.𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲.

𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑁂

𑀢𑀺𑀓𑀦𑀺𑀧𑀸𑀢-𑀝𑀻𑀓𑀸

𑁧. 𑀧𑀞𑀫𑀧𑀡𑁆𑀡𑀸𑀲𑀓𑀁

𑁧. 𑀩𑀸𑀮𑀯𑀕𑁆𑀕𑁄

𑁧. 𑀪𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧. 𑀢𑀺𑀓𑀦𑀺𑀧𑀸𑀢𑀲𑁆𑀲 𑀧𑀞𑀫𑁂 𑀪𑀬𑀦𑁆𑀢𑀺 𑀪𑀻𑀢𑀺 𑀘𑁂𑀢𑀲𑁄 𑀩𑁆𑀬𑀥𑁄𑀢𑀺 𑀆𑀳 ‘‘𑀘𑀺𑀢𑁆𑀢𑀼𑀢𑁆𑀭𑀸𑀲𑁄’’𑀢𑀺. 𑀉𑀧𑀤𑁆𑀤𑀯𑁄𑀢𑀺 𑀅𑀦𑁆𑀢𑀭𑀸𑀬𑁄. 𑀢𑀲𑁆𑀲 𑀧𑀦 𑀯𑀺𑀓𑁆𑀔𑁂𑀧𑀓𑀸𑀭𑀡𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀅𑀦𑁂𑀓𑀕𑁆𑀕𑀢𑀸𑀓𑀸𑀭𑁄’’𑀢𑀺. 𑀉𑀧𑀲𑀕𑁆𑀕𑁄𑀢𑀺 𑀉𑀧𑀲𑀚𑁆𑀚𑀦𑀁, 𑀤𑁂𑀯𑀢𑁄𑀧𑀧𑀻𑀴𑀸𑀤𑀺𑀦𑀸 𑀅𑀧𑁆𑀧𑀝𑀺𑀓𑀸𑀭𑀯𑀺𑀖𑀸𑀢𑀸𑀧𑀢𑁆𑀢𑀺. 𑀲𑀸 𑀧𑀦 𑀬𑀲𑁆𑀫𑀸 𑀧𑀝𑀺𑀓𑀸𑀭𑀸𑀪𑀸𑀯𑁂𑀦 𑀯𑀺𑀳𑀜𑁆𑀜𑀫𑀸𑀦𑀲𑁆𑀲 𑀓𑀺𑀜𑁆𑀘𑀺 𑀓𑀸𑀢𑀼𑀁 𑀅𑀲𑀫𑀢𑁆𑀣𑀲𑁆𑀲 𑀑𑀲𑀻𑀤𑀦𑀓𑀸𑀭𑀡𑀁, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀢𑀢𑁆𑀣 𑀢𑀢𑁆𑀣 𑀮𑀕𑁆𑀕𑀦𑀸𑀓𑀸𑀭𑁄’’𑀢𑀺. 𑀬𑀣𑀸𑀯𑀼𑀢𑁆𑀢𑁂 𑀤𑀺𑀯𑀲𑁂 𑀅𑀦𑀸𑀕𑀘𑁆𑀙𑀦𑁆𑀢𑁂𑀲𑀽𑀢𑀺 𑀯𑀜𑁆𑀘𑁂𑀢𑁆𑀯𑀸 𑀆𑀕𑀦𑁆𑀢𑀼𑀁 𑀦𑀺𑀬𑀫𑀺𑀢𑀤𑀺𑀯𑀲𑁂 𑀅𑀦𑀸𑀕𑀘𑁆𑀙𑀦𑁆𑀢𑁂𑀲𑀼. 𑀤𑁆𑀯𑀸𑀭𑁂 𑀅𑀕𑁆𑀕𑀺𑀁 𑀤𑀢𑁆𑀯𑀸𑀢𑀺 𑀩𑀳𑀺 𑀅𑀦𑀺𑀓𑁆𑀔𑀫𑀦𑀢𑁆𑀣𑀸𑀬 𑀤𑁆𑀯𑀸𑀭𑁂 𑀅𑀕𑁆𑀕𑀺𑀁 𑀤𑀢𑁆𑀯𑀸.

𑀦𑀴𑁂𑀳𑀺 𑀙𑀦𑁆𑀦𑀧𑀝𑀺𑀘𑁆𑀙𑀦𑁆𑀦𑀸𑀢𑀺 𑀦𑀴𑁂𑀳𑀺 𑀢𑀺𑀡𑀘𑁆𑀙𑀤𑀦𑀲𑀗𑁆𑀔𑁂𑀧𑁂𑀦 𑀉𑀧𑀭𑀺 𑀙𑀸𑀤𑁂𑀢𑁆𑀯𑀸 𑀢𑁂𑀳𑀺𑀬𑁂𑀯 𑀤𑀸𑀭𑀼𑀓𑀼𑀝𑀺𑀓𑀦𑀺𑀬𑀸𑀫𑁂𑀦 𑀧𑀭𑀺𑀢𑁄𑀧𑀺 𑀙𑀸𑀤𑀺𑀢𑀸. 𑀏𑀲𑁂𑀯 𑀦𑀬𑁄𑀢𑀺 𑀇𑀫𑀺𑀦𑀸 𑀢𑀺𑀡𑁂𑀳𑀺 𑀙𑀦𑁆𑀦𑀢𑀁 𑀲𑁂𑀲𑀲𑀫𑁆𑀪𑀸𑀭𑀸𑀦𑀁 𑀭𑀼𑀓𑁆𑀔𑀫𑀬𑀢𑀜𑁆𑀘 𑀅𑀢𑀺𑀤𑀺𑀲𑀢𑀺.

𑀯𑀺𑀥𑀯𑀧𑀼𑀢𑁆𑀢𑁂𑀢𑀺 𑀅𑀦𑁆𑀢𑀪𑀸𑀯𑁄𑀧𑀮𑀓𑁆𑀔𑀡𑀁. 𑀢𑁂 𑀳𑀺 𑀦𑀺𑀧𑁆𑀧𑀺𑀢𑀺𑀓𑀸 𑀅𑀯𑀺𑀦𑀻𑀢𑀸 𑀅𑀲𑀁𑀬𑀢𑀸 𑀬𑀁 𑀓𑀺𑀜𑁆𑀘𑀺 𑀓𑀸𑀭𑀺𑀦𑁄. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑀪𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀮𑀓𑁆𑀔𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁨. 𑀤𑀼𑀢𑀺𑀬𑁂 𑀮𑀓𑁆𑀔𑀻𑀬𑀢𑀺 𑀩𑀸𑀮𑁄 𑀅𑀬𑀦𑁆𑀢𑀺 𑀜𑀸𑀬𑀢𑀺 𑀏𑀢𑁂𑀦𑀸𑀢𑀺 𑀮𑀓𑁆𑀔𑀡𑀁, 𑀓𑀫𑁆𑀫𑀁 𑀮𑀓𑁆𑀔𑀡𑀫𑁂𑀢𑀲𑁆𑀲𑀸𑀢𑀺 𑀓𑀫𑁆𑀫𑀮𑀓𑁆𑀔𑀡𑁄𑀢𑀺 𑀆𑀳 ‘‘𑀓𑀸𑀬𑀤𑁆𑀯𑀸𑀭𑀸𑀤𑀺𑀧𑀯𑀢𑁆𑀢𑀁 𑀓𑀫𑁆𑀫’’𑀦𑁆𑀢𑀺𑀆𑀤𑀺. 𑀅𑀧𑀤𑀻𑀬𑀦𑁆𑀢𑀺 𑀤𑁄𑀲𑀸 𑀏𑀢𑁂𑀦 𑀭𑀓𑁆𑀔𑀻𑀬𑀦𑁆𑀢𑀺, 𑀮𑀽𑀬𑀦𑁆𑀢𑀺 𑀙𑀺𑀚𑁆𑀚𑀦𑁆𑀢𑀺 𑀯𑀸𑀢𑀺 𑀅𑀧𑀤𑀸𑀦𑀁, 𑀲𑀢𑁆𑀢𑀸𑀦𑀁 𑀲𑀫𑁆𑀫𑀸, 𑀫𑀺𑀘𑁆𑀙𑀸 𑀯𑀸 𑀧𑀯𑀢𑁆𑀢𑀧𑁆𑀧𑀬𑁄𑀕𑁄. 𑀢𑁂𑀦 𑀲𑁄𑀪𑀢𑀻𑀢𑀺 𑀅𑀧𑀤𑀸𑀦𑀲𑁄𑀪𑀦𑀻. 𑀢𑁂𑀦𑀸𑀳 ‘‘𑀧𑀜𑁆𑀜𑀸 𑀦𑀸𑀫𑀸’’𑀢𑀺𑀆𑀤𑀺. 𑀅𑀢𑁆𑀢𑀦𑁄 𑀘𑀭𑀺𑀢𑁂𑀦𑁂𑀯𑀸𑀢𑀺 𑀅𑀢𑁆𑀢𑀦𑁄 𑀘𑀭𑀺𑀬𑀸𑀬 𑀏𑀯. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑀮𑀓𑁆𑀔𑀡𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩-𑁪. 𑀘𑀺𑀦𑁆𑀢𑀻𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁩-𑁪. 𑀢𑀢𑀺𑀬𑁂 𑀏𑀢𑁂𑀳𑀻𑀢𑀺 𑀤𑀼𑀘𑁆𑀘𑀺𑀦𑁆𑀢𑀺𑀢𑀘𑀺𑀦𑁆𑀢𑀺𑀢𑀸𑀤𑀻𑀳𑀺. 𑀏𑀢𑁂𑀦 𑀮𑀓𑁆𑀔𑀡𑀲𑀤𑁆𑀤𑀲𑁆𑀲 𑀲𑀭𑀡𑀢𑁆𑀣𑀢𑀫𑀸𑀳. 𑀢𑀸𑀦𑁂𑀯𑀸𑀢𑀺 𑀮𑀓𑁆𑀔𑀡𑀸𑀦𑀺 𑀏𑀯. 𑀅𑀲𑁆𑀲𑀸𑀢𑀺 𑀩𑀸𑀮𑀲𑁆𑀲. 𑀩𑀸𑀮𑁄 𑀅𑀬𑀦𑁆𑀢𑀺 𑀦𑀺𑀫𑀻𑀬𑀢𑀺 𑀲𑀜𑁆𑀚𑀸𑀦𑀻𑀬𑀢𑀺 𑀏𑀢𑁂𑀳𑀻𑀢𑀺 𑀩𑀸𑀮𑀦𑀺𑀫𑀺𑀢𑁆𑀢𑀸𑀦𑀺. 𑀅𑀧𑀤𑀸𑀦𑀁 𑀯𑀼𑀘𑁆𑀘𑀢𑀺, 𑀯𑀺𑀔𑁆𑀬𑀸𑀢𑀁 𑀓𑀫𑁆𑀫𑀁, 𑀤𑀼𑀘𑁆𑀘𑀺𑀦𑁆𑀢𑀺𑀢𑀘𑀺𑀦𑁆𑀢𑀺𑀢𑀸𑀤𑀻𑀦𑀺 𑀘 𑀩𑀸𑀮𑁂 𑀯𑀺𑀔𑁆𑀬𑀸𑀢𑀸𑀦𑀺 𑀅𑀲𑀸𑀥𑀸𑀭𑀡𑀪𑀸𑀯𑁂𑀦. 𑀢𑀲𑁆𑀫𑀸 ‘‘𑀩𑀸𑀮𑀲𑁆𑀲 𑀅𑀧𑀤𑀸𑀦𑀸𑀦𑀻’’𑀢𑀺. 𑀅𑀪𑀺𑀚𑁆𑀛𑀸𑀤𑀻𑀳𑀺 𑀤𑀼𑀝𑁆𑀞𑀁 𑀤𑀽𑀲𑀺𑀢𑀁 𑀘𑀺𑀦𑁆𑀢𑀺𑀢𑀁 𑀤𑀼𑀘𑁆𑀘𑀺𑀦𑁆𑀢𑀺𑀢𑀁, 𑀢𑀁 𑀘𑀺𑀦𑁆𑀢𑁂𑀢𑀻𑀢𑀺 𑀤𑀼𑀘𑁆𑀘𑀺𑀦𑁆𑀢𑀺𑀢𑀘𑀺𑀦𑁆𑀢𑀻. 𑀮𑁄𑀪𑀸𑀤𑀻𑀳𑀺 𑀤𑀼𑀝𑁆𑀞𑀁 𑀪𑀸𑀲𑀺𑀢𑀁 𑀫𑀼𑀲𑀸𑀯𑀸𑀤𑀸𑀤𑀺𑀁 𑀪𑀸𑀲𑀢𑀻𑀢𑀺 𑀤𑀼𑀩𑁆𑀪𑀸𑀲𑀺𑀢𑀪𑀸𑀲𑀻. 𑀢𑁂𑀲𑀁𑀬𑁂𑀯 𑀯𑀲𑁂𑀦 𑀓𑀢𑁆𑀢𑀩𑁆𑀩𑀢𑁄 𑀤𑀼𑀓𑁆𑀓𑀝𑀓𑀫𑁆𑀫𑀁 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀁 𑀓𑀭𑁄𑀢𑀻𑀢𑀺 𑀤𑀼𑀓𑁆𑀓𑀝𑀓𑀫𑁆𑀫𑀓𑀸𑀭𑀻. 𑀢𑁂𑀦𑀸𑀳 ‘‘𑀘𑀺𑀦𑁆𑀢𑀬𑀦𑁆𑀢𑁄’’𑀢𑀺𑀆𑀤𑀺. 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦𑀸𑀢𑀺 ‘‘𑀩𑀸𑀮𑁄 𑀅𑀬’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑀯𑀘𑀦𑀲𑁆𑀲 ‘‘𑀧𑀡𑁆𑀟𑀺𑀢𑁄 𑀅𑀬𑀦𑁆𑀢𑀺 𑀏𑀢𑁂𑀳𑀺 𑀮𑀓𑁆𑀔𑀻𑀬𑀢𑀻’’𑀢𑀺𑀆𑀤𑀺𑀦𑀸 𑀅𑀦𑀼𑀲𑁆𑀲𑀭𑀡𑁂𑀦. 𑀫𑀦𑁄𑀲𑀼𑀘𑀭𑀺𑀢𑀸𑀤𑀻𑀦𑀁 𑀯𑀲𑁂𑀦𑀸𑀢𑀺 ‘‘𑀘𑀺𑀦𑁆𑀢𑀬𑀦𑁆𑀢𑁄 𑀅𑀦𑀪𑀺𑀚𑁆𑀛𑀸𑀩𑁆𑀬𑀸𑀧𑀸𑀤𑀲𑀫𑁆𑀫𑀸𑀤𑀲𑁆𑀲𑀦𑀯𑀲𑁂𑀦 𑀲𑀼𑀘𑀺𑀦𑁆𑀢𑀺𑀢𑀫𑁂𑀯 𑀘𑀺𑀦𑁆𑀢𑁂𑀢𑀻’’𑀢𑀺𑀆𑀤𑀺𑀦𑀸 𑀫𑀦𑁄𑀲𑀼𑀘𑀭𑀺𑀢𑀸𑀤𑀻𑀦𑀁 𑀢𑀺𑀡𑁆𑀡𑀁 𑀲𑀼𑀘𑀭𑀺𑀢𑀸𑀦𑀁 𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀘𑀢𑀼𑀢𑁆𑀣𑀁 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀘𑀺𑀦𑁆𑀢𑀻𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫-𑁧𑁦. 𑀅𑀬𑁄𑀦𑀺𑀲𑁄𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁫-𑁧𑁦. 𑀧𑀜𑁆𑀘𑀫𑁂 𑀓𑀢𑀺 𑀦𑀼 𑀔𑁄 𑀅𑀦𑀼𑀲𑁆𑀲𑀢𑀺𑀝𑁆𑀞𑀸𑀦𑀸𑀦𑀻𑀢𑀺𑀆𑀤𑀺 𑀙𑀓𑁆𑀓𑁂 𑀆𑀯𑀺 𑀪𑀯𑀺𑀲𑁆𑀲𑀢𑀻𑀢𑀺. 𑀏𑀯𑀁 𑀘𑀺𑀦𑁆𑀢𑀺𑀢𑀦𑁆𑀢𑀺 𑀅𑀬𑁄𑀦𑀺𑀲𑁄 𑀘𑀺𑀦𑁆𑀢𑀺𑀢𑀁. 𑀅𑀧𑀜𑁆𑀳𑀫𑁂𑀯 𑀧𑀜𑁆𑀳𑀦𑁆𑀢𑀺 𑀓𑀣𑁂𑀲𑀻𑀢𑀺 𑀅𑀧𑀜𑁆𑀳𑀫𑁂𑀯 𑀧𑀜𑁆𑀳𑁄 𑀅𑀬𑀦𑁆𑀢𑀺 𑀫𑀜𑁆𑀜𑀫𑀸𑀦𑁄 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀤𑀲𑀯𑀺𑀥𑀁 𑀩𑁆𑀬𑀜𑁆𑀚𑀦𑀩𑀼𑀤𑁆𑀥𑀺𑀁 𑀅𑀧𑀭𑀺𑀳𑀸𑀧𑁂𑀢𑁆𑀯𑀸𑀢𑀺 𑁋

‘‘𑀲𑀺𑀣𑀺𑀮𑀁 𑀥𑀦𑀺𑀢𑀜𑁆𑀘 𑀤𑀻𑀖𑀭𑀲𑁆𑀲𑀁, 𑀕𑀭𑀼𑀓𑀁 𑀮𑀳𑀼𑀓𑀜𑁆𑀘 𑀦𑀺𑀕𑁆𑀕𑀳𑀻𑀢𑀁;

𑀲𑀫𑁆𑀩𑀦𑁆𑀥𑀁 𑀯𑀯𑀢𑁆𑀣𑀺𑀢𑀁 𑀯𑀺𑀫𑀼𑀢𑁆𑀢𑀁, 𑀤𑀲𑀥𑀸 𑀩𑁆𑀬𑀜𑁆𑀚𑀦𑀩𑀼𑀤𑁆𑀥𑀺𑀬𑀸 𑀧𑀪𑁂𑀤𑁄’’𑀢𑀺. (𑀤𑀻. 𑀦𑀺. 𑀅𑀝𑁆𑀞. 𑁧.𑁧𑁯𑁦; 𑀫. 𑀦𑀺. 𑀅𑀝𑁆𑀞. 𑁨.𑁨𑁯𑁧; 𑀧𑀭𑀺. 𑀅𑀝𑁆𑀞. 𑁪𑁮𑁫; 𑀯𑀺. 𑀲𑀗𑁆𑀕. 𑀅𑀝𑁆𑀞. 𑁨𑁫𑁨) 𑁋

𑀏𑀯𑀁 𑀯𑀼𑀢𑁆𑀢𑀁 𑀤𑀲𑀯𑀺𑀥𑀁 𑀩𑁆𑀬𑀜𑁆𑀚𑀦𑀩𑀼𑀤𑁆𑀥𑀺𑀁 𑀅𑀧𑀭𑀺𑀳𑀸𑀧𑁂𑀢𑁆𑀯𑀸.

𑀢𑀢𑁆𑀣 𑀞𑀸𑀦𑀓𑀭𑀡𑀸𑀦𑀺 𑀲𑀺𑀣𑀺𑀮𑀸𑀦𑀺 𑀓𑀢𑁆𑀯𑀸 𑀉𑀘𑁆𑀘𑀸𑀭𑁂𑀢𑀩𑁆𑀩𑀁 𑀅𑀓𑁆𑀔𑀭𑀁 𑀲𑀺𑀣𑀺𑀮𑀁, 𑀢𑀸𑀦𑀺𑀬𑁂𑀯 𑀥𑀦𑀺𑀢𑀸𑀦𑀺 𑀅𑀲𑀺𑀣𑀺𑀮𑀸𑀦𑀺 𑀓𑀢𑁆𑀯𑀸 𑀉𑀘𑁆𑀘𑀸𑀭𑁂𑀢𑀩𑁆𑀩𑀁 𑀅𑀓𑁆𑀔𑀭𑀁 𑀥𑀦𑀺𑀢𑀁. 𑀤𑁆𑀯𑀺𑀫𑀢𑁆𑀢𑀓𑀸𑀮𑀁 𑀤𑀻𑀖𑀁, 𑀏𑀓𑀫𑀢𑁆𑀢𑀓𑀸𑀮𑀁 𑀭𑀲𑁆𑀲𑀁. 𑀕𑀭𑀼𑀓𑀦𑁆𑀢𑀺 𑀤𑀻𑀖𑀫𑁂𑀯, 𑀬𑀁 𑀯𑀸 ‘‘𑀆𑀬𑀲𑁆𑀫𑀢𑁄 𑀩𑀼𑀤𑁆𑀥𑀭𑀓𑁆𑀔𑀺𑀢𑀢𑁆𑀣𑁂𑀭𑀲𑁆𑀲𑀸’’𑀢𑀺 𑀲𑀁𑀬𑁄𑀕𑀧𑀭𑀁 𑀓𑀢𑁆𑀯𑀸 𑀯𑀼𑀘𑁆𑀘𑀢𑀺, 𑀮𑀳𑀼𑀓𑀦𑁆𑀢𑀺 𑀭𑀲𑁆𑀲𑀫𑁂𑀯, 𑀬𑀁 𑀯𑀸 ‘‘𑀆𑀬𑀲𑁆𑀫𑀢𑁄 𑀩𑀼𑀤𑁆𑀥𑀭𑀓𑁆𑀔𑀺𑀢𑀣𑁂𑀭𑀲𑁆𑀲𑀸’’𑀢𑀺 𑀏𑀯𑀁 𑀯𑀺𑀲𑀁𑀬𑁄𑀕𑀧𑀭𑀁 𑀓𑀢𑁆𑀯𑀸 𑀯𑀼𑀘𑁆𑀘𑀢𑀺. 𑀦𑀺𑀕𑁆𑀕𑀳𑀻𑀢𑀦𑁆𑀢𑀺 𑀬𑀁 𑀓𑀭𑀡𑀸𑀦𑀺 𑀦𑀺𑀕𑁆𑀕𑀳𑁂𑀢𑁆𑀯𑀸 𑀅𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀅𑀯𑀺𑀯𑀝𑁂𑀦 𑀫𑀼𑀔𑁂𑀦 𑀲𑀸𑀦𑀼𑀦𑀸𑀲𑀺𑀓𑀁 𑀓𑀢𑁆𑀯𑀸 𑀯𑀢𑁆𑀢𑀩𑁆𑀩𑀁. 𑀲𑀫𑁆𑀩𑀦𑁆𑀥𑀦𑁆𑀢𑀺 𑀬𑀁 𑀧𑀭𑀧𑀤𑁂𑀦 𑀲𑀫𑁆𑀩𑀦𑁆𑀥𑀺𑀢𑁆𑀯𑀸 ‘‘𑀢𑀼𑀡𑁆𑀳𑀲𑁆𑀲𑀸’’𑀢𑀺 𑀯𑀼𑀘𑁆𑀘𑀢𑀺. 𑀯𑀯𑀢𑁆𑀣𑀺𑀢𑀦𑁆𑀢𑀺 𑀬𑀁 𑀧𑀭𑀧𑀤𑁂𑀦 𑀅𑀲𑀫𑁆𑀩𑀦𑁆𑀥𑀁 𑀓𑀢𑁆𑀯𑀸 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 ‘‘𑀢𑀼𑀡𑁆𑀳𑀻 𑀅𑀲𑁆𑀲𑀸’’𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀫𑀼𑀢𑁆𑀢𑀦𑁆𑀢𑀺 𑀬𑀁 𑀓𑀭𑀡𑀸𑀦𑀺 𑀅𑀦𑀺𑀕𑁆𑀕𑀳𑁂𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀯𑀺𑀯𑀝𑁂𑀦 𑀫𑀼𑀔𑁂𑀦 𑀲𑀸𑀦𑀼𑀦𑀸𑀲𑀺𑀓𑀁 𑀅𑀓𑀢𑁆𑀯𑀸 𑀯𑀼𑀘𑁆𑀘𑀢𑀺. 𑀤𑀲𑀥𑀸 𑀩𑁆𑀬𑀜𑁆𑀚𑀦𑀩𑀼𑀤𑁆𑀥𑀺𑀬𑀸 𑀧𑀪𑁂𑀤𑁄𑀢𑀺 𑀏𑀯𑀁 𑀲𑀺𑀣𑀺𑀮𑀸𑀤𑀺𑀯𑀲𑁂𑀦 𑀩𑁆𑀬𑀜𑁆𑀚𑀦𑀩𑀼𑀤𑁆𑀥𑀺𑀬𑀸 𑀅𑀓𑁆𑀔𑀭𑀼𑀧𑁆𑀧𑀸𑀤𑀓𑀘𑀺𑀢𑁆𑀢𑀲𑁆𑀲 𑀤𑀲𑀧𑁆𑀧𑀓𑀸𑀭𑁂𑀦 𑀧𑀪𑁂𑀤𑁄. 𑀲𑀩𑁆𑀩𑀸𑀦𑀺 𑀳𑀺 𑀅𑀓𑁆𑀔𑀭𑀸𑀦𑀺 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀺 𑀬𑀣𑀸𑀥𑀺𑀧𑁆𑀧𑁂𑀢𑀢𑁆𑀣𑀩𑁆𑀬𑀜𑁆𑀚𑀦𑀢𑁄 𑀩𑁆𑀬𑀜𑁆𑀚𑀦𑀸𑀦𑀺 𑀘.

‘‘𑀅𑀝𑁆𑀞𑀸𑀦𑀁 𑀔𑁄 𑀏𑀢𑀁, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢𑀸’’𑀢𑀺𑀆𑀤𑀺 𑀧𑀜𑁆𑀘𑀓𑁂 𑀆𑀯𑀺 𑀪𑀯𑀺𑀲𑁆𑀲𑀢𑀺. ‘‘𑀓𑀢𑀺 𑀦𑀼 𑀔𑁄, 𑀆𑀦𑀦𑁆𑀤, 𑀅𑀦𑀼𑀲𑁆𑀲𑀢𑀺𑀝𑁆𑀞𑀸𑀦𑀸𑀦𑀻’’𑀢𑀺𑀆𑀤𑀺 𑀧𑀦 𑀙𑀓𑁆𑀓𑁂 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀙𑀝𑁆𑀞𑀸𑀤𑀻𑀲𑀼 𑀦𑀢𑁆𑀣𑀺 𑀯𑀢𑁆𑀢𑀩𑁆𑀩𑀁.

𑀅𑀬𑁄𑀦𑀺𑀲𑁄𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀩𑀸𑀮𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀭𑀣𑀓𑀸𑀭𑀯𑀕𑁆𑀕𑁄

𑁧. 𑀜𑀸𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧. 𑀤𑀼𑀢𑀺𑀬𑀲𑁆𑀲 𑀧𑀞𑀫𑁂 𑀜𑀸𑀢𑁄𑀬𑁂𑀯 𑀧𑀜𑁆𑀜𑀸𑀢𑁄𑀢𑀺 𑀆𑀳 ‘‘𑀜𑀸𑀢𑁄 𑀧𑀜𑁆𑀜𑀸𑀢𑁄’’𑀢𑀺. 𑀓𑀲𑁆𑀲 𑀅𑀦𑀦𑀼𑀮𑁄𑀫𑀺𑀓𑁂𑀢𑀺 𑀆𑀳 ‘‘𑀲𑀸𑀲𑀦𑀲𑁆𑀲𑀸’’𑀢𑀺, 𑀲𑀸𑀲𑀦𑀲𑁆𑀲 𑀅𑀦𑀦𑀼𑀮𑁄𑀫𑀺𑀓𑁂 𑀅𑀧𑁆𑀧𑀢𑀺𑀭𑀽𑀧𑁂𑀢𑀺 𑀅𑀢𑁆𑀣𑁄. 𑀇𑀤𑀸𑀦𑀺 𑀅𑀦𑀦𑀼𑀮𑁄𑀫𑀺𑀓𑀲𑀤𑁆𑀤𑀲𑁆𑀲 𑀦𑀺𑀩𑁆𑀩𑀘𑀦𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀦 𑀅𑀦𑀼𑀮𑁄𑀫𑁂𑀢𑀻𑀢𑀺 𑀅𑀦𑀦𑀼𑀮𑁄𑀫𑀺𑀓’’𑀦𑁆𑀢𑀺 𑀆𑀳. 𑀲𑀸𑀲𑀦𑀲𑁆𑀲𑀸𑀢𑀺 𑀯𑀸 𑀲𑀸𑀲𑀦𑀦𑁆𑀢𑀺 𑀅𑀢𑁆𑀣𑁄. 𑀲𑀸𑀲𑀦𑀁 𑀦 𑀅𑀦𑀼𑀮𑁄𑀫𑁂𑀢𑀻𑀢𑀺 𑀅𑀦𑀦𑀼𑀮𑁄𑀫𑀺𑀓𑀦𑁆𑀢𑀺 𑀏𑀯𑀫𑁂𑀢𑁆𑀣 𑀲𑀫𑁆𑀩𑀦𑁆𑀥𑁄 𑀤𑀝𑁆𑀞𑀩𑁆𑀩𑁄. 𑀲𑀪𑀸𑀕𑀯𑀺𑀲𑀪𑀸𑀕𑀦𑁆𑀢𑀺 𑀮𑀺𑀗𑁆𑀕𑀢𑁄 𑀲𑀪𑀸𑀕𑀯𑀺𑀲𑀪𑀸𑀕𑀁. ‘‘𑀯𑀺𑀬𑀧𑀼𑀕𑁆𑀕𑀮𑁂’’𑀢𑀺 𑀆𑀳𑀸𑀢𑀺 𑀮𑀺𑀗𑁆𑀕𑀲𑀪𑀸𑀕𑁂𑀳𑀺 𑀅𑀯𑀺𑀲𑁂𑀲𑁂𑀢𑁆𑀯𑀸 𑀆𑀳. 𑀉𑀫𑁆𑀫𑀸𑀤𑀁 𑀧𑀸𑀧𑀼𑀡𑀻𑀢𑀺 𑀲𑁄 𑀓𑀺𑀭 𑀲𑀻𑀮𑀁 𑀅𑀥𑀺𑀝𑁆𑀞𑀸𑀬 𑀧𑀺𑀳𑀺𑀢𑀤𑁆𑀯𑀸𑀭𑀕𑀩𑁆𑀪𑁂 𑀲𑀬𑀦𑀧𑀺𑀝𑁆𑀞𑁂 𑀦𑀺𑀲𑀻𑀤𑀺𑀢𑁆𑀯𑀸 𑀪𑀭𑀺𑀬𑀁 𑀆𑀭𑀩𑁆𑀪 𑀫𑁂𑀢𑁆𑀢𑀁 𑀪𑀸𑀯𑁂𑀦𑁆𑀢𑁄 𑀫𑁂𑀢𑁆𑀢𑀸𑀫𑀼𑀔𑁂𑀦 𑀉𑀧𑁆𑀧𑀦𑁆𑀦𑁂𑀦 𑀭𑀸𑀕𑁂𑀦 𑀅𑀦𑁆𑀥𑀻𑀓𑀢𑁄 𑀪𑀭𑀺𑀬𑀸𑀬 𑀲𑀦𑁆𑀢𑀺𑀓𑀁 𑀕𑀦𑁆𑀢𑀼𑀓𑀸𑀫𑁄 𑀤𑁆𑀯𑀸𑀭𑀁 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀪𑀺𑀢𑁆𑀢𑀺𑀁 𑀪𑀺𑀦𑁆𑀤𑀺𑀢𑁆𑀯𑀸𑀧𑀺 𑀦𑀺𑀓𑁆𑀔𑀫𑀺𑀢𑀼𑀓𑀸𑀫𑀢𑀸𑀬 𑀪𑀺𑀢𑁆𑀢𑀺𑀁 𑀧𑀳𑀭𑀦𑁆𑀢𑁄 𑀲𑀩𑁆𑀩𑀭𑀢𑁆𑀢𑀺𑀁 𑀪𑀺𑀢𑁆𑀢𑀺𑀬𑀼𑀤𑁆𑀥𑀫𑀓𑀸𑀲𑀺. 𑀲𑁂𑀲𑀫𑁂𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀜𑀸𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑀸𑀭𑀡𑀻𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨. 𑀤𑀼𑀢𑀺𑀬𑁂 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀫𑁆𑀧𑀺 𑀧𑀩𑁆𑀩𑀚𑁆𑀚𑀸𑀦𑀺𑀲𑁆𑀲𑀺𑀢𑀫𑁂𑀯𑀸𑀢𑀺 𑀇𑀫𑀺𑀦𑀸 𑀧𑀩𑁆𑀩𑀚𑁆𑀚𑀽𑀧𑀕𑀢𑀲𑀫𑀦𑀦𑁆𑀢𑀭𑀫𑁂𑀯 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀫𑁆𑀧𑀺 𑀲𑀫𑀸𑀤𑀺𑀦𑁆𑀦𑀫𑁂𑀯 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀫𑀕𑁆𑀕𑀲𑀦𑁆𑀦𑀺𑀲𑁆𑀲𑀺𑀢𑀸𑀦𑁂𑀯 𑀳𑁄𑀦𑁆𑀢𑀻𑀢𑀺 𑀫𑀕𑁆𑀕𑀸𑀥𑀺𑀕𑀫𑀢𑁆𑀣𑀸𑀬 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀢𑁆𑀢𑀸 𑀓𑀲𑀺𑀡𑀧𑀭𑀺𑀓𑀫𑁆𑀫𑀸𑀤𑀻𑀦𑀺 𑀫𑀕𑁆𑀕𑀲𑀦𑁆𑀦𑀺𑀲𑁆𑀲𑀺𑀢𑀸𑀦𑁂𑀯 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀫𑀕𑁆𑀕𑀕𑁆𑀕𑀳𑀡𑁂𑀦𑁂𑀯 𑀢𑁂𑀲𑀫𑁆𑀧𑀺 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁, 𑀢𑁂𑀳𑀺 𑀯𑀺𑀦𑀸 𑀫𑀕𑁆𑀕𑀸𑀥𑀺𑀕𑀫𑀲𑁆𑀲 𑀅𑀲𑀫𑁆𑀪𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀕𑁆𑀕𑀫𑀕𑁆𑀕𑀸𑀥𑀺𑀕𑀫𑁂𑀦 𑀅𑀲𑀫𑁆𑀫𑁄𑀳𑀧𑁆𑀧𑀝𑀺𑀯𑁂𑀥𑀲𑁆𑀲 𑀲𑀺𑀔𑀸𑀧𑀢𑁆𑀢𑀢𑁆𑀢𑀸 𑀫𑀕𑁆𑀕𑀥𑀫𑁆𑀫𑁂𑀲𑀼 𑀯𑀺𑀬 𑀨𑀮𑀥𑀫𑁆𑀫𑁂𑀲𑀼𑀧𑀺 𑀲𑀸𑀢𑀺𑀲𑀬𑁄 𑀅𑀲𑀫𑁆𑀫𑁄𑀳𑁄𑀢𑀺 ‘‘𑀲𑀬𑀁 𑀅𑀪𑀺𑀜𑁆𑀜𑀸’’𑀢𑀺 𑀯𑀼𑀢𑁆𑀢𑀁, 𑀲𑀸𑀫𑀁 𑀚𑀸𑀦𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑀣𑀸 𑀚𑀸𑀦𑀦𑀸 𑀧𑀦𑀲𑁆𑀲 𑀲𑀘𑁆𑀙𑀺𑀓𑀭𑀡𑀁 𑀅𑀢𑁆𑀢𑀧𑀘𑁆𑀘𑀓𑁆𑀔𑀓𑀺𑀭𑀺𑀬𑀸𑀢𑀺 ‘‘𑀲𑀘𑁆𑀙𑀺𑀓𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀅𑀢𑁆𑀢𑀦𑀸𑀯 𑀅𑀪𑀺𑀯𑀺𑀲𑀺𑀝𑁆𑀞𑀸𑀬 𑀧𑀜𑁆𑀜𑀸𑀬 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸’’𑀢𑀺. 𑀢𑀣𑀸 𑀲𑀘𑁆𑀙𑀺𑀓𑀺𑀭𑀺𑀬𑀸 𑀘𑀲𑁆𑀲 𑀅𑀢𑁆𑀢𑀦𑀺 𑀧𑀝𑀺𑀮𑀸𑀪𑁄𑀢𑀺 ‘‘𑀉𑀧𑀲𑀫𑁆𑀧𑀚𑁆𑀚𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀧𑀝𑀺𑀮𑀪𑀺𑀢𑁆𑀯𑀸’’𑀢𑀺.

𑀲𑀸𑀭𑀡𑀻𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀆𑀲𑀁𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩. 𑀢𑀢𑀺𑀬𑁂 𑀲𑀦𑁆𑀢𑁄𑀢𑀺 𑀏𑀢𑁆𑀣 𑀲𑀦𑁆𑀢-𑀲𑀤𑁆𑀤𑁄 ‘‘𑀤𑀻𑀖𑀁 𑀲𑀦𑁆𑀢𑀲𑁆𑀲 𑀬𑁄𑀚𑀦’’𑀦𑁆𑀢𑀺𑀆𑀤𑀻𑀲𑀼 (𑀥. 𑀧. 𑁬𑁦) 𑀓𑀺𑀮𑀦𑁆𑀢𑀪𑀸𑀯𑁂 𑀆𑀕𑀢𑁄. ‘‘𑀅𑀬𑀜𑁆𑀘 𑀯𑀺𑀢𑀓𑁆𑀓𑁄, 𑀅𑀬𑀜𑁆𑀘 𑀯𑀺𑀘𑀸𑀭𑁄 𑀲𑀦𑁆𑀢𑁄 𑀳𑁄𑀦𑁆𑀢𑀺 𑀲𑀫𑀺𑀢𑀸’’𑀢𑀺𑀆𑀤𑀻𑀲𑀼 (𑀯𑀺𑀪. 𑁫𑁭𑁬) 𑀦𑀺𑀭𑀼𑀤𑁆𑀥𑀪𑀸𑀯𑁂. ‘‘𑀅𑀥𑀺𑀕𑀢𑁄 𑀔𑁄 𑀫𑁆𑀬𑀸𑀬𑀁 𑀥𑀫𑁆𑀫𑁄, 𑀕𑀫𑁆𑀪𑀻𑀭𑁄 𑀤𑀼𑀤𑁆𑀤𑀲𑁄 𑀤𑀼𑀭𑀦𑀼𑀩𑁄𑀥𑁄 𑀲𑀦𑁆𑀢𑁄 𑀧𑀡𑀻𑀢𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁬𑁭; 𑀫. 𑀦𑀺. 𑁧.𑁨𑁮𑁧; 𑀲𑀁. 𑀦𑀺. 𑁧.𑁧𑁭𑁨; 𑀫𑀳𑀸𑀯. 𑁭-𑁮) 𑀲𑀦𑁆𑀢𑀜𑀸𑀡𑀕𑁄𑀘𑀭𑀢𑀸𑀬𑀁. ‘‘𑀉𑀧𑀲𑀦𑁆𑀢𑀲𑁆𑀲 𑀲𑀤𑀸 𑀲𑀢𑀺𑀫𑀢𑁄’’𑀢𑀺𑀆𑀤𑀻𑀲𑀼 (𑀉𑀤𑀸. 𑁨𑁭) 𑀓𑀺𑀮𑁂𑀲𑀯𑀽𑀧𑀲𑀫𑁂. ‘‘𑀲𑀦𑁆𑀢𑁄 𑀳𑀯𑁂 𑀲𑀩𑁆𑀪𑀺 𑀧𑀯𑁂𑀤𑀬𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀥. 𑀧. 𑁧𑁫𑁧) 𑀲𑀸𑀥𑀽𑀲𑀼. ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀫𑀳𑀸𑀘𑁄𑀭𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸’’𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁧𑁯𑁫) 𑀅𑀢𑁆𑀣𑀺𑀪𑀸𑀯𑁂. 𑀇𑀥𑀸𑀧𑀺 𑀅𑀢𑁆𑀣𑀺𑀪𑀸𑀯𑁂𑀬𑁂𑀯𑀸𑀢𑀺 𑀆𑀳 ‘‘𑀲𑀦𑁆𑀢𑁄𑀢𑀺 𑀅𑀢𑁆𑀣𑀺 𑀉𑀧𑀮𑀩𑁆𑀪𑀦𑁆𑀢𑀻’’𑀢𑀺. 𑀢𑀢𑁆𑀣 𑀅𑀢𑁆𑀣𑀻𑀢𑀺 𑀮𑁄𑀓𑀲𑀗𑁆𑀓𑁂𑀢𑀯𑀲𑁂𑀦 𑀲𑀁𑀯𑀺𑀚𑁆𑀚𑀦𑁆𑀢𑀺. 𑀅𑀢𑁆𑀣𑀺𑀪𑀸𑀯𑁄 𑀳𑁂𑀢𑁆𑀣 𑀧𑀼𑀕𑁆𑀕𑀮𑀲𑀫𑁆𑀩𑀦𑁆𑀥𑁂𑀦 𑀯𑀼𑀢𑁆𑀢𑀢𑁆𑀢𑀸 𑀮𑁄𑀓𑀲𑀫𑀜𑁆𑀜𑀸𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄, 𑀦 𑀧𑀭𑀫𑀢𑁆𑀣𑀯𑀲𑁂𑀦. 𑀅𑀢𑁆𑀣𑀻𑀢𑀺 𑀘𑁂𑀢𑀁 𑀦𑀺𑀧𑀸𑀢𑀧𑀤𑀁 𑀤𑀝𑁆𑀞𑀩𑁆𑀩𑀁 ‘‘𑀅𑀢𑁆𑀣𑀺 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀓𑁂𑀲𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁧𑁧𑁦) 𑀯𑀺𑀬.

𑀲𑀁𑀯𑀺𑀚𑁆𑀚𑀫𑀸𑀦𑀸𑀢𑀺 𑀉𑀧𑀮𑀩𑁆𑀪𑀫𑀸𑀦𑀸. 𑀬𑀜𑁆𑀳𑀺 𑀲𑀁𑀯𑀺𑀚𑁆𑀚𑀢𑀺, 𑀢𑀁 𑀉𑀧𑀮𑀩𑁆𑀪𑀢𑀺. 𑀢𑁂𑀦𑀸𑀳 ‘‘𑀲𑀁𑀯𑀺𑀚𑁆𑀚𑀫𑀸𑀦𑀸𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦’’𑀦𑁆𑀢𑀺. 𑀅𑀦𑀸𑀲𑁄𑀢𑀺 𑀧𑀢𑁆𑀣𑀦𑀸𑀭𑀳𑀺𑀢𑁄. 𑀢𑁂𑀦𑀸𑀳 ‘‘𑀅𑀧𑀢𑁆𑀣𑀦𑁄’’𑀢𑀺. 𑀆𑀲𑀁𑀲𑀢𑀺 𑀧𑀢𑁆𑀣𑁂𑀢𑀻𑀢𑀺 𑀆𑀲𑀁𑀲𑁄. 𑀯𑁂𑀡𑀼𑀯𑁂𑀢𑁆𑀢𑀸𑀤𑀺𑀯𑀺𑀮𑀻𑀯𑁂𑀳𑀺 𑀲𑀼𑀧𑁆𑀧𑀸𑀤𑀺𑀪𑀸𑀚𑀦𑀓𑀸𑀭𑀓𑀸 𑀯𑀺𑀮𑀻𑀯𑀓𑀸𑀭𑀓𑀸. 𑀫𑀺𑀕𑀫𑀘𑁆𑀙𑀸𑀤𑀻𑀦𑀁 𑀦𑀺𑀲𑀸𑀤𑀦𑀢𑁄 𑀦𑁂𑀲𑀸𑀤𑀸, 𑀫𑀸𑀕𑀯𑀺𑀓𑀫𑀘𑁆𑀙𑀩𑀦𑁆𑀥𑀸𑀤𑀬𑁄. 𑀭𑀣𑁂𑀲𑀼 𑀘𑀫𑁆𑀫𑁂𑀦 𑀦𑀳𑀦𑀓𑀭𑀡𑀢𑁄 𑀭𑀣𑀓𑀸𑀭𑀸, 𑀥𑀫𑁆𑀫𑀓𑀸𑀭𑀸. 𑀧𑀼𑀇𑀢𑀺 𑀓𑀭𑀻𑀲𑀲𑁆𑀲 𑀦𑀸𑀫𑀁, 𑀢𑀁 𑀓𑀼𑀲𑁂𑀦𑁆𑀢𑀺 𑀅𑀧𑀦𑁂𑀦𑁆𑀢𑀻𑀢𑀺 𑀧𑀼𑀓𑁆𑀓𑀼𑀲𑀸, 𑀧𑀼𑀧𑁆𑀨𑀘𑁆𑀙𑀟𑁆𑀟𑀓𑀸.

𑀤𑀼𑀩𑁆𑀩𑀡𑁆𑀡𑁄𑀢𑀺 𑀯𑀺𑀭𑀽𑀧𑁄. 𑀑𑀓𑁄𑀝𑀺𑀫𑀓𑁄𑀢𑀺 𑀆𑀭𑁄𑀳𑀸𑀪𑀸𑀯𑁂𑀦 𑀳𑁂𑀝𑁆𑀞𑀺𑀫𑀓𑁄, 𑀭𑀲𑁆𑀲𑀓𑀸𑀬𑁄𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀮𑀓𑀼𑀡𑁆𑀟𑀓𑁄’’𑀢𑀺. 𑀮𑀓𑀼 𑀯𑀺𑀬 𑀖𑀝𑀺𑀓𑀸 𑀯𑀺𑀬 𑀟𑁂𑀢𑀺 𑀧𑀯𑀢𑁆𑀢𑀢𑀻𑀢𑀺 𑀳𑀺 𑀮𑀓𑀼𑀡𑁆𑀟𑀓𑁄, 𑀭𑀲𑁆𑀲𑁄. 𑀓𑀡𑀢𑀺 𑀦𑀺𑀫𑀻𑀮𑀢𑀻𑀢𑀺 𑀓𑀸𑀡𑁄. 𑀢𑀁 𑀧𑀦𑀲𑁆𑀲 𑀦𑀺𑀫𑀻𑀮𑀦𑀁 𑀏𑀓𑁂𑀦 𑀅𑀓𑁆𑀔𑀺𑀦𑀸 𑀤𑁆𑀯𑀻𑀳𑀺𑀧𑀺 𑀘𑀸𑀢𑀺 𑀆𑀳 ‘‘𑀏𑀓𑀓𑁆𑀔𑀺𑀓𑀸𑀡𑁄 𑀯𑀸 𑀉𑀪𑀬𑀓𑁆𑀔𑀺𑀓𑀸𑀡𑁄 𑀯𑀸’’𑀢𑀺. 𑀓𑀼𑀡𑀦𑀁 𑀓𑀼𑀡𑁄, 𑀳𑀢𑁆𑀣𑀯𑁂𑀓𑀮𑁆𑀮𑀁. 𑀢𑀁 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀓𑀼𑀡𑀻. 𑀔𑀜𑁆𑀚𑁄 𑀯𑀼𑀘𑁆𑀘𑀢𑀺 𑀧𑀸𑀤𑀯𑀺𑀓𑀮𑁄. 𑀳𑁂𑀝𑁆𑀞𑀺𑀫𑀓𑀸𑀬𑀲𑀗𑁆𑀔𑀸𑀢𑁄 𑀲𑀭𑀻𑀭𑀲𑁆𑀲 𑀧𑀓𑁆𑀔𑁄 𑀧𑀤𑁂𑀲𑁄 𑀳𑀢𑁄 𑀅𑀲𑁆𑀲𑀸𑀢𑀺 𑀧𑀓𑁆𑀔𑀳𑀢𑁄. 𑀢𑁂𑀦𑀸𑀳 ‘‘𑀧𑀻𑀞𑀲𑀧𑁆𑀧𑀻’’𑀢𑀺. 𑀧𑀤𑀻𑀧𑁂 𑀧𑀤𑀻𑀧𑀦𑁂 𑀏𑀢𑀩𑁆𑀩𑀁 𑀦𑁂𑀢𑀩𑁆𑀩𑀦𑁆𑀢𑀺 𑀧𑀤𑀻𑀧𑁂𑀬𑁆𑀬𑀁, 𑀢𑁂𑀮𑀸𑀤𑀺𑀉𑀧𑀓𑀭𑀡𑀁.

𑀆𑀲𑀁 𑀦 𑀓𑀭𑁄𑀢𑀻𑀢𑀺 𑀭𑀚𑁆𑀚𑀸𑀪𑀺𑀲𑁂𑀓𑁂 𑀓𑀦𑀺𑀝𑁆𑀞𑁄 𑀧𑀢𑁆𑀣𑀦𑀁 𑀦 𑀓𑀭𑁄𑀢𑀺 𑀚𑁂𑀝𑁆𑀞𑁂 𑀲𑀢𑀺 𑀓𑀦𑀺𑀝𑁆𑀞𑀲𑁆𑀲 𑀅𑀦𑀥𑀺𑀓𑀸𑀭𑀢𑁆𑀢𑀸. 𑀅𑀪𑀺𑀲𑁂𑀓𑀁 𑀅𑀭𑀳𑀢𑀻𑀢𑀺 𑀅𑀪𑀺𑀲𑁂𑀓𑀸𑀭𑀳𑁄, 𑀦 𑀅𑀪𑀺𑀲𑁂𑀓𑀸𑀭𑀳𑁄 𑀓𑀸𑀡𑀓𑀼𑀡𑀺𑀆𑀤𑀺𑀤𑁄𑀲𑀲𑀫𑀦𑁆𑀦𑀸𑀕𑀢𑁄.

𑀲𑀻𑀮𑀲𑁆𑀲 𑀤𑀼𑀝𑁆𑀞𑀼 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀅𑀪𑀸𑀯𑀢𑁆𑀣𑁄 𑀇𑀥 𑀤𑀼-𑀲𑀤𑁆𑀤𑁄𑀢𑀺 𑀆𑀳 ‘‘𑀦𑀺𑀲𑁆𑀲𑀻𑀮𑁄’’𑀢𑀺. ‘‘𑀧𑀸𑀧𑀁 𑀧𑀸𑀧𑁂𑀦 𑀲𑀼𑀓𑀭’’𑀦𑁆𑀢𑀺𑀆𑀤𑀻𑀲𑀼 (𑀉𑀤𑀸. 𑁪𑁮; 𑀘𑀽𑀴𑀯. 𑁩𑁪𑁩) 𑀯𑀺𑀬 𑀧𑀸𑀧-𑀲𑀤𑁆𑀤𑁄 𑀦𑀺𑀳𑀻𑀦𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀮𑀸𑀫𑀓𑀥𑀫𑁆𑀫𑁄’’𑀢𑀺. 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀯𑀸 𑀤𑀼𑀲𑁆𑀲𑀻𑀮𑁄. 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀸 𑀧𑀸𑀧𑀥𑀫𑁆𑀫𑁄. 𑀓𑀸𑀬𑀯𑀸𑀘𑀸𑀲𑀁𑀯𑀭𑀪𑁂𑀤𑁂𑀦 𑀯𑀸 𑀤𑀼𑀲𑁆𑀲𑀻𑀮𑁄, 𑀫𑀦𑁄𑀲𑀁𑀯𑀭𑀪𑁂𑀤𑁂𑀦, 𑀲𑀢𑀺𑀲𑀁𑀯𑀭𑀸𑀤𑀺𑀪𑁂𑀤𑁂𑀦 𑀯𑀸 𑀧𑀸𑀧𑀥𑀫𑁆𑀫𑁄. 𑀅𑀲𑀼𑀤𑁆𑀥𑀧𑁆𑀧𑀬𑁄𑀕𑀢𑀸𑀬 𑀤𑀼𑀲𑁆𑀲𑀻𑀮𑁄, 𑀅𑀲𑀼𑀤𑁆𑀥𑀸𑀲𑀬𑀢𑀸𑀬 𑀧𑀸𑀧𑀥𑀫𑁆𑀫𑁄. 𑀓𑀼𑀲𑀮𑀲𑀻𑀮𑀯𑀺𑀭𑀳𑁂𑀦 𑀤𑀼𑀲𑁆𑀲𑀻𑀮𑁄, 𑀅𑀓𑀼𑀲𑀮𑀲𑀻𑀮𑀲𑀫𑀦𑁆𑀦𑀸𑀕𑀫𑁂𑀦 𑀧𑀸𑀧𑀥𑀫𑁆𑀫𑁄. 𑀅𑀲𑀼𑀘𑀻𑀳𑀻𑀢𑀺 𑀅𑀧𑀭𑀺𑀲𑀼𑀤𑁆𑀥𑁂𑀳𑀺. 𑀲𑀗𑁆𑀓𑀸𑀳𑀺 𑀲𑀭𑀺𑀢𑀩𑁆𑀩𑀲𑀫𑀸𑀘𑀸𑀭𑁄𑀢𑀺 ‘‘𑀇𑀫𑀲𑁆𑀲 𑀫𑀜𑁆𑀜𑁂 𑀇𑀤𑀁 𑀓𑀫𑁆𑀫’’𑀦𑁆𑀢𑀺 𑀏𑀯𑀁 𑀧𑀭𑁂𑀳𑀺 𑀲𑀗𑁆𑀓𑀸𑀬 𑀲𑀭𑀺𑀢𑀩𑁆𑀩𑀲𑀫𑀸𑀘𑀸𑀭𑁄. 𑀢𑁂𑀦𑀸𑀳 ‘‘𑀓𑀺𑀜𑁆𑀘𑀺𑀤𑁂𑀯𑀸’’𑀢𑀺𑀆𑀤𑀺. 𑀅𑀢𑁆𑀢𑀦𑀸𑀬𑁂𑀯 𑀯𑀸 𑀲𑀗𑁆𑀓𑀸𑀳𑀺 𑀲𑀭𑀺𑀢𑀩𑁆𑀩𑀲𑀫𑀸𑀘𑀸𑀭𑁄𑀢𑀺 𑀏𑀢𑁂𑀦𑀧𑀺 𑀓𑀫𑁆𑀫𑀲𑀸𑀥𑀦𑀢𑀁𑀬𑁂𑀯 𑀲𑀗𑁆𑀓𑀲𑁆𑀲𑀭𑀲𑀤𑁆𑀤𑀲𑁆𑀲 𑀤𑀲𑁆𑀲𑁂𑀢𑀺. 𑀅𑀢𑁆𑀢𑀦𑁄 𑀲𑀗𑁆𑀓𑀸𑀬 𑀧𑀭𑁂𑀲𑀁 𑀲𑀫𑀸𑀘𑀸𑀭𑀓𑀺𑀭𑀺𑀬𑀁 𑀲𑀭𑀢𑀺 𑀆𑀲𑀗𑁆𑀓𑀢𑀺 𑀯𑀺𑀥𑀸𑀯𑀢𑀻𑀢𑀺𑀧𑀺 𑀲𑀗𑁆𑀓𑀲𑁆𑀲𑀭𑀲𑀫𑀸𑀘𑀸𑀭𑁄𑀢𑀺 𑀏𑀯𑀫𑁂𑀢𑁆𑀣 𑀓𑀢𑁆𑀢𑀼𑀲𑀸𑀥𑀦𑀢𑀸𑀧𑀺 𑀤𑀝𑁆𑀞𑀩𑁆𑀩𑀸. 𑀢𑀲𑁆𑀲 𑀳𑀺 𑀤𑁆𑀯𑁂 𑀢𑀬𑁄 𑀚𑀦𑁂 𑀓𑀣𑁂𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀫𑀫 𑀤𑁄𑀲𑀁 𑀫𑀜𑁆𑀜𑁂 𑀓𑀣𑁂𑀦𑁆𑀢𑀻’’𑀢𑀺 𑀢𑁂𑀲𑀁 𑀲𑀫𑀸𑀘𑀸𑀭𑀁 𑀲𑀗𑁆𑀓𑀸𑀬 𑀲𑀭𑀢𑀺 𑀥𑀸𑀯𑀢𑀺.

𑀏𑀯𑀁𑀧𑀝𑀺𑀜𑁆𑀜𑁄𑀢𑀺 𑀲𑀮𑀸𑀓𑀕𑁆𑀕𑀳𑀡𑀸𑀤𑀻𑀲𑀼 ‘‘𑀓𑀺𑀢𑁆𑀢𑀓𑀸 𑀯𑀺𑀳𑀸𑀭𑁂 𑀲𑀫𑀡𑀸’’𑀢𑀺 𑀕𑀡𑀦𑀸𑀬 𑀆𑀭𑀤𑁆𑀥𑀸𑀬 ‘‘𑀅𑀳𑀫𑁆𑀧𑀺 𑀲𑀫𑀡𑁄, 𑀅𑀳𑀫𑁆𑀧𑀺 𑀲𑀫𑀡𑁄’’𑀢𑀺 𑀧𑀝𑀺𑀜𑁆𑀜𑀁 𑀤𑀢𑁆𑀯𑀸 𑀲𑀮𑀸𑀓𑀕𑁆𑀕𑀳𑀡𑀸𑀤𑀻𑀦𑀺 𑀓𑀭𑁄𑀢𑀻𑀢𑀺 𑀲𑀫𑀡𑁄 𑀅𑀳𑀦𑁆𑀢𑀺 𑀏𑀯𑀁𑀲𑀫𑀡𑀧𑁆𑀧𑀝𑀺𑀜𑁆𑀜𑁄. 𑀲𑀼𑀫𑁆𑀪𑀓𑀧𑀢𑁆𑀢𑀥𑀭𑁂𑀢𑀺 𑀫𑀢𑁆𑀢𑀺𑀓𑀸𑀧𑀢𑁆𑀢𑀥𑀭𑁂. 𑀧𑀽𑀢𑀺𑀦𑀸 𑀓𑀫𑁆𑀫𑁂𑀦𑀸𑀢𑀺 𑀲𑀁𑀓𑀺𑀮𑀺𑀝𑁆𑀞𑀓𑀫𑁆𑀫𑁂𑀦, 𑀦𑀺𑀕𑁆𑀕𑀼𑀡𑀢𑀸𑀬 𑀯𑀸 𑀕𑀼𑀡𑀲𑀸𑀭𑀯𑀺𑀭𑀳𑀺𑀢𑀢𑁆𑀢𑀸 𑀅𑀦𑁆𑀢𑁄𑀧𑀽𑀢𑀺. 𑀓𑀲𑀫𑁆𑀩𑀼𑀓𑀘𑀯𑀭𑁄 𑀚𑀸𑀢𑁄 𑀲𑀜𑁆𑀚𑀸𑀢𑁄 𑀅𑀲𑁆𑀲𑀸𑀢𑀺 𑀓𑀲𑀫𑁆𑀩𑀼𑀚𑀸𑀢𑁄𑀢𑀺 𑀆𑀳 ‘‘𑀲𑀜𑁆𑀚𑀸𑀢𑀭𑀸𑀕𑀸𑀤𑀺𑀓𑀘𑀯𑀭𑁄’’𑀢𑀺. 𑀅𑀣 𑀯𑀸 𑀓𑀲𑀫𑁆𑀩𑀼 𑀯𑀼𑀘𑁆𑀘𑀢𑀺 𑀢𑀺𑀦𑁆𑀢𑀓𑀼𑀡𑀧𑀓𑀲𑀝𑀁 𑀉𑀤𑀓𑀁, 𑀇𑀫𑀲𑁆𑀫𑀺𑀜𑁆𑀘 𑀲𑀸𑀲𑀦𑁂 𑀤𑀼𑀲𑁆𑀲𑀻𑀮𑁄 𑀦𑀸𑀫 𑀚𑀺𑀕𑀼𑀘𑁆𑀙𑀦𑀻𑀬𑀢𑁆𑀢𑀸 𑀢𑀺𑀦𑁆𑀢𑀓𑀼𑀡𑀧𑀉𑀤𑀓𑀲𑀤𑀺𑀲𑁄, 𑀢𑀲𑁆𑀫𑀸 𑀓𑀲𑀫𑁆𑀩𑀼 𑀯𑀺𑀬 𑀚𑀸𑀢𑁄𑀢𑀺 𑀓𑀲𑀫𑁆𑀩𑀼𑀚𑀸𑀢𑁄. 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀉𑀧𑀦𑀺𑀲𑁆𑀲𑀬𑀲𑁆𑀲 𑀦𑀢𑁆𑀣𑀺𑀢𑀸𑀬𑀸𑀢𑀺 𑀬𑀢𑁆𑀣 𑀧𑀢𑀺𑀝𑁆𑀞𑀺𑀢𑁂𑀦 𑀲𑀓𑁆𑀓𑀸 𑀪𑀯𑁂𑀬𑁆𑀬 𑀅𑀭𑀳𑀢𑁆𑀢𑀁 𑀮𑀤𑁆𑀥𑀼𑀁, 𑀢𑀲𑁆𑀲𑀸 𑀧𑀢𑀺𑀝𑁆𑀞𑀸𑀬 𑀪𑀺𑀦𑁆𑀦𑀢𑁆𑀢𑀸 𑀯𑀼𑀢𑁆𑀢𑀁. 𑀫𑀳𑀸𑀲𑀻𑀮𑀲𑁆𑀫𑀺𑀁 𑀧𑀭𑀺𑀧𑀽𑀭𑀓𑀸𑀭𑀺𑀢𑀸𑀬𑀸𑀢𑀺 𑀬𑀢𑁆𑀣 𑀧𑀢𑀺𑀝𑁆𑀞𑀺𑀢𑁂𑀦 𑀲𑀓𑁆𑀓𑀸 𑀪𑀯𑁂𑀬𑁆𑀬 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀢𑀼𑀁, 𑀢𑀲𑁆𑀫𑀺𑀁 𑀧𑀭𑀺𑀧𑀽𑀭𑀓𑀸𑀭𑀺𑀢𑀸𑀬.

𑀆𑀲𑀁𑀲𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀘𑀓𑁆𑀓𑀯𑀢𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪. 𑀘𑀢𑀼𑀢𑁆𑀣𑁂 𑀘𑀢𑀽𑀳𑀺 𑀲𑀗𑁆𑀕𑀳𑀯𑀢𑁆𑀣𑀽𑀳𑀻𑀢𑀺 𑀤𑀸𑀦𑀧𑀺𑀬𑀯𑀘𑀦𑀅𑀢𑁆𑀣𑀘𑀭𑀺𑀬𑀸𑀲𑀫𑀸𑀦𑀢𑁆𑀢𑀢𑀸𑀲𑀗𑁆𑀔𑀸𑀢𑁂𑀳𑀺 𑀘𑀢𑀽𑀳𑀺 𑀲𑀗𑁆𑀕𑀳𑀓𑀸𑀭𑀡𑁂𑀳𑀺. 𑀘𑀓𑁆𑀓𑀁 𑀯𑀢𑁆𑀢𑁂𑀢𑀻𑀢𑀺 𑀆𑀡𑀸𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀺. 𑀘𑀓𑁆𑀓𑀦𑁆𑀢𑀺 𑀯𑀸 𑀇𑀥 𑀭𑀢𑀦𑀘𑀓𑁆𑀓𑀁 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀜𑁆𑀳𑀺 𑀘𑀓𑁆𑀓𑀲𑀤𑁆𑀤𑁄 𑀲𑀫𑁆𑀧𑀢𑁆𑀢𑀺𑀬𑀁, 𑀮𑀓𑁆𑀔𑀡𑁂, 𑀭𑀣𑀗𑁆𑀕𑁂, 𑀇𑀭𑀺𑀬𑀸𑀧𑀣𑁂, 𑀤𑀸𑀦𑁂, 𑀭𑀢𑀦𑀥𑀫𑁆𑀫𑀔𑀼𑀭𑀘𑀓𑁆𑀓𑀸𑀤𑀻𑀲𑀼 𑀘 𑀤𑀺𑀲𑁆𑀲𑀢𑀺. ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀘𑀓𑁆𑀓𑀸𑀦𑀺, 𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑀸𑀦𑀁 𑀤𑁂𑀯𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁩𑁧) 𑀳𑀺 𑀲𑀫𑁆𑀧𑀢𑁆𑀢𑀺𑀬𑀁 𑀤𑀺𑀲𑁆𑀲𑀢𑀺. ‘‘𑀧𑀸𑀤𑀢𑀮𑁂𑀲𑀼 𑀘𑀓𑁆𑀓𑀸𑀦𑀺 𑀚𑀸𑀢𑀸𑀦𑀻’’𑀢𑀺 (𑀤𑀻. 𑀦𑀺. 𑁨.𑁩𑁫; 𑁩.𑁨𑁦𑁪) 𑀏𑀢𑁆𑀣 𑀮𑀓𑁆𑀔𑀡𑁂. ‘‘𑀘𑀓𑁆𑀓𑀁𑀯 𑀯𑀳𑀢𑁄 𑀧𑀤’’𑀦𑁆𑀢𑀺 (𑀥. 𑀧. 𑁧) 𑀏𑀢𑁆𑀣 𑀭𑀣𑀗𑁆𑀕𑁂. ‘‘𑀘𑀢𑀼𑀘𑀓𑁆𑀓𑀁 𑀦𑀯𑀤𑁆𑀯𑀸𑀭’’𑀦𑁆𑀢𑀺 (𑀲𑀁. 𑀦𑀺. 𑁧.𑁨𑁯) 𑀏𑀢𑁆𑀣 𑀇𑀭𑀺𑀬𑀸𑀧𑀣𑁂. ‘‘𑀤𑀤𑀁 𑀪𑀼𑀜𑁆𑀚 𑀫𑀸 𑀘 𑀧𑀫𑀸𑀤𑁄, 𑀘𑀓𑁆𑀓𑀁 𑀯𑀢𑁆𑀢𑀬 𑀲𑀩𑁆𑀩𑀧𑀸𑀡𑀺𑀦’’𑀦𑁆𑀢𑀺 (𑀚𑀸. 𑁧.𑁭.𑁧𑁪𑁯) 𑀏𑀢𑁆𑀣 𑀤𑀸𑀦𑁂. ‘‘𑀤𑀺𑀩𑁆𑀩𑀁 𑀘𑀓𑁆𑀓𑀭𑀢𑀦𑀁 𑀧𑀸𑀢𑀼𑀭𑀳𑁄𑀲𑀻’’𑀢𑀺 (𑀤𑀻. 𑀦𑀺. 𑁨.𑁨𑁪𑁩) 𑀏𑀢𑁆𑀣 𑀭𑀢𑀦𑀘𑀓𑁆𑀓𑁂. ‘‘𑀫𑀬𑀸 𑀧𑀯𑀢𑁆𑀢𑀺𑀢𑀁 𑀘𑀓𑁆𑀓’’𑀦𑁆𑀢𑀺 (𑀲𑀼. 𑀦𑀺. 𑁫𑁬𑁨) 𑀏𑀢𑁆𑀣 𑀥𑀫𑁆𑀫𑀘𑀓𑁆𑀓𑁂. ‘‘𑀇𑀘𑁆𑀙𑀸𑀳𑀢𑀲𑁆𑀲 𑀧𑁄𑀲𑀲𑁆𑀲, 𑀘𑀓𑁆𑀓𑀁 𑀪𑀫𑀢𑀺 𑀫𑀢𑁆𑀣𑀓𑁂’’𑀢𑀺 (𑀚𑀸. 𑁧.𑁫.𑁧𑁦𑁩) 𑀏𑀢𑁆𑀣 𑀔𑀼𑀭𑀘𑀓𑁆𑀓𑁂. ‘‘𑀔𑀼𑀭𑀧𑀭𑀺𑀬𑀦𑁆𑀢𑁂𑀦 𑀘𑀓𑁆𑀓𑁂𑀦𑀸’’𑀢𑀺 (𑀤𑀻. 𑀦𑀺. 𑁧.𑁧𑁬𑁬) 𑀏𑀢𑁆𑀣 𑀧𑀳𑀭𑀡𑀘𑀓𑁆𑀓𑁂. ‘‘𑀅𑀲𑀦𑀺𑀯𑀺𑀘𑀓𑁆𑀓’’𑀦𑁆𑀢𑀺 (𑀤𑀻. 𑀦𑀺. 𑁩.𑁬𑁧) 𑀏𑀢𑁆𑀣 𑀅𑀲𑀦𑀺𑀫𑀡𑁆𑀟𑀮𑁂. 𑀇𑀥 𑀧𑀦𑀸𑀬𑀁 𑀭𑀢𑀦𑀘𑀓𑁆𑀓𑁂 𑀤𑀝𑁆𑀞𑀩𑁆𑀩𑁄.

𑀓𑀺𑀢𑁆𑀢𑀸𑀯𑀢𑀸 𑀧𑀦𑀸𑀬𑀁 𑀘𑀓𑁆𑀓𑀯𑀢𑁆𑀢𑀻 𑀦𑀸𑀫 𑀳𑁄𑀢𑀺? 𑀏𑀓𑀗𑁆𑀕𑀼𑀮𑀤𑁆𑀯𑀗𑁆𑀕𑀼𑀮𑀫𑀢𑁆𑀢𑀫𑁆𑀧𑀺 𑀘𑀓𑁆𑀓𑀭𑀢𑀦𑀁 𑀆𑀓𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀧𑀯𑀢𑁆𑀢𑀢𑀺. 𑀲𑀩𑁆𑀩𑀘𑀓𑁆𑀓𑀯𑀢𑁆𑀢𑀻𑀦𑀜𑁆𑀳𑀺 𑀦𑀺𑀲𑀺𑀦𑁆𑀦𑀸𑀲𑀦𑀢𑁄 𑀉𑀝𑁆𑀞𑀳𑀺𑀢𑁆𑀯𑀸 𑀘𑀓𑁆𑀓𑀭𑀢𑀦𑀲𑀫𑀻𑀧𑀁 𑀕𑀦𑁆𑀢𑁆𑀯𑀸 𑀳𑀢𑁆𑀣𑀺𑀲𑁄𑀡𑁆𑀟𑀲𑀤𑀺𑀲𑀧𑀦𑀸𑀴𑀺𑀁 𑀲𑀼𑀯𑀡𑁆𑀡𑀪𑀺𑀗𑁆𑀕𑀸𑀭𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀉𑀤𑀓𑁂𑀦 𑀅𑀩𑁆𑀪𑀼𑀓𑁆𑀓𑀺𑀭𑀺𑀢𑁆𑀯𑀸 ‘‘𑀅𑀪𑀺𑀯𑀺𑀚𑀺𑀦𑀸𑀢𑀼 𑀪𑀯𑀁 𑀘𑀓𑁆𑀓𑀭𑀢𑀦’’𑀦𑁆𑀢𑀺 𑀯𑀘𑀦𑀲𑀫𑀦𑀦𑁆𑀢𑀭𑀫𑁂𑀯 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀘𑀓𑁆𑀓𑀭𑀢𑀦𑀁 𑀧𑀯𑀢𑁆𑀢𑀢𑀻𑀢𑀺. 𑀬𑀲𑁆𑀲 𑀧𑀯𑀢𑁆𑀢𑀺𑀲𑀫𑀓𑀸𑀮𑀫𑁂𑀯, 𑀲𑁄 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀦𑀸𑀫 𑀳𑁄𑀢𑀺.

𑀥𑀫𑁆𑀫𑁄𑀢𑀺 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀥𑀫𑁆𑀫𑁄, 𑀤𑀲𑀯𑀺𑀥𑀁 𑀯𑀸 𑀘𑀓𑁆𑀓𑀯𑀢𑁆𑀢𑀺𑀯𑀢𑁆𑀢𑀁. 𑀤𑀲𑀯𑀺𑀥𑁂 𑀯𑀸 𑀓𑀼𑀲𑀮𑀥𑀫𑁆𑀫𑁂 𑀅𑀕𑀭𑀳𑀺𑀢𑁂 𑀯𑀸 𑀭𑀸𑀚𑀥𑀫𑁆𑀫𑁂 𑀦𑀺𑀬𑀼𑀢𑁆𑀢𑁄𑀢𑀺 𑀥𑀫𑁆𑀫𑀺𑀓𑁄. 𑀢𑁂𑀦 𑀘 𑀥𑀫𑁆𑀫𑁂𑀦 𑀲𑀓𑀮𑀮𑁄𑀓𑀁 𑀭𑀜𑁆𑀚𑁂𑀢𑀻𑀢𑀺 𑀥𑀫𑁆𑀫𑀭𑀸𑀚𑀸. 𑀥𑀫𑁆𑀫𑁂𑀦 𑀯𑀸 𑀮𑀤𑁆𑀥𑀭𑀚𑁆𑀚𑀢𑁆𑀢𑀸 𑀥𑀫𑁆𑀫𑀭𑀸𑀚𑀸. 𑀘𑀓𑁆𑀓𑀯𑀢𑁆𑀢𑀻𑀳𑀺 𑀥𑀫𑁆𑀫𑁂𑀦 𑀜𑀸𑀬𑁂𑀦 𑀭𑀚𑁆𑀚𑀁 𑀅𑀥𑀺𑀕𑀘𑁆𑀙𑀢𑀺, 𑀦 𑀅𑀥𑀫𑁆𑀫𑁂𑀦. 𑀤𑀲𑀯𑀺𑀥𑁂𑀦 𑀘𑀓𑁆𑀓𑀯𑀢𑁆𑀢𑀺𑀯𑀢𑁆𑀢𑁂𑀦𑀸𑀢𑀺 𑀤𑀲𑀧𑁆𑀧𑀪𑁂𑀤𑁂𑀦 𑀘𑀓𑁆𑀓𑀯𑀢𑁆𑀢𑀻𑀦𑀁 𑀯𑀢𑁆𑀢𑁂𑀦.

𑀓𑀺𑀁 𑀧𑀦 𑀢𑀁 𑀤𑀲𑀯𑀺𑀥𑀁 𑀘𑀓𑁆𑀓𑀯𑀢𑁆𑀢𑀺𑀯𑀢𑁆𑀢𑀦𑁆𑀢𑀺? 𑀯𑀼𑀘𑁆𑀘𑀢𑁂 𑁋

‘‘𑀓𑀢𑀫𑀁 𑀧𑀦 𑀢𑀁, 𑀤𑁂𑀯, 𑀅𑀭𑀺𑀬𑀁 𑀘𑀓𑁆𑀓𑀯𑀢𑁆𑀢𑀺𑀯𑀢𑁆𑀢𑀦𑁆𑀢𑀺? 𑀢𑁂𑀦 𑀳𑀺 𑀢𑁆𑀯𑀁, 𑀢𑀸𑀢, 𑀥𑀫𑁆𑀫𑀁𑀬𑁂𑀯 𑀦𑀺𑀲𑁆𑀲𑀸𑀬 𑀥𑀫𑁆𑀫𑀁 𑀲𑀓𑁆𑀓𑀭𑁄𑀦𑁆𑀢𑁄 𑀥𑀫𑁆𑀫𑀁 𑀕𑀭𑀼𑀁 𑀓𑀭𑁄𑀦𑁆𑀢𑁄 𑀥𑀫𑁆𑀫𑀁 𑀫𑀸𑀦𑁂𑀦𑁆𑀢𑁄 𑀥𑀫𑁆𑀫𑀁 𑀧𑀽𑀚𑁂𑀦𑁆𑀢𑁄 𑀥𑀫𑁆𑀫𑀁 𑀅𑀧𑀘𑀸𑀬𑀫𑀸𑀦𑁄 𑀥𑀫𑁆𑀫𑀤𑁆𑀥𑀚𑁄 𑀥𑀫𑁆𑀫𑀓𑁂𑀢𑀼 𑀥𑀫𑁆𑀫𑀸𑀥𑀺𑀧𑀢𑁂𑀬𑁆𑀬𑁄 𑀥𑀫𑁆𑀫𑀺𑀓𑀁 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺𑀁 𑀲𑀁𑀯𑀺𑀤𑀳𑀲𑁆𑀲𑀼 𑀅𑀦𑁆𑀢𑁄𑀚𑀦𑀲𑁆𑀫𑀺𑀁 𑀩𑀮𑀓𑀸𑀬𑀲𑁆𑀫𑀺𑀁 𑀔𑀢𑁆𑀢𑀺𑀬𑁂𑀲𑀼 𑀅𑀦𑀼𑀬𑀦𑁆𑀢𑁂𑀲𑀼 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑁂𑀲𑀼 𑀦𑁂𑀕𑀫𑀚𑀸𑀦𑀧𑀤𑁂𑀲𑀼 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀲𑀼 𑀫𑀺𑀕𑀧𑀓𑁆𑀔𑀻𑀲𑀼. 𑀫𑀸 𑀘 𑀢𑁂, 𑀢𑀸𑀢, 𑀯𑀺𑀚𑀺𑀢𑁂 𑀅𑀥𑀫𑁆𑀫𑀓𑀸𑀭𑁄 𑀧𑀯𑀢𑁆𑀢𑀺𑀢𑁆𑀣. 𑀬𑁂 𑀘 𑀢𑁂, 𑀢𑀸𑀢, 𑀯𑀺𑀚𑀺𑀢𑁂 𑀅𑀥𑀦𑀸 𑀅𑀲𑁆𑀲𑀼, 𑀢𑁂𑀲𑀜𑁆𑀘 𑀥𑀦𑀫𑀦𑀼𑀧𑁆𑀧𑀤𑁂𑀬𑁆𑀬𑀸𑀲𑀺. 𑀬𑁂 𑀘 𑀢𑁂, 𑀢𑀸𑀢, 𑀯𑀺𑀚𑀺𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀫𑀤𑀧𑁆𑀧𑀫𑀸𑀤𑀸 𑀧𑀝𑀺𑀯𑀺𑀭𑀢𑀸 𑀔𑀦𑁆𑀢𑀺𑀲𑁄𑀭𑀘𑁆𑀘𑁂 𑀦𑀺𑀯𑀺𑀝𑁆𑀞𑀸 𑀏𑀓𑀫𑀢𑁆𑀢𑀸𑀦𑀁 𑀤𑀫𑁂𑀦𑁆𑀢𑀺, 𑀏𑀓𑀫𑀢𑁆𑀢𑀸𑀦𑀁 𑀲𑀫𑁂𑀦𑁆𑀢𑀺, 𑀏𑀓𑀫𑀢𑁆𑀢𑀸𑀦𑀁 𑀧𑀭𑀺𑀦𑀺𑀩𑁆𑀩𑀸𑀧𑁂𑀦𑁆𑀢𑀺. 𑀢𑁂 𑀓𑀸𑀮𑁂𑀦 𑀓𑀸𑀮𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀭𑀺𑀧𑀼𑀘𑁆𑀙𑁂𑀬𑁆𑀬𑀸𑀲𑀺 𑀧𑀭𑀺𑀕𑁆𑀕𑀡𑁆𑀳𑁂𑀬𑁆𑀬𑀸𑀲𑀺 𑁋 ‘𑀓𑀺𑀁, 𑀪𑀦𑁆𑀢𑁂, 𑀓𑀼𑀲𑀮𑀁 𑀓𑀺𑀁 𑀅𑀓𑀼𑀲𑀮𑀁, 𑀓𑀺𑀁 𑀲𑀸𑀯𑀚𑁆𑀚𑀁 𑀓𑀺𑀁 𑀅𑀦𑀯𑀚𑁆𑀚𑀁, 𑀓𑀺𑀁 𑀲𑁂𑀯𑀺𑀢𑀩𑁆𑀩𑀁 𑀓𑀺𑀁 𑀦 𑀲𑁂𑀯𑀺𑀢𑀩𑁆𑀩𑀁, 𑀓𑀺𑀁 𑀫𑁂 𑀓𑀭𑀺𑀬𑀫𑀸𑀦𑀁 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀅𑀲𑁆𑀲, 𑀓𑀺𑀁 𑀯𑀸 𑀧𑀦 𑀫𑁂 𑀓𑀭𑀺𑀬𑀫𑀸𑀦𑀁 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀅𑀲𑁆𑀲𑀸’𑀢𑀺. 𑀢𑁂𑀲𑀁 𑀲𑀼𑀢𑁆𑀯𑀸 𑀬𑀁 𑀅𑀓𑀼𑀲𑀮𑀁, 𑀢𑀁 𑀅𑀪𑀺𑀦𑀺𑀯𑀚𑁆𑀚𑁂𑀬𑁆𑀬𑀸𑀲𑀺, 𑀬𑀁 𑀓𑀼𑀲𑀮𑀁, 𑀢𑀁 𑀲𑀫𑀸𑀤𑀸𑀬 𑀯𑀢𑁆𑀢𑁂𑀬𑁆𑀬𑀸𑀲𑀺. 𑀇𑀤𑀁 𑀔𑁄, 𑀢𑀸𑀢, 𑀢𑀁 𑀅𑀭𑀺𑀬𑀁 𑀘𑀓𑁆𑀓𑀯𑀢𑁆𑀢𑀺𑀯𑀢𑁆𑀢’’𑀦𑁆𑀢𑀺 𑁋

𑀏𑀯𑀁 𑀘𑀓𑁆𑀓𑀯𑀢𑁆𑀢𑀺𑀲𑀼𑀢𑁆𑀢𑁂 (𑀤𑀻. 𑀦𑀺. 𑁩.𑁮𑁪) 𑀆𑀕𑀢𑀦𑀬𑁂𑀦 𑀅𑀦𑁆𑀢𑁄𑀚𑀦𑀲𑁆𑀫𑀺𑀁 𑀩𑀮𑀓𑀸𑀬𑁂 𑀏𑀓𑀁, 𑀔𑀢𑁆𑀢𑀺𑀬𑁂𑀲𑀼 𑀏𑀓𑀁, 𑀅𑀦𑀼𑀬𑀦𑁆𑀢𑁂𑀲𑀼 𑀏𑀓𑀁, 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑁂𑀲𑀼 𑀏𑀓𑀁, 𑀦𑁂𑀕𑀫𑀚𑀸𑀦𑀧𑀤𑁂𑀲𑀼 𑀏𑀓𑀁, 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀲𑀼 𑀏𑀓𑀁, 𑀫𑀺𑀕𑀧𑀓𑁆𑀔𑀻𑀲𑀼 𑀏𑀓𑀁, 𑀅𑀥𑀫𑁆𑀫𑀓𑀸𑀭𑀧𑁆𑀧𑀝𑀺𑀓𑁆𑀔𑁂𑀧𑁄 𑀏𑀓𑀁, 𑀅𑀥𑀦𑀸𑀦𑀁 𑀥𑀦𑀸𑀦𑀼𑀧𑁆𑀧𑀤𑀸𑀦𑀁 𑀏𑀓𑀁, 𑀲𑀫𑀡𑀩𑁆𑀭𑀸𑀳𑁆𑀫𑀡𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀳𑀧𑀼𑀘𑁆𑀙𑀦𑀁 𑀏𑀓𑀦𑁆𑀢𑀺 𑀏𑀯𑀫𑁂𑀯𑀁 𑀢𑀁 𑀘𑀓𑁆𑀓𑀯𑀢𑁆𑀢𑀺𑀯𑀢𑁆𑀢𑀁 𑀤𑀲𑀯𑀺𑀥𑀁 𑀳𑁄𑀢𑀺. 𑀕𑀳𑀧𑀢𑀺𑀓𑁂 𑀧𑀦 𑀧𑀓𑁆𑀔𑀺𑀚𑀸𑀢𑁂 𑀘 𑀯𑀺𑀲𑀼𑀁 𑀓𑀢𑁆𑀯𑀸 𑀕𑀡𑁆𑀳𑀦𑁆𑀢𑀲𑁆𑀲 𑀤𑁆𑀯𑀸𑀤𑀲𑀯𑀺𑀥𑀁 𑀳𑁄𑀢𑀺.

𑀅𑀜𑁆𑀜𑀣𑀸 𑀯𑀢𑁆𑀢𑀺𑀢𑀼𑀁 𑀅𑀤𑁂𑀦𑁆𑀢𑁄 𑀲𑁄 𑀥𑀫𑁆𑀫𑁄 𑀅𑀥𑀺𑀝𑁆𑀞𑀸𑀦𑀁 𑀏𑀢𑀲𑁆𑀲𑀸𑀢𑀺 𑀢𑀤𑀥𑀺𑀝𑁆𑀞𑀸𑀦𑀁. 𑀢𑁂𑀦 𑀢𑀤𑀥𑀺𑀝𑁆𑀞𑀸𑀦𑁂𑀦 𑀘𑁂𑀢𑀲𑀸. 𑀲𑀓𑁆𑀓𑀭𑁄𑀦𑁆𑀢𑁄𑀢𑀺 𑀆𑀤𑀭𑀓𑀺𑀭𑀺𑀬𑀸𑀯𑀲𑁂𑀦 𑀓𑀭𑁄𑀦𑁆𑀢𑁄. 𑀢𑁂𑀦𑀸𑀳 ‘‘𑀬𑀣𑀸’’𑀢𑀺𑀆𑀤𑀺. 𑀕𑀭𑀼𑀁 𑀓𑀭𑁄𑀦𑁆𑀢𑁄𑀢𑀺 𑀧𑀸𑀲𑀸𑀡𑀘𑁆𑀙𑀢𑁆𑀢𑀁 𑀯𑀺𑀬 𑀕𑀭𑀼𑀓𑀭𑀡𑀯𑀲𑁂𑀦 𑀕𑀭𑀼𑀁 𑀓𑀭𑁄𑀦𑁆𑀢𑁄. 𑀢𑁂𑀦𑁂𑀯𑀸𑀳 ‘‘𑀢𑀲𑁆𑀫𑀺𑀁 𑀕𑀸𑀭𑀯𑀼𑀧𑁆𑀧𑀢𑁆𑀢𑀺𑀬𑀸’’𑀢𑀺. 𑀥𑀫𑁆𑀫𑀸𑀥𑀺𑀧𑀢𑀺𑀪𑀽𑀢𑀸𑀕𑀢𑀪𑀸𑀯𑁂𑀦𑀸𑀢𑀺 𑀇𑀫𑀺𑀦𑀸 𑀬𑀣𑀸𑀯𑀼𑀢𑁆𑀢𑀥𑀫𑁆𑀫𑀲𑁆𑀲 𑀚𑁂𑀝𑁆𑀞𑀓𑀪𑀸𑀯𑁂𑀦 𑀧𑀼𑀭𑀺𑀫𑀢𑀭𑀁 𑀅𑀢𑁆𑀢𑀪𑀸𑀯𑁂𑀲𑀼 𑀲𑀓𑁆𑀓𑀘𑁆𑀘𑀁 𑀲𑀫𑀼𑀧𑀘𑀺𑀢𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀥𑀫𑁆𑀫𑀯𑀲𑁂𑀦𑁂𑀯 𑀘 𑀲𑀩𑁆𑀩𑀓𑀺𑀭𑀺𑀬𑀸𑀦𑀁 𑀓𑀭𑀡𑁂𑀦𑀸𑀢𑀺 𑀏𑀢𑁂𑀦 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀬𑀣𑀸𑀯𑀼𑀢𑁆𑀢𑀥𑀫𑁆𑀫𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀅𑀲𑁆𑀲𑀸𑀢𑀺 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺𑀬𑀸. 𑀧𑀭𑀁 𑀭𑀓𑁆𑀔𑀦𑁆𑀢𑁄𑀢𑀺 𑀅𑀜𑁆𑀜𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀤𑀺𑀅𑀦𑀢𑁆𑀣𑀢𑁄 𑀭𑀓𑁆𑀔𑀦𑁆𑀢𑁄. 𑀢𑁂𑀦𑁂𑀯 𑀧𑀭𑀭𑀓𑁆𑀔𑀲𑀸𑀥𑀦𑁂𑀦 𑀔𑀦𑁆𑀢𑀺𑀆𑀤𑀺𑀕𑀼𑀡𑁂𑀦 𑀅𑀢𑁆𑀢𑀸𑀦𑀁 𑀢𑀢𑁄 𑀏𑀯 𑀭𑀓𑁆𑀔𑀢𑀺. 𑀫𑁂𑀢𑁆𑀢𑀘𑀺𑀢𑁆𑀢𑀢𑀸𑀢𑀺 𑀫𑁂𑀢𑁆𑀢𑀘𑀺𑀢𑁆𑀢𑀢𑀸𑀬. 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀕𑁂𑀳𑀸𑀤𑀻𑀦𑀺 𑀲𑀻𑀢𑀼𑀡𑁆𑀳𑀸𑀤𑀺𑀧𑁆𑀧𑀝𑀺𑀩𑀸𑀳𑀦𑁂𑀦 𑀆𑀯𑀭𑀡𑀁.

𑀅𑀦𑁆𑀢𑁄𑀚𑀦𑀲𑁆𑀫𑀺𑀦𑁆𑀢𑀺 𑀅𑀩𑁆𑀪𑀦𑁆𑀢𑀭𑀪𑀽𑀢𑁂 𑀧𑀼𑀢𑁆𑀢𑀤𑀸𑀭𑀸𑀤𑀺𑀚𑀦𑁂. 𑀲𑀻𑀮𑀲𑀁𑀯𑀭𑁂 𑀧𑀢𑀺𑀝𑁆𑀞𑀸𑀧𑁂𑀦𑁆𑀢𑁄𑀢𑀺 𑀇𑀫𑀺𑀦𑀸 𑀭𑀓𑁆𑀔𑀁 𑀤𑀲𑁆𑀲𑁂𑀢𑀺. 𑀯𑀢𑁆𑀣𑀕𑀦𑁆𑀥𑀫𑀸𑀮𑀸𑀤𑀻𑀦𑀺 𑀘𑀲𑁆𑀲 𑀤𑀤𑀫𑀸𑀦𑁄𑀢𑀺 𑀇𑀫𑀺𑀦𑀸 𑀆𑀯𑀭𑀡𑀁, 𑀇𑀢𑀭𑁂𑀦 𑀕𑀼𑀢𑁆𑀢𑀺𑀁. 𑀲𑀫𑁆𑀧𑀤𑀸𑀦𑁂𑀦𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀲𑀻𑀮𑀲𑀁𑀯𑀭𑁂𑀲𑀼 𑀧𑀢𑀺𑀝𑁆𑀞𑀸𑀧𑀦𑀸𑀤𑀻𑀦𑀁 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀏𑀲 𑀦𑀬𑁄 𑀧𑀭𑁂𑀲𑀼𑀧𑀺 𑀧𑀺-𑀲𑀤𑁆𑀤𑀕𑁆𑀕𑀳𑀡𑁂. 𑀦𑀺𑀕𑀫𑁄 𑀦𑀺𑀯𑀸𑀲𑁄 𑀏𑀢𑁂𑀲𑀦𑁆𑀢𑀺 𑀦𑁂𑀕𑀫𑀸. 𑀏𑀯𑀁 𑀚𑀸𑀦𑀧𑀤𑀸𑀢𑀺 𑀆𑀳 ‘‘𑀢𑀣𑀸 𑀦𑀺𑀕𑀫𑀯𑀸𑀲𑀺𑀦𑁄’’𑀢𑀺𑀆𑀤𑀺𑀦𑀸.

𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺𑀬𑀸 𑀓𑀸𑀬𑀓𑀫𑁆𑀫𑀸𑀤𑀻𑀲𑀼 𑀲𑀁𑀯𑀺𑀤𑀳𑀦𑀁 𑀞𑀧𑀦𑀁 𑀦𑀸𑀫 𑀢𑀤𑀼𑀧𑀤𑁂𑀲𑁄𑀬𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀓𑀣𑁂𑀢𑁆𑀯𑀸’’𑀢𑀺. 𑀏𑀢𑁂𑀲𑀽𑀢𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑁂𑀲𑀼 𑀲𑀫𑀡𑀸𑀤𑀻𑀲𑀼. 𑀧𑀝𑀺𑀯𑀢𑁆𑀢𑁂𑀢𑀼𑀁 𑀦 𑀲𑀓𑁆𑀓𑀸 𑀔𑀻𑀡𑀸𑀦𑀁 𑀓𑀺𑀮𑁂𑀲𑀸𑀦𑀁 𑀧𑀼𑀦 𑀅𑀦𑀼𑀧𑁆𑀧𑀚𑁆𑀚𑀦𑀢𑁄. 𑀲𑁂𑀲𑀫𑁂𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀘𑀓𑁆𑀓𑀯𑀢𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀲𑀘𑁂𑀢𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫. 𑀧𑀜𑁆𑀘𑀫𑁂 𑀇𑀲𑀬𑁄 𑀧𑀢𑀦𑁆𑀢𑀺 𑀲𑀦𑁆𑀦𑀺𑀧𑀢𑀦𑁆𑀢𑀺 𑀏𑀢𑁆𑀣𑀸𑀢𑀺 𑀇𑀲𑀺𑀧𑀢𑀦𑀦𑁆𑀢𑀺 𑀆𑀳 ‘‘𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀗𑁆𑀔𑀸𑀢𑀸𑀦’’𑀦𑁆𑀢𑀺𑀆𑀤𑀺. 𑀲𑀩𑁆𑀩𑀽𑀧𑀓𑀭𑀡𑀸𑀦𑀺 𑀲𑀚𑁆𑀚𑁂𑀢𑁆𑀯𑀸𑀢𑀺 𑀲𑀩𑁆𑀩𑀸𑀦𑀺 𑀭𑀼𑀓𑁆𑀔𑀲𑁆𑀲 𑀙𑁂𑀤𑀦𑀢𑀘𑁆𑀙𑀦𑀸𑀤𑀺𑀲𑀸𑀥𑀦𑀸𑀦𑀺 𑀉𑀧𑀓𑀭𑀡𑀸𑀦𑀺 𑀭𑀜𑁆𑀜𑀸 𑀆𑀡𑀢𑁆𑀢𑀤𑀺𑀯𑀲𑁂𑀬𑁂𑀯 𑀲𑀚𑁆𑀚𑁂𑀢𑁆𑀯𑀸. 𑀦𑀸𑀦𑀸 𑀓𑀭𑀻𑀬𑀢𑀺 𑀏𑀢𑁂𑀦𑀸𑀢𑀺 𑀦𑀸𑀦𑀸𑀓𑀭𑀡𑀁, 𑀦𑀸𑀦𑀸𑀪𑀸𑀯𑁄𑀢𑀺 𑀆𑀳 ‘‘𑀦𑀸𑀦𑀢𑁆𑀢’’𑀦𑁆𑀢𑀺. 𑀦𑁂𑀲𑀦𑁆𑀢𑀺 𑀲𑀭𑀮𑁄𑀧𑁂𑀦𑀸𑀬𑀁 𑀦𑀺𑀤𑁆𑀤𑁂𑀲𑁄𑀢𑀺 𑀆𑀳 ‘‘𑀦 𑀏𑀲’’𑀦𑁆𑀢𑀺. 𑀢𑀣𑀸 𑀅𑀢𑁆𑀣𑁂𑀲𑀦𑁆𑀢𑀺 𑀏𑀢𑁆𑀣𑀸𑀧𑀻𑀢𑀺 𑀆𑀳 ‘‘𑀅𑀢𑁆𑀣𑀺 𑀏𑀲’’𑀦𑁆𑀢𑀺. 𑀧𑀯𑀢𑁆𑀢𑀦𑀢𑁆𑀣𑀁 𑀅𑀪𑀺𑀲𑀗𑁆𑀔𑀭𑀡𑀁 𑀅𑀪𑀺𑀲𑀗𑁆𑀔𑀸𑀭𑁄, 𑀢𑀲𑁆𑀲 𑀕𑀢𑀺 𑀯𑁂𑀕𑀲𑀸 𑀧𑀯𑀢𑁆𑀢𑀺. 𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀧𑀬𑁄𑀕𑀲𑁆𑀲 𑀕𑀫𑀦’’𑀦𑁆𑀢𑀺.

𑀲𑀕𑀡𑁆𑀟𑀸𑀢𑀺 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀕𑀡𑁆𑀟𑀸. 𑀢𑁂𑀦𑀸𑀳 ‘‘𑀉𑀡𑁆𑀡𑀢𑁄𑀡𑀢𑀝𑁆𑀞𑀸𑀦𑀬𑀼𑀢𑁆𑀢𑀸’’𑀢𑀺. 𑀲𑀓𑀲𑀸𑀯𑀸𑀢𑀺 𑀲𑀓𑀲𑀝𑀸. 𑀢𑁂𑀦𑀸𑀳 ‘‘𑀧𑀽𑀢𑀺𑀲𑀸𑀭𑁂𑀦𑀸’’𑀢𑀺𑀆𑀤𑀺. 𑀏𑀯𑀁 𑀕𑀼𑀡𑀧𑀢𑀦𑁂𑀦 𑀧𑀢𑀺𑀢𑀸𑀢𑀺 𑀬𑀣𑀸 𑀢𑀁 𑀘𑀓𑁆𑀓𑀁 𑀦𑀸𑀪𑀺𑀅𑀭𑀦𑁂𑀫𑀻𑀦𑀁 𑀲𑀤𑁄𑀲𑀢𑀸𑀬 𑀦 𑀧𑀢𑀺𑀝𑁆𑀞𑀸𑀲𑀺, 𑀏𑀯𑀫𑁂𑀓𑀘𑁆𑀘𑁂 𑀧𑀼𑀕𑁆𑀕𑀮𑀸 𑀓𑀸𑀬𑀯𑀗𑁆𑀓𑀸𑀤𑀺𑀯𑀲𑁂𑀦 𑀲𑀤𑁄𑀲𑀢𑀸𑀬 𑀕𑀼𑀡𑀧𑀢𑀦𑁂𑀦 𑀧𑀢𑀺𑀢𑀸 𑀲𑀓𑀝𑁆𑀞𑀸𑀦𑁂 𑀦 𑀢𑀺𑀝𑁆𑀞𑀦𑁆𑀢𑀺. 𑀏𑀢𑁆𑀣 𑀘 𑀨𑀭𑀼𑀲𑀯𑀸𑀘𑀸𑀤𑀬𑁄𑀧𑀺 𑀅𑀧𑀸𑀬𑀕𑀫𑀦𑀻𑀬𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦𑁂𑀯 𑀧𑀳𑀻𑀬𑀦𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀸.

𑀲𑀘𑁂𑀢𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀅𑀧𑀡𑁆𑀡𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬. 𑀙𑀝𑁆𑀞𑁂 𑀯𑀺𑀭𑀚𑁆𑀛𑀦𑀓𑀺𑀭𑀺𑀬𑀸 𑀦𑀸𑀫 𑀧𑀘𑁆𑀙𑀸 𑀲𑀫𑀸𑀤𑀸𑀢𑀩𑁆𑀩𑀢𑀸𑀬 𑀅𑀧𑀡𑁆𑀡𑀓𑀧𑁆𑀧𑀬𑁄𑀕𑀲𑀫𑀸𑀤𑀸𑀦𑀸 𑀯𑀺𑀬 𑀳𑁄𑀢𑀺, 𑀅𑀯𑀺𑀭𑀚𑁆𑀛𑀦𑀓𑀺𑀭𑀺𑀬𑀸 𑀧𑀦 𑀧𑀘𑁆𑀙𑀸 𑀅𑀲𑀫𑀸𑀤𑀸𑀢𑀩𑁆𑀩𑀢𑀸𑀬 𑀅𑀦𑀽𑀦𑀸𑀢𑀺 𑀢𑀁𑀲𑀫𑀗𑁆𑀕𑀺𑀧𑀼𑀕𑁆𑀕𑀮𑁄 𑀅𑀧𑀡𑁆𑀡𑀓𑁄, 𑀢𑀲𑁆𑀲 𑀪𑀸𑀯𑁄 𑀅𑀧𑀡𑁆𑀡𑀓𑀢𑀸𑀢𑀺 𑀆𑀳 ‘‘𑀅𑀧𑀡𑁆𑀡𑀓𑀧𑀝𑀺𑀧𑀤𑀦𑁆𑀢𑀺 𑀅𑀯𑀺𑀭𑀤𑁆𑀥𑀧𑀝𑀺𑀧𑀤’’𑀦𑁆𑀢𑀺𑀆𑀤𑀺. 𑀬𑀲𑁆𑀫𑀸 𑀲𑀸 𑀅𑀥𑀺𑀧𑁆𑀧𑁂𑀢𑀢𑁆𑀣𑀲𑀸𑀥𑀦𑁂𑀦 𑀏𑀓𑀁𑀲𑀺𑀓𑀸 𑀯𑀝𑁆𑀝𑀢𑁄 𑀦𑀺𑀬𑁆𑀬𑀸𑀦𑀸𑀯𑀳𑀸, 𑀢𑀢𑁆𑀣 𑀘 𑀬𑀼𑀢𑁆𑀢𑀺𑀬𑀼𑀢𑁆𑀢𑀸 𑀅𑀲𑀸𑀭𑀸𑀧𑀕𑀢𑀸 𑀅𑀯𑀺𑀭𑀼𑀤𑁆𑀥𑀢𑀸𑀬 𑀅𑀧𑀘𑁆𑀘𑀦𑀻𑀓𑀸 𑀅𑀦𑀼𑀮𑁄𑀫𑀺𑀓𑀸 𑀅𑀦𑀼𑀥𑀫𑁆𑀫𑀪𑀽𑀢𑀸 𑀘, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀏𑀓𑀁𑀲𑀧𑀝𑀺𑀧𑀤’’𑀦𑁆𑀢𑀺𑀆𑀤𑀺. 𑀦 𑀢𑀓𑁆𑀓𑀕𑁆𑀕𑀸𑀳𑁂𑀦 𑀯𑀸 𑀦𑀬𑀕𑁆𑀕𑀸𑀳𑁂𑀦 𑀯𑀸𑀢𑀺 𑀢𑀓𑁆𑀓𑀕𑁆𑀕𑀸𑀳𑁂𑀦 𑀯𑀸 𑀧𑀝𑀺𑀧𑀦𑁆𑀦𑁄 𑀦 𑀳𑁄𑀢𑀺 𑀦𑀬𑀕𑁆𑀕𑀸𑀳𑁂𑀦 𑀯𑀸 𑀅𑀧𑀡𑁆𑀡𑀓𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁄. 𑀢𑀢𑁆𑀣 𑀢𑀓𑁆𑀓𑀕𑁆𑀕𑀸𑀳𑁂𑀦 𑀯𑀸𑀢𑀺 𑀆𑀘𑀭𑀺𑀬𑀁 𑀅𑀮𑀪𑀺𑀢𑁆𑀯𑀸 ‘‘𑀏𑀯𑀁 𑀫𑁂 𑀲𑀼𑀕𑀢𑀺, 𑀦𑀺𑀩𑁆𑀩𑀸𑀦𑀁 𑀯𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀅𑀢𑁆𑀢𑀦𑁄 𑀢𑀓𑁆𑀓𑀕𑁆𑀕𑀳𑀡𑀫𑀢𑁆𑀢𑁂𑀦. 𑀦𑀬𑀕𑁆𑀕𑀸𑀳𑁂𑀦𑀸𑀢𑀺 𑀧𑀘𑁆𑀘𑀓𑁆𑀔𑀢𑁄 𑀅𑀤𑀺𑀲𑁆𑀯𑀸 𑀦𑀬𑀢𑁄 𑀅𑀦𑀼𑀫𑀸𑀦𑀢𑁄 𑀕𑀳𑀡𑁂𑀦. 𑀏𑀯𑀁 𑀕𑀳𑁂𑀢𑁆𑀯𑀸 𑀧𑀝𑀺𑀧𑀦𑁆𑀦𑁄𑀢𑀺 𑀢𑀓𑁆𑀓𑀫𑀢𑁆𑀢𑁂𑀦, 𑀦𑀬𑀕𑁆𑀕𑀸𑀳𑁂𑀦 𑀯𑀸 𑀧𑀝𑀺𑀧𑀦𑁆𑀦𑁄. 𑀧𑀡𑁆𑀟𑀺𑀢𑀲𑀢𑁆𑀣𑀯𑀸𑀳𑁄 𑀯𑀺𑀬 𑀲𑀫𑁆𑀧𑀢𑁆𑀢𑀻𑀳𑀺 𑀦 𑀧𑀭𑀺𑀳𑀸𑀬𑀢𑀻𑀢𑀺 𑀬𑁄𑀚𑀦𑀸.

𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀧𑀭𑀺𑀳𑀸𑀦𑀜𑁆𑀘 𑀅𑀧𑀭𑀺𑀳𑀸𑀦𑀜𑁆𑀘 𑀲𑀦𑁆𑀥𑀸𑀬 𑀚𑀸𑀢𑀓𑁂 (𑀚𑀸. 𑁧.𑁧.𑁧) 𑀯𑀼𑀢𑁆𑀢𑀁. 𑀅𑀬𑀁 𑀧𑀦𑁂𑀢𑁆𑀣 𑀕𑀸𑀣𑀸𑀬 𑀅𑀢𑁆𑀣𑀬𑁄𑀚𑀦𑀸 𑁋 𑀅𑀧𑀡𑁆𑀡𑀓𑀁 𑀞𑀸𑀦𑀁 𑀅𑀯𑀺𑀭𑀤𑁆𑀥𑀓𑀸𑀭𑀡𑀁 𑀦𑀺𑀬𑁆𑀬𑀸𑀦𑀺𑀓𑀓𑀸𑀭𑀡𑀁 𑀏𑀓𑁂 𑀩𑁄𑀥𑀺𑀲𑀢𑁆𑀢𑀧𑁆𑀧𑀫𑀼𑀔𑀸 𑀧𑀡𑁆𑀟𑀺𑀢𑀫𑀦𑀼𑀲𑁆𑀲𑀸 𑀕𑀡𑁆𑀳𑀺𑀁𑀲𑀼. 𑀬𑁂 𑀧𑀦 𑀢𑁂 𑀩𑀸𑀮𑀲𑀢𑁆𑀣𑀯𑀸𑀳𑀧𑀼𑀢𑁆𑀢𑀧𑁆𑀧𑀫𑀼𑀔𑀸 𑀢𑀓𑁆𑀓𑀺𑀓𑀸 𑀆𑀳𑀼, 𑀢𑁂 𑀤𑀼𑀢𑀺𑀬𑀁 𑀲𑀸𑀧𑀭𑀸𑀥𑀁 𑀅𑀦𑁂𑀓𑀁𑀲𑀺𑀓𑀁 𑀞𑀸𑀦𑀁 𑀅𑀦𑀺𑀬𑁆𑀬𑀸𑀦𑀺𑀓𑀁 𑀓𑀸𑀭𑀡𑀁 𑀅𑀕𑁆𑀕𑀳𑁂𑀲𑀼𑀁, 𑀢𑁂 𑀓𑀡𑁆𑀳𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑀸. 𑀢𑀢𑁆𑀣 𑀲𑀼𑀓𑁆𑀓𑀧𑀝𑀺𑀧𑀤𑀸 𑀅𑀧𑀭𑀺𑀳𑀸𑀦𑀺𑀧𑀝𑀺𑀧𑀤𑀸, 𑀓𑀡𑁆𑀳𑀧𑀝𑀺𑀧𑀤𑀸 𑀧𑀭𑀺𑀳𑀸𑀦𑀺𑀧𑀝𑀺𑀧𑀤𑀸, 𑀢𑀲𑁆𑀫𑀸 𑀬𑁂 𑀲𑀼𑀓𑁆𑀓𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑀸, 𑀢𑁂 𑀅𑀧𑀭𑀺𑀳𑀻𑀦𑀸 𑀲𑁄𑀢𑁆𑀣𑀺𑀪𑀸𑀯𑀁 𑀧𑀢𑁆𑀢𑀸. 𑀬𑁂 𑀧𑀦 𑀓𑀡𑁆𑀳𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑀸, 𑀢𑁂 𑀧𑀭𑀺𑀳𑀻𑀦𑀸 𑀅𑀦𑀬𑀩𑁆𑀬𑀲𑀦𑀁 𑀆𑀧𑀦𑁆𑀦𑀸𑀢𑀺 𑀇𑀫𑀫𑀢𑁆𑀣𑀁 𑀪𑀕𑀯𑀸 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀕𑀳𑀧𑀢𑀺𑀦𑁄 𑀯𑀢𑁆𑀯𑀸 𑀉𑀢𑁆𑀢𑀭𑀺 𑀇𑀤𑀫𑀸𑀳 ‘‘𑀏𑀢𑀤𑀜𑁆𑀜𑀸𑀬 𑀫𑁂𑀥𑀸𑀯𑀻, 𑀢𑀁 𑀕𑀡𑁆𑀳𑁂 𑀬𑀤𑀧𑀡𑁆𑀡𑀓’’𑀦𑁆𑀢𑀺.

𑀢𑀢𑁆𑀣 𑀏𑀢𑀤𑀜𑁆𑀜𑀸𑀬 𑀫𑁂𑀥𑀸𑀯𑀻𑀢𑀺 𑀫𑁂𑀥𑀸𑀢𑀺 𑀮𑀤𑁆𑀥𑀦𑀸𑀫𑀸𑀬 𑀯𑀺𑀲𑀼𑀤𑁆𑀥𑀸𑀬 𑀉𑀢𑁆𑀢𑀫𑀸𑀬 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄 𑀓𑀼𑀮𑀧𑀼𑀢𑁆𑀢𑁄 𑀏𑀢𑀁 𑀅𑀧𑀡𑁆𑀡𑀓𑀁 𑀞𑀸𑀦𑀁 𑀤𑀼𑀢𑀺𑀬𑀜𑁆𑀘𑀸𑀢𑀺 𑀤𑁆𑀯𑀻𑀲𑀼 𑀅𑀢𑀓𑁆𑀓𑀕𑁆𑀕𑀸𑀳𑀢𑀓𑁆𑀓𑀕𑁆𑀕𑀸𑀳𑀲𑀗𑁆𑀔𑀸𑀢𑁂𑀲𑀼 𑀞𑀸𑀦𑁂𑀲𑀼 𑀕𑀼𑀡𑀤𑁄𑀲𑀁 𑀯𑀼𑀤𑁆𑀥𑀺𑀳𑀸𑀦𑀺𑀁 𑀅𑀢𑁆𑀣𑀸𑀦𑀢𑁆𑀣𑀁 𑀜𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑀁 𑀕𑀡𑁆𑀳𑁂 𑀬𑀤𑀧𑀡𑁆𑀡𑀓𑀦𑁆𑀢𑀺 𑀬𑀁 𑀅𑀧𑀡𑁆𑀡𑀓𑀁 𑀏𑀓𑀁𑀲𑀺𑀓𑀁 𑀲𑀼𑀓𑁆𑀓𑀧𑀝𑀺𑀧𑀤𑀸𑀅𑀧𑀭𑀺𑀳𑀸𑀦𑀺𑀬𑀧𑀝𑀺𑀧𑀤𑀸𑀲𑀗𑁆𑀔𑀸𑀢𑀁 𑀦𑀺𑀬𑁆𑀬𑀸𑀦𑀺𑀓𑀓𑀸𑀭𑀡𑀁, 𑀢𑀤𑁂𑀯 𑀕𑀡𑁆𑀳𑁂𑀬𑁆𑀬. 𑀓𑀲𑁆𑀫𑀸? 𑀏𑀓𑀁𑀲𑀺𑀓𑀸𑀤𑀺𑀪𑀸𑀯𑀢𑁄𑀬𑁂𑀯. 𑀇𑀢𑀭𑀁 𑀧𑀦 𑀦 𑀕𑀡𑁆𑀳𑁂𑀬𑁆𑀬. 𑀓𑀲𑁆𑀫𑀸? 𑀅𑀦𑁂𑀓𑀁𑀲𑀺𑀓𑀸𑀤𑀺𑀪𑀸𑀯𑀢𑁄𑀬𑁂𑀯.

𑀬𑀯𑀦𑁆𑀢𑀺 𑀢𑀸𑀬 𑀲𑀢𑁆𑀢𑀸 𑀅𑀫𑀺𑀲𑁆𑀲𑀺𑀢𑀸𑀧𑀺 𑀲𑀫𑀸𑀦𑀚𑀸𑀢𑀺𑀢𑀸𑀬 𑀫𑀺𑀲𑁆𑀲𑀺𑀢𑀸 𑀯𑀺𑀬 𑀳𑁄𑀦𑁆𑀢𑀻𑀢𑀺 𑀬𑁄𑀦𑀺. 𑀲𑀸 𑀧𑀦 𑀅𑀢𑁆𑀣𑀢𑁄 𑀅𑀡𑁆𑀟𑀸𑀤𑀺𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀯𑀺𑀲𑀺𑀝𑁆𑀞𑁄 𑀔𑀦𑁆𑀥𑀸𑀦𑀁 𑀪𑀸𑀕𑀲𑁄 𑀧𑀯𑀢𑁆𑀢𑀺𑀯𑀺𑀲𑁂𑀲𑁄𑀢𑀺 𑀆𑀳 ‘‘𑀔𑀦𑁆𑀥𑀓𑁄𑀝𑁆𑀞𑀸𑀲𑁄 𑀬𑁄𑀦𑀺 𑀦𑀸𑀫𑀸’’𑀢𑀺. 𑀓𑀸𑀭𑀡𑀁 𑀬𑁄𑀦𑀺 𑀦𑀸𑀫, 𑀬𑁄𑀦𑀻𑀢𑀺 𑀢𑀁 𑀢𑀁 𑀨𑀮𑀁 𑀅𑀦𑀼𑀧𑀘𑀺𑀢𑀜𑀸𑀡𑀲𑀫𑁆𑀪𑀸𑀭𑁂𑀳𑀺 𑀤𑀼𑀭𑀯𑀕𑀸𑀥𑀪𑁂𑀤𑀢𑀸𑀬 𑀫𑀺𑀲𑁆𑀲𑀺𑀢𑀁 𑀯𑀺𑀬 𑀳𑁄𑀢𑀻𑀢𑀺. 𑀬𑀢𑁄 𑀏𑀓𑀢𑁆𑀢𑀦𑀬𑁂𑀦 𑀲𑁄 𑀏𑀯𑀸𑀬𑀦𑁆𑀢𑀺 𑀩𑀸𑀮𑀸𑀦𑀁 𑀫𑀺𑀘𑁆𑀙𑀸𑀕𑀸𑀳𑁄. 𑀧𑀲𑁆𑀲𑀸𑀯𑀫𑀕𑁆𑀕𑁄 𑀬𑁄𑀦𑀺 𑀦𑀸𑀫 𑀬𑀯𑀦𑁆𑀢𑀺 𑀢𑀸𑀬 𑀲𑀢𑁆𑀢𑀸 𑀬𑁄𑀦𑀺𑀲𑀫𑁆𑀩𑀦𑁆𑀥𑁂𑀦 𑀫𑀺𑀲𑁆𑀲𑀺𑀢𑀸 𑀳𑁄𑀦𑁆𑀢𑀻𑀢𑀺. 𑀧𑀕𑁆𑀕𑀳𑀺𑀢𑀸 𑀅𑀦𑀼𑀝𑁆𑀞𑀸𑀦𑁂𑀦, 𑀧𑀼𑀦𑀧𑁆𑀧𑀼𑀦𑀁 𑀆𑀲𑁂𑀯𑀦𑀸𑀬 𑀧𑀭𑀺𑀧𑀼𑀡𑁆𑀡𑀸.

‘‘𑀘𑀓𑁆𑀔𑀼𑀢𑁄𑀧𑀻’’𑀢𑀺𑀆𑀤𑀺𑀫𑁆𑀳𑀺 𑀧𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀯𑀻𑀣𑀻𑀲𑀼 𑀢𑀤𑀦𑀼𑀕𑀢𑀫𑀦𑁄𑀯𑀺𑀜𑁆𑀜𑀸𑀡𑀯𑀻𑀣𑀻𑀲𑀼 𑀘 𑀓𑀺𑀜𑁆𑀘𑀸𑀧𑀺 𑀓𑀼𑀲𑀮𑀸𑀤𑀻𑀦𑀁 𑀧𑀯𑀢𑁆𑀢𑀺 𑀅𑀢𑁆𑀣𑀺, 𑀓𑀸𑀫𑀸𑀲𑀯𑀸𑀤𑀬𑁄 𑀏𑀯 𑀧𑀦 𑀯𑀡𑀢𑁄 𑀬𑀽𑀲𑀁 𑀯𑀺𑀬 𑀧𑀕𑁆𑀖𑀭𑀦𑀓𑀅𑀲𑀼𑀘𑀺𑀪𑀸𑀯𑁂𑀦 𑀲𑀦𑁆𑀤𑀦𑁆𑀢𑀺, 𑀢𑀲𑁆𑀫𑀸 𑀢𑁂 𑀏𑀯 ‘‘𑀆𑀲𑀯𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑀢𑁆𑀣 𑀳𑀺 𑀧𑀕𑁆𑀖𑀭𑀦𑀓𑀅𑀲𑀼𑀘𑀺𑀫𑁆𑀳𑀺 𑀆𑀲𑀯𑀲𑀤𑁆𑀤𑁄 𑀦𑀺𑀭𑀼𑀴𑁆𑀳𑁄𑀢𑀺. 𑀥𑀫𑁆𑀫𑀢𑁄 𑀬𑀸𑀯 𑀕𑁄𑀢𑁆𑀭𑀪𑀽𑀢𑀺 𑀢𑀢𑁄 𑀧𑀭𑀁 𑀫𑀕𑁆𑀕𑀨𑀮𑁂𑀲𑀼 𑀅𑀧𑁆𑀧𑀯𑀢𑁆𑀢𑀦𑀢𑁄 𑀯𑀼𑀢𑁆𑀢𑀁. 𑀏𑀢𑁂 𑀳𑀺 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀥𑀫𑁆𑀫𑁂 𑀕𑀘𑁆𑀙𑀦𑁆𑀢𑀸 𑀢𑀢𑁄 𑀧𑀭𑀁 𑀦 𑀕𑀘𑁆𑀙𑀦𑁆𑀢𑀺. 𑀦𑀦𑀼 𑀢𑀢𑁄 𑀧𑀭𑀁 𑀪𑀯𑀗𑁆𑀕𑀸𑀤𑀻𑀦𑀺𑀧𑀺 𑀕𑀘𑁆𑀙𑀦𑁆𑀢𑀻𑀢𑀺 𑀘𑁂? 𑀦, 𑀢𑁂𑀲𑀫𑁆𑀧𑀺 𑀧𑀼𑀩𑁆𑀩𑁂 𑀆𑀮𑀫𑁆𑀩𑀺𑀢𑁂𑀲𑀼 𑀮𑁄𑀓𑀺𑀬𑀥𑀫𑁆𑀫𑁂𑀲𑀼 𑀲𑀸𑀲𑀯𑀪𑀸𑀯𑁂𑀦 𑀅𑀦𑁆𑀢𑁄𑀕𑀥𑀢𑁆𑀢𑀸 𑀢𑀢𑁄 𑀧𑀭𑀢𑀸𑀪𑀸𑀯𑀢𑁄. 𑀏𑀢𑁆𑀣 𑀘 𑀕𑁄𑀢𑁆𑀭𑀪𑀼𑀯𑀘𑀦𑁂𑀦 𑀕𑁄𑀢𑁆𑀭𑀪𑀼𑀯𑁄𑀤𑀸𑀦𑀨𑀮𑀲𑀫𑀸𑀧𑀢𑁆𑀢𑀺𑀧𑀼𑀭𑁂𑀘𑀸𑀭𑀺𑀓𑀧𑀭𑀺𑀓𑀫𑁆𑀫𑀸𑀦𑀺 𑀯𑀼𑀢𑁆𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀧𑀞𑀫𑀫𑀕𑁆𑀕𑀧𑀼𑀭𑁂𑀘𑀸𑀭𑀺𑀓𑀫𑁂𑀯 𑀯𑀸 𑀕𑁄𑀢𑁆𑀭𑀪𑀼 𑀅𑀯𑀥𑀺𑀦𑀺𑀤𑀲𑁆𑀲𑀦𑀪𑀸𑀯𑁂𑀦 𑀕𑀳𑀺𑀢𑀁, 𑀢𑀢𑁄 𑀧𑀭𑀁 𑀧𑀦 𑀫𑀕𑁆𑀕𑀨𑀮𑀲𑀫𑀸𑀦𑀢𑀸𑀬 𑀅𑀜𑁆𑀜𑁂𑀲𑀼 𑀫𑀕𑁆𑀕𑁂𑀲𑀼 𑀫𑀕𑁆𑀕𑀯𑀻𑀣𑀺𑀬𑀁 𑀲𑀫𑀸𑀧𑀢𑁆𑀢𑀺𑀯𑀻𑀣𑀻𑀬𑀁 𑀦𑀺𑀭𑁄𑀥𑀸𑀦𑀦𑁆𑀢𑀭𑀜𑁆𑀘 𑀧𑀯𑀢𑁆𑀢𑀫𑀸𑀦𑁂𑀲𑀼 𑀨𑀮𑁂𑀲𑀼 𑀦𑀺𑀩𑁆𑀩𑀸𑀦𑁂 𑀘 𑀆𑀲𑀯𑀸𑀦𑀁 𑀧𑀯𑀢𑁆𑀢𑀺 𑀦𑀺𑀯𑀸𑀭𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀯𑀦𑁆𑀢𑀻𑀢𑀺 𑀕𑀘𑁆𑀙𑀦𑁆𑀢𑀺, 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀧𑀯𑀢𑁆𑀢𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀯𑀥𑀺𑀅𑀢𑁆𑀣𑁄 𑀆-𑀓𑀸𑀭𑁄, 𑀅𑀯𑀥𑀺 𑀘 𑀫𑀭𑀺𑀬𑀸𑀤𑀸𑀪𑀺𑀯𑀺𑀥𑀺𑀪𑁂𑀤𑀢𑁄 𑀤𑀼𑀯𑀺𑀥𑁄. 𑀢𑀢𑁆𑀣 𑀫𑀭𑀺𑀬𑀸𑀤𑀁 𑀓𑀺𑀭𑀺𑀬𑀁 𑀩𑀳𑀺 𑀓𑀢𑁆𑀯𑀸 𑀧𑀯𑀢𑁆𑀢𑀢𑀺 𑀬𑀣𑀸 ‘‘𑀆𑀧𑀸𑀝𑀮𑀻𑀧𑀼𑀢𑁆𑀢𑀁 𑀯𑀼𑀝𑁆𑀞𑁄 𑀤𑁂𑀯𑁄’’𑀢𑀺. 𑀅𑀪𑀺𑀯𑀺𑀥𑀺 𑀧𑀦 𑀓𑀺𑀭𑀺𑀬𑀁 𑀩𑁆𑀬𑀸𑀧𑁂𑀢𑁆𑀯𑀸 𑀧𑀯𑀢𑁆𑀢𑀢𑀺 𑀬𑀣𑀸 ‘‘𑀆𑀪𑀯𑀕𑁆𑀕𑀁 𑀪𑀕𑀯𑀢𑁄 𑀬𑀲𑁄 𑀧𑀯𑀢𑁆𑀢𑀢𑀻’’𑀢𑀺. 𑀅𑀪𑀺𑀯𑀺𑀥𑀺𑀅𑀢𑁆𑀣𑁄 𑀘𑀸𑀬𑀫𑀸-𑀓𑀸𑀭𑁄 𑀇𑀥 𑀕𑀳𑀺𑀢𑁄𑀢𑀺 𑀯𑀼𑀢𑁆𑀢𑀁 ‘‘𑀅𑀦𑁆𑀢𑁄𑀓𑀭𑀡𑀢𑁆𑀣𑁄’’𑀢𑀺.

𑀫𑀤𑀺𑀭𑀸𑀤𑀬𑁄𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀲𑀺𑀦𑁆𑀥𑀯𑀓𑀸𑀤𑀫𑁆𑀩𑀭𑀺𑀓𑀸𑀧𑁄𑀢𑀺𑀓𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀘𑀺𑀭𑀧𑀸𑀭𑀺𑀯𑀸𑀲𑀺𑀬𑀝𑁆𑀞𑁄 𑀘𑀺𑀭𑀧𑀭𑀺𑀯𑀼𑀝𑁆𑀞𑀢𑀸 𑀧𑀼𑀭𑀸𑀡𑀪𑀸𑀯𑁄. 𑀅𑀯𑀺𑀚𑁆𑀚𑀸 𑀦𑀸𑀳𑁄𑀲𑀻𑀢𑀺𑀆𑀤𑀻𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 ‘‘𑀧𑀼𑀭𑀺𑀫𑀸, 𑀪𑀺𑀓𑁆𑀔𑀯𑁂, 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺 𑀪𑀯𑀢𑀡𑁆𑀳𑀸𑀬𑀸’’𑀢𑀺 (𑀅. 𑀦𑀺. 𑁧𑁦.𑁬𑁨) 𑀇𑀤𑀁 𑀲𑀼𑀢𑁆𑀢𑀁 𑀲𑀗𑁆𑀕𑀳𑀺𑀢𑀁. 𑀅𑀯𑀺𑀚𑁆𑀚𑀸𑀲𑀯𑀪𑀯𑀸𑀲𑀯𑀸𑀦𑀁 𑀘𑀺𑀭𑀧𑀭𑀺𑀯𑀼𑀝𑁆𑀞𑀢𑀸𑀬 𑀤𑀲𑁆𑀲𑀺𑀢𑀸𑀬 𑀢𑀩𑁆𑀪𑀸𑀯𑀪𑀸𑀯𑀺𑀦𑁄 𑀓𑀸𑀫𑀸𑀲𑀯𑀲𑁆𑀲 𑀘𑀺𑀭𑀧𑀭𑀺𑀯𑀼𑀝𑁆𑀞𑀢𑀸 𑀤𑀲𑁆𑀲𑀺𑀢𑀸𑀯 𑀳𑁄𑀢𑀺. 𑀅𑀜𑁆𑀜𑁂𑀲𑀼 𑀘 𑀬𑀣𑀸𑀯𑀼𑀢𑁆𑀢𑁂 𑀥𑀫𑁆𑀫𑁂 𑀑𑀓𑀸𑀲𑀜𑁆𑀘 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑁂𑀲𑀼 𑀫𑀸𑀦𑀸𑀤𑀻𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼 𑀅𑀢𑁆𑀢𑀢𑁆𑀢𑀦𑀺𑀬𑀸𑀤𑀺𑀕𑁆𑀕𑀸𑀳𑀯𑀲𑁂𑀦 𑀅𑀪𑀺𑀩𑁆𑀬𑀸𑀧𑀦𑀁 𑀫𑀤𑀓𑀭𑀡𑀯𑀲𑁂𑀦 𑀆𑀲𑀯𑀲𑀤𑀺𑀲𑀢𑀸 𑀘 𑀏𑀢𑁂𑀲𑀁𑀬𑁂𑀯, 𑀦 𑀅𑀜𑁆𑀜𑁂𑀲𑀦𑁆𑀢𑀺 𑀏𑀢𑁂𑀲𑁆𑀯𑁂𑀯 𑀆𑀲𑀯𑀲𑀤𑁆𑀤𑁄 𑀦𑀺𑀭𑀼𑀴𑁆𑀳𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀆𑀬𑀢𑀁 𑀅𑀦𑀸𑀤𑀺𑀓𑀸𑀮𑀺𑀓𑀢𑁆𑀢𑀸. 𑀧𑀲𑀯𑀦𑁆𑀢𑀻𑀢𑀺 𑀨𑀮𑀦𑁆𑀢𑀺. 𑀦 𑀳𑀺 𑀓𑀺𑀜𑁆𑀘𑀺 𑀲𑀁𑀲𑀸𑀭𑀤𑀼𑀓𑁆𑀔𑀁 𑀅𑀢𑁆𑀣𑀺, 𑀬𑀁 𑀆𑀲𑀯𑁂𑀳𑀺 𑀯𑀺𑀦𑀸 𑀉𑀧𑁆𑀧𑀚𑁆𑀚𑁂𑀬𑁆𑀬. 𑀧𑀼𑀭𑀺𑀫𑀸𑀦𑀺 𑀘𑁂𑀢𑁆𑀣𑀸𑀢𑀺 𑀏𑀢𑁂𑀲𑀼 𑀘𑀢𑀽𑀲𑀼 𑀅𑀢𑁆𑀣𑀯𑀺𑀓𑀧𑁆𑀧𑁂𑀲𑀼 𑀧𑀼𑀭𑀺𑀫𑀸𑀦𑀺 𑀢𑀻𑀡𑀺. 𑀬𑀢𑁆𑀣𑀸𑀢𑀺 𑀬𑁂𑀲𑀼 𑀲𑀼𑀢𑁆𑀢𑀸𑀪𑀺𑀥𑀫𑁆𑀫𑀧𑁆𑀧𑀤𑁂𑀲𑁂𑀲𑀼. 𑀢𑀢𑁆𑀣 𑀬𑀼𑀚𑁆𑀚𑀦𑁆𑀢𑀺 𑀓𑀺𑀮𑁂𑀲𑁂𑀲𑀼𑀬𑁂𑀯 𑀬𑀣𑀸𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑀢𑁆𑀢𑀬𑀲𑁆𑀲 𑀲𑀫𑁆𑀪𑀯𑀢𑁄. 𑀧𑀘𑁆𑀙𑀺𑀫𑀁 𑀓𑀫𑁆𑀫𑁂𑀧𑀻𑀢𑀺 𑀧𑀘𑁆𑀙𑀺𑀫𑀁 ‘‘𑀆𑀬𑀢𑀁 𑀯𑀸 𑀲𑀁𑀲𑀸𑀭𑀤𑀼𑀓𑁆𑀔𑀁 𑀲𑀯𑀦𑁆𑀢𑀺 𑀧𑀲𑀯𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀦𑀺𑀩𑁆𑀩𑀘𑀦𑀁 𑀓𑀫𑁆𑀫𑁂𑀧𑀺 𑀬𑀼𑀚𑁆𑀚𑀢𑀺 𑀤𑀼𑀓𑁆𑀔𑀧𑁆𑀧𑀲𑀯𑀦𑀲𑁆𑀲 𑀓𑀺𑀮𑁂𑀲𑀓𑀫𑁆𑀫𑀲𑀸𑀥𑀸𑀭𑀡𑀢𑁆𑀢𑀸.

𑀤𑀺𑀝𑁆𑀞𑀥𑀫𑁆𑀫𑀸 𑀯𑀼𑀘𑁆𑀘𑀦𑁆𑀢𑀺 𑀧𑀘𑁆𑀘𑀓𑁆𑀔𑀪𑀽𑀢𑀸 𑀔𑀦𑁆𑀥𑀸, 𑀤𑀺𑀝𑁆𑀞𑀥𑀫𑁆𑀫𑁂 𑀪𑀯𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑀸. 𑀯𑀺𑀯𑀸𑀤𑀫𑀽𑀮𑀪𑀽𑀢𑀸𑀢𑀺 𑀯𑀺𑀯𑀸𑀤𑀲𑁆𑀲 𑀫𑀽𑀮𑀓𑀸𑀭𑀡𑀪𑀽𑀢𑀸 𑀓𑁄𑀥𑀽𑀧𑀦𑀸𑀳𑀫𑀓𑁆𑀔𑀧𑀮𑀸𑀲𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀫𑀸𑀬𑀸𑀲𑀸𑀞𑁂𑀬𑁆𑀬𑀣𑀫𑁆𑀪𑀲𑀸𑀭𑀫𑁆𑀪𑀫𑀸𑀦𑀸𑀢𑀺𑀫𑀸𑀦𑀸. 𑀬𑁂𑀦 𑀤𑁂𑀯𑀽𑀧𑀧𑀢𑁆𑀬𑀲𑁆𑀲𑀸𑀢𑀺 𑀬𑁂𑀦 𑀓𑀫𑁆𑀫𑀓𑀺𑀮𑁂𑀲𑀧𑁆𑀧𑀓𑀸𑀭𑁂𑀦 𑀆𑀲𑀯𑁂𑀦 𑀤𑁂𑀯𑁂𑀲𑀼 𑀉𑀧𑀧𑀢𑁆𑀢𑀺 𑀦𑀺𑀩𑁆𑀩𑀢𑁆𑀢𑀺 𑀅𑀲𑁆𑀲 𑀫𑀬𑁆𑀳𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀕𑀦𑁆𑀥𑀩𑁆𑀩𑁄 𑀯𑀸 𑀯𑀺𑀳𑀗𑁆𑀕𑀫𑁄 𑀆𑀓𑀸𑀲𑀘𑀸𑀭𑀻 𑀅𑀲𑁆𑀲𑀦𑁆𑀢𑀺 𑀯𑀺𑀪𑀢𑁆𑀢𑀺𑀁 𑀯𑀺𑀧𑀭𑀺𑀡𑀸𑀫𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁. 𑀏𑀢𑁆𑀣 𑀘 𑀬𑀓𑁆𑀔𑀕𑀦𑁆𑀥𑀩𑁆𑀩𑀯𑀺𑀦𑀺𑀫𑀼𑀢𑁆𑀢𑀸 𑀲𑀩𑁆𑀩𑀸 𑀤𑁂𑀯𑀢𑀸 𑀤𑁂𑀯𑀕𑁆𑀕𑀳𑀡𑁂𑀦 𑀕𑀳𑀺𑀢𑀸. 𑀦𑀴𑁄 𑀯𑀼𑀘𑁆𑀘𑀢𑀺 𑀫𑀽𑀮𑀁, 𑀢𑀲𑁆𑀫𑀸 𑀯𑀺𑀦𑀴𑀻𑀓𑀢𑀸𑀢𑀺 𑀯𑀺𑀕𑀢𑀦𑀴𑀸 𑀯𑀺𑀕𑀢𑀫𑀽𑀮𑀸 𑀓𑀢𑀸𑀢𑀺 𑀅𑀢𑁆𑀣𑁄. 𑀅𑀯𑀲𑁂𑀲𑀸 𑀘 𑀅𑀓𑀼𑀲𑀮𑀸 𑀥𑀫𑁆𑀫𑀸𑀢𑀺 𑀅𑀓𑀼𑀲𑀮𑀓𑀫𑁆𑀫𑀢𑁄 𑀅𑀯𑀲𑁂𑀲𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀆𑀲𑀯𑀸𑀢𑀺 𑀆𑀕𑀢𑀸𑀢𑀺 𑀲𑀫𑁆𑀩𑀦𑁆𑀥𑁄.

𑀧𑀝𑀺𑀖𑀸𑀢𑀸𑀬𑀸𑀢𑀺 𑀧𑀝𑀺𑀲𑁂𑀥𑀦𑀸𑀬. 𑀧𑀭𑀽𑀧𑀯𑀸𑀤…𑀧𑁂… 𑀉𑀧𑀤𑁆𑀤𑀯𑀸𑀢𑀺 𑀇𑀤𑀁 𑀬𑀤𑀺 𑀪𑀕𑀯𑀸 𑀲𑀺𑀓𑁆𑀔𑀸𑀧𑀤𑀁 𑀦 𑀧𑀜𑁆𑀜𑀸𑀧𑁂𑀬𑁆𑀬, 𑀢𑀢𑁄 𑀅𑀲𑀤𑁆𑀥𑀫𑁆𑀫𑀧𑁆𑀧𑀝𑀺𑀲𑁂𑀯𑀦𑀅𑀤𑀺𑀦𑁆𑀦𑀸𑀤𑀸𑀦𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀳𑁂𑀢𑀼 𑀬𑁂 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀧𑀭𑀽𑀧𑀯𑀸𑀤𑀸𑀤𑀬𑁄 𑀤𑀺𑀝𑁆𑀞𑀥𑀫𑁆𑀫𑀺𑀓𑀸 𑀦𑀸𑀦𑀧𑁆𑀧𑀓𑀸𑀭𑀸 𑀅𑀦𑀢𑁆𑀣𑀸, 𑀬𑁂 𑀘 𑀢𑀦𑁆𑀦𑀺𑀫𑀺𑀢𑁆𑀢𑀫𑁂𑀯 𑀦𑀺𑀭𑀬𑀸𑀤𑀻𑀲𑀼 𑀦𑀺𑀩𑁆𑀩𑀢𑁆𑀢𑀲𑁆𑀲 𑀧𑀜𑁆𑀘𑀯𑀺𑀥𑀩𑀦𑁆𑀥𑀦𑀓𑀫𑁆𑀫𑀓𑀸𑀭𑀡𑀸𑀤𑀺𑀯𑀲𑁂𑀦 𑀫𑀳𑀸𑀤𑀼𑀓𑁆𑀔𑀸𑀦𑀼𑀪𑀯𑀸𑀤𑀺𑀧𑁆𑀧𑀓𑀸𑀭𑀸 𑀅𑀦𑀢𑁆𑀣𑀸, 𑀢𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀢𑁂 𑀧𑀦𑁂𑀢𑁂𑀢𑀺 𑀏𑀢𑁂 𑀓𑀸𑀫𑀭𑀸𑀕𑀸𑀤𑀺𑀓𑀺𑀮𑁂𑀲𑀢𑁂𑀪𑀽𑀫𑀓𑀓𑀫𑁆𑀫𑀧𑀭𑀽𑀧𑀯𑀸𑀤𑀸𑀤𑀺𑀉𑀧𑁆𑀧𑀤𑁆𑀤𑀯𑀧𑁆𑀧𑀓𑀸𑀭𑀸 𑀆𑀲𑀯𑀸. 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀯𑀺𑀦𑀬𑀸𑀤𑀺𑀧𑀸𑀴𑀺𑀧𑁆𑀧𑀤𑁂𑀲𑁂. 𑀬𑀣𑀸𑀢𑀺 𑀬𑁂𑀦 𑀤𑀼𑀯𑀺𑀥𑀸𑀤𑀺𑀧𑁆𑀧𑀓𑀸𑀭𑁂𑀦 𑀅𑀯𑀲𑁂𑀲𑁂𑀲𑀼 𑀘 𑀲𑀼𑀢𑁆𑀢𑀦𑁆𑀢𑁂𑀲𑀼 𑀢𑀺𑀥𑀸 𑀆𑀕𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀦𑀺𑀭𑀬𑀁 𑀕𑀫𑁂𑀦𑁆𑀢𑀻𑀢𑀺 𑀦𑀺𑀭𑀬𑀕𑀸𑀫𑀺𑀦𑀺𑀬𑀸. 𑀙𑀓𑁆𑀓𑀦𑀺𑀧𑀸𑀢𑁂𑀢𑀺 𑀙𑀓𑁆𑀓𑀦𑀺𑀧𑀸𑀢𑁂 𑀆𑀳𑀼𑀦𑁂𑀬𑁆𑀬𑀲𑀼𑀢𑁆𑀢𑁂 (𑀅. 𑀦𑀺. 𑁬.𑁫𑁮). 𑀢𑀢𑁆𑀣 𑀳𑀺 𑀆𑀲𑀯𑀸 𑀙𑀥𑀸 𑀆𑀕𑀢𑀸.

𑀲𑀭𑀲𑀪𑁂𑀤𑁄𑀢𑀺 𑀔𑀡𑀺𑀓𑀦𑀺𑀭𑁄𑀥𑁄. 𑀔𑀻𑀡𑀸𑀓𑀸𑀭𑁄𑀢𑀺 𑀅𑀘𑁆𑀘𑀦𑁆𑀢𑀸𑀬 𑀔𑀻𑀡𑀢𑀸. 𑀆𑀲𑀯𑀸 𑀔𑀻𑀬𑀦𑁆𑀢𑀺 𑀧𑀳𑀻𑀬𑀦𑁆𑀢𑀺 𑀏𑀢𑁂𑀦𑀸𑀢𑀺 𑀆𑀲𑀯𑀓𑁆𑀔𑀬𑁄, 𑀫𑀕𑁆𑀕𑁄. 𑀆𑀲𑀯𑀸𑀦𑀁 𑀔𑀬𑀦𑁆𑀢𑁂 𑀉𑀧𑁆𑀧𑀚𑁆𑀚𑀦𑀢𑁄 𑀆𑀲𑀯𑀓𑁆𑀔𑀬𑁄, 𑀨𑀮𑀁. 𑀆𑀲𑀯𑀓𑁆𑀔𑀬𑁂𑀦 𑀧𑀢𑁆𑀢𑀩𑁆𑀩𑀢𑁄 𑀆𑀲𑀯𑀸 𑀔𑀻𑀬𑀦𑁆𑀢𑀺 𑀏𑀢𑁆𑀣𑀸𑀢𑀺 𑀆𑀲𑀯𑀓𑁆𑀔𑀬𑁄, 𑀦𑀺𑀩𑁆𑀩𑀸𑀦𑀁. 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁨.𑁫𑁫𑁭-𑁫𑁬𑁦) 𑀯𑀺𑀢𑁆𑀣𑀸𑀭𑀺𑀢𑁄, 𑀢𑀲𑁆𑀫𑀸 𑀢𑀢𑁆𑀣, 𑀢𑀁 𑀲𑀁𑀯𑀡𑁆𑀡𑀦𑀸𑀬 𑀘 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄.

𑀢𑀣𑀸𑀢𑀺 𑀇𑀫𑀺𑀦𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀺𑀢𑁆𑀣𑀸𑀭𑀺𑀢𑀢𑀁 𑀉𑀧𑀲𑀁𑀳𑀭𑀢𑀺. 𑀓𑀼𑀲𑀮𑀧𑁆𑀧𑀯𑀢𑁆𑀢𑀺𑀁 𑀆𑀯𑀭𑀦𑁆𑀢𑀺 𑀦𑀺𑀯𑀸𑀭𑁂𑀦𑁆𑀢𑀻𑀢𑀺 𑀆𑀯𑀭𑀡𑀻𑀬𑀸. 𑀧𑀼𑀭𑀺𑀫𑀧𑁆𑀧𑀯𑀢𑁆𑀢𑀺𑀯𑀲𑁂𑀦𑀸𑀢𑀺 𑀦𑀺𑀤𑁆𑀤𑁄𑀓𑁆𑀓𑀫𑀦𑀢𑁄 𑀧𑀼𑀩𑁆𑀩𑁂 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀧𑀯𑀢𑁆𑀢𑀺𑀯𑀲𑁂𑀦. 𑀞𑀧𑁂𑀢𑁆𑀯𑀸𑀢𑀺 𑀳𑀢𑁆𑀣𑀕𑀢𑀁 𑀓𑀺𑀜𑁆𑀘𑀺 𑀞𑀧𑁂𑀦𑁆𑀢𑁄 𑀯𑀺𑀬 𑀓𑀫𑁆𑀫𑀝𑁆𑀞𑀸𑀦𑀁 𑀲𑀢𑀺𑀲𑀫𑁆𑀧𑀚𑀜𑁆𑀜𑀯𑀲𑁂𑀦 𑀞𑀧𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀫𑁂𑀯 𑀫𑀦𑀲𑀺𑀓𑀭𑁄𑀦𑁆𑀢𑁄 𑀦𑀺𑀤𑁆𑀤𑀁 𑀑𑀓𑁆𑀓𑀫𑀢𑀺, 𑀛𑀸𑀦𑀲𑀫𑀸𑀧𑀦𑁆𑀦𑁄 𑀯𑀺𑀬 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑁂𑀦𑁂𑀯 𑀓𑀸𑀮𑁂𑀦 𑀧𑀩𑀼𑀚𑁆𑀛𑀫𑀸𑀦𑁄 𑀓𑀫𑁆𑀫𑀝𑁆𑀞𑀸𑀦𑀁 𑀞𑀧𑀺𑀢𑀝𑁆𑀞𑀸𑀦𑁂 𑀕𑀡𑁆𑀳𑀦𑁆𑀢𑁄𑀬𑁂𑀯 𑀧𑀩𑀼𑀚𑁆𑀛𑀢𑀺 𑀦𑀸𑀫. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀲𑁆𑀫𑀸…𑀧𑁂… 𑀦𑀸𑀫 𑀳𑁄𑀢𑀻’’𑀢𑀺. 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑁂𑀢𑀺 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀧𑀭𑀺𑀳𑀭𑀺𑀬𑀫𑀸𑀦𑀓𑀫𑁆𑀫𑀝𑁆𑀞𑀸𑀦𑁂. 𑀧𑀭𑀺𑀕𑁆𑀕𑀳𑀓𑀫𑁆𑀫𑀝𑁆𑀞𑀸𑀦𑀯𑀲𑁂𑀦𑀸𑀢𑀺 𑀲𑀬𑀦𑀁 𑀉𑀧𑀕𑀘𑁆𑀙𑀦𑁆𑀢𑁂𑀦 𑀧𑀭𑀺𑀕𑁆𑀕𑀳𑀫𑀸𑀦𑀓𑀫𑁆𑀫𑀝𑁆𑀞𑀸𑀦𑀫𑀦𑀲𑀺𑀓𑀸𑀭𑀯𑀲𑁂𑀦. 𑀲𑁄 𑀧𑀦 𑀥𑀸𑀢𑀼𑀫𑀦𑀲𑀺𑀓𑀸𑀭𑀯𑀲𑁂𑀦 𑀇𑀘𑁆𑀙𑀺𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀬𑀁 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀅𑀧𑀡𑁆𑀡𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀅𑀢𑁆𑀢𑀩𑁆𑀬𑀸𑀩𑀸𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭. 𑀲𑀢𑁆𑀢𑀫𑁂 𑀩𑁆𑀬𑀸𑀩𑀸𑀥𑀦𑀁 𑀤𑀼𑀓𑁆𑀔𑀸𑀧𑀦𑀦𑁆𑀢𑀺 𑀆𑀳 ‘‘𑀅𑀢𑁆𑀢𑀩𑁆𑀬𑀸𑀩𑀸𑀥𑀸𑀬𑀸𑀢𑀺 𑀅𑀢𑁆𑀢𑀤𑀼𑀓𑁆𑀔𑀸𑀬𑀸’’𑀢𑀺. 𑀫𑀕𑁆𑀕𑀨𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀧𑀺 𑀓𑀸𑀬𑀲𑀼𑀘𑀭𑀺𑀢𑀸𑀤𑀺𑀲𑀗𑁆𑀕𑀳𑁄 𑀏𑀯𑀸𑀢𑀺 𑀆𑀳 ‘‘𑀅𑀯𑀸𑀭𑀺𑀢𑀸𑀦𑁂𑀯𑀸’’𑀢𑀺.

𑀅𑀢𑁆𑀢𑀩𑁆𑀬𑀸𑀩𑀸𑀥𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀤𑁂𑀯𑀮𑁄𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁮. 𑀅𑀝𑁆𑀞𑀫𑁂 𑀇𑀢𑀻𑀢𑀺 𑀧𑀤𑀲𑀦𑁆𑀥𑀺𑀩𑁆𑀬𑀜𑁆𑀚𑀦𑀲𑀺𑀮𑀺𑀝𑁆𑀞𑀢𑀸𑀢𑀺 𑀧𑀼𑀭𑀺𑀫𑀧𑀤𑀸𑀦𑀁 𑀧𑀘𑁆𑀙𑀺𑀫𑀧𑀤𑁂𑀳𑀺 𑀅𑀢𑁆𑀣𑀢𑁄 𑀲𑀳𑀺𑀢𑀢𑀸𑀬 𑀩𑁆𑀬𑀜𑁆𑀚𑀦𑀸𑀦𑀁 𑀯𑀸𑀓𑁆𑀬𑀸𑀦𑀁 𑀲𑀺𑀮𑀺𑀝𑁆𑀞𑀢𑀸𑀬 𑀤𑀻𑀧𑀦𑁂 𑀦𑀺𑀧𑀸𑀢𑁄.

𑀤𑁂𑀯𑀮𑁄𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀧𑀞𑀫𑀧𑀸𑀧𑀡𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁯. 𑀦𑀯𑀫𑁂 𑀉𑀕𑁆𑀖𑀸𑀝𑁂𑀢𑁆𑀯𑀸𑀢𑀺 𑀆𑀲𑀦𑀤𑁆𑀯𑀸𑀭𑀜𑁆𑀘𑁂𑀯 𑀪𑀡𑁆𑀟𑀧𑀲𑀺𑀩𑁆𑀩𑀓𑁂 𑀘 𑀯𑀺𑀯𑀭𑀺𑀢𑁆𑀯𑀸. 𑀦𑀸𑀥𑀺𑀝𑁆𑀞𑀸𑀢𑀻𑀢𑀺 𑀢𑀁𑀢𑀁𑀓𑀬𑀯𑀺𑀓𑁆𑀓𑀬𑁂 𑀅𑀢𑁆𑀢𑀦𑀸 𑀯𑁄𑀬𑁄𑀕𑀁 𑀦𑀸𑀧𑀚𑁆𑀚𑀢𑀺. 𑀤𑀺𑀯𑀸𑀓𑀸𑀮𑁂𑀢𑀺 𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑁂. 𑀅𑀲𑁆𑀲𑀸𑀫𑀺𑀓𑁄 𑀳𑁄𑀢𑀺 𑀢𑀻𑀲𑀼𑀧𑀺 𑀓𑀸𑀮𑁂𑀲𑀼 𑀮𑀤𑁆𑀥𑀩𑁆𑀩𑀮𑀸𑀪𑀲𑁆𑀲 𑀅𑀮𑀪𑀦𑀢𑁄. 𑀅𑀧𑀢𑀺𑀯𑀸𑀢𑀸𑀩𑀸𑀥𑀁 𑀭𑀢𑁆𑀢𑀺𑀝𑁆𑀞𑀸𑀦𑀁. 𑀙𑀸𑀬𑀼𑀤𑀓𑀲𑀫𑁆𑀧𑀦𑁆𑀦𑀁 𑀤𑀺𑀯𑀸𑀝𑁆𑀞𑀸𑀦𑀁. 𑀯𑀺𑀧𑀲𑁆𑀲𑀦𑀸𑀧𑀺 𑀯𑀝𑁆𑀝𑀢𑀺 𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀺𑀓𑁄𑀬𑁂𑀯. 𑀢𑁂𑀦𑀧𑀺 𑀳𑀺 𑀦𑀯𑀥𑀸 𑀇𑀦𑁆𑀤𑁆𑀭𑀺𑀬𑀸𑀦𑀁 𑀢𑀺𑀓𑁆𑀔𑀢𑁆𑀢𑀁 𑀆𑀧𑀸𑀤𑁂𑀦𑁆𑀢𑁂𑀦 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑀁 𑀕𑀳𑁂𑀢𑀩𑁆𑀩𑀁, 𑀯𑀺𑀧𑀲𑁆𑀲𑀦𑀸𑀦𑀺𑀫𑀺𑀢𑁆𑀢𑀁 𑀲𑀫𑀸𑀳𑀺𑀢𑀸𑀓𑀸𑀭𑀲𑀮𑁆𑀮𑀓𑁆𑀔𑀡𑀸𑀬.

𑀧𑀞𑀫𑀧𑀸𑀧𑀡𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀤𑀼𑀢𑀺𑀬𑀧𑀸𑀧𑀡𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦. 𑀤𑀲𑀫𑁂 𑀯𑀺𑀲𑀺𑀝𑁆𑀞𑀥𑀼𑀭𑁄𑀢𑀺 𑀯𑀺𑀲𑀺𑀝𑁆𑀞𑀥𑀼𑀭𑀲𑀫𑁆𑀧𑀕𑁆𑀕𑀸𑀳𑁄 𑀯𑀻𑀭𑀺𑀬𑀲𑀫𑁆𑀧𑀦𑁆𑀦𑁄. 𑀜𑀸𑀡𑀯𑀻𑀭𑀺𑀬𑀸𑀬𑀢𑁆𑀢𑀸 𑀳𑀺 𑀅𑀢𑁆𑀣𑀲𑀺𑀤𑁆𑀥𑀺𑀬𑁄. 𑀢𑁂𑀦𑀸𑀳 ‘‘𑀉𑀢𑁆𑀢𑀫𑀥𑀼𑀭𑁄’’𑀢𑀺𑀆𑀤𑀺. 𑀯𑀺𑀓𑁆𑀓𑀸𑀬𑀺𑀓𑀪𑀡𑁆𑀟𑀦𑁆𑀢𑀺 𑀯𑀺𑀓𑁆𑀓𑀬𑁂𑀢𑀩𑁆𑀩𑀪𑀡𑁆𑀟𑀁. 𑀦𑀺𑀓𑁆𑀔𑀺𑀢𑁆𑀢𑀥𑀦𑁂𑀦𑀸𑀢𑀺 𑀦𑀺𑀤𑀳𑀺𑀢𑁆𑀯𑀸 𑀞𑀧𑀺𑀢𑀥𑀦𑀯𑀲𑁂𑀦. 𑀯𑀴𑀜𑁆𑀚𑀦𑀓𑀯𑀲𑁂𑀦𑀸𑀢𑀺 𑀤𑀺𑀯𑀲𑁂 𑀤𑀺𑀯𑀲𑁂 𑀤𑀸𑀦𑀽𑀧𑀪𑁄𑀕𑀯𑀲𑁂𑀦 𑀯𑀴𑀜𑁆𑀚𑀺𑀢𑀩𑁆𑀩𑀥𑀦𑀯𑀲𑁂𑀦. 𑀉𑀧𑀪𑁄𑀕𑀧𑀭𑀺𑀪𑁄𑀕𑀪𑀡𑁆𑀟𑁂𑀦𑀸𑀢𑀺 𑀉𑀧𑀪𑁄𑀕𑀧𑀭𑀺𑀪𑁄𑀕𑀽𑀧𑀓𑀭𑀡𑁂𑀦. 𑀦𑀺𑀧𑀢𑀦𑁆𑀢𑀻𑀢𑀺 𑀦𑀺𑀧𑀸𑀢𑁂𑀦𑁆𑀢𑀺, 𑀅𑀢𑁆𑀢𑀦𑁄 𑀥𑀦𑀕𑁆𑀕𑀳𑁂𑀦 𑀦𑀺𑀧𑀸𑀢𑀯𑀼𑀢𑁆𑀢𑀺𑀓𑁂 𑀓𑀭𑁄𑀦𑁆𑀢𑀺. 𑀢𑁂𑀦𑀸𑀳 ‘‘𑀦𑀺𑀫𑀦𑁆𑀢𑁂𑀦𑁆𑀢𑀻’’𑀢𑀺.

𑀜𑀸𑀡𑀣𑀸𑀫𑁂𑀦𑀸𑀢𑀺 𑀜𑀸𑀡𑀲𑁆𑀲 𑀣𑀺𑀭𑀪𑀸𑀯𑁂𑀦. 𑀜𑀸𑀡𑀧𑀭𑀓𑁆𑀓𑀫𑁂𑀦𑀸𑀢𑀺 𑀜𑀸𑀡𑀲𑀳𑀺𑀢𑁂𑀦 𑀯𑀻𑀭𑀺𑀬𑁂𑀦. 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀧𑀭𑀫𑀢𑁆𑀣𑀪𑁂𑀤𑀜𑁆𑀳𑀺 𑀬𑁂𑀦 𑀲𑀼𑀢𑁂𑀦 𑀇𑀚𑁆𑀛𑀢𑀺, 𑀢𑀁 𑀲𑀼𑀢𑀁 𑀦𑀸𑀫. 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀓𑀦𑀺𑀓𑀸𑀬…𑀧𑁂… 𑀩𑀳𑀼𑀲𑁆𑀲𑀼𑀢𑀸’’𑀢𑀺 𑀆𑀳. 𑀆𑀕𑀢𑁄𑀢𑀺 𑀲𑀼𑀧𑁆𑀧𑀯𑀢𑁆𑀢𑀺𑀪𑀸𑀯𑁂𑀦 𑀲𑁆𑀯𑀸𑀕𑀢𑁄. 𑀢𑁂𑀦𑀸𑀳 ‘‘𑀧𑀕𑀼𑀡𑁄 𑀧𑀯𑀢𑁆𑀢𑀺𑀢𑁄’’𑀢𑀺. 𑀅𑀪𑀺𑀥𑀫𑁆𑀫𑁂 𑀆𑀕𑀢𑀸 𑀓𑀼𑀲𑀮𑀸𑀤𑀺𑀓𑁆𑀔𑀦𑁆𑀥𑀸𑀤𑀺𑀪𑁂𑀤𑀪𑀺𑀦𑁆𑀦𑀸 𑀥𑀫𑁆𑀫𑀸 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑁂𑀧𑀺 𑀑𑀢𑀭𑀦𑁆𑀢𑀻𑀢𑀺 ‘‘𑀥𑀫𑁆𑀫𑀥𑀭𑀸𑀢𑀺 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀥𑀭𑀸’’𑀇𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀦 𑀳𑀺 𑀆𑀪𑀺𑀥𑀫𑁆𑀫𑀺𑀓𑀪𑀸𑀯𑁂𑀦 𑀯𑀺𑀦𑀸 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀜𑁆𑀜𑀼𑀢𑀸 𑀲𑀫𑁆𑀪𑀯𑀢𑀺. 𑀤𑁆𑀯𑁂𑀫𑀸𑀢𑀺𑀓𑀸𑀥𑀭𑀸𑀢𑀺 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀺𑀫𑀸𑀢𑀺𑀓𑀸𑀯𑀲𑁂𑀦 𑀤𑁆𑀯𑁂𑀫𑀸𑀢𑀺𑀓𑀸𑀥𑀭𑀸𑀢𑀺 𑀯𑀤𑀦𑁆𑀢𑀺, ‘‘𑀯𑀺𑀦𑀬𑀸𑀪𑀺𑀥𑀫𑁆𑀫𑀫𑀸𑀢𑀺𑀓𑀸𑀥𑀭𑀸’’𑀢𑀺 𑀬𑀼𑀢𑁆𑀢𑀁. 𑀧𑀭𑀺𑀧𑀼𑀘𑁆𑀙𑀢𑀻𑀢𑀺 𑀲𑀩𑁆𑀩𑀪𑀸𑀕𑁂𑀦 𑀧𑀼𑀘𑁆𑀙𑀺𑀢𑀩𑁆𑀩𑀁 𑀧𑀼𑀘𑁆𑀙𑀢𑀺. 𑀢𑁂𑀦𑀸𑀳 ‘‘𑀅𑀢𑁆𑀣𑀸𑀦𑀢𑁆𑀣𑀁 𑀓𑀸𑀭𑀡𑀸𑀓𑀸𑀭𑀡𑀁 𑀧𑀼𑀘𑁆𑀙𑀢𑀻’’𑀢𑀺. 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀯𑀺𑀘𑀸𑀭𑁂𑀢𑀺.

𑀦 𑀏𑀯𑀁 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄𑀢𑀺 𑀏𑀯𑀁 𑀤𑁂𑀲𑀦𑀸𑀦𑀼𑀓𑁆𑀓𑀫𑁂𑀦 𑀅𑀢𑁆𑀣𑁄 𑀦 𑀕𑀳𑁂𑀢𑀩𑁆𑀩𑁄. 𑀅𑀜𑁆𑀜𑁄 𑀳𑀺 𑀤𑁂𑀲𑀦𑀸𑀓𑁆𑀓𑀫𑁄 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀯𑀲𑁂𑀦 𑀧𑀯𑀢𑁆𑀢𑀦𑀢𑁄, 𑀅𑀜𑁆𑀜𑁄 𑀧𑀝𑀺𑀧𑀢𑁆𑀢𑀺𑀓𑁆𑀓𑀫𑁄. 𑀳𑁂𑀝𑁆𑀞𑀺𑀫𑁂𑀦 𑀯𑀸 𑀧𑀭𑀺𑀘𑁆𑀙𑁂𑀤𑁄𑀢𑀺 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀲𑀗𑁆𑀔𑀸𑀢𑁂𑀲𑀼 𑀢𑀻𑀲𑀼 𑀪𑀸𑀕𑁂𑀲𑀼 𑀓𑀢𑁆𑀣𑀘𑀺 𑀳𑁂𑀝𑁆𑀞𑀺𑀫𑀦𑀬𑁂𑀦 𑀤𑁂𑀲𑀦𑀸𑀬 𑀧𑀭𑀺𑀘𑁆𑀙𑁂𑀤𑀁 𑀯𑁂𑀤𑀺𑀢𑀩𑁆𑀩𑀁 𑀲𑀻𑀮𑁂𑀦, 𑀓𑀢𑁆𑀣𑀘𑀺 𑀉𑀧𑀭𑀺𑀫𑁂𑀦 𑀪𑀸𑀕𑁂𑀦 𑀧𑀜𑁆𑀜𑀸𑀬, 𑀓𑀢𑁆𑀣𑀘𑀺 𑀤𑁆𑀯𑀻𑀳𑀺𑀧𑀺 𑀪𑀸𑀕𑁂𑀳𑀺 𑀲𑀻𑀮𑀧𑀜𑁆𑀜𑀸𑀯𑀲𑁂𑀦. 𑀇𑀥 𑀧𑀦 𑀲𑀼𑀢𑁆𑀢𑁂 𑀉𑀧𑀭𑀺𑀫𑁂𑀦 𑀪𑀸𑀕𑁂𑀦 𑀧𑀭𑀺𑀘𑁆𑀙𑁂𑀤𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀯𑀢𑁆𑀯𑀸 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀲𑁆𑀫𑀸’’𑀢𑀺𑀆𑀤𑀺𑀫𑀸𑀳. 𑀬𑀲𑁆𑀫𑀸 𑀯𑀸 𑀪𑀕𑀯𑀸 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀯𑀲𑁂𑀦 𑀧𑀞𑀫𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀁 𑀤𑀲𑁆𑀲𑁂𑀦𑁆𑀢𑁄 𑀅𑀭𑀳𑀢𑁆𑀢𑀁 𑀧𑀯𑁂𑀤𑁂𑀢𑁆𑀯𑀸 ‘‘𑀢𑀬𑀺𑀤𑀁 𑀅𑀭𑀳𑀢𑁆𑀢𑀁 𑀇𑀫𑀸𑀬 𑀆𑀭𑀤𑁆𑀥𑀯𑀻𑀭𑀺𑀬𑀢𑀸𑀬 𑀳𑁄𑀢𑀻’’𑀢𑀺 𑀤𑀲𑁆𑀲𑁂𑀦𑁆𑀢𑁄 𑀯𑀻𑀭𑀺𑀬𑀸𑀭𑀫𑁆𑀪𑀁 𑀧𑀯𑁂𑀤𑁂𑀢𑁆𑀯𑀸 ‘‘𑀲𑁆𑀯𑀸𑀬𑀁 𑀯𑀻𑀭𑀺𑀬𑀸𑀭𑀫𑁆𑀪𑁄 𑀇𑀫𑀺𑀦𑀸 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑀦𑁆𑀦𑀺𑀲𑁆𑀲𑀬𑁂𑀦 𑀪𑀯𑀢𑀻’’𑀢𑀺 𑀤𑀲𑁆𑀲𑁂𑀦𑁆𑀢𑁄 𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀁 𑀧𑀯𑁂𑀤𑁂𑀢𑀺 𑀳𑁂𑀝𑁆𑀞𑀸 𑀤𑀲𑁆𑀲𑀺𑀢𑀦𑀺𑀤𑀲𑁆𑀲𑀦𑀸𑀦𑀼𑀭𑀽𑀧𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀤𑀼𑀢𑀺𑀬𑀧𑀸𑀧𑀡𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀭𑀣𑀓𑀸𑀭𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀧𑀼𑀕𑁆𑀕𑀮𑀯𑀕𑁆𑀕𑁄

𑁧. 𑀲𑀫𑀺𑀤𑁆𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧. 𑀢𑀢𑀺𑀬𑀲𑁆𑀲 𑀧𑀞𑀫𑁂 𑀭𑀼𑀘𑁆𑀘𑀢𑀻𑀢𑀺 𑀓𑀸𑀬𑀲𑀓𑁆𑀔𑀺𑀆𑀤𑀻𑀲𑀼 𑀧𑀼𑀕𑁆𑀕𑀮𑁂𑀲𑀼 𑀅𑀢𑀺𑀯𑀺𑀬 𑀲𑀼𑀦𑁆𑀤𑀭𑀢𑀭𑀧𑀡𑀻𑀢𑀢𑀭𑀪𑀸𑀯𑁂𑀦 𑀢𑁂 𑀘𑀺𑀢𑁆𑀢𑀲𑁆𑀲 𑀅𑀪𑀺𑀭𑀼𑀘𑀺𑀉𑀧𑁆𑀧𑀸𑀤𑀓𑁄 𑀓𑀢𑀫𑁄𑀢𑀺 𑀧𑀼𑀘𑁆𑀙𑀢𑀺. 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀥𑀼𑀭𑀁 𑀅𑀳𑁄𑀲𑀺 𑀲𑀤𑁆𑀥𑀸𑀥𑀼𑀭𑀁 𑀫𑀕𑁆𑀕𑀯𑀼𑀝𑁆𑀞𑀸𑀦𑀦𑁆𑀢𑀺 𑀓𑀢𑁆𑀯𑀸, 𑀲𑁂𑀲𑀺𑀦𑁆𑀤𑁆𑀭𑀺𑀬𑀸𑀦𑀺 𑀧𑀦 𑀓𑀣𑀦𑁆𑀢𑀺 𑀆𑀳 ‘‘𑀲𑁂𑀲𑀸𑀦𑀻’’𑀢𑀺𑀆𑀤𑀺. 𑀧𑀝𑀺𑀯𑀺𑀤𑁆𑀥𑀫𑀕𑁆𑀕𑁄𑀯𑀸𑀢𑀺 𑀢𑀻𑀳𑀺𑀧𑀺 𑀣𑁂𑀭𑁂𑀳𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀝𑀺𑀯𑀺𑀤𑁆𑀥𑀅𑀭𑀳𑀢𑁆𑀢𑀫𑀕𑁆𑀕𑁄 𑀏𑀯 𑀓𑀣𑀺𑀢𑁄, 𑀢𑀲𑁆𑀫𑀸 𑀦 𑀲𑀼𑀓𑀭𑀁 𑀏𑀓𑀁𑀲𑁂𑀦 𑀩𑁆𑀬𑀸𑀓𑀸𑀢𑀼𑀁 ‘‘𑀅𑀬𑀁…𑀧𑁂… 𑀧𑀡𑀻𑀢𑀢𑀭𑁄 𑀘𑀸’’𑀢𑀺. 𑀪𑀼𑀫𑁆𑀫𑀦𑁆𑀢𑀭𑁂𑀦𑁂𑀯 𑀓𑀣𑁂𑀲𑀺 ‘‘𑀢𑀻𑀲𑀼𑀧𑀺 𑀧𑀼𑀕𑁆𑀕𑀮𑁂𑀲𑀼 𑀅𑀕𑁆𑀕𑀫𑀕𑁆𑀕𑀝𑁆𑀞𑁄𑀯 𑀧𑀡𑀻𑀢𑀢𑀭𑁄’’𑀢𑀺.

𑀲𑀫𑀺𑀤𑁆𑀥𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀕𑀺𑀮𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨. 𑀤𑀼𑀢𑀺𑀬𑁂 𑀳𑀺𑀢𑀸𑀦𑀻𑀢𑀺 𑀪𑀩𑁆𑀬𑀸𑀦𑀺. 𑀯𑀼𑀤𑁆𑀥𑀺𑀓𑀭𑀸𑀦𑀻𑀢𑀺 𑀆𑀭𑁄𑀕𑁆𑀬𑀸𑀤𑀺𑀯𑀼𑀤𑁆𑀥𑀺𑀓𑀭𑀸𑀦𑀺. 𑀅𑀦𑀼𑀘𑁆𑀙𑀯𑀺𑀓𑀦𑁆𑀢𑀺 𑀉𑀧𑀝𑁆𑀞𑀸𑀦𑀓𑀺𑀭𑀺𑀬𑀸𑀬 𑀅𑀦𑀼𑀭𑀽𑀧𑀁. 𑀯𑀸𑀢𑀸𑀧𑀫𑀸𑀭𑀭𑁄𑀕𑁂𑀦𑀸𑀢𑀺 𑀯𑀸𑀢𑀭𑁄𑀕𑁂𑀦 𑀘 𑀅𑀧𑀫𑀸𑀭𑀭𑁄𑀕𑁂𑀦 𑀘, 𑀯𑀸𑀢𑀦𑀺𑀤𑀸𑀦𑁂𑀦 𑀯𑀸 𑀅𑀧𑀫𑀸𑀭𑀭𑁄𑀕𑁂𑀦. 𑀦𑀺𑀝𑁆𑀞𑀧𑁆𑀧𑀢𑁆𑀢𑀕𑀺𑀮𑀸𑀦𑁄𑀢𑀺 ‘‘𑀇𑀫𑀺𑀦𑀸 𑀭𑁄𑀕𑁂𑀦 𑀦 𑀘𑀺𑀭𑀲𑁆𑀲𑁂𑀯 𑀫𑀭𑀺𑀲𑁆𑀲𑀢𑀻’’𑀢𑀺 𑀦𑀺𑀝𑁆𑀞𑀁 𑀧𑀢𑁆𑀢𑁄 𑀕𑀺𑀮𑀸𑀦𑁄. 𑀔𑀺𑀧𑀺𑀢𑀓𑀁 𑀦𑀸𑀫 𑀯𑀫𑀣𑀼𑀭𑁄𑀕𑁄. 𑀓𑀘𑁆𑀙𑀽𑀢𑀺 𑀣𑀼𑀮𑁆𑀮𑀓𑀘𑁆𑀙𑀼𑀆𑀩𑀸𑀥𑁄. 𑀢𑀺𑀡𑀧𑀼𑀧𑁆𑀨𑀓𑀚𑀭𑁄 𑀯𑀺𑀲𑀫𑀯𑀸𑀢𑀲𑀫𑁆𑀨𑀲𑁆𑀲𑀚𑀭𑁄𑀕𑁄. 𑀬𑁂𑀲𑀦𑁆𑀢𑀺 𑀬𑁂𑀲𑀁 𑀭𑁄𑀕𑀸𑀦𑀁. 𑀧𑀝𑀺𑀚𑀕𑁆𑀕𑀦𑁂𑀦𑀸𑀢𑀺 𑀧𑀝𑀺𑀓𑀸𑀭𑀫𑀢𑁆𑀢𑁂𑀦. 𑀨𑀸𑀲𑀼𑀓𑀦𑁆𑀢𑀺 𑀩𑁆𑀬𑀸𑀥𑀺𑀯𑀽𑀧𑀲𑀫𑀦𑁂𑀦 𑀲𑀭𑀻𑀭𑀲𑁆𑀲 𑀨𑀸𑀲𑀼𑀪𑀸𑀯𑁄. 𑀩𑁆𑀬𑀸𑀥𑀺𑀦𑀺𑀤𑀸𑀦𑀲𑀫𑀼𑀝𑁆𑀞𑀸𑀦𑀚𑀸𑀦𑀦𑁂𑀦 𑀧𑀡𑁆𑀟𑀺𑀢𑁄, 𑀧𑀝𑀺𑀓𑀸𑀭𑀓𑀺𑀭𑀺𑀬𑀸𑀬 𑀬𑀼𑀢𑁆𑀢𑀓𑀸𑀭𑀺𑀢𑀸𑀬 𑀤𑀓𑁆𑀔𑁄, 𑀉𑀝𑁆𑀞𑀸𑀦𑀯𑀻𑀭𑀺𑀬𑀲𑀫𑁆𑀧𑀢𑁆𑀢𑀺𑀬𑀸 𑀅𑀦𑀮𑀲𑁄.

𑀧𑀤𑀧𑀭𑀫𑁄 𑀧𑀼𑀕𑁆𑀕𑀮𑁄 𑀓𑀣𑀺𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑁄𑀓𑁆𑀓𑀫𑀦𑀲𑁆𑀲 𑀅𑀬𑁄𑀕𑁆𑀕𑀪𑀸𑀯𑀢𑁄. 𑀅𑀮𑀪𑀦𑁆𑀢𑁄𑀯 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑀁 𑀥𑀫𑁆𑀫𑀯𑀺𑀦𑀬𑀁 𑀲𑀯𑀦𑀸𑀬 𑀑𑀓𑁆𑀓𑀫𑀢𑀺 𑀦𑀺𑀬𑀸𑀫𑀁 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀲𑀫𑁆𑀫𑀢𑁆𑀢𑀁 𑀧𑀘𑁆𑀘𑁂𑀓𑀩𑁄𑀥𑀺𑀁. 𑀬𑀦𑁆𑀢𑀺, 𑀬𑀢𑁄. 𑀑𑀯𑀸𑀤𑀁 𑀮𑀪𑀺𑀢𑁆𑀯𑀸𑀢𑀺 𑀆𑀪𑀺𑀲𑀫𑀸𑀘𑀸𑀭𑀺𑀓𑀯𑀢𑁆𑀢𑀁 𑀑𑀯𑀸𑀤𑀫𑀢𑁆𑀢𑀁. 𑀏𑀢𑁆𑀢𑀓𑁄𑀧𑀺 𑀳𑀺 𑀢𑀲𑁆𑀲 𑀳𑀺𑀢𑀸𑀯𑀳𑁄𑀢𑀺. 𑀢𑀦𑁆𑀦𑀺𑀲𑁆𑀲𑀺𑀢𑁄𑀯𑀸𑀢𑀺 𑀯𑀺𑀧𑀜𑁆𑀘𑀺𑀢𑀜𑁆𑀜𑀼𑀦𑀺𑀲𑁆𑀲𑀺𑀢𑁄𑀯 𑀳𑁄𑀢𑀺. 𑀧𑀼𑀦𑀧𑁆𑀧𑀼𑀦𑀁 𑀤𑁂𑀲𑁂𑀢𑀩𑁆𑀩𑁄𑀯 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑁄𑀓𑁆𑀓𑀫𑀦𑀲𑁆𑀲 𑀬𑁄𑀕𑁆𑀕𑀪𑀸𑀯𑀢𑁄.

𑀕𑀺𑀮𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀲𑀗𑁆𑀔𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩. 𑀢𑀢𑀺𑀬𑁂 𑀯𑀺𑀯𑀺𑀥𑁂𑀳𑀺 𑀆𑀓𑀸𑀭𑁂𑀳𑀺 𑀆𑀩𑀸𑀥𑀦𑀢𑁄 𑀩𑁆𑀬𑀸𑀩𑀸𑀥𑁄𑀯 𑀩𑁆𑀬𑀸𑀩𑀚𑁆𑀛𑀁, 𑀓𑀸𑀬𑀺𑀓𑀁 𑀘𑁂𑀢𑀲𑀺𑀓𑀜𑁆𑀘 𑀤𑀼𑀓𑁆𑀔𑀁. 𑀲𑀳 𑀩𑁆𑀬𑀸𑀩𑀚𑁆𑀛𑁂𑀦 𑀯𑀢𑁆𑀢𑀢𑀻𑀢𑀺 𑀲𑀩𑁆𑀬𑀸𑀩𑀚𑁆𑀛𑀁. 𑀢𑁂𑀦𑀸𑀳 ‘‘𑀲𑀤𑀼𑀓𑁆𑀔’’𑀦𑁆𑀢𑀺. 𑀘𑁂𑀢𑀦𑀸𑀭𑀸𑀲𑀺𑀦𑁆𑀢𑀺 𑀧𑀼𑀩𑁆𑀩𑀘𑁂𑀢𑀦𑀸𑀤𑀺𑀭𑀸𑀲𑀺𑀁. 𑀘𑁂𑀢𑀦𑀁 𑀧𑀼𑀦𑀧𑁆𑀧𑀼𑀦𑀁 𑀧𑀯𑀢𑁆𑀢𑁂𑀦𑁆𑀢𑁄 ‘‘𑀭𑀸𑀲𑀺𑀁 𑀓𑀭𑁄𑀢𑀺 𑀧𑀺𑀡𑁆𑀟𑀁 𑀓𑀭𑁄𑀢𑀻’’𑀢𑀺 𑀘 𑀯𑀼𑀢𑁆𑀢𑁄. 𑀲𑀤𑀼𑀓𑁆𑀔𑀦𑁆𑀢𑀺 𑀦𑀺𑀭𑀦𑁆𑀢𑀭𑀤𑀼𑀓𑁆𑀔𑀁. 𑀢𑁂𑀦𑀸𑀳 ‘‘𑀲𑀸𑀩𑀸𑀥𑀁 𑀦𑀺𑀭𑀲𑁆𑀲𑀸𑀤’’𑀦𑁆𑀢𑀺. 𑀅𑀢𑁆𑀣𑀻𑀢𑀺 𑀉𑀚𑀼𑀓𑀁 𑀤𑀼𑀓𑁆𑀔𑀯𑁂𑀤𑀦𑀸 𑀦𑀢𑁆𑀣𑀻𑀢𑀺 𑀅𑀯𑀢𑁆𑀢𑀩𑁆𑀩𑀢𑁆𑀢𑀸 𑀯𑀼𑀢𑁆𑀢𑀁. 𑀅𑀦𑀺𑀝𑁆𑀞𑀲𑀪𑀸𑀯𑀢𑁆𑀢𑀸 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑀢𑁆𑀢𑀸 𑀘 𑀤𑀼𑀓𑁆𑀔𑀧𑀓𑁆𑀔𑀺𑀓𑀸𑀯 𑀲𑀸 𑀤𑀝𑁆𑀞𑀩𑁆𑀩𑀸. 𑀦 𑀳𑀺 𑀅𑀓𑀼𑀲𑀮𑀯𑀺𑀧𑀸𑀓𑀸 𑀇𑀝𑁆𑀞𑀸 𑀦𑀸𑀫 𑀅𑀢𑁆𑀣𑀻, 𑀓𑀼𑀲𑀮𑀯𑀺𑀧𑀸𑀓𑀸 𑀧𑀦 𑀉𑀧𑁂𑀓𑁆𑀔𑀸𑀯𑁂𑀤𑀦𑀸 𑀢𑀢𑁆𑀣 𑀅𑀧𑁆𑀧𑀸𑀯𑀲𑀭𑀸. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀦𑀺𑀭𑀬𑀲𑁆𑀲 𑀤𑀼𑀓𑁆𑀔𑀩𑀳𑀼𑀮𑀢𑁆𑀢𑀸 𑀤𑀼𑀓𑁆𑀔𑀲𑁆𑀲 𑀘 𑀢𑀢𑁆𑀣 𑀩𑀮𑀯𑀢𑀸𑀬 𑀲𑀸 𑀅𑀩𑁆𑀩𑁄𑀳𑀸𑀭𑀺𑀓𑀝𑁆𑀞𑀸𑀦𑁂 𑀞𑀺𑀢𑀸𑀢𑀺 𑀯𑀼𑀢𑁆𑀢𑀁. 𑀉𑀧𑀫𑀁 𑀓𑀢𑁆𑀯𑀸 𑀆𑀳𑀝𑁄 𑀯𑀺𑀲𑁂𑀲𑁄 𑀯𑀺𑀬 𑀲𑀸𑀫𑀜𑁆𑀜𑀲𑁆𑀲 𑀬𑀣𑀸 𑀅𑀬𑁄𑀧𑀺𑀡𑁆𑀟𑀺𑀭𑁄𑀳𑀺𑀦𑁄 𑀯𑀺𑀬 𑀭𑀽𑀧𑀸𑀦𑀦𑁆𑀢𑀺. 𑀧𑀝𑀺𑀪𑀸𑀕𑀉𑀧𑀫𑀸𑀢𑀺 𑀧𑀝𑀺𑀩𑀺𑀫𑁆𑀩𑀉𑀧𑀫𑀸.

𑀢𑁂 𑀅𑀕𑁆𑀕𑀳𑁂𑀢𑁆𑀯𑀸𑀢𑀺 𑀳𑁂𑀝𑁆𑀞𑀺𑀫𑀩𑁆𑀭𑀳𑁆𑀫𑀮𑁄𑀓𑁂 𑀅𑀕𑁆𑀕𑀳𑁂𑀢𑁆𑀯𑀸. 𑀯𑁄𑀫𑀺𑀲𑁆𑀲𑀓𑀲𑀼𑀔𑀤𑀼𑀓𑁆𑀔𑀦𑁆𑀢𑀺 𑀯𑀺𑀫𑀺𑀲𑁆𑀲𑀓𑀲𑀼𑀔𑀤𑀼𑀓𑁆𑀔𑀁 𑀧𑀻𑀢𑀺𑀫𑀺𑀲𑁆𑀲𑀓𑀪𑀸𑀯𑀢𑁄. 𑀓𑀫𑁆𑀫𑀦𑁆𑀢𑀺 𑀧𑀸𑀧𑀓𑀫𑁆𑀫𑀁. 𑀓𑀫𑁆𑀫𑀲𑀻𑀲𑁂𑀦 𑀨𑀮𑀁 𑀯𑀤𑀢𑀺. 𑀓𑀸𑀫𑀜𑁆𑀘𑁂𑀢𑁆𑀣 ‘‘𑀅𑀩𑁆𑀬𑀸𑀩𑀚𑁆𑀛𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀻’’𑀢𑀺 𑀆𑀕𑀢𑀁, ‘‘𑀅𑀩𑁆𑀬𑀸𑀩𑀚𑁆𑀛𑀸 𑀨𑀲𑁆𑀲𑀸 𑀨𑀼𑀲𑀦𑁆𑀢𑀻’’𑀢𑀺 𑀧𑀦 𑀯𑀘𑀦𑁂𑀦 𑀮𑁄𑀓𑀼𑀢𑁆𑀢𑀭𑀨𑀲𑁆𑀲𑀸𑀧𑀺 𑀲𑀗𑁆𑀕𑀬𑁆𑀳𑀦𑁆𑀢𑀻𑀢𑀺 ‘‘𑀢𑀻𑀡𑀺 𑀲𑀼𑀘𑀭𑀺𑀢𑀸𑀦𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸𑀦𑀺 𑀓𑀣𑀺𑀢𑀸𑀦𑀻’’𑀢𑀺 𑀯𑀼𑀢𑁆𑀢𑀁.

𑀲𑀗𑁆𑀔𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀩𑀳𑀼𑀓𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪. 𑀘𑀢𑀼𑀢𑁆𑀣𑁂 𑀅𑀯𑀲𑁆𑀲𑀬𑀁 𑀕𑀢𑁄𑀢𑀺 𑀯𑀝𑁆𑀝𑀤𑀼𑀓𑁆𑀔𑀧𑀭𑀺𑀫𑀼𑀢𑁆𑀢𑀺𑀬𑀸 𑀅𑀯𑀲𑁆𑀲𑀬𑁄 𑀫𑀬𑁆𑀳𑀦𑁆𑀢𑀺 𑀲𑀭𑀡𑀕𑀫𑀦𑀓𑁆𑀓𑀫𑁂𑀦 𑀉𑀧𑀕𑀢𑁄 𑀳𑁄𑀢𑀺. 𑀲𑀢𑀦𑁆𑀢𑀺𑀓𑀦𑁆𑀢𑀺 𑀲𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀁. 𑀅𑀕𑁆𑀕𑀳𑀺𑀢𑀲𑀭𑀡𑀧𑀼𑀩𑁆𑀩𑀲𑁆𑀲𑀸𑀢𑀺 𑀅𑀕𑁆𑀕𑀳𑀺𑀢𑀧𑀼𑀩𑁆𑀩𑀲𑀭𑀡𑀲𑁆𑀲. 𑀅𑀓𑀢𑀸𑀪𑀺𑀦𑀺𑀯𑁂𑀲𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀢𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀦 𑀓𑀢𑁄 𑀲𑀭𑀡𑀕𑀫𑀦𑀸𑀪𑀺𑀦𑀺𑀯𑁂𑀲𑁄 𑀬𑁂𑀦𑀸𑀢𑀺 𑀅𑀓𑀢𑀸𑀪𑀺𑀦𑀺𑀯𑁂𑀲𑁄, 𑀢𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑀁. 𑀓𑀸𑀫𑀁 𑀧𑀼𑀩𑁆𑀩𑁂𑀧𑀺 𑀲𑀭𑀡𑀤𑀸𑀬𑀓𑁄 𑀆𑀘𑀭𑀺𑀬𑁄 𑀯𑀼𑀢𑁆𑀢𑁄, 𑀧𑀩𑁆𑀩𑀚𑁆𑀚𑀸𑀤𑀸𑀬𑀓𑁄𑀧𑀺 𑀲𑀭𑀡𑀤𑀸𑀬𑀓𑁄𑀯. 𑀧𑀼𑀩𑁆𑀩𑁂 𑀧𑀦 𑀉𑀧𑀸𑀲𑀓𑀪𑀸𑀯𑀸𑀧𑀸𑀤𑀓𑀯𑀲𑁂𑀦 𑀲𑀭𑀡𑀤𑀸𑀬𑀓𑁄 𑀅𑀥𑀺𑀧𑁆𑀧𑁂𑀢𑁄. 𑀇𑀤𑀁 𑀧𑀦 𑀕𑀳𑀺𑀢𑀧𑀩𑁆𑀩𑀚𑁆𑀚𑀲𑁆𑀲 𑀲𑀭𑀡𑀕𑀫𑀦𑀁. 𑀧𑀩𑁆𑀩𑀚𑀸 𑀳𑀺 𑀲𑀯𑀺𑀲𑁂𑀲𑀁 𑀲𑀭𑀡𑀕𑀫𑀦𑀦𑁆𑀢𑀺 𑀧𑀩𑁆𑀩𑀚𑁆𑀚𑀸𑀤𑀸𑀬𑀓𑁄 𑀧𑀼𑀦 𑀯𑀼𑀢𑁆𑀢𑁄. 𑀏𑀢𑁂𑀢𑀺 𑀧𑀩𑁆𑀩𑀚𑁆𑀚𑀸𑀤𑀸𑀬𑀓𑀸𑀤𑀬𑁄. 𑀤𑀼𑀯𑀺𑀥𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀸𑀢𑀺 𑀮𑁄𑀓𑀺𑀬𑀥𑀫𑁆𑀫𑀲𑀫𑁆𑀧𑀸𑀧𑀓𑁄 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀲𑀫𑁆𑀧𑀸𑀧𑀓𑁄𑀢𑀺 𑀤𑁆𑀯𑀺𑀧𑁆𑀧𑀓𑀸𑀭𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀸, 𑀓𑀢𑀸𑀪𑀺𑀦𑀺𑀯𑁂𑀲𑀅𑀓𑀢𑀸𑀪𑀺𑀦𑀺𑀯𑁂𑀲𑀯𑀲𑁂𑀦 𑀯𑀸. 𑀉𑀧𑀭𑀻𑀢𑀺 𑀧𑀞𑀫𑀫𑀕𑁆𑀕𑀢𑁄 𑀉𑀧𑀭𑀺. 𑀦𑁂𑀯 𑀲𑀓𑁆𑀓𑁄𑀢𑀻𑀢𑀺 𑀆𑀘𑀭𑀺𑀬𑁂𑀦 𑀓𑀢𑀲𑁆𑀲 𑀉𑀧𑀓𑀸𑀭𑀲𑁆𑀲 𑀫𑀳𑀸𑀦𑀼𑀪𑀸𑀯𑀢𑁆𑀢𑀸 𑀢𑀲𑁆𑀲 𑀧𑀢𑀺𑀓𑀸𑀭𑀁 𑀦𑀸𑀫 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺.

𑀩𑀳𑀼𑀓𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀯𑀚𑀺𑀭𑀽𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁫. 𑀧𑀜𑁆𑀘𑀫𑁂 𑀅𑀭𑀼𑀇𑀢𑀺 𑀧𑀼𑀭𑀸𑀡𑀁 𑀤𑀼𑀝𑁆𑀞𑀯𑀡𑀁 𑀯𑀼𑀘𑁆𑀘𑀢𑀺. 𑀓-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄𑀢𑀺 𑀅𑀭𑀼𑀓𑀽𑀧𑀫𑀁 𑀘𑀺𑀢𑁆𑀢𑀁 𑀏𑀢𑀲𑁆𑀲𑀸𑀢𑀺 𑀅𑀭𑀼𑀓𑀽𑀧𑀫𑀘𑀺𑀢𑁆𑀢𑁄 𑀅𑀧𑁆𑀧𑀫𑀢𑁆𑀢𑀓𑀲𑁆𑀲𑀧𑀺 𑀤𑀼𑀓𑁆𑀔𑀲𑁆𑀲 𑀅𑀲𑀳𑀦𑀢𑁄. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀇𑀢𑁆𑀢𑀭𑀓𑀸𑀮𑁄𑀪𑀸𑀲𑁂𑀦𑀸𑀢𑀺 𑀧𑀭𑀺𑀢𑁆𑀢𑀫𑁂𑀯 𑀓𑀸𑀮𑁄 𑀜𑀸𑀡𑁄𑀪𑀸𑀲𑀯𑀺𑀭𑀳𑁂𑀦. 𑀮𑀕𑀢𑀻𑀢𑀺 𑀓𑁄𑀥𑀸𑀲𑀗𑁆𑀕𑀯𑀲𑁂𑀦 𑀓𑀼𑀧𑁆𑀧𑀦𑁆𑀢𑁄 𑀧𑀼𑀕𑁆𑀕𑀮𑁄 𑀲𑀫𑁆𑀫𑀼𑀔𑀸, ‘‘𑀓𑀺𑀁 𑀯𑀤𑀲𑀻’’𑀢𑀺𑀆𑀤𑀺𑀦𑀸 𑀧𑀭𑀫𑁆𑀫𑀼𑀔𑀸 𑀘 𑀉𑀧𑀦𑀬𑁆𑀳𑀦𑀯𑀲𑁂𑀦 𑀮𑀕𑀢𑀺, 𑀦 𑀢𑀡𑁆𑀳𑀸𑀲𑀗𑁆𑀕𑀯𑀲𑁂𑀦. 𑀓𑀼𑀧𑁆𑀧𑀢𑀻𑀢𑀺 𑀓𑀼𑀚𑁆𑀛𑀢𑀺. 𑀩𑁆𑀬𑀸𑀧𑀚𑁆𑀚𑀢𑀻𑀢𑀺 𑀯𑀺𑀧𑀦𑁆𑀦𑀘𑀺𑀢𑁆𑀢𑁄 𑀳𑁄𑀢𑀺. 𑀣𑀤𑁆𑀥𑀪𑀸𑀯𑀁 𑀆𑀧𑀚𑁆𑀚𑀢𑀺 𑀈𑀲𑀓𑀫𑁆𑀧𑀺 𑀫𑀼𑀤𑀼𑀢𑁆𑀢𑀸𑀪𑀸𑀯𑀢𑁄. 𑀤𑀼𑀝𑁆𑀞𑀸𑀭𑀼𑀓𑁄𑀢𑀺 𑀫𑀁𑀲𑀮𑁄𑀳𑀺𑀢𑀸𑀦𑀁 𑀤𑀼𑀝𑁆𑀞𑀪𑀸𑀯𑁂𑀦 𑀧𑀓𑀢𑀺𑀪𑀸𑀯𑀁 𑀚𑀳𑀺𑀢𑁆𑀯𑀸 𑀞𑀺𑀢𑁄 𑀤𑀼𑀝𑁆𑀞𑀯𑀡𑁄. ‘‘𑀤𑀼𑀝𑁆𑀞𑀸𑀭𑀼𑀢𑀸’’𑀢𑀺𑀧𑀺 𑀧𑀞𑀦𑁆𑀢𑀺, 𑀢𑀢𑁆𑀣𑀸𑀧𑀺 𑀢𑀸𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄.

𑀢𑀲𑁆𑀲𑀸𑀢𑀺 𑀤𑀼𑀝𑁆𑀞𑀸𑀭𑀼𑀓𑀲𑁆𑀲. 𑀲𑀯𑀦𑀦𑁆𑀢𑀺 𑀅𑀲𑀼𑀘𑀺𑀯𑀺𑀲𑀦𑁆𑀤𑀦𑀁. 𑀉𑀤𑁆𑀥𑀼𑀫𑀸𑀢𑀲𑁆𑀲 𑀯𑀺𑀬𑀸𑀢𑀺 𑀓𑁄𑀥𑁂𑀦 𑀉𑀤𑁆𑀥𑀁 𑀉𑀤𑁆𑀥𑀁 𑀥𑀼𑀫𑀸𑀢𑀓𑀲𑁆𑀲 𑀯𑀺𑀬 𑀓𑁄𑀥𑀽𑀧𑀸𑀬𑀸𑀲𑀲𑁆𑀲 𑀅𑀯𑀺𑀲𑁆𑀲𑀚𑁆𑀚𑀦𑀢𑁄. 𑀘𑀡𑁆𑀟𑀺𑀓𑀢𑀲𑁆𑀲𑀸𑀢𑀺 𑀓𑀼𑀧𑀺𑀢𑀲𑁆𑀲. 𑀏𑀢𑁆𑀣 𑀘 𑀓𑀺𑀜𑁆𑀘𑀸𑀧𑀺 𑀳𑁂𑀝𑁆𑀞𑀺𑀫𑀫𑀕𑁆𑀕𑀯𑀚𑁆𑀛𑀸𑀧𑀺 𑀓𑀺𑀮𑁂𑀲𑀸 𑀢𑁂𑀳𑀺 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀁 𑀆𑀧𑀸𑀤𑀺𑀢𑀢𑁆𑀢𑀸 𑀲𑀫𑀼𑀘𑁆𑀙𑀺𑀦𑁆𑀦𑀸, 𑀢𑀣𑀸𑀧𑀺 𑀢𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀅𑀕𑁆𑀕𑀫𑀕𑁆𑀕𑀲𑁆𑀲 𑀅𑀦𑀼𑀧𑁆𑀧𑀦𑁆𑀦𑀢𑁆𑀢𑀸 𑀢𑀢𑁆𑀣 𑀅𑀧𑁆𑀧𑀳𑀻𑀦𑀸𑀧𑀺 𑀓𑀺𑀮𑁂𑀲𑀸 𑀅𑀢𑁆𑀣𑁂𑀯𑀸𑀢𑀺 𑀓𑀢𑁆𑀯𑀸 𑀢𑁂𑀲𑀁 𑀜𑀸𑀡𑀸𑀦𑀁 𑀯𑀺𑀚𑁆𑀚𑀽𑀧𑀫𑀢𑀸 𑀯𑀼𑀢𑁆𑀢𑀸, 𑀦 𑀢𑁂𑀳𑀺 𑀫𑀕𑁆𑀕𑁂𑀳𑀺 𑀧𑀳𑀻𑀦𑀸𑀦𑀁 𑀓𑀺𑀮𑁂𑀲𑀸𑀦𑀁 𑀅𑀢𑁆𑀣𑀺𑀪𑀸𑀯𑀢𑁄𑀢𑀺 𑀤𑀝𑁆𑀞𑀩𑁆𑀩𑀁.

𑀯𑀚𑀺𑀭𑀽𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀲𑁂𑀯𑀺𑀢𑀩𑁆𑀩𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁬. 𑀙𑀝𑁆𑀞𑁂 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑁄𑀢𑀺 𑀓𑀸𑀮𑁂𑀦 𑀓𑀸𑀮𑀁 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑁄. 𑀅𑀮𑁆𑀮𑀻𑀬𑀺𑀢𑀩𑁆𑀩𑁄𑀢𑀺 𑀙𑀸𑀬𑀸𑀬 𑀯𑀺𑀬 𑀯𑀺𑀦𑀸 𑀪𑀸𑀯𑀦𑀸𑀬 𑀦𑀺𑀮𑁆𑀮𑀻𑀬𑀺𑀢𑀩𑁆𑀩𑁄. 𑀧𑀼𑀦𑀧𑁆𑀧𑀼𑀦𑀁 𑀉𑀧𑀸𑀲𑀺𑀢𑀩𑁆𑀩𑁄𑀢𑀺 𑀅𑀪𑀺𑀡𑁆𑀳𑀲𑁄 𑀉𑀧𑀦𑀺𑀲𑀻𑀤𑀺𑀢𑀩𑁆𑀩𑁄. 𑀅𑀦𑀼𑀤𑁆𑀤𑀬𑀸𑀢𑀺 𑀫𑁂𑀢𑁆𑀢𑀸𑀧𑀼𑀩𑁆𑀩𑀪𑀸𑀕𑁄. 𑀉𑀧𑀲𑀗𑁆𑀓𑀫𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 ‘‘𑀏𑀢𑀲𑁆𑀲 𑀲𑀻𑀮𑁂𑀦 𑀅𑀪𑀺𑀯𑀼𑀤𑁆𑀥𑀺 𑀪𑀯𑀺𑀲𑁆𑀲𑀢𑀻’’𑀢𑀺 𑀉𑀧𑀓𑀸𑀭𑀢𑁆𑀣𑀁 𑀉𑀧𑀲𑁂𑀯𑀦𑀸𑀤𑀺 𑀯𑀝𑁆𑀝𑀢𑀺.

𑀦 𑀧𑀝𑀺𑀳𑀜𑁆𑀜𑀺𑀲𑁆𑀲𑀢𑀻𑀢𑀺 ‘‘𑀅𑀧𑁂𑀳𑀺, 𑀓𑀺𑀁 𑀏𑀢𑁂𑀦𑀸’’𑀢𑀺 𑀧𑀝𑀺𑀓𑁆𑀔𑁂𑀧𑀸𑀪𑀸𑀯𑀢𑁄 𑀧𑀺𑀬𑀲𑀻𑀮𑀢𑁆𑀢𑀸 𑀦 𑀧𑀝𑀺𑀳𑀜𑁆𑀜𑀺𑀲𑁆𑀲𑀢𑀺. 𑀨𑀸𑀲𑀼 𑀪𑀯𑀺𑀲𑁆𑀲𑀢𑀻𑀢𑀺 𑀤𑁆𑀯𑀻𑀲𑀼 𑀳𑀺 𑀲𑀻𑀮𑀯𑀦𑁆𑀢𑁂𑀲𑀼 𑀏𑀓𑁂𑀦 𑀲𑀻𑀮𑀲𑁆𑀲 𑀯𑀡𑁆𑀡𑁂 𑀓𑀣𑀺𑀢𑁂 𑀇𑀢𑀭𑁄 𑀅𑀦𑀼𑀫𑁄𑀤𑀢𑀺. 𑀢𑁂𑀦 𑀢𑁂𑀲𑀁 𑀓𑀣𑀸 𑀨𑀸𑀲𑀼 𑀘𑁂𑀯 𑀳𑁄𑀢𑀺 𑀧𑀯𑀢𑁆𑀢𑀺𑀦𑀻 𑀘. 𑀏𑀓𑀲𑁆𑀫𑀺𑀁 𑀧𑀦 𑀤𑀼𑀲𑁆𑀲𑀻𑀮𑁂 𑀲𑀢𑀺 𑀤𑀼𑀲𑁆𑀲𑀻𑀮𑀲𑁆𑀲 𑀲𑀻𑀮𑀓𑀣𑀸 𑀤𑀼𑀓𑁆𑀓𑀣𑀸, 𑀦𑁂𑀯 𑀲𑀻𑀮𑀓𑀣𑀸 𑀳𑁄𑀢𑀺, 𑀦 𑀨𑀸𑀲𑀼 𑀳𑁄𑀢𑀺, 𑀦 𑀧𑀯𑀢𑁆𑀢𑀺𑀦𑀻. 𑀤𑀼𑀲𑁆𑀲𑀻𑀮𑀲𑁆𑀲 𑀳𑀺 𑀲𑀻𑀮𑀓𑀣𑀸 𑀅𑀨𑀸𑀲𑀼 𑀪𑀯𑀺𑀲𑁆𑀲𑀢𑀺. 𑀲𑀻𑀮𑀓𑀣𑀸𑀬 𑀯𑀼𑀢𑁆𑀢𑀫𑀢𑁆𑀣𑀁 𑀲𑀫𑀸𑀥𑀺𑀧𑀜𑁆𑀜𑀸𑀓𑀣𑀸𑀲𑀼𑀧𑀺 𑀅𑀢𑀺𑀤𑀺𑀲𑀢𑀺 ‘‘𑀲𑀫𑀸𑀥𑀺𑀧𑀜𑁆𑀜𑀸𑀓𑀣𑀸𑀲𑀼𑀧𑀺 𑀏𑀲𑁂𑀯 𑀦𑀬𑁄’’𑀢𑀺. 𑀤𑁆𑀯𑁂 𑀳𑀺 𑀲𑀫𑀸𑀥𑀺𑀮𑀸𑀪𑀺𑀦𑁄 𑀲𑀫𑀸𑀥𑀺𑀓𑀣𑀁 𑀲𑀧𑁆𑀧𑀜𑁆𑀜𑀸 𑀘 𑀧𑀜𑁆𑀜𑀸𑀓𑀣𑀁 𑀓𑀣𑁂𑀦𑁆𑀢𑀸 𑀭𑀢𑁆𑀢𑀺𑀁 𑀯𑀸 𑀤𑀺𑀯𑀲𑀁 𑀯𑀸 𑀅𑀢𑀺𑀓𑁆𑀓𑀫𑀦𑁆𑀢𑀫𑁆𑀧𑀺 𑀦 𑀚𑀸𑀦𑀦𑁆𑀢𑀺.

𑀢𑀢𑁆𑀣 𑀢𑀢𑁆𑀣 𑀧𑀜𑁆𑀜𑀸𑀬 𑀅𑀦𑀼𑀕𑁆𑀕𑀳𑁂𑀲𑁆𑀲𑀸𑀫𑀻𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀅𑀦𑀼𑀕𑁆𑀕𑀳𑁂𑀢𑀩𑁆𑀩𑁂 𑀧𑀜𑁆𑀜𑀸𑀬 𑀲𑁄𑀥𑁂𑀢𑀩𑁆𑀩𑁂 𑀯𑀟𑁆𑀠𑁂𑀢𑀩𑁆𑀩𑁂 𑀘 𑀅𑀥𑀺𑀓𑀲𑀻𑀮𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑀧𑀜𑁆𑀜𑀸𑀬 𑀅𑀦𑀼𑀕𑁆𑀕𑀳𑁂𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄. 𑀢𑀜𑁆𑀘 𑀅𑀦𑀼𑀕𑁆𑀕𑀡𑁆𑀳𑀦𑀁 𑀲𑀻𑀮𑀲𑁆𑀲 𑀅𑀲𑀧𑁆𑀧𑀸𑀬𑀸𑀦𑀼𑀧𑀓𑀸𑀭𑀥𑀫𑁆𑀫𑁂 𑀯𑀚𑁆𑀚𑁂𑀢𑁆𑀯𑀸 𑀢𑀧𑁆𑀧𑀝𑀺𑀧𑀓𑁆𑀔𑀲𑁂𑀯𑀦𑁂𑀦 𑀳𑁄𑀢𑀻𑀢𑀺 𑀆𑀳 ‘‘𑀲𑀻𑀮𑀲𑁆𑀲 𑀅𑀲𑀧𑁆𑀧𑀸𑀬𑁂’’𑀢𑀺𑀆𑀤𑀺. 𑀲𑀻𑀮𑀲𑁆𑀲 𑀅𑀲𑀧𑁆𑀧𑀸𑀬𑀸𑀦𑀼𑀧𑀓𑀸𑀭𑀥𑀫𑁆𑀫𑀸 𑀦𑀸𑀫 𑀅𑀦𑀸𑀘𑀸𑀭𑀸𑀕𑁄𑀘𑀭𑀸𑀤𑀬𑁄, 𑀢𑀧𑁆𑀧𑀝𑀺𑀧𑀓𑁆𑀔𑀢𑁄 𑀉𑀧𑀓𑀸𑀭𑀥𑀫𑁆𑀫𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀸𑀦𑁂𑀢𑀺 𑀢𑀁𑀢𑀁𑀲𑀺𑀓𑁆𑀔𑀸𑀓𑁄𑀝𑁆𑀞𑀸𑀲𑀧𑀤𑀝𑁆𑀞𑀸𑀦𑁂. 𑀅𑀦𑀼𑀕𑁆𑀕𑀡𑁆𑀳𑀸𑀢𑀺 𑀦𑀸𑀫𑀸𑀢𑀺 𑀅𑀪𑀺𑀦𑁆𑀦𑀁 𑀅𑀲𑀁𑀓𑀺𑀮𑀺𑀝𑁆𑀞𑀁 𑀓𑀢𑁆𑀯𑀸 𑀅𑀦𑀼𑀕𑁆𑀕𑀡𑁆𑀳𑀸𑀢𑀺 𑀦𑀸𑀫. 𑀔𑀸𑀭𑀧𑀭𑀺𑀲𑁆𑀲𑀸𑀯𑀦𑁂𑀢𑀺 𑀭𑀚𑀓𑀸𑀦𑀁 𑀊𑀲𑀔𑀸𑀭𑀸𑀤𑀺𑀔𑀸𑀭𑀧𑀭𑀺𑀲𑁆𑀲𑀸𑀯𑀦𑀧𑀝𑁂. 𑀳𑀸𑀬𑀢𑀻𑀢𑀺 𑀲𑀻𑀮𑀸𑀤𑀺𑀦𑀸 𑀧𑀭𑀺𑀳𑀸𑀬𑀢𑀺. 𑀲𑁂𑀝𑁆𑀞𑀁 𑀧𑀼𑀕𑁆𑀕𑀮𑀦𑁆𑀢𑀺 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀲𑁂𑀝𑁆𑀞𑀁 𑀉𑀢𑁆𑀢𑀭𑀺𑀢𑀭𑀁 𑀉𑀢𑁆𑀢𑀫𑀁 𑀧𑀼𑀕𑁆𑀕𑀮𑀁.

𑀲𑁂𑀯𑀺𑀢𑀩𑁆𑀩𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀚𑀺𑀕𑀼𑀘𑁆𑀙𑀺𑀢𑀩𑁆𑀩𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁭. 𑀲𑀢𑁆𑀢𑀫𑁂 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀻𑀢𑀺 𑀏𑀢𑁆𑀣 𑀅𑀪𑀺-𑀲𑀤𑁆𑀤𑀸𑀧𑁂𑀓𑁆𑀔𑀸𑀬 ‘‘𑀦’’𑀦𑁆𑀢𑀺 𑀲𑀸𑀫𑀺𑀅𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀦𑁆𑀢𑀺 𑀆𑀳 ‘‘𑀅𑀲𑁆𑀲𑀸’’𑀢𑀺 ‘‘𑀢𑀁 𑀔𑁄 𑀧𑀦 𑀪𑀯𑀦𑁆𑀢’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬. 𑀧𑀸𑀧𑀓𑁄 𑀓𑀺𑀢𑁆𑀢𑀺𑀲𑀤𑁆𑀤𑁄𑀢𑀺 𑀮𑀸𑀫𑀓𑀪𑀸𑀯𑁂𑀦 𑀓𑀣𑁂𑀢𑀩𑁆𑀩𑀲𑀤𑁆𑀤𑁄. 𑀕𑀽𑀣𑀓𑀽𑀧𑁄 𑀯𑀺𑀬 𑀤𑀼𑀲𑁆𑀲𑀻𑀮𑁆𑀬𑀦𑁆𑀢𑀺 𑀏𑀢𑁂𑀦 𑀤𑀼𑀲𑁆𑀲𑀻𑀮𑀲𑁆𑀲 𑀕𑀽𑀣𑀲𑀤𑀺𑀲𑀢𑁆𑀢𑀫𑁂𑀯 𑀤𑀲𑁆𑀲𑁂𑀢𑀺. 𑀯𑀘𑀦𑀦𑁆𑀢𑀺 𑀅𑀦𑀺𑀝𑁆𑀞𑀯𑀘𑀦𑀁. 𑀧𑀼𑀭𑀺𑀫𑀦𑀬𑁂𑀦𑁂𑀯𑀸𑀢𑀺 ‘‘𑀕𑀽𑀣𑀓𑀽𑀧𑁄 𑀯𑀺𑀬 𑀤𑀼𑀲𑁆𑀲𑀻𑀮𑁆𑀬’’𑀦𑁆𑀢𑀺𑀆𑀤𑀺𑀦𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦. 𑀲𑀼𑀘𑀺𑀫𑀺𑀢𑁆𑀢𑁄𑀢𑀺 𑀲𑀻𑀮𑀸𑀘𑀸𑀭𑀲𑀼𑀤𑁆𑀥𑀺𑀬𑀸 𑀲𑀼𑀘𑀺𑀫𑀺𑀢𑁆𑀢𑁄. 𑀲𑀳 𑀅𑀬𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀻𑀢𑀺 𑀲𑀳𑀸𑀬𑀸𑀢𑀺 𑀆𑀳 ‘‘𑀲𑀳𑀕𑀸𑀫𑀺𑀦𑁄’’𑀢𑀺.

𑀚𑀺𑀕𑀼𑀘𑁆𑀙𑀺𑀢𑀩𑁆𑀩𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀕𑀽𑀣𑀪𑀸𑀡𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁮. 𑀅𑀝𑁆𑀞𑀫𑁂 𑀕𑀽𑀣𑀪𑀸𑀡𑀻𑀢𑀺 𑀕𑀽𑀣𑀲𑀤𑀺𑀲𑀯𑀘𑀦𑀢𑁆𑀢𑀸 𑀕𑀽𑀣𑀪𑀸𑀡𑀻. 𑀬𑀣𑀸 𑀳𑀺 𑀕𑀽𑀣𑀁 𑀦𑀸𑀫 𑀫𑀳𑀸𑀚𑀦𑀲𑁆𑀲 𑀅𑀦𑀺𑀝𑁆𑀞𑀁 𑀳𑁄𑀢𑀺, 𑀏𑀯𑀫𑁂𑀯 𑀇𑀫𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀯𑀘𑀦𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀅𑀦𑀺𑀝𑁆𑀞𑀁 𑀳𑁄𑀢𑀺. 𑀤𑀼𑀕𑁆𑀕𑀦𑁆𑀥𑀓𑀣𑀦𑁆𑀢𑀺 𑀓𑀺𑀮𑁂𑀲𑀸𑀲𑀼𑀘𑀺𑀲𑀁𑀓𑀺𑀮𑀺𑀝𑁆𑀞𑀢𑀸𑀬 𑀕𑀽𑀣𑀁 𑀯𑀺𑀬 𑀤𑀼𑀕𑁆𑀕𑀦𑁆𑀥𑀯𑀸𑀬𑀦𑀓𑀣𑀁. 𑀧𑀼𑀧𑁆𑀨𑀪𑀸𑀡𑀻𑀢𑀺 𑀲𑀼𑀧𑀼𑀧𑁆𑀨𑀲𑀤𑀺𑀲𑀯𑀘𑀦𑀢𑁆𑀢𑀸 𑀧𑀼𑀧𑁆𑀨𑀪𑀸𑀡𑀻. 𑀬𑀣𑀸 𑀳𑀺 𑀨𑀼𑀮𑁆𑀮𑀸𑀦𑀺 𑀯𑀲𑁆𑀲𑀺𑀓𑀸𑀦𑀺 𑀯𑀸 𑀅𑀥𑀺𑀫𑀼𑀢𑁆𑀢𑀺𑀓𑀸𑀦𑀺 𑀯𑀸 𑀫𑀳𑀸𑀚𑀦𑀲𑁆𑀲 𑀇𑀝𑁆𑀞𑀸𑀦𑀺 𑀓𑀦𑁆𑀢𑀸𑀦𑀺 𑀳𑁄𑀦𑁆𑀢𑀺, 𑀏𑀯𑀫𑁂𑀯 𑀇𑀫𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀯𑀘𑀦𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀇𑀝𑁆𑀞𑀁 𑀳𑁄𑀢𑀺 𑀓𑀦𑁆𑀢𑀁. 𑀧𑀼𑀧𑁆𑀨𑀸𑀦𑀺 𑀯𑀺𑀬𑀸𑀢𑀺 𑀘𑀫𑁆𑀧𑀓𑀲𑀼𑀫𑀦𑀸𑀤𑀺𑀲𑀼𑀕𑀦𑁆𑀥𑀧𑀼𑀧𑁆𑀨𑀸𑀦𑀺 𑀯𑀺𑀬. 𑀲𑀼𑀕𑀦𑁆𑀥𑀓𑀣𑀦𑁆𑀢𑀺 𑀲𑀼𑀘𑀺𑀕𑀦𑁆𑀥𑀯𑀸𑀬𑀦𑀓𑀣𑀁 𑀓𑀺𑀮𑁂𑀲𑀤𑀼𑀕𑁆𑀕𑀦𑁆𑀥𑀸𑀪𑀸𑀯𑀢𑁄. 𑀫𑀥𑀼𑀪𑀸𑀡𑀻𑀢𑀺 𑀏𑀢𑁆𑀣 ‘‘𑀫𑀼𑀤𑀼𑀪𑀸𑀡𑀻’’𑀢𑀺𑀧𑀺 𑀧𑀞𑀦𑁆𑀢𑀺. 𑀉𑀪𑀬𑀢𑁆𑀣𑀸𑀧𑀺 𑀳𑀺 𑀫𑀥𑀼𑀭𑀯𑀘𑀦𑁄𑀢𑀺 𑀅𑀢𑁆𑀣𑁄. 𑀬𑀣𑀸 𑀳𑀺 𑀘𑀢𑀼𑀫𑀥𑀼𑀭𑀁 𑀦𑀸𑀫 𑀫𑀥𑀼𑀭𑀁 𑀧𑀡𑀻𑀢𑀁, 𑀏𑀯𑀫𑁂𑀯 𑀇𑀫𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀯𑀘𑀦𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀫𑀥𑀼𑀭𑀁 𑀳𑁄𑀢𑀺. 𑀫𑀥𑀼𑀭𑀓𑀣𑀦𑁆𑀢𑀺 𑀓𑀡𑁆𑀡𑀲𑀼𑀔𑀢𑀸𑀬 𑀧𑁂𑀫𑀦𑀻𑀬𑀢𑀸𑀬 𑀘 𑀲𑀤𑁆𑀤𑀢𑁄 𑀅𑀢𑁆𑀣𑀢𑁄 𑀘 𑀫𑀥𑀼𑀭𑀲𑀪𑀸𑀯𑀓𑀣𑀁. 𑀅𑀢𑁆𑀢𑀳𑁂𑀢𑀼 𑀯𑀸𑀢𑀺 𑀅𑀢𑁆𑀢𑀦𑁄 𑀯𑀸 𑀳𑀢𑁆𑀣𑀧𑀸𑀤𑀸𑀤𑀺𑀘𑁆𑀙𑁂𑀤𑀦𑀳𑀭𑀡𑀳𑁂𑀢𑀼. 𑀧𑀭𑀳𑁂𑀢𑀼 𑀯𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀢𑁂𑀦𑀸𑀳 ‘‘𑀅𑀢𑁆𑀢𑀦𑁄 𑀯𑀸’’𑀢𑀺𑀆𑀤𑀺.

‘‘𑀦𑁂𑀮𑀗𑁆𑀕𑁄𑀢𑀺 𑀔𑁄, 𑀪𑀦𑁆𑀢𑁂, 𑀲𑀻𑀮𑀸𑀦𑀫𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺 𑀲𑀼𑀢𑁆𑀢𑁂 (𑀲𑀁. 𑀦𑀺. 𑁪.𑁩𑁪𑁭) 𑀆𑀕𑀢𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀏𑀢𑁆𑀣 𑀯𑀼𑀢𑁆𑀢𑀲𑀻𑀮𑀁 𑀯𑀺𑀬𑀸’’𑀢𑀺. 𑀧𑀽𑀭𑁂𑀢𑀺 𑀕𑀼𑀡𑀸𑀦𑀁 𑀧𑀸𑀭𑀺𑀧𑀽𑀭𑀺𑀬𑀁. 𑀲𑀼𑀓𑀼𑀫𑀸𑀭𑀸𑀢𑀺 𑀅𑀨𑀭𑀼𑀲𑀢𑀸𑀬 𑀫𑀼𑀤𑀼𑀓𑀸 𑀓𑁄𑀫𑀮𑀸. 𑀧𑀼𑀭𑀲𑁆𑀲𑀸𑀢𑀺 𑀏𑀢𑁆𑀣 𑀧𑀼𑀭-𑀲𑀤𑁆𑀤𑁄 𑀢𑀦𑁆𑀦𑀺𑀯𑀸𑀲𑀺𑀯𑀸𑀘𑀓𑁄 𑀤𑀝𑁆𑀞𑀩𑁆𑀩𑁄 ‘‘𑀕𑀸𑀫𑁄 𑀆𑀕𑀢𑁄’’𑀢𑀺𑀆𑀤𑀻𑀲𑀼 𑀯𑀺𑀬. 𑀢𑁂𑀦𑀸𑀳 ‘‘𑀦𑀕𑀭𑀯𑀸𑀲𑀻𑀦’’𑀦𑁆𑀢𑀺. 𑀫𑀦𑀁 𑀅𑀧𑁆𑀧𑀸𑀬𑀢𑀺 𑀯𑀟𑁆𑀠𑁂𑀢𑀻𑀢𑀺 𑀫𑀦𑀸𑀧𑀸. 𑀢𑁂𑀦𑀸𑀳 ‘‘𑀘𑀺𑀢𑁆𑀢𑀯𑀼𑀤𑁆𑀥𑀺𑀓𑀭𑀸’’𑀢𑀺.

𑀕𑀽𑀣𑀪𑀸𑀡𑀻𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀅𑀦𑁆𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁯. 𑀦𑀯𑀫𑁂 𑀅𑀦𑁆𑀥𑁄𑀢𑀺𑀆𑀤𑀻𑀲𑀼 𑀧𑀸𑀴𑀺𑀧𑀤𑁂𑀲𑀼 𑀧𑀞𑀫𑁄 𑀤𑀺𑀝𑁆𑀞𑀥𑀫𑁆𑀫𑀺𑀓𑀪𑁄𑀕𑀲𑀁𑀳𑀭𑀡𑀧𑀜𑁆𑀜𑀸𑀘𑀓𑁆𑀔𑀼𑀦𑁄 𑀘 𑀲𑀫𑁆𑀧𑀭𑀸𑀬𑀺𑀓𑀢𑁆𑀣𑀲𑀸𑀥𑀦𑀧𑀜𑁆𑀜𑀸𑀘𑀓𑁆𑀔𑀼𑀦𑁄 𑀘 𑀅𑀪𑀸𑀯𑀸 ‘‘𑀅𑀦𑁆𑀥𑁄’’𑀢𑀺 𑀯𑀼𑀘𑁆𑀘𑀢𑀺 𑀤𑀼𑀢𑀺𑀬𑁄𑀧𑀺, 𑀢𑀢𑀺𑀬𑁄 𑀧𑀦 𑀤𑁆𑀯𑀺𑀦𑁆𑀦𑀫𑁆𑀧𑀺 𑀪𑀸𑀯𑀸 ‘‘𑀤𑁆𑀯𑀺𑀘𑀓𑁆𑀔𑀽’’𑀢𑀺 𑀯𑀼𑀘𑁆𑀘𑀢𑀺. 𑀧𑀜𑁆𑀜𑀸𑀘𑀓𑁆𑀔𑀽𑀢𑀺 𑀆𑀬𑀓𑁄𑀲𑀮𑁆𑀮𑀪𑀽𑀢𑀸 𑀧𑀜𑁆𑀜𑀸𑀘𑀓𑁆𑀔𑀼. 𑀢𑁂𑀦𑀸𑀳 ‘‘𑀨𑀸𑀢𑀺𑀁 𑀓𑀭𑁂𑀬𑁆𑀬𑀸’’𑀢𑀺. 𑀅𑀥𑀫𑀼𑀢𑁆𑀢𑀫𑁂𑀢𑀺 𑀅𑀥𑀫𑁂 𑀘𑁂𑀯 𑀉𑀢𑁆𑀢𑀫𑁂 𑀘. 𑀧𑀝𑀺𑀧𑀓𑁆𑀔𑀯𑀲𑁂𑀦𑀸𑀢𑀺 𑀧𑀝𑀺𑀧𑀓𑁆𑀔𑀲𑁆𑀲 𑀅𑀢𑁆𑀣𑀺𑀢𑀸𑀯𑀲𑁂𑀦. 𑀲𑀼𑀓𑁆𑀓𑀲𑀧𑁆𑀧𑀝𑀺𑀪𑀸𑀕𑀸𑀢𑀺 𑀲𑀼𑀓𑁆𑀓𑀥𑀫𑁆𑀫𑁂𑀳𑀺 𑀧𑀳𑀸𑀬𑀓𑁂𑀳𑀺 𑀲𑀧𑁆𑀧𑀝𑀺𑀪𑀸𑀕𑀸𑀢𑀺 𑀚𑀸𑀦𑁂𑀬𑁆𑀬. 𑀓𑀡𑁆𑀳𑀲𑀧𑁆𑀧𑀝𑀺𑀪𑀸𑀕𑀸𑀢𑀺 𑀓𑀡𑁆𑀳𑀥𑀫𑁆𑀫𑁂𑀳𑀺 𑀧𑀳𑀸𑀢𑀩𑁆𑀩𑁂𑀳𑀺 𑀲𑀧𑁆𑀧𑀝𑀺𑀪𑀸𑀕𑀸𑀢𑀺 𑀚𑀸𑀦𑁂𑀬𑁆𑀬.

𑀢𑀣𑀸𑀚𑀸𑀢𑀺𑀓𑀸𑀢𑀺 𑀬𑀸𑀤𑀺𑀲𑁂𑀳𑀺 𑀲𑀧𑀼𑀢𑁆𑀢𑀤𑀸𑀭𑀧𑀭𑀺𑀚𑀦𑀲𑀜𑀸𑀢𑀺𑀫𑀺𑀢𑁆𑀢𑀩𑀦𑁆𑀥𑀯𑀕𑁆𑀕𑀁 𑀅𑀢𑁆𑀢𑀸𑀦𑀁 𑀲𑀼𑀔𑁂𑀢𑀺 𑀧𑀻𑀡𑁂𑀢𑀺, 𑀢𑀸𑀤𑀺𑀲𑀸 𑀪𑁄𑀕𑀸𑀧𑀺 𑀦 𑀲𑀦𑁆𑀢𑀺. 𑀧𑀼𑀜𑁆𑀜𑀸𑀦𑀺 𑀘 𑀦 𑀓𑀭𑁄𑀢𑀻𑀢𑀺 𑀲𑀫𑀡𑀩𑁆𑀭𑀸𑀳𑁆𑀫𑀡𑀓𑀧𑀡𑀤𑁆𑀥𑀺𑀓𑀬𑀸𑀘𑀓𑀸𑀦𑀁 𑀲𑀦𑁆𑀢𑀧𑁆𑀧𑀦𑀯𑀲𑁂𑀦 𑀧𑀼𑀜𑁆𑀜𑀸𑀦𑀺 𑀦 𑀓𑀭𑁄𑀢𑀺. 𑀉𑀪𑀬𑀢𑁆𑀣𑀸𑀢𑀺 𑀉𑀪𑀬𑀲𑁆𑀫𑀺𑀁 𑀮𑁄𑀓𑁂, 𑀉𑀪𑀬𑀲𑁆𑀫𑀺𑀁 𑀯𑀸 𑀅𑀢𑁆𑀣𑁂𑀢𑀺 𑀯𑀺𑀕𑁆𑀕𑀳𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀥𑀮𑁄𑀓𑁂’’𑀢𑀺𑀆𑀤𑀺𑀫𑀸𑀳. 𑀉𑀪𑀬𑁂𑀦𑀸𑀢𑀺 𑀯𑀼𑀢𑁆𑀢𑀫𑀢𑁆𑀣𑀁 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀓𑀣’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀲𑁆𑀫𑀺𑀁 𑀞𑀸𑀦𑁂𑀢𑀺 𑀬𑀲𑁆𑀫𑀺𑀁𑀬𑁂𑀯 𑀞𑀸𑀦𑁂. 𑀦 𑀲𑁄𑀘𑀢𑀻𑀢𑀺 𑀲𑁄𑀓𑀳𑁂𑀢𑀽𑀦𑀁 𑀢𑀢𑁆𑀣 𑀅𑀪𑀸𑀯𑀢𑁄 𑀦 𑀲𑁄𑀘𑀢𑀺.

𑀅𑀦𑁆𑀥𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀅𑀯𑀓𑀼𑀚𑁆𑀚𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁦. 𑀤𑀲𑀫𑁂 𑀅𑀯𑀓𑀼𑀚𑁆𑀚𑀧𑀜𑁆𑀜𑁄𑀢𑀺 𑀦𑀺𑀓𑁆𑀓𑀼𑀚𑁆𑀚𑀧𑀜𑁆𑀜𑁄. 𑀢𑁂𑀦𑀸𑀳 ‘‘𑀅𑀥𑁄𑀫𑀼𑀔𑀧𑀜𑁆𑀜𑁄’’𑀢𑀺. 𑀧𑀼𑀩𑁆𑀩𑀧𑀝𑁆𑀞𑀧𑀦𑀸𑀢𑀺 𑀧𑀞𑀫𑀸𑀭𑀫𑁆𑀪𑁄. 𑀲𑀦𑁆𑀦𑀺𑀝𑁆𑀞𑀸𑀦𑀦𑁆𑀢𑀺 𑀓𑀣𑀸𑀧𑀭𑀺𑀬𑁄𑀲𑀸𑀦𑀁. 𑀅𑀧𑁆𑀧𑀦𑀸𑀢𑀺 𑀤𑁂𑀲𑀦𑀸𑀬 𑀦𑀺𑀝𑁆𑀞𑀸𑀧𑀦𑀁. 𑀅𑀦𑁂𑀓𑁂 𑀯𑀸 𑀅𑀦𑀼𑀲𑀦𑁆𑀥𑀺𑀬𑁄𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀲𑀫𑀸𑀥𑀺 𑀯𑀸𑀢𑀺𑀆𑀤𑀻𑀲𑀼 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸 𑀧𑀭𑀫𑀢𑁆𑀣𑀢𑁄 𑀲𑀸𑀲𑀦𑀦𑁆𑀢𑀺 𑀢𑀤𑀢𑁆𑀣𑁄𑀧𑀸𑀤𑀓𑀲𑀫𑀸𑀥𑀺 𑀢𑀲𑁆𑀲 𑀆𑀤𑀻𑀢𑀺 𑀯𑀼𑀢𑁆𑀢𑁄, 𑀢𑀤𑀸𑀲𑀦𑁆𑀦𑀢𑁆𑀢𑀸 𑀯𑀺𑀧𑀲𑁆𑀲𑀦𑀸, 𑀢𑀲𑁆𑀲 𑀫𑀽𑀮𑀪𑀸𑀯𑁂𑀦 𑀏𑀓𑀤𑁂𑀲𑀢𑁆𑀢𑀸 𑀫𑀕𑁆𑀕𑁄.

𑀲𑀸𑀲𑀦𑀲𑁆𑀲 𑀧𑀸𑀭𑀺𑀧𑀽𑀭𑀺𑀲𑀼𑀤𑁆𑀥𑀺𑀬𑁄 𑀦𑀸𑀫 𑀲𑀢𑁆𑀣𑀸𑀭𑀸 𑀤𑁂𑀲𑀺𑀢𑀦𑀺𑀬𑀸𑀫𑁂𑀦𑁂𑀯 𑀲𑀺𑀤𑁆𑀥𑀸, 𑀢𑀸 𑀧𑀦𑁂𑀢𑁆𑀣 𑀓𑀣𑁂𑀦𑁆𑀢𑀲𑁆𑀲 𑀯𑀲𑁂𑀦 𑀕𑀳𑁂𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀦𑀽𑀦𑀁 𑀓𑀢𑁆𑀯𑀸 𑀤𑁂𑀲𑁂𑀦𑁆𑀢𑀻’’𑀢𑀺, ‘‘𑀦𑀺𑀕𑁆𑀕𑀡𑁆𑀞𑀺𑀁 𑀓𑀢𑁆𑀯𑀸 𑀤𑁂𑀲𑁂𑀦𑁆𑀢𑀻’’𑀢𑀺 𑀘 𑀯𑀼𑀢𑁆𑀢𑀁. 𑀢𑀢𑁆𑀣 𑀦𑀺𑀚𑁆𑀚𑀝𑀦𑁆𑀢𑀺 𑀦𑀺𑀕𑁆𑀕𑀼𑀫𑁆𑀩𑀁 𑀅𑀦𑀸𑀓𑀼𑀮𑀁. 𑀦𑀺𑀕𑁆𑀕𑀡𑁆𑀞𑀺𑀦𑁆𑀢𑀺 𑀕𑀡𑁆𑀞𑀺𑀝𑁆𑀞𑀸𑀦𑀭𑀳𑀺𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀁 𑀓𑀢𑁆𑀯𑀸.

𑀆𑀓𑀺𑀡𑁆𑀡𑀸𑀦𑀻𑀢𑀺 𑀆𑀓𑀺𑀭𑀺𑀢𑁆𑀯𑀸 𑀲𑀁𑀓𑀺𑀭𑀺𑀢𑁆𑀯𑀸 𑀞𑀧𑀺𑀢𑀸𑀦𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀧𑀓𑁆𑀔𑀺𑀢𑁆𑀢𑀸𑀦𑀻’’𑀢𑀺. 𑀉𑀘𑁆𑀙𑀗𑁆𑀕𑁄 𑀯𑀺𑀬 𑀉𑀘𑁆𑀙𑀗𑁆𑀕𑀧𑀜𑁆𑀜𑁄 𑀧𑀼𑀕𑁆𑀕𑀮𑁄 𑀤𑀝𑁆𑀞𑀩𑁆𑀩𑁄𑀢𑀺 𑀉𑀘𑁆𑀙𑀗𑁆𑀕𑀲𑀤𑀺𑀲𑀧𑀜𑁆𑀜𑀢𑀸𑀬 𑀉𑀘𑁆𑀙𑀗𑁆𑀕𑀧𑀜𑁆𑀜𑁄. 𑀏𑀯𑀁 𑀧𑀜𑁆𑀜𑀸 𑀯𑀺𑀬 𑀧𑀼𑀕𑁆𑀕𑀮𑁄𑀧𑀺 𑀉𑀘𑁆𑀙𑀗𑁆𑀕𑁄 𑀯𑀺𑀬 𑀳𑁄𑀢𑀺, 𑀢𑀲𑁆𑀫𑀺𑀁 𑀥𑀫𑁆𑀫𑀸𑀦𑀁 𑀅𑀘𑀺𑀭𑀝𑁆𑀞𑀸𑀦𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀯𑀼𑀢𑁆𑀢𑀁. 𑀬𑀣𑀸 𑀘 𑀉𑀘𑁆𑀙𑀗𑁆𑀕𑀲𑀤𑀺𑀲𑀸 𑀧𑀜𑁆𑀜𑀸, 𑀏𑀯𑀁 𑀦𑀺𑀓𑁆𑀓𑀼𑀚𑁆𑀚𑀓𑀼𑀫𑁆𑀪𑀲𑀤𑀺𑀲𑀸 𑀧𑀜𑁆𑀜𑀸 𑀏𑀯𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀲𑀁𑀯𑀺𑀤𑀳𑀦𑀧𑀜𑁆𑀜𑀸𑀬𑀸𑀢𑀺 ‘‘𑀏𑀯𑀁 𑀓𑀢𑁂 𑀇𑀤𑀁 𑀦𑀸𑀫 𑀪𑀯𑀺𑀲𑁆𑀲𑀢𑀻’’𑀢𑀺 𑀏𑀯𑀁 𑀢𑀁𑀢𑀁𑀅𑀢𑁆𑀣𑀓𑀺𑀘𑁆𑀘𑀁 𑀲𑀁𑀯𑀺𑀥𑀸𑀢𑀼𑀁 𑀲𑀫𑀢𑁆𑀣𑀢𑀸𑀬 𑀯𑀺𑀘𑀸𑀭𑀡𑀧𑀜𑁆𑀜𑀸𑀬 𑀭𑀳𑀺𑀢𑁄. 𑀲𑁂𑀬𑁆𑀬𑁄𑀢𑀺 𑀲𑁂𑀝𑁆𑀞𑁄 𑀧𑀸𑀲𑀁𑀲𑁄. 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀦𑁆𑀢𑀺 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺𑀆𑀤𑀺𑀓𑀁 𑀅𑀭𑀺𑀬𑀫𑀕𑁆𑀕𑀲𑁆𑀲 𑀅𑀥𑀺𑀕𑀫𑀸𑀬 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀢𑁆𑀢𑀺𑀁.

𑀅𑀯𑀓𑀼𑀚𑁆𑀚𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀼𑀕𑁆𑀕𑀮𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀤𑁂𑀯𑀤𑀽𑀢𑀯𑀕𑁆𑀕𑁄

𑁧. 𑀲𑀩𑁆𑀭𑀳𑁆𑀫𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁧. 𑀘𑀢𑀼𑀢𑁆𑀣𑀲𑁆𑀲 𑀧𑀞𑀫𑁂 𑀲𑀩𑁆𑀭𑀳𑁆𑀫𑀓𑀸𑀦𑀻𑀢𑀺 𑀲𑀲𑁂𑀝𑁆𑀞𑀓𑀸𑀦𑀺. 𑀬𑁂𑀲𑀦𑁆𑀢𑀺 𑀬𑁂𑀲𑀁 𑀓𑀼𑀮𑀸𑀦𑀁. 𑀧𑀼𑀢𑁆𑀢𑀸𑀦𑀦𑁆𑀢𑀺 𑀧𑀼𑀢𑁆𑀢𑁂𑀳𑀺. 𑀧𑀽𑀚𑀺𑀢𑀲𑀤𑁆𑀤𑀬𑁄𑀕𑁂𑀦 𑀳𑀺 𑀇𑀤𑀁 𑀓𑀭𑀡𑀢𑁆𑀣𑁂 𑀲𑀸𑀫𑀺𑀯𑀘𑀦𑀁. 𑀢𑁂𑀦𑀸𑀢𑀺 𑀆𑀳𑀸𑀭𑀸𑀤𑀺𑀦𑀸. 𑀧𑀝𑀺𑀚𑀕𑁆𑀕𑀺𑀢𑀸 𑀕𑁄𑀧𑀺𑀢𑀸𑀢𑀺 𑀬𑀣𑀸𑀓𑀸𑀮𑀁 𑀢𑀲𑁆𑀲 𑀢𑀲𑁆𑀲 𑀤𑀸𑀢𑀩𑁆𑀩𑀲𑁆𑀲 𑀤𑀸𑀦𑁂𑀦 𑀯𑁂𑀬𑁆𑀬𑀸𑀯𑀘𑁆𑀘𑀲𑁆𑀲 𑀘 𑀓𑀭𑀡𑁂𑀦 𑀧𑀝𑀺𑀚𑀕𑁆𑀕𑀺𑀢𑀸 𑀘𑁂𑀯 𑀉𑀧𑁆𑀧𑀦𑁆𑀦𑀸𑀦𑀢𑁆𑀣𑀧𑁆𑀧𑀳𑀭𑀡𑁂𑀦 𑀕𑁄𑀧𑀺𑀢𑀸 𑀘 𑀳𑁄𑀦𑁆𑀢𑀺. 𑀢𑁂𑀲𑀦𑁆𑀢𑀺 𑀫𑀸𑀢𑀸𑀧𑀺𑀢𑀽𑀦𑀁. 𑀩𑁆𑀭𑀳𑁆𑀫𑀸𑀤𑀺𑀪𑀸𑀯𑀲𑀸𑀥𑀦𑀢𑁆𑀣𑀦𑁆𑀢𑀺 𑀢𑁂𑀲𑀁 𑀕𑀼𑀡𑀸𑀦𑀁 𑀅𑀢𑁆𑀣𑀺𑀢𑀸𑀬 𑀮𑁄𑀓𑁂 𑀩𑁆𑀭𑀳𑁆𑀫𑀸 𑀦𑀸𑀫 𑀯𑀼𑀘𑁆𑀘𑀢𑀺, 𑀆𑀘𑀭𑀺𑀬𑁄 𑀦𑀸𑀫 𑀯𑀼𑀘𑁆𑀘𑀢𑀺, 𑀆𑀳𑀼𑀦𑁂𑀬𑁆𑀬𑁄 𑀦𑀸𑀫 𑀯𑀼𑀘𑁆𑀘𑀢𑀺, 𑀢𑁂 𑀫𑀸𑀢𑀸𑀧𑀺𑀢𑀽𑀦𑀁 𑀧𑀼𑀢𑁆𑀢𑀓𑀁 𑀧𑀝𑀺𑀮𑀪𑀦𑁆𑀢𑀻𑀢𑀺 𑀤𑀲𑁆𑀲𑀦𑀯𑀲𑁂𑀦 𑀦𑁂𑀲𑀁 𑀩𑁆𑀭𑀳𑁆𑀫𑀸𑀤𑀺𑀪𑀸𑀯𑀲𑀸𑀥𑀦𑀢𑁆𑀣𑀁 ‘‘𑀩𑀳𑀼𑀓𑀸𑀭𑀸’’𑀢𑀺, 𑀯𑀢𑁆𑀯𑀸 𑀢𑀁 𑀢𑁂𑀲𑀁 𑀩𑀳𑀼𑀓𑀸𑀭𑀢𑀁 𑀦𑀸𑀦𑀸𑀓𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀆𑀧𑀸𑀤𑀓𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀫𑀸𑀢𑀸𑀧𑀺𑀢𑀭𑁄 𑀳𑀺 𑀧𑀼𑀢𑁆𑀢𑀸𑀦𑀁 𑀚𑀻𑀯𑀺𑀢𑀲𑁆𑀲 𑀆𑀧𑀸𑀤𑀓𑀸, 𑀲𑀭𑀻𑀭𑀲𑁆𑀲 𑀧𑁄𑀲𑀓𑀸, 𑀆𑀘𑀸𑀭𑀲𑀫𑀸𑀘𑀸𑀭𑀸𑀦𑀁 𑀲𑀺𑀓𑁆𑀔𑀸𑀧𑀓𑀸 𑀲𑀓𑀮𑀲𑁆𑀲𑀧𑀺 𑀇𑀫𑀲𑁆𑀲 𑀮𑁄𑀓𑀲𑁆𑀲 𑀤𑀲𑁆𑀲𑁂𑀢𑀸𑀭𑁄. 𑀢𑁂𑀦𑀸𑀳 ‘‘𑀧𑀼𑀢𑁆𑀢𑀸𑀦𑀁 𑀳𑀻’’𑀢𑀺𑀆𑀤𑀺. 𑀇𑀝𑁆𑀞𑀸𑀭𑀫𑁆𑀫𑀡𑀁 𑀢𑀸𑀯 𑀢𑁂 𑀤𑀲𑁆𑀲𑁂𑀦𑁆𑀢𑀼, 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑀁 𑀓𑀣𑀦𑁆𑀢𑀺? 𑀢𑀫𑁆𑀧𑀺 𑀤𑀲𑁆𑀲𑁂𑀢𑀩𑁆𑀩𑀫𑁂𑀯 𑀯𑀚𑁆𑀚𑀦𑀻𑀬𑀪𑀸𑀯𑀚𑀸𑀦𑀸𑀧𑀦𑀢𑁆𑀣𑀁.

𑀅𑀯𑀺𑀚𑀳𑀺𑀢𑀸 𑀳𑁄𑀦𑁆𑀢𑀻𑀢𑀺 𑀢𑀸𑀲𑀁 𑀪𑀸𑀯𑀦𑀸𑀬 𑀩𑁆𑀭𑀳𑁆𑀫𑀸𑀦𑀁 𑀩𑁆𑀭𑀳𑁆𑀫𑀮𑁄𑀓𑁂 𑀉𑀧𑁆𑀧𑀦𑁆𑀦𑀢𑁆𑀢𑀸 𑀅𑀯𑀺𑀚𑀳𑀺𑀢𑀸 𑀳𑁄𑀦𑁆𑀢𑀺 𑀪𑀸𑀯𑀦𑀸. 𑀮𑁄𑀪𑀦𑀻𑀬𑀯𑀬𑀲𑁆𑀫𑀺𑀁 𑀧𑀞𑀫𑀬𑁄𑀩𑁆𑀩𑀦𑁂 𑀅𑀢𑀺𑀯𑀺𑀬 𑀫𑀼𑀤𑀼𑀪𑀸𑀯𑀧𑁆𑀧𑀢𑁆𑀢𑀤𑀲𑁆𑀲𑀦𑀢𑁆𑀣𑀁 𑀲𑀢𑀯𑀺𑀳𑀢𑀕𑁆𑀕𑀳𑀡𑀁. 𑀧𑀸𑀝𑀺𑀬𑁂𑀓𑁆𑀓𑀦𑁆𑀢𑀺 𑀯𑀺𑀲𑀼𑀁. 𑀇𑀫𑀺𑀦𑀸 𑀓𑀸𑀭𑀡𑁂𑀦𑀸𑀢𑀺 𑀇𑀫𑀺𑀦𑀸 𑀬𑀣𑀸𑀯𑀼𑀢𑁆𑀢𑁂𑀦 𑀧𑀼𑀢𑁆𑀢𑁂𑀲𑀼 𑀧𑀯𑀢𑁆𑀢𑀺𑀢𑁂𑀳𑀺 𑀅𑀢𑀺𑀓𑁆𑀓𑀫𑁂𑀦 𑀫𑁂𑀢𑁆𑀢𑀸𑀤𑀺𑀲𑀫𑀼𑀧𑁆𑀧𑀢𑁆𑀢𑀺𑀲𑀗𑁆𑀔𑀸𑀢𑁂𑀦 𑀓𑀸𑀭𑀡𑁂𑀦.

𑀣𑀭𑀼𑀲𑀺𑀧𑁆𑀧𑀦𑁆𑀢𑀺 𑀅𑀲𑀺𑀲𑀢𑁆𑀢𑀺𑀓𑀼𑀦𑁆𑀢𑀓𑀮𑀸𑀧𑀸𑀤𑀺𑀆𑀬𑀼𑀥𑀲𑀺𑀧𑁆𑀧𑀁. 𑀫𑀼𑀤𑁆𑀤𑀸𑀕𑀡𑀦𑀸𑀢𑀺 𑀅𑀗𑁆𑀕𑀼𑀮𑀺𑀲𑀁𑀓𑁄𑀘𑀦𑀸𑀤𑀺𑀦𑀸 𑀳𑀢𑁆𑀣𑀫𑀼𑀤𑁆𑀤𑀸𑀬 𑀕𑀡𑀦𑀸. 𑀆𑀤𑀺𑀲𑀤𑁆𑀤𑁂𑀦 𑀧𑀸𑀡𑀸𑀤𑀻𑀦𑀁 𑀲𑀗𑁆𑀕𑀳𑁄. 𑀧𑀘𑁆𑀙𑀸𑀘𑀭𑀺𑀬𑀸 𑀦𑀸𑀫 𑀫𑀸𑀢𑀸𑀧𑀺𑀢𑀽𑀦𑀁 𑀲𑀦𑁆𑀢𑀺𑀓𑁂 𑀉𑀕𑁆𑀕𑀳𑀺𑀢𑀕𑀳𑀝𑁆𑀞𑀯𑀢𑁆𑀢𑀲𑁆𑀲𑁂𑀯 𑀧𑀼𑀕𑁆𑀕𑀮𑀲𑁆𑀲 𑀬𑀣𑀸𑀲𑀓𑀁 𑀳𑀢𑁆𑀣𑀸𑀘𑀭𑀺𑀬𑀸𑀤𑀻𑀦𑀁 𑀲𑀺𑀧𑁆𑀧𑀕𑁆𑀕𑀸𑀳𑀸𑀧𑀦𑀦𑁆𑀢𑀺 𑀓𑀢𑁆𑀯𑀸 𑀲𑀩𑁆𑀩𑀧𑀞𑀫𑀁 𑀆𑀘𑀭𑀺𑀬𑀸 𑀦𑀸𑀫𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀆𑀦𑀻𑀬 𑀳𑀼𑀢𑀁 𑀆𑀳𑀼𑀢𑀁. 𑀧𑀓𑀸𑀭𑁂𑀳𑀺 𑀳𑀼𑀢𑀁 𑀧𑀸𑀳𑀼𑀢𑀁. 𑀅𑀪𑀺𑀲𑀗𑁆𑀔𑀢𑀦𑁆𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁.

𑀦𑀫𑁄 𑀓𑀭𑁂𑀬𑁆𑀬𑀸𑀢𑀺 𑀲𑀸𑀬𑀁 𑀧𑀸𑀢𑀁 𑀉𑀧𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 ‘‘𑀇𑀤𑀁 𑀫𑀬𑁆𑀳𑀁 𑀉𑀢𑁆𑀢𑀫𑀧𑀼𑀜𑁆𑀜𑀓𑁆𑀔𑁂𑀢𑁆𑀢’’𑀦𑁆𑀢𑀺 𑀦𑀫𑀓𑁆𑀓𑀸𑀭𑀁 𑀓𑀭𑁂𑀬𑁆𑀬. 𑀢𑀸𑀬 𑀦𑀁 𑀧𑀸𑀭𑀺𑀘𑀭𑀺𑀬𑀸𑀬𑀸𑀢𑀺 𑀏𑀢𑁆𑀣 𑀦𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀬𑀣𑀸𑀯𑀼𑀢𑁆𑀢𑀧𑀭𑀺𑀘𑀭𑀡𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀧𑀸𑀭𑀺𑀘𑀭𑀺𑀬𑀸𑀬𑀸𑀢𑀺 𑀪𑀭𑀡𑀓𑀺𑀘𑁆𑀘𑀓𑀭𑀡𑀓𑀼𑀮𑀯𑀁𑀲𑀧𑁆𑀧𑀢𑀺𑀝𑁆𑀞𑀸𑀦𑀸𑀧𑀦𑀸𑀤𑀺𑀦𑀸 𑀧𑀜𑁆𑀘𑀯𑀺𑀥𑀉𑀧𑀝𑁆𑀞𑀸𑀦𑁂𑀦. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀧𑀜𑁆𑀘𑀳𑀺 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀞𑀸𑀦𑁂𑀳𑀺 𑀧𑀼𑀢𑁆𑀢𑁂𑀦 𑀧𑀼𑀭𑀢𑁆𑀣𑀺𑀫𑀸 𑀤𑀺𑀲𑀸 𑀫𑀸𑀢𑀸𑀧𑀺𑀢𑀭𑁄 𑀧𑀘𑁆𑀘𑀼𑀧𑀝𑁆𑀞𑀸𑀢𑀩𑁆𑀩𑀸 𑁋 ‘𑀪𑀢𑁄 𑀦𑁂𑀲𑀁 𑀪𑀭𑀺𑀲𑁆𑀲𑀸𑀫𑀺, 𑀓𑀺𑀘𑁆𑀘𑀁 𑀦𑁂𑀲𑀁 𑀓𑀭𑀺𑀲𑁆𑀲𑀸𑀫𑀺, 𑀓𑀼𑀮𑀯𑀁𑀲𑀁 𑀞𑀧𑁂𑀲𑁆𑀲𑀸𑀫𑀺, 𑀤𑀸𑀬𑀚𑁆𑀚𑀁 𑀧𑀝𑀺𑀧𑀚𑁆𑀚𑀸𑀫𑀺, 𑀅𑀣 𑀯𑀸 𑀧𑀦 𑀧𑁂𑀢𑀸𑀦𑀁 𑀓𑀸𑀮𑀓𑀢𑀸𑀦𑀁 𑀤𑀓𑁆𑀔𑀺𑀡𑀁 𑀅𑀦𑀼𑀧𑁆𑀧𑀤𑀲𑁆𑀲𑀸𑀫𑀻’𑀢𑀺. 𑀇𑀫𑁂𑀳𑀺 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀧𑀜𑁆𑀘𑀳𑀺 𑀞𑀸𑀦𑁂𑀳𑀺 𑀧𑀼𑀢𑁆𑀢𑁂𑀦 𑀧𑀼𑀭𑀢𑁆𑀣𑀺𑀫𑀸 𑀤𑀺𑀲𑀸 𑀫𑀸𑀢𑀸𑀧𑀺𑀢𑀭𑁄 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀧𑀜𑁆𑀘𑀳𑀺 𑀞𑀸𑀦𑁂𑀳𑀺 𑀧𑀼𑀢𑁆𑀢𑀁 𑀅𑀦𑀼𑀓𑀫𑁆𑀧𑀦𑁆𑀢𑀺, 𑀧𑀸𑀧𑀸 𑀦𑀺𑀯𑀸𑀭𑁂𑀦𑁆𑀢𑀺, 𑀓𑀮𑁆𑀬𑀸𑀡𑁂 𑀦𑀺𑀯𑁂𑀲𑁂𑀦𑁆𑀢𑀺, 𑀲𑀺𑀧𑁆𑀧𑀁 𑀲𑀺𑀓𑁆𑀔𑀸𑀧𑁂𑀦𑁆𑀢𑀺, 𑀧𑀢𑀺𑀭𑀽𑀧𑁂𑀦 𑀤𑀸𑀭𑁂𑀦 𑀲𑀁𑀬𑁄𑀚𑁂𑀦𑁆𑀢𑀺, 𑀲𑀫𑀬𑁂 𑀤𑀸𑀬𑀚𑁆𑀚𑀁 𑀦𑀺𑀬𑁆𑀬𑀸𑀤𑁂𑀦𑁆𑀢𑀻’’𑀢𑀺 (𑀤𑀻. 𑀦𑀺. 𑁩.𑁨𑁬𑁭).

𑀅𑀧𑀺𑀘 𑀬𑁄 𑀫𑀸𑀢𑀸𑀧𑀺𑀢𑀭𑁄 𑀢𑀻𑀲𑀼 𑀯𑀢𑁆𑀣𑀽𑀲𑀼 𑀅𑀪𑀺𑀧𑁆𑀧𑀲𑀦𑁆𑀦𑁂 𑀓𑀢𑁆𑀯𑀸 𑀲𑀻𑀮𑁂𑀲𑀼 𑀯𑀸 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀧𑀩𑁆𑀩𑀚𑁆𑀚𑀸𑀬 𑀯𑀸 𑀦𑀺𑀬𑁄𑀚𑁂𑀢𑁆𑀯𑀸 𑀉𑀧𑀝𑁆𑀞𑀳𑀢𑀺, 𑀅𑀬𑀁 𑀫𑀸𑀢𑀸𑀧𑀺𑀢𑀽𑀧𑀝𑁆𑀞𑀸𑀓𑀸𑀦𑀁 𑀅𑀕𑁆𑀕𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑀸 𑀧𑀦𑀸𑀬𑀁 𑀧𑀸𑀭𑀺𑀘𑀭𑀺𑀬𑀸 𑀧𑀼𑀢𑁆𑀢𑀲𑁆𑀲 𑀉𑀪𑀬𑀮𑁄𑀓𑀳𑀺𑀢𑀲𑀼𑀔𑀸𑀯𑀳𑀸𑀢𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀇𑀥𑁂𑀯 𑀦𑀁 𑀧𑀲𑀁𑀲𑀦𑁆𑀢𑀺, 𑀧𑁂𑀘𑁆𑀘 𑀲𑀕𑁆𑀕𑁂 𑀧𑀫𑁄𑀤𑀢𑀻’’𑀢𑀺 𑀯𑀼𑀢𑁆𑀢𑀁. 𑀧𑀲𑀁𑀲𑀦𑁆𑀢𑀻𑀢𑀺 ‘‘𑀅𑀬𑀁 𑀧𑀼𑀕𑁆𑀕𑀮𑁄 𑀫𑀢𑁆𑀢𑁂𑀬𑁆𑀬𑁄 𑀧𑁂𑀢𑁆𑀢𑁂𑀬𑁆𑀬𑁄 𑀲𑀕𑁆𑀕𑀲𑀁𑀯𑀢𑁆𑀢𑀦𑀺𑀬𑀁 𑀧𑀝𑀺𑀧𑀤𑀁 𑀧𑀽𑀭𑁂𑀢𑀻’’𑀢𑀺 𑀇𑀥𑁂𑀯 𑀦𑀁 𑀧𑀲𑀁𑀲𑀦𑁆𑀢𑀺. 𑀆𑀫𑁄𑀤𑀢𑀺 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀫𑁄𑀤𑀧𑁆𑀧𑀢𑁆𑀢𑀺𑀬𑀸. 𑀧𑀫𑁄𑀤𑀢𑀺 𑀦𑀸𑀦𑀧𑁆𑀧𑀓𑀸𑀭𑀫𑁄𑀤𑀲𑀫𑁆𑀧𑀯𑀢𑁆𑀢𑀺𑀬𑀸.

𑀲𑀩𑁆𑀭𑀳𑁆𑀫𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀆𑀦𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁨. 𑀤𑀼𑀢𑀺𑀬𑁂 𑀢𑀣𑀸𑀚𑀸𑀢𑀺𑀓𑁄𑀢𑀺 𑀢𑀣𑀸𑀲𑀪𑀸𑀯𑁄. 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀮𑀸𑀪𑁄𑀢𑀺 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀬 𑀅𑀥𑀺𑀕𑀫𑁄. 𑀭𑀽𑀧𑀫𑁂𑀯 𑀓𑀺𑀮𑁂𑀲𑀼𑀧𑁆𑀧𑀢𑁆𑀢𑀺𑀬𑀸 𑀓𑀸𑀭𑀡𑀪𑀸𑀯𑀢𑁄 𑀭𑀽𑀧𑀦𑀺𑀫𑀺𑀢𑁆𑀢𑀁. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀲𑀲𑁆𑀲𑀢𑀸𑀤𑀺𑀦𑀺𑀫𑀺𑀢𑁆𑀢𑀦𑁆𑀢𑀺 𑀲𑀲𑁆𑀲𑀢𑀼𑀘𑁆𑀙𑁂𑀤𑀪𑀸𑀯𑀦𑀺𑀫𑀺𑀢𑁆𑀢𑀁. 𑀧𑀼𑀕𑁆𑀕𑀮𑀦𑀺𑀫𑀺𑀢𑁆𑀢𑀦𑁆𑀢𑀺 𑀧𑀼𑀕𑁆𑀕𑀮𑀸𑀪𑀺𑀦𑀺𑀯𑁂𑀲𑀦𑀦𑀺𑀫𑀺𑀢𑁆𑀢𑀁. 𑀥𑀫𑁆𑀫𑀦𑀺𑀫𑀺𑀢𑁆𑀢𑀦𑁆𑀢𑀺 𑀥𑀫𑁆𑀫𑀸𑀭𑀫𑁆𑀫𑀡𑀲𑀗𑁆𑀔𑀸𑀢𑀁 𑀦𑀺𑀫𑀺𑀢𑁆𑀢𑀁. ‘‘𑀲𑀺𑀬𑀸 𑀦𑀼 𑀔𑁄, 𑀪𑀦𑁆𑀢𑁂’’𑀢𑀺 𑀣𑁂𑀭𑁂𑀦 𑀧𑀼𑀝𑁆𑀞𑁄 𑀪𑀕𑀯𑀸 ‘‘𑀲𑀺𑀬𑀸’’𑀢𑀺 𑀅𑀯𑁄𑀘 𑀮𑁄𑀓𑀼𑀢𑁆𑀢𑀭𑀲𑀫𑀸𑀥𑀺𑀧𑁆𑀧𑀝𑀺𑀮𑀸𑀪𑀁 𑀲𑀦𑁆𑀥𑀸𑀬. 𑀲𑁄 𑀳𑀺 𑀦𑀺𑀩𑁆𑀩𑀸𑀦𑀁 𑀲𑀦𑁆𑀢𑀁 𑀧𑀡𑀻𑀢𑀦𑁆𑀢𑀺 𑀘 𑀧𑀲𑁆𑀲𑀢𑀺. 𑀢𑁂𑀦𑀸𑀳 ‘‘𑀇𑀥𑀸𑀦𑀦𑁆𑀤𑀸’’𑀢𑀺𑀆𑀤𑀺.

𑀦𑀺𑀩𑁆𑀩𑀸𑀦𑀁 𑀲𑀦𑁆𑀢𑀦𑁆𑀢𑀺 𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀢𑁆𑀯𑀸𑀢𑀺 𑀦𑀺𑀩𑁆𑀩𑀸𑀦𑀁 𑀲𑀦𑁆𑀢𑀦𑁆𑀢𑀺 𑀆𑀪𑀼𑀚𑀺𑀢𑁆𑀯𑀸 𑀨𑀮𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀢𑁆𑀯𑀸. 𑀤𑀺𑀯𑀲𑀫𑁆𑀧𑀻𑀢𑀺𑀆𑀤𑀺𑀦𑀸 𑀅𑀲𑀗𑁆𑀔𑀢𑀸𑀬 𑀥𑀸𑀢𑀼𑀬𑀸 𑀅𑀘𑁆𑀘𑀦𑁆𑀢𑀲𑀦𑁆𑀢𑀧𑀡𑀻𑀢𑀸𑀤𑀺𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀅𑀝𑁆𑀞𑀯𑀺𑀥𑁂𑀢𑀺 ‘‘𑀲𑀦𑁆𑀢𑀁 𑀧𑀡𑀻𑀢𑀁 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀢𑀡𑁆𑀳𑀸𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦’’𑀦𑁆𑀢𑀺 𑀏𑀯𑀁 𑀅𑀝𑁆𑀞𑀯𑀺𑀥𑁂 𑀆𑀪𑁄𑀕𑀲𑀜𑁆𑀜𑀺𑀢𑁂 𑀲𑀫𑀦𑁆𑀦𑀸𑀳𑀸𑀭𑁂. 𑀦𑀺𑀤𑁆𑀥𑀸𑀭𑀡𑁂 𑀘𑁂𑀢𑀁 𑀪𑀼𑀫𑁆𑀫𑀁. 𑀇𑀫𑀲𑁆𑀫𑀺𑀁 𑀞𑀸𑀦𑁂…𑀧𑁂… 𑀮𑀩𑁆𑀪𑀦𑁆𑀢𑁂𑀯𑀸𑀢𑀺 ‘‘𑀇𑀥𑀸𑀦𑀦𑁆𑀤, 𑀪𑀺𑀓𑁆𑀔𑀼𑀦𑁄 𑀏𑀯𑀁 𑀳𑁄𑀢𑀻’’𑀢𑀺 𑀆𑀕𑀢𑁂 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑀧𑁆𑀧𑀤𑁂𑀲𑁂 𑀏𑀓𑁄𑀧𑀺 𑀆𑀪𑁄𑀕𑀲𑀫𑀦𑁆𑀦𑀸𑀳𑀸𑀭𑁄 𑀘𑁂𑀧𑀺 𑀲𑀩𑁆𑀩𑁂 𑀅𑀝𑁆𑀞𑀧𑀺 𑀆𑀪𑁄𑀕𑀲𑀫𑀦𑁆𑀦𑀸𑀳𑀸𑀭𑀸 𑀮𑀩𑁆𑀪𑀦𑁆𑀢𑁂𑀯 𑀲𑀫𑀦𑁆𑀦𑀸𑀳𑀭𑀢𑀁 𑀅𑀢𑁆𑀣𑀸𑀯𑀳𑀢𑁆𑀢𑀸.

𑀜𑀸𑀡𑁂𑀦 𑀚𑀸𑀦𑀺𑀢𑁆𑀯𑀸𑀢𑀺 𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑀳𑀺𑀢𑁂𑀦 𑀫𑀕𑁆𑀕𑀜𑀸𑀡𑁂𑀦 𑀚𑀸𑀦𑀺𑀢𑁆𑀯𑀸. 𑀧𑀭𑀸𑀦𑀺 𑀘 𑀑𑀧𑀭𑀸𑀦𑀺 𑀘 𑀘𑀓𑁆𑀔𑀸𑀤𑀻𑀦𑀺 𑀆𑀬𑀢𑀦𑀸𑀦𑀺. 𑀲𑀦𑁆𑀢𑀢𑀸𑀬𑀸𑀢𑀺 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀢𑀸𑀬. 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀥𑀽𑀫𑀯𑀺𑀭𑀳𑀺𑀢𑁄𑀢𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺 𑀏𑀯 𑀲𑀦𑁆𑀢𑀸𑀧𑀦𑀝𑁆𑀞𑁂𑀦 𑀥𑀽𑀫𑁄, 𑀢𑁂𑀦 𑀯𑀺𑀭𑀳𑀺𑀢𑁄. 𑀅𑀦𑀻𑀖𑁄𑀢𑀺 𑀅𑀧𑀸𑀧𑁄. 𑀚𑀸𑀢𑀺𑀚𑀭𑀸𑀕𑀳𑀡𑁂𑀦𑁂𑀯 𑀩𑁆𑀬𑀸𑀥𑀺𑀫𑀭𑀡𑀫𑁆𑀧𑀺 𑀕𑀳𑀺𑀢𑀫𑁂𑀯𑀸𑀢𑀺 𑀢𑀩𑁆𑀪𑀸𑀯𑀪𑀸𑀯𑀢𑁄𑀢𑀺 𑀯𑀼𑀢𑁆𑀢𑀁.

𑀆𑀦𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀲𑀸𑀭𑀺𑀧𑀼𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁩. 𑀢𑀢𑀺𑀬𑁂, ‘‘𑀲𑀸𑀭𑀺𑀧𑀼𑀢𑁆𑀢, 𑀫𑀬𑀸 𑀲𑀁𑀔𑀺𑀢𑁆𑀢𑁂𑀦 𑀤𑁂𑀲𑀺𑀢𑀁 𑀥𑀫𑁆𑀫𑀁 𑀢𑀸𑀤𑀺𑀲𑁂𑀦𑀧𑀺 𑀦 𑀲𑀼𑀓𑀭𑀁 𑀯𑀺𑀜𑁆𑀜𑀸𑀢𑀼’’𑀦𑁆𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦𑁂𑀯 𑀯𑀤𑀦𑁆𑀢𑁄 𑀣𑁂𑀭𑀲𑁆𑀲 𑀜𑀸𑀡𑀁 𑀲𑀩𑁆𑀩𑀫𑀢𑀺𑀓𑁆𑀓𑀫𑀁. 𑀅𑀜𑁆𑀜𑀸𑀢𑀸𑀭𑁄 𑀘 𑀤𑀼𑀮𑁆𑀮𑀪𑀸𑀢𑀺 𑀳𑀺 𑀇𑀫𑀺𑀦𑀸 𑀲𑀸𑀫𑀜𑁆𑀜𑀯𑀘𑀦𑁂𑀦 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀫𑁆𑀧𑀺 𑀅𑀦𑁆𑀢𑁄𑀕𑀥𑀁 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀢𑁂𑀦𑀧𑀺 𑀅𑀢𑁆𑀢𑀦𑁄 𑀤𑁂𑀲𑀦𑀸𑀬 𑀤𑀼𑀧𑁆𑀧𑀝𑀺𑀯𑀺𑀤𑁆𑀥𑀪𑀸𑀯𑀁 𑀤𑀲𑁆𑀲𑁂𑀢𑀺.

𑀲𑀫𑁆𑀫𑀸𑀢𑀺 𑀳𑁂𑀢𑀼𑀦𑀸 𑀓𑀸𑀭𑀡𑁂𑀦. 𑀢𑁂𑀦𑀸𑀳 ‘‘𑀉𑀧𑀸𑀬𑁂𑀦𑀸’’𑀢𑀺𑀆𑀤𑀺. 𑀫𑀸𑀦𑀸𑀪𑀺𑀲𑀫𑀬𑀸𑀢𑀺 𑀫𑀸𑀦𑀲𑁆𑀲 𑀤𑀲𑁆𑀲𑀦𑀸𑀪𑀺𑀲𑀫𑀬𑀸. 𑀧𑀳𑀸𑀦𑀸𑀪𑀺𑀲𑀫𑀬𑁄𑀢𑀺 𑀘 𑀤𑀲𑁆𑀲𑀦𑀸𑀪𑀺𑀲𑀫𑀬𑁄𑀢𑀺 𑀘 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑁄 𑀯𑀼𑀢𑁆𑀢𑁄. 𑀅𑀭𑀳𑀢𑁆𑀢𑀫𑀕𑁆𑀕𑁄 𑀳𑀺 𑀧𑀭𑀺𑀜𑁆𑀜𑀸𑀓𑀺𑀘𑁆𑀘𑀲𑀺𑀤𑁆𑀥𑀺𑀬𑀸 𑀓𑀺𑀘𑁆𑀘𑀯𑀲𑁂𑀦 𑀫𑀸𑀦𑀁 𑀧𑀲𑁆𑀲𑀢𑀺, 𑀅𑀲𑀫𑁆𑀫𑁄𑀳𑀧𑁆𑀧𑀝𑀺𑀯𑁂𑀥𑀯𑀲𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀅𑀬𑀫𑀲𑁆𑀲 𑀤𑀲𑁆𑀲𑀦𑀸𑀪𑀺𑀲𑀫𑀬𑁄. 𑀢𑁂𑀦 𑀤𑀺𑀝𑁆𑀞𑁄 𑀧𑀦 𑀧𑀳𑀸𑀦𑀸𑀪𑀺𑀲𑀫𑀬𑁄 𑀘. 𑀤𑀲𑁆𑀲𑀦𑀸𑀪𑀺𑀲𑀫𑀬𑁂𑀦 𑀳𑀺 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀫𑁂𑀯 𑀧𑀳𑀻𑀬𑀢𑀺. 𑀤𑀺𑀝𑁆𑀞𑀯𑀺𑀲𑁂𑀦 𑀤𑀺𑀝𑁆𑀞𑀲𑀢𑁆𑀢𑀸𑀦𑀁 𑀚𑀻𑀯𑀺𑀢𑀁 𑀯𑀺𑀬 𑀅𑀬𑀫𑀲𑁆𑀲 𑀧𑀳𑀸𑀦𑀸𑀪𑀺𑀲𑀫𑀬𑁄. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀧𑀳𑀸𑀦𑀸𑀪𑀺𑀲𑀫𑀬𑀲𑁆𑀲 𑀤𑀲𑁆𑀲𑀦𑀸𑀪𑀺𑀲𑀫𑀬𑀦𑀸𑀦𑀦𑁆𑀢𑀭𑀺𑀬𑀓𑀢𑁆𑀢𑀸 ‘‘𑀧𑀳𑀸𑀦𑀸𑀪𑀺𑀲𑀫𑀬𑁂𑀦’’𑀇𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀧𑀳𑀸𑀦𑀸𑀪𑀺𑀲𑀫𑀬𑁂 𑀳𑀺 𑀕𑀳𑀺𑀢𑁂 𑀤𑀲𑁆𑀲𑀦𑀸𑀪𑀺𑀲𑀫𑀬𑁄 𑀕𑀳𑀺𑀢𑁄𑀯 𑀳𑁄𑀢𑀺.

𑀅𑀦𑁆𑀢𑀫𑀓𑀸𑀲𑀺 𑀤𑀼𑀓𑁆𑀔𑀲𑁆𑀲𑀸𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀫𑀸𑀦𑀲𑁆𑀲 𑀧𑀳𑀻𑀦𑀢𑁆𑀢𑀸 𑀬𑁂 𑀇𑀫𑁂 ‘‘𑀓𑀸𑀬𑀩𑀦𑁆𑀥𑀦𑀲𑁆𑀲 𑀅𑀦𑁆𑀢𑁄 𑀚𑀻𑀭𑀢𑀺 (𑀘𑀽𑀴𑀯. 𑁨𑁭𑁮), 𑀳𑀭𑀺𑀢𑀦𑁆𑀢𑀁 𑀯𑀸’’𑀢𑀺 (𑀫. 𑀦𑀺. 𑁧.𑁩𑁦𑁪) 𑀏𑀯𑀁 𑀯𑀼𑀢𑁆𑀢𑀅𑀦𑁆𑀢𑀺𑀫𑀫𑀭𑀺𑀬𑀸𑀤𑀦𑁆𑀢𑁄 𑀘 ‘‘𑀅𑀦𑁆𑀢𑀫𑀺𑀤𑀁, 𑀪𑀺𑀓𑁆𑀔𑀯𑁂, 𑀚𑀻𑀯𑀺𑀓𑀸𑀦’’𑀦𑁆𑀢𑀺 (𑀲𑀁. 𑀦𑀺. 𑁩.𑁮𑁦; 𑀇𑀢𑀺𑀯𑀼. 𑁯𑁧) 𑀏𑀯𑀁 𑀯𑀼𑀢𑁆𑀢𑀮𑀸𑀫𑀓𑀦𑁆𑀢𑁄 𑀘 ‘‘𑀲𑀓𑁆𑀓𑀸𑀬𑁄 𑀏𑀓𑁄 𑀅𑀦𑁆𑀢𑁄’’𑀢𑀺 (𑀲𑀁. 𑀦𑀺. 𑁩.𑁧𑁦𑁩) 𑀏𑀯𑀁 𑀯𑀼𑀢𑁆𑀢𑀓𑁄𑀝𑁆𑀞𑀸𑀲𑀦𑁆𑀢𑁄 𑀘 ‘‘𑀏𑀲𑁂𑀯𑀦𑁆𑀢𑁄 𑀤𑀼𑀓𑁆𑀔𑀲𑁆𑀲 𑀲𑀧𑀘𑁆𑀘𑀬𑀲𑀗𑁆𑀔𑀬𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑀓𑁄𑀝𑁆𑀞𑀸𑀲𑀦𑁆𑀢𑁄 𑀘𑀸𑀢𑀺 𑀘𑀢𑁆𑀢𑀸𑀭𑁄 𑀅𑀦𑁆𑀢𑀸, 𑀢𑁂𑀲𑀼 𑀲𑀩𑁆𑀩𑀲𑁆𑀲𑁂𑀯 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀅𑀤𑀼𑀁 𑀘𑀢𑀼𑀢𑁆𑀣𑀓𑁄𑀝𑀺𑀲𑀗𑁆𑀔𑀸𑀢𑀁 𑀅𑀦𑁆𑀢𑀫𑀓𑀸𑀲𑀺, 𑀧𑀭𑀺𑀘𑁆𑀙𑁂𑀤𑀁 𑀧𑀭𑀺𑀯𑀝𑀼𑀫𑀁 𑀅𑀓𑀸𑀲𑀺, 𑀅𑀦𑁆𑀢𑀺𑀫𑀲𑀫𑀼𑀤𑀬𑀫𑀢𑁆𑀢𑀸𑀯𑀲𑁂𑀲𑀁 𑀤𑀼𑀓𑁆𑀔𑀫𑀓𑀸𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦𑀸𑀳 ‘‘𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀫𑀓𑀸𑀲𑀻’’𑀢𑀺.

𑀦𑀦𑀼 𑀘 ‘‘𑀧𑀳𑀸𑀦’’𑀦𑁆𑀢𑀺 𑀇𑀫𑀲𑁆𑀲 𑀦𑀺𑀤𑁆𑀤𑁂𑀲𑁂 𑀦𑀺𑀩𑁆𑀩𑀸𑀦𑀁 𑀆𑀕𑀢𑀁? 𑀇𑀥 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀧𑁆𑀧𑀳𑀸𑀦𑀲𑀗𑁆𑀔𑀸𑀢𑀁 𑀅𑀭𑀳𑀢𑁆𑀢𑀨𑀮𑀁 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀦𑀺𑀤𑁆𑀤𑁂𑀲𑁂𑀦𑀸𑀬𑀁 𑀯𑀡𑁆𑀡𑀦𑀸 𑀯𑀺𑀭𑀼𑀚𑁆𑀛𑀢𑀻𑀢𑀺 𑀆𑀳 ‘‘𑀦𑀺𑀤𑁆𑀤𑁂𑀲𑁂 𑀧𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀢𑀸𑀦𑀺 𑀧𑀤𑀸𑀦𑀺 𑀆𑀕𑀢𑀸𑀦𑀻𑀢𑀺 𑀢𑀲𑁆𑀫𑀺𑀁 𑀦𑀺𑀤𑁆𑀤𑁂𑀲𑁂 ‘‘𑀧𑀳𑀸𑀦𑀁 𑀯𑀽𑀧𑀲𑀫𑀁 𑀧𑀝𑀺𑀦𑀺𑀲𑁆𑀲𑀕𑁆𑀕’’𑀦𑁆𑀢𑀺𑀆𑀤𑀻𑀦𑀺 (𑀘𑀽𑀴𑀦𑀺. 𑁭𑁫 𑀉𑀤𑀬𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄) 𑀧𑀤𑀸𑀦𑀺 𑀆𑀕𑀢𑀸𑀦𑀺.

𑀥𑀫𑁆𑀫𑀢𑀓𑁆𑀓𑀧𑀼𑀭𑁂𑀚𑀯𑀦𑁆𑀢𑀺 𑀇𑀫𑀺𑀦𑀸 𑀢𑀲𑁆𑀫𑀺𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀯𑀺𑀫𑁄𑀓𑁆𑀔𑁂 𑀞𑀢𑁆𑀯𑀸 𑀛𑀸𑀦𑀗𑁆𑀕𑀸𑀦𑀺 𑀯𑀺𑀧𑀲𑁆𑀲𑀺𑀢𑁆𑀯𑀸 𑀅𑀥𑀺𑀕𑀢𑀁 𑀅𑀭𑀳𑀢𑁆𑀢𑀯𑀺𑀫𑁄𑀓𑁆𑀔𑀁 𑀯𑀤𑀢𑀺. 𑀅𑀭𑀳𑀢𑁆𑀢𑀯𑀺𑀫𑁄𑀓𑁆𑀔𑀲𑁆𑀲 𑀳𑀺 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀲𑀗𑁆𑀔𑀸𑀢𑁄 𑀥𑀫𑁆𑀫𑀢𑀓𑁆𑀓𑁄 𑀧𑀼𑀭𑁂𑀚𑀯𑁄 𑀳𑁄𑀢𑀺.

𑀲𑀸𑀭𑀺𑀧𑀼𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀦𑀺𑀤𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁪. 𑀘𑀢𑀼𑀢𑁆𑀣𑁂 𑀧𑀺𑀡𑁆𑀟𑀓𑀭𑀡𑀢𑁆𑀣𑀸𑀬𑀸𑀢𑀺 𑀆𑀬𑀽𑀳𑀦𑀯𑀲𑁂𑀦 𑀭𑀸𑀲𑀺𑀓𑀭𑀡𑀢𑁆𑀣𑀸𑀬. 𑀅𑀪𑀺𑀦𑁆𑀦𑀸𑀦𑀻𑀢𑀺 𑀏𑀓𑀤𑁂𑀲𑁂𑀦𑀧𑀺 𑀅𑀔𑀡𑁆𑀟𑀺𑀢𑀸𑀦𑀺. 𑀪𑀺𑀦𑁆𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀳𑀺 𑀩𑀻𑀚𑀁 𑀩𑀻𑀚𑀓𑀺𑀘𑁆𑀘𑀸𑀬 𑀦 𑀉𑀧𑀓𑀧𑁆𑀧𑀢𑀺. 𑀅𑀧𑀽𑀢𑀻𑀦𑀻𑀢𑀺 𑀉𑀤𑀓𑀢𑁂𑀫𑀦𑁂𑀦 𑀧𑀽𑀢𑀺𑀪𑀸𑀯𑀁 𑀦 𑀉𑀧𑀕𑀢𑀸𑀦𑀺. 𑀧𑀽𑀢𑀺𑀩𑀻𑀚𑀜𑁆𑀳𑀺 𑀩𑀻𑀚𑀢𑁆𑀣𑀸𑀬 𑀦 𑀉𑀧𑀓𑀧𑁆𑀧𑀢𑀺. 𑀢𑁂𑀦𑀸𑀳 ‘‘𑀧𑀽𑀢𑀺𑀪𑀸𑀯𑁂𑀦 𑀅𑀩𑀻𑀚𑀢𑁆𑀢𑀁 𑀅𑀧𑁆𑀧𑀢𑁆𑀢𑀸𑀦𑀻’’𑀢𑀺. 𑀦 𑀯𑀸𑀢𑁂𑀦 𑀦 𑀘 𑀆𑀢𑀧𑁂𑀦 𑀳𑀢𑀸𑀦𑀻𑀢𑀺 𑀯𑀸𑀢𑁂𑀦 𑀘 𑀆𑀢𑀧𑁂𑀦 𑀘 𑀦 𑀳𑀢𑀸𑀦𑀺, 𑀦𑀺𑀭𑁄𑀚𑀢𑀁 𑀦 𑀧𑀸𑀧𑀺𑀢𑀸𑀦𑀺. 𑀦𑀺𑀭𑁄𑀚𑀜𑁆𑀳𑀺 𑀓𑀲𑀝𑀩𑀻𑀚𑀁 𑀩𑀻𑀚𑀢𑁆𑀣𑀸𑀬 𑀦 𑀉𑀧𑀓𑀧𑁆𑀧𑀢𑀺. 𑀲𑀸𑀭𑀸𑀤𑀸𑀦𑀻𑀢𑀺 𑀢𑀡𑁆𑀟𑀼𑀮𑀲𑀸𑀭𑀲𑁆𑀲 𑀆𑀤𑀸𑀦𑀢𑁄 𑀲𑀸𑀭𑀸𑀤𑀸𑀦𑀺. 𑀦𑀺𑀲𑁆𑀲𑀸𑀭𑀜𑁆𑀳𑀺 𑀩𑀻𑀚𑀁 𑀩𑀻𑀚𑀢𑁆𑀣𑀸𑀬 𑀦 𑀉𑀧𑀓𑀧𑁆𑀧𑀢𑀺. 𑀢𑁂𑀦𑀸𑀳 ‘‘𑀕𑀳𑀺𑀢𑀲𑀸𑀭𑀸𑀦𑀻’’𑀢𑀺, 𑀧𑀢𑀺𑀝𑁆𑀞𑀺𑀢𑀲𑀸𑀭𑀸𑀦𑀻𑀢𑀺 𑀅𑀢𑁆𑀣𑁄. 𑀲𑀦𑁆𑀦𑀺𑀘𑀬𑀪𑀸𑀯𑁂𑀦 𑀲𑀼𑀔𑀁 𑀲𑀬𑀺𑀢𑀸𑀦𑀻𑀢𑀺 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀓𑁄𑀝𑁆𑀞𑀧𑀓𑁆𑀔𑀺𑀢𑁆𑀢𑀦𑀺𑀬𑀸𑀫𑁂𑀦𑁂𑀯 𑀲𑀼𑀔𑀲𑀬𑀺𑀢𑀸𑀦𑀺.

𑀓𑀫𑁆𑀫𑀯𑀺𑀪𑀢𑁆𑀢𑀻𑀢𑀺 𑀓𑀫𑁆𑀫𑀯𑀺𑀪𑀸𑀕𑁄. 𑀤𑀺𑀝𑁆𑀞𑀥𑀫𑁆𑀫𑁄 𑀯𑀼𑀘𑁆𑀘𑀢𑀺 𑀧𑀘𑁆𑀘𑀓𑁆𑀔𑀪𑀽𑀢𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀅𑀢𑁆𑀢𑀪𑀸𑀯𑁄, 𑀢𑀢𑁆𑀣 𑀯𑁂𑀤𑀺𑀢𑀩𑁆𑀩𑀨𑀮𑀁 𑀓𑀫𑁆𑀫𑀁 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁. 𑀧𑀘𑁆𑀘𑀼𑀧𑀦𑁆𑀦𑀪𑀯𑀢𑁄 𑀅𑀦𑀦𑁆𑀢𑀭𑀁 𑀯𑁂𑀤𑀺𑀢𑀩𑁆𑀩𑀨𑀮𑀁 𑀓𑀫𑁆𑀫𑀁 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀁. 𑀅𑀧𑀭𑀧𑀭𑀺𑀬𑀸𑀬𑀯𑁂𑀤𑀦𑀻𑀬𑀦𑁆𑀢𑀺 𑀤𑀺𑀝𑁆𑀞𑀥𑀫𑁆𑀫𑀸𑀦𑀦𑁆𑀢𑀭𑀪𑀯𑀢𑁄 𑀅𑀜𑁆𑀜𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑀧𑀭𑀺𑀬𑀸𑀬𑁂 𑀅𑀢𑁆𑀢𑀪𑀸𑀯𑀧𑀭𑀺𑀯𑀢𑁆𑀢𑁂 𑀯𑁂𑀤𑀺𑀢𑀩𑁆𑀩𑀨𑀮𑀁 𑀓𑀫𑁆𑀫𑀁. 𑀧𑀝𑀺𑀧𑀓𑁆𑀔𑁂𑀳𑀺 𑀅𑀦𑀪𑀺𑀪𑀽𑀢𑀢𑀸𑀬 𑀧𑀘𑁆𑀘𑀬𑀯𑀺𑀲𑁂𑀲𑁂𑀦 𑀧𑀝𑀺𑀮𑀤𑁆𑀥𑀯𑀺𑀲𑁂𑀲𑀢𑀸𑀬 𑀘 𑀩𑀮𑀯𑀪𑀸𑀯𑀧𑁆𑀧𑀢𑁆𑀢𑀸 𑀢𑀸𑀤𑀺𑀲𑀲𑁆𑀲 𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑀲𑁆𑀲 𑀯𑀲𑁂𑀦 𑀲𑀸𑀢𑀺𑀲𑀬𑀸 𑀳𑀼𑀢𑁆𑀯𑀸 𑀧𑀯𑀢𑁆𑀢𑀸 𑀧𑀞𑀫𑀚𑀯𑀦𑀘𑁂𑀢𑀦𑀸 𑀢𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀨𑀮𑀤𑀸𑀬𑀺𑀦𑀻 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀓𑀫𑁆𑀫𑀁 𑀦𑀸𑀫. 𑀲𑀸 𑀳𑀺 𑀯𑀼𑀢𑁆𑀢𑀸𑀓𑀸𑀭𑁂𑀦 𑀩𑀮𑀯𑀢𑀻 𑀚𑀯𑀦𑀲𑀦𑁆𑀢𑀸𑀦𑁂 𑀕𑀼𑀡𑀯𑀺𑀲𑁂𑀲𑀬𑀼𑀢𑁆𑀢𑁂𑀲𑀼 𑀉𑀧𑀓𑀸𑀭𑀸𑀦𑀼𑀧𑀓𑀸𑀭𑀯𑀲𑀧𑁆𑀧𑀯𑀢𑁆𑀢𑀺𑀬𑀸 𑀆𑀲𑁂𑀯𑀦𑀸𑀮𑀸𑀪𑁂𑀦 𑀅𑀧𑁆𑀧𑀯𑀺𑀧𑀸𑀓𑀢𑀸𑀬 𑀘 𑀧𑀞𑀫𑀚𑀯𑀦𑀘𑁂𑀢𑀦𑀸 𑀇𑀢𑀭𑀤𑁆𑀯𑀬𑀁 𑀯𑀺𑀬 𑀧𑀯𑀢𑁆𑀢𑀲𑀦𑁆𑀢𑀸𑀦𑀼𑀧𑀭𑀫𑀸𑀧𑁂𑀓𑁆𑀔𑀁 𑀑𑀓𑀸𑀲𑀮𑀸𑀪𑀸𑀧𑁂𑀓𑁆𑀔𑀜𑁆𑀘 𑀓𑀫𑁆𑀫𑀁 𑀦 𑀳𑁄𑀢𑀻𑀢𑀺 𑀇𑀥𑁂𑀯 𑀧𑀼𑀧𑁆𑀨𑀫𑀢𑁆𑀢𑀁 𑀯𑀺𑀬 𑀧𑀯𑀢𑁆𑀢𑀺𑀯𑀺𑀧𑀸𑀓𑀫𑀢𑁆𑀢𑀁 𑀨𑀮𑀁 𑀤𑁂𑀢𑀺. 𑀢𑀣𑀸 𑀅𑀲𑀓𑁆𑀓𑁄𑀦𑁆𑀢𑀦𑁆𑀢𑀺 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀤𑀸𑀦𑀁 𑀦𑀸𑀫 𑀉𑀧𑀥𑀺𑀧𑁆𑀧𑀬𑁄𑀕𑀸𑀤𑀺𑀧𑀘𑁆𑀘𑀬𑀦𑁆𑀢𑀭𑀲𑀫𑀯𑀸𑀬𑁂𑀦𑁂𑀯 𑀳𑁄𑀢𑀻𑀢𑀺 𑀢𑀤𑀪𑀸𑀯𑀢𑁄 𑀢𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀯𑀺𑀧𑀸𑀓𑀁 𑀤𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀁. 𑀅𑀳𑁄𑀲𑀺𑀓𑀫𑁆𑀫𑀦𑁆𑀢𑀺 𑀅𑀳𑁄𑀲𑀺 𑀏𑀯 𑀓𑀫𑁆𑀫𑀁, 𑀦 𑀢𑀲𑁆𑀲 𑀯𑀺𑀧𑀸𑀓𑁄 𑀅𑀳𑁄𑀲𑀺 𑀅𑀢𑁆𑀣𑀺 𑀪𑀯𑀺𑀲𑁆𑀲𑀢𑀺 𑀘𑀸𑀢𑀺 𑀏𑀯𑀁 𑀯𑁂𑀤𑀺𑀢𑀩𑁆𑀩𑀁 𑀓𑀫𑁆𑀫𑀁.