(𑁧𑁬) 𑁬. 𑀅𑀘𑁂𑀮𑀓𑀯𑀕𑁆𑀕𑀯𑀡𑁆𑀡𑀦𑀸

𑁧𑁫𑁭-𑁧𑁬𑁩. 𑀇𑀢𑁄 𑀧𑀭𑁂𑀲𑀼 𑀧𑀦 𑀲𑀼𑀢𑁆𑀢𑀧𑀤𑁂𑀲𑀼 ‘‘𑀕𑀸𑀴𑁆𑀳𑀸’’𑀢𑀺 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀯𑀭𑀦𑁆𑀢𑁄 ‘‘𑀓𑀓𑁆𑀔𑀴𑀸’’𑀢𑀺 𑀆𑀳. 𑀓𑀓𑁆𑀔𑀴𑀘𑀸𑀭𑁄 𑀘𑀲𑁆𑀲𑀸 𑀦 𑀮𑀽𑀔𑀲𑀪𑀸𑀯𑁄. 𑀅𑀣 𑀔𑁄 𑀢𑀡𑁆𑀳𑀸𑀯𑀲𑁂𑀦 𑀣𑀺𑀭𑀕𑁆𑀕𑀳𑀡𑀦𑁆𑀢𑀺 𑀆𑀳 ‘‘𑀮𑁄𑀪𑀯𑀲𑁂𑀦 𑀣𑀺𑀭𑀕𑁆𑀕𑀳𑀡𑀸’’𑀢𑀺. 𑀅𑀕𑀸𑀴𑁆𑀳𑀸 𑀧𑀝𑀺𑀧𑀤𑀸𑀢𑀺 𑀯𑀸 𑀓𑀸𑀫𑀸𑀦𑀁 𑀑𑀕𑀸𑀳𑀦𑀁 𑀧𑀝𑀺𑀧𑀢𑁆𑀢𑀺, 𑀓𑀸𑀫𑀲𑀼𑀔𑀸𑀦𑀼𑀬𑁄𑀕𑁄𑀢𑀺 𑀅𑀢𑁆𑀣𑁄. 𑀦𑀺𑀚𑁆𑀛𑀸𑀫𑀸 𑀧𑀝𑀺𑀧𑀤𑀸𑀢𑀺 𑀓𑀸𑀬𑀲𑁆𑀲 𑀦𑀺𑀚𑁆𑀛𑀸𑀧𑀦𑀯𑀲𑁂𑀦 𑀔𑁂𑀧𑀦𑀯𑀲𑁂𑀦 𑀧𑀯𑀢𑁆𑀢𑀸 𑀧𑀝𑀺𑀧𑀢𑁆𑀢𑀺, 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑁄𑀢𑀺 𑀅𑀢𑁆𑀣𑁄. 𑀦𑀺𑀘𑁆𑀘𑁂𑀮𑁄𑀢𑀺 𑀦𑀺𑀲𑁆𑀲𑀝𑁆𑀞𑀘𑁂𑀮𑁄 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀧𑀝𑀺𑀓𑁆𑀔𑀺𑀢𑁆𑀢𑀘𑁂𑀮𑁄. 𑀦𑀕𑁆𑀕𑀺𑀬𑀯𑀢𑀲𑀫𑀸𑀤𑀸𑀦𑁂𑀦 𑀦𑀕𑁆𑀕𑁄. 𑀞𑀺𑀢𑀓𑁄𑀯 𑀉𑀘𑁆𑀘𑀸𑀭𑀁 𑀓𑀭𑁄𑀢𑀻𑀢𑀺𑀆𑀤𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀯𑀫𑀺𑀢𑁆𑀯𑀸 𑀫𑀼𑀔𑀯𑀺𑀓𑁆𑀔𑀸𑀮𑀦𑀸𑀤𑀺𑀆𑀘𑀸𑀭𑀲𑁆𑀲𑀧𑀺 𑀢𑁂𑀦 𑀯𑀺𑀲𑁆𑀲𑀝𑁆𑀞𑀢𑁆𑀢𑀸. 𑀚𑀺𑀯𑁆𑀳𑀸𑀬 𑀳𑀢𑁆𑀣𑀁 𑀅𑀧𑀮𑁂𑀔𑀢𑀺 𑀅𑀯𑀮𑁂𑀔𑀢𑀺 𑀉𑀤𑀓𑁂𑀦 𑀅𑀥𑁄𑀯𑀦𑀢𑁄. 𑀤𑀼𑀢𑀺𑀬𑀯𑀺𑀓𑀧𑁆𑀧𑁂𑀧𑀺 𑀏𑀲𑁂𑀯 𑀦𑀬𑁄. ‘‘𑀏𑀳𑀺, 𑀪𑀤𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 𑀉𑀧𑀕𑀫𑀦𑀲𑀗𑁆𑀔𑀸𑀢𑁄 𑀯𑀺𑀥𑀺 𑀏𑀳𑀺𑀪𑀤𑀦𑁆𑀢𑁄, 𑀢𑀁 𑀘𑀭𑀢𑀻𑀢𑀺 𑀏𑀳𑀺𑀪𑀤𑀦𑁆𑀢𑀺𑀓𑁄, 𑀢𑀧𑁆𑀧𑀝𑀺𑀓𑁆𑀔𑁂𑀧𑁂𑀦 𑀦 𑀏𑀳𑀺𑀪𑀤𑀦𑁆𑀢𑀺𑀓𑁄. 𑀦 𑀓𑀭𑁄𑀢𑀺 ‘‘𑀲𑀫𑀡𑁂𑀦 𑀦𑀸𑀫 𑀧𑀭𑀲𑁆𑀲 𑀯𑀘𑀦𑀓𑀭𑁂𑀦 𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦.

𑀧𑀼𑀭𑁂𑀢𑀭𑀦𑁆𑀢𑀺 𑀢𑀁 𑀞𑀸𑀦𑀁 𑀅𑀢𑁆𑀢𑀦𑁄 𑀉𑀧𑀕𑀫𑀦𑀢𑁄 𑀧𑀼𑀭𑁂𑀢𑀭𑀁. 𑀢𑀁 𑀓𑀺𑀭 𑀲𑁄 ‘‘𑀪𑀺𑀓𑁆𑀔𑀼𑀦𑀸 𑀦𑀸𑀫 𑀬𑀤𑀺𑀘𑁆𑀙𑀓𑀸 𑀏𑀯 𑀪𑀺𑀓𑁆𑀔𑀸 𑀕𑀳𑁂𑀢𑀩𑁆𑀩𑀸’’𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀦 𑀕𑀡𑁆𑀳𑀸𑀢𑀺. 𑀉𑀤𑁆𑀤𑀺𑀲𑁆𑀲 𑀓𑀢𑀁 𑀫𑀫 𑀦𑀺𑀫𑀺𑀢𑁆𑀢𑀪𑀸𑀯𑁂𑀦 𑀩𑀳𑀽 𑀔𑀼𑀤𑁆𑀤𑀓𑀸 𑀧𑀸𑀡𑀸 𑀲𑀗𑁆𑀖𑀸𑀢𑀁 𑀆𑀧𑀸𑀤𑀺𑀢𑀸𑀢𑀺 𑀦 𑀕𑀡𑁆𑀳𑀸𑀢𑀺. 𑀦𑀺𑀫𑀦𑁆𑀢𑀦𑀁 𑀦 𑀲𑀸𑀤𑀺𑀬𑀢𑀺 𑀏𑀯𑀁 𑀢𑁂𑀲𑀁 𑀯𑀘𑀦𑀁 𑀓𑀢𑀁 𑀪𑀯𑀺𑀲𑁆𑀲𑀢𑀻𑀢𑀺. 𑀓𑀼𑀫𑁆𑀪𑀺 𑀆𑀤𑀻𑀲𑀼𑀧𑀺 𑀲𑁄 𑀲𑀢𑁆𑀢𑀲𑀜𑁆𑀜𑀻𑀢𑀺 𑀆𑀳 ‘‘𑀓𑀼𑀫𑁆𑀪𑀺-𑀓𑀴𑁄𑀧𑀺𑀬𑁄’’𑀢𑀺𑀆𑀤𑀺. 𑀓𑀩𑀴𑀦𑁆𑀢𑀭𑀸𑀬𑁄 𑀳𑁄𑀢𑀻𑀢𑀺 𑀉𑀝𑁆𑀞𑀺𑀢𑀲𑁆𑀲 𑀤𑁆𑀯𑀺𑀦𑁆𑀦𑀫𑁆𑀧𑀺 𑀓𑀩𑀴𑀦𑁆𑀢𑀭𑀸𑀬𑁄 𑀳𑁄𑀢𑀺. 𑀕𑀸𑀫𑀲𑀪𑀸𑀕𑀸𑀤𑀺𑀯𑀲𑁂𑀦 𑀲𑀗𑁆𑀕𑀫𑁆𑀫 𑀓𑀺𑀢𑁆𑀢𑁂𑀦𑁆𑀢𑀺 𑀏𑀢𑀺𑀲𑁆𑀲𑀸𑀢𑀺 𑀲𑀗𑁆𑀓𑀺𑀢𑁆𑀢𑀺, 𑀬𑀣𑀸𑀲𑀁𑀳𑀢𑀢𑀡𑁆𑀟𑀼𑀮𑀸𑀤𑀺𑀲𑀜𑁆𑀘𑀬𑁄. 𑀫𑀸𑀦𑀼𑀲𑀓𑀸𑀦𑀻𑀢𑀺 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀸 𑀫𑀦𑀼𑀲𑁆𑀲𑀸.

𑀲𑀼𑀭𑀸𑀧𑀸𑀦𑀫𑁂𑀯𑀸𑀢𑀺 𑀫𑀚𑁆𑀚𑀮𑀓𑁆𑀔𑀡𑀧𑁆𑀧𑀢𑁆𑀢𑀸𑀬 𑀲𑀼𑀭𑀸𑀬 𑀧𑀸𑀦𑀫𑁂𑀯. 𑀲𑀼𑀭𑀸𑀕𑀳𑀡𑁂𑀦𑁂𑀯𑁂𑀢𑁆𑀣 𑀫𑁂𑀭𑀬𑀫𑁆𑀧𑀺 𑀲𑀗𑁆𑀕𑀳𑀺𑀢𑀁. 𑀏𑀓𑀸𑀕𑀸𑀭𑀫𑁂𑀯 𑀉𑀜𑁆𑀙𑀢𑀻𑀢𑀺 𑀏𑀓𑀸𑀕𑀸𑀭𑀺𑀓𑁄. 𑀏𑀓𑀸𑀮𑁄𑀧𑁂𑀦𑁂𑀯 𑀯𑀢𑁆𑀢𑀢𑀻𑀢𑀺 𑀏𑀓𑀸𑀮𑁄𑀧𑀺𑀓𑁄. 𑀤𑀻𑀬𑀢𑀺 𑀏𑀢𑀸𑀬𑀸𑀢𑀺 𑀤𑀢𑁆𑀢𑀺, 𑀤𑁆𑀯𑀢𑁆𑀢𑀺𑀆𑀮𑁄𑀧𑀫𑀢𑁆𑀢𑀕𑁆𑀕𑀸𑀳𑀺 𑀔𑀼𑀤𑁆𑀤𑀓𑀁 𑀪𑀺𑀓𑁆𑀔𑀸𑀤𑀸𑀦𑀪𑀸𑀚𑀦𑀁. 𑀢𑁂𑀦𑀸𑀳 ‘‘𑀔𑀼𑀤𑁆𑀤𑀓𑀧𑀸𑀢𑀻’’𑀢𑀺. 𑀅𑀪𑀼𑀜𑁆𑀚𑀦𑀯𑀲𑁂𑀦 𑀏𑀓𑁄 𑀅𑀳𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀏𑀓𑀸𑀳𑀺𑀓𑁄, 𑀆𑀳𑀸𑀭𑁄, 𑀢𑀁 𑀏𑀓𑀸𑀳𑀺𑀓𑀁. 𑀲𑁄 𑀧𑀦 𑀅𑀢𑁆𑀣𑀢𑁄 𑀏𑀓𑀤𑀺𑀯𑀲𑀁 𑀮𑀗𑁆𑀖𑀓𑁄 𑀳𑁄𑀢𑀻𑀢𑀺 𑀆𑀳 ‘‘𑀏𑀓𑀸𑀤𑀺𑀯𑀲𑀦𑁆𑀢𑀭𑀺𑀓’’𑀦𑁆𑀢𑀺. 𑀤𑁆𑀯𑀸𑀳𑀺𑀓𑀦𑁆𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀓𑀸𑀳𑀁 𑀅𑀪𑀼𑀜𑁆𑀚𑀺𑀢𑁆𑀯𑀸 𑀏𑀓𑀸𑀳𑀁 𑀪𑀼𑀜𑁆𑀚𑀦𑀁 𑀏𑀓𑀸𑀳𑀯𑀸𑀭𑁄, 𑀢𑀁 𑀏𑀓𑀸𑀳𑀺𑀓𑀫𑁂𑀯 𑀅𑀢𑁆𑀣𑀢𑁄. 𑀤𑁆𑀯𑀻𑀳𑀁 𑀅𑀪𑀼𑀜𑁆𑀚𑀺𑀢𑁆𑀯𑀸 𑀤𑁆𑀯𑀻𑀳𑀁 𑀪𑀼𑀜𑁆𑀚𑀦𑀁 𑀤𑁆𑀯𑀻𑀳𑀯𑀸𑀭𑁄. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀉𑀓𑁆𑀓𑀝𑁆𑀞𑁄 𑀧𑀦 𑀧𑀭𑀺𑀬𑀸𑀬𑀪𑀢𑁆𑀢𑀪𑁄𑀚𑀦𑀺𑀓𑁄 𑀤𑁆𑀯𑀻𑀳𑀁 𑀅𑀪𑀼𑀜𑁆𑀚𑀺𑀢𑁆𑀯𑀸 𑀏𑀓𑀸𑀳𑀫𑁂𑀯 𑀪𑀼𑀜𑁆𑀚𑀢𑀺. 𑀲𑁂𑀲𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄.

𑀫𑀺𑀘𑁆𑀙𑀸𑀯𑀸𑀬𑀸𑀫𑀯𑀲𑁂𑀦𑁂𑀯 𑀉𑀓𑁆𑀓𑀼𑀝𑀺𑀓𑀯𑀢𑀸𑀦𑀼𑀬𑁄𑀕𑁄𑀢𑀺 𑀆𑀳 ‘‘𑀉𑀓𑁆𑀓𑀼𑀝𑀺𑀓𑀯𑀻𑀭𑀺𑀬𑀫𑀦𑀼𑀬𑀼𑀢𑁆𑀢𑁄’’𑀢𑀺. 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀦𑁆𑀢𑀺 𑀅𑀢𑁆𑀢𑀦𑁄 𑀓𑀺𑀮𑀫𑀣𑀸𑀦𑀼𑀬𑁄𑀕𑀁, 𑀲𑀭𑀻𑀭𑀤𑀼𑀓𑁆𑀔𑀓𑀸𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀲𑀭𑀻𑀭𑀧𑀭𑀺𑀬𑀸𑀬𑁄 𑀳𑀺 𑀇𑀥 𑀅𑀢𑁆𑀢𑀲𑀤𑁆𑀤𑁄 ‘‘𑀅𑀢𑁆𑀢𑀦𑁆𑀢𑀧𑁄’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁪𑁧𑁩) 𑀯𑀺𑀬. 𑀤𑁆𑀯𑁂 𑀅𑀦𑁆𑀢𑁂𑀢𑀺 𑀉𑀪𑁄 𑀓𑁄𑀝𑀺𑀬𑁄, 𑀉𑀪𑁄 𑀮𑀸𑀫𑀓𑀧𑀝𑀺𑀧𑀢𑁆𑀢𑀺𑀬𑁄𑀢𑀺 𑀅𑀢𑁆𑀣𑁄. 𑀮𑀸𑀫𑀓𑀫𑁆𑀧𑀺 𑀳𑀺 𑀅𑀦𑁆𑀢𑁄𑀢𑀺 𑀯𑀼𑀘𑁆𑀘𑀢𑀺 ‘‘𑀅𑀦𑁆𑀢𑀫𑀺𑀤𑀁, 𑀪𑀺𑀓𑁆𑀔𑀯𑁂, 𑀚𑀻𑀯𑀺𑀓𑀸𑀦𑀁 (𑀲𑀁. 𑀦𑀺. 𑁩.𑁮𑁦; 𑀇𑀢𑀺𑀯𑀼. 𑁬𑁧), 𑀓𑁄𑀝𑁆𑀞𑀓𑁄 𑀅𑀦𑁆𑀢𑁄’’𑀢𑀺 𑀏𑀯𑀫𑀸𑀤𑀻𑀲𑀼. 𑀫𑀚𑁆𑀛𑀺𑀫𑀧𑀝𑀺𑀧𑀤𑀸𑀬 𑀉𑀧𑁆𑀧𑀣𑀪𑀸𑀯𑁂𑀦 𑀅𑀫𑀦𑀻𑀬𑀸 𑀕𑀦𑁆𑀢𑀩𑁆𑀩𑀸 𑀜𑀸𑀢𑀩𑁆𑀩𑀸𑀢𑀺 𑀅𑀦𑁆𑀢𑀸. 𑀢𑀢𑁄 𑀏𑀯 𑀮𑀸𑀫𑀓𑀸.

𑀅𑀘𑁂𑀮𑀓𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑁂𑀬𑁆𑀬𑀸𑀮𑀯𑀕𑁆𑀕𑀯𑀡𑁆𑀡𑀦𑀸

𑁧𑁬𑁪-𑁧𑁮𑁪. 𑀲𑀫𑀦𑀼𑀜𑁆𑀜𑁄𑀢𑀺 𑀲𑀫𑁆𑀫𑀤𑁂𑀯 𑀓𑀢𑀸𑀦𑀼𑀜𑁆𑀜𑁄. 𑀢𑁂𑀦𑀸𑀳 ‘‘𑀲𑀫𑀸𑀦𑀚𑁆𑀛𑀸𑀲𑀬𑁄’’𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑀇𑀢𑀺 𑀫𑀦𑁄𑀭𑀣𑀧𑀽𑀭𑀡𑀺𑀬𑀸 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬-𑀅𑀝𑁆𑀞𑀓𑀣𑀸𑀬

𑀢𑀺𑀓𑀦𑀺𑀧𑀸𑀢𑀯𑀡𑁆𑀡𑀦𑀸𑀬 𑀅𑀦𑀼𑀢𑁆𑀢𑀸𑀦𑀢𑁆𑀣𑀤𑀻𑀧𑀦𑀸 𑀲𑀫𑀢𑁆𑀢𑀸.