(𑁧𑁪) 𑁪. 𑀬𑁄𑀥𑀸𑀚𑀻𑀯𑀯𑀕𑁆𑀕𑁄

𑁧. 𑀬𑁄𑀥𑀸𑀚𑀻𑀯𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁪. 𑀘𑀢𑀼𑀢𑁆𑀣𑀲𑁆𑀲 𑀧𑀞𑀫𑁂 𑀬𑀼𑀚𑁆𑀛𑀦𑀁 𑀬𑁄𑀥𑁄, 𑀲𑁄 𑀆𑀚𑀻𑀯𑁄 𑀏𑀢𑀲𑁆𑀲𑀸𑀢𑀺 𑀬𑁄𑀥𑀸𑀚𑀻𑀯𑁄. 𑀬𑀼𑀤𑁆𑀥𑀫𑀼𑀧𑀚𑀻𑀯𑀢𑀻𑀢𑀺 𑀯𑀸 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂 𑀬𑁄𑀥𑀸𑀚𑀻𑀯𑁄𑀢𑀺 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀧𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀦𑀸𑀳 ‘‘𑀬𑀼𑀤𑁆𑀥𑀁 𑀉𑀧𑀚𑀻𑀯𑀢𑀻𑀢𑀺 𑀬𑁄𑀥𑀸𑀚𑀻𑀯𑁄’’𑀢𑀺. 𑀲𑀳…𑀧𑁂… 𑀧𑀲𑁆𑀲𑀢𑀻𑀢𑀺 𑀧𑀼𑀩𑁆𑀩𑀪𑀸𑀕𑁂 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀲𑀫𑁆𑀫𑀲𑀦𑀯𑀲𑁂𑀦, 𑀫𑀕𑁆𑀕𑀓𑁆𑀔𑀡𑁂 𑀅𑀪𑀺𑀲𑀫𑀬𑀯𑀲𑁂𑀦 𑀅𑀢𑁆𑀢𑀧𑀘𑁆𑀘𑀓𑁆𑀔𑁂𑀦 𑀜𑀸𑀡𑁂𑀦 𑀧𑀲𑁆𑀲𑀢𑀺.

𑀬𑁄𑀥𑀸𑀚𑀻𑀯𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀧𑀭𑀺𑀲𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁫. 𑀤𑀼𑀢𑀺𑀬𑁂 𑀅𑀧𑁆𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀦𑀻𑀢𑀸𑀢𑀺 ‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀭𑀽𑀧𑀁 𑀦𑀺𑀘𑁆𑀘𑀁 𑀯𑀸 𑀅𑀦𑀺𑀘𑁆𑀘𑀁 𑀯𑀸’’𑀢𑀺𑀆𑀤𑀺𑀦𑀸 𑀅𑀧𑁆𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 𑀓𑁂𑀯𑀮𑀁 𑀥𑀫𑁆𑀫𑀤𑁂𑀲𑀦𑀸𑀯𑀲𑁂𑀦𑁂𑀯 𑀯𑀺𑀦𑀻𑀢𑀧𑀭𑀺𑀲𑀸. 𑀤𑀼𑀩𑁆𑀩𑀺𑀦𑀻𑀢𑀧𑀭𑀺𑀲𑀸𑀢𑀺 𑀤𑀼𑀓𑁆𑀔𑁂𑀦 𑀯𑀺𑀦𑀻𑀢𑀧𑀭𑀺𑀲𑀸. 𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀦𑀻𑀢𑀸𑀢𑀺 ‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀦𑀸 𑀧𑀼𑀘𑁆𑀙𑀺𑀢𑁆𑀯𑀸 𑀅𑀦𑀼𑀫𑀢𑀺𑀕𑁆𑀕𑀳𑀡𑀯𑀲𑁂𑀦 𑀯𑀺𑀦𑀻𑀢𑀸. 𑀲𑀼𑀯𑀺𑀦𑀻𑀢𑀧𑀭𑀺𑀲𑀸𑀢𑀺 𑀲𑀼𑀔𑁂𑀦 𑀯𑀺𑀦𑀻𑀢𑀧𑀭𑀺𑀲𑀸. 𑀅𑀦𑀼𑀫𑀢𑀺𑀕𑁆𑀕𑀳𑀡𑀯𑀲𑁂𑀦 𑀯𑀺𑀦𑀬𑀦𑀜𑁆𑀳𑀺 𑀦 𑀤𑀼𑀓𑁆𑀓𑀭𑀁 𑀳𑁄𑀢𑀺.

𑀧𑀭𑀺𑀲𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀉𑀧𑁆𑀧𑀸𑀤𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁭. 𑀘𑀢𑀼𑀢𑁆𑀣𑁂 𑀉𑀧𑁆𑀧𑀸𑀤𑀸 𑀯𑀸 𑀢𑀣𑀸𑀕𑀢𑀸𑀦𑀦𑁆𑀢𑀺 𑀢𑀣𑀸𑀕𑀢𑀸𑀦𑀁 𑀉𑀧𑁆𑀧𑀸𑀤𑁂𑀧𑀺 𑀯𑁂𑀦𑁂𑀬𑁆𑀬𑀧𑀼𑀕𑁆𑀕𑀮𑀸𑀦𑀁 𑀫𑀕𑁆𑀕𑀨𑀮𑀼𑀧𑁆𑀧𑀢𑁆𑀢𑀺 𑀯𑀺𑀬 𑀲𑀗𑁆𑀔𑀸𑀭𑀸𑀦𑀁 𑀅𑀦𑀺𑀘𑁆𑀘𑀸𑀤𑀺𑀲𑀪𑀸𑀯𑁄 𑀦 𑀢𑀣𑀸𑀕𑀢𑀼𑀧𑁆𑀧𑀸𑀤𑀸𑀬𑀢𑁆𑀢𑁄, 𑀅𑀣 𑀔𑁄 𑀢𑀣𑀸𑀕𑀢𑀸𑀦𑀁 𑀉𑀧𑁆𑀧𑀸𑀤𑁂𑀧𑀺 𑀅𑀦𑀼𑀧𑁆𑀧𑀸𑀤𑁂𑀧𑀺 𑀳𑁄𑀢𑀺𑀫𑁂𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀞𑀺𑀢𑀸𑀯 𑀲𑀸 𑀥𑀸𑀢𑀽𑀢𑀺 𑀞𑀺𑀢𑁄 𑀏𑀯 𑀲𑁄 𑀅𑀦𑀺𑀘𑁆𑀘𑀲𑀪𑀸𑀯𑁄 𑀩𑁆𑀬𑀪𑀺𑀘𑀸𑀭𑀸𑀪𑀸𑀯𑀢𑁄 𑀦 𑀓𑀤𑀸𑀘𑀺 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸 𑀦 𑀳𑁄𑀢𑀺. 𑀓𑀸𑀫𑀁 𑀅𑀲𑀗𑁆𑀔𑀢𑀸 𑀯𑀺𑀬 𑀥𑀸𑀢𑀼 𑀦 𑀦𑀺𑀘𑁆𑀘𑁄 𑀲𑁄 𑀲𑀪𑀸𑀯𑁄, 𑀢𑀣𑀸𑀧𑀺 𑀲𑀩𑁆𑀩𑀓𑀸𑀮𑀺𑀓𑁄𑀬𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀧𑀭𑁄 𑀦𑀬𑁄 𑁋 𑀞𑀺𑀢𑀸𑀯 𑀲𑀸 𑀥𑀸𑀢𑀽𑀢𑀺 ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺 𑀏𑀲𑀸 𑀥𑀸𑀢𑀼 𑀏𑀲 𑀲𑀪𑀸𑀯𑁄 𑀢𑀣𑀸𑀕𑀢𑀸𑀦𑀁 𑀉𑀧𑁆𑀧𑀸𑀤𑀢𑁄 𑀧𑀼𑀩𑁆𑀩𑁂 𑀉𑀤𑁆𑀥𑀜𑁆𑀘 𑀅𑀧𑁆𑀧𑀝𑀺𑀯𑀺𑀚𑁆𑀛𑀺𑀬𑀫𑀸𑀦𑁄 𑀦 𑀢𑀣𑀸𑀕𑀢𑁂𑀳𑀺 𑀉𑀧𑁆𑀧𑀸𑀤𑀺𑀢𑁄, 𑀅𑀣 𑀔𑁄 𑀲𑀩𑁆𑀩𑀓𑀸𑀮𑀁 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸, 𑀞𑀺𑀢𑀸𑀯 𑀲𑀸 𑀥𑀸𑀢𑀼, 𑀓𑁂𑀯𑀮𑀁 𑀧𑀦 𑀲𑀬𑀫𑁆𑀪𑀼𑀜𑀸𑀡𑁂𑀦 𑀅𑀪𑀺𑀲𑀫𑁆𑀩𑀼𑀚𑁆𑀛𑀦𑀢𑁄 ‘‘𑀅𑀬𑀁 𑀥𑀫𑁆𑀫𑁄 𑀢𑀣𑀸𑀕𑀢𑁂𑀦 𑀅𑀪𑀺𑀲𑀫𑁆𑀩𑀼𑀤𑁆𑀥𑁄’’𑀢𑀺 𑀧𑀯𑁂𑀤𑀦𑀢𑁄 𑀘 𑀢𑀣𑀸𑀕𑀢𑁄 𑀥𑀫𑁆𑀫𑀲𑁆𑀲𑀸𑀫𑀻𑀢𑀺 𑀯𑀼𑀘𑁆𑀘𑀢𑀺 𑀅𑀧𑀼𑀩𑁆𑀩𑀲𑁆𑀲 𑀢𑀲𑁆𑀲 𑀉𑀧𑁆𑀧𑀸𑀤𑀦𑀢𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀞𑀺𑀢𑀸𑀯 𑀲𑀸 𑀥𑀸𑀢𑀽’’𑀢𑀺.

𑀅𑀪𑀺𑀲𑀫𑁆𑀩𑀼𑀚𑁆𑀛𑀢𑀻𑀢𑀺 𑀜𑀸𑀡𑁂𑀦 𑀅𑀪𑀺𑀲𑀫𑁆𑀩𑀼𑀚𑁆𑀛𑀢𑀺. 𑀅𑀪𑀺𑀲𑀫𑁂𑀢𑀻𑀢𑀺 𑀜𑀸𑀡𑁂𑀦 𑀅𑀪𑀺𑀲𑀫𑀸𑀕𑀘𑁆𑀙𑀢𑀺. 𑀆𑀘𑀺𑀓𑁆𑀔𑀢𑀻𑀢𑀺 𑀓𑀣𑁂𑀢𑀺. 𑀤𑁂𑀲𑁂𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀧𑀜𑁆𑀜𑀸𑀧𑁂𑀢𑀻𑀢𑀺 𑀚𑀸𑀦𑀸𑀧𑁂𑀢𑀺. 𑀧𑀝𑁆𑀞𑀧𑁂𑀢𑀻𑀢𑀺 𑀜𑀸𑀡𑀫𑀼𑀔𑁂 𑀞𑀧𑁂𑀢𑀺. 𑀯𑀺𑀯𑀭𑀢𑀻𑀢𑀺 𑀯𑀺𑀯𑀭𑀺𑀢𑁆𑀯𑀸 𑀤𑀲𑁆𑀲𑁂𑀢𑀺. 𑀯𑀺𑀪𑀚𑀢𑀻𑀢𑀺 𑀯𑀺𑀪𑀸𑀕𑀢𑁄 𑀤𑀲𑁆𑀲𑁂𑀢𑀺. 𑀉𑀢𑁆𑀢𑀸𑀦𑀻𑀓𑀭𑁄𑀢𑀻𑀢𑀺 𑀧𑀸𑀓𑀝𑀁 𑀓𑀭𑁄𑀢𑀺.

𑀅𑀣 𑀯𑀸 𑀅𑀪𑀺𑀲𑀫𑁆𑀩𑀼𑀚𑁆𑀛𑀢𑀻𑀢𑀺 𑀧𑀘𑁆𑀘𑀓𑁆𑀔𑀓𑀭𑀡𑁂𑀦 𑀅𑀪𑀺𑀫𑀼𑀔𑀁 𑀩𑀼𑀚𑁆𑀛𑀢𑀺, 𑀬𑀸𑀣𑀸𑀯𑀢𑁄 𑀧𑀝𑀺𑀯𑀺𑀚𑁆𑀛𑀢𑀺. 𑀢𑀢𑁄 𑀏𑀯 𑀅𑀪𑀺𑀲𑀫𑁂𑀢𑀺 𑀅𑀪𑀺𑀫𑀼𑀔𑀁 𑀲𑀫𑀸𑀕𑀘𑁆𑀙𑀢𑀺. 𑀆𑀤𑀺𑀢𑁄 𑀓𑀣𑁂𑀦𑁆𑀢𑁄 𑀆𑀘𑀺𑀓𑁆𑀔𑀢𑀺, 𑀉𑀤𑁆𑀤𑀺𑀲𑀢𑀻𑀢𑀺 𑀅𑀢𑁆𑀣𑁄. 𑀢𑀫𑁂𑀯 𑀉𑀤𑁆𑀤𑁂𑀲𑀁 𑀧𑀭𑀺𑀬𑁄𑀲𑀸𑀧𑁂𑀦𑁆𑀢𑁄 𑀤𑁂𑀲𑁂𑀢𑀺. 𑀬𑀣𑀸𑀉𑀤𑁆𑀤𑀺𑀝𑁆𑀞𑀫𑀢𑁆𑀣𑀁 𑀦𑀺𑀤𑀲𑁆𑀲𑀦𑀯𑀲𑁂𑀦 𑀧𑀓𑀸𑀭𑁂𑀳𑀺 𑀜𑀸𑀧𑁂𑀦𑁆𑀢𑁄 𑀧𑀜𑁆𑀜𑀸𑀧𑁂𑀢𑀺. 𑀧𑀓𑀸𑀭𑁂𑀳𑀺 𑀏𑀢𑀫𑀢𑁆𑀣𑀁 𑀧𑀢𑀺𑀝𑁆𑀞𑀧𑁂𑀦𑁆𑀢𑁄 𑀧𑀝𑁆𑀞𑀧𑁂𑀢𑀺. 𑀬𑀣𑀸𑀉𑀤𑁆𑀤𑀺𑀝𑁆𑀞𑀁 𑀧𑀝𑀺𑀦𑀺𑀤𑀲𑁆𑀲𑀦𑀯𑀲𑁂𑀦 𑀯𑀺𑀯𑀭𑀢𑀺 𑀯𑀺𑀪𑀚𑀢𑀺. 𑀯𑀺𑀯𑀝𑀁 𑀯𑀺𑀪𑀢𑁆𑀢𑀜𑁆𑀘 𑀅𑀢𑁆𑀣𑀁 𑀳𑁂𑀢𑀽𑀤𑀸𑀳𑀭𑀡𑀤𑀲𑁆𑀲𑀦𑁂𑀳𑀺 𑀧𑀸𑀓𑀝𑀁 𑀓𑀭𑁄𑀦𑁆𑀢𑁄 𑀉𑀢𑁆𑀢𑀸𑀦𑀻𑀓𑀭𑁄𑀢𑀺.

𑀉𑀧𑁆𑀧𑀸𑀤𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫-𑁧𑁦. 𑀓𑁂𑀲𑀓𑀫𑁆𑀩𑀮𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁩𑁮-𑁧𑁪𑁩. 𑀧𑀜𑁆𑀘𑀫𑁂 𑀢𑀦𑁆𑀢𑀸𑀯𑀼𑀢𑀸𑀦𑀁 𑀯𑀢𑁆𑀣𑀸𑀦𑀦𑁆𑀢𑀺 𑀇𑀤𑀁 ‘‘𑀬𑀸𑀦𑀺 𑀓𑀸𑀦𑀺𑀘𑀻’’𑀢𑀺 𑀇𑀫𑀺𑀦𑀸 𑀲𑀫𑀸𑀦𑀸𑀥𑀺𑀓𑀭𑀡𑀦𑁆𑀢𑀺 𑀆𑀳 ‘‘𑀧𑀘𑁆𑀘𑀢𑁆𑀢𑁂 𑀲𑀸𑀫𑀺𑀯𑀘𑀦’’𑀦𑁆𑀢𑀺. 𑀯𑀸𑀬𑀺𑀢𑀸𑀦𑀦𑁆𑀢𑀺 𑀯𑀻𑀢𑀸𑀦𑀁. 𑀮𑀸𑀫𑀓𑁄𑀢𑀺 𑀦𑀺𑀳𑀻𑀦𑁄, 𑀫𑀓𑁆𑀔𑀮𑀺 𑀫𑁄𑀖𑀧𑀼𑀭𑀺𑀲𑁄𑀢𑀺 𑀏𑀢𑁆𑀣 𑀫𑀓𑁆𑀔𑀮𑀻𑀢𑀺 𑀢𑀲𑁆𑀲 𑀦𑀸𑀫𑀁. 𑀢𑀁 𑀓𑀺𑀭 𑀲𑀓𑀤𑁆𑀤𑀫𑀸𑀬 𑀪𑀽𑀫𑀺𑀬𑀸 𑀢𑁂𑀮𑀖𑀝𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀁, ‘‘𑀢𑀸𑀢, 𑀫𑀸 𑀔𑀮𑀻’’𑀢𑀺 𑀲𑀸𑀫𑀺𑀓𑁄 𑀆𑀳. 𑀲𑁄 𑀧𑀫𑀸𑀤𑁂𑀦 𑀔𑀮𑀺𑀢𑁆𑀯𑀸 𑀧𑀢𑀺𑀢𑁆𑀯𑀸 𑀲𑀸𑀫𑀺𑀓𑀲𑁆𑀲 𑀪𑀬𑁂𑀦 𑀧𑀮𑀸𑀬𑀺𑀢𑀼𑀁 𑀆𑀭𑀤𑁆𑀥𑁄. 𑀲𑀸𑀫𑀺𑀓𑁄 𑀉𑀧𑀥𑀸𑀯𑀺𑀢𑁆𑀯𑀸 𑀦𑀁 𑀤𑀼𑀲𑁆𑀲𑀓𑀡𑁆𑀡𑁂 𑀅𑀕𑁆𑀕𑀳𑁂𑀲𑀺, 𑀲𑀸𑀝𑀓𑀁 𑀙𑀟𑁆𑀟𑁂𑀢𑁆𑀯𑀸 𑀅𑀘𑁂𑀮𑀓𑁄 𑀳𑀼𑀢𑁆𑀯𑀸 𑀧𑀮𑀸𑀬𑀺. 𑀲𑁄 𑀧𑀡𑁆𑀡𑁂𑀦 𑀯𑀸 𑀢𑀺𑀡𑁂𑀦 𑀯𑀸 𑀧𑀝𑀺𑀘𑁆𑀙𑀸𑀤𑁂𑀢𑀼𑀫𑁆𑀧𑀺 𑀅𑀚𑀸𑀦𑀦𑁆𑀢𑁄 𑀚𑀸𑀢𑀭𑀽𑀧𑁂𑀦𑁂𑀯 𑀏𑀓𑀁 𑀕𑀸𑀫𑀁 𑀧𑀸𑀯𑀺𑀲𑀺. 𑀫𑀦𑀼𑀲𑁆𑀲𑀸 𑀢𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀲𑀫𑀡𑁄 𑀅𑀭𑀳𑀸 𑀅𑀧𑁆𑀧𑀺𑀘𑁆𑀙𑁄, 𑀦𑀢𑁆𑀣𑀺 𑀇𑀫𑀺𑀦𑀸 𑀲𑀤𑀺𑀲𑁄’’𑀢𑀺 𑀧𑀽𑀯𑀪𑀢𑁆𑀢𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀉𑀧𑀲𑀗𑁆𑀓𑀫𑀦𑁆𑀢𑀺. 𑀲𑁄 ‘‘𑀫𑀬𑁆𑀳𑀁 𑀲𑀸𑀝𑀓𑀁 𑀅𑀦𑀺𑀯𑀢𑁆𑀣𑀪𑀸𑀯𑁂𑀦 𑀇𑀤𑀁 𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀢𑀢𑁄 𑀧𑀝𑁆𑀞𑀸𑀬 𑀲𑀸𑀝𑀓𑀁 𑀮𑀪𑀺𑀢𑁆𑀯𑀸𑀧𑀺 𑀦 𑀦𑀺𑀯𑀸𑀲𑁂𑀲𑀺, 𑀢𑀤𑁂𑀯 𑀘 𑀧𑀩𑁆𑀩𑀚𑁆𑀚𑀁 𑀅𑀕𑁆𑀕𑀳𑁂𑀲𑀺. 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀅𑀜𑁆𑀜𑁂𑀧𑀺 𑀅𑀜𑁆𑀜𑁂𑀧𑀻𑀢𑀺 𑀧𑀜𑁆𑀘𑀲𑀢𑀸 𑀫𑀦𑀼𑀲𑁆𑀲𑀸 𑀧𑀩𑁆𑀩𑀚𑀺𑀁𑀲𑀼. 𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀫𑀓𑁆𑀔𑀮𑀺 𑀫𑁄𑀖𑀧𑀼𑀭𑀺𑀲𑁄’’𑀢𑀺. 𑀙𑀝𑁆𑀞𑀸𑀤𑀻𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑀺 𑀏𑀯.

𑀓𑁂𑀲𑀓𑀫𑁆𑀩𑀮𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧-𑁧𑁩. 𑀧𑀞𑀫𑀫𑁄𑀭𑀦𑀺𑀯𑀸𑀧𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁪𑁪-𑁧𑁪𑁬. 𑀏𑀓𑀸𑀤𑀲𑀫𑁂 𑀅𑀓𑀼𑀧𑁆𑀧𑀥𑀫𑁆𑀫𑀢𑀸𑀬 𑀔𑀬𑀯𑀬𑀲𑀗𑁆𑀔𑀸𑀢𑀁 𑀅𑀦𑁆𑀢𑀁 𑀅𑀢𑀻𑀢𑀸𑀢𑀺 𑀅𑀘𑁆𑀘𑀦𑁆𑀢𑀸, 𑀏𑀯𑀁 𑀅𑀧𑀭𑀺𑀳𑀸𑀬𑀦𑀲𑀪𑀸𑀯𑀢𑁆𑀢𑀸 𑀅𑀘𑁆𑀘𑀦𑁆𑀢𑀸 𑀦𑀺𑀝𑁆𑀞𑀸 𑀅𑀲𑁆𑀲𑀸𑀢𑀺 𑀅𑀘𑁆𑀘𑀦𑁆𑀢𑀦𑀺𑀝𑁆𑀞𑁄. 𑀢𑁂𑀦𑀸𑀳 ‘‘𑀅𑀦𑁆𑀢𑀁 𑀅𑀢𑀺𑀓𑁆𑀓𑀦𑁆𑀢𑀦𑀺𑀝𑁆𑀞𑁄’’𑀢𑀺𑀆𑀤𑀺. 𑀦 𑀳𑀺 𑀧𑀝𑀺𑀯𑀺𑀤𑁆𑀥𑀲𑁆𑀲 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀲𑁆𑀲 𑀤𑀲𑁆𑀲𑀦𑀁 𑀓𑀼𑀧𑁆𑀧𑀦𑀁 𑀦𑀸𑀫 𑀅𑀢𑁆𑀣𑀺. 𑀥𑀼𑀯𑀦𑀺𑀝𑁆𑀞𑁄𑀢𑀺 𑀲𑀢𑀢𑀦𑀺𑀝𑁆𑀞𑁄. 𑀅𑀘𑁆𑀘𑀦𑁆𑀢𑀫𑁂𑀯 𑀘𑀢𑀽𑀳𑀺 𑀬𑁄𑀕𑁂𑀳𑀺 𑀔𑁂𑀫𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀅𑀘𑁆𑀘𑀦𑁆𑀢𑀬𑁄𑀕𑀓𑁆𑀔𑁂𑀫𑀻, 𑀦𑀺𑀘𑁆𑀘𑀬𑁄𑀕𑀓𑁆𑀔𑁂𑀫𑀻𑀢𑀺 𑀅𑀢𑁆𑀣𑁄. 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀯𑀼𑀲𑀺𑀢𑀢𑁆𑀢𑀸 𑀢𑀲𑁆𑀲 𑀅𑀯𑀺𑀳𑀸𑀬𑀦𑀲𑀪𑀸𑀯𑀢𑁆𑀢𑀸 𑀅𑀘𑁆𑀘𑀦𑁆𑀢𑀁 𑀩𑁆𑀭𑀳𑁆𑀫𑀘𑀸𑀭𑀻𑀢𑀺 𑀅𑀘𑁆𑀘𑀦𑁆𑀢𑀩𑁆𑀭𑀳𑁆𑀫𑀘𑀸𑀭𑀻, 𑀦𑀺𑀘𑁆𑀘𑀩𑁆𑀭𑀳𑁆𑀫𑀘𑀸𑀭𑀻𑀢𑀺 𑀅𑀢𑁆𑀣𑁄. 𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀺𑀬𑁄𑀲𑀸𑀦𑀁 𑀯𑀝𑁆𑀝𑀤𑀼𑀓𑁆𑀔𑀧𑀭𑀺𑀬𑁄𑀲𑀸𑀦𑀜𑁆𑀘. 𑀅𑀘𑁆𑀘𑀦𑁆𑀢𑀁 𑀧𑀭𑀺𑀬𑁄𑀲𑀸𑀦𑀫𑀲𑁆𑀲𑀸𑀢𑀺 𑀅𑀘𑁆𑀘𑀦𑁆𑀢𑀧𑀭𑀺𑀬𑁄𑀲𑀸𑀦𑁄. 𑀤𑁆𑀯𑀸𑀤𑀲𑀫𑀢𑁂𑀭𑀲𑀫𑀸𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑀧𑀞𑀫𑀫𑁄𑀭𑀦𑀺𑀯𑀸𑀧𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀬𑁄𑀥𑀸𑀚𑀻𑀯𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁪𑁭-𑁧𑁫𑁬. 𑀫𑀗𑁆𑀕𑀮𑀯𑀕𑁆𑀕𑁄 𑀉𑀢𑁆𑀢𑀸𑀦𑀢𑁆𑀣𑁄𑀬𑁂𑀯.

𑀢𑀢𑀺𑀬𑀧𑀡𑁆𑀡𑀸𑀲𑀓𑀁 𑀦𑀺𑀝𑁆𑀞𑀺𑀢𑀁.