𑀏𑀓𑀯𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄

𑁨𑁧. 𑀉𑀧𑁆𑀧𑀢𑁆𑀢𑀺𑀓𑀣𑀸

𑁭𑁯𑁭. 𑀅𑀝𑁆𑀞𑀯𑀻𑀲𑀢𑀺 𑀭𑀽𑀧𑀸𑀦𑀺, 𑀓𑀮𑀸𑀧𑀸 𑀘𑁂𑀓𑀯𑀻𑀲𑀢𑀺;

𑀯𑀼𑀢𑁆𑀢𑀸 𑀘𑁂𑀢𑁆𑀢𑀸𑀯𑀢𑀸 𑀢𑁂𑀲𑀁, 𑀉𑀧𑁆𑀧𑀸𑀤𑁄 𑀤𑀸𑀦𑀺 𑀦𑀺𑀬𑁆𑀬𑀢𑁂.

𑁭𑁯𑁮. 𑀅𑀡𑁆𑀟𑀚𑀸 𑀚𑀮𑀸𑀩𑀼𑀚𑀸 𑀘, 𑀲𑀁𑀲𑁂𑀤𑀚𑁄𑀧𑀧𑀸𑀢𑀺𑀓𑀸;

𑀇𑀘𑁆𑀘𑀼𑀧𑁆𑀧𑀢𑁆𑀢𑀺𑀧𑀪𑁂𑀤𑁂𑀦, 𑀘𑀢𑀲𑁆𑀲𑁄 𑀬𑁄𑀦𑀺𑀬𑁄 𑀫𑀢𑀸.

𑁭𑁯𑁯. 𑀪𑀼𑀫𑁆𑀫𑀯𑀚𑁆𑀚𑁂𑀲𑀼 𑀤𑁂𑀯𑁂𑀲𑀼,

𑀧𑁂𑀢𑁂 𑀦𑀺𑀚𑁆𑀛𑀸𑀫𑀢𑀡𑁆𑀳𑀺𑀓𑁂;

𑀦𑀺𑀭𑀬𑁂𑀲𑀼 𑀘 𑀲𑀫𑁆𑀪𑁄𑀢𑀺,

𑀬𑁄𑀦𑁂𑀓𑀸𑀯𑁄𑀧𑀧𑀸𑀢𑀺𑀓𑀸.

𑁮𑁦𑁦. 𑀪𑀼𑀫𑁆𑀫𑀤𑁂𑀯𑁂 𑀫𑀦𑀼𑀲𑁆𑀲𑁂𑀲𑀼,

𑀢𑀺𑀭𑀘𑁆𑀙𑀸𑀦𑀸𑀲𑀼𑀭𑁂 𑀢𑀣𑀸;

𑀧𑁂𑀢𑁂𑀲𑀼 𑀘𑀸𑀯𑀲𑁂𑀲𑁂𑀲𑀼,

𑀘𑀢𑀲𑁆𑀲𑁄𑀧𑀺 𑀘 𑀬𑁄𑀦𑀺𑀬𑁄.

𑁮𑁦𑁧. 𑀢𑀢𑁆𑀣𑀡𑁆𑀟𑀚𑀸 𑀚𑀮𑀸𑀩𑀼𑀚𑀸, 𑀕𑀩𑁆𑀪𑀲𑁂𑀬𑁆𑀬𑀲𑀫𑀼𑀕𑁆𑀕𑀫𑁄;

𑀲𑀁𑀲𑁂𑀤𑀚𑁄𑀧𑀧𑀸𑀢𑀺𑀓𑀸, 𑀑𑀧𑀧𑀸𑀢𑀺𑀓𑀦𑀸𑀫𑀓𑀸.

𑁮𑁦𑁨. 𑀢𑀢𑁆𑀣 𑀲𑀫𑁆𑀧𑀼𑀡𑁆𑀡𑀸𑀬𑀢𑀦𑁄, 𑀕𑀩𑁆𑀪𑀲𑁂𑀬𑁆𑀬𑀲𑀫𑀼𑀕𑁆𑀕𑀫𑁄;

𑀅𑀪𑀸𑀯𑁄 𑀤𑁆𑀯𑁂 𑀲𑀪𑀸𑀯𑀸 𑀘, 𑀇𑀢𑁆𑀣𑀺𑀧𑀼𑀫𑁆𑀪𑀸𑀯𑀫𑀺𑀲𑁆𑀲𑀺𑀢𑀸.

𑁮𑁦𑁩. 𑀧𑀭𑀺𑀧𑀼𑀡𑁆𑀡𑀸𑀧𑀭𑀺𑀧𑀼𑀡𑁆𑀡𑁄, 𑀑𑀧𑀧𑀸𑀢𑀺𑀓𑀦𑀸𑀫𑀓𑁄;

𑀅𑀪𑀸𑀯𑁄 𑀤𑁆𑀯𑁂 𑀲𑀪𑀸𑀯𑀸 𑀘, 𑀘𑀢𑀼𑀭𑀸𑀧𑀸𑀬𑀪𑀽𑀫𑀺𑀬𑀁.

𑁮𑁦𑁪. 𑀲𑀫𑁆𑀧𑀼𑀡𑁆𑀡𑀸𑀬𑀢𑀦𑁄𑀯𑁂𑀲𑁄,

𑀓𑀸𑀫𑁂 𑀲𑀼𑀕𑀢𑀺𑀬𑀁 𑀧𑀦;

𑀆𑀤𑀺𑀓𑀧𑁆𑀧𑁂 𑀅𑀪𑀸𑀯𑁄 𑀘,

𑀤𑁆𑀯𑁂 𑀲𑀪𑀸𑀯𑀸 𑀢𑀢𑁄 𑀧𑀭𑀁.

𑁮𑁦𑁫. 𑀅𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑁄, 𑀅𑀪𑀸𑀯𑁄 𑀘 𑀫𑀳𑀕𑁆𑀕𑀢𑁂;

𑀇𑀘𑁆𑀘𑁂𑀯𑀁 𑀤𑀲𑀥𑀸 𑀳𑁄𑀦𑁆𑀢𑀺, 𑀲𑀩𑁆𑀩𑀸 𑀲𑀦𑁆𑀥𑀺𑀲𑀫𑀼𑀕𑁆𑀕𑀫𑀸.

𑁮𑁦𑁬. 𑀢𑀢𑁆𑀣𑁂𑀯 𑀤𑀲𑀥𑀸 𑀪𑀺𑀦𑁆𑀦𑁂, 𑀅𑀢𑁆𑀢𑀪𑀸𑀯𑀲𑀫𑀼𑀕𑁆𑀕𑀫𑁂;

𑀲𑀦𑁆𑀥𑀺𑀬𑀜𑁆𑀘 𑀧𑀯𑀢𑁆𑀢𑁂 𑀘, 𑀭𑀽𑀧𑀼𑀧𑁆𑀧𑀢𑁆𑀢𑀺𑀁 𑀯𑀺𑀪𑀸𑀯𑀬𑁂.

𑁮𑁦𑁭. 𑀢𑀢𑁆𑀣𑀸𑀪𑀸𑀯𑀓𑀲𑀢𑁆𑀢𑀸𑀦𑀁, 𑀕𑀩𑁆𑀪𑀲𑁂𑀬𑁆𑀬𑀲𑀫𑀼𑀕𑁆𑀕𑀫𑁂;

𑀓𑀸𑀬𑀯𑀢𑁆𑀣𑀼𑀯𑀲𑀸 𑀤𑁆𑀯𑁂𑀯, 𑀤𑀲𑀓𑀸 𑀳𑁄𑀦𑁆𑀢𑀺 𑀓𑀫𑁆𑀫𑀚𑀸.

𑁮𑁦𑁮. 𑀭𑀽𑀧𑀲𑀦𑁆𑀢𑀢𑀺𑀲𑀻𑀲𑀸𑀦𑀺, 𑀤𑁆𑀯𑁂 𑀘 𑀭𑀽𑀧𑀸𑀦𑀺 𑀯𑀻𑀲𑀢𑀺;

𑀅𑀕𑀳𑀻𑀢𑀕𑁆𑀕𑀳𑀡𑁂𑀦, 𑀢𑀢𑁆𑀣𑁂𑀓𑀸𑀤𑀲 𑀦𑀺𑀤𑁆𑀤𑀺𑀲𑁂.

𑁮𑁦𑁯. 𑀢𑀢𑁄 𑀧𑀭𑀁 𑀧𑀯𑀢𑁆𑀢𑀺𑀫𑁆𑀳𑀺, 𑀯𑀟𑁆𑀠𑀫𑀸𑀦𑀲𑁆𑀲 𑀚𑀦𑁆𑀢𑀼𑀦𑁄;

𑀘𑀓𑁆𑀔𑀼𑀤𑀲𑀓𑀸𑀤𑀬𑁄 𑀘, 𑀘𑀢𑁆𑀢𑀸𑀭𑁄 𑀳𑁄𑀦𑁆𑀢𑀺 𑀲𑀫𑁆𑀪𑀯𑀸.

𑁮𑁧𑁦. 𑀇𑀘𑁆𑀘𑀸𑀪𑀸𑀯𑀓𑀲𑀢𑁆𑀢𑀸𑀦𑀁, 𑀙𑀴𑁂𑀯𑀼𑀢𑁆𑀢𑀫𑀓𑁄𑀝𑀺𑀬𑀸;

𑀳𑁂𑀝𑁆𑀞𑀺𑀫𑀓𑁄𑀝𑀺𑀬𑀸 𑀤𑁆𑀯𑁂𑀯, 𑀕𑀩𑁆𑀪𑀲𑁂𑀬𑁆𑀬𑀲𑀫𑀼𑀕𑁆𑀕𑀫𑁂.

𑁮𑁧𑁧. 𑀘𑀓𑁆𑀔𑀼𑀲𑁄𑀢𑀖𑀸𑀦𑀯𑀲𑀸, 𑀢𑀢𑁆𑀣 𑀢𑀺𑀤𑁆𑀯𑁂𑀓𑀳𑀻𑀦𑀓𑀸;

𑀏𑀓𑁄 𑀢𑀬𑁄 𑀢𑀬𑁄 𑀘𑁂𑀯, 𑀲𑀺𑀬𑀼𑀁𑀢𑀺𑀘𑀢𑀼𑀧𑀜𑁆𑀘𑀓𑀸.

𑁮𑁧𑁨. 𑀑𑀧𑀧𑀸𑀢𑀺𑀓𑀲𑀗𑁆𑀔𑀸𑀢𑁂, 𑀅𑀪𑀸𑀯𑀓𑀲𑀫𑀼𑀕𑁆𑀕𑀫𑁂;

𑀚𑀺𑀯𑁆𑀳𑀸𑀓𑀸𑀬𑀯𑀢𑁆𑀣𑀼𑀯𑀲𑀸, 𑀢𑀬𑁄 𑀳𑁂𑀝𑁆𑀞𑀺𑀫𑀓𑁄𑀝𑀺𑀬𑀸.

𑁮𑁧𑁩. 𑀉𑀢𑁆𑀢𑀫𑀓𑁄𑀝𑀺𑀬𑀸 𑀳𑁄𑀦𑁆𑀢𑀺, 𑀙𑀴𑁂𑀯𑁄𑀪𑀺𑀦𑁆𑀦𑀫𑀦𑁆𑀢𑀭𑁂;

𑀘𑀢𑀼𑀓𑁆𑀓𑀧𑀜𑁆𑀘𑀓𑀸 𑀢𑀢𑁆𑀣, 𑀤𑁆𑀯𑁂𑀓𑀳𑀻𑀦𑀸 𑀢𑀬𑁄 𑀢𑀬𑁄.

𑁮𑁧𑁪. 𑀙𑀓𑁆𑀓𑀸𑀤𑀬𑁄 𑀅𑀪𑀸𑀯𑀸𑀦𑀁,

𑀇𑀘𑁆𑀘𑁂𑀯𑀁 𑀧𑀜𑁆𑀘𑀲𑀗𑁆𑀕𑀳𑀸;

𑀏𑀓𑁄 𑀢𑀬𑁄 𑀢𑀬𑁄 𑀘𑁂𑀓𑁄,

𑀏𑀓𑁄𑀢𑀺 𑀘 𑀬𑀣𑀸𑀓𑁆𑀓𑀫𑀁.

𑁮𑁧𑁫. 𑀲𑀪𑀸𑀯𑀓𑀸𑀦𑀁 𑀤𑁆𑀯𑀺𑀦𑁆𑀦𑀫𑁆𑀧𑀺, 𑀤𑀼𑀯𑀺𑀥𑀸 𑀲𑀢𑁆𑀢𑀓𑀸𑀤𑀬𑁄;

𑀪𑀸𑀯𑀸𑀤𑀺𑀓𑀸 𑀬𑀣𑀸𑀯𑀼𑀢𑁆𑀢𑀸, 𑀦𑀯𑀥𑀸 𑀦𑀯𑀥𑀸 𑀲𑀺𑀬𑀼𑀁.

𑁮𑁧𑁬. 𑀲𑀢𑁆𑀢𑁂𑀯𑀼𑀢𑁆𑀢𑀫𑀢𑁄 𑀳𑁂𑀝𑁆𑀞𑀸, 𑀢𑀺𑀘𑀢𑀼𑀓𑁆𑀓𑀸 𑀢𑀤𑀦𑁆𑀢𑀭𑁂;

𑀘𑀢𑀼𑀓𑁆𑀓𑀧𑀜𑁆𑀘𑀓𑀘𑁆𑀙𑀓𑁆𑀓𑀸, 𑀧𑀜𑁆𑀘𑀙𑀓𑁆𑀓𑀸𑀧𑀺 𑀘 𑀤𑁆𑀯𑀺𑀥𑀸.

𑁮𑁧𑁭. 𑀢𑀺𑀡𑁆𑀡𑀦𑁆𑀦𑀫𑁆𑀧𑀺 𑀯𑀲𑁂𑀦𑁂𑀯, 𑀲𑀢𑁆𑀢𑀓𑀘𑁆𑀙𑀓𑁆𑀓𑀧𑀜𑁆𑀘𑀓𑀸;

𑀘𑀢𑀼𑀓𑁆𑀓𑀢𑀺𑀓𑀤𑀼𑀓𑁆𑀓𑀸 𑀘, 𑀙 𑀓𑁄𑀝𑁆𑀞𑀸𑀲𑀸 𑀬𑀣𑀸𑀭𑀳𑀁.

𑁮𑁧𑁮. 𑀤𑁆𑀯𑁂 𑀲𑀢𑁆𑀢 𑀘 𑀦𑀯 𑀧𑀜𑁆𑀘, 𑀢𑀬𑁄 𑀘𑁂𑀓𑁄 𑀬𑀣𑀸𑀓𑁆𑀓𑀫𑀁;

𑀭𑀽𑀧𑀲𑀦𑁆𑀢𑀢𑀺𑀲𑀻𑀲𑀸𑀦𑀁, 𑀭𑀸𑀲𑀬𑁄 𑀲𑀢𑁆𑀢𑀯𑀻𑀲𑀢𑀺.

𑁮𑁧𑁯. 𑀓𑀫𑁆𑀫𑀚𑀸𑀢𑀸 𑀬𑀣𑀸𑀬𑁄𑀕𑀁, 𑀧𑀯𑀢𑁆𑀢𑀦𑁆𑀢𑀺 𑀔𑀡𑁂 𑀔𑀡𑁂;

𑀓𑀸𑀫𑀸𑀯𑀘𑀭𑀲𑀢𑁆𑀢𑀸𑀦𑀁, 𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑀺𑀬𑀁.

𑁮𑁨𑁦. 𑀢𑀢𑁆𑀣 𑀲𑀦𑁆𑀢𑀢𑀺𑀲𑀻𑀲𑀸𑀦𑀺, 𑀭𑀽𑀧𑀸𑀦𑀺 𑀘 𑀬𑀣𑀸𑀭𑀳𑀁;

𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯, 𑀲𑀩𑁆𑀩𑀢𑁆𑀣𑀸𑀧𑀺 𑀯𑀺𑀦𑀺𑀤𑁆𑀤𑀺𑀲𑁂.

𑁮𑁨𑁧. 𑀲𑀻𑀢𑀼𑀡𑁆𑀳𑁄𑀢𑀼𑀲𑀫𑀜𑁆𑀜𑀸𑀢𑀸,

𑀢𑁂𑀚𑁄𑀥𑀸𑀢𑀼 𑀞𑀺𑀢𑀺𑀓𑁆𑀔𑀡𑁂;

𑀪𑀽𑀢𑀸 𑀲𑀦𑁆𑀥𑀺𑀓𑁆𑀔𑀡𑁂 𑀭𑀽𑀧𑀁,

𑀚𑀦𑁂𑀢𑀺 𑀉𑀢𑀼𑀚𑀝𑁆𑀞𑀓𑀁.

𑁮𑁨𑁨. 𑀧𑀝𑀺𑀲𑀦𑁆𑀥𑀺𑀫𑀢𑀺𑀓𑁆𑀓𑀫𑁆𑀫, 𑀘𑀺𑀢𑁆𑀢𑀁 𑀘𑀺𑀢𑁆𑀢𑀚𑀫𑀝𑁆𑀞𑀓𑀁;

𑀪𑀯𑀗𑁆𑀕𑀸𑀤𑀺𑀫𑀼𑀧𑀸𑀤𑀸𑀬, 𑀚𑀦𑁂𑀢𑀼𑀧𑁆𑀧𑀢𑁆𑀢𑀺𑀬𑀁 𑀧𑀦.

𑁮𑁨𑁩. 𑀪𑀼𑀢𑁆𑀢𑀸𑀳𑀸𑀭𑁄 𑀞𑀺𑀢𑀺𑀧𑁆𑀧𑀢𑁆𑀢𑁄, 𑀫𑀸𑀢𑀭𑀸 𑀘 𑀲𑀬𑀫𑁆𑀧𑀺 𑀘;

𑀲𑀭𑀻𑀭𑀸𑀦𑀼𑀕𑀢𑁄 𑀳𑀼𑀢𑁆𑀯𑀸, 𑀚𑀦𑁂𑀢𑀸𑀳𑀸𑀭𑀚𑀝𑁆𑀞𑀓𑀁.

𑁮𑁨𑁪. 𑀇𑀢𑀺 𑀲𑀼𑀤𑁆𑀥𑀝𑁆𑀞𑀓𑀸𑀦𑀺 𑀘, 𑀢𑁂𑀲𑀫𑀼𑀝𑁆𑀞𑀸𑀦𑀺𑀓𑀸𑀧𑀭𑁂;

𑀲𑀤𑁆𑀤𑀯𑀺𑀜𑁆𑀜𑀢𑁆𑀢𑀺𑀮𑀳𑀼𑀢𑀸, 𑀲𑀫𑁆𑀪𑀯𑁂 𑀲𑀫𑁆𑀪𑀯𑀦𑁆𑀢𑀺 𑀘.

𑁮𑁨𑁫. 𑀇𑀢𑁆𑀣𑀁 𑀘𑀢𑀼𑀲𑀫𑀼𑀝𑁆𑀞𑀸𑀦𑀸, 𑀓𑀮𑀸𑀧𑀸 𑀓𑀸𑀫𑀪𑀽𑀫𑀺𑀬𑀁;

𑀬𑀸𑀯𑀚𑀻𑀯𑀁 𑀧𑀯𑀢𑁆𑀢𑀦𑁆𑀢𑀺, 𑀤𑀻𑀧𑀚𑀸𑀮𑀸𑀯 𑀲𑀦𑁆𑀢𑀢𑀺.

𑁮𑁨𑁬. 𑀘𑀓𑁆𑀔𑀼𑀲𑁄𑀢𑀯𑀢𑁆𑀣𑀼𑀯𑀲𑀸, 𑀤𑀲𑀓𑀸 𑀘 𑀢𑀬𑁄 𑀧𑀭𑀁;

𑀚𑀻𑀯𑀺𑀢𑀦𑀯𑀓𑀜𑁆𑀘𑁂𑀯, 𑀭𑀽𑀧𑀸𑀯𑀘𑀭𑀪𑀽𑀫𑀺𑀬𑀁.

𑁮𑁨𑁭. 𑀳𑁄𑀦𑁆𑀢𑀺 𑀲𑀦𑁆𑀥𑀺𑀧𑀯𑀢𑁆𑀢𑀻𑀲𑀼, 𑀘𑀢𑁆𑀢𑀸𑀭𑁄 𑀓𑀫𑁆𑀫𑀚𑀸 𑀲𑀤𑀸;

𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯, 𑀧𑀯𑀢𑁆𑀢𑁂 𑀉𑀢𑀼𑀘𑀺𑀢𑁆𑀢𑀚𑀸.

𑁮𑁨𑁮. 𑀚𑀻𑀯𑀺𑀢𑀦𑀯𑀓𑀜𑁆𑀘𑁂𑀓𑀁, 𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑀺𑀬𑀁;

𑀧𑀯𑀢𑁆𑀢𑁂 𑀉𑀢𑀼𑀚𑀜𑁆𑀘𑁂𑀢𑀺, 𑀤𑁆𑀯𑁂𑀥𑀸𑀲𑀜𑁆𑀜𑀻𑀦𑀫𑀼𑀤𑁆𑀤𑀺𑀲𑁂.

𑁮𑁨𑁯. 𑀇𑀘𑁆𑀘𑀼𑀧𑁆𑀧𑀢𑁆𑀢𑀺𑀓𑀫𑀁 𑀜𑀢𑁆𑀯𑀸, 𑀯𑀺𑀪𑀸𑀯𑁂𑀬𑁆𑀬 𑀢𑀢𑁄 𑀧𑀭𑀁;

𑀓𑀮𑀸𑀧𑀸𑀦𑀜𑁆𑀘 𑀭𑀽𑀧𑀸𑀦𑀁, 𑀲𑀫𑁆𑀪𑀯𑀸𑀲𑀫𑁆𑀪𑀯𑀫𑁆𑀧𑀺 𑀘.

𑁮𑁩𑁦. 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀲𑀦𑁆𑀢𑀸𑀦𑁂, 𑀲𑀩𑁆𑀩𑁂 𑀲𑀫𑁆𑀪𑁄𑀦𑁆𑀢𑀺 𑀲𑀫𑁆𑀪𑀯𑀸;

𑀓𑀮𑀸𑀧𑀸 𑀘𑁂𑀯 𑀭𑀽𑀧𑀸𑀦𑀺, 𑀢𑀣𑀸 𑀲𑀦𑁆𑀢𑀢𑀺𑀭𑀸𑀲𑀬𑁄.

𑁮𑁩𑁧. 𑀩𑀳𑀺𑀤𑁆𑀥𑀸 𑀫𑀢𑀓𑀸𑀬𑁂 𑀘, 𑀦𑁄𑀧𑀮𑀩𑁆𑀪𑀦𑁆𑀢𑀺 𑀓𑀫𑁆𑀫𑀚𑀸;

𑀘𑀺𑀢𑁆𑀢𑁄𑀚𑀚𑀸 𑀓𑀮𑀸𑀧𑀸 𑀘, 𑀉𑀢𑀼𑀚𑀸 𑀮𑀳𑀼𑀢𑀸𑀤𑀬𑁄.

𑁮𑁩𑁨. 𑀢𑀣𑀸 𑀲𑀼𑀤𑁆𑀥𑀝𑁆𑀞𑀓𑀲𑀤𑁆𑀤-𑀦𑀯𑀓𑀜𑁆𑀘𑁄𑀢𑀼 𑀲𑀩𑁆𑀩𑀣𑀸;

𑀓𑀮𑀸𑀧𑀸 𑀢𑀢𑁆𑀣 𑀮𑀩𑁆𑀪𑀦𑁆𑀢𑀺, 𑀤𑁆𑀯𑁂 𑀘 𑀭𑀽𑀧𑀸𑀦𑀺 𑀉𑀤𑁆𑀤𑀺𑀲𑁂.

𑁮𑁩𑁩. 𑀢𑁂𑀲𑀫𑀼𑀝𑁆𑀞𑀸𑀦𑀺𑀓𑀸 𑀲𑀩𑁆𑀩𑁂, 𑀓𑀮𑀸𑀧𑀸 𑀦𑀢𑁆𑀣𑀺 𑀲𑀦𑁆𑀥𑀺𑀬𑀁;

𑀉𑀧𑁆𑀧𑀸𑀤𑀓𑀸𑀮𑁂 𑀲𑀩𑁆𑀩𑀢𑁆𑀣, 𑀚𑀭𑀢𑀸𑀦𑀺𑀘𑁆𑀘𑀢𑀸𑀧𑀺 𑀘.

𑁮𑁩𑁪. 𑀓𑀮𑀸𑀧𑀸 𑀓𑀫𑁆𑀫𑀚𑀸 𑀲𑀦𑁆𑀢𑀺, 𑀚𑀸𑀢𑀺𑀭𑀽𑀧𑀜𑁆𑀘 𑀲𑀦𑁆𑀥𑀺𑀬𑀁;

𑀭𑀽𑀧𑀸𑀦𑀺 𑀘 𑀓𑀮𑀸𑀧𑀸 𑀘, 𑀲𑀩𑁆𑀩𑁂𑀧𑀺 𑀘 𑀧𑀯𑀢𑁆𑀢𑀺𑀬𑀁.

𑁮𑁩𑁫. 𑀲𑀦𑁆𑀢𑀺 𑀲𑀩𑁆𑀩𑀸𑀦𑀺 𑀭𑀽𑀧𑀸𑀦𑀺, 𑀓𑀸𑀫𑁂𑀲𑀼 𑀘𑀢𑀼𑀲𑀫𑁆𑀪𑀯𑀸;

𑀚𑀻𑀯𑀺𑀢𑀦𑀯𑀓𑀁 𑀳𑀺𑀢𑁆𑀯𑀸, 𑀓𑀮𑀸𑀧𑀸 𑀳𑁄𑀦𑁆𑀢𑀺 𑀯𑀻𑀲𑀢𑀺.

𑁮𑁩𑁬. 𑀤𑀲𑀓𑁂𑀲𑁆𑀯𑁂𑀯 𑀕𑀳𑀺𑀢𑀁, 𑀯𑀺𑀲𑀼𑀁 𑀓𑀸𑀫𑁂 𑀦 𑀮𑀩𑁆𑀪𑀢𑀺;

𑀚𑀻𑀯𑀺𑀢𑀦𑀯𑀓𑀁 𑀦𑀸𑀫, 𑀭𑀽𑀧𑀮𑁄𑀓𑁂 𑀯𑀺𑀲𑀼𑀁 𑀲𑀺𑀬𑀸.

𑁮𑁩𑁭. 𑀆𑀳𑀸𑀭𑀚𑀓𑀮𑀸𑀧𑀸 𑀘, 𑀪𑀸𑀯𑀸 𑀤𑁆𑀯𑁂 𑀘𑀸𑀤𑀺𑀓𑀧𑁆𑀧𑀺𑀓𑁂;

𑀆𑀤𑀺𑀓𑀸𑀮𑁂 𑀦 𑀮𑀩𑁆𑀪𑀦𑁆𑀢𑀺, 𑀧𑀘𑁆𑀙𑀸 𑀮𑀩𑁆𑀪𑀦𑁆𑀢𑀺 𑀓𑁂𑀘𑀺𑀧𑀺.

𑁮𑁩𑁮. 𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀪𑀸𑀯-𑀤𑀲𑀓𑀸 𑀭𑀽𑀧𑀪𑀽𑀫𑀺𑀬𑀁;

𑀆𑀳𑀸𑀭𑀚𑀓𑀮𑀸𑀧𑀸 𑀘, 𑀦 𑀮𑀩𑁆𑀪𑀦𑁆𑀢𑁂𑀯 𑀲𑀩𑁆𑀩𑀣𑀸.

𑁮𑁩𑁯. 𑀘𑀓𑁆𑀔𑀼𑀲𑁄𑀢𑀯𑀢𑁆𑀣𑀼𑀲𑀤𑁆𑀤𑀸, 𑀓𑀮𑀸𑀧𑀸 𑀘𑀺𑀢𑁆𑀢𑀚𑀸𑀧𑀺 𑀘;

𑀅𑀲𑀜𑁆𑀜𑀺𑀪𑀽𑀫𑀺𑀬𑀁 𑀧𑀼𑀩𑁆𑀩𑁂, 𑀯𑀼𑀢𑁆𑀢𑀸𑀧𑀺 𑀘 𑀦 𑀮𑀩𑁆𑀪𑀭𑁂.

𑁮𑁪𑁦. 𑀓𑀮𑀸𑀧𑀸 𑀲𑀢𑁆𑀢 𑀭𑀽𑀧𑀸𑀦𑀺, 𑀧𑀜𑁆𑀘 𑀭𑀽𑀧𑁂𑀲𑁆𑀯𑀲𑀜𑁆𑀜𑀺𑀲𑀼;

𑀦𑀢𑁆𑀣𑁂𑀓𑀸𑀤𑀲 𑀭𑀽𑀧𑀸𑀦𑀺, 𑀓𑀮𑀸𑀧𑁂𑀓𑀽𑀦𑀯𑀻𑀲𑀢𑀺.

𑁮𑁪𑁧. 𑀢𑀲𑁆𑀫𑀸 𑀢𑁂𑀯𑀻𑀲 𑀭𑀽𑀧𑀸𑀦𑀺, 𑀓𑀮𑀸𑀧𑀸 𑀧𑀦 𑀘𑀼𑀤𑁆𑀤𑀲;

𑀢𑁂𑀲𑀫𑀼𑀝𑁆𑀞𑀸𑀦𑀺𑀓𑀸 𑀲𑀦𑁆𑀢𑀺, 𑀭𑀽𑀧𑀸𑀯𑀘𑀭𑀪𑀽𑀫𑀺𑀬𑀁.

𑁮𑁪𑁨. 𑀲𑀢𑁆𑀢𑀭𑀲𑁂𑀯 𑀭𑀽𑀧𑀸𑀦𑀺, 𑀓𑀮𑀸𑀧𑀸 𑀤𑁆𑀯𑁂 𑀤𑁆𑀯𑀺𑀲𑀫𑁆𑀪𑀯𑀸;

𑀅𑀲𑀜𑁆𑀜𑀻𑀦𑀁 𑀢𑀼 𑀲𑀫𑁆𑀪𑁄𑀦𑁆𑀢𑀺, 𑀦𑀢𑁆𑀣𑀸𑀭𑀽𑀧𑁂𑀲𑀼 𑀓𑀺𑀜𑁆𑀘𑀺𑀧𑀺.

𑁮𑁪𑁩. 𑀉𑀧𑁆𑀧𑀢𑁆𑀢𑀺𑀓𑁆𑀓𑀫𑀫𑀺𑀘𑁆𑀘𑁂𑀯𑀁, 𑀲𑀫𑁆𑀪𑀯𑀸𑀲𑀫𑁆𑀪𑀯𑀫𑁆𑀧𑀺 𑀘;

𑀓𑀮𑀸𑀧𑀸𑀦𑀜𑁆𑀘 𑀭𑀽𑀧𑀸𑀦𑀁, 𑀬𑀣𑀸𑀬𑁄𑀕𑀁 𑀯𑀺𑀪𑀸𑀯𑀬𑁂𑀢𑀺.

𑀇𑀢𑀺 𑀭𑀽𑀧𑀯𑀺𑀪𑀸𑀕𑁂 𑀉𑀧𑁆𑀧𑀢𑁆𑀢𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀏𑀓𑀯𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.