𑀅𑀝𑁆𑀞𑀫𑁄 𑀧𑀭𑀺𑀘𑁆𑀙𑁂𑀤𑁄

𑁨. 𑀘𑁂𑀢𑀲𑀺𑀓𑀯𑀺𑀪𑀸𑀕𑁄

𑁮. 𑀘𑁂𑀢𑀲𑀺𑀓𑀲𑀫𑁆𑀧𑀬𑁄𑀕𑀓𑀣𑀸

𑁨𑁮𑁬. 𑀇𑀢𑀺 𑀘𑀺𑀢𑁆𑀢𑀯𑀺𑀥𑀺𑀁 𑀜𑀢𑁆𑀯𑀸, 𑀤𑁆𑀯𑁂𑀧𑀜𑁆𑀜𑀸𑀲 𑀯𑀺𑀪𑀸𑀯𑀺𑀦𑀸;

𑀜𑁂𑀬𑁆𑀬𑀸 𑀘𑁂𑀢𑀲𑀺 𑀲𑀫𑁆𑀪𑀽𑀢𑀸, 𑀥𑀫𑁆𑀫𑀸 𑀘𑁂𑀢𑀲𑀺𑀓𑀸 𑀓𑀣𑀁.

𑁨𑁮𑁭. 𑀨𑀲𑁆𑀲𑁄 𑀘 𑀯𑁂𑀤𑀦𑀸 𑀲𑀜𑁆𑀜𑀸, 𑀘𑁂𑀢𑀦𑁂𑀓𑀕𑁆𑀕𑀢𑀸 𑀢𑀣𑀸;

𑀚𑀻𑀯𑀺𑀢𑀁 𑀫𑀦𑀲𑀺𑀓𑀸𑀭𑁄, 𑀲𑀢𑁆𑀢 𑀲𑀸𑀥𑀸𑀭𑀡𑀸 𑀇𑀫𑁂.

𑁨𑁮𑁮. 𑀯𑀺𑀢𑀓𑁆𑀓𑁄 𑀘 𑀯𑀺𑀘𑀸𑀭𑁄 𑀘, 𑀧𑀻𑀢𑀺 𑀘 𑀯𑀻𑀭𑀺𑀬𑀁 𑀢𑀣𑀸;

𑀙𑀦𑁆𑀤𑁄 𑀘 𑀅𑀥𑀺𑀫𑁄𑀓𑁆𑀔𑁄 𑀘, 𑀙 𑀧𑀓𑀺𑀡𑁆𑀡𑀓𑀦𑀸𑀫𑀓𑀸.

𑁨𑁮𑁯. 𑀧𑀼𑀜𑁆𑀜𑀸𑀧𑀼𑀜𑁆𑀜𑁂𑀲𑀼 𑀧𑀸𑀓𑁂𑀲𑀼, 𑀓𑁆𑀭𑀺𑀬𑀸𑀲𑀼 𑀘 𑀬𑀣𑀸𑀭𑀳𑀁;

𑀫𑀸𑀦𑀲𑁂𑀲𑀼 𑀧𑀯𑀢𑁆𑀢𑀦𑁆𑀢𑀺, 𑀯𑀺𑀧𑁆𑀧𑀓𑀺𑀡𑁆𑀡𑀸 𑀧𑀓𑀺𑀡𑁆𑀡𑀓𑀸.

𑁨𑁯𑁦. 𑀲𑀤𑁆𑀥𑀸 𑀲𑀢𑀺𑀦𑁆𑀤𑁆𑀭𑀺𑀬𑀜𑁆𑀘𑁂𑀯, 𑀳𑀺𑀭𑁄𑀢𑁆𑀢𑀧𑁆𑀧𑀩𑀮𑀤𑁆𑀯𑀬𑀁;

𑀅𑀮𑁄𑀪𑁄 𑀘 𑀅𑀤𑁄𑀲𑁄 𑀘, 𑀧𑀜𑁆𑀜𑀸 𑀫𑀚𑁆𑀛𑀢𑁆𑀢𑀢𑀸𑀧𑀺 𑀘.

𑁨𑁯𑁧. 𑀅𑀝𑁆𑀞𑁂𑀢𑁂 𑀉𑀢𑁆𑀢𑀫𑀸 𑀦𑀸𑀫, 𑀥𑀫𑁆𑀫𑀸 𑀉𑀢𑁆𑀢𑀫𑀲𑀸𑀥𑀦𑀸;

𑀦𑀺𑀯𑀚𑁆𑀚𑀸𑀢𑀺 𑀧𑀯𑀼𑀘𑁆𑀘𑀦𑁆𑀢𑀺, 𑀬𑀼𑀕𑀴𑀸 𑀙 𑀢𑀢𑁄𑀧𑀭𑁂.

𑁨𑁯𑁨. 𑀧𑀲𑁆𑀲𑀤𑁆𑀥𑀺 𑀓𑀸𑀬𑀘𑀺𑀢𑁆𑀢𑀸𑀦𑀁, 𑀮𑀳𑀼𑀢𑀸 𑀫𑀼𑀤𑀼𑀢𑀸 𑀢𑀣𑀸;

𑀓𑀫𑁆𑀫𑀜𑁆𑀜𑀢𑀸 𑀘 𑀧𑀸𑀕𑀼𑀜𑁆𑀜-𑀢𑀸 𑀘 𑀉𑀚𑀼𑀓𑀢𑀸𑀢𑀺 𑀘.

𑁨𑁯𑁩. 𑀅𑀧𑁆𑀧𑀫𑀜𑁆𑀜𑀸𑀤𑁆𑀯𑀬𑀁 𑀦𑀸𑀫, 𑀓𑀭𑀼𑀡𑀸𑀫𑀼𑀤𑀺𑀢𑀸 𑀲𑀺𑀬𑀼𑀁;

𑀲𑀫𑁆𑀫𑀸𑀯𑀸𑀘𑀸 𑀘 𑀓𑀫𑁆𑀫𑀦𑁆𑀢𑀸-𑀚𑀻𑀯𑀸 𑀘 𑀯𑀺𑀭𑀢𑀺𑀢𑁆𑀢𑀬𑀁.

𑁨𑁯𑁪. 𑀧𑀜𑁆𑀘𑀯𑀻𑀲 𑀧𑀦𑀺𑀘𑁆𑀘𑁂𑀢𑁂, 𑀅𑀦𑀯𑀚𑁆𑀚𑀸 𑀬𑀣𑀸𑀭𑀳𑀁;

𑀧𑀸𑀧𑀸𑀳𑁂𑀢𑀼𑀓𑀫𑀼𑀢𑁆𑀢𑁂𑀲𑀼, 𑀅𑀦𑀯𑀚𑁆𑀚𑁂𑀲𑀼 𑀚𑀸𑀬𑀭𑁂.

𑁨𑁯𑁫. 𑀮𑁄𑀪𑁄 𑀤𑁄𑀲𑁄 𑀘 𑀫𑁄𑀳𑁄 𑀘,

𑀫𑀸𑀦𑁄 𑀤𑀺𑀝𑁆𑀞𑀺 𑀘 𑀲𑀁𑀲𑀬𑁄;

𑀣𑀺𑀦𑀫𑀺𑀤𑁆𑀥𑀜𑁆𑀘 𑀉𑀤𑁆𑀥𑀘𑁆𑀘𑀁,

𑀓𑀼𑀓𑁆𑀓𑀼𑀘𑁆𑀘𑀜𑁆𑀘 𑀢𑀣𑀸 𑀤𑀲.

𑁨𑁯𑁬. 𑀅𑀳𑀺𑀭𑀻𑀓𑀫𑀦𑁄𑀢𑁆𑀢𑀧𑁆𑀧𑀁, 𑀇𑀲𑁆𑀲𑀸 𑀫𑀘𑁆𑀙𑀭𑀺𑀬𑀦𑁆𑀢𑀺 𑀘;

𑀳𑁄𑀦𑁆𑀢𑀺 𑀘𑀼𑀤𑁆𑀤𑀲 𑀲𑀸𑀯𑀚𑁆𑀚𑀸, 𑀲𑀸𑀯𑀚𑁆𑀚𑁂𑀲𑁆𑀯𑁂𑀯 𑀲𑀫𑁆𑀪𑀯𑀸.

𑁨𑁯𑁭. 𑀤𑁆𑀯𑁂𑀧𑀜𑁆𑀜𑀸𑀲 𑀘𑀢𑀼𑀤𑁆𑀥𑁂𑀯𑀁, 𑀥𑀫𑁆𑀫𑀸 𑀘𑁂𑀢𑀲𑀺𑀓𑀸 𑀞𑀺𑀢𑀸;

𑀢𑁂𑀲𑀁 𑀤𑀸𑀦𑀺 𑀧𑀯𑀓𑁆𑀔𑀸𑀫𑀺, 𑀲𑀫𑁆𑀧𑀬𑁄𑀕𑀜𑁆𑀘 𑀲𑀗𑁆𑀕𑀳𑀁.

𑁨𑁯𑁮. 𑀲𑀢𑁆𑀢 𑀲𑀸𑀥𑀸𑀭𑀡𑀸 𑀲𑀩𑁆𑀩-𑀘𑀺𑀢𑁆𑀢𑀲𑀸𑀥𑀸𑀭𑀡𑀸 𑀢𑀢𑁄;

𑀘𑀺𑀢𑁆𑀢𑁂𑀦 𑀲𑀤𑁆𑀥𑀺 𑀅𑀝𑁆𑀞𑀦𑁆𑀦𑀁, 𑀯𑀺𑀧𑁆𑀧𑀬𑁄𑀕𑁄 𑀦 𑀓𑀢𑁆𑀣𑀘𑀺.

𑁨𑁯𑁯. 𑀯𑀺𑀢𑀓𑁆𑀓𑁄 𑀧𑀜𑁆𑀘𑀯𑀺𑀜𑁆𑀜𑀸𑀡𑀁, 𑀤𑀼𑀢𑀺𑀬𑀸𑀤𑀺𑀯𑀺𑀯𑀚𑁆𑀚𑀺𑀢𑁂;

𑀯𑀺𑀘𑀸𑀭𑁄𑀧𑀺 𑀘 𑀢𑀢𑁆𑀣𑁂𑀯, 𑀢𑀢𑀺𑀬𑀸𑀤𑀺𑀯𑀺𑀯𑀚𑁆𑀚𑀺𑀢𑁂.

𑁩𑁦𑁦. 𑀲𑁄𑀫𑀦𑀲𑁆𑀲𑀬𑀼𑀢𑁂 𑀧𑀻𑀢𑀺-𑀘𑀢𑀼𑀢𑁆𑀣𑀚𑁆𑀛𑀸𑀦𑀯𑀚𑁆𑀚𑀺𑀢𑁂;

𑀯𑀻𑀭𑀺𑀬𑀁 𑀧𑀞𑀫𑀸𑀯𑀚𑁆𑀚-𑀯𑀺𑀧𑀸𑀓𑀸𑀳𑁂𑀢𑀼𑀯𑀚𑁆𑀚𑀺𑀢𑁂.

𑁩𑁦𑁧. 𑀙𑀦𑁆𑀤𑁄 𑀲𑀫𑁆𑀪𑁄𑀢𑀺 𑀲𑀩𑁆𑀩𑀢𑁆𑀣, 𑀫𑁄𑀫𑀽𑀳𑀸𑀳𑁂𑀢𑀼𑀯𑀚𑁆𑀚𑀺𑀢𑁂;

𑀅𑀥𑀺𑀫𑁄𑀓𑁆𑀔𑁄 𑀯𑀺𑀘𑀺𑀓𑀺𑀘𑁆𑀙𑀸-𑀧𑀜𑁆𑀘𑀯𑀺𑀜𑁆𑀜𑀸𑀡𑀯𑀚𑁆𑀚𑀺𑀢𑁂.

𑁩𑁦𑁨. 𑀙𑀲𑀝𑁆𑀞𑀺 𑀧𑀜𑁆𑀘𑀧𑀜𑁆𑀜𑀸𑀲, 𑀲𑀢𑁆𑀢𑀢𑀺 𑀘𑁂𑀯 𑀲𑁄𑀴𑀲;

𑀯𑀻𑀲𑀢𑁂𑀓𑀸𑀤𑀲𑁂𑀯𑀸𑀣, 𑀧𑀓𑀺𑀡𑁆𑀡𑀓𑀯𑀺𑀯𑀚𑁆𑀚𑀺𑀢𑀸.

𑁩𑁦𑁩. 𑀫𑀸𑀦𑀲𑀸 𑀧𑀜𑁆𑀘𑀧𑀜𑁆𑀜𑀸𑀲, 𑀲𑀯𑀺𑀢𑀓𑁆𑀓𑀸 𑀙𑀲𑀝𑁆𑀞𑀺 𑀘;

𑀲𑀯𑀺𑀘𑀸𑀭𑁂𑀓𑀧𑀜𑁆𑀜𑀸𑀲, 𑀲𑀧𑁆𑀧𑀻𑀢𑀺𑀓𑀫𑀦𑀸 𑀢𑀣𑀸.

𑁩𑁦𑁪. 𑀢𑁂𑀲𑀢𑁆𑀢𑀢𑀺 𑀲𑀯𑀻𑀭𑀺𑀬𑀸, 𑀲𑀙𑀦𑁆𑀤𑁂𑀓𑀽𑀦𑀲𑀢𑁆𑀢𑀢𑀺;

𑀲𑀸𑀥𑀺𑀫𑁄𑀓𑁆𑀔𑀸 𑀧𑀯𑀼𑀘𑁆𑀘𑀦𑁆𑀢𑀺, 𑀅𑀝𑁆𑀞𑀲𑀢𑁆𑀢𑀢𑀺 𑀫𑀸𑀦𑀲𑀸.

𑁩𑁦𑁫. 𑀧𑀜𑁆𑀜𑀸𑀧𑁆𑀧𑀫𑀜𑁆𑀜𑀸𑀯𑀺𑀭𑀢𑀻, 𑀳𑀺𑀢𑁆𑀯𑀸 𑀏𑀓𑀽𑀦𑀲𑀝𑁆𑀞𑀺𑀲𑀼;

𑀧𑀸𑀧𑀸𑀳𑁂𑀢𑀼𑀓𑀫𑀼𑀢𑁆𑀢𑁂𑀲𑀼, 𑀲𑀤𑁆𑀥𑀸𑀤𑁂𑀓𑀽𑀦𑀯𑀻𑀲𑀢𑀺.

𑁩𑁦𑁬. 𑀤𑁆𑀯𑀺𑀳𑁂𑀢𑀼𑀓𑀸𑀳𑁂𑀢𑀼𑀧𑀸𑀧𑀯𑀚𑁆𑀚𑀺𑀢𑁂𑀲𑀼 𑀲𑀫𑀸𑀲𑀢𑁄;

𑀧𑀜𑁆𑀜𑀸 𑀢𑀼 𑀚𑀸𑀬𑀢𑁂 𑀲𑀢𑁆𑀢𑀘𑀢𑁆𑀢𑀸𑀮𑀻𑀲𑁂𑀲𑀼 𑀲𑀩𑁆𑀩𑀣𑀸.

𑁩𑁦𑁭. 𑀫𑀳𑀸𑀓𑁆𑀭𑀺𑀬𑀸𑀓𑀸𑀫𑀧𑀼𑀜𑁆𑀜-𑀭𑀽𑀧𑀚𑁆𑀛𑀸𑀦𑁂𑀲𑀼 𑀚𑀸𑀬𑀭𑁂;

𑀅𑀧𑁆𑀧𑀫𑀜𑁆𑀜𑀸𑀝𑁆𑀞𑀯𑀻𑀲𑁂𑀲𑀼, 𑀳𑀺𑀢𑁆𑀯𑀸 𑀛𑀸𑀦𑀁 𑀢𑀼 𑀧𑀜𑁆𑀘𑀫𑀁.

𑁩𑁦𑁮. 𑀮𑁄𑀓𑀼𑀢𑁆𑀢𑀭𑁂𑀲𑀼 𑀲𑀩𑁆𑀩𑀢𑁆𑀣, 𑀲𑀳𑁂𑀯 𑀯𑀺𑀭𑀢𑀺𑀢𑁆𑀢𑀬𑀁;

𑀓𑀸𑀫𑀧𑀼𑀜𑁆𑀜𑁂𑀲𑀼 𑀲𑀫𑁆𑀪𑁄𑀢𑀺, 𑀬𑀣𑀸𑀲𑀫𑁆𑀪𑀯𑀢𑁄 𑀯𑀺𑀲𑀼𑀁.

𑁩𑁦𑁯. 𑀯𑀺𑀭𑀢𑀻𑀅𑀧𑁆𑀧𑀫𑀜𑁆𑀜𑀸𑀲𑀼, 𑀧𑀜𑁆𑀘𑀲𑁆𑀯𑀧𑀺 𑀬𑀣𑀸𑀭𑀳𑀁;

𑀓𑀤𑀸𑀘𑀺𑀤𑁂𑀯 𑀲𑀫𑁆𑀪𑁄𑀢𑀺, 𑀏𑀓𑁂𑀓𑁄𑀯 𑀦 𑀘𑁂𑀓𑀢𑁄.

𑁩𑁧𑁦. 𑀅𑀳𑀺𑀭𑀻𑀓𑀫𑀦𑁄𑀢𑁆𑀢𑀧𑁆𑀧𑀁, 𑀫𑁄𑀳𑀉𑀤𑁆𑀥𑀘𑁆𑀘𑀫𑁂𑀯 𑀘;

𑀧𑀸𑀧𑀲𑀸𑀥𑀸𑀭𑀡𑀸 𑀦𑀸𑀫, 𑀘𑀢𑁆𑀢𑀸𑀭𑁄 𑀧𑀸𑀧𑀲𑀫𑁆𑀪𑀯𑀸.

𑁩𑁧𑁧. 𑀮𑁄𑀪𑁄 𑀘 𑀮𑁄𑀪𑀫𑀽𑀮𑁂𑀲𑀼, 𑀤𑀺𑀝𑁆𑀞𑀺𑀬𑀼𑀢𑁆𑀢𑁂𑀲𑀼 𑀤𑀺𑀝𑁆𑀞𑀺 𑀘;

𑀫𑀸𑀦𑁄 𑀤𑀺𑀝𑁆𑀞𑀺𑀯𑀺𑀬𑀼𑀢𑁆𑀢𑁂𑀲𑀼, 𑀤𑀺𑀝𑁆𑀞𑀺𑀫𑀸𑀦𑀸 𑀦 𑀘𑁂𑀓𑀢𑁄.

𑁩𑁧𑁨. 𑀤𑁄𑀲𑀫𑀽𑀮𑁂𑀲𑀼 𑀤𑁄𑀲𑁄 𑀘, 𑀇𑀲𑁆𑀲𑀸 𑀫𑀘𑁆𑀙𑀭𑀺𑀬𑀁 𑀢𑀣𑀸;

𑀓𑀼𑀓𑁆𑀓𑀼𑀘𑁆𑀘𑀫𑀺𑀢𑀺 𑀘𑀢𑁆𑀢𑀸𑀭𑁄, 𑀯𑀺𑀘𑀺𑀓𑀺𑀘𑁆𑀙𑀸 𑀢𑀼 𑀓𑀗𑁆𑀔𑀺𑀢𑁂.

𑁩𑁧𑁩. 𑀲𑀳𑁂𑀯 𑀣𑀺𑀦𑀫𑀺𑀤𑁆𑀥𑀁 𑀢𑀼, 𑀲𑀲𑀗𑁆𑀔𑀸𑀭𑁂𑀲𑀼 𑀧𑀜𑁆𑀘𑀲𑀼;

𑀇𑀢𑀺 𑀘𑀼𑀤𑁆𑀤𑀲 𑀲𑀸𑀯𑀚𑁆𑀚𑀸, 𑀲𑀸𑀯𑀚𑁆𑀚𑁂𑀲𑁆𑀯𑁂𑀯 𑀦𑀺𑀘𑁆𑀙𑀺𑀢𑀸.

𑁩𑁧𑁪. 𑀫𑀸𑀦𑁄 𑀘 𑀣𑀺𑀦𑀫𑀺𑀤𑁆𑀥𑀜𑁆𑀘, 𑀲𑀳 𑀯𑀸𑀣 𑀯𑀺𑀲𑀼𑀁 𑀦 𑀯𑀸;

𑀇𑀲𑁆𑀲𑀸𑀫𑀘𑁆𑀙𑁂𑀭𑀓𑀼𑀓𑁆𑀓𑀼𑀘𑁆𑀘𑀸, 𑀅𑀜𑁆𑀜𑀫𑀜𑁆𑀜𑀁 𑀯𑀺𑀲𑀼𑀁 𑀦 𑀯𑀸𑀢𑀺.

𑀇𑀢𑀺 𑀘𑁂𑀢𑀲𑀺𑀓𑀯𑀺𑀪𑀸𑀕𑁂 𑀘𑁂𑀢𑀲𑀺𑀓𑀲𑀫𑁆𑀧𑀬𑁄𑀕𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀅𑀝𑁆𑀞𑀫𑁄 𑀧𑀭𑀺𑀘𑁆𑀙𑁂𑀤𑁄.