𑀘𑀢𑀼𑀯𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄

𑁨𑁪. 𑀧𑀭𑀺𑀕𑁆𑀕𑀳𑀯𑀺𑀲𑀼𑀤𑁆𑀥𑀺𑀓𑀣𑀸

𑁯𑁪𑁦. 𑀲𑀻𑀮𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀻𑀳𑀺, 𑀬𑀣𑀸𑀯𑀼𑀢𑁆𑀢𑀸𑀳𑀺 𑀫𑀡𑁆𑀟𑀺𑀢𑁄;

𑀧𑀬𑁄𑀕𑀸𑀲𑀬𑀲𑀫𑁆𑀧𑀦𑁆𑀦𑁄, 𑀦𑀺𑀩𑁆𑀩𑀸𑀦𑀸𑀪𑀺𑀭𑀢𑁄 𑀢𑀢𑁄.

𑁯𑁪𑁧. 𑀔𑀦𑁆𑀥𑀸𑀬𑀢𑀦𑀥𑀸𑀢𑀸𑀤𑀺𑀧𑁆𑀧𑀪𑁂𑀤𑁂𑀳𑀺 𑀬𑀣𑀸𑀭𑀳𑀁;

𑀮𑀓𑁆𑀔𑀡𑀧𑀘𑁆𑀘𑀼𑀧𑀝𑁆𑀞𑀸𑀦-𑀧𑀤𑀝𑁆𑀞𑀸𑀦𑀯𑀺𑀪𑀸𑀕𑀢𑁄.

𑁯𑁪𑁨. 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀲𑀗𑁆𑀔𑀸𑀭𑁂, 𑀦𑀸𑀫𑀭𑀽𑀧𑀁 𑀬𑀣𑀸𑀓𑀣𑀁;

𑀯𑀯𑀢𑁆𑀣𑀧𑁂𑀦𑁆𑀢𑁄 𑀢𑀢𑁆𑀣𑁂𑀯𑀫𑀦𑀼𑀧𑀲𑁆𑀲𑀢𑀺 𑀧𑀜𑁆𑀜𑀯𑀸.

𑁯𑁪𑁩. 𑀦𑀸𑀫𑀭𑀽𑀧𑀫𑀺𑀤𑀁 𑀲𑀼𑀤𑁆𑀥𑀁, 𑀅𑀢𑁆𑀢𑀪𑀸𑀯𑁄𑀢𑀺 𑀯𑀼𑀘𑁆𑀘𑀢𑀺;

𑀦𑀢𑁆𑀣𑁂𑀢𑁆𑀣 𑀓𑁄𑀘𑀺 𑀅𑀢𑁆𑀢𑀸 𑀯𑀸, 𑀲𑀢𑁆𑀢𑁄 𑀚𑀻𑀯𑁄 𑀘 𑀧𑀼𑀕𑁆𑀕𑀮𑁄.

𑁯𑁪𑁪. 𑀬𑀣𑀸𑀧𑀺 𑀅𑀗𑁆𑀕𑀲𑀫𑁆𑀪𑀸𑀭𑀸, 𑀳𑁄𑀢𑀺 𑀲𑀤𑁆𑀤𑁄 𑀭𑀣𑁄 𑀇𑀢𑀺;

𑀏𑀯𑀁 𑀔𑀦𑁆𑀥𑁂𑀲𑀼 𑀲𑀦𑁆𑀢𑁂𑀲𑀼, 𑀳𑁄𑀢𑀺 𑀲𑀢𑁆𑀢𑁄𑀢𑀺 𑀲𑀫𑁆𑀫𑀼𑀢𑀺.

𑁯𑁪𑁫. 𑀔𑀦𑁆𑀥𑀸𑀬𑀢𑀦𑀥𑀸𑀢𑀽𑀦𑀁, 𑀬𑀣𑀸𑀬𑁄𑀕𑀫𑀦𑀼𑀓𑁆𑀓𑀫𑁄;

𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑁄 𑀧𑀯𑀢𑁆𑀢𑀦𑁆𑀢𑁄, 𑀲𑀁𑀲𑀸𑀭𑁄𑀢𑀺 𑀧𑀯𑀼𑀘𑁆𑀘𑀢𑀺.

𑁯𑁪𑁬. 𑀇𑀢𑀺 𑀦𑀸𑀦𑀧𑁆𑀧𑀓𑀸𑀭𑁂𑀦, 𑀢𑁂𑀪𑀽𑀫𑀓𑀧𑀭𑀺𑀕𑁆𑀕𑀳𑁄;

𑀪𑀽𑀫𑀺𑀥𑀫𑁆𑀫𑀯𑀯𑀢𑁆𑀣𑀸𑀦𑀁, 𑀲𑀼𑀤𑁆𑀥𑀲𑀗𑁆𑀔𑀸𑀭𑀤𑀲𑁆𑀲𑀦𑀁.

𑁯𑁪𑁭. 𑀅𑀢𑁆𑀢𑀤𑀺𑀝𑁆𑀞𑀺𑀧𑀳𑀸𑀦𑁂𑀦, 𑀤𑀺𑀝𑁆𑀞𑀺𑀲𑀁𑀓𑁆𑀮𑁂𑀲𑀲𑁄𑀥𑀦𑀁;

𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺 𑀦𑀸𑀫𑀸𑀢𑀺, 𑀜𑀸𑀡𑀫𑁂𑀢𑀁 𑀧𑀯𑀼𑀘𑁆𑀘𑀢𑀺.

𑁯𑁪𑁮. 𑀧𑀭𑀺𑀕𑁆𑀕𑀳𑀺𑀢𑀲𑀗𑁆𑀔𑀸𑀭𑁄, 𑀦𑀸𑀫𑀭𑀽𑀧𑀫𑀧𑀢𑁆𑀣𑀺𑀬𑀸;

𑀢𑀢𑁄 𑀧𑀭𑀁 𑀬𑀣𑀸𑀬𑁄𑀕𑀁, 𑀧𑀭𑀺𑀕𑁆𑀕𑀡𑁆𑀳𑀢𑀺 𑀧𑀘𑁆𑀘𑀬𑁂.

𑁯𑁪𑁯. 𑀤𑀼𑀓𑁆𑀔𑀲𑀫𑀼𑀤𑀬𑁄 𑀢𑀢𑁆𑀣, 𑀢𑀡𑁆𑀳𑀸 𑀲𑀁𑀲𑀸𑀭𑀦𑀸𑀬𑀺𑀓𑀸;

𑀲𑀫𑁄𑀥𑀸𑀦𑁂𑀢𑀺 𑀲𑀗𑁆𑀔𑀸𑀭𑁂, 𑀢𑀢𑁆𑀣 𑀢𑀢𑁆𑀣𑀼𑀧𑀧𑀢𑁆𑀢𑀺𑀬𑀸.

𑁯𑁫𑁦. 𑀢𑀡𑁆𑀳𑀸𑀲𑀫𑁆𑀪𑀯𑀫𑁂𑀯𑁂𑀢𑀁, 𑀢𑀲𑁆𑀫𑀸 𑀤𑀼𑀓𑁆𑀔𑀁 𑀧𑀯𑀼𑀘𑁆𑀘𑀢𑀺;

𑀢𑀤𑀧𑁆𑀧𑀯𑀢𑁆𑀢𑀺 𑀦𑀺𑀩𑁆𑀩𑀸𑀦𑀁, 𑀫𑀕𑁆𑀕𑁄 𑀢𑀁𑀧𑀸𑀧𑀓𑁄𑀢𑀺 𑀘.

𑁯𑁫𑁧. 𑀘𑀢𑀼𑀲𑀘𑁆𑀘𑀯𑀯𑀢𑁆𑀣𑀸𑀦-𑀫𑀼𑀔𑁂𑀦𑁂𑀯𑀫𑁆𑀧𑀺 𑀧𑀘𑁆𑀘𑀬𑁂;

𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺 𑀏𑀓𑀘𑁆𑀘𑁂, 𑀲𑀗𑁆𑀔𑀸𑀭𑀸𑀦𑀫𑀣𑀸𑀧𑀭𑁂.

𑁯𑁫𑁨. 𑀆𑀮𑁄𑀓𑀸𑀓𑀸𑀲𑀯𑀸𑀬𑀸𑀧𑀧𑀣𑀯𑀺𑀜𑁆𑀘𑀼𑀧𑀦𑀺𑀲𑁆𑀲𑀬𑀁;

𑀪𑀯𑀗𑁆𑀕𑀧𑀭𑀺𑀡𑀸𑀫𑀜𑁆𑀘, 𑀮𑀪𑀺𑀢𑁆𑀯𑀸𑀯 𑀬𑀣𑀸𑀭𑀳𑀁.

𑁯𑁫𑁩. 𑀙 𑀯𑀢𑁆𑀣𑀽𑀦𑀺 𑀘 𑀦𑀺𑀲𑁆𑀲𑀸𑀬, 𑀙 𑀤𑁆𑀯𑀸𑀭𑀸𑀭𑀫𑁆𑀫𑀡𑀸𑀦𑀺 𑀘;

𑀧𑀝𑀺𑀘𑁆𑀘 𑀫𑀦𑀲𑀺𑀓𑀸𑀭𑀁, 𑀧𑀯𑀢𑁆𑀢𑀦𑁆𑀢𑀺 𑀅𑀭𑀽𑀧𑀺𑀦𑁄.

𑁯𑁫𑁪. 𑀬𑀣𑀸𑀲𑀓𑀲𑀫𑀼𑀝𑁆𑀞𑀸𑀦𑀁, 𑀯𑀺𑀪𑀸𑀕𑁂𑀳𑀺 𑀘 𑀭𑀽𑀧𑀺𑀦𑁄;

𑀧𑀯𑀢𑁆𑀢𑀦𑁆𑀢𑀺 𑀏𑀓𑀘𑁆𑀘𑁂𑀢𑀺, 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺 𑀧𑀘𑁆𑀘𑀬𑁂.

𑁯𑁫𑁫. 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀲𑀗𑁆𑀔𑀸𑀭𑀸 𑀢𑀼 𑀢𑀢𑁄 𑀢𑀣𑀸;

𑀯𑀺𑀜𑁆𑀜𑀸𑀡𑀁 𑀦𑀸𑀫𑀭𑀽𑀧𑀜𑁆𑀘, 𑀲𑀴𑀸𑀬𑀢𑀦𑀦𑀸𑀫𑀓𑀁.

𑁯𑁫𑁬. 𑀨𑀲𑁆𑀲𑁄 𑀘 𑀯𑁂𑀤𑀦𑀸 𑀢𑀡𑁆𑀳𑀸, 𑀉𑀧𑀸𑀤𑀸𑀦𑀁 𑀪𑀯𑁄 𑀢𑀢𑁄;

𑀚𑀸𑀢𑀺 𑀚𑀭𑀸 𑀫𑀭𑀡𑀜𑁆𑀘, 𑀧𑀯𑀢𑁆𑀢𑀢𑀺 𑀬𑀣𑀸𑀭𑀳𑀁.

𑁯𑁫𑁭. 𑀢𑀢𑁄 𑀲𑁄𑀓𑁄 𑀧𑀭𑀺𑀤𑁂𑀯𑁄, 𑀤𑀼𑀓𑁆𑀔𑀜𑁆𑀘𑁂𑀯 𑀢𑀣𑀸𑀧𑀭𑀁;

𑀤𑁄𑀫𑀦𑀲𑁆𑀲𑀫𑀼𑀧𑀸𑀬𑀸𑀲𑁄, 𑀲𑀫𑁆𑀪𑁄𑀢𑀺 𑀘 𑀬𑀣𑀸𑀭𑀳𑀁.

𑁯𑁫𑁮. 𑀏𑀢𑀲𑁆𑀲 𑀓𑁂𑀯𑀮𑀲𑁆𑀲𑁂𑀯𑀁, 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑁆𑀪𑀯𑁄;

𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄𑀯, 𑀦𑀢𑁆𑀣𑀜𑁆𑀜𑁄 𑀓𑁄𑀘𑀺 𑀓𑀸𑀭𑀓𑁄.

𑁯𑁫𑁯. 𑀢𑀢𑁆𑀣𑀸𑀯𑀺𑀚𑁆𑀚𑀸𑀤𑀬𑁄 𑀤𑁆𑀯𑁂𑀧𑀺, 𑀅𑀤𑁆𑀥𑀸𑀢𑀻𑀢𑁄 𑀅𑀦𑀸𑀕𑀢𑁄;

𑀚𑀸𑀢𑀸𑀤𑀬𑁄𑀧𑀭𑁂 𑀅𑀝𑁆𑀞, 𑀧𑀘𑁆𑀘𑀼𑀧𑁆𑀧𑀦𑁆𑀦𑁄𑀢𑀺 𑀯𑀡𑁆𑀡𑀺𑀢𑁄.

𑁯𑁬𑁦. 𑀧𑀼𑀜𑁆𑀜𑀸𑀧𑀼𑀜𑁆𑀜𑀸𑀦𑁂𑀜𑁆𑀚𑀯𑀲𑀸, 𑀲𑀗𑁆𑀔𑀸𑀭𑀸 𑀢𑀺𑀯𑀺𑀥𑀸 𑀢𑀣𑀸;

𑀪𑀯𑁂𑀓𑀤𑁂𑀲𑁄 𑀓𑀫𑁆𑀫𑀜𑁆𑀘, 𑀓𑀫𑁆𑀫𑀯𑀝𑁆𑀝𑀦𑁆𑀢𑀺 𑀯𑀼𑀘𑁆𑀘𑀢𑀺.

𑁯𑁬𑁧. 𑀅𑀯𑀺𑀚𑁆𑀚𑀸𑀢𑀡𑁆𑀳𑀼𑀧𑀸𑀤𑀸𑀦𑀸, 𑀓𑁆𑀮𑁂𑀲𑀯𑀝𑁆𑀝𑀫𑀣𑀸𑀧𑀭𑁂;

𑀯𑀺𑀧𑀸𑀓𑀯𑀝𑁆𑀝𑀁 𑀲𑀢𑁆𑀢𑀸𑀧𑀺, 𑀉𑀧𑀧𑀢𑁆𑀢𑀺𑀪𑀯𑁄𑀧𑀺 𑀘.

𑁯𑁬𑁨. 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀸𑀦𑀁 𑀢𑀼, 𑀕𑀳𑀡𑁂 𑀕𑀳𑀺𑀢𑀸𑀯 𑀢𑁂;

𑀢𑀡𑁆𑀳𑀼𑀧𑀸𑀤𑀸𑀦𑀪𑀯𑀸𑀢𑀺, 𑀅𑀢𑀻𑀢𑁂 𑀧𑀜𑁆𑀘 𑀳𑁂𑀢𑀯𑁄.

𑁯𑁬𑁩. 𑀢𑀡𑁆𑀳𑀼𑀧𑀸𑀤𑀸𑀦𑀪𑀯𑀸𑀦𑀁, 𑀕𑀳𑀡𑁂 𑀕𑀳𑀺𑀢𑀸𑀯 𑀢𑁂;

𑀅𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑀸 𑀘𑁂𑀢𑀺, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀧𑀺 𑀧𑀜𑁆𑀘𑀓𑁂.

𑁯𑁬𑁪. 𑀯𑀺𑀜𑁆𑀜𑀸𑀡𑀸𑀤𑀺𑀲𑀭𑀽𑀧𑁂𑀦, 𑀤𑀲𑁆𑀲𑀺𑀢𑀁 𑀨𑀮𑀧𑀜𑁆𑀘𑀓𑀁;

𑀢𑀣𑀸 𑀢𑀤𑁂𑀯 𑀚𑀸𑀢𑀸𑀤𑀺-𑀦𑀸𑀫𑁂𑀦𑀸𑀦𑀸𑀕𑀢𑀦𑁆𑀢𑀺 𑀘.

𑁯𑁬𑁫. 𑀅𑀢𑀻𑀢𑁂 𑀳𑁂𑀢𑀯𑁄 𑀧𑀜𑁆𑀘, 𑀇𑀤𑀸𑀦𑀺 𑀨𑀮𑀧𑀜𑁆𑀘𑀓𑀁;

𑀇𑀤𑀸𑀦𑀺 𑀳𑁂𑀢𑀯𑁄 𑀧𑀜𑁆𑀘, 𑀆𑀬𑀢𑀺𑀁 𑀨𑀮𑀧𑀜𑁆𑀘𑀓𑀁.

𑁯𑁬𑁬. 𑀳𑁂𑀢𑀼𑀨𑀮𑀁 𑀨𑀮𑀳𑁂𑀢𑀼, 𑀧𑀼𑀦 𑀳𑁂𑀢𑀼𑀨𑀮𑀸𑀦𑀺 𑀘;

𑀢𑀺𑀲𑀦𑁆𑀥𑀺 𑀘𑀢𑀼𑀲𑀗𑁆𑀔𑁂𑀧𑀁, 𑀯𑀻𑀲𑀢𑀸𑀓𑀸𑀭𑀫𑀩𑁆𑀭𑀯𑀼𑀁.

𑁯𑁬𑁭. 𑀅𑀢𑁆𑀣𑀥𑀫𑁆𑀫𑀧𑀝𑀺𑀯𑁂𑀥-𑀤𑁂𑀲𑀦𑀸𑀦𑀁 𑀬𑀣𑀸𑀭𑀳𑀁;

𑀕𑀫𑁆𑀪𑀻𑀭𑀢𑁆𑀢𑀸 𑀘𑀢𑀼𑀦𑁆𑀦𑀫𑁆𑀧𑀺, 𑀘𑀢𑀼𑀕𑀫𑁆𑀪𑀻𑀭𑀢𑀸 𑀫𑀢𑀸.

𑁯𑁬𑁮. 𑀏𑀓𑀢𑁆𑀢𑀦𑀸𑀦𑀢𑁆𑀢𑀦𑀬𑀸, 𑀅𑀩𑁆𑀬𑀸𑀧𑀸𑀭𑀦𑀬𑁄𑀧𑀭𑁄;

𑀢𑀣𑁂𑀯𑀁𑀥𑀫𑁆𑀫𑀢𑀸 𑀘𑁂𑀢𑀺, 𑀦𑀬𑀸 𑀯𑀼𑀢𑁆𑀢𑀸 𑀘𑀢𑀼𑀩𑁆𑀩𑀺𑀥𑀸.

𑁯𑁬𑁯. 𑀚𑀭𑀸𑀫𑀭𑀡𑀲𑁄𑀓𑀸𑀤𑀺-𑀧𑀻𑀴𑀺𑀢𑀸𑀦𑀫𑀪𑀺𑀡𑁆𑀳𑀲𑁄;

𑀆𑀲𑀯𑀸𑀦𑀁 𑀲𑀫𑀼𑀧𑁆𑀧𑀸𑀤𑀸, 𑀅𑀯𑀺𑀚𑁆𑀚𑀸 𑀘 𑀧𑀯𑀢𑁆𑀢𑀢𑀺.

𑁯𑁭𑁦. 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀲𑀗𑁆𑀔𑀸𑀭𑀸𑀧𑀺 𑀬𑀣𑀸 𑀧𑀼𑀭𑁂;

𑀩𑀤𑁆𑀥𑀸𑀯𑀺𑀘𑁆𑀙𑁂𑀤𑀫𑀺𑀘𑁆𑀘𑁂𑀯𑀁, 𑀪𑀯𑀘𑀓𑁆𑀓𑀫𑀦𑀸𑀤𑀺𑀓𑀁.

𑁯𑁭𑁧. 𑀢𑀡𑁆𑀳𑀸𑀯𑀺𑀚𑁆𑀚𑀸𑀦𑀸𑀪𑀺𑀓𑀁 𑀢𑀁, 𑀚𑀭𑀸𑀫𑀭𑀡𑀦𑁂𑀫𑀺𑀓𑀁;

𑀲𑁂𑀲𑀸𑀓𑀸𑀭𑀸𑀤𑀺𑀖𑀝𑀺𑀓𑀁, 𑀢𑀺𑀪𑀯𑀸𑀭𑀣𑀬𑁄𑀚𑀺𑀢𑀁.

𑁯𑁭𑁨. 𑀢𑀺𑀅𑀤𑁆𑀥𑀜𑁆𑀘 𑀢𑀺𑀯𑀝𑁆𑀝𑀜𑁆𑀘, 𑀢𑀺𑀲𑀦𑁆𑀥𑀺𑀖𑀝𑀺𑀓𑀁 𑀢𑀣𑀸;

𑀘𑀢𑀼𑀲𑀗𑁆𑀔𑁂𑀧𑀕𑀫𑁆𑀪𑀻𑀭𑀦𑀬𑀫𑀡𑁆𑀟𑀺𑀢𑀤𑁂𑀲𑀦𑀁.

𑁯𑁭𑁩. 𑀯𑀻𑀲𑀢𑀸𑀓𑀸𑀭𑀯𑀺𑀪𑀸𑀕𑀁, 𑀤𑁆𑀯𑀸𑀤𑀲𑀸𑀓𑀸𑀭𑀲𑀗𑁆𑀕𑀳𑀁;

𑀥𑀫𑁆𑀫𑀝𑁆𑀞𑀺𑀢𑀻𑀢𑀺 𑀤𑀻𑀧𑁂𑀦𑁆𑀢𑀺, 𑀇𑀤𑀧𑁆𑀧𑀘𑁆𑀘𑀬𑀢𑀁 𑀩𑀼𑀥𑀸.

𑁯𑁭𑁪. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄𑀬𑀁, 𑀧𑀘𑁆𑀘𑀬𑀸𑀓𑀸𑀭𑀦𑀸𑀫𑀢𑁄;

𑀲𑀗𑁆𑀔𑁂𑀧𑀢𑁄 𑀘 𑀯𑀺𑀢𑁆𑀣𑀸𑀭𑀸, 𑀯𑀺𑀯𑀺𑀥𑀸𑀓𑀸𑀭𑀪𑁂𑀤𑀢𑁄.

𑁯𑁭𑁫. 𑀚𑀦𑁂𑀢𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁂, 𑀅𑀯𑀺𑀚𑁆𑀚𑀸𑀤𑀺𑀧𑀯𑀢𑁆𑀢𑀺𑀬𑀸;

𑀅𑀯𑀺𑀚𑁆𑀚𑀸𑀤𑀺𑀦𑀺𑀭𑁄𑀥𑁂𑀦, 𑀦𑀺𑀭𑁄𑀥𑁂𑀢𑀺 𑀘 𑀲𑀩𑁆𑀩𑀣𑀸.

𑁯𑁭𑁬. 𑀧𑀘𑁆𑀘𑀬𑀧𑁆𑀧𑀘𑁆𑀘𑀬𑀼𑀧𑁆𑀧𑀦𑁆𑀦-𑀯𑀲𑁂𑀦𑁂𑀯 𑀧𑀯𑀢𑁆𑀢𑀢𑀺;

𑀲𑀁𑀲𑀸𑀭𑁄𑀬𑀦𑁆𑀢𑀺 𑀏𑀓𑀘𑁆𑀘𑁂, 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺 𑀧𑀘𑁆𑀘𑀬𑁂.

𑁯𑁭𑁭. 𑀲𑀫𑀦𑁆𑀢𑀧𑀝𑁆𑀞𑀸𑀦𑀫𑀳𑀸𑀧𑀓𑀭𑀡𑀯𑀺𑀪𑀸𑀕𑀢𑁄;

𑀏𑀓𑀘𑁆𑀘𑁂 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺, 𑀘𑀢𑀼𑀯𑀻𑀲𑀢𑀺 𑀧𑀘𑁆𑀘𑀬𑁂.

𑁯𑁭𑁮. 𑀇𑀢𑀺 𑀦𑀸𑀦𑀧𑁆𑀧𑀓𑀸𑀭𑁂𑀦, 𑀧𑀘𑁆𑀘𑀬𑀸𑀦𑀁 𑀧𑀭𑀺𑀕𑁆𑀕𑀳𑁄;

𑀲𑀧𑁆𑀧𑀘𑁆𑀘𑀬𑀦𑀸𑀫𑀭𑀽𑀧𑀁, 𑀯𑀯𑀢𑁆𑀣𑀸𑀦𑀦𑁆𑀢𑀺 𑀯𑁂𑀤𑀺𑀢𑀁.

𑁯𑁭𑁯. 𑀇𑀤𑀧𑁆𑀧𑀘𑁆𑀘𑀬𑀢𑀸𑀜𑀸𑀡𑀁, 𑀧𑀘𑁆𑀘𑀬𑀸𑀓𑀸𑀭𑀤𑀲𑁆𑀲𑀦𑀁;

𑀥𑀫𑁆𑀫𑀝𑁆𑀞𑀺𑀢𑀺 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀦𑀸𑀫𑀓𑀁.

𑁯𑁮𑁦. 𑀓𑀸𑀮𑀢𑁆𑀢𑀬𑀯𑀺𑀪𑀸𑀕𑁂𑀲𑀼, 𑀓𑀗𑁆𑀔𑀸𑀲𑀁𑀓𑁆𑀮𑁂𑀲𑀲𑁄𑀥𑀦𑀁;

𑀓𑀗𑁆𑀔𑀸𑀯𑀺𑀢𑀭𑀡𑀸 𑀦𑀸𑀫, 𑀯𑀺𑀲𑀼𑀤𑁆𑀥𑀻𑀢𑀺 𑀧𑀯𑀼𑀘𑁆𑀘𑀢𑀻𑀢𑀺.

𑀇𑀢𑀺 𑀦𑀺𑀩𑁆𑀩𑀸𑀦𑀯𑀺𑀪𑀸𑀕𑁂 𑀧𑀭𑀺𑀕𑁆𑀕𑀳𑀯𑀺𑀲𑀼𑀤𑁆𑀥𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀘𑀢𑀼𑀯𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.