𑁩. 𑀯𑀺𑀦𑀬𑀧𑁂𑀬𑁆𑀬𑀸𑀮𑀁

𑁨𑁦𑁧. 𑀅𑀢𑁆𑀣𑀯𑀲𑁂𑀢𑀺 𑀯𑀼𑀤𑁆𑀥𑀺𑀯𑀺𑀲𑁂𑀲𑁂 𑀆𑀦𑀺𑀲𑀁𑀲𑀯𑀺𑀲𑁂𑀲𑁂. 𑀢𑁂𑀲𑀁 𑀧𑀦 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀓𑀸𑀭𑀡𑀢𑁆𑀢𑀸 𑀆𑀳 ‘‘𑀤𑁆𑀯𑁂 𑀓𑀸𑀭𑀡𑀸𑀦𑀺 𑀲𑀦𑁆𑀥𑀸𑀬𑀸’’𑀢𑀺. 𑀅𑀢𑁆𑀣𑁄𑀬𑁂𑀯 𑀯𑀸 𑀅𑀢𑁆𑀣𑀯𑀲𑁄, 𑀤𑁆𑀯𑁂 𑀅𑀢𑁆𑀣𑁂 𑀤𑁆𑀯𑁂 𑀓𑀸𑀭𑀡𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀣 𑀯𑀸 𑀅𑀢𑁆𑀣𑁄 𑀨𑀮𑀁 𑀢𑀤𑀥𑀻𑀦𑀯𑀼𑀢𑁆𑀢𑀺𑀢𑀸𑀬 𑀯𑀲𑁄 𑀏𑀢𑀲𑁆𑀲𑀸𑀢𑀺 𑀅𑀢𑁆𑀣𑀯𑀲𑁄, 𑀓𑀸𑀭𑀡𑀦𑁆𑀢𑀺 𑀏𑀯𑀫𑁆𑀧𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀬𑀣𑀸 ‘‘𑀅𑀦𑀪𑀺𑀚𑁆𑀛𑀸 𑀥𑀫𑁆𑀫𑀧𑀤’’𑀦𑁆𑀢𑀺 𑀯𑀼𑀢𑁆𑀢𑁂 𑀅𑀦𑀪𑀺𑀚𑁆𑀛𑀸 𑀏𑀓𑁄 𑀥𑀫𑁆𑀫𑀓𑁄𑀝𑁆𑀞𑀸𑀲𑁄𑀢𑀺 𑀅𑀢𑁆𑀣𑁄 𑀳𑁄𑀢𑀺. 𑀏𑀯𑀫𑀺𑀥𑀸𑀧𑀺 𑀲𑀺𑀓𑁆𑀔𑀸𑀧𑀤𑀦𑁆𑀢𑀺 𑀲𑀺𑀓𑁆𑀔𑀸𑀓𑁄𑀝𑁆𑀞𑀸𑀲𑁄 𑀲𑀺𑀓𑁆𑀔𑀸𑀬 𑀏𑀓𑁄 𑀧𑀤𑁂𑀲𑁄𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄𑀢𑀺 𑀆𑀳 ‘‘𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀦𑁆𑀢𑀺 𑀲𑀺𑀓𑁆𑀔𑀸𑀓𑁄𑀝𑁆𑀞𑀸𑀲𑁄 𑀞𑀧𑀺𑀢𑁄’’𑀢𑀺.

𑀲𑀗𑁆𑀖𑀲𑀼𑀝𑁆𑀞𑀼 𑀦𑀸𑀫 𑀲𑀗𑁆𑀖𑀲𑁆𑀲 𑀲𑀼𑀝𑁆𑀞𑀼𑀪𑀸𑀯𑁄 ‘‘𑀲𑀼𑀝𑁆𑀞𑀼 𑀤𑁂𑀯𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁩𑁯) 𑀆𑀕𑀢𑀝𑁆𑀞𑀸𑀦𑁂 𑀯𑀺𑀬 ‘‘𑀲𑀼𑀝𑁆𑀞𑀼, 𑀪𑀦𑁆𑀢𑁂’’𑀢𑀺 𑀯𑀘𑀦𑀲𑀫𑁆𑀧𑀝𑀺𑀘𑁆𑀙𑀦𑀪𑀸𑀯𑁄. 𑀢𑁂𑀦𑀸𑀳 ‘‘𑀲𑀗𑁆𑀖𑀲𑀼𑀝𑁆𑀞𑀼𑀢𑀸𑀬𑀸𑀢𑀺 𑀲𑀗𑁆𑀖𑀲𑁆𑀲 𑀲𑀼𑀝𑁆𑀞𑀼𑀪𑀸𑀯𑀸𑀬𑀸’’𑀢𑀺𑀆𑀤𑀺. 𑀤𑀼𑀫𑁆𑀫𑀗𑁆𑀓𑀽𑀦𑀁 𑀧𑀼𑀕𑁆𑀕𑀮𑀸𑀦𑀁 𑀦𑀺𑀕𑁆𑀕𑀳𑀸𑀬𑀸𑀢𑀺 𑀤𑀼𑀫𑁆𑀫𑀗𑁆𑀓𑀽 𑀦𑀸𑀫 𑀤𑀼𑀲𑁆𑀲𑀻𑀮𑀧𑀼𑀕𑁆𑀕𑀮𑀸. 𑀬𑁂 𑀫𑀗𑁆𑀓𑀼𑀢𑀁 𑀆𑀧𑀸𑀤𑀺𑀬𑀫𑀸𑀦𑀸𑀧𑀺 𑀤𑀼𑀓𑁆𑀔𑁂𑀦 𑀆𑀧𑀚𑁆𑀚𑀦𑁆𑀢𑀺, 𑀯𑀻𑀢𑀺𑀓𑁆𑀓𑀫𑀁 𑀓𑀭𑁄𑀦𑁆𑀢𑀸 𑀯𑀸 𑀓𑀢𑁆𑀯𑀸 𑀯𑀸 𑀦 𑀮𑀚𑁆𑀚𑀦𑁆𑀢𑀺, 𑀢𑁂𑀲𑀁 𑀦𑀺𑀕𑁆𑀕𑀳𑀢𑁆𑀣𑀸𑀬. 𑀢𑁂 𑀳𑀺 𑀲𑀺𑀓𑁆𑀔𑀸𑀧𑀤𑁂 𑀅𑀲𑀢𑀺 ‘‘𑀓𑀺𑀁 𑀢𑀼𑀫𑁆𑀳𑁂𑀳𑀺 𑀤𑀺𑀝𑁆𑀞𑀁, 𑀓𑀺𑀁 𑀲𑀼𑀢𑀁, 𑀓𑀺𑀁 𑀅𑀫𑁆𑀳𑁂𑀳𑀺 𑀓𑀢𑀁, 𑀓𑀢𑀭𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀢𑀫𑀁 𑀆𑀧𑀢𑁆𑀢𑀺𑀁 𑀭𑁄𑀧𑁂𑀢𑁆𑀯𑀸 𑀅𑀫𑁆𑀳𑁂 𑀦𑀺𑀕𑁆𑀕𑀡𑁆𑀳𑀣𑀸’’𑀢𑀺 𑀲𑀗𑁆𑀖𑀁 𑀯𑀺𑀳𑁂𑀞𑁂𑀲𑁆𑀲𑀦𑁆𑀢𑀺, 𑀲𑀺𑀓𑁆𑀔𑀸𑀧𑀤𑁂 𑀧𑀦 𑀲𑀢𑀺 𑀢𑁂𑀲𑀁 𑀲𑀗𑁆𑀖𑁄 𑀲𑀺𑀓𑁆𑀔𑀸𑀧𑀤𑀁 𑀤𑀲𑁆𑀲𑁂𑀢𑁆𑀯𑀸 𑀥𑀫𑁆𑀫𑁂𑀦 𑀯𑀺𑀦𑀬𑁂𑀦 𑀲𑀢𑁆𑀣𑀼𑀲𑀸𑀲𑀦𑁂𑀦 𑀦𑀺𑀕𑁆𑀕𑀳𑁂𑀲𑁆𑀲𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀤𑀼𑀫𑁆𑀫𑀗𑁆𑀓𑀽𑀦𑀁 𑀧𑀼𑀕𑁆𑀕𑀮𑀸𑀦𑀁 𑀦𑀺𑀕𑁆𑀕𑀳𑀸𑀬𑀸’’𑀢𑀺.

𑀧𑁂𑀲𑀮𑀸𑀦𑀁 𑀪𑀺𑀓𑁆𑀔𑀽𑀦𑀁 𑀨𑀸𑀲𑀼𑀯𑀺𑀳𑀸𑀭𑀸𑀬𑀸𑀢𑀺 𑀧𑁂𑀲𑀮𑀸𑀦𑀁 𑀧𑀺𑀬𑀲𑀻𑀮𑀸𑀦𑀁 𑀪𑀺𑀓𑁆𑀔𑀽𑀦𑀁 𑀨𑀸𑀲𑀼𑀯𑀺𑀳𑀸𑀭𑀢𑁆𑀣𑀸𑀬. 𑀧𑀺𑀬𑀲𑀻𑀮𑀸 𑀳𑀺 𑀪𑀺𑀓𑁆𑀔𑀽 𑀓𑀢𑁆𑀢𑀩𑁆𑀩𑀸𑀓𑀢𑁆𑀢𑀩𑁆𑀩𑀁 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑀁 𑀯𑁂𑀮𑀁 𑀫𑀭𑀺𑀬𑀸𑀤𑀁 𑀅𑀚𑀸𑀦𑀦𑁆𑀢𑀸 𑀲𑀺𑀓𑁆𑀔𑀢𑁆𑀢𑀬𑀧𑀸𑀭𑀺𑀧𑀽𑀭𑀺𑀬𑀸 𑀖𑀝𑀫𑀸𑀦𑀸 𑀓𑀺𑀮𑀫𑀦𑁆𑀢𑀺, 𑀉𑀩𑁆𑀩𑀸𑀴𑁆𑀳𑀸 𑀳𑁄𑀦𑁆𑀢𑀺, 𑀓𑀢𑁆𑀢𑀩𑁆𑀩𑀸𑀓𑀢𑁆𑀢𑀩𑁆𑀩𑀁 𑀧𑀦 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑀁 𑀯𑁂𑀮𑀁 𑀫𑀭𑀺𑀬𑀸𑀤𑀜𑁆𑀘 𑀜𑀢𑁆𑀯𑀸 𑀲𑀺𑀓𑁆𑀔𑀢𑁆𑀢𑀬𑀧𑀸𑀭𑀺𑀧𑀽𑀭𑀺𑀬𑀸 𑀖𑀝𑁂𑀦𑁆𑀢𑀸 𑀦 𑀓𑀺𑀮𑀫𑀦𑁆𑀢𑀺, 𑀦 𑀉𑀩𑁆𑀩𑀸𑀴𑁆𑀳𑀸 𑀳𑁄𑀦𑁆𑀢𑀺. 𑀢𑁂𑀦 𑀢𑁂𑀲𑀁 𑀲𑀺𑀓𑁆𑀔𑀸𑀧𑀤𑀧𑁆𑀧𑀜𑁆𑀜𑀸𑀧𑀦𑀸 𑀨𑀸𑀲𑀼𑀯𑀺𑀳𑀸𑀭𑀸𑀬 𑀲𑀁𑀯𑀢𑁆𑀢𑀢𑀺. 𑀬𑁄 𑀯𑀸 𑀤𑀼𑀫𑁆𑀫𑀗𑁆𑀓𑀽𑀦𑀁 𑀧𑀼𑀕𑁆𑀕𑀮𑀸𑀦𑀁 𑀦𑀺𑀕𑁆𑀕𑀳𑁄, 𑀲𑁆𑀯𑁂𑀯 𑀏𑀢𑁂𑀲𑀁 𑀨𑀸𑀲𑀼𑀯𑀺𑀳𑀸𑀭𑁄. 𑀤𑀼𑀲𑁆𑀲𑀻𑀮𑀧𑀼𑀕𑁆𑀕𑀮𑁂 𑀦𑀺𑀲𑁆𑀲𑀸𑀬 𑀳𑀺 𑀉𑀧𑁄𑀲𑀣𑁄 𑀦 𑀢𑀺𑀝𑁆𑀞𑀢𑀺, 𑀧𑀯𑀸𑀭𑀡𑀸 𑀦 𑀢𑀺𑀝𑁆𑀞𑀢𑀺, 𑀲𑀗𑁆𑀖𑀓𑀫𑁆𑀫𑀸𑀦𑀺 𑀦𑀧𑁆𑀧𑀯𑀢𑁆𑀢𑀦𑁆𑀢𑀺, 𑀲𑀸𑀫𑀕𑁆𑀕𑀻 𑀦 𑀳𑁄𑀢𑀺, 𑀪𑀺𑀓𑁆𑀔𑀽 𑀅𑀦𑁂𑀓𑀕𑁆𑀕𑀸 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀓𑀫𑁆𑀫𑀝𑁆𑀞𑀸𑀦𑀸𑀤𑀻𑀦𑀺 𑀅𑀦𑀼𑀬𑀼𑀜𑁆𑀚𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀤𑀼𑀲𑁆𑀲𑀻𑀮𑁂𑀲𑀼 𑀧𑀦 𑀦𑀺𑀕𑁆𑀕𑀳𑀺𑀢𑁂𑀲𑀼 𑀲𑀩𑁆𑀩𑁄𑀧𑀺 𑀅𑀬𑀁 𑀉𑀧𑀤𑁆𑀤𑀯𑁄 𑀦 𑀳𑁄𑀢𑀺, 𑀢𑀢𑁄 𑀧𑁂𑀲𑀮𑀸 𑀪𑀺𑀓𑁆𑀔𑀽 𑀨𑀸𑀲𑀼 𑀯𑀺𑀳𑀭𑀦𑁆𑀢𑀺. 𑀏𑀯𑀁 ‘‘𑀧𑁂𑀲𑀮𑀸𑀦𑀁 𑀪𑀺𑀓𑁆𑀔𑀽𑀦𑀁 𑀨𑀸𑀲𑀼𑀯𑀺𑀳𑀸𑀭𑀸𑀬𑀸’’𑀢𑀺 𑀏𑀢𑁆𑀣 𑀤𑁆𑀯𑀺𑀥𑀸 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

‘‘𑀦 𑀯𑁄 𑀅𑀳𑀁, 𑀘𑀼𑀦𑁆𑀤, 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀦𑀁𑀬𑁂𑀯 𑀆𑀲𑀯𑀸𑀦𑀁 𑀲𑀁𑀯𑀭𑀸𑀬 𑀥𑀫𑁆𑀫𑀁 𑀤𑁂𑀲𑁂𑀫𑀻’’𑀢𑀺 (𑀤𑀻. 𑀦𑀺. 𑁩.𑁧𑁮𑁨) 𑀏𑀢𑁆𑀣 𑀯𑀺𑀯𑀸𑀤𑀫𑀽𑀮𑀪𑀽𑀢𑀸 𑀓𑀺𑀮𑁂𑀲𑀸 𑀆𑀲𑀯𑀸𑀢𑀺 𑀆𑀕𑀢𑀸.

‘‘𑀬𑁂𑀦 𑀤𑁂𑀯𑀽𑀧𑀧𑀢𑁆𑀬𑀲𑁆𑀲, 𑀕𑀦𑁆𑀥𑀩𑁆𑀩𑁄 𑀯𑀸 𑀯𑀺𑀳𑀗𑁆𑀕𑀫𑁄;

𑀬𑀓𑁆𑀔𑀢𑁆𑀢𑀁 𑀬𑁂𑀦 𑀕𑀘𑁆𑀙𑁂𑀬𑁆𑀬𑀁, 𑀫𑀦𑀼𑀲𑁆𑀲𑀢𑁆𑀢𑀜𑁆𑀘 𑀅𑀩𑁆𑀩𑀚𑁂;

𑀢𑁂 𑀫𑀬𑁆𑀳𑀁 𑀆𑀲𑀯𑀸 𑀔𑀻𑀡𑀸, 𑀯𑀺𑀤𑁆𑀥𑀲𑁆𑀢𑀸 𑀯𑀺𑀦𑀴𑀻𑀓𑀢𑀸’’𑀢𑀺. (𑀅. 𑀦𑀺. 𑁪.𑁩𑁬) 𑁋

𑀏𑀢𑁆𑀣 𑀢𑁂𑀪𑀽𑀫𑀓𑀁 𑀓𑀫𑁆𑀫𑀁 𑀅𑀯𑀲𑁂𑀲𑀸 𑀘 𑀅𑀓𑀼𑀲𑀮𑀸 𑀥𑀫𑁆𑀫𑀸. 𑀇𑀥 𑀧𑀦 𑀧𑀭𑀽𑀧𑀯𑀸𑀤𑀯𑀺𑀧𑁆𑀧𑀝𑀺𑀲𑀸𑀭𑀯𑀥𑀩𑀦𑁆𑀥𑀦𑀸𑀤𑀬𑁄 𑀘𑁂𑀯 𑀅𑀧𑀸𑀬𑀤𑀼𑀓𑁆𑀔𑀪𑀽𑀢𑀸 𑀘 𑀦𑀸𑀦𑀧𑁆𑀧𑀓𑀸𑀭𑀸 𑀉𑀧𑀤𑁆𑀤𑀯𑀸 𑀆𑀲𑀯𑀸𑀢𑀺 𑀆𑀳 𑁋 ‘‘𑀤𑀺𑀝𑁆𑀞𑀥𑀫𑁆𑀫𑁂 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀯𑀻𑀢𑀺𑀓𑁆𑀓𑀫𑀧𑀘𑁆𑀘𑀬𑀸 𑀧𑀝𑀺𑀮𑀤𑁆𑀥𑀩𑁆𑀩𑀸𑀦’’𑀦𑁆𑀢𑀺𑀆𑀤𑀺. 𑀬𑀤𑀺 𑀳𑀺 𑀪𑀕𑀯𑀸 𑀲𑀺𑀓𑁆𑀔𑀸𑀧𑀤𑀁 𑀦 𑀧𑀜𑁆𑀜𑀸𑀧𑁂𑀬𑁆𑀬, 𑀢𑀢𑁄 𑀅𑀲𑀤𑁆𑀥𑀫𑁆𑀫𑀧𑁆𑀧𑀝𑀺𑀲𑁂𑀯𑀦𑀅𑀤𑀺𑀦𑁆𑀦𑀸𑀤𑀸𑀦𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀳𑁂𑀢𑀼 𑀬𑁂 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀧𑀭𑀽𑀧𑀯𑀸𑀤𑀸𑀤𑀬𑁄 𑀤𑀺𑀝𑁆𑀞𑀥𑀫𑁆𑀫𑀺𑀓𑀸 𑀦𑀸𑀦𑀧𑁆𑀧𑀓𑀸𑀭𑀸 𑀅𑀦𑀢𑁆𑀣𑀸, 𑀬𑁂 𑀘 𑀢𑀦𑁆𑀦𑀺𑀫𑀺𑀢𑁆𑀢𑀫𑁂𑀯 𑀦𑀺𑀭𑀬𑀸𑀤𑀻𑀲𑀼 𑀦𑀺𑀩𑁆𑀩𑀢𑁆𑀢𑀲𑁆𑀲 𑀧𑀜𑁆𑀜𑀯𑀺𑀥𑀩𑀦𑁆𑀥𑀦𑀓𑀫𑁆𑀫𑀓𑀸𑀭𑀡𑀸𑀤𑀺𑀯𑀲𑁂𑀦 𑀫𑀳𑀸𑀤𑀼𑀓𑁆𑀔𑀸𑀦𑀼𑀪𑀯𑀦𑀧𑁆𑀧𑀓𑀸𑀭𑀸 𑀅𑀦𑀢𑁆𑀣𑀸, 𑀢𑁂 𑀲𑀦𑁆𑀥𑀸𑀬 𑀇𑀤𑀁 𑀯𑀼𑀢𑁆𑀢𑀁 ‘‘𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀦𑀁 𑀆𑀲𑀯𑀸𑀦𑀁 𑀲𑀁𑀯𑀭𑀸𑀬 𑀲𑀫𑁆𑀧𑀭𑀸𑀬𑀺𑀓𑀸𑀦𑀁 𑀆𑀲𑀯𑀸𑀦𑀁 𑀧𑀝𑀺𑀖𑀸𑀢𑀸𑀬𑀸’’𑀢𑀺. 𑀤𑀺𑀝𑁆𑀞𑀥𑀫𑁆𑀫𑁄 𑀯𑀼𑀘𑁆𑀘𑀢𑀺 𑀧𑀘𑁆𑀘𑀓𑁆𑀔𑁄 𑀅𑀢𑁆𑀢𑀪𑀸𑀯𑁄, 𑀢𑀢𑁆𑀣 𑀪𑀯𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑀸. 𑀲𑀫𑁆𑀧𑀭𑁂𑀢𑀩𑁆𑀩𑀢𑁄 𑀧𑁂𑀘𑁆𑀘 𑀕𑀦𑁆𑀢𑀩𑁆𑀩𑀢𑁄 𑀲𑀫𑁆𑀧𑀭𑀸𑀬𑁄, 𑀧𑀭𑀮𑁄𑀓𑁄, 𑀢𑀢𑁆𑀣 𑀪𑀯𑀸 𑀲𑀫𑁆𑀧𑀭𑀸𑀬𑀺𑀓𑀸.

𑀅𑀓𑀼𑀲𑀮𑀯𑁂𑀭𑀸𑀦𑀦𑁆𑀢𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀧𑀜𑁆𑀘𑀤𑀼𑀘𑁆𑀘𑀭𑀺𑀢𑀸𑀦𑀁. 𑀢𑀸𑀦𑀺 𑀯𑁂𑀭𑀓𑀸𑀭𑀡𑀢𑁆𑀢𑀸 ‘‘𑀯𑁂𑀭𑀸𑀦𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀧𑀼𑀕𑁆𑀕𑀮𑁂𑀲𑀼 𑀧𑀦 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀺 𑀯𑁂𑀭𑀸𑀦𑀺. 𑀢𑁂 𑀏𑀯 𑀯𑀸 𑀤𑀼𑀓𑁆𑀔𑀥𑀫𑁆𑀫𑀸𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸 𑀯𑀥𑀩𑀦𑁆𑀥𑀦𑀸𑀤𑀬𑁄. 𑀢𑁂𑀲𑀁 𑀧𑀓𑁆𑀔𑀼𑀧𑀘𑁆𑀙𑁂𑀤𑀦𑀢𑁆𑀣𑀸𑀬𑀸𑀢𑀺 𑀢𑁂𑀲𑀁 𑀧𑀸𑀧𑀺𑀘𑁆𑀙𑀸𑀦𑀁 𑀧𑀓𑁆𑀔𑀼𑀧𑀘𑁆𑀙𑁂𑀤𑀸𑀬 𑀕𑀡𑀪𑁄𑀚𑀦𑀲𑀤𑀺𑀲𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁. 𑀧𑀡𑁆𑀟𑀺𑀢𑀫𑀦𑀼𑀲𑁆𑀲𑀸𑀦𑀦𑁆𑀢𑀺 𑀮𑁄𑀓𑀺𑀬𑀧𑀭𑀺𑀓𑁆𑀔𑀓𑀚𑀦𑀸𑀦𑀁. 𑀢𑁂 𑀳𑀺 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀲𑀢𑀺 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀁 𑀜𑀢𑁆𑀯𑀸 𑀯𑀸 𑀬𑀣𑀸𑀧𑀜𑁆𑀜𑀢𑁆𑀢𑀁 𑀧𑀝𑀺𑀧𑀚𑁆𑀚𑀫𑀸𑀦𑁂 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀯𑀸 𑁋 ‘‘𑀬𑀸𑀦𑀺 𑀯𑀢 𑀮𑁄𑀓𑁂 𑀫𑀳𑀸𑀚𑀦𑀲𑁆𑀲 𑀭𑀚𑁆𑀚𑀦𑀤𑀼𑀲𑁆𑀲𑀦𑀫𑀼𑀬𑁆𑀳𑀦𑀝𑁆𑀞𑀸𑀦𑀸𑀦𑀺, 𑀢𑁂𑀳𑀺 𑀇𑀫𑁂 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀆𑀭𑀓𑀸 𑀯𑀺𑀳𑀭𑀦𑁆𑀢𑀺, 𑀤𑀼𑀓𑁆𑀓𑀭𑀁 𑀯𑀢 𑀓𑀭𑁄𑀦𑁆𑀢𑀺, 𑀪𑀸𑀭𑀺𑀬𑀁 𑀯𑀢 𑀓𑀭𑁄𑀦𑁆𑀢𑀻’’𑀢𑀺 𑀧𑀲𑀸𑀤𑀁 𑀆𑀧𑀚𑁆𑀚𑀦𑁆𑀢𑀺 𑀯𑀺𑀦𑀬𑀧𑀺𑀝𑀓𑁂 𑀧𑁄𑀢𑁆𑀣𑀓𑀁 𑀤𑀺𑀲𑁆𑀯𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀢𑀯𑁂𑀤𑀺𑀩𑁆𑀭𑀸𑀳𑁆𑀫𑀡𑁄 𑀯𑀺𑀬. 𑀉𑀧𑀭𑀽𑀧𑀭𑀺𑀧𑀲𑀸𑀤𑀪𑀸𑀯𑀸𑀬𑀸𑀢𑀺 𑀪𑀺𑀬𑁆𑀬𑁄 𑀪𑀺𑀬𑁆𑀬𑁄 𑀧𑀲𑀸𑀤𑀼𑀧𑁆𑀧𑀸𑀤𑀦𑀢𑁆𑀣𑀁. 𑀬𑁂𑀧𑀺 𑀳𑀺 𑀲𑀸𑀲𑀦𑁂 𑀧𑀲𑀦𑁆𑀦𑀸 𑀓𑀼𑀮𑀧𑀼𑀢𑁆𑀢𑀸, 𑀢𑁂𑀧𑀺 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀁 𑀯𑀸 𑀜𑀢𑁆𑀯𑀸 𑀬𑀣𑀸𑀧𑀜𑁆𑀜𑀢𑁆𑀢𑀁 𑀧𑀝𑀺𑀧𑀚𑁆𑀚𑀫𑀸𑀦𑁂 𑀪𑀺𑀓𑁆𑀔𑀽 𑀯𑀸 𑀤𑀺𑀲𑁆𑀯𑀸 ‘‘𑀅𑀳𑁄, 𑀅𑀬𑁆𑀬𑀸, 𑀤𑀼𑀓𑁆𑀓𑀭𑀓𑀸𑀭𑀺𑀦𑁄, 𑀬𑁂 𑀬𑀸𑀯𑀚𑀻𑀯𑀁 𑀏𑀓𑀪𑀢𑁆𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀺𑀦𑀬𑀲𑀁𑀯𑀭𑀁 𑀅𑀦𑀼𑀧𑀸𑀮𑁂𑀦𑁆𑀢𑀻’’𑀢𑀺 𑀪𑀺𑀬𑁆𑀬𑁄 𑀪𑀺𑀬𑁆𑀬𑁄 𑀧𑀲𑀻𑀤𑀦𑁆𑀢𑀺.

𑀲𑀤𑁆𑀥𑀫𑁆𑀫𑀲𑁆𑀲 𑀘𑀺𑀭𑀝𑁆𑀞𑀺𑀢𑀢𑁆𑀣𑀦𑁆𑀢𑀺 𑀧𑀭𑀺𑀬𑀢𑁆𑀢𑀺𑀲𑀤𑁆𑀥𑀫𑁆𑀫𑁄, 𑀧𑀝𑀺𑀧𑀢𑁆𑀢𑀺𑀲𑀤𑁆𑀥𑀫𑁆𑀫𑁄, 𑀅𑀥𑀺𑀕𑀫𑀲𑀤𑁆𑀥𑀫𑁆𑀫𑁄𑀢𑀺 𑀢𑀺𑀯𑀺𑀥𑀲𑁆𑀲𑀧𑀺 𑀲𑀤𑁆𑀥𑀫𑁆𑀫𑀲𑁆𑀲 𑀘𑀺𑀭𑀝𑁆𑀞𑀺𑀢𑀢𑁆𑀣𑀁. 𑀢𑀢𑁆𑀣 𑀧𑀺𑀝𑀓𑀢𑁆𑀢𑀬𑀲𑀗𑁆𑀕𑀳𑀺𑀢𑀁 𑀲𑀩𑁆𑀩𑀫𑁆𑀧𑀺 𑀩𑀼𑀤𑁆𑀥𑀯𑀘𑀦𑀁 𑀧𑀭𑀺𑀬𑀢𑁆𑀢𑀺𑀲𑀤𑁆𑀥𑀫𑁆𑀫𑁄 𑀦𑀸𑀫. 𑀢𑁂𑀭𑀲 𑀥𑀼𑀢𑀕𑀼𑀡𑀸, 𑀘𑀼𑀤𑁆𑀤𑀲 𑀔𑀦𑁆𑀥𑀓𑀯𑀢𑁆𑀢𑀸𑀦𑀺, 𑀤𑁆𑀯𑁂𑀅𑀲𑀻𑀢𑀺 𑀫𑀳𑀸𑀯𑀢𑁆𑀢𑀸𑀦𑀺, 𑀲𑀻𑀮𑀲𑀫𑀸𑀥𑀺𑀯𑀺𑀧𑀲𑁆𑀲𑀦𑀸𑀢𑀺 𑀅𑀬𑀁 𑀧𑀝𑀺𑀧𑀢𑁆𑀢𑀺𑀲𑀤𑁆𑀥𑀫𑁆𑀫𑁄 𑀦𑀸𑀫. 𑀘𑀢𑁆𑀢𑀸𑀭𑁄 𑀅𑀭𑀺𑀬𑀫𑀕𑁆𑀕𑀸 𑀘𑀢𑁆𑀢𑀸𑀭𑀺 𑀘 𑀲𑀸𑀫𑀜𑁆𑀜𑀨𑀮𑀸𑀦𑀺 𑀦𑀺𑀩𑁆𑀩𑀸𑀦𑀜𑁆𑀘𑀸𑀢𑀺 𑀅𑀬𑀁 𑀅𑀥𑀺𑀕𑀫𑀲𑀤𑁆𑀥𑀫𑁆𑀫𑁄 𑀦𑀸𑀫. 𑀲𑁄 𑀲𑀩𑁆𑀩𑁄 𑀬𑀲𑁆𑀫𑀸 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀲𑀢𑀺 𑀪𑀺𑀓𑁆𑀔𑀽 𑀲𑀺𑀓𑁆𑀔𑀸𑀧𑀤𑀜𑁆𑀘 𑀢𑀲𑁆𑀲 𑀯𑀺𑀪𑀗𑁆𑀕𑀜𑁆𑀘 𑀢𑀤𑀢𑁆𑀣𑀚𑁄𑀢𑀦𑀢𑁆𑀣𑀁 𑀅𑀜𑁆𑀜𑀜𑁆𑀘 𑀩𑀼𑀤𑁆𑀥𑀯𑀘𑀦𑀁 𑀧𑀭𑀺𑀬𑀸𑀧𑀼𑀡𑀦𑁆𑀢𑀺, 𑀬𑀣𑀸𑀧𑀜𑁆𑀜𑀢𑁆𑀢𑀜𑁆𑀘 𑀧𑀝𑀺𑀧𑀚𑁆𑀚𑀫𑀸𑀦𑀸 𑀧𑀝𑀺𑀧𑀢𑁆𑀢𑀺𑀁 𑀧𑀽𑀭𑁂𑀢𑁆𑀯𑀸 𑀧𑀝𑀺𑀧𑀢𑁆𑀢𑀺𑀬𑀸 𑀅𑀥𑀺𑀕𑀦𑁆𑀢𑀩𑁆𑀩𑀁 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀅𑀥𑀺𑀕𑀘𑁆𑀙𑀦𑁆𑀢𑀺, 𑀢𑀲𑁆𑀫𑀸 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀘𑀺𑀭𑀝𑁆𑀞𑀺𑀢𑀺𑀓𑁄 𑀳𑁄𑀢𑀺.

𑀧𑀜𑁆𑀘𑀯𑀺𑀥𑀲𑁆𑀲𑀧𑀺 𑀯𑀺𑀦𑀬𑀲𑁆𑀲𑀸𑀢𑀺 𑀢𑀤𑀗𑁆𑀕𑀯𑀺𑀦𑀬𑀸𑀤𑀺𑀯𑀲𑁂𑀦 𑀧𑀜𑁆𑀘𑀧𑁆𑀧𑀓𑀸𑀭𑀲𑁆𑀲 𑀯𑀺𑀦𑀬𑀲𑁆𑀲. 𑀯𑀺𑀦𑀬𑀝𑁆𑀞𑀓𑀣𑀸𑀬𑀁 (𑀧𑀸𑀭𑀸. 𑀅𑀝𑁆𑀞. 𑁩𑁯) 𑀧𑀦 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀲𑀢𑀺 𑀲𑀁𑀯𑀭𑀯𑀺𑀦𑀬𑁄 𑀘 𑀧𑀳𑀸𑀦𑀯𑀺𑀦𑀬𑁄 𑀘 𑀲𑀫𑀣𑀯𑀺𑀦𑀬𑁄 𑀘 𑀧𑀜𑁆𑀜𑀢𑁆𑀢𑀺𑀯𑀺𑀦𑀬𑁄 𑀘𑀸𑀢𑀺 𑀘𑀢𑀼𑀩𑁆𑀩𑀺𑀥𑁄𑀧𑀺 𑀯𑀺𑀦𑀬𑁄 𑀅𑀦𑀼𑀕𑁆𑀕𑀳𑀺𑀢𑁄 𑀳𑁄𑀢𑀺 𑀉𑀧𑀢𑁆𑀣𑀫𑁆𑀪𑀺𑀢𑁄 𑀲𑀼𑀧𑀢𑁆𑀣𑀫𑁆𑀪𑀺𑀢𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀯𑀺𑀦𑀬𑀸𑀦𑀼𑀕𑁆𑀕𑀳𑀸𑀬𑀸’’𑀢𑀺. 𑀢𑀢𑁆𑀣 𑀲𑀁𑀯𑀭𑀯𑀺𑀦𑀬𑁄𑀢𑀺 𑀲𑀻𑀮𑀲𑀁𑀯𑀭𑁄, 𑀲𑀢𑀺𑀲𑀁𑀯𑀭𑁄, 𑀜𑀸𑀡𑀲𑀁𑀯𑀭𑁄, 𑀔𑀦𑁆𑀢𑀺𑀲𑀁𑀯𑀭𑁄, 𑀯𑀻𑀭𑀺𑀬𑀲𑀁𑀯𑀭𑁄𑀢𑀺 𑀧𑀜𑁆𑀘𑀯𑀺𑀥𑁄𑀧𑀺 𑀲𑀁𑀯𑀭𑁄 𑀬𑀣𑀸𑀲𑀓𑀁 𑀲𑀁𑀯𑀭𑀺𑀢𑀩𑁆𑀩𑀸𑀦𑀁 𑀯𑀺𑀦𑁂𑀢𑀩𑁆𑀩𑀸𑀦𑀜𑁆𑀘 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀁 𑀲𑀁𑀯𑀭𑀡𑀢𑁄 𑀲𑀁𑀯𑀭𑁄, 𑀯𑀺𑀦𑀬𑀦𑀢𑁄 𑀯𑀺𑀦𑀬𑁄𑀢𑀺 𑀯𑀼𑀘𑁆𑀘𑀢𑀺. 𑀧𑀳𑀸𑀦𑀯𑀺𑀦𑀬𑁄𑀢𑀺 𑀢𑀤𑀗𑁆𑀕𑀧𑁆𑀧𑀳𑀸𑀦𑀁, 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑀁, 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀁, 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀧𑁆𑀧𑀳𑀸𑀦𑀁, 𑀦𑀺𑀲𑁆𑀲𑀭𑀡𑀧𑁆𑀧𑀳𑀸𑀦𑀦𑁆𑀢𑀺 𑀧𑀜𑁆𑀘𑀯𑀺𑀥𑀫𑁆𑀧𑀺 𑀧𑀳𑀸𑀦𑀁 𑀬𑀲𑁆𑀫𑀸 𑀘𑀸𑀕𑀝𑁆𑀞𑁂𑀦 𑀧𑀳𑀸𑀦𑀁, 𑀯𑀺𑀦𑀬𑀦𑀝𑁆𑀞𑁂𑀦 𑀯𑀺𑀦𑀬𑁄, 𑀢𑀲𑁆𑀫𑀸 𑀧𑀳𑀸𑀦𑀯𑀺𑀦𑀬𑁄𑀢𑀺 𑀯𑀼𑀘𑁆𑀘𑀢𑀺. 𑀲𑀫𑀣𑀯𑀺𑀦𑀬𑁄𑀢𑀺 𑀲𑀢𑁆𑀢 𑀅𑀥𑀺𑀓𑀭𑀡𑀲𑀫𑀣𑀸. 𑀧𑀜𑁆𑀜𑀢𑁆𑀢𑀺𑀯𑀺𑀦𑀬𑁄𑀢𑀺 𑀲𑀺𑀓𑁆𑀔𑀸𑀧𑀤𑀫𑁂𑀯. 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀳𑀺 𑀯𑀺𑀚𑁆𑀚𑀫𑀸𑀦𑀸𑀬 𑀏𑀯 𑀲𑀺𑀓𑁆𑀔𑀸𑀧𑀤𑀲𑀫𑁆𑀪𑀯𑀢𑁄 𑀲𑀺𑀓𑁆𑀔𑀸𑀧𑀤𑀲𑀗𑁆𑀔𑀸𑀢𑁄 𑀧𑀜𑁆𑀜𑀢𑁆𑀢𑀺𑀯𑀺𑀦𑀬𑁄𑀢𑀺 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀅𑀦𑀼𑀕𑁆𑀕𑀳𑀺𑀢𑁄 𑀳𑁄𑀢𑀺.

𑁨𑁦𑁨-𑁨𑁩𑁦. 𑀪𑀺𑀓𑁆𑀔𑀽𑀦𑀁 𑀧𑀜𑁆𑀘𑀸𑀢𑀺 𑀦𑀺𑀤𑀸𑀦𑀧𑀸𑀭𑀸𑀚𑀺𑀓𑀲𑀗𑁆𑀖𑀸𑀤𑀺𑀲𑁂𑀲𑀸𑀦𑀺𑀬𑀢𑀯𑀺𑀢𑁆𑀣𑀸𑀭𑀼𑀤𑁆𑀤𑁂𑀲𑀯𑀲𑁂𑀦 𑀧𑀜𑁆𑀘 𑀪𑀺𑀓𑁆𑀔𑀽𑀦𑀁 𑀉𑀤𑁆𑀤𑁂𑀲𑀸. 𑀪𑀺𑀓𑁆𑀔𑀼𑀦𑀻𑀦𑀁 𑀘𑀢𑁆𑀢𑀸𑀭𑁄𑀢𑀺 𑀪𑀺𑀓𑁆𑀔𑀽𑀦𑀁 𑀯𑀼𑀢𑁆𑀢𑁂𑀲𑀼 𑀅𑀦𑀺𑀬𑀢𑀼𑀤𑁆𑀤𑁂𑀲𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 𑀘𑀢𑁆𑀢𑀸𑀭𑁄.

𑀏𑀳𑀺𑀪𑀺𑀓𑁆𑀔𑀽𑀧𑀲𑀫𑁆𑀧𑀤𑀸𑀢𑀺 ‘‘𑀏𑀳𑀺 𑀪𑀺𑀓𑁆𑀔𑀽’’𑀢𑀺 𑀯𑀘𑀦𑀫𑀢𑁆𑀢𑁂𑀦 𑀧𑀜𑁆𑀜𑀢𑁆𑀢𑀉𑀧𑀲𑀫𑁆𑀧𑀤𑀸. 𑀪𑀕𑀯𑀸 𑀳𑀺 𑀏𑀳𑀺𑀪𑀺𑀓𑁆𑀔𑀼𑀪𑀸𑀯𑀸𑀬 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀁 𑀧𑀼𑀕𑁆𑀕𑀮𑀁 𑀤𑀺𑀲𑁆𑀯𑀸 𑀭𑀢𑁆𑀢𑀧𑀁𑀲𑀼𑀓𑀽𑀮𑀦𑁆𑀢𑀭𑀢𑁄 𑀲𑀼𑀯𑀡𑁆𑀡𑀯𑀡𑁆𑀡𑀁 𑀤𑀓𑁆𑀔𑀺𑀡𑀳𑀢𑁆𑀣𑀁 𑀦𑀻𑀳𑀭𑀺𑀢𑁆𑀯𑀸 𑀩𑁆𑀭𑀳𑁆𑀫𑀖𑁄𑀲𑀁 𑀦𑀺𑀘𑁆𑀙𑀸𑀭𑁂𑀦𑁆𑀢𑁄 ‘‘𑀏𑀳𑀺 𑀪𑀺𑀓𑁆𑀔𑀼, 𑀘𑀭 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀫𑁆𑀫𑀸 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸𑀬𑀸’’𑀢𑀺 𑀯𑀤𑀢𑀺. 𑀢𑀲𑁆𑀲 𑀲𑀳𑁂𑀯 𑀪𑀕𑀯𑀢𑁄 𑀯𑀘𑀦𑁂𑀦 𑀕𑀺𑀳𑀺𑀮𑀺𑀗𑁆𑀕𑀁 𑀅𑀦𑁆𑀢𑀭𑀥𑀸𑀬𑀢𑀺, 𑀧𑀩𑁆𑀩𑀚𑁆𑀚𑀸 𑀘 𑀉𑀧𑀲𑀫𑁆𑀧𑀤𑀸 𑀘 𑀭𑀼𑀳𑀢𑀺, 𑀪𑀡𑁆𑀟𑀼 𑀓𑀸𑀲𑀸𑀯𑀯𑀲𑀦𑁄 𑀳𑁄𑀢𑀺 𑁋 𑀏𑀓𑀁 𑀦𑀺𑀯𑀸𑀲𑁂𑀢𑁆𑀯𑀸 𑀏𑀓𑀁 𑀧𑀸𑀭𑀼𑀧𑀺𑀢𑁆𑀯𑀸 𑀏𑀓𑀁 𑀅𑀁𑀲𑁂 𑀞𑀧𑁂𑀢𑁆𑀯𑀸 𑀯𑀸𑀫𑀅𑀁𑀲𑀓𑀽𑀝𑁂 𑀆𑀲𑀢𑁆𑀢𑀦𑀻𑀮𑀼𑀧𑁆𑀧𑀮𑀯𑀡𑁆𑀡𑀫𑀢𑁆𑀢𑀺𑀓𑀸𑀧𑀢𑁆𑀢𑁄.

‘‘𑀢𑀺𑀘𑀻𑀯𑀭𑀜𑁆𑀘 𑀧𑀢𑁆𑀢𑁄 𑀘, 𑀯𑀸𑀲𑀺 𑀲𑀽𑀘𑀺 𑀘 𑀩𑀦𑁆𑀥𑀦𑀁;

𑀧𑀭𑀺𑀲𑁆𑀲𑀸𑀯𑀦𑁂𑀦 𑀅𑀝𑁆𑀞𑁂𑀢𑁂, 𑀬𑀼𑀢𑁆𑀢𑀬𑁄𑀕𑀲𑁆𑀲 𑀪𑀺𑀓𑁆𑀔𑀼𑀦𑁄’’𑀢𑀺. (𑀤𑀻. 𑀦𑀺. 𑀅𑀝𑁆𑀞. 𑁧.𑁨𑁧𑁫; 𑀫. 𑀦𑀺. 𑀅𑀝𑁆𑀞. 𑁧.𑁨𑁯𑁪; 𑁨.𑁩𑁪𑁯; 𑀅. 𑀦𑀺. 𑀅𑀝𑁆𑀞. 𑁨.𑁪.𑁧𑁯𑁮; 𑀧𑀸𑀭𑀸. 𑀅𑀝𑁆𑀞. 𑁪𑁫 𑀧𑀤𑀪𑀸𑀚𑀦𑀻𑀬𑀯𑀡𑁆𑀡𑀦𑀸; 𑀅𑀧. 𑀅𑀝𑁆𑀞. 𑁧.𑀅𑀯𑀺𑀤𑀽𑀭𑁂𑀦𑀺𑀤𑀸𑀦𑀓𑀣𑀸; 𑀩𑀼. 𑀯𑀁. 𑀅𑀝𑁆𑀞. 𑁨𑁭.𑀅𑀯𑀺𑀤𑀽𑀭𑁂𑀦𑀺𑀤𑀸𑀦𑀓𑀣𑀸; 𑀚𑀸. 𑀅𑀝𑁆𑀞. 𑁧.𑀅𑀯𑀺𑀤𑀽𑀭𑁂𑀦𑀺𑀤𑀸𑀦𑀓𑀣𑀸; 𑀫𑀳𑀸𑀦𑀺. 𑀅𑀝𑁆𑀞. 𑁨𑁦𑁬) 𑁋

𑀏𑀯𑀁 𑀯𑀼𑀢𑁆𑀢𑁂𑀳𑀺 𑀅𑀝𑁆𑀞𑀳𑀺 𑀧𑀭𑀺𑀓𑁆𑀔𑀸𑀭𑁂𑀳𑀺 𑀲𑀭𑀻𑀭𑁂 𑀧𑀝𑀺𑀫𑀼𑀓𑁆𑀓𑁂𑀳𑀺𑀬𑁂𑀯 𑀯𑀲𑁆𑀲𑀲𑀢𑀺𑀓𑀢𑁆𑀣𑁂𑀭𑁄 𑀯𑀺𑀬 𑀇𑀭𑀺𑀬𑀸𑀧𑀣𑀲𑀫𑁆𑀧𑀦𑁆𑀦𑁄 𑀩𑀼𑀤𑁆𑀥𑀸𑀘𑀭𑀺𑀬𑀓𑁄 𑀩𑀼𑀤𑁆𑀥𑀼𑀧𑀚𑁆𑀛𑀸𑀬𑀓𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀯𑀦𑁆𑀤𑀫𑀸𑀦𑁄𑀬𑁂𑀯 𑀢𑀺𑀝𑁆𑀞𑀢𑀺.

𑀲𑀭𑀡𑀕𑀫𑀦𑀽𑀧𑀲𑀫𑁆𑀧𑀤𑀸𑀢𑀺 ‘‘𑀩𑀼𑀤𑁆𑀥𑀁 𑀲𑀭𑀡𑀁 𑀕𑀘𑁆𑀙𑀸𑀫𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀢𑀺𑀓𑁆𑀔𑀢𑁆𑀢𑀼𑀁 𑀯𑀸𑀘𑀁 𑀪𑀺𑀦𑁆𑀤𑀺𑀢𑁆𑀯𑀸 𑀯𑀼𑀢𑁆𑀢𑁂𑀳𑀺 𑀢𑀻𑀳𑀺 𑀲𑀭𑀡𑀕𑀫𑀦𑁂𑀳𑀺 𑀅𑀦𑀼𑀜𑁆𑀜𑀸𑀢𑀉𑀧𑀲𑀫𑁆𑀧𑀤𑀸. 𑀑𑀯𑀸𑀤𑀽𑀧𑀲𑀫𑁆𑀧𑀤𑀸𑀢𑀺 𑀑𑀯𑀸𑀤𑀧𑁆𑀧𑀝𑀺𑀕𑁆𑀕𑀳𑀡𑀉𑀧𑀲𑀫𑁆𑀧𑀤𑀸. 𑀲𑀸 𑀘 ‘‘𑀢𑀲𑁆𑀫𑀸𑀢𑀺𑀳 𑀢𑁂, 𑀓𑀲𑁆𑀲𑀧, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 ‘𑀢𑀺𑀩𑁆𑀩𑀁 𑀫𑁂 𑀳𑀺𑀭𑁄𑀢𑁆𑀢𑀧𑁆𑀧𑀁, 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀪𑀯𑀺𑀲𑁆𑀲𑀢𑀺 𑀣𑁂𑀭𑁂𑀲𑀼 𑀦𑀯𑁂𑀲𑀼 𑀫𑀚𑁆𑀛𑀺𑀫𑁂𑀲𑀽’𑀢𑀺. 𑀏𑀯𑀜𑁆𑀳𑀺 𑀢𑁂, 𑀓𑀲𑁆𑀲𑀧, 𑀲𑀺𑀓𑁆𑀔𑀺𑀢𑀩𑁆𑀩𑀁. 𑀢𑀲𑁆𑀫𑀸𑀢𑀺𑀳 𑀢𑁂, 𑀓𑀲𑁆𑀲𑀧, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 ‘𑀬𑀁 𑀓𑀺𑀜𑁆𑀘𑀺 𑀥𑀫𑁆𑀫𑀁 𑀲𑀼𑀡𑀺𑀲𑁆𑀲𑀸𑀫𑀺 𑀓𑀼𑀲𑀮𑀽𑀧𑀲𑀁𑀳𑀺𑀢𑀁, 𑀲𑀩𑁆𑀩𑀁 𑀢𑀁 𑀅𑀝𑁆𑀞𑀺𑀁 𑀓𑀢𑁆𑀯𑀸 𑀫𑀦𑀲𑀺 𑀓𑀭𑀺𑀢𑁆𑀯𑀸 𑀲𑀩𑁆𑀩𑀘𑁂𑀢𑀲𑀸 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸 𑀑𑀳𑀺𑀢𑀲𑁄𑀢𑁄 𑀥𑀫𑁆𑀫𑀁 𑀲𑀼𑀡𑀺𑀲𑁆𑀲𑀸𑀫𑀻’𑀢𑀺, 𑀏𑀯𑀜𑁆𑀳𑀺 𑀢𑁂, 𑀓𑀲𑁆𑀲𑀧, 𑀲𑀺𑀓𑁆𑀔𑀺𑀢𑀩𑁆𑀩𑀁. 𑀢𑀲𑁆𑀫𑀸𑀢𑀺𑀳 𑀢𑁂, 𑀓𑀲𑁆𑀲𑀧, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 ‘𑀲𑀸𑀢𑀲𑀳𑀕𑀢𑀸 𑀘 𑀫𑁂 𑀓𑀸𑀬𑀕𑀢𑀸𑀲𑀢𑀺 𑀦 𑀯𑀺𑀚𑀳𑀺𑀲𑁆𑀲𑀢𑀻’𑀢𑀺, 𑀏𑀯𑀜𑁆𑀳𑀺 𑀢𑁂, 𑀓𑀲𑁆𑀲𑀧, 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺 (𑀲𑀁. 𑀦𑀺. 𑁨.𑁧𑁫𑁪) 𑀇𑀫𑀺𑀦𑀸 𑀑𑀯𑀸𑀤𑀧𑁆𑀧𑀝𑀺𑀕𑁆𑀕𑀳𑀡𑁂𑀦 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀲𑁆𑀲 𑀅𑀦𑀼𑀜𑁆𑀜𑀸𑀢𑀉𑀧𑀲𑀫𑁆𑀧𑀤𑀸.

𑀧𑀜𑁆𑀳𑀩𑁆𑀬𑀸𑀓𑀭𑀡𑀽𑀧𑀲𑀫𑁆𑀧𑀤𑀸 𑀦𑀸𑀫 𑀲𑁄𑀧𑀸𑀓𑀲𑁆𑀲 𑀅𑀦𑀼𑀜𑁆𑀜𑀸𑀢𑀉𑀧𑀲𑀫𑁆𑀧𑀤𑀸. 𑀪𑀕𑀯𑀸 𑀓𑀺𑀭 𑀧𑀼𑀩𑁆𑀩𑀸𑀭𑀸𑀫𑁂 𑀅𑀦𑀼𑀘𑀗𑁆𑀓𑀫𑀦𑁆𑀢𑀁 𑀲𑁄𑀧𑀸𑀓𑀲𑀸𑀫𑀡𑁂𑀭𑀁 ‘‘𑀉𑀤𑁆𑀥𑀼𑀫𑀸𑀢𑀓𑀲𑀜𑁆𑀜𑀸𑀢𑀺 𑀯𑀸, 𑀲𑁄𑀧𑀸𑀓, 𑀭𑀽𑀧𑀲𑀜𑁆𑀜𑀸𑀢𑀺 𑀯𑀸 𑀇𑀫𑁂 𑀥𑀫𑁆𑀫𑀸 𑀦𑀸𑀦𑀢𑁆𑀣𑀸 𑀦𑀸𑀦𑀸𑀩𑁆𑀬𑀜𑁆𑀚𑀦𑀸, 𑀉𑀤𑀸𑀳𑀼 𑀏𑀓𑀢𑁆𑀣𑀸 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦’’𑀦𑁆𑀢𑀺 𑀤𑀲 𑀅𑀲𑀼𑀪𑀦𑀺𑀲𑁆𑀲𑀺𑀢𑁂 𑀧𑀜𑁆𑀳𑁂 𑀧𑀼𑀘𑁆𑀙𑀺. 𑀲𑁄 𑀩𑁆𑀬𑀸𑀓𑀸𑀲𑀺. 𑀪𑀕𑀯𑀸 𑀢𑀲𑁆𑀲 𑀲𑀸𑀥𑀼𑀓𑀸𑀭𑀁 𑀤𑀢𑁆𑀯𑀸 ‘‘𑀓𑀢𑀺𑀯𑀲𑁆𑀲𑁄𑀲𑀺, 𑀢𑁆𑀯𑀁 𑀲𑁄𑀧𑀸𑀓𑀸’’𑀢𑀺 𑀧𑀼𑀘𑁆𑀙𑀺. 𑀲𑀢𑁆𑀢𑀯𑀲𑁆𑀲𑁄𑀳𑀁 𑀪𑀕𑀯𑀸𑀢𑀺. 𑀲𑁄𑀧𑀸𑀓, 𑀢𑁆𑀯𑀁 𑀫𑀫 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀺𑀢𑁆𑀯𑀸 𑀧𑀜𑁆𑀳𑁂 𑀩𑁆𑀬𑀸𑀓𑀸𑀲𑀻𑀢𑀺 𑀆𑀭𑀤𑁆𑀥𑀘𑀺𑀢𑁆𑀢𑁄 𑀉𑀧𑀲𑀫𑁆𑀧𑀤𑀁 𑀅𑀦𑀼𑀚𑀸𑀦𑀺. 𑀅𑀬𑀁 𑀧𑀜𑁆𑀳𑀩𑁆𑀬𑀸𑀓𑀭𑀡𑀽𑀧𑀲𑀫𑁆𑀧𑀤𑀸.

𑀜𑀢𑁆𑀢𑀺𑀘𑀢𑀼𑀢𑁆𑀣𑀉𑀧𑀲𑀫𑁆𑀧𑀤𑀸 𑀦𑀸𑀫 𑀪𑀺𑀓𑁆𑀔𑀽𑀦𑀁 𑀏𑀢𑀭𑀳𑀺 𑀉𑀧𑀲𑀫𑁆𑀧𑀤𑀸. 𑀕𑀭𑀼𑀥𑀫𑁆𑀫𑀽𑀧𑀲𑀫𑁆𑀧𑀤𑀸𑀢𑀺 𑀕𑀭𑀼𑀥𑀫𑁆𑀫𑀧𑁆𑀧𑀝𑀺𑀕𑁆𑀕𑀳𑀡𑁂𑀦 𑀉𑀧𑀲𑀫𑁆𑀧𑀤𑀸. 𑀲𑀸 𑀘 𑀫𑀳𑀸𑀧𑀚𑀸𑀧𑀢𑀺𑀬𑀸 𑀅𑀝𑁆𑀞𑀕𑀭𑀼𑀥𑀫𑁆𑀫𑀧𑁆𑀧𑀝𑀺𑀕𑁆𑀕𑀳𑀡𑁂𑀦 𑀅𑀦𑀼𑀜𑁆𑀜𑀸𑀢𑀸. 𑀉𑀪𑀢𑁄𑀲𑀗𑁆𑀖𑁂 𑀉𑀧𑀲𑀫𑁆𑀧𑀤𑀸 𑀦𑀸𑀫 𑀪𑀺𑀓𑁆𑀔𑀼𑀦𑀺𑀬𑀸 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀢𑁄 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦, 𑀪𑀺𑀓𑁆𑀔𑀼𑀲𑀗𑁆𑀖𑀢𑁄 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦𑀸𑀢𑀺 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀓𑀫𑁆𑀫𑁂𑀳𑀺 𑀅𑀦𑀼𑀜𑁆𑀜𑀸𑀢𑀸 𑀅𑀝𑁆𑀞𑀯𑀸𑀘𑀺𑀓𑀽𑀧𑀲𑀫𑁆𑀧𑀤𑀸. 𑀤𑀽𑀢𑁂𑀦 𑀉𑀧𑀲𑀫𑁆𑀧𑀤𑀸 𑀦𑀸𑀫 𑀅𑀟𑁆𑀠𑀓𑀸𑀲𑀺𑀬𑀸 𑀕𑀡𑀺𑀓𑀸𑀬 𑀅𑀦𑀼𑀜𑁆𑀜𑀸𑀢𑀸 𑀉𑀧𑀲𑀫𑁆𑀧𑀤𑀸.

𑀜𑀢𑁆𑀢𑀺𑀓𑀫𑁆𑀫𑀁 𑀦𑀯 𑀞𑀸𑀦𑀸𑀦𑀺 𑀕𑀘𑁆𑀙𑀢𑀻𑀢𑀺 𑀓𑀢𑀫𑀸𑀦𑀺 𑀦𑀯 𑀞𑀸𑀦𑀸𑀦𑀺 𑀕𑀘𑁆𑀙𑀢𑀺? 𑀑𑀲𑀸𑀭𑀡𑀁, 𑀦𑀺𑀲𑁆𑀲𑀸𑀭𑀡𑀁, 𑀉𑀧𑁄𑀲𑀣𑁄, 𑀧𑀯𑀸𑀭𑀡𑀸, 𑀲𑀫𑁆𑀫𑀼𑀢𑀺, 𑀤𑀸𑀦𑀁, 𑀧𑀝𑀺𑀕𑁆𑀕𑀳𑀁, 𑀧𑀘𑁆𑀘𑀼𑀓𑁆𑀓𑀟𑁆𑀠𑀦𑀁, 𑀓𑀫𑁆𑀫𑀮𑀓𑁆𑀔𑀡𑀜𑁆𑀜𑁂𑀯 𑀦𑀯𑀫𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑀸𑀦𑀺 𑀦𑀯 𑀞𑀸𑀦𑀸𑀦𑀺 𑀕𑀘𑁆𑀙𑀢𑀺. 𑀢𑀢𑁆𑀣 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄, 𑀇𑀢𑁆𑀣𑀦𑁆𑀦𑀸𑀫𑁄 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀆𑀬𑀲𑁆𑀫𑀢𑁄 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄, 𑀅𑀦𑀼𑀲𑀺𑀝𑁆𑀞𑁄 𑀲𑁄 𑀫𑀬𑀸, 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀇𑀢𑁆𑀣𑀦𑁆𑀦𑀸𑀫𑁄 𑀆𑀕𑀘𑁆𑀙𑁂𑀬𑁆𑀬, 𑀆𑀕𑀘𑁆𑀙𑀸𑀳𑀻𑀢𑀺 𑀯𑀢𑁆𑀢𑀩𑁆𑀩𑁄’’𑀢𑀺 (𑀫𑀳𑀸𑀯. 𑁧𑁨𑁬) 𑀏𑀯𑀁 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑀲𑁆𑀲 𑀑𑀲𑀸𑀭𑀡𑀸 𑀑𑀲𑀸𑀭𑀡𑀸 𑀦𑀸𑀫.

‘‘𑀲𑀼𑀡𑀦𑁆𑀢𑀼 𑀫𑁂, 𑀆𑀬𑀲𑁆𑀫𑀦𑁆𑀢𑀸, 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀥𑀫𑁆𑀫𑀓𑀣𑀺𑀓𑁄, 𑀇𑀫𑀲𑁆𑀲 𑀦𑁂𑀯 𑀲𑀼𑀢𑁆𑀢𑀁 𑀆𑀕𑀘𑁆𑀙𑀢𑀺, 𑀦𑁄 𑀲𑀼𑀢𑁆𑀢𑀯𑀺𑀪𑀗𑁆𑀕𑁄, 𑀲𑁄 𑀅𑀢𑁆𑀣𑀁 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀩𑁆𑀬𑀜𑁆𑀚𑀦𑀘𑁆𑀙𑀸𑀬𑀸𑀬 𑀅𑀢𑁆𑀣𑀁 𑀧𑀝𑀺𑀩𑀸𑀳𑀢𑀺. 𑀬𑀤𑀸𑀬𑀲𑁆𑀫𑀦𑁆𑀢𑀸𑀦𑀁 𑀧𑀢𑁆𑀢𑀓𑀮𑁆𑀮𑀁, 𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼𑀁 𑀯𑀼𑀝𑁆𑀞𑀸𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 𑀇𑀫𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀬𑁆𑀬𑀸𑀫𑀸’’𑀢𑀺 𑀏𑀯𑀁 𑀉𑀩𑁆𑀩𑀸𑀳𑀺𑀓𑀯𑀺𑀦𑀺𑀘𑁆𑀙𑀬𑁂 𑀥𑀫𑁆𑀫𑀓𑀣𑀺𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀲𑁆𑀲𑀸𑀭𑀡𑀸 𑀦𑀺𑀲𑁆𑀲𑀸𑀭𑀡𑀸 𑀦𑀸𑀫.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄, 𑀅𑀚𑁆𑀚𑀼𑀧𑁄𑀲𑀣𑁄 𑀧𑀦𑁆𑀦𑀭𑀲𑁄. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀉𑀧𑁄𑀲𑀣𑀁 𑀓𑀭𑁂𑀬𑁆𑀬𑀸’’𑀢𑀺 𑀏𑀯𑀁 𑀉𑀧𑁄𑀲𑀣𑀓𑀫𑁆𑀫𑀯𑀲𑁂𑀦 𑀞𑀧𑀺𑀢𑀸 𑀜𑀢𑁆𑀢𑀺 𑀉𑀧𑁄𑀲𑀣𑁄 𑀦𑀸𑀫.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄, 𑀅𑀚𑁆𑀚 𑀧𑀯𑀸𑀭𑀡𑀸 𑀧𑀦𑁆𑀦𑀭𑀲𑀻. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀧𑀯𑀸𑀭𑁂𑀬𑁆𑀬𑀸’’𑀢𑀺 𑀏𑀯𑀁 𑀧𑀯𑀸𑀭𑀡𑀸𑀓𑀫𑁆𑀫𑀯𑀲𑁂𑀦 𑀞𑀧𑀺𑀢𑀸 𑀜𑀢𑁆𑀢𑀺 𑀧𑀯𑀸𑀭𑀡𑀸 𑀦𑀸𑀫.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄, 𑀇𑀢𑁆𑀣𑀦𑁆𑀦𑀸𑀫𑁄 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀆𑀬𑀲𑁆𑀫𑀢𑁄 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀅𑀳𑀁 𑀇𑀢𑁆𑀣𑀦𑁆𑀦𑀸𑀫𑀁 𑀅𑀦𑀼𑀲𑀸𑀲𑁂𑀬𑁆𑀬’’𑀦𑁆𑀢𑀺, ‘‘𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀇𑀢𑁆𑀣𑀦𑁆𑀦𑀸𑀫𑁄 𑀇𑀢𑁆𑀣𑀦𑁆𑀦𑀸𑀫𑀁 𑀅𑀦𑀼𑀲𑀸𑀲𑁂𑀬𑁆𑀬𑀸’’𑀢𑀺, ‘‘𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀅𑀳𑀁 𑀇𑀢𑁆𑀣𑀦𑁆𑀦𑀸𑀫𑀁 𑀅𑀦𑁆𑀢𑀭𑀸𑀬𑀺𑀓𑁂 𑀥𑀫𑁆𑀫𑁂 𑀧𑀼𑀘𑁆𑀙𑁂𑀬𑁆𑀬’’𑀦𑁆𑀢𑀺, ‘‘𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀇𑀢𑁆𑀣𑀦𑁆𑀦𑀸𑀫𑁄 𑀇𑀢𑁆𑀣𑀦𑁆𑀦𑀸𑀫𑀁 𑀅𑀦𑁆𑀢𑀭𑀸𑀬𑀺𑀓𑁂 𑀥𑀫𑁆𑀫𑁂 𑀧𑀼𑀘𑁆𑀙𑁂𑀬𑁆𑀬𑀸’’𑀢𑀺, ‘‘𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀅𑀳𑀁 𑀇𑀢𑁆𑀣𑀦𑁆𑀦𑀸𑀫𑀁 𑀯𑀺𑀦𑀬𑀁 𑀧𑀼𑀘𑁆𑀙𑁂𑀬𑁆𑀬’’𑀦𑁆𑀢𑀺, ‘‘𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀇𑀢𑁆𑀣𑀦𑁆𑀦𑀸𑀫𑁄 𑀇𑀢𑁆𑀣𑀦𑁆𑀦𑀸𑀫𑀁 𑀯𑀺𑀦𑀬𑀁 𑀧𑀼𑀘𑁆𑀙𑁂𑀬𑁆𑀬𑀸’’𑀢𑀺, ‘‘𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀅𑀳𑀁 𑀇𑀢𑁆𑀣𑀦𑁆𑀦𑀸𑀫𑁂𑀦 𑀯𑀺𑀦𑀬𑀁 𑀧𑀼𑀝𑁆𑀞𑁄 𑀯𑀺𑀲𑁆𑀲𑀚𑁆𑀚𑁂𑀬𑁆𑀬’’𑀦𑁆𑀢𑀺, ‘‘𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀇𑀢𑁆𑀣𑀦𑁆𑀦𑀸𑀫𑁄 𑀇𑀢𑁆𑀣𑀦𑁆𑀦𑀸𑀫𑁂𑀦 𑀯𑀺𑀦𑀬𑀁 𑀧𑀼𑀝𑁆𑀞𑁄 𑀯𑀺𑀲𑁆𑀲𑀚𑁆𑀚𑁂𑀬𑁆𑀬𑀸’’𑀢𑀺 𑀏𑀯𑀁 𑀅𑀢𑁆𑀢𑀸𑀦𑀁 𑀯𑀸 𑀧𑀭𑀁 𑀯𑀸 𑀲𑀫𑁆𑀫𑀦𑁆𑀦𑀺𑀢𑀼𑀁 𑀞𑀧𑀺𑀢𑀸 𑀜𑀢𑁆𑀢𑀺 𑀲𑀫𑁆𑀫𑀼𑀢𑀺 𑀦𑀸𑀫.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄, 𑀇𑀤𑀁 𑀘𑀻𑀯𑀭𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀲𑁆𑀲𑀕𑁆𑀕𑀺𑀬𑀁 𑀲𑀗𑁆𑀖𑀲𑁆𑀲 𑀦𑀺𑀲𑁆𑀲𑀝𑁆𑀞𑀁. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀫𑀁 𑀘𑀻𑀯𑀭𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀤𑁂𑀬𑁆𑀬𑀸’’𑀢𑀺, ‘‘𑀬𑀤𑀸𑀬𑀲𑁆𑀫𑀦𑁆𑀢𑀸𑀦𑀁 𑀧𑀢𑁆𑀢𑀓𑀮𑁆𑀮𑀁, 𑀆𑀬𑀲𑁆𑀫𑀦𑁆𑀢𑀸 𑀇𑀫𑀁 𑀘𑀻𑀯𑀭𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀤𑁂𑀬𑁆𑀬𑀼’’𑀦𑁆𑀢𑀺 𑀏𑀯𑀁 𑀦𑀺𑀲𑁆𑀲𑀝𑁆𑀞𑀘𑀻𑀯𑀭𑀧𑀢𑁆𑀢𑀸𑀤𑀻𑀦𑀁 𑀤𑀸𑀦𑀁 𑀤𑀸𑀦𑀁 𑀦𑀸𑀫.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄, 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀁 𑀲𑀭𑀢𑀺 𑀯𑀺𑀯𑀭𑀢𑀺 𑀉𑀢𑁆𑀢𑀸𑀦𑀺𑀁 𑀓𑀭𑁄𑀢𑀺 𑀤𑁂𑀲𑁂𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀅𑀳𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀧𑀢𑁆𑀢𑀺𑀁 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬’’𑀦𑁆𑀢𑀺, ‘‘𑀬𑀤𑀸𑀬𑀲𑁆𑀫𑀦𑁆𑀢𑀸𑀦𑀁 𑀧𑀢𑁆𑀢𑀓𑀮𑁆𑀮𑀁, 𑀅𑀳𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀧𑀢𑀺𑀁 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬’’𑀦𑁆𑀢𑀺, 𑀢𑁂𑀦 𑀯𑀢𑁆𑀢𑀩𑁆𑀩𑁄 ‘‘𑀧𑀲𑁆𑀲𑀲𑀻’’𑀢𑀺? 𑀆𑀫 𑀧𑀲𑁆𑀲𑀸𑀫𑀻𑀢𑀺. ‘‘𑀆𑀬𑀢𑀺𑀁 𑀲𑀁𑀯𑀭𑁂𑀬𑁆𑀬𑀸𑀲𑀻’’𑀢𑀺 𑀏𑀯𑀁 𑀆𑀧𑀢𑁆𑀢𑀺𑀧𑁆𑀧𑀝𑀺𑀕𑁆𑀕𑀳𑁄 𑀧𑀝𑀺𑀕𑁆𑀕𑀳𑁄 𑀦𑀸𑀫.

‘‘𑀲𑀼𑀡𑀦𑁆𑀢𑀼 𑀫𑁂, 𑀆𑀬𑀲𑁆𑀫𑀦𑁆𑀢𑀸 𑀆𑀯𑀸𑀲𑀺𑀓𑀸, 𑀬𑀤𑀸𑀬𑀲𑁆𑀫𑀦𑁆𑀢𑀸𑀦𑀁 𑀧𑀢𑁆𑀢𑀓𑀮𑁆𑀮𑀁, 𑀇𑀤𑀸𑀦𑀺 𑀉𑀧𑁄𑀲𑀣𑀁 𑀓𑀭𑁂𑀬𑁆𑀬𑀸𑀫, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀫, 𑀆𑀕𑀫𑁂 𑀓𑀸𑀮𑁂 𑀧𑀯𑀸𑀭𑁂𑀬𑁆𑀬𑀸𑀫𑀸’’𑀢𑀺, 𑀢𑁂 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀪𑀡𑁆𑀟𑀦𑀓𑀸𑀭𑀓𑀸 𑀓𑀮𑀳𑀓𑀸𑀭𑀓𑀸 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑀸 𑀢𑀁 𑀓𑀸𑀮𑀁 𑀅𑀦𑀼𑀯𑀲𑁂𑀬𑁆𑀬𑀼𑀁, 𑀆𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀩𑁆𑀬𑀢𑁆𑀢𑁂𑀦 𑀧𑀝𑀺𑀩𑀮𑁂𑀦 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀜𑀸𑀧𑁂𑀢𑀩𑁆𑀩𑀸 ‘‘𑀲𑀼𑀡𑀦𑁆𑀢𑀼 𑀫𑁂, 𑀆𑀬𑀲𑁆𑀫𑀦𑁆𑀢𑀸 𑀆𑀯𑀸𑀲𑀺𑀓𑀸, 𑀬𑀤𑀸𑀬𑀲𑁆𑀫𑀦𑁆𑀢𑀸𑀦𑀁 𑀧𑀢𑁆𑀢𑀓𑀮𑁆𑀮𑀁, 𑀇𑀤𑀸𑀦𑀺 𑀉𑀧𑁄𑀲𑀣𑀁 𑀓𑀭𑁂𑀬𑁆𑀬𑀸𑀫, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀫, 𑀆𑀕𑀫𑁂 𑀚𑀼𑀡𑁆𑀳𑁂 𑀧𑀯𑀸𑀭𑁂𑀬𑁆𑀬𑀸𑀫𑀸’’𑀢𑀺 𑀏𑀯𑀁 𑀓𑀢𑀸 𑀧𑀯𑀸𑀭𑀡𑀸 𑀧𑀘𑁆𑀘𑀼𑀓𑁆𑀓𑀟𑁆𑀠𑀦𑀸 𑀦𑀸𑀫.

𑀲𑀩𑁆𑀩𑁂𑀳𑁂𑀯 𑀏𑀓𑀚𑁆𑀛𑀁 𑀲𑀦𑁆𑀦𑀺𑀧𑀢𑀺𑀢𑀩𑁆𑀩𑀁, 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄, 𑀅𑀫𑁆𑀳𑀸𑀓𑀁 𑀪𑀡𑁆𑀟𑀦𑀚𑀸𑀢𑀸𑀦𑀁 𑀓𑀮𑀳𑀚𑀸𑀢𑀸𑀦𑀁 𑀯𑀺𑀯𑀸𑀤𑀸𑀧𑀦𑁆𑀦𑀸𑀦𑀁 𑀯𑀺𑀳𑀭𑀢𑀁 𑀩𑀳𑀼 𑀅𑀲𑁆𑀲𑀸𑀫𑀡𑀓𑀁 𑀅𑀚𑁆𑀛𑀸𑀘𑀺𑀡𑁆𑀡𑀁 𑀪𑀸𑀲𑀺𑀢𑀧𑀭𑀺𑀓𑁆𑀓𑀦𑁆𑀢𑀁. 𑀲𑀘𑁂 𑀫𑀬𑀁 𑀇𑀫𑀸𑀳𑀺 𑀆𑀧𑀢𑁆𑀢𑀻𑀳𑀺 𑀅𑀜𑁆𑀜𑀫𑀜𑁆𑀜𑀁 𑀓𑀸𑀭𑁂𑀲𑁆𑀲𑀸𑀫, 𑀲𑀺𑀬𑀸𑀧𑀺 𑀢𑀁 𑀅𑀥𑀺𑀓𑀭𑀡𑀁 𑀓𑀓𑁆𑀔𑀴𑀢𑁆𑀢𑀸𑀬 𑀯𑀸𑀴𑀢𑁆𑀢𑀸𑀬 𑀪𑁂𑀤𑀸𑀬 𑀲𑀁𑀯𑀢𑁆𑀢𑁂𑀬𑁆𑀬. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀫𑀁 𑀅𑀥𑀺𑀓𑀭𑀡𑀁 𑀢𑀺𑀡𑀯𑀢𑁆𑀣𑀸𑀭𑀓𑁂𑀦 𑀯𑀽𑀧𑀲𑀫𑁂𑀬𑁆𑀬 𑀞𑀧𑁂𑀢𑁆𑀯𑀸 𑀣𑀼𑀮𑁆𑀮𑀯𑀚𑁆𑀚𑀁, 𑀞𑀧𑁂𑀢𑁆𑀯𑀸 𑀕𑀺𑀳𑀺𑀧𑀝𑀺𑀲𑀁𑀬𑀼𑀢𑁆𑀢’’𑀦𑁆𑀢𑀺 𑀏𑀯𑀁 𑀢𑀺𑀡𑀯𑀢𑁆𑀣𑀸𑀭𑀓𑀲𑀫𑀣𑁂 𑀓𑀢𑀸 𑀲𑀩𑁆𑀩𑀧𑀞𑀫𑀸 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀜𑀢𑁆𑀢𑀺 𑀓𑀫𑁆𑀫𑀮𑀓𑁆𑀔𑀡𑀁 𑀦𑀸𑀫.

𑀜𑀢𑁆𑀢𑀺𑀤𑀼𑀢𑀺𑀬𑀁 𑀓𑀫𑁆𑀫𑀁 𑀲𑀢𑁆𑀢 𑀞𑀸𑀦𑀸𑀦𑀺 𑀕𑀘𑁆𑀙𑀢𑀻𑀢𑀺 𑀓𑀢𑀫𑀸𑀦𑀺 𑀲𑀢𑁆𑀢 𑀞𑀸𑀦𑀸𑀦𑀺 𑀕𑀘𑁆𑀙𑀢𑀺? 𑀑𑀲𑀸𑀭𑀡𑀁, 𑀦𑀺𑀲𑁆𑀲𑀸𑀭𑀡𑀁, 𑀲𑀫𑁆𑀫𑀼𑀢𑀺, 𑀤𑀸𑀦𑀁, 𑀉𑀤𑁆𑀥𑀭𑀡𑀁, 𑀤𑁂𑀲𑀦𑀁, 𑀓𑀫𑁆𑀫𑀮𑀓𑁆𑀔𑀡𑀜𑁆𑀜𑁂𑀯 𑀲𑀢𑁆𑀢𑀫𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑀸𑀦𑀺 𑀲𑀢𑁆𑀢 𑀞𑀸𑀦𑀸𑀦𑀺 𑀕𑀘𑁆𑀙𑀢𑀺. 𑀢𑀢𑁆𑀣 𑀯𑀟𑁆𑀠𑀲𑁆𑀲 𑀮𑀺𑀘𑁆𑀙𑀯𑀺𑀦𑁄 𑀧𑀢𑁆𑀢𑀦𑀺𑀓𑁆𑀓𑀼𑀚𑁆𑀚𑀦𑀯𑀲𑁂𑀦 𑀔𑀦𑁆𑀥𑀓𑁂 𑀯𑀼𑀢𑁆𑀢𑀸 𑀦𑀺𑀲𑁆𑀲𑀸𑀭𑀡𑀸, 𑀢𑀲𑁆𑀲𑁂𑀯 𑀧𑀢𑀉𑀓𑁆𑀓𑀼𑀚𑁆𑀚𑀦𑀯𑀲𑁂𑀦 𑀯𑀼𑀢𑁆𑀢𑀸 𑀑𑀲𑀸𑀭𑀡𑀸 𑀘 𑀯𑁂𑀤𑀺𑀢𑀩𑁆𑀩𑀸. 𑀲𑀻𑀫𑀸𑀲𑀫𑁆𑀫𑀼𑀢𑀺 𑀢𑀺𑀘𑀻𑀯𑀭𑁂𑀦 𑀅𑀯𑀺𑀧𑁆𑀧𑀯𑀸𑀲𑀲𑀫𑁆𑀫𑀼𑀢𑀺 𑀲𑀦𑁆𑀣𑀢𑀲𑀫𑁆𑀫𑀼𑀢𑀺 𑀪𑀢𑁆𑀢𑀼𑀤𑁆𑀤𑁂𑀲𑀓𑀲𑁂𑀦𑀸𑀲𑀦𑀕𑁆𑀕𑀸𑀳𑀸𑀧𑀓𑀪𑀡𑁆𑀟𑀸𑀕𑀸𑀭𑀺𑀓- 𑀘𑀻𑀯𑀭𑀧𑁆𑀧𑀝𑀺𑀕𑁆𑀕𑀸𑀳𑀓-𑀘𑀻𑀯𑀭𑀪𑀸𑀚𑀓-𑀬𑀸𑀕𑀼𑀪𑀸𑀚𑀓-𑀨𑀮𑀪𑀸𑀚𑀓-𑀔𑀚𑁆𑀚𑀪𑀸𑀚𑀓-𑀅𑀧𑁆𑀧𑀫𑀢𑁆𑀢𑀓𑀯𑀺𑀲𑁆𑀲𑀚𑁆𑀚𑀓- 𑀲𑀸𑀝𑀺𑀬𑀕𑁆𑀕𑀸𑀳𑀸𑀧𑀓-𑀧𑀢𑁆𑀢𑀕𑁆𑀕𑀸𑀳𑀸𑀧𑀓-𑀆𑀭𑀸𑀫𑀺𑀓𑀧𑁂𑀲𑀓-𑀲𑀸𑀫𑀡𑁂𑀭𑀧𑁂𑀲𑀓𑀲𑀫𑁆𑀫𑀼𑀢𑀻𑀢𑀺 𑀏𑀢𑀸𑀲𑀁 𑀲𑀫𑁆𑀫𑀼𑀢𑀻𑀦𑀁 𑀯𑀲𑁂𑀦 𑀲𑀫𑁆𑀫𑀼𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀓𑀞𑀺𑀦𑀘𑀻𑀯𑀭𑀤𑀸𑀦𑀫𑀢𑀓𑀘𑀻𑀯𑀭𑀤𑀸𑀦𑀯𑀲𑁂𑀦 𑀤𑀸𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀓𑀞𑀺𑀦𑀼𑀤𑁆𑀥𑀸𑀭𑀡𑀯𑀲𑁂𑀦 𑀉𑀤𑁆𑀥𑀸𑀭𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀼𑀝𑀺𑀯𑀢𑁆𑀣𑀼𑀯𑀺𑀳𑀸𑀭𑀯𑀢𑁆𑀣𑀼𑀤𑁂𑀲𑀦𑀸𑀯𑀲𑁂𑀦 𑀤𑁂𑀲𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀬𑀸 𑀧𑀦 𑀢𑀺𑀡𑀯𑀢𑁆𑀣𑀸𑀭𑀓𑀲𑀫𑀣𑁂 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀜𑀢𑁆𑀢𑀺𑀜𑁆𑀘 𑀏𑀓𑁂𑀓𑀲𑁆𑀫𑀺𑀁 𑀧𑀓𑁆𑀔𑁂 𑀏𑀓𑁂𑀓𑀁 𑀜𑀢𑁆𑀢𑀺𑀜𑁆𑀘𑀸𑀢𑀺 𑀢𑀺𑀲𑁆𑀲𑁄𑀧𑀺 𑀜𑀢𑁆𑀢𑀺𑀬𑁄 𑀞𑀧𑁂𑀢𑁆𑀯𑀸 𑀧𑀼𑀦 𑀏𑀓𑀲𑁆𑀫𑀺𑀁 𑀧𑀓𑁆𑀔𑁂 𑀏𑀓𑀸, 𑀏𑀓𑀲𑁆𑀫𑀺𑀁 𑀧𑀓𑁆𑀔𑁂 𑀏𑀓𑀸𑀢𑀺 𑀤𑁆𑀯𑁂𑀧𑀺 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀯𑀸𑀘𑀸 𑀯𑀼𑀢𑁆𑀢𑀸. 𑀢𑀸𑀲𑀁 𑀯𑀲𑁂𑀦 𑀓𑀫𑁆𑀫𑀮𑀓𑁆𑀔𑀡𑀁 𑀯𑁂𑀤𑀺𑀢𑀩𑁆𑀩𑀁.

𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀁 𑀲𑀢𑁆𑀢 𑀞𑀸𑀦𑀸𑀦𑀺 𑀕𑀘𑁆𑀙𑀢𑀻𑀢𑀺 𑀓𑀢𑀫𑀸𑀦𑀺 𑀲𑀢𑁆𑀢 𑀞𑀸𑀦𑀸𑀦𑀺 𑀕𑀘𑁆𑀙𑀢𑀺? 𑀑𑀲𑀸𑀭𑀡𑀁, 𑀦𑀺𑀲𑁆𑀲𑀸𑀭𑀡𑀁, 𑀲𑀫𑁆𑀫𑀼𑀢𑀺, 𑀤𑀸𑀦𑀁, 𑀦𑀺𑀕𑁆𑀕𑀳𑀁, 𑀲𑀫𑀦𑀼𑀪𑀸𑀲𑀦𑀁, 𑀓𑀫𑁆𑀫𑀮𑀓𑁆𑀔𑀡𑀜𑁆𑀜𑁂𑀯 𑀲𑀢𑁆𑀢𑀫𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑀸𑀦𑀺 𑀲𑀢𑁆𑀢 𑀞𑀸𑀦𑀸𑀦𑀺 𑀕𑀘𑁆𑀙𑀢𑀺. 𑀢𑀢𑁆𑀣 𑀢𑀚𑁆𑀚𑀦𑀻𑀬𑀓𑀫𑁆𑀫𑀸𑀤𑀻𑀦𑀁 𑀲𑀢𑁆𑀢𑀦𑁆𑀦𑀁 𑀓𑀫𑁆𑀫𑀸𑀦𑀁 𑀯𑀲𑁂𑀦 𑀦𑀺𑀲𑁆𑀲𑀸𑀭𑀡𑀸, 𑀢𑁂𑀲𑀁𑀬𑁂𑀯 𑀘 𑀓𑀫𑁆𑀫𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑀯𑀲𑁂𑀦 𑀑𑀲𑀸𑀭𑀡𑀸 𑀯𑁂𑀤𑀺𑀢𑀩𑁆𑀩𑀸. 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑀲𑀫𑁆𑀫𑀼𑀢𑀺𑀯𑀲𑁂𑀦 𑀲𑀫𑁆𑀫𑀼𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀧𑀭𑀺𑀯𑀸𑀲𑀤𑀸𑀦𑀫𑀸𑀦𑀢𑁆𑀢𑀤𑀸𑀦𑀯𑀲𑁂𑀦 𑀤𑀸𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀓𑀫𑁆𑀫𑀯𑀲𑁂𑀦 𑀦𑀺𑀕𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄. 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀓𑀸, 𑀅𑀝𑁆𑀞 𑀬𑀸𑀯𑀢𑀢𑀺𑀬𑀓𑀸, 𑀅𑀭𑀺𑀝𑁆𑀞𑁄, 𑀘𑀡𑁆𑀟𑀓𑀸𑀴𑀻 𑀘 𑀇𑀫𑁂𑀢𑁂 𑀬𑀸𑀯𑀢𑀢𑀺𑀬𑀓𑀸𑀢𑀺 𑀇𑀫𑀸𑀲𑀁 𑀏𑀓𑀸𑀤𑀲𑀦𑁆𑀦𑀁 𑀲𑀫𑀦𑀼𑀪𑀸𑀲𑀦𑀸𑀦𑀁 𑀯𑀲𑁂𑀦 𑀲𑀫𑀦𑀼𑀪𑀸𑀲𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀉𑀧𑀲𑀫𑁆𑀧𑀤𑀓𑀫𑁆𑀫𑀅𑀩𑁆𑀪𑀸𑀦𑀓𑀫𑁆𑀫𑀯𑀲𑁂𑀦 𑀓𑀫𑁆𑀫𑀮𑀓𑁆𑀔𑀡𑀁 𑀯𑁂𑀤𑀺𑀢𑀩𑁆𑀩𑀁.

𑀥𑀫𑁆𑀫𑀲𑀫𑁆𑀫𑀼𑀔𑀢𑀸𑀢𑀺𑀆𑀤𑀻𑀲𑀼 𑀬𑁂𑀦 𑀥𑀫𑁆𑀫𑁂𑀦, 𑀬𑁂𑀦 𑀯𑀺𑀦𑀬𑁂𑀦, 𑀬𑁂𑀦 𑀲𑀢𑁆𑀣𑀼𑀲𑀸𑀲𑀦𑁂𑀦 𑀲𑀗𑁆𑀖𑁄 𑀓𑀫𑁆𑀫𑀁 𑀓𑀭𑁄𑀢𑀺, 𑀅𑀬𑀁 𑀥𑀫𑁆𑀫𑀲𑀫𑁆𑀫𑀼𑀔𑀢𑀸, 𑀯𑀺𑀦𑀬𑀲𑀫𑁆𑀫𑀼𑀔𑀢𑀸, 𑀲𑀢𑁆𑀣𑀼𑀲𑀸𑀲𑀦𑀲𑀫𑁆𑀫𑀼𑀔𑀢𑀸. 𑀢𑀢𑁆𑀣 𑀥𑀫𑁆𑀫𑁄𑀢𑀺 𑀪𑀽𑀢𑀯𑀢𑁆𑀣𑀼. 𑀯𑀺𑀦𑀬𑁄𑀢𑀺 𑀘𑁄𑀤𑀦𑀸 𑀘𑁂𑀯 𑀲𑀸𑀭𑀡𑀸 𑀘. 𑀲𑀢𑁆𑀣𑀼𑀲𑀸𑀲𑀦𑀁 𑀦𑀸𑀫 𑀜𑀢𑁆𑀢𑀺𑀲𑀫𑁆𑀧𑀤𑀸 𑀘𑁂𑀯 𑀅𑀦𑀼𑀲𑀸𑀯𑀦𑀲𑀫𑁆𑀧𑀤𑀸 𑀘. 𑀬𑀸𑀯𑀢𑀺𑀓𑀸 𑀪𑀺𑀓𑁆𑀔𑀽 𑀓𑀫𑁆𑀫𑀧𑁆𑀧𑀢𑁆𑀢𑀸, 𑀢𑁂 𑀆𑀕𑀢𑀸 𑀳𑁄𑀦𑁆𑀢𑀺, 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑁄 𑀆𑀳𑀝𑁄 𑀳𑁄𑀢𑀺, 𑀲𑀫𑁆𑀫𑀼𑀔𑀻𑀪𑀽𑀢𑀸 𑀦𑀧𑁆𑀧𑀝𑀺𑀓𑁆𑀓𑁄𑀲𑀦𑁆𑀢𑀺, 𑀅𑀬𑀁 𑀲𑀗𑁆𑀖𑀲𑀫𑁆𑀫𑀼𑀔𑀢𑀸. 𑀬𑀲𑁆𑀲 𑀲𑀗𑁆𑀖𑁄 𑀓𑀫𑁆𑀫𑀁 𑀓𑀭𑁄𑀢𑀺, 𑀢𑀲𑁆𑀲 𑀲𑀫𑁆𑀫𑀼𑀔𑀻𑀪𑀸𑀯𑁄 𑀧𑀼𑀕𑁆𑀕𑀮𑀲𑀫𑁆𑀫𑀼𑀔𑀢𑀸. 𑀲𑁂𑀲𑀫𑁂𑀢𑁆𑀣 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀇𑀢𑀺 𑀫𑀦𑁄𑀭𑀣𑀧𑀽𑀭𑀡𑀺𑀬𑀸 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬-𑀅𑀝𑁆𑀞𑀓𑀣𑀸𑀬

𑀤𑀼𑀓𑀦𑀺𑀧𑀸𑀢𑀯𑀡𑁆𑀡𑀦𑀸𑀬 𑀅𑀦𑀼𑀢𑁆𑀢𑀸𑀦𑀢𑁆𑀣𑀤𑀻𑀧𑀦𑀸 𑀲𑀫𑀢𑁆𑀢𑀸.