(𑁮) 𑁩. 𑀆𑀦𑀦𑁆𑀤𑀯𑀕𑁆𑀕𑁄

𑁧. 𑀙𑀦𑁆𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁨. 𑀢𑀢𑀺𑀬𑀲𑁆𑀲 𑀧𑀞𑀫𑁂 𑀙𑀦𑁆𑀦𑀧𑀭𑀺𑀩𑁆𑀩𑀸𑀚𑀓𑁄𑀢𑀺 𑀦 𑀦𑀕𑁆𑀕𑀧𑀭𑀺𑀩𑁆𑀩𑀸𑀚𑀓𑁄. 𑀩𑀸𑀳𑀺𑀭𑀓𑀲𑀫𑀬𑀁 𑀮𑀼𑀜𑁆𑀘𑀺𑀢𑁆𑀯𑀸 𑀳𑀭𑀦𑁆𑀢𑁄𑀢𑀺 𑀩𑀸𑀳𑀺𑀭𑀓𑀸𑀦𑀁 𑀲𑀫𑀬𑀁 𑀦𑀺𑀲𑁂𑀥𑁂𑀢𑁆𑀯𑀸 𑀆𑀧𑀦𑁆𑀦𑁄.

𑀧𑀜𑁆𑀜𑀸𑀘𑀓𑁆𑀔𑀼𑀲𑁆𑀲 𑀯𑀺𑀩𑀦𑁆𑀥𑀦𑀢𑁄 𑀅𑀦𑁆𑀥𑀁 𑀓𑀭𑁄𑀢𑀻𑀢𑀺 𑀅𑀦𑁆𑀥𑀓𑀭𑀡𑁄𑀢𑀺 𑀆𑀳 ‘‘𑀬𑀲𑁆𑀲 𑀭𑀸𑀕𑁄 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺. 𑀅𑀘𑀓𑁆𑀔𑀼𑀓𑀭𑀡𑁄𑀢𑀺 𑀅𑀲𑀫𑀢𑁆𑀣𑀲𑀫𑀸𑀲𑁄𑀬𑀁 ‘‘𑀅𑀲𑀽𑀭𑀺𑀬𑀧𑀲𑁆𑀲𑀸𑀦𑀺 𑀫𑀼𑀔𑀸𑀦𑀻’’𑀢𑀺𑀆𑀤𑀻𑀲𑀼 𑀯𑀺𑀬𑀸𑀢𑀺 𑀆𑀳 ‘‘𑀧𑀜𑁆𑀜𑀸𑀘𑀓𑁆𑀔𑀼𑀁 𑀦 𑀓𑀭𑁄𑀢𑀻𑀢𑀺 𑀅𑀘𑀓𑁆𑀔𑀼𑀓𑀭𑀡𑁄’’𑀢𑀺. 𑀧𑀜𑁆𑀜𑀸𑀦𑀺𑀭𑁄𑀥𑀺𑀓𑁄𑀢𑀺 𑀅𑀦𑀼𑀧𑁆𑀧𑀦𑁆𑀦𑀸𑀬 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸𑀬 𑀧𑀜𑁆𑀜𑀸𑀬 𑀉𑀧𑁆𑀧𑀚𑁆𑀚𑀺𑀢𑀼𑀁 𑀦 𑀤𑁂𑀢𑀺, 𑀮𑁄𑀓𑀺𑀬𑀧𑀜𑁆𑀜𑀁 𑀧𑀦 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀧𑀜𑁆𑀘𑀸𑀪𑀺𑀜𑁆𑀜𑀸𑀯𑀲𑁂𑀦 𑀉𑀧𑁆𑀧𑀦𑁆𑀦𑀫𑁆𑀧𑀺 𑀲𑀫𑀼𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀔𑀺𑀧𑀢𑀻𑀢𑀺 𑀧𑀜𑁆𑀜𑀸𑀦𑀺𑀭𑁄𑀥𑀺𑀓𑁄𑀢𑀺 𑀏𑀯𑀫𑁆𑀧𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀅𑀦𑀼𑀧𑁆𑀧𑀦𑁆𑀦𑀸𑀦𑀼𑀧𑁆𑀧𑀸𑀤𑀉𑀧𑁆𑀧𑀦𑁆𑀦𑀧𑀭𑀺𑀳𑀸𑀦𑀺𑀦𑀺𑀫𑀺𑀢𑁆𑀢𑀢𑀸𑀬 𑀳𑀺 𑀧𑀜𑁆𑀜𑀁 𑀦𑀺𑀭𑁄𑀥𑁂𑀢𑀻𑀢𑀺 𑀧𑀜𑁆𑀜𑀸𑀦𑀺𑀭𑁄𑀥𑀺𑀓𑁄. 𑀯𑀺𑀳𑀦𑀢𑀺 𑀯𑀺𑀩𑀸𑀥𑀢𑀻𑀢𑀺 𑀯𑀺𑀖𑀸𑀢𑁄, 𑀤𑀼𑀓𑁆𑀔𑀦𑁆𑀢𑀺 𑀆𑀳 ‘‘𑀤𑀼𑀓𑁆𑀔𑀲𑀗𑁆𑀔𑀸𑀢𑀲𑁆𑀲 𑀯𑀺𑀖𑀸𑀢𑀲𑁆𑀲𑀸’’𑀢𑀺. 𑀓𑀺𑀮𑁂𑀲𑀦𑀺𑀩𑁆𑀩𑀸𑀦𑀦𑁆𑀢𑀺 𑀇𑀫𑀺𑀦𑀸 𑀅𑀲𑀗𑁆𑀔𑀢𑀦𑀺𑀩𑁆𑀩𑀸𑀦𑀫𑁂𑀯 𑀯𑀤𑀢𑀺. 𑀅𑀲𑀗𑁆𑀔𑀢𑀜𑁆𑀳𑀺 𑀦𑀺𑀩𑁆𑀩𑀸𑀦𑀁 𑀦𑀸𑀫, 𑀢𑀁 𑀧𑀘𑁆𑀘𑀓𑁆𑀔𑀁 𑀓𑀸𑀢𑀼𑀁 𑀦 𑀤𑁂𑀢𑀻𑀢𑀺 𑀅𑀦𑀺𑀩𑁆𑀩𑀸𑀦𑀲𑀁𑀯𑀢𑁆𑀢𑀦𑀺𑀓𑁄. 𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑁄 𑀓𑀣𑀺𑀢𑁄 𑀧𑀼𑀩𑁆𑀩𑀪𑀸𑀕𑀺𑀬𑀲𑁆𑀲𑀧𑀺 𑀅𑀭𑀺𑀬𑀫𑀕𑁆𑀕𑀲𑁆𑀲 𑀓𑀣𑀺𑀢𑀢𑁆𑀢𑀸.

𑀙𑀦𑁆𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀆𑀚𑀻𑀯𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁩. 𑀤𑀼𑀢𑀺𑀬𑁂 𑀦 𑀅𑀜𑁆𑀜𑀸𑀢𑀼𑀓𑀸𑀫𑁄𑀢𑀺 𑀦 𑀆𑀚𑀸𑀦𑀺𑀢𑀼𑀓𑀸𑀫𑁄𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀧𑀭𑀺𑀕𑁆𑀕𑀡𑁆𑀳𑀦𑀢𑁆𑀣𑀁 𑀧𑀦 𑀆𑀕𑀢𑁄’’𑀢𑀺, 𑀧𑀜𑁆𑀜𑀸𑀬 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀕𑀡𑁆𑀳𑀦𑀢𑁆𑀣𑀦𑁆𑀢𑀺 𑀅𑀢𑁆𑀣𑁄. 𑀓𑀸𑀭𑀡𑀸𑀧𑀤𑁂𑀲𑁄𑀢𑀺 𑀓𑀸𑀭𑀡𑀦𑀺𑀤𑁆𑀤𑁂𑀲𑁄. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑀆𑀚𑀻𑀯𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀫𑀳𑀸𑀦𑀸𑀫𑀲𑀓𑁆𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁪. 𑀢𑀢𑀺𑀬𑁂 𑀕𑀺𑀮𑀸𑀦𑀲𑁆𑀲 𑀪𑀸𑀯𑁄 𑀕𑁂𑀮𑀜𑁆𑀜𑀦𑁆𑀢𑀺 𑀆𑀳 ‘‘𑀕𑀺𑀮𑀸𑀦𑀪𑀸𑀯𑀢𑁄’’𑀢𑀺. 𑀤𑀻𑀧𑁂𑀢𑀻𑀢𑀺 𑀤𑁂𑀲𑀦𑀸𑀓𑁆𑀓𑀫𑁂𑀦𑁂𑀯 𑀧𑀜𑁆𑀜𑀸𑀧𑁂𑀢𑀺. 𑀧𑀞𑀫𑀜𑁆𑀳𑀺 𑀲𑁂𑀔𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀬𑁄 𑀯𑀢𑁆𑀯𑀸 𑀧𑀘𑁆𑀙𑀸 𑀅𑀲𑁂𑀔𑀲𑀻𑀮𑀸𑀤𑀻𑀦𑀺 𑀯𑀤𑀦𑁆𑀢𑁄 𑀇𑀫𑀫𑀢𑁆𑀣𑀁 𑀤𑀻𑀧𑁂𑀢𑀺.

𑀫𑀳𑀸𑀦𑀸𑀫𑀲𑀓𑁆𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀦𑀺𑀕𑀡𑁆𑀞𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁫. 𑀘𑀢𑀼𑀢𑁆𑀣𑁂 𑀳𑀁𑀲𑀯𑀝𑁆𑀝𑀓𑀘𑁆𑀙𑀦𑁆𑀦𑁂𑀦𑀸𑀢𑀺 𑀳𑀁𑀲𑀯𑀝𑁆𑀝𑀓𑀧𑀭𑀺𑀘𑁆𑀙𑀦𑁆𑀦𑁂𑀦, 𑀳𑀁𑀲𑀫𑀡𑁆𑀟𑀮𑀸𑀓𑀸𑀭𑁂𑀦𑀸𑀢𑀺 𑀅𑀢𑁆𑀣𑁄. 𑀦𑀢𑁆𑀣𑀺 𑀏𑀢𑀲𑁆𑀲 𑀧𑀭𑀺𑀲𑁂𑀲𑀦𑁆𑀢𑀺 𑀅𑀧𑀭𑀺𑀲𑁂𑀲𑀁. 𑀢𑁂𑀦𑀸𑀳 ‘‘𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀅𑀲𑁂𑀲𑁂𑀢𑁆𑀯𑀸’’𑀢𑀺. 𑀅𑀧𑀭𑀺𑀲𑁂𑀲𑀥𑀫𑁆𑀫𑀚𑀸𑀦𑀦𑀢𑁄 𑀯𑀸 𑀅𑀧𑀭𑀺𑀲𑁂𑀲𑀲𑀗𑁆𑀔𑀸𑀢𑀁 𑀜𑀸𑀡𑀤𑀲𑁆𑀲𑀦𑀁 𑀧𑀝𑀺𑀚𑀸𑀦𑀸𑀢𑀻𑀢𑀺 𑀏𑀯𑀫𑁆𑀧𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀲𑀢𑀢𑀦𑁆𑀢𑀺 𑀦𑀺𑀘𑁆𑀘𑀁. 𑀲𑀫𑀺𑀢𑀦𑁆𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀦𑁆𑀢𑀺 𑀆𑀳 ‘‘𑀲𑀢𑀢𑀁 𑀲𑀫𑀺𑀢𑀦𑁆𑀢𑀺 𑀲𑀩𑁆𑀩𑀓𑀸𑀮𑀁 𑀦𑀺𑀭𑀦𑁆𑀢𑀭’’𑀦𑁆𑀢𑀺. 𑀅𑀣 𑀯𑀸 𑀦𑀺𑀘𑁆𑀘𑀝𑁆𑀞𑁂𑀦 𑀲𑀢𑀢-𑀲𑀤𑁆𑀤𑁂𑀦 𑀅𑀪𑀺𑀡𑁆𑀳𑀧𑁆𑀧𑀯𑀢𑁆𑀢𑀺 𑀚𑁄𑀢𑀺𑀢𑀸 𑀲𑀺𑀬𑀸𑀢𑀺 ‘‘𑀲𑀫𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑁂𑀦 𑀦𑀺𑀭𑀦𑁆𑀢𑀭𑀧𑁆𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀢𑀻𑀢𑀺 𑀆𑀳 ‘‘𑀲𑀩𑁆𑀩𑀓𑀸𑀮𑀁 𑀦𑀺𑀭𑀦𑁆𑀢𑀭’’𑀦𑁆𑀢𑀺.

𑀯𑀺𑀲𑀼𑀤𑁆𑀥𑀺𑀲𑀫𑁆𑀧𑀸𑀧𑀦𑀢𑁆𑀣𑀸𑀬𑀸𑀢𑀺 𑀭𑀸𑀕𑀸𑀤𑀻𑀳𑀺 𑀫𑀮𑁂𑀳𑀺 𑀅𑀪𑀺𑀚𑁆𑀛𑀸𑀯𑀺𑀲𑀫𑀮𑁄𑀪𑀸𑀤𑀻𑀳𑀺 𑀘 𑀉𑀧𑀓𑁆𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑀸𑀦𑀁 𑀲𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀺𑀧𑀸𑀧𑀦𑀢𑁆𑀣𑀸𑀬. 𑀲𑀫𑀢𑀺𑀓𑁆𑀓𑀫𑀦𑀢𑁆𑀣𑀸𑀬𑀸𑀢𑀺 𑀲𑁄𑀓𑀲𑁆𑀲 𑀘 𑀧𑀭𑀺𑀤𑁂𑀯𑀲𑁆𑀲 𑀘 𑀧𑀳𑀸𑀦𑀢𑁆𑀣𑀸𑀬. 𑀅𑀢𑁆𑀣𑀁 𑀕𑀫𑀦𑀢𑁆𑀣𑀸𑀬𑀸𑀢𑀺 𑀓𑀸𑀬𑀺𑀓𑀤𑀼𑀓𑁆𑀔𑀲𑁆𑀲 𑀘 𑀘𑁂𑀢𑀲𑀺𑀓𑀤𑁄𑀫𑀦𑀲𑁆𑀲𑀲𑁆𑀲 𑀘𑀸𑀢𑀺 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀅𑀢𑁆𑀣𑀗𑁆𑀕𑀫𑀦𑀸𑀬, 𑀦𑀺𑀭𑁄𑀥𑀸𑀬𑀸𑀢𑀺 𑀅𑀢𑁆𑀣𑁄. 𑀜𑀸𑀬𑀢𑀺 𑀦𑀺𑀘𑁆𑀙𑀬𑁂𑀦 𑀓𑀫𑀢𑀺 𑀦𑀺𑀩𑁆𑀩𑀸𑀦𑀁. 𑀢𑀁 𑀯𑀸 𑀜𑀸𑀬𑀢𑀺 𑀧𑀝𑀺𑀯𑀺𑀚𑁆𑀛𑀢𑀺 𑀏𑀢𑁂𑀦𑀸𑀢𑀺 𑀜𑀸𑀬𑁄, 𑀅𑀭𑀺𑀬𑀫𑀕𑁆𑀕𑁄𑀢𑀺 𑀆𑀳 ‘‘𑀫𑀕𑁆𑀕𑀲𑁆𑀲 𑀅𑀥𑀺𑀕𑀫𑀦𑀢𑁆𑀣𑀸𑀬𑀸’’𑀢𑀺. 𑀅𑀧𑀘𑁆𑀘𑀬𑀦𑀺𑀩𑁆𑀩𑀸𑀦𑀲𑁆𑀲 𑀲𑀘𑁆𑀙𑀺𑀓𑀭𑀡𑀢𑁆𑀣𑀸𑀬𑀸𑀢𑀺 𑀧𑀘𑁆𑀘𑀬𑀭𑀳𑀺𑀢𑀢𑁆𑀢𑀸 𑀅𑀧𑀘𑁆𑀘𑀬𑀲𑁆𑀲 𑀅𑀲𑀗𑁆𑀔𑀢𑀲𑁆𑀲 𑀢𑀡𑁆𑀳𑀸𑀯𑀸𑀦𑀯𑀺𑀭𑀳𑀺𑀢𑀢𑁆𑀢𑀸 𑀦𑀺𑀩𑁆𑀩𑀸𑀦𑀦𑁆𑀢𑀺 𑀮𑀤𑁆𑀥𑀦𑀸𑀫𑀲𑁆𑀲 𑀅𑀫𑀢𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬, 𑀅𑀢𑁆𑀢𑀧𑀘𑁆𑀘𑀓𑁆𑀔𑀢𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀨𑀼𑀲𑀺𑀢𑁆𑀯𑀸 𑀨𑀼𑀲𑀺𑀢𑁆𑀯𑀸𑀢𑀺 𑀧𑀢𑁆𑀯𑀸 𑀧𑀢𑁆𑀯𑀸. 𑀲𑁂𑀲𑀫𑁂𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀦𑀺𑀕𑀡𑁆𑀞𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀦𑀺𑀯𑁂𑀲𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁬. 𑀧𑀜𑁆𑀘𑀫𑁂 𑀓𑀺𑀘𑁆𑀘𑀓𑀭𑀡𑀻𑀬𑁂𑀲𑀼 𑀲𑀳𑀪𑀸𑀯𑀝𑁆𑀞𑁂𑀦 𑀅𑀫𑀸 𑀳𑁄𑀦𑁆𑀢𑀻𑀢𑀺 𑀅𑀫𑀘𑁆𑀘𑀸. ‘‘𑀅𑀬𑀁 𑀅𑀚𑁆𑀛𑀢𑁆𑀢𑀺𑀓𑁄’’𑀢𑀺 𑀏𑀯𑀁 𑀚𑀸𑀦𑀦𑁆𑀢𑀺, 𑀜𑀸𑀬𑀦𑁆𑀢𑀺 𑀯𑀸𑀢𑀺 𑀜𑀸𑀢𑀻. 𑀲𑀲𑁆𑀲𑀼𑀲𑀲𑀼𑀭𑀧𑀓𑁆𑀔𑀺𑀓𑀸𑀢𑀺 𑀲𑀲𑁆𑀲𑀼𑀲𑀲𑀼𑀭𑀸 𑀘 𑀢𑀧𑁆𑀧𑀓𑁆𑀔𑀺𑀓𑁄 𑀘 𑀲𑀲𑁆𑀲𑀼𑀲𑀲𑀼𑀭𑀧𑀓𑁆𑀔𑀺𑀓𑀸. 𑀮𑁄𑀳𑀺𑀢𑁂𑀦 𑀲𑀫𑁆𑀩𑀤𑁆𑀥𑀸𑀢𑀺 𑀲𑀸𑀮𑁄𑀳𑀺𑀢𑀸. 𑀧𑀺𑀢𑀼𑀧𑀓𑁆𑀔𑀺𑀓𑀸 𑀯𑀸 𑀜𑀸𑀢𑀻, 𑀫𑀸𑀢𑀼𑀧𑀓𑁆𑀔𑀺𑀓𑀸 𑀲𑀸𑀮𑁄𑀳𑀺𑀢𑀸. 𑀫𑀸𑀢𑀼𑀧𑀺𑀢𑀼𑀧𑀓𑁆𑀔𑀺𑀓𑀸 𑀯𑀸 𑀜𑀸𑀢𑀻, 𑀲𑀲𑁆𑀲𑀼𑀲𑀲𑀼𑀭𑀧𑀓𑁆𑀔𑀺𑀓𑀸 𑀲𑀸𑀮𑁄𑀳𑀺𑀢𑀸. 𑀅𑀯𑁂𑀘𑁆𑀘 𑀭𑀢𑀦𑀲𑁆𑀲 𑀕𑀼𑀡𑁂 𑀬𑀸𑀣𑀸𑀯𑀢𑁄 𑀜𑀢𑁆𑀯𑀸 𑀧𑀲𑀸𑀤𑁄 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁄. 𑀲𑁄 𑀧𑀦 𑀬𑀲𑁆𑀫𑀸 𑀫𑀕𑁆𑀕𑁂𑀦𑀸𑀕𑀢𑀢𑁆𑀢𑀸 𑀓𑁂𑀦𑀘𑀺 𑀅𑀓𑀫𑁆𑀧𑀦𑀻𑀬𑁄 𑀘 𑀅𑀧𑁆𑀧𑀥𑀁𑀲𑀺𑀬𑁄 𑀘 𑀳𑁄𑀢𑀺, 𑀢𑀲𑁆𑀫𑀸 𑀏𑀯𑀁 𑀯𑀼𑀢𑁆𑀢𑀁 ‘‘𑀅𑀘𑀮𑀧𑁆𑀧𑀲𑀸𑀤𑁄’’𑀢𑀺. 𑀪𑀸𑀯𑀜𑁆𑀜𑀣𑀢𑁆𑀢𑀦𑁆𑀢𑀺 𑀲𑀪𑀸𑀯𑀲𑁆𑀲 𑀅𑀜𑁆𑀜𑀣𑀢𑁆𑀢𑀁.

𑀯𑀻𑀲𑀢𑀺𑀬𑀸 𑀓𑁄𑀝𑁆𑀞𑀸𑀲𑁂𑀲𑀽𑀢𑀺 𑀓𑁂𑀲𑀸𑀤𑀺𑀫𑀢𑁆𑀣𑀮𑀼𑀗𑁆𑀕𑀧𑀭𑀺𑀬𑀦𑁆𑀢𑁂𑀲𑀼. 𑀤𑁆𑀯𑀸𑀤𑀲𑀲𑀼 𑀓𑁄𑀝𑁆𑀞𑀸𑀲𑁂𑀲𑀽𑀢𑀺 𑀧𑀺𑀢𑁆𑀢𑀸𑀤𑀺𑀫𑀼𑀢𑁆𑀢𑀧𑀭𑀺𑀬𑀦𑁆𑀢𑁂𑀲𑀼. 𑀘𑀢𑀽𑀲𑀼 𑀓𑁄𑀝𑁆𑀞𑀸𑀲𑁂𑀲𑀽𑀢𑀺 ‘‘𑀬𑁂𑀦 𑀘 𑀲𑀦𑁆𑀢𑀧𑁆𑀧𑀢𑀺, 𑀬𑁂𑀦 𑀘 𑀚𑀻𑀭𑀻𑀬𑀢𑀺, 𑀬𑁂𑀦 𑀘 𑀧𑀭𑀺𑀤𑀬𑁆𑀳𑀢𑀺, 𑀬𑁂𑀦 𑀘 𑀅𑀲𑀺𑀢𑀧𑀻𑀢𑀔𑀸𑀬𑀺𑀢𑀲𑀸𑀬𑀺𑀢𑀁 𑀲𑀫𑁆𑀫𑀸 𑀧𑀭𑀺𑀡𑀸𑀫𑀁 𑀕𑀘𑁆𑀙𑀢𑀻’’𑀢𑀺 (𑀫. 𑀦𑀺. 𑁧.𑁩𑁦𑁪) 𑀏𑀯𑀁 𑀯𑀼𑀢𑁆𑀢𑁂𑀲𑀼 𑀘𑀢𑀽𑀲𑀼 𑀓𑁄𑀝𑁆𑀞𑀸𑀲𑁂𑀲𑀼. 𑀙𑀲𑀼 𑀓𑁄𑀝𑁆𑀞𑀸𑀲𑁂𑀲𑀽𑀢𑀺 ‘‘𑀉𑀤𑁆𑀥𑀗𑁆𑀕𑀫𑀸 𑀯𑀸𑀢𑀸, 𑀅𑀥𑁄𑀕𑀫𑀸 𑀯𑀸𑀢𑀸, 𑀓𑀼𑀘𑁆𑀙𑀺𑀲𑀬𑀸 𑀯𑀸𑀢𑀸, 𑀓𑁄𑀝𑁆𑀞𑀸𑀲𑀬𑀸 𑀯𑀸𑀢𑀸, 𑀅𑀗𑁆𑀕𑀫𑀗𑁆𑀕𑀸𑀦𑀼𑀲𑀸𑀭𑀺𑀦𑁄 𑀯𑀸𑀢𑀸, 𑀅𑀲𑁆𑀲𑀸𑀲𑁄 𑀧𑀲𑁆𑀲𑀸𑀲𑁄’’𑀢𑀺 (𑀫. 𑀦𑀺. 𑁨.𑁩𑁦𑁫) 𑀏𑀯𑀁 𑀯𑀼𑀢𑁆𑀢𑁂𑀲𑀼 𑀙𑀲𑀼 𑀓𑁄𑀝𑁆𑀞𑀸𑀲𑁂𑀲𑀼. 𑀯𑀺𑀢𑁆𑀣𑀫𑁆𑀪𑀦𑀁 𑀲𑁂𑀲𑀪𑀽𑀢𑀢𑁆𑀢𑀬𑀲𑀦𑁆𑀣𑀫𑁆𑀪𑀺𑀢𑀢𑀸𑀧𑀸𑀤𑀦𑀁, ‘‘𑀉𑀧𑀓𑀻𑀴𑀦’’𑀦𑁆𑀢𑀺 𑀏𑀓𑁂. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀦𑀺𑀯𑁂𑀲𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬-𑁭. 𑀧𑀞𑀫𑀪𑀯𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁭𑁭-𑁭𑁮. 𑀙𑀝𑁆𑀞𑁂 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀦𑁆𑀢𑀺 𑀓𑀫𑁆𑀫𑀲𑀳𑀚𑀸𑀢𑀁 𑀯𑀺𑀜𑁆𑀜𑀸𑀡𑀁. 𑀲𑁂𑀲𑀫𑁂𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀲𑀢𑁆𑀢𑀫𑁂 𑀦𑀢𑁆𑀣𑀺 𑀯𑀢𑁆𑀢𑀩𑁆𑀩𑀁.

𑀧𑀞𑀫𑀪𑀯𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀲𑀻𑀮𑀩𑁆𑀩𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁯. 𑀅𑀝𑁆𑀞𑀫𑁂 𑀤𑀼𑀓𑁆𑀓𑀭𑀓𑀸𑀭𑀺𑀓𑀸𑀦𑀼𑀬𑁄𑀕𑁄𑀢𑀺 𑀤𑀼𑀓𑁆𑀓𑀭𑀓𑀺𑀭𑀺𑀬𑀸𑀬 𑀅𑀦𑀼𑀬𑁄𑀕𑁄. 𑀉𑀧𑀝𑁆𑀞𑀸𑀦𑁂𑀦 𑀲𑀸𑀭𑀦𑁆𑀢𑀺 𑀉𑀧𑀝𑁆𑀞𑀸𑀦𑀸𑀓𑀸𑀭𑁂𑀦 𑀲𑀸𑀭𑀁. ‘‘𑀇𑀤𑀁 𑀯𑀭’’𑀦𑁆𑀢𑀺𑀆𑀤𑀺𑀦𑀸 𑀉𑀧𑀝𑁆𑀞𑀸𑀦𑀸𑀓𑀸𑀭𑀁 𑀯𑀺𑀪𑀸𑀯𑁂𑀢𑀺. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀲𑀢𑁆𑀣𑀸𑀭𑀸 𑀧𑀼𑀘𑁆𑀙𑀺𑀢𑁂 𑀧𑀜𑁆𑀳𑁂.

𑀲𑀻𑀮𑀩𑁆𑀩𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀕𑀦𑁆𑀥𑀚𑀸𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁦. 𑀦𑀯𑀫𑁂 𑀫𑀽𑀮𑁂, 𑀫𑀽𑀮𑀲𑁆𑀲 𑀯𑀸 𑀕𑀦𑁆𑀥𑁄 𑀫𑀽𑀮𑀕𑀦𑁆𑀥𑁄𑀢𑀺 𑀆𑀳 ‘‘𑀫𑀽𑀮𑀯𑀢𑁆𑀣𑀼𑀓𑁄 𑀕𑀦𑁆𑀥𑁄’’𑀢𑀺. 𑀫𑀽𑀮𑀁 𑀯𑀢𑁆𑀣𑀼 𑀏𑀢𑀲𑁆𑀲𑀸𑀢𑀺 𑀫𑀽𑀮𑀯𑀢𑁆𑀣𑀼𑀓𑁄. 𑀇𑀤𑀸𑀦𑀺 𑀫𑀽𑀮𑀁 𑀕𑀦𑁆𑀥𑀬𑁄𑀕𑀢𑁄 𑀕𑀦𑁆𑀥𑁄𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀕𑀦𑁆𑀥𑀲𑀫𑁆𑀧𑀦𑁆𑀦𑀁 𑀯𑀸 𑀫𑀽𑀮𑀫𑁂𑀯 𑀫𑀽𑀮𑀕𑀦𑁆𑀥𑁄’’𑀢𑀺 𑀆𑀳. 𑀧𑀘𑁆𑀙𑀺𑀫𑁄𑀬𑁂𑀯𑁂𑀢𑁆𑀣 𑀅𑀢𑁆𑀣𑀯𑀺𑀓𑀧𑁆𑀧𑁄 𑀬𑀼𑀢𑁆𑀢𑀢𑀭𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀲𑁆𑀲 𑀳𑀺 𑀕𑀦𑁆𑀥𑁄’’𑀢𑀺𑀆𑀤𑀺𑀫𑀸𑀳. 𑀯𑀲𑁆𑀲𑀺𑀓𑀧𑀼𑀧𑁆𑀨𑀸𑀤𑀻𑀦𑀦𑁆𑀢𑀺 𑀲𑀼𑀫𑀦𑀧𑀼𑀧𑁆𑀨𑀸𑀤𑀻𑀦𑀁.

𑀕𑀦𑁆𑀥𑀚𑀸𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀘𑀽𑀴𑀦𑀺𑀓𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁧. 𑀤𑀲𑀫𑁂 𑀅𑀭𑀼𑀡𑀯𑀢𑀺𑀲𑀼𑀢𑁆𑀢𑀦𑁆𑀢𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀦𑁆𑀢𑀺 ‘‘𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀭𑀸𑀚𑀸 𑀅𑀳𑁄𑀲𑀺 𑀅𑀭𑀼𑀡𑀯𑀸 𑀦𑀸𑀫. 𑀭𑀜𑁆𑀜𑁄 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀅𑀭𑀼𑀡𑀯𑀢𑁄 𑀅𑀭𑀼𑀡𑀯𑀢𑀻 𑀦𑀸𑀫 𑀭𑀸𑀚𑀥𑀸𑀦𑀻 𑀅𑀳𑁄𑀲𑀺. 𑀅𑀭𑀼𑀡𑀯𑀢𑀺𑀁 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀭𑀸𑀚𑀥𑀸𑀦𑀺𑀁 𑀲𑀺𑀔𑀻 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀸𑀲𑀺. 𑀲𑀺𑀔𑀺𑀲𑁆𑀲 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀅𑀪𑀺𑀪𑀽𑀲𑀫𑁆𑀪𑀯𑀁 𑀦𑀸𑀫 𑀲𑀸𑀯𑀓𑀬𑀼𑀕𑀁 𑀅𑀳𑁄𑀲𑀺 𑀅𑀕𑁆𑀕𑀁 𑀪𑀤𑁆𑀤𑀬𑀼𑀕𑀁. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀲𑀺𑀔𑀻 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀅𑀪𑀺𑀪𑀼𑀁 𑀪𑀺𑀓𑁆𑀔𑀼𑀁 𑀆𑀫𑀦𑁆𑀢𑁂𑀲𑀻’’𑀢𑀺𑀆𑀤𑀺𑀦𑀸 𑀩𑁆𑀭𑀳𑁆𑀫𑀲𑀁𑀬𑀼𑀢𑁆𑀢𑁂 (𑀲𑀁. 𑀦𑀺. 𑁧.𑁧𑁮𑁫) 𑀆𑀕𑀢𑀲𑁆𑀲 𑀅𑀭𑀼𑀡𑀯𑀢𑀺𑀲𑀼𑀢𑁆𑀢𑀦𑁆𑀢𑀲𑁆𑀲 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀁. 𑀅𑀢𑀺𑀧𑁆𑀧𑀕𑁄𑀢𑀺 𑀅𑀢𑀺𑀯𑀺𑀬 𑀧𑀕𑁄, 𑀅𑀢𑀺𑀯𑀺𑀬 𑀧𑀸𑀢𑁄𑀢𑀺 𑀅𑀢𑁆𑀣𑁄, 𑀦 𑀢𑀸𑀯 𑀓𑀼𑀮𑁂𑀲𑀼 𑀪𑀢𑁆𑀢𑀁 𑀦𑀺𑀝𑁆𑀞𑀸𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀉𑀚𑁆𑀛𑀸𑀬𑀦𑁆𑀢𑀻𑀢𑀺 𑀅𑀯𑀛𑀸𑀬𑀦𑁆𑀢𑀺, 𑀳𑁂𑀝𑁆𑀞𑀸 𑀓𑀢𑁆𑀯𑀸 𑀘𑀺𑀦𑁆𑀢𑁂𑀦𑁆𑀢𑀺, 𑀮𑀸𑀫𑀓𑀢𑁄 𑀘𑀺𑀦𑁆𑀢𑁂𑀦𑁆𑀢𑀺. 𑀅𑀦𑁂𑀓𑀯𑀺𑀳𑀺𑀢𑀁 𑀇𑀤𑁆𑀥𑀺𑀯𑀺𑀓𑀼𑀩𑁆𑀩𑀦𑀁 𑀓𑀢𑁆𑀯𑀸𑀢𑀺 ‘‘𑀧𑀓𑀢𑀺𑀯𑀡𑁆𑀡𑀁 𑀯𑀺𑀚𑀳𑀺𑀢𑁆𑀯𑀸 𑀦𑀸𑀕𑀯𑀡𑁆𑀡𑀁 𑀯𑀸 𑀤𑀲𑁆𑀲𑁂𑀢𑀺, 𑀲𑀼𑀧𑀡𑁆𑀡𑀯𑀡𑁆𑀡𑀁 𑀯𑀸 𑀤𑀲𑁆𑀲𑁂𑀢𑀻’’𑀢𑀺𑀆𑀤𑀺𑀦𑀸 (𑀧𑀝𑀺. 𑀫. 𑁩.𑁧𑁩) 𑀦𑀬𑁂𑀦 𑀆𑀕𑀢𑀁 𑀅𑀦𑁂𑀓𑀧𑁆𑀧𑀓𑀸𑀭𑀁 𑀇𑀤𑁆𑀥𑀺𑀯𑀺𑀓𑀼𑀩𑁆𑀩𑀦𑀁 𑀓𑀢𑁆𑀯𑀸. 𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀦𑁆𑀢𑀺 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑀁. 𑀕𑀸𑀣𑀸𑀤𑁆𑀯𑀬𑀁 𑀅𑀪𑀸𑀲𑀻𑀢𑀺 𑀣𑁂𑀭𑁄 𑀓𑀺𑀭 ‘‘𑀓𑀣𑀁 𑀤𑁂𑀲𑀺𑀢𑀸 𑀔𑁄 𑀥𑀫𑁆𑀫𑀤𑁂𑀲𑀦𑀸 𑀲𑀩𑁆𑀩𑁂𑀲𑀁 𑀧𑀺𑀬𑀸 𑀫𑀦𑀸𑀧𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀲𑀩𑁆𑀩𑁂𑀧𑀺 𑀧𑀸𑀲𑀡𑁆𑀟𑀸 𑀲𑀩𑁆𑀩𑁂 𑀤𑁂𑀯𑀫𑀦𑀼𑀲𑁆𑀲𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀲𑀫𑀬𑁂 𑀧𑀼𑀭𑀺𑀲𑀓𑀸𑀭𑀁 𑀯𑀡𑁆𑀡𑀬𑀦𑁆𑀢𑀺, 𑀯𑀻𑀭𑀺𑀬𑀲𑁆𑀲 𑀅𑀯𑀡𑁆𑀡𑀯𑀸𑀤𑀻 𑀦𑀸𑀫 𑀦𑀢𑁆𑀣𑀺, 𑀯𑀻𑀭𑀺𑀬𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀁 𑀓𑀢𑁆𑀯𑀸 𑀤𑁂𑀲𑁂𑀲𑁆𑀲𑀸𑀫𑀺. 𑀏𑀯𑀫𑀲𑁆𑀲 𑀥𑀫𑁆𑀫𑀤𑁂𑀲𑀦𑀸 𑀲𑀩𑁆𑀩𑁂𑀲𑀁 𑀧𑀺𑀬𑀸 𑀪𑀯𑀺𑀲𑁆𑀲𑀢𑀺 𑀫𑀦𑀸𑀧𑀸’’𑀢𑀺 𑀜𑀢𑁆𑀯𑀸 𑀢𑀻𑀲𑀼 𑀧𑀺𑀝𑀓𑁂𑀲𑀼 𑀯𑀺𑀘𑀺𑀦𑀺𑀢𑁆𑀯𑀸 ‘‘𑀆𑀭𑀫𑁆𑀪𑀣 𑀦𑀺𑀓𑁆𑀓𑀫𑀣𑀸’’𑀢𑀺 (𑀲𑀁. 𑀦𑀺. 𑁧.𑁧𑁮𑁬) 𑀇𑀤𑀁 𑀕𑀸𑀣𑀸𑀤𑁆𑀯𑀬𑀁 𑀅𑀪𑀸𑀲𑀺.

𑀓𑀺𑀁 𑀆𑀮𑁄𑀓𑁄 𑀅𑀬𑀦𑁆𑀢𑀺 𑀓𑀲𑁆𑀲 𑀦𑀼 𑀔𑁄 𑀅𑀬𑀁 𑀆𑀮𑁄𑀓𑁄𑀢𑀺. 𑀯𑀺𑀘𑀺𑀦𑀦𑁆𑀢𑀸𑀦𑀦𑁆𑀢𑀺 𑀘𑀺𑀦𑁆𑀢𑁂𑀦𑁆𑀢𑀸𑀦𑀁. 𑀲𑀩𑁆𑀩𑁂𑀢𑀺 𑀮𑁄𑀓𑀥𑀸𑀢𑀼𑀬𑀁 𑀲𑀩𑁆𑀩𑁂 𑀤𑁂𑀯𑀸 𑀘 𑀫𑀦𑀼𑀲𑁆𑀲𑀸 𑀘. 𑀑𑀲𑀝𑀸𑀬 𑀧𑀭𑀺𑀲𑀸𑀬𑀸𑀢𑀺 𑀥𑀫𑁆𑀫𑀲𑁆𑀲𑀯𑀦𑀢𑁆𑀣𑀁 𑀲𑀫𑁄𑀲𑀝𑀸𑀬 𑀧𑀭𑀺𑀫𑀺𑀢𑀧𑀭𑀺𑀘𑁆𑀙𑀺𑀦𑁆𑀦𑀸𑀬 𑀧𑀭𑀺𑀲𑀸𑀬. 𑀅𑀢𑁆𑀣𑁄𑀧𑀺 𑀦𑁂𑀲𑀁 𑀧𑀸𑀓𑀝𑁄 𑀅𑀳𑁄𑀲𑀻𑀢𑀺 𑀦 𑀓𑁂𑀯𑀮𑀁 𑀢𑁂 𑀲𑀤𑁆𑀤𑀫𑁂𑀯 𑀅𑀲𑁆𑀲𑁄𑀲𑀼𑀁, 𑀅𑀣 𑀔𑁄 𑀅𑀢𑁆𑀣𑁄𑀧𑀺 𑀢𑁂𑀲𑀁 𑀧𑀓𑀢𑀺𑀲𑀯𑀦𑀽𑀧𑀘𑀸𑀭𑁂 𑀯𑀺𑀬 𑀧𑀸𑀓𑀝𑁄 𑀅𑀳𑁄𑀲𑀺. 𑀢𑁂𑀦 𑀲𑀳𑀲𑁆𑀲𑀁 𑀮𑁄𑀓𑀥𑀸𑀢𑀼𑀁 𑀯𑀺𑀜𑁆𑀜𑀸𑀧𑁂𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀧𑀭𑀺𑀳𑀭𑀦𑁆𑀢𑀻𑀢𑀺 𑀲𑀺𑀦𑁂𑀭𑀼𑀁 𑀤𑀓𑁆𑀔𑀺𑀡𑀢𑁄 𑀓𑀢𑁆𑀯𑀸 𑀧𑀭𑀺𑀯𑀢𑁆𑀢𑁂𑀦𑁆𑀢𑀺. 𑀯𑀺𑀭𑁄𑀘𑀫𑀸𑀦𑀸𑀢𑀺 𑀅𑀢𑁆𑀢𑀦𑁄 𑀚𑀼𑀢𑀺𑀬𑀸 𑀤𑀺𑀩𑁆𑀩𑀫𑀸𑀦𑀸, 𑀲𑁄𑀪𑀫𑀸𑀦𑀸 𑀯𑀸. 𑀢𑀸𑀯 𑀲𑀳𑀲𑁆𑀲𑀥𑀸 𑀮𑁄𑀓𑁄𑀢𑀺 𑀬𑀢𑁆𑀢𑀓𑁄 𑀘𑀦𑁆𑀤𑀺𑀫𑀲𑀽𑀭𑀺𑀬𑁂𑀳𑀺 𑀑𑀪𑀸𑀲𑀺𑀬𑀫𑀸𑀦𑁄 𑀮𑁄𑀓𑀥𑀸𑀢𑀼𑀲𑀗𑁆𑀔𑀸𑀢𑁄 𑀏𑀓𑁂𑀓𑁄 𑀮𑁄𑀓𑁄, 𑀢𑀢𑁆𑀢𑀓𑁂𑀦 𑀧𑀫𑀸𑀡𑁂𑀦 𑀲𑀳𑀲𑁆𑀲𑀥𑀸 𑀮𑁄𑀓𑁄, 𑀇𑀫𑀺𑀦𑀸 𑀘𑀓𑁆𑀓𑀯𑀸𑀴𑁂𑀦 𑀲𑀤𑁆𑀥𑀺𑀁 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑀦𑁆𑀢𑀺 𑀅𑀢𑁆𑀣𑁄. 𑀓𑀲𑁆𑀫𑀸 𑀧𑀦𑁂𑀲𑀸 𑀆𑀦𑀻𑀢𑀸𑀢𑀺 𑀏𑀲𑀸 𑀘𑀽𑀴𑀦𑀺𑀓𑀸 𑀮𑁄𑀓𑀥𑀸𑀢𑀼 𑀓𑀲𑁆𑀫𑀸 𑀪𑀕𑀯𑀢𑀸 𑀆𑀦𑀻𑀢𑀸, 𑀤𑁂𑀲𑀺𑀢𑀸𑀢𑀺 𑀅𑀢𑁆𑀣𑁄. 𑀫𑀚𑁆𑀛𑀺𑀫𑀺𑀓𑀸𑀬 𑀮𑁄𑀓𑀥𑀸𑀢𑀼𑀬𑀸 𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀤𑁆𑀯𑀺𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀬𑀸 𑀧𑀭𑀺𑀫𑀸𑀡𑀤𑀲𑁆𑀲𑀦𑀢𑁆𑀣𑀁.

𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀬𑀸 𑀲𑀳𑀲𑁆𑀲𑀻 𑀤𑁆𑀯𑀺𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼, 𑀲𑀸 𑀘𑀓𑁆𑀓𑀯𑀸𑀴𑀕𑀡𑀦𑀸𑀬 𑀤𑀲𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀧𑀭𑀺𑀫𑀸𑀡𑀸. 𑀢𑁂𑀦𑀸𑀳 ‘‘𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀸𑀦𑀺 𑀲𑀳𑀲𑁆𑀲𑀪𑀸𑀕𑁂𑀦 𑀕𑀡𑁂𑀢𑁆𑀯𑀸’’𑀢𑀺𑀆𑀤𑀺. 𑀓𑀫𑁆𑀧𑀦𑀤𑁂𑀯𑀢𑀽𑀧𑀲𑀗𑁆𑀓𑀫𑀦𑀸𑀤𑀺𑀦𑀸 𑀚𑀸𑀢𑀘𑀓𑁆𑀓𑀯𑀸𑀴𑁂𑀦 𑀲𑀳 𑀬𑁄𑀕𑀓𑁆𑀔𑁂𑀫𑀁 𑀞𑀸𑀦𑀁 𑀚𑀸𑀢𑀺𑀓𑁆𑀔𑁂𑀢𑁆𑀢𑀁. 𑀢𑀢𑁆𑀢𑀓𑀸𑀬 𑀏𑀯 𑀚𑀸𑀢𑀺𑀓𑁆𑀔𑁂𑀢𑁆𑀢𑀪𑀸𑀯𑁄 𑀥𑀫𑁆𑀫𑀢𑀸𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄, ‘‘𑀧𑀭𑀺𑀕𑁆𑀕𑀳𑀯𑀲𑁂𑀦𑀸’’𑀢𑀺 𑀓𑁂𑀘𑀺. 𑀲𑀩𑁆𑀩𑁂𑀲𑀫𑁆𑀧𑀺 𑀩𑀼𑀤𑁆𑀥𑀸𑀦𑀁 𑀏𑀯𑀁 𑀚𑀸𑀢𑀺𑀓𑁆𑀔𑁂𑀢𑁆𑀢𑀁 𑀢𑀦𑁆𑀦𑀺𑀯𑀸𑀲𑀻𑀦𑀁𑀬𑁂𑀯 𑀘 𑀤𑁂𑀯𑀢𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄𑀢𑀺 𑀯𑀤𑀦𑁆𑀢𑀺. 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀸𑀤𑀻𑀦𑀁 𑀲𑀢𑁆𑀢𑀦𑁆𑀦𑀁𑀬𑁂𑀯 𑀕𑀳𑀡𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀫𑀳𑀸𑀪𑀺𑀦𑀻𑀳𑀸𑀭𑀸𑀤𑀺𑀓𑀸𑀮𑁂𑀧𑀺 𑀢𑀲𑁆𑀲 𑀧𑀓𑀫𑁆𑀧𑀦𑀲𑁆𑀲 𑀮𑀩𑁆𑀪𑀦𑀢𑁄.

𑀲𑀳𑀲𑁆𑀲𑀁 𑀲𑀳𑀲𑁆𑀲𑀥𑀸 𑀓𑀢𑁆𑀯𑀸 𑀕𑀡𑀺𑀢𑀁 𑀫𑀚𑁆𑀛𑀺𑀫𑀺𑀓𑀦𑁆𑀢𑀺𑀆𑀤𑀺𑀦𑀸 𑀫𑀚𑁆𑀛𑀺𑀫𑀺𑀓𑀸𑀬 𑀮𑁄𑀓𑀥𑀸𑀢𑀼𑀬𑀸 𑀲𑀳𑀲𑁆𑀲𑀁 𑀢𑀺𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼, 𑀲𑀸𑀬𑁂𑀯 𑀘 𑀫𑀳𑀸𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀽𑀢𑀺 𑀤𑀲𑁆𑀲𑁂𑀢𑀺. 𑀲𑀭𑀲𑁂𑀦𑁂𑀯 𑀆𑀡𑀸𑀧𑀯𑀢𑁆𑀢𑀦𑀁 𑀆𑀡𑀸𑀓𑁆𑀔𑁂𑀢𑁆𑀢𑀁, 𑀬𑀁 𑀏𑀓𑀚𑁆𑀛𑀁 𑀲𑀁𑀯𑀝𑁆𑀝𑀢𑀺 𑀯𑀺𑀯𑀝𑁆𑀝𑀢𑀺 𑀘. 𑀆𑀡𑀸 𑀨𑀭𑀢𑀻𑀢𑀺 𑀢𑀦𑁆𑀦𑀺𑀯𑀸𑀲𑀺𑀤𑁂𑀯𑀢𑀸𑀦𑀁 𑀲𑀺𑀭𑀲𑀸 𑀲𑀫𑁆𑀧𑀝𑀺𑀘𑁆𑀙𑀦𑁂𑀦 𑀯𑀢𑁆𑀢𑀢𑀺, 𑀢𑀜𑁆𑀘 𑀔𑁄 𑀓𑁂𑀯𑀮𑀁 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦𑁂𑀯, 𑀅𑀥𑀺𑀧𑁆𑀧𑀸𑀬𑀯𑀲𑁂𑀦 𑀘 𑀧𑀦 ‘‘𑀬𑀸𑀯𑀢𑀸 𑀧𑀦 𑀆𑀓𑀗𑁆𑀔𑁂𑀬𑁆𑀬𑀸’’𑀢𑀺 (𑀅. 𑀦𑀺. 𑁩.𑁮𑁧) 𑀯𑀘𑀦𑀢𑁄 𑀩𑀼𑀤𑁆𑀥𑀸𑀦𑀁 𑀅𑀯𑀺𑀲𑀬𑁄 𑀦𑀸𑀫 𑀦𑀢𑁆𑀣𑀺, 𑀯𑀺𑀲𑀬𑀓𑁆𑀔𑁂𑀢𑁆𑀢𑀲𑁆𑀲 𑀧𑀫𑀸𑀡𑀧𑀭𑀺𑀘𑁆𑀙𑁂𑀤𑁄 𑀦𑀸𑀫 𑀦𑀢𑁆𑀣𑀺. 𑀯𑀺𑀲𑀫𑁄𑀢𑀺 𑀲𑀽𑀭𑀺𑀬𑀼𑀕𑁆𑀕𑀫𑀦𑀸𑀤𑀻𑀦𑀁 𑀯𑀺𑀲𑀫𑀪𑀸𑀯𑀢𑁄 𑀯𑀺𑀲𑀫𑁄. 𑀢𑁂𑀦𑁂𑀯𑀸𑀳 ‘‘𑀏𑀓𑀲𑁆𑀫𑀺𑀁 𑀞𑀸𑀦𑁂 𑀲𑀽𑀭𑀺𑀬𑁄 𑀉𑀕𑁆𑀕𑀢𑁄 𑀳𑁄𑀢𑀻’’𑀢𑀺𑀆𑀤𑀺. 𑀲𑁂𑀲𑀫𑁂𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀘𑀽𑀴𑀦𑀺𑀓𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀆𑀦𑀦𑁆𑀤𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.