𑀏𑀓𑀸𑀤𑀲𑀫𑁄 𑀧𑀭𑀺𑀘𑁆𑀙𑁂𑀤𑁄

𑁧𑁧. 𑀭𑀸𑀲𑀺𑀲𑀭𑀽𑀧𑀓𑀣𑀸

𑁩𑁮𑁪. 𑀲𑀩𑁆𑀩𑀁 𑀲𑀪𑀸𑀯𑀲𑀸𑀫𑀜𑁆𑀜-𑀯𑀺𑀲𑁂𑀲𑁂𑀦 𑀬𑀣𑀸𑀭𑀳𑀁;

𑀕𑀢𑀭𑀸𑀲𑀺𑀯𑀲𑁂𑀦𑀸𑀣, 𑀅𑀝𑁆𑀞𑀸𑀭𑀲𑀯𑀺𑀥𑀁 𑀓𑀣𑀁.

𑁩𑁮𑁫. 𑀨𑀲𑁆𑀲𑀧𑀜𑁆𑀘𑀓𑀭𑀸𑀲𑀻 𑀘, 𑀛𑀸𑀦𑀺𑀦𑁆𑀤𑁆𑀭𑀺𑀬𑀫𑀣𑀸𑀧𑀭𑁂;

𑀫𑀕𑁆𑀕𑀩𑀮𑀳𑁂𑀢𑀼𑀓𑀫𑁆𑀫-𑀧𑀣𑀮𑁄𑀓𑀺𑀬𑀭𑀸𑀲𑀬𑁄.

𑁩𑁮𑁬. 𑀦𑀺𑀭𑀯𑀚𑁆𑀚𑀸 𑀙 𑀧𑀲𑁆𑀲𑀤𑁆𑀥𑀺-𑀆𑀤𑀺𑀓𑀸 𑀘 𑀲𑀢𑀻𑀫𑀢𑀸;

𑀬𑀼𑀕𑀦𑀦𑁆𑀥𑀸 𑀘 𑀲𑀫𑀣𑀸, 𑀢𑀣𑀸 𑀬𑁂𑀯𑀸𑀧𑀦𑀸𑀢𑀺 𑀘.

𑁩𑁮𑁭. 𑀨𑀲𑁆𑀲𑁄 𑀘 𑀯𑁂𑀤𑀦𑀸 𑀲𑀜𑁆𑀜𑀸, 𑀘𑁂𑀢𑀦𑀸 𑀘𑀺𑀢𑁆𑀢𑀫𑁂𑀯 𑀘;

𑀨𑀲𑁆𑀲𑀧𑀜𑁆𑀘𑀓𑀭𑀸𑀲𑀻𑀢𑀺, 𑀧𑀜𑁆𑀘 𑀥𑀫𑁆𑀫𑀸 𑀧𑀓𑀸𑀲𑀺𑀢𑀸.

𑁩𑁮𑁮. 𑀯𑀺𑀢𑀓𑁆𑀓𑁄 𑀘 𑀯𑀺𑀘𑀸𑀭𑁄 𑀘, 𑀧𑀻𑀢𑀺 𑀘𑁂𑀓𑀕𑁆𑀕𑀢𑀸 𑀢𑀣𑀸;

𑀲𑀼𑀔𑀁 𑀤𑀼𑀓𑁆𑀔𑀫𑀼𑀧𑁂𑀓𑁆𑀔𑀸𑀢𑀺, 𑀲𑀢𑁆𑀢 𑀛𑀸𑀦𑀗𑁆𑀕𑀦𑀸𑀫𑀓𑀸.

𑁩𑁮𑁯. 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀜𑁆𑀘 𑀯𑀻𑀭𑀺𑀬𑀁, 𑀲𑀢𑀺 𑀘𑁂𑀯 𑀲𑀫𑀸𑀥𑀺 𑀘;

𑀧𑀜𑁆𑀜𑀸 𑀘𑀢𑀼𑀩𑁆𑀩𑀺𑀥𑀸 𑀯𑀼𑀢𑁆𑀢𑀸, 𑀫𑀦𑁄 𑀧𑀜𑁆𑀘𑀸𑀧𑀺 𑀯𑁂𑀤𑀦𑀸.

𑁩𑁯𑁦. 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀫𑁂𑀓𑀦𑁆𑀢𑀺, 𑀘𑀓𑁆𑀔𑀸𑀤𑀻𑀦𑀺 𑀘 𑀲𑀢𑁆𑀢𑀥𑀸;

𑀩𑀸𑀯𑀻𑀲𑀢𑀺𑀦𑁆𑀤𑁆𑀭𑀺𑀬𑀸 𑀦𑀸𑀫, 𑀥𑀫𑁆𑀫𑀸 𑀲𑁄𑀴𑀲 𑀤𑁂𑀲𑀺𑀢𑀸.

𑁩𑁯𑁧. 𑀆𑀤𑀺𑀫𑀕𑁆𑀕𑁂 𑀅𑀦𑀜𑁆𑀜𑀸𑀢-𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁 𑀪𑀯𑁂;

𑀫𑀚𑁆𑀛𑁂 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀅𑀦𑁆𑀢𑁂, 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀘.

𑁩𑁯𑁨. 𑀧𑀜𑁆𑀜𑀸𑀦𑀼𑀢𑁆𑀢𑀭𑀘𑀺𑀢𑁆𑀢𑁂𑀲𑀼, 𑀳𑁄𑀦𑁆𑀢𑀺 𑀢𑀻𑀡𑀺𑀦𑁆𑀤𑁆𑀭𑀺𑀬𑀸𑀦𑀺𑀧𑀺;

𑀢𑀺𑀳𑁂𑀢𑀼𑀓𑁂𑀲𑀼 𑀲𑁂𑀲𑁂𑀲𑀼, 𑀏𑀓𑀁 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀫𑀢𑀁.

𑁩𑁯𑁩. 𑀲𑀼𑀔𑀁 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀜𑁆𑀘𑁂𑀯, 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀢𑀣𑀸;

𑀤𑁄𑀫𑀦𑀲𑁆𑀲𑀫𑀼𑀧𑁂𑀓𑁆𑀔𑀸𑀢𑀺, 𑀧𑀜𑁆𑀘𑀥𑀸 𑀯𑁂𑀤𑀦𑀸 𑀓𑀣𑀸.

𑁩𑁯𑁪. 𑀭𑀽𑀧𑀸𑀭𑀽𑀧𑀯𑀲𑀸 𑀤𑁆𑀯𑁂𑀥𑀸, 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀫𑁂𑀓𑀓𑀁;

𑀘𑀓𑁆𑀔𑀼𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀺𑀢𑁆𑀣𑀺𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀸.

𑁩𑁯𑁫. 𑀢𑀢𑁆𑀣 𑀚𑀻𑀯𑀺𑀢𑀭𑀽𑀧𑀜𑁆𑀘, 𑀅𑀝𑁆𑀞𑁂𑀢𑁆𑀣 𑀦 𑀢𑀼 𑀕𑀬𑁆𑀳𑀭𑁂;

𑀢𑀲𑁆𑀫𑀸 𑀦𑀸𑀫𑀺𑀦𑁆𑀤𑁆𑀭𑀺𑀬𑀸𑀦𑁂𑀯, 𑀤𑀲𑀧𑀜𑁆𑀘 𑀯𑀺𑀦𑀺𑀤𑁆𑀤𑀺𑀲𑁂.

𑁩𑁯𑁬. 𑀲𑀫𑁆𑀫𑀸𑀤𑀺𑀝𑁆𑀞𑀺 𑀘 𑀲𑀗𑁆𑀓𑀧𑁆𑀧𑁄, 𑀯𑀸𑀬𑀸𑀫𑁄 𑀯𑀺𑀭𑀢𑀺𑀢𑁆𑀢𑀬𑀁;

𑀲𑀫𑁆𑀫𑀸𑀲𑀢𑀺 𑀲𑀫𑀸𑀥𑀺 𑀘, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀘 𑀥𑀫𑁆𑀫𑀢𑁄.

𑁩𑁯𑁭. 𑀫𑀕𑁆𑀕𑀗𑁆𑀕𑀸𑀦𑀺 𑀦𑀯𑁂𑀢𑀸𑀦𑀺, 𑀤𑁆𑀯𑀸𑀤𑀲𑀸𑀧𑀺 𑀬𑀢𑁄 𑀤𑁆𑀯𑀺𑀥𑀸;

𑀲𑀫𑁆𑀫𑀸𑀫𑀺𑀘𑁆𑀙𑀸𑀢𑀺 𑀲𑀗𑁆𑀓𑀧𑁆𑀧𑁄, 𑀯𑀸𑀬𑀸𑀫𑁄 𑀘 𑀲𑀫𑀸𑀥𑀺 𑀘.

𑁩𑁯𑁮. 𑀮𑁄𑀓𑀧𑀸𑀮𑀤𑀼𑀓𑀜𑁆𑀘𑁂𑀯, 𑀳𑀺𑀭𑁄𑀢𑁆𑀢𑀧𑁆𑀧𑀫𑀣𑀸𑀧𑀭𑀁;

𑀅𑀳𑀺𑀭𑀻𑀓𑀫𑀦𑁄𑀢𑁆𑀢𑀧𑁆𑀧𑀁, 𑀤𑀼𑀓𑀁 𑀮𑁄𑀓𑀯𑀺𑀦𑀸𑀲𑀓𑀁.

𑁩𑁯𑁯. 𑀧𑀜𑁆𑀘 𑀲𑀤𑁆𑀥𑀸𑀤𑀬𑁄 𑀘𑁂𑀢𑀺, 𑀩𑀮𑀥𑀫𑁆𑀫𑀸 𑀦𑀯𑁂𑀭𑀺𑀢𑀸;

𑀓𑀡𑁆𑀳𑀲𑀼𑀓𑁆𑀓𑀯𑀲𑁂𑀦𑀸𑀧𑀺, 𑀧𑀝𑀺𑀧𑀓𑁆𑀔𑁂 𑀅𑀓𑀫𑁆𑀧𑀺𑀬𑀸.

𑁪𑁦𑁦. 𑀙 𑀳𑁂𑀢𑀽 𑀳𑁂𑀢𑀼𑀭𑀸𑀲𑀺𑀫𑁆𑀳𑀺,

𑀮𑁄𑀪𑀸𑀮𑁄𑀪𑀸𑀤𑀺𑀓𑀸 𑀢𑀺𑀓𑀸;

𑀫𑁄𑀫𑀽𑀳𑁂 𑀓𑀗𑁆𑀔𑀺𑀢𑀼𑀤𑁆𑀥𑀘𑁆𑀘𑀸,

𑀢𑀢𑁆𑀣 𑀯𑀼𑀢𑁆𑀢𑀸𑀢𑀺 𑀅𑀝𑁆𑀞𑀥𑀸.

𑁪𑁦𑁧. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀅𑀪𑀺𑀚𑁆𑀛𑀸 𑀘, 𑀩𑁆𑀬𑀸𑀧𑀸𑀤𑁄 𑀯𑀺𑀭𑀢𑀺𑀢𑁆𑀢𑀬𑀁;

𑀲𑀫𑁆𑀫𑀸𑀤𑀺𑀝𑁆𑀞𑀺𑀦𑀪𑀺𑀚𑁆𑀛𑀸 𑀘, 𑀅𑀩𑁆𑀬𑀸𑀧𑀸𑀤𑁄 𑀘 𑀘𑁂𑀢𑀦𑀸.

𑁪𑁦𑁨. 𑀤𑀲 𑀓𑀫𑁆𑀫𑀧𑀣𑀸𑀦𑁂𑀢𑁆𑀣, 𑀯𑀼𑀢𑁆𑀢𑀸 𑀯𑀺𑀭𑀢𑀺𑀘𑁂𑀢𑀦𑀸;

𑀮𑁄𑀓𑀧𑀸𑀮𑀯𑀺𑀦𑀸𑀲𑀸𑀢𑀺, 𑀯𑀼𑀢𑁆𑀢𑀸 𑀮𑁄𑀓𑀤𑀼𑀓𑀸 𑀤𑁆𑀯𑀺𑀥𑀸.

𑁪𑁦𑁩. 𑀧𑀲𑁆𑀲𑀤𑁆𑀥𑀺𑀆𑀤𑀺𑀬𑀼𑀕𑀴𑀸, 𑀦𑀺𑀭𑀯𑀚𑁆𑀚𑀸 𑀙 𑀭𑀸𑀲𑀬𑁄;

𑀲𑀢𑀺 𑀘 𑀲𑀫𑁆𑀧𑀚𑀜𑁆𑀜𑀜𑁆𑀘, 𑀉𑀧𑀓𑀸𑀭𑀤𑀼𑀓𑀁 𑀪𑀯𑁂.

𑁪𑁦𑁪. 𑀬𑀼𑀕𑀦𑀦𑁆𑀥𑀤𑀼𑀓𑀁 𑀦𑀸𑀫, 𑀲𑀫𑀣𑁄 𑀘 𑀯𑀺𑀧𑀲𑁆𑀲𑀦𑀸;

𑀧𑀕𑁆𑀕𑀳𑁄 𑀘 𑀅𑀯𑀺𑀓𑁆𑀔𑁂𑀧𑁄, 𑀲𑀫𑀣𑀤𑁆𑀤𑀼𑀓𑀫𑀻𑀭𑀺𑀢𑀁.

𑁪𑁦𑁫. 𑀬𑁂 𑀲𑀭𑀽𑀧𑁂𑀦 𑀦𑀺𑀤𑁆𑀤𑀺𑀝𑁆𑀞𑀸, 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀢𑀸𑀤𑀺𑀦𑀸;

𑀢𑁂 𑀞𑀧𑁂𑀢𑁆𑀯𑀸𑀯𑀲𑁂𑀲𑀸 𑀢𑀼, 𑀬𑁂𑀯𑀸𑀧𑀦𑀓𑀦𑀸𑀫𑀓𑀸.

𑁪𑁦𑁬. 𑀙𑀦𑁆𑀤𑁄 𑀘 𑀅𑀥𑀺𑀫𑁄𑀓𑁆𑀔𑁄 𑀘, 𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸 𑀢𑀣𑀸;

𑀉𑀤𑁆𑀥𑀘𑁆𑀘𑀁 𑀫𑀦𑀲𑀺𑀓𑀸𑀭𑁄, 𑀧𑀜𑁆𑀘𑀸𑀧𑀡𑁆𑀡𑀓𑀦𑀸𑀫𑀓𑀸.

𑁪𑁦𑁭. 𑀫𑀸𑀦𑁄 𑀘 𑀣𑀺𑀦𑀫𑀺𑀤𑁆𑀥𑀜𑁆𑀘, 𑀇𑀲𑁆𑀲𑀸 𑀫𑀘𑁆𑀙𑀭𑀺𑀬𑀁 𑀢𑀣𑀸;

𑀓𑀼𑀓𑁆𑀓𑀼𑀘𑁆𑀘𑀫𑀧𑁆𑀧𑀫𑀜𑁆𑀜𑀸 𑀘, 𑀢𑀺𑀲𑁆𑀲𑁄 𑀯𑀺𑀭𑀢𑀺𑀬𑁄𑀧𑀺 𑀘.

𑁪𑁦𑁮. 𑀏𑀢𑁂 𑀅𑀦𑀺𑀬𑀢𑀸 𑀦𑀸𑀫, 𑀏𑀓𑀸𑀤𑀲 𑀬𑀣𑀸𑀭𑀳𑀁;

𑀢𑀢𑁄 𑀘 𑀲𑁂𑀲𑀸 𑀲𑀩𑁆𑀩𑁂𑀧𑀺, 𑀦𑀺𑀬𑀢𑀸𑀢𑀺 𑀧𑀓𑀺𑀢𑁆𑀢𑀺𑀢𑀸.

𑁪𑁦𑁯. 𑀓𑁂𑀘𑀺 𑀭𑀸𑀲𑀺𑀁 𑀦 𑀪𑀚𑀦𑁆𑀢𑀺, 𑀓𑁂𑀘𑀺 𑀘𑀸𑀦𑀺𑀬𑀢𑀸 𑀬𑀢𑁄;

𑀢𑀲𑁆𑀫𑀸 𑀬𑁂𑀯𑀸𑀧𑀦𑀸𑀢𑁂𑀯, 𑀥𑀫𑁆𑀫𑀸 𑀲𑁄𑀴𑀲 𑀤𑁂𑀲𑀺𑀢𑀸.

𑁪𑁧𑁦. 𑀲𑀢𑁆𑀢𑀢𑀺𑀁𑀲𑀸𑀯𑀲𑁂𑀲𑀸 𑀢𑀼, 𑀢𑀢𑁆𑀣 𑀢𑀢𑁆𑀣 𑀬𑀣𑀸𑀭𑀳𑀁;

𑀲𑀭𑀽𑀧𑁂𑀦𑁂𑀯 𑀦𑀺𑀤𑁆𑀤𑀺𑀝𑁆𑀞𑀸, 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀲𑀩𑁆𑀩𑀣𑀸.

𑁪𑁧𑁧. 𑀤𑁂𑀲𑀺𑀢𑀸𑀦𑀼𑀢𑁆𑀢𑀭𑀼𑀤𑁆𑀥𑀘𑁆𑀘𑁂, 𑀦𑀸𑀫𑀢𑁄 𑀯𑀺𑀭𑀢𑀼𑀤𑁆𑀥𑀯𑀸;

𑀢𑀣𑀸𑀦𑀼𑀢𑁆𑀢𑀭𑀘𑀺𑀢𑁆𑀢𑁂𑀲𑀼, 𑀦𑀺𑀬𑀢𑀁 𑀯𑀺𑀭𑀢𑀺𑀢𑁆𑀢𑀬𑀁.

𑁪𑁧𑁨. 𑀘𑀺𑀢𑁆𑀢𑀁 𑀯𑀺𑀢𑀓𑁆𑀓𑁄 𑀲𑀤𑁆𑀥𑀸 𑀘,

𑀳𑀺𑀭𑁄𑀢𑁆𑀢𑀧𑁆𑀧𑀩𑀮𑀤𑁆𑀯𑀬𑀁;

𑀅𑀮𑁄𑀪𑁄 𑀘 𑀅𑀤𑁄𑀲𑁄 𑀘,

𑀮𑁄𑀪𑁄 𑀤𑁄𑀲𑁄 𑀘 𑀤𑀺𑀝𑁆𑀞𑀺 𑀘.

𑁪𑁧𑁩. 𑀅𑀳𑀺𑀭𑀻𑀓𑀫𑀦𑁄𑀢𑁆𑀢𑀧𑁆𑀧𑀁,

𑀉𑀤𑁆𑀥𑀘𑁆𑀘𑀁 𑀯𑀺𑀭𑀢𑀺𑀢𑁆𑀢𑀬𑀁;

𑀲𑁄𑀴𑀲𑁂𑀢𑁂 𑀬𑀣𑀸𑀬𑁄𑀕𑀁,

𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀤𑁂𑀲𑀺𑀢𑀸.

𑁪𑁧𑁪. 𑀯𑁂𑀤𑀦𑀸 𑀢𑀻𑀲𑀼 𑀯𑀻𑀭𑀺𑀬𑀁, 𑀲𑀢𑀺 𑀘 𑀘𑀢𑀼𑀭𑀸𑀲𑀺𑀓𑀸;

𑀲𑀫𑀸𑀥𑀺 𑀙𑀲𑀼 𑀧𑀜𑁆𑀜𑀸 𑀘, 𑀲𑀢𑁆𑀢𑀝𑁆𑀞𑀸𑀦𑁂𑀲𑀼 𑀤𑀻𑀧𑀺𑀢𑀸.

𑁪𑁧𑁫. 𑀏𑀓𑀯𑀻𑀲 𑀧𑀦𑀺𑀘𑁆𑀘𑁂𑀢𑁂, 𑀲𑀯𑀺𑀪𑀢𑁆𑀢𑀺𑀓𑀦𑀸𑀫𑀓𑀸;

𑀲𑁂𑀲𑀸 𑀤𑁆𑀯𑀢𑁆𑀢𑀺𑀁𑀲𑀢𑀺 𑀥𑀫𑁆𑀫𑀸, 𑀲𑀩𑁆𑀩𑁂𑀧𑀺 𑀅𑀯𑀺𑀪𑀢𑁆𑀢𑀺𑀓𑀸𑀢𑀺.

𑀇𑀢𑀺 𑀘𑁂𑀢𑀲𑀺𑀓𑀯𑀺𑀪𑀸𑀕𑁂 𑀭𑀸𑀲𑀺𑀲𑀭𑀽𑀧𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀏𑀓𑀸𑀤𑀲𑀫𑁄 𑀧𑀭𑀺𑀘𑁆𑀙𑁂𑀤𑁄.