𑁫. 𑀘𑀽𑀴𑀯𑀕𑁆𑀕𑁄

𑁧. 𑀲𑀫𑁆𑀫𑀼𑀔𑀻𑀪𑀸𑀯𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁧. 𑀧𑀜𑁆𑀘𑀫𑀲𑁆𑀲 𑀧𑀞𑀫𑁂 𑀲𑀫𑁆𑀫𑀼𑀔𑁄 𑀪𑀯𑀢𑀺 𑀬𑁂𑀦 𑀲𑁄 𑀲𑀫𑁆𑀫𑀼𑀔𑀻𑀪𑀸𑀯𑁄, 𑀧𑀼𑀭𑀢𑁄 𑀯𑀺𑀚𑁆𑀚𑀫𑀸𑀦𑀢𑀸, 𑀢𑀲𑁆𑀫𑀸 𑀲𑀫𑁆𑀫𑀼𑀔𑀻𑀪𑀸𑀯𑀸. 𑀧𑀼𑀜𑁆𑀜𑀓𑀫𑁆𑀫𑀦𑁆𑀢𑀺 𑀤𑀸𑀦𑀲𑀗𑁆𑀔𑀸𑀢𑀁 𑀧𑀼𑀜𑁆𑀜𑀓𑀫𑁆𑀫𑀁. 𑀤𑁆𑀯𑁂 𑀥𑀫𑁆𑀫𑀸 𑀲𑀼𑀮𑀪𑀸 𑀩𑀸𑀳𑀺𑀭𑀢𑁆𑀢𑀸 𑀬𑀣𑀸𑀲𑀓𑀁 𑀧𑀘𑁆𑀘𑀬𑀲𑀫𑀯𑀸𑀬𑁂𑀦 𑀮𑀩𑁆𑀪𑀦𑀢𑁄. 𑀲𑀤𑁆𑀥𑀸 𑀧𑀦 𑀤𑀼𑀮𑁆𑀮𑀪𑀸 𑀧𑀘𑀼𑀭𑀚𑀦𑀲𑁆𑀲 𑀅𑀦𑀯𑀝𑁆𑀞𑀺𑀢𑀓𑀺𑀘𑁆𑀘𑀢𑁆𑀢𑀸. 𑀢𑁂𑀦𑁂𑀯𑀸𑀳 ‘‘𑀧𑀼𑀣𑀼𑀚𑁆𑀚𑀦𑀲𑁆𑀲𑀸’’𑀢𑀺𑀆𑀤𑀺.

𑀲𑀫𑁆𑀫𑀼𑀔𑀻𑀪𑀸𑀯𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀢𑀺𑀞𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁨. 𑀤𑀼𑀢𑀺𑀬𑁂 𑀫𑀘𑁆𑀙𑀭𑀺𑀬𑀫𑁂𑀯 𑀫𑀮𑀁 𑀫𑀘𑁆𑀙𑀭𑀺𑀬𑀫𑀮𑀁, 𑀘𑀺𑀢𑁆𑀢𑀲𑁆𑀲 𑀫𑀮𑀻𑀦𑀲𑀪𑀸𑀯𑀸𑀧𑀸𑀤𑀦𑀢𑁄 𑀯𑀺𑀕𑀢𑀁 𑀫𑀘𑁆𑀙𑀭𑀺𑀬𑀫𑀮𑀁 𑀏𑀢𑁆𑀣𑀸𑀢𑀺 𑀯𑀺𑀕𑀢𑀫𑀘𑁆𑀙𑀭𑀺𑀬𑀫𑀮𑀁. 𑀕𑁂𑀥𑀸𑀪𑀸𑀯𑁂𑀦 𑀓𑁄𑀘𑀺 𑀓𑀺𑀜𑁆𑀘𑀺 𑀤𑁂𑀦𑁆𑀢𑁄𑀧𑀺 𑀢𑀢𑁆𑀣 𑀆𑀲𑀢𑁆𑀢𑀺𑀁 𑀦 𑀯𑀺𑀲𑁆𑀲𑀚𑁆𑀚𑁂𑀢𑀺, 𑀅𑀬𑀁 𑀧𑀦 𑀦 𑀢𑀸𑀤𑀺𑀲𑁄𑀢𑀺 𑀆𑀳 ‘‘𑀯𑀺𑀲𑁆𑀲𑀝𑁆𑀞𑀘𑀸𑀕𑁄’’𑀢𑀺. 𑀫𑀮𑀻𑀦𑀳𑀢𑁆𑀣𑁄𑀯 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺𑀬𑀸 𑀅𑀪𑀸𑀯𑀢𑁄. 𑀥𑁄𑀢𑀳𑀢𑁆𑀣𑁄𑀯 𑀥𑁄𑀢𑀳𑀢𑁆𑀣𑁂𑀦 𑀓𑀸𑀢𑀩𑁆𑀩𑀓𑀺𑀘𑁆𑀘𑀲𑀸𑀥𑀦𑀢𑁄. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀘𑀺𑀢𑁆𑀢𑁂 𑀲𑀼𑀤𑁆𑀥𑁂 𑀯𑀺𑀲𑀼𑀚𑁆𑀛𑀦𑁆𑀢𑀺, 𑀇𑀢𑀺 𑀯𑀼𑀢𑁆𑀢𑀁 𑀫𑀳𑁂𑀲𑀺𑀦𑀸’’𑀢𑀺. 𑀬𑀸𑀘𑀺𑀢𑀼𑀁 𑀬𑀼𑀢𑁆𑀢𑁄 𑀬𑀸𑀘𑀓𑀸𑀦𑀁 𑀫𑀦𑁄𑀭𑀣𑀧𑀽𑀭𑀡𑀢𑁄. 𑀬𑀸𑀘𑀬𑁄𑀕𑁄 𑀧𑀬𑁄𑀕𑀸𑀲𑀳𑁂𑀳𑀺 𑀬𑀸𑀘𑀓𑁂𑀳𑀺 𑀲𑀼𑀝𑁆𑀞𑀼 𑀬𑀼𑀢𑁆𑀢𑀪𑀸𑀯𑀢𑁄. 𑀢𑀁𑀲𑀫𑀗𑁆𑀕𑀻 𑀏𑀯 𑀢𑀢𑁆𑀣 𑀭𑀢𑁄 𑀦𑀸𑀫, 𑀦 𑀘𑀺𑀢𑁆𑀢𑀫𑀢𑁆𑀢𑁂𑀦𑁂𑀯𑀸𑀢𑀺 𑀆𑀳 ‘‘𑀤𑀸𑀦𑀁…𑀧𑁂… 𑀭𑀢𑁄 𑀦𑀸𑀫 𑀳𑁄𑀢𑀻’’𑀢𑀺.

‘‘𑀉𑀘𑁆𑀘𑀸, 𑀪𑀦𑁆𑀢𑁂’’𑀢𑀺 𑀯𑀢𑁆𑀯𑀸 𑀅𑀬𑀁 𑀫𑀁 𑀉𑀘𑁆𑀘𑀢𑁄 𑀯𑀤𑀢𑀻𑀢𑀺 𑀘𑀺𑀦𑁆𑀢𑁂𑀬𑁆𑀬𑀸𑀢𑀺 𑀧𑀼𑀦 ‘‘𑀦𑀸𑀢𑀺𑀉𑀘𑁆𑀘𑀸 𑀢𑀼𑀫𑁆𑀳𑁂’’𑀢𑀺 𑀆𑀳, 𑀲𑀭𑀻𑀭𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀫𑁂𑀘𑀓𑀯𑀡𑁆𑀡𑀲𑁆𑀲𑀸𑀢𑀺 𑀦𑀻𑀮𑁄𑀪𑀸𑀲𑀲𑁆𑀲. 𑀧𑀼𑀘𑁆𑀙𑀻𑀢𑀺 𑀪𑀺𑀓𑁆𑀔𑀽 𑀧𑀼𑀘𑁆𑀙𑀺. 𑀪𑀽𑀫𑀺𑀬𑀁 𑀮𑁂𑀔𑀁 𑀮𑀺𑀔𑀦𑁆𑀢𑁄 𑀅𑀘𑁆𑀙𑀻𑀢𑀺 𑀧𑀞𑀫𑀁 𑀫𑀜𑁆𑀘𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 𑀉𑀝𑁆𑀞𑀸𑀬 𑀪𑀽𑀫𑀺𑀬𑀁 𑀮𑁂𑀔𑀁 𑀮𑀺𑀔𑀦𑁆𑀢𑁄 𑀅𑀘𑁆𑀙𑀺 ‘‘𑀅𑀔𑀻𑀡𑀸𑀲𑀯𑁄𑀢𑀺 𑀫𑀜𑁆𑀜𑀦𑀸 𑀳𑁄𑀢𑀽’’𑀢𑀺. 𑀢𑀣𑀸 𑀳𑀺 𑀭𑀸𑀚𑀸 𑀔𑀻𑀡𑀸𑀲𑀯𑀲𑁆𑀲 𑀦𑀸𑀫…𑀧𑁂… 𑀦𑀺𑀯𑀢𑁆𑀢𑀺. 𑀥𑀚𑀧𑀕𑁆𑀕𑀳𑀺𑀢𑀸𑀯𑀸𑀢𑀺 𑀧𑀕𑁆𑀕𑀳𑀺𑀢𑀥𑀚𑀸𑀯. 𑀲𑀺𑀮𑀸𑀘𑁂𑀢𑀺𑀬𑀝𑁆𑀞𑀸𑀦𑀦𑁆𑀢𑀺 𑀣𑀽𑀧𑀸𑀭𑀸𑀫𑀲𑁆𑀲 𑀘 𑀫𑀳𑀸𑀘𑁂𑀢𑀺𑀬𑀲𑁆𑀲 𑀘 𑀅𑀦𑁆𑀢𑀭𑁂 𑀲𑀺𑀮𑀸𑀬 𑀓𑀢𑀘𑁂𑀢𑀺𑀬𑀝𑁆𑀞𑀸𑀦𑀁. 𑀘𑁂𑀢𑀺𑀬𑀁…𑀧𑁂… 𑀅𑀝𑁆𑀞𑀸𑀲𑀺 𑀲𑀸𑀯𑀓𑀲𑁆𑀲 𑀢𑀁 𑀓𑀽𑀝𑀸𑀕𑀸𑀭𑀦𑁆𑀢𑀺 𑀓𑀢𑁆𑀯𑀸.

𑀧𑀘𑁆𑀙𑀸𑀪𑀸𑀕𑁂𑀦𑀸𑀢𑀺 𑀥𑀫𑁆𑀫𑀓𑀣𑀺𑀓𑀲𑁆𑀲 𑀣𑁂𑀭𑀲𑁆𑀲 𑀧𑀺𑀝𑁆𑀞𑀺𑀧𑀲𑁆𑀲𑁂𑀦. 𑀕𑁄𑀦𑀲𑁄𑀢𑀺 𑀫𑀡𑁆𑀟𑀮𑀲𑀧𑁆𑀧𑁄. 𑀥𑀫𑁆𑀫𑀲𑁆𑀲𑀯𑀦𑀦𑁆𑀢𑀭𑀸𑀬 𑀩𑀳𑀽𑀦𑀁 𑀲𑀕𑁆𑀕𑀫𑀕𑁆𑀕𑀧𑁆𑀧𑀝𑀺𑀮𑀸𑀪𑀦𑁆𑀢𑀭𑀸𑀬𑁄 𑀪𑀯𑁂𑀬𑁆𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀥𑀫𑁆𑀫𑀲𑁆𑀲𑀯𑀦𑀦𑁆𑀢𑀭𑀸𑀬𑀁 𑀦 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀯𑀺𑀲𑀁 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸𑀢𑀺 𑀯𑀺𑀧𑀲𑁆𑀲𑀦𑀸𑀢𑁂𑀚𑁂𑀦 𑀯𑀺𑀲𑀯𑁂𑀕𑀁 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸. 𑀕𑀸𑀣𑀸𑀲𑀳𑀲𑁆𑀲𑀦𑁆𑀢𑀺 𑀕𑀸𑀣𑀸𑀲𑀳𑀲𑁆𑀲𑀯𑀦𑁆𑀢𑀁. 𑀧𑀝𑁆𑀞𑀸𑀦𑀕𑀸𑀣𑀸𑀬𑀸𑀢𑀺 𑀧𑀝𑁆𑀞𑀸𑀧𑀦𑀕𑀸𑀣𑀸𑀬, 𑀆𑀤𑀺𑀕𑀸𑀣𑀸𑀬𑀸𑀢𑀺 𑀅𑀢𑁆𑀣𑁄. 𑀧𑀝𑁆𑀞𑀸𑀦…𑀧𑁂… 𑀅𑀯𑀲𑀸𑀦𑀕𑀸𑀣𑀁 𑀏𑀯 𑀯𑀯𑀢𑁆𑀣𑀧𑁂𑀲𑀺, 𑀦 𑀤𑁆𑀯𑀺𑀦𑁆𑀦𑀁 𑀅𑀦𑁆𑀢𑀭𑁂 𑀯𑀼𑀢𑁆𑀢𑀁 𑀓𑀺𑀮𑀦𑁆𑀢𑀓𑀸𑀬𑀢𑁆𑀢𑀸. 𑀲𑀭𑀪𑀸𑀡𑀁 𑀲𑀸𑀬𑀦𑁆𑀳𑀥𑀫𑁆𑀫𑀓𑀣𑀸. 𑀧𑀕𑁆𑀕𑀡𑁆𑀳𑀸𑀢𑀻𑀢𑀺 𑀧𑀘𑁆𑀘𑀓𑁆𑀔𑀁 𑀓𑀭𑁄𑀦𑁆𑀢𑀻 𑀕𑀡𑁆𑀳𑀸𑀢𑀺, 𑀲𑀓𑁆𑀓𑀘𑁆𑀘𑀁 𑀲𑀼𑀡𑀸𑀢𑀻𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀓𑀣𑀦𑀤𑀺𑀯𑀲𑁂 𑀥𑀫𑁆𑀫𑀓𑀣𑀺𑀓𑀸𑀦𑀁 𑀅𑀓𑀺𑀮𑀫𑀦𑀢𑁆𑀣𑀁 𑀲𑀤𑁆𑀥𑀸 𑀉𑀧𑀸𑀲𑀓𑀸 𑀲𑀺𑀦𑀺𑀤𑁆𑀥𑀪𑁄𑀚𑀦𑀁 𑀫𑀥𑀼𑀧𑀸𑀦𑀓𑀜𑁆𑀘 𑀤𑁂𑀦𑁆𑀢𑀺 𑀲𑀭𑀲𑁆𑀲 𑀫𑀥𑀼𑀭𑀪𑀸𑀯𑀸𑀬 𑀲𑀧𑁆𑀧𑀺𑀫𑀥𑀼𑀓𑀢𑁂𑀮𑀸𑀤𑀺𑀜𑁆𑀘 𑀪𑁂𑀲𑀚𑁆𑀚𑀁. 𑀢𑁂𑀦𑀸𑀳 ‘‘𑀅𑀭𑀺𑀬𑀯𑀁𑀲𑀁 𑀓𑀣𑁂𑀲𑁆𑀲𑀸𑀫𑀻’’𑀢𑀺𑀆𑀤𑀺. 𑀘𑀢𑀽𑀳𑀺 𑀤𑀸𑀞𑀸𑀳𑀺 𑀟𑀁𑀲𑀺𑀢𑁆𑀯𑀸𑀢𑀺 𑀤𑀴𑁆𑀳𑀤𑀝𑁆𑀞𑀪𑀸𑀯𑀤𑀲𑁆𑀲𑀦𑀁. 𑀘𑀭𑀺𑀲𑁆𑀲𑀸𑀫𑀻𑀢𑀺 𑀲𑀫𑁆𑀫𑀸𑀦𑁂𑀲𑁆𑀲𑀸𑀫𑀺, 𑀲𑀓𑁆𑀓𑀘𑁆𑀘𑀁 𑀲𑀼𑀡𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄. 𑀦𑀺𑀫𑁆𑀫𑀣𑁂𑀢𑁆𑀯𑀸𑀢𑀺 𑀦𑀺𑀫𑁆𑀫𑀤𑁆𑀤𑀺𑀢𑁆𑀯𑀸, 𑀅𑀧𑀦𑁂𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀢𑀺𑀞𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀅𑀢𑁆𑀣𑀯𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁩. 𑀢𑀢𑀺𑀬𑁂 𑀅𑀢𑁆𑀣𑁄 𑀦𑀸𑀫 𑀨𑀮𑀁, 𑀢𑀁 𑀏𑀢𑀲𑁆𑀲 𑀯𑀲𑁄𑀢𑀺 𑀅𑀢𑁆𑀣𑀯𑀲𑁄. 𑀳𑁂𑀢𑀼, 𑀅𑀢𑁆𑀣𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄, 𑀲𑁄 𑀏𑀯𑀸𑀢𑀺 𑀆𑀳 ‘‘𑀢𑀬𑁄 𑀅𑀢𑁆𑀣𑁂 𑀢𑀻𑀡𑀺 𑀓𑀸𑀭𑀡𑀸𑀦𑀻’’𑀢𑀺. 𑀥𑀫𑁆𑀫𑀤𑁂𑀲𑀦𑀸 𑀦𑀸𑀫 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁂𑀦 𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀁 𑀧𑀓𑀸𑀲𑀦𑀸𑀢𑀺 𑀆𑀳 ‘‘𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀧𑀓𑀸𑀲𑁂𑀢𑀻’’𑀢𑀺. 𑀅𑀝𑁆𑀞𑀓𑀣𑀁 𑀜𑀸𑀡𑁂𑀦 𑀧𑀝𑀺𑀲𑀁𑀯𑁂𑀤𑀻𑀢𑀺 𑀧𑀸𑀴𑀺𑀧𑀤𑀸𑀦𑀁 𑀅𑀢𑁆𑀣𑀁 𑀯𑀺𑀯𑀭𑀡𑀜𑀸𑀡𑁂𑀦 𑀧𑀝𑀺 𑀧𑀝𑀺 𑀲𑀁𑀯𑁂𑀤𑀦𑀲𑀻𑀮𑁄 ‘‘𑀅𑀬𑀁 𑀇𑀫𑀲𑁆𑀲 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑁄’’𑀢𑀺. 𑀏𑀢𑁂𑀦 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸𑀩𑁆𑀬𑀸𑀧𑀸𑀭𑀫𑀸𑀳. 𑀧𑀸𑀴𑀺𑀥𑀫𑁆𑀫𑀁 𑀧𑀝𑀺𑀲𑀁𑀯𑁂𑀤𑀻𑀢𑀺 𑀧𑀸𑀴𑀺𑀕𑀢𑀺𑀁 𑀧𑀸𑀴𑀺𑀁 𑀧𑀤𑀯𑀺𑀯𑀭𑀡𑀁 𑀧𑀝𑀺 𑀧𑀝𑀺 𑀲𑀁𑀯𑁂𑀤𑀦𑀲𑀻𑀮𑁄. 𑀏𑀢𑁂𑀦 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸𑀩𑁆𑀬𑀸𑀧𑀸𑀭𑀫𑀸𑀳.

𑀅𑀢𑁆𑀣𑀯𑀲𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀓𑀣𑀸𑀧𑀯𑀢𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁪. 𑀘𑀢𑀼𑀢𑁆𑀣𑁂 𑀧𑀯𑀢𑁆𑀢𑀺𑀦𑀻𑀢𑀺 𑀬𑀸𑀯 𑀅𑀥𑀺𑀧𑁆𑀧𑁂𑀢𑀢𑁆𑀣𑀦𑀺𑀕𑀫𑀦𑀸 𑀅𑀯𑀺𑀘𑁆𑀙𑁂𑀤𑁂𑀦 𑀧𑀯𑀢𑁆𑀢𑀺𑀦𑀻. 𑀧𑀝𑀺𑀖𑀸𑀢𑀸𑀪𑀸𑀯𑁂𑀦 𑀅𑀧𑁆𑀧𑀝𑀺𑀳𑀢𑀸. 𑀦𑀺𑀬𑁆𑀬𑀸𑀦𑀺𑀓𑀸 𑀲𑀧𑁆𑀧𑀸𑀝𑀺𑀳𑀻𑀭𑀓𑀸.

𑀓𑀣𑀸𑀧𑀯𑀢𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀧𑀡𑁆𑀟𑀺𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁫. 𑀧𑀜𑁆𑀘𑀫𑁂 𑀧𑀡𑁆𑀟𑀺𑀢𑀧𑀜𑁆𑀜𑀢𑁆𑀢𑀸𑀦𑀻𑀢𑀺 𑀧𑀡𑁆𑀟𑀺𑀢𑁂𑀳𑀺 𑀧𑀞𑀫𑀁 𑀧𑀜𑁆𑀜𑀢𑁆𑀢𑀸𑀦𑀺. 𑀓𑀣𑀺𑀢𑀸𑀦𑀻𑀢𑀺 𑀲𑁂𑀬𑁆𑀬𑀲𑁄 𑀓𑀣𑀺𑀢𑀸𑀦𑀺. 𑀫𑀳𑀸𑀧𑀼𑀭𑀺𑀲𑁂𑀳𑀻𑀢𑀺 𑀩𑀼𑀤𑁆𑀥𑀩𑁄𑀥𑀺𑀲𑀢𑁆𑀢𑁂𑀳𑀺. 𑀓𑀭𑀼𑀡𑀸𑀢𑀺 𑀓𑀭𑀼𑀡𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀯𑀼𑀢𑁆𑀢𑀸. 𑀧𑀼𑀩𑁆𑀩𑀪𑀸𑀕𑁄𑀢𑀺 𑀢𑀲𑁆𑀲 𑀉𑀧𑀘𑀸𑀭𑁄. 𑀤𑀫𑁄𑀢𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄 ‘‘𑀫𑀦𑀘𑁆𑀙𑀝𑁆𑀞𑀸𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀤𑀫𑀦’’𑀦𑁆𑀢𑀺 𑀓𑀢𑁆𑀯𑀸. 𑀅𑀢𑁆𑀢𑀤𑀫𑀦𑀦𑁆𑀢𑀺 𑀘𑀺𑀢𑁆𑀢𑀤𑀫𑀦𑀁. 𑀧𑀼𑀡𑁆𑀡𑁄𑀯𑀸𑀤𑁂 (𑀫. 𑀦𑀺. 𑁩.𑁩𑁯𑁬) ‘‘𑀲𑀓𑁆𑀔𑀺𑀲𑁆𑀲𑀲𑀺 𑀔𑁄, 𑀢𑁆𑀯𑀁 𑀧𑀼𑀡𑁆𑀡, 𑀇𑀫𑀺𑀦𑀸 𑀤𑀫𑀽𑀧𑀲𑀫𑁂𑀦𑀸’’𑀢𑀺 𑀆𑀕𑀢𑀢𑁆𑀢𑀸 𑀤𑀫𑁄𑀢𑀺 𑀯𑀼𑀢𑁆𑀢𑀸 𑀔𑀦𑁆𑀢𑀺𑀧𑀺. 𑀆𑀴𑀯𑀓𑁂 𑀆𑀴𑀯𑀓𑀲𑀼𑀢𑁆𑀢𑁂 (𑀲𑀁. 𑀦𑀺. 𑁧.𑁨𑁪𑁬; 𑀲𑀼. 𑀦𑀺. 𑁧𑁯𑁦) ‘‘𑀲𑀘𑁆𑀘𑀸 𑀤𑀫𑀸 𑀘𑀸𑀕𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑀸 𑀧𑀜𑁆𑀜𑀸𑀧𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 ‘‘𑀤𑀫𑁄’’𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀭𑀓𑁆𑀔𑀦𑀁 𑀕𑁄𑀧𑀦𑀁 𑀧𑀝𑀺𑀚𑀕𑁆𑀕𑀦𑀦𑁆𑀢𑀺 𑀫𑀸𑀢𑀸𑀧𑀺𑀢𑀽𑀦𑀁 𑀫𑀦𑀼𑀲𑁆𑀲𑀸𑀫𑀦𑀼𑀲𑁆𑀲𑀓𑀢𑀽𑀧𑀤𑁆𑀤𑀯𑀢𑁄 𑀭𑀓𑁆𑀔𑀦𑀁, 𑀩𑁆𑀬𑀸𑀥𑀺𑀆𑀤𑀺𑀅𑀦𑀢𑁆𑀣𑀢𑁄 𑀕𑁄𑀧𑀦𑀁, 𑀖𑀸𑀲𑀘𑁆𑀙𑀸𑀤𑀦𑀸𑀤𑀻𑀳𑀺 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀡𑁂𑀦 𑀧𑀝𑀺𑀚𑀕𑁆𑀕𑀦𑀁. 𑀲𑀦𑁆𑀢𑁄 𑀦𑀸𑀫 𑀲𑀩𑁆𑀩𑀓𑀺𑀮𑁂𑀲𑀤𑀭𑀣𑀧𑀭𑀺𑀴𑀸𑀳𑀽𑀧𑀲𑀫𑁂𑀦 𑀉𑀧𑀲𑀦𑁆𑀢𑀓𑀸𑀬𑀯𑀘𑀻𑀲𑀫𑀸𑀘𑀸𑀭𑀢𑀸𑀬 𑀘. 𑀉𑀢𑁆𑀢𑀫𑀝𑁆𑀞𑁂𑀦 𑀲𑀦𑁆𑀢𑀸𑀦𑀦𑁆𑀢𑀺 𑀫𑀢𑁆𑀢𑁂𑀬𑁆𑀬𑀢𑀸𑀤𑀻𑀳𑀺 𑀲𑁂𑀝𑁆𑀞𑀝𑁆𑀞𑁂𑀦 𑀲𑀦𑁆𑀢𑀸𑀦𑀁.

𑀇𑀥 𑀇𑀫𑁂𑀲𑀁𑀬𑁂𑀯 𑀢𑀺𑀡𑁆𑀡𑀁 𑀞𑀸𑀦𑀸𑀦𑀁 𑀓𑀭𑀡𑁂𑀦𑀸𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀆𑀕𑀢𑀸𑀦𑀁 𑀢𑀺𑀡𑁆𑀡𑀁 𑀞𑀸𑀦𑀸𑀦𑀁 𑀓𑀭𑀡𑁂𑀦 𑀦𑀺𑀩𑁆𑀩𑀢𑁆𑀢𑀦𑁂𑀦. 𑀏𑀢𑀸𑀦𑀺…𑀧𑁂… 𑀓𑀸𑀭𑀡𑀸𑀦𑀻𑀢𑀺 𑀫𑀸𑀢𑀼𑀧𑀝𑁆𑀞𑀸𑀦𑀁 𑀧𑀺𑀢𑀼𑀧𑀝𑁆𑀞𑀸𑀦𑀦𑁆𑀢𑀺 𑀏𑀢𑀸𑀦𑀺 𑀤𑁆𑀯𑁂 𑀉𑀢𑁆𑀢𑀫𑀧𑀼𑀭𑀺𑀲𑀸𑀦𑀁 𑀓𑀸𑀭𑀡𑀸𑀦𑀺. 𑀉𑀢𑁆𑀢𑀫𑀓𑀺𑀘𑁆𑀘𑀓𑀭𑀡𑁂𑀦 𑀳𑀺 𑀫𑀸𑀢𑀸𑀧𑀺𑀢𑀼𑀉𑀧𑀝𑁆𑀞𑀸𑀓𑀸 ‘‘𑀉𑀢𑁆𑀢𑀫𑀧𑀼𑀭𑀺𑀲𑀸’’𑀢𑀺 𑀯𑀼𑀢𑁆𑀢𑀸. 𑀢𑁂𑀦𑀸𑀳 ‘‘𑀫𑀸𑀢𑀸𑀧𑀺𑀢𑀼…𑀧𑁂… 𑀯𑀼𑀢𑁆𑀢𑁄’’𑀢𑀺. 𑀅𑀦𑀼𑀧𑀤𑁆𑀤𑀯𑀪𑀸𑀯𑁂𑀦 𑀔𑁂𑀫𑀁.

𑀧𑀡𑁆𑀟𑀺𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀲𑀻𑀮𑀯𑀦𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁬. 𑀙𑀝𑁆𑀞𑁂 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀦𑁆𑀢𑀺 𑀏𑀢𑁆𑀣 ‘‘𑀫𑀦𑀼𑀲𑁆𑀲𑀸 𑀧𑀼𑀜𑁆𑀜𑀁 𑀧𑀲𑀯𑀦𑁆𑀢𑀻’’𑀢𑀺 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀢𑁆𑀢𑀸 𑀪𑀸𑀯𑀦𑀸𑀫𑀬𑀲𑁆𑀲𑀧𑀺 𑀧𑀼𑀜𑁆𑀜𑀲𑁆𑀲 𑀲𑀗𑁆𑀕𑀡𑁆𑀳𑀦𑀢𑁄 𑀮𑁄𑀓𑀼𑀢𑁆𑀢𑀭𑀲𑁆𑀲𑀧𑀺 𑀲𑀫𑁆𑀪𑀯𑁄 𑀤𑀝𑁆𑀞𑀩𑁆𑀩𑁄.

𑀲𑀻𑀮𑀯𑀦𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀲𑀗𑁆𑀔𑀢𑀮𑀓𑁆𑀔𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁭. 𑀲𑀢𑁆𑀢𑀫𑁂 𑀲𑀫𑁂𑀘𑁆𑀘 𑀲𑀫𑁆𑀪𑀽𑀬 𑀧𑀘𑁆𑀘𑀬𑁂𑀳𑀺 𑀓𑀢𑀁 𑀲𑀗𑁆𑀔𑀢𑀁. 𑀦𑀺𑀫𑀺𑀢𑁆𑀢𑀸𑀦𑀻𑀢𑀺 𑀲𑀜𑁆𑀚𑀸𑀦𑀦𑀲𑁆𑀲 𑀦𑀺𑀫𑀺𑀢𑁆𑀢𑀸𑀦𑀺. 𑀳𑁂𑀢𑀼𑀧𑀘𑁆𑀘𑀬𑀲𑀫𑀯𑀸𑀬𑁂 𑀉𑀧𑁆𑀧𑀚𑁆𑀚𑀦𑀁 𑀉𑀧𑁆𑀧𑀸𑀤𑁄, 𑀅𑀢𑁆𑀢𑀮𑀸𑀪𑁄. 𑀯𑀬𑁄𑀢𑀺 𑀪𑀗𑁆𑀕𑁄. 𑀞𑀺𑀢𑀲𑁆𑀲𑀸𑀢𑀺 𑀉𑀧𑁆𑀧𑀸𑀤𑀓𑁆𑀔𑀡𑀢𑁄 𑀉𑀤𑁆𑀥𑀁 𑀞𑀺𑀢𑀺𑀓𑁆𑀔𑀡𑀧𑀢𑁆𑀢𑀲𑁆𑀲. 𑀲𑀸 𑀧𑀦𑀲𑁆𑀲 𑀅𑀯𑀢𑁆𑀣𑀸 𑀉𑀧𑁆𑀧𑀸𑀤𑀸𑀯𑀢𑁆𑀣𑀸𑀬 𑀪𑀺𑀦𑁆𑀦𑀸𑀢𑀺 𑀓𑀢𑁆𑀯𑀸 𑀅𑀜𑁆𑀜𑀣𑀢𑁆𑀢𑀁 𑀚𑀭𑀸𑀢𑀺 𑀘 𑀯𑀼𑀢𑁆𑀢𑀸. 𑀬𑀲𑁆𑀫𑀸 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀫𑀸𑀦𑁄 𑀏𑀯 𑀪𑀺𑀚𑁆𑀚𑀢𑀺, 𑀢𑀣𑀸 𑀲𑀢𑀺 𑀉𑀧𑁆𑀧𑀸𑀤𑀪𑀗𑁆𑀕𑀸 𑀲𑀫𑀸𑀦𑀓𑁆𑀔𑀡𑀸 𑀲𑀺𑀬𑀼𑀁, 𑀦 𑀘 𑀢𑀁 𑀬𑀼𑀚𑁆𑀚𑀢𑀺, 𑀢𑀲𑁆𑀫𑀸 𑀉𑀧𑁆𑀧𑀸𑀤𑀸𑀯𑀢𑁆𑀣𑀸𑀬 𑀪𑀺𑀦𑁆𑀦𑀸 𑀪𑀗𑁆𑀕𑀸𑀪𑀺𑀫𑀼𑀔𑀸𑀯𑀢𑁆𑀣𑀸 𑀚𑀭𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀬𑁂 𑀧𑀦 ‘‘𑀲𑀗𑁆𑀔𑀸𑀭𑀸𑀦𑀁 𑀞𑀺𑀢𑀺 𑀦𑀢𑁆𑀣𑀻’’𑀢𑀺 𑀯𑀤𑀦𑁆𑀢𑀺, 𑀢𑁂𑀲𑀁 𑀢𑀁 𑀫𑀺𑀘𑁆𑀙𑀸. 𑀬𑀣𑀸 𑀳𑀺 𑀢𑀲𑁆𑀲𑁂𑀯 𑀥𑀫𑁆𑀫𑀲𑁆𑀲 𑀉𑀧𑁆𑀧𑀸𑀤𑀸𑀯𑀢𑁆𑀣𑀸𑀬 𑀪𑀺𑀦𑁆𑀦𑀸 𑀪𑀗𑁆𑀕𑀸𑀯𑀢𑁆𑀣𑀸 𑀇𑀘𑁆𑀙𑀺𑀢𑀸, 𑀅𑀜𑁆𑀜𑀣𑀸 ‘‘𑀅𑀜𑁆𑀜𑀁 𑀉𑀧𑁆𑀧𑀚𑁆𑀚𑀢𑀺, 𑀅𑀜𑁆𑀜𑀁 𑀦𑀺𑀭𑀼𑀚𑁆𑀛𑀢𑀻’’𑀢𑀺 𑀆𑀧𑀚𑁆𑀚𑀢𑀺, 𑀏𑀯𑀁 𑀉𑀧𑁆𑀧𑀚𑁆𑀚𑀫𑀸𑀦𑀲𑁆𑀲 𑀪𑀗𑁆𑀕𑀸𑀪𑀺𑀫𑀼𑀔𑀸 𑀥𑀫𑁆𑀫𑀸 𑀇𑀘𑁆𑀙𑀺𑀢𑀩𑁆𑀩𑀸. 𑀲𑀸 𑀘 𑀞𑀺𑀢𑀺𑀓𑁆𑀔𑀡𑁄. 𑀦 𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑁄 𑀪𑀺𑀚𑁆𑀚𑀢𑀻𑀢𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀦𑁆𑀢𑀺.

𑀲𑀗𑁆𑀔𑀢𑀦𑁆𑀢𑀺 𑀢𑁂𑀪𑀽𑀫𑀓𑀸 𑀥𑀫𑁆𑀫𑀸 𑀧𑀘𑁆𑀘𑀬𑀲𑀫𑀼𑀧𑁆𑀧𑀦𑁆𑀦𑀢𑁆𑀢𑀸. 𑀬𑀤𑀺 𑀏𑀯𑀁 𑀫𑀕𑁆𑀕𑀨𑀮𑀥𑀫𑁆𑀫𑀸 𑀓𑀣𑀦𑁆𑀢𑀺 𑀆𑀳 ‘‘𑀫𑀕𑁆𑀕𑀨𑀮𑀸𑀦𑀺 𑀧𑀦𑀸’’𑀢𑀺𑀆𑀤𑀺. 𑀮𑀓𑁆𑀔𑀡𑀓𑀣𑀸 𑀳𑀺 𑀬𑀸𑀯𑀤𑁂𑀯 𑀲𑀫𑁆𑀫𑀲𑀦𑀢𑁆𑀣𑀸. 𑀉𑀧𑁆𑀧𑀸𑀤𑀓𑁆𑀔𑀡𑁂 𑀉𑀧𑁆𑀧𑀸𑀤𑁄, 𑀦 𑀞𑀸𑀦𑀪𑀗𑁆𑀕𑀓𑁆𑀔𑀡𑁂𑀲𑀼. 𑀓𑀲𑁆𑀫𑀸? 𑀉𑀧𑁆𑀧𑀸𑀤𑀉𑀧𑁆𑀧𑀸𑀤𑀓𑁆𑀔𑀡𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀢𑀸. 𑀬𑀣𑀸 𑀳𑀺 𑀉𑀧𑁆𑀧𑀸𑀤𑀲𑀗𑁆𑀔𑀸𑀢𑁂𑀦 𑀯𑀺𑀓𑀸𑀭𑁂𑀦 𑀉𑀧𑁆𑀧𑀸𑀤𑀓𑁆𑀔𑀡𑁄 𑀧𑀭𑀺𑀘𑁆𑀙𑀺𑀦𑁆𑀦𑁄, 𑀏𑀯𑀁 𑀉𑀧𑁆𑀧𑀸𑀤𑀓𑁆𑀔𑀡𑁂𑀦𑀧𑀺 𑀉𑀧𑁆𑀧𑀸𑀤𑁄 𑀧𑀭𑀺𑀘𑁆𑀙𑀺𑀦𑁆𑀦𑁄. 𑀲𑁂𑀲𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀫𑀢𑁆𑀢𑀢𑀸𑀬𑀧𑀺 𑀓𑀸𑀮𑀲𑁆𑀲 𑀮𑁄𑀓𑀲𑀫𑀜𑁆𑀜𑀸𑀯𑀲𑁂𑀦𑁂𑀯 𑀯𑀼𑀢𑁆𑀢𑀁. 𑀮𑀓𑁆𑀔𑀡𑀁 𑀦 𑀲𑀗𑁆𑀔𑀢𑀁, 𑀲𑀗𑁆𑀔𑀢𑀁 𑀦 𑀮𑀓𑁆𑀔𑀡𑀦𑁆𑀢𑀺 𑀦𑁂𑀲𑀁 𑀪𑁂𑀤𑀤𑀲𑁆𑀲𑀦𑀁. 𑀅𑀯𑀢𑁆𑀣𑀸𑀯𑀢𑁄 𑀳𑀺 𑀅𑀯𑀢𑁆𑀣𑀸 𑀪𑀺𑀦𑁆𑀦𑀸𑀯𑀸𑀢𑀺. 𑀧𑀭𑀺𑀘𑁆𑀙𑀺𑀦𑁆𑀦𑀦𑁆𑀢𑀺 𑀏𑀢𑁆𑀣 𑀉𑀧𑁆𑀧𑀸𑀤𑀯𑀬𑁂𑀳𑀺 𑀢𑀸𑀯 𑀲𑀗𑁆𑀔𑀢𑀁 𑀧𑀭𑀺𑀘𑁆𑀙𑀺𑀦𑁆𑀦𑀁 𑀳𑁄𑀢𑀼, 𑀚𑀭𑀸𑀬 𑀧𑀦 𑀢𑀁 𑀓𑀣𑀁 𑀧𑀭𑀺𑀘𑁆𑀙𑀺𑀦𑁆𑀦𑀦𑁆𑀢𑀺 𑀯𑀼𑀘𑁆𑀘𑀢𑀺? 𑀦 𑀯𑀼𑀘𑁆𑀘𑀢𑀺 𑀧𑀭𑀺𑀘𑁆𑀙𑁂𑀤𑁄 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀫𑀢𑁆𑀢𑁂𑀦, 𑀅𑀣 𑀔𑁄 𑀲𑀪𑀸𑀯𑀪𑁂𑀤𑁂𑀦𑀸𑀢𑀺 𑀦𑀸𑀬𑀁 𑀤𑁄𑀲𑁄. 𑀲𑀗𑁆𑀔𑀢𑀁 𑀥𑀫𑁆𑀫𑀚𑀸𑀢𑀁 𑀧𑀭𑀺𑀘𑁆𑀙𑀺𑀦𑁆𑀦𑀁 𑀢𑀩𑁆𑀩𑀦𑁆𑀢𑀁 𑀥𑀫𑁆𑀫𑀚𑀸𑀢𑀁 𑀲𑀗𑁆𑀔𑀢𑀦𑁆𑀢𑀺 𑀧𑀜𑁆𑀜𑀸𑀬𑀢𑀺 𑀏𑀯𑀁 𑀢𑁂𑀲𑀁 𑀅𑀪𑀸𑀯𑁂𑀦 𑀦𑀺𑀩𑁆𑀩𑀸𑀦𑀫𑁂𑀢𑀦𑁆𑀢𑀺 𑀮𑀓𑁆𑀔𑀺𑀢𑀩𑁆𑀩𑀢𑁄 𑀲𑀜𑁆𑀚𑀸𑀦𑀺𑀢𑀩𑁆𑀩𑀢𑁄. 𑀇𑀤𑀸𑀦𑀺 ‘‘𑀬𑀣𑀸 𑀳𑀻’’𑀢𑀺𑀆𑀤𑀺𑀦𑀸 𑀬𑀣𑀸𑀯𑀼𑀢𑁆𑀢𑀫𑀢𑁆𑀢𑀁 𑀉𑀧𑀫𑀸𑀳𑀺 𑀯𑀺𑀪𑀸𑀯𑁂𑀢𑀺.

𑀲𑀗𑁆𑀔𑀢𑀮𑀓𑁆𑀔𑀡𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀅𑀲𑀗𑁆𑀔𑀢𑀮𑀓𑁆𑀔𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁮. 𑀅𑀝𑁆𑀞𑀫𑁂 𑀅𑀲𑀗𑁆𑀔𑀢𑀲𑁆𑀲𑀸𑀢𑀺 𑀯𑀼𑀢𑁆𑀢𑀦𑀬𑁂𑀦 𑀦 𑀲𑀗𑁆𑀔𑀢𑀲𑁆𑀲. 𑀢𑁂𑀦𑀸𑀳 ‘‘𑀧𑀘𑁆𑀘𑀬𑁂𑀳𑀻’’𑀢𑀺𑀆𑀤𑀺. 𑀬𑀣𑀸 𑀉𑀧𑁆𑀧𑀸𑀤𑀸𑀤𑀻𑀦𑀁 𑀪𑀸𑀯𑁂𑀦 𑀲𑀗𑁆𑀔𑀢𑀥𑀫𑁆𑀫𑀚𑀸𑀢𑀁 𑀲𑀗𑁆𑀔𑀢𑀦𑁆𑀢𑀺 𑀧𑀜𑁆𑀜𑀸𑀬𑀢𑀺, 𑀏𑀯𑀁 𑀢𑁂𑀲𑀁 𑀅𑀪𑀸𑀯𑁂𑀦 𑀦𑀺𑀩𑁆𑀩𑀸𑀦𑀁 𑀅𑀲𑀗𑁆𑀔𑀢𑀦𑁆𑀢𑀺 𑀧𑀜𑁆𑀜𑀸𑀬𑀢𑀺.

𑀅𑀲𑀗𑁆𑀔𑀢𑀮𑀓𑁆𑀔𑀡𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀧𑀩𑁆𑀩𑀢𑀭𑀸𑀚𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁯. 𑀦𑀯𑀫𑁂 𑀇𑀥 𑀲𑀸𑀮-𑀲𑀤𑁆𑀤𑁄 𑀭𑀼𑀓𑁆𑀔𑀲𑀸𑀫𑀜𑁆𑀜𑀧𑀭𑀺𑀬𑀸𑀬𑁄, 𑀦 𑀭𑀼𑀓𑁆𑀔𑀯𑀺𑀲𑁂𑀲𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀫𑀳𑀸𑀲𑀸𑀮𑀸𑀢𑀺 𑀫𑀳𑀸𑀭𑀼𑀓𑁆𑀔𑀸’’𑀢𑀺. 𑀓𑀼𑀮𑀚𑁂𑀝𑁆𑀞𑀓𑀦𑁆𑀢𑀺 𑀢𑀲𑁆𑀫𑀺𑀁 𑀓𑀼𑀮𑁂 𑀚𑁂𑀝𑁆𑀞𑀪𑀽𑀢𑀁 𑀲𑀸𑀫𑀺𑀪𑀽𑀢𑀁. 𑀲𑀺𑀮𑀸𑀫𑀬𑁄 𑀦 𑀧𑀁𑀲𑀼𑀫𑀬𑁄 𑀫𑀺𑀲𑁆𑀲𑀓𑁄 𑀘. 𑀕𑀸𑀫𑀁 𑀕𑀸𑀫𑀽𑀧𑀘𑀸𑀭𑀜𑁆𑀘 𑀞𑀧𑁂𑀢𑁆𑀯𑀸 𑀲𑀩𑁆𑀩𑀁 𑀅𑀭𑀜𑁆𑀜𑀦𑁆𑀢𑀺 𑀆𑀳 ‘‘𑀅𑀭𑀜𑁆𑀜𑀲𑁆𑀫𑀺𑀦𑁆𑀢𑀺 𑀅𑀕𑀸𑀫𑀓𑀝𑁆𑀞𑀸𑀦𑁂’’𑀢𑀺. 𑀫𑀳𑀦𑁆𑀢𑁄 𑀧𑀩𑁆𑀩𑀢𑁄 𑀲𑁂𑀮𑁄𑀢𑀺 𑀬𑁄𑀚𑀦𑀸.

𑀧𑀩𑁆𑀩𑀢𑀭𑀸𑀚𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀆𑀢𑀧𑁆𑀧𑀓𑀭𑀡𑀻𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁦. 𑀤𑀲𑀫𑁂 𑀲𑀭𑀻𑀭𑀲𑀫𑁆𑀪𑀯𑀸𑀦𑀦𑁆𑀢𑀺 𑀲𑀭𑀻𑀭𑁂 𑀲𑀫𑁆𑀪𑀽𑀢𑀸𑀦𑀁. 𑀤𑀼𑀓𑁆𑀔𑀸𑀦𑀦𑁆𑀢𑀺 𑀅𑀦𑀺𑀝𑁆𑀞𑀸𑀦𑀁. 𑀩𑀳𑀮𑀸𑀦𑀦𑁆𑀢𑀺 𑀦𑀺𑀭𑀦𑁆𑀢𑀭𑀧𑁆𑀧𑀯𑀢𑁆𑀢𑀺𑀬𑀸 𑀅𑀯𑀺𑀭𑀴𑀸𑀦𑀁. 𑀢𑀸𑀧𑀦𑀯𑀲𑁂𑀦𑀸𑀢𑀺 𑀤𑀼𑀓𑁆𑀔𑀸𑀧𑀦𑀯𑀲𑁂𑀦. 𑀢𑀺𑀩𑁆𑀩𑀸𑀦𑀦𑁆𑀢𑀺 𑀓𑀼𑀭𑀽𑀭𑀸𑀦𑀁. 𑀢𑀸𑀲𑀁 𑀬𑀣𑀸𑀯𑀼𑀢𑁆𑀢𑀸𑀦𑀁 𑀅𑀥𑀺𑀯𑀸𑀲𑀦𑀸𑀬 𑀧𑀳𑀸𑀢𑀩𑁆𑀩𑀤𑀼𑀓𑁆𑀔𑀯𑁂𑀤𑀦𑀸𑀦𑀁 𑀧𑀚𑀳𑀦𑀁 𑀦𑀸𑀫 𑀔𑀫𑀦𑀫𑁂𑀯𑀸𑀢𑀺 𑀆𑀳 ‘‘𑀔𑀫𑀦𑀢𑁆𑀣𑀸𑀬𑀸’’𑀢𑀺. 𑀆𑀡𑀸𑀧𑁂𑀢𑁆𑀯𑀸𑀢𑀺 ‘‘𑀆𑀢𑀧𑁆𑀧𑀁 𑀓𑀭𑀡𑀻𑀬’’𑀦𑁆𑀢𑀺 𑀩𑀼𑀤𑁆𑀥𑀸𑀡𑀁 𑀯𑀺𑀥𑀸𑀬. 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸 𑀓𑀣𑀺𑀢𑀸 𑀲𑀲𑀫𑁆𑀪𑀸𑀭𑀸𑀦𑀁 𑀫𑀕𑁆𑀕𑀥𑀫𑁆𑀫𑀸𑀦𑀁 𑀓𑀣𑀺𑀢𑀢𑁆𑀢𑀸.

𑀆𑀢𑀧𑁆𑀧𑀓𑀭𑀡𑀻𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀫𑀳𑀸𑀘𑁄𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁧. 𑀏𑀓𑀸𑀤𑀲𑀫𑁂 𑀫𑀳𑀸𑀩𑀮𑀯𑀘𑁄𑀭𑁄 𑀫𑀳𑀸𑀘𑁄𑀭𑁄𑀢𑀺 𑀆𑀳 ‘‘𑀫𑀳𑀦𑁆𑀢𑁄 𑀩𑀮𑀯𑀘𑁄𑀭𑁄’’𑀢𑀺. 𑀩𑀮𑀯𑀘𑁄𑀭𑁄𑀢𑀺 𑀘 𑀫𑀳𑀸𑀣𑀸𑀫𑀢𑀸𑀬 𑀫𑀳𑀸𑀧𑀭𑀺𑀯𑀸𑀭𑀢𑀸𑀬 𑀫𑀳𑀸𑀘𑁄𑀭𑀺𑀬𑀓𑀫𑁆𑀫𑀲𑀫𑀢𑁆𑀣𑀢𑀸𑀬 𑀘 𑀯𑁂𑀤𑀺𑀢𑀩𑁆𑀩𑁄. 𑀫𑀳𑀢𑀁 𑀕𑀸𑀫𑀦𑀺𑀕𑀫𑀸𑀦𑀁 𑀯𑀺𑀮𑀼𑀧𑁆𑀧𑀦𑀁 𑀫𑀳𑀸𑀯𑀺𑀮𑁄𑀧𑁄. 𑀢𑀁 𑀢𑀁 𑀓𑀸𑀭𑀡𑀁 𑀧𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀢𑀁 𑀢𑀁 𑀅𑀓𑀭𑀡𑀫𑁂𑀯 𑀓𑀸𑀭𑀡𑀁 𑀓𑀢𑁆𑀯𑀸 𑀢𑀧𑁆𑀧𑀝𑀺𑀩𑀤𑁆𑀥𑀸𑀬 𑀓𑀣𑀸𑀬 𑀧𑀓𑁆𑀔𑀺𑀧𑀺𑀢𑁆𑀯𑀸. 𑀅𑀢𑁆𑀣𑀁 𑀓𑀣𑀬𑀺𑀲𑁆𑀲𑀦𑁆𑀢𑀻𑀢𑀺 𑀢𑀲𑁆𑀲 𑀢𑀲𑁆𑀲 𑀅𑀢𑁆𑀣𑀜𑁆𑀘 𑀓𑀣𑀬𑀺𑀲𑁆𑀲𑀦𑁆𑀢𑀺. 𑀳𑀭𑀦𑁆𑀢𑀸𑀢𑀺 𑀅𑀧𑀦𑁂𑀦𑁆𑀢𑀸 𑀧𑀭𑀺𑀳𑀭𑀦𑁆𑀢𑀸. 𑀤𑀲𑀯𑀢𑁆𑀣𑀼𑀓𑀸𑀬𑀸𑀢𑀺 ‘‘𑀲𑀲𑁆𑀲𑀢𑁄 𑀮𑁄𑀓𑁄’’𑀢𑀺 (𑀫. 𑀦𑀺. 𑁧.𑁨𑁬𑁯) 𑀆𑀤𑀺𑀤𑀲𑀯𑀢𑁆𑀣𑀼𑀲𑀦𑁆𑀦𑀺𑀲𑁆𑀲𑀺𑀢𑀸𑀬. 𑀅𑀦𑁆𑀢𑀁 𑀕𑀳𑁂𑀢𑁆𑀯𑀸 𑀞𑀺𑀢𑀤𑀺𑀝𑁆𑀞𑀺𑀬𑀸𑀢𑀺 𑀢𑀫𑁂𑀯 𑀲𑀲𑁆𑀲𑀢𑀸𑀤𑀺𑀅𑀦𑁆𑀢𑀁 𑀕𑀳𑁂𑀢𑁆𑀯𑀸 𑀅𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀞𑀺𑀢𑀤𑀺𑀝𑁆𑀞𑀺𑀬𑀸.

𑀫𑀳𑀸𑀘𑁄𑀭𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀽𑀴𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀞𑀫𑀧𑀡𑁆𑀡𑀸𑀲𑀓𑀁 𑀦𑀺𑀝𑁆𑀞𑀺𑀢𑀁.

𑁨. 𑀤𑀼𑀢𑀺𑀬𑀧𑀡𑁆𑀡𑀸𑀲𑀓𑀁