𑁧. 𑀧𑀞𑀫𑁄 𑀧𑀭𑀺𑀘𑁆𑀙𑁂𑀤𑁄

𑀭𑀽𑀧𑀲𑀗𑁆𑀔𑁂𑀧𑁄

𑁩. 𑀲𑀘𑁆𑀘𑀸𑀦𑀺 𑀧𑀭𑀫𑀢𑁆𑀣𑀜𑁆𑀘, 𑀲𑀫𑁆𑀫𑀼𑀢𑀺𑀜𑁆𑀘𑀸𑀢𑀺 𑀤𑁆𑀯𑁂 𑀢𑀳𑀺𑀁;

𑀣𑀤𑁆𑀥𑀪𑀸𑀯𑀸𑀤𑀺𑀦𑀸 𑀜𑁂𑀬𑁆𑀬𑀁, 𑀲𑀘𑁆𑀘𑀁 𑀢𑀁 𑀧𑀭𑀫𑀢𑁆𑀣𑀓𑀁.

𑁪. 𑀲𑀦𑁆𑀦𑀺𑀯𑁂𑀲𑀯𑀺𑀲𑁂𑀲𑀸𑀤𑀺𑀜𑁂𑀬𑁆𑀬𑀁 𑀲𑀫𑁆𑀫𑀼𑀢𑀺 𑀢𑀁 𑀤𑁆𑀯𑀬𑀁;

𑀪𑀸𑀯𑀲𑀗𑁆𑀓𑁂𑀢𑀲𑀺𑀤𑁆𑀥𑀻𑀦𑀁, 𑀢𑀣𑀢𑁆𑀢𑀸 𑀲𑀘𑁆𑀘𑀫𑀻𑀭𑀺𑀢𑀁.

𑁫. 𑀧𑀭𑀫𑀢𑁆𑀣𑁄 𑀲𑀦𑀺𑀩𑁆𑀩𑀸𑀦𑀧𑀜𑁆𑀘𑀓𑁆𑀔𑀦𑁆𑀥𑁂𑀢𑁆𑀣 𑀭𑀸𑀲𑀺𑀢𑁄;

𑀔𑀦𑁆𑀥𑀢𑁆𑀣𑁄 𑀘 𑀲𑀫𑀸𑀲𑁂𑀢𑁆𑀯𑀸, 𑀯𑀼𑀢𑁆𑀢𑁄𑀢𑀻𑀢𑀸𑀤𑀺𑀪𑁂𑀤𑀦𑀁.

𑁬. 𑀯𑁂𑀤𑀦𑀸𑀤𑀻𑀲𑀼𑀧𑁂𑀓𑀲𑁆𑀫𑀺𑀁, 𑀔𑀦𑁆𑀥𑀲𑀤𑁆𑀤𑁄 𑀢𑀼 𑀭𑀼𑀴𑁆𑀳𑀺𑀬𑀸;

𑀲𑀫𑀼𑀤𑁆𑀤𑀸𑀤𑁂𑀓𑀤𑁂𑀲𑁂 𑀢𑀼, 𑀲𑀫𑀼𑀤𑁆𑀤𑀸𑀤𑀺𑀭𑀯𑁄 𑀬𑀣𑀸.

𑁭. 𑀢𑀢𑁆𑀣 𑀲𑀻𑀢𑀸𑀤𑀺𑀭𑀼𑀧𑁆𑀧𑀢𑁆𑀢𑀸, 𑀭𑀽𑀧𑀁 𑀪𑁆𑀯𑀸𑀧𑀸𑀦𑀮𑀸𑀦𑀺𑀮𑀁;

𑀪𑀽𑀢𑀁 𑀓𑀣𑀺𑀦𑀤𑀯𑀢𑀸𑀧𑀘𑀦𑀻𑀭𑀡𑀪𑀸𑀯𑀓𑀁.

𑁮. 𑀘𑀓𑁆𑀔𑀼 𑀲𑁄𑀢𑀜𑁆𑀘 𑀖𑀸𑀦𑀜𑁆𑀘, 𑀚𑀺𑀯𑁆𑀳𑀸 𑀓𑀸𑀬𑁄 𑀧𑀪𑀸 𑀭𑀯𑁄;

𑀕𑀦𑁆𑀥𑁄 𑀭𑀲𑁄𑀚𑀸 𑀇𑀢𑁆𑀣𑀻 𑀘, 𑀧𑀼𑀫𑀸 𑀯𑀢𑁆𑀣𑀼 𑀘 𑀚𑀻𑀯𑀺𑀢𑀁.

𑁯. 𑀔𑀁 𑀚𑀸𑀢𑀺 𑀚𑀭𑀢𑀸 𑀪𑀗𑁆𑀕𑁄, 𑀭𑀽𑀧𑀲𑁆𑀲 𑀮𑀳𑀼𑀢𑀸 𑀢𑀣𑀸;

𑀫𑀼𑀤𑀼𑀓𑀫𑁆𑀫𑀜𑁆𑀜𑀢𑀸 𑀓𑀸𑀬𑀯𑀘𑀻𑀯𑀺𑀜𑁆𑀜𑀢𑁆𑀢𑀺 𑀪𑀽𑀢𑀺𑀓𑀁.

𑁧𑁦. 𑀘𑀓𑁆𑀔𑀸𑀤𑀻 𑀤𑀝𑁆𑀞𑀼𑀓𑀸𑀫𑀸𑀤𑀺𑀳𑁂𑀢𑀼𑀓𑀫𑁆𑀫𑀚𑀪𑀽𑀢𑀺𑀓𑀸;

𑀧𑀲𑀸𑀤𑀸 𑀭𑀽𑀧𑀲𑀤𑁆𑀤𑀸𑀤𑀻, 𑀘𑀓𑁆𑀔𑀼𑀜𑀸𑀡𑀸𑀤𑀺𑀕𑁄𑀘𑀭𑀸.

𑁧𑁧. 𑀑𑀚𑀸 𑀳𑀺 𑀬𑀸𑀧𑀦𑀸 𑀇𑀢𑁆𑀣𑀺𑀧𑀼𑀫𑀮𑀺𑀗𑁆𑀕𑀸𑀤𑀺𑀳𑁂𑀢𑀼𑀓𑀁;

𑀪𑀸𑀯𑀤𑁆𑀯𑀬𑀁 𑀢𑀼 𑀓𑀸𑀬𑀁𑀯, 𑀩𑁆𑀬𑀸𑀧𑀺 𑀦𑁄 𑀲𑀳𑀯𑀼𑀢𑁆𑀢𑀺𑀓𑀁.

𑁧𑁨. 𑀦𑀺𑀲𑁆𑀲𑀬𑀁 𑀯𑀢𑁆𑀣𑀼 𑀥𑀸𑀢𑀽𑀦𑀁, 𑀤𑁆𑀯𑀺𑀦𑁆𑀦𑀁 𑀓𑀫𑁆𑀫𑀚𑀧𑀸𑀮𑀦𑀁;

𑀚𑀻𑀯𑀺𑀢𑀁 𑀉𑀧𑁆𑀧𑀮𑀸𑀤𑀻𑀦𑀁, 𑀉𑀤𑀓𑀁𑀯 𑀞𑀺𑀢𑀺𑀓𑁆𑀔𑀡𑁂.

𑁧𑁩. 𑀔𑀁 𑀭𑀽𑀧𑀸𑀦𑀁 𑀧𑀭𑀺𑀘𑁆𑀙𑁂𑀤𑁄, 𑀚𑀸𑀢𑀺𑀆𑀤𑀺𑀢𑁆𑀢𑀬𑀁 𑀧𑀦;

𑀭𑀽𑀧𑀦𑀺𑀩𑁆𑀩𑀢𑁆𑀢𑀺 𑀧𑀸𑀓𑁄 𑀘, 𑀪𑁂𑀤𑁄 𑀘𑁂𑀯 𑀬𑀣𑀸𑀓𑁆𑀓𑀫𑀁.

𑁧𑁪. 𑀮𑀳𑀼𑀢𑀸𑀤𑀺𑀢𑁆𑀢𑀬𑀁 𑀢𑀁 𑀳𑀺, 𑀭𑀽𑀧𑀸𑀦𑀁 𑀓𑀫𑀢𑁄 𑀲𑀺𑀬𑀸;

𑀅𑀤𑀦𑁆𑀥𑀣𑀤𑁆𑀥𑀢𑀸 𑀘𑀸𑀧𑀺, 𑀓𑀸𑀬𑀓𑀫𑁆𑀫𑀸𑀦𑀼𑀓𑀽𑀮𑀢𑀸.

𑁧𑁫. 𑀅𑀪𑀺𑀓𑁆𑀓𑀫𑀸𑀤𑀺𑀚𑀦𑀓𑀘𑀺𑀢𑁆𑀢𑀚𑀲𑁆𑀲𑀸𑀦𑀺𑀮𑀲𑁆𑀲 𑀳𑀺;

𑀯𑀺𑀓𑀸𑀭𑁄 𑀓𑀸𑀬𑀯𑀺𑀜𑁆𑀜𑀢𑁆𑀢𑀺, 𑀭𑀽𑀧𑀢𑁆𑀣𑀫𑁆𑀪𑀸𑀤𑀺𑀓𑀸𑀭𑀡𑀁.

𑁧𑁬. 𑀯𑀘𑀻𑀪𑁂𑀤𑀓𑀘𑀺𑀢𑁆𑀢𑁂𑀦, 𑀪𑀽𑀢𑀪𑀽𑀫𑀺𑀯𑀺𑀓𑀸𑀭𑀢𑀸;

𑀯𑀘𑀻𑀯𑀺𑀜𑁆𑀜𑀢𑁆𑀢𑀼𑀧𑀸𑀤𑀺𑀦𑁆𑀦𑀖𑀝𑁆𑀝𑀦𑀲𑁆𑀲𑁂𑀯 𑀓𑀸𑀭𑀡𑀁.

𑁧𑁭. 𑀭𑀽𑀧𑀫𑀩𑁆𑀬𑀸𑀓𑀢𑀁 𑀲𑀩𑁆𑀩𑀁, 𑀯𑀺𑀧𑁆𑀧𑀬𑀼𑀢𑁆𑀢𑀫𑀳𑁂𑀢𑀼𑀓𑀁;

𑀅𑀦𑀸𑀮𑀫𑁆𑀩𑀁 𑀧𑀭𑀺𑀢𑁆𑀢𑀸𑀤𑀺, 𑀇𑀢𑀺 𑀏𑀓𑀯𑀺𑀥𑀁 𑀦𑀬𑁂.

𑁧𑁮. 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀘𑀓𑁆𑀔𑀸𑀤𑀻, 𑀧𑀜𑁆𑀘𑁂𑀢𑁂𑀯 𑀧𑀲𑀸𑀤𑀓𑀸;

𑀯𑀢𑁆𑀣𑀼𑀦𑀸 𑀯𑀢𑁆𑀣𑀼 𑀢𑀸𑀦𑁂𑀯, 𑀤𑁆𑀯𑀸𑀭𑀸 𑀯𑀺𑀜𑁆𑀜𑀢𑁆𑀢𑀺𑀪𑀻 𑀲𑀳.

𑁧𑁯. 𑀲𑁂𑀲𑀁 𑀩𑀸𑀯𑀻𑀲𑀢𑀺 𑀘𑁂𑀓𑀯𑀻𑀲 𑀯𑀻𑀲𑀢𑀺 𑀩𑀸𑀳𑀺𑀭𑀁;

𑀅𑀧𑁆𑀧𑀲𑀸𑀤𑀫𑀯𑀢𑁆𑀣𑀼𑀁 𑀘, 𑀅𑀤𑁆𑀯𑀸𑀭𑀜𑁆𑀘 𑀬𑀣𑀸𑀓𑁆𑀓𑀫𑀁.

𑁨𑁦. 𑀧𑀲𑀸𑀤𑀸 𑀧𑀜𑁆𑀘 𑀪𑀸𑀯𑀸𑀬𑀼, 𑀇𑀦𑁆𑀤𑁆𑀭𑀺𑀬𑀦𑀺𑀦𑁆𑀤𑁆𑀭𑀺𑀬𑁂𑀢𑀭𑀁;

𑀯𑀺𑀦𑀸𑀧𑀁 𑀆𑀤𑀺𑀢𑁄 𑀬𑀸𑀯, 𑀭𑀲𑀸 𑀣𑀽𑀮𑀁 𑀦 𑀘𑁂𑀢𑀭𑀁.

𑁨𑁧. 𑀅𑀝𑁆𑀞𑀓𑀁 𑀅𑀯𑀺𑀦𑀺𑀩𑁆𑀪𑁄𑀕𑀁, 𑀯𑀡𑁆𑀡𑀕𑀦𑁆𑀥𑀭𑀲𑁄𑀚𑀓𑀁;

𑀪𑀽𑀢𑀁 𑀢𑀁 𑀢𑀼 𑀯𑀺𑀦𑀺𑀩𑁆𑀪𑁄𑀕𑀫𑀺𑀢𑀭𑀦𑁆𑀢𑀺 𑀯𑀺𑀦𑀺𑀤𑁆𑀤𑀺𑀲𑁂.

𑁨𑁨. 𑀅𑀝𑁆𑀞𑀸𑀭𑀲𑀸𑀤𑀺𑀢𑁄 𑀭𑀽𑀧𑀸, 𑀦𑀺𑀧𑁆𑀨𑀦𑁆𑀦𑀁 𑀢𑀼 𑀦 𑀘𑁂𑀢𑀭𑀁;

𑀨𑁄𑀝𑁆𑀞𑀩𑁆𑀩𑀫𑀸𑀧𑀯𑀚𑁆𑀚𑀁 𑀢𑀼, 𑀪𑀽𑀢𑀁 𑀓𑀸𑀫𑁂 𑀦 𑀘𑁂𑀢𑀭𑀁.

𑁨𑁩. 𑀲𑁂𑀓𑁆𑀔𑀲𑀧𑁆𑀧𑀝𑀺𑀖𑀸𑀲𑁂𑀓𑁆𑀔𑀧𑀝𑀺𑀖𑀁 𑀤𑁆𑀯𑀬𑀯𑀚𑁆𑀚𑀺𑀢𑀁;

𑀯𑀡𑁆𑀡𑀁 𑀢𑀤𑀺𑀢𑀭𑀁 𑀣𑀽𑀮𑀁, 𑀲𑀼𑀔𑀼𑀫𑀜𑁆𑀘𑁂𑀢𑀺 𑀢𑀁 𑀢𑀺𑀥𑀸.

𑁨𑁪. 𑀓𑀫𑁆𑀫𑀚𑀸𑀓𑀫𑁆𑀫𑀚𑀁𑀦𑁂𑀯𑀓𑀫𑁆𑀫𑀸𑀓𑀫𑁆𑀫𑀚𑀢𑁄 𑀢𑀺𑀥𑀸;

𑀘𑀺𑀢𑁆𑀢𑁄𑀚𑀉𑀢𑀼𑀚𑀸𑀤𑀻𑀦𑀁, 𑀯𑀲𑁂𑀦𑀸𑀧𑀺 𑀢𑀺𑀥𑀸 𑀢𑀣𑀸.

𑁨𑁫. 𑀤𑀺𑀝𑁆𑀞𑀁 𑀲𑀼𑀢𑀁 𑀫𑀼𑀢𑀜𑁆𑀘𑀸𑀧𑀺, 𑀯𑀺𑀜𑁆𑀜𑀸𑀢𑀁 𑀯𑀢 𑀘𑁂𑀢𑀲𑀸;

𑀏𑀓𑀫𑁂𑀓𑀜𑁆𑀘 𑀧𑀜𑁆𑀘𑀸𑀧𑀺, 𑀯𑀻𑀲𑀢𑀺 𑀘 𑀓𑀫𑀸 𑀲𑀺𑀬𑀼𑀁.

𑁨𑁬. 𑀳𑀤𑀬𑀁 𑀯𑀢𑁆𑀣𑀼 𑀯𑀺𑀜𑁆𑀜𑀢𑁆𑀢𑀺, 𑀤𑁆𑀯𑀸𑀭𑀁 𑀘𑀓𑁆𑀔𑀸𑀤𑀺𑀧𑀜𑁆𑀘𑀓𑀁;

𑀯𑀢𑁆𑀣𑀼 𑀤𑁆𑀯𑀸𑀭𑀜𑁆𑀘 𑀲𑁂𑀲𑀸𑀦𑀺, 𑀯𑀢𑁆𑀣𑀼 𑀤𑁆𑀯𑀸𑀭𑀜𑁆𑀘 𑀦𑁄 𑀲𑀺𑀬𑀸.

𑁨𑁭. 𑀦𑀺𑀧𑁆𑀨𑀦𑁆𑀦𑀁 𑀭𑀽𑀧𑀭𑀽𑀧𑀁 𑀔𑀁, 𑀧𑀭𑀺𑀘𑁆𑀙𑁂𑀤𑁄𑀣 𑀮𑀓𑁆𑀔𑀡𑀁;

𑀚𑀸𑀢𑀺𑀆𑀤𑀺𑀢𑁆𑀢𑀬𑀁 𑀭𑀽𑀧𑀁, 𑀯𑀺𑀓𑀸𑀭𑁄 𑀮𑀳𑀼𑀢𑀸𑀤𑀺𑀓𑀁.

𑁨𑁮. 𑀬𑀣𑀸 𑀲𑀗𑁆𑀔𑀢𑀥𑀫𑁆𑀫𑀸𑀦𑀁, 𑀮𑀓𑁆𑀔𑀡𑀁 𑀲𑀗𑁆𑀔𑀢𑀁 𑀢𑀣𑀸;

𑀧𑀭𑀺𑀘𑁆𑀙𑁂𑀤𑀸𑀤𑀺𑀓𑀁 𑀭𑀽𑀧𑀁, 𑀢𑀚𑁆𑀚𑀸𑀢𑀺𑀫𑀦𑀢𑀺𑀓𑁆𑀓𑀫𑀸.

𑁨𑁯. 𑀓𑀫𑁆𑀫𑀘𑀺𑀢𑁆𑀢𑀸𑀦𑀮𑀸𑀳𑀸𑀭𑀧𑀘𑁆𑀘𑀬𑀸𑀦𑀁 𑀯𑀲𑁂𑀦𑀺𑀥;

𑀜𑁂𑀬𑁆𑀬𑀸 𑀧𑀯𑀢𑁆𑀢𑀺 𑀭𑀽𑀧𑀲𑁆𑀲, 𑀧𑀺𑀡𑁆𑀟𑀸𑀦𑀜𑁆𑀘 𑀯𑀲𑀸 𑀓𑀣𑀁.

𑁩𑁦. 𑀓𑀫𑁆𑀫𑀚𑀁 𑀲𑁂𑀦𑁆𑀤𑁆𑀭𑀺𑀬𑀁 𑀯𑀢𑁆𑀣𑀼, 𑀯𑀺𑀜𑁆𑀜𑀢𑁆𑀢𑀺 𑀘𑀺𑀢𑁆𑀢𑀚𑀸 𑀭𑀯𑁄;

𑀘𑀺𑀢𑁆𑀢𑀕𑁆𑀕𑀺𑀚𑁄 𑀮𑀳𑀼𑀢𑀸𑀤𑀺𑀢𑁆𑀢𑀬𑀁 𑀘𑀺𑀢𑁆𑀢𑀸𑀦𑀮𑀦𑁆𑀦𑀚𑀁.

𑁩𑁧. 𑀅𑀝𑁆𑀞𑀓𑀁 𑀚𑀸𑀢𑀺 𑀘𑀸𑀓𑀸𑀲𑁄, 𑀘𑀢𑀼𑀚𑀸 𑀚𑀭𑀢𑀸 𑀔𑀬𑀁;

𑀓𑀼𑀢𑁄𑀘𑀺 𑀦𑁂𑀯 𑀚𑀸𑀢𑀁 𑀢𑀧𑁆𑀧𑀸𑀓𑀪𑁂𑀤𑀁 𑀳𑀺 𑀢𑀁 𑀤𑁆𑀯𑀬𑀁.

𑁩𑁨. 𑀚𑀸𑀢𑀺𑀬𑀸𑀧𑀺 𑀦 𑀚𑀸𑀢𑀢𑁆𑀢𑀁, 𑀓𑀼𑀢𑁄𑀘𑀺𑀝𑁆𑀞𑀓𑀣𑀸𑀦𑀬𑀸;

𑀮𑀓𑁆𑀔𑀡𑀸𑀪𑀸𑀯𑀢𑁄 𑀢𑀲𑁆𑀲𑀸, 𑀲𑀢𑀺 𑀢𑀲𑁆𑀫𑀺𑀁 𑀦 𑀦𑀺𑀝𑁆𑀞𑀺𑀢𑀺.

𑁩𑁩. 𑀓𑀫𑁆𑀫𑀘𑀺𑀢𑁆𑀢𑀸𑀦𑀮𑀦𑁆𑀦𑁂𑀳𑀺, 𑀧𑀺𑀡𑁆𑀟𑀸 𑀦𑀯 𑀘 𑀲𑀢𑁆𑀢 𑀘;

𑀘𑀢𑁆𑀢𑀸𑀭𑁄 𑀤𑁆𑀯𑁂 𑀘 𑀯𑀺𑀜𑁆𑀜𑁂𑀬𑁆𑀬𑀸, 𑀲𑀚𑀻𑀯𑁂 𑀤𑁆𑀯𑁂 𑀅𑀚𑀻𑀯𑀓𑁂.

𑁩𑁪. 𑀅𑀝𑁆𑀞𑀓𑀁 𑀚𑀻𑀯𑀺𑀢𑁂𑀦𑀸𑀬𑀼𑀦𑀯𑀓𑀁 𑀪𑀸𑀯𑀯𑀢𑁆𑀣𑀼𑀦𑀸;

𑀘𑀓𑁆𑀔𑀸𑀤𑀻 𑀧𑀜𑁆𑀘 𑀤𑀲𑀓𑀸, 𑀓𑀮𑀸𑀧𑀸 𑀦𑀯 𑀓𑀫𑁆𑀫𑀚𑀸.

𑁩𑁫. 𑀲𑀼𑀤𑁆𑀥𑀝𑁆𑀞𑀯𑀺𑀜𑁆𑀜𑀢𑁆𑀢𑀺𑀬𑀼𑀢𑁆𑀢𑀦𑀯𑀓𑁄𑀧𑀺 𑀘 𑀤𑀲𑀓𑁄;

𑀲𑀼𑀤𑁆𑀥𑀲𑀤𑁆𑀤𑁂𑀦 𑀦𑀯𑀓𑁄, 𑀮𑀳𑀼𑀢𑀸𑀤𑀺𑀤𑀲𑁂𑀓𑀓𑁄.

𑁩𑁬. 𑀯𑀺𑀜𑁆𑀜𑀢𑁆𑀢𑀺𑀮𑀳𑀼𑀢𑀸𑀤𑀻𑀳𑀺, 𑀧𑀼𑀦 𑀤𑁆𑀯𑀸𑀤𑀲 𑀢𑁂𑀭𑀲;

𑀘𑀺𑀢𑁆𑀢𑀚𑀸 𑀇𑀢𑀺 𑀯𑀺𑀜𑁆𑀜𑁂𑀬𑁆𑀬𑀸, 𑀓𑀮𑀸𑀧𑀸 𑀲𑀢𑁆𑀢 𑀯𑀸 𑀙 𑀯𑀸.

𑁩𑁭. 𑀲𑀼𑀤𑁆𑀥𑀝𑁆𑀞𑀁 𑀲𑀤𑁆𑀤𑀦𑀯𑀓𑀁, 𑀮𑀳𑀼𑀢𑀸𑀤𑀺𑀤𑀲𑁂𑀓𑀓𑀁;

𑀲𑀤𑁆𑀤𑁂𑀦𑀮𑀳𑀼𑀢𑀸𑀤𑀻𑀳𑀺, 𑀘𑀢𑀼𑀭𑁄𑀢𑀼𑀚𑀓𑀡𑁆𑀡𑀺𑀓𑀸.

𑁩𑁮. 𑀲𑀼𑀤𑁆𑀥𑀝𑁆𑀞𑀮𑀳𑀼𑀢𑀸𑀤𑀻𑀳𑀺, 𑀅𑀦𑁆𑀦𑀚𑀸 𑀤𑁆𑀯𑁂𑀢𑀺𑀫𑁂 𑀦𑀯;

𑀲𑀢𑁆𑀢 𑀘𑀢𑁆𑀢𑀸𑀭𑀺 𑀤𑁆𑀯𑁂 𑀘𑁂𑀢𑀺, 𑀓𑀮𑀸𑀧𑀸 𑀯𑀻𑀲𑀢𑀻 𑀤𑁆𑀯𑀺𑀪𑀺.

𑁩𑁯. 𑀢𑀬𑀝𑁆𑀞𑀓𑀸 𑀘 𑀘𑀢𑁆𑀢𑀸𑀭𑁄, 𑀦𑀯𑀓𑀸 𑀤𑀲𑀓𑀸 𑀦𑀯;

𑀢𑀬𑁄 𑀤𑁆𑀯𑁂𑀓𑁄 𑀘 𑀏𑀓𑁂𑀦, 𑀤𑀲 𑀤𑁆𑀯𑀻𑀳𑀺 𑀘 𑀢𑀻𑀳𑀺 𑀘.

𑁪𑁦. 𑀘𑀢𑀼𑀦𑁆𑀦𑀫𑁆𑀧𑀺 𑀘 𑀥𑀸𑀢𑀽𑀦𑀁, 𑀅𑀥𑀺𑀓𑀁𑀲𑀯𑀲𑁂𑀦𑀺𑀥;

𑀭𑀽𑀧𑀪𑁂𑀤𑁄𑀣 𑀯𑀺𑀜𑁆𑀜𑁂𑀬𑁆𑀬𑁄, 𑀓𑀫𑁆𑀫𑀘𑀺𑀢𑁆𑀢𑀸𑀦𑀮𑀦𑁆𑀦𑀚𑁄.

𑁪𑁧. 𑀓𑁂𑀲𑀸𑀤𑀺𑀫𑀢𑁆𑀣𑀮𑀼𑀗𑁆𑀕𑀦𑁆𑀢𑀸, 𑀧𑀣𑀯𑀁𑀲𑀸𑀢𑀺 𑀯𑀻𑀲𑀢𑀺;

𑀧𑀺𑀢𑁆𑀢𑀸𑀤𑀺𑀫𑀼𑀢𑁆𑀢𑀓𑀦𑁆𑀢𑀸 𑀢𑁂, 𑀚𑀮𑀁𑀲𑀸 𑀤𑁆𑀯𑀸𑀤𑀲𑀻𑀭𑀺𑀢𑀸.

𑁪𑁨. 𑀬𑁂𑀦 𑀲𑀦𑁆𑀢𑀧𑁆𑀧𑀦𑀁 𑀬𑁂𑀦, 𑀚𑀻𑀭𑀡𑀁 𑀤𑀳𑀦𑀁 𑀢𑀣𑀸;

𑀬𑁂𑀦𑀲𑀺𑀢𑀸𑀤𑀺𑀧𑀸𑀓𑁄𑀢𑀺, 𑀘𑀢𑀼𑀭𑀁𑀲𑀸𑀦𑀮𑀸𑀥𑀺𑀓𑀸.

𑁪𑁩. 𑀉𑀤𑁆𑀥𑀸𑀥𑁄𑀕𑀫𑀓𑀼𑀘𑁆𑀙𑀺𑀝𑁆𑀞𑀸, 𑀓𑁄𑀝𑁆𑀞𑀸𑀲𑁂𑀬𑁆𑀬𑀗𑁆𑀕𑀲𑀸𑀭𑀺 𑀘;

𑀅𑀲𑁆𑀲𑀸𑀲𑁄𑀢𑀺 𑀘 𑀯𑀺𑀜𑁆𑀜𑁂𑀬𑁆𑀬𑀸, 𑀙𑀴𑀁𑀲𑀸 𑀯𑀸𑀬𑀼𑀦𑀺𑀲𑁆𑀲𑀺𑀢𑀸.

𑁪𑁪. 𑀧𑀼𑀩𑁆𑀩𑀫𑀼𑀢𑁆𑀢𑀓𑀭𑀻𑀲𑀜𑁆𑀘𑀼𑀤𑀭𑀺𑀬𑀁 𑀘𑀢𑀼𑀭𑁄𑀢𑀼𑀚𑀸;

𑀓𑀫𑁆𑀫𑀸 𑀧𑀸𑀘𑀕𑁆𑀕𑀺 𑀘𑀺𑀢𑁆𑀢𑀫𑁆𑀳𑀸-𑀲𑁆𑀲𑀸𑀲𑁄𑀢𑀺 𑀙𑀧𑀺 𑀏𑀓𑀚𑀸.

𑁪𑁫. 𑀲𑁂𑀤𑀲𑀺𑀗𑁆𑀖𑀸𑀦𑀺𑀓𑀲𑁆𑀲𑀼 𑀘, 𑀔𑁂𑀴𑁄 𑀘𑀺𑀢𑁆𑀢𑁄𑀢𑀼𑀲𑀫𑁆𑀪𑀯𑀸;

𑀤𑁆𑀯𑀺𑀚𑀸 𑀤𑁆𑀯𑀢𑁆𑀢𑀺𑀁𑀲 𑀓𑁄𑀝𑁆𑀞𑀸𑀲𑀸, 𑀲𑁂𑀲𑀸 𑀏𑀯 𑀘𑀢𑀼𑀩𑁆𑀪𑀯𑀸.

𑁪𑁬. 𑀏𑀓𑀚𑁂𑀲𑁆𑀯𑀸𑀤𑀺𑀘𑀢𑀽𑀲𑀼, 𑀉𑀢𑀼𑀚𑀸 𑀘𑀢𑀼𑀭𑀝𑁆𑀞𑀓𑀸;

𑀚𑀻𑀯𑀻𑀢𑀦𑀯𑀓𑁄 𑀧𑀸𑀘𑁂𑀲𑁆𑀲𑀸𑀲𑁂 𑀘𑀺𑀢𑁆𑀢𑀪𑀯𑀝𑁆𑀞𑀓𑁄.

𑁪𑁭. 𑀤𑁆𑀯𑀺𑀚𑁂𑀲𑀼 𑀫𑀦𑀢𑁂𑀚𑁂𑀳𑀺, 𑀤𑁆𑀯𑁂 𑀤𑁆𑀯𑁂 𑀳𑁄𑀦𑁆𑀢𑀺 𑀧𑀦𑀝𑁆𑀞𑀓𑀸;

𑀲𑁂𑀲𑀢𑁂𑀚𑀸𑀦𑀺𑀮𑀁𑀲𑁂𑀲𑀼, 𑀏𑀓𑁂𑀓𑀫𑁆𑀳𑀺 𑀢𑀬𑁄 𑀢𑀬𑁄.

𑁪𑁮. 𑀅𑀝𑁆𑀞𑀓𑁄𑀚𑀫𑀦𑀕𑁆𑀕𑀻𑀳𑀺, 𑀳𑁄𑀦𑁆𑀢𑀺 𑀅𑀝𑁆𑀞𑀲𑀼 𑀓𑀫𑁆𑀫𑀢𑁄;

𑀅𑀝𑁆𑀞𑀸𑀬𑀼𑀦𑀯𑀓𑀸 𑀏𑀯𑀁, 𑀇𑀫𑁂 𑀅𑀝𑁆𑀞 𑀘𑀢𑀼𑀩𑁆𑀪𑀯𑀸.

𑁪𑁯. 𑀘𑀢𑀼𑀯𑀻𑀲𑁂𑀲𑀼 𑀲𑁂𑀲𑁂𑀲𑀼, 𑀘𑀢𑀼𑀚𑁂𑀲𑀼𑀝𑁆𑀞𑀓𑀸 𑀢𑀬𑁄;

𑀏𑀓𑁂𑀓𑀫𑁆𑀳𑀺 𑀘 𑀯𑀺𑀜𑁆𑀜𑁂𑀬𑁆𑀬𑀸, 𑀧𑀺𑀡𑁆𑀟𑀸 𑀘𑀺𑀢𑁆𑀢𑀸𑀦𑀮𑀦𑁆𑀦𑀚𑀸.

𑁫𑁦. 𑀓𑀫𑁆𑀫𑀚𑀸 𑀓𑀸𑀬𑀪𑀸𑀯𑀯𑁆𑀳𑀸, 𑀤𑀲𑀓𑀸𑀧𑀺 𑀲𑀺𑀬𑀼𑀁 𑀢𑀳𑀺𑀁;

𑀘𑀢𑀼𑀯𑀻𑀲𑁂𑀲𑀼 𑀅𑀁𑀲𑁂𑀲𑀼, 𑀏𑀓𑁂𑀓𑀫𑁆𑀳𑀺 𑀤𑀼𑀯𑁂 𑀤𑀼𑀯𑁂.

𑁫𑁧. 𑀧𑀜𑁆𑀘𑀸𑀧𑀺 𑀘𑀓𑁆𑀔𑀼𑀲𑁄𑀢𑀸𑀤𑀻, 𑀧𑀤𑁂𑀲𑀤𑀲𑀓𑀸 𑀧𑀼𑀦;

𑀦𑀯𑀓𑀸 𑀲𑀤𑁆𑀤𑀲𑀗𑁆𑀔𑀸𑀢𑀸, 𑀤𑁆𑀯𑁂𑀢𑀺𑀘𑁆𑀘𑁂𑀯𑀁 𑀓𑀮𑀸𑀧𑀢𑁄.

𑁫𑁨. 𑀢𑁂𑀧𑀜𑁆𑀜𑀸𑀲 𑀤𑀲𑁂𑀓𑀜𑁆𑀘, 𑀦𑀯𑀼𑀢𑁆𑀢𑀭𑀲𑀢𑀸𑀦𑀺 𑀘;

𑀤𑀲𑀓𑀸 𑀦𑀯𑀓𑀸 𑀘𑁂𑀯, 𑀅𑀝𑁆𑀞𑀓𑀸 𑀘 𑀲𑀺𑀬𑀼𑀁 𑀓𑀫𑀸.

𑁫𑁩. 𑀲𑁂𑀓𑀧𑀜𑁆𑀘𑀲𑀢𑀁 𑀓𑀸𑀬𑁂, 𑀲𑀳𑀲𑁆𑀲𑀁 𑀢𑀁 𑀧𑀯𑀢𑁆𑀢𑀢𑀺;

𑀧𑀭𑀺𑀧𑀼𑀡𑁆𑀡𑀺𑀦𑁆𑀤𑁆𑀭𑀺𑀬𑁂 𑀭𑀽𑀧𑀁, 𑀦𑀺𑀧𑁆𑀨𑀦𑁆𑀦𑀁 𑀥𑀸𑀢𑀼𑀪𑁂𑀤𑀢𑁄.

𑁫𑁪. 𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀲𑀺𑀬𑀼𑀁 𑀭𑀽𑀧-𑀳𑁂𑀢𑀽 𑀓𑀫𑁆𑀫𑀸𑀤𑀬𑁄 𑀧𑀦;

𑀞𑀺𑀢𑀺 𑀦 𑀧𑀸𑀞𑁂 𑀘𑀺𑀢𑁆𑀢𑀲𑁆𑀲, 𑀦 𑀪𑀗𑁆𑀕𑁂 𑀭𑀽𑀧𑀲𑀫𑁆𑀪𑀯𑁄.

𑁫𑁫. ‘‘𑀅𑀜𑁆𑀜𑀣𑀢𑁆𑀢𑀁 𑀞𑀺𑀢𑀲𑁆𑀲𑀸’’𑀢𑀺, 𑀯𑀼𑀢𑁆𑀢𑀢𑁆𑀢𑀸𑀯 𑀞𑀺𑀢𑀺𑀓𑁆𑀔𑀡𑀁;

𑀅𑀢𑁆𑀣𑀻𑀢𑀺 𑀘𑁂 𑀧𑀩𑀦𑁆𑀥𑁂𑀦, 𑀞𑀺𑀢𑀺 𑀢𑀢𑁆𑀣 𑀧𑀯𑀼𑀘𑁆𑀘𑀢𑀺.

𑁫𑁬. 𑀅𑀣 𑀯𑀸 𑀢𑀺𑀓𑁆𑀔𑀡𑁂 𑀓𑀫𑁆𑀫𑀁, 𑀘𑀺𑀢𑁆𑀢𑀫𑀢𑁆𑀢𑀼𑀤𑀬𑀓𑁆𑀔𑀡𑁂;

𑀉𑀢𑀼𑀑𑀚𑀸𑀢𑁆𑀢𑀦𑁄 𑀞𑀸𑀦𑁂, 𑀭𑀽𑀧𑀳𑁂𑀢𑀽 𑀪𑀯𑀦𑁆𑀢𑀺 𑀳𑀺.

𑁫𑁭. 𑀲𑁂𑀬𑁆𑀬𑀲𑁆𑀲𑀸𑀤𑀺𑀓𑁆𑀔𑀡𑁂 𑀓𑀸𑀬-

𑀪𑀸𑀯𑀯𑀢𑁆𑀣𑀼𑀯𑀲𑀸 𑀢𑀬𑁄;

𑀤𑀲𑀓𑀸 𑀳𑁄𑀦𑁆𑀢𑀺𑀪𑀸𑀯𑀺𑀲𑁆𑀲,

𑀯𑀺𑀦𑀸 𑀪𑀸𑀯𑀁 𑀤𑀼𑀯𑁂 𑀲𑀺𑀬𑀼𑀁.

𑁫𑁮. 𑀢𑀢𑁄 𑀧𑀭𑀜𑁆𑀘 𑀓𑀫𑁆𑀫𑀕𑁆𑀕𑀺𑀘𑀺𑀢𑁆𑀢𑀚𑀸 𑀢𑁂 𑀘 𑀧𑀺𑀡𑁆𑀟𑀺𑀓𑀸;

𑀅𑀝𑁆𑀞𑀓𑀸 𑀘 𑀤𑀼𑀯𑁂 𑀧𑀼𑀩𑁆𑀩𑁂, 𑀯𑀼𑀢𑁆𑀢𑀯𑀼𑀢𑁆𑀢𑀓𑁆𑀔𑀡𑁂 𑀯𑀤𑁂.

𑁫𑁯. 𑀓𑀸𑀮𑁂𑀦𑀸𑀳𑀸𑀭𑀚𑀁 𑀳𑁄𑀢𑀺, 𑀘𑀓𑁆𑀔𑀸𑀤𑀺𑀤𑀲𑀓𑀸𑀦𑀺 𑀘;

𑀘𑀢𑀼𑀧𑀘𑁆𑀘𑀬𑀢𑁄 𑀭𑀽𑀧𑀁, 𑀲𑀫𑁆𑀧𑀺𑀡𑁆𑀟𑁂𑀯𑀁 𑀧𑀯𑀢𑁆𑀢𑀢𑀺.

𑁬𑁦. 𑀢𑀁 𑀲𑀢𑁆𑀢𑀭𑀲𑀘𑀺𑀢𑁆𑀢𑀸𑀬𑀼, 𑀯𑀺𑀦𑀸 𑀯𑀺𑀜𑁆𑀜𑀢𑁆𑀢𑀺𑀮𑀓𑁆𑀔𑀡𑀁;

𑀲𑀦𑁆𑀢𑀢𑀸𑀫𑀭𑀡𑀸 𑀭𑀽𑀧𑀁, 𑀚𑀭𑀸𑀤𑀺𑀨𑀮𑀫𑀸𑀯𑀳𑀁.

𑁬𑁧. 𑀪𑀗𑁆𑀕𑀸 𑀲𑀢𑁆𑀢𑀭𑀲𑀼𑀧𑁆𑀧𑀸𑀤𑁂, 𑀚𑀸𑀬𑀢𑁂 𑀓𑀫𑁆𑀫𑀚𑀁 𑀦 𑀢𑀁;

𑀢𑀤𑀼𑀤𑁆𑀥𑀁 𑀚𑀸𑀬𑀢𑁂 𑀢𑀲𑁆𑀫𑀸, 𑀢𑀓𑁆𑀔𑀬𑀸 𑀫𑀭𑀡𑀁 𑀪𑀯𑁂.

𑁬𑁨. 𑀆𑀬𑀼𑀓𑀫𑁆𑀫𑀼𑀪𑀬𑁂𑀲𑀁 𑀯𑀸, 𑀔𑀬𑁂𑀦 𑀫𑀭𑀡𑀁 𑀪𑀯𑁂;

𑀉𑀧𑀓𑁆𑀓𑀫𑁂𑀦 𑀯𑀸 𑀓𑁂𑀲𑀜𑁆𑀘𑀼𑀧𑀘𑁆𑀙𑁂𑀤𑀓𑀓𑀫𑁆𑀫𑀼𑀦𑀸.

𑁬𑁩. 𑀑𑀧𑀧𑀸𑀢𑀺𑀓𑀪𑀸𑀯𑀺𑀲𑁆𑀲, 𑀤𑀲𑀓𑀸 𑀲𑀢𑁆𑀢 𑀓𑀫𑁆𑀫𑀚𑀸;

𑀓𑀸𑀫𑁂 𑀆𑀤𑁄 𑀪𑀯𑀦𑁆𑀢𑀕𑁆𑀕𑀺𑀚𑀸𑀳𑀺 𑀧𑀼𑀩𑁆𑀩𑁂𑀯 𑀪𑀽𑀬𑀢𑁂.

𑁬𑁪. 𑀆𑀤𑀺𑀓𑀧𑁆𑀧𑀦𑀭𑀸𑀦𑀜𑁆𑀘, 𑀅𑀧𑀸𑀬𑁂 𑀅𑀦𑁆𑀥𑀓𑀲𑁆𑀲 𑀘;

𑀩𑀥𑀺𑀭𑀲𑁆𑀲𑀸𑀧𑀺 𑀆𑀤𑁄 𑀙, 𑀧𑀼𑀩𑁆𑀩𑁂𑀯𑁂𑀢𑀭𑀚𑀸 𑀲𑀺𑀬𑀼𑀁.

𑁬𑁫. 𑀢𑀢𑁆𑀣𑁂𑀯𑀦𑁆𑀥𑀩𑀥𑀺𑀭𑀲𑁆𑀲, 𑀧𑀜𑁆𑀘 𑀳𑁄𑀦𑁆𑀢𑀺 𑀅𑀪𑀸𑀯𑀺𑀦𑁄;

𑀬𑀼𑀢𑁆𑀢𑀺𑀬𑀸 𑀇𑀥 𑀯𑀺𑀜𑁆𑀜𑁂𑀬𑁆𑀬𑀸, 𑀧𑀜𑁆𑀘 𑀯𑀸 𑀘𑀢𑀼𑀭𑁄𑀧𑀺 𑀯𑀸.

𑁬𑁬. 𑀘𑀓𑁆𑀔𑀸𑀤𑀺𑀢𑁆𑀢𑀬𑀳𑀻𑀦𑀲𑁆𑀲, 𑀘𑀢𑀼𑀭𑁄𑀯 𑀪𑀯𑀦𑁆𑀢𑀺𑀢𑀺;

𑀯𑀼𑀢𑁆𑀢𑀁 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸, 𑀕𑀳𑁂𑀢𑀩𑁆𑀩𑀁 𑀯𑀺𑀚𑀸𑀦𑀢𑀸.

𑁬𑁭. 𑀭𑀽𑀧𑁂 𑀚𑀻𑀯𑀺𑀢𑀙𑀓𑁆𑀓𑀜𑁆𑀘, 𑀘𑀓𑁆𑀔𑀸𑀤𑀺𑀲𑀢𑁆𑀢𑀓𑀢𑁆𑀢𑀬𑀁;

𑀧𑀜𑁆𑀘 𑀙 𑀉𑀢𑀼𑀘𑀺𑀢𑁆𑀢𑁂𑀳𑀺, 𑀧𑀜𑁆𑀘 𑀙𑀸𑀲𑀜𑁆𑀜𑀺𑀦𑀁 𑀪𑀯𑁂.

𑁬𑁮. 𑀧𑀜𑁆𑀘𑀥𑀸𑀢𑁆𑀯𑀸𑀤𑀺𑀦𑀺𑀬𑀫𑀸, 𑀧𑀸𑀞𑁂 𑀕𑀦𑁆𑀥𑀭𑀲𑁄𑀚𑀦𑀁;

𑀦𑀼𑀧𑁆𑀧𑀢𑁆𑀢𑀺 𑀢𑀢𑁆𑀣 𑀪𑀽𑀢𑀸𑀦𑀁, 𑀅𑀨𑁄𑀝𑁆𑀞𑀩𑁆𑀩𑀧𑀯𑀢𑁆𑀢𑀺𑀦𑀁.

𑁬𑁯. 𑀣𑀤𑁆𑀥𑀼𑀡𑁆𑀳𑀻𑀭𑀡𑀪𑀸𑀯𑁄𑀯, 𑀦𑀢𑁆𑀣𑀺 𑀥𑀸𑀢𑁆𑀯𑀸𑀤𑀺𑀓𑀺𑀘𑁆𑀘𑀢𑁄;

𑀅𑀜𑁆𑀜𑀁 𑀕𑀦𑁆𑀥𑀸𑀤𑀻𑀦𑀁 𑀢𑁂𑀲𑀁, 𑀢𑀓𑁆𑀓𑀺𑀘𑁆𑀘𑁂𑀦𑁄𑀧𑀮𑀤𑁆𑀥𑀺𑀢𑁄.

𑁭𑁦. 𑀭𑀽𑀧𑁂 𑀲𑀧𑁆𑀧𑀝𑀺𑀖𑀢𑁆𑀢𑀸𑀤𑀺, 𑀢𑀢𑁆𑀣 𑀭𑀼𑀧𑁆𑀧𑀦𑀢𑀸 𑀯𑀺𑀬;

𑀖𑀝𑁆𑀝𑀦𑀜𑁆𑀘 𑀭𑀯𑀼𑀧𑁆𑀧𑀸𑀤𑀲𑁆𑀲𑀜𑁆𑀜𑀢𑁆𑀣𑀲𑁆𑀲𑁂𑀯 𑀳𑁂𑀢𑀼𑀢𑀸.

𑁭𑁧. 𑀇𑀘𑁆𑀙𑀺𑀢𑀩𑁆𑀩𑀫𑀺𑀫𑁂𑀓𑀦𑁆𑀢𑀫𑁂𑀯𑀁 𑀧𑀸𑀞𑀸𑀯𑀺𑀭𑁄𑀥𑀢𑁄;

𑀅𑀣 𑀯𑀸 𑀢𑁂𑀳𑀺 𑀯𑀺𑀜𑁆𑀜𑁂𑀬𑁆𑀬𑀁, 𑀤𑀲𑀓𑀁 𑀦𑀯𑀓𑀝𑁆𑀞𑀓𑀁.

𑁭𑁨. 𑀲𑀩𑁆𑀩𑀁 𑀓𑀸𑀫𑀪𑀯𑁂 𑀭𑀽𑀧𑀁, 𑀭𑀽𑀧𑁂 𑀏𑀓𑀽𑀦𑀯𑀻𑀲𑀢𑀺;

𑀅𑀲𑀜𑁆𑀜𑀻𑀦𑀁 𑀤𑀲 𑀕𑀦𑁆𑀥𑀭𑀲𑁄𑀚𑀸𑀳𑀺 𑀘 𑀩𑁆𑀭𑀳𑁆𑀫𑀼𑀦𑀁.

𑀇𑀢𑀺 𑀲𑀘𑁆𑀘𑀲𑀗𑁆𑀔𑁂𑀧𑁂 𑀭𑀽𑀧𑀲𑀗𑁆𑀔𑁂𑀧𑁄 𑀦𑀸𑀫

𑀧𑀞𑀫𑁄 𑀧𑀭𑀺𑀘𑁆𑀙𑁂𑀤𑁄.