𑀘𑀢𑀼𑀢𑁆𑀣𑁄 𑀧𑀭𑀺𑀘𑁆𑀙𑁂𑀤𑁄

𑁪. 𑀯𑀻𑀣𑀺𑀧𑀭𑀺𑀓𑀫𑁆𑀫𑀓𑀣𑀸

𑁧𑁨𑁬. 𑀧𑀞𑀫𑀸𑀯𑀚𑁆𑀚𑀦𑀁 𑀧𑀜𑁆𑀘-𑀤𑀲𑀦𑁆𑀦𑀁 𑀧𑀭𑀢𑁄 𑀪𑀯𑁂;

𑀤𑀼𑀢𑀺𑀬𑀸𑀯𑀚𑁆𑀚𑀦𑀁 𑀳𑁄𑀢𑀺, 𑀏𑀓𑀯𑀻𑀲𑀢𑀺𑀢𑁄 𑀧𑀭𑀁.

𑁧𑁨𑁭. 𑀏𑀓𑀫𑁆𑀳𑀸 𑀧𑀜𑁆𑀘𑀯𑀺𑀜𑁆𑀜𑀸𑀡𑀁, 𑀧𑀜𑁆𑀘𑀫𑁆𑀳𑀸 𑀲𑀫𑁆𑀧𑀝𑀺𑀘𑁆𑀙𑀦𑀁;

𑀲𑀼𑀔𑀲𑀦𑁆𑀢𑀻𑀭𑀡𑀁 𑀳𑁄𑀢𑀺, 𑀧𑀜𑁆𑀘𑀯𑀻𑀲𑀢𑀺𑀢𑁄 𑀧𑀭𑀁.

𑁧𑁨𑁮. 𑀲𑀢𑁆𑀢𑀢𑀺𑀁𑀲𑀢𑀺𑀢𑁄 𑀳𑁄𑀢𑀺, 𑀉𑀧𑁂𑀓𑁆𑀔𑀸𑀢𑀻𑀭𑀡𑀤𑁆𑀯𑀬𑀁;

𑀯𑁄𑀝𑁆𑀞𑀩𑁆𑀩𑀦𑀲𑀭𑀽𑀧𑀸𑀦𑀁, 𑀤𑁆𑀯𑀺𑀦𑁆𑀦𑀁 𑀓𑀸𑀫𑀚𑀯𑀸 𑀧𑀭𑀁.

𑁧𑁨𑁯. 𑀫𑀕𑁆𑀕𑀸𑀪𑀺𑀜𑁆𑀜𑀸 𑀧𑀭𑀁 𑀤𑁆𑀯𑀺𑀦𑁆𑀦𑀁, 𑀢𑀺𑀡𑁆𑀡𑀦𑁆𑀦𑀁 𑀮𑁄𑀓𑀺𑀬𑀧𑁆𑀧𑀦𑀸;

𑀨𑀮𑀸 𑀘𑀢𑀼𑀦𑁆𑀦𑀁 𑀧𑀜𑁆𑀘𑀦𑁆𑀦𑀁, 𑀉𑀧𑀭𑀺𑀝𑁆𑀞𑀨𑀮𑀤𑁆𑀯𑀬𑀁.

𑁧𑁩𑁦. 𑀪𑀯𑀦𑁆𑀢𑀺 𑀘𑀢𑁆𑀢𑀸𑀮𑀻𑀲𑀫𑁆𑀳𑀸, 𑀲𑀼𑀔𑀧𑀸𑀓𑀸 𑀤𑁆𑀯𑀺𑀳𑁂𑀢𑀼𑀓𑀸;

𑀢𑀣𑁂𑀓𑀘𑀢𑁆𑀢𑀸𑀮𑀻𑀲𑀫𑁆𑀳𑀸, 𑀉𑀧𑁂𑀓𑁆𑀔𑀸𑀬 𑀲𑀫𑀸𑀬𑀼𑀢𑀸.

𑁧𑁩𑁧. 𑀳𑁄𑀦𑁆𑀢𑀺 𑀲𑀢𑁆𑀢𑀢𑀺𑀢𑁄 𑀓𑀸𑀫𑁂, 𑀲𑀼𑀔𑀧𑀸𑀓𑀸 𑀢𑀺𑀳𑁂𑀢𑀼𑀓𑀸;

𑀤𑁆𑀯𑀸𑀲𑀢𑁆𑀢𑀢𑀺𑀫𑁆𑀳𑀸 𑀚𑀸𑀬𑀦𑁆𑀢𑀺, 𑀉𑀧𑁂𑀓𑁆𑀔𑀸𑀲𑀳𑀺𑀢𑀸 𑀧𑀦.

𑁧𑁩𑁨. 𑀏𑀓𑀽𑀦𑀲𑀝𑁆𑀞𑀺𑀢𑁄 𑀭𑀽𑀧-𑀧𑀸𑀓𑀸 𑀧𑀸𑀓𑀸 𑀅𑀭𑀽𑀧𑀺𑀦𑁄;

𑀓𑀫𑀸𑀝𑁆𑀞𑀘𑀢𑁆𑀢𑀸𑀮𑀻𑀲𑀫𑁆𑀳𑀸, 𑀢𑀣𑁂𑀓𑀤𑁆𑀯𑀺𑀢𑀺𑀳𑀻𑀦𑀢𑁄.

𑁧𑁩𑁩. 𑀧𑀼𑀩𑁆𑀩𑀲𑀗𑁆𑀕𑀳𑀫𑀺𑀘𑁆𑀘𑁂𑀯𑀁, 𑀯𑀺𑀕𑀡𑁂𑀢𑁆𑀯𑀸 𑀯𑀺𑀘𑀓𑁆𑀔𑀡𑁄;

𑀧𑀭𑀲𑀗𑁆𑀕𑀳𑀲𑀗𑁆𑀔𑁆𑀬𑀸𑀤𑀺𑀁, 𑀯𑀺𑀪𑀸𑀯𑁂𑀬𑁆𑀬 𑀯𑀺𑀲𑀸𑀭𑀤𑁄.

𑁧𑁩𑁪. 𑀧𑀜𑁆𑀘𑀤𑁆𑀯𑀸𑀭𑀸𑀯𑀚𑁆𑀚𑀦𑀢𑁄, 𑀤𑀲 𑀘𑀺𑀢𑁆𑀢𑀸𑀦𑀺 𑀤𑀻𑀧𑀬𑁂;

𑀲𑁂𑀲𑀸𑀯𑀚𑁆𑀚𑀦𑀢𑁄 𑀧𑀜𑁆𑀘𑀘𑀢𑁆𑀢𑀸𑀮𑀻𑀲𑀦𑁆𑀢𑀺 𑀪𑀸𑀲𑀺𑀢𑀁.

𑁧𑁩𑁫. 𑀧𑀜𑁆𑀘𑀯𑀺𑀜𑁆𑀜𑀸𑀡𑀢𑁄 𑀧𑀸𑀧𑀯𑀺𑀧𑀸𑀓𑀸 𑀲𑀫𑁆𑀧𑀝𑀺𑀘𑁆𑀙𑀦𑀸;

𑀧𑀭𑀫𑁂𑀓𑀁 𑀤𑁆𑀯𑀬𑀁 𑀧𑀼𑀜𑁆𑀜𑀯𑀺𑀧𑀸𑀓𑀸 𑀲𑀫𑁆𑀧𑀝𑀺𑀘𑁆𑀙𑀦𑀸.

𑁧𑁩𑁬. 𑀲𑀦𑁆𑀢𑀻𑀭𑀡𑀸 𑀤𑁆𑀯𑀺𑀳𑁂𑀢𑀼𑀫𑁆𑀳𑀸, 𑀧𑀸𑀓𑀸 𑀤𑁆𑀯𑀸𑀤𑀲 𑀚𑀸𑀬𑀭𑁂;

𑀢𑀺𑀳𑁂𑀢𑀼𑀓𑀸𑀫𑀧𑀸𑀓𑀫𑁆𑀳𑀸, 𑀏𑀓𑀯𑀻𑀲𑀢𑀺 𑀮𑀩𑁆𑀪𑀭𑁂.

𑁧𑁩𑁭. 𑀭𑀽𑀧𑀸𑀯𑀘𑀭𑀧𑀸𑀓𑀫𑁆𑀳𑀸, 𑀧𑀭𑀫𑁂𑀓𑀽𑀦𑀯𑀻𑀲𑀢𑀺;

𑀦𑀯𑀝𑁆𑀞𑀸𑀭𑀽𑀧𑀧𑀸𑀓𑀫𑁆𑀳𑀸, 𑀲𑀢𑁆𑀢 𑀙𑀸𑀧𑀺 𑀬𑀣𑀸𑀓𑁆𑀓𑀫𑀁.

𑁧𑁩𑁮. 𑀧𑀝𑀺𑀖𑀫𑁆𑀳𑀸 𑀢𑀼 𑀲𑀢𑁆𑀢𑁂𑀯, 𑀲𑀺𑀢𑀫𑁆𑀳𑀸 𑀢𑁂𑀭𑀲𑁂𑀭𑀺𑀢𑀸;

𑀧𑀸𑀧𑀧𑀼𑀜𑁆𑀜𑀤𑁆𑀯𑀺𑀳𑁂𑀢𑀼𑀫𑁆𑀳𑀸, 𑀏𑀓𑀯𑀻𑀲𑀢𑀺 𑀪𑀸𑀯𑀬𑁂.

𑁧𑁩𑁯. 𑀤𑁆𑀯𑀺𑀳𑁂𑀢𑀼𑀓𑀸𑀫𑀓𑁆𑀭𑀺𑀬𑀢𑁄, 𑀅𑀝𑁆𑀞𑀸𑀭𑀲 𑀉𑀧𑁂𑀓𑁆𑀔𑀓𑀸;

𑀲𑀢𑁆𑀢𑀭𑀲 𑀲𑀼𑀔𑁄𑀧𑁂𑀢𑀸, 𑀯𑀺𑀪𑀸𑀯𑁂𑀬𑁆𑀬 𑀯𑀺𑀘𑀓𑁆𑀔𑀡𑁄.

𑁧𑁪𑁦. 𑀓𑀸𑀫𑀧𑀼𑀜𑁆𑀜𑀢𑀺𑀳𑁂𑀢𑀼𑀫𑁆𑀳𑀸, 𑀢𑁂𑀢𑁆𑀢𑀺𑀁𑀲𑁂𑀯 𑀉𑀧𑁂𑀓𑁆𑀔𑀓𑀸;

𑀢𑁂𑀧𑀜𑁆𑀜𑀸𑀲 𑀲𑀼𑀔𑁄𑀧𑁂𑀢𑀸, 𑀪𑀯𑀦𑁆𑀢𑀻𑀢𑀺 𑀧𑀓𑀸𑀲𑀺𑀢𑀁.

𑁧𑁪𑁧. 𑀢𑀺𑀳𑁂𑀢𑀼𑀓𑀸𑀫𑀓𑁆𑀭𑀺𑀬𑀢𑁄, 𑀘𑀢𑀼𑀯𑀻𑀲𑀢𑀺𑀧𑁂𑀓𑁆𑀔𑀓𑀸;

𑀲𑀼𑀔𑀺𑀢𑀫𑁆𑀳𑀸 𑀢𑀼 𑀤𑀻𑀧𑁂𑀬𑁆𑀬, 𑀧𑀜𑁆𑀘𑀯𑀻𑀲𑀢𑀺 𑀧𑀡𑁆𑀟𑀺𑀢𑁄.

𑁧𑁪𑁨. 𑀤𑀲𑀭𑀽𑀧𑀚𑀯𑀫𑁆𑀳𑁂𑀓𑀸-𑀤𑀲𑀤𑁆𑀯𑀸𑀤𑀲 𑀢𑁂𑀭𑀲;

𑀬𑀣𑀸𑀓𑁆𑀓𑀫𑀁 𑀧𑀜𑁆𑀘𑀤𑀲, 𑀆𑀭𑀼𑀧𑁆𑀧𑀸 𑀧𑀭𑀺𑀤𑀻𑀧𑀬𑁂.

𑁧𑁪𑁩. 𑀨𑀮𑀫𑁆𑀳𑀸 𑀘𑀼𑀤𑁆𑀤𑀲𑁂𑀯𑀸𑀳𑀼, 𑀫𑀕𑁆𑀕𑀫𑁆𑀳𑀸 𑀢𑀼 𑀲𑀓𑀁 𑀨𑀮𑀁;

𑀧𑀭𑀁 𑀲𑀗𑁆𑀕𑀳𑀫𑀺𑀘𑁆𑀘𑁂𑀯𑀁, 𑀯𑀺𑀕𑀡𑁂𑀬𑁆𑀬 𑀯𑀺𑀲𑀸𑀭𑀤𑁄.

𑁧𑁪𑁪. 𑀧𑀼𑀩𑁆𑀩𑀸𑀧𑀭𑀲𑀫𑁄𑀥𑀸𑀦-𑀫𑀺𑀢𑀺 𑀜𑀢𑁆𑀯𑀸 𑀢𑀢𑁄 𑀧𑀭𑀁;

𑀯𑀢𑁆𑀣𑀼𑀯𑀻𑀣𑀺𑀲𑀫𑁄𑀥𑀸𑀦𑀁, 𑀬𑀣𑀸𑀲𑀫𑁆𑀪𑀯𑀫𑀼𑀤𑁆𑀤𑀺𑀲𑁂.

𑁧𑁪𑁫. 𑀧𑀜𑁆𑀘 𑀯𑀢𑁆𑀣𑀽𑀦𑀺 𑀦𑀺𑀲𑁆𑀲𑀸𑀬, 𑀓𑀫𑀢𑁄 𑀧𑀜𑁆𑀘𑀫𑀸𑀦𑀲𑀸;

𑀢𑁂𑀢𑁆𑀢𑀺𑀁𑀲 𑀧𑀦 𑀦𑀺𑀲𑁆𑀲𑀸𑀬, 𑀳𑀤𑀬𑀁 𑀫𑀸𑀦𑀲𑀸 𑀲𑀺𑀬𑀼𑀁.

𑁧𑁪𑁬. 𑀓𑀸𑀫𑀧𑀸𑀓𑀫𑀦𑁄𑀥𑀸𑀢𑀼-𑀳𑀲𑀺𑀢𑀼𑀧𑁆𑀧𑀸𑀤𑀫𑀸𑀦𑀲𑀸;

𑀤𑁄𑀲𑀫𑀽𑀮𑀸𑀦𑀺 𑀫𑀕𑁆𑀕𑁄 𑀘, 𑀭𑀽𑀧𑀚𑁆𑀛𑀸𑀦𑀸𑀯 𑀲𑀩𑁆𑀩𑀣𑀸.

𑁧𑁪𑁭. 𑀤𑀲𑀸𑀯𑀲𑁂𑀲𑀸𑀧𑀼𑀜𑁆𑀜𑀸𑀦𑀺, 𑀓𑀸𑀫𑀧𑀼𑀜𑁆𑀜𑀫𑀳𑀸𑀓𑁆𑀭𑀺𑀬𑀸;

𑀯𑁄𑀝𑁆𑀞𑀩𑁆𑀩𑀸𑀭𑀽𑀧𑀚𑀯𑀦𑀁, 𑀲𑀢𑁆𑀢 𑀮𑁄𑀓𑀼𑀢𑁆𑀢𑀭𑀸𑀦𑀺 𑀘.

𑁧𑁪𑁮. 𑀤𑁆𑀯𑁂𑀘𑀢𑁆𑀢𑀸𑀮𑀻𑀲 𑀘𑀺𑀢𑁆𑀢𑀸𑀦𑀺, 𑀧𑀜𑁆𑀘𑀯𑁄𑀓𑀸𑀭𑀪𑀽𑀫𑀺𑀬𑀁;

𑀦𑀺𑀲𑁆𑀲𑀸𑀬 𑀳𑀤𑀬𑀁 𑀳𑁄𑀦𑁆𑀢𑀺, 𑀅𑀭𑀽𑀧𑁂 𑀦𑀺𑀲𑁆𑀲𑀬𑀁 𑀯𑀺𑀦𑀸.

𑁧𑁪𑁯. 𑀆𑀭𑀼𑀧𑁆𑀧𑀧𑀸𑀓𑀸 𑀘𑀢𑁆𑀢𑀸𑀭𑁄, 𑀅𑀦𑀺𑀲𑁆𑀲𑀸𑀬𑁂𑀢𑀺 𑀲𑀩𑁆𑀩𑀣𑀸;

𑀯𑀺𑀢𑁆𑀣𑀸𑀭𑁂𑀦𑀝𑁆𑀞𑀥𑀸 𑀪𑀺𑀦𑁆𑀦𑀁, 𑀲𑀗𑁆𑀔𑁂𑀧𑀸 𑀢𑀺𑀯𑀺𑀥𑀁 𑀪𑀯𑁂.

𑁧𑁫𑁦. 𑀢𑁂𑀘𑀢𑁆𑀢𑀸𑀮𑀻𑀲 𑀦𑀺𑀲𑁆𑀲𑀸𑀬, 𑀅𑀦𑀺𑀲𑁆𑀲𑀸𑀬 𑀘𑀢𑀼𑀩𑁆𑀩𑀺𑀥𑀁;

𑀦𑀺𑀲𑁆𑀲𑀺𑀢𑀸𑀦𑀺𑀲𑁆𑀲𑀺𑀢𑀸 𑀲𑁂𑀲𑀸, 𑀤𑁆𑀯𑁂𑀘𑀢𑁆𑀢𑀸𑀮𑀻𑀲 𑀫𑀸𑀦𑀲𑀸.

𑁧𑁫𑁧. 𑀧𑀜𑁆𑀘 𑀘𑀺𑀢𑁆𑀢𑀧𑁆𑀧𑀦𑀸 𑀳𑁄𑀦𑁆𑀢𑀺, 𑀓𑀫𑁂𑀦𑁂𑀓𑁂𑀓𑀯𑀻𑀣𑀺𑀬𑀁;

𑀫𑀦𑁄𑀥𑀸𑀢𑀼𑀢𑁆𑀢𑀺𑀓𑀁 𑀦𑀸𑀫, 𑀧𑀜𑁆𑀘𑀤𑁆𑀯𑀸𑀭𑀺𑀓𑀫𑀻𑀭𑀺𑀢𑀁.

𑁧𑁫𑁨. 𑀲𑀼𑀔𑀢𑀻𑀭𑀡𑀯𑁄𑀝𑁆𑀞𑀩𑁆𑀩-𑀧𑀭𑀺𑀢𑁆𑀢𑀚𑀯𑀦𑀸 𑀧𑀦;

𑀏𑀓𑀢𑀺𑀁𑀲𑀸𑀧𑀺 𑀚𑀸𑀬𑀦𑁆𑀢𑁂, 𑀙𑀲𑀼 𑀯𑀻𑀣𑀻𑀲𑀼 𑀲𑀫𑁆𑀪𑀯𑀸.

𑁧𑁫𑁩. 𑀫𑀳𑀸𑀧𑀸𑀓𑀸 𑀧𑀦𑀝𑁆𑀞𑀸𑀧𑀺, 𑀉𑀧𑁂𑀓𑁆𑀔𑀸𑀢𑀻𑀭𑀡𑀤𑁆𑀯𑀬𑀁;

𑀙𑀲𑀼 𑀤𑁆𑀯𑀸𑀭𑁂𑀲𑀼 𑀚𑀸𑀬𑀦𑁆𑀢𑀺, 𑀤𑀲 𑀫𑀼𑀢𑁆𑀢𑀸 𑀘 𑀯𑀻𑀣𑀺𑀬𑀸.

𑁧𑁫𑁪. 𑀘𑀼𑀢𑀺𑀲𑀦𑁆𑀥𑀺𑀪𑀯𑀗𑁆𑀕𑀸𑀦𑀁, 𑀯𑀲𑀸 𑀧𑀸𑀓𑀸 𑀫𑀳𑀕𑁆𑀕𑀢𑀸;

𑀦𑀯 𑀯𑀻𑀣𑀺𑀯𑀺𑀫𑀼𑀢𑁆𑀢𑀸𑀢𑀺, 𑀤𑀲𑀥𑀸 𑀯𑀻𑀣𑀺𑀲𑀗𑁆𑀕𑀳𑁄.

𑁧𑁫𑁫. 𑀏𑀓𑀤𑁆𑀯𑀸𑀭𑀺𑀓𑀘𑀺𑀢𑁆𑀢𑀸𑀦𑀺, 𑀧𑀜𑁆𑀘𑀙𑀤𑁆𑀯𑀸𑀭𑀺𑀓𑀸 𑀢𑀣𑀸;

𑀙𑀤𑁆𑀯𑀸𑀭𑀺𑀓𑀯𑀺𑀫𑀼𑀢𑁆𑀢𑀸 𑀘, 𑀯𑀺𑀫𑀼𑀢𑁆𑀢𑀸𑀢𑀺 𑀘 𑀲𑀩𑁆𑀩𑀣𑀸.

𑁧𑁫𑁬. 𑀙𑀢𑁆𑀢𑀺𑀁𑀲 𑀢𑀬𑁂𑀓𑀢𑀺𑀁𑀲, 𑀤𑀲 𑀘𑁂𑀯 𑀦𑀯𑁂𑀢𑀺 𑀘;

𑀜𑀢𑁆𑀯𑀸 𑀯𑀻𑀣𑀺𑀲𑀫𑁄𑀥𑀸𑀦𑀁, 𑀕𑁄𑀘𑀭𑀜𑁆𑀘 𑀲𑀫𑀼𑀤𑁆𑀤𑀺𑀲𑁂.

𑁧𑁫𑁭. 𑀓𑀫𑀢𑁄 𑀧𑀜𑁆𑀘𑀯𑀺𑀜𑁆𑀜𑀸𑀡𑀸, 𑀮𑁄𑀓𑀼𑀢𑁆𑀢𑀭𑀫𑀳𑀕𑁆𑀕𑀢𑀸;

𑀅𑀪𑀺𑀜𑁆𑀜𑀸𑀯𑀚𑁆𑀚𑀺𑀢𑀸 𑀲𑀩𑁆𑀩𑀸, 𑀧𑀜𑁆𑀘𑀢𑀸𑀮𑀻𑀲 𑀫𑀸𑀦𑀲𑀸.

𑁧𑁫𑁮. 𑀬𑀣𑀸𑀲𑀫𑁆𑀪𑀯𑀢𑁄 𑀳𑁄𑀦𑁆𑀢𑀺, 𑀭𑀽𑀧𑀸𑀤𑁂𑀓𑁂𑀓𑀕𑁄𑀘𑀭𑀸;

𑀧𑀜𑁆𑀘𑀕𑁄𑀘𑀭𑀫𑀻𑀭𑁂𑀦𑁆𑀢𑀺, 𑀫𑀦𑁄𑀥𑀸𑀢𑀼𑀢𑁆𑀢𑀺𑀓𑀁 𑀧𑀦.

𑁧𑁫𑁯. 𑀲𑀦𑁆𑀢𑀻𑀭𑀡𑀫𑀳𑀸𑀧𑀸𑀓𑀸, 𑀧𑀭𑀺𑀢𑁆𑀢𑀚𑀯𑀦𑀸𑀦𑀺 𑀘;

𑀯𑁄𑀝𑁆𑀞𑀩𑁆𑀩𑀦𑀫𑀪𑀺𑀜𑁆𑀜𑀸 𑀘, 𑀢𑁂𑀘𑀢𑁆𑀢𑀸𑀮𑀻𑀲 𑀲𑀫𑁆𑀪𑀯𑀸.

𑁧𑁬𑁦. 𑀙𑀸𑀭𑀫𑁆𑀫𑀡𑁂𑀲𑀼 𑀳𑁄𑀦𑁆𑀢𑀻𑀢𑀺, 𑀅𑀝𑁆𑀞𑀥𑀸 𑀢𑀺𑀯𑀺𑀥𑀸 𑀧𑀼𑀦;

𑀏𑀓𑀸𑀭𑀫𑁆𑀫𑀡𑀘𑀺𑀢𑁆𑀢𑀸𑀦𑀺, 𑀧𑀜𑁆𑀘𑀙𑀸𑀭𑀫𑁆𑀫𑀡𑀸𑀦𑀺 𑀘.

𑁧𑁬𑁧. 𑀲𑀗𑁆𑀔𑁂𑀧𑀸 𑀫𑀸𑀦𑀲𑀸 𑀧𑀜𑁆𑀘-𑀘𑀢𑁆𑀢𑀸𑀮𑀻𑀲 𑀢𑀬𑁄 𑀢𑀣𑀸;

𑀢𑁂𑀘𑀢𑁆𑀢𑀸𑀮𑀻𑀲 𑀘𑁂𑀯𑁂𑀢𑀺, 𑀲𑀢𑁆𑀢𑀥𑀸𑀧𑀺 𑀲𑀺𑀬𑀼𑀁 𑀓𑀣𑀁.

𑁧𑁬𑁨. 𑀓𑀸𑀫𑀧𑀸𑀓𑀫𑀦𑁄𑀥𑀸𑀢𑀼-𑀳𑀲𑀺𑀢𑀼𑀧𑁆𑀧𑀸𑀤𑀫𑀸𑀦𑀲𑀸;

𑀧𑀜𑁆𑀘𑀯𑀻𑀲 𑀬𑀣𑀸𑀬𑁄𑀕𑀁, 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸 𑀫𑀢𑀸.

𑁧𑁬𑁩. 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑀁, 𑀧𑀞𑀫𑀸𑀭𑀼𑀧𑁆𑀧𑀫𑀸𑀦𑀲𑀁;

𑀢𑀲𑁆𑀲𑁂𑀯 𑀦𑀢𑁆𑀣𑀺𑀪𑀸𑀯𑀁 𑀢𑀼, 𑀢𑀢𑀺𑀬𑀸𑀭𑀼𑀧𑁆𑀧𑀓𑀁 𑀢𑀣𑀸.

𑁧𑁬𑁪. 𑀆𑀮𑀫𑁆𑀩𑀺𑀢𑁆𑀯𑀸 𑀧𑀯𑀢𑁆𑀢𑀦𑁆𑀢𑀺, 𑀆𑀭𑀼𑀧𑁆𑀧𑀸 𑀓𑀫𑀢𑁄 𑀢𑀢𑁄;

𑀤𑀼𑀢𑀺𑀬𑀜𑁆𑀘 𑀘𑀢𑀼𑀢𑁆𑀣𑀜𑁆𑀘, 𑀙 𑀫𑀳𑀕𑁆𑀕𑀢𑀕𑁄𑀘𑀭𑀸.

𑁧𑁬𑁫. 𑀅𑀧𑁆𑀧𑀫𑀸𑀡𑀲𑀫𑀜𑁆𑀜𑀸 𑀢𑁂, 𑀦𑀺𑀩𑁆𑀩𑀸𑀦𑁂 𑀧𑀦 𑀕𑁄𑀘𑀭𑁂;

𑀅𑀝𑁆𑀞 𑀮𑁄𑀓𑀼𑀢𑁆𑀢𑀭𑀸 𑀥𑀫𑁆𑀫𑀸, 𑀦𑀺𑀬𑀫𑁂𑀦 𑀯𑀯𑀢𑁆𑀣𑀺𑀢𑀸.

𑁧𑁬𑁬. 𑀓𑀲𑀺𑀡𑀸𑀲𑀼𑀪𑀓𑁄𑀝𑁆𑀞𑀸𑀲𑁂,

𑀆𑀦𑀸𑀧𑀸𑀦𑁂 𑀘 𑀬𑁄𑀕𑀺𑀦𑁄;

𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀫𑁆𑀳𑀺,

𑀅𑀧𑁆𑀧𑀫𑀜𑁆𑀜𑀸𑀦𑀼𑀬𑀼𑀜𑁆𑀚𑀢𑁄.

𑁧𑁬𑁭. 𑀲𑀢𑁆𑀢𑀧𑀡𑁆𑀡𑀢𑁆𑀢𑀺𑀬𑀜𑁆𑀘𑁂𑀯, 𑀭𑀽𑀧𑀚𑁆𑀛𑀸𑀦𑀁 𑀧𑀯𑀢𑁆𑀢𑀢𑀺;

𑀬𑀣𑀸𑀯𑀼𑀢𑁆𑀢𑀦𑀺𑀫𑀺𑀢𑁆𑀢𑀫𑁆𑀳𑀺, 𑀲𑁂𑀲𑀫𑀸𑀭𑀼𑀧𑁆𑀧𑀓𑀦𑁆𑀢𑀺 𑀘.

𑁧𑁬𑁮. 𑀅𑀪𑀺𑀜𑁆𑀜𑀸𑀯𑀚𑁆𑀚𑀺𑀢𑀸 𑀏𑀓𑀯𑀻𑀲 𑀫𑀳𑀕𑁆𑀕𑀢𑀸 𑀲𑀩𑁆𑀩𑀸;

𑀲𑀩𑁆𑀩𑁂 𑀧𑀡𑁆𑀡𑀢𑁆𑀢𑀺𑀲𑀗𑁆𑀔𑀸𑀢𑁂, 𑀦𑀯𑀢𑁆𑀢𑀩𑁆𑀩𑁂 𑀧𑀯𑀢𑁆𑀢𑀭𑁂.

𑁧𑁬𑁯. 𑀚𑀸𑀬𑀦𑁆𑀢𑀸𑀓𑀼𑀲𑀮𑀸 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀚𑀯𑀸 𑀢𑀣𑀸;

𑀅𑀧𑁆𑀧𑀫𑀸𑀡𑀁 𑀯𑀺𑀦𑀸 𑀯𑀻𑀲, 𑀧𑀭𑀺𑀢𑁆𑀢𑀸𑀤𑀻𑀲𑀼 𑀢𑀻𑀲𑀼𑀧𑀺.

𑁧𑁭𑁦. 𑀢𑀺𑀳𑁂𑀢𑀼𑀓𑀸𑀫𑀧𑀼𑀜𑁆𑀜𑀸𑀦𑀺, 𑀧𑀼𑀜𑁆𑀜𑀸𑀪𑀺𑀜𑁆𑀜𑀸 𑀘 𑀧𑀜𑁆𑀘𑀺𑀫𑁂;

𑀘𑀢𑀽𑀲𑀼𑀧𑀺 𑀧𑀯𑀢𑁆𑀢𑀦𑁆𑀢𑀺, 𑀅𑀭𑀳𑀢𑁆𑀢𑀤𑁆𑀯𑀬𑀁 𑀯𑀺𑀦𑀸.

𑁧𑁭𑁧. 𑀓𑁆𑀭𑀺𑀬𑀸𑀪𑀺𑀜𑁆𑀜𑀸 𑀘 𑀯𑁄𑀝𑁆𑀞𑀩𑁆𑀩𑀁, 𑀓𑁆𑀭𑀺𑀬𑀸𑀓𑀸𑀫𑁂 𑀢𑀺𑀳𑁂𑀢𑀼𑀓𑀸;

𑀙 𑀲𑀩𑁆𑀩𑀢𑁆𑀣𑀸𑀧𑀺 𑀳𑁄𑀦𑁆𑀢𑀻𑀢𑀺, 𑀲𑀢𑁆𑀢𑀥𑀸 𑀫𑀸𑀦𑀲𑀸 𑀞𑀺𑀢𑀸.

𑁧𑁭𑁨. 𑀏𑀓𑀢𑀺𑀘𑁆𑀘𑀢𑀼𑀓𑁄𑀝𑁆𑀞𑀸𑀲𑀕𑁄𑀘𑀭𑀸 𑀢𑀺𑀯𑀺𑀥𑀸 𑀧𑀦;

𑀲𑀫𑀲𑀝𑁆𑀞𑀺 𑀢𑀣𑀸 𑀯𑀻𑀲, 𑀓𑀫𑁂𑀦𑁂𑀓𑀸𑀤𑀲𑁂𑀢𑀺 𑀘.

𑁧𑁭𑁩. 𑀧𑀜𑁆𑀘𑀤𑁆𑀯𑀸𑀭𑁂𑀲𑀼 𑀧𑀜𑁆𑀘𑀸𑀧𑀺, 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀯 𑀕𑁄𑀘𑀭𑀸;

𑀢𑁂𑀓𑀸𑀮𑀺𑀓𑀸 𑀦𑀯𑀢𑁆𑀢𑀩𑁆𑀩𑀸, 𑀫𑀦𑁄𑀤𑁆𑀯𑀸𑀭𑁂 𑀬𑀣𑀸𑀭𑀳𑀁.

𑁧𑁭𑁪. 𑀅𑀚𑁆𑀛𑀢𑁆𑀢𑀸 𑀘 𑀩𑀳𑀺𑀤𑁆𑀥𑀸 𑀘, 𑀧𑀜𑁆𑀘𑀤𑁆𑀯𑀸𑀭𑁂𑀲𑀼 𑀕𑁄𑀘𑀭𑀸;

𑀫𑀦𑁄𑀤𑁆𑀯𑀸𑀭𑁂 𑀦𑀯𑀢𑁆𑀢𑀩𑁆𑀩𑁄, 𑀦𑀢𑁆𑀣𑀺𑀪𑀸𑀯𑁄𑀧𑀺 𑀮𑀩𑁆𑀪𑀢𑀺.

𑁧𑁭𑁫. 𑀧𑀜𑁆𑀘𑀤𑁆𑀯𑀸𑀭𑁂𑀲𑀼 𑀧𑀜𑁆𑀘𑀦𑁆𑀦-𑀫𑁂𑀓𑀫𑁂𑀓𑁄 𑀘 𑀕𑁄𑀘𑀭𑁄;

𑀙𑀸𑀧𑀺 𑀆𑀭𑀫𑁆𑀫𑀡𑀸 𑀳𑁄𑀦𑁆𑀢𑀺, 𑀫𑀦𑁄𑀤𑁆𑀯𑀸𑀭𑀫𑁆𑀳𑀺 𑀲𑀩𑁆𑀩𑀣𑀸.

𑁧𑁭𑁬. 𑀧𑀜𑁆𑀘𑀤𑁆𑀯𑀸𑀭𑁂𑀲𑀼 𑀕𑀳𑀺𑀢𑀁, 𑀢𑀤𑀜𑁆𑀜𑀫𑁆𑀧𑀺 𑀘 𑀕𑁄𑀘𑀭𑀁;

𑀫𑀦𑁄𑀤𑁆𑀯𑀸𑀭𑁂 𑀯𑀯𑀢𑁆𑀣𑀸𑀦𑀁, 𑀕𑀘𑁆𑀙𑀢𑀻𑀢𑀺 𑀳𑀺 𑀤𑁂𑀲𑀺𑀢𑀁.

𑁧𑁭𑁭. 𑀅𑀢𑀻𑀢𑀸 𑀯𑀢𑁆𑀢𑀫𑀸𑀦𑀸 𑀘, 𑀲𑀫𑁆𑀪𑀯𑀸 𑀓𑀸𑀫𑀲𑀦𑁆𑀥𑀺𑀬𑀸;

𑀙𑀤𑁆𑀯𑀸𑀭𑀕𑀳𑀺𑀢𑀸 𑀳𑁄𑀦𑁆𑀢𑀺, 𑀢𑀺𑀯𑀺𑀥𑀸 𑀢𑁂𑀧𑀺 𑀕𑁄𑀘𑀭𑀸.

𑁧𑁭𑁮. 𑀓𑀫𑁆𑀫𑀦𑀺𑀫𑀺𑀢𑁆𑀢𑀫𑁂𑀯𑁂𑀓𑀁, 𑀫𑀦𑁄𑀤𑁆𑀯𑀸𑀭𑁂 𑀉𑀧𑀝𑁆𑀞𑀺𑀢𑀁;

𑀦𑀯𑀢𑁆𑀢𑀩𑁆𑀩𑀫𑀢𑀻𑀢𑀜𑁆𑀘, 𑀥𑀫𑁆𑀫𑀸𑀭𑀫𑁆𑀫𑀡𑀲𑀗𑁆𑀕𑀳𑀁.

𑁧𑁭𑁯. 𑀆𑀮𑀫𑁆𑀩𑀺𑀢𑁆𑀯𑀸 𑀬𑀣𑀸𑀬𑁄𑀕𑀁, 𑀧𑀝𑀺𑀲𑀦𑁆𑀥𑀺𑀫𑀳𑀕𑁆𑀕𑀢𑀸;

𑀅𑀦𑁆𑀢𑁂 𑀘𑀼𑀢𑀺 𑀪𑀯𑁂 𑀫𑀚𑁆𑀛𑁂, 𑀪𑀯𑀗𑁆𑀕𑀫𑁆𑀧𑀺 𑀧𑀯𑀢𑁆𑀢𑀢𑀻𑀢𑀺.

𑀇𑀢𑀺 𑀘𑀺𑀢𑁆𑀢𑀯𑀺𑀪𑀸𑀕𑁂 𑀯𑀻𑀣𑀺𑀧𑀭𑀺𑀓𑀫𑁆𑀫𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀘𑀢𑀼𑀢𑁆𑀣𑁄 𑀧𑀭𑀺𑀘𑁆𑀙𑁂𑀤𑁄.