𑀤𑀲𑀫𑁄 𑀧𑀭𑀺𑀘𑁆𑀙𑁂𑀤𑁄

𑁧𑁦. 𑀧𑀪𑁂𑀤𑀓𑀣𑀸

𑁩𑁫𑁨. 𑀏𑀓𑀼𑀧𑁆𑀧𑀸𑀤𑀸 𑀦𑀺𑀭𑁄𑀥𑀸 𑀘, 𑀏𑀓𑀸𑀮𑀫𑁆𑀩𑀡𑀯𑀢𑁆𑀣𑀼𑀓𑀸;

𑀲𑀳𑀕𑀢𑀸 𑀲𑀳𑀚𑀸𑀢𑀸, 𑀲𑀁𑀲𑀝𑁆𑀞𑀸 𑀲𑀳𑀯𑀼𑀢𑁆𑀢𑀺𑀦𑁄.

𑁩𑁫𑁩. 𑀢𑁂𑀧𑀜𑁆𑀜𑀸𑀲 𑀧𑀦𑀺𑀘𑁆𑀘𑁂𑀢𑁂, 𑀲𑀫𑁆𑀧𑀬𑀼𑀢𑁆𑀢𑀸 𑀬𑀣𑀸𑀭𑀳𑀁;

𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸, 𑀅𑀝𑁆𑀞𑀸𑀭𑀲𑀯𑀺𑀥𑀸𑀧𑀺 𑀘.

𑁩𑁫𑁪. 𑀏𑀓𑀥𑀸 𑀙𑀩𑁆𑀩𑀺𑀥𑀸 𑀘𑁂𑀯, 𑀘𑀢𑀼𑀥𑀸 𑀲𑀢𑁆𑀢𑀥𑀸 𑀞𑀺𑀢𑀸;

𑀘𑀺𑀢𑁆𑀢𑀼𑀧𑁆𑀧𑀸𑀤𑀧𑀪𑁂𑀤𑁂𑀦, 𑀪𑀺𑀦𑁆𑀤𑀺𑀢𑀩𑁆𑀩𑀸 𑀯𑀺𑀪𑀸𑀯𑀺𑀦𑀸.

𑁩𑁫𑁫. 𑀅𑀝𑁆𑀞 𑀥𑀫𑁆𑀫𑀸𑀯𑀺𑀦𑀺𑀩𑁆𑀪𑁄𑀕𑀸, 𑀪𑀺𑀦𑁆𑀦𑀸𑀲𑀻𑀢𑀺 𑀦𑀯𑀼𑀢𑁆𑀢𑀭𑀸;

𑀲𑀢𑁆𑀢𑀲𑀢𑀁 𑀤𑀲 𑀤𑁆𑀯𑁂 𑀘, 𑀲𑀩𑁆𑀩𑁂 𑀳𑁄𑀦𑁆𑀢𑀺 𑀲𑀫𑀺𑀲𑁆𑀲𑀺𑀢𑀸.

𑁩𑁫𑁬. 𑀲𑀦𑁆𑀢𑀻𑀭𑀡𑀫𑀦𑁄𑀥𑀸𑀢𑀼, 𑀲𑀺𑀢𑀯𑁄𑀝𑁆𑀞𑀩𑁆𑀩𑀦𑀸 𑀢𑀣𑀸;

𑀅𑀧𑀼𑀜𑁆𑀜𑀸 𑀓𑀸𑀫𑀧𑀼𑀜𑁆𑀜𑀸 𑀘, 𑀫𑀳𑀸𑀧𑀸𑀓𑀸 𑀫𑀳𑀸𑀓𑁆𑀭𑀺𑀬𑀸.

𑁩𑁫𑁭. 𑀧𑀞𑀫𑀚𑁆𑀛𑀸𑀦𑀥𑀫𑁆𑀫𑀸 𑀘, 𑀮𑁄𑀓𑀼𑀢𑁆𑀢𑀭𑀫𑀳𑀕𑁆𑀕𑀢𑀸;

𑀧𑀜𑁆𑀘𑀧𑀜𑁆𑀜𑀸𑀲 𑀲𑀩𑁆𑀩𑁂𑀧𑀺, 𑀯𑀺𑀢𑀓𑁆𑀓𑀸 𑀳𑁄𑀦𑁆𑀢𑀺 𑀪𑁂𑀤𑀺𑀢𑀸.

𑁩𑁫𑁮. 𑀯𑀺𑀘𑀸𑀭𑀸𑀧𑀺 𑀘 𑀢𑁂𑀬𑁂𑀯, 𑀤𑀼𑀢𑀺𑀬𑀚𑁆𑀛𑀸𑀦𑀦𑀸𑀫𑀓𑀸;

𑀏𑀓𑀸𑀤𑀲𑀸𑀧𑀭𑁂 𑀘𑁂𑀢𑀺, 𑀙𑀲𑀝𑁆𑀞𑀺 𑀧𑀭𑀺𑀤𑀻𑀧𑀺𑀢𑀸.

𑁩𑁫𑁯. 𑀅𑀧𑀼𑀜𑁆𑀜𑀸 𑀓𑀸𑀫𑀧𑀼𑀜𑁆𑀜𑀸 𑀘, 𑀫𑀳𑀸𑀧𑀸𑀓𑀸 𑀫𑀳𑀸𑀓𑁆𑀭𑀺𑀬𑀸;

𑀘𑀢𑀼𑀓𑁆𑀓𑀸 𑀘𑁂𑀯 𑀘𑀢𑁆𑀢𑀸𑀭𑁄, 𑀲𑀺𑀢𑀜𑁆𑀘 𑀲𑀼𑀔𑀢𑀻𑀭𑀡𑀁.

𑁩𑁬𑁦. 𑀧𑀞𑀫𑀸𑀤𑀺𑀢𑀺𑀓𑀚𑁆𑀛𑀸𑀦𑀸, 𑀮𑁄𑀓𑀼𑀢𑁆𑀢𑀭𑀫𑀳𑀕𑁆𑀕𑀢𑀸;

𑀇𑀘𑁆𑀘𑁂𑀯𑀫𑁂𑀓𑀧𑀜𑁆𑀜𑀸𑀲, 𑀧𑀻𑀢𑀺𑀬𑁄 𑀳𑁄𑀦𑁆𑀢𑀺 𑀲𑀩𑁆𑀩𑀣𑀸.

𑁩𑁬𑁧. 𑀲𑀺𑀢𑀯𑁄𑀝𑁆𑀞𑀩𑁆𑀩𑀦𑀸 𑀤𑁆𑀯𑁂 𑀘, 𑀲𑀸𑀯𑀚𑁆𑀚𑀸 𑀘𑀸𑀦𑀯𑀚𑁆𑀚𑀓𑀸;

𑀪𑀺𑀦𑁆𑀦𑀫𑁂𑀯𑀁 𑀢𑀼 𑀯𑀻𑀭𑀺𑀬𑀁, 𑀢𑁂𑀲𑀢𑁆𑀢𑀢𑀺𑀯𑀺𑀥𑀁 𑀪𑀯𑁂.

𑁩𑁬𑁨. 𑀲𑀸𑀯𑀚𑁆𑀚𑀸 𑀘𑀸𑀦𑀯𑀚𑁆𑀚𑀸 𑀘, 𑀫𑁄𑀫𑀽𑀳𑀤𑁆𑀯𑀬𑀯𑀚𑁆𑀚𑀺𑀢𑀸;

𑀙𑀦𑁆𑀤𑀸 𑀪𑀯𑀦𑁆𑀢𑀺 𑀲𑀩𑁆𑀩𑁂𑀧𑀺, 𑀲𑀝𑁆𑀞𑀺𑀪𑁂𑀤𑀸 𑀦𑀯𑀼𑀢𑁆𑀢𑀭𑀸.

𑁩𑁬𑁩. 𑀲𑀦𑁆𑀢𑀻𑀭𑀡𑀫𑀦𑁄𑀥𑀸𑀢𑀼, 𑀲𑀺𑀢𑀯𑁄𑀝𑁆𑀞𑀩𑁆𑀩𑀦𑀸 𑀢𑀣𑀸;

𑀲𑀸𑀯𑀚𑁆𑀚𑀸 𑀘𑀸𑀦𑀯𑀚𑁆𑀚𑀸 𑀘, 𑀯𑀺𑀘𑀺𑀓𑀺𑀘𑁆𑀙𑀸𑀯𑀺𑀯𑀚𑁆𑀚𑀺𑀢𑀸.

𑁩𑁬𑁪. 𑀅𑀥𑀺𑀫𑁄𑀓𑁆𑀔𑀸 𑀧𑀦𑀺𑀘𑁆𑀘𑁂𑀯𑀁, 𑀅𑀝𑁆𑀞𑀲𑀢𑁆𑀢𑀢𑀺 𑀪𑁂𑀤𑀺𑀢𑀸;

𑀢𑀺𑀲𑀢𑀁 𑀦𑀯𑀼𑀢𑀺 𑀤𑁆𑀯𑁂 𑀘, 𑀪𑀺𑀦𑁆𑀦𑀸 𑀳𑁄𑀦𑁆𑀢𑀺 𑀧𑀓𑀺𑀡𑁆𑀡𑀓𑀸.

𑁩𑁬𑁫. 𑀏𑀓𑀽𑀦𑀲𑀝𑁆𑀞𑀺 𑀯𑀸 𑀳𑁄𑀦𑁆𑀢𑀺, 𑀲𑀤𑁆𑀥𑀸𑀤𑁂𑀓𑀽𑀦𑀯𑀻𑀲𑀢𑀺;

𑀲𑀳𑀲𑁆𑀲𑀜𑁆𑀘 𑀲𑀢𑀜𑁆𑀘𑁂𑀓𑀁, 𑀏𑀓𑀯𑀻𑀲𑀜𑁆𑀘 𑀲𑀩𑁆𑀩𑀣𑀸.

𑁩𑁬𑁬. 𑀜𑀸𑀡𑁂𑀦 𑀲𑀫𑁆𑀧𑀬𑀼𑀢𑁆𑀢𑀸 𑀘, 𑀓𑀸𑀫𑁂 𑀤𑁆𑀯𑀸𑀤𑀲𑀥𑀸𑀧𑀭𑁂;

𑀧𑀜𑁆𑀘𑀢𑀺𑀁𑀲𑀸𑀢𑀺 𑀧𑀜𑁆𑀜𑀸𑀧𑀺, 𑀲𑀢𑁆𑀢𑀢𑀸𑀮𑀻𑀲𑀥𑀸 𑀓𑀣𑀸.

𑁩𑁬𑁭. 𑀭𑀽𑀧𑀚𑁆𑀛𑀸𑀦𑀘𑀢𑀼𑀓𑁆𑀓𑀸 𑀘, 𑀓𑀸𑀫𑀧𑀼𑀜𑁆𑀜𑀸 𑀫𑀳𑀸𑀓𑁆𑀭𑀺𑀬𑀸;

𑀅𑀝𑁆𑀞𑀯𑀻𑀲𑀧𑁆𑀧𑀫𑀜𑁆𑀜𑁂𑀯𑀁, 𑀙𑀧𑁆𑀧𑀜𑁆𑀜𑀸𑀲 𑀪𑀯𑀦𑁆𑀢𑀺 𑀘.

𑁩𑁬𑁮. 𑀅𑀦𑀼𑀢𑁆𑀢𑀭𑀸 𑀓𑀸𑀫𑀧𑀼𑀜𑁆𑀜𑀸, 𑀢𑀺𑀲𑁆𑀲𑁄 𑀯𑀺𑀭𑀢𑀺𑀬𑁄 𑀧𑀦;

𑀳𑁄𑀦𑁆𑀢𑀺 𑀲𑁄𑀴𑀲𑀥𑀸 𑀪𑀺𑀦𑁆𑀦𑀸, 𑀅𑀝𑁆𑀞𑀢𑀸𑀮𑀻𑀲 𑀧𑀺𑀡𑁆𑀟𑀺𑀢𑀸.

𑁩𑁬𑁯. 𑀧𑀜𑁆𑀘𑀯𑀻𑀲𑀸𑀦𑀯𑀚𑁆𑀚𑁂𑀯𑀁, 𑀲𑀫𑁆𑀧𑀬𑀼𑀢𑁆𑀢𑀸 𑀘𑀢𑀼𑀩𑁆𑀩𑀺𑀥𑀸;

𑀲𑀳𑀲𑁆𑀲𑀤𑁆𑀯𑀺𑀲𑀢𑀜𑁆𑀘𑁂𑀯, 𑀤𑁆𑀯𑀺 𑀘 𑀲𑀢𑁆𑀢𑀢𑀺 𑀪𑁂𑀤𑀢𑁄.

𑁩𑁭𑁦. 𑀘𑀢𑁆𑀢𑀸𑀭𑁄 𑀧𑀸𑀧𑀲𑀸𑀫𑀜𑁆𑀜𑀸, 𑀪𑀺𑀦𑁆𑀦𑀸 𑀤𑁆𑀯𑀸𑀤𑀲𑀥𑀸 𑀧𑀦;

𑀅𑀝𑁆𑀞𑀢𑀸𑀮𑀻𑀲𑀥𑀸 𑀳𑁄𑀦𑁆𑀢𑀺, 𑀢𑁂 𑀲𑀩𑁆𑀩𑁂 𑀧𑀭𑀺𑀧𑀺𑀡𑁆𑀟𑀺𑀢𑀸.

𑁩𑁭𑁧. 𑀮𑁄𑀪𑁄 𑀧𑀦𑀝𑁆𑀞𑀥𑀸 𑀪𑀺𑀦𑁆𑀦𑁄, 𑀣𑀺𑀦𑀫𑀺𑀤𑁆𑀥𑀜𑁆𑀘 𑀧𑀜𑁆𑀘𑀥𑀸;

𑀘𑀢𑀼𑀥𑀸 𑀤𑀺𑀝𑁆𑀞𑀺𑀫𑀸𑀦𑁄 𑀘, 𑀘𑀢𑀼𑀥𑀸 𑀤𑀺𑀝𑁆𑀞𑀺𑀬𑁄 𑀯𑀺𑀲𑀼𑀁.

𑁩𑁭𑁨. 𑀤𑁆𑀯𑀺𑀥𑀸 𑀤𑁄𑀲𑀸𑀤𑀺𑀘𑀢𑁆𑀢𑀸𑀭𑁄, 𑀯𑀺𑀘𑀺𑀓𑀺𑀘𑁆𑀙𑁂𑀓𑀥𑀸𑀢𑀺 𑀘;

𑀲𑀸𑀯𑀚𑁆𑀚𑀸 𑀲𑀢𑁆𑀢𑀥𑀸 𑀯𑀼𑀢𑁆𑀢𑀸, 𑀪𑀺𑀦𑁆𑀦𑀸𑀲𑀻𑀢𑀺 𑀢𑀺𑀓𑀼𑀢𑁆𑀢𑀭𑀸.

𑁩𑁭𑁩. 𑀇𑀘𑁆𑀘𑀝𑁆𑀞𑀸𑀭𑀲𑀥𑀸 𑀯𑀼𑀢𑁆𑀢𑀸, 𑀢𑁂𑀧𑀜𑁆𑀜𑀸𑀲𑀸𑀧𑀺 𑀪𑁂𑀤𑀢𑁄;

𑀤𑁆𑀯𑀺𑀲𑀳𑀲𑁆𑀲𑀜𑁆𑀘 𑀢𑀼 𑀲𑀢𑀁, 𑀪𑀯𑀦𑁆𑀢𑁂𑀓𑀽𑀦𑀲𑀝𑁆𑀞𑀺 𑀘.

𑁩𑁭𑁪. 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀻𑀢𑀺𑀲𑀼𑀔𑁄𑀧𑁂𑀓𑁆𑀔𑀸𑀲𑀼 𑀧𑀜𑁆𑀘𑀲𑀼;

𑀪𑀺𑀦𑁆𑀤𑀺𑀢𑁆𑀯𑀸 𑀛𑀸𑀦𑀪𑁂𑀤𑁂𑀦, 𑀕𑀳𑁂𑀢𑀩𑁆𑀩𑀸 𑀅𑀦𑀼𑀢𑁆𑀢𑀭𑀸.

𑁩𑁭𑁫. 𑀅𑀜𑁆𑀜𑀢𑁆𑀭 𑀧𑀦 𑀲𑀩𑁆𑀩𑀢𑁆𑀣, 𑀦𑀢𑁆𑀣𑀺 𑀪𑁂𑀤𑀧𑁆𑀧𑀬𑁄𑀚𑀦𑀁;

𑀅𑀝𑁆𑀞𑁂𑀯 𑀓𑀲𑁆𑀫𑀸 𑀕𑀬𑁆𑀳𑀦𑁆𑀢𑀺, 𑀅𑀪𑁂𑀤𑁂𑀦𑀸𑀢𑀺 𑀮𑀓𑁆𑀔𑀬𑁂.

𑁩𑁭𑁬. 𑀧𑀞𑀫𑀸𑀤𑀺𑀘𑀢𑀼𑀚𑁆𑀛𑀸𑀦𑀸, 𑀮𑁄𑀓𑀼𑀢𑁆𑀢𑀭𑀫𑀳𑀕𑁆𑀕𑀢𑀸;

𑀇𑀘𑁆𑀘𑁂𑀓𑀫𑁂𑀓𑀤𑀲𑀥𑀸, 𑀘𑀢𑀼𑀢𑀸𑀮𑀻𑀲 𑀧𑀺𑀡𑁆𑀟𑀺𑀢𑀸.

𑁩𑁭𑁭. 𑀢𑁂𑀯𑀻𑀲 𑀧𑀜𑁆𑀘𑀫𑀸 𑀘𑁂𑀢𑀺, 𑀲𑀢𑁆𑀢𑀲𑀝𑁆𑀞𑀺 𑀲𑀫𑀺𑀲𑁆𑀲𑀺𑀢𑀸;

𑀅𑀧𑁆𑀧𑀦𑀸 𑀢𑀢𑁆𑀣 𑀲𑀩𑁆𑀩𑀸𑀧𑀺, 𑀅𑀝𑁆𑀞𑀧𑀜𑁆𑀜𑀸𑀲 𑀤𑀻𑀧𑀺𑀢𑀸.

𑁩𑁭𑁮. 𑀧𑀜𑁆𑀘𑀢𑀺𑀁𑀲𑁂𑀯 𑀲𑀗𑁆𑀔𑁂𑀧𑀸, 𑀮𑁄𑀓𑀼𑀢𑁆𑀢𑀭𑀫𑀳𑀕𑁆𑀕𑀢𑀸;

𑀅𑀧𑁆𑀧𑀦𑀸 𑀢𑀢𑁆𑀣 𑀲𑀩𑁆𑀩𑀸𑀧𑀺, 𑀙𑀩𑁆𑀩𑀻𑀲𑀢𑀺 𑀧𑀓𑀸𑀲𑀺𑀢𑀸.

𑁩𑁭𑁯. 𑀇𑀤𑁆𑀥𑀺𑀯𑀺𑀥𑀁 𑀤𑀺𑀩𑁆𑀩𑀲𑁄𑀢𑀁, 𑀘𑁂𑀢𑁄𑀧𑀭𑀺𑀬𑀦𑀸𑀫𑀓𑀸;

𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺, 𑀤𑀺𑀩𑁆𑀩𑀘𑀓𑁆𑀔𑀽𑀢𑀺 𑀧𑀜𑁆𑀘𑀥𑀸.

𑁩𑁮𑁦. 𑀅𑀪𑀺𑀜𑁆𑀜𑀸𑀜𑀸𑀡𑀫𑀻𑀭𑁂𑀦𑁆𑀢𑀺, 𑀭𑀽𑀧𑀸𑀯𑀘𑀭𑀧𑀜𑁆𑀘𑀫𑀸;

𑀓𑀼𑀲𑀮𑀜𑁆𑀘 𑀓𑁆𑀭𑀺𑀬𑀸 𑀘𑁂𑀢𑀺, 𑀪𑁂𑀤𑀺𑀢𑀁 𑀤𑀼𑀯𑀺𑀥𑀫𑁆𑀧𑀺 𑀘.

𑁩𑁮𑁧. 𑀢𑀁 𑀤𑁆𑀯𑀬𑀫𑁆𑀧𑀺 𑀲𑀫𑁆𑀫𑀺𑀲𑁆𑀲𑁂𑀢𑁆𑀯𑀸, 𑀧𑀜𑁆𑀘𑀸𑀪𑀺𑀜𑁆𑀜𑀸 𑀘 𑀮𑁄𑀓𑀺𑀬𑀸;

𑀆𑀲𑀯𑀓𑁆𑀔𑀬𑀜𑀸𑀡𑀜𑁆𑀘, 𑀙𑀴𑀪𑀺𑀜𑁆𑀜𑀸 𑀧𑀯𑀼𑀘𑁆𑀘𑀭𑁂.

𑁩𑁮𑁨. 𑀮𑁄𑀓𑀺𑀬𑀸 𑀘 𑀤𑀲𑀸𑀪𑀺𑀜𑁆𑀜𑀸, 𑀪𑀺𑀦𑁆𑀤𑀺𑀢𑁆𑀯𑀸 𑀓𑀼𑀲𑀮𑀓𑁆𑀭𑀺𑀬𑀸;

𑀲𑀢𑁆𑀢𑀲𑀢𑁆𑀢𑀢𑀺 𑀛𑀸𑀦𑀸𑀦𑀺, 𑀅𑀝𑁆𑀞𑀲𑀝𑁆𑀞𑀺 𑀧𑀦𑀧𑁆𑀧𑀦𑀸.

𑁩𑁮𑁩. 𑀲𑀢𑁆𑀢𑀲𑀢𑁆𑀢𑀢𑀺 𑀘𑀺𑀢𑁆𑀢𑀸𑀦𑀺, 𑀘𑀢𑀼𑀧𑀜𑁆𑀜𑀸𑀲 𑀲𑀩𑁆𑀩𑀣𑀸;

𑀧𑀘𑀺𑀢𑀸𑀦𑀺 𑀘 𑀘𑀺𑀢𑁆𑀢𑀸𑀦𑀺, 𑀏𑀓𑀢𑀺𑀁𑀲𑀲𑀢𑀁 𑀲𑀺𑀬𑀼𑀦𑁆𑀢𑀺.

𑀇𑀢𑀺 𑀘𑁂𑀢𑀲𑀺𑀓𑀯𑀺𑀪𑀸𑀕𑁂 𑀧𑀪𑁂𑀤𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀤𑀲𑀫𑁄 𑀧𑀭𑀺𑀘𑁆𑀙𑁂𑀤𑁄.