𑁮. 𑀅𑀝𑁆𑀞𑀫𑁄 𑀧𑀭𑀺𑀘𑁆𑀙𑁂𑀤𑁄

𑀧𑀓𑀺𑀡𑁆𑀡𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁪𑁭𑁫. 𑀇𑀤𑀸𑀦𑀺 𑀧𑀦 𑀲𑀩𑁆𑀩𑁂𑀲𑀁, 𑀏𑀢𑁂𑀲𑀁 𑀫𑀸𑀦𑀲𑀁 𑀫𑀬𑀸;

𑀧𑀸𑀝𑀯𑀢𑁆𑀣𑀸𑀬 𑀪𑀺𑀓𑁆𑀔𑀽𑀦𑀁, 𑀓𑀣𑀻𑀬𑀢𑀺 𑀧𑀓𑀺𑀡𑁆𑀡𑀓𑀁.

𑀇𑀤𑀸𑀦𑀺 𑀧𑀦 𑀓𑀸𑀮𑁂 𑀏𑀢𑁂𑀲𑀁 𑀢𑀺𑀳𑁂𑀢𑀼𑀓𑀤𑁆𑀯𑀺𑀳𑁂𑀢𑀼𑀓𑀅𑀳𑁂𑀢𑀼𑀓𑀸𑀦𑀁 𑀲𑀩𑁆𑀩𑁂𑀲𑀁 𑀧𑀼𑀕𑁆𑀕𑀮𑀸𑀦𑀁 𑀧𑀓𑀺𑀡𑁆𑀡𑀓𑀁 𑀫𑀸𑀦𑀲𑀁 𑀪𑀺𑀓𑁆𑀔𑀽𑀦𑀁𑀧𑀸𑀝𑀯𑀢𑁆𑀣𑀸𑀬 𑀪𑀺𑀓𑁆𑀔𑀽𑀦𑀁 𑀙𑁂𑀓𑀪𑀸𑀯𑀢𑁆𑀣𑀸𑀬 𑀫𑀬𑀸 𑀓𑀣𑀻𑀬𑀢𑁂 𑀉𑀘𑁆𑀘𑀢𑁂.

𑁪𑁭𑁬-𑁮𑁫. 𑀧𑀦𑁆𑀣𑀫𑀓𑁆𑀓𑀝𑀓𑁄 𑀉𑀡𑁆𑀡𑀦𑀸𑀪𑀺 𑀧𑀦𑁆𑀣𑀫𑀓𑁆𑀓𑀝𑀓𑁄 𑀦𑀸𑀫 𑀧𑀜𑁆𑀘𑀲𑀼 𑀤𑀺𑀲𑀸𑀲𑀼 𑀢𑀲𑁆𑀲 𑀲𑀼𑀢𑁆𑀢𑀁 𑀧𑀲𑀸𑀭𑁂𑀢𑁆𑀯𑀸 𑀚𑀸𑀮𑀫𑀚𑁆𑀛𑁂 𑀦𑀺𑀧𑀚𑁆𑀚𑀢𑀺. 𑀧𑀞𑀫𑀸𑀬 𑀤𑀺𑀲𑀸𑀬𑁂𑀢𑁆𑀣 𑀏𑀢𑁆𑀣 𑀏𑀢𑀸𑀲𑀼 𑀤𑀺𑀲𑀸𑀲𑀼 𑀧𑀞𑀫𑀸𑀬 𑀤𑀺𑀲𑀸𑀬 𑀧𑀲𑀸𑀭𑀺𑀢𑁂 𑀲𑀼𑀢𑁆𑀢𑁂 𑀧𑀸𑀡𑀓𑁂𑀦 𑀧𑀝𑀗𑁆𑀕𑁂𑀦 𑀯𑀸 𑀫𑀓𑁆𑀔𑀺𑀓𑀸𑀬 𑀯𑀸 𑀖𑀝𑁆𑀝𑀺𑀢𑁂 𑀲𑀢𑀺 𑀲𑀸 𑀉𑀡𑁆𑀡𑀦𑀸𑀪𑀺 𑀓𑀺𑀜𑁆𑀘𑀺 𑀘𑀮𑀺𑀢𑁆𑀯𑀸 𑀨𑀦𑁆𑀤𑀦𑀁 𑀓𑀢𑁆𑀯𑀸 𑀦𑀺𑀧𑀦𑁆𑀦𑀝𑁆𑀞𑀸𑀦𑀢𑁄 𑀲𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀲𑀼𑀢𑁆𑀢𑀁 𑀅𑀦𑀼𑀲𑀸𑀭𑁂𑀢𑁆𑀯𑀸 𑀢𑀲𑁆𑀲 𑀧𑀸𑀡𑀓𑀲𑁆𑀲 𑀬𑀽𑀲𑀁 𑀬𑀽𑀲𑀲𑀗𑁆𑀔𑀸𑀢𑀁 𑀲𑁄𑀡𑀺𑀢𑀁 𑀧𑀺𑀯𑀢𑀺. 𑀧𑀼𑀦𑀸𑀕𑀦𑁆𑀢𑁆𑀯𑀸 𑀢𑀢𑁆𑀣𑁂𑀯 𑀢𑀲𑁆𑀫𑀺𑀁 𑀚𑀸𑀮𑀫𑀚𑁆𑀛𑁂𑀬𑁂𑀯 𑀬𑀣𑀸𑀲𑀼𑀔𑀁 𑀦𑀺𑀧𑀚𑁆𑀚𑀢𑀺, 𑀬𑀣𑀸 𑀧𑀞𑀫𑀸𑀬 𑀤𑀺𑀲𑀸𑀬 𑀘𑀮𑀦𑀸𑀤𑀺𑀓𑀁 𑀓𑀺𑀭𑀺𑀬𑀁 𑀓𑀭𑁄𑀢𑀺, 𑀏𑀯𑀫𑁂𑀯 𑀤𑀼𑀢𑀺𑀬𑀸𑀤𑀻𑀲𑀼 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀘𑀮𑀦𑀸𑀤𑀺𑀓𑀁 𑀓𑀺𑀭𑀺𑀬𑀁 𑀓𑀭𑁄𑀢𑀺, 𑀏𑀯𑀁 𑀧𑀜𑁆𑀘𑀲𑀼 𑀤𑀺𑀲𑀸𑀲𑀼 𑀲𑀼𑀢𑁆𑀢𑀁 𑀯𑀺𑀬 𑀧𑀜𑁆𑀘 𑀧𑀲𑀸𑀤𑀸 𑀧𑀡𑁆𑀟𑀺𑀢𑁂𑀦 𑀤𑀝𑁆𑀞𑀩𑁆𑀩𑀸, 𑀫𑀚𑁆𑀛𑁂 𑀫𑀓𑁆𑀓𑀝𑀓𑁄 𑀯𑀺𑀬 𑀘 𑀘𑀺𑀢𑁆𑀢𑀁 𑀧𑀦 𑀧𑀡𑁆𑀟𑀺𑀢𑁂𑀦 𑀤𑀝𑁆𑀞𑀩𑁆𑀩𑀁. 𑀧𑀸𑀡𑀓𑀸𑀤𑀻𑀳𑀺 𑀔𑀼𑀤𑁆𑀤𑀓𑀢𑀺𑀭𑀘𑁆𑀙𑀸𑀦𑁂𑀳𑀺 𑀢𑀲𑁆𑀲 𑀲𑀗𑁆𑀖𑀝𑁆𑀝𑀦𑀸 𑀯𑀺𑀬 𑀆𑀭𑀫𑁆𑀫𑀡𑁂 𑀧𑀦 𑀧𑀲𑀸𑀤𑀸𑀦𑀁 𑀲𑀗𑁆𑀖𑀝𑁆𑀝𑀦𑀸 𑀧𑀡𑁆𑀟𑀺𑀢𑁂𑀦 𑀤𑀝𑁆𑀞𑀩𑁆𑀩𑀸. 𑀚𑀸𑀮𑀫𑀚𑁆𑀛𑁂 𑀦𑀺𑀧𑀦𑁆𑀦𑀸𑀬 𑀉𑀡𑁆𑀡𑀦𑀸𑀪𑀺𑀬𑀸 𑀢𑀁 𑀘𑀮𑀦𑀁 𑀯𑀺𑀬 𑀧𑀲𑀸𑀤𑁂 𑀖𑀝𑁆𑀝𑁂𑀢𑀻𑀢𑀺 𑀧𑀲𑀸𑀤𑀖𑀝𑁆𑀝𑀦𑀁, 𑀓𑀺𑀁 𑀢𑀁? 𑀆𑀭𑀫𑁆𑀫𑀡𑀁. 𑀢𑀢𑁆𑀣 𑀢𑀺𑀲𑁆𑀲𑀁 𑀯𑀻𑀣𑀺𑀬𑀁 𑀧𑀲𑀸𑀤𑀖𑀝𑁆𑀝𑀦𑀁 𑀆𑀭𑀫𑁆𑀫𑀡𑀁 𑀕𑀳𑁂𑀢𑁆𑀯𑀸 𑀫𑀦𑁄𑀥𑀸𑀢𑀼𑀓𑀺𑀭𑀺𑀬𑀸𑀘𑀺𑀢𑁆𑀢𑀁 𑀪𑀯𑀗𑁆𑀕𑀁 𑀆𑀯𑀝𑁆𑀝𑁂𑀢𑀻𑀢𑀺 𑀪𑀯𑀗𑁆𑀕𑀸𑀯𑀝𑁆𑀝𑀦𑀁 𑀫𑀢𑀁 𑀪𑀕𑀯𑀢𑀸. 𑀢𑀲𑁆𑀲 𑀧𑀦𑁆𑀣𑀫𑀓𑁆𑀓𑀝𑀓𑀲𑁆𑀲 𑀲𑀼𑀢𑁆𑀢𑀸𑀦𑀼𑀲𑀸𑀭𑀁𑀯 𑀲𑀼𑀢𑁆𑀢𑀁 𑀅𑀦𑀼𑀕𑀫𑀦𑀁 𑀯𑀺𑀬 𑀯𑀻𑀣𑀺𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀦𑀁 𑀧𑀡𑁆𑀟𑀺𑀢𑁂𑀦 𑀤𑀝𑁆𑀞𑀩𑁆𑀩𑀁. 𑀲𑀻𑀲𑁂 𑀧𑀦 𑀯𑀺𑀚𑁆𑀛𑀺𑀢𑁆𑀯𑀸 𑀅𑀲𑁆𑀲 𑀫𑀓𑁆𑀓𑀝𑀲𑁆𑀲 𑀬𑀽𑀲𑀧𑀸𑀦𑀁 𑀯𑀺𑀬 𑀚𑀯𑀦𑀲𑁆𑀲 𑀘𑀺𑀢𑁆𑀢𑀲𑁆𑀲 𑀆𑀭𑀫𑁆𑀫𑀡𑁂𑀲𑀼 𑀧𑀯𑀢𑁆𑀢𑀦𑀁 𑀧𑀡𑁆𑀟𑀺𑀢𑁂𑀦 𑀤𑀝𑁆𑀞𑀩𑁆𑀩𑀁. 𑀧𑀼𑀦 𑀆𑀕𑀦𑁆𑀢𑁆𑀯𑀸 𑀲𑀼𑀢𑁆𑀢𑀚𑀸𑀮𑀫𑀚𑁆𑀛𑁂 𑀦𑀺𑀧𑀚𑁆𑀚𑀦𑀁 𑀬𑀣𑀸 𑀯𑀢𑁆𑀣𑀼𑀁𑀬𑁂𑀯 𑀳𑀤𑀬𑀯𑀢𑁆𑀣𑀼𑀁 𑀏𑀯 𑀦𑀺𑀲𑁆𑀲𑀸𑀬 𑀘𑀺𑀢𑁆𑀢𑀲𑁆𑀲 𑀧𑀭𑀺𑀯𑀢𑁆𑀢𑀦𑀁 𑀧𑀡𑁆𑀟𑀺𑀢𑁂𑀦 𑀤𑀝𑁆𑀞𑀩𑁆𑀩𑀁.

𑁪𑁮𑁬-𑁯𑁩. 𑀇𑀤𑀁 𑀢𑀼 𑀧𑀦 𑀑𑀧𑀫𑁆𑀫𑀁, 𑀅𑀢𑁆𑀣𑀁 𑀤𑀻𑀧𑁂𑀢𑀺 𑀓𑀺𑀁 𑀢𑀼 𑀳𑀺 𑀇𑀤𑀁 𑀑𑀧𑀫𑁆𑀫𑀁 𑀓𑀁 𑀅𑀢𑁆𑀣𑀁 𑀤𑀻𑀧𑁂𑀢𑀺 𑀧𑀓𑀸𑀲𑁂𑀢𑀺? 𑀧𑀞𑀫𑀁 𑀧𑀲𑀸𑀤𑁂 𑀆𑀭𑀫𑁆𑀫𑀡𑁂𑀦 𑀖𑀝𑁆𑀝𑀺𑀢𑁂 𑀲𑀢𑀺 𑀧𑀲𑀸𑀤𑀯𑀢𑁆𑀣𑀼𑀢𑁄 𑀧𑀲𑀸𑀤𑁄 𑀯𑀢𑁆𑀣𑀼 𑀦𑀺𑀲𑁆𑀲𑀬𑁄 𑀏𑀢𑀲𑁆𑀲𑀸𑀢𑀺 𑀧𑀲𑀸𑀤𑀯𑀢𑁆𑀣𑀼, 𑀘𑀺𑀢𑁆𑀢𑀁, 𑀢𑀢𑁄 𑀧𑀲𑀸𑀤𑀯𑀢𑁆𑀣𑀼𑀢𑁄, 𑀧𑀞𑀫𑀁 𑀏𑀯 𑀯𑀢𑁆𑀣𑀼𑀲𑀦𑁆𑀦𑀺𑀲𑁆𑀲𑀺𑀢𑀁 𑀪𑀯𑀗𑁆𑀕𑀲𑀗𑁆𑀔𑀸𑀢𑀁 𑀫𑀦𑁄 𑀚𑀸𑀬𑀢𑀺, 𑀇𑀢𑀺𑀧𑀺 𑀅𑀢𑁆𑀣𑁄 𑀢𑁂𑀦 𑀑𑀧𑀫𑁆𑀫𑁂𑀦 𑀤𑀻𑀧𑀺𑀢𑁄. 𑀏𑀓𑁂𑀓𑀸𑀭𑀫𑁆𑀫𑀡𑀁 𑀤𑁆𑀯𑀻𑀲𑀼 𑀤𑁆𑀯𑀻𑀲𑀼 𑀤𑁆𑀯𑀸𑀭𑁂𑀲𑀼 𑀲𑀩𑁆𑀩𑀲𑁄 𑀲𑀩𑁆𑀩𑀧𑁆𑀧𑀓𑀸𑀭𑁂𑀦 𑀧𑀦 𑀆𑀧𑀸𑀣𑀁 𑀆𑀕𑀘𑁆𑀙𑀢𑀺, 𑀅𑀬𑀫𑀢𑁆𑀣𑁄𑀧𑀺 𑀢𑁂𑀦 𑀑𑀧𑀫𑁆𑀫𑁂𑀦 𑀤𑀻𑀧𑀺𑀢𑁄 ‘‘𑀤𑁆𑀯𑀻𑀲𑀼 𑀤𑁆𑀯𑀻𑀲𑀼 𑀤𑁆𑀯𑀸𑀭𑁂𑀲𑀽’’𑀢𑀺, 𑀏𑀓𑀁 𑀭𑀽𑀧𑀸𑀭𑀫𑁆𑀫𑀡𑀁 𑀏𑀓𑀲𑁆𑀫𑀺𑀁𑀬𑁂𑀯 𑀔𑀡𑁂 𑀘𑀓𑁆𑀔𑀼𑀤𑁆𑀯𑀸𑀭𑁂, 𑀫𑀦𑁄𑀤𑁆𑀯𑀸𑀭𑁂 𑀘𑀸𑀢𑀺 𑀤𑁆𑀯𑀻𑀲𑀼 𑀤𑁆𑀯𑀸𑀭𑁂𑀲𑀼 𑀆𑀧𑀸𑀣𑀁 𑀆𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀲𑁄𑀢𑀤𑁆𑀯𑀸𑀭𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄 𑀜𑁂𑀬𑁆𑀬𑁄. 𑀭𑀽𑀧𑀁 𑀘𑀓𑁆𑀔𑀼𑀧𑀲𑀸𑀤𑀫𑁆𑀳𑀺 𑀖𑀝𑁆𑀝𑁂𑀢𑁆𑀯𑀸 𑀢𑀗𑁆𑀔𑀡𑁂 𑀧𑀦 𑀢𑀲𑁆𑀲 𑀔𑀡𑁂 𑀧𑀦 𑀢𑀣𑀸 𑀫𑀦𑁄𑀤𑁆𑀯𑀸𑀭𑁂 𑀧𑀦 𑀆𑀧𑀸𑀣𑀁 𑀆𑀕𑀘𑁆𑀙𑀢𑀺, 𑀪𑀯𑀗𑁆𑀕𑀘𑀮𑀦𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀦 𑀲𑀁𑀲𑀬𑁄 𑀏𑀢𑀲𑁆𑀫𑀺𑀁 𑀯𑀘𑀦𑁂 𑀲𑀁𑀲𑀬𑁄 𑀦𑀢𑁆𑀣𑀺. 𑀬𑀣𑀸 𑀔𑀕𑁄 𑀬𑀣𑀸 𑀲𑀓𑀼𑀡𑁄. 𑀳𑀺 𑀲𑀘𑁆𑀘𑀁 𑀫𑀬𑀸 𑀯𑀼𑀢𑁆𑀢𑀁 𑀯𑀘𑀦𑀁. 𑀭𑀼𑀓𑁆𑀔𑀕𑁆𑀕𑁂 𑀭𑀼𑀓𑁆𑀔𑀓𑁄𑀝𑀺𑀬𑀁 𑀦𑀺𑀮𑀻𑀬𑀦𑁆𑀢𑁄𑀯 𑀲𑀸𑀔𑀺𑀦𑁄 𑀲𑀸𑀔𑀁 𑀖𑀝𑁆𑀝𑁂𑀢𑀺, 𑀢𑀲𑁆𑀲 𑀙𑀸𑀬𑀸 𑀪𑀽𑀫𑀺𑀬𑀁 𑀧𑀣𑀯𑀺𑀬𑀁 𑀨𑀭𑀢𑀺 𑀧𑀝𑀺𑀳𑀜𑁆𑀜𑀢𑀺. 𑀇𑀥𑀸𑀢𑀺 𑀦𑀺𑀧𑀸𑀢𑁄. 𑀲𑀸𑀔𑀸𑀬 𑀲𑀓𑀼𑀡𑁂𑀦 𑀖𑀝𑁆𑀝𑀦𑀁 𑀪𑀽𑀫𑀺𑀬𑀁 𑀙𑀸𑀬𑀸𑀨𑀭𑀡𑀸𑀧𑀺 𑀘 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀏𑀓𑀓𑁆𑀔𑀡𑀲𑁆𑀫𑀺𑀁𑀬𑁂𑀯 𑀚𑀸𑀬𑀭𑁂 𑀚𑀸𑀬𑀦𑁆𑀢𑀺. 𑀏𑀯𑀫𑁂𑀯 𑀧𑀦 𑀭𑀽𑀧𑀲𑁆𑀲, 𑀧𑀲𑀸𑀤𑀲𑁆𑀲 𑀘 𑀖𑀝𑁆𑀝𑀦𑀁, 𑀢𑀣𑁂𑀯 𑀅𑀢𑁆𑀣𑀢𑁄 𑀅𑀢𑁆𑀣𑀯𑀲𑁂𑀦 𑀪𑀯𑀗𑁆𑀕𑀘𑀮𑀦𑀲𑁆𑀲𑀸𑀧𑀺 𑀧𑀘𑁆𑀘𑀬𑀢𑁆𑀢𑁂𑀦 𑀧𑀘𑁆𑀘𑀬𑀪𑀸𑀯𑁂𑀦 𑀫𑀦𑁄𑀤𑁆𑀯𑀸𑀭𑁂 𑀆𑀧𑀸𑀣𑀁 𑀆𑀕𑀫𑀦𑀁 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀏𑀓𑀓𑁆𑀔𑀡𑁂𑀬𑁂𑀯 𑀳𑁄𑀢𑀺.

𑁪𑁯𑁪-𑁭. 𑀢𑀢𑁄 𑀧𑀭𑀁 𑀪𑀯𑀗𑁆𑀕𑀲𑁄𑀢𑀁 𑀙𑀺𑀦𑁆𑀤𑀺𑀢𑁆𑀯𑀸 𑀘𑀓𑁆𑀔𑀼𑀤𑁆𑀯𑀸𑀭𑁂 𑀘𑀓𑁆𑀔𑀼𑀧𑀲𑀸𑀤𑁂 𑀬𑀣𑀸𑀓𑁆𑀓𑀫𑀁 𑀆𑀯𑀚𑁆𑀚𑀦𑁂 𑀲𑀫𑀼𑀧𑁆𑀧𑀦𑁆𑀦𑁂, 𑀤𑀲𑁆𑀲𑀦𑁂 𑀲𑀫𑀼𑀧𑁆𑀧𑀦𑁆𑀦𑁂, 𑀲𑀫𑁆𑀧𑀝𑀺𑀘𑁆𑀙𑀦𑁂 𑀲𑀫𑀼𑀧𑁆𑀧𑀦𑁆𑀦𑁂, 𑀲𑀦𑁆𑀢𑀻𑀭𑀡𑁂 𑀲𑀫𑀼𑀧𑁆𑀧𑀦𑁆𑀦𑁂, 𑀢𑀣𑀸 𑀯𑁄𑀝𑁆𑀞𑀩𑁆𑀩𑀦𑁂 𑀘 𑀲𑀫𑀼𑀧𑁆𑀧𑀦𑁆𑀦𑁂 𑀓𑀼𑀲𑀮𑀁 𑀚𑀯𑀦𑀘𑀺𑀢𑁆𑀢𑀁 𑀚𑀯𑀢𑀺, 𑀢𑀣𑀸 𑀅𑀓𑀼𑀲𑀮𑀫𑁂𑀯 𑀘𑀺𑀢𑁆𑀢𑀁 𑀚𑀯𑀢𑀺. 𑀲𑁄𑀢𑀤𑁆𑀯𑀸𑀭𑀸𑀤𑀻𑀲𑀼𑀧𑀺 𑀲𑀤𑁆𑀤𑀸𑀤𑀻𑀦𑀁 𑀆𑀭𑀫𑁆𑀫𑀡𑀸𑀦𑀁 𑀖𑀝𑁆𑀝𑀦𑁂 𑀏𑀲𑁂𑀯 𑀦𑀬𑁄 𑀅𑀯𑀺𑀲𑁂𑀲𑁂𑀦 𑀯𑀺𑀜𑁆𑀜𑀼𑀦𑀸 𑀯𑀺𑀜𑁆𑀜𑁂𑀬𑁆𑀬𑁄. 𑀏𑀢𑀲𑁆𑀲 𑀅𑀢𑁆𑀣𑀲𑁆𑀲 𑀤𑀻𑀧𑀦𑁂 𑀤𑁄𑀯𑀸𑀭𑀺𑀓𑁄𑀧𑀫𑀸𑀤𑀻𑀦𑀺 𑀯𑀘𑀦𑀸𑀦𑀺 𑀉𑀤𑁆𑀥𑀭𑀺𑀢𑁆𑀯𑀸 𑀢𑀢𑁄 𑀧𑀓𑀭𑀡𑀢𑁄 𑀦𑀻𑀳𑀭𑀺𑀢𑁆𑀯𑀸 𑀏𑀢𑁆𑀣 𑀏𑀢𑀲𑁆𑀫𑀺𑀁 𑀯𑀻𑀣𑀺𑀬𑀸𑀥𑀺𑀓𑀸𑀭𑁂 𑀯𑀺𑀜𑁆𑀜𑀼𑀦𑀸 𑀤𑀲𑁆𑀲𑁂𑀢𑀩𑁆𑀩𑀸𑀦𑀺.

𑁪𑁯𑁮-𑁯. 𑀅𑀲𑀫𑁆𑀪𑁂𑀤𑁂𑀦 𑀘𑀓𑁆𑀔𑀼𑀲𑁆𑀲𑀸𑀢𑀺 𑀢𑀲𑁆𑀲𑀸𑀧𑀺 𑀘𑀓𑁆𑀔𑀼 𑀅𑀲𑀫𑁆𑀪𑀺𑀦𑁆𑀦𑀁 𑀳𑁄𑀢𑀺. 𑀚𑀻𑀯𑀺𑀢𑀸 𑀦𑀺𑀭𑀼𑀤𑁆𑀥𑀫𑁆𑀧𑀺 𑀧𑀺𑀢𑁆𑀢𑁂𑀦 𑀯𑀸 𑀲𑁂𑀫𑁆𑀳𑁂𑀦 𑀯𑀸 𑀭𑀼𑀳𑀺𑀭𑁂𑀦 𑀯𑀸 𑀧𑀮𑀺𑀩𑀼𑀤𑁆𑀥𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀁 𑀲𑀫𑁆𑀪𑀺𑀦𑁆𑀦𑀁 𑀦𑀸𑀫, 𑀲𑀓𑁆𑀓𑁄𑀦𑁆𑀢𑀁 𑀅𑀲𑀫𑁆𑀪𑀺𑀦𑁆𑀦𑀁 𑀦𑀸𑀫 𑀳𑁄𑀢𑀺. 𑀢𑁂𑀦 𑀘𑀓𑁆𑀔𑀼𑀧𑀲𑀸𑀤𑀲𑁆𑀲 𑀅𑀲𑀫𑁆𑀪𑀺𑀦𑁆𑀦𑁂𑀦 𑀭𑀽𑀧𑀸𑀧𑀸𑀣𑀕𑀫𑀦𑁂𑀦 𑀆𑀮𑁄𑀓𑀲𑀦𑁆𑀦𑀺𑀲𑁆𑀲𑀬𑁂𑀦𑀸𑀧𑀺. 𑀢𑁂𑀦 𑀢𑀺𑀯𑀺𑀥𑁂𑀦 𑀧𑀘𑁆𑀘𑀬𑁂𑀦 𑀲𑀫𑀦𑀓𑁆𑀓𑀸𑀭𑀳𑁂𑀢𑀼𑀦𑀸 𑀧𑀜𑁆𑀘𑀤𑁆𑀯𑀸𑀭𑀸𑀯𑀚𑁆𑀚𑀦𑀧𑀘𑁆𑀘𑀬𑁂𑀦 𑀲𑀳 𑀧𑀯𑀢𑁆𑀢𑀦𑁂𑀦. 𑀏𑀢𑁂𑀳𑀺 𑀧𑀦 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀲𑀁 𑀏𑀓𑀢𑁄 𑀇𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀻𑀢𑀺 𑀲𑀫𑁂𑀢𑀸, 𑀲𑀫𑁂𑀢𑁂𑀳𑀺 𑀲𑀳𑀕𑀢𑁂𑀳𑀺 𑀲𑀫𑀸𑀕𑀫𑀁 𑀏𑀓𑀻𑀪𑀸𑀯𑀁 𑀆𑀕𑀢𑁂𑀳𑀺, 𑀢𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀘𑀓𑁆𑀔𑀼𑀧𑀲𑀸𑀤𑀦𑀺𑀲𑁆𑀲𑀺𑀢𑀁 𑀯𑀺𑀜𑁆𑀜𑀸𑀡𑀁 𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀘𑁂𑀢𑀲𑀺𑀓𑁂𑀳𑀺 𑀲𑀳 𑀚𑀸𑀬𑀢𑁂.

𑁫𑁦𑁦-𑁧. 𑀅𑀲𑀫𑁆𑀪𑁂𑀤𑁂𑀦 𑀲𑁄𑀢𑀲𑁆𑀲 𑀲𑁄𑀢𑀧𑀲𑀸𑀤𑀲𑁆𑀲 𑀅𑀲𑀫𑁆𑀪𑀺𑀦𑁆𑀦𑁂𑀦 𑀲𑀤𑁆𑀤𑀸𑀧𑀸𑀣𑀕𑀫𑁂𑀦 𑀘 𑀲𑀤𑁆𑀤𑀲𑁆𑀲 𑀆𑀧𑀸𑀣𑀕𑀫𑀦𑁂𑀦 𑀘. 𑀆𑀓𑀸𑀲𑀦𑀺𑀲𑁆𑀲𑀬𑁂𑀦𑀸𑀧𑀺 𑀧𑀺𑀳𑀺𑀢𑀓𑀡𑁆𑀡𑀘𑁆𑀙𑀺𑀤𑁆𑀤𑀲𑁆𑀲 𑀲𑁄𑀢𑀯𑀺𑀜𑁆𑀜𑀸𑀡𑀁 𑀦𑀼𑀧𑁆𑀧𑀚𑁆𑀚𑀢𑀺. 𑀢𑁂𑀦 𑀢𑀺𑀯𑀺𑀥𑁂𑀦 𑀧𑀘𑁆𑀘𑀬𑁂𑀦. 𑀲𑀫𑀦𑀓𑁆𑀓𑀸𑀭𑀳𑁂𑀢𑀼𑀦𑀸 𑀧𑀜𑁆𑀘𑀤𑁆𑀯𑀸𑀭𑀸𑀯𑀚𑁆𑀚𑀦𑀧𑀘𑁆𑀘𑀬𑁂𑀦 𑀲𑀳 𑀧𑀯𑀢𑁆𑀢𑁂𑀦. 𑀏𑀢𑁂𑀳𑀺 𑀧𑀦 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀲𑀫𑁂𑀢𑁂𑀳𑀺 𑀲𑀳𑀕𑀢𑁂𑀳𑀺 𑀲𑀫𑀸𑀕𑀫𑀁 𑀏𑀓𑀻𑀪𑀸𑀯𑀁 𑀆𑀕𑀢𑁂𑀳𑀺 𑀢𑀁 𑀲𑁄𑀢𑀯𑀺𑀜𑁆𑀜𑀸𑀡𑀁 𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀲𑀳 𑀚𑀸𑀬𑀢𑀺.

𑁫𑁦𑁨-𑁩. 𑀅𑀲𑀫𑁆𑀪𑁂𑀤𑁂𑀦 𑀖𑀸𑀦𑀲𑁆𑀲 𑀖𑀸𑀦𑀧𑀲𑀸𑀤𑀲𑁆𑀲 𑀅𑀲𑀫𑁆𑀪𑀺𑀦𑁆𑀦𑁂𑀦 𑀕𑀦𑁆𑀥𑀸𑀧𑀸𑀣𑀕𑀫𑁂𑀦 𑀘 𑀕𑀦𑁆𑀥𑀲𑁆𑀲 𑀆𑀧𑀸𑀣𑀕𑀫𑀦𑁂𑀦 𑀘. 𑀯𑀸𑀬𑁄𑀲𑀦𑁆𑀦𑀺𑀲𑁆𑀲𑀬𑁂𑀦𑀸𑀧𑀻𑀢𑀺 𑀖𑀸𑀦𑀩𑀺𑀮𑀫𑁆𑀳𑀺 𑀧𑀯𑀺𑀲𑀦𑁆𑀢𑁂𑀦 𑀯𑀸𑀬𑀼𑀦𑀸𑀢𑀺 𑀅𑀢𑁆𑀣𑁄. 𑀢𑁂𑀦 𑀢𑀺𑀯𑀺𑀥𑁂𑀦 𑀧𑀘𑁆𑀘𑀬𑁂𑀦. 𑀲𑀫𑀦𑀓𑁆𑀓𑀸𑀭𑀳𑁂𑀢𑀼𑀦𑀸 𑀧𑀜𑁆𑀘𑀤𑁆𑀯𑀸𑀭𑀸𑀯𑀚𑁆𑀚𑀦𑀧𑀘𑁆𑀘𑀬𑁂𑀦 𑀲𑀳 𑀧𑀯𑀢𑁆𑀢𑁂𑀦. 𑀏𑀢𑁂𑀳𑀺 𑀧𑀦 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀲𑀫𑁂𑀢𑁂𑀳𑀺 𑀲𑀳𑀕𑀢𑁂𑀳𑀺 𑀲𑀫𑀸𑀕𑀫𑀁 𑀏𑀓𑀻𑀪𑀸𑀯𑀁 𑀆𑀕𑀢𑁂𑀳𑀺 𑀢𑀁 𑀖𑀸𑀦𑀯𑀺𑀜𑁆𑀜𑀸𑀡𑀁 𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀲𑀳 𑀚𑀸𑀬𑀢𑀺.

𑁫𑁦𑁪-𑁫. 𑀅𑀲𑀫𑁆𑀪𑁂𑀤𑁂𑀦 𑀚𑀺𑀯𑁆𑀳𑀸𑀬 𑀚𑀺𑀯𑁆𑀳𑀸𑀬 𑀅𑀲𑀫𑁆𑀪𑀺𑀦𑁆𑀦𑁂𑀦 𑀭𑀲𑀸𑀧𑀸𑀣𑀕𑀫𑁂𑀦 𑀘 𑀭𑀲𑀲𑁆𑀲 𑀆𑀧𑀸𑀣𑀕𑀫𑀦𑁂𑀦 𑀘. 𑀆𑀧𑁄𑀲𑀦𑁆𑀦𑀺𑀲𑁆𑀲𑀬𑁂𑀦𑀸𑀧𑀻𑀢𑀺 𑀚𑀺𑀯𑁆𑀳𑀸𑀢𑁂𑀫𑀦𑀁 𑀆𑀧𑀁 𑀮𑀤𑁆𑀥𑀸 𑀘 𑀉𑀧𑁆𑀧𑀚𑁆𑀚𑀢𑀺, 𑀢𑁂𑀦 𑀯𑀺𑀦𑀸 𑀲𑀼𑀓𑁆𑀔𑀔𑀸𑀤𑀦𑀻𑀬𑁂 𑀚𑀺𑀯𑁆𑀳𑀸𑀬 𑀲𑀸𑀬𑀺𑀢𑁂𑀧𑀺 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀁 𑀦𑀼𑀧𑁆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦 𑀢𑀺𑀯𑀺𑀥𑁂𑀦 𑀧𑀘𑁆𑀘𑀬𑁂𑀦. 𑀲𑀫𑀦𑀓𑁆𑀓𑀸𑀭𑀳𑁂𑀢𑀼𑀦𑀸 𑀧𑀜𑁆𑀘𑀤𑁆𑀯𑀸𑀭𑀸𑀯𑀚𑁆𑀚𑀦𑀧𑀘𑁆𑀘𑀬𑁂𑀦 𑀲𑀳 𑀧𑀯𑀢𑁆𑀢𑁂𑀦. 𑀏𑀢𑁂𑀳𑀺 𑀧𑀦 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀲𑀫𑁂𑀢𑁂𑀳𑀺 𑀲𑀳𑀕𑀢𑁂𑀳𑀺 𑀲𑀫𑀸𑀕𑀫𑀁 𑀏𑀓𑀻𑀪𑀸𑀯𑀁 𑀆𑀕𑀢𑁂𑀳𑀺 𑀢𑀁 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀁 𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀲𑀳 𑀚𑀸𑀬𑀢𑀺.

𑁫𑁦𑁬-𑁭. 𑀓𑀸𑀬𑀧𑀲𑀸𑀤𑀲𑁆𑀲 𑀅𑀲𑀫𑁆𑀪𑁂𑀤𑁂𑀦 𑀨𑁄𑀝𑁆𑀞𑀩𑁆𑀩𑀲𑁆𑀲 𑀆𑀧𑀸𑀣𑀕𑀫𑀦𑁂𑀦 𑀘. 𑀧𑀣𑀯𑀻𑀦𑀺𑀲𑁆𑀲𑀬𑁂𑀦𑀸𑀧𑀻𑀢𑀺 𑀢𑁂𑀦 𑀯𑀺𑀦𑀸 𑀓𑀸𑀬𑀤𑁆𑀯𑀸𑀭𑀫𑁆𑀧𑀻𑀢𑀺 𑀩𑀳𑀺𑀤𑁆𑀥𑀸 𑀫𑀳𑀸𑀪𑀽𑀢𑀸𑀭𑀫𑁆𑀫𑀡𑀁 𑀅𑀚𑁆𑀛𑀢𑁆𑀢𑀺𑀓𑀁 𑀓𑀸𑀬𑀧𑀲𑀸𑀤𑀁 𑀖𑀝𑁆𑀝𑁂𑀢𑁆𑀯𑀸 𑀧𑀲𑀸𑀤𑀧𑀘𑁆𑀘𑀬𑁂𑀲𑀼 𑀫𑀳𑀸𑀪𑀽𑀢𑁂𑀲𑀼 𑀧𑀝𑀺𑀳𑀜𑁆𑀜𑀢𑀺. 𑀢𑁂𑀦 𑀢𑀺𑀯𑀺𑀥𑁂𑀦 𑀧𑀘𑁆𑀘𑀬𑁂𑀦. 𑀲𑀫𑀦𑀓𑁆𑀓𑀸𑀭𑀳𑁂𑀢𑀼𑀦𑀸 𑀧𑀜𑁆𑀘𑀤𑁆𑀯𑀸𑀭𑀸𑀯𑀚𑁆𑀚𑀦𑀧𑀘𑁆𑀘𑀬𑁂𑀦 𑀲𑀳 𑀧𑀯𑀢𑁆𑀢𑁂𑀦. 𑀏𑀢𑁂𑀳𑀺 𑀧𑀦 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀲𑀫𑁂𑀢𑁂𑀳𑀺 𑀲𑀳𑀕𑀢𑁂𑀳𑀺 𑀲𑀫𑀸𑀕𑀫𑀁 𑀏𑀓𑀻𑀪𑀸𑀯𑀁 𑀆𑀕𑀢𑁂𑀳𑀺 𑀢𑀁 𑀓𑀸𑀬𑀯𑀺𑀜𑁆𑀜𑀸𑀡𑀁 𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀲𑀳 𑀚𑀸𑀬𑀢𑀺.

𑁫𑁦𑁮-𑁯. 𑀅𑀲𑀫𑁆𑀪𑁂𑀤𑀸 𑀫𑀦𑀲𑁆𑀲𑀸𑀧𑀻𑀢𑀺 𑀫𑀦𑀦𑁆𑀢𑀺 𑀪𑀯𑀗𑁆𑀕𑀘𑀺𑀢𑁆𑀢𑀁. 𑀢𑀁 𑀦𑀺𑀭𑀼𑀤𑁆𑀥𑀫𑁆𑀧𑀺 𑀆𑀯𑀚𑁆𑀚𑀦𑀘𑀺𑀢𑁆𑀢𑀲𑁆𑀲 𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀅𑀲𑀫𑀢𑁆𑀣𑀁 𑀫𑀦𑁆𑀤𑀢𑀫𑀕𑀢𑀫𑁂𑀯 𑀯𑀢𑁆𑀢𑀫𑀸𑀦𑀫𑁆𑀧𑀺 𑀲𑀫𑁆𑀪𑀺𑀦𑁆𑀦𑀁 𑀦𑀸𑀫 𑀳𑁄𑀢𑀺. 𑀆𑀯𑀚𑁆𑀚𑀦𑀲𑁆𑀲 𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀲𑀫𑀢𑁆𑀣𑀁 𑀅𑀲𑀫𑁆𑀪𑀺𑀦𑁆𑀦𑀁 𑀦𑀸𑀫. 𑀫𑀦𑀲𑁆𑀲 𑀅𑀲𑀫𑁆𑀪𑁂𑀤𑁂𑀦 𑀥𑀫𑁆𑀫𑀲𑁆𑀲 𑀆𑀧𑀸𑀣𑀕𑀫𑀦𑁂𑀦 𑀘 𑀯𑀢𑁆𑀣𑀼𑀲𑀦𑁆𑀦𑀺𑀲𑁆𑀲𑀬𑁂𑀦 𑀳𑀤𑀬𑀯𑀢𑁆𑀣𑀼𑀲𑀦𑁆𑀦𑀺𑀲𑁆𑀲𑀬𑁂𑀦. 𑀢𑁂𑀦 𑀢𑀺𑀯𑀺𑀥𑁂𑀦 𑀧𑀘𑁆𑀘𑀬𑁂𑀦. 𑀲𑀫𑀦𑀓𑁆𑀓𑀸𑀭𑀳𑁂𑀢𑀼𑀦𑀸 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑁂𑀦 𑀲𑀳 𑀧𑀯𑀢𑁆𑀢𑁂𑀦. 𑀏𑀢𑁂𑀳𑀺 𑀧𑀦 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀲𑀫𑁂𑀢𑁂𑀳𑀺 𑀲𑀳𑀕𑀢𑁂𑀳𑀺 𑀲𑀫𑀸𑀕𑀫𑀁 𑀏𑀓𑀻𑀪𑀸𑀯𑀁 𑀆𑀕𑀢𑁂𑀳𑀺 𑀢𑀁 𑀫𑀦𑁄𑀯𑀺𑀜𑁆𑀜𑀸𑀡𑀁 𑀢𑀁 𑀫𑀦𑁄𑀯𑀺𑀜𑁆𑀜𑀸𑀡𑀲𑀗𑁆𑀔𑀸𑀢𑀁 𑀚𑀯𑀦𑀘𑀺𑀢𑁆𑀢𑀁 𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀲𑀳 𑀚𑀸𑀬𑀢𑁂.

𑁫𑁧𑁦-𑁧𑁧. 𑀫𑀦𑁄 𑀪𑀯𑀗𑁆𑀕𑀘𑀺𑀢𑁆𑀢𑀁 𑀦𑀸𑀫 𑀯𑀺𑀪𑀸𑀯𑀺𑀦𑀸 𑀯𑁂𑀤𑀺𑀢𑀩𑁆𑀩𑀁. 𑀆𑀯𑀚𑁆𑀚𑀦𑀓𑁆𑀭𑀺𑀬𑀸𑀘𑀺𑀢𑁆𑀢𑀁 𑀆𑀯𑀚𑁆𑀚𑀦𑀓𑀺𑀭𑀺𑀬𑀸𑀘𑀺𑀢𑁆𑀢𑀤𑁆𑀯𑀬𑀁 𑀲𑀫𑀦𑀓𑁆𑀓𑀸𑀭𑁄 𑀦𑀸𑀫 𑀯𑀺𑀪𑀸𑀯𑀺𑀦𑀸 𑀲𑀜𑁆𑀜𑀺𑀢𑀁. 𑀯𑀢𑁆𑀣𑀼𑀲𑀦𑁆𑀦𑀺𑀲𑁆𑀲𑀬𑁂𑀦 𑀇𑀢𑀺 𑀅𑀬𑀁 𑀧𑀸𑀞𑁄 𑀲𑀩𑁆𑀩𑀢𑁆𑀣 𑀲𑀩𑁆𑀩𑁂𑀲𑀼 𑀪𑀯𑁂𑀲𑀼 𑀦 𑀕𑀘𑁆𑀙𑀢𑀺. 𑀧𑀜𑁆𑀘𑀳𑀺 𑀔𑀦𑁆𑀥𑁂𑀳𑀺 𑀯𑁄𑀓𑀸𑀭𑁄 𑀯𑁄𑀓𑀺𑀡𑁆𑀡𑁄𑀢𑀺 𑀧𑀜𑁆𑀘𑀯𑁄𑀓𑀸𑀭𑁄, 𑀧𑀜𑁆𑀘𑀯𑁄𑀓𑀸𑀭𑀪𑀯𑀁 𑀲𑀦𑁆𑀥𑀸𑀬 𑀓𑀸𑀭𑀡𑀁 𑀓𑀢𑁆𑀯𑀸 ‘‘𑀯𑀢𑁆𑀣𑀼𑀲𑀦𑁆𑀦𑀺𑀲𑁆𑀲𑀬𑁂𑀦𑀸’’𑀢𑀺 𑀅𑀬𑀁 𑀧𑀸𑀞𑁄 𑀧𑀦 𑀓𑀣𑀺𑀢𑁄 𑀫𑀬𑀸, 𑀧𑀜𑁆𑀘𑀯𑁄𑀓𑀸𑀭𑀪𑀯𑁄 𑀦𑀸𑀫 𑀓𑀸𑀫𑀭𑀽𑀧𑀪𑀯𑁄, 𑀅𑀭𑀽𑀧𑀪𑀯𑁄 𑀘𑀢𑀼𑀯𑁄𑀓𑀸𑀭𑀪𑀯𑁄 𑀦𑀸𑀫, 𑀅𑀲𑀜𑁆𑀜𑀻𑀪𑀯𑁄 𑀏𑀓𑀯𑁄𑀓𑀸𑀭𑀪𑀯𑁄 𑀦𑀸𑀫. 𑀅𑀬𑀁 𑀧𑀸𑀞𑁄 𑀘𑀢𑀼𑀯𑁄𑀓𑀸𑀭𑀅𑀭𑀽𑀧𑀪𑀯𑀁 𑀲𑀦𑁆𑀥𑀸𑀬 𑀦 𑀓𑀣𑀺𑀢𑁄𑀢𑀺 𑀅𑀢𑁆𑀣𑁄. 𑀯𑀢𑁆𑀣𑀼𑀲𑁆𑀲 𑀭𑀽𑀧𑀢𑁆𑀢𑀸 𑀅𑀭𑀽𑀧𑀪𑀯𑁂 𑀓𑀣𑀁 𑀯𑀢𑁆𑀣𑀼𑀲𑀦𑁆𑀦𑀺𑀲𑁆𑀲𑀬𑁄 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑁫𑁧𑁨-𑁪. 𑀧𑀝𑀺𑀲𑀦𑁆𑀥𑀸𑀤𑀺𑀘𑀺𑀢𑁆𑀢𑀸𑀦𑀺, 𑀲𑀩𑁆𑀩𑀸𑀦𑁂𑀓𑀽𑀦𑀯𑀻𑀲𑀢𑀺 𑀳𑁄𑀦𑁆𑀢𑀺, 𑀓𑀸𑀫𑀸𑀯𑀘𑀭𑁂𑀲𑀼 𑀤𑀲, 𑀭𑀽𑀧𑁂𑀲𑀼 𑀧𑀜𑁆𑀘, 𑀅𑀭𑀽𑀧𑀻𑀲𑀼 𑀘𑀢𑁆𑀢𑀸𑀭𑀺, 𑀲𑀩𑁆𑀩𑀸𑀦𑀺 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀸𑀦𑀺 𑀏𑀓𑀽𑀦𑀯𑀻𑀲𑀢𑀺 𑀳𑁄𑀦𑁆𑀢𑀺. 𑀓𑀫𑁆𑀫𑀁 𑀦𑀸𑀫 𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸. 𑀓𑀫𑁆𑀫𑀦𑀺𑀫𑀺𑀢𑁆𑀢𑀁 𑀦𑀸𑀫 𑀭𑀽𑀧𑀸𑀦𑀺 𑀧𑀜𑁆𑀘𑀸𑀭𑀫𑁆𑀫𑀡𑀸𑀦𑀺 𑀧𑀜𑁆𑀜𑀢𑁆𑀢𑀺 𑀘 𑀫𑀳𑀕𑁆𑀕𑀢𑀘𑀺𑀢𑁆𑀢𑀜𑁆𑀘. 𑀢𑀣𑀸 𑀕𑀢𑀺𑀦𑀺𑀫𑀺𑀢𑁆𑀢𑀓𑀁 𑀦𑀸𑀫 𑀓𑀧𑁆𑀧𑀭𑀼𑀓𑁆𑀔𑀸𑀤𑀬𑁄, 𑀅𑀓𑀼𑀲𑀮𑀧𑀓𑁆𑀔𑁂 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀪𑀽𑀢𑀸 𑀮𑁄𑀳𑀓𑀼𑀫𑁆𑀪𑀸𑀤𑀬𑁄 𑀘. 𑀇𑀢𑀺 𑀏𑀯𑀁 𑀇𑀫𑀺𑀦𑀸 𑀫𑀬𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀢𑁂𑀲𑀁 𑀧𑀝𑀺𑀲𑀦𑁆𑀥𑀸𑀤𑀺𑀘𑀺𑀢𑁆𑀢𑀸𑀦𑀁 𑀆𑀭𑀫𑁆𑀫𑀡𑀁 𑀢𑀺𑀯𑀺𑀥𑀁 𑀪𑀕𑀯𑀢𑀸 𑀉𑀤𑀻𑀭𑀺𑀢𑀁. 𑀓𑀸𑀫𑀸𑀯𑀘𑀭𑀲𑀦𑁆𑀥𑀻𑀦𑀁 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁 𑀓𑀸𑀫𑀸𑀯𑀘𑀭𑀸𑀭𑀫𑁆𑀫𑀡𑀁 𑀪𑀕𑀯𑀢𑀸 𑀫𑀢𑀁. 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀭𑀽𑀧𑀸𑀤𑀺𑀧𑀜𑁆𑀘𑀸𑀭𑀫𑁆𑀫𑀡𑀁, 𑀕𑀢𑀺𑀦𑀺𑀫𑀺𑀢𑁆𑀢𑀁 𑀧𑀜𑁆𑀘𑀸𑀭𑀫𑁆𑀫𑀡𑀜𑁆𑀘 𑀧𑀘𑁆𑀘𑀼𑀧𑁆𑀧𑀦𑁆𑀦𑀜𑁆𑀘 𑀳𑁄𑀢𑀺. 𑀅𑀢𑀻𑀢𑀁 𑀯𑀸 𑀓𑀫𑁆𑀫𑀁 𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸 𑀅𑀢𑀻𑀢𑀸𑀬𑁂𑀯, 𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀸. 𑀅𑀦𑀸𑀕𑀢𑀁 𑀆𑀭𑀫𑁆𑀫𑀡𑀁 𑀦𑀢𑁆𑀣𑀺.

𑁫𑁧𑁫-𑁨𑁬. 𑀅𑀝𑁆𑀞𑁂𑀯 𑀘 𑀫𑀳𑀸𑀯𑀺𑀧𑀸𑀓𑀸, 𑀢𑀻𑀡𑀺 𑀲𑀦𑁆𑀢𑀻𑀭𑀡𑀸𑀦𑀺 𑀘𑀸𑀢𑀺 𑀏𑀓𑀸𑀤𑀲𑀯𑀺𑀥𑀁 𑀘𑀺𑀢𑁆𑀢𑀁 𑀢𑀤𑀸𑀭𑀫𑁆𑀫𑀡𑀲𑀜𑁆𑀜𑀺𑀢𑀁. 𑀏𑀓𑀸𑀤𑀲𑀯𑀺𑀥𑁂 𑀘𑀺𑀢𑁆𑀢𑁂 𑀢𑀤𑀸𑀭𑀫𑁆𑀫𑀡𑀲𑀜𑁆𑀜𑀺𑀢𑁂 𑀧𑀼𑀜𑁆𑀜𑀯𑀺𑀧𑀸𑀓𑀸𑀦𑀺 𑀓𑀼𑀲𑀮𑀯𑀺𑀧𑀸𑀓𑀸 𑀤𑀲 𑀳𑁄𑀦𑁆𑀢𑀺, 𑀅𑀧𑀼𑀜𑁆𑀜𑀚𑀁 𑀅𑀓𑀼𑀲𑀮𑀯𑀺𑀧𑀸𑀓𑀁 𑀧𑀦 𑀏𑀓𑀁 𑀳𑁄𑀢𑀺. 𑀫𑀳𑀸𑀯𑀺𑀧𑀸𑀓𑀸 𑀭𑀽𑀧𑀸𑀭𑀽𑀧𑀪𑀯𑀤𑁆𑀯𑀬𑁂 𑀦 𑀚𑀸𑀬𑀦𑁆𑀢𑀺, 𑀓𑀸𑀫𑀭𑀽𑀧𑀪𑀯𑁂 𑀲𑀦𑁆𑀢𑀻𑀭𑀡𑀢𑁆𑀢𑀬𑀁 𑀳𑁄𑀢𑀺. 𑀬𑀸𑀦𑀺 𑀢𑀤𑀸𑀭𑀫𑁆𑀫𑀡𑀘𑀺𑀢𑁆𑀢𑀸𑀦𑀺 𑀲𑀢𑁆𑀣𑀼𑀦𑀸 𑀚𑀺𑀦𑁂𑀦 𑀯𑀼𑀢𑁆𑀢𑀸𑀦𑀺, 𑀢𑁂𑀲𑀼 𑀢𑀤𑀸𑀭𑀫𑁆𑀫𑀡𑀘𑀺𑀢𑁆𑀢𑁂𑀲𑀼 𑀏𑀓𑀫𑁆𑀧𑀺 𑀢𑀤𑀸𑀭𑀫𑁆𑀫𑀡𑀘𑀺𑀢𑁆𑀢𑀁 𑀭𑀽𑀧𑀸𑀭𑀽𑀧𑀪𑀯𑀤𑁆𑀯𑀬𑁂 𑀢𑀤𑀸𑀭𑀫𑁆𑀫𑀡𑀁 𑀳𑀼𑀢𑁆𑀯𑀸 𑀓𑀤𑀸𑀘𑀺𑀧𑀺 𑀦𑀧𑁆𑀧𑀯𑀢𑁆𑀢𑀢𑀺. 𑀓𑀲𑁆𑀫𑀸 𑀓𑀸𑀭𑀡𑀸? 𑀢𑀢𑁆𑀣 𑀢𑀲𑁆𑀫𑀺𑀁 𑀭𑀽𑀧𑀸𑀭𑀽𑀧𑀪𑀯𑀤𑁆𑀯𑀬𑁂 ‘‘𑀢𑀤𑀸𑀭𑀫𑁆𑀫𑀡𑀁 𑀦 𑀳𑁄𑀢𑀻’’𑀢𑀺 𑀯𑀘𑀦𑀁 𑀘𑁄𑀤𑀓𑁄 𑀪𑀯𑁂𑀬𑁆𑀬, 𑀩𑀻𑀚𑀲𑁆𑀲𑀸𑀪𑀸𑀯𑀢𑁄 𑀧𑀦 𑀦 𑀳𑁄𑀢𑀻𑀢𑀺 𑀧𑀭𑀺𑀳𑀸𑀭𑁄. 𑀅𑀓𑀸𑀫𑀸𑀯𑀘𑀭𑀸𑀭𑀫𑁆𑀫𑀡𑁂 𑀅𑀓𑀸𑀫𑀸𑀯𑀘𑀭𑀥𑀫𑁆𑀫𑁂 𑀇𑀤𑀁 𑀢𑀤𑀸𑀭𑀫𑁆𑀫𑀡𑀫𑀸𑀦𑀲𑀁 𑀦𑁂𑀯 𑀅𑀦𑀼𑀩𑀦𑁆𑀥𑀢𑀺. 𑀳𑀺 𑀓𑀲𑁆𑀫𑀸 𑀓𑀸𑀭𑀡𑀸? 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸 𑀘 𑀏𑀓𑀦𑁆𑀢𑁂𑀦 𑀅𑀯𑀲𑁆𑀲𑀁 𑀢𑀤𑀸𑀭𑀫𑁆𑀫𑀡𑀫𑀸𑀦𑀲𑀲𑁆𑀲 𑀓𑀸𑀫𑀸𑀯𑀘𑀭𑀸𑀭𑀫𑁆𑀫𑀡𑀢𑁆𑀢𑀸 𑀘 𑀢𑀣𑀸 𑀅𑀧𑀭𑀺𑀘𑀺𑀢𑀢𑁆𑀢𑀸 𑀘 𑀲𑀩𑁆𑀩𑀤𑀸 𑀦𑀸𑀦𑀼𑀩𑀦𑁆𑀥𑀢𑀺. 𑀢𑀜𑁆𑀳𑀺 𑀬𑀣𑀸 𑀧𑀺𑀢𑀭𑀁 𑀯𑀸 𑀧𑀺𑀢𑀼𑀲𑀤𑀺𑀲𑀁 𑀯𑀸 𑀜𑀸𑀢𑀺𑀁 𑀅𑀦𑀼𑀩𑀦𑁆𑀥𑀦𑁆𑀢𑁄𑀧𑀺 𑀢𑀭𑀼𑀡𑀤𑀸𑀭𑀓𑁄 𑀖𑀭𑀤𑁆𑀯𑀸𑀭𑀦𑁆𑀢𑀭𑀯𑀻𑀣𑀺𑀘𑀢𑀼𑀓𑁆𑀓𑀸𑀤𑀺𑀫𑁆𑀳𑀺 𑀧𑀭𑀺𑀘𑀺𑀢𑁂𑀬𑁂𑀯 𑀤𑁂𑀲𑁂 𑀅𑀦𑀼𑀩𑀦𑁆𑀥𑀢𑀺, 𑀦 𑀅𑀭𑀜𑁆𑀜𑀁 𑀯𑀸 𑀬𑀼𑀤𑁆𑀥𑀪𑀽𑀫𑀺𑀁 𑀯𑀸 𑀕𑀘𑁆𑀙𑀢𑀺, 𑀏𑀯𑀁 𑀓𑀸𑀫𑀸𑀯𑀘𑀭𑁂 𑀥𑀫𑁆𑀫𑁂 𑀅𑀦𑀼𑀩𑀦𑁆𑀥𑀦𑁆𑀢𑀫𑁆𑀧𑀺 𑀫𑀳𑀕𑁆𑀕𑀢𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀫𑀸𑀭𑀩𑁆𑀪 𑀧𑀯𑀢𑁆𑀢𑀫𑀸𑀦𑁂 𑀥𑀫𑁆𑀫𑁂 𑀦𑀸𑀦𑀼𑀩𑀦𑁆𑀥𑀢𑀺. 𑀬𑀲𑁆𑀫𑀸 𑀘𑀲𑁆𑀲 𑀲𑀩𑁆𑀩𑁄 𑀓𑀸𑀫𑀸𑀯𑀘𑀭𑀧𑀸𑀓𑁄 𑀘 𑀓𑀺𑀭𑀺𑀬𑀸𑀫𑀦𑁄𑀥𑀸𑀢𑀼 𑀓𑀺𑀭𑀺𑀬𑀸𑀅𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀲𑁄𑀫𑀦𑀲𑁆𑀲𑀲𑀳𑀕𑀢𑀸 𑀇𑀫𑁂 𑀥𑀫𑁆𑀫𑀸 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸𑀢𑀺 𑀏𑀯𑀁 𑀅𑀘𑁆𑀘𑀦𑁆𑀢𑀁 𑀧𑀭𑀺𑀢𑁆𑀢𑀫𑁂𑀯 𑀆𑀭𑀫𑁆𑀫𑀡𑀁 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀘𑁂𑀢𑀁 𑀫𑀳𑀕𑁆𑀕𑀢𑀮𑁄𑀓𑀼𑀢𑁆𑀢𑀭𑀸𑀭𑀫𑁆𑀫𑀡𑁂 𑀓𑀸𑀫𑀸𑀯𑀘𑀭𑀥𑀫𑁆𑀫𑁂𑀧𑀺 𑀦𑀸𑀦𑀼𑀩𑀦𑁆𑀥𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁫𑁨𑁭-𑁩𑁨. 𑀓𑀺𑀁 𑀢𑁂𑀦 𑀬𑀼𑀢𑁆𑀢𑀺𑀯𑀸𑀤𑁂𑀦, 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀲𑀼 𑀳𑀺 ‘‘𑀚𑀦𑀓𑀁 𑀢𑁂𑀦 𑀢𑀼𑀮𑁆𑀬’’𑀦𑁆𑀢𑀺𑀆𑀤𑀺𑀓𑁂𑀦 𑀢𑁂𑀦, 𑀬𑀼𑀢𑁆𑀢𑀺𑀬𑀸 𑀯𑀸𑀤𑁄 𑀬𑀼𑀢𑁆𑀢𑀺𑀯𑀸𑀤𑁄, ‘‘𑀚𑀦𑀓𑀁 𑀢𑁂𑀦 𑀢𑀼𑀮𑁆𑀬’’𑀦𑁆𑀢𑀺𑀆𑀤𑀺𑀓𑀸𑀬 𑀬𑀼𑀢𑁆𑀢𑀺𑀓𑀣𑀸𑀬 𑀓𑀺𑀁 𑀧𑀬𑁄𑀚𑀦𑀁 𑀯𑀼𑀢𑁆𑀢𑀁? 𑀅𑀝𑁆𑀞𑀓𑀣𑀸𑀲𑀼 𑀳𑀺 𑀲𑀘𑁆𑀘𑀁 ‘‘𑀓𑀺𑀁 𑀢𑁂𑀦 𑀬𑀼𑀢𑁆𑀢𑀺𑀯𑀸𑀤𑁂𑀦𑀸’’𑀢𑀺 𑀯𑀘𑀦𑀁, ‘‘𑀅𑀢𑁆𑀣𑀓𑀣𑀸𑀲𑀽’’𑀢𑀺 𑀯𑀢𑁆𑀢𑀩𑁆𑀩𑁂 𑀲𑀫𑀸𑀲𑁂 𑀳𑀺 𑀢𑁆𑀣-𑀲𑁆𑀲 𑀝𑁆𑀞-𑀓𑀸𑀭𑀁 𑀓𑀢𑁆𑀯𑀸 ‘‘𑀅𑀝𑁆𑀞𑀓𑀣𑀸𑀲𑀽’’𑀢𑀺 𑀯𑀼𑀢𑁆𑀢𑀁. 𑀓𑀸𑀫𑀸𑀯𑀘𑀭𑁂 𑀥𑀫𑁆𑀫𑁂 𑀧𑀝𑀺𑀘𑁆𑀘 𑀢𑀤𑀸𑀭𑀫𑁆𑀫𑀡𑀪𑀸𑀯𑀤𑀻𑀧𑀓𑀁 𑀯𑀘𑀦𑀁 𑀆𑀘𑀭𑀺𑀬𑁂𑀦 𑀯𑀼𑀢𑁆𑀢𑀁. 𑀢𑀤𑀸𑀭𑀫𑁆𑀫𑀡𑀘𑀺𑀢𑁆𑀢𑀸𑀦𑀺, 𑀏𑀓𑀸𑀤𑀲𑀧𑀺 𑀲𑀩𑁆𑀩𑀲𑁄 𑀲𑀩𑁆𑀩𑀧𑁆𑀧𑀓𑀸𑀭𑁂𑀦𑀧𑀺 𑀢𑀤𑀸𑀭𑀫𑁆𑀫𑀡𑀘𑀺𑀢𑁆𑀢𑀸𑀦𑀺 𑀦𑀸𑀫𑀕𑁄𑀢𑁆𑀢𑀁 𑀧𑀦𑀸𑀭𑀩𑁆𑀪 𑀢𑀺𑀲𑁆𑀲𑀸𑀤𑀺𑀓𑀁 𑀦𑀸𑀫𑀧𑀜𑁆𑀜𑀢𑁆𑀢𑀺𑀁 𑀧𑀝𑀺𑀘𑁆𑀘 𑀓𑀘𑁆𑀘𑀸𑀬𑀦𑀕𑁄𑀢𑁆𑀢𑀓𑀲𑁆𑀲𑀧𑀕𑁄𑀢𑁆𑀢𑀸𑀤𑀺𑀓𑀁 𑀕𑁄𑀢𑁆𑀢𑀧𑀜𑁆𑀜𑀢𑁆𑀢𑀺𑀁 𑀧𑀝𑀺𑀘𑁆𑀘 𑀚𑀯𑀦𑁂 𑀚𑀯𑀺𑀢𑁂𑀧𑀺 𑀘 𑀢𑀤𑀸𑀭𑀫𑁆𑀫𑀡𑀁 𑀦 𑀕𑀡𑁆𑀳𑀦𑁆𑀢𑀺, 𑀭𑀽𑀧𑀸𑀭𑀽𑀧𑀪𑀯𑁂𑀲𑀼 𑀯𑀸 𑀢𑀤𑀸𑀭𑀫𑁆𑀫𑀡𑀁 𑀦 𑀕𑀡𑁆𑀳𑀦𑁆𑀢𑀺. 𑀬𑀤𑀸 𑀧𑀜𑁆𑀜𑀢𑁆𑀢𑀺𑀫𑀸𑀭𑀩𑁆𑀪, 𑀚𑀯𑀦𑁂 𑀚𑀯𑀺𑀢𑁂𑀧𑀺 𑀯𑀸 𑀬𑀤𑀸 𑀫𑀬𑀸 𑀯𑀼𑀢𑁆𑀢𑀸𑀬 𑀧𑀜𑁆𑀜𑀢𑁆𑀢𑀺𑀬𑀸 𑀲𑁂𑀲𑀧𑀜𑁆𑀜𑀢𑁆𑀢𑀺𑀁 𑀧𑀝𑀺𑀘𑁆𑀘 𑀚𑀯𑀦𑁂 𑀚𑀯𑀺𑀢𑁂𑀧𑀺 𑀯𑀸 𑀢𑀤𑀸𑀭𑀫𑁆𑀫𑀡𑀁 𑀦 𑀮𑀩𑁆𑀪𑀢𑁂 𑀆𑀘𑀭𑀺𑀬𑁂𑀦, 𑀢𑀣𑀸 𑀤𑀼𑀓𑁆𑀔𑀅𑀦𑀺𑀘𑁆𑀘𑀅𑀦𑀢𑁆𑀢𑀮𑀓𑁆𑀔𑀡𑀸𑀭𑀫𑁆𑀫𑀡𑀺𑀓𑀸𑀬 𑀯𑀺𑀧𑀲𑁆𑀲𑀦𑀸𑀬 𑀢𑀤𑀸𑀭𑀫𑁆𑀫𑀡𑀁 𑀦 𑀮𑀩𑁆𑀪𑀢𑁂 𑀆𑀘𑀭𑀺𑀬𑁂𑀦. 𑀢𑀤𑀸𑀭𑀫𑁆𑀫𑀡𑀸 𑀦 𑀮𑀩𑁆𑀪𑀦𑁆𑀢𑀺, 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑁂𑀲𑀼𑀧𑀺 𑀫𑀺𑀘𑁆𑀙𑀢𑁆𑀢𑁂 𑀫𑀺𑀘𑁆𑀙𑀸𑀲𑀪𑀸𑀯𑁂 ‘‘𑀦𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑁆𑀬𑀸𑀤𑀺𑀯𑀲𑁂𑀦 𑀦𑀺𑀬𑀢𑀸𑀦𑀺 𑀘𑀢𑁆𑀢𑀸𑀭𑀺 𑀤𑀺𑀝𑁆𑀞𑀺𑀬𑀼𑀢𑁆𑀢𑀚𑀯𑀦𑀸𑀦𑀺 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀸𑀦𑀺, 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑁂𑀲𑀼𑀧𑀺 𑀢𑀤𑀸𑀭𑀫𑁆𑀫𑀡𑀁 𑀦 𑀮𑀩𑁆𑀪𑀢𑁂 𑀆𑀘𑀭𑀺𑀬𑁂𑀦, 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂 𑀆𑀭𑀩𑁆𑀪 𑀚𑀯𑀦𑁂 𑀕𑀢𑁂𑀧𑀺 𑀢𑀤𑀸𑀭𑀫𑁆𑀫𑀡𑀁 𑀦 𑀮𑀩𑁆𑀪𑀢𑁂 𑀆𑀘𑀭𑀺𑀬𑁂𑀦. 𑀢𑀣𑀸 𑀫𑀳𑀕𑁆𑀕𑀢𑁂 𑀥𑀫𑁆𑀫𑁂 𑀆𑀭𑀩𑁆𑀪 𑀚𑀯𑀦𑁂 𑀚𑀯𑀺𑀢𑁂𑀧𑀺 𑀢𑀤𑀸𑀭𑀫𑁆𑀫𑀡𑀁 𑀦 𑀮𑀩𑁆𑀪𑀢𑁂 𑀆𑀘𑀭𑀺𑀬𑁂𑀦, 𑀧𑀝𑀺𑀲𑀫𑁆𑀪𑀺𑀤𑀸𑀜𑀸𑀡𑀁 𑀆𑀭𑀩𑁆𑀪 𑀚𑀯𑀦𑁂 𑀚𑀯𑀺𑀢𑁂𑀧𑀺 𑀢𑀤𑀸𑀭𑀫𑁆𑀫𑀡𑀁 𑀦 𑀮𑀩𑁆𑀪𑀢𑁂 𑀆𑀘𑀭𑀺𑀬𑁂𑀦. 𑀫𑀦𑁄𑀤𑁆𑀯𑀸𑀭𑁂𑀧𑀺 𑀲𑀩𑁆𑀩𑁂𑀲𑀁 𑀚𑀯𑀦𑀸𑀦𑀁 𑀅𑀦𑀦𑁆𑀢𑀭𑀁 𑀅𑀦𑀼𑀧𑀼𑀩𑁆𑀩𑀢𑁄 𑀢𑀤𑀸𑀭𑀫𑁆𑀫𑀡𑀘𑀺𑀢𑁆𑀢𑀸𑀦𑀺 𑀪𑀯𑀦𑁆𑀢𑀺.

𑁫𑁩𑁩-𑁪. 𑀫𑀦𑁄𑀤𑁆𑀯𑀸𑀭𑁂 𑀆𑀭𑀫𑁆𑀫𑀡𑀖𑀝𑁆𑀝𑀦𑀸 𑀦 𑀯𑀺𑀚𑁆𑀚𑀢𑀺. 𑀪𑀯𑀗𑁆𑀕𑀢𑁄 𑀘𑁂𑀢𑀲𑁄 𑀯𑀻𑀣𑀺𑀘𑀺𑀢𑁆𑀢𑀲𑁆𑀲 𑀯𑀼𑀝𑁆𑀞𑀸𑀦𑀁 𑀓𑀣𑀁 𑀓𑁂𑀦 𑀧𑀓𑀸𑀭𑁂𑀦 𑀳𑁄𑀢𑀺? 𑀫𑀦𑁄𑀤𑁆𑀯𑀸𑀭𑁂𑀧𑀺 𑀖𑀝𑁆𑀝𑀦𑀸𑀬 𑀯𑀺𑀦𑀸 𑀖𑀝𑁆𑀝𑀦𑀁 𑀯𑀚𑁆𑀚𑁂𑀢𑁆𑀯𑀸 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑁂𑀯 𑀬𑀲𑁆𑀫𑀸 𑀓𑀸𑀭𑀡𑀸, 𑀢𑀲𑁆𑀫𑀸 𑀯𑀻𑀣𑀺𑀘𑀺𑀢𑁆𑀢𑀸𑀦𑀁 𑀲𑀫𑁆𑀪𑀯𑁄 𑀳𑁄𑀢𑀺.

𑁫𑁩𑁫-𑁬. 𑀤𑁆𑀯𑀸𑀤𑀲𑀸𑀧𑀼𑀜𑁆𑀜𑀘𑀺𑀢𑁆𑀢𑀸𑀦𑀁 𑀤𑁆𑀯𑀸𑀤𑀲𑀅𑀓𑀼𑀲𑀮𑀘𑀺𑀢𑁆𑀢𑀸𑀦𑀁 𑀯𑀺𑀧𑀸𑀓𑀸 𑀲𑀢𑁆𑀢𑀲𑀢𑁆𑀢𑀢𑀺 𑀧𑀸𑀧𑀧𑀸𑀓𑀸 𑀤𑁆𑀯𑀸𑀤𑀲𑀧𑀸𑀧𑀘𑀺𑀢𑁆𑀢𑀸𑀦𑀁 𑀯𑀺𑀧𑀸𑀓𑀸 𑀘𑀢𑀼𑀭𑀸𑀲𑀻𑀢𑀺 𑀧𑀯𑀢𑁆𑀢𑀺𑀬𑀁 𑀳𑁄𑀦𑁆𑀢𑀺. 𑀏𑀓𑀲𑁆𑀲 𑀲𑁄𑀫𑀦𑀲𑁆𑀲𑀬𑀼𑀢𑁆𑀢𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑀸𑀓𑀼𑀲𑀮𑀲𑁆𑀲 𑀘𑀓𑁆𑀔𑀼𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀯𑀺𑀜𑁆𑀜𑀸𑀡𑀸𑀦𑀺, 𑀲𑀫𑁆𑀧𑀝𑀺𑀘𑁆𑀙𑀦𑀁, 𑀉𑀧𑁂𑀓𑁆𑀔𑀸𑀬𑀼𑀢𑁆𑀢𑀲𑀦𑁆𑀢𑀻𑀭𑀡𑀸𑀦𑀺 𑀘𑀸𑀢𑀺 𑀲𑀢𑁆𑀢 𑀅𑀓𑀼𑀲𑀮𑀧𑀸𑀓𑀸 𑀳𑁄𑀦𑁆𑀢𑀺. 𑀢𑀣𑀸 𑀲𑁂𑀲𑀸𑀦𑀁 𑀏𑀓𑀸𑀤𑀲𑀦𑁆𑀦𑀁 𑀅𑀓𑀼𑀲𑀮𑀸𑀦𑀫𑁆𑀧𑀺 𑀲𑀢𑁆𑀢 𑀯𑀺𑀧𑀸𑀓𑀸 𑀳𑁄𑀦𑁆𑀢𑀺. 𑀏𑀓𑀸𑀤𑀲𑀯𑀺𑀥𑀸𑀦𑀁 𑀢𑀼, 𑀳𑀺𑀢𑁆𑀯𑀸 𑀉𑀤𑁆𑀥𑀘𑁆𑀘𑀫𑀸𑀦𑀲𑀁 𑀉𑀤𑁆𑀥𑀘𑁆𑀘𑀫𑀸𑀦𑀲𑀁 𑀳𑀺𑀢𑁆𑀯𑀸 𑀏𑀓𑀸𑀤𑀲𑀯𑀺𑀥𑀸𑀦𑀁 𑀧𑀝𑀺𑀲𑀦𑁆𑀥𑀺𑀬𑁄 𑀏𑀓𑀸𑀤𑀲𑀯𑀺𑀥𑀸 𑀘𑁂𑀯 𑀪𑀯𑀦𑁆𑀢𑀺.

𑁫𑁩𑁭-𑁮. 𑀓𑁆𑀭𑀺𑀬𑀘𑀺𑀢𑁆𑀢𑁂𑀲𑀼 𑀲𑀩𑁆𑀩𑁂𑀲𑀼 𑀬𑀁 𑀆𑀯𑀚𑁆𑀚𑀦𑀤𑁆𑀯𑀬𑀁 𑀚𑀯𑀦𑀁 𑀦 𑀘 𑀳𑁄𑀢𑀺, 𑀢𑀁 𑀆𑀯𑀚𑁆𑀚𑀦𑀤𑁆𑀯𑀬𑀁 𑀓𑀭𑀡𑀫𑀢𑁆𑀢𑀢𑁆𑀢𑀸 𑀓𑀺𑀭𑀺𑀬𑀸𑀫𑀢𑁆𑀢𑀢𑁆𑀢𑀸 𑀯𑀸𑀢𑀧𑀼𑀧𑁆𑀨𑀲𑀫𑀁 𑀯𑀸𑀢𑀧𑀼𑀧𑁆𑀨𑁂𑀦 𑀲𑀤𑀺𑀲𑀁 𑀫𑀢𑀁 𑀪𑀕𑀯𑀢𑀸. 𑀅𑀬𑀫𑁂𑀢𑁆𑀣𑀸𑀥𑀺𑀧𑁆𑀧𑀸𑀬𑁄 𑁋 𑀔𑀻𑀡𑀸𑀲𑀯𑁂 𑀉𑀧𑁆𑀧𑀦𑁆𑀦𑀓𑀸𑀮𑁂 𑀯𑀸 𑀢𑀁 𑀆𑀯𑀚𑁆𑀚𑀦𑀤𑁆𑀯𑀬𑀁 𑀓𑀺𑀭𑀺𑀬𑀘𑀺𑀢𑁆𑀢𑀁 𑀪𑀯𑀺𑀢𑀼𑀁 𑀬𑀼𑀢𑁆𑀢𑀁. 𑀲𑀩𑁆𑀩𑁂𑀲𑀼 𑀧𑀼𑀣𑀼𑀚𑁆𑀚𑀦𑁂𑀲𑀼 𑀉𑀧𑁆𑀧𑀦𑁆𑀦𑀓𑀸𑀮𑁂 𑀓𑀣𑀁 𑀓𑀺𑀭𑀺𑀬𑀸 𑀳𑁄𑀢𑀻𑀢𑀺 𑀘𑁂? 𑀓𑀭𑀡𑀫𑀢𑁆𑀢𑀢𑁆𑀢𑀸 𑀅𑀨𑀮𑀤𑀸𑀬𑀓𑀁 𑀯𑀸𑀢𑀧𑀼𑀧𑁆𑀨𑀁 𑀯𑀺𑀬 𑀅𑀨𑀮𑀤𑀸𑀬𑀓𑀁 𑀓𑀺𑀭𑀺𑀬𑀘𑀺𑀢𑁆𑀢𑀁 𑀪𑀯𑀺𑀢𑀼𑀁 𑀬𑀼𑀢𑁆𑀢𑀺𑀳𑀸𑀭𑁄 𑀓𑀺𑀭𑀺𑀬𑀸 𑀧𑀦 𑀳𑁄𑀢𑀺. 𑀬𑀁 𑀲𑀩𑁆𑀩𑀁 𑀓𑀺𑀭𑀺𑀬𑀘𑀺𑀢𑁆𑀢𑀁 𑀓𑀺𑀘𑁆𑀘𑀲𑀸𑀥𑀦𑀢𑁄 𑀚𑀯𑀦𑀓𑀺𑀘𑁆𑀘𑀲𑀸𑀥𑀦𑀯𑀲𑁂𑀦 𑀚𑀯𑀦𑀢𑁆𑀢𑀁 𑀚𑀯𑀦𑀪𑀸𑀯𑀁 𑀧𑀢𑁆𑀢𑀁 𑀙𑀺𑀦𑁆𑀦𑀫𑀽𑀮𑀲𑁆𑀲 𑀭𑀼𑀓𑁆𑀔𑀲𑁆𑀲 𑀧𑀼𑀧𑁆𑀨𑀁 𑀅𑀨𑀮𑀁 𑀳𑁄𑀢𑀺 𑀬𑀣𑀸, 𑀏𑀯𑀁 𑀙𑀺𑀦𑁆𑀦𑀸𑀯𑀺𑀚𑁆𑀚𑀸𑀢𑀡𑁆𑀳𑀸𑀫𑀽𑀮𑀲𑁆𑀲 𑀯𑀻𑀢𑀭𑀸𑀕𑀲𑁆𑀲 𑀢𑀁 𑀲𑀩𑁆𑀩𑀁 𑀓𑀺𑀭𑀺𑀬𑀘𑀺𑀢𑁆𑀢𑀁 𑀅𑀨𑀮𑀁 𑀯𑀺𑀧𑀸𑀓𑀯𑀺𑀭𑀳𑀺𑀢𑀁 𑀲𑀺𑀬𑀸 𑀪𑀯𑁂𑀬𑁆𑀬.

𑁫𑁩𑁯-𑁪𑁦. 𑀧𑀝𑀺𑀘𑁆𑀘 𑀧𑀦 𑀏𑀢𑀲𑁆𑀫𑀸, 𑀨𑀮𑀫𑁂𑀢𑀻𑀢𑀺 𑀧𑀘𑁆𑀘𑀬𑁄 𑀏𑀓𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀏𑀢𑀲𑁆𑀫𑀸 𑀥𑀫𑁆𑀫𑀢𑁄 𑀨𑀮𑀁 𑀏𑀢𑀺 𑀧𑀯𑀢𑁆𑀢𑀢𑀺 𑀢𑀲𑁆𑀫𑀸 𑀧𑀘𑁆𑀘𑀬𑁄, 𑀬𑁄 𑀥𑀫𑁆𑀫𑁄 𑀬𑀲𑁆𑀲 𑀥𑀫𑁆𑀫𑀲𑁆𑀲 𑀞𑀺𑀢𑀺𑀬𑀸 𑀉𑀧𑁆𑀧𑀢𑁆𑀢𑀺𑀬𑀸𑀧𑀺 𑀉𑀧𑀓𑀸𑀭𑁄 𑀦𑀸𑀫 𑀳𑁄𑀢𑀺, 𑀲𑁄 𑀥𑀫𑁆𑀫𑁄 𑀢𑀲𑁆𑀲 𑀥𑀫𑁆𑀫𑀲𑁆𑀲 𑀧𑀘𑁆𑀘𑀬𑁄𑀢𑀺 𑀧𑀘𑁆𑀘𑀬𑁄 𑀦𑀸𑀫 𑀧𑀡𑁆𑀟𑀺𑀢𑁂𑀦 𑀧𑀯𑀼𑀘𑁆𑀘𑀢𑁂. 𑀲𑀫𑁆𑀪𑀯𑁄 𑀧𑀪𑀯𑁄 𑀳𑁂𑀢𑀼 𑀓𑀸𑀭𑀡𑀁 𑀧𑀘𑁆𑀘𑀬𑁄 𑀫𑀢𑁄 𑀪𑀕𑀯𑀢𑀸. 𑀇𑀤𑀁 𑀯𑀘𑀦𑀁 𑀅𑀜𑁆𑀜𑀢𑁆𑀣 𑀤𑀻𑀧𑀦𑀯𑀘𑀦𑀁.

𑁫𑁪𑁧. 𑀮𑁄𑀪𑀸𑀤𑀺 𑀧𑀦 𑀬𑁄 𑀥𑀫𑁆𑀫𑁄, 𑀫𑀽𑀮𑀝𑁆𑀞𑁂𑀦𑀼𑀧𑀓𑀸𑀭𑀓𑁄 𑀬𑁄 𑀮𑁄𑀪𑀸𑀤𑀺 𑀧𑀦 𑀥𑀫𑁆𑀫𑁄 𑀫𑀽𑀮𑀪𑀸𑀯𑁂𑀦 𑀨𑀮𑀥𑀫𑁆𑀫𑀲𑁆𑀲 𑀉𑀧𑀓𑀸𑀭𑀓𑁄, 𑀲𑁄 𑀮𑁄𑀪𑀸𑀤𑀺𑀥𑀫𑁆𑀫𑁄 𑀨𑀮𑀥𑀫𑁆𑀫𑀲𑁆𑀲 𑀳𑁂𑀢𑀽𑀢𑀺 𑀳𑁂𑀢𑀼 𑀦𑀸𑀫 𑀯𑀺𑀪𑀸𑀯𑀺𑀦𑀸 𑀯𑀺𑀜𑁆𑀜𑀸𑀢𑀩𑁆𑀩𑁄.

𑁫𑁪𑁨. 𑀮𑁄𑀪𑁄 𑀤𑁄𑀲𑁄 𑀘 𑀫𑁄𑀳𑁄 𑀘 𑀢𑀣𑀸 𑀅𑀮𑁄𑀪𑀸𑀤𑀬𑁄 𑀢𑀬𑁄 𑀳𑁂𑀢𑀽, 𑀢𑁂 𑀙 𑀏𑀯 𑀳𑁂𑀢𑀼𑀬𑁄 𑀳𑁄𑀦𑁆𑀢𑀺, 𑀚𑀸𑀢𑀺𑀢𑁄 𑀚𑀸𑀢𑀺𑀯𑀲𑁂𑀦 𑀓𑀼𑀲𑀮𑀚𑀸𑀢𑀺𑀅𑀓𑀼𑀲𑀮𑀚𑀸𑀢𑀺𑀅𑀩𑁆𑀬𑀸𑀓𑀢𑀚𑀸𑀢𑀺𑀯𑀲𑁂𑀦 𑀦𑀯𑀥𑀸 𑀦𑀯𑀳𑀺 𑀓𑁄𑀝𑁆𑀞𑀸𑀲𑁂𑀳𑀺 𑀲𑀺𑀬𑀼𑀁.

𑁫𑁪𑁩-𑁪. 𑀥𑀫𑁆𑀫𑀸𑀦𑀁 𑀓𑀼𑀲𑀮𑀸𑀤𑀻𑀦𑀁, 𑀓𑀼𑀲𑀮𑀸𑀤𑀺𑀢𑁆𑀢𑀲𑀸𑀥𑀓𑁄 𑀬𑁄 𑀥𑀫𑁆𑀫𑁄 𑀓𑀼𑀲𑀮𑀸𑀤𑀻𑀦𑀁 𑀥𑀫𑁆𑀫𑀸𑀦𑀁 𑀓𑀼𑀲𑀮𑀸𑀤𑀺𑀢𑁆𑀢𑀲𑀸𑀥𑀓𑁄 𑀓𑀼𑀲𑀮𑀸𑀤𑀺𑀪𑀸𑀯𑀲𑀸𑀥𑀓𑁄, 𑀲𑁄 𑀥𑀫𑁆𑀫𑁄 𑀫𑀽𑀮𑀝𑁆𑀞𑁄 𑀦𑀸𑀫. 𑀏𑀯𑀁 𑀯𑀘𑀦𑀁 𑀏𑀓𑁂 𑀏𑀓𑀘𑁆𑀘𑁂 𑀆𑀘𑀭𑀺𑀬𑀸 𑀯𑀤𑀦𑁆𑀢𑀺. 𑀏𑀯𑀁 𑀲𑀦𑁆𑀢𑁂 𑀓𑀼𑀲𑀮𑀸𑀓𑀼𑀲𑀮𑀸𑀤𑀻𑀦𑀁 𑀥𑀫𑁆𑀫𑀸𑀦𑀁 𑀓𑀼𑀲𑀮𑀸𑀤𑀺𑀢𑁆𑀢𑀲𑀸𑀥𑀓𑀯𑀲𑁂𑀦 𑀫𑀽𑀮𑀝𑁆𑀞𑁂 𑀲𑀦𑁆𑀢𑁂 𑀢𑀁𑀲𑀫𑀼𑀝𑁆𑀞𑀸𑀦𑀭𑀽𑀧𑀻𑀲𑀼 𑀢𑁂𑀳𑀺 𑀘𑀺𑀢𑁆𑀢𑁂𑀳𑀺 𑀲𑀫𑀼𑀝𑁆𑀞𑀸𑀦𑀭𑀽𑀧𑁂𑀲𑀼 𑀢𑁂𑀳𑀺 𑀘𑀺𑀢𑁆𑀢𑁂𑀳𑀺 𑀲𑀫𑀼𑀝𑁆𑀞𑀺𑀢𑁂𑀲𑀼 𑀘𑀺𑀢𑁆𑀢𑀚𑀭𑀽𑀧𑁂𑀲𑀼 𑀳𑁂𑀢𑀽𑀦𑀁 𑀮𑁄𑀪𑀸𑀤𑀺𑀳𑁂𑀢𑀽𑀦𑀁 𑀳𑁂𑀢𑀼𑀧𑀘𑁆𑀘𑀬𑀢𑀸 𑀓𑀤𑀸𑀘𑀺𑀧𑀺 𑀦𑁂𑀯 𑀲𑀫𑁆𑀧𑀚𑁆𑀚𑀢𑀺. 𑀅𑀬𑀫𑁂𑀢𑁆𑀣𑀸𑀥𑀺𑀧𑁆𑀧𑀸𑀬𑁄 𑁋 𑀬𑀤𑀺 𑀘𑀺𑀢𑁆𑀢𑁂𑀲𑀼 𑀭𑀽𑀧𑀸𑀦𑀺 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑁂𑀲𑀼 𑀢𑁂 𑀮𑁄𑀪𑀸𑀤𑀬𑁄𑀧𑀺 𑀘𑀺𑀢𑁆𑀢𑀸𑀦𑀁 𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀸𑀦𑀁 𑀏𑀓𑀼𑀧𑁆𑀧𑀸𑀤𑀢𑁆𑀢𑀸 𑀘 𑀭𑀽𑀧𑀸𑀦𑀺 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀺𑀬𑁂𑀯. 𑀢𑀤𑀸 𑀢𑁂𑀲𑀁 𑀫𑀢𑁂 𑀢𑁂𑀲𑀁 𑀘𑀺𑀢𑁆𑀢𑀚𑀭𑀽𑀧𑀸𑀦𑀁 𑀓𑀼𑀲𑀮𑀸𑀤𑀺𑀢𑁆𑀢𑀁 𑀲𑀺𑀬𑀸. 𑀦 𑀘 𑀓𑀤𑀸𑀘𑀺 𑀭𑀽𑀧𑀸𑀦𑀺 𑀓𑀼𑀲𑀮𑀸𑀤𑀺𑀦𑀸𑀫𑀓𑀸𑀦𑀺 𑀤𑀺𑀲𑁆𑀲𑀦𑁆𑀢𑀺 𑀬𑀲𑁆𑀫𑀸, 𑀢𑀲𑁆𑀫𑀸 𑀘𑀺𑀢𑁆𑀢𑀚𑀭𑀽𑀧𑀸𑀦𑀁 𑀓𑀼𑀲𑀮𑀸𑀤𑀺𑀪𑀸𑀯𑀜𑀸𑀧𑀦𑀢𑁆𑀣𑀁 𑀢𑁂𑀲𑀁 𑀘𑀺𑀢𑁆𑀢𑀚𑀭𑀽𑀧𑀸𑀦𑀁 𑀢𑁂 𑀮𑁄𑀪𑀸𑀤𑀬𑁄 𑀳𑁂𑀢𑀼𑀧𑀘𑁆𑀘𑀬𑀸 𑀦 𑀳𑁄𑀦𑁆𑀢𑀺, 𑀇𑀢𑀺 𑀯𑀘𑀦𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀏𑀯𑀜𑁆𑀘 𑀲𑀢𑀺 𑀘𑀺𑀢𑁆𑀢𑀚𑀭𑀽𑀧𑀸𑀦𑀺 𑀦𑀸𑀫 𑀓𑀤𑀸𑀘𑀺𑀧𑀺 𑀯𑀺𑀬𑀼𑀢𑁆𑀢𑀸𑀦𑀺 𑀘𑀭𑀦𑁆𑀢𑀺, 𑀢𑀲𑁆𑀫𑀸 𑀓𑀼𑀲𑀮𑀸𑀤𑀺𑀢𑁆𑀢𑀲𑀸𑀥𑀓𑁄 𑀫𑀽𑀮𑀝𑁆𑀞𑁄 𑀦 𑀳𑁄𑀢𑀺.

𑁫𑁪𑁫-𑁬. 𑀳𑀺 𑀲𑀘𑁆𑀘𑀁 ‘‘𑀏𑀯𑀁 𑀲𑀦𑁆𑀢𑁂 𑀢𑀼 𑀳𑁂𑀢𑀽𑀦’’𑀦𑁆𑀢𑀺𑀆𑀤𑀺𑀓𑀁 𑀯𑀘𑀦𑀁. 𑀢𑁂 𑀮𑁄𑀪𑀸𑀤𑀬𑁄 𑀳𑁂𑀢𑀽 𑀢𑁂𑀲𑀁 𑀭𑀽𑀧𑀸𑀦𑀁 𑀓𑀼𑀲𑀮𑀸𑀤𑀺𑀢𑀁 𑀓𑀼𑀲𑀮𑀸𑀤𑀺𑀪𑀸𑀯𑀁 𑀦 𑀲𑀸𑀥𑁂𑀦𑁆𑀢𑀺 𑀦 𑀦𑀺𑀧𑁆𑀨𑀸𑀤𑁂𑀦𑁆𑀢𑀺. 𑀢𑁂 𑀳𑁂𑀢𑀽 𑀢𑁂𑀲𑀁 𑀧𑀦 𑀭𑀽𑀧𑀸𑀦𑀁 𑀧𑀘𑁆𑀘𑀬𑀸 𑀦 𑀘 𑀦 𑀳𑁄𑀦𑁆𑀢𑀺𑀬𑁂𑀯, 𑀢𑀲𑁆𑀫𑀸 𑀓𑀸𑀭𑀡𑀸 𑀓𑀼𑀲𑀮𑀸𑀤𑀻𑀦𑀁 𑀥𑀫𑁆𑀫𑀸𑀦𑀁 𑀓𑀼𑀲𑀮𑀸𑀤𑀺𑀢𑁆𑀢𑀲𑀸𑀥𑀓𑁄 𑀬𑁄 𑀥𑀫𑁆𑀫𑁄, 𑀲𑁄 𑀥𑀫𑁆𑀫𑁄 𑀫𑀽𑀮𑀝𑁆𑀞𑁄𑀢𑀺 𑀫𑀽𑀮𑀲𑀪𑀸𑀯𑁄 𑀦𑀸𑀫 𑀲𑀫𑀬𑀜𑁆𑀜𑀼𑀦𑀸 𑀲𑀫𑀬𑀯𑀺𑀚𑀸𑀦𑀦𑀲𑀻𑀮𑁂𑀦 𑀯𑀺𑀜𑁆𑀜𑀼𑀦𑀸 𑀕𑀦𑁆𑀢𑀩𑁆𑀩𑁄 𑀚𑀸𑀦𑀺𑀢𑀩𑁆𑀩𑁄.

𑁫𑁪𑁭. 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀪𑀸𑀯𑀲𑁆𑀲, 𑀲𑀸𑀥𑀦𑁂𑀦𑀼𑀧𑀓𑀸𑀭𑀓𑁄 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀪𑀸𑀯𑀁 𑀲𑀸𑀥𑀦𑁂𑀦 𑀉𑀧𑀓𑀸𑀭𑀓𑁄 𑀬𑁄 𑀅𑀢𑁆𑀣𑁄, 𑀲𑁄 𑀅𑀢𑁆𑀣𑁄 𑀳𑁂𑀢𑀽𑀦𑀁 𑀮𑁄𑀪𑀸𑀤𑀻𑀦𑀁 𑀫𑀽𑀮𑀝𑁆𑀞𑁄 𑀫𑀽𑀮𑀲𑀪𑀸𑀯𑁄 𑀇𑀢𑀺 𑀘 𑀕𑀳𑀡𑀁 𑀯𑀺𑀪𑀸𑀯𑀺𑀦𑀸 𑀯𑀺𑀜𑁆𑀜𑀸𑀢𑀩𑁆𑀩𑀁.

𑁫𑁪𑁮-𑁯. 𑀓𑀼𑀲𑀮𑀸𑀓𑀼𑀲𑀮𑀸 𑀳𑁂𑀢𑀽 𑀓𑀼𑀲𑀮𑀸 𑀳𑁂𑀢𑀽, 𑀅𑀓𑀼𑀲𑀮𑀸 𑀳𑁂𑀢𑀽, 𑀓𑁆𑀭𑀺𑀬𑀸𑀳𑁂𑀢𑀽 𑀲𑀩𑁆𑀩𑀲𑁄 𑀲𑀩𑁆𑀩𑀧𑁆𑀧𑀓𑀸𑀭𑁂𑀦 𑀲𑀩𑁆𑀩𑁂 𑀓𑀺𑀭𑀺𑀬𑀸𑀳𑁂𑀢𑀼𑀬𑁄 𑀘 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀧𑀜𑁆𑀘𑀯𑁄𑀓𑀸𑀭𑀪𑀽𑀫𑀺𑀬𑀁 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀪𑀸𑀯𑁂𑀦 𑀳𑁂𑀢𑀼𑀧𑀘𑁆𑀘𑀬𑀢𑀁 𑀬𑀸𑀢𑀸 𑀕𑀢𑀸. 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀁 𑀘𑀺𑀢𑁆𑀢𑀚𑀭𑀽𑀧𑀸𑀦𑀜𑁆𑀘 𑀳𑁂𑀢𑀼𑀧𑀘𑁆𑀘𑀬𑀢𑀁 𑀬𑀸𑀢𑀸 𑀕𑀢𑀸, 𑀏𑀢𑁂 𑀳𑁂𑀢𑀽 𑀘𑀢𑀼𑀯𑁄𑀓𑀸𑀭𑀪𑀽𑀫𑀺𑀬𑀁 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀏𑀯 𑀥𑀫𑁆𑀫𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑀢𑀁 𑀬𑀸𑀢𑀸 𑀕𑀢𑀸.

𑁫𑁫𑁦-𑁧. 𑀓𑀸𑀫𑁂 𑀯𑀺𑀧𑀸𑀓𑀳𑁂𑀢𑀽𑀧𑀺 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑀢𑀁 𑀬𑀸𑀢𑀸, 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂𑀧𑀺 𑀓𑀝𑀢𑁆𑀢𑀸𑀭𑀽𑀧𑀚𑀸𑀢𑀸𑀦𑀁 𑀓𑀫𑁆𑀫𑀚𑀭𑀽𑀧𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑀢𑀁 𑀬𑀸𑀢𑀸, 𑀢𑀲𑁆𑀫𑀸 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑁆𑀔𑀡𑁂𑀬𑁂𑀯 𑀓𑀫𑁆𑀫𑀚𑀭𑀽𑀧𑀸𑀦𑀁 𑀉𑀧𑁆𑀧𑀸𑀤𑁄 𑀳𑁄𑀢𑀺, 𑀬𑀲𑁆𑀫𑀸 𑀓𑀸𑀭𑀡𑀸 𑀧𑀯𑀢𑁆𑀢𑀺𑀬𑀁 𑀘𑀺𑀢𑁆𑀢𑀚𑀸𑀦𑀜𑁆𑀘 𑀭𑀽𑀧𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑀢𑀁 𑀕𑀢𑀸.

𑁫𑁫𑁨-𑁫. 𑀭𑀽𑀧𑁂 𑀯𑀺𑀧𑀸𑀓𑀳𑁂𑀢𑀽 𑀓𑀸𑀫𑀸𑀯𑀘𑀭𑀪𑀽𑀫𑀺𑀬𑀁 𑀳𑁂𑀢𑀼𑀬𑁄 𑀯𑀺𑀬 𑀳𑁂𑀢𑀼𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀧𑀜𑁆𑀘𑀯𑁄𑀓𑀸𑀭𑁂 𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀳𑁂𑀢𑀯𑁄 𑀘𑀺𑀢𑁆𑀢𑀚𑀸𑀦𑀁 𑀭𑀽𑀧𑀸𑀦𑀜𑁆𑀘 𑀲𑀫𑁆𑀧𑀬𑀼𑀢𑁆𑀢𑀸𑀦𑀜𑁆𑀘 𑀧𑀜𑁆𑀘𑀯𑁄𑀓𑀸𑀭𑀪𑀽𑀫𑀺𑀬𑀁 𑀳𑁂𑀢𑀼𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀘𑀢𑀼𑀯𑁄𑀓𑀸𑀭𑁂 𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀚𑀸 𑀳𑁂𑀢𑀯𑁄 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀏𑀯 𑀘𑀢𑀼𑀯𑁄𑀓𑀸𑀭𑀪𑀽𑀫𑀺𑀬𑀁 𑀳𑁂𑀢𑀼𑀧𑀘𑁆𑀘𑀬𑀸 𑀪𑀯𑀦𑁆𑀢𑀺. 𑀇𑀢𑀭𑁂 𑀘𑀢𑀼𑀯𑁄𑀓𑀸𑀭𑁂 𑀅𑀭𑀽𑀧𑀪𑀯𑁂 𑀯𑀺𑀧𑀸𑀓𑀚𑀸 𑀳𑁂𑀢𑀯𑁄 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀏𑀯 𑀲𑀪𑀽𑀫𑀺𑀬𑀁 𑀅𑀢𑁆𑀢𑀦𑁄 𑀪𑀽𑀫𑀺𑀬𑀁 𑀅𑀭𑀽𑀧𑀪𑀽𑀫𑀺𑀬𑀁 𑀳𑁂𑀢𑀼𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀳𑁂𑀢𑀼𑀢𑁆𑀣𑁄 𑀳𑁂𑀢𑀽𑀦𑀁 𑀅𑀢𑁆𑀣𑁄 𑀳𑁂𑀢𑀼𑀬𑁄 𑀘𑁂𑀯 𑀳𑁂𑀢𑀼𑀧𑀘𑁆𑀘𑀬𑁄 𑀘𑁂𑀯 𑀳𑁂𑀢𑀼𑀧𑀘𑁆𑀘𑀬𑀲𑀫𑁆𑀪𑀯𑁄 𑀳𑁂𑀢𑀼𑀧𑀘𑁆𑀘𑀬𑀼𑀧𑁆𑀧𑀢𑁆𑀢𑀺, 𑀏𑀯𑀫𑁂𑀯 𑀏𑀯𑀁 𑀇𑀫𑀺𑀦𑀸 𑀧𑀓𑀸𑀭𑁂𑀦. 𑀲𑀜𑁆𑀚𑀸𑀢𑁄 𑀲𑀼𑀔𑀳𑁂𑀢𑀼 𑀬𑀲𑁆𑀲𑀸𑀢𑀺 𑀲𑀜𑁆𑀚𑀸𑀢𑀲𑀼𑀔𑀳𑁂𑀢𑀼, 𑀢𑁂𑀦 𑀯𑀺𑀜𑁆𑀜𑁂𑀬𑁆𑀬𑁄.

𑁫𑁫𑁬-𑁮. 𑀙𑀦𑁆𑀤𑁄 𑀘𑀺𑀢𑁆𑀢𑀜𑁆𑀘 𑀯𑀻𑀭𑀺𑀬𑀁 𑀯𑀻𑀫𑀁𑀲𑀸 𑀘𑀸𑀢𑀺 𑀘𑀢𑀼𑀥𑀸𑀥𑀺𑀧𑀢𑀻 𑀮𑁄𑀓𑀸𑀥𑀺𑀧𑀢𑀺𑀦𑀸 𑀲𑀢𑁆𑀣𑀼𑀦𑀸 𑀯𑀼𑀢𑁆𑀢𑀸. 𑀙𑀦𑁆𑀤𑀁 𑀚𑁂𑀝𑁆𑀞𑀓𑀁 𑀓𑀢𑁆𑀯𑀸 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀢𑁆𑀢𑀺𑀓𑀸𑀮𑀲𑁆𑀫𑀺𑀁 𑀬𑁄 𑀙𑀦𑁆𑀤𑁄, 𑀲𑁄 𑀙𑀦𑁆𑀤𑀸𑀥𑀺𑀧𑀢𑀺 𑀦𑀸𑀫, 𑀙𑀦𑁆𑀤𑀁 𑀥𑀼𑀭𑀁 𑀓𑀢𑁆𑀯𑀸 𑀲𑀫𑀸𑀥𑀺𑀓𑀭𑀡𑀘𑀺𑀢𑁆𑀢𑀲𑁆𑀲 𑀏𑀲𑁂𑀯 𑀦𑀬𑁄 𑀲𑁂𑀲𑁂𑀲𑀼𑀧𑀺 𑀘 𑀢𑀻𑀲𑀼 𑀫𑀬𑀸 𑀯𑀼𑀢𑁆𑀢𑀢𑁄 𑀙𑀦𑁆𑀤𑀸𑀥𑀺𑀧𑀢𑀺𑀢𑁄 𑀲𑁂𑀲𑁂𑀲𑀼𑀧𑀺 𑀘 𑀅𑀥𑀺𑀧𑀢𑀻𑀲𑀼. 𑀬𑁄 𑀥𑀫𑁆𑀫𑁄 𑀚𑁂𑀝𑁆𑀞𑀝𑁆𑀞𑁂𑀦 𑀉𑀧𑀓𑀸𑀭𑀓𑁄, 𑀲𑁄 𑀥𑀫𑁆𑀫𑁄 𑀅𑀥𑀺𑀧𑀢𑀻𑀢𑀺 𑀅𑀥𑀺𑀧𑀢𑀺 𑀦𑀸𑀫 𑀪𑀕𑀯𑀢𑀸 𑀦𑀺𑀤𑁆𑀤𑀺𑀝𑁆𑀞𑁄.

𑁫𑁫𑁯. 𑀲𑀼𑀫𑀢𑀺𑀫𑀢𑀺𑀯𑀺𑀩𑁄𑀥𑀦𑀁 𑀯𑀺𑀘𑀺𑀢𑁆𑀢𑀁,

𑀓𑀼𑀫𑀢𑀺𑀫𑀢𑀺𑀦𑁆𑀥𑀦𑀧𑀸𑀯𑀓𑀁 𑀧𑀥𑀸𑀦𑀁;

𑀇𑀫𑀫𑀢𑀺𑀫𑀥𑀼𑀭𑀁 𑀅𑀯𑁂𑀤𑀺 𑀬𑁄 𑀬𑁄,

𑀚𑀺𑀦𑀯𑀘𑀦𑀁 𑀲𑀓𑀮𑀁 𑀅𑀯𑁂𑀤𑀺 𑀲𑁄 𑀲𑁄.

𑀬𑁄 𑀬𑁄 𑀚𑀦𑁄 𑀇𑀫𑀁 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑀁 𑀲𑀼𑀫𑀢𑀺𑀫𑀢𑀺𑀯𑀺𑀩𑁄𑀥𑀦𑀁 𑀲𑀼𑀫𑀢𑀻𑀦𑀁 𑀲𑀼𑀦𑁆𑀤𑀭𑀫𑀢𑀻𑀦𑀁 𑀧𑀡𑁆𑀟𑀺𑀢𑀸𑀦𑀁 𑀫𑀢𑀺𑀬𑀸 𑀯𑀺𑀩𑁄𑀥𑀦𑀓𑀭𑀁 𑀯𑀺𑀘𑀺𑀢𑁆𑀢𑀁 𑀓𑀼𑀫𑀢𑀻𑀦𑀁 𑀓𑀼𑀘𑁆𑀙𑀺𑀢𑀫𑀢𑀻𑀦𑀁 𑀩𑀸𑀮𑀸𑀦𑀁 𑀫𑀢𑀺𑀇𑀦𑁆𑀥𑀦𑁂 𑀧𑀥𑀸𑀦𑀁 𑀧𑀸𑀯𑀓𑀁 𑀅𑀢𑀺𑀫𑀥𑀼𑀭𑀓𑀭𑀁 𑀅𑀯𑁂𑀤𑀺 𑀚𑀸𑀦𑀺, 𑀲𑁄 𑀲𑁄 𑀚𑀦𑁄 𑀲𑀓𑀮𑀁 𑀚𑀺𑀦𑀯𑀘𑀦𑀁 𑀅𑀯𑁂𑀤𑀺 𑀚𑀸𑀦𑀺.

𑀇𑀢𑀺 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑀝𑀻𑀓𑀸𑀬

𑀧𑀓𑀺𑀡𑁆𑀡𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀝𑁆𑀞𑀫𑁄 𑀧𑀭𑀺𑀘𑁆𑀙𑁂𑀤𑁄.