(𑁧𑁦) 𑁫. 𑀮𑁄𑀡𑀓𑀧𑀮𑁆𑀮𑀯𑀕𑁆𑀕𑁄

𑁧. 𑀅𑀘𑁆𑀘𑀸𑀬𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁩. 𑀧𑀜𑁆𑀘𑀫𑀲𑁆𑀲 𑀧𑀞𑀫𑁂 𑀅𑀢𑀺𑀧𑀸𑀢𑀺𑀓𑀸𑀦𑀻𑀢𑀺 𑀲𑀻𑀖𑀁 𑀧𑀯𑀢𑁆𑀢𑁂𑀢𑀩𑁆𑀩𑀸𑀦𑀺. 𑀓𑀭𑀡𑀻𑀬𑀸𑀦𑀻𑀢𑀺 𑀏𑀢𑁆𑀣 𑀅𑀯𑀲𑁆𑀲𑀓𑁂 𑀅𑀦𑀻𑀬𑀲𑀤𑁆𑀤𑁄 𑀤𑀝𑁆𑀞𑀩𑁆𑀩𑁄𑀢𑀺 𑀆𑀳 ‘‘𑀅𑀯𑀲𑁆𑀲𑀓𑀺𑀘𑁆𑀘𑀸𑀦𑀻’’𑀢𑀺. 𑀦𑀺𑀓𑁆𑀔𑀦𑁆𑀢𑀲𑁂𑀢𑀗𑁆𑀓𑀼𑀭𑀸𑀦𑀻𑀢𑀺 𑀩𑀻𑀚𑀢𑁄 𑀦𑀺𑀓𑁆𑀔𑀦𑁆𑀢𑀲𑁂𑀢𑀗𑁆𑀓𑀼𑀭𑀸𑀦𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑀅𑀘𑁆𑀘𑀸𑀬𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀧𑀯𑀺𑀯𑁂𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁪. 𑀤𑀼𑀢𑀺𑀬𑁂 𑀲𑀸𑀡𑁂𑀳𑀺 𑀯𑀸𑀓𑁂𑀳𑀺 𑀦𑀺𑀩𑁆𑀩𑀢𑁆𑀢𑀺𑀢𑀸𑀦𑀺 𑀲𑀸𑀡𑀸𑀦𑀺. 𑀫𑀺𑀲𑁆𑀲𑀲𑀸𑀡𑀸𑀦𑀺 𑀫𑀲𑀸𑀡𑀸𑀦𑀺 𑀦 𑀪𑀗𑁆𑀕𑀸𑀦𑀺. 𑀏𑀭𑀓𑀢𑀺𑀡𑀸𑀤𑀻𑀦𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀅𑀓𑁆𑀓𑀫𑀓𑀘𑀺𑀓𑀤𑀮𑀺𑀯𑀸𑀓𑀸𑀤𑀻𑀦𑀁 𑀲𑀗𑁆𑀕𑀳𑁄. 𑀏𑀭𑀓𑀸𑀤𑀻𑀳𑀺 𑀓𑀢𑀸𑀦𑀺 𑀳𑀺 𑀙𑀯𑀸𑀦𑀺 𑀮𑀸𑀫𑀓𑀸𑀦𑀺 𑀤𑀼𑀲𑁆𑀲𑀸𑀦𑀻𑀢𑀺 ‘‘𑀙𑀯𑀤𑀼𑀲𑁆𑀲𑀸𑀦𑀻’’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀮𑀪𑀦𑁆𑀢𑀺. 𑀓𑀼𑀡𑁆𑀟𑀓𑀦𑁆𑀢𑀺 𑀢𑀦𑀼𑀢𑀭𑀁 𑀢𑀡𑁆𑀟𑀼𑀮𑀧𑁆𑀧𑀓𑀭𑀡𑀁. 𑀧𑀜𑁆𑀘 𑀤𑀼𑀲𑁆𑀲𑀻𑀮𑁆𑀬𑀸𑀦𑀻𑀢𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀺 𑀧𑀜𑁆𑀘. 𑀘𑀢𑁆𑀢𑀸𑀭𑁄 𑀆𑀲𑀯𑀸𑀢𑀺 𑀓𑀸𑀫𑀸𑀲𑀯𑀸𑀤𑀬𑁄 𑀘𑀢𑁆𑀢𑀸𑀭𑁄 𑀆𑀲𑀯𑀸. 𑀲𑀻𑀮𑀕𑁆𑀕𑀧𑁆𑀧𑀢𑁆𑀢𑁄𑀢𑀺 𑀲𑀻𑀮𑁂𑀦, 𑀲𑀻𑀮𑀲𑁆𑀲 𑀯𑀸 𑀅𑀕𑁆𑀕𑀧𑁆𑀧𑀢𑁆𑀢𑁄.

𑀧𑀯𑀺𑀯𑁂𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀲𑀭𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁫. 𑀢𑀢𑀺𑀬𑁂 𑀯𑀺𑀤𑁆𑀥𑁂𑀢𑀺 𑀤𑀽𑀭𑀻𑀪𑀽𑀢𑁂. 𑀤𑀽𑀭𑀪𑀸𑀯𑁄 𑀘 𑀆𑀓𑀸𑀲𑀲𑁆𑀲 𑀯𑀮𑀸𑀳𑀓𑀯𑀺𑀕𑀫𑁂𑀦 𑀳𑁄𑀢𑀻𑀢𑀺 𑀆𑀳 ‘‘𑀯𑀮𑀸𑀳𑀓𑀯𑀺𑀕𑀫𑁂𑀦 𑀤𑀽𑀭𑀻𑀪𑀽𑀢𑁂’’𑀢𑀺. 𑀢𑁂𑀦𑁂𑀯 𑀳𑀺 ‘‘𑀯𑀺𑀤𑁆𑀥𑁂 𑀯𑀺𑀕𑀢𑀯𑀮𑀸𑀳𑀓𑁂’’𑀢𑀺 𑀯𑀼𑀢𑁆𑀢𑀁. 𑀦𑀪𑀁 𑀅𑀩𑁆𑀪𑀼𑀲𑁆𑀲𑀓𑁆𑀓𑀫𑀸𑀦𑁄𑀢𑀺 𑀆𑀓𑀸𑀲𑀁 𑀅𑀪𑀺𑀮𑀗𑁆𑀖𑀦𑁆𑀢𑁄. 𑀇𑀫𑀺𑀦𑀸 𑀢𑀭𑀼𑀡𑀲𑀽𑀭𑀺𑀬𑀪𑀸𑀯𑁄 𑀤𑀲𑁆𑀲𑀺𑀢𑁄. 𑀦𑀸𑀢𑀺𑀤𑀽𑀭𑁄𑀤𑀺𑀢𑁂 𑀳𑀺 𑀆𑀤𑀺𑀘𑁆𑀘𑁂 𑀢𑀭𑀼𑀡𑀲𑀽𑀭𑀺𑀬𑀲𑀫𑀜𑁆𑀜𑀸. 𑀤𑀼𑀯𑀺𑀥𑀫𑁂𑀯𑀲𑁆𑀲 𑀲𑀁𑀬𑁄𑀚𑀦𑀁 𑀦𑀢𑁆𑀣𑀻𑀢𑀺 𑀑𑀭𑀫𑁆𑀪𑀸𑀕𑀺𑀬𑀉𑀤𑁆𑀥𑀫𑁆𑀪𑀸𑀕𑀺𑀬𑀯𑀲𑁂𑀦 𑀤𑀼𑀯𑀺𑀥𑀫𑁆𑀧𑀺 𑀲𑀁𑀬𑁄𑀚𑀦𑀁 𑀅𑀲𑁆𑀲 𑀧𑀞𑀫𑀚𑁆𑀛𑀸𑀦𑀮𑀸𑀪𑀺𑀦𑁄 𑀅𑀭𑀺𑀬𑀲𑀸𑀯𑀓𑀲𑁆𑀲 𑀦𑀢𑁆𑀣𑀺. 𑀓𑀲𑁆𑀫𑀸 𑀧𑀦𑀲𑁆𑀲 𑀉𑀤𑁆𑀥𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀫𑁆𑀧𑀺 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁. 𑀑𑀭𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀸𑀦𑀫𑁂𑀯 𑀳𑁂𑀢𑁆𑀣 𑀧𑀳𑀸𑀦𑀁 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀇𑀢𑀭𑀫𑁆𑀧𑀻’’𑀢𑀺𑀆𑀤𑀺, 𑀇𑀢𑀭𑀁 𑀉𑀤𑁆𑀥𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀁 𑀧𑀼𑀦 𑀇𑀫𑀁 𑀮𑁄𑀓𑀁 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀆𑀦𑁂𑀢𑀼𑀁 𑀅𑀲𑀫𑀢𑁆𑀣𑀢𑀸𑀬 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀛𑀸𑀦𑀮𑀸𑀪𑀺𑀦𑁄 𑀳𑀺 𑀲𑀩𑁆𑀩𑁂𑀧𑀺 𑀅𑀭𑀺𑀬𑀸 𑀩𑁆𑀭𑀳𑁆𑀫𑀮𑁄𑀓𑀽𑀧𑀧𑀦𑁆𑀦𑀸 𑀳𑁂𑀝𑁆𑀞𑀸 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀉𑀤𑁆𑀥𑀁 𑀉𑀤𑁆𑀥𑀁 𑀉𑀧𑁆𑀧𑀚𑁆𑀚𑀦𑁆𑀢𑀸𑀧𑀺 𑀯𑁂𑀳𑀧𑁆𑀨𑀮𑀁 𑀅𑀓𑀦𑀺𑀝𑁆𑀞𑀁 𑀪𑀯𑀕𑁆𑀕𑀜𑁆𑀘 𑀧𑀢𑁆𑀯𑀸 𑀦 𑀧𑀼𑀦𑀜𑁆𑀜𑀢𑁆𑀣 𑀚𑀸𑀬𑀦𑁆𑀢𑀺, 𑀢𑀢𑁆𑀣 𑀢𑀢𑁆𑀣𑁂𑀯 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑀺. 𑀢𑁂𑀦𑁂𑀯𑀸𑀳 ‘‘𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀛𑀸𑀦𑀸𑀦𑀸𑀕𑀸𑀫𑀻 𑀦𑀸𑀫 𑀓𑀣𑀺𑀢𑁄’’𑀢𑀺. 𑀛𑀸𑀦𑀯𑀲𑁂𑀦 𑀳𑀺 𑀳𑁂𑀝𑁆𑀞𑀸 𑀦 𑀆𑀕𑀘𑁆𑀙𑀢𑀻𑀢𑀺 𑀛𑀸𑀦𑀸𑀦𑀸𑀕𑀸𑀫𑀻.

𑀲𑀭𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀧𑀭𑀺𑀲𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁬. 𑀘𑀢𑀼𑀢𑁆𑀣𑁂 𑀧𑀘𑁆𑀘𑀬𑀩𑀸𑀳𑀼𑀮𑁆𑀮𑀺𑀓𑀸𑀢𑀺 𑀘𑀻𑀯𑀭𑀸𑀤𑀺𑀩𑀸𑀳𑀼𑀮𑁆𑀮𑀸𑀬 𑀧𑀝𑀺𑀧𑀦𑁆𑀦𑀸. 𑀅𑀯𑀻𑀢𑀢𑀡𑁆𑀳𑀢𑀸𑀬 𑀳𑀺 𑀢𑀁 𑀢𑀁 𑀧𑀭𑀺𑀓𑁆𑀔𑀸𑀭𑀚𑀸𑀢𑀁 𑀩𑀳𑀼𑀁 𑀮𑀦𑁆𑀢𑀺 𑀆𑀤𑀺𑀬𑀦𑁆𑀢𑀻𑀢𑀺 𑀩𑀳𑀼𑀮𑀸, 𑀢𑁂 𑀏𑀯 𑀩𑀸𑀳𑀼𑀮𑀺𑀓𑀸 𑀬𑀣𑀸 ‘‘𑀯𑁂𑀦𑀬𑀺𑀓𑁄’’𑀢𑀺 (𑀫. 𑀦𑀺. 𑁧.𑁨𑁪𑁬; 𑀅. 𑀦𑀺. 𑁮.𑁧𑁧; 𑀧𑀸𑀭𑀸. 𑁮). 𑀢𑁂 𑀧𑀘𑁆𑀘𑀬𑀩𑀸𑀳𑀼𑀮𑁆𑀮𑀸𑀬 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑀸 𑀳𑁄𑀦𑁆𑀢𑀻𑀢𑀺 𑀘𑀻𑀯𑀭𑀸𑀤𑀺𑀩𑀸𑀳𑀼𑀮𑁆𑀮𑀸𑀬 𑀧𑀝𑀺𑀧𑀦𑁆𑀦𑀸 𑀦𑀸𑀫 𑀳𑁄𑀦𑁆𑀢𑀺. 𑀲𑀺𑀓𑁆𑀔𑀸𑀬 𑀅𑀕𑀸𑀭𑀯𑀪𑀸𑀯𑀢𑁄 𑀲𑀺𑀣𑀺𑀮𑀁 𑀅𑀕𑀸𑀴𑁆𑀳𑀁 𑀕𑀡𑁆𑀳𑀦𑁆𑀢𑀻𑀢𑀺 𑀲𑀸𑀣𑀮𑀺𑀓𑀸. 𑀲𑀺𑀣𑀺𑀮𑀦𑁆𑀢𑀺 𑀘 𑀪𑀸𑀯𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄. 𑀲𑀺𑀣𑀺𑀮𑀲𑀤𑁆𑀤𑁂𑀦 𑀲𑀫𑀸𑀦𑀢𑁆𑀣𑀲𑁆𑀲 𑀲𑀣𑀮𑀲𑀤𑁆𑀤𑀲𑁆𑀲 𑀯𑀲𑁂𑀦 𑀲𑀸𑀣𑀮𑀺𑀓𑀸𑀢𑀺 𑀧𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀯𑀕𑀫𑀦𑀝𑁆𑀞𑁂𑀦𑀸𑀢𑀺 𑀅𑀥𑁄𑀕𑀫𑀦𑀝𑁆𑀞𑁂𑀦, 𑀑𑀭𑀫𑁆𑀪𑀸𑀕𑀺𑀬𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁄. 𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑀸𑀢𑀺 𑀑𑀭𑁄𑀧𑀺𑀢𑀥𑀼𑀭𑀸 𑀉𑀚𑁆𑀚𑀺𑀢𑀼𑀲𑁆𑀲𑀸𑀳𑀸. 𑀉𑀧𑀥𑀺𑀯𑀺𑀯𑁂𑀓𑁄 𑀦𑀺𑀩𑁆𑀩𑀸𑀦𑀁. 𑀤𑀼𑀯𑀺𑀥𑀫𑁆𑀧𑀺 𑀯𑀻𑀭𑀺𑀬𑀦𑁆𑀢𑀺 𑀓𑀸𑀬𑀺𑀓𑀁 𑀘𑁂𑀢𑀲𑀺𑀓𑀜𑁆𑀘 𑀯𑀻𑀭𑀺𑀬𑀁.

𑀪𑀡𑁆𑀟𑀦𑀁 𑀚𑀸𑀢𑀁 𑀏𑀢𑁂𑀲𑀦𑁆𑀢𑀺 𑀪𑀡𑁆𑀟𑀦𑀚𑀸𑀢𑀸. 𑀯𑀺𑀲𑁂𑀲𑀦𑀲𑁆𑀲 𑀧𑀭𑀦𑀺𑀧𑀸𑀢𑀯𑀲𑁂𑀦 𑀘𑁂𑀢𑀁 𑀯𑀼𑀢𑁆𑀢𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀯𑀺𑀲𑁂𑀲𑀦𑀲𑁆𑀲 𑀧𑀼𑀩𑁆𑀩𑀦𑀺𑀧𑀸𑀢𑀯𑀲𑁂𑀦𑁂𑀯 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀚𑀸𑀢𑀪𑀡𑁆𑀟𑀦𑀸’’𑀢𑀺 𑀆𑀳. 𑀓𑀮𑀳𑁄 𑀚𑀸𑀢𑁄 𑀏𑀢𑁂𑀲𑀦𑁆𑀢𑀺 𑀓𑀮𑀳𑀚𑀸𑀢𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀓𑀮𑀳𑀲𑁆𑀲 𑀧𑀼𑀩𑁆𑀩𑀪𑀸𑀕𑁄𑀢𑀺 𑀓𑀮𑀳𑀲𑁆𑀲 𑀳𑁂𑀢𑀼𑀪𑀽𑀢𑀸 𑀧𑀝𑀺𑀪𑀸𑀕𑀸 𑀢𑀁𑀲𑀤𑀺𑀲𑀻 𑀘 𑀅𑀦𑀺𑀝𑁆𑀞𑀓𑀺𑀭𑀺𑀬𑀸. 𑀳𑀢𑁆𑀣𑀧𑀭𑀸𑀫𑀸𑀲𑀸𑀤𑀺𑀯𑀲𑁂𑀦𑀸𑀢𑀺 𑀓𑀼𑀚𑁆𑀛𑀺𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀲𑁆𑀲 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸 𑀧𑀮𑀧𑀦𑀅𑀘𑁆𑀙𑀺𑀦𑁆𑀤𑀦𑀸𑀤𑀺𑀯𑀲𑁂𑀦. ‘‘𑀅𑀬𑀁 𑀥𑀫𑁆𑀫𑁄, 𑀦𑀸𑀬𑀁 𑀥𑀫𑁆𑀫𑁄’’𑀢𑀺𑀆𑀤𑀺𑀦𑀸 𑀯𑀺𑀭𑀼𑀤𑁆𑀥𑀯𑀸𑀤𑀪𑀽𑀢𑀁 𑀯𑀺𑀯𑀸𑀤𑀁 𑀆𑀧𑀦𑁆𑀦𑀸𑀢𑀺 𑀯𑀺𑀯𑀸𑀤𑀧𑀦𑁆𑀦𑀸. 𑀢𑁂𑀦𑀸𑀳 ‘‘𑀯𑀺𑀭𑀼𑀤𑁆𑀥𑀯𑀸𑀤𑀁 𑀆𑀧𑀦𑁆𑀦𑀸’’𑀢𑀺. 𑀫𑀼𑀔𑀲𑀦𑁆𑀦𑀺𑀲𑁆𑀲𑀺𑀢𑀢𑀸𑀬 𑀯𑀸𑀘𑀸 𑀇𑀥 ‘‘𑀫𑀼𑀔’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀸𑀢𑀺 𑀆𑀳 ‘‘𑀨𑀭𑀼𑀲𑀸 𑀯𑀸𑀘𑀸 𑀫𑀼𑀔𑀲𑀢𑁆𑀢𑀺𑀬𑁄’’𑀢𑀺.

𑀲𑀢𑀺𑀧𑀺 𑀉𑀪𑀬𑁂𑀲𑀁 𑀓𑀮𑀸𑀧𑀸𑀦𑀁 𑀧𑀭𑀫𑀢𑁆𑀣𑀢𑁄 𑀪𑁂𑀤𑁂 𑀧𑀘𑀼𑀭𑀚𑀦𑁂𑀳𑀺 𑀧𑀦 𑀤𑀼𑀯𑀺𑀜𑁆𑀜𑁂𑀬𑁆𑀬𑀦𑀸𑀦𑀢𑁆𑀢𑀁 𑀔𑀻𑀭𑁄𑀤𑀓𑀲𑀫𑁆𑀫𑁄𑀤𑀺𑀢𑀁 𑀅𑀘𑁆𑀘𑀦𑁆𑀢𑀫𑁂𑀢𑀁 𑀲𑀁𑀲𑀝𑁆𑀞𑀁 𑀯𑀺𑀬 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀻𑀢𑀺 𑀆𑀳 ‘‘𑀔𑀻𑀭𑁄𑀤𑀓𑀁 𑀯𑀺𑀬 𑀪𑀽𑀢𑀸’’𑀢𑀺. 𑀬𑀣𑀸 𑀔𑀻𑀭𑀜𑁆𑀘 𑀉𑀤𑀓𑀜𑁆𑀘 𑀅𑀜𑁆𑀜𑀫𑀜𑁆𑀜𑀁 𑀲𑀁𑀲𑀦𑁆𑀤𑀢𑀺, 𑀯𑀺𑀲𑀼𑀁 𑀦 𑀳𑁄𑀢𑀺, 𑀏𑀓𑀢𑁆𑀢𑀁 𑀯𑀺𑀬 𑀉𑀧𑁂𑀢𑀺, 𑀏𑀯𑀁 𑀲𑀸𑀫𑀕𑁆𑀕𑀺𑀯𑀲𑁂𑀦 𑀏𑀓𑀢𑁆𑀢𑀽𑀧𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀢𑀺 𑀅𑀢𑁆𑀣𑁄. 𑀫𑁂𑀢𑁆𑀢𑀘𑀺𑀢𑁆𑀢𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑁆𑀯𑀸 𑀑𑀮𑁄𑀓𑀦𑀁 𑀘𑀓𑁆𑀔𑀽𑀦𑀺 𑀯𑀺𑀬 𑀘𑀓𑁆𑀔𑀽𑀦𑀺 𑀦𑀸𑀫𑀸𑀢𑀺 𑀆𑀳 ‘‘𑀉𑀧𑀲𑀦𑁆𑀢𑁂𑀳𑀺 𑀫𑁂𑀢𑁆𑀢𑀘𑀓𑁆𑀔𑀽𑀳𑀻’’𑀢𑀺. 𑀧𑀺𑀬𑀪𑀸𑀯𑀤𑀻𑀧𑀓𑀸𑀦𑀺 𑀳𑀺 𑀘𑀓𑁆𑀔𑀽𑀦𑀺 𑀧𑀺𑀬𑀘𑀓𑁆𑀔𑀽𑀦𑀺. 𑀧𑀫𑀼𑀤𑀺𑀢𑀲𑁆𑀲 𑀧𑀻𑀢𑀺 𑀚𑀸𑀬𑀢𑀻𑀢𑀺 𑀧𑀫𑁄𑀤𑀧𑀘𑁆𑀘𑀬𑀩𑀮𑀯𑀧𑀻𑀢𑀺𑀫𑀸𑀳. 𑀧𑀜𑁆𑀘𑀯𑀡𑁆𑀡𑀸 𑀧𑀻𑀢𑀺 𑀉𑀧𑁆𑀧𑀚𑁆𑀚𑀢𑀻𑀢𑀺 𑀔𑀼𑀤𑁆𑀤𑀺𑀓𑀸𑀤𑀺𑀪𑁂𑀤𑁂𑀦 𑀧𑀜𑁆𑀘𑀧𑁆𑀧𑀓𑀸𑀭𑀸 𑀧𑀻𑀢𑀺 𑀉𑀧𑁆𑀧𑀚𑁆𑀚𑀢𑀺. 𑀧𑀻𑀢𑀺𑀫𑀦𑀲𑁆𑀲𑀸𑀢𑀺 𑀢𑀸𑀬 𑀧𑀻𑀢𑀺𑀬𑀸 𑀧𑀻𑀡𑀺𑀢𑀫𑀦𑀲𑁆𑀲, 𑀧𑀲𑁆𑀲𑀤𑁆𑀥𑀺𑀆𑀯𑀳𑁂𑀳𑀺 𑀉𑀴𑀸𑀭𑁂𑀳𑀺 𑀧𑀻𑀢𑀺𑀯𑁂𑀕𑁂𑀳𑀺 𑀢𑀺𑀦𑁆𑀢𑀘𑀺𑀢𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀯𑀺𑀕𑀢𑀤𑀭𑀣𑁄𑀢𑀺 𑀓𑀺𑀮𑁂𑀲𑀧𑀭𑀺𑀴𑀸𑀳𑀸𑀦𑀁 𑀤𑀽𑀭𑀻𑀪𑀸𑀯𑁂𑀦 𑀯𑀽𑀧𑀲𑀦𑁆𑀢𑀤𑀭𑀣𑁄.

𑀓𑁂𑀦 𑀉𑀤𑀓𑁂𑀦 𑀤𑀸𑀭𑀺𑀢𑁄 𑀧𑀩𑁆𑀩𑀢𑀧𑁆𑀧𑀤𑁂𑀲𑁄𑀢𑀺 𑀓𑀢𑁆𑀯𑀸 𑀆𑀳 ‘‘𑀓𑀦𑁆𑀤𑀭𑁄 𑀦𑀸𑀫𑀸’’𑀢𑀺𑀆𑀤𑀺. 𑀉𑀤𑀓𑀲𑁆𑀲 𑀬𑀣𑀸𑀦𑀺𑀦𑁆𑀦𑀁 𑀧𑀯𑀢𑁆𑀢𑀺𑀬𑀸 𑀦𑀤𑀺𑀦𑀺𑀩𑁆𑀩𑀢𑁆𑀢𑀦𑀪𑀸𑀯𑁂𑀦 ‘‘𑀦𑀤𑀺𑀓𑀼𑀜𑁆𑀚𑁄’’𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀲𑀸𑀯𑀝𑁆𑀝𑀸 𑀦𑀤𑀺𑀬𑁄 𑀧𑀤𑀭𑀸. 𑀅𑀝𑁆𑀞 𑀫𑀸𑀲𑁂𑀢𑀺 𑀳𑁂𑀫𑀦𑁆𑀢𑀕𑀺𑀫𑁆𑀳𑀉𑀢𑀼𑀯𑀲𑁂𑀦 𑀅𑀝𑁆𑀞 𑀫𑀸𑀲𑁂. 𑀔𑀼𑀤𑁆𑀤𑀓𑀸 𑀉𑀤𑀓𑀯𑀸𑀳𑀺𑀦𑀺𑀬𑁄 𑀲𑀸𑀔𑀸 𑀯𑀺𑀬𑀸𑀢𑀺 𑀲𑀸𑀔𑀸. 𑀔𑀼𑀤𑁆𑀤𑀓𑀲𑁄𑀩𑁆𑀪𑀸 𑀓𑀼𑀲𑀼𑀩𑁆𑀪𑀸 𑀑𑀓𑀸𑀭𑀲𑁆𑀲 𑀉𑀓𑀸𑀭𑀁 𑀓𑀢𑁆𑀯𑀸. 𑀬𑀢𑁆𑀣 𑀉𑀧𑀭𑀺 𑀉𑀦𑁆𑀦𑀢𑀧𑁆𑀧𑀤𑁂𑀲𑀢𑁄 𑀉𑀤𑀓𑀁 𑀆𑀕𑀦𑁆𑀢𑁆𑀯𑀸 𑀢𑀺𑀝𑁆𑀞𑀢𑀺 𑀘𑁂𑀯 𑀲𑀦𑁆𑀤𑀢𑀺 𑀘, 𑀢𑁂 𑀓𑀼𑀲𑀼𑀩𑁆𑀪𑀸 𑀔𑀼𑀤𑁆𑀤𑀓𑀆𑀯𑀸𑀝𑀸. 𑀔𑀼𑀤𑁆𑀤𑀓𑀦𑀤𑀺𑀬𑁄𑀢𑀺 𑀧𑀩𑁆𑀩𑀢𑀧𑀸𑀤𑀸𑀤𑀺𑀢𑁄 𑀦𑀺𑀓𑁆𑀔𑀦𑁆𑀢𑀸 𑀔𑀼𑀤𑁆𑀤𑀓𑀸 𑀦𑀤𑀺𑀬𑁄.

𑀧𑀭𑀺𑀲𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫-𑁭. 𑀧𑀞𑀫𑀆𑀚𑀸𑀦𑀻𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁯𑁭-𑁯𑁯. 𑀧𑀜𑁆𑀘𑀫𑁂 𑀅𑀦𑀼𑀘𑁆𑀙𑀯𑀺𑀓𑁄𑀢𑀺 𑀭𑀜𑁆𑀜𑁄 𑀧𑀭𑀺𑀪𑀼𑀜𑁆𑀚𑀦𑀬𑁄𑀕𑁆𑀕𑁄. 𑀳𑀢𑁆𑀣𑀧𑀸𑀤𑀸𑀤𑀺𑀅𑀗𑁆𑀕𑀲𑀫𑀢𑀸𑀬𑀸𑀢𑀺 𑀳𑀢𑁆𑀣𑀧𑀸𑀤𑀸𑀤𑀺𑀅𑀯𑀬𑀯𑀲𑀫𑀢𑀸𑀬, 𑀭𑀜𑁆𑀜𑁄 𑀯𑀸 𑀲𑁂𑀦𑀸𑀬 𑀅𑀗𑁆𑀕𑀪𑀽𑀢𑀢𑁆𑀢𑀸 𑀭𑀜𑁆𑀜𑁄 𑀅𑀗𑁆𑀕𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀆𑀦𑁂𑀢𑁆𑀯𑀸 𑀳𑀼𑀦𑀺𑀢𑀩𑁆𑀩𑀦𑁆𑀢𑀺 𑀆𑀳𑀼𑀦𑀁, 𑀆𑀳𑀼𑀢𑀻𑀢𑀺 𑀅𑀢𑁆𑀣𑀢𑁄 𑀏𑀓𑀦𑁆𑀢𑀺 𑀆𑀳 ‘‘𑀆𑀳𑀼𑀢𑀺𑀲𑀗𑁆𑀔𑀸𑀢𑀁 𑀧𑀺𑀡𑁆𑀟𑀧𑀸𑀢’’𑀦𑁆𑀢𑀺. 𑀤𑀽𑀭𑀢𑁄𑀧𑀺 𑀆𑀦𑁂𑀢𑁆𑀯𑀸 𑀲𑀻𑀮𑀯𑀦𑁆𑀢𑁂𑀲𑀼 𑀤𑀸𑀢𑀩𑁆𑀩𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀧𑀺𑀡𑁆𑀟𑀧𑀸𑀢𑀦𑁆𑀢𑀺 𑀘 𑀦𑀺𑀤𑀲𑁆𑀲𑀦𑀫𑀢𑁆𑀢𑀁. 𑀆𑀦𑁂𑀢𑁆𑀯𑀸 𑀳𑀼𑀦𑀺𑀢𑀩𑁆𑀩𑀸𑀦𑀜𑁆𑀳𑀺 𑀘𑀻𑀯𑀭𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀧𑀘𑁆𑀘𑀬𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁 𑀆𑀳𑀼𑀦𑀦𑁆𑀢𑀺. 𑀢𑀁 𑀅𑀭𑀳𑀢𑀻𑀢𑀺 𑀆𑀳𑀼𑀦𑁂𑀬𑁆𑀬𑁄. 𑀧𑀝𑀺𑀕𑁆𑀕𑀳𑁂𑀢𑀼𑀁 𑀬𑀼𑀢𑁆𑀢𑁄𑀢𑀺 𑀢𑀲𑁆𑀲 𑀫𑀳𑀧𑁆𑀨𑀮𑀪𑀸𑀯𑀓𑀭𑀡𑀢𑁄 𑀧𑀝𑀺𑀕𑁆𑀕𑀡𑁆𑀳𑀺𑀢𑀼𑀁 𑀅𑀦𑀼𑀘𑁆𑀙𑀯𑀺𑀓𑁄.

𑀧𑀸𑀳𑀼𑀦𑀓𑀪𑀢𑁆𑀢𑀲𑁆𑀲𑀸𑀢𑀺 𑀤𑀺𑀲𑀯𑀺𑀤𑀺𑀲𑀢𑁄 𑀆𑀕𑀢𑀸𑀦𑀁 𑀧𑀺𑀬𑀫𑀦𑀸𑀧𑀸𑀦𑀁 𑀜𑀸𑀢𑀺𑀫𑀺𑀢𑁆𑀢𑀸𑀦𑀁 𑀅𑀢𑁆𑀣𑀸𑀬 𑀲𑀓𑁆𑀓𑀸𑀭𑁂 𑀧𑀝𑀺𑀬𑀢𑁆𑀢𑀲𑁆𑀲 𑀆𑀕𑀦𑁆𑀢𑀼𑀓𑀪𑀢𑁆𑀢𑀲𑁆𑀲. 𑀢𑀜𑁆𑀳𑀺 𑀞𑀧𑁂𑀢𑁆𑀯𑀸 𑀢𑁂 𑀢𑀣𑀸𑀭𑀽𑀧𑁂 𑀧𑀸𑀳𑀼𑀦𑀓𑁂 𑀲𑀗𑁆𑀖𑀲𑁆𑀲𑁂𑀯 𑀤𑀸𑀢𑀼𑀁 𑀬𑀼𑀢𑁆𑀢𑀁, 𑀲𑀗𑁆𑀖𑁄𑀯 𑀢𑀁 𑀧𑀝𑀺𑀕𑁆𑀕𑀳𑁂𑀢𑀼𑀁 𑀬𑀼𑀢𑁆𑀢𑁄. 𑀲𑀗𑁆𑀖𑀲𑀤𑀺𑀲𑁄 𑀳𑀺 𑀧𑀸𑀳𑀼𑀦𑀓𑁄 𑀦𑀢𑁆𑀣𑀺. 𑀢𑀣𑀸 𑀳𑁂𑀲 𑀏𑀓𑀲𑁆𑀫𑀺𑀁 𑀩𑀼𑀤𑁆𑀥𑀦𑁆𑀢𑀭𑁂 𑀯𑀻𑀢𑀺𑀯𑀢𑁆𑀢𑁂 𑀤𑀺𑀲𑁆𑀲𑀢𑀺, 𑀓𑀤𑀸𑀘𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑁂𑀧𑀺 𑀓𑀧𑁆𑀧𑁂 𑀯𑀻𑀢𑀺𑀯𑀢𑁆𑀢𑁂. 𑀅𑀩𑁆𑀩𑁄𑀓𑀺𑀡𑁆𑀡𑀜𑁆𑀘 𑀧𑀺𑀬𑀫𑀦𑀸𑀧𑀢𑀸𑀤𑀺𑀓𑀭𑁂𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄. 𑀏𑀯𑀁 𑀧𑀸𑀳𑀼𑀦𑀫𑀲𑁆𑀲 𑀤𑀸𑀢𑀼𑀁 𑀬𑀼𑀢𑁆𑀢𑀁, 𑀧𑀸𑀳𑀼𑀦𑀜𑁆𑀘 𑀧𑀝𑀺𑀕𑁆𑀕𑀳𑁂𑀢𑀼𑀁 𑀬𑀼𑀢𑁆𑀢𑁄𑀢𑀺 𑀧𑀸𑀳𑀼𑀦𑁂𑀬𑁆𑀬𑁄. 𑀅𑀬𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 ‘‘𑀜𑀸𑀢𑀺𑀫𑀺𑀢𑁆𑀢𑀸 𑀯𑀺𑀧𑁆𑀧𑀯𑀼𑀝𑁆𑀞𑀸 𑀦 𑀘𑀺𑀭𑀲𑁆𑀲𑁂𑀯 𑀲𑀫𑀸𑀕𑀘𑁆𑀙𑀦𑁆𑀢𑀺, 𑀅𑀦𑀯𑀝𑁆𑀞𑀺𑀢𑀸 𑀘 𑀢𑁂𑀲𑀼 𑀧𑀺𑀬𑀫𑀦𑀸𑀧𑀢𑀸, 𑀦 𑀏𑀯𑀫𑀭𑀺𑀬𑀲𑀗𑁆𑀖𑁄, 𑀢𑀲𑁆𑀫𑀸 𑀲𑀗𑁆𑀖𑁄𑀯 𑀧𑀸𑀳𑀼𑀦𑁂𑀬𑁆𑀬𑁄’’𑀢𑀺.

𑀤𑀓𑁆𑀔𑀦𑁆𑀢𑀺 𑀏𑀢𑀸𑀬 𑀲𑀢𑁆𑀢𑀸 𑀬𑀣𑀸𑀥𑀺𑀧𑁆𑀧𑁂𑀢𑀸𑀳𑀺 𑀲𑀫𑁆𑀧𑀢𑁆𑀢𑀻𑀳𑀺 𑀯𑀟𑁆𑀠𑀦𑁆𑀢𑀻𑀢𑀺 𑀤𑀓𑁆𑀔𑀺𑀡𑀸, 𑀧𑀭𑀮𑁄𑀓𑀁 𑀲𑀤𑁆𑀤𑀳𑀺𑀢𑁆𑀯𑀸 𑀤𑀸𑀦𑀁. 𑀢𑀁 𑀤𑀓𑁆𑀔𑀺𑀡𑀁 𑀅𑀭𑀳𑀢𑀺, 𑀤𑀓𑁆𑀔𑀺𑀡𑀸𑀬 𑀯𑀸 𑀳𑀺𑀢𑁄 𑀬𑀲𑁆𑀫𑀸 𑀫𑀳𑀧𑁆𑀨𑀮𑀓𑀭𑀡𑀢𑀸𑀬 𑀯𑀺𑀲𑁄𑀥𑁂𑀢𑀻𑀢𑀺 𑀤𑀓𑁆𑀔𑀺𑀡𑁂𑀬𑁆𑀬𑁄.

𑀧𑀼𑀜𑁆𑀜𑀢𑁆𑀣𑀺𑀓𑁂𑀳𑀺 𑀅𑀜𑁆𑀚𑀮𑀺 𑀓𑀭𑀡𑀻𑀬𑁄 𑀏𑀢𑁆𑀣𑀸𑀢𑀺 𑀅𑀜𑁆𑀚𑀮𑀺𑀓𑀭𑀡𑀻𑀬𑁄. 𑀉𑀪𑁄 𑀳𑁂𑀢𑁆𑀣 𑀲𑀺𑀭𑀲𑀺 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀲𑀩𑁆𑀩𑀮𑁄𑀓𑁂𑀦 𑀓𑀬𑀺𑀭𑀫𑀸𑀦𑀁 𑀅𑀜𑁆𑀚𑀮𑀺𑀓𑀫𑁆𑀫𑀁 𑀅𑀭𑀳𑀢𑀻𑀢𑀺 𑀯𑀸 𑀅𑀜𑁆𑀚𑀮𑀺𑀓𑀭𑀡𑀻𑀬𑁄. 𑀢𑁂𑀦𑀸𑀳 ‘‘𑀅𑀜𑁆𑀚𑀮𑀺𑀧𑀕𑁆𑀕𑀳𑀡𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑁄’’𑀢𑀺.

𑀬𑀤𑀺𑀧𑀺 𑀧𑀸𑀴𑀺𑀬𑀁 ‘‘𑀅𑀦𑀼𑀢𑁆𑀢𑀭’’𑀦𑁆𑀢𑀺 𑀯𑀼𑀢𑁆𑀢𑀁, 𑀦𑀢𑁆𑀣𑀺 𑀇𑀢𑁄 𑀉𑀢𑁆𑀢𑀭𑀁 𑀯𑀺𑀲𑀺𑀝𑁆𑀞𑀦𑁆𑀢𑀺 𑀳𑀺 𑀅𑀦𑀼𑀢𑁆𑀢𑀭𑀁, 𑀲𑀫𑀫𑁆𑀧𑀺𑀲𑁆𑀲 𑀧𑀦 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀲𑀤𑀺𑀲’’𑀦𑁆𑀢𑀺 𑀆𑀳. 𑀔𑀺𑀢𑁆𑀢𑀁 𑀯𑀼𑀢𑁆𑀢𑀁 𑀩𑀻𑀚𑀁 𑀫𑀳𑀧𑁆𑀨𑀮𑀪𑀸𑀯𑀓𑀭𑀡𑁂𑀦 𑀢𑀸𑀬𑀢𑀺 𑀭𑀓𑁆𑀔𑀢𑀺, 𑀔𑀺𑀧𑀦𑁆𑀢𑀺 𑀯𑀧𑀦𑁆𑀢𑀺 𑀏𑀢𑁆𑀣 𑀩𑀻𑀚𑀸𑀦𑀻𑀢𑀺 𑀯𑀸 𑀔𑁂𑀢𑁆𑀢𑀁, 𑀓𑁂𑀤𑀸𑀭𑀸𑀤𑀺, 𑀔𑁂𑀢𑁆𑀢𑀁 𑀯𑀺𑀬 𑀔𑁂𑀢𑁆𑀢𑀁, 𑀧𑀼𑀜𑁆𑀜𑀸𑀦𑀁 𑀔𑁂𑀢𑁆𑀢𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁. 𑀬𑀣𑀸 𑀳𑀺 𑀭𑀜𑁆𑀜𑁄 𑀯𑀸 𑀅𑀫𑀘𑁆𑀘𑀲𑁆𑀲 𑀯𑀸 𑀲𑀸𑀮𑀻𑀦𑀁 𑀯𑀸 𑀬𑀯𑀸𑀦𑀁 𑀯𑀸 𑀯𑀺𑀭𑀼𑀳𑀦𑀝𑁆𑀞𑀸𑀦𑀁 ‘‘𑀭𑀜𑁆𑀜𑁄 𑀲𑀸𑀮𑀺𑀓𑁆𑀔𑁂𑀢𑀁 𑀬𑀯𑀓𑁆𑀔𑁂𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀲𑀗𑁆𑀖𑁄 𑀲𑀩𑁆𑀩𑀮𑁄𑀓𑀲𑁆𑀲 𑀧𑀼𑀜𑁆𑀜𑀸𑀦𑀁 𑀯𑀺𑀭𑀼𑀳𑀦𑀝𑁆𑀞𑀸𑀦𑀁. 𑀲𑀗𑁆𑀖𑀁 𑀦𑀺𑀲𑁆𑀲𑀸𑀬 𑀳𑀺 𑀮𑁄𑀓𑀲𑁆𑀲 𑀦𑀸𑀦𑀧𑁆𑀧𑀓𑀸𑀭𑀳𑀺𑀢𑀲𑀼𑀔𑀲𑀁𑀯𑀢𑁆𑀢𑀦𑀺𑀓𑀸𑀦𑀺 𑀧𑀼𑀜𑁆𑀜𑀸𑀦𑀺 𑀯𑀺𑀭𑀼𑀳𑀦𑁆𑀢𑀺, 𑀢𑀲𑁆𑀫𑀸 𑀲𑀗𑁆𑀖𑁄 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀙𑀝𑁆𑀞𑀲𑀢𑁆𑀢𑀫𑀸𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑀧𑀞𑀫𑀆𑀚𑀸𑀦𑀻𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀧𑁄𑀢𑁆𑀣𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁦. 𑀅𑀝𑁆𑀞𑀫𑁂 𑀦𑀯𑁄𑀢𑀺 𑀦𑀯𑀯𑀸𑀬𑀺𑀫𑁄. 𑀢𑁂𑀦𑀸𑀳 ‘‘𑀓𑀭𑀡𑀁 𑀉𑀧𑀸𑀤𑀸𑀬 𑀯𑀼𑀘𑁆𑀘𑀢𑀻’’𑀢𑀺. 𑀯𑀸𑀓𑀫𑀬𑀯𑀢𑁆𑀣𑀦𑁆𑀢𑀺 𑀲𑀸𑀡𑀸𑀤𑀺𑀯𑀸𑀓𑀲𑀸𑀝𑀓𑀁. 𑀤𑀼𑀩𑁆𑀩𑀡𑁆𑀡𑁄𑀢𑀺 𑀯𑀺𑀯𑀡𑁆𑀡𑁄. 𑀤𑀼𑀓𑁆𑀔𑀲𑀫𑁆𑀨𑀲𑁆𑀲𑁄𑀢𑀺 𑀔𑀭𑀲𑀫𑁆𑀨𑀲𑁆𑀲𑁄. 𑀅𑀧𑁆𑀧𑀁 𑀅𑀕𑁆𑀖𑀢𑀻𑀢𑀺 𑀅𑀧𑁆𑀧𑀕𑁆𑀖𑁄. 𑀅𑀢𑀺𑀩𑀳𑀼𑀁 𑀅𑀕𑁆𑀖𑀦𑁆𑀢𑁄 𑀓𑀳𑀸𑀧𑀡𑀕𑁆𑀖𑀦𑀓𑁄 𑀳𑁄𑀢𑀺. 𑀧𑀭𑀺𑀪𑁄𑀕𑀫𑀚𑁆𑀛𑀺𑀫𑁄𑀢𑀺 𑀧𑀭𑀺𑀪𑁄𑀕𑀓𑀸𑀮𑀯𑀲𑁂𑀦 𑀫𑀚𑁆𑀛𑀺𑀫𑁄. 𑀲𑁄 𑀳𑀺 𑀦𑀯𑀪𑀸𑀯𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀚𑀺𑀡𑁆𑀡𑀪𑀸𑀯𑀁 𑀅𑀧𑁆𑀧𑀢𑁆𑀢𑁄 𑀫𑀚𑁆𑀛𑁂 𑀧𑀭𑀺𑀪𑁄𑀕𑀓𑀸𑀮𑁂𑀧𑀺 𑀤𑀼𑀩𑁆𑀩𑀡𑁆𑀡𑁄 𑀘 𑀤𑀼𑀓𑁆𑀔𑀲𑀫𑁆𑀨𑀲𑁆𑀲𑁄 𑀘 𑀅𑀧𑁆𑀧𑀕𑁆𑀖𑁄𑀬𑁂𑀯 𑀳𑁄𑀢𑀺. 𑀅𑀢𑀺𑀩𑀳𑀼𑀁 𑀅𑀕𑁆𑀖𑀦𑁆𑀢𑁄 𑀅𑀟𑁆𑀠𑀁 𑀅𑀕𑁆𑀖𑀢𑀺, 𑀚𑀺𑀡𑁆𑀡𑀓𑀸𑀮𑁂 𑀧𑀦 𑀅𑀟𑁆𑀠𑀫𑀸𑀲𑀓𑀁 𑀯𑀸 𑀓𑀸𑀓𑀡𑀺𑀓𑀁 𑀯𑀸 𑀅𑀕𑁆𑀖𑀢𑀺. 𑀉𑀓𑁆𑀔𑀮𑀺𑀧𑀭𑀺𑀧𑀼𑀜𑁆𑀙𑀦𑀦𑁆𑀢𑀺 𑀓𑀸𑀴𑀼𑀓𑁆𑀔𑀮𑀺𑀧𑀭𑀺𑀧𑀼𑀜𑁆𑀙𑀦𑀁. 𑀦𑀯𑁄𑀢𑀺𑀧𑀺 𑀉𑀧𑀲𑀫𑁆𑀧𑀤𑀸𑀬 𑀧𑀜𑁆𑀘𑀯𑀲𑁆𑀲𑀓𑀸𑀮𑀢𑁄 𑀳𑁂𑀝𑁆𑀞𑀸 𑀚𑀸𑀢𑀺𑀬𑀸 𑀲𑀝𑁆𑀞𑀺𑀯𑀲𑁆𑀲𑁄𑀧𑀺 𑀦𑀯𑁄𑀬𑁂𑀯. 𑀤𑀼𑀩𑁆𑀩𑀡𑁆𑀡𑀢𑀸𑀬𑀸𑀢𑀺 𑀲𑀭𑀻𑀭𑀯𑀡𑁆𑀡𑁂𑀦𑀧𑀺 𑀕𑀼𑀡𑀯𑀡𑁆𑀡𑁂𑀦𑀧𑀺 𑀤𑀼𑀩𑁆𑀩𑀡𑁆𑀡𑀢𑀸𑀬. 𑀤𑀼𑀲𑁆𑀲𑀻𑀮𑀲𑁆𑀲 𑀳𑀺 𑀧𑀭𑀺𑀲𑀫𑀚𑁆𑀛𑁂 𑀦𑀺𑀢𑁆𑀢𑁂𑀚𑀢𑀸𑀬 𑀲𑀭𑀻𑀭𑀯𑀡𑁆𑀡𑁄𑀧𑀺 𑀦 𑀲𑀫𑁆𑀧𑀚𑁆𑀚𑀢𑀺, 𑀕𑀼𑀡𑀯𑀡𑁆𑀡𑁂𑀦 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀲𑀭𑀻𑀭𑀯𑀡𑁆𑀡𑁂𑀦 𑀤𑀼𑀩𑁆𑀩𑀡𑁆𑀡𑀢𑀸𑀧𑀺 𑀕𑀼𑀡𑀯𑀡𑁆𑀡𑀲𑁆𑀲 𑀅𑀪𑀸𑀯𑁂𑀦 𑀤𑀼𑀩𑁆𑀩𑀡𑁆𑀡𑀢𑀸𑀬𑀸𑀢𑀺 𑀯𑀼𑀢𑁆𑀢𑀁.

𑀬𑁂 𑀔𑁄 𑀧𑀦𑀲𑁆𑀲𑀸𑀢𑀺 𑀬𑁂 𑀔𑁄 𑀧𑀦 𑀢𑀲𑁆𑀲 𑀉𑀧𑀝𑁆𑀞𑀸𑀓𑀸 𑀯𑀸 𑀜𑀸𑀢𑀺𑀫𑀺𑀢𑁆𑀢𑀸𑀤𑀬𑁄 𑀯𑀸 𑀏𑀢𑀁 𑀧𑀼𑀕𑁆𑀕𑀮𑀁 𑀲𑁂𑀯𑀦𑁆𑀢𑀺. 𑀢𑁂𑀲𑀦𑁆𑀢𑀺 𑀢𑁂𑀲𑀁 𑀧𑀼𑀕𑁆𑀕𑀮𑀸𑀦𑀁 𑀙 𑀲𑀢𑁆𑀣𑀸𑀭𑁂 𑀲𑁂𑀯𑀦𑁆𑀢𑀸𑀦𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸𑀦𑀁 𑀯𑀺𑀬. 𑀤𑁂𑀯𑀤𑀢𑁆𑀢𑁂 𑀲𑁂𑀯𑀦𑁆𑀢𑀸𑀦𑀁 𑀓𑁄𑀓𑀸𑀮𑀺𑀓𑀸𑀤𑀻𑀦𑀁 𑀯𑀺𑀬 𑀘 𑀢𑀁 𑀲𑁂𑀯𑀦𑀁 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀳𑁄𑀢𑀺. 𑀫𑀚𑁆𑀛𑀺𑀫𑁄𑀢𑀺 𑀧𑀜𑁆𑀘𑀯𑀲𑁆𑀲𑀓𑀸𑀮𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀦𑀯𑀯𑀲𑁆𑀲𑀓𑀸𑀮𑀸 𑀫𑀚𑁆𑀛𑀺𑀫𑁄 𑀦𑀸𑀫. 𑀣𑁂𑀭𑁄𑀢𑀺 𑀤𑀲𑀯𑀲𑁆𑀲𑀢𑁄 𑀧𑀝𑁆𑀞𑀸𑀬 𑀣𑁂𑀭𑁄 𑀦𑀸𑀫. 𑀏𑀯𑀫𑀸𑀳𑀁𑀲𑀽𑀢𑀺 𑀏𑀯𑀁 𑀯𑀤𑀦𑁆𑀢𑀺. 𑀓𑀺𑀁 𑀦𑀼 𑀔𑁄 𑀢𑀼𑀬𑁆𑀳𑀦𑁆𑀢𑀺 𑀢𑀼𑀬𑁆𑀳𑀁 𑀩𑀸𑀮𑀲𑁆𑀲 𑀪𑀡𑀺𑀢𑁂𑀦 𑀓𑁄 𑀅𑀢𑁆𑀣𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀣𑀸𑀭𑀽𑀧𑀦𑁆𑀢𑀺 𑀢𑀣𑀸𑀚𑀸𑀢𑀺𑀓𑀁 𑀢𑀣𑀸𑀲𑀪𑀸𑀯𑀁 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀲𑁆𑀲 𑀓𑀸𑀭𑀡𑀪𑀽𑀢𑀁.

𑀢𑀻𑀳𑀺 𑀓𑀧𑁆𑀧𑀸𑀲𑀅𑀁𑀲𑀽𑀳𑀺 𑀲𑀼𑀢𑁆𑀢𑀁 𑀓𑀦𑁆𑀢𑀺𑀢𑁆𑀯𑀸 𑀓𑀢𑀯𑀢𑁆𑀣𑀦𑁆𑀢𑀺 𑀢𑀬𑁄 𑀓𑀧𑁆𑀧𑀸𑀲𑀅𑀁𑀲𑀽 𑀕𑀳𑁂𑀢𑁆𑀯𑀸 𑀓𑀦𑁆𑀢𑀺𑀢𑀲𑀼𑀢𑁆𑀢𑁂𑀦 𑀯𑀸𑀬𑀺𑀢𑀁 𑀲𑀼𑀔𑀼𑀫𑀯𑀢𑁆𑀣𑀁, 𑀢𑀁 𑀦𑀯𑀯𑀸𑀬𑀺𑀫𑀁 𑀅𑀦𑀕𑁆𑀖𑀁 𑀳𑁄𑀢𑀺, 𑀧𑀭𑀺𑀪𑁄𑀕𑀫𑀚𑁆𑀛𑀺𑀫𑀁 𑀯𑀻𑀲𑀫𑁆𑀧𑀺 𑀢𑀺𑀁𑀲𑀫𑁆𑀧𑀺 𑀲𑀳𑀲𑁆𑀲𑀸𑀦𑀺 𑀅𑀕𑁆𑀖𑀢𑀺, 𑀚𑀺𑀡𑁆𑀡𑀓𑀸𑀮𑁂, 𑀅𑀝𑁆𑀞𑀧𑀺 𑀤𑀲𑀧𑀺 𑀲𑀳𑀲𑁆𑀲𑀸𑀦𑀺 𑀅𑀕𑁆𑀖𑀢𑀺.

𑀢𑁂𑀲𑀁 𑀢𑀁 𑀳𑁄𑀢𑀻𑀢𑀺 𑀢𑁂𑀲𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀤𑀬𑁄 𑀲𑁂𑀯𑀦𑁆𑀢𑀸 𑀯𑀺𑀬 𑀢𑀁 𑀲𑁂𑀯𑀦𑀁 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀳𑁄𑀢𑀺. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀜𑁆𑀳𑀺 𑀏𑀓𑀁 𑀦𑀺𑀲𑁆𑀲𑀸𑀬 𑀬𑀸𑀯𑀚𑁆𑀚𑀓𑀸𑀮𑀸 𑀫𑀼𑀘𑁆𑀘𑀦𑀓𑀲𑀢𑁆𑀢𑀸𑀦𑀁 𑀧𑀫𑀸𑀡𑀁 𑀦𑀢𑁆𑀣𑀺, 𑀢𑀣𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁂 𑀅𑀯𑀲𑁂𑀲𑁂 𑀘 𑀅𑀲𑀻𑀢𑀺 𑀫𑀳𑀸𑀲𑀸𑀯𑀓𑁂 𑀦𑀺𑀲𑁆𑀲𑀸𑀬 𑀲𑀕𑁆𑀕𑀕𑀢𑀲𑀢𑁆𑀢𑀸𑀦𑀁 𑀧𑀫𑀸𑀡𑀁 𑀦𑀢𑁆𑀣𑀺, 𑀬𑀸𑀯𑀚𑁆𑀚𑀓𑀸𑀮𑀸 𑀢𑁂𑀲𑀁 𑀤𑀺𑀝𑁆𑀞𑀸𑀦𑀼𑀕𑀢𑀺𑀁 𑀧𑀝𑀺𑀧𑀦𑁆𑀦𑀲𑀢𑁆𑀢𑀸𑀦𑀫𑁆𑀧𑀺 𑀧𑀫𑀸𑀡𑀁 𑀦𑀢𑁆𑀣𑀺𑀬𑁂𑀯. 𑀆𑀥𑁂𑀬𑁆𑀬𑀁 𑀕𑀘𑁆𑀙𑀢𑀻𑀢𑀺 𑀢𑀲𑁆𑀲 𑀫𑀳𑀸𑀣𑁂𑀭𑀲𑁆𑀲 𑀢𑀁 𑀅𑀢𑁆𑀣𑀦𑀺𑀲𑁆𑀲𑀺𑀢𑀁 𑀯𑀘𑀦𑀁 𑀬𑀣𑀸 𑀕𑀦𑁆𑀥𑀓𑀭𑀡𑁆𑀟𑀓𑁂 𑀓𑀸𑀲𑀺𑀓𑀯𑀢𑁆𑀣𑀁 𑀆𑀥𑀸𑀢𑀩𑁆𑀩𑀢𑀁 𑀞𑀧𑁂𑀢𑀩𑁆𑀩𑀢𑀁 𑀕𑀘𑁆𑀙𑀢𑀺, 𑀏𑀯𑀁 𑀉𑀢𑁆𑀢𑀫𑀗𑁆𑀕𑁂 𑀲𑀺𑀭𑀲𑁆𑀫𑀺𑀁 𑀳𑀤𑀬𑁂 𑀘 𑀆𑀥𑀸𑀢𑀩𑁆𑀩𑀢𑀁 𑀞𑀧𑁂𑀢𑀩𑁆𑀩𑀢𑀁 𑀕𑀘𑁆𑀙𑀢𑀺.

𑀧𑁄𑀢𑁆𑀣𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀮𑁄𑀡𑀓𑀧𑀮𑁆𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁧. 𑀦𑀯𑀫𑁂 𑀬𑀣𑀸 𑀬𑀣𑀸 𑀓𑀫𑁆𑀫𑀁 𑀓𑀭𑁄𑀢𑀻𑀢𑀺 𑀬𑁂𑀦 𑀬𑁂𑀦 𑀧𑀓𑀸𑀭𑁂𑀦 𑀧𑀸𑀡𑀖𑀸𑀢𑀸𑀤𑀺𑀧𑀸𑀧𑀓𑀫𑁆𑀫𑀁 𑀓𑀭𑁄𑀢𑀺. 𑀯𑀺𑀧𑀸𑀓𑀁 𑀧𑀝𑀺𑀲𑀁𑀯𑁂𑀤𑀺𑀬𑀢𑁂𑀯𑀸𑀢𑀺 𑀅𑀯𑀥𑀸𑀭𑀡𑁂𑀦 𑀓𑀫𑁆𑀫𑀲𑀺𑀤𑁆𑀥𑀺𑀬𑀁 𑀢𑀩𑁆𑀩𑀺𑀧𑀸𑀓𑀲𑁆𑀲 𑀅𑀧𑁆𑀧𑀯𑀢𑁆𑀢𑀺 𑀦𑀸𑀫 𑀦𑀢𑁆𑀣𑀻𑀢𑀺 𑀤𑀻𑀧𑁂𑀢𑀺. 𑀢𑁂𑀦𑁂𑀯𑀸𑀳 ‘‘𑀦 𑀳𑀺 𑀲𑀓𑁆𑀓𑀸’’𑀢𑀺𑀆𑀤𑀺. 𑀏𑀯𑀁 𑀲𑀦𑁆𑀢𑀦𑁆𑀢𑀺 𑀪𑀼𑀫𑁆𑀫𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀦𑁆𑀢𑀺 𑀆𑀳 ‘‘𑀏𑀯𑀁 𑀲𑀦𑁆𑀢𑁂’’𑀢𑀺. 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁂𑀦𑀸𑀢𑀺 𑀓𑀫𑁆𑀫𑀯𑀺𑀜𑁆𑀜𑀸𑀡𑀲𑁆𑀲 𑀆𑀬𑀢𑀺𑀁 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀸𑀧𑀚𑁆𑀚𑀦𑁂𑀦.

‘‘𑀅𑀬𑀫𑁆𑀧𑀺 𑀔𑁄 𑀓𑀸𑀬𑁄 𑀏𑀯𑀁𑀥𑀫𑁆𑀫𑁄 𑀏𑀯𑀁𑀪𑀸𑀯𑀻 𑀏𑀯𑀁𑀅𑀦𑀢𑀻𑀢𑁄’’𑀢𑀺𑀆𑀤𑀺𑀦𑀸 𑀓𑀸𑀬𑀲𑁆𑀲 𑀅𑀲𑀼𑀪𑀸𑀦𑀺𑀘𑁆𑀘𑀸𑀤𑀺𑀆𑀓𑀸𑀭𑀅𑀦𑀼𑀧𑀲𑁆𑀲𑀦𑀸 𑀓𑀸𑀬𑀪𑀸𑀯𑀦𑀸𑀢𑀺 𑀆𑀳 ‘‘𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀗𑁆𑀔𑀸𑀢𑀸𑀬 𑀢𑀸𑀬 𑀪𑀸𑀯𑀦𑀸𑀬𑀸’’𑀢𑀺. 𑀭𑀸𑀕𑀸𑀤𑀻𑀦𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀤𑁄𑀲𑀫𑁄𑀳𑀸𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. ‘‘𑀭𑀸𑀕𑁄 𑀔𑁄, 𑀆𑀯𑀼𑀲𑁄, 𑀧𑀫𑀸𑀡𑀓𑀭𑀡𑁄, 𑀤𑁄𑀲𑁄 𑀧𑀫𑀸𑀡𑀓𑀭𑀡𑁄, 𑀫𑁄𑀳𑁄 𑀧𑀫𑀸𑀡𑀓𑀭𑀡𑁄, 𑀢𑁂 𑀔𑀻𑀡𑀸𑀲𑀯𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸’’𑀢𑀺 (𑀫. 𑀦𑀺. 𑁧.𑁪𑁫𑁯) 𑀳𑀺 𑀯𑀼𑀢𑁆𑀢𑀁.

𑀬𑀣𑀸 𑀳𑀺 𑀧𑀩𑁆𑀩𑀢𑀧𑀸𑀤𑁂 𑀧𑀽𑀢𑀺𑀧𑀡𑁆𑀡𑀲𑁆𑀲 𑀉𑀤𑀓𑀁 𑀦𑀸𑀫 𑀳𑁄𑀢𑀺, 𑀓𑀸𑀴𑀯𑀡𑁆𑀡𑀁 𑀑𑀮𑁄𑀓𑁂𑀦𑁆𑀢𑀸𑀦𑀁 𑀩𑁆𑀬𑀸𑀫𑀲𑀢𑀁 𑀕𑀫𑁆𑀪𑀻𑀭𑀁 𑀯𑀺𑀬 𑀔𑀸𑀬𑀢𑀺, 𑀬𑀝𑁆𑀞𑀺𑀁 𑀯𑀸 𑀭𑀚𑁆𑀚𑀼𑀁 𑀯𑀸 𑀕𑀳𑁂𑀢𑁆𑀯𑀸 𑀫𑀺𑀦𑀦𑁆𑀢𑀲𑁆𑀲 𑀧𑀺𑀝𑁆𑀞𑀺𑀧𑀸𑀤𑁄𑀤𑁆𑀥𑀭𑀡𑀫𑀢𑁆𑀢𑀫𑁆𑀧𑀺 𑀦 𑀳𑁄𑀢𑀺, 𑀏𑀯𑀫𑁂𑀯 𑀏𑀓𑀘𑁆𑀘𑀲𑁆𑀲 𑀬𑀸𑀯 𑀭𑀸𑀕𑀸𑀤𑀬𑁄 𑀦𑀼𑀧𑁆𑀧𑀚𑁆𑀚𑀦𑁆𑀢𑀺, 𑀢𑀸𑀯 𑀢𑀁 𑀧𑀼𑀕𑁆𑀕𑀮𑀁 𑀲𑀜𑁆𑀚𑀸𑀦𑀺𑀢𑀼𑀁 𑀦 𑀲𑀓𑁆𑀓𑀸 𑀳𑁄𑀢𑀺, 𑀲𑁄𑀢𑀸𑀧𑀦𑁆𑀦𑁄 𑀯𑀺𑀬 𑀲𑀓𑀤𑀸𑀕𑀸𑀫𑀻 𑀯𑀺𑀬 𑀅𑀦𑀸𑀕𑀸𑀫𑀻 𑀯𑀺𑀬 𑀘 𑀔𑀸𑀬𑀢𑀺. 𑀬𑀤𑀸 𑀧𑀦𑀲𑁆𑀲 𑀭𑀸𑀕𑀸𑀤𑀬𑁄 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀤𑀸 𑀭𑀢𑁆𑀢𑁄 𑀤𑀼𑀝𑁆𑀞𑁄 𑀫𑀽𑀴𑁆𑀳𑁄𑀢𑀺 𑀧𑀜𑁆𑀜𑀸𑀬𑀢𑀺. 𑀇𑀢𑀺 𑀢𑁂 𑀭𑀸𑀕𑀸𑀤𑀬𑁄 ‘‘𑀏𑀢𑁆𑀢𑀓𑁄 𑀅𑀬’’𑀦𑁆𑀢𑀺 𑀧𑀼𑀕𑁆𑀕𑀮𑀲𑁆𑀲 𑀧𑀫𑀸𑀡𑀁 𑀤𑀲𑁆𑀲𑁂𑀦𑁆𑀢𑀸𑀯 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀧𑀫𑀸𑀡𑀓𑀭𑀡𑀸 𑀦𑀸𑀫 𑀯𑀼𑀢𑁆𑀢𑀸.

𑀚𑀸𑀧𑁂𑀢𑀼𑀦𑁆𑀢𑀺 𑀚𑀺𑀦𑀥𑀦𑀁 𑀓𑀸𑀢𑀼𑀁. 𑀲𑁄𑀢𑀺 𑀭𑀸𑀚𑀸, 𑀫𑀳𑀸𑀫𑀢𑁆𑀢𑁄 𑀯𑀸. 𑀅𑀲𑁆𑀲𑀸𑀢𑀺 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀬𑀸𑀘𑀦𑁆𑀢𑀲𑁆𑀲. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑀮𑁄𑀡𑀓𑀧𑀮𑁆𑀮𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀧𑀁𑀲𑀼𑀥𑁄𑀯𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁨. 𑀤𑀲𑀫𑁂 𑀅𑀦𑀻𑀳𑀢𑀤𑁄𑀲𑀦𑁆𑀢𑀺 𑀅𑀦𑀧𑀦𑀻𑀢𑀣𑀽𑀮𑀓𑀸𑀴𑀓𑀁. 𑀅𑀦𑀧𑀦𑀻𑀢𑀓𑀲𑀸𑀯𑀦𑁆𑀢𑀺 𑀅𑀦𑀧𑀕𑀢𑀲𑀼𑀔𑀼𑀫𑀓𑀸𑀴𑀓𑀁. 𑀧𑀳𑀝𑀫𑀢𑁆𑀢𑀦𑁆𑀢𑀺 𑀆𑀳𑀝𑀫𑀢𑁆𑀢𑀁.

𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀯𑀲𑁂𑀦 𑀉𑀧𑁆𑀧𑀦𑁆𑀦𑀁 𑀘𑀺𑀢𑁆𑀢𑀁 𑀘𑀺𑀢𑁆𑀢𑀫𑁂𑀯, 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀘𑀺𑀢𑁆𑀢𑀁 𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀜𑁆𑀘 𑀢𑀢𑁄 𑀘𑀺𑀢𑁆𑀢𑀢𑁄 𑀅𑀥𑀺𑀓𑀁 𑀘𑀺𑀢𑁆𑀢𑀦𑁆𑀢𑀺 𑀅𑀥𑀺𑀘𑀺𑀢𑁆𑀢𑀦𑁆𑀢𑀺 𑀆𑀳 ‘‘𑀅𑀥𑀺𑀘𑀺𑀢𑁆𑀢𑀦𑁆𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢’’𑀦𑁆𑀢𑀺. 𑀅𑀦𑀼𑀬𑀼𑀢𑁆𑀢𑀲𑁆𑀲𑀸𑀢𑀺 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀉𑀧𑁆𑀧𑀸𑀤𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑀲𑁆𑀲 𑀧𑀝𑀺𑀩𑁆𑀭𑀽𑀳𑀦𑀯𑀲𑁂𑀦 𑀅𑀦𑀼 𑀅𑀦𑀼 𑀬𑀼𑀢𑁆𑀢𑀲𑁆𑀲, 𑀢𑀢𑁆𑀣 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀧𑀼𑀭𑁂𑀪𑀢𑁆𑀢𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑁆𑀧𑀝𑀺𑀓𑁆𑀓𑀦𑁆𑀢𑁄 𑀦𑀺𑀲𑀻𑀤𑀦𑀁 𑀆𑀤𑀸𑀬 ‘‘𑀅𑀲𑀼𑀓𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀯𑀸 𑀯𑀦𑀲𑀡𑁆𑀟𑁂 𑀯𑀸 𑀧𑀩𑁆𑀪𑀸𑀭𑁂 𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀦𑀺𑀓𑁆𑀔𑀫𑀦𑁆𑀢𑁄𑀧𑀺 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀳𑀢𑁆𑀣𑁂𑀳𑀺 𑀯𑀸 𑀧𑀸𑀤𑁂𑀳𑀺 𑀯𑀸 𑀦𑀺𑀲𑀚𑁆𑀚𑀝𑁆𑀞𑀸𑀦𑀢𑁄 𑀢𑀺𑀡𑀧𑀡𑁆𑀡𑀸𑀦𑀺 𑀅𑀧𑀦𑁂𑀦𑁆𑀢𑁄𑀧𑀺 𑀅𑀥𑀺𑀘𑀺𑀢𑁆𑀢𑀁 𑀅𑀦𑀼𑀬𑀼𑀢𑁆𑀢𑁄𑀬𑁂𑀯. 𑀦𑀺𑀲𑀻𑀤𑀺𑀢𑁆𑀯𑀸 𑀧𑀦 𑀳𑀢𑁆𑀣𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀪𑀸𑀯𑀦𑀁 𑀅𑀦𑀼𑀬𑀼𑀜𑁆𑀚𑀦𑁆𑀢𑁄 𑀪𑀸𑀯𑀦𑀸𑀬 𑀅𑀧𑁆𑀧𑀦𑀁 𑀅𑀧𑁆𑀧𑀢𑁆𑀢𑀸𑀬𑀧𑀺 𑀅𑀥𑀺𑀘𑀺𑀢𑁆𑀢𑀫𑀦𑀼𑀬𑀼𑀢𑁆𑀢𑁄𑀬𑁂𑀯 𑀢𑀤𑀢𑁆𑀣𑁂𑀦𑀧𑀺 𑀢𑀁𑀲𑀤𑁆𑀤𑀯𑁄𑀳𑀸𑀭𑀢𑁄. 𑀘𑀺𑀢𑁆𑀢𑀲𑀫𑁆𑀧𑀦𑁆𑀦𑁄𑀢𑀺 𑀥𑀫𑁆𑀫𑀘𑀺𑀢𑁆𑀢𑀲𑁆𑀲 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀲𑀫𑁆𑀧𑀦𑁆𑀦𑀘𑀺𑀢𑁆𑀢𑁄. 𑀧𑀡𑁆𑀟𑀺𑀢𑀚𑀸𑀢𑀺𑀓𑁄𑀢𑀺 𑀧𑀡𑁆𑀟𑀺𑀢𑀲𑀪𑀸𑀯𑁄.

𑀓𑀸𑀫𑁂 𑀆𑀭𑀩𑁆𑀪𑀸𑀢𑀺 𑀯𑀢𑁆𑀣𑀼𑀓𑀸𑀫𑁂 𑀆𑀭𑀩𑁆𑀪. 𑀓𑀸𑀫𑀭𑀸𑀕𑀲𑀗𑁆𑀔𑀸𑀢𑁂𑀦 𑀯𑀸 𑀓𑀸𑀫𑁂𑀦 𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄 𑀓𑀸𑀫𑀯𑀺𑀢𑀓𑁆𑀓𑁄. 𑀩𑁆𑀬𑀸𑀧𑀚𑁆𑀚𑀢𑀺 𑀘𑀺𑀢𑁆𑀢𑀁 𑀏𑀢𑁂𑀦𑀸𑀢𑀺 𑀩𑁆𑀬𑀸𑀧𑀸𑀤𑁄, 𑀤𑁄𑀲𑁄. 𑀯𑀺𑀳𑀺𑀁𑀲𑀦𑁆𑀢𑀺 𑀏𑀢𑀸𑀬 𑀲𑀢𑁆𑀢𑁂, 𑀯𑀺𑀳𑀺𑀁𑀲𑀦𑀁 𑀯𑀸 𑀢𑁂𑀲𑀁 𑀏𑀢𑀦𑁆𑀢𑀺 𑀯𑀺𑀳𑀺𑀁𑀲𑀸, 𑀧𑀭𑁂𑀲𑀁 𑀯𑀺𑀳𑁂𑀞𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀲𑁆𑀲 𑀓𑀭𑀼𑀡𑀸𑀧𑀝𑀺𑀧𑀓𑁆𑀔𑀲𑁆𑀲 𑀧𑀸𑀧𑀥𑀫𑁆𑀫𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀜𑀸𑀢𑀓𑁂 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑁄 𑀯𑀺𑀢𑀓𑁆𑀓𑁄𑀢𑀺 𑀜𑀸𑀢𑀓𑁂 𑀆𑀭𑀩𑁆𑀪 𑀕𑁂𑀳𑀲𑁆𑀲𑀺𑀢𑀧𑁂𑀫𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀯𑀺𑀢𑀓𑁆𑀓𑁄. 𑀚𑀦𑀧𑀤𑀫𑀸𑀭𑀩𑁆𑀪 𑀉𑀧𑁆𑀧𑀦𑁆𑀦𑁄 𑀯𑀺𑀢𑀓𑁆𑀓𑁄𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀅𑀳𑁄 𑀯𑀢 𑀫𑀁…𑀧𑁂… 𑀉𑀧𑁆𑀧𑀦𑁆𑀦𑁄 𑀯𑀺𑀢𑀓𑁆𑀓𑁄𑀢𑀺 ‘‘𑀅𑀳𑁄 𑀯𑀢 𑀫𑀁 𑀧𑀭𑁂 𑀦 𑀅𑀯𑀚𑀸𑀦𑁂𑀬𑁆𑀬𑀼𑀁, 𑀦 𑀳𑁂𑀝𑁆𑀞𑀸 𑀓𑀢𑁆𑀯𑀸 𑀫𑀜𑁆𑀜𑁂𑀬𑁆𑀬𑀼𑀁, 𑀧𑀸𑀲𑀸𑀡𑀘𑁆𑀙𑀢𑁆𑀢𑀁 𑀯𑀺𑀬 𑀕𑀭𑀼𑀁 𑀓𑀭𑁂𑀬𑁆𑀬𑀼’’𑀦𑁆𑀢𑀺 𑀏𑀯𑀁 𑀉𑀧𑁆𑀧𑀦𑁆𑀦𑀯𑀺𑀢𑀓𑁆𑀓𑁄. 𑀤𑀲𑀯𑀺𑀧𑀲𑁆𑀲𑀦𑀼𑀧𑀓𑁆𑀓𑀺𑀮𑁂𑀲𑀯𑀺𑀢𑀓𑁆𑀓𑀸𑀢𑀺 𑀑𑀪𑀸𑀲𑀸𑀤𑀺𑀤𑀲𑀯𑀺𑀧𑀲𑁆𑀲𑀦𑀼𑀧𑀓𑁆𑀓𑀺𑀮𑁂𑀲𑁂 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀯𑀺𑀢𑀓𑁆𑀓𑀸.

𑀅𑀯𑀲𑀺𑀝𑁆𑀞𑀸 𑀥𑀫𑁆𑀫𑀯𑀺𑀢𑀓𑁆𑀓𑀸 𑀏𑀢𑀲𑁆𑀲𑀸𑀢𑀺 𑀅𑀯𑀲𑀺𑀝𑁆𑀞𑀥𑀫𑁆𑀫𑀯𑀺𑀢𑀓𑁆𑀓𑁄, 𑀯𑀺𑀧𑀲𑁆𑀲𑀦𑀸𑀲𑀫𑀸𑀥𑀺. 𑀦 𑀏𑀓𑀕𑁆𑀕𑀪𑀸𑀯𑀧𑁆𑀧𑀢𑁆𑀢𑁄 𑀦 𑀏𑀓𑀕𑁆𑀕𑀢𑀁 𑀧𑀢𑁆𑀢𑁄. 𑀏𑀓𑀁 𑀉𑀤𑁂𑀢𑀻𑀢𑀺 𑀳𑀺 𑀏𑀓𑁄𑀤𑀺, 𑀧𑀝𑀺𑀧𑀓𑁆𑀔𑁂𑀳𑀺 𑀅𑀦𑀪𑀺𑀪𑀽𑀢𑀢𑁆𑀢𑀸 𑀅𑀕𑁆𑀕𑀁 𑀲𑁂𑀝𑁆𑀞𑀁 𑀳𑀼𑀢𑁆𑀯𑀸 𑀉𑀤𑁂𑀢𑀻𑀢𑀺 𑀅𑀢𑁆𑀣𑁄. 𑀲𑁂𑀝𑁆𑀞𑁄𑀧𑀺 𑀳𑀺 𑀮𑁄𑀓𑁂 𑀏𑀓𑁄𑀢𑀺 𑀯𑀼𑀘𑁆𑀘𑀢𑀺, 𑀏𑀓𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀲𑀫𑀸𑀥𑀸𑀦𑀯𑀲𑁂𑀦 𑀧𑀯𑀢𑁆𑀢𑀘𑀺𑀢𑁆𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀏𑀓𑁄𑀤𑀺𑀲𑁆𑀲 𑀪𑀸𑀯𑁄 𑀏𑀓𑁄𑀤𑀺𑀪𑀸𑀯𑁄, 𑀏𑀓𑀕𑁆𑀕𑀢𑀸𑀬𑁂𑀢𑀁 𑀅𑀥𑀺𑀯𑀘𑀦𑀁.

𑀦𑀺𑀬𑀓𑀚𑁆𑀛𑀢𑁆𑀢𑀦𑁆𑀢𑀺 𑀅𑀢𑁆𑀢𑀲𑀦𑁆𑀢𑀸𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀕𑁄𑀘𑀭𑀚𑁆𑀛𑀢𑁆𑀢𑀦𑁆𑀢𑀺 𑀇𑀥 𑀦𑀺𑀩𑁆𑀩𑀸𑀦𑀁 𑀅𑀥𑀺𑀧𑁆𑀧𑁂𑀢𑀁. 𑀢𑁂𑀦𑀸𑀳 ‘‘𑀏𑀓𑀲𑁆𑀫𑀺𑀁 𑀦𑀺𑀩𑁆𑀩𑀸𑀦𑀕𑁄𑀘𑀭𑁂𑀬𑁂𑀯 𑀢𑀺𑀝𑁆𑀞𑀢𑀻’’𑀢𑀺. 𑀲𑀼𑀝𑁆𑀞𑀼 𑀦𑀺𑀲𑀻𑀤𑀢𑀻𑀢𑀺 𑀲𑀫𑀸𑀥𑀺𑀧𑀝𑀺𑀧𑀓𑁆𑀔𑁂 𑀓𑀺𑀮𑁂𑀲𑁂 𑀲𑀦𑁆𑀦𑀺𑀲𑀻𑀤𑁂𑀦𑁆𑀢𑁄 𑀲𑀼𑀝𑁆𑀞𑀼 𑀦𑀺𑀲𑀻𑀤𑀢𑀺. 𑀏𑀓𑀕𑁆𑀕𑀁 𑀳𑁄𑀢𑀻𑀢𑀺 𑀅𑀩𑁆𑀬𑀕𑁆𑀕𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀏𑀓𑀕𑁆𑀕𑀁 𑀳𑁄𑀢𑀺. 𑀲𑀫𑁆𑀫𑀸 𑀆𑀥𑀺𑀬𑀢𑀻𑀢𑀺 𑀬𑀣𑀸 𑀆𑀭𑀫𑁆𑀫𑀡𑁂 𑀲𑀼𑀝𑁆𑀞𑀼 𑀅𑀧𑁆𑀧𑀺𑀢𑀁 𑀳𑁄𑀢𑀺, 𑀏𑀯𑀁 𑀲𑀫𑁆𑀫𑀸 𑀲𑀫𑁆𑀫𑀤𑁂𑀯 𑀆𑀥𑀺𑀬𑀢𑀺.

𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀭𑀡𑀻𑀬𑀲𑁆𑀲𑀸𑀢𑀺 𑀏𑀢𑁆𑀣 ‘‘𑀅𑀪𑀺𑀜𑁆𑀜𑀸𑀬 𑀲𑀘𑁆𑀙𑀺𑀓𑀭𑀡𑀻𑀬𑀲𑁆𑀲𑀸’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀅𑀪𑀺𑀜𑁆𑀜𑀸’’𑀢𑀺 𑀬-𑀓𑀸𑀭𑀮𑁄𑀧𑁂𑀦 𑀧𑀦 𑀧𑀼𑀦 𑀓𑀸𑀮𑀓𑀺𑀭𑀺𑀬𑀸𑀦𑀺𑀤𑁆𑀤𑁂𑀲𑁄 𑀓𑀢𑁄𑀢𑀺 𑀆𑀳 ‘‘𑀅𑀪𑀺𑀚𑀸𑀦𑀺𑀢𑁆𑀯𑀸 𑀧𑀘𑁆𑀘𑀓𑁆𑀔𑀁 𑀓𑀸𑀢𑀩𑁆𑀩𑀲𑁆𑀲𑀸’’𑀢𑀺. 𑀅𑀪𑀺𑀜𑁆𑀜𑀸𑀬 𑀇𑀤𑁆𑀥𑀺𑀯𑀺𑀥𑀸𑀤𑀺𑀜𑀸𑀡𑁂𑀦 𑀲𑀘𑁆𑀙𑀺𑀓𑀺𑀭𑀺𑀬𑀁 𑀇𑀤𑁆𑀥𑀺𑀯𑀺𑀥𑀧𑀘𑁆𑀘𑀦𑀼𑀪𑀯𑀦𑀸𑀤𑀺𑀓𑀁 𑀅𑀪𑀺𑀜𑁆𑀜𑀸𑀲𑀘𑁆𑀙𑀺𑀓𑀭𑀡𑀻𑀬𑀦𑁆𑀢𑀺 𑀏𑀯𑀁 𑀯𑀸 𑀏𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀲𑀓𑁆𑀔𑀺𑀪𑀩𑁆𑀩𑀢𑀁 𑀧𑀸𑀧𑀼𑀡𑀸𑀢𑀻𑀢𑀺 𑀏𑀢𑁆𑀣 𑀧𑀦 𑀬𑀲𑁆𑀲 𑀧𑀘𑁆𑀘𑀓𑁆𑀔𑀁 𑀅𑀢𑁆𑀣𑀺, 𑀲𑁄 𑀲𑀓𑁆𑀔𑀻, 𑀲𑀓𑁆𑀔𑀺𑀦𑁄 𑀪𑀩𑁆𑀩𑀢𑀸 𑀲𑀓𑁆𑀔𑀺𑀪𑀩𑁆𑀩𑀢𑀸, 𑀲𑀓𑁆𑀔𑀺𑀪𑀯𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀓𑁆𑀔𑀻 𑀘 𑀲𑁄 𑀪𑀩𑁆𑀩𑁄 𑀘𑀸𑀢𑀺 𑀲𑀓𑁆𑀔𑀺𑀪𑀩𑁆𑀩𑁄. 𑀅𑀬𑀜𑁆𑀳𑀺 𑀇𑀤𑁆𑀥𑀺𑀯𑀺𑀥𑀸𑀤𑀻𑀦𑀁 𑀪𑀩𑁆𑀩𑁄 𑀢𑀢𑁆𑀣 𑀘 𑀲𑀓𑁆𑀔𑀻𑀢𑀺 𑀲𑀓𑁆𑀔𑀺𑀪𑀩𑁆𑀩𑁄, 𑀢𑀲𑁆𑀲 𑀪𑀸𑀯𑁄 𑀲𑀓𑁆𑀔𑀺𑀪𑀩𑁆𑀩𑀢𑀸, 𑀢𑀁 𑀧𑀸𑀧𑀼𑀡𑀸𑀢𑀻𑀢𑀺 𑀅𑀢𑁆𑀣𑁄.

𑀅𑀪𑀺𑀜𑁆𑀜𑀸𑀧𑀸𑀤𑀓𑀚𑁆𑀛𑀸𑀦𑀸𑀤𑀺𑀪𑁂𑀤𑁂𑀢𑀺 𑀏𑀢𑁆𑀣 𑀅𑀪𑀺𑀜𑁆𑀜𑀸𑀧𑀸𑀤𑀸 𑀘 𑀅𑀪𑀺𑀜𑁆𑀜𑀸𑀧𑀸𑀤𑀓𑀚𑁆𑀛𑀸𑀦𑀜𑁆𑀘 𑀅𑀪𑀺𑀜𑁆𑀜𑀸𑀧𑀸𑀤𑀓𑀚𑁆𑀛𑀸𑀦𑀸𑀦𑀺. 𑀆𑀤𑀺-𑀲𑀤𑁆𑀤𑁂𑀦 𑀅𑀭𑀳𑀢𑁆𑀢𑀜𑁆𑀘 𑀅𑀭𑀳𑀢𑁆𑀢𑀲𑁆𑀲 𑀯𑀺𑀧𑀲𑁆𑀲𑀦𑀸 𑀘 𑀲𑀗𑁆𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦𑁂𑀯 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀁 (𑀫. 𑀦𑀺. 𑀅𑀝𑁆𑀞. 𑁨.𑁧𑁯𑁮) 𑁋

‘‘𑀲𑀢𑀺 𑀲𑀢𑀺𑀆𑀬𑀢𑀦𑁂𑀢𑀺 𑀲𑀢𑀺 𑀲𑀢𑀺𑀓𑀸𑀭𑀡𑁂. 𑀓𑀺𑀜𑁆𑀘𑁂𑀢𑁆𑀣 𑀓𑀸𑀭𑀡𑀁? 𑀅𑀪𑀺𑀜𑁆𑀜𑀸 𑀯𑀸 𑀅𑀪𑀺𑀜𑁆𑀜𑀸𑀧𑀸𑀤𑀓𑀚𑁆𑀛𑀸𑀦𑀁 𑀯𑀸, 𑀅𑀯𑀲𑀸𑀦𑁂 𑀧𑀦 𑀅𑀭𑀳𑀢𑁆𑀢𑀁 𑀯𑀸 𑀓𑀸𑀭𑀡𑀁 𑀅𑀭𑀳𑀢𑁆𑀢𑀲𑁆𑀲 𑀯𑀺𑀧𑀲𑁆𑀲𑀦𑀸 𑀯𑀸𑀢𑀺 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁.

𑀬𑀜𑁆𑀳𑀺 𑀢𑀁 𑀢𑀢𑁆𑀭 𑀢𑀢𑁆𑀭 𑀲𑀓𑁆𑀔𑀺𑀪𑀩𑁆𑀩𑀢𑀸𑀲𑀗𑁆𑀔𑀸𑀢𑀁 𑀇𑀤𑁆𑀥𑀺𑀯𑀺𑀥𑀧𑀘𑁆𑀘𑀦𑀼𑀪𑀯𑀦𑀸𑀤𑀺, 𑀢𑀲𑁆𑀲 𑀅𑀪𑀺𑀜𑁆𑀜𑀸 𑀓𑀸𑀭𑀡𑀁. 𑀅𑀣 𑀇𑀤𑁆𑀥𑀺𑀯𑀺𑀥𑀧𑀘𑁆𑀘𑀦𑀼𑀪𑀯𑀦𑀸𑀤𑀺 𑀅𑀪𑀺𑀜𑁆𑀜𑀸, 𑀏𑀯𑀁 𑀲𑀢𑀺 𑀅𑀪𑀺𑀜𑁆𑀜𑀸𑀧𑀸𑀤𑀓𑀚𑁆𑀛𑀸𑀦𑀁 𑀓𑀸𑀭𑀡𑀁. 𑀅𑀯𑀲𑀸𑀦𑁂 𑀙𑀝𑁆𑀞𑀸𑀪𑀺𑀜𑁆𑀜𑀸𑀬 𑀧𑀦 𑀅𑀭𑀳𑀢𑁆𑀢𑀁, 𑀅𑀭𑀳𑀢𑁆𑀢𑀲𑁆𑀲 𑀯𑀺𑀧𑀲𑁆𑀲𑀦𑀸 𑀯𑀸 𑀓𑀸𑀭𑀡𑀁. 𑀅𑀭𑀳𑀢𑁆𑀢𑀜𑁆𑀳𑀺 ‘‘𑀓𑀼𑀤𑀸𑀲𑁆𑀲𑀼 𑀦𑀸𑀫𑀸𑀳𑀁 𑀢𑀤𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀸𑀫𑀺, 𑀬𑀤𑀭𑀺𑀬𑀸 𑀏𑀢𑀭𑀳𑀺 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀦𑁆𑀢𑀻’’𑀢𑀺 (𑀫. 𑀦𑀺. 𑁧.𑁪𑁬𑁫; 𑁩.𑁩𑁦𑁭) 𑀅𑀦𑀼𑀢𑁆𑀢𑀭𑁂𑀲𑀼 𑀯𑀺𑀫𑁄𑀓𑁆𑀔𑁂𑀲𑀼 𑀧𑀺𑀳𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀅𑀪𑀺𑀜𑁆𑀜𑀸 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀲𑁆𑀲 𑀓𑀸𑀭𑀡𑀁. 𑀇𑀤𑀜𑁆𑀘 𑀲𑀸𑀥𑀸𑀭𑀡𑀁 𑀦 𑀳𑁄𑀢𑀺, 𑀲𑀸𑀥𑀸𑀭𑀡𑀯𑀲𑁂𑀦 𑀧𑀦 𑀅𑀭𑀳𑀢𑁆𑀢𑀲𑁆𑀲 𑀯𑀺𑀧𑀲𑁆𑀲𑀦𑀸 𑀓𑀸𑀭𑀡𑀁. 𑀇𑀫𑀲𑁆𑀫𑀺𑀜𑁆𑀳𑀺 𑀲𑀼𑀢𑁆𑀢𑁂 𑀅𑀭𑀳𑀢𑁆𑀢𑀨𑀮𑀯𑀲𑁂𑀦 𑀙𑀝𑁆𑀞𑀸𑀪𑀺𑀜𑁆𑀜𑀸 𑀯𑀼𑀢𑁆𑀢𑀸. 𑀢𑁂𑀦𑁂𑀯𑀸𑀳 ‘‘𑀆𑀲𑀯𑀸𑀦𑀁 𑀔𑀬𑀸𑀢𑀺𑀆𑀤𑀺 𑀘𑁂𑀢𑁆𑀣 𑀨𑀮𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺.

𑀧𑀁𑀲𑀼𑀥𑁄𑀯𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀦𑀺𑀫𑀺𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁩. 𑀏𑀓𑀸𑀤𑀲𑀫𑁂 𑀬𑁂𑀳𑀺 𑀨𑀮𑀁 𑀦𑀺𑀫𑀻𑀬𑀢𑀺, 𑀉𑀧𑁆𑀧𑀚𑁆𑀚𑀦𑀝𑁆𑀞𑀸𑀦𑁂 𑀧𑀓𑁆𑀔𑀺𑀧𑀫𑀸𑀦𑀁 𑀯𑀺𑀬 𑀳𑁄𑀢𑀺, 𑀢𑀸𑀦𑀺 𑀦𑀺𑀫𑀺𑀢𑁆𑀢𑀸𑀦𑀺. 𑀢𑁂𑀦𑀸𑀳 ‘‘𑀢𑀻𑀡𑀺 𑀓𑀸𑀭𑀡𑀸𑀦𑀻’’𑀢𑀺. 𑀓𑀸𑀮𑁂𑀦 𑀓𑀸𑀮𑀦𑁆𑀢𑀺 𑀏𑀢𑁆𑀣 𑀓𑀸𑀮𑁂𑀦𑀸𑀢𑀺 𑀪𑀼𑀫𑁆𑀫𑀢𑁆𑀣𑁂 𑀓𑀭𑀡𑀯𑀘𑀦𑀁. 𑀓𑀸𑀮𑀦𑁆𑀢𑀺 𑀘 𑀉𑀧𑀬𑁄𑀕𑀯𑀘𑀦𑀦𑁆𑀢𑀺 𑀆𑀳 ‘‘𑀓𑀸𑀮𑁂 𑀓𑀸𑀮𑁂’’𑀢𑀺. 𑀫𑀦𑀲𑀺 𑀓𑀸𑀢𑀩𑁆𑀩𑀸𑀢𑀺 𑀘𑀺𑀢𑁆𑀢𑁂 𑀓𑀸𑀢𑀩𑁆𑀩𑀸, 𑀉𑀧𑁆𑀧𑀸𑀤𑁂𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀉𑀧𑀮𑀓𑁆𑀔𑀺𑀢𑀲𑀫𑀸𑀥𑀸𑀦𑀸𑀓𑀸𑀭𑁄 𑀲𑀫𑀸𑀥𑀺𑀬𑁂𑀯 𑀇𑀥 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑀦𑁆𑀢𑀺 𑀆𑀳 ‘‘𑀏𑀓𑀕𑁆𑀕𑀢𑀸 𑀳𑀺 𑀇𑀥 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀸’’𑀢𑀺. 𑀞𑀸𑀦𑀁 𑀢𑀁 𑀘𑀺𑀢𑁆𑀢𑀁 𑀓𑁄𑀲𑀚𑁆𑀚𑀸𑀬 𑀲𑀁𑀯𑀢𑁆𑀢𑁂𑀬𑁆𑀬𑀸𑀢𑀺 𑀏𑀢𑁆𑀣 𑀞𑀸𑀦𑀁 𑀅𑀢𑁆𑀣𑀻𑀢𑀺 𑀯𑀘𑀦𑀲𑁂𑀲𑁄. 𑀢𑀁 𑀪𑀸𑀯𑀦𑀸𑀘𑀺𑀢𑁆𑀢𑀁 𑀓𑁄𑀲𑀚𑁆𑀚𑀸𑀬 𑀲𑀁𑀯𑀢𑁆𑀢𑁂𑀬𑁆𑀬, 𑀢𑀲𑁆𑀲 𑀲𑀁𑀯𑀢𑁆𑀢𑀦𑀲𑁆𑀲 𑀓𑀸𑀭𑀡𑀁 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀢𑀁 𑀯𑀸 𑀫𑀦𑀲𑀺𑀓𑀭𑀡𑀁 𑀘𑀺𑀢𑁆𑀢𑀁 𑀓𑁄𑀲𑀚𑁆𑀚𑀸𑀬 𑀲𑀁𑀯𑀢𑁆𑀢𑁂𑀬𑁆𑀬, 𑀏𑀢𑀲𑁆𑀲 𑀞𑀸𑀦𑀁 𑀓𑀸𑀭𑀡𑀁 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀓𑀸𑀭𑀡𑀁 𑀯𑀺𑀚𑁆𑀚𑀢𑀻’’𑀢𑀺𑀆𑀤𑀺. 𑀜𑀸𑀡𑀚𑀯𑀦𑁆𑀢𑀺 𑀲𑀗𑁆𑀔𑀸𑀭𑁂𑀲𑀼 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀁 𑀧𑀜𑁆𑀜𑀸𑀚𑀯𑀁.

𑀬𑀁 𑀓𑀺𑀜𑁆𑀘𑀺 𑀲𑀼𑀯𑀡𑁆𑀡𑀢𑀸𑀧𑀦𑀬𑁄𑀕𑁆𑀕𑀅𑀗𑁆𑀕𑀸𑀭𑀪𑀸𑀚𑀦𑀁 𑀇𑀥 ‘‘𑀉𑀓𑁆𑀓𑀸’’𑀢𑀺 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀅𑀗𑁆𑀕𑀸𑀭𑀓𑀧𑀮𑁆𑀮’’𑀦𑁆𑀢𑀺. 𑀲𑀚𑁆𑀚𑁂𑀬𑁆𑀬𑀸𑀢𑀺 𑀬𑀣𑀸 𑀢𑀢𑁆𑀣 𑀧𑀓𑁆𑀔𑀺𑀢𑁆𑀢𑀁 𑀲𑀼𑀯𑀡𑁆𑀡𑀁 𑀢𑀧𑁆𑀧𑀢𑀺, 𑀏𑀯𑀁 𑀧𑀝𑀺𑀬𑀸𑀤𑀺𑀬𑁂𑀬𑁆𑀬. 𑀆𑀮𑀺𑀫𑁆𑀧𑁂𑀬𑁆𑀬𑀸𑀢𑀺 𑀆𑀤𑀺𑀬𑁂𑀬𑁆𑀬, 𑀚𑀮𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀢𑀢𑁆𑀣 𑀅𑀗𑁆𑀕𑀸𑀭𑁂…𑀧𑁂… 𑀕𑀸𑀳𑀸𑀧𑁂𑀬𑁆𑀬𑀸’’𑀢𑀺. 𑀫𑀽𑀲𑀸𑀬 𑀯𑀸 𑀧𑀓𑁆𑀔𑀺𑀧𑁂𑀬𑁆𑀬𑀸𑀢𑀺 𑀢𑀢𑁆𑀢𑀓𑁂 𑀯𑀸 𑀧𑀓𑁆𑀔𑀺𑀧𑁂𑀬𑁆𑀬. 𑀉𑀧𑀥𑀸𑀭𑁂𑀢𑀻𑀢𑀺 𑀲𑀮𑁆𑀮𑀓𑁆𑀔𑁂𑀢𑀺.

𑀦𑀺𑀫𑀺𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀮𑁄𑀡𑀓𑀧𑀮𑁆𑀮𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀢𑀺𑀬𑀧𑀡𑁆𑀡𑀸𑀲𑀓𑀁 𑀦𑀺𑀝𑁆𑀞𑀺𑀢𑀁.

𑁩. 𑀢𑀢𑀺𑀬𑀧𑀡𑁆𑀡𑀸𑀲𑀓𑀁