𑁫. 𑀧𑀜𑁆𑀘𑀫𑁄 𑀧𑀭𑀺𑀘𑁆𑀙𑁂𑀤𑁄

𑀦𑀺𑀩𑁆𑀩𑀸𑀦𑀧𑀜𑁆𑀜𑀢𑁆𑀢𑀺𑀧𑀭𑀺𑀤𑀻𑀧𑀦𑁄

𑁩𑁦𑁪. 𑀭𑀸𑀕𑀸𑀤𑀻𑀦𑀁 𑀔𑀬𑀁 𑀯𑀼𑀢𑁆𑀢𑀁, 𑀦𑀺𑀩𑁆𑀩𑀸𑀦𑀁 𑀲𑀦𑁆𑀢𑀺𑀮𑀓𑁆𑀔𑀡𑀁;

𑀲𑀁𑀲𑀸𑀭𑀤𑀼𑀓𑁆𑀔𑀲𑀦𑁆𑀢𑀸𑀧𑀢𑀢𑁆𑀢𑀲𑁆𑀲𑀸𑀮𑀁 𑀲𑀫𑁂𑀢𑀯𑁂.

𑁩𑁦𑁫. 𑀔𑀬𑀫𑀢𑁆𑀢𑀁 𑀦 𑀦𑀺𑀩𑁆𑀩𑀸𑀦𑀁, 𑀲𑀕𑀫𑁆𑀪𑀻𑀭𑀸𑀤𑀺𑀯𑀸𑀘𑀢𑁄;

𑀅𑀪𑀸𑀯𑀲𑁆𑀲 𑀳𑀺 𑀓𑀼𑀫𑁆𑀫𑀸𑀦𑀁, 𑀮𑁄𑀫𑀲𑁆𑀲𑁂𑀯 𑀦 𑀯𑀸𑀘𑀢𑀸.

𑁩𑁦𑁬. 𑀔𑀬𑁄𑀢𑀺 𑀯𑀼𑀘𑁆𑀘𑀢𑁂 𑀫𑀕𑁆𑀕𑁄, 𑀢𑀧𑁆𑀧𑀸𑀧𑀢𑁆𑀢𑀸 𑀇𑀤𑀁 𑀔𑀬𑀁;

𑀅𑀭𑀳𑀢𑁆𑀢𑀁 𑀯𑀺𑀬𑀼𑀧𑁆𑀧𑀸𑀤-𑀯𑀬𑀸𑀪𑀸𑀯𑀸 𑀥𑀼𑀯𑀜𑁆𑀘 𑀢𑀁.

𑁩𑁦𑁭. 𑀲𑀗𑁆𑀔𑀢𑀁 𑀲𑀫𑁆𑀫𑀼𑀢𑀺𑀜𑁆𑀘𑀸𑀧𑀺, 𑀜𑀸𑀡𑀫𑀸𑀮𑀫𑁆𑀩 𑀦𑁂𑀯 𑀳𑀺;

𑀙𑀺𑀦𑁆𑀤𑁂 𑀫𑀮𑁂 𑀢𑀢𑁄 𑀯𑀢𑁆𑀣𑀼, 𑀇𑀘𑁆𑀙𑀺𑀢𑀩𑁆𑀩𑀫𑀲𑀗𑁆𑀔𑀢𑀁.

𑁩𑁦𑁮. 𑀧𑀢𑁆𑀢𑀼𑀓𑀸𑀫𑁂𑀦 𑀢𑀁 𑀲𑀦𑁆𑀢𑀺𑀁, 𑀙𑀩𑁆𑀩𑀺𑀲𑀼𑀤𑁆𑀥𑀺𑀁 𑀲𑀫𑀸𑀤𑀺𑀬;

𑀜𑀸𑀡𑀤𑀲𑁆𑀲𑀦𑀲𑀼𑀤𑁆𑀥𑀻 𑀢𑀼, 𑀲𑀸𑀥𑁂𑀢𑀩𑁆𑀩𑀸 𑀳𑀺𑀢𑀢𑁆𑀣𑀺𑀦𑀸.

𑁩𑁦𑁯. 𑀘𑁂𑀢𑀦𑀸𑀤𑀺𑀯𑀺𑀥𑀸 𑀲𑀻𑀮-𑀲𑀼𑀤𑁆𑀥𑀺 𑀢𑀢𑁆𑀣 𑀘𑀢𑀼𑀩𑁆𑀩𑀺𑀥𑀸;

𑀲𑁄𑀧𑀘𑀸𑀭𑀲𑀫𑀸𑀥𑀻 𑀢𑀼, 𑀘𑀺𑀢𑁆𑀢𑀲𑀼𑀤𑁆𑀥𑀻𑀢𑀺 𑀯𑀼𑀘𑁆𑀘𑀢𑁂.

𑁩𑁧𑁦. 𑀲𑀫𑁆𑀧𑀸𑀤𑁂𑀢𑁆𑀯𑀸𑀤𑀺𑀤𑁆𑀯𑁂𑀲𑀼𑀤𑁆𑀥𑀺𑀁, 𑀦𑀫𑀦𑀸 𑀦𑀸𑀫𑀁 𑀢𑀼 𑀭𑀼𑀧𑁆𑀧-

𑀢𑁄 𑀭𑀽𑀧𑀁 𑀦𑀢𑁆𑀣𑀺 𑀅𑀢𑁆𑀢𑀸𑀤𑀺𑀯𑀢𑁆𑀣𑀽𑀢𑀺 𑀘 𑀯𑀯𑀢𑁆𑀣𑀧𑁂.

𑁩𑁧𑁧. 𑀫𑀡𑀺𑀦𑁆𑀥𑀦𑀸𑀢𑀧𑁂 𑀅𑀕𑁆𑀕𑀺, 𑀅𑀲𑀦𑁆𑀢𑁄𑀧𑀺 𑀲𑀫𑀸𑀕𑀫𑁂;

𑀬𑀣𑀸 𑀳𑁄𑀢𑀺 𑀢𑀣𑀸 𑀘𑀺𑀢𑁆𑀢𑀁, 𑀯𑀢𑁆𑀣𑀸𑀮𑀫𑁆𑀩𑀸𑀤𑀺𑀲𑀗𑁆𑀕𑀫𑁂.

𑁩𑁧𑁨. 𑀧𑀗𑁆𑀕𑀼𑀮𑀦𑁆𑀥𑀸 𑀬𑀣𑀸 𑀕𑀦𑁆𑀢𑀼𑀁, 𑀧𑀘𑁆𑀘𑁂𑀓𑀫𑀲𑀫𑀢𑁆𑀣𑀓𑀸;

𑀬𑀦𑁆𑀢𑀺 𑀬𑀼𑀢𑁆𑀢𑀸 𑀬𑀣𑀸 𑀏𑀯𑀁, 𑀦𑀸𑀫𑀭𑀽𑀧𑀯𑁆𑀳𑀬𑀸 𑀓𑁆𑀭𑀺𑀬𑀸.

𑁩𑁧𑁩. 𑀦 𑀦𑀸𑀫𑀭𑀽𑀧𑀢𑁄 𑀅𑀜𑁆𑀜𑁄, 𑀅𑀢𑁆𑀢𑀸𑀤𑀺 𑀇𑀢𑀺 𑀤𑀲𑁆𑀲𑀦𑀁;

𑀲𑁄𑀥𑀦𑀢𑁆𑀢𑀸 𑀳𑀺 𑀤𑀼𑀤𑁆𑀤𑀺𑀝𑁆𑀞𑀺𑀁, 𑀤𑀺𑀝𑁆𑀞𑀺𑀲𑀼𑀤𑁆𑀥𑀻𑀢𑀺 𑀯𑀼𑀘𑁆𑀘𑀢𑀺.

𑁩𑁧𑁪. 𑀅𑀯𑀺𑀚𑁆𑀚𑀸𑀢𑀡𑁆𑀳𑀼𑀧𑀸𑀤𑀸𑀦-𑀓𑀫𑁆𑀫𑁂𑀦𑀸𑀤𑀺𑀫𑁆𑀳𑀺 𑀢𑀁 𑀤𑁆𑀯𑀬𑀁;

𑀭𑀽𑀧𑀁 𑀓𑀫𑁆𑀫𑀸𑀤𑀺𑀢𑁄 𑀦𑀸𑀫𑀁, 𑀯𑀢𑁆𑀣𑀸𑀤𑀻𑀳𑀺 𑀧𑀯𑀢𑁆𑀢𑀺𑀬𑀁.

𑁩𑁧𑁫. 𑀲𑀤𑀸 𑀲𑀩𑁆𑀩𑀢𑁆𑀣 𑀲𑀩𑁆𑀩𑁂𑀲𑀁, 𑀲𑀤𑀺𑀲𑀁 𑀦 𑀬𑀢𑁄 𑀢𑀢𑁄;

𑀦𑀸𑀳𑁂𑀢𑀼𑀦𑀸𑀜𑁆𑀜𑁄 𑀅𑀢𑁆𑀢𑀸𑀤𑀺𑀦𑀺𑀘𑁆𑀘𑀳𑁂𑀢𑀽𑀢𑀺 𑀧𑀲𑁆𑀲𑀢𑀺.

𑁩𑁧𑁬. 𑀏𑀯𑀁 𑀢𑀻𑀭𑀬𑀢𑁂 𑀓𑀗𑁆𑀔𑀸, 𑀬𑀸𑀬 𑀧𑀜𑁆𑀜𑀸𑀬 𑀧𑀘𑁆𑀘𑀬𑁂;

𑀤𑀺𑀝𑁆𑀞𑀢𑁆𑀢𑀸 𑀲𑀼𑀤𑁆𑀥𑀺 𑀲𑀸 𑀓𑀗𑁆𑀔𑀸𑀢𑀭𑀡𑀁 𑀇𑀢𑀺 𑀯𑀼𑀘𑁆𑀘𑀢𑀺.

𑁩𑁧𑁭. 𑀧𑀢𑁆𑀢𑀜𑁆𑀜𑀸𑀢𑀧𑀭𑀺𑀜𑁆𑀜𑁄 𑀲𑁄, 𑀅𑀢𑁆𑀭𑀝𑁆𑀞𑁄 𑀬𑀢𑀢𑁂𑀬𑀢𑀺;

𑀢𑀻𑀭𑀡𑀯𑁆𑀳𑀧𑀭𑀺𑀜𑁆𑀜𑀸𑀬, 𑀯𑀺𑀲𑀼𑀤𑁆𑀥𑀢𑁆𑀣𑀁 𑀲𑀤𑀸𑀤𑀭𑁄.

𑁩𑁧𑁮. 𑀢𑀺𑀓𑀸𑀮𑀸𑀤𑀺𑀯𑀲𑀸 𑀔𑀦𑁆𑀥𑁂, 𑀲𑀫𑀸𑀲𑁂𑀢𑁆𑀯𑀸 𑀓𑀮𑀸𑀧𑀢𑁄;

𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸𑀦𑀢𑁆𑀢𑀸𑀢𑀺, 𑀆𑀤𑁄 𑀏𑀯𑀁 𑀯𑀺𑀧𑀲𑁆𑀲𑀢𑀺.

𑁩𑁧𑁯. 𑀔𑀦𑁆𑀥𑀸𑀦𑀺𑀘𑁆𑀘𑀸 𑀔𑀬𑀝𑁆𑀞𑁂𑀦, 𑀪𑀬𑀝𑁆𑀞𑁂𑀦 𑀤𑀼𑀔𑀸𑀯 𑀢𑁂;

𑀅𑀦𑀢𑁆𑀢𑀸𑀲𑀸𑀭𑀓𑀝𑁆𑀞𑁂𑀦, 𑀇𑀢𑀺 𑀧𑀲𑁆𑀲𑁂 𑀧𑀼𑀦𑀧𑁆𑀧𑀼𑀦𑀁.

𑁩𑁨𑁦. 𑀆𑀓𑀸𑀭𑁂𑀳𑀺 𑀅𑀦𑀺𑀘𑁆𑀘𑀸𑀤𑀺𑀘𑀢𑁆𑀢𑀸𑀮𑀻𑀲𑁂𑀳𑀺 𑀲𑀫𑁆𑀫𑀲𑁂;

𑀮𑀓𑁆𑀔𑀡𑀸𑀦𑀁 𑀯𑀺𑀪𑀽𑀢𑀢𑁆𑀣𑀁, 𑀔𑀦𑁆𑀥𑀸𑀦𑀁 𑀧𑀦 𑀲𑀩𑁆𑀩𑀲𑁄.

𑁩𑁨𑁧. 𑀏𑀯𑀜𑁆𑀘𑀸𑀧𑀺 𑀅𑀲𑀺𑀚𑁆𑀛𑀦𑁆𑀢𑁂, 𑀦𑀯𑀥𑀸 𑀦𑀺𑀲𑀺𑀢𑀺𑀦𑁆𑀤𑁆𑀭𑀺𑀬𑁄;

𑀲𑀢𑁆𑀢𑀓𑀤𑁆𑀯𑀬𑀢𑁄 𑀲𑀫𑁆𑀫𑀸, 𑀭𑀽𑀧𑀸𑀭𑀽𑀧𑁂 𑀯𑀺𑀧𑀲𑁆𑀲𑀬𑁂.

𑁩𑁨𑁨. 𑀭𑀽𑀧𑀫𑀸𑀤𑀸𑀦𑀦𑀺𑀓𑁆𑀔𑁂𑀧𑀸, 𑀯𑀬𑁄𑀯𑀼𑀤𑁆𑀥𑀢𑁆𑀢𑀕𑀸𑀫𑀺𑀢𑁄;

𑀲𑀫𑁆𑀫𑀲𑁂𑀯𑀦𑁆𑀦𑀚𑀸𑀤𑀻𑀳𑀺, 𑀥𑀫𑁆𑀫𑀢𑀸𑀭𑀽𑀧𑀢𑁄𑀧𑀺 𑀘.

𑁩𑁨𑁩. 𑀦𑀸𑀫𑀁 𑀓𑀮𑀸𑀧𑀬𑀫𑀢𑁄, 𑀔𑀡𑀢𑁄 𑀓𑀫𑀢𑁄𑀧𑀺 𑀘;

𑀤𑀺𑀝𑁆𑀞𑀺𑀫𑀸𑀦𑀦𑀺𑀓𑀦𑁆𑀢𑀻𑀦𑀁, 𑀧𑀲𑁆𑀲𑁂 𑀉𑀕𑁆𑀖𑀸𑀝𑀦𑀸𑀤𑀺𑀢𑁄.

𑁩𑁨𑁪. 𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀓𑀫𑁆𑀫𑀦𑁆𑀦-𑀳𑁂𑀢𑀼𑀢𑁄 𑀭𑀽𑀧𑀁 𑀉𑀩𑁆𑀪𑀯𑁂;

𑀯𑀺𑀦𑀸𑀳𑀸𑀭𑀁 𑀲𑀨𑀲𑁆𑀲𑁂𑀳𑀺, 𑀯𑁂𑀤𑀦𑀸𑀤𑀺𑀢𑁆𑀢𑀬𑀁 𑀪𑀯𑁂.

𑁩𑁨𑁫. 𑀢𑁂𑀳𑀺𑀬𑁂𑀯 𑀯𑀺𑀦𑀸 𑀨𑀲𑁆𑀲𑀁,

𑀦𑀸𑀫𑀭𑀽𑀧𑀸𑀥𑀺𑀓𑁂𑀳𑀺 𑀢𑀼;

𑀘𑀺𑀢𑁆𑀢𑀁 𑀳𑁂𑀢𑀼𑀓𑁆𑀔𑀬𑀸 𑀲𑁄 𑀲𑁄,

𑀯𑁂𑀢𑀺 𑀯𑁂 𑀢𑀲𑁆𑀲 𑀢𑀲𑁆𑀲 𑀢𑀼.

𑁩𑁨𑁬. 𑀳𑁂𑀢𑀼𑀢𑁄𑀤𑀬𑀦𑀸𑀲𑁂𑀯𑀁, 𑀔𑀡𑁄𑀤𑀬𑀯𑀬𑁂𑀦𑀧𑀺;

𑀇𑀢𑀺 𑀧𑀜𑁆𑀜𑀸𑀲𑀸𑀓𑀸𑀭𑁂𑀳𑀺, 𑀧𑀲𑁆𑀲𑁂 𑀧𑀼𑀦𑀽𑀤𑀬𑀩𑁆𑀩𑀬𑀁.

𑁩𑁨𑁭. 𑀬𑁄𑀕𑀺𑀲𑁆𑀲𑁂𑀯𑀁 𑀲𑀫𑀸𑀭𑀤𑁆𑀥𑀉𑀤𑀬𑀩𑁆𑀩𑀬𑀤𑀲𑁆𑀲𑀺𑀦𑁄;

𑀧𑀸𑀢𑀼𑀪𑁄𑀦𑁆𑀢𑀺 𑀉𑀧𑀓𑁆𑀮𑁂𑀲𑀸, 𑀲𑀪𑀸𑀯𑀸 𑀳𑁂𑀢𑀼𑀢𑁄𑀧𑀺 𑀘.

𑁩𑁨𑁮. 𑀢𑁂 𑀑𑀪𑀸𑀲𑀫𑀢𑀼𑀲𑁆𑀲𑀸𑀳𑀧𑀲𑁆𑀲𑀤𑁆𑀥𑀺𑀲𑀼𑀔𑀼𑀧𑁂𑀓𑁆𑀔𑀦𑀸;

𑀲𑀢𑀺 𑀧𑀻𑀢𑀸𑀥𑀺𑀫𑁄𑀓𑁆𑀔𑁄 𑀘, 𑀦𑀺𑀓𑀦𑁆𑀢𑀺 𑀘 𑀤𑀲𑀻𑀭𑀺𑀢𑀸.

𑁩𑁨𑁯. 𑀢𑀡𑁆𑀳𑀸𑀤𑀺𑀝𑁆𑀞𑀼𑀦𑁆𑀦𑀢𑀺𑀕𑁆𑀕𑀸𑀳𑀯𑀢𑁆𑀣𑀼𑀢𑁄 𑀢𑀺𑀁𑀲𑀥𑀸 𑀢𑁂 𑀘;

𑀢𑀤𑀼𑀧𑁆𑀧𑀦𑁆𑀦𑁂 𑀘𑀮𑁂 𑀩𑀸𑀮𑁄, 𑀅𑀫𑀕𑁆𑀕𑁂 𑀫𑀕𑁆𑀕𑀤𑀲𑁆𑀲𑀓𑁄.

𑁩𑁩𑁦. 𑀯𑀺𑀧𑀲𑁆𑀲𑀦𑀸 𑀧𑀣𑁄𑀓𑁆𑀓𑀦𑁆𑀢𑀸, 𑀢𑀤𑀸𑀲𑀺 𑀫𑀢𑀺𑀫𑀸𑀥𑀼𑀦𑀸;

𑀦 𑀫𑀕𑁆𑀕𑁄 𑀕𑀸𑀳𑀯𑀢𑁆𑀣𑀼𑀢𑁆𑀢𑀸, 𑀢𑁂𑀲𑀁 𑀇𑀢𑀺 𑀯𑀺𑀧𑀲𑁆𑀲𑀢𑀺.

𑁩𑁩𑁧. 𑀉𑀧𑀓𑁆𑀮𑁂𑀲𑁂 𑀅𑀦𑀺𑀘𑁆𑀘𑀸𑀤𑀺-𑀯𑀲𑀕𑁂 𑀲𑁄𑀤𑀬𑀩𑁆𑀩𑀬𑁂;

𑀧𑀲𑁆𑀲𑀢𑁄 𑀯𑀻𑀣𑀺𑀦𑁄𑀓𑁆𑀓𑀦𑁆𑀢𑀤𑀲𑁆𑀲𑀦𑀁 𑀯𑀼𑀘𑁆𑀘𑀢𑁂 𑀧𑀣𑁄.

𑁩𑁩𑁨. 𑀫𑀕𑁆𑀕𑀸𑀫𑀕𑁆𑀕𑁂 𑀯𑀯𑀢𑁆𑀣𑁂𑀢𑁆𑀯𑀸, 𑀬𑀸 𑀧𑀜𑁆𑀜𑀸 𑀏𑀯𑀫𑀼𑀝𑁆𑀞𑀺𑀢𑀸;

𑀫𑀕𑁆𑀕𑀸𑀫𑀕𑁆𑀕𑀺𑀓𑁆𑀔𑀲𑀗𑁆𑀔𑀸𑀢𑀸, 𑀲𑀼𑀤𑁆𑀥𑀺 𑀲𑀸 𑀧𑀜𑁆𑀘𑀫𑀻 𑀪𑀯𑁂.

𑁩𑁩𑁩. 𑀧𑀳𑀸𑀦𑀯𑁆𑀳𑀧𑀭𑀺𑀜𑁆𑀜𑀸𑀬, 𑀆𑀤𑀺𑀢𑁄 𑀲𑀼𑀤𑁆𑀥𑀺𑀲𑀺𑀤𑁆𑀥𑀺𑀬𑀸;

𑀢𑀻𑀭𑀡𑀯𑁆𑀳𑀧𑀭𑀺𑀜𑁆𑀜𑀸𑀬, 𑀅𑀦𑁆𑀢𑀕𑁄 𑀬𑀢𑀢𑁂𑀥𑀼𑀦𑀸.

𑁩𑁩𑁪. 𑀚𑀸𑀬𑀢𑁂 𑀦𑀯𑀜𑀸𑀡𑀻 𑀲𑀸, 𑀯𑀺𑀲𑀼𑀤𑁆𑀥𑀺 𑀓𑀫𑀢𑁄𑀤𑀬-

𑀩𑁆𑀩𑀬𑀸𑀤𑀻 𑀖𑀝𑀫𑀸𑀦𑀲𑁆𑀲, 𑀦𑀯 𑀳𑁄𑀦𑁆𑀢𑀺 𑀧𑀦𑁂𑀢𑁆𑀣 𑀳𑀺.

𑁩𑁩𑁫. 𑀲𑀦𑁆𑀢𑀢𑀻𑀭𑀺𑀬𑀢𑁄 𑀘𑁂𑀯, 𑀖𑀦𑁂𑀦𑀸𑀧𑀺 𑀘 𑀙𑀦𑁆𑀦𑀢𑁄;

𑀮𑀓𑁆𑀔𑀡𑀸𑀦𑀺 𑀦 𑀔𑀸𑀬𑀦𑁆𑀢𑁂, 𑀲𑀁𑀓𑀺𑀮𑀺𑀝𑁆𑀞𑀸 𑀯𑀺𑀧𑀲𑁆𑀲𑀦𑀸.

𑁩𑁩𑁬. 𑀢𑀢𑁄𑀢𑁆𑀭 𑀲𑀫𑁆𑀫𑀲𑁂 𑀪𑀺𑀬𑁆𑀬𑁄, 𑀧𑀼𑀦𑀤𑁂𑀯𑀼𑀤𑀬𑀩𑁆𑀩𑀬𑀁;

𑀢𑁂𑀦𑀸𑀦𑀺𑀘𑁆𑀘𑀸𑀤𑀺𑀲𑀫𑁆𑀧𑀲𑁆𑀲𑀁, 𑀧𑀝𑀼𑀢𑀁 𑀧𑀭𑀫𑀁 𑀯𑀚𑁂.

𑁩𑁩𑁭. 𑀆𑀯𑀝𑁆𑀝𑁂𑀢𑁆𑀯𑀸 𑀬𑀤𑀼𑀧𑁆𑀧𑀸𑀤𑀝𑁆𑀞𑀺𑀢𑀺𑀆𑀤𑀻𑀳𑀺 𑀧𑀲𑁆𑀲𑀢𑁄;

𑀪𑀗𑁆𑀕𑁂𑀯 𑀢𑀺𑀝𑁆𑀞𑀢𑁂 𑀜𑀸𑀡𑀁, 𑀢𑀤𑀸 𑀪𑀗𑁆𑀕𑀫𑀢𑀻 𑀲𑀺𑀬𑀸.

𑁩𑁩𑁮. 𑀏𑀯𑀁 𑀧𑀲𑁆𑀲𑀬𑀢𑁄 𑀪𑀗𑁆𑀕𑀁, 𑀢𑀺𑀪𑀯𑁄 𑀔𑀸𑀬𑀢𑁂 𑀬𑀤𑀸;

𑀲𑀻𑀳𑀸𑀤𑀺𑀯 𑀪𑀬𑀁 𑀳𑀼𑀢𑁆𑀯𑀸, 𑀲𑀺𑀬𑀸 𑀮𑀤𑁆𑀥𑀸 𑀪𑀬𑀺𑀓𑁆𑀔𑀡𑀸.

𑁩𑁩𑁯. 𑀲𑀸𑀤𑀻𑀦𑀯𑀸 𑀧𑀢𑀺𑀝𑁆𑀞𑀦𑁆𑀢𑁂, 𑀔𑀦𑁆𑀥𑀸𑀤𑀺𑀢𑁆𑀢𑀖𑀭𑀁 𑀯𑀺𑀬;

𑀬𑀤𑀸 𑀢𑀤𑀸 𑀲𑀺𑀬𑀸 𑀮𑀤𑁆𑀥𑀸, 𑀆𑀤𑀻𑀦𑀯𑀸𑀦𑀼𑀧𑀲𑁆𑀲𑀦𑀸.

𑁩𑁪𑁦. 𑀲𑀗𑁆𑀔𑀸𑀭𑀸𑀤𑀻𑀦𑀯𑀁 𑀤𑀺𑀲𑁆𑀯𑀸, 𑀭𑀫𑀢𑁂 𑀦 𑀪𑀯𑀸𑀤𑀺𑀲𑀼;

𑀫𑀢𑀺 𑀬𑀤𑀸 𑀢𑀤𑀸 𑀮𑀤𑁆𑀥𑀸, 𑀲𑀺𑀬𑀸 𑀦𑀺𑀩𑁆𑀩𑀺𑀤𑀧𑀲𑁆𑀲𑀦𑀸.

𑁩𑁪𑁧. 𑀜𑀸𑀡𑀁 𑀫𑀼𑀘𑁆𑀘𑀺𑀢𑀼𑀓𑀸𑀫𑀁 𑀢𑁂, 𑀲𑀩𑁆𑀩𑀪𑀽𑀲𑀗𑁆𑀔𑀢𑁂 𑀬𑀤𑀸;

𑀚𑀸𑀮𑀸𑀤𑀻𑀳𑀺 𑀘 𑀫𑀘𑁆𑀙𑀸𑀤𑀻, 𑀢𑀤𑀸 𑀮𑀤𑁆𑀥𑀸 𑀘𑀚𑁆𑀚𑀫𑀢𑀺.

𑁩𑁪𑁨. 𑀲𑀗𑁆𑀔𑀸𑀭𑁂 𑀅𑀲𑀼𑀪𑀸𑀦𑀺𑀘𑁆𑀘𑀤𑀼𑀓𑁆𑀔𑀢𑁄𑀦𑀢𑁆𑀢𑀢𑁄 𑀫𑀢𑀺;

𑀧𑀲𑁆𑀲𑀦𑁆𑀢𑀻 𑀘𑀢𑁆𑀢𑀼𑀫𑀼𑀲𑁆𑀲𑀼𑀓𑁆𑀓𑀸, 𑀧𑀝𑀺𑀲𑀗𑁆𑀔𑀸𑀦𑀼𑀧𑀲𑁆𑀲𑀦𑀸.

𑁩𑁪𑁩. 𑀯𑀼𑀢𑁆𑀢𑀸𑀢𑁆𑀭 𑀧𑀝𑀼𑀪𑀸𑀯𑀸𑀬, 𑀲𑀩𑁆𑀩𑀜𑀸𑀡𑀧𑀯𑀢𑁆𑀢𑀺𑀬𑀸;

𑀫𑀻𑀦𑀲𑀜𑁆𑀜𑀸𑀬 𑀲𑀧𑁆𑀧𑀲𑁆𑀲, 𑀕𑀸𑀳𑀮𑀼𑀤𑁆𑀤𑀲𑀫𑁄𑀧𑀫𑀸.

𑁩𑁪𑁪. 𑀅𑀢𑁆𑀢𑀢𑁆𑀢𑀦𑀺𑀬𑀢𑁄 𑀲𑀼𑀜𑁆𑀜𑀁, 𑀤𑁆𑀯𑀺𑀥𑀸 ‘‘𑀦𑀸𑀳𑀁 𑀓𑁆𑀯𑀘𑀸’’𑀤𑀺𑀦𑀸;

𑀘𑀢𑀼𑀥𑀸 𑀙𑀩𑁆𑀩𑀺𑀥𑀸 𑀘𑀸𑀧𑀺, 𑀩𑀳𑀼𑀥𑀸 𑀧𑀲𑁆𑀲𑀢𑁄 𑀪𑀼𑀲𑀁.

𑁩𑁪𑁫. 𑀆𑀯𑀝𑁆𑀝𑀢𑀺𑀕𑁆𑀕𑀺𑀫𑀸𑀲𑀚𑁆𑀚,

𑀦𑁆𑀳𑀸𑀭𑀽𑀯 𑀫𑀢𑀺 𑀲𑀗𑁆𑀔𑀢𑀁;

𑀘𑀢𑁆𑀢𑀪𑀭𑀺𑀬𑁄 𑀬𑀣𑀸 𑀤𑁄𑀲𑁂,

𑀢𑀣𑀸 𑀢𑀁 𑀲𑀫𑀼𑀧𑁂𑀓𑁆𑀔𑀢𑁂.

𑁩𑁪𑁬. 𑀢𑀸𑀯 𑀲𑀸𑀤𑀻𑀦𑀯𑀸𑀦𑀫𑁆𑀧𑀺, 𑀮𑀓𑁆𑀔𑀡𑁂 𑀢𑀺𑀝𑁆𑀞𑀢𑁂 𑀫𑀢𑀺;

𑀦 𑀧𑀲𑁆𑀲𑁂 𑀬𑀸𑀯 𑀲𑀸 𑀢𑀻𑀭𑀁, 𑀲𑀸𑀫𑀼𑀤𑁆𑀤𑀲𑀓𑀼𑀡𑀻 𑀬𑀣𑀸.

𑁩𑁪𑁭. 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀜𑀸𑀡𑀸𑀬𑀁, 𑀲𑀺𑀔𑀸𑀧𑀢𑁆𑀢𑀸 𑀯𑀺𑀧𑀲𑁆𑀲𑀦𑀸;

𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻𑀢𑀺 𑀘, 𑀲𑀸𑀦𑀼𑀮𑁄𑀫𑀸𑀢𑀺 𑀯𑀼𑀘𑁆𑀘𑀢𑀺.

𑁩𑁪𑁮. 𑀧𑀢𑁆𑀯𑀸 𑀫𑁄𑀓𑁆𑀔𑀫𑀼𑀔𑀁 𑀲𑀢𑁆𑀢, 𑀲𑀸𑀥𑁂𑀢𑀺𑀭𑀺𑀬𑀧𑀼𑀕𑁆𑀕𑀮𑁂;

𑀛𑀸𑀦𑀗𑁆𑀕𑀸𑀤𑀺𑀧𑁆𑀧𑀪𑁂𑀤𑁂 𑀘, 𑀧𑀸𑀤𑀓𑀸𑀤𑀺𑀯𑀲𑁂𑀦 𑀲𑀸.

𑁩𑁪𑁯. 𑀅𑀦𑀺𑀘𑁆𑀘𑀢𑁄 𑀳𑀺 𑀯𑀼𑀝𑁆𑀞𑀸𑀦𑀁, 𑀬𑀤𑀺 𑀬𑀲𑁆𑀲𑀸𑀲𑀺 𑀬𑁄𑀕𑀺𑀦𑁄;

𑀲𑁄𑀥𑀺𑀫𑁄𑀓𑁆𑀔𑀲𑁆𑀲 𑀩𑀸𑀳𑀼𑀮𑁆𑀮𑀸, 𑀢𑀺𑀓𑁆𑀔𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑁄 𑀪𑀯𑁂.

𑁩𑁫𑁦. 𑀤𑀼𑀓𑁆𑀔𑀢𑁄𑀦𑀢𑁆𑀢𑀢𑁄 𑀢𑀜𑁆𑀘𑁂, 𑀲𑀺𑀬𑀸 𑀳𑁄𑀦𑁆𑀢𑀺 𑀓𑀫𑁂𑀦 𑀢𑁂;

𑀧𑀲𑁆𑀲𑀤𑁆𑀥𑀺𑀯𑁂𑀤𑀩𑀸𑀳𑀼𑀮𑁆𑀮𑀸, 𑀢𑀺𑀓𑁆𑀔𑁂𑀓𑀕𑁆𑀕𑀫𑀢𑀺𑀦𑁆𑀤𑁆𑀭𑀺𑀬𑀸.

𑁩𑁫𑁧. 𑀧𑀜𑁆𑀜𑀸𑀥𑀼𑀭𑀢𑁆𑀢𑀫𑀼𑀤𑁆𑀤𑀺𑀝𑁆𑀞𑀁, 𑀯𑀼𑀝𑁆𑀞𑀸𑀦𑀁 𑀬𑀤𑀺𑀦𑀢𑁆𑀢𑀢𑁄;

𑀲𑀤𑁆𑀥𑀸𑀥𑀼𑀭𑀢𑁆𑀢𑀁 𑀲𑁂𑀲𑁂𑀳𑀺, 𑀢𑀁 𑀯𑀺𑀬𑀸𑀪𑀺𑀦𑀺𑀯𑁂𑀲𑀢𑁄.

𑁩𑁫𑁨. 𑀤𑁆𑀯𑁂 𑀢𑀺𑀓𑁆𑀔𑀲𑀤𑁆𑀥𑀲𑀫𑀣𑀸, 𑀲𑀺𑀬𑀼𑀁 𑀲𑀤𑁆𑀥𑀸𑀦𑀼𑀲𑀸𑀭𑀺𑀦𑁄;

𑀆𑀤𑁄 𑀫𑀚𑁆𑀛𑁂𑀲𑀼 𑀞𑀸𑀦𑁂𑀲𑀼, 𑀙𑀲𑀼 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑀓𑀸.

𑁩𑁫𑁩. 𑀇𑀢𑀭𑁄 𑀥𑀫𑁆𑀫𑀸𑀦𑀼𑀲𑀸𑀭𑀻𑀤𑁄, 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄 𑀅𑀦𑀦𑁆𑀢𑀓𑁂;

𑀧𑀜𑁆𑀜𑀸𑀫𑀼𑀢𑁆𑀢𑁄𑀪𑀬𑀢𑁆𑀣𑀦𑁆𑀢𑁂, 𑀅𑀛𑀸𑀦𑀺𑀛𑀸𑀦𑀺𑀓𑀸 𑀘 𑀢𑁂.

𑁩𑁫𑁪. 𑀢𑀺𑀓𑁆𑀔𑀲𑀤𑁆𑀥𑀲𑁆𑀲 𑀘𑀦𑁆𑀢𑁂𑀧𑀺, 𑀲𑀤𑁆𑀥𑀸𑀫𑀼𑀢𑁆𑀢𑀢𑁆𑀢𑀫𑀻𑀭𑀺𑀢𑀁;

𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀫𑀚𑁆𑀛𑀲𑁆𑀲, 𑀓𑀸𑀬𑀲𑀓𑁆𑀔𑀺𑀢𑁆𑀢𑀫𑀝𑁆𑀞𑀲𑀼.

𑁩𑁫𑁫. 𑀯𑀼𑀢𑁆𑀢𑀁 𑀫𑁄𑀓𑁆𑀔𑀓𑀣𑀸𑀬𑀁 𑀬𑀁, 𑀢𑀺𑀓𑁆𑀔𑀧𑀜𑁆𑀜𑀸𑀭𑀳𑀲𑁆𑀲 𑀢𑀼;

𑀤𑀺𑀝𑁆𑀞𑀺𑀧𑀢𑁆𑀢𑀢𑁆𑀢𑀁 𑀳𑁂𑀢𑀜𑁆𑀘, 𑀢𑀜𑁆𑀘 𑀦𑀢𑁆𑀣𑀸𑀪𑀺𑀥𑀫𑁆𑀫𑀺𑀓𑁂.

𑁩𑁫𑁬. 𑀢𑁂 𑀲𑀩𑁆𑀩𑁂 𑀅𑀝𑁆𑀞𑀫𑁄𑀓𑁆𑀔𑀸𑀦𑀁, 𑀮𑀸𑀪𑀻 𑀘𑁂 𑀙𑀲𑀼 𑀫𑀚𑁆𑀛𑀲𑀼;

𑀓𑀸𑀬𑀲𑀓𑁆𑀔𑀻 𑀲𑀺𑀬𑀼𑀁 𑀅𑀦𑁆𑀢𑁂, 𑀉𑀪𑀢𑁄𑀪𑀸𑀕𑀫𑀼𑀢𑁆𑀢𑀓𑀸.

𑁩𑁫𑁭. 𑀅𑀦𑀼𑀮𑁄𑀫𑀸𑀦𑀺 𑀘𑀢𑁆𑀢𑀸𑀭𑀺, 𑀢𑀻𑀡𑀺 𑀤𑁆𑀯𑁂 𑀯𑀸 𑀪𑀯𑀦𑁆𑀢𑀺 𑀳𑀺;

𑀫𑀕𑁆𑀕𑀲𑁆𑀲 𑀯𑀻𑀣𑀺𑀬𑀁 𑀫𑀦𑁆𑀤𑀫𑀚𑁆𑀛𑀢𑀺𑀓𑁆𑀔𑀫𑀢𑀺𑀩𑁆𑀩𑀲𑀸.

𑁩𑁫𑁮. 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀘𑀢𑁆𑀢𑀸𑀭𑀺, 𑀧𑀝𑀺𑀲𑀺𑀤𑁆𑀥𑀸𑀦𑀺 𑀲𑀩𑁆𑀩𑀣𑀸;

𑀏𑀯𑀫𑀝𑁆𑀞𑀲𑀸𑀮𑀺𑀦𑀺𑀬𑀸, 𑀯𑀼𑀢𑁆𑀢𑀢𑁆𑀢𑀸 𑀏𑀯𑀫𑀻𑀭𑀺𑀢𑀁.

𑁩𑁫𑁯. 𑀪𑀯𑀗𑁆𑀕𑀸𑀲𑀦𑁆𑀦𑀤𑁄𑀲𑁄𑀧𑀺, 𑀦𑀧𑁆𑀧𑀦𑀸𑀬 𑀣𑀺𑀭𑀢𑁆𑀢𑀢𑁄;

𑀲𑀼𑀤𑁆𑀥𑀺𑀁 𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑁂𑀯𑀁 𑀮𑀪𑁂 𑀬𑀢𑀺.

𑁩𑁬𑁦. 𑀆𑀯𑀚𑁆𑀚𑀁 𑀯𑀺𑀬 𑀫𑀕𑁆𑀕𑀲𑁆𑀲, 𑀙𑀝𑁆𑀞𑀲𑀢𑁆𑀢𑀫𑀲𑀼𑀤𑁆𑀥𑀺𑀦𑀁;

𑀅𑀦𑁆𑀢𑀭𑀸 𑀲𑀦𑁆𑀢𑀺𑀫𑀸𑀭𑀩𑁆𑀪, 𑀢𑁂𑀳𑀺 𑀕𑁄𑀢𑁆𑀭𑀪𑀼 𑀚𑀸𑀬𑀢𑁂.

𑁩𑁬𑁧. 𑀲𑀁𑀬𑁄𑀚𑀦𑀢𑁆𑀢𑀬𑀘𑁆𑀙𑁂𑀤𑀻, 𑀫𑀕𑁆𑀕𑁄 𑀉𑀧𑁆𑀧𑀚𑁆𑀚𑀢𑁂 𑀢𑀢𑁄;

𑀨𑀮𑀸𑀦𑀺 𑀏𑀓𑀁 𑀤𑁆𑀯𑁂 𑀢𑀻𑀡𑀺, 𑀢𑀢𑁄 𑀯𑀼𑀢𑁆𑀢𑀫𑀢𑀺𑀓𑁆𑀓𑀫𑀸.

𑁩𑁬𑁨. 𑀢𑀣𑀸 𑀪𑀸𑀯𑀬𑀢𑁄 𑀳𑁄𑀢𑀺, 𑀭𑀸𑀕𑀤𑁄𑀲𑀢𑀦𑀽𑀓𑀭𑀁;

𑀤𑀼𑀢𑀺𑀬𑁄 𑀢𑀧𑁆𑀨𑀮𑀁 𑀢𑀫𑁆𑀳𑀸, 𑀲𑀓𑀤𑀸𑀕𑀸𑀫𑀺 𑀢𑀧𑁆𑀨𑀮𑀻.

𑁩𑁬𑁩. 𑀏𑀯𑀁 𑀪𑀸𑀯𑀬𑀢𑁄 𑀭𑀸𑀕𑀤𑁄𑀲𑀦𑀸𑀲𑀓𑀭𑀼𑀩𑁆𑀪𑀯𑁂;

𑀢𑀢𑀺𑀬𑁄 𑀢𑀧𑁆𑀨𑀮𑀁 𑀢𑀫𑁆𑀳𑀸, 𑀢𑀧𑁆𑀨𑀮𑀝𑁆𑀞𑁄𑀦𑀸𑀕𑀸𑀫𑀺𑀓𑁄.

𑁩𑁬𑁪. 𑀏𑀯𑀁 𑀪𑀸𑀯𑀬𑀢𑁄 𑀲𑁂𑀲𑀤𑁄𑀲𑀦𑀸𑀲𑀓𑀭𑀼𑀩𑁆𑀪𑀯𑁂;

𑀘𑀢𑀼𑀢𑁆𑀣𑁄 𑀢𑀧𑁆𑀨𑀮𑀁 𑀢𑀫𑁆𑀳𑀸, 𑀅𑀭𑀳𑀸 𑀢𑀧𑁆𑀨𑀮𑀝𑁆𑀞𑀓𑁄.

𑁩𑁬𑁫. 𑀓𑀢𑀓𑀺𑀘𑁆𑀘𑁄 𑀪𑀯𑀘𑁆𑀙𑁂𑀤𑁄, 𑀤𑀓𑁆𑀔𑀺𑀡𑁂𑀬𑁆𑀬𑁄𑀧𑀥𑀺𑀓𑁆𑀔𑀬𑀸;

𑀦𑀺𑀩𑁆𑀩𑀼𑀢𑀺𑀁 𑀬𑀸𑀢𑀺 𑀤𑀻𑀧𑁄𑀯, 𑀲𑀩𑁆𑀩𑀤𑀼𑀓𑁆𑀔𑀦𑁆𑀢𑀲𑀜𑁆𑀜𑀺𑀢𑀁.

𑁩𑁬𑁬. 𑀏𑀯𑀁 𑀲𑀺𑀤𑁆𑀥𑀸 𑀲𑀺𑀬𑀸 𑀲𑀼𑀤𑁆𑀥𑀺, 𑀜𑀸𑀡𑀤𑀲𑁆𑀲𑀦𑀲𑀜𑁆𑀜𑀺𑀢𑀸;

𑀯𑀼𑀢𑁆𑀢𑀁 𑀏𑀢𑁆𑀢𑀸𑀯𑀢𑀸 𑀲𑀘𑁆𑀘𑀁, 𑀧𑀭𑀫𑀢𑁆𑀣𑀁 𑀲𑀫𑀸𑀲𑀢𑁄.

𑁩𑁬𑁭. 𑀲𑀘𑁆𑀘𑀁 𑀲𑀫𑁆𑀫𑀼𑀢𑀺 𑀲𑀢𑁆𑀢𑀸𑀤𑀺𑀅𑀯𑀢𑁆𑀣𑀼 𑀯𑀼𑀘𑁆𑀘𑀢𑁂 𑀬𑀢𑁄;

𑀦 𑀮𑀩𑁆𑀪𑀸𑀮𑀸𑀢𑀘𑀓𑁆𑀓𑀁𑀯, 𑀢𑀁 𑀳𑀺 𑀭𑀽𑀧𑀸𑀤𑀬𑁄 𑀯𑀺𑀦𑀸.

𑁩𑁬𑁮. 𑀢𑁂𑀦 𑀢𑁂𑀦 𑀧𑀓𑀸𑀭𑁂𑀦, 𑀭𑀽𑀧𑀸𑀤𑀺𑀁 𑀦 𑀯𑀺𑀳𑀸𑀬 𑀢𑀼;

𑀢𑀣𑀸 𑀢𑀣𑀸𑀪𑀺𑀥𑀸𑀦𑀜𑁆𑀘, 𑀕𑀸𑀳𑀜𑁆𑀘 𑀯𑀢𑁆𑀢𑀢𑁂 𑀢𑀢𑁄.

𑁩𑁬𑁯. 𑀮𑀩𑁆𑀪𑀢𑁂 𑀧𑀭𑀺𑀓𑀧𑁆𑀧𑁂𑀦, 𑀬𑀢𑁄 𑀢𑀁 𑀦 𑀫𑀼𑀲𑀸 𑀢𑀢𑁄;

𑀅𑀯𑀼𑀢𑁆𑀢𑀸𑀮𑀫𑁆𑀩𑀫𑀺𑀘𑁆𑀘𑀸𑀳𑀼, 𑀧𑀭𑀺𑀢𑁆𑀢𑀸𑀤𑀻𑀲𑁆𑀯𑀯𑀸𑀘𑀢𑁄.

𑁩𑁭𑁦. 𑀧𑀸𑀧𑀓𑀮𑁆𑀬𑀸𑀡𑀫𑀺𑀢𑁆𑀢𑁄𑀬𑀁, 𑀲𑀢𑁆𑀢𑁄𑀢𑀺 𑀔𑀦𑁆𑀥𑀲𑀦𑁆𑀢𑀢𑀺;

𑀏𑀓𑀢𑁆𑀢𑁂𑀦 𑀕𑀳𑁂𑀢𑁆𑀯𑀸𑀦, 𑀯𑁄𑀳𑀭𑀦𑁆𑀢𑀻𑀥 𑀧𑀡𑁆𑀟𑀺𑀢𑀸.

𑁩𑁭𑁧. 𑀧𑀣𑀯𑀸𑀤𑀺 𑀯𑀺𑀬𑁂𑀓𑁄𑀧𑀺, 𑀧𑀼𑀕𑁆𑀕𑀮𑁄 𑀦 𑀬𑀢𑁄 𑀢𑀢𑁄;

𑀓𑀼𑀤𑀺𑀝𑁆𑀞𑀺𑀯𑀢𑁆𑀣𑀼𑀪𑀸𑀯𑁂𑀦, 𑀧𑀼𑀕𑁆𑀕𑀮𑀕𑁆𑀕𑀳𑀡𑀁 𑀪𑀯𑁂.

𑁩𑁭𑁨. 𑀏𑀢𑀁 𑀯𑀺𑀲𑀬𑀢𑁄 𑀓𑀢𑁆𑀯𑀸, 𑀲𑀗𑁆𑀔𑀸𑀤𑀻𑀳𑀺 𑀧𑀤𑁂𑀳𑀺 𑀢𑀼;

𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺, 𑀇𑀢𑀺 𑀢𑀜𑁆𑀜𑀽𑀳𑀺 𑀪𑀸𑀲𑀺𑀢𑀸.

𑁩𑁭𑁩. 𑀧𑀜𑁆𑀜𑀢𑁆𑀢𑀺 𑀯𑀺𑀚𑁆𑀚𑀫𑀸𑀦𑀲𑁆𑀲, 𑀭𑀽𑀧𑀸𑀤𑀺𑀯𑀺𑀲𑀬𑀢𑁆𑀢𑀢𑁄;

𑀓𑀸𑀬𑀁 𑀧𑀜𑁆𑀜𑀢𑁆𑀢𑀺 𑀘𑁂 𑀲𑀼𑀝𑁆𑀞𑀼, 𑀯𑀤𑀢𑁄 𑀲𑀼𑀡 𑀲𑀘𑁆𑀘𑀢𑁄.

𑁩𑁭𑁪. 𑀲𑀯𑀺𑀜𑁆𑀜𑀢𑁆𑀢𑀺𑀯𑀺𑀓𑀸𑀭𑁄 𑀳𑀺, 𑀲𑀤𑁆𑀤𑁄 𑀲𑀘𑁆𑀘𑀤𑁆𑀯𑀬𑀲𑁆𑀲 𑀢𑀼;

𑀧𑀜𑁆𑀜𑀸𑀧𑀦𑀢𑁆𑀢𑀸 𑀧𑀜𑁆𑀜𑀢𑁆𑀢𑀺, 𑀇𑀢𑀺 𑀢𑀜𑁆𑀜𑀽𑀳𑀺 𑀪𑀸𑀲𑀺𑀢𑀸.

𑁩𑁭𑁫. 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀤𑀺𑀆𑀮𑀫𑁆𑀩𑀁, 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸-

𑀜𑀸𑀡𑀲𑁆𑀲𑀸𑀢𑀺 𑀇𑀤𑀜𑁆𑀘𑁂𑀯𑀁, 𑀲𑀢𑀺 𑀬𑀼𑀚𑁆𑀚𑀢𑀺 𑀦𑀸𑀜𑁆𑀜𑀣𑀸.