𑀢𑀢𑀺𑀬𑁄 𑀧𑀭𑀺𑀘𑁆𑀙𑁂𑀤𑁄

𑁩. 𑀯𑀻𑀣𑀺𑀲𑀗𑁆𑀕𑀳𑀓𑀣𑀸

𑁮𑁫. 𑀘𑀓𑁆𑀔𑀼𑀲𑁄𑀢𑀖𑀸𑀦𑀚𑀺𑀯𑁆𑀳𑀸-𑀓𑀸𑀬𑀸𑀬𑀢𑀦 𑀧𑀜𑁆𑀘𑀥𑀸;

𑀧𑀲𑀸𑀤𑀸 𑀳𑀤𑀬𑀜𑁆𑀘𑁂𑀢𑀺, 𑀙 𑀯𑀢𑁆𑀣𑀽𑀦𑀺 𑀯𑀺𑀦𑀺𑀤𑁆𑀤𑀺𑀲𑁂.

𑁮𑁬. 𑀘𑀓𑁆𑀔𑀼𑀲𑁄𑀢𑀖𑀸𑀦𑀚𑀺𑀯𑁆𑀳𑀸-𑀓𑀸𑀬𑀤𑁆𑀯𑀸𑀭𑀸 𑀘 𑀧𑀜𑁆𑀘𑀥𑀸;

𑀫𑀦𑁄𑀤𑁆𑀯𑀸𑀭𑀁 𑀪𑀯𑀗𑁆𑀕𑀦𑁆𑀢𑀺, 𑀙 𑀤𑁆𑀯𑀸𑀭𑀸 𑀘𑀺𑀢𑁆𑀢𑀯𑀻𑀣𑀺𑀬𑀸.

𑁮𑁭. 𑀭𑀽𑀧𑀲𑀤𑁆𑀤𑀕𑀦𑁆𑀥𑀭𑀲-𑀨𑁄𑀝𑁆𑀞𑀩𑁆𑀩𑀸 𑀧𑀜𑁆𑀘 𑀕𑁄𑀘𑀭𑀸;

𑀥𑀫𑁆𑀫𑀸𑀭𑀫𑁆𑀫𑀡𑀧𑀜𑁆𑀜𑀢𑁆𑀢𑀺, 𑀙 𑀤𑁆𑀯𑀸𑀭𑀸𑀭𑀫𑁆𑀫𑀡𑀓𑁆𑀓𑀫𑀸.

𑁮𑁮. 𑀦𑀺𑀫𑀺𑀢𑁆𑀢𑀕𑀢𑀺𑀓𑀫𑁆𑀫𑀸𑀦𑀺, 𑀓𑀫𑁆𑀫𑀫𑁂𑀯𑀸𑀣 𑀕𑁄𑀘𑀭𑀸;

𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀸𑀦𑀁, 𑀘𑀼𑀢𑀺𑀬𑀸 𑀘 𑀬𑀣𑀸𑀭𑀳𑀁.

𑁮𑁯. 𑀫𑀭𑀡𑀸𑀲𑀦𑁆𑀦𑀲𑀢𑁆𑀢𑀲𑁆𑀲, 𑀬𑀣𑁄𑀧𑀝𑁆𑀞𑀺𑀢𑀕𑁄𑀘𑀭𑀁;

𑀙𑀤𑁆𑀯𑀸𑀭𑁂𑀲𑀼 𑀢𑀫𑀸𑀭𑀩𑁆𑀪, 𑀧𑀝𑀺𑀲𑀦𑁆𑀥𑀺 𑀪𑀯𑀦𑁆𑀢𑀭𑁂.

𑁯𑁦. 𑀏𑀓𑀘𑀺𑀢𑁆𑀢𑀓𑁆𑀔𑀡𑀸 𑀳𑁄𑀢𑀺, 𑀬𑀸𑀯𑀚𑀻𑀯𑀁 𑀢𑀢𑁄 𑀧𑀭𑀁;

𑀪𑀯𑀗𑁆𑀕𑀁 𑀧𑀭𑀺𑀬𑁄𑀲𑀸𑀦𑁂, 𑀘𑀼𑀢𑀺 𑀘𑁂𑀓𑀓𑁆𑀔𑀡𑀸 𑀪𑀯𑁂.

𑁯𑁧. 𑀤𑀼𑀳𑁂𑀢𑀸𑀳𑁂𑀢𑀼𑀘𑀼𑀢𑀺𑀬𑀸, 𑀓𑀸𑀫𑀸𑀯𑀘𑀭𑀲𑀦𑁆𑀥𑀺𑀬𑁄;

𑀢𑀺𑀳𑁂𑀢𑀼𑀓𑀸𑀫𑀘𑀼𑀢𑀺𑀬𑀸, 𑀲𑀩𑁆𑀩𑀸𑀧𑀺 𑀧𑀝𑀺𑀲𑀦𑁆𑀥𑀺𑀬𑁄.

𑁯𑁨. 𑀭𑀽𑀧𑀸𑀯𑀘𑀭𑀘𑀼𑀢𑀺𑀬𑀸, 𑀲𑀳𑁂𑀢𑀼𑀧𑀝𑀺𑀲𑀦𑁆𑀥𑀺𑀬𑁄;

𑀆𑀭𑀼𑀧𑁆𑀧𑀢𑁄𑀧𑀭𑀺 𑀓𑀸𑀫𑁂, 𑀢𑀢𑁆𑀣 𑀯𑀸𑀧𑀺 𑀢𑀺𑀳𑁂𑀢𑀼𑀓𑀸.

𑁯𑁩. 𑀧𑀝𑀺𑀲𑀦𑁆𑀥𑀺 𑀪𑀯𑀗𑁆𑀕𑀜𑁆𑀘, 𑀏𑀓𑀫𑁂𑀯𑁂𑀓𑀚𑀸𑀢𑀺𑀬𑀁;

𑀘𑀼𑀢𑀺 𑀘𑀸𑀭𑀫𑁆𑀫𑀡𑀜𑁆𑀘𑀲𑁆𑀲, 𑀏𑀯𑀫𑁂𑀯 𑀬𑀣𑀸𑀭𑀳𑀁.

𑁯𑁪. 𑀭𑀽𑀧𑀸𑀤𑀸𑀭𑀫𑁆𑀫𑀡𑁂 𑀘𑀓𑁆𑀔𑀼-𑀧𑁆𑀧𑀲𑀸𑀤𑀸𑀤𑀺𑀫𑁆𑀳𑀺 𑀖𑀝𑁆𑀝𑀺𑀢𑁂;

𑀫𑀚𑁆𑀛𑁂 𑀪𑀯𑀗𑁆𑀕𑀁 𑀙𑀺𑀦𑁆𑀤𑀺𑀢𑁆𑀯𑀸, 𑀯𑀻𑀣𑀺 𑀦𑀸𑀫 𑀧𑀯𑀢𑁆𑀢𑀢𑀺.

𑁯𑁫. 𑀆𑀯𑀚𑁆𑀚𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑀫𑁆𑀧𑀝𑀺𑀘𑁆𑀙𑀦𑀢𑀻𑀭𑀡𑀸;

𑀯𑁄𑀝𑁆𑀞𑀩𑁆𑀩𑀓𑀸𑀫𑀚𑀯𑀦𑀢𑀤𑀸𑀭𑀫𑁆𑀫𑀡𑀦𑀸𑀫𑀓𑀸.

𑁯𑁬. 𑀲𑀢𑁆𑀢𑁂𑀯 𑀞𑀸𑀦𑀲𑀗𑁆𑀔𑁂𑀧𑀸, 𑀧𑀜𑁆𑀘𑀤𑁆𑀯𑀸𑀭𑀺𑀓𑀫𑀸𑀦𑀲𑀸;

𑀘𑀢𑀼𑀧𑀜𑁆𑀜𑀸𑀲 𑀲𑀩𑁆𑀩𑁂𑀧𑀺, 𑀯𑀺𑀢𑁆𑀣𑀸𑀭𑁂𑀦 𑀲𑀭𑀽𑀧𑀢𑁄.

𑁯𑁭. 𑀆𑀯𑀚𑁆𑀚𑀲𑀩𑁆𑀩𑀚𑀯𑀦𑀢𑀤𑀸𑀭𑀫𑁆𑀫𑀡𑀦𑀸𑀫𑀓𑀸;

𑀲𑀢𑁆𑀢𑀲𑀝𑁆𑀞𑀺 𑀲𑀭𑀽𑀧𑁂𑀦, 𑀫𑀦𑁄𑀤𑁆𑀯𑀸𑀭𑀺𑀓𑀫𑀸𑀦𑀲𑀸.

𑁯𑁮. 𑀇𑀝𑁆𑀞𑁂 𑀆𑀭𑀫𑁆𑀫𑀡𑁂 𑀳𑁄𑀦𑁆𑀢𑀺, 𑀧𑀼𑀜𑁆𑀜𑀧𑀸𑀓𑀸𑀦𑀺 𑀲𑀩𑁆𑀩𑀣𑀸;

𑀅𑀦𑀺𑀝𑁆𑀞𑁂 𑀧𑀸𑀧𑀧𑀸𑀓𑀸𑀦𑀺, 𑀦𑀺𑀬𑀫𑁄𑀬𑀁 𑀧𑀓𑀸𑀲𑀺𑀢𑁄.

𑁯𑁯. 𑀢𑀢𑁆𑀣𑀸𑀧𑀺 𑀅𑀢𑀺𑀇𑀝𑁆𑀞𑀫𑁆𑀳𑀺, 𑀢𑀤𑀸𑀭𑀫𑁆𑀫𑀡𑀢𑀻𑀭𑀡𑀁;

𑀲𑁄𑀫𑀦𑀲𑁆𑀲𑀬𑀼𑀢𑀁 𑀇𑀝𑁆𑀞𑀫𑀚𑁆𑀛𑀢𑁆𑀢𑀫𑁆𑀳𑀺 𑀉𑀧𑁂𑀓𑁆𑀔𑀺𑀢𑀁.

𑁧𑁦𑁦. 𑀕𑁄𑀘𑀭𑁂𑀢𑀺𑀧𑀭𑀺𑀢𑁆𑀢𑀫𑁆𑀳𑀺, 𑀅𑀢𑀺𑀅𑀧𑁆𑀧𑀸𑀬𑀼𑀓𑁂 𑀧𑀦;

𑀪𑀯𑀗𑁆𑀕𑀫𑁂𑀯 𑀘𑀮𑀢𑀺, 𑀫𑁄𑀖𑀯𑀸𑀭𑁄𑀢𑀺 𑀲𑁄 𑀓𑀢𑁄.

𑁧𑁦𑁧. 𑀯𑁄𑀝𑁆𑀞𑀩𑁆𑀩𑀦𑀁 𑀧𑀭𑀺𑀢𑁆𑀢𑀫𑁆𑀳𑀺, 𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀁 𑀧𑀯𑀢𑁆𑀢𑀢𑀺;

𑀢𑀢𑁄 𑀪𑀯𑀗𑁆𑀕𑀧𑀸𑀢𑁄𑀯, 𑀲𑁄𑀧𑀺 𑀫𑁄𑀖𑁄𑀢𑀺 𑀯𑀼𑀘𑁆𑀘𑀢𑀺.

𑁧𑁦𑁨. 𑀚𑀯𑀦𑀜𑁆𑀘 𑀫𑀳𑀦𑁆𑀢𑀫𑁆𑀳𑀺, 𑀚𑀯𑀺𑀢𑁆𑀯𑀸𑀦 𑀢𑀢𑁄 𑀧𑀭𑀁;

𑀦 𑀲𑀫𑁆𑀪𑁄𑀢𑀺 𑀢𑀤𑀸𑀮𑀫𑁆𑀩𑀁, 𑀲𑁄𑀧𑀺 𑀫𑁄𑀖𑁄𑀢𑀺 𑀯𑀼𑀘𑁆𑀘𑀢𑀺.

𑁧𑁦𑁩. 𑀕𑁄𑀘𑀭𑁂𑀢𑀺𑀫𑀳𑀦𑁆𑀢𑀫𑁆𑀳𑀺, 𑀅𑀢𑀺𑀤𑀻𑀖𑀸𑀬𑀼𑀓𑁂 𑀧𑀦;

𑀲𑀫𑁆𑀪𑁄𑀢𑀺 𑀘 𑀢𑀤𑀸𑀮𑀫𑁆𑀩𑀁, 𑀲𑀫𑁆𑀧𑀼𑀡𑁆𑀡𑁄𑀢𑀺 𑀧𑀯𑀼𑀘𑁆𑀘𑀢𑀺.

𑁧𑁦𑁪. 𑀕𑁄𑀘𑀭𑁂𑀢𑀺𑀫𑀳𑀦𑁆𑀢𑀫𑁆𑀳𑀺, 𑀢𑀤𑀸𑀭𑀫𑁆𑀫𑀡𑀲𑀫𑁆𑀪𑀯𑁄;

𑀧𑀜𑁆𑀘𑀤𑁆𑀯𑀸𑀭𑁂 𑀫𑀦𑁄𑀤𑁆𑀯𑀸𑀭𑁂, 𑀯𑀺𑀪𑀽𑀢𑁂 𑀧𑀦 𑀕𑁄𑀘𑀭𑁂.

𑁧𑁦𑁫. 𑀓𑀸𑀫𑀸𑀯𑀘𑀭𑀲𑀢𑁆𑀢𑀸𑀦𑀁, 𑀓𑀸𑀫𑀸𑀯𑀘𑀭𑀕𑁄𑀘𑀭𑁂;

𑀧𑀭𑀺𑀢𑁆𑀢𑀚𑀯𑀦𑁂𑀲𑁆𑀯𑁂𑀯, 𑀢𑀤𑀸𑀭𑀫𑁆𑀫𑀡𑀫𑀼𑀤𑁆𑀤𑀺𑀲𑁂.

𑁧𑁦𑁬. 𑀦𑀸𑀢𑀺𑀢𑀺𑀓𑁆𑀔𑁂 𑀦𑀸𑀢𑀺𑀲𑀻𑀖𑁂, 𑀦𑀸𑀢𑀺𑀢𑁂𑀚𑀼𑀲𑁆𑀲𑀤𑁂 𑀚𑀯𑁂;

𑀲𑀫𑀫𑀦𑁆𑀤𑀧𑁆𑀧𑀯𑀢𑁆𑀢𑀫𑁆𑀳𑀺, 𑀢𑀤𑀸𑀭𑀫𑁆𑀫𑀡𑀫𑀺𑀘𑁆𑀙𑀺𑀢𑀁.

𑁧𑁦𑁭. 𑀲𑀼𑀔𑁄𑀧𑁂𑀢𑀁 𑀢𑀤𑀸𑀮𑀫𑁆𑀩𑀁, 𑀉𑀧𑁂𑀓𑁆𑀔𑀸𑀓𑁆𑀭𑀺𑀬𑀢𑁄 𑀧𑀭𑀁;

𑀦 𑀳𑁄𑀢𑀼𑀧𑁂𑀓𑁆𑀔𑀸𑀲𑀳𑀺𑀢𑀁, 𑀲𑀼𑀔𑀺𑀢𑀓𑁆𑀭𑀺𑀬𑀢𑁄 𑀢𑀣𑀸.

𑁧𑁦𑁮. 𑀦 𑀳𑁄𑀢𑀺 𑀤𑁄𑀫𑀦𑀲𑁆𑀲𑀫𑁆𑀳𑀸, 𑀲𑁄𑀫𑀦𑀲𑁆𑀲𑀺𑀓𑀫𑀸𑀦𑀲𑀁;

𑀢𑀤𑀸𑀭𑀫𑁆𑀫𑀡𑀫𑀜𑁆𑀜𑀜𑁆𑀘, 𑀪𑀯𑀗𑁆𑀕𑀁 𑀘𑀼𑀢𑀺 𑀯𑀸 𑀢𑀣𑀸.

𑁧𑁦𑁯. 𑀭𑀚𑁆𑀚𑀦𑀸𑀤𑀺𑀯𑀲𑁂𑀦𑁂𑀢𑁆𑀣, 𑀚𑀯𑀦𑀸𑀓𑀼𑀲𑀮𑀁 𑀪𑀯𑁂;

𑀓𑀼𑀲𑀮𑀁 𑀧𑀦 𑀲𑀫𑁆𑀪𑁄𑀢𑀺, 𑀲𑀤𑁆𑀥𑀸𑀧𑀜𑁆𑀜𑀸𑀤𑀺𑀲𑀫𑁆𑀪𑀯𑁂.

𑁧𑁧𑁦. 𑀢𑀤𑁂𑀯 𑀯𑀻𑀢𑀭𑀸𑀕𑀸𑀦𑀁, 𑀓𑁆𑀭𑀺𑀬𑀸 𑀦𑀸𑀫 𑀧𑀯𑀼𑀘𑁆𑀘𑀢𑀺;

𑀅𑀯𑀺𑀧𑀸𑀓𑀢𑀫𑀸𑀧𑀦𑁆𑀦𑀁, 𑀯𑀝𑁆𑀝𑀫𑀽𑀮𑀧𑀭𑀺𑀓𑁆𑀔𑀬𑀸.

𑁧𑁧𑁧. 𑀅𑀧𑁆𑀧𑀦𑀸𑀚𑀯𑀦𑀁 𑀲𑁂𑀲𑀁, 𑀫𑀳𑀕𑁆𑀕𑀢𑀫𑀦𑀼𑀢𑁆𑀢𑀭𑀁;

𑀙𑀩𑁆𑀩𑀻𑀲𑀢𑀺 𑀬𑀣𑀸𑀬𑁄𑀕𑀁, 𑀅𑀧𑁆𑀧𑀦𑀸𑀯𑀻𑀣𑀺𑀬𑀁 𑀪𑀯𑁂.

𑁧𑁧𑁨. 𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲, 𑀓𑀲𑀺𑀡𑀸𑀤𑀺𑀓𑀕𑁄𑀘𑀭𑁂;

𑀲𑀼𑀲𑀫𑀸𑀳𑀺𑀢𑀘𑀺𑀢𑁆𑀢𑀲𑁆𑀲, 𑀉𑀧𑀘𑀸𑀭𑀲𑀫𑀸𑀥𑀺𑀦𑀸.

𑁧𑁧𑁩. 𑀧𑀭𑀺𑀓𑀫𑁆𑀫𑁄𑀧𑀘𑀸𑀭𑀸𑀦𑀼𑀮𑁄𑀫𑀕𑁄𑀢𑁆𑀭𑀪𑀼𑀢𑁄 𑀧𑀭𑀁;

𑀧𑀜𑁆𑀘𑀫𑀁 𑀯𑀸 𑀘𑀢𑀼𑀢𑁆𑀣𑀁 𑀯𑀸, 𑀚𑀯𑀦𑀁 𑀳𑁄𑀢𑀺 𑀅𑀧𑁆𑀧𑀦𑀸.

𑁧𑁧𑁪. 𑀧𑀼𑀣𑀼𑀚𑁆𑀚𑀦𑀸𑀦 𑀲𑁂𑀓𑁆𑀔𑀸𑀦𑀁, 𑀓𑀸𑀫𑀧𑀼𑀜𑁆𑀜𑀢𑀺𑀳𑁂𑀢𑀼𑀢𑁄;

𑀢𑀺𑀳𑁂𑀢𑀼𑀓𑀸𑀫𑀓𑁆𑀭𑀺𑀬𑀢𑁄, 𑀯𑀻𑀢𑀭𑀸𑀕𑀸𑀦𑀫𑀧𑁆𑀧𑀦𑀸.

𑁧𑁧𑁫. 𑀢𑀢𑁆𑀭𑀸𑀧𑀺 𑀲𑀼𑀔𑀺𑀢𑀚𑀯𑀁, 𑀲𑀼𑀔𑀺𑀢𑀤𑁆𑀯𑀬𑀢𑁄 𑀧𑀭𑀁;

𑀉𑀧𑁂𑀓𑁆𑀔𑀺𑀢𑀫𑁆𑀳𑀸 𑀲𑀫𑁆𑀪𑁄𑀢𑀺, 𑀉𑀧𑁂𑀓𑁆𑀔𑁂𑀓𑀕𑁆𑀕𑀢𑀸𑀬𑀼𑀢𑀁.

𑁧𑁧𑁬. 𑀧𑀜𑁆𑀘 𑀯𑀸𑀭𑁂 𑀙 𑀯𑀸 𑀲𑀢𑁆𑀢, 𑀧𑀭𑀺𑀢𑁆𑀢𑀚𑀯𑀦𑀁 𑀪𑀯𑁂;

𑀲𑀓𑀺𑀁 𑀤𑁆𑀯𑁂 𑀯𑀸 𑀢𑀤𑀸𑀮𑀫𑁆𑀩𑀁, 𑀲𑀓𑀺𑀫𑀸𑀯𑀚𑁆𑀚𑀦𑀸𑀤𑀬𑁄.

𑁧𑁧𑁭. 𑀅𑀧𑁆𑀧𑀦𑀸𑀚𑀯𑀦𑀜𑁆𑀘𑁂𑀓𑀁, 𑀧𑀞𑀫𑀼𑀧𑁆𑀧𑀢𑁆𑀢𑀺𑀬𑀁 𑀧𑀦;

𑀢𑀢𑁄 𑀧𑀭𑀁 𑀯𑀲𑀻𑀪𑀽𑀢𑀁, 𑀅𑀳𑁄𑀭𑀢𑁆𑀢𑀁 𑀧𑀯𑀢𑁆𑀢𑀢𑀺.

𑁧𑁧𑁮. 𑀲𑀓𑀺𑀁 𑀤𑁆𑀯𑁂 𑀯𑀸 𑀦𑀺𑀭𑁄𑀥𑀲𑁆𑀲, 𑀲𑀫𑀸𑀧𑀢𑁆𑀢𑀺𑀓𑁆𑀔𑀡𑁂 𑀧𑀦;

𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀚𑀯𑀦𑀁, 𑀢𑀢𑁄 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀢𑀺.

𑁧𑁧𑁯. 𑀦𑀺𑀭𑁄𑀥𑀸 𑀯𑀼𑀝𑁆𑀞𑀳𑀦𑁆𑀢𑀲𑁆𑀲, 𑀉𑀧𑀭𑀺𑀝𑁆𑀞𑀨𑀮𑀤𑁆𑀯𑀬𑀁;

𑀧𑀜𑁆𑀘𑀸𑀪𑀺𑀜𑁆𑀜𑀸 𑀢𑀣𑀸 𑀫𑀕𑁆𑀕𑀸, 𑀏𑀓𑀘𑀺𑀢𑁆𑀢𑀓𑁆𑀔𑀡𑀸 𑀫𑀢𑀸.

𑁧𑁨𑁦. 𑀨𑀮𑀫𑁂𑀓𑀤𑁆𑀯𑀬𑀁 𑀢𑀣𑀸, 𑀢𑀺𑀲𑁆𑀲𑁄 𑀯𑀸 𑀫𑀕𑁆𑀕𑀯𑀻𑀣𑀺𑀬𑀁;

𑀲𑀫𑀸𑀧𑀢𑁆𑀢𑀺𑀓𑁆𑀔𑀡𑁂 𑀢𑀫𑁆𑀧𑀺, 𑀅𑀳𑁄𑀭𑀢𑁆𑀢𑀁 𑀧𑀯𑀢𑁆𑀢𑀢𑀺.

𑁧𑁨𑁧. 𑀧𑀜𑁆𑀘𑀤𑁆𑀯𑀸𑀭𑁂 𑀦 𑀮𑀩𑁆𑀪𑀦𑁆𑀢𑀺, 𑀮𑁄𑀓𑀼𑀢𑁆𑀢𑀭𑀫𑀳𑀕𑁆𑀕𑀢𑀸;

𑀯𑀻𑀣𑀺𑀫𑀼𑀢𑁆𑀢𑀫𑀦𑁄𑀥𑀸𑀢𑀼, 𑀧𑀜𑁆𑀘 𑀘𑀺𑀢𑁆𑀢𑀸𑀦𑀺 𑀅𑀦𑁆𑀢𑀺𑀫𑁂.

𑁧𑁨𑁨. 𑀧𑀭𑀺𑀢𑁆𑀢𑀸𑀦𑁂𑀯 𑀲𑀩𑁆𑀩𑀸𑀦𑀺, 𑀧𑀜𑁆𑀘𑀤𑁆𑀯𑀸𑀭𑁂𑀲𑀼 𑀲𑀫𑁆𑀪𑀯𑀸;

𑀫𑀦𑁄𑀤𑁆𑀯𑀸𑀭𑀫𑁆𑀳𑀺 𑀯𑁄𑀝𑁆𑀞𑀩𑁆𑀩-𑀢𑀤𑀸𑀮𑀫𑁆𑀩𑀚𑀯𑀸 𑀲𑀺𑀬𑀼𑀁.

𑁧𑁨𑁩. 𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀯𑀻𑀣𑀺, 𑀢𑀤𑀸𑀭𑀫𑁆𑀫𑀡𑀫𑁂𑀯 𑀘;

𑀭𑀽𑀧𑁂 𑀦𑀢𑁆𑀣𑀺 𑀢𑀣𑀸𑀭𑀽𑀧𑁂, 𑀘𑀓𑁆𑀔𑀼𑀲𑁄𑀢𑀸𑀧𑀺 𑀯𑀻𑀣𑀺𑀬𑁄.

𑁧𑁨𑁪. 𑀲𑀩𑁆𑀩𑀸𑀧𑀺 𑀯𑀻𑀣𑀺𑀬𑁄 𑀓𑀸𑀫𑁂,

𑀭𑀽𑀧𑁂 𑀢𑀺𑀲𑁆𑀲𑁄 𑀧𑀓𑀸𑀲𑀺𑀢𑀸;

𑀏𑀓𑀸 𑀯𑀻𑀣𑀺 𑀧𑀦𑀸𑀭𑀽𑀧𑁂,

𑀦𑀢𑁆𑀣𑀸𑀲𑀜𑁆𑀜𑀻𑀲𑀼 𑀓𑀸𑀘𑀺𑀧𑀺.

𑁧𑁨𑁫. 𑀲𑀢𑁆𑀢𑀸𑀧𑀺 𑀯𑀻𑀣𑀺𑀘𑀺𑀢𑁆𑀢𑀸𑀦𑀺, 𑀓𑀸𑀫𑁂 𑀭𑀽𑀧𑁂 𑀙 𑀲𑀫𑁆𑀪𑀯𑀸;

𑀅𑀭𑀽𑀧𑁂 𑀤𑁆𑀯𑁂 𑀫𑀦𑁄𑀤𑁆𑀯𑀸𑀭𑀸-𑀯𑀚𑁆𑀚𑀦𑀁 𑀚𑀯𑀦𑀦𑁆𑀢𑀺 𑀘𑀸𑀢𑀺.

𑀇𑀢𑀺 𑀘𑀺𑀢𑁆𑀢𑀯𑀺𑀪𑀸𑀕𑁂 𑀯𑀻𑀣𑀺𑀲𑀗𑁆𑀕𑀳𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀢𑀢𑀺𑀬𑁄 𑀧𑀭𑀺𑀘𑁆𑀙𑁂𑀤𑁄.