𑀧𑀜𑁆𑀘𑀫𑁄 𑀧𑀭𑀺𑀘𑁆𑀙𑁂𑀤𑁄

𑁫. 𑀪𑀽𑀫𑀺𑀧𑀼𑀕𑁆𑀕𑀮𑀓𑀣𑀸

𑁧𑁮𑁦. 𑀇𑀢𑁄 𑀧𑀭𑀁 𑀧𑀯𑀓𑁆𑀔𑀸𑀫𑀺, 𑀪𑀽𑀫𑀺𑀧𑀼𑀕𑁆𑀕𑀮𑀪𑁂𑀤𑀢𑁄;

𑀘𑀺𑀢𑁆𑀢𑀸𑀦𑀁 𑀧𑀦 𑀲𑀩𑁆𑀩𑁂𑀲𑀁, 𑀓𑀫𑀢𑁄 𑀲𑀗𑁆𑀕𑀳𑀁 𑀓𑀣𑀁.

𑁧𑁮𑁧. 𑀦𑀺𑀭𑀬𑀜𑁆𑀘 𑀢𑀺𑀭𑀘𑁆𑀙𑀸𑀦𑀬𑁄𑀦𑀺 𑀧𑁂𑀢𑀸𑀲𑀼𑀭𑀸 𑀢𑀣𑀸;

𑀘𑀢𑀼𑀭𑀸𑀧𑀸𑀬𑀪𑀽𑀫𑀻𑀢𑀺, 𑀓𑀸𑀫𑁂 𑀤𑀼𑀕𑁆𑀕𑀢𑀺𑀬𑁄 𑀫𑀢𑀸.

𑁧𑁮𑁨. 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸 𑀘, 𑀢𑀸𑀯𑀢𑀺𑀁𑀲𑀸 𑀘 𑀬𑀸𑀫𑀓𑀸;

𑀢𑀼𑀲𑀺𑀢𑀸 𑀘𑁂𑀯 𑀦𑀺𑀫𑁆𑀫𑀸𑀦𑀭𑀢𑀺𑀦𑁄 𑀯𑀲𑀯𑀢𑁆𑀢𑀺𑀦𑁄.

𑁧𑁮𑁩. 𑀙𑀴𑁂𑀢𑁂 𑀤𑁂𑀯𑀮𑁄𑀓𑀸 𑀘, 𑀫𑀸𑀦𑀯𑀸𑀢𑀺 𑀘 𑀲𑀢𑁆𑀢𑀥𑀸;

𑀓𑀸𑀫𑀲𑀼𑀕𑀢𑀺𑀬𑁄 𑀘𑁂𑀓𑀸𑀤𑀲𑀥𑀸 𑀓𑀸𑀫𑀪𑀽𑀫𑀺𑀬𑁄.

𑁧𑁮𑁪. 𑀩𑁆𑀭𑀳𑁆𑀫𑀸𑀦𑀁 𑀧𑀸𑀭𑀺𑀲𑀚𑁆𑀚𑀸 𑀘, 𑀢𑀣𑀸 𑀩𑁆𑀭𑀳𑁆𑀫𑀧𑀼𑀭𑁄𑀳𑀺𑀢𑀸;

𑀫𑀳𑀸𑀩𑁆𑀭𑀳𑁆𑀫𑀸 𑀘 𑀢𑀺𑀯𑀺𑀥𑀸, 𑀧𑀞𑀫𑀚𑁆𑀛𑀸𑀦𑀪𑀽𑀫𑀺𑀬𑁄.

𑁧𑁮𑁫. 𑀧𑀭𑀺𑀢𑁆𑀢𑀸𑀪𑀸𑀧𑁆𑀧𑀫𑀸𑀡𑀸𑀪𑀸, 𑀢𑀣𑁂𑀯𑀸𑀪𑀲𑁆𑀲𑀭𑀸𑀢𑀺 𑀘;

𑀤𑀼𑀢𑀺𑀬𑀚𑁆𑀛𑀸𑀦𑀪𑀽𑀫𑀺 𑀘, 𑀢𑀺𑀯𑀺𑀥𑀸𑀯 𑀧𑀓𑀸𑀲𑀺𑀢𑀸.

𑁧𑁮𑁬. 𑀧𑀭𑀺𑀢𑁆𑀢𑀲𑀼𑀪𑀸𑀧𑁆𑀧𑀫𑀸𑀡𑀸𑀲𑀼𑀪𑀸 𑀘 𑀲𑀼𑀪𑀓𑀺𑀡𑁆𑀳𑀓𑀸;

𑀢𑀺𑀯𑀺𑀥𑀸𑀧𑀺 𑀧𑀯𑀼𑀘𑁆𑀘𑀦𑁆𑀢𑀺, 𑀢𑀢𑀺𑀬𑀚𑁆𑀛𑀸𑀦𑀪𑀽𑀫𑀺𑀬𑁄.

𑁧𑁮𑁭. 𑀯𑁂𑀳𑀧𑁆𑀨𑀮𑀸 𑀅𑀲𑀜𑁆𑀜𑀻 𑀘, 𑀲𑀼𑀤𑁆𑀥𑀸𑀯𑀸𑀲𑀸 𑀘 𑀧𑀜𑁆𑀘𑀥𑀸;

𑀇𑀘𑁆𑀘𑁂𑀢𑀸 𑀧𑀦 𑀲𑀢𑁆𑀢𑀸𑀧𑀺, 𑀘𑀢𑀼𑀢𑁆𑀣𑀚𑁆𑀛𑀸𑀦𑀪𑀽𑀫𑀺𑀬𑁄.

𑁧𑁮𑁮. 𑀅𑀯𑀺𑀳𑀸 𑀘 𑀅𑀢𑀧𑁆𑀧𑀸 𑀘, 𑀲𑀼𑀤𑀲𑁆𑀲𑀸 𑀘 𑀲𑀼𑀤𑀲𑁆𑀲𑀺𑀦𑁄;

𑀅𑀓𑀦𑀺𑀝𑁆𑀞𑀸𑀢𑀺 𑀧𑀜𑁆𑀘𑁂𑀢𑁂, 𑀲𑀼𑀤𑁆𑀥𑀸𑀯𑀸𑀲𑀸 𑀧𑀓𑀸𑀲𑀺𑀢𑀸.

𑁧𑁮𑁯. 𑀇𑀢𑀺 𑀲𑁄𑀴𑀲𑀥𑀸 𑀪𑀺𑀦𑁆𑀦𑀸, 𑀩𑁆𑀭𑀳𑁆𑀫𑀮𑁄𑀓𑀸 𑀧𑀯𑀼𑀘𑁆𑀘𑀭𑁂;

𑀭𑀽𑀧𑀺𑀩𑁆𑀭𑀳𑁆𑀫𑀸𑀦𑀫𑀸𑀯𑀸𑀲𑀸, 𑀭𑀽𑀧𑀸𑀯𑀘𑀭𑀪𑀽𑀫𑀺𑀬𑁄.

𑁧𑁯𑁦. 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀦𑀸𑀫𑀸𑀤𑀻𑀳𑀺 𑀧𑀓𑀸𑀲𑀺𑀢𑀸;

𑀅𑀭𑀽𑀧𑀺𑀩𑁆𑀭𑀳𑁆𑀫𑀮𑁄𑀓𑀸 𑀘, 𑀘𑀢𑀼𑀥𑀸𑀭𑀽𑀧𑀪𑀽𑀫𑀺𑀬𑁄.

𑁧𑁯𑁧. 𑀲𑁄𑀢𑀸𑀧𑀦𑁆𑀦𑀸𑀤𑀺𑀪𑁂𑀤𑁂𑀦, 𑀘𑀢𑀼𑀥𑀸𑀦𑀼𑀢𑁆𑀢𑀭𑀸 𑀫𑀢𑀸;

𑀧𑀜𑁆𑀘𑀢𑀺𑀁𑀲 𑀧𑀦𑀺𑀘𑁆𑀘𑁂𑀯𑀁, 𑀲𑀩𑁆𑀩𑀣𑀸𑀧𑀺 𑀘 𑀪𑀽𑀫𑀺𑀬𑁄.

𑁧𑁯𑁨. 𑀚𑀸𑀬𑀦𑁆𑀢𑀺 𑀘𑀢𑀼𑀭𑀸𑀧𑀸𑀬𑁂, 𑀧𑀸𑀧𑀧𑀸𑀓𑀸𑀬 𑀲𑀦𑁆𑀥𑀺𑀬𑀸;

𑀓𑀸𑀫𑀸𑀯𑀘𑀭𑀤𑁂𑀯𑁂𑀲𑀼, 𑀫𑀳𑀸𑀧𑀸𑀓𑁂𑀳𑀺 𑀚𑀸𑀬𑀭𑁂.

𑁧𑁯𑁩. 𑀅𑀳𑁂𑀢𑀼𑀓𑀸 𑀧𑀼𑀜𑁆𑀜𑀧𑀸𑀓𑀸𑀳𑁂𑀢𑀼𑀓𑁂𑀦 𑀢𑀼 𑀚𑀸𑀬𑀭𑁂;

𑀪𑀼𑀫𑁆𑀫𑀤𑁂𑀯𑀫𑀦𑀼𑀲𑁆𑀲𑁂𑀲𑀼, 𑀫𑀳𑀸𑀧𑀸𑀓𑁂𑀳𑀺 𑀘𑁂𑀢𑀭𑁂.

𑁧𑁯𑁪. 𑀯𑀺𑀧𑀸𑀓𑀁 𑀧𑀞𑀫𑀚𑁆𑀛𑀸𑀦𑀁, 𑀧𑀞𑀫𑀚𑁆𑀛𑀸𑀦𑀪𑀽𑀫𑀺𑀬𑀁;

𑀤𑀼𑀢𑀺𑀬𑀁 𑀢𑀢𑀺𑀬𑀜𑁆𑀘𑁂𑀯, 𑀤𑀼𑀢𑀺𑀬𑀚𑁆𑀛𑀸𑀦𑀪𑀽𑀫𑀺𑀬𑀁.

𑁧𑁯𑁫. 𑀢𑀢𑀺𑀬𑀫𑁆𑀳𑀺 𑀘𑀢𑀼𑀢𑁆𑀣𑀁 𑀢𑀼, 𑀘𑀢𑀼𑀢𑁆𑀣𑀫𑁆𑀳𑀺 𑀘 𑀧𑀜𑁆𑀘𑀫𑀁;

𑀆𑀭𑀼𑀧𑁆𑀧𑀸 𑀘 𑀓𑀫𑁂𑀦𑁂𑀯, 𑀆𑀭𑀼𑀧𑁆𑀧𑁂 𑀳𑁄𑀦𑁆𑀢𑀺 𑀲𑀦𑁆𑀥𑀺𑀬𑁄.

𑁧𑁯𑁬. 𑀓𑀸𑀬𑀯𑀸𑀘𑀸𑀫𑀦𑁄𑀤𑁆𑀯𑀸𑀭𑁂, 𑀓𑀫𑁆𑀫𑀁 𑀧𑀸𑀡𑀯𑀥𑀸𑀤𑀺𑀓𑀁;

𑀓𑀢𑁆𑀯𑀸 𑀧𑀸𑀧𑀓𑀘𑀺𑀢𑁆𑀢𑁂𑀳𑀺, 𑀚𑀸𑀬𑀦𑁆𑀢𑀸𑀧𑀸𑀬𑀪𑀽𑀫𑀺𑀬𑀁.

𑁧𑁯𑁭. 𑀓𑀸𑀬𑀯𑀸𑀘𑀸𑀫𑀦𑁄𑀤𑁆𑀯𑀸𑀭𑁂, 𑀤𑀸𑀦𑀁 𑀲𑀻𑀮𑀜𑁆𑀘 𑀪𑀸𑀯𑀦𑀁;

𑀓𑀸𑀫𑀧𑀼𑀜𑁆𑀜𑁂𑀳𑀺 𑀓𑀢𑁆𑀯𑀸𑀦, 𑀓𑀸𑀫𑀲𑀼𑀕𑀢𑀺𑀬𑀁 𑀲𑀺𑀬𑀼𑀁.

𑁧𑁯𑁮. 𑀧𑀭𑀺𑀢𑁆𑀢𑀁 𑀫𑀚𑁆𑀛𑀺𑀫𑀁 𑀛𑀸𑀦𑀁, 𑀧𑀡𑀻𑀢𑀜𑁆𑀘 𑀬𑀣𑀸𑀓𑁆𑀓𑀫𑀁;

𑀪𑀸𑀯𑁂𑀢𑁆𑀯𑀸 𑀢𑀺𑀯𑀺𑀥𑀸 𑀳𑁄𑀦𑁆𑀢𑀺, 𑀢𑀻𑀲𑀼 𑀪𑀽𑀫𑀻𑀲𑀼 𑀬𑁄𑀕𑀺𑀦𑁄.

𑁧𑁯𑁯. 𑀯𑁂𑀳𑀧𑁆𑀨𑀮𑁂𑀲𑀼 𑀚𑀸𑀬𑀦𑁆𑀢𑀺, 𑀪𑀸𑀯𑁂𑀢𑁆𑀯𑀸 𑀧𑀜𑁆𑀘𑀫𑀁 𑀢𑀣𑀸;

𑀲𑀜𑁆𑀜𑀸𑀯𑀺𑀭𑀸𑀕𑀢𑀜𑁆𑀘𑁂𑀯, 𑀪𑀸𑀯𑁂𑀢𑁆𑀯𑀸𑀲𑀜𑁆𑀜𑀺𑀪𑀽𑀫𑀺𑀬𑀁.

𑁨𑁦𑁦. 𑀲𑀼𑀤𑁆𑀥𑀸𑀯𑀸𑀲𑁂𑀲𑀼 𑀚𑀸𑀬𑀦𑁆𑀢𑀺, 𑀅𑀦𑀸𑀕𑀸𑀫𑀺𑀓𑀧𑀼𑀕𑁆𑀕𑀮𑀸;

𑀆𑀭𑀼𑀧𑁆𑀧𑀸𑀦𑀺 𑀘 𑀪𑀸𑀯𑁂𑀢𑁆𑀯𑀸, 𑀅𑀭𑀽𑀧𑁂𑀲𑀼 𑀬𑀣𑀸𑀓𑁆𑀓𑀫𑀁.

𑁨𑁦𑁧. 𑀮𑁄𑀓𑀼𑀢𑁆𑀢𑀭𑀁 𑀢𑀼 𑀪𑀸𑀯𑁂𑀢𑁆𑀯𑀸, 𑀬𑀣𑀸𑀲𑀓𑀫𑀦𑀦𑁆𑀢𑀭𑀁;

𑀲𑀫𑀸𑀧𑀢𑁆𑀢𑀺𑀓𑁆𑀔𑀡𑁂 𑀘𑁂𑀯, 𑀅𑀧𑁆𑀧𑁂𑀢𑀺 𑀨𑀮𑀫𑀸𑀦𑀲𑀁.

𑁨𑁦𑁨. 𑀅𑀧𑀸𑀬𑀫𑁆𑀳𑀸 𑀘𑀼𑀢𑀸 𑀲𑀢𑁆𑀢𑀸, 𑀓𑀸𑀫𑀥𑀸𑀢𑀼𑀫𑁆𑀳𑀺 𑀚𑀸𑀬𑀭𑁂;

𑀲𑀩𑁆𑀩𑀝𑁆𑀞𑀸𑀦𑁂𑀲𑀼 𑀚𑀸𑀬𑀦𑁆𑀢𑀺, 𑀓𑀸𑀫𑀲𑀼𑀕𑀢𑀺𑀢𑁄 𑀘𑀼𑀢𑀸.

𑁨𑁦𑁩. 𑀘𑀼𑀢𑀸 𑀚𑀸𑀬𑀦𑁆𑀢𑀺 𑀭𑀽𑀧𑀫𑁆𑀳𑀸, 𑀲𑀩𑁆𑀩𑀢𑁆𑀣𑀸𑀧𑀸𑀬𑀯𑀚𑁆𑀚𑀺𑀢𑁂;

𑀓𑀸𑀫𑀲𑀼𑀕𑀢𑀺𑀬𑀁 𑀳𑁄𑀦𑁆𑀢𑀺, 𑀅𑀭𑀽𑀧𑀸𑀲𑀜𑁆𑀜𑀢𑁄 𑀘𑀼𑀢𑀸.

𑁨𑁦𑁪. 𑀢𑀣𑀸𑀭𑀽𑀧𑀘𑀼𑀢𑀸 𑀳𑁄𑀦𑁆𑀢𑀺, 𑀢𑀢𑁆𑀣𑁂𑀯𑁄𑀧𑀭𑀺𑀫𑁂𑀯 𑀘;

𑀯𑀝𑁆𑀝𑀫𑀽𑀮𑀲𑀫𑀼𑀘𑁆𑀙𑁂𑀤𑀸, 𑀦𑀺𑀩𑁆𑀩𑀸𑀬𑀦𑁆𑀢𑀺 𑀅𑀦𑀸𑀲𑀯𑀸.

𑁨𑁦𑁫. 𑀲𑀼𑀤𑁆𑀥𑀸𑀯𑀸𑀲𑁂𑀲𑁆𑀯𑀦𑀸𑀕𑀸𑀫𑀺-𑀧𑀼𑀕𑁆𑀕𑀮𑀸𑀯𑁄𑀧𑀧𑀚𑁆𑀚𑀭𑁂;

𑀓𑀸𑀫𑀥𑀸𑀢𑀼𑀫𑁆𑀳𑀺 𑀚𑀸𑀬𑀦𑁆𑀢𑀺, 𑀅𑀦𑀸𑀕𑀸𑀫𑀺𑀯𑀺𑀯𑀚𑁆𑀚𑀺𑀢𑀸.

𑁨𑁦𑁬. 𑀳𑁂𑀝𑁆𑀞𑀼𑀧𑀧𑀢𑁆𑀢𑀺𑀩𑁆𑀭𑀳𑁆𑀫𑀸𑀦𑀁, 𑀅𑀭𑀺𑀬𑀸𑀦𑀁 𑀦 𑀓𑀢𑁆𑀣𑀘𑀺;

𑀅𑀲𑀜𑁆𑀜𑀲𑀢𑁆𑀢𑀸𑀧𑀸𑀬𑁂𑀲𑀼, 𑀦𑀢𑁆𑀣𑁂𑀯𑀸𑀭𑀺𑀬𑀧𑀼𑀕𑁆𑀕𑀮𑀸.

𑁨𑁦𑁭. 𑀯𑁂𑀳𑀧𑁆𑀨𑀮𑁂 𑀅𑀓𑀦𑀺𑀝𑁆𑀞𑁂, 𑀪𑀯𑀕𑁆𑀕𑁂 𑀘 𑀧𑀢𑀺𑀝𑁆𑀞𑀺𑀢𑀸;

𑀦 𑀧𑀼𑀦𑀸𑀜𑁆𑀜𑀢𑁆𑀣 𑀚𑀸𑀬𑀦𑁆𑀢𑀺, 𑀲𑀩𑁆𑀩𑁂 𑀅𑀭𑀺𑀬𑀧𑀼𑀕𑁆𑀕𑀮𑀸.

𑁨𑁦𑁮. 𑀙𑀲𑀼 𑀤𑁂𑀯𑁂𑀲𑁆𑀯𑀦𑀸𑀕𑀸𑀫𑀻, 𑀯𑀻𑀢𑀭𑀸𑀕𑀸 𑀦 𑀢𑀺𑀝𑁆𑀞𑀭𑁂;

𑀦 𑀘𑀺𑀭𑀝𑁆𑀞𑀸𑀬𑀺𑀦𑁄 𑀢𑀢𑁆𑀣, 𑀮𑁄𑀓𑀺𑀬𑀸𑀧𑀺 𑀘 𑀬𑁄𑀕𑀺𑀦𑁄.

𑁨𑁦𑁯. 𑀕𑀺𑀳𑀺𑀮𑀺𑀗𑁆𑀕𑁂 𑀦 𑀢𑀺𑀝𑁆𑀞𑀦𑁆𑀢𑀺, 𑀫𑀦𑀼𑀲𑁆𑀲𑁂𑀲𑀼 𑀅𑀦𑀸𑀲𑀯𑀸;

𑀧𑀩𑁆𑀩𑀚𑁆𑀚𑀸𑀬𑀜𑁆𑀘 𑀪𑀼𑀫𑁆𑀫𑁂 𑀘, 𑀩𑁆𑀭𑀳𑁆𑀫𑀢𑁆𑀢𑁂𑀧𑀺 𑀘 𑀢𑀺𑀝𑁆𑀞𑀭𑁂.

𑁨𑁧𑁦. 𑀬𑀸𑀦𑀺 𑀧𑀜𑁆𑀜𑀸𑀲 𑀯𑀲𑁆𑀲𑀸𑀦𑀺,

𑀫𑀦𑀼𑀲𑁆𑀲𑀸𑀦𑀁 𑀲 𑀧𑀺𑀡𑁆𑀟𑀺𑀢𑁄;

𑀏𑀓𑁄 𑀭𑀢𑁆𑀢𑀺𑀤𑀺𑀯𑁄 𑀢𑁂𑀦,

𑀫𑀸𑀲𑁂𑀓𑁄 𑀢𑀺𑀁𑀲 𑀭𑀢𑁆𑀢𑀺𑀬𑁄.

𑁨𑁧𑁧. 𑀤𑁆𑀯𑀸𑀤𑀲𑀫𑀸𑀲𑀺𑀬𑁄 𑀯𑀲𑁆𑀲𑁄, 𑀢𑁂𑀦 𑀧𑀜𑁆𑀘𑀲𑀢𑀁 𑀪𑀯𑁂;

𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁, 𑀧𑀫𑀸𑀡𑀫𑀺𑀤𑀫𑀸𑀬𑀼𑀦𑁄.

𑁨𑁧𑁨. 𑀢𑀁 𑀦𑀯𑀼𑀢𑀺𑀯𑀲𑁆𑀲𑀲𑀢-𑀲𑀳𑀲𑁆𑀲𑀁 𑀧𑀦 𑀧𑀺𑀡𑁆𑀟𑀺𑀢𑀁;

𑀕𑀡𑀦𑀸𑀬 𑀫𑀦𑀼𑀲𑁆𑀲𑀸𑀦𑀁, 𑀘𑀢𑀼𑀪𑀸𑀕𑀽𑀧𑀭𑀽𑀧𑀭𑀺.

𑁨𑁧𑁩. 𑀬𑀁 𑀫𑀦𑀼𑀲𑁆𑀲𑀯𑀲𑁆𑀲𑀲𑀢𑀁, 𑀢𑀤𑁂𑀓𑁄 𑀤𑀺𑀯𑀲𑁄 𑀓𑀢𑁄;

𑀢𑁂𑀦 𑀯𑀲𑁆𑀲𑀲𑀳𑀲𑁆𑀲𑀸𑀬𑀼, 𑀢𑀸𑀯𑀢𑀺𑀁𑀲𑁂𑀲𑀼 𑀤𑁂𑀲𑀺𑀢𑁄.

𑁨𑁧𑁪. 𑀓𑁄𑀝𑀺𑀢𑁆𑀢𑀬𑀁 𑀲𑀝𑁆𑀞𑀺𑀲𑀢𑀲𑀳𑀲𑁆𑀲𑀜𑁆𑀘𑀸𑀥𑀺𑀓𑀁 𑀪𑀯𑁂;

𑀕𑀡𑀦𑀸𑀬 𑀫𑀦𑀼𑀲𑁆𑀲𑀸𑀦𑀁, 𑀢𑀸𑀯𑀢𑀺𑀁𑀲𑁂𑀲𑀼 𑀧𑀺𑀡𑁆𑀟𑀺𑀢𑀁.

𑁨𑁧𑁫. 𑀆𑀬𑀼𑀧𑁆𑀧𑀫𑀸𑀡𑀫𑀺𑀘𑁆𑀘𑁂𑀯𑀁, 𑀤𑁂𑀯𑀸𑀦𑀫𑀼𑀧𑀭𑀽𑀧𑀭𑀺;

𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀤𑁆𑀯𑀺𑀕𑀼𑀡𑀁 𑀓𑀢𑁆𑀯𑀸, 𑀘𑀢𑀼𑀪𑀸𑀕𑀫𑀼𑀤𑀸𑀳𑀝𑀁.

𑁨𑁧𑁬. 𑀕𑀡𑀦𑀸𑀬 𑀫𑀦𑀼𑀲𑁆𑀲𑀸𑀦𑀁, 𑀢𑀢𑁆𑀣 𑀘𑀼𑀤𑁆𑀤𑀲 𑀓𑁄𑀝𑀺𑀬𑁄;

𑀘𑀢𑁆𑀢𑀸𑀮𑀻𑀲𑀲𑀢𑀲𑀳𑀲𑁆𑀲𑀸𑀥𑀺𑀓𑀸 𑀬𑀸𑀫𑀪𑀽𑀫𑀺𑀬𑀁.

𑁨𑁧𑁭. 𑀢𑀼𑀲𑀺𑀢𑀸𑀦𑀁 𑀧𑀓𑀸𑀲𑁂𑀦𑁆𑀢𑀺, 𑀲𑀢𑁆𑀢𑀧𑀜𑁆𑀜𑀸𑀲 𑀓𑁄𑀝𑀺𑀬𑁄;

𑀲𑀝𑁆𑀞𑀺𑀲𑀢𑀲𑀳𑀲𑁆𑀲𑀸𑀦𑀺, 𑀯𑀲𑁆𑀲𑀸𑀦𑀺 𑀅𑀥𑀺𑀓𑀸𑀦𑀺 𑀘.

𑁨𑁧𑁮. 𑀦𑀺𑀫𑁆𑀫𑀸𑀦𑀭𑀢𑀺𑀤𑁂𑀯𑀸𑀦𑀁, 𑀤𑁆𑀯𑀺𑀲𑀢𑀁 𑀢𑀺𑀁𑀲 𑀓𑁄𑀝𑀺𑀬𑁄;

𑀘𑀢𑁆𑀢𑀸𑀮𑀻𑀲𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺 𑀘 𑀲𑀩𑁆𑀩𑀣𑀸.

𑁨𑁧𑁯. 𑀦𑀯𑀓𑁄𑀝𑀺𑀲𑀢𑀜𑁆𑀘𑁂𑀓𑀯𑀻𑀲𑀢𑀺𑀯𑀲𑁆𑀲𑀓𑁄𑀝𑀺𑀬𑁄;

𑀲𑀝𑁆𑀞𑀺𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀥𑀺𑀓𑀸 𑀯𑀲𑀯𑀢𑁆𑀢𑀺𑀲𑀼.

𑁨𑁨𑁦. 𑀓𑀧𑁆𑀧𑀲𑁆𑀲 𑀢𑀢𑀺𑀬𑁄 𑀪𑀸𑀕𑁄, 𑀉𑀧𑀟𑁆𑀠𑀜𑁆𑀘 𑀬𑀣𑀸𑀓𑁆𑀓𑀫𑀁;

𑀓𑀧𑁆𑀧𑁂𑀓𑁄 𑀤𑁆𑀯𑁂 𑀘 𑀘𑀢𑁆𑀢𑀸𑀭𑁄, 𑀅𑀝𑁆𑀞 𑀓𑀧𑁆𑀧𑀸 𑀘 𑀲𑁄𑀴𑀲.

𑁨𑁨𑁧. 𑀤𑁆𑀯𑀢𑁆𑀢𑀺𑀁𑀲 𑀘𑀢𑀼𑀲𑀝𑁆𑀞𑀻 𑀘, 𑀦𑀯𑀲𑀼 𑀩𑁆𑀭𑀳𑁆𑀫𑀪𑀽𑀫𑀺𑀲𑀼;

𑀯𑁂𑀳𑀧𑁆𑀨𑀮𑀸 𑀅𑀲𑀜𑁆𑀜𑀻 𑀘, 𑀧𑀜𑁆𑀘𑀓𑀧𑁆𑀧𑀲𑀢𑀸𑀬𑀼𑀓𑀸.

𑁨𑁨𑁨. 𑀓𑀧𑁆𑀧𑀲𑀳𑀲𑁆𑀲𑀁 𑀤𑁆𑀯𑁂 𑀘𑀢𑁆𑀢𑀸𑀭𑀺, 𑀅𑀝𑁆𑀞 𑀲𑁄𑀴𑀲 𑀘𑀓𑁆𑀓𑀫𑀸;

𑀲𑀳𑀲𑁆𑀲𑀸𑀦𑀺 𑀘 𑀓𑀧𑁆𑀧𑀸𑀦𑀁, 𑀲𑀼𑀤𑁆𑀥𑀸𑀯𑀸𑀲𑀸𑀦𑀫𑀼𑀤𑁆𑀤𑀺𑀲𑁂.

𑁨𑁨𑁩. 𑀯𑀻𑀲𑀓𑀧𑁆𑀧𑀲𑀳𑀲𑁆𑀲𑀸𑀦𑀺, 𑀘𑀢𑁆𑀢𑀸𑀮𑀻𑀲𑀜𑁆𑀘 𑀲𑀝𑁆𑀞𑀺 𑀘;

𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑀸, 𑀓𑀧𑁆𑀧𑀸 𑀘𑀸𑀭𑀼𑀧𑁆𑀧𑀓𑁂 𑀓𑀫𑀸.

𑁨𑁨𑁪. 𑀆𑀬𑀼𑀧𑁆𑀧𑀫𑀸𑀡𑀦𑀺𑀬𑀫𑁄, 𑀦𑀢𑁆𑀣𑀺 𑀪𑀼𑀫𑁆𑀫𑁂 𑀘 𑀫𑀸𑀦𑀯𑁂;

𑀯𑀲𑁆𑀲𑀸𑀦𑀁 𑀕𑀡𑀦𑀸 𑀦𑀢𑁆𑀣𑀺, 𑀘𑀢𑀼𑀭𑀸𑀧𑀸𑀬𑀪𑀽𑀫𑀺𑀬𑀁.

𑁨𑁨𑁫. 𑀧𑀼𑀣𑀼𑀚𑁆𑀚𑀦𑀸𑀭𑀺𑀬𑀸 𑀘𑁂𑀢𑀺, 𑀤𑀼𑀯𑀺𑀥𑀸 𑀳𑁄𑀦𑁆𑀢𑀺 𑀧𑀼𑀕𑁆𑀕𑀮𑀸;

𑀢𑀺𑀳𑁂𑀢𑀼𑀓𑀸𑀤𑀺𑀪𑁂𑀤𑁂𑀦, 𑀢𑀺𑀯𑀺𑀥𑀸 𑀘 𑀧𑀼𑀣𑀼𑀚𑁆𑀚𑀦𑀸.

𑁨𑁨𑁬. 𑀫𑀕𑁆𑀕𑀝𑁆𑀞𑀸 𑀘 𑀨𑀮𑀝𑁆𑀞𑀸 𑀘,

𑀅𑀝𑁆𑀞𑁂𑀯𑀸𑀭𑀺𑀬𑀧𑀼𑀕𑁆𑀕𑀮𑀸;

𑀆𑀤𑀺𑀢𑁄 𑀲𑀢𑁆𑀢 𑀲𑁂𑀓𑁆𑀔𑀸 𑀘,

𑀅𑀲𑁂𑀓𑁆𑀔𑁄 𑀘𑀸𑀭𑀳𑀸𑀧𑀭𑁄.

𑁨𑁨𑁭. 𑀅𑀳𑁂𑀢𑀼𑀓𑀸𑀯 𑀮𑀩𑁆𑀪𑀦𑁆𑀢𑀺, 𑀲𑀢𑁆𑀢𑀸 𑀤𑀼𑀕𑁆𑀕𑀢𑀺𑀬𑀁 𑀧𑀦;

𑀢𑀺𑀳𑁂𑀢𑀼𑀓𑀸𑀯 𑀮𑀩𑁆𑀪𑀦𑁆𑀢𑀺, 𑀭𑀽𑀧𑀸𑀭𑀽𑀧𑁂 𑀲𑀘𑀺𑀢𑁆𑀢𑀓𑀸.

𑁨𑁨𑁮. 𑀓𑀸𑀫𑀸𑀯𑀘𑀭𑀤𑁂𑀯𑁂𑀲𑀼, 𑀅𑀳𑁂𑀢𑀼𑀓𑀯𑀺𑀯𑀚𑁆𑀚𑀺𑀢𑀸;

𑀯𑀺𑀦𑀺𑀧𑀸𑀢𑀸𑀲𑀼𑀭𑁂 𑀘𑁂𑀯, 𑀫𑀸𑀦𑀯𑁂 𑀘 𑀢𑀬𑁄𑀧𑀺 𑀘.

𑁨𑁨𑁯. 𑀅𑀭𑀺𑀬𑀸 𑀦𑀸𑀫 𑀮𑀩𑁆𑀪𑀦𑁆𑀢𑀺, 𑀅𑀲𑀜𑁆𑀜𑀸𑀧𑀸𑀬𑀯𑀚𑁆𑀚𑀺𑀢𑁂;

𑀧𑀼𑀣𑀼𑀚𑁆𑀚𑀦𑀸 𑀢𑀼 𑀮𑀩𑁆𑀪𑀦𑁆𑀢𑀺, 𑀲𑀼𑀤𑁆𑀥𑀸𑀯𑀸𑀲𑀯𑀺𑀯𑀚𑁆𑀚𑀺𑀢𑁂.

𑁨𑁩𑁦. 𑀲𑀼𑀤𑁆𑀥𑀸𑀯𑀸𑀲𑀫𑀧𑀸𑀬𑀜𑁆𑀘, 𑀳𑀺𑀢𑁆𑀯𑀸𑀲𑀜𑁆𑀜𑀺𑀪𑀯𑀁 𑀢𑀺𑀥𑀸;

𑀲𑁄𑀢𑀸𑀧𑀦𑁆𑀦𑀸𑀤𑀬𑁄 𑀤𑁆𑀯𑁂𑀧𑀺, 𑀲𑁂𑀲𑀝𑁆𑀞𑀸𑀦𑁂𑀲𑀼 𑀮𑀩𑁆𑀪𑀭𑁂.

𑁨𑁩𑁧. 𑀇𑀢𑀺 𑀲𑀩𑁆𑀩𑀧𑁆𑀧𑀪𑁂𑀤𑁂𑀦, 𑀪𑀽𑀫𑀺𑀧𑀼𑀕𑁆𑀕𑀮𑀲𑀗𑁆𑀕𑀳𑀁;

𑀜𑀢𑁆𑀯𑀸 𑀯𑀺𑀜𑁆𑀜𑀽 𑀯𑀺𑀪𑀸𑀯𑁂𑀬𑁆𑀬, 𑀢𑀢𑁆𑀣 𑀘𑀺𑀢𑁆𑀢𑀸𑀦𑀺 𑀲𑀫𑁆𑀪𑀯𑀸𑀢𑀺.

𑀇𑀢𑀺 𑀘𑀺𑀢𑁆𑀢𑀯𑀺𑀪𑀸𑀕𑁂 𑀪𑀽𑀫𑀺𑀧𑀼𑀕𑁆𑀕𑀮𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀧𑀜𑁆𑀘𑀫𑁄 𑀧𑀭𑀺𑀘𑁆𑀙𑁂𑀤𑁄.