𑀏𑀓𑀽𑀦𑀢𑀺𑀁𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄

𑁨𑁯. 𑀦𑀸𑀫𑀧𑀜𑁆𑀜𑀢𑁆𑀢𑀺𑀓𑀣𑀸

𑁧𑁧𑁧𑁪. 𑀦𑀸𑀫𑀯𑁄𑀳𑀸𑀭𑀲𑀗𑁆𑀓𑁂𑀢𑀓𑀸𑀭𑀡𑁄𑀧𑀦𑀺𑀩𑀦𑁆𑀥𑀦𑀸;

𑀬𑀣𑀸𑀯𑀼𑀢𑁆𑀢𑀢𑁆𑀣𑀲𑀤𑁆𑀤𑀸𑀦𑀁, 𑀅𑀦𑁆𑀢𑀭𑀸 𑀘𑀺𑀦𑁆𑀢𑀦𑀸 𑀕𑀢𑀸.

𑁧𑁧𑁧𑁫. 𑀦𑀸𑀫𑀧𑀜𑁆𑀜𑀢𑁆𑀢𑀺 𑀦𑀸𑀫𑀸𑀬𑀁, 𑀅𑀢𑁆𑀣𑀲𑀤𑁆𑀤𑀯𑀺𑀦𑀺𑀲𑁆𑀲𑀝𑀸;

𑀢𑀁𑀤𑁆𑀯𑀬𑀸𑀩𑀤𑁆𑀥𑀲𑀗𑁆𑀓𑁂𑀢𑀜𑁂𑀬𑁆𑀬𑀸𑀓𑀸𑀭𑁄𑀧𑀮𑀓𑁆𑀔𑀺𑀢𑀸.

𑁧𑁧𑁧𑁬. 𑀬𑀸 𑀕𑀬𑁆𑀳𑀢𑀺 𑀦𑀸𑀫𑀖𑁄𑀲𑀕𑁄𑀘𑀭𑀼𑀧𑁆𑀧𑀦𑁆𑀦𑀯𑀻𑀣𑀺𑀬𑀸;

𑀧𑀯𑀢𑁆𑀢𑀸𑀦𑀦𑁆𑀢𑀭𑀼𑀧𑁆𑀧𑀦𑁆𑀦-𑀫𑀦𑁄𑀤𑁆𑀯𑀸𑀭𑀺𑀓𑀯𑀻𑀣𑀺𑀬𑀸.

𑁧𑁧𑁧𑁭. 𑀫𑀜𑁆𑀘𑀧𑀻𑀞𑀸𑀤𑀺𑀲𑀤𑁆𑀤𑀁 𑀳𑀺, 𑀲𑁄𑀢𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸;

𑀲𑀼𑀢𑁆𑀯𑀸 𑀢𑀫𑁂𑀯 𑀘𑀺𑀦𑁆𑀢𑁂𑀢𑁆𑀯𑀸, 𑀫𑀦𑁄𑀤𑁆𑀯𑀸𑀭𑀺𑀓𑀯𑀻𑀣𑀺𑀬𑀸.

𑁧𑁧𑁧𑁮. 𑀢𑀢𑁄 𑀲𑀗𑁆𑀓𑁂𑀢𑀦𑀺𑀧𑁆𑀨𑀦𑁆𑀦𑀁, 𑀦𑀸𑀫𑀁 𑀘𑀺𑀦𑁆𑀢𑀸𑀬 𑀕𑀬𑁆𑀳𑀢𑀺;

𑀦𑀸𑀫𑀧𑀜𑁆𑀜𑀢𑁆𑀢𑀺𑀅𑀢𑁆𑀣𑀸 𑀢𑀼, 𑀢𑀢𑁄 𑀕𑀬𑁆𑀳𑀦𑁆𑀢𑀺 𑀲𑀫𑁆𑀪𑀯𑀸.

𑁧𑁧𑁧𑁯. 𑀲𑀤𑁆𑀤𑀦𑀸𑀫𑀢𑁆𑀣𑀧𑀜𑁆𑀜𑀢𑁆𑀢𑀺𑀧𑀭𑀫𑀢𑁆𑀣𑀯𑀲𑁂𑀦 𑀳𑀺;

𑀘𑀢𑀼𑀥𑀸 𑀢𑀺𑀯𑀺𑀥𑀸 𑀯𑀸𑀣, 𑀘𑀺𑀦𑁆𑀢𑀦𑀸 𑀢𑀢𑁆𑀣 𑀇𑀘𑁆𑀙𑀺𑀢𑀸.

𑁧𑁧𑁨𑁦. 𑀇𑀢𑁆𑀣𑀫𑀝𑁆𑀞𑀓𑀣𑀸𑀫𑀕𑁆𑀕𑀁, 𑀯𑀡𑁆𑀡𑁂𑀦𑁆𑀢𑁂𑀦 𑀳𑀺 𑀤𑀲𑁆𑀲𑀺𑀢𑁄;

𑀦𑀬𑁄 𑀆𑀘𑀭𑀺𑀬𑁂𑀦𑁂𑀢𑀺, 𑀯𑀺𑀪𑀸𑀕𑁄𑀬𑀁 𑀧𑀓𑀸𑀲𑀺𑀢𑁄.

𑁧𑁧𑁨𑁧. 𑀦𑀢𑁆𑀣𑀜𑁆𑀜𑀸 𑀓𑀸𑀘𑀺 𑀯𑀺𑀜𑁆𑀜𑀢𑁆𑀢𑀺, 𑀯𑀺𑀓𑀸𑀭𑀲𑀳𑀺𑀢𑁄 𑀧𑀦;

𑀲𑀤𑁆𑀤𑁄𑀯 𑀦𑀸𑀫𑀧𑀜𑁆𑀜𑀢𑁆𑀢𑀺, 𑀇𑀘𑁆𑀘𑁂𑀓𑀘𑁆𑀘𑁂𑀳𑀺 𑀯𑀡𑁆𑀡𑀺𑀢𑀁.

𑁧𑁧𑁨𑁨. 𑀢𑀤𑁂𑀢𑀁 𑀦𑀸𑀫𑀧𑀜𑁆𑀜𑀢𑁆𑀢𑀺𑀪𑀸𑀯𑁂𑀦𑁂𑀓𑀯𑀺𑀥𑀫𑁆𑀧𑀺 𑀘;

𑀦𑁂𑀭𑀼𑀢𑁆𑀢𑀺𑀓𑀬𑀸𑀤𑀺𑀘𑁆𑀙𑀓𑀯𑀲𑀸 𑀦𑀸𑀫𑀁 𑀤𑁆𑀯𑀺𑀥𑀸 𑀪𑀯𑁂.

𑁧𑁧𑁨𑁩. 𑀲𑀜𑁆𑀜𑀸𑀲𑀼 𑀥𑀸𑀢𑀼𑀭𑀽𑀧𑀸𑀦𑀺, 𑀧𑀘𑁆𑀘𑀬𑀜𑁆𑀘 𑀢𑀢𑁄 𑀧𑀭𑀁;

𑀓𑀢𑁆𑀯𑀸 𑀯𑀡𑁆𑀡𑀸𑀕𑀫𑀸𑀤𑀺𑀜𑁆𑀘, 𑀲𑀤𑁆𑀤𑀮𑀓𑁆𑀔𑀡𑀲𑀸𑀥𑀺𑀢𑀁.

𑁧𑁧𑁨𑁪. 𑀦𑁂𑀭𑀼𑀢𑁆𑀢𑀺𑀓𑀫𑀼𑀤𑀻𑀭𑁂𑀦𑁆𑀢𑀺, 𑀦𑀸𑀫𑀁 𑀬𑀸𑀤𑀺𑀘𑁆𑀙𑀓𑀁 𑀧𑀤𑀁;

𑀬𑀤𑀺𑀘𑁆𑀙𑀸𑀬 𑀓𑀢𑀫𑀢𑁆𑀢𑀁, 𑀩𑁆𑀬𑀜𑁆𑀚𑀦𑀢𑁆𑀣𑀯𑀺𑀯𑀚𑁆𑀚𑀺𑀢𑀁.

𑁧𑁧𑁨𑁫. 𑀢𑀺𑀯𑀺𑀥𑀫𑁆𑀧𑀺 𑀢𑀤𑀦𑁆𑀯𑀢𑁆𑀣𑀓𑀸𑀤𑀺𑀫𑀜𑁆𑀘𑁄𑀧𑀘𑀸𑀭𑀺𑀫𑀁;

𑀦𑀺𑀩𑁆𑀩𑀘𑀦𑀢𑁆𑀣𑀲𑀸𑀧𑁂𑀓𑁆𑀔𑀁, 𑀢𑀢𑁆𑀣𑀸𑀦𑁆𑀯𑀢𑁆𑀣𑀫𑀼𑀤𑀻𑀭𑀺𑀢𑀁.

𑁧𑁧𑁨𑁬. 𑀬𑀤𑀺𑀘𑁆𑀙𑀸𑀓𑀢𑀲𑀗𑁆𑀓𑁂𑀢𑀁, 𑀓𑀸𑀤𑀺𑀫𑀜𑁆𑀘𑁄𑀧𑀘𑀸𑀭𑀺𑀫𑀁;

𑀅𑀢𑀫𑁆𑀪𑀽𑀢𑀲𑁆𑀲 𑀢𑀩𑁆𑀪𑀸𑀯𑀯𑁄𑀳𑀸𑀭𑁄𑀢𑀺 𑀧𑀯𑀼𑀘𑁆𑀘𑀢𑀺.

𑁧𑁧𑁨𑁭. 𑀢𑀣𑀸 𑀲𑀸𑀫𑀜𑁆𑀜𑀦𑀸𑀫𑀜𑁆𑀘, 𑀕𑀼𑀡𑀦𑀸𑀫𑀜𑁆𑀘 𑀓𑀺𑀢𑁆𑀢𑀺𑀫𑀁;

𑀑𑀧𑀧𑀸𑀢𑀺𑀓𑀫𑀺𑀘𑁆𑀘𑁂𑀯𑀁, 𑀦𑀸𑀫𑀁 𑀳𑁄𑀢𑀺 𑀘𑀢𑀼𑀩𑁆𑀩𑀺𑀥𑀁.

𑁧𑁧𑁨𑁮. 𑀫𑀳𑀸𑀚𑀦𑀲𑀫𑁆𑀫𑀢𑀜𑁆𑀘, 𑀅𑀦𑁆𑀯𑀢𑁆𑀣𑀜𑁆𑀘𑁂𑀯 𑀢𑀸𑀤𑀺𑀲𑀁;

𑀢𑀻𑀡𑀺 𑀦𑀸𑀫𑀸𑀦𑀺 𑀘𑀦𑁆𑀤𑀸𑀤𑀺𑀦𑀸𑀫𑀁 𑀢𑀢𑁆𑀣𑁄𑀧𑀧𑀸𑀢𑀺𑀓𑀁.

𑁧𑁧𑁨𑁯. 𑀬𑀸𑀤𑀺𑀘𑁆𑀙𑀓𑀫𑀸𑀯𑀢𑁆𑀣𑀺𑀓𑀁, 𑀦𑁂𑀫𑀺𑀢𑁆𑀢𑀓𑀫𑀣𑀸𑀧𑀭𑀁;

𑀮𑀺𑀗𑁆𑀕𑀺𑀓𑀁 𑀭𑀼𑀴𑁆𑀳𑀺𑀓𑀜𑁆𑀘𑁂𑀢𑀺, 𑀦𑀸𑀫𑀁 𑀧𑀜𑁆𑀘𑀯𑀺𑀥𑀁 𑀪𑀯𑁂.

𑁧𑁧𑁩𑁦. 𑀬𑀸𑀤𑀺𑀘𑁆𑀙𑀓𑀁 𑀬𑀣𑀸𑀯𑀼𑀟𑁆𑀠𑀁, 𑀯𑀘𑁆𑀙𑀤𑀫𑁆𑀫𑀸𑀤𑀺𑀓𑀁 𑀧𑀦;

𑀆𑀯𑀢𑁆𑀣𑀺𑀓𑀁 𑀦𑁂𑀫𑀺𑀢𑁆𑀢𑀓𑀁, 𑀲𑀻𑀮𑀯𑀸𑀧𑀜𑁆𑀜𑀯𑀸𑀤𑀺𑀓𑀁.

𑁧𑁧𑁩𑁧. 𑀮𑀺𑀗𑁆𑀕𑀺𑀓𑀁 𑀤𑀺𑀝𑁆𑀞𑀮𑀺𑀗𑁆𑀕𑀁 𑀢𑀼, 𑀤𑀡𑁆𑀟𑀻𑀙𑀢𑁆𑀢𑀻𑀢𑀺𑀆𑀤𑀺𑀓𑀁;

𑀭𑀼𑀴𑁆𑀳𑀺𑀓𑀁 𑀮𑁂𑀲𑀫𑀢𑁆𑀢𑁂𑀦, 𑀭𑀼𑀴𑁆𑀳𑀁 𑀕𑁄𑀫𑀳𑀺𑀁𑀲𑀸𑀤𑀺𑀓𑀁.

𑁧𑁧𑁩𑁨. 𑀯𑀺𑀚𑁆𑀚𑀫𑀸𑀦𑀸𑀯𑀺𑀚𑁆𑀚𑀫𑀸𑀦-𑀧𑀜𑁆𑀜𑀢𑁆𑀢𑁄𑀪𑀬𑀫𑀺𑀲𑁆𑀲𑀺𑀢𑀸;

𑀯𑀺𑀪𑀢𑁆𑀢𑀸 𑀦𑀸𑀫𑀧𑀜𑁆𑀜𑀢𑁆𑀢𑀺, 𑀙𑀩𑁆𑀩𑀺𑀥𑀸 𑀳𑁄𑀢𑀺 𑀢𑀢𑁆𑀣 𑀳𑀺.

𑁧𑁧𑁩𑁩. 𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀻𑀢𑀺, 𑀯𑀺𑀚𑁆𑀚𑀫𑀸𑀦𑀢𑁆𑀣𑀤𑀻𑀧𑀺𑀢𑀸;

𑀯𑀼𑀘𑁆𑀘𑀢𑀺 𑀔𑀦𑁆𑀥𑀸𑀬𑀢𑀦-𑀥𑀸𑀢𑀼𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀤𑀺𑀓𑀸.

𑁧𑁧𑁩𑁪. 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺-𑀦𑀸𑀫𑀺𑀓𑀸 𑀧𑀭𑀫𑀢𑁆𑀣𑀢𑁄;

𑀅𑀯𑀺𑀚𑁆𑀚𑀫𑀸𑀦𑀫𑀜𑁆𑀘𑀸𑀤𑀺, 𑀅𑀢𑁆𑀣𑀧𑀜𑁆𑀜𑀢𑁆𑀢𑀺𑀤𑀻𑀧𑀺𑀢𑀸.

𑁧𑁧𑁩𑁫. 𑀯𑀺𑀚𑁆𑀚𑀫𑀸𑀦𑁂𑀦 𑀅𑀯𑀺𑀚𑁆𑀚-𑀫𑀸𑀦𑀧𑀜𑁆𑀜𑀢𑁆𑀢𑀺𑀦𑀸𑀫𑀺𑀓𑀸;

𑀢𑁂𑀯𑀺𑀚𑁆𑀚𑁄 𑀙𑀴𑀪𑀺𑀜𑁆𑀜𑁄 𑀘, 𑀲𑀻𑀮𑀯𑀸 𑀧𑀜𑁆𑀜𑀯𑀸𑀧𑀺 𑀘.

𑁧𑁧𑁩𑁬. 𑀅𑀯𑀺𑀚𑁆𑀚𑀫𑀸𑀦𑁂𑀦 𑀯𑀺𑀚𑁆𑀚-𑀫𑀸𑀦𑀧𑀜𑁆𑀜𑀢𑁆𑀢𑀺𑀦𑀸𑀫𑀺𑀓𑀸;

𑀇𑀢𑁆𑀣𑀺𑀭𑀽𑀧𑀁 𑀇𑀢𑁆𑀣𑀺𑀲𑀤𑁆𑀤𑁄, 𑀇𑀢𑁆𑀣𑀺𑀘𑀺𑀢𑁆𑀢𑀦𑁆𑀢𑀺𑀆𑀤𑀺𑀓𑀸.

𑁧𑁧𑁩𑁭. 𑀯𑀺𑀚𑁆𑀚𑀫𑀸𑀦𑁂𑀦 𑀢𑀼 𑀯𑀺𑀚𑁆𑀚-𑀫𑀸𑀦𑀧𑀜𑁆𑀜𑀢𑁆𑀢𑀺𑀦𑀸𑀫𑀺𑀓𑀸;

𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀘 𑀘𑀓𑁆𑀔𑀼-𑀲𑀫𑁆𑀨𑀲𑁆𑀲𑁄 𑀘𑁂𑀯𑀫𑀸𑀤𑀺𑀓𑀸.

𑁧𑁧𑁩𑁮. 𑀅𑀯𑀺𑀚𑁆𑀚𑀫𑀸𑀦𑁂𑀦𑀸𑀯𑀺𑀚𑁆𑀚-𑀫𑀸𑀦𑀧𑀜𑁆𑀜𑀢𑁆𑀢𑀺𑀦𑀸𑀫𑀺𑀓𑀸;

𑀔𑀢𑁆𑀢𑀺𑀬𑀧𑀼𑀢𑁆𑀢𑁄 𑀩𑁆𑀭𑀸𑀳𑁆𑀫𑀡-𑀧𑀼𑀢𑁆𑀢𑁄 𑀇𑀘𑁆𑀘𑁂𑀯𑀫𑀸𑀤𑀺𑀓𑀸.

𑁧𑁧𑁩𑁯. 𑀇𑀢𑀺 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦, 𑀦𑀸𑀫𑀧𑀜𑁆𑀜𑀢𑁆𑀢𑀺𑀬𑀸 𑀩𑀼𑀥𑁄;

𑀲𑀭𑀽𑀧𑀁 𑀯𑀺𑀲𑀬𑀜𑁆𑀘𑁂𑀯, 𑀯𑀺𑀪𑀸𑀕𑀜𑁆𑀘 𑀯𑀺𑀪𑀸𑀯𑀬𑁂.

𑁧𑁧𑁪𑁦. 𑀇𑀘𑁆𑀘𑁂𑀯𑀁 𑀧𑀭𑀫𑀢𑁆𑀣𑀸 𑀘, 𑀬𑀣𑀸𑀯𑀼𑀢𑁆𑀢𑀸 𑀘𑀢𑀼𑀩𑁆𑀩𑀺𑀥𑀸;

𑀧𑀜𑁆𑀜𑀢𑁆𑀢𑀺 𑀤𑀼𑀯𑀺𑀥𑀸 𑀘𑁂𑀢𑀺, 𑀜𑁂𑀬𑁆𑀬𑀢𑁆𑀣𑀸 𑀙𑀩𑁆𑀩𑀺𑀥𑀸 𑀫𑀢𑀸𑀢𑀺.

𑀇𑀢𑀺 𑀧𑀜𑁆𑀜𑀢𑁆𑀢𑀺𑀯𑀺𑀪𑀸𑀕𑁂 𑀦𑀸𑀫𑀧𑀜𑁆𑀜𑀢𑁆𑀢𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀏𑀓𑀽𑀦𑀢𑀺𑀁𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.

𑀦𑀺𑀝𑁆𑀞𑀺𑀢𑁄 𑀘 𑀲𑀩𑁆𑀩𑀣𑀸𑀧𑀺 𑀧𑀜𑁆𑀜𑀢𑁆𑀢𑀺𑀯𑀺𑀪𑀸𑀕𑁄.

𑀦𑀺𑀕𑀫𑀦𑀓𑀣𑀸

𑁧𑁧𑁪𑁧. 𑀲𑁂𑀝𑁆𑀞𑁂 𑀓𑀜𑁆𑀘𑀺𑀯𑀭𑁂 𑀭𑀝𑁆𑀞𑁂, 𑀓𑀸𑀯𑁂𑀭𑀺𑀦𑀕𑀭𑁂 𑀯𑀭𑁂;

𑀓𑀼𑀮𑁂 𑀲𑀜𑁆𑀚𑀸𑀢𑀪𑀽𑀢𑁂𑀦, 𑀩𑀳𑀼𑀲𑁆𑀲𑀼𑀢𑁂𑀦 𑀜𑀸𑀡𑀺𑀦𑀸.

𑁧𑁧𑁪𑁨. 𑀅𑀦𑀼𑀭𑀼𑀤𑁆𑀥𑁂𑀦 𑀣𑁂𑀭𑁂𑀦, 𑀅𑀦𑀺𑀭𑀼𑀤𑁆𑀥𑀬𑀲𑀲𑁆𑀲𑀺𑀦𑀸;

𑀢𑀫𑁆𑀩𑀭𑀝𑁆𑀞𑁂 𑀯𑀲𑀦𑁆𑀢𑁂𑀦, 𑀦𑀕𑀭𑁂 𑀢𑀜𑁆𑀚𑀦𑀸𑀫𑀓𑁂.

𑁧𑁧𑁪𑁩. 𑀢𑀢𑁆𑀣 𑀲𑀗𑁆𑀖𑀯𑀺𑀲𑀺𑀝𑁆𑀞𑁂𑀦, 𑀬𑀸𑀘𑀺𑀢𑁂𑀦 𑀅𑀦𑀸𑀓𑀼𑀮𑀁;

𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁, 𑀯𑀸𑀘𑀦𑀸𑀫𑀕𑁆𑀕𑀦𑀺𑀲𑁆𑀲𑀺𑀢𑀁.

𑁧𑁧𑁪𑁪. 𑀧𑀭𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑀁, 𑀧𑀭𑀫𑀢𑁆𑀣𑀯𑀺𑀦𑀺𑀘𑁆𑀙𑀬𑀁;

𑀧𑀓𑀭𑀡𑀁 𑀓𑀢𑀁 𑀢𑁂𑀦, 𑀧𑀭𑀫𑀢𑁆𑀣𑀢𑁆𑀣𑀯𑁂𑀤𑀺𑀦𑀸𑀢𑀺.

𑀇𑀢𑀺 𑀅𑀦𑀼𑀭𑀼𑀤𑁆𑀥𑀸𑀘𑀭𑀺𑀬𑁂𑀦 𑀭𑀘𑀺𑀢𑁄

𑀧𑀭𑀫𑀢𑁆𑀣𑀯𑀺𑀦𑀺𑀘𑁆𑀙𑀬𑁄 𑀦𑀺𑀝𑁆𑀞𑀺𑀢𑁄.

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲