𑁪. 𑀘𑀢𑀼𑀢𑁆𑀣𑁄 𑀧𑀭𑀺𑀘𑁆𑀙𑁂𑀤𑁄

𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀧𑀓𑀺𑀡𑁆𑀡𑀓𑀦𑀬𑀲𑀗𑁆𑀔𑁂𑀧𑁄

𑁧𑁯𑁨. 𑀏𑀓𑀥𑀸𑀤𑀺𑀦𑀬𑁄𑀤𑀸𑀦𑀺, 𑀧𑀝𑀼𑀯𑀟𑁆𑀠𑀸𑀬 𑀬𑁄𑀕𑀺𑀦𑀁;

𑀯𑀼𑀘𑁆𑀘𑀢𑁂 𑀯𑀺𑀲𑀬𑀕𑁆𑀕𑀸𑀳𑀸, 𑀲𑀩𑁆𑀩𑀫𑁂𑀓𑀯𑀺𑀥𑀁 𑀫𑀦𑀁.

𑁧𑁯𑁩. 𑀏𑀓𑀸𑀲𑀻𑀢𑀺 𑀢𑀺𑀪𑀽𑀫𑀝𑁆𑀞𑀁, 𑀮𑁄𑀓𑀺𑀬𑀁 𑀲𑀼𑀢𑁆𑀢𑀭𑀜𑁆𑀘 𑀢𑀁;

𑀲𑁂𑀲𑀁 𑀮𑁄𑀓𑀼𑀢𑁆𑀢𑀭𑀁 𑀅𑀝𑁆𑀞, 𑀅𑀦𑀼𑀢𑁆𑀢𑀭𑀜𑁆𑀘𑀺𑀢𑀻 𑀤𑁆𑀯𑀺𑀥𑀸.

𑁧𑁯𑁪. 𑀮𑁄𑀓𑀧𑀸𑀓𑀓𑁆𑀭𑀺𑀬𑀸𑀳𑁂𑀢𑀽, 𑀘𑁂𑀓𑀳𑁂𑀢𑀽𑀢𑀺 𑀲𑀢𑁆𑀢𑀳𑀺;

𑀢𑀺𑀁𑀲 𑀦𑀸𑀥𑀺𑀧𑀢𑀺 𑀲𑀸𑀥𑀺-𑀧𑀢𑀺 𑀲𑁂𑀲𑀸𑀢𑀺𑀧𑀻 𑀤𑁆𑀯𑀺𑀥𑀸.

𑁧𑁯𑁫. 𑀙𑀦𑁆𑀤𑀘𑀺𑀢𑁆𑀢𑀻𑀳𑀯𑀻𑀫𑀁𑀲𑀸-𑀲𑁆𑀯𑁂𑀓𑁂𑀦 𑀫𑀢𑀺𑀫𑀸 𑀬𑀼𑀢𑀁;

𑀯𑀺𑀦𑀸 𑀯𑀻𑀫𑀁𑀲𑀫𑁂𑀓𑁂𑀦, 𑀜𑀸𑀡𑀳𑀻𑀦𑀫𑀦𑀁 𑀬𑀼𑀢𑀁.

𑁧𑁯𑁬. 𑀧𑀭𑀺𑀢𑁆𑀢𑀸𑀦𑀧𑁆𑀧𑀫𑀸𑀡𑀸𑀦𑀺, 𑀫𑀳𑀕𑁆𑀕𑀢𑀫𑀦𑀸𑀦𑀺𑀢𑀺;

𑀢𑀺𑀥𑀸 𑀙𑀦𑀯 𑀘𑀝𑁆𑀞 𑀘, 𑀢𑀺𑀦𑀯𑀸 𑀘 𑀬𑀣𑀸𑀓𑁆𑀓𑀫𑀁.

𑁧𑁯𑁭. 𑀤𑁆𑀯𑀺𑀧𑀜𑁆𑀘 𑀘𑀺𑀢𑁆𑀢𑀁 𑀯𑀺𑀜𑁆𑀜𑀸𑀡𑀁, 𑀢𑀺𑀲𑁆𑀲𑁄 𑀳𑀺 𑀫𑀦𑁄𑀥𑀸𑀢𑀼𑀬𑁄;

𑀙𑀲𑀢𑁆𑀢𑀢𑀺 𑀫𑀦𑁄𑀜𑀸𑀡-𑀥𑀸𑀢𑀽𑀢𑀺 𑀢𑀺𑀯𑀺𑀥𑀸 𑀧𑀼𑀦.

𑁧𑁯𑁮. 𑀏𑀓𑀸𑀭𑀫𑁆𑀫𑀡𑀘𑀺𑀢𑁆𑀢𑀸𑀦𑀺, 𑀅𑀦𑀪𑀺𑀜𑁆𑀜𑀁 𑀫𑀳𑀕𑁆𑀕𑀢𑀁;

𑀅𑀫𑀮𑀁 𑀧𑀜𑁆𑀘𑀯𑀺𑀜𑁆𑀜𑀸𑀡𑀁, 𑀦𑀯𑀧𑀜𑁆𑀘 𑀪𑀯𑀦𑁆𑀢𑀺𑀫𑁂.

𑁧𑁯𑁯. 𑀧𑀜𑁆𑀘𑀸𑀮𑀫𑁆𑀩𑀁 𑀫𑀦𑁄𑀥𑀸𑀢𑀼, 𑀲𑀸𑀪𑀺𑀜𑁆𑀜𑀁 𑀓𑀸𑀫𑀥𑀸𑀢𑀼𑀚𑀁;

𑀲𑁂𑀲𑀁 𑀙𑀸𑀭𑀫𑁆𑀫𑀡𑀁 𑀢𑀁 𑀳𑀺, 𑀢𑁂𑀘𑀢𑁆𑀢𑀸𑀮𑀻𑀲 𑀲𑀗𑁆𑀔𑁆𑀬𑀢𑁄.

𑁨𑁦𑁦. 𑀓𑀸𑀫𑀧𑀸𑀓𑀤𑀼𑀲𑀸 𑀘𑀸𑀤𑀺-𑀫𑀕𑁆𑀕𑁄 𑀘𑀸𑀤𑀺𑀓𑁆𑀭𑀺𑀬𑀸 𑀤𑀼𑀯𑁂;

𑀭𑀽𑀧𑀸 𑀲𑀩𑁆𑀩𑁂𑀢𑀺𑀭𑀽𑀧𑁂 𑀦, 𑀢𑁂𑀘𑀢𑁆𑀢𑀸𑀮𑀻𑀲 𑀳𑁄𑀦𑁆𑀢𑀺𑀫𑁂.

𑁨𑁦𑁧. 𑀯𑀺𑀦𑀸𑀯 𑀭𑀽𑀧𑁂𑀦𑀸𑀭𑀼𑀧𑁆𑀧-𑀯𑀺𑀧𑀸𑀓𑀸 𑀘𑀢𑀼𑀭𑁄 𑀲𑀺𑀬𑀼𑀁;

𑀤𑁆𑀯𑁂𑀘𑀢𑁆𑀢𑀸𑀮𑀻𑀲 𑀲𑁂𑀲𑀸𑀦𑀺, 𑀯𑀢𑁆𑀢𑀦𑁆𑀢𑀼𑀪𑀬𑀣𑀸𑀧𑀺 𑀘.

𑁨𑁦𑁨. 𑀘𑀢𑀼𑀥𑀸𑀧𑀺 𑀅𑀳𑁂𑀢𑁆𑀯𑁂𑀓𑀤𑁆𑀯𑀺𑀳𑁂𑀢𑀼𑀓𑀢𑀺𑀳𑁂𑀢𑀼𑀢𑁄;

𑀅𑀝𑁆𑀞𑀸𑀭𑀲 𑀤𑁆𑀯𑁂 𑀩𑀸𑀯𑀻𑀲, 𑀲𑀢𑁆𑀢𑀘𑀢𑁆𑀢𑀸𑀮𑀺𑀲𑀁 𑀪𑀯𑁂.

𑁨𑁦𑁩. 𑀓𑀸𑀫𑁂 𑀚𑀯𑀸 𑀲𑀯𑁄𑀝𑁆𑀞𑀩𑁆𑀩𑀸, 𑀅𑀪𑀺𑀜𑁆𑀜𑀸𑀤𑁆𑀯𑀬𑀫𑁂𑀯 𑀘;

𑀭𑀽𑀧𑀺𑀭𑀺𑀬𑀸𑀧𑀣𑀯𑀺𑀜𑁆𑀜𑀢𑁆𑀢𑀺𑀓𑀭𑀸𑀫𑁂 𑀘𑀢𑀼𑀭𑀝𑁆𑀞𑀓𑀸.

𑁨𑁦𑁪. 𑀙𑀩𑁆𑀩𑀻𑀲𑀢𑀺 𑀚𑀯𑀸 𑀲𑁂𑀲𑀸, 𑀓𑀭𑀸 𑀭𑀽𑀧𑀺𑀭𑀺𑀬𑀸𑀧𑀣𑁂;

𑀤𑁆𑀯𑀺𑀧𑀜𑁆𑀘𑀫𑀦𑀯𑀚𑁆𑀚𑀸𑀦𑀺, 𑀓𑀸𑀫𑀭𑀽𑀧𑀨𑀮𑀸𑀦𑀺 𑀘.

𑁨𑁦𑁫. 𑀆𑀤𑀺𑀓𑁆𑀭𑀺𑀬𑀸𑀢𑀺 𑀘𑁂𑀓𑀽𑀦-𑀯𑀻𑀲 𑀭𑀽𑀧𑀓𑀭𑀸 𑀇𑀫𑁂;

𑀲𑁂𑀲𑀸 𑀘𑀼𑀤𑁆𑀤𑀲 𑀪𑀺𑀦𑁆𑀦𑀸𑀯𑀘𑀼𑀢𑀺 𑀲𑀦𑁆𑀥𑀺 𑀦 𑀢𑀻𑀡𑀺𑀧𑀺.

𑁨𑁦𑁬. 𑀏𑀓𑀓𑀺𑀘𑁆𑀘𑀸𑀤𑀺𑀢𑁄 𑀧𑀜𑁆𑀘-𑀯𑀺𑀥𑀸 𑀢𑀢𑁆𑀣𑁂𑀓𑀓𑀺𑀘𑁆𑀘𑀓𑀸;

𑀤𑁆𑀯𑀺𑀧𑀜𑁆𑀘𑀘𑀺𑀢𑁆𑀢𑀁 𑀚𑀯𑀦𑀁, 𑀫𑀦𑁄𑀥𑀸𑀢𑀼𑀝𑁆𑀞𑀲𑀝𑁆𑀞𑀺𑀫𑁂.

𑁨𑁦𑁭. 𑀤𑁆𑀯𑀺𑀓𑀺𑀘𑁆𑀘𑀸𑀤𑀻𑀦𑀺 𑀯𑁄𑀝𑁆𑀞𑀩𑁆𑀩𑀁, 𑀲𑀼𑀔𑀢𑀻𑀭𑀁 𑀫𑀳𑀕𑁆𑀕𑀢𑁂;

𑀧𑀸𑀓𑀸 𑀓𑀸𑀫𑀫𑀳𑀸𑀧𑀸𑀓𑀸, 𑀲𑁂𑀲𑀸 𑀢𑀻𑀭𑀸 𑀬𑀣𑀸𑀓𑁆𑀓𑀫𑀁.

𑁨𑁦𑁮. 𑀤𑀲𑁆𑀲𑀦𑀁 𑀲𑀯𑀦𑀁 𑀤𑀺𑀝𑁆𑀞𑀁, 𑀲𑀼𑀢𑀁 𑀖𑀸𑀬𑀦𑀓𑀸𑀤𑀺𑀓𑀁;

𑀢𑀬𑀁 𑀫𑀼𑀢𑀁 𑀫𑀦𑁄𑀥𑀸𑀢𑀼𑀢𑁆𑀢𑀬𑀁 𑀤𑀺𑀝𑁆𑀞𑀁 𑀲𑀼𑀢𑀁 𑀫𑀼𑀢𑀁.

𑁨𑁦𑁯. 𑀤𑀺𑀝𑁆𑀞𑀁 𑀲𑀼𑀢𑀁 𑀫𑀼𑀢𑀁 𑀜𑀸𑀢𑀁, 𑀲𑀸𑀪𑀺𑀜𑁆𑀜𑀁 𑀲𑁂𑀲𑀓𑀸𑀫𑀺𑀓𑀁;

𑀯𑀺𑀜𑁆𑀜𑀸𑀢𑀸𑀭𑀫𑁆𑀫𑀡𑀁 𑀲𑁂𑀲𑀫𑁂𑀯𑀁 𑀙𑀩𑁆𑀩𑀺𑀥𑀫𑀻𑀭𑀬𑁂.

𑁨𑁧𑁦. 𑀲𑀢𑁆𑀢𑀥𑀸 𑀲𑀢𑁆𑀢𑀯𑀺𑀜𑁆𑀜𑀸𑀡𑀥𑀸𑀢𑀽𑀦𑀁 𑀢𑀼 𑀯𑀲𑀸 𑀪𑀯𑁂;

𑀯𑀼𑀘𑁆𑀘𑀢𑁂𑀤𑀸𑀦𑀺 𑀢𑀲𑁆𑀲𑁂𑀯, 𑀅𑀦𑀦𑁆𑀢𑀭𑀦𑀬𑀓𑁆𑀓𑀫𑁄.

𑁨𑁧𑁧. 𑀧𑀼𑀜𑁆𑀜𑁂𑀲𑁆𑀯𑀸𑀤𑀺𑀤𑁆𑀯𑀬𑀸 𑀓𑀸𑀫𑁂, 𑀭𑀽𑀧𑀧𑀼𑀜𑁆𑀜𑀫𑀦𑀦𑁆𑀢𑀓𑀁;

𑀢𑀧𑁆𑀧𑀸𑀤𑀓𑀼𑀢𑁆𑀢𑀭𑀸𑀦𑀦𑁆𑀢𑀁, 𑀪𑀯𑀗𑁆𑀕𑀜𑁆𑀘𑀸𑀤𑀺𑀢𑀻𑀭𑀡𑀁.

𑁨𑁧𑁨. 𑀤𑀼𑀢𑀺𑀬𑀦𑁆𑀢𑀤𑁆𑀯𑀬𑀸 𑀢𑀻𑀭𑀁, 𑀪𑀯𑀗𑁆𑀕𑀁 𑀢𑀢𑀺𑀬𑀤𑁆𑀯𑀬𑀸;

𑀢𑁂 𑀅𑀦𑀦𑁆𑀢𑀸𑀫𑀮𑀁 𑀧𑀼𑀜𑁆𑀜𑀁, 𑀫𑀚𑁆𑀛𑀢𑁆𑀢𑀜𑁆𑀘 𑀫𑀳𑀕𑁆𑀕𑀢𑀁.

𑁨𑁧𑁩. 𑀲𑀩𑁆𑀩𑀯𑀸𑀭𑁂 𑀲𑀬𑀜𑁆𑀘𑁂𑀢𑀺, 𑀢𑁂𑀧𑀜𑁆𑀜𑀸𑀲 𑀢𑀺𑀲𑀢𑁆𑀢 𑀘;

𑀢𑁂𑀢𑁆𑀢𑀺𑀁𑀲 𑀘 𑀪𑀯𑀦𑁆𑀢𑁂𑀢𑁂, 𑀭𑀽𑀧𑁂𑀲𑀼 𑀧𑀦 𑀧𑀼𑀜𑁆𑀜𑀢𑁄.

𑁨𑁧𑁪. 𑀢𑀧𑁆𑀧𑀸𑀓𑀸 𑀘 𑀫𑀢𑀺𑀬𑀼𑀢𑁆𑀢-𑀓𑀸𑀫𑀧𑀸𑀓𑀸 𑀲𑀬𑀁 𑀤𑀲;

𑀆𑀭𑀼𑀧𑁆𑀧𑀧𑀼𑀜𑁆𑀜𑀢𑁄 𑀢𑁂 𑀘, 𑀲𑀓𑁄 𑀧𑀸𑀓𑁄 𑀲𑀬𑀁 𑀧𑀼𑀦.

𑁨𑁧𑁫. 𑀅𑀥𑁄𑀧𑀸𑀓𑀸 𑀘 𑀅𑀦𑁆𑀢𑀫𑁆𑀳𑀸, 𑀢𑀢𑀺𑀬𑀜𑁆𑀘 𑀨𑀮𑀦𑁆𑀢𑀺𑀫𑁂;

𑀤𑀲𑁂𑀓𑀤𑁆𑀯𑀺𑀢𑀺𑀧𑀜𑁆𑀘𑀸𑀳𑀺, 𑀫𑀕𑁆𑀕𑀸 𑀘𑁂𑀓𑀁 𑀲𑀓𑀁 𑀨𑀮𑀁.

𑁨𑁧𑁬. 𑀮𑁄𑀪𑀫𑀽𑀮𑁂𑀓𑀳𑁂𑀢𑀽𑀳𑀺, 𑀅𑀦𑁆𑀢𑀓𑀸𑀫𑀲𑀼𑀪𑀸 𑀯𑀺𑀬;

𑀲𑀢𑁆𑀢 𑀤𑁄𑀲𑀤𑁆𑀯𑀬𑀸 𑀓𑀸𑀫-𑀪𑀯𑀗𑁆𑀕𑀧𑁂𑀓𑁆𑀔𑀯𑀸 𑀲𑀬𑀁.

𑁨𑁧𑁭. 𑀫𑀳𑀸𑀧𑀸𑀓𑀢𑀺𑀳𑁂𑀢𑀽𑀳𑀺, 𑀲𑀸𑀯𑀚𑁆𑀚𑀸 𑀲𑀩𑁆𑀩𑀲𑀦𑁆𑀥𑀺𑀬𑁄;

𑀓𑀸𑀫𑀘𑁆𑀘𑀼𑀢𑀻𑀳𑀺 𑀲𑁂𑀲𑀸𑀳𑀺, 𑀲𑀸𑀯𑀚𑁆𑀚𑀸 𑀓𑀸𑀫𑀲𑀦𑁆𑀥𑀺𑀬𑁄.

𑁨𑁧𑁮. 𑀓𑀸𑀫𑀘𑁆𑀘𑀼𑀢𑀺 𑀘 𑀯𑁄𑀝𑁆𑀞𑀩𑁆𑀩𑀁, 𑀲𑀬𑀜𑁆𑀘 𑀲𑀼𑀔𑀢𑀻𑀭𑀢𑁄;

𑀧𑀝𑀺𑀘𑁆𑀙𑀸 𑀢𑀻𑀭𑀡𑀸𑀦𑀺 𑀤𑁆𑀯𑁂, 𑀇𑀢𑀭𑀸 𑀲𑀓𑀢𑀻𑀭𑀡𑀁.

𑁨𑁧𑁯. 𑀲𑀓𑀁 𑀲𑀓𑀁 𑀧𑀝𑀺𑀘𑁆𑀙𑀁 𑀢𑀼, 𑀯𑀺𑀜𑁆𑀜𑀸𑀡𑁂𑀳𑀺 𑀤𑁆𑀯𑀺𑀧𑀜𑁆𑀘𑀳𑀺;

𑀭𑀽𑀧𑀧𑀸𑀓𑁂𑀳𑀺 𑀲𑀸𑀯𑀚𑁆𑀚𑀸, 𑀲𑀦𑁆𑀥𑀺𑀬𑁄𑀳𑁂𑀢𑀼𑀯𑀚𑁆𑀚𑀺𑀢𑀸.

𑁨𑁨𑁦. 𑀅𑀭𑀽𑀧𑀧𑀸𑀓𑁂𑀲𑁆𑀯𑀸𑀤𑀺𑀫𑁆𑀳𑀸, 𑀓𑀸𑀫𑀧𑀸𑀓𑀸 𑀢𑀺𑀳𑁂𑀢𑀼𑀓𑀸;

𑀅𑀦𑁆𑀢𑀸𑀯𑀚𑁆𑀚𑀫𑁆𑀧𑀺 𑀘𑀸𑀭𑀼𑀧𑁆𑀧-𑀧𑀸𑀓𑀸 𑀘 𑀦𑀯 𑀳𑁄𑀦𑁆𑀢𑀺𑀫𑁂.

𑁨𑁨𑁧. 𑀤𑀼𑀢𑀺𑀬𑀸𑀤𑀻𑀳𑀺 𑀢𑁂𑀬𑁂𑀯, 𑀅𑀥𑁄𑀧𑀸𑀓𑀁 𑀯𑀺𑀦𑀸 𑀯𑀺𑀦𑀸;

𑀨𑀮𑀸 𑀢𑀺𑀳𑁂𑀢𑀼𑀓𑀸 𑀧𑀸𑀓𑀸, 𑀲𑀬𑀜𑁆𑀘𑁂𑀢𑀺 𑀘𑀢𑀼𑀤𑁆𑀤𑀲.

𑁨𑁨𑁨. 𑀤𑁆𑀯𑀺𑀧𑀜𑁆𑀘𑀸𑀤𑀺𑀓𑁆𑀭𑀺𑀬𑀸 𑀳𑀸𑀲𑀸, 𑀲𑀬𑀜𑁆𑀘𑀸𑀭𑀼𑀧𑁆𑀧𑀯𑀚𑁆𑀚𑀺𑀢𑀸;

𑀜𑀸𑀡𑀬𑀼𑀢𑁆𑀢𑀪𑀯𑀗𑁆𑀕𑀸𑀢𑀺, 𑀤𑀲 𑀯𑁄𑀝𑁆𑀞𑀩𑁆𑀩𑀢𑁄 𑀧𑀦.

𑁨𑁨𑁩. 𑀓𑀸𑀫𑁂 𑀚𑀯𑀸 𑀪𑀯𑀗𑁆𑀕𑀸 𑀘, 𑀓𑀸𑀫𑀭𑀽𑀧𑁂 𑀲𑀬𑀫𑁆𑀧𑀺 𑀯𑀸;

𑀦𑀯𑀧𑀜𑁆𑀘 𑀲𑀳𑁂𑀢𑀸𑀤𑀺-𑀓𑀺𑀭𑀺𑀬𑀤𑁆𑀯𑀬𑀢𑁄 𑀧𑀦.

𑁨𑁨𑁪. 𑀲𑀬𑀁 𑀪𑀯𑀗𑁆𑀕𑀫𑀢𑀺𑀫𑀸, 𑀭𑀽𑀧𑁂 𑀲𑀸𑀢𑀓𑁆𑀭𑀺𑀬𑀸𑀧𑀺 𑀘;

𑀢𑀧𑁆𑀧𑀸𑀤𑀓𑀦𑁆𑀢𑀺𑀫𑀜𑁆𑀘𑁂𑀢𑀺, 𑀩𑀸𑀯𑀻𑀲 𑀢𑀢𑀺𑀬𑀸 𑀧𑀦.

𑁨𑁨𑁫. 𑀢𑁂 𑀘 𑀧𑀸𑀓𑀸 𑀲𑀬𑀜𑁆𑀘𑀦𑁆𑀢𑁂, 𑀨𑀮𑀁 𑀫𑀚𑁆𑀛𑀸 𑀫𑀳𑀕𑁆𑀕𑀢𑀸;

𑀓𑁆𑀭𑀺𑀬𑀸𑀢𑀺 𑀯𑀻𑀲𑀢𑀺 𑀳𑁄𑀦𑁆𑀢𑀺, 𑀲𑁂𑀲𑀤𑁆𑀯𑀻𑀳𑀺 𑀤𑀼𑀓𑁂𑀳𑀺 𑀢𑀼.

𑁨𑁨𑁬. 𑀯𑀼𑀢𑁆𑀢𑀧𑀸𑀓𑀸 𑀲𑀬𑀜𑁆𑀘𑁂𑀢𑀺, 𑀘𑀼𑀤𑁆𑀤𑀲𑁂𑀯𑀁 𑀓𑁆𑀭𑀺𑀬𑀸𑀚𑀯𑀸;

𑀢𑀤𑀸𑀭𑀫𑁆𑀫𑀡𑀁 𑀫𑀼𑀜𑁆𑀘𑀺𑀢𑁆𑀯𑀸, 𑀧𑀝𑁆𑀞𑀸𑀦𑀦𑀬𑀢𑁄 𑀦𑀬𑁂.

𑁨𑁨𑁭. 𑀅𑀣 𑀲𑀸𑀢𑀓𑁆𑀭𑀺𑀬𑀸 𑀲𑀸𑀢𑀁, 𑀲𑁂𑀲𑀁 𑀲𑁂𑀲𑀓𑁆𑀭𑀺𑀬𑀸𑀧𑀺 𑀘;

𑀢𑀤𑀸𑀮𑀫𑁆𑀩𑀁 𑀬𑀣𑀸𑀬𑁄𑀕𑀁, 𑀯𑀤𑁂 𑀅𑀝𑁆𑀞𑀓𑀣𑀸𑀦𑀬𑀸.

𑁨𑁨𑁮. 𑀫𑀳𑀕𑁆𑀕𑀢𑀸 𑀓𑁆𑀭𑀺𑀬𑀸 𑀲𑀩𑁆𑀩𑀸, 𑀲𑀓𑀧𑀼𑀜𑁆𑀜𑀲𑀫𑀸 𑀢𑀳𑀺𑀁;

𑀅𑀦𑁆𑀢𑀸 𑀨𑀮𑀦𑁆𑀢𑀺𑀫𑀁 𑀳𑁄𑀢𑀺, 𑀅𑀬𑀫𑁂𑀯 𑀯𑀺𑀲𑁂𑀲𑀢𑀸.

𑁨𑁨𑁯. 𑀇𑀫𑀲𑁆𑀲𑀸𑀦𑀦𑁆𑀢𑀭𑀸 𑀥𑀫𑁆𑀫𑀸, 𑀏𑀢𑁆𑀢𑀓𑀸𑀢𑀺 𑀧𑀓𑀸𑀲𑀺𑀢𑀸;

𑀇𑀫𑀁 𑀧𑀦𑁂𑀢𑁆𑀢𑀓𑁂𑀳𑀻𑀢𑀺, 𑀯𑀼𑀘𑁆𑀘𑀢𑁂𑀬𑀁 𑀦𑀬𑁄𑀥𑀼𑀦𑀸.

𑁨𑁩𑁦. 𑀤𑁆𑀯𑀻𑀳𑀺 𑀓𑀸𑀫𑀚𑀯𑀸 𑀢𑀻𑀳𑀺, 𑀭𑀽𑀧𑀸𑀭𑀽𑀧𑀸 𑀘𑀢𑀽𑀳𑀺 𑀢𑀼;

𑀫𑀕𑁆𑀕𑀸 𑀙𑀳𑀺 𑀨𑀮𑀸𑀤𑀺 𑀤𑁆𑀯𑁂, 𑀲𑁂𑀲𑀸 𑀤𑁆𑀯𑁂 𑀧𑀦 𑀲𑀢𑁆𑀢𑀳𑀺.

𑁨𑁩𑁧. 𑀏𑀓𑀫𑁆𑀳𑀸 𑀤𑀲 𑀧𑀜𑁆𑀘𑀳𑀺, 𑀧𑀝𑀺𑀘𑁆𑀙𑀸 𑀲𑀼𑀔𑀢𑀻𑀭𑀡𑀁;

𑀓𑀸𑀫𑁂 𑀤𑁄𑀲𑀓𑁆𑀭𑀺𑀬𑀸𑀳𑀻𑀦-𑀚𑀯𑁂𑀳𑀺 𑀕𑀳𑀢𑁄 𑀲𑀓𑀸.

𑁨𑁩𑁨. 𑀓𑀸𑀫𑁂 𑀚𑀯𑀸 𑀓𑁆𑀭𑀺𑀬𑀸𑀳𑀻𑀦𑀸, 𑀢𑀤𑀸𑀮𑀫𑁆𑀩𑀸 𑀲𑀯𑁄𑀝𑁆𑀞𑀩𑁆𑀩𑀸;

𑀲𑀕𑀳𑀜𑁆𑀘𑁂𑀢𑀺 𑀢𑁂𑀢𑁆𑀢𑀺𑀁𑀲𑀘𑀺𑀢𑁆𑀢𑁂𑀳𑀺 𑀧𑀭𑀢𑀻𑀭𑀡𑀸.

𑁨𑁩𑁩. 𑀓𑀸𑀫𑀧𑀼𑀜𑁆𑀜𑀲𑀼𑀔𑀻𑀢𑀻𑀭𑀓𑀡𑁆𑀳𑀯𑁄𑀝𑁆𑀞𑀩𑁆𑀩𑀢𑁄 𑀤𑁆𑀯𑀬𑀁;

𑀫𑀳𑀸𑀧𑀸𑀓𑀦𑁆𑀢𑀺𑀫𑀁 𑀳𑁄𑀢𑀺, 𑀅𑀦𑀸𑀭𑀼𑀧𑁆𑀧𑀘𑀼𑀢𑀻𑀳𑀺 𑀘.

𑁨𑁩𑁪. 𑀲𑀢𑁆𑀢𑀢𑀺𑀁𑀲 𑀧𑀦𑁂𑀢𑀸𑀦𑀺, 𑀏𑀢𑁆𑀣 𑀳𑀺𑀢𑁆𑀯𑀸 𑀤𑀼𑀲𑀤𑁆𑀯𑀬𑀁;

𑀏𑀢𑁂𑀳𑀺 𑀧𑀜𑁆𑀘𑀢𑀺𑀁𑀲𑁂𑀳𑀺, 𑀚𑀸𑀬𑀢𑁂 𑀤𑀼𑀢𑀺𑀬𑀤𑁆𑀯𑀬𑀁.

𑁨𑁩𑁫. 𑀲𑀼𑀔𑀢𑀻𑀭𑀸𑀤𑀺 𑀲𑀢𑁆𑀢𑁂𑀢𑁂, 𑀓𑁆𑀭𑀺𑀬𑀢𑁄 𑀘𑀸𑀧𑀺 𑀲𑀫𑁆𑀪𑀯𑀸;

𑀜𑁂𑀬𑁆𑀬𑀸 𑀲𑁂𑀲𑀸𑀦𑀺 𑀘𑀢𑁆𑀢𑀸𑀭𑀺, 𑀪𑀯𑀗𑁆𑀕𑁂𑀦 𑀘 𑀮𑀩𑁆𑀪𑀭𑁂.

𑁨𑁩𑁬. 𑀫𑀕𑁆𑀕𑀯𑀚𑁆𑀚𑀸 𑀲𑀯𑁄𑀝𑁆𑀞𑀩𑁆𑀩𑀲𑀼𑀔𑀺𑀢𑀻𑀭𑀚𑀯𑀸𑀔𑀺𑀮𑀸;

𑀘𑀼𑀢𑀻𑀢𑀺 𑀦𑀯𑀓𑀝𑁆𑀞𑀸𑀳𑀺, 𑀢𑀢𑀺𑀬𑀤𑁆𑀯𑀬𑀫𑀸𑀤𑀺𑀲𑁂.

𑁨𑁩𑁭. 𑀏𑀢𑁂𑀳𑀺 𑀤𑁄𑀲𑀯𑀚𑁆𑀚𑁂𑀳𑀺, 𑀲𑀢𑁆𑀢𑀢𑀻𑀳𑀺𑀢𑀭𑀤𑁆𑀯𑀬𑀁;

𑀭𑀽𑀧𑀧𑀸𑀓𑀸 𑀯𑀺𑀦𑀸𑀭𑀼𑀧𑁆𑀧𑀧𑀸𑀓𑀸𑀳𑁂𑀢𑀼𑀤𑀼𑀳𑁂𑀢𑀼𑀓𑁂.

𑁨𑁩𑁮. 𑀢𑁂𑀳𑁂𑀯𑁂𑀓𑀽𑀦𑀲𑀝𑁆𑀞𑀻𑀳𑀺, 𑀳𑁄𑀦𑁆𑀢𑀺𑀭𑀼𑀧𑁆𑀧𑀸𑀤𑀺𑀓𑀁 𑀯𑀺𑀦𑀸;

𑀳𑀸𑀲𑀸𑀯𑀚𑁆𑀚𑁂 𑀚𑀯𑁂 𑀭𑀽𑀧𑁂, 𑀅𑀝𑁆𑀞𑀙𑀓𑁆𑀓𑁂𑀳𑀺 𑀢𑁂𑀳𑀺 𑀢𑀼.

𑁨𑁩𑁯. 𑀲𑀸𑀥𑁄𑀧𑀸𑀓𑁂𑀳𑀺 𑀢𑁂𑀳𑁂𑀯, 𑀤𑀼𑀢𑀺𑀬𑀸𑀤𑀻𑀦𑀺 𑀅𑀢𑁆𑀢𑀦𑀸;

𑀅𑀥𑁄𑀥𑁄𑀚𑀯𑀳𑀻𑀦𑁂𑀳𑀺, 𑀏𑀓𑁂𑀓𑀽𑀦𑁂𑀳𑀺 𑀚𑀸𑀬𑀭𑁂.

𑁨𑁪𑁦. 𑀲𑀼𑀔𑀢𑀻𑀭𑀪𑀯𑀗𑁆𑀕𑀸𑀦𑀺, 𑀲𑀬𑀜𑁆𑀘𑀸𑀢𑀺 𑀢𑀺𑀲𑀢𑁆𑀢𑀳𑀺;

𑀅𑀦𑁆𑀢𑀸𑀯𑀚𑁆𑀚𑀁 𑀅𑀦𑀸𑀭𑀼𑀧𑁆𑀧𑀪𑀯𑀗𑁆𑀕𑁂𑀳𑀺 𑀧𑀦𑁂𑀢𑀭𑀁.

𑁨𑁪𑁧. 𑀯𑀼𑀢𑁆𑀢𑀸𑀦𑀦𑁆𑀢𑀭𑀲𑀗𑁆𑀔𑀸𑀢𑁄, 𑀦𑀬𑁄 𑀤𑀸𑀦𑀺 𑀅𑀦𑁂𑀓𑀥𑀸;

𑀧𑀼𑀕𑁆𑀕𑀮𑀸𑀤𑀺𑀧𑁆𑀧𑀪𑁂𑀤𑀸𑀧𑀺, 𑀧𑀯𑀢𑁆𑀢𑀺 𑀢𑀲𑁆𑀲 𑀯𑀼𑀘𑁆𑀘𑀢𑁂.

𑁨𑁪𑁨. 𑀧𑀼𑀣𑀼𑀚𑁆𑀚𑀦𑀲𑁆𑀲 𑀚𑀸𑀬𑀦𑁆𑀢𑁂, 𑀤𑀺𑀝𑁆𑀞𑀺𑀓𑀗𑁆𑀔𑀸𑀬𑀼𑀢𑀸𑀦𑀺 𑀯𑁂;

𑀲𑁂𑀓𑁆𑀔𑀲𑁆𑀲𑁂𑀯𑀸𑀫𑀮𑀸 𑀲𑀢𑁆𑀢, 𑀅𑀦𑀦𑁆𑀢𑀸𑀦𑀺𑀢𑀭𑀲𑁆𑀲 𑀢𑀼.

𑁨𑁪𑁩. 𑀅𑀦𑁆𑀢𑀸𑀫𑀮𑀁 𑀅𑀦𑀸𑀯𑀚𑁆𑀚𑀓𑁆𑀭𑀺𑀬𑀸 𑀘𑁂𑀓𑀽𑀦𑀯𑀻𑀲𑀢𑀺;

𑀓𑀼𑀲𑀮𑀸𑀓𑀼𑀲𑀮𑀸 𑀲𑁂𑀲𑀸, 𑀳𑁄𑀦𑁆𑀢𑀺 𑀲𑁂𑀓𑁆𑀔𑀧𑀼𑀣𑀼𑀚𑁆𑀚𑀦𑁂.

𑁨𑁪𑁪. 𑀇𑀢𑀭𑀸𑀦𑀺 𑀧𑀦𑀸𑀯𑀚𑁆𑀚𑀤𑁆𑀯𑀬𑀁 𑀧𑀸𑀓𑀸 𑀘 𑀲𑀸𑀲𑀯𑀸;

𑀢𑀺𑀡𑁆𑀡𑀦𑁆𑀦𑀫𑁆𑀧𑀺 𑀲𑀺𑀬𑀼𑀁 𑀏𑀯𑀁, 𑀧𑀜𑁆𑀘𑀥𑀸 𑀲𑀢𑁆𑀢𑀪𑁂𑀤𑀢𑁄.

𑁨𑁪𑁫. 𑀓𑀸𑀫𑁂 𑀲𑁄𑀴𑀲 𑀖𑀸𑀦𑀸𑀤𑀺𑀢𑁆𑀢𑀬𑀁 𑀤𑁄𑀲𑀫𑀳𑀸𑀨𑀮𑀸;

𑀭𑀽𑀧𑀸𑀭𑀽𑀧𑁂 𑀲𑀧𑀸𑀓𑁄𑀢𑀺, 𑀧𑀜𑁆𑀘𑀯𑀻𑀲𑀢𑀺 𑀏𑀓𑀚𑀸.

𑁨𑁪𑁬. 𑀓𑀸𑀫𑀧𑀸𑀓𑀸 𑀘 𑀲𑁂𑀲𑀸𑀤𑀺𑀫𑀕𑁆𑀕𑁄 𑀆𑀤𑀺𑀓𑁆𑀭𑀺𑀬𑀸 𑀤𑀼𑀯𑁂;

𑀭𑀽𑀧𑁂 𑀚𑀯𑀸𑀢𑀺 𑀩𑀸𑀯𑀻𑀲, 𑀤𑁆𑀯𑀺𑀚𑀸 𑀲𑁂𑀲𑀸 𑀢𑀺𑀥𑀸𑀢𑀼𑀚𑀸.

𑁨𑁪𑁭. 𑀯𑀺𑀢𑁆𑀣𑀸𑀭𑁄𑀧𑀺 𑀘 𑀪𑀽𑀫𑀻𑀲𑀼, 𑀜𑁂𑀬𑁆𑀬𑁄 𑀓𑀸𑀫𑀲𑀼𑀪𑀸𑀲𑀼𑀪𑀁;

𑀳𑀸𑀲𑀯𑀚𑁆𑀚𑀫𑀳𑁂𑀢𑀼𑀜𑁆𑀘, 𑀅𑀧𑀸𑀬𑁂 𑀲𑀢𑁆𑀢𑀢𑀺𑀁𑀲𑀺𑀫𑁂.

𑁨𑁪𑁮. 𑀳𑀺𑀢𑁆𑀯𑀸 𑀫𑀳𑀕𑁆𑀕𑀢𑁂 𑀧𑀸𑀓𑁂, 𑀅𑀲𑀻𑀢𑀺 𑀲𑁂𑀲𑀓𑀸𑀫𑀺𑀲𑀼;

𑀘𑀓𑁆𑀔𑀼𑀲𑁄𑀢𑀫𑀦𑁄𑀥𑀸𑀢𑀼, 𑀢𑀻𑀭𑀡𑀁 𑀯𑁄𑀝𑁆𑀞𑀩𑁆𑀩𑀫𑁆𑀧𑀺 𑀘.

𑁨𑁪𑁯. 𑀤𑁄𑀲𑀳𑀻𑀦𑀚𑀯𑀸 𑀲𑁄 𑀲𑁄, 𑀧𑀸𑀓𑁄 𑀭𑀽𑀧𑁂 𑀅𑀦𑀸𑀭𑀺𑀬𑁂;

𑀧𑀜𑁆𑀘𑀲𑀝𑁆𑀞𑀺 𑀙𑀲𑀝𑁆𑀞𑀻 𑀢𑀼, 𑀧𑀭𑀺𑀢𑁆𑀢𑀸𑀪𑀸𑀤𑀻𑀲𑀼 𑀢𑀻𑀲𑀼.

𑁨𑁫𑁦. 𑀆𑀤𑀺𑀧𑀜𑁆𑀘𑀸𑀫𑀮𑀸 𑀓𑀗𑁆𑀔𑀸𑀤𑀺𑀝𑁆𑀞𑀺𑀬𑀼𑀢𑁆𑀢𑁂 𑀯𑀺𑀦𑀸 𑀢𑀳𑀺𑀁;

𑀢𑁂𑀬𑁂𑀯 𑀧𑀜𑁆𑀘𑀧𑀜𑁆𑀜𑀸𑀲, 𑀚𑀸𑀬𑀭𑁂 𑀲𑀼𑀤𑁆𑀥𑀪𑀽𑀫𑀺𑀲𑀼.

𑁨𑁫𑁧. 𑀆𑀤𑀺𑀫𑀕𑁆𑀕𑀤𑀼𑀲𑀸𑀳𑀸𑀲𑀭𑀽𑀧𑀳𑀻𑀦𑀚𑀯𑀸 𑀲𑀓𑁄;

𑀧𑀸𑀓𑁄 𑀯𑁄𑀝𑁆𑀞𑀩𑁆𑀩𑀦𑀜𑁆𑀘𑀸𑀢𑀺, 𑀢𑀺𑀢𑀸𑀮𑀻𑀲𑀁 𑀲𑀺𑀬𑀼𑀁 𑀦𑀪𑁂.

𑁨𑁫𑁨. 𑀅𑀥𑁄𑀥𑁄𑀫𑀦𑀯𑀚𑁆𑀚𑀸 𑀢𑁂,

𑀧𑀸𑀓𑁄 𑀘𑁂𑀯 𑀲𑀓𑁄 𑀲𑀓𑁄;

𑀤𑀼𑀢𑀺𑀬𑀸𑀤𑀻𑀲𑀼 𑀚𑀸𑀬𑀦𑁆𑀢𑁂,

𑀤𑁆𑀯𑁂 𑀤𑁆𑀯𑁂 𑀊𑀦𑀸 𑀢𑀢𑁄 𑀢𑀢𑁄.

𑁨𑁫𑁩. 𑀅𑀭𑀽𑀧𑁂𑀲𑁆𑀯𑁂𑀓𑀫𑁂𑀓𑀲𑁆𑀫𑀺𑀁, 𑀭𑀽𑀧𑁂𑀲𑁆𑀯𑀸𑀤𑀺𑀢𑁆𑀢𑀺𑀓𑁂𑀧𑀺 𑀘;

𑀢𑀺𑀓𑁂 𑀘 𑀢𑀢𑀺𑀬𑁂 𑀏𑀓𑀁, 𑀤𑁆𑀯𑁂 𑀳𑁄𑀦𑁆𑀢𑀺 𑀤𑀼𑀢𑀺𑀬𑀢𑁆𑀢𑀺𑀓𑁂.

𑁨𑁫𑁪. 𑀅𑀦𑁆𑀢𑀺𑀫𑀁 𑀭𑀽𑀧𑀧𑀸𑀓𑀁 𑀢𑀼, 𑀙𑀲𑀼 𑀯𑁂𑀳𑀧𑁆𑀨𑀮𑀸𑀤𑀺𑀲𑀼;

𑀓𑀸𑀫𑀲𑀼𑀕𑀢𑀺𑀬𑀁𑀬𑁂𑀯, 𑀫𑀳𑀸𑀧𑀸𑀓𑀸 𑀧𑀯𑀢𑁆𑀢𑀭𑁂.

𑁨𑁫𑁫. 𑀖𑀸𑀬𑀦𑀸𑀤𑀺𑀢𑁆𑀢𑀬𑀁 𑀓𑀸𑀫𑁂, 𑀧𑀝𑀺𑀖𑀤𑁆𑀯𑀬𑀫𑁂𑀯 𑀘;

𑀲𑀢𑁆𑀢𑀭𑀲𑁂𑀲𑀼 𑀧𑀞𑀫𑀁, 𑀅𑀫𑀮𑀁 𑀫𑀸𑀦𑀯𑀸𑀤𑀺𑀲𑀼.

𑁨𑁫𑁬. 𑀅𑀭𑀺𑀬𑀸𑀧𑀸𑀬𑀯𑀚𑁆𑀚𑁂𑀲𑀼, 𑀘𑀢𑀼𑀭𑁄𑀤𑀺𑀧𑁆𑀨𑀮𑀸𑀤𑀺𑀓𑀸;

𑀅𑀧𑀸𑀬𑀸𑀭𑀼𑀧𑁆𑀧𑀯𑀚𑁆𑀚𑁂𑀲𑀼, 𑀳𑀸𑀲𑀭𑀽𑀧𑀲𑀼𑀪𑀓𑁆𑀭𑀺𑀬𑀁.

𑁨𑁫𑁭. 𑀅𑀧𑀸𑀬𑀼𑀤𑁆𑀥𑀢𑁆𑀢𑀬𑀁 𑀳𑀺𑀢𑁆𑀯𑀸, 𑀳𑁄𑀢𑀸𑀓𑀸𑀲𑀲𑀼𑀪𑀓𑁆𑀭𑀺𑀬𑀁;

𑀢𑀣𑀸𑀧𑀸𑀬𑀼𑀤𑁆𑀥𑀤𑁆𑀯𑁂 𑀳𑀺𑀢𑁆𑀯𑀸, 𑀯𑀺𑀜𑁆𑀜𑀸𑀡𑀓𑀼𑀲𑀮𑀓𑁆𑀭𑀺𑀬𑀁.

𑁨𑁫𑁮. 𑀪𑀯𑀕𑁆𑀕𑀸𑀧𑀸𑀬𑀯𑀚𑁆𑀚𑁂𑀲𑀼, 𑀆𑀓𑀺𑀜𑁆𑀘𑀜𑁆𑀜𑀲𑀼𑀪𑀓𑁆𑀭𑀺𑀬𑀁;

𑀤𑀺𑀝𑁆𑀞𑀺𑀓𑀗𑁆𑀔𑀸𑀬𑀼𑀢𑀸 𑀲𑀼𑀤𑁆𑀥𑁂, 𑀯𑀺𑀦𑀸 𑀲𑀩𑁆𑀩𑀸𑀲𑀼 𑀪𑀽𑀫𑀺𑀲𑀼.

𑁨𑁫𑁯. 𑀅𑀫𑀮𑀸𑀦𑀺 𑀘 𑀢𑀻𑀡𑀦𑁆𑀢𑁂,

𑀪𑀯𑀕𑁆𑀕𑁂 𑀘 𑀲𑀼𑀪𑀓𑁆𑀭𑀺𑀬𑀸;

𑀫𑀳𑀸𑀓𑁆𑀭𑀺𑀬𑀸 𑀘 𑀳𑁄𑀦𑁆𑀢𑁂𑀢𑁂,

𑀢𑁂𑀭𑀲𑁂𑀯𑀸𑀦𑀧𑀸𑀬𑀺𑀲𑀼.

𑁨𑁬𑁦. 𑀅𑀦𑀸𑀭𑀼𑀧𑁆𑀧𑁂 𑀫𑀦𑁄𑀥𑀸𑀢𑀼, 𑀤𑀲𑁆𑀲𑀦𑀁 𑀲𑀯𑀢𑀻𑀭𑀡𑀁;

𑀓𑀸𑀫𑁂 𑀅𑀦𑀺𑀝𑁆𑀞𑀲𑀁𑀬𑁄𑀕𑁂, 𑀩𑁆𑀭𑀳𑁆𑀫𑀸𑀦𑀁 𑀧𑀸𑀧𑀚𑀁 𑀨𑀮𑀁.

𑁨𑁬𑁧. 𑀯𑁄𑀝𑁆𑀞𑀩𑁆𑀩𑀁 𑀓𑀸𑀫𑀧𑀼𑀜𑁆𑀜𑀜𑁆𑀘, 𑀤𑀺𑀝𑁆𑀞𑀺𑀳𑀻𑀦𑀁 𑀲𑀉𑀤𑁆𑀥𑀯𑀁;

𑀘𑀼𑀤𑁆𑀤𑀲𑁂𑀢𑀸𑀦𑀺 𑀘𑀺𑀢𑁆𑀢𑀸𑀦𑀺, 𑀚𑀸𑀬𑀭𑁂 𑀢𑀺𑀁𑀲𑀪𑀽𑀫𑀺𑀲𑀼.

𑁨𑁬𑁨. 𑀇𑀦𑁆𑀤𑁆𑀭𑀺𑀬𑀸𑀦𑀺 𑀤𑀼𑀯𑁂 𑀅𑀦𑁆𑀢𑀤𑁆𑀯𑀬𑀯𑀚𑁆𑀚𑁂𑀲𑁆𑀯𑀳𑁂𑀢𑀼𑀲𑀼;

𑀢𑀻𑀡𑀺 𑀓𑀗𑁆𑀔𑁂𑀢𑀭𑀸𑀳𑁂𑀢𑀼𑀧𑀸𑀧𑁂 𑀘𑀢𑁆𑀢𑀸𑀭𑀺 𑀢𑁂𑀭𑀲.

𑁨𑁬𑁩. 𑀙 𑀜𑀸𑀡𑀳𑀻𑀦𑁂 𑀢𑀩𑁆𑀩𑀦𑁆𑀢𑀲𑀸𑀲𑀯𑁂 𑀲𑀢𑁆𑀢 𑀦𑀺𑀫𑁆𑀫𑀮𑁂;

𑀘𑀢𑁆𑀢𑀸𑀮𑀻𑀲𑁂 𑀧𑀦𑀝𑁆𑀞𑁂𑀯𑀁, 𑀜𑁂𑀬𑁆𑀬𑀫𑀺𑀦𑁆𑀤𑁆𑀭𑀺𑀬𑀪𑁂𑀤𑀢𑁄.