𑀤𑁆𑀯𑀸𑀯𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄

𑁨𑁨. 𑀧𑀓𑀺𑀡𑁆𑀡𑀓𑀓𑀣𑀸

𑁮𑁪𑁪. 𑀇𑀢𑁆𑀣𑀁 𑀭𑀽𑀧𑀸𑀦𑀫𑀼𑀧𑁆𑀧𑀢𑁆𑀢𑀺𑀁, 𑀤𑀻𑀧𑁂𑀢𑁆𑀯𑀸 𑀤𑀸𑀦𑀺 𑀯𑀼𑀘𑁆𑀘𑀢𑀺;

𑀧𑀯𑀢𑁆𑀢𑀺𑀓𑁄𑀲𑀮𑁆𑀮𑀢𑁆𑀣𑀸𑀬, 𑀢𑀢𑁆𑀣𑁂𑀯𑁂𑀢𑀁 𑀧𑀓𑀺𑀡𑁆𑀡𑀓𑀁.

𑁮𑁪𑁫. 𑀤𑀼𑀯𑀺𑀥𑀸 𑀲𑀦𑁆𑀥𑀺𑀬𑁄 𑀢𑀢𑁆𑀣, 𑀫𑀺𑀲𑁆𑀲𑀸𑀫𑀺𑀲𑁆𑀲𑀯𑀺𑀪𑀸𑀕𑀢𑁄;

𑀢𑀺𑀯𑀺𑀥𑀸𑀧𑀺 𑀘𑁂𑀓𑀘𑀢𑀼-𑀧𑀜𑁆𑀘𑀯𑁄𑀓𑀸𑀭𑀪𑁂𑀤𑀢𑁄.

𑁮𑁪𑁬. 𑀭𑀽𑀧𑀫𑀢𑁆𑀢𑀸 𑀅𑀲𑀜𑁆𑀜𑀻𑀦𑀁, 𑀦𑀸𑀫𑀸𑀪𑀸𑀯𑀸 𑀅𑀫𑀺𑀲𑁆𑀲𑀺𑀢𑀸;

𑀦𑀸𑀫𑀫𑀢𑁆𑀢𑀸 𑀅𑀭𑀽𑀧𑀻𑀦𑀁, 𑀭𑀽𑀧𑀸𑀪𑀸𑀯𑀸𑀢𑀺 𑀘 𑀤𑁆𑀯𑀺𑀥𑀸.

𑁮𑁪𑁭. 𑀓𑀸𑀫𑀸𑀯𑀘𑀭𑀺𑀓𑀸 𑀘𑁂𑀯, 𑀭𑀽𑀧𑀸𑀯𑀘𑀭𑀺𑀓𑀸𑀢𑀺 𑀘;

𑀤𑀼𑀯𑀺𑀥𑀸 𑀫𑀺𑀲𑁆𑀲𑀺𑀢𑀸 𑀘𑁂𑀢𑀺, 𑀪𑀯𑀦𑁆𑀢𑀺 𑀘 𑀘𑀢𑀼𑀩𑁆𑀩𑀺𑀥𑀸.

𑁮𑁪𑁮. 𑀏𑀓𑀘𑁆𑀘𑀢𑀼𑀯𑁄𑀓𑀸𑀭𑀸 𑀘, 𑀅𑀫𑀺𑀲𑁆𑀲𑀸 𑀧𑀜𑁆𑀘 𑀲𑀦𑁆𑀥𑀺𑀬𑁄;

𑀙𑀩𑁆𑀩𑀻𑀲𑀢𑀺𑀯𑀺𑀥𑀸 𑀫𑀺𑀲𑁆𑀲𑀸, 𑀧𑀜𑁆𑀘𑀯𑁄𑀓𑀸𑀭𑀲𑀦𑁆𑀥𑀺𑀬𑁄.

𑁮𑁪𑁯. 𑀇𑀢𑁆𑀣𑀁 𑀪𑀽𑀫𑀺𑀧𑁆𑀧𑀪𑁂𑀤𑁂𑀦, 𑀏𑀓𑀢𑀺𑀁𑀲𑀯𑀺𑀥𑀸𑀧𑀺 𑀘;

𑀲𑀦𑁆𑀢𑀢𑀺𑀭𑀸𑀲𑀺𑀪𑁂𑀤𑁂𑀦, 𑀲𑀺𑀬𑀼𑀁 𑀢𑀺𑀁𑀲𑀯𑀺𑀥𑀸 𑀓𑀣𑀁.

𑁮𑁫𑁦. 𑀭𑀽𑀧𑀲𑀦𑁆𑀢𑀢𑀺𑀲𑀻𑀲𑀸𑀦𑀁,

𑀭𑀸𑀲𑀬𑁄 𑀲𑀢𑁆𑀢𑀯𑀻𑀲𑀢𑀺;

𑀯𑀼𑀢𑁆𑀢𑀸 𑀓𑀸𑀫𑁂 𑀯𑀲𑀸 𑀢𑁂𑀲𑀁,

𑀲𑀢𑁆𑀢𑀓𑀸 𑀓𑀸𑀫𑀲𑀦𑁆𑀥𑀺𑀬𑁄.

𑁮𑁫𑁧. 𑀯𑁂𑀤𑀦𑀸𑀲𑀜𑁆𑀜𑀸𑀲𑀗𑁆𑀔𑀸𑀭-𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀲𑀗𑁆𑀕𑀳𑀸;

𑀲𑀩𑁆𑀩𑀢𑁆𑀣𑀸𑀧𑀺 𑀘𑀢𑀲𑁆𑀲𑁄𑀯, 𑀦𑀸𑀫𑀲𑀦𑁆𑀢𑀢𑀺𑀬𑁄 𑀲𑀺𑀬𑀼𑀁.

𑁮𑁫𑁨. 𑀇𑀘𑁆𑀘𑀼𑀪𑀺𑀦𑁆𑀦𑀁 𑀯𑀲𑀸 𑀳𑁄𑀦𑁆𑀢𑀺, 𑀢𑀢𑁆𑀣𑁂𑀓𑀸𑀤𑀲𑀓𑀸𑀤𑀬𑁄;

𑀲𑀦𑁆𑀢𑀢𑀺𑀭𑀸𑀲𑀬𑁄 𑀧𑀼𑀩𑁆𑀩𑁂, 𑀯𑀺𑀪𑀢𑁆𑀢𑀸 𑀲𑀢𑁆𑀢𑀓𑀸𑀤𑀬𑁄.

𑁮𑁫𑁩. 𑀏𑀓𑀸𑀤𑀲𑀓𑀤𑀲𑀓-𑀦𑀯𑀝𑁆𑀞𑀲𑀢𑁆𑀢𑀓𑀸 𑀲𑀺𑀬𑀼𑀁;

𑀙𑀓𑁆𑀓𑁂𑀦 𑀲𑀤𑁆𑀥𑀺𑀁 𑀯𑀺𑀜𑁆𑀜𑁂𑀬𑁆𑀬𑀸, 𑀢𑀲𑁆𑀫𑀸 𑀢𑀢𑁆𑀣 𑀙 𑀲𑀗𑁆𑀕𑀳𑀸.

𑁮𑁫𑁪. 𑀅𑀝𑁆𑀞 𑀲𑀦𑁆𑀢𑀢𑀺𑀬𑁄 𑀳𑁄𑀦𑁆𑀢𑀺, 𑀭𑀽𑀧𑀮𑁄𑀓𑁂𑀦 𑀫𑀺𑀲𑁆𑀲𑀺𑀢𑀸;

𑀅𑀝𑁆𑀞𑀓𑁄 𑀭𑀸𑀲𑀺 𑀢𑀢𑁆𑀣𑁂𑀓𑁄, 𑀢𑀲𑁆𑀫𑀸 𑀲𑀦𑁆𑀢𑀢𑀺 𑀯𑀼𑀘𑁆𑀘𑀢𑀺.

𑁮𑁫𑁫. 𑀚𑀻𑀯𑀺𑀢𑀦𑀯𑀓𑁄 𑀢𑁆𑀯𑁂𑀓𑁄, 𑀅𑀲𑀜𑁆𑀜𑀻 𑀧𑀝𑀺𑀲𑀦𑁆𑀥𑀺𑀬𑀁;

𑀅𑀭𑀽𑀧𑀻𑀦𑀁 𑀘𑀢𑀲𑁆𑀲𑁄𑀧𑀺, 𑀦𑀸𑀫𑀲𑀦𑁆𑀢𑀢𑀺𑀬𑁄 𑀲𑀺𑀬𑀼𑀁.

𑁮𑁫𑁬. 𑀇𑀘𑁆𑀘𑁂𑀓𑀓𑀘𑀢𑀼𑀓𑁆𑀓𑀸𑀦𑀁, 𑀯𑀲𑁂𑀦 𑀤𑁆𑀯𑁂 𑀅𑀫𑀺𑀲𑁆𑀲𑀺𑀢𑀸;

𑀅𑀝𑁆𑀞𑀯𑀻𑀲𑀜𑁆𑀘 𑀫𑀺𑀲𑁆𑀲𑀸𑀢𑀺, 𑀢𑀺𑀁𑀲𑁂𑀯 𑀳𑁄𑀦𑁆𑀢𑀺 𑀲𑀦𑁆𑀥𑀺𑀬𑁄.

𑁮𑁫𑁭. 𑀏𑀓𑀼𑀧𑁆𑀧𑀸𑀤𑀦𑀺𑀭𑁄𑀥𑀸 𑀘, 𑀅𑀫𑀺𑀲𑁆𑀲𑀸 𑀢𑀢𑁆𑀣 𑀭𑀸𑀲𑀬𑁄;

𑀫𑀺𑀲𑁆𑀲𑀺𑀢𑀸𑀦𑀁 𑀯𑀺𑀪𑀸𑀕𑁄𑀬𑀁, 𑀬𑀣𑀸𑀬𑁄𑀕𑀁 𑀓𑀣𑀻𑀬𑀢𑀺.

𑁮𑁫𑁮. 𑀉𑀧𑁆𑀧𑀸𑀤𑀝𑁆𑀞𑀺𑀢𑀺𑀪𑀗𑁆𑀕𑀸𑀦𑀁, 𑀯𑀲𑀸 𑀢𑀻𑀡𑀺 𑀔𑀡𑀸𑀦𑀺𑀧𑀺;

𑀲𑀫𑀸𑀦𑀸𑀦𑁂𑀯 𑀦𑀸𑀫𑀸𑀦𑀁, 𑀏𑀓𑀘𑀺𑀢𑁆𑀢𑀓𑁆𑀔𑀡𑀁 𑀫𑀢𑀁.

𑁮𑁫𑁯. 𑀢𑀼𑀮𑁆𑀬𑀫𑀼𑀧𑁆𑀧𑀸𑀤𑀪𑀗𑁆𑀕𑀸𑀦𑀁, 𑀭𑀽𑀧𑀸𑀦𑀫𑁆𑀧𑀺 𑀔𑀡𑀤𑁆𑀯𑀬𑀁;

𑀏𑀓𑀽𑀦𑀧𑀜𑁆𑀜𑀸𑀲𑀫𑀢𑁆𑀢𑀁, 𑀞𑀺𑀢𑀺𑀓𑁆𑀔𑀡𑀫𑀼𑀤𑀻𑀭𑀺𑀢𑀁.

𑁮𑁬𑁦. 𑀦𑀸𑀫𑀭𑀽𑀧𑀸𑀦𑀫𑀼𑀧𑁆𑀧𑀸𑀤𑁄, 𑀪𑀗𑁆𑀕𑁄𑀧𑀺 𑀳𑀺 𑀲𑀫𑁄 𑀫𑀢𑁄;

𑀤𑀦𑁆𑀥𑀁 𑀳𑀺 𑀯𑀢𑁆𑀢𑀺𑀓𑀁 𑀭𑀽𑀧𑀁, 𑀦𑀸𑀫𑀁 𑀢𑀼 𑀮𑀳𑀼𑀯𑀢𑁆𑀢𑀺𑀓𑀁.

𑁮𑁬𑁧. 𑀢𑀣𑀸 𑀳𑀺 𑀭𑀽𑀧𑁂 𑀢𑀺𑀝𑁆𑀞𑀦𑁆𑀢𑁂, 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀢𑀼 𑀲𑁄𑀴𑀲;

𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀧𑀯𑀢𑁆𑀢𑀺𑀢𑁆𑀯𑀸, 𑀪𑀺𑀚𑁆𑀚𑀦𑁆𑀢𑀺 𑀘 𑀮𑀳𑀼𑀁 𑀮𑀳𑀼𑀁.

𑁮𑁬𑁨. 𑀢𑀲𑁆𑀫𑀸 𑀳𑀺 𑀏𑀓𑀧𑀜𑁆𑀜𑀸𑀲-𑀔𑀡𑀭𑀽𑀧𑀓𑁆𑀔𑀡𑀁 𑀢𑀣𑀸;

𑀲𑀢𑁆𑀢𑀭𑀲𑀘𑀺𑀢𑁆𑀢𑀓𑁆𑀔𑀡𑀁, 𑀢𑀺𑀔𑀡𑀦𑁆𑀢𑀺 𑀘 𑀯𑀼𑀘𑁆𑀘𑀢𑀺.

𑁮𑁬𑁩. 𑀘𑀺𑀢𑁆𑀢𑀓𑁆𑀔𑀡𑀁 𑀳𑀺 𑀢𑀺𑀡𑁆𑀡𑀦𑁆𑀦𑀁, 𑀢𑀢𑁆𑀣 𑀯𑀺𑀜𑁆𑀜𑀢𑁆𑀢𑀺𑀓𑀤𑁆𑀯𑀬𑀁;

𑀮𑀓𑁆𑀔𑀡𑀢𑁆𑀢𑀬𑀭𑀽𑀧𑀁 𑀢𑀼, 𑀲𑀮𑀓𑁆𑀔𑀡𑀯𑀯𑀢𑁆𑀣𑀺𑀢𑀁.

𑁮𑁬𑁪. 𑀢𑀲𑁆𑀫𑀸 𑀳𑀺𑀢𑁆𑀯𑀸 𑀤𑁆𑀯𑀬𑀜𑁆𑀘𑁂𑀢𑀁, 𑀩𑀸𑀯𑀻𑀲𑀢𑀺𑀯𑀺𑀥𑀫𑁆𑀧𑀺 𑀘;

𑀭𑀽𑀧𑀁 𑀦𑀸𑀫 𑀘𑀢𑀼𑀓𑁆𑀓𑀜𑁆𑀘, 𑀲𑀮𑀓𑁆𑀔𑀡𑀦𑀺𑀬𑀸𑀫𑀺𑀢𑀁.

𑁮𑁬𑁫. 𑀏𑀓𑀼𑀧𑁆𑀧𑀸𑀤𑀦𑀺𑀭𑁄𑀥𑀸 𑀘, 𑀢𑀢𑁆𑀣 𑀢𑀼𑀮𑁆𑀬𑀓𑁆𑀔𑀡𑀸 𑀫𑀢𑀸;

𑀅𑀢𑀼𑀮𑁆𑀬𑀓𑁆𑀔𑀡𑀥𑀫𑁆𑀫𑀸𑀦𑀁, 𑀲𑀺𑀬𑀸 𑀪𑁂𑀤𑀁 𑀬𑀣𑀸𑀭𑀳𑀁.

𑁮𑁬𑁬. 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀚𑀸𑀢𑀁, 𑀢𑀲𑁆𑀫𑀸 𑀭𑀽𑀧𑀁 𑀢𑀢𑁄 𑀧𑀭𑀁;

𑀲𑀢𑁆𑀢𑀭𑀲𑀫𑀘𑀺𑀢𑁆𑀢𑀲𑁆𑀲, 𑀪𑀗𑁆𑀕𑁂𑀦 𑀲𑀳 𑀪𑀺𑀚𑁆𑀚𑀢𑀺.

𑁮𑁬𑁭. 𑀢𑀲𑁆𑀲 𑀞𑀺𑀢𑀺𑀓𑁆𑀔𑀡𑁂 𑀚𑀸𑀢𑀁, 𑀭𑀽𑀧𑀫𑁆𑀧𑀺 𑀘 𑀢𑀢𑁄 𑀧𑀭𑀁;

𑀅𑀝𑁆𑀞𑀸𑀭𑀲𑀫𑀘𑀺𑀢𑁆𑀢𑀲𑁆𑀲, 𑀉𑀧𑁆𑀧𑀸𑀤𑁂 𑀧𑀦 𑀪𑀺𑀚𑁆𑀚𑀢𑀺.

𑁮𑁬𑁮. 𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂 𑀚𑀸𑀢𑀁, 𑀭𑀽𑀧𑀫𑁆𑀧𑀺 𑀘 𑀢𑀢𑁄 𑀧𑀭𑀁;

𑀅𑀝𑁆𑀞𑀸𑀭𑀲𑀫𑀘𑀺𑀢𑁆𑀢𑀲𑁆𑀲, 𑀞𑀺𑀢𑀺𑀓𑀸𑀮𑁂𑀲𑀼 𑀪𑀺𑀚𑁆𑀚𑀢𑀺.

𑁮𑁬𑁯. 𑀢𑀣𑀸 𑀤𑀼𑀢𑀺𑀬𑀘𑀺𑀢𑁆𑀢𑀲𑁆𑀲, 𑀉𑀧𑁆𑀧𑀸𑀤𑀫𑁆𑀳𑀺 𑀲𑀫𑀼𑀝𑁆𑀞𑀺𑀢𑀁;

𑀅𑀝𑁆𑀞𑀸𑀭𑀲𑀫𑀘𑀺𑀢𑁆𑀢𑀲𑁆𑀲, 𑀪𑀗𑁆𑀕𑁂𑀦 𑀲𑀳 𑀪𑀺𑀚𑁆𑀚𑀢𑀺.

𑁮𑁭𑁦. 𑀇𑀢𑀺 𑀯𑀼𑀢𑁆𑀢𑀦𑀺𑀬𑀸𑀫𑁂𑀦, 𑀲𑀚𑀸𑀢𑀺𑀓𑁆𑀔𑀡𑀢𑁄 𑀧𑀭𑀁;

𑀞𑀢𑁆𑀯𑀸 𑀏𑀓𑀽𑀦𑀧𑀜𑁆𑀜𑀸𑀲, 𑀔𑀡𑀸𑀦𑀺 𑀧𑀼𑀦 𑀪𑀺𑀚𑁆𑀚𑀢𑀺.

𑁮𑁭𑁧. 𑀢𑀲𑁆𑀫𑀸 𑀏𑀓𑀽𑀦𑀧𑀜𑁆𑀜𑀸𑀲, 𑀓𑀮𑀸𑀧𑀸 𑀲𑀳 𑀯𑀢𑁆𑀢𑀭𑁂;

𑀏𑀓𑁄 𑀚𑀸𑀬𑀢𑀺 𑀏𑀓𑁄 𑀘, 𑀪𑀺𑀚𑁆𑀚𑀢𑀻𑀢𑀺 𑀘 𑀲𑀩𑁆𑀩𑀣𑀸.

𑁮𑁭𑁨. 𑀏𑀓𑀲𑀦𑁆𑀢𑀢𑀺𑀲𑀫𑁆𑀩𑀦𑁆𑀥𑀸, 𑀓𑀮𑀸𑀧𑀸 𑀲𑀳 𑀓𑀫𑁆𑀫𑀚𑀸;

𑀬𑀣𑀸𑀦𑀼𑀧𑀼𑀩𑁆𑀩𑀖𑀝𑀺𑀢𑀸, 𑀏𑀓𑀧𑀜𑁆𑀜𑀸𑀲 𑀮𑀩𑁆𑀪𑀭𑁂.

𑁮𑁭𑁩. 𑀲𑀢𑁆𑀢𑀯𑀻𑀲 𑀧𑀦𑀺𑀘𑁆𑀘𑁂𑀯𑀁, 𑀓𑀸𑀫𑁂 𑀤𑁆𑀯𑁂 𑀭𑀽𑀧𑀪𑀽𑀫𑀺𑀬𑀁;

𑀭𑀽𑀧𑀲𑀦𑁆𑀢𑀢𑀺𑀲𑀻𑀲𑀸𑀦𑀁, 𑀭𑀸𑀲𑀬𑁄 𑀲𑀢𑁆𑀢𑀓𑀸𑀤𑀬𑁄.

𑁮𑁭𑁪. 𑀏𑀓𑀽𑀦𑀢𑀺𑀁𑀲 𑀲𑀩𑁆𑀩𑁂𑀧𑀺, 𑀓𑀫𑁆𑀫𑀚𑀸𑀢𑀸 𑀬𑀣𑀸𑀭𑀳𑀁;

𑀏𑀓𑀧𑀜𑁆𑀜𑀸𑀲 𑀖𑀝𑀺𑀓𑀸, 𑀧𑀯𑀢𑁆𑀢𑀦𑁆𑀢𑀺 𑀔𑀡𑁂 𑀔𑀡𑁂.

𑁮𑁭𑁫. 𑀢𑀢𑁆𑀣 𑀲𑀦𑁆𑀥𑀺𑀓𑁆𑀔𑀡𑁂 𑀚𑀸𑀢𑀁, 𑀲𑀢𑁆𑀢𑀭𑀲𑀫𑀘𑁂𑀢𑀲𑁄;

𑀉𑀧𑁆𑀧𑀸𑀤𑁂 𑀪𑀺𑀚𑁆𑀚𑀢𑀺𑀘𑁆𑀘𑁂𑀯𑀁, 𑀯𑀼𑀢𑁆𑀢𑁄 𑀅𑀝𑁆𑀞𑀓𑀣𑀸𑀦𑀬𑁄.

𑁮𑁭𑁬. 𑀢𑀁 𑀦𑀬𑀁 𑀧𑀝𑀺𑀩𑀸𑀳𑀺𑀢𑁆𑀯𑀸, 𑀘𑀺𑀢𑁆𑀢𑁂𑀦 𑀲𑀳 𑀪𑀺𑀚𑁆𑀚𑀢𑀺;

𑀘𑀺𑀢𑁆𑀢𑁂𑀦 𑀲𑀳 𑀚𑀸𑀢𑀦𑁆𑀢𑀺, 𑀯𑀼𑀢𑁆𑀢𑀫𑀸𑀘𑀭𑀺𑀬𑁂𑀦 𑀳𑀺.

𑁮𑁭𑁭. 𑀆𑀦𑀸𑀧𑀸𑀦𑀢𑀓𑁆𑀓𑀘𑀸𑀭𑀸, 𑀏𑀓𑀼𑀧𑁆𑀧𑀸𑀤𑀦𑀺𑀭𑁄𑀥𑀓𑀸;

𑀯𑀼𑀢𑁆𑀢𑀸 𑀳𑀺 𑀬𑀫𑀓𑁂 𑀓𑀸𑀬𑀯𑀘𑀻𑀲𑀗𑁆𑀔𑀸𑀭𑀦𑀸𑀫𑀓𑀸.

𑁮𑁭𑁮. 𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑁆𑀔𑀡𑁂 𑀚𑀸𑀢𑀸, 𑀉𑀢𑀼 𑀢𑀲𑁆𑀲 𑀞𑀺𑀢𑀺𑀓𑁆𑀔𑀡𑁂;

𑀭𑀽𑀧𑀁 𑀚𑀦𑁂𑀢𑀺 𑀢𑀢𑁆𑀣𑀸𑀧𑀺, 𑀉𑀢𑀼 𑀪𑀗𑁆𑀕𑀓𑁆𑀔𑀡𑁂𑀧𑀺 𑀘.

𑁮𑁭𑁯. 𑀅𑀦𑀼𑀧𑀼𑀩𑁆𑀩𑀓𑁆𑀓𑀫𑁂𑀦𑁂𑀯𑀁, 𑀚𑀸𑀢𑀁 𑀭𑀽𑀧𑀁 𑀢𑀣𑀸𑀧𑀭𑀁;

𑀅𑀝𑁆𑀞𑀸𑀭𑀲𑀫𑀉𑀧𑁆𑀧𑀸𑀤𑀝𑁆𑀞𑀺𑀢𑀺𑀆𑀤𑀻𑀲𑀼 𑀪𑀺𑀚𑁆𑀚𑀢𑀺.

𑁮𑁮𑁦. 𑀇𑀢𑁆𑀣𑀁 𑀓𑀮𑀸𑀧𑀸 𑀖𑀝𑀺𑀢𑀸, 𑀉𑀢𑀼𑀚𑀸𑀳𑀸𑀭𑀚𑀸𑀧𑀺 𑀘;

𑀏𑀓𑀲𑀦𑁆𑀢𑀢𑀺𑀲𑀫𑁆𑀩𑀦𑁆𑀥𑀸, 𑀏𑀓𑀧𑀜𑁆𑀜𑀸𑀲 𑀮𑀩𑁆𑀪𑀭𑁂.

𑁮𑁮𑁧. 𑀓𑀮𑀸𑀧𑀸 𑀘𑀺𑀢𑁆𑀢𑀚𑀸 𑀬𑀲𑁆𑀫𑀸, 𑀉𑀧𑁆𑀧𑀸𑀤𑀓𑁆𑀔𑀡𑀲𑀫𑁆𑀪𑀽𑀢𑀸;

𑀖𑀝𑀺𑀓𑀸 𑀲𑀳 𑀮𑀩𑁆𑀪𑀦𑁆𑀢𑀺, 𑀢𑀲𑁆𑀫𑀸 𑀲𑀢𑁆𑀢𑀭𑀲𑁂𑀯 𑀢𑁂.

𑁮𑁮𑁨. 𑀲𑀩𑁆𑀩𑁂𑀧𑀺 𑀭𑀽𑀧𑀚𑀦𑀓𑀸, 𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀬𑀣𑀸𑀲𑀓𑀁;

𑀚𑀦𑁂𑀦𑁆𑀢𑀺 𑀞𑀺𑀢𑀺𑀪𑀗𑁆𑀕𑁂𑀲𑀼, 𑀦 𑀚𑀦𑁂𑀦𑁆𑀢𑀻𑀢𑀺 𑀓𑁂𑀘𑀦𑀸.

𑁮𑁮𑁩. 𑀓𑀼𑀲𑀮𑀸𑀩𑁆𑀬𑀸𑀓𑀢𑀸𑀤𑀻𑀦𑀁, 𑀏𑀓𑀼𑀧𑁆𑀧𑀸𑀤𑀦𑀺𑀭𑁄𑀥𑀢𑀸;

𑀥𑀫𑁆𑀫𑀸𑀦𑀁 𑀬𑀫𑀓𑁂 𑀯𑀼𑀢𑁆𑀢𑀸, 𑀇𑀢𑀺 𑀧𑀸𑀴𑀺 𑀯𑀤𑀦𑁆𑀢𑀺 𑀘.

𑁮𑁮𑁪. 𑀓𑀼𑀲𑀮𑀸𑀤𑀺𑀓𑀲𑀫𑁆𑀩𑀦𑁆𑀥𑀸, 𑀢𑀢𑁆𑀣 𑀢𑀢𑁆𑀣 𑀳𑀺 𑀤𑁂𑀲𑀺𑀢𑀸;

𑀇𑀢𑀺 𑀯𑀢𑁆𑀯𑀸 𑀧𑀼𑀭𑁂 𑀯𑀼𑀢𑁆𑀢𑀁, 𑀇𑀘𑁆𑀙𑀦𑁆𑀢𑀸𑀘𑀭𑀺𑀬𑀸 𑀦𑀬𑀁.

𑁮𑁮𑁫. 𑀇𑀘𑁆𑀘𑁂𑀯𑀁 𑀘𑀢𑀼𑀲𑀫𑁆𑀪𑀽𑀢𑀸, 𑀭𑀽𑀧𑀲𑀦𑁆𑀢𑀢𑀺𑀭𑀸𑀲𑀬𑁄;

𑀭𑀽𑀧𑀸𑀦𑀺 𑀘 𑀓𑀮𑀸𑀧𑀸 𑀘, 𑀏𑀓𑀸𑀩𑀤𑁆𑀥𑀸 𑀬𑀣𑀸𑀭𑀳𑀁.

𑁮𑁮𑁬. 𑀲𑀼𑀢𑁆𑀢𑀧𑀯𑀢𑁆𑀢𑀫𑀢𑁆𑀢𑀸𑀦𑀁, 𑀲𑀫𑁆𑀩𑀼𑀤𑁆𑀥𑀸𑀦𑀫𑁆𑀧𑀺 𑀧𑀸𑀡𑀺𑀦𑀁;

𑀬𑀸𑀯 𑀫𑀭𑀡𑀓𑀸𑀮𑀸𑀧𑀺, 𑀧𑀯𑀢𑁆𑀢𑀦𑁆𑀢𑀺 𑀦𑀺𑀭𑀦𑁆𑀢𑀭𑀁.

𑁮𑁮𑁭. 𑀆𑀬𑀼𑀓𑁆𑀔𑀬𑀸 𑀘 𑀫𑀭𑀡𑀁, 𑀢𑀣𑀸 𑀓𑀫𑁆𑀫𑀓𑁆𑀔𑀬𑀸 𑀲𑀺𑀬𑀸;

𑀉𑀪𑀺𑀦𑁆𑀦𑀁 𑀯𑀸 𑀔𑀬𑀸 𑀘𑀸𑀣, 𑀉𑀧𑀘𑁆𑀙𑁂𑀤𑀓𑀓𑀫𑁆𑀫𑀼𑀦𑀸.

𑁮𑁮𑁮. 𑀘𑀢𑀼𑀥𑀸𑀧𑀺 𑀫𑀭𑀦𑁆𑀢𑀲𑁆𑀲, 𑀢𑀲𑁆𑀲𑁂𑀯𑀁 𑀢𑀼 𑀬𑀣𑀸𑀭𑀳𑀁;

𑀲𑀢𑁆𑀢𑀭𑀲𑀘𑀺𑀢𑁆𑀢𑀓𑁆𑀔𑀡𑀫𑀢𑁆𑀢𑀲𑁂𑀲𑀫𑁆𑀳𑀺 𑀚𑀻𑀯𑀺𑀢𑁂.

𑁮𑁮𑁯. 𑀉𑀧𑀭𑀺𑀘𑁆𑀘𑀼𑀢𑀺𑀘𑀺𑀢𑁆𑀢𑀲𑁆𑀲, 𑀲𑀢𑁆𑀢𑀭𑀲𑀫𑀘𑁂𑀢𑀲𑁄;

𑀞𑀺𑀢𑀺𑀓𑀸𑀮𑀫𑀼𑀧𑀸𑀤𑀸𑀬, 𑀦 𑀢𑀼 𑀚𑀸𑀬𑀢𑀺 𑀓𑀫𑁆𑀫𑀚𑀁.

𑁮𑁯𑁦. 𑀢𑀲𑁆𑀲𑀼𑀧𑁆𑀧𑀸𑀤𑀓𑁆𑀔𑀡𑁂 𑀚𑀸𑀢𑀁,

𑀭𑀽𑀧𑀜𑁆𑀘 𑀘𑀼𑀢𑀺𑀬𑀸 𑀲𑀳;

𑀪𑀺𑀚𑁆𑀚𑀢𑀻𑀢𑀺 𑀫𑀢𑁄 𑀦𑀸𑀫,

𑀢𑀢𑁄 𑀳𑁄𑀢𑀺 𑀲 𑀧𑀼𑀕𑁆𑀕𑀮𑁄.

𑁮𑁯𑁧. 𑀘𑀺𑀢𑁆𑀢𑀚𑀸𑀳𑀸𑀭𑀚𑀜𑁆𑀘𑀸𑀧𑀺, 𑀦 𑀚𑀸𑀬𑀢𑀺 𑀢𑀢𑁄 𑀧𑀭𑀁;

𑀉𑀢𑀼𑀲𑀫𑁆𑀪𑀯𑀭𑀽𑀧𑀁 𑀢𑀼, 𑀅𑀯𑀲𑀺𑀲𑁆𑀲𑀢𑀺 𑀯𑀸 𑀦 𑀯𑀸.

𑁮𑁯𑁨. 𑀢𑀢𑁄 𑀯𑀼𑀢𑁆𑀢𑀦𑀬𑁂𑀦𑁂𑀯, 𑀫𑀢𑀲𑀢𑁆𑀢𑁄 𑀬𑀣𑀸𑀭𑀳𑀁;

𑀫𑀺𑀲𑁆𑀲𑀸𑀫𑀺𑀲𑁆𑀲𑀸𑀳𑀺 𑀲𑀦𑁆𑀥𑀻𑀳𑀺, 𑀧𑀼𑀦𑀤𑁂𑀯𑁄𑀧𑀧𑀚𑁆𑀚𑀢𑀺.

𑁮𑁯𑁩. 𑀢𑀢𑁄 𑀯𑀼𑀢𑁆𑀢𑀦𑀬𑁂𑀦𑁂𑀯, 𑀏𑀓𑀽𑀦𑀢𑀺𑀁𑀲 𑀓𑀫𑁆𑀫𑀚𑀸;

𑀢𑁂𑀲𑀫𑀼𑀝𑁆𑀞𑀸𑀦𑀺𑀓𑀸 𑀧𑀜𑁆𑀘, 𑀘𑀢𑀼𑀢𑁆𑀢𑀺𑀁𑀲 𑀲𑀫𑀺𑀲𑁆𑀲𑀺𑀢𑀸.

𑁮𑁯𑁪. 𑀓𑀮𑀸𑀧𑀸 𑀭𑀸𑀲𑀬𑁄 𑀳𑁄𑀦𑁆𑀢𑀺, 𑀲𑀢𑁆𑀢𑀯𑀻𑀲𑀢𑀺𑀪𑀽𑀫𑀺𑀲𑀼;

𑀇𑀢𑀺 𑀲𑀩𑁆𑀩𑀧𑀓𑀸𑀭𑁂𑀦, 𑀭𑀽𑀧𑀥𑀫𑁆𑀫𑀸 𑀧𑀓𑀸𑀲𑀺𑀢𑀸𑀢𑀺.

𑀇𑀢𑀺 𑀭𑀽𑀧𑀯𑀺𑀪𑀸𑀕𑁂 𑀧𑀓𑀺𑀡𑁆𑀡𑀓𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀤𑁆𑀯𑀸𑀯𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.

𑀦𑀺𑀝𑁆𑀞𑀺𑀢𑁄 𑀘 𑀲𑀩𑁆𑀩𑀣𑀸𑀧𑀺 𑀭𑀽𑀧𑀯𑀺𑀪𑀸𑀕𑁄.