𑀲𑀢𑁆𑀢𑀫𑁄 𑀧𑀭𑀺𑀘𑁆𑀙𑁂𑀤𑁄

𑁭. 𑀪𑀽𑀫𑀺𑀧𑀼𑀕𑁆𑀕𑀮𑀲𑀫𑁆𑀪𑀯𑀓𑀣𑀸

𑁨𑁭𑁦. 𑀤𑁆𑀯𑀺𑀳𑁂𑀢𑀼𑀓𑀸𑀳𑁂𑀢𑀼𑀓𑀸𑀦𑀁, 𑀦 𑀲𑀫𑁆𑀧𑀚𑁆𑀚𑀢𑀺 𑀅𑀧𑁆𑀧𑀦𑀸;

𑀅𑀭𑀳𑀢𑁆𑀢𑀜𑁆𑀘 𑀦𑀢𑁆𑀣𑀻𑀢𑀺, 𑀦𑀢𑁆𑀣𑁂𑀯 𑀚𑀯𑀦𑀓𑁆𑀭𑀺𑀬𑀸.

𑁨𑁭𑁧. 𑀜𑀸𑀡𑀧𑀸𑀓𑀸 𑀦 𑀯𑀢𑁆𑀢𑀦𑁆𑀢𑀺, 𑀚𑀴𑀢𑁆𑀢𑀸 𑀫𑀽𑀮𑀲𑀦𑁆𑀥𑀺𑀬𑀸;

𑀤𑁆𑀯𑀺𑀳𑁂𑀢𑀼𑀓𑀢𑀤𑀸𑀮𑀫𑁆𑀩𑀁, 𑀲𑀺𑀬𑀸 𑀲𑀼𑀕𑀢𑀺𑀬𑀁 𑀦 𑀯𑀸.

𑁨𑁭𑁨. 𑀢𑀺𑀳𑁂𑀢𑀼𑀓𑀸𑀦𑀁 𑀲𑀢𑁆𑀢𑀸𑀦𑀁, 𑀲𑀫𑀣𑀜𑁆𑀘 𑀯𑀺𑀧𑀲𑁆𑀲𑀦𑀁;

𑀪𑀸𑀯𑁂𑀦𑁆𑀢𑀸𑀦𑀁 𑀧𑀯𑀢𑁆𑀢𑀦𑁆𑀢𑀺, 𑀙𑀩𑁆𑀩𑀻𑀲𑀢𑀺𑀧𑀺 𑀅𑀧𑁆𑀧𑀦𑀸.

𑁨𑁭𑁩. 𑀅𑀭𑀳𑀦𑁆𑀢𑀸𑀦 𑀲𑀢𑁆𑀢𑀸𑀦𑀁, 𑀪𑀯𑀦𑁆𑀢𑀺 𑀚𑀯𑀦𑀓𑁆𑀭𑀺𑀬𑀸;

𑀬𑀣𑀸𑀪𑀽𑀫𑀺𑀦𑀺𑀬𑀸𑀫𑁂𑀦, 𑀜𑀸𑀡𑀧𑀸𑀓𑀸 𑀘 𑀮𑀩𑁆𑀪𑀭𑁂.

𑁨𑁭𑁪. 𑀯𑀚𑁆𑀛𑀸 𑀧𑀞𑀫𑀫𑀕𑁆𑀕𑁂𑀦, 𑀓𑀗𑁆𑀔𑀸𑀤𑀺𑀝𑁆𑀞𑀺𑀬𑀼𑀢𑀸 𑀧𑀦;

𑀧𑀝𑀺𑀖𑀁 𑀢𑀢𑀺𑀬𑁂𑀦𑁂𑀯, 𑀓𑀫𑁆𑀫𑀫𑀦𑁆𑀢𑁂𑀦 𑀲𑀸𑀲𑀯𑀁.

𑁨𑁭𑁫. 𑀢𑀲𑁆𑀫𑀸 𑀢𑁂𑀲𑀁 𑀦 𑀯𑀢𑁆𑀢𑀦𑁆𑀢𑀺, 𑀢𑀸𑀦𑀺 𑀘𑀺𑀢𑁆𑀢𑀸𑀦𑀺 𑀲𑀩𑁆𑀩𑀣𑀸;

𑀫𑀕𑁆𑀕𑀝𑁆𑀞𑀸𑀦𑀁 𑀢𑀼 𑀫𑀕𑁆𑀕𑁄𑀯, 𑀦𑀸𑀜𑁆𑀜𑀁 𑀲𑀫𑁆𑀪𑁄𑀢𑀺 𑀓𑀺𑀜𑁆𑀘𑀺𑀧𑀺.

𑁨𑁭𑁬. 𑀅𑀳𑁂𑀢𑀼𑀓𑀯𑀺𑀧𑀸𑀓𑀸𑀦𑀺, 𑀮𑀩𑁆𑀪𑀫𑀸𑀦𑀸𑀬 𑀯𑀻𑀣𑀺𑀬𑀸;

𑀲𑀩𑁆𑀩𑀣𑀸𑀧𑀺 𑀘 𑀲𑀩𑁆𑀩𑁂𑀲𑀁, 𑀲𑀫𑁆𑀪𑀯𑀦𑁆𑀢𑀺 𑀬𑀣𑀸𑀭𑀳𑀁.

𑁨𑁭𑁭. 𑀧𑀜𑁆𑀘𑀤𑁆𑀯𑀸𑀭𑁂 𑀫𑀦𑁄𑀤𑁆𑀯𑀸𑀭𑁂, 𑀥𑀼𑀯𑀫𑀸𑀯𑀚𑁆𑀚𑀦𑀤𑁆𑀯𑀬𑀁;

𑀧𑀭𑀺𑀢𑁆𑀢𑀧𑀼𑀜𑁆𑀜𑀸𑀧𑀼𑀜𑁆𑀜𑀸𑀦𑀺, 𑀮𑀩𑁆𑀪𑀦𑁆𑀢𑀺 𑀮𑀳𑀼𑀯𑀼𑀢𑁆𑀢𑀺𑀢𑁄.

𑁨𑁭𑁮. 𑀓𑁆𑀭𑀺𑀬𑀸𑀚𑀯𑀦𑀫𑀧𑁆𑀧𑀦𑀸, 𑀦𑀢𑁆𑀣𑀸𑀧𑀸𑀬𑁂𑀲𑀼 𑀓𑀸𑀭𑀡𑀁;

𑀦𑀢𑁆𑀣𑀺 𑀲𑀳𑁂𑀢𑀼𑀓𑀸 𑀧𑀸𑀓𑀸, 𑀤𑀼𑀕𑁆𑀕𑀢𑀢𑁆𑀢𑀸 𑀳𑀺 𑀲𑀦𑁆𑀥𑀺𑀬𑀸.

𑁨𑁭𑁯. 𑀩𑁆𑀭𑀳𑁆𑀫𑀸𑀦𑀁 𑀧𑀝𑀺𑀖𑀁 𑀦𑀢𑁆𑀣𑀺, 𑀛𑀸𑀦𑀯𑀺𑀓𑁆𑀔𑀫𑁆𑀪𑀺𑀢𑀁 𑀢𑀣𑀸;

𑀳𑁂𑀝𑁆𑀞𑀸𑀛𑀸𑀦𑀁 𑀯𑀺𑀭𑀢𑁆𑀢𑀢𑁆𑀢𑀸, 𑀦 𑀪𑀸𑀯𑁂𑀦𑁆𑀢𑀺 𑀅𑀭𑀽𑀧𑀺𑀦𑁄.

𑁨𑁮𑁦. 𑀧𑀼𑀩𑁆𑀩𑁂𑀯 𑀤𑀺𑀝𑁆𑀞𑀲𑀘𑁆𑀘𑀸𑀯, 𑀅𑀭𑀺𑀬𑀸𑀭𑀽𑀧𑀪𑀽𑀫𑀓𑀸;

𑀢𑀲𑁆𑀫𑀸𑀤𑀺𑀫𑀕𑁆𑀕𑁄 𑀦𑀢𑁆𑀣𑁂𑀢𑁆𑀣, 𑀓𑀸𑀬𑀸𑀪𑀸𑀯𑀸 𑀲𑀺𑀢𑀁 𑀢𑀣𑀸.

𑁨𑁮𑁧. 𑀲𑀼𑀤𑁆𑀥𑀸𑀯𑀸𑀲𑀸𑀧𑀺 𑀧𑀢𑁆𑀢𑀸𑀯, 𑀳𑁂𑀝𑁆𑀞𑀸𑀦𑀼𑀢𑁆𑀢𑀭𑀧𑀜𑁆𑀘𑀓𑀁;

𑀲𑀢𑁆𑀢𑀧𑀸𑀧𑀧𑀳𑀻𑀦𑀸 𑀘, 𑀢𑀲𑁆𑀫𑀸 𑀦𑀢𑁆𑀣𑁂𑀢𑁆𑀣 𑀢𑀸𑀦𑀺 𑀘.

𑁨𑁮𑁨. 𑀧𑀜𑁆𑀘𑀤𑁆𑀯𑀸𑀭𑀺𑀓𑀘𑀺𑀢𑁆𑀢𑀸𑀦𑀺, 𑀤𑁆𑀯𑀸𑀭𑀸𑀪𑀸𑀯𑁂 𑀦 𑀯𑀺𑀚𑁆𑀚𑀭𑁂;

𑀲𑀳𑁂𑀢𑀼𑀓𑀯𑀺𑀧𑀸𑀓𑀸 𑀘, 𑀬𑀣𑀸𑀪𑀽𑀫𑀺𑀯𑀯𑀢𑁆𑀣𑀺𑀢𑀸.

𑁨𑁮𑁩. 𑀲𑀫𑁆𑀪𑀯𑀸𑀲𑀫𑁆𑀪𑀯𑀜𑁆𑀘𑁂𑀯𑀁, 𑀜𑀢𑁆𑀯𑀸 𑀧𑀼𑀕𑁆𑀕𑀮𑀪𑀽𑀫𑀺𑀲𑀼;

𑀮𑀩𑁆𑀪𑀫𑀸𑀦𑀯𑀲𑀸 𑀢𑀢𑁆𑀣, 𑀘𑀺𑀢𑁆𑀢𑀲𑀗𑁆𑀕𑀳𑀫𑀼𑀤𑁆𑀤𑀺𑀲𑁂.

𑁨𑁮𑁪. 𑀓𑀼𑀲𑀮𑀸𑀤𑀺𑀧𑁆𑀧𑀪𑁂𑀤𑀸 𑀘, 𑀢𑀣𑀸 𑀪𑀽𑀫𑀸𑀤𑀺𑀪𑁂𑀤𑀢𑁄;

𑀯𑀢𑁆𑀣𑀼𑀤𑁆𑀯𑀸𑀭𑀸𑀭𑀫𑁆𑀫𑀡𑀢𑁄, 𑀪𑀽𑀫𑀺𑀧𑀼𑀕𑁆𑀕𑀮𑀢𑁄𑀧𑀺 𑀘.

𑁨𑁮𑁫. 𑀯𑀺𑀪𑀸𑀕𑁄 𑀬𑁄 𑀲𑀫𑀼𑀤𑁆𑀤𑀺𑀝𑁆𑀞𑁄,

𑀘𑀺𑀢𑁆𑀢𑀸𑀦𑀜𑁆𑀘 𑀢𑀼 𑀲𑀫𑁆𑀪𑀯𑀸;

𑀜𑁂𑀬𑁆𑀬𑁄 𑀘𑁂𑀢𑀲𑀺𑀓𑀸𑀦𑀜𑁆𑀘,

𑀲𑀫𑁆𑀧𑀬𑁄𑀕𑀸𑀦𑀼𑀲𑀸𑀭𑀢𑁄𑀢𑀺.

𑀇𑀢𑀺 𑀘𑀺𑀢𑁆𑀢𑀯𑀺𑀪𑀸𑀕𑁂 𑀪𑀽𑀫𑀺𑀧𑀼𑀕𑁆𑀕𑀮𑀲𑀫𑁆𑀪𑀯𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀲𑀢𑁆𑀢𑀫𑁄 𑀧𑀭𑀺𑀘𑁆𑀙𑁂𑀤𑁄.

𑀦𑀺𑀝𑁆𑀞𑀺𑀢𑁄 𑀘 𑀘𑀺𑀢𑁆𑀢𑀯𑀺𑀪𑀸𑀕𑁄.