𑁩. 𑀲𑀭𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁫. 𑀢𑀢𑀺𑀬𑁂 𑀯𑀺𑀤𑁆𑀥𑁂𑀢𑀺 𑀤𑀽𑀭𑀻𑀪𑀽𑀢𑁂. 𑀤𑀽𑀭𑀪𑀸𑀯𑁄 𑀘 𑀆𑀓𑀸𑀲𑀲𑁆𑀲 𑀯𑀮𑀸𑀳𑀓𑀯𑀺𑀕𑀫𑁂𑀦 𑀳𑁄𑀢𑀻𑀢𑀺 𑀆𑀳 ‘‘𑀯𑀮𑀸𑀳𑀓𑀯𑀺𑀕𑀫𑁂𑀦 𑀤𑀽𑀭𑀻𑀪𑀽𑀢𑁂’’𑀢𑀺. 𑀢𑁂𑀦𑁂𑀯 𑀳𑀺 ‘‘𑀯𑀺𑀤𑁆𑀥𑁂 𑀯𑀺𑀕𑀢𑀯𑀮𑀸𑀳𑀓𑁂’’𑀢𑀺 𑀯𑀼𑀢𑁆𑀢𑀁. 𑀦𑀪𑀁 𑀅𑀩𑁆𑀪𑀼𑀲𑁆𑀲𑀓𑁆𑀓𑀫𑀸𑀦𑁄𑀢𑀺 𑀆𑀓𑀸𑀲𑀁 𑀅𑀪𑀺𑀮𑀗𑁆𑀖𑀦𑁆𑀢𑁄. 𑀇𑀫𑀺𑀦𑀸 𑀢𑀭𑀼𑀡𑀲𑀽𑀭𑀺𑀬𑀪𑀸𑀯𑁄 𑀤𑀲𑁆𑀲𑀺𑀢𑁄. 𑀦𑀸𑀢𑀺𑀤𑀽𑀭𑁄𑀤𑀺𑀢𑁂 𑀳𑀺 𑀆𑀤𑀺𑀘𑁆𑀘𑁂 𑀢𑀭𑀼𑀡𑀲𑀽𑀭𑀺𑀬𑀲𑀫𑀜𑁆𑀜𑀸. 𑀤𑀼𑀯𑀺𑀥𑀫𑁂𑀯𑀲𑁆𑀲 𑀲𑀁𑀬𑁄𑀚𑀦𑀁 𑀦𑀢𑁆𑀣𑀻𑀢𑀺 𑀑𑀭𑀫𑁆𑀪𑀸𑀕𑀺𑀬𑀉𑀤𑁆𑀥𑀫𑁆𑀪𑀸𑀕𑀺𑀬𑀯𑀲𑁂𑀦 𑀤𑀼𑀯𑀺𑀥𑀫𑁆𑀧𑀺 𑀲𑀁𑀬𑁄𑀚𑀦𑀁 𑀅𑀲𑁆𑀲 𑀧𑀞𑀫𑀚𑁆𑀛𑀸𑀦𑀮𑀸𑀪𑀺𑀦𑁄 𑀅𑀭𑀺𑀬𑀲𑀸𑀯𑀓𑀲𑁆𑀲 𑀦𑀢𑁆𑀣𑀺. 𑀓𑀲𑁆𑀫𑀸 𑀧𑀦𑀲𑁆𑀲 𑀉𑀤𑁆𑀥𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀫𑁆𑀧𑀺 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁. 𑀑𑀭𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀸𑀦𑀫𑁂𑀯 𑀳𑁂𑀢𑁆𑀣 𑀧𑀳𑀸𑀦𑀁 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀇𑀢𑀭𑀫𑁆𑀧𑀻’’𑀢𑀺𑀆𑀤𑀺, 𑀇𑀢𑀭𑀁 𑀉𑀤𑁆𑀥𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀁 𑀧𑀼𑀦 𑀇𑀫𑀁 𑀮𑁄𑀓𑀁 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀆𑀦𑁂𑀢𑀼𑀁 𑀅𑀲𑀫𑀢𑁆𑀣𑀢𑀸𑀬 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀛𑀸𑀦𑀮𑀸𑀪𑀺𑀦𑁄 𑀳𑀺 𑀲𑀩𑁆𑀩𑁂𑀧𑀺 𑀅𑀭𑀺𑀬𑀸 𑀩𑁆𑀭𑀳𑁆𑀫𑀮𑁄𑀓𑀽𑀧𑀧𑀦𑁆𑀦𑀸 𑀳𑁂𑀝𑁆𑀞𑀸 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀉𑀤𑁆𑀥𑀁 𑀉𑀤𑁆𑀥𑀁 𑀉𑀧𑁆𑀧𑀚𑁆𑀚𑀦𑁆𑀢𑀸𑀧𑀺 𑀯𑁂𑀳𑀧𑁆𑀨𑀮𑀁 𑀅𑀓𑀦𑀺𑀝𑁆𑀞𑀁 𑀪𑀯𑀕𑁆𑀕𑀜𑁆𑀘 𑀧𑀢𑁆𑀯𑀸 𑀦 𑀧𑀼𑀦𑀜𑁆𑀜𑀢𑁆𑀣 𑀚𑀸𑀬𑀦𑁆𑀢𑀺, 𑀢𑀢𑁆𑀣 𑀢𑀢𑁆𑀣𑁂𑀯 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑀺. 𑀢𑁂𑀦𑁂𑀯𑀸𑀳 ‘‘𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀛𑀸𑀦𑀸𑀦𑀸𑀕𑀸𑀫𑀻 𑀦𑀸𑀫 𑀓𑀣𑀺𑀢𑁄’’𑀢𑀺. 𑀛𑀸𑀦𑀯𑀲𑁂𑀦 𑀳𑀺 𑀳𑁂𑀝𑁆𑀞𑀸 𑀦 𑀆𑀕𑀘𑁆𑀙𑀢𑀻𑀢𑀺 𑀛𑀸𑀦𑀸𑀦𑀸𑀕𑀸𑀫𑀻.

𑀲𑀭𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.