(𑁬) 𑁧. 𑀩𑁆𑀭𑀸𑀳𑁆𑀫𑀡𑀯𑀕𑁆𑀕𑁄

𑁧. 𑀧𑀞𑀫𑀤𑁆𑀯𑁂𑀩𑁆𑀭𑀸𑀳𑁆𑀫𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁨. 𑀩𑁆𑀭𑀸𑀳𑁆𑀫𑀡𑀯𑀕𑁆𑀕𑀲𑁆𑀲 𑀧𑀞𑀫𑁂 𑀚𑀭𑀸𑀚𑀺𑀡𑁆𑀡𑀸𑀢𑀺 𑀚𑀭𑀸𑀯𑀲𑁂𑀦 𑀚𑀺𑀡𑁆𑀡𑀸, 𑀦 𑀩𑁆𑀬𑀸𑀥𑀺𑀆𑀤𑀻𑀦𑀁 𑀯𑀲𑁂𑀦 𑀚𑀺𑀡𑁆𑀡𑀲𑀤𑀺𑀲𑀢𑁆𑀢𑀸 𑀚𑀺𑀡𑁆𑀡𑀸. 𑀯𑀬𑁄𑀯𑀼𑀤𑁆𑀥𑀸𑀢𑀺 𑀯𑀬𑀲𑁄 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑀺𑀬𑀸 𑀯𑀼𑀤𑁆𑀥𑀸, 𑀦 𑀲𑀻𑀮𑀸𑀤𑀺𑀯𑀼𑀤𑁆𑀥𑀺𑀬𑀸. 𑀚𑀸𑀢𑀺𑀫𑀳𑀮𑁆𑀮𑀓𑀸𑀢𑀺 𑀚𑀸𑀢𑀺𑀬𑀸 𑀫𑀳𑀦𑁆𑀢𑀢𑀸𑀬 𑀘𑀺𑀭𑀭𑀢𑁆𑀢𑀜𑁆𑀜𑀼𑀢𑀸𑀬 𑀚𑀸𑀢𑀺𑀫𑀳𑀮𑁆𑀮𑀓𑀸. 𑀢𑀬𑁄 𑀅𑀤𑁆𑀥𑁂 𑀅𑀢𑀺𑀓𑁆𑀓𑀦𑁆𑀢𑀸𑀢𑀺 𑀧𑀞𑀫𑁄, 𑀫𑀚𑁆𑀛𑀺𑀫𑁄, 𑀧𑀘𑁆𑀙𑀺𑀫𑁄𑀢𑀺 𑀢𑀬𑁄 𑀅𑀤𑁆𑀥𑁂 𑀅𑀢𑀻𑀢𑀸. 𑀢𑀢𑀺𑀬𑀁 𑀯𑀬𑀁 𑀅𑀦𑀼𑀧𑁆𑀧𑀢𑁆𑀢𑀸𑀢𑀺 𑀢𑀢𑁄 𑀏𑀯 𑀧𑀘𑁆𑀙𑀺𑀫𑀁 𑀯𑀬𑀁 𑀅𑀦𑀼𑀧𑁆𑀧𑀢𑁆𑀢𑀸. 𑀅𑀓𑀢𑀪𑀬𑀧𑀭𑀺𑀢𑁆𑀢𑀸𑀡𑀸𑀢𑀺 𑀏𑀢𑁆𑀣 𑀪𑀬𑀧𑀭𑀺𑀢𑁆𑀢𑀸𑀡𑀦𑁆𑀢𑀺 𑀤𑀼𑀕𑁆𑀕𑀢𑀺𑀪𑀬𑀢𑁄 𑀧𑀭𑀺𑀢𑁆𑀢𑀸𑀬𑀓𑀁 𑀧𑀼𑀜𑁆𑀜𑀁, 𑀢𑀁 𑀅𑀓𑀢𑀁 𑀏𑀢𑁂𑀳𑀻𑀢𑀺 𑀅𑀓𑀢𑀪𑀬𑀧𑀭𑀺𑀢𑁆𑀢𑀸𑀡𑀸. 𑀧𑀢𑀺𑀝𑁆𑀞𑀸𑀓𑀫𑁆𑀫𑀦𑁆𑀢𑀺 𑀲𑀼𑀕𑀢𑀺𑀲𑀗𑁆𑀔𑀸𑀢𑀧𑁆𑀧𑀢𑀺𑀝𑁆𑀞𑀸𑀯𑀳𑀁 𑀓𑀫𑁆𑀫𑀁. 𑀉𑀧𑀲𑀁𑀳𑀭𑀻𑀬𑀢𑀻𑀢𑀺 𑀲𑀫𑁆𑀧𑀸𑀧𑀻𑀬𑀢𑀺. ‘‘𑀉𑀧𑀦𑀻𑀬𑀢𑀻’’𑀢𑀺 𑀯𑀼𑀢𑁆𑀢𑀁, 𑀓𑀺𑀁 𑀓𑁂𑀦 𑀉𑀧𑀦𑀻𑀬𑀢𑀻𑀢𑀺 𑀆𑀳 ‘‘𑀅𑀬𑀜𑁆𑀳𑀺 𑀚𑀸𑀢𑀺𑀬𑀸 𑀚𑀭𑀁 𑀉𑀧𑀦𑀻𑀬𑀢𑀻’’𑀢𑀺𑀆𑀤𑀺. 𑀅𑀬𑀦𑁆𑀢𑀺 𑀮𑁄𑀓𑁄. 𑀚𑀸𑀢𑁄 𑀦 𑀚𑀸𑀢𑀪𑀸𑀯𑁂𑀦𑁂𑀯 𑀢𑀺𑀝𑁆𑀞𑀢𑀺, 𑀅𑀣 𑀔𑁄 𑀢𑀢𑁄 𑀧𑀭𑀁 𑀚𑀭𑀁 𑀧𑀸𑀧𑀻𑀬𑀢𑀺, 𑀚𑀭𑀸𑀬 𑀩𑁆𑀬𑀸𑀥𑀺𑀁 𑀧𑀸𑀧𑀻𑀬𑀢𑀺. 𑀏𑀯𑀁 𑀧𑀭𑀢𑁄 𑀧𑀭𑀁 𑀤𑀼𑀓𑁆𑀔𑀫𑁂𑀯 𑀉𑀧𑀦𑀻𑀬𑀢𑀺.

𑀢𑀸𑀬𑀦𑀝𑁆𑀞𑁂𑀦𑀸𑀢𑀺 𑀭𑀓𑁆𑀔𑀦𑀝𑁆𑀞𑁂𑀦. 𑀦𑀺𑀮𑀻𑀬𑀦𑀝𑁆𑀞𑁂𑀦𑀸𑀢𑀺 𑀦𑀺𑀮𑀻𑀦𑀝𑁆𑀞𑀸𑀦𑀪𑀸𑀯𑁂𑀦. 𑀧𑀢𑀺𑀝𑁆𑀞𑀸𑀦𑀝𑁆𑀞𑁂𑀦𑀸𑀢𑀺 𑀧𑀢𑀺𑀝𑁆𑀞𑀸𑀦𑀪𑀸𑀯𑁂𑀦. 𑀅𑀯𑀲𑁆𑀲𑀬𑀦𑀝𑁆𑀞𑁂𑀦𑀸𑀢𑀺 𑀅𑀯𑀲𑁆𑀲𑀬𑀺𑀢𑀩𑁆𑀩𑀪𑀸𑀯𑁂𑀦. 𑀉𑀢𑁆𑀢𑀫𑀕𑀢𑀺𑀯𑀲𑁂𑀦𑀸𑀢𑀺 𑀧𑀭𑀫𑀕𑀢𑀺𑀪𑀸𑀯𑁂𑀦.

𑀧𑀞𑀫𑀤𑁆𑀯𑁂𑀩𑁆𑀭𑀸𑀳𑁆𑀫𑀡𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀤𑀼𑀢𑀺𑀬𑀤𑁆𑀯𑁂𑀩𑁆𑀭𑀸𑀳𑁆𑀫𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁩. 𑀤𑀼𑀢𑀺𑀬𑁂 𑀪𑀚𑀺𑀢𑀩𑁆𑀩𑀝𑁆𑀞𑁂𑀦 𑀧𑀭𑁂𑀲𑀁 𑀪𑀸𑀚𑀺𑀢𑀩𑁆𑀩𑀝𑁆𑀞𑁂𑀦 𑀪𑀸𑀚𑀦𑀁, 𑀪𑀡𑁆𑀟𑀓𑀁.

𑀤𑀼𑀢𑀺𑀬𑀤𑁆𑀯𑁂𑀩𑁆𑀭𑀸𑀳𑁆𑀫𑀡𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩-𑁪. 𑀅𑀜𑁆𑀜𑀢𑀭𑀩𑁆𑀭𑀸𑀳𑁆𑀫𑀡𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁫𑁪-𑁫𑁫. 𑀢𑀢𑀺𑀬𑁂 𑀬𑁂𑀲𑀁 𑀭𑀸𑀕𑀸𑀤𑀻𑀦𑀁 𑀅𑀧𑁆𑀧𑀳𑀸𑀦𑁂𑀦 𑀧𑀼𑀭𑀺𑀲𑀲𑁆𑀲 𑀅𑀢𑁆𑀢𑀩𑁆𑀬𑀸𑀩𑀸𑀥𑀸𑀤𑀻𑀦𑀁 𑀲𑀫𑁆𑀪𑀯𑁄, 𑀧𑀳𑀸𑀦𑁂𑀦 𑀅𑀲𑀫𑁆𑀪𑀯𑁄𑀢𑀺 𑀏𑀯𑀁 𑀭𑀸𑀕𑀸𑀤𑀻𑀦𑀁 𑀧𑀳𑀸𑀬𑀓𑁄 𑀅𑀭𑀺𑀬𑀥𑀫𑁆𑀫𑁄 𑀫𑀳𑀸𑀦𑀼𑀪𑀸𑀯𑀢𑀸𑀬 𑀫𑀳𑀸𑀦𑀺𑀲𑀁𑀲𑀢𑀸𑀬 𑀘 𑀲𑀸𑀫𑀁 𑀧𑀲𑁆𑀲𑀺𑀢𑀩𑁆𑀩𑁄𑀢𑀺 𑀲𑀦𑁆𑀤𑀺𑀝𑁆𑀞𑀺𑀓𑁄. 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑁂𑀲𑀼 𑀧𑀤𑁂𑀲𑀼𑀧𑀺 𑀬𑀣𑀸𑀭𑀳𑀁 𑀦𑀻𑀳𑀭𑀺𑀢𑁆𑀯𑀸 𑀯𑀢𑁆𑀢𑀩𑁆𑀩𑁄. 𑀲𑀤𑁆𑀤𑀢𑁆𑀣𑁄 𑀧𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀲𑀁𑀯𑀡𑁆𑀡𑀦𑀸𑀲𑀼 (𑀯𑀺𑀲𑀼𑀤𑁆𑀥𑀺. 𑀫𑀳𑀸𑀝𑀻. 𑁧.𑁧𑁪𑁭) 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀘𑀢𑀼𑀢𑁆𑀣𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀅𑀜𑁆𑀜𑀢𑀭𑀩𑁆𑀭𑀸𑀳𑁆𑀫𑀡𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀦𑀺𑀩𑁆𑀩𑀼𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁬. 𑀧𑀜𑁆𑀘𑀫𑁂 𑀦 𑀓𑀸𑀮𑀦𑁆𑀢𑀭𑁂 𑀧𑀢𑁆𑀢𑀩𑁆𑀩𑀦𑁆𑀢𑀺 𑀬𑀤𑀸 𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑁄, 𑀢𑀤𑀸 𑀏𑀯 𑀮𑀤𑁆𑀥𑀩𑁆𑀩𑀢𑁆𑀢𑀸 𑀦 𑀓𑀸𑀮𑀦𑁆𑀢𑀭𑁂 𑀧𑀢𑁆𑀢𑀩𑁆𑀩𑀁. 𑀫𑀕𑁆𑀕𑀜𑀸𑀡𑁂𑀦 𑀉𑀧𑀦𑁂𑀢𑀩𑁆𑀩𑀢𑁆𑀢𑀸 𑀉𑀧𑀦𑁂𑀬𑁆𑀬𑀁. 𑀉𑀧𑀦𑁂𑀬𑁆𑀬𑀫𑁂𑀯 𑀑𑀧𑀦𑁂𑀬𑁆𑀬𑀺𑀓𑀦𑁆𑀢𑀺 𑀆𑀳 ‘‘𑀧𑀝𑀺𑀧𑀢𑁆𑀢𑀺𑀬𑀸 𑀉𑀧𑀕𑀦𑁆𑀢𑀩𑁆𑀩’’𑀦𑁆𑀢𑀺.

𑀦𑀺𑀩𑁆𑀩𑀼𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀧𑀮𑁄𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁭. 𑀙𑀝𑁆𑀞𑁂 𑀆𑀘𑀭𑀺𑀬𑀧𑀸𑀘𑀭𑀺𑀬𑀸𑀦𑀦𑁆𑀢𑀺 𑀆𑀘𑀭𑀺𑀬𑀸𑀦𑀫𑁆𑀧𑀺 𑀆𑀘𑀭𑀺𑀬𑀸𑀦𑀁. 𑀦𑀺𑀭𑀦𑁆𑀢𑀭𑀨𑀼𑀝𑁄 𑀦𑁂𑀭𑀬𑀺𑀓𑀲𑀢𑁆𑀢𑁂𑀳𑀺 𑀦𑀺𑀭𑀬𑀕𑀸𑀫𑀺𑀓𑀫𑁆𑀫𑀲𑁆𑀲 𑀓𑀸𑀭𑀓𑀸𑀦𑀁 𑀩𑀳𑀼𑀪𑀸𑀯𑀸. 𑀉𑀪𑀬𑀫𑁆𑀧𑁂𑀢𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀁 𑀅𑀢𑁆𑀣𑀤𑁆𑀯𑀬𑀁. 𑀖𑀦𑀦𑀺𑀯𑀸𑀲𑀢𑀦𑁆𑀢𑀺 𑀕𑀸𑀫𑀸𑀦𑀁 𑀖𑀦𑀲𑀦𑁆𑀦𑀺𑀯𑀸𑀲𑀢𑀁. 𑀏𑀓𑀦𑁆𑀢𑁂𑀦𑁂𑀯 𑀅𑀥𑀫𑁆𑀫𑁄𑀢𑀺 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀳𑁂𑀢𑀼𑀓𑀢𑁆𑀢𑀸 𑀅𑀦𑀢𑁆𑀣𑀳𑁂𑀢𑀼𑀢𑀸𑀬 𑀘 𑀦𑀺𑀬𑀫𑁂𑀦𑁂𑀯 𑀅𑀥𑀫𑁆𑀫𑁄. 𑀦 𑀅𑀥𑀫𑁆𑀫𑀭𑀸𑀕𑁄𑀢𑀺 𑀅𑀥𑀺𑀧𑁆𑀧𑁂𑀢𑁄𑀢𑀺 𑀧𑀭𑀧𑀭𑀺𑀓𑁆𑀔𑀸𑀭𑁂𑀲𑀼 𑀭𑀸𑀕𑁄 𑀯𑀺𑀬 𑀦 𑀫𑀳𑀸𑀲𑀸𑀯𑀚𑁆𑀚𑁄𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀲𑀓𑀲𑀓𑀧𑀭𑀺𑀓𑁆𑀔𑀸𑀭𑀯𑀺𑀲𑀬𑁄 𑀭𑀸𑀕𑁄 𑀯𑀺𑀲𑀫𑀮𑁄𑀪𑁄 𑀯𑀺𑀬 𑀦 𑀏𑀓𑀦𑁆𑀢𑀢𑁄 𑀅𑀧𑀸𑀬𑀼𑀧𑁆𑀧𑀢𑁆𑀢𑀺𑀚𑀦𑀓𑁄. 𑀧𑀭𑀧𑀭𑀺𑀓𑁆𑀔𑀸𑀭𑁂𑀲𑀼 𑀉𑀧𑁆𑀧𑀚𑁆𑀚𑀫𑀸𑀦𑀲𑁆𑀲 𑀫𑀳𑀸𑀲𑀸𑀯𑀚𑁆𑀚𑀢𑀸𑀬 𑀅𑀥𑀫𑁆𑀫𑀭𑀸𑀕𑀢𑀸. 𑀮𑁄𑀪𑀲𑁆𑀲 𑀲𑀫𑀓𑀸𑀮𑁄 𑀦𑀸𑀫 𑀦𑀢𑁆𑀣𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀁 𑀯𑀺𑀬 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑀫𑀼𑀝𑁆𑀞𑀸𑀦𑀢𑁆𑀢𑀸. 𑀏𑀲𑀸𑀢𑀺 𑀏𑀲𑁄 𑀧𑀸𑀧𑀥𑀫𑁆𑀫𑁄. 𑀲𑀫𑀮𑁄𑀪𑁄 𑀯𑀺𑀲𑀫𑀮𑀓𑁆𑀔𑀡𑀸𑀪𑀸𑀯𑀢𑁄. 𑀢𑀣𑀸 𑀳𑀺 𑀢𑀁𑀲𑀫𑀼𑀝𑁆𑀞𑀸𑀦𑁄 𑀧𑀬𑁄𑀕𑁄 𑀫𑀺𑀘𑁆𑀙𑀸𑀘𑀸𑀭𑁄𑀢𑀺 𑀦 𑀯𑀼𑀘𑁆𑀘𑀢𑀺. 𑀅𑀯𑀢𑁆𑀣𑀼𑀧𑀝𑀺𑀲𑁂𑀯𑀦𑀲𑀗𑁆𑀔𑀸𑀢𑁂𑀦𑀸𑀢𑀺 𑀬𑀁 𑀮𑁄𑀓𑀺𑀬𑀲𑀸𑀥𑀼𑀲𑀫𑀦𑀼𑀜𑁆𑀜𑀸𑀢𑀁 𑀭𑀸𑀕𑀲𑁆𑀲 𑀯𑀢𑁆𑀣𑀼𑀝𑁆𑀞𑀸𑀦𑀁, 𑀢𑀢𑁄 𑀅𑀜𑁆𑀜𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀧𑀝𑀺𑀲𑁂𑀯𑀦𑀲𑀗𑁆𑀔𑀸𑀢𑁂𑀦.

𑀯𑀺𑀯𑀺𑀥𑀲𑀲𑁆𑀲𑀸𑀦𑀦𑁆𑀢𑀺 𑀲𑀸𑀮𑀺𑀯𑀻𑀳𑀺𑀆𑀤𑀺𑀦𑀸𑀦𑀧𑁆𑀧𑀓𑀸𑀭𑀲𑀲𑁆𑀲𑀸𑀦𑀁. 𑀤𑀼𑀲𑁆𑀲𑀲𑁆𑀲𑀦𑁆𑀢𑀺 𑀧𑀘𑁆𑀘𑀬𑀤𑀽𑀲𑁂𑀦 𑀤𑀽𑀲𑀺𑀢𑀁 𑀲𑀲𑁆𑀲𑀁. 𑀲𑀫𑁆𑀧𑀚𑁆𑀚𑀫𑀸𑀦𑁂𑀢𑀺 𑀦𑀺𑀧𑁆𑀨𑀚𑁆𑀚𑀦𑀢𑁄 𑀧𑀕𑁂𑀯 𑀕𑀩𑁆𑀪𑀧𑀭𑀺𑀯𑀼𑀤𑁆𑀥𑀺𑀓𑀸𑀮𑁂. 𑀧𑀸𑀡𑀓𑀸𑀢𑀺 𑀲𑀮𑀪𑀸𑀤𑀺𑀧𑀸𑀡𑀓𑀸. 𑀧𑀢𑀦𑁆𑀢𑀻𑀢𑀺 𑀲𑀲𑁆𑀲𑀸𑀦𑀁 𑀫𑀢𑁆𑀣𑀓𑁂 𑀧𑀢𑀦𑁆𑀢𑀺. 𑀲𑀮𑀸𑀓𑀸𑀫𑀢𑁆𑀢𑀫𑁂𑀯 𑀲𑀫𑁆𑀧𑀚𑁆𑀚𑀢𑀻𑀢𑀺 𑀯𑀟𑁆𑀠𑀺𑀢𑁆𑀯𑀸 𑀕𑀩𑁆𑀪𑀁 𑀕𑀳𑁂𑀢𑀼𑀁 𑀅𑀲𑀫𑀢𑁆𑀣𑀁 𑀲𑀫𑁆𑀧𑀚𑁆𑀚𑀢𑀺. 𑀢𑁂𑀢𑀺 𑀯𑀸𑀴𑀅𑀫𑀦𑀼𑀲𑁆𑀲𑀸. 𑀮𑀤𑁆𑀥𑁄𑀓𑀸𑀲𑀸𑀢𑀺 𑀬𑀓𑁆𑀔𑀸𑀥𑀺𑀧𑀢𑀻𑀳𑀺 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀮𑀤𑁆𑀥𑁄𑀓𑀸𑀲𑀸.

𑀧𑀮𑁄𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀯𑀘𑁆𑀙𑀕𑁄𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁮. 𑀲𑀢𑁆𑀢𑀫𑁂 𑀫𑀳𑀸𑀯𑀺𑀧𑀸𑀓𑀦𑁆𑀢𑀺 𑀉𑀴𑀸𑀭𑀨𑀮𑀁 𑀩𑀳𑀼𑀯𑀺𑀧𑀸𑀓𑀁. 𑀥𑀫𑁆𑀫𑁄 𑀦𑀸𑀫 𑀓𑀣𑀺𑀢𑀓𑀣𑀸 ‘‘𑀅𑀢𑁆𑀣𑀁 𑀤𑀳𑀢𑀺 𑀯𑀺𑀤𑀳𑀢𑀻’’𑀢𑀺 𑀓𑀢𑁆𑀯𑀸. 𑀅𑀦𑀼𑀥𑀫𑁆𑀫𑁄 𑀦𑀸𑀫 𑀧𑀝𑀺𑀓𑀣𑀦𑀁 ‘‘𑀢𑀁 𑀅𑀦𑀼𑀕𑀢𑁄 𑀥𑀫𑁆𑀫𑁄’’𑀢𑀺 𑀓𑀢𑁆𑀯𑀸. 𑀲𑀳 𑀥𑀫𑁆𑀫𑁂𑀦𑀸𑀢𑀺 𑀲𑀳𑀥𑀫𑁆𑀫𑁄, 𑀲𑁄 𑀏𑀯 𑀲𑀳𑀥𑀫𑁆𑀫𑀺𑀓𑁄. 𑀥𑀫𑁆𑀫𑀲𑀤𑁆𑀤𑁄 𑀘𑁂𑀢𑁆𑀣 𑀓𑀸𑀭𑀡𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀲𑀓𑀸𑀭𑀡𑁄’’𑀢𑀺. 𑀯𑀸𑀤𑀲𑁆𑀲𑀸𑀢𑀺 𑀯𑀘𑀦𑀲𑁆𑀲. 𑀅𑀦𑀼𑀧𑀸𑀢𑁄 𑀅𑀦𑀼𑀧𑀘𑁆𑀙𑀸 𑀧𑀯𑀢𑁆𑀢𑀺.

𑀧𑀭𑀺𑀧𑀦𑁆𑀣𑁂 𑀢𑀺𑀝𑁆𑀞𑀢𑀻𑀢𑀺 𑀧𑀸𑀭𑀺𑀧𑀦𑁆𑀣𑀺𑀓𑁄. 𑀧𑀦𑁆𑀣𑁂 𑀞𑀢𑁆𑀯𑀸 𑀧𑀭𑁂𑀲𑀁 𑀲𑀸𑀧𑀢𑁂𑀬𑁆𑀬𑀁 𑀙𑀺𑀦𑁆𑀤𑀦𑀢𑁄 𑀧𑀦𑁆𑀣𑀤𑀽𑀳𑀦𑀘𑁄𑀭𑁄. 𑀬𑀤𑀺 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁, 𑀓𑀣𑀁 𑀢𑀁 𑀅𑀲𑁂𑀓𑁆𑀔𑀦𑁆𑀢𑀺 𑀆𑀳 ‘‘𑀅𑀲𑁂𑀓𑁆𑀔𑀲𑁆𑀲 𑀧𑀯𑀢𑁆𑀢𑀢𑁆𑀢𑀸’’𑀢𑀺. 𑀇𑀢𑀭𑀸𑀦𑀻𑀢𑀺 𑀲𑀻𑀮𑀓𑁆𑀔𑀦𑁆𑀥𑀸𑀤𑀻𑀦𑀺. 𑀲𑀬𑀫𑁆𑀧𑀻𑀢𑀺 𑀧𑀺-𑀲𑀤𑁆𑀤𑁄 ‘‘𑀅𑀲𑁂𑀓𑁆𑀔𑀲𑁆𑀲 𑀧𑀯𑀢𑁆𑀢𑀸 𑀘𑀸’’𑀢𑀺 𑀇𑀫𑀫𑀢𑁆𑀣𑀁 𑀲𑀫𑁆𑀧𑀺𑀡𑁆𑀟𑁂𑀢𑀺.

𑀦𑀺𑀩𑁆𑀩𑀺𑀲𑁂𑀯𑀦𑁄𑀢𑀺 𑀯𑀺𑀲𑁂𑀯𑀦𑀭𑀳𑀺𑀢𑁄 𑀯𑀺𑀕𑀢𑀯𑀺𑀮𑁄𑀫𑀪𑀸𑀯𑁄. 𑀦 𑀉𑀧𑀧𑀭𑀺𑀓𑁆𑀔𑀦𑁆𑀢𑀻𑀢𑀺 𑀦 𑀯𑀺𑀘𑀸𑀭𑁂𑀦𑁆𑀢𑀺. 𑀚𑀸𑀢𑀺𑀁 𑀦𑀺𑀩𑁆𑀩𑀢𑁆𑀢𑀺𑀁 𑀬𑀸𑀢𑀺 𑀉𑀧𑀕𑀘𑁆𑀙𑀢𑀻𑀢𑀺 𑀚𑀸𑀢𑀺𑀬𑁄, 𑀚𑀸𑀢𑁄𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀬𑀢𑁆𑀣 𑀓𑀢𑁆𑀣𑀘𑀺 𑀓𑀼𑀮𑀚𑀸𑀢𑁂’’𑀢𑀺.

𑀓𑁂𑀯𑀮𑀻𑀢𑀺 𑀓𑁂𑀯𑀮𑀯𑀸, 𑀧𑀸𑀭𑀺𑀧𑀽𑀭𑀺𑀫𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀧𑀭𑀺𑀧𑀼𑀡𑁆𑀡𑀪𑀸𑀯𑁂𑀦 𑀬𑀼𑀢𑁆𑀢𑁄’’𑀢𑀺. 𑀏𑀢𑀁 𑀓𑁂𑀯𑀮𑀻𑀢𑀺 𑀧𑀤𑀁. 𑀅𑀪𑀺𑀜𑁆𑀜𑀸𑀧𑀸𑀭𑀦𑁆𑀢𑀺 𑀅𑀪𑀺𑀚𑀸𑀦𑀲𑁆𑀲 𑀧𑀸𑀭𑀁. 𑀧𑀭𑀺𑀬𑀦𑁆𑀢𑀁 𑀕𑀢𑀢𑁆𑀢𑀸 𑀧𑀸𑀭𑀕𑀽. 𑀏𑀲 𑀦𑀬𑁄 𑀲𑁂𑀲𑀧𑀤𑁂𑀲𑀼𑀧𑀺. 𑀔𑁂𑀢𑁆𑀢𑀯𑀺𑀦𑀺𑀘𑁆𑀙𑀬𑀲𑀯𑀦𑁂𑀦𑀸𑀢𑀺 ‘‘𑀇𑀫𑁂𑀳𑀺 𑀲𑀻𑀮𑀸𑀤𑀺𑀕𑀼𑀡𑀲𑀫𑁆𑀧𑀦𑁆𑀦𑀸 𑀲𑀤𑁂𑀯𑀓𑁂 𑀮𑁄𑀓𑁂 𑀧𑀼𑀜𑁆𑀜𑀲𑁆𑀲 𑀔𑁂𑀢𑁆𑀢𑀁, 𑀢𑀤𑀜𑁆𑀜𑁄 𑀦 𑀔𑁂𑀢𑁆𑀢’’𑀦𑁆𑀢𑀺 𑀏𑀯𑀁 𑀔𑁂𑀢𑁆𑀢𑀯𑀺𑀦𑀺𑀘𑁆𑀙𑀬𑀲𑀯𑀦𑁂𑀦 𑀭𑀳𑀺𑀢𑀸.

𑀯𑀘𑁆𑀙𑀕𑁄𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀢𑀺𑀓𑀡𑁆𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁯. 𑀅𑀝𑁆𑀞𑀫𑁂 𑀤𑀼𑀭𑀸𑀲𑀤𑀸𑀢𑀺 𑀤𑀼𑀭𑀼𑀧𑀲𑀗𑁆𑀓𑀫𑀦𑀸. 𑀕𑀭𑀳𑀸 𑀫𑀼𑀘𑁆𑀘𑀺𑀲𑁆𑀲𑀢𑀻𑀢𑀺 𑀫𑀬𑀺 𑀏𑀯𑀁 𑀓𑀣𑁂𑀦𑁆𑀢𑁂 𑀲𑀫𑀡𑁄 𑀕𑁄𑀢𑀫𑁄 𑀓𑀺𑀜𑁆𑀘𑀺 𑀓𑀣𑁂𑀲𑁆𑀲𑀢𑀺, 𑀏𑀯𑀁 𑀫𑁂 𑀯𑀘𑀦𑀫𑀢𑁆𑀢𑀫𑁆𑀧𑀺 𑀦 𑀮𑀤𑁆𑀥𑀦𑁆𑀢𑀺 𑀅𑀬𑀁 𑀕𑀭𑀳𑀸 𑀫𑀼𑀘𑁆𑀘𑀺𑀲𑁆𑀲𑀢𑀻𑀢𑀺. 𑀧𑀡𑁆𑀟𑀺𑀢𑀸𑀢𑀺 𑀧𑀡𑁆𑀟𑀺𑀘𑁆𑀘𑁂𑀦 𑀲𑀫𑀦𑁆𑀦𑀸𑀕𑀢𑀸. 𑀥𑀻𑀭𑀸𑀢𑀺 𑀥𑀺𑀢𑀺𑀲𑀫𑁆𑀧𑀦𑁆𑀦𑀸. 𑀩𑁆𑀬𑀢𑁆𑀢𑀸𑀢𑀺 𑀧𑀭𑀯𑀸𑀤𑀫𑀤𑁆𑀤𑀦𑀲𑀫𑀢𑁆𑀣𑁂𑀦 𑀯𑁂𑀬𑁆𑀬𑀢𑁆𑀢𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑀸. 𑀩𑀳𑀼𑀲𑁆𑀲𑀼𑀢𑀸𑀢𑀺 𑀩𑀸𑀳𑀼𑀲𑀘𑁆𑀘𑀯𑀦𑁆𑀢𑁄. 𑀯𑀸𑀤𑀺𑀦𑁄𑀢𑀺 𑀯𑀸𑀤𑀺𑀫𑀕𑁆𑀕𑀓𑀼𑀲𑀮𑀸. 𑀲𑀫𑁆𑀫𑀢𑀸𑀢𑀺 𑀩𑀳𑀼𑀦𑁄 𑀚𑀦𑀲𑁆𑀲 𑀲𑀸𑀥𑀼𑀲𑀫𑁆𑀫𑀢𑀸. 𑀧𑀡𑁆𑀟𑀺𑀢𑀸𑀤𑀺𑀆𑀓𑀸𑀭𑀧𑀭𑀺𑀘𑁆𑀙𑁂𑀤𑀦𑁆𑀢𑀺 𑀢𑁂𑀲𑀁 𑀢𑁂𑀯𑀺𑀚𑁆𑀚𑀸𑀦𑀁 𑀧𑀡𑁆𑀟𑀺𑀢𑀸𑀓𑀸𑀭𑀸𑀤𑀺𑀆𑀓𑀸𑀭𑀧𑀭𑀺𑀘𑁆𑀙𑁂𑀤𑀁. 𑀆𑀓𑀸𑀭𑀲𑀤𑁆𑀤𑁄 𑀓𑀸𑀭𑀡𑀧𑀭𑀺𑀬𑀸𑀬𑁄, 𑀧𑀭𑀺𑀘𑁆𑀙𑁂𑀤𑀲𑀤𑁆𑀤𑁄 𑀧𑀭𑀺𑀫𑀸𑀡𑀢𑁆𑀣𑁄𑀢𑀺 𑀆𑀳 ‘‘𑀏𑀢𑁆𑀢𑀓𑁂𑀦 𑀓𑀸𑀭𑀡𑁂𑀦𑀸’’𑀢𑀺.

𑀬𑀣𑀸𑀢𑀺 𑀬𑁂𑀦𑀸𑀓𑀸𑀭𑁂𑀦, 𑀬𑁂𑀦 𑀓𑀸𑀭𑀡𑁂𑀦𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀬𑀣𑀸𑀢𑀺 𑀓𑀸𑀭𑀡𑀯𑀘𑀦’’𑀦𑁆𑀢𑀺. ‘‘𑀤𑁆𑀯𑀻𑀳𑀺𑀧𑀺 𑀧𑀓𑁆𑀔𑁂𑀳𑀻’’𑀢𑀺 𑀯𑀢𑁆𑀯𑀸 𑀢𑁂 𑀧𑀓𑁆𑀔𑁂 𑀲𑀭𑀽𑀧𑀢𑁄 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀸𑀢𑀺𑀢𑁄 𑀘 𑀧𑀺𑀢𑀺𑀢𑁄 𑀘𑀸’’𑀢𑀺 𑀆𑀳. 𑀢𑁂𑀲𑀁 𑀧𑀓𑁆𑀔𑀸𑀦𑀁 𑀯𑀲𑁂𑀦𑀲𑁆𑀲 𑀲𑀼𑀚𑀸𑀢𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀲𑁆𑀲 𑀫𑀸𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀚𑀦𑀓𑀚𑀦𑀺𑀓𑀸𑀪𑀸𑀯𑁂𑀦 𑀯𑀺𑀦𑀸𑀧𑀺 𑀮𑁄𑀓𑁂 𑀫𑀸𑀢𑀸𑀧𑀺𑀢𑀼𑀲𑀫𑀜𑁆𑀜𑀸 𑀤𑀺𑀲𑁆𑀲𑀢𑀺, 𑀇𑀥 𑀧𑀦 𑀲𑀸 𑀑𑀭𑀲𑀧𑀼𑀢𑁆𑀢𑀯𑀲𑁂𑀦𑁂𑀯 𑀇𑀘𑁆𑀙𑀺𑀢𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀁𑀲𑀼𑀤𑁆𑀥𑀕𑀳𑀡𑀺𑀓𑁄’’𑀢𑀺 𑀯𑀼𑀢𑁆𑀢𑀁. 𑀕𑀩𑁆𑀪𑀁 𑀕𑀡𑁆𑀳𑀸𑀢𑀺 𑀥𑀸𑀭𑁂𑀢𑀻𑀢𑀺 𑀕𑀳𑀡𑀻, 𑀕𑀩𑁆𑀪𑀸𑀲𑀬𑀲𑀜𑁆𑀜𑀺𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀧𑁆𑀧𑀤𑁂𑀲𑁄. 𑀬𑀣𑀸𑀪𑀼𑀢𑁆𑀢𑀲𑁆𑀲 𑀆𑀳𑀸𑀭𑀲𑁆𑀲 𑀯𑀺𑀧𑀸𑀘𑀦𑀯𑀲𑁂𑀦 𑀕𑀡𑁆𑀳𑀦𑀢𑁄 𑀅𑀙𑀟𑁆𑀟𑀦𑀢𑁄 𑀕𑀳𑀡𑀻, 𑀓𑀫𑁆𑀫𑀚𑀢𑁂𑀚𑁄𑀥𑀸𑀢𑀼.

𑀧𑀺𑀢𑀸 𑀘 𑀫𑀸𑀢𑀸 𑀘 𑀧𑀺𑀢𑀭𑁄, 𑀧𑀺𑀢𑀽𑀦𑀁 𑀧𑀺𑀢𑀭𑁄 𑀧𑀺𑀢𑀸𑀫𑀳𑀸, 𑀢𑁂𑀲𑀁 𑀬𑀼𑀕𑁄 𑀧𑀺𑀢𑀸𑀫𑀳𑀬𑀼𑀕𑁄, 𑀢𑀲𑁆𑀫𑀸 ‘‘𑀬𑀸𑀯 𑀲𑀢𑁆𑀢𑀫𑀸 𑀧𑀺𑀢𑀸𑀫𑀳𑀬𑀼𑀕𑀸 𑀧𑀺𑀢𑀸𑀫𑀳𑀤𑁆𑀯𑀦𑁆𑀤𑀸’’𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀤𑁆𑀯𑀦𑁆𑀤𑀁 𑀅𑀕𑁆𑀕𑀳𑁂𑀢𑁆𑀯𑀸 ‘‘𑀬𑀼𑀕𑀦𑁆𑀢𑀺 𑀆𑀬𑀼𑀧𑁆𑀧𑀫𑀸𑀡𑀁 𑀯𑀼𑀘𑁆𑀘𑀢𑀻’’𑀢𑀺 𑀯𑀼𑀢𑁆𑀢𑀁. 𑀬𑀼𑀕-𑀲𑀤𑁆𑀤𑀲𑁆𑀲 𑀘 𑀅𑀢𑁆𑀣𑀓𑀣𑀸 𑀤𑀲𑁆𑀲𑀺𑀢𑀸 ‘‘𑀧𑀺𑀢𑀸𑀫𑀳𑁄𑀬𑁂𑀯 𑀧𑀺𑀢𑀸𑀫𑀳𑀬𑀼𑀕’’𑀦𑁆𑀢𑀺. 𑀧𑀼𑀩𑁆𑀩𑀧𑀼𑀭𑀺𑀲𑀸𑀢𑀺 𑀧𑀼𑀭𑀺𑀲𑀕𑁆𑀕𑀳𑀡𑀜𑁆𑀘𑁂𑀢𑁆𑀣 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑀯𑀲𑁂𑀦 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀯𑀜𑁆𑀳𑀺 ‘‘𑀫𑀸𑀢𑀺𑀢𑁄’’𑀢𑀺 𑀧𑀸𑀴𑀺𑀯𑀘𑀦𑀁 𑀲𑀫𑀢𑁆𑀣𑀺𑀢𑀁 𑀳𑁄𑀢𑀺. 𑀅𑀓𑁆𑀔𑀺𑀢𑁆𑀢𑁄𑀢𑀺 𑀅𑀓𑁆𑀔𑁂𑀧𑁄. 𑀅𑀦𑀯𑀓𑁆𑀔𑀺𑀢𑁆𑀢𑁄𑀢𑀺 𑀲𑀤𑁆𑀥𑀣𑀸𑀮𑀺𑀧𑀸𑀓𑀸𑀤𑀻𑀲𑀼 𑀅𑀦𑀯𑀓𑁆𑀔𑀺𑀢𑁆𑀢𑁄 𑀦 𑀙𑀟𑁆𑀟𑀺𑀢𑁄. 𑀚𑀸𑀢𑀺𑀯𑀸𑀤𑁂𑀦𑀸𑀢𑀺 𑀳𑁂𑀢𑀼𑀫𑁆𑀳𑀺 𑀓𑀭𑀡𑀯𑀘𑀦𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀓𑁂𑀦 𑀓𑀸𑀭𑀡𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀘 ‘‘𑀉𑀪𑀢𑁄…𑀧𑁂… 𑀧𑀺𑀢𑀸𑀫𑀳𑀬𑀼𑀕𑀸’’𑀢𑀺 𑀏𑀢𑁂𑀦 𑀩𑁆𑀭𑀸𑀳𑁆𑀫𑀡𑀲𑁆𑀲 𑀬𑁄𑀦𑀺𑀤𑁄𑀲𑀸𑀪𑀸𑀯𑁄 𑀤𑀲𑁆𑀲𑀺𑀢𑁄 𑀲𑀁𑀲𑀼𑀤𑁆𑀥𑀕𑀳𑀡𑀺𑀓𑀢𑀸𑀓𑀺𑀢𑁆𑀢𑀦𑀢𑁄. ‘‘𑀅𑀓𑁆𑀔𑀺𑀢𑁆𑀢𑁄’’𑀢𑀺 𑀇𑀫𑀺𑀦𑀸 𑀓𑀺𑀭𑀺𑀬𑀸𑀧𑀭𑀸𑀥𑀸𑀪𑀸𑀯𑁄. 𑀲𑀁𑀲𑀼𑀤𑁆𑀥𑀚𑀸𑀢𑀺𑀓𑀸𑀧𑀺 𑀳𑀺 𑀲𑀢𑁆𑀢𑀸 𑀓𑀺𑀭𑀺𑀬𑀸𑀧𑀭𑀸𑀥𑁂𑀦 𑀔𑁂𑀧𑀁 𑀧𑀸𑀧𑀼𑀡𑀦𑁆𑀢𑀺. ‘‘𑀅𑀦𑀼𑀧𑀓𑁆𑀓𑀼𑀝𑁆𑀞𑁄’’𑀢𑀺 𑀇𑀫𑀺𑀦𑀸 𑀅𑀬𑀼𑀢𑁆𑀢𑀲𑀁𑀲𑀕𑁆𑀕𑀸𑀪𑀸𑀯𑁄. 𑀅𑀬𑀼𑀢𑁆𑀢𑀲𑀁𑀲𑀕𑁆𑀕𑀜𑁆𑀳𑀺 𑀧𑀝𑀺𑀘𑁆𑀘 𑀲𑀢𑁆𑀢𑀸 𑀲𑀼𑀤𑁆𑀥𑀚𑀸𑀢𑀺𑀓𑀸 𑀓𑀺𑀭𑀺𑀬𑀸𑀧𑀭𑀸𑀥𑀭𑀳𑀺𑀢𑀸𑀧𑀺 𑀅𑀓𑁆𑀓𑁄𑀲𑀁 𑀮𑀪𑀦𑁆𑀢𑀺.

𑀢𑀦𑁆𑀢𑀺 𑀕𑀭𑀳𑀸𑀯𑀘𑀦𑀁. 𑀫𑀦𑁆𑀢𑁂 𑀧𑀭𑀺𑀯𑀢𑁆𑀢𑁂𑀢𑀻𑀢𑀺 𑀯𑁂𑀤𑁂 𑀲𑀚𑁆𑀛𑀸𑀬𑀢𑀺, 𑀧𑀭𑀺𑀬𑀸𑀧𑀼𑀡𑀸𑀢𑀻𑀢𑀺 𑀅𑀢𑁆𑀣𑁄. 𑀫𑀦𑁆𑀢𑁂 𑀥𑀸𑀭𑁂𑀢𑀻𑀢𑀺 𑀬𑀣𑀸𑀅𑀥𑀻𑀢𑁂 𑀫𑀦𑁆𑀢𑁂 𑀅𑀲𑀫𑁆𑀫𑀼𑀝𑁆𑀞𑁂 𑀓𑀢𑁆𑀯𑀸 𑀳𑀤𑀬𑁂 𑀞𑀧𑁂𑀢𑀺.

𑀑𑀝𑁆𑀞𑀧𑀳𑀢𑀓𑀭𑀡𑀯𑀲𑁂𑀦𑀸𑀢𑀺 𑀅𑀢𑁆𑀣𑀸𑀯𑀥𑀸𑀭𑀡𑀯𑀲𑁂𑀦. 𑀲𑀦𑀺𑀖𑀡𑁆𑀟𑀼𑀓𑁂𑀝𑀼𑀪𑀸𑀦𑀦𑁆𑀢𑀺 𑀏𑀢𑁆𑀣 𑀯𑀘𑀦𑀻𑀬𑀯𑀸𑀘𑀓𑀪𑀸𑀯𑁂𑀦 𑀅𑀢𑁆𑀣𑀁 𑀲𑀤𑁆𑀤𑀜𑁆𑀘 𑀔𑀡𑁆𑀟𑀢𑀺 𑀪𑀺𑀦𑁆𑀤𑀢𑀺 𑀯𑀺𑀪𑀚𑁆𑀚 𑀤𑀲𑁆𑀲𑁂𑀢𑀻𑀢𑀺 𑀦𑀺𑀔𑀡𑁆𑀟𑀼, 𑀲𑁄 𑀏𑀯 𑀇𑀥 𑀔-𑀓𑀸𑀭𑀲𑁆𑀲 𑀖-𑀓𑀸𑀭𑀁 𑀓𑀢𑁆𑀯𑀸 ‘‘𑀦𑀺𑀖𑀡𑁆𑀟𑀽’’𑀢𑀺 𑀯𑀼𑀢𑁆𑀢𑁄. 𑀓𑀺𑀝𑀢𑀺 𑀕𑀫𑁂𑀢𑀺 𑀓𑀺𑀭𑀺𑀬𑀸𑀤𑀺𑀯𑀺𑀪𑀸𑀕𑀁, 𑀢𑀁 𑀯𑀸 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀢𑁄 𑀕𑀫𑁂𑀦𑁆𑀢𑁄 𑀧𑀽𑀭𑁂𑀢𑀻𑀢𑀺 𑀓𑁂𑀝𑀼𑀪𑀁. 𑀯𑁂𑀯𑀘𑀦𑀧𑁆𑀧𑀓𑀸𑀲𑀓𑀦𑁆𑀢𑀺 𑀧𑀭𑀺𑀬𑀸𑀬𑀲𑀤𑁆𑀤𑀤𑀻𑀧𑀓𑀁, 𑀏𑀓𑁂𑀓𑀲𑁆𑀲 𑀅𑀢𑁆𑀣𑀲𑁆𑀲 𑀅𑀦𑁂𑀓𑀧𑀭𑀺𑀬𑀸𑀬𑀯𑀘𑀦𑀯𑀺𑀪𑀸𑀯𑀓𑀦𑁆𑀢𑀺 𑀅𑀢𑁆𑀣𑁄. 𑀦𑀺𑀤𑀲𑁆𑀲𑀦𑀫𑀢𑁆𑀢𑀜𑁆𑀘𑁂𑀢𑀁 𑀅𑀦𑁂𑀓𑁂𑀲𑀫𑁆𑀧𑀺 𑀅𑀢𑁆𑀣𑀸𑀦𑀁 𑀏𑀓𑀲𑀤𑁆𑀤𑀯𑀘𑀦𑀻𑀬𑀢𑀸𑀯𑀺𑀪𑀸𑀯𑀦𑀯𑀲𑁂𑀦𑀧𑀺 𑀢𑀲𑁆𑀲 𑀕𑀦𑁆𑀣𑀲𑁆𑀲 𑀧𑀯𑀢𑁆𑀢𑀢𑁆𑀢𑀸. 𑀯𑀘𑀻𑀪𑁂𑀤𑀸𑀤𑀺𑀮𑀓𑁆𑀔𑀡𑀸 𑀓𑀺𑀭𑀺𑀬𑀸 𑀓𑀧𑁆𑀧𑀻𑀬𑀢𑀺 𑀯𑀺𑀓𑀧𑁆𑀧𑀻𑀬𑀢𑀺 𑀏𑀢𑁂𑀦𑀸𑀢𑀺 𑀓𑀺𑀭𑀺𑀬𑀸𑀓𑀧𑁆𑀧𑁄, 𑀲𑁄 𑀧𑀦 𑀯𑀡𑁆𑀡𑀧𑀤𑀲𑀫𑁆𑀩𑀦𑁆𑀥𑀧𑀤𑀢𑁆𑀣𑀸𑀤𑀺𑀯𑀺𑀪𑀸𑀕𑀢𑁄 𑀩𑀳𑀼𑀓𑀧𑁆𑀧𑁄𑀢𑀺 𑀆𑀳 ‘‘𑀓𑀺𑀭𑀺𑀬𑀸𑀓𑀧𑁆𑀧𑀯𑀺𑀓𑀧𑁆𑀧𑁄’’𑀢𑀺. 𑀇𑀤𑀜𑁆𑀘 𑀫𑀽𑀮𑀓𑀺𑀭𑀺𑀬𑀸𑀓𑀧𑁆𑀧𑀕𑀦𑁆𑀣𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑁄 𑀳𑀺 𑀫𑀳𑀸𑀯𑀺𑀲𑀬𑁄 𑀲𑀢𑀲𑀳𑀲𑁆𑀲𑀧𑀭𑀺𑀫𑀸𑀡𑁄 𑀦𑀫𑀸𑀘𑀭𑀺𑀬𑀸𑀤𑀺𑀧𑁆𑀧𑀓𑀭𑀡𑀁. 𑀞𑀸𑀦𑀓𑀭𑀡𑀸𑀤𑀺𑀯𑀺𑀪𑀸𑀕𑀢𑁄 𑀦𑀺𑀩𑁆𑀩𑀘𑀦𑀯𑀺𑀪𑀸𑀕𑀢𑁄 𑀘 𑀅𑀓𑁆𑀔𑀭𑀸 𑀧𑀪𑁂𑀤𑀻𑀬𑀦𑁆𑀢𑀺 𑀏𑀢𑁂𑀳𑀻𑀢𑀺 𑀅𑀓𑁆𑀔𑀭𑀧𑁆𑀧𑀪𑁂𑀤𑀸, 𑀲𑀺𑀓𑁆𑀔𑀸𑀦𑀺𑀭𑀼𑀢𑁆𑀢𑀺𑀬𑁄. 𑀏𑀢𑁂𑀲𑀦𑁆𑀢𑀺 𑀘𑀢𑀼𑀦𑁆𑀦𑀁 𑀯𑁂𑀤𑀸𑀦𑀁.

𑀧𑀤𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀁, 𑀧𑀜𑁆𑀘𑀯𑀺𑀥𑀁 𑀯𑀸 𑀧𑀤𑀁, 𑀢𑀁 𑀧𑀤𑀁 𑀓𑀸𑀬𑀢𑀻𑀢𑀺 𑀧𑀤𑀓𑁄, 𑀢𑁂𑀬𑁂𑀯 𑀯𑀸 𑀯𑁂𑀤𑁂 𑀧𑀤𑀲𑁄 𑀓𑀸𑀬𑀢𑀻𑀢𑀺 𑀧𑀤𑀓𑁄. 𑀢𑀤𑀯𑀲𑁂𑀲𑀦𑁆𑀢𑀺 𑀯𑀼𑀢𑁆𑀢𑀸𑀯𑀲𑁂𑀲𑀁 𑀯𑀸𑀓𑁆𑀬𑀁. 𑀏𑀢𑁆𑀢𑀸𑀯𑀢𑀸 𑀲𑀤𑁆𑀤𑀩𑁆𑀬𑀸𑀓𑀭𑀡𑀁 𑀯𑀢𑁆𑀯𑀸 𑀧𑀼𑀦 ‘‘𑀩𑁆𑀬𑀸𑀓𑀭𑀡’’𑀦𑁆𑀢𑀺 𑀅𑀢𑁆𑀣𑀩𑁆𑀬𑀸𑀓𑀭𑀡𑀫𑀸𑀳. 𑀢𑀁 𑀢𑀁 𑀲𑀤𑁆𑀤𑀁 𑀢𑀤𑀢𑁆𑀣𑀜𑁆𑀘 𑀩𑁆𑀬𑀸𑀓𑀭𑁄𑀢𑀺 𑀩𑁆𑀬𑀸𑀘𑀺𑀓𑁆𑀔𑀢𑀺 𑀏𑀢𑁂𑀦𑀸𑀢𑀺 𑀩𑁆𑀬𑀸𑀓𑀭𑀡𑀁, 𑀲𑀤𑁆𑀤𑀲𑀢𑁆𑀣𑀁. 𑀆𑀬𑀢𑀺𑀁 𑀳𑀺𑀢𑀁 𑀢𑁂𑀦 𑀮𑁄𑀓𑁄 𑀦 𑀬𑀢𑀢𑀺 𑀦 𑀈𑀳𑀢𑀻𑀢𑀺 𑀮𑁄𑀓𑀸𑀬𑀢𑀁. 𑀢𑀜𑁆𑀳𑀺 𑀕𑀦𑁆𑀣𑀁 𑀦𑀺𑀲𑁆𑀲𑀸𑀬 𑀲𑀢𑁆𑀢𑀸 𑀧𑀼𑀜𑁆𑀜𑀓𑀺𑀭𑀺𑀬𑀸𑀬 𑀘𑀺𑀢𑁆𑀢𑀫𑁆𑀧𑀺 𑀦 𑀉𑀧𑁆𑀧𑀸𑀤𑁂𑀦𑁆𑀢𑀺.

𑀅𑀲𑀻𑀢𑀺 𑀫𑀳𑀸𑀲𑀸𑀯𑀓𑀸𑀢𑀺 𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑁄, 𑀯𑀧𑁆𑀧𑁄, 𑀪𑀤𑁆𑀤𑀺𑀬𑁄, 𑀫𑀳𑀸𑀦𑀸𑀫𑁄, 𑀅𑀲𑁆𑀲𑀚𑀺, 𑀦𑀸𑀴𑀓𑁄, 𑀬𑀲𑁄, 𑀯𑀺𑀫𑀮𑁄, 𑀲𑀼𑀩𑀸𑀳𑀼, 𑀧𑀼𑀡𑁆𑀡𑀚𑀺, 𑀕𑀯𑀫𑁆𑀧𑀢𑀺, 𑀉𑀭𑀼𑀯𑁂𑀮𑀓𑀲𑁆𑀲𑀧𑁄, 𑀦𑀤𑀻𑀓𑀲𑁆𑀲𑀧𑁄, 𑀕𑀬𑀸𑀓𑀲𑁆𑀲𑀧𑁄, 𑀲𑀸𑀭𑀺𑀧𑀼𑀢𑁆𑀢𑁄, 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄, 𑀫𑀳𑀸𑀓𑀲𑁆𑀲𑀧𑁄, 𑀫𑀳𑀸𑀓𑀘𑁆𑀘𑀸𑀦𑁄, 𑀫𑀳𑀸𑀓𑁄𑀝𑁆𑀞𑀺𑀓𑁄, 𑀫𑀳𑀸𑀓𑀧𑁆𑀧𑀺𑀦𑁄, 𑀫𑀳𑀸𑀘𑀼𑀦𑁆𑀤𑁄, 𑀅𑀦𑀼𑀭𑀼𑀤𑁆𑀥𑁄, 𑀓𑀗𑁆𑀔𑀸𑀭𑁂𑀯𑀢𑁄, 𑀆𑀦𑀦𑁆𑀤𑁄, 𑀦𑀦𑁆𑀤𑀓𑁄, 𑀪𑀕𑀼, 𑀦𑀦𑁆𑀤𑀺𑀬𑁄, 𑀓𑀺𑀫𑀺𑀮𑁄, 𑀪𑀤𑁆𑀤𑀺𑀬𑁄, 𑀭𑀸𑀳𑀼𑀮𑁄, 𑀲𑀻𑀯𑀮𑀺, 𑀉𑀧𑀸𑀮𑀺, 𑀤𑀩𑁆𑀩𑁄, 𑀉𑀧𑀲𑁂𑀦𑁄, 𑀔𑀤𑀺𑀭𑀯𑀦𑀺𑀬𑀭𑁂𑀯𑀢𑁄, 𑀧𑀼𑀡𑁆𑀡𑁄 𑀫𑀦𑁆𑀢𑀸𑀦𑀺𑀧𑀼𑀢𑁆𑀢𑁄, 𑀧𑀼𑀡𑁆𑀡𑁄 𑀲𑀼𑀦𑀸𑀧𑀭𑀦𑁆𑀢𑀓𑁄, 𑀲𑁄𑀡𑁄 𑀓𑀼𑀝𑀺𑀓𑀡𑁆𑀡𑁄, 𑀲𑁄𑀡𑁄 𑀓𑁄𑀴𑀺𑀯𑀺𑀲𑁄, 𑀭𑀸𑀥𑁄, 𑀲𑀼𑀪𑀽𑀢𑀺, 𑀅𑀗𑁆𑀕𑀼𑀮𑀺𑀫𑀸𑀮𑁄, 𑀯𑀓𑁆𑀓𑀮𑀺, 𑀓𑀸𑀴𑀼𑀤𑀸𑀬𑀻, 𑀫𑀳𑀸𑀉𑀤𑀸𑀬𑀻, 𑀧𑀺𑀮𑀺𑀦𑁆𑀤𑀯𑀘𑁆𑀙𑁄, 𑀲𑁄𑀪𑀺𑀢𑁄, 𑀓𑀼𑀫𑀸𑀭𑀓𑀲𑁆𑀲𑀧𑁄, 𑀭𑀝𑁆𑀞𑀧𑀸𑀮𑁄, 𑀯𑀗𑁆𑀕𑀻𑀲𑁄, 𑀲𑀪𑀺𑀬𑁄, 𑀲𑁂𑀮𑁄, 𑀉𑀧𑀯𑀸𑀡𑁄, 𑀫𑁂𑀖𑀺𑀬𑁄, 𑀲𑀸𑀕𑀢𑁄, 𑀦𑀸𑀕𑀺𑀢𑁄, 𑀮𑀓𑀼𑀡𑁆𑀟𑀓𑀪𑀤𑁆𑀤𑀺𑀬𑁄, 𑀧𑀺𑀡𑁆𑀟𑁄𑀮𑁄 𑀪𑀸𑀭𑀤𑁆𑀯𑀸𑀚𑁄, 𑀫𑀳𑀸𑀧𑀦𑁆𑀣𑀓𑁄, 𑀘𑀽𑀴𑀧𑀦𑁆𑀣𑀓𑁄, 𑀩𑀸𑀓𑀼𑀮𑁄, 𑀓𑀼𑀡𑁆𑀟𑀥𑀸𑀦𑁄, 𑀤𑀸𑀭𑀼𑀘𑀻𑀭𑀺𑀬𑁄, 𑀬𑀲𑁄𑀚𑁄, 𑀅𑀚𑀺𑀢𑁄, 𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑁄, 𑀧𑀼𑀡𑁆𑀡𑀓𑁄, 𑀫𑁂𑀢𑁆𑀢𑀕𑀼, 𑀥𑁄𑀢𑀓𑁄, 𑀉𑀧𑀲𑀻𑀯𑁄, 𑀦𑀦𑁆𑀤𑁄, 𑀳𑁂𑀫𑀓𑁄, 𑀢𑁄𑀤𑁂𑀬𑁆𑀬𑁄, 𑀓𑀧𑁆𑀧𑁄, 𑀚𑀢𑀼𑀓𑀡𑁆𑀡𑀻, 𑀪𑀤𑁆𑀭𑀸𑀯𑀼𑀥𑁄, 𑀉𑀤𑀬𑁄, 𑀧𑁄𑀲𑀮𑁄, 𑀫𑁄𑀖𑀭𑀸𑀚𑀸, 𑀧𑀺𑀗𑁆𑀕𑀺𑀬𑁄𑀢𑀺 𑀏𑀢𑁂 𑀅𑀲𑀻𑀢𑀺 𑀫𑀳𑀸𑀲𑀸𑀯𑀓𑀸 𑀦𑀸𑀫.

𑀓𑀲𑁆𑀫𑀸 𑀧𑀦𑁂𑀢𑁂 𑀏𑀯 𑀣𑁂𑀭𑀸 ‘‘𑀫𑀳𑀸𑀲𑀸𑀯𑀓𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺? 𑀅𑀪𑀺𑀦𑀻𑀳𑀸𑀭𑀲𑁆𑀲 𑀫𑀳𑀦𑁆𑀢𑀪𑀸𑀯𑀢𑁄. 𑀢𑀣𑀸 𑀳𑀺 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸𑀧𑀺 𑀫𑀳𑀸𑀲𑀸𑀯𑀓𑁂𑀲𑀼 𑀅𑀦𑁆𑀢𑁄𑀕𑀥𑀸. 𑀢𑁂 𑀳𑀺 𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑀲𑁆𑀲 𑀫𑀢𑁆𑀣𑀓𑀧𑁆𑀧𑀢𑁆𑀢𑀺𑀬𑀸 𑀲𑀸𑀯𑀓𑁂𑀲𑀼 𑀅𑀕𑁆𑀕𑀥𑀫𑁆𑀫𑀸𑀥𑀺𑀕𑀫𑁂𑀦 𑀅𑀕𑁆𑀕𑀝𑁆𑀞𑀸𑀦𑁂 𑀞𑀺𑀢𑀸𑀧𑀺 𑀅𑀪𑀺𑀦𑀻𑀳𑀸𑀭𑀫𑀳𑀦𑁆𑀢𑀢𑀸𑀲𑀸𑀫𑀜𑁆𑀜𑁂𑀦 ‘‘𑀫𑀳𑀸𑀲𑀸𑀯𑀓𑀸’’𑀢𑀺𑀧𑀺 𑀯𑀼𑀘𑁆𑀘𑀦𑁆𑀢𑀺, 𑀇𑀢𑀭𑁂 𑀧𑀦 𑀧𑀓𑀢𑀺𑀲𑀸𑀯𑀓𑁂𑀳𑀺 𑀲𑀸𑀢𑀺𑀲𑀬𑀁 𑀫𑀳𑀸𑀪𑀺𑀦𑀻𑀳𑀸𑀭𑀸. 𑀢𑀣𑀸 𑀳𑀺 𑀢𑁂 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀢𑀧𑀡𑀺𑀥𑀸𑀦𑀸, 𑀢𑀢𑁄 𑀏𑀯 𑀲𑀸𑀢𑀺𑀲𑀬𑀁 𑀅𑀪𑀺𑀜𑁆𑀜𑀸𑀲𑀫𑀸𑀧𑀢𑁆𑀢𑀻𑀲𑀼 𑀯𑀲𑀺𑀦𑁄 𑀧𑀪𑀺𑀦𑁆𑀦𑀧𑁆𑀧𑀝𑀺𑀲𑀫𑁆𑀪𑀺𑀤𑀸 𑀘. 𑀓𑀸𑀫𑀁 𑀲𑀩𑁆𑀩𑁂𑀧𑀺 𑀅𑀭𑀳𑀦𑁆𑀢𑁄 𑀲𑀻𑀮𑀯𑀺𑀲𑀼𑀤𑁆𑀥𑀺𑀆𑀤𑀺𑀓𑁂 𑀲𑀫𑁆𑀧𑀸𑀤𑁂𑀢𑁆𑀯𑀸 𑀘𑀢𑀽𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀼 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀘𑀺𑀢𑁆𑀢𑀸 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀬𑀣𑀸𑀪𑀽𑀢𑀁 𑀪𑀸𑀯𑁂𑀢𑁆𑀯𑀸 𑀫𑀕𑁆𑀕𑀧𑁆𑀧𑀝𑀺𑀧𑀸𑀝𑀺𑀬𑀸 𑀅𑀦𑀯𑀲𑁂𑀲𑀢𑁄 𑀓𑀺𑀮𑁂𑀲𑁂 𑀔𑁂𑀧𑁂𑀢𑁆𑀯𑀸 𑀅𑀕𑁆𑀕𑀨𑀮𑁂 𑀧𑀢𑀺𑀝𑁆𑀞𑀳𑀦𑁆𑀢𑀺, 𑀢𑀣𑀸𑀧𑀺 𑀬𑀣𑀸 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑀢𑁄 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀲𑁆𑀲, 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀢𑁄 𑀘 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀲𑁆𑀲 𑀧𑀼𑀩𑁆𑀩𑀪𑀸𑀕𑀪𑀸𑀯𑀦𑀸𑀯𑀺𑀲𑁂𑀲𑀲𑀺𑀤𑁆𑀥𑁄 𑀫𑀕𑁆𑀕𑀪𑀸𑀯𑀦𑀸𑀯𑀺𑀲𑁂𑀲𑁄, 𑀏𑀯𑀁 𑀅𑀪𑀺𑀦𑀻𑀳𑀸𑀭𑀫𑀳𑀦𑁆𑀢𑀢𑁆𑀢𑀧𑀼𑀩𑁆𑀩𑀬𑁄𑀕𑀫𑀳𑀦𑁆𑀢𑀢𑁆𑀢𑀸 𑀳𑀺 𑀲𑀲𑀦𑁆𑀢𑀸𑀦𑁂 𑀲𑀸𑀢𑀺𑀲𑀬𑀲𑁆𑀲 𑀕𑀼𑀡𑀯𑀺𑀲𑁂𑀲𑀲𑁆𑀲 𑀦𑀺𑀧𑁆𑀨𑀸𑀤𑀺𑀢𑀢𑁆𑀢𑀸 𑀲𑀻𑀮𑀸𑀤𑀻𑀳𑀺 𑀕𑀼𑀡𑁂𑀳𑀺 𑀫𑀳𑀦𑁆𑀢𑀸 𑀲𑀸𑀯𑀓𑀸𑀢𑀺 𑀫𑀳𑀸𑀲𑀸𑀯𑀓𑀸. 𑀢𑁂𑀲𑀼𑀬𑁂𑀯 𑀧𑀦 𑀬𑁂 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑁂𑀲𑀼 𑀧𑀸𑀫𑁄𑀓𑁆𑀔𑀪𑀸𑀯𑁂𑀦 𑀥𑀼𑀭𑀪𑀽𑀢𑀸𑀦𑀁 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀗𑁆𑀓𑀧𑁆𑀧𑀸𑀤𑀻𑀦𑀁 𑀲𑀸𑀢𑀺𑀲𑀬𑀁 𑀓𑀺𑀘𑁆𑀘𑀸𑀦𑀼𑀪𑀸𑀯𑀦𑀺𑀧𑁆𑀨𑀢𑁆𑀢𑀺𑀬𑀸 𑀓𑀸𑀭𑀡𑀪𑀽𑀢𑀸𑀬 𑀢𑀚𑁆𑀚𑀸𑀪𑀺𑀦𑀻𑀳𑀸𑀭𑀸𑀪𑀺𑀦𑀻𑀳𑀝𑀸𑀬 𑀲𑀓𑁆𑀓𑀘𑁆𑀘𑀁 𑀦𑀺𑀭𑀦𑁆𑀢𑀭𑀁 𑀘𑀺𑀭𑀓𑀸𑀮𑀲𑀫𑁆𑀪𑀸𑀯𑀺𑀢𑀸𑀬 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀬𑀣𑀸𑀓𑁆𑀓𑀫𑀁 𑀧𑀜𑁆𑀜𑀸𑀬 𑀲𑀫𑀸𑀥𑀺𑀲𑁆𑀫𑀺𑀜𑁆𑀘 𑀉𑀓𑁆𑀓𑀝𑁆𑀞𑀧𑀸𑀭𑀫𑀺𑀧𑁆𑀧𑀢𑁆𑀢𑀺𑀬𑀸 𑀲𑀯𑀺𑀲𑁂𑀲𑀁 𑀲𑀩𑁆𑀩𑀕𑀼𑀡𑁂𑀳𑀺 𑀅𑀕𑁆𑀕𑀪𑀸𑀯𑁂 𑀞𑀺𑀢𑀸, 𑀢𑁂 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸. 𑀇𑀢𑀭𑁂 𑀅𑀝𑁆𑀞𑀲𑀢𑁆𑀢𑀢𑀺 𑀣𑁂𑀭𑀸 𑀲𑀸𑀯𑀓𑀧𑀸𑀭𑀫𑀺𑀬𑀸 𑀫𑀢𑁆𑀣𑀓𑁂 𑀲𑀩𑁆𑀩𑀲𑀸𑀯𑀓𑀸𑀦𑀁 𑀅𑀕𑁆𑀕𑀪𑀸𑀯𑁂𑀦 𑀅𑀝𑁆𑀞𑀺𑀢𑀢𑁆𑀢𑀸 ‘‘𑀫𑀳𑀸𑀲𑀸𑀯𑀓𑀸’’𑀇𑀘𑁆𑀘𑁂𑀯 𑀯𑀼𑀘𑁆𑀘𑀦𑁆𑀢𑀺. 𑀧𑀓𑀢𑀺𑀲𑀸𑀯𑀓𑀸 𑀧𑀦 𑀅𑀪𑀺𑀦𑀻𑀳𑀸𑀭𑀫𑀳𑀦𑁆𑀢𑀢𑁆𑀢𑀸𑀪𑀸𑀯𑀢𑁄 𑀧𑀼𑀩𑁆𑀩𑀬𑁄𑀕𑀫𑀳𑀦𑁆𑀢𑀢𑁆𑀢𑀸𑀪𑀸𑀯𑀢𑁄 𑀘 ‘‘𑀲𑀢𑁆𑀣𑀼𑀲𑀸𑀯𑀓𑀸’’𑀇𑀘𑁆𑀘𑁂𑀯 𑀯𑀼𑀘𑁆𑀘𑀦𑁆𑀢𑀺. 𑀢𑁂 𑀧𑀦 𑀅𑀕𑁆𑀕𑀲𑀸𑀯𑀓𑀸 𑀯𑀺𑀬 𑀫𑀳𑀸𑀲𑀸𑀯𑀓𑀸 𑀯𑀺𑀬 𑀘 𑀦 𑀧𑀭𑀺𑀫𑀺𑀢𑀸, 𑀅𑀣 𑀔𑁄 𑀅𑀦𑁂𑀓𑀲𑀢𑀸 𑀅𑀦𑁂𑀓𑀲𑀳𑀲𑁆𑀲𑀸.

𑀯𑀬𑀢𑀻𑀢𑀺 𑀯𑀬𑁄, 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑁂𑀲𑀼 𑀓𑀢𑁆𑀣𑀘𑀺 𑀅𑀧𑀭𑀺𑀓𑀺𑀮𑀫𑀦𑁆𑀢𑁄 𑀅𑀯𑀺𑀢𑁆𑀣𑀸𑀬𑀦𑁆𑀢𑁄 𑀢𑁂 𑀕𑀦𑁆𑀣𑁂 𑀲𑀦𑁆𑀢𑀸𑀦𑁂𑀢𑀺 𑀧𑀡𑁂𑀢𑀻𑀢𑀺 𑀅𑀢𑁆𑀣𑁄. 𑀤𑁆𑀯𑁂 𑀧𑀝𑀺𑀲𑁂𑀥𑀸 𑀧𑀓𑀢𑀺𑀁 𑀕𑀫𑁂𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀯𑀬𑁄 𑀦 𑀳𑁄𑀢𑀻’’𑀢𑀺 𑀯𑀢𑁆𑀯𑀸 𑀢𑀢𑁆𑀣 𑀅𑀯𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀯𑀬𑁄 𑀦𑀸𑀫…𑀧𑁂… 𑀦 𑀲𑀓𑁆𑀓𑁄𑀢𑀻’’𑀢𑀺 𑀯𑀼𑀢𑁆𑀢𑀁.

𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂. 𑀏𑀢𑀦𑁆𑀢𑀺 ‘‘𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀻’’𑀢𑀺𑀆𑀤𑀺𑀯𑀘𑀦𑀁. 𑀢𑀢𑀺𑀬𑀯𑀺𑀚𑁆𑀚𑀸𑀥𑀺𑀕𑀫𑀸𑀬 𑀧𑀝𑀺𑀧𑀢𑁆𑀢𑀺𑀓𑁆𑀓𑀫𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁭𑁦) 𑀲𑀸𑀢𑀺𑀲𑀬𑀁 𑀯𑀺𑀢𑁆𑀣𑀸𑀭𑀺𑀢𑁄, 𑀢𑀣𑀸 𑀇𑀥 𑀅𑀯𑀢𑁆𑀢𑀼𑀓𑀸𑀫𑀢𑀸𑀬 𑀪𑀬𑀪𑁂𑀭𑀯𑀲𑀼𑀢𑁆𑀢𑀸𑀤𑀻𑀲𑀼 (𑀫. 𑀦𑀺. 𑁧.𑁩𑁪 𑀆𑀤𑀬𑁄) 𑀯𑀺𑀬 𑀲𑀗𑁆𑀔𑁂𑀧𑀢𑁄 𑀘 𑀯𑀢𑁆𑀢𑀼𑀓𑀸𑀫𑀢𑀸𑀬 ‘‘𑀤𑁆𑀯𑀺𑀦𑁆𑀦𑀁 𑀯𑀺𑀚𑁆𑀚𑀸𑀦’’𑀫𑀺𑀘𑁆𑀘𑁂𑀯 𑀯𑀼𑀢𑁆𑀢𑀁.

𑀯𑀺𑀚𑁆𑀚𑀸𑀢𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑀧𑁆𑀧𑀝𑀺𑀘𑁆𑀙𑀸𑀤𑀓𑀲𑁆𑀲 𑀫𑁄𑀳𑀓𑁆𑀔𑀦𑁆𑀥𑀲𑁆𑀲 𑀯𑀺𑀚𑁆𑀚𑀦𑀝𑁆𑀞𑁂𑀦𑀧𑀺 𑀯𑀺𑀚𑁆𑀚𑀸. 𑀫𑁄𑀳𑁄 𑀧𑀝𑀺𑀘𑁆𑀙𑀸𑀤𑀓𑀝𑁆𑀞𑁂𑀦 𑀢𑀫𑁄𑀢𑀺 𑀯𑀼𑀘𑁆𑀘𑀢𑀺 𑀢𑀫𑁄 𑀯𑀺𑀬𑀸𑀢𑀺 𑀓𑀢𑁆𑀯𑀸. 𑀓𑀸𑀢𑀩𑁆𑀩𑀢𑁄 𑀓𑀭𑀡𑀁, 𑀑𑀪𑀸𑀲𑁄𑀯 𑀓𑀭𑀡𑀁 𑀑𑀪𑀸𑀲𑀓𑀭𑀡𑀁, 𑀅𑀢𑁆𑀢𑀦𑁄 𑀧𑀘𑁆𑀘𑀬𑁂𑀳𑀺 𑀑𑀪𑀸𑀲𑀪𑀸𑀯𑁂𑀦 𑀦𑀺𑀩𑁆𑀩𑀢𑁆𑀢𑁂𑀢𑀩𑁆𑀩𑀝𑁆𑀞𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀬𑀁 𑀅𑀢𑁆𑀣𑁄𑀢𑀺 𑀅𑀬𑀫𑁂𑀯 𑀅𑀥𑀺𑀧𑁆𑀧𑁂𑀢𑀢𑁆𑀣𑁄. 𑀧𑀲𑀁𑀲𑀸𑀯𑀘𑀦𑀦𑁆𑀢𑀺 𑀢𑀲𑁆𑀲𑁂𑀯 𑀅𑀢𑁆𑀣𑀲𑁆𑀲 𑀣𑁄𑀫𑀦𑀸𑀯𑀘𑀦𑀁 𑀧𑀝𑀺𑀧𑀓𑁆𑀔𑀯𑀺𑀥𑀫𑀦𑀧𑀯𑀢𑁆𑀢𑀺𑀯𑀺𑀲𑁂𑀲𑀸𑀦𑀁 𑀩𑁄𑀥𑀦𑀢𑁄. 𑀬𑁄𑀚𑀦𑀸𑀢𑀺 𑀧𑀲𑀁𑀲𑀸𑀯𑀲𑁂𑀦 𑀯𑀼𑀢𑁆𑀢𑀧𑀤𑀸𑀦𑀁 𑀅𑀢𑁆𑀣𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀧𑀤𑀲𑁆𑀲 𑀘 𑀬𑁄𑀚𑀦𑀸. 𑀅𑀯𑀺𑀚𑁆𑀚𑀸 𑀯𑀺𑀳𑀢𑀸𑀢𑀺 𑀏𑀢𑁂𑀦 𑀯𑀺𑀚𑁆𑀚𑀦𑀝𑁆𑀞𑁂𑀦 𑀯𑀺𑀚𑁆𑀚𑀸𑀢𑀺 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀤𑀻𑀧𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀲𑁆𑀫𑀸 𑀯𑀺𑀚𑁆𑀚𑀸 𑀉𑀧𑁆𑀧𑀦𑁆𑀦𑀸𑀢𑀺 𑀏𑀢𑁂𑀦 𑀯𑀺𑀚𑁆𑀚𑀸𑀧𑀝𑀺𑀧𑀓𑁆𑀔𑀸 𑀅𑀯𑀺𑀚𑁆𑀚𑀸, 𑀧𑀝𑀺𑀧𑀓𑁆𑀔𑀢𑀸 𑀘𑀲𑁆𑀲𑀸 𑀧𑀳𑀸𑀢𑀩𑁆𑀩𑀪𑀸𑀯𑁂𑀦 𑀯𑀺𑀚𑁆𑀚𑀸𑀬 𑀘 𑀧𑀳𑀸𑀬𑀓𑀪𑀸𑀯𑁂𑀦𑀸𑀢𑀺 𑀤𑀲𑁆𑀲𑁂𑀢𑀺. 𑀇𑀢𑀭𑀲𑁆𑀫𑀺𑀫𑁆𑀧𑀺 𑀧𑀤𑀤𑁆𑀯𑀬𑁂𑀢𑀺 ‘‘𑀢𑀫𑁄 𑀯𑀺𑀳𑀢𑁄, 𑀆𑀮𑁄𑀓𑁄 𑀉𑀧𑁆𑀧𑀦𑁆𑀦𑁄’’𑀢𑀺 𑀧𑀤𑀤𑁆𑀯𑀬𑁂𑀧𑀺. 𑀏𑀲𑁂𑀯 𑀦𑀬𑁄𑀢𑀺 𑀬𑀣𑀸𑀯𑀼𑀢𑁆𑀢𑀬𑁄𑀚𑀦𑀁 𑀅𑀢𑀺𑀤𑀺𑀲𑀢𑀺. 𑀢𑀢𑁆𑀣𑀸𑀬𑀁 𑀬𑁄𑀚𑀦𑀸 𑁋 𑀏𑀯𑀁 𑀅𑀥𑀺𑀕𑀢𑀯𑀺𑀚𑁆𑀚𑀲𑁆𑀲 𑀢𑀫𑁄 𑀯𑀺𑀳𑀢𑁄 𑀯𑀺𑀤𑁆𑀥𑀲𑁆𑀢𑁄. 𑀓𑀲𑁆𑀫𑀸? 𑀬𑀲𑁆𑀫𑀸 𑀆𑀮𑁄𑀓𑁄 𑀉𑀧𑁆𑀧𑀦𑁆𑀦𑁄 𑀜𑀸𑀡𑀸𑀮𑁄𑀓𑁄 𑀧𑀸𑀢𑀼𑀪𑀽𑀢𑁄𑀢𑀺. 𑀧𑁂𑀲𑀺𑀢𑀢𑁆𑀢𑀲𑁆𑀲𑀸𑀢𑀺 𑀬𑀣𑀸𑀥𑀺𑀧𑁆𑀧𑁂𑀢𑀢𑁆𑀣𑀲𑀺𑀤𑁆𑀥𑀺𑀧𑁆𑀧𑀢𑁆𑀢𑀺𑀁 𑀯𑀺𑀲𑁆𑀲𑀝𑁆𑀞𑀘𑀺𑀢𑁆𑀢𑀲𑁆𑀲, 𑀧𑀞𑀫𑀯𑀺𑀚𑁆𑀚𑀸𑀥𑀺𑀕𑀫𑀸𑀬 𑀧𑁂𑀲𑀺𑀢𑀘𑀺𑀢𑁆𑀢𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀦𑁆𑀢𑀺 𑀇𑀫𑀺𑀦𑀸 𑀢𑀲𑁆𑀲 𑀛𑀸𑀦𑀘𑀺𑀢𑁆𑀢𑀲𑁆𑀲 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀢𑀫𑀸𑀳. 𑀯𑀺𑀧𑀲𑁆𑀲𑀦𑀸 𑀢𑀺𑀯𑀺𑀥𑀸 𑀯𑀺𑀧𑀲𑁆𑀲𑀓𑀧𑀼𑀕𑁆𑀕𑀮𑀪𑁂𑀤𑁂𑀦. 𑀫𑀳𑀸𑀩𑁄𑀥𑀺𑀲𑀢𑁆𑀢𑀸𑀦𑀜𑁆𑀳𑀺 𑀧𑀘𑁆𑀘𑁂𑀓𑀩𑁄𑀥𑀺𑀲𑀢𑁆𑀢𑀸𑀦𑀜𑁆𑀘 𑀯𑀺𑀧𑀲𑁆𑀲𑀦𑀸 𑀘𑀺𑀦𑁆𑀢𑀸𑀫𑀬𑀜𑀸𑀡𑀲𑀁𑀯𑀟𑁆𑀠𑀺𑀢𑀢𑁆𑀢𑀸 𑀲𑀬𑀫𑁆𑀪𑀼𑀜𑀸𑀡𑀪𑀽𑀢𑀸, 𑀇𑀢𑀭𑁂𑀲𑀁 𑀲𑀼𑀢𑀫𑀬𑀜𑀸𑀡𑀲𑀁𑀯𑀟𑁆𑀠𑀺𑀢𑀢𑁆𑀢𑀸 𑀧𑀭𑁄𑀧𑀤𑁂𑀲𑀲𑀫𑁆𑀪𑀽𑀢𑀸. 𑀲𑀸 ‘‘𑀞𑀧𑁂𑀢𑁆𑀯𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀅𑀯𑀲𑁂𑀲𑀭𑀽𑀧𑀸𑀭𑀽𑀧𑀚𑁆𑀛𑀸𑀦𑀸𑀦𑀁 𑀅𑀜𑁆𑀜𑀢𑀭𑀢𑁄 𑀯𑀼𑀝𑁆𑀞𑀸𑀬𑀸’’𑀢𑀺𑀆𑀤𑀺𑀦𑀸 𑀅𑀦𑁂𑀓𑀥𑀸 𑀅𑀭𑀽𑀧𑀫𑀼𑀔𑀯𑀲𑁂𑀦 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑁂 𑀯𑀼𑀢𑁆𑀢𑀸𑀦𑀁 𑀢𑁂𑀲𑀁 𑀢𑁂𑀲𑀁 𑀥𑀸𑀢𑀼𑀧𑀭𑀺𑀕𑁆𑀕𑀳𑀫𑀼𑀔𑀸𑀦𑀁 𑀅𑀜𑁆𑀜𑀢𑀭𑀫𑀼𑀔𑀯𑀲𑁂𑀦 𑀘 𑀅𑀦𑁂𑀓𑀥𑀸𑀯 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁩𑁦𑁬) 𑀦𑀸𑀦𑀸𑀦𑀬𑀢𑁄 𑀯𑀺𑀪𑀸𑀯𑀺𑀢𑀸. 𑀫𑀳𑀸𑀩𑁄𑀥𑀺𑀲𑀢𑁆𑀢𑀸𑀦𑀁 𑀧𑀦 𑀘𑀢𑀼𑀯𑀻𑀲𑀢𑀺𑀓𑁄𑀝𑀺𑀲𑀢𑀲𑀳𑀲𑁆𑀲𑀫𑀼𑀔𑁂𑀦 𑀧𑀪𑁂𑀤𑀕𑀫𑀦𑀢𑁄 𑀦𑀸𑀦𑀸𑀦𑀬𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑀦𑁆𑀦𑀺𑀲𑁆𑀲𑀬𑀲𑁆𑀲 𑀅𑀭𑀺𑀬𑀫𑀕𑁆𑀕𑀜𑀸𑀡𑀲𑁆𑀲 𑀅𑀥𑀺𑀝𑁆𑀞𑀸𑀦𑀪𑀽𑀢𑀁 𑀧𑀼𑀩𑁆𑀩𑀪𑀸𑀕𑀜𑀸𑀡𑀕𑀩𑁆𑀪𑀁 𑀕𑀡𑁆𑀳𑀸𑀧𑁂𑀦𑁆𑀢𑀁 𑀧𑀭𑀺𑀧𑀸𑀓𑀁 𑀕𑀘𑁆𑀙𑀦𑁆𑀢𑀁 𑀧𑀭𑀫𑀕𑀫𑁆𑀪𑀻𑀭𑀁 𑀲𑀡𑁆𑀳𑀲𑀼𑀔𑀼𑀫𑀢𑀭𑀁 𑀅𑀦𑀜𑁆𑀜𑀲𑀸𑀥𑀸𑀭𑀡𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀳𑁄𑀢𑀺, 𑀬𑀁 𑀅𑀝𑁆𑀞𑀓𑀣𑀸𑀲𑀼 ‘‘𑀫𑀳𑀸𑀯𑀚𑀺𑀭𑀜𑀸𑀡’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀬𑀲𑁆𑀲 𑀘 𑀧𑀯𑀢𑁆𑀢𑀺𑀯𑀺𑀪𑀸𑀕𑁂𑀦 𑀘𑀢𑀼𑀯𑀻𑀲𑀢𑀺𑀓𑁄𑀝𑀺𑀲𑀢𑀲𑀳𑀲𑁆𑀲𑀧𑁆𑀧𑀪𑁂𑀤𑀲𑁆𑀲 𑀧𑀸𑀤𑀓𑀪𑀸𑀯𑁂𑀦 𑀲𑀫𑀸𑀧𑀚𑁆𑀚𑀺𑀬𑀫𑀸𑀦𑀸 𑀘𑀢𑀼𑀯𑀻𑀲𑀢𑀺𑀓𑁄𑀝𑀺𑀲𑀢𑀲𑀳𑀲𑁆𑀲𑀲𑀗𑁆𑀔𑀸 𑀤𑁂𑀯𑀲𑀺𑀓𑀁 𑀲𑀢𑁆𑀣𑀼 𑀯𑀴𑀜𑁆𑀚𑀦𑀓𑀲𑀫𑀸𑀧𑀢𑁆𑀢𑀺𑀬𑁄 𑀯𑀼𑀘𑁆𑀘𑀦𑁆𑀢𑀺, 𑀲𑁆𑀯𑀸𑀬𑀁 𑀩𑀼𑀤𑁆𑀥𑀸𑀦𑀁 𑀯𑀺𑀧𑀲𑁆𑀲𑀦𑀸𑀘𑀸𑀭𑁄 𑀧𑀭𑀫𑀢𑁆𑀣𑀫𑀜𑁆𑀚𑀽𑀲𑀸𑀬𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀲𑀁𑀯𑀡𑁆𑀡𑀦𑀸𑀬𑀁 (𑀯𑀺𑀲𑀼𑀤𑁆𑀥𑀺. 𑀫𑀳𑀸𑀝𑀻. 𑁧.𑁧𑁪𑁪) 𑀤𑀲𑁆𑀲𑀺𑀢𑁄, 𑀅𑀢𑁆𑀣𑀺𑀓𑁂𑀳𑀺 𑀢𑀢𑁄 𑀕𑀳𑁂𑀢𑀩𑁆𑀩𑁄𑀢𑀺. 𑀇𑀥 𑀧𑀦 𑀲𑀸𑀯𑀓𑀸𑀦𑀁 𑀯𑀺𑀧𑀲𑁆𑀲𑀦𑀸𑀘𑀸𑀭𑀁 𑀲𑀦𑁆𑀥𑀸𑀬 ‘‘𑀯𑀺𑀧𑀲𑁆𑀲𑀦𑀸𑀧𑀸𑀤𑀓’’𑀦𑁆𑀢𑀺 𑀯𑀼𑀢𑁆𑀢𑀁.

𑀓𑀸𑀫𑀁 𑀳𑁂𑀝𑁆𑀞𑀺𑀫𑀫𑀕𑁆𑀕𑀜𑀸𑀡𑀸𑀦𑀺𑀧𑀺 𑀆𑀲𑀯𑀸𑀦𑀁 𑀔𑁂𑀧𑀦𑀜𑀸𑀡𑀸𑀦𑀺 𑀏𑀯, 𑀅𑀦𑀯𑀲𑁂𑀲𑀢𑁄 𑀧𑀦 𑀢𑁂𑀲𑀁 𑀔𑁂𑀧𑀦𑀁 𑀅𑀕𑁆𑀕𑀫𑀕𑁆𑀕𑀜𑀸𑀡𑁂𑀦𑁂𑀯𑀸𑀢𑀺 𑀆𑀳 ‘‘𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀢𑁆𑀣𑀸𑀬𑀸’’𑀢𑀺. 𑀆𑀲𑀯𑀯𑀺𑀦𑀸𑀲𑀦𑀢𑁄𑀢𑀺 𑀆𑀲𑀯𑀸𑀦𑀁 𑀦𑀺𑀲𑁆𑀲𑁂𑀲𑀁 𑀲𑀫𑀼𑀘𑁆𑀙𑀺𑀦𑁆𑀤𑀦𑀢𑁄. 𑀆𑀲𑀯𑀸𑀦𑀁 𑀔𑀬𑁂 𑀜𑀸𑀡𑀁 𑀆𑀲𑀯𑀓𑁆𑀔𑀬𑀜𑀸𑀡𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁆𑀭 𑀘𑁂𑀢𑀁 𑀜𑀸𑀡’’𑀦𑁆𑀢𑀺 𑀯𑀢𑁆𑀯𑀸 ‘‘𑀔𑀬𑁂’’𑀢𑀺 𑀆𑀥𑀸𑀭𑁂 𑀪𑀼𑀫𑁆𑀫𑀁, 𑀦 𑀯𑀺𑀲𑀬𑁂𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁆𑀣 𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸’’𑀢𑀺 𑀆𑀳. 𑀅𑀪𑀺𑀦𑀻𑀳𑀭𑀢𑀻𑀢𑀺 𑀅𑀪𑀺𑀫𑀼𑀔𑀁 𑀦𑀻𑀳𑀭𑀢𑀺, 𑀬𑀣𑀸 𑀫𑀕𑁆𑀕𑀸𑀪𑀺𑀲𑀫𑀬𑁄 𑀳𑁄𑀢𑀺, 𑀲𑀯𑀦𑀁 𑀢𑀤𑀪𑀺𑀫𑀼𑀔𑀁 𑀧𑀯𑀢𑁆𑀢𑁂𑀢𑀺. 𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑀤𑀼𑀓𑁆𑀔𑀲𑁆𑀲 𑀅𑀭𑀺𑀬𑀲𑀘𑁆𑀘𑀲𑁆𑀲 𑀢𑀤𑀸 𑀪𑀺𑀓𑁆𑀔𑀼𑀦𑀸 𑀧𑀘𑁆𑀘𑀓𑁆𑀔𑀢𑁄 𑀕𑀳𑀺𑀢𑀪𑀸𑀯𑀤𑀲𑁆𑀲𑀦𑀁. 𑀏𑀢𑁆𑀢𑀓𑀁 𑀤𑀼𑀓𑁆𑀔𑀦𑁆𑀢𑀺 𑀢𑀲𑁆𑀲 𑀧𑀭𑀺𑀘𑁆𑀙𑀺𑀚𑁆𑀚 𑀕𑀳𑀺𑀢𑀪𑀸𑀯𑀤𑀲𑁆𑀲𑀦𑀁. 𑀦 𑀇𑀢𑁄 𑀪𑀺𑀬𑁆𑀬𑁄𑀢𑀺 𑀢𑀲𑁆𑀲 𑀅𑀦𑀯𑀲𑁂𑀲𑀢𑁄 𑀕𑀳𑀺𑀢𑀪𑀸𑀯𑀤𑀲𑁆𑀲𑀦𑀁. 𑀢𑁂𑀦𑀸𑀳 ‘‘𑀲𑀩𑁆𑀩𑀫𑁆𑀧𑀺 𑀤𑀼𑀓𑁆𑀔𑀲𑀘𑁆𑀘’’𑀦𑁆𑀢𑀺𑀆𑀤𑀺. 𑀲𑀭𑀲𑀮𑀓𑁆𑀔𑀡𑀧𑀝𑀺𑀯𑁂𑀥𑁂𑀦𑀸𑀢𑀺 𑀲𑀪𑀸𑀯𑀲𑀗𑁆𑀔𑀸𑀢𑀲𑁆𑀲 𑀮𑀓𑁆𑀔𑀡𑀲𑁆𑀲 𑀅𑀲𑀫𑁆𑀫𑁄𑀳𑀢𑁄 𑀧𑀝𑀺𑀯𑀺𑀚𑁆𑀛𑀦𑁂𑀦. 𑀅𑀲𑀫𑁆𑀫𑁄𑀳𑀧𑀝𑀺𑀯𑁂𑀥𑁄𑀢𑀺 𑀘 𑀬𑀣𑀸 𑀢𑀲𑁆𑀫𑀺𑀁 𑀜𑀸𑀡𑁂 𑀧𑀯𑀢𑁆𑀢𑁂 𑀧𑀘𑁆𑀙𑀸 𑀤𑀼𑀓𑁆𑀔𑀲𑀘𑁆𑀘𑀲𑁆𑀲 𑀲𑀭𑀽𑀧𑀸𑀤𑀺𑀧𑀭𑀺𑀘𑁆𑀙𑁂𑀤𑁂 𑀲𑀫𑁆𑀫𑁄𑀳𑁄 𑀦 𑀳𑁄𑀢𑀺, 𑀢𑀣𑀸 𑀧𑀯𑀢𑁆𑀢𑀺. 𑀢𑁂𑀦𑁂𑀯𑀸𑀳 ‘‘𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻’’𑀢𑀺. 𑀤𑀼𑀓𑁆𑀔𑀁 𑀲𑀫𑀼𑀤𑁂𑀢𑀺 𑀏𑀢𑀲𑁆𑀫𑀸𑀢𑀺 𑀤𑀼𑀓𑁆𑀔𑀲𑀫𑀼𑀤𑀬𑁄. 𑀬𑀁 𑀞𑀸𑀦𑀁 𑀧𑀢𑁆𑀯𑀸𑀢𑀺 𑀬𑀁 𑀦𑀺𑀩𑁆𑀩𑀸𑀦𑀁 𑀫𑀕𑁆𑀕𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑀝𑁆𑀞𑁂𑀦 𑀓𑀸𑀭𑀡𑀪𑀽𑀢𑀁 𑀆𑀕𑀫𑁆𑀫. 𑀧𑀢𑁆𑀯𑀸𑀢𑀺 𑀘 𑀢𑀤𑀼𑀪𑀬𑀯𑀢𑁄 𑀧𑀼𑀕𑁆𑀕𑀮𑀲𑁆𑀲 𑀧𑀯𑀢𑁆𑀢𑀺𑀬𑀸𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀧𑀢𑁆𑀯𑀸𑀢𑀺 𑀯𑀸 𑀧𑀸𑀧𑀼𑀡𑀦𑀳𑁂𑀢𑀼. 𑀅𑀧𑁆𑀧𑀯𑀢𑁆𑀢𑀺𑀦𑁆𑀢𑀺 𑀅𑀧𑁆𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀁. 𑀢𑁂 𑀯𑀸 𑀦 𑀧𑀯𑀢𑁆𑀢𑀦𑁆𑀢𑀺 𑀏𑀢𑁆𑀣𑀸𑀢𑀺 𑀅𑀧𑁆𑀧𑀯𑀢𑁆𑀢𑀺, 𑀦𑀺𑀩𑁆𑀩𑀸𑀦𑀁. 𑀢𑀲𑁆𑀲𑀸𑀢𑀺 𑀤𑀼𑀓𑁆𑀔𑀦𑀺𑀭𑁄𑀥𑀲𑁆𑀲. 𑀲𑀫𑁆𑀧𑀸𑀧𑀓𑀦𑁆𑀢𑀺 𑀲𑀘𑁆𑀙𑀺𑀓𑀺𑀭𑀺𑀬𑀸𑀯𑀲𑁂𑀦 𑀲𑀫𑁆𑀫𑀤𑁂𑀯 𑀧𑀸𑀧𑀓𑀁.

𑀓𑀺𑀮𑁂𑀲𑀯𑀲𑁂𑀦𑀸𑀢𑀺 𑀆𑀲𑀯𑀲𑀗𑁆𑀔𑀸𑀢𑀓𑀺𑀮𑁂𑀲𑀯𑀲𑁂𑀦. 𑀬𑀲𑁆𑀫𑀸 𑀆𑀲𑀯𑀸𑀦𑀁 𑀤𑀼𑀓𑁆𑀔𑀲𑀘𑁆𑀘𑀧𑀭𑀺𑀬𑀸𑀬𑁄 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀲𑁂𑀲𑀲𑀘𑁆𑀘𑀸𑀦𑀜𑁆𑀘 𑀢𑀁𑀲𑀫𑀼𑀤𑀬𑀸𑀤𑀺𑀧𑀭𑀺𑀬𑀸𑀬𑁄 𑀅𑀢𑁆𑀣𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀧𑀭𑀺𑀬𑀸𑀬𑀢𑁄’’𑀢𑀺. 𑀤𑀲𑁆𑀲𑁂𑀦𑁆𑀢𑁄 𑀲𑀘𑁆𑀘𑀸𑀦𑀻𑀢𑀺 𑀬𑁄𑀚𑀦𑀸. 𑀆𑀲𑀯𑀸𑀦𑀜𑁆𑀘𑁂𑀢𑁆𑀣 𑀕𑀳𑀡𑀁 ‘‘𑀆𑀲𑀯𑀸𑀦𑀁 𑀔𑀬𑀜𑀸𑀡𑀸𑀬𑀸’’𑀢𑀺 𑀆𑀭𑀤𑁆𑀥𑀢𑁆𑀢𑀸. 𑀢𑀣𑀸 𑀳𑀺 ‘‘𑀓𑀸𑀫𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀻’’𑀢𑀺𑀆𑀤𑀺𑀦𑀸 𑀆𑀲𑀯𑀯𑀺𑀫𑀼𑀢𑁆𑀢𑀺𑀲𑀻𑀲𑁂𑀦𑁂𑀯 𑀲𑀩𑁆𑀩𑀓𑀺𑀮𑁂𑀲𑀯𑀺𑀫𑀼𑀢𑁆𑀢𑀺 𑀯𑀼𑀢𑁆𑀢𑀸. ‘‘𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻’’𑀢𑀺𑀆𑀤𑀺𑀦𑀸 𑀫𑀺𑀲𑁆𑀲𑀓𑀫𑀕𑁆𑀕𑁄 𑀇𑀥 𑀓𑀣𑀺𑀢𑁄𑀢𑀺 ‘‘𑀲𑀳 𑀯𑀺𑀧𑀲𑁆𑀲𑀦𑀸𑀬 𑀓𑁄𑀝𑀺𑀧𑁆𑀧𑀢𑁆𑀢𑀁 𑀫𑀕𑁆𑀕𑀁 𑀓𑀣𑁂𑀲𑀻’’𑀢𑀺 𑀯𑀼𑀢𑁆𑀢𑀁. 𑀚𑀸𑀦𑀢𑁄 𑀧𑀲𑁆𑀲𑀢𑁄𑀢𑀺 𑀇𑀫𑀺𑀦𑀸 𑀧𑀭𑀺𑀜𑁆𑀜𑀸𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀸𑀯𑀦𑀸𑀪𑀺𑀲𑀫𑀬𑀸 𑀯𑀼𑀢𑁆𑀢𑀸. 𑀯𑀺𑀫𑀼𑀘𑁆𑀘𑀢𑀻𑀢𑀺 𑀇𑀫𑀺𑀦𑀸 𑀧𑀳𑀸𑀦𑀸𑀪𑀺𑀲𑀫𑀬𑁄 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀇𑀫𑀺𑀦𑀸 𑀫𑀕𑁆𑀕𑀓𑁆𑀔𑀡𑀁 𑀤𑀲𑁆𑀲𑁂𑀢𑀻’’𑀢𑀺. 𑀚𑀸𑀦𑀢𑁄 𑀧𑀲𑁆𑀲𑀢𑁄𑀢𑀺 𑀯𑀸 𑀳𑁂𑀢𑀼𑀦𑀺𑀤𑁆𑀤𑁂𑀲𑁄. 𑀬𑀁 𑀚𑀸𑀦𑀦𑀳𑁂𑀢𑀼 𑀓𑀸𑀫𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀻𑀢𑀺 𑀬𑁄𑀚𑀦𑀸. 𑀥𑀫𑁆𑀫𑀸𑀦𑀜𑁆𑀳𑀺 𑀲𑀫𑀸𑀦𑀓𑀸𑀮𑀺𑀓𑀸𑀦𑀫𑁆𑀧𑀺 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑀸 𑀲𑀳𑀚𑀸𑀢𑀓𑁄𑀝𑀺𑀬𑀸 𑀮𑀩𑁆𑀪𑀢𑀺. 𑀪𑀯𑀸𑀲𑀯𑀕𑁆𑀕𑀳𑀡𑁂𑀦𑁂𑀯 𑀏𑀢𑁆𑀣 𑀪𑀯𑀭𑀸𑀕𑀲𑁆𑀲 𑀯𑀺𑀬 𑀪𑀯𑀤𑀺𑀝𑁆𑀞𑀺𑀬𑀸𑀧𑀺 𑀲𑀫𑀯𑀭𑁄𑀥𑁄𑀢𑀺 𑀤𑀺𑀝𑁆𑀞𑀸𑀲𑀯𑀲𑁆𑀲𑀧𑀺 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄.

𑀔𑀻𑀡𑀸 𑀚𑀸𑀢𑀻𑀢𑀺𑀆𑀤𑀻𑀳𑀺 𑀧𑀤𑁂𑀳𑀺. 𑀢𑀲𑁆𑀲𑀸𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀲𑁆𑀲. 𑀪𑀽𑀫𑀺𑀦𑁆𑀢𑀺 𑀧𑀯𑀢𑁆𑀢𑀺𑀝𑁆𑀞𑀸𑀦𑀁. 𑀬𑁂𑀦𑀸𑀥𑀺𑀧𑁆𑀧𑀸𑀬𑁂𑀦 ‘‘𑀓𑀢𑀫𑀸 𑀧𑀦𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀘𑁄𑀤𑀦𑀸 𑀓𑀢𑀸, 𑀢𑀁 𑀯𑀺𑀯𑀭𑀦𑁆𑀢𑁄 ‘‘𑀦 𑀢𑀸𑀯𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀦 𑀢𑀸𑀯𑀲𑁆𑀲 𑀅𑀢𑀻𑀢𑀸 𑀚𑀸𑀢𑀺 𑀔𑀻𑀡𑀸 𑀫𑀕𑁆𑀕𑀪𑀸𑀯𑀦𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀧𑀼𑀩𑁆𑀩𑁂𑀯 𑀔𑀻𑀡𑀢𑁆𑀢𑀸’’𑀢𑀺. 𑀦 𑀅𑀦𑀸𑀕𑀢𑀸 𑀅𑀲𑁆𑀲 𑀚𑀸𑀢𑀺 𑀔𑀻𑀡𑀸𑀢𑀺 𑀬𑁄𑀚𑀦𑀸. 𑀦 𑀅𑀦𑀸𑀕𑀢𑀸𑀢𑀺 𑀘 𑀅𑀦𑀸𑀕𑀢𑀪𑀸𑀯𑀲𑀸𑀫𑀜𑁆𑀜𑀁 𑀕𑀳𑁂𑀢𑁆𑀯𑀸 𑀮𑁂𑀲𑁂𑀦 𑀘𑁄𑀤𑁂𑀢𑀺. 𑀢𑁂𑀦𑀸𑀳 ‘‘𑀅𑀦𑀸𑀕𑀢𑁂 𑀯𑀸𑀬𑀸𑀫𑀸𑀪𑀸𑀯𑀢𑁄’’𑀢𑀺. 𑀅𑀦𑀸𑀕𑀢𑀯𑀺𑀲𑁂𑀲𑁄 𑀧𑀦𑁂𑀢𑁆𑀣 𑀅𑀥𑀺𑀧𑁆𑀧𑁂𑀢𑁄, 𑀢𑀲𑁆𑀲 𑀔𑁂𑀧𑀦𑁂 𑀯𑀸𑀬𑀸𑀫𑁄 𑀮𑀩𑁆𑀪𑀢𑁂𑀯. 𑀢𑁂𑀦𑀸𑀳 ‘‘𑀬𑀸 𑀧𑀦 𑀫𑀕𑁆𑀕𑀲𑁆𑀲𑀸’’𑀢𑀺𑀆𑀤𑀺. 𑀏𑀓𑀘𑀢𑀼𑀧𑀜𑁆𑀘𑀯𑁄𑀓𑀸𑀭𑀪𑀯𑁂𑀲𑀽𑀢𑀺 𑀪𑀯𑀢𑁆𑀢𑀬𑀕𑁆𑀕𑀳𑀡𑀁 𑀯𑀼𑀢𑁆𑀢𑀦𑀬𑁂𑀦 𑀅𑀦𑀯𑀲𑁂𑀲𑀢𑁄 𑀚𑀸𑀢𑀺𑀬𑀸 𑀔𑀻𑀡𑀪𑀸𑀯𑀤𑀲𑁆𑀲𑀦𑀢𑁆𑀣𑀁. 𑀢𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀁 𑀚𑀸𑀢𑀺𑀁. 𑀲𑁄𑀢𑀺 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼.

𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄 𑀦𑀸𑀫 𑀇𑀥 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀦𑀺𑀩𑁆𑀩𑀢𑁆𑀢𑀦𑀫𑁂𑀯𑀸𑀢𑀺 𑀆𑀳 ‘‘𑀧𑀭𑀺𑀯𑀼𑀢𑁆𑀣’’𑀦𑁆𑀢𑀺. 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀧𑀭𑀺𑀜𑁆𑀜𑀸𑀤𑀺𑀓𑀺𑀘𑁆𑀘𑀲𑀸𑀥𑀦𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀸𑀬 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀸𑀤𑀻𑀦𑀫𑁆𑀧𑀺 𑀤𑀼𑀓𑁆𑀔𑀲𑀘𑁆𑀘𑁂 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀸𑀦𑀼𑀕𑀼𑀡𑀸 𑀧𑀯𑀢𑁆𑀢𑀺, 𑀇𑀢𑀭𑁂𑀲𑀼 𑀘 𑀲𑀘𑁆𑀘𑁂𑀲𑀼 𑀦𑁂𑀲𑀁 𑀧𑀳𑀸𑀦𑀸𑀪𑀺𑀲𑀫𑀬𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀺 𑀧𑀸𑀓𑀝𑀸 𑀏𑀯. 𑀢𑁂𑀦 𑀯𑀼𑀢𑁆𑀢𑀁 ‘‘𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 𑀧𑀭𑀺𑀜𑁆𑀜𑀸𑀧𑀳𑀸𑀦𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀸𑀯𑀦𑀸𑀪𑀺𑀲𑀫𑀬𑀯𑀲𑁂𑀦𑀸’’𑀢𑀺. 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑀸𑀤𑀬𑁄𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀲𑀢𑁆𑀢𑀲𑁂𑀔𑀁 𑀲𑀗𑁆𑀕𑀡𑁆𑀳𑀸𑀢𑀺.

𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀇𑀫𑁂 𑀧𑀓𑀸𑀭𑀸 𑀇𑀢𑁆𑀣𑀁, 𑀢𑀩𑁆𑀪𑀸𑀯𑁄 𑀇𑀢𑁆𑀣𑀢𑁆𑀢𑀁, 𑀢𑀤𑀢𑁆𑀣𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂 𑀧𑀦 𑀧𑀓𑀸𑀭𑀸 𑀅𑀭𑀺𑀬𑀫𑀕𑁆𑀕𑀩𑁆𑀬𑀸𑀧𑀸𑀭𑀪𑀽𑀢𑀸 𑀧𑀭𑀺𑀜𑁆𑀜𑀸𑀤𑀬𑁄 𑀇𑀥𑀸𑀥𑀺𑀧𑁆𑀧𑁂𑀢𑀸𑀢𑀺 𑀆𑀳 ‘‘𑀏𑀯𑀁𑀲𑁄𑀴𑀲𑀯𑀺𑀥𑀓𑀺𑀘𑁆𑀘𑀪𑀸𑀯𑀸𑀬𑀸’’𑀢𑀺. 𑀢𑁂 𑀳𑀺 𑀫𑀕𑁆𑀕𑀁 𑀧𑀘𑁆𑀘𑀯𑁂𑀓𑁆𑀔𑀢𑁄 𑀫𑀕𑁆𑀕𑀸𑀦𑀼𑀪𑀸𑀯𑁂𑀦 𑀧𑀸𑀓𑀝𑀸 𑀳𑀼𑀢𑁆𑀯𑀸 𑀉𑀧𑀝𑁆𑀞𑀳𑀦𑁆𑀢𑀺, 𑀧𑀭𑀺𑀜𑁆𑀜𑀸𑀤𑀻𑀲𑀼 𑀘 𑀧𑀳𑀸𑀦𑀫𑁂𑀯 𑀧𑀥𑀸𑀦𑀁 𑀢𑀤𑀢𑁆𑀣𑀢𑁆𑀢𑀸 𑀇𑀢𑀭𑁂𑀲𑀦𑁆𑀢𑀺 𑀆𑀳 ‘‘𑀓𑀺𑀮𑁂𑀲𑀓𑁆𑀔𑀬𑀸𑀬 𑀯𑀸’’𑀢𑀺. 𑀧𑀳𑀻𑀦𑀓𑀺𑀮𑁂𑀲𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑁂𑀦 𑀯𑀸 𑀏𑀢𑀁 𑀯𑀼𑀢𑁆𑀢𑀁. 𑀤𑀼𑀢𑀺𑀬𑀯𑀺𑀓𑀧𑁆𑀧𑁂 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀦𑀺𑀲𑁆𑀲𑀓𑁆𑀓𑁂 𑀲𑀫𑁆𑀧𑀤𑀸𑀦𑀯𑀘𑀦𑀦𑁆𑀢𑀺 𑀆𑀳 ‘‘𑀇𑀢𑁆𑀣𑀪𑀸𑀯𑀢𑁄’’𑀢𑀺. 𑀅𑀧𑀭𑀦𑁆𑀢𑀺 𑀅𑀦𑀸𑀕𑀢𑀁. 𑀇𑀫𑁂 𑀧𑀦 𑀘𑀭𑀺𑀫𑀓𑀢𑁆𑀢𑀪𑀸𑀯𑀲𑀗𑁆𑀔𑀸𑀢𑀸 𑀧𑀜𑁆𑀘𑀓𑁆𑀔𑀦𑁆𑀥𑀸. 𑀧𑀭𑀺𑀜𑁆𑀜𑀸𑀢𑀸 𑀢𑀺𑀝𑁆𑀞𑀦𑁆𑀢𑀻𑀢𑀺 𑀏𑀢𑁂𑀦 𑀢𑁂𑀲𑀁 𑀅𑀧𑁆𑀧𑀢𑀺𑀝𑁆𑀞𑀢𑀁 𑀤𑀲𑁆𑀲𑁂𑀢𑀺. 𑀅𑀧𑀭𑀺𑀜𑁆𑀜𑀸𑀫𑀽𑀮𑀓𑀸 𑀳𑀺 𑀧𑀢𑀺𑀝𑁆𑀞𑀸. 𑀬𑀣𑀸𑀳 ‘‘𑀓𑀩𑀴𑀻𑀓𑀸𑀭𑁂 𑀘𑁂, 𑀪𑀺𑀓𑁆𑀔𑀯𑁂, 𑀆𑀳𑀸𑀭𑁂 𑀅𑀢𑁆𑀣𑀺 𑀭𑀸𑀕𑁄, 𑀅𑀢𑁆𑀣𑀺 𑀦𑀦𑁆𑀤𑀻, 𑀅𑀢𑁆𑀣𑀺 𑀢𑀡𑁆𑀳𑀸, 𑀧𑀢𑀺𑀝𑁆𑀞𑀺𑀢𑀁 𑀢𑀢𑁆𑀣 𑀯𑀺𑀜𑁆𑀜𑀸𑀡𑀁 𑀯𑀺𑀭𑀼𑀴𑁆𑀳’’𑀦𑁆𑀢𑀺𑀆𑀤𑀺 (𑀲𑀁. 𑀦𑀺. 𑁨.𑁬𑁪; 𑀓𑀣𑀸. 𑁨𑁯𑁬; 𑀫𑀳𑀸𑀦𑀺. 𑁭). 𑀢𑁂𑀦𑁂𑀯𑀸𑀳 𑁋 ‘‘𑀙𑀺𑀦𑁆𑀦𑀫𑀽𑀮𑀓𑀸 𑀭𑀼𑀓𑁆𑀔𑀸 𑀯𑀺𑀬𑀸’’𑀢𑀺𑀆𑀤𑀺.

𑀬𑀲𑁆𑀲𑀸𑀢𑀺 𑀧𑀼𑀣𑀼𑀚𑁆𑀚𑀦𑀲𑁆𑀲. 𑀢𑀲𑁆𑀲 𑀳𑀺 𑀲𑀻𑀮𑀁 𑀓𑀤𑀸𑀘𑀺 𑀯𑀟𑁆𑀠𑀢𑀺, 𑀓𑀤𑀸𑀘𑀺 𑀳𑀸𑀬𑀢𑀺. 𑀲𑁂𑀓𑁆𑀔𑀸𑀧𑀺 𑀧𑀦 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀦𑁄𑀯, 𑀅𑀲𑁂𑀓𑁆𑀔𑁂𑀲𑀼 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀢𑁂𑀦𑀸𑀳 ‘‘𑀔𑀻𑀡𑀸𑀲𑀯𑀲𑁆𑀲𑀸’’𑀢𑀺𑀆𑀤𑀺. 𑀯𑀲𑀺𑀧𑁆𑀧𑀢𑁆𑀢𑀦𑁆𑀢𑀺 𑀯𑀲𑀻𑀪𑀸𑀯𑀧𑁆𑀧𑀢𑁆𑀢𑀁. 𑀲𑀼𑀝𑁆𑀞𑀼 𑀲𑀫𑀸𑀳𑀺𑀢𑀦𑁆𑀢𑀺 𑀅𑀕𑁆𑀕𑀨𑀮𑀲𑀫𑀸𑀥𑀺𑀦𑀸 𑀲𑀫𑁆𑀫𑀤𑁂𑀯 𑀲𑀫𑀸𑀳𑀺𑀢𑀁. 𑀥𑀺𑀢𑀺𑀲𑀫𑁆𑀧𑀦𑁆𑀦𑀦𑁆𑀢𑀺 𑀅𑀕𑁆𑀕𑀨𑀮𑀥𑀺𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑀁. 𑀫𑀘𑁆𑀘𑀼𑀁 𑀚𑀳𑀺𑀢𑁆𑀯𑀸 𑀞𑀺𑀢𑀦𑁆𑀢𑀺 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀸𑀯𑀢𑁄 𑀯𑀼𑀢𑁆𑀢𑀁. 𑀓𑀣𑀁 𑀧𑀼𑀦𑀩𑁆𑀪𑀯𑀸𑀪𑀸𑀯𑁄𑀢𑀺 𑀆𑀳 ‘‘𑀲𑀩𑁆𑀩𑁂 𑀧𑀸𑀧𑀥𑀫𑁆𑀫𑁂 𑀧𑀚𑀳𑀺𑀢𑁆𑀯𑀸 𑀞𑀺𑀢’’𑀦𑁆𑀢𑀺. 𑀲𑀩𑁆𑀩𑀲𑁆𑀲𑀧𑀺 𑀜𑁂𑀬𑁆𑀬𑀥𑀫𑁆𑀫𑀲𑁆𑀲 𑀘𑀢𑀼𑀲𑀘𑁆𑀘𑀦𑁆𑀢𑁄𑀕𑀥𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀩𑀼𑀤𑁆𑀥𑀦𑁆𑀢𑀺 𑀘𑀢𑀼𑀲𑀘𑁆𑀘𑀩𑀼𑀤𑁆𑀥’’𑀦𑁆𑀢𑀺. 𑀩𑀼𑀤𑁆𑀥𑀲𑀸𑀯𑀓𑀸𑀢𑀺 𑀲𑀸𑀯𑀓𑀩𑀼𑀤𑁆𑀥𑀸 𑀦𑀫𑀲𑁆𑀲𑀦𑁆𑀢𑀺, 𑀧𑀕𑁂𑀯 𑀇𑀢𑀭𑀸 𑀧𑀚𑀸. 𑀇𑀢𑀭𑀸 𑀳𑀺 𑀧𑀚𑀸 𑀲𑀸𑀯𑀓𑁂𑀧𑀺 𑀦𑀫𑀲𑁆𑀲𑀦𑁆𑀢𑀺. 𑀇𑀢𑀺 𑀏𑀢𑁆𑀢𑀓𑁂𑀦 𑀞𑀸𑀦𑁂𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀯𑀲𑁂𑀦 𑀕𑀸𑀣𑀸𑀦𑀁 𑀅𑀢𑁆𑀣𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀲𑀸𑀯𑀓𑀲𑁆𑀲𑀧𑀺 𑀯𑀲𑁂𑀦 𑀅𑀢𑁆𑀣𑀁 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀅𑀣 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀸𑀯𑀓𑁄𑀧𑀺 𑀕𑁄𑀢𑀫𑁄 𑀫𑀼𑀔𑀦𑀺𑀩𑁆𑀩𑀢𑁆𑀢𑁂𑀦 𑀲𑀫𑁆𑀧𑀢𑁆𑀢𑁂𑀦 𑀲𑀫𑁆𑀩𑀦𑁆𑀥𑁂𑀦, 𑀬𑀢𑁄 𑀲𑀩𑁆𑀩𑁂𑀧𑀺 𑀅𑀭𑀺𑀬𑀲𑀸𑀯𑀓𑀸 𑀪𑀕𑀯𑀢𑁄 𑀑𑀭𑀲𑀧𑀼𑀢𑁆𑀢𑀸𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺.

𑀦𑀺𑀯𑀼𑀲𑁆𑀲𑀢𑀻𑀢𑀺 𑀦𑀺𑀯𑀸𑀲𑁄, 𑀦𑀺𑀯𑀼𑀢𑁆𑀣𑁄 𑀔𑀦𑁆𑀥𑀲𑀦𑁆𑀢𑀸𑀦𑁄𑀢𑀺 𑀆𑀳 ‘‘𑀦𑀺𑀯𑀼𑀢𑁆𑀣𑀓𑁆𑀔𑀦𑁆𑀥𑀧𑀭𑀫𑁆𑀧𑀭’’𑀦𑁆𑀢𑀺. 𑀅𑀯𑁂𑀢𑀺, 𑀅𑀯𑁂𑀤𑀻𑀢𑀺 𑀧𑀸𑀞𑀤𑁆𑀯𑀬𑁂𑀦𑀧𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀲𑁆𑀲 𑀓𑀺𑀘𑁆𑀘𑀲𑀺𑀤𑁆𑀥𑀺𑀁𑀬𑁂𑀯 𑀤𑀲𑁆𑀲𑁂𑀢𑀺. 𑀏𑀓𑀢𑁆𑀢𑀓𑀸𑀬𑀏𑀓𑀢𑁆𑀢𑀲𑀜𑁆𑀜𑀺𑀪𑀸𑀯𑀲𑀸𑀫𑀜𑁆𑀜𑀢𑁄 𑀯𑁂𑀳𑀧𑁆𑀨𑀮𑀸𑀧𑀺 𑀏𑀢𑁆𑀣𑁂𑀯 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀻𑀢𑀺 ‘‘𑀙 𑀓𑀸𑀫𑀸𑀯𑀘𑀭𑁂, 𑀦𑀯 𑀩𑁆𑀭𑀳𑁆𑀫𑀮𑁄𑀓𑁂’’𑀇𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀇𑀢𑀭𑁂 𑀧𑀦 𑀅𑀧𑀘𑀼𑀭𑀪𑀸𑀯𑀢𑁄 𑀦 𑀯𑀼𑀢𑁆𑀢𑀸. 𑀏𑀓𑀘𑁆𑀘𑀸𑀦𑀁 𑀅𑀯𑀺𑀲𑀬𑀪𑀸𑀯𑀢𑁄 𑀘 𑀅𑀯𑀘𑀦𑀁 𑀤𑀝𑁆𑀞𑀩𑁆𑀩𑀁. 𑀚𑀸𑀢𑀺 𑀔𑀻𑀬𑀢𑀺 𑀏𑀢𑁂𑀦𑀸𑀢𑀺 𑀚𑀸𑀢𑀺𑀓𑁆𑀔𑀬𑁄, 𑀅𑀭𑀳𑀢𑁆𑀢𑀦𑁆𑀢𑀺 𑀆𑀳 ‘‘𑀅𑀭𑀳𑀢𑁆𑀢𑀁 𑀧𑀢𑁆𑀢𑁄’’𑀢𑀺. ‘‘𑀅𑀪𑀺𑀜𑁆𑀜𑀸𑀬𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀬𑀓𑀸𑀭𑀮𑁄𑀧𑁂𑀦 ‘‘𑀅𑀪𑀺𑀜𑁆𑀜𑀸’’𑀢𑀺 𑀦𑀺𑀤𑁆𑀤𑁂𑀲𑁄 𑀓𑀢𑁄𑀢𑀺 𑀆𑀳 ‘‘𑀚𑀸𑀦𑀺𑀢𑁆𑀯𑀸’’𑀢𑀺. 𑀓𑀺𑀘𑁆𑀘𑀯𑁄𑀲𑀸𑀦𑁂𑀦𑀸𑀢𑀺 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 𑀓𑀢𑁆𑀢𑀩𑁆𑀩𑀲𑁆𑀲 𑀲𑁄𑀴𑀲𑀯𑀺𑀥𑀲𑁆𑀲 𑀓𑀺𑀘𑁆𑀘𑀲𑁆𑀲 𑀧𑀭𑀺𑀬𑁄𑀲𑀸𑀦𑁂𑀦. 𑀯𑁄𑀲𑀺𑀢𑁄𑀢𑀺 𑀧𑀭𑀺𑀬𑁄𑀲𑀺𑀢𑁄, 𑀦𑀺𑀝𑁆𑀞𑀺𑀢𑁄𑀢𑀺 𑀅𑀢𑁆𑀣𑁄. 𑀫𑁄𑀦𑁂𑀬𑁆𑀬𑁂𑀦 𑀲𑀫𑀦𑁆𑀦𑀸𑀕𑀢𑁄𑀢𑀺 𑀓𑀸𑀬𑀫𑁄𑀦𑁂𑀬𑁆𑀬𑀸𑀤𑀻𑀳𑀺 𑀲𑀫𑀦𑁆𑀦𑀸𑀕𑀢𑁄. 𑀮𑀧𑀺𑀢𑀁 𑀮𑀧𑀢𑀻𑀢𑀺 𑀮𑀧𑀺𑀢𑀮𑀸𑀧𑀦𑁄. 𑀅𑀢𑁆𑀢𑀧𑀘𑁆𑀘𑀓𑁆𑀔𑀢𑁄 𑀜𑀢𑁆𑀯𑀸𑀢𑀺 𑀇𑀫𑀺𑀦𑀸 𑀢𑁂𑀲𑀁 𑀯𑀺𑀚𑁆𑀚𑀸𑀦𑀁 𑀧𑀝𑀺𑀮𑀤𑁆𑀥𑀪𑀸𑀯𑀁 𑀤𑀻𑀧𑁂𑀢𑀺.

𑀢𑀺𑀓𑀡𑁆𑀡𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀚𑀸𑀡𑀼𑀲𑁆𑀲𑁄𑀡𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁦. 𑀦𑀯𑀫𑁂 𑀤𑁂𑀬𑁆𑀬𑀥𑀫𑁆𑀫𑀲𑁆𑀲𑁂𑀢𑀁 𑀦𑀸𑀫𑀦𑁆𑀢𑀺 𑀬𑀸𑀕𑀁 𑀓𑀭𑁄𑀦𑁆𑀢𑁂𑀦 𑀤𑀸𑀢𑀩𑁆𑀩𑀤𑁂𑀬𑁆𑀬𑀥𑀫𑁆𑀫𑀁 𑀲𑀦𑁆𑀥𑀸𑀬 𑀯𑀤𑀢𑀺 𑀢𑀤𑀜𑁆𑀜𑀲𑁆𑀲 𑀧𑀸𑀴𑀺𑀬𑀁 𑀤𑁂𑀬𑁆𑀬𑀥𑀫𑁆𑀫𑀕𑁆𑀕𑀳𑀡𑁂𑀦𑁂𑀯 𑀕𑀳𑀺𑀢𑀢𑁆𑀢𑀸. 𑀫𑀢𑀓𑀪𑀢𑁆𑀢𑀦𑁆𑀢𑀺 𑀫𑀢𑀓𑁂 𑀉𑀤𑁆𑀤𑀺𑀲𑁆𑀲 𑀤𑀸𑀢𑀩𑁆𑀩𑀪𑀢𑁆𑀢𑀁, 𑀧𑀺𑀢𑀼𑀧𑀺𑀡𑁆𑀟𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀭𑀧𑀼𑀭𑀺𑀲𑀸𑀦𑀦𑁆𑀢𑀺 𑀯𑀺𑀲𑀺𑀝𑁆𑀞𑀧𑀼𑀭𑀺𑀲𑀸𑀦𑀁, 𑀉𑀢𑁆𑀢𑀫𑀧𑀼𑀭𑀺𑀲𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀫𑁂𑀢𑀁 𑀤𑀸𑀦𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀪𑁂𑀤𑀁 𑀬𑀜𑁆𑀜𑀲𑀤𑁆𑀥𑀸𑀤𑀺𑀤𑀸𑀦𑀁.

𑀚𑀸𑀡𑀼𑀲𑁆𑀲𑁄𑀡𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀲𑀗𑁆𑀕𑀸𑀭𑀯𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁧. 𑀤𑀲𑀫𑁂 𑀚𑀺𑀡𑁆𑀡𑀸𑀦𑀁 𑀳𑀢𑁆𑀣𑀺𑀲𑀸𑀮𑀸𑀤𑀻𑀦𑀁 𑀧𑀝𑀺𑀲𑀗𑁆𑀔𑀭𑀡𑀁 𑀧𑀼𑀦 𑀧𑀸𑀓𑀢𑀺𑀓𑀓𑀭𑀡𑀁 𑀚𑀺𑀡𑁆𑀡𑀧𑀝𑀺𑀲𑀗𑁆𑀔𑀭𑀡𑀁, 𑀢𑀲𑁆𑀲 𑀓𑀸𑀭𑀓𑁄 𑀚𑀺𑀡𑁆𑀡𑀧𑀝𑀺𑀲𑀗𑁆𑀔𑀭𑀡𑀓𑀸𑀭𑀓𑁄. 𑀩𑀸𑀳𑀺𑀭𑀲𑀫𑀬𑁂𑀢𑀺 𑀲𑀢𑁆𑀣𑀼𑀲𑀸𑀲𑀦𑀢𑁄 𑀩𑀸𑀳𑀺𑀭𑁂 𑀅𑀜𑁆𑀜𑀢𑀺𑀢𑁆𑀣𑀺𑀬𑀲𑀫𑀬𑁂. 𑀲𑀩𑁆𑀩𑀘𑀢𑀼𑀓𑁆𑀓𑁂𑀦𑀸𑀢𑀺𑀆𑀤𑀻𑀲𑀼 𑀲𑀩𑁆𑀩𑁂𑀲𑀼 𑀤𑁆𑀯𑀺𑀧𑀤𑀘𑀢𑀼𑀧𑁆𑀧𑀤𑀸𑀤𑀺𑀪𑁂𑀤𑁂𑀲𑀼 𑀧𑀸𑀡𑁂𑀲𑀼 𑀏𑀓𑁂𑀓𑀲𑁆𑀫𑀺𑀁 𑀘𑀢𑁆𑀢𑀸𑀭𑁄 𑀘𑀢𑁆𑀢𑀸𑀭𑁄 𑀧𑀸𑀡𑁂 𑀯𑀥𑀺𑀢𑁆𑀯𑀸 𑀬𑀚𑀺𑀢𑀩𑁆𑀩𑀁 𑀬𑀜𑁆𑀜𑀁 𑀲𑀩𑁆𑀩𑀘𑀢𑀼𑀓𑁆𑀓𑀁 𑀦𑀸𑀫. 𑀲𑁂𑀲𑁂𑀲𑀼𑀧𑀺 𑀇𑀫𑀺𑀦𑀸 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀲𑁆𑀲 𑀯𑀸 𑀢𑀲𑁆𑀲 𑀯𑀸𑀢𑀺 𑀦𑀺𑀲𑁆𑀲𑀓𑁆𑀓𑁂 𑀲𑀸𑀫𑀺𑀯𑀘𑀦𑀦𑁆𑀢𑀺 𑀆𑀳 ‘‘𑀬𑀲𑁆𑀫𑀸 𑀯𑀸 𑀢𑀲𑁆𑀫𑀸 𑀯𑀸’’𑀢𑀺. 𑀏𑀯𑀫𑀲𑁆𑀲𑀸𑀬𑀦𑁆𑀢𑀺 𑀏𑀢𑁆𑀣 𑀅𑀲𑁆𑀲𑀽𑀢𑀺 𑀦𑀺𑀧𑀸𑀢𑀫𑀢𑁆𑀢𑀦𑁆𑀢𑀺 𑀆𑀳 ‘‘𑀏𑀯𑀁 𑀲𑀦𑁆𑀢𑁂𑀧𑀺 𑀅𑀬’’𑀦𑁆𑀢𑀺.

𑀯𑀟𑁆𑀠𑁂𑀦𑁆𑀢𑁄𑀢𑀺 𑀧𑀝𑁆𑀞𑀧𑁂𑀦𑁆𑀢𑁄. 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀑𑀕𑀥𑀁 𑀫𑀽𑀮𑀁 𑀧𑀢𑀺𑀝𑁆𑀞𑀸𑀪𑀽𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑁄𑀕𑀥𑀁. 𑀢𑁂𑀦𑀸𑀳 ‘‘𑀅𑀭𑀳𑀢𑁆𑀢𑀫𑀕𑁆𑀕𑀲𑀗𑁆𑀔𑀸𑀢𑀲𑁆𑀲𑀸’’𑀢𑀺𑀆𑀤𑀺. 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁂𑀦 𑀘𑁂𑀢𑁆𑀣 𑀅𑀭𑀳𑀢𑁆𑀢𑀫𑀕𑁆𑀕𑀲𑁆𑀲𑁂𑀯 𑀕𑀳𑀡𑀁 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀉𑀢𑁆𑀢𑀫𑀁 𑀧𑀢𑀺𑀝𑁆𑀞𑀸𑀪𑀽𑀢𑀁 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀪𑀸𑀯𑁂𑀦.

𑀅𑀧𑁆𑀧𑁂𑀳𑀺 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀸𑀤𑀻𑀳𑀺 𑀅𑀢𑁆𑀣𑁄 𑀏𑀢𑀺𑀲𑁆𑀲𑀸𑀢𑀺 𑀅𑀧𑁆𑀧𑀝𑁆𑀞𑀸 𑀢𑁆𑀣-𑀓𑀸𑀭𑀲𑁆𑀲 𑀝𑁆𑀞-𑀓𑀸𑀭𑀁 𑀓𑀢𑁆𑀯𑀸. 𑀢𑁂𑀦𑀸𑀳 ‘‘𑀬𑀢𑁆𑀣 𑀩𑀳𑀽’’𑀢𑀺𑀆𑀤𑀺. 𑀬𑀢𑁆𑀣𑀸𑀢𑀺 𑀬𑀲𑁆𑀲𑀁 𑀧𑀝𑀺𑀧𑀤𑀸𑀬𑀁. 𑀅𑀧𑁆𑀧𑁄 𑀲𑀫𑀸𑀭𑀫𑁆𑀪𑁄 𑀏𑀢𑀲𑁆𑀲𑀸𑀢𑀺 𑀅𑀧𑁆𑀧𑀲𑀫𑀸𑀭𑀫𑁆𑀪𑁄. 𑀧𑀸𑀲𑀁𑀲𑀸𑀢𑀺 𑀧𑀲𑀁𑀲𑀸𑀭𑀳𑀸. 𑀏𑀢𑀁 𑀬𑁂𑀯 𑀓𑀣𑀸𑀧𑁂𑀲𑁆𑀲𑀸𑀫𑀻𑀢𑀺 𑀏𑀢𑁂𑀦𑁂𑀯 𑀩𑁆𑀭𑀸𑀳𑁆𑀫𑀡𑁂𑀦 𑀓𑀣𑀸𑀧𑁂𑀲𑁆𑀲𑀸𑀫𑀺.

𑀲𑁄𑀧𑁆𑀧𑁂𑀦𑀸𑀢𑀺 𑀦𑀺𑀤𑁆𑀤𑀸𑀬. 𑀧𑀫𑀸𑀤𑁂𑀦𑀸𑀢𑀺 𑀚𑀸𑀕𑀭𑀺𑀬𑀸𑀤𑀻𑀲𑀼 𑀅𑀦𑀦𑀼𑀬𑀼𑀜𑁆𑀚𑀦𑀢𑁄 𑀲𑀢𑀺𑀯𑀺𑀧𑁆𑀧𑀯𑀸𑀲𑀮𑀓𑁆𑀔𑀡𑁂𑀦 𑀧𑀫𑀸𑀤𑁂𑀦. 𑀧𑀘𑁆𑀘𑀦𑀻𑀓𑀧𑀝𑀺𑀳𑀭𑀡𑀯𑀲𑁂𑀦𑀸𑀢𑀺 𑀧𑀝𑀺𑀧𑀓𑁆𑀔𑀸𑀧𑀦𑀬𑀦𑀯𑀲𑁂𑀦. 𑀢𑀣𑀸 𑀳𑀺 𑀪𑀕𑀯𑀢𑁄 𑀘 𑀲𑀸𑀲𑀦𑀲𑁆𑀲 𑀘 𑀧𑀝𑀺𑀧𑀓𑁆𑀔𑀸 𑀢𑀺𑀢𑁆𑀣𑀺𑀬𑀸, 𑀢𑁂𑀲𑀁 𑀳𑀭𑀡𑀢𑁄 𑀧𑀝𑀺𑀳𑀸𑀭𑀺𑀬𑀁. 𑀢𑁂 𑀳𑀺 𑀤𑀺𑀝𑁆𑀞𑀺𑀳𑀭𑀡𑀯𑀲𑁂𑀦 𑀤𑀺𑀝𑁆𑀞𑀺𑀧𑁆𑀧𑀓𑀸𑀲𑀦𑁂 𑀅𑀲𑀫𑀢𑁆𑀣𑀪𑀸𑀯𑁂𑀦 𑀘 𑀇𑀤𑁆𑀥𑀺𑀆𑀤𑁂𑀲𑀦𑀸𑀦𑀼𑀲𑀸𑀲𑀦𑀻𑀳𑀺 𑀳𑀭𑀺𑀢𑀸 𑀅𑀧𑀦𑀻𑀢𑀸 𑀳𑁄𑀦𑁆𑀢𑀻𑀢𑀺. ‘‘𑀧𑀝𑀻’’𑀢𑀺 𑀯𑀸 𑀅𑀬𑀁 𑀲𑀤𑁆𑀤𑁄 ‘‘𑀧𑀘𑁆𑀙𑀸’’𑀢𑀺 𑀏𑀢𑀲𑁆𑀲 𑀅𑀢𑁆𑀣𑀁 𑀩𑁄𑀥𑁂𑀢𑀺 ‘‘𑀢𑀲𑁆𑀫𑀺𑀁 𑀧𑀝𑀺𑀧𑀯𑀺𑀝𑁆𑀞𑀲𑁆𑀫𑀺𑀁, 𑀅𑀜𑁆𑀜𑁄 𑀆𑀕𑀜𑁆𑀙𑀺 𑀩𑁆𑀭𑀸𑀳𑁆𑀫𑀡𑁄’’𑀢𑀺𑀆𑀤𑀻𑀲𑀼 (𑀲𑀼. 𑀦𑀺. 𑁯𑁮𑁫; 𑀘𑀽𑀴𑀦𑀺. 𑀯𑀢𑁆𑀣𑀼𑀕𑀸𑀣𑀸 𑁪) 𑀯𑀺𑀬, 𑀢𑀲𑁆𑀫𑀸 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀓𑀢𑀓𑀺𑀘𑁆𑀘𑁂𑀦 𑀧𑀘𑁆𑀙𑀸 𑀳𑀭𑀺𑀢𑀩𑁆𑀩𑀁 𑀧𑀯𑀢𑁆𑀢𑁂𑀢𑀩𑁆𑀩𑀦𑁆𑀢𑀺 𑀧𑀝𑀺𑀳𑀸𑀭𑀺𑀬𑀁, 𑀅𑀢𑁆𑀢𑀦𑁄 𑀯𑀸 𑀉𑀧𑀓𑁆𑀓𑀺𑀮𑁂𑀲𑁂𑀲𑀼 𑀘𑀢𑀼𑀢𑁆𑀣𑀚𑁆𑀛𑀸𑀦𑀫𑀕𑁆𑀕𑁂𑀳𑀺 𑀳𑀭𑀺𑀢𑁂𑀲𑀼 𑀧𑀘𑁆𑀙𑀸𑀳𑀭𑀡𑀁 𑀧𑀝𑀺𑀳𑀸𑀭𑀺𑀬𑀁, 𑀇𑀤𑁆𑀥𑀺𑀆𑀤𑁂𑀲𑀦𑀸𑀦𑀼𑀲𑀸𑀲𑀦𑀺𑀬𑁄 𑀘 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂𑀦 𑀓𑀢𑀓𑀺𑀘𑁆𑀘𑁂𑀦 𑀘 𑀲𑀢𑁆𑀢𑀳𑀺𑀢𑀢𑁆𑀣𑀁 𑀧𑀼𑀦 𑀧𑀯𑀢𑁆𑀢𑁂𑀢𑀩𑁆𑀩𑀸, 𑀳𑀭𑀺𑀢𑁂𑀲𑀼 𑀘 𑀅𑀢𑁆𑀢𑀦𑁄 𑀉𑀧𑀓𑁆𑀓𑀺𑀮𑁂𑀲𑁂𑀲𑀼 𑀧𑀭𑀲𑀢𑁆𑀢𑀸𑀦𑀁 𑀉𑀧𑀓𑁆𑀓𑀺𑀮𑁂𑀲𑀳𑀭𑀡𑀸𑀦𑀺 𑀳𑁄𑀦𑁆𑀢𑀻𑀢𑀺 𑀧𑀝𑀺𑀳𑀸𑀭𑀺𑀬𑀸𑀦𑀺 𑀪𑀯𑀦𑁆𑀢𑀺, 𑀧𑀝𑀺𑀳𑀸𑀭𑀺𑀬𑀫𑁂𑀯 𑀧𑀸𑀝𑀺𑀳𑀸𑀭𑀺𑀬𑀁. 𑀧𑀝𑀺𑀳𑀸𑀭𑀺𑀬𑁂 𑀯𑀸 𑀇𑀤𑁆𑀥𑀺𑀆𑀤𑁂𑀲𑀦𑀸𑀦𑀼𑀲𑀸𑀲𑀦𑀺𑀲𑀫𑀼𑀤𑀸𑀬𑁂 𑀪𑀯𑀁 𑀏𑀓𑁂𑀓𑀁 𑀧𑀸𑀝𑀺𑀳𑀸𑀭𑀺𑀬𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀧𑀝𑀺𑀳𑀸𑀭𑀺𑀬𑀁 𑀯𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀫𑀕𑁆𑀕𑁄 𑀘 𑀧𑀝𑀺𑀧𑀓𑁆𑀔𑀳𑀭𑀡𑀢𑁄, 𑀢𑀢𑁆𑀣 𑀚𑀸𑀢𑀁 𑀦𑀺𑀫𑀺𑀢𑁆𑀢𑀪𑀽𑀢𑁂, 𑀢𑀢𑁄 𑀯𑀸 𑀆𑀕𑀢𑀦𑁆𑀢𑀺 𑀧𑀸𑀝𑀺𑀳𑀸𑀭𑀺𑀬𑀁.

𑀆𑀕𑀢𑀦𑀺𑀫𑀺𑀢𑁆𑀢𑁂𑀦𑀸𑀢𑀺 𑀆𑀕𑀢𑀸𑀓𑀸𑀭𑀲𑀮𑁆𑀮𑀓𑁆𑀔𑀡𑀯𑀲𑁂𑀦. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀏𑀓𑁄 𑀭𑀸𑀚𑀸𑀢𑀺 𑀤𑀓𑁆𑀔𑀺𑀡𑀫𑀥𑀼𑀭𑀸𑀥𑀺𑀧𑀢𑀺 𑀏𑀓𑁄 𑀧𑀡𑁆𑀟𑀼𑀭𑀸𑀚𑀸. 𑀏𑀯𑀫𑁆𑀧𑀺 𑀢𑁂 𑀫𑀦𑁄𑀢𑀺 𑀇𑀫𑀺𑀦𑀸 𑀆𑀓𑀸𑀭𑁂𑀦 𑀢𑀯 𑀫𑀦𑁄 𑀧𑀯𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀢𑁂𑀦 𑀧𑀓𑀸𑀭𑁂𑀦 𑀧𑀯𑀢𑁆𑀢𑁄𑀢𑀺 𑀆𑀳 ‘‘𑀲𑁄𑀫𑀦𑀲𑁆𑀲𑀺𑀢𑁄 𑀯𑀸’’𑀢𑀺𑀆𑀤𑀺. 𑀲𑀸𑀫𑀜𑁆𑀜𑀚𑁄𑀢𑀦𑀸 𑀯𑀺𑀲𑁂𑀲𑁂 𑀅𑀯𑀢𑀺𑀝𑁆𑀞𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑁂𑀯𑀁 𑀯𑀼𑀢𑁆𑀢𑀁. ‘‘𑀏𑀯𑀁 𑀢𑀯 𑀫𑀦𑁄’’𑀢𑀺 𑀇𑀤𑀜𑁆𑀘 𑀫𑀦𑀲𑁄 𑀲𑁄𑀫𑀦𑀲𑁆𑀲𑀺𑀢𑀢𑀸𑀤𑀺𑀫𑀢𑁆𑀢𑀤𑀲𑁆𑀲𑀦𑀁, 𑀦 𑀧𑀦 𑀬𑁂𑀦 𑀲𑁄 𑀲𑁄𑀫𑀦𑀲𑁆𑀲𑀺𑀢𑁄 𑀯𑀸 𑀤𑁄𑀫𑀦𑀲𑁆𑀲𑀺𑀢𑁄 𑀯𑀸, 𑀢𑀁𑀤𑀲𑁆𑀲𑀦𑀁. 𑀲𑁄𑀫𑀦𑀲𑁆𑀲𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀢𑀤𑁂𑀓𑀝𑁆𑀞𑀸 𑀭𑀸𑀕𑀸𑀤𑀬𑁄 𑀲𑀤𑁆𑀥𑀸𑀤𑀬𑁄 𑀘 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀺, 𑀤𑁄𑀫𑀦𑀲𑁆𑀲𑀕𑁆𑀕𑀳𑀡𑁂𑀦 𑀤𑁄𑀲𑀸𑀤𑀬𑁄. 𑀤𑀼𑀢𑀺𑀬𑀦𑁆𑀢𑀺 ‘‘𑀇𑀢𑁆𑀣𑀫𑁆𑀧𑀺 𑀢𑁂 𑀫𑀦𑁄’’𑀢𑀺 𑀧𑀤𑀁. 𑀇𑀢𑀺𑀧𑀻𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀦𑀺𑀤𑀲𑁆𑀲𑀦𑀢𑁆𑀣𑁄 ‘‘𑀅𑀢𑁆𑀣𑀻𑀢𑀺 𑀔𑁄, 𑀓𑀘𑁆𑀘𑀸𑀦, 𑀅𑀬𑀫𑁂𑀓𑁄 𑀅𑀦𑁆𑀢𑁄’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁨.𑁧𑁫; 𑁩.𑁯𑁦) 𑀯𑀺𑀬. 𑀢𑁂𑀦𑀸𑀳 ‘‘𑀇𑀫𑀜𑁆𑀘 𑀇𑀫𑀜𑁆𑀘 𑀅𑀢𑁆𑀣𑀁 𑀘𑀺𑀦𑁆𑀢𑀬𑀫𑀸𑀦’’𑀦𑁆𑀢𑀺. 𑀧𑀺-𑀲𑀤𑁆𑀤𑁄 𑀯𑀼𑀢𑁆𑀢𑀢𑁆𑀣𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄.

𑀓𑀣𑁂𑀦𑁆𑀢𑀸𑀦𑀁 𑀲𑀼𑀢𑁆𑀯𑀸𑀢𑀺 𑀓𑀣𑁂𑀦𑁆𑀢𑀸𑀦𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸. 𑀢𑀲𑁆𑀲 𑀯𑀲𑁂𑀦𑀸𑀢𑀺 𑀢𑀲𑁆𑀲 𑀯𑀺𑀢𑀓𑁆𑀓𑀺𑀢𑀲𑁆𑀲 𑀯𑀲𑁂𑀦. 𑀅𑀝𑁆𑀝𑀓𑀸𑀭𑀓𑁂𑀦𑀸𑀢𑀺 𑀯𑀺𑀦𑀺𑀘𑁆𑀙𑀬𑀓𑀸𑀭𑀓𑁂𑀦.

𑀦 𑀅𑀭𑀺𑀬𑀸𑀦𑀦𑁆𑀢𑀺 𑀅𑀭𑀺𑀬𑀸𑀦𑀁 𑀫𑀕𑁆𑀕𑀨𑀮𑀘𑀺𑀢𑁆𑀢𑀁 𑀦 𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄. 𑀢𑀜𑁆𑀳𑀺 𑀢𑁂𑀦 𑀅𑀦𑀥𑀺𑀕𑀢𑀢𑁆𑀢𑀸 𑀘𑁂𑀢𑁄𑀧𑀭𑀺𑀬𑀜𑀸𑀡𑁂𑀦𑀧𑀺 𑀦 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁, 𑀅𑀜𑁆𑀜𑀁 𑀧𑀦 𑀘𑀺𑀢𑁆𑀢𑀁 𑀚𑀸𑀦𑀸𑀢𑀺𑀬𑁂𑀯. 𑀳𑁂𑀝𑁆𑀞𑀺𑀫𑁄 𑀉𑀧𑀭𑀺𑀫𑀲𑁆𑀲 𑀘𑀺𑀢𑁆𑀢𑀁 𑀦 𑀚𑀸𑀦𑀸𑀢𑀻𑀢𑀺𑀆𑀤𑀻𑀦𑀺𑀧𑀺 𑀫𑀕𑁆𑀕𑀨𑀮𑀘𑀺𑀢𑁆𑀢𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀲𑁄𑀢𑀸𑀧𑀦𑁆𑀦𑀸𑀤𑀬𑁄𑀧𑀺 𑀳𑀺 𑀅𑀢𑁆𑀢𑀦𑀸 𑀅𑀥𑀺𑀕𑀢𑀫𑁂𑀯 𑀫𑀕𑁆𑀕𑀨𑀮𑀁 𑀧𑀭𑁂𑀳𑀺 𑀉𑀧𑁆𑀧𑀸𑀤𑀺𑀢𑀁 𑀲𑀫𑁆𑀫𑀸 𑀘𑁂𑀢𑁄𑀧𑀭𑀺𑀬𑀜𑀸𑀡𑁂𑀦 𑀚𑀸𑀦𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀦 𑀅𑀢𑁆𑀢𑀦𑀸 𑀅𑀦𑀥𑀺𑀕𑀢𑀁. 𑀲𑀩𑁆𑀩𑁂𑀧𑀺 𑀅𑀭𑀺𑀬𑀸 𑀅𑀢𑁆𑀢𑀦𑁄 𑀨𑀮𑀁 𑀲𑀫𑀸𑀧𑀚𑁆𑀚𑀦𑁆𑀢𑀺 𑀅𑀥𑀺𑀕𑀢𑀢𑁆𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀢𑁂𑀲𑀼 𑀘𑀸’’𑀢𑀺𑀆𑀤𑀺𑀫𑀸𑀳. 𑀬𑀤𑀺 𑀅𑀭𑀺𑀬𑀸 𑀅𑀢𑁆𑀢𑀦𑀸 𑀅𑀥𑀺𑀕𑀢𑀨𑀮𑀁 𑀲𑀫𑀸𑀧𑀚𑁆𑀚𑀦𑁆𑀢𑀺, 𑀉𑀧𑀭𑀺𑀫𑀸𑀧𑀺 𑀳𑁂𑀝𑁆𑀞𑀺𑀫𑀁 𑀨𑀮𑀁 𑀲𑀫𑀸𑀧𑀚𑁆𑀚𑀦𑁆𑀢𑀺 𑀅𑀥𑀺𑀕𑀢𑀢𑁆𑀢𑀸 𑀮𑁄𑀓𑀺𑀬𑀲𑀫𑀸𑀧𑀢𑁆𑀢𑀺𑀬𑁄 𑀯𑀺𑀬𑀸𑀢𑀺 𑀓𑀲𑁆𑀲𑀘𑀺 𑀆𑀲𑀗𑁆𑀓𑀸 𑀲𑀺𑀬𑀸, 𑀢𑀦𑁆𑀦𑀺𑀯𑀢𑁆𑀢𑀦𑀢𑁆𑀣𑀫𑀸𑀳 ‘‘𑀉𑀧𑀭𑀺𑀫𑁄 𑀳𑁂𑀝𑁆𑀞𑀺𑀫𑀁 𑀦 𑀲𑀫𑀸𑀧𑀚𑁆𑀚𑀢𑀻’’𑀢𑀺.

𑀉𑀧𑀭𑀺𑀫𑁄𑀢𑀺 𑀲𑀓𑀤𑀸𑀕𑀸𑀫𑀺𑀆𑀤𑀺𑀅𑀭𑀺𑀬𑀧𑀼𑀕𑁆𑀕𑀮𑁄. 𑀳𑁂𑀝𑁆𑀞𑀺𑀫𑀦𑁆𑀢𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀺𑀁. 𑀦 𑀲𑀫𑀸𑀧𑀚𑁆𑀚𑀢𑀻𑀢𑀺 𑀲𑀢𑀺𑀧𑀺 𑀅𑀥𑀺𑀕𑀢𑀢𑁆𑀢𑁂 𑀦 𑀲𑀫𑀸𑀧𑀚𑁆𑀚𑀢𑀺. 𑀓𑀲𑁆𑀫𑀸𑀢𑀺 𑀘𑁂? 𑀓𑀸𑀭𑀡𑀫𑀸𑀳 ‘‘𑀢𑁂𑀲𑀜𑁆𑀳𑀻’’𑀢𑀺𑀆𑀤𑀺, 𑀢𑁂𑀲𑀁 𑀲𑀓𑀤𑀸𑀕𑀸𑀫𑀺𑀆𑀤𑀻𑀦𑀁 𑀳𑁂𑀝𑁆𑀞𑀺𑀫𑀸 𑀳𑁂𑀝𑁆𑀞𑀺𑀫𑀸 𑀨𑀮𑀲𑀫𑀸𑀧𑀢𑁆𑀢𑀺 𑀢𑁂𑀲𑀼 𑀢𑁂𑀲𑀼𑀬𑁂𑀯 𑀳𑁂𑀝𑁆𑀞𑀺𑀫𑁂𑀲𑀼 𑀅𑀭𑀺𑀬𑀧𑀼𑀕𑁆𑀕𑀮𑁂𑀲𑀼 𑀧𑀯𑀢𑁆𑀢𑀢𑀺, 𑀦 𑀉𑀧𑀭𑀺𑀫𑁂𑀲𑀽𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 𑀳𑁂𑀝𑁆𑀞𑀺𑀫𑀁 𑀨𑀮𑀘𑀺𑀢𑁆𑀢𑀁 𑀉𑀧𑀭𑀺𑀫𑀲𑁆𑀲 𑀦 𑀉𑀧𑁆𑀧𑀚𑁆𑀚𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀓𑀲𑁆𑀫𑀸𑀢𑀺 𑀘𑁂? 𑀧𑀼𑀕𑁆𑀕𑀮𑀦𑁆𑀢𑀭𑀪𑀸𑀯𑀽𑀧𑀕𑀫𑀦𑁂𑀦 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀢𑁆𑀢𑀸. 𑀏𑀢𑁂𑀦 𑀉𑀧𑀭𑀺𑀫𑁄 𑀅𑀭𑀺𑀬𑁄 𑀳𑁂𑀝𑁆𑀞𑀺𑀫𑀁 𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀢𑀺 𑀅𑀢𑁆𑀢𑀦𑀸 𑀅𑀥𑀺𑀕𑀢𑀢𑁆𑀢𑀸 𑀬𑀣𑀸 𑀢𑀁 𑀮𑁄𑀓𑀺𑀬𑀲𑀫𑀸𑀧𑀢𑁆𑀢𑀺𑀦𑁆𑀢𑀺 𑀏𑀯𑀁 𑀧𑀯𑀢𑁆𑀢𑁄 𑀳𑁂𑀢𑀼 𑀩𑁆𑀬𑀪𑀺𑀘𑀸𑀭𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀦 𑀳𑀺 𑀮𑁄𑀓𑀺𑀬𑀚𑁆𑀛𑀸𑀦𑁂𑀲𑀼 𑀧𑀼𑀕𑁆𑀕𑀮𑀦𑁆𑀢𑀭𑀪𑀸𑀯𑀽𑀧𑀕𑀫𑀦𑀁 𑀦𑀸𑀫 𑀅𑀢𑁆𑀣𑀺 𑀯𑀺𑀲𑁂𑀲𑀸𑀪𑀸𑀯𑀢𑁄, 𑀇𑀥 𑀧𑀦 𑀅𑀲𑀫𑀼𑀕𑁆𑀖𑀸𑀝𑀺𑀢𑀓𑀫𑁆𑀫𑀓𑀺𑀮𑁂𑀲𑀦𑀺𑀭𑁄𑀥𑀦𑁂𑀦 𑀧𑀼𑀣𑀼𑀚𑁆𑀚𑀦𑁂𑀳𑀺 𑀯𑀺𑀬 𑀲𑁄𑀢𑀸𑀧𑀦𑁆𑀦𑀲𑁆𑀲 𑀲𑁄𑀢𑀸𑀧𑀦𑁆𑀦𑀸𑀤𑀻𑀳𑀺 𑀲𑀓𑀤𑀸𑀕𑀸𑀫𑀺𑀆𑀤𑀻𑀦𑀁 𑀧𑀼𑀕𑁆𑀕𑀮𑀦𑁆𑀢𑀭𑀪𑀸𑀯𑀽𑀧𑀕𑀫𑀦𑀁 𑀅𑀢𑁆𑀣𑀺. 𑀬𑀢𑁄 𑀳𑁂𑀝𑁆𑀞𑀺𑀫𑀸 𑀳𑁂𑀝𑁆𑀞𑀺𑀫𑀸 𑀨𑀮𑀥𑀫𑁆𑀫𑀸 𑀉𑀧𑀭𑀽𑀧𑀭𑀺𑀫𑀕𑁆𑀕𑀥𑀫𑁆𑀫𑁂𑀳𑀺 𑀦𑀺𑀯𑀢𑁆𑀢𑀺𑀢𑀸 𑀧𑀝𑀺𑀧𑀓𑁆𑀔𑁂𑀳𑀺 𑀯𑀺𑀬 𑀅𑀪𑀺𑀪𑀽𑀢𑀸 𑀅𑀧𑁆𑀧𑀯𑀢𑁆𑀢𑀺𑀥𑀫𑁆𑀫𑀢𑀁𑀬𑁂𑀯 𑀆𑀧𑀦𑁆𑀦𑀸. 𑀢𑁂𑀦𑁂𑀯 𑀯𑀼𑀢𑁆𑀢𑀁 ‘‘𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀢𑁆𑀢𑀸’’𑀢𑀺.

𑀅𑀧𑀺𑀘 𑀓𑀼𑀲𑀮𑀓𑀺𑀭𑀺𑀬𑀧𑁆𑀧𑀯𑀢𑁆𑀢𑀺 𑀦𑀸𑀫 𑀅𑀜𑁆𑀜𑀸, 𑀯𑀺𑀧𑀸𑀓𑀧𑁆𑀧𑀯𑀢𑁆𑀢𑀺 𑀘 𑀅𑀜𑁆𑀜𑀸𑀢𑀺 𑀅𑀦𑀦𑁆𑀢𑀭𑀨𑀮𑀢𑁆𑀢𑀸 𑀘 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀸𑀦𑀁 𑀳𑁂𑀝𑁆𑀞𑀺𑀫𑀢𑁄 𑀉𑀧𑀭𑀺𑀫𑁄 𑀪𑀯𑀦𑁆𑀢𑀭𑀕𑀢𑁄 𑀯𑀺𑀬 𑀳𑁄𑀢𑀺. 𑀢𑀁𑀢𑀁𑀨𑀮𑀯𑀲𑁂𑀦𑁂𑀯 𑀳𑀺 𑀅𑀭𑀺𑀬𑀸𑀦𑀁 𑀲𑁄𑀢𑀸𑀧𑀦𑁆𑀦𑀸𑀤𑀺𑀦𑀸𑀫𑀮𑀸𑀪𑁄. 𑀢𑁂 𑀲𑀘𑁂 𑀅𑀜𑁆𑀜𑀨𑀮𑀲𑀫𑀗𑁆𑀕𑀺𑀦𑁄𑀧𑀺 𑀳𑁄𑀦𑁆𑀢𑀺, 𑀲𑁄𑀢𑀸𑀧𑀦𑁆𑀦𑀸𑀤𑀺𑀦𑀸𑀫𑀫𑁆𑀧𑀺 𑀢𑁂𑀲𑀁 𑀅𑀯𑀯𑀢𑁆𑀣𑀺𑀢𑀁 𑀲𑀺𑀬𑀸. 𑀢𑀲𑁆𑀲 𑀢𑀲𑁆𑀲 𑀯𑀸 𑀅𑀭𑀺𑀬𑀲𑁆𑀲 𑀢𑀁 𑀢𑀁 𑀨𑀮𑀁 𑀲𑀤𑀺𑀲𑀦𑁆𑀢𑀺 𑀓𑀢𑁆𑀯𑀸 𑀦 𑀉𑀧𑀭𑀺𑀫𑀲𑁆𑀲 𑀳𑁂𑀝𑁆𑀞𑀺𑀫𑀨𑀮𑀲𑀫𑀗𑁆𑀕𑀺𑀢𑀸𑀬 𑀮𑁂𑀲𑁄𑀧𑀺 𑀲𑀫𑁆𑀪𑀯𑀢𑀺, 𑀓𑀼𑀢𑁄 𑀢𑀲𑁆𑀲𑀸 𑀲𑀫𑀸𑀧𑀚𑁆𑀚𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀳𑁂𑀝𑁆𑀞𑀺𑀫𑀸 𑀘 𑀲𑁄𑀢𑀸𑀧𑀦𑁆𑀦𑀸𑀤𑀬𑁄 𑀉𑀧𑀭𑀺𑀫𑀁 𑀲𑀓𑀤𑀸𑀕𑀸𑀫𑀺𑀨𑀮𑀸𑀤𑀺𑀁 𑀦 𑀲𑀫𑀸𑀧𑀚𑁆𑀚𑀦𑁆𑀢𑀺 𑀅𑀦𑀥𑀺𑀕𑀢𑀢𑁆𑀢𑀸. 𑀦 𑀳𑀺 𑀅𑀦𑀥𑀺𑀕𑀢𑀁 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑀼𑀁 𑀲𑀓𑁆𑀓𑀸, 𑀢𑀲𑁆𑀫𑀸 𑀲𑀩𑁆𑀩𑁂𑀧𑀺 𑀅𑀭𑀺𑀬𑀸 𑀅𑀢𑁆𑀢𑀦𑁄𑀬𑁂𑀯 𑀨𑀮𑀁 𑀲𑀫𑀸𑀧𑀚𑁆𑀚𑀦𑁆𑀢𑀻𑀢𑀺 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁.

𑀧𑀯𑀢𑁆𑀢𑁂𑀦𑁆𑀢𑀸𑀢𑀺 𑀧𑀯𑀢𑁆𑀢𑀓𑀸 𑀳𑀼𑀢𑁆𑀯𑀸, 𑀧𑀯𑀢𑁆𑀢𑀦𑀯𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀏𑀯𑀦𑁆𑀢𑀺 𑀬𑀣𑀸𑀦𑀼𑀲𑀺𑀝𑁆𑀞𑀸𑀬 𑀅𑀦𑀼𑀲𑀸𑀲𑀦𑀺𑀬𑀸 𑀯𑀺𑀥𑀺𑀯𑀲𑁂𑀦 𑀧𑀝𑀺𑀲𑁂𑀥𑀯𑀲𑁂𑀦 𑀘 𑀧𑀯𑀢𑁆𑀢𑀺𑀢𑀸𑀓𑀸𑀭𑀧𑀭𑀸𑀫𑀲𑀦𑀁. 𑀲𑀸 𑀘 𑀲𑀫𑁆𑀫𑀸𑀯𑀺𑀢𑀓𑁆𑀓𑀸 𑀦𑀸𑀫 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑀸𑀦𑀜𑁆𑀘 𑀧𑀯𑀢𑁆𑀢𑀺𑀆𑀓𑀸𑀭𑀤𑀲𑁆𑀲𑀦𑀯𑀲𑁂𑀦 𑀧𑀯𑀢𑁆𑀢𑀢𑀺. 𑀢𑀢𑁆𑀣 𑀆𑀦𑀺𑀲𑀁𑀲𑀲𑁆𑀲 𑀆𑀤𑀻𑀦𑀯𑀲𑁆𑀲 𑀘 𑀯𑀺𑀪𑀸𑀯𑀦𑀢𑁆𑀣𑀁 𑀅𑀦𑀺𑀘𑁆𑀘𑀲𑀜𑁆𑀜𑀫𑁂𑀯, 𑀦 𑀦𑀺𑀘𑁆𑀘𑀲𑀜𑁆𑀜𑀦𑁆𑀢𑀺 𑀅𑀢𑁆𑀣𑁄. 𑀧𑀝𑀺𑀬𑁄𑀕𑀺𑀦𑀺𑀯𑀢𑁆𑀢𑀦𑀢𑁆𑀣𑀜𑁆𑀳𑀺 𑀏𑀯-𑀓𑀸𑀭𑀕𑁆𑀕𑀳𑀡𑀁. 𑀇𑀥𑀸𑀧𑀺 𑀏𑀯𑀲𑀤𑁆𑀤𑀕𑁆𑀕𑀳𑀡𑀲𑁆𑀲 𑀅𑀢𑁆𑀣𑁄 𑀧𑀬𑁄𑀚𑀦𑀜𑁆𑀘 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀇𑀤𑀁-𑀕𑀳𑀡𑁂𑀧𑀺 𑀏𑀲𑁂𑀯 𑀦𑀬𑁄. 𑀧𑀜𑁆𑀘𑀓𑀸𑀫𑀕𑀼𑀡𑀭𑀸𑀕𑀦𑁆𑀢𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀤𑀝𑁆𑀞𑀩𑁆𑀩𑀁 𑀢𑀤𑀜𑁆𑀜𑀭𑀸𑀕𑀲𑁆𑀲 𑀤𑁄𑀲𑀸𑀤𑀻𑀦𑀜𑁆𑀘 𑀧𑀳𑀸𑀦𑀲𑁆𑀲 𑀇𑀘𑁆𑀙𑀺𑀢𑀢𑁆𑀢𑀸 𑀢𑀧𑁆𑀧𑀳𑀸𑀦𑀲𑁆𑀲 𑀘 𑀢𑀤𑀜𑁆𑀜𑀭𑀸𑀕𑀸𑀤𑀺𑀔𑁂𑀧𑀲𑁆𑀲 𑀉𑀧𑀸𑀬𑀪𑀸𑀯𑀢𑁄. 𑀢𑀣𑀸 𑀯𑀼𑀢𑁆𑀢𑀁 𑀤𑀼𑀝𑁆𑀞𑀮𑁄𑀳𑀺𑀢𑀯𑀺𑀫𑁄𑀘𑀦𑀲𑁆𑀲 𑀧𑀼𑀩𑁆𑀩𑀤𑀼𑀝𑁆𑀞𑀫𑀁𑀲𑀔𑁂𑀧𑀦𑀽𑀧𑀸𑀬𑀢𑀸 𑀯𑀺𑀬. 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀫𑁂𑀯𑀸𑀢𑀺 𑀅𑀯𑀥𑀸𑀭𑀡𑀁 𑀧𑀝𑀺𑀓𑁆𑀔𑁂𑀧𑀪𑀸𑀯𑀢𑁄 𑀲𑀸𑀯𑀚𑁆𑀚𑀥𑀫𑁆𑀫𑀦𑀺𑀯𑀢𑁆𑀢𑀦𑀧𑀭𑀁 𑀤𑀝𑁆𑀞𑀩𑁆𑀩𑀁, 𑀢𑀲𑁆𑀲 𑀅𑀥𑀺𑀕𑀫𑀽𑀧𑀸𑀬𑀸𑀦𑀺𑀲𑀁𑀲𑀪𑀽𑀢𑀸𑀦𑀁 𑀢𑀤𑀜𑁆𑀜𑁂𑀲𑀁 𑀅𑀦𑀯𑀚𑁆𑀚𑀥𑀫𑁆𑀫𑀸𑀦𑀁 𑀦𑀸𑀦𑀦𑁆𑀢𑀭𑀺𑀬𑀪𑀸𑀯𑀢𑁄.

𑀘𑀺𑀦𑁆𑀢𑀸𑀫𑀡𑀺𑀓𑀯𑀺𑀚𑁆𑀚𑀸𑀲𑀭𑀺𑀓𑁆𑀔𑀓𑀢𑀦𑁆𑀢𑀺 𑀇𑀫𑀺𑀦𑀸 ‘‘𑀘𑀺𑀦𑁆𑀢𑀸𑀫𑀡𑀻’’𑀢𑀺 𑀏𑀯𑀁 𑀮𑀤𑁆𑀥𑀦𑀸𑀫𑀸 𑀮𑁄𑀓𑁂 𑀏𑀓𑀸 𑀯𑀺𑀚𑁆𑀚𑀸 𑀅𑀢𑁆𑀣𑀺, 𑀬𑀸𑀬 𑀧𑀭𑁂𑀲𑀁 𑀘𑀺𑀢𑁆𑀢𑀁 𑀯𑀺𑀚𑀸𑀦𑀦𑁆𑀢𑀻𑀢𑀺 𑀤𑀻𑀧𑁂𑀢𑀺. ‘‘𑀢𑀲𑁆𑀲𑀸 𑀓𑀺𑀭 𑀯𑀺𑀚𑁆𑀚𑀸𑀬 𑀲𑀸𑀥𑀓𑁄 𑀧𑀼𑀕𑁆𑀕𑀮𑁄 𑀢𑀸𑀤𑀺𑀲𑁂 𑀤𑁂𑀲𑀓𑀸𑀮𑁂 𑀫𑀦𑁆𑀢𑀁 𑀧𑀭𑀺𑀚𑀧𑁆𑀧𑀺𑀢𑁆𑀯𑀸 𑀬𑀲𑁆𑀲 𑀘𑀺𑀢𑁆𑀢𑀁 𑀚𑀸𑀦𑀺𑀢𑀼𑀓𑀸𑀫𑁄, 𑀢𑀲𑁆𑀲 𑀤𑀺𑀝𑁆𑀞𑀳𑀢𑁆𑀣𑀸𑀤𑀺𑀯𑀺𑀲𑁂𑀲𑀲𑀜𑁆𑀚𑀸𑀦𑀦𑀫𑀼𑀔𑁂𑀦 𑀘𑀺𑀢𑁆𑀢𑀸𑀘𑀸𑀭𑀁 𑀅𑀦𑀼𑀫𑀺𑀦𑀦𑁆𑀢𑁄 𑀓𑀣𑁂𑀢𑀻’’𑀢𑀺 𑀓𑁂𑀘𑀺. 𑀅𑀧𑀭𑁂 ‘‘𑀯𑀸𑀘𑀁 𑀦𑀺𑀘𑁆𑀙𑀭𑀸𑀧𑁂𑀢𑁆𑀯𑀸 𑀢𑀢𑁆𑀣 𑀅𑀓𑁆𑀔𑀭𑀲𑀮𑁆𑀮𑀓𑁆𑀔𑀡𑀯𑀲𑁂𑀦𑀸’’𑀢𑀺 𑀯𑀤𑀦𑁆𑀢𑀺.

𑀇𑀤𑀜𑁆𑀘 𑀧𑀦 𑀲𑀩𑁆𑀩𑀦𑁆𑀢𑀺 ‘‘𑀪𑀯𑀁 𑀕𑁄𑀢𑀫𑁄 𑀅𑀦𑁂𑀓𑀯𑀺𑀳𑀺𑀢𑀁 𑀇𑀤𑁆𑀥𑀺𑀯𑀺𑀥𑀁 𑀧𑀘𑁆𑀘𑀦𑀼𑀪𑁄𑀢𑀻’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀁 𑀲𑀩𑁆𑀩𑀫𑁆𑀧𑀺.

𑀲𑀗𑁆𑀕𑀸𑀭𑀯𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀩𑁆𑀭𑀸𑀳𑁆𑀫𑀡𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.