(𑁧𑁧) 𑁧. 𑀲𑀫𑁆𑀩𑁄𑀥𑀯𑀕𑁆𑀕𑁄

𑁧-𑁩. 𑀧𑀼𑀩𑁆𑀩𑁂𑀯𑀲𑀫𑁆𑀩𑁄𑀥𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁦𑁪-𑁧𑁦𑁬. 𑀢𑀢𑀺𑀬𑀲𑁆𑀲 𑀧𑀞𑀫𑁂 𑀲𑀫𑁆𑀩𑁄𑀥𑀺𑀢𑁄 𑀧𑀼𑀩𑁆𑀩𑁂𑀯𑀸𑀢𑀺 𑀲𑀫𑁆𑀩𑁄𑀥𑁄 𑀯𑀼𑀘𑁆𑀘𑀢𑀺 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼 𑀜𑀸𑀡𑀁 ‘‘𑀲𑀸𑀫𑀁 𑀲𑀫𑁆𑀫𑀸 𑀩𑀼𑀚𑁆𑀛𑀺 𑀏𑀢𑁂𑀦𑀸’’𑀢𑀺 𑀓𑀢𑁆𑀯𑀸, 𑀢𑀢𑁄 𑀧𑀼𑀩𑁆𑀩𑁂𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀅𑀭𑀺𑀬𑀫𑀕𑁆𑀕𑀧𑁆𑀧𑀢𑁆𑀢𑀺𑀢𑁄 𑀅𑀧𑀭𑀪𑀸𑀕𑁂𑀬𑁂𑀯𑀸’’𑀢𑀺. 𑀩𑁄𑀥𑀺𑀲𑀢𑁆𑀢𑀲𑁆𑀲𑁂𑀯 𑀲𑀢𑁄𑀢𑀺 𑀏𑀢𑁆𑀣 𑀬𑀣𑀸 𑀉𑀤𑀓𑀢𑁄 𑀉𑀕𑁆𑀕𑀦𑁆𑀢𑁆𑀯𑀸 𑀞𑀺𑀢𑀁 𑀧𑀭𑀺𑀧𑀸𑀓𑀕𑀢𑀁 𑀧𑀤𑀼𑀫𑀁 𑀲𑀽𑀭𑀺𑀬𑀭𑀲𑁆𑀫𑀺𑀲𑀫𑁆𑀨𑀲𑁆𑀲𑁂𑀦 𑀅𑀯𑀲𑁆𑀲𑀁 𑀩𑀼𑀚𑁆𑀛𑀺𑀲𑁆𑀲𑀢𑀻𑀢𑀺 𑀩𑀼𑀚𑁆𑀛𑀦𑀓𑀧𑀤𑀼𑀫𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀩𑀼𑀤𑁆𑀥𑀸𑀦𑀁 𑀲𑀦𑁆𑀢𑀺𑀓𑁂 𑀩𑁆𑀬𑀸𑀓𑀭𑀡𑀲𑁆𑀲 𑀮𑀤𑁆𑀥𑀢𑁆𑀢𑀸 𑀅𑀯𑀲𑁆𑀲𑀁 𑀅𑀦𑀦𑁆𑀢𑀭𑀸𑀬𑁂𑀦 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀩𑀼𑀚𑁆𑀛𑀺𑀲𑁆𑀲𑀢𑀻𑀢𑀺 𑀩𑀼𑀚𑁆𑀛𑀦𑀓𑀲𑀢𑁆𑀢𑁄𑀢𑀺 𑀩𑁄𑀥𑀺𑀲𑀢𑁆𑀢𑁄. 𑀢𑁂𑀦𑀸𑀳 ‘‘𑀩𑀼𑀚𑁆𑀛𑀦𑀓𑀲𑀢𑁆𑀢𑀲𑁆𑀲𑁂𑀯…𑀧𑁂… 𑀆𑀭𑀪𑀦𑁆𑀢𑀲𑁆𑀲𑁂𑀯 𑀲𑀢𑁄’’𑀢𑀺. 𑀬𑀸 𑀯𑀸 𑀏𑀲𑀸 𑀘𑀢𑀼𑀫𑀕𑁆𑀕𑀜𑀸𑀡𑀲𑀗𑁆𑀔𑀸𑀢𑀸 𑀩𑁄𑀥𑀺, ‘‘𑀢𑀁 𑀩𑁄𑀥𑀺𑀁 𑀓𑀼𑀤𑀸𑀲𑁆𑀲𑀼 𑀦𑀸𑀫𑀸𑀳𑀁 𑀧𑀸𑀧𑀼𑀡𑀺𑀲𑁆𑀲𑀸𑀫𑀻’’𑀢𑀺 𑀧𑀢𑁆𑀣𑀬𑀫𑀸𑀦𑁄 𑀧𑀝𑀺𑀧𑀚𑁆𑀚𑀢𑀻𑀢𑀺 𑀩𑁄𑀥𑀺𑀬𑀁 𑀲𑀢𑁆𑀢𑁄 𑀆𑀲𑀢𑁆𑀢𑁄𑀢𑀺𑀧𑀺 𑀩𑁄𑀥𑀺𑀲𑀢𑁆𑀢𑁄. 𑀢𑁂𑀦𑀸𑀳 ‘‘𑀲𑀫𑁆𑀩𑁄𑀥𑀺𑀬𑀸 𑀯𑀸 𑀲𑀢𑁆𑀢𑀲𑁆𑀲𑁂𑀯 𑀮𑀕𑁆𑀕𑀲𑁆𑀲𑁂𑀯 𑀲𑀢𑁄’’𑀢𑀺.

𑀅𑀣 𑀯𑀸 𑀩𑁄𑀥𑀻𑀢𑀺 𑀜𑀸𑀡𑀁 ‘‘𑀩𑀼𑀚𑁆𑀛𑀢𑀺 𑀏𑀢𑁂𑀦𑀸’’𑀢𑀺 𑀓𑀢𑁆𑀯𑀸, 𑀩𑁄𑀥𑀺𑀫𑀸 𑀲𑀢𑁆𑀢𑁄 𑀩𑁄𑀥𑀺𑀲𑀢𑁆𑀢𑁄, 𑀧𑀼𑀭𑀺𑀫𑀧𑀤𑁂 𑀉𑀢𑁆𑀢𑀭𑀧𑀤𑀮𑁄𑀧𑀁 𑀓𑀢𑁆𑀯𑀸 𑀬𑀣𑀸 ‘‘𑀜𑀸𑀡𑀲𑀢𑁆𑀢𑁄’’𑀢𑀺, 𑀜𑀸𑀡𑀯𑀸 𑀧𑀜𑁆𑀜𑀯𑀸 𑀧𑀡𑁆𑀟𑀺𑀢𑁄 𑀲𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀩𑀼𑀤𑁆𑀥𑀸𑀦𑀜𑁆𑀳𑀺 𑀧𑀸𑀤𑀫𑀽𑀮𑁂 𑀅𑀪𑀺𑀦𑀻𑀳𑀸𑀭𑀢𑁄 𑀧𑀝𑁆𑀞𑀸𑀬 𑀧𑀡𑁆𑀟𑀺𑀢𑁄𑀯 𑀲𑁄 𑀲𑀢𑁆𑀢𑁄, 𑀦 𑀅𑀦𑁆𑀥𑀩𑀸𑀮𑁄𑀢𑀺 𑀩𑁄𑀥𑀺𑀲𑀢𑁆𑀢𑁄. 𑀏𑀯𑀁 𑀕𑀼𑀡𑀯𑀢𑁄 𑀉𑀧𑁆𑀧𑀦𑁆𑀦𑀦𑀸𑀫𑀯𑀲𑁂𑀦 𑀩𑁄𑀥𑀺𑀲𑀢𑁆𑀢𑀲𑁆𑀲𑁂𑀯 𑀲𑀢𑁄. 𑀅𑀲𑁆𑀲𑀸𑀤𑀻𑀬𑀢𑀻𑀢𑀺 𑀅𑀲𑁆𑀲𑀸𑀤𑁄, 𑀲𑀼𑀔𑀁. 𑀢𑀜𑁆𑀘 𑀲𑀸𑀢𑀸𑀓𑀸𑀭𑀮𑀓𑁆𑀔𑀡𑀦𑁆𑀢𑀺 𑀆𑀳 ‘‘𑀅𑀲𑁆𑀲𑀸𑀤𑁄𑀢𑀺 𑀫𑀥𑀼𑀭𑀸𑀓𑀸𑀭𑁄’’𑀢𑀺. 𑀙𑀦𑁆𑀤𑀭𑀸𑀕𑁄 𑀯𑀺𑀦𑀻𑀬𑀢𑀺 𑀘𑁂𑀯 𑀧𑀳𑀻𑀬𑀢𑀺 𑀘 𑀏𑀢𑁆𑀣𑀸𑀢𑀺 𑀦𑀺𑀩𑁆𑀩𑀸𑀦𑀁 ‘‘𑀙𑀦𑁆𑀤𑀭𑀸𑀕𑀯𑀺𑀦𑀬𑁄 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑀜𑁆𑀘𑀸’’𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦𑀸𑀳 ‘‘𑀦𑀺𑀩𑁆𑀩𑀸𑀦’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀆𑀕𑀫𑁆𑀫𑀸𑀢𑀺 𑀇𑀤𑀁 𑀬𑁄 𑀚𑀦𑁄 𑀭𑀸𑀕𑀁 𑀯𑀺𑀦𑁂𑀢𑀺 𑀧𑀚𑀳𑀢𑀺 𑀘, 𑀢𑀲𑁆𑀲 𑀆𑀭𑀫𑁆𑀫𑀡𑀓𑀭𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀤𑀼𑀢𑀺𑀬𑀢𑀢𑀺𑀬𑀸𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑀧𑀼𑀩𑁆𑀩𑁂𑀯𑀲𑀫𑁆𑀩𑁄𑀥𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪-𑁯. 𑀲𑀫𑀡𑀩𑁆𑀭𑀸𑀳𑁆𑀫𑀡𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁦𑁭-𑁧𑁧𑁨. 𑀘𑀢𑀼𑀢𑁆𑀣𑁂 𑀲𑀸𑀫𑀜𑁆𑀜𑀦𑁆𑀢𑀺 𑀅𑀭𑀺𑀬𑀫𑀕𑁆𑀕𑁄, 𑀢𑁂𑀦 𑀅𑀭𑀡𑀻𑀬𑀢𑁄 𑀉𑀧𑀕𑀦𑁆𑀢𑀩𑁆𑀩𑀢𑁄 𑀲𑀸𑀫𑀜𑁆𑀜𑀢𑁆𑀣𑀁, 𑀅𑀭𑀺𑀬𑀨𑀮𑀦𑁆𑀢𑀺 𑀆𑀳 ‘‘𑀲𑀸𑀫𑀜𑁆𑀜𑀢𑁆𑀣𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀁 𑀅𑀭𑀺𑀬𑀨𑀮’’𑀦𑁆𑀢𑀺. 𑀩𑁆𑀭𑀳𑁆𑀫𑀜𑁆𑀜𑀢𑁆𑀣𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀢𑁂𑀦𑀸𑀳 ‘‘𑀇𑀢𑀭𑀁 𑀢𑀲𑁆𑀲𑁂𑀯 𑀯𑁂𑀯𑀘𑀦’’𑀦𑁆𑀢𑀺. 𑀅𑀭𑀺𑀬𑀫𑀕𑁆𑀕𑀲𑀗𑁆𑀔𑀸𑀢𑀁 𑀲𑀸𑀫𑀜𑁆𑀜𑀫𑁂𑀯 𑀯𑀸 𑀅𑀭𑀡𑀻𑀬𑀢𑁄 𑀲𑀸𑀫𑀜𑁆𑀜𑀢𑁆𑀣𑀦𑁆𑀢𑀺 𑀆𑀳 ‘‘𑀲𑀸𑀫𑀜𑁆𑀜𑀢𑁆𑀣𑁂𑀦 𑀯𑀸 𑀘𑀢𑁆𑀢𑀸𑀭𑁄 𑀫𑀕𑁆𑀕𑀸’’𑀢𑀺. 𑀧𑀜𑁆𑀘𑀫𑀸𑀤𑀻𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑀲𑀫𑀡𑀩𑁆𑀭𑀸𑀳𑁆𑀫𑀡𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀤𑀼𑀢𑀺𑀬𑀦𑀺𑀤𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁩. 𑀤𑀲𑀫𑁂 𑀯𑀺𑀯𑀝𑁆𑀝𑀕𑀸𑀫𑀺𑀓𑀫𑁆𑀫𑀸𑀦𑀦𑁆𑀢𑀺 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀓𑀫𑁆𑀫𑀸𑀦𑀁. 𑀢𑀤𑀪𑀺𑀦𑀺𑀯𑀢𑁆𑀢𑁂𑀢𑀻𑀢𑀺 𑀏𑀢𑁆𑀣 𑀢𑀁-𑀲𑀤𑁆𑀤𑁂𑀦 𑀧𑀘𑁆𑀘𑀸𑀫𑀲𑀦𑀲𑁆𑀲 𑀯𑀺𑀧𑀸𑀓𑀲𑁆𑀲 𑀧𑀭𑀸𑀫𑀸𑀲𑁄𑀢𑀺 𑀆𑀳 ‘‘𑀢𑀁 𑀅𑀪𑀺𑀦𑀺𑀯𑀢𑁆𑀢𑁂𑀢𑀻’’𑀢𑀺, 𑀢𑀁 𑀯𑀺𑀧𑀸𑀓𑀁 𑀅𑀪𑀺𑀪𑀯𑀺𑀢𑁆𑀯𑀸 𑀦𑀺𑀯𑀢𑁆𑀢𑁂𑀢𑀻𑀢𑀺 𑀅𑀢𑁆𑀣𑁄. 𑀇𑀤𑀸𑀦𑀺 𑀦 𑀓𑁂𑀯𑀮𑀁 𑀯𑀺𑀧𑀸𑀓𑀲𑁆𑀲𑁂𑀯 𑀧𑀭𑀸𑀫𑀸𑀲𑁄 𑀢𑀁-𑀲𑀤𑁆𑀤𑁂𑀦, 𑀅𑀣 𑀔𑁄 𑀙𑀦𑁆𑀤𑀭𑀸𑀕𑀝𑁆𑀞𑀸𑀦𑀺𑀬𑀸𑀦𑀁 𑀥𑀫𑁆𑀫𑀸𑀦𑀁 𑀢𑀩𑁆𑀩𑀺𑀧𑀸𑀓𑀲𑁆𑀲 𑀘 𑀧𑀭𑀸𑀫𑀸𑀲𑁄 𑀤𑀝𑁆𑀞𑀩𑁆𑀩𑁄𑀢𑀺 𑀆𑀳 ‘‘𑀬𑀤𑀸 𑀯𑀸 𑀢𑁂𑀦𑀸’’𑀢𑀺𑀆𑀤𑀺. 𑀢𑁂 𑀘𑁂𑀯 𑀥𑀫𑁆𑀫𑁂𑀢𑀺 𑀢𑁂 𑀙𑀦𑁆𑀤𑀭𑀸𑀕𑀝𑁆𑀞𑀸𑀦𑀺𑀬𑁂 𑀥𑀫𑁆𑀫𑁂. 𑀦𑀺𑀩𑁆𑀩𑀺𑀚𑁆𑀛𑀺𑀢𑁆𑀯𑀸 𑀧𑀲𑁆𑀲𑀢𑀻𑀢𑀺 𑀓𑀺𑀮𑁂𑀲𑁂 𑀦𑀺𑀩𑁆𑀩𑀺𑀚𑁆𑀛𑀺𑀢𑁆𑀯𑀸 𑀯𑀺𑀪𑀽𑀢𑀁 𑀧𑀸𑀓𑀝𑀁 𑀓𑀢𑁆𑀯𑀸 𑀧𑀲𑁆𑀲𑀢𑀻𑀢𑀺.

𑀤𑀼𑀢𑀺𑀬𑀦𑀺𑀤𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀫𑁆𑀩𑁄𑀥𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.