𑁩. 𑀢𑀢𑀺𑀬𑁄 𑀧𑀭𑀺𑀘𑁆𑀙𑁂𑀤𑁄

𑀘𑀺𑀢𑁆𑀢𑀧𑀯𑀢𑁆𑀢𑀺𑀧𑀭𑀺𑀤𑀻𑀧𑀦𑁄

𑁧𑁧𑁬. 𑀘𑀺𑀢𑁆𑀢𑀁 𑀯𑀺𑀲𑀬𑀕𑁆𑀕𑀸𑀳𑀁 𑀢𑀁, 𑀧𑀸𑀓𑀸𑀧𑀸𑀓𑀤𑀢𑁄 𑀤𑀼𑀥𑀸;

𑀓𑀼𑀲𑀮𑀸𑀓𑀼𑀲𑀮𑀁 𑀧𑀼𑀩𑁆𑀩𑀁, 𑀧𑀭𑀫𑀩𑁆𑀬𑀸𑀓𑀢𑀁 𑀫𑀢𑀁.

𑁧𑁧𑁭. 𑀓𑀼𑀲𑀮𑀁 𑀢𑀢𑁆𑀣 𑀓𑀸𑀫𑀸𑀤𑀺𑀪𑀽𑀫𑀺𑀢𑁄 𑀘𑀢𑀼𑀥𑀸 𑀲𑀺𑀬𑀸;

𑀅𑀝𑁆𑀞 𑀧𑀜𑁆𑀘 𑀘𑀢𑁆𑀢𑀸𑀭𑀺 𑀘, 𑀘𑀢𑁆𑀢𑀸𑀭𑀺 𑀓𑀫𑀢𑁄 𑀓𑀣𑀁.

𑁧𑁧𑁮. 𑀲𑁄𑀫𑀦𑀲𑁆𑀲𑀫𑀢𑀺𑀬𑀼𑀢𑁆𑀢𑀫𑀲𑀗𑁆𑀔𑀸𑀭𑀫𑀦𑀫𑁂𑀓𑀁;

𑀲𑀲𑀗𑁆𑀔𑀸𑀭𑀫𑀦𑀜𑁆𑀘𑁂𑀓𑀁, 𑀢𑀣𑀸 𑀳𑀻𑀦𑀫𑀢𑀺𑀤𑁆𑀯𑀬𑀁.

𑁧𑁧𑁯. 𑀢𑀣𑁄𑀧𑁂𑀓𑁆𑀔𑀸𑀫𑀢𑀺𑀬𑀼𑀢𑁆𑀢𑀁, 𑀫𑀢𑀺𑀳𑀻𑀦𑀦𑁆𑀢𑀺 𑀅𑀝𑁆𑀞𑀥𑀸;

𑀓𑀸𑀫𑀸𑀯𑀘𑀭𑀧𑀼𑀜𑁆𑀜𑁂𑀢𑁆𑀣, 𑀪𑀺𑀚𑁆𑀚𑀢𑁂 𑀯𑁂𑀤𑀦𑀸𑀤𑀺𑀢𑁄.

𑁧𑁨𑁦. 𑀤𑀸𑀦𑀁 𑀲𑀻𑀮𑀜𑁆𑀘 𑀪𑀸𑀯𑀦𑀸, 𑀧𑀢𑁆𑀢𑀺𑀤𑀸𑀦𑀸𑀦𑀼𑀫𑁄𑀤𑀦𑀸;

𑀯𑁂𑀬𑁆𑀬𑀸𑀯𑀘𑁆𑀘𑀸𑀧𑀘𑀸𑀬𑀜𑁆𑀘, 𑀤𑁂𑀲𑀦𑀸 𑀲𑀼𑀢𑀺 𑀤𑀺𑀝𑁆𑀞𑀺𑀚𑀼.

𑁧𑁨𑁧. 𑀏𑀢𑁂𑀲𑁆𑀯𑁂𑀓𑀫𑀬𑀁 𑀳𑀼𑀢𑁆𑀯𑀸, 𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀯𑀸 𑀦 𑀯𑀸;

𑀤𑁆𑀯𑀸𑀭𑀳𑀻𑀦𑀸𑀤𑀺𑀬𑁄𑀦𑀻𑀦𑀁, 𑀕𑀢𑀺𑀬𑀸𑀤𑀺𑀧𑁆𑀧𑀪𑁂𑀤𑀯𑀸.

𑁧𑁨𑁨. 𑀢𑀺𑀓𑀸𑀮𑀺𑀓𑀧𑀭𑀺𑀢𑁆𑀢𑀸𑀤𑀺𑀕𑁄𑀘𑀭𑁂𑀲𑁆𑀯𑁂𑀓𑀫𑀸𑀤𑀺𑀬;

𑀉𑀤𑁂𑀢𑀺 𑀓𑀸𑀮𑀫𑀼𑀢𑁆𑀢𑀁 𑀯𑀸, 𑀫𑀢𑀺𑀳𑀻𑀦𑀁 𑀯𑀺𑀦𑀸𑀫𑀮𑀁.

𑁧𑁨𑁩. 𑀙𑀕𑁄𑀘𑀭𑁂𑀲𑀼 𑀭𑀽𑀧𑀸𑀤𑀺𑀧𑀜𑁆𑀘𑀓𑀁 𑀧𑀜𑁆𑀘 𑀕𑁄𑀘𑀭𑀸;

𑀲𑁂𑀲𑀁 𑀭𑀽𑀧𑀫𑀭𑀽𑀧𑀜𑁆𑀘, 𑀧𑀜𑁆𑀜𑀢𑁆𑀢𑀺 𑀙𑀝𑁆𑀞𑀕𑁄𑀘𑀭𑁄.

𑁧𑁨𑁪. 𑀜𑀸𑀡𑀬𑀼𑀢𑁆𑀢𑀯𑀭𑀁 𑀢𑀢𑁆𑀣, 𑀤𑀢𑁆𑀯𑀸 𑀲𑀦𑁆𑀥𑀺𑀁 𑀢𑀺𑀳𑁂𑀢𑀼𑀓𑀁;

𑀧𑀘𑁆𑀙𑀸 𑀧𑀘𑁆𑀘𑀢𑀺 𑀧𑀸𑀓𑀸𑀦𑀁, 𑀧𑀯𑀢𑁆𑀢𑁂 𑀅𑀝𑁆𑀞𑀓𑁂 𑀤𑀼𑀯𑁂.

𑁧𑁨𑁫. 𑀢𑁂𑀲𑀼𑀬𑁂𑀯 𑀦𑀺𑀳𑀻𑀦𑀁 𑀢𑀼, 𑀤𑀢𑁆𑀯𑀸 𑀲𑀦𑁆𑀥𑀺𑀁 𑀤𑀼𑀳𑁂𑀢𑀼𑀓𑀁;

𑀤𑁂𑀢𑀺 𑀤𑁆𑀯𑀸𑀤𑀲 𑀧𑀸𑀓𑁂 𑀘, 𑀧𑀯𑀢𑁆𑀢𑁂 𑀥𑀻𑀬𑀼𑀢𑀁 𑀯𑀺𑀦𑀸.

𑁧𑁨𑁬. 𑀏𑀯𑀁 𑀥𑀻𑀳𑀻𑀦𑀫𑀼𑀓𑁆𑀓𑀝𑁆𑀞𑀁, 𑀲𑀦𑁆𑀥𑀺𑀬𑀜𑁆𑀘 𑀧𑀯𑀢𑁆𑀢𑀺𑀬𑀁;

𑀳𑀻𑀦𑀁 𑀧𑀦𑀼𑀪𑀬𑀢𑁆𑀣𑀸𑀧𑀺, 𑀳𑁂𑀢𑀼𑀳𑀻𑀦𑁂𑀯 𑀧𑀘𑁆𑀘𑀢𑀺.

𑁧𑁨𑁭. 𑀓𑀸𑀫𑀲𑀼𑀕𑀢𑀺𑀬𑀁𑀬𑁂𑀯, 𑀪𑀯𑀪𑁄𑀕𑀤𑀤𑀁 𑀇𑀤𑀁;

𑀭𑀽𑀧𑀸𑀧𑀸𑀬𑁂 𑀧𑀯𑀢𑁆𑀢𑁂𑀯, 𑀧𑀘𑁆𑀘𑀢𑁂 𑀅𑀦𑀼𑀭𑀽𑀧𑀢𑁄.

𑁧𑁨𑁮. 𑀯𑀺𑀢𑀓𑁆𑀓𑀘𑀸𑀭𑀧𑀻𑀢𑀻𑀳𑀺, 𑀲𑀼𑀔𑁂𑀓𑀕𑁆𑀕𑀬𑀼𑀢𑀁 𑀫𑀦𑀁;

𑀆𑀤𑀺 𑀘𑀸𑀭𑀸𑀤𑀺𑀧𑀻𑀢𑀸𑀤𑀺𑀲𑀼𑀔𑀸𑀤𑀻𑀳𑀺 𑀧𑀭𑀁 𑀢𑀬𑀁.

𑁧𑁨𑁯. 𑀉𑀧𑁂𑀓𑁆𑀔𑁂𑀓𑀕𑁆𑀕𑀢𑀸𑀬𑀦𑁆𑀢𑀫𑀸𑀭𑀼𑀧𑁆𑀧𑀜𑁆𑀘𑁂𑀯𑀫𑀗𑁆𑀕𑀢𑁄;

𑀧𑀜𑁆𑀘𑀥𑀸 𑀭𑀽𑀧𑀧𑀼𑀜𑁆𑀜𑀁 𑀢𑀼, 𑀳𑁄𑀢𑀸𑀭𑀫𑁆𑀫𑀡𑀢𑁄 𑀧𑀦.

𑁧𑁩𑁦. 𑀆𑀤𑀺𑀲𑁆𑀲𑀸𑀲𑀼𑀪𑀫𑀦𑁆𑀢𑀲𑁆𑀲𑀼-

𑀧𑁂𑀓𑁆𑀔𑀸 𑀫𑁂𑀢𑁆𑀢𑀸𑀤𑀬𑁄 𑀢𑀬𑁄;

𑀆𑀤𑁄 𑀘𑀢𑀼𑀦𑁆𑀦𑀁 𑀧𑀜𑁆𑀘𑀦𑁆𑀦𑀁,

𑀲𑀲𑁆𑀲𑀸𑀲𑀓𑀲𑀺𑀡𑀸𑀦𑀺 𑀢𑀼.

𑁧𑁩𑁧. 𑀦𑀪𑀢𑀫𑁆𑀫𑀦𑀢𑀲𑁆𑀲𑀼𑀜𑁆𑀜𑀢𑀘𑁆𑀘𑀺𑀢𑁆𑀢𑀘𑀢𑀼𑀕𑁄𑀘𑀭𑁂;

𑀓𑀫𑁂𑀦𑀸𑀢𑀺𑀓𑁆𑀓𑀫𑀸𑀭𑀼𑀧𑁆𑀧𑀧𑀼𑀜𑁆𑀜𑀁 𑀳𑁄𑀢𑀺 𑀘𑀢𑀼𑀩𑁆𑀩𑀺𑀥𑀁.

𑁧𑁩𑁨. 𑀅𑀫𑀮𑀁 𑀲𑀦𑁆𑀢𑀺𑀫𑀸𑀭𑀩𑁆𑀪, 𑀳𑁄𑀢𑀺 𑀢𑀁 𑀫𑀕𑁆𑀕𑀬𑁄𑀕𑀢𑁄;

𑀘𑀢𑀼𑀥𑀸 𑀧𑀸𑀤𑀓𑀚𑁆𑀛𑀸𑀦𑀪𑁂𑀤𑀢𑁄 𑀧𑀼𑀦 𑀯𑀻𑀲𑀢𑀺.

𑁧𑁩𑁩. 𑀤𑀺𑀝𑁆𑀞𑀺𑀓𑀗𑁆𑀔𑀸𑀦𑀼𑀤𑀁 𑀆𑀤𑀺, 𑀓𑀸𑀫𑀤𑁄𑀲𑀢𑀦𑀽𑀓𑀭𑀁;

𑀧𑀭𑀁 𑀧𑀭𑀁 𑀢𑀤𑀼𑀘𑁆𑀙𑁂𑀤𑀻, 𑀅𑀦𑁆𑀢𑀁 𑀲𑁂𑀲𑀓𑀦𑀸𑀲𑀓𑀁.

𑁧𑁩𑁪. 𑀏𑀯𑀁 𑀪𑀽𑀫𑀺𑀢𑁆𑀢𑀬𑀁 𑀧𑀼𑀜𑁆𑀜𑀁, 𑀪𑀸𑀯𑀦𑀸𑀫𑀬𑀫𑁂𑀢𑁆𑀣 𑀳𑀺;

𑀧𑀞𑀫𑀁 𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬, 𑀤𑀼𑀢𑀺𑀬𑀁 𑀉𑀪𑀬𑁂𑀦𑀧𑀺.

𑁧𑁩𑁫. 𑀢𑀢𑀺𑀬𑁂 𑀆𑀤𑀺 𑀦𑀺𑀲𑁆𑀲𑀸𑀬,

𑀲𑁂𑀲𑀸 𑀦𑀺𑀲𑁆𑀲𑀸𑀬 𑀯𑀸 𑀦 𑀯𑀸;

𑀳𑁄𑀦𑁆𑀢𑀺 𑀆𑀤𑀺𑀤𑁆𑀯𑀬𑀁 𑀢𑀢𑁆𑀣,

𑀲𑀸𑀥𑁂𑀢𑀺 𑀲𑀓𑀪𑀽𑀪𑀯𑀁.

𑁧𑁩𑁬. 𑀲𑀸𑀥𑁂𑀢𑀸𑀦𑀼𑀢𑁆𑀢𑀭𑀁 𑀲𑀦𑁆𑀢𑀺𑀁, 𑀅𑀪𑀺𑀜𑁆𑀜𑀸 𑀧𑀦𑀺𑀥𑁂𑀯 𑀢𑀼;

𑀛𑀸𑀦𑀽𑀤𑀬𑀨𑀮𑀢𑁆𑀢𑀸 𑀦, 𑀨𑀮𑀤𑀸𑀦𑀸𑀧𑀺 𑀲𑀫𑁆𑀪𑀯𑀸.

𑁧𑁩𑁭. 𑀦𑀸𑀜𑁆𑀜𑀪𑀽𑀨𑀮𑀤𑀁 𑀓𑀫𑁆𑀫𑀁, 𑀭𑀽𑀧𑀧𑀸𑀓𑀲𑁆𑀲 𑀕𑁄𑀘𑀭𑁄;

𑀲𑀓𑀫𑁆𑀫𑀕𑁄𑀘𑀭𑁄𑀬𑁂𑀯, 𑀦 𑀘𑀜𑁆𑀜𑁄𑀬𑀫𑀲𑀫𑁆𑀪𑀯𑁄.

𑁧𑁩𑁮. 𑀧𑀸𑀧𑀁 𑀓𑀸𑀫𑀺𑀓𑀫𑁂𑀯𑁂𑀓𑀁, 𑀳𑁂𑀢𑀼𑀢𑁄 𑀢𑀁 𑀤𑁆𑀯𑀺𑀥𑀸 𑀧𑀼𑀦;

𑀫𑀽𑀮𑀢𑁄 𑀢𑀺𑀯𑀺𑀥𑀁 𑀮𑁄𑀪-𑀤𑁄𑀲𑀫𑁄𑀳𑀯𑀲𑀸 𑀲𑀺𑀬𑀸.

𑁧𑁩𑁯. 𑀲𑁄𑀫𑀦𑀲𑁆𑀲𑀓𑀼𑀤𑀺𑀝𑁆𑀞𑀻𑀳𑀺, 𑀬𑀼𑀢𑁆𑀢𑀫𑁂𑀓𑀫𑀲𑀗𑁆𑀔𑀭𑀁;

𑀲𑀲𑀗𑁆𑀔𑀸𑀭𑀫𑀦𑀜𑁆𑀘𑁂𑀓𑀁, 𑀳𑀻𑀦𑀤𑀺𑀝𑁆𑀞𑀺𑀤𑁆𑀯𑀬𑀁 𑀢𑀣𑀸.

𑁧𑁪𑁦. 𑀉𑀧𑁂𑀓𑁆𑀔𑀸𑀤𑀺𑀝𑁆𑀞𑀺𑀬𑀼𑀢𑁆𑀢𑀫𑁆𑀧𑀺, 𑀢𑀣𑀸 𑀤𑀺𑀝𑁆𑀞𑀺𑀯𑀺𑀬𑀼𑀢𑁆𑀢𑀓𑀁;

𑀯𑁂𑀤𑀦𑀸𑀤𑀺𑀝𑁆𑀞𑀺𑀆𑀤𑀻𑀳𑀺, 𑀮𑁄𑀪𑀫𑀽𑀮𑁂𑀯𑀫𑀝𑁆𑀞𑀥𑀸.

𑁧𑁪𑁧. 𑀲𑀤𑀼𑀓𑁆𑀔𑀤𑁄𑀲𑀸𑀲𑀗𑁆𑀔𑀸𑀭𑀁, 𑀇𑀢𑀭𑀁 𑀤𑁄𑀲𑀫𑀽𑀮𑀓𑀁;

𑀫𑁄𑀳𑀫𑀽𑀮𑀫𑁆𑀧𑀺 𑀲𑁄𑀧𑁂𑀓𑁆𑀔𑀁, 𑀓𑀗𑁆𑀔𑀼𑀤𑁆𑀥𑀘𑁆𑀘𑀬𑀼𑀢𑀁 𑀤𑁆𑀯𑀺𑀥𑀸.

𑁧𑁪𑁨. 𑀢𑀢𑁆𑀣 𑀤𑁄𑀲𑀤𑁆𑀯𑀬𑀁 𑀯𑀢𑁆𑀣𑀼𑀁, 𑀦𑀺𑀲𑁆𑀲𑀸𑀬𑁂𑀯𑀺𑀢𑀭𑁂 𑀧𑀦;

𑀦𑀺𑀲𑁆𑀲𑀸𑀬 𑀯𑀸 𑀦 𑀯𑀸 𑀳𑁄𑀦𑁆𑀢𑀺, 𑀯𑀥𑀸𑀤𑀺𑀲𑀳𑀺𑀢𑀸 𑀓𑀣𑀁.

𑁧𑁪𑁩. 𑀨𑀭𑀼𑀲𑁆𑀲𑀯𑀥𑀩𑁆𑀬𑀸𑀧𑀸𑀤𑀸, 𑀲𑀤𑁄𑀲𑁂𑀦 𑀲𑀮𑁄𑀪𑀢𑁄;

𑀓𑀼𑀤𑀺𑀝𑁆𑀞𑀺𑀫𑁂𑀣𑀼𑀦𑀸𑀪𑀺𑀚𑁆𑀛𑀸, 𑀲𑁂𑀲𑀸 𑀓𑀫𑁆𑀫𑀧𑀣𑀸 𑀤𑁆𑀯𑀺𑀪𑀺.

𑁧𑁪𑁪. 𑀲𑀦𑁆𑀥𑀺𑀁 𑀘𑀢𑀽𑀲𑁆𑀯𑀧𑀸𑀬𑁂𑀲𑀼, 𑀤𑁂𑀢𑀺 𑀲𑀩𑁆𑀩𑀢𑁆𑀣 𑀯𑀼𑀢𑁆𑀢𑀺𑀬𑀁;

𑀧𑀘𑁆𑀘𑀢𑁂 𑀕𑁄𑀘𑀭𑀁 𑀢𑀲𑁆𑀲, 𑀲𑀓𑀮𑀁 𑀅𑀫𑀮𑀁 𑀯𑀺𑀦𑀸.

𑁧𑁪𑁫. 𑀅𑀩𑁆𑀬𑀸𑀓𑀢𑀁 𑀤𑁆𑀯𑀺𑀥𑀸 𑀧𑀸𑀓-𑀓𑁆𑀭𑀺𑀬𑀸 𑀢𑀢𑁆𑀣𑀸𑀤𑀺 𑀪𑀽𑀫𑀺𑀢𑁄;

𑀘𑀢𑀼𑀥𑀸 𑀓𑀸𑀫𑀧𑀸𑀓𑁂𑀢𑁆𑀣, 𑀧𑀼𑀜𑁆𑀜𑀧𑀸𑀓𑀸𑀤𑀺𑀢𑁄 𑀤𑀼𑀥𑀸.

𑁧𑁪𑁬. 𑀧𑀼𑀜𑁆𑀜𑀧𑀸𑀓𑀸 𑀤𑁆𑀯𑀺𑀥𑀸𑀳𑁂𑀢𑀼-𑀲𑀳𑁂𑀢𑀽𑀢𑀺 𑀤𑁆𑀯𑀺𑀭𑀝𑁆𑀞𑀓𑀸;

𑀅𑀳𑁂𑀢𑀽 𑀧𑀜𑁆𑀘 𑀜𑀸𑀡𑀸𑀦𑀺, 𑀕𑀳𑀡𑀁 𑀢𑀻𑀭𑀡𑀸 𑀉𑀪𑁄.

𑁧𑁪𑁭. 𑀓𑀸𑀬𑀜𑀸𑀡𑀁 𑀲𑀼𑀔𑀻 𑀢𑀢𑁆𑀣, 𑀲𑁄𑀫𑀦𑀲𑁆𑀲𑀸𑀤𑀺 𑀢𑀻𑀭𑀡𑀁;

𑀲𑁄𑀧𑁂𑀓𑁆𑀔𑀸𑀦𑀺 𑀙 𑀲𑁂𑀲𑀸𑀦𑀺, 𑀲𑀧𑀼𑀜𑁆𑀜𑀁𑀯 𑀲𑀳𑁂𑀢𑀼𑀓𑀁.

𑁧𑁪𑁮. 𑀓𑁂𑀯𑀮𑀁 𑀲𑀦𑁆𑀥𑀺𑀪𑀯𑀗𑁆𑀕-𑀢𑀤𑀸𑀮𑀫𑁆𑀩𑀘𑀼𑀢𑀺𑀩𑁆𑀩𑀲𑀸;

𑀚𑀸𑀬𑀢𑁂 𑀲𑁂𑀲𑀫𑁂𑀢𑀲𑁆𑀲, 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑀸 𑀦𑀬𑁂.

𑁧𑁪𑁯. 𑀫𑀦𑀼𑀲𑁆𑀲𑀯𑀺𑀦𑀺𑀧𑀸𑀢𑀻𑀦𑀁, 𑀲𑀦𑁆𑀥𑀸𑀤𑀺 𑀅𑀦𑁆𑀢𑀢𑀻𑀭𑀡𑀁;

𑀳𑁄𑀢𑀺 𑀅𑀜𑁆𑀜𑁂𑀦 𑀓𑀫𑁆𑀫𑁂𑀦, 𑀲𑀳𑁂𑀢𑀼𑀧𑀺 𑀅𑀳𑁂𑀢𑀼𑀦𑀁.

𑁧𑁫𑁦. 𑀧𑀸𑀧𑀚𑀸 𑀧𑀼𑀜𑁆𑀜𑀚𑀸𑀳𑁂𑀢𑀼-𑀲𑀫𑀸 𑀢𑀻𑀭𑀁 𑀯𑀺𑀦𑀸𑀤𑀺𑀓𑀁;

𑀲𑀤𑀼𑀓𑁆𑀔𑀁 𑀓𑀸𑀬𑀯𑀺𑀜𑁆𑀜𑀸𑀡𑀁, 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑀸 𑀇𑀫𑁂.

𑁧𑁫𑁧. 𑀢𑁂 𑀲𑀸𑀢𑀕𑁄𑀘𑀭𑀸 𑀢𑁂𑀲𑀼, 𑀤𑁆𑀯𑀺𑀝𑁆𑀞𑀸𑀦𑀁 𑀆𑀤𑀺𑀢𑀻𑀭𑀡𑀁;

𑀧𑀜𑁆𑀘𑀝𑁆𑀞𑀸𑀦𑀸𑀧𑀭𑀸 𑀤𑁆𑀯𑁂 𑀢𑁂, 𑀧𑀭𑀺𑀢𑁆𑀢𑀯𑀺𑀲𑀬𑀸𑀔𑀺𑀮𑀸.

𑁧𑁫𑁨. 𑀲𑀫𑁆𑀧𑀝𑀺𑀘𑁆𑀙𑀤𑁆𑀯𑀺𑀧𑀜𑁆𑀘𑀦𑁆𑀦𑀁, 𑀧𑀜𑁆𑀘 𑀭𑀽𑀧𑀸𑀤𑀬𑁄 𑀢𑀳𑀺𑀁;

𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀯 𑀲𑁂𑀲𑀸𑀦𑀁, 𑀧𑀸𑀓𑀸𑀦𑀁 𑀙 𑀢𑀺𑀓𑀸𑀮𑀺𑀓𑀸.

𑁧𑁫𑁩. 𑀭𑀽𑀧𑀸𑀭𑀽𑀧𑀯𑀺𑀧𑀸𑀓𑀸𑀦𑀁, 𑀲𑀩𑁆𑀩𑀲𑁄 𑀲𑀤𑀺𑀲𑀁 𑀯𑀤𑁂;

𑀲𑀓𑀧𑀼𑀜𑁆𑀜𑁂𑀦 𑀲𑀦𑁆𑀥𑀸𑀤𑀺-𑀲𑀓𑀺𑀘𑁆𑀘𑀢𑁆𑀢𑀬𑀢𑀁 𑀯𑀺𑀦𑀸.

𑁧𑁫𑁪. 𑀲𑀫𑀸𑀦𑀼𑀢𑁆𑀢𑀭𑀧𑀸𑀓𑀸𑀧𑀺, 𑀲𑀓𑀧𑀼𑀜𑁆𑀜𑁂𑀦 𑀲𑀩𑁆𑀩𑀲𑁄;

𑀳𑀺𑀢𑁆𑀯𑀸 𑀫𑁄𑀓𑁆𑀔𑀫𑀼𑀔𑀁 𑀢𑀁 𑀳𑀺, 𑀤𑁆𑀯𑀺𑀥𑀸 𑀫𑀕𑁆𑀕𑁂 𑀢𑀺𑀥𑀸 𑀨𑀮𑁂.

𑁧𑁫𑁫. 𑀓𑁆𑀭𑀺𑀬𑀸 𑀢𑀺𑀥𑀸𑀫𑀮𑀸𑀪𑀸𑀯𑀸,

𑀪𑀽𑀫𑀺𑀢𑁄 𑀢𑀢𑁆𑀣 𑀓𑀸𑀫𑀺𑀓𑀸;

𑀤𑁆𑀯𑀺𑀥𑀸 𑀳𑁂𑀢𑀼𑀲𑀳𑁂𑀢𑀽𑀢𑀺,

𑀢𑀺𑀥𑀸𑀳𑁂𑀢𑀼 𑀢𑀳𑀺𑀁 𑀓𑀣𑀁.

𑁧𑁫𑁬. 𑀆𑀯𑀚𑁆𑀚𑀳𑀲𑀺𑀢𑀸𑀯𑀚𑁆𑀚𑀸, 𑀲𑁄𑀧𑁂𑀓𑁆𑀔𑀲𑀼𑀔𑀼𑀧𑁂𑀓𑁆𑀔𑀯𑀸;

𑀧𑀜𑁆𑀘𑀙𑀓𑀸𑀫𑀸𑀯𑀘𑀭𑀸, 𑀲𑀓𑀮𑀸𑀭𑀫𑁆𑀫𑀡𑀸 𑀘 𑀢𑁂.

𑁧𑁫𑁭. 𑀲𑀳𑁂𑀢𑀼𑀭𑀽𑀧𑀭𑀽𑀧𑀸 𑀘, 𑀲𑀓𑀧𑀜𑁆𑀜𑀁𑀯𑀸𑀭𑀳𑀢𑁄;

𑀯𑀼𑀢𑁆𑀢𑀺𑀬𑀸 𑀦 𑀨𑀮𑁂 𑀧𑀼𑀧𑁆𑀨𑀁, 𑀬𑀣𑀸 𑀙𑀺𑀦𑁆𑀦𑀮𑀢𑀸 𑀨𑀮𑀁.

𑁧𑁫𑁮. 𑀅𑀦𑀸𑀲𑁂𑀯𑀦𑀬𑀸𑀯𑀚𑁆𑀚-𑀤𑁆𑀯𑀬𑀁 𑀧𑀼𑀣𑀼𑀚𑁆𑀚𑀦𑀲𑁆𑀲 𑀳𑀺;

𑀦 𑀨𑀮𑁂 𑀯𑀢𑁆𑀢𑀫𑀸𑀦𑀫𑁆𑀧𑀺, 𑀫𑁄𑀖𑀧𑀼𑀧𑁆𑀨𑀁 𑀨𑀮𑀁 𑀬𑀣𑀸.

𑁧𑁫𑁯. 𑀢𑀺𑀲𑀢𑁆𑀢 𑀤𑁆𑀯𑀺𑀙 𑀙𑀢𑁆𑀢𑀺𑀁𑀲, 𑀘𑀢𑀼𑀧𑀜𑁆𑀘 𑀬𑀣𑀸𑀓𑁆𑀓𑀫𑀁;

𑀧𑀼𑀜𑁆𑀜𑀁 𑀧𑀸𑀧𑀁 𑀨𑀮𑀁 𑀓𑁆𑀭𑀺𑀬𑀸, 𑀏𑀓𑀽𑀦𑀦𑀯𑀼𑀢𑀻𑀯𑀺𑀥𑀁.

𑁧𑁬𑁦. 𑀲𑀦𑁆𑀥𑀺 𑀪𑀯𑀗𑁆𑀕𑀫𑀸𑀯𑀚𑁆𑀚𑀁, 𑀤𑀲𑁆𑀲𑀦𑀸𑀤𑀺𑀓𑀧𑀜𑁆𑀘𑀓𑀁;

𑀕𑀳𑀢𑀻𑀭𑀡𑀯𑁄𑀝𑁆𑀞𑀩𑁆𑀩-𑀚𑀯𑀢𑀕𑁆𑀕𑁄𑀘𑀭𑀁 𑀘𑀼𑀢𑀺.

𑁧𑁬𑁧. 𑀇𑀢𑀺 𑀏𑀲𑀁 𑀤𑁆𑀯𑀺𑀲𑀢𑁆𑀢𑀦𑁆𑀦𑀁, 𑀓𑀺𑀘𑁆𑀘𑀯𑀼𑀢𑁆𑀢𑀺𑀯𑀲𑀸𑀥𑀼𑀦𑀸;

𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺 𑀙𑀤𑁆𑀯𑀸𑀭𑁂, 𑀲𑀗𑁆𑀔𑁂𑀧𑀸 𑀯𑀼𑀘𑁆𑀘𑀢𑁂 𑀓𑀣𑀁.

𑁧𑁬𑁨. 𑀓𑀸𑀫𑁂 𑀲𑀭𑀸𑀕𑀺𑀦𑀁 𑀓𑀫𑁆𑀫-𑀦𑀺𑀫𑀺𑀢𑁆𑀢𑀸𑀤𑀺 𑀘𑀼𑀢𑀺𑀓𑁆𑀔𑀡𑁂;

𑀔𑀸𑀬𑀢𑁂 𑀫𑀦𑀲𑁄𑀬𑁂𑀯, 𑀲𑁂𑀲𑀸𑀦𑀁 𑀓𑀫𑁆𑀫𑀕𑁄𑀘𑀭𑁄.

𑁧𑁬𑁩. 𑀉𑀧𑀝𑁆𑀞𑀺𑀢𑀁 𑀢𑀫𑀸𑀭𑀩𑁆𑀪, 𑀧𑀜𑁆𑀘𑀯𑀸𑀭𑀁 𑀚𑀯𑁄 𑀪𑀯𑁂;

𑀢𑀤𑀸𑀮𑀫𑁆𑀩𑀁 𑀢𑀢𑁄 𑀢𑀫𑁆𑀳𑀸, 𑀘𑀼𑀢𑀺 𑀳𑁄𑀢𑀺 𑀚𑀯𑁂𑀳𑀺 𑀯𑀸.

𑁧𑁬𑁪. 𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀲𑀗𑁆𑀔𑀸𑀭-𑀲𑀳𑀚𑁂𑀳𑀺 𑀅𑀧𑀸𑀬𑀺𑀦𑀁;

𑀯𑀺𑀲𑀬𑀸𑀤𑀻𑀦𑀯𑀘𑁆𑀙𑀸𑀤𑀺-𑀦𑀫𑀦𑀓𑁆𑀔𑀺𑀧𑀓𑁂𑀳𑀺 𑀢𑀼.

𑁧𑁬𑁫. 𑀅𑀧𑁆𑀧𑀳𑀻𑀦𑁂𑀳𑀺 𑀲𑁂𑀲𑀸𑀦𑀁, 𑀙𑀸𑀤𑀦𑀁 𑀦𑀫𑀦𑀫𑁆𑀧𑀺 𑀘;

𑀔𑀺𑀧𑀓𑀸 𑀧𑀦 𑀲𑀗𑁆𑀔𑀸𑀭𑀸, 𑀓𑀼𑀲𑀮𑀸𑀯 𑀪𑀯𑀦𑁆𑀢𑀺𑀳.

𑁧𑁬𑁬. 𑀓𑀺𑀘𑁆𑀘𑀢𑁆𑀢𑀬𑁂 𑀓𑀢𑁂 𑀏𑀯𑀁, 𑀓𑀫𑁆𑀫𑀤𑀻𑀧𑀺𑀢𑀕𑁄𑀘𑀭𑁂;

𑀢𑀚𑁆𑀚𑀁 𑀯𑀢𑁆𑀣𑀼𑀁 𑀲𑀳𑀼𑀧𑁆𑀧𑀦𑁆𑀦𑀁, 𑀦𑀺𑀲𑁆𑀲𑀸𑀬 𑀯𑀸 𑀦 𑀯𑀸 𑀢𑀳𑀺𑀁.

𑁧𑁬𑁭. 𑀢𑀚𑁆𑀚𑀸 𑀲𑀦𑁆𑀥𑀺 𑀲𑀺𑀬𑀸 𑀳𑀺𑀢𑁆𑀯𑀸, 𑀅𑀦𑁆𑀢𑀭𑀢𑁆𑀢𑀁 𑀪𑀯𑀦𑁆𑀢𑀭𑁂;

𑀅𑀦𑁆𑀢𑀭𑀢𑁆𑀢𑀁 𑀯𑀺𑀦𑀸 𑀤𑀽𑀭𑁂, 𑀧𑀝𑀺𑀲𑀦𑁆𑀥𑀺 𑀓𑀣𑀁 𑀪𑀯𑁂.

𑁧𑁬𑁮. 𑀇𑀳𑁂𑀯 𑀓𑀫𑁆𑀫𑀢𑀡𑁆𑀳𑀸𑀤𑀺-𑀳𑁂𑀢𑀼𑀢𑁄 𑀧𑀼𑀩𑁆𑀩𑀘𑀺𑀢𑁆𑀢𑀢𑁄;

𑀘𑀺𑀢𑁆𑀢𑀁 𑀤𑀽𑀭𑁂 𑀲𑀺𑀬𑀸 𑀤𑀻𑀧-𑀧𑀝𑀺𑀖𑁄𑀲𑀸𑀤𑀺𑀓𑀁 𑀬𑀣𑀸.

𑁧𑁬𑁯. 𑀦𑀸𑀲𑀜𑁆𑀜𑀸 𑀘𑀯𑀫𑀸𑀦𑀲𑁆𑀲, 𑀦𑀺𑀫𑀺𑀢𑁆𑀢𑀁 𑀦 𑀘𑀼𑀢𑀻 𑀘 𑀬𑀁;

𑀉𑀤𑁆𑀥𑀁 𑀲𑀦𑁆𑀥𑀺𑀦𑀺𑀫𑀺𑀢𑁆𑀢𑀁 𑀓𑀺𑀁, 𑀧𑀘𑁆𑀘𑀬𑁄𑀧𑀺 𑀓𑀦𑀦𑁆𑀢𑀭𑁄.

𑁧𑁭𑁦. 𑀧𑀼𑀩𑁆𑀩𑀪𑀯𑁂 𑀘𑀼𑀢𑀺 𑀤𑀸𑀦𑀺, 𑀓𑀸𑀫𑁂 𑀚𑀸𑀬𑀦𑀲𑀦𑁆𑀥𑀺𑀬𑀸;

𑀅𑀜𑁆𑀜𑀘𑀺𑀢𑁆𑀢𑀦𑁆𑀢𑀭𑀸𑀪𑀸𑀯𑀸, 𑀳𑁄𑀢𑀸𑀦𑀦𑁆𑀢𑀭𑀓𑀸𑀭𑀡𑀁.

𑁧𑁭𑁧. 𑀪𑀯𑀦𑁆𑀢𑀭𑀓𑀢𑀁 𑀓𑀫𑁆𑀫𑀁, 𑀬𑀫𑁄𑀓𑀸𑀲𑀁 𑀮𑀪𑁂 𑀢𑀢𑁄;

𑀳𑁄𑀢𑀺 𑀲𑀸 𑀲𑀦𑁆𑀥𑀺 𑀢𑁂𑀦𑁂𑀯, 𑀉𑀧𑀝𑁆𑀞𑀸𑀧𑀺𑀢𑀕𑁄𑀘𑀭𑁂.

𑁧𑁭𑁨. 𑀬𑀲𑁆𑀫𑀸 𑀘𑀺𑀢𑁆𑀢𑀯𑀺𑀭𑀸𑀕𑀢𑁆𑀢𑀁, 𑀓𑀸𑀢𑀼𑀁 𑀦𑀸𑀲𑀓𑁆𑀔𑀺 𑀲𑀩𑁆𑀩𑀲𑁄;

𑀢𑀲𑁆𑀫𑀸 𑀲𑀸𑀦𑀼𑀲𑀬𑀲𑁆𑀲𑁂𑀯, 𑀧𑀼𑀦𑀼𑀧𑁆𑀧𑀢𑁆𑀢𑀺 𑀲𑀺𑀬𑀸 𑀪𑀯𑁂.

𑁧𑁭𑁩. 𑀧𑀜𑁆𑀘𑀤𑁆𑀯𑀸𑀭𑁂 𑀲𑀺𑀬𑀸 𑀲𑀦𑁆𑀥𑀺, 𑀯𑀺𑀦𑀸 𑀓𑀫𑁆𑀫𑀁 𑀤𑁆𑀯𑀺𑀕𑁄𑀘𑀭𑁂;

𑀪𑀯𑀲𑀦𑁆𑀥𑀸𑀦𑀢𑁄 𑀲𑀦𑁆𑀥𑀺, 𑀪𑀯𑀗𑁆𑀕𑀁 𑀢𑀁 𑀢𑀤𑀗𑁆𑀕𑀢𑁄.

𑁧𑁭𑁪. 𑀢𑀫𑁂𑀯𑀦𑁆𑀢𑁂 𑀘𑀼𑀢𑀺 𑀢𑀲𑁆𑀫𑀺𑀁, 𑀕𑁄𑀘𑀭𑁂 𑀘𑀯𑀦𑁂𑀦 𑀢𑀼;

𑀏𑀓𑀲𑀦𑁆𑀢𑀢𑀺𑀬𑀸 𑀏𑀯𑀁, 𑀉𑀧𑁆𑀧𑀢𑁆𑀢𑀺𑀝𑁆𑀞𑀺𑀢𑀺𑀪𑁂𑀤𑀓𑀸.

𑁧𑁭𑁫. 𑀅𑀣𑀜𑁆𑀜𑀸𑀭𑀫𑁆𑀫𑀡𑀸𑀧𑀸𑀣-𑀕𑀢𑁂 𑀘𑀺𑀢𑁆𑀢𑀦𑁆𑀢𑀭𑀲𑁆𑀲 𑀳𑀺;

𑀳𑁂𑀢𑀼𑀲𑀗𑁆𑀔𑁆𑀬𑀁 𑀪𑀯𑀗𑁆𑀕𑀲𑁆𑀲, 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀘𑀮𑀦𑀁 𑀪𑀯𑁂.

𑁧𑁭𑁬. 𑀖𑀝𑁆𑀝𑀺𑀢𑁂 𑀅𑀜𑁆𑀜𑀯𑀢𑁆𑀣𑀼𑀫𑁆𑀳𑀺, 𑀅𑀜𑁆𑀜𑀦𑀺𑀲𑁆𑀲𑀺𑀢𑀓𑀫𑁆𑀧𑀦𑀁;

𑀏𑀓𑀸𑀩𑀤𑁆𑀥𑁂𑀦 𑀳𑁄𑀢𑀻𑀢𑀺, 𑀲𑀓𑁆𑀔𑀭𑁄𑀧𑀫𑀬𑀸 𑀯𑀤𑁂.

𑁧𑁭𑁭. 𑀫𑀦𑁄𑀥𑀸𑀢𑀼𑀓𑁆𑀭𑀺𑀬𑀸𑀯𑀚𑁆𑀚𑀁, 𑀢𑀢𑁄 𑀳𑁄𑀢𑀺 𑀲𑀓𑀺𑀁 𑀪𑀯𑁂;

𑀤𑀲𑁆𑀲𑀦𑀸𑀤𑀺 𑀲𑀓𑀤𑁆𑀯𑀸𑀭-𑀕𑁄𑀘𑀭𑁄 𑀕𑀳𑀡𑀁 𑀢𑀢𑁄.

𑁧𑁭𑁮. 𑀲𑀦𑁆𑀢𑀻𑀭𑀡𑀁 𑀢𑀢𑁄 𑀢𑀫𑁆𑀳𑀸, 𑀯𑁄𑀝𑁆𑀞𑀩𑁆𑀩𑀜𑁆𑀘 𑀲𑀓𑀺𑀁 𑀢𑀢𑁄;

𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀚𑀯𑁄 𑀓𑀸𑀫𑁂, 𑀢𑀫𑁆𑀳𑀸 𑀢𑀤𑀦𑀼𑀭𑀽𑀧𑀢𑁄.

𑁧𑁭𑁯. 𑀢𑀤𑀸𑀮𑀫𑁆𑀩𑀤𑁆𑀯𑀺𑀓𑀁 𑀢𑀫𑁆𑀳𑀸, 𑀪𑀯𑀗𑁆𑀕𑀁𑀢𑀺𑀫𑀳𑀦𑁆𑀢𑀭𑀺;

𑀚𑀯𑀸 𑀫𑀳𑀦𑁆𑀢𑁂 𑀯𑁄𑀝𑁆𑀞𑀩𑁆𑀩𑀸, 𑀧𑀭𑀺𑀢𑁆𑀢𑁂 𑀦𑀺𑀢𑀭𑁂 𑀫𑀦𑀁.

𑁧𑁮𑁦. 𑀯𑁄𑀝𑁆𑀞𑀩𑁆𑀩𑀲𑁆𑀲 𑀧𑀭𑀺𑀢𑁆𑀢𑁂 𑀢𑀼, 𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀁 𑀚𑀯𑁄 𑀯𑀺𑀬;

𑀯𑀤𑀦𑁆𑀢𑀺 𑀯𑀼𑀢𑁆𑀢𑀺𑀁 𑀢𑀁 𑀧𑀸𑀞𑁂, 𑀅𑀦𑀸𑀲𑁂𑀯𑀦𑀢𑁄 𑀦 𑀳𑀺.

𑁧𑁮𑁧. 𑀦𑀺𑀬𑀫𑁄𑀧𑀺𑀥 𑀘𑀺𑀢𑁆𑀢𑀲𑁆𑀲, 𑀓𑀫𑁆𑀫𑀸𑀤𑀺𑀦𑀺𑀬𑀫𑁄 𑀯𑀺𑀬;

𑀜𑁂𑀬𑁆𑀬𑁄 𑀅𑀫𑁆𑀩𑁄𑀧𑀫𑀸𑀤𑀻𑀳𑀺, 𑀤𑀲𑁆𑀲𑁂𑀢𑁆𑀯𑀸 𑀢𑀁 𑀲𑀼𑀤𑀻𑀧𑀬𑁂.

𑁧𑁮𑁨. 𑀫𑀦𑁄𑀤𑁆𑀯𑀸𑀭𑁂𑀢𑀭𑀸𑀯𑀚𑁆𑀚𑀁, 𑀪𑀯𑀗𑁆𑀕𑀫𑁆𑀳𑀸 𑀲𑀺𑀬𑀸 𑀢𑀢𑁄;

𑀚𑀯𑁄𑀓𑀸𑀫𑁂 𑀯𑀺𑀪𑀽𑀢𑁂 𑀢𑀼, 𑀓𑀸𑀫𑀯𑁆𑀳𑁂 𑀯𑀺𑀲𑀬𑁂 𑀢𑀢𑁄.

𑁧𑁮𑁩. 𑀓𑀸𑀫𑀻𑀦𑀁 𑀢𑀼 𑀢𑀤𑀸𑀮𑀫𑁆𑀩𑀁, 𑀪𑀯𑀗𑁆𑀕𑀁 𑀢𑀼 𑀢𑀢𑁄 𑀲𑀺𑀬𑀸;

𑀅𑀯𑀺𑀪𑀽𑀢𑁂 𑀧𑀭𑀺𑀢𑁆𑀢𑁂 𑀘, 𑀪𑀯𑀗𑁆𑀕𑀁 𑀚𑀯𑀢𑁄 𑀪𑀯𑁂.

𑁧𑁮𑁪. 𑀅𑀯𑀺𑀪𑀽𑀢𑁂 𑀯𑀺𑀪𑀽𑀢𑁂 𑀘, 𑀧𑀭𑀺𑀢𑁆𑀢𑁂 𑀅𑀧𑀭𑀺𑀢𑁆𑀢𑀓𑁂;

𑀚𑀯𑀸𑀬𑁂𑀯 𑀪𑀯𑀗𑁆𑀕𑀁 𑀢𑀼, 𑀩𑁆𑀭𑀳𑁆𑀫𑀸𑀦𑀁 𑀘𑀢𑀼𑀕𑁄𑀘𑀭𑁂.

𑁧𑁮𑁫. 𑀫𑀳𑀕𑁆𑀕𑀢𑀁 𑀧𑀦𑀸𑀭𑀩𑁆𑀪, 𑀚𑀯𑀺𑀢𑁂 𑀤𑁄𑀲𑀲𑀁𑀬𑀼𑀢𑁂;

𑀯𑀺𑀭𑀼𑀤𑁆𑀥𑀢𑁆𑀢𑀸 𑀪𑀯𑀗𑁆𑀕𑀁 𑀦, 𑀓𑀺𑀁 𑀲𑀺𑀬𑀸 𑀲𑀼𑀔𑀲𑀦𑁆𑀥𑀺𑀦𑁄.

𑁧𑁮𑁬. 𑀉𑀧𑁂𑀓𑁆𑀔𑀸𑀢𑀻𑀭𑀡𑀁 𑀳𑁄𑀢𑀺, 𑀧𑀭𑀺𑀢𑁆𑀢𑁂𑀦𑀸𑀯𑀚𑁆𑀚𑀁 𑀓𑀣𑀁.

𑀦𑀺𑀬𑀫𑁄 𑀦 𑀯𑀺𑀦𑀸𑀯𑀚𑁆𑀚𑀁, 𑀫𑀕𑁆𑀕𑀢𑁄 𑀨𑀮𑀲𑀫𑁆𑀪𑀯𑀸.