𑀅𑀝𑁆𑀞𑀯𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄

𑁨𑁮. 𑀅𑀢𑁆𑀣𑀧𑀜𑁆𑀜𑀢𑁆𑀢𑀺𑀓𑀣𑀸

𑁧𑁦𑁮𑁪. 𑀢𑀢𑁆𑀣 𑀘 𑀧𑀼𑀩𑁆𑀩𑀸𑀧𑀭𑀺𑀬-𑀧𑀯𑀢𑁆𑀢𑀓𑁆𑀔𑀦𑁆𑀥𑀲𑀫𑁆𑀫𑀢𑀸;

𑀯𑀺𑀜𑁆𑀜𑀢𑁆𑀢𑀺𑀦𑁆𑀤𑁆𑀭𑀺𑀬𑀯𑀺𑀧𑁆𑀨𑀸𑀭-𑀯𑀺𑀲𑁂𑀲𑁄𑀧𑀦𑀺𑀩𑀦𑁆𑀥𑀦𑀸.

𑁧𑁦𑁮𑁫. 𑀤𑁂𑀯𑀬𑀓𑁆𑀔𑀫𑀦𑀼𑀲𑁆𑀲𑀸𑀤𑀺-𑀦𑀸𑀦𑀸𑀪𑁂𑀤𑀸 𑀲𑀮𑀓𑁆𑀔𑀺𑀓𑀸;

𑀲𑀢𑁆𑀢𑀧𑀜𑁆𑀜𑀢𑁆𑀢𑀺 𑀦𑀸𑀫𑀸𑀬𑀁, 𑀲𑁆𑀯𑀸𑀬𑀁 𑀲𑀢𑁆𑀢𑁄𑀢𑀺 𑀲𑀫𑁆𑀫𑀢𑁄.

𑁧𑁦𑁮𑁬. 𑀯𑀝𑁆𑀝𑀢𑁆𑀢𑀬𑀫𑀼𑀧𑀸𑀤𑀸𑀬,

𑀔𑀦𑁆𑀥𑀸𑀬𑀢𑀦𑀯𑀼𑀢𑁆𑀢𑀺𑀬𑀸;

𑀓𑀸𑀭𑀓𑁄 𑀯𑁂𑀤𑀓𑁄 𑀯𑀸𑀬𑀁,

𑀲𑀦𑁆𑀥𑀸𑀯𑀢𑀺 𑀪𑀯𑁂 𑀪𑀯𑁂.

𑁧𑁦𑁮𑁭. 𑀢𑀲𑁆𑀫𑀸 𑀲𑀁𑀲𑀸𑀭𑀫𑀸𑀧𑀦𑁆𑀦𑁄, 𑀲𑀢𑁆𑀢𑁄 𑀦𑀸𑀫 𑀲 𑀧𑀼𑀕𑁆𑀕𑀮𑁄;

𑀅𑀳𑀫𑀢𑁆𑀢𑀸𑀧𑀭𑀸 𑀇𑀢𑁆𑀣𑀻, 𑀧𑀼𑀭𑀺𑀲𑁄𑀢𑀺 𑀘 𑀓𑀧𑁆𑀧𑀺𑀢𑁄.

𑁧𑁦𑁮𑁮. 𑀲𑁆𑀯𑀸𑀬𑀁 𑀔𑀦𑁆𑀥𑀸𑀤𑀺𑀢𑁄 𑀲𑀢𑁆𑀢𑁄, 𑀅𑀜𑁆𑀜𑁄𑀢𑀺 𑀘 𑀦 𑀯𑀼𑀘𑁆𑀘𑀢𑀺;

𑀔𑀦𑁆𑀥𑀸𑀤𑀺𑀯𑀺𑀦𑀺𑀫𑀼𑀢𑁆𑀢𑀲𑁆𑀲, 𑀲𑀢𑁆𑀢𑀲𑁆𑀲𑁂𑀯 𑀅𑀪𑀸𑀯𑀢𑁄.

𑁧𑁦𑁮𑁯. 𑀔𑀦𑁆𑀥𑀸 𑀔𑀦𑁆𑀥𑀸𑀦𑀫𑁂𑀯𑀸𑀬𑀁, 𑀲𑀢𑁆𑀢𑁄𑀢𑀺 𑀘 𑀦 𑀯𑀼𑀘𑁆𑀘𑀢𑀺;

𑀔𑀦𑁆𑀥𑀯𑁄𑀳𑀸𑀭𑀢𑁄 𑀢𑀲𑁆𑀲, 𑀅𑀜𑁆𑀜𑀯𑁄𑀳𑀸𑀭𑀲𑀫𑁆𑀪𑀯𑀸.

𑁧𑁦𑁯𑁦. 𑀇𑀘𑁆𑀘𑁂𑀯𑀁 𑀔𑀦𑁆𑀥𑀦𑀸𑀦𑀢𑁆𑀢𑁂-𑀓𑀢𑁆𑀢𑀫𑀼𑀢𑁆𑀢𑁄𑀧𑀺 𑀅𑀢𑁆𑀣𑀢𑁄;

𑀢𑀩𑁆𑀩𑀺𑀲𑁂𑀲𑀸𑀯𑀘𑀭𑀺𑀢-𑀯𑁄𑀳𑀸𑀭𑁄 𑀘 𑀢𑀼 𑀤𑀺𑀲𑁆𑀲𑀢𑀺.

𑁧𑁦𑁯𑁧. 𑀢𑁂𑀦𑀸𑀬𑀁 𑀧𑀼𑀕𑁆𑀕𑀮𑁄 𑀲𑀢𑁆𑀢𑁄, 𑀚𑀸𑀬𑀢𑀺𑀚𑁆𑀚𑀺𑀬𑁆𑀬𑀢𑀻𑀢𑀺 𑀘;

𑀫𑀻𑀬𑀢𑀻𑀢𑀺 𑀘 𑀢𑀲𑁆𑀲𑀸𑀬𑀁, 𑀲𑀁𑀲𑀸𑀭𑁄𑀢𑀺 𑀧𑀯𑀼𑀘𑁆𑀘𑀢𑀺.

𑁧𑁦𑁯𑁨. 𑀫𑀢𑁄 𑀚𑀸𑀢𑁄 𑀘 𑀦 𑀲𑁆𑀯𑁂𑀯, 𑀔𑀦𑁆𑀥𑀪𑁂𑀤𑁄𑀧𑀘𑀸𑀭𑀢𑁄;

𑀦𑀸𑀧𑀭𑁄 𑀲𑁆𑀯𑁂𑀯 𑀲𑀦𑁆𑀢𑀸𑀦𑀪𑁂𑀤𑀸𑀪𑀸𑀯𑁄𑀧𑀘𑀸𑀭𑀢𑁄.

𑁧𑁦𑁯𑁩. 𑀦𑀸𑀦𑀢𑁆𑀢𑁂𑀓𑀢𑁆𑀢𑀫𑀺𑀘𑁆𑀘𑁂𑀯𑀁, 𑀧𑀼𑀕𑁆𑀕𑀮𑀲𑁆𑀲𑁄𑀧𑀘𑀸𑀭𑀢𑁄;

𑀉𑀘𑁆𑀙𑁂𑀤𑀲𑀲𑁆𑀲𑀢𑀢𑁆𑀢𑀁 𑀯𑀸, 𑀢𑀲𑁆𑀫𑀸 𑀦𑁄𑀧𑁂𑀢𑀺 𑀧𑀼𑀕𑁆𑀕𑀮𑁄.

𑁧𑁦𑁯𑁪. 𑀇𑀘𑁆𑀘𑀸𑀬𑀁 𑀧𑀼𑀕𑁆𑀕𑀮𑁄 𑀦𑀸𑀫, 𑀲𑀢𑁆𑀢𑁄 𑀲𑀁𑀲𑀸𑀭𑀓𑀸𑀭𑀓𑁄;

𑀔𑀦𑁆𑀥𑀸𑀤𑀺𑀓𑀫𑀼𑀧𑀸𑀤𑀸𑀬, 𑀧𑀜𑁆𑀜𑀢𑁆𑀢𑁄𑀢𑀺 𑀧𑀯𑀼𑀘𑁆𑀘𑀢𑀺.

𑁧𑁦𑁯𑁫. 𑀢𑀲𑁆𑀫𑀸 𑀧𑀼𑀕𑁆𑀕𑀮𑀲𑀗𑁆𑀔𑀸𑀢𑀸, 𑀲𑀁𑀲𑀸𑀭𑁄𑀧𑀦𑀺𑀩𑀦𑁆𑀥𑀦𑀸;

𑀲𑀢𑁆𑀢𑀧𑀜𑁆𑀜𑀢𑁆𑀢𑀺 𑀦𑀸𑀫𑀸𑀢𑀺, 𑀯𑀺𑀜𑁆𑀜𑀸𑀢𑀩𑁆𑀩𑀸 𑀯𑀺𑀪𑀸𑀯𑀺𑀦𑀸.

𑁧𑁦𑁯𑁬. 𑀅𑀚𑁆𑀛𑀢𑁆𑀢𑀺𑀓𑀸 𑀘 𑀓𑁂𑀲𑀸𑀤𑀺𑀓𑁄𑀝𑁆𑀞𑀸𑀲𑀸 𑀩𑀸𑀳𑀺𑀭𑁂𑀲𑀼 𑀘;

𑀪𑀽𑀫𑀺𑀧𑀩𑁆𑀩𑀢𑀧𑀸𑀲𑀸𑀡𑀢𑀺𑀡𑀭𑀼𑀓𑁆𑀔𑀮𑀢𑀸𑀤𑀺𑀓𑀸.

𑁧𑁦𑁯𑁭. 𑀪𑀽𑀢𑀲𑀫𑁆𑀪𑀸𑀭𑀦𑀺𑀩𑁆𑀩𑀢𑁆𑀢𑀺𑀯𑀺𑀪𑀸𑀕𑀧𑀭𑀺𑀓𑀧𑁆𑀧𑀺𑀢𑀸;

𑀢𑀫𑀼𑀧𑀸𑀤𑀸𑀬 𑀲𑀫𑁆𑀪𑀸𑀭𑀧𑀜𑁆𑀜𑀢𑁆𑀢𑀻𑀢𑀺 𑀧𑀯𑀼𑀘𑁆𑀘𑀢𑀺.

𑁧𑁦𑁯𑁮. 𑀪𑀽𑀢𑀲𑀫𑁆𑀪𑀸𑀭𑀲𑀡𑁆𑀞𑀸𑀦𑀯𑀺𑀪𑀸𑀕𑀧𑀭𑀺𑀓𑀧𑁆𑀧𑀺𑀢𑀸;

𑀲𑀡𑁆𑀞𑀸𑀦𑀧𑀜𑁆𑀜𑀢𑁆𑀢𑀺 𑀦𑀸𑀫, 𑀣𑀫𑁆𑀪𑀓𑀼𑀫𑁆𑀪𑀸𑀤𑀺𑀓𑀸 𑀫𑀢𑀸.

𑁧𑁦𑁯𑁯. 𑀪𑀽𑀢𑀲𑀫𑁆𑀪𑀸𑀭𑀲𑀗𑁆𑀖𑀸𑀢𑀯𑀺𑀲𑁂𑀲𑀧𑀭𑀺𑀓𑀧𑁆𑀧𑀺𑀢𑀸;

𑀲𑀗𑁆𑀖𑀸𑀢𑀧𑀜𑁆𑀜𑀢𑁆𑀢𑀺 𑀦𑀸𑀫, 𑀭𑀣𑀕𑁂𑀳𑀸𑀤𑀺𑀓𑀸 𑀫𑀢𑀸.

𑁧𑁧𑁦𑁦. 𑀪𑀽𑀢𑀲𑀫𑁆𑀪𑀸𑀭𑀯𑀺𑀲𑁂𑀲𑀧𑀭𑀺𑀡𑀸𑀫𑀧𑀓𑀧𑁆𑀧𑀺𑀢𑀸;

𑀧𑀭𑀺𑀡𑀸𑀫𑀧𑀜𑁆𑀜𑀢𑁆𑀢𑀻𑀢𑀺, 𑀤𑀥𑀺𑀪𑀢𑁆𑀢𑀸𑀤𑀺𑀓𑀸 𑀫𑀢𑀸.

𑁧𑁧𑁦𑁧. 𑀇𑀢𑁆𑀣𑀫𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸, 𑀥𑀫𑁆𑀫𑀸 𑀲𑀫𑁆𑀪𑀸𑀭𑀲𑀫𑁆𑀪𑀽𑀢𑀸;

𑀲𑀦𑁆𑀢𑀸𑀦𑀯𑀼𑀢𑁆𑀢𑀺 𑀲𑀗𑁆𑀓𑁂𑀢𑀲𑀺𑀤𑁆𑀥𑀸 𑀧𑀜𑁆𑀜𑀢𑁆𑀢𑀺 𑀧𑀜𑁆𑀘𑀥𑀸.

𑁧𑁧𑁦𑁨. 𑀢𑀣𑀸 𑀢𑀣𑀸 𑀲𑀫𑀼𑀧𑁆𑀧𑀦𑁆𑀦𑀯𑀺𑀓𑀧𑁆𑀧𑀸𑀪𑁄𑀕𑀲𑀫𑁆𑀫𑀢𑀸;

𑀯𑀺𑀓𑀧𑁆𑀧𑀧𑀜𑁆𑀜𑀢𑁆𑀢𑀺 𑀦𑀸𑀫, 𑀓𑀸𑀮𑀸𑀓𑀸𑀲𑀤𑀺𑀲𑀸𑀤𑀺𑀓𑀸.

𑁧𑁧𑁦𑁩. 𑀢𑀁 𑀢𑀁 𑀦𑀺𑀫𑀺𑀢𑁆𑀢𑀫𑀸𑀕𑀫𑁆𑀫, 𑀢𑀢𑁄𑀧𑀝𑁆𑀞𑀸𑀦𑀓𑀧𑁆𑀧𑀺𑀢𑀸;

𑀉𑀧𑀝𑁆𑀞𑀸𑀦𑀧𑀜𑁆𑀜𑀢𑁆𑀢𑀻𑀢𑀺, 𑀧𑀝𑀺𑀪𑀸𑀕𑀸𑀤𑀺𑀓𑀸 𑀫𑀢𑀸.

𑁧𑁧𑁦𑁪. 𑀯𑀺𑀲𑁂𑀲𑀸𑀓𑀸𑀭𑀫𑀢𑁆𑀢𑀸𑀧𑀺, 𑀅𑀢𑁆𑀣𑀦𑁆𑀢𑀭𑀧𑀓𑀧𑁆𑀧𑀺𑀢𑀸;

𑀆𑀓𑀸𑀭𑀧𑀜𑁆𑀜𑀢𑁆𑀢𑀺 𑀦𑀸𑀫, 𑀯𑀺𑀜𑁆𑀜𑀢𑁆𑀢𑀺𑀮𑀳𑀼𑀢𑀸𑀤𑀺𑀓𑀸.

𑁧𑁧𑁦𑁫. 𑀢𑀁 𑀢𑀁 𑀓𑀸𑀭𑀡𑀫𑀸𑀕𑀫𑁆𑀫, 𑀢𑀣𑀸 𑀯𑁄𑀳𑀸𑀭𑀓𑀧𑁆𑀧𑀺𑀢𑀸;

𑀯𑁄𑀳𑀸𑀭𑀧𑀜𑁆𑀜𑀢𑁆𑀢𑀺 𑀦𑀸𑀫, 𑀓𑀣𑀺𑀦𑀸𑀧𑀢𑁆𑀢𑀺𑀆𑀤𑀺𑀓𑀸.

𑁧𑁧𑁦𑁬. 𑀩𑀸𑀮𑁄 𑀬𑁄 𑀲𑁄 𑀘 𑀫𑁂 𑀅𑀢𑁆𑀢𑀸,

𑀲𑁄 𑀪𑀯𑀺𑀲𑁆𑀲𑀸𑀫𑀺 𑀫𑀁 𑀘 𑀢𑀼;

𑀦𑀺𑀘𑁆𑀘𑁄 𑀥𑀼𑀯𑁄 𑀲𑀲𑁆𑀲𑀢𑁄𑀢𑀺-

𑀆𑀤𑀺𑀓𑀸 𑀧𑀦 𑀲𑀩𑁆𑀩𑀣𑀸.

𑁧𑁧𑁦𑁭. 𑀢𑀩𑁆𑀩𑁄𑀳𑀸𑀭𑀦𑀺𑀫𑀺𑀢𑁆𑀢𑀸𑀦𑀁, 𑀅𑀪𑀸𑀯𑁂𑀧𑀺 𑀧𑀯𑀢𑁆𑀢𑀺𑀢𑁄;

𑀅𑀪𑀺𑀦𑀺𑀯𑁂𑀲𑀧𑀜𑁆𑀜𑀢𑁆𑀢𑀺, 𑀦𑀸𑀫 𑀢𑀺𑀢𑁆𑀣𑀺𑀬𑀓𑀧𑁆𑀧𑀺𑀢𑀸.

𑁧𑁧𑁦𑁮. 𑀇𑀘𑁆𑀘𑁂𑀯𑀁 𑀮𑁄𑀓𑀲𑀸𑀲𑀦𑀢𑀺𑀢𑁆𑀣𑀸𑀬𑀢𑀦𑀓𑀧𑁆𑀧𑀺𑀢𑀸;

𑀲𑀦𑁆𑀢𑀸𑀦𑀫𑀼𑀢𑁆𑀢𑀲𑀗𑁆𑀓𑁂𑀢𑀲𑀺𑀤𑁆𑀥𑀸 𑀅𑀢𑁆𑀣𑀸𑀧𑀺 𑀧𑀜𑁆𑀘𑀥𑀸.

𑁧𑁧𑁦𑁯. 𑀲𑀗𑁆𑀓𑀸𑀦𑀯𑀼𑀢𑁆𑀢𑀺𑀲𑀦𑁆𑀢𑀸𑀦𑀫𑀼𑀢𑁆𑀢𑀪𑁂𑀤𑀯𑀲𑀸 𑀤𑁆𑀯𑀺𑀥𑀸;

𑀅𑀢𑁆𑀣𑀧𑀜𑁆𑀜𑀢𑁆𑀢𑀺 𑀦𑀸𑀫𑀸𑀬𑀁, 𑀤𑀲𑀥𑀸 𑀧𑀭𑀺𑀤𑀻𑀧𑀺𑀢𑀸.

𑁧𑁧𑁧𑁦. 𑀇𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀲𑀼, 𑀧𑀜𑁆𑀜𑀢𑁆𑀢𑀢𑁆𑀣𑁂𑀲𑀼 𑀧𑀡𑁆𑀟𑀺𑀢𑀸;

𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑀁 𑀲𑀦𑁆𑀥𑀸𑀬, 𑀯𑁄𑀳𑀭𑀦𑁆𑀢𑀺 𑀬𑀣𑀸𑀓𑀣𑀁.

𑁧𑁧𑁧𑁧. 𑀢𑀤𑀜𑁆𑀜𑁂 𑀧𑀦 𑀩𑀸𑀮𑀸 𑀘, 𑀢𑀺𑀢𑁆𑀣𑀺𑀬𑀸𑀧𑀺 𑀅𑀓𑁄𑀯𑀺𑀤𑀸;

𑀧𑀜𑁆𑀜𑀢𑁆𑀢𑀺𑀫𑀢𑀺𑀥𑀸𑀯𑀺𑀢𑁆𑀯𑀸, 𑀕𑀡𑁆𑀳𑀦𑁆𑀢𑀺 𑀧𑀭𑀫𑀢𑁆𑀣𑀢𑁄.

𑁧𑁧𑁧𑁨. 𑀢𑁂 𑀢𑀣𑀸 𑀕𑀳𑀺𑀢𑀸𑀓𑀸𑀭𑀸, 𑀅𑀜𑁆𑀜𑀸𑀡𑀕𑀳𑀺𑀢𑀸 𑀚𑀦𑀸;

𑀫𑀺𑀘𑁆𑀙𑀢𑁆𑀢𑀸𑀪𑀺𑀦𑀺𑀯𑀺𑀝𑁆𑀞𑀸 𑀘, 𑀯𑀟𑁆𑀠𑀦𑁆𑀢𑀺 𑀪𑀯𑀩𑀦𑁆𑀥𑀦𑀁.

𑁧𑁧𑁧𑁩. 𑀤𑀼𑀯𑀺𑀥𑁂𑀲𑀼𑀧𑀺 𑀅𑀢𑁆𑀣𑁂𑀲𑀼, 𑀢𑀲𑁆𑀫𑀸 𑀧𑀡𑁆𑀟𑀺𑀢𑀚𑀸𑀢𑀺𑀓𑁄;

𑀧𑀭𑀫𑀢𑁆𑀣𑀧𑀜𑁆𑀜𑀢𑁆𑀢𑀻𑀲𑀼, 𑀯𑀺𑀪𑀸𑀕𑀫𑀺𑀢𑀺 𑀮𑀓𑁆𑀔𑀬𑁂𑀢𑀺.

𑀇𑀢𑀺 𑀧𑀜𑁆𑀜𑀢𑁆𑀢𑀺𑀯𑀺𑀪𑀸𑀕𑁂 𑀅𑀢𑁆𑀣𑀧𑀜𑁆𑀜𑀢𑁆𑀢𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀅𑀝𑁆𑀞𑀯𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.