.𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲.

𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑁂

𑀤𑀼𑀓𑀦𑀺𑀧𑀸𑀢-𑀝𑀻𑀓𑀸

𑁧. 𑀧𑀞𑀫𑀧𑀡𑁆𑀡𑀸𑀲𑀓𑀁

𑁧. 𑀓𑀫𑁆𑀫𑀓𑀸𑀭𑀡𑀯𑀕𑁆𑀕𑁄

𑁧. 𑀯𑀚𑁆𑀚𑀲𑀼𑀢𑁆𑀢𑀯𑀡𑁆𑀡𑀦𑀸

𑁧. 𑀤𑀼𑀓𑀦𑀺𑀧𑀸𑀢𑀲𑁆𑀲 𑀧𑀞𑀫𑁂 𑀧𑀳𑀸𑀭𑀲𑀸𑀥𑀦𑀢𑁆𑀣𑀦𑁆𑀢𑀺 𑀤𑀡𑁆𑀟𑀧𑁆𑀧𑀳𑀸𑀭𑀲𑁆𑀲 𑀲𑀼𑀔𑀲𑀺𑀤𑁆𑀥𑀺-𑀅𑀢𑁆𑀣𑀁. 𑀓𑀜𑁆𑀚𑀺𑀢𑁄 𑀦𑀺𑀩𑁆𑀩𑀢𑁆𑀢𑀁 𑀓𑀜𑁆𑀚𑀺𑀬𑀁, 𑀆𑀭𑀦𑀸𑀮𑀁, 𑀬𑀁 𑀩𑀺𑀮𑀗𑁆𑀕𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺, 𑀢𑀁 𑀬𑀢𑁆𑀣 𑀲𑀺𑀜𑁆𑀘𑀢𑀺, 𑀲𑀸 𑀓𑀜𑁆𑀚𑀺𑀬𑀉𑀓𑁆𑀔𑀮𑀺𑀓𑀸 𑀩𑀺𑀮𑀗𑁆𑀕𑀣𑀸𑀮𑀺𑀓𑀸, 𑀢𑀁𑀲𑀤𑀺𑀲𑀁 𑀓𑀸𑀭𑀡𑀁 𑀩𑀺𑀮𑀗𑁆𑀕𑀣𑀸𑀮𑀺𑀓𑀁. 𑀲𑀻𑀲𑀓𑀝𑀸𑀳𑀁 𑀉𑀧𑁆𑀧𑀸𑀝𑁂𑀢𑁆𑀯𑀸𑀢𑀺 𑀅𑀬𑁄𑀕𑀼𑀴𑀧𑁆𑀧𑀯𑁂𑀲𑀧𑁆𑀧𑀫𑀸𑀡𑀁 𑀙𑀺𑀤𑁆𑀤𑀁 𑀓𑀢𑁆𑀯𑀸. 𑀲𑀗𑁆𑀔𑀫𑀼𑀡𑁆𑀟𑀓𑀫𑁆𑀫𑀓𑀸𑀭𑀡𑀦𑁆𑀢𑀺 𑀲𑀗𑁆𑀔𑀁 𑀯𑀺𑀬 𑀫𑀼𑀡𑁆𑀟𑀓𑀭𑀡𑀁 𑀓𑀫𑁆𑀫𑀓𑀸𑀭𑀡𑀁. 𑀭𑀸𑀳𑀼𑀫𑀼𑀔𑀓𑀫𑁆𑀫𑀓𑀸𑀭𑀡𑀦𑁆𑀢𑀺 𑀭𑀸𑀳𑀼𑀫𑀼𑀔𑀕𑀢𑀲𑀽𑀭𑀺𑀬𑀲𑀤𑀺𑀲𑀓𑀫𑁆𑀫𑀓𑀸𑀭𑀡𑀁.

𑀚𑁄𑀢𑀺𑀫𑀸𑀮𑀺𑀓𑀦𑁆𑀢𑀺 𑀚𑁄𑀢𑀺𑀫𑀸𑀮𑀯𑀦𑁆𑀢𑀁 𑀓𑀫𑁆𑀫𑀓𑀸𑀭𑀡𑀁. 𑀳𑀢𑁆𑀣𑀧𑀚𑁆𑀚𑁄𑀢𑀺𑀓𑀦𑁆𑀢𑀺 𑀳𑀢𑁆𑀣𑀲𑁆𑀲 𑀧𑀚𑁆𑀚𑁄𑀢𑀦𑀓𑀫𑁆𑀫𑀓𑀸𑀭𑀡𑀁. 𑀏𑀭𑀓𑀯𑀢𑁆𑀢𑀓𑀫𑁆𑀫𑀓𑀸𑀭𑀡𑀦𑁆𑀢𑀺 𑀏𑀭𑀓𑀯𑀢𑁆𑀢𑀲𑀤𑀺𑀲𑁂 𑀲𑀭𑀻𑀭𑀢𑁄 𑀘𑀫𑁆𑀫𑀯𑀢𑁆𑀢𑁂 𑀉𑀧𑁆𑀧𑀸𑀝𑀦𑀓𑀫𑁆𑀫𑀓𑀸𑀭𑀡𑀁. 𑀘𑀻𑀭𑀓𑀯𑀸𑀲𑀺𑀓𑀓𑀫𑁆𑀫𑀓𑀸𑀭𑀡𑀦𑁆𑀢𑀺 𑀲𑀭𑀻𑀭𑀢𑁄 𑀉𑀧𑁆𑀧𑀸𑀝𑀺𑀢𑀯𑀢𑁆𑀢𑀘𑀻𑀭𑀓𑁂𑀳𑀺 𑀦𑀺𑀯𑀸𑀲𑀸𑀧𑀦𑀓𑀫𑁆𑀫𑀓𑀸𑀭𑀡𑀁. 𑀢𑀁 𑀓𑀭𑁄𑀦𑁆𑀢𑀸 𑀬𑀣𑀸 𑀕𑀻𑀯𑀢𑁄 𑀧𑀝𑁆𑀞𑀸𑀬 𑀯𑀤𑁆𑀥𑁂 𑀓𑀦𑁆𑀢𑀺𑀢𑁆𑀯𑀸 𑀓𑀝𑀺𑀬𑀁 𑀞𑀧𑁂𑀦𑁆𑀢𑀺, 𑀏𑀯𑀁 𑀕𑁄𑀧𑁆𑀨𑀓𑀢𑁄 𑀧𑀝𑁆𑀞𑀸𑀬 𑀓𑀦𑁆𑀢𑀺𑀢𑁆𑀯𑀸𑀧𑀺 𑀓𑀝𑀺𑀬𑀫𑁂𑀯 𑀞𑀧𑁂𑀦𑁆𑀢𑀺. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀓𑀝𑀺𑀢𑁄 𑀧𑀝𑁆𑀞𑀸𑀬 𑀓𑀦𑁆𑀢𑀺𑀢𑁆𑀯𑀸 𑀕𑁄𑀧𑁆𑀨𑀓𑁂𑀲𑀼 𑀞𑀧𑁂𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀏𑀡𑁂𑀬𑁆𑀬𑀓𑀓𑀫𑁆𑀫𑀓𑀸𑀭𑀡𑀦𑁆𑀢𑀺 𑀏𑀡𑀺𑀫𑀺𑀕𑀲𑀤𑀺𑀲𑀓𑀫𑁆𑀫𑀓𑀸𑀭𑀡𑀁. 𑀅𑀬𑀯𑀮𑀬𑀸𑀦𑀺 𑀤𑀢𑁆𑀯𑀸𑀢𑀺 𑀅𑀬𑀯𑀮𑀬𑀸𑀦𑀺 𑀧𑀝𑀺𑀫𑀼𑀜𑁆𑀘𑀺𑀢𑁆𑀯𑀸. 𑀅𑀬𑀲𑀽𑀮𑀸𑀦𑀺 𑀓𑁄𑀝𑁆𑀝𑁂𑀦𑁆𑀢𑀻𑀢𑀺 𑀓𑀧𑁆𑀧𑀭𑀚𑀡𑁆𑀡𑀼𑀓𑀓𑁄𑀝𑀻𑀲𑀼 𑀅𑀬𑀲𑀽𑀮𑀸𑀦𑀺 𑀧𑀯𑁂𑀲𑁂𑀦𑁆𑀢𑀺. 𑀢𑀦𑁆𑀢𑀺 𑀢𑀁 𑀢𑀣𑀸𑀓𑀢𑀓𑀫𑁆𑀫𑀓𑀸𑀭𑀡𑀁 𑀲𑀢𑁆𑀢𑀁.

𑀩𑀴𑀺𑀲𑀫𑀁𑀲𑀺𑀓𑀦𑁆𑀢𑀺 𑀩𑀮𑀺𑀲𑁂𑀳𑀺 𑀫𑀁𑀲𑀼𑀧𑁆𑀧𑀸𑀝𑀦𑀓𑀫𑁆𑀫𑀓𑀸𑀭𑀡𑀁. 𑀓𑀳𑀸𑀧𑀡𑀺𑀓𑀦𑁆𑀢𑀺 𑀓𑀳𑀸𑀧𑀡𑀫𑀢𑁆𑀢𑀲𑁄 𑀙𑀺𑀦𑁆𑀤𑀦𑀓𑀫𑁆𑀫𑀓𑀸𑀭𑀡𑀁. 𑀓𑁄𑀝𑁆𑀝𑁂𑀦𑁆𑀢𑀻𑀢𑀺 𑀙𑀺𑀦𑁆𑀤𑀦𑁆𑀢𑀺. 𑀔𑀸𑀭𑀸𑀧𑀢𑀘𑁆𑀙𑀺𑀓𑀦𑁆𑀢𑀺 𑀢𑀘𑁆𑀙𑁂𑀢𑁆𑀯𑀸 𑀔𑀸𑀭𑀸𑀧𑀲𑀺𑀜𑁆𑀘𑀦𑀓𑀫𑁆𑀫𑀓𑀸𑀭𑀡𑀁. 𑀧𑀮𑀺𑀖𑀧𑀭𑀺𑀯𑀢𑁆𑀢𑀺𑀓𑀦𑁆𑀢𑀺 𑀧𑀮𑀺𑀖𑀲𑁆𑀲 𑀯𑀺𑀬 𑀧𑀭𑀺𑀯𑀢𑁆𑀢𑀦𑀓𑀫𑁆𑀫𑀓𑀸𑀭𑀡𑀁. 𑀏𑀓𑀸𑀩𑀤𑁆𑀥𑀁 𑀓𑀭𑁄𑀦𑁆𑀢𑀺 𑀅𑀬𑀲𑀽𑀮𑀲𑁆𑀲 𑀓𑁄𑀝𑁆𑀝𑀦𑁂𑀦. 𑀧𑀮𑀸𑀮𑀧𑀻𑀞𑀓𑀦𑁆𑀢𑀺 𑀧𑀮𑀸𑀮𑀧𑀻𑀞𑀲𑁆𑀲 𑀯𑀺𑀬 𑀲𑀭𑀻𑀭𑀲𑁆𑀲 𑀲𑀁𑀯𑁂𑀮𑁆𑀮𑀦𑀓𑀫𑁆𑀫𑀓𑀸𑀭𑀡𑀁. 𑀓𑀸𑀭𑀡𑀺𑀓𑀸𑀢𑀺 𑀖𑀸𑀢𑀦𑀓𑀸𑀭𑀓𑀸. 𑀧𑀮𑀸𑀮𑀯𑀝𑁆𑀝𑀺𑀁 𑀯𑀺𑀬 𑀓𑀢𑁆𑀯𑀸𑀢𑀺 𑀬𑀣𑀸 𑀧𑀮𑀸𑀮𑀧𑀻𑀞𑀁 𑀓𑀭𑁄𑀦𑁆𑀢𑀸 𑀧𑀮𑀸𑀮𑀁 𑀯𑀝𑁆𑀝𑀺𑀁 𑀓𑀢𑁆𑀯𑀸 𑀲𑀁𑀯𑁂𑀮𑁆𑀮𑀦𑀯𑀲𑁂𑀦 𑀧𑀼𑀦 𑀯𑁂𑀞𑁂𑀦𑁆𑀢𑀺, 𑀏𑀯𑀁 𑀓𑀭𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀙𑀸𑀢𑀓𑀲𑀼𑀦𑀔𑁂𑀳𑀻𑀢𑀺 𑀔𑀼𑀤𑁆𑀤𑀓𑁂𑀳𑀺 𑀓𑁄𑀮𑁂𑀬𑁆𑀬𑀓𑀲𑀼𑀦𑀔𑁂𑀳𑀺. 𑀢𑁂 𑀳𑀺 𑀩𑀮𑀯𑀦𑁆𑀢𑀸 𑀚𑀯𑀬𑁄𑀕𑀸 𑀲𑀽𑀭𑀸 𑀘 𑀳𑁄𑀦𑁆𑀢𑀺. 𑀲𑀳𑀲𑁆𑀲𑀪𑀡𑁆𑀟𑀺𑀓𑀦𑁆𑀢𑀺 𑀲𑀳𑀲𑁆𑀲𑀢𑁆𑀣𑀯𑀺𑀓𑀁.

𑀬𑀸𑀳𑀦𑁆𑀢𑀺 𑀬𑀁 𑀅𑀳𑀁. 𑀬𑀦𑁆𑀢𑀺 𑀘 𑀓𑀸𑀭𑀡𑀯𑀘𑀦𑀁. 𑀢𑁂𑀦𑀸𑀳 ‘‘𑀬𑁂𑀦 𑀅𑀳’’𑀦𑁆𑀢𑀺. 𑀙𑀺𑀦𑁆𑀦𑀫𑀽𑀮𑀓𑁂𑀢𑀺 𑀢𑀡𑁆𑀳𑀸𑀫𑀽𑀮𑀲𑁆𑀲 𑀉𑀘𑁆𑀙𑀺𑀦𑁆𑀦𑀢𑁆𑀢𑀸 𑀲𑀜𑁆𑀙𑀺𑀦𑁆𑀦𑀫𑀽𑀮𑀓𑁂.

𑀯𑀚𑁆𑀚𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀧𑀥𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁨. 𑀤𑀼𑀢𑀺𑀬𑁂 𑀉𑀪𑀢𑁄𑀩𑁆𑀬𑀽𑀴𑁆𑀳𑀲𑀗𑁆𑀕𑀸𑀫𑀧𑁆𑀧𑀯𑁂𑀲𑀦𑀲𑀤𑀺𑀲𑀦𑁆𑀢𑀺 𑀬𑀼𑀤𑁆𑀥𑀢𑁆𑀣𑀸𑀬 𑀉𑀪𑀢𑁄𑀭𑀸𑀲𑀺𑀓𑀢𑀘𑀢𑀼𑀭𑀗𑁆𑀕𑀺𑀦𑀺𑀲𑁂𑀦𑀸𑀫𑀚𑁆𑀛𑀧𑁆𑀧𑀯𑁂𑀲𑀦𑀲𑀤𑀺𑀲𑀁. 𑀤𑀸𑀦𑀜𑁆𑀘 𑀬𑀼𑀤𑁆𑀥𑀜𑁆𑀘 𑀲𑀫𑀸𑀦𑀫𑀸𑀳𑀽𑀢𑀺 𑀏𑀢𑁆𑀣 𑀓𑀣𑀁 𑀧𑀦𑀻𑀤𑀫𑀼𑀪𑀬𑀁 𑀲𑀫𑀸𑀦𑀁? 𑀚𑀻𑀯𑀺𑀢𑀯𑀺𑀦𑀸𑀲𑀪𑀻𑀭𑀼𑀓𑁄 𑀳𑀺 𑀬𑀼𑀚𑁆𑀛𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀪𑁄𑀕𑀓𑁆𑀔𑀬𑀪𑀻𑀭𑀼𑀓𑁄 𑀤𑀸𑀦𑀁 𑀤𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. ‘‘𑀚𑀻𑀯𑀺𑀢𑀜𑁆𑀘 𑀭𑀓𑁆𑀔𑀺𑀲𑁆𑀲𑀸𑀫𑀺, 𑀬𑀼𑀚𑁆𑀛𑀺𑀲𑁆𑀲𑀸𑀫𑀻’’𑀢𑀺 𑀳𑀺 𑀯𑀤𑀦𑁆𑀢𑁄 𑀦 𑀬𑀼𑀚𑁆𑀛𑀢𑀺, 𑀚𑀻𑀯𑀺𑀢𑁂 𑀧𑀦 𑀆𑀮𑀬𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 ‘‘𑀳𑀢𑁆𑀣𑀧𑀸𑀤𑀸𑀤𑀺𑀘𑁆𑀙𑁂𑀤𑁄 𑀯𑀸 𑀳𑁄𑀢𑀼 𑀫𑀭𑀡𑀁 𑀯𑀸, 𑀕𑀡𑁆𑀳𑀺𑀲𑁆𑀲𑀸𑀫𑁂𑀢𑀁 𑀇𑀲𑁆𑀲𑀭𑀺𑀬’’𑀦𑁆𑀢𑀺 𑀉𑀲𑁆𑀲𑀳𑀦𑁆𑀢𑁄𑀯 𑀬𑀼𑀚𑁆𑀛𑀢𑀺. ‘‘𑀪𑁄𑀕𑁂 𑀘 𑀭𑀓𑁆𑀔𑀺𑀲𑁆𑀲𑀸𑀫𑀺, 𑀤𑀸𑀦𑀜𑁆𑀘 𑀤𑀲𑁆𑀲𑀸𑀫𑀻’’𑀢𑀺 𑀯𑀤𑀦𑁆𑀢𑁄𑀧𑀺 𑀦 𑀤𑀤𑀸𑀢𑀺, 𑀪𑁄𑀕𑁂𑀲𑀼 𑀧𑀦 𑀆𑀮𑀬𑀁 𑀧𑀺𑀲𑁆𑀲𑀚𑁆𑀚𑁂𑀢𑁆𑀯𑀸 ‘‘𑀫𑀳𑀸𑀤𑀸𑀦𑀁 𑀤𑀲𑁆𑀲𑀸𑀫𑀻’’𑀢𑀺 𑀉𑀲𑁆𑀲𑀳𑀦𑁆𑀢𑁄𑀯 𑀤𑁂𑀢𑀺. 𑀏𑀯𑀁 𑀤𑀸𑀦𑀜𑁆𑀘 𑀬𑀼𑀤𑁆𑀥𑀜𑁆𑀘 𑀲𑀫𑀁 𑀳𑁄𑀢𑀺. 𑀓𑀺𑀜𑁆𑀘 𑀪𑀺𑀬𑁆𑀬𑁄 𑁋 𑀅𑀧𑁆𑀧𑀸𑀧𑀺 𑀲𑀦𑁆𑀢𑀸 𑀩𑀳𑀼𑀓𑁂 𑀚𑀺𑀦𑀦𑁆𑀢𑀺, 𑀬𑀣𑀸 𑀘 𑀬𑀼𑀤𑁆𑀥𑁂 𑀅𑀧𑁆𑀧𑀓𑀸𑀧𑀺 𑀯𑀻𑀭𑀧𑀼𑀭𑀺𑀲𑀸 𑀩𑀳𑀼𑀓𑁂 𑀪𑀻𑀭𑀼𑀧𑀼𑀭𑀺𑀲𑁂 𑀚𑀺𑀦𑀦𑁆𑀢𑀺, 𑀏𑀯𑀁 𑀲𑀤𑁆𑀥𑀸𑀤𑀺𑀲𑀫𑁆𑀧𑀦𑁆𑀦𑁄 𑀅𑀧𑁆𑀧𑀓𑀫𑁆𑀧𑀺 𑀤𑀸𑀦𑀁 𑀤𑀤𑀦𑁆𑀢𑁄 𑀩𑀳𑀼𑀯𑀺𑀥𑀁 𑀮𑁄𑀪𑀤𑁄𑀲𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀤𑀺𑀪𑁂𑀤𑀁 𑀢𑀧𑁆𑀧𑀝𑀺𑀧𑀓𑁆𑀔𑀁 𑀅𑀪𑀺𑀪𑀯𑀢𑀺, 𑀩𑀳𑀼𑀜𑁆𑀘 𑀤𑀸𑀦𑀯𑀺𑀧𑀸𑀓𑀁 𑀅𑀥𑀺𑀕𑀘𑁆𑀙𑀢𑀺. 𑀏𑀯𑀫𑁆𑀧𑀺 𑀤𑀸𑀦𑀜𑁆𑀘 𑀬𑀼𑀤𑁆𑀥𑀜𑁆𑀘 𑀲𑀫𑀸𑀦𑀁. 𑀢𑁂𑀦𑀸𑀳 ‘‘𑀅𑀧𑁆𑀧𑀫𑁆𑀧𑀺 𑀘𑁂 𑀲𑀤𑁆𑀤𑀳𑀸𑀦𑁄 𑀤𑀤𑀸𑀢𑀺, 𑀢𑁂𑀦𑁂𑀯 𑀲𑁄 𑀳𑁄𑀢𑀺 𑀲𑀼𑀔𑀻 𑀧𑀭𑀢𑁆𑀣𑀸’’𑀢𑀺.

𑀅𑀕𑀸𑀭𑀲𑁆𑀲 𑀳𑀺𑀢𑀁 𑀓𑀲𑀺𑀕𑁄𑀭𑀓𑁆𑀔𑀸𑀤𑀺 𑀅𑀕𑀸𑀭𑀺𑀬𑀁, 𑀢𑀁 𑀦𑀢𑁆𑀣𑀺 𑀏𑀢𑁆𑀣𑀸𑀢𑀺 𑀅𑀦𑀕𑀸𑀭𑀺𑀬𑀁, 𑀧𑀩𑁆𑀩𑀚𑁆𑀚𑀸𑀢𑀺 𑀆𑀳 ‘‘𑀅𑀕𑀸𑀭𑀲𑁆𑀲…𑀧𑁂… 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚’’𑀦𑁆𑀢𑀺. 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑀢𑁆𑀣𑀸𑀬𑀸𑀢𑀺 𑀏𑀢𑁆𑀣 𑀘𑀢𑁆𑀢𑀸𑀭𑁄 𑀉𑀧𑀥𑀻 𑁋 𑀓𑀸𑀫𑀼𑀧𑀥𑀺, 𑀔𑀦𑁆𑀥𑀼𑀧𑀥𑀺, 𑀓𑀺𑀮𑁂𑀲𑀼𑀧𑀥𑀺, 𑀅𑀪𑀺𑀲𑀗𑁆𑀔𑀸𑀭𑀼𑀧𑀥𑀻𑀢𑀺. 𑀓𑀸𑀫𑀸𑀧𑀺 𑀳𑀺 ‘‘𑀬𑀁 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁, 𑀅𑀬𑀁 𑀓𑀸𑀫𑀸𑀦𑀁 𑀅𑀲𑁆𑀲𑀸𑀤𑁄’’𑀢𑀺 (𑀅. 𑀦𑀺. 𑁯.𑁩𑁪) 𑀏𑀯𑀁 𑀯𑀼𑀢𑁆𑀢𑀲𑁆𑀲 𑀲𑀼𑀔𑀲𑁆𑀲, 𑀢𑀤𑀲𑁆𑀲𑀸𑀤𑀦𑀺𑀫𑀺𑀢𑁆𑀢𑀲𑁆𑀲 𑀯𑀸 𑀤𑀼𑀓𑁆𑀔𑀲𑁆𑀲 𑀅𑀥𑀺𑀝𑁆𑀞𑀸𑀦𑀪𑀸𑀯𑀢𑁄 𑀉𑀧𑀥𑀻𑀬𑀢𑀺 𑀏𑀢𑁆𑀣 𑀲𑀼𑀔𑀦𑁆𑀢𑀺 𑀇𑀫𑀺𑀦𑀸 𑀯𑀘𑀦𑀢𑁆𑀣𑁂𑀦 ‘‘𑀉𑀧𑀥𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀔𑀦𑁆𑀥𑀸𑀧𑀺 𑀔𑀦𑁆𑀥𑀫𑀽𑀮𑀓𑀲𑁆𑀲 𑀤𑀼𑀓𑁆𑀔𑀲𑁆𑀲 𑀅𑀥𑀺𑀝𑁆𑀞𑀸𑀦𑀪𑀸𑀯𑀢𑁄, 𑀓𑀺𑀮𑁂𑀲𑀸𑀧𑀺 𑀅𑀧𑀸𑀬𑀤𑀼𑀓𑁆𑀔𑀲𑁆𑀲 𑀅𑀥𑀺𑀝𑁆𑀞𑀸𑀦𑀪𑀸𑀯𑀢𑁄, 𑀅𑀪𑀺𑀲𑀗𑁆𑀔𑀸𑀭𑀸𑀧𑀺 𑀪𑀯𑀤𑀼𑀓𑁆𑀔𑀲𑁆𑀲 𑀅𑀥𑀺𑀝𑁆𑀞𑀸𑀦𑀪𑀸𑀯𑀢𑁄 ‘‘𑀉𑀧𑀥𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀲𑀩𑁆𑀩𑁂𑀲𑀁 𑀉𑀧𑀥𑀻𑀦𑀁 𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀧𑀳𑀸𑀦𑀁 𑀏𑀢𑁆𑀣𑀸𑀢𑀺 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑀁, 𑀦𑀺𑀩𑁆𑀩𑀸𑀦𑀁. 𑀢𑁂𑀦𑀸𑀳 ‘‘𑀲𑀩𑁆𑀩𑁂𑀲𑀁 𑀔𑀦𑁆𑀥𑀽𑀧𑀥𑀺…𑀧𑁂… 𑀦𑀺𑀩𑁆𑀩𑀸𑀦𑀲𑁆𑀲 𑀅𑀢𑁆𑀣𑀸𑀬𑀸’’𑀢𑀺.

𑀧𑀥𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀢𑀧𑀦𑀻𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁩. 𑀢𑀢𑀺𑀬𑁂 𑀢𑀧𑀦𑀻𑀬𑀸𑀢𑀺 𑀏𑀢𑁆𑀣 𑀓𑀢𑁆𑀢𑀼𑀅𑀢𑁆𑀣𑁂 𑀅𑀦𑀻𑀬-𑀲𑀤𑁆𑀤𑁄𑀢𑀺 𑀆𑀳 ‘‘𑀢𑀧𑀦𑁆𑀢𑀻𑀢𑀺 𑀢𑀧𑀦𑀻𑀬𑀸’’𑀢𑀺. 𑀢𑀧𑀦𑁆𑀢𑀻𑀢𑀺 𑀯𑀺𑀩𑀸𑀥𑁂𑀦𑁆𑀢𑀺, 𑀯𑀺𑀳𑁂𑀞𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑀧𑀦𑀁 𑀯𑀸 𑀤𑀼𑀓𑁆𑀔𑀁, 𑀤𑀺𑀝𑁆𑀞𑁂 𑀘𑁂𑀯 𑀥𑀫𑁆𑀫𑁂 𑀅𑀪𑀺𑀲𑀫𑁆𑀧𑀭𑀸𑀬𑀜𑁆𑀘 𑀢𑀲𑁆𑀲 𑀉𑀧𑁆𑀧𑀸𑀤𑀦𑁂𑀦 𑀘𑁂𑀯 𑀅𑀦𑀼𑀩𑀮𑀧𑁆𑀧𑀤𑀸𑀦𑁂𑀦 𑀘 𑀳𑀺𑀢𑀸𑀢𑀺 𑀢𑀧𑀦𑀻𑀬𑀸. 𑀅𑀣 𑀯𑀸 𑀢𑀧𑀦𑁆𑀢𑀺 𑀢𑁂𑀦𑀸𑀢𑀺 𑀢𑀧𑀦𑀁, 𑀅𑀦𑀼𑀢𑀸𑀧𑁄, 𑀯𑀺𑀧𑁆𑀧𑀝𑀺𑀲𑀸𑀭𑁄𑀢𑀺 𑀅𑀢𑁆𑀣𑁄. 𑀢𑀲𑁆𑀲 𑀳𑁂𑀢𑀼𑀪𑀸𑀯𑀢𑁄 𑀳𑀺𑀢𑀸𑀢𑀺 𑀢𑀧𑀦𑀻𑀬𑀸. 𑀅𑀦𑀼𑀲𑁄𑀘𑀢𑀻𑀢𑀺 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑀼𑀢𑁆𑀯𑀸 𑀓𑀢𑀸𑀓𑀢𑀁 𑀅𑀦𑀼𑀕𑀫𑁆𑀫 𑀲𑁄𑀘𑀢𑀺. 𑀲𑁄𑀘𑀦𑀜𑁆𑀳𑀺 𑀓𑀢𑀢𑁆𑀢𑀸 𑀘 𑀳𑁄𑀢𑀺 𑀅𑀓𑀢𑀢𑁆𑀢𑀸 𑀘. 𑀢𑀣𑀸 𑀘𑁂𑀯 𑀧𑀸𑀴𑀺𑀬𑀁 𑀯𑀺𑀪𑀢𑁆𑀢𑀁. 𑀦𑀦𑁆𑀤𑀬𑀓𑁆𑀔𑀸𑀤𑀻𑀦𑀁 𑀯𑀢𑁆𑀣𑀽𑀦𑀺 𑀧𑀸𑀓𑀝𑀸𑀦𑀻𑀢𑀺 𑀢𑀸𑀦𑀺 𑀅𑀤𑀲𑁆𑀲𑁂𑀢𑁆𑀯𑀸 𑀤𑁆𑀯𑁂𑀪𑀸𑀢𑀺𑀓𑀯𑀢𑁆𑀣𑀼𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑁂 𑀓𑀺𑀭𑀸’’𑀢𑀺 𑀆𑀤𑀺𑀫𑀸𑀳. 𑀢𑀢𑁆𑀣 𑀢𑁂𑀢𑀺 𑀤𑁆𑀯𑁂 𑀪𑀸𑀢𑀭𑁄. 𑀧𑀼𑀦 𑀓𑀺𑀁 𑀫𑀕𑁆𑀕𑀲𑀻𑀢𑀺 𑀧𑀼𑀦 𑀓𑀺𑀁 𑀇𑀘𑁆𑀙𑀲𑀺.

𑀢𑀧𑀦𑀻𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀉𑀧𑀜𑁆𑀜𑀸𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁫. 𑀧𑀜𑁆𑀘𑀫𑁂 𑀇𑀫𑀜𑁆𑀳𑀺 𑀥𑀫𑁆𑀫𑀤𑁆𑀯𑀬𑀦𑁆𑀢𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀅𑀲𑀦𑁆𑀢𑀼𑀝𑁆𑀞𑀺𑀢𑀸, 𑀧𑀥𑀸𑀦𑀲𑁆𑀫𑀺𑀁 𑀅𑀦𑁄𑀲𑀓𑁆𑀓𑀦𑀲𑀗𑁆𑀔𑀸𑀢𑀁 𑀥𑀫𑁆𑀫𑀤𑁆𑀯𑀬𑀁. 𑀇𑀫𑀺𑀦𑀸𑀢𑀺 ‘‘𑀅𑀲𑀦𑁆𑀢𑀼𑀝𑁆𑀞𑀺𑀢𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀽’’𑀢𑀺 𑀯𑀘𑀦𑁂𑀦. 𑀇𑀫𑀁 𑀤𑀻𑀧𑁂𑀢𑀻𑀢𑀺 ‘‘𑀬𑀸𑀯 𑀲𑁄 𑀉𑀧𑁆𑀧𑀚𑁆𑀚𑀢𑀺, 𑀦 𑀢𑀸𑀯𑀸𑀳𑀁 𑀲𑀦𑁆𑀢𑀼𑀝𑁆𑀞𑁄 𑀅𑀳𑁄𑀲𑀺’’𑀦𑁆𑀢𑀺 𑀏𑀢𑀁 𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀯𑀓𑁆𑀔𑀫𑀸𑀦𑀢𑁆𑀣𑀁 𑀤𑀻𑀧𑁂𑀢𑀺. 𑀧𑀥𑀸𑀦𑀲𑁆𑀫𑀺𑀦𑁆𑀢𑀺 𑀯𑀻𑀭𑀺𑀬𑀸𑀭𑀫𑁆𑀪𑁂. 𑀇𑀫𑀫𑀢𑁆𑀣𑀦𑁆𑀢𑀺 ‘‘𑀧𑀥𑀸𑀦𑀲𑁆𑀫𑀺𑀜𑁆𑀘𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀫𑀢𑁆𑀣𑀁. 𑀯𑀻𑀭𑀺𑀬𑀧𑁆𑀧𑀯𑀸𑀳𑁂 𑀯𑀢𑁆𑀢𑀫𑀸𑀦𑁂 𑀅𑀦𑁆𑀢𑀭𑀸 𑀏𑀯 𑀧𑀝𑀺𑀕𑀫𑀦𑀁 𑀦𑀺𑀯𑀢𑁆𑀢𑀦𑀁 𑀧𑀝𑀺𑀯𑀸𑀦𑀁, 𑀢𑀤𑀲𑁆𑀲 𑀅𑀢𑁆𑀣𑀻𑀢𑀺 𑀧𑀝𑀺𑀯𑀸𑀦𑀻, 𑀦 𑀧𑀝𑀺𑀯𑀸𑀦𑀻 𑀅𑀧𑁆𑀧𑀝𑀺𑀯𑀸𑀦𑀻, 𑀢𑀲𑁆𑀲 𑀪𑀸𑀯𑁄 𑀅𑀧𑁆𑀧𑀝𑀺𑀯𑀸𑀦𑀺𑀢𑀸, 𑀅𑀦𑁄𑀲𑀓𑁆𑀓𑀦𑀸𑀢𑀺 𑀆𑀳 ‘‘𑀅𑀧𑁆𑀧𑀝𑀺𑀯𑀸𑀦𑀺𑀢𑀸𑀢𑀺 𑀅𑀧𑁆𑀧𑀝𑀺𑀓𑁆𑀓𑀫𑀦𑀸 𑀅𑀦𑁄𑀲𑀓𑁆𑀓𑀦𑀸’’𑀢𑀺. 𑀢𑀢𑁆𑀣 𑀅𑀦𑁄𑀲𑀓𑁆𑀓𑀦𑀸𑀢𑀺 𑀅𑀧𑁆𑀧𑀝𑀺𑀦𑀺𑀯𑀢𑁆𑀢𑀺.

𑀆𑀕𑀫𑀦𑀻𑀬𑀧𑀝𑀺𑀧𑀤𑀸𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀲𑀗𑁆𑀔𑀸𑀢𑀸 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀢𑁆𑀢𑀺. 𑀲𑀸 𑀳𑀺 𑀆𑀕𑀘𑁆𑀙𑀦𑁆𑀢𑀺 𑀯𑀺𑀲𑁂𑀲𑀫𑀥𑀺𑀕𑀘𑁆𑀙𑀦𑁆𑀢𑀺 𑀏𑀢𑀸𑀬, 𑀆𑀕𑀘𑁆𑀙𑀢𑀺 𑀯𑀸 𑀯𑀺𑀲𑁂𑀲𑀸𑀥𑀺𑀕𑀫𑁄 𑀏𑀢𑀸𑀬𑀸𑀢𑀺 𑀆𑀕𑀫𑀦𑀻𑀬𑀸, 𑀲𑀸 𑀏𑀯 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀢𑁄 𑀧𑀝𑀺𑀧𑀤𑀸𑀢𑀺 𑀆𑀕𑀫𑀦𑀻𑀬𑀧𑀝𑀺𑀧𑀤𑀸. 𑀅𑀧𑁆𑀧𑀝𑀺𑀯𑀸𑀦𑀧𑀥𑀸𑀦𑀦𑁆𑀢𑀺 𑀑𑀲𑀓𑁆𑀓𑀦𑀸𑀭𑀳𑀺𑀢𑀧𑁆𑀧𑀥𑀸𑀦𑀁, 𑀅𑀦𑁆𑀢𑀭𑀸 𑀅𑀦𑁄𑀲𑀓𑁆𑀓𑀺𑀢𑁆𑀯𑀸 𑀓𑀢𑀯𑀻𑀭𑀺𑀬𑀦𑁆𑀢𑀺 𑀅𑀢𑁆𑀣𑁄.

𑀉𑀧𑀜𑁆𑀜𑀸𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀲𑀁𑀬𑁄𑀚𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁬. 𑀙𑀝𑁆𑀞𑁂 𑀲𑀁𑀬𑁄𑀚𑀦𑀸𑀦𑀁 𑀳𑀺𑀢𑀸 𑀧𑀘𑁆𑀘𑀬𑀪𑀸𑀯𑁂𑀦𑀸𑀢𑀺 𑀲𑀁𑀬𑁄𑀚𑀦𑀺𑀬𑀸, 𑀢𑁂𑀪𑀽𑀫𑀓𑀸 𑀥𑀫𑁆𑀫𑀸. 𑀢𑁂𑀦𑀸𑀳 ‘‘𑀤𑀲𑀦𑁆𑀦𑀁 𑀲𑀁𑀬𑁄𑀚𑀦𑀸𑀦’’𑀦𑁆𑀢𑀺𑀆𑀤𑀺. 𑀲𑀁𑀬𑁄𑀚𑀦𑀺𑀬𑁂 𑀥𑀫𑁆𑀫𑁂 𑀅𑀲𑁆𑀲𑀸𑀤𑀢𑁄 𑀅𑀦𑀼𑀧𑀲𑁆𑀲𑀢𑀺 𑀲𑀻𑀮𑁂𑀦𑀸𑀢𑀺 𑀅𑀲𑁆𑀲𑀸𑀤𑀸𑀦𑀼𑀧𑀲𑁆𑀲𑀻, 𑀢𑀲𑁆𑀲 𑀪𑀸𑀯𑁄 𑀅𑀲𑁆𑀲𑀸𑀤𑀸𑀦𑀼𑀧𑀲𑁆𑀲𑀺𑀢𑀸. 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀺𑀢𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀉𑀓𑁆𑀓𑀡𑁆𑀞𑀦𑀯𑀲𑁂𑀦𑀸𑀢𑀺 𑀲𑀁𑀬𑁄𑀚𑀦𑀺𑀬𑁂𑀲𑀼 𑀢𑁂𑀪𑀽𑀫𑀓𑀥𑀫𑁆𑀫𑁂𑀲𑀼 𑀦𑀺𑀩𑁆𑀩𑀺𑀦𑁆𑀤𑀦𑀯𑀲𑁂𑀦. 𑀚𑀦𑀦𑀁 𑀚𑀸𑀢𑀺, 𑀔𑀦𑁆𑀥𑀸𑀦𑀁 𑀧𑀸𑀢𑀼𑀪𑀸𑀯𑁄𑀢𑀺 𑀆𑀳 ‘‘𑀚𑀸𑀢𑀺𑀬𑀸𑀢𑀺 𑀔𑀦𑁆𑀥𑀦𑀺𑀩𑁆𑀩𑀢𑁆𑀢𑀺𑀢𑁄’’𑀢𑀺, 𑀔𑀦𑁆𑀥𑀸𑀦𑀁 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀅𑀧𑀭𑀸𑀧𑀭𑀁 𑀦𑀺𑀩𑁆𑀩𑀢𑁆𑀢𑀺𑀢𑁄𑀢𑀺 𑀅𑀢𑁆𑀣𑁄. 𑀔𑀦𑁆𑀥𑀧𑀭𑀺𑀧𑀸𑀓𑁄 𑀏𑀓𑀪𑀯𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀔𑀦𑁆𑀥𑀸𑀦𑀁 𑀧𑀼𑀭𑀸𑀡𑀪𑀸𑀯𑁄. 𑀏𑀓𑀪𑀯𑀧𑀭𑀺𑀬𑀸𑀧𑀦𑁆𑀦𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀧𑁆𑀧𑀩𑀦𑁆𑀥𑀯𑀺𑀘𑁆𑀙𑁂𑀤𑀯𑀲𑁂𑀦 𑀔𑀦𑁆𑀥𑀸𑀦𑀁 𑀪𑁂𑀤𑁄 𑀇𑀥 𑀫𑀭𑀡𑀦𑁆𑀢𑀺 𑀆𑀳 ‘‘𑀫𑀭𑀡𑁂𑀦𑀸𑀢𑀺 𑀔𑀦𑁆𑀥𑀪𑁂𑀤𑀢𑁄’’𑀢𑀺. 𑀅𑀦𑁆𑀢𑁄𑀦𑀺𑀚𑁆𑀛𑀸𑀦𑀁 𑀘𑀺𑀢𑁆𑀢𑀲𑀦𑁆𑀢𑀸𑀧𑁄. 𑀧𑀭𑀺𑀤𑁂𑀯𑁄 𑀦𑀸𑀫 𑀜𑀸𑀢𑀺𑀩𑁆𑀬𑀲𑀦𑀸𑀤𑀻𑀳𑀺 𑀨𑀼𑀝𑁆𑀞𑀲𑁆𑀲 𑀯𑀸𑀘𑀸𑀯𑀺𑀧𑁆𑀧𑀮𑀸𑀧𑁄. 𑀲𑁄 𑀘 𑀲𑁄𑀓𑀲𑀫𑀼𑀝𑁆𑀞𑀸𑀦𑁄𑀢𑀺 𑀆𑀳 ‘‘𑀢𑀦𑁆𑀦𑀺𑀲𑁆𑀲𑀺𑀢𑀮𑀸𑀮𑀧𑁆𑀧𑀺𑀢𑀮𑀓𑁆𑀔𑀡𑁂𑀳𑀺 𑀧𑀭𑀺𑀤𑁂𑀯𑁂𑀳𑀻’’𑀢𑀺. 𑀮𑀸𑀮𑀧𑁆𑀧𑀺𑀢𑀁 𑀯𑀸𑀘𑀸𑀯𑀺𑀧𑁆𑀧𑀮𑀸𑀧𑁄, 𑀲𑁄 𑀘 𑀅𑀢𑁆𑀣𑀢𑁄 𑀲𑀤𑁆𑀤𑁄𑀬𑁂𑀯.

𑀤𑀼𑀓𑁆𑀔𑀦𑁆𑀢𑀺 𑀇𑀥 𑀓𑀸𑀬𑀺𑀓𑀁 𑀤𑀼𑀓𑁆𑀔𑀁 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀓𑀸𑀬𑀧𑀝𑀺𑀧𑀻𑀴𑀦𑀤𑀼𑀓𑁆𑀔𑁂𑀳𑀻’’𑀢𑀺. 𑀫𑀦𑁄𑀯𑀺𑀖𑀸𑀢𑀤𑁄𑀫𑀦𑀲𑁆𑀲𑁂𑀳𑀻𑀢𑀺 𑀫𑀦𑀲𑁄 𑀯𑀺𑀖𑀸𑀢𑀓𑀭𑁂𑀳𑀺 𑀤𑁄𑀫𑀦𑀲𑁆𑀲𑁂𑀳𑀺. 𑀩𑁆𑀬𑀸𑀧𑀸𑀤𑀲𑀫𑁆𑀧𑀬𑁄𑀕𑁂𑀦 𑀫𑀦𑀲𑁄 𑀯𑀺𑀳𑀦𑀦𑀭𑀲𑀜𑁆𑀳𑀺 𑀤𑁄𑀫𑀦𑀲𑁆𑀲𑀁. 𑀪𑀼𑀲𑁄 𑀆𑀬𑀸𑀲𑁄 𑀉𑀧𑀸𑀬𑀸𑀲𑁄 𑀬𑀣𑀸 ‘‘𑀪𑀼𑀲𑀫𑀸𑀤𑀸𑀦𑀁 𑀉𑀧𑀸𑀤𑀸𑀦’’𑀦𑁆𑀢𑀺, 𑀲𑁄 𑀘 𑀅𑀢𑁆𑀣𑀢𑁄 𑀜𑀸𑀢𑀺𑀩𑁆𑀬𑀲𑀦𑀸𑀤𑀻𑀳𑀺 𑀨𑀼𑀝𑁆𑀞𑀲𑁆𑀲 𑀅𑀥𑀺𑀫𑀢𑁆𑀢𑀘𑁂𑀢𑁄𑀤𑀼𑀓𑁆𑀔𑀧𑁆𑀧𑀪𑀸𑀯𑀺𑀢𑁄 𑀤𑁄𑀲𑁄𑀬𑁂𑀯. 𑀓𑀸𑀬𑀘𑀺𑀢𑁆𑀢𑀸𑀦𑀜𑁆𑀳𑀺 𑀆𑀬𑀸𑀲𑀦𑀯𑀲𑁂𑀦 𑀤𑁄𑀲𑀲𑁆𑀲𑁂𑀯 𑀧𑀯𑀢𑁆𑀢𑀺𑀆𑀓𑀸𑀭𑁄 𑀉𑀧𑀸𑀬𑀸𑀲𑁄𑀢𑀺 𑀯𑀼𑀘𑁆𑀘𑀢𑀺 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑁄. 𑀢𑀁 𑀘𑀼𑀤𑁆𑀤𑀲𑀳𑀺 𑀅𑀓𑀼𑀲𑀮𑀘𑁂𑀢𑀲𑀺𑀓𑁂𑀳𑀺 𑀅𑀜𑁆𑀜𑁄 𑀏𑀓𑁄 𑀘𑁂𑀢𑀲𑀺𑀓𑀥𑀫𑁆𑀫𑁄𑀢𑀺 𑀏𑀓𑁂. 𑀬𑀁 𑀯𑀺𑀲𑀸𑀤𑁄𑀢𑀺 𑀘 𑀯𑀤𑀦𑁆𑀢𑀺.

𑀲𑀁𑀬𑁄𑀚𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀓𑀡𑁆𑀳𑀲𑀼𑀢𑁆𑀢𑀯𑀡𑁆𑀡𑀦𑀸

𑁭. 𑀲𑀢𑁆𑀢𑀫𑁂 𑀬𑀣𑀸 ‘‘𑀓𑀡𑁆𑀳𑀸 𑀕𑀸𑀯𑀻’’𑀢𑀺𑀆𑀤𑀻𑀲𑀼 𑀓𑀸𑀴𑀯𑀡𑁆𑀡𑁂𑀦 𑀲𑀫𑀦𑁆𑀦𑀸𑀕𑀢𑀸 ‘‘𑀓𑀡𑁆𑀳𑀸’’𑀢𑀺 𑀯𑀼𑀘𑁆𑀘𑀢𑀺, 𑀦 𑀏𑀯𑀁 𑀓𑀸𑀴𑀯𑀡𑁆𑀡𑀢𑀸𑀬 𑀥𑀫𑁆𑀫𑀸 ‘‘𑀓𑀡𑁆𑀳𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀅𑀣 𑀔𑁄 𑀓𑀡𑁆𑀳𑀸𑀪𑀺𑀚𑀸𑀢𑀺𑀦𑀺𑀩𑁆𑀩𑀢𑁆𑀢𑀺𑀳𑁂𑀢𑀼𑀢𑁄 𑀅𑀧𑁆𑀧𑀪𑀲𑁆𑀲𑀭𑀪𑀸𑀯𑀓𑀭𑀡𑀢𑁄 𑀯𑀸 ‘‘𑀓𑀡𑁆𑀳𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀦 𑀓𑀸𑀴𑀯𑀡𑁆𑀡𑀢𑀸𑀬𑀸’’𑀢𑀺𑀆𑀤𑀺𑀫𑀸𑀳. 𑀓𑀡𑁆𑀳𑀢𑀸𑀬𑀸𑀢𑀺 𑀓𑀡𑁆𑀳𑀸𑀪𑀺𑀚𑀸𑀢𑀺𑀢𑀸𑀬. 𑀓𑀡𑁆𑀳𑀸𑀪𑀺𑀚𑀸𑀢𑀻𑀢𑀺 𑀘 𑀅𑀧𑀸𑀬𑀸 𑀯𑀼𑀘𑁆𑀘𑀦𑁆𑀢𑀺 𑀫𑀦𑀼𑀲𑁆𑀲𑁂𑀲𑀼 𑀘 𑀤𑁄𑀪𑀕𑁆𑀕𑀺𑀬𑀁. 𑀲𑀭𑀲𑁂𑀦𑀸𑀢𑀺 𑀲𑀪𑀸𑀯𑁂𑀦. 𑀦 𑀳𑀺𑀭𑀻𑀬𑀢𑀺 𑀦 𑀮𑀚𑁆𑀚𑀢𑀻𑀢𑀺 𑀅𑀳𑀺𑀭𑀺𑀓𑁄, 𑀧𑀼𑀕𑁆𑀕𑀮𑁄, 𑀘𑀺𑀢𑁆𑀢𑀁, 𑀢𑀁 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀲𑀫𑀼𑀤𑀸𑀬𑁄 𑀯𑀸. 𑀢𑀲𑁆𑀲 𑀪𑀸𑀯𑁄 𑀅𑀳𑀺𑀭𑀺𑀓𑁆𑀓𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀏𑀓𑀲𑁆𑀲 𑀓-𑀓𑀸𑀭𑀲𑁆𑀲 𑀮𑁄𑀧𑀁 𑀓𑀢𑁆𑀯𑀸 𑀅𑀳𑀺𑀭𑀺𑀓𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀅𑀳𑀺𑀭𑀺𑀓𑀦𑁆𑀢𑀺 𑀅𑀳𑀺𑀭𑀺𑀓𑀪𑀸𑀯𑁄’’𑀢𑀺. 𑀦 𑀑𑀢𑁆𑀢𑀧𑁆𑀧𑀢𑀻𑀢𑀺 𑀅𑀦𑁄𑀢𑁆𑀢𑀸𑀧𑀻, 𑀧𑀼𑀕𑁆𑀕𑀮𑁄, 𑀬𑀣𑀸𑀯𑀼𑀢𑁆𑀢𑀥𑀫𑁆𑀫𑀲𑀫𑀼𑀤𑀸𑀬𑁄 𑀯𑀸, 𑀢𑀲𑁆𑀲 𑀪𑀸𑀯𑁄 𑀅𑀦𑁄𑀢𑁆𑀢𑀧𑁆𑀧𑀦𑁆𑀢𑀺 𑀆𑀳 ‘‘𑀅𑀦𑁄𑀢𑁆𑀢𑀸𑀧𑀺𑀪𑀸𑀯𑁄’’𑀢𑀺.

𑀓𑀡𑁆𑀳𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀲𑀼𑀓𑁆𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁮. 𑀅𑀝𑁆𑀞𑀫𑁂 ‘‘𑀲𑀼𑀓𑁆𑀓𑀁 𑀯𑀢𑁆𑀣’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬 𑀦 𑀯𑀡𑁆𑀡𑀲𑀼𑀓𑁆𑀓𑀢𑀸𑀬 𑀥𑀫𑁆𑀫𑀸𑀦𑀁 𑀲𑀼𑀓𑁆𑀓𑀢𑀸, 𑀅𑀣 𑀔𑁄 𑀲𑀼𑀓𑁆𑀓𑀸𑀪𑀺𑀚𑀸𑀢𑀺𑀳𑁂𑀢𑀼𑀢𑁄 𑀧𑀪𑀲𑁆𑀲𑀭𑀪𑀸𑀯𑀓𑀭𑀡𑀢𑁄 𑀘𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀦 𑀯𑀡𑁆𑀡𑀲𑀼𑀓𑁆𑀓𑀢𑀸𑀬𑀸’’𑀢𑀺𑀆𑀤𑀺𑀫𑀸𑀳. 𑀲𑀼𑀓𑁆𑀓𑀢𑀸𑀬𑀸𑀢𑀺 𑀲𑀼𑀓𑁆𑀓𑀸𑀪𑀺𑀚𑀸𑀢𑀺𑀢𑀸𑀬. 𑀳𑀺𑀭𑀻 𑀧𑀸𑀧𑀥𑀫𑁆𑀫𑁂 𑀕𑀽𑀣𑀁 𑀯𑀺𑀬 𑀧𑀲𑁆𑀲𑀦𑁆𑀢𑀻 𑀚𑀺𑀕𑀼𑀘𑁆𑀙𑀢𑀻𑀢𑀺 𑀆𑀳 ‘‘𑀧𑀸𑀧𑀢𑁄 𑀚𑀺𑀕𑀼𑀘𑁆𑀙𑀦𑀮𑀓𑁆𑀔𑀡𑀸 𑀳𑀺𑀭𑀻’’𑀢𑀺. 𑀑𑀢𑁆𑀢𑀧𑁆𑀧𑀁 𑀢𑁂 𑀉𑀡𑁆𑀳𑀁 𑀯𑀺𑀬 𑀧𑀲𑁆𑀲𑀦𑁆𑀢𑀁 𑀢𑀢𑁄 𑀪𑀸𑀬𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀪𑀸𑀬𑀦𑀮𑀓𑁆𑀔𑀡𑀁 𑀑𑀢𑀧𑁆𑀧’’𑀦𑁆𑀢𑀺. 𑀇𑀤𑀜𑁆𑀘 𑀳𑀺𑀭𑁄𑀢𑁆𑀢𑀧𑁆𑀧𑀁 𑀅𑀜𑁆𑀜𑀫𑀜𑁆𑀜𑀯𑀺𑀧𑁆𑀧𑀬𑁄𑀕𑀻 𑀧𑀸𑀧𑀢𑁄 𑀯𑀺𑀫𑀼𑀔𑀪𑀽𑀢𑀜𑁆𑀘, 𑀢𑀲𑁆𑀫𑀸 𑀦𑁂𑀲𑀁 𑀇𑀤𑀁 𑀦𑀸𑀦𑀸𑀓𑀭𑀡𑀁 𑁋 𑀅𑀚𑁆𑀛𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀳𑀺𑀭𑀻, 𑀩𑀳𑀺𑀤𑁆𑀥𑀸𑀲𑀫𑀼𑀝𑁆𑀞𑀸𑀦𑀁 𑀑𑀢𑁆𑀢𑀧𑁆𑀧𑀁. 𑀅𑀢𑁆𑀢𑀸𑀥𑀺𑀧𑀢𑀺 𑀳𑀺𑀭𑀻, 𑀮𑁄𑀓𑀸𑀥𑀺𑀧𑀢𑀺 𑀑𑀢𑀧𑁆𑀧𑀁. 𑀮𑀚𑁆𑀚𑀸𑀲𑀪𑀸𑀯𑀲𑀡𑁆𑀞𑀺𑀢𑀸 𑀳𑀺𑀭𑀻, 𑀪𑀬𑀲𑀪𑀸𑀯𑀲𑀡𑁆𑀞𑀺𑀢𑀁 𑀑𑀢𑁆𑀢𑀧𑁆𑀧𑀁. 𑀲𑀧𑁆𑀧𑀢𑀺𑀲𑁆𑀲𑀯𑀮𑀓𑁆𑀔𑀡𑀸 𑀳𑀺𑀭𑀻, 𑀯𑀚𑁆𑀚𑀪𑀻𑀭𑀼𑀓𑀪𑀬𑀤𑀲𑁆𑀲𑀸𑀯𑀺𑀮𑀓𑁆𑀔𑀡𑀁 𑀑𑀢𑁆𑀢𑀧𑁆𑀧𑀦𑁆𑀢𑀺.

𑀢𑀢𑁆𑀣 𑀅𑀚𑁆𑀛𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀳𑀺𑀭𑀺𑀁 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀲𑀫𑀼𑀝𑁆𑀞𑀸𑀧𑁂𑀢𑀺 𑀚𑀸𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸, 𑀯𑀬𑀁, 𑀲𑀽𑀭𑀪𑀸𑀯𑀁, 𑀩𑀸𑀳𑀼𑀲𑀘𑁆𑀘𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸. 𑀓𑀣𑀁? ‘‘𑀧𑀸𑀧𑀓𑀭𑀡𑀁 𑀦𑀸𑀫𑁂𑀢𑀁 𑀦 𑀚𑀸𑀢𑀺𑀲𑀫𑁆𑀧𑀦𑁆𑀦𑀸𑀦𑀁 𑀓𑀫𑁆𑀫𑀁, 𑀳𑀻𑀦𑀚𑀘𑁆𑀘𑀸𑀦𑀁 𑀓𑁂𑀯𑀝𑁆𑀝𑀸𑀤𑀻𑀦𑀁 𑀓𑀫𑁆𑀫𑀁, 𑀫𑀸𑀤𑀺𑀲𑀲𑁆𑀲 𑀚𑀸𑀢𑀺𑀲𑀫𑁆𑀧𑀦𑁆𑀦𑀲𑁆𑀲 𑀇𑀤𑀁 𑀓𑀸𑀢𑀼𑀁 𑀦 𑀬𑀼𑀢𑁆𑀢’’𑀦𑁆𑀢𑀺 𑀏𑀯𑀁 𑀢𑀸𑀯 𑀚𑀸𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀸𑀧𑀁 𑀅𑀓𑀭𑁄𑀦𑁆𑀢𑁄 𑀳𑀺𑀭𑀺𑀁 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀢𑀣𑀸 ‘‘𑀧𑀸𑀧𑀓𑀭𑀡𑀁 𑀦𑀸𑀫𑁂𑀢𑀁 𑀤𑀳𑀭𑁂𑀳𑀺 𑀓𑀢𑁆𑀢𑀩𑁆𑀩𑀁 𑀓𑀫𑁆𑀫𑀁, 𑀫𑀸𑀤𑀺𑀲𑀲𑁆𑀲 𑀯𑀬𑁂 𑀞𑀺𑀢𑀲𑁆𑀲 𑀇𑀤𑀁 𑀓𑀸𑀢𑀼𑀁 𑀦 𑀬𑀼𑀢𑁆𑀢’’𑀦𑁆𑀢𑀺 𑀏𑀯𑀁 𑀯𑀬𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀸𑀧𑀁 𑀅𑀓𑀭𑁄𑀦𑁆𑀢𑁄 𑀳𑀺𑀭𑀺𑀁 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀢𑀣𑀸 ‘‘𑀧𑀸𑀧𑀓𑀭𑀡𑀁 𑀦𑀸𑀫𑁂𑀢𑀁 𑀤𑀼𑀩𑁆𑀩𑀮𑀚𑀸𑀢𑀺𑀓𑀸𑀦𑀁 𑀓𑀫𑁆𑀫𑀁, 𑀫𑀸𑀤𑀺𑀲𑀲𑁆𑀲 𑀲𑀽𑀭𑀪𑀸𑀯𑀲𑀫𑁆𑀧𑀦𑁆𑀦𑀲𑁆𑀲 𑀇𑀤𑀁 𑀓𑀸𑀢𑀼𑀁 𑀦 𑀬𑀼𑀢𑁆𑀢’’𑀦𑁆𑀢𑀺 𑀏𑀯𑀁 𑀲𑀽𑀭𑀪𑀸𑀯𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀸𑀧𑀁 𑀅𑀓𑀭𑁄𑀦𑁆𑀢𑁄 𑀳𑀺𑀭𑀺𑀁 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀢𑀣𑀸 ‘‘𑀧𑀸𑀧𑀓𑀫𑁆𑀫𑀁 𑀦𑀸𑀫𑁂𑀢𑀁 𑀅𑀦𑁆𑀥𑀩𑀸𑀮𑀸𑀦𑀁 𑀓𑀫𑁆𑀫𑀁, 𑀦 𑀧𑀡𑁆𑀟𑀺𑀢𑀸𑀦𑀁, 𑀫𑀸𑀤𑀺𑀲𑀲𑁆𑀲 𑀧𑀡𑁆𑀟𑀺𑀢𑀲𑁆𑀲 𑀩𑀳𑀼𑀲𑁆𑀲𑀼𑀢𑀲𑁆𑀲 𑀇𑀤𑀁 𑀓𑀸𑀢𑀼𑀁 𑀦 𑀬𑀼𑀢𑁆𑀢’’𑀦𑁆𑀢𑀺 𑀏𑀯𑀁 𑀩𑀸𑀳𑀼𑀲𑀘𑁆𑀘𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀸𑀧𑀁 𑀅𑀓𑀭𑁄𑀦𑁆𑀢𑁄 𑀳𑀺𑀭𑀺𑀁 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀏𑀯𑀁 𑀅𑀚𑁆𑀛𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀳𑀺𑀭𑀺𑀁 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑁄 𑀘 𑀳𑀺𑀭𑀺𑀁 𑀦𑀺𑀲𑁆𑀲𑀸𑀬 𑀧𑀸𑀧𑀓𑀫𑁆𑀫𑀁 𑀦 𑀓𑀭𑁄𑀢𑀺.

𑀓𑀣𑀁 𑀩𑀳𑀺𑀤𑁆𑀥𑀸𑀲𑀫𑀼𑀝𑁆𑀞𑀸𑀦𑀁 𑀑𑀢𑁆𑀢𑀧𑁆𑀧𑀁? ‘‘𑀲𑀘𑁂 𑀢𑁆𑀯𑀁 𑀧𑀸𑀧𑀓𑀫𑁆𑀫𑀁 𑀓𑀭𑀺𑀲𑁆𑀲𑀲𑀺, 𑀘𑀢𑀽𑀲𑀼 𑀧𑀭𑀺𑀲𑀸𑀲𑀼 𑀕𑀭𑀳𑀧𑁆𑀧𑀢𑁆𑀢𑁄 𑀪𑀯𑀺𑀲𑁆𑀲𑀲𑀺, 𑀢𑀢𑁄 𑀢𑀁 𑀲𑀻𑀮𑀯𑀦𑁆𑀢𑁄 𑀲𑀩𑁆𑀭𑀳𑁆𑀫𑀘𑀸𑀭𑀻 𑀯𑀺𑀯𑀚𑁆𑀚𑀺𑀲𑁆𑀲𑀦𑁆𑀢𑀻’’𑀢𑀺 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀩𑀳𑀺𑀤𑁆𑀥𑀸𑀲𑀫𑀼𑀝𑁆𑀞𑀸𑀦𑀁 𑀑𑀢𑁆𑀢𑀧𑁆𑀧𑀁 𑀦𑀺𑀲𑁆𑀲𑀸𑀬 𑀧𑀸𑀧𑀓𑀫𑁆𑀫𑀁 𑀦 𑀓𑀭𑁄𑀢𑀺. 𑀏𑀯𑀁 𑀩𑀳𑀺𑀤𑁆𑀥𑀸𑀲𑀫𑀼𑀝𑁆𑀞𑀸𑀦𑀁 𑀑𑀢𑁆𑀢𑀧𑁆𑀧𑀁.

𑀓𑀣𑀁 𑀅𑀢𑁆𑀢𑀸𑀥𑀺𑀧𑀢𑀺 𑀳𑀺𑀭𑀻? 𑀇𑀥𑁂𑀓𑀘𑁆𑀘𑁄 𑀓𑀼𑀮𑀧𑀼𑀢𑁆𑀢𑁄 𑀅𑀢𑁆𑀢𑀸𑀦𑀁 𑀅𑀥𑀺𑀧𑀢𑀺𑀁 𑀚𑁂𑀝𑁆𑀞𑀓𑀁 𑀓𑀢𑁆𑀯𑀸 ‘‘𑀫𑀸𑀤𑀺𑀲𑀲𑁆𑀲 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑀲𑁆𑀲 𑀩𑀳𑀼𑀲𑁆𑀲𑀼𑀢𑀲𑁆𑀲 𑀥𑀼𑀢𑀥𑀭𑀲𑁆𑀲 𑀦 𑀬𑀼𑀢𑁆𑀢𑀁 𑀧𑀸𑀧𑀓𑀫𑁆𑀫𑀁 𑀓𑀸𑀢𑀼’’𑀦𑁆𑀢𑀺 𑀧𑀸𑀧𑀁 𑀦 𑀓𑀭𑁄𑀢𑀺. 𑀏𑀯𑀁 𑀅𑀢𑁆𑀢𑀸𑀥𑀺𑀧𑀢𑀺 𑀳𑀺𑀭𑀻. 𑀢𑁂𑀦𑀸𑀳 𑀪𑀕𑀯𑀸 ‘‘𑀲𑁄 𑀅𑀢𑁆𑀢𑀸𑀦𑀁𑀬𑁂𑀯 𑀅𑀥𑀺𑀧𑀢𑀺𑀁 𑀓𑀭𑀺𑀢𑁆𑀯𑀸 𑀅𑀓𑀼𑀲𑀮𑀁 𑀧𑀚𑀳𑀢𑀺, 𑀓𑀼𑀲𑀮𑀁 𑀪𑀸𑀯𑁂𑀢𑀺, 𑀲𑀸𑀯𑀚𑁆𑀚𑀁 𑀧𑀚𑀳𑀢𑀺, 𑀅𑀦𑀯𑀚𑁆𑀚𑀁 𑀪𑀸𑀯𑁂𑀢𑀺, 𑀲𑀼𑀤𑁆𑀥𑀁 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀢𑀻’’𑀢𑀺 (𑀅. 𑀦𑀺. 𑁩.𑁪𑁦).

𑀓𑀣𑀁 𑀮𑁄𑀓𑀸𑀥𑀺𑀧𑀢𑀺 𑀑𑀢𑁆𑀢𑀧𑁆𑀧𑀁? 𑀇𑀥𑁂𑀓𑀘𑁆𑀘𑁄 𑀓𑀼𑀮𑀧𑀼𑀢𑁆𑀢𑁄 𑀮𑁄𑀓𑀁 𑀅𑀥𑀺𑀧𑀢𑀺𑀁 𑀚𑁂𑀝𑁆𑀞𑀓𑀁 𑀓𑀢𑁆𑀯𑀸 ‘‘𑀲𑀘𑁂 𑀔𑁄 𑀢𑁆𑀯𑀁 𑀧𑀸𑀧𑀓𑀫𑁆𑀫𑀁 𑀓𑀭𑁂𑀬𑁆𑀬𑀸𑀲𑀺, 𑀲𑀩𑁆𑀭𑀳𑁆𑀫𑀘𑀸𑀭𑀺𑀦𑁄 𑀢𑀸𑀯 𑀢𑀁 𑀚𑀸𑀦𑀺𑀲𑁆𑀲𑀦𑁆𑀢𑀺, 𑀫𑀳𑀺𑀤𑁆𑀥𑀺𑀓𑀸 𑀫𑀳𑀸𑀦𑀼𑀪𑀸𑀯𑀸 𑀮𑁄𑀓𑁂 𑀘 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀤𑁂𑀯𑀢𑀸 𑀘, 𑀢𑀲𑁆𑀫𑀸 𑀢𑁂 𑀦 𑀬𑀼𑀢𑁆𑀢𑀁 𑀧𑀸𑀧𑀁 𑀓𑀸𑀢𑀼’’𑀦𑁆𑀢𑀺 𑀧𑀸𑀧𑀓𑀫𑁆𑀫𑀁 𑀦 𑀓𑀭𑁄𑀢𑀺. 𑀬𑀣𑀸𑀳 𑁋 ‘‘𑀫𑀳𑀸 𑀔𑁄 𑀧𑀦𑀸𑀬𑀁 𑀮𑁄𑀓𑀲𑀦𑁆𑀦𑀺𑀯𑀸𑀲𑁄, 𑀫𑀳𑀦𑁆𑀢𑀲𑁆𑀫𑀺𑀁 𑀔𑁄 𑀧𑀦 𑀮𑁄𑀓𑀲𑀦𑁆𑀦𑀺𑀯𑀸𑀲𑁂 𑀲𑀦𑁆𑀢𑀺 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀇𑀤𑁆𑀥𑀺𑀫𑀦𑁆𑀢𑁄 𑀤𑀺𑀩𑁆𑀩𑀘𑀓𑁆𑀔𑀼𑀓𑀸 𑀧𑀭𑀘𑀺𑀢𑁆𑀢𑀯𑀺𑀤𑀼𑀦𑁄. 𑀢𑁂 𑀤𑀽𑀭𑀢𑁄𑀧𑀺 𑀧𑀲𑁆𑀲𑀦𑁆𑀢𑀺, 𑀆𑀲𑀦𑁆𑀦𑀸𑀧𑀺 𑀦 𑀤𑀺𑀲𑁆𑀲𑀦𑁆𑀢𑀺, 𑀘𑁂𑀢𑀲𑀸𑀧𑀺 𑀘𑀺𑀢𑁆𑀢𑀁 𑀚𑀸𑀦𑀦𑁆𑀢𑀺, 𑀢𑁂𑀧𑀺 𑀫𑀁 𑀏𑀯𑀁 𑀚𑀸𑀦𑀺𑀲𑁆𑀲𑀦𑁆𑀢𑀺 ‘𑀧𑀲𑁆𑀲𑀣, 𑀪𑁄, 𑀇𑀫𑀁 𑀓𑀼𑀮𑀧𑀼𑀢𑁆𑀢𑀁, 𑀲𑀤𑁆𑀥𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄 𑀲𑀫𑀸𑀦𑁄 𑀯𑁄𑀓𑀺𑀡𑁆𑀡𑁄 𑀯𑀺𑀳𑀭𑀢𑀺 𑀧𑀸𑀧𑀓𑁂𑀳𑀺 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀻’𑀢𑀺. 𑀲𑀦𑁆𑀢𑀺 𑀤𑁂𑀯𑀢𑀸 𑀇𑀤𑁆𑀥𑀺𑀫𑀦𑁆𑀢𑀺𑀦𑀺𑀬𑁄 𑀤𑀺𑀩𑁆𑀩𑀘𑀓𑁆𑀔𑀼𑀓𑀸 𑀧𑀭𑀘𑀺𑀢𑁆𑀢𑀯𑀺𑀤𑀼𑀦𑀺𑀬𑁄, 𑀢𑀸 𑀤𑀽𑀭𑀢𑁄𑀧𑀺 𑀧𑀲𑁆𑀲𑀦𑁆𑀢𑀺, 𑀆𑀲𑀦𑁆𑀦𑀸𑀧𑀺 𑀦 𑀤𑀺𑀲𑁆𑀲𑀦𑁆𑀢𑀺, 𑀘𑁂𑀢𑀲𑀸𑀧𑀺 𑀘𑀺𑀢𑁆𑀢𑀁 𑀚𑀸𑀦𑀦𑁆𑀢𑀺, 𑀢𑀸𑀧𑀺 𑀫𑀁 𑀚𑀸𑀦𑀺𑀲𑁆𑀲𑀦𑁆𑀢𑀺 ‘𑀧𑀲𑁆𑀲𑀣, 𑀪𑁄, 𑀇𑀫𑀁 𑀓𑀼𑀮𑀧𑀼𑀢𑁆𑀢𑀁, 𑀲𑀤𑁆𑀥𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄 𑀲𑀫𑀸𑀦𑁄 𑀯𑁄𑀓𑀺𑀡𑁆𑀡𑁄 𑀯𑀺𑀳𑀭𑀢𑀺 𑀧𑀸𑀧𑀓𑁂𑀳𑀺 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀻’𑀢𑀺…𑀧𑁂… 𑀲𑁄 𑀮𑁄𑀓𑀁𑀬𑁂𑀯 𑀅𑀥𑀺𑀧𑀢𑀺𑀁 𑀓𑀭𑀺𑀢𑁆𑀯𑀸 𑀅𑀓𑀼𑀲𑀮𑀁…𑀧𑁂… 𑀧𑀭𑀺𑀳𑀭𑀢𑀻’’𑀢𑀺. 𑀏𑀯𑀁 𑀮𑁄𑀓𑀸𑀥𑀺𑀧𑀢𑀺 𑀑𑀢𑁆𑀢𑀧𑁆𑀧𑀁.

𑀮𑀚𑁆𑀚𑀸𑀲𑀪𑀸𑀯𑀲𑀡𑁆𑀞𑀺𑀢𑀸𑀢𑀺 𑀏𑀢𑁆𑀣 𑀮𑀚𑁆𑀚𑀸𑀢𑀺 𑀮𑀚𑁆𑀚𑀦𑀸𑀓𑀸𑀭𑁄, 𑀢𑁂𑀦 𑀲𑀪𑀸𑀯𑁂𑀦 𑀲𑀡𑁆𑀞𑀺𑀢𑀸 𑀳𑀺𑀭𑀻. 𑀪𑀬𑀦𑁆𑀢𑀺 𑀅𑀧𑀸𑀬𑀪𑀬𑀁, 𑀢𑁂𑀦 𑀲𑀪𑀸𑀯𑁂𑀦 𑀲𑀡𑁆𑀞𑀺𑀢𑀁 𑀑𑀢𑁆𑀢𑀧𑁆𑀧𑀁. 𑀢𑀤𑀼𑀪𑀬𑀁 𑀧𑀸𑀧𑀧𑀭𑀺𑀯𑀚𑁆𑀚𑀦𑁂 𑀧𑀸𑀓𑀝𑀁 𑀳𑁄𑀢𑀺. 𑀢𑀢𑁆𑀣 𑀬𑀣𑀸 𑀤𑁆𑀯𑀻𑀲𑀼 𑀅𑀬𑁄𑀕𑀼𑀴𑁂𑀲𑀼 𑀏𑀓𑁄 𑀲𑀻𑀢𑀮𑁄 𑀪𑀯𑁂𑀬𑁆𑀬 𑀕𑀽𑀣𑀫𑀓𑁆𑀔𑀺𑀢𑁄, 𑀏𑀓𑁄 𑀉𑀡𑁆𑀳𑁄 𑀆𑀤𑀺𑀢𑁆𑀢𑁄. 𑀢𑁂𑀲𑀼 𑀬𑀣𑀸 𑀲𑀻𑀢𑀮𑀁 𑀕𑀽𑀣𑀫𑀓𑁆𑀔𑀺𑀢𑀢𑁆𑀢𑀸 𑀚𑀺𑀕𑀼𑀘𑁆𑀙𑀦𑁆𑀢𑁄 𑀯𑀺𑀜𑁆𑀜𑀼𑀚𑀸𑀢𑀺𑀓𑁄 𑀦 𑀕𑀡𑁆𑀳𑀸𑀢𑀺, 𑀇𑀢𑀭𑀁 𑀟𑀸𑀳𑀪𑀬𑁂𑀦. 𑀏𑀯𑀁 𑀧𑀡𑁆𑀟𑀺𑀢𑁄 𑀮𑀚𑁆𑀚𑀸𑀬 𑀚𑀺𑀕𑀼𑀘𑁆𑀙𑀦𑁆𑀢𑁄 𑀧𑀸𑀧𑀁 𑀦 𑀓𑀭𑁄𑀢𑀺, 𑀑𑀢𑁆𑀢𑀧𑁆𑀧𑁂𑀦 𑀅𑀧𑀸𑀬𑀪𑀬𑀪𑀻𑀢𑁄 𑀧𑀸𑀧𑀁 𑀦 𑀓𑀭𑁄𑀢𑀺, 𑀏𑀯𑀁 𑀮𑀚𑁆𑀚𑀸𑀲𑀪𑀸𑀯𑀲𑀡𑁆𑀞𑀺𑀢𑀸 𑀳𑀺𑀭𑀻, 𑀪𑀬𑀲𑀪𑀸𑀯𑀲𑀡𑁆𑀞𑀺𑀢𑀁 𑀑𑀢𑁆𑀢𑀧𑁆𑀧𑀁.

𑀓𑀣𑀁 𑀲𑀧𑁆𑀧𑀢𑀺𑀲𑁆𑀲𑀯𑀮𑀓𑁆𑀔𑀡𑀸 𑀳𑀺𑀭𑀻, 𑀯𑀚𑁆𑀚𑀪𑀻𑀭𑀼𑀓𑀪𑀬𑀤𑀲𑁆𑀲𑀸𑀯𑀺𑀮𑀓𑁆𑀔𑀡𑀁 𑀑𑀢𑁆𑀢𑀧𑁆𑀧𑀁? 𑀏𑀓𑀘𑁆𑀘𑁄 𑀳𑀺 𑀚𑀸𑀢𑀺𑀫𑀳𑀢𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀸, 𑀲𑀢𑁆𑀣𑀼𑀫𑀳𑀢𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀸, 𑀤𑀸𑀬𑀚𑁆𑀚𑀫𑀳𑀢𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀸, 𑀲𑀩𑁆𑀭𑀳𑁆𑀫𑀘𑀸𑀭𑀺𑀫𑀳𑀢𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀸𑀢𑀺 𑀏𑀯𑀁 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀢𑀢𑁆𑀣 𑀕𑀸𑀭𑀯𑁂𑀦 𑀲𑀧𑁆𑀧𑀢𑀺𑀲𑁆𑀲𑀯𑀮𑀓𑁆𑀔𑀡𑀁 𑀳𑀺𑀭𑀺𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀧𑀸𑀧𑀁 𑀦 𑀓𑀭𑁄𑀢𑀺. 𑀏𑀓𑀘𑁆𑀘𑁄 𑀅𑀢𑁆𑀢𑀸𑀦𑀼𑀯𑀸𑀤𑀪𑀬𑀁, 𑀧𑀭𑀸𑀦𑀼𑀯𑀸𑀤𑀪𑀬𑀁, 𑀤𑀡𑁆𑀟𑀪𑀬𑀁, 𑀤𑀼𑀕𑁆𑀕𑀢𑀺𑀪𑀬𑀦𑁆𑀢𑀺 𑀏𑀯𑀁 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀯𑀚𑁆𑀚𑀢𑁄 𑀪𑀸𑀬𑀦𑁆𑀢𑁄 𑀯𑀚𑁆𑀚𑀪𑀻𑀭𑀼𑀓𑀪𑀬𑀤𑀲𑁆𑀲𑀸𑀯𑀺𑀮𑀓𑁆𑀔𑀡𑀁 𑀑𑀢𑁆𑀢𑀧𑁆𑀧𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑁆𑀯𑀸 𑀧𑀸𑀧𑀓𑀫𑁆𑀫𑀁 𑀦 𑀓𑀭𑁄𑀢𑀺. 𑀏𑀢𑁆𑀣 𑀘 𑀅𑀚𑁆𑀛𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀤𑀺𑀢𑀸 𑀳𑀺𑀭𑁄𑀢𑁆𑀢𑀧𑁆𑀧𑀸𑀦𑀁 𑀢𑀢𑁆𑀣 𑀢𑀢𑁆𑀣 𑀧𑀸𑀓𑀝𑀪𑀸𑀯𑁂𑀦 𑀯𑀼𑀢𑁆𑀢𑀸, 𑀦 𑀧𑀦 𑀦𑁂𑀲𑀁 𑀓𑀤𑀸𑀘𑀺 𑀅𑀜𑁆𑀜𑀫𑀜𑁆𑀜𑀯𑀺𑀧𑁆𑀧𑀬𑁄𑀕𑁄. 𑀦 𑀳𑀺 𑀮𑀚𑁆𑀚𑀦𑀁 𑀦𑀺𑀩𑁆𑀪𑀬𑀁, 𑀧𑀸𑀧𑀪𑀬𑀁 𑀯𑀸 𑀅𑀮𑀚𑁆𑀚𑀦𑀁 𑀅𑀢𑁆𑀣𑀻𑀢𑀺. 𑀏𑀯𑀫𑁂𑀢𑁆𑀣 𑀯𑀺𑀢𑁆𑀣𑀸𑀭𑀢𑁄 𑀅𑀢𑁆𑀣𑀯𑀡𑁆𑀡𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀲𑀼𑀓𑁆𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀘𑀭𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁯. 𑀦𑀯𑀫𑁂 𑀮𑁄𑀓𑀦𑁆𑀢𑀺 𑀲𑀢𑁆𑀢𑀮𑁄𑀓𑀁. 𑀲𑀦𑁆𑀥𑀸𑀭𑁂𑀦𑁆𑀢𑀻𑀢𑀺 𑀆𑀘𑀸𑀭𑀲𑀦𑁆𑀥𑀸𑀭𑀡𑀯𑀲𑁂𑀦 𑀥𑀸𑀭𑁂𑀦𑁆𑀢𑀺. 𑀞𑀧𑁂𑀦𑁆𑀢𑀻𑀢𑀺 𑀫𑀭𑀺𑀬𑀸𑀤𑀸𑀬𑀁 𑀞𑀧𑁂𑀦𑁆𑀢𑀺. 𑀭𑀓𑁆𑀔𑀦𑁆𑀢𑀻𑀢𑀺 𑀆𑀘𑀸𑀭𑀲𑀦𑁆𑀥𑀸𑀭𑀡𑁂𑀦 𑀫𑀭𑀺𑀬𑀸𑀤𑀸𑀬𑀁 𑀞𑀧𑁂𑀢𑁆𑀯𑀸 𑀭𑀓𑁆𑀔𑀦𑁆𑀢𑀺. 𑀕𑀭𑀼𑀘𑀺𑀢𑁆𑀢𑀻𑀓𑀸𑀭𑀯𑀲𑁂𑀦 𑀦 𑀧𑀜𑁆𑀜𑀸𑀬𑁂𑀣𑀸𑀢𑀺 𑀕𑀭𑀼𑀁 𑀓𑀢𑁆𑀯𑀸 𑀘𑀺𑀢𑁆𑀢𑁂 𑀓𑀭𑀡𑀯𑀲𑁂𑀦 𑀦 𑀧𑀜𑁆𑀜𑀸𑀬𑁂𑀣, 𑀅𑀬𑀫𑀸𑀘𑀸𑀭𑁄 𑀦 𑀮𑀩𑁆𑀪𑁂𑀬𑁆𑀬. 𑀫𑀸𑀢𑀼𑀘𑁆𑀙𑀸𑀢𑀺 𑀯𑀸𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀆𑀤𑁆𑀬𑀢𑁆𑀣𑁄. 𑀢𑁂𑀦 𑀫𑀸𑀢𑀼𑀮𑀸𑀦𑀻𑀢𑀺 𑀯𑀸 𑀆𑀘𑀭𑀺𑀬𑀪𑀭𑀺𑀬𑀸𑀢𑀺 𑀯𑀸 𑀕𑀭𑀽𑀦𑀁 𑀤𑀸𑀭𑀸𑀢𑀺 𑀯𑀸𑀢𑀺 𑀇𑀫𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀢𑁆𑀣 𑀫𑀸𑀢𑀼 𑀪𑀕𑀺𑀦𑀻 𑀫𑀸𑀢𑀼𑀘𑁆𑀙𑀸. 𑀫𑀸𑀢𑀼𑀮𑀪𑀭𑀺𑀬𑀸 𑀫𑀸𑀢𑀼𑀮𑀸𑀦𑀻. 𑀕𑀭𑀽𑀦𑀁 𑀤𑀸𑀭𑀸 𑀫𑀳𑀸𑀧𑀺𑀢𑀼𑀘𑀽𑀴𑀧𑀺𑀢𑀼𑀚𑁂𑀝𑁆𑀞𑀪𑀸𑀢𑀼𑀆𑀤𑀻𑀦𑀁 𑀕𑀭𑀼𑀝𑁆𑀞𑀸𑀦𑀺𑀬𑀸𑀦𑀁 𑀪𑀭𑀺𑀬𑀸. 𑀬𑀣𑀸 𑀅𑀚𑁂𑀴𑀓𑀸𑀢𑀺𑀆𑀤𑀻𑀲𑀼 𑀅𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑀣𑀸 𑀅𑀚𑁂𑀴𑀓𑀸𑀤𑀬𑁄 𑀢𑀺𑀭𑀘𑁆𑀙𑀸𑀦𑀸 𑀳𑀺𑀭𑁄𑀢𑁆𑀢𑀧𑁆𑀧𑀭𑀳𑀺𑀢𑀸 𑀫𑀸𑀢𑀸𑀢𑀺 𑀲𑀜𑁆𑀜𑀁 𑀅𑀓𑀢𑁆𑀯𑀸 𑀪𑀺𑀦𑁆𑀦𑀫𑀭𑀺𑀬𑀸𑀤𑀸 𑀲𑀩𑁆𑀩𑀢𑁆𑀣 𑀲𑀫𑁆𑀪𑁂𑀤𑁂𑀦 𑀯𑀢𑁆𑀢𑀦𑁆𑀢𑀺, 𑀏𑀯𑀫𑀬𑀁 𑀫𑀦𑀼𑀲𑁆𑀲𑀮𑁄𑀓𑁄 𑀬𑀤𑀺 𑀮𑁄𑀓𑀧𑀸𑀮𑀥𑀫𑁆𑀫𑀸 𑀦 𑀪𑀯𑁂𑀬𑁆𑀬𑀼𑀁, 𑀲𑀩𑁆𑀩𑀢𑁆𑀣 𑀲𑀫𑁆𑀪𑁂𑀤𑁂𑀦 𑀯𑀢𑁆𑀢𑁂𑀬𑁆𑀬. 𑀬𑀲𑁆𑀫𑀸 𑀧𑀦𑀺𑀫𑁂 𑀮𑁄𑀓𑀧𑀸𑀮𑀓𑀥𑀫𑁆𑀫𑀸 𑀮𑁄𑀓𑀁 𑀧𑀸𑀮𑁂𑀦𑁆𑀢𑀺, 𑀢𑀲𑁆𑀫𑀸 𑀦𑀢𑁆𑀣𑀺 𑀲𑀫𑁆𑀪𑁂𑀤𑁄𑀢𑀺.

𑀘𑀭𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀯𑀲𑁆𑀲𑀽𑀧𑀦𑀸𑀬𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦. 𑀤𑀲𑀫𑁂 𑀅𑀧𑀜𑁆𑀜𑀢𑁆𑀢𑀸𑀢𑀺 𑀅𑀦𑀦𑀼𑀜𑁆𑀜𑀸𑀢𑀸, 𑀅𑀯𑀺𑀳𑀺𑀢𑀸 𑀯𑀸. 𑀯𑀲𑁆𑀲𑁂𑀢𑀺 𑀯𑀲𑁆𑀲𑀸𑀭𑀢𑁆𑀢𑀁 𑀲𑀦𑁆𑀥𑀸𑀬 𑀯𑀤𑀢𑀺, 𑀉𑀢𑀼𑀯𑀲𑁆𑀲𑁂𑀢𑀺 𑀳𑁂𑀫𑀦𑁆𑀢𑀁 𑀲𑀦𑁆𑀥𑀸𑀬. 𑀏𑀓𑀺𑀦𑁆𑀤𑁆𑀭𑀺𑀬𑀁 𑀚𑀻𑀯𑀁 𑀯𑀺𑀳𑁂𑀞𑁂𑀦𑁆𑀢𑀸𑀢𑀺 𑀭𑀼𑀓𑁆𑀔𑀮𑀢𑀸𑀤𑀻𑀲𑀼 𑀚𑀻𑀯𑀲𑀜𑁆𑀜𑀺𑀢𑀸𑀬 𑀏𑀯𑀫𑀸𑀳𑀁𑀲𑀼. 𑀏𑀓𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀘 𑀓𑀸𑀬𑀺𑀦𑁆𑀤𑁆𑀭𑀺𑀬𑀁 𑀅𑀢𑁆𑀣𑀻𑀢𑀺 𑀫𑀜𑁆𑀜𑀫𑀸𑀦𑀸 𑀯𑀤𑀦𑁆𑀢𑀺. 𑀲𑀗𑁆𑀖𑀸𑀢𑀁 𑀆𑀧𑀸𑀤𑁂𑀦𑁆𑀢𑀸𑀢𑀺 𑀯𑀺𑀦𑀸𑀲𑀁 𑀆𑀧𑀸𑀤𑁂𑀦𑁆𑀢𑀸. 𑀲𑀁𑀓𑀲𑀸𑀬𑀺𑀲𑁆𑀲𑀦𑁆𑀢𑀻𑀢𑀺 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀸 𑀦𑀺𑀩𑀤𑁆𑀥𑀯𑀸𑀲𑀁 𑀯𑀲𑀺𑀲𑁆𑀲𑀦𑁆𑀢𑀺. 𑀅𑀧𑀭𑀚𑁆𑀚𑀼𑀕𑀢𑀸𑀬 𑀆𑀲𑀸𑀴𑁆𑀳𑀺𑀬𑀸 𑀉𑀧𑀕𑀦𑁆𑀢𑀩𑁆𑀩𑀸𑀢𑀺 𑀏𑀢𑁆𑀣 𑀅𑀧𑀭𑀚𑁆𑀚𑀼 𑀕𑀢𑀸𑀬 𑀅𑀲𑁆𑀲𑀸𑀢𑀺 𑀅𑀧𑀭𑀚𑁆𑀚𑀼𑀕𑀢𑀸, 𑀢𑀲𑁆𑀲𑀸 𑀅𑀧𑀭𑀚𑁆𑀚𑀼𑀕𑀢𑀸𑀬 𑀅𑀢𑀺𑀓𑁆𑀓𑀦𑁆𑀢𑀸𑀬, 𑀅𑀧𑀭𑀲𑁆𑀫𑀺𑀁 𑀤𑀺𑀯𑀲𑁂𑀢𑀺 𑀅𑀢𑁆𑀣𑁄, 𑀢𑀲𑁆𑀫𑀸 𑀆𑀲𑀸𑀴𑁆𑀳𑀺𑀧𑀼𑀡𑁆𑀡𑀫𑀸𑀬 𑀅𑀦𑀦𑁆𑀢𑀭𑁂 𑀧𑀸𑀝𑀺𑀧𑀤𑀤𑀺𑀯𑀲𑁂 𑀉𑀧𑀕𑀦𑁆𑀢𑀩𑁆𑀩𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀫𑀸𑀲𑀕𑀢𑀸𑀬 𑀆𑀲𑀸𑀴𑁆𑀳𑀺𑀬𑀸 𑀉𑀧𑀕𑀦𑁆𑀢𑀩𑁆𑀩𑀸𑀢𑀺 𑀫𑀸𑀲𑁄 𑀕𑀢𑀸𑀬 𑀅𑀲𑁆𑀲𑀸𑀢𑀺 𑀫𑀸𑀲𑀕𑀢𑀸, 𑀢𑀲𑁆𑀲𑀸 𑀫𑀸𑀲𑀕𑀢𑀸𑀬 𑀅𑀢𑀺𑀓𑁆𑀓𑀦𑁆𑀢𑀸𑀬, 𑀫𑀸𑀲𑁂 𑀧𑀭𑀺𑀧𑀼𑀡𑁆𑀡𑁂𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸 𑀆𑀲𑀸𑀴𑁆𑀳𑀺𑀧𑀼𑀡𑁆𑀡𑀫𑀢𑁄 𑀧𑀭𑀸𑀬 𑀧𑀼𑀡𑁆𑀡𑀫𑀸𑀬 𑀅𑀦𑀦𑁆𑀢𑀭𑁂 𑀧𑀸𑀝𑀺𑀧𑀤𑀤𑀺𑀯𑀲𑁂 𑀉𑀧𑀕𑀦𑁆𑀢𑀩𑁆𑀩𑀸𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀯𑀲𑁆𑀲𑀽𑀧𑀦𑀸𑀬𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀓𑀫𑁆𑀫𑀓𑀸𑀭𑀡𑀯𑀕𑁆𑀕𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀅𑀥𑀺𑀓𑀭𑀡𑀯𑀕𑁆𑀕𑀯𑀡𑁆𑀡𑀦𑀸

𑁧𑁧. 𑀤𑀼𑀢𑀺𑀬𑀯𑀕𑁆𑀕𑀲𑁆𑀲 𑀧𑀞𑀫𑁂 𑀅𑀧𑁆𑀧𑀝𑀺𑀲𑀗𑁆𑀔𑀸𑀦𑁂 𑀦 𑀓𑀫𑁆𑀧𑀢𑀻𑀢𑀺 𑀧𑀝𑀺𑀲𑀗𑁆𑀔𑀸𑀦𑀩𑀮𑀁, 𑀉𑀧𑀧𑀭𑀺𑀓𑁆𑀔𑀦𑀧𑀜𑁆𑀜𑀸𑀬𑁂𑀢𑀁 𑀦𑀸𑀫𑀁. 𑀯𑀻𑀭𑀺𑀬𑀲𑀻𑀲𑁂𑀦 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀪𑀸𑀯𑁂𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀁 𑀩𑀮𑀁 𑀪𑀸𑀯𑀦𑀸𑀩𑀮𑀁. 𑀯𑀻𑀭𑀺𑀬𑀼𑀧𑀢𑁆𑀣𑀫𑁆𑀪𑁂𑀦 𑀳𑀺 𑀓𑀼𑀲𑀮𑀪𑀸𑀯𑀦𑀸 𑀩𑀮𑀯𑀢𑀻 𑀣𑀺𑀭𑀸 𑀉𑀧𑁆𑀧𑀚𑁆𑀚𑀢𑀺, 𑀢𑀣𑀸 𑀉𑀧𑁆𑀧𑀦𑁆𑀦𑀸 𑀩𑀮𑀯𑀢𑀻 𑀓𑀼𑀲𑀮𑀪𑀸𑀯𑀦𑀸 𑀩𑀮𑀯𑀦𑁆𑀢𑁄 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸𑀢𑀺𑀧𑀺 𑀯𑀼𑀘𑁆𑀘𑀦𑁆𑀢𑀺. 𑀅𑀢𑁆𑀣𑀢𑁄 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑀻𑀲𑁂𑀦 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸 𑀳𑁄𑀦𑁆𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋 ‘‘𑀢𑀢𑁆𑀣 𑀓𑀢𑀫𑀁 𑀪𑀸𑀯𑀦𑀸𑀩𑀮𑀁? 𑀬𑀸 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀆𑀲𑁂𑀯𑀦𑀸 𑀪𑀸𑀯𑀦𑀸 𑀩𑀳𑀼𑀮𑀻𑀓𑀫𑁆𑀫𑀁, 𑀇𑀤𑀁 𑀯𑀼𑀘𑁆𑀘𑀢𑀺 𑀪𑀸𑀯𑀦𑀸𑀩𑀮𑀁. 𑀲𑀢𑁆𑀢𑀧𑀺 𑀩𑁄𑀚𑁆𑀛𑀗𑁆𑀕𑀸 𑀪𑀸𑀯𑀦𑀸𑀩𑀮’’𑀦𑁆𑀢𑀺 (𑀥. 𑀲. 𑁧𑁩𑁬𑁧).

𑀅𑀓𑀫𑁆𑀧𑀺𑀬𑀝𑁆𑀞𑁂𑀦𑀸𑀢𑀺 𑀧𑀝𑀺𑀧𑀓𑁆𑀔𑁂𑀳𑀺 𑀅𑀓𑀫𑁆𑀧𑀦𑀻𑀬𑀝𑁆𑀞𑁂𑀦. 𑀤𑀼𑀭𑀪𑀺𑀪𑀯𑀦𑀝𑁆𑀞𑁂𑀦𑀸𑀢𑀺 𑀤𑀼𑀭𑀪𑀺𑀪𑀯𑀦𑀻𑀬𑀝𑁆𑀞𑁂𑀦. 𑀅𑀦𑀚𑁆𑀛𑁄𑀫𑀤𑁆𑀤𑀦𑀝𑁆𑀞𑁂𑀦𑀸𑀢𑀺 𑀅𑀥𑀺𑀪𑀯𑀺𑀢𑁆𑀯𑀸 𑀅𑀦𑀯𑀫𑀤𑁆𑀤𑀦𑀝𑁆𑀞𑁂𑀦. 𑀏𑀢𑀸𑀦𑀻𑀢𑀺 𑀏𑀢𑀸𑀦𑀺 𑀬𑀣𑀸𑀯𑀼𑀢𑁆𑀢𑀸𑀦𑀺 𑀤𑁆𑀯𑁂𑀧𑀺 𑀩𑀮𑀸𑀦𑀺. 𑀏𑀢𑀤𑀕𑁆𑀕𑀁 𑀦𑀸𑀕𑀢𑀦𑁆𑀢𑀺 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀤𑁆𑀯𑀺𑀦𑁆𑀦𑀁 𑀩𑀮𑀸𑀦𑀁 𑀬𑀤𑀺𑀤𑀁 𑀪𑀸𑀯𑀦𑀸𑀩𑀮’’𑀦𑁆𑀢𑀺 𑀏𑀯𑀫𑁂𑀢𑁆𑀣 𑀏𑀢𑀤𑀕𑁆𑀕𑀁 𑀦𑀸𑀕𑀢𑀦𑁆𑀢𑀺 𑀅𑀢𑁆𑀣𑁄.

𑁧𑁨. 𑀤𑀼𑀢𑀺𑀬𑁂 𑀯𑀺𑀯𑁂𑀓𑀁 𑀦𑀺𑀲𑁆𑀲𑀺𑀢𑀦𑁆𑀢𑀺 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁, 𑀬𑀣𑀸 𑀯𑀸 𑀯𑀺𑀯𑁂𑀓𑀯𑀲𑁂𑀦 𑀧𑀯𑀢𑁆𑀢𑀁 𑀛𑀸𑀦𑀁 ‘‘𑀯𑀺𑀯𑁂𑀓𑀚’’𑀦𑁆𑀢𑀺 𑀯𑀼𑀢𑁆𑀢𑀁, 𑀏𑀯𑀁 𑀯𑀺𑀯𑁂𑀓𑀯𑀲𑁂𑀦 𑀧𑀯𑀢𑁆𑀢𑁄 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 ‘‘𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑁄’’𑀢𑀺 𑀤𑀝𑁆𑀞𑀩𑁆𑀩𑁄. 𑀦𑀺𑀲𑁆𑀲𑀬𑀝𑁆𑀞𑁄 𑀘 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀸𑀦𑀁 𑀯𑀲𑁂𑀦 𑀫𑀕𑁆𑀕𑀨𑀮𑀸𑀦𑀁 𑀯𑁂𑀤𑀺𑀢𑀩𑁆𑀩𑁄, 𑀅𑀲𑀢𑀺𑀧𑀺 𑀯𑀸 𑀧𑀼𑀩𑁆𑀩𑀸𑀧𑀭𑀪𑀸𑀯𑁂 ‘‘𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄’’𑀢𑀺 𑀏𑀢𑁆𑀣 𑀧𑀘𑁆𑀘𑀬𑁂𑀦 𑀲𑀫𑀼𑀧𑁆𑀧𑀸𑀤𑀦𑀁 𑀯𑀺𑀬 𑀅𑀯𑀺𑀦𑀸𑀪𑀸𑀯𑀺𑀥𑀫𑁆𑀫𑀩𑁆𑀬𑀸𑀧𑀸𑀭𑀸 𑀦𑀺𑀲𑁆𑀲𑀬𑀦𑀪𑀸𑀯𑀦𑀸 𑀲𑀫𑁆𑀪𑀯𑀦𑁆𑀢𑀻𑀢𑀺. ‘‘𑀢𑀤𑀗𑁆𑀕𑀲𑀫𑀼𑀘𑁆𑀙𑁂𑀤𑀦𑀺𑀲𑁆𑀲𑀭𑀡𑀯𑀺𑀯𑁂𑀓𑀦𑀺𑀲𑁆𑀲𑀺𑀢’’𑀦𑁆𑀢𑀺 𑀯𑀢𑁆𑀯𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀲𑁆𑀲 𑀅𑀯𑀘𑀦𑀁 ‘‘𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀻’’𑀢𑀺𑀆𑀤𑀺𑀦𑀸 𑀇𑀥 𑀪𑀸𑀯𑁂𑀢𑀩𑁆𑀩𑀸𑀦𑀁 𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀦𑀁 𑀯𑀼𑀢𑁆𑀢𑀢𑁆𑀢𑀸. 𑀪𑀸𑀯𑀺𑀢𑀩𑁄𑀚𑁆𑀛𑀗𑁆𑀕𑀲𑁆𑀲 𑀳𑀺 𑀲𑀘𑁆𑀙𑀺𑀓𑀸𑀢𑀩𑁆𑀩𑀸 𑀩𑀮𑀩𑁄𑀚𑁆𑀛𑀗𑁆𑀕𑀸, 𑀢𑁂𑀲𑀁 𑀓𑀺𑀘𑁆𑀘𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀺𑀯𑁂𑀓𑁄. 𑀅𑀚𑁆𑀛𑀸𑀲𑀬𑀢𑁄𑀢𑀺 ‘‘𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀧𑀯𑀢𑁆𑀢𑀅𑀚𑁆𑀛𑀸𑀲𑀬𑀢𑁄. 𑀬𑀤𑀺𑀧𑀺 𑀳𑀺 𑀯𑀺𑀧𑀲𑁆𑀲𑀦𑀸𑀓𑁆𑀔𑀡𑁂 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀁 𑀘𑀺𑀢𑁆𑀢𑀁, 𑀲𑀗𑁆𑀔𑀸𑀭𑁂𑀲𑀼 𑀧𑀦 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀢𑀧𑁆𑀧𑀝𑀺𑀧𑀓𑁆𑀔𑁂 𑀦𑀺𑀩𑁆𑀩𑀸𑀦𑁂 𑀦𑀺𑀦𑁆𑀦𑀢𑀸𑀬 𑀅𑀚𑁆𑀛𑀸𑀲𑀬𑀢𑁄 𑀦𑀺𑀲𑁆𑀲𑀭𑀡𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑁄 𑀳𑁄𑀢𑀺 𑀉𑀡𑁆𑀳𑀸𑀪𑀺𑀪𑀽𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀻𑀢𑀦𑀺𑀦𑁆𑀦𑀘𑀺𑀢𑁆𑀢𑀢𑀸 𑀯𑀺𑀬.

‘‘𑀧𑀜𑁆𑀘𑀯𑀺𑀥𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀫𑁆𑀧𑀻𑀢𑀺 𑀏𑀓𑁂’’𑀢𑀺 𑀯𑀢𑁆𑀯𑀸 𑀢𑀢𑁆𑀣 𑀬𑀣𑀸𑀯𑀼𑀢𑁆𑀢𑀯𑀺𑀯𑁂𑀓𑀢𑁆𑀢𑀬𑀢𑁄 𑀅𑀜𑁆𑀜𑀁 𑀯𑀺𑀯𑁂𑀓𑀤𑁆𑀯𑀬𑀁 𑀉𑀤𑁆𑀥𑀭𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀢𑁂 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀛𑀸𑀦𑀓𑁆𑀔𑀡𑁂 𑀢𑀸𑀯 𑀓𑀺𑀘𑁆𑀘𑀢𑁄 𑀯𑀺𑀓𑁆𑀔𑀫𑁆𑀪𑀦𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁, 𑀯𑀺𑀧𑀲𑁆𑀲𑀦𑀸𑀓𑁆𑀔𑀡𑁂 𑀅𑀚𑁆𑀛𑀸𑀲𑀬𑀢𑁄 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀪𑀸𑀯𑁂𑀢𑀻𑀢𑀺 𑀯𑀢𑁆𑀢𑀩𑁆𑀩𑀁 ‘‘𑀏𑀯𑀸𑀳𑀁 𑀅𑀦𑀼𑀢𑁆𑀢𑀭𑀁 𑀯𑀺𑀫𑁄𑀓𑁆𑀔𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀢𑀢𑁆𑀣 𑀦𑀺𑀦𑁆𑀦𑀚𑁆𑀛𑀸𑀲𑀬𑀢𑀸𑀬. 𑀢𑁂𑀦𑀸𑀳 ‘‘𑀢𑀲𑁆𑀫𑀸 𑀢𑁂𑀲𑀁 𑀫𑀢𑁂𑀦𑀸’’𑀢𑀺𑀆𑀤𑀺. 𑀳𑁂𑀝𑁆𑀞𑀸 𑀓𑀲𑀺𑀡𑀚𑁆𑀛𑀸𑀦𑀕𑁆𑀕𑀳𑀡𑁂𑀦 𑀆𑀭𑀼𑀧𑁆𑀧𑀸𑀦𑀫𑁆𑀧𑀺 𑀕𑀳𑀡𑀁 𑀤𑀝𑁆𑀞𑀩𑁆𑀩𑀁, 𑀢𑀲𑁆𑀫𑀸 ‘‘𑀏𑀢𑁂𑀲𑀁 𑀛𑀸𑀦𑀸𑀦’’𑀦𑁆𑀢𑀺 𑀇𑀫𑀺𑀦𑀸𑀧𑀺 𑀢𑁂𑀲𑀁 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀲𑁆𑀫𑀸 𑀧𑀳𑀸𑀦𑀯𑀺𑀦𑀬𑁄 𑀯𑀺𑀬 𑀯𑀺𑀭𑀸𑀕𑀦𑀺𑀭𑁄𑀥𑀸𑀧𑀺 𑀇𑀥𑀸𑀥𑀺𑀧𑁆𑀧𑁂𑀢𑀯𑀺𑀯𑁂𑀓𑁂𑀦 𑀅𑀢𑁆𑀣𑀢𑁄 𑀦𑀺𑀩𑁆𑀩𑀺𑀲𑀺𑀝𑁆𑀞𑀸, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀏𑀲 𑀦𑀬𑁄 𑀯𑀺𑀭𑀸𑀕𑀦𑀺𑀲𑁆𑀲𑀺𑀢𑀦𑁆𑀢𑀺𑀆𑀤𑀻𑀲𑀽’’𑀢𑀺. 𑀢𑁂𑀦𑀸𑀳 ‘‘𑀯𑀺𑀯𑁂𑀓𑀢𑁆𑀣𑀸 𑀏𑀯 𑀳𑀺 𑀯𑀺𑀭𑀸𑀕𑀸𑀤𑀬𑁄’’𑀢𑀺.

𑀯𑁄𑀲𑁆𑀲𑀕𑁆𑀕-𑀲𑀤𑁆𑀤𑁄 𑀧𑀭𑀺𑀘𑁆𑀘𑀸𑀕𑀢𑁆𑀣𑁄 𑀧𑀓𑁆𑀔𑀦𑁆𑀤𑀦𑀢𑁆𑀣𑁄 𑀘𑀸𑀢𑀺 𑀯𑁄𑀲𑁆𑀲𑀕𑁆𑀕𑀲𑁆𑀲 𑀤𑀼𑀯𑀺𑀥𑀢𑀸 𑀯𑀼𑀢𑁆𑀢𑀸. 𑀯𑁄𑀲𑁆𑀲𑀚𑁆𑀚𑀦𑀜𑁆𑀳𑀺 𑀧𑀳𑀸𑀦𑀁 𑀯𑀺𑀲𑁆𑀲𑀝𑁆𑀞𑀪𑀸𑀯𑁂𑀦 𑀦𑀺𑀭𑁄𑀥𑀦𑀧𑀓𑁆𑀔𑀦𑁆𑀤𑀦𑀫𑁆𑀧𑀺 𑀘. 𑀢𑀲𑁆𑀫𑀸 𑀯𑀺𑀧𑀲𑁆𑀲𑀦𑀸𑀓𑁆𑀔𑀡𑁂 𑀢𑀤𑀗𑁆𑀕𑀯𑀲𑁂𑀦 𑀫𑀕𑁆𑀕𑀓𑁆𑀔𑀡𑁂 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀧𑀝𑀺𑀧𑀓𑁆𑀔𑀲𑁆𑀲 𑀧𑀳𑀸𑀦𑀁 𑀯𑁄𑀲𑁆𑀲𑀕𑁆𑀕𑁄, 𑀢𑀣𑀸 𑀯𑀺𑀧𑀲𑁆𑀲𑀦𑀸𑀓𑁆𑀔𑀡𑁂 𑀢𑀦𑁆𑀦𑀺𑀦𑁆𑀦𑀪𑀸𑀯𑁂𑀦, 𑀫𑀕𑁆𑀕𑀓𑁆𑀔𑀡𑁂 𑀆𑀭𑀫𑁆𑀫𑀡𑀓𑀭𑀡𑁂𑀦 𑀯𑀺𑀲𑁆𑀲𑀝𑁆𑀞𑀲𑀪𑀸𑀯𑀢𑀸 𑀯𑁄𑀲𑁆𑀲𑀕𑁆𑀕𑁄𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦𑁂𑀯𑀸𑀳 ‘‘𑀢𑀢𑁆𑀣 𑀧𑀭𑀺𑀘𑁆𑀘𑀸𑀕𑀯𑁄𑀲𑁆𑀲𑀕𑁆𑀕𑁄’’𑀢𑀺𑀆𑀤𑀺. 𑀅𑀬𑀁 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄𑀢𑀺 𑀅𑀬𑀁 𑀫𑀺𑀲𑁆𑀲𑀓𑀯𑀲𑁂𑀦 𑀯𑀼𑀢𑁆𑀢𑁄 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄. 𑀬𑀣𑀸𑀯𑀼𑀢𑁆𑀢𑁂𑀦 𑀧𑀓𑀸𑀭𑁂𑀦𑀸𑀢𑀺 𑀢𑀤𑀗𑁆𑀕𑀧𑁆𑀧𑀳𑀸𑀦𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀧𑁆𑀧𑀓𑀸𑀭𑁂𑀦 𑀢𑀦𑁆𑀦𑀺𑀦𑁆𑀦𑀢𑀤𑀸𑀭𑀫𑁆𑀫𑀡𑀧𑁆𑀧𑀓𑀸𑀭𑁂𑀦 𑀘. 𑀧𑀼𑀩𑁆𑀩𑁂 𑀯𑁄𑀲𑁆𑀲𑀕𑁆𑀕𑀯𑀘𑀦𑀲𑁆𑀲𑁂𑀯 𑀅𑀢𑁆𑀣𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀆𑀳 ‘‘𑀲𑀓𑀮𑁂𑀦 𑀯𑀘𑀦𑁂𑀦𑀸’’𑀢𑀺. 𑀧𑀭𑀺𑀡𑀫𑀦𑁆𑀢𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀓𑁆𑀔𑀡𑁂 𑀢𑀤𑀗𑁆𑀕𑀢𑀦𑁆𑀦𑀺𑀦𑁆𑀦𑀧𑁆𑀧𑀓𑀸𑀭𑁂𑀦 𑀧𑀭𑀺𑀡𑀫𑀦𑁆𑀢𑀁. 𑀧𑀭𑀺𑀡𑀢𑀦𑁆𑀢𑀺 𑀫𑀕𑁆𑀕𑀓𑁆𑀔𑀡𑁂 𑀲𑀫𑀼𑀘𑁆𑀙𑁂𑀤𑀢𑀤𑀸𑀭𑀫𑁆𑀫𑀡𑀧𑁆𑀧𑀓𑀸𑀭𑁂𑀦 𑀧𑀭𑀺𑀡𑀢𑀁. 𑀧𑀭𑀺𑀡𑀸𑀫𑁄 𑀦𑀸𑀫 𑀇𑀥 𑀧𑀭𑀺𑀧𑀸𑀓𑁄𑀢𑀺 𑀆𑀳 ‘‘𑀧𑀭𑀺𑀧𑀘𑁆𑀘𑀦𑁆𑀢𑀁 𑀧𑀭𑀺𑀧𑀓𑁆𑀓𑀜𑁆𑀘𑀸’’𑀢𑀺. 𑀧𑀭𑀺𑀧𑀸𑀓𑁄 𑀘 𑀆𑀲𑁂𑀯𑀦𑀮𑀸𑀪𑁂𑀦 𑀮𑀤𑁆𑀥𑀲𑀸𑀫𑀢𑁆𑀣𑀺𑀬𑀲𑁆𑀲 𑀓𑀺𑀮𑁂𑀲𑁂 𑀧𑀭𑀺𑀘𑁆𑀘𑀚𑀺𑀢𑀼𑀁 𑀦𑀺𑀩𑁆𑀩𑀸𑀦𑀁 𑀧𑀓𑁆𑀔𑀦𑁆𑀤𑀺𑀢𑀼𑀁 𑀢𑀺𑀓𑁆𑀔𑀯𑀺𑀲𑀤𑀪𑀸𑀯𑁄. 𑀢𑁂𑀦𑀸𑀳 ‘‘𑀅𑀬𑀜𑁆𑀳𑀻’’𑀢𑀺𑀆𑀤𑀺. 𑀏𑀲 𑀦𑀬𑁄𑀢𑀺 𑀬𑁆𑀯𑀸𑀬𑀁 𑀦𑀬𑁄 ‘‘𑀯𑀺𑀯𑁂𑀓𑀦𑀺𑀲𑁆𑀲𑀺𑀢’’𑀦𑁆𑀢𑀺𑀆𑀤𑀺𑀦𑀸 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁂 𑀯𑀼𑀢𑁆𑀢𑁄, 𑀲𑁂𑀲𑁂𑀲𑀼 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄, 𑀏𑀯𑀁 𑀢𑀢𑁆𑀣 𑀦𑁂𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄.

‘‘𑀯𑀺𑀯𑁂𑀓𑀦𑀺𑀲𑁆𑀲𑀺𑀢’’𑀦𑁆𑀢𑀺𑀆𑀤𑀻𑀲𑀼 𑀮𑀩𑁆𑀪𑀫𑀸𑀦𑀫𑀢𑁆𑀣𑀁 𑀲𑀸𑀫𑀜𑁆𑀜𑀢𑁄 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀇𑀥𑀸𑀥𑀺𑀧𑁆𑀧𑁂𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀥 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀩𑁆𑀩𑀲𑀗𑁆𑀔𑀢𑁂𑀳𑀻𑀢𑀺 𑀲𑀩𑁆𑀩𑁂𑀳𑀺 𑀧𑀘𑁆𑀘𑀬𑀲𑀫𑀼𑀧𑁆𑀧𑀦𑁆𑀦𑀥𑀫𑁆𑀫𑁂𑀳𑀺. 𑀲𑀩𑁆𑀩𑁂𑀲𑀦𑁆𑀢𑀺 𑀲𑀗𑁆𑀔𑀢𑀥𑀫𑁆𑀫𑀸𑀦𑀁. 𑀯𑀺𑀯𑁂𑀓𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸𑀢𑀺 𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑀁 𑀯𑀺𑀯𑁂𑀓𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸. 𑀢𑀜𑁆𑀘 𑀔𑁄𑀢𑀺 𑀢𑀤𑁂𑀯 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁.

𑁧𑁩. 𑀢𑀢𑀺𑀬𑁂 𑀘𑀺𑀢𑁆𑀢𑁂𑀓𑀕𑁆𑀕𑀢𑁆𑀣𑀸𑀬𑀸𑀢𑀺 𑀘𑀺𑀢𑁆𑀢𑀲𑀫𑀸𑀥𑀸𑀦𑀢𑁆𑀣𑀸𑀬, 𑀤𑀺𑀝𑁆𑀞𑀥𑀫𑁆𑀫𑁂 𑀲𑀼𑀔𑀯𑀺𑀳𑀸𑀭𑀸𑀬𑀸𑀢𑀺 𑀅𑀢𑁆𑀣𑁄. 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀲𑀻𑀲𑁂𑀦 𑀳𑀺 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑁄 𑀯𑀼𑀢𑁆𑀢𑁄. 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀔𑀻𑀡𑀸𑀲𑀯𑀸𑀦𑀁 𑀯𑀲𑁂𑀦 𑀳𑁂𑀢𑀁 𑀯𑀼𑀢𑁆𑀢𑀁. 𑀢𑁂 𑀳𑀺 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 ‘‘𑀏𑀓𑀕𑁆𑀕𑀘𑀺𑀢𑁆𑀢𑀸 𑀲𑀼𑀔𑀁 𑀤𑀺𑀯𑀲𑀁 𑀯𑀺𑀳𑀭𑀺𑀲𑁆𑀲𑀸𑀫𑀸’’𑀢𑀺 𑀇𑀘𑁆𑀘𑁂𑀯 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺. 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀢𑁆𑀣𑀸𑀬𑀸𑀢𑀺𑀆𑀤𑀻𑀲𑀼 𑀧𑀦 𑀲𑁂𑀓𑁆𑀔𑀧𑀼𑀣𑀼𑀚𑁆𑀚𑀦𑀸 ‘‘𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀲𑀫𑀸𑀳𑀺𑀢𑁂𑀦 𑀘𑀺𑀢𑁆𑀢𑁂𑀦 𑀯𑀺𑀧𑀲𑁆𑀲𑀸𑀫𑀸’’𑀢𑀺 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀸 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀢𑁆𑀣𑀸𑀬 𑀪𑀸𑀯𑁂𑀦𑁆𑀢𑀺.

𑀬𑁂 𑀧𑀦 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀅𑀪𑀺𑀜𑁆𑀜𑀸𑀧𑀸𑀤𑀓𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 ‘‘𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀳𑁄𑀢𑀻’’𑀢𑀺 (𑀤𑀻. 𑀦𑀺. 𑁧.𑁨𑁩𑁮; 𑀫. 𑀦𑀺. 𑁧.𑁧𑁪𑁭; 𑀲𑀁. 𑀦𑀺. 𑁨.𑁭𑁦; 𑁫.𑁮𑁩𑁪, 𑁮𑁪𑁨) 𑀯𑀼𑀢𑁆𑀢𑀦𑀬𑀸 𑀅𑀪𑀺𑀜𑁆𑀜𑀸𑀬𑁄 𑀧𑀢𑁆𑀣𑁂𑀦𑁆𑀢𑀸 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺, 𑀢𑁂 𑀅𑀪𑀺𑀜𑁆𑀜𑀸𑀧𑀸𑀤𑀓𑀢𑁆𑀣𑀸𑀬 𑀪𑀸𑀯𑁂𑀦𑁆𑀢𑀺. 𑀬𑁂 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 ‘‘𑀲𑀢𑁆𑀢𑀸𑀳𑀁 𑀅𑀘𑀺𑀢𑁆𑀢𑀸 𑀳𑀼𑀢𑁆𑀯𑀸 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀦𑀺𑀭𑁄𑀥𑀁 𑀦𑀺𑀩𑁆𑀩𑀸𑀦𑀁 𑀧𑀢𑁆𑀯𑀸 𑀲𑀼𑀔𑀁 𑀯𑀺𑀳𑀭𑀺𑀲𑁆𑀲𑀸𑀫𑀸’’𑀢𑀺 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺, 𑀢𑁂 𑀦𑀺𑀭𑁄𑀥𑀧𑀸𑀤𑀓𑀢𑁆𑀣𑀸𑀬 𑀪𑀸𑀯𑁂𑀦𑁆𑀢𑀺. 𑀬𑁂 𑀧𑀦 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 ‘‘𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑀸 𑀩𑁆𑀭𑀳𑁆𑀫𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀲𑁆𑀲𑀸𑀫𑀸’’𑀢𑀺 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺, 𑀢𑁂 𑀪𑀯𑀯𑀺𑀲𑁂𑀲𑀢𑁆𑀣𑀸𑀬 𑀪𑀸𑀯𑁂𑀦𑁆𑀢𑀺.

𑀬𑀼𑀢𑁆𑀢𑀁 𑀢𑀸𑀯 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀬 𑀪𑀯𑀯𑀺𑀲𑁂𑀲𑀢𑁆𑀣𑀢𑀸 𑀯𑀺𑀬 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀢𑁆𑀣𑀢𑀸𑀧𑀺 𑀘𑀢𑀼𑀓𑁆𑀓𑀚𑁆𑀛𑀸𑀦𑀲𑀸𑀥𑀸𑀭𑀡𑀸𑀢𑀺 𑀢𑁂𑀲𑀁 𑀯𑀲𑁂𑀦 ‘‘𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀻’’𑀢𑀺 𑀯𑀘𑀦𑀁, 𑀅𑀪𑀺𑀜𑁆𑀜𑀸𑀧𑀸𑀤𑀓𑀢𑁆𑀣𑀢𑀸 𑀧𑀦 𑀦𑀺𑀭𑁄𑀥𑀧𑀸𑀤𑀓𑀢𑁆𑀣𑀢𑀸 𑀘 𑀘𑀢𑀼𑀢𑁆𑀣𑀲𑁆𑀲𑁂𑀯 𑀛𑀸𑀦𑀲𑁆𑀲 𑀆𑀯𑁂𑀡𑀺𑀓𑀸, 𑀲𑀸 𑀓𑀣𑀁 𑀘𑀢𑀼𑀓𑁆𑀓𑀚𑁆𑀛𑀸𑀦𑀲𑀸𑀥𑀸𑀭𑀡𑀸 𑀯𑀼𑀢𑁆𑀢𑀸𑀢𑀺? 𑀧𑀭𑀫𑁆𑀧𑀭𑀸𑀥𑀺𑀝𑁆𑀞𑀸𑀦𑀪𑀸𑀯𑀢𑁄. 𑀧𑀤𑀝𑁆𑀞𑀸𑀦𑀧𑀤𑀝𑁆𑀞𑀸𑀦𑀫𑁆𑀧𑀺 𑀳𑀺 𑀧𑀤𑀝𑁆𑀞𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺 𑀓𑀸𑀭𑀡𑀓𑀸𑀭𑀡𑀦𑁆𑀢𑀺 𑀬𑀣𑀸 ‘‘𑀢𑀺𑀡𑁂𑀳𑀺 𑀪𑀢𑁆𑀢𑀁 𑀲𑀺𑀤𑁆𑀥’’𑀦𑁆𑀢𑀺.

𑁧𑁪. 𑀘𑀢𑀼𑀢𑁆𑀣𑁂 𑀲𑀲𑀓𑀲𑁆𑀲 𑀉𑀧𑁆𑀧𑀢𑀦𑀁 𑀯𑀺𑀬 𑀳𑁄𑀢𑀻𑀢𑀺 𑀧𑀣𑀯𑀺𑀚𑀺𑀕𑀼𑀘𑁆𑀙𑀦𑀲𑀲𑀓𑀲𑁆𑀲 𑀉𑀧𑁆𑀧𑀢𑀦𑀁 𑀯𑀺𑀬 𑀳𑁄𑀢𑀺. 𑀢𑀢𑁆𑀣𑀸𑀬𑀁 𑀅𑀢𑁆𑀣𑀲𑀮𑁆𑀮𑀸𑀧𑀺𑀓𑀸 𑀉𑀧𑀫𑀸 𑁋 𑀧𑀣𑀯𑀻 𑀓𑀺𑀭 𑀲𑀲𑀓𑀁 𑀆𑀳 𑁋 ‘‘𑀳𑁂 𑀲𑀲𑀓𑀸’’𑀢𑀺. 𑀲𑀲𑀓𑁄 𑀆𑀳 𑁋 ‘‘𑀓𑁄 𑀏𑀲𑁄’’𑀢𑀺. 𑀓𑀲𑁆𑀫𑀸 𑀫𑀫𑁂𑀯 𑀉𑀧𑀭𑀺 𑀲𑀩𑁆𑀩𑀇𑀭𑀺𑀬𑀸𑀧𑀣𑁂 𑀓𑀧𑁆𑀧𑁂𑀦𑁆𑀢𑁄 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀁 𑀓𑀭𑁄𑀦𑁆𑀢𑁄 𑀫𑀁 𑀦 𑀚𑀸𑀦𑀸𑀲𑀻𑀢𑀺? 𑀲𑀼𑀝𑁆𑀞𑀼 𑀢𑀬𑀸 𑀅𑀳𑀁 𑀤𑀺𑀝𑁆𑀞𑁄, 𑀫𑀬𑀸 𑀅𑀓𑁆𑀓𑀦𑁆𑀢𑀝𑁆𑀞𑀸𑀦𑀜𑁆𑀳𑀺 𑀅𑀗𑁆𑀕𑀼𑀮𑀕𑁆𑀕𑁂𑀳𑀺 𑀨𑀼𑀝𑁆𑀞𑀝𑁆𑀞𑀸𑀦𑀁 𑀯𑀺𑀬 𑀳𑁄𑀢𑀺, 𑀯𑀺𑀲𑁆𑀲𑀝𑁆𑀞𑀉𑀤𑀓𑀁 𑀅𑀧𑁆𑀧𑀫𑀢𑁆𑀢𑀓𑀁, 𑀓𑀭𑀻𑀲𑀁 𑀓𑀝𑀓𑀨𑀮𑀫𑀢𑁆𑀢𑀁, 𑀳𑀢𑁆𑀣𑀺𑀅𑀲𑁆𑀲𑀸𑀤𑀻𑀳𑀺 𑀧𑀦 𑀅𑀓𑁆𑀓𑀦𑁆𑀢𑀝𑁆𑀞𑀸𑀦𑀫𑁆𑀧𑀺 𑀫𑀳𑀦𑁆𑀢𑀁, 𑀧𑀲𑁆𑀲𑀸𑀯𑁄𑀧𑀺 𑀦𑁂𑀲𑀁 𑀖𑀝𑀫𑀢𑁆𑀢𑁄, 𑀉𑀘𑁆𑀘𑀸𑀭𑁄𑀧𑀺 𑀧𑀘𑁆𑀙𑀺𑀫𑀢𑁆𑀢𑁄 𑀳𑁄𑀢𑀺, 𑀅𑀮𑀁 𑀫𑀬𑁆𑀳𑀁 𑀢𑀬𑀸𑀢𑀺 𑀉𑀧𑁆𑀧𑀢𑀺𑀢𑁆𑀯𑀸 𑀅𑀜𑁆𑀜𑀲𑁆𑀫𑀺𑀁 𑀞𑀸𑀦𑁂 𑀧𑀢𑀺𑀢𑁄. 𑀢𑀢𑁄 𑀦𑀁 𑀧𑀣𑀯𑀻 𑀆𑀳 𑁋 ‘‘𑀅𑀳𑁄 𑀤𑀽𑀭𑀁 𑀕𑀢𑁄𑀧𑀺 𑀦𑀦𑀼 𑀫𑀬𑁆𑀳𑀁𑀬𑁂𑀯 𑀉𑀧𑀭𑀺 𑀧𑀢𑀺𑀢𑁄𑀲𑀻’’𑀢𑀺? 𑀲𑁄 𑀧𑀼𑀦 𑀢𑀁 𑀚𑀺𑀕𑀼𑀘𑁆𑀙𑀦𑁆𑀢𑁄 𑀉𑀧𑁆𑀧𑀢𑀺𑀢𑁆𑀯𑀸 𑀅𑀜𑁆𑀜𑀢𑁆𑀣 𑀧𑀢𑀺𑀢𑁄. 𑀏𑀯𑀁 𑀯𑀲𑁆𑀲𑀲𑀳𑀲𑁆𑀲𑀫𑁆𑀧𑀺 𑀉𑀧𑁆𑀧𑀢𑀺𑀢𑁆𑀯𑀸 𑀉𑀧𑁆𑀧𑀢𑀺𑀢𑁆𑀯𑀸 𑀧𑀢𑀫𑀸𑀦𑁄 𑀲𑀲𑀓𑁄 𑀦𑁂𑀯 𑀧𑀣𑀯𑀺𑀬𑀸 𑀅𑀦𑁆𑀢𑀁 𑀧𑀸𑀧𑀼𑀡𑀺𑀢𑀼𑀁 𑀲𑀓𑁆𑀓𑁄𑀢𑀺. 𑀦 𑀓𑁄𑀝𑀺𑀦𑁆𑀢𑀺 𑀦 𑀧𑀼𑀩𑁆𑀩𑀓𑁄𑀝𑀺𑀁. 𑀇𑀢𑀭𑁂𑀲𑀦𑁆𑀢𑀺 𑀯𑀺𑀧𑀜𑁆𑀘𑀺𑀢𑀜𑁆𑀜𑀼𑀦𑁂𑀬𑁆𑀬𑀧𑀤𑀧𑀭𑀫𑀸𑀦𑀁.

𑁧𑁫. 𑀧𑀜𑁆𑀘𑀫𑁂 𑀲𑀫𑀣𑁂𑀳𑀺 𑀅𑀥𑀺𑀓𑀭𑀻𑀬𑀢𑀺 𑀯𑀽𑀧𑀲𑀫𑁆𑀫𑀢𑀻𑀢𑀺 𑀅𑀥𑀺𑀓𑀭𑀡𑀁, 𑀅𑀝𑁆𑀞𑀸𑀭𑀲 𑀪𑁂𑀤𑀓𑀭𑀯𑀢𑁆𑀣𑀽𑀦𑀺 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑁄 𑀯𑀺𑀯𑀸𑀤𑁄𑀬𑁂𑀯 𑀯𑀺𑀯𑀸𑀤𑀸𑀥𑀺𑀓𑀭𑀡𑀁. ‘‘𑀇𑀥 𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀁 𑀅𑀦𑀼𑀯𑀤𑀦𑁆𑀢𑀺 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀯𑀸’’𑀢𑀺𑀆𑀤𑀺𑀦𑀸 (𑀘𑀽𑀴𑀯. 𑁨𑁧𑁫) 𑀘𑀢𑀲𑁆𑀲𑁄 𑀯𑀺𑀧𑀢𑁆𑀢𑀺𑀬𑁄 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑁄 𑀅𑀦𑀼𑀯𑀸𑀤𑁄𑀬𑁂𑀯 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁. 𑀧𑀜𑁆𑀘𑀧𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀆𑀧𑀢𑁆𑀢𑀸𑀥𑀺𑀓𑀭𑀡𑀁. ‘‘𑀲𑀢𑁆𑀢𑀧𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀆𑀧𑀢𑁆𑀢𑀸𑀥𑀺𑀓𑀭𑀡’’𑀦𑁆𑀢𑀺 (𑀘𑀽𑀴𑀯. 𑁨𑁧𑁫) 𑀯𑀘𑀦𑀢𑁄 𑀆𑀧𑀢𑁆𑀢𑀺𑀬𑁂𑀯 𑀆𑀧𑀢𑁆𑀢𑀸𑀥𑀺𑀓𑀭𑀡𑀁. ‘‘𑀬𑀸 𑀲𑀗𑁆𑀖𑀲𑁆𑀲 𑀓𑀺𑀘𑁆𑀘𑀬𑀢𑀸 𑀓𑀭𑀡𑀻𑀬𑀢𑀸 𑀅𑀧𑀮𑁄𑀓𑀦𑀓𑀫𑁆𑀫𑀁 𑀜𑀢𑁆𑀢𑀺𑀓𑀫𑁆𑀫𑀁 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀁 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫’’𑀦𑁆𑀢𑀺 (𑀘𑀽𑀴𑀯. 𑁨𑁧𑁫) 𑀏𑀯𑀫𑀸𑀕𑀢𑀁 𑀘𑀢𑀼𑀩𑁆𑀩𑀺𑀥𑀁 𑀲𑀗𑁆𑀖𑀓𑀺𑀘𑁆𑀘𑀁 𑀓𑀺𑀘𑁆𑀘𑀸𑀥𑀺𑀓𑀭𑀡𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑁧𑁬. 𑀙𑀝𑁆𑀞𑁂 𑀅𑀧𑀸𑀓𑀝𑀦𑀸𑀫𑁄𑀢𑀺 ‘‘𑀲𑁂𑀮𑁄, 𑀓𑀽𑀝𑀤𑀦𑁆𑀢𑁄’’𑀢𑀺𑀆𑀤𑀺𑀦𑀸 𑀅𑀦𑀪𑀺𑀜𑁆𑀜𑀸𑀢𑁄. 𑀬𑁂𑀦 𑀯𑀸 𑀓𑀸𑀭𑀡𑁂𑀦𑀸𑀢𑀺 𑀳𑁂𑀢𑀼𑀫𑁆𑀳𑀺 𑀇𑀤𑀁 𑀓𑀭𑀡𑀯𑀘𑀦𑀁. 𑀳𑁂𑀢𑀼𑀅𑀢𑁆𑀣𑁄 𑀳𑀺 𑀓𑀺𑀭𑀺𑀬𑀸𑀓𑀸𑀭𑀡𑀁, 𑀦 𑀓𑀭𑀡𑀁 𑀯𑀺𑀬 𑀓𑀺𑀭𑀺𑀬𑀢𑁆𑀣𑁄, 𑀢𑀲𑁆𑀫𑀸 𑀦𑀸𑀦𑀧𑁆𑀧𑀓𑀸𑀭𑀕𑀼𑀡𑀯𑀺𑀲𑁂𑀲𑀸𑀥𑀺𑀕𑀫𑀢𑁆𑀣𑀸 𑀇𑀥 𑀉𑀧𑀲𑀗𑁆𑀓𑀫𑀦𑀓𑀺𑀭𑀺𑀬𑀸𑀢𑀺 ‘‘𑀅𑀦𑁆𑀦𑁂𑀦 𑀯𑀲𑀢𑀺, 𑀅𑀚𑁆𑀛𑁂𑀦𑁂𑀦 𑀯𑀲𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬 𑀳𑁂𑀢𑀼𑀅𑀢𑁆𑀣𑀫𑁂𑀯𑁂𑀢𑀁 𑀓𑀭𑀡𑀯𑀘𑀦𑀁 𑀬𑀼𑀢𑁆𑀢𑀁, 𑀦 𑀓𑀭𑀡𑀢𑁆𑀣𑀁 𑀢𑀲𑁆𑀲 𑀅𑀬𑀼𑀚𑁆𑀚𑀫𑀸𑀦𑀢𑁆𑀢𑀸𑀢𑀺 𑀯𑀼𑀢𑁆𑀢𑀁 ‘‘𑀬𑁂𑀦 𑀯𑀸 𑀓𑀸𑀭𑀡𑁂𑀦𑀸’’𑀢𑀺. 𑀅𑀯𑀺𑀪𑀸𑀕𑀢𑁄 𑀲𑀢𑀢𑀁 𑀧𑀯𑀢𑁆𑀢𑀺𑀢𑀦𑀺𑀭𑀢𑀺𑀲𑀬𑀲𑀸𑀤𑀼𑀯𑀺𑀧𑀼𑀮𑀸𑀫𑀢𑀭𑀲𑀲𑀤𑁆𑀥𑀫𑁆𑀫𑀨𑀮𑀢𑀸𑀬 𑀲𑀸𑀤𑀼𑀨𑀮𑀦𑀺𑀘𑁆𑀘𑀨𑀮𑀺𑀢𑀫𑀳𑀸𑀭𑀼𑀓𑁆𑀔𑁂𑀦 𑀪𑀕𑀯𑀸 𑀉𑀧𑀫𑀺𑀢𑁄. 𑀲𑀸𑀤𑀼𑀨𑀮𑀽𑀧𑀪𑁄𑀕𑀸𑀥𑀺𑀧𑁆𑀧𑀸𑀬𑀕𑁆𑀕𑀳𑀡𑁂𑀦𑁂𑀯 𑀳𑀺 𑀭𑀼𑀓𑁆𑀔𑀲𑁆𑀲 𑀲𑀸𑀤𑀼𑀨𑀮𑀢𑀸 𑀕𑀳𑀺𑀢𑀸𑀢𑀺. 𑀉𑀧𑀲𑀗𑁆𑀓𑀫𑀻𑀢𑀺 𑀉𑀧𑀲𑀗𑁆𑀓𑀦𑁆𑀢𑁄. 𑀲𑀫𑁆𑀧𑀢𑁆𑀢𑀓𑀸𑀫𑀢𑀸𑀬 𑀳𑀺 𑀓𑀺𑀜𑁆𑀘𑀺 𑀞𑀸𑀦𑀁 𑀕𑀘𑁆𑀙𑀦𑁆𑀢𑁄 𑀢𑀁𑀢𑀁𑀧𑀤𑁂𑀲𑀸𑀢𑀺𑀓𑁆𑀓𑀫𑀦𑁂𑀦 𑀉𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀦𑁆𑀢𑁄𑀢𑀺 𑀘 𑀯𑀢𑁆𑀢𑀩𑁆𑀩𑀢𑀁 𑀮𑀪𑀢𑀺. 𑀢𑁂𑀦𑀸𑀳 ‘‘𑀕𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺, 𑀉𑀧𑀕𑀢𑁄𑀢𑀺 𑀅𑀢𑁆𑀣𑁄. 𑀉𑀧𑀲𑀗𑁆𑀓𑀫𑀺𑀢𑁆𑀯𑀸𑀢𑀺 𑀧𑀼𑀩𑁆𑀩𑀓𑀸𑀮𑀓𑀺𑀭𑀺𑀬𑀸𑀦𑀺𑀤𑁆𑀤𑁂𑀲𑁄𑀢𑀺 𑀆𑀳 ‘‘𑀉𑀧𑀲𑀗𑁆𑀓𑀫𑀦𑀧𑀭𑀺𑀬𑁄𑀲𑀸𑀦𑀤𑀻𑀧𑀦’’𑀦𑁆𑀢𑀺. 𑀢𑀢𑁄𑀢𑀺 𑀬𑀁 𑀞𑀸𑀦𑀁 𑀧𑀢𑁆𑀢𑁄 ‘‘𑀉𑀧𑀲𑀗𑁆𑀓𑀫𑀻’’𑀢𑀺 𑀯𑀼𑀢𑁆𑀢𑁄, 𑀢𑀢𑁄 𑀉𑀧𑀕𑀢𑀝𑁆𑀞𑀸𑀦𑀢𑁄.

𑀬𑀣𑀸 𑀔𑀫𑀦𑀻𑀬𑀸𑀤𑀻𑀦𑀺 𑀧𑀼𑀘𑁆𑀙𑀦𑁆𑀢𑁄𑀢𑀺 𑀬𑀣𑀸 𑀪𑀕𑀯𑀸 ‘‘𑀓𑀘𑁆𑀘𑀺 𑀢𑁂, 𑀩𑁆𑀭𑀸𑀳𑁆𑀫𑀡, 𑀔𑀫𑀦𑀻𑀬𑀁, 𑀓𑀘𑁆𑀘𑀺 𑀬𑀸𑀧𑀦𑀻𑀬’’𑀦𑁆𑀢𑀺𑀆𑀤𑀺𑀦𑀸 𑀔𑀫𑀦𑀻𑀬𑀸𑀤𑀻𑀦𑀺 𑀧𑀼𑀘𑁆𑀙𑀦𑁆𑀢𑁄 𑀢𑁂𑀦 𑀩𑁆𑀭𑀸𑀳𑁆𑀫𑀡𑁂𑀦 𑀲𑀤𑁆𑀥𑀺𑀁 𑀲𑀫𑀧𑁆𑀧𑀯𑀢𑁆𑀢𑀫𑁄𑀤𑁄 𑀅𑀳𑁄𑀲𑀺 𑀧𑀼𑀩𑁆𑀩𑀪𑀸𑀲𑀺𑀢𑀸𑀬, 𑀏𑀯𑀁 𑀲𑁄𑀧𑀺 𑀩𑁆𑀭𑀸𑀳𑁆𑀫𑀡𑁄 𑀢𑀤𑀦𑀼𑀓𑀭𑀡𑁂𑀦 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑀧𑁆𑀧𑀯𑀢𑁆𑀢𑀫𑁄𑀤𑁄 𑀅𑀳𑁄𑀲𑀻𑀢𑀺 𑀬𑁄𑀚𑀦𑀸. 𑀢𑀁 𑀧𑀦 𑀲𑀫𑀧𑁆𑀧𑀯𑀢𑁆𑀢𑀫𑁄𑀤𑀢𑀁 𑀉𑀧𑀫𑀸𑀬 𑀤𑀲𑁆𑀲𑁂𑀢𑀼𑀁 ‘‘𑀲𑀻𑀢𑁄𑀤𑀓𑀁 𑀯𑀺𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀫𑁆𑀫𑁄𑀤𑀺𑀢𑀦𑁆𑀢𑀺 𑀲𑀁𑀲𑀦𑁆𑀤𑀺𑀢𑀁. 𑀏𑀓𑀻𑀪𑀸𑀯𑀦𑁆𑀢𑀺 𑀲𑀫𑁆𑀫𑁄𑀤𑀦𑀓𑀺𑀭𑀺𑀬𑀸𑀬 𑀲𑀫𑀸𑀦𑀢𑀁. 𑀔𑀫𑀦𑀻𑀬𑀦𑁆𑀢𑀺 ‘‘𑀇𑀤𑀁 𑀘𑀢𑀼𑀘𑀓𑁆𑀓𑀁 𑀦𑀯𑀤𑁆𑀯𑀸𑀭𑀁 𑀲𑀭𑀻𑀭𑀬𑀦𑁆𑀢𑀁 𑀤𑀼𑀓𑁆𑀔𑀩𑀳𑀼𑀮𑀢𑀸𑀬 𑀲𑀪𑀸𑀯𑀢𑁄 𑀤𑀼𑀲𑁆𑀲𑀳𑀁, 𑀓𑀘𑁆𑀘𑀺 𑀔𑀫𑀺𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬’’𑀦𑁆𑀢𑀺 𑀧𑀼𑀘𑁆𑀙𑀢𑀺. 𑀬𑀸𑀧𑀦𑀻𑀬𑀦𑁆𑀢𑀺 𑀆𑀳𑀸𑀭𑀸𑀤𑀺𑀧𑁆𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀓𑀁 𑀘𑀺𑀭𑀧𑁆𑀧𑀩𑀦𑁆𑀥𑀲𑀗𑁆𑀔𑀸𑀢𑀸𑀬 𑀬𑀸𑀧𑀦𑀸𑀬 𑀓𑀘𑁆𑀘𑀺 𑀬𑀸𑀧𑁂𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀁. 𑀲𑀻𑀲𑀭𑁄𑀕𑀸𑀤𑀺𑀆𑀩𑀸𑀥𑀸𑀪𑀸𑀯𑁂𑀦 𑀓𑀘𑁆𑀘𑀺 𑀅𑀧𑁆𑀧𑀸𑀩𑀸𑀥𑀁. 𑀤𑀼𑀓𑁆𑀔𑀚𑀻𑀯𑀺𑀓𑀸𑀪𑀸𑀯𑁂𑀦 𑀓𑀘𑁆𑀘𑀺 𑀅𑀧𑁆𑀧𑀸𑀢𑀗𑁆𑀓𑀁. 𑀢𑀁𑀢𑀁𑀓𑀺𑀘𑁆𑀘𑀓𑀭𑀡𑁂 𑀉𑀝𑁆𑀞𑀸𑀦𑀲𑀼𑀔𑀢𑀸𑀬 𑀓𑀘𑁆𑀘𑀺 𑀮𑀳𑀼𑀝𑁆𑀞𑀸𑀦𑀁. 𑀢𑀤𑀦𑀼𑀭𑀽𑀧𑀩𑀮𑀬𑁄𑀕𑀢𑁄 𑀓𑀘𑁆𑀘𑀺 𑀩𑀮𑀁. 𑀲𑀼𑀔𑀯𑀺𑀳𑀸𑀭𑀲𑀫𑁆𑀪𑀯𑁂𑀦 𑀓𑀘𑁆𑀘𑀺 𑀨𑀸𑀲𑀼𑀯𑀺𑀳𑀸𑀭𑁄 𑀅𑀢𑁆𑀣𑀻𑀢𑀺 𑀲𑀩𑁆𑀩𑀢𑁆𑀣 𑀓𑀘𑁆𑀘𑀺-𑀲𑀤𑁆𑀤𑀁 𑀬𑁄𑀚𑁂𑀢𑁆𑀯𑀸 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀩𑀮𑀧𑁆𑀧𑀢𑁆𑀢𑀸 𑀧𑀻𑀢𑀺 𑀧𑀻𑀢𑀺𑀬𑁂𑀯. 𑀢𑀭𑀼𑀡𑀧𑀻𑀢𑀺 𑀧𑀸𑀫𑁄𑀚𑁆𑀚𑀁. 𑀲𑀫𑁆𑀫𑁄𑀤𑀁 𑀚𑀦𑁂𑀢𑀺 𑀓𑀭𑁄𑀢𑀻𑀢𑀺 𑀲𑀫𑁆𑀫𑁄𑀤𑀦𑀻𑀓𑀁, 𑀢𑀤𑁂𑀯 𑀲𑀫𑁆𑀫𑁄𑀤𑀦𑀻𑀬𑀁. 𑀲𑀫𑁆𑀫𑁄𑀤𑀺𑀢𑀩𑁆𑀩𑀢𑁄 𑀲𑀫𑁆𑀫𑁄𑀤𑀦𑀻𑀬𑀦𑁆𑀢𑀺 𑀇𑀫𑀁 𑀧𑀦 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀫𑁆𑀫𑁄𑀤𑀺𑀢𑀼𑀁 𑀬𑀼𑀢𑁆𑀢𑀪𑀸𑀯𑀢𑁄’’𑀢𑀺 𑀆𑀳. 𑀲𑀭𑀺𑀢𑀩𑁆𑀩𑀪𑀸𑀯𑀢𑁄𑀢𑀺 𑀅𑀦𑀼𑀲𑁆𑀲𑀭𑀺𑀢𑀩𑁆𑀩𑀪𑀸𑀯𑀢𑁄. ‘‘𑀲𑀭𑀡𑀻𑀬’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀤𑀻𑀖𑀁 𑀓𑀢𑁆𑀯𑀸 ‘‘𑀲𑀸𑀭𑀡𑀻𑀬’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀼𑀬𑁆𑀬𑀫𑀸𑀦𑀲𑀼𑀔𑀢𑁄𑀢𑀺 𑀆𑀧𑀸𑀣𑀕𑀢𑀫𑀥𑀼𑀭𑀢𑀁 𑀆𑀳, 𑀅𑀦𑀼𑀲𑁆𑀲𑀭𑀺𑀬𑀫𑀸𑀦𑀲𑀼𑀔𑀢𑁄𑀢𑀺 𑀯𑀺𑀫𑀤𑁆𑀤𑀭𑀫𑀡𑀻𑀬𑀢𑀁. 𑀩𑁆𑀬𑀜𑁆𑀚𑀦𑀧𑀭𑀺𑀲𑀼𑀤𑁆𑀥𑀢𑀸𑀬𑀸𑀢𑀺 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀪𑀸𑀯𑁂𑀦 𑀢𑀲𑁆𑀲𑀸 𑀓𑀣𑀸𑀬 𑀯𑀘𑀦𑀘𑀸𑀢𑀼𑀭𑀺𑀬𑀫𑀸𑀳. 𑀅𑀢𑁆𑀣𑀧𑀭𑀺𑀲𑀼𑀤𑁆𑀥𑀢𑀸𑀬𑀸𑀢𑀺 𑀅𑀢𑁆𑀣𑀲𑁆𑀲 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀢𑀁. 𑀅𑀦𑁂𑀓𑁂𑀳𑀺 𑀧𑀭𑀺𑀬𑀸𑀬𑁂𑀳𑀻𑀢𑀺 𑀅𑀦𑁂𑀓𑁂𑀳𑀺 𑀓𑀸𑀭𑀡𑁂𑀳𑀺.

𑀅𑀢𑀺𑀤𑀽𑀭𑀅𑀘𑁆𑀘𑀸𑀲𑀦𑁆𑀦𑀧𑁆𑀧𑀝𑀺𑀓𑁆𑀔𑁂𑀧𑁂𑀦 𑀦𑀸𑀢𑀺𑀤𑀽𑀭𑀁 𑀦𑀘𑁆𑀘𑀸𑀲𑀦𑁆𑀦𑀁 𑀦𑀸𑀫 𑀕𑀳𑀺𑀢𑀁, 𑀢𑀁 𑀧𑀦 𑀅𑀯𑀓𑀁𑀲𑀢𑁄 𑀉𑀪𑀺𑀦𑁆𑀦𑀁 𑀧𑀲𑀸𑀭𑀺𑀢𑀳𑀢𑁆𑀣𑀸𑀲𑀗𑁆𑀖𑀝𑁆𑀝𑀦𑁂𑀦 𑀤𑀝𑁆𑀞𑀩𑁆𑀩𑀁. 𑀕𑀻𑀯𑀁 𑀧𑀲𑀸𑀭𑁂𑀢𑁆𑀯𑀸𑀢𑀺 𑀕𑀻𑀯𑀁 𑀧𑀭𑀺𑀯𑀝𑁆𑀝𑀦𑀯𑀲𑁂𑀦 𑀧𑀲𑀸𑀭𑁂𑀢𑁆𑀯𑀸.

𑀏𑀢𑀤𑀯𑁄𑀘𑀸𑀢𑀺 𑀏𑀢𑀁 ‘‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀳𑁂𑀢𑀽’’𑀢𑀺𑀆𑀤𑀺𑀧𑀼𑀘𑁆𑀙𑀸𑀯𑀘𑀦𑀁 𑀅𑀯𑁄𑀘. 𑀢𑁂𑀦𑁂𑀯 ‘‘𑀏𑀢𑀤𑀯𑁄𑀘𑀸’’𑀢𑀺 𑀧𑀤𑀁 𑀉𑀤𑁆𑀥𑀭𑀺𑀢𑁆𑀯𑀸 𑀤𑀼𑀯𑀺𑀥𑀸 𑀳𑀺 𑀧𑀼𑀘𑁆𑀙𑀸𑀢𑀺𑀆𑀤𑀺𑀦𑀸 𑀧𑀼𑀘𑁆𑀙𑀸𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀅𑀕𑀸𑀭𑁂 𑀦𑀺𑀬𑀼𑀢𑁆𑀢𑁄 𑀅𑀕𑀸𑀭𑀺𑀓𑁄, 𑀢𑀲𑁆𑀲 𑀧𑀼𑀘𑁆𑀙𑀸 𑀅𑀕𑀸𑀭𑀺𑀓𑀧𑀼𑀘𑁆𑀙𑀸. 𑀅𑀕𑀸𑀭𑀺𑀓𑀢𑁄 𑀅𑀜𑁆𑀜𑁄 𑀅𑀦𑀕𑀸𑀭𑀺𑀓𑁄 𑀧𑀩𑁆𑀩𑀚𑁆𑀚𑀽𑀧𑀕𑀢𑁄, 𑀢𑀲𑁆𑀲 𑀧𑀼𑀘𑁆𑀙𑀸 𑀅𑀦𑀕𑀸𑀭𑀺𑀓𑀧𑀼𑀘𑁆𑀙𑀸. 𑀓𑀺𑀜𑁆𑀘𑀸𑀧𑀺 𑀅𑀜𑁆𑀜𑀢𑁆𑀣 ‘‘𑀚𑀦𑀓𑁄 𑀳𑁂𑀢𑀼, 𑀧𑀕𑁆𑀕𑀸𑀳𑀓𑁄 𑀧𑀘𑁆𑀘𑀬𑁄. 𑀅𑀲𑀸𑀥𑀸𑀭𑀡𑁄 𑀳𑁂𑀢𑀼, 𑀲𑀸𑀥𑀸𑀭𑀡𑁄 𑀧𑀘𑁆𑀘𑀬𑁄. 𑀲𑀪𑀸𑀕𑁄 𑀳𑁂𑀢𑀼, 𑀅𑀲𑀪𑀸𑀕𑁄 𑀧𑀘𑁆𑀘𑀬𑁄. 𑀧𑀼𑀩𑁆𑀩𑀓𑀸𑀮𑀺𑀓𑁄 𑀳𑁂𑀢𑀼, 𑀲𑀳𑀧𑀯𑀢𑁆𑀢𑁄 𑀧𑀘𑁆𑀘𑀬𑁄’’𑀢𑀺𑀆𑀤𑀺𑀦𑀸 𑀳𑁂𑀢𑀼𑀧𑀘𑁆𑀘𑀬𑀸 𑀯𑀺𑀪𑀚𑁆𑀚 𑀯𑀼𑀘𑁆𑀘𑀦𑁆𑀢𑀺. 𑀇𑀥 𑀧𑀦 ‘‘𑀘𑀢𑁆𑀢𑀸𑀭𑁄 𑀔𑁄, 𑀪𑀺𑀓𑁆𑀔𑀯𑁂, 𑀫𑀳𑀸𑀪𑀽𑀢𑀸 𑀳𑁂𑀢𑀼 𑀘𑀢𑁆𑀢𑀸𑀭𑁄 𑀫𑀳𑀸𑀪𑀽𑀢𑀸 𑀧𑀘𑁆𑀘𑀬𑁄 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀧𑀜𑁆𑀜𑀸𑀧𑀦𑀸𑀬𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁮𑁬) 𑀯𑀺𑀬 𑀳𑁂𑀢𑀼𑀧𑀘𑁆𑀘𑀬𑀲𑀤𑁆𑀤𑀸 𑀲𑀫𑀸𑀦𑀢𑁆𑀣𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀉𑀪𑀬𑀫𑁆𑀧𑁂𑀢𑀁 𑀓𑀸𑀭𑀡𑀯𑁂𑀯𑀘𑀦𑀫𑁂𑀯𑀸’’𑀢𑀺 𑀆𑀳. 𑀯𑀺𑀲𑀫𑀘𑀭𑀺𑀬𑀸𑀢𑀺 𑀪𑀸𑀯𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄.

𑀅𑀪𑀺𑀓𑁆𑀓𑀦𑁆𑀢𑀸𑀢𑀺 𑀅𑀢𑀺𑀓𑁆𑀓𑀦𑁆𑀢𑀸, 𑀯𑀺𑀕𑀢𑀸𑀢𑀺 𑀅𑀢𑁆𑀣𑁄𑀢𑀺 𑀆𑀳 ‘‘𑀔𑀬𑁂 𑀤𑀺𑀲𑁆𑀲𑀢𑀻’’𑀢𑀺. 𑀢𑀣𑀸 𑀳𑀺 ‘‘𑀦𑀺𑀓𑁆𑀔𑀦𑁆𑀢𑁄 𑀧𑀞𑀫𑁄 𑀬𑀸𑀫𑁄’’𑀢𑀺 𑀉𑀧𑀭𑀺 𑀯𑀼𑀢𑁆𑀢𑀁. 𑀅𑀪𑀺𑀓𑁆𑀓𑀦𑁆𑀢𑀢𑀭𑁄𑀢𑀺 𑀅𑀢𑀺𑀯𑀺𑀬 𑀓𑀦𑁆𑀢𑀢𑀭𑁄 𑀫𑀦𑁄𑀭𑀫𑁄, 𑀢𑀸𑀤𑀺𑀲𑁄 𑀘 𑀲𑀼𑀦𑁆𑀤𑀭𑁄 𑀪𑀤𑁆𑀤𑀓𑁄 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀲𑀼𑀦𑁆𑀤𑀭𑁂 𑀤𑀺𑀲𑁆𑀲𑀢𑀻’’𑀢𑀺. 𑀓𑁄𑀢𑀺 𑀤𑁂𑀯𑀦𑀸𑀕𑀬𑀓𑁆𑀔𑀕𑀦𑁆𑀥𑀩𑁆𑀩𑀸𑀤𑀻𑀲𑀼 𑀓𑁄 𑀓𑀢𑀫𑁄? 𑀫𑁂𑀢𑀺 𑀫𑀫. 𑀧𑀸𑀤𑀸𑀦𑀻𑀢𑀺 𑀧𑀸𑀤𑁂. 𑀇𑀤𑁆𑀥𑀺𑀬𑀸𑀢𑀺 𑀇𑀫𑀸𑀬 𑀏𑀯𑀭𑀽𑀧𑀸𑀬 𑀤𑁂𑀯𑀺𑀤𑁆𑀥𑀺𑀬𑀸. 𑀬𑀲𑀲𑀸𑀢𑀺 𑀇𑀫𑀺𑀦𑀸 𑀏𑀤𑀺𑀲𑁂𑀦 𑀧𑀭𑀺𑀯𑀸𑀭𑁂𑀦 𑀧𑀭𑀺𑀘𑁆𑀙𑁂𑀤𑁂𑀦 𑀘. 𑀚𑀮𑀦𑁆𑀢𑀺 𑀯𑀺𑀚𑁆𑀚𑁄𑀢𑀫𑀸𑀦𑁄. 𑀅𑀪𑀺𑀓𑁆𑀓𑀦𑁆𑀢𑁂𑀦𑀸𑀢𑀺 𑀅𑀢𑀺𑀯𑀺𑀬 𑀓𑀦𑁆𑀢𑁂𑀦 𑀓𑀫𑀦𑀻𑀬𑁂𑀦 𑀅𑀪𑀺𑀭𑀽𑀧𑁂𑀦. 𑀯𑀡𑁆𑀡𑁂𑀦𑀸𑀢𑀺 𑀙𑀯𑀺𑀯𑀡𑁆𑀡𑁂𑀦 𑀲𑀭𑀻𑀭𑀯𑀡𑁆𑀡𑀦𑀺𑀪𑀸𑀬. 𑀲𑀩𑁆𑀩𑀸 𑀑𑀪𑀸𑀲𑀬𑀁 𑀤𑀺𑀲𑀸𑀢𑀺 𑀤𑀲 𑀤𑀺𑀲𑀸 𑀧𑀪𑀸𑀲𑁂𑀦𑁆𑀢𑁄, 𑀘𑀦𑁆𑀤𑁄 𑀯𑀺𑀬 𑀲𑀽𑀭𑀺𑀬𑁄 𑀯𑀺𑀬 𑀘 𑀏𑀓𑁄𑀪𑀸𑀲𑀁 𑀏𑀓𑀸𑀮𑁄𑀓𑀁 𑀓𑀭𑁄𑀦𑁆𑀢𑁄𑀢𑀺 𑀕𑀸𑀣𑀸𑀬 𑀅𑀢𑁆𑀣𑁄. 𑀅𑀪𑀺𑀭𑀽𑀧𑁂𑀢𑀺 𑀉𑀴𑀸𑀭𑀭𑀽𑀧𑁂 𑀲𑀫𑁆𑀧𑀦𑁆𑀦𑀭𑀽𑀧𑁂.

‘‘𑀘𑁄𑀭𑁄, 𑀘𑁄𑀭𑁄; 𑀲𑀧𑁆𑀧𑁄, 𑀲𑀧𑁆𑀧𑁄’’𑀢𑀺𑀆𑀤𑀻𑀲𑀼 𑀪𑀬𑁂 𑀆𑀫𑁂𑀟𑀺𑀢𑀁. ‘‘𑀯𑀺𑀚𑁆𑀛, 𑀯𑀺𑀚𑁆𑀛; 𑀧𑀳𑀭, 𑀧𑀳𑀭𑀸’’𑀢𑀺𑀆𑀤𑀻𑀲𑀼 𑀓𑁄𑀥𑁂. ‘‘𑀲𑀸𑀥𑀼, 𑀲𑀸𑀥𑀽’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩𑁨𑁭.𑀲𑀁. 𑀦𑀺. 𑁨.𑁧𑁨𑁭; 𑁩.𑁩𑁫; 𑁫.𑁧𑁦𑁮𑁫) 𑀧𑀲𑀁𑀲𑀸𑀬𑀁. ‘‘𑀕𑀘𑁆𑀙, 𑀕𑀘𑁆𑀙; 𑀮𑀼𑀦𑀸𑀳𑀺, 𑀮𑀼𑀦𑀸𑀳𑀻’’𑀢𑀺𑀆𑀤𑀻𑀲𑀼 𑀢𑀼𑀭𑀺𑀢𑁂. ‘‘𑀆𑀕𑀘𑁆𑀙, 𑀆𑀕𑀘𑁆𑀙𑀸’’𑀢𑀺𑀆𑀤𑀻𑀲𑀼 𑀓𑁄𑀢𑀽𑀳𑀮𑁂. ‘‘𑀩𑀼𑀤𑁆𑀥𑁄, 𑀩𑀼𑀤𑁆𑀥𑁄𑀢𑀺 𑀘𑀺𑀦𑁆𑀢𑁂𑀦𑁆𑀢𑁄’’𑀢𑀺𑀆𑀤𑀻𑀲𑀼 (𑀩𑀼. 𑀯𑀁. 𑁨.𑁪𑁪) 𑀅𑀘𑁆𑀙𑀭𑁂. ‘‘𑀅𑀪𑀺𑀓𑁆𑀓𑀫𑀣𑀸𑀬𑀲𑁆𑀫𑀦𑁆𑀢𑁄, 𑀅𑀪𑀺𑀓𑁆𑀓𑀫𑀣𑀸𑀬𑀲𑁆𑀫𑀦𑁆𑀢𑁄’’𑀢𑀺𑀆𑀤𑀻𑀲𑀼 𑀳𑀸𑀲𑁂. ‘‘𑀓𑀳𑀁 𑀏𑀓𑀧𑀼𑀢𑁆𑀢𑀓, 𑀓𑀳𑀁 𑀏𑀓𑀧𑀼𑀢𑁆𑀢𑀓𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁩𑁫𑁩; 𑀲𑀁. 𑀦𑀺. 𑁨.𑁬𑁩) 𑀲𑁄𑀓𑁂. ‘‘𑀅𑀳𑁄 𑀲𑀼𑀔𑀁, 𑀅𑀳𑁄 𑀲𑀼𑀔’’𑀦𑁆𑀢𑀺𑀆𑀤𑀻𑀲𑀼 (𑀉𑀤𑀸. 𑁨𑁦; 𑀤𑀻. 𑀦𑀺. 𑁩.𑁩𑁦𑁫; 𑀘𑀽𑀴𑀯. 𑁩𑁩𑁨) 𑀧𑀲𑀸𑀤𑁂. 𑀘-𑀲𑀤𑁆𑀤𑁄 𑀅𑀯𑀼𑀢𑁆𑀢𑀲𑀫𑀼𑀘𑁆𑀘𑀬𑀢𑁆𑀢𑁄. 𑀢𑁂𑀦 𑀕𑀭𑀳𑀸𑀅𑀲𑀫𑁆𑀫𑀸𑀦𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀢𑀢𑁆𑀣 ‘‘𑀧𑀸𑀧𑁄, 𑀧𑀸𑀧𑁄’’𑀢𑀺𑀆𑀤𑀻𑀲𑀼 𑀕𑀭𑀳𑀸𑀬𑀁. ‘‘𑀅𑀪𑀺𑀭𑀽𑀧𑀓, 𑀅𑀪𑀺𑀭𑀽𑀧𑀓𑀸’’𑀢𑀺𑀆𑀤𑀻𑀲𑀼 𑀅𑀲𑀫𑁆𑀫𑀸𑀦𑁂 𑀤𑀝𑁆𑀞𑀩𑁆𑀩𑀁.

𑀦𑀬𑀺𑀤𑀁 𑀆𑀫𑁂𑀟𑀺𑀢𑀯𑀲𑁂𑀦 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀼𑀢𑁆𑀢𑀁, 𑀅𑀣 𑀔𑁄 𑀅𑀢𑁆𑀣𑀤𑁆𑀯𑀬𑀯𑀲𑁂𑀦𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀣 𑀯𑀸’’𑀢𑀺𑀆𑀤𑀺𑀫𑀸𑀳. ‘‘𑀅𑀪𑀺𑀓𑁆𑀓𑀦𑁆𑀢’’𑀦𑁆𑀢𑀺 𑀯𑀘𑀦𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀦𑀧𑀼𑀁𑀲𑀓𑀯𑀲𑁂𑀦 𑀯𑀼𑀢𑁆𑀢𑀁, 𑀢𑀁 𑀧𑀦 𑀪𑀕𑀯𑀢𑁄 𑀯𑀘𑀦𑀁 𑀥𑀫𑁆𑀫𑀲𑁆𑀲 𑀤𑁂𑀲𑀦𑀸𑀢𑀺 𑀓𑀢𑁆𑀯𑀸 𑀢𑀣𑀸 𑀯𑀼𑀢𑁆𑀢𑀁 ‘‘𑀪𑁄𑀢𑁄 𑀕𑁄𑀢𑀫𑀲𑁆𑀲 𑀥𑀫𑁆𑀫𑀤𑁂𑀲𑀦𑀸’’𑀢𑀺. 𑀤𑀼𑀢𑀺𑀬𑀧𑀤𑁂𑀧𑀺 𑀏𑀲𑁂𑀯 𑀦𑀬𑁄. 𑀤𑁄𑀲𑀦𑀸𑀲𑀦𑀢𑁄𑀢𑀺 𑀭𑀸𑀕𑀸𑀤𑀺𑀓𑀺𑀮𑁂𑀲𑀯𑀺𑀥𑀫𑀦𑀢𑁄. 𑀕𑀼𑀡𑀸𑀥𑀺𑀕𑀫𑀦𑀢𑁄𑀢𑀺 𑀲𑀻𑀮𑀸𑀤𑀺𑀕𑀼𑀡𑀸𑀦𑀁 𑀲𑀫𑁆𑀧𑀸𑀧𑀦𑀢𑁄. 𑀬𑁂 𑀕𑀼𑀡𑁂 𑀤𑁂𑀲𑀦𑀸 𑀅𑀥𑀺𑀕𑀫𑁂𑀢𑀺, 𑀢𑁂𑀲𑀼 𑀧𑀥𑀸𑀦𑀪𑀽𑀢𑁂 𑀢𑀸𑀯 𑀤𑀲𑁆𑀲𑁂𑀢𑀼𑀁 ‘‘𑀲𑀤𑁆𑀥𑀸𑀚𑀦𑀦𑀢𑁄 𑀧𑀜𑁆𑀜𑀸𑀚𑀦𑀦𑀢𑁄’’𑀢𑀺 𑀯𑀼𑀢𑁆𑀢𑀁. 𑀲𑀤𑁆𑀥𑀸𑀧𑀫𑀼𑀔𑀸 𑀳𑀺 𑀮𑁄𑀓𑀺𑀬𑀸 𑀕𑀼𑀡𑀸, 𑀧𑀜𑁆𑀜𑀸𑀧𑀫𑀼𑀔𑀸 𑀮𑁄𑀓𑀼𑀢𑁆𑀢𑀭𑀸.

𑀲𑀻𑀮𑀸𑀤𑀺𑀅𑀢𑁆𑀣𑀲𑀫𑁆𑀧𑀢𑁆𑀢𑀺𑀬𑀸 𑀲𑀸𑀢𑁆𑀣𑀢𑁄, 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀬𑀸 𑀲𑀩𑁆𑀬𑀜𑁆𑀚𑀦𑀢𑁄. 𑀲𑀼𑀯𑀺𑀜𑁆𑀜𑁂𑀬𑁆𑀬𑀲𑀤𑁆𑀤𑀧𑁆𑀧𑀬𑁄𑀕𑀢𑀸𑀬 𑀉𑀢𑁆𑀢𑀸𑀦𑀧𑀤𑀢𑁄, 𑀲𑀡𑁆𑀳𑀲𑀼𑀔𑀼𑀫𑀪𑀸𑀯𑁂𑀦 𑀤𑀼𑀯𑀺𑀜𑁆𑀜𑁂𑀬𑁆𑀬𑀢𑁆𑀣𑀢𑀸𑀬 𑀕𑀫𑁆𑀪𑀻𑀭𑀢𑁆𑀣𑀢𑁄. 𑀲𑀺𑀦𑀺𑀤𑁆𑀥𑀫𑀼𑀤𑀼𑀫𑀥𑀼𑀭𑀲𑀤𑁆𑀤𑀧𑁆𑀧𑀬𑁄𑀕𑀢𑀸𑀬 𑀓𑀡𑁆𑀡𑀲𑀼𑀔𑀢𑁄, 𑀯𑀺𑀧𑀼𑀮𑀯𑀺𑀲𑀼𑀤𑁆𑀥𑀧𑁂𑀫𑀦𑀻𑀬𑀢𑁆𑀣𑀢𑀸𑀬 𑀳𑀤𑀬𑀗𑁆𑀕𑀫𑀢𑁄. 𑀫𑀸𑀦𑀸𑀢𑀺𑀫𑀸𑀦𑀯𑀺𑀥𑀫𑀦𑁂𑀦 𑀅𑀦𑀢𑁆𑀢𑀼𑀓𑁆𑀓𑀁𑀲𑀦𑀢𑁄, 𑀣𑀫𑁆𑀪𑀲𑀸𑀭𑀫𑁆𑀪𑀦𑀺𑀫𑁆𑀫𑀤𑁆𑀤𑀦𑁂𑀦 𑀅𑀧𑀭𑀯𑀫𑁆𑀪𑀦𑀢𑁄. 𑀳𑀺𑀢𑀸𑀥𑀺𑀧𑁆𑀧𑀸𑀬𑀧𑁆𑀧𑀯𑀢𑁆𑀢𑀺𑀬𑀸 𑀧𑀭𑁂𑀲𑀁 𑀭𑀸𑀕𑀧𑀭𑀺𑀴𑀸𑀳𑀸𑀤𑀺𑀯𑀽𑀧𑀲𑀫𑀦𑁂𑀦 𑀓𑀭𑀼𑀡𑀸𑀲𑀻𑀢𑀮𑀢𑁄, 𑀓𑀺𑀮𑁂𑀲𑀦𑁆𑀥𑀓𑀸𑀭𑀯𑀺𑀥𑀫𑀦𑁂𑀦 𑀧𑀜𑁆𑀜𑀸𑀯𑀤𑀸𑀢𑀢𑁄. 𑀓𑀭𑀯𑀻𑀓𑀭𑀼𑀢𑀫𑀜𑁆𑀚𑀼𑀢𑀸𑀬 𑀆𑀧𑀸𑀣𑀭𑀫𑀡𑀻𑀬𑀢𑁄, 𑀧𑀼𑀩𑁆𑀩𑀸𑀧𑀭𑀸𑀯𑀺𑀭𑀼𑀤𑁆𑀥𑀲𑀼𑀯𑀺𑀲𑀼𑀤𑁆𑀥𑀢𑁆𑀣𑀢𑀸𑀬 𑀯𑀺𑀫𑀤𑁆𑀤𑀓𑁆𑀔𑀫𑀢𑁄. 𑀆𑀧𑀸𑀣𑀭𑀫𑀡𑀻𑀬𑀢𑀸𑀬 𑀏𑀯𑀁 𑀲𑀼𑀬𑁆𑀬𑀫𑀸𑀦𑀲𑀼𑀔𑀢𑁄, 𑀯𑀺𑀫𑀤𑁆𑀤𑀓𑁆𑀔𑀫𑀢𑀸𑀬 𑀳𑀺𑀢𑀚𑁆𑀛𑀸𑀲𑀬𑀧𑁆𑀧𑀯𑀢𑁆𑀢𑀺𑀢𑀢𑀸𑀬 𑀘 𑀯𑀻𑀫𑀁𑀲𑀺𑀬𑀫𑀸𑀦𑀳𑀺𑀢𑀢𑁄. 𑀏𑀯𑀫𑀸𑀤𑀻𑀳𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀲𑀁𑀲𑀸𑀭𑀘𑀓𑁆𑀓𑀦𑀺𑀯𑀢𑁆𑀢𑀦𑀢𑁄, 𑀲𑀤𑁆𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀢𑁄, 𑀫𑀺𑀘𑁆𑀙𑀸𑀯𑀸𑀤𑀯𑀺𑀕𑀫𑀦𑀢𑁄, 𑀲𑀫𑁆𑀫𑀸𑀯𑀸𑀤𑀧𑀢𑀺𑀝𑁆𑀞𑀸𑀧𑀦𑀢𑁄, 𑀅𑀓𑀼𑀲𑀮𑀫𑀽𑀮𑀲𑀫𑀼𑀤𑁆𑀥𑀭𑀡𑀢𑁄, 𑀓𑀼𑀲𑀮𑀫𑀽𑀮𑀲𑀁𑀭𑁄𑀧𑀦𑀢𑁄, 𑀅𑀧𑀸𑀬𑀤𑁆𑀯𑀸𑀭𑀧𑀺𑀥𑀸𑀦𑀢𑁄, 𑀲𑀕𑁆𑀕𑀫𑁄𑀓𑁆𑀔𑀤𑁆𑀯𑀸𑀭𑀯𑀺𑀯𑀭𑀡𑀢𑁄, 𑀧𑀭𑀺𑀬𑀼𑀝𑁆𑀞𑀸𑀦𑀯𑀽𑀧𑀲𑀫𑀦𑀢𑁄, 𑀅𑀦𑀼𑀲𑀬𑀲𑀫𑀼𑀕𑁆𑀖𑀸𑀢𑀦𑀢𑁄𑀢𑀺 𑀏𑀯𑀫𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄.

𑀅𑀥𑁄𑀫𑀼𑀔𑀝𑁆𑀞𑀧𑀺𑀢𑀦𑁆𑀢𑀺 𑀓𑁂𑀦𑀘𑀺 𑀅𑀥𑁄𑀫𑀼𑀔𑀁 𑀞𑀧𑀺𑀢𑀁. 𑀳𑁂𑀝𑁆𑀞𑀸𑀫𑀼𑀔𑀚𑀸𑀢𑀦𑁆𑀢𑀺 𑀲𑀪𑀸𑀯𑁂𑀦𑁂𑀯 𑀳𑁂𑀝𑁆𑀞𑀸𑀫𑀼𑀔𑀚𑀸𑀢𑀁. 𑀉𑀧𑀭𑀺𑀫𑀼𑀔𑀦𑁆𑀢𑀺 𑀉𑀤𑁆𑀥𑀁𑀫𑀼𑀔𑀁. 𑀉𑀕𑁆𑀖𑀸𑀝𑁂𑀬𑁆𑀬𑀸𑀢𑀺 𑀯𑀺𑀯𑀝𑀁 𑀓𑀭𑁂𑀬𑁆𑀬. 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸𑀢𑀺 ‘‘𑀧𑀼𑀭𑀢𑁆𑀣𑀸𑀪𑀺𑀫𑀼𑀔𑁄 𑀉𑀢𑁆𑀢𑀭𑀸𑀪𑀺𑀫𑀼𑀔𑁄 𑀯𑀸 𑀕𑀘𑁆𑀙𑀸’’𑀢𑀺𑀆𑀤𑀻𑀦𑀺 𑀅𑀯𑀢𑁆𑀯𑀸 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸 ‘‘𑀦𑀺𑀲𑁆𑀲𑀦𑁆𑀤𑁂𑀳𑀁 𑀏𑀲 𑀫𑀕𑁆𑀕𑁄, 𑀏𑀯𑀁 𑀕𑀘𑁆𑀙𑁂𑀬𑁆𑀬𑀸’’𑀢𑀺 𑀯𑀤𑁂𑀬𑁆𑀬. 𑀓𑀸𑀴𑀧𑀓𑁆𑀔𑀘𑀸𑀢𑀼𑀤𑁆𑀤𑀲𑀻𑀢𑀺 𑀓𑀸𑀴𑀧𑀓𑁆𑀔𑁂 𑀘𑀸𑀢𑀼𑀤𑁆𑀤𑀲𑀻.

𑀦𑀺𑀓𑁆𑀓𑀼𑀚𑁆𑀚𑀺𑀢𑀁 𑀆𑀥𑁂𑀬𑁆𑀬𑀲𑁆𑀲 𑀅𑀦𑀸𑀥𑀸𑀭𑀪𑀽𑀢𑀁 𑀪𑀸𑀚𑀦𑀁 𑀆𑀥𑀸𑀭𑀪𑀸𑀯𑀸𑀧𑀸𑀤𑀦𑀯𑀲𑁂𑀦 𑀉𑀓𑁆𑀓𑀼𑀚𑁆𑀚𑁂𑀬𑁆𑀬. 𑀳𑁂𑀝𑁆𑀞𑀸𑀫𑀼𑀔𑀚𑀸𑀢𑀢𑀸𑀬 𑀲𑀤𑁆𑀥𑀫𑁆𑀫𑀯𑀺𑀫𑀼𑀔𑀁, 𑀅𑀥𑁄𑀫𑀼𑀔𑀞𑀧𑀺𑀢𑀢𑀸𑀬 𑀅𑀲𑀤𑁆𑀥𑀫𑁆𑀫𑁂 𑀧𑀢𑀺𑀢𑀦𑁆𑀢𑀺 𑀏𑀯𑀁 𑀧𑀤𑀤𑁆𑀯𑀬𑀁 𑀬𑀣𑀸𑀭𑀳𑀁 𑀬𑁄𑀚𑁂𑀢𑀩𑁆𑀩𑀁, 𑀦 𑀬𑀣𑀸𑀲𑀗𑁆𑀔𑁆𑀬𑀁. 𑀓𑀸𑀫𑀁 𑀓𑀸𑀫𑀘𑁆𑀙𑀦𑁆𑀤𑀸𑀤𑀬𑁄𑀧𑀺 𑀧𑀝𑀺𑀘𑁆𑀙𑀸𑀤𑀓𑀸 𑀦𑀻𑀯𑀭𑀡𑀪𑀸𑀯𑀢𑁄, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀧𑀦 𑀲𑀯𑀺𑀲𑁂𑀲𑀁 𑀧𑀝𑀺𑀘𑁆𑀙𑀸𑀤𑀺𑀓𑀸 𑀲𑀢𑁆𑀢𑁂 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀦𑀯𑀲𑁂𑀦𑀸𑀢𑀺 𑀆𑀳 ‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀕𑀳𑀦𑀧𑀝𑀺𑀘𑁆𑀙𑀦𑁆𑀦’’𑀦𑁆𑀢𑀺. 𑀢𑁂𑀦𑀸𑀳 𑀪𑀕𑀯𑀸 ‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀧𑀭𑀫𑀸𑀳𑀁, 𑀪𑀺𑀓𑁆𑀔𑀯𑁂, 𑀯𑀚𑁆𑀚𑀁 𑀯𑀤𑀸𑀫𑀻’’𑀢𑀺 (𑀅. 𑀦𑀺. 𑁧.𑁩𑁧𑁦). 𑀲𑀩𑁆𑀩𑁄 𑀅𑀧𑀸𑀬𑀕𑀸𑀫𑀺𑀫𑀕𑁆𑀕𑁄 𑀓𑀼𑀫𑁆𑀫𑀕𑁆𑀕𑁄 ‘‘𑀓𑀼𑀘𑁆𑀙𑀺𑀢𑁄 𑀫𑀕𑁆𑀕𑁄’’𑀢𑀺 𑀓𑀢𑁆𑀯𑀸. 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀻𑀦𑀁 𑀉𑀚𑀼𑀧𑀝𑀺𑀧𑀓𑁆𑀔𑀢𑀸𑀬 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀆𑀤𑀬𑁄 𑀅𑀝𑁆𑀞 𑀫𑀺𑀘𑁆𑀙𑀢𑁆𑀢𑀥𑀫𑁆𑀫𑀸 𑀫𑀺𑀘𑁆𑀙𑀸𑀫𑀕𑁆𑀕𑁄. 𑀢𑁂𑀦𑁂𑀯 𑀳𑀺 𑀢𑀤𑀼𑀪𑀬𑀧𑁆𑀧𑀝𑀺𑀧𑀓𑁆𑀔𑀢𑀁 𑀲𑀦𑁆𑀥𑀸𑀬 ‘‘𑀲𑀕𑁆𑀕𑀫𑁄𑀓𑁆𑀔𑀫𑀕𑁆𑀕𑀁 𑀆𑀯𑀺𑀓𑀭𑁄𑀦𑁆𑀢𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀲𑀧𑁆𑀧𑀺𑀆𑀤𑀺𑀲𑀦𑁆𑀦𑀺𑀲𑁆𑀲𑀬𑁄 𑀧𑀤𑀻𑀧𑁄 𑀦 𑀢𑀣𑀸 𑀉𑀚𑁆𑀚𑀮𑁄, 𑀬𑀣𑀸 𑀢𑁂𑀮𑀲𑀦𑁆𑀦𑀺𑀲𑁆𑀲𑀬𑁄𑀢𑀺 𑀢𑁂𑀮𑀧𑀚𑁆𑀚𑁄𑀢𑀕𑁆𑀕𑀳𑀡𑀁.𑀏𑀢𑁂𑀳𑀺 𑀧𑀭𑀺𑀬𑀸𑀬𑁂𑀳𑀻𑀢𑀺 𑀏𑀢𑁂𑀳𑀺 𑀦𑀺𑀓𑁆𑀓𑀼𑀚𑁆𑀚𑀺𑀢𑀼𑀓𑁆𑀓𑀼𑀚𑁆𑀚𑀦𑀧𑁆𑀧𑀝𑀺𑀘𑁆𑀙𑀦𑁆𑀦𑀯𑀺𑀯𑀭𑀡𑀸𑀤𑀺𑀉𑀧𑀫𑁄𑀧𑀫𑀺𑀢𑀩𑁆𑀩𑀸𑀓𑀸𑀭𑁂𑀳𑀺.

𑀧𑀲𑀦𑁆𑀦𑀓𑀸𑀭𑀦𑁆𑀢𑀺 𑀧𑀲𑀦𑁆𑀦𑁂𑀳𑀺 𑀓𑀸𑀢𑀩𑁆𑀩𑀁 𑀲𑀓𑁆𑀓𑀸𑀭𑀁. 𑀲𑀭𑀡𑀦𑁆𑀢𑀺 𑀧𑀝𑀺𑀲𑀭𑀡𑀁. 𑀢𑁂𑀦𑀸𑀳 ‘‘𑀧𑀭𑀸𑀬𑀡’’𑀦𑁆𑀢𑀺. 𑀧𑀭𑀸𑀬𑀡𑀪𑀸𑀯𑁄 𑀘 𑀅𑀦𑀢𑁆𑀣𑀦𑀺𑀲𑁂𑀥𑀦𑁂𑀦 𑀅𑀢𑁆𑀣𑀲𑀫𑁆𑀧𑀝𑀺𑀧𑀸𑀤𑀦𑁂𑀦 𑀘 𑀳𑁄𑀢𑀻𑀢𑀺 𑀆𑀳 ‘‘𑀅𑀖𑀲𑁆𑀲, 𑀢𑀸𑀢𑀸, 𑀳𑀺𑀢𑀲𑁆𑀲 𑀘 𑀯𑀺𑀥𑀸𑀢𑀸’’𑀢𑀺. 𑀅𑀖𑀲𑁆𑀲𑀸𑀢𑀺 𑀤𑀼𑀓𑁆𑀔𑀢𑁄𑀢𑀺 𑀯𑀤𑀦𑁆𑀢𑀺, 𑀧𑀸𑀧𑀢𑁄𑀢𑀺 𑀧𑀦 𑀅𑀢𑁆𑀣𑁄 𑀬𑀼𑀢𑁆𑀢𑁄. 𑀦𑀺𑀲𑁆𑀲𑀓𑁆𑀓𑁂 𑀘𑁂𑀢𑀁 𑀲𑀸𑀫𑀺𑀯𑀘𑀦𑀁. 𑀏𑀢𑁆𑀣 𑀘 𑀦𑀸𑀬𑀁 𑀕𑀫𑀺-𑀲𑀤𑁆𑀤𑁄 𑀦𑀻-𑀲𑀤𑁆𑀤𑀸𑀤𑀬𑁄 𑀯𑀺𑀬 𑀤𑁆𑀯𑀺𑀓𑀫𑁆𑀫𑀓𑁄, 𑀢𑀲𑁆𑀫𑀸 𑀬𑀣𑀸 ‘‘𑀅𑀚𑀁 𑀕𑀸𑀫𑀁 𑀦𑁂𑀢𑀻’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 ‘‘𑀪𑀕𑀯𑀦𑁆𑀢𑀁 𑀲𑀭𑀡𑀁 𑀕𑀘𑁆𑀙𑀸𑀫𑀻’’𑀢𑀺 𑀯𑀢𑁆𑀢𑀼𑀁 𑀦 𑀲𑀓𑁆𑀓𑀸. ‘‘𑀲𑀭𑀡𑀦𑁆𑀢𑀺 𑀕𑀘𑁆𑀙𑀸𑀫𑀻’’𑀢𑀺 𑀧𑀦 𑀯𑀢𑁆𑀢𑀩𑁆𑀩𑀁. 𑀇𑀢𑀺-𑀲𑀤𑁆𑀤𑁄 𑀘𑁂𑀢𑁆𑀣 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄. 𑀢𑀲𑁆𑀲 𑀘𑀸𑀬𑀫𑀢𑁆𑀣𑁄 𑁋 𑀕𑀫𑀦𑀜𑁆𑀘 𑀢𑀤𑀥𑀺𑀧𑁆𑀧𑀸𑀬𑁂𑀦 𑀪𑀚𑀦𑀁 𑀚𑀸𑀦𑀦𑀁 𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀪𑀚𑀸𑀫𑀻𑀢𑀺𑀆𑀤𑀻𑀲𑀼 𑀧𑀼𑀭𑀺𑀫𑀲𑁆𑀲 𑀧𑀼𑀭𑀺𑀫𑀲𑁆𑀲 𑀧𑀘𑁆𑀙𑀺𑀫𑀁 𑀧𑀘𑁆𑀙𑀺𑀫𑀁 𑀅𑀢𑁆𑀣𑀯𑀘𑀦𑀁. 𑀪𑀚𑀦𑀁 𑀯𑀸 𑀲𑀭𑀡𑀸𑀥𑀺𑀧𑁆𑀧𑀸𑀬𑁂𑀦 𑀉𑀧𑀲𑀗𑁆𑀓𑀫𑀦𑀁. 𑀲𑁂𑀯𑀦𑀁 𑀲𑀦𑁆𑀢𑀺𑀓𑀸𑀯𑀘𑀭𑀢𑀸. 𑀧𑀬𑀺𑀭𑀼𑀧𑀸𑀲𑀦𑀁 𑀯𑀢𑁆𑀢𑀧𑁆𑀧𑀝𑀺𑀯𑀢𑁆𑀢𑀓𑀭𑀡𑁂𑀦 𑀉𑀧𑀝𑁆𑀞𑀸𑀦𑀦𑁆𑀢𑀺 𑀏𑀯𑀁 𑀲𑀩𑁆𑀩𑀣𑀸𑀧𑀺 𑀅𑀦𑀜𑁆𑀜𑀲𑀭𑀡𑀢𑀁𑀬𑁂𑀯 𑀤𑀻𑀧𑁂𑀢𑀺. ‘‘𑀕𑀘𑁆𑀙𑀸𑀫𑀻’’𑀢𑀺 𑀧𑀤𑀲𑁆𑀲 𑀩𑀼𑀚𑁆𑀛𑀸𑀫𑀻𑀢𑀺 𑀅𑀬𑀫𑀢𑁆𑀣𑁄 𑀓𑀣𑀁 𑀮𑀩𑁆𑀪𑀢𑀻𑀢𑀺 𑀆𑀳 ‘‘𑀬𑁂𑀲𑀁 𑀳𑀻’’𑀢𑀺𑀆𑀤𑀺.

𑀅𑀥𑀺𑀕𑀢𑀫𑀕𑁆𑀕𑁂 𑀲𑀘𑁆𑀙𑀺𑀓𑀢𑀦𑀺𑀭𑁄𑀥𑁂𑀢𑀺 𑀧𑀤𑀤𑁆𑀯𑀬𑁂𑀦𑀧𑀺 𑀨𑀮𑀝𑁆𑀞𑀸 𑀏𑀯 𑀤𑀲𑁆𑀲𑀺𑀢𑀸, 𑀦 𑀫𑀕𑁆𑀕𑀝𑁆𑀞𑀸𑀢𑀺 𑀢𑁂 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀫𑀸𑀦𑁂 𑀘𑀸’’𑀢𑀺 𑀆𑀳. 𑀦𑀦𑀼 𑀘 𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑁄𑀧𑀺 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀢𑀻𑀢𑀺 𑀯𑀼𑀘𑁆𑀘𑀢𑀻𑀢𑀺? 𑀓𑀺𑀜𑁆𑀘𑀸𑀧𑀺 𑀯𑀼𑀘𑁆𑀘𑀢𑀺, 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀧𑀦 𑀫𑀕𑁆𑀕𑀝𑁆𑀞𑀸 𑀏𑀯 𑀢𑀣𑀸 𑀯𑀢𑁆𑀢𑀩𑁆𑀩𑀸, 𑀦 𑀇𑀢𑀭𑁂 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑁄𑀓𑁆𑀓𑀫𑀦𑀸𑀪𑀸𑀯𑀢𑁄. 𑀢𑀣𑀸 𑀳𑀺 𑀢𑁂 𑀏𑀯 𑀯𑀼𑀢𑁆𑀢𑀸 ‘‘𑀅𑀧𑀸𑀬𑁂𑀲𑀼 𑀅𑀧𑀢𑀫𑀸𑀦𑁂 𑀥𑀸𑀭𑁂𑀢𑀻’’𑀢𑀺. 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑁄𑀓𑁆𑀓𑀫𑀦𑁂𑀦 𑀳𑀺 𑀅𑀧𑀸𑀬𑀯𑀺𑀦𑀺𑀫𑀼𑀢𑁆𑀢𑀺𑀲𑀫𑁆𑀪𑀯𑁄. 𑀅𑀓𑁆𑀔𑀸𑀬𑀢𑀻𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀆𑀤𑁆𑀬𑀢𑁆𑀣𑁄, 𑀧𑀓𑀸𑀭𑀢𑁆𑀣𑁄 𑀯𑀸. 𑀢𑁂𑀦 ‘‘𑀬𑀸𑀯𑀢𑀸, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀲𑀗𑁆𑀔𑀢𑀸 𑀯𑀸 𑀅𑀲𑀗𑁆𑀔𑀢𑀸 𑀯𑀸, 𑀯𑀺𑀭𑀸𑀕𑁄 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀻’’𑀢𑀺 (𑀇𑀢𑀺𑀯𑀼. 𑁯𑁦; 𑀅. 𑀦𑀺. 𑁪.𑁩𑁪) 𑀲𑀼𑀢𑁆𑀢𑀧𑀤𑀁 𑀲𑀗𑁆𑀕𑀡𑁆𑀳𑀸𑀢𑀺, ‘‘𑀯𑀺𑀢𑁆𑀣𑀸𑀭𑁄’’𑀢𑀺 𑀯𑀸 𑀇𑀫𑀺𑀦𑀸. 𑀏𑀢𑁆𑀣 𑀘 𑀅𑀭𑀺𑀬𑀫𑀕𑁆𑀕𑁄 𑀦𑀺𑀬𑁆𑀬𑀸𑀦𑀺𑀓𑀢𑀸𑀬, 𑀦𑀺𑀩𑁆𑀩𑀸𑀦𑀁 𑀢𑀲𑁆𑀲 𑀢𑀤𑀢𑁆𑀣𑀲𑀺𑀤𑁆𑀥𑀺𑀳𑁂𑀢𑀼𑀢𑀸𑀬𑀸𑀢𑀺 𑀉𑀪𑀬𑀫𑁂𑀯 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑁄𑀢𑀺 𑀯𑀼𑀢𑁆𑀢𑁄. 𑀦𑀺𑀩𑁆𑀩𑀸𑀦𑀜𑁆𑀳𑀺 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀽𑀢𑀁 𑀮𑀪𑀺𑀢𑁆𑀯𑀸 𑀅𑀭𑀺𑀬𑀫𑀕𑁆𑀕𑁄 𑀢𑀤𑀢𑁆𑀣𑀲𑀺𑀤𑁆𑀥𑀺𑀬𑀸 𑀲𑀁𑀯𑀢𑁆𑀢𑀢𑀺, 𑀢𑀣𑀸𑀧𑀺 𑀬𑀲𑁆𑀫𑀸 𑀅𑀭𑀺𑀬𑀨𑀮𑀸𑀦𑀁 ‘‘𑀢𑀸𑀬 𑀲𑀤𑁆𑀥𑀸𑀬 𑀅𑀯𑀽𑀧𑀲𑀦𑁆𑀢𑀸𑀬𑀸’’𑀢𑀺𑀆𑀤𑀺𑀯𑀘𑀦𑀢𑁄 𑀫𑀕𑁆𑀕𑁂𑀦 𑀲𑀫𑀼𑀘𑁆𑀙𑀺𑀦𑁆𑀦𑀸𑀦𑀁 𑀓𑀺𑀮𑁂𑀲𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀧𑁆𑀧𑀳𑀸𑀦𑀓𑀺𑀘𑁆𑀘𑀢𑀸𑀬 𑀦𑀺𑀬𑁆𑀬𑀸𑀦𑀸𑀦𑀼𑀕𑀼𑀡𑀢𑀸𑀬 𑀦𑀺𑀬𑁆𑀬𑀸𑀦𑀧𑀭𑀺𑀬𑁄𑀲𑀸𑀦𑀢𑀸𑀬 𑀘. 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀲𑁆𑀲 𑀧𑀦 𑀦𑀺𑀬𑁆𑀬𑀸𑀦𑀺𑀓𑀥𑀫𑁆𑀫𑀲𑀫𑀥𑀺𑀕𑀫𑀳𑁂𑀢𑀼𑀢𑀸𑀬𑀸𑀢𑀺 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀦𑀬𑁂𑀦 𑀥𑀫𑁆𑀫𑀪𑀸𑀯𑁄 𑀮𑀩𑁆𑀪𑀢𑀺 𑀏𑀯. 𑀲𑁆𑀯𑀸𑀬𑀫𑀢𑁆𑀣𑁄 𑀧𑀸𑀞𑀸𑀭𑀼𑀴𑁆𑀳𑁄 𑀏𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀦 𑀓𑁂𑀯𑀮’’𑀦𑁆𑀢𑀺𑀆𑀤𑀺𑀫𑀸𑀳.

𑀓𑀸𑀫𑀭𑀸𑀕𑁄 𑀪𑀯𑀭𑀸𑀕𑁄𑀢𑀺 𑀏𑀯𑀫𑀸𑀤𑀺𑀪𑁂𑀤𑁄 𑀲𑀩𑁆𑀩𑁄𑀧𑀺 𑀭𑀸𑀕𑁄 𑀯𑀺𑀭𑀚𑁆𑀚𑀢𑀺 𑀧𑀳𑀻𑀬𑀢𑀺 𑀏𑀢𑁂𑀦𑀸𑀢𑀺 𑀭𑀸𑀕𑀯𑀺𑀭𑀸𑀕𑁄𑀢𑀺 𑀫𑀕𑁆𑀕𑁄 𑀓𑀣𑀺𑀢𑁄. 𑀏𑀚𑀸𑀲𑀗𑁆𑀔𑀸𑀢𑀸𑀬 𑀢𑀡𑁆𑀳𑀸𑀬 𑀅𑀦𑁆𑀢𑁄𑀦𑀺𑀚𑁆𑀛𑀸𑀦𑀮𑀓𑁆𑀔𑀡𑀲𑁆𑀲 𑀲𑁄𑀓𑀲𑁆𑀲 𑀘 𑀢𑀤𑀼𑀧𑁆𑀧𑀢𑁆𑀢𑀺𑀬𑀁 𑀲𑀩𑁆𑀩𑀲𑁄 𑀧𑀭𑀺𑀓𑁆𑀔𑀻𑀡𑀢𑁆𑀢𑀸 𑀅𑀦𑁂𑀚𑀫𑀲𑁄𑀓𑀦𑁆𑀢𑀺 𑀨𑀮𑀁 𑀓𑀣𑀺𑀢𑀁. 𑀅𑀧𑁆𑀧𑀝𑀺𑀓𑀽𑀮𑀦𑁆𑀢𑀺 𑀅𑀯𑀺𑀭𑁄𑀥𑀤𑀻𑀧𑀦𑀢𑁄 𑀓𑁂𑀦𑀘𑀺 𑀅𑀯𑀺𑀭𑀼𑀤𑁆𑀥𑀁, 𑀇𑀝𑁆𑀞𑀁 𑀧𑀡𑀻𑀢𑀦𑁆𑀢𑀺 𑀯𑀸 𑀅𑀢𑁆𑀣𑁄. 𑀧𑀕𑀼𑀡𑀭𑀽𑀧𑁂𑀦 𑀧𑀯𑀢𑁆𑀢𑀺𑀢𑀢𑁆𑀢𑀸, 𑀧𑀓𑀝𑁆𑀞𑀕𑀼𑀡𑀯𑀺𑀪𑀸𑀯𑀦𑀢𑁄 𑀯𑀸 𑀧𑀕𑀼𑀡𑀁. 𑀲𑀩𑁆𑀩𑀥𑀫𑁆𑀫𑀓𑁆𑀔𑀦𑁆𑀥𑀸 𑀓𑀣𑀺𑀢𑀸𑀢𑀺 𑀬𑁄𑀚𑀦𑀸.

𑀤𑀺𑀝𑁆𑀞𑀺𑀲𑀻𑀮𑀲𑀗𑁆𑀖𑀸𑀢𑁂𑀦𑀸𑀢𑀺 ‘‘𑀬𑀸𑀬𑀁 𑀤𑀺𑀝𑁆𑀞𑀺 𑀅𑀭𑀺𑀬𑀸 𑀦𑀺𑀬𑁆𑀬𑀸𑀦𑀺𑀓𑀸 𑀦𑀺𑀬𑁆𑀬𑀸𑀢𑀺 𑀢𑀓𑁆𑀓𑀭𑀲𑁆𑀲 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀸𑀬, 𑀢𑀣𑀸𑀭𑀽𑀧𑀸𑀬 𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀲𑀸𑀫𑀜𑁆𑀜𑀕𑀢𑁄 𑀯𑀺𑀳𑀭𑀢𑀻’’𑀢𑀺 (𑀤𑀻. 𑀦𑀺. 𑁩.𑁩𑁨𑁪, 𑁩𑁫𑁭; 𑀫. 𑀦𑀺. 𑁧.𑁪𑁯𑁨; 𑁩.𑁫𑁪; 𑀅. 𑀦𑀺. 𑁬.𑁧𑁨; 𑀧𑀭𑀺. 𑁨𑁭𑁪) 𑀏𑀯𑀁 𑀯𑀼𑀢𑁆𑀢𑀸𑀬 𑀤𑀺𑀝𑁆𑀞𑀺𑀬𑀸, ‘‘𑀬𑀸𑀦𑀺 𑀢𑀸𑀦𑀺 𑀲𑀻𑀮𑀸𑀦𑀺 𑀅𑀔𑀡𑁆𑀟𑀸𑀦𑀺 𑀅𑀘𑁆𑀙𑀺𑀤𑁆𑀤𑀸𑀦𑀺 𑀅𑀲𑀩𑀮𑀸𑀦𑀺 𑀅𑀓𑀫𑁆𑀫𑀸𑀲𑀸𑀦𑀺 𑀪𑀼𑀚𑀺𑀲𑁆𑀲𑀸𑀦𑀺 𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑀸𑀦𑀺 𑀅𑀧𑀭𑀸𑀫𑀝𑁆𑀞𑀸𑀦𑀺 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑀸𑀦𑀺, 𑀢𑀣𑀸𑀭𑀽𑀧𑁂𑀳𑀺 𑀲𑀻𑀮𑁂𑀳𑀺 𑀲𑀻𑀮𑀲𑀸𑀫𑀜𑁆𑀜𑀕𑀢𑁄 𑀯𑀺𑀳𑀭𑀢𑀻’’𑀢𑀺 (𑀤𑀻. 𑀦𑀺. 𑁩.𑁩𑁨𑁪; 𑀫. 𑀦𑀺. 𑁧.𑁪𑁯𑁨; 𑁩.𑁫𑁪; 𑀅. 𑀦𑀺. 𑁬.𑁧𑁨; 𑀧𑀭𑀺. 𑁨𑁭𑁪) 𑀘 𑀏𑀯𑀁 𑀯𑀼𑀢𑁆𑀢𑀸𑀦𑀁 𑀲𑀻𑀮𑀸𑀦𑀜𑁆𑀘 𑀲𑀁𑀳𑀢𑀪𑀸𑀯𑁂𑀦, 𑀤𑀺𑀝𑁆𑀞𑀺𑀲𑀻𑀮𑀲𑀸𑀫𑀜𑁆𑀜𑁂𑀦𑀸𑀢𑀺 𑀅𑀢𑁆𑀣𑁄. 𑀲𑀁𑀳𑀢𑁄𑀢𑀺 𑀖𑀝𑀺𑀢𑁄, 𑀲𑀫𑁂𑀢𑁄𑀢𑀺 𑀅𑀢𑁆𑀣𑁄. 𑀅𑀭𑀺𑀬𑀧𑀼𑀕𑁆𑀕𑀮𑀸 𑀳𑀺 𑀬𑀢𑁆𑀣 𑀓𑀢𑁆𑀣𑀘𑀺 𑀤𑀽𑀭𑁂 𑀞𑀺𑀢𑀸𑀧𑀺 𑀅𑀢𑁆𑀢𑀦𑁄 𑀕𑀼𑀡𑀲𑀸𑀫𑀕𑁆𑀕𑀺𑀬𑀸 𑀲𑀁𑀳𑀢𑀸 𑀏𑀯. 𑀅𑀝𑁆𑀞 𑀘 𑀧𑀼𑀕𑁆𑀕𑀮 𑀥𑀫𑁆𑀫𑀤𑀲𑀸 𑀢𑁂𑀢𑀺 𑀢𑁂 𑀧𑀼𑀭𑀺𑀲𑀬𑀼𑀕𑀯𑀲𑁂𑀦 𑀘𑀢𑁆𑀢𑀸𑀭𑁄𑀧𑀺 𑀧𑀼𑀕𑁆𑀕𑀮𑀯𑀲𑁂𑀦 𑀅𑀝𑁆𑀞𑁂𑀯 𑀅𑀭𑀺𑀬𑀥𑀫𑁆𑀫𑀲𑁆𑀲 𑀧𑀘𑁆𑀘𑀓𑁆𑀔𑀤𑀲𑁆𑀲𑀸𑀯𑀺𑀢𑀸𑀬 𑀥𑀫𑁆𑀫𑀤𑀲𑀸. 𑀢𑀻𑀡𑀺 𑀯𑀢𑁆𑀣𑀽𑀦𑀺 𑀲𑀭𑀡𑀦𑁆𑀢𑀺 𑀕𑀫𑀦𑁂𑀦 𑀢𑀺𑀓𑁆𑀔𑀢𑁆𑀢𑀼𑀁 𑀕𑀫𑀦𑁂𑀦 𑀘 𑀢𑀻𑀡𑀺 𑀲𑀭𑀡𑀕𑀫𑀦𑀸𑀦𑀺. 𑀧𑀝𑀺𑀯𑁂𑀤𑁂𑀲𑀻𑀢𑀺 𑀅𑀢𑁆𑀢𑀦𑁄 𑀳𑀤𑀬𑀕𑀢𑀁 𑀯𑀸𑀘𑀸𑀬 𑀧𑀯𑁂𑀤𑁂𑀲𑀺.

𑀲𑀭𑀡𑀕𑀫𑀦𑀲𑁆𑀲 𑀯𑀺𑀲𑀬𑀧𑁆𑀧𑀪𑁂𑀤𑀨𑀮𑀲𑀁𑀓𑀺𑀮𑁂𑀲𑀪𑁂𑀤𑀸𑀦𑀁 𑀯𑀺𑀬 𑀓𑀢𑁆𑀢𑀼𑀯𑀺𑀪𑀸𑀯𑀦𑀸 𑀢𑀢𑁆𑀣 𑀓𑁄𑀲𑀮𑁆𑀮𑀸𑀬 𑀳𑁄𑀢𑀻𑀢𑀺 𑀲𑀭𑀡𑀕𑀫𑀦𑁂𑀲𑀼 𑀅𑀢𑁆𑀣𑀓𑁄𑀲𑀮𑁆𑀮𑀢𑁆𑀣𑀁 ‘‘𑀲𑀭𑀡𑀁, 𑀲𑀭𑀡𑀕𑀫𑀦𑀁, 𑀬𑁄 𑀘 𑀲𑀭𑀡𑀁 𑀕𑀘𑁆𑀙𑀢𑀺, 𑀲𑀭𑀡𑀕𑀫𑀦𑀧𑁆𑀧𑀪𑁂𑀤𑁄, 𑀲𑀭𑀡𑀕𑀫𑀦𑀨𑀮𑀁, 𑀲𑀁𑀓𑀺𑀮𑁂𑀲𑁄, 𑀪𑁂𑀤𑁄𑀢𑀺 𑀅𑀬𑀁 𑀯𑀺𑀥𑀺 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁 𑀢𑁂𑀦 𑀯𑀺𑀦𑀸 𑀲𑀭𑀡𑀕𑀫𑀦𑀲𑁆𑀲𑁂𑀯 𑀅𑀲𑀫𑁆𑀪𑀯𑀢𑁄. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀯𑁄𑀤𑀸𑀦𑀁 𑀦 𑀕𑀳𑀺𑀢𑀁, 𑀦𑀦𑀼 𑀯𑁄𑀤𑀸𑀦𑀯𑀺𑀪𑀸𑀯𑀦𑀸𑀧𑀺 𑀢𑀢𑁆𑀣 𑀓𑁄𑀲𑀮𑁆𑀮𑀸𑀬 𑀳𑁄𑀢𑀻𑀢𑀺? 𑀲𑀘𑁆𑀘𑀫𑁂𑀢𑀁, 𑀢𑀁 𑀧𑀦 𑀲𑀁𑀓𑀺𑀮𑁂𑀲𑀕𑁆𑀕𑀳𑀡𑁂𑀦 𑀅𑀢𑁆𑀣𑀢𑁄 𑀤𑀻𑀧𑀺𑀢𑀁 𑀳𑁄𑀢𑀻𑀢𑀺 𑀦 𑀕𑀳𑀺𑀢𑀁. 𑀬𑀸𑀦𑀺 𑀳𑀺 𑀦𑁂𑀲𑀁 𑀲𑀁𑀓𑀺𑀮𑁂𑀲𑀓𑀸𑀭𑀡𑀸𑀦𑀺 𑀅𑀜𑁆𑀜𑀸𑀡𑀸𑀤𑀻𑀦𑀺, 𑀢𑁂𑀲𑀁 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀅𑀦𑀼𑀧𑁆𑀧𑀸𑀤𑀦𑁂𑀦, 𑀉𑀧𑁆𑀧𑀦𑁆𑀦𑀸𑀦𑀜𑁆𑀘 𑀧𑀳𑀸𑀦𑁂𑀦 𑀯𑁄𑀤𑀸𑀦𑀁 𑀳𑁄𑀢𑀻𑀢𑀺.

𑀳𑀺𑀁𑀲𑀢𑁆𑀣𑀲𑁆𑀲 𑀥𑀸𑀢𑀼𑀲𑀤𑁆𑀤𑀲𑁆𑀲 𑀯𑀲𑁂𑀦𑁂𑀢𑀁 𑀧𑀤𑀁 𑀤𑀝𑁆𑀞𑀩𑁆𑀩𑀦𑁆𑀢𑀺 ‘‘𑀳𑀺𑀁𑀲𑀢𑀻𑀢𑀺 𑀲𑀭𑀡’’𑀦𑁆𑀢𑀺 𑀯𑀢𑁆𑀯𑀸 𑀢𑀁 𑀧𑀦 𑀳𑀺𑀁𑀲𑀦𑀁 𑀓𑁂𑀲𑀁, 𑀓𑀣𑀁, 𑀓𑀲𑁆𑀲 𑀯𑀸𑀢𑀺 𑀘𑁄𑀤𑀦𑀁 𑀲𑁄𑀥𑁂𑀦𑁆𑀢𑁄 ‘‘𑀲𑀭𑀡𑀕𑀢𑀸𑀦’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀪𑀬𑀦𑁆𑀢𑀺 𑀯𑀝𑁆𑀝𑀪𑀬𑀁. 𑀲𑀦𑁆𑀢𑀸𑀲𑀦𑁆𑀢𑀺 𑀘𑀺𑀢𑁆𑀢𑀼𑀢𑁆𑀭𑀸𑀲𑀁. 𑀢𑁂𑀦𑁂𑀯 𑀘𑁂𑀢𑀲𑀺𑀓𑀤𑀼𑀓𑁆𑀔𑀲𑁆𑀲 𑀕𑀳𑀺𑀢𑀢𑁆𑀢𑀸 𑀤𑀼𑀓𑁆𑀔𑀦𑁆𑀢𑀺 𑀓𑀸𑀬𑀺𑀓𑀁 𑀤𑀼𑀓𑁆𑀔𑀁. 𑀤𑀼𑀕𑁆𑀕𑀢𑀺𑀧𑀭𑀺𑀓𑀺𑀮𑁂𑀲𑀦𑁆𑀢𑀺 𑀤𑀼𑀕𑁆𑀕𑀢𑀺𑀧𑀭𑀺𑀬𑀸𑀧𑀦𑁆𑀦𑀁 𑀲𑀩𑁆𑀩𑀫𑁆𑀧𑀺 𑀤𑀼𑀓𑁆𑀔𑀁. 𑀢𑀬𑀺𑀤𑀁 𑀲𑀩𑁆𑀩𑀁 𑀧𑀭𑀢𑁄 𑀨𑀮𑀓𑀣𑀸𑀬 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀏𑀢𑀦𑁆𑀢𑀺 𑀲𑀭𑀡𑀦𑁆𑀢𑀺 𑀧𑀤𑀁. 𑀏𑀯𑀁 𑀅𑀯𑀺𑀲𑁂𑀲𑀢𑁄 𑀲𑀭𑀡𑀲𑀤𑁆𑀤𑀲𑁆𑀲 𑀧𑀤𑀢𑁆𑀣𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀯𑀺𑀲𑁂𑀲𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀅𑀣 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀳𑀺𑀢𑁂 𑀧𑀯𑀢𑁆𑀢𑀦𑁂𑀦𑀸𑀢𑀺 ‘‘𑀲𑀫𑁆𑀧𑀦𑁆𑀦𑀲𑀻𑀮𑀸, 𑀪𑀺𑀓𑁆𑀔𑀯𑁂, 𑀯𑀺𑀳𑀭𑀣𑀸’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁬𑁪, 𑁬𑁯) 𑀅𑀢𑁆𑀣𑁂 𑀦𑀺𑀬𑁄𑀚𑀦𑁂𑀦. 𑀅𑀳𑀺𑀢𑀸 𑀦𑀺𑀯𑀢𑁆𑀢𑀦𑁂𑀦𑀸𑀢𑀺 ‘‘𑀧𑀸𑀡𑀸𑀢𑀺𑀧𑀸𑀢𑀲𑁆𑀲 𑀔𑁄 𑀧𑀸𑀧𑀓𑁄 𑀯𑀺𑀧𑀸𑀓𑁄 𑀅𑀪𑀺𑀲𑀫𑁆𑀧𑀭𑀸𑀬’’𑀦𑁆𑀢𑀺𑀆𑀤𑀺𑀦𑀸 𑀆𑀤𑀻𑀦𑀯𑀤𑀲𑁆𑀲𑀦𑀸𑀤𑀺𑀫𑀼𑀔𑁂𑀦 𑀅𑀦𑀢𑁆𑀣𑀢𑁄 𑀦𑀺𑀯𑀢𑁆𑀢𑀦𑁂𑀦. 𑀪𑀬𑀁 𑀳𑀺𑀁𑀲𑀢𑀻𑀢𑀺 𑀳𑀺𑀢𑀸𑀳𑀺𑀢𑁂𑀲𑀼 𑀅𑀧𑁆𑀧𑀯𑀢𑁆𑀢𑀺𑀧𑁆𑀧𑀯𑀢𑁆𑀢𑀺𑀳𑁂𑀢𑀼𑀓𑀁 𑀩𑁆𑀬𑀲𑀦𑀁 𑀅𑀧𑁆𑀧𑀯𑀢𑁆𑀢𑀺𑀓𑀭𑀡𑁂𑀦 𑀯𑀺𑀦𑀸𑀲𑁂𑀢𑀺 𑀩𑀼𑀤𑁆𑀥𑁄. 𑀪𑀯𑀓𑀦𑁆𑀢𑀸𑀭𑀸 𑀉𑀢𑁆𑀢𑀸𑀭𑀡𑁂𑀦 𑀫𑀕𑁆𑀕𑀲𑀗𑁆𑀔𑀸𑀢𑁄 𑀥𑀫𑁆𑀫𑁄. 𑀇𑀢𑀭𑁄 𑀅𑀲𑁆𑀲𑀸𑀲𑀤𑀸𑀦𑁂𑀦 𑀲𑀢𑁆𑀢𑀸𑀦𑀁 𑀪𑀬𑀁 𑀳𑀺𑀁𑀲𑀢𑀻𑀢𑀺 𑀬𑁄𑀚𑀦𑀸. 𑀓𑀸𑀭𑀸𑀦𑀦𑁆𑀢𑀺 𑀤𑀸𑀦𑀯𑀲𑁂𑀦 𑀧𑀽𑀚𑀸𑀯𑀲𑁂𑀦 𑀘 𑀉𑀧𑀦𑀻𑀢𑀸𑀦𑀁 𑀲𑀓𑁆𑀓𑀸𑀭𑀸𑀦𑀁. 𑀯𑀺𑀧𑀼𑀮𑀨𑀮𑀧𑁆𑀧𑀝𑀺𑀮𑀸𑀪𑀓𑀭𑀡𑁂𑀦 𑀲𑀢𑁆𑀢𑀸𑀦𑀁 𑀪𑀬𑀁 𑀳𑀺𑀁𑀲𑀢𑀺 𑀲𑀗𑁆𑀖𑁄 𑀅𑀦𑀼𑀢𑁆𑀢𑀭𑀤𑀓𑁆𑀔𑀺𑀡𑁂𑀬𑁆𑀬𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀫𑀺𑀦𑀸𑀧𑀺 𑀧𑀭𑀺𑀬𑀸𑀬𑁂𑀦𑀸𑀢𑀺 𑀇𑀫𑀺𑀦𑀸𑀧𑀺 𑀯𑀺𑀪𑀚𑀺𑀢𑁆𑀯𑀸 𑀯𑀼𑀢𑁆𑀢𑁂𑀦 𑀓𑀸𑀭𑀡𑁂𑀦.

‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀪𑀕𑀯𑀸, 𑀲𑁆𑀯𑀸𑀓𑁆𑀔𑀸𑀢𑁄 𑀥𑀫𑁆𑀫𑁄, 𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀲𑀗𑁆𑀖𑁄’’𑀢𑀺 𑀏𑀯𑀁 𑀧𑀯𑀢𑁆𑀢𑁄 𑀢𑀢𑁆𑀣 𑀭𑀢𑀦𑀢𑁆𑀢𑀬𑁂 𑀧𑀲𑀸𑀤𑁄 𑀢𑀧𑁆𑀧𑀲𑀸𑀤𑁄, 𑀢𑀤𑁂𑀯 𑀭𑀢𑁆𑀢𑀦𑀢𑁆𑀢𑀬𑀁 𑀕𑀭𑀼 𑀏𑀢𑀲𑁆𑀲𑀸𑀢𑀺 𑀢𑀕𑁆𑀕𑀭𑀼, 𑀢𑀩𑁆𑀪𑀸𑀯𑁄 𑀢𑀕𑁆𑀕𑀭𑀼𑀢𑀸, 𑀢𑀧𑁆𑀧𑀲𑀸𑀤𑁄 𑀘 𑀢𑀕𑁆𑀕𑀭𑀼𑀢𑀸 𑀘 𑀢𑀧𑁆𑀧𑀲𑀸𑀤𑀢𑀕𑁆𑀕𑀭𑀼𑀢𑀸. 𑀢𑀸𑀳𑀺 𑀢𑀧𑁆𑀧𑀲𑀸𑀤𑀢𑀕𑁆𑀕𑀭𑀼𑀢𑀸𑀳𑀺. 𑀯𑀺𑀥𑀼𑀢𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀲𑀫𑁆𑀫𑁄𑀳𑀅𑀲𑁆𑀲𑀤𑁆𑀥𑀺𑀬𑀸𑀤𑀺𑀢𑀸𑀬 𑀯𑀺𑀳𑀢𑀓𑀺𑀮𑁂𑀲𑁄. 𑀢𑀤𑁂𑀯 𑀭𑀢𑀦𑀢𑁆𑀢𑀬𑀁 𑀧𑀭𑀸𑀬𑀡𑀁 𑀕𑀢𑀺 𑀢𑀸𑀡𑀁 𑀮𑁂𑀡𑀦𑁆𑀢𑀺 𑀏𑀯𑀁 𑀧𑀯𑀢𑁆𑀢𑀺𑀬𑀸 𑀢𑀧𑁆𑀧𑀭𑀸𑀬𑀡𑀢𑀸𑀓𑀸𑀭𑀧𑁆𑀧𑀯𑀢𑁆𑀢𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀲𑀭𑀡𑀕𑀫𑀦𑀁 𑀲𑀭𑀡𑀦𑁆𑀢𑀺 𑀕𑀘𑁆𑀙𑀢𑀺 𑀏𑀢𑁂𑀦𑀸𑀢𑀺. 𑀢𑀁𑀲𑀫𑀗𑁆𑀕𑀻𑀢𑀺 𑀢𑁂𑀦 𑀬𑀣𑀸𑀯𑀼𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀏𑀯𑀁 𑀉𑀧𑁂𑀢𑀻𑀢𑀺 𑀏𑀯𑀁 𑀪𑀚𑀢𑀺 𑀲𑁂𑀯𑀢𑀺 𑀧𑀬𑀺𑀭𑀼𑀧𑀸𑀲𑀢𑀺, 𑀏𑀯𑀁 𑀯𑀸 𑀚𑀸𑀦𑀸𑀢𑀺 𑀩𑀼𑀚𑁆𑀛𑀢𑀻𑀢𑀺 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀢𑁆𑀣 𑀘 𑀧𑀲𑀸𑀤𑀕𑁆𑀕𑀳𑀡𑁂𑀦 𑀮𑁄𑀓𑀺𑀬𑀲𑀭𑀡𑀕𑀫𑀦𑀫𑀸𑀳. 𑀢𑀜𑁆𑀳𑀺 𑀧𑀲𑀸𑀤𑀧𑁆𑀧𑀥𑀸𑀦𑀁. 𑀕𑀭𑀼𑀢𑀸𑀕𑀳𑀡𑁂𑀦 𑀮𑁄𑀓𑀼𑀢𑁆𑀢𑀭𑀁. 𑀅𑀭𑀺𑀬𑀸 𑀳𑀺 𑀭𑀢𑀦𑀢𑁆𑀢𑀬𑀕𑀼𑀡𑀸𑀪𑀺𑀜𑁆𑀜𑀢𑀸𑀬 𑀧𑀸𑀲𑀸𑀡𑀘𑁆𑀙𑀢𑁆𑀢𑀁 𑀧𑀺𑀬 𑀕𑀭𑀼𑀁 𑀓𑀢𑁆𑀯𑀸 𑀧𑀲𑁆𑀲𑀦𑁆𑀢𑀺, 𑀢𑀲𑁆𑀫𑀸 𑀢𑀧𑁆𑀧𑀲𑀸𑀤𑁂𑀦 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀯𑀺𑀳𑀢𑀓𑀺𑀮𑁂𑀲𑁄, 𑀢𑀕𑁆𑀕𑀭𑀼𑀢𑀸𑀬 𑀲𑀫𑀼𑀘𑁆𑀙𑁂𑀤𑀯𑀲𑁂𑀦𑀸𑀢𑀺 𑀬𑁄𑀚𑁂𑀢𑀩𑁆𑀩𑀁 𑀅𑀕𑀸𑀭𑀯𑀓𑀭𑀡𑀳𑁂𑀢𑀽𑀦𑀁 𑀲𑀫𑀼𑀘𑁆𑀙𑀺𑀦𑁆𑀤𑀦𑀢𑁄. 𑀢𑀧𑁆𑀧𑀭𑀸𑀬𑀡𑀢𑀸 𑀧𑀦𑁂𑀢𑁆𑀣 𑀢𑀕𑁆𑀕𑀢𑀺𑀓𑀢𑀸𑀢𑀺 𑀢𑀸𑀬 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀯𑀓𑁆𑀔𑀫𑀸𑀦𑀁 𑀲𑀭𑀡𑀕𑀫𑀦𑀁 𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀯𑀺𑀲𑁂𑀲𑁂𑀦 𑀯𑀸 𑀧𑀲𑀸𑀤𑀕𑀭𑀼𑀢𑀸 𑀚𑁄𑀢𑀺𑀢𑀸𑀢𑀺 𑀧𑀲𑀸𑀤𑀕𑁆𑀕𑀳𑀡𑁂𑀦 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑀲𑁆𑀲 𑀇𑀢𑀭𑀲𑁆𑀲 𑀘 𑀕𑀳𑀡𑀁, 𑀢𑀣𑀸 𑀕𑀭𑀼𑀢𑀸𑀕𑀳𑀡𑁂𑀦𑀸𑀢𑀺 𑀉𑀪𑀬𑁂𑀦𑀧𑀺 𑀉𑀪𑀬𑀁 𑀲𑀭𑀡𑀕𑀫𑀦𑀁 𑀬𑁄𑀚𑁂𑀢𑀩𑁆𑀩𑀁.

𑀫𑀕𑁆𑀕𑀓𑁆𑀔𑀡𑁂 𑀇𑀚𑁆𑀛𑀢𑀻𑀢𑀺 𑀬𑁄𑀚𑀦𑀸. 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀁 𑀳𑀼𑀢𑁆𑀯𑀸𑀢𑀺 𑀏𑀢𑁂𑀦 𑀅𑀢𑁆𑀣𑀢𑁄 𑀘𑀢𑀼𑀲𑀘𑁆𑀘𑀸𑀥𑀺𑀕𑀫𑁄 𑀏𑀯 𑀮𑁄𑀓𑀼𑀢𑁆𑀢𑀭𑀲𑀭𑀡𑀕𑀫𑀦𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀳𑀺 𑀦𑀺𑀩𑁆𑀩𑀸𑀦𑀥𑀫𑁆𑀫𑁄 𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀺𑀲𑀫𑀬𑀯𑀲𑁂𑀦, 𑀫𑀕𑁆𑀕𑀥𑀫𑁆𑀫𑁄 𑀪𑀸𑀯𑀦𑀸𑀪𑀺𑀲𑀫𑀬𑀯𑀲𑁂𑀦 𑀧𑀝𑀺𑀯𑀺𑀚𑁆𑀛𑀺𑀬𑀫𑀸𑀦𑁄𑀬𑁂𑀯 𑀲𑀭𑀡𑀕𑀫𑀦𑀢𑁆𑀢𑀁 𑀲𑀸𑀥𑁂𑀢𑀺, 𑀩𑀼𑀤𑁆𑀥𑀕𑀼𑀡𑀸 𑀧𑀦 𑀲𑀸𑀯𑀓𑀕𑁄𑀘𑀭𑀪𑀽𑀢𑀸 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀯𑀲𑁂𑀦, 𑀢𑀣𑀸 𑀅𑀭𑀺𑀬𑀲𑀗𑁆𑀖𑀕𑀼𑀡𑀸. 𑀢𑁂𑀦𑀸𑀳 ‘‘𑀓𑀺𑀘𑁆𑀘𑀢𑁄 𑀲𑀓𑀮𑁂𑀧𑀺 𑀭𑀢𑀦𑀢𑁆𑀢𑀬𑁂 𑀇𑀚𑁆𑀛𑀢𑀻’’𑀢𑀺. 𑀇𑀚𑁆𑀛𑀦𑁆𑀢𑀜𑁆𑀘 𑀲𑀳𑁂𑀯 𑀇𑀚𑁆𑀛𑀢𑀺, 𑀦 𑀮𑁄𑀓𑀺𑀬𑀁 𑀯𑀺𑀬 𑀧𑀝𑀺𑀧𑀸𑀝𑀺𑀬𑀸 𑀅𑀲𑀫𑁆𑀫𑁄𑀳𑀧𑁆𑀧𑀝𑀺𑀯𑁂𑀥𑁂𑀦 𑀧𑀝𑀺𑀯𑀺𑀤𑁆𑀥𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑁂 𑀧𑀦 𑀯𑀤𑀦𑁆𑀢𑀺 ‘‘𑀦 𑀲𑀭𑀡𑀕𑀫𑀦𑀁 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀁 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑀺, 𑀫𑀕𑁆𑀕𑀲𑁆𑀲 𑀅𑀥𑀺𑀕𑀢𑀢𑁆𑀢𑀸 𑀧𑀦 𑀅𑀥𑀺𑀕𑀢𑀫𑁂𑀯 𑀳𑁄𑀢𑀺 𑀏𑀓𑀘𑁆𑀘𑀸𑀦𑀁 𑀢𑁂𑀯𑀺𑀚𑁆𑀚𑀸𑀤𑀻𑀦𑀁 𑀮𑁄𑀓𑀺𑀬𑀯𑀺𑀚𑁆𑀚𑀸𑀤𑀬𑁄 𑀯𑀺𑀬𑀸’’𑀢𑀺, 𑀢𑁂𑀲𑀁 𑀮𑁄𑀓𑀺𑀬𑀫𑁂𑀯 𑀲𑀭𑀡𑀕𑀫𑀦𑀁 𑀲𑀺𑀬𑀸, 𑀦 𑀮𑁄𑀓𑀼𑀢𑁆𑀢𑀭𑀁, 𑀢𑀜𑁆𑀘 𑀅𑀬𑀼𑀢𑁆𑀢𑀁 𑀤𑀼𑀯𑀺𑀥𑀲𑁆𑀲𑀧𑀺 𑀇𑀘𑁆𑀙𑀺𑀢𑀩𑁆𑀩𑀢𑁆𑀢𑀸.

𑀢𑀦𑁆𑀢𑀺 𑀮𑁄𑀓𑀺𑀬𑀲𑀭𑀡𑀕𑀫𑀦𑀁. 𑀲𑀤𑁆𑀥𑀸𑀧𑀝𑀺𑀮𑀸𑀪𑁄 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀪𑀕𑀯𑀸’’𑀢𑀺𑀆𑀤𑀺𑀦𑀸. 𑀲𑀤𑁆𑀥𑀸𑀫𑀽𑀮𑀺𑀓𑀸𑀢𑀺 𑀬𑀣𑀸𑀯𑀼𑀢𑁆𑀢𑀲𑀤𑁆𑀥𑀸𑀧𑀼𑀩𑁆𑀩𑀗𑁆𑀕𑀫𑀸. 𑀲𑀫𑁆𑀫𑀸𑀤𑀺𑀝𑁆𑀞𑀺 𑀩𑀼𑀤𑁆𑀥𑀲𑀼𑀩𑀼𑀤𑁆𑀥𑀢𑀁, 𑀥𑀫𑁆𑀫𑀲𑀼𑀥𑀫𑁆𑀫𑀢𑀁, 𑀲𑀗𑁆𑀖𑀲𑀼𑀧𑁆𑀧𑀝𑀺𑀧𑀢𑁆𑀢𑀺𑀜𑁆𑀘 𑀮𑁄𑀓𑀺𑀬𑀸𑀯𑀩𑁄𑀥𑀯𑀲𑁂𑀦𑁂𑀯 𑀲𑀫𑁆𑀫𑀸 𑀜𑀸𑀬𑁂𑀦 𑀤𑀲𑁆𑀲𑀦𑀢𑁄. 𑀲𑀤𑁆𑀥𑀸𑀫𑀽𑀮𑀺𑀓𑀸 𑀘 𑀲𑀫𑁆𑀫𑀸𑀤𑀺𑀝𑁆𑀞𑀻𑀢𑀺 𑀏𑀢𑁂𑀦 𑀲𑀤𑁆𑀥𑀽𑀧𑀦𑀺𑀲𑁆𑀲𑀬𑀸 𑀬𑀣𑀸𑀯𑀼𑀢𑁆𑀢𑀮𑀓𑁆𑀔𑀡𑀸 𑀧𑀜𑁆𑀜𑀸 𑀮𑁄𑀓𑀺𑀬𑀲𑀭𑀡𑀕𑀫𑀦𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀤𑀺𑀝𑁆𑀞𑀺𑀚𑀼𑀓𑀫𑁆𑀫𑀦𑁆𑀢𑀺 𑀯𑀼𑀘𑁆𑀘𑀢𑀻’’𑀢𑀺. 𑀤𑀺𑀝𑁆𑀞𑀺𑀬𑁂𑀯 𑀅𑀢𑁆𑀢𑀦𑁄 𑀧𑀘𑁆𑀘𑀬𑁂𑀳𑀺 𑀉𑀚𑀼 𑀓𑀭𑀻𑀬𑀢𑀻𑀢𑀺 𑀓𑀢𑁆𑀯𑀸, 𑀤𑀺𑀝𑁆𑀞𑀺 𑀯𑀸 𑀉𑀚𑀼 𑀓𑀭𑀻𑀬𑀢𑀺 𑀏𑀢𑁂𑀦𑀸𑀢𑀺 𑀤𑀺𑀝𑁆𑀞𑀺𑀚𑀼𑀓𑀫𑁆𑀫𑀁, 𑀢𑀣𑀸𑀧𑀯𑀢𑁆𑀢𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄. 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀢𑀧𑁆𑀧𑀭𑀸𑀬𑀡𑀢𑀸𑀓𑀸𑀭𑀧𑁆𑀧𑀯𑀢𑁆𑀢𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄’’𑀢𑀺 𑀇𑀤𑀜𑁆𑀘 𑀯𑀘𑀦𑀁 𑀲𑀫𑀢𑁆𑀣𑀺𑀢𑀁 𑀳𑁄𑀢𑀺, 𑀲𑀤𑁆𑀥𑀸𑀧𑀼𑀩𑁆𑀩𑀗𑁆𑀕𑀫𑀲𑀫𑁆𑀫𑀸𑀤𑀺𑀝𑁆𑀞𑀺𑀕𑁆𑀕𑀳𑀡𑀁 𑀧𑀦 𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀢𑀧𑁆𑀧𑀥𑀸𑀦𑀢𑀸𑀬𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀤𑁆𑀥𑀸𑀧𑀝𑀺𑀮𑀸𑀪𑁄𑀢𑀺 𑀇𑀫𑀺𑀦𑀸 𑀫𑀸𑀢𑀸𑀤𑀻𑀳𑀺 𑀉𑀲𑁆𑀲𑀸𑀳𑀺𑀢𑀤𑀸𑀭𑀓𑀸𑀤𑀻𑀦𑀁 𑀯𑀺𑀬 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀁 𑀲𑀭𑀡𑀕𑀫𑀦𑀁 𑀤𑀲𑁆𑀲𑁂𑀢𑀺, 𑀲𑀫𑁆𑀫𑀸𑀤𑀺𑀝𑁆𑀞𑀻𑀢𑀺 𑀇𑀫𑀺𑀦𑀸 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀲𑀭𑀡𑀕𑀫𑀦𑀁.

𑀢𑀬𑀺𑀤𑀁 𑀮𑁄𑀓𑀺𑀬𑀁 𑀲𑀭𑀡𑀕𑀫𑀦𑀁. 𑀅𑀢𑁆𑀢𑀸 𑀲𑀦𑁆𑀦𑀺𑀬𑁆𑀬𑀸𑀢𑀻𑀬𑀢𑀺 𑀅𑀧𑁆𑀧𑀻𑀬𑀢𑀺 𑀧𑀭𑀺𑀘𑁆𑀘𑀚𑀻𑀬𑀢𑀺 𑀏𑀢𑁂𑀦𑀸𑀢𑀺 𑀅𑀢𑁆𑀢𑀲𑀦𑁆𑀦𑀺𑀬𑁆𑀬𑀸𑀢𑀦𑀁, 𑀬𑀣𑀸𑀯𑀼𑀢𑁆𑀢𑀁 𑀤𑀺𑀝𑁆𑀞𑀺𑀚𑀼𑀓𑀫𑁆𑀫𑀁. 𑀢𑀁 𑀭𑀢𑀦𑀢𑁆𑀢𑀬𑀁 𑀧𑀭𑀸𑀬𑀡𑀁 𑀧𑀝𑀺𑀲𑀭𑀡𑀁 𑀏𑀢𑀲𑁆𑀲𑀸𑀢𑀺 𑀢𑀧𑁆𑀧𑀭𑀸𑀬𑀡𑁄, 𑀧𑀼𑀕𑁆𑀕𑀮𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀯𑀸, 𑀢𑀲𑁆𑀲 𑀪𑀸𑀯𑁄 𑀢𑀧𑁆𑀧𑀭𑀸𑀬𑀡𑀢𑀸, 𑀬𑀣𑀸𑀯𑀼𑀢𑁆𑀢𑀁 𑀤𑀺𑀝𑁆𑀞𑀺𑀚𑀼𑀓𑀫𑁆𑀫𑀫𑁂𑀯. 𑀲𑀭𑀡𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀲𑀺𑀲𑁆𑀲𑀪𑀸𑀯𑀁 𑀅𑀦𑁆𑀢𑁂𑀯𑀸𑀲𑀺𑀓𑀪𑀸𑀯𑀁 𑀉𑀧𑀕𑀘𑁆𑀙𑀢𑀺 𑀏𑀢𑁂𑀦𑀸𑀢𑀺 𑀲𑀺𑀲𑁆𑀲𑀪𑀸𑀯𑀽𑀧𑀕𑀫𑀦𑀁. 𑀲𑀭𑀡𑀕𑀫𑀦𑀸𑀥𑀺𑀧𑁆𑀧𑀸𑀬𑁂𑀦𑁂𑀯 𑀧𑀡𑀺𑀧𑀢𑀢𑀺 𑀏𑀢𑁂𑀦𑀸𑀢𑀺 𑀧𑀡𑀺𑀧𑀸𑀢𑁄. 𑀲𑀩𑁆𑀩𑀢𑁆𑀣 𑀬𑀣𑀸𑀯𑀼𑀢𑁆𑀢𑀤𑀺𑀝𑁆𑀞𑀺𑀚𑀼𑀓𑀫𑁆𑀫𑀯𑀲𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀢𑁆𑀢𑀧𑀭𑀺𑀘𑁆𑀘𑀚𑀦𑀦𑁆𑀢𑀺 𑀲𑀁𑀲𑀸𑀭𑀤𑀼𑀓𑁆𑀔𑀦𑀺𑀲𑁆𑀲𑀭𑀡𑀢𑁆𑀣𑀁 𑀅𑀢𑁆𑀢𑀦𑁄 𑀅𑀢𑁆𑀣𑀪𑀸𑀯𑀲𑁆𑀲 𑀧𑀭𑀺𑀘𑁆𑀘𑀚𑀦𑀁. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀩𑀼𑀤𑁆𑀥𑀸𑀤𑀻𑀦𑀁𑀬𑁂𑀯𑀸𑀢𑀺 𑀅𑀯𑀥𑀸𑀭𑀡𑀁 𑀅𑀢𑁆𑀢𑀲𑀦𑁆𑀦𑀺𑀬𑁆𑀬𑀸𑀢𑀦𑀸𑀤𑀻𑀲𑀼𑀧𑀺 𑀢𑀢𑁆𑀣 𑀢𑀢𑁆𑀣 𑀯𑀢𑁆𑀢𑀩𑁆𑀩𑀁. 𑀏𑀯𑀜𑁆𑀳𑀺 𑀢𑀤𑀜𑁆𑀜𑀦𑀺𑀯𑀢𑁆𑀢𑀦𑀁 𑀓𑀢𑀁 𑀳𑁄𑀢𑀺.

𑀏𑀯𑀁 𑀅𑀢𑁆𑀢𑀲𑀦𑁆𑀦𑀺𑀬𑁆𑀬𑀸𑀢𑀦𑀸𑀤𑀻𑀦𑀺 𑀏𑀓𑁂𑀦 𑀧𑀓𑀸𑀭𑁂𑀦 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀧𑀭𑁂𑀳𑀺𑀧𑀺 𑀧𑀓𑀸𑀭𑁂𑀳𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑁂𑀦 𑀧𑀭𑀺𑀬𑀸𑀬𑀦𑁆𑀢𑀭𑁂𑀳𑀺𑀧𑀺 𑀅𑀢𑁆𑀢𑀲𑀦𑁆𑀦𑀺𑀬𑁆𑀬𑀸𑀢𑀦𑀁 𑀓𑀢𑀫𑁂𑀯 𑀳𑁄𑀢𑀺 𑀅𑀢𑁆𑀣𑀲𑁆𑀲 𑀅𑀪𑀺𑀦𑁆𑀦𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀺. 𑀆𑀴𑀯𑀓𑀸𑀤𑀻𑀦𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀲𑀸𑀢𑀸𑀕𑀺𑀭𑀺𑀳𑁂𑀫𑀯𑀢𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀦𑀦𑀼 𑀘𑁂𑀢𑁂 𑀆𑀴𑀯𑀓𑀸𑀤𑀬𑁄 𑀫𑀕𑁆𑀕𑁂𑀦𑁂𑀯 𑀆𑀕𑀢𑀲𑀭𑀡𑀕𑀫𑀦𑀸, 𑀓𑀣𑀁 𑀢𑁂𑀲𑀁 𑀢𑀧𑁆𑀧𑀭𑀸𑀬𑀡𑀢𑀸𑀲𑀭𑀡𑀕𑀫𑀦𑀁 𑀯𑀼𑀢𑁆𑀢𑀦𑁆𑀢𑀺? 𑀫𑀕𑁆𑀕𑁂𑀦𑀸𑀕𑀢𑀲𑀭𑀡𑀕𑀫𑀦𑁂𑀳𑀺𑀧𑀺 ‘‘𑀲𑁄 𑀅𑀳𑀁 𑀯𑀺𑀘𑀭𑀺𑀲𑁆𑀲𑀸𑀫𑀺…𑀧𑁂… 𑀲𑀼𑀥𑀫𑁆𑀫𑀢𑀁 (𑀲𑀁. 𑀦𑀺. 𑁧.𑁨𑁪𑁬; 𑀲𑀼. 𑀦𑀺. 𑁧𑁯𑁪). 𑀢𑁂 𑀫𑀬𑀁 𑀯𑀺𑀘𑀭𑀺𑀲𑁆𑀲𑀸𑀫, 𑀕𑀸𑀫𑀸 𑀕𑀸𑀫𑀁 𑀦𑀕𑀸 𑀦𑀕𑀁…𑀧𑁂… 𑀲𑀼𑀥𑀫𑁆𑀫𑀢’’𑀦𑁆𑀢𑀺 (𑀲𑀼. 𑀦𑀺. 𑁧𑁮𑁨) 𑀘 𑀢𑁂𑀳𑀺 𑀢𑀧𑁆𑀧𑀭𑀸𑀬𑀡𑀢𑀸𑀓𑀸𑀭𑀲𑁆𑀲 𑀧𑀯𑁂𑀤𑀺𑀢𑀢𑁆𑀢𑀸 𑀢𑀣𑀸 𑀯𑀼𑀢𑁆𑀢𑀁.

𑀲𑁄 𑀧𑀦𑁂𑀲 𑀜𑀸𑀢𑀺…𑀧𑁂… 𑀯𑀲𑁂𑀦𑀸𑀢𑀺 𑀏𑀢𑁆𑀣 𑀜𑀸𑀢𑀺𑀯𑀲𑁂𑀦, 𑀪𑀬𑀯𑀲𑁂𑀦, 𑀆𑀘𑀭𑀺𑀬𑀯𑀲𑁂𑀦, 𑀤𑀓𑁆𑀔𑀺𑀡𑁂𑀬𑁆𑀬𑀯𑀲𑁂𑀦𑀸𑀢𑀺 𑀧𑀘𑁆𑀘𑁂𑀓𑀁 ‘‘𑀯𑀲𑁂𑀦𑀸’’𑀢𑀺 𑀧𑀤𑀁 𑀬𑁄𑀚𑁂𑀢𑀩𑁆𑀩𑀁. 𑀢𑀢𑁆𑀣 𑀜𑀸𑀢𑀺𑀯𑀲𑁂𑀦𑀸𑀢𑀺 𑀜𑀸𑀢𑀺𑀪𑀸𑀯𑀯𑀲𑁂𑀦. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀤𑀓𑁆𑀔𑀺𑀡𑁂𑀬𑁆𑀬𑀧𑀡𑀺𑀧𑀸𑀢𑁂𑀦𑀸𑀢𑀺 𑀤𑀓𑁆𑀔𑀺𑀡𑁂𑀬𑁆𑀬𑀢𑀸𑀳𑁂𑀢𑀼𑀓𑁂𑀦 𑀧𑀡𑀺𑀧𑀢𑀦𑁂𑀦𑀸𑀢𑀺 𑀅𑀢𑁆𑀣𑁄. 𑀇𑀢𑀭𑁂𑀳𑀻𑀢𑀺 𑀜𑀸𑀢𑀺𑀪𑀸𑀯𑀸𑀤𑀺𑀯𑀲𑀧𑁆𑀧𑀯𑀢𑁆𑀢𑁂𑀳𑀺 𑀢𑀻𑀳𑀺 𑀧𑀡𑀺𑀧𑀸𑀢𑁂𑀳𑀺. 𑀇𑀢𑀭𑁂𑀳𑀻𑀢𑀺𑀆𑀤𑀺𑀦𑀸 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀢𑀲𑁆𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑀦𑁆𑀤𑀢𑀻𑀢𑀺 𑀧𑀡𑀺𑀧𑀸𑀢𑀲𑁆𑀲 𑀮𑀓𑁆𑀔𑀡𑀯𑀘𑀦𑀁. 𑀏𑀯𑀭𑀽𑀧𑀦𑁆𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀲𑀫𑁆𑀧𑀭𑀸𑀬𑀺𑀓𑀜𑁆𑀳𑀺 𑀦𑀺𑀬𑁆𑀬𑀸𑀦𑀺𑀓𑀁 𑀯𑀸 𑀅𑀦𑀺𑀬𑁆𑀬𑀸𑀦𑀺𑀓𑀁 𑀯𑀸 𑀅𑀦𑀼𑀲𑀸𑀲𑀦𑀺𑀁 𑀧𑀘𑁆𑀘𑀸𑀲𑀻𑀲𑀦𑁆𑀢𑁄 𑀤𑀓𑁆𑀔𑀺𑀡𑁂𑀬𑁆𑀬𑀧𑀡𑀺𑀧𑀸𑀢𑀫𑁂𑀯 𑀓𑀭𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀭𑀡𑀕𑀫𑀦𑀧𑁆𑀧𑀪𑁂𑀤𑁄𑀢𑀺 𑀲𑀭𑀡𑀕𑀫𑀦𑀯𑀺𑀪𑀸𑀕𑁄.

𑀅𑀭𑀺𑀬𑀫𑀕𑁆𑀕𑁄 𑀏𑀯 𑀮𑁄𑀓𑀼𑀢𑁆𑀢𑀭𑀁 𑀲𑀭𑀡𑀕𑀫𑀦𑀦𑁆𑀢𑀺 𑀆𑀳 ‘‘𑀘𑀢𑁆𑀢𑀸𑀭𑀺 𑀲𑀸𑀫𑀜𑁆𑀜𑀨𑀮𑀸𑀦𑀺 𑀯𑀺𑀧𑀸𑀓𑀨𑀮’’𑀦𑁆𑀢𑀺. 𑀲𑀩𑁆𑀩𑀤𑀼𑀓𑁆𑀔𑀓𑁆𑀔𑀬𑁄𑀢𑀺 𑀲𑀓𑀮𑀲𑁆𑀲 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑁄. 𑀏𑀢𑀦𑁆𑀢𑀺 ‘‘𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺, 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑀻’’𑀢𑀺 (𑀥. 𑀧. 𑁧𑁯𑁦) 𑀏𑀯𑀁 𑀯𑀼𑀢𑁆𑀢𑀁 𑀅𑀭𑀺𑀬𑀲𑀘𑁆𑀘𑀸𑀦𑀁 𑀤𑀲𑁆𑀲𑀦𑀁.

𑀦𑀺𑀘𑁆𑀘𑀢𑁄 𑀅𑀦𑀼𑀧𑀕𑀫𑀦𑀸𑀤𑀺𑀯𑀲𑁂𑀦𑀸𑀢𑀺 𑀦𑀺𑀘𑁆𑀘𑀦𑁆𑀢𑀺 𑀅𑀕𑁆𑀕𑀳𑀡𑀸𑀤𑀺𑀯𑀲𑁂𑀦. 𑀅𑀝𑁆𑀞𑀸𑀦𑀦𑁆𑀢𑀺 𑀳𑁂𑀢𑀼𑀧𑁆𑀧𑀝𑀺𑀓𑁆𑀔𑁂𑀧𑁄. 𑀅𑀦𑀯𑀓𑀸𑀲𑁄𑀢𑀺 𑀧𑀘𑁆𑀘𑀬𑀧𑁆𑀧𑀝𑀺𑀓𑁆𑀔𑁂𑀧𑁄. 𑀉𑀪𑀬𑁂𑀦𑀧𑀺 𑀓𑀸𑀭𑀡𑀫𑁂𑀯 𑀧𑀝𑀺𑀓𑁆𑀔𑀺𑀧𑀢𑀺. 𑀬𑀦𑁆𑀢𑀺 𑀬𑁂𑀦 𑀓𑀸𑀭𑀡𑁂𑀦. 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑁄𑀢𑀺 𑀫𑀕𑁆𑀕𑀤𑀺𑀝𑁆𑀞𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀲𑁄𑀢𑀸𑀧𑀦𑁆𑀦𑁄. 𑀓𑀜𑁆𑀘𑀺 𑀲𑀗𑁆𑀔𑀸𑀭𑀦𑁆𑀢𑀺 𑀘𑀢𑀼𑀪𑀽𑀫𑀓𑁂𑀲𑀼 𑀲𑀗𑁆𑀔𑀢𑀲𑀗𑁆𑀔𑀸𑀭𑁂𑀲𑀼 𑀏𑀓𑀲𑀗𑁆𑀔𑀸𑀭𑀫𑁆𑀧𑀺. 𑀦𑀺𑀘𑁆𑀘𑀢𑁄 𑀉𑀧𑀕𑀘𑁆𑀙𑁂𑀬𑁆𑀬𑀸𑀢𑀺 𑀦𑀺𑀘𑁆𑀘𑁄𑀢𑀺 𑀕𑀡𑁆𑀳𑁂𑀬𑁆𑀬. 𑀲𑀼𑀔𑀢𑁄 𑀉𑀧𑀕𑀘𑁆𑀙𑁂𑀬𑁆𑀬𑀸𑀢𑀺 ‘‘𑀏𑀓𑀦𑁆𑀢𑀲𑀼𑀔𑀻 𑀅𑀢𑁆𑀢𑀸 𑀳𑁄𑀢𑀺 𑀅𑀭𑁄𑀕𑁄 𑀧𑀭𑀁 𑀫𑀭𑀡𑀸’’𑀢𑀺 (𑀤𑀻. 𑀦𑀺. 𑁧.𑁭𑁬, 𑁭𑁯) 𑀏𑀯𑀁 𑀅𑀢𑁆𑀢𑀤𑀺𑀝𑁆𑀞𑀺𑀯𑀲𑁂𑀦 𑀲𑀼𑀔𑀢𑁄 𑀕𑀸𑀳𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀦 𑀧𑀦 𑀅𑀭𑀺𑀬𑀲𑀸𑀯𑀓𑁄 𑀧𑀭𑀺𑀴𑀸𑀳𑀯𑀽𑀧𑀲𑀫𑀦𑀢𑁆𑀣𑀁 𑀫𑀢𑁆𑀢𑀳𑀢𑁆𑀣𑀺𑀧𑀭𑀺𑀢𑀸𑀲𑀺𑀢𑁄 𑀯𑀺𑀬 𑀘𑁄𑀓𑁆𑀔𑀩𑁆𑀭𑀸𑀳𑁆𑀫𑀡𑁄 𑀉𑀓𑁆𑀓𑀸𑀭𑀪𑀽𑀫𑀺𑀁 𑀓𑀜𑁆𑀘𑀺 𑀲𑀗𑁆𑀔𑀸𑀭𑀁 𑀲𑀼𑀔𑀢𑁄 𑀉𑀧𑀕𑀘𑁆𑀙𑀢𑀺. 𑀅𑀢𑁆𑀢𑀯𑀸𑀭𑁂 𑀓𑀲𑀺𑀡𑀸𑀤𑀺𑀧𑀜𑁆𑀜𑀢𑁆𑀢𑀺𑀲𑀗𑁆𑀕𑀳𑀢𑁆𑀣𑀁 ‘‘𑀲𑀗𑁆𑀔𑀸𑀭’’𑀦𑁆𑀢𑀺 𑀅𑀯𑀢𑁆𑀯𑀸 ‘‘𑀓𑀜𑁆𑀘𑀺 𑀥𑀫𑁆𑀫’’𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀫𑁂𑀲𑀼𑀧𑀺 𑀞𑀸𑀦𑁂𑀲𑀼 𑀘𑀢𑀼𑀪𑀽𑀫𑀓𑀯𑀲𑁂𑀦𑁂𑀯 𑀧𑀭𑀺𑀘𑁆𑀙𑁂𑀤𑁄 𑀯𑁂𑀤𑀺𑀢𑀩𑁆𑀩𑁄 𑀢𑁂𑀪𑀽𑀫𑀓𑀯𑀲𑁂𑀦𑁂𑀯 𑀯𑀸. 𑀬𑀁 𑀬𑀜𑁆𑀳𑀺 𑀧𑀼𑀣𑀼𑀚𑁆𑀚𑀦𑁄 𑀕𑀸𑀳𑀯𑀲𑁂𑀦 𑀕𑀡𑁆𑀳𑀸𑀢𑀺, 𑀢𑀢𑁄 𑀢𑀢𑁄 𑀅𑀭𑀺𑀬𑀲𑀸𑀯𑀓𑁄 𑀕𑀸𑀳𑀁 𑀯𑀺𑀦𑀺𑀯𑁂𑀞𑁂𑀢𑀺.

𑀫𑀸𑀢𑀭𑀦𑁆𑀢𑀺𑀆𑀤𑀻𑀲𑀼 𑀚𑀦𑀺𑀓𑀸 𑀫𑀸𑀢𑀸, 𑀚𑀦𑀓𑁄 𑀧𑀺𑀢𑀸, 𑀫𑀦𑀼𑀲𑁆𑀲𑀪𑀽𑀢𑁄 𑀔𑀻𑀡𑀸𑀲𑀯𑁄 𑀅𑀭𑀳𑀸𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀓𑀺𑀁 𑀧𑀦 𑀅𑀭𑀺𑀬𑀲𑀸𑀯𑀓𑁄 𑀅𑀜𑁆𑀜𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬𑀸𑀢𑀺? 𑀏𑀢𑀫𑁆𑀧𑀺 𑀅𑀝𑁆𑀞𑀸𑀦𑀁, 𑀧𑀼𑀣𑀼𑀚𑁆𑀚𑀦𑀪𑀸𑀯𑀲𑁆𑀲 𑀧𑀦 𑀫𑀳𑀸𑀲𑀸𑀯𑀚𑁆𑀚𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀅𑀭𑀺𑀬𑀪𑀸𑀯𑀲𑁆𑀲 𑀘 𑀨𑀮𑀤𑀲𑁆𑀲𑀦𑀢𑁆𑀣𑀁 𑀏𑀯𑀁 𑀯𑀼𑀢𑁆𑀢𑀁. 𑀧𑀤𑀼𑀝𑁆𑀞𑀘𑀺𑀢𑁆𑀢𑁄𑀢𑀺 𑀯𑀥𑀓𑀘𑀺𑀢𑁆𑀢𑁂𑀦 𑀧𑀤𑀼𑀝𑁆𑀞𑀘𑀺𑀢𑁆𑀢𑁄. 𑀮𑁄𑀳𑀺𑀢𑀁 𑀉𑀧𑁆𑀧𑀸𑀤𑁂𑀬𑁆𑀬𑀸𑀢𑀺 𑀚𑀻𑀯𑀫𑀸𑀦𑀓𑀲𑀭𑀻𑀭𑁂 𑀔𑀼𑀤𑁆𑀤𑀓𑀫𑀓𑁆𑀔𑀺𑀓𑀸𑀬 𑀧𑀺𑀯𑀦𑀫𑀢𑁆𑀢𑀫𑁆𑀧𑀺 𑀮𑁄𑀳𑀺𑀢𑀁 𑀉𑀧𑁆𑀧𑀸𑀤𑁂𑀬𑁆𑀬. 𑀲𑀗𑁆𑀖𑀁 𑀪𑀺𑀦𑁆𑀤𑁂𑀬𑁆𑀬𑀸𑀢𑀺 𑀲𑀫𑀸𑀦𑀲𑀁𑀯𑀸𑀲𑀓𑀁 𑀲𑀫𑀸𑀦𑀲𑀻𑀫𑀸𑀬𑀁 𑀞𑀺𑀢𑀁 𑀲𑀗𑁆𑀖𑀁 ‘‘𑀓𑀫𑁆𑀫𑁂𑀦 𑀉𑀤𑁆𑀤𑁂𑀲𑁂𑀦 𑀯𑁄𑀳𑀭𑀦𑁆𑀢𑁄 𑀅𑀦𑀼𑀲𑁆𑀲𑀸𑀯𑀦𑁂𑀦 𑀲𑀮𑀸𑀓𑀕𑁆𑀕𑀸𑀳𑁂𑀦𑀸’’𑀢𑀺 (𑀧𑀭𑀺. 𑁪𑁫𑁮) 𑀏𑀯𑀁 𑀯𑀼𑀢𑁆𑀢𑁂𑀳𑀺 𑀧𑀜𑁆𑀘𑀳𑀺 𑀓𑀸𑀭𑀡𑁂𑀳𑀺 𑀪𑀺𑀦𑁆𑀤𑁂𑀬𑁆𑀬. 𑀅𑀜𑁆𑀜𑀁 𑀲𑀢𑁆𑀣𑀸𑀭𑀦𑁆𑀢𑀺 𑀅𑀜𑁆𑀜𑀁 𑀢𑀺𑀢𑁆𑀣𑀓𑀭𑀁 ‘‘𑀅𑀬𑀁 𑀫𑁂 𑀲𑀢𑁆𑀣𑀸’’𑀢𑀺 𑀏𑀯𑀁 𑀕𑀡𑁆𑀳𑁂𑀬𑁆𑀬𑀸𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻𑀢𑀺 𑀅𑀢𑁆𑀣𑁄.

𑀦 𑀢𑁂 𑀕𑀫𑀺𑀲𑁆𑀲𑀦𑁆𑀢𑀺 𑀅𑀧𑀸𑀬𑀦𑁆𑀢𑀺 𑀢𑁂 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀢𑀸 𑀢𑀦𑁆𑀦𑀺𑀫𑀺𑀢𑁆𑀢𑀁 𑀅𑀧𑀸𑀬𑀁 𑀦 𑀕𑀫𑀺𑀲𑁆𑀲𑀦𑁆𑀢𑀺, 𑀤𑁂𑀯𑀓𑀸𑀬𑀁 𑀧𑀦 𑀧𑀭𑀺𑀧𑀽𑀭𑁂𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀤𑀲𑀳𑀺 𑀞𑀸𑀦𑁂𑀳𑀻𑀢𑀺 𑀤𑀲𑀳𑀺 𑀓𑀸𑀭𑀡𑁂𑀳𑀺. 𑀅𑀥𑀺𑀕𑀡𑁆𑀳𑀦𑁆𑀢𑀻𑀢𑀺 𑀅𑀥𑀺𑀪𑀯𑀦𑁆𑀢𑀺.

𑀯𑁂𑀮𑀸𑀫𑀲𑀼𑀢𑁆𑀢𑀸𑀤𑀺𑀯𑀲𑁂𑀦𑀸𑀢𑀺 𑀏𑀢𑁆𑀣 ‘‘𑀓𑀭𑀻𑀲𑀲𑁆𑀲 𑀘𑀢𑀼𑀢𑁆𑀣𑀪𑀸𑀕𑀧𑁆𑀧𑀫𑀸𑀡𑀸𑀦𑀁 𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑀲𑀗𑁆𑀔𑀸𑀦𑀁 𑀲𑀼𑀯𑀡𑁆𑀡𑀧𑀸𑀢𑀺𑀭𑀽𑀧𑀺𑀬𑀧𑀸𑀢𑀺𑀓𑀁𑀲𑀧𑀸𑀢𑀻𑀦𑀁 𑀬𑀣𑀸𑀓𑁆𑀓𑀫𑀁 𑀭𑀽𑀧𑀺𑀬𑀲𑀼𑀯𑀡𑁆𑀡𑀳𑀺𑀭𑀜𑁆𑀜𑀧𑀽𑀭𑀸𑀦𑀁 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑁆𑀧𑀝𑀺𑀫𑀡𑁆𑀟𑀺𑀢𑀸𑀦𑀁 𑀘𑀢𑀼𑀭𑀸𑀲𑀻𑀢𑀺𑀬𑀸 𑀳𑀢𑁆𑀣𑀺𑀲𑀳𑀲𑁆𑀲𑀸𑀦𑀁, 𑀘𑀢𑀼𑀭𑀸𑀲𑀻𑀢𑀺𑀬𑀸 𑀅𑀲𑁆𑀲𑀲𑀳𑀲𑁆𑀲𑀸𑀦𑀁, 𑀘𑀢𑀼𑀭𑀸𑀲𑀻𑀢𑀺𑀬𑀸 𑀭𑀣𑀲𑀳𑀲𑁆𑀲𑀸𑀦𑀁, 𑀘𑀢𑀼𑀭𑀸𑀲𑀻𑀢𑀺𑀬𑀸 𑀥𑁂𑀦𑀼𑀲𑀳𑀲𑁆𑀲𑀸𑀦𑀁, 𑀘𑀢𑀼𑀭𑀸𑀲𑀻𑀢𑀺𑀬𑀸 𑀓𑀜𑁆𑀜𑀸𑀲𑀳𑀲𑁆𑀲𑀸𑀦𑀁, 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀮𑁆𑀮𑀗𑁆𑀓𑀲𑀳𑀲𑁆𑀲𑀸𑀦𑀁, 𑀘𑀢𑀼𑀭𑀸𑀲𑀻𑀢𑀺𑀬𑀸 𑀯𑀢𑁆𑀣𑀓𑁄𑀝𑀺𑀲𑀳𑀲𑁆𑀲𑀸𑀦𑀁, 𑀅𑀧𑀭𑀺𑀫𑀸𑀡𑀲𑁆𑀲 𑀘 𑀔𑀚𑁆𑀚𑀪𑁄𑀚𑁆𑀚𑀸𑀤𑀺𑀪𑁂𑀤𑀲𑁆𑀲 𑀆𑀳𑀸𑀭𑀲𑁆𑀲 𑀧𑀭𑀺𑀘𑁆𑀘𑀚𑀦𑀯𑀲𑁂𑀦 𑀲𑀢𑁆𑀢𑀫𑀸𑀲𑀸𑀥𑀺𑀓𑀸𑀦𑀺 𑀲𑀢𑁆𑀢 𑀲𑀁𑀯𑀘𑁆𑀙𑀭𑀸𑀦𑀺 𑀦𑀺𑀭𑀦𑁆𑀢𑀭𑀁 𑀧𑀯𑀢𑁆𑀢𑀯𑁂𑀮𑀸𑀫𑀫𑀳𑀸𑀤𑀸𑀦𑀢𑁄 𑀏𑀓𑀲𑁆𑀲 𑀲𑁄𑀢𑀸𑀧𑀦𑁆𑀦𑀲𑁆𑀲 𑀤𑀺𑀦𑁆𑀦𑀤𑀸𑀦𑀁 𑀫𑀳𑀧𑁆𑀨𑀮𑀢𑀭𑀁. 𑀢𑀢𑁄 𑀲𑀢𑀁 𑀲𑁄𑀢𑀸𑀧𑀦𑁆𑀦𑀸𑀦𑀁 𑀤𑀺𑀦𑁆𑀦𑀤𑀸𑀦𑀢𑁄 𑀏𑀓𑀲𑁆𑀲 𑀲𑀓𑀤𑀸𑀕𑀸𑀫𑀺𑀦𑁄, 𑀢𑀢𑁄 𑀏𑀓𑀲𑁆𑀲 𑀅𑀦𑀸𑀕𑀸𑀫𑀺𑀦𑁄, 𑀢𑀢𑁄 𑀏𑀓𑀲𑁆𑀲 𑀅𑀭𑀳𑀢𑁄, 𑀢𑀢𑁄 𑀏𑀓𑀲𑁆𑀲 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲, 𑀢𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲, 𑀢𑀢𑁄 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀤𑀸𑀦𑀁 𑀫𑀳𑀧𑁆𑀨𑀮𑀢𑀭𑀁, 𑀢𑀢𑁄 𑀘𑀸𑀢𑀼𑀤𑁆𑀤𑀺𑀲𑀁 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀯𑀺𑀳𑀸𑀭𑀓𑀭𑀡𑀁, 𑀢𑀢𑁄 𑀲𑀭𑀡𑀕𑀫𑀦𑀁 𑀫𑀳𑀧𑁆𑀨𑀮𑀢𑀭’’𑀦𑁆𑀢𑀺 𑀇𑀫𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑀲𑁆𑀲 𑀯𑁂𑀮𑀸𑀫𑀲𑀼𑀢𑁆𑀢𑀲𑁆𑀲 (𑀅. 𑀦𑀺. 𑁯.𑁨𑁦) 𑀯𑀲𑁂𑀦. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀬𑀁, 𑀕𑀳𑀧𑀢𑀺, 𑀯𑁂𑀮𑀸𑀫𑁄 𑀩𑁆𑀭𑀸𑀳𑁆𑀫𑀡𑁄 𑀤𑀸𑀦𑀁 𑀅𑀤𑀸𑀲𑀺 𑀫𑀳𑀸𑀤𑀸𑀦𑀁, 𑀬𑁄 𑀏𑀓𑀁 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑀁 𑀪𑁄𑀚𑁂𑀬𑁆𑀬, 𑀇𑀤𑀁 𑀢𑀢𑁄 𑀫𑀳𑀧𑁆𑀨𑀮𑀢𑀭’’𑀦𑁆𑀢𑀺𑀆𑀤𑀺 (𑀅. 𑀦𑀺. 𑁯.𑁨𑁦). 𑀯𑁂𑀮𑀸𑀫𑀲𑀼𑀢𑁆𑀢𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀅𑀕𑁆𑀕𑀧𑁆𑀧𑀲𑀸𑀤𑀲𑀼𑀢𑁆𑀢𑀸𑀤𑀻𑀦𑀁 (𑀅. 𑀦𑀺. 𑁪.𑁩𑁪; 𑀇𑀢𑀺𑀯𑀼. 𑁯𑁦) 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄.

𑀅𑀜𑁆𑀜𑀸𑀡𑀁 𑀯𑀢𑁆𑀣𑀼𑀢𑁆𑀢𑀬𑀲𑁆𑀲 𑀕𑀼𑀡𑀸𑀦𑀁 𑀅𑀚𑀸𑀦𑀦𑀁 𑀢𑀢𑁆𑀣 𑀲𑀫𑁆𑀫𑁄𑀳𑁄, ‘‘𑀩𑀼𑀤𑁆𑀥𑁄 𑀦𑀼 𑀔𑁄, 𑀦 𑀦𑀼 𑀔𑁄’’𑀢𑀺𑀆𑀤𑀺𑀦𑀸 𑀯𑀺𑀘𑀺𑀓𑀺𑀘𑁆𑀙𑀸 𑀲𑀁𑀲𑀬𑁄. 𑀫𑀺𑀘𑁆𑀙𑀸𑀜𑀸𑀡𑀁 𑀢𑀲𑁆𑀲 𑀕𑀼𑀡𑀸𑀦𑀁 𑀅𑀕𑀼𑀡𑀪𑀸𑀯𑀧𑀭𑀺𑀓𑀧𑁆𑀧𑀦𑁂𑀦 𑀯𑀺𑀧𑀭𑀻𑀢𑀕𑁆𑀕𑀸𑀳𑁄. 𑀆𑀤𑀺-𑀲𑀤𑁆𑀤𑁂𑀦 𑀅𑀦𑀸𑀤𑀭𑀸𑀕𑀸𑀭𑀯𑀸𑀤𑀻𑀦𑀁 𑀲𑀗𑁆𑀕𑀳𑁄. 𑀦 𑀫𑀳𑀸𑀚𑀼𑀢𑀺𑀓𑀦𑁆𑀢𑀺 𑀦 𑀉𑀚𑁆𑀚𑀮𑀁, 𑀅𑀧𑀭𑀺𑀲𑀼𑀤𑁆𑀥𑀁 𑀅𑀧𑀭𑀺𑀬𑁄𑀤𑀸𑀢𑀦𑁆𑀢𑀺 𑀅𑀢𑁆𑀣𑁄. 𑀦 𑀫𑀳𑀸𑀯𑀺𑀧𑁆𑀨𑀸𑀭𑀦𑁆𑀢𑀺 𑀅𑀦𑀼𑀴𑀸𑀭𑀁. 𑀲𑀸𑀯𑀚𑁆𑀚𑁄𑀢𑀺 𑀤𑀺𑀝𑁆𑀞𑀺𑀢𑀡𑁆𑀳𑀸𑀤𑀺𑀯𑀲𑁂𑀦 𑀲𑀤𑁄𑀲𑁄. 𑀮𑁄𑀓𑀺𑀬𑀁 𑀲𑀭𑀡𑀕𑀫𑀦𑀁 𑀲𑀺𑀓𑁆𑀔𑀸𑀲𑀫𑀸𑀤𑀸𑀦𑀁 𑀯𑀺𑀬 𑀅𑀕𑁆𑀕𑀳𑀺𑀢𑀓𑀸𑀮𑀧𑀭𑀺𑀘𑁆𑀙𑁂𑀤𑀁 𑀚𑀻𑀯𑀺𑀢𑀧𑀭𑀺𑀬𑀦𑁆𑀢𑀫𑁂𑀯 𑀳𑁄𑀢𑀺, 𑀢𑀲𑁆𑀫𑀸 𑀢𑀲𑁆𑀲 𑀔𑀦𑁆𑀥𑀪𑁂𑀤𑁂𑀦 𑀪𑁂𑀤𑁄𑀢𑀺 𑀆𑀳 ‘‘𑀅𑀦𑀯𑀚𑁆𑀚𑁄 𑀓𑀸𑀮𑀓𑀺𑀭𑀺𑀬𑀸𑀬𑀸’’𑀢𑀺. 𑀲𑁄𑀢𑀺 𑀅𑀦𑀯𑀚𑁆𑀚𑁄 𑀲𑀭𑀡𑀕𑀫𑀦𑀪𑁂𑀤𑁄. 𑀲𑀢𑀺𑀧𑀺 𑀅𑀦𑀯𑀚𑁆𑀚𑀢𑁆𑀢𑁂 𑀇𑀝𑁆𑀞𑀨𑀮𑁄𑀧𑀺 𑀦 𑀳𑁄𑀢𑀻𑀢𑀺 𑀆𑀳 ‘‘𑀅𑀨𑀮𑁄’’𑀢𑀺. 𑀓𑀲𑁆𑀫𑀸? 𑀅𑀯𑀺𑀧𑀸𑀓𑀢𑁆𑀢𑀸. 𑀦 𑀳𑀺 𑀢𑀁 𑀅𑀓𑀼𑀲𑀮𑀦𑁆𑀢𑀺.

𑀓𑁄 𑀉𑀧𑀸𑀲𑀓𑁄𑀢𑀺 𑀲𑀭𑀽𑀧𑀧𑀼𑀘𑁆𑀙𑀸, 𑀢𑀲𑁆𑀫𑀸 ‘‘𑀓𑀺𑀁𑀮𑀓𑁆𑀔𑀡𑁄 𑀉𑀧𑀸𑀲𑀓𑁄’’𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀲𑁆𑀫𑀸𑀢𑀺 𑀳𑁂𑀢𑀼𑀧𑀼𑀘𑁆𑀙𑀸. 𑀢𑁂𑀦 𑀓𑁂𑀦 𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑁂𑀦 𑀉𑀧𑀸𑀲𑀓𑀲𑀤𑁆𑀤𑁄 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀦𑀺𑀭𑀼𑀴𑁆𑀳𑁄𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀓𑀲𑁆𑀫𑀸 𑀉𑀧𑀸𑀲𑀓𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺. 𑀲𑀤𑁆𑀤𑀲𑁆𑀲 𑀅𑀪𑀺𑀥𑁂𑀬𑁆𑀬𑁄 𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀁 𑀢𑀤𑀢𑁆𑀣𑀲𑁆𑀲 𑀢𑀩𑁆𑀪𑀸𑀯𑀓𑀸𑀭𑀡𑀁. 𑀓𑀺𑀫𑀲𑁆𑀲 𑀲𑀻𑀮𑀦𑁆𑀢𑀺 𑀓𑀻𑀤𑀺𑀲𑀁 𑀅𑀲𑁆𑀲 𑀉𑀧𑀸𑀲𑀓𑀲𑁆𑀲 𑀲𑀻𑀮𑀁, 𑀓𑀺𑀢𑁆𑀢𑀓𑁂𑀦 𑀲𑀻𑀮𑁂𑀦𑀸𑀬𑀁 𑀲𑀻𑀮𑀲𑀫𑁆𑀧𑀦𑁆𑀦𑁄 𑀦𑀸𑀫 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀓𑁄 𑀆𑀚𑀻𑀯𑁄𑀢𑀺 𑀓𑁄 𑀅𑀲𑁆𑀲 𑀲𑀫𑁆𑀫𑀸𑀆𑀚𑀻𑀯𑁄? 𑀲𑁄 𑀧𑀦 𑀫𑀺𑀘𑁆𑀙𑀸𑀚𑀻𑀯𑀲𑁆𑀲 𑀧𑀭𑀺𑀯𑀚𑁆𑀚𑀦𑁂𑀦 𑀳𑁄𑀢𑀻𑀢𑀺 𑀲𑁄𑀧𑀺 𑀯𑀺𑀪𑀚𑀻𑀬𑀢𑀻𑀢𑀺. 𑀓𑀸 𑀯𑀺𑀧𑀢𑁆𑀢𑀻𑀢𑀺 𑀓𑀸 𑀲𑀻𑀮𑀲𑁆𑀲, 𑀆𑀚𑀻𑀯𑀲𑁆𑀲 𑀯𑀸 𑀯𑀺𑀧𑀢𑁆𑀢𑀺. 𑀅𑀦𑀦𑁆𑀢𑀭𑀲𑁆𑀲 𑀳𑀺 𑀯𑀺𑀥𑀺 𑀯𑀸 𑀧𑀝𑀺𑀲𑁂𑀥𑁄 𑀯𑀸𑀢𑀺. 𑀓𑀸 𑀲𑀫𑁆𑀧𑀢𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄.

𑀬𑁄 𑀓𑁄𑀘𑀻𑀢𑀺 𑀔𑀢𑁆𑀢𑀺𑀬𑀸𑀤𑀻𑀲𑀼 𑀬𑁄 𑀓𑁄𑀘𑀺. 𑀢𑁂𑀦 𑀲𑀭𑀡𑀕𑀫𑀦𑀫𑁂𑀯𑁂𑀢𑁆𑀣 𑀓𑀸𑀭𑀡𑀁, 𑀦 𑀚𑀸𑀢𑀺𑀆𑀤𑀺𑀯𑀺𑀲𑁂𑀲𑁄𑀢𑀺 𑀤𑀲𑁆𑀲𑁂𑀢𑀺. 𑀉𑀧𑀸𑀲𑀦𑀢𑁄𑀢𑀺 𑀢𑁂𑀦𑁂𑀯 𑀲𑀭𑀡𑀕𑀫𑀦𑁂𑀦 𑀢𑀢𑁆𑀣 𑀘 𑀲𑀓𑁆𑀓𑀘𑁆𑀘𑀓𑀺𑀭𑀺𑀬𑀸𑀬 𑀆𑀤𑀭𑀕𑀸𑀭𑀯𑀩𑀳𑀼𑀫𑀸𑀦𑀸𑀤𑀺𑀬𑁄𑀕𑁂𑀦 𑀧𑀬𑀺𑀭𑀼𑀧𑀸𑀲𑀦𑀢𑁄. 𑀯𑁂𑀭𑀫𑀡𑀺𑀬𑁄𑀢𑀺 𑀯𑁂𑀭𑀁 𑀯𑀼𑀘𑁆𑀘𑀢𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀤𑀼𑀲𑁆𑀲𑀻𑀮𑁆𑀬𑀁, 𑀢𑀲𑁆𑀲 𑀫𑀡𑀦𑀢𑁄 𑀳𑀦𑀦𑀢𑁄 𑀯𑀺𑀦𑀸𑀲𑀦𑀢𑁄 𑀯𑁂𑀭𑀫𑀡𑀺𑀬𑁄, 𑀧𑀜𑁆𑀘 𑀯𑀺𑀭𑀢𑀺𑀬𑁄 𑀯𑀺𑀭𑀢𑀺𑀧𑁆𑀧𑀥𑀸𑀦𑀢𑁆𑀢𑀸 𑀢𑀲𑁆𑀲 𑀲𑀻𑀮𑀲𑁆𑀲. 𑀢𑁂𑀦𑁂𑀯𑀸𑀳 ‘‘𑀧𑀝𑀺𑀯𑀺𑀭𑀢𑁄 𑀳𑁄𑀢𑀻’’𑀢𑀺.

𑀫𑀺𑀘𑁆𑀙𑀸𑀯𑀡𑀺𑀚𑁆𑀚𑀸𑀢𑀺 𑀦 𑀲𑀫𑁆𑀫𑀸𑀯𑀡𑀺𑀚𑁆𑀚𑀸 𑀅𑀬𑀼𑀢𑁆𑀢𑀯𑀡𑀺𑀚𑁆𑀚𑀸 𑀅𑀲𑀸𑀭𑀼𑀧𑁆𑀧𑀯𑀡𑀺𑀚𑁆𑀚𑀸. 𑀧𑀳𑀸𑀬𑀸𑀢𑀺 𑀅𑀓𑀭𑀡𑁂𑀦𑁂𑀯 𑀧𑀚𑀳𑀺𑀢𑁆𑀯𑀸. 𑀥𑀫𑁆𑀫𑁂𑀦𑀸𑀢𑀺 𑀥𑀫𑁆𑀫𑀢𑁄 𑀅𑀦𑀧𑁂𑀢𑁂𑀦. 𑀢𑁂𑀦 𑀅𑀜𑁆𑀜𑀫𑁆𑀧𑀺 𑀅𑀥𑀫𑁆𑀫𑀺𑀓𑀁 𑀚𑀻𑀯𑀺𑀓𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀲𑀫𑁂𑀦𑀸𑀢𑀺 𑀅𑀯𑀺𑀲𑀫𑁂𑀦. 𑀢𑁂𑀦 𑀓𑀸𑀬𑀯𑀺𑀲𑀫𑀸𑀤𑀺𑀤𑀼𑀘𑁆𑀘𑀭𑀺𑀢𑀁 𑀯𑀚𑁆𑀚𑁂𑀢𑁆𑀯𑀸 𑀓𑀸𑀬𑀲𑀫𑀸𑀤𑀺𑀦𑀸 𑀲𑀼𑀘𑀭𑀺𑀢𑁂𑀦 𑀆𑀚𑀻𑀯𑀁 𑀤𑀲𑁆𑀲𑁂𑀢𑀺. 𑀲𑀢𑁆𑀣𑀯𑀡𑀺𑀚𑁆𑀚𑀸𑀢𑀺 𑀆𑀬𑀼𑀥𑀪𑀡𑁆𑀟𑀁 𑀓𑀢𑁆𑀯𑀸 𑀯𑀸 𑀓𑀸𑀭𑁂𑀢𑁆𑀯𑀸 𑀯𑀸 𑀬𑀣𑀸𑀓𑀢𑀁 𑀯𑀸 𑀧𑀝𑀺𑀮𑀪𑀺𑀢𑁆𑀯𑀸 𑀢𑀲𑁆𑀲 𑀯𑀺𑀓𑁆𑀓𑀬𑁄. 𑀲𑀢𑁆𑀢𑀯𑀡𑀺𑀚𑁆𑀚𑀸𑀢𑀺 𑀫𑀦𑀼𑀲𑁆𑀲𑀯𑀺𑀓𑁆𑀓𑀬𑁄. 𑀫𑀁𑀲𑀯𑀡𑀺𑀚𑁆𑀚𑀸𑀢𑀺 𑀲𑀽𑀦𑀓𑀸𑀭𑀸𑀤𑀬𑁄 𑀯𑀺𑀬 𑀫𑀺𑀕𑀲𑀽𑀓𑀭𑀸𑀤𑀺𑀓𑁂 𑀧𑁄𑀲𑁂𑀢𑁆𑀯𑀸 𑀫𑀁𑀲𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀯𑀺𑀓𑁆𑀓𑀬𑁄. 𑀫𑀚𑁆𑀚𑀯𑀡𑀺𑀚𑁆𑀚𑀸𑀢𑀺 𑀬𑀁 𑀓𑀺𑀜𑁆𑀘𑀺 𑀫𑀚𑁆𑀚𑀁 𑀬𑁄𑀚𑁂𑀢𑁆𑀯𑀸 𑀢𑀲𑁆𑀲 𑀯𑀺𑀓𑁆𑀓𑀬𑁄. 𑀯𑀺𑀲𑀯𑀡𑀺𑀚𑁆𑀚𑀸𑀢𑀺 𑀯𑀺𑀲𑀁 𑀬𑁄𑀚𑁂𑀢𑁆𑀯𑀸 𑀯𑀺𑀲𑀁 𑀕𑀳𑁂𑀢𑁆𑀯𑀸 𑀯𑀸 𑀢𑀲𑁆𑀲 𑀯𑀺𑀓𑁆𑀓𑀬𑁄. 𑀢𑀢𑁆𑀣 𑀲𑀢𑁆𑀣𑀯𑀡𑀺𑀚𑁆𑀚𑀸 𑀧𑀭𑁄𑀧𑀭𑁄𑀥𑀦𑀺𑀫𑀺𑀢𑁆𑀢𑀢𑀸𑀬 𑀅𑀓𑀭𑀡𑀻𑀬𑀸 𑀯𑀼𑀢𑁆𑀢𑀸. 𑀲𑀢𑁆𑀢𑀯𑀡𑀺𑀚𑁆𑀚𑀸 𑀅𑀪𑀼𑀚𑀺𑀲𑁆𑀲𑀪𑀸𑀯𑀓𑀭𑀡𑀢𑁄, 𑀫𑀁𑀲𑀯𑀺𑀲𑀯𑀡𑀺𑀚𑁆𑀚𑀸 𑀯𑀥𑀳𑁂𑀢𑀼𑀢𑁄, 𑀫𑀚𑁆𑀚𑀯𑀡𑀺𑀚𑁆𑀚𑀸 𑀧𑀫𑀸𑀤𑀝𑁆𑀞𑀸𑀦𑀢𑁄.

𑀢𑀲𑁆𑀲𑁂𑀯𑀸𑀢𑀺 𑀧𑀜𑁆𑀘𑀯𑁂𑀭𑀫𑀡𑀺𑀮𑀓𑁆𑀔𑀡𑀲𑁆𑀲 𑀲𑀻𑀮𑀲𑁆𑀲 𑀘𑁂𑀯 𑀧𑀜𑁆𑀘𑀫𑀺𑀘𑁆𑀙𑀸𑀯𑀡𑀺𑀚𑁆𑀚𑀸𑀮𑀓𑁆𑀔𑀡𑀲𑁆𑀲 𑀆𑀚𑀻𑀯𑀲𑁆𑀲 𑀘. 𑀯𑀺𑀧𑀢𑁆𑀢𑀻𑀢𑀺 𑀪𑁂𑀤𑁄 𑀧𑀓𑁄𑀧𑁄 𑀘. 𑀬𑀸𑀬𑀸𑀢𑀺 𑀬𑀸𑀬 𑀧𑀝𑀺𑀧𑀢𑁆𑀢𑀺𑀬𑀸. 𑀘𑀡𑁆𑀟𑀸𑀮𑁄𑀢𑀺 𑀉𑀧𑀸𑀲𑀓𑀘𑀡𑁆𑀟𑀸𑀮𑁄. 𑀫𑀮𑀦𑁆𑀢𑀺 𑀉𑀧𑀸𑀲𑀓𑀫𑀮𑀁. 𑀧𑀝𑀺𑀓𑀼𑀝𑁆𑀞𑁄𑀢𑀺 𑀉𑀧𑀸𑀲𑀓𑀦𑀺𑀳𑀻𑀦𑁄. 𑀩𑀼𑀤𑁆𑀥𑀸𑀤𑀻𑀲𑀼 𑀓𑀫𑁆𑀫𑀓𑀫𑁆𑀫𑀨𑀮𑁂𑀲𑀼 𑀘 𑀲𑀤𑁆𑀥𑀸𑀯𑀺𑀧𑀭𑀺𑀬𑀸𑀬𑁄 𑀅𑀲𑁆𑀲𑀤𑁆𑀥𑀺𑀬𑀁 𑀫𑀺𑀘𑁆𑀙𑀸𑀥𑀺𑀫𑁄𑀓𑁆𑀔𑁄, 𑀬𑀣𑀸𑀯𑀼𑀢𑁆𑀢𑁂𑀦 𑀅𑀲𑁆𑀲𑀤𑁆𑀥𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑁄 𑀅𑀲𑁆𑀲𑀤𑁆𑀥𑁄. 𑀬𑀣𑀸𑀯𑀼𑀢𑁆𑀢𑀲𑀻𑀮𑀯𑀺𑀧𑀢𑁆𑀢𑀺𑀆𑀚𑀻𑀯𑀯𑀺𑀧𑀢𑁆𑀢𑀺𑀯𑀲𑁂𑀦 𑀤𑀼𑀲𑁆𑀲𑀻𑀮𑁄. ‘‘𑀇𑀫𑀺𑀦𑀸 𑀤𑀺𑀝𑁆𑀞𑀸𑀤𑀺𑀦𑀸 𑀇𑀤𑀁 𑀦𑀸𑀫 𑀫𑀗𑁆𑀕𑀮𑀁 𑀳𑁄𑀢𑀻’’𑀢𑀺 𑁋 𑀏𑀯𑀁 𑀩𑀸𑀮𑀚𑀦𑀧𑀭𑀺𑀓𑀧𑁆𑀧𑀺𑀢𑀓𑁄𑀢𑀽𑀳𑀮𑀲𑀗𑁆𑀔𑀸𑀢𑁂𑀦 𑀤𑀺𑀝𑁆𑀞𑀲𑀼𑀢𑀫𑀼𑀢𑀫𑀗𑁆𑀕𑀮𑁂𑀦 𑀲𑀫𑀦𑁆𑀦𑀸𑀕𑀢𑁄 𑀓𑁄𑀢𑀽𑀳𑀮𑀫𑀗𑁆𑀕𑀮𑀺𑀓𑁄. 𑀫𑀗𑁆𑀕𑀮𑀁 𑀧𑀘𑁆𑀘𑁂𑀢𑀻𑀢𑀺 𑀤𑀺𑀝𑁆𑀞𑀫𑀗𑁆𑀕𑀮𑀸𑀤𑀺𑀪𑁂𑀤𑀁 𑀫𑀗𑁆𑀕𑀮𑀫𑁂𑀯 𑀧𑀢𑁆𑀢𑀺𑀬𑀸𑀬𑀢𑀺. 𑀦𑁄 𑀓𑀫𑁆𑀫𑀦𑁆𑀢𑀺 𑀓𑀫𑁆𑀫𑀲𑁆𑀲𑀓𑀢𑀁 𑀦𑁄 𑀧𑀢𑁆𑀢𑀺𑀬𑀸𑀬𑀢𑀺. 𑀇𑀢𑁄 𑀩𑀳𑀺𑀤𑁆𑀥𑀸𑀢𑀺 𑀇𑀢𑁄 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀲𑀸𑀲𑀦𑀢𑁄 𑀩𑀳𑀺𑀤𑁆𑀥𑀸 𑀩𑀸𑀳𑀺𑀭𑀓𑀲𑀫𑀬𑁂. 𑀤𑀓𑁆𑀔𑀺𑀡𑁂𑀬𑁆𑀬𑀁 𑀧𑀭𑀺𑀬𑁂𑀲𑀢𑀻𑀢𑀺 𑀤𑀼𑀧𑁆𑀧𑀝𑀺𑀧𑀦𑁆𑀦𑀁 𑀤𑀓𑁆𑀔𑀺𑀡𑀸𑀭𑀳𑀲𑀜𑁆𑀜𑀻 𑀕𑀯𑁂𑀲𑀢𑀺. 𑀧𑀼𑀩𑁆𑀩𑀓𑀸𑀭𑀁 𑀓𑀭𑁄𑀢𑀻𑀢𑀺 𑀤𑀸𑀦𑀫𑀸𑀦𑀦𑀸𑀤𑀺𑀓𑀁 𑀓𑀼𑀲𑀮𑀓𑀺𑀭𑀺𑀬𑀁 𑀧𑀞𑀫𑀢𑀭𑀁 𑀓𑀭𑁄𑀢𑀺. 𑀏𑀢𑁆𑀣 𑀘 𑀤𑀓𑁆𑀔𑀺𑀡𑁂𑀬𑁆𑀬𑀧𑀭𑀺𑀬𑁂𑀲𑀦𑀧𑀼𑀩𑁆𑀩𑀓𑀸𑀭𑁂 𑀏𑀓𑀁 𑀓𑀢𑁆𑀯𑀸 𑀧𑀜𑁆𑀘 𑀥𑀫𑁆𑀫𑀸 𑀯𑁂𑀤𑀺𑀢𑀩𑁆𑀩𑀸.

𑀯𑀺𑀧𑀢𑁆𑀢𑀺𑀬𑀁 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀲𑀫𑁆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀘𑀢𑀼𑀦𑁆𑀦𑀫𑁆𑀧𑀺 𑀧𑀭𑀺𑀲𑀸𑀦𑀁 𑀭𑀢𑀺𑀚𑀦𑀦𑀝𑁆𑀞𑁂𑀦 𑀉𑀧𑀸𑀲𑀓𑁄𑀯 𑀭𑀢𑀦𑀁 𑀉𑀧𑀸𑀲𑀓𑀭𑀢𑀦𑀁. 𑀕𑀼𑀡𑀲𑁄𑀪𑀸𑀓𑀺𑀢𑁆𑀢𑀺𑀲𑀤𑁆𑀤𑀲𑀼𑀕𑀦𑁆𑀥𑀢𑀸𑀳𑀺 𑀉𑀧𑀸𑀲𑀓𑁄𑀯 𑀧𑀤𑀼𑀫𑀁 𑀉𑀧𑀸𑀲𑀓𑀧𑀤𑀼𑀫𑀁. 𑀢𑀣𑀸 𑀉𑀧𑀸𑀲𑀓𑀧𑀼𑀡𑁆𑀟𑀭𑀻𑀓𑁄.

𑀆𑀤𑀺𑀫𑁆𑀳𑀻𑀢𑀺 𑀆𑀤𑀺𑀅𑀢𑁆𑀣𑁂. 𑀓𑁄𑀝𑀺𑀬𑀦𑁆𑀢𑀺 𑀧𑀭𑀺𑀬𑀦𑁆𑀢𑀓𑁄𑀝𑀺𑀬𑀁. 𑀯𑀺𑀳𑀸𑀭𑀕𑁆𑀕𑁂𑀦𑀸𑀢𑀺 𑀑𑀯𑀭𑀓𑀓𑁄𑀝𑁆𑀞𑀸𑀲𑁂𑀦, ‘‘𑀇𑀫𑀲𑁆𑀫𑀺𑀁 𑀕𑀩𑁆𑀪𑁂 𑀯𑀲𑀦𑁆𑀢𑀸𑀦𑀁 𑀇𑀤𑀁 𑀦𑀸𑀫 𑀨𑀮𑀁 𑀧𑀸𑀧𑀼𑀡𑀸𑀢𑀻’’𑀢𑀺𑀆𑀤𑀻𑀦𑀸 𑀢𑀁 𑀢𑀁 𑀯𑀲𑀦𑀝𑁆𑀞𑀸𑀦𑀓𑁄𑀝𑁆𑀞𑀸𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀚𑁆𑀚𑀢𑀦𑁆𑀢𑀺 𑀅𑀚𑁆𑀚 𑀇𑀘𑁆𑀘𑁂𑀯 𑀅𑀢𑁆𑀣𑁄.

𑀧𑀸𑀡𑁂𑀳𑀺 𑀉𑀧𑁂𑀢𑀦𑁆𑀢𑀺 𑀇𑀫𑀺𑀦𑀸 𑀢𑀲𑁆𑀲 𑀲𑀭𑀡𑀕𑀫𑀦𑀲𑁆𑀲 𑀆𑀧𑀸𑀡𑀓𑁄𑀝𑀺𑀓𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀸𑀯 𑀫𑁂 𑀚𑀻𑀯𑀺𑀢𑀁 𑀧𑀯𑀢𑁆𑀢𑀢𑀻’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀧𑀼𑀦 𑀚𑀻𑀯𑀺𑀢𑁂𑀦𑀧𑀺 𑀢𑀁 𑀯𑀢𑁆𑀣𑀼𑀢𑁆𑀢𑀬𑀁 𑀧𑀝𑀺𑀧𑀽𑀚𑁂𑀦𑁆𑀢𑁄 𑀲𑀭𑀡𑀕𑀫𑀦𑀁 𑀭𑀓𑁆𑀔𑀸𑀫𑀻𑀢𑀺 𑀉𑀧𑁆𑀧𑀦𑁆𑀦𑀁 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀥𑀺𑀧𑁆𑀧𑀸𑀬𑀁 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀅𑀳𑀜𑁆𑀳𑀻’’𑀢𑀺𑀆𑀤𑀺𑀫𑀸𑀳. 𑀧𑀸𑀡𑁂𑀳𑀺 𑀉𑀧𑁂𑀢𑀦𑁆𑀢𑀺 𑀳𑀺 𑀬𑀸𑀯 𑀫𑁂 𑀧𑀸𑀡𑀸 𑀥𑀭𑀦𑁆𑀢𑀺, 𑀢𑀸𑀯 𑀲𑀭𑀡𑀁 𑀉𑀧𑁂𑀢𑀁. 𑀉𑀧𑁂𑀦𑁆𑀢𑁄 𑀘 𑀦 𑀯𑀸𑀘𑀸𑀫𑀢𑁆𑀢𑁂𑀦 𑀦 𑀏𑀓𑀯𑀸𑀭𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑀢𑁆𑀢𑁂𑀦, 𑀅𑀣 𑀔𑁄 𑀧𑀸𑀡𑀸𑀦𑀁 𑀧𑀭𑀺𑀘𑁆𑀘𑀚𑀦𑀯𑀲𑁂𑀦𑀧𑀺 𑀬𑀸𑀯𑀚𑀻𑀯𑀁 𑀉𑀧𑁂𑀢𑀦𑁆𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁧𑁭-𑁧𑁯. 𑀲𑀢𑁆𑀢𑀫𑁂 𑀚𑀸𑀡𑀼𑀲𑁆𑀲𑁄𑀡𑀻𑀢𑀺 𑀦𑁂𑀢𑀁 𑀢𑀲𑁆𑀲 𑀫𑀸𑀢𑀸𑀧𑀺𑀢𑀽𑀳𑀺 𑀓𑀢𑀁 𑀦𑀸𑀫𑀁, 𑀅𑀧𑀺𑀘 𑀔𑁄 𑀞𑀸𑀦𑀦𑁆𑀢𑀭𑀧𑁆𑀧𑀝𑀺𑀮𑀸𑀪𑀮𑀤𑁆𑀥𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀚𑀸𑀡𑀼𑀲𑁆𑀲𑁄𑀡𑀻𑀢𑀺 𑀞𑀸𑀦𑀦𑁆𑀢𑀭𑀁 𑀓𑀺𑀭𑀸’’𑀢𑀺𑀆𑀤𑀺. 𑀏𑀓𑀁 𑀞𑀸𑀦𑀦𑁆𑀢𑀭𑀦𑁆𑀢𑀺 𑀏𑀓𑀁 𑀧𑀼𑀭𑁄𑀳𑀺𑀢𑀝𑁆𑀞𑀸𑀦𑀁. 𑀉𑀡𑁆𑀳𑀻𑀲𑀆𑀤𑀺𑀓𑀓𑀼𑀥𑀪𑀡𑁆𑀟𑁂𑀳𑀺 𑀲𑀤𑁆𑀥𑀺𑀁 𑀮𑀤𑁆𑀥𑀁 𑀢𑀣𑀸 𑀘𑀲𑁆𑀲 𑀭𑀜𑁆𑀜𑀸 𑀤𑀺𑀦𑁆𑀦𑀦𑁆𑀢𑀺 𑀯𑀤𑀦𑁆𑀢𑀺. 𑀢𑁂𑀦𑀸𑀳 ‘‘𑀭𑀜𑁆𑀜𑁄 𑀲𑀦𑁆𑀢𑀺𑀓𑁂 𑀘 𑀮𑀤𑁆𑀥𑀚𑀸𑀡𑀼𑀲𑁆𑀲𑁄𑀡𑀺𑀲𑀓𑁆𑀓𑀸𑀭𑀢𑁆𑀢𑀸’’𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯. 𑀅𑀝𑁆𑀞𑀫𑀦𑀯𑀫𑁂𑀲𑀼 𑀦𑀢𑁆𑀣𑀺 𑀯𑀢𑁆𑀢𑀩𑁆𑀩𑀁.

𑁨𑁦-𑁨𑁧. 𑀤𑀲𑀫𑁂 𑀤𑀼𑀦𑁆𑀦𑀺𑀓𑁆𑀔𑀺𑀢𑁆𑀢𑀦𑁆𑀢𑀺 𑀤𑀼𑀝𑁆𑀞𑀼 𑀦𑀺𑀓𑁆𑀔𑀺𑀢𑁆𑀢𑀁 𑀧𑀤𑀧𑀘𑁆𑀘𑀸𑀪𑀝𑁆𑀞𑀁 𑀓𑀢𑁆𑀯𑀸 𑀫𑀦𑀲𑀺 𑀞𑀧𑀺𑀢𑀁. 𑀧𑀚𑁆𑀚𑀢𑀺 𑀜𑀸𑀬𑀢𑀺 𑀅𑀢𑁆𑀣𑁄 𑀏𑀢𑁂𑀦𑀸𑀢𑀺 𑀧𑀤𑀁, 𑀅𑀢𑁆𑀣𑀁 𑀩𑁆𑀬𑀜𑁆𑀚𑀬𑀢𑀺 𑀧𑀓𑀸𑀲𑁂𑀢𑀻𑀢𑀺 𑀩𑁆𑀬𑀜𑁆𑀚𑀦𑀁, 𑀧𑀤𑀫𑁂𑀯. 𑀢𑁂𑀦𑁂𑀯𑀸𑀳 ‘‘𑀉𑀧𑁆𑀧𑀝𑀺𑀧𑀸𑀝𑀺𑀬𑀸…𑀧𑁂… 𑀩𑁆𑀬𑀜𑁆𑀚𑀦𑀦𑁆𑀢𑀺 𑀯𑀼𑀘𑁆𑀘𑀢𑀻’’𑀢𑀺. 𑀧𑀤𑀲𑀫𑀼𑀤𑀸𑀬𑀩𑁆𑀬𑀢𑀺𑀭𑁂𑀓𑁂𑀦 𑀯𑀺𑀲𑀼𑀁 𑀧𑀸𑀴𑀺 𑀦𑀸𑀫 𑀦𑀢𑁆𑀣𑀻𑀢𑀺 𑀆𑀳 ‘‘𑀉𑀪𑀬𑀫𑁂𑀢𑀁 𑀧𑀸𑀴𑀺𑀬𑀸𑀯 𑀦𑀸𑀫’’𑀦𑁆𑀢𑀺. 𑀧𑀓𑀝𑁆𑀞𑀸𑀦𑀜𑁆𑀳𑀺 𑀯𑀘𑀦𑀧𑁆𑀧𑀩𑀦𑁆𑀥𑀸𑀦𑀁 𑀆𑀴𑀺𑀬𑁂𑀯 𑀧𑀸𑀴𑀻𑀢𑀺 𑀯𑀼𑀘𑁆𑀘𑀢𑀺. 𑀲𑁂𑀲𑀫𑁂𑀢𑁆𑀣 𑀏𑀓𑀸𑀤𑀲𑀫𑀜𑁆𑀘 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀅𑀥𑀺𑀓𑀭𑀡𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀩𑀸𑀮𑀯𑀕𑁆𑀕𑀯𑀡𑁆𑀡𑀦𑀸

𑁨𑁨-𑁨𑁪. 𑀢𑀢𑀺𑀬𑀲𑁆𑀲 𑀧𑀞𑀫𑀤𑀼𑀢𑀺𑀬𑀢𑀢𑀺𑀬𑀸𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑁨𑁫. 𑀘𑀢𑀼𑀢𑁆𑀣𑁂 𑀦𑁂𑀢𑀩𑁆𑀩𑁄𑀢𑀺 𑀅𑀜𑁆𑀜𑀢𑁄 𑀆𑀳𑀭𑀺𑀢𑁆𑀯𑀸 𑀩𑁄𑀥𑁂𑀢𑀩𑁆𑀩𑁄, 𑀜𑀸𑀧𑁂𑀢𑀩𑁆𑀩𑁄𑀢𑀺 𑀅𑀢𑁆𑀣𑁄.

𑁨𑁭. 𑀙𑀝𑁆𑀞𑁂 𑀦𑁄 𑀘𑁂𑀧𑀺 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀓𑀭𑁄𑀦𑁆𑀢𑀻𑀢𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀺 𑀓𑀭𑁄𑀦𑁆𑀢𑁄 𑀲𑀘𑁂𑀧𑀺 𑀅𑀧𑁆𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀓𑀭𑁄𑀦𑁆𑀢𑀺. 𑀧𑀝𑀺𑀘𑁆𑀙𑀦𑁆𑀦𑀫𑁂𑀯𑀸𑀢𑀺 𑀯𑀺𑀜𑁆𑀜𑀽𑀳𑀺 𑀕𑀭𑀳𑀺𑀢𑀩𑁆𑀩𑀪𑀸𑀯𑀢𑁄 𑀧𑀝𑀺𑀘𑁆𑀙𑀸𑀤𑀦𑀸𑀭𑀳𑀢𑁆𑀢𑀸 𑀧𑀝𑀺𑀘𑁆𑀙𑀦𑁆𑀦𑀫𑁂𑀯𑀸𑀢𑀺 𑀯𑀼𑀘𑁆𑀘𑀢𑀺. 𑀅𑀯𑀻𑀘𑀺𑀆𑀤𑀬𑁄 𑀧𑀤𑁂𑀲𑀯𑀺𑀲𑁂𑀲𑀸 𑀢𑀢𑁆𑀣𑀽𑀧𑀧𑀦𑁆𑀦𑀸 𑀲𑀢𑁆𑀢𑀸 𑀘 𑀦𑀺𑀭𑀬𑀕𑁆𑀕𑀳𑀡𑁂𑀦 𑀕𑀳𑀺𑀢𑀸𑀢𑀺 𑀆𑀳 ‘‘𑀦𑀺𑀭𑀬𑁄𑀢𑀺 𑀲𑀳𑁄𑀓𑀸𑀲𑀓𑀸 𑀔𑀦𑁆𑀥𑀸’’𑀢𑀺. 𑀢𑀺𑀭𑀘𑁆𑀙𑀸𑀦𑀬𑁄𑀦𑀺 𑀦𑀸𑀫 𑀯𑀺𑀲𑀼𑀁 𑀧𑀤𑁂𑀲𑀯𑀺𑀲𑁂𑀲𑁄 𑀦𑀢𑁆𑀣𑀻𑀢𑀺 𑀆𑀳 ‘‘𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁 𑀔𑀦𑁆𑀥𑀸𑀯 𑀮𑀩𑁆𑀪𑀦𑁆𑀢𑀻’’𑀢𑀺.

𑁩𑁧. 𑀤𑀲𑀫𑁂 𑀅𑀢𑁆𑀣𑁄 𑀨𑀮𑀁 𑀢𑀤𑀥𑀻𑀦𑀯𑀼𑀢𑁆𑀢𑀺𑀢𑀸𑀬 𑀯𑀲𑁄 𑀏𑀢𑀲𑁆𑀲𑀸𑀢𑀺 𑀅𑀢𑁆𑀣𑀯𑀲𑁄, 𑀳𑁂𑀢𑀽𑀢𑀺 𑀆𑀳 ‘‘𑀅𑀢𑁆𑀣𑀯𑀲𑁂𑀢𑀺 𑀓𑀸𑀭𑀡𑀸𑀦𑀻’’𑀢𑀺. 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀻𑀢𑀺 𑀅𑀭𑀜𑁆𑀜𑀮𑀓𑁆𑀔𑀡𑀧𑁆𑀧𑀢𑁆𑀢𑀸𑀦𑀺 𑀯𑀦𑀧𑀢𑁆𑀣𑀸𑀦𑀺. 𑀯𑀦𑀧𑀢𑁆𑀣-𑀲𑀤𑁆𑀤𑁄 𑀳𑀺 𑀲𑀡𑁆𑀟𑀪𑀽𑀢𑁂 𑀭𑀼𑀓𑁆𑀔𑀲𑀫𑀽𑀳𑁂𑀧𑀺 𑀯𑀢𑁆𑀢𑀢𑀻𑀢𑀺 𑀅𑀭𑀜𑁆𑀜𑀕𑁆𑀕𑀳𑀡𑀁. 𑀯𑀦𑀻𑀬𑀢𑀺 𑀯𑀺𑀯𑁂𑀓𑀓𑀸𑀫𑁂𑀳𑀺 𑀪𑀚𑀻𑀬𑀢𑀺, 𑀯𑀦𑀼𑀢𑁂 𑀯𑀸 𑀢𑁂 𑀅𑀢𑁆𑀢𑀲𑀫𑁆𑀧𑀢𑁆𑀢𑀺𑀬𑀸 𑀯𑀲𑀦𑀢𑁆𑀣𑀸𑀬 𑀬𑀸𑀘𑀦𑁆𑀢𑁄 𑀯𑀺𑀬 𑀳𑁄𑀢𑀻𑀢𑀺 𑀯𑀦𑀁, 𑀧𑀢𑀺𑀝𑁆𑀞𑀳𑀦𑁆𑀢𑀺 𑀏𑀢𑁆𑀣 𑀯𑀺𑀯𑁂𑀓𑀓𑀸𑀫𑀸 𑀬𑀣𑀸𑀥𑀺𑀧𑁆𑀧𑁂𑀢𑀯𑀺𑀲𑁂𑀲𑀸𑀥𑀺𑀕𑀫𑁂𑀦𑀸𑀢𑀺 𑀧𑀢𑁆𑀣𑀁, 𑀯𑀦𑁂𑀲𑀼 𑀧𑀢𑁆𑀣𑀁 𑀕𑀳𑀦𑀝𑁆𑀞𑀸𑀦𑁂 𑀲𑁂𑀦𑀸𑀲𑀦𑀁 𑀯𑀦𑀧𑀢𑁆𑀣𑀁. 𑀓𑀺𑀜𑁆𑀘𑀸𑀧𑀻𑀢𑀺 𑀅𑀦𑀼𑀚𑀸𑀦𑀦𑀲𑀫𑁆𑀪𑀸𑀯𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀓𑀺𑀁 𑀅𑀦𑀼𑀚𑀸𑀦𑀸𑀢𑀺? 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀅𑀭𑀜𑁆𑀜𑀪𑀸𑀯𑀁 𑀕𑀸𑀫𑀢𑁄 𑀩𑀳𑀺 𑀅𑀭𑀜𑁆𑀜𑀦𑁆𑀢𑀺. 𑀢𑁂𑀦𑀸𑀳 ‘‘𑀦𑀺𑀧𑁆𑀧𑀭𑀺𑀬𑀸𑀬𑁂𑀦𑀸’’𑀢𑀺𑀆𑀤𑀺. 𑀓𑀺𑀁 𑀲𑀫𑁆𑀪𑀸𑀯𑁂𑀢𑀺? 𑀆𑀭𑀜𑁆𑀜𑀓𑀗𑁆𑀕𑀦𑀺𑀧𑁆𑀨𑀸𑀤𑀓𑀢𑁆𑀢𑀁. 𑀬𑀜𑁆𑀳𑀺 𑀆𑀭𑀜𑁆𑀜𑀓𑀗𑁆𑀕𑀦𑀺𑀧𑁆𑀨𑀸𑀤𑀓𑀁, 𑀢𑀁 𑀯𑀺𑀲𑁂𑀲𑀢𑁄 𑀅𑀭𑀜𑁆𑀜𑀦𑁆𑀢𑀺 𑀯𑀢𑁆𑀢𑀩𑁆𑀩𑀦𑁆𑀢𑀺. 𑀢𑁂𑀦𑀸𑀳 ‘‘𑀬𑀁 𑀢𑀁 𑀧𑀜𑁆𑀘𑀥𑀦𑀼𑀲𑀢𑀺𑀓’’𑀦𑁆𑀢𑀺𑀆𑀤𑀺. 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀳𑀺 𑀇𑀦𑁆𑀤𑀔𑀻𑀮𑀸𑀢𑀺 𑀇𑀦𑁆𑀤𑀔𑀻𑀮𑀢𑁄 𑀩𑀳𑀺 𑀦𑀺𑀓𑁆𑀔𑀫𑀺𑀢𑁆𑀯𑀸, 𑀢𑀢𑁄 𑀩𑀳𑀺 𑀧𑀝𑁆𑀞𑀸𑀬𑀸𑀢𑀺 𑀅𑀢𑁆𑀣𑁄. 𑀩𑀳𑀺 𑀇𑀦𑁆𑀤𑀔𑀻𑀮𑀸𑀢𑀺 𑀯𑀸 𑀬𑀢𑁆𑀣 𑀤𑁆𑀯𑁂 𑀢𑀻𑀡𑀺 𑀇𑀦𑁆𑀤𑀔𑀻𑀮𑀸𑀦𑀺, 𑀢𑀢𑁆𑀣 𑀩𑀳𑀺𑀤𑁆𑀥𑀸 𑀇𑀦𑁆𑀤𑀔𑀻𑀮𑀢𑁄 𑀧𑀝𑁆𑀞𑀸𑀬. 𑀬𑀢𑁆𑀣 𑀢𑀁 𑀦𑀢𑁆𑀣𑀺, 𑀢𑀤𑀭𑀳𑀝𑁆𑀞𑀸𑀦𑀢𑁄 𑀧𑀝𑁆𑀞𑀸𑀬𑀸𑀢𑀺 𑀯𑀤𑀦𑁆𑀢𑀺. 𑀕𑀸𑀫𑀦𑁆𑀢𑀦𑁆𑀢𑀺 𑀕𑀸𑀫𑀲𑀫𑀻𑀧𑀁. 𑀅𑀦𑀼𑀧𑀘𑀸𑀭𑀝𑁆𑀞𑀸𑀦𑀦𑁆𑀢𑀺 𑀦𑀺𑀘𑁆𑀘𑀓𑀺𑀘𑁆𑀘𑀯𑀲𑁂𑀦 𑀦 𑀉𑀧𑀘𑀭𑀺𑀢𑀩𑁆𑀩𑀝𑁆𑀞𑀸𑀦𑀁. 𑀢𑁂𑀦𑀸𑀳 ‘‘𑀬𑀢𑁆𑀣 𑀦 𑀓𑀲𑀻𑀬𑀢𑀺 𑀦 𑀯𑀧𑀻𑀬𑀢𑀻’’𑀢𑀺.

𑀅𑀢𑁆𑀢𑀦𑁄 𑀘 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀦𑁆𑀢𑀺 𑀏𑀢𑁂𑀦 𑀲𑀢𑁆𑀣𑀸 𑀅𑀢𑁆𑀢𑀦𑁄 𑀯𑀺𑀯𑁂𑀓𑀸𑀪𑀺𑀭𑀢𑀺𑀁 𑀧𑀓𑀸𑀲𑁂𑀢𑀺. 𑀢𑀢𑁆𑀣 𑀤𑀺𑀝𑁆𑀞𑀥𑀫𑁆𑀫𑁄 𑀦𑀸𑀫 𑀅𑀬𑀁 𑀧𑀘𑁆𑀘𑀓𑁆𑀔𑁄 𑀅𑀢𑁆𑀢𑀪𑀸𑀯𑁄, 𑀲𑀼𑀔𑀯𑀺𑀳𑀸𑀭𑁄 𑀦𑀸𑀫 𑀘𑀢𑀼𑀦𑁆𑀦𑀁 𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑀸𑀦𑀁 𑀨𑀸𑀲𑀼𑀢𑀸. 𑀏𑀓𑀓𑀲𑁆𑀲 𑀳𑀺 𑀅𑀭𑀜𑁆𑀜𑁂 𑀅𑀦𑁆𑀢𑀫𑀲𑁄 𑀉𑀘𑁆𑀘𑀸𑀭𑀯𑀲𑁆𑀲𑀸𑀯𑀓𑀺𑀘𑁆𑀘𑀁 𑀉𑀧𑀸𑀤𑀸𑀬 𑀲𑀩𑁆𑀩𑁂 𑀇𑀭𑀺𑀬𑀸𑀧𑀣𑀸 𑀨𑀸𑀲𑀼𑀓𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀤𑀺𑀝𑁆𑀞𑀥𑀫𑁆𑀫𑁂 𑀲𑀼𑀔𑀯𑀺𑀳𑀸𑀭𑀁 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀦𑁆𑀢𑀺 𑀏𑀯𑀁 𑀯𑀸 𑀏𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀧𑀘𑁆𑀙𑀺𑀫𑀜𑁆𑀘 𑀚𑀦𑀢𑀁 𑀅𑀦𑀼𑀓𑀫𑁆𑀧𑀫𑀸𑀦𑁄𑀢𑀺 𑀓𑀣𑀁 𑀅𑀭𑀜𑁆𑀜𑀯𑀸𑀲𑁂𑀦 𑀧𑀘𑁆𑀙𑀺𑀫𑀸 𑀚𑀦𑀢𑀸 𑀅𑀦𑀼𑀓𑀫𑁆𑀧𑀺𑀢𑀸 𑀳𑁄𑀢𑀺? 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑀸 𑀳𑀺 𑀓𑀼𑀮𑀧𑀼𑀢𑁆𑀢𑀸 𑀪𑀕𑀯𑀢𑁄 𑀅𑀭𑀜𑁆𑀜𑀯𑀸𑀲𑀁 𑀤𑀺𑀲𑁆𑀯𑀸 ‘‘𑀪𑀕𑀯𑀸𑀧𑀺 𑀦𑀸𑀫 𑀅𑀭𑀜𑁆𑀜𑀲𑁂𑀦𑀸𑀲𑀦𑀸𑀦𑀺 𑀦 𑀫𑀼𑀜𑁆𑀘𑀢𑀺, 𑀬𑀲𑁆𑀲 𑀦𑁂𑀯𑀢𑁆𑀣𑀺 𑀧𑀭𑀺𑀜𑁆𑀜𑀸𑀢𑀩𑁆𑀩𑀁 𑀦 𑀧𑀳𑀸𑀢𑀩𑁆𑀩𑀁 𑀦 𑀪𑀸𑀯𑁂𑀢𑀩𑁆𑀩𑀁 𑀦 𑀲𑀘𑁆𑀙𑀺𑀓𑀸𑀢𑀩𑁆𑀩𑀁, 𑀓𑀺𑀫𑀗𑁆𑀕𑀁 𑀧𑀦 𑀫𑀬’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀢𑁆𑀣 𑀯𑀲𑀺𑀢𑀩𑁆𑀩𑀫𑁂𑀯 𑀫𑀜𑁆𑀜𑀺𑀲𑁆𑀲𑀦𑁆𑀢𑀺, 𑀏𑀯𑀁 𑀔𑀺𑀧𑁆𑀧𑀫𑁂𑀯 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑀸 𑀪𑀯𑀺𑀲𑁆𑀲𑀦𑁆𑀢𑀺. 𑀏𑀯𑀁 𑀧𑀘𑁆𑀙𑀺𑀫𑀸 𑀚𑀦𑀢𑀸 𑀅𑀦𑀼𑀓𑀫𑁆𑀧𑀺𑀢𑀸 𑀳𑁄𑀢𑀺. 𑀏𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀘𑁆𑀙𑀺𑀫𑁂 𑀫𑀫 𑀲𑀸𑀯𑀓𑁂 𑀅𑀦𑀼𑀓𑀫𑁆𑀧𑀦𑁆𑀢𑁄’’𑀢𑀺.

𑁩𑁨. 𑀏𑀓𑀸𑀤𑀲𑀫𑁂 𑀯𑀺𑀚𑁆𑀚𑀁 𑀪𑀚𑀦𑁆𑀢𑀻𑀢𑀺 𑀯𑀺𑀚𑁆𑀚𑀸𑀪𑀸𑀕𑀺𑀬𑀸, 𑀯𑀺𑀚𑁆𑀚𑀸𑀪𑀸𑀕𑁂 𑀯𑀺𑀚𑁆𑀚𑀸𑀓𑁄𑀝𑁆𑀞𑀸𑀲𑁂 𑀯𑀢𑁆𑀢𑀦𑁆𑀢𑀻𑀢𑀺𑀧𑀺 𑀯𑀺𑀚𑁆𑀚𑀸𑀪𑀸𑀕𑀺𑀬𑀸. 𑀧𑀤𑀁 𑀧𑀘𑁆𑀙𑀺𑀦𑁆𑀤𑀢𑀻𑀢𑀺 𑀫𑀕𑁆𑀕𑀘𑀺𑀢𑁆𑀢𑀲𑁆𑀲 𑀧𑀢𑀺𑀝𑁆𑀞𑀁 𑀉𑀧𑀘𑁆𑀙𑀺𑀦𑁆𑀤𑀢𑀺, 𑀫𑀕𑁆𑀕𑀘𑀺𑀢𑁆𑀢𑀁 𑀧𑀢𑀺𑀝𑁆𑀞𑀸𑀧𑁂𑀢𑀼𑀁 𑀦 𑀤𑁂𑀢𑀻𑀢𑀺 𑀅𑀢𑁆𑀣𑁄. 𑀉𑀩𑁆𑀩𑀝𑁆𑀝𑁂𑀢𑁆𑀯𑀸𑀢𑀺 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀲𑀫𑀽𑀮𑀁 𑀉𑀤𑁆𑀥𑀭𑀺𑀢𑁆𑀯𑀸. 𑀅𑀝𑁆𑀞𑀲𑀼 𑀞𑀸𑀦𑁂𑀲𑀽𑀢𑀺 𑀩𑀼𑀤𑁆𑀥𑀸𑀤𑀻𑀲𑀼 𑀅𑀝𑁆𑀞𑀲𑀼 𑀞𑀸𑀦𑁂𑀲𑀼. 𑀭𑀸𑀕𑀲𑁆𑀲 𑀔𑀬𑀯𑀺𑀭𑀸𑀕𑁂𑀦𑀸𑀢𑀺 𑀭𑀸𑀕𑀲𑁆𑀲 𑀔𑀬𑀲𑀗𑁆𑀔𑀸𑀢𑁂𑀦 𑀯𑀺𑀭𑀸𑀕𑁂𑀦, 𑀭𑀸𑀕𑀲𑁆𑀲 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀸𑀧𑀸𑀤𑀦𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀩𑀸𑀮𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀲𑀫𑀘𑀺𑀢𑁆𑀢𑀯𑀕𑁆𑀕𑀯𑀡𑁆𑀡𑀦𑀸

𑁩𑁩. 𑀘𑀢𑀼𑀢𑁆𑀣𑀲𑁆𑀲 𑀧𑀞𑀫𑁂 𑀪𑀯𑀦𑁆𑀢𑀺 𑀏𑀢𑁆𑀣 𑀧𑀢𑀺𑀝𑁆𑀞𑀳𑀦𑁆𑀢𑀻𑀢𑀺 𑀪𑀽𑀫𑀺, 𑀅𑀲𑀧𑁆𑀧𑀼𑀭𑀺𑀲𑀸𑀦𑀁 𑀪𑀽𑀫𑀺 𑀅𑀲𑀧𑁆𑀧𑀼𑀭𑀺𑀲𑀪𑀽𑀫𑀺. 𑀲𑀧𑁆𑀧𑀼𑀭𑀺𑀲𑀪𑀽𑀫𑀺𑀬𑀫𑁆𑀧𑀺 𑀏𑀲𑁂𑀯 𑀦𑀬𑁄. 𑀓𑀢𑀁 𑀦 𑀚𑀸𑀦𑀸𑀢𑀻𑀢𑀺 𑀅𑀓𑀢𑀜𑁆𑀜𑀽, 𑀅𑀲𑀫𑀢𑁆𑀣𑀲𑀫𑀸𑀲𑁄𑀬𑀁 𑀕𑀫𑀓𑀢𑁆𑀢𑀸 ‘‘𑀅𑀲𑀽𑀭𑀺𑀬𑀧𑀲𑁆𑀲𑀸’’𑀢𑀺𑀆𑀤𑀻𑀲𑀼 𑀯𑀺𑀬. 𑀢𑁂𑀦𑀸𑀳 ‘‘𑀓𑀢𑀁 𑀦 𑀚𑀸𑀦𑀸𑀢𑀻’’𑀢𑀺. 𑀅𑀓𑀢𑀯𑁂𑀤𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀧𑀸𑀓𑀝𑀁 𑀓𑀢𑁆𑀯𑀸 𑀦 𑀚𑀸𑀦𑀸𑀢𑀻𑀢𑀺 ‘‘𑀇𑀤𑀜𑁆𑀘𑀺𑀤𑀜𑁆𑀘 𑀫𑀬𑁆𑀳𑀁 𑀇𑀫𑀺𑀦𑀸 𑀓𑀢’’𑀦𑁆𑀢𑀺 𑀲𑀗𑁆𑀖𑀫𑀚𑁆𑀛𑀕𑀡𑀫𑀚𑁆𑀛𑀸𑀤𑀻𑀲𑀼 𑀧𑀸𑀓𑀝𑀁 𑀓𑀢𑁆𑀯𑀸 𑀦 𑀚𑀸𑀦𑀸𑀢𑀺, 𑀦 𑀧𑀓𑀸𑀲𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀉𑀧𑀜𑁆𑀜𑀸𑀢𑀦𑁆𑀢𑀺 𑀣𑁄𑀫𑀦𑀸𑀯𑀲𑁂𑀦 𑀉𑀧𑀕𑀦𑁆𑀢𑁆𑀯𑀸 𑀜𑀸𑀢𑀁. 𑀢𑁂𑀦𑀸𑀳 ‘‘𑀯𑀡𑁆𑀡𑀺𑀢’’𑀦𑁆𑀢𑀺𑀆𑀤𑀺.

𑁩𑁪. 𑀤𑀼𑀢𑀺𑀬𑁂 𑀯𑀲𑁆𑀲𑀲𑀢𑀧𑀭𑀺𑀫𑀸𑀡𑀫𑀸𑀬𑀼 𑀅𑀲𑁆𑀲𑀸𑀢𑀺 𑀯𑀲𑁆𑀲𑀲𑀢𑀸𑀬𑀼𑀓𑁄, 𑀯𑀲𑁆𑀲𑀲𑀢𑀸𑀬𑀼𑀓𑀢𑀜𑁆𑀘 𑀯𑀲𑁆𑀲𑀲𑀢𑀸𑀬𑀼𑀓𑀓𑀸𑀮𑁂 𑀚𑀸𑀢𑀲𑁆𑀲𑁂𑀯 𑀳𑁄𑀢𑀺, 𑀦𑀸𑀜𑁆𑀜𑀲𑁆𑀲𑀸𑀢𑀺 𑀆𑀳 ‘‘𑀯𑀲𑁆𑀲𑀲𑀢𑀸𑀬𑀼𑀓𑀓𑀸𑀮𑁂 𑀚𑀸𑀢𑁄’’𑀢𑀺. 𑀯𑀲𑁆𑀲𑀲𑀢𑀁 𑀚𑀻𑀯𑀢𑀺 𑀲𑀻𑀮𑁂𑀦𑀸𑀢𑀺 𑀯𑀲𑁆𑀲𑀲𑀢𑀚𑀻𑀯𑀻. 𑀯𑀲𑁆𑀲𑀲𑀢𑀦𑁆𑀢𑀺 𑀘 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀉𑀧𑀬𑁄𑀕𑀯𑀘𑀦𑀁. 𑀢𑁂𑀦𑀸𑀳 ‘‘𑀲𑀓𑀮𑀁 𑀯𑀲𑁆𑀲𑀲𑀢𑀁 𑀚𑀻𑀯𑀦𑁆𑀢𑁄’’𑀢𑀺. 𑀫𑀸𑀢𑀸𑀧𑀺𑀢𑀽𑀦𑀁 𑀫𑀸𑀢𑀸𑀯 𑀩𑀳𑀽𑀧𑀓𑀸𑀭𑀢𑀭𑀸𑀢𑀺 𑀢𑀲𑁆𑀲𑀸𑀬𑁂𑀯 𑀧𑀥𑀸𑀦𑀪𑀸𑀯𑁂𑀦 𑀧𑀝𑀺𑀓𑀸𑀢𑀩𑁆𑀩𑀢𑁆𑀢𑀸 𑀤𑀓𑁆𑀔𑀺𑀡𑀁 𑀅𑀁𑀲𑀓𑀽𑀝𑀁 𑀯𑀤𑀦𑁆𑀢𑀺. 𑀳𑀤𑀬𑀮𑁄𑀳𑀺𑀢𑀁 𑀧𑀸𑀬𑁂𑀢𑁆𑀯𑀸𑀢𑀺 𑀔𑀻𑀭𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀮𑁄𑀳𑀺𑀢𑀜𑁆𑀳𑀺 𑀔𑀻𑀭𑀪𑀸𑀯𑁂𑀦 𑀧𑀭𑀺𑀡𑀸𑀫𑀁 𑀕𑀘𑁆𑀙𑀢𑀺. 𑀢𑁆𑀬𑀸𑀲𑁆𑀲𑀸𑀢𑀺 𑀢𑁂 𑀅𑀲𑁆𑀲. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑁩𑁫. 𑀢𑀢𑀺𑀬𑁂 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀏𑀢𑁆𑀣 𑀬𑁂𑀦𑀸𑀥𑀺𑀧𑁆𑀧𑀸𑀬𑁂𑀦 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺, 𑀢𑀁 𑀧𑀸𑀓𑀝𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀲𑁄 𑀳𑀺 𑀩𑁆𑀭𑀸𑀳𑁆𑀫𑀡𑁄’’𑀢𑀺𑀆𑀤𑀺𑀫𑀸𑀳. 𑀯𑀺𑀭𑀚𑁆𑀛𑀦𑀧𑀜𑁆𑀳𑀦𑁆𑀢𑀺 𑀬𑀁 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀯𑀺𑀭𑀚𑁆𑀛𑀺𑀢𑁆𑀯𑀸 𑀓𑀣𑁂𑀲𑀺, 𑀅𑀯𑀺𑀧𑀭𑀻𑀢𑀁 𑀓𑀢𑁆𑀯𑀸 𑀲𑀫𑁆𑀧𑀸𑀤𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀸𑀤𑀺𑀲𑀁 𑀧𑀜𑁆𑀳𑀦𑁆𑀢𑀺 𑀅𑀢𑁆𑀣𑁄. 𑀉𑀪𑀢𑁄𑀓𑁄𑀝𑀺𑀓𑀁 𑀧𑀜𑁆𑀳𑀦𑁆𑀢𑀺 𑀉𑀪𑁄𑀳𑀺 𑀓𑁄𑀝𑀻𑀳𑀺 𑀬𑀼𑀢𑁆𑀢𑀁 𑀧𑀜𑁆𑀳𑀁. ‘‘𑀓𑀺𑀁𑀯𑀸𑀤𑀻 𑀪𑀯𑀁 𑀕𑁄𑀢𑀫𑁄’’𑀢𑀺 𑀳𑀺 𑀧𑀼𑀝𑁆𑀞𑁄 ‘‘𑀓𑀺𑀭𑀺𑀬𑀯𑀸𑀤𑀺𑀫𑁆𑀳𑀻’’𑀢𑀺 𑀯𑀸 𑀯𑀤𑁂𑀬𑁆𑀬 ‘‘𑀅𑀓𑀺𑀭𑀺𑀬𑀯𑀸𑀤𑀺𑀫𑁆𑀳𑀻’’𑀢𑀺 𑀯𑀸, 𑀢𑀲𑁆𑀫𑀸 𑀇𑀫𑀲𑁆𑀲 𑀧𑀜𑁆𑀳𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑁂 ‘‘𑀓𑀺𑀭𑀺𑀬𑀯𑀸𑀤𑀺𑀫𑁆𑀳𑀻’’𑀢𑀺 𑀏𑀓𑀸 𑀓𑁄𑀝𑀺, ‘‘𑀅𑀓𑀺𑀭𑀺𑀬𑀯𑀸𑀤𑀺𑀫𑁆𑀳𑀻’’𑀢𑀺 𑀤𑀼𑀢𑀺𑀬𑀸𑀢𑀺 𑀓𑁄𑀝𑀺𑀤𑁆𑀯𑀬𑀬𑀼𑀢𑁆𑀢𑁄 𑀅𑀬𑀁 𑀧𑀜𑁆𑀳𑁄. 𑀉𑀕𑁆𑀕𑀺𑀮𑀺𑀢𑀼𑀦𑁆𑀢𑀺 𑀤𑁆𑀯𑁂 𑀓𑁄𑀝𑀺𑀬𑁄 𑀫𑁄𑀘𑁂𑀢𑁆𑀯𑀸 𑀓𑀣𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀩𑀳𑀺 𑀦𑀻𑀳𑀭𑀺𑀢𑀼𑀁 𑀅𑀢𑁆𑀣𑀢𑁄 𑀅𑀧𑀦𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀢𑀺. 𑀤𑁆𑀯𑁂 𑀓𑁄𑀝𑀺𑀬𑁄 𑀫𑁄𑀘𑁂𑀦𑁆𑀢𑁄 𑀳𑀺 𑀢𑀁 𑀩𑀳𑀺 𑀦𑀻𑀳𑀭𑀢𑀺 𑀦𑀸𑀫. 𑀦𑀺𑀕𑁆𑀕𑀺𑀮𑀺𑀢𑀼𑀦𑁆𑀢𑀺 𑀧𑀼𑀘𑁆𑀙𑀸𑀬 𑀤𑁄𑀲𑀁 𑀤𑀢𑁆𑀯𑀸 𑀳𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀧𑀯𑁂𑀲𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀢𑀺. 𑀢𑀢𑁆𑀣 𑀤𑁄𑀲𑀁 𑀤𑀢𑁆𑀯𑀸 𑀳𑀸𑀭𑁂𑀦𑁆𑀢𑁄 𑀳𑀺 𑀕𑀺𑀮𑀺𑀢𑁆𑀯𑀸 𑀯𑀺𑀬 𑀅𑀤𑀲𑁆𑀲𑀦𑀁 𑀕𑀫𑁂𑀦𑁆𑀢𑁄 𑀧𑀯𑁂𑀲𑁂𑀢𑀺 𑀦𑀸𑀫. 𑀓𑀺𑀁𑀮𑀤𑁆𑀥𑀺𑀓𑁄𑀢𑀺 𑀓𑀺𑀁𑀤𑁆𑀤𑀺𑀝𑁆𑀞𑀺𑀓𑁄. 𑀯𑀤𑀦𑁆𑀢𑀺 𑀏𑀢𑁂𑀦𑀸𑀢𑀺 𑀯𑀸𑀤𑁄, 𑀤𑀺𑀝𑁆𑀞𑀺. 𑀓𑁄 𑀯𑀸𑀤𑁄 𑀏𑀢𑀲𑁆𑀲𑀸𑀢𑀺 𑀓𑀺𑀁𑀯𑀸𑀤𑀻. 𑀓𑀺𑀫𑀓𑁆𑀔𑀸𑀬𑀻𑀢𑀺 𑀓𑀺𑀫𑀪𑀺𑀥𑀸𑀬𑀻, 𑀓𑀻𑀤𑀺𑀲𑀻 𑀥𑀫𑁆𑀫𑀓𑀣𑀸. 𑀢𑁂𑀦𑀸𑀳 ‘‘𑀓𑀺𑀁 𑀦𑀸𑀫…𑀧𑁂… 𑀧𑀼𑀘𑁆𑀙𑀢𑀻’’𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑁩𑁬. 𑀘𑀢𑀼𑀢𑁆𑀣𑁂 𑀤𑀓𑁆𑀔𑀺𑀡𑀁 𑀅𑀭𑀳𑀦𑁆𑀢𑀻𑀢𑀺 𑀤𑀓𑁆𑀔𑀺𑀡𑁂𑀬𑁆𑀬𑀸. 𑀆𑀳𑀼𑀦𑀁 𑀯𑀼𑀘𑁆𑀘𑀢𑀺 𑀤𑀸𑀦𑀁, 𑀢𑀁 𑀅𑀭𑀳𑀦𑁆𑀢𑀻𑀢𑀺 𑀆𑀳𑀼𑀦𑁂𑀬𑁆𑀬𑀸.

𑁩𑁭. 𑀧𑀜𑁆𑀘𑀫𑁂 𑀓𑀣𑀫𑀬𑀁 𑀫𑀺𑀕𑀸𑀭𑀫𑀸𑀢𑀸 𑀦𑀸𑀫 𑀚𑀸𑀢𑀸𑀢𑀺 𑀆𑀳 ‘‘𑀲𑀸 𑀳𑀻’’𑀢𑀺𑀆𑀤𑀺. 𑀲𑀩𑁆𑀩𑀚𑁂𑀝𑁆𑀞𑀓𑀲𑁆𑀲 𑀧𑀼𑀢𑁆𑀢𑀲𑁆𑀲𑀸𑀢𑀺 𑀅𑀢𑁆𑀢𑀦𑁄 𑀧𑀼𑀢𑁆𑀢𑁂𑀲𑀼 𑀲𑀩𑁆𑀩𑀧𑀞𑀫𑀁 𑀚𑀸𑀢𑀲𑁆𑀲 𑀧𑀼𑀢𑁆𑀢𑀲𑁆𑀲. 𑀅𑀬𑁆𑀬𑀓𑀲𑁂𑀝𑁆𑀞𑀺𑀦𑁄𑀯 𑀲𑀫𑀸𑀦𑀦𑀸𑀫𑀓𑀢𑁆𑀢𑀸𑀢𑀺 𑀫𑀺𑀕𑀸𑀭𑀲𑁂𑀝𑁆𑀞𑀺𑀦𑀸 𑀏𑀯 𑀲𑀤𑀺𑀲𑀦𑀸𑀫𑀓𑀢𑁆𑀢𑀸. 𑀢𑀲𑁆𑀲𑀸 𑀓𑀺𑀭 𑀲𑀩𑁆𑀩𑀚𑁂𑀝𑁆𑀞𑀲𑁆𑀲 𑀧𑀼𑀢𑁆𑀢𑀲𑁆𑀲 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 𑀅𑀬𑁆𑀬𑀓𑀲𑁆𑀲 𑀫𑀺𑀕𑀸𑀭𑀲𑁂𑀝𑁆𑀞𑀺𑀲𑁆𑀲𑁂𑀯 𑀦𑀸𑀫𑀁 𑀅𑀓𑀁𑀲𑀼. 𑀅𑀦𑀺𑀩𑀤𑁆𑀥𑀯𑀸𑀲𑁄 𑀳𑀼𑀢𑁆𑀯𑀸𑀢𑀺 𑀏𑀓𑀲𑁆𑀫𑀺𑀁𑀬𑁂𑀯 𑀯𑀺𑀳𑀸𑀭𑁂 𑀦𑀺𑀩𑀤𑁆𑀥𑀯𑀸𑀲𑁄 𑀅𑀳𑀼𑀢𑁆𑀯𑀸. 𑀥𑀼𑀯𑀧𑀭𑀺𑀪𑁄𑀕𑀸𑀦𑀻𑀢𑀺 𑀦𑀺𑀬𑀢𑀧𑀭𑀺𑀪𑁄𑀕𑀸𑀦𑀺. 𑀦𑀦𑀼 𑀪𑀕𑀯𑀸 𑀓𑀤𑀸𑀘𑀺 𑀘𑀸𑀭𑀺𑀓𑀫𑁆𑀧𑀺 𑀧𑀓𑁆𑀓𑀫𑀢𑀺, 𑀓𑀣𑀁 𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀥𑀼𑀯𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀻𑀢𑀺 𑀆𑀳 ‘‘𑀉𑀢𑀼𑀯𑀲𑁆𑀲𑀁 𑀘𑀸𑀭𑀺𑀓𑀁 𑀘𑀭𑀺𑀢𑁆𑀯𑀸𑀧𑀻’’𑀢𑀺𑀆𑀤𑀺. 𑀢𑀢𑁆𑀣 𑀉𑀢𑀼𑀯𑀲𑁆𑀲𑀦𑁆𑀢𑀺 𑀳𑁂𑀫𑀦𑁆𑀢𑀕𑀺𑀫𑁆𑀳𑁂 𑀲𑀦𑁆𑀥𑀸𑀬 𑀯𑀤𑀢𑀺. 𑀫𑀕𑁆𑀕𑀁 𑀞𑀧𑁂𑀢𑁆𑀯𑀸𑀢𑀺 𑀣𑁂𑀭𑀲𑁆𑀲 𑀆𑀕𑀫𑀦𑀫𑀕𑁆𑀕𑀁 𑀞𑀧𑁂𑀢𑁆𑀯𑀸. 𑀉𑀡𑁆𑀳𑀯𑀮𑀸𑀳𑀓𑀸𑀢𑀺 𑀉𑀡𑁆𑀳𑀉𑀢𑀼𑀦𑁄 𑀧𑀘𑁆𑀘𑀬𑀪𑀽𑀢𑀫𑁂𑀖𑀫𑀸𑀮𑀸𑀲𑀫𑀼𑀝𑁆𑀞𑀸𑀧𑀓𑀸 𑀤𑁂𑀯𑀧𑀼𑀢𑁆𑀢𑀸. 𑀢𑁂𑀲𑀁 𑀓𑀺𑀭 𑀢𑀣𑀸𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑀫𑀓𑀸𑀮𑀫𑁂𑀯 𑀬𑀣𑀺𑀘𑁆𑀙𑀺𑀢𑀁 𑀞𑀸𑀦𑀁 𑀉𑀡𑁆𑀳𑀁 𑀨𑀭𑀫𑀸𑀦𑀸, 𑀯𑀮𑀸𑀳𑀓𑀫𑀸𑀮𑀸 𑀦𑀸𑀢𑀺𑀩𑀳𑀮𑀸 𑀇𑀢𑁄 𑀘𑀺𑀢𑁄 𑀦𑀪𑀁 𑀙𑀸𑀤𑁂𑀦𑁆𑀢𑀻 𑀯𑀺𑀥𑀸𑀯𑀢𑀺. 𑀏𑀲 𑀦𑀬𑁄 𑀲𑀻𑀢𑀯𑀮𑀸𑀳𑀓𑀯𑀲𑁆𑀲𑀯𑀮𑀸𑀳𑀓𑀸𑀲𑀼. 𑀅𑀩𑁆𑀪𑀯𑀮𑀸𑀳𑀓𑀸 𑀧𑀦 𑀤𑁂𑀯𑀢𑀸 𑀲𑀻𑀢𑀼𑀡𑁆𑀳𑀯𑀲𑁆𑀲𑁂𑀳𑀺 𑀯𑀺𑀦𑀸 𑀓𑁂𑀯𑀮𑀁 𑀅𑀩𑁆𑀪𑀧𑀝𑀮𑀲𑁆𑀲𑁂𑀯 𑀲𑀫𑀼𑀝𑁆𑀞𑀸𑀧𑀓𑀸 𑀯𑁂𑀤𑀺𑀢𑀩𑁆𑀩𑀸. 𑀓𑁂𑀯𑀮𑀁 𑀯𑀸 𑀯𑀸𑀢𑀲𑁆𑀲𑁂𑀯, 𑀢𑁂𑀦𑁂𑀯 𑀤𑁂𑀯𑀢𑀸 𑀯𑀸𑀢𑀯𑀮𑀸𑀳𑀓𑀸.

𑀏𑀢𑁆𑀣 𑀘 𑀬𑀁 𑀯𑀲𑁆𑀲𑀸𑀦𑁂 𑀘 𑀲𑀺𑀲𑀺𑀭𑁂 𑀘 𑀅𑀩𑁆𑀪𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀉𑀢𑀼𑀲𑀫𑀼𑀝𑁆𑀞𑀸𑀦𑀁 𑀧𑀸𑀓𑀢𑀺𑀓𑀫𑁂𑀯. 𑀬𑀁 𑀧𑀦 𑀅𑀩𑁆𑀪𑀫𑁆𑀳𑀺𑀬𑁂𑀯 𑀅𑀢𑀺𑀅𑀩𑁆𑀪𑀁 𑀲𑀢𑁆𑀢𑀸𑀳𑀫𑁆𑀧𑀺 𑀘𑀦𑁆𑀤𑀲𑀽𑀭𑀺𑀬𑁂 𑀙𑀸𑀤𑁂𑀢𑁆𑀯𑀸 𑀏𑀓𑀦𑁆𑀥𑀓𑀸𑀭𑀁 𑀓𑀭𑁄𑀢𑀺, 𑀬𑀜𑁆𑀘 𑀘𑀺𑀢𑁆𑀢𑀯𑁂𑀲𑀸𑀔𑀫𑀸𑀲𑁂𑀲𑀼 𑀅𑀩𑁆𑀪𑀁, 𑀢𑀁 𑀤𑁂𑀯𑀢𑀸𑀦𑀼𑀪𑀸𑀯𑁂𑀦 𑀉𑀧𑁆𑀧𑀦𑁆𑀦𑀁 𑀅𑀩𑁆𑀪𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑁄 𑀘 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀉𑀢𑀼𑀫𑁆𑀳𑀺 𑀉𑀢𑁆𑀢𑀭𑀤𑀓𑁆𑀔𑀺𑀡𑀸𑀤𑀺𑀧𑀓𑀢𑀺𑀯𑀸𑀢𑁄 𑀳𑁄𑀢𑀺, 𑀅𑀬𑀁 𑀉𑀢𑀼𑀲𑀫𑀼𑀝𑁆𑀞𑀸𑀦𑁄. 𑀯𑀸𑀢𑁂𑀧𑀺 𑀯𑀦𑀭𑀼𑀓𑁆𑀔𑀓𑁆𑀔𑀦𑁆𑀥𑀸𑀤𑀺𑀧𑁆𑀧𑀤𑀸𑀮𑀦𑁄 𑀅𑀢𑀺𑀯𑀸𑀢𑁄 𑀦𑀸𑀫 𑀅𑀢𑁆𑀣𑀺. 𑀅𑀬𑀜𑁆𑀘𑁂𑀯, 𑀬𑁄 𑀘 𑀅𑀜𑁆𑀜𑁄𑀧𑀺 𑀅𑀓𑀸𑀮𑀯𑀸𑀢𑁄, 𑀅𑀬𑀜𑁆𑀘 𑀤𑁂𑀯𑀢𑀸𑀦𑀼𑀪𑀸𑀯𑁂𑀦 𑀦𑀺𑀩𑁆𑀩𑀢𑁆𑀢𑁄. 𑀬𑀁 𑀕𑀺𑀫𑁆𑀳𑀸𑀦𑁂 𑀉𑀡𑁆𑀳𑀁, 𑀢𑀁 𑀉𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀁 𑀧𑀸𑀓𑀢𑀺𑀫𑁂𑀯. 𑀬𑀁 𑀧𑀦 𑀉𑀡𑁆𑀳𑁂𑀧𑀺 𑀅𑀢𑀺𑀉𑀡𑁆𑀳𑀁 𑀲𑀻𑀢𑀓𑀸𑀮𑁂 𑀘 𑀉𑀧𑁆𑀧𑀦𑁆𑀦𑀁 𑀉𑀡𑁆𑀳𑀁, 𑀢𑀁 𑀤𑁂𑀯𑀢𑀸𑀦𑀼𑀪𑀸𑀯𑁂𑀦 𑀦𑀺𑀩𑁆𑀩𑀢𑁆𑀢𑀁. 𑀬𑀁 𑀯𑀲𑁆𑀲𑀸𑀦𑁂 𑀘 𑀳𑁂𑀫𑀦𑁆𑀢𑁂 𑀘 𑀲𑀻𑀢𑀁 𑀳𑁄𑀢𑀺, 𑀢𑀁 𑀉𑀢𑀼𑀲𑀫𑀼𑀝𑁆𑀞𑀸𑀦𑀫𑁂𑀯. 𑀬𑀁 𑀧𑀦 𑀲𑀻𑀢𑁂𑀧𑀺 𑀅𑀢𑀺𑀲𑀻𑀢𑀁, 𑀕𑀺𑀫𑁆𑀳𑁂 𑀘 𑀉𑀧𑁆𑀧𑀦𑁆𑀦𑀁 𑀲𑀻𑀢𑀁, 𑀢𑀁 𑀤𑁂𑀯𑀢𑀸𑀦𑀼𑀪𑀸𑀯𑁂𑀦 𑀦𑀺𑀩𑁆𑀩𑀢𑁆𑀢𑀁. 𑀬𑀁 𑀯𑀲𑁆𑀲𑀺𑀓𑁂 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀯𑀲𑁆𑀲𑀁, 𑀢𑀁 𑀉𑀢𑀼𑀲𑀫𑀼𑀝𑁆𑀞𑀸𑀦𑀫𑁂𑀯, 𑀬𑀁 𑀧𑀦 𑀯𑀲𑁆𑀲𑁂𑀬𑁂𑀯 𑀅𑀢𑀺𑀯𑀲𑁆𑀲𑀁, 𑀬𑀜𑁆𑀘 𑀘𑀺𑀢𑁆𑀢𑀯𑁂𑀲𑀸𑀔𑀫𑀸𑀲𑁂𑀲𑀼 𑀯𑀲𑁆𑀲𑀁, 𑀢𑀁 𑀤𑁂𑀯𑀢𑀸𑀦𑀼𑀪𑀸𑀯𑁂𑀦 𑀦𑀺𑀩𑁆𑀩𑀢𑁆𑀢𑀁.

𑀢𑀢𑁆𑀭𑀺𑀤𑀁 𑀯𑀢𑁆𑀣𑀼 𑁋 𑀏𑀓𑁄 𑀓𑀺𑀭 𑀯𑀲𑁆𑀲𑀯𑀮𑀸𑀳𑀓𑀤𑁂𑀯𑀧𑀼𑀢𑁆𑀢𑁄 𑀢𑀕𑀭𑀓𑀽𑀝𑀯𑀸𑀲𑀺𑀔𑀻𑀡𑀸𑀲𑀯𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀣𑁂𑀭𑁄 𑁋 ‘‘𑀓𑁄𑀲𑀺 𑀢𑁆𑀯’’𑀦𑁆𑀢𑀺 𑀧𑀼𑀘𑁆𑀙𑀺. 𑀅𑀳𑀁, 𑀪𑀦𑁆𑀢𑁂, 𑀯𑀲𑁆𑀲𑀯𑀮𑀸𑀳𑀓𑁄 𑀤𑁂𑀯𑀧𑀼𑀢𑁆𑀢𑁄𑀢𑀺. 𑀢𑀼𑀫𑁆𑀳𑀸𑀓𑀁 𑀓𑀺𑀭 𑀘𑀺𑀢𑁆𑀢𑁂𑀦 𑀤𑁂𑀯𑁄 𑀯𑀲𑁆𑀲𑀢𑀻𑀢𑀺? 𑀆𑀫, 𑀪𑀦𑁆𑀢𑁂𑀢𑀺. 𑀧𑀲𑁆𑀲𑀺𑀢𑀼𑀓𑀸𑀫𑀸 𑀫𑀬𑀦𑁆𑀢𑀺. 𑀢𑁂𑀫𑀺𑀲𑁆𑀲𑀣, 𑀪𑀦𑁆𑀢𑁂𑀢𑀺. 𑀫𑁂𑀖𑀲𑀻𑀲𑀁 𑀯𑀸 𑀕𑀚𑁆𑀚𑀺𑀢𑀁 𑀯𑀸 𑀦 𑀧𑀜𑁆𑀜𑀸𑀬𑀢𑀺, 𑀓𑀣𑀁 𑀢𑁂𑀫𑀺𑀲𑁆𑀲𑀸𑀫𑀸𑀢𑀺? 𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀘𑀺𑀢𑁆𑀢𑁂𑀦 𑀤𑁂𑀯𑁄 𑀯𑀲𑁆𑀲𑀢𑀺, 𑀢𑀼𑀫𑁆𑀳𑁂 𑀧𑀡𑁆𑀡𑀲𑀸𑀮𑀁 𑀧𑀯𑀺𑀲𑀣𑀸𑀢𑀺. 𑀲𑀸𑀥𑀼 𑀤𑁂𑀯𑀧𑀼𑀢𑁆𑀢𑀸𑀢𑀺 𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀧𑀡𑁆𑀡𑀲𑀸𑀮𑀁 𑀧𑀸𑀯𑀺𑀲𑀺. 𑀤𑁂𑀯𑀧𑀼𑀢𑁆𑀢𑁄 𑀢𑀲𑁆𑀫𑀺𑀁 𑀧𑀯𑀺𑀲𑀦𑁆𑀢𑁂𑀬𑁂𑀯 𑀏𑀓𑀁 𑀕𑀻𑀢𑀁 𑀕𑀸𑀬𑀺𑀢𑁆𑀯𑀸 𑀳𑀢𑁆𑀣𑀁 𑀉𑀓𑁆𑀔𑀺𑀧𑀺, 𑀲𑀫𑀦𑁆𑀢𑀸 𑀢𑀺𑀬𑁄𑀚𑀦𑀝𑁆𑀞𑀸𑀦𑀁 𑀏𑀓𑀫𑁂𑀖𑀁 𑀅𑀳𑁄𑀲𑀺. 𑀣𑁂𑀭𑁄 𑀅𑀟𑁆𑀠𑀢𑀺𑀦𑁆𑀢𑁄 𑀧𑀡𑁆𑀡𑀲𑀸𑀮𑀁 𑀧𑀯𑀺𑀝𑁆𑀞𑁄𑀢𑀺.

𑀓𑀸𑀫𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸𑀧𑀺 𑀤𑁂𑀯𑀢𑀸 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀯, 𑀢𑀸 𑀧𑀦 𑀢𑁂𑀦 𑀢𑁂𑀦 𑀯𑀺𑀲𑁂𑀲𑁂𑀦 𑀯𑀢𑁆𑀯𑀸 𑀇𑀤𑀸𑀦𑀺 𑀢𑀤𑀜𑁆𑀜𑁂 𑀧𑀞𑀫𑀪𑀽𑀫𑀺𑀓𑁂 𑀓𑀸𑀫𑀸𑀯𑀘𑀭𑀤𑁂𑀯𑁂 𑀲𑀸𑀫𑀜𑁆𑀜𑀢𑁄 𑀕𑀡𑁆𑀳𑀦𑁆𑀢𑁄 ‘‘𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸’’𑀢𑀺 𑀆𑀳. 𑀥𑀢𑀭𑀝𑁆𑀞𑀯𑀺𑀭𑀽𑀴𑁆𑀳𑀓𑀯𑀺𑀭𑀽𑀧𑀓𑁆𑀔𑀓𑀼𑀯𑁂𑀭𑀲𑀗𑁆𑀔𑀸𑀢𑀸 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀏𑀢𑁂𑀲𑀦𑁆𑀢𑀺 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸, 𑀢𑁂 𑀲𑀺𑀦𑁂𑀭𑀼𑀲𑁆𑀲 𑀧𑀩𑁆𑀩𑀢𑀲𑁆𑀲 𑀯𑁂𑀫𑀚𑁆𑀛𑁂 𑀳𑁄𑀦𑁆𑀢𑀺. 𑀢𑁂𑀲𑀼 𑀧𑀩𑁆𑀩𑀢𑀝𑁆𑀞𑀓𑀸𑀧𑀺 𑀅𑀢𑁆𑀣𑀺 𑀆𑀓𑀸𑀲𑀝𑁆𑀞𑀓𑀸𑀧𑀺. 𑀢𑁂𑀲𑀁 𑀧𑀭𑀫𑁆𑀧𑀭𑀸 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀁 𑀧𑀢𑁆𑀢𑀸. 𑀔𑀺𑀟𑁆𑀟𑀸𑀧𑀤𑁄𑀲𑀺𑀓𑀸 𑀫𑀦𑁄𑀧𑀤𑁄𑀲𑀺𑀓𑀸 𑀘𑀦𑁆𑀤𑀺𑀫𑀸 𑀤𑁂𑀯𑀧𑀼𑀢𑁆𑀢𑁄 𑀲𑀽𑀭𑀺𑀬𑁄 𑀤𑁂𑀯𑀧𑀼𑀢𑁆𑀢𑁄𑀢𑀺 𑀏𑀢𑁂 𑀲𑀩𑁆𑀩𑁂𑀧𑀺 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀤𑁂𑀯𑀮𑁄𑀓𑀝𑁆𑀞𑀸 𑀏𑀯.

𑀢𑀸𑀯𑀢𑀺𑀁𑀲𑀸𑀢𑀺 𑀢𑀸𑀯𑀢𑀺𑀁𑀲𑀸𑀦𑀁 𑀤𑁂𑀯𑀸𑀦𑀁 𑀦𑀸𑀫𑀁, 𑀢𑁂𑀧𑀺 𑀅𑀢𑁆𑀣𑀺 𑀧𑀩𑁆𑀩𑀢𑀝𑁆𑀞𑀓𑀸, 𑀅𑀢𑁆𑀣𑀺 𑀆𑀓𑀸𑀲𑀝𑁆𑀞𑀓𑀸, 𑀢𑁂𑀲𑀁 𑀧𑀭𑀫𑁆𑀧𑀭𑀸 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀁 𑀧𑀢𑁆𑀢𑀸. 𑀢𑀣𑀸 𑀬𑀸𑀫𑀸𑀤𑀻𑀦𑀁. 𑀏𑀓𑀤𑁂𑀯𑀮𑁄𑀓𑁂𑀧𑀺 𑀳𑀺 𑀤𑁂𑀯𑀸𑀦𑀁 𑀧𑀭𑀫𑁆𑀧𑀭𑀸 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀁 𑀅𑀧𑁆𑀧𑀢𑁆𑀢𑀸 𑀦𑀸𑀫 𑀦𑀢𑁆𑀣𑀺. 𑀢𑀢𑁆𑀣 𑀫𑀖𑁂𑀦 𑀫𑀸𑀡𑀯𑁂𑀦 𑀲𑀤𑁆𑀥𑀺𑀁 𑀫𑀘𑀮𑀕𑀸𑀫𑁂 𑀓𑀸𑀮𑀁 𑀓𑀢𑁆𑀯𑀸 𑀢𑁂𑀢𑁆𑀢𑀺𑀁𑀲 𑀲𑀳𑀧𑀼𑀜𑁆𑀜𑀓𑀸𑀭𑀺𑀦𑁄 𑀏𑀢𑁆𑀣 𑀦𑀺𑀩𑁆𑀩𑀢𑁆𑀢𑀸𑀢𑀺 𑀢𑀁 𑀲𑀳𑀘𑀸𑀭𑀺𑀢𑀁 𑀞𑀸𑀦𑀁 𑀢𑁂𑀢𑁆𑀢𑀺𑀁𑀲𑀁, 𑀢𑀤𑁂𑀯 𑀢𑀸𑀯𑀢𑀺𑀁𑀲𑀁, 𑀢𑀁 𑀦𑀺𑀯𑀸𑀲𑁄 𑀏𑀢𑁂𑀲𑀦𑁆𑀢𑀺 𑀢𑀸𑀯𑀢𑀺𑀁𑀲𑀸𑀢𑀺 𑀯𑀤𑀦𑁆𑀢𑀺. 𑀬𑀲𑁆𑀫𑀸 𑀧𑀦 𑀲𑁂𑀲𑀘𑀓𑁆𑀓𑀯𑀸𑀴𑁂𑀲𑀼𑀧𑀺 𑀙𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑀸 𑀅𑀢𑁆𑀣𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀲𑀳𑀲𑁆𑀲𑀁 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 𑀲𑀳𑀲𑁆𑀲𑀁 𑀢𑀸𑀯𑀢𑀺𑀁𑀲𑀸𑀦’’𑀦𑁆𑀢𑀺 (𑀅. 𑀦𑀺. 𑁩.𑁮𑁧). 𑀢𑀲𑁆𑀫𑀸 𑀦𑀸𑀫𑀧𑀡𑁆𑀡𑀢𑁆𑀢𑀺𑀬𑁂𑀯𑁂𑀲𑀸 𑀢𑀲𑁆𑀲 𑀤𑁂𑀯𑀮𑁄𑀓𑀲𑁆𑀲𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀤𑀼𑀓𑁆𑀔𑀢𑁄 𑀬𑀸𑀢𑀸 𑀅𑀧𑀬𑀸𑀢𑀸𑀢𑀺 𑀬𑀸𑀫𑀸. 𑀅𑀢𑁆𑀢𑀦𑁄 𑀲𑀺𑀭𑀺𑀲𑀫𑁆𑀧𑀢𑁆𑀢𑀺𑀬𑀸 𑀢𑀼𑀲𑀁 𑀇𑀢𑀸 𑀕𑀢𑀸𑀢𑀺 𑀢𑀼𑀲𑀺𑀢𑀸. 𑀦𑀺𑀫𑁆𑀫𑀸𑀦𑁂 𑀭𑀢𑀺 𑀏𑀢𑁂𑀲𑀦𑁆𑀢𑀺 𑀦𑀺𑀫𑁆𑀫𑀸𑀦𑀭𑀢𑀺𑀦𑁄. 𑀯𑀲𑀯𑀢𑁆𑀢𑀻 𑀤𑁂𑀯𑀢𑀸𑀢𑀺 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀺𑀦𑁄 𑀤𑁂𑀯𑀸. 𑀧𑀭𑀦𑀺𑀫𑁆𑀫𑀺𑀢𑁂𑀲𑀼 𑀪𑁄𑀕𑁂𑀲𑀼 𑀯𑀲𑀁 𑀯𑀢𑁆𑀢𑁂𑀦𑁆𑀢𑀻𑀢𑀺 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀺𑀦𑁄.

𑀩𑁆𑀭𑀽𑀳𑀺𑀢𑁄 𑀧𑀭𑀺𑀯𑀼𑀤𑁆𑀥𑁄 𑀢𑁂𑀳𑀺 𑀢𑁂𑀳𑀺 𑀛𑀸𑀦𑀸𑀤𑀻𑀳𑀺 𑀯𑀺𑀲𑀺𑀝𑁆𑀞𑁂𑀳𑀺 𑀕𑀼𑀡𑁂𑀳𑀻𑀢𑀺 𑀩𑁆𑀭𑀳𑁆𑀫𑀸. 𑀯𑀡𑁆𑀡𑀯𑀦𑁆𑀢𑀢𑀸𑀬 𑀘𑁂𑀯 𑀤𑀻𑀖𑀸𑀬𑀼𑀓𑀢𑀸𑀬 𑀘 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸𑀤𑀻𑀳𑀺 𑀫𑀳𑀦𑁆𑀢𑁄 𑀩𑁆𑀭𑀳𑁆𑀫𑀸𑀢𑀺 𑀫𑀳𑀸𑀩𑁆𑀭𑀳𑁆𑀫𑀸. 𑀢𑀲𑁆𑀲 𑀧𑀭𑀺𑀲𑀸𑀬𑀁 𑀪𑀯𑀸 𑀧𑀭𑀺𑀘𑀸𑀭𑀺𑀓𑀸𑀢𑀺 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸. 𑀢𑀲𑁆𑀲𑁂𑀯 𑀧𑀼𑀭𑁄𑀳𑀺𑀢𑀝𑁆𑀞𑀸𑀦𑁂 𑀞𑀺𑀢𑀸𑀢𑀺 𑀩𑁆𑀭𑀳𑁆𑀫𑀧𑀼𑀭𑁄𑀳𑀺𑀢𑀸. 𑀆𑀪𑀲𑁆𑀲𑀭𑁂𑀳𑀺 𑀧𑀭𑀺𑀢𑁆𑀢𑀸 𑀆𑀪𑀸 𑀏𑀢𑁂𑀲𑀦𑁆𑀢𑀺 𑀧𑀭𑀺𑀢𑁆𑀢𑀸𑀪𑀸. 𑀅𑀧𑁆𑀧𑀫𑀸𑀡𑀸 𑀆𑀪𑀸 𑀏𑀢𑁂𑀲𑀦𑁆𑀢𑀺 𑀅𑀧𑁆𑀧𑀫𑀸𑀡𑀸𑀪𑀸. 𑀤𑀻𑀧𑀺𑀓𑀸𑀬 𑀅𑀘𑁆𑀘𑀺 𑀯𑀺𑀬 𑀏𑀢𑁂𑀲𑀁 𑀲𑀭𑀻𑀭𑀢𑁄 𑀆𑀪𑀸 𑀙𑀺𑀚𑁆𑀚𑀺𑀢𑁆𑀯𑀸 𑀙𑀺𑀚𑁆𑀚𑀺𑀢𑁆𑀯𑀸 𑀧𑀢𑀦𑁆𑀢𑀻 𑀯𑀺𑀬 𑀲𑀭𑀢𑀺 𑀯𑀺𑀲𑁆𑀲𑀭𑀢𑀻𑀢𑀺 𑀆𑀪𑀲𑁆𑀲𑀭𑀸, 𑀬𑀣𑀸𑀯𑀼𑀢𑁆𑀢𑀧𑁆𑀧𑀪𑀸𑀬 𑀆𑀪𑀸𑀲𑀦𑀲𑀻𑀮𑀸 𑀯𑀸 𑀆𑀪𑀲𑁆𑀲𑀭𑀸. 𑀲𑀼𑀪𑀸𑀢𑀺 𑀲𑁄𑀪𑀦𑀸 𑀧𑀪𑀸. 𑀲𑀼𑀪𑀸𑀢𑀺 𑀳𑀺 𑀏𑀓𑀕𑁆𑀖𑀦𑀸 𑀦𑀺𑀘𑁆𑀘𑀮𑀸 𑀲𑀭𑀻𑀭𑀸𑀪𑀸 𑀯𑀼𑀘𑁆𑀘𑀢𑀺, 𑀲𑀸 𑀧𑀭𑀺𑀢𑁆𑀢𑀸 𑀲𑀼𑀪𑀸 𑀏𑀢𑁂𑀲𑀦𑁆𑀢𑀺 𑀧𑀭𑀺𑀢𑁆𑀢𑀲𑀼𑀪𑀸. 𑀅𑀧𑁆𑀧𑀫𑀸𑀡𑀸 𑀲𑀼𑀪𑀸 𑀏𑀢𑁂𑀲𑀦𑁆𑀢𑀺 𑀅𑀧𑁆𑀧𑀫𑀸𑀡𑀲𑀼𑀪𑀸. 𑀲𑀼𑀪𑁂𑀦 𑀑𑀓𑀺𑀡𑁆𑀡𑀸 𑀯𑀺𑀓𑀺𑀡𑁆𑀡𑀸, 𑀲𑀼𑀪𑁂𑀦 𑀲𑀭𑀻𑀭𑀧𑁆𑀧𑀪𑀸𑀯𑀡𑁆𑀡𑁂𑀦 𑀏𑀓𑀕𑁆𑀖𑀦𑀸 𑀲𑀼𑀯𑀡𑁆𑀡𑀫𑀜𑁆𑀚𑀽𑀲𑀸𑀬 𑀞𑀧𑀺𑀢𑀲𑀫𑁆𑀧𑀚𑁆𑀚𑀮𑀺𑀢𑀓𑀜𑁆𑀘𑀦𑀧𑀺𑀡𑁆𑀟𑀲𑀲𑁆𑀲𑀺𑀭𑀺𑀓𑀸𑀢𑀺 𑀲𑀼𑀪𑀓𑀺𑀡𑁆𑀡𑀸. 𑀢𑀢𑁆𑀣 𑀲𑁄𑀪𑀦𑀸𑀬 𑀧𑀪𑀸𑀬 𑀓𑀺𑀡𑁆𑀡𑀸 𑀲𑀼𑀪𑀸𑀓𑀺𑀡𑁆𑀡𑀸𑀢𑀺 𑀯𑀢𑁆𑀢𑀩𑁆𑀩𑁂 𑀪𑀸-𑀲𑀤𑁆𑀤𑀲𑁆𑀲 𑀭𑀲𑁆𑀲𑀢𑁆𑀢𑀁 𑀅𑀦𑁆𑀢𑀺𑀫 𑀡-𑀓𑀸𑀭𑀲𑁆𑀲 𑀳-𑀓𑀸𑀭𑀜𑁆𑀘 𑀓𑀢𑁆𑀯𑀸 ‘‘𑀲𑀼𑀪𑀓𑀺𑀡𑁆𑀳𑀸’’𑀢𑀺 𑀯𑀼𑀢𑁆𑀢𑀁. 𑀯𑀺𑀧𑀼𑀮𑀨𑀮𑀸 𑀯𑁂𑀳𑀧𑁆𑀨𑀮𑀸. 𑀯𑀺𑀧𑀼𑀮𑀨𑀮𑀸𑀢𑀺 𑀘 𑀯𑀺𑀧𑀼𑀮𑀲𑀦𑁆𑀢𑀲𑀼𑀔𑀯𑀡𑁆𑀡𑀸𑀤𑀺𑀨𑀮𑀸. 𑀅𑀧𑁆𑀧𑀓𑁂𑀦 𑀓𑀸𑀮𑁂𑀦 𑀅𑀢𑁆𑀢𑀦𑁄 𑀞𑀸𑀦𑀁 𑀦 𑀯𑀺𑀚𑀳𑀦𑁆𑀢𑀻𑀢𑀺 𑀅𑀯𑀺𑀳𑀸. 𑀓𑁂𑀦𑀘𑀺 𑀦 𑀢𑀧𑀦𑀻𑀬𑀸𑀢𑀺 𑀅𑀢𑀧𑁆𑀧𑀸. 𑀅𑀓𑀺𑀘𑁆𑀙𑁂𑀦 𑀲𑀼𑀔𑁂𑀦 𑀧𑀲𑁆𑀲𑀺𑀢𑀩𑁆𑀩𑀸 𑀫𑀦𑀼𑀜𑁆𑀜𑀭𑀽𑀧𑀢𑀸𑀬𑀸𑀢𑀺 𑀲𑀼𑀤𑀲𑁆𑀲𑀸. 𑀲𑀼𑀧𑀭𑀺𑀲𑀼𑀤𑁆𑀥𑀤𑀲𑁆𑀲𑀦𑀢𑀸𑀬 𑀲𑀫𑁆𑀫𑀸 𑀧𑀲𑁆𑀲𑀦𑁆𑀢𑀺 𑀲𑀻𑀮𑁂𑀦𑀸𑀢𑀺 𑀲𑀼𑀤𑀲𑁆𑀲𑀻. 𑀉𑀓𑁆𑀓𑀝𑁆𑀞𑀲𑀫𑁆𑀧𑀢𑁆𑀢𑀻𑀳𑀺 𑀬𑁄𑀕𑀢𑁄 𑀦𑀢𑁆𑀣𑀺 𑀏𑀢𑁂𑀲𑀁 𑀓𑀦𑀺𑀝𑁆𑀞𑀸 𑀲𑀫𑁆𑀧𑀢𑁆𑀢𑀻𑀢𑀺 𑀅𑀓𑀦𑀺𑀝𑁆𑀞𑀸.

𑀓𑀸𑀬𑀲𑀓𑁆𑀔𑀻𑀳𑀻𑀢𑀺 𑀦𑀸𑀫𑀓𑀸𑀬𑁂𑀦 𑀤𑁂𑀲𑀦𑀸𑀬 𑀲𑀫𑁆𑀧𑀝𑀺𑀘𑁆𑀙𑀦𑀯𑀲𑁂𑀦 𑀲𑀓𑁆𑀔𑀺𑀪𑀽𑀢𑁂𑀳𑀺. 𑀳𑀮𑀸𑀳𑀮𑀦𑁆𑀢𑀺 𑀓𑁄𑀮𑀸𑀳𑀮𑀁. 𑀫𑀳𑀕𑁆𑀕𑀢𑀘𑀺𑀢𑁆𑀢𑁂𑀦𑀸𑀢𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀧𑀸𑀤𑀓𑁂𑀦 𑀅𑀪𑀺𑀜𑁆𑀜𑀸𑀘𑀺𑀢𑁆𑀢𑁂𑀦.

𑀦𑀦𑀼 𑀘 ‘‘𑀅𑀚𑁆𑀛𑀢𑁆𑀢𑀦𑁆𑀢𑀺 𑀓𑀸𑀫𑀪𑀯𑁄, 𑀩𑀳𑀺𑀤𑁆𑀥𑀸𑀢𑀺 𑀭𑀽𑀧𑀸𑀭𑀽𑀧𑀪𑀯𑁄’’𑀢𑀺 𑀘 𑀅𑀬𑀼𑀢𑁆𑀢𑀫𑁂𑀢𑀁? 𑀬𑀲𑁆𑀫𑀺𑀜𑁆𑀳𑀺 𑀪𑀯𑁂 𑀲𑀢𑁆𑀢𑀸 𑀩𑀳𑀼𑀢𑀭𑀁 𑀓𑀸𑀮𑀁 𑀯𑀲𑀦𑁆𑀢𑀺, 𑀲𑁄 𑀦𑁂𑀲𑀁 𑀅𑀚𑁆𑀛𑀢𑁆𑀢𑀁. 𑀬𑀲𑁆𑀫𑀺𑀜𑁆𑀘 𑀅𑀧𑁆𑀧𑀢𑀭𑀁 𑀓𑀸𑀮𑀁 𑀯𑀲𑀦𑁆𑀢𑀺, 𑀲𑁄 𑀦𑁂𑀲𑀁 𑀩𑀳𑀺𑀤𑁆𑀥𑀸𑀢𑀺 𑀯𑀢𑁆𑀢𑀼𑀁 𑀬𑀼𑀢𑁆𑀢𑀁. 𑀭𑀽𑀧𑀸𑀭𑀽𑀧𑀪𑀯𑁂 𑀘 𑀲𑀢𑁆𑀢𑀸 𑀘𑀺𑀭𑀢𑀭𑀁 𑀯𑀲𑀦𑁆𑀢𑀺, 𑀅𑀧𑁆𑀧𑀢𑀭𑀁 𑀓𑀸𑀫𑀪𑀯𑁂, 𑀢𑀲𑁆𑀫𑀸 ‘‘𑀅𑀚𑁆𑀛𑀢𑁆𑀢𑀦𑁆𑀢𑀺 𑀓𑀸𑀫𑀪𑀯𑁄, 𑀩𑀳𑀺𑀤𑁆𑀥𑀸𑀢𑀺 𑀭𑀽𑀧𑀸𑀭𑀽𑀧𑀪𑀯𑁄’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀓𑀺𑀜𑁆𑀘𑀸𑀧𑀻’’𑀢𑀺𑀆𑀤𑀺. 𑀘𑀢𑀼𑀢𑁆𑀣𑀫𑁂𑀯 𑀓𑁄𑀝𑁆𑀞𑀸𑀲𑀦𑁆𑀢𑀺 𑀯𑀺𑀯𑀝𑁆𑀝𑀝𑁆𑀞𑀸𑀬𑀺𑀲𑀗𑁆𑀔𑀸𑀢𑀁 𑀘𑀢𑀼𑀢𑁆𑀣𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑀁. 𑀇𑀢𑀭𑁂𑀲𑀽𑀢𑀺 𑀲𑀁𑀯𑀝𑁆𑀝𑀲𑀁𑀯𑀝𑁆𑀝𑀝𑁆𑀞𑀸𑀬𑀺𑀯𑀺𑀯𑀝𑁆𑀝𑀲𑀗𑁆𑀔𑀸𑀢𑁂𑀲𑀼 𑀢𑀻𑀲𑀼 𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑁂𑀲𑀼. 𑀆𑀮𑀬𑁄𑀢𑀺 𑀲𑀗𑁆𑀕𑁄. 𑀧𑀢𑁆𑀣𑀦𑀸𑀢𑀺 ‘‘𑀓𑀣𑀁 𑀦𑀸𑀫 𑀢𑀢𑁆𑀭𑀽𑀧𑀧𑀦𑁆𑀦𑀸 𑀪𑀯𑀺𑀲𑁆𑀲𑀸𑀫𑀸’’𑀢𑀺 𑀅𑀪𑀺𑀧𑀢𑁆𑀣𑀦𑀸. 𑀅𑀪𑀺𑀮𑀸𑀲𑁄𑀢𑀺 𑀢𑀢𑁆𑀭𑀽𑀧𑀧𑀚𑁆𑀚𑀺𑀢𑀼𑀓𑀸𑀫𑀢𑀸. 𑀢𑀲𑁆𑀫𑀸𑀢𑀺𑀆𑀤𑀺𑀦𑀸 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀦𑀺𑀕𑀫𑁂𑀢𑀺.

𑀏𑀢𑁆𑀣𑀸𑀬𑀁 𑀅𑀥𑀺𑀧𑁆𑀧𑀸𑀬𑁄 𑁋 𑀓𑀲𑁆𑀲𑀘𑀺𑀧𑀺 𑀓𑀺𑀮𑁂𑀲𑀲𑁆𑀲 𑀅𑀯𑀺𑀓𑁆𑀔𑀫𑁆𑀪𑀺𑀢𑀢𑁆𑀢𑀸 𑀓𑁂𑀦𑀘𑀺𑀧𑀺 𑀧𑀓𑀸𑀭𑁂𑀦 𑀯𑀺𑀓𑁆𑀔𑀫𑁆𑀪𑀦𑀫𑀢𑁆𑀢𑁂𑀦𑀧𑀺 𑀅𑀯𑀺𑀫𑀼𑀢𑁆𑀢𑁄 𑀓𑀸𑀫𑀪𑀯𑁄 𑀅𑀚𑁆𑀛𑀢𑁆𑀢𑀕𑁆𑀕𑀳𑀡𑀲𑁆𑀲 𑀅𑀢𑁆𑀢𑀸𑀦𑀁 𑀅𑀥𑀺𑀓𑀺𑀘𑁆𑀘 𑀉𑀤𑁆𑀤𑀺𑀲𑁆𑀲 𑀧𑀯𑀢𑁆𑀢𑀕𑁆𑀕𑀸𑀳𑀲𑁆𑀲 𑀯𑀺𑀲𑁂𑀲𑀧𑀘𑁆𑀘𑀬𑁄𑀢𑀺 𑀅𑀚𑁆𑀛𑀢𑁆𑀢𑀁 𑀦𑀸𑀫. 𑀢𑀢𑁆𑀣 𑀩𑀦𑁆𑀥𑀦𑀁 𑀅𑀚𑁆𑀛𑀢𑁆𑀢𑀲𑀁𑀬𑁄𑀚𑀦𑀁, 𑀢𑁂𑀦 𑀲𑀁𑀬𑀼𑀢𑁆𑀢𑁄 𑀅𑀚𑁆𑀛𑀢𑁆𑀢𑀲𑀁𑀬𑁄𑀚𑀦𑁄. 𑀢𑀩𑁆𑀩𑀺𑀧𑀭𑀺𑀬𑀸𑀬𑀢𑁄 𑀩𑀳𑀺𑀤𑁆𑀥𑀸𑀲𑀁𑀬𑁄𑀚𑀦𑁄𑀢𑀺.

𑀙𑀦𑁆𑀤𑀭𑀸𑀕𑀯𑀲𑁂𑀦𑁂𑀯 𑀅𑀚𑁆𑀛𑀢𑁆𑀢𑀲𑀁𑀬𑁄𑀚𑀦𑀁 𑀩𑀳𑀺𑀤𑁆𑀥𑀸𑀲𑀁𑀬𑁄𑀚𑀦𑀜𑁆𑀘 𑀧𑀼𑀕𑁆𑀕𑀮𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀑𑀭𑀫𑁆𑀪𑀸𑀕𑀺𑀬𑀉𑀤𑁆𑀥𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀯𑀲𑁂𑀦𑀧𑀺 𑀤𑀲𑁆𑀲𑁂𑀢𑀼𑀁 ‘‘𑀑𑀭𑀫𑁆𑀪𑀸𑀕𑀺𑀬𑀸𑀦𑀺 𑀯𑀸’’𑀢𑀺𑀆𑀤𑀺𑀫𑀸𑀳. 𑀑𑀭𑀁 𑀯𑀼𑀘𑁆𑀘𑀢𑀺 𑀓𑀸𑀫𑀥𑀸𑀢𑀼, 𑀧𑀝𑀺𑀲𑀦𑁆𑀥𑀺𑀬𑀸 𑀧𑀘𑁆𑀘𑀬𑀪𑀸𑀯𑁂𑀦 𑀢𑀁 𑀑𑀭𑀁 𑀪𑀚𑀦𑁆𑀢𑀻𑀢𑀺 𑀑𑀭𑀫𑁆𑀪𑀸𑀕𑀺𑀬𑀸𑀦𑀺. 𑀢𑀢𑁆𑀣 𑀘 𑀓𑀫𑁆𑀫𑀼𑀦𑀸 𑀯𑀺𑀧𑀸𑀓𑀁 𑀲𑀢𑁆𑀢𑁂𑀦 𑀘 𑀤𑀼𑀓𑁆𑀔𑀁 𑀲𑀁𑀬𑁄𑀚𑁂𑀦𑁆𑀢𑀻𑀢𑀺 𑀲𑀁𑀬𑁄𑀚𑀦𑀸𑀦𑀺, 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀓𑀸𑀫𑀭𑀸𑀕𑀧𑀝𑀺𑀖𑀸. 𑀉𑀤𑁆𑀥𑀁 𑀯𑀼𑀘𑁆𑀘𑀢𑀺 𑀭𑀽𑀧𑀸𑀭𑀽𑀧𑀥𑀸𑀢𑀼, 𑀯𑀼𑀢𑁆𑀢𑀦𑀬𑁂𑀦𑁂𑀢𑀁 𑀉𑀤𑁆𑀥𑀁 𑀪𑀚𑀦𑁆𑀢𑀻𑀢𑀺 𑀉𑀤𑁆𑀥𑀫𑁆𑀪𑀸𑀕𑀺𑀬𑀸𑀦𑀺, 𑀲𑀁𑀬𑁄𑀚𑀦𑀸𑀦𑀺. 𑀭𑀽𑀧𑀭𑀸𑀕𑀸𑀭𑀽𑀧𑀭𑀸𑀕𑀫𑀸𑀦𑀼𑀤𑁆𑀥𑀘𑁆𑀘𑀸𑀯𑀺𑀚𑁆𑀚𑀸. 𑀅𑀣 𑀯𑀸 𑀑𑀭𑀫𑁆𑀪𑀸𑀕𑁄 𑀯𑀼𑀘𑁆𑀘𑀢𑀺 𑀓𑀸𑀫𑀥𑀸𑀢𑀼 𑀭𑀽𑀧𑀸𑀭𑀽𑀧𑀪𑀯𑀢𑁄 𑀳𑁂𑀝𑁆𑀞𑀸𑀪𑀽𑀢𑀢𑁆𑀢𑀸, 𑀢𑀢𑁆𑀭𑀽𑀧𑀧𑀢𑁆𑀢𑀺𑀬𑀸 𑀧𑀘𑁆𑀘𑀬𑀪𑀸𑀯𑀢𑁄 𑀑𑀭𑀫𑁆𑀪𑀸𑀕𑀲𑁆𑀲 𑀳𑀺𑀢𑀸𑀦𑀻𑀢𑀺 𑀑𑀭𑀫𑁆𑀪𑀸𑀕𑀺𑀬𑀸𑀦𑀺 𑀬𑀣𑀸 ‘‘𑀯𑀘𑁆𑀙𑀸𑀬𑁄𑀕𑁄 𑀤𑀼𑀳𑀓𑁄’’𑀢𑀺. 𑀉𑀤𑁆𑀥𑀫𑁆𑀪𑀸𑀕𑁄 𑀦𑀸𑀫 𑀫𑀳𑀕𑁆𑀕𑀢𑀪𑀸𑀯𑁄, 𑀢𑀲𑁆𑀲 𑀳𑀺𑀢𑀸𑀦𑀺 𑀉𑀤𑁆𑀥𑀫𑁆𑀪𑀸𑀕𑀺𑀬𑀸𑀦𑀺. 𑀧𑀸𑀤𑁂𑀲𑀼 𑀩𑀤𑁆𑀥𑀧𑀸𑀲𑀸𑀡𑁄 𑀯𑀺𑀬 𑀧𑀜𑁆𑀘𑁄𑀭𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀸𑀦𑀺 𑀳𑁂𑀝𑁆𑀞𑀸 𑀆𑀓𑀟𑁆𑀠𑀫𑀸𑀦𑀸𑀓𑀸𑀭𑀸𑀦𑀺 𑀳𑁄𑀦𑁆𑀢𑀺. 𑀳𑀢𑁆𑀣𑁂𑀳𑀺 𑀕𑀳𑀺𑀢𑀭𑀼𑀓𑁆𑀔𑀲𑀸𑀔𑀸 𑀯𑀺𑀬 𑀧𑀜𑁆𑀘𑀼𑀤𑁆𑀥𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀸𑀦𑀺 𑀉𑀧𑀭𑀺 𑀆𑀓𑀟𑁆𑀠𑀫𑀸𑀦𑀸𑀓𑀸𑀭𑀸𑀦𑀺. 𑀬𑁂𑀲𑀜𑁆𑀳𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀆𑀤𑀻𑀦𑀺 𑀅𑀧𑁆𑀧𑀳𑀻𑀦𑀸𑀦𑀺, 𑀢𑁂 𑀪𑀯𑀕𑁆𑀕𑁂𑀧𑀺 𑀦𑀺𑀩𑁆𑀩𑀢𑁆𑀢𑁂 𑀏𑀢𑀸𑀦𑀺 𑀆𑀓𑀟𑁆𑀠𑀺𑀢𑁆𑀯𑀸 𑀓𑀸𑀫𑀪𑀯𑁂𑀬𑁂𑀯 𑀧𑀸𑀢𑁂𑀦𑁆𑀢𑀺, 𑀢𑀲𑁆𑀫𑀸 𑀏𑀢𑀸𑀦𑀺 𑀧𑀜𑁆𑀘 𑀕𑀘𑁆𑀙𑀦𑁆𑀢𑀁 𑀯𑀸𑀭𑁂𑀦𑁆𑀢𑀺, 𑀕𑀢𑀁 𑀧𑀼𑀦 𑀆𑀦𑁂𑀦𑁆𑀢𑀺. 𑀭𑀽𑀧𑀭𑀸𑀕𑀸𑀤𑀻𑀦𑀺 𑀧𑀜𑁆𑀘 𑀕𑀘𑁆𑀙𑀦𑁆𑀢𑀁 𑀦 𑀯𑀸𑀭𑁂𑀦𑁆𑀢𑀺, 𑀆𑀕𑀦𑁆𑀢𑀼𑀁 𑀧𑀦 𑀦 𑀤𑁂𑀦𑁆𑀢𑀺.

𑀅𑀲𑀫𑀼𑀘𑁆𑀙𑀺𑀦𑁆𑀦𑁂𑀲𑀼 𑀑𑀭𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑁂𑀲𑀼 𑀮𑀤𑁆𑀥𑀧𑀘𑁆𑀘𑀬𑁂𑀲𑀼 𑀉𑀤𑁆𑀥𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀅𑀕𑀡𑀦𑀽𑀧𑀕𑀸𑀦𑀺 𑀳𑁄𑀦𑁆𑀢𑀻𑀢𑀺 𑀮𑀩𑁆𑀪𑀫𑀸𑀦𑀸𑀦𑀫𑁆𑀧𑀺 𑀧𑀼𑀣𑀼𑀚𑁆𑀚𑀦𑀸𑀦𑀁 𑀯𑀲𑁂𑀦 𑀅𑀯𑀺𑀪𑀚𑀺𑀢𑁆𑀯𑀸 𑀅𑀭𑀺𑀬𑀸𑀦𑀁 𑀬𑁄𑀕𑀯𑀲𑁂𑀦 𑀯𑀺𑀪𑀚𑀺𑀢𑀼𑀓𑀸𑀫𑁄 ‘‘𑀉𑀪𑀬𑀫𑁆𑀧𑀺 𑀘𑁂𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀝𑁆𑀝𑀦𑀺𑀲𑁆𑀲𑀺𑀢𑀫𑀳𑀸𑀚𑀦𑀲𑁆𑀲𑀸𑀢𑀺 𑀧𑀼𑀣𑀼𑀚𑁆𑀚𑀦𑁂 𑀲𑀦𑁆𑀥𑀸𑀬 𑀯𑀤𑀢𑀺. 𑀤𑁆𑀯𑁂𑀥𑀸 𑀧𑀭𑀺𑀘𑁆𑀙𑀺𑀦𑁆𑀦𑁄𑀢𑀺 𑀓𑀸𑀫𑀲𑀼𑀕𑀢𑀺𑀭𑀽𑀧𑀸𑀭𑀽𑀧𑀪𑀯𑀯𑀲𑁂𑀦 𑀤𑁆𑀯𑀻𑀳𑀺 𑀧𑀓𑀸𑀭𑁂𑀳𑀺 𑀧𑀭𑀺𑀘𑁆𑀙𑀺𑀦𑁆𑀦𑁄.

𑀯𑀘𑁆𑀙𑀓𑀲𑀸𑀮𑁄𑀧𑀫𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑁂 𑀧𑀦 𑀓𑀲𑁆𑀲𑀘𑀺 𑀓𑀺𑀮𑁂𑀲𑀲𑁆𑀲 𑀅𑀯𑀺𑀓𑁆𑀔𑀫𑁆𑀪𑀺𑀢𑀢𑁆𑀢𑀸, 𑀓𑀣𑀜𑁆𑀘𑀺𑀧𑀺 𑀅𑀯𑀺𑀫𑀼𑀢𑁆𑀢𑁄 𑀓𑀸𑀫𑀪𑀯𑁄 𑀅𑀚𑁆𑀛𑀢𑁆𑀢𑀕𑁆𑀕𑀳𑀡𑀲𑁆𑀲 𑀯𑀺𑀲𑁂𑀲𑀧𑀘𑁆𑀘𑀬𑀢𑁆𑀢𑀸, 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀅𑀩𑁆𑀪𑀦𑁆𑀢𑀭𑀝𑁆𑀞𑁂𑀦 𑀅𑀦𑁆𑀢𑁄 𑀦𑀸𑀫. 𑀭𑀽𑀧𑀸𑀭𑀽𑀧𑀪𑀯𑁄 𑀢𑀩𑁆𑀩𑀺𑀧𑀭𑀺𑀬𑀸𑀬𑀢𑁄 𑀩𑀳𑀺 𑀦𑀸𑀫. 𑀢𑀣𑀸 𑀳𑀺 𑀬𑀲𑁆𑀲 𑀑𑀭𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀅𑀧𑁆𑀧𑀳𑀻𑀦𑀸𑀦𑀺, 𑀲𑁄 𑀅𑀚𑁆𑀛𑀢𑁆𑀢𑀲𑀁𑀬𑁄𑀚𑀦𑁄 𑀯𑀼𑀢𑁆𑀢𑁄. 𑀬𑀲𑁆𑀲 𑀢𑀸𑀦𑀺 𑀧𑀳𑀻𑀦𑀸𑀦𑀺, 𑀲𑁄 𑀩𑀳𑀺𑀤𑁆𑀥𑀸𑀲𑀁𑀬𑁄𑀚𑀦𑁄. 𑀢𑀲𑁆𑀫𑀸 𑀅𑀦𑁆𑀢𑁄 𑀅𑀲𑀫𑀼𑀘𑁆𑀙𑀺𑀦𑁆𑀦𑀩𑀦𑁆𑀥𑀦𑀢𑀸𑀬 𑀩𑀳𑀺 𑀘 𑀧𑀯𑀢𑁆𑀢𑀫𑀸𑀦𑀪𑀯𑀗𑁆𑀕𑀲𑀦𑁆𑀢𑀸𑀦𑀢𑀸𑀬 𑀅𑀦𑁆𑀢𑁄𑀩𑀤𑁆𑀥𑁄 𑀩𑀳𑀺𑀲𑀬𑀺𑀢𑁄 𑀦𑀸𑀫. 𑀦𑀺𑀭𑀦𑁆𑀢𑀭𑀧𑁆𑀧𑀯𑀢𑁆𑀢𑀪𑀯𑀗𑁆𑀕𑀲𑀦𑁆𑀢𑀸𑀦𑀯𑀲𑁂𑀦 𑀳𑀺 𑀲𑀬𑀺𑀢𑀯𑁄𑀳𑀸𑀭𑁄. 𑀓𑀸𑀫𑀁 𑀦𑁂𑀲𑀁 𑀩𑀳𑀺𑀩𑀦𑁆𑀥𑀦𑀫𑁆𑀧𑀺 𑀅𑀲𑀫𑀼𑀘𑁆𑀙𑀺𑀦𑁆𑀦𑀁, 𑀅𑀦𑁆𑀢𑁄𑀩𑀦𑁆𑀥𑀦𑀲𑁆𑀲 𑀧𑀦 𑀫𑀽𑀮𑀢𑀸𑀬 𑀏𑀯𑀁 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀲𑀁𑀬𑁄𑀚𑀦𑀁 𑀧𑀦 𑀢𑁂𑀲𑀁 𑀓𑀸𑀫𑀸𑀯𑀘𑀭𑀽𑀧𑀦𑀺𑀩𑀤𑁆𑀥𑀫𑁂𑀯𑀸’’𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑀢𑁆𑀢𑀬𑁂𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀢𑁆𑀢𑀸𑀯𑀢𑀸 𑀘 𑀓𑀺𑀭𑀸𑀢𑀺 𑀓𑀺𑀭-𑀲𑀤𑁆𑀤𑁄 𑀅𑀭𑀼𑀘𑀺𑀲𑀁𑀲𑀽𑀘𑀦𑀢𑁆𑀣𑁄. 𑀢𑁂𑀦𑁂𑀢𑁆𑀣 𑀆𑀘𑀭𑀺𑀬𑀯𑀸𑀤𑀲𑁆𑀲 𑀅𑀢𑁆𑀢𑀦𑁄 𑀅𑀭𑀼𑀘𑁆𑀘𑀦𑀪𑀸𑀯𑀁 𑀤𑀻𑀧𑁂𑀢𑀺. ‘‘𑀲𑀻𑀮𑀯𑀸’’𑀢𑀺 𑀅𑀦𑀸𑀫𑀝𑁆𑀞𑀯𑀺𑀲𑁂𑀲𑀲𑀸𑀫𑀜𑁆𑀜𑀢𑁄 𑀲𑀻𑀮𑀲𑀗𑁆𑀔𑁂𑀧𑁂𑀦 𑀕𑀳𑀺𑀢𑀁, 𑀢𑀜𑁆𑀘 𑀘𑀢𑀼𑀩𑁆𑀩𑀺𑀥𑀦𑁆𑀢𑀺 𑀆𑀘𑀭𑀺𑀬𑀢𑁆𑀣𑁂𑀭𑁄 ‘‘𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁 𑀉𑀤𑁆𑀤𑀺𑀲𑀺𑀢𑁆𑀯𑀸’’𑀢𑀺 𑀆𑀳. 𑀢𑀢𑁆𑀣𑀸𑀢𑀺 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑁂𑀲𑀼. 𑀚𑁂𑀝𑁆𑀞𑀓𑀲𑀻𑀮𑀦𑁆𑀢𑀺 𑀧𑀥𑀸𑀦𑀲𑀻𑀮𑀁. 𑀉𑀪𑀬𑀢𑁆𑀣𑀸𑀢𑀺 𑀉𑀤𑁆𑀤𑁂𑀲𑀦𑀺𑀤𑁆𑀤𑁂𑀲𑁂𑀲𑀼, 𑀦𑀺𑀤𑁆𑀤𑁂𑀲𑁂 𑀯𑀺𑀬 𑀉𑀤𑁆𑀤𑁂𑀲𑁂𑀧𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄𑀯 𑀣𑁂𑀭𑁂𑀦 𑀯𑀼𑀢𑁆𑀢𑁄 ‘‘𑀲𑀻𑀮𑀯𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀻𑀮𑀕𑁆𑀕𑀳𑀡𑀜𑁆𑀳𑀺 𑀧𑀸𑀴𑀺𑀬𑀁 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀯𑀲𑁂𑀦𑁂𑀯 𑀆𑀕𑀢𑀁. 𑀢𑁂𑀦𑀸𑀳 ‘‘𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄𑀬𑁂𑀯𑀸’’𑀢𑀺𑀆𑀤𑀺. 𑀢𑀢𑁆𑀣 𑀅𑀯𑀥𑀸𑀭𑀡𑁂𑀦 𑀇𑀢𑀭𑁂𑀲𑀁 𑀢𑀺𑀡𑁆𑀡𑀁 𑀏𑀓𑀤𑁂𑀲𑁂𑀦 𑀧𑀸𑀢𑀺𑀫𑁄𑀓𑁆𑀔𑀦𑁆𑀢𑁄𑀕𑀥𑀪𑀸𑀯𑀁 𑀤𑀻𑀧𑁂𑀢𑀺. 𑀢𑀣𑀸 𑀳𑀺 𑀅𑀦𑁄𑀮𑁄𑀓𑀺𑀬𑁄𑀮𑁄𑀓𑀦𑁂 𑀆𑀚𑀻𑀯𑀳𑁂𑀢𑀼 𑀘 𑀲𑀺𑀓𑁆𑀔𑀸𑀧𑀤𑀯𑀻𑀢𑀺𑀓𑁆𑀓𑀫𑁂 𑀕𑀺𑀮𑀸𑀦𑀧𑀘𑁆𑀘𑀬𑀲𑁆𑀲 𑀅𑀧𑀘𑁆𑀘𑀯𑁂𑀓𑁆𑀔𑀺𑀢𑀧𑀭𑀺𑀪𑁄𑀕𑁂 𑀘 𑀆𑀧𑀢𑁆𑀢𑀺 𑀯𑀺𑀳𑀺𑀢𑀸𑀢𑀺. 𑀢𑀻𑀡𑀻𑀢𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀻𑀮𑀸𑀤𑀻𑀦𑀺. 𑀲𑀻𑀮𑀦𑁆𑀢𑀺 𑀯𑀼𑀢𑁆𑀢𑀝𑁆𑀞𑀸𑀦𑀁 𑀦𑀸𑀫 𑀅𑀢𑁆𑀣𑀻𑀢𑀺 𑀲𑀻𑀮𑀧𑀭𑀺𑀬𑀸𑀬𑁂𑀦 𑀢𑁂𑀲𑀁 𑀓𑀢𑁆𑀣𑀘𑀺 𑀲𑀼𑀢𑁆𑀢𑁂 𑀕𑀳𑀺𑀢𑀝𑁆𑀞𑀸𑀦𑀁 𑀦𑀸𑀫 𑀓𑀺𑀁 𑀅𑀢𑁆𑀣𑀺 𑀬𑀣𑀸 ‘‘𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄’’𑀢𑀺? 𑀆𑀘𑀭𑀺𑀬𑀲𑁆𑀲 𑀲𑀫𑁆𑀫𑀼𑀔𑀢𑀸𑀬 𑀅𑀧𑁆𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀉𑀧𑀘𑀸𑀭𑁂𑀦 𑀧𑀼𑀘𑁆𑀙𑀦𑁆𑀢𑁄 𑀯𑀺𑀬 𑀯𑀤𑀢𑀺. 𑀢𑁂𑀦𑀸𑀳 ‘‘𑀅𑀦𑀦𑀼𑀚𑀸𑀦𑀦𑁆𑀢𑁄’’𑀢𑀺. 𑀙𑀤𑁆𑀯𑀸𑀭𑀭𑀓𑁆𑀔𑀸𑀫𑀢𑁆𑀢𑀓𑀫𑁂𑀯𑀸𑀢𑀺 𑀢𑀲𑁆𑀲 𑀲𑀮𑁆𑀮𑀳𑀼𑀓𑀪𑀸𑀯𑀫𑀸𑀳 𑀘𑀺𑀢𑁆𑀢𑀸𑀥𑀺𑀝𑁆𑀞𑀸𑀦𑀪𑀸𑀯𑀫𑀢𑁆𑀢𑁂𑀦 𑀧𑀝𑀺𑀧𑀸𑀓𑀢𑀺𑀓𑀪𑀸𑀯𑀸𑀧𑀢𑁆𑀢𑀺𑀢𑁄. 𑀇𑀢𑀭𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀧𑀘𑁆𑀘𑀬𑀼𑀧𑁆𑀧𑀢𑁆𑀢𑀺𑀫𑀢𑁆𑀢𑀓𑀦𑁆𑀢𑀺 𑀨𑀮𑁂𑀦 𑀳𑁂𑀢𑀼𑀁 𑀤𑀲𑁆𑀲𑁂𑀢𑀺. 𑀉𑀧𑁆𑀧𑀸𑀤𑀦𑀳𑁂𑀢𑀼𑀓𑀸 𑀳𑀺 𑀧𑀘𑁆𑀘𑀬𑀸𑀦𑀁 𑀉𑀧𑁆𑀧𑀢𑁆𑀢𑀺. 𑀇𑀤𑀫𑀢𑁆𑀣𑀦𑁆𑀢𑀺 𑀇𑀤𑀁 𑀧𑀬𑁄𑀚𑀦𑀁 𑀇𑀫𑀲𑁆𑀲 𑀧𑀘𑁆𑀘𑀬𑀲𑁆𑀲 𑀧𑀭𑀺𑀪𑀼𑀜𑁆𑀚𑀦𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦𑀺𑀧𑁆𑀧𑀭𑀺𑀬𑀸𑀬𑁂𑀦𑀸𑀢𑀺 𑀇𑀫𑀺𑀦𑀸 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀸𑀤𑀻𑀦𑀺 𑀢𑀻𑀡𑀺 𑀧𑀥𑀸𑀦𑀲𑁆𑀲 𑀲𑀻𑀮𑀲𑁆𑀲 𑀧𑀭𑀺𑀧𑀸𑀮𑀦𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀧𑀭𑀺𑀬𑀸𑀬𑀲𑀻𑀮𑀸𑀦𑀺 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀺. 𑀇𑀤𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑁆𑀲𑁂𑀯 𑀧𑀥𑀸𑀦𑀪𑀸𑀯𑀁 𑀩𑁆𑀬𑀢𑀺𑀭𑁂𑀓𑀢𑁄 𑀅𑀦𑁆𑀯𑀬𑀢𑁄 𑀘 𑀉𑀧𑀫𑀸𑀬 𑀯𑀺𑀪𑀸𑀯𑁂𑀢𑀼𑀁 ‘‘𑀬𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑁄 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄. 𑀲𑁂𑀲𑀸𑀦𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀸𑀤𑀻𑀦𑀺.

𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄𑀢𑀺 𑀬𑁄 𑀳𑀺 𑀦𑀁 𑀧𑀸𑀢𑀺 𑀭𑀓𑁆𑀔𑀢𑀺, 𑀢𑀁 𑀫𑁄𑀓𑁆𑀔𑁂𑀢𑀺 𑀫𑁄𑀘𑁂𑀢𑀺 𑀆𑀧𑀸𑀬𑀺𑀓𑀸𑀤𑀻𑀳𑀺 𑀤𑀼𑀓𑁆𑀔𑁂𑀳𑀻𑀢𑀺 𑀧𑀸𑀢𑀺𑀫𑁄𑀓𑁆𑀔𑀦𑁆𑀢𑀺 𑀮𑀤𑁆𑀥𑀦𑀸𑀫𑁂𑀦 𑀲𑀺𑀓𑁆𑀔𑀸𑀧𑀤𑀲𑀻𑀮𑁂𑀦 𑀧𑀺𑀳𑀺𑀢𑀓𑀸𑀬𑀯𑀘𑀻𑀤𑁆𑀯𑀸𑀭𑁄. 𑀲𑁄 𑀧𑀦 𑀬𑀲𑁆𑀫𑀸 𑀏𑀯𑀁𑀪𑀽𑀢𑁄 𑀢𑁂𑀦 𑀲𑀫𑀦𑁆𑀦𑀸𑀕𑀢𑁄 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀧𑀸𑀢𑀻𑀫𑁄𑀓𑁆𑀔𑀲𑀁𑀯𑀭𑁂𑀦 𑀲𑀫𑀦𑁆𑀦𑀸𑀕𑀢𑁄’’𑀢𑀺.

𑀅𑀧𑀭𑁄 𑀦𑀬𑁄 𑁋 𑀓𑀺𑀮𑁂𑀲𑀸𑀦𑀁 𑀩𑀮𑀯𑀪𑀸𑀯𑀢𑁄, 𑀧𑀸𑀧𑀓𑀺𑀭𑀺𑀬𑀸𑀬 𑀘 𑀲𑀼𑀓𑀭𑀪𑀸𑀯𑀢𑁄, 𑀧𑀼𑀜𑁆𑀜𑀓𑀺𑀭𑀺𑀬𑀸𑀬 𑀘 𑀤𑀼𑀓𑁆𑀓𑀭𑀪𑀸𑀯𑀢𑁄 𑀩𑀳𑀼𑀓𑁆𑀔𑀢𑁆𑀢𑀼𑀁 𑀅𑀧𑀸𑀬𑁂𑀲𑀼 𑀧𑀢𑀦𑀲𑀻𑀮𑁄𑀢𑀺 𑀧𑀸𑀢𑀻, 𑀧𑀼𑀣𑀼𑀚𑁆𑀚𑀦𑁄. 𑀅𑀦𑀺𑀘𑁆𑀘𑀢𑀸𑀬 𑀯𑀸 𑀪𑀯𑀸𑀤𑀻𑀲𑀼 𑀓𑀫𑁆𑀫𑀯𑁂𑀕𑀓𑁆𑀔𑀺𑀢𑁆𑀢𑁄 𑀖𑀝𑀺𑀬𑀦𑁆𑀢𑀁 𑀯𑀺𑀬 𑀅𑀦𑀯𑀝𑁆𑀞𑀸𑀦𑁂𑀦 𑀧𑀭𑀺𑀩𑁆𑀪𑀫𑀦𑀢𑁄 𑀕𑀫𑀦𑀢𑁄 𑀕𑀫𑀦𑀲𑀻𑀮𑁄𑀢𑀺 𑀧𑀸𑀢𑀻, 𑀫𑀭𑀡𑀯𑀲𑁂𑀦 𑀢𑀫𑁆𑀳𑀺 𑀢𑀫𑁆𑀳𑀺 𑀲𑀢𑁆𑀢𑀦𑀺𑀓𑀸𑀬𑁂 𑀅𑀢𑁆𑀢𑀪𑀸𑀯𑀲𑁆𑀲 𑀧𑀸𑀢𑀦𑀲𑀻𑀮𑁄 𑀯𑀸 𑀧𑀸𑀢𑀻, 𑀲𑀢𑁆𑀢𑀲𑀦𑁆𑀢𑀸𑀦𑁄, 𑀘𑀺𑀢𑁆𑀢𑀫𑁂𑀯 𑀯𑀸. 𑀢𑀁 𑀧𑀸𑀢𑀺𑀁 𑀲𑀁𑀲𑀸𑀭𑀤𑀼𑀓𑁆𑀔𑀢𑁄 𑀫𑁄𑀓𑁆𑀔𑁂𑀢𑀻𑀢𑀺 𑀧𑀸𑀢𑀺𑀫𑁄𑀓𑁆𑀔𑀁. 𑀘𑀺𑀢𑁆𑀢𑀲𑁆𑀲 𑀳𑀺 𑀯𑀺𑀫𑁄𑀓𑁆𑀔𑁂𑀦 𑀲𑀢𑁆𑀢𑁄 𑀯𑀺𑀫𑀼𑀢𑁆𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀯𑀼𑀢𑁆𑀢𑀜𑁆𑀳𑀺 ‘‘𑀘𑀺𑀢𑁆𑀢𑀯𑁄𑀤𑀸𑀦𑀸 𑀯𑀺𑀲𑀼𑀚𑁆𑀛𑀦𑁆𑀢𑀻’’𑀢𑀺, ‘‘𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀢𑁆𑀢’’𑀦𑁆𑀢𑀺 (𑀫𑀳𑀸𑀯. 𑁨𑁮) 𑀘.

𑀅𑀣 𑀯𑀸 𑀅𑀯𑀺𑀚𑁆𑀚𑀸𑀤𑀺𑀦𑀸 𑀳𑁂𑀢𑀼𑀦𑀸 𑀲𑀁𑀲𑀸𑀭𑁂 𑀧𑀢𑀢𑀺 𑀕𑀘𑁆𑀙𑀢𑀺 𑀧𑀯𑀢𑁆𑀢𑀢𑀻𑀢𑀺 𑀧𑀸𑀢𑀺, ‘‘𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀸𑀦𑀁 𑀲𑀢𑁆𑀢𑀸𑀦𑀁 𑀢𑀡𑁆𑀳𑀸𑀲𑀁𑀬𑁄𑀚𑀦𑀸𑀦𑀁 𑀲𑀦𑁆𑀥𑀸𑀯𑀢𑀁 𑀲𑀁𑀲𑀭𑀢’’𑀦𑁆𑀢𑀺 (𑀲𑀁. 𑀦𑀺. 𑁨.𑁧𑁨𑁪) 𑀳𑀺 𑀯𑀼𑀢𑁆𑀢𑀁, 𑀢𑀲𑁆𑀲 𑀧𑀸𑀢𑀺𑀦𑁄 𑀲𑀢𑁆𑀢𑀲𑁆𑀲 𑀢𑀡𑁆𑀳𑀸𑀤𑀺𑀲𑀁𑀓𑀺𑀮𑁂𑀲𑀢𑁆𑀢𑀬𑀢𑁄 𑀫𑁄𑀓𑁆𑀔𑁄 𑀏𑀢𑁂𑀦𑀸𑀢𑀺 𑀧𑀸𑀢𑀺𑀫𑁄𑀓𑁆𑀔𑁄. ‘‘𑀓𑀡𑁆𑀞𑁂𑀓𑀸𑀴𑁄’’𑀢𑀺𑀆𑀤𑀻𑀦𑀁 𑀯𑀺𑀬𑀲𑁆𑀲 𑀲𑀫𑀸𑀲𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸.

𑀅𑀣 𑀯𑀸 𑀧𑀸𑀢𑁂𑀢𑀺 𑀯𑀺𑀦𑀺𑀧𑀸𑀢𑁂𑀢𑀺 𑀤𑀼𑀓𑁆𑀔𑁂𑀢𑀺 𑀧𑀸𑀢𑀺, 𑀘𑀺𑀢𑁆𑀢𑀁. 𑀯𑀼𑀢𑁆𑀢𑀜𑁆𑀳𑀺 𑁋

‘‘𑀘𑀺𑀢𑁆𑀢𑁂𑀦 𑀦𑀻𑀬𑀢𑁂 𑀮𑁄𑀓𑁄, 𑀘𑀺𑀢𑁆𑀢𑁂𑀦 𑀧𑀭𑀺𑀓𑀲𑁆𑀲𑀢𑀻’’𑀢𑀺; (𑀲𑀁. 𑀦𑀺. 𑁧.𑁬𑁨);

𑀢𑀲𑁆𑀲 𑀧𑀸𑀢𑀺𑀦𑁄 𑀫𑁄𑀓𑁆𑀔𑁄 𑀏𑀢𑁂𑀦𑀸𑀢𑀺 𑀧𑀸𑀢𑀺𑀫𑁄𑀓𑁆𑀔𑁄. 𑀧𑀢𑀢𑀺 𑀯𑀸 𑀏𑀢𑁂𑀦 𑀅𑀧𑀸𑀬𑀤𑀼𑀓𑁆𑀔𑁂 𑀲𑀁𑀲𑀸𑀭𑀤𑀼𑀓𑁆𑀔𑁂 𑀘𑀸𑀢𑀺 𑀧𑀸𑀢𑀺, 𑀢𑀡𑁆𑀳𑀸𑀤𑀺𑀲𑀁𑀓𑀺𑀮𑁂𑀲𑁄. 𑀯𑀼𑀢𑁆𑀢𑀜𑁆𑀳𑀺 𑁋

‘‘𑀢𑀡𑁆𑀳𑀸 𑀚𑀦𑁂𑀳𑀺 𑀧𑀼𑀭𑀺𑀲𑀁, (𑀲𑀁. 𑀦𑀺. 𑁧.𑁫𑁬-𑁫𑁭) 𑀢𑀡𑁆𑀳𑀸𑀤𑀼𑀢𑀺𑀬𑁄 𑀧𑀼𑀭𑀺𑀲𑁄’’𑀢𑀺 (𑀇𑀢𑀺𑀯𑀼. 𑁧𑁫, 𑁧𑁦𑁫; 𑀅. 𑀦𑀺. 𑁪.𑁯) 𑀘 𑀆𑀤𑀺;

𑀢𑀢𑁄 𑀧𑀸𑀢𑀺𑀢𑁄 𑀫𑁄𑀓𑁆𑀔𑁄𑀢𑀺 𑀧𑀸𑀢𑀺𑀫𑁄𑀓𑁆𑀔𑁄.

𑀅𑀣 𑀯𑀸 𑀧𑀢𑀢𑀺 𑀏𑀢𑁆𑀣𑀸𑀢𑀺 𑀧𑀸𑀢𑀺, 𑀙 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸𑀦𑀺 𑀆𑀬𑀢𑀦𑀸𑀦𑀺. 𑀯𑀼𑀢𑁆𑀢𑀜𑁆𑀳𑀺 𑁋

‘‘𑀙𑀲𑀼 𑀮𑁄𑀓𑁄 𑀲𑀫𑀼𑀧𑁆𑀧𑀦𑁆𑀦𑁄, 𑀙𑀲𑀼 𑀓𑀼𑀩𑁆𑀩𑀢𑀺 𑀲𑀦𑁆𑀣𑀯’’𑀦𑁆𑀢𑀺 (𑀲𑀁. 𑀦𑀺. 𑁧.𑁭𑁦; 𑀲𑀼. 𑀦𑀺. 𑁧𑁭𑁧);

𑀢𑀢𑁄 𑀙𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸𑀬𑀢𑀦𑀲𑀗𑁆𑀔𑀸𑀢𑀢𑁄 𑀧𑀸𑀢𑀺𑀢𑁄 𑀫𑁄𑀓𑁆𑀔𑁄𑀢𑀺 𑀧𑀸𑀢𑀺𑀫𑁄𑀓𑁆𑀔𑁄.

𑀅𑀣 𑀯𑀸 𑀧𑀸𑀢𑁄 𑀯𑀺𑀦𑀺𑀧𑀸𑀢𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀧𑀸𑀢𑀻, 𑀲𑀁𑀲𑀸𑀭𑁄. 𑀢𑀢𑁄 𑀫𑁄𑀓𑁆𑀔𑁄𑀢𑀺 𑀧𑀸𑀢𑀺𑀫𑁄𑀓𑁆𑀔𑁄.

𑀅𑀣 𑀯𑀸 𑀲𑀩𑁆𑀩𑀮𑁄𑀓𑀸𑀥𑀺𑀧𑀢𑀺𑀪𑀸𑀯𑀢𑁄 𑀥𑀫𑁆𑀫𑀺𑀲𑁆𑀲𑀭𑁄 𑀪𑀕𑀯𑀸 ‘‘𑀧𑀢𑀻’’𑀢𑀺 𑀯𑀼𑀘𑁆𑀘𑀢𑀺, 𑀫𑀼𑀘𑁆𑀘𑀢𑀺 𑀏𑀢𑁂𑀦𑀸𑀢𑀺 𑀫𑁄𑀓𑁆𑀔𑁄, 𑀧𑀢𑀺𑀦𑁄 𑀫𑁄𑀓𑁆𑀔𑁄 𑀧𑀢𑀺𑀫𑁄𑀓𑁆𑀔𑁄 𑀢𑁂𑀦 𑀧𑀜𑁆𑀜𑀢𑁆𑀢𑀢𑁆𑀢𑀸𑀢𑀺, 𑀧𑀢𑀺𑀫𑁄𑀓𑁆𑀔𑁄 𑀏𑀯 𑀧𑀸𑀢𑀺𑀫𑁄𑀓𑁆𑀔𑁄. 𑀲𑀩𑁆𑀩𑀕𑀼𑀡𑀸𑀦𑀁 𑀯𑀸 𑀫𑀽𑀮𑀪𑀸𑀯𑀢𑁄 𑀉𑀢𑁆𑀢𑀫𑀝𑁆𑀞𑁂𑀦 𑀧𑀢𑀺 𑀘 𑀲𑁄 𑀬𑀣𑀸𑀯𑀼𑀢𑁆𑀢𑀝𑁆𑀞𑁂𑀦 𑀫𑁄𑀓𑁆𑀔𑁄 𑀘𑀸𑀢𑀺 𑀧𑀢𑀺𑀫𑁄𑀓𑁆𑀔𑁄, 𑀧𑀢𑀺𑀫𑁄𑀓𑁆𑀔𑁄 𑀏𑀯 𑀧𑀸𑀢𑀺𑀫𑁄𑀓𑁆𑀔𑁄. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀧𑀸𑀢𑀺𑀫𑁄𑀓𑁆𑀔𑀦𑁆𑀢𑀺 𑀆𑀤𑀺𑀫𑁂𑀢𑀁 𑀫𑀼𑀔𑀫𑁂𑀢𑀁 𑀧𑀫𑀼𑀔𑀫𑁂𑀢’’𑀦𑁆𑀢𑀺 (𑀫𑀳𑀸𑀯. 𑁧𑁩𑁫) 𑀯𑀺𑀢𑁆𑀣𑀸𑀭𑁄.

𑀅𑀣 𑀯𑀸 𑀧-𑀇𑀢𑀺 𑀧𑀓𑀸𑀭𑁂, 𑀅𑀢𑀻𑀢𑀺 𑀅𑀘𑁆𑀘𑀦𑁆𑀢𑀢𑁆𑀣𑁂 𑀦𑀺𑀧𑀸𑀢𑁄, 𑀢𑀲𑁆𑀫𑀸 𑀧𑀓𑀸𑀭𑁂𑀳𑀺 𑀅𑀘𑁆𑀘𑀦𑁆𑀢𑀁 𑀫𑁄𑀓𑁆𑀔𑁂𑀢𑀻𑀢𑀺 𑀧𑀸𑀢𑀺𑀫𑁄𑀓𑁆𑀔𑁄. 𑀇𑀤𑀜𑁆𑀳𑀺 𑀲𑀻𑀮𑀁 𑀲𑀬𑀁 𑀢𑀤𑀗𑁆𑀕𑀯𑀲𑁂𑀦, 𑀲𑀫𑀸𑀥𑀺𑀲𑀳𑀺𑀢𑀁 𑀧𑀜𑁆𑀜𑀸𑀲𑀳𑀺𑀢𑀜𑁆𑀘 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦, 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀘 𑀅𑀘𑁆𑀘𑀦𑁆𑀢𑀁 𑀫𑁄𑀓𑁆𑀔𑁂𑀢𑀺 𑀫𑁄𑀘𑁂𑀢𑀻𑀢𑀺 𑀧𑀸𑀢𑀺𑀫𑁄𑀓𑁆𑀔𑁄. 𑀧𑀢𑀺 𑀧𑀢𑀺 𑀫𑁄𑀓𑁆𑀔𑁄𑀢𑀺 𑀯𑀸 𑀧𑀢𑀺𑀫𑁄𑀓𑁆𑀔𑁄, 𑀢𑀫𑁆𑀳𑀸 𑀢𑀫𑁆𑀳𑀸 𑀯𑀻𑀢𑀺𑀓𑁆𑀓𑀫𑀤𑁄𑀲𑀢𑁄 𑀧𑀘𑁆𑀘𑁂𑀓𑀁 𑀫𑁄𑀓𑁆𑀔𑁄𑀢𑀺 𑀅𑀢𑁆𑀣𑁄. 𑀧𑀢𑀺𑀫𑁄𑀓𑁆𑀔𑁄 𑀏𑀯 𑀧𑀸𑀢𑀺𑀫𑁄𑀓𑁆𑀔𑁄. 𑀫𑁄𑀓𑁆𑀔𑁄 𑀯𑀸 𑀦𑀺𑀩𑁆𑀩𑀸𑀦𑀁, 𑀢𑀲𑁆𑀲 𑀫𑁄𑀓𑁆𑀔𑀲𑁆𑀲 𑀧𑀢𑀺𑀩𑀺𑀫𑁆𑀩𑀪𑀽𑀢𑁄𑀢𑀺 𑀧𑀢𑀺𑀫𑁄𑀓𑁆𑀔𑁄. 𑀲𑀻𑀮𑀲𑀁𑀯𑀭𑁄 𑀳𑀺 𑀲𑀽𑀭𑀺𑀬𑀲𑁆𑀲 𑀅𑀭𑀼𑀡𑀼𑀕𑁆𑀕𑀫𑀦𑀁 𑀯𑀺𑀬 𑀦𑀺𑀩𑁆𑀩𑀸𑀦𑀲𑁆𑀲 𑀉𑀤𑀬𑀪𑀽𑀢𑁄 𑀢𑀧𑁆𑀧𑀝𑀺𑀪𑀸𑀕𑁄 𑀯𑀺𑀬 𑀬𑀣𑀸𑀭𑀳𑀁 𑀓𑀺𑀮𑁂𑀲𑀦𑀺𑀩𑁆𑀩𑀸𑀧𑀦𑀢𑁄 𑀧𑀢𑀺𑀫𑁄𑀓𑁆𑀔𑀁, 𑀧𑀢𑀺𑀫𑁄𑀓𑁆𑀔𑀁𑀬𑁂𑀯 𑀧𑀸𑀢𑀺𑀫𑁄𑀓𑁆𑀔𑀁.

𑀅𑀣 𑀯𑀸 𑀫𑁄𑀓𑁆𑀔𑀁 𑀧𑀢𑀺 𑀯𑀢𑁆𑀢𑀢𑀺, 𑀫𑁄𑀓𑁆𑀔𑀸𑀪𑀺𑀫𑀼𑀔𑀦𑁆𑀢𑀺 𑀯𑀸 𑀧𑀢𑀺𑀫𑁄𑀓𑁆𑀔𑀁, 𑀧𑀢𑀺𑀫𑁄𑀓𑁆𑀔𑀫𑁂𑀯 𑀧𑀸𑀢𑀺𑀫𑁄𑀓𑁆𑀔𑀦𑁆𑀢𑀺 𑀏𑀯𑀫𑁂𑀢𑁆𑀣 𑀧𑀸𑀢𑀺𑀫𑁄𑀓𑁆𑀔𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄𑀢𑀺 𑀓𑀸𑀬𑀺𑀓𑀯𑀸𑀘𑀲𑀺𑀓𑀅𑀯𑀻𑀢𑀺𑀓𑁆𑀓𑀫𑀲𑀗𑁆𑀔𑀸𑀢𑁂𑀦 𑀆𑀘𑀸𑀭𑁂𑀦, 𑀦𑀯𑁂𑀲𑀺𑀬𑀸𑀤𑀺𑀕𑁄𑀘𑀭𑀢𑀸𑀤𑀺𑀲𑀗𑁆𑀔𑀸𑀢𑁂𑀦 𑀕𑁄𑀘𑀭𑁂𑀦 𑀲𑀫𑁆𑀧𑀦𑁆𑀦𑁄, 𑀲𑀫𑁆𑀧𑀦𑁆𑀦𑀆𑀘𑀸𑀭𑀕𑁄𑀘𑀭𑁄𑀢𑀺 𑀅𑀢𑁆𑀣𑁄. 𑀅𑀧𑁆𑀧𑀫𑀢𑁆𑀢𑀓𑁂𑀲𑀽𑀢𑀺 𑀧𑀭𑀺𑀢𑁆𑀢𑀓𑁂𑀲𑀼 𑀅𑀦𑀸𑀧𑀢𑁆𑀢𑀺𑀕𑀫𑀦𑀻𑀬𑁂𑀲𑀼. ‘‘𑀤𑀼𑀓𑁆𑀓𑀝𑀤𑀼𑀩𑁆𑀪𑀸𑀲𑀺𑀢𑀫𑀢𑁆𑀢𑁂𑀲𑀽’’𑀢𑀺 𑀅𑀧𑀭𑁂. 𑀯𑀚𑁆𑀚𑁂𑀲𑀽𑀢𑀺 𑀕𑀸𑀭𑀬𑁆𑀳𑁂𑀲𑀼. 𑀢𑁂 𑀧𑀦 𑀏𑀓𑀦𑁆𑀢𑀢𑁄 𑀅𑀓𑀼𑀲𑀮𑀲𑀪𑀸𑀯𑀸 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀅𑀓𑀼𑀲𑀮𑀥𑀫𑁆𑀫𑁂𑀲𑀽’’𑀢𑀺. 𑀪𑀬𑀤𑀲𑁆𑀲𑀻𑀢𑀺 𑀪𑀬𑀢𑁄 𑀤𑀲𑁆𑀲𑀦𑀲𑀻𑀮𑁄, 𑀧𑀭𑀫𑀸𑀡𑀼𑀫𑀢𑁆𑀢𑀫𑁆𑀧𑀺 𑀯𑀚𑁆𑀚𑀁 𑀲𑀺𑀦𑁂𑀭𑀼𑀧𑁆𑀧𑀫𑀸𑀡𑀁 𑀯𑀺𑀬 𑀓𑀢𑁆𑀯𑀸 𑀪𑀸𑀬𑀦𑀲𑀻𑀮𑁄. 𑀲𑀫𑁆𑀫𑀸 𑀆𑀤𑀺𑀬𑀺𑀢𑁆𑀯𑀸𑀢𑀺 𑀲𑀫𑁆𑀫𑀤𑁂𑀯 𑀲𑀓𑁆𑀓𑀘𑁆𑀘𑀁 𑀲𑀩𑁆𑀩𑀲𑁄𑀯 𑀆𑀤𑀺𑀬𑀺𑀢𑁆𑀯𑀸. 𑀲𑀺𑀓𑁆𑀔𑀸𑀧𑀤𑁂𑀲𑀽𑀢𑀺 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀦𑁆𑀢𑀺 𑀲𑀫𑀼𑀤𑀸𑀬𑀢𑁄 𑀅𑀯𑀬𑀯𑀦𑀺𑀤𑁆𑀥𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀺𑀓𑁆𑀔𑀸𑀧𑀤𑁂𑀲𑀼 𑀢𑀁 𑀢𑀁 𑀲𑀺𑀓𑁆𑀔𑀸𑀧𑀤𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀲𑀺𑀓𑁆𑀔𑀢𑀻’’𑀢𑀺 𑀅𑀢𑁆𑀣𑀫𑀸𑀳, 𑀲𑀺𑀓𑁆𑀔𑀸𑀧𑀤𑀫𑁂𑀯 𑀳𑀺 𑀲𑀫𑀸𑀤𑀸𑀢𑀩𑁆𑀩𑀁 𑀲𑀺𑀓𑁆𑀔𑀺𑀢𑀩𑁆𑀩𑀜𑁆𑀘𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀁 𑀓𑀺𑀜𑁆𑀘𑀺 𑀲𑀺𑀓𑁆𑀔𑀸𑀧𑀤𑁂𑀲𑀽𑀢𑀺 𑀲𑀺𑀓𑁆𑀔𑀸𑀓𑁄𑀝𑁆𑀞𑀸𑀲𑁂𑀲𑀼 𑀫𑀽𑀮𑀧𑀜𑁆𑀜𑀢𑁆𑀢𑀺𑀅𑀦𑀼𑀧𑀜𑁆𑀜𑀢𑁆𑀢𑀺𑀲𑀩𑁆𑀩𑀢𑁆𑀣𑀧𑀜𑁆𑀜𑀢𑁆𑀢𑀺𑀧𑀤𑁂𑀲𑀧𑀜𑁆𑀜𑀢𑁆𑀢𑀺𑀆𑀤𑀺𑀪𑁂𑀤𑀁 𑀬𑀁 𑀓𑀺𑀜𑁆𑀘𑀺 𑀲𑀺𑀓𑁆𑀔𑀺𑀢𑀩𑁆𑀩𑀁. 𑀬𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁 𑀧𑀽𑀭𑁂𑀢𑀩𑁆𑀩𑀁 𑀲𑀻𑀮𑀁, 𑀢𑀁 𑀧𑀦 𑀤𑁆𑀯𑀸𑀭𑀯𑀲𑁂𑀦 𑀤𑀼𑀯𑀺𑀥𑀫𑁂𑀯𑀸𑀢𑀺 𑀆𑀳 ‘‘𑀓𑀸𑀬𑀺𑀓𑀁 𑀯𑀸 𑀯𑀸𑀘𑀲𑀺𑀓𑀁 𑀯𑀸’’𑀢𑀺. 𑀇𑀫𑀲𑁆𑀫𑀺𑀁 𑀅𑀢𑁆𑀣𑀯𑀺𑀓𑀧𑁆𑀧𑁂 𑀲𑀺𑀓𑁆𑀔𑀸𑀧𑀤𑁂𑀲𑀽𑀢𑀺 𑀆𑀥𑀸𑀭𑁂 𑀪𑀼𑀫𑁆𑀫𑀁 𑀲𑀺𑀓𑁆𑀔𑀸𑀪𑀸𑀕𑁂𑀲𑀼 𑀓𑀲𑁆𑀲𑀘𑀺 𑀯𑀺𑀲𑀼𑀁 𑀅𑀕𑁆𑀕𑀳𑀡𑀢𑁄. 𑀢𑁂𑀦𑀸𑀳 ‘‘𑀢𑀁 𑀲𑀩𑁆𑀩’’𑀦𑁆𑀢𑀺.

𑀅𑀜𑁆𑀜𑀢𑀭𑀁 𑀤𑁂𑀯𑀖𑀝𑀦𑁆𑀢𑀺 𑀅𑀜𑁆𑀜𑀢𑀭𑀁 𑀤𑁂𑀯𑀦𑀺𑀓𑀸𑀬𑀁. 𑀆𑀕𑀸𑀫𑀻 𑀳𑁄𑀢𑀻𑀢𑀺 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀆𑀕𑀫𑀦𑀲𑀻𑀮𑁄 𑀳𑁄𑀢𑀺. 𑀆𑀕𑀦𑁆𑀢𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀇𑀫𑀺𑀦𑀸 𑀅𑀗𑁆𑀕𑁂𑀦𑀸𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦.

𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑁄 𑀬𑁂𑀪𑀼𑀬𑁆𑀬𑁂𑀦 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀫𑀼𑀔𑁂𑀦 𑀓𑀫𑁆𑀫𑀝𑁆𑀞𑀸𑀦𑀸𑀪𑀺𑀦𑀺𑀯𑁂𑀲𑀻 𑀳𑁄𑀢𑀻𑀢𑀺 𑀆𑀳 ‘‘𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀲𑁆𑀲 𑀥𑀸𑀢𑀼𑀓𑀫𑁆𑀫𑀝𑁆𑀞𑀸𑀦𑀺𑀓𑀪𑀺𑀓𑁆𑀔𑀼𑀦𑁄’’𑀢𑀺. 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀦𑀺𑀕𑀫𑁂𑀦𑁆𑀢𑁄 ‘‘𑀧𑀞𑀫𑁂𑀦 𑀅𑀗𑁆𑀕𑁂𑀦𑀸’’𑀢𑀺𑀆𑀤𑀺𑀫𑀸𑀳.

𑀘𑀺𑀢𑁆𑀢𑀲𑁆𑀲 𑀲𑀼𑀔𑀼𑀫𑀪𑀸𑀯𑁄 𑀇𑀥 𑀲𑀼𑀔𑀫𑀢𑁆𑀢𑀪𑀸𑀯𑀫𑀸𑀧𑀦𑁆𑀦𑁂𑀦 𑀤𑀝𑁆𑀞𑀩𑁆𑀩𑁄𑀢𑀺 𑀆𑀳 ‘‘𑀲𑀩𑁆𑀩𑀸𑀧𑀺 𑀳𑀺 𑀢𑀸’’𑀢𑀺𑀆𑀤𑀺. 𑀢𑀦𑁆𑀢𑀺𑀯𑀲𑁂𑀦𑀸𑀢𑀺 𑀓𑁂𑀯𑀮𑀁 𑀢𑀦𑁆𑀢𑀺𑀝𑁆𑀞𑀧𑀦𑀯𑀲𑁂𑀦, 𑀦 𑀧𑀦 𑀣𑁂𑀭𑀲𑁆𑀲 𑀓𑀲𑁆𑀲𑀘𑀺 𑀫𑀕𑁆𑀕𑀲𑁆𑀲 𑀯𑀸 𑀨𑀮𑀲𑁆𑀲 𑀯𑀸 𑀉𑀧𑁆𑀧𑀸𑀤𑀦𑀢𑁆𑀣𑀸𑀬, 𑀦𑀸𑀧𑀺 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀁 𑀬𑁄𑀚𑀦𑀢𑁆𑀣𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁩𑁮. 𑀙𑀝𑁆𑀞𑁂 𑀫𑀳𑀸𑀓𑀘𑁆𑀘𑀸𑀦𑁄𑀢𑀺 𑀕𑀺𑀳𑀺𑀓𑀸𑀮𑁂 𑀉𑀚𑁆𑀚𑁂𑀦𑀺𑀭𑀜𑁆𑀜𑁄 𑀧𑀼𑀭𑁄𑀳𑀺𑀢𑀧𑀼𑀢𑁆𑀢𑁄 𑀅𑀪𑀺𑀭𑀽𑀧𑁄 𑀤𑀲𑁆𑀲𑀦𑀻𑀬𑁄 𑀧𑀸𑀲𑀸𑀤𑀺𑀓𑁄 𑀲𑀼𑀯𑀡𑁆𑀡𑀯𑀡𑁆𑀡𑁄 𑀘. 𑀯𑀭𑀡𑀸 𑀦𑀸𑀫 𑀭𑀼𑀓𑁆𑀔𑁄, 𑀢𑀲𑁆𑀲 𑀅𑀯𑀺𑀤𑀽𑀭𑁂 𑀪𑀯𑀢𑁆𑀢𑀸 𑀦𑀕𑀭𑀫𑁆𑀧𑀺 𑀯𑀭𑀡𑀲𑀤𑁆𑀤𑁂𑀦 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀯𑀭𑀡𑀸 𑀦𑀸𑀫 𑀏𑀓𑀁 𑀦𑀕𑀭’’𑀦𑁆𑀢𑀺. 𑀤𑁆𑀯𑀦𑁆𑀤𑀧𑀤𑀲𑁆𑀲 𑀧𑀘𑁆𑀘𑁂𑀓𑀁 𑀅𑀪𑀺𑀲𑀫𑁆𑀩𑀦𑁆𑀥𑁄 𑀳𑁄𑀢𑀻𑀢𑀺 𑀳𑁂𑀢𑀼𑀲𑀤𑁆𑀤𑀁 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀸𑀫𑀭𑀸𑀕𑀸𑀪𑀺𑀦𑀺𑀯𑁂𑀲𑀳𑁂𑀢𑀽’’𑀢𑀺𑀆𑀤𑀺𑀫𑀸𑀳. 𑀳𑁂𑀢𑀼𑀲𑀤𑁆𑀤𑁂𑀦 𑀲𑀫𑁆𑀩𑀦𑁆𑀥𑁂 𑀲𑀢𑀺 𑀬𑁄 𑀅𑀢𑁆𑀣𑁄 𑀲𑀫𑁆𑀪𑀯𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀸𑀫𑀭𑀸𑀕𑁂𑀦 𑀅𑀪𑀺𑀦𑀺𑀯𑀺𑀝𑁆𑀞𑀢𑁆𑀢𑀸𑀢𑀺 𑀏𑀢𑁂𑀦 𑀓𑀸𑀫𑀭𑀸𑀕𑀸𑀪𑀺𑀦𑀺𑀯𑁂𑀲𑀳𑁂𑀢𑀽𑀢𑀺 𑀇𑀫𑀲𑁆𑀲 𑀅𑀢𑁆𑀣𑀁 𑀤𑀻𑀧𑁂𑀢𑀺, 𑀢𑀣𑀸 𑀯𑀺𑀦𑀺𑀩𑀤𑁆𑀥𑀢𑁆𑀢𑀸𑀢𑀺𑀆𑀤𑀻𑀳𑀺 𑀓𑀸𑀫𑀭𑀸𑀕𑀯𑀺𑀦𑀺𑀩𑀤𑁆𑀥𑀳𑁂𑀢𑀽𑀢𑀺𑀆𑀤𑀻𑀦𑀁. 𑀢𑀢𑁄 𑀫𑀼𑀔𑁄𑀢𑀺 𑀢𑀤𑀪𑀺𑀫𑀼𑀔𑁄. 𑀫𑀸𑀦𑀦𑁆𑀢𑀺 𑀆𑀴𑁆𑀳𑀓𑀸𑀤𑀺𑀫𑀸𑀦𑀪𑀡𑁆𑀟𑀁. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑁩𑁯. 𑀲𑀢𑁆𑀢𑀫𑁂 𑀫𑀥𑀼𑀭𑀸𑀬𑀦𑁆𑀢𑀺 𑀉𑀢𑁆𑀢𑀭𑀫𑀥𑀼𑀭𑀸𑀬𑀁. 𑀕𑀼𑀦𑁆𑀤𑀸𑀯𑀦𑁂𑀢𑀺 𑀓𑀡𑁆𑀳𑀕𑀼𑀦𑁆𑀤𑀸𑀯𑀦𑁂, 𑀓𑀸𑀴𑀧𑀺𑀧𑁆𑀧𑀮𑀺𑀯𑀦𑁂𑀢𑀺 𑀅𑀢𑁆𑀣𑁄. 𑀚𑀭𑀸𑀚𑀺𑀡𑁆𑀡𑁂𑀢𑀺 𑀚𑀭𑀸𑀬 𑀚𑀺𑀡𑁆𑀡𑁂, 𑀦 𑀩𑁆𑀬𑀸𑀥𑀺𑀆𑀤𑀻𑀦𑀁 𑀯𑀲𑁂𑀦 𑀚𑀺𑀡𑁆𑀡𑀲𑀤𑀺𑀲𑁂 𑀦𑀸𑀧𑀺 𑀅𑀓𑀸𑀮𑀺𑀓𑁂𑀦 𑀚𑀭𑀸𑀬 𑀅𑀪𑀺𑀪𑀽𑀢𑁂. 𑀯𑀬𑁄𑀯𑀼𑀤𑁆𑀥𑁂𑀢𑀺 𑀚𑀺𑀡𑁆𑀡𑀢𑁆𑀢𑀸 𑀏𑀯 𑀘𑀲𑁆𑀲 𑀯𑀬𑁄𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑀺𑀬𑀸 𑀯𑀼𑀤𑁆𑀥𑁂𑀦 𑀲𑀻𑀮𑀸𑀤𑀺𑀯𑀼𑀤𑁆𑀥𑀺𑀬𑀸. 𑀚𑀸𑀢𑀺𑀫𑀳𑀮𑁆𑀮𑀓𑁂𑀢𑀺 𑀚𑀸𑀢𑀺𑀬𑀸 𑀫𑀳𑀦𑁆𑀢𑀢𑀸𑀬 𑀘𑀺𑀭𑀭𑀢𑁆𑀢𑀢𑀸𑀬 𑀫𑀳𑀮𑁆𑀮𑀓𑁂, 𑀦 𑀪𑁄𑀕𑀧𑀭𑀺𑀯𑀸𑀭𑀸𑀤𑀻𑀳𑀻𑀢𑀺 𑀅𑀢𑁆𑀣𑁄. 𑀅𑀤𑁆𑀥𑀕𑀢𑁂𑀢𑀺 𑀏𑀢𑁆𑀣 𑀅𑀤𑁆𑀥-𑀲𑀤𑁆𑀤𑁄 𑀤𑀻𑀖𑀓𑀸𑀮𑀯𑀸𑀘𑀻𑀢𑀺 𑀆𑀳 ‘‘𑀤𑀻𑀖𑀓𑀸𑀮𑀤𑁆𑀥𑀸𑀦𑀁 𑀅𑀢𑀺𑀓𑁆𑀓𑀦𑁆𑀢𑁂’’𑀢𑀺. 𑀯𑀬𑁄𑀢𑀺 𑀧𑀼𑀭𑀺𑀫𑀧𑀤𑀮𑁄𑀧𑁂𑀦𑀸𑀬𑀁 𑀦𑀺𑀤𑁆𑀤𑁂𑀲𑁄𑀢𑀺 𑀆𑀳 ‘‘𑀧𑀘𑁆𑀙𑀺𑀫𑀯𑀬’’𑀦𑁆𑀢𑀺, 𑀯𑀲𑁆𑀲𑀲𑀢𑀲𑁆𑀲 𑀢𑀢𑀺𑀬𑀓𑁄𑀝𑁆𑀞𑀸𑀲𑀲𑀗𑁆𑀔𑀸𑀢𑀁 𑀧𑀘𑁆𑀙𑀺𑀫𑀯𑀬𑀁 𑀅𑀦𑀼𑀧𑁆𑀧𑀢𑁆𑀢𑁂𑀢𑀺 𑀅𑀢𑁆𑀣𑁄.

𑀪𑀯𑀢𑀺 𑀏𑀢𑁆𑀣 𑀨𑀮𑀁 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬𑀸𑀢𑀺 𑀪𑀽𑀫𑀺, 𑀓𑀸𑀭𑀡𑀦𑁆𑀢𑀺 𑀆𑀳 ‘‘𑀬𑁂𑀦 𑀓𑀸𑀭𑀡𑁂𑀦𑀸’’𑀢𑀺𑀆𑀤𑀺. 𑀧𑀭𑀺𑀧𑀓𑁆𑀓𑁄𑀢𑀺 𑀧𑀭𑀺𑀡𑀢𑁄, 𑀯𑀼𑀤𑁆𑀥𑀺𑀪𑀸𑀯𑀁 𑀧𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀫𑁄𑀖𑀚𑀺𑀡𑁆𑀡𑁄𑀢𑀺 𑀅𑀦𑁆𑀢𑁄 𑀣𑀺𑀭𑀓𑀭𑀡𑀸𑀦𑀁 𑀥𑀫𑁆𑀫𑀸𑀦𑀁 𑀅𑀪𑀸𑀯𑁂𑀦 𑀢𑀼𑀘𑁆𑀙𑀚𑀺𑀡𑁆𑀡𑁄 𑀦𑀸𑀫. 𑀩𑀸𑀮𑀤𑀸𑀭𑀓𑁄𑀧𑀺 𑀤𑀳𑀭𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀢𑀢𑁄 𑀯𑀺𑀲𑁂𑀲𑀦𑀢𑁆𑀣𑀁 ‘‘𑀬𑀼𑀯𑀸’’𑀢𑀺 𑀯𑀼𑀢𑁆𑀢𑀁. 𑀅𑀢𑀺𑀓𑁆𑀓𑀦𑁆𑀢𑀧𑀞𑀫𑀯𑀬𑀸 𑀏𑀯 𑀲𑀢𑁆𑀢𑀸 𑀲𑀪𑀸𑀯𑁂𑀦 𑀧𑀮𑀺𑀢𑀲𑀺𑀭𑀸 𑀳𑁄𑀦𑁆𑀢𑀻𑀢𑀺 𑀧𑀞𑀫𑀯𑀬𑁂 𑀞𑀺𑀢𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀼𑀲𑀼𑀓𑀸𑀴𑀓𑁂𑀲𑁄’’𑀢𑀺 𑀯𑀼𑀢𑁆𑀢𑀁. 𑀪𑀤𑁆𑀭𑁂𑀦𑀸𑀢𑀺 𑀮𑀤𑁆𑀥𑀓𑁂𑀦. 𑀏𑀓𑀘𑁆𑀘𑁄 𑀳𑀺 𑀤𑀳𑀭𑁄𑀧𑀺 𑀲𑀫𑀸𑀦𑁄 𑀓𑀸𑀡𑁄 𑀯𑀸 𑀳𑁄𑀢𑀺 𑀓𑀼𑀡𑀺𑀆𑀤𑀻𑀦𑀁 𑀯𑀸 𑀅𑀜𑁆𑀜𑀢𑀭𑁄, 𑀲𑁄 𑀦 𑀪𑀤𑁆𑀭𑁂𑀦 𑀬𑁄𑀩𑁆𑀩𑀦𑁂𑀦 𑀲𑀫𑀦𑁆𑀦𑀸𑀕𑀢𑁄 𑀦𑀸𑀫 𑀳𑁄𑀢𑀺. 𑀬𑁄 𑀧𑀦 𑀅𑀪𑀺𑀭𑀽𑀧𑁄 𑀳𑁄𑀢𑀺 𑀤𑀲𑁆𑀲𑀦𑀻𑀬𑁄 𑀧𑀸𑀲𑀸𑀤𑀺𑀓𑁄 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀲𑀫𑁆𑀧𑀦𑁆𑀦𑁄 𑀬𑀁 𑀬𑀤𑁂𑀯 𑀅𑀮𑀗𑁆𑀓𑀸𑀭𑀧𑀭𑀺𑀳𑀸𑀭𑀁 𑀇𑀘𑁆𑀙𑀢𑀺, 𑀢𑁂𑀦 𑀢𑁂𑀦 𑀅𑀮𑀗𑁆𑀓𑀢𑁄 𑀤𑁂𑀯𑀧𑀼𑀢𑁆𑀢𑁄 𑀯𑀺𑀬 𑀘𑀭𑀢𑀺, 𑀅𑀬𑀁 𑀪𑀤𑁆𑀭𑁂𑀦 𑀬𑁄𑀩𑁆𑀩𑀦𑁂𑀦 𑀲𑀫𑀦𑁆𑀦𑀸𑀕𑀢𑁄 𑀦𑀸𑀫 𑀳𑁄𑀢𑀺. 𑀢𑁂𑀦𑁂𑀯𑀸𑀳 ‘‘𑀬𑁂𑀦 𑀬𑁄𑀩𑁆𑀩𑀦𑁂𑀦 𑀲𑀫𑀦𑁆𑀦𑀸𑀕𑀢𑁄’’𑀢𑀺𑀆𑀤𑀺.

𑀬𑀫𑁆𑀳𑀺 𑀲𑀘𑁆𑀘𑀜𑁆𑀘 𑀥𑀫𑁆𑀫𑁄 𑀘𑀸𑀢𑀺 𑀬𑀫𑁆𑀳𑀺 𑀧𑀼𑀕𑁆𑀕𑀮𑁂 𑀲𑁄𑀴𑀲𑀳𑀸𑀓𑀸𑀭𑁂𑀳𑀺 𑀧𑀝𑀺𑀯𑀺𑀤𑁆𑀥𑀢𑁆𑀢𑀸 𑀘𑀢𑀼𑀩𑁆𑀩𑀺𑀥𑀁 𑀲𑀘𑁆𑀘𑀁, 𑀜𑀸𑀡𑁂𑀦 𑀲𑀘𑁆𑀙𑀺𑀓𑀢𑀢𑁆𑀢𑀸 𑀦𑀯𑀯𑀺𑀥𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄 𑀘 𑀅𑀢𑁆𑀣𑀺. 𑀅𑀳𑀺𑀁𑀲𑀸𑀢𑀺 𑀤𑁂𑀲𑀦𑀸𑀫𑀢𑁆𑀢𑀫𑁂𑀢𑀁, 𑀬𑀫𑁆𑀳𑀺 𑀧𑀦 𑀘𑀢𑀼𑀩𑁆𑀩𑀺𑀥𑀸𑀧𑀺 𑀅𑀧𑁆𑀧𑀫𑀜𑁆𑀜𑀸𑀪𑀸𑀯𑀦𑀸 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀲𑀁𑀬𑀫𑁄 𑀤𑀫𑁄𑀢𑀺 𑀲𑀻𑀮𑀜𑁆𑀘𑁂𑀯 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄 𑀘. 𑀯𑀦𑁆𑀢𑀫𑀮𑁄𑀢𑀺 𑀫𑀕𑁆𑀕𑀜𑀸𑀡𑁂𑀦 𑀦𑀻𑀳𑀝𑀫𑀮𑁄. 𑀥𑀻𑀭𑁄𑀢𑀺 𑀥𑀺𑀢𑀺𑀲𑀫𑁆𑀧𑀦𑁆𑀦𑁄. 𑀣𑁂𑀭𑁄𑀢𑀺 𑀲𑁄 𑀇𑀫𑁂𑀳𑀺 𑀣𑀺𑀭𑀪𑀸𑀯𑀓𑀸𑀭𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀣𑁂𑀭𑁄𑀢𑀺 𑀧𑀯𑀼𑀘𑁆𑀘𑀢𑀻𑀢𑀺 𑀅𑀢𑁆𑀣𑁄.

𑁪𑁦. 𑀅𑀝𑁆𑀞𑀫𑁂 ‘‘𑀘𑁄𑀭𑀸 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀻’’𑀢𑀺 𑀧𑀤𑀁 𑀉𑀤𑁆𑀥𑀭𑀺𑀢𑁆𑀯𑀸 𑀬𑁂𑀳𑀺 𑀓𑀸𑀭𑀡𑁂𑀳𑀺 𑀢𑁂 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀺, 𑀢𑁂𑀲𑀁 𑀲𑀩𑁆𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀓𑁆𑀔𑀲𑀫𑁆𑀧𑀦𑁆𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀦𑀺𑀯𑀸𑀲𑀝𑁆𑀞𑀸𑀦𑀲𑀫𑁆𑀧𑀦𑁆𑀦𑀢𑀸 𑀕𑀺𑀭𑀺𑀤𑀼𑀕𑁆𑀕𑀸𑀤𑀺𑀲𑀩𑁆𑀪𑀸𑀯𑀢𑁄. 𑀅𑀢𑀺𑀬𑀸𑀢𑀼𑀦𑁆𑀢𑀺 𑀅𑀦𑁆𑀢𑁄 𑀬𑀸𑀢𑀼𑀁, 𑀕𑀦𑁆𑀢𑀼𑀁 𑀧𑀯𑀺𑀲𑀺𑀢𑀼𑀦𑁆𑀢𑀺 𑀅𑀢𑁆𑀣𑁄. 𑀢𑀁 𑀧𑀦 𑀅𑀦𑁆𑀢𑁄𑀧𑀯𑀺𑀲𑀦𑀁 𑀓𑁂𑀦𑀘𑀺 𑀓𑀸𑀭𑀡𑁂𑀦 𑀩𑀳𑀺𑀕𑀢𑀲𑁆𑀲 𑀳𑁄𑀢𑀻𑀢𑀺 𑀆𑀳 ‘‘𑀩𑀳𑀺𑀤𑁆𑀥𑀸 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀺𑀢𑁆𑀯𑀸’’𑀢𑀺𑀆𑀤𑀺. 𑀦𑀺𑀬𑁆𑀬𑀸𑀢𑀼𑀦𑁆𑀢𑀺 𑀩𑀳𑀺 𑀦𑀺𑀓𑁆𑀔𑀫𑀺𑀢𑀼𑀁. 𑀢𑀜𑁆𑀘 𑀩𑀳𑀺𑀦𑀺𑀓𑁆𑀔𑀫𑀦𑀁 𑀩𑀳𑀺𑀤𑁆𑀥𑀸𑀓𑀭𑀡𑀻𑀬𑁂 𑀲𑀢𑀺 𑀲𑀫𑁆𑀪𑀯𑀢𑀻𑀢𑀺 𑀆𑀳 ‘‘𑀘𑁄𑀭𑀸 𑀚𑀦𑀧𑀤𑀁 𑀯𑀺𑀮𑀼𑀫𑁆𑀧𑀦𑁆𑀢𑀻’’𑀢𑀺𑀆𑀤𑀺. 𑀅𑀦𑀼𑀲𑀜𑁆𑀜𑀸𑀢𑀼𑀦𑁆𑀢𑀺 𑀅𑀦𑀼𑀲𑀜𑁆𑀘𑀭𑀺𑀢𑀼𑀁. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑁪𑁧. 𑀦𑀯𑀫𑁂 𑀫𑀺𑀘𑁆𑀙𑀸𑀧𑀝𑀺𑀧𑀢𑁆𑀢𑀸𑀥𑀺𑀓𑀭𑀡𑀳𑁂𑀢𑀽𑀢𑀺 𑀏𑀢𑁆𑀣 𑀅𑀥𑀺-𑀲𑀤𑁆𑀤𑁄 𑀅𑀦𑀢𑁆𑀣𑀓𑁄𑀢𑀺 𑀆𑀳 ‘‘𑀫𑀺𑀘𑁆𑀙𑀸𑀧𑀝𑀺𑀧𑀢𑁆𑀢𑀺𑀬𑀸 𑀓𑀭𑀡𑀳𑁂𑀢𑀽’’𑀢𑀺. 𑀦 𑀆𑀭𑀸𑀥𑀓𑁄𑀢𑀺 𑀦 𑀲𑀫𑁆𑀧𑀸𑀤𑀓𑁄 𑀦 𑀧𑀭𑀺𑀧𑀽𑀭𑀓𑁄. 𑀜𑀸𑀬𑀢𑀺 𑀧𑀝𑀺𑀯𑀺𑀚𑁆𑀛𑀦𑀯𑀲𑁂𑀦 𑀦𑀺𑀩𑁆𑀩𑀸𑀦𑀁 𑀕𑀘𑁆𑀙𑀢𑀻𑀢𑀺 𑀜𑀸𑀬𑁄, 𑀲𑁄 𑀏𑀯 𑀢𑀁𑀲𑀫𑀗𑁆𑀕𑀺𑀦𑀁 𑀯𑀝𑁆𑀝𑀤𑀼𑀓𑁆𑀔𑀧𑀸𑀢𑀢𑁄 𑀥𑀸𑀭𑀡𑀝𑁆𑀞𑁂𑀦 𑀥𑀫𑁆𑀫𑁄𑀢𑀺 𑀜𑀸𑀬𑁄 𑀥𑀫𑁆𑀫𑁄, 𑀅𑀭𑀺𑀬𑀫𑀕𑁆𑀕𑁄. 𑀲𑁄 𑀧𑀦𑁂𑀢𑁆𑀣 𑀲𑀳 𑀯𑀺𑀧𑀲𑁆𑀲𑀦𑀸𑀬 𑀅𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀲𑀳𑀯𑀺𑀧𑀲𑁆𑀲𑀦𑀓𑀁 𑀫𑀕𑁆𑀕’’𑀦𑁆𑀢𑀺. 𑀆𑀭𑀸𑀥𑀦𑀁 𑀦𑀸𑀫 𑀲𑀁𑀲𑀺𑀤𑁆𑀥𑀺, 𑀲𑀸 𑀧𑀦 𑀬𑀲𑁆𑀫𑀸 𑀲𑀫𑁆𑀧𑀸𑀤𑀦𑁂𑀦 𑀧𑀭𑀺𑀧𑀽𑀭𑀡𑁂𑀦 𑀇𑀘𑁆𑀙𑀺𑀢𑀸, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀲𑀫𑁆𑀧𑀸𑀤𑁂𑀢𑀼𑀁 𑀧𑀽𑀭𑁂𑀢𑀼’’𑀦𑁆𑀢𑀺.

𑁪𑁨. 𑀤𑀲𑀫𑁂 𑀤𑀼𑀕𑁆𑀕𑀳𑀺𑀢𑁂𑀳𑀻𑀢𑀺 𑀅𑀢𑁆𑀣𑀢𑁄 𑀩𑁆𑀬𑀜𑁆𑀚𑀦𑀢𑁄 𑀘 𑀤𑀼𑀝𑁆𑀞𑀼 𑀕𑀳𑀺𑀢𑁂𑀳𑀺, 𑀊𑀦𑀸𑀥𑀺𑀓𑀯𑀺𑀧𑀭𑀻𑀢𑀧𑀤𑀧𑀘𑁆𑀘𑀸𑀪𑀝𑁆𑀞𑀸𑀤𑀺𑀯𑀲𑁂𑀦 𑀯𑀺𑀮𑁄𑀫𑁂𑀢𑁆𑀯𑀸 𑀕𑀳𑀺𑀢𑁂𑀳𑀻𑀢𑀺 𑀅𑀢𑁆𑀣𑁄. 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀕𑀳𑀺𑀢𑁂𑀳𑀻𑀢𑀺 𑀇𑀤𑀁 𑀧𑀦 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀤𑀼𑀕𑁆𑀕𑀳𑀲𑁆𑀲 𑀊𑀦𑀸𑀥𑀺𑀓𑀸𑀤𑀺𑀯𑀲𑁂𑀦𑀧𑀺 𑀲𑀫𑁆𑀪𑀯𑀢𑁄. 𑀢𑁂𑀦𑁂𑀯𑀸𑀳 ‘‘𑀅𑀢𑁆𑀢𑀦𑁄 𑀤𑀼𑀕𑁆𑀕𑀳𑀺𑀢𑀲𑀼𑀢𑁆𑀢𑀦𑁆𑀢𑀸𑀦𑀁𑀬𑁂𑀯 𑀅𑀢𑁆𑀣𑀜𑁆𑀘 𑀧𑀸𑀴𑀺𑀜𑁆𑀘 𑀉𑀢𑁆𑀢𑀭𑀺𑀢𑀭𑀁 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑀻’’𑀢𑀺.