𑁪. 𑀤𑁂𑀯𑀤𑀽𑀢𑀯𑀕𑁆𑀕𑁄

𑁧. 𑀲𑀩𑁆𑀭𑀳𑁆𑀫𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁧. 𑀘𑀢𑀼𑀢𑁆𑀣𑀲𑁆𑀲 𑀧𑀞𑀫𑁂 𑀲𑀩𑁆𑀭𑀳𑁆𑀫𑀓𑀸𑀦𑀻𑀢𑀺 𑀲𑀲𑁂𑀝𑁆𑀞𑀓𑀸𑀦𑀺. 𑀬𑁂𑀲𑀦𑁆𑀢𑀺 𑀬𑁂𑀲𑀁 𑀓𑀼𑀮𑀸𑀦𑀁. 𑀧𑀼𑀢𑁆𑀢𑀸𑀦𑀦𑁆𑀢𑀺 𑀧𑀼𑀢𑁆𑀢𑁂𑀳𑀺. 𑀧𑀽𑀚𑀺𑀢𑀲𑀤𑁆𑀤𑀬𑁄𑀕𑁂𑀦 𑀳𑀺 𑀇𑀤𑀁 𑀓𑀭𑀡𑀢𑁆𑀣𑁂 𑀲𑀸𑀫𑀺𑀯𑀘𑀦𑀁. 𑀢𑁂𑀦𑀸𑀢𑀺 𑀆𑀳𑀸𑀭𑀸𑀤𑀺𑀦𑀸. 𑀧𑀝𑀺𑀚𑀕𑁆𑀕𑀺𑀢𑀸 𑀕𑁄𑀧𑀺𑀢𑀸𑀢𑀺 𑀬𑀣𑀸𑀓𑀸𑀮𑀁 𑀢𑀲𑁆𑀲 𑀢𑀲𑁆𑀲 𑀤𑀸𑀢𑀩𑁆𑀩𑀲𑁆𑀲 𑀤𑀸𑀦𑁂𑀦 𑀯𑁂𑀬𑁆𑀬𑀸𑀯𑀘𑁆𑀘𑀲𑁆𑀲 𑀘 𑀓𑀭𑀡𑁂𑀦 𑀧𑀝𑀺𑀚𑀕𑁆𑀕𑀺𑀢𑀸 𑀘𑁂𑀯 𑀉𑀧𑁆𑀧𑀦𑁆𑀦𑀸𑀦𑀢𑁆𑀣𑀧𑁆𑀧𑀳𑀭𑀡𑁂𑀦 𑀕𑁄𑀧𑀺𑀢𑀸 𑀘 𑀳𑁄𑀦𑁆𑀢𑀺. 𑀢𑁂𑀲𑀦𑁆𑀢𑀺 𑀫𑀸𑀢𑀸𑀧𑀺𑀢𑀽𑀦𑀁. 𑀩𑁆𑀭𑀳𑁆𑀫𑀸𑀤𑀺𑀪𑀸𑀯𑀲𑀸𑀥𑀦𑀢𑁆𑀣𑀦𑁆𑀢𑀺 𑀢𑁂𑀲𑀁 𑀕𑀼𑀡𑀸𑀦𑀁 𑀅𑀢𑁆𑀣𑀺𑀢𑀸𑀬 𑀮𑁄𑀓𑁂 𑀩𑁆𑀭𑀳𑁆𑀫𑀸 𑀦𑀸𑀫 𑀯𑀼𑀘𑁆𑀘𑀢𑀺, 𑀆𑀘𑀭𑀺𑀬𑁄 𑀦𑀸𑀫 𑀯𑀼𑀘𑁆𑀘𑀢𑀺, 𑀆𑀳𑀼𑀦𑁂𑀬𑁆𑀬𑁄 𑀦𑀸𑀫 𑀯𑀼𑀘𑁆𑀘𑀢𑀺, 𑀢𑁂 𑀫𑀸𑀢𑀸𑀧𑀺𑀢𑀽𑀦𑀁 𑀧𑀼𑀢𑁆𑀢𑀓𑀁 𑀧𑀝𑀺𑀮𑀪𑀦𑁆𑀢𑀻𑀢𑀺 𑀤𑀲𑁆𑀲𑀦𑀯𑀲𑁂𑀦 𑀦𑁂𑀲𑀁 𑀩𑁆𑀭𑀳𑁆𑀫𑀸𑀤𑀺𑀪𑀸𑀯𑀲𑀸𑀥𑀦𑀢𑁆𑀣𑀁 ‘‘𑀩𑀳𑀼𑀓𑀸𑀭𑀸’’𑀢𑀺, 𑀯𑀢𑁆𑀯𑀸 𑀢𑀁 𑀢𑁂𑀲𑀁 𑀩𑀳𑀼𑀓𑀸𑀭𑀢𑀁 𑀦𑀸𑀦𑀸𑀓𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀆𑀧𑀸𑀤𑀓𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀫𑀸𑀢𑀸𑀧𑀺𑀢𑀭𑁄 𑀳𑀺 𑀧𑀼𑀢𑁆𑀢𑀸𑀦𑀁 𑀚𑀻𑀯𑀺𑀢𑀲𑁆𑀲 𑀆𑀧𑀸𑀤𑀓𑀸, 𑀲𑀭𑀻𑀭𑀲𑁆𑀲 𑀧𑁄𑀲𑀓𑀸, 𑀆𑀘𑀸𑀭𑀲𑀫𑀸𑀘𑀸𑀭𑀸𑀦𑀁 𑀲𑀺𑀓𑁆𑀔𑀸𑀧𑀓𑀸 𑀲𑀓𑀮𑀲𑁆𑀲𑀧𑀺 𑀇𑀫𑀲𑁆𑀲 𑀮𑁄𑀓𑀲𑁆𑀲 𑀤𑀲𑁆𑀲𑁂𑀢𑀸𑀭𑁄. 𑀢𑁂𑀦𑀸𑀳 ‘‘𑀧𑀼𑀢𑁆𑀢𑀸𑀦𑀁 𑀳𑀻’’𑀢𑀺𑀆𑀤𑀺. 𑀇𑀝𑁆𑀞𑀸𑀭𑀫𑁆𑀫𑀡𑀁 𑀢𑀸𑀯 𑀢𑁂 𑀤𑀲𑁆𑀲𑁂𑀦𑁆𑀢𑀼, 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑀁 𑀓𑀣𑀦𑁆𑀢𑀺? 𑀢𑀫𑁆𑀧𑀺 𑀤𑀲𑁆𑀲𑁂𑀢𑀩𑁆𑀩𑀫𑁂𑀯 𑀯𑀚𑁆𑀚𑀦𑀻𑀬𑀪𑀸𑀯𑀚𑀸𑀦𑀸𑀧𑀦𑀢𑁆𑀣𑀁.

𑀅𑀯𑀺𑀚𑀳𑀺𑀢𑀸 𑀳𑁄𑀦𑁆𑀢𑀻𑀢𑀺 𑀢𑀸𑀲𑀁 𑀪𑀸𑀯𑀦𑀸𑀬 𑀩𑁆𑀭𑀳𑁆𑀫𑀸𑀦𑀁 𑀩𑁆𑀭𑀳𑁆𑀫𑀮𑁄𑀓𑁂 𑀉𑀧𑁆𑀧𑀦𑁆𑀦𑀢𑁆𑀢𑀸 𑀅𑀯𑀺𑀚𑀳𑀺𑀢𑀸 𑀳𑁄𑀦𑁆𑀢𑀺 𑀪𑀸𑀯𑀦𑀸. 𑀮𑁄𑀪𑀦𑀻𑀬𑀯𑀬𑀲𑁆𑀫𑀺𑀁 𑀧𑀞𑀫𑀬𑁄𑀩𑁆𑀩𑀦𑁂 𑀅𑀢𑀺𑀯𑀺𑀬 𑀫𑀼𑀤𑀼𑀪𑀸𑀯𑀧𑁆𑀧𑀢𑁆𑀢𑀤𑀲𑁆𑀲𑀦𑀢𑁆𑀣𑀁 𑀲𑀢𑀯𑀺𑀳𑀢𑀕𑁆𑀕𑀳𑀡𑀁. 𑀧𑀸𑀝𑀺𑀬𑁂𑀓𑁆𑀓𑀦𑁆𑀢𑀺 𑀯𑀺𑀲𑀼𑀁. 𑀇𑀫𑀺𑀦𑀸 𑀓𑀸𑀭𑀡𑁂𑀦𑀸𑀢𑀺 𑀇𑀫𑀺𑀦𑀸 𑀬𑀣𑀸𑀯𑀼𑀢𑁆𑀢𑁂𑀦 𑀧𑀼𑀢𑁆𑀢𑁂𑀲𑀼 𑀧𑀯𑀢𑁆𑀢𑀺𑀢𑁂𑀳𑀺 𑀅𑀢𑀺𑀓𑁆𑀓𑀫𑁂𑀦 𑀫𑁂𑀢𑁆𑀢𑀸𑀤𑀺𑀲𑀫𑀼𑀧𑁆𑀧𑀢𑁆𑀢𑀺𑀲𑀗𑁆𑀔𑀸𑀢𑁂𑀦 𑀓𑀸𑀭𑀡𑁂𑀦.

𑀣𑀭𑀼𑀲𑀺𑀧𑁆𑀧𑀦𑁆𑀢𑀺 𑀅𑀲𑀺𑀲𑀢𑁆𑀢𑀺𑀓𑀼𑀦𑁆𑀢𑀓𑀮𑀸𑀧𑀸𑀤𑀺𑀆𑀬𑀼𑀥𑀲𑀺𑀧𑁆𑀧𑀁. 𑀫𑀼𑀤𑁆𑀤𑀸𑀕𑀡𑀦𑀸𑀢𑀺 𑀅𑀗𑁆𑀕𑀼𑀮𑀺𑀲𑀁𑀓𑁄𑀘𑀦𑀸𑀤𑀺𑀦𑀸 𑀳𑀢𑁆𑀣𑀫𑀼𑀤𑁆𑀤𑀸𑀬 𑀕𑀡𑀦𑀸. 𑀆𑀤𑀺𑀲𑀤𑁆𑀤𑁂𑀦 𑀧𑀸𑀡𑀸𑀤𑀻𑀦𑀁 𑀲𑀗𑁆𑀕𑀳𑁄. 𑀧𑀘𑁆𑀙𑀸𑀘𑀭𑀺𑀬𑀸 𑀦𑀸𑀫 𑀫𑀸𑀢𑀸𑀧𑀺𑀢𑀽𑀦𑀁 𑀲𑀦𑁆𑀢𑀺𑀓𑁂 𑀉𑀕𑁆𑀕𑀳𑀺𑀢𑀕𑀳𑀝𑁆𑀞𑀯𑀢𑁆𑀢𑀲𑁆𑀲𑁂𑀯 𑀧𑀼𑀕𑁆𑀕𑀮𑀲𑁆𑀲 𑀬𑀣𑀸𑀲𑀓𑀁 𑀳𑀢𑁆𑀣𑀸𑀘𑀭𑀺𑀬𑀸𑀤𑀻𑀦𑀁 𑀲𑀺𑀧𑁆𑀧𑀕𑁆𑀕𑀸𑀳𑀸𑀧𑀦𑀦𑁆𑀢𑀺 𑀓𑀢𑁆𑀯𑀸 𑀲𑀩𑁆𑀩𑀧𑀞𑀫𑀁 𑀆𑀘𑀭𑀺𑀬𑀸 𑀦𑀸𑀫𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀆𑀦𑀻𑀬 𑀳𑀼𑀢𑀁 𑀆𑀳𑀼𑀢𑀁. 𑀧𑀓𑀸𑀭𑁂𑀳𑀺 𑀳𑀼𑀢𑀁 𑀧𑀸𑀳𑀼𑀢𑀁. 𑀅𑀪𑀺𑀲𑀗𑁆𑀔𑀢𑀦𑁆𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁.

𑀦𑀫𑁄 𑀓𑀭𑁂𑀬𑁆𑀬𑀸𑀢𑀺 𑀲𑀸𑀬𑀁 𑀧𑀸𑀢𑀁 𑀉𑀧𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 ‘‘𑀇𑀤𑀁 𑀫𑀬𑁆𑀳𑀁 𑀉𑀢𑁆𑀢𑀫𑀧𑀼𑀜𑁆𑀜𑀓𑁆𑀔𑁂𑀢𑁆𑀢’’𑀦𑁆𑀢𑀺 𑀦𑀫𑀓𑁆𑀓𑀸𑀭𑀁 𑀓𑀭𑁂𑀬𑁆𑀬. 𑀢𑀸𑀬 𑀦𑀁 𑀧𑀸𑀭𑀺𑀘𑀭𑀺𑀬𑀸𑀬𑀸𑀢𑀺 𑀏𑀢𑁆𑀣 𑀦𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀬𑀣𑀸𑀯𑀼𑀢𑁆𑀢𑀧𑀭𑀺𑀘𑀭𑀡𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀧𑀸𑀭𑀺𑀘𑀭𑀺𑀬𑀸𑀬𑀸𑀢𑀺 𑀪𑀭𑀡𑀓𑀺𑀘𑁆𑀘𑀓𑀭𑀡𑀓𑀼𑀮𑀯𑀁𑀲𑀧𑁆𑀧𑀢𑀺𑀝𑁆𑀞𑀸𑀦𑀸𑀧𑀦𑀸𑀤𑀺𑀦𑀸 𑀧𑀜𑁆𑀘𑀯𑀺𑀥𑀉𑀧𑀝𑁆𑀞𑀸𑀦𑁂𑀦. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀧𑀜𑁆𑀘𑀳𑀺 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀞𑀸𑀦𑁂𑀳𑀺 𑀧𑀼𑀢𑁆𑀢𑁂𑀦 𑀧𑀼𑀭𑀢𑁆𑀣𑀺𑀫𑀸 𑀤𑀺𑀲𑀸 𑀫𑀸𑀢𑀸𑀧𑀺𑀢𑀭𑁄 𑀧𑀘𑁆𑀘𑀼𑀧𑀝𑁆𑀞𑀸𑀢𑀩𑁆𑀩𑀸 𑁋 ‘𑀪𑀢𑁄 𑀦𑁂𑀲𑀁 𑀪𑀭𑀺𑀲𑁆𑀲𑀸𑀫𑀺, 𑀓𑀺𑀘𑁆𑀘𑀁 𑀦𑁂𑀲𑀁 𑀓𑀭𑀺𑀲𑁆𑀲𑀸𑀫𑀺, 𑀓𑀼𑀮𑀯𑀁𑀲𑀁 𑀞𑀧𑁂𑀲𑁆𑀲𑀸𑀫𑀺, 𑀤𑀸𑀬𑀚𑁆𑀚𑀁 𑀧𑀝𑀺𑀧𑀚𑁆𑀚𑀸𑀫𑀺, 𑀅𑀣 𑀯𑀸 𑀧𑀦 𑀧𑁂𑀢𑀸𑀦𑀁 𑀓𑀸𑀮𑀓𑀢𑀸𑀦𑀁 𑀤𑀓𑁆𑀔𑀺𑀡𑀁 𑀅𑀦𑀼𑀧𑁆𑀧𑀤𑀲𑁆𑀲𑀸𑀫𑀻’𑀢𑀺. 𑀇𑀫𑁂𑀳𑀺 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀧𑀜𑁆𑀘𑀳𑀺 𑀞𑀸𑀦𑁂𑀳𑀺 𑀧𑀼𑀢𑁆𑀢𑁂𑀦 𑀧𑀼𑀭𑀢𑁆𑀣𑀺𑀫𑀸 𑀤𑀺𑀲𑀸 𑀫𑀸𑀢𑀸𑀧𑀺𑀢𑀭𑁄 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀧𑀜𑁆𑀘𑀳𑀺 𑀞𑀸𑀦𑁂𑀳𑀺 𑀧𑀼𑀢𑁆𑀢𑀁 𑀅𑀦𑀼𑀓𑀫𑁆𑀧𑀦𑁆𑀢𑀺, 𑀧𑀸𑀧𑀸 𑀦𑀺𑀯𑀸𑀭𑁂𑀦𑁆𑀢𑀺, 𑀓𑀮𑁆𑀬𑀸𑀡𑁂 𑀦𑀺𑀯𑁂𑀲𑁂𑀦𑁆𑀢𑀺, 𑀲𑀺𑀧𑁆𑀧𑀁 𑀲𑀺𑀓𑁆𑀔𑀸𑀧𑁂𑀦𑁆𑀢𑀺, 𑀧𑀢𑀺𑀭𑀽𑀧𑁂𑀦 𑀤𑀸𑀭𑁂𑀦 𑀲𑀁𑀬𑁄𑀚𑁂𑀦𑁆𑀢𑀺, 𑀲𑀫𑀬𑁂 𑀤𑀸𑀬𑀚𑁆𑀚𑀁 𑀦𑀺𑀬𑁆𑀬𑀸𑀤𑁂𑀦𑁆𑀢𑀻’’𑀢𑀺 (𑀤𑀻. 𑀦𑀺. 𑁩.𑁨𑁬𑁭).

𑀅𑀧𑀺𑀘 𑀬𑁄 𑀫𑀸𑀢𑀸𑀧𑀺𑀢𑀭𑁄 𑀢𑀻𑀲𑀼 𑀯𑀢𑁆𑀣𑀽𑀲𑀼 𑀅𑀪𑀺𑀧𑁆𑀧𑀲𑀦𑁆𑀦𑁂 𑀓𑀢𑁆𑀯𑀸 𑀲𑀻𑀮𑁂𑀲𑀼 𑀯𑀸 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀧𑀩𑁆𑀩𑀚𑁆𑀚𑀸𑀬 𑀯𑀸 𑀦𑀺𑀬𑁄𑀚𑁂𑀢𑁆𑀯𑀸 𑀉𑀧𑀝𑁆𑀞𑀳𑀢𑀺, 𑀅𑀬𑀁 𑀫𑀸𑀢𑀸𑀧𑀺𑀢𑀽𑀧𑀝𑁆𑀞𑀸𑀓𑀸𑀦𑀁 𑀅𑀕𑁆𑀕𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑀸 𑀧𑀦𑀸𑀬𑀁 𑀧𑀸𑀭𑀺𑀘𑀭𑀺𑀬𑀸 𑀧𑀼𑀢𑁆𑀢𑀲𑁆𑀲 𑀉𑀪𑀬𑀮𑁄𑀓𑀳𑀺𑀢𑀲𑀼𑀔𑀸𑀯𑀳𑀸𑀢𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀇𑀥𑁂𑀯 𑀦𑀁 𑀧𑀲𑀁𑀲𑀦𑁆𑀢𑀺, 𑀧𑁂𑀘𑁆𑀘 𑀲𑀕𑁆𑀕𑁂 𑀧𑀫𑁄𑀤𑀢𑀻’’𑀢𑀺 𑀯𑀼𑀢𑁆𑀢𑀁. 𑀧𑀲𑀁𑀲𑀦𑁆𑀢𑀻𑀢𑀺 ‘‘𑀅𑀬𑀁 𑀧𑀼𑀕𑁆𑀕𑀮𑁄 𑀫𑀢𑁆𑀢𑁂𑀬𑁆𑀬𑁄 𑀧𑁂𑀢𑁆𑀢𑁂𑀬𑁆𑀬𑁄 𑀲𑀕𑁆𑀕𑀲𑀁𑀯𑀢𑁆𑀢𑀦𑀺𑀬𑀁 𑀧𑀝𑀺𑀧𑀤𑀁 𑀧𑀽𑀭𑁂𑀢𑀻’’𑀢𑀺 𑀇𑀥𑁂𑀯 𑀦𑀁 𑀧𑀲𑀁𑀲𑀦𑁆𑀢𑀺. 𑀆𑀫𑁄𑀤𑀢𑀺 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀫𑁄𑀤𑀧𑁆𑀧𑀢𑁆𑀢𑀺𑀬𑀸. 𑀧𑀫𑁄𑀤𑀢𑀺 𑀦𑀸𑀦𑀧𑁆𑀧𑀓𑀸𑀭𑀫𑁄𑀤𑀲𑀫𑁆𑀧𑀯𑀢𑁆𑀢𑀺𑀬𑀸.

𑀲𑀩𑁆𑀭𑀳𑁆𑀫𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀆𑀦𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁨. 𑀤𑀼𑀢𑀺𑀬𑁂 𑀢𑀣𑀸𑀚𑀸𑀢𑀺𑀓𑁄𑀢𑀺 𑀢𑀣𑀸𑀲𑀪𑀸𑀯𑁄. 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀮𑀸𑀪𑁄𑀢𑀺 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀬 𑀅𑀥𑀺𑀕𑀫𑁄. 𑀭𑀽𑀧𑀫𑁂𑀯 𑀓𑀺𑀮𑁂𑀲𑀼𑀧𑁆𑀧𑀢𑁆𑀢𑀺𑀬𑀸 𑀓𑀸𑀭𑀡𑀪𑀸𑀯𑀢𑁄 𑀭𑀽𑀧𑀦𑀺𑀫𑀺𑀢𑁆𑀢𑀁. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀲𑀲𑁆𑀲𑀢𑀸𑀤𑀺𑀦𑀺𑀫𑀺𑀢𑁆𑀢𑀦𑁆𑀢𑀺 𑀲𑀲𑁆𑀲𑀢𑀼𑀘𑁆𑀙𑁂𑀤𑀪𑀸𑀯𑀦𑀺𑀫𑀺𑀢𑁆𑀢𑀁. 𑀧𑀼𑀕𑁆𑀕𑀮𑀦𑀺𑀫𑀺𑀢𑁆𑀢𑀦𑁆𑀢𑀺 𑀧𑀼𑀕𑁆𑀕𑀮𑀸𑀪𑀺𑀦𑀺𑀯𑁂𑀲𑀦𑀦𑀺𑀫𑀺𑀢𑁆𑀢𑀁. 𑀥𑀫𑁆𑀫𑀦𑀺𑀫𑀺𑀢𑁆𑀢𑀦𑁆𑀢𑀺 𑀥𑀫𑁆𑀫𑀸𑀭𑀫𑁆𑀫𑀡𑀲𑀗𑁆𑀔𑀸𑀢𑀁 𑀦𑀺𑀫𑀺𑀢𑁆𑀢𑀁. ‘‘𑀲𑀺𑀬𑀸 𑀦𑀼 𑀔𑁄, 𑀪𑀦𑁆𑀢𑁂’’𑀢𑀺 𑀣𑁂𑀭𑁂𑀦 𑀧𑀼𑀝𑁆𑀞𑁄 𑀪𑀕𑀯𑀸 ‘‘𑀲𑀺𑀬𑀸’’𑀢𑀺 𑀅𑀯𑁄𑀘 𑀮𑁄𑀓𑀼𑀢𑁆𑀢𑀭𑀲𑀫𑀸𑀥𑀺𑀧𑁆𑀧𑀝𑀺𑀮𑀸𑀪𑀁 𑀲𑀦𑁆𑀥𑀸𑀬. 𑀲𑁄 𑀳𑀺 𑀦𑀺𑀩𑁆𑀩𑀸𑀦𑀁 𑀲𑀦𑁆𑀢𑀁 𑀧𑀡𑀻𑀢𑀦𑁆𑀢𑀺 𑀘 𑀧𑀲𑁆𑀲𑀢𑀺. 𑀢𑁂𑀦𑀸𑀳 ‘‘𑀇𑀥𑀸𑀦𑀦𑁆𑀤𑀸’’𑀢𑀺𑀆𑀤𑀺.

𑀦𑀺𑀩𑁆𑀩𑀸𑀦𑀁 𑀲𑀦𑁆𑀢𑀦𑁆𑀢𑀺 𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀢𑁆𑀯𑀸𑀢𑀺 𑀦𑀺𑀩𑁆𑀩𑀸𑀦𑀁 𑀲𑀦𑁆𑀢𑀦𑁆𑀢𑀺 𑀆𑀪𑀼𑀚𑀺𑀢𑁆𑀯𑀸 𑀨𑀮𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀢𑁆𑀯𑀸. 𑀤𑀺𑀯𑀲𑀫𑁆𑀧𑀻𑀢𑀺𑀆𑀤𑀺𑀦𑀸 𑀅𑀲𑀗𑁆𑀔𑀢𑀸𑀬 𑀥𑀸𑀢𑀼𑀬𑀸 𑀅𑀘𑁆𑀘𑀦𑁆𑀢𑀲𑀦𑁆𑀢𑀧𑀡𑀻𑀢𑀸𑀤𑀺𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀅𑀝𑁆𑀞𑀯𑀺𑀥𑁂𑀢𑀺 ‘‘𑀲𑀦𑁆𑀢𑀁 𑀧𑀡𑀻𑀢𑀁 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀢𑀡𑁆𑀳𑀸𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦’’𑀦𑁆𑀢𑀺 𑀏𑀯𑀁 𑀅𑀝𑁆𑀞𑀯𑀺𑀥𑁂 𑀆𑀪𑁄𑀕𑀲𑀜𑁆𑀜𑀺𑀢𑁂 𑀲𑀫𑀦𑁆𑀦𑀸𑀳𑀸𑀭𑁂. 𑀦𑀺𑀤𑁆𑀥𑀸𑀭𑀡𑁂 𑀘𑁂𑀢𑀁 𑀪𑀼𑀫𑁆𑀫𑀁. 𑀇𑀫𑀲𑁆𑀫𑀺𑀁 𑀞𑀸𑀦𑁂…𑀧𑁂… 𑀮𑀩𑁆𑀪𑀦𑁆𑀢𑁂𑀯𑀸𑀢𑀺 ‘‘𑀇𑀥𑀸𑀦𑀦𑁆𑀤, 𑀪𑀺𑀓𑁆𑀔𑀼𑀦𑁄 𑀏𑀯𑀁 𑀳𑁄𑀢𑀻’’𑀢𑀺 𑀆𑀕𑀢𑁂 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑀧𑁆𑀧𑀤𑁂𑀲𑁂 𑀏𑀓𑁄𑀧𑀺 𑀆𑀪𑁄𑀕𑀲𑀫𑀦𑁆𑀦𑀸𑀳𑀸𑀭𑁄 𑀘𑁂𑀧𑀺 𑀲𑀩𑁆𑀩𑁂 𑀅𑀝𑁆𑀞𑀧𑀺 𑀆𑀪𑁄𑀕𑀲𑀫𑀦𑁆𑀦𑀸𑀳𑀸𑀭𑀸 𑀮𑀩𑁆𑀪𑀦𑁆𑀢𑁂𑀯 𑀲𑀫𑀦𑁆𑀦𑀸𑀳𑀭𑀢𑀁 𑀅𑀢𑁆𑀣𑀸𑀯𑀳𑀢𑁆𑀢𑀸.

𑀜𑀸𑀡𑁂𑀦 𑀚𑀸𑀦𑀺𑀢𑁆𑀯𑀸𑀢𑀺 𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑀳𑀺𑀢𑁂𑀦 𑀫𑀕𑁆𑀕𑀜𑀸𑀡𑁂𑀦 𑀚𑀸𑀦𑀺𑀢𑁆𑀯𑀸. 𑀧𑀭𑀸𑀦𑀺 𑀘 𑀑𑀧𑀭𑀸𑀦𑀺 𑀘 𑀘𑀓𑁆𑀔𑀸𑀤𑀻𑀦𑀺 𑀆𑀬𑀢𑀦𑀸𑀦𑀺. 𑀲𑀦𑁆𑀢𑀢𑀸𑀬𑀸𑀢𑀺 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀢𑀸𑀬. 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀥𑀽𑀫𑀯𑀺𑀭𑀳𑀺𑀢𑁄𑀢𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺 𑀏𑀯 𑀲𑀦𑁆𑀢𑀸𑀧𑀦𑀝𑁆𑀞𑁂𑀦 𑀥𑀽𑀫𑁄, 𑀢𑁂𑀦 𑀯𑀺𑀭𑀳𑀺𑀢𑁄. 𑀅𑀦𑀻𑀖𑁄𑀢𑀺 𑀅𑀧𑀸𑀧𑁄. 𑀚𑀸𑀢𑀺𑀚𑀭𑀸𑀕𑀳𑀡𑁂𑀦𑁂𑀯 𑀩𑁆𑀬𑀸𑀥𑀺𑀫𑀭𑀡𑀫𑁆𑀧𑀺 𑀕𑀳𑀺𑀢𑀫𑁂𑀯𑀸𑀢𑀺 𑀢𑀩𑁆𑀪𑀸𑀯𑀪𑀸𑀯𑀢𑁄𑀢𑀺 𑀯𑀼𑀢𑁆𑀢𑀁.

𑀆𑀦𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀲𑀸𑀭𑀺𑀧𑀼𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁩. 𑀢𑀢𑀺𑀬𑁂, ‘‘𑀲𑀸𑀭𑀺𑀧𑀼𑀢𑁆𑀢, 𑀫𑀬𑀸 𑀲𑀁𑀔𑀺𑀢𑁆𑀢𑁂𑀦 𑀤𑁂𑀲𑀺𑀢𑀁 𑀥𑀫𑁆𑀫𑀁 𑀢𑀸𑀤𑀺𑀲𑁂𑀦𑀧𑀺 𑀦 𑀲𑀼𑀓𑀭𑀁 𑀯𑀺𑀜𑁆𑀜𑀸𑀢𑀼’’𑀦𑁆𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦𑁂𑀯 𑀯𑀤𑀦𑁆𑀢𑁄 𑀣𑁂𑀭𑀲𑁆𑀲 𑀜𑀸𑀡𑀁 𑀲𑀩𑁆𑀩𑀫𑀢𑀺𑀓𑁆𑀓𑀫𑀁. 𑀅𑀜𑁆𑀜𑀸𑀢𑀸𑀭𑁄 𑀘 𑀤𑀼𑀮𑁆𑀮𑀪𑀸𑀢𑀺 𑀳𑀺 𑀇𑀫𑀺𑀦𑀸 𑀲𑀸𑀫𑀜𑁆𑀜𑀯𑀘𑀦𑁂𑀦 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀫𑁆𑀧𑀺 𑀅𑀦𑁆𑀢𑁄𑀕𑀥𑀁 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀢𑁂𑀦𑀧𑀺 𑀅𑀢𑁆𑀢𑀦𑁄 𑀤𑁂𑀲𑀦𑀸𑀬 𑀤𑀼𑀧𑁆𑀧𑀝𑀺𑀯𑀺𑀤𑁆𑀥𑀪𑀸𑀯𑀁 𑀤𑀲𑁆𑀲𑁂𑀢𑀺.

𑀲𑀫𑁆𑀫𑀸𑀢𑀺 𑀳𑁂𑀢𑀼𑀦𑀸 𑀓𑀸𑀭𑀡𑁂𑀦. 𑀢𑁂𑀦𑀸𑀳 ‘‘𑀉𑀧𑀸𑀬𑁂𑀦𑀸’’𑀢𑀺𑀆𑀤𑀺. 𑀫𑀸𑀦𑀸𑀪𑀺𑀲𑀫𑀬𑀸𑀢𑀺 𑀫𑀸𑀦𑀲𑁆𑀲 𑀤𑀲𑁆𑀲𑀦𑀸𑀪𑀺𑀲𑀫𑀬𑀸. 𑀧𑀳𑀸𑀦𑀸𑀪𑀺𑀲𑀫𑀬𑁄𑀢𑀺 𑀘 𑀤𑀲𑁆𑀲𑀦𑀸𑀪𑀺𑀲𑀫𑀬𑁄𑀢𑀺 𑀘 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑁄 𑀯𑀼𑀢𑁆𑀢𑁄. 𑀅𑀭𑀳𑀢𑁆𑀢𑀫𑀕𑁆𑀕𑁄 𑀳𑀺 𑀧𑀭𑀺𑀜𑁆𑀜𑀸𑀓𑀺𑀘𑁆𑀘𑀲𑀺𑀤𑁆𑀥𑀺𑀬𑀸 𑀓𑀺𑀘𑁆𑀘𑀯𑀲𑁂𑀦 𑀫𑀸𑀦𑀁 𑀧𑀲𑁆𑀲𑀢𑀺, 𑀅𑀲𑀫𑁆𑀫𑁄𑀳𑀧𑁆𑀧𑀝𑀺𑀯𑁂𑀥𑀯𑀲𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀅𑀬𑀫𑀲𑁆𑀲 𑀤𑀲𑁆𑀲𑀦𑀸𑀪𑀺𑀲𑀫𑀬𑁄. 𑀢𑁂𑀦 𑀤𑀺𑀝𑁆𑀞𑁄 𑀧𑀦 𑀧𑀳𑀸𑀦𑀸𑀪𑀺𑀲𑀫𑀬𑁄 𑀘. 𑀤𑀲𑁆𑀲𑀦𑀸𑀪𑀺𑀲𑀫𑀬𑁂𑀦 𑀳𑀺 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀫𑁂𑀯 𑀧𑀳𑀻𑀬𑀢𑀺. 𑀤𑀺𑀝𑁆𑀞𑀯𑀺𑀲𑁂𑀦 𑀤𑀺𑀝𑁆𑀞𑀲𑀢𑁆𑀢𑀸𑀦𑀁 𑀚𑀻𑀯𑀺𑀢𑀁 𑀯𑀺𑀬 𑀅𑀬𑀫𑀲𑁆𑀲 𑀧𑀳𑀸𑀦𑀸𑀪𑀺𑀲𑀫𑀬𑁄. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀧𑀳𑀸𑀦𑀸𑀪𑀺𑀲𑀫𑀬𑀲𑁆𑀲 𑀤𑀲𑁆𑀲𑀦𑀸𑀪𑀺𑀲𑀫𑀬𑀦𑀸𑀦𑀦𑁆𑀢𑀭𑀺𑀬𑀓𑀢𑁆𑀢𑀸 ‘‘𑀧𑀳𑀸𑀦𑀸𑀪𑀺𑀲𑀫𑀬𑁂𑀦’’𑀇𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀧𑀳𑀸𑀦𑀸𑀪𑀺𑀲𑀫𑀬𑁂 𑀳𑀺 𑀕𑀳𑀺𑀢𑁂 𑀤𑀲𑁆𑀲𑀦𑀸𑀪𑀺𑀲𑀫𑀬𑁄 𑀕𑀳𑀺𑀢𑁄𑀯 𑀳𑁄𑀢𑀺.

𑀅𑀦𑁆𑀢𑀫𑀓𑀸𑀲𑀺 𑀤𑀼𑀓𑁆𑀔𑀲𑁆𑀲𑀸𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀫𑀸𑀦𑀲𑁆𑀲 𑀧𑀳𑀻𑀦𑀢𑁆𑀢𑀸 𑀬𑁂 𑀇𑀫𑁂 ‘‘𑀓𑀸𑀬𑀩𑀦𑁆𑀥𑀦𑀲𑁆𑀲 𑀅𑀦𑁆𑀢𑁄 𑀚𑀻𑀭𑀢𑀺 (𑀘𑀽𑀴𑀯. 𑁨𑁭𑁮), 𑀳𑀭𑀺𑀢𑀦𑁆𑀢𑀁 𑀯𑀸’’𑀢𑀺 (𑀫. 𑀦𑀺. 𑁧.𑁩𑁦𑁪) 𑀏𑀯𑀁 𑀯𑀼𑀢𑁆𑀢𑀅𑀦𑁆𑀢𑀺𑀫𑀫𑀭𑀺𑀬𑀸𑀤𑀦𑁆𑀢𑁄 𑀘 ‘‘𑀅𑀦𑁆𑀢𑀫𑀺𑀤𑀁, 𑀪𑀺𑀓𑁆𑀔𑀯𑁂, 𑀚𑀻𑀯𑀺𑀓𑀸𑀦’’𑀦𑁆𑀢𑀺 (𑀲𑀁. 𑀦𑀺. 𑁩.𑁮𑁦; 𑀇𑀢𑀺𑀯𑀼. 𑁯𑁧) 𑀏𑀯𑀁 𑀯𑀼𑀢𑁆𑀢𑀮𑀸𑀫𑀓𑀦𑁆𑀢𑁄 𑀘 ‘‘𑀲𑀓𑁆𑀓𑀸𑀬𑁄 𑀏𑀓𑁄 𑀅𑀦𑁆𑀢𑁄’’𑀢𑀺 (𑀲𑀁. 𑀦𑀺. 𑁩.𑁧𑁦𑁩) 𑀏𑀯𑀁 𑀯𑀼𑀢𑁆𑀢𑀓𑁄𑀝𑁆𑀞𑀸𑀲𑀦𑁆𑀢𑁄 𑀘 ‘‘𑀏𑀲𑁂𑀯𑀦𑁆𑀢𑁄 𑀤𑀼𑀓𑁆𑀔𑀲𑁆𑀲 𑀲𑀧𑀘𑁆𑀘𑀬𑀲𑀗𑁆𑀔𑀬𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑀓𑁄𑀝𑁆𑀞𑀸𑀲𑀦𑁆𑀢𑁄 𑀘𑀸𑀢𑀺 𑀘𑀢𑁆𑀢𑀸𑀭𑁄 𑀅𑀦𑁆𑀢𑀸, 𑀢𑁂𑀲𑀼 𑀲𑀩𑁆𑀩𑀲𑁆𑀲𑁂𑀯 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀅𑀤𑀼𑀁 𑀘𑀢𑀼𑀢𑁆𑀣𑀓𑁄𑀝𑀺𑀲𑀗𑁆𑀔𑀸𑀢𑀁 𑀅𑀦𑁆𑀢𑀫𑀓𑀸𑀲𑀺, 𑀧𑀭𑀺𑀘𑁆𑀙𑁂𑀤𑀁 𑀧𑀭𑀺𑀯𑀝𑀼𑀫𑀁 𑀅𑀓𑀸𑀲𑀺, 𑀅𑀦𑁆𑀢𑀺𑀫𑀲𑀫𑀼𑀤𑀬𑀫𑀢𑁆𑀢𑀸𑀯𑀲𑁂𑀲𑀁 𑀤𑀼𑀓𑁆𑀔𑀫𑀓𑀸𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦𑀸𑀳 ‘‘𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀫𑀓𑀸𑀲𑀻’’𑀢𑀺.

𑀦𑀦𑀼 𑀘 ‘‘𑀧𑀳𑀸𑀦’’𑀦𑁆𑀢𑀺 𑀇𑀫𑀲𑁆𑀲 𑀦𑀺𑀤𑁆𑀤𑁂𑀲𑁂 𑀦𑀺𑀩𑁆𑀩𑀸𑀦𑀁 𑀆𑀕𑀢𑀁? 𑀇𑀥 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀧𑁆𑀧𑀳𑀸𑀦𑀲𑀗𑁆𑀔𑀸𑀢𑀁 𑀅𑀭𑀳𑀢𑁆𑀢𑀨𑀮𑀁 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀦𑀺𑀤𑁆𑀤𑁂𑀲𑁂𑀦𑀸𑀬𑀁 𑀯𑀡𑁆𑀡𑀦𑀸 𑀯𑀺𑀭𑀼𑀚𑁆𑀛𑀢𑀻𑀢𑀺 𑀆𑀳 ‘‘𑀦𑀺𑀤𑁆𑀤𑁂𑀲𑁂 𑀧𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀢𑀸𑀦𑀺 𑀧𑀤𑀸𑀦𑀺 𑀆𑀕𑀢𑀸𑀦𑀻𑀢𑀺 𑀢𑀲𑁆𑀫𑀺𑀁 𑀦𑀺𑀤𑁆𑀤𑁂𑀲𑁂 ‘‘𑀧𑀳𑀸𑀦𑀁 𑀯𑀽𑀧𑀲𑀫𑀁 𑀧𑀝𑀺𑀦𑀺𑀲𑁆𑀲𑀕𑁆𑀕’’𑀦𑁆𑀢𑀺𑀆𑀤𑀻𑀦𑀺 (𑀘𑀽𑀴𑀦𑀺. 𑁭𑁫 𑀉𑀤𑀬𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄) 𑀧𑀤𑀸𑀦𑀺 𑀆𑀕𑀢𑀸𑀦𑀺.

𑀥𑀫𑁆𑀫𑀢𑀓𑁆𑀓𑀧𑀼𑀭𑁂𑀚𑀯𑀦𑁆𑀢𑀺 𑀇𑀫𑀺𑀦𑀸 𑀢𑀲𑁆𑀫𑀺𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀯𑀺𑀫𑁄𑀓𑁆𑀔𑁂 𑀞𑀢𑁆𑀯𑀸 𑀛𑀸𑀦𑀗𑁆𑀕𑀸𑀦𑀺 𑀯𑀺𑀧𑀲𑁆𑀲𑀺𑀢𑁆𑀯𑀸 𑀅𑀥𑀺𑀕𑀢𑀁 𑀅𑀭𑀳𑀢𑁆𑀢𑀯𑀺𑀫𑁄𑀓𑁆𑀔𑀁 𑀯𑀤𑀢𑀺. 𑀅𑀭𑀳𑀢𑁆𑀢𑀯𑀺𑀫𑁄𑀓𑁆𑀔𑀲𑁆𑀲 𑀳𑀺 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀲𑀗𑁆𑀔𑀸𑀢𑁄 𑀥𑀫𑁆𑀫𑀢𑀓𑁆𑀓𑁄 𑀧𑀼𑀭𑁂𑀚𑀯𑁄 𑀳𑁄𑀢𑀺.

𑀲𑀸𑀭𑀺𑀧𑀼𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀦𑀺𑀤𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁪. 𑀘𑀢𑀼𑀢𑁆𑀣𑁂 𑀧𑀺𑀡𑁆𑀟𑀓𑀭𑀡𑀢𑁆𑀣𑀸𑀬𑀸𑀢𑀺 𑀆𑀬𑀽𑀳𑀦𑀯𑀲𑁂𑀦 𑀭𑀸𑀲𑀺𑀓𑀭𑀡𑀢𑁆𑀣𑀸𑀬. 𑀅𑀪𑀺𑀦𑁆𑀦𑀸𑀦𑀻𑀢𑀺 𑀏𑀓𑀤𑁂𑀲𑁂𑀦𑀧𑀺 𑀅𑀔𑀡𑁆𑀟𑀺𑀢𑀸𑀦𑀺. 𑀪𑀺𑀦𑁆𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀳𑀺 𑀩𑀻𑀚𑀁 𑀩𑀻𑀚𑀓𑀺𑀘𑁆𑀘𑀸𑀬 𑀦 𑀉𑀧𑀓𑀧𑁆𑀧𑀢𑀺. 𑀅𑀧𑀽𑀢𑀻𑀦𑀻𑀢𑀺 𑀉𑀤𑀓𑀢𑁂𑀫𑀦𑁂𑀦 𑀧𑀽𑀢𑀺𑀪𑀸𑀯𑀁 𑀦 𑀉𑀧𑀕𑀢𑀸𑀦𑀺. 𑀧𑀽𑀢𑀺𑀩𑀻𑀚𑀜𑁆𑀳𑀺 𑀩𑀻𑀚𑀢𑁆𑀣𑀸𑀬 𑀦 𑀉𑀧𑀓𑀧𑁆𑀧𑀢𑀺. 𑀢𑁂𑀦𑀸𑀳 ‘‘𑀧𑀽𑀢𑀺𑀪𑀸𑀯𑁂𑀦 𑀅𑀩𑀻𑀚𑀢𑁆𑀢𑀁 𑀅𑀧𑁆𑀧𑀢𑁆𑀢𑀸𑀦𑀻’’𑀢𑀺. 𑀦 𑀯𑀸𑀢𑁂𑀦 𑀦 𑀘 𑀆𑀢𑀧𑁂𑀦 𑀳𑀢𑀸𑀦𑀻𑀢𑀺 𑀯𑀸𑀢𑁂𑀦 𑀘 𑀆𑀢𑀧𑁂𑀦 𑀘 𑀦 𑀳𑀢𑀸𑀦𑀺, 𑀦𑀺𑀭𑁄𑀚𑀢𑀁 𑀦 𑀧𑀸𑀧𑀺𑀢𑀸𑀦𑀺. 𑀦𑀺𑀭𑁄𑀚𑀜𑁆𑀳𑀺 𑀓𑀲𑀝𑀩𑀻𑀚𑀁 𑀩𑀻𑀚𑀢𑁆𑀣𑀸𑀬 𑀦 𑀉𑀧𑀓𑀧𑁆𑀧𑀢𑀺. 𑀲𑀸𑀭𑀸𑀤𑀸𑀦𑀻𑀢𑀺 𑀢𑀡𑁆𑀟𑀼𑀮𑀲𑀸𑀭𑀲𑁆𑀲 𑀆𑀤𑀸𑀦𑀢𑁄 𑀲𑀸𑀭𑀸𑀤𑀸𑀦𑀺. 𑀦𑀺𑀲𑁆𑀲𑀸𑀭𑀜𑁆𑀳𑀺 𑀩𑀻𑀚𑀁 𑀩𑀻𑀚𑀢𑁆𑀣𑀸𑀬 𑀦 𑀉𑀧𑀓𑀧𑁆𑀧𑀢𑀺. 𑀢𑁂𑀦𑀸𑀳 ‘‘𑀕𑀳𑀺𑀢𑀲𑀸𑀭𑀸𑀦𑀻’’𑀢𑀺, 𑀧𑀢𑀺𑀝𑁆𑀞𑀺𑀢𑀲𑀸𑀭𑀸𑀦𑀻𑀢𑀺 𑀅𑀢𑁆𑀣𑁄. 𑀲𑀦𑁆𑀦𑀺𑀘𑀬𑀪𑀸𑀯𑁂𑀦 𑀲𑀼𑀔𑀁 𑀲𑀬𑀺𑀢𑀸𑀦𑀻𑀢𑀺 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀓𑁄𑀝𑁆𑀞𑀧𑀓𑁆𑀔𑀺𑀢𑁆𑀢𑀦𑀺𑀬𑀸𑀫𑁂𑀦𑁂𑀯 𑀲𑀼𑀔𑀲𑀬𑀺𑀢𑀸𑀦𑀺.

𑀓𑀫𑁆𑀫𑀯𑀺𑀪𑀢𑁆𑀢𑀻𑀢𑀺 𑀓𑀫𑁆𑀫𑀯𑀺𑀪𑀸𑀕𑁄. 𑀤𑀺𑀝𑁆𑀞𑀥𑀫𑁆𑀫𑁄 𑀯𑀼𑀘𑁆𑀘𑀢𑀺 𑀧𑀘𑁆𑀘𑀓𑁆𑀔𑀪𑀽𑀢𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀅𑀢𑁆𑀢𑀪𑀸𑀯𑁄, 𑀢𑀢𑁆𑀣 𑀯𑁂𑀤𑀺𑀢𑀩𑁆𑀩𑀨𑀮𑀁 𑀓𑀫𑁆𑀫𑀁 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁. 𑀧𑀘𑁆𑀘𑀼𑀧𑀦𑁆𑀦𑀪𑀯𑀢𑁄 𑀅𑀦𑀦𑁆𑀢𑀭𑀁 𑀯𑁂𑀤𑀺𑀢𑀩𑁆𑀩𑀨𑀮𑀁 𑀓𑀫𑁆𑀫𑀁 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀁. 𑀅𑀧𑀭𑀧𑀭𑀺𑀬𑀸𑀬𑀯𑁂𑀤𑀦𑀻𑀬𑀦𑁆𑀢𑀺 𑀤𑀺𑀝𑁆𑀞𑀥𑀫𑁆𑀫𑀸𑀦𑀦𑁆𑀢𑀭𑀪𑀯𑀢𑁄 𑀅𑀜𑁆𑀜𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑀧𑀭𑀺𑀬𑀸𑀬𑁂 𑀅𑀢𑁆𑀢𑀪𑀸𑀯𑀧𑀭𑀺𑀯𑀢𑁆𑀢𑁂 𑀯𑁂𑀤𑀺𑀢𑀩𑁆𑀩𑀨𑀮𑀁 𑀓𑀫𑁆𑀫𑀁. 𑀧𑀝𑀺𑀧𑀓𑁆𑀔𑁂𑀳𑀺 𑀅𑀦𑀪𑀺𑀪𑀽𑀢𑀢𑀸𑀬 𑀧𑀘𑁆𑀘𑀬𑀯𑀺𑀲𑁂𑀲𑁂𑀦 𑀧𑀝𑀺𑀮𑀤𑁆𑀥𑀯𑀺𑀲𑁂𑀲𑀢𑀸𑀬 𑀘 𑀩𑀮𑀯𑀪𑀸𑀯𑀧𑁆𑀧𑀢𑁆𑀢𑀸 𑀢𑀸𑀤𑀺𑀲𑀲𑁆𑀲 𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑀲𑁆𑀲 𑀯𑀲𑁂𑀦 𑀲𑀸𑀢𑀺𑀲𑀬𑀸 𑀳𑀼𑀢𑁆𑀯𑀸 𑀧𑀯𑀢𑁆𑀢𑀸 𑀧𑀞𑀫𑀚𑀯𑀦𑀘𑁂𑀢𑀦𑀸 𑀢𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀨𑀮𑀤𑀸𑀬𑀺𑀦𑀻 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀓𑀫𑁆𑀫𑀁 𑀦𑀸𑀫. 𑀲𑀸 𑀳𑀺 𑀯𑀼𑀢𑁆𑀢𑀸𑀓𑀸𑀭𑁂𑀦 𑀩𑀮𑀯𑀢𑀻 𑀚𑀯𑀦𑀲𑀦𑁆𑀢𑀸𑀦𑁂 𑀕𑀼𑀡𑀯𑀺𑀲𑁂𑀲𑀬𑀼𑀢𑁆𑀢𑁂𑀲𑀼 𑀉𑀧𑀓𑀸𑀭𑀸𑀦𑀼𑀧𑀓𑀸𑀭𑀯𑀲𑀧𑁆𑀧𑀯𑀢𑁆𑀢𑀺𑀬𑀸 𑀆𑀲𑁂𑀯𑀦𑀸𑀮𑀸𑀪𑁂𑀦 𑀅𑀧𑁆𑀧𑀯𑀺𑀧𑀸𑀓𑀢𑀸𑀬 𑀘 𑀧𑀞𑀫𑀚𑀯𑀦𑀘𑁂𑀢𑀦𑀸 𑀇𑀢𑀭𑀤𑁆𑀯𑀬𑀁 𑀯𑀺𑀬 𑀧𑀯𑀢𑁆𑀢𑀲𑀦𑁆𑀢𑀸𑀦𑀼𑀧𑀭𑀫𑀸𑀧𑁂𑀓𑁆𑀔𑀁 𑀑𑀓𑀸𑀲𑀮𑀸𑀪𑀸𑀧𑁂𑀓𑁆𑀔𑀜𑁆𑀘 𑀓𑀫𑁆𑀫𑀁 𑀦 𑀳𑁄𑀢𑀻𑀢𑀺 𑀇𑀥𑁂𑀯 𑀧𑀼𑀧𑁆𑀨𑀫𑀢𑁆𑀢𑀁 𑀯𑀺𑀬 𑀧𑀯𑀢𑁆𑀢𑀺𑀯𑀺𑀧𑀸𑀓𑀫𑀢𑁆𑀢𑀁 𑀨𑀮𑀁 𑀤𑁂𑀢𑀺. 𑀢𑀣𑀸 𑀅𑀲𑀓𑁆𑀓𑁄𑀦𑁆𑀢𑀦𑁆𑀢𑀺 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀤𑀸𑀦𑀁 𑀦𑀸𑀫 𑀉𑀧𑀥𑀺𑀧𑁆𑀧𑀬𑁄𑀕𑀸𑀤𑀺𑀧𑀘𑁆𑀘𑀬𑀦𑁆𑀢𑀭𑀲𑀫𑀯𑀸𑀬𑁂𑀦𑁂𑀯 𑀳𑁄𑀢𑀻𑀢𑀺 𑀢𑀤𑀪𑀸𑀯𑀢𑁄 𑀢𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀯𑀺𑀧𑀸𑀓𑀁 𑀤𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀁. 𑀅𑀳𑁄𑀲𑀺𑀓𑀫𑁆𑀫𑀦𑁆𑀢𑀺 𑀅𑀳𑁄𑀲𑀺 𑀏𑀯 𑀓𑀫𑁆𑀫𑀁, 𑀦 𑀢𑀲𑁆𑀲 𑀯𑀺𑀧𑀸𑀓𑁄 𑀅𑀳𑁄𑀲𑀺 𑀅𑀢𑁆𑀣𑀺 𑀪𑀯𑀺𑀲𑁆𑀲𑀢𑀺 𑀘𑀸𑀢𑀺 𑀏𑀯𑀁 𑀯𑁂𑀤𑀺𑀢𑀩𑁆𑀩𑀁 𑀓𑀫𑁆𑀫𑀁.

𑀅𑀢𑁆𑀣𑀲𑀸𑀥𑀺𑀓𑀸𑀢𑀺 𑀤𑀸𑀦𑀸𑀤𑀺𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀅𑀢𑁆𑀣𑀲𑁆𑀲 𑀦𑀺𑀧𑁆𑀨𑀸𑀤𑀺𑀓𑀸. 𑀓𑀸 𑀧𑀦 𑀲𑀸𑀢𑀺 𑀆𑀳 ‘‘𑀲𑀢𑁆𑀢𑀫𑀚𑀯𑀦𑀘𑁂𑀢𑀦𑀸’’𑀢𑀺. 𑀲𑀸 𑀳𑀺 𑀲𑀦𑁆𑀦𑀺𑀝𑁆𑀞𑀸𑀧𑀓𑀘𑁂𑀢𑀦𑀸 𑀯𑀼𑀢𑁆𑀢𑀦𑀬𑁂𑀦 𑀧𑀝𑀺𑀮𑀤𑁆𑀥𑀯𑀺𑀲𑁂𑀲𑀸 𑀧𑀼𑀭𑀺𑀫𑀚𑀯𑀦𑀘𑁂𑀢𑀦𑀸𑀳𑀺 𑀮𑀤𑁆𑀥𑀸𑀲𑁂𑀯𑀦𑀸 𑀘 𑀲𑀫𑀸𑀦𑀸 𑀅𑀦𑀦𑁆𑀢𑀭𑀢𑁆𑀢𑀪𑀸𑀯𑁂 𑀯𑀺𑀧𑀸𑀓𑀤𑀸𑀬𑀺𑀦𑀻 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀓𑀫𑁆𑀫𑀁 𑀦𑀸𑀫. 𑀧𑀼𑀭𑀺𑀫𑀉𑀧𑀫𑀸𑀬𑀬𑁂𑀯𑀸𑀢𑀺 𑀫𑀺𑀕𑀮𑀼𑀤𑁆𑀤𑀓𑁄𑀧𑀫𑀸𑀬𑀬𑁂𑀯.

𑀲𑀢𑀺 𑀲𑀁𑀲𑀸𑀭𑀧𑁆𑀧𑀯𑀢𑁆𑀢𑀺𑀬𑀸𑀢𑀺 𑀇𑀫𑀺𑀦𑀸 𑀅𑀲𑀢𑀺 𑀲𑀁𑀲𑀸𑀭𑀧𑁆𑀧𑀯𑀢𑁆𑀢𑀺𑀬𑀁 𑀅𑀳𑁄𑀲𑀺𑀓𑀫𑁆𑀫𑀧𑀓𑁆𑀔𑁂 𑀢𑀺𑀝𑁆𑀞𑀢𑀺 𑀯𑀺𑀧𑀘𑁆𑀘𑀦𑁄𑀓𑀸𑀲𑀲𑁆𑀲 𑀅𑀪𑀸𑀯𑀢𑁄𑀢𑀺 𑀤𑀻𑀧𑁂𑀢𑀺. 𑀬𑀁 𑀕𑀭𑀼𑀓𑀦𑁆𑀢𑀺 𑀬𑀁 𑀅𑀓𑀼𑀲𑀮𑀁 𑀫𑀳𑀸𑀲𑀸𑀯𑀚𑁆𑀚𑀁, 𑀓𑀼𑀲𑀮𑀜𑁆𑀘 𑀫𑀳𑀸𑀦𑀼𑀪𑀸𑀯𑀁 𑀓𑀫𑁆𑀫𑀁. 𑀓𑀼𑀲𑀮𑀁 𑀯𑀸 𑀳𑀺 𑀳𑁄𑀢𑀼 𑀅𑀓𑀼𑀲𑀮𑀁 𑀯𑀸, 𑀬𑀁 𑀕𑀭𑀼𑀓𑀁 𑀫𑀸𑀢𑀼𑀖𑀸𑀢𑀸𑀤𑀺𑀓𑀫𑁆𑀫𑀁 𑀯𑀸 𑀫𑀳𑀕𑁆𑀕𑀢𑀓𑀫𑁆𑀫𑀁 𑀯𑀸, 𑀢𑀤𑁂𑀯 𑀧𑀞𑀫𑀁 𑀯𑀺𑀧𑀘𑁆𑀘𑀢𑀺. 𑀢𑁂𑀦𑀸𑀳 ‘‘𑀓𑀼𑀲𑀮𑀸𑀓𑀼𑀲𑀮𑁂𑀲𑀼 𑀧𑀦𑀸’’𑀢𑀺𑀆𑀤𑀺. 𑀬𑀁 𑀩𑀳𑀼𑀮𑀦𑁆𑀢𑀺 𑀬𑀁 𑀩𑀳𑀼𑀮𑀁 𑀅𑀪𑀺𑀡𑁆𑀳𑀲𑁄 𑀓𑀢𑀁 𑀲𑀫𑀸𑀲𑁂𑀯𑀺𑀢𑀁. 𑀢𑁂𑀦𑀸𑀳 ‘‘𑀓𑀼𑀲𑀮𑀸𑀓𑀼𑀲𑀮𑁂𑀲𑀼 𑀧𑀦 𑀬𑀁 𑀩𑀳𑀼𑀮𑀁 𑀳𑁄𑀢𑀻’’𑀢𑀺𑀆𑀤𑀺. 𑀬𑀤𑀸𑀲𑀦𑁆𑀦𑀁 𑀦𑀸𑀫 𑀫𑀭𑀡𑀓𑀸𑀮𑁂 𑀅𑀦𑀼𑀲𑁆𑀲𑀭𑀺𑀢𑀁 𑀓𑀫𑁆𑀫𑀁, 𑀆𑀲𑀦𑁆𑀦𑀓𑀸𑀮𑁂 𑀓𑀢𑁂 𑀧𑀦 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺 𑀆𑀳 ‘‘𑀬𑀁 𑀧𑀦 𑀓𑀼𑀲𑀮𑀸𑀓𑀼𑀲𑀮𑁂𑀲𑀼 𑀆𑀲𑀦𑁆𑀦𑀫𑀭𑀡𑁂’’𑀢𑀺𑀆𑀤𑀺. 𑀅𑀦𑀼𑀲𑁆𑀲𑀭𑀺𑀢𑀼𑀦𑁆𑀢𑀺 𑀧𑀭𑀺𑀩𑁆𑀬𑀢𑁆𑀢𑀪𑀸𑀯𑁂𑀦 𑀅𑀦𑀼𑀲𑁆𑀲𑀭𑀺𑀢𑀼𑀁.

𑀢𑁂𑀲𑀁 𑀅𑀪𑀸𑀯𑁂𑀢𑀺 𑀢𑁂𑀲𑀁 𑀬𑀁𑀕𑀭𑀼𑀓𑀸𑀤𑀻𑀦𑀁 𑀢𑀺𑀡𑁆𑀡𑀁 𑀓𑀫𑁆𑀫𑀸𑀦𑀁 𑀅𑀪𑀸𑀯𑁂. 𑀬𑀢𑁆𑀣 𑀓𑀢𑁆𑀣𑀘𑀺 𑀯𑀺𑀧𑀸𑀓𑀁 𑀤𑁂𑀢𑀻𑀢𑀺 𑀧𑀝𑀺𑀲𑀦𑁆𑀥𑀺𑀚𑀦𑀓𑀯𑀲𑁂𑀦 𑀯𑀺𑀧𑀸𑀓𑀁 𑀤𑁂𑀢𑀺. 𑀧𑀝𑀺𑀲𑀦𑁆𑀥𑀺𑀚𑀦𑀓𑀯𑀲𑁂𑀦 𑀳𑀺 𑀕𑀭𑀼𑀓𑀸𑀤𑀺𑀓𑀫𑁆𑀫𑀘𑀢𑀼𑀓𑁆𑀓𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀕𑀭𑀼𑀓𑀁 𑀲𑀩𑁆𑀩𑀧𑀞𑀫𑀁 𑀯𑀺𑀧𑀘𑁆𑀘𑀢𑀺, 𑀕𑀭𑀼𑀓𑁂 𑀅𑀲𑀢𑀺 𑀩𑀳𑀼𑀮𑀻𑀓𑀢𑀁, 𑀢𑀲𑁆𑀫𑀺𑀁 𑀅𑀲𑀢𑀺 𑀬𑀤𑀸𑀲𑀦𑁆𑀦𑀁, 𑀢𑀲𑁆𑀫𑀺𑀁 𑀅𑀲𑀢𑀺 ‘‘𑀓𑀝𑀢𑁆𑀢𑀸 𑀯𑀸 𑀧𑀦𑀸’’𑀢𑀺 𑀯𑀼𑀢𑁆𑀢𑀁 𑀧𑀼𑀭𑀺𑀫𑀚𑀸𑀢𑀻𑀲𑀼 𑀓𑀢𑀓𑀫𑁆𑀫𑀁 𑀯𑀺𑀧𑀘𑁆𑀘𑀢𑀺. 𑀩𑀳𑀼𑀮𑀸𑀲𑀦𑁆𑀦𑀧𑀼𑀩𑁆𑀩𑀓𑀢𑁂𑀲𑀼 𑀘 𑀩𑀮𑀸𑀩𑀮𑀁 𑀚𑀸𑀦𑀺𑀢𑀩𑁆𑀩𑀁. 𑀧𑀸𑀧𑀢𑁄 𑀧𑀸𑀧𑀦𑁆𑀢𑀭𑀁 𑀓𑀮𑁆𑀬𑀸𑀡𑀜𑁆𑀘, 𑀓𑀮𑁆𑀬𑀸𑀡𑀢𑁄 𑀓𑀮𑁆𑀬𑀸𑀡𑀦𑁆𑀢𑀭𑀁 𑀧𑀸𑀧𑀜𑁆𑀘 𑀩𑀳𑀼𑀮𑀻𑀓𑀢𑀁. 𑀢𑀢𑁄 𑀫𑀳𑀢𑁄𑀯 𑀧𑀼𑀩𑁆𑀩𑀓𑀢𑀸𑀤𑀺 𑀅𑀧𑁆𑀧𑀜𑁆𑀘 𑀩𑀳𑀼𑀮𑀸𑀦𑀼𑀲𑁆𑀲𑀭𑀡𑁂𑀦 𑀯𑀺𑀧𑁆𑀧𑀝𑀺𑀲𑀸𑀭𑀸𑀤𑀺𑀚𑀦𑀦𑀢𑁄, 𑀧𑀝𑀺𑀧𑀓𑁆𑀔𑀲𑁆𑀲 𑀅𑀧𑀭𑀺𑀧𑀼𑀡𑁆𑀡𑀢𑀸𑀬 𑀆𑀭𑀤𑁆𑀥𑀯𑀺𑀧𑀸𑀓𑀲𑁆𑀲 𑀓𑀫𑁆𑀫𑀲𑁆𑀲 𑀓𑀫𑁆𑀫𑀲𑁂𑀲𑀲𑁆𑀲 𑀯𑀸 𑀅𑀧𑀭𑀧𑀭𑀺𑀬𑀸𑀬𑀯𑁂𑀤𑀦𑀻𑀬𑀲𑁆𑀲 𑀅𑀧𑀭𑀺𑀓𑁆𑀔𑀻𑀡𑀢𑀸𑀬 𑀲𑀦𑁆𑀢𑀢𑀺𑀬𑀸 𑀧𑀭𑀺𑀡𑀸𑀫𑀯𑀺𑀲𑁂𑀲𑀢𑁄𑀢𑀺 𑀢𑁂𑀳𑀺 𑀢𑁂𑀳𑀺 𑀓𑀸𑀭𑀡𑁂𑀳𑀺 𑀆𑀬𑀽𑀳𑀺𑀢𑀨𑀮𑀁 𑀧𑀞𑀫𑀁 𑀯𑀺𑀧𑀘𑁆𑀘𑀢𑀺. 𑀫𑀳𑀸𑀦𑀸𑀭𑀤𑀓𑀲𑁆𑀲𑀧𑀚𑀸𑀢𑀓𑁂 (𑀚𑀸. 𑁨.𑁨𑁨.𑁧𑁧𑁫𑁩 𑀆𑀤𑀬𑁄) 𑀯𑀺𑀤𑁂𑀳𑀭𑀜𑁆𑀜𑁄 𑀲𑁂𑀦𑀸𑀧𑀢𑀺 𑀅𑀮𑀸𑀢𑁄, 𑀩𑀻𑀚𑀓𑁄 𑀤𑀸𑀲𑁄, 𑀭𑀸𑀚𑀓𑀜𑁆𑀜𑀸 𑀭𑀼𑀘𑀸 𑀘 𑀏𑀢𑁆𑀣 𑀦𑀺𑀤𑀲𑁆𑀲𑀦𑀁. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋

‘‘𑀢𑀢𑁆𑀭𑀸𑀦𑀦𑁆𑀤, 𑀬𑁆𑀯𑀸𑀬𑀁 𑀧𑀼𑀕𑁆𑀕𑀮𑁄 𑀇𑀥 𑀧𑀸𑀡𑀸𑀢𑀺𑀧𑀸𑀢𑀻…𑀧𑁂… 𑀫𑀺𑀘𑁆𑀙𑀸𑀤𑀺𑀝𑁆𑀞𑀺. 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺, 𑀧𑀼𑀩𑁆𑀩𑁂 𑀯𑀸𑀲𑁆𑀲 𑀢𑀁 𑀓𑀢𑀁 𑀳𑁄𑀢𑀺 𑀧𑀸𑀧𑀓𑀫𑁆𑀫𑀁 𑀤𑀼𑀓𑁆𑀔𑀯𑁂𑀤𑀦𑀻𑀬𑀁, 𑀧𑀘𑁆𑀙𑀸 𑀯𑀸𑀲𑁆𑀲 𑀢𑀁 𑀓𑀢𑀁 𑀳𑁄𑀢𑀺 𑀧𑀸𑀧𑀓𑀫𑁆𑀫𑀁 𑀤𑀼𑀓𑁆𑀔𑀯𑁂𑀤𑀦𑀻𑀬𑀁, 𑀫𑀭𑀡𑀓𑀸𑀮𑁂 𑀯𑀸𑀲𑁆𑀲 𑀳𑁄𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀲𑀫𑀢𑁆𑀢𑀸 𑀲𑀫𑀸𑀤𑀺𑀦𑁆𑀦𑀸, 𑀢𑁂𑀦 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀻’’𑀢𑀺 𑁋

𑀆𑀤𑀺. 𑀲𑀩𑁆𑀩𑀁 𑀫𑀳𑀸𑀓𑀫𑁆𑀫𑀯𑀺𑀪𑀗𑁆𑀕𑀲𑀼𑀢𑁆𑀢𑀁 (𑀫. 𑀦𑀺. 𑁩.𑁩𑁦𑁩) 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀓𑀺𑀁 𑀩𑀳𑀼𑀦𑀸. 𑀬𑀁 𑀢𑀁 𑀢𑀣𑀸𑀕𑀢𑀲𑁆𑀲 𑀫𑀳𑀸𑀓𑀫𑁆𑀫𑀯𑀺𑀪𑀗𑁆𑀕𑀜𑀸𑀡𑀁, 𑀢𑀲𑁆𑀲𑁂𑀯𑀸𑀬𑀁 𑀯𑀺𑀲𑀬𑁄, 𑀬𑀤𑀺𑀤𑀁 𑀢𑀲𑁆𑀲 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀢𑁂𑀦 𑀢𑁂𑀦 𑀓𑀸𑀭𑀡𑁂𑀦 𑀧𑀼𑀩𑁆𑀩𑀸𑀧𑀭𑀯𑀺𑀧𑀸𑀓𑀢𑀸 𑀲𑀫𑀢𑁆𑀣𑀻𑀬𑀢𑀺.

𑀇𑀤𑀸𑀦𑀺 𑀚𑀦𑀓𑀸𑀤𑀺𑀓𑀫𑁆𑀫𑀘𑀢𑀼𑀓𑁆𑀓𑀁 𑀯𑀺𑀪𑀚𑀦𑁆𑀢𑁄 ‘‘𑀚𑀦𑀓𑀁 𑀦𑀸𑀫𑀸’’𑀢𑀺𑀆𑀤𑀺𑀫𑀸𑀳. 𑀧𑀯𑀢𑁆𑀢𑀺𑀁 𑀦 𑀚𑀦𑁂𑀢𑀻𑀢𑀺 𑀧𑀯𑀢𑁆𑀢𑀺𑀯𑀺𑀧𑀸𑀓𑀁 𑀦 𑀚𑀦𑁂𑀢𑀺. 𑀧𑀞𑀫𑀦𑀬𑁂 𑀚𑀦𑀓𑀓𑀫𑁆𑀫𑀲𑁆𑀲 𑀧𑀝𑀺𑀲𑀦𑁆𑀥𑀺𑀯𑀺𑀧𑀸𑀓𑀫𑀢𑁆𑀢𑀲𑁆𑀲𑁂𑀯 𑀯𑀼𑀢𑁆𑀢𑀢𑁆𑀢𑀸 𑀢𑀲𑁆𑀲 𑀧𑀯𑀢𑁆𑀢𑀺𑀯𑀺𑀧𑀸𑀓𑀤𑀸𑀬𑀓𑀢𑁆𑀢𑀫𑁆𑀧𑀺 𑀅𑀦𑀼𑀚𑀸𑀦𑀦𑁆𑀢𑁄 ‘‘𑀅𑀧𑀭𑁄 𑀦𑀬𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀝𑀺𑀲𑀦𑁆𑀥𑀺𑀤𑀸𑀦𑀸𑀤𑀺𑀯𑀲𑁂𑀦 𑀯𑀺𑀧𑀸𑀓𑀲𑀦𑁆𑀢𑀸𑀦𑀲𑁆𑀲 𑀦𑀺𑀩𑁆𑀩𑀢𑁆𑀢𑀓𑀁 𑀚𑀦𑀓𑀁. 𑀲𑀼𑀔𑀤𑀼𑀓𑁆𑀔𑀲𑀦𑁆𑀢𑀸𑀦𑀲𑁆𑀲 𑀦𑀸𑀫𑀭𑀽𑀧𑀧𑁆𑀧𑀩𑀦𑁆𑀥𑀲𑁆𑀲 𑀯𑀸 𑀘𑀺𑀭𑀢𑀭𑀁 𑀧𑀯𑀢𑁆𑀢𑀺𑀳𑁂𑀢𑀼𑀪𑀽𑀢𑀁 𑀉𑀧𑀢𑁆𑀣𑀫𑁆𑀪𑀓𑀁. 𑀢𑁂𑀦𑀸𑀳 ‘‘𑀲𑀼𑀔𑀤𑀼𑀓𑁆𑀔𑀁 𑀉𑀧𑀢𑁆𑀣𑀫𑁆𑀪𑁂𑀢𑀺, 𑀅𑀤𑁆𑀥𑀸𑀦𑀁 𑀧𑀯𑀢𑁆𑀢𑁂𑀢𑀻’’𑀢𑀺. 𑀉𑀧𑀧𑀻𑀴𑀓𑀁 𑀲𑀼𑀔𑀤𑀼𑀓𑁆𑀔𑀧𑁆𑀧𑀩𑀦𑁆𑀥𑁂 𑀧𑀯𑀢𑁆𑀢𑀫𑀸𑀦𑁂 𑀲𑀡𑀺𑀓𑀁 𑀲𑀡𑀺𑀓𑀁 𑀳𑀸𑀧𑁂𑀢𑀺. 𑀢𑁂𑀦𑀸𑀳 ‘‘𑀲𑀼𑀔𑀤𑀼𑀓𑁆𑀔𑀁 𑀧𑀻𑀴𑁂𑀢𑀺 𑀩𑀸𑀥𑁂𑀢𑀺, 𑀅𑀤𑁆𑀥𑀸𑀦𑀁 𑀧𑀯𑀢𑁆𑀢𑀺𑀢𑀼𑀁 𑀦 𑀤𑁂𑀢𑀻’’𑀢𑀺.

𑀯𑀸𑀢𑀓𑀸𑀴𑀓𑁄 𑀫𑀳𑀮𑁆𑀮𑀓𑁄 𑀘𑁄𑀭𑁂 𑀖𑀸𑀢𑁂𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀲𑁄 𑀓𑀺𑀭 𑀫𑀳𑀮𑁆𑀮𑀓𑀓𑀸𑀮𑁂 𑀏𑀓𑀧𑁆𑀧𑀳𑀸𑀭𑁂𑀦 𑀲𑀻𑀲𑀁 𑀙𑀺𑀦𑁆𑀤𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀤𑁆𑀯𑁂 𑀢𑀬𑁄 𑀯𑀸𑀭𑁂 𑀧𑀳𑀭𑀦𑁆𑀢𑁄 𑀫𑀦𑀼𑀲𑁆𑀲𑁂 𑀓𑀺𑀮𑀫𑁂𑀢𑀺, 𑀢𑀲𑁆𑀫𑀸 𑀢𑁂 𑀏𑀯𑀫𑀸𑀳𑀁𑀲𑀼. 𑀅𑀦𑀼𑀮𑁄𑀫𑀺𑀓𑀁 𑀔𑀦𑁆𑀢𑀺𑀁 𑀧𑀝𑀺𑀮𑀪𑀺𑀢𑁆𑀯𑀸𑀢𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑁆𑀲 𑀑𑀭𑀢𑁄 𑀅𑀦𑀼𑀮𑁄𑀫𑀺𑀓𑀁 𑀔𑀦𑁆𑀢𑀺𑀁 𑀮𑀪𑀺𑀢𑁆𑀯𑀸. 𑀢𑀭𑀼𑀡𑀯𑀘𑁆𑀙𑀸𑀬 𑀕𑀸𑀯𑀺𑀬𑀸 𑀫𑀤𑁆𑀤𑀺𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑀺𑀢𑁄𑀢𑀺 𑀏𑀓𑀸 𑀓𑀺𑀭 𑀬𑀓𑁆𑀔𑀺𑀦𑀻 𑀥𑁂𑀦𑀼𑀯𑁂𑀲𑁂𑀦 𑀆𑀕𑀦𑁆𑀢𑁆𑀯𑀸 𑀉𑀭𑁂 𑀧𑀳𑀭𑀺𑀢𑁆𑀯𑀸 𑀫𑀸𑀭𑁂𑀲𑀺, 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀦𑀕𑀭𑁂 𑀪𑀯𑁄 𑀦𑀸𑀕𑀭𑀺𑀬𑁄.

𑀖𑀸𑀢𑁂𑀢𑁆𑀯𑀸𑀢𑀺 𑀉𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸. 𑀓𑀫𑁆𑀫𑀲𑁆𑀲 𑀉𑀧𑀘𑁆𑀙𑀺𑀦𑁆𑀤𑀦𑀁 𑀦𑀸𑀫 𑀢𑀲𑁆𑀲 𑀯𑀺𑀧𑀸𑀓𑀧𑁆𑀧𑀝𑀺𑀩𑀸𑀳𑀦𑀫𑁂𑀯𑀸𑀢𑀺 𑀆𑀳 ‘‘𑀢𑀲𑁆𑀲 𑀯𑀺𑀧𑀸𑀓𑀁 𑀧𑀝𑀺𑀩𑀸𑀳𑀺𑀢𑁆𑀯𑀸’’𑀢𑀺. 𑀢𑀜𑁆𑀘 𑀅𑀢𑁆𑀢𑀦𑁄 𑀯𑀺𑀧𑀸𑀓𑀼𑀧𑁆𑀧𑀢𑁆𑀢𑀺𑀬𑀸 𑀑𑀓𑀸𑀲𑀓𑀭𑀡𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀅𑀢𑁆𑀢𑀦𑁄 𑀯𑀺𑀧𑀸𑀓𑀲𑁆𑀲 𑀑𑀓𑀸𑀲𑀁 𑀓𑀭𑁄𑀢𑀻’’𑀢𑀺. 𑀯𑀺𑀧𑀘𑁆𑀘𑀦𑀸𑀬 𑀓𑀢𑁄𑀓𑀸𑀲𑀁 𑀓𑀫𑁆𑀫𑀁 𑀯𑀺𑀧𑀓𑁆𑀓𑀫𑁆𑀫𑁂𑀯 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀏𑀯𑀁 𑀧𑀦 𑀓𑀫𑁆𑀫𑁂𑀦 𑀓𑀢𑁂 𑀑𑀓𑀸𑀲𑁂 𑀢𑀁 𑀯𑀺𑀧𑀸𑀓𑀁 𑀉𑀧𑁆𑀧𑀦𑁆𑀦𑀁 𑀦𑀸𑀫 𑀯𑀼𑀘𑁆𑀘𑀢𑀻’’𑀢𑀺. 𑀉𑀧𑀧𑀻𑀴𑀓𑀁 𑀅𑀜𑁆𑀜𑀲𑁆𑀲 𑀯𑀺𑀧𑀸𑀓𑀁 𑀉𑀧𑀘𑁆𑀙𑀺𑀦𑁆𑀤𑀢𑀺, 𑀦 𑀲𑀬𑀁 𑀅𑀢𑁆𑀢𑀦𑁄 𑀯𑀺𑀧𑀸𑀓𑀁 𑀤𑁂𑀢𑀺. 𑀉𑀧𑀖𑀸𑀢𑀓𑀁 𑀧𑀦 𑀤𑀼𑀩𑁆𑀩𑀮𑀓𑀫𑁆𑀫𑀁 𑀉𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀺𑀧𑀸𑀓𑀁 𑀉𑀧𑁆𑀧𑀸𑀤𑁂𑀢𑀻𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄. 𑀓𑀺𑀜𑁆𑀘𑀺 𑀩𑀳𑁆𑀯𑀸𑀩𑀸𑀥𑀢𑀸𑀤𑀺𑀧𑀘𑁆𑀘𑀬𑀽𑀧𑀲𑀦𑁆𑀦𑀺𑀧𑀸𑀢𑁂𑀦 𑀯𑀺𑀧𑀸𑀓𑀲𑁆𑀲 𑀯𑀺𑀩𑀸𑀥𑀓𑀁 𑀉𑀧𑀧𑀻𑀴𑀓𑀁, 𑀢𑀣𑀸 𑀯𑀺𑀧𑀸𑀓𑀲𑁆𑀲𑁂𑀯 𑀉𑀧𑀘𑁆𑀙𑁂𑀤𑀓𑀁. 𑀉𑀧𑀖𑀸𑀢𑀓𑀓𑀫𑁆𑀫𑀁 𑀧𑀦 𑀉𑀧𑀖𑀸𑀢𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀺𑀧𑀸𑀓𑀲𑁆𑀲 𑀑𑀓𑀸𑀲𑀓𑀭𑀡𑁂𑀦 𑀯𑀺𑀧𑀘𑁆𑀘𑀦𑁂 𑀲𑀢𑀺 𑀚𑀦𑀓𑀫𑁂𑀯 𑀲𑀺𑀬𑀸. 𑀚𑀦𑀓𑀸𑀤𑀺𑀪𑀸𑀯𑁄 𑀦𑀸𑀫 𑀯𑀺𑀧𑀸𑀓𑀁 𑀧𑀢𑀺 𑀇𑀘𑁆𑀙𑀺𑀢𑀩𑁆𑀩𑁄, 𑀦 𑀓𑀫𑁆𑀫𑀁 𑀧𑀢𑀻𑀢𑀺 𑀯𑀺𑀧𑀸𑀓𑀲𑁆𑀲𑁂𑀯 𑀉𑀧𑀖𑀸𑀢𑀓𑀢𑀸 𑀬𑀼𑀢𑁆𑀢𑀸 𑀯𑀺𑀬 𑀤𑀺𑀲𑁆𑀲𑀢𑀺, 𑀯𑀻𑀫𑀁𑀲𑀺𑀢𑀩𑁆𑀩𑀁.

𑀅𑀧𑀭𑁄 𑀦𑀬𑁄 𑁋 𑀬𑀲𑁆𑀫𑀺𑀁 𑀓𑀫𑁆𑀫𑁂 𑀓𑀢𑁂 𑀧𑀝𑀺𑀲𑀦𑁆𑀥𑀺𑀬𑀁 𑀧𑀯𑀢𑁆𑀢𑁂 𑀘 𑀯𑀺𑀧𑀸𑀓𑀓𑀝𑀢𑁆𑀢𑀸𑀭𑀽𑀧𑀸𑀦𑀁 𑀉𑀧𑁆𑀧𑀢𑁆𑀢𑀺 𑀳𑁄𑀢𑀺, 𑀢𑀁 𑀚𑀦𑀓𑀁. 𑀬𑀲𑁆𑀫𑀺𑀁 𑀧𑀦 𑀓𑀢𑁂 𑀅𑀜𑁆𑀜𑁂𑀦 𑀚𑀦𑀺𑀢𑀲𑁆𑀲 𑀇𑀝𑁆𑀞𑀲𑁆𑀲 𑀯𑀸 𑀅𑀦𑀺𑀝𑁆𑀞𑀲𑁆𑀲 𑀯𑀸 𑀨𑀮𑀲𑁆𑀲 𑀯𑀺𑀩𑀸𑀥𑀓𑀯𑀺𑀘𑁆𑀙𑁂𑀤𑀓𑀧𑀘𑁆𑀘𑀬𑀸𑀦𑀼𑀧𑁆𑀧𑀢𑁆𑀢𑀺𑀬𑀸 𑀉𑀧𑀩𑁆𑀭𑀽𑀳𑀦𑀧𑀘𑁆𑀘𑀬𑀼𑀧𑁆𑀧𑀢𑁆𑀢𑀺𑀬𑀸 𑀚𑀦𑀓𑀲𑀸𑀫𑀢𑁆𑀣𑀺𑀬𑀸𑀦𑀼𑀭𑀽𑀧𑀁 𑀧𑀭𑀺𑀲𑀼𑀤𑁆𑀥𑀺𑀘𑀺𑀭𑀢𑀭𑀧𑁆𑀧𑀩𑀦𑁆𑀥𑀸 𑀳𑁄𑀢𑀺, 𑀢𑀁 𑀉𑀧𑀢𑁆𑀣𑀫𑁆𑀪𑀓𑀁. 𑀚𑀦𑀓𑁂𑀦 𑀦𑀺𑀩𑁆𑀩𑀢𑁆𑀢𑀺𑀢𑀁 𑀓𑀼𑀲𑀮𑀨𑀮𑀁 𑀯𑀸 𑀅𑀓𑀼𑀲𑀮𑀨𑀮𑀁 𑀯𑀸 𑀬𑁂𑀦 𑀧𑀘𑁆𑀘𑀦𑀻𑀓𑀪𑀽𑀢𑁂𑀦 𑀭𑁄𑀕𑀥𑀸𑀢𑀼𑀯𑀺𑀲𑀫𑀢𑀸𑀤𑀺𑀦𑀺𑀫𑀺𑀢𑁆𑀢𑀢𑀸𑀬 𑀯𑀺𑀩𑀸𑀥𑀬𑀢𑀺, 𑀢𑀁 𑀉𑀧𑀧𑀻𑀴𑀓𑀁. 𑀬𑁂𑀦 𑀧𑀦 𑀓𑀫𑁆𑀫𑀼𑀦𑀸 𑀚𑀦𑀓𑀲𑀸𑀫𑀢𑁆𑀣𑀺𑀬𑀯𑀲𑁂𑀦 𑀘𑀺𑀭𑀢𑀭𑀧𑁆𑀧𑀩𑀦𑁆𑀥𑀸𑀭𑀳𑀫𑁆𑀧𑀺 𑀲𑀫𑀸𑀦𑀁 𑀨𑀮𑀁 𑀯𑀺𑀘𑁆𑀙𑁂𑀤𑀓𑀧𑀘𑁆𑀘𑀬𑀼𑀧𑁆𑀧𑀢𑁆𑀢𑀺𑀬𑀸 𑀉𑀧𑀳𑀜𑁆𑀜𑀢𑀺 𑀯𑀺𑀘𑁆𑀙𑀺𑀚𑁆𑀚𑀢𑀺, 𑀢𑀁 𑀉𑀧𑀖𑀸𑀢𑀓𑀦𑁆𑀢𑀺 𑀅𑀬𑀫𑁂𑀢𑁆𑀣 𑀲𑀸𑀭𑁄.

𑀢𑀢𑁆𑀣 𑀓𑁂𑀘𑀺 𑀤𑀼𑀢𑀺𑀬𑀲𑁆𑀲 𑀓𑀼𑀲𑀮𑀪𑀸𑀯𑀁 𑀇𑀢𑁆𑀣𑀢𑁆𑀢𑀫𑀸𑀕𑀢𑀲𑁆𑀲 𑀅𑀧𑁆𑀧𑀸𑀩𑀸𑀥𑀤𑀻𑀖𑀸𑀬𑀼𑀓𑀢𑀸𑀲𑀁𑀯𑀢𑁆𑀢𑀦𑀯𑀲𑁂𑀦, 𑀧𑀘𑁆𑀙𑀺𑀫𑀸𑀦𑀁 𑀤𑁆𑀯𑀺𑀦𑁆𑀦𑀁 𑀅𑀓𑀼𑀲𑀮𑀪𑀸𑀯𑀁 𑀩𑀳𑁆𑀯𑀸𑀩𑀸𑀥𑀅𑀧𑁆𑀧𑀸𑀬𑀼𑀓𑀢𑀸𑀲𑀁𑀯𑀢𑁆𑀢𑀦𑀯𑀲𑁂𑀦 𑀯𑀡𑁆𑀡𑁂𑀦𑁆𑀢𑀺. 𑀢𑀣𑀸 𑀘 𑀯𑀼𑀢𑁆𑀢𑀁 𑀫𑀚𑁆𑀛𑀺𑀫𑀦𑀺𑀓𑀸𑀬𑁂 𑀘𑀽𑀴𑀓𑀫𑁆𑀫𑀯𑀺𑀪𑀗𑁆𑀕𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 (𑀫. 𑀦𑀺. 𑀅𑀝𑁆𑀞. 𑁩.𑁨𑁯𑁦) 𑁋

‘‘𑀘𑀢𑁆𑀢𑀸𑀭𑀺 𑀳𑀺 𑀓𑀫𑁆𑀫𑀸𑀦𑀺 𑁋 𑀉𑀧𑀧𑀻𑀴𑀓𑀁, 𑀉𑀧𑀘𑁆𑀙𑁂𑀤𑀓𑀁, 𑀚𑀦𑀓𑀁, 𑀉𑀧𑀢𑁆𑀣𑀫𑁆𑀪𑀓𑀦𑁆𑀢𑀺. 𑀩𑀮𑀯𑀓𑀫𑁆𑀫𑁂𑀦 𑀳𑀺 𑀦𑀺𑀩𑁆𑀩𑀢𑁆𑀢𑀁 𑀧𑀯𑀢𑁆𑀢𑁂 𑀉𑀧𑀧𑀻𑀴𑀓𑀁 𑀆𑀕𑀦𑁆𑀢𑁆𑀯𑀸 𑀅𑀢𑁆𑀣𑀢𑁄 𑀏𑀯𑀁 𑀯𑀤𑀢𑀺 𑀦𑀸𑀫 ‘𑀲𑀘𑀸𑀳𑀁 𑀧𑀞𑀫𑀢𑀭𑀁 𑀚𑀸𑀦𑁂𑀬𑁆𑀬𑀁, 𑀦 𑀢𑁂 𑀇𑀥 𑀦𑀺𑀩𑁆𑀩𑀢𑁆𑀢𑀺𑀢𑀼𑀁 𑀤𑀤𑁂𑀬𑁆𑀬𑀁, 𑀘𑀢𑀽𑀲𑀼𑀬𑁂𑀯 𑀢𑀁 𑀅𑀧𑀸𑀬𑁂𑀲𑀼 𑀦𑀺𑀩𑁆𑀩𑀢𑁆𑀢𑀸𑀧𑁂𑀬𑁆𑀬𑀁. 𑀳𑁄𑀢𑀼, 𑀢𑁆𑀯𑀁 𑀬𑀢𑁆𑀣 𑀓𑀢𑁆𑀣𑀘𑀺 𑀦𑀺𑀩𑁆𑀩𑀢𑁆𑀢, 𑀅𑀳𑀁 𑀉𑀧𑀧𑀻𑀴𑀓𑀓𑀫𑁆𑀫𑀁 𑀦𑀸𑀫 𑀢𑀁 𑀧𑀻𑀴𑁂𑀢𑁆𑀯𑀸 𑀦𑀺𑀭𑁄𑀚𑀁 𑀦𑀺𑀬𑀽𑀲𑀁 𑀓𑀲𑀝𑀁 𑀓𑀭𑀺𑀲𑁆𑀲𑀸𑀫𑀻’𑀢𑀺. 𑀢𑀢𑁄 𑀧𑀝𑁆𑀞𑀸𑀬 𑀢𑀁 𑀢𑀸𑀤𑀺𑀲𑀁 𑀓𑀭𑁄𑀢𑀺. 𑀓𑀺𑀁 𑀓𑀭𑁄𑀢𑀺? 𑀧𑀭𑀺𑀲𑁆𑀲𑀬𑀁 𑀉𑀧𑀦𑁂𑀢𑀺, 𑀪𑁄𑀕𑁂 𑀯𑀺𑀦𑀸𑀲𑁂𑀢𑀺.

‘‘𑀢𑀢𑁆𑀣 𑀤𑀸𑀭𑀓𑀲𑁆𑀲 𑀫𑀸𑀢𑀼𑀓𑀼𑀘𑁆𑀙𑀺𑀬𑀁 𑀦𑀺𑀩𑁆𑀩𑀢𑁆𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀫𑀸𑀢𑀼 𑀅𑀲𑁆𑀲𑀸𑀤𑁄 𑀯𑀸 𑀲𑀼𑀔𑀁 𑀯𑀸 𑀦 𑀳𑁄𑀢𑀺, 𑀫𑀸𑀢𑀸𑀧𑀺𑀢𑀽𑀦𑀁 𑀧𑀻𑀴𑀸𑀯 𑀉𑀧𑁆𑀧𑀚𑁆𑀚𑀢𑀺. 𑀏𑀯𑀁 𑀧𑀭𑀺𑀲𑁆𑀲𑀬𑀁 𑀉𑀧𑀦𑁂𑀢𑀺. 𑀤𑀸𑀭𑀓𑀲𑁆𑀲 𑀧𑀦 𑀫𑀸𑀢𑀼𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀕𑁂𑀳𑁂 𑀪𑁄𑀕𑀸 𑀉𑀤𑀓𑀁 𑀧𑀢𑁆𑀯𑀸 𑀮𑁄𑀡𑀁 𑀯𑀺𑀬 𑀭𑀸𑀚𑀸𑀤𑀻𑀦𑀁 𑀯𑀲𑁂𑀦 𑀦𑀲𑁆𑀲𑀦𑁆𑀢𑀺, 𑀓𑀼𑀫𑁆𑀪𑀤𑁄𑀳𑀦𑀥𑁂𑀦𑀼𑀬𑁄 𑀔𑀻𑀭𑀁 𑀦 𑀤𑁂𑀦𑁆𑀢𑀺, 𑀲𑀽𑀭𑀢𑀸 𑀕𑁄𑀡𑀸 𑀘𑀡𑁆𑀟𑀸 𑀳𑁄𑀦𑁆𑀢𑀺, 𑀓𑀸𑀡𑀸 𑀳𑁄𑀦𑁆𑀢𑀺, 𑀔𑀜𑁆𑀚𑀸 𑀳𑁄𑀦𑁆𑀢𑀺, 𑀕𑁄𑀫𑀡𑁆𑀟𑀮𑁂 𑀭𑁄𑀕𑁄 𑀧𑀢𑀢𑀺, 𑀤𑀸𑀲𑀸𑀤𑀬𑁄 𑀯𑀘𑀦𑀁 𑀦 𑀓𑀭𑁄𑀦𑁆𑀢𑀺, 𑀯𑀸𑀧𑀺𑀢𑀁 𑀲𑀲𑁆𑀲𑀁 𑀦 𑀚𑀸𑀬𑀢𑀺, 𑀕𑁂𑀳𑀕𑀢𑀁 𑀕𑁂𑀳𑁂, 𑀅𑀭𑀜𑁆𑀜𑀕𑀢𑀁 𑀅𑀭𑀜𑁆𑀜𑁂 𑀦𑀲𑁆𑀲𑀢𑀺, 𑀅𑀦𑀼𑀧𑀼𑀩𑁆𑀩𑁂𑀦 𑀖𑀸𑀲𑀘𑁆𑀙𑀸𑀤𑀦𑀫𑀢𑁆𑀢𑀁 𑀤𑀼𑀮𑁆𑀮𑀪𑀁 𑀳𑁄𑀢𑀺, 𑀕𑀩𑁆𑀪𑀧𑀭𑀺𑀳𑀸𑀭𑁄 𑀦 𑀳𑁄𑀢𑀺, 𑀯𑀺𑀚𑀸𑀢𑀓𑀸𑀮𑁂 𑀫𑀸𑀢𑀼 𑀣𑀜𑁆𑀜𑀁 𑀙𑀺𑀚𑁆𑀚𑀢𑀺, 𑀤𑀸𑀭𑀓𑁄 𑀧𑀭𑀺𑀳𑀸𑀭𑀁 𑀅𑀮𑀪𑀦𑁆𑀢𑁄 𑀧𑀻𑀴𑀺𑀢𑁄 𑀦𑀺𑀭𑁄𑀚𑁄 𑀦𑀺𑀬𑀽𑀲𑁄 𑀓𑀲𑀝𑁄 𑀳𑁄𑀢𑀺. 𑀇𑀤𑀁 𑀉𑀧𑀧𑀻𑀴𑀓𑀓𑀫𑁆𑀫𑀁 𑀦𑀸𑀫.

‘‘𑀤𑀻𑀖𑀸𑀬𑀼𑀓𑀓𑀫𑁆𑀫𑁂𑀦 𑀧𑀦 𑀦𑀺𑀩𑁆𑀩𑀢𑁆𑀢𑀲𑁆𑀲 𑀉𑀧𑀘𑁆𑀙𑁂𑀤𑀓𑀓𑀫𑁆𑀫𑀁 𑀆𑀕𑀦𑁆𑀢𑁆𑀯𑀸 𑀆𑀬𑀼𑀁 𑀙𑀺𑀦𑁆𑀤𑀢𑀺. 𑀬𑀣𑀸 𑀳𑀺 𑀧𑀼𑀭𑀺𑀲𑁄 𑀅𑀝𑁆𑀞𑀼𑀲𑀪𑀕𑀫𑀦𑀁 𑀓𑀢𑁆𑀯𑀸 𑀲𑀭𑀁 𑀔𑀺𑀧𑁂𑀬𑁆𑀬, 𑀢𑀫𑀜𑁆𑀜𑁄 𑀥𑀦𑀼𑀢𑁄 𑀫𑀼𑀢𑁆𑀢𑀫𑀢𑁆𑀢𑀁 𑀫𑀼𑀕𑁆𑀕𑀭𑁂𑀦 𑀧𑀳𑀭𑀺𑀢𑁆𑀯𑀸 𑀢𑀢𑁆𑀣𑁂𑀯 𑀧𑀸𑀢𑁂𑀬𑁆𑀬, 𑀏𑀯𑀁 𑀤𑀻𑀖𑀸𑀬𑀼𑀓𑀓𑀫𑁆𑀫𑁂𑀦 𑀦𑀺𑀩𑁆𑀩𑀢𑁆𑀢𑀲𑁆𑀲 𑀉𑀧𑀘𑁆𑀙𑁂𑀤𑀓𑀓𑀫𑁆𑀫𑀁 𑀆𑀬𑀼𑀁 𑀙𑀺𑀦𑁆𑀤𑀢𑀺. 𑀓𑀺𑀁 𑀓𑀭𑁄𑀢𑀺? 𑀘𑁄𑀭𑀸𑀦𑀁 𑀅𑀝𑀯𑀺𑀁 𑀧𑀯𑁂𑀲𑁂𑀢𑀺, 𑀯𑀸𑀴𑀫𑀘𑁆𑀙𑁄𑀤𑀓𑀁 𑀑𑀢𑀸𑀭𑁂𑀢𑀺, 𑀅𑀜𑁆𑀜𑀢𑀭𑀁 𑀯𑀸 𑀧𑀦 𑀲𑀧𑀭𑀺𑀲𑁆𑀲𑀬𑀞𑀸𑀦𑀁 𑀉𑀧𑀦𑁂𑀢𑀺. 𑀇𑀤𑀁 𑀉𑀧𑀘𑁆𑀙𑁂𑀤𑀓𑀓𑀫𑁆𑀫𑀁 𑀦𑀸𑀫. ‘𑀉𑀧𑀖𑀸𑀢𑀓’𑀦𑁆𑀢𑀺𑀧𑀺 𑀏𑀢𑀲𑁆𑀲𑁂𑀯 𑀦𑀸𑀫𑀁. 𑀧𑀝𑀺𑀲𑀦𑁆𑀥𑀺𑀦𑀺𑀩𑁆𑀩𑀢𑁆𑀢𑀓𑀁 𑀧𑀦 𑀓𑀫𑁆𑀫𑀁 𑀚𑀦𑀓𑀓𑀫𑁆𑀫𑀁 𑀦𑀸𑀫. 𑀅𑀧𑁆𑀧𑀪𑁄𑀕𑀓𑀼𑀮𑀸𑀤𑀻𑀲𑀼 𑀦𑀺𑀩𑁆𑀩𑀢𑁆𑀢𑀲𑁆𑀲 𑀪𑁄𑀕𑀲𑀫𑁆𑀧𑀤𑀸𑀤𑀺𑀓𑀭𑀡𑁂𑀦 𑀉𑀧𑀢𑁆𑀣𑀫𑁆𑀪𑀓𑀓𑀫𑁆𑀫𑀁 𑀉𑀧𑀢𑁆𑀣𑀫𑁆𑀪𑀓𑀓𑀫𑁆𑀫𑀁 𑀦𑀸𑀫.

‘‘𑀧𑀭𑀺𑀢𑁆𑀢𑀓𑀫𑁆𑀫𑁂𑀦𑀧𑀺 𑀦𑀺𑀩𑁆𑀩𑀢𑁆𑀢𑀁 𑀏𑀢𑀁 𑀧𑀯𑀢𑁆𑀢𑁂 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀯𑀺𑀭𑀢𑀺𑀓𑀫𑁆𑀫𑀁 𑀆𑀕𑀦𑁆𑀢𑁆𑀯𑀸 𑀅𑀢𑁆𑀣𑀢𑁄 𑀏𑀯𑀁 𑀯𑀤𑀢𑀺 𑀦𑀸𑀫 ‘𑀲𑀘𑀸𑀳𑀁 𑀧𑀞𑀫𑀢𑀭𑀁 𑀚𑀸𑀦𑁂𑀬𑁆𑀬𑀁, 𑀦 𑀢𑁂 𑀇𑀥 𑀦𑀺𑀩𑁆𑀩𑀢𑁆𑀢𑀺𑀢𑀼𑀁 𑀤𑀤𑁂𑀬𑁆𑀬𑀁, 𑀤𑁂𑀯𑀮𑁄𑀓𑁂𑀬𑁂𑀯 𑀢𑀁 𑀦𑀺𑀩𑁆𑀩𑀢𑁆𑀢𑀸𑀧𑁂𑀬𑁆𑀬𑀁, 𑀳𑁄𑀢𑀼, 𑀢𑁆𑀯𑀁 𑀬𑀢𑁆𑀣 𑀓𑀢𑁆𑀣𑀘𑀺 𑀦𑀺𑀩𑁆𑀩𑀢𑁆𑀢, 𑀅𑀳𑀁 𑀉𑀧𑀢𑁆𑀣𑀫𑁆𑀪𑀓𑀓𑀫𑁆𑀫𑀁 𑀦𑀸𑀫 𑀉𑀧𑀢𑁆𑀣𑀫𑁆𑀪𑀁 𑀢𑁂 𑀓𑀭𑀺𑀲𑁆𑀲𑀸𑀫𑀻’𑀢𑀺 𑀉𑀧𑀢𑁆𑀣𑀫𑁆𑀪𑀁 𑀓𑀭𑁄𑀢𑀺. 𑀓𑀺𑀁 𑀓𑀭𑁄𑀢𑀺? 𑀧𑀭𑀺𑀲𑁆𑀲𑀬𑀁 𑀦𑀸𑀲𑁂𑀢𑀺, 𑀪𑁄𑀕𑁂 𑀉𑀧𑁆𑀧𑀸𑀤𑁂𑀢𑀺.

‘‘𑀢𑀢𑁆𑀣 𑀤𑀸𑀭𑀓𑀲𑁆𑀲 𑀫𑀸𑀢𑀼𑀓𑀼𑀘𑁆𑀙𑀺𑀬𑀁 𑀦𑀺𑀩𑁆𑀩𑀢𑁆𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀫𑀸𑀢𑀸𑀧𑀺𑀢𑀽𑀦𑀁 𑀲𑀼𑀔𑀫𑁂𑀯 𑀲𑀸𑀢𑀫𑁂𑀯 𑀳𑁄𑀢𑀺. 𑀬𑁂𑀧𑀺 𑀧𑀓𑀢𑀺𑀬𑀸 𑀫𑀦𑀼𑀲𑁆𑀲𑀸𑀫𑀦𑀼𑀲𑁆𑀲𑀧𑀭𑀺𑀲𑁆𑀲𑀬𑀸 𑀳𑁄𑀦𑁆𑀢𑀺, 𑀢𑁂 𑀲𑀩𑁆𑀩𑁂 𑀅𑀧𑀕𑀘𑁆𑀙𑀦𑁆𑀢𑀺. 𑀏𑀯𑀁 𑀧𑀭𑀺𑀲𑁆𑀲𑀬𑀁 𑀦𑀸𑀲𑁂𑀢𑀺. 𑀤𑀸𑀭𑀓𑀲𑁆𑀲 𑀧𑀦 𑀫𑀸𑀢𑀼𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀕𑁂𑀳𑁂 𑀪𑁄𑀕𑀸𑀦𑀁 𑀧𑀫𑀸𑀡𑀁 𑀦 𑀳𑁄𑀢𑀺, 𑀦𑀺𑀥𑀺𑀓𑀼𑀫𑁆𑀪𑀺𑀬𑁄 𑀧𑀼𑀭𑀢𑁄𑀧𑀺 𑀧𑀘𑁆𑀙𑀢𑁄𑀧𑀺 𑀕𑁂𑀳𑀁 𑀧𑀭𑀺𑀯𑀝𑁆𑀝𑀫𑀸𑀦𑀸 𑀧𑀯𑀺𑀲𑀦𑁆𑀢𑀺. 𑀫𑀸𑀢𑀸𑀧𑀺𑀢𑀭𑁄 𑀧𑀭𑁂𑀳𑀺 𑀞𑀧𑀺𑀢𑀥𑀦𑀲𑁆𑀲𑀧𑀺 𑀲𑀫𑁆𑀫𑀼𑀔𑀻𑀪𑀸𑀯𑀁 𑀕𑀘𑁆𑀙𑀦𑁆𑀢𑀺, 𑀥𑁂𑀦𑀼𑀬𑁄 𑀩𑀳𑀼𑀔𑀻𑀭𑀸 𑀳𑁄𑀦𑁆𑀢𑀺, 𑀕𑁄𑀡𑀸 𑀲𑀼𑀔𑀲𑀻𑀮𑀸 𑀳𑁄𑀦𑁆𑀢𑀺, 𑀯𑀧𑁆𑀧𑀝𑁆𑀞𑀸𑀦𑁂 𑀲𑀲𑁆𑀲𑀸𑀦𑀺 𑀲𑀫𑁆𑀧𑀚𑁆𑀚𑀦𑁆𑀢𑀺, 𑀯𑀟𑁆𑀠𑀺𑀬𑀸 𑀯𑀸 𑀲𑀫𑁆𑀧𑀬𑀼𑀢𑁆𑀢𑀁, 𑀢𑀸𑀯𑀓𑀸𑀮𑀺𑀓𑀁 𑀯𑀸 𑀤𑀺𑀦𑁆𑀦𑀁 𑀥𑀦𑀁 𑀅𑀘𑁄𑀤𑀺𑀢𑀸 𑀲𑀬𑀫𑁂𑀯 𑀆𑀳𑀭𑀺𑀢𑁆𑀯𑀸 𑀤𑁂𑀦𑁆𑀢𑀺, 𑀤𑀸𑀲𑀸𑀤𑀬𑁄 𑀲𑀼𑀩𑁆𑀩𑀘𑀸 𑀳𑁄𑀦𑁆𑀢𑀺, 𑀓𑀫𑁆𑀫𑀦𑁆𑀢𑀸 𑀦 𑀧𑀭𑀺𑀳𑀸𑀬𑀦𑁆𑀢𑀺, 𑀤𑀸𑀭𑀓𑁄 𑀕𑀩𑁆𑀪𑀢𑁄 𑀧𑀝𑁆𑀞𑀸𑀬 𑀧𑀭𑀺𑀳𑀸𑀭𑀁 𑀮𑀪𑀢𑀺, 𑀓𑁄𑀫𑀸𑀭𑀺𑀓𑀯𑁂𑀚𑁆𑀚𑀸 𑀲𑀦𑁆𑀦𑀺𑀳𑀺𑀢𑀸𑀯 𑀳𑁄𑀦𑁆𑀢𑀺. 𑀕𑀳𑀧𑀢𑀺𑀓𑀼𑀮𑁂 𑀚𑀸𑀢𑁄 𑀲𑁂𑀝𑁆𑀞𑀺𑀝𑁆𑀞𑀸𑀦𑀁, 𑀅𑀫𑀘𑁆𑀘𑀓𑀼𑀮𑀸𑀤𑀻𑀲𑀼 𑀚𑀸𑀢𑁄 𑀲𑁂𑀦𑀸𑀧𑀢𑀺𑀝𑁆𑀞𑀸𑀦𑀸𑀤𑀻𑀦𑀺 𑀮𑀪𑀢𑀺. 𑀏𑀯𑀁 𑀪𑁄𑀕𑁂 𑀉𑀧𑁆𑀧𑀸𑀤𑁂𑀢𑀺. 𑀲𑁄 𑀅𑀧𑀭𑀺𑀲𑁆𑀲𑀬𑁄 𑀲𑀪𑁄𑀕𑁄 𑀘𑀺𑀭𑀁 𑀚𑀻𑀯𑀢𑀺. 𑀇𑀤𑀁 𑀉𑀧𑀢𑁆𑀣𑀫𑁆𑀪𑀓𑀓𑀫𑁆𑀫𑀁 𑀦𑀸𑀫. 𑀇𑀫𑁂𑀲𑀼 𑀘𑀢𑀽𑀲𑀼 𑀧𑀼𑀭𑀺𑀫𑀸𑀦𑀺 𑀤𑁆𑀯𑁂 𑀅𑀓𑀼𑀲𑀮𑀸𑀦𑁂𑀯, 𑀚𑀦𑀓𑀁 𑀓𑀼𑀲𑀮𑀫𑁆𑀧𑀺 𑀅𑀓𑀼𑀲𑀮𑀫𑁆𑀧𑀺, 𑀉𑀧𑀢𑁆𑀣𑀫𑁆𑀪𑀓𑀁 𑀓𑀼𑀲𑀮𑀫𑁂𑀯𑀸’’𑀢𑀺.

𑀏𑀢𑁆𑀣 𑀯𑀺𑀩𑀸𑀥𑀽𑀧𑀖𑀸𑀢𑀸 𑀦𑀸𑀫 𑀓𑀼𑀲𑀮𑀯𑀺𑀧𑀸𑀓𑀫𑁆𑀳𑀺 𑀦 𑀬𑀼𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀤𑁆𑀯𑁂 𑀅𑀓𑀼𑀲𑀮𑀸𑀦𑁂𑀯𑀸’’𑀢𑀺 𑀯𑀼𑀢𑁆𑀢𑀁. 𑀤𑁂𑀯𑀤𑀢𑁆𑀢𑀸𑀤𑀻𑀦𑀁 𑀧𑀦 𑀦𑀸𑀕𑀸𑀤𑀻𑀦𑀁 𑀇𑀢𑁄 𑀅𑀦𑀼𑀧𑁆𑀧𑀤𑀺𑀦𑁆𑀦𑀬𑀸𑀧𑀦𑀓𑀧𑁂𑀢𑀸𑀦𑀜𑁆𑀘 𑀦𑀭𑀓𑀸𑀤𑀻𑀲𑀼 𑀅𑀓𑀼𑀲𑀮𑀯𑀺𑀧𑀸𑀓𑀽𑀧𑀢𑁆𑀣𑀫𑁆𑀪𑀦𑀽𑀧𑀧𑀻𑀴𑀦𑀽𑀧𑀖𑀸𑀢𑀓𑀸𑀦𑀺 𑀲𑀦𑁆𑀢𑀻𑀢𑀺 𑀘𑀢𑀼𑀦𑁆𑀦𑀫𑁆𑀧𑀺 𑀓𑀼𑀲𑀮𑀸𑀓𑀼𑀲𑀮𑀪𑀸𑀯𑁄 𑀦 𑀯𑀺𑀭𑀼𑀚𑁆𑀛𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀬𑀸 𑀩𑀳𑀽𑀲𑀼 𑀆𑀦𑀦𑁆𑀢𑀭𑀺𑀬𑁂𑀲𑀼 𑀓𑀢𑁂𑀲𑀼 𑀏𑀓𑁂𑀦 𑀕𑀳𑀺𑀢𑀧𑁆𑀧𑀝𑀺𑀲𑀦𑁆𑀥𑀺𑀓𑀲𑁆𑀲 𑀇𑀢𑀭𑁂𑀲𑀁 𑀢𑀲𑁆𑀲 𑀅𑀦𑀼𑀩𑀮𑀧𑁆𑀧𑀤𑀸𑀬𑀺𑀢𑀸 𑀯𑀼𑀢𑁆𑀢𑀸, 𑀲𑀸𑀧𑀺 𑀲𑀫𑀢𑁆𑀣𑀺𑀢𑀸 𑀳𑁄𑀢𑀺.

𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦 𑀏𑀓𑀸𑀤𑀲 𑀓𑀫𑁆𑀫𑀸𑀦𑀺 𑀯𑀺𑀪𑀚𑀺𑀢𑁆𑀯𑀸 𑀇𑀤𑀸𑀦𑀺 𑀅𑀪𑀺𑀥𑀫𑁆𑀫𑀧𑀭𑀺𑀬𑀸𑀧𑀦𑁆𑀦𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀢𑁆𑀣𑁂𑀓𑀘𑁆𑀘𑀸𑀦𑀺 𑀧𑀸𑀧𑀓𑀸𑀦𑀺 𑀓𑀫𑁆𑀫𑀲𑀫𑀸𑀤𑀸𑀦𑀸𑀦𑀻’’𑀢𑀺𑀆𑀤𑀺𑀦𑀸 𑀯𑀺𑀪𑀗𑁆𑀕𑀧𑀸𑀴𑀺𑀁 (𑀯𑀺𑀪. 𑁮𑁧𑁦) 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀕𑀢𑀺𑀲𑀫𑁆𑀧𑀢𑁆𑀢𑀺𑀧𑀝𑀺𑀩𑀸𑀴𑁆𑀳𑀸𑀦𑀻𑀢𑀺 𑀕𑀢𑀺𑀲𑀫𑁆𑀧𑀢𑁆𑀢𑀺𑀬𑀸 𑀧𑀝𑀺𑀩𑀸𑀳𑀺𑀢𑀸𑀦𑀺 𑀦𑀺𑀯𑀸𑀭𑀺𑀢𑀸𑀦𑀺 𑀧𑀝𑀺𑀲𑁂𑀥𑀺𑀢𑀸𑀦𑀺. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑁆𑀣 𑀘 𑀕𑀢𑀺𑀲𑀫𑁆𑀧𑀢𑁆𑀢𑀻𑀢𑀺 𑀲𑀫𑁆𑀧𑀦𑁆𑀦𑀕𑀢𑀺 𑀤𑁂𑀯𑀮𑁄𑀓𑁄 𑀘 𑀫𑀦𑀼𑀲𑁆𑀲𑀮𑁄𑀓𑁄 𑀘. 𑀕𑀢𑀺𑀯𑀺𑀧𑀢𑁆𑀢𑀻𑀢𑀺 𑀯𑀺𑀧𑀦𑁆𑀦𑀕𑀢𑀺 𑀘𑀢𑁆𑀢𑀸𑀭𑁄 𑀅𑀧𑀸𑀬𑀸. 𑀉𑀧𑀥𑀺𑀲𑀫𑁆𑀧𑀢𑁆𑀢𑀻𑀢𑀺 𑀅𑀢𑁆𑀢𑀪𑀸𑀯𑀲𑀫𑀺𑀤𑁆𑀥𑀺. 𑀉𑀧𑀥𑀺𑀯𑀺𑀧𑀢𑁆𑀢𑀻𑀢𑀺 𑀳𑀻𑀦𑀅𑀢𑁆𑀢𑀪𑀸𑀯𑀢𑀸. 𑀓𑀸𑀮𑀲𑀫𑁆𑀧𑀢𑁆𑀢𑀻𑀢𑀺 𑀲𑀼𑀭𑀸𑀚𑀲𑀼𑀫𑀦𑀼𑀲𑁆𑀲𑀓𑀸𑀮𑀲𑀗𑁆𑀔𑀸𑀢𑁄 𑀲𑀫𑁆𑀧𑀦𑁆𑀦𑀓𑀸𑀮𑁄. 𑀓𑀸𑀮𑀯𑀺𑀧𑀢𑁆𑀢𑀻𑀢𑀺 𑀤𑀼𑀭𑀸𑀚𑀤𑀼𑀫𑁆𑀫𑀦𑀼𑀲𑁆𑀲𑀓𑀸𑀮𑀲𑀗𑁆𑀔𑀸𑀢𑁄 𑀯𑀺𑀧𑀦𑁆𑀦𑀓𑀸𑀮𑁄. 𑀧𑀬𑁄𑀕𑀲𑀫𑁆𑀧𑀢𑁆𑀢𑀻𑀢𑀺 𑀲𑀫𑁆𑀫𑀸𑀧𑀬𑁄𑀕𑁄. 𑀧𑀬𑁄𑀕𑀯𑀺𑀧𑀢𑁆𑀢𑀻𑀢𑀺 𑀫𑀺𑀘𑁆𑀙𑀸𑀧𑀬𑁄𑀕𑁄.

𑀇𑀤𑀸𑀦𑀺 𑀬𑀣𑀸𑀯𑀼𑀢𑁆𑀢𑀧𑀸𑀴𑀺𑀬𑀸 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑀸𑀦𑀼𑀪𑀯𑀦𑀸𑀭𑀳𑁂 𑀓𑀫𑁆𑀫𑁂 𑀯𑀺𑀚𑁆𑀚𑀫𑀸𑀦𑁂𑀬𑁂𑀯𑀸𑀢𑀺 𑀇𑀫𑀺𑀦𑀸 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑀸𑀦𑀼𑀪𑀯𑀦𑀦𑀺𑀫𑁆𑀫𑀺𑀢𑁆𑀢𑀓𑀲𑁆𑀲 𑀧𑀸𑀧𑀓𑀫𑁆𑀫𑀲𑁆𑀲 𑀲𑀩𑁆𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀢𑀁 𑀓𑀫𑁆𑀫𑀦𑁆𑀢𑀺 𑀢𑀁 𑀧𑀸𑀧𑀓𑀁 𑀓𑀫𑁆𑀫𑀁. 𑀏𑀓𑀘𑁆𑀘𑀲𑁆𑀲 𑀳𑀺 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑀸𑀦𑀼𑀪𑀯𑀦𑀦𑀺𑀫𑀺𑀢𑁆𑀢𑀁 𑀩𑀳𑀼𑀧𑀸𑀧𑀓𑀫𑁆𑀫𑀁 𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀕𑀢𑀺𑀯𑀺𑀧𑀢𑁆𑀢𑀺𑀬𑀁 𑀞𑀺𑀢𑀲𑁆𑀲𑁂𑀯 𑀯𑀺𑀧𑀘𑁆𑀘𑀢𑀺. 𑀬𑀤𑀺 𑀧𑀦 𑀲𑁄 𑀏𑀓𑁂𑀦 𑀓𑀮𑁆𑀬𑀸𑀡𑀓𑀫𑁆𑀫𑁂𑀦 𑀕𑀢𑀺𑀲𑀫𑁆𑀧𑀢𑁆𑀢𑀺𑀬𑀁 𑀤𑁂𑀯𑁂𑀲𑀼 𑀯𑀸 𑀫𑀦𑀼𑀲𑁆𑀲𑁂𑀲𑀼 𑀯𑀸 𑀦𑀺𑀩𑁆𑀩𑀢𑁆𑀢𑁂𑀬𑁆𑀬, 𑀢𑀸𑀤𑀺𑀲𑁂 𑀞𑀸𑀦𑁂 𑀅𑀓𑀼𑀲𑀮𑀲𑁆𑀲 𑀯𑀸𑀭𑁄 𑀦𑀢𑁆𑀣𑀺, 𑀏𑀓𑀦𑁆𑀢𑀁 𑀓𑀼𑀲𑀮𑀲𑁆𑀲𑁂𑀯𑀸𑀢𑀺 𑀢𑀁 𑀓𑀫𑁆𑀫𑀁 𑀕𑀢𑀺𑀲𑀫𑁆𑀧𑀢𑁆𑀢𑀺𑀧𑀝𑀺𑀩𑀸𑀴𑁆𑀳𑀁 𑀦 𑀯𑀺𑀧𑀘𑁆𑀘𑀢𑀺. 𑀧𑀢𑀺𑀩𑀸𑀳𑀺𑀢𑀁 𑀳𑀼𑀢𑁆𑀯𑀸𑀢𑀺 𑀩𑀸𑀥𑀺𑀢𑀁 𑀳𑀼𑀢𑁆𑀯𑀸. 𑀅𑀢𑁆𑀢𑀪𑀸𑀯𑀲𑀫𑀺𑀤𑁆𑀥𑀺𑀬𑀦𑁆𑀢𑀺 𑀲𑀭𑀻𑀭𑀲𑀫𑁆𑀧𑀢𑁆𑀢𑀺𑀬𑀁. 𑀓𑀺𑀮𑀺𑀝𑁆𑀞𑀓𑀫𑁆𑀫𑀲𑁆𑀲𑀸𑀢𑀺 𑀳𑀢𑁆𑀣𑀺𑀫𑁂𑀡𑁆𑀟𑀅𑀲𑁆𑀲𑀩𑀦𑁆𑀥𑀓𑀕𑁄𑀧𑀸𑀮𑀓𑀸𑀤𑀺𑀓𑀫𑁆𑀫𑀲𑁆𑀲. 𑀧𑀮𑀸𑀬𑀺𑀢𑀩𑁆𑀩𑀬𑀼𑀢𑁆𑀢𑀓𑀸𑀮𑁂𑀢𑀺 𑀳𑀢𑁆𑀣𑀺𑀆𑀤𑀺𑀧𑀘𑁆𑀘𑀢𑁆𑀣𑀺𑀓𑀲𑀫𑀸𑀕𑀫𑀓𑀸𑀮𑁂. 𑀮𑀜𑁆𑀚𑀁 𑀤𑁂𑀢𑀻𑀢𑀺 𑀏𑀯𑀁 𑀫𑁂 𑀩𑀸𑀥𑀢𑀁 𑀧𑀭𑁂𑀲𑀁 𑀯𑀲𑁂 𑀦 𑀳𑁄𑀢𑀻𑀢𑀺 𑀤𑁂𑀢𑀺. 𑀘𑁄𑀭𑀺𑀓𑀬𑀼𑀢𑁆𑀢𑀓𑀸𑀮𑁂𑀢𑀺 𑀧𑀓𑁆𑀔𑀩𑀮𑀸𑀤𑀻𑀦𑀁 𑀮𑀩𑁆𑀪𑀫𑀸𑀦𑀓𑀸𑀮𑁂. 𑀅𑀦𑁆𑀢𑀭𑀓𑀧𑁆𑀧𑁂𑀢𑀺 𑀧𑀭𑀺𑀬𑁄𑀲𑀸𑀦𑀧𑁆𑀧𑀢𑁆𑀢𑁂 𑀅𑀦𑁆𑀢𑀭𑀓𑀧𑁆𑀧𑁂.

𑀅𑀪𑀺𑀥𑀫𑁆𑀫𑀦𑀬𑁂𑀦 𑀲𑁄𑀴𑀲 𑀓𑀫𑁆𑀫𑀸𑀦𑀺 𑀯𑀺𑀪𑀚𑀺𑀢𑁆𑀯𑀸 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑀧𑀭𑀺𑀬𑀸𑀬𑁂𑀦 (𑀧𑀝𑀺. 𑀫. 𑁧.𑁨𑁩𑁪-𑁨𑁩𑁫) 𑀤𑁆𑀯𑀸𑀤𑀲 𑀓𑀫𑁆𑀫𑀸𑀦𑀺 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀭𑀸𑀦𑀺𑀧𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀢𑀻𑀢𑀪𑀯𑁂𑀲𑀼 𑀓𑀢𑀲𑁆𑀲 𑀓𑀫𑁆𑀫𑀲𑁆𑀲 𑀅𑀢𑀻𑀢𑀪𑀯𑁂𑀲𑀼𑀬𑁂𑀯 𑀯𑀺𑀧𑀓𑁆𑀓𑀯𑀺𑀧𑀸𑀓𑀁 𑀕𑀳𑁂𑀢𑁆𑀯𑀸 ‘‘𑀅𑀳𑁄𑀲𑀺 𑀓𑀫𑁆𑀫𑀁 𑀅𑀳𑁄𑀲𑀺 𑀓𑀫𑁆𑀫𑀯𑀺𑀧𑀸𑀓𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀬𑀁 𑀓𑀫𑁆𑀫𑀁 𑀅𑀢𑀻𑀢𑁂 𑀆𑀬𑀽𑀳𑀺𑀢’’𑀦𑁆𑀢𑀺𑀆𑀤𑀺. 𑀯𑀺𑀧𑀸𑀓𑀯𑀸𑀭𑀦𑁆𑀢𑀺 𑀯𑀺𑀧𑀘𑁆𑀘𑀦𑀸𑀯𑀲𑀭𑀁 𑀯𑀺𑀧𑀸𑀓𑀯𑀸𑀭𑀁. ‘‘𑀯𑀺𑀧𑀸𑀓𑀯𑀸𑀭𑀁 𑀮𑀪𑀢𑀻’’𑀢𑀺 𑀇𑀫𑀺𑀦𑀸 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 ‘‘𑀧𑀝𑀺𑀲𑀦𑁆𑀥𑀺𑀁 𑀚𑀦𑁂𑀲𑀻’’𑀢𑀺𑀆𑀤𑀺𑀦𑀸 𑀯𑀺𑀪𑀸𑀯𑁂𑀢𑀺. 𑀢𑀢𑁆𑀣 𑀧𑀝𑀺𑀲𑀦𑁆𑀥𑀺𑀁 𑀚𑀦𑁂𑀲𑀻𑀢𑀺 𑀇𑀫𑀺𑀦𑀸 𑀘 𑀧𑀝𑀺𑀲𑀦𑁆𑀥𑀺𑀤𑀸𑀬𑀓𑀲𑁆𑀲 𑀓𑀫𑁆𑀫𑀲𑁆𑀲 𑀧𑀯𑀢𑁆𑀢𑀺𑀯𑀺𑀧𑀸𑀓𑀤𑀸𑀬𑀺𑀢𑀸𑀧𑀺 𑀯𑀼𑀢𑁆𑀢𑀸 𑀳𑁄𑀢𑀺. 𑀧𑀯𑀢𑁆𑀢𑀺𑀯𑀺𑀧𑀸𑀓𑀲𑁆𑀲𑁂𑀯 𑀧𑀦 𑀤𑀸𑀬𑀓𑀁 𑀭𑀽𑀧𑀚𑀦𑀓𑀲𑀻𑀲𑁂𑀦 𑀯𑀤𑀢𑀺. 𑀢𑀲𑁆𑀲𑁂𑀯 𑀅𑀢𑀻𑀢𑀲𑁆𑀲 𑀓𑀫𑁆𑀫𑀲𑁆𑀲 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀲𑁆𑀲 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀲𑁆𑀲 𑀘 𑀧𑀘𑁆𑀘𑀬𑀯𑁂𑀓𑀮𑁆𑀮𑁂𑀦 𑀅𑀢𑀻𑀢𑀪𑀯𑁂𑀲𑀼𑀬𑁂𑀯 𑀅𑀯𑀺𑀧𑀓𑁆𑀓𑀯𑀺𑀧𑀸𑀓𑀜𑁆𑀘, 𑀅𑀢𑀻𑀢𑁂𑀬𑁂𑀯 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀅𑀧𑀭𑀧𑀭𑀺𑀬𑀸𑀬𑀯𑁂𑀤𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀅𑀯𑀺𑀧𑀓𑁆𑀓𑀯𑀺𑀧𑀸𑀓𑀜𑁆𑀘 𑀕𑀳𑁂𑀢𑁆𑀯𑀸 ‘‘𑀅𑀳𑁄𑀲𑀺 𑀓𑀫𑁆𑀫𑀁 𑀦𑀸𑀳𑁄𑀲𑀺 𑀓𑀫𑁆𑀫𑀯𑀺𑀧𑀸𑀓𑁄’’𑀢𑀺𑀧𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀬𑀁 𑀧𑀦 𑀯𑀺𑀧𑀸𑀓𑀯𑀸𑀭𑀁 𑀦 𑀮𑀪𑀻’’𑀢𑀺𑀆𑀤𑀺.

𑀅𑀢𑀻𑀢𑀲𑁆𑀲𑁂𑀯 𑀓𑀫𑁆𑀫𑀲𑁆𑀲 𑀅𑀯𑀺𑀧𑀓𑁆𑀓𑀯𑀺𑀧𑀸𑀓𑀲𑁆𑀲 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀯𑁂 𑀧𑀘𑁆𑀘𑀬𑀲𑀫𑁆𑀧𑀢𑁆𑀢𑀺𑀬𑀸 𑀯𑀺𑀧𑀘𑁆𑀘𑀫𑀸𑀦𑀁 𑀯𑀺𑀧𑀸𑀓𑀁 𑀕𑀳𑁂𑀢𑁆𑀯𑀸 ‘‘𑀅𑀳𑁄𑀲𑀺 𑀓𑀫𑁆𑀫𑀁 𑀅𑀢𑁆𑀣𑀺 𑀓𑀫𑁆𑀫𑀯𑀺𑀧𑀸𑀓𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀬𑀁 𑀧𑀦 𑀅𑀢𑀻𑀢𑁂 𑀆𑀬𑀽𑀳𑀺𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀅𑀢𑀻𑀢𑀲𑁆𑀲𑁂𑀯 𑀓𑀫𑁆𑀫𑀲𑁆𑀲 𑀅𑀢𑀺𑀓𑁆𑀓𑀦𑁆𑀢𑀯𑀺𑀧𑀸𑀓𑀓𑀸𑀮𑀲𑁆𑀲 𑀘 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀯𑁂 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑀲𑁆𑀲 𑀘 𑀅𑀯𑀺𑀧𑀘𑁆𑀘𑀫𑀸𑀦𑀯𑀺𑀧𑀸𑀓𑀁 𑀕𑀳𑁂𑀢𑁆𑀯𑀸 ‘‘𑀅𑀳𑁄𑀲𑀺 𑀓𑀫𑁆𑀫𑀁 𑀦𑀢𑁆𑀣𑀺 𑀓𑀫𑁆𑀫𑀯𑀺𑀧𑀸𑀓𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀅𑀮𑀤𑁆𑀥𑀯𑀺𑀧𑀸𑀓𑀯𑀸𑀭’’𑀦𑁆𑀢𑀺𑀆𑀤𑀺. 𑀅𑀢𑀻𑀢𑀲𑁆𑀲𑁂𑀯 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀸𑀭𑀳𑀲𑁆𑀲 𑀅𑀯𑀺𑀧𑀓𑁆𑀓𑀯𑀺𑀧𑀸𑀓𑀲𑁆𑀲 𑀅𑀦𑀸𑀕𑀢𑀪𑀯𑁂 𑀧𑀘𑁆𑀘𑀬𑀲𑀫𑁆𑀧𑀢𑁆𑀢𑀺𑀬𑀸 𑀯𑀺𑀧𑀘𑁆𑀘𑀺𑀢𑀩𑁆𑀩𑀁 𑀯𑀺𑀧𑀸𑀓𑀁 𑀕𑀳𑁂𑀢𑁆𑀯𑀸 ‘‘𑀅𑀳𑁄𑀲𑀺 𑀓𑀫𑁆𑀫𑀁 𑀪𑀯𑀺𑀲𑁆𑀲𑀢𑀺 𑀓𑀫𑁆𑀫𑀯𑀺𑀧𑀸𑀓𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀁 𑀧𑀦 𑀅𑀢𑀻𑀢𑁂 𑀆𑀬𑀽𑀳𑀺𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀅𑀢𑀻𑀢𑀲𑁆𑀲𑁂𑀯 𑀓𑀫𑁆𑀫𑀲𑁆𑀲 𑀅𑀢𑀺𑀓𑁆𑀓𑀦𑁆𑀢𑀯𑀺𑀧𑀸𑀓𑀓𑀸𑀮𑀲𑁆𑀲 𑀘 𑀅𑀦𑀸𑀕𑀢𑀪𑀯𑁂 𑀧𑀭𑀺𑀦𑀺𑀩𑁆𑀩𑀸𑀬𑀺𑀢𑀩𑁆𑀩𑀲𑁆𑀲 𑀅𑀯𑀺𑀧𑀘𑁆𑀘𑀺𑀢𑀩𑁆𑀩𑀯𑀺𑀧𑀸𑀓𑀜𑁆𑀘 𑀕𑀳𑁂𑀢𑁆𑀯𑀸 ‘‘𑀅𑀳𑁄𑀲𑀺 𑀓𑀫𑁆𑀫𑀁 𑀦 𑀪𑀯𑀺𑀲𑁆𑀲𑀢𑀺 𑀓𑀫𑁆𑀫𑀯𑀺𑀧𑀸𑀓𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀬𑀁 𑀅𑀦𑀸𑀕𑀢𑁂 𑀯𑀺𑀧𑀸𑀓𑀯𑀸𑀭𑀁 𑀦 𑀮𑀪𑀺𑀲𑁆𑀲𑀢𑀻’’𑀢𑀺𑀆𑀤𑀺. 𑀏𑀯𑀁 𑀢𑀸𑀯 𑀅𑀢𑀻𑀢𑀓𑀫𑁆𑀫𑀁 𑀅𑀢𑀻𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀸𑀕𑀢𑀯𑀺𑀧𑀸𑀓𑀸𑀯𑀺𑀧𑀸𑀓𑀯𑀲𑁂𑀦 𑀙𑀥𑀸 𑀤𑀲𑁆𑀲𑀺𑀢𑀁.

𑀇𑀤𑀸𑀦𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀯𑁂 𑀓𑀢𑀲𑁆𑀲 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀲𑁆𑀲 𑀇𑀥𑁂𑀯 𑀯𑀺𑀧𑀘𑁆𑀘𑀫𑀸𑀦𑀁 𑀯𑀺𑀧𑀸𑀓𑀁 𑀕𑀳𑁂𑀢𑁆𑀯𑀸 ‘‘𑀅𑀢𑁆𑀣𑀺 𑀓𑀫𑁆𑀫𑀁 𑀅𑀢𑁆𑀣𑀺 𑀓𑀫𑁆𑀫𑀯𑀺𑀧𑀸𑀓𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀁 𑀧𑀦 𑀏𑀢𑀭𑀳𑀺 𑀆𑀬𑀽𑀳𑀺𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀬𑀁 𑀧𑀦 𑀏𑀢𑀭𑀳𑀺 𑀯𑀺𑀧𑀸𑀓𑀯𑀸𑀭𑀁 𑀦 𑀮𑀪𑀢𑀻𑀢𑀺𑀆𑀤𑀺𑀦𑀸 𑀢𑀲𑁆𑀲𑁂𑀯 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀓𑀫𑁆𑀫𑀲𑁆𑀲 𑀧𑀘𑁆𑀘𑀬𑀯𑁂𑀓𑀮𑁆𑀮𑁂𑀦 𑀇𑀥 𑀅𑀯𑀺𑀧𑀘𑁆𑀘𑀫𑀸𑀦𑀜𑁆𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑀲𑁆𑀲 𑀇𑀥 𑀅𑀯𑀺𑀧𑀘𑁆𑀘𑀫𑀸𑀦𑀜𑁆𑀘 𑀯𑀺𑀧𑀸𑀓𑀁 𑀕𑀳𑁂𑀢𑁆𑀯𑀸 ‘‘𑀅𑀢𑁆𑀣𑀺 𑀓𑀫𑁆𑀫𑀁 𑀦𑀢𑁆𑀣𑀺 𑀓𑀫𑁆𑀫𑀯𑀺𑀧𑀸𑀓𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲𑁂𑀯 𑀓𑀫𑁆𑀫𑀲𑁆𑀲 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀲𑁆𑀲 𑀅𑀧𑀭𑀧𑀭𑀺𑀬𑀸𑀬𑀯𑁂𑀤𑀦𑀻𑀬𑀲𑁆𑀲 𑀘 𑀅𑀦𑀸𑀕𑀢𑀪𑀯𑁂 𑀯𑀺𑀧𑀘𑁆𑀘𑀺𑀢𑀩𑁆𑀩𑀯𑀺𑀧𑀸𑀓𑀁 𑀕𑀳𑁂𑀢𑁆𑀯𑀸 ‘‘𑀅𑀢𑁆𑀣𑀺 𑀓𑀫𑁆𑀫𑀁 𑀪𑀯𑀺𑀲𑁆𑀲𑀢𑀺 𑀓𑀫𑁆𑀫𑀯𑀺𑀧𑀸𑀓𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀬𑀁 𑀧𑀦 𑀏𑀢𑀭𑀳𑀺 𑀆𑀬𑀽𑀳𑀺𑀢𑀁 𑀅𑀦𑀸𑀕𑀢𑁂 𑀯𑀺𑀧𑀸𑀓𑀯𑀸𑀭𑀁 𑀮𑀪𑀺𑀲𑁆𑀲𑀢𑀻’’𑀢𑀺𑀆𑀤𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲𑁂𑀯 𑀓𑀫𑁆𑀫𑀲𑁆𑀲 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀲𑁆𑀲 𑀧𑀘𑁆𑀘𑀬𑀯𑁂𑀓𑀮𑁆𑀮𑁂𑀦 𑀅𑀦𑀸𑀕𑀢𑀪𑀯𑁂 𑀅𑀯𑀺𑀧𑀘𑁆𑀘𑀺𑀢𑀩𑁆𑀩𑀜𑁆𑀘 𑀅𑀦𑀸𑀕𑀢𑀪𑀯𑁂 𑀧𑀭𑀺𑀦𑀺𑀩𑁆𑀩𑀸𑀬𑀺𑀢𑀩𑁆𑀩𑀲𑁆𑀲 𑀅𑀧𑀭𑀧𑀭𑀺𑀬𑀸𑀬𑀯𑁂𑀤𑀦𑀻𑀬𑀲𑁆𑀲 𑀅𑀯𑀺𑀧𑀘𑁆𑀘𑀺𑀢𑀩𑁆𑀩𑀜𑁆𑀘 𑀯𑀺𑀧𑀸𑀓𑀁 𑀕𑀳𑁂𑀢𑁆𑀯𑀸 ‘‘𑀅𑀢𑁆𑀣𑀺 𑀓𑀫𑁆𑀫𑀁 𑀦 𑀪𑀯𑀺𑀲𑁆𑀲𑀢𑀺 𑀓𑀫𑁆𑀫𑀯𑀺𑀧𑀸𑀓𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀬𑀁 𑀧𑀦 𑀯𑀺𑀧𑀸𑀓𑀯𑀸𑀭𑀁 𑀦 𑀮𑀪𑀺𑀲𑁆𑀲𑀢𑀻’’𑀢𑀺𑀆𑀤𑀺.

𑀏𑀯𑀜𑁆𑀘 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀫𑁆𑀫𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀸𑀕𑀢𑀯𑀺𑀧𑀸𑀓𑀸𑀯𑀺𑀧𑀸𑀓𑀯𑀲𑁂𑀦 𑀘𑀢𑀼𑀥𑀸 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀦𑀸𑀕𑀢𑀪𑀯𑁂 𑀓𑀢𑀲𑁆𑀲 𑀓𑀫𑁆𑀫𑀲𑁆𑀲 𑀅𑀦𑀸𑀕𑀢𑁂 𑀯𑀺𑀧𑀘𑁆𑀘𑀺𑀢𑀩𑁆𑀩𑀯𑀺𑀧𑀸𑀓𑀁 𑀕𑀳𑁂𑀢𑁆𑀯𑀸 ‘‘𑀪𑀯𑀺𑀲𑁆𑀲𑀢𑀺 𑀓𑀫𑁆𑀫𑀁 𑀪𑀯𑀺𑀲𑁆𑀲𑀢𑀺 𑀓𑀫𑁆𑀫𑀯𑀺𑀧𑀸𑀓𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀁 𑀧𑀦𑀸𑀦𑀸𑀕𑀢𑁂 𑀆𑀬𑀽𑀳𑀺𑀲𑁆𑀲𑀢𑀻’’𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑁂𑀯 𑀅𑀦𑀸𑀕𑀢𑀲𑁆𑀲 𑀓𑀫𑁆𑀫𑀲𑁆𑀲 𑀧𑀘𑁆𑀘𑀬𑀯𑁂𑀓𑀮𑁆𑀮𑁂𑀦 𑀅𑀯𑀺𑀧𑀘𑁆𑀘𑀺𑀢𑀩𑁆𑀩𑀜𑁆𑀘 𑀅𑀦𑀸𑀕𑀢𑀪𑀯𑁂 𑀧𑀭𑀺𑀦𑀺𑀩𑁆𑀩𑀸𑀬𑀺𑀢𑀩𑁆𑀩𑀲𑁆𑀲 𑀅𑀯𑀺𑀧𑀘𑁆𑀘𑀺𑀢𑀩𑁆𑀩𑀜𑁆𑀘 𑀯𑀺𑀧𑀸𑀓𑀁 𑀕𑀳𑁂𑀢𑁆𑀯𑀸 ‘‘𑀪𑀯𑀺𑀲𑁆𑀲𑀢𑀺 𑀓𑀫𑁆𑀫𑀁 𑀦 𑀪𑀯𑀺𑀲𑁆𑀲𑀢𑀺 𑀓𑀫𑁆𑀫𑀯𑀺𑀧𑀸𑀓𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀬𑀁 𑀧𑀦 𑀯𑀺𑀧𑀸𑀓𑀯𑀸𑀭𑀁 𑀦 𑀮𑀪𑀺𑀲𑁆𑀲𑀢𑀻’’𑀢𑀺𑀆𑀤𑀺. 𑀏𑀯𑀁 𑀅𑀦𑀸𑀕𑀢𑀓𑀫𑁆𑀫𑀁 𑀅𑀦𑀸𑀕𑀢𑀯𑀺𑀧𑀸𑀓𑀸𑀯𑀺𑀧𑀸𑀓𑀯𑀲𑁂𑀦 𑀤𑁆𑀯𑀺𑀥𑀸 𑀤𑀲𑁆𑀲𑀺𑀢𑀁. 𑀏𑀯𑀦𑁆𑀢𑀺𑀆𑀤𑀺𑀦𑀸 𑀬𑀣𑀸𑀯𑀼𑀢𑁆𑀢𑀤𑁆𑀯𑀸𑀤𑀲𑀓𑀫𑁆𑀫𑀸𑀦𑀺 𑀦𑀺𑀕𑀫𑁂𑀢𑀺.

𑀇𑀤𑀸𑀦𑀺 𑀲𑀩𑁆𑀩𑁂𑀲𑀼 𑀬𑀣𑀸𑀯𑀼𑀢𑁆𑀢𑀧𑁆𑀧𑀪𑁂𑀤𑁂𑀲𑀼 𑀓𑀫𑁆𑀫𑁂𑀲𑀼 𑀬𑀸𑀦𑀺 𑀅𑀪𑀺𑀥𑀫𑁆𑀫𑀦𑀬𑁂𑀦 𑀯𑀺𑀪𑀢𑁆𑀢𑀸𑀦𑀺 𑀲𑁄𑀴𑀲 𑀓𑀫𑁆𑀫𑀸𑀦𑀺, 𑀬𑀸𑀦𑀺 𑀘 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑀧𑀭𑀺𑀬𑀸𑀬𑁂𑀦 𑀯𑀺𑀪𑀢𑁆𑀢𑀸𑀦𑀺 𑀤𑁆𑀯𑀸𑀤𑀲 𑀓𑀫𑁆𑀫𑀸𑀦𑀺, 𑀢𑀸𑀦𑀺 𑀲𑀩𑁆𑀩𑀸𑀦𑀺 𑀲𑀼𑀢𑁆𑀢𑀦𑁆𑀢𑀺𑀓𑀧𑀭𑀺𑀬𑀸𑀬𑁂𑀦 𑀯𑀺𑀪𑀢𑁆𑀢𑁂𑀲𑀼 𑀏𑀓𑀸𑀤𑀲𑀯𑀺𑀥𑁂𑀲𑀼𑀬𑁂𑀯 𑀓𑀫𑁆𑀫𑁂𑀲𑀼 𑀅𑀦𑁆𑀢𑁄𑀕𑀥𑀸𑀦𑀺, 𑀢𑀸𑀦𑀺 𑀘 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀅𑀧𑀭𑀧𑀭𑀺𑀬𑀸𑀬𑀯𑁂𑀤𑀦𑀻𑀬𑁂𑀲𑀼 𑀢𑀻𑀲𑀼𑀬𑁂𑀯 𑀅𑀦𑁆𑀢𑁄𑀕𑀥𑀸𑀦𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀢𑀺 𑀇𑀫𑀸𑀦𑀺 𑀘𑁂𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀢𑁆𑀢𑀦𑁄 𑀞𑀸𑀦𑀸 𑀑𑀲𑀓𑁆𑀓𑀺𑀢𑁆𑀯𑀸𑀢𑀺 𑀅𑀢𑁆𑀢𑀦𑁄 𑀬𑀣𑀸𑀯𑀼𑀢𑁆𑀢𑀤𑁆𑀯𑀸𑀤𑀲𑀲𑁄𑀴𑀲𑀧𑁆𑀧𑀪𑁂𑀤𑀲𑀗𑁆𑀔𑀸𑀢𑀝𑁆𑀞𑀸𑀦𑀢𑁄 𑀧𑀭𑀺𑀳𑀸𑀧𑁂𑀢𑁆𑀯𑀸, 𑀢𑀁 𑀢𑀁 𑀧𑀪𑁂𑀤𑀁 𑀳𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀓𑀸𑀤𑀲 𑀓𑀫𑁆𑀫𑀸𑀦𑀺𑀬𑁂𑀯 𑀪𑀯𑀦𑁆𑀢𑀻𑀢𑀺 𑀢𑀁𑀲𑀪𑀸𑀯𑀸𑀦𑀁𑀬𑁂𑀯 𑀓𑀫𑁆𑀫𑀸𑀦𑀁 𑀤𑁆𑀯𑀸𑀤𑀲𑀥𑀸 𑀲𑁄𑀴𑀲𑀥𑀸 𑀘 𑀯𑀺𑀪𑀚𑀺𑀢𑁆𑀯𑀸 𑀯𑀼𑀢𑁆𑀢𑀢𑁆𑀢𑀸 𑀏𑀯𑀫𑀸𑀳. 𑀬𑀲𑁆𑀫𑀸 𑀏𑀓𑀸𑀤𑀲𑀥𑀸 𑀯𑀼𑀢𑁆𑀢𑀓𑀫𑁆𑀫𑀸𑀦𑀺 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀸𑀦𑀺 𑀯𑀸 𑀲𑀺𑀬𑀼𑀁 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀸𑀦𑀺 𑀯𑀸 𑀅𑀧𑀭𑀧𑀭𑀺𑀬𑀸𑀬𑀯𑁂𑀤𑀦𑀻𑀬𑀸𑀦𑀺 𑀯𑀸, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀢𑀻𑀡𑀺𑀬𑁂𑀯 𑀓𑀫𑁆𑀫𑀸𑀦𑀺 𑀳𑁄𑀦𑁆𑀢𑀻’’𑀢𑀺.

𑀢𑁂𑀲𑀁 𑀲𑀗𑁆𑀓𑀫𑀦𑀁 𑀦𑀢𑁆𑀣𑀻𑀢𑀺 𑀢𑁂𑀲𑀁 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀸𑀤𑀻𑀦𑀁 𑀲𑀗𑁆𑀓𑀫𑀦𑀁 𑀦𑀢𑁆𑀣𑀺, 𑀲𑀗𑁆𑀓𑀫𑀦𑀁 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀸𑀤𑀺𑀪𑀸𑀯𑀸𑀧𑀢𑁆𑀢𑀺. 𑀢𑁂𑀦𑀸𑀳 ‘‘𑀬𑀣𑀸𑀞𑀸𑀦𑁂𑀬𑁂𑀯 𑀢𑀺𑀝𑁆𑀞𑀦𑁆𑀢𑀻’’𑀢𑀺, 𑀅𑀢𑁆𑀢𑀦𑁄 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀸𑀤𑀺𑀝𑁆𑀞𑀸𑀦𑁂𑀬𑁂𑀯 𑀢𑀺𑀝𑁆𑀞𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀫𑁂𑀯 𑀳𑀺 𑀧𑀞𑀫𑀚𑀯𑀦𑀘𑁂𑀢𑀦𑀸, 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀫𑁂𑀯 𑀲𑀢𑁆𑀢𑀫𑀚𑀯𑀦𑀘𑁂𑀢𑀦𑀸, 𑀫𑀚𑁆𑀛𑁂 𑀧𑀜𑁆𑀘 𑀅𑀧𑀭𑀧𑀭𑀺𑀬𑀸𑀬𑀯𑁂𑀤𑀦𑀻𑀬𑀫𑁂𑀯𑀸𑀢𑀺 𑀦𑀢𑁆𑀣𑀺 𑀢𑁂𑀲𑀁 𑀅𑀜𑁆𑀜𑀫𑀜𑁆𑀜𑀁 𑀲𑀗𑁆𑀕𑀳𑁄, 𑀢𑀲𑁆𑀫𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀸𑀤𑀺𑀲𑀪𑀸𑀯𑁂𑀬𑁂𑀯 𑀢𑀺𑀝𑁆𑀞𑀦𑁆𑀢𑀺. 𑀢𑁂𑀦𑁂𑀯 𑀪𑀕𑀯𑀢𑀸 𑁋 ‘‘𑀤𑀺𑀝𑁆𑀞𑁂 𑀯𑀸 𑀥𑀫𑁆𑀫𑁂, 𑀉𑀧𑀧𑀚𑁆𑀚 𑀯𑀸, 𑀅𑀧𑀭𑁂 𑀯𑀸 𑀧𑀭𑀺𑀬𑀸𑀬𑁂’’𑀢𑀺 𑀢𑀬𑁄 𑀯𑀺𑀓𑀧𑁆𑀧𑀸 𑀤𑀲𑁆𑀲𑀺𑀢𑀸. 𑀢𑁂𑀦𑁂𑀯𑀸𑀳 ‘‘𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁 𑀓𑀫𑁆𑀫’’𑀦𑁆𑀢𑀺𑀆𑀤𑀺. 𑀢𑀢𑁆𑀣 ‘‘𑀤𑀺𑀝𑁆𑀞𑁂 𑀯𑀸 𑀥𑀫𑁆𑀫𑁂’’𑀢𑀺 𑀲𑀢𑁆𑀣𑀸 𑀦 𑀯𑀤𑁂𑀬𑁆𑀬𑀸𑀢𑀺 𑀅𑀲𑀢𑀺 𑀦𑀺𑀬𑀸𑀫𑁂 𑀦 𑀯𑀤𑁂𑀬𑁆𑀬. 𑀬𑀲𑁆𑀫𑀸 𑀧𑀦 𑀢𑁂𑀲𑀁 𑀲𑀗𑁆𑀓𑀫𑀦𑀁 𑀦𑀢𑁆𑀣𑀺, 𑀦𑀺𑀬𑀢𑀲𑀪𑀸𑀯𑀸 𑀳𑀺 𑀢𑀸𑀦𑀺, 𑀢𑀲𑁆𑀫𑀸 𑀲𑀢𑁆𑀣𑀸 ‘‘𑀤𑀺𑀝𑁆𑀞𑁂 𑀯𑀸 𑀥𑀫𑁆𑀫𑁂’’𑀢𑀺𑀆𑀤𑀺𑀫𑀯𑁄𑀘.

𑀲𑀼𑀓𑁆𑀓𑀧𑀓𑁆𑀔𑁂𑀢𑀺 ‘‘𑀅𑀮𑁄𑀪𑁄 𑀦𑀺𑀤𑀸𑀦𑀁 𑀓𑀫𑁆𑀫𑀸𑀦𑀁 𑀲𑀫𑀼𑀤𑀬𑀸𑀬𑀸’’𑀢𑀺𑀆𑀤𑀺𑀦𑀸 𑀆𑀕𑀢𑁂 𑀓𑀼𑀲𑀮𑀧𑀓𑁆𑀔𑁂. 𑀦𑀺𑀭𑀼𑀤𑁆𑀥𑁂𑀢𑀺 𑀅𑀭𑀺𑀬𑀫𑀕𑁆𑀕𑀸𑀥𑀺𑀕𑀫𑁂𑀦 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑁂𑀦 𑀦𑀺𑀭𑀼𑀤𑁆𑀥𑁂. 𑀢𑀸𑀮𑀯𑀢𑁆𑀣𑀼 𑀯𑀺𑀬 𑀓𑀢𑀦𑁆𑀢𑀺 𑀬𑀣𑀸 𑀢𑀸𑀮𑁂 𑀙𑀺𑀦𑁆𑀦𑁂 𑀞𑀺𑀢𑀝𑁆𑀞𑀸𑀦𑁂 𑀓𑀺𑀜𑁆𑀘𑀺 𑀦 𑀳𑁄𑀢𑀺, 𑀏𑀯𑀁 𑀓𑀫𑁆𑀫𑁂 𑀧𑀳𑀻𑀦𑁂 𑀓𑀺𑀜𑁆𑀘𑀺 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀢𑀸𑀮𑀯𑀢𑁆𑀣𑀽𑀢𑀺 𑀯𑀸 𑀫𑀢𑁆𑀣𑀓𑀘𑁆𑀙𑀺𑀦𑁆𑀦𑁄 𑀢𑀸𑀮𑁄 𑀯𑀼𑀢𑁆𑀢𑁄 𑀧𑀢𑁆𑀢𑀨𑀮𑀫𑀓𑀼𑀮𑀲𑀽𑀘𑀺𑀆𑀤𑀻𑀦𑀁 𑀅𑀪𑀸𑀯𑀢𑁄. 𑀢𑀢𑁄 𑀏𑀯 𑀲𑁄 𑀅𑀯𑀺𑀭𑀼𑀴𑁆𑀳𑀺𑀥𑀫𑁆𑀫𑁄. 𑀏𑀯𑀁 𑀧𑀳𑀻𑀦𑀓𑀫𑁆𑀫𑁄 𑀲𑀢𑁆𑀢𑀲𑀦𑁆𑀢𑀸𑀦𑁄. 𑀢𑁂𑀦𑀸𑀳 ‘‘𑀫𑀢𑁆𑀣𑀓𑀘𑁆𑀙𑀺𑀦𑁆𑀦𑀢𑀸𑀮𑁄 𑀯𑀺𑀬𑀸’’𑀢𑀺. 𑀅𑀦𑀼𑀅𑀪𑀸𑀯𑀁 𑀓𑀢𑀁 𑀧𑀘𑁆𑀙𑀢𑁄 𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀬𑀸 𑀅𑀪𑀸𑀯𑀢𑁄. 𑀢𑁂𑀦𑀸𑀳 ‘‘𑀬𑀣𑀸’’𑀢𑀺𑀆𑀤𑀺. 𑀅𑀧𑁆𑀧𑀯𑀢𑁆𑀢𑀺𑀓𑀢𑀓𑀸𑀮𑁄 𑀯𑀺𑀬𑀸𑀢𑀺 𑀩𑀻𑀚𑀸𑀦𑀁 𑀲𑀩𑁆𑀩𑀲𑁄 𑀅𑀧𑁆𑀧𑀯𑀢𑁆𑀢𑀺𑀬𑀸 𑀓𑀢𑀓𑀸𑀮𑁄 𑀯𑀺𑀬. 𑀙𑀺𑀦𑁆𑀦𑀫𑀽𑀮𑀓𑀸𑀦𑀦𑁆𑀢𑀺 𑀓𑀺𑀮𑁂𑀲𑀫𑀽𑀮𑀲𑁆𑀲 𑀲𑀩𑁆𑀩𑀲𑁄 𑀙𑀺𑀦𑁆𑀦𑀢𑁆𑀢𑀸 𑀙𑀺𑀦𑁆𑀦𑀫𑀽𑀮𑀓𑀸𑀦𑀁. 𑀓𑀺𑀮𑁂𑀲𑀸 𑀳𑀺 𑀔𑀦𑁆𑀥𑀸𑀦𑀁 𑀫𑀽𑀮𑀸𑀦𑀺.

𑀯𑁂𑀤𑀦𑀻𑀬𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀜𑁆𑀜𑀁 𑀯𑀢𑁆𑀣𑀼 𑀦𑀢𑁆𑀣𑀻𑀢𑀺 𑀅𑀜𑁆𑀜𑀁 𑀅𑀥𑀺𑀝𑁆𑀞𑀸𑀦𑀁 𑀦𑀢𑁆𑀣𑀺. 𑀲𑀼𑀕𑀢𑀺𑀲𑀜𑁆𑀜𑀺𑀢𑀸𑀧𑀺 𑀳𑁂𑀝𑁆𑀞𑀺𑀫𑀦𑁆𑀢𑁂𑀦 𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑁄 𑀅𑀦𑀧𑀕𑀢𑀢𑁆𑀢𑀸 𑀤𑀼𑀕𑁆𑀕𑀢𑀺𑀬𑁄 𑀏𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀲𑀩𑁆𑀩𑀸 𑀤𑀼𑀕𑁆𑀕𑀢𑀺𑀬𑁄’’𑀢𑀺, 𑀏𑀯𑀁 𑀯𑀸 𑀏𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀮𑁄𑀪𑁄 𑀏𑀢𑀲𑁆𑀲 𑀓𑀸𑀭𑀡𑀪𑀽𑀢𑁄 𑀅𑀢𑁆𑀣𑀻𑀢𑀺 𑀮𑁄𑀪𑀁, 𑀮𑁄𑀪𑀦𑀺𑀫𑀺𑀢𑁆𑀢𑀁 𑀓𑀫𑁆𑀫𑀁. 𑀢𑀣𑀸 𑀤𑁄𑀲𑀦𑁆𑀢𑀺 𑀏𑀢𑁆𑀣𑀸𑀧𑀺. 𑀢𑁂𑀦𑀸𑀳 ‘‘𑀮𑁄𑀪𑀤𑁄𑀲𑀲𑀻𑀲𑁂𑀦 𑀮𑁄𑀪𑀚𑀜𑁆𑀘 𑀤𑁄𑀲𑀚𑀜𑁆𑀘 𑀓𑀫𑁆𑀫𑀫𑁂𑀯 𑀦𑀺𑀤𑁆𑀤𑀺𑀝𑁆𑀞’’𑀦𑁆𑀢𑀺. 𑀯𑀝𑁆𑀝𑀯𑀺𑀯𑀝𑁆𑀝𑀦𑁆𑀢𑀺 𑀯𑀝𑁆𑀝𑀜𑁆𑀘 𑀯𑀺𑀯𑀝𑁆𑀝𑀜𑁆𑀘.

𑀦𑀺𑀤𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀳𑀢𑁆𑀣𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁫. 𑀧𑀜𑁆𑀘𑀫𑁂 𑀆𑀴𑀯𑀺𑀬𑀦𑁆𑀢𑀺 𑀆𑀴𑀯𑀺𑀭𑀝𑁆𑀞𑁂, 𑀦 𑀆𑀴𑀯𑀺𑀦𑀕𑀭𑁂. 𑀢𑁂𑀦𑀸𑀳 ‘‘𑀆𑀴𑀯𑀺𑀬𑀦𑁆𑀢𑀺 𑀆𑀴𑀯𑀺𑀭𑀝𑁆𑀞𑁂’’𑀢𑀺. 𑀅𑀣𑀸𑀢𑀺 𑀅𑀯𑀺𑀘𑁆𑀙𑁂𑀤𑀢𑁆𑀣𑁂 𑀦𑀺𑀧𑀸𑀢𑁄. 𑀢𑀢𑁆𑀣 𑀪𑀕𑀯𑀢𑁄 𑀦𑀺𑀲𑀚𑁆𑀚𑀸𑀬 𑀅𑀯𑀺𑀘𑁆𑀙𑀺𑀦𑁆𑀦𑀸𑀬 𑀏𑀯𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀏𑀯’’𑀦𑁆𑀢𑀺𑀆𑀤𑀺. 𑀳𑀢𑁆𑀣𑀢𑁄 𑀳𑀢𑁆𑀣𑀁 𑀕𑀢𑀢𑁆𑀢𑀸𑀢𑀺 𑀆𑀴𑀯𑀓𑀲𑁆𑀲 𑀬𑀓𑁆𑀔𑀲𑁆𑀲 𑀳𑀢𑁆𑀣𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀳𑀢𑁆𑀣𑀁, 𑀢𑀢𑁄 𑀭𑀸𑀚𑀧𑀼𑀭𑀺𑀲𑀸𑀦𑀁 𑀳𑀢𑁆𑀣𑀁 𑀕𑀢𑀢𑁆𑀢𑀸.

𑀫𑀸𑀖𑀲𑁆𑀲𑀸𑀢𑀺 𑀫𑀸𑀖𑀫𑀸𑀲𑀲𑁆𑀲. 𑀏𑀯𑀁 𑀨𑀕𑁆𑀕𑀼𑀦𑀲𑁆𑀲𑀸𑀢𑀺 𑀏𑀢𑁆𑀣𑀸𑀧𑀺. 𑀔𑀼𑀭𑀦𑁆𑀢𑀭𑁂𑀳𑀺 𑀓𑀤𑁆𑀤𑀫𑁄 𑀉𑀕𑁆𑀕𑀦𑁆𑀢𑁆𑀯𑀸 𑀢𑀺𑀝𑁆𑀞𑀢𑀻𑀢𑀺 𑀓𑀤𑁆𑀤𑀫𑁄 𑀔𑀼𑀭𑀦𑁆𑀢𑀭𑁂𑀳𑀺 𑀉𑀕𑁆𑀕𑀦𑁆𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀘𑀢𑀽𑀳𑀺 𑀤𑀺𑀲𑀸𑀳𑀺 𑀯𑀸𑀬𑀦𑁆𑀢𑁄 𑀯𑀸𑀢𑁄 𑀯𑁂𑀭𑀫𑁆𑀪𑁄𑀢𑀺 𑀯𑀼𑀘𑁆𑀘𑀢𑀺 𑀯𑁂𑀭𑀫𑁆𑀪𑀯𑀸𑀢𑀲𑀤𑀺𑀲𑀢𑁆𑀢𑀸.

𑀧𑀜𑁆𑀘𑀤𑁆𑀯𑀸𑀭𑀓𑀸𑀬𑀦𑁆𑀢𑀺 𑀧𑀜𑁆𑀘𑀤𑁆𑀯𑀸𑀭𑀸𑀦𑀼𑀲𑀸𑀭𑁂𑀦 𑀧𑀯𑀢𑁆𑀢𑀁 𑀯𑀺𑀜𑁆𑀜𑀸𑀡𑀓𑀸𑀬𑀁. 𑀔𑁄𑀪𑀬𑀫𑀸𑀦𑀸𑀢𑀺 𑀓𑀺𑀮𑁂𑀲𑀔𑁄𑀪𑀯𑀲𑁂𑀦 𑀔𑁄𑀪𑀬𑀫𑀸𑀦𑀸 𑀘𑀺𑀢𑁆𑀢𑀁 𑀲𑀗𑁆𑀔𑁄𑀪𑀁 𑀓𑀭𑁄𑀦𑁆𑀢𑀸. 𑀘𑁂𑀢𑀲𑀺𑀓𑀸𑀢𑀺 𑀫𑀦𑁄𑀤𑁆𑀯𑀸𑀭𑀺𑀓𑀘𑀺𑀢𑁆𑀢𑀲𑀦𑁆𑀦𑀺𑀲𑁆𑀲𑀺𑀢𑀸. 𑀢𑁂𑀦𑀸𑀳 ‘‘𑀫𑀦𑁄𑀤𑁆𑀯𑀸𑀭𑀁 𑀔𑁄𑀪𑀬𑀫𑀸𑀦𑀸’’𑀢𑀺. 𑀲𑁄 𑀭𑀸𑀕𑁄𑀢𑀺 𑀢𑀁𑀲𑀤𑀺𑀲𑁄 𑀭𑀸𑀕𑁄. 𑀪𑀯𑀢𑀺 𑀳𑀺 𑀢𑀁𑀲𑀤𑀺𑀲𑁂 𑀢𑀩𑁆𑀩𑁄𑀳𑀸𑀭𑁄 𑀬𑀣𑀸 ‘‘𑀲𑀸 𑀏𑀯 𑀢𑀺𑀢𑁆𑀢𑀺𑀭𑀺𑀓𑀸, 𑀢𑀸𑀦𑀺 𑀏𑀯 𑀑𑀲𑀥𑀸𑀦𑀻’’𑀢𑀺. 𑀬𑀸𑀤𑀺𑀲𑁄 𑀳𑀺 𑀏𑀓𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀉𑀧𑁆𑀧𑀚𑁆𑀚𑀦𑀓𑀭𑀸𑀕𑁄, 𑀢𑀸𑀤𑀺𑀲𑁄 𑀏𑀯 𑀢𑀢𑁄 𑀅𑀜𑁆𑀜𑀲𑁆𑀲 𑀭𑀸𑀕𑀪𑀸𑀯𑀲𑀸𑀫𑀜𑁆𑀜𑀢𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀣𑀸𑀭𑀽𑀧𑁄 𑀭𑀸𑀕𑁄’’𑀢𑀺𑀆𑀤𑀺. 𑀇𑀘𑁆𑀙𑀺𑀢𑀸𑀮𑀸𑀪𑁂𑀦 𑀭𑀚𑀦𑀻𑀬𑁂𑀲𑀼 𑀯𑀸 𑀦𑀺𑀭𑀼𑀤𑁆𑀥𑁂𑀲𑀼 𑀯𑀢𑁆𑀣𑀽𑀲𑀼 𑀤𑁄𑀫𑀦𑀲𑁆𑀲𑀼𑀧𑁆𑀧𑀢𑁆𑀢𑀺𑀬𑀸 𑀤𑁄𑀲𑀧𑀭𑀺𑀴𑀸𑀳𑀸𑀦𑀁 𑀲𑀫𑁆𑀪𑀯𑁄 𑀯𑁂𑀤𑀺𑀢𑀩𑁆𑀩𑁄.

𑀦 𑀮𑀺𑀫𑁆𑀧𑀢𑀺 𑀅𑀦𑀼𑀧𑀮𑀺𑀢𑁆𑀢𑀘𑀺𑀢𑁆𑀢𑀢𑁆𑀢𑀸. 𑀲𑀻𑀢𑀺𑀪𑀽𑀢𑁄 𑀦𑀺𑀩𑁆𑀩𑀼𑀢𑀲𑀩𑁆𑀩𑀧𑀭𑀺𑀴𑀸𑀳𑀢𑁆𑀢𑀸. 𑀆𑀲𑀢𑁆𑀢𑀺𑀬𑁄 𑀯𑀼𑀘𑁆𑀘𑀦𑁆𑀢𑀺 𑀢𑀡𑁆𑀳𑀸𑀬𑁄 𑀢𑀢𑁆𑀣 𑀢𑀢𑁆𑀣 𑀆𑀲𑀜𑁆𑀚𑀦𑀝𑁆𑀞𑁂𑀦. 𑀤𑀭𑀣𑀦𑁆𑀢𑀺 𑀧𑀭𑀺𑀴𑀸𑀳𑀚𑀸𑀢𑀁. 𑀘𑁂𑀢𑀲𑁄𑀢𑀺 𑀲𑀸𑀫𑀺𑀯𑀘𑀦𑀁.

𑀳𑀢𑁆𑀣𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀤𑁂𑀯𑀤𑀽𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁬. 𑀙𑀝𑁆𑀞𑁂 𑀤𑁂𑀯𑀤𑀽𑀢𑀸𑀦𑀻𑀢𑀺 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑀁 𑀓𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀤𑁂𑀯𑀤𑀽𑀢𑀸’’𑀢𑀺, 𑀉𑀪𑀬𑀮𑀺𑀗𑁆𑀕𑀁 𑀯𑀸 𑀏𑀢𑀁 𑀧𑀤𑀁, 𑀢𑀲𑁆𑀫𑀸 𑀦𑀧𑀼𑀁𑀲𑀓𑀮𑀺𑀗𑁆𑀕𑀯𑀲𑁂𑀦 𑀧𑀸𑀴𑀺𑀬𑀁 𑀯𑀼𑀢𑁆𑀢𑀲𑁆𑀲 𑀧𑀼𑀮𑁆𑀮𑀺𑀗𑁆𑀕𑀯𑀲𑁂𑀦 𑀅𑀢𑁆𑀣𑀤𑀲𑁆𑀲𑀦𑀁 𑀓𑀢𑀁. 𑀤𑁂𑀯𑁄𑀢𑀺 𑀫𑀘𑁆𑀘𑀽𑀢𑀺 𑀅𑀪𑀺𑀪𑀯𑀦𑀝𑁆𑀞𑁂𑀦 𑀲𑀢𑁆𑀢𑀸𑀦𑀁 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑀸𑀧𑀦𑀢𑁄 𑀫𑀘𑁆𑀘𑀼𑀭𑀸𑀚𑀸 ‘‘𑀤𑁂𑀯𑁄’’𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸 𑀳𑀺 𑀤𑁂𑀯𑁄 𑀧𑀓𑀢𑀺𑀲𑀢𑁆𑀢𑁂 𑀅𑀪𑀺𑀪𑀯𑀢𑀺, 𑀏𑀯𑀁 𑀫𑀘𑁆𑀘𑀼 𑀲𑀩𑁆𑀩𑀲𑀢𑁆𑀢𑁂 𑀅𑀪𑀺𑀪𑀯𑀢𑀺, 𑀢𑀲𑁆𑀫𑀸 𑀤𑁂𑀯𑁄 𑀯𑀺𑀬𑀸𑀢𑀺 𑀤𑁂𑀯𑁄. ‘‘𑀢𑀲𑁆𑀲 𑀤𑀽𑀢𑀸’’𑀢𑀺 𑀯𑀢𑁆𑀯𑀸 𑀇𑀤𑀸𑀦𑀺𑀲𑁆𑀲 𑀤𑀽𑀢𑁂 𑀢𑁂𑀲𑀁 𑀤𑀽𑀢𑀪𑀸𑀯𑀜𑁆𑀘 𑀯𑀺𑀪𑀸𑀯𑁂𑀢𑀼𑀁 ‘‘𑀚𑀺𑀡𑁆𑀡𑀩𑁆𑀬𑀸𑀥𑀺𑀫𑀢𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑁂𑀦 𑀘𑁄𑀤𑀦𑀢𑁆𑀣𑁂𑀦 𑀤𑁂𑀯𑀲𑁆𑀲 𑀤𑀽𑀢𑀸 𑀯𑀺𑀬𑀸𑀢𑀺 𑀤𑁂𑀯𑀤𑀽𑀢𑀸𑀢𑀺 𑀤𑀲𑁆𑀲𑁂𑀢𑀺. ‘‘𑀅𑀳𑀁 𑀅𑀲𑀼𑀓𑀁 𑀧𑀫𑀤𑁆𑀤𑀺𑀢𑀼𑀁 𑀆𑀕𑀫𑀺𑀲𑁆𑀲𑀸𑀫𑀺, 𑀢𑀼𑀯𑀁 𑀢𑀲𑁆𑀲 𑀓𑁂𑀲𑁂 𑀕𑀳𑁂𑀢𑁆𑀯𑀸 𑀫𑀸 𑀯𑀺𑀲𑁆𑀲𑀚𑁆𑀚𑁂𑀳𑀻’’𑀢𑀺 𑀫𑀘𑁆𑀘𑀼𑀤𑁂𑀯𑀲𑁆𑀲 𑀆𑀡𑀸𑀓𑀭𑀸 𑀤𑀽𑀢𑀸 𑀯𑀺𑀬𑀸𑀢𑀺 𑀳𑀺 𑀤𑀽𑀢𑀸𑀢𑀺 𑀯𑀼𑀘𑁆𑀘𑀦𑁆𑀢𑀺.

𑀇𑀤𑀸𑀦𑀺 𑀲𑀤𑁆𑀥𑀸𑀢𑀩𑁆𑀩𑀝𑁆𑀞𑁂𑀦 𑀤𑁂𑀯𑀸 𑀯𑀺𑀬 𑀤𑀽𑀢𑀸𑀢𑀺 𑀤𑁂𑀯𑀤𑀽𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀤𑁂𑀯𑀸 𑀯𑀺𑀬 𑀤𑀽𑀢𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀮𑀗𑁆𑀓𑀢𑀧𑁆𑀧𑀝𑀺𑀬𑀢𑁆𑀢𑀸𑀬𑀸𑀢𑀺 𑀇𑀤𑀁 𑀅𑀢𑁆𑀢𑀦𑁄 𑀤𑀺𑀩𑁆𑀩𑀸𑀦𑀼𑀪𑀸𑀯𑀁 𑀆𑀯𑀺𑀓𑀢𑁆𑀯𑀸 𑀞𑀺𑀢𑀸𑀬𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀤𑁂𑀯𑀢𑀸𑀬 𑀩𑁆𑀬𑀸𑀓𑀭𑀡𑀲𑀤𑀺𑀲𑀫𑁂𑀯 𑀳𑁄𑀢𑀺 𑀦 𑀘𑀺𑀭𑀲𑁆𑀲𑁂𑀯 𑀚𑀭𑀸𑀩𑁆𑀬𑀸𑀥𑀺𑀫𑀭𑀡𑀲𑁆𑀲 𑀲𑀫𑁆𑀪𑀯𑀢𑁄. 𑀯𑀺𑀲𑀼𑀤𑁆𑀥𑀺𑀤𑁂𑀯𑀸𑀦𑀦𑁆𑀢𑀺 𑀔𑀻𑀡𑀸𑀲𑀯𑀩𑁆𑀭𑀳𑁆𑀫𑀸𑀦𑀁. 𑀢𑁂 𑀳𑀺 𑀘𑀭𑀺𑀫𑀪𑀯𑁂 𑀩𑁄𑀥𑀺𑀲𑀢𑁆𑀢𑀸𑀦𑀁 𑀚𑀺𑀡𑁆𑀡𑀸𑀤𑀺𑀪𑁂𑀤𑀁 𑀤𑀲𑁆𑀲𑁂𑀦𑁆𑀢𑀺, 𑀢𑀲𑁆𑀫𑀸 𑀅𑀦𑁆𑀢𑀺𑀫𑀪𑀯𑀺𑀓𑀩𑁄𑀥𑀺𑀲𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀺𑀤𑁂𑀯𑁂𑀳𑀺 𑀉𑀧𑀝𑁆𑀞𑀸𑀧𑀺𑀢𑀪𑀸𑀯𑀁 𑀉𑀧𑀸𑀤𑀸𑀬 𑀢𑀤𑀜𑁆𑀜𑁂𑀲𑀫𑁆𑀧𑀺 𑀢𑁂𑀳𑀺 𑀅𑀦𑀼𑀧𑀝𑁆𑀞𑀸𑀧𑀺𑀢𑀸𑀦𑀫𑁆𑀧𑀺 𑀢𑀣𑀸 𑀯𑁄𑀳𑀭𑀺𑀢𑀩𑁆𑀩𑀢𑀸 𑀧𑀭𑀺𑀬𑀸𑀬𑀲𑀺𑀤𑁆𑀥𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀤𑀺𑀲𑁆𑀯𑀸𑀯𑀸𑀢𑀺 𑀯𑀺𑀲𑀼𑀤𑁆𑀥𑀺𑀤𑁂𑀯𑁂𑀳𑀺 𑀤𑀲𑁆𑀲𑀺𑀢𑁂 𑀤𑀺𑀲𑁆𑀯𑀸𑀯. 𑀢𑀢𑁄𑀬𑁂𑀯 𑀳𑀺 𑀢𑁂 𑀯𑀺𑀲𑀼𑀤𑁆𑀥𑀺𑀤𑁂𑀯𑀸𑀦𑀁 𑀤𑀽𑀢𑀸 𑀯𑀼𑀢𑁆𑀢𑀸.

𑀓𑀲𑁆𑀫𑀸 𑀆𑀭𑀤𑁆𑀥𑀦𑁆𑀢𑀺 𑀓𑁂𑀯𑀮𑀁 𑀤𑁂𑀯𑀤𑀽𑀢𑁂 𑀏𑀯 𑀲𑀭𑀽𑀧𑀢𑁄 𑀅𑀤𑀲𑁆𑀲𑁂𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀤𑁂𑀯𑀸𑀦𑀁 𑀤𑀽𑀢𑀸𑀦𑀁 𑀤𑀲𑁆𑀲𑀦𑀽𑀧𑀸𑀬𑀢𑁆𑀢𑀸 𑀢𑀣𑀸 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀤𑁂𑀯𑀤𑀽𑀢𑀸…𑀧𑁂… 𑀲𑀫𑀦𑀼𑀬𑀼𑀜𑁆𑀚𑀢𑀻’’𑀢𑀺 𑀆𑀳. 𑀢𑀢𑁆𑀣 𑀤𑁂𑀯𑀤𑀽𑀢𑀸…𑀧𑁂… 𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀤𑁂𑀯𑀤𑀽𑀢𑀸𑀦𑀁 𑀅𑀦𑀼𑀬𑀼𑀜𑁆𑀚𑀦𑀝𑁆𑀞𑀸𑀦𑀽𑀧𑀕𑀲𑁆𑀲 𑀓𑀫𑁆𑀫𑀲𑁆𑀲 𑀤𑀲𑁆𑀲𑀦𑀢𑁆𑀣𑀁.

𑀏𑀓𑀘𑁆𑀘𑁂 𑀣𑁂𑀭𑀸𑀢𑀺 𑀅𑀦𑁆𑀥𑀓𑀸𑀤𑀺𑀓𑁂 𑀯𑀺𑀜𑁆𑀜𑀸𑀡𑀯𑀸𑀤𑀺𑀦𑁄 𑀘 𑀲𑀦𑁆𑀥𑀸𑀬 𑀯𑀤𑀢𑀺. 𑀦𑁂𑀭𑀬𑀺𑀓𑁂 𑀦𑀺𑀭𑀬𑁂 𑀧𑀸𑀮𑁂𑀦𑁆𑀢𑀺 𑀢𑀢𑁄 𑀦𑀺𑀕𑁆𑀕𑀦𑁆𑀢𑀼𑀁 𑀅𑀧𑁆𑀧𑀤𑀸𑀦𑀯𑀲𑁂𑀦 𑀭𑀓𑁆𑀔𑀦𑁆𑀢𑀻𑀢𑀺 𑀦𑀺𑀭𑀬𑀧𑀸𑀮𑀸. 𑀅𑀣 𑀯𑀸 𑀦𑀺𑀭𑀬𑀧𑀸𑀮𑀢𑀸𑀬 𑀦𑁂𑀭𑀬𑀺𑀓𑀸𑀦𑀁 𑀦𑀺𑀭𑀬𑀤𑀼𑀓𑁆𑀔𑁂𑀦 𑀧𑀭𑀺𑀬𑁄𑀦𑀤𑁆𑀥𑀸𑀬 𑀅𑀮𑀁 𑀲𑀫𑀢𑁆𑀣𑀸𑀢𑀺 𑀦𑀺𑀭𑀬𑀧𑀸𑀮𑀸. 𑀢𑀦𑁆𑀢𑀺 ‘‘𑀦𑀢𑁆𑀣𑀺 𑀦𑀺𑀭𑀬𑀧𑀸𑀮𑀸’’𑀢𑀺 𑀯𑀘𑀦𑀁. 𑀧𑀝𑀺𑀲𑁂𑀥𑀺𑀢𑀫𑁂𑀯𑀸𑀢𑀺 ‘‘𑀅𑀢𑁆𑀣𑀺 𑀦𑀺𑀭𑀬𑁂𑀲𑀼 𑀦𑀺𑀭𑀬𑀧𑀸𑀮𑀸 𑀅𑀢𑁆𑀣𑀺 𑀘 𑀓𑀸𑀭𑀡𑀺𑀓𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀪𑀺𑀥𑀫𑁆𑀫𑁂 (𑀓𑀣𑀸. 𑁮𑁬𑁬) 𑀧𑀝𑀺𑀲𑁂𑀥𑀺𑀢𑀫𑁂𑀯. 𑀬𑀤𑀺 𑀦𑀺𑀭𑀬𑀧𑀸𑀮𑀸 𑀦𑀸𑀫 𑀦 𑀲𑀺𑀬𑀼𑀁, 𑀓𑀫𑁆𑀫𑀓𑀸𑀭𑀡𑀸𑀧𑀺 𑀦 𑀪𑀯𑁂𑀬𑁆𑀬. 𑀲𑀢𑀺 𑀳𑀺 𑀓𑀸𑀭𑀡𑀺𑀓𑁂 𑀓𑀫𑁆𑀫𑀓𑀸𑀭𑀡𑀸𑀬 𑀪𑀯𑀺𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀬𑀣𑀸 𑀳𑀻’’𑀢𑀺𑀆𑀤𑀺. 𑀏𑀢𑁆𑀣𑀸𑀳 𑁋 ‘‘𑀓𑀺𑀁 𑀧𑀦𑁂𑀢𑁂 𑀦𑀺𑀭𑀬𑀧𑀸𑀮𑀸 𑀦𑁂𑀭𑀬𑀺𑀓𑀸, 𑀉𑀤𑀸𑀳𑀼 𑀅𑀦𑁂𑀭𑀬𑀺𑀓𑀸’’𑀢𑀺. 𑀓𑀺𑀜𑁆𑀘𑁂𑀢𑁆𑀣 𑁋 𑀬𑀤𑀺 𑀢𑀸𑀯 𑀦𑁂𑀭𑀬𑀺𑀓𑀸 𑀦𑀺𑀭𑀬𑀲𑀁𑀯𑀢𑁆𑀢𑀦𑀺𑀬𑁂𑀦 𑀓𑀫𑁆𑀫𑁂𑀦 𑀦𑀺𑀩𑁆𑀩𑀢𑁆𑀢𑀸, 𑀲𑀬𑀫𑁆𑀧𑀺 𑀦𑀺𑀭𑀬𑀤𑀼𑀓𑁆𑀔𑀁 𑀧𑀘𑁆𑀘𑀦𑀼𑀪𑀯𑁂𑀬𑁆𑀬𑀼𑀁, 𑀢𑀣𑀸 𑀲𑀢𑀺 𑀅𑀜𑁆𑀜𑁂𑀲𑀁 𑀦𑁂𑀭𑀬𑀺𑀓𑀸𑀦𑀁 𑀖𑀸𑀢𑀦𑀸𑀬 𑀅𑀲𑀫𑀢𑁆𑀣𑀸 𑀲𑀺𑀬𑀼𑀁, ‘‘𑀇𑀫𑁂 𑀦𑁂𑀭𑀬𑀺𑀓𑀸 𑀇𑀫𑁂 𑀦𑀺𑀭𑀬𑀧𑀸𑀮𑀸’’𑀢𑀺 𑀯𑀯𑀢𑁆𑀣𑀸𑀦𑀜𑁆𑀘 𑀦 𑀲𑀺𑀬𑀸. 𑀬𑁂 𑀘 𑀬𑁂 𑀖𑀸𑀢𑁂𑀦𑁆𑀢𑀺, 𑀢𑁂𑀳𑀺 𑀲𑀫𑀸𑀦𑀭𑀽𑀧𑀩𑀮𑀧𑁆𑀧𑀫𑀸𑀡𑁂𑀳𑀺 𑀇𑀢𑀭𑁂𑀲𑀁 𑀪𑀬𑀲𑀦𑁆𑀢𑀸𑀲𑀸 𑀦 𑀲𑀺𑀬𑀼𑀁. 𑀅𑀣 𑀅𑀦𑁂𑀭𑀬𑀺𑀓𑀸, 𑀦𑁂𑀲𑀁 𑀢𑀢𑁆𑀣 𑀓𑀣𑀁 𑀲𑀫𑁆𑀪𑀯𑁄𑀢𑀺? 𑀯𑀼𑀘𑁆𑀘𑀢𑁂 𑁋 𑀅𑀦𑁂𑀭𑀬𑀺𑀓𑀸 𑀦𑀺𑀭𑀬𑀧𑀸𑀮𑀸 𑀅𑀦𑀺𑀭𑀬𑀕𑀢𑀺𑀲𑀁𑀯𑀢𑁆𑀢𑀦𑀺𑀬𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀺𑀢𑁄. 𑀦𑀺𑀭𑀬𑀽𑀧𑀧𑀢𑁆𑀢𑀺𑀲𑀁𑀯𑀢𑁆𑀢𑀦𑀺𑀬𑀓𑀫𑁆𑀫𑀢𑁄 𑀳𑀺 𑀅𑀜𑁆𑀜𑁂𑀦𑁂𑀯 𑀓𑀫𑁆𑀫𑀼𑀦𑀸 𑀢𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀭𑀓𑁆𑀔𑀲𑀚𑀸𑀢𑀺𑀓𑀢𑁆𑀢𑀸. 𑀢𑀣𑀸 𑀳𑀺 𑀯𑀤𑀦𑁆𑀢𑀺 𑀲𑀩𑁆𑀩𑀢𑁆𑀣𑀺𑀯𑀸𑀤𑀺𑀦𑁄 𑁋

‘‘𑀓𑁄𑀥𑀸 𑀓𑀼𑀭𑀽𑀭𑀓𑀫𑁆𑀫𑀦𑁆𑀢𑀸, 𑀧𑀸𑀧𑀸𑀪𑀺𑀭𑀼𑀘𑀺𑀦𑁄 𑀢𑀣𑀸;

𑀤𑀼𑀓𑁆𑀔𑀺𑀢𑁂𑀲𑀼 𑀘 𑀦𑀦𑁆𑀤𑀦𑁆𑀢𑀺, 𑀚𑀸𑀬𑀦𑁆𑀢𑀺 𑀬𑀫𑀭𑀓𑁆𑀔𑀲𑀸’’𑀢𑀺.

𑀢𑀢𑁆𑀣 𑀬𑀤𑁂𑀓𑁂 𑀯𑀤𑀦𑁆𑀢𑀺 ‘‘𑀬𑀸𑀢𑀦𑀸𑀤𑀼𑀓𑁆𑀔𑀁 𑀧𑀝𑀺𑀲𑀁𑀯𑁂𑀤𑁂𑀬𑁆𑀬𑀼𑀁, 𑀅𑀣 𑀯𑀸 𑀅𑀜𑁆𑀜𑀫𑀜𑁆𑀜𑀁 𑀖𑀸𑀢𑁂𑀬𑁆𑀬𑀼’’𑀦𑁆𑀢𑀺𑀆𑀤𑀺, 𑀢𑀬𑀺𑀤𑀁 𑀅𑀲𑀸𑀭𑀁 𑀦𑀺𑀭𑀬𑀧𑀸𑀮𑀸𑀦𑀁 𑀦𑁂𑀭𑀬𑀺𑀓𑀪𑀸𑀯𑀲𑁆𑀲𑁂𑀯 𑀅𑀪𑀸𑀯𑀢𑁄. 𑀬𑀤𑀺𑀧𑀺 𑀅𑀦𑁂𑀭𑀬𑀺𑀓𑀸 𑀦𑀺𑀭𑀬𑀧𑀸𑀮𑀸, 𑀅𑀬𑁄𑀫𑀬𑀸𑀬 𑀧𑀦 𑀆𑀤𑀺𑀢𑁆𑀢𑀸𑀬 𑀲𑀫𑁆𑀧𑀚𑁆𑀚𑀮𑀺𑀢𑀸𑀬 𑀲𑀚𑁄𑀢𑀺𑀪𑀽𑀢𑀸𑀬 𑀦𑀺𑀭𑀬𑀪𑀽𑀫𑀺𑀬𑀸 𑀧𑀭𑀺𑀓𑁆𑀓𑀫𑀫𑀸𑀦𑀸 𑀓𑀣𑀁 𑀤𑀸𑀳𑀤𑀼𑀓𑁆𑀔𑀁 𑀦𑀸𑀦𑀼𑀪𑀯𑀦𑁆𑀢𑀻𑀢𑀺? 𑀓𑀫𑁆𑀫𑀸𑀦𑀼𑀪𑀸𑀯𑀢𑁄. 𑀬𑀣𑀸 𑀳𑀺 𑀇𑀤𑁆𑀥𑀺𑀫𑀦𑁆𑀢𑁄 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀸𑀤𑀬𑁄 𑀦𑁂𑀭𑀬𑀺𑀓𑁂 𑀅𑀦𑀼𑀓𑀫𑁆𑀧𑀦𑁆𑀢𑀸 𑀇𑀤𑁆𑀥𑀺𑀩𑀮𑁂𑀦 𑀦𑀺𑀭𑀬𑀪𑀽𑀫𑀺𑀁 𑀉𑀧𑀕𑀢𑀸 𑀤𑀸𑀳𑀤𑀼𑀓𑁆𑀔𑁂𑀦 𑀦 𑀩𑀸𑀥𑀻𑀬𑀦𑁆𑀢𑀺, 𑀏𑀯𑀁 𑀲𑀫𑁆𑀧𑀤𑀫𑀺𑀤𑀁 𑀤𑀝𑁆𑀞𑀩𑁆𑀩𑀁.

𑀇𑀤𑁆𑀥𑀺𑀯𑀺𑀲𑀬𑀲𑁆𑀲 𑀅𑀘𑀺𑀦𑁆𑀢𑁂𑀬𑁆𑀬𑀪𑀸𑀯𑀢𑁄𑀢𑀺 𑀘𑁂? 𑀇𑀤𑀫𑁆𑀧𑀺 𑀢𑀁𑀲𑀫𑀸𑀦𑀁 𑀓𑀫𑁆𑀫𑀯𑀺𑀧𑀸𑀓𑀲𑁆𑀲 𑀅𑀘𑀺𑀦𑁆𑀢𑁂𑀬𑁆𑀬𑀪𑀸𑀯𑀢𑁄. 𑀢𑀣𑀸𑀭𑀽𑀧𑁂𑀦 𑀳𑀺 𑀓𑀫𑁆𑀫𑀼𑀦𑀸 𑀢𑁂 𑀦𑀺𑀩𑁆𑀩𑀢𑁆𑀢𑀸 𑀬𑀣𑀸 𑀦𑀺𑀭𑀬𑀤𑀼𑀓𑁆𑀔𑁂𑀦 𑀅𑀩𑀸𑀥𑀺𑀢𑀸 𑀏𑀯 𑀳𑀼𑀢𑁆𑀯𑀸 𑀦𑁂𑀭𑀬𑀺𑀓𑁂 𑀖𑀸𑀢𑁂𑀦𑁆𑀢𑀺, 𑀦 𑀘𑁂𑀢𑁆𑀢𑀓𑁂𑀦 𑀩𑀸𑀳𑀺𑀭𑀯𑀺𑀲𑀬𑀸𑀪𑀸𑀯𑁄 𑀬𑀼𑀚𑁆𑀚𑀢𑀺 𑀇𑀝𑁆𑀞𑀸𑀦𑀺𑀝𑁆𑀞𑀢𑀸𑀬 𑀧𑀘𑁆𑀘𑁂𑀓𑀁 𑀤𑁆𑀯𑀸𑀭𑀧𑀼𑀭𑀺𑀲𑁂𑀲𑀼𑀧𑀺 𑀯𑀺𑀪𑀢𑁆𑀢𑀲𑀪𑀸𑀯𑀢𑁆𑀢𑀸. 𑀢𑀣𑀸 𑀳𑀺 𑀏𑀓𑀘𑁆𑀘𑀲𑁆𑀲 𑀤𑁆𑀯𑀸𑀭𑀲𑁆𑀲 𑀧𑀼𑀭𑀺𑀲𑀲𑁆𑀲 𑀘 𑀇𑀝𑁆𑀞𑀁 𑀏𑀓𑀘𑁆𑀘𑀲𑁆𑀲 𑀅𑀦𑀺𑀝𑁆𑀞𑀁, 𑀏𑀓𑀘𑁆𑀘𑀲𑁆𑀲 𑀘 𑀅𑀦𑀺𑀝𑁆𑀞𑀁 𑀏𑀓𑀘𑁆𑀘𑀲𑁆𑀲 𑀇𑀝𑁆𑀞𑀁 𑀳𑁄𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀬𑀤𑁂𑀓𑁂 𑀯𑀤𑀦𑁆𑀢𑀺 ‘‘𑀦𑀢𑁆𑀣𑀺 𑀓𑀫𑁆𑀫𑀯𑀲𑁂𑀦 𑀢𑁂𑀚𑀲𑀸 𑀧𑀭𑀽𑀧𑀢𑀸𑀧𑀦’’𑀦𑁆𑀢𑀺𑀆𑀤𑀺, 𑀢𑀤𑀧𑀸𑀳𑀢𑀁 𑀳𑁄𑀢𑀺. 𑀬𑀁 𑀧𑀦 𑀯𑀤𑀦𑁆𑀢𑀺 ‘‘𑀅𑀦𑁂𑀭𑀬𑀺𑀓𑀸𑀦𑀁 𑀢𑁂𑀲𑀁 𑀓𑀣𑀁 𑀢𑀢𑁆𑀣 𑀲𑀫𑁆𑀪𑀯𑁄’’𑀢𑀺 𑀦𑀺𑀭𑀬𑁂 𑀦𑁂𑀭𑀬𑀺𑀓𑀸𑀦𑀁 𑀬𑀸𑀢𑀦𑀸𑀲𑀩𑁆𑀪𑀸𑀯𑀪𑀸𑀯𑀢𑁄. 𑀦𑁂𑀭𑀬𑀺𑀓𑀲𑀢𑁆𑀢𑀬𑀸𑀢𑀦𑀸𑀬𑁄𑀕𑁆𑀕𑀜𑁆𑀳𑀺 𑀅𑀢𑁆𑀢𑀪𑀸𑀯𑀁 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀁 𑀓𑀫𑁆𑀫𑀁 𑀢𑀸𑀤𑀺𑀲𑀦𑀺𑀓𑀦𑁆𑀢𑀺 𑀯𑀺𑀦𑀸𑀫𑀺𑀢𑀁 𑀦𑀺𑀭𑀬𑀝𑁆𑀞𑀸𑀦𑁂 𑀏𑀯 𑀦𑀺𑀩𑁆𑀩𑀢𑁆𑀢𑁂𑀢𑀺. 𑀢𑁂 𑀳𑀺 𑀦𑁂𑀭𑀬𑀺𑀓𑁂𑀳𑀺 𑀅𑀥𑀺𑀓𑀢𑀭𑀩𑀮𑀸𑀭𑁄𑀳𑀧𑀭𑀺𑀡𑀸𑀳𑀸 𑀅𑀢𑀺𑀯𑀺𑀬 𑀪𑀬𑀸𑀦𑀓𑀤𑀲𑁆𑀲𑀦𑀸 𑀓𑀼𑀭𑀽𑀭𑀢𑀭𑀧𑀬𑁄𑀕𑀸 𑀘 𑀳𑁄𑀦𑁆𑀢𑀺. 𑀏𑀢𑁂𑀦𑁂𑀯 𑀢𑀢𑁆𑀣 𑀦𑁂𑀭𑀬𑀺𑀓𑀸𑀦𑀁 𑀯𑀺𑀩𑀸𑀥𑀓𑀓𑀸𑀓𑀲𑀼𑀦𑀔𑀸𑀤𑀻𑀦𑀫𑁆𑀧𑀺 𑀦𑀺𑀩𑁆𑀩𑀢𑁆𑀢𑀺𑀬𑀸 𑀅𑀢𑁆𑀣𑀺𑀪𑀸𑀯𑁄 𑀲𑀁𑀯𑀡𑁆𑀡𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑁄.

𑀓𑀣𑀫𑀜𑁆𑀜𑀕𑀢𑀺𑀓𑁂𑀳𑀺 𑀅𑀜𑁆𑀜𑀕𑀢𑀺𑀓𑀩𑀸𑀥𑀦𑀦𑁆𑀢𑀺 𑀘 𑀦 𑀯𑀢𑁆𑀢𑀩𑁆𑀩𑀁 𑀅𑀜𑁆𑀜𑀢𑁆𑀣𑀸𑀧𑀺 𑀢𑀣𑀸 𑀤𑀲𑁆𑀲𑀦𑀢𑁄. 𑀬𑀁 𑀧𑀦𑁂𑀓𑁂 𑀯𑀤𑀦𑁆𑀢𑀺 ‘‘𑀅𑀲𑀢𑁆𑀢𑀲𑀪𑀸𑀯𑀸 𑀏𑀯 𑀦𑀺𑀭𑀬𑁂 𑀦𑀺𑀭𑀬𑀧𑀸𑀮𑀸 𑀦𑀺𑀭𑀬𑁂 𑀲𑀼𑀦𑀔𑀸𑀤𑀬𑁄 𑀘𑀸’’𑀢𑀺, 𑀢𑀫𑁆𑀧𑁂𑀢𑁂𑀲𑀁 𑀫𑀢𑀺𑀫𑀢𑁆𑀢𑀁 𑀅𑀜𑁆𑀜𑀢𑁆𑀣 𑀢𑀣𑀸 𑀅𑀤𑀲𑁆𑀲𑀦𑀢𑁄. 𑀦 𑀳𑀺 𑀓𑀸𑀘𑀺 𑀅𑀢𑁆𑀣𑀺 𑀢𑀸𑀤𑀺𑀲𑀻 𑀥𑀫𑁆𑀫𑀧𑁆𑀧𑀯𑀢𑁆𑀢𑀺, 𑀬𑀸 𑀅𑀲𑀢𑁆𑀢𑀲𑀪𑀸𑀯𑀸, 𑀲𑀫𑁆𑀧𑀢𑀺𑀲𑀢𑁆𑀢𑁂𑀳𑀺 𑀅𑀧𑁆𑀧𑀬𑁄𑀚𑀺𑀢𑀸 𑀘 𑀅𑀢𑁆𑀣𑀓𑀺𑀘𑁆𑀘𑀁 𑀲𑀸𑀥𑁂𑀦𑁆𑀢𑀻 𑀤𑀺𑀝𑁆𑀞𑀧𑀼𑀩𑁆𑀩𑀸. 𑀧𑁂𑀢𑀸𑀦𑀁 𑀧𑀸𑀦𑀻𑀬𑀦𑀺𑀯𑀸𑀭𑀓𑀸𑀦𑀁 𑀤𑀡𑁆𑀟𑀸𑀤𑀺𑀳𑀢𑁆𑀣𑀸𑀦𑀜𑁆𑀘 𑀧𑀼𑀭𑀺𑀲𑀸𑀦𑀁 𑀲𑀩𑁆𑀪𑀸𑀯𑁂 𑀅𑀲𑀢𑁆𑀢𑀪𑀸𑀯𑁂 𑀘 𑀯𑀺𑀲𑁂𑀲𑀓𑀸𑀭𑀡𑀁 𑀦𑀢𑁆𑀣𑀻𑀢𑀺 𑀢𑀸𑀤𑀺𑀲𑀸𑀦𑀁 𑀲𑀩𑁆𑀪𑀸𑀯𑁂 𑀓𑀺𑀁 𑀧𑀸𑀧𑀓𑀸𑀦𑀁 𑀯𑀢𑁆𑀢𑀩𑁆𑀩𑀁. 𑀲𑀼𑀧𑀺𑀦𑁄𑀧𑀖𑀸𑀢𑁄𑀧𑀺 𑀅𑀢𑁆𑀣𑀓𑀺𑀘𑁆𑀘𑀲𑀫𑀢𑁆𑀣𑀢𑀸𑀬 𑀅𑀧𑁆𑀧𑀫𑀸𑀡𑀁 𑀤𑀲𑁆𑀲𑀦𑀸𑀤𑀺𑀫𑀢𑁆𑀢𑁂𑀦𑀧𑀺 𑀢𑀤𑀢𑁆𑀣𑀲𑀺𑀤𑁆𑀥𑀺𑀢𑁄. 𑀢𑀣𑀸 𑀳𑀺 𑀲𑀼𑀧𑀺𑀦𑁂 𑀆𑀳𑀸𑀭𑀽𑀧𑀪𑁄𑀕𑀸𑀤𑀺𑀦𑀸 𑀦 𑀅𑀢𑁆𑀣𑀲𑀺𑀤𑁆𑀥𑀺, 𑀇𑀤𑁆𑀥𑀺𑀦𑀺𑀫𑁆𑀫𑀸𑀦𑀭𑀽𑀧𑀁 𑀧𑀦𑁂𑀢𑁆𑀣 𑀮𑀤𑁆𑀥𑀧𑀭𑀺𑀳𑀸𑀭𑀁 𑀇𑀤𑁆𑀥𑀺𑀯𑀺𑀲𑀬𑀲𑁆𑀲 𑀅𑀘𑀺𑀦𑁆𑀢𑁂𑀬𑁆𑀬𑀪𑀸𑀯𑀢𑁄. 𑀇𑀥𑀸𑀧𑀺 𑀓𑀫𑁆𑀫𑀯𑀺𑀧𑀸𑀓𑀲𑁆𑀲 𑀅𑀘𑀺𑀦𑁆𑀢𑁂𑀬𑁆𑀬𑀪𑀸𑀯𑀢𑁄𑀢𑀺 𑀘𑁂? 𑀢𑀁 𑀦, 𑀅𑀲𑀺𑀤𑁆𑀥𑀢𑁆𑀢𑀸. 𑀦𑁂𑀭𑀬𑀺𑀓𑀸𑀦𑀁 𑀓𑀫𑁆𑀫𑀯𑀺𑀧𑀸𑀓𑁄 𑀦𑀺𑀭𑀬𑀧𑀸𑀮𑀸𑀢𑀺 𑀲𑀺𑀤𑁆𑀥𑀫𑁂𑀢𑁆𑀢𑀁, 𑀯𑀼𑀢𑁆𑀢𑀦𑀬𑁂𑀦 𑀧𑀸𑀴𑀺𑀢𑁄 𑀘 𑀢𑁂𑀲𑀁 𑀲𑀢𑁆𑀢𑀪𑀸𑀯𑁄 𑀏𑀯 𑀲𑀺𑀤𑁆𑀥𑁄. 𑀲𑀓𑁆𑀓𑀸 𑀳𑀺 𑀯𑀢𑁆𑀢𑀼𑀁 𑀲𑀢𑁆𑀢𑀲𑀗𑁆𑀔𑀸𑀢𑀸 𑀦𑀺𑀭𑀬𑀧𑀸𑀮𑀲𑀜𑁆𑀜𑀺𑀢𑀸 𑀥𑀫𑁆𑀫𑀧𑁆𑀧𑀯𑀢𑁆𑀢𑀺 𑀲𑀸𑀪𑀺𑀲𑀦𑁆𑀥𑀺𑀓𑀧𑀭𑀽𑀧𑀖𑀸𑀢𑀺 𑀅𑀢𑁆𑀣𑀓𑀺𑀘𑁆𑀘𑀲𑀩𑁆𑀪𑀸𑀯𑀢𑁄 𑀑𑀚𑀸𑀳𑀸𑀭𑀸𑀤𑀺 𑀭𑀓𑁆𑀔𑀲𑀲𑀦𑁆𑀢𑀢𑀺 𑀯𑀺𑀬. 𑀅𑀪𑀺𑀲𑀦𑁆𑀥𑀺𑀧𑀼𑀩𑁆𑀩𑀓𑀢𑀸 𑀘𑁂𑀢𑁆𑀣 𑀦 𑀲𑀓𑁆𑀓𑀸 𑀧𑀝𑀺𑀓𑁆𑀔𑀺𑀧𑀺𑀢𑀼𑀁 𑀢𑀣𑀸 𑀢𑀣𑀸 𑀅𑀪𑀺𑀲𑀦𑁆𑀥𑀺𑀬𑀸 𑀖𑀸𑀢𑀦𑀢𑁄. 𑀢𑀢𑁄 𑀏𑀯 𑀦 𑀲𑀗𑁆𑀖𑀸𑀢𑀧𑀩𑁆𑀩𑀢𑁂𑀳𑀺 𑀅𑀦𑁂𑀓𑀦𑁆𑀢𑀺𑀓𑀢𑀸. 𑀬𑁂 𑀧𑀦 𑀯𑀤𑀦𑁆𑀢𑀺 ‘‘𑀪𑀽𑀢𑀯𑀺𑀲𑁂𑀲𑀸 𑀏𑀯 𑀢𑁂 𑀯𑀡𑁆𑀡𑀲𑀡𑁆𑀞𑀸𑀦𑀸𑀤𑀺𑀯𑀺𑀲𑁂𑀲𑀯𑀦𑁆𑀢𑁄 𑀪𑁂𑀭𑀯𑀸𑀓𑀸𑀭𑀸 𑀦𑀭𑀓𑀧𑀸𑀮𑀸𑀢𑀺 𑀲𑀫𑀜𑁆𑀜𑀁 𑀮𑀪𑀦𑁆𑀢𑀻’’𑀢𑀺, 𑀢𑀤𑀲𑀺𑀤𑁆𑀥𑀁 𑀉𑀚𑀼𑀓𑀫𑁂𑀯 𑀧𑀸𑀴𑀺𑀬𑀁 ‘‘𑀅𑀢𑁆𑀣𑀺 𑀦𑀺𑀭𑀬𑁂 𑀦𑀺𑀭𑀬𑀧𑀸𑀮𑀸’’𑀢𑀺 𑀯𑀸𑀤𑀲𑁆𑀲 𑀧𑀢𑀺𑀝𑁆𑀞𑀸𑀧𑀺𑀢𑀢𑁆𑀢𑀸.

𑀅𑀧𑀺𑀘 𑀬𑀣𑀸 𑀅𑀭𑀺𑀬𑀯𑀺𑀦𑀬𑁂 𑀦𑀭𑀓𑀧𑀸𑀮𑀸𑀦𑀁 𑀪𑀽𑀢𑀫𑀢𑁆𑀢𑀢𑀸 𑀅𑀲𑀺𑀤𑁆𑀥𑀸, 𑀢𑀣𑀸 𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑀯𑀸𑀤𑀺𑀦𑁄𑀧𑀺 𑀪𑀽𑀢𑀫𑀢𑁆𑀢𑀢𑀸 𑀅𑀲𑀺𑀤𑁆𑀥𑀸 𑀲𑀩𑁆𑀩𑀲𑁄 𑀭𑀽𑀧𑀥𑀫𑁆𑀫𑀸𑀦𑀁 𑀅𑀢𑁆𑀣𑀺𑀪𑀸𑀯𑀲𑁆𑀲𑁂𑀯 𑀅𑀧𑁆𑀧𑀝𑀺𑀚𑀸𑀦𑀦𑀢𑁄. 𑀦 𑀳𑀺 𑀢𑀲𑁆𑀲 𑀪𑀽𑀢𑀸𑀦𑀺 𑀦𑀸𑀫 𑀧𑀭𑀫𑀢𑁆𑀣𑀢𑁄 𑀲𑀦𑁆𑀢𑀺. 𑀬𑀤𑀺 𑀧𑀭𑀫𑀢𑁆𑀣𑀁 𑀕𑀳𑁂𑀢𑁆𑀯𑀸 𑀯𑁄𑀳𑀭𑀢𑀺, 𑀅𑀣 𑀓𑀲𑁆𑀫𑀸 𑀘𑀓𑁆𑀔𑀼𑀭𑀽𑀧𑀸𑀤𑀻𑀦𑀺 𑀧𑀝𑀺𑀓𑁆𑀔𑀺𑀧𑀢𑀻𑀢𑀺? 𑀢𑀺𑀝𑁆𑀞𑀢𑁂𑀲𑀸 𑀅𑀦𑀯𑀝𑁆𑀞𑀺𑀢𑀢𑀓𑁆𑀓𑀸𑀦𑀁 𑀅𑀧𑁆𑀧𑀳𑀻𑀦𑀯𑀺𑀧𑀮𑁆𑀮𑀸𑀲𑀸𑀦𑀁 𑀯𑀸𑀤𑀯𑀻𑀫𑀁𑀲𑀸. 𑀏𑀯𑀁 𑀅𑀢𑁆𑀣𑁂𑀯 𑀦𑀺𑀭𑀬𑁂 𑀦𑀺𑀭𑀬𑀧𑀸𑀮𑀸𑀢𑀺 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁. 𑀲𑀢𑀺 𑀘 𑀦𑁂𑀲𑀁 𑀲𑀩𑁆𑀪𑀸𑀯𑁂 𑀅𑀲𑀢𑀺𑀧𑀺 𑀩𑀸𑀳𑀺𑀭𑁂 𑀯𑀺𑀲𑀬𑁂 𑀦𑀭𑀓𑁂 𑀯𑀺𑀬 𑀤𑁂𑀲𑀸𑀤𑀺𑀦𑀺𑀬𑀫𑁄 𑀳𑁄𑀢𑀻𑀢𑀺 𑀯𑀸𑀤𑁄 𑀦 𑀲𑀺𑀚𑁆𑀛𑀢𑀺, 𑀲𑀢𑀺 𑀏𑀯 𑀧𑀦 𑀩𑀸𑀳𑀺𑀭𑁂 𑀯𑀺𑀲𑀬𑁂 𑀤𑁂𑀲𑀸𑀤𑀺𑀦𑀺𑀬𑀫𑁄𑀢𑀺 𑀤𑀝𑁆𑀞𑀩𑁆𑀩𑀁.

𑀤𑁂𑀯𑀤𑀽𑀢𑀲𑀭𑀸𑀧𑀦𑀯𑀲𑁂𑀦 𑀲𑀢𑁆𑀢𑁂 𑀬𑀣𑀽𑀧𑀘𑀺𑀢𑁂 𑀧𑀼𑀜𑁆𑀜𑀓𑀫𑁆𑀫𑁂 𑀬𑀫𑁂𑀢𑀺 𑀦𑀺𑀬𑀫𑁂𑀢𑀻𑀢𑀺 𑀬𑀫𑁄. 𑀢𑀲𑁆𑀲 𑀬𑀫𑀲𑁆𑀲 𑀯𑁂𑀫𑀸𑀦𑀺𑀓𑀧𑁂𑀢𑀸𑀦𑀁 𑀭𑀸𑀚𑀪𑀸𑀯𑀢𑁄 𑀭𑀜𑁆𑀜𑁄. 𑀢𑁂𑀦𑀸𑀳 ‘‘𑀬𑀫𑀭𑀸𑀚𑀸 𑀦𑀸𑀫 𑀯𑁂𑀫𑀸𑀦𑀺𑀓𑀧𑁂𑀢𑀭𑀸𑀚𑀸’’𑀢𑀺. 𑀓𑀫𑁆𑀫𑀯𑀺𑀧𑀸𑀓𑀦𑁆𑀢𑀺 𑀅𑀓𑀼𑀲𑀮𑀓𑀫𑁆𑀫𑀯𑀺𑀧𑀸𑀓𑀁. 𑀯𑁂𑀫𑀸𑀦𑀺𑀓𑀧𑁂𑀢𑀸 𑀳𑀺 𑀓𑀡𑁆𑀳𑀲𑀼𑀓𑁆𑀓𑀯𑀲𑁂𑀦 𑀫𑀺𑀲𑁆𑀲𑀓𑀁 𑀓𑀫𑁆𑀫𑀁 𑀓𑀢𑁆𑀯𑀸 𑀯𑀺𑀦𑀺𑀧𑀸𑀢𑀺𑀓𑀤𑁂𑀯𑀢𑀸 𑀯𑀺𑀬 𑀲𑀼𑀓𑁆𑀓𑁂𑀦 𑀓𑀫𑁆𑀫𑀼𑀦𑀸 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀦𑁆𑀢𑀺. 𑀢𑀣𑀸 𑀳𑀺 𑀫𑀕𑁆𑀕𑀨𑀮𑀪𑀸𑀕𑀺𑀦𑁄𑀧𑀺 𑀳𑁄𑀦𑁆𑀢𑀺, 𑀧𑀯𑀢𑁆𑀢𑀺𑀬𑀁 𑀧𑀦 𑀓𑀫𑁆𑀫𑀸𑀦𑀼𑀭𑀽𑀧𑀁 𑀓𑀤𑀸𑀘𑀺 𑀧𑀼𑀜𑁆𑀜𑀨𑀮𑀁, 𑀓𑀤𑀸𑀘𑀺 𑀅𑀧𑀼𑀜𑁆𑀜𑀨𑀮𑀁 𑀧𑀘𑁆𑀘𑀦𑀼𑀪𑀯𑀦𑁆𑀢𑀺. 𑀬𑁂𑀲𑀁 𑀧𑀦 𑀅𑀭𑀺𑀬𑀫𑀕𑁆𑀕𑁄 𑀉𑀧𑁆𑀧𑀚𑁆𑀚𑀢𑀺, 𑀢𑁂𑀲𑀁 𑀫𑀕𑁆𑀕𑀸𑀥𑀺𑀕𑀫𑀢𑁄 𑀧𑀝𑁆𑀞𑀸𑀬 𑀧𑀼𑀜𑁆𑀜𑀨𑀮𑀫𑁂𑀯 𑀉𑀧𑁆𑀧𑀚𑁆𑀚𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀧𑀼𑀜𑁆𑀜𑀨𑀮𑀁 𑀧𑀼𑀩𑁆𑀩𑁂 𑀯𑀺𑀬 𑀓𑀝𑀼𑀓𑀁 𑀦 𑀳𑁄𑀢𑀺, 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑁂 𑀞𑀺𑀢𑀸𑀦𑀁 𑀯𑀺𑀬 𑀫𑀼𑀤𑀼𑀓𑀫𑁂𑀯 𑀳𑁄𑀢𑀻𑀢𑀺 𑀅𑀧𑀭𑁂. 𑀥𑀫𑁆𑀫𑀺𑀓𑁄 𑀭𑀸𑀚𑀸𑀢𑀺 𑀏𑀢𑁆𑀣 𑀢𑀲𑁆𑀲 𑀥𑀫𑁆𑀫𑀺𑀓𑀪𑀸𑀯𑁄 𑀥𑀫𑁆𑀫𑀤𑁂𑀯𑀧𑀼𑀢𑁆𑀢𑀲𑁆𑀲 𑀯𑀺𑀬 𑀉𑀧𑁆𑀧𑀢𑁆𑀢𑀺𑀦𑀺𑀬𑀢𑁄 𑀥𑀫𑁆𑀫𑀢𑀸𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀤𑁆𑀯𑀸𑀭𑁂𑀲𑀽𑀢𑀺 𑀅𑀯𑀻𑀘𑀺𑀫𑀳𑀸𑀦𑀭𑀓𑀲𑁆𑀲 𑀘𑀢𑀽𑀲𑀼 𑀤𑁆𑀯𑀸𑀭𑁂𑀲𑀼. 𑀔𑀻𑀡𑀸𑀲𑀯𑀸 𑀩𑁆𑀭𑀸𑀳𑁆𑀫𑀡𑀸 𑀦𑀸𑀫 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁂𑀦.

𑀅𑀦𑀼𑀬𑁄𑀕𑀯𑀢𑁆𑀢𑀦𑁆𑀢𑀺 𑀅𑀦𑀼𑀬𑁄𑀕𑁂 𑀓𑀢𑁂 𑀯𑀢𑁆𑀢𑀺𑀢𑀩𑁆𑀩𑀯𑀢𑁆𑀢𑀁. 𑀆𑀭𑁄𑀧𑁂𑀦𑁆𑀢𑁄𑀢𑀺 𑀓𑀸𑀭𑀸𑀧𑁂𑀦𑁆𑀢𑁄, 𑀅𑀢𑁆𑀢𑀦𑁄 𑀧𑀼𑀘𑁆𑀙𑀁 𑀉𑀤𑁆𑀤𑀺𑀲𑁆𑀲 𑀧𑀝𑀺𑀯𑀘𑀦𑀁 𑀤𑀸𑀧𑁂𑀦𑁆𑀢𑁄 𑀧𑀼𑀘𑁆𑀙𑀢𑀺. 𑀧𑀭𑀲𑁆𑀲 𑀳𑀺 𑀅𑀥𑀺𑀧𑁆𑀧𑀸𑀬𑀁 𑀜𑀸𑀢𑀼𑀁 𑀇𑀘𑁆𑀙𑀦𑁆𑀢𑁄 𑀢𑀤𑀼𑀧𑀕𑀁 𑀧𑀬𑁄𑀕𑀁 𑀓𑀭𑁄𑀦𑁆𑀢𑁄 𑀧𑀼𑀘𑁆𑀙𑀢𑀺 𑀦𑀸𑀫. 𑀮𑀤𑁆𑀥𑀺𑀦𑁆𑀢𑀺 𑀕𑀸𑀳𑀁. 𑀧𑀢𑀺𑀝𑁆𑀞𑀸𑀧𑁂𑀦𑁆𑀢𑁄𑀢𑀺 𑀢𑀢𑁆𑀣 𑀦𑀺𑀘𑁆𑀘𑀓𑀸𑀮𑀁 𑀓𑀸𑀭𑀸𑀧𑁂𑀦𑁆𑀢𑁄. 𑀓𑀸𑀭𑀡𑀁 𑀧𑀼𑀘𑁆𑀙𑀦𑁆𑀢𑁄𑀢𑀺 𑀬𑀼𑀢𑁆𑀢𑀺𑀁 𑀧𑀼𑀘𑁆𑀙𑀦𑁆𑀢𑁄. 𑀲𑀫𑀦𑀼𑀪𑀸𑀲𑀢𑀻𑀢𑀺 𑀬𑀣𑀸𑀦𑀼𑀬𑀼𑀢𑁆𑀢𑀫𑀢𑁆𑀣𑀁 𑀯𑀺𑀪𑀽𑀢𑀁 𑀓𑀢𑁆𑀯𑀸 𑀓𑀣𑁂𑀢𑀺.

𑀚𑀺𑀡𑁆𑀡𑀦𑁆𑀢𑀺 𑀚𑀭𑀸𑀧𑀢𑁆𑀢𑀺𑀬𑀸 𑀚𑀺𑀡𑁆𑀡𑀁. 𑀏𑀓𑀘𑁆𑀘𑁄 𑀤𑀳𑀭𑀓𑀸𑀮𑀢𑁄 𑀧𑀝𑁆𑀞𑀸𑀬 𑀧𑀡𑁆𑀟𑀼𑀭𑁄𑀕𑀸𑀤𑀺𑀦𑀸 𑀅𑀪𑀺𑀪𑀽𑀢𑀓𑀸𑀬𑀢𑀸𑀬 𑀚𑀺𑀡𑁆𑀡𑀲𑀤𑀺𑀲𑁄 𑀳𑁄𑀢𑀺, 𑀅𑀬𑀁 𑀦 𑀢𑀣𑀸 𑀚𑀭𑀸𑀧𑀢𑁆𑀢𑀺𑀬𑀸 𑀚𑀺𑀡𑁆𑀡𑁄𑀢𑀺 𑀤𑀲𑁆𑀲𑁂𑀢𑀺. 𑀕𑁄𑀧𑀸𑀦𑀲𑀻 𑀯𑀺𑀬 𑀯𑀗𑁆𑀓𑀦𑁆𑀢𑀺 𑀯𑀗𑁆𑀓𑀕𑁄𑀧𑀸𑀦𑀲𑀻 𑀯𑀺𑀬 𑀯𑀗𑁆𑀓𑀁. 𑀦 𑀳𑀺 𑀯𑀗𑁆𑀓𑀪𑀸𑀯𑀲𑁆𑀲 𑀦𑀺𑀤𑀲𑁆𑀲𑀦𑀢𑁆𑀣𑀁 𑀅𑀯𑀗𑁆𑀓𑀕𑁄𑀧𑀸𑀦𑀲𑀻 𑀕𑀬𑁆𑀳𑀢𑀺. 𑀪𑀕𑁆𑀕𑀦𑁆𑀢𑀺 𑀪𑀕𑁆𑀕𑀲𑀭𑀻𑀭𑀁 𑀓𑀝𑀺𑀬𑀁 𑀪𑀕𑁆𑀕𑀓𑀸𑀬𑀢𑁆𑀢𑀸. 𑀢𑁂𑀦𑀸𑀳 ‘‘𑀇𑀫𑀺𑀦𑀸𑀧𑀺𑀲𑁆𑀲 𑀯𑀗𑁆𑀓𑀪𑀸𑀯𑀫𑁂𑀯 𑀤𑀻𑀧𑁂𑀢𑀻’’𑀢𑀺. 𑀤𑀡𑁆𑀟𑀧𑀝𑀺𑀲𑀭𑀡𑀦𑁆𑀢𑀺 𑀞𑀸𑀦𑀕𑀫𑀦𑁂𑀲𑀼 𑀤𑀡𑁆𑀟𑁄 𑀧𑀝𑀺𑀲𑀭𑀡𑀁 𑀏𑀢𑀲𑁆𑀲𑀸𑀢𑀺 𑀤𑀡𑁆𑀟𑀧𑀝𑀺𑀲𑀭𑀡𑀁 𑀢𑁂𑀦 𑀯𑀺𑀦𑀸 𑀯𑀢𑁆𑀢𑀺𑀢𑀼𑀁 𑀅𑀲𑀫𑀢𑁆𑀣𑀢𑁆𑀢𑀸. 𑀢𑁂𑀦𑀸𑀳 ‘‘𑀤𑀡𑁆𑀟𑀤𑀼𑀢𑀺𑀬’’𑀦𑁆𑀢𑀺. 𑀚𑀭𑀸𑀢𑀼𑀭𑀦𑁆𑀢𑀺 𑀚𑀭𑀸𑀬 𑀧𑀢𑁆𑀣𑀢𑀲𑀁𑀓𑀺𑀮𑀦𑁆𑀢𑀓𑀸𑀬𑀁. 𑀲𑀩𑁆𑀩𑀲𑁄 𑀓𑀺𑀫𑀺𑀳𑀢𑀁 𑀯𑀺𑀬 𑀫𑀳𑀸𑀔𑀮𑁆𑀮𑀸𑀝𑀁 𑀲𑀻𑀲𑀫𑀲𑁆𑀲𑀸𑀢𑀺 𑀫𑀳𑀸𑀔𑀮𑁆𑀮𑀸𑀝𑀲𑀻𑀲𑀁. 𑀲𑀜𑁆𑀚𑀸𑀢𑀯𑀮𑀺𑀦𑁆𑀢𑀺 𑀲𑀫𑀦𑁆𑀢𑀢𑁄 𑀚𑀸𑀢𑀯𑀮𑀺𑀓𑀁. 𑀚𑀭𑀸𑀥𑀫𑁆𑀫𑁄𑀢𑀺 𑀚𑀭𑀸𑀧𑀓𑀢𑀺𑀓𑁄. 𑀢𑁂𑀦𑀸𑀳 ‘‘𑀚𑀭𑀸𑀲𑀪𑀸𑀯𑁄’’𑀢𑀺. 𑀲𑀪𑀸𑀯𑁄 𑀘 𑀦𑀸𑀫 𑀢𑁂𑀚𑁄𑀥𑀸𑀢𑀼𑀬𑀸 𑀉𑀡𑁆𑀳𑀢𑀸 𑀯𑀺𑀬 𑀦 𑀓𑀤𑀸𑀘𑀺 𑀯𑀺𑀕𑀘𑁆𑀙𑀢𑀻𑀢𑀺 𑀆𑀳 ‘‘𑀅𑀧𑀭𑀺𑀫𑀼𑀢𑁆𑀢𑁄 𑀚𑀭𑀸𑀬𑀸’’𑀢𑀺𑀆𑀤𑀺.

𑀅𑀢𑁆𑀣𑀢𑁄 𑀏𑀯𑀁 𑀯𑀤𑀢𑀺 𑀦𑀸𑀫, 𑀯𑀸𑀘𑀸𑀬 𑀅𑀯𑀤𑀦𑁆𑀢𑁄𑀧𑀺 𑀅𑀢𑁆𑀣𑀸𑀧𑀢𑁆𑀢𑀺𑀢𑁄 𑀏𑀯𑀁 𑀯𑀤𑀦𑁆𑀢𑁄 𑀯𑀺𑀬 𑀳𑁄𑀢𑀺 𑀯𑀺𑀜𑁆𑀜𑀽𑀦𑀦𑁆𑀢𑀺 𑀅𑀢𑁆𑀣𑁄. 𑀢𑀭𑀼𑀡𑁄 𑀅𑀳𑁄𑀲𑀺𑀁 𑀬𑁄𑀩𑁆𑀩𑀦𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀊𑀭𑀽𑀦𑀁 𑀩𑀮𑀁 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀊𑀭𑀼𑀩𑀮𑀻. 𑀢𑁂𑀦 𑀤𑀽𑀭𑁂𑀧𑀺 𑀕𑀫𑀦𑀸𑀕𑀫𑀦𑀮𑀗𑁆𑀖𑀦𑀸𑀤𑀺𑀲𑀫𑀢𑁆𑀣𑀢𑀁 𑀤𑀲𑁆𑀲𑁂𑀢𑀺, 𑀩𑀸𑀳𑀼𑀩𑀮𑀻𑀢𑀺 𑀧𑀦 𑀇𑀫𑀺𑀦𑀸 𑀳𑀢𑁆𑀣𑁂𑀳𑀺 𑀓𑀸𑀢𑀩𑁆𑀩𑀓𑀺𑀘𑁆𑀘𑀲𑀫𑀢𑁆𑀣𑀢𑀁, 𑀚𑀯𑀕𑁆𑀕𑀳𑀡𑁂𑀦 𑀯𑁂𑀕𑀲𑀸 𑀧𑀯𑀢𑁆𑀢𑀺𑀲𑀫𑀢𑁆𑀣𑀢𑀁. 𑀅𑀦𑁆𑀢𑀭𑀳𑀺𑀢𑀸𑀢𑀺 𑀦𑀝𑁆𑀞𑀸. 𑀏𑀢𑁆𑀣 𑀘 𑀦 𑀔𑁄 𑀧𑀦𑀸𑀳𑀦𑁆𑀢𑀺𑀆𑀤𑀺 𑀚𑀭𑀸𑀬 𑀤𑁂𑀯𑀤𑀽𑀢𑀪𑀸𑀯𑀤𑀲𑁆𑀲𑀦𑀁. 𑀢𑁂𑀦𑀸𑀳 ‘‘𑀢𑁂𑀦𑁂𑀲 𑀤𑁂𑀯𑀤𑀽𑀢𑁄 𑀦𑀸𑀫 𑀚𑀸𑀢𑁄’’𑀢𑀺. 𑀆𑀩𑀸𑀥𑀲𑁆𑀲 𑀅𑀢𑁆𑀣𑀺𑀢𑀸𑀬 𑀆𑀩𑀸𑀥𑀺𑀓𑀁. 𑀯𑀺𑀯𑀺𑀥𑀁 𑀤𑀼𑀓𑁆𑀔𑀁 𑀆𑀤𑀳𑀢𑀻𑀢𑀺 𑀩𑁆𑀬𑀸𑀥𑀺, 𑀯𑀺𑀲𑁂𑀲𑁂𑀦 𑀯𑀸 𑀆𑀥𑀺𑀬𑀢𑀺 𑀏𑀢𑁂𑀦𑀸𑀢𑀺 𑀩𑁆𑀬𑀸𑀥𑀺, 𑀩𑁆𑀬𑀸𑀥𑀺 𑀲𑀁𑀚𑀸𑀢𑁄 𑀏𑀢𑀲𑁆𑀲𑀸𑀢𑀺 𑀩𑁆𑀬𑀸𑀥𑀺𑀢𑀁. 𑀏𑀲 𑀦𑀬𑁄 𑀤𑀼𑀓𑁆𑀔𑀺𑀢𑀦𑁆𑀢𑀺 𑀏𑀢𑁆𑀣𑀸𑀧𑀺.

𑀤𑀼𑀢𑀺𑀬𑀁 𑀤𑁂𑀯𑀤𑀽𑀢𑀦𑁆𑀢𑀺 𑀏𑀢𑁆𑀣𑀸𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀩𑁆𑀬𑀸𑀥𑀺𑀦𑀸 𑀅𑀪𑀺𑀳𑀢𑁄𑀢𑀺 𑀩𑁆𑀬𑀸𑀥𑀺𑀦𑀸 𑀩𑀸𑀥𑀺𑀢𑁄, 𑀉𑀧𑀤𑁆𑀤𑀼𑀢𑁄𑀢𑀺 𑀅𑀢𑁆𑀣𑁄.

𑀯𑀺𑀧𑀭𑀺𑀪𑀺𑀦𑁆𑀦𑀯𑀡𑁆𑀡𑁄𑀢𑀺 𑀯𑀺𑀧𑀭𑀺𑀪𑀺𑀦𑁆𑀦𑀦𑀻𑀮𑀯𑀡𑁆𑀡𑁄. 𑀢𑀜𑁆𑀳𑀺 𑀬𑀢𑁆𑀣 𑀬𑀢𑁆𑀣 𑀕𑀳𑀺𑀢𑀧𑀼𑀩𑁆𑀩𑀓𑀁, 𑀢𑀢𑁆𑀣 𑀢𑀢𑁆𑀣 𑀧𑀡𑁆𑀟𑀼𑀯𑀡𑁆𑀡𑀁, 𑀫𑀁𑀲𑀼𑀲𑁆𑀲𑀤𑀝𑁆𑀞𑀸𑀦𑁂 𑀭𑀢𑁆𑀢𑀯𑀡𑁆𑀡𑀁, 𑀬𑁂𑀪𑀼𑀬𑁆𑀬𑁂𑀦 𑀘 𑀦𑀻𑀮𑀲𑀸𑀝𑀓𑀧𑀸𑀭𑀼𑀢𑀁 𑀯𑀺𑀬 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀯𑀺𑀧𑀭𑀺𑀪𑀺𑀦𑁆𑀦𑀦𑀻𑀮𑀯𑀡𑁆𑀡𑁄’’𑀢𑀺.

‘‘𑀓𑁄 𑀮𑀪𑀢𑀺, 𑀓𑁄 𑀦 𑀮𑀪𑀢𑀻’’𑀢𑀺 𑀦𑀺𑀭𑀬𑀼𑀧𑀕𑀲𑁆𑀲𑁂𑀯 𑀯𑀲𑁂𑀦𑀸𑀬𑀁 𑀯𑀺𑀘𑀸𑀭𑀡𑀸𑀢𑀺 ‘‘𑀬𑁂𑀦 𑀢𑀸𑀯 𑀩𑀳𑀼 𑀧𑀸𑀧𑀁 𑀓𑀢’’𑀦𑁆𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀩𑀳𑀼 𑀧𑀸𑀧𑀁 𑀓𑀢𑀦𑁆𑀢𑀺 𑀩𑀳𑀼𑀲𑁄 𑀧𑀸𑀧𑀁 𑀓𑀢𑀁. 𑀢𑁂𑀦 𑀧𑀸𑀧𑀲𑁆𑀲 𑀩𑀳𑀼𑀮𑀻𑀓𑀭𑀡𑀫𑀸𑀳. 𑀩𑀳𑀽𑀢𑀺 𑀯𑀸 𑀫𑀳𑀦𑁆𑀢𑀁. 𑀫𑀳𑀢𑁆𑀣𑁄𑀧𑀺 𑀳𑀺 𑀩𑀳𑀼𑀲𑀤𑁆𑀤𑁄 𑀤𑀺𑀲𑁆𑀲𑀢𑀺 ‘‘𑀩𑀳𑀼 𑀯𑀢 𑀓𑀢𑀁 𑀅𑀲𑁆𑀲𑀸’’𑀢𑀺𑀆𑀤𑀻𑀲𑀼, 𑀕𑀭𑀼𑀓𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁄 𑀕𑀭𑀼𑀓𑀁 𑀩𑀳𑀼𑀮𑀁 𑀯𑀸 𑀧𑀸𑀧𑀁 𑀓𑀢𑁆𑀯𑀸 𑀞𑀺𑀢𑁄 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀢𑀺𑀬𑁂𑀯, 𑀦 𑀬𑀫𑀧𑀼𑀭𑀺𑀲𑁂𑀳𑀺 𑀬𑀫𑀲𑁆𑀲 𑀲𑀦𑁆𑀢𑀺𑀓𑀁 𑀦𑀻𑀬𑀢𑀻𑀢𑀺. 𑀧𑀭𑀺𑀢𑁆𑀢𑀦𑁆𑀢𑀺 𑀧𑀫𑀸𑀡𑀧𑀭𑀺𑀢𑁆𑀢𑀢𑀸𑀬 𑀓𑀸𑀮𑀧𑀭𑀺𑀢𑁆𑀢𑀢𑀸𑀬 𑀘 𑀧𑀭𑀺𑀢𑁆𑀢𑀁. 𑀧𑀼𑀭𑀺𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀕𑀭𑀽𑀢𑀺 𑀅𑀢𑁆𑀣𑁄, 𑀤𑀼𑀢𑀺𑀬𑀲𑁆𑀫𑀺𑀁 𑀅𑀩𑀳𑀼𑀮𑀦𑁆𑀢𑀺. 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀉𑀧𑀫𑀸𑀬 𑀯𑀺𑀪𑀸𑀯𑁂𑀢𑀼𑀁 ‘‘𑀬𑀣𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑀢𑁆𑀢𑀩𑁆𑀩𑀫𑁂𑀯 𑀓𑀭𑁄𑀦𑁆𑀢𑀻𑀢𑀺 𑀤𑀡𑁆𑀟𑀫𑁂𑀯 𑀓𑀭𑁄𑀦𑁆𑀢𑀺. 𑀅𑀦𑀼𑀯𑀺𑀚𑁆𑀚𑀺𑀢𑁆𑀯𑀸𑀢𑀺 𑀯𑀻𑀫𑀁𑀲𑀺𑀢𑁆𑀯𑀸. 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑀦𑁆𑀢𑀺 𑀅𑀝𑁆𑀝𑀓𑀭𑀡𑀝𑁆𑀞𑀸𑀦𑀁. 𑀧𑀭𑀺𑀢𑁆𑀢𑀧𑀸𑀧𑀓𑀫𑁆𑀫𑀸𑀢𑀺 𑀤𑀼𑀩𑁆𑀩𑀮𑀧𑀸𑀧𑀓𑀫𑁆𑀫𑀸. 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬𑀸𑀢𑀺 𑀧𑀭𑁂𑀳𑀺 𑀅𑀲𑀸𑀭𑀺𑀬𑀫𑀸𑀦𑁂𑀧𑀺 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀲𑀭𑀦𑁆𑀢𑀺. 𑀢𑁂 𑀳𑀺 𑀧𑀸𑀧𑀓𑀫𑁆𑀫𑀲𑁆𑀲 𑀤𑀼𑀩𑁆𑀩𑀮𑀪𑀸𑀯𑀢𑁄 𑀓𑀢𑀽𑀧𑀘𑀺𑀢𑀲𑁆𑀲 𑀘 𑀑𑀓𑀸𑀲𑀸𑀭𑀳𑀓𑀼𑀲𑀮𑀓𑀫𑁆𑀫𑀲𑁆𑀲 𑀩𑀮𑀯𑀪𑀸𑀯𑀢𑁄 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬𑀧𑀺 𑀲𑀭𑀦𑁆𑀢𑀺. 𑀲𑀸𑀭𑀺𑀬𑀫𑀸𑀦𑀸𑀧𑀻𑀢𑀺 ‘‘𑀇𑀤𑀁 𑀦𑀸𑀫 𑀢𑀬𑀸 𑀓𑀢𑀁 𑀧𑀼𑀜𑁆𑀜𑀓𑀫𑁆𑀫’’𑀦𑁆𑀢𑀺 𑀧𑀭𑁂𑀳𑀺 𑀲𑀸𑀭𑀺𑀬𑀫𑀸𑀦𑀸𑀧𑀺.

𑀆𑀓𑀸𑀲𑀘𑁂𑀢𑀺𑀬𑀦𑁆𑀢𑀺 𑀕𑀺𑀭𑀺𑀲𑀺𑀔𑀭𑁂 𑀅𑀩𑁆𑀪𑁄𑀓𑀸𑀲𑁂 𑀯𑀺𑀯𑀝𑀗𑁆𑀕𑀡𑁂 𑀓𑀢𑀘𑁂𑀢𑀺𑀬𑀁. 𑀭𑀢𑁆𑀢𑀧𑀝𑁂𑀦𑀸𑀢𑀺 𑀭𑀢𑁆𑀢𑀯𑀡𑁆𑀡𑁂𑀦 𑀧𑀝𑁂𑀦 𑀧𑀽𑀚𑁂𑀲𑀺 𑀧𑀝𑀸𑀓𑀁 𑀓𑀢𑁆𑀯𑀸. 𑀅𑀕𑁆𑀕𑀺𑀚𑀸𑀮𑀲𑀤𑁆𑀤𑀦𑁆𑀢𑀺 𑀧𑀝𑀧𑀝𑀸𑀬𑀦𑁆𑀢𑀁 𑀦𑀭𑀓𑁂 𑀅𑀕𑁆𑀕𑀺𑀚𑀸𑀮𑀲𑀤𑁆𑀤𑀁 𑀲𑀼𑀢𑁆𑀯𑀸𑀯. 𑀅𑀢𑁆𑀢𑀦𑀸 𑀧𑀽𑀚𑀺𑀢𑀧𑀝𑀁 𑀅𑀦𑀼𑀲𑁆𑀲𑀭𑀻𑀢𑀺 𑀢𑀤𑀸 𑀧𑀝𑀸𑀓𑀸𑀬 𑀯𑀸𑀢𑀧𑁆𑀧𑀳𑀸𑀭𑀲𑀤𑁆𑀤𑁂 𑀦𑀺𑀫𑀺𑀢𑁆𑀢𑀲𑁆𑀲 𑀕𑀳𑀺𑀢𑀢𑁆𑀢𑀸 ‘‘𑀫𑀬𑀸 𑀢𑀤𑀸 𑀆𑀓𑀸𑀲𑀘𑁂𑀢𑀺𑀬𑁂 𑀧𑀽𑀚𑀺𑀢𑀭𑀢𑁆𑀢𑀧𑀝𑀲𑀤𑁆𑀤𑁄 𑀯𑀺𑀬𑀸’’𑀢𑀺 𑀅𑀢𑁆𑀢𑀦𑀸 𑀧𑀽𑀚𑀺𑀢𑀧𑀝𑀁 𑀅𑀦𑀼𑀲𑁆𑀲𑀭𑀺.

𑀲𑀼𑀫𑀦𑀧𑀼𑀧𑁆𑀨𑀓𑀼𑀫𑁆𑀪𑁂𑀦𑀸𑀢𑀺 𑀓𑀼𑀫𑁆𑀪𑀧𑀭𑀺𑀫𑀸𑀡𑁂𑀦 𑀲𑀼𑀫𑀦𑀧𑀼𑀧𑁆𑀨𑀭𑀸𑀲𑀺𑀦𑀸. ‘‘𑀤𑀲𑀸𑀥𑀺𑀓𑀁 𑀦𑀸𑀴𑀺𑀲𑀳𑀲𑁆𑀲𑀓𑀼𑀫𑁆𑀪’’𑀦𑁆𑀢𑀺 𑀓𑁂𑀘𑀺, ‘‘𑀧𑀜𑁆𑀘𑀅𑀫𑁆𑀩𑀡’’𑀦𑁆𑀢𑀺 𑀅𑀧𑀭𑁂. 𑀢𑀻𑀳𑀺𑀧𑀺𑀦 𑀲𑀭𑀢𑀺 𑀩𑀮𑀯𑀢𑁄 𑀧𑀸𑀧𑀓𑀫𑁆𑀫𑁂𑀦 𑀩𑁆𑀬𑀸𑀫𑁄𑀳𑀺𑀢𑁄. 𑀢𑀼𑀡𑁆𑀳𑀻 𑀅𑀳𑁄𑀲𑀻𑀢𑀺 ‘‘𑀓𑀫𑁆𑀫𑀸𑀭𑀳𑁄 𑀅𑀬’’𑀦𑁆𑀢𑀺 𑀢𑀢𑁆𑀣 𑀧𑀝𑀺𑀓𑀸𑀭𑀁 𑀅𑀧𑀲𑁆𑀲𑀦𑁆𑀢𑁄 𑀢𑀼𑀡𑁆𑀳𑀻 𑀅𑀳𑁄𑀲𑀺.

𑀏𑀓𑀧𑀓𑁆𑀔𑀘𑁆𑀙𑀤𑀦𑀫𑀢𑁆𑀢𑀸𑀳𑀻𑀢𑀺 𑀫𑀚𑁆𑀛𑀺𑀫𑀧𑁆𑀧𑀫𑀸𑀡𑀲𑁆𑀲 𑀕𑁂𑀳𑀲𑁆𑀲 𑀏𑀓𑀘𑁆𑀙𑀤𑀦𑀧𑁆𑀧𑀫𑀸𑀡𑁂𑀳𑀺. 𑀲𑀼𑀢𑁆𑀢𑀸𑀳𑀢𑀁 𑀓𑀭𑀺𑀢𑁆𑀯𑀸𑀢𑀺 𑀓𑀸𑀴𑀲𑀼𑀢𑁆𑀢𑀁 𑀧𑀸𑀢𑁂𑀢𑁆𑀯𑀸. 𑀬𑀣𑀸 𑀭𑀣𑁄 𑀲𑀩𑁆𑀩𑀲𑁄 𑀧𑀚𑁆𑀚𑀮𑀺𑀢𑁄 𑀳𑁄𑀢𑀺 𑀅𑀬𑁄𑀫𑀬𑁄, 𑀏𑀯𑀁 𑀬𑀼𑀕𑀸𑀤𑀬𑁄𑀧𑀺𑀲𑁆𑀲 𑀧𑀚𑁆𑀚𑀮𑀺𑀢𑀸 𑀲𑀚𑁄𑀢𑀺𑀪𑀽𑀢𑀸 𑀏𑀯 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀲𑀤𑁆𑀥𑀺𑀁…𑀧𑁂… 𑀭𑀣𑁂 𑀬𑁄𑀚𑁂𑀢𑁆𑀯𑀸’’𑀢𑀺. 𑀫𑀳𑀸𑀓𑀽𑀝𑀸𑀕𑀸𑀭𑀧𑁆𑀧𑀫𑀸𑀡𑀦𑁆𑀢𑀺 𑀲𑀢𑁆𑀢𑀪𑀽𑀫𑀓𑀫𑀳𑀸𑀓𑀽𑀝𑀸𑀕𑀸𑀭𑀧𑁆𑀧𑀫𑀸𑀡𑀁.

𑀯𑀺𑀪𑀢𑁆𑀢𑁄𑀢𑀺 𑀲𑀢𑁆𑀢𑀸𑀦𑀁 𑀲𑀸𑀥𑀸𑀭𑀡𑁂𑀦 𑀧𑀸𑀧𑀓𑀫𑁆𑀫𑀼𑀦𑀸 𑀯𑀺𑀪𑀢𑁆𑀢𑁄. 𑀳𑀻𑀦𑀁 𑀓𑀸𑀬𑀦𑁆𑀢𑀺 𑀳𑀻𑀦𑀁 𑀲𑀢𑁆𑀢𑀦𑀺𑀓𑀸𑀬𑀁, 𑀳𑀻𑀦𑀁 𑀯𑀸 𑀅𑀢𑁆𑀢𑀪𑀸𑀯𑀁. 𑀉𑀧𑀸𑀤𑀸𑀦𑁂𑀢𑀺 𑀘𑀢𑀼𑀩𑁆𑀩𑀺𑀥𑁂 𑀉𑀧𑀸𑀤𑀸𑀦𑁂. 𑀅𑀢𑁆𑀣𑀢𑁄 𑀧𑀦 𑀢𑀡𑁆𑀳𑀸𑀤𑀺𑀝𑁆𑀞𑀺𑀕𑁆𑀕𑀸𑀳𑁄𑀢𑀺 𑀆𑀳 ‘‘𑀢𑀡𑁆𑀳𑀸𑀤𑀺𑀝𑁆𑀞𑀺𑀕𑁆𑀕𑀳𑀡𑁂’’𑀢𑀺. 𑀲𑀫𑁆𑀪𑀯𑀢𑀺 𑀚𑀭𑀸𑀫𑀭𑀡𑀁 𑀏𑀢𑁂𑀦𑀸𑀢𑀺 𑀲𑀫𑁆𑀪𑀯𑁄, 𑀉𑀧𑀸𑀤𑀸𑀦𑀦𑁆𑀢𑀺 𑀆𑀳 ‘‘𑀚𑀸𑀢𑀺𑀬𑀸 𑀘 𑀫𑀭𑀡𑀲𑁆𑀲 𑀙 𑀓𑀸𑀭𑀡𑀪𑀽𑀢𑁂’’𑀢𑀺. 𑀅𑀦𑀼𑀧𑀸𑀤𑀸𑀢𑀺 𑀅𑀦𑀼𑀧𑀸𑀤𑀸𑀬. 𑀢𑁂𑀦𑀸𑀳 ‘‘𑀅𑀦𑀼𑀧𑀸𑀤𑀺𑀬𑀺𑀢𑁆𑀯𑀸’’𑀢𑀺. 𑀲𑀓𑀮𑀯𑀝𑁆𑀝𑀤𑀼𑀓𑁆𑀔𑀁 𑀅𑀢𑀺𑀓𑁆𑀓𑀦𑁆𑀢𑀸𑀢𑀺 𑀘𑀭𑀺𑀫𑀘𑀺𑀢𑁆𑀢𑀦𑀺𑀭𑁄𑀥𑁂𑀦 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀓𑀺𑀮𑁂𑀲𑀸𑀦𑀫𑁆𑀧𑀺 𑀅𑀲𑀫𑁆𑀪𑀯𑀢𑁄 𑀲𑀩𑁆𑀩𑀁 𑀯𑀝𑁆𑀝𑀤𑀼𑀓𑁆𑀔𑀁 𑀅𑀢𑀺𑀓𑁆𑀓𑀦𑁆𑀢𑀸.

𑀤𑁂𑀯𑀤𑀽𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀘𑀢𑀼𑀫𑀳𑀸𑀭𑀸𑀚𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁭. 𑀲𑀢𑁆𑀢𑀫𑁂 𑀅𑀫𑀸 𑀲𑀳 𑀯𑀢𑁆𑀢𑀦𑁆𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀓𑀺𑀘𑁆𑀘𑁂𑀢𑀺 𑀅𑀫𑀘𑁆𑀘𑀸, 𑀲𑀳𑀺𑀢𑀸. 𑀧𑀭𑀺𑀲𑀢𑀺 𑀪𑀯𑀸𑀢𑀺 𑀧𑀸𑀭𑀺𑀲𑀚𑁆𑀚𑀸, 𑀧𑀭𑀺𑀯𑀸𑀭𑀝𑁆𑀞𑀸𑀦𑀺𑀬𑀸 𑀧𑀭𑀺𑀲𑀸𑀧𑀭𑀺𑀬𑀸𑀧𑀦𑁆𑀦𑀸. 𑀢𑁂𑀦𑀸𑀳 ‘‘𑀧𑀭𑀺𑀘𑀸𑀭𑀺𑀓𑀤𑁂𑀯𑀢𑀸’’𑀢𑀺. 𑀢𑀸𑀢𑀸𑀢𑀺 𑀆𑀮𑀧𑀦𑀁. 𑀏𑀯𑀦𑁆𑀢𑀺 ‘‘𑀓𑀘𑁆𑀘𑀺 𑀩𑀳𑀽 𑀫𑀦𑀼𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀸𑀓𑀸𑀭𑁂𑀦. 𑀅𑀝𑁆𑀞 𑀯𑀸𑀭𑁂𑀢𑀺 𑀏𑀓𑀲𑁆𑀫𑀺𑀁 𑀅𑀟𑁆𑀠𑀫𑀸𑀲𑁂 𑀘𑀢𑀼𑀓𑁆𑀔𑀢𑁆𑀢𑀼𑀁 𑀢𑀣𑀸 𑀇𑀢𑀭𑀲𑁆𑀫𑀺𑀦𑁆𑀢𑀺 𑀏𑀯𑀁 𑀅𑀝𑁆𑀞 𑀯𑀸𑀭𑁂. 𑀅𑀥𑀺𑀝𑁆𑀞𑀳𑀦𑁆𑀢𑀻𑀢𑀺 𑀅𑀥𑀺𑀢𑀺𑀝𑁆𑀞𑀦𑁆𑀢𑀺. 𑀧𑀝𑀺𑀚𑀸𑀕𑀭𑁄𑀦𑁆𑀢𑀻𑀢𑀺 𑀧𑀝𑀺 𑀧𑀝𑀺 𑀚𑀸𑀕𑀭𑁄𑀦𑁆𑀢𑀺. 𑀧𑀼𑀜𑁆𑀜𑀁 𑀓𑀭𑁄𑀦𑁆𑀢𑀸 𑀳𑀺 𑀲𑀢𑁆𑀢𑀸 𑀚𑀸𑀕𑀭𑁄𑀦𑁆𑀢𑀺 𑀦𑀸𑀫 𑀓𑀸𑀢𑀩𑁆𑀩𑀓𑀺𑀘𑁆𑀘𑀧𑁆𑀧𑀲𑀼𑀢𑀢𑁆𑀢𑀸, 𑀇𑀢𑀭𑁂 𑀧𑀦 𑀲𑀼𑀧𑀦𑁆𑀢𑀺 𑀦𑀸𑀫 𑀲𑀳𑀺𑀢𑀧𑀭𑀳𑀺𑀢𑀯𑀺𑀫𑀼𑀢𑁆𑀢𑀢𑁆𑀢𑀸. 𑀘𑀸𑀢𑀼𑀤𑁆𑀤𑀲𑀺𑀉𑀧𑁄𑀲𑀣𑀲𑁆𑀲 𑀅𑀦𑀼𑀕𑀫𑀦𑀁 𑀯𑀺𑀬 𑀧𑀦𑁆𑀦𑀭𑀲𑀺𑀉𑀧𑁄𑀲𑀣𑀲𑁆𑀲 𑀧𑀘𑁆𑀘𑀼𑀕𑁆𑀕𑀫𑀦𑀁 𑀦 𑀮𑀩𑁆𑀪𑀢𑀺 𑀤𑀺𑀯𑀲𑀸𑀪𑀸𑀯𑀢𑁄.

𑀢𑀢𑁄𑀢𑀺 𑀢𑀢𑁄 𑀢𑀢𑁄. 𑀢𑀁 𑀉𑀧𑀦𑀺𑀲𑁆𑀲𑀸𑀬𑀸𑀢𑀺 𑀢𑀸 𑀢𑀸 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀺𑀬𑁄 𑀉𑀧𑀦𑀺𑀲𑁆𑀲𑀸𑀬. 𑀅𑀥𑀺𑀯𑀢𑁆𑀣𑀸𑀢𑀺 𑀆𑀭𑀸𑀫𑀯𑀦𑀭𑀼𑀓𑁆𑀔𑀸𑀤𑀻𑀲𑀼 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸. 𑀢𑁂𑀢𑀺 𑀢𑁂 𑀤𑁂𑀯𑀸. 𑀲𑀦𑁆𑀥𑀸𑀬 𑀓𑀣𑁂𑀢𑀻𑀢𑀺 𑀪𑀕𑀯𑀸 𑀓𑀣𑁂𑀢𑀺. 𑀯𑀼𑀢𑁆𑀢𑀦𑁆𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁.

𑀦𑀺𑀘𑁆𑀘𑀁 𑀦𑀺𑀩𑀤𑁆𑀥𑀁 𑀉𑀧𑁄𑀲𑀣𑁄 𑀲𑀁𑀯𑀘𑁆𑀙𑀭𑁂 𑀲𑀁𑀯𑀘𑁆𑀙𑀭𑁂 𑀧𑀝𑀺 𑀧𑀝𑀺 𑀳𑀭𑀺𑀢𑀩𑁆𑀩𑀢𑁄 𑀧𑀯𑀢𑁆𑀢𑁂𑀢𑀩𑁆𑀩𑀢𑁄 𑀧𑀸𑀝𑀺𑀳𑀸𑀭𑀺𑀬𑀧𑀓𑁆𑀔𑁄 𑀦𑀸𑀫. 𑀕𑀼𑀡𑀗𑁆𑀕𑁂𑀳𑀻𑀢𑀺 𑀉𑀧𑁄𑀲𑀣𑀗𑁆𑀕𑁂𑀳𑀺.

𑀯𑀼𑀢𑁆𑀣𑀯𑀸𑀲𑁄𑀢𑀺 𑀯𑀼𑀲𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄. 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀦𑁆𑀢𑀺 𑀤𑀼𑀓𑁆𑀔𑀸𑀤𑀻𑀲𑀼 𑀧𑀭𑀺𑀜𑁆𑀜𑀸𑀢𑀸𑀤𑀺𑀓𑀺𑀘𑁆𑀘𑀁. 𑀑𑀢𑀸𑀭𑁂𑀢𑁆𑀯𑀸𑀢𑀺 𑀙𑀟𑁆𑀟𑁂𑀢𑁆𑀯𑀸. 𑀧𑀭𑀺𑀓𑁆𑀔𑀻𑀡𑀪𑀯𑀲𑀁𑀬𑁄𑀚𑀦𑁄𑀢𑀺 𑀲𑀩𑁆𑀩𑀲𑁄 𑀔𑀻𑀡𑀪𑀯𑀩𑀦𑁆𑀥𑀦𑁄. 𑀓𑀸𑀭𑀡𑁂𑀦 𑀚𑀸𑀦𑀺𑀢𑁆𑀯𑀸𑀢𑀺 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀲𑀳𑀺𑀢𑀸𑀬 𑀫𑀕𑁆𑀕𑀧𑀜𑁆𑀜𑀸𑀬 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀚𑀸𑀦𑀺𑀢𑁆𑀯𑀸.

𑀚𑀸𑀦𑀦𑁆𑀢𑁄𑀢𑀺 ‘‘𑀅𑀭𑀳𑀦𑁆𑀢𑀸𑀦𑀁 𑀅𑀦𑀼𑀓𑀭𑀡𑀧𑁆𑀧𑀝𑀺𑀧𑀢𑁆𑀢𑀺 𑀏𑀲𑀸, 𑀬𑀤𑀺𑀤𑀁 𑀲𑀫𑁆𑀫𑀤𑁂𑀯 𑀉𑀧𑁄𑀲𑀣𑀸𑀦𑀼𑀝𑁆𑀞𑀸𑀦’’𑀦𑁆𑀢𑀺 𑀏𑀯𑀁 𑀉𑀧𑁄𑀲𑀣𑀓𑀫𑁆𑀫𑀲𑁆𑀲 𑀕𑀼𑀡𑀁 𑀚𑀸𑀦𑀦𑁆𑀢𑁄. 𑀏𑀯𑀭𑀽𑀧𑁂𑀦𑀸𑀢𑀺 𑀬𑀸𑀤𑀺𑀲𑁄 𑀪𑀕𑀯𑀢𑁄 𑀉𑀧𑁄𑀲𑀣𑀪𑀸𑀯𑁄 𑀯𑀺𑀳𑀺𑀢𑁄, 𑀏𑀯𑀭𑀽𑀧𑁂𑀦 𑀅𑀭𑀳𑀦𑁆𑀢𑀸𑀦𑀼𑀓𑀭𑀡𑁂𑀦 𑀉𑀧𑁄𑀲𑀣𑀓𑀫𑁆𑀫𑁂𑀦. 𑀲𑀓𑁆𑀓𑀸 𑀧𑀳𑀺𑀢𑀢𑁆𑀢𑁄 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀔𑀻𑀡𑀸𑀲𑀯𑀲𑀫𑁆𑀧𑀢𑁆𑀢𑀺𑀁 𑀧𑀸𑀧𑀼𑀡𑀺𑀢𑀼𑀁. 𑀅𑀝𑁆𑀞𑀫𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯 𑀲𑀢𑁆𑀢𑀫𑁂 𑀯𑀼𑀢𑁆𑀢𑀦𑀬𑀢𑁆𑀢𑀸.

𑀘𑀢𑀼𑀫𑀳𑀸𑀭𑀸𑀚𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀲𑀼𑀔𑀼𑀫𑀸𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁯. 𑀦𑀯𑀫𑁂 𑀦𑀺𑀤𑁆𑀤𑀼𑀓𑁆𑀔𑁄𑀢𑀺 𑀓𑀸𑀬𑀺𑀓𑀘𑁂𑀢𑀲𑀺𑀓𑀤𑀼𑀓𑁆𑀔𑀯𑀺𑀭𑀳𑀺𑀢𑁄. 𑀲𑀤𑀼𑀓𑁆𑀔𑁂 𑀳𑀺 𑀲𑀯𑀺𑀖𑀸𑀢𑁂 𑀲𑀼𑀔𑀼𑀫𑀸𑀮𑀢𑁆𑀢𑀸 𑀅𑀦𑀯𑀲𑀭𑀸, 𑀢𑀲𑁆𑀫𑀸 𑀲𑀼𑀔𑀺𑀢𑁄 𑀦𑀺𑀤𑁆𑀤𑀼𑀓𑁆𑀔𑀢𑀸𑀬 𑀲𑀼𑀔𑀼𑀫𑀸𑀮𑁄 𑀦𑀸𑀫. 𑀬𑀸𑀯𑀲𑁆𑀲 𑀲𑀼𑀔𑀼𑀫𑀸𑀮𑀢𑁆𑀢𑀸 𑀧𑀭𑀫𑀼𑀓𑁆𑀓𑀁𑀲𑀕𑀢𑀸𑀢𑀺 𑀆𑀳 ‘‘𑀧𑀭𑀫𑀲𑀼𑀔𑀼𑀫𑀸𑀮𑁄’’𑀢𑀺. 𑀅𑀢𑀺𑀯𑀺𑀬 𑀲𑀼𑀔𑀼𑀫𑀸𑀮𑁄𑀢𑀺 𑀅𑀢𑁆𑀣𑁄. 𑀅𑀦𑁆𑀢𑀫𑀢𑀻𑀢𑀁 𑀅𑀘𑁆𑀘𑀦𑁆𑀢𑀁. 𑀲𑀩𑁆𑀩𑀤𑀸 𑀲𑀼𑀔𑀼𑀫𑀸𑀮𑁄𑀢𑀺 𑀆𑀳 ‘‘𑀲𑀢𑀢𑀦𑀺𑀤𑁆𑀤𑀼𑀓𑁆𑀔𑁄’’𑀢𑀺. 𑀘𑀭𑀺𑀬𑀓𑀸𑀮𑁂𑀢𑀺 𑀩𑁄𑀥𑀺𑀘𑀭𑀺𑀬𑀸𑀬 𑀘𑀭𑀡𑀓𑀸𑀮𑁂. 𑀢𑁂𑀦𑀸𑀢𑀺 𑀩𑁄𑀥𑀺𑀲𑀢𑁆𑀢𑁂𑀦. 𑀅𑀜𑁆𑀜𑀢𑁆𑀣 𑀧𑀦 𑀧𑀤𑀼𑀫𑀦𑁆𑀢𑀺 𑀭𑀢𑁆𑀢𑀁 𑀓𑀫𑀮𑀁. 𑀧𑀼𑀡𑁆𑀟𑀭𑀻𑀓𑀦𑁆𑀢𑀺 𑀲𑁂𑀢𑀁 𑀯𑀼𑀘𑁆𑀘𑀢𑀺. 𑀇𑀢𑀭𑀸𑀢𑀺 𑀇𑀢𑀭𑀧𑁄𑀓𑁆𑀔𑀭𑀡𑀺𑀬𑁄. ‘‘𑀩𑁄𑀥𑀺𑀲𑀢𑁆𑀢𑀲𑁆𑀲 𑀓𑀺𑀭𑀸’’𑀢𑀺𑀆𑀤𑀺𑀓𑀁 𑀧𑁄𑀓𑁆𑀔𑀭𑀡𑀻𑀦𑀁 𑀉𑀧𑁆𑀧𑀢𑁆𑀢𑀺𑀤𑀲𑁆𑀲𑀦𑀁. 𑀓𑀼𑀤𑁆𑀤𑀸𑀮𑀓𑀫𑁆𑀫𑀓𑀸𑀭𑁂𑀢𑀺 𑀔𑀡𑀓𑁂. 𑀧𑁄𑀓𑁆𑀔𑀭𑀡𑀺𑀝𑁆𑀞𑀸𑀦𑀸𑀦𑀻𑀢𑀺 𑀧𑁄𑀓𑁆𑀔𑀭𑀡𑀺𑀔𑀡𑀦𑀬𑁄𑀕𑁆𑀕𑀝𑁆𑀞𑀸𑀦𑀸𑀦𑀺. 𑀕𑀡𑁆𑀳𑀸𑀧𑁂𑀲𑀻𑀢𑀺 𑀔𑀡𑀸𑀧𑁂𑀲𑀺. 𑀧𑁄𑀓𑁆𑀔𑀭𑀡𑀺𑀲𑀤𑁆𑀤𑁄 𑀘𑁂𑀢𑁆𑀣 𑀢𑀸𑀤𑀺𑀲𑁂 𑀚𑀮𑀸𑀲𑀬𑁂 𑀦𑀺𑀭𑀼𑀴𑁆𑀳𑁄 𑀤𑀝𑁆𑀞𑀩𑁆𑀩𑁄 𑀧𑀗𑁆𑀓𑀚𑀸𑀤𑀺𑀲𑀤𑁆𑀤𑀸 𑀯𑀺𑀬. 𑀲𑁄𑀧𑀸𑀦𑀩𑀸𑀳𑀼𑀓𑀸𑀦𑀁 𑀫𑀢𑁆𑀣𑀓𑀝𑁆𑀞𑀸𑀦𑀁 𑀉𑀡𑁆𑀳𑀻𑀲𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁. 𑀉𑀤𑀓𑀲𑁂𑀘𑀦𑀦𑀸𑀴𑀺𑀓𑀸𑀢𑀺 𑀉𑀤𑀓𑀘𑁆𑀙𑀝𑀸𑀯𑀺𑀲𑁆𑀲𑀚𑁆𑀚𑀦𑀦𑀸𑀴𑀺𑀬𑀦𑁆𑀢𑀸𑀦𑀺. 𑀧𑀜𑁆𑀘𑀯𑀺𑀥𑀸𑀢𑀺 𑀯𑀡𑁆𑀡𑀯𑀲𑁂𑀦 𑀚𑀸𑀢𑀺𑀯𑀲𑁂𑀦 𑀘.

𑀔𑁄 𑀧𑀦𑀲𑁆𑀲𑀸𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀓𑀸𑀲𑀺𑀓-𑀲𑀤𑁆𑀤𑁄 𑀅𑀢𑀺𑀯𑀺𑀬 𑀲𑀡𑁆𑀳𑁂 𑀲𑀼𑀔𑀼𑀫𑁂 𑀫𑀳𑀕𑁆𑀖𑀯𑀢𑁆𑀣𑁂 𑀦𑀺𑀭𑀼𑀴𑁆𑀳𑁄, 𑀅𑀜𑁆𑀜𑀲𑁆𑀫𑀺𑀫𑁆𑀧𑀺 𑀢𑀣𑀸𑀚𑀸𑀢𑀺𑀓𑁂 𑀭𑀼𑀴𑁆𑀳𑀺𑀯𑀲𑁂𑀦 𑀧𑀯𑀢𑁆𑀢𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦𑀸𑀳 ‘‘𑀅𑀓𑀸𑀲𑀺𑀓𑀁 𑀘𑀦𑁆𑀤𑀦’’𑀦𑁆𑀢𑀺. 𑀳𑁂𑀫𑀦𑁆𑀢𑁂 𑀯𑀸𑀲𑁄 𑀳𑁂𑀫𑀦𑁆𑀢𑀁, 𑀳𑁂𑀫𑀦𑁆𑀢𑀁 𑀅𑀭𑀳𑀢𑀻𑀢𑀺 𑀳𑁂𑀫𑀦𑁆𑀢𑀺𑀓𑁄, 𑀧𑀸𑀲𑀸𑀤𑁄. ‘‘𑀇𑀢𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄’’𑀢𑀺 𑀯𑀢𑁆𑀯𑀸 𑀢𑀤𑁂𑀯 𑀦𑁂𑀲𑀁 𑀅𑀭𑀳𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀳𑁂𑀫𑀦𑁆𑀢𑀺𑀓𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀚𑀸𑀮𑀸𑀦𑀻𑀢𑀺 𑀲𑀚𑀸𑀮𑀯𑀸𑀢𑀧𑀸𑀦𑀸𑀦𑀺, 𑀉𑀤𑀓𑀬𑀦𑁆𑀢𑀸𑀦𑀻𑀢𑀺 𑀉𑀤𑀓𑀥𑀸𑀭𑀸𑀯𑀺𑀲𑁆𑀲𑀦𑁆𑀤𑀦𑀓𑀬𑀦𑁆𑀢𑀸𑀦𑀺. 𑀧𑀸𑀲𑀸𑀤𑀫𑀢𑁆𑀣𑀓𑁂𑀢𑀺 𑀧𑀸𑀲𑀸𑀤𑀲𑁆𑀲 𑀉𑀧𑀭𑀺𑀆𑀓𑀸𑀲𑀢𑀮𑁂. 𑀩𑀦𑁆𑀥𑀺𑀢𑁆𑀯𑀸𑀢𑀺 𑀧𑀬𑁄𑀚𑀺𑀢𑀬𑀦𑁆𑀢𑁂 𑀲𑀼𑀓𑁆𑀔𑀫𑀳𑀺𑀁𑀲𑀘𑀫𑁆𑀫𑀁 𑀩𑀦𑁆𑀥𑀺𑀢𑁆𑀯𑀸. 𑀬𑀦𑁆𑀢𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸𑀢𑀺 𑀬𑀣𑀸𑀧𑀬𑁄𑀚𑀺𑀢𑀁 𑀬𑀦𑁆𑀢𑀁 𑀧𑀸𑀲𑀸𑀡𑀸𑀭𑁄𑀧𑀦𑀢𑁆𑀣𑀜𑁆𑀘𑁂𑀯 𑀧𑀼𑀦 𑀢𑁂𑀲𑀁 𑀯𑀺𑀲𑁆𑀲𑀚𑁆𑀚𑀦𑀢𑁆𑀣𑀜𑁆𑀘 𑀧𑀭𑀺𑀯𑀢𑁆𑀢𑁂𑀢𑁆𑀯𑀸. 𑀢𑀲𑁆𑀫𑀺𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀻𑀢𑀺 𑀙𑀤𑀦𑀧𑀺𑀝𑁆𑀞𑁂 𑀩𑀤𑁆𑀥𑀲𑀼𑀓𑁆𑀔𑀫𑀳𑀺𑀁𑀲𑀘𑀫𑁆𑀫𑁂 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀺.

𑀲𑀳𑀲𑁆𑀲𑀣𑀸𑀫𑀦𑁆𑀢𑀺 𑀧𑀼𑀭𑀺𑀲𑀲𑀳𑀲𑁆𑀲𑀩𑀮𑀁, 𑀧𑀼𑀭𑀺𑀲𑀲𑀳𑀲𑁆𑀲𑁂𑀦 𑀯𑀳𑀺𑀢𑀩𑁆𑀩𑀪𑀸𑀭𑀯𑀳𑀁. 𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑁄𑀯𑀸𑀢𑀺 𑀭𑀢𑀦𑀫𑀬𑀧𑀮𑁆𑀮𑀗𑁆𑀓𑁂 𑀬𑀣𑀸𑀦𑀺𑀲𑀺𑀦𑁆𑀦𑁄 𑀏𑀯. 𑀉𑀧𑁆𑀧𑀢𑀦𑀸𑀓𑀸𑀭𑀧𑀢𑁆𑀢𑀦𑁆𑀢𑀺 𑀉𑀧𑁆𑀧𑀢𑀺𑀢𑁆𑀯𑀸 𑀞𑀺𑀢𑀁 𑀯𑀺𑀬. 𑀚𑀺𑀬𑀁 𑀧𑁄𑀣𑁂𑀦𑁆𑀢𑀲𑁆𑀲𑀸𑀢𑀺 𑀚𑀺𑀬𑀸𑀖𑀸𑀢𑀁 𑀓𑀭𑁄𑀦𑁆𑀢𑀲𑁆𑀲. 𑀚𑀺𑀬𑀧𑁆𑀧𑀳𑀸𑀭𑀲𑀤𑁆𑀤𑁄𑀢𑀺 𑀚𑀺𑀬𑀸𑀖𑀸𑀢𑀲𑀤𑁆𑀤𑁄. 𑀬𑀦𑁆𑀢𑁂 𑀩𑀤𑁆𑀥𑀦𑁆𑀢𑀺 𑀬𑀦𑁆𑀢𑀩𑀤𑁆𑀥𑀁 𑀓𑀢𑁆𑀯𑀸 𑀞𑀧𑀺𑀢𑀁. 𑀲𑀤𑁆𑀤𑀦𑁆𑀢𑀭𑁂𑀢𑀺 𑀣𑀸𑀫𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀲𑀤𑁆𑀤𑀲𑀯𑀦𑀝𑁆𑀞𑀸𑀦𑁂. 𑀕𑀸𑀯𑀼𑀢𑀲𑁆𑀲 𑀘𑀢𑀼𑀢𑁆𑀣𑁄 𑀪𑀸𑀕𑁄 𑀓𑁄𑀲𑁄𑀢𑀺𑀧𑀺 𑀯𑀼𑀘𑁆𑀘𑀢𑀺 𑀤𑁆𑀯𑀺𑀲𑀳𑀲𑁆𑀲𑀤𑀡𑁆𑀟𑀧𑁆𑀧𑀫𑀸𑀡𑀝𑁆𑀞𑀸𑀦𑀁.

𑀲𑀩𑁆𑀩𑀝𑁆𑀞𑀸𑀦𑀸𑀦𑀻𑀢𑀺 𑀫𑀳𑀸𑀧𑀼𑀭𑀺𑀲𑀲𑁆𑀲 𑀢𑀸𑀦𑀺 𑀢𑀸𑀦𑀺 𑀲𑀩𑁆𑀩𑀸𑀦𑀺 𑀯𑀲𑀦𑀝𑁆𑀞𑀸𑀦𑀸𑀦𑀺. 𑀲𑀺𑀔𑀸𑀩𑀤𑁆𑀥𑁄𑀢𑀺 𑀧𑀼𑀭𑀺𑀲𑀲𑀪𑀸𑀯𑀲𑁆𑀲𑁂𑀯 𑀯𑀺𑀲𑁂𑀲𑀢𑁄 𑀤𑀲𑁆𑀲𑀦𑀫𑁂𑀢𑀁. 𑀦 𑀉𑀧𑁆𑀧𑀺𑀮𑀸𑀯𑀺𑀢𑀪𑀸𑀯𑀢𑁆𑀣𑀦𑁆𑀢𑀺 𑀉𑀧𑁆𑀧𑀺𑀮𑀸𑀯𑀺𑀢𑀪𑀸𑀯𑀲𑀗𑁆𑀔𑀸𑀢𑀁 𑀅𑀢𑁆𑀣𑀁 𑀦 𑀓𑀣𑁂𑀲𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀲 𑀳𑀺 𑀩𑁄𑀥𑀺𑀫𑀽𑀮𑁂𑀬𑁂𑀯 𑀲𑁂𑀢𑀼𑀖𑀸𑀢𑁄. 𑀢𑁂𑀦𑁂𑀯𑀸𑀢𑀺 𑀅𑀧𑁆𑀧𑀫𑀸𑀤𑀮𑀓𑁆𑀔𑀡𑀲𑁆𑀲 𑀤𑀻𑀧𑀦𑀢𑁄 𑀏𑀯. 𑀅𑀢𑁆𑀢𑀸𑀦𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸𑀢𑀺 𑀅𑀢𑁆𑀢𑀦𑁄 𑀚𑀭𑀸𑀧𑀢𑁆𑀢𑀺𑀁 𑀅𑀘𑀺𑀦𑁆𑀢𑁂𑀢𑁆𑀯𑀸 𑀅𑀝𑁆𑀝𑀻𑀬𑀢𑀺. 𑀦 𑀧𑀦𑁂𑀲 𑀫𑀕𑁆𑀕𑁂𑀦 𑀧𑀳𑀻𑀦𑁄 𑀢𑀤𑀸 𑀫𑀕𑁆𑀕𑀲𑁆𑀲 𑀅𑀦𑀥𑀺𑀕𑀢𑀢𑁆𑀢𑀸. 𑀲𑀺𑀓𑁆𑀔𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀬𑀣𑀸𑀲𑀫𑀸𑀤𑀺𑀦𑁆𑀦𑀲𑀺𑀓𑁆𑀔𑀁 𑀧𑀳𑀸𑀬.

𑀅𑀯𑀺𑀧𑀭𑀻𑀢𑀩𑁆𑀬𑀸𑀥𑀺𑀆𑀤𑀺𑀲𑀪𑀸𑀯𑀸𑀯𑀸𑀢𑀺 𑀏𑀓𑀦𑁆𑀢𑁂𑀦 𑀩𑁆𑀬𑀸𑀥𑀺𑀆𑀤𑀺𑀲𑀪𑀸𑀯𑀸 𑀏𑀯. 𑀏𑀯𑀁 𑀚𑀺𑀕𑀼𑀘𑁆𑀙𑀸𑀯𑀺𑀳𑀸𑀭𑁂𑀦𑀸𑀢𑀺 𑀏𑀯𑀁 𑀲𑀓𑀮𑀲𑁆𑀲𑁂𑀯 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀚𑀺𑀕𑀼𑀘𑁆𑀙𑀦𑀯𑀺𑀳𑀸𑀭𑁂𑀦 𑀯𑀺𑀳𑀭𑀦𑁆𑀢𑀲𑁆𑀲. 𑀏𑀯𑀁 𑀚𑀺𑀕𑀼𑀘𑁆𑀙𑀦𑀦𑁆𑀢𑀺 𑀏𑀯𑀁 𑀧𑀭𑀲𑁆𑀲 𑀚𑀺𑀕𑀼𑀘𑁆𑀙𑀦𑀁. 𑀧𑀭𑀁 𑀅𑀚𑀺𑀕𑀼𑀘𑁆𑀙𑀫𑀸𑀦𑁄𑀢𑀺 𑀓𑀭𑀼𑀡𑀸𑀬𑀦𑁂𑀦 𑀏𑀯𑀁 𑀧𑀭𑀁 𑀅𑀚𑀺𑀕𑀼𑀘𑁆𑀙𑀦𑁆𑀢𑁄. 𑀅𑀪𑀺𑀪𑁄𑀲𑁆𑀫𑀻𑀢𑀺 𑀅𑀪𑀺𑀪𑀯𑀺𑀢𑀸 𑀅𑀲𑁆𑀫𑀺. 𑀉𑀲𑁆𑀲𑀸𑀳𑁄 𑀅𑀳𑀽𑀢𑀺 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀯𑀻𑀭𑀺𑀬𑀫𑁂𑀯 𑀘𑀢𑀼𑀩𑁆𑀩𑀺𑀥𑀲𑀫𑁆𑀫𑀧𑁆𑀧𑀥𑀸𑀦𑀯𑀻𑀭𑀺𑀬𑀜𑁆𑀘 𑀅𑀳𑁄𑀲𑀺, 𑀬𑁂𑀦 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀸𑀬𑀡𑁄 𑀚𑀸𑀢𑁄.

𑀲𑀼𑀔𑀼𑀫𑀸𑀮𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀆𑀥𑀺𑀧𑀢𑁂𑀬𑁆𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁦. 𑀤𑀲𑀫𑁂 𑀅𑀪𑀺𑀪𑀯𑀺𑀢𑁆𑀯𑀸 𑀧𑀯𑀢𑁆𑀢𑀦𑀝𑁆𑀞𑁂𑀦 𑀅𑀥𑀺𑀧𑀢𑀺 𑀬𑀁 𑀓𑀺𑀜𑁆𑀘𑀺 𑀚𑁂𑀝𑁆𑀞𑀓𑀁 𑀦 𑀓𑀸𑀭𑀓𑀁 𑀅𑀢𑁆𑀢𑀸𑀦𑀁 𑀅𑀥𑀺𑀧𑀢𑀻𑀢𑀺 𑀓𑀢𑁆𑀯𑀸 𑀅𑀢𑁆𑀢𑀸 𑀏𑀯 𑀅𑀥𑀺𑀧𑀢𑀺, 𑀢𑀢𑁄 𑀆𑀕𑀢𑀁 𑀅𑀢𑁆𑀢𑀸𑀥𑀺𑀧𑀢𑁂𑀬𑁆𑀬𑀁. 𑀢𑁂𑀦𑀸𑀳 ‘‘𑀅𑀢𑁆𑀢𑀸𑀦’’𑀦𑁆𑀢𑀺𑀆𑀤𑀺. 𑀮𑁄𑀓𑀦𑁆𑀢𑀺 𑀲𑀢𑁆𑀢𑀮𑁄𑀓𑀁. 𑀲𑁄 𑀘 𑀔𑁄 𑀇𑀤𑁆𑀥𑀺𑀯𑀺𑀥𑀸𑀤𑀺𑀕𑀼𑀡𑀯𑀺𑀲𑁂𑀲𑀬𑀼𑀢𑁆𑀢𑁄 𑀅𑀥𑀺𑀧𑁆𑀧𑁂𑀢𑁄 𑀅𑀥𑀺𑀧𑀢𑀺𑀪𑀸𑀯𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀦𑀯𑀯𑀺𑀥𑀁 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀦𑁆𑀢𑀺 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁂𑀦 𑀯𑀼𑀢𑁆𑀢𑀁. 𑀇𑀢𑀺 𑀪𑀯𑁄𑀢𑀺 𑀏𑀯𑀁 𑀲𑀫𑁆𑀧𑀢𑁆𑀢𑀺𑀪𑀯𑁄, 𑀢𑀢𑁆𑀣 𑀏𑀯𑀁 𑀅𑀪𑀺𑀯𑀼𑀤𑁆𑀥𑀻𑀢𑀺. 𑀲𑀫𑁆𑀧𑀢𑁆𑀢𑀺𑀪𑀯𑀲𑁆𑀲 𑀳𑁂𑀢𑀽𑀢𑀺 𑀢𑀁𑀢𑀁𑀲𑀫𑁆𑀧𑀢𑁆𑀢𑀺𑀪𑀯𑀲𑁆𑀲 𑀢𑀢𑁆𑀣 𑀘 𑀅𑀪𑀺𑀯𑀼𑀤𑁆𑀥𑀺𑀬𑀸 𑀳𑁂𑀢𑀼. 𑀚𑀸𑀢𑀺𑀦𑀺𑀫𑀺𑀢𑁆𑀢𑀲𑁆𑀲 𑀓𑀫𑁆𑀫𑀪𑀯𑀲𑁆𑀲 𑀓𑀢𑀽𑀧𑀘𑀺𑀢𑀢𑁆𑀢𑀸 𑀚𑀸𑀢𑀺 𑀅𑀦𑁆𑀢𑁄𑀧𑀯𑀺𑀝𑁆𑀞𑀸. 𑀚𑀭𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄 𑀳𑁂𑀢𑀼𑀲𑀺𑀤𑁆𑀥𑀺𑀬𑀸 𑀨𑀮𑀲𑀺𑀤𑁆𑀥𑀺𑀢𑁄.

𑀅𑀲𑀮𑁆𑀮𑀻𑀦𑀦𑁆𑀢𑀺 𑀦 𑀲𑀗𑁆𑀓𑁄𑀘𑀧𑁆𑀧𑀢𑁆𑀢𑀁. 𑀉𑀧𑀝𑁆𑀞𑀺𑀢𑀸𑀢𑀺 𑀓𑀸𑀬𑀸𑀤𑀺𑀲𑀪𑀸𑀯𑀲𑀮𑁆𑀮𑀓𑁆𑀔𑀡𑀯𑀲𑁂𑀦 𑀉𑀧𑀝𑁆𑀞𑀺𑀢𑀸. 𑀅𑀲𑀫𑁆𑀫𑀼𑀝𑁆𑀞𑀸 𑀲𑀫𑁆𑀫𑁄𑀲𑀸𑀪𑀸𑀯𑀢𑁄. 𑀅𑀲𑀸𑀭𑀤𑁆𑀥𑁄𑀢𑀺 𑀲𑀸𑀭𑀫𑁆𑀪𑀲𑁆𑀲 𑀲𑀸𑀭𑀫𑁆𑀪𑀳𑁂𑀢𑀽𑀦𑀜𑁆𑀘 𑀯𑀺𑀓𑁆𑀔𑀫𑁆𑀪𑀦𑁂𑀦 𑀅𑀲𑀸𑀭𑀤𑁆𑀥𑁄. 𑀏𑀓𑀕𑁆𑀕𑀁 𑀅𑀦𑁂𑀓𑀕𑁆𑀕𑀪𑀸𑀯𑀲𑁆𑀲 𑀤𑀽𑀭𑀲𑀫𑀼𑀲𑁆𑀲𑀸𑀧𑀺𑀢𑀢𑁆𑀢𑀸. 𑀦𑀺𑀫𑁆𑀫𑀮𑀁 𑀓𑀢𑁆𑀯𑀸𑀢𑀺 𑀭𑀸𑀕𑀸𑀤𑀺𑀫𑀮𑀸𑀦𑀁 𑀅𑀧𑀦𑀬𑀦𑁂𑀦 𑀫𑀮𑀭𑀳𑀺𑀢𑀁 𑀓𑀢𑁆𑀯𑀸. 𑀕𑁄𑀧𑀸𑀬𑀢𑀻𑀢𑀺 𑀲𑀁𑀓𑀺𑀮𑁂𑀲𑀸𑀦𑀢𑁆𑀣𑀢𑁄 𑀭𑀓𑁆𑀔𑀢𑀺. 𑀅𑀬𑀦𑁆𑀢𑀺 𑀏𑀯𑀁𑀧𑀝𑀺𑀧𑀦𑁆𑀦𑁄 𑀪𑀺𑀓𑁆𑀔𑀼. 𑀲𑀼𑀤𑁆𑀥𑀫𑀢𑁆𑀢𑀸𑀦𑀁 𑀧𑀭𑀺𑀳𑀭𑀢𑀺 𑀅𑀲𑀼𑀤𑁆𑀥𑀪𑀸𑀯𑀲𑁆𑀲 𑀓𑀺𑀮𑁂𑀲𑀲𑁆𑀲𑀧𑀺 𑀅𑀪𑀸𑀯𑀢𑁄.

𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀫𑀜𑁆𑀜𑀲𑀻𑀢𑀺 𑀅𑀲𑀓𑁆𑀔𑀺𑀁 𑀓𑀢𑁆𑀯𑀸 𑀫𑀜𑁆𑀜𑀲𑀺. 𑀢𑀸𑀬 𑀢𑀡𑁆𑀳𑀸𑀬 𑀦𑀺𑀩𑁆𑀩𑀢𑁆𑀢𑁄𑀢𑀺 𑀢𑀫𑁆𑀫𑀬𑁄, 𑀢𑀡𑁆𑀳𑀸𑀯𑀲𑀺𑀓𑁄. 𑀢𑀲𑁆𑀲 𑀪𑀸𑀯𑁄 𑀢𑀫𑁆𑀫𑀬𑀢𑀸, 𑀢𑀲𑁆𑀲𑀸 𑀢𑀫𑁆𑀫𑀬𑀢𑀸𑀬 𑀅𑀪𑀸𑀯𑁂𑀦. 𑀦 𑀳𑀸𑀬𑀢𑀺 𑀧𑀜𑁆𑀜𑀸𑀤𑀺𑀕𑀼𑀡𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀺𑀬𑀸.

𑀆𑀥𑀺𑀧𑀢𑁂𑀬𑁆𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑁂𑀯𑀤𑀽𑀢𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.