𑁯. 𑀘𑁂𑀢𑀲𑀺𑀓𑀲𑀗𑁆𑀕𑀳𑀓𑀣𑀸

𑁩𑁧𑁫. 𑀲𑀢𑁆𑀢 𑀲𑀸𑀥𑀸𑀭𑀡𑀸 𑀘𑁂𑀯, 𑀙 𑀥𑀫𑁆𑀫𑀸 𑀘 𑀧𑀓𑀺𑀡𑁆𑀡𑀓𑀸;

𑀲𑀤𑁆𑀥𑀸𑀤𑀺 𑀧𑀜𑁆𑀘𑀯𑀻𑀲𑁂𑀢𑀺, 𑀅𑀝𑁆𑀞𑀢𑀺𑀁𑀲 𑀲𑀫𑀺𑀲𑁆𑀲𑀺𑀢𑀸.

𑁩𑁧𑁬. 𑀓𑀸𑀫𑀸𑀯𑀘𑀭𑀧𑀼𑀜𑁆𑀜𑁂𑀲𑀼, 𑀮𑀩𑁆𑀪𑀦𑁆𑀢𑀺 𑀧𑀞𑀫𑀤𑁆𑀯𑀬𑁂;

𑀲𑀢𑁆𑀢𑀢𑀺𑀁𑀲𑁂𑀯 𑀤𑀼𑀢𑀺𑀬𑁂, 𑀧𑀜𑁆𑀜𑀸𑀫𑀢𑁆𑀢𑀯𑀺𑀯𑀚𑁆𑀚𑀺𑀢𑀸.

𑁩𑁧𑁭. 𑀢𑀢𑀺𑀬𑁂 𑀘 𑀬𑀣𑀸𑀯𑀼𑀢𑁆𑀢𑀸, 𑀧𑀻𑀢𑀺𑀫𑀢𑁆𑀢𑀯𑀺𑀯𑀚𑁆𑀚𑀺𑀢𑀸;

𑀙𑀢𑁆𑀢𑀺𑀁𑀲𑁂𑀯 𑀘𑀢𑀼𑀢𑁆𑀣𑀫𑁆𑀳𑀺, 𑀧𑀜𑁆𑀜𑀸𑀧𑀻𑀢𑀺𑀤𑁆𑀯𑀬𑀁 𑀯𑀺𑀦𑀸.

𑁩𑁧𑁮. 𑀫𑀳𑀸𑀓𑁆𑀭𑀺𑀬𑀸𑀲𑀼 𑀬𑀼𑀚𑁆𑀚𑀦𑁆𑀢𑀺, 𑀳𑀺𑀢𑁆𑀯𑀸 𑀯𑀺𑀭𑀢𑀺𑀬𑁄 𑀢𑀣𑀸;

𑀧𑀜𑁆𑀘𑀢𑀺𑀁𑀲 𑀘𑀢𑀼𑀢𑁆𑀢𑀺𑀁𑀲𑀤𑁆𑀯𑀬𑀁 𑀢𑁂𑀢𑁆𑀢𑀺𑀁𑀲𑀓𑀁 𑀓𑀫𑀸.

𑁩𑁧𑁯. 𑀞𑀧𑁂𑀢𑁆𑀯𑀸 𑀅𑀧𑁆𑀧𑀫𑀜𑁆𑀜𑀸 𑀘, 𑀫𑀳𑀸𑀧𑀸𑀓𑁂𑀲𑀼 𑀬𑁄𑀚𑀺𑀢𑀸;

𑀢𑁂𑀢𑁆𑀢𑀺𑀁𑀲𑀸 𑀘𑁂𑀯 𑀤𑁆𑀯𑀢𑁆𑀢𑀺𑀁𑀲𑀤𑁆𑀯𑀬𑁂𑀓𑀢𑁆𑀢𑀺𑀁𑀲𑀓𑀁 𑀓𑀫𑀸.

𑁩𑁨𑁦. 𑀅𑀧𑁆𑀧𑀫𑀜𑁆𑀜𑀸 𑀕𑀳𑁂𑀢𑁆𑀯𑀸𑀦, 𑀳𑀺𑀢𑁆𑀯𑀸 𑀯𑀺𑀭𑀢𑀺𑀬𑁄 𑀢𑀣𑀸;

𑀧𑀜𑁆𑀘𑀢𑀺𑀁𑀲𑁂𑀯 𑀧𑀞𑀫𑁂, 𑀭𑀽𑀧𑀸𑀯𑀘𑀭𑀫𑀸𑀦𑀲𑁂.

𑁩𑁨𑁧. 𑀯𑀺𑀢𑀓𑁆𑀓𑀁 𑀤𑀼𑀢𑀺𑀬𑁂 𑀳𑀺𑀢𑁆𑀯𑀸, 𑀯𑀺𑀘𑀸𑀭𑀜𑁆𑀘 𑀢𑀢𑁄 𑀧𑀭𑀁;

𑀘𑀢𑀼𑀢𑁆𑀣𑁂 𑀧𑀦 𑀧𑀻𑀢𑀺𑀜𑁆𑀘, 𑀅𑀧𑁆𑀧𑀫𑀜𑁆𑀜𑀜𑁆𑀘 𑀧𑀜𑁆𑀘𑀫𑁂.

𑁩𑁨𑁨. 𑀬𑀣𑀸𑀯𑀼𑀢𑁆𑀢𑀧𑀓𑀸𑀭𑀸𑀯, 𑀘𑀢𑀼𑀢𑁆𑀢𑀺𑀁𑀲 𑀬𑀣𑀸𑀓𑁆𑀓𑀫𑀁;

𑀢𑁂𑀢𑁆𑀢𑀺𑀁𑀲 𑀘𑁂𑀯 𑀤𑁆𑀯𑀢𑁆𑀢𑀺𑀁𑀲, 𑀲𑀫𑀢𑀺𑀁𑀲𑀜𑁆𑀘 𑀮𑀩𑁆𑀪𑀭𑁂.

𑁩𑁨𑁩. 𑀧𑀜𑁆𑀘𑀫𑁂𑀦 𑀲𑀫𑀸𑀦𑀸 𑀘, 𑀞𑀧𑁂𑀢𑁆𑀯𑀸𑀭𑀼𑀧𑁆𑀧𑀫𑀸𑀦𑀲𑀸;

𑀪𑀽𑀫𑀸𑀭𑀫𑁆𑀫𑀡𑀪𑁂𑀤𑀜𑁆𑀘, 𑀅𑀗𑁆𑀕𑀸𑀦𑀜𑁆𑀘 𑀧𑀡𑀻𑀢𑀢𑀁.

𑁩𑁨𑁪. 𑀅𑀧𑁆𑀧𑀫𑀜𑁆𑀜𑀸 𑀞𑀧𑁂𑀢𑁆𑀯𑀸𑀦, 𑀕𑀳𑁂𑀢𑁆𑀯𑀸 𑀯𑀺𑀭𑀢𑀺𑀢𑁆𑀢𑀬𑀁;

𑀙𑀢𑁆𑀢𑀺𑀁𑀲𑀸𑀦𑀼𑀢𑁆𑀢𑀭𑁂 𑀳𑁄𑀦𑁆𑀢𑀺, 𑀧𑀞𑀫𑀚𑁆𑀛𑀸𑀦𑀫𑀸𑀦𑀲𑁂.

𑁩𑁨𑁫. 𑀯𑀺𑀢𑀓𑁆𑀓𑀁 𑀤𑀼𑀢𑀺𑀬𑁂 𑀳𑀺𑀢𑁆𑀯𑀸, 𑀯𑀺𑀘𑀸𑀭𑀜𑁆𑀘 𑀢𑀢𑁄 𑀧𑀭𑀁;

𑀧𑀻𑀢𑀺𑀁 𑀳𑀺𑀢𑁆𑀯𑀸 𑀘𑀢𑀼𑀢𑁆𑀣𑁂 𑀘, 𑀧𑀜𑁆𑀘𑀫𑁂𑀧𑀺 𑀘 𑀲𑀩𑁆𑀩𑀣𑀸.

𑁩𑁨𑁬. 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀯, 𑀧𑀜𑁆𑀘𑀢𑀺𑀁𑀲 𑀬𑀣𑀸𑀓𑁆𑀓𑀫𑀁;

𑀘𑀢𑀼𑀢𑁆𑀢𑀺𑀁𑀲𑀜𑁆𑀘 𑀢𑁂𑀢𑁆𑀢𑀺𑀁𑀲, 𑀢𑀣𑀸 𑀢𑁂𑀢𑁆𑀢𑀺𑀁𑀲 𑀘𑀸𑀧𑀭𑁂.

𑁩𑁨𑁭. 𑀏𑀯𑀁 𑀩𑀸𑀯𑀻𑀲𑀥𑀸 𑀪𑁂𑀤𑁄, 𑀅𑀦𑀯𑀚𑁆𑀚𑁂𑀲𑀼 𑀲𑀗𑁆𑀕𑀳𑁄;

𑀏𑀓𑀽𑀦𑀲𑀝𑁆𑀞𑀺𑀘𑀺𑀢𑁆𑀢𑁂𑀲𑀼, 𑀅𑀝𑁆𑀞𑀢𑀺𑀁𑀲𑀸𑀦𑀫𑀻𑀭𑀺𑀢𑁄.

𑁩𑁨𑁮. 𑀯𑀺𑀭𑀢𑀻 𑀅𑀧𑁆𑀧𑀫𑀜𑁆𑀜𑀸 𑀘, 𑀕𑀳𑁂𑀢𑁆𑀯𑀸 𑀧𑀦 𑀲𑀩𑁆𑀩𑀲𑁄;

𑀏𑀓𑀫𑁂𑀓𑀁 𑀕𑀳𑁂𑀢𑁆𑀯𑀸 𑀘, 𑀧𑀘𑁆𑀘𑀓𑁆𑀔𑀸𑀬 𑀘 𑀲𑀩𑁆𑀩𑀣𑀸.

𑁩𑁨𑁯. 𑀓𑀸𑀫𑁂𑀲𑀼 𑀲𑀢𑁆𑀢𑀥𑀸 𑀧𑀼𑀜𑁆𑀜𑁂, 𑀘𑀢𑀼𑀥𑀸 𑀘 𑀓𑁆𑀭𑀺𑀬𑁂 𑀢𑀣𑀸;

𑀭𑀽𑀧𑀚𑁆𑀛𑀸𑀦𑀘𑀢𑀼𑀓𑁆𑀓𑁂 𑀘, 𑀓𑀢𑁆𑀢𑀩𑁆𑀩𑁄𑀬𑀫𑁆𑀧𑀺 𑀲𑀗𑁆𑀕𑀳𑁄.

𑁩𑁩𑁦. 𑀇𑀫𑀺𑀦𑀸 𑀧𑀦𑀼𑀧𑀸𑀬𑁂𑀦, 𑀲𑀫𑀲𑀢𑁆𑀢𑀢𑀺 𑀪𑁂𑀤𑀢𑁄;

𑀅𑀦𑀯𑀚𑁆𑀚𑁂𑀲𑀼 𑀯𑀺𑀜𑁆𑀜𑁂𑀬𑁆𑀬𑁄, 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀲𑀗𑁆𑀕𑀳𑁄.

𑁩𑁩𑁧. 𑀇𑀢𑀺 𑀲𑀩𑁆𑀩𑀧𑁆𑀧𑀓𑀸𑀭𑁂𑀦, 𑀅𑀦𑀯𑀚𑁆𑀚𑀯𑀺𑀦𑀺𑀘𑁆𑀙𑀬𑀁;

𑀜𑀢𑁆𑀯𑀸 𑀬𑁄𑀚𑁂𑀬𑁆𑀬 𑀫𑁂𑀥𑀸𑀯𑀻, 𑀲𑀸𑀯𑀚𑁆𑀚𑁂𑀲𑀼 𑀘 𑀲𑀗𑁆𑀕𑀳𑀁.

𑁩𑁩𑁨. 𑀲𑀢𑁆𑀢 𑀲𑀸𑀥𑀸𑀭𑀡𑀸 𑀘𑁂𑀯, 𑀙 𑀥𑀫𑁆𑀫𑀸 𑀘 𑀧𑀓𑀺𑀡𑁆𑀡𑀓𑀸;

𑀘𑀢𑁆𑀢𑀸𑀭𑁄 𑀧𑀸𑀧𑀲𑀸𑀫𑀜𑁆𑀜𑀸, 𑀥𑀫𑁆𑀫𑀸 𑀲𑀢𑁆𑀢𑀭𑀲𑁂𑀯𑀺𑀫𑁂.

𑁩𑁩𑁩. 𑀏𑀓𑀽𑀦𑀯𑀻𑀲𑀸𑀲𑀗𑁆𑀔𑀸𑀭𑁂, 𑀧𑀞𑀫𑁂 𑀮𑁄𑀪𑀤𑀺𑀝𑁆𑀞𑀺𑀬𑀸;

𑀤𑀼𑀢𑀺𑀬𑁂 𑀮𑁄𑀪𑀫𑀸𑀦𑁂𑀦, 𑀬𑀣𑀸𑀯𑀼𑀢𑁆𑀢𑀸 𑀘 𑀢𑀢𑁆𑀢𑀓𑀸.

𑁩𑁩𑁪. 𑀅𑀝𑁆𑀞𑀸𑀭𑀲 𑀯𑀺𑀦𑀸 𑀧𑀻𑀢𑀺𑀁, 𑀢𑀢𑀺𑀬𑁂 𑀮𑁄𑀪𑀤𑀺𑀝𑁆𑀞𑀺𑀬𑀸;

𑀘𑀢𑀼𑀢𑁆𑀣𑁂𑀧𑀺 𑀯𑀺𑀦𑀸 𑀧𑀻𑀢𑀺𑀁, 𑀮𑁄𑀪𑀫𑀸𑀦𑁂𑀦 𑀢𑀢𑁆𑀢𑀓𑀸.

𑁩𑁩𑁫. 𑀧𑀝𑀺𑀖𑁂 𑀘 𑀯𑀺𑀦𑀸 𑀧𑀻𑀢𑀺𑀁, 𑀅𑀲𑀗𑁆𑀔𑀸𑀭𑁂 𑀢𑀣𑁂𑀯 𑀢𑁂;

𑀮𑀩𑁆𑀪𑀦𑁆𑀢𑀺 𑀤𑁄𑀲𑀓𑀼𑀓𑁆𑀓𑀼𑀘𑁆𑀘-𑀫𑀘𑁆𑀙𑀭𑀺𑀬𑀸𑀳𑀺 𑀯𑀻𑀲𑀢𑀺.

𑁩𑁩𑁬. 𑀅𑀲𑀗𑁆𑀔𑀸𑀭𑁂𑀲𑀼 𑀯𑀼𑀢𑁆𑀢𑀸 𑀘, 𑀲𑀲𑀗𑁆𑀔𑀸𑀭𑁂𑀲𑀼 𑀧𑀜𑁆𑀘𑀥𑀸;

𑀣𑀺𑀦𑀫𑀺𑀤𑁆𑀥𑁂𑀦𑁂𑀓𑀯𑀻𑀲, 𑀯𑀻𑀲 𑀤𑁆𑀯𑁂𑀯𑀻𑀲𑀢𑀺𑀓𑁆𑀓𑀫𑀸.

𑁩𑁩𑁭. 𑀙𑀦𑁆𑀤𑀁 𑀧𑀻𑀢𑀺𑀜𑁆𑀘 𑀉𑀤𑁆𑀥𑀘𑁆𑀘𑁂, 𑀳𑀺𑀢𑁆𑀯𑀸 𑀧𑀜𑁆𑀘𑀤𑀲𑁂𑀯 𑀢𑁂;

𑀳𑀺𑀢𑁆𑀯𑀸 𑀯𑀺𑀫𑁄𑀓𑁆𑀔𑀁 𑀓𑀗𑁆𑀔𑀜𑁆𑀘, 𑀕𑀳𑁂𑀢𑁆𑀯𑀸 𑀓𑀗𑁆𑀔𑀺𑀢𑁂 𑀢𑀣𑀸.

𑁩𑁩𑁮. 𑀲𑀢𑁆𑀢𑀯𑀻𑀲𑀢𑀺𑀥𑀫𑁆𑀫𑀸𑀦𑀁, 𑀇𑀢𑀺 𑀤𑁆𑀯𑀸𑀤𑀲 𑀲𑀗𑁆𑀕𑀳𑀸;

𑀤𑁆𑀯𑀸𑀤𑀲𑀸𑀧𑀼𑀜𑁆𑀜𑀘𑀺𑀢𑁆𑀢𑁂𑀲𑀼, 𑀯𑀺𑀜𑁆𑀜𑀸𑀢𑀩𑁆𑀩𑀸 𑀯𑀺𑀪𑀸𑀯𑀺𑀦𑀸.

𑁩𑁩𑁯. 𑀳𑀺𑀢𑁆𑀯𑀸 𑀙𑀸𑀦𑀺𑀬𑀢𑁂 𑀥𑀫𑁆𑀫𑁂, 𑀕𑀳𑁂𑀢𑁆𑀯𑀸 𑀘 𑀬𑀣𑀸𑀭𑀳𑀁;

𑀘𑀢𑀼𑀢𑁆𑀢𑀺𑀁𑀲𑀸𑀧𑀺 𑀯𑀺𑀜𑁆𑀜𑁂𑀬𑁆𑀬𑀸, 𑀲𑀗𑁆𑀕𑀳𑀸 𑀢𑀢𑁆𑀣 𑀯𑀺𑀜𑁆𑀜𑀼𑀦𑀸.

𑁩𑁪𑁦. 𑀤𑁆𑀯𑀸𑀤𑀲𑀸𑀓𑀼𑀲𑀮𑁂𑀲𑁆𑀯𑁂𑀯, 𑀜𑀢𑁆𑀯𑀸 𑀲𑀗𑁆𑀕𑀳𑀫𑀼𑀢𑁆𑀢𑀭𑀁;

𑀜𑁂𑀬𑁆𑀬𑀸𑀳𑁂𑀢𑀼𑀓𑀘𑀺𑀢𑁆𑀢𑁂𑀲𑀼, 𑀲𑀗𑁆𑀕𑀳𑀁 𑀓𑀫𑀢𑁄 𑀓𑀣𑀁?

𑁩𑁪𑁧. 𑀲𑀢𑁆𑀢 𑀲𑀸𑀥𑀸𑀭𑀡𑀸 𑀙𑀦𑁆𑀤𑀯𑀚𑁆𑀚𑀺𑀢𑀸 𑀘 𑀧𑀓𑀺𑀡𑁆𑀡𑀓𑀸;

𑀳𑀲𑀺𑀢𑀼𑀧𑁆𑀧𑀸𑀤𑀘𑀺𑀢𑁆𑀢𑀫𑁆𑀳𑀺, 𑀤𑁆𑀯𑀸𑀤𑀲𑁂𑀯 𑀧𑀓𑀸𑀲𑀺𑀢𑀸.

𑁩𑁪𑁨. 𑀯𑁄𑀝𑁆𑀞𑀩𑁆𑀩𑁂 𑀘 𑀯𑀺𑀦𑀸 𑀧𑀻𑀢𑀺𑀁, 𑀯𑀻𑀭𑀺𑀬𑀁 𑀲𑀼𑀔𑀢𑀻𑀭𑀡𑁂;

𑀏𑀓𑀸𑀤𑀲 𑀬𑀣𑀸𑀯𑀼𑀢𑁆𑀢𑀸, 𑀥𑀫𑁆𑀫𑀸 𑀤𑁆𑀯𑀻𑀲𑀼𑀧𑀺 𑀤𑁂𑀲𑀺𑀢𑀸.

𑁩𑁪𑁩. 𑀫𑀦𑁄𑀥𑀸𑀢𑀼𑀢𑁆𑀢𑀺𑀓𑁂 𑀘𑁂𑀯, 𑀉𑀧𑁂𑀓𑁆𑀔𑀸𑀢𑀻𑀭𑀡𑀤𑁆𑀯𑀬𑁂;

𑀤𑀲 𑀳𑁄𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀸, 𑀳𑀺𑀢𑁆𑀯𑀸 𑀯𑀻𑀭𑀺𑀬𑀧𑀻𑀢𑀺𑀬𑁄.

𑁩𑁪𑁪. 𑀲𑀢𑁆𑀢 𑀲𑀸𑀥𑀸𑀭𑀡𑀸 𑀏𑀯, 𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑀫𑁆𑀪𑀯𑀸;

𑀇𑀘𑁆𑀘𑀸𑀳𑁂𑀢𑀼𑀓𑀘𑀺𑀢𑁆𑀢𑁂𑀲𑀼, 𑀧𑀜𑁆𑀘𑀥𑀸 𑀲𑀗𑁆𑀕𑀳𑁄 𑀞𑀺𑀢𑁄.

𑁩𑁪𑁫. 𑀇𑀢𑀺 𑀘𑁂𑀢𑀲𑀺𑀓𑁂 𑀥𑀫𑁆𑀫𑁂, 𑀘𑀺𑀢𑁆𑀢𑁂𑀲𑀼 𑀕𑀡𑀺𑀢𑁂 𑀧𑀼𑀦;

𑀘𑀺𑀢𑁆𑀢𑁂𑀦 𑀲𑀳 𑀲𑀗𑁆𑀕𑀬𑁆𑀳, 𑀕𑀡𑁂𑀬𑁆𑀬𑀸𑀧𑀺 𑀘 𑀧𑀡𑁆𑀟𑀺𑀢𑁄.

𑁩𑁪𑁬. 𑀅𑀝𑁆𑀞𑀢𑀺𑀁𑀲𑀸𑀢𑀺 𑀬𑁂 𑀯𑀼𑀢𑁆𑀢𑀸, 𑀘𑀺𑀢𑁆𑀢𑁂𑀦 𑀲𑀳 𑀢𑁂 𑀧𑀼𑀦;

𑀏𑀓𑀽𑀦𑀘𑀢𑁆𑀢𑀸𑀮𑀻𑀲𑁂𑀢𑀺, 𑀲𑀩𑁆𑀩𑀢𑁆𑀣𑁂𑀓𑀸𑀥𑀺𑀓𑀁 𑀦𑀬𑁂.

𑁩𑁪𑁭. 𑀩𑀸𑀯𑀻𑀲𑁂𑀯𑀁 𑀤𑀲 𑀤𑁆𑀯𑁂 𑀘, 𑀧𑀜𑁆𑀘 𑀘𑁂𑀢𑀺 𑀬𑀣𑀸𑀭𑀳𑀁;

𑀲𑀗𑁆𑀕𑀳𑀸 𑀲𑀫𑁆𑀧𑀬𑀼𑀢𑁆𑀢𑀸𑀦𑀁, 𑀢𑀸𑀮𑀻𑀲𑁂𑀓𑀽𑀦𑀓𑀸 𑀓𑀣𑀸.

𑁩𑁪𑁮. 𑀯𑀺𑀢𑀓𑁆𑀓𑁄 𑀘 𑀯𑀺𑀘𑀸𑀭𑁄 𑀘, 𑀧𑀻𑀢𑀺 𑀧𑀜𑁆𑀜𑀸 𑀢𑀣𑀸 𑀧𑀦;

𑀅𑀧𑁆𑀧𑀫𑀜𑁆𑀜𑀸 𑀯𑀺𑀭𑀢𑀻𑀢𑀺, 𑀦𑀯 𑀥𑀫𑁆𑀫𑀸 𑀬𑀣𑀸𑀭𑀳𑀁.

𑁩𑁪𑁯. 𑀕𑀳𑁂𑀢𑀩𑁆𑀩𑀸𑀧𑀦𑁂𑀢𑀩𑁆𑀩𑀸, 𑀪𑀯𑀦𑁆𑀢𑀺 𑀅𑀦𑀯𑀚𑁆𑀚𑀓𑁂;

𑀧𑀭𑀺𑀯𑀢𑁆𑀢𑁂𑀢𑀺 𑀲𑀩𑁆𑀩𑀢𑁆𑀣, 𑀯𑁂𑀤𑀦𑀸 𑀢𑀼 𑀬𑀣𑀸𑀭𑀳𑀁.

𑁩𑁫𑁦. 𑀙𑀦𑁆𑀤𑀸𑀥𑀺𑀫𑁄𑀓𑁆𑀔𑀯𑀻𑀭𑀺𑀬𑀸, 𑀲𑀤𑁆𑀥𑀸𑀤𑁂𑀓𑀽𑀦𑀯𑀻𑀲𑀢𑀺;

𑀨𑀲𑁆𑀲𑀸𑀤𑀬𑁄 𑀙𑀴𑁂𑀯𑀸𑀢𑀺, 𑀦 𑀘𑀮𑀦𑁆𑀢𑀝𑁆𑀞𑀯𑀻𑀲𑀢𑀺.

𑁩𑁫𑁧. 𑀢𑁂𑀭𑀲𑁂𑀯 𑀢𑀼 𑀲𑀸𑀯𑀚𑁆𑀚𑁂, 𑀙𑀴𑁂𑀯𑀸𑀳𑁂𑀢𑀼𑀫𑀸𑀦𑀲𑁂;

𑀦 𑀘𑀮𑀦𑁆𑀢𑀺 𑀤𑀲 𑀅𑀜𑁆𑀜𑁂, 𑀘𑀼𑀤𑁆𑀤𑀲𑀸 𑀙 𑀘 𑀲𑀫𑁆𑀪𑀯𑀸𑀢𑀺.

𑀇𑀢𑀺 𑀘𑁂𑀢𑀲𑀺𑀓𑀯𑀺𑀪𑀸𑀕𑁂 𑀘𑁂𑀢𑀲𑀺𑀓𑀲𑀗𑁆𑀕𑀳𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀦𑀯𑀫𑁄 𑀧𑀭𑀺𑀘𑁆𑀙𑁂𑀤𑁄.