𑁨𑁦. 𑀓𑀮𑀸𑀧𑀓𑀣𑀸

𑁭𑁫𑁪. 𑀇𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦, 𑀲𑀩𑁆𑀩𑀁 𑀭𑀽𑀧𑀫𑁆𑀧𑀺 𑀧𑀺𑀡𑁆𑀟𑀺𑀢𑀁;

𑀲𑀳𑀯𑀼𑀢𑁆𑀢𑀺𑀦𑀺𑀬𑀸𑀫𑁂𑀦, 𑀏𑀓𑀯𑀻𑀲𑀯𑀺𑀥𑀁 𑀓𑀣𑀁.

𑁭𑁫𑁫. 𑀓𑀫𑁆𑀫𑀁 𑀘𑀺𑀢𑁆𑀢𑁄𑀢𑀼𑀓𑀸𑀳𑀸𑀭𑀲𑀫𑀼𑀝𑁆𑀞𑀸𑀦𑀸 𑀬𑀣𑀸𑀓𑁆𑀓𑀫𑀁;

𑀦𑀯 𑀙 𑀘𑀢𑀼𑀭𑁄 𑀤𑁆𑀯𑁂 𑀘, 𑀓𑀮𑀸𑀧𑀸 𑀏𑀓𑀯𑀻𑀲𑀢𑀺.

𑁭𑁫𑁬. 𑀚𑀻𑀯𑀺𑀢𑀜𑁆𑀘𑀸𑀯𑀺𑀦𑀺𑀩𑁆𑀪𑁄𑀕-𑀭𑀽𑀧𑀸𑀦𑀺 𑀘 𑀬𑀣𑀸𑀓𑁆𑀓𑀫𑀁;

𑀘𑀓𑁆𑀔𑀸𑀤𑀺𑀓𑁂𑀳𑀺 𑀬𑁄𑀚𑁂𑀢𑁆𑀯𑀸, 𑀤𑀲𑀓𑀸 𑀅𑀝𑁆𑀞 𑀤𑀻𑀧𑀺𑀢𑀸.

𑁭𑁫𑁭. 𑀘𑀓𑁆𑀔𑀼𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀤𑀲𑀓𑀸 𑀘 𑀘𑀢𑀼𑀩𑁆𑀩𑀺𑀥𑀸;

𑀓𑀸𑀬𑀺𑀢𑁆𑀣𑀺𑀧𑀼𑀫𑁆𑀪𑀸𑀯𑀯𑀢𑁆𑀣𑀼𑀤𑀲𑀓𑀸 𑀘 𑀢𑀣𑀸𑀧𑀭𑁂.

𑁭𑁫𑁮. 𑀚𑀻𑀯𑀺𑀢𑁂𑀦𑀸𑀯𑀺𑀦𑀺𑀩𑁆𑀪𑁄𑀕𑀭𑀽𑀧𑀸𑀦𑀺 𑀦𑀯𑀓𑀦𑁆𑀢𑀺 𑀘;

𑀦𑀯𑁂𑀢𑁂 𑀓𑀫𑁆𑀫𑀚𑀸 𑀦𑀸𑀫, 𑀓𑀮𑀸𑀧𑀸 𑀲𑀫𑀼𑀤𑀻𑀭𑀺𑀢𑀸.

𑁭𑁫𑁯. 𑀅𑀯𑀺𑀦𑀺𑀩𑁆𑀪𑁄𑀕𑀭𑀽𑀧𑀸𑀦𑀺, 𑀲𑀼𑀤𑁆𑀥𑀝𑁆𑀞𑀓𑀫𑀣𑀸𑀧𑀭𑀁;

𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀦𑀯𑀓𑀁, 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀬𑀸 𑀲𑀳.

𑁭𑁬𑁦. 𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀤𑀲𑀓𑀁, 𑀲𑀤𑁆𑀤𑁂𑀦 𑀲𑀳𑀯𑀼𑀢𑁆𑀢𑀺𑀢𑁄;

𑀮𑀳𑀼𑀢𑀸𑀤𑁂𑀓𑀸𑀤𑀲𑀓𑀁, 𑀢𑀺𑀡𑁆𑀡𑀦𑁆𑀦𑀁 𑀲𑀳 𑀲𑀫𑁆𑀪𑀯𑀸.

𑁭𑁬𑁧. 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀮𑀳𑀼𑀢𑀸𑀤𑀻𑀳𑀺 𑀤𑁆𑀯𑀸𑀤𑀲𑀓𑀁 𑀪𑀯𑁂;

𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀮𑀳𑀼𑀢𑀸𑀤𑀻𑀳𑀺 𑀢𑁂𑀭𑀲𑀓𑀁 𑀢𑀣𑀸.

𑁭𑁬𑁨. 𑀇𑀢𑀺 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸, 𑀓𑀮𑀸𑀧𑀸 𑀙 𑀧𑀓𑀸𑀲𑀺𑀢𑀸;

𑀭𑀽𑀧𑀸𑀓𑀸𑀭𑀯𑀺𑀓𑀸𑀭𑀫𑁆𑀧𑀺, 𑀲𑀗𑁆𑀕𑀳𑁂𑀢𑁆𑀯𑀸 𑀬𑀣𑀸𑀭𑀳𑀁.

𑁭𑁬𑁩. 𑀲𑀼𑀤𑁆𑀥𑀝𑁆𑀞𑀓𑀁 𑀢𑀼 𑀧𑀞𑀫𑀁, 𑀲𑀤𑁆𑀤𑁂𑀦 𑀦𑀯𑀓𑀁 𑀪𑀯𑁂;

𑀮𑀳𑀼𑀢𑀸𑀤𑁂𑀓𑀸𑀤𑀲𑀓𑀁, 𑀮𑀳𑀼𑀢𑀸𑀤𑀻𑀳𑀺 𑀢𑀻𑀳𑀺𑀧𑀺.

𑁭𑁬𑁪. 𑀲𑀤𑁆𑀤𑁂𑀦 𑀮𑀳𑀼𑀢𑀸𑀤𑀻𑀳𑀺, 𑀢𑀣𑀸 𑀤𑁆𑀯𑀸𑀤𑀲𑀓𑀦𑁆𑀢𑀺 𑀘;

𑀓𑀮𑀸𑀧𑀸 𑀉𑀢𑀼𑀲𑀫𑁆𑀪𑀽𑀢𑀸, 𑀘𑀢𑀼𑀥𑀸𑀯 𑀧𑀓𑀺𑀢𑁆𑀢𑀺𑀢𑀸.

𑁭𑁬𑁫. 𑀲𑀼𑀤𑁆𑀥𑀝𑁆𑀞𑀓𑀜𑁆𑀘 𑀧𑀞𑀫𑀁, 𑀆𑀳𑀸𑀭𑀚𑀫𑀣𑀸𑀧𑀭𑀁;

𑀮𑀳𑀼𑀢𑀸𑀤𑁂𑀓𑀸𑀤𑀲𑀓𑀁, 𑀇𑀢𑀺 𑀤𑁆𑀯𑁂 𑀑𑀚𑀚𑀸 𑀫𑀢𑀸.

𑁭𑁬𑁬. 𑀓𑀮𑀸𑀧𑀸𑀦𑀁 𑀧𑀭𑀺𑀘𑁆𑀙𑁂𑀤𑀮𑀓𑁆𑀔𑀡𑀢𑁆𑀢𑀸 𑀯𑀺𑀘𑀓𑁆𑀔𑀡𑀸;

𑀦 𑀓𑀮𑀸𑀧𑀗𑁆𑀕𑀫𑀺𑀘𑁆𑀘𑀸𑀳𑀼, 𑀆𑀓𑀸𑀲𑀁 𑀮𑀓𑁆𑀔𑀡𑀸𑀦𑀺 𑀘.

𑁭𑁬𑁭. 𑀢𑀢𑁆𑀣 𑀘𑁂𑀓𑀽𑀦𑀦𑀯𑀼𑀢𑀺, 𑀢𑁂𑀲𑀝𑁆𑀞𑀺 𑀘 𑀬𑀣𑀸𑀓𑁆𑀓𑀫𑀁;

𑀢𑀸𑀮𑀻𑀲𑁂𑀓𑀽𑀦𑀯𑀻𑀲𑀸 𑀘, 𑀓𑀮𑀸𑀧𑀗𑁆𑀕𑀸𑀦𑀺 𑀢𑀸𑀦𑀺 𑀘.

𑁭𑁬𑁮. 𑀮𑀓𑁆𑀔𑀡𑀸𑀓𑀸𑀲𑀭𑀽𑀧𑀸𑀦𑀺, 𑀓𑀮𑀸𑀧𑁂𑀲𑀼 𑀢𑀳𑀺𑀁 𑀢𑀳𑀺𑀁;

𑀧𑀜𑁆𑀘 𑀧𑀜𑁆𑀘𑁂𑀢𑀺 𑀭𑀽𑀧𑀸𑀦𑀺, 𑀢𑀺𑀲𑀢𑀁 𑀲𑁄𑀴𑀲𑀸𑀥𑀺𑀓𑀁.

𑁭𑁬𑁯. 𑀅𑀕𑀳𑀻𑀢𑀕𑁆𑀕𑀳𑀡𑁂𑀦, 𑀅𑀝𑁆𑀞𑀯𑀻𑀲𑀯𑀺𑀥𑀸𑀦𑀺𑀧𑀺;

𑀭𑀽𑀧𑀓𑁄𑀝𑁆𑀞𑀸𑀲𑀦𑀸𑀫𑁂𑀦, 𑀧𑀜𑁆𑀘𑀯𑀻𑀲𑀢𑀺 𑀪𑀸𑀯𑀬𑁂.

𑁭𑁭𑁦. 𑀪𑀽𑀢𑀢𑁆𑀢𑀬𑀁 𑀢𑀼 𑀨𑁄𑀝𑁆𑀞𑀩𑁆𑀩𑀁, 𑀓𑀢𑁆𑀯𑀸𑀧𑀘𑀬𑀲𑀦𑁆𑀢𑀢𑀺𑀁;

𑀚𑀸𑀢𑀺𑀫𑁂𑀓𑀜𑁆𑀘 𑀓𑀢𑁆𑀯𑀸 𑀯𑀸, 𑀯𑀺𑀦𑀸𑀣 𑀳𑀤𑀬𑀁 𑀢𑀳𑀺𑀁.

𑁭𑁭𑁧. 𑀥𑀫𑁆𑀫𑀲𑀗𑁆𑀕𑀡𑀺𑀬𑀁 𑀳𑁂𑀢𑀁, 𑀭𑀽𑀧𑀓𑀡𑁆𑀟𑁂 𑀲𑀭𑀽𑀧𑀢𑁄;

𑀯𑀢𑁆𑀣𑀼𑀭𑀽𑀧𑀁 𑀦 𑀦𑀺𑀤𑁆𑀤𑀺𑀝𑁆𑀞𑀁, 𑀧𑀝𑁆𑀞𑀸𑀦𑁂 𑀤𑁂𑀲𑀺𑀢𑀁 𑀢𑀼 𑀢𑀁.

𑁭𑁭𑁨. 𑀤𑁆𑀯𑁂 𑀲𑀤𑁆𑀤𑀦𑀯𑀓𑀸 𑀘𑁂𑀯,

𑀢𑀬𑁄 𑀲𑀼𑀤𑁆𑀥𑀝𑁆𑀞𑀓𑀸𑀧𑀺 𑀘;

𑀤𑁆𑀯𑁂 𑀤𑁆𑀯𑁂 𑀘𑀺𑀢𑁆𑀢𑁄𑀢𑀼𑀲𑀫𑁆𑀪𑀽𑀢𑀸,

𑀏𑀓𑁄 𑀆𑀳𑀸𑀭𑀚𑁄𑀢𑀺 𑀘.

𑁭𑁭𑁩. 𑀢𑁂𑀲𑀫𑀼𑀝𑁆𑀞𑀸𑀦𑀺𑀓𑀸 𑀧𑀜𑁆𑀘, 𑀓𑀫𑁆𑀫𑀚𑀸𑀦𑀺 𑀦𑀯𑁂𑀢𑀺 𑀘;

𑀭𑀽𑀧𑀭𑀽𑀧𑀯𑀲𑁂𑀦𑁂𑀢𑁂, 𑀓𑀮𑀸𑀧𑀸 𑀘𑀼𑀤𑁆𑀤𑀲𑁂𑀭𑀺𑀢𑀸.

𑁭𑁭𑁪. 𑀤𑀲𑀓𑁂𑀲𑁆𑀯𑁂𑀯 𑀲𑀗𑁆𑀕𑀬𑁆𑀳, 𑀚𑀻𑀯𑀺𑀢𑀦𑀯𑀓𑀁 𑀢𑀳𑀺𑀁;

𑀪𑀸𑀯𑀤𑁆𑀤𑀲𑀓𑀫𑁂𑀓𑀁 𑀯𑀸, 𑀓𑀢𑁆𑀯𑀸 𑀯𑀢𑁆𑀣𑀼𑀁 𑀯𑀺𑀦𑀸 𑀢𑀣𑀸.

𑁭𑁭𑁫. 𑀲𑀤𑁆𑀤𑀸 𑀘𑀺𑀢𑁆𑀢𑁄𑀢𑀼𑀚𑀸 𑀤𑁆𑀯𑁂𑀯, 𑀢𑁂𑀲𑀫𑀼𑀝𑁆𑀞𑀸𑀦𑀺𑀓𑀸 𑀢𑀬𑁄;

𑀲𑀼𑀤𑁆𑀥𑀝𑁆𑀞𑀓𑀸 𑀘 𑀲𑀢𑁆𑀢𑁂𑀯, 𑀓𑀫𑁆𑀫𑀚𑀸 𑀤𑀲𑀓𑀸𑀦𑀺 𑀘.

𑁭𑁭𑁬. 𑀙𑀦𑁆𑀦𑀯𑀽𑀢𑀺𑀯𑀺𑀥𑀁 𑀢𑀢𑁆𑀣, 𑀭𑀽𑀧𑀁 𑀪𑀸𑀲𑀦𑁆𑀢𑀺 𑀧𑀡𑁆𑀟𑀺𑀢𑀸;

𑀅𑀕𑀳𑀻𑀢𑀕𑁆𑀕𑀳𑀡𑁂𑀦, 𑀅𑀝𑁆𑀞𑀸𑀭𑀲𑀯𑀺𑀥𑀁 𑀪𑀯𑁂.

𑁭𑁭𑁭. 𑀢𑁂𑀲𑀫𑁂𑀯 𑀓𑀮𑀸𑀧𑀸𑀦𑀁, 𑀲𑀢𑁆𑀢𑀓𑀘𑁆𑀙𑀓𑁆𑀓𑀧𑀜𑁆𑀘𑀓𑀸;

𑀘𑀢𑀼𑀓𑁆𑀓𑀸 𑀘 𑀢𑀺𑀓𑀤𑁆𑀯𑀺𑀓𑀸, 𑀏𑀓𑀓𑀸 𑀘 𑀬𑀣𑀸𑀭𑀳𑀁.

𑁭𑁭𑁮. 𑀤𑁆𑀯𑁂 𑀲𑀢𑁆𑀢 𑀦𑀯 𑀙 𑀢𑀬𑁄, 𑀢𑀬𑁄𑀧𑀺 𑀘 𑀬𑀣𑀸𑀓𑁆𑀓𑀫𑀁;

𑀘𑀢𑁆𑀢𑀸𑀭𑁄𑀢𑀺 𑀘𑀢𑀼𑀢𑁆𑀢𑀺𑀁𑀲, 𑀲𑀳𑀯𑀼𑀢𑁆𑀢𑀺𑀓𑀭𑀸𑀲𑀬𑁄.

𑁭𑁭𑁯. 𑀘𑀓𑁆𑀔𑀼𑀲𑁄𑀢𑀖𑀸𑀦𑀚𑀺𑀯𑁆𑀳𑀸-𑀓𑀸𑀬𑀯𑀢𑁆𑀣𑀼𑀯𑀲𑀸 𑀲𑀺𑀬𑀼𑀁;

𑀇𑀢𑁆𑀣𑀺𑀧𑀼𑀫𑁆𑀪𑀸𑀯𑀤𑀲𑀓𑀲𑀳𑀺𑀢𑀸 𑀲𑀢𑁆𑀢𑀓𑀸 𑀤𑁆𑀯𑀺𑀥𑀸.

𑁭𑁮𑁦. 𑀘𑀓𑁆𑀔𑀼𑀲𑁄𑀢𑀖𑀸𑀦𑀳𑀻𑀦𑀸, 𑀧𑀘𑁆𑀘𑁂𑀓𑀁 𑀤𑁆𑀯𑁂 𑀲𑀪𑀸𑀯𑀓𑀸;

𑀅𑀪𑀸𑀯𑀢𑁄 𑀪𑀸𑀯𑀳𑀻𑀦𑁄, 𑀇𑀢𑁆𑀣𑀁 𑀙𑀓𑁆𑀓𑀸𑀧𑀺 𑀲𑀢𑁆𑀢𑀥𑀸.

𑁭𑁮𑁧. 𑀘𑀓𑁆𑀔𑀼𑀲𑁄𑀢𑀯𑀺𑀳𑀻𑀦𑀸 𑀘,

𑀘𑀓𑁆𑀔𑀼𑀖𑀸𑀦𑀯𑀺𑀳𑀻𑀦𑀓𑀸;

𑀲𑁄𑀢𑀖𑀸𑀦𑀯𑀺𑀳𑀻𑀦𑀸 𑀘,

𑀲𑀪𑀸𑀯𑀸 𑀤𑁆𑀯𑁂 𑀢𑀬𑁄 𑀢𑀬𑁄.

𑁭𑁮𑁨. 𑀘𑀓𑁆𑀔𑀸𑀤𑁂𑀓𑁂𑀓𑀢𑁄 𑀳𑀻𑀦𑀸,

𑀢𑀺𑀯𑀺𑀥𑀸𑀧𑀺 𑀅𑀪𑀸𑀯𑀢𑁄;

𑀇𑀘𑁆𑀘𑁂𑀯𑀁 𑀧𑀜𑁆𑀘𑀓𑀸 𑀦𑀸𑀫,

𑀦𑀯𑀓𑀸 𑀭𑀸𑀲𑀬𑁄 𑀲𑀺𑀬𑀼𑀁.

𑁭𑁮𑁩. 𑀘𑀓𑁆𑀔𑀸𑀤𑀺𑀢𑁆𑀢𑀬𑀳𑀻𑀦𑀸𑀯, 𑀏𑀓𑀢𑁄 𑀤𑁆𑀯𑁂 𑀲𑀪𑀸𑀯𑀓𑀸;

𑀘𑀓𑁆𑀔𑀸𑀤𑀺𑀢𑁆𑀢𑀬𑀢𑁄 𑀤𑁆𑀯𑀻𑀳𑀺, 𑀢𑀬𑁄 𑀳𑀻𑀦𑀸 𑀅𑀪𑀸𑀯𑀓𑀸.

𑁭𑁮𑁪. 𑀭𑀽𑀧𑀮𑁄𑀓𑁂 𑀘𑀓𑁆𑀔𑀼𑀲𑁄𑀢-𑀯𑀢𑁆𑀣𑀼𑀚𑀻𑀯𑀺𑀢𑀦𑀯𑀓𑀸;

𑀘𑀢𑁆𑀢𑀸𑀭𑁄𑀯 𑀓𑀮𑀸𑀧𑀸𑀢𑀺, 𑀘𑀢𑀼𑀓𑁆𑀓𑀸 𑀙 𑀬𑀣𑀸𑀭𑀳𑀁.

𑁭𑁮𑁫. 𑀚𑀺𑀯𑁆𑀳𑀸𑀓𑀸𑀬𑀯𑀢𑁆𑀣𑀼𑀯𑀲𑀸,

𑀅𑀪𑀸𑀯𑁄 𑀤𑁆𑀯𑁂 𑀲𑀪𑀸𑀯𑀓𑀸;

𑀓𑀸𑀬𑀪𑀸𑀯𑀯𑀢𑁆𑀣𑀼𑀯𑀲𑀸,

𑀇𑀢𑀺 𑀳𑁄𑀦𑁆𑀢𑀺 𑀢𑀬𑁄 𑀢𑀺𑀓𑀸.

𑁭𑁮𑁬. 𑀓𑀸𑀬𑀯𑀢𑁆𑀣𑀼𑀯𑀲𑁂𑀦𑁂𑀓𑁄, 𑀤𑁆𑀯𑁂 𑀘 𑀘𑀺𑀢𑁆𑀢𑁄𑀢𑀼𑀲𑀫𑁆𑀪𑀯𑀸;

𑀲𑀤𑁆𑀤𑀦𑀯𑀓𑀝𑁆𑀞𑀓𑀸𑀢𑀺, 𑀤𑀼𑀓𑀸 𑀘 𑀢𑀺𑀯𑀺𑀥𑀸 𑀲𑀺𑀬𑀼𑀁.

𑁭𑁮𑁭. 𑀚𑀻𑀯𑀺𑀢𑀦𑀯𑀓𑀜𑁆𑀘𑁂𑀓𑀁, 𑀢𑁂𑀲𑀫𑀼𑀝𑁆𑀞𑀸𑀦𑀺𑀓𑀸𑀦𑀺 𑀘;

𑀲𑀼𑀤𑁆𑀥𑀝𑁆𑀞𑀓𑀸𑀦𑀺 𑀢𑀻𑀡𑀻𑀢𑀺, 𑀘𑀢𑁆𑀢𑀸𑀭𑁄 𑀏𑀓𑀓𑀸 𑀲𑀺𑀬𑀼𑀁.

𑁭𑁮𑁮. 𑀘𑀢𑀼𑀢𑁆𑀢𑀺𑀁𑀲 𑀧𑀦𑀺𑀘𑁆𑀘𑁂𑀢𑁂, 𑀲𑀦𑁆𑀥𑀺𑀬𑀜𑁆𑀘 𑀧𑀯𑀢𑁆𑀢𑀺𑀬𑀁;

𑀭𑀽𑀧𑀭𑀽𑀧𑀓𑀮𑀸𑀧𑀸𑀦𑀁, 𑀭𑀸𑀲𑀬𑁄 𑀳𑁄𑀦𑁆𑀢𑀺 𑀲𑀫𑁆𑀪𑀯𑀸.

𑁭𑁮𑁯. 𑀲𑀢𑁆𑀢𑀢𑀺 𑀲𑀝𑁆𑀞𑀺𑀫𑀺𑀘𑁆𑀘𑁂𑀯𑀫𑀸𑀤𑀺𑀦𑀸 𑀘 𑀬𑀣𑀸𑀭𑀳𑀁;

𑀓𑀮𑀸𑀧𑀭𑀸𑀲𑀺𑀭𑀽𑀧𑀸𑀦𑀺, 𑀢𑀢𑁆𑀣 𑀢𑀢𑁆𑀣 𑀯𑀺𑀪𑀸𑀯𑀬𑁂.

𑁭𑁯𑁦. 𑀲𑁄𑀴𑀲 𑀧𑀜𑁆𑀘𑀤𑀲𑁂𑀢𑀺𑀆𑀤𑀺𑀪𑁂𑀤𑀯𑀲𑀸𑀧𑀺 𑀘;

𑀅𑀕𑀳𑀻𑀢𑀕𑁆𑀕𑀳𑀡𑁂𑀦, 𑀢𑀢𑁆𑀣 𑀢𑀢𑁆𑀣 𑀯𑀺𑀦𑀺𑀤𑁆𑀤𑀺𑀲𑁂.

𑁭𑁯𑁧. 𑀘𑀢𑀼𑀘𑀢𑁆𑀢𑀸𑀮𑀻𑀲𑀲𑀢𑀁, 𑀓𑀮𑀸𑀧𑀸 𑀳𑁄𑀦𑁆𑀢𑀺 𑀧𑀺𑀡𑁆𑀟𑀺𑀢𑀸;

𑀙𑀩𑁆𑀩𑀻𑀲 𑀢𑀢𑁆𑀣 𑀭𑀽𑀧𑀸𑀦𑀺, 𑀲𑀳𑀲𑁆𑀲𑀜𑁆𑀘 𑀘𑀢𑀼𑀲𑁆𑀲𑀢𑀁.

𑁭𑁯𑁨. 𑀇𑀘𑁆𑀘𑀸𑀧𑀸𑀬𑀘𑀢𑀼𑀓𑁆𑀓𑁂 𑀘, 𑀓𑀸𑀫𑁂 𑀲𑀼𑀕𑀢𑀺𑀲𑀢𑁆𑀢𑀓𑁂;

𑀭𑀽𑀧𑁂 𑀘 𑀧𑀜𑁆𑀘𑀤𑀲𑀓𑁂, 𑀅𑀲𑀜𑁆𑀜𑀸𑀧𑀸𑀬𑀪𑀽𑀫𑀺𑀬𑀁.

𑁭𑁯𑁩. 𑀘𑀢𑀼𑀓𑁄𑀝𑁆𑀞𑀸𑀲𑀺𑀓𑁂𑀲𑁆𑀯𑁂𑀯, 𑀲𑀢𑁆𑀢𑀯𑀻𑀲𑀯𑀺𑀥𑁂𑀲𑀼𑀧𑀺;

𑀚𑀸𑀢𑀺𑀝𑁆𑀞𑀸𑀦𑁂𑀲𑀼 𑀲𑀢𑁆𑀢𑀸𑀦𑀁, 𑀲𑀦𑁆𑀥𑀺𑀬𑀜𑁆𑀘 𑀧𑀯𑀢𑁆𑀢𑀺𑀬𑀁.

𑁭𑁯𑁪. 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀲𑀦𑁆𑀢𑀸𑀦𑁂, 𑀢𑀣𑀸𑀦𑀺𑀦𑁆𑀤𑁆𑀭𑀺𑀬𑀓𑀫𑁆𑀳𑀺 𑀘;

𑀩𑀳𑀺𑀲𑀗𑁆𑀔𑀸𑀭𑀲𑀦𑁆𑀢𑀸𑀦𑁂, 𑀫𑀢𑀓𑀸𑀬𑁂 𑀘 𑀲𑀫𑁆𑀪𑀯𑀸.

𑁭𑁯𑁫. 𑀮𑀩𑁆𑀪𑀫𑀸𑀦𑀓𑀮𑀸𑀧𑀸 𑀘, 𑀓𑀮𑀸𑀧𑀸𑀦𑀜𑁆𑀘 𑀭𑀸𑀲𑀬𑁄;

𑀢𑀢𑁆𑀣 𑀯𑀺𑀢𑁆𑀣𑀸𑀭𑀲𑀗𑁆𑀔𑁂𑀧𑀸, 𑀭𑀽𑀧𑀸𑀦𑀁 𑀕𑀡𑀦𑀸𑀧𑀺 𑀘.

𑁭𑁯𑁬. 𑀏𑀢𑁆𑀣 𑀭𑀽𑀧𑀸 𑀅𑀯𑀼𑀢𑁆𑀢𑀸 𑀳𑀺, 𑀬𑀣𑀸𑀯𑀼𑀢𑁆𑀢𑀸𑀦𑀼𑀲𑀸𑀭𑀢𑁄;

𑀯𑀺𑀢𑁆𑀣𑀸𑀭𑁂𑀢𑁆𑀯𑀸𑀦 𑀯𑀺𑀜𑁆𑀜𑁂𑀬𑁆𑀬𑀸, 𑀲𑀩𑁆𑀩𑀣𑀸𑀧𑀺 𑀘 𑀯𑀺𑀜𑁆𑀜𑀼𑀦𑀸𑀢𑀺.

𑀇𑀢𑀺 𑀭𑀽𑀧𑀯𑀺𑀪𑀸𑀕𑁂 𑀓𑀮𑀸𑀧𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀯𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.