𑁂𑀢𑁆𑀣 ‘‘𑀮𑀚𑁆𑀚𑀻 𑀤𑀬𑀸𑀧𑀦𑁆𑀦𑁄’’𑀢𑀺 𑀦 𑀯𑀼𑀢𑁆𑀢𑀁, 𑀅𑀥𑀺𑀓𑀸𑀭𑀯𑀲𑁂𑀦 𑀧𑀦 𑀅𑀢𑁆𑀣𑀢𑁄 𑀯𑀼𑀢𑁆𑀢𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀣𑀸 𑀳𑀺 𑀮𑀚𑁆𑀚𑀸𑀤𑀬𑁄 𑀧𑀸𑀡𑀸𑀢𑀺𑀧𑀸𑀢𑀧𑁆𑀧𑀳𑀸𑀦𑀲𑁆𑀲 𑀯𑀺𑀲𑁂𑀲𑀧𑀘𑁆𑀘𑀬𑀸, 𑀏𑀯𑀁 𑀅𑀤𑀺𑀦𑁆𑀦𑀸𑀤𑀸𑀦𑀧𑁆𑀧𑀳𑀸𑀦𑀲𑁆𑀲𑀧𑀻𑀢𑀺, 𑀢𑀲𑁆𑀫𑀸 𑀲𑀸𑀧𑀺 𑀧𑀸𑀴𑀺 𑀆𑀦𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑀸. 𑀏𑀲 𑀦𑀬𑁄 𑀇𑀢𑁄 𑀧𑀭𑁂𑀲𑀼𑀧𑀺. 𑀅𑀣 𑀯𑀸 𑀲𑀼𑀘𑀺𑀪𑀽𑀢𑁂𑀦𑀸𑀢𑀺 𑀏𑀢𑁂𑀦 𑀳𑀺𑀭𑁄𑀢𑁆𑀢𑀧𑁆𑀧𑀸𑀤𑀻𑀳𑀺 𑀲𑀫𑀦𑁆𑀦𑀸𑀕𑀫𑁄, 𑀅𑀳𑀺𑀭𑀺𑀓𑀸𑀤𑀻𑀦𑀜𑁆𑀘 𑀧𑀳𑀸𑀦𑀁 𑀯𑀼𑀢𑁆𑀢𑀫𑁂𑀯𑀸𑀢𑀺 ‘‘𑀮𑀚𑁆𑀚𑀻’’𑀢𑀺𑀆𑀤𑀺 𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀅𑀲𑁂𑀝𑁆𑀞𑀘𑀭𑀺𑀬𑀦𑁆𑀢𑀺 𑀅𑀲𑁂𑀝𑁆𑀞𑀸𑀦𑀁 𑀳𑀻𑀦𑀸𑀦𑀁, 𑀅𑀲𑁂𑀝𑁆𑀞𑀁 𑀯𑀸 𑀮𑀸𑀫𑀓𑀁 𑀘𑀭𑀺𑀬𑀁, 𑀦𑀺𑀳𑀻𑀦𑀯𑀼𑀢𑁆𑀢𑀺𑀁 𑀫𑁂𑀣𑀼𑀦𑀦𑁆𑀢𑀺 𑀅𑀢𑁆𑀣𑁄. 𑀩𑁆𑀭𑀳𑁆𑀫𑀁 𑀲𑁂𑀝𑁆𑀞𑀁 𑀆𑀘𑀸𑀭𑀦𑁆𑀢𑀺 𑀫𑁂𑀣𑀼𑀦𑀯𑀺𑀭𑀢𑀺𑀫𑀸𑀳. 𑀆𑀭𑀸𑀘𑀸𑀭𑀻 𑀫𑁂𑀣𑀼𑀦𑀸𑀢𑀺 𑀏𑀢𑁂𑀦 𑁋 ‘‘𑀇𑀥𑁂𑀓𑀘𑁆𑀘𑁄 𑀦 𑀳𑁂𑀯 𑀔𑁄 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀤𑁆𑀯𑀬𑀁𑀤𑁆𑀯𑀬𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀢𑀺, 𑀅𑀧𑀺𑀘 𑀔𑁄 𑀫𑀸𑀢𑀼𑀕𑀸𑀫𑀲𑁆𑀲 𑀉𑀘𑁆𑀙𑀸𑀤𑀦𑀧𑀭𑀺𑀫𑀤𑁆𑀤𑀦𑀦𑁆𑀳𑀸𑀧𑀦𑀲𑀫𑁆𑀩𑀸𑀳𑀦𑀁 𑀲𑀸𑀤𑀺𑀬𑀢𑀺, 𑀲𑁄 𑀢𑀁 𑀅𑀲𑁆𑀲𑀸𑀤𑁂𑀢𑀺, 𑀢𑀁 𑀦𑀺𑀓𑀸𑀫𑁂𑀢𑀺, 𑀢𑁂𑀦 𑀘 𑀯𑀺𑀢𑁆𑀢𑀺𑀁 𑀆𑀧𑀚𑁆𑀚𑀢𑀻’’𑀢𑀺𑀆𑀤𑀺𑀦𑀸 (𑀅. 𑀦𑀺. 𑁭.𑁫𑁦) 𑀯𑀼𑀢𑁆𑀢𑀸 𑀲𑀢𑁆𑀢𑀯𑀺𑀥𑀫𑁂𑀣𑀼𑀦𑀲𑀁𑀬𑁄𑀕𑀸𑀧𑀺 𑀧𑀝𑀺𑀯𑀺𑀭𑀢𑀺 𑀤𑀲𑁆𑀲𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

‘‘𑀲𑀘𑁆𑀘𑀢𑁄 𑀣𑁂𑀢𑀢𑁄’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁧𑁯) 𑀯𑀺𑀬 𑀣𑁂𑀢-𑀲𑀤𑁆𑀤𑁄 𑀣𑀺𑀭𑀧𑀭𑀺𑀬𑀸𑀬𑁄, 𑀣𑀺𑀭𑀪𑀸𑀯𑁄 𑀘 𑀲𑀘𑁆𑀘𑀯𑀸𑀤𑀺𑀢𑀸𑀬 𑀞𑀺𑀢𑀓𑀣𑀢𑁆𑀢𑀸 𑀓𑀣𑀸𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄𑀢𑀺 𑀆𑀳 ‘‘𑀞𑀺𑀢𑀓𑀣𑀸𑀢𑀺 𑀅𑀢𑁆𑀣𑁄’’𑀢𑀺. 𑀦 𑀞𑀺𑀢𑀓𑀣𑁄𑀢𑀺 𑀬𑀣𑀸 𑀳𑀮𑀺𑀤𑁆𑀤𑀺𑀭𑀸𑀕𑀸𑀤𑀬𑁄 𑀅𑀦𑀯𑀝𑁆𑀞𑀺𑀢𑀲𑀪𑀸𑀯𑀢𑀸𑀬 𑀦 𑀞𑀺𑀢𑀸, 𑀏𑀯𑀁 𑀦 𑀞𑀺𑀢𑀸 𑀓𑀣𑀸 𑀬𑀲𑁆𑀲 𑀲𑁄 𑀦 𑀞𑀺𑀢𑀓𑀣𑁄𑀢𑀺 𑀳𑀮𑀺𑀤𑁆𑀤𑀺𑀭𑀸𑀕𑀸𑀤𑀬𑁄 𑀬𑀣𑀸 𑀓𑀣𑀸𑀬 𑀉𑀧𑀫𑀸 𑀳𑁄𑀦𑁆𑀢𑀺, 𑀏𑀯𑀁 𑀬𑁄𑀚𑁂𑀢𑀩𑁆𑀩𑀁. 𑀏𑀲 𑀦𑀬𑁄 ‘‘𑀧𑀸𑀲𑀸𑀡𑀮𑁂𑀔𑀸 𑀯𑀺𑀬𑀸’’𑀢𑀺𑀆𑀤𑀻𑀲𑀼𑀧𑀺. 𑀲𑀤𑁆𑀥𑀸 𑀅𑀬𑀢𑀺 𑀧𑀯𑀢𑁆𑀢𑀢𑀺 𑀏𑀢𑁆𑀣𑀸𑀢𑀺 𑀲𑀤𑁆𑀥𑀸𑀬𑀸, 𑀲𑀤𑁆𑀥𑀸𑀬𑀸 𑀏𑀯 𑀲𑀤𑁆𑀥𑀸𑀬𑀺𑀓𑀸 𑀬𑀣𑀸 𑀯𑁂𑀦𑀬𑀺𑀓𑀸. 𑀲𑀤𑁆𑀥𑀸𑀬 𑀯𑀸 𑀅𑀬𑀺𑀢𑀩𑁆𑀩𑀸 𑀲𑀤𑁆𑀥𑀸𑀬𑀺𑀓𑀸, 𑀲𑀤𑁆𑀥𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀯𑀢𑁆𑀢𑀩𑁆𑀩𑀢𑀁 𑀆𑀧𑀚𑁆𑀚𑀢𑀺 𑀯𑀺𑀲𑀁𑀯𑀸𑀤𑀦𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀏𑀓𑀁 𑀪𑀢𑁆𑀢𑀁 𑀏𑀓𑀪𑀢𑁆𑀢𑀁, 𑀢𑀁 𑀏𑀢𑁂𑀲𑀫𑀢𑁆𑀣𑀻𑀢𑀺 𑀏𑀓𑀪𑀢𑁆𑀢𑀺𑀓𑀸, 𑀏𑀓𑀲𑁆𑀫𑀺𑀁 𑀤𑀺𑀯𑀲𑁂 𑀏𑀓𑀯𑀸𑀭𑀫𑁂𑀯 𑀪𑀼𑀜𑁆𑀚𑀦𑀓𑀸. 𑀢𑀬𑀺𑀤𑀁 𑀭𑀢𑁆𑀢𑀺𑀪𑁄𑀚𑀦𑁂𑀦𑀧𑀺 𑀲𑀺𑀬𑀸𑀢𑀺 𑀆𑀳 ‘‘𑀭𑀢𑁆𑀢𑀽𑀧𑀭𑀢𑀸’’𑀢𑀺. 𑀏𑀯𑀫𑁆𑀧𑀺 𑀲𑀸𑀬𑀦𑁆𑀳𑀪𑁄𑀚𑀦𑁂𑀦𑀧𑀺 𑀲𑀺𑀬𑀼𑀁 𑀏𑀓𑀪𑀢𑁆𑀢𑀺𑀓𑀸𑀢𑀺 𑀢𑀤𑀸𑀲𑀗𑁆𑀓𑀸𑀦𑀺𑀯𑀢𑁆𑀢𑀦𑀢𑁆𑀣𑀁 ‘‘𑀯𑀺𑀭𑀢𑀸 𑀯𑀺𑀓𑀸𑀮𑀪𑁄𑀚𑀦𑀸’’𑀢𑀺 𑀯𑀼𑀢𑁆𑀢𑀁. 𑀅𑀭𑀼𑀡𑀼𑀕𑁆𑀕𑀫𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀫𑀚𑁆𑀛𑀦𑁆𑀳𑀺𑀓𑀸 𑀅𑀬𑀁 𑀩𑀼𑀤𑁆𑀥𑀸𑀦𑀁 𑀅𑀭𑀺𑀬𑀸𑀦𑀁 𑀆𑀘𑀺𑀡𑁆𑀡𑀲𑀫𑀸𑀘𑀺𑀡𑁆𑀡𑁄 𑀪𑁄𑀚𑀦𑀲𑁆𑀲 𑀓𑀸𑀮𑁄 𑀦𑀸𑀫, 𑀢𑀤𑀜𑁆𑀜𑁄 𑀯𑀺𑀓𑀸𑀮𑁄. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀤𑀼𑀢𑀺𑀬𑀧𑀤𑁂𑀦 𑀭𑀢𑁆𑀢𑀺𑀪𑁄𑀚𑀦𑀲𑁆𑀲 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀅𑀧𑀭𑀡𑁆𑀳𑁄 ‘‘𑀯𑀺𑀓𑀸𑀮𑁄’’𑀢𑀺 𑀯𑀼𑀢𑁆𑀢𑁄.

𑀲𑀗𑁆𑀔𑁂𑀧𑀢𑁄 ‘‘𑀲𑀩𑁆𑀩𑀧𑀸𑀧𑀲𑁆𑀲 𑀅𑀓𑀭𑀡’’𑀦𑁆𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀁 (𑀤𑀻. 𑀦𑀺. 𑁨.𑁯𑁦; 𑀥. 𑀧. 𑁧𑁮𑁩) 𑀪𑀕𑀯𑀢𑁄 𑀲𑀸𑀲𑀦𑀁 𑀲𑀘𑁆𑀙𑀦𑁆𑀤𑀭𑀸𑀕𑀧𑁆𑀧𑀯𑀢𑁆𑀢𑀺𑀢𑁄 𑀦𑀘𑁆𑀘𑀸𑀤𑀻𑀦𑀁 𑀤𑀲𑁆𑀲𑀦𑀁 𑀦 𑀅𑀦𑀼𑀮𑁄𑀫𑁂𑀢𑀻𑀢𑀺 𑀆𑀳 ‘‘𑀲𑀸𑀲𑀦𑀲𑁆𑀲 𑀅𑀦𑀦𑀼𑀮𑁄𑀫𑀢𑁆𑀢𑀸’’𑀢𑀺. 𑀅𑀢𑁆𑀢𑀦𑀸 𑀧𑀬𑁄𑀚𑀺𑀬𑀫𑀸𑀦𑀁 𑀧𑀭𑁂𑀳𑀺 𑀧𑀬𑁄𑀚𑀸𑀧𑀻𑀬𑀫𑀸𑀦𑀜𑁆𑀘 𑀦𑀘𑁆𑀘𑀁 𑀦𑀘𑁆𑀘𑀪𑀸𑀯𑀲𑀸𑀫𑀜𑁆𑀜𑀢𑁄 𑀧𑀸𑀴𑀺𑀬𑀁 𑀏𑀓𑁂𑀦𑁂𑀯 𑀦𑀘𑁆𑀘𑀲𑀤𑁆𑀤𑁂𑀦 𑀕𑀳𑀺𑀢𑀁, 𑀢𑀣𑀸 𑀕𑀻𑀢𑀯𑀸𑀤𑀺𑀢𑀲𑀤𑁆𑀤𑀸 𑀘𑀸𑀢𑀺 𑀆𑀳 ‘‘𑀦𑀘𑁆𑀘𑀦𑀦𑀘𑁆𑀘𑀸𑀧𑀦𑀸𑀤𑀺𑀯𑀲𑁂𑀦𑀸’’𑀢𑀺. 𑀆𑀤𑀺-𑀲𑀤𑁆𑀤𑁂𑀦 𑀕𑀸𑀬𑀦𑀕𑀸𑀬𑀸𑀧𑀦𑀯𑀸𑀤𑀦𑀯𑀸𑀤𑀸𑀧𑀦𑀸𑀦𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀤𑀲𑁆𑀲𑀦𑁂𑀦 𑀘𑁂𑀢𑁆𑀣 𑀲𑀯𑀦𑀫𑁆𑀧𑀺 𑀲𑀗𑁆𑀕𑀳𑀺𑀢𑀁 𑀯𑀺𑀭𑀽𑀧𑁂𑀓𑀲𑁂𑀲𑀦𑀬𑁂𑀦. 𑀆𑀮𑁄𑀘𑀦𑀲𑀪𑀸𑀯𑀢𑀸𑀬 𑀯𑀸 𑀧𑀜𑁆𑀘𑀦𑁆𑀦𑀁 𑀯𑀺𑀜𑁆𑀜𑀸𑀡𑀸𑀦𑀁 𑀲𑀯𑀦𑀓𑀺𑀭𑀺𑀬𑀸𑀬𑀧𑀺 𑀤𑀲𑁆𑀲𑀦𑀲𑀗𑁆𑀔𑁂𑀧𑀲𑀩𑁆𑀪𑀸𑀯𑀢𑁄 𑀤𑀲𑁆𑀲𑀦𑀸𑀇𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀅𑀯𑀺𑀲𑀽𑀓𑀪𑀽𑀢𑀲𑁆𑀲 𑀕𑀻𑀢𑀲𑁆𑀲 𑀲𑀯𑀦𑀁 𑀓𑀤𑀸𑀘𑀺 𑀯𑀝𑁆𑀝𑀢𑀻𑀢𑀺 𑀆𑀳 ‘‘𑀯𑀺𑀲𑀽𑀓𑀪𑀽𑀢𑀁 𑀤𑀲𑁆𑀲𑀦’’𑀦𑁆𑀢𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓𑀧𑀸𑀞𑀝𑁆𑀞𑀓𑀣𑀸𑀬 ‘‘𑀥𑀫𑁆𑀫𑀽𑀧𑀲𑀁𑀳𑀺𑀢𑀁 𑀕𑀻𑀢𑀁 𑀯𑀝𑁆𑀝𑀢𑀺, 𑀕𑀻𑀢𑀽𑀧𑀲𑀁𑀳𑀺𑀢𑁄 𑀥𑀫𑁆𑀫𑁄 𑀦 𑀯𑀝𑁆𑀝𑀢𑀻’’𑀢𑀺.

𑀬𑀁 𑀓𑀺𑀜𑁆𑀘𑀻𑀢𑀺 𑀕𑀦𑁆𑀣𑀺𑀢𑀁 𑀯𑀸 𑀅𑀕𑀦𑁆𑀣𑀺𑀢𑀁 𑀯𑀸 𑀬𑀁 𑀓𑀺𑀜𑁆𑀘𑀺 𑀧𑀼𑀧𑁆𑀨𑀁. 𑀕𑀦𑁆𑀥𑀚𑀸𑀢𑀦𑁆𑀢𑀺 𑀕𑀦𑁆𑀥𑀚𑀸𑀢𑀺𑀬𑀁. 𑀢𑀲𑁆𑀲𑀸𑀧𑀺 ‘‘𑀬𑀁 𑀓𑀺𑀜𑁆𑀘𑀻’’𑀢𑀺 𑀯𑀘𑀦𑀢𑁄 𑀥𑀽𑀧𑀺𑀢𑀲𑁆𑀲𑀧𑀺 𑀅𑀥𑀽𑀧𑀺𑀢𑀲𑁆𑀲𑀧𑀺 𑀬𑀲𑁆𑀲 𑀓𑀲𑁆𑀲𑀘𑀺 𑀯𑀺𑀮𑁂𑀧𑀦𑀸𑀤𑀺 𑀦 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀉𑀘𑁆𑀘𑀸𑀢𑀺 𑀉𑀘𑁆𑀘𑀲𑀤𑁆𑀤𑁂𑀦 𑀲𑀫𑀸𑀦𑀢𑁆𑀣𑀁 𑀏𑀓𑀁 𑀲𑀤𑁆𑀤𑀦𑁆𑀢𑀭𑀁. 𑀲𑁂𑀢𑀺 𑀏𑀢𑁆𑀣𑀸𑀢𑀺 𑀲𑀬𑀦𑀁. 𑀉𑀘𑁆𑀘𑀸𑀲𑀬𑀦𑀁 𑀫𑀳𑀸𑀲𑀬𑀦𑀜𑁆𑀘 𑀲𑀫𑀡𑀲𑀸𑀭𑀼𑀧𑁆𑀧𑀭𑀳𑀺𑀢𑀁 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀅𑀓𑀧𑁆𑀧𑀺𑀬𑀢𑁆𑀣𑀭𑀡’’𑀦𑁆𑀢𑀺, 𑀆𑀲𑀦𑁆𑀤𑀸𑀤𑀺𑀆𑀲𑀦𑀜𑁆𑀘𑁂𑀢𑁆𑀣 𑀲𑀬𑀦𑁂𑀦 𑀲𑀗𑁆𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀲𑁆𑀫𑀸 𑀧𑀦 𑀆𑀥𑀸𑀭𑁂 𑀧𑀝𑀺𑀓𑁆𑀔𑀺𑀢𑁆𑀢𑁂 𑀢𑀤𑀸𑀥𑀸𑀭𑀓𑀺𑀭𑀺𑀬𑀸 𑀧𑀝𑀺𑀓𑁆𑀔𑀺𑀢𑁆𑀢𑀸𑀯 𑀳𑁄𑀢𑀺, 𑀢𑀲𑁆𑀫𑀸 ‘‘𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀸’’𑀇𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀅𑀢𑁆𑀣𑀢𑁄 𑀧𑀦 𑀢𑀤𑀼𑀧𑀪𑁄𑀕𑀪𑀽𑀢𑀦𑀺𑀲𑀚𑁆𑀚𑀸𑀦𑀺𑀧𑀚𑁆𑀚𑀦𑁂𑀳𑀺 𑀯𑀺𑀭𑀢𑀺 𑀤𑀲𑁆𑀲𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀅𑀣 𑀯𑀸 ‘‘𑀉𑀘𑁆𑀘𑀸𑀲𑀬𑀦𑀸𑀲𑀦𑀫𑀳𑀸𑀲𑀬𑀦𑀸𑀲𑀦𑀸’’𑀢𑀺, 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂 𑀏𑀓𑀲𑁂𑀲𑀦𑀬𑁂𑀦 𑀅𑀬𑀁 𑀦𑀺𑀤𑁆𑀤𑁂𑀲𑁄 𑀓𑀢𑁄 𑀬𑀣𑀸 ‘‘𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦’’𑀦𑁆𑀢𑀺. (𑀫. 𑀦𑀺. 𑁩.𑁧𑁨𑁬; 𑀲𑀁. 𑀦𑀺. 𑁨.𑁧) 𑀆𑀲𑀦𑀓𑀺𑀭𑀺𑀬𑀸𑀧𑀼𑀩𑁆𑀩𑀓𑀢𑁆𑀢𑀸 𑀯𑀸 𑀲𑀬𑀦𑀓𑀺𑀭𑀺𑀬𑀸𑀬 𑀲𑀬𑀦𑀕𑁆𑀕𑀳𑀡𑁂𑀦𑁂𑀯 𑀆𑀲𑀦𑀫𑁆𑀧𑀺 𑀲𑀗𑁆𑀕𑀳𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

‘‘𑀓𑀻𑀯𑀸’’𑀢𑀺 𑀅𑀬𑀁 𑀦𑀺𑀧𑀸𑀢𑁄. ‘‘𑀓𑀺𑀢𑁆𑀢𑀓’’𑀦𑁆𑀢𑀺 𑀇𑀫𑀲𑁆𑀲 𑀅𑀢𑁆𑀣𑀁 𑀩𑁄𑀥𑁂𑀢𑀻𑀢𑀺 𑀆𑀳 ‘‘𑀓𑀻𑀯𑀫𑀳𑀧𑁆𑀨𑀮𑁄𑀢𑀺 𑀓𑀺𑀢𑁆𑀢𑀓𑀁 𑀫𑀳𑀧𑁆𑀨𑀮𑁄’’𑀢𑀺. 𑀲𑁂𑀲𑀧𑀤𑁂𑀲𑀽𑀢𑀺 ‘‘𑀓𑀻𑀯𑀫𑀳𑀸𑀦𑀺𑀲𑀁𑀲𑁄’’𑀢𑀺𑀆𑀤𑀻𑀲𑀼. 𑀭𑀢𑁆𑀢-𑀲𑀤𑁆𑀤𑁄 𑀭𑀢𑀦𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀧𑀳𑀽𑀢𑀭𑀢𑁆𑀢𑀭𑀢𑀦𑀸𑀦𑀦𑁆𑀢𑀺 𑀧𑀳𑀽𑀢𑁂𑀦 𑀭𑀢𑁆𑀢𑀲𑀗𑁆𑀔𑀸𑀢𑁂𑀦 𑀭𑀢𑀦𑁂𑀦 𑀲𑀫𑀦𑁆𑀦𑀸𑀕𑀢𑀸𑀦’’𑀦𑁆𑀢𑀺. 𑀧𑀸𑀴𑀺𑀬𑀁 𑀧𑀦 ‘‘𑀧𑀳𑀽𑀢𑀲𑀢𑁆𑀢𑀭𑀢𑀦𑀸𑀦’’𑀦𑁆𑀢𑀺𑀧𑀺 𑀧𑀸𑀞𑁄 𑀤𑀺𑀲𑁆𑀲𑀢𑀺. 𑀪𑁂𑀭𑀺𑀢𑀮𑀲𑀤𑀺𑀲𑀁 𑀓𑀢𑁆𑀯𑀸𑀢𑀺 𑀪𑁂𑀭𑀺𑀢𑀮𑀁 𑀯𑀺𑀬 𑀲𑀫𑀁 𑀓𑀢𑁆𑀯𑀸. 𑀢𑀢𑁄 𑀏𑀓𑀁 𑀪𑀸𑀕𑀁 𑀦 𑀅𑀕𑁆𑀖𑀢𑀻𑀢𑀺 𑀬𑀣𑀸𑀯𑀼𑀢𑁆𑀢𑀁 𑀘𑀓𑁆𑀓𑀯𑀢𑁆𑀢𑀺𑀭𑀚𑁆𑀚𑀁 𑀢𑀢𑁄 𑀲𑁄𑀴𑀲𑀪𑀸𑀕𑀢𑁄 𑀏𑀓𑀁 𑀪𑀸𑀕𑀁 𑀦 𑀅𑀕𑁆𑀖𑀢𑀺. 𑀢𑀢𑁄 𑀩𑀳𑀼𑀢𑀭𑀁 𑀳𑁄𑀢𑀻𑀢𑀺 𑀘𑀓𑁆𑀓𑀯𑀢𑁆𑀢𑀺𑀭𑀚𑁆𑀚𑀲𑀺𑀭𑀺𑀢𑁄 𑀩𑀳𑀼𑀢𑀭𑀁 𑀳𑁄𑀢𑀺.

𑀘𑀸𑀢𑀼𑀫𑀳𑀸𑀭𑀸𑀚𑀻𑀓𑀸𑀦𑀦𑁆𑀢𑀺𑀆𑀤𑀻𑀲𑀼 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸 𑀦𑀸𑀫 𑀲𑀺𑀦𑁂𑀭𑀼𑀧𑀩𑁆𑀩𑀢𑀲𑁆𑀲 𑀯𑁂𑀫𑀚𑁆𑀛𑁂 𑀳𑁄𑀦𑁆𑀢𑀺, 𑀢𑁂𑀲𑀼 𑀩𑀳𑀽 𑀧𑀩𑁆𑀩𑀢𑀝𑁆𑀞𑀸𑀧𑀺 𑀆𑀓𑀸𑀲𑀝𑁆𑀞𑀸𑀧𑀺, 𑀢𑁂𑀲𑀁 𑀧𑀭𑀫𑁆𑀧𑀭𑀸 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀁 𑀧𑀢𑁆𑀢𑀸, 𑀔𑀺𑀟𑁆𑀟𑀸𑀧𑀤𑁄𑀲𑀺𑀓𑀸, 𑀫𑀦𑁄𑀧𑀤𑁄𑀲𑀺𑀓𑀸, 𑀲𑀻𑀢𑀯𑀮𑀸𑀳𑀓𑀸, 𑀉𑀡𑁆𑀳𑀯𑀮𑀸𑀳𑀓𑀸, 𑀘𑀦𑁆𑀤𑀺𑀫𑀸, 𑀤𑁂𑀯𑀧𑀼𑀢𑁆𑀢𑁄, 𑀲𑀽𑀭𑀺𑀬𑁄, 𑀤𑁂𑀯𑀧𑀼𑀢𑁆𑀢𑁄𑀢𑀺 𑀏𑀢𑁂 𑀲𑀩𑁆𑀩𑁂 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀤𑁂𑀯𑀮𑁄𑀓𑀝𑁆𑀞𑀓𑀸 𑀏𑀯. 𑀢𑁂𑀢𑁆𑀢𑀺𑀁𑀲 𑀚𑀦𑀸 𑀢𑀢𑁆𑀣 𑀉𑀧𑁆𑀧𑀦𑁆𑀦𑀸𑀢𑀺 𑀢𑀸𑀯𑀢𑀺𑀁𑀲𑀸. 𑀅𑀧𑀺𑀘 𑀢𑀸𑀯𑀢𑀺𑀁𑀲𑀸𑀢𑀺 𑀢𑁂𑀲𑀁 𑀤𑁂𑀯𑀸𑀦𑀁 𑀦𑀸𑀫𑀫𑁂𑀯𑀸𑀢𑀺 𑀯𑀼𑀢𑁆𑀢𑀁. 𑀢𑁂𑀧𑀺 𑀅𑀢𑁆𑀣𑀺 𑀧𑀩𑁆𑀩𑀢𑀝𑁆𑀞𑀓𑀸, 𑀅𑀢𑁆𑀣𑀺 𑀆𑀓𑀸𑀲𑀝𑁆𑀞𑀓𑀸, 𑀢𑁂𑀲𑀁 𑀧𑀭𑀫𑁆𑀧𑀭𑀸 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀁 𑀧𑀢𑁆𑀢𑀸, 𑀢𑀣𑀸 𑀬𑀸𑀫𑀸𑀤𑀻𑀦𑀁. 𑀏𑀓𑀤𑁂𑀯𑀮𑁄𑀓𑁂𑀧𑀺 𑀳𑀺 𑀤𑁂𑀯𑀸𑀦𑀁 𑀧𑀭𑀫𑁆𑀧𑀭𑀸 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀁 𑀅𑀧𑁆𑀧𑀢𑁆𑀢𑀸 𑀦𑀸𑀫 𑀦𑀢𑁆𑀣𑀺. 𑀢𑀢𑁆𑀣 𑀤𑀺𑀩𑁆𑀩𑀲𑀼𑀔𑀁 𑀬𑀸𑀢𑀸 𑀧𑀬𑀸𑀢𑀸 𑀲𑀫𑁆𑀧𑀢𑁆𑀢𑀸𑀢𑀺 𑀬𑀸𑀫𑀸. 𑀢𑀼𑀝𑁆𑀞𑀸 𑀧𑀳𑀝𑁆𑀞𑀸𑀢𑀺 𑀢𑀼𑀲𑀺𑀢𑀸. 𑀧𑀓𑀢𑀺𑀧𑀝𑀺𑀬𑀢𑁆𑀢𑀸𑀭𑀫𑁆𑀫𑀡𑀢𑁄 𑀅𑀢𑀺𑀭𑁂𑀓𑁂𑀦 𑀭𑀫𑀺𑀢𑀼𑀓𑀸𑀫𑀓𑀸𑀮𑁂 𑀬𑀣𑀸𑀭𑀼𑀘𑀺𑀢𑁂 𑀪𑁄𑀕𑁂 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀭𑀫𑀦𑁆𑀢𑀻𑀢𑀺 𑀦𑀺𑀫𑁆𑀫𑀸𑀦𑀭𑀢𑀺. 𑀘𑀺𑀢𑁆𑀢𑀸𑀘𑀸𑀭𑀁 𑀜𑀢𑁆𑀯𑀸 𑀧𑀭𑁂𑀳𑀺 𑀦𑀺𑀫𑁆𑀫𑀺𑀢𑁂𑀲𑀼 𑀪𑁄𑀕𑁂𑀲𑀼 𑀯𑀲𑀁 𑀯𑀢𑁆𑀢𑁂𑀦𑁆𑀢𑀻𑀢𑀺 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻.

𑀢𑀢𑁆𑀣 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 𑀤𑁂𑀯𑀸𑀦𑀁 𑀫𑀦𑀼𑀲𑁆𑀲𑀕𑀡𑀦𑀸𑀬 𑀦𑀯𑀼𑀢𑀺𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺 𑀆𑀬𑀼𑀧𑁆𑀧𑀫𑀸𑀡𑀁. 𑀢𑀸𑀯𑀢𑀺𑀁𑀲𑀸𑀦𑀁 𑀤𑁂𑀯𑀸𑀦𑀁 𑀢𑀺𑀲𑁆𑀲𑁄 𑀘 𑀯𑀲𑁆𑀲𑀓𑁄𑀝𑀺𑀬𑁄 𑀲𑀝𑁆𑀞𑀺 𑀘 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺. 𑀬𑀸𑀫𑀸𑀦𑀁 𑀤𑁂𑀯𑀸𑀦𑀁 𑀘𑀼𑀤𑁆𑀤𑀲 𑀘 𑀯𑀲𑁆𑀲𑀓𑁄𑀝𑀺𑀬𑁄 𑀘𑀢𑁆𑀢𑀸𑀭𑀺 𑀘 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺. 𑀢𑀼𑀲𑀺𑀢𑀸𑀦𑀁 𑀤𑁂𑀯𑀸𑀦𑀁 𑀲𑀢𑁆𑀢𑀧𑀜𑁆𑀜𑀸𑀲 𑀘 𑀯𑀲𑁆𑀲𑀓𑁄𑀝𑀺𑀬𑁄 𑀲𑀝𑁆𑀞𑀺 𑀘 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺. 𑀦𑀺𑀫𑁆𑀫𑀸𑀦𑀭𑀢𑀻𑀦𑀁 𑀤𑁂𑀯𑀸𑀦𑀁 𑀤𑁆𑀯𑁂 𑀘 𑀯𑀲𑁆𑀲𑀓𑁄𑀝𑀺𑀲𑀢𑀸𑀦𑀺 𑀢𑀺𑀲𑁆𑀲𑁄 𑀘 𑀯𑀲𑁆𑀲𑀓𑁄𑀝𑀺𑀬𑁄 𑀘𑀢𑁆𑀢𑀸𑀭𑀺 𑀘 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺. 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻𑀦𑀁 𑀤𑁂𑀯𑀸𑀦𑀁 𑀦𑀯 𑀘 𑀯𑀲𑁆𑀲𑀓𑁄𑀝𑀺𑀲𑀢𑀸𑀦𑀺 𑀏𑀓𑀯𑀻𑀲 𑀓𑁄𑀝𑀺𑀬𑁄 𑀘 𑀲𑀝𑁆𑀞𑀺 𑀘 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺.

𑀫𑀼𑀝𑁆𑀞𑀺𑀳𑀢𑁆𑀣𑀧𑀸𑀤𑀓𑁂𑀢𑀺 𑀧𑀸𑀤𑀢𑀮𑀢𑁄 𑀬𑀸𑀯 𑀅𑀝𑀦𑀺𑀬𑀸 𑀳𑁂𑀝𑁆𑀞𑀺𑀫𑀦𑁆𑀢𑁄, 𑀢𑀸𑀯 𑀫𑀼𑀝𑁆𑀞𑀺𑀭𑀢𑀦𑀧𑁆𑀧𑀫𑀸𑀡𑀧𑀸𑀤𑀓𑁂. 𑀢𑀜𑁆𑀘 𑀔𑁄 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀳𑀢𑁆𑀣𑁂𑀦, 𑀬𑀲𑁆𑀲𑀺𑀤𑀸𑀦𑀺 𑀯𑀟𑁆𑀠𑀓𑀻𑀳𑀢𑁆𑀣𑁄𑀢𑀺 𑀲𑀫𑀜𑁆𑀜𑀸. 𑀲𑀻𑀮𑀲𑀫𑀸𑀤𑀸𑀦𑀢𑁄 𑀧𑀝𑁆𑀞𑀸𑀬 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀅𑀓𑀢𑁆𑀯𑀸 𑀥𑀫𑁆𑀫𑀲𑁆𑀲𑀯𑀦𑁂𑀦 𑀯𑀸 𑀓𑀫𑁆𑀫𑀝𑁆𑀞𑀸𑀦𑀫𑀦𑀲𑀺𑀓𑀸𑀭𑁂𑀦 𑀯𑀸 𑀯𑀻𑀢𑀺𑀦𑀸𑀫𑁂𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀢𑀁 𑀧𑀦 𑀉𑀧𑀯𑀲𑀦𑁆𑀢𑁂𑀦…𑀧𑁂… 𑀯𑀺𑀘𑀸𑀭𑁂𑀢𑀩𑁆𑀩’’𑀦𑁆𑀢𑀺.

𑀯𑀸𑀘𑀁 𑀪𑀺𑀦𑁆𑀤𑀺𑀢𑁆𑀯𑀸 𑀉𑀧𑁄𑀲𑀣𑀗𑁆𑀕𑀸𑀦𑀺 𑀲𑀫𑀸𑀤𑀸𑀢𑀩𑁆𑀩𑀸𑀦𑀻𑀢𑀺 ‘‘𑀇𑀫𑀜𑁆𑀘 𑀭𑀢𑁆𑀢𑀺𑀁 𑀇𑀫𑀜𑁆𑀘 𑀤𑀺𑀯𑀲’’𑀦𑁆𑀢𑀺 𑀓𑀸𑀮𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸 ‘‘𑀉𑀧𑁄𑀲𑀣𑀗𑁆𑀕𑀯𑀲𑁂𑀦 𑀅𑀝𑁆𑀞 𑀲𑀺𑀓𑁆𑀔𑀸𑀧𑀤𑀸𑀦𑀺 𑀲𑀫𑀸𑀤𑀺𑀬𑀸𑀫𑀻’’𑀢𑀺 𑀏𑀓𑀢𑁄 𑀓𑀢𑁆𑀯𑀸 𑀧𑀼𑀦 𑀧𑀘𑁆𑀘𑁂𑀓𑀁 ‘‘𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀺𑀲𑀺𑀓𑁆𑀔𑀸𑀧𑀤𑀁 𑀲𑀫𑀸𑀤𑀺𑀬𑀸𑀫𑀺…𑀧𑁂… 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀸 𑀯𑁂𑀭𑀫𑀡𑀺𑀲𑀺𑀓𑁆𑀔𑀸𑀧𑀤𑀁 𑀲𑀫𑀸𑀤𑀺𑀬𑀸𑀫𑀻’’𑀢𑀺 𑀏𑀯𑀁 𑀯𑀘𑀻𑀪𑁂𑀤𑀁 𑀓𑀢𑁆𑀯𑀸 𑀬𑀣𑀸𑀧𑀸𑀴𑀺 𑀲𑀫𑀸𑀤𑀸𑀢𑀩𑁆𑀩𑀸𑀦𑀺. 𑀧𑀸𑀴𑀺𑀁 𑀅𑀚𑀸𑀦𑀦𑁆𑀢𑁂𑀦 𑀧𑀦 𑀅𑀢𑁆𑀢𑀦𑁄 𑀪𑀸𑀲𑀸𑀬 𑀧𑀘𑁆𑀘𑁂𑀓𑀁 𑀯𑀸 ‘‘𑀩𑀼𑀤𑁆𑀥𑀧𑀜𑁆𑀜𑀢𑁆𑀢𑀁 𑀉𑀧𑁄𑀲𑀣𑀁 𑀅𑀥𑀺𑀝𑁆𑀞𑀸𑀫𑀻’’𑀢𑀺 𑀏𑀓𑀢𑁄 𑀅𑀥𑀺𑀝𑁆𑀞𑀸𑀦𑀯𑀲𑁂𑀦 𑀯𑀸 𑀲𑀫𑀸𑀤𑀸𑀢𑀩𑁆𑀩𑀸𑀦𑀺, 𑀅𑀜𑁆𑀜𑀁 𑀅𑀮𑀪𑀦𑁆𑀢𑁂𑀦 𑀅𑀥𑀺𑀝𑁆𑀞𑀸𑀢𑀩𑁆𑀩𑀸𑀦𑀺. 𑀉𑀧𑀸𑀲𑀓𑀲𑀻𑀮𑀜𑁆𑀳𑀺 𑀅𑀢𑁆𑀢𑀦𑀸 𑀲𑀫𑀸𑀤𑀺𑀬𑀦𑁆𑀢𑁂𑀦𑀧𑀺 𑀲𑀫𑀸𑀤𑀺𑀦𑁆𑀦𑀁 𑀧𑀭𑀲𑀦𑁆𑀢𑀺𑀓𑁂 𑀲𑀫𑀸𑀤𑀺𑀬𑀦𑁆𑀢𑁂𑀦𑀧𑀺, 𑀏𑀓𑀚𑁆𑀛𑀁 𑀲𑀫𑀸𑀤𑀺𑀦𑁆𑀦𑀫𑁆𑀧𑀺 𑀲𑀫𑀸𑀤𑀺𑀦𑁆𑀦𑀫𑁂𑀯 𑀳𑁄𑀢𑀺 𑀧𑀘𑁆𑀘𑁂𑀓𑀁 𑀲𑀫𑀸𑀤𑀺𑀦𑁆𑀦𑀫𑁆𑀧𑀺. 𑀢𑀁 𑀧𑀦 𑀏𑀓𑀚𑁆𑀛𑀁 𑀲𑀫𑀸𑀤𑀺𑀬𑀢𑁄 𑀏𑀓𑀸𑀬𑁂𑀯 𑀯𑀺𑀭𑀢𑀺 𑀏𑀓𑀸 𑀘𑁂𑀢𑀦𑀸 𑀳𑁄𑀢𑀺. 𑀲𑀸 𑀧𑀦 𑀲𑀩𑁆𑀩𑀯𑀺𑀭𑀢𑀺𑀘𑁂𑀢𑀦𑀸𑀦𑀁 𑀓𑀺𑀘𑁆𑀘𑀓𑀸𑀭𑀻𑀢𑀺 𑀢𑁂𑀦𑀧𑀺 𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑀸𑀦𑀺 𑀲𑀫𑀸𑀤𑀺𑀦𑁆𑀦𑀸𑀦𑁂𑀯. 𑀧𑀘𑁆𑀘𑁂𑀓𑀁 𑀲𑀫𑀸𑀤𑀺𑀬𑀢𑁄 𑀧𑀦 𑀦𑀸𑀦𑀸𑀯𑀺𑀭𑀢𑀺𑀘𑁂𑀢𑀦𑀸𑀬𑁄 𑀬𑀣𑀸𑀲𑀓𑀁 𑀓𑀺𑀘𑁆𑀘𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀲𑀩𑁆𑀩𑀲𑀫𑀸𑀤𑀸𑀦𑁂 𑀧𑀦 𑀯𑀘𑀻𑀪𑁂𑀤𑁄 𑀓𑀸𑀢𑀩𑁆𑀩𑁄𑀬𑁂𑀯. 𑀧𑀭𑀽𑀧𑀭𑁄𑀥𑀧𑀝𑀺𑀲𑀁𑀬𑀼𑀢𑁆𑀢𑀸 𑀧𑀭𑀯𑀺𑀳𑀺𑀁𑀲𑀸𑀲𑀁𑀬𑀼𑀢𑁆𑀢𑀸.

𑀦𑀦𑀼 𑀘 ‘‘𑀫𑀡𑀺’’𑀦𑁆𑀢𑀺 𑀯𑀼𑀢𑁆𑀢𑁂 𑀯𑁂𑀴𑀼𑀭𑀺𑀬𑀫𑁆𑀧𑀺 𑀲𑀗𑁆𑀕𑀳𑀺𑀢𑀫𑁂𑀯, 𑀓𑀺𑀫𑀢𑁆𑀣𑀁 𑀧𑀦 𑀯𑁂𑀴𑀼𑀭𑀺𑀬𑀦𑁆𑀢𑀺 𑀆𑀳 ‘‘𑀯𑁂𑀴𑀼𑀭𑀺𑀬𑀦𑁆𑀢𑀺…𑀧𑁂… 𑀤𑀲𑁆𑀲𑁂𑀢𑀻’’𑀢𑀺. ‘‘𑀫𑀡𑀺’’𑀦𑁆𑀢𑀺 𑀯𑀢𑁆𑀯𑀸𑀯 ‘‘𑀯𑁂𑀴𑀼𑀭𑀺𑀬’’𑀦𑁆𑀢𑀺 𑀇𑀫𑀺𑀦𑀸 𑀚𑀸𑀢𑀺𑀫𑀡𑀺𑀪𑀸𑀯𑀁 𑀤𑀲𑁆𑀲𑁂𑀢𑀻𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀏𑀓𑀯𑀲𑁆𑀲𑀺𑀓𑀯𑁂𑀴𑀼𑀯𑀡𑁆𑀡𑀦𑁆𑀢𑀺 𑀚𑀸𑀢𑀺𑀢𑁄 𑀏𑀓𑀯𑀲𑁆𑀲𑀸𑀢𑀺𑀓𑁆𑀓𑀦𑁆𑀢𑀯𑁂𑀴𑀼𑀯𑀡𑁆𑀡𑀁. 𑀮𑀤𑁆𑀥𑀓𑀦𑁆𑀢𑀺 𑀲𑀼𑀦𑁆𑀤𑀭𑀁. 𑀘𑀦𑁆𑀤𑀧𑁆𑀧𑀪𑀸 𑀢𑀸𑀭𑀕𑀡𑀸𑀯 𑀲𑀩𑁆𑀩𑁂𑀢𑀺 𑀬𑀣𑀸 𑀘𑀦𑁆𑀤𑀧𑁆𑀧𑀪𑀸𑀬 𑀓𑀮𑀁 𑀲𑀩𑁆𑀩𑁂 𑀢𑀸𑀭𑀸𑀕𑀡𑀸 𑀦𑀸𑀦𑀼𑀪𑀯𑀦𑁆𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄𑀢𑀺 𑀆𑀳 ‘‘𑀘𑀦𑁆𑀤𑀧𑁆𑀧𑀪𑀸𑀢𑀺 𑀲𑀸𑀫𑀺𑀅𑀢𑁆𑀣𑁂 𑀧𑀘𑁆𑀘𑀢𑁆𑀢’’𑀦𑁆𑀢𑀺.

𑀉𑀧𑁄𑀲𑀣𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀫𑀳𑀸𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.