𑁧𑁩. 𑀢𑁂𑀭𑀲𑀫𑁄 𑀧𑀭𑀺𑀘𑁆𑀙𑁂𑀤𑁄

𑀦𑀺𑀲𑁆𑀲𑀦𑁆𑀤𑀨𑀮𑀯𑀺𑀪𑀸𑀕𑁄

𑁧𑁭𑁯𑁨. 𑀯𑀺𑀧𑀲𑁆𑀲𑀦𑀸𑀬 𑀦𑀺𑀲𑁆𑀲𑀦𑁆𑀤𑀫𑀺𑀢𑀺 𑀯𑀼𑀢𑁆𑀢𑀫𑀺𑀢𑁄 𑀧𑀭𑀁;

𑀲𑀘𑁆𑀘𑀸𑀦𑀁 𑀧𑀝𑀺𑀯𑁂𑀥𑀸𑀤𑀺𑀁, 𑀧𑀯𑀓𑁆𑀔𑀸𑀫𑀺 𑀬𑀣𑀸𑀓𑁆𑀓𑀫𑀁.

𑁧𑁭𑁯𑁩. 𑀧𑀭𑀺𑀜𑁆𑀜𑀸 𑀘 𑀧𑀳𑀸𑀦𑀜𑁆𑀘, 𑀲𑀘𑁆𑀙𑀺𑀓𑀺𑀭𑀺𑀬𑀸 𑀘 𑀪𑀸𑀯𑀦𑀸;

𑀇𑀢𑀺 𑀤𑀼𑀓𑁆𑀔𑀸𑀤𑀺𑀲𑀘𑁆𑀘𑁂𑀲𑀼, 𑀓𑀺𑀘𑁆𑀘𑀫𑀸𑀳𑀼 𑀘𑀢𑀼𑀩𑁆𑀩𑀺𑀥𑀁.

𑁧𑁭𑁯𑁪. 𑀢𑀁 𑀲𑀩𑁆𑀩𑀁 𑀫𑀕𑁆𑀕𑀓𑀸𑀮𑀫𑁆𑀳𑀺, 𑀓𑀭𑀺𑀲𑁆𑀲𑀢𑀺 𑀢𑀢𑁄 𑀧𑀭𑀁;

𑀧𑀝𑀺𑀧𑀲𑁆𑀲𑀤𑁆𑀥𑀓𑀺𑀘𑁆𑀘𑀢𑁆𑀢𑀸, 𑀓𑀢𑀁 𑀳𑁄𑀢𑀺 𑀨𑀮𑁂 𑀓𑀣𑀁.

𑁧𑁭𑁯𑁫. 𑀙𑀺𑀦𑁆𑀦𑀢𑀸𑀮𑁄 𑀨𑀮𑀲𑁆𑀲𑁂𑀯, 𑀙𑀺𑀦𑁆𑀦𑀸𑀦𑀼𑀲𑀬𑀫𑀽𑀮𑀓𑀸;

𑀔𑀦𑁆𑀥𑀸 𑀦𑀸𑀮𑀫𑀥𑀺𑀝𑁆𑀞𑀸𑀦𑀁, 𑀯𑀺𑀧𑀮𑁆𑀮𑀸𑀲𑀧𑀯𑀢𑁆𑀢𑀺𑀬𑀸.

𑁧𑁭𑁯𑁬. 𑀅𑀘𑁆𑀘𑀦𑁆𑀢𑀧𑀝𑀺𑀧𑀓𑁆𑀔𑀢𑁆𑀢𑀸, 𑀘𑀢𑀼𑀫𑀕𑁆𑀕𑀧𑀯𑀢𑁆𑀢𑀺𑀬𑀸;

𑀧𑀭𑀁 𑀓𑁆𑀮𑁂𑀲𑀸 𑀦 𑀚𑀸𑀬𑀦𑁆𑀢𑀺, 𑀤𑀟𑁆𑀠𑀩𑀻𑀚𑀗𑁆𑀓𑀼𑀭𑀁 𑀬𑀣𑀸.

𑁧𑁭𑁯𑁭. 𑀦𑀺𑀬𑁆𑀬𑀸𑀦𑀝𑁆𑀞𑀯𑀺𑀲𑁂𑀲𑁂𑀦, 𑀅𑀜𑁆𑀜𑀫𑀜𑁆𑀜𑀲𑁆𑀲 𑀧𑀘𑁆𑀘𑀬𑁄;

𑀫𑀕𑁆𑀕𑁄𑀯 𑀫𑀕𑁆𑀕𑀁 𑀪𑀸𑀯𑁂𑀢𑀺, 𑀚𑀸𑀬𑀫𑀸𑀦𑁄𑀣 𑀯𑀸 𑀧𑀼𑀦.

𑁧𑁭𑁯𑁮. 𑀫𑀕𑁆𑀕𑀧𑁆𑀧𑀯𑀢𑁆𑀢𑀺𑀲𑀦𑁆𑀢𑀸𑀦𑁂, 𑀪𑀸𑀯𑀦𑀸𑀢𑀺 𑀧𑀯𑀼𑀘𑁆𑀘𑀢𑀺;

𑀯𑀢𑁆𑀢𑀫𑀸𑀦𑁂𑀦 𑀢𑀁 𑀓𑀺𑀘𑁆𑀘𑀁, 𑀦𑀺𑀧𑁆𑀨𑀸𑀤𑀺𑀢𑀫𑀲𑁂𑀲𑀢𑁄.

𑁧𑁭𑁯𑁯. 𑀇𑀢𑀺 𑀢𑀻𑀡𑀺𑀧𑀺 𑀲𑀘𑁆𑀘𑀸𑀦𑀺, 𑀓𑀺𑀘𑁆𑀘𑀢𑁄 𑀧𑀝𑀺𑀯𑀺𑀚𑁆𑀛𑀢𑀺;

𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀼𑀩𑁆𑀩𑀦𑁆𑀢𑁄, 𑀫𑀕𑁆𑀕𑁄 𑀏𑀓𑀓𑁆𑀔𑀡𑁂 𑀲𑀳.

𑁧𑁮𑁦𑁦. 𑀓𑀺𑀘𑁆𑀘𑀧𑁆𑀧𑀯𑀢𑁆𑀢𑀺𑀢𑁄 𑀘𑁂𑀢𑁆𑀣, 𑀧𑀝𑀺𑀯𑁂𑀥𑁄𑀢𑀺 𑀯𑀼𑀘𑁆𑀘𑀢𑀺;

𑀢𑀜𑁆𑀘 𑀲𑀸𑀥𑁂𑀢𑀺 𑀫𑀕𑁆𑀕𑁄𑀬𑀁, 𑀦𑀺𑀬𑁆𑀬𑀦𑁆𑀢𑁄 𑀲𑀦𑁆𑀢𑀺𑀕𑁄𑀘𑀭𑁄.

𑁧𑁮𑁦𑁧. 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀲𑀗𑁆𑀔𑀸𑀭𑁂, 𑀫𑀕𑁆𑀕𑀲𑁆𑀲𑀸𑀭𑀩𑁆𑀪 𑀦𑀺𑀩𑁆𑀩𑀼𑀢𑀺𑀁,

𑀦𑀺𑀬𑁆𑀬𑀸𑀦𑀫𑁂𑀯 𑀲𑀘𑁆𑀘𑁂𑀲𑀼, 𑀓𑀺𑀘𑁆𑀘𑀲𑀸𑀥𑀦𑀫𑀻𑀭𑀺𑀢𑀁.

𑁧𑁮𑁦𑁨. 𑀫𑀕𑁆𑀕𑁄 𑀏𑀯 𑀳𑀺 𑀦𑀺𑀬𑁆𑀬𑀸𑀢𑀺, 𑀲𑁂𑀲𑀸 𑀢𑀲𑁆𑀲𑁄𑀧𑀓𑀸𑀭𑀓𑀸;

𑀅𑀧𑁆𑀧𑁂𑀦𑁆𑀢𑀸 𑀛𑀸𑀦𑀥𑀫𑁆𑀫𑀸 𑀘, 𑀩𑀼𑀚𑁆𑀛𑀦𑁆𑀢𑀸 𑀩𑁄𑀥𑀺𑀧𑀓𑁆𑀔𑀺𑀬𑀸.

𑁧𑁮𑁦𑁩. 𑀢𑀲𑁆𑀫𑀸 𑀢𑀲𑁆𑀲𑁂𑀯 𑀯𑀼𑀝𑁆𑀞𑀸𑀦𑀁, 𑀧𑀓𑀸𑀲𑁂𑀦𑁆𑀢𑀺 𑀯𑀺𑀲𑁂𑀲𑀢𑁄;

𑀔𑀦𑁆𑀥𑁂𑀳𑀺 𑀘 𑀓𑀺𑀮𑁂𑀲𑁂𑀳𑀺, 𑀯𑀺𑀫𑁄𑀓𑁆𑀔𑀢𑁆𑀢𑀬𑀢𑁄 𑀓𑀣𑀁.

𑁧𑁮𑁦𑁪. 𑀓𑀢𑁆𑀯𑀸𑀦𑀸𑀪𑀺𑀦𑀺𑀯𑁂𑀲𑀁 𑀢𑀼, 𑀬𑀢𑁆𑀣 𑀢𑀢𑁆𑀣 𑀬𑀣𑀸 𑀢𑀣𑀸;

𑀪𑀽𑀫𑀺𑀥𑀫𑁆𑀫𑀁 𑀧𑀭𑀺𑀕𑁆𑀕𑀬𑁆𑀳, 𑀯𑀺𑀧𑀲𑁆𑀲𑀺𑀢𑁆𑀯𑀸 𑀢𑀢𑁄 𑀧𑀭𑀁.

𑁧𑁮𑁦𑁫. 𑀬𑀢𑁄 𑀓𑀼𑀢𑁄𑀘𑀺 𑀯𑀼𑀝𑁆𑀞𑀸𑀦𑀁, 𑀬𑀤𑀺 𑀳𑁄𑀢𑀺 𑀅𑀦𑀺𑀘𑁆𑀘𑀢𑁄;

𑀳𑀼𑀢𑁆𑀯𑀸𑀥𑀺𑀫𑁄𑀓𑁆𑀔𑀩𑀳𑀼𑀮𑁄, 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀯𑀺𑀲𑁂𑀲𑀢𑁄.

𑁧𑁮𑁦𑁬. 𑀅𑀦𑀺𑀫𑀺𑀢𑁆𑀢𑀯𑀺𑀫𑁄𑀓𑁆𑀔𑁂𑀦, 𑀦𑀺𑀬𑁆𑀬𑀦𑁆𑀢𑁄 𑀲𑀢𑁆𑀢𑀧𑀼𑀕𑁆𑀕𑀮𑁄;

𑀲𑀤𑁆𑀥𑀸𑀦𑀼𑀲𑀸𑀭𑀻 𑀧𑀞𑀫𑁂, 𑀫𑀚𑁆𑀛𑁂 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑀓𑁄.

𑁧𑁮𑁦𑁭. 𑀅𑀦𑁆𑀢𑁂 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄𑀢𑀺, 𑀢𑀫𑀻𑀭𑁂𑀦𑁆𑀢𑀺 𑀢𑀣𑀸𑀕𑀢𑀸;

𑀲𑀗𑁆𑀔𑀸𑀭𑁂 𑀤𑀼𑀓𑁆𑀔𑀢𑁄 𑀤𑀺𑀲𑁆𑀯𑀸, 𑀯𑀼𑀝𑁆𑀞𑀳𑀦𑁆𑀢𑁄 𑀲 𑀧𑀼𑀕𑁆𑀕𑀮𑁄.

𑁧𑁮𑁦𑁮. 𑀧𑀲𑁆𑀲𑀤𑁆𑀥𑀺𑀩𑀳𑀼𑀮𑁄 𑀳𑀼𑀢𑁆𑀯𑀸, 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀮𑀸𑀪𑀢𑁄;

𑀢𑀣𑁂𑀯𑀸𑀧𑁆𑀧𑀡𑀺𑀳𑀺𑀢𑁂𑀦, 𑀦𑀺𑀬𑁆𑀬𑀦𑁆𑀢𑁄 𑀢𑀺𑀯𑀺𑀥𑁄 𑀪𑀯𑁂.

𑁧𑁮𑁦𑁯. 𑀅𑀦𑀢𑁆𑀢𑀢𑁄 𑀯𑀼𑀝𑁆𑀞𑀳𑀺𑀢𑁆𑀯𑀸, 𑀯𑁂𑀤𑀩𑀸𑀳𑀼𑀮𑁆𑀬𑀬𑁄𑀕𑀢𑁄;

𑀲𑀼𑀜𑁆𑀜𑀢𑁂𑀦𑀸𑀣 𑀦𑀺𑀬𑁆𑀬𑀦𑁆𑀢𑁄, 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀯𑀺𑀲𑁂𑀲𑀢𑁄.

𑁧𑁮𑁧𑁦. 𑀥𑀫𑁆𑀫𑀸𑀦𑀼𑀲𑀸𑀭𑀻 𑀧𑀞𑀫𑁂, 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄 𑀢𑀢𑁄 𑀧𑀭𑀁;

𑀅𑀦𑁆𑀢𑁂 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄𑀢𑀺, 𑀢𑀫𑁆𑀧𑀺 𑀤𑀻𑀧𑁂𑀦𑁆𑀢𑀺 𑀧𑀡𑁆𑀟𑀺𑀢𑀸.

𑁧𑁮𑁧𑁧. 𑀆𑀦𑁂𑀜𑁆𑀚𑀧𑀸𑀤𑀓𑀚𑁆𑀛𑀸𑀦-𑀦𑀸𑀫𑀓𑀸𑀬𑀯𑀺𑀲𑁂𑀲𑀢𑁄;

𑀲𑀘𑁆𑀙𑀺𑀓𑀢𑁆𑀯𑀸𑀦 𑀦𑀺𑀩𑁆𑀩𑀸𑀦𑀁, 𑀫𑀚𑁆𑀛𑁂 𑀙 𑀓𑀸𑀬𑀲𑀓𑁆𑀔𑀺𑀦𑁄.

𑁧𑁮𑁧𑁨. 𑀅𑀭𑀽𑀧𑀢𑁄 𑀘 𑀫𑀕𑁆𑀕𑁂𑀦, 𑀆𑀦𑁂𑀜𑁆𑀚𑁂𑀦 𑀘 𑀭𑀽𑀧𑀢𑁄;

𑀯𑀺𑀫𑀼𑀢𑁆𑀢𑁄 𑀉𑀪𑀢𑁄𑀪𑀸𑀕-𑀯𑀺𑀫𑀼𑀢𑁆𑀢𑁄 𑀅𑀭𑀳𑀸 𑀪𑀯𑁂.

𑁧𑁮𑁧𑁩. 𑀢𑀺𑀯𑀺𑀫𑁄𑀓𑁆𑀔𑀫𑀼𑀔𑀻𑀪𑀽𑀢𑀸, 𑀇𑀢𑀺 𑀯𑀼𑀝𑁆𑀞𑀸𑀦𑀲𑀸𑀥𑀺𑀓𑀸;

𑀲𑀢𑁆𑀢𑀧𑀼𑀕𑁆𑀕𑀮𑀪𑁂𑀤𑀜𑁆𑀘, 𑀲𑀫𑁆𑀧𑀸𑀤𑁂𑀢𑀺 𑀯𑀺𑀧𑀲𑁆𑀲𑀦𑀸.

𑁧𑁮𑁧𑁪. 𑀅𑀥𑀺𑀫𑀼𑀘𑁆𑀘𑀢𑀺 𑀲𑀤𑁆𑀥𑀸 𑀘, 𑀬𑀣𑀸𑀯𑀢𑁆𑀣𑀼𑀲𑀪𑀸𑀯𑀢𑁄;

𑀜𑁂𑀬𑁆𑀬𑀥𑀫𑁆𑀫𑁂𑀲𑀼 𑀲𑀩𑁆𑀩𑀢𑁆𑀣, 𑀧𑀜𑁆𑀜𑀸 𑀘 𑀧𑀝𑀺𑀯𑀺𑀚𑁆𑀛𑀢𑀺.

𑁧𑁮𑁧𑁫. 𑀢𑀲𑁆𑀫𑀸 𑀲𑀤𑁆𑀥𑀸 𑀘 𑀧𑀜𑁆𑀜𑀸 𑀘, 𑀯𑀢𑁆𑀣𑀼𑀦𑀺𑀘𑁆𑀙𑀬𑀮𑀓𑁆𑀔𑀡𑀸;

𑀯𑀢𑁆𑀣𑀼𑀧𑁆𑀧𑀢𑀺𑀝𑁆𑀞𑀺𑀢𑀸 𑀘𑀸𑀬𑀁, 𑀢𑀺𑀮𑀓𑁆𑀔𑀡𑀯𑀺𑀧𑀲𑁆𑀲𑀦𑀸.

𑁧𑁮𑁧𑁬. 𑀢𑀲𑁆𑀫𑀸 𑀲𑀤𑁆𑀥𑀸𑀥𑀼𑀭𑁄 𑀬𑁄𑀕𑀻, 𑀤𑀺𑀲𑁆𑀯𑁄𑀴𑀸𑀭𑀺𑀓𑀮𑀓𑁆𑀔𑀡𑀁;

𑀢𑀢𑁄 𑀧𑀭𑀫𑀦𑀢𑁆𑀢𑀸𑀢𑀺, 𑀲𑀼𑀔𑀼𑀫𑁂 𑀅𑀥𑀺𑀫𑀼𑀘𑁆𑀘𑀢𑀺.

𑁧𑁮𑁧𑁭. 𑀢𑀲𑁆𑀲𑁂𑀯𑀫𑀥𑀺𑀫𑀼𑀢𑁆𑀢𑀲𑁆𑀲, 𑀲𑀤𑁆𑀥𑀸 𑀯𑀸 𑀧𑀦 𑀓𑁂𑀯𑀮𑀸;

𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀸𑀥𑀺𑀓𑀸 𑀘, 𑀯𑀼𑀝𑁆𑀞𑀸𑀦𑀖𑀝𑀺𑀓𑀸 𑀪𑀯𑁂.

𑁧𑁮𑁧𑁮. 𑀣𑀽𑀮𑀮𑀓𑁆𑀔𑀡𑀫𑁄𑀳𑀸𑀬, 𑀧𑀜𑁆𑀜𑀸𑀥𑀼𑀭𑁂 𑀯𑀺𑀧𑀲𑁆𑀲𑀢𑁄;

𑀥𑀫𑁆𑀫𑀲𑀪𑀸𑀯𑀫𑀸𑀳𑀘𑁆𑀘, 𑀲𑀼𑀔𑀼𑀫𑀁 𑀧𑀝𑀺𑀯𑀺𑀚𑁆𑀛𑀢𑀺.

𑁧𑁮𑁧𑁯. 𑀢𑀲𑁆𑀫𑀸 𑀲𑀤𑁆𑀥𑀸𑀥𑀼𑀭𑀲𑁆𑀲𑁂𑀯, 𑀯𑀼𑀝𑁆𑀞𑀸𑀦𑀤𑁆𑀯𑀬𑀫𑀸𑀤𑀺𑀢𑁄;

𑀅𑀦𑁆𑀢𑁂 𑀲𑀤𑁆𑀥𑀸𑀦𑀼𑀕𑀢𑀲𑁆𑀲, 𑀧𑀜𑁆𑀜𑀸 𑀲𑀼𑀧𑀭𑀺𑀧𑀽𑀭𑀢𑀺.

𑁧𑁮𑁨𑁦. 𑀧𑀜𑁆𑀜𑀸𑀥𑀼𑀭𑀲𑁆𑀲 𑀲𑁂𑀲𑀦𑁆𑀢𑀺, 𑀓𑁂𑀘𑀺 𑀆𑀘𑀭𑀺𑀬𑀸 𑀧𑀦;

𑀥𑀼𑀭𑀲𑀁𑀲𑀦𑁆𑀤𑀦𑀁 𑀦𑀸𑀫, 𑀯𑀼𑀝𑁆𑀞𑀸𑀦𑁂𑀲𑀼 𑀯𑀺𑀪𑀸𑀯𑀬𑀼𑀁.

𑁧𑁮𑁨𑁧. 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄 𑀘,

𑀓𑁄𑀮𑀁𑀓𑁄𑀮𑁄 𑀢𑀣𑀸𑀧𑀭𑁄;

𑀏𑀓𑀩𑀻𑀚𑀻𑀢𑀺 𑀢𑀺𑀯𑀺𑀥𑁄,

𑀲𑁄𑀢𑀸𑀧𑀦𑁆𑀦𑁄 𑀧𑀯𑀼𑀘𑁆𑀘𑀢𑀺.

𑁧𑁮𑁨𑁨. 𑀲𑀓𑀺𑀁𑀤𑁂𑀯 𑀇𑀫𑀁 𑀮𑁄𑀓𑀁, 𑀆𑀕𑀦𑁆𑀢𑁆𑀯𑀸 𑀧𑀼𑀦 𑀧𑀼𑀕𑁆𑀕𑀮𑁄;

𑀲𑀓𑀤𑀸𑀕𑀸𑀫𑀺𑀦𑀸𑀫𑁂𑀦, 𑀤𑀼𑀢𑀺𑀬𑁄𑀧𑀺 𑀧𑀓𑀸𑀲𑀺𑀢𑁄.

𑁧𑁮𑁨𑁩. 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻, 𑀉𑀧𑀳𑀘𑁆𑀘𑀸𑀧𑀭𑁄 𑀢𑀣𑀸;

𑀅𑀲𑀗𑁆𑀔𑀸𑀭𑀁 𑀲𑀲𑀗𑁆𑀔𑀸𑀭𑀁, 𑀉𑀤𑁆𑀥𑀁𑀲𑁄𑀢𑁄𑀢𑀺 𑀧𑀜𑁆𑀘𑀥𑀸.

𑁧𑁮𑁨𑁪. 𑀅𑀦𑀸𑀕𑀸𑀫𑀻 𑀘 𑀢𑀢𑀺𑀬𑁄, 𑀘𑀢𑀼𑀢𑁆𑀣𑁄 𑀅𑀭𑀳𑀸𑀢𑀺 𑀘;

𑀇𑀢𑁆𑀣𑀁 𑀨𑀮𑀝𑁆𑀞𑀸 𑀘𑀢𑁆𑀢𑀸𑀭𑁄, 𑀫𑀕𑁆𑀕𑀝𑁆𑀞𑀸 𑀘 𑀢𑀢𑁄𑀧𑀭𑁂.

𑁧𑁮𑁨𑁫. 𑀪𑀸𑀯𑀦𑀸𑀧𑀭𑀺𑀬𑀸𑀬𑁂𑀦, 𑀧𑀝𑀺𑀯𑁂𑀥𑀸𑀦𑀼𑀭𑀽𑀧𑀢𑁄;

𑀘𑀢𑁆𑀢𑀸𑀭𑁄 𑀘 𑀬𑀼𑀕𑀸 𑀳𑁄𑀦𑁆𑀢𑀺, 𑀅𑀝𑁆𑀞 𑀘𑀸𑀭𑀺𑀬𑀧𑀼𑀕𑁆𑀕𑀮𑀸.

𑁧𑁮𑁨𑁬. 𑀤𑀺𑀝𑁆𑀞𑀺𑀓𑀗𑁆𑀔𑀸 𑀧𑀳𑀻𑀬𑀦𑁆𑀢𑀺, 𑀆𑀤𑀺𑀫𑀕𑁆𑀕𑁂𑀦 𑀲𑀩𑁆𑀩𑀣𑀸;

𑀅𑀧𑀸𑀬𑀕𑀫𑀦𑀻𑀬𑀫𑁆𑀧𑀺, 𑀧𑀸𑀧𑀫𑀜𑁆𑀜𑀁 𑀧𑀳𑀻𑀬𑀢𑀺.

𑁧𑁮𑁨𑁭. 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁂𑀦, 𑀔𑀻𑀬𑀦𑁆𑀢𑁄𑀴𑀸𑀭𑀺𑀓𑀸 𑀢𑀣𑀸;

𑀅𑀦𑀸𑀕𑀸𑀫𑀺𑀓𑀫𑀕𑁆𑀕𑁂𑀦, 𑀓𑀸𑀫𑀤𑁄𑀲𑀸𑀯 𑀲𑀩𑁆𑀩𑀣𑀸.

𑁧𑁮𑁨𑁮. 𑀅𑀭𑀳𑀢𑁆𑀢𑁂𑀦 𑀲𑀩𑁆𑀩𑁂𑀧𑀺, 𑀓𑁆𑀮𑁂𑀲𑀸 𑀔𑀻𑀬𑀦𑁆𑀢𑀺 𑀲𑀩𑁆𑀩𑀣𑀸;

𑀓𑁆𑀮𑁂𑀲𑀳𑀸𑀦𑀺 𑀬𑀣𑀸𑀬𑁄𑀕-𑀫𑀺𑀢𑀺 𑀜𑁂𑀬𑁆𑀬𑀸 𑀯𑀺𑀪𑀸𑀯𑀺𑀦𑀸.

𑁧𑁮𑁨𑁯. 𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀅𑀢𑁆𑀣𑁂 𑀥𑀫𑁆𑀫𑁂 𑀦𑀺𑀭𑀼𑀢𑁆𑀢𑀺𑀬𑀁;

𑀧𑀝𑀺𑀪𑀸𑀦𑁂 𑀘 𑀪𑀸𑀲𑀦𑁆𑀢𑀺, 𑀜𑀸𑀡𑀁 𑀪𑁂𑀤𑀕𑀢𑀁 𑀩𑀼𑀥𑀸.

𑁧𑁮𑁩𑁦. 𑀳𑁂𑀢𑀼𑀧𑁆𑀨𑀮𑀜𑁆𑀘 𑀦𑀺𑀩𑁆𑀩𑀸𑀦𑀁, 𑀪𑀸𑀲𑀺𑀢𑀢𑁆𑀣𑁄 𑀢𑀣𑀸𑀧𑀭𑁄;

𑀧𑀸𑀓𑀸𑀓𑁆𑀭𑀺𑀬𑀸𑀢𑀺 𑀧𑀜𑁆𑀘𑁂𑀢𑁂, 𑀅𑀢𑁆𑀣𑀦𑀸𑀫𑁂𑀦 𑀪𑀸𑀲𑀺𑀢𑀸.

𑁧𑁮𑁩𑁧. 𑀳𑁂𑀢𑀼 𑀘𑀸𑀭𑀺𑀬𑀫𑀕𑁆𑀕𑁄 𑀘, 𑀪𑀸𑀲𑀺𑀢𑀜𑁆𑀘 𑀢𑀣𑀸𑀧𑀭𑀁;

𑀓𑀼𑀲𑀮𑀸𑀓𑀼𑀲𑀮𑀜𑁆𑀘𑁂𑀢𑀺, 𑀧𑀜𑁆𑀘 𑀥𑀫𑁆𑀫𑁄 𑀧𑀓𑀸𑀲𑀺𑀢𑁄.

𑁧𑁮𑁩𑁨. 𑀢𑀢𑁆𑀣𑁂𑀯𑀁 𑀤𑀲𑀥𑀸 𑀪𑁂𑀤𑁂, 𑀅𑀢𑁆𑀣𑀥𑀫𑁆𑀫𑁂 𑀬𑀣𑀸𑀭𑀳𑀁;

𑀬𑁄 𑀯𑁄𑀳𑀸𑀭𑁄 𑀲𑀪𑀸𑀯𑁂𑀦, 𑀲𑀸 𑀦𑀺𑀭𑀼𑀢𑁆𑀢𑀻𑀢𑀺 𑀲𑀫𑁆𑀫𑀢𑀸.

𑁧𑁮𑁩𑁩. 𑀢𑀁𑀢𑀁𑀕𑁄𑀘𑀭𑀓𑀺𑀘𑁆𑀘𑀸𑀤𑀺-𑀪𑁂𑀤𑀪𑀺𑀦𑁆𑀦𑀁 𑀢𑀳𑀺𑀁 𑀢𑀳𑀺𑀁;

𑀧𑀯𑀢𑁆𑀢𑀫𑀸𑀦𑀁 𑀬𑀁 𑀜𑀸𑀡𑀁, 𑀧𑀝𑀺𑀪𑀸𑀦𑀁 𑀢𑀫𑀻𑀭𑀺𑀢𑀁.

𑁧𑁮𑁩𑁪. 𑀧𑀼𑀩𑁆𑀩𑀬𑁄𑀕𑁄 𑀩𑀸𑀳𑀼𑀲𑁆𑀲𑀘𑁆𑀘𑀁,

𑀤𑁂𑀲𑀪𑀸𑀲𑀸 𑀢𑀣𑀸𑀕𑀫𑁄;

𑀧𑀭𑀺𑀧𑀼𑀘𑁆𑀙𑀸 𑀘𑀸𑀥𑀺𑀕𑀫𑁄,

𑀦𑀺𑀲𑁆𑀲𑀬𑁄 𑀫𑀺𑀢𑁆𑀢𑀲𑀫𑁆𑀧𑀤𑀸.

𑁧𑁮𑁩𑁫. 𑀇𑀘𑁆𑀘𑀽𑀧𑀦𑀺𑀲𑁆𑀲𑀬𑀁 𑀮𑀤𑁆𑀥𑀸, 𑀪𑀺𑀚𑁆𑀚𑀢𑀺 𑀧𑀝𑀺𑀲𑀫𑁆𑀪𑀺𑀤𑀸;

𑀅𑀲𑁂𑀓𑁆𑀔𑀪𑀽𑀫𑀺𑀬𑀁 𑀯𑀸𑀣, 𑀲𑁂𑀓𑁆𑀔𑀪𑀽𑀫𑀺𑀬𑀫𑁂𑀯 𑀯𑀸.

𑁧𑁮𑁩𑁬. 𑀲𑀭𑀲𑁆𑀲𑀢𑁄 𑀆𑀕𑀫𑀢𑁄, 𑀢𑀣𑀸𑀮𑀫𑁆𑀩𑀡𑀢𑁄𑀧𑀺 𑀘;

𑀦𑀸𑀫𑀼𑀧𑁆𑀧𑀢𑁆𑀢𑀺𑀁 𑀧𑀓𑀸𑀲𑁂𑀦𑁆𑀢𑀺, 𑀨𑀮𑀲𑁆𑀲 𑀢𑀺𑀯𑀺𑀥𑀁 𑀩𑀼𑀥𑀸.

𑁧𑁮𑁩𑁭. 𑀢𑀺𑀥𑀸 𑀢𑀢𑁄 𑀲𑀫𑀸𑀧𑀢𑁆𑀢𑀺, 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀺𑀓𑀸;

𑀲𑀼𑀜𑁆𑀜𑀢𑀸 𑀘𑀸𑀦𑀺𑀫𑀺𑀢𑁆𑀢𑀸 𑀘, 𑀢𑀣𑀸𑀧𑁆𑀧𑀡𑀺𑀳𑀺𑀢𑀸𑀢𑀺 𑀘.

𑁧𑁮𑁩𑁮. 𑀢𑀜𑁆𑀘 𑀯𑀼𑀢𑁆𑀢𑀦𑀬𑁂𑀦𑁂𑀯, 𑀲𑀫𑀸𑀧𑀚𑁆𑀚𑀺𑀢𑀼𑀫𑀺𑀘𑁆𑀙𑀢𑁄;

𑀯𑀺𑀧𑀲𑁆𑀲𑀦𑁆𑀢𑀲𑁆𑀲 𑀲𑀗𑁆𑀔𑀸𑀭𑁂, 𑀨𑀮𑀫𑀧𑁆𑀧𑁂𑀢𑀺 𑀅𑀢𑁆𑀢𑀦𑁄.

𑁧𑁮𑁩𑁯. 𑀦𑀺𑀭𑁄𑀥𑀁 𑀢𑀼 𑀲𑀫𑀸𑀧𑀢𑁆𑀢𑀺𑀁, 𑀭𑀽𑀧𑀸𑀭𑀽𑀧𑀲𑁆𑀲 𑀮𑀸𑀪𑀓𑁄;

𑀲𑀫𑀸𑀧𑀚𑁆𑀚𑀢𑀸𑀦𑀸𑀕𑀸𑀫𑀻, 𑀅𑀭𑀳𑀸 𑀘 𑀬𑀣𑀸 𑀢𑀣𑀸.

𑁧𑁮𑁪𑁦. 𑀭𑀽𑀧𑀸𑀭𑀽𑀧𑀲𑀫𑀸𑀧𑀢𑁆𑀢𑀺𑀁, 𑀲𑀫𑀸𑀧𑀚𑁆𑀚 𑀬𑀣𑀸𑀓𑁆𑀓𑀫𑀁;

𑀯𑀼𑀝𑁆𑀞𑀳𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑁆𑀢𑁄, 𑀢𑀢𑁆𑀣 𑀢𑀢𑁆𑀣𑁂𑀯 𑀲𑀗𑁆𑀔𑀢𑁂.

𑁧𑁮𑁪𑁧. 𑀬𑀼𑀕𑀦𑀦𑁆𑀥𑀁 𑀧𑀯𑀢𑁆𑀢𑁂𑀢𑁆𑀯𑀸, 𑀲𑀫𑀣𑀜𑁆𑀘 𑀯𑀺𑀧𑀲𑁆𑀲𑀦𑀁;

𑀬𑀸𑀯𑀸𑀓𑀺𑀜𑁆𑀘𑀜𑁆𑀜𑀸𑀬𑀢𑀦-𑀫𑀺𑀢𑁆𑀣𑀁 𑀧𑀢𑁆𑀯𑀸 𑀢𑀢𑁄 𑀧𑀭𑀁.

𑁧𑁮𑁪𑁨. 𑀅𑀥𑀺𑀝𑁆𑀞𑁂𑀬𑁆𑀬𑀫𑀥𑀺𑀝𑁆𑀞𑀸𑀬, 𑀓𑀢𑁆𑀯𑀸𑀪𑁄𑀕𑀁 𑀬𑀣𑀸𑀭𑀳𑀁;

𑀫𑀕𑁆𑀕𑀸𑀭𑀽𑀧𑀲𑀫𑀸𑀧𑀢𑁆𑀢𑀺𑀁, 𑀲𑀫𑀸𑀧𑀚𑁆𑀚𑀢𑀺 𑀧𑀡𑁆𑀟𑀺𑀢𑁄.

𑁧𑁮𑁪𑁩. 𑀢𑀢𑁄 𑀦𑀺𑀭𑁄𑀥𑀁 𑀨𑀼𑀲𑀢𑀺, 𑀘𑀺𑀢𑁆𑀢𑀼𑀧𑁆𑀧𑀸𑀤𑀤𑁆𑀯𑀬𑀸 𑀧𑀭𑀁;

𑀢𑀲𑁆𑀲𑁂𑀯𑀁 𑀫𑀦𑀲𑀸𑀪𑀸𑀯𑁄, 𑀦𑀺𑀭𑁄𑀥𑁄𑀢𑀺 𑀧𑀯𑀼𑀘𑁆𑀘𑀢𑀺.

𑁧𑁮𑁪𑁪. 𑀨𑀮𑀘𑀺𑀢𑁆𑀢𑀲𑀫𑀼𑀧𑁆𑀧𑀸𑀤𑀸, 𑀯𑀼𑀝𑁆𑀞𑀸𑀦𑀁 𑀢𑀲𑁆𑀲 𑀤𑀻𑀧𑀺𑀢𑀁;

𑀢𑀢𑁄 𑀪𑀯𑀗𑁆𑀕𑀁 𑀙𑁂𑀢𑁆𑀯𑀸𑀦, 𑀧𑀘𑁆𑀘𑀯𑁂𑀓𑁆𑀔𑀢𑀺 𑀩𑀼𑀤𑁆𑀥𑀺𑀫𑀸.

𑁧𑁮𑁪𑁫. 𑀇𑀘𑁆𑀘𑀸𑀦𑁂𑀓𑀕𑀼𑀡𑀸𑀥𑀸𑀭𑀁, 𑀧𑀜𑁆𑀜𑀸𑀪𑀸𑀯𑀦𑀫𑀼𑀢𑁆𑀢𑀫𑀁;

𑀪𑀸𑀯𑁂𑀬𑁆𑀬 𑀫𑀢𑀺𑀫𑀸 𑀬𑁄𑀕𑀻, 𑀧𑀢𑁆𑀣𑁂𑀦𑁆𑀢𑁄 𑀳𑀺𑀢𑀫𑀢𑁆𑀢𑀦𑁄.

𑁧𑁮𑁪𑁬. 𑀇𑀢𑁆𑀣𑀁 𑀲𑀼𑀲𑀫𑁆𑀧𑀸𑀤𑀺𑀢𑀲𑀻𑀮𑀘𑀺𑀢𑁆𑀢-

𑀧𑀜𑁆𑀜𑀸𑀯𑀺𑀲𑀼𑀤𑁆𑀥𑀻 𑀧𑀝𑀺𑀧𑀸𑀤𑀬𑀦𑁆𑀢𑀸;

𑀧𑀢𑁆𑀯𑀸𑀦 𑀲𑀫𑁆𑀩𑁄𑀥𑀺𑀫𑀧𑁂𑀢𑀲𑁄𑀓𑀸,

𑀧𑀸𑀮𑁂𑀦𑁆𑀢𑀺 𑀲𑁄𑀢𑁆𑀣𑀺𑀁 𑀧𑀭𑀫𑀁 𑀘𑀺𑀭𑀸𑀬.

𑁧𑁮𑁪𑁭. 𑀢𑁂 𑀧𑀢𑁆𑀢𑀺𑀧𑀢𑁆𑀢𑀸 𑀧𑀭𑀫𑀧𑁆𑀧𑀢𑀻𑀢𑀸,

𑀧𑀓𑁆𑀔𑀸𑀮𑀺𑀢𑀓𑁆𑀮𑁂𑀲𑀫𑀮𑀸 𑀫𑀳𑁂𑀲𑀻;

𑀅𑀘𑁆𑀘𑀦𑁆𑀢𑀯𑁄𑀤𑀸𑀢𑀕𑀼𑀡𑁄𑀤𑀺𑀢𑀢𑁆𑀢𑀸,

𑀮𑁄𑀓𑀲𑁆𑀲 𑀳𑁄𑀦𑁆𑀢𑀼𑀢𑁆𑀢𑀫𑀤𑀓𑁆𑀔𑀺𑀡𑁂𑀬𑁆𑀬𑀸.

𑀇𑀢𑀺 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑁂 𑀦𑀺𑀲𑁆𑀲𑀦𑁆𑀤𑀨𑀮𑀯𑀺𑀪𑀸𑀕𑁄 𑀦𑀸𑀫

𑀢𑁂𑀭𑀲𑀫𑁄 𑀧𑀭𑀺𑀘𑁆𑀙𑁂𑀤𑁄.

𑀦𑀺𑀝𑁆𑀞𑀺𑀢𑁄 𑀘 𑀲𑀩𑁆𑀩𑀣𑀸𑀧𑀺 𑀯𑀺𑀧𑀲𑁆𑀲𑀦𑀸𑀯𑀺𑀪𑀸𑀕𑁄.

𑀦𑀺𑀕𑀫𑀦𑀓𑀣𑀸

𑁧𑁮𑁪𑁮. 𑀏𑀢𑁆𑀢𑀸𑀯𑀢𑀸 𑀧𑀝𑀺𑀜𑁆𑀜𑀸𑀢𑁄, 𑀧𑀯𑀓𑁆𑀔𑀸𑀫𑀻𑀢𑀺 𑀆𑀤𑀺𑀢𑁄;

𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑁄, 𑀧𑀭𑀺𑀦𑀺𑀝𑁆𑀞𑀸𑀧𑀺𑀢𑁄 𑀫𑀬𑀸.

𑁧𑁮𑁪𑁯. 𑀢𑁂𑀭𑀲𑁂𑀯 𑀧𑀭𑀺𑀘𑁆𑀙𑁂𑀤𑀸, 𑀯𑀺𑀪𑀢𑁆𑀢𑀸 𑀲𑀢𑁆𑀢 𑀲𑀸𑀥𑀺𑀓𑀸;

𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑁂, 𑀪𑀸𑀡𑀯𑀸𑀭𑀸 𑀧𑀓𑀸𑀲𑀺𑀢𑀸.

𑁧𑁮𑁫𑁦. 𑀅𑀪𑀺𑀥𑀫𑁆𑀫𑀧𑀭𑀫𑀢𑁆𑀣𑀸, 𑀲𑀫𑀣𑁄 𑀘 𑀯𑀺𑀧𑀲𑁆𑀲𑀦𑀸;

𑀯𑀺𑀲𑀼𑀁 𑀯𑀺𑀲𑀼𑀁 𑀯𑀺𑀪𑀢𑁆𑀢𑀸𑀢𑀺, 𑀯𑀺𑀪𑀸𑀕𑁂𑀢𑁆𑀣 𑀢𑀺𑀥𑀸 𑀫𑀢𑀸.

𑁧𑁮𑁫𑁧. 𑀲𑁄𑀬𑀁 𑀯𑀺𑀚𑁆𑀚𑀸𑀯𑀺𑀫𑁄𑀓𑁆𑀔𑀸 𑀘, 𑀳𑀤𑀬𑁂𑀲𑀼 𑀯𑀺𑀪𑀸𑀯𑀺𑀦𑀁;

𑀯𑀮𑁆𑀮𑀪𑀢𑁆𑀢𑀫𑀥𑀺𑀝𑁆𑀞𑀸𑀬, 𑀲𑀸𑀲𑀦𑁂𑀢𑁆𑀣 𑀕𑀯𑁂𑀲𑀺𑀦𑀁.

𑁧𑁮𑁫𑁨. 𑀫𑀦𑁄𑀕𑀢𑀢𑀫𑀼𑀤𑁆𑀥𑀁𑀲𑀻, 𑀭𑀯𑀺𑀭𑀁𑀲𑀻𑀯 𑀧𑀡𑁆𑀟𑀺𑀢𑁄;

𑀤𑀲𑁆𑀲𑁂𑀢𑀼 𑀘𑀺𑀭𑀫𑀸𑀮𑁄𑀓𑀁, 𑀲𑀤𑁆𑀥𑀫𑁆𑀫𑀭𑀢𑀦𑀸𑀮𑀬𑁂.

𑁧𑁮𑁫𑁩. 𑀧𑀡𑁆𑀟𑀺𑀘𑁆𑀘𑀁 𑀧𑀭𑀫𑀢𑁆𑀣𑁂𑀲𑀼, 𑀧𑀸𑀝𑀯𑀁 𑀧𑀝𑀺𑀧𑀢𑁆𑀢𑀺𑀬𑀁;

𑀧𑀢𑁆𑀣𑀬𑀦𑁆𑀢𑁂𑀦 𑀪𑀺𑀓𑁆𑀔𑀽𑀦-𑀫𑀺𑀢𑁆𑀣𑀁 𑀲𑀼𑀕𑀢𑀲𑀸𑀲𑀦𑁂.

𑁧𑁮𑁫𑁪. 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤-𑀫𑀲𑀁𑀓𑀺𑀡𑁆𑀡𑀫𑀦𑀸𑀓𑀼𑀮𑀁;

𑀓𑀼𑀩𑁆𑀩𑀢𑀸 𑀳𑀺𑀢𑀓𑀸𑀫𑁂𑀦, 𑀲𑀼𑀓𑀢𑁂𑀦 𑀓𑀢𑁂𑀦 𑀫𑁂.

𑁧𑁮𑁫𑁫. 𑀫𑀳𑀸𑀫𑁂𑀭𑀼𑀦𑀺𑀪𑀁 𑀕𑁂𑀳𑀁, 𑀫𑀳𑀸𑀘𑁂𑀢𑀺𑀬𑀪𑀽𑀲𑀺𑀢𑀁;

𑀫𑀳𑀸𑀯𑀺𑀳𑀸𑀭𑀫𑀸𑀭𑀼𑀴𑁆𑀳-𑀫𑀳𑀸𑀩𑁄𑀥𑀺𑀫𑀳𑀼𑀲𑁆𑀲𑀯𑀁.

𑁧𑁮𑁫𑁬. 𑀅𑀮𑀗𑁆𑀓𑀸𑀢𑀼𑀁 𑀧𑀳𑁄𑀦𑁆𑀢𑀸𑀮𑀁, 𑀘𑀺𑀭𑀓𑀸𑀮𑀁 𑀢𑀧𑁄𑀥𑀦𑀸;

𑀮𑀗𑁆𑀓𑀸𑀤𑀻𑀧𑀲𑁆𑀲𑀮𑀗𑁆𑀓𑀸𑀭𑀁, 𑀓𑀮𑀗𑁆𑀓𑀸𑀧𑀕𑀢𑀸𑀮𑀬𑀁.

𑁧𑁮𑁫𑁭. 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑁄,

𑀅𑀦𑁆𑀢𑀭𑀸𑀬𑀁 𑀯𑀺𑀦𑀸 𑀬𑀣𑀸;

𑀦𑀺𑀝𑁆𑀞𑀺𑀢𑁄𑀬𑀁 𑀢𑀣𑀸 𑀮𑁄𑀓𑁂,

𑀦𑀺𑀝𑁆𑀞𑀦𑁆𑀢𑀚𑁆𑀛𑀸𑀲𑀬𑀸 𑀲𑀼𑀪𑀸.

𑀇𑀢𑀺 𑀅𑀦𑀼𑀭𑀼𑀤𑁆𑀥𑀸𑀘𑀭𑀺𑀬𑁂𑀦 𑀯𑀺𑀭𑀘𑀺𑀢𑀁

𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑀧𑀓𑀭𑀡𑀁 𑀦𑀺𑀝𑁆𑀞𑀺𑀢𑀁.