𑁫. 𑀧𑀜𑁆𑀜𑀢𑁆𑀢𑀺𑀯𑀺𑀪𑀸𑀕𑁄

𑁨𑁭. 𑀧𑀪𑁂𑀤𑀓𑀣𑀸

𑁧𑁦𑁬𑁨. 𑀘𑀺𑀢𑁆𑀢𑀁 𑀘𑁂𑀢𑀲𑀺𑀓𑀁 𑀭𑀽𑀧𑀁, 𑀦𑀺𑀩𑁆𑀩𑀸𑀦𑀫𑁆𑀧𑀺 𑀘 𑀪𑀸𑀚𑀺𑀢𑀁;

𑀢𑀲𑁆𑀫𑀸 𑀤𑀸𑀦𑀺 𑀬𑀣𑀸𑀬𑁄𑀕𑀁, 𑀧𑀜𑁆𑀜𑀢𑁆𑀢𑀺𑀧𑀺 𑀧𑀯𑀼𑀘𑁆𑀘𑀢𑀺.

𑁧𑁦𑁬𑁩. 𑀲𑀸 𑀘𑀸𑀬𑀁 𑀅𑀢𑁆𑀣𑀧𑀜𑁆𑀜𑀢𑁆𑀢𑀺-𑀦𑀸𑀫𑀧𑀜𑁆𑀜𑀢𑁆𑀢𑀺𑀪𑁂𑀤𑀢𑁄;

𑀤𑀼𑀯𑀺𑀥𑀸 𑀳𑁄𑀢𑀺 𑀧𑀜𑁆𑀜𑀢𑁆𑀢𑀺, 𑀅𑀢𑁆𑀣𑀧𑀜𑁆𑀜𑀢𑁆𑀢𑀺 𑀢𑀢𑁆𑀣 𑀘.

𑁧𑁦𑁬𑁪. 𑀲𑀢𑁆𑀢𑀲𑀫𑁆𑀪𑀸𑀭𑀲𑀡𑁆𑀞𑀸𑀦-𑀲𑀗𑁆𑀖𑀸𑀝𑀧𑀭𑀺𑀡𑀸𑀫𑀢𑁄;

𑀯𑀺𑀓𑀧𑁆𑀧𑀼𑀧𑀝𑁆𑀞𑀸𑀦𑀸𑀓𑀸𑀭𑀯𑁄𑀳𑀸𑀭𑀸𑀪𑀺𑀦𑀺𑀯𑁂𑀲𑀢𑁄.

𑁧𑁦𑁬𑁫. 𑀢𑀣𑀸 𑀧𑀯𑀢𑁆𑀢𑀲𑀗𑁆𑀓𑁂𑀢𑀲𑀺𑀤𑁆𑀥𑀸 𑀅𑀢𑁆𑀣𑀸 𑀧𑀓𑀧𑁆𑀧𑀺𑀢𑀸;

𑀧𑀜𑁆𑀜𑀸𑀧𑀻𑀬𑀦𑁆𑀢𑀺 𑀦𑀸𑀫𑀸𑀢𑀺, 𑀧𑀜𑁆𑀜𑀢𑁆𑀢𑀻𑀢𑀺 𑀧𑀓𑀺𑀢𑁆𑀢𑀺𑀢𑀸.

𑁧𑁦𑁬𑁬. 𑀅𑀢𑁆𑀣𑀸 𑀳𑀺 𑀧𑀭𑀫𑀢𑁆𑀣𑀢𑁆𑀣𑀸, 𑀧𑀜𑁆𑀜𑀢𑁆𑀢𑀢𑁆𑀣𑀸𑀢𑀺 𑀘 𑀤𑁆𑀯𑀺𑀥𑀸;

𑀢𑀢𑁆𑀣 𑀘 𑀧𑀭𑀫𑀢𑁆𑀣𑀢𑁆𑀣𑀸, 𑀲𑀘𑁆𑀘𑀺𑀓𑀝𑁆𑀞𑀸 𑀲𑀮𑀓𑁆𑀔𑀡𑀸.

𑁧𑁦𑁬𑁭. 𑀧𑀜𑁆𑀜𑀢𑁆𑀢𑀢𑁆𑀣𑀸 𑀲𑀘𑁆𑀘𑀺𑀓𑀝𑁆𑀞𑀲𑀮𑀓𑁆𑀔𑀡𑀲𑀪𑀸𑀯𑀢𑁄;

𑀅𑀜𑁆𑀜𑀣𑀸 𑀕𑀳𑀺𑀢𑀸 𑀢𑀁𑀢𑀫𑀼𑀧𑀸𑀤𑀸𑀬 𑀧𑀓𑀧𑁆𑀧𑀺𑀢𑀸.

𑁧𑁦𑁬𑁮. 𑀢𑀲𑁆𑀫𑀸 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺, 𑀅𑀢𑁆𑀣𑀧𑀜𑁆𑀜𑀢𑁆𑀢𑀺𑀦𑀸𑀫𑀓𑀸;

𑀧𑀜𑁆𑀜𑀧𑁂𑀢𑀩𑁆𑀩𑀦𑀸𑀫𑀸𑀯, 𑀧𑀜𑁆𑀜𑀢𑁆𑀢𑀢𑁆𑀣𑀸𑀯 𑀲𑀩𑁆𑀩𑀣𑀸.

𑁧𑁦𑁬𑁯. 𑀧𑀭𑀫𑀢𑁆𑀣𑀸 𑀬𑀣𑀸𑀯𑀼𑀢𑁆𑀢𑀸, 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀤𑀬𑁄;

𑀧𑀜𑁆𑀜𑀢𑁆𑀢𑀸 𑀇𑀢𑁆𑀣𑀺𑀧𑀼𑀭𑀺𑀲𑀫𑀜𑁆𑀘𑀧𑀻𑀞𑀧𑀝𑀸𑀤𑀬𑁄.

𑁧𑁦𑁭𑁦. 𑀬𑁂𑀦 𑀯𑀼𑀘𑁆𑀘𑀢𑀺 𑀢𑀁 𑀦𑀸𑀫𑀁, 𑀧𑀜𑁆𑀜𑀧𑁂𑀢𑀻𑀢𑀺 𑀯𑀼𑀘𑁆𑀘𑀢𑀺;

𑀧𑀜𑁆𑀜𑀢𑁆𑀢𑀻𑀢𑀺 𑀘 𑀲𑀸 𑀦𑀸𑀫𑀧𑀜𑁆𑀜𑀢𑁆𑀢𑀻𑀢𑀺 𑀢𑀢𑁄 𑀫𑀢𑀸.

𑁧𑁦𑁭𑁧. 𑀲𑀗𑁆𑀔𑀸 𑀲𑀫𑀜𑁆𑀜𑀸 𑀧𑀜𑁆𑀜𑀢𑁆𑀢𑀺, 𑀯𑁄𑀳𑀸𑀭𑁄𑀢𑀺 𑀘 𑀪𑀸𑀚𑀺𑀢𑀸;

𑀘𑀢𑀼𑀥𑀸 𑀧𑀜𑁆𑀜𑀧𑁂𑀢𑀩𑁆𑀩𑀧𑀜𑁆𑀜𑀢𑁆𑀢𑀻𑀢𑀺 𑀳𑀺 𑀯𑀡𑁆𑀡𑀺𑀢𑀸.

𑁧𑁦𑁭𑁨. 𑀢𑀢𑁄 𑀦𑀸𑀫𑀁 𑀦𑀸𑀫𑀓𑀫𑁆𑀫𑀁, 𑀦𑀸𑀫𑀥𑁂𑀬𑁆𑀬𑀁 𑀅𑀣𑀸𑀧𑀭𑀁;

𑀦𑀺𑀭𑀼𑀢𑁆𑀢𑀺 𑀩𑁆𑀬𑀜𑁆𑀚𑀦𑀫𑀪𑀺𑀮𑀸𑀧𑁄𑀢𑀺 𑀧𑀦 𑀪𑀸𑀚𑀺𑀢𑀸.

𑁧𑁦𑁭𑁩. 𑀦𑀸𑀫𑀧𑀜𑁆𑀜𑀢𑁆𑀢𑀺 𑀦𑀸𑀫𑀸𑀢𑀺, 𑀧𑀜𑁆𑀜𑀢𑁆𑀢𑀺 𑀤𑀼𑀯𑀺𑀥𑀸 𑀓𑀢𑀸;

𑀲𑀩𑁆𑀩𑁂𑀯 𑀥𑀫𑁆𑀫𑀸 𑀧𑀜𑁆𑀜𑀢𑁆𑀢𑀺𑀧𑀣𑀸𑀢𑀺 𑀧𑀦 𑀪𑀸𑀚𑀺𑀢𑀸.

𑁧𑁦𑁭𑁪. 𑀧𑀭𑀫𑀢𑁆𑀣𑀧𑀜𑁆𑀜𑀢𑁆𑀢𑀢𑁆𑀣𑀸, 𑀤𑀼𑀯𑀺𑀥𑀸 𑀳𑁄𑀦𑁆𑀢𑀺 𑀢𑀢𑁆𑀣 𑀘;

𑀧𑀜𑁆𑀜𑀢𑁆𑀢𑀺𑀧𑀣𑀸𑀯 𑀳𑁄𑀦𑁆𑀢𑀺, 𑀧𑀭𑀫𑀢𑁆𑀣𑀸 𑀲𑀮𑀓𑁆𑀔𑀡𑀸.

𑁧𑁦𑁭𑁫. 𑀧𑀜𑁆𑀜𑀢𑁆𑀢𑀢𑁆𑀣𑀸 𑀧𑀜𑁆𑀜𑀢𑁆𑀢𑀺 𑀘, 𑀧𑀜𑁆𑀜𑀧𑁂𑀢𑀩𑁆𑀩𑀫𑀢𑁆𑀢𑀢𑁄;

𑀧𑀜𑁆𑀜𑀢𑁆𑀢𑀺𑀧𑀣𑀸 𑀘 𑀦𑀸𑀫𑀧𑀜𑁆𑀜𑀢𑁆𑀢𑀺𑀧𑀣𑀪𑀸𑀯𑀢𑁄.

𑁧𑁦𑁭𑁬. 𑀦𑀸𑀫𑀫𑁆𑀧𑀺 𑀧𑀜𑁆𑀜𑀸𑀧𑁂𑀢𑀩𑁆𑀩𑀫𑁂𑀯 𑀓𑀺𑀜𑁆𑀘𑀸𑀧𑀺 𑀓𑁂𑀦𑀘𑀺;

𑀦𑀸𑀫𑀫𑁂𑀯𑀫𑁆𑀧𑁂𑀢𑀁 𑀢𑀢𑁆𑀣, 𑀧𑀜𑁆𑀜𑀢𑁆𑀢𑀺𑀘𑁆𑀘𑁂𑀯 𑀯𑀡𑁆𑀡𑀺𑀢𑀁.

𑁧𑁦𑁭𑁭. 𑀧𑀜𑁆𑀜𑀧𑁂𑀢𑀩𑁆𑀩𑀥𑀫𑁆𑀫𑀸 𑀘, 𑀢𑁂𑀲𑀁 𑀧𑀜𑁆𑀜𑀸𑀧𑀺𑀢𑀸𑀧𑀺 𑀘;

𑀇𑀘𑁆𑀙𑀺𑀢𑀩𑁆𑀩𑀸𑀧𑀺 𑀧𑀜𑁆𑀜𑀢𑁆𑀢𑀺𑀧𑀣𑀸 𑀧𑀜𑁆𑀜𑀢𑁆𑀢𑀺𑀦𑀸𑀦𑀢𑀸.

𑁧𑁦𑁭𑁮. 𑀇𑀢𑀺 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦, 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀦𑀬𑁂;

𑀦𑀬𑀁 𑀕𑀳𑁂𑀢𑁆𑀯𑀸 𑀏𑀢𑁆𑀣𑀸𑀧𑀺, 𑀧𑀜𑁆𑀜𑀢𑁆𑀢𑀺 𑀤𑀼𑀯𑀺𑀥𑀸 𑀓𑀢𑀸.

𑁧𑁦𑁭𑁯. 𑀢𑀲𑁆𑀫𑀺𑀫𑁆𑀧𑀺 𑀧𑀭𑀫𑀢𑁆𑀣𑀸 𑀘, 𑀲𑀘𑁆𑀘𑀺𑀓𑀝𑁆𑀞𑀲𑀮𑀓𑁆𑀔𑀡𑀸;

𑀅𑀢𑁆𑀣𑀸 𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑀸 𑀘, 𑀅𑀢𑁆𑀣𑀧𑀜𑁆𑀜𑀢𑁆𑀢𑀺𑀦𑀸𑀫𑀓𑀸.

𑁧𑁦𑁮𑁦. 𑀢𑁂𑀲𑀁 𑀧𑀜𑁆𑀜𑀸𑀧𑀺𑀓𑀸 𑀘𑁂𑀯, 𑀦𑀸𑀫𑀧𑀜𑁆𑀜𑀢𑁆𑀢𑀺𑀦𑀸𑀫𑀺𑀓𑀸;

𑀇𑀘𑁆𑀘𑁂𑀯𑀁 𑀯𑀡𑁆𑀡𑀦𑀸𑀫𑀕𑁆𑀕𑁂, 𑀜𑁂𑀬𑁆𑀬𑀢𑁆𑀢𑀸 𑀢𑀺𑀯𑀺𑀥𑀸 𑀓𑀢𑀸.

𑁧𑁦𑁮𑁧. 𑀧𑀭𑀫𑀢𑁆𑀣𑀲𑀘𑁆𑀘𑀁 𑀦𑀸𑀫, 𑀧𑀭𑀫𑀢𑁆𑀣𑀸𑀯 𑀢𑀢𑁆𑀣 𑀘;

𑀲𑀘𑁆𑀘𑀺𑀓𑀝𑁆𑀞𑀲𑀪𑀸𑀯𑀢𑁆𑀢𑀸, 𑀅𑀯𑀺𑀲𑀁𑀯𑀸𑀤𑀓𑀸 𑀳𑀺 𑀢𑁂.

𑁧𑁦𑁮𑁨. 𑀲𑀫𑁆𑀫𑀼𑀢𑀺𑀲𑀘𑁆𑀘𑀁 𑀧𑀜𑁆𑀜𑀢𑁆𑀢𑀺𑀤𑁆𑀯𑀬𑀁 𑀯𑁄𑀳𑀸𑀭𑀯𑀼𑀢𑁆𑀢𑀺𑀬𑀸;

𑀮𑁄𑀓𑀲𑀫𑀜𑁆𑀜𑀸𑀥𑀺𑀧𑁆𑀧𑀸𑀬𑀸𑀯𑀺𑀲𑀁𑀯𑀸𑀤𑀓𑀪𑀸𑀯𑀢𑁄.

𑁧𑁦𑁮𑁩. 𑀇𑀢𑀺 𑀲𑀘𑁆𑀘𑀤𑁆𑀯𑀬𑀫𑁆𑀧𑁂𑀢𑀁, 𑀅𑀓𑁆𑀔𑀸𑀲𑀺 𑀧𑀼𑀭𑀺𑀲𑀼𑀢𑁆𑀢𑀫𑁄;

𑀢𑁂𑀦𑀸𑀧𑀺 𑀦𑀸𑀫𑀲𑀁𑀯𑀺𑀜𑁆𑀜𑀽, 𑀯𑁄𑀳𑀭𑁂𑀬𑁆𑀬𑀼𑀪𑀬𑀫𑁆𑀧𑀺 𑀯𑀸.

𑀇𑀢𑀺 𑀧𑀜𑁆𑀜𑀢𑁆𑀢𑀺𑀯𑀺𑀪𑀸𑀕𑁂 𑀧𑀪𑁂𑀤𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀲𑀢𑁆𑀢𑀯𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.