𑁨. 𑀤𑀼𑀢𑀺𑀬𑁄 𑀧𑀭𑀺𑀘𑁆𑀙𑁂𑀤𑁄

𑀔𑀦𑁆𑀥𑀢𑁆𑀢𑀬𑀲𑀗𑁆𑀔𑁂𑀧𑁄

𑁭𑁩. 𑀯𑁂𑀤𑀦𑀸𑀦𑀼𑀪𑀯𑁄 𑀢𑁂𑀥𑀸, 𑀲𑀼𑀔𑀤𑀼𑀓𑁆𑀔𑀫𑀼𑀧𑁂𑀓𑁆𑀔𑀬𑀸;

𑀇𑀝𑁆𑀞𑀸𑀦𑀺𑀝𑁆𑀞𑀸𑀦𑀼𑀪𑀯𑀦𑀫𑀚𑁆𑀛𑀸𑀦𑀼𑀪𑀯𑀮𑀓𑁆𑀔𑀡𑀸.

𑁭𑁪. 𑀓𑀸𑀬𑀺𑀓𑀁 𑀫𑀸𑀦𑀲𑀁 𑀤𑀼𑀓𑁆𑀔𑀁, 𑀲𑀼𑀔𑁄𑀧𑁂𑀓𑁆𑀔𑀸 𑀘 𑀯𑁂𑀤𑀦𑀸;

𑀏𑀓𑀁 𑀫𑀸𑀦𑀲𑀫𑁂𑀯𑁂𑀢𑀺, 𑀧𑀜𑁆𑀘𑀥𑀺𑀦𑁆𑀤𑁆𑀭𑀺𑀬𑀪𑁂𑀤𑀢𑁄.

𑁭𑁫. 𑀬𑀣𑀸 𑀢𑀣𑀸 𑀯𑀸 𑀲𑀜𑁆𑀜𑀸𑀡𑀁, 𑀲𑀜𑁆𑀜𑀸 𑀲𑀢𑀺𑀦𑀺𑀩𑀦𑁆𑀥𑀦𑀁;

𑀙𑀥𑀸 𑀙𑀤𑁆𑀯𑀸𑀭𑀲𑀫𑁆𑀪𑀽𑀢𑀨𑀲𑁆𑀲𑀚𑀸𑀦𑀁 𑀯𑀲𑁂𑀦 𑀲𑀸.

𑁭𑁬. 𑀲𑀗𑁆𑀔𑀸𑀭𑀸 𑀘𑁂𑀢𑀦𑀸 𑀨𑀲𑁆𑀲𑁄,

𑀫𑀦𑀓𑁆𑀓𑀸𑀭𑀸𑀬𑀼 𑀲𑀡𑁆𑀞𑀺𑀢𑀺;

𑀢𑀓𑁆𑀓𑁄 𑀘𑀸𑀭𑁄 𑀘 𑀯𑀸𑀬𑀸𑀫𑁄,

𑀧𑀻𑀢𑀺 𑀙𑀦𑁆𑀤𑁄𑀥𑀺𑀫𑁄𑀓𑁆𑀔𑀓𑁄.

𑁭𑁭. 𑀲𑀤𑁆𑀥𑀸 𑀲𑀢𑀺 𑀳𑀺𑀭𑁄𑀢𑁆𑀢𑀧𑁆𑀧𑀁, 𑀘𑀸𑀕𑁄 𑀫𑁂𑀢𑁆𑀢𑀸 𑀫𑀢𑀺 𑀧𑀼𑀦;

𑀫𑀚𑁆𑀛𑀢𑁆𑀢𑀢𑀸 𑀘 𑀧𑀲𑁆𑀲𑀤𑁆𑀥𑀻, 𑀓𑀸𑀬𑀘𑀺𑀢𑁆𑀢𑀯𑀲𑀸 𑀤𑀼𑀯𑁂.

𑁭𑁮. 𑀮𑀳𑀼𑀢𑀸 𑀫𑀼𑀤𑀼𑀓𑀫𑁆𑀫𑀜𑁆𑀜𑀧𑀸𑀕𑀼𑀜𑁆𑀜𑀫𑀼𑀚𑀼𑀢𑀸 𑀢𑀣𑀸;

𑀤𑀬𑀸 𑀫𑀼𑀤𑀸 𑀫𑀺𑀘𑁆𑀙𑀸𑀯𑀸𑀘𑀸, 𑀓𑀫𑁆𑀫𑀦𑁆𑀢𑀸𑀚𑀻𑀯𑀲𑀁𑀯𑀭𑁄.

𑁭𑁯. 𑀮𑁄𑀪𑁄 𑀤𑁄𑀲𑁄 𑀘 𑀫𑁄𑀳𑁄 𑀘, 𑀤𑀺𑀝𑁆𑀞𑀺 𑀉𑀤𑁆𑀥𑀘𑁆𑀘𑀫𑁂𑀯 𑀘;

𑀅𑀳𑀺𑀭𑀻𑀓𑀁 𑀅𑀦𑁄𑀢𑁆𑀢𑀧𑁆𑀧𑀁, 𑀯𑀺𑀘𑀺𑀓𑀺𑀘𑁆𑀙𑀺𑀢𑀫𑁂𑀯 𑀘.

𑁮𑁦. 𑀫𑀸𑀦𑁄 𑀇𑀲𑁆𑀲𑀸 𑀘 𑀫𑀘𑁆𑀙𑁂𑀭𑀁, 𑀓𑀼𑀓𑁆𑀓𑀼𑀘𑁆𑀘𑀁 𑀣𑀺𑀦𑀫𑀺𑀤𑁆𑀥𑀓𑀁;

𑀇𑀢𑀺 𑀏𑀢𑁂𑀯 𑀧𑀜𑁆𑀜𑀸𑀲, 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀲𑀜𑁆𑀜𑀺𑀢𑀸.

𑁮𑁧. 𑀩𑁆𑀬𑀸𑀧𑀸𑀭𑁄 𑀘𑁂𑀢𑀦𑀸 𑀨𑀲𑁆𑀲𑁄, 𑀨𑀼𑀲𑀦𑀁 𑀲𑀭𑀡𑀁 𑀢𑀳𑀺𑀁;

𑀫𑀦𑀓𑁆𑀓𑀸𑀭𑁄 𑀧𑀸𑀮𑀦𑀸𑀬𑀼, 𑀲𑀫𑀸𑀥𑀺 𑀅𑀯𑀺𑀲𑀸𑀭𑀢𑀸.

𑁮𑁨. 𑀆𑀭𑁄𑀧𑀦𑀸𑀦𑀼𑀫𑀚𑁆𑀚𑀝𑁆𑀞𑀸, 𑀢𑀓𑁆𑀓𑀘𑀸𑀭𑀸 𑀧𑀦𑀻𑀳𑀦𑀸;

𑀯𑀻𑀭𑀺𑀬𑀁 𑀧𑀻𑀦𑀦𑀸 𑀧𑀻𑀢𑀺, 𑀙𑀦𑁆𑀤𑁄 𑀢𑀼 𑀓𑀢𑁆𑀢𑀼𑀓𑀸𑀫𑀢𑀸.

𑁮𑁩. 𑀅𑀥𑀺𑀫𑁄𑀓𑁆𑀔𑁄 𑀦𑀺𑀘𑁆𑀙𑀬𑁄 𑀲𑀤𑁆𑀥𑀸,

𑀧𑀲𑀸𑀤𑁄 𑀲𑀭𑀡𑀁 𑀲𑀢𑀺;

𑀳𑀺𑀭𑀻 𑀧𑀸𑀧𑀚𑀺𑀕𑀼𑀘𑁆𑀙𑀸 𑀳𑀺,

𑀑𑀢𑁆𑀢𑀧𑁆𑀧𑀁 𑀢𑀲𑁆𑀲 𑀪𑀻𑀭𑀼𑀢𑀸.

𑁮𑁪. 𑀅𑀮𑀕𑁆𑀕𑁄 𑀘 𑀅𑀘𑀡𑁆𑀟𑀺𑀓𑁆𑀓𑀁, 𑀘𑀸𑀕𑁄 𑀫𑁂𑀢𑁆𑀢𑀸 𑀫𑀢𑀺 𑀧𑀦;

𑀬𑀸𑀣𑀸𑀯𑀩𑁄𑀥𑁄 𑀫𑀚𑁆𑀛𑀢𑁆𑀢𑀁, 𑀲𑀫𑀯𑀸𑀳𑀺𑀢𑀮𑀓𑁆𑀔𑀡𑀁.

𑁮𑁫. 𑀙 𑀬𑀼𑀕𑀸𑀦𑀺 𑀓𑀸𑀬𑀘𑀺𑀢𑁆𑀢𑀤𑀭𑀕𑀸𑀭𑀯𑀣𑀤𑁆𑀥𑀢𑀸-

𑀅𑀓𑀫𑁆𑀫𑀜𑁆𑀜𑀢𑁆𑀢𑀕𑁂𑀮𑀜𑁆𑀜𑀓𑀼𑀝𑀺𑀮𑀸𑀦𑀁 𑀯𑀺𑀦𑁄𑀤𑀦𑀸.

𑁮𑁬. 𑀢𑀸𑀦𑀼𑀤𑁆𑀥𑀢𑀸𑀤𑀺𑀣𑀺𑀦𑀸𑀤𑀺𑀤𑀺𑀝𑁆𑀞𑀸𑀤𑀻𑀦𑀁 𑀬𑀣𑀸𑀓𑁆𑀓𑀫𑀁;

𑀲𑁂𑀲𑀓𑀸𑀤𑀺𑀅𑀲𑀤𑁆𑀥𑀸𑀤𑀺𑀫𑀸𑀬𑀸𑀤𑀻𑀦𑀁 𑀯𑀺𑀧𑀓𑁆𑀔𑀺𑀦𑁄.

𑁮𑁭. 𑀤𑀼𑀓𑁆𑀔𑀸𑀧𑀦𑀬𑀦𑀓𑀸𑀫𑀸, 𑀤𑀬𑀸 𑀫𑁄𑀤𑀸 𑀧𑀫𑁄𑀤𑀦𑀸;

𑀯𑀘𑀻𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀁, 𑀯𑀺𑀭𑀸𑀫𑁄 𑀯𑀺𑀭𑀢𑀺𑀢𑁆𑀢𑀬𑀁.

𑁮𑁮. 𑀮𑁄𑀪𑁄 𑀤𑁄𑀲𑁄 𑀘 𑀫𑁄𑀳𑁄 𑀘,

𑀕𑁂𑀥𑀘𑀡𑁆𑀟𑀫𑀦𑀦𑁆𑀥𑀦𑀸;

𑀓𑀫𑁂𑀦 𑀤𑀺𑀝𑁆𑀞𑀺 𑀤𑀼𑀕𑁆𑀕𑀸𑀳𑁄,

𑀉𑀤𑁆𑀥𑀘𑁆𑀘𑀁 𑀪𑀦𑁆𑀢𑀢𑀁 𑀫𑀢𑀁.

𑁮𑁯. 𑀅𑀳𑀺𑀭𑀻𑀓𑀫𑀮𑀚𑁆𑀚𑀢𑁆𑀢𑀁, 𑀅𑀦𑁄𑀢𑁆𑀢𑀧𑁆𑀧𑀫𑀢𑀸𑀲𑀢𑀸;

𑀲𑀁𑀲𑀬𑁄 𑀯𑀺𑀘𑀺𑀓𑀺𑀘𑁆𑀙𑀸 𑀳𑀺, 𑀫𑀸𑀦𑁄 𑀉𑀦𑁆𑀦𑀢𑀺𑀮𑀓𑁆𑀔𑀡𑁄.

𑁯𑁦. 𑀧𑀭𑀲𑁆𑀲𑀓𑀲𑀫𑁆𑀧𑀢𑁆𑀢𑀻𑀦𑀁,

𑀉𑀲𑀽𑀬𑀸 𑀘 𑀦𑀺𑀕𑀽𑀳𑀦𑀸;

𑀇𑀲𑁆𑀲𑀸𑀫𑀘𑁆𑀙𑁂𑀭𑀓𑀸 𑀢𑀸𑀧𑁄,

𑀓𑀢𑀸𑀓𑀢𑀲𑁆𑀲 𑀲𑁄𑀘𑀦𑀸.

𑁯𑁧. 𑀣𑀺𑀦𑀁 𑀘𑀺𑀢𑁆𑀢𑀲𑁆𑀲 𑀲𑀗𑁆𑀓𑁄𑀘𑁄, 𑀅𑀓𑀫𑁆𑀫𑀜𑁆𑀜𑀢𑁆𑀢𑀢𑀸 𑀧𑀦;

𑀫𑀺𑀤𑁆𑀥𑀫𑀺𑀘𑁆𑀘𑁂𑀯𑀫𑁂𑀢𑁂𑀲𑀁, 𑀮𑀓𑁆𑀔𑀡𑀜𑁆𑀘 𑀦𑀬𑁂 𑀩𑀼𑀥𑁄.

𑁯𑁨. 𑀯𑁂𑀤𑀦𑀸𑀤𑀺𑀲𑀫𑀸𑀥𑀦𑁆𑀢𑀸, 𑀲𑀢𑁆𑀢 𑀲𑀩𑁆𑀩𑀕𑀲𑀜𑁆𑀜𑀺𑀢𑀸;

𑀢𑀓𑁆𑀓𑀸𑀤𑀺𑀅𑀥𑀺𑀫𑁄𑀓𑁆𑀔𑀦𑁆𑀢𑀸, 𑀙 𑀧𑀓𑀺𑀡𑁆𑀡𑀓𑀦𑀸𑀫𑀓𑀸.

𑁯𑁩. 𑀲𑀤𑁆𑀥𑀸𑀤𑀬𑁄 𑀯𑀺𑀭𑀫𑀦𑁆𑀢𑀸, 𑀅𑀭𑀡𑀸 𑀧𑀜𑁆𑀘𑀯𑀻𑀲𑀢𑀺;

𑀮𑁄𑀪𑀸𑀤𑀺𑀫𑀺𑀤𑁆𑀥𑀓𑀦𑁆𑀢𑀸𑀦𑀺, 𑀲𑀭𑀡𑀸𑀦𑀺 𑀘𑀢𑀼𑀤𑁆𑀤𑀲.

𑁯𑁪. 𑀇𑀲𑁆𑀲𑀸𑀫𑀘𑁆𑀙𑁂𑀭𑀓𑀼𑀓𑁆𑀓𑀼𑀘𑁆𑀘𑀤𑁄𑀲𑀸 𑀓𑀸𑀫𑁂 𑀤𑀬𑀸 𑀫𑀼𑀤𑀸;

𑀓𑀸𑀫𑁂 𑀭𑀽𑀧𑁂 𑀘 𑀲𑁂𑀲𑀸 𑀙-𑀘𑀢𑁆𑀢𑀸𑀮𑀻𑀲 𑀢𑀺𑀥𑀸𑀢𑀼𑀚𑀸.

𑁯𑁫. 𑀙𑀦𑁆𑀤𑀦𑀺𑀘𑁆𑀙𑀬𑀫𑀚𑁆𑀛𑀢𑁆𑀢𑀫𑀦𑀓𑁆𑀓𑀸𑀭𑀸 𑀲𑀉𑀤𑁆𑀥𑀯𑀸;

𑀤𑀬𑀸𑀤𑀻 𑀧𑀜𑁆𑀘 𑀫𑀸𑀦𑀸𑀤𑀻, 𑀙 𑀬𑁂𑀯𑀸𑀧𑀦 𑀲𑁄𑀴𑀲.

𑁯𑁬. 𑀙𑀦𑁆𑀤𑀸𑀤𑀻 𑀧𑀜𑁆𑀘 𑀦𑀺𑀬𑀢𑀸, 𑀢𑀢𑁆𑀣𑁂𑀓𑀸𑀤𑀲 𑀦𑁂𑀢𑀭𑀸;

𑀅𑀳𑀺𑀭𑀻𑀓𑀫𑀦𑁄𑀢𑁆𑀢𑀧𑁆𑀧𑀁, 𑀮𑁄𑀓𑀦𑀸𑀲𑀦𑀓𑀁 𑀤𑁆𑀯𑀬𑀁.

𑁯𑁭. 𑀏𑀢𑁂 𑀤𑁆𑀯𑁂 𑀫𑁄𑀳𑀼𑀤𑁆𑀥𑀘𑁆𑀘𑀸𑀢𑀺, 𑀘𑀢𑁆𑀢𑀸𑀭𑁄 𑀧𑀸𑀧𑀲𑀩𑁆𑀩𑀕𑀸;

𑀮𑁄𑀓𑀧𑀸𑀮𑀤𑀼𑀓𑀁 𑀯𑀼𑀢𑁆𑀢𑀁, 𑀳𑀺𑀭𑀺𑀑𑀢𑁆𑀢𑀧𑁆𑀧𑀦𑀸𑀫𑀓𑀁.

𑁯𑁮. 𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑀸, 𑀛𑀸𑀦𑀗𑁆𑀕𑀸 𑀢𑀓𑁆𑀓𑀘𑀸𑀭𑀓𑀸;

𑀧𑀻𑀢𑀺 𑀏𑀓𑀕𑁆𑀕𑀢𑀸 𑀘𑁂𑀢𑀺, 𑀲𑀢𑁆𑀢 𑀯𑀺𑀢𑁆𑀢𑀺𑀢𑁆𑀢𑀬𑁂𑀦 𑀯𑁂.

𑁯𑁯. 𑀲𑀤𑁆𑀥𑀸 𑀲𑀢𑀺 𑀫𑀢𑁂𑀓𑀕𑁆𑀕-𑀥𑀺𑀢𑀺 𑀮𑁄𑀓𑀯𑀺𑀦𑀸𑀲𑀓𑀸;

𑀧𑀸𑀮𑀓𑀸 𑀦𑀯 𑀘𑁂𑀢𑀸𑀦𑀺, 𑀩𑀮𑀸𑀦𑀺 𑀅𑀯𑀺𑀓𑀫𑁆𑀧𑀢𑁄.

𑁧𑁦𑁦. 𑀏𑀢𑁆𑀣 𑀲𑀤𑁆𑀥𑀸𑀤𑀺𑀧𑀜𑁆𑀘𑀸𑀬𑀼, 𑀓𑀢𑁆𑀯𑀸𑀢𑁆𑀭 𑀘𑀢𑀼𑀥𑀸 𑀫𑀢𑀺𑀁;

𑀯𑁂𑀤𑀦𑀸𑀳𑀺 𑀤𑁆𑀯𑀺𑀲𑀢𑁆𑀢𑁂𑀢𑁂, 𑀇𑀦𑁆𑀤𑁆𑀭𑀺𑀬𑀸𑀦𑀸𑀥𑀺𑀧𑀘𑁆𑀘𑀢𑁄.

𑁧𑁦𑁧. 𑀫𑀦𑀭𑀽𑀧𑀺𑀦𑁆𑀤𑁆𑀭𑀺𑀬𑁂𑀳𑁂𑀢𑁂, 𑀲𑀩𑁆𑀩𑁂 𑀇𑀦𑁆𑀤𑁆𑀭𑀺𑀬𑀦𑀸𑀫𑀓𑀸;

𑀩𑀸𑀯𑀻𑀲𑀢𑀺 𑀪𑀯𑀦𑁆𑀢𑀸𑀬𑀼𑀤𑁆𑀯𑀬𑀁 𑀓𑀢𑁆𑀯𑁂𑀓𑀲𑀗𑁆𑀕𑀳𑀁.

𑁧𑁦𑁨. 𑀤𑀺𑀝𑁆𑀞𑀻𑀳𑁂𑀓𑀕𑁆𑀕𑀢𑀸𑀢𑀓𑁆𑀓𑀲𑀢𑀻𑀯𑀺𑀭𑀢𑀺𑀬𑁄 𑀧𑀣𑀸;

𑀅𑀝𑁆𑀞 𑀦𑀺𑀬𑁆𑀬𑀸𑀦𑀢𑁄 𑀆𑀤𑀺𑀘𑀢𑀼𑀭𑁄 𑀪𑀺𑀢𑁆𑀯𑀸𑀦 𑀤𑁆𑀯𑀸𑀤𑀲.

𑁧𑁦𑁩. 𑀨𑀲𑁆𑀲𑁄 𑀘 𑀘𑁂𑀢𑀦𑀸 𑀘𑁂𑀯,

𑀤𑁆𑀯𑁂𑀯𑁂𑀢𑁆𑀣𑀸𑀳𑀸𑀭𑀡𑀢𑁆𑀢𑀢𑁄;

𑀆𑀳𑀸𑀭𑀸 𑀫𑀦𑀯𑁄𑀚𑀸𑀳𑀺,

𑀪𑀯𑀦𑁆𑀢𑀺 𑀘𑀢𑀼𑀭𑁄𑀣𑀯𑀸.

𑁧𑁦𑁪. 𑀳𑁂𑀢𑀼 𑀫𑀽𑀮𑀝𑁆𑀞𑀢𑁄 𑀧𑀸𑀧𑁂,

𑀮𑁄𑀪𑀸𑀤𑀺𑀢𑁆𑀢𑀬𑀫𑀻𑀭𑀺𑀢𑀁;

𑀓𑀼𑀲𑀮𑀸𑀩𑁆𑀬𑀸𑀓𑀢𑁂 𑀘𑀸𑀧𑀺,

𑀅𑀮𑁄𑀪𑀸𑀤𑀺𑀢𑁆𑀢𑀬𑀁 𑀢𑀣𑀸.

𑁧𑁦𑁫. 𑀤𑀺𑀝𑁆𑀞𑀺𑀮𑁄𑀪𑀤𑀼𑀲𑀸 𑀓𑀫𑁆𑀫𑀧𑀣𑀸𑀧𑀸𑀬𑀲𑁆𑀲 𑀫𑀕𑁆𑀕𑀢𑁄;

𑀢𑀩𑁆𑀩𑀺𑀧𑀓𑁆𑀔𑀸 𑀲𑀼𑀕𑀢𑀺𑀬𑀸, 𑀢𑀬𑁄𑀢𑀺 𑀙 𑀧𑀣𑀻𑀭𑀺𑀢𑀸.

𑁧𑁦𑁬. 𑀧𑀲𑁆𑀲𑀤𑁆𑀥𑀸𑀤𑀺𑀬𑀼𑀕𑀸𑀦𑀺 𑀙, 𑀯𑀕𑁆𑀕𑀢𑁆𑀢𑀸 𑀬𑀼𑀕𑀴𑀸𑀦𑀺 𑀢𑀼;

𑀉𑀧𑀓𑀸𑀭𑀸 𑀲𑀢𑀺 𑀥𑀻 𑀘, 𑀩𑀳𑀽𑀧𑀓𑀸𑀭𑀪𑀸𑀯𑀢𑁄.

𑁧𑁦𑁭. 𑀑𑀖𑀸𑀳𑀭𑀡𑀢𑁄 𑀬𑁄𑀕𑀸,

𑀬𑁄𑀚𑀦𑁂𑀦𑀸𑀪𑀯𑀕𑁆𑀕𑀢𑁄;

𑀲𑀯𑀦𑁂𑀦𑀸𑀲𑀯𑀸 𑀤𑀺𑀝𑁆𑀞𑀺-

𑀫𑁄𑀳𑁂𑀚𑁂𑀢𑁆𑀣 𑀤𑀼𑀥𑀸 𑀮𑀼𑀪𑁄.

𑁧𑁦𑁮. 𑀤𑀴𑁆𑀳𑀕𑁆𑀕𑀸𑀳𑁂𑀦 𑀤𑀺𑀝𑁆𑀞𑁂𑀚𑀸, 𑀉𑀧𑀸𑀤𑀸𑀦𑀁 𑀢𑀺𑀥𑀸 𑀢𑀳𑀺𑀁;

𑀤𑀺𑀝𑁆𑀞𑀺 𑀤𑁄𑀲𑁂𑀦 𑀢𑁂 𑀕𑀦𑁆𑀣𑀸, 𑀕𑀦𑁆𑀣𑀢𑁄 𑀤𑀺𑀝𑁆𑀞𑀺𑀳 𑀤𑁆𑀯𑀺𑀥𑀸.

𑁧𑁦𑁯. 𑀧𑀜𑁆𑀘𑀸𑀯𑀭𑀡𑀢𑁄 𑀓𑀸𑀫-𑀓𑀗𑁆𑀔𑀸𑀤𑁄𑀲𑀼𑀤𑁆𑀥𑀯𑀁 𑀢𑀧𑁄;

𑀣𑀺𑀦𑀫𑀺𑀤𑁆𑀥𑀜𑁆𑀘 𑀫𑁄𑀳𑁂𑀦, 𑀙 𑀯𑀸 𑀦𑀻𑀯𑀭𑀡𑀸𑀦𑀺𑀣.

𑁧𑁧𑁦. 𑀓𑀢𑁆𑀯𑀸 𑀢𑀸𑀧𑀼𑀤𑁆𑀥𑀯𑀁 𑀏𑀓𑀁, 𑀣𑀺𑀦𑀫𑀺𑀤𑁆𑀥𑀜𑁆𑀘 𑀯𑀼𑀘𑁆𑀘𑀢𑀺;

𑀓𑀺𑀘𑁆𑀘𑀲𑁆𑀲𑀸𑀳𑀸𑀭𑀢𑁄 𑀘𑁂𑀯, 𑀯𑀺𑀧𑀓𑁆𑀔𑀲𑁆𑀲 𑀘 𑀮𑁂𑀲𑀢𑁄.

𑁧𑁧𑁧. 𑀤𑀺𑀝𑁆𑀞𑁂𑀚𑀼𑀤𑁆𑀥𑀯𑀤𑁄𑀲𑀦𑁆𑀥-

𑀓𑀗𑁆𑀔𑀸𑀣𑀺𑀦𑀼𑀡𑁆𑀡𑀢𑀻 𑀤𑀲;

𑀮𑁄𑀓𑀦𑀸𑀲𑀬𑀼𑀕𑁂𑀦𑁂𑀢𑁂,

𑀓𑀺𑀮𑁂𑀲𑀸 𑀘𑀺𑀢𑁆𑀢𑀓𑁆𑀮𑁂𑀲𑀢𑁄.

𑁧𑁧𑁨. 𑀮𑁄𑀪𑀤𑁄𑀲𑀫𑀽𑀳𑀫𑀸𑀦-𑀤𑀺𑀝𑁆𑀞𑀺𑀓𑀗𑁆𑀔𑀺𑀲𑁆𑀲𑀫𑀘𑁆𑀙𑀭𑀸;

𑀲𑀁𑀬𑁄𑀚𑀦𑀸𑀦𑀺 𑀤𑀺𑀝𑁆𑀞𑁂𑀚𑀸, 𑀪𑀺𑀢𑁆𑀯𑀸 𑀩𑀦𑁆𑀥𑀦𑀢𑁄 𑀤𑀼𑀥𑀸.

𑁧𑁧𑁩. 𑀢𑀸𑀦𑀺 𑀫𑁄𑀳𑀼𑀤𑁆𑀥𑀯𑀁𑀫𑀸𑀦𑀓𑀗𑁆𑀔𑀸𑀤𑁄𑀲𑁂𑀚𑀤𑀺𑀝𑁆𑀞𑀺𑀬𑁄;

𑀤𑀼𑀥𑀸𑀤𑀺𑀝𑁆𑀞𑀺 𑀢𑀺𑀥𑀸 𑀮𑁄𑀪𑀁, 𑀪𑀺𑀢𑁆𑀯𑀸 𑀲𑀼𑀢𑁆𑀢𑁂 𑀤𑀲𑀻𑀭𑀺𑀢𑀸.

𑁧𑁧𑁪. 𑀤𑀺𑀝𑁆𑀞𑀺𑀮𑁄𑀪𑀫𑀽𑀳𑀫𑀸𑀦𑀤𑁄𑀲𑀓𑀗𑁆𑀔𑀸 𑀢𑀳𑀺𑀁 𑀤𑀼𑀥𑀸;

𑀓𑀢𑁆𑀯𑀸 𑀮𑁄𑀪𑀫𑀺𑀫𑁂 𑀲𑀢𑁆𑀢𑀸𑀦𑀼𑀲𑀬𑀸 𑀲𑀫𑀼𑀤𑀻𑀭𑀺𑀢𑀸.

𑁧𑁧𑁫. 𑀤𑀺𑀝𑁆𑀞𑀺 𑀏𑀯 𑀧𑀭𑀸𑀫𑀸𑀲𑁄, 𑀜𑁂𑀬𑁆𑀬𑁄 𑀏𑀯𑀁 𑀲𑀫𑀸𑀲𑀢𑁄;

𑀅𑀢𑁆𑀣𑁄 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀲𑁆𑀲, 𑀯𑀼𑀢𑁆𑀢𑁄 𑀯𑀼𑀢𑁆𑀢𑀸𑀦𑀼𑀲𑀸𑀭𑀢𑁄.

𑀇𑀢𑀺 𑀲𑀘𑁆𑀘𑀲𑀗𑁆𑀔𑁂𑀧𑁂 𑀔𑀦𑁆𑀥𑀢𑁆𑀢𑀬𑀲𑀗𑁆𑀔𑁂𑀧𑁄 𑀦𑀸𑀫

𑀤𑀼𑀢𑀺𑀬𑁄 𑀧𑀭𑀺𑀘𑁆𑀙𑁂𑀤𑁄.