𑁬. 𑀪𑀽𑀫𑀺𑀧𑀼𑀕𑁆𑀕𑀮𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀓𑀣𑀸

𑁨𑁩𑁨. 𑀓𑀸𑀫𑀲𑀼𑀕𑀢𑀺𑀬𑀁 𑀳𑁄𑀦𑁆𑀢𑀺, 𑀫𑀳𑀸𑀧𑀸𑀓𑀸 𑀬𑀣𑀸𑀭𑀳𑀁;

𑀫𑀳𑀕𑁆𑀕𑀢𑀯𑀺𑀧𑀸𑀓𑀸 𑀘, 𑀬𑀣𑀸𑀲𑀦𑁆𑀥𑀺𑀯𑀯𑀢𑁆𑀣𑀺𑀢𑀸.

𑁨𑁩𑁩. 𑀯𑁄𑀝𑁆𑀞𑀩𑁆𑀩𑀓𑀸𑀫𑀧𑀼𑀜𑁆𑀜𑀸𑀦𑀺, 𑀯𑀺𑀬𑀼𑀢𑁆𑀢𑀸𑀦𑀺 𑀘 𑀤𑀺𑀝𑁆𑀞𑀺𑀬𑀸;

𑀉𑀤𑁆𑀥𑀘𑁆𑀘𑀲𑀳𑀺𑀢𑀜𑁆𑀘𑁂𑀢𑀺, 𑀳𑁄𑀦𑁆𑀢𑀺 𑀲𑀩𑁆𑀩𑀢𑁆𑀣 𑀘𑀼𑀤𑁆𑀤𑀲.

𑁨𑁩𑁪. 𑀲𑀦𑁆𑀢𑀻𑀭𑀡𑀫𑀦𑁄𑀥𑀸𑀢𑀼-𑀘𑀓𑁆𑀔𑀼𑀲𑁄𑀢𑀫𑀦𑀸 𑀧𑀦;

𑀤𑀲 𑀘𑀺𑀢𑁆𑀢𑀸𑀦𑀺 𑀚𑀸𑀬𑀦𑁆𑀢𑀺, 𑀲𑀩𑁆𑀩𑀢𑁆𑀣𑀸𑀭𑀽𑀧𑀯𑀚𑁆𑀚𑀺𑀢𑁂.

𑁨𑁩𑁫. 𑀤𑀺𑀝𑁆𑀞𑀺𑀕𑀢𑀲𑀫𑁆𑀧𑀬𑀼𑀢𑁆𑀢𑀸, 𑀯𑀺𑀘𑀺𑀓𑀺𑀘𑁆𑀙𑀸𑀬𑀼𑀢𑀸 𑀢𑀣𑀸;

𑀧𑀜𑁆𑀘 𑀲𑀩𑁆𑀩𑀢𑁆𑀣 𑀚𑀸𑀬𑀦𑁆𑀢𑀺, 𑀲𑀼𑀤𑁆𑀥𑀸𑀯𑀸𑀲𑀯𑀺𑀯𑀚𑁆𑀚𑀺𑀢𑁂.

𑁨𑁩𑁬. 𑀤𑁄𑀲𑀫𑀽𑀮𑀤𑁆𑀯𑀬𑀜𑁆𑀘𑁂𑀯, 𑀖𑀸𑀦𑀸𑀤𑀺𑀢𑁆𑀢𑀬𑀫𑀸𑀦𑀲𑀸;

𑀅𑀝𑁆𑀞 𑀲𑀩𑁆𑀩𑀢𑁆𑀣 𑀚𑀸𑀬𑀦𑁆𑀢𑀺, 𑀫𑀳𑀕𑁆𑀕𑀢𑀯𑀺𑀯𑀚𑁆𑀚𑀺𑀢𑁂.

𑁨𑁩𑁭. 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀚𑀯𑀦𑀁, 𑀅𑀦𑀸𑀕𑀸𑀫𑀺𑀨𑀮𑀸𑀤𑀬𑁄;

𑀫𑀳𑀸𑀓𑁆𑀭𑀺𑀬𑀸 𑀘 𑀚𑀸𑀬𑀦𑁆𑀢𑀺, 𑀢𑁂𑀭𑀲𑀸𑀧𑀸𑀬𑀯𑀚𑁆𑀚𑀺𑀢𑁂.

𑁨𑁩𑁮. 𑀳𑁂𑀝𑁆𑀞𑀸𑀭𑀼𑀧𑁆𑀧𑀚𑀯𑀸 𑀤𑁆𑀯𑁂 𑀤𑁆𑀯𑁂, 𑀙𑀸𑀧𑀸𑀬𑀼𑀧𑀭𑀺𑀯𑀚𑁆𑀚𑀺𑀢𑁂;

𑀲𑀺𑀢𑀭𑀽𑀧𑀚𑀯𑀸 𑀳𑁄𑀦𑁆𑀢𑀺, 𑀅𑀭𑀽𑀧𑀸𑀧𑀸𑀬𑀯𑀚𑁆𑀚𑀺𑀢𑁂.

𑁨𑁩𑁯. 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺, 𑀲𑀼𑀤𑁆𑀥𑀸𑀧𑀸𑀬𑀯𑀺𑀯𑀚𑁆𑀚𑀺𑀢𑁂;

𑀧𑀞𑀫𑀸𑀦𑀼𑀢𑁆𑀢𑀭𑀁 𑀲𑀼𑀤𑁆𑀥𑀸-𑀧𑀸𑀬𑀸𑀭𑀽𑀧𑀯𑀺𑀯𑀚𑁆𑀚𑀺𑀢𑁂.

𑁨𑁪𑁦. 𑀅𑀯𑀢𑁆𑀣𑀸𑀪𑀽𑀫𑀺𑀪𑀽𑀢𑀢𑁆𑀢𑀸, 𑀦 𑀕𑀬𑁆𑀳𑀦𑁆𑀢𑀺 𑀅𑀦𑀼𑀢𑁆𑀢𑀭𑀸;

𑀏𑀓𑀯𑁄𑀓𑀸𑀭𑀪𑀽𑀫𑀺 𑀘, 𑀭𑀽𑀧𑀫𑀢𑁆𑀢𑀸 𑀦 𑀕𑀬𑁆𑀳𑀢𑀺.

𑁨𑁪𑁧. 𑀲𑀪𑀼𑀫𑁆𑀫𑀸 𑀲𑀩𑁆𑀩𑀪𑀼𑀫𑁆𑀫𑀸 𑀘, 𑀏𑀓𑀤𑁆𑀯𑀺𑀢𑁆𑀢𑀬𑀯𑀚𑁆𑀚𑀺𑀢𑀸;

𑀢𑀣𑀸𑀭𑀽𑀧𑀲𑀼𑀤𑁆𑀥𑀸𑀯𑀸𑀲-𑀩𑁆𑀭𑀳𑁆𑀫𑀸𑀧𑀸𑀬𑀯𑀲𑀸𑀢𑀺 𑀘.

𑁨𑁪𑁨. 𑀫𑀸𑀦𑀲𑀸 𑀧𑀜𑁆𑀘 𑀓𑁄𑀝𑁆𑀞𑀸𑀲𑀸, 𑀲𑀢𑁆𑀢𑀭𑀲 𑀘𑀢𑀼𑀤𑁆𑀤𑀲;

𑀙𑀢𑁆𑀢𑀺𑀁𑀲𑀢𑁂𑀓𑀯𑀻𑀲𑀸 𑀘, 𑀏𑀓𑀜𑁆𑀘𑁂𑀯 𑀬𑀣𑀸𑀓𑁆𑀓𑀫𑀁.

𑁨𑁪𑁩. 𑀅𑀝𑁆𑀞𑀸𑀭𑀲𑀸𑀧𑀺 𑀳𑁄𑀦𑁆𑀢𑁂𑀢𑁂, 𑀦𑀯𑀥𑀸𑀧𑀺 𑀧𑀼𑀦𑁂𑀓𑀥𑀸;

𑀘𑀢𑀼𑀥𑀸 𑀢𑀺𑀯𑀺𑀥𑀸 𑀘𑁂𑀯, 𑀏𑀓𑀥𑀸𑀢𑀺 𑀘 𑀪𑁂𑀤𑀢𑁄.

𑁨𑁪𑁪. 𑀢𑁂𑀭𑀲𑀸𑀧𑀺 𑀘 𑀓𑁄𑀝𑁆𑀞𑀸𑀲𑀸, 𑀪𑀯𑀦𑁆𑀢𑁂𑀓𑀢𑀺𑀪𑀽𑀫𑀓𑀸;

𑀙𑀲𑀢𑁆𑀢𑁂𑀓𑀸𑀤𑀲𑀲𑀢𑁆𑀢-𑀭𑀲𑀪𑀽𑀫𑀓𑀫𑀸𑀦𑀲𑀸.

𑁨𑁪𑁫. 𑀏𑀓𑀤𑁆𑀯𑀬𑀢𑀺𑀘𑀢𑀼𑀓𑁆𑀓𑀧𑀜𑁆𑀘𑀓𑀸𑀥𑀺𑀓𑀯𑀻𑀲𑀚𑀸;

𑀙𑀩𑁆𑀩𑀻𑀲𑀢𑀺𑀁𑀲𑀚𑀸 𑀘𑁂𑀢𑀺, 𑀬𑀣𑀸𑀦𑀼𑀓𑁆𑀓𑀫𑀢𑁄 𑀪𑀯𑁂.

𑁨𑁪𑁬. 𑀘𑀢𑁆𑀢𑀸𑀭𑀺 𑀧𑀼𑀦 𑀘𑀢𑁆𑀢𑀸𑀭𑀺, 𑀏𑀓𑀫𑀝𑁆𑀞𑀝𑁆𑀞 𑀘𑁂𑀓𑀓𑀁;

𑀘𑀢𑁆𑀢𑀸𑀭𑁂𑀓𑀸𑀤𑀲 𑀤𑁆𑀯𑁂 𑀤𑁆𑀯𑁂, 𑀲𑀢𑁆𑀢 𑀢𑁂𑀯𑀻𑀲 𑀘𑀼𑀤𑁆𑀤𑀲.

𑁨𑁪𑁭. 𑀓𑁆𑀭𑀺𑀬𑀸𑀚𑀯𑀫𑀳𑀸𑀧𑀸𑀓𑀸, 𑀮𑁄𑀓𑀼𑀢𑁆𑀢𑀭𑀫𑀳𑀕𑁆𑀕𑀢𑀸;

𑀤𑁆𑀯𑁂𑀧𑀜𑁆𑀜𑀸𑀲 𑀦 𑀮𑀩𑁆𑀪𑀦𑁆𑀢𑀺, 𑀘𑀢𑀼𑀭𑀸𑀧𑀸𑀬𑀪𑀽𑀫𑀺𑀬𑀁.

𑁨𑁪𑁮. 𑀓𑀸𑀫𑀸𑀯𑀘𑀭𑀤𑁂𑀯𑁂𑀲𑀼, 𑀙𑀲𑀼 𑀪𑀼𑀫𑁆𑀫𑁂 𑀘 𑀫𑀸𑀦𑀯𑁂;

𑀓𑀸𑀫𑀲𑀼𑀕𑀢𑀺𑀬𑀁 𑀦𑀢𑁆𑀣𑀺, 𑀦𑀯 𑀧𑀸𑀓𑀸 𑀫𑀳𑀕𑁆𑀕𑀢𑀸.

𑁨𑁪𑁯. 𑀤𑁄𑀲𑀫𑀽𑀮𑀫𑀳𑀸𑀧𑀸𑀓𑀸, 𑀖𑀸𑀦𑀸𑀤𑀺𑀢𑁆𑀢𑀬𑀫𑀸𑀦𑀲𑀸;

𑀦𑀢𑁆𑀣𑀸𑀭𑀽𑀧𑀯𑀺𑀧𑀸𑀓𑀸 𑀘, 𑀯𑀻𑀲𑀢𑀻 𑀭𑀽𑀧𑀪𑀽𑀫𑀺𑀬𑀁.

𑁨𑁫𑁦. 𑀓𑀗𑁆𑀔𑀸𑀤𑀺𑀝𑁆𑀞𑀺𑀬𑀼𑀢𑀸 𑀧𑀜𑁆𑀘𑀸𑀭𑀽𑀧𑀧𑀸𑀓𑀸 𑀘𑀢𑀼𑀩𑁆𑀩𑀺𑀥𑀸;

𑀧𑀜𑁆𑀘𑀸𑀤𑁄𑀦𑀼𑀢𑁆𑀢𑀭𑀸 𑀘𑁂𑀯, 𑀲𑀼𑀤𑁆𑀥𑀸𑀯𑀸𑀲𑁂 𑀦 𑀮𑀩𑁆𑀪𑀭𑁂.

𑁨𑁫𑁧. 𑀆𑀤𑀸𑀯𑀚𑁆𑀚𑀦𑀫𑀕𑁆𑀕𑀸 𑀘, 𑀧𑀝𑀺𑀖𑀸𑀭𑀽𑀧𑀫𑀸𑀦𑀲𑀸;

𑀓𑀸𑀫𑀧𑀸𑀓𑀸 𑀲𑀺𑀢𑀸𑀭𑀽𑀧𑁂, 𑀢𑁂𑀘𑀢𑁆𑀢𑀸𑀮𑀻𑀲 𑀦𑀢𑁆𑀣𑀺 𑀢𑁂.

𑁨𑁫𑁨. 𑀲𑀢𑁆𑀢𑀢𑀺𑀁𑀲 𑀧𑀭𑀺𑀢𑁆𑀢𑀸 𑀘, 𑀮𑀩𑁆𑀪𑀦𑁆𑀢𑀸𑀧𑀸𑀬𑀪𑀽𑀫𑀺𑀬𑀁;

𑀫𑀸𑀦𑀲𑀸𑀲𑀻𑀢𑀺 𑀮𑀩𑁆𑀪𑀦𑁆𑀢𑀺, 𑀓𑀸𑀫𑀲𑀼𑀕𑀢𑀺𑀬𑀁 𑀧𑀦.

𑁨𑁫𑁩. 𑀏𑀓𑀽𑀦𑀲𑀢𑁆𑀢𑀢𑀺 𑀭𑀽𑀧𑁂, 𑀲𑀼𑀤𑁆𑀥𑁂 𑀧𑀜𑁆𑀜𑀸𑀲 𑀧𑀜𑁆𑀘 𑀘;

𑀙𑀘𑀢𑁆𑀢𑀸𑀮𑀻𑀲 𑀆𑀭𑀼𑀧𑁆𑀧𑁂, 𑀦𑀢𑁆𑀣𑀸𑀲𑀜𑁆𑀜𑀻𑀲𑀼 𑀓𑀺𑀜𑁆𑀘𑀺𑀧𑀺.

𑁨𑁫𑁪. 𑀇𑀢𑁆𑀣𑀫𑁂𑀓𑀤𑁆𑀯𑀺𑀢𑀺𑀘𑀢𑀼𑀧𑀜𑁆𑀘𑀪𑀼𑀫𑁆𑀫𑀸𑀦𑀺 𑀲𑁄𑀴𑀲;

𑀤𑀲 𑀧𑀜𑁆𑀘𑀤𑀲𑁂𑀯𑀸𑀣, 𑀘𑀢𑀼𑀢𑁆𑀢𑀺𑀁𑀲 𑀘𑀢𑀼𑀤𑁆𑀤𑀲.

𑁨𑁫𑁫. 𑀅𑀧𑀸𑀬𑀸𑀳𑁂𑀢𑀼𑀓𑀸𑀦𑀁 𑀢𑀼, 𑀫𑀳𑀸𑀧𑀸𑀓𑀓𑁆𑀭𑀺𑀬𑀸𑀚𑀯𑁂;

𑀳𑀺𑀢𑁆𑀯𑀸 𑀲𑁂𑀲𑀧𑀭𑀺𑀢𑁆𑀢𑀸𑀦𑀺, 𑀘𑀺𑀢𑁆𑀢𑀸𑀦𑀺 𑀧𑀦 𑀮𑀩𑁆𑀪𑀭𑁂.

𑁨𑁫𑁬. 𑀤𑁆𑀯𑀺𑀳𑁂𑀢𑀼𑀓𑀸𑀳𑁂𑀢𑀼𑀓𑀸𑀦𑀁, 𑀲𑁂𑀲𑀸𑀦𑀁 𑀓𑀸𑀫𑀫𑀸𑀦𑀲𑀸;

𑀮𑀩𑁆𑀪𑀦𑁆𑀢𑀺 𑀧𑀦 𑀳𑀺𑀢𑁆𑀯𑀸𑀦, 𑀜𑀸𑀡𑀧𑀸𑀓𑀓𑁆𑀭𑀺𑀬𑀸𑀚𑀯𑁂.

𑁨𑁫𑁭. 𑀢𑀺𑀳𑁂𑀢𑀼𑀓𑀸𑀦𑀁 𑀲𑀢𑁆𑀢𑀸𑀦𑀁, 𑀢𑀢𑁆𑀣 𑀢𑀢𑁆𑀣𑀽𑀧𑀧𑀢𑁆𑀢𑀺𑀬𑀁;

𑀢𑀢𑁆𑀣 𑀢𑀢𑁆𑀣𑀽𑀧𑀧𑀦𑁆𑀦𑀸𑀦𑀁, 𑀮𑀩𑁆𑀪𑀫𑀸𑀦𑀸𑀦𑀺 𑀮𑀩𑁆𑀪𑀭𑁂.

𑁨𑁫𑁮. 𑀢𑀺𑀳𑁂𑀢𑀼𑀓𑀸𑀦𑀁 𑀲𑀩𑁆𑀩𑁂𑀧𑀺, 𑀫𑀸𑀦𑀲𑀸𑀧𑀸𑀬𑀧𑀸𑀡𑀺𑀦𑀁;

𑀲𑀢𑁆𑀢𑀢𑀺𑀁𑀲𑀸𑀯𑀲𑁂𑀲𑀸𑀦𑀁, 𑀏𑀓𑀢𑀸𑀮𑀻𑀲 𑀦𑀺𑀤𑁆𑀤𑀺𑀲𑁂.

𑁨𑁫𑁯. 𑀧𑀼𑀣𑀼𑀚𑁆𑀚𑀦𑀸𑀦 𑀲𑁂𑀓𑁆𑀔𑀸𑀦𑀁, 𑀦 𑀲𑀦𑁆𑀢𑀺 𑀚𑀯𑀦𑀓𑁆𑀭𑀺𑀬𑀸;

𑀦 𑀲𑀦𑁆𑀢𑀺 𑀯𑀻𑀢𑀭𑀸𑀕𑀸𑀦𑀁, 𑀧𑀼𑀜𑁆𑀜𑀸𑀧𑀼𑀜𑁆𑀜𑀸𑀦𑀺 𑀲𑀩𑁆𑀩𑀣𑀸.

𑁨𑁬𑁦. 𑀓𑀗𑁆𑀔𑀸𑀤𑀺𑀝𑁆𑀞𑀺𑀬𑀼𑀢𑀸 𑀧𑀜𑁆𑀘, 𑀲𑁂𑀓𑁆𑀔𑀸𑀦𑀁 𑀦𑀢𑁆𑀣𑀺 𑀫𑀸𑀦𑀲𑀸;

𑀤𑁄𑀲𑀫𑀽𑀮𑀤𑁆𑀯𑀬𑀜𑁆𑀘𑀸𑀧𑀺, 𑀦𑀢𑁆𑀣𑀸𑀦𑀸𑀕𑀸𑀫𑀺𑀦𑁄 𑀧𑀦.

𑁨𑁬𑁧. 𑀯𑀯𑀢𑁆𑀣𑀺𑀢𑀸𑀭𑀺𑀬𑁂𑀲𑁆𑀯𑁂𑀯, 𑀬𑀣𑀸𑀲𑀓𑀫𑀦𑀼𑀢𑁆𑀢𑀭𑀸;

𑀫𑀕𑁆𑀕𑀝𑁆𑀞𑀸𑀦𑀁 𑀲𑀓𑁄 𑀫𑀕𑁆𑀕𑁄, 𑀦𑀢𑁆𑀣𑀜𑁆𑀜𑀁 𑀓𑀺𑀜𑁆𑀘𑀺 𑀲𑀩𑁆𑀩𑀣𑀸.

𑁨𑁬𑁨. 𑀧𑀼𑀣𑀼𑀚𑁆𑀚𑀦𑀸𑀦𑀁 𑀤𑁆𑀯𑀺𑀦𑁆𑀦𑀫𑁆𑀧𑀺, 𑀨𑀮𑀝𑁆𑀞𑀸𑀦𑀁 𑀬𑀣𑀸𑀓𑁆𑀓𑀫𑀁;

𑀢𑀢𑀺𑀬𑀲𑁆𑀲 𑀨𑀮𑀝𑁆𑀞𑀲𑁆𑀲, 𑀘𑀢𑀼𑀢𑁆𑀣𑀲𑁆𑀲 𑀘 𑀲𑀫𑁆𑀪𑀯𑀸.

𑁨𑁬𑁩. 𑀢𑁂𑀲𑀝𑁆𑀞𑀺 𑀘𑁂𑀯 𑀘𑀺𑀢𑁆𑀢𑀸𑀦𑀺, 𑀮𑀩𑁆𑀪𑀦𑁆𑀢𑁂𑀓𑀽𑀦𑀲𑀝𑁆𑀞𑀺 𑀘;

𑀲𑀢𑁆𑀢𑀧𑀜𑁆𑀜𑀸𑀲 𑀘𑀺𑀢𑁆𑀢𑀸𑀦𑀺, 𑀢𑁂𑀧𑀜𑁆𑀜𑀸𑀲 𑀘 𑀲𑀩𑁆𑀩𑀣𑀸.

𑁨𑁬𑁪. 𑀘𑀢𑀼𑀧𑀜𑁆𑀜𑀸𑀲 𑀧𑀜𑁆𑀜𑀸𑀲, 𑀧𑀜𑁆𑀜𑀸𑀲𑀤𑁆𑀯𑀬𑀳𑀻𑀦𑀓𑀸;

𑀓𑀸𑀫𑁂𑀲𑀼 𑀢𑁂𑀲𑀁 𑀲𑀫𑁆𑀪𑁄𑀦𑁆𑀢𑀺, 𑀘𑀢𑀼𑀢𑀸𑀮𑀻𑀲 𑀘𑀓𑁆𑀓𑀫𑀸.

𑁨𑁬𑁫. 𑀢𑁂𑀘𑀢𑁆𑀢𑀸𑀮𑀻𑀲 𑀘𑁂𑀓𑀽𑀦𑀘𑀢𑁆𑀢𑀸𑀮𑀻𑀲 𑀬𑀣𑀸𑀓𑁆𑀓𑀫𑀁;

𑀪𑀯𑀦𑁆𑀢𑁂𑀓𑀽𑀦𑀢𑀸𑀮𑀻𑀲, 𑀧𑀜𑁆𑀘𑀢𑁆𑀢𑀺𑀁𑀲 𑀘 𑀭𑀽𑀧𑀺𑀲𑀼.

𑁨𑁬𑁬. 𑀲𑀢𑁆𑀢𑀯𑀻𑀲 𑀘 𑀢𑁂𑀯𑀻𑀲, 𑀢𑁂𑀯𑀻𑀲 𑀘 𑀬𑀣𑀸𑀓𑁆𑀓𑀫𑀁;

𑀆𑀭𑀼𑀧𑁆𑀧𑁂𑀲𑀼𑀧𑀺 𑀮𑀩𑁆𑀪𑀦𑁆𑀢𑀺, 𑀢𑁂𑀲𑀫𑀝𑁆𑀞𑀸𑀭𑀲𑁂𑀯 𑀘.

𑁨𑁬𑁭. 𑀧𑀼𑀣𑀼𑀚𑁆𑀚𑀦𑀸 𑀘 𑀘𑀢𑁆𑀢𑀸𑀭𑁄, 𑀅𑀧𑀸𑀬𑀸𑀳𑁂𑀢𑀼𑀓𑀸𑀤𑀬𑁄;

𑀅𑀭𑀺𑀬𑀸 𑀘𑁂𑀯 𑀅𑀝𑁆𑀞𑀸𑀢𑀺, 𑀤𑁆𑀯𑀸𑀤𑀲𑀦𑁆𑀦𑀁 𑀯𑀲𑀸 𑀲𑀺𑀬𑀼𑀁.

𑁨𑁬𑁮. 𑀙𑀩𑁆𑀩𑀺𑀥𑀸 𑀘𑀺𑀢𑁆𑀢𑀓𑁄𑀝𑁆𑀞𑀸𑀲𑀸, 𑀏𑀓𑀧𑀼𑀕𑁆𑀕𑀮𑀺𑀓𑀸 𑀢𑀣𑀸;

𑀘𑀢𑀼𑀧𑀜𑁆𑀘𑀙𑀲𑀢𑁆𑀢𑀝𑁆𑀞-𑀧𑀼𑀕𑁆𑀕𑀮𑀝𑁆𑀞𑀸𑀢𑀺 𑀘𑀓𑁆𑀓𑀫𑀸.

𑁨𑁬𑁯. 𑀙𑀩𑁆𑀩𑀻𑀲 𑀘𑀼𑀤𑁆𑀤𑀲𑁂𑀯𑀸𑀣, 𑀢𑁂𑀭𑀲 𑀤𑁆𑀯𑁂 𑀘 𑀫𑀸𑀦𑀲𑀸;

𑀤𑀲 𑀲𑀢𑁆𑀢𑀸𑀥𑀺𑀓𑀸 𑀘𑁂𑀯, 𑀧𑀼𑀦 𑀲𑀢𑁆𑀢𑀸𑀥𑀺𑀓𑀸 𑀤𑀲𑀸𑀢𑀺.

𑀇𑀢𑀺 𑀘𑀺𑀢𑁆𑀢𑀯𑀺𑀪𑀸𑀕𑁂 𑀪𑀽𑀫𑀺𑀧𑀼𑀕𑁆𑀕𑀮𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀙𑀝𑁆𑀞𑁄 𑀧𑀭𑀺𑀘𑁆𑀙𑁂𑀤𑁄.