𑁨𑁩. 𑀫𑀽𑀮𑀯𑀺𑀲𑀼𑀤𑁆𑀥𑀺𑀓𑀣𑀸

𑁮𑁯𑁫. 𑀇𑀢𑁆𑀣𑀁 𑀘𑀺𑀢𑁆𑀢𑀁 𑀘𑁂𑀢𑀲𑀺𑀓𑀁, 𑀭𑀽𑀧𑀜𑁆𑀘𑁂𑀯𑀸𑀢𑀺 𑀲𑀗𑁆𑀔𑀢𑀸;

𑀯𑀼𑀢𑁆𑀢𑀸 𑀅𑀲𑀗𑁆𑀔𑀢𑀁 𑀤𑀸𑀦𑀺, 𑀦𑀺𑀩𑁆𑀩𑀸𑀦𑀦𑁆𑀢𑀺 𑀧𑀯𑀼𑀘𑁆𑀘𑀢𑀺.

𑁮𑁯𑁬. 𑀲𑀻𑀮𑀯𑀺𑀲𑀼𑀤𑁆𑀥𑀺 𑀆𑀤𑀺𑀫𑁆𑀳𑀺, 𑀢𑀢𑁄 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺 𑀘;

𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀦𑀸𑀫𑀸 𑀘, 𑀓𑀗𑁆𑀔𑀸𑀯𑀺𑀢𑀭𑀡𑀸𑀧𑀺 𑀘.

𑁮𑁯𑁭. 𑀢𑀢𑁄 𑀧𑀭𑀁 𑀫𑀕𑁆𑀕𑀸𑀫𑀕𑁆𑀕-𑀜𑀸𑀡𑀤𑀲𑁆𑀲𑀦𑀦𑀸𑀫𑀺𑀓𑀸;

𑀢𑀣𑀸 𑀧𑀝𑀺𑀧𑀤𑀸𑀜𑀸𑀡-𑀤𑀲𑁆𑀲𑀦𑀸 𑀜𑀸𑀡𑀤𑀲𑁆𑀲𑀦𑀁.

𑁮𑁯𑁮. 𑀇𑀘𑁆𑀘𑀸𑀦𑀼𑀓𑁆𑀓𑀫𑀢𑁄 𑀯𑀼𑀢𑁆𑀢𑀸, 𑀲𑀢𑁆𑀢 𑀳𑁄𑀦𑁆𑀢𑀺 𑀯𑀺𑀲𑀼𑀤𑁆𑀥𑀺𑀬𑁄;

𑀲𑀢𑁆𑀢𑀫𑀸𑀦𑀼𑀢𑁆𑀢𑀭𑀸 𑀢𑀢𑁆𑀣, 𑀧𑀼𑀩𑁆𑀩𑀪𑀸𑀕𑀸 𑀙 𑀮𑁄𑀓𑀺𑀬𑀸.

𑁮𑁯𑁯. 𑀲𑀁𑀯𑀭𑁄 𑀧𑀸𑀢𑀺𑀫𑁄𑀓𑁆𑀔𑁄 𑀘, 𑀢𑀣𑁂𑀯𑀺𑀦𑁆𑀤𑁆𑀭𑀺𑀬𑀲𑀁𑀯𑀭𑁄;

𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺 𑀘, 𑀲𑀻𑀮𑀁 𑀧𑀘𑁆𑀘𑀬𑀦𑀺𑀲𑁆𑀲𑀺𑀢𑀁.

𑁯𑁦𑁦. 𑀇𑀢𑀺 𑀲𑀻𑀮𑀯𑀺𑀲𑀼𑀤𑁆𑀥𑀻𑀢𑀺, 𑀲𑀼𑀤𑁆𑀥𑀫𑁂𑀢𑀁 𑀧𑀯𑀼𑀘𑁆𑀘𑀢𑀺;

𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁, 𑀥𑀼𑀢𑀗𑁆𑀕𑀧𑀭𑀺𑀯𑀸𑀭𑀺𑀢𑀁.

𑁯𑁦𑁧. 𑀓𑀲𑀺𑀡𑀸𑀦𑀺 𑀤𑀲𑀸𑀲𑀼𑀪𑀸, 𑀤𑀲𑀸𑀦𑀼𑀲𑁆𑀲𑀢𑀺𑀬𑁄 𑀧𑀦;

𑀅𑀧𑁆𑀧𑀫𑀜𑁆𑀜𑀸 𑀘 𑀲𑀜𑁆𑀜𑀸 𑀘, 𑀯𑀯𑀢𑁆𑀣𑀸𑀭𑀼𑀧𑁆𑀧𑀓𑀸𑀢𑀺 𑀘.

𑁯𑁦𑁨. 𑀲𑀫𑀣𑀓𑁆𑀓𑀫𑁆𑀫𑀝𑁆𑀞𑀸𑀦𑀸𑀦𑀺, 𑀢𑀸𑀮𑀻𑀲𑀝𑁆𑀞𑀓𑀣𑀸𑀦𑀬𑁂;

𑀧𑀸𑀴𑀺𑀬𑀁 𑀢𑀼 𑀯𑀺𑀪𑀢𑁆𑀢𑀸𑀦𑀺, 𑀅𑀝𑁆𑀞𑀢𑀺𑀁𑀲𑀸𑀢𑀺 𑀯𑀡𑁆𑀡𑀺𑀢𑀁.

𑁯𑁦𑁩. 𑀧𑀣𑀯𑀸𑀧𑁄 𑀘 𑀢𑁂𑀚𑁄 𑀘,

𑀯𑀸𑀬𑁄 𑀦𑀻𑀮𑀜𑁆𑀘 𑀧𑀻𑀢𑀓𑀁;

𑀮𑁄𑀳𑀺𑀢𑁄𑀤𑀸𑀢𑀫𑀸𑀓𑀸𑀲𑀁,

𑀆𑀮𑁄𑀓𑀓𑀲𑀺𑀡𑀦𑁆𑀢𑀺 𑀘.

𑁯𑁦𑁪. 𑀓𑀲𑀺𑀡𑀸𑀦𑀺 𑀤𑀲𑁂𑀢𑀸𑀦𑀺, 𑀯𑀼𑀢𑁆𑀢𑀸𑀦𑀝𑁆𑀞𑀓𑀣𑀸𑀦𑀬𑁂;

𑀅𑀝𑁆𑀞𑁂𑀯 𑀧𑀸𑀴𑀺𑀬𑀁 𑀳𑀺𑀢𑁆𑀯𑀸, 𑀅𑀦𑁆𑀢𑁂 𑀢𑀼 𑀓𑀲𑀺𑀡𑀤𑁆𑀯𑀬𑀁.

𑁯𑁦𑁫. 𑀉𑀤𑁆𑀥𑀼𑀫𑀸𑀢𑀁 𑀯𑀺𑀦𑀻𑀮𑀜𑁆𑀘, 𑀯𑀺𑀧𑀼𑀩𑁆𑀩𑀓𑀁 𑀯𑀺𑀔𑀸𑀬𑀺𑀢𑀁;

𑀯𑀺𑀘𑁆𑀙𑀺𑀤𑁆𑀤𑀓𑀜𑁆𑀘 𑀯𑀺𑀓𑁆𑀔𑀺𑀢𑁆𑀢𑀁, 𑀳𑀢𑀯𑀺𑀓𑁆𑀔𑀺𑀢𑁆𑀢𑀮𑁄𑀳𑀺𑀢𑀁.

𑁯𑁦𑁬. 𑀧𑀼𑀴𑀯𑀓𑀁 𑀅𑀝𑁆𑀞𑀺𑀓𑀜𑁆𑀘𑁂𑀢𑀺, 𑀅𑀲𑀼𑀪𑀸 𑀤𑀲 𑀤𑁂𑀲𑀺𑀢𑀸;

𑀭𑀽𑀧𑀓𑀸𑀬𑀯𑀺𑀪𑀸𑀕𑀸𑀬, 𑀤𑀲𑀓𑀸𑀬𑀯𑀺𑀧𑀢𑁆𑀢𑀺𑀬𑀸.

𑁯𑁦𑁭. 𑀩𑀼𑀤𑁆𑀥𑁂 𑀥𑀫𑁆𑀫𑁂 𑀘 𑀲𑀗𑁆𑀖𑁂 𑀘, 𑀲𑀻𑀮𑁂 𑀘𑀸𑀕𑁂 𑀘 𑀅𑀢𑁆𑀢𑀦𑀸;

𑀤𑁂𑀯𑀢𑁄𑀧𑀲𑀫𑀸𑀬𑀜𑁆𑀘, 𑀲𑀢𑁆𑀢𑀸𑀦𑀼𑀲𑁆𑀲𑀢𑀺𑀬𑁄 𑀓𑀫𑀸.

𑁯𑁦𑁮. 𑀫𑀭𑀡𑀲𑁆𑀲𑀢𑀺 𑀦𑀸𑀫𑁂𑀓𑀸, 𑀢𑀣𑀸 𑀓𑀸𑀬𑀕𑀢𑀸𑀲𑀢𑀺;

𑀆𑀦𑀸𑀧𑀸𑀦𑀲𑁆𑀲𑀢𑀺𑀘𑁆𑀘𑁂𑀯𑀁, 𑀤𑀲𑀸𑀦𑀼𑀲𑁆𑀲𑀢𑀺𑀬𑁄 𑀫𑀢𑀸.

𑁯𑁦𑁯. 𑀫𑁂𑀢𑁆𑀢𑀸 𑀓𑀭𑀼𑀡𑀸 𑀫𑀼𑀤𑀺𑀢𑀸, 𑀉𑀧𑁂𑀓𑁆𑀔𑀸𑀢𑀺 𑀘𑀢𑀼𑀩𑁆𑀩𑀺𑀥𑀸;

𑀯𑀼𑀢𑁆𑀢𑀸 𑀩𑁆𑀭𑀳𑁆𑀫𑀯𑀺𑀳𑀸𑀭𑀸 𑀘, 𑀅𑀧𑁆𑀧𑀫𑀜𑁆𑀜𑀸𑀢𑀺 𑀢𑀸𑀤𑀺𑀦𑀸.

𑁯𑁧𑁦. 𑀏𑀓𑀸𑀳𑀸𑀭𑁂 𑀧𑀝𑀺𑀓𑁆𑀓𑀽𑀮-𑀲𑀜𑁆𑀜𑀸 𑀦𑀸𑀫𑁂𑀓𑀫𑁂𑀯 𑀢𑀼;

𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀁, 𑀘𑀢𑀼𑀥𑀸𑀢𑀼𑀧𑀭𑀺𑀕𑁆𑀕𑀳𑁄.

𑁯𑁧𑁧. 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁, 𑀯𑀺𑀜𑁆𑀜𑀸𑀡𑀜𑁆𑀘𑀫𑀣𑀸𑀧𑀭𑀁;

𑀆𑀓𑀺𑀜𑁆𑀘𑀜𑁆𑀜𑀁 𑀢𑀣𑀸 𑀦𑁂𑀯-𑀲𑀜𑁆𑀜𑀸𑀦𑀸𑀲𑀜𑁆𑀜𑀦𑀸𑀫𑀓𑀁.

𑁯𑁧𑁨. 𑀇𑀘𑁆𑀘𑀸𑀦𑀼𑀓𑁆𑀓𑀫𑀢𑁄 𑀯𑀼𑀢𑁆𑀢𑀸, 𑀅𑀭𑀽𑀧𑀚𑁆𑀛𑀸𑀦𑀺𑀓𑀸 𑀧𑀦;

𑀅𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀸𑀦𑀺, 𑀘𑀢𑁆𑀢𑀸𑀭𑁄𑀧𑀺 𑀧𑀓𑀺𑀢𑁆𑀢𑀺𑀢𑀸.

𑁯𑁧𑁩. 𑀓𑀲𑀺𑀡𑀸𑀲𑀼𑀪𑀓𑁄𑀝𑁆𑀞𑀸𑀲𑁂, 𑀆𑀦𑀸𑀧𑀸𑀦𑁂 𑀘 𑀲𑀩𑁆𑀩𑀣𑀸;

𑀤𑀺𑀲𑁆𑀯𑀸 𑀲𑀼𑀢𑁆𑀯𑀸 𑀨𑀼𑀲𑀺𑀢𑁆𑀯𑀸 𑀯𑀸, 𑀧𑀭𑀺𑀓𑀫𑁆𑀫𑀁 𑀢𑀼 𑀓𑀼𑀩𑁆𑀩𑀢𑁄.

𑁯𑁧𑁪. 𑀉𑀕𑁆𑀕𑀳𑁄 𑀦𑀸𑀫 𑀲𑀫𑁆𑀪𑁄𑀢𑀺, 𑀦𑀺𑀫𑀺𑀢𑁆𑀢𑀁 𑀢𑀢𑁆𑀣 𑀬𑀼𑀜𑁆𑀚𑀢𑁄;

𑀧𑀝𑀺𑀪𑀸𑀕𑁄 𑀢𑀫𑀸𑀭𑀩𑁆𑀪, 𑀢𑀢𑁆𑀣 𑀯𑀢𑁆𑀢𑀢𑀺 𑀅𑀧𑁆𑀧𑀦𑀸.

𑁯𑁧𑁫. 𑀲𑀸𑀥𑀼 𑀲𑀢𑁆𑀢𑀸 𑀲𑀼𑀔𑀻 𑀳𑁄𑀦𑁆𑀢𑀼, 𑀤𑀼𑀓𑁆𑀔𑀸 𑀫𑀼𑀘𑁆𑀘𑀦𑁆𑀢𑀼 𑀧𑀸𑀡𑀺𑀦𑁄;

𑀅𑀳𑁄 𑀲𑀢𑁆𑀢𑀸 𑀲𑀼𑀔𑀧𑁆𑀧𑀢𑁆𑀢𑀸, 𑀳𑁄𑀦𑁆𑀢𑀼 𑀬𑀤𑀺𑀘𑁆𑀙𑀓𑀸𑀢𑀺 𑀘.

𑁯𑁧𑁬. 𑀉𑀤𑁆𑀤𑀺𑀲𑁆𑀲 𑀯𑀸 𑀅𑀦𑁄𑀤𑀺𑀲𑁆𑀲, 𑀬𑀼𑀜𑁆𑀚𑀢𑁄 𑀲𑀢𑁆𑀢𑀕𑁄𑀘𑀭𑁂;

𑀅𑀧𑁆𑀧𑀫𑀜𑁆𑀜𑀸 𑀧𑀦𑀧𑁆𑀧𑁂𑀦𑁆𑀢𑀺, 𑀅𑀦𑀼𑀧𑀼𑀩𑁆𑀩𑁂𑀦 𑀯𑀢𑁆𑀢𑀺𑀓𑀸.

𑁯𑁧𑁭. 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑁂, 𑀧𑀞𑀫𑀸𑀭𑀼𑀧𑁆𑀧𑀫𑀸𑀦𑀲𑁂;

𑀢𑀲𑁆𑀲𑁂𑀯 𑀦𑀢𑁆𑀣𑀺𑀪𑀸𑀯𑁂 𑀘, 𑀢𑀢𑀺𑀬𑀸𑀭𑀼𑀧𑁆𑀧𑀓𑁂𑀢𑀺 𑀘.

𑁯𑁧𑁮. 𑀬𑀼𑀜𑁆𑀚𑀦𑁆𑀢𑀲𑁆𑀲 𑀧𑀦𑁂𑀢𑁂𑀲𑀼, 𑀕𑁄𑀘𑀭𑁂𑀲𑀼 𑀘𑀢𑀽𑀲𑀼𑀧𑀺;

𑀅𑀧𑁆𑀧𑁂𑀦𑁆𑀢𑀺 𑀅𑀦𑀼𑀧𑀼𑀩𑁆𑀩𑁂𑀦, 𑀆𑀭𑀼𑀧𑁆𑀧𑀸𑀧𑀺 𑀘𑀢𑀼𑀩𑁆𑀩𑀺𑀥𑀸.

𑁯𑁧𑁯. 𑀆𑀦𑀸𑀧𑀸𑀦𑀜𑁆𑀘 𑀓𑀲𑀺𑀡𑀁, 𑀧𑀜𑁆𑀘𑀓𑀚𑁆𑀛𑀸𑀦𑀺𑀓𑀁 𑀢𑀳𑀺𑀁;

𑀧𑀞𑀫𑀚𑁆𑀛𑀸𑀦𑀺𑀓𑀸 𑀯𑀼𑀢𑁆𑀢𑀸, 𑀓𑁄𑀝𑁆𑀞𑀸𑀲𑀸𑀲𑀼𑀪𑀪𑀸𑀯𑀦𑀸.

𑁯𑁨𑁦. 𑀲𑀼𑀔𑀺𑀢𑀚𑁆𑀛𑀸𑀦𑀺𑀓𑀸 𑀢𑀺𑀲𑁆𑀲𑁄, 𑀅𑀧𑁆𑀧𑀫𑀜𑁆𑀜𑀸 𑀘 𑀳𑁂𑀝𑁆𑀞𑀺𑀫𑀸;

𑀉𑀧𑁂𑀓𑁆𑀔𑀸𑀭𑀼𑀧𑁆𑀧𑀓𑀸 𑀧𑀜𑁆𑀘, 𑀉𑀧𑁂𑀓𑁆𑀔𑀸𑀛𑀸𑀦𑀺𑀓𑀸𑀢𑀺 𑀘.

𑁯𑁨𑁧. 𑀏𑀓𑀸 𑀤𑀲𑁂𑀓𑀸 𑀤𑀲 𑀘, 𑀢𑀬𑁄 𑀧𑀜𑁆𑀘𑁂𑀢𑀺 𑀲𑀩𑁆𑀩𑀣𑀸;

𑀧𑀭𑀺𑀓𑀫𑁆𑀫𑀯𑀲𑀸 𑀢𑀺𑀁𑀲, 𑀙 𑀓𑁄𑀝𑁆𑀞𑀸𑀲𑀸 𑀬𑀣𑀸𑀓𑁆𑀓𑀫𑀁.

𑁯𑁨𑁨. 𑀧𑀜𑁆𑀘𑀓𑀸𑀤𑀺𑀲𑀼𑀔𑁄𑀧𑁂𑀓𑁆𑀔𑀸, 𑀛𑀸𑀦𑀪𑁂𑀤𑀸 𑀘𑀢𑀼𑀩𑁆𑀩𑀺𑀥𑀸;

𑀏𑀓𑀘𑁆𑀘𑀢𑀼𑀧𑀜𑁆𑀘𑀛𑀸𑀦-𑀯𑀲𑁂𑀦 𑀢𑀺𑀯𑀺𑀥𑀸 𑀲𑀺𑀬𑀼𑀁.

𑁯𑁨𑁩. 𑀭𑀽𑀧𑀸𑀭𑀽𑀧𑀯𑀲𑀸 𑀤𑁆𑀯𑁂 𑀘, 𑀅𑀧𑁆𑀧𑀦𑀸𑀢𑁄 𑀧𑀼𑀦𑁂𑀓𑀥𑀸;

𑀇𑀘𑁆𑀘𑁂𑀯𑀫𑀧𑁆𑀧𑀦𑀸 𑀓𑀫𑁆𑀫-𑀝𑁆𑀞𑀸𑀦𑀪𑁂𑀤𑀸 𑀲𑀫𑀺𑀲𑁆𑀲𑀺𑀢𑀸.

𑁯𑁨𑁪. 𑀤𑁆𑀯𑁂 𑀘 𑀲𑀜𑁆𑀜𑀸𑀯𑀯𑀢𑁆𑀣𑀸𑀦𑀸, 𑀅𑀝𑁆𑀞𑀸𑀦𑀼𑀲𑁆𑀲𑀢𑀺𑀬𑁄𑀢𑀺 𑀘;

𑀲𑁂𑀲𑀸 𑀤𑀲 𑀧𑀯𑀼𑀘𑁆𑀘𑀦𑁆𑀢𑀺, 𑀉𑀧𑀘𑀸𑀭𑀲𑀫𑀸𑀥𑀺𑀓𑀸.

𑁯𑁨𑁫. 𑀧𑀭𑀺𑀓𑀫𑁆𑀫𑁄𑀧𑀘𑀸𑀭𑀸𑀦𑀼𑀮𑁄𑀫𑀕𑁄𑀢𑁆𑀭𑀪𑀼𑀢𑁄 𑀧𑀭𑀁;

𑀧𑀜𑁆𑀘𑀫𑀁 𑀯𑀸 𑀘𑀢𑀼𑀢𑁆𑀣𑀁 𑀯𑀸, 𑀚𑀯𑀦𑀁 𑀳𑁄𑀢𑀺 𑀅𑀧𑁆𑀧𑀦𑀸.

𑁯𑁨𑁬. 𑀅𑀧𑁆𑀧𑀦𑀸𑀚𑀯𑀦𑀁 𑀲𑀩𑁆𑀩𑀁, 𑀮𑁄𑀓𑀼𑀢𑁆𑀢𑀭𑀫𑀳𑀕𑁆𑀕𑀢𑀁;

𑀢𑀺𑀳𑁂𑀢𑀼𑀓𑀧𑀭𑀺𑀢𑁆𑀢𑀸𑀦𑀺, 𑀧𑀼𑀭𑀺𑀫𑀸𑀦𑀺 𑀬𑀣𑀸𑀭𑀳𑀁.

𑁯𑁨𑁭. 𑀆𑀯𑀚𑁆𑀚𑀦𑀸 𑀘 𑀯𑀲𑀺𑀢𑀸, 𑀢𑀁𑀲𑀫𑀸𑀧𑀚𑁆𑀚𑀦𑀸 𑀢𑀣𑀸;

𑀅𑀥𑀺𑀝𑁆𑀞𑀸𑀦𑀸 𑀘 𑀯𑀼𑀝𑁆𑀞𑀸𑀦𑀸, 𑀧𑀘𑁆𑀘𑀯𑁂𑀓𑁆𑀔𑀡 𑀧𑀜𑁆𑀘𑀫𑀸.

𑁯𑁨𑁮. 𑀯𑀲𑀺𑀢𑀸𑀳𑀺 𑀯𑀲𑀻𑀪𑀽𑀢𑀸, 𑀇𑀢𑀺 𑀓𑀢𑁆𑀯𑀸𑀦 𑀧𑀜𑁆𑀘𑀳𑀺;

𑀪𑀸𑀯𑁂𑀦𑁆𑀢𑀲𑁆𑀲 𑀧𑀦𑀧𑁆𑀧𑁂𑀦𑁆𑀢𑀺, 𑀉𑀧𑀭𑀽𑀧𑀭𑀺 𑀅𑀧𑁆𑀧𑀦𑀸.

𑁯𑁨𑁯. 𑀬𑀼𑀜𑁆𑀚𑀦𑁆𑀢𑀲𑁆𑀲 𑀢𑀼 𑀯𑀼𑀝𑁆𑀞𑀸𑀬, 𑀓𑀲𑀺𑀡𑀚𑁆𑀛𑀸𑀦𑀧𑀜𑁆𑀘𑀫𑀸;

𑀧𑀜𑁆𑀘𑀸𑀪𑀺𑀜𑁆𑀜𑀸 𑀳𑀺 𑀅𑀧𑁆𑀧𑁂𑀦𑁆𑀢𑀺, 𑀭𑀽𑀧𑀲𑀤𑁆𑀤𑀸𑀤𑀺𑀕𑁄𑀘𑀭𑁂.

𑁯𑁩𑁦. 𑀮𑁄𑀓𑀼𑀢𑁆𑀢𑀭𑀸 𑀧𑀦𑀧𑁆𑀧𑁂𑀦𑁆𑀢𑀺, 𑀲𑀩𑁆𑀩𑁂 𑀦𑀺𑀩𑁆𑀩𑀸𑀦𑀕𑁄𑀘𑀭𑁂;

𑀅𑀦𑀺𑀘𑁆𑀘𑀤𑀼𑀓𑁆𑀔𑀸𑀦𑀢𑁆𑀢𑀸𑀢𑀺, 𑀪𑀽𑀫𑀺𑀥𑀫𑁆𑀫𑁂 𑀯𑀺𑀧𑀲𑁆𑀲𑀢𑁄.

𑁯𑁩𑁧. 𑀢𑀢𑁆𑀣 𑀘 𑀧𑀸𑀤𑀓𑀚𑁆𑀛𑀸𑀦𑀁, 𑀲𑀫𑁆𑀫𑀝𑁆𑀞𑀚𑁆𑀛𑀸𑀦𑀫𑁂𑀯 𑀯𑀸;

𑀅𑀚𑁆𑀛𑀸𑀲𑀬𑁄 𑀘 𑀯𑀼𑀝𑁆𑀞𑀸𑀦-𑀕𑀸𑀫𑀺𑀦𑀻 𑀘 𑀯𑀺𑀧𑀲𑁆𑀲𑀦𑀸.

𑁯𑁩𑁨. 𑀫𑀕𑁆𑀕𑀸𑀦𑀁 𑀛𑀸𑀦𑀪𑁂𑀤𑀸𑀬, 𑀬𑀣𑀸𑀬𑁄𑀕𑀁 𑀦𑀺𑀬𑀸𑀫𑀢𑀸;

𑀬𑀣𑀸𑀲𑀓𑀁 𑀨𑀮𑀸𑀦𑀁 𑀢𑀼, 𑀫𑀕𑁆𑀕𑀸 𑀳𑁄𑀦𑁆𑀢𑀺 𑀦𑀺𑀬𑀸𑀫𑀢𑀸.

𑁯𑁩𑁩. 𑀫𑀕𑁆𑀕𑀸𑀦𑀦𑁆𑀢𑀭𑀫𑁂𑀯𑀸𑀣, 𑀪𑀽𑀫𑀺𑀥𑀫𑁆𑀫𑁂 𑀯𑀺𑀧𑀲𑁆𑀲𑀢𑁄;

𑀨𑀮𑀲𑀫𑀸𑀧𑀢𑁆𑀢𑀺𑀬𑀫𑁆𑀧𑀺, 𑀅𑀧𑁆𑀧𑁂𑀢𑀺 𑀨𑀮𑀫𑀸𑀦𑀲𑀁.

𑁯𑁩𑁪. 𑀅𑀦𑀼𑀧𑀼𑀩𑁆𑀩𑀲𑀫𑀸𑀧𑀢𑁆𑀢𑀺𑀁, 𑀲𑀫𑀸𑀧𑀚𑁆𑀚𑀺𑀲𑁆𑀲 𑀯𑀼𑀝𑁆𑀞𑀺𑀢𑁄;

𑀛𑀸𑀦𑀥𑀫𑁆𑀫𑁂 𑀯𑀺𑀧𑀲𑁆𑀲𑀺𑀢𑁆𑀯𑀸, 𑀢𑀢𑁆𑀣 𑀢𑀢𑁆𑀣𑁂𑀯 𑀧𑀡𑁆𑀟𑀺𑀢𑁄.

𑁯𑁩𑁫. 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀫𑀧𑁆𑀧𑁂𑀢𑁆𑀯𑀸, 𑀏𑀓𑀤𑁆𑀯𑀺𑀚𑀯𑀦𑀸𑀧𑀭𑀁;

𑀦𑀺𑀭𑁄𑀥𑀁 𑀦𑀸𑀫 𑀨𑀼𑀲𑀢𑀺, 𑀲𑀫𑀸𑀧𑀢𑁆𑀢𑀺𑀫𑀘𑀺𑀢𑁆𑀢𑀓𑀁.

𑁯𑁩𑁬. 𑀅𑀭𑀳𑀸 𑀯𑀸 𑀅𑀦𑀸𑀕𑀸𑀫𑀻, 𑀧𑀜𑁆𑀘𑀯𑁄𑀓𑀸𑀭𑀪𑀽𑀫𑀺𑀬𑀁;

𑀬𑀣𑀸𑀲𑀓𑀁 𑀨𑀮𑀼𑀧𑁆𑀧𑀸𑀤𑁄, 𑀯𑀼𑀝𑁆𑀞𑀸𑀦𑀦𑁆𑀢𑀺 𑀢𑀢𑁄 𑀫𑀢𑁄.

𑁯𑁩𑁭. 𑀅𑀧𑁆𑀧𑀦𑀸𑀧𑀭𑀺𑀬𑁄𑀲𑀸𑀦𑁂, 𑀲𑀺𑀬𑀸 𑀲𑀩𑁆𑀩𑀢𑁆𑀣 𑀲𑀫𑁆𑀪𑀯𑀸;

𑀪𑀯𑀗𑁆𑀕𑀧𑀸𑀢𑁄 𑀢𑀁 𑀙𑁂𑀢𑁆𑀯𑀸, 𑀚𑀸𑀬𑀢𑁂 𑀧𑀘𑁆𑀘𑀯𑁂𑀓𑁆𑀔𑀡𑀸.

𑁯𑁩𑁮. 𑀇𑀢𑀺 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦, 𑀅𑀧𑁆𑀧𑀦𑀸𑀦𑀬𑀲𑀗𑁆𑀕𑀳𑀁;

𑀬𑀣𑀸𑀬𑁄𑀕𑀁 𑀯𑀺𑀪𑀸𑀯𑁂𑀬𑁆𑀬, 𑀢𑀢𑁆𑀣 𑀢𑀢𑁆𑀣 𑀯𑀺𑀘𑀓𑁆𑀔𑀡𑁄.

𑁯𑁩𑁯. 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺 𑀦𑀸𑀫𑀸𑀬𑀁, 𑀘𑀺𑀢𑁆𑀢𑀲𑀁𑀓𑁆𑀮𑁂𑀲𑀲𑁄𑀥𑀦𑁄;

𑀉𑀧𑀘𑀸𑀭𑀧𑁆𑀧𑀦𑀸𑀪𑁂𑀤𑁄, 𑀲𑀫𑀣𑁄 𑀧𑀼𑀩𑁆𑀩𑀪𑀸𑀕𑀺𑀬𑁄𑀢𑀺.

𑀇𑀢𑀺 𑀦𑀺𑀩𑁆𑀩𑀸𑀦𑀯𑀺𑀪𑀸𑀕𑁂 𑀫𑀽𑀮𑀯𑀺𑀲𑀼𑀤𑁆𑀥𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀢𑁂𑀯𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.