𑁨. 𑀧𑀓𑀺𑀡𑁆𑀡𑀓𑀓𑀣𑀸

𑁪𑁬. 𑀓𑀼𑀲𑀮𑀸𑀦𑁂𑀓𑀯𑀻𑀲𑁂𑀯, 𑀤𑁆𑀯𑀸𑀤𑀲𑀸𑀓𑀼𑀲𑀮𑀸𑀦𑀺 𑀘;

𑀙𑀢𑁆𑀢𑀺𑀁𑀲𑀢𑀺 𑀯𑀺𑀧𑀸𑀓𑀸𑀦𑀺, 𑀓𑁆𑀭𑀺𑀬𑀸𑀘𑀺𑀢𑁆𑀢𑀸𑀦𑀺 𑀯𑀻𑀲𑀢𑀺.

𑁪𑁭. 𑀓𑀸𑀫𑁂𑀲𑀼 𑀘𑀢𑀼𑀧𑀜𑁆𑀜𑀸𑀲, 𑀭𑀽𑀧𑁂𑀲𑀼 𑀤𑀲 𑀧𑀜𑁆𑀘 𑀘;

𑀤𑁆𑀯𑀸𑀤𑀲𑀸𑀭𑀼𑀧𑁆𑀧𑀘𑀺𑀢𑁆𑀢𑀸𑀦𑀺, 𑀅𑀝𑁆𑀞𑀸𑀦𑀼𑀢𑁆𑀢𑀭𑀫𑀸𑀦𑀲𑀸.

𑁪𑁮. 𑀓𑀸𑀫𑁂 𑀢𑁂𑀯𑀻𑀲 𑀧𑀸𑀓𑀸𑀦𑀺, 𑀧𑀼𑀜𑁆𑀜𑀸𑀧𑀼𑀜𑁆𑀜𑀸𑀦𑀺 𑀯𑀻𑀲𑀢𑀺;

𑀏𑀓𑀸𑀤𑀲 𑀓𑁆𑀭𑀺𑀬𑀸 𑀘𑁂𑀢𑀺, 𑀘𑀢𑀼𑀧𑀜𑁆𑀜𑀸𑀲 𑀲𑀩𑁆𑀩𑀣𑀸.

𑁪𑁯. 𑀧𑀼𑀜𑁆𑀜𑀧𑀸𑀓𑀓𑁆𑀭𑀺𑀬𑀸𑀪𑁂𑀤𑀸, 𑀢𑀬𑁄 𑀭𑀽𑀧𑁂𑀲𑀼 𑀧𑀜𑁆𑀘𑀓𑀸;

𑀆𑀭𑀼𑀧𑁆𑀧𑁂𑀢𑀺 𑀘𑀢𑀼𑀓𑁆𑀓𑀸𑀦𑀺, 𑀲𑀢𑁆𑀢𑀯𑀻𑀲 𑀫𑀳𑀕𑁆𑀕𑀢𑀸.

𑁫𑁦. 𑀘𑀢𑀼𑀫𑀕𑁆𑀕𑀨𑀮𑀸𑀦𑀁 𑀢𑀼, 𑀯𑀲𑁂𑀦𑀝𑁆𑀞𑀧𑀺 𑀛𑀸𑀦𑀢𑁄;

𑀤𑀲𑁄𑀪𑀬𑀫𑁆𑀧𑀺 𑀫𑀺𑀲𑁆𑀲𑁂𑀢𑁆𑀯𑀸, 𑀢𑀸𑀮𑀻𑀲𑀸𑀦𑀼𑀢𑁆𑀢𑀭𑀸 𑀲𑀺𑀬𑀼𑀁.

𑁫𑁧. 𑀧𑀼𑀜𑁆𑀜𑀧𑀸𑀓𑀓𑁆𑀭𑀺𑀬𑀸𑀧𑀸𑀧𑀸, 𑀲𑀦𑁆𑀢𑀺 𑀓𑀸𑀫𑁂 𑀫𑀳𑀕𑁆𑀕𑀢𑁂;

𑀧𑀸𑀧𑀁 𑀦𑀢𑁆𑀣𑀺 𑀓𑁆𑀭𑀺𑀬𑀸𑀧𑀸𑀧𑀸, 𑀦 𑀯𑀺𑀚𑁆𑀚𑀦𑁆𑀢𑀺 𑀅𑀦𑀼𑀢𑁆𑀢𑀭𑁂.

𑁫𑁨. 𑀧𑀸𑀧𑀸𑀳𑁂𑀢𑀼𑀓𑀫𑀼𑀢𑁆𑀢𑀸𑀦𑀺, 𑀅𑀦𑀯𑀚𑁆𑀚𑀸𑀦𑀺 𑀲𑀩𑁆𑀩𑀣𑀸;

𑀏𑀓𑀽𑀦𑀲𑀝𑁆𑀞𑀺 𑀘𑀺𑀢𑁆𑀢𑀸𑀦𑀺, 𑀧𑀼𑀜𑁆𑀜𑀧𑀸𑀓𑀓𑁆𑀭𑀺𑀬𑀸𑀯𑀲𑀸.

𑁫𑁩. 𑀓𑀫𑁆𑀫𑀘𑀺𑀢𑁆𑀢𑀸𑀦𑀺 𑀢𑁂𑀢𑁆𑀢𑀺𑀁𑀲, 𑀧𑀼𑀜𑁆𑀜𑀸𑀧𑀼𑀜𑁆𑀜𑀸𑀦𑀺 𑀲𑀩𑁆𑀩𑀣𑀸;

𑀙𑀢𑁆𑀢𑀺𑀁𑀲 𑀢𑁂𑀲𑀁 𑀧𑀸𑀓𑀸𑀦𑀺, 𑀓𑁆𑀭𑀺𑀬𑀸 𑀯𑀻𑀲 𑀦 𑀘𑁄𑀪𑀬𑀁.

𑁫𑁪. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀸𑀤𑀺, 𑀧𑀜𑁆𑀘𑀯𑀺𑀜𑁆𑀜𑀸𑀡𑀦𑀸𑀫𑀓𑀸;

𑀧𑀜𑁆𑀘𑀤𑁆𑀯𑀸𑀭𑀸𑀯𑀚𑁆𑀚𑀦𑀜𑁆𑀘, 𑀤𑀼𑀯𑀺𑀥𑀁 𑀲𑀫𑁆𑀧𑀝𑀺𑀘𑁆𑀙𑀦𑀁.

𑁫𑁫. 𑀫𑀦𑁄𑀥𑀸𑀢𑀼𑀢𑁆𑀢𑀬𑀁 𑀦𑀸𑀫, 𑀙𑀲𑀢𑁆𑀢𑀢𑀺 𑀢𑀢𑁄 𑀧𑀭𑁂;

𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀢𑀺, 𑀲𑀢𑁆𑀢𑀥𑀸 𑀥𑀸𑀢𑀼𑀪𑁂𑀤𑀢𑁄.

𑁫𑁬. 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀜𑁆𑀘, 𑀫𑀦𑁄𑀥𑀸𑀢𑀼𑀢𑁆𑀢𑀬𑀁 𑀢𑀣𑀸;

𑀓𑀢𑁆𑀯𑀸 𑀫𑀦𑁄𑀯𑀺𑀜𑁆𑀜𑀸𑀡𑀦𑁆𑀢𑀺, 𑀙 𑀯𑀺𑀜𑁆𑀜𑀸𑀡𑀸 𑀧𑀓𑀺𑀢𑁆𑀢𑀺𑀢𑀸.

𑁫𑁭. 𑀆𑀯𑀚𑁆𑀚𑀦𑀁 𑀤𑀲𑁆𑀲𑀦𑀜𑁆𑀘, 𑀲𑀯𑀦𑀁 𑀖𑀸𑀬𑀦𑀁 𑀢𑀣𑀸;

𑀲𑀸𑀬𑀦𑀁 𑀨𑀼𑀲𑀦𑀜𑁆𑀘𑁂𑀯, 𑀲𑀫𑁆𑀧𑀝𑀺𑀘𑁆𑀙𑀦𑀢𑀻𑀭𑀡𑀁.

𑁫𑁮. 𑀯𑁄𑀝𑁆𑀞𑀩𑁆𑀩𑀦𑀜𑁆𑀘 𑀚𑀯𑀦𑀁, 𑀢𑀤𑀸𑀭𑀫𑁆𑀫𑀡𑀦𑀸𑀫𑀓𑀁;

𑀪𑀯𑀗𑁆𑀕𑀁 𑀘𑀼𑀢𑀺 𑀲𑀦𑁆𑀥𑀻𑀢𑀺, 𑀘𑀺𑀢𑁆𑀢𑀁 𑀘𑀼𑀤𑁆𑀤𑀲𑀥𑀸 𑀞𑀺𑀢𑀁.

𑁫𑁯. 𑀆𑀯𑀚𑁆𑀚𑀦𑀸𑀤𑀬𑁄 𑀤𑁆𑀯𑁂 𑀤𑁆𑀯𑁂, 𑀬𑀼𑀕𑀸 𑀲𑀢𑁆𑀢 𑀬𑀣𑀸𑀓𑁆𑀓𑀫𑀁;

𑀢𑀻𑀡𑀺 𑀢𑀻𑀭𑀡𑀘𑀺𑀢𑁆𑀢𑀸𑀦𑀺, 𑀏𑀓𑀁 𑀯𑁄𑀝𑁆𑀞𑀩𑁆𑀩𑀦𑀁 𑀫𑀢𑀁.

𑁬𑁦. 𑀓𑀼𑀲𑀮𑀸𑀓𑀼𑀲𑀮𑀸 𑀲𑀩𑁆𑀩𑁂, 𑀨𑀮𑀸 𑀘𑀸𑀯𑀚𑁆𑀚𑀦𑀁 𑀯𑀺𑀦𑀸;

𑀓𑁆𑀭𑀺𑀬𑀸 𑀘 𑀧𑀜𑁆𑀘𑀧𑀜𑁆𑀜𑀸𑀲, 𑀚𑀯𑀦𑀦𑁆𑀢𑀺 𑀧𑀯𑀼𑀘𑁆𑀘𑀭𑁂.

𑁬𑁧. 𑀲𑀦𑁆𑀢𑀻𑀭𑀡𑀫𑀳𑀸𑀧𑀸𑀓𑀸, 𑀢𑀤𑀸𑀭𑀫𑁆𑀫𑀡𑀦𑀸𑀫𑀓𑀸;

𑀏𑀓𑀸𑀤𑀲 𑀧𑀯𑀢𑁆𑀢𑀦𑁆𑀢𑀺, 𑀚𑀯𑀦𑀸𑀭𑀫𑁆𑀫𑀡𑁂 𑀬𑀢𑁄.

𑁬𑁨. 𑀫𑀳𑀕𑁆𑀕𑀢𑀫𑀳𑀸𑀧𑀸𑀓𑀸, 𑀉𑀧𑁂𑀓𑁆𑀔𑀸𑀢𑀻𑀭𑀡𑀤𑁆𑀯𑀬𑀁;

𑀘𑀼𑀢𑀺𑀲𑀦𑁆𑀥𑀺𑀪𑀯𑀗𑁆𑀕𑀸𑀦𑀺, 𑀘𑀺𑀢𑁆𑀢𑀸𑀦𑁂𑀓𑀽𑀦𑀯𑀻𑀲𑀢𑀺.

𑁬𑁩. 𑀚𑀯𑀦𑀸𑀯𑀚𑁆𑀚𑀦𑀸𑀤𑀻𑀦𑀺, 𑀯𑁄𑀝𑁆𑀞𑀩𑁆𑀩𑀲𑀼𑀔𑀢𑀻𑀭𑀡𑀸;

𑀫𑀳𑀕𑁆𑀕𑀢𑀫𑀳𑀸𑀧𑀸𑀓𑀸, 𑀉𑀧𑁂𑀓𑁆𑀔𑀸𑀢𑀻𑀭𑀡𑀸𑀢𑀺 𑀘.

𑁬𑁪. 𑀅𑀝𑁆𑀞𑀲𑀝𑁆𑀞𑀺 𑀢𑀣𑀸 𑀤𑁆𑀯𑁂 𑀘, 𑀦𑀯𑀝𑁆𑀞 𑀤𑁆𑀯𑁂 𑀬𑀣𑀸𑀓𑁆𑀓𑀫𑀁;

𑀏𑀓𑀤𑁆𑀯𑀺𑀢𑀺𑀘𑀢𑀼𑀧𑁆𑀧𑀜𑁆𑀘𑀓𑀺𑀘𑁆𑀘𑀝𑁆𑀞𑀸𑀦𑀸𑀦𑀺 𑀦𑀺𑀤𑁆𑀤𑀺𑀲𑁂.

𑁬𑁫. 𑀭𑀽𑀧𑀧𑀸𑀓𑀸 𑀫𑀳𑀸𑀧𑀸𑀓𑀸, 𑀫𑀦𑁄𑀥𑀸𑀢𑀼 𑀘 𑀢𑀻𑀭𑀡𑀁;

𑀭𑀽𑀧𑀁 𑀚𑀦𑁂𑀦𑁆𑀢𑀺 𑀏𑀓𑀽𑀦𑀯𑀻𑀲𑀢𑀺 𑀦𑁂𑀢𑀭𑀤𑁆𑀯𑀬𑀁.

𑁬𑁬. 𑀅𑀪𑀺𑀜𑁆𑀜𑀸𑀯𑀚𑁆𑀚𑀺𑀢𑀸 𑀲𑀩𑁆𑀩𑁂, 𑀅𑀧𑁆𑀧𑀦𑀸𑀚𑀯𑀦𑀸 𑀧𑀦;

𑀭𑀽𑀧𑀁 𑀚𑀦𑁂𑀦𑁆𑀢𑀺 𑀙𑀩𑁆𑀩𑀻𑀲, 𑀧𑀡𑀸𑀫𑁂𑀦𑁆𑀢𑀺𑀭𑀺𑀬𑀸𑀧𑀣𑀁.

𑁬𑁭. 𑀅𑀪𑀺𑀜𑁆𑀜𑀸𑀤𑁆𑀯𑀬𑀯𑁄𑀝𑁆𑀞𑀩𑁆𑀩𑀧𑀭𑀺𑀢𑁆𑀢𑀚𑀯𑀦𑀸 𑀧𑀦;

𑀤𑁆𑀯𑀢𑁆𑀢𑀺𑀁𑀲 𑀭𑀽𑀧𑀯𑀺𑀜𑁆𑀜𑀢𑁆𑀢𑀺𑀇𑀭𑀺𑀬𑀸𑀧𑀣𑀲𑀸𑀥𑀓𑀸.

𑁬𑁮. 𑀧𑀜𑁆𑀘𑀯𑀺𑀜𑁆𑀜𑀸𑀡𑀫𑀸𑀭𑀼𑀧𑁆𑀧-𑀯𑀺𑀧𑀸𑀓𑀸 𑀲𑀩𑁆𑀩𑀲𑀦𑁆𑀥𑀺𑀬𑁄;

𑀘𑀼𑀢𑀺 𑀔𑀻𑀡𑀸𑀲𑀯𑀲𑁆𑀲𑁂𑀢𑀺, 𑀲𑁄𑀴𑀲𑁂𑀢𑁂 𑀦 𑀓𑀺𑀜𑁆𑀘𑀺𑀧𑀺.

𑁬𑁯. 𑀭𑀽𑀧𑀁 𑀚𑀦𑁂𑀦𑁆𑀢𑀺 𑀘𑀺𑀢𑁆𑀢𑀸𑀦𑀺, 𑀲𑀢𑁆𑀢𑀲𑀢𑁆𑀢𑀢𑀺 𑀲𑀩𑁆𑀩𑀣𑀸;

𑀅𑀝𑁆𑀞𑀧𑀜𑁆𑀜𑀸𑀲 𑀘𑀺𑀢𑁆𑀢𑀸𑀦𑀺, 𑀧𑀡𑀸𑀫𑁂𑀦𑁆𑀢𑀺𑀭𑀺𑀬𑀸𑀧𑀣𑀁.

𑁭𑁦. 𑀤𑁆𑀯𑀢𑁆𑀢𑀺𑀁𑀲 𑀘𑀢𑀼𑀯𑀺𑀜𑁆𑀜𑀢𑁆𑀢𑀺𑀁, 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀺 𑀫𑀸𑀦𑀲𑀸;

𑀦 𑀚𑀦𑁂𑀦𑁆𑀢𑀺 𑀢𑀲𑁆𑀲𑀫𑁆𑀧𑁂𑀓𑀁, 𑀬𑀣𑀸𑀯𑀼𑀢𑁆𑀢𑀸𑀦𑀺 𑀲𑁄𑀴𑀲.

𑁭𑁧. 𑀲𑁄𑀫𑀦𑀲𑁆𑀲𑀲𑀳𑀕𑀢𑀸, 𑀧𑀭𑀺𑀢𑁆𑀢𑀚𑀯𑀦𑀸 𑀧𑀦;

𑀳𑀲𑀦𑀫𑁆𑀧𑀺 𑀚𑀦𑁂𑀦𑁆𑀢𑀻𑀢𑀺, 𑀘𑀢𑀼𑀓𑀺𑀘𑁆𑀘𑀸𑀦𑀺 𑀢𑁂𑀭𑀲.

𑁭𑁨. 𑀲𑀩𑁆𑀩𑀫𑁆𑀧𑀺 𑀧𑀜𑁆𑀘𑀯𑁄𑀓𑀸𑀭𑁂, 𑀓𑀺𑀘𑁆𑀘𑀫𑁂𑀢𑀁 𑀧𑀓𑀸𑀲𑀺𑀢𑀁;

𑀆𑀭𑀼𑀧𑁆𑀧𑁂 𑀧𑀦 𑀲𑀩𑁆𑀩𑀫𑁆𑀧𑀺, 𑀭𑀽𑀧𑀸𑀬𑀢𑁆𑀢𑀁 𑀦 𑀯𑀺𑀚𑁆𑀚𑀢𑀺.

𑁭𑁩. 𑀅𑀲𑀜𑁆𑀜𑀻𑀦𑀁 𑀢𑀼 𑀲𑀩𑁆𑀩𑀸𑀦𑀺, 𑀘𑀺𑀢𑁆𑀢𑀸𑀦𑁂𑀯 𑀦 𑀮𑀩𑁆𑀪𑀭𑁂;

𑀭𑀽𑀧𑀓𑁆𑀔𑀦𑁆𑀥𑁄𑀯 𑀢𑁂𑀲𑀁 𑀢𑀼, 𑀅𑀢𑁆𑀢𑀪𑀸𑀯𑁄𑀢𑀺 𑀯𑀼𑀘𑁆𑀘𑀢𑀺.

𑁭𑁪. 𑀧𑀸𑀡𑀸𑀢𑀺𑀧𑀸𑀢𑀣𑁂𑀬𑁆𑀬𑀸𑀤𑀺𑀯𑀲𑁂𑀦𑁄𑀧𑀘𑀺𑀢𑀁 𑀧𑀦;

𑀉𑀤𑁆𑀥𑀘𑁆𑀘𑀭𑀳𑀺𑀢𑀸𑀧𑀼𑀜𑁆𑀜𑀁, 𑀘𑀢𑀼𑀭𑀸𑀧𑀸𑀬𑀪𑀽𑀫𑀺𑀬𑀁.

𑁭𑁫. 𑀤𑀢𑁆𑀯𑀸 𑀲𑀦𑁆𑀥𑀺𑀁 𑀧𑀯𑀢𑁆𑀢𑁂 𑀢𑀼, 𑀧𑀜𑁆𑀘𑀯𑁄𑀓𑀸𑀭𑀪𑀽𑀫𑀺𑀬𑀁;

𑀉𑀤𑁆𑀥𑀘𑁆𑀘𑀲𑀳𑀺𑀢𑀜𑁆𑀘𑀸𑀧𑀺, 𑀲𑀢𑁆𑀢 𑀧𑀸𑀓𑀸𑀦𑀺 𑀧𑀘𑁆𑀘𑀢𑀺.

𑁭𑁬. 𑀤𑀸𑀦𑀲𑀻𑀮𑀸𑀤𑀺𑀪𑁂𑀤𑁂𑀦, 𑀧𑀯𑀢𑁆𑀢𑀁 𑀓𑀼𑀲𑀮𑀁 𑀧𑀦;

𑀓𑀸𑀫𑁂 𑀫𑀸𑀦𑀲𑀫𑀼𑀓𑁆𑀓𑀝𑁆𑀞𑀁, 𑀘𑀢𑀼𑀓𑁆𑀓𑀁 𑀢𑀼 𑀢𑀺𑀳𑁂𑀢𑀼𑀓𑀁.

𑁭𑁭. 𑀤𑀢𑁆𑀯𑀸 𑀢𑀺𑀳𑁂𑀢𑀼𑀓𑀁 𑀲𑀦𑁆𑀥𑀺𑀁, 𑀓𑀸𑀫𑁂 𑀲𑀼𑀕𑀢𑀺𑀬𑀁 𑀧𑀦;

𑀲𑁄𑀴𑀲 𑀧𑀼𑀜𑁆𑀜𑀧𑀸𑀓𑀸𑀦𑀺, 𑀧𑀯𑀢𑁆𑀢𑁂 𑀢𑀼 𑀯𑀺𑀧𑀘𑁆𑀘𑀢𑀺.

𑁭𑁮. 𑀢𑀺𑀳𑁂𑀢𑀼𑀓𑁄𑀫𑀓𑀁 𑀧𑀼𑀜𑁆𑀜𑀁, 𑀉𑀓𑁆𑀓𑀝𑁆𑀞𑀜𑁆𑀘 𑀤𑁆𑀯𑀺𑀳𑁂𑀢𑀼𑀓𑀁;

𑀤𑀢𑁆𑀯𑀸 𑀤𑁆𑀯𑀺𑀳𑁂𑀢𑀼𑀓𑀁 𑀲𑀦𑁆𑀥𑀺𑀁, 𑀓𑀸𑀫𑁂 𑀲𑀼𑀕𑀢𑀺𑀬𑀁 𑀢𑀣𑀸.

𑁭𑁯. 𑀧𑀯𑀢𑁆𑀢𑁂 𑀧𑀦 𑀜𑀸𑀡𑁂𑀦, 𑀲𑀫𑁆𑀧𑀬𑀼𑀢𑁆𑀢𑀁 𑀯𑀺𑀯𑀚𑁆𑀚𑀺𑀬;

𑀤𑁆𑀯𑀸𑀤𑀲 𑀧𑀼𑀜𑁆𑀜𑀧𑀸𑀓𑀸𑀦𑀺, 𑀯𑀺𑀧𑀘𑁆𑀘𑀢𑀺 𑀬𑀣𑀸𑀭𑀳𑀁.

𑁮𑁦. 𑀤𑁆𑀯𑀺𑀳𑁂𑀢𑀼𑀓𑁄𑀫𑀓𑀁 𑀧𑀼𑀜𑁆𑀜𑀁, 𑀧𑀝𑀺𑀲𑀦𑁆𑀥𑀺𑀫𑀳𑁂𑀢𑀼𑀓𑀁;

𑀤𑁂𑀢𑀺 𑀫𑀸𑀦𑀼𑀲𑀓𑁂 𑀘𑁂𑀯, 𑀯𑀺𑀦𑀺𑀧𑀸𑀢𑀸𑀲𑀼𑀭𑁂 𑀢𑀣𑀸.

𑁮𑁧. 𑀅𑀝𑁆𑀞𑀸𑀳𑁂𑀢𑀼𑀓𑀧𑀸𑀓𑀸𑀦𑀺, 𑀧𑀯𑀢𑁆𑀢𑁂 𑀢𑀼 𑀯𑀺𑀧𑀘𑁆𑀘𑀭𑁂;

𑀘𑀢𑁆𑀢𑀸𑀭𑀺𑀧𑀺 𑀘𑀢𑀼𑀓𑁆𑀓𑀸𑀦𑀺, 𑀧𑀜𑁆𑀘𑀯𑁄𑀓𑀸𑀭𑀪𑀽𑀫𑀺𑀬𑀁.

𑁮𑁨. 𑀪𑀸𑀯𑀦𑀸𑀫𑀬𑀧𑀼𑀜𑁆𑀜𑀁 𑀢𑀼, 𑀫𑀳𑀕𑁆𑀕𑀢𑀫𑀦𑀼𑀢𑁆𑀢𑀭𑀁;

𑀬𑀣𑀸𑀪𑀽𑀫𑀺𑀦𑀺𑀬𑀸𑀫𑁂𑀦, 𑀤𑁂𑀢𑀺 𑀧𑀸𑀓𑀁 𑀬𑀣𑀸𑀲𑀓𑀁.

𑁮𑁩. 𑀓𑀝𑀢𑁆𑀢𑀸𑀭𑀽𑀧𑀧𑀸𑀓𑀸𑀦𑀺, 𑀧𑀜𑁆𑀘𑀯𑁄𑀓𑀸𑀭𑀪𑀽𑀫𑀺𑀬𑀁;

𑀆𑀭𑀼𑀧𑁆𑀧𑀸𑀦𑀼𑀢𑁆𑀢𑀭𑁂 𑀧𑀸𑀓𑀁, 𑀢𑀣𑀸 𑀭𑀽𑀧𑀫𑀲𑀜𑁆𑀜𑀺𑀲𑀼.

𑁮𑁪. 𑀧𑀼𑀜𑁆𑀜𑀸𑀧𑀼𑀜𑁆𑀜𑀸𑀦𑀺 𑀓𑀫𑁆𑀫𑀸𑀦𑀺, 𑀢𑁂𑀢𑁆𑀢𑀺𑀁𑀲𑀸𑀧𑀺 𑀘 𑀬𑀩𑁆𑀩𑀣𑀸;

𑀲𑀜𑁆𑀚𑀦𑁂𑀦𑁆𑀢𑀺 𑀬𑀣𑀸𑀬𑁄𑀕𑀁, 𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑀺𑀬𑀁.

𑀇𑀢𑀺 𑀘𑀺𑀢𑁆𑀢𑀯𑀺𑀪𑀸𑀕𑁂 𑀧𑀓𑀺𑀡𑁆𑀡𑀓𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀢𑀺𑀬𑁄 𑀧𑀭𑀺𑀘𑁆𑀙𑁂𑀤𑁄.