𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀅𑀪𑀺𑀥𑀫𑁆𑀫𑀸𑀯𑀢𑀸𑀭-𑀧𑀼𑀭𑀸𑀡𑀝𑀻𑀓𑀸

𑁧. 𑀧𑀞𑀫𑁄 𑀧𑀭𑀺𑀘𑁆𑀙𑁂𑀤𑁄

𑀘𑀺𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁮. 𑀢𑀢𑁆𑀣 𑀢𑁂𑀲𑀼 𑀘𑀢𑀼𑀩𑁆𑀩𑀺𑀥𑁂𑀲𑀼 𑀧𑀭𑀫𑀢𑁆𑀣𑁂𑀲𑀼, 𑀚𑀸𑀢𑀺𑀦𑀺𑀤𑁆𑀥𑀸𑀭𑀡𑀁. 𑀘𑀺𑀢𑁆𑀢𑀦𑁆𑀢𑀺 𑀘𑀺𑀢𑁆𑀢𑀁 𑀦𑀸𑀫. 𑀯𑀺𑀚𑀸𑀦𑀸𑀢𑀻𑀢𑀺 𑀯𑀺𑀚𑀸𑀦𑀦𑀁, 𑀯𑀺𑀲𑀬𑀸𑀦𑀁 𑀯𑀺𑀚𑀸𑀦𑀦𑀁 𑀯𑀺𑀲𑀬𑀯𑀺𑀚𑀸𑀦𑀦𑀁. 𑀘𑀺𑀢𑁆𑀢𑀲𑀭𑀽𑀧𑀧𑀭𑀺𑀤𑀻𑀧𑀦𑀫𑀺𑀤𑀁 𑀯𑀘𑀦𑀁. 𑀢𑀲𑁆𑀲 𑀧𑀦 𑀘𑀺𑀢𑁆𑀢𑀲𑁆𑀲 𑀓𑁄 𑀯𑀘𑀦𑀢𑁆𑀣𑁄 𑀓𑁄 𑀲𑀤𑁆𑀤𑀢𑁆𑀣𑁄. 𑀯𑀼𑀘𑁆𑀘𑀢𑁂 𑀆𑀘𑀭𑀺𑀬𑁂𑀦. 𑀲𑀩𑁆𑀩𑀲𑀗𑁆𑀕𑀸𑀳𑀓𑀯𑀲𑁂𑀦 𑀲𑀩𑁆𑀩𑁂𑀲𑀁 𑀘𑀺𑀢𑁆𑀢𑀸𑀦𑀁 𑀲𑀗𑁆𑀕𑀸𑀳𑀓𑀦𑀬𑀯𑀲𑁂𑀦. 𑀆𑀭𑀫𑁆𑀫𑀡𑀁 𑀘𑀺𑀦𑁆𑀢𑁂𑀢𑀺 𑀚𑀸𑀦𑀸𑀢𑀻𑀢𑀺 𑀘𑀺𑀢𑁆𑀢𑀁, 𑀢𑀤𑀸 𑀲𑀩𑁆𑀩𑀁 𑀘𑀺𑀢𑁆𑀢𑀁 𑀅𑀥𑀺𑀧𑁆𑀧𑁂𑀢𑀁. 𑀚𑀯𑀦𑀯𑀻𑀣𑀺𑀯𑀲𑁂𑀦 𑀅𑀢𑁆𑀢𑀲𑀦𑁆𑀢𑀸𑀦𑀁 𑀘𑀺𑀦𑁄𑀢𑀻𑀢𑀺 𑀘𑀺𑀢𑁆𑀢𑀁, 𑀢𑀤𑀸 𑀓𑀼𑀲𑀮𑀸𑀓𑀼𑀲𑀮𑀫𑀳𑀸𑀓𑀺𑀭𑀺𑀬𑀸𑀘𑀺𑀢𑁆𑀢𑀁 𑀅𑀥𑀺𑀧𑁆𑀧𑁂𑀢𑀁. 𑀅𑀜𑁆𑀜𑁂𑀲𑀁 𑀚𑀯𑀦𑀸𑀦𑀁 𑀅𑀕𑁆𑀕𑀳𑀡𑀁 𑀓𑀸𑀫𑀸𑀯𑀘𑀭𑀚𑀯𑀦𑀸𑀦𑀺 𑀏𑀯 𑀬𑁂𑀪𑀼𑀬𑁆𑀬𑀯𑀲𑁂𑀦 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀚𑀯𑀦𑁆𑀢𑀻𑀢𑀺 𑀜𑀸𑀧𑀦𑀢𑁆𑀣𑀁.

𑁯. 𑀯𑀺𑀘𑀺𑀢𑁆𑀢𑀁 𑀓𑀭𑀡𑀁 𑀬𑀲𑁆𑀲 𑀢𑀁 𑀯𑀺𑀘𑀺𑀢𑁆𑀢𑀓𑀭𑀡𑀁, 𑀢𑀲𑁆𑀲 𑀪𑀸𑀯𑁄 𑀯𑀺𑀘𑀺𑀢𑁆𑀢𑀓𑀭𑀡𑀸. ‘‘𑀇𑀫𑀲𑁆𑀲 𑀭𑀽𑀧𑀲𑁆𑀲 𑀉𑀤𑁆𑀥𑀁 𑀇𑀤𑀁 𑀳𑁄𑀢𑀼, 𑀳𑁂𑀝𑁆𑀞𑀸 𑀇𑀤𑀁 𑀳𑁄𑀢𑀼, 𑀉𑀪𑀬𑀧𑀲𑁆𑀲𑁂 𑀇𑀤’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀬𑀣𑀸𑀘𑀺𑀦𑁆𑀢𑀺𑀢𑁂𑀦 𑀓𑀫𑁂𑀦 𑀲𑁂𑀲𑀘𑀺𑀢𑁆𑀢𑀭𑀽𑀧𑀦𑀺𑀧𑁆𑀨𑀸𑀤𑀦𑀁 𑀳𑁄𑀢𑀺, 𑀏𑀯𑀁 𑀬𑀁 𑀓𑀺𑀜𑁆𑀘𑀺 𑀮𑁄𑀓𑁂 𑀯𑀺𑀘𑀺𑀢𑁆𑀢𑀁 𑀲𑀺𑀧𑁆𑀧𑀚𑀸𑀢𑀁, 𑀲𑀩𑁆𑀩𑀁 𑀢𑀁 𑀘𑀺𑀢𑁆𑀢𑁂𑀦𑁂𑀯 𑀓𑀭𑀻𑀬𑀢𑀺. 𑀏𑀯𑀁 𑀯𑀺𑀘𑀺𑀢𑁆𑀢𑀓𑀭𑀡𑀢𑀸𑀬 𑀘𑀺𑀢𑁆𑀢𑀁. 𑀢𑀤𑀸 𑀓𑀭𑀡𑀢𑀸𑀬 𑀘𑀺𑀢𑁆𑀢𑀁 𑀓𑀭𑁄𑀢𑀻𑀢𑀺 𑀘𑀺𑀢𑁆𑀢𑀁. 𑀇𑀤𑀁 𑀢𑀤𑁆𑀥𑀺𑀢𑀧𑀤𑀁. 𑀯𑀸 𑀅𑀬𑀁 𑀅𑀜𑁆𑀜𑁄 𑀦𑀬𑁄. 𑀢𑀁 𑀅𑀢𑁆𑀢𑀦𑁄 𑀘𑀺𑀢𑁆𑀢𑀢𑀸𑀬 𑀅𑀜𑁆𑀜𑀤𑁂𑀯 𑀲𑀭𑀸𑀕𑀁 𑀘𑀺𑀢𑁆𑀢𑀁, 𑀅𑀜𑁆𑀜𑀁 𑀲𑀤𑁄𑀲𑀁, 𑀅𑀜𑁆𑀜𑀁 𑀲𑀫𑁄𑀳𑀁. 𑀅𑀜𑁆𑀜𑀁 𑀓𑀸𑀫𑀸𑀯𑀘𑀭𑀁, 𑀅𑀜𑁆𑀜𑀁 𑀭𑀽𑀧𑀸𑀯𑀘𑀭𑀸𑀤𑀺𑀪𑁂𑀤𑀁. 𑀅𑀜𑁆𑀜𑀁 𑀭𑀽𑀧𑀸𑀭𑀫𑁆𑀫𑀡𑀁, 𑀅𑀜𑁆𑀜𑀁 𑀲𑀤𑁆𑀤𑀸𑀤𑀺𑀆𑀭𑀫𑁆𑀫𑀡𑀁. 𑀭𑀽𑀧𑀸𑀭𑀫𑁆𑀫𑀡𑁂𑀲𑀼𑀧𑀺 𑀅𑀜𑁆𑀜𑀁 𑀦𑀻𑀮𑀸𑀭𑀫𑁆𑀫𑀡𑀁, 𑀅𑀜𑁆𑀜𑀁 𑀧𑀻𑀢𑀸𑀤𑀺𑀆𑀭𑀫𑁆𑀫𑀡𑀁. 𑀲𑀤𑁆𑀤𑀸𑀤𑀺𑀆𑀭𑀫𑁆𑀫𑀡𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀩𑁆𑀩𑁂𑀲𑀼𑀧𑀺 𑀢𑁂𑀲𑀼 𑀅𑀜𑁆𑀜𑀁 𑀳𑀻𑀦𑀁, 𑀅𑀜𑁆𑀜𑀁 𑀫𑀚𑁆𑀛𑀺𑀫𑀁, 𑀅𑀜𑁆𑀜𑀁 𑀧𑀡𑀻𑀢𑀁. 𑀳𑀻𑀦𑀸𑀤𑀻𑀲𑀼𑀧𑀺 𑀅𑀜𑁆𑀜𑀁 𑀙𑀦𑁆𑀤𑀸𑀥𑀺𑀧𑀢𑁂𑀬𑁆𑀬𑀁, 𑀅𑀜𑁆𑀜𑀁 𑀘𑀺𑀢𑁆𑀢𑀸𑀥𑀺𑀧𑀢𑁂𑀬𑁆𑀬𑀁, 𑀅𑀜𑁆𑀜𑀁 𑀯𑀻𑀭𑀺𑀬𑀸𑀥𑀺𑀧𑀢𑁂𑀬𑁆𑀬𑀁, 𑀅𑀜𑁆𑀜𑀁 𑀯𑀻𑀫𑀁𑀲𑀸𑀥𑀺𑀧𑀢𑁂𑀬𑁆𑀬𑀁, 𑀢𑀲𑁆𑀫𑀸 𑀬𑀲𑁆𑀲 𑀇𑀫𑁂𑀲𑀁 𑀲𑀫𑁆𑀧𑀬𑀼𑀢𑁆𑀢𑀪𑀽𑀫𑀺𑀆𑀭𑀫𑁆𑀫𑀡𑀳𑀻𑀦𑀫𑀚𑁆𑀛𑀺𑀫𑀧𑀡𑀻𑀢𑀸𑀥𑀺𑀧𑀢𑀻𑀦𑀁 𑀯𑀲𑁂𑀦 𑀅𑀢𑁆𑀢𑀦𑁄 𑀘𑀺𑀢𑁆𑀢𑀢𑀸𑀬 𑀘𑀺𑀢𑁆𑀢𑀁. 𑀘𑀺𑀢𑁆𑀢𑁄 𑀏𑀢𑀲𑁆𑀫𑀺𑀁 𑀅𑀢𑁆𑀣𑀻𑀢𑀺 𑀘𑀺𑀢𑁆𑀢𑀁. 𑀢𑀤𑀸 𑀲𑀩𑁆𑀩𑀁 𑀘𑀺𑀢𑁆𑀢𑀁. 𑀧𑀜𑁆𑀜𑀢𑁆𑀢𑀺𑀬𑀫𑁆𑀧𑀺 𑀯𑀺𑀜𑁆𑀜𑀸𑀡𑁂 𑀯𑀺𑀘𑀺𑀢𑁆𑀢𑁂 𑀘𑀺𑀢𑁆𑀢𑀲𑁆𑀲 𑀓𑀫𑁆𑀫𑀁 𑀘𑀺𑀢𑁆𑀢𑀓𑀫𑁆𑀫𑀁, 𑀘𑀺𑀢𑁆𑀢𑀓𑀫𑁆𑀫𑀫𑁂𑀯 𑀘𑀺𑀢𑁆𑀢𑀓𑀫𑁆𑀫𑀓𑀁, 𑀘𑀺𑀢𑁆𑀢𑀓𑀫𑁆𑀫𑀓𑁂 𑀯𑀺𑀘𑀺𑀢𑁆𑀢𑁂 𑀇𑀥 𑀇𑀫𑀲𑁆𑀫𑀺𑀁 𑀅𑀥𑀺𑀓𑀸𑀭𑁂 𑀘𑀺𑀢𑁆𑀢𑀲𑀫𑁆𑀫𑀼𑀢𑀺 𑀘𑀺𑀢𑁆𑀢𑀲𑀤𑁆𑀤𑁄 𑀯𑀺𑀜𑁆𑀜𑀸𑀡𑁂 𑀘𑀺𑀢𑁆𑀢𑁂 𑀯𑀺𑀜𑁆𑀜𑀼𑀦𑀸 𑀤𑀝𑁆𑀞𑀩𑁆𑀩𑁄.

𑀢𑀁 𑀧𑀦 𑀲𑀩𑁆𑀩𑀲𑀗𑁆𑀕𑀸𑀳𑀓𑀯𑀲𑁂𑀦 𑀘𑀺𑀦𑁆𑀢𑁂𑀢𑀻𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀘𑀺𑀢𑁆𑀢𑀁. 𑀲𑀸𑀭𑀫𑁆𑀫𑀡𑀢𑁄 𑀲𑀸𑀭𑀫𑁆𑀫𑀡𑀪𑀸𑀯𑁂𑀦 𑀏𑀓𑀯𑀺𑀥𑀁. 𑀲𑀯𑀺𑀧𑀸𑀓𑀸𑀯𑀺𑀧𑀸𑀓𑀢𑁄 𑀲𑀯𑀺𑀧𑀸𑀓𑀸𑀯𑀺𑀧𑀸𑀓𑀯𑀲𑁂𑀦 𑀤𑀼𑀯𑀺𑀥𑀁. 𑀢𑀢𑁆𑀣 𑀢𑀲𑁆𑀫𑀺𑀁 𑀤𑀼𑀯𑀺𑀥𑁂 𑀘𑀺𑀢𑁆𑀢𑁂 𑀲𑀯𑀺𑀧𑀸𑀓𑀁 𑀦𑀸𑀫 𑀘𑀺𑀢𑁆𑀢𑀁 𑀓𑀼𑀲𑀮𑀸𑀓𑀼𑀲𑀮𑀁, 𑀅𑀯𑀺𑀧𑀸𑀓𑀁 𑀅𑀩𑁆𑀬𑀸𑀓𑀢𑀁, 𑀓𑀼𑀲𑀮𑀸𑀓𑀼𑀲𑀮𑀪𑀸𑀯𑁂𑀦 𑀅𑀓𑀣𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀓𑀼𑀲𑀮𑀚𑀸𑀢𑀺 𑀅𑀓𑀼𑀲𑀮𑀚𑀸𑀢𑀺 𑀅𑀩𑁆𑀬𑀸𑀓𑀢𑀚𑀸𑀢𑀻𑀢𑀺 𑀚𑀸𑀢𑀺𑀪𑁂𑀤𑀢𑁄 𑀢𑀺𑀯𑀺𑀥𑀁.

𑀢𑀢𑁆𑀣 𑀢𑀲𑁆𑀫𑀺𑀁 𑀯𑀘𑀦𑁂 ‘‘𑀓𑀼𑀲𑀮’’𑀦𑁆𑀢𑀺 𑀏𑀢𑀲𑁆𑀲 𑀲𑀤𑁆𑀤𑀲𑁆𑀲 𑀧𑀦 𑀓𑁄 𑀯𑀘𑀦𑀢𑁆𑀣𑁄.

𑁧𑁦. 𑀓𑀼𑀘𑁆𑀙𑀺𑀢𑀸𑀦𑀁 𑀲𑀮𑀦𑀢𑁄 𑀧𑀸𑀧𑀓𑀸𑀦𑀁 𑀥𑀫𑁆𑀫𑀸𑀦𑀁 𑀓𑀫𑁆𑀧𑀦𑀢𑁄 𑀯𑀺𑀤𑁆𑀥𑀁𑀲𑀦𑀢𑁄. 𑀓𑀼𑀘𑁆𑀙𑀺𑀢𑁂𑀦𑀸𑀓𑀸𑀭𑁂𑀦 𑀲𑀬𑀦𑁆𑀢𑀻𑀢𑀺 𑀓𑀼𑀲𑀸, 𑀓𑀼𑀲𑀸𑀦𑀁 𑀅𑀓𑀼𑀲𑀮𑀲𑀗𑁆𑀔𑀸𑀢𑀸𑀦𑀁 𑀮𑀯𑀦𑁂𑀦 𑀙𑀺𑀦𑁆𑀤𑀦𑀢𑁄. 𑀓𑀼𑀘𑁆𑀙𑀺𑀢𑁂 𑀲𑀸𑀢𑀺 𑀢𑀦𑀼𑀁 𑀓𑀭𑁄𑀢𑀻𑀢𑀺 𑀓𑀼𑀲𑀁, 𑀓𑀼𑀲𑁂𑀦 𑀜𑀸𑀡𑁂𑀦 𑀮𑀸𑀢𑀩𑁆𑀩𑀢𑁆𑀢𑀸 𑀕𑀳𑁂𑀢𑀩𑁆𑀩𑀢𑁆𑀢𑀸. 𑀯𑀸 𑀅𑀬𑀁 𑀅𑀜𑁆𑀜𑁄 𑀦𑀬𑁄.

𑁧𑁧. 𑀓𑀼𑀲𑀮𑀲𑀤𑁆𑀤𑁄𑀬𑀁 𑀅𑀬𑀁 𑀓𑀼𑀲𑀮𑀲𑀤𑁆𑀤𑁄 𑀙𑁂𑀓𑁂 𑀅𑀢𑁆𑀣𑁂 𑀆𑀭𑁄𑀕𑁆𑀬𑀢𑁆𑀣𑁂 𑀅𑀦𑀯𑀚𑁆𑀚𑀢𑁆𑀣𑁂 𑀇𑀝𑁆𑀞𑀯𑀺𑀧𑀸𑀓𑁂 𑀅𑀢𑁆𑀣𑁂𑀧𑀺 𑀤𑀺𑀝𑁆𑀞𑁄 𑀅𑀫𑁆𑀳𑁂𑀳𑀺. 𑀇𑀥 𑀇𑀫𑀲𑁆𑀫𑀺𑀁 𑀅𑀥𑀺𑀓𑀸𑀭𑁂 𑀅𑀦𑀯𑀚𑁆𑀚𑀸𑀤𑀺𑀓𑁂 𑀅𑀢𑁆𑀣𑁂 𑀤𑀺𑀝𑁆𑀞𑁄. 𑀆𑀤𑀺-𑀲𑀤𑁆𑀤𑁂𑀦 𑀆𑀭𑁄𑀕𑁆𑀬𑀢𑁆𑀣𑀇𑀝𑁆𑀞𑀯𑀺𑀧𑀸𑀓𑀢𑁆𑀣𑀸 𑀕𑀳𑁂𑀢𑀩𑁆𑀩𑀸. 𑀤𑀺𑀝𑁆𑀞𑁄 𑀬𑀲𑁆𑀫𑀸, 𑀢𑀲𑁆𑀫𑀸 𑀅𑀦𑀯𑀚𑁆𑀚𑀇𑀝𑁆𑀞𑀯𑀺𑀧𑀸𑀓𑀮𑀓𑁆𑀔𑀡𑀁 𑀓𑀼𑀲𑀮𑀁. 𑀦𑀢𑁆𑀣𑀺 𑀅𑀯𑀚𑁆𑀚𑀁 𑀓𑀺𑀮𑁂𑀲𑀸𑀯𑀚𑁆𑀚𑀁 𑀓𑀺𑀮𑁂𑀲𑀤𑁄𑀲𑁄 𑀓𑀺𑀮𑁂𑀲𑀤𑀭𑀣𑁄 𑀏𑀢𑀲𑁆𑀲𑀸𑀢𑀺 𑀅𑀦𑀯𑀚𑁆𑀚𑀁, 𑀓𑀫𑁆𑀫𑁂𑀦 𑀯𑀺𑀧𑀘𑁆𑀘𑀻𑀬𑀢𑁂𑀢𑀺 𑀯𑀺𑀧𑀸𑀓𑁄, 𑀇𑀝𑁆𑀞𑀸𑀦𑀺𑀝𑁆𑀞𑀸𑀤𑀺𑀆𑀭𑀫𑁆𑀫𑀡𑀸𑀦𑀼𑀪𑀯𑀦𑀯𑀲𑁂𑀦, 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦 𑀘 𑀇𑀝𑁆𑀞𑁄 𑀯𑀺𑀧𑀸𑀓𑁄 𑀏𑀢𑀲𑁆𑀲𑀸𑀢𑀺 𑀇𑀝𑁆𑀞𑀯𑀺𑀧𑀸𑀓𑀁, 𑀅𑀦𑀯𑀚𑁆𑀚𑀫𑁂𑀯 𑀇𑀝𑁆𑀞𑀯𑀺𑀧𑀸𑀓𑀁, 𑀢𑀁 𑀮𑀓𑁆𑀔𑀻𑀬𑀢𑀺 𑀅𑀦𑁂𑀦 𑀅𑀯𑀺𑀜𑁆𑀜𑀸𑀢𑀁 𑀮𑀓𑁆𑀔𑀺𑀢𑀩𑁆𑀩𑀁 𑀓𑀼𑀲𑀮𑀦𑁆𑀢𑀺 𑀮𑀓𑁆𑀔𑀡𑀁, 𑀅𑀦𑀯𑀚𑁆𑀚𑀇𑀝𑁆𑀞𑀯𑀺𑀧𑀸𑀓𑀁 𑀮𑀓𑁆𑀔𑀡𑀁 𑀏𑀢𑀲𑁆𑀲𑀸𑀢𑀺 𑀅𑀦𑀯𑀚𑁆𑀚𑀇𑀝𑁆𑀞𑀯𑀺𑀧𑀸𑀓𑀮𑀓𑁆𑀔𑀡𑀁. 𑀅𑀦𑀯𑀚𑁆𑀚𑀇𑀝𑁆𑀞𑀯𑀺𑀧𑀸𑀓𑀫𑁂𑀯 𑀓𑀼𑀲𑀮𑀁. 𑀦𑀦𑀼 𑀓𑀣𑀁 𑀲𑀬𑀫𑁂𑀯 𑀅𑀢𑁆𑀢𑀦𑁄 𑀮𑀓𑁆𑀔𑀡𑀁 𑀪𑀯𑁂𑀬𑁆𑀬𑀸𑀢𑀺 𑀘𑁄𑀤𑀦𑀸 𑀪𑀯𑁂𑀬𑁆𑀬 𑀯𑀺𑀜𑁆𑀜𑀸𑀢𑀸𑀯𑀺𑀜𑁆𑀜𑀸𑀢𑀲𑀤𑁆𑀤𑀢𑁆𑀣𑀪𑀸𑀯𑁂𑀦 𑀮𑀓𑁆𑀔𑀡𑀮𑀓𑁆𑀔𑀺𑀢𑀩𑁆𑀩𑀪𑀸𑀯𑀬𑀼𑀢𑁆𑀢𑀺𑀢𑁄. 𑀓𑀼𑀲𑀮𑀲𑀤𑁆𑀤𑀢𑁆𑀣𑀯𑀲𑁂𑀦 𑀳𑀺 𑀅𑀯𑀺𑀜𑁆𑀜𑀸𑀢𑀁 𑀅𑀧𑀸𑀓𑀝𑀁 𑀓𑀼𑀲𑀮𑀁 𑀮𑀓𑁆𑀔𑀺𑀢𑀩𑁆𑀩𑀁 𑀳𑁄𑀢𑀺. 𑀅𑀦𑀯𑀚𑁆𑀚𑀇𑀝𑁆𑀞𑀯𑀺𑀧𑀸𑀓𑀲𑀤𑁆𑀤𑀢𑁆𑀣𑀯𑀲𑁂𑀦 𑀯𑀺𑀜𑁆𑀜𑀸𑀢𑀁 𑀧𑀸𑀓𑀝𑀁 𑀓𑀼𑀲𑀮𑀁 𑀮𑀓𑁆𑀔𑀡𑀁 𑀳𑁄𑀢𑀺. 𑀅𑀓𑀼𑀲𑀮𑀯𑀺𑀤𑁆𑀥𑀁𑀲𑀦𑀭𑀲𑀁 𑀅𑀓𑀼𑀲𑀮𑀸𑀦𑀁 𑀯𑀺𑀤𑁆𑀥𑀁𑀲𑀦𑀁 𑀅𑀓𑀼𑀲𑀮𑀯𑀺𑀤𑁆𑀥𑀁𑀲𑀦𑀁, 𑀢𑀁 𑀭𑀲𑁄 𑀓𑀺𑀘𑁆𑀘𑀫𑁂𑀢𑀲𑁆𑀲𑀸𑀢𑀺 𑀅𑀓𑀼𑀲𑀮𑀯𑀺𑀤𑁆𑀥𑀁𑀲𑀦𑀭𑀲𑀁, 𑀅𑀓𑀼𑀲𑀮𑀯𑀺𑀤𑁆𑀥𑀁𑀲𑀦𑀓𑀺𑀘𑁆𑀘𑀁. 𑀯𑁄𑀤𑀸𑀦𑀪𑀸𑀯𑁂𑀦 𑀧𑀘𑁆𑀘𑀼𑀧𑀝𑁆𑀞𑀸𑀢𑀻𑀢𑀺 𑀯𑁄𑀤𑀸𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀯𑁄𑀤𑀸𑀦𑀉𑀧𑀝𑁆𑀞𑀸𑀦𑀸𑀓𑀸𑀭𑀁 𑀯𑁄𑀤𑀸𑀦𑀕𑀬𑁆𑀳𑀸𑀓𑀸𑀭𑀁. 𑀯𑀸 𑀅𑀬𑀁 𑀅𑀜𑁆𑀜𑁄 𑀦𑀬𑁄. 𑀯𑀚𑁆𑀚𑀧𑀝𑀺𑀧𑀓𑁆𑀔𑀢𑁆𑀢𑀸 𑀅𑀦𑀯𑀚𑁆𑀚𑀮𑀓𑁆𑀔𑀡𑀫𑁂𑀯 𑀓𑀼𑀲𑀮𑀁, 𑀯𑀚𑁆𑀚𑀧𑀝𑀺𑀧𑀓𑁆𑀔𑀮𑀓𑁆𑀔𑀡𑀁 𑀓𑀼𑀲𑀮𑀦𑁆𑀢𑀺 𑀅𑀢𑁆𑀣𑁄. 𑀯𑁄𑀤𑀸𑀦𑀪𑀸𑀯𑀭𑀲𑀁 𑀯𑁄𑀤𑀸𑀦𑀪𑀸𑀯𑀲𑀫𑁆𑀧𑀢𑁆𑀢𑀺𑀓𑀁. 𑀇𑀝𑁆𑀞𑀯𑀺𑀧𑀸𑀓𑀧𑀘𑁆𑀘𑀼𑀧𑀝𑁆𑀞𑀸𑀦𑀁 𑀇𑀝𑁆𑀞𑀯𑀺𑀧𑀸𑀓𑀨𑀮𑀁. 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀧𑀤𑀝𑁆𑀞𑀸𑀦𑀁 𑀧𑀤𑀜𑁆𑀘 𑀢𑀁 𑀞𑀸𑀦𑀜𑁆𑀘𑀸𑀢𑀺 𑀧𑀤𑀝𑁆𑀞𑀸𑀦𑀁, 𑀉𑀪𑁄 𑀓𑀸𑀭𑀡𑀢𑁆𑀣𑀸𑀥𑀺𑀯𑀘𑀦𑀁, 𑀢𑀲𑁆𑀫𑀸 𑀆𑀲𑀦𑁆𑀦𑀓𑀸𑀭𑀡𑀦𑁆𑀢𑀺 𑀅𑀢𑁆𑀣𑁄, 𑀇𑀢𑀭𑀣𑀸 𑀧𑀼𑀦𑀭𑀼𑀢𑁆𑀢𑀺𑀤𑁄𑀲𑁄 𑀲𑀺𑀬𑀸, 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀧𑀤𑀝𑁆𑀞𑀸𑀦𑀁 𑀆𑀲𑀦𑁆𑀦𑀓𑀸𑀭𑀡𑀁 𑀏𑀢𑀲𑁆𑀲𑀸𑀢𑀺 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀧𑀤𑀝𑁆𑀞𑀸𑀦𑀁.

𑀲𑀸𑀯𑀚𑁆𑀚𑀸𑀦𑀺𑀝𑁆𑀞𑀯𑀺𑀧𑀸𑀓𑀮𑀓𑁆𑀔𑀡𑀁 𑀅𑀓𑀼𑀲𑀮𑀁. 𑀢𑀤𑀼𑀪𑀬𑀯𑀺𑀧𑀭𑀻𑀢𑀁 𑀢𑁂𑀳𑀺 𑀉𑀪𑀬𑁂𑀳𑀺 𑀓𑀼𑀲𑀮𑀸𑀓𑀼𑀲𑀮𑁂𑀳𑀺 𑀯𑀺𑀧𑀭𑀻𑀢𑀁 𑀅𑀯𑀺𑀧𑀸𑀓𑀮𑀓𑁆𑀔𑀡𑀁 𑀏𑀢𑀲𑁆𑀲𑀸𑀢𑀺 𑀢𑀤𑀼𑀪𑀬𑀯𑀺𑀧𑀭𑀻𑀢𑀮𑀓𑁆𑀔𑀡𑀁 𑀅𑀩𑁆𑀬𑀸𑀓𑀢𑀁. 𑀯𑀸 𑀅𑀬𑀁 𑀅𑀜𑁆𑀜𑁄 𑀦𑀬𑁄. 𑀅𑀯𑀺𑀧𑀸𑀓𑀸𑀭𑀳𑀁 𑀯𑀺𑀧𑀸𑀓𑀲𑁆𑀲 𑀅𑀦𑀦𑀼𑀘𑁆𑀙𑀯𑀺𑀓𑀁.

𑀲𑀯𑀢𑁆𑀣𑀼𑀓𑀸𑀯𑀢𑁆𑀣𑀼𑀓𑀪𑁂𑀤𑀢𑁄𑀢𑀺 𑀲𑀯𑀢𑁆𑀣𑀼𑀓𑀁 𑀳𑀤𑀬𑀯𑀢𑁆𑀣𑀼𑀓𑀁, 𑀅𑀯𑀢𑁆𑀣𑀼𑀓𑀁 𑀳𑀤𑀬𑀯𑀢𑁆𑀣𑀼𑀯𑀺𑀭𑀳𑀺𑀢𑀁.

𑁧𑁨. 𑀉𑀤𑁆𑀤𑀸𑀦𑀢𑁄 𑀲𑀗𑁆𑀔𑁂𑀧𑀯𑀲𑁂𑀦 𑀓𑀺𑀮𑁂𑀲𑀯𑀢𑁆𑀣𑀼𑀯𑀲𑁂𑀦 𑀤𑀼𑀯𑁂 𑀓𑀸𑀫𑀸 𑀳𑁄𑀦𑁆𑀢𑀺. 𑀙𑀦𑁆𑀤𑀭𑀸𑀕𑁄𑀯 𑀓𑀺𑀮𑁂𑀲𑁄, 𑀢𑁂𑀪𑀽𑀫𑀓𑁂 𑀧𑀯𑀢𑁆𑀢𑀁 𑀯𑀝𑁆𑀝𑀲𑀳𑀺𑀢𑀁 𑀯𑀢𑁆𑀣𑀼, 𑀯𑀲𑀢𑀺 𑀓𑀺𑀮𑁂𑀲𑁄 𑀏𑀢𑁆𑀣𑀸𑀢𑀺 𑀯𑀢𑁆𑀣𑀼.

𑁧𑁩. 𑀓𑀺𑀮𑁂𑀲𑀓𑀸𑀫𑁄 𑀯𑀢𑁆𑀣𑀼𑀁 𑀓𑀸𑀫𑁂𑀢𑀺 𑀇𑀘𑁆𑀙𑀢𑀺, 𑀯𑀢𑁆𑀣𑀼 𑀓𑀺𑀮𑁂𑀲𑀓𑀸𑀫𑁂𑀦 𑀓𑀸𑀫𑀻𑀬𑀢𑀺 𑀇𑀘𑁆𑀙𑀻𑀬𑀢𑀻𑀢𑀺 𑀓𑀢𑁆𑀢𑀼𑀓𑀸𑀭𑀓𑀓𑀫𑁆𑀫𑀓𑀸𑀭𑀓𑀤𑁆𑀯𑀬𑁂 𑀲𑀸𑀥𑀦𑀤𑁆𑀯𑀬𑁂 𑀏𑀲 𑀏𑀲𑁄 𑀤𑀼𑀯𑀺𑀥𑁄𑀧𑀺 𑀓𑀸𑀫𑁄 𑀲𑀺𑀚𑁆𑀛𑀢𑀺.

𑁧𑁪-𑁫. 𑀲𑁄 𑀅𑀬𑀁 𑀤𑀼𑀯𑀺𑀥𑁄𑀧𑀺 𑀓𑀸𑀫𑁄 𑀬𑀲𑁆𑀫𑀺𑀁 𑀧𑀤𑁂𑀲𑁂 𑀲𑀫𑁆𑀧𑀢𑁆𑀢𑀻𑀦𑀁 𑀯𑀲𑁂𑀦 𑀅𑀯𑀘𑀭𑀢𑀺, 𑀇𑀢𑀺 𑀢𑀲𑁆𑀫𑀸 𑀓𑀸𑀭𑀡𑀸 𑀲𑁄 𑀧𑀦 𑀧𑀤𑁂𑀲𑁄 𑀘𑀢𑀼𑀧𑀸𑀬𑀸𑀦𑀁 𑀙𑀦𑁆𑀦𑀁 𑀤𑁂𑀯𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀯𑀲𑁂𑀦 𑀏𑀯 𑀏𑀓𑀸𑀤𑀲𑀯𑀺𑀥𑁄 𑀳𑁄𑀢𑀺.

𑁧𑁬. 𑀓𑀸𑀫𑁄𑀯𑀘𑀭𑀢𑀻𑀢𑀺 𑀏𑀢𑁆𑀣 𑀏𑀢𑀲𑁆𑀫𑀺𑀁 𑀏𑀓𑀸𑀤𑀲𑀯𑀺𑀥𑁂 𑀧𑀤𑁂𑀲𑁂 𑀓𑀸𑀫𑁄 𑀅𑀯𑀘𑀭𑀢𑀺, 𑀇𑀢𑀺 𑀢𑀲𑁆𑀫𑀸 𑀓𑀸𑀭𑀡𑀸 𑀲𑁄 𑀧𑀤𑁂𑀲𑁄 𑀅𑀲𑁆𑀲 𑀓𑀸𑀫𑀲𑁆𑀲 𑀅𑀦𑁂𑀦 𑀓𑀸𑀫𑁂𑀦 𑀅𑀪𑀺𑀮𑀓𑁆𑀔𑀺𑀢𑀢𑁆𑀢𑀸 𑀓𑀸𑀫𑀸𑀯𑀘𑀭𑀲𑀜𑁆𑀜𑀺𑀢𑁄. 𑀅𑀪𑀺𑀮𑀓𑁆𑀔𑀺𑀢𑀲𑀤𑁆𑀤𑀧𑁆𑀧𑀬𑁄𑀕𑁂 𑀢𑀢𑀺𑀬𑀢𑁆𑀣𑁂 ‘‘𑀅𑀲𑁆𑀲𑀸’’𑀢𑀺 𑀙𑀝𑁆𑀞𑀻 𑀳𑁄𑀢𑀻𑀢𑀺 𑀲𑀤𑁆𑀤𑀲𑀢𑁆𑀣𑀯𑀺𑀤𑀽 𑀧𑀞𑀦𑁆𑀢𑀺. 𑀲𑀲𑀢𑁆𑀣𑀸𑀯𑀘𑀭𑁄 𑀧𑀤𑁂𑀲𑁄 𑀯𑀺𑀬 𑀲𑀢𑁆𑀢𑁂 𑀲𑀲𑀦𑁆𑀢𑀺 𑀳𑀺𑀁𑀲𑀦𑁆𑀢𑀺 𑀢𑁂𑀳𑀻𑀢𑀺 𑀲𑀢𑁆𑀣𑀸, 𑀲𑀳 𑀲𑀢𑁆𑀣𑁂𑀳𑀻𑀢𑀺 𑀲𑀲𑀢𑁆𑀣𑀸, 𑀲𑀲𑀢𑁆𑀣𑀸 𑀧𑀼𑀭𑀺𑀲𑀸 𑀅𑀯𑀘𑀭𑀦𑁆𑀢𑀺 𑀏𑀢𑁆𑀣𑀸𑀢𑀺 𑀲𑀲𑀢𑁆𑀣𑀸𑀯𑀘𑀭𑁄. 𑀬𑀣𑀸 𑀳𑀺 𑀬𑀲𑁆𑀫𑀺𑀁 𑀧𑀤𑁂𑀲𑁂 𑀲𑀲𑀢𑁆𑀣𑀸 𑀧𑀼𑀭𑀺𑀲𑀸 𑀅𑀯𑀘𑀭𑀦𑁆𑀢𑀺, 𑀲𑁄 𑀧𑀤𑁂𑀲𑁄 𑀯𑀺𑀚𑁆𑀚𑀫𑀸𑀦𑁂𑀲𑀼𑀧𑀺 𑀅𑀜𑁆𑀜𑁂𑀲𑀼 𑀤𑁆𑀯𑀺𑀧𑀤𑀘𑀢𑀼𑀧𑁆𑀧𑀤𑁂𑀲𑀼 𑀅𑀯𑀘𑀭𑀦𑁆𑀢𑁂𑀲𑀼 𑀢𑁂𑀲𑀁 𑀉𑀧𑀮𑀓𑁆𑀔𑀺𑀢𑀢𑁆𑀢𑀸 ‘‘𑀲𑀲𑀢𑁆𑀣𑀸𑀯𑀘𑀭𑁄’’𑀢𑁆𑀯𑁂𑀯 𑀯𑀼𑀘𑁆𑀘𑀢𑀺, 𑀏𑀯𑀁 𑀯𑀺𑀚𑁆𑀚𑀫𑀸𑀦𑁂𑀲𑀼𑀧𑀺 𑀅𑀜𑁆𑀜𑁂𑀲𑀼 𑀭𑀽𑀧𑀸𑀯𑀘𑀭𑀸𑀤𑀻𑀲𑀼 𑀢𑀢𑁆𑀣 𑀅𑀯𑀘𑀭𑀦𑁆𑀢𑁂𑀲𑀼 𑀢𑁂𑀲𑀁 𑀅𑀪𑀺𑀮𑀓𑁆𑀔𑀺𑀢𑀢𑁆𑀢𑀸 𑀅𑀬𑀁 𑀧𑀤𑁂𑀲𑁄 ‘‘𑀓𑀸𑀫𑀸𑀯𑀘𑀭𑁄’’𑀢𑁆𑀯𑁂𑀯 𑀯𑀼𑀘𑁆𑀘𑀢𑀺.

𑁧𑁭. 𑀬𑀣𑀸 𑀭𑀽𑀧𑀪𑀯𑁄 𑀉𑀢𑁆𑀢𑀭𑀧𑀤𑀲𑁆𑀲 𑀮𑁄𑀧𑀁 𑀓𑀢𑁆𑀯𑀸 𑀭𑀽𑀧𑀦𑁆𑀢𑀺 𑀯𑀼𑀢𑁆𑀢𑁄, 𑀏𑀯𑀁 𑀢𑀣𑀸 𑀲𑁆𑀯𑀸𑀬𑀁 𑀲𑁄 𑀅𑀬𑀁 𑀏𑀲𑁄 𑀓𑀸𑀫𑀸𑀯𑀘𑀭𑁄 𑀉𑀢𑁆𑀢𑀭𑀧𑀤𑀲𑁆𑀲 𑀮𑁄𑀧𑀁 𑀓𑀢𑁆𑀯𑀸 𑀓𑀸𑀫𑁄 𑀇𑀢𑀺 𑀲𑀜𑁆𑀜𑀺𑀢𑁄 𑀓𑀸𑀫𑁄 𑀦𑀸𑀫 𑀉𑀤𑀻𑀭𑀺𑀢𑁄 𑀧𑀡𑁆𑀟𑀺𑀢𑁂𑀦 𑀓𑀣𑀺𑀢𑁄.

𑁧𑁮. 𑀢𑀲𑁆𑀫𑀺𑀁 𑀓𑀸𑀫𑁂 𑀇𑀤𑀁 𑀘𑀺𑀢𑁆𑀢𑀁 𑀢𑀲𑁆𑀫𑀺𑀁 𑀓𑀸𑀫𑀸𑀯𑀘𑀭𑁂 𑀲𑀤𑀸 𑀅𑀯𑀘𑀭𑀢𑀺, 𑀇𑀢𑀺 𑀢𑀲𑁆𑀫𑀸 𑀓𑀸𑀭𑀡𑀸 𑀓𑀸𑀫𑀸𑀯𑀘𑀭𑀁 𑀇𑀢𑀺 𑀏𑀯𑀁 𑀓𑀸𑀫𑀖𑀸𑀢𑀺𑀦𑀸 𑀓𑀸𑀫𑀸𑀦𑀁 𑀯𑀺𑀦𑀸𑀲𑀓𑁂𑀦 𑀩𑀼𑀤𑁆𑀥𑁂𑀦 𑀓𑀣𑀺𑀢𑀁. 𑀓𑀺𑀜𑁆𑀘𑀸𑀧𑀺 𑀏𑀢𑀁 𑀭𑀽𑀧𑀸𑀭𑀽𑀧𑀪𑀯𑁂𑀲𑀼𑀧𑀺 𑀅𑀯𑀘𑀭𑀢𑀺, 𑀬𑀣𑀸 𑀧𑀦 𑀲𑀗𑁆𑀕𑀸𑀫𑁂 𑀬𑁂𑀪𑀼𑀬𑁆𑀬𑁂𑀦 𑀅𑀯𑀘𑀭𑀡𑀢𑁄 ‘‘𑀲𑀗𑁆𑀕𑀸𑀫𑀸𑀯𑀘𑀭𑁄’’𑀢𑀺 𑀮𑀤𑁆𑀥𑀦𑀸𑀫𑁄 𑀦𑀸𑀕𑁄 𑀦𑀕𑀭𑁂 𑀘𑀭𑀦𑁆𑀢𑁄𑀧𑀺 ‘‘𑀲𑀗𑁆𑀕𑀸𑀫𑀸𑀯𑀘𑀭𑁄’’𑀢𑁆𑀯𑁂𑀯 𑀯𑀼𑀘𑁆𑀘𑀢𑀺, 𑀣𑀮𑀘𑀭𑀚𑀮𑀘𑀭𑀸 𑀧𑀸𑀡𑀺𑀦𑁄 𑀅𑀣𑀮𑁂 𑀅𑀚𑀮𑁂 𑀞𑀺𑀢𑀸𑀧𑀺 ‘‘𑀣𑀮𑀘𑀭𑀚𑀮𑀘𑀭𑀸’’𑀢𑁆𑀯𑁂𑀯 𑀯𑀼𑀘𑁆𑀘𑀦𑁆𑀢𑀺, 𑀏𑀯𑀁 𑀇𑀤𑀁 𑀅𑀜𑁆𑀜𑀢𑁆𑀣 𑀅𑀯𑀘𑀭𑀦𑁆𑀢𑀫𑁆𑀧𑀺 𑀓𑀸𑀫𑀸𑀯𑀘𑀭𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀯𑀸 𑀏𑀢𑁆𑀣 𑀓𑀸𑀫𑁄 𑀅𑀯𑀘𑀭𑀢𑀻𑀢𑀺𑀧𑀺 𑀓𑀸𑀫𑀸𑀯𑀘𑀭𑀁. 𑀓𑀸𑀫𑀜𑁆𑀘𑁂𑀲 𑀭𑀽𑀧𑀸𑀭𑀽𑀧𑀸𑀯𑀘𑀭𑁂𑀲𑀼𑀧𑀺 𑀅𑀯𑀘𑀭𑀢𑀺, 𑀬𑀣𑀸 𑀧𑀦 𑀯𑀤𑀢𑀻𑀢𑀺 𑀯𑀘𑁆𑀙𑁄, 𑀫𑀳𑀺𑀬𑀁 𑀲𑁂𑀢𑀻𑀢𑀺 𑀫𑀳𑀺𑀁𑀲𑁄𑀢𑀺 𑀯𑀼𑀢𑁆𑀢𑁂 𑀦 𑀬𑀢𑁆𑀢𑀓𑀸 𑀯𑀤𑀦𑁆𑀢𑀺, 𑀫𑀳𑀺𑀬𑀁 𑀯𑀸 𑀲𑁂𑀦𑁆𑀢𑀺, 𑀲𑀩𑁆𑀩𑁂𑀲𑀁 𑀢𑀁 𑀦𑀸𑀫𑀁 𑀳𑁄𑀢𑀺, 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀤𑀝𑁆𑀞𑀩𑁆𑀩𑀁.

𑁧𑁯. 𑀧𑀝𑀺𑀲𑀦𑁆𑀥𑀺𑀁 𑀪𑀯𑁂 𑀓𑀸𑀫𑁂 𑀓𑀸𑀫𑀪𑀯𑀲𑀗𑁆𑀔𑀸𑀢𑁂 𑀓𑀸𑀫𑁂 𑀧𑀝𑀺𑀲𑀦𑁆𑀥𑀺𑀁 𑀅𑀯𑀘𑀸𑀭𑀬𑀢𑀺, 𑀇𑀢𑀺 𑀢𑀲𑁆𑀫𑀸 𑀓𑀸𑀫𑀸𑀯𑀘𑀭𑀁. 𑀇𑀢𑀺 𑀏𑀯𑀁 𑀯𑀸 𑀅𑀬𑀁 𑀅𑀜𑁆𑀜𑁄 𑀦𑀬𑁄. 𑀢𑀢𑁆𑀭 𑀢𑀲𑁆𑀫𑀺𑀁 𑀓𑀸𑀫𑀸𑀯𑀘𑀭𑁂 𑀧𑀭𑀺𑀬𑀸𑀧𑀦𑁆𑀦𑀁 𑀅𑀦𑁆𑀢𑁄𑀕𑀥𑀁, 𑀇𑀢𑀺 𑀢𑀲𑁆𑀫𑀸 𑀓𑀸𑀫𑀸𑀯𑀘𑀭𑀁.

𑁨𑁦. 𑀅𑀝𑁆𑀞𑀯𑀺𑀥𑀁 𑀘𑀺𑀢𑁆𑀢𑀁 𑀓𑀸𑀫𑀸𑀯𑀘𑀭𑀲𑀜𑁆𑀜𑀺𑀢𑀁 𑀇𑀤𑀁 𑀅𑀝𑁆𑀞𑀯𑀺𑀥𑀁 𑀘𑀺𑀢𑁆𑀢𑀁. 𑀤𑀲𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼𑀯𑀲𑁂𑀦𑁂𑀯 𑀧𑀼𑀜𑁆𑀜𑀓𑀺𑀭𑀺𑀬𑀸 𑀏𑀯 𑀢𑁂𑀲𑀁 𑀢𑁂𑀲𑀁 𑀨𑀮𑀸𑀦𑀺𑀲𑀁𑀲𑀸𑀦𑀁 𑀯𑀢𑁆𑀣𑀽𑀦𑀺 𑀓𑀸𑀭𑀡𑀸𑀦𑀻𑀢𑀺 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀦𑀺, 𑀢𑁂𑀲𑀁 𑀯𑀲𑁄, 𑀢𑁂𑀦 𑀧𑀯𑀢𑁆𑀢𑀢𑀺.

𑁨𑁧. 𑀤𑀸𑀦𑀁 𑀲𑀻𑀮𑀁 𑀪𑀸𑀯𑀦𑀸 𑀧𑀢𑁆𑀢𑀺𑀤𑀸𑀦𑀁 𑀯𑁂𑀬𑁆𑀬𑀸𑀯𑀘𑁆𑀘𑀁 𑀥𑀫𑁆𑀫𑀤𑁂𑀲𑀦𑀸 𑀅𑀦𑀼𑀫𑁄𑀤𑀦𑀸 𑀤𑀺𑀝𑁆𑀞𑀺𑀚𑀼𑀪𑀸𑀯𑁄 𑀲𑀁𑀲𑀼𑀢𑀺 𑀥𑀫𑁆𑀫𑀲𑁆𑀲𑀯𑀦𑀜𑁆𑀘 𑀅𑀧𑀘𑀸𑀬𑁄 𑀅𑀧𑀘𑀸𑀬𑀦𑀁, 𑀏𑀯𑀁 𑀇𑀫𑀺𑀦𑀸 𑀫𑀬𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀧𑀼𑀜𑁆𑀜𑀸𑀦𑀺 𑀏𑀯 𑀯𑀢𑁆𑀣𑀽𑀦𑀺 𑀧𑀼𑀜𑁆𑀜𑀯𑀢𑁆𑀣𑀽𑀦𑀺, 𑀢𑁂𑀲𑀁 𑀧𑀪𑁂𑀤𑁄 𑀧𑀼𑀜𑁆𑀜𑀯𑀢𑁆𑀣𑀼𑀧𑁆𑀧𑀪𑁂𑀤𑁄 𑀜𑁂𑀬𑁆𑀬𑁄 𑀧𑀡𑁆𑀟𑀺𑀢𑁂𑀦 𑀚𑀸𑀦𑀺𑀢𑀩𑁆𑀩𑁄.

𑁨𑁨-𑁩. 𑀕𑀘𑁆𑀙𑀦𑁆𑀢𑀺 𑀲𑀗𑁆𑀕𑀳𑀁 𑀤𑀸𑀦𑁂 𑀧𑀢𑁆𑀢𑀺𑀤𑀸𑀦𑀸𑀦𑀼𑀫𑁄𑀤𑀦𑀸 𑀤𑀸𑀦𑁂 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺, 𑀯𑁂𑀬𑁆𑀬𑀸𑀯𑀘𑁆𑀘𑀸𑀧𑀘𑀸𑀬𑀦𑀸 𑀲𑀻𑀮𑀫𑀬𑁂 𑀧𑀼𑀜𑁆𑀜𑁂 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺, 𑀥𑀫𑁆𑀫𑀤𑁂𑀲𑀦𑀸 𑀥𑀫𑁆𑀫𑀲𑁆𑀲𑀯𑀦𑀁 𑀤𑀺𑀝𑁆𑀞𑀺𑀉𑀚𑀼𑀓𑀸 𑀪𑀸𑀯𑀦𑀸𑀫𑀬𑁂 𑀧𑀼𑀜𑁆𑀜𑁂 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺, 𑀤𑀲 𑀧𑀼𑀜𑁆𑀜𑀓𑀺𑀭𑀺𑀬𑀸𑀧𑀺 𑀘 𑀢𑀻𑀡𑀺 𑀏𑀯 𑀲𑀫𑁆𑀪𑁄𑀦𑁆𑀢𑀺.

𑁨𑁪. 𑀲𑀩𑁆𑀩𑀸𑀦𑀼𑀲𑁆𑀲𑀢𑀺𑀧𑀼𑀜𑁆𑀜𑀜𑁆𑀘 𑀧𑀲𑀁𑀲𑀸 𑀲𑀭𑀡𑀢𑁆𑀢𑀬𑀁 𑀭𑀢𑀦𑀢𑁆𑀢𑀬𑀕𑀼𑀡𑀧𑀲𑀁𑀲𑀸 𑀘 𑀏𑀢𑁂 𑀤𑀺𑀝𑁆𑀞𑀺𑀚𑀼𑀓𑀫𑁆𑀫𑀫𑁆𑀳𑀺 𑀲𑀗𑁆𑀕𑀬𑁆𑀳𑀦𑁆𑀢𑀺, 𑀢𑀲𑁆𑀫𑀺𑀁 𑀲𑀗𑁆𑀕𑀳𑀧𑀸𑀧𑀼𑀡𑁂 𑀲𑀁𑀲𑀬𑁄 𑀲𑀦𑁆𑀤𑁂𑀳𑁄 𑀦𑀢𑁆𑀣𑀺.

𑁨𑁫. 𑀧𑀼𑀭𑀺𑀫𑀸 𑀘𑁂𑀢𑀦𑀸 𑀢𑀢𑁄 𑀧𑀼𑀩𑁆𑀩𑀪𑀸𑀕𑁂 𑀧𑀯𑀢𑁆𑀢𑀸 𑀘𑁂𑀢𑀦𑀸, 𑀫𑀼𑀜𑁆𑀘𑀘𑁂𑀢𑀦𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀘𑁂𑀢𑀦𑀸, 𑀧𑀭𑀘𑁂𑀢𑀦𑀸 𑀧𑀘𑁆𑀙𑀸𑀓𑀸𑀮𑁂 𑀧𑀯𑀢𑁆𑀢𑀸 𑀘𑁂𑀢𑀦𑀸, 𑀢𑀺𑀲𑁆𑀲𑁄𑀧𑀺 𑀘𑁂𑀢𑀦𑀸 𑀤𑀸𑀦𑀫𑀬𑁂 𑀧𑀼𑀜𑁆𑀜𑁂 𑀳𑁄𑀦𑁆𑀢𑀺. 𑀏𑀯𑀦𑁆𑀢𑀺 𑀬𑀣𑀸 𑀢𑀺𑀲𑁆𑀲𑁄𑀧𑀺 𑀘𑁂𑀢𑀦𑀸 𑀤𑀸𑀦𑀫𑀬𑁂 𑀧𑀼𑀜𑁆𑀜𑁂 𑀳𑁄𑀦𑁆𑀢𑀺, 𑀏𑀯𑀁 𑀢𑀣𑀸 𑀤𑀸𑀦𑀫𑀬𑀧𑀼𑀜𑁆𑀜𑀢𑁄 𑀲𑁂𑀲𑁂𑀲𑀼𑀧𑀺 𑀲𑀻𑀮𑀫𑀬𑀪𑀸𑀯𑀦𑀸𑀫𑀬𑁂𑀲𑀼 𑀢𑀺𑀲𑁆𑀲𑁄 𑀘𑁂𑀢𑀦𑀸 𑀧𑀡𑁆𑀟𑀺𑀢𑁄 𑀤𑀻𑀧𑀬𑁂 𑀓𑀣𑁂𑀬𑁆𑀬.

𑀳𑀺 𑀲𑀘𑁆𑀘𑀁 𑀬𑀤𑀸 𑀧𑀦 𑀬𑁄 𑀧𑀼𑀕𑁆𑀕𑀮𑁄 𑀤𑁂𑀬𑁆𑀬𑀥𑀫𑁆𑀫𑀧𑀝𑀺𑀕𑁆𑀕𑀸𑀳𑀓𑀸𑀤𑀺𑀲𑀫𑁆𑀧𑀢𑁆𑀢𑀺𑀁 𑀆𑀕𑀫𑁆𑀫 𑀧𑀝𑀺𑀘𑁆𑀘. 𑀧𑀝𑀺𑀕𑁆𑀕𑀸𑀳𑀓𑀸𑀤𑀺𑀲𑀫𑁆𑀧𑀢𑁆𑀢𑀺𑀦𑁆𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀤𑁂𑀲𑀓𑀸𑀮𑀓𑀮𑁆𑀬𑀸𑀡𑀫𑀺𑀢𑁆𑀢𑀸𑀤𑀬𑁄 𑀕𑀳𑀺𑀢𑀸. 𑀅𑀜𑁆𑀜𑀁 𑀯𑀸 𑀲𑁄𑀫𑀦𑀲𑁆𑀲𑀳𑁂𑀢𑀼𑀦𑁆𑀢𑀺 𑀅𑀜𑁆𑀜-𑀕𑁆𑀕𑀳𑀡𑁂𑀦 𑀲𑀤𑁆𑀥𑀸𑀩𑀳𑀼𑀮𑀢𑀸𑀯𑀺𑀲𑀼𑀤𑁆𑀥𑀺𑀤𑀺𑀝𑁆𑀞𑀺𑀢𑀸𑀓𑀼𑀲𑀮𑀓𑀺𑀭𑀺𑀬𑀸𑀦𑀺𑀲𑀁𑀲𑀤𑀲𑁆𑀲𑀺𑀢𑀸𑀲𑁄𑀫𑀦𑀲𑁆𑀲𑀧𑀝𑀺𑀲𑀦𑁆𑀥𑀺𑀓𑀢𑀸𑀤𑀻𑀦𑀁 𑀲𑀗𑁆𑀕𑀳𑁄. 𑀅𑀢𑁆𑀣𑀺 𑀤𑀺𑀦𑁆𑀦𑀁 𑀤𑀸𑀦𑀲𑁆𑀲 𑀨𑀮𑀁 𑀅𑀢𑁆𑀣𑀺. 𑀆𑀤𑀺-𑀲𑀤𑁆𑀤𑁂𑀦 𑀅𑀢𑁆𑀣𑀺𑀳𑀼𑀢𑀸𑀤𑀬𑁄 𑀕𑀳𑀺𑀢𑀸. 𑀧𑀼𑀭𑀓𑁆𑀔𑀢𑁆𑀯𑀸𑀢𑀺 𑀧𑀼𑀭𑀢𑁄 𑀓𑀢𑁆𑀯𑀸. 𑀧𑀭𑁂𑀳𑀺 𑀅𑀦𑀼𑀲𑁆𑀲𑀸𑀳𑀺𑀢𑁄 𑀅𑀘𑁄𑀤𑀺𑀢𑁄 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀢𑀺. 𑀤𑀸𑀦𑀸𑀤𑀻𑀦𑀻𑀢𑀺 𑀯𑀘𑀦𑁂𑀦 𑀤𑁂𑀬𑁆𑀬𑀥𑀫𑁆𑀫𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀤𑀸𑀦𑀘𑁂𑀢𑀦𑀸 𑀕𑀳𑁂𑀢𑀩𑁆𑀩𑀸. 𑀢𑀤𑀸 𑀅𑀲𑁆𑀲 𑀧𑀼𑀕𑁆𑀕𑀮𑀲𑁆𑀲. 𑀲𑀗𑁆𑀔𑀭𑀡𑀁 𑀲𑀗𑁆𑀔𑀸𑀭𑁄, 𑀦𑀢𑁆𑀣𑀺 𑀲𑀗𑁆𑀔𑀸𑀭𑁄 𑀏𑀢𑀲𑁆𑀲𑀸𑀢𑀺 𑀅𑀲𑀗𑁆𑀔𑀸𑀭𑁄, 𑀢𑀁 𑀏𑀯 𑀅𑀲𑀗𑁆𑀔𑀸𑀭𑀺𑀓𑀁, 𑀅𑀧𑁆𑀧𑀬𑁄𑀕𑀦𑁆𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 𑀯𑀼𑀢𑁆𑀢𑀦𑀬𑁄 𑀦𑀸𑀫 ‘‘𑀤𑁂𑀬𑁆𑀬𑀥𑀫𑁆𑀫𑀧𑀝𑀺𑀕𑁆𑀕𑀸𑀳𑀓𑀸𑀤𑀺𑀲𑀫𑁆𑀧𑀢𑁆𑀢𑀺’’𑀦𑁆𑀢𑀺 𑀯𑀘𑀦𑀁. 𑀇𑀫𑀲𑁆𑀫𑀺𑀁 𑀧𑀦𑀢𑁆𑀣𑁂 𑀲𑀗𑁆𑀔𑀭𑁄𑀢𑀻𑀢𑀺 𑀲𑀗𑁆𑀔𑀸𑀭𑁄 𑀦𑀸𑀫 𑀅𑀢𑁆𑀢𑀦𑁄 𑀯𑀸 𑀧𑀯𑀢𑁆𑀢𑀲𑁆𑀲 𑀧𑀼𑀩𑁆𑀩𑀧𑁆𑀧𑀬𑁄𑀕𑀲𑁆𑀲 𑀅𑀥𑀺𑀯𑀘𑀦𑀁, 𑀧𑀭𑀲𑁆𑀲 𑀯𑀸 𑀧𑀯𑀢𑁆𑀢𑀧𑀼𑀩𑁆𑀩𑀧𑁆𑀧𑀬𑁄𑀕𑀲𑁆𑀲 𑀅𑀥𑀺𑀯𑀘𑀦𑀁. 𑀅𑀬𑀫𑀲𑁆𑀲 𑀅𑀥𑀺𑀧𑁆𑀧𑀸𑀬𑁄 𑁋 𑀬𑀤𑀸 𑀬𑁄 ‘‘𑀤𑀸𑀦𑀸𑀤𑀻𑀦𑀺 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀢𑁆𑀢𑀁 𑀲𑀫𑀼𑀧𑁆𑀧𑀸𑀤𑁂𑀢𑁆𑀯𑀸 𑀦𑀸𑀓𑀸𑀲𑀺, 𑀧𑀘𑁆𑀙𑀸 𑀅𑀢𑁆𑀢𑀦𑁄 𑀧𑀼𑀩𑁆𑀩𑀘𑁂𑀢𑀦𑀸𑀬 𑀉𑀲𑁆𑀲𑀸𑀳𑀺𑀢𑁄 𑀓𑀭𑁄𑀢𑀺, 𑀢𑀤𑀸 𑀲𑀲𑀗𑁆𑀔𑀸𑀭𑀺𑀓𑀁 𑀳𑁄𑀢𑀺, 𑀅𑀢𑁆𑀢𑀦𑁄 𑀧𑀼𑀩𑁆𑀩𑀧𑁆𑀧𑀬𑁄𑀕𑁂𑀦 𑀲𑀳 𑀧𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀧𑀝𑀺𑀧𑀢𑁆𑀢𑀺𑀤𑀲𑁆𑀲𑀦𑁂𑀦 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀸 𑀲𑀻𑀮𑀸𑀤𑀻𑀳𑀺 𑀧𑀝𑀺𑀧𑀚𑁆𑀚𑀦𑁆𑀢𑀺 𑀚𑀸𑀦𑀦𑁆𑀢𑀺 𑀕𑀘𑁆𑀙𑀦𑁆𑀢𑀺 𑀯𑀸 𑀦𑀺𑀩𑁆𑀩𑀸𑀦𑀁 𑀏𑀢𑀸𑀬𑀸𑀢𑀺 𑀧𑀝𑀺𑀧𑀢𑁆𑀢𑀺, 𑀢𑀸𑀬 𑀤𑀲𑁆𑀲𑀦𑀁 𑀧𑀝𑀺𑀧𑀢𑁆𑀢𑀺𑀤𑀲𑁆𑀲𑀦𑀁, 𑀢𑁂𑀦. 𑀚𑀸𑀢𑁄 𑀧𑀭𑀺𑀘𑀬𑁄 𑀏𑀢𑁂𑀲𑀦𑁆𑀢𑀺 𑀚𑀸𑀢𑀧𑀭𑀺𑀘𑀬𑀸. 𑀲𑀳𑀲𑀸𑀢𑀺 𑀯𑁂𑀕𑁂𑀦. 𑀘𑀢𑀽𑀲𑀼𑀧𑀺 𑀯𑀺𑀓𑀧𑁆𑀧𑁂𑀲𑀼 𑀤𑀲𑁆𑀲𑁂𑀬𑁆𑀬.

𑁨𑁬. 𑀤𑀲𑀧𑀼𑀜𑁆𑀜𑀓𑁆𑀭𑀺𑀬𑀸𑀤𑀻𑀦𑀁 𑀯𑀲𑁂𑀦 𑀘 𑀩𑀳𑀽𑀦𑀺𑀧𑀺 𑀪𑀯𑀦𑁆𑀢𑀺 𑀏𑀢𑀸𑀦𑀺 𑀧𑀦 𑀘𑀺𑀢𑁆𑀢𑀸𑀦𑀺 𑀤𑀲𑀧𑀼𑀜𑁆𑀜𑀓𑀺𑀭𑀺𑀬𑀸𑀤𑀻𑀦𑀁 𑀯𑀲𑁂𑀦𑀧𑀺 𑀩𑀳𑀽𑀦𑀺𑀧𑀺 𑀪𑀯𑀦𑁆𑀢𑀺 𑀇𑀢𑀺 𑀏𑀯𑀁 𑀧𑀓𑀸𑀲𑀬𑁂 𑀪𑀕𑀯𑀸 𑀧𑀓𑀸𑀲𑁂𑀬𑁆𑀬.

𑁨𑁭. 𑀲𑀢𑁆𑀢𑀭𑀲 𑀲𑀳𑀲𑁆𑀲𑀸𑀦𑀺, 𑀤𑁆𑀯𑁂 𑀲𑀢𑀸𑀦𑀺 𑀅𑀲𑀻𑀢𑀺 𑀘;

𑀓𑀸𑀫𑀸𑀯𑀘𑀭𑀧𑀼𑀜𑁆𑀜𑀸𑀦𑀺, 𑀪𑀯𑀦𑁆𑀢𑀻𑀢𑀺 𑀯𑀺𑀦𑀺𑀤𑁆𑀤𑀺𑀲𑁂𑀢𑀺. 𑁋

𑀓𑀸𑀫𑀸𑀯𑀘𑀭𑀧𑀼𑀜𑁆𑀜𑀸𑀦𑀺 𑀲𑀢𑁆𑀢𑀭𑀲 𑀲𑀳𑀲𑁆𑀲𑀸𑀦𑀺 𑀘 𑀤𑁆𑀯𑁂 𑀲𑀢𑀸𑀦𑀺 𑀘 𑀅𑀲𑀻𑀢𑀺 𑀘 𑀪𑀯𑀦𑁆𑀢𑀺, 𑀇𑀢𑀺 𑀯𑀘𑀦𑀁 𑀯𑀺𑀦𑀺𑀤𑁆𑀤𑀺𑀲𑁂 𑀆𑀘𑀭𑀺𑀬𑁄 𑀓𑀣𑁂𑀬𑁆𑀬.

𑀤𑀲𑀧𑀼𑀜𑁆𑀜𑀓𑁆𑀭𑀺𑀬𑀸𑀯𑀢𑁆𑀣𑀼, 𑀙𑀤𑁆𑀯𑀸𑀭𑀸𑀥𑀺𑀧𑀢𑀻𑀳𑀺 𑀘;

𑀓𑀸𑀬𑀸𑀤𑀻𑀳𑀺 𑀘 𑀢𑀻𑀳𑁂𑀯, 𑀳𑀻𑀦𑀸𑀤𑀻𑀳𑀺 𑀘 𑀢𑀻𑀳𑀺 𑀢𑀼.

𑀤𑁆𑀯𑀻𑀲𑀼 𑀪𑀯𑁂𑀲𑀼 𑀓𑀸𑀫𑀪𑀯𑀭𑀽𑀧𑀪𑀯𑁂𑀲𑀼. 𑀧𑀝𑀺𑀧𑀤𑀸𑀤𑀺𑀪𑁂𑀤𑀢𑁄 𑀤𑀼𑀓𑁆𑀔𑀸𑀧𑀝𑀺𑀧𑀤𑀁 𑀤𑀦𑁆𑀥𑀸𑀪𑀺𑀜𑁆𑀜𑀁, 𑀤𑀼𑀓𑁆𑀔𑀸𑀧𑀝𑀺𑀧𑀤𑀁 𑀔𑀺𑀧𑁆𑀧𑀸𑀪𑀺𑀜𑁆𑀜𑀁, 𑀲𑀼𑀔𑀸𑀧𑀝𑀺𑀧𑀤𑀁 𑀤𑀦𑁆𑀥𑀸𑀪𑀺𑀜𑁆𑀜𑀁, 𑀲𑀼𑀔𑀸𑀧𑀝𑀺𑀧𑀤𑀁 𑀔𑀺𑀧𑁆𑀧𑀸𑀪𑀺𑀜𑁆𑀜𑀁. 𑀭𑀽𑀧𑀸𑀯𑀘𑀭𑀪𑀸𑀯𑀦𑀸𑀧𑀼𑀜𑁆𑀜𑀯𑀲𑀧𑁆𑀧𑀯𑀢𑁆𑀢𑀁 𑀭𑀽𑀧𑀸𑀯𑀘𑀭𑁂 𑀧𑀯𑀢𑁆𑀢𑀲𑁆𑀲 𑀪𑀸𑀯𑀦𑀸𑀧𑀼𑀜𑁆𑀜𑀲𑁆𑀲 𑀯𑀲𑁂𑀦 𑀧𑀯𑀢𑁆𑀢𑀁 𑀭𑀽𑀧𑀸𑀯𑀘𑀭𑀽𑀧𑀧𑀢𑁆𑀢𑀺𑀦𑀺𑀧𑁆𑀨𑀸𑀤𑀓𑀁 𑀭𑀽𑀧𑀸𑀯𑀘𑀭𑁂 𑀉𑀧𑀧𑀢𑁆𑀢𑀺𑀬𑀸 𑀧𑀝𑀺𑀲𑀦𑁆𑀥𑀺𑀬𑀸 𑀦𑀺𑀧𑁆𑀨𑀸𑀤𑀓𑀁 𑀳𑁄𑀢𑀺.

𑀲𑀯𑀢𑁆𑀣𑀼𑀓𑀸𑀯𑀢𑁆𑀣𑀼𑀓𑀪𑁂𑀤𑀢𑁄𑀢𑀺 𑀅𑀭𑀽𑀧𑀸𑀯𑀘𑀭𑀁 𑀬𑀤𑀸 𑀓𑀸𑀫𑀭𑀽𑀧𑁂 𑀚𑀸𑀬𑀢𑀺, 𑀢𑀤𑀸 𑀳𑀤𑀬𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀚𑀸𑀬𑀢𑀺, 𑀇𑀢𑀺 𑀢𑀲𑁆𑀫𑀸 𑀲𑀯𑀢𑁆𑀣𑀼𑀓𑀁 𑀦𑀸𑀫 𑀚𑀸𑀢𑀁. 𑀬𑀤𑀸 𑀅𑀭𑀽𑀧𑁂 𑀚𑀸𑀬𑀢𑀺, 𑀢𑀤𑀸 𑀳𑀤𑀬𑀯𑀢𑁆𑀣𑀼𑀁 𑀅𑀦𑀺𑀲𑁆𑀲𑀸𑀬 𑀚𑀸𑀬𑀢𑀺, 𑀇𑀢𑀺 𑀢𑀲𑁆𑀫𑀸 𑀅𑀯𑀢𑁆𑀣𑀼𑀓𑀁 𑀦𑀸𑀫 𑀚𑀸𑀢𑀁.

𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑁆𑀲 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑀁 𑀆𑀭𑀫𑁆𑀫𑀡𑀁. 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑁆𑀲 𑀢𑀢𑁆𑀣 𑀧𑀯𑀢𑁆𑀢𑀯𑀺𑀜𑁆𑀜𑀸𑀡𑀁, 𑀢𑀲𑁆𑀫𑀺𑀁 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑁂 𑀧𑀯𑀢𑁆𑀢𑀁 𑀯𑀺𑀜𑁆𑀜𑀸𑀡𑀁 𑀘𑀺𑀢𑁆𑀢𑀁 𑀆𑀭𑀫𑁆𑀫𑀡𑀁 𑀳𑁄𑀢𑀺. 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑁆𑀲 𑀢𑀲𑁆𑀲 𑀅𑀧𑀕𑀫𑁄 𑀢𑀲𑁆𑀲 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑁆𑀲 𑀅𑀧𑀕𑀫𑁄 𑀅𑀪𑀸𑀯𑁄 𑀯𑁄𑀳𑀸𑀭𑁄 𑀆𑀭𑀫𑁆𑀫𑀡𑀁 𑀳𑁄𑀢𑀺. 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑁆𑀲 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀆𑀭𑀫𑁆𑀫𑀡𑀁 𑀳𑁄𑀢𑀺.

𑀭𑀽𑀧𑁂 𑀲𑀜𑁆𑀜𑀸 𑀭𑀽𑀧𑀲𑀜𑁆𑀜𑀸. 𑀲𑀜𑁆𑀜𑀸𑀲𑀻𑀲𑁂𑀦 𑀘𑀺𑀢𑁆𑀢𑀫𑁆𑀧𑀺 𑀕𑀳𑀺𑀢𑀁. 𑀲𑀫𑀢𑀺𑀓𑁆𑀓𑀫𑀸 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑀲𑀫𑀢𑀺𑀓𑁆𑀓𑀫𑀦𑁂𑀦. 𑀧𑀝𑀺𑀖𑁂 𑀤𑁆𑀯𑀸𑀭𑀸𑀭𑀫𑁆𑀫𑀡𑀸𑀦𑀁 𑀲𑀗𑁆𑀖𑀝𑁆𑀝𑀦𑁂 𑀧𑀯𑀢𑁆𑀢𑀸 𑀲𑀜𑁆𑀜𑀸 𑀧𑀝𑀺𑀖𑀲𑀜𑁆𑀜𑀸. 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀁 𑀅𑀥𑀺𑀯𑀘𑀦𑀁. 𑀢𑀸𑀲𑀁 𑀧𑀝𑀺𑀖𑀲𑀜𑁆𑀜𑀸𑀦𑀁 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀅𑀢𑁆𑀣𑀗𑁆𑀕𑀫𑁂𑀦. 𑀦𑀸𑀦𑀸 𑀅𑀢𑁆𑀢𑀸 𑀲𑀪𑀸𑀯𑁄 𑀏𑀢𑀲𑁆𑀲𑀸𑀢𑀺 𑀦𑀸𑀦𑀢𑁆𑀢𑀁, 𑀆𑀭𑀫𑁆𑀫𑀡𑀁, 𑀦𑀸𑀦𑀢𑁆𑀢𑁂 𑀦𑀸𑀦𑀸𑀲𑀪𑀸𑀯𑁂 𑀧𑀯𑀢𑁆𑀢𑀸 𑀲𑀜𑁆𑀜𑀸 𑀦𑀸𑀦𑀢𑁆𑀢𑀲𑀜𑁆𑀜𑀸, 𑀦𑀸𑀦𑀸 𑀅𑀢𑁆𑀢𑀸 𑀲𑀪𑀸𑀯𑁄 𑀏𑀢𑀺𑀲𑁆𑀲𑀸𑀢𑀺 𑀯𑀸 𑀦𑀸𑀦𑀢𑁆𑀢𑀸, 𑀲𑀸𑀬𑁂𑀯 𑀲𑀜𑁆𑀜𑀸 𑀦𑀸𑀦𑀢𑁆𑀢𑀲𑀜𑁆𑀜𑀸, 𑀓𑀸𑀫𑀸𑀯𑀘𑀭𑀲𑀜𑁆𑀜𑀸𑀢𑀺 𑀅𑀢𑁆𑀣𑁄. 𑀢𑀸𑀲𑀁 𑀦𑀸𑀦𑀢𑁆𑀢𑀲𑀜𑁆𑀜𑀸𑀦𑀁 𑀅𑀫𑀦𑀲𑀺𑀓𑀸𑀭𑀸 𑀅𑀫𑀦𑀲𑀺𑀓𑀸𑀭𑁂𑀦.

𑀦𑀺𑀬𑀢𑀸𑀦𑀺𑀬𑀢𑀯𑀢𑁆𑀣𑀼𑀓𑀪𑁂𑀤𑀢𑁄𑀢𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀦𑀺𑀬𑀢𑀯𑀢𑁆𑀣𑀼𑀓𑁄. 𑀓𑀲𑁆𑀫𑀸? 𑀓𑀸𑀫𑀭𑀽𑀧𑁂𑀲𑀼𑀬𑁂𑀯 𑀳𑀤𑀬𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀦𑀢𑁄. 𑀇𑀢𑀭𑁂 𑀧𑀦 𑀢𑀬𑁄 𑀫𑀕𑁆𑀕𑀸 𑀅𑀦𑀺𑀬𑀢𑀯𑀢𑁆𑀣𑀼𑀓𑀸. 𑀓𑀲𑁆𑀫𑀸? 𑀓𑀸𑀫𑀭𑀽𑀧𑁂𑀲𑀼 𑀳𑀤𑀬𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀚𑀸𑀬𑀦𑁆𑀢𑀺, 𑀅𑀭𑀽𑀧𑁂 𑀳𑀤𑀬𑀯𑀢𑁆𑀣𑀼𑀁 𑀅𑀦𑀺𑀲𑁆𑀲𑀸𑀬 𑀚𑀸𑀬𑀦𑁆𑀢𑀺, 𑀢𑀲𑁆𑀫𑀸 𑀅𑀦𑀺𑀬𑀢𑀯𑀢𑁆𑀣𑀼𑀓𑀸. 𑀢𑀻𑀳𑀺 𑀯𑀺𑀫𑁄𑀓𑁆𑀔𑀫𑀼𑀔𑁂𑀳𑀻𑀢𑀺 𑀲𑀼𑀜𑁆𑀜𑀢𑀅𑀦𑀺𑀫𑀺𑀢𑁆𑀢𑀅𑀧𑁆𑀧𑀡𑀺𑀳𑀺𑀢𑀲𑀗𑁆𑀔𑀸𑀢𑁂𑀳𑀺 𑀢𑀻𑀳𑀺 𑀯𑀺𑀫𑁄𑀓𑁆𑀔𑀫𑀼𑀔𑁂𑀳𑀺.

𑀬𑀲𑁆𑀲 𑀲𑀁𑀯𑀺𑀚𑁆𑀚𑀦𑁆𑀢𑀺, 𑀢𑀁 𑀧𑀼𑀕𑁆𑀕𑀮𑀁 𑀯𑀝𑁆𑀝𑀲𑁆𑀫𑀺𑀁 𑀲𑀁𑀬𑁄𑀚𑁂𑀦𑁆𑀢𑀺 𑀩𑀦𑁆𑀥𑀦𑁆𑀢𑀻𑀢𑀺 𑀲𑀁𑀬𑁄𑀚𑀦𑀸. 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀸𑀬𑁂𑀯 𑀲𑀁𑀬𑁄𑀚𑀦𑀸 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀲𑀁𑀬𑁄𑀚𑀦𑀸, 𑀢𑁂𑀲𑀁 𑀧𑀳𑀸𑀦𑀁 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀲𑀁𑀬𑁄𑀚𑀦𑀧𑁆𑀧𑀳𑀸𑀦𑀁, 𑀢𑀁 𑀓𑀭𑁄𑀢𑀻𑀢𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀲𑀁𑀬𑁄𑀚𑀦𑀧𑁆𑀧𑀳𑀸𑀦𑀓𑀭𑀁, 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀘𑀺𑀢𑁆𑀢𑀁. 𑀫𑀸𑀦𑁄𑀧𑀺 𑀏𑀓𑀤𑁂𑀲𑀢𑁄 𑀅𑀧𑀸𑀬𑀕𑀸𑀫𑀺𑀓𑁄𑀬𑁂𑀯 𑀧𑀳𑀺𑀬𑁆𑀬𑀢𑁂. 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀦𑀺𑀲𑁆𑀲𑁂𑀲𑀢𑁄 𑀦 𑀧𑀳𑀺𑀬𑁆𑀬𑀢𑁂. 𑀲𑁂𑀲𑀓𑀺𑀮𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀉𑀤𑁆𑀥𑀘𑁆𑀘𑀁 𑀧𑀦 𑀏𑀓𑀤𑁂𑀲𑀢𑁄𑀧𑀺 𑀅𑀧𑀸𑀬𑀕𑀸𑀫𑀺𑀓𑀫𑁆𑀧𑀺 𑀦 𑀧𑀳𑀺𑀬𑁆𑀬𑀢𑀺. 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀘𑀺𑀢𑁆𑀢𑀁 𑀭𑀸𑀕𑀤𑁄𑀲𑀫𑁄𑀳𑀸𑀦𑀁 𑀢𑀦𑀼𑀢𑁆𑀢𑀓𑀭𑀁. 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀦𑀸𑀲𑀺𑀢𑀲𑀁𑀬𑁄𑀚𑀦𑀸𑀦𑀁 𑀧𑀳𑀸𑀦𑀁 𑀓𑀲𑁆𑀫𑀸 𑀦 𑀯𑀼𑀢𑁆𑀢𑀦𑁆𑀢𑀺 𑀘𑁂? 𑀧𑀞𑀫𑀫𑀕𑁆𑀕𑀢𑁄 𑀤𑀼𑀢𑀺𑀬𑀫𑀕𑁆𑀕𑀲𑁆𑀲 𑀫𑀳𑀦𑁆𑀢𑀢𑁆𑀢𑀸 𑀧𑀞𑀫𑀫𑀕𑁆𑀕𑁂𑀦 𑀦𑀸𑀲𑀺𑀢𑀸 𑀲𑀁𑀬𑁄𑀚𑀦𑀸 𑀤𑀼𑀢𑀺𑀬𑀫𑀕𑁆𑀕𑁂𑀦 𑀦𑀸𑀲𑀺𑀢𑀸𑀢𑀺 𑀧𑀜𑁆𑀜𑀸𑀬𑀢𑀺, 𑀇𑀢𑀺 𑀬𑀲𑁆𑀫𑀸, 𑀢𑀲𑁆𑀫𑀸 𑀦 𑀯𑀼𑀢𑁆𑀢𑀁. 𑀢𑀢𑀺𑀬𑀘𑀢𑀼𑀢𑁆𑀣𑀫𑀕𑁆𑀕𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀣 𑀏𑀢𑀲𑁆𑀫𑀺𑀁 𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑁂. 𑀏𑀓𑁂𑀓𑀦𑁆𑀢𑀺 𑀯𑀺𑀘𑁆𑀙𑀸𑀯𑀲𑁂𑀦 𑀯𑀼𑀢𑁆𑀢𑀁. 𑀫𑀕𑁆𑀕𑀸𑀦𑀼𑀭𑀽𑀧𑀦𑁆𑀢𑀺 𑀯𑀘𑀦𑀁 𑀧𑀞𑀫𑀫𑀕𑁆𑀕𑀲𑁆𑀲 𑀧𑀞𑀫𑀨𑀮𑀜𑁆𑀘 𑀅𑀦𑀼𑀭𑀽𑀧𑀦𑁆𑀢𑀺 𑀯𑀺𑀜𑁆𑀜𑀸𑀧𑀦𑀢𑁆𑀣𑀁.

𑁨𑁮. 𑀓𑀸𑀫𑁂 𑀅𑀝𑁆𑀞𑁂𑀯 𑀓𑀸𑀫𑀸𑀯𑀘𑀭𑁂 𑀅𑀝𑁆𑀞 𑀏𑀯 𑀘𑀺𑀢𑁆𑀢𑀸𑀦𑀺, 𑀭𑀽𑀧𑁂 𑀭𑀽𑀧𑀪𑀯𑁂 𑀧𑀜𑁆𑀘 𑀘𑀺𑀢𑁆𑀢𑀸𑀦𑀺, 𑀅𑀭𑀽𑀧𑀺𑀲𑀼 𑀘𑀢𑁆𑀢𑀸𑀭𑀺 𑀘𑀺𑀢𑁆𑀢𑀸𑀦𑀺, 𑀅𑀦𑀼𑀢𑁆𑀢𑀭𑀸𑀦𑀺 𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑀸𑀦𑀺 𑀘𑀢𑁆𑀢𑀸𑀭𑀺, 𑀏𑀯𑀁 𑀇𑀫𑀺𑀦𑀸 𑀫𑀬𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀓𑀼𑀲𑀮𑀸𑀦𑀺 𑀘𑀺𑀢𑁆𑀢𑀸𑀦𑀺 𑀏𑀓𑀯𑀻𑀲𑀢𑀺 𑀳𑁄𑀦𑁆𑀢𑀺.

𑁨𑁯. 𑀓𑀼𑀲𑀮𑀸𑀓𑀼𑀲𑀮𑀸𑀧𑀕𑀢𑁂𑀦 𑀲𑀢𑀸 𑀫𑀼𑀦𑀺𑀦𑀸 𑀓𑀼𑀲𑀮𑀢𑁄, 𑀅𑀓𑀼𑀲𑀮𑀢𑁄 𑀘 𑀅𑀧𑀕𑀢𑁂𑀦 𑀲𑀢𑀸 𑀲𑀢𑀺𑀲𑀫𑁆𑀧𑀦𑁆𑀦𑁂𑀦 𑀓𑀼𑀲𑀮𑁂 𑀓𑀼𑀲𑀮𑁂𑀦 𑀙𑁂𑀓𑁂𑀦 𑀯𑀲𑀺𑀦𑀸 𑀧𑀜𑁆𑀘𑀯𑀲𑀻𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀬𑀁 𑀓𑀼𑀲𑀮𑀘𑀺𑀢𑁆𑀢𑀁 𑀘𑀢𑀼𑀪𑀽𑀫𑀺𑀕𑀢𑀁 𑀘𑀢𑀽𑀲𑀼 𑀪𑀽𑀫𑀻𑀲𑀼 𑀧𑀯𑀢𑁆𑀢𑀁 𑀲𑀓𑀮𑀁 𑀲𑀩𑁆𑀩𑀁 𑀮𑀧𑀺𑀢𑀁 𑀓𑀣𑀺𑀢𑀁, 𑀢𑀁 𑀓𑀼𑀲𑀮𑀘𑀺𑀢𑁆𑀢𑀁 𑀫𑀬𑀸𑀧𑀺 𑀩𑀼𑀤𑁆𑀥𑀤𑀢𑁆𑀢𑀸𑀘𑀭𑀺𑀬𑁂𑀦 𑀮𑀧𑀺𑀢𑀁 𑀓𑀣𑀺𑀢𑀁.

𑀦𑀺𑀬𑀢𑀸𑀦𑀺𑀬𑀢𑀯𑀢𑁆𑀣𑀼𑀯𑀲𑁂𑀦𑀸𑀢𑀺 𑀧𑀝𑀺𑀖𑀲𑀫𑁆𑀧𑀬𑀼𑀢𑁆𑀢𑀤𑁆𑀯𑀬𑀁 𑀓𑀸𑀫𑁂𑀬𑁂𑀯 𑀳𑀤𑀬𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀚𑀸𑀬𑀢𑀺, 𑀅𑀜𑁆𑀜𑀪𑀽𑀫𑀻𑀲𑀼 𑀦 𑀚𑀸𑀬𑀢𑀺, 𑀢𑀲𑁆𑀫𑀸 𑀦𑀺𑀬𑀢𑀯𑀢𑁆𑀣𑀼𑀓𑀁 𑀳𑁄𑀢𑀺. 𑀇𑀢𑀭𑀸𑀦𑀺 𑀧𑀦 𑀅𑀓𑀼𑀲𑀮𑀸𑀦𑀺 𑀓𑀸𑀫𑀭𑀽𑀧𑁂𑀲𑀼 𑀉𑀧𑁆𑀧𑀚𑁆𑀚𑀦𑀓𑀸𑀮𑁂 𑀳𑀤𑀬𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀚𑀸𑀬𑀦𑁆𑀢𑀺, 𑀅𑀭𑀽𑀧𑁂 𑀳𑀤𑀬𑀯𑀢𑁆𑀣𑀼𑀁 𑀅𑀦𑀺𑀲𑁆𑀲𑀸𑀬 𑀚𑀸𑀬𑀦𑁆𑀢𑀺, 𑀢𑀲𑁆𑀫𑀸 𑀅𑀦𑀺𑀬𑀢𑀯𑀢𑁆𑀣𑀼𑀓𑀸𑀦𑀺, 𑀢𑁂𑀦. 𑀧𑀝𑀺𑀲𑀦𑁆𑀥𑀺𑀚𑀦𑀓𑀸𑀚𑀦𑀓𑀯𑀲𑁂𑀦 𑀘𑀸𑀢𑀺 𑀉𑀤𑁆𑀥𑀘𑁆𑀘𑀲𑀳𑀕𑀢𑀁 𑀧𑀝𑀺𑀲𑀦𑁆𑀥𑀺𑀁 𑀦 𑀚𑀦𑁂𑀢𑀺. 𑀬𑀤𑀺 𑀧𑀝𑀺𑀲𑀦𑁆𑀥𑀺𑀁 𑀚𑀦𑁂𑀬𑁆𑀬, 𑀅𑀧𑀸𑀬𑁂𑀲𑀼𑀬𑁂𑀯 𑀚𑀦𑁂𑀬𑁆𑀬. 𑀓𑀲𑁆𑀫𑀸? 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀏𑀓𑀤𑁂𑀲𑀢𑁄 𑀅𑀧𑀸𑀬𑀕𑀸𑀫𑀺𑀓𑀫𑁆𑀧𑀺 𑀦 𑀚𑀳𑀺𑀢𑀁, 𑀲𑀩𑁆𑀩𑀁 𑀦 𑀚𑀳𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀲𑁄𑀧𑀺 𑀫𑀕𑁆𑀕𑁄 𑀅𑀧𑀸𑀬𑀕𑀸𑀫𑀻 𑀦 𑀳𑁄𑀢𑀺. 𑀅𑀜𑁆𑀜𑁂 𑀧𑀦 𑀓𑀺𑀮𑁂𑀲𑀸 𑀏𑀓𑀤𑁂𑀲𑀯𑀲𑁂𑀦 𑀅𑀧𑀸𑀬𑀕𑀸𑀫𑀺𑀓𑀸 𑀚𑀳𑀺𑀢𑀸, 𑀢𑁂𑀦 𑀧𑀞𑀫𑀫𑀕𑁆𑀕𑁂𑀦𑀸𑀢𑀺 𑀢𑀲𑁆𑀫𑀸 𑀦 𑀚𑀦𑁂𑀢𑀺. 𑀏𑀓𑀸𑀤𑀲𑀯𑀺𑀥𑀁 𑀧𑀦 𑀧𑀝𑀺𑀲𑀦𑁆𑀥𑀺𑀁 𑀚𑀦𑁂𑀢𑀺, 𑀢𑁂𑀦.

𑀤𑀺𑀝𑁆𑀞𑀫𑀗𑁆𑀕𑀮𑀸𑀤𑀻𑀦𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀲𑀼𑀢𑀫𑀗𑁆𑀕𑀮𑀸𑀤𑀻𑀦𑀺 𑀕𑀳𑀺𑀢𑀸𑀦𑀺. 𑀲𑀸𑀭𑀢𑁄 𑀉𑀢𑁆𑀢𑀫𑀢𑁄 𑀧𑀘𑁆𑀘𑁂𑀢𑀺 𑀲𑀤𑁆𑀤𑀳𑀢𑀺. 𑀲𑀪𑀸𑀯𑀢𑀺𑀓𑁆𑀔𑁂𑀦 𑀲𑀪𑀸𑀯𑁄 𑀢𑀺𑀓𑁆𑀔𑁄 𑀏𑀢𑀲𑁆𑀲𑀸𑀢𑀺 𑀲𑀪𑀸𑀯𑀢𑀺𑀓𑁆𑀔𑀁, 𑀢𑁂𑀦 𑀲𑀪𑀸𑀯𑀢𑀺𑀓𑁆𑀔𑁂𑀦.

𑀅𑀲𑁆𑀲 𑀧𑀦 𑀧𑀝𑀺𑀖𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀲𑀼 𑀅𑀓𑀼𑀲𑀮𑀓𑀫𑁆𑀫𑁂𑀲𑀼 𑀢𑀺𑀓𑁆𑀔𑀧𑁆𑀧𑀯𑀢𑁆𑀢𑀺𑀓𑀸𑀮𑁂 𑀅𑀲𑀗𑁆𑀔𑀸𑀭𑀺𑀓𑀲𑁆𑀲 𑀉𑀧𑁆𑀧𑀢𑁆𑀢𑀺, 𑀫𑀦𑁆𑀤𑀧𑁆𑀧𑀯𑀢𑁆𑀢𑀺𑀓𑀸𑀮𑁂 𑀲𑀲𑀗𑁆𑀔𑀸𑀭𑀺𑀓𑀲𑁆𑀲 𑀉𑀧𑁆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀢𑀲𑁆𑀲 𑀫𑁄𑀫𑀽𑀳𑀲𑁆𑀲.

𑀤𑀼𑀓𑁆𑀔𑀯𑀺𑀲𑁂𑀲𑀲𑁆𑀲 𑀤𑀼𑀓𑁆𑀔𑀦𑀸𑀦𑀢𑁆𑀢𑀲𑁆𑀲.

𑁩𑁦. 𑀮𑁄𑀪𑀫𑀽𑀮𑀯𑀲𑁂𑀦 𑀅𑀝𑁆𑀞 𑀘𑀺𑀢𑁆𑀢𑀸𑀦𑀺, 𑀤𑁄𑀲𑀫𑀽𑀮𑀯𑀲𑀸 𑀤𑀼𑀯𑁂 𑀘𑀺𑀢𑁆𑀢𑀸𑀦𑀺, 𑀫𑁄𑀳𑀫𑀽𑀮𑀯𑀲𑁂𑀦 𑀤𑁆𑀯𑁂 𑀘𑀺𑀢𑁆𑀢𑀸𑀦𑀺. 𑀏𑀯𑀁 𑀇𑀫𑀺𑀦𑀸 𑀫𑀬𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀅𑀓𑀼𑀲𑀮𑀸𑀦𑀺 𑀤𑁆𑀯𑀸𑀤𑀲𑀧𑁆𑀧𑀓𑀸𑀭𑀸𑀦𑀺 𑀲𑀺𑀬𑀼𑀁 𑀪𑀯𑁂𑀬𑁆𑀬𑀼𑀁.

𑁩𑁧. 𑀬𑀁 𑀧𑀸𑀧𑀫𑀸𑀦𑀲𑀁 𑀬𑀁 𑀅𑀓𑀼𑀲𑀮𑀘𑀺𑀢𑁆𑀢𑀁 𑀧𑀸𑀧𑀸𑀧𑀸𑀧𑁂𑀲𑀼 𑀧𑀸𑀧𑀅𑀧𑀸𑀧𑁂𑀲𑀼 𑀓𑀼𑀲𑀮𑀸𑀓𑀼𑀲𑀮𑁂𑀲𑀼 𑀅𑀧𑀸𑀧𑁂𑀦 𑀅𑀧𑁆𑀧𑀯𑀢𑁆𑀢𑁂𑀦 𑀧𑀸𑀧𑀸𑀧𑀸𑀧𑀧𑁆𑀧𑀳𑀻𑀦𑁂𑀦 𑀯𑀼𑀢𑁆𑀢𑀁 𑀈𑀭𑀺𑀢𑀁 𑀓𑀣𑀺𑀢𑀁, 𑀢𑀁 𑀧𑀸𑀧𑀫𑀸𑀦𑀲𑀁 𑀢𑀁 𑀅𑀓𑀼𑀲𑀮𑀘𑀺𑀢𑁆𑀢𑀁 𑀫𑀬𑀸 𑀲𑀫𑀼𑀤𑀸𑀳𑀝𑀁 𑀓𑀣𑀺𑀢𑀁.

𑀬𑀣𑀸 𑀧𑀦𑀲𑁆𑀲 𑀬𑀣𑀸 𑀧𑀦 𑀅𑀲𑁆𑀲 𑀯𑀺𑀧𑀸𑀓𑀲𑁆𑀲 𑀓𑀼𑀲𑀮𑀁 𑀤𑀸𑀦𑀸𑀤𑀺𑀯𑀲𑁂𑀦 𑀤𑀸𑀦𑀸𑀤𑀻𑀦𑀁 𑀤𑀲𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀦𑀁 𑀯𑀲𑁂𑀦 𑀙𑀲𑀼 𑀆𑀭𑀫𑁆𑀫𑀡𑁂𑀲𑀼 𑀧𑀯𑀢𑁆𑀢𑀢𑀺, 𑀇𑀤𑀁 𑀯𑀺𑀧𑀸𑀓𑀘𑀺𑀢𑁆𑀢𑀁 𑀢𑀣𑀸 𑀦 𑀧𑀯𑀢𑁆𑀢𑀢𑀺. 𑀳𑀺 𑀲𑀘𑁆𑀘𑀁 𑀇𑀤𑀁 𑀯𑀺𑀧𑀸𑀓𑀁 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀘𑀼𑀢𑀺𑀢𑀤𑀸𑀭𑀫𑁆𑀫𑀡𑀯𑀲𑁂𑀦 𑀧𑀭𑀺𑀢𑁆𑀢𑀥𑀫𑁆𑀫𑀧𑀭𑀺𑀬𑀸𑀧𑀦𑁆𑀦𑁂𑀲𑀼 𑀓𑀸𑀫𑀸𑀯𑀘𑀭𑀥𑀫𑁆𑀫𑀦𑁆𑀢𑁄𑀕𑀥𑁂𑀲𑀼 𑀙𑀲𑀼 𑀆𑀭𑀫𑁆𑀫𑀡𑁂𑀲𑀼 𑀧𑀯𑀢𑁆𑀢𑀢𑀺. 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀜𑁆𑀘 𑀯𑀺𑀲𑁂𑀲𑁂 𑀅𑀲𑀢𑀺𑀧𑀺 𑀓𑀼𑀲𑀮𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀢𑁄 𑀅𑀲𑁆𑀲 𑀯𑀺𑀧𑀸𑀓𑀲𑁆𑀲, 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀜𑁆𑀘 𑀦𑀸𑀦𑀢𑁆𑀢𑁂 𑀅𑀲𑀢𑀺𑀧𑀺 𑀇𑀤𑀁 𑀯𑀺𑀧𑀸𑀓𑀁 𑀆𑀤𑀸𑀲𑀢𑀮𑀸𑀤𑀻𑀲𑀼 𑀥𑀫𑁆𑀫𑀚𑀸𑀢𑁂𑀲𑀼 𑀫𑀼𑀔𑀦𑀺𑀫𑀺𑀢𑁆𑀢𑀁 𑀯𑀺𑀬 𑀦𑀺𑀭𑀼𑀲𑁆𑀲𑀸𑀳𑀁. 𑀅𑀬𑀫𑀲𑁆𑀲𑀸𑀥𑀺𑀧𑁆𑀧𑀸𑀬𑁄 𑁋 𑀬𑀣𑀸 𑀆𑀤𑀸𑀲𑀢𑀮𑁂 𑀫𑀼𑀔𑀦𑀺𑀫𑀺𑀢𑁆𑀢𑀁 𑀫𑀼𑀔𑁂 𑀘𑀮𑀺𑀢𑁂 𑀘𑀮𑀢𑀺, 𑀅𑀘𑀮𑀺𑀢𑁂 𑀦 𑀘𑀮𑀢𑀺, 𑀫𑀼𑀔𑀲𑁆𑀲 𑀓𑀸𑀭𑀡𑀁 𑀯𑀺𑀦𑀸 𑀫𑀼𑀔𑀦𑀺𑀫𑀺𑀢𑁆𑀢𑀲𑁆𑀲 𑀯𑀺𑀬 𑀓𑀸𑀭𑀡𑀁 𑀦𑀢𑁆𑀣𑀺, 𑀏𑀯𑀁 𑀓𑀼𑀲𑀮𑀓𑀸𑀭𑀡𑀸 𑀯𑀺𑀧𑀸𑀓𑀲𑁆𑀲 𑀅𑀜𑁆𑀜𑀁 𑀓𑀸𑀭𑀡𑀁 𑀦𑀢𑁆𑀣𑀺, 𑀦𑀺𑀭𑀼𑀲𑁆𑀲𑀸𑀳𑀁 𑀯𑀺𑀧𑀸𑀓𑀁.

𑁩𑁨. 𑀓𑀸𑀫𑀸𑀯𑀘𑀭𑀤𑁂𑀯𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀇𑀫𑁂 𑀅𑀝𑁆𑀞 𑀫𑀳𑀸𑀯𑀺𑀧𑀸𑀓𑀸 𑀤𑀼𑀳𑁂𑀢𑀼𑀓𑀢𑀺𑀳𑁂𑀢𑀼𑀓𑀸𑀦𑀁 𑀓𑀸𑀫𑀸𑀯𑀘𑀭𑀤𑁂𑀯𑀸𑀦𑀁, 𑀫𑀦𑀼𑀲𑁆𑀲𑀸𑀦𑀜𑁆𑀘 𑀧𑀝𑀺𑀲𑀦𑁆𑀥𑀺𑀬𑁄 𑀪𑀯𑀦𑁆𑀢𑀺.

𑁩𑁩-𑁪. 𑀢𑀢𑁄 𑀧𑀭𑀁 𑀧𑀯𑀢𑁆𑀢𑀺𑀬𑀁 𑀬𑀸𑀯𑀢𑀸𑀬𑀼𑀓𑀁 𑀪𑀯𑀗𑁆𑀕𑀁 𑀳𑀼𑀢𑁆𑀯𑀸 𑀩𑀮𑀯𑀸𑀭𑀫𑁆𑀫𑀡𑁂 𑀅𑀢𑀺𑀫𑀳𑀦𑁆𑀢𑀯𑀺𑀪𑀽𑀢𑀸𑀭𑀫𑁆𑀫𑀡𑁂 𑀢𑀤𑀸𑀭𑀫𑁆𑀫𑀡𑀜𑁆𑀘 𑀳𑀼𑀢𑁆𑀯𑀸 𑀢𑀢𑁄 𑀧𑀭𑀁 𑀫𑀭𑀡𑀓𑀸𑀮𑀲𑁆𑀫𑀺𑀁 𑀘𑀼𑀢𑀺 𑀳𑀼𑀢𑁆𑀯𑀸 𑀧𑀯𑀢𑁆𑀢𑀦𑁆𑀢𑀺, 𑀏𑀯𑀁 𑀇𑀫𑀺𑀦𑀸 𑀫𑀬𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀯𑀺𑀧𑀘𑁆𑀘𑀦𑁆𑀢𑀺 𑀯𑀺𑀧𑀸𑀓𑀪𑀸𑀯𑁂𑀦 𑀚𑀸𑀬𑀦𑁆𑀢𑀺.

𑁩𑁫. 𑀲𑀪𑀽𑀫𑀺𑀓𑀼𑀲𑀮𑁂𑀳𑁂𑀯 𑀫𑀳𑀸𑀧𑀸𑀓𑀸 𑀲𑀫𑀸 𑀯𑀺𑀦𑀸 𑀫𑀳𑀸𑀧𑀸𑀓𑀸 𑀓𑀫𑁆𑀫𑀤𑁆𑀯𑀸𑀭𑀁 𑀓𑀫𑁆𑀫𑀓𑀸𑀭𑀡𑀁 𑀯𑀺𑀦𑀸, 𑀓𑀫𑁆𑀫𑀜𑁆𑀘 𑀫𑀳𑀸𑀧𑀼𑀜𑁆𑀜𑀸𑀦𑀁 𑀓𑀺𑀭𑀺𑀬𑀯𑀢𑁆𑀣𑀼𑀓𑀁 𑀯𑀺𑀦𑀸 𑀯𑀚𑁆𑀚𑁂𑀢𑁆𑀯𑀸 𑀲𑀪𑀽𑀫𑀺𑀓𑀼𑀲𑀮𑁂𑀳𑁂𑀯 𑀅𑀢𑁆𑀢𑀦𑁄 𑀪𑀽𑀫𑀺𑀬𑀁 𑀧𑀯𑀢𑁆𑀢𑁂𑀳𑀺 𑀓𑀼𑀲𑀮𑁂𑀳𑀺 𑀏𑀯 𑀲𑀫𑀸 𑀲𑀤𑀺𑀲𑀸. 𑀓𑀫𑁆𑀫𑀤𑁆𑀯𑀸𑀭𑀁 𑀦𑀸𑀫 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀓𑀫𑁆𑀫𑀤𑁆𑀯𑀸𑀭𑀁, 𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀓𑀫𑁆𑀫𑀤𑁆𑀯𑀸𑀭𑀁, 𑀪𑀯𑀗𑁆𑀕𑀲𑀗𑁆𑀔𑀸𑀢𑀁 𑀫𑀦𑁄𑀤𑁆𑀯𑀸𑀭𑀁, 𑀇𑀢𑀺 𑀢𑀺𑀯𑀺𑀥𑀁 𑀓𑀫𑁆𑀫𑀤𑁆𑀯𑀸𑀭𑀁 𑀓𑀫𑁆𑀫𑀓𑀸𑀭𑀡𑀁. 𑀓𑀫𑁆𑀫𑀁 𑀦𑀸𑀫 𑀅𑀝𑁆𑀞𑀓𑀸𑀫𑀸𑀯𑀘𑀭𑀓𑀼𑀲𑀮𑀘𑁂𑀢𑀦𑀸 𑀇𑀥 𑀅𑀥𑀺𑀧𑁆𑀧𑁂𑀢𑀸.

𑁩𑁬. 𑀧𑀸𑀓𑀸 𑀓𑀼𑀲𑀮𑀯𑀺𑀧𑀸𑀓𑀸 𑀅𑀯𑀺𑀜𑁆𑀜𑀢𑁆𑀢𑀺𑀚𑀦𑀢𑁆𑀢𑀸 𑀘 𑀯𑀺𑀜𑁆𑀜𑀢𑁆𑀢𑀺 𑀘 𑀯𑀺𑀜𑁆𑀜𑀢𑁆𑀢𑀺 𑀘 𑀯𑀺𑀜𑁆𑀜𑀢𑁆𑀢𑀺𑀯𑀺𑀜𑁆𑀜𑀢𑁆𑀢𑀺𑀬𑁄𑀢𑀺 𑀯𑀢𑁆𑀢𑀩𑁆𑀩𑁂 𑀲𑀭𑀽𑀧𑁂𑀓𑀲𑁂𑀲𑀁 𑀓𑀢𑁆𑀯𑀸 ‘‘𑀯𑀺𑀜𑁆𑀜𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀸 𑀚𑀦𑁂𑀦𑁆𑀢𑀻𑀢𑀺 𑀯𑀺𑀜𑁆𑀜𑀢𑁆𑀢𑀺𑀚𑀦𑀸, 𑀦 𑀯𑀺𑀜𑁆𑀜𑀢𑁆𑀢𑀺𑀚𑀦𑀸 𑀅𑀯𑀺𑀜𑁆𑀜𑀢𑁆𑀢𑀺𑀚𑀦𑀸, 𑀢𑁂𑀲𑀁 𑀪𑀸𑀯𑁄 𑀅𑀯𑀺𑀜𑁆𑀜𑀢𑁆𑀢𑀺𑀚𑀦𑀢𑁆𑀢𑀁. 𑀢𑀲𑁆𑀫𑀸 𑀅𑀯𑀺𑀜𑁆𑀜𑀢𑁆𑀢𑀺𑀚𑀦𑀢𑁆𑀢𑀸 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀲𑀗𑁆𑀔𑀸𑀢𑀸𑀦𑀁 𑀓𑀫𑁆𑀫𑀤𑁆𑀯𑀸𑀭𑀸𑀦𑀁 𑀅𑀚𑀦𑀓𑀢𑁆𑀢𑀸 𑀫𑀦𑁄𑀤𑁆𑀯𑀸𑀭𑀲𑀗𑁆𑀔𑀸𑀢𑀲𑁆𑀲 𑀓𑀫𑁆𑀫𑀤𑁆𑀯𑀸𑀭𑀲𑁆𑀲 𑀯𑀲𑁂𑀦 𑀘 𑀅𑀧𑁆𑀧𑀯𑀢𑁆𑀢𑀦𑀢𑁄 𑀅𑀯𑀺𑀧𑀸𑀓𑀲𑀪𑀸𑀯𑀢𑁄 𑀘 𑀅𑀓𑀫𑁆𑀫𑀪𑀸𑀯𑀢𑁄 𑀘 𑀅𑀧𑁆𑀧𑀯𑀢𑁆𑀢𑀦𑀢𑁄 𑀘𑁂𑀯 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼𑀯𑀲𑁂𑀦 𑀅𑀧𑁆𑀧𑀯𑀢𑁆𑀢𑀦𑀢𑁄 𑀘𑁂𑀯 𑀧𑀼𑀜𑁆𑀜𑁂𑀳𑀺 𑀦𑁄 𑀲𑀫𑀸 𑀅𑀲𑀤𑀺𑀲𑀸.

𑁩𑁭-𑁯. 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸 𑀳𑀺 𑀢𑁂𑀲𑀫𑁂𑀓𑀦𑁆𑀢𑀢𑁄 𑀢𑁂𑀲𑀁 𑀯𑀺𑀧𑀸𑀓𑀸𑀦𑀁 𑀏𑀓𑀦𑁆𑀢𑀢𑁄 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸 𑀓𑀸𑀫𑀸𑀯𑀘𑀭𑀸𑀭𑀫𑁆𑀫𑀡𑀢𑁆𑀢𑀸 𑀢𑁂𑀲𑀼 𑀯𑀺𑀧𑀸𑀓𑁂𑀲𑀼 𑀲𑀢𑁆𑀢𑀧𑀜𑁆𑀜𑀢𑁆𑀢𑀺𑀓𑀸𑀭𑀫𑁆𑀫𑀡𑀸 𑀓𑀭𑀼𑀡𑀸𑀫𑀼𑀤𑀺𑀢𑀸 𑀓𑀤𑀸𑀘𑀺 𑀓𑀺𑀲𑁆𑀫𑀺𑀜𑁆𑀘𑀺 𑀓𑀸𑀮𑁂 𑀦 𑀚𑀸𑀬𑀦𑁆𑀢𑀺, 𑀢𑀣𑀸 𑀏𑀯𑀁 𑀢𑀺𑀲𑁆𑀲𑁄 𑀧𑀦 𑀯𑀺𑀭𑀢𑀺𑀬𑁄 𑀏𑀢𑁂𑀲𑀼 𑀯𑀺𑀧𑀸𑀓𑁂𑀲𑀼 𑀦 𑀚𑀸𑀬𑀦𑁆𑀢𑀺, 𑀳𑀺 𑀓𑀲𑁆𑀫𑀸 𑀓𑀸𑀭𑀡𑀸 𑀦 𑀚𑀸𑀬𑀦𑁆𑀢𑀺, 𑀧𑀜𑁆𑀘 𑀲𑀺𑀓𑁆𑀔𑀸𑀧𑀤𑀸 𑀓𑀼𑀲𑀮𑀸𑀢𑀺 𑀓𑀼𑀲𑀮𑀸 𑀦𑀸𑀫𑀸𑀢𑀺 𑀲𑀢𑁆𑀣𑀼𑀦𑀸 𑀯𑀼𑀢𑁆𑀢𑀸 𑀬𑀲𑁆𑀫𑀸 𑀓𑀸𑀭𑀡𑀸, 𑀢𑀲𑁆𑀫𑀸 𑀦 𑀚𑀸𑀬𑀦𑁆𑀢𑀺. 𑀢𑀣𑀸𑀥𑀺𑀧𑀢𑀺𑀦𑁄𑀧𑁂𑀢𑁆𑀣 𑀢𑀣𑀸 𑀏𑀯𑀫𑁂𑀯 𑀘𑀢𑁆𑀢𑀸𑀭𑁄 𑀅𑀥𑀺𑀧𑀢𑀺𑀦𑁄𑀧𑀺 𑀏𑀢𑁂𑀲𑀼 𑀯𑀺𑀧𑀸𑀓𑁂𑀲𑀼 𑀦 𑀲𑀦𑁆𑀢𑀺. 𑀓𑀲𑁆𑀫𑀸? 𑀙𑀦𑁆𑀤𑀸𑀤𑀻𑀦𑀺 𑀥𑀫𑁆𑀫𑀚𑀸𑀢𑀸𑀦𑀺 𑀧𑀼𑀭𑁂𑀢𑀭𑀁 𑀓𑀢𑁆𑀯𑀸 𑀅𑀦𑀼𑀧𑁆𑀧𑀚𑁆𑀚𑀦𑀢𑁄 𑀦 𑀲𑀦𑁆𑀢𑀺, 𑀇𑀢𑀺 𑀯𑀘𑀦𑀁 𑀯𑀺𑀦𑀺𑀤𑁆𑀤𑀺𑀲𑁂 𑀆𑀘𑀭𑀺𑀬𑁄 𑀓𑀣𑁂𑀬𑁆𑀬.

𑁪𑁦. 𑀅𑀲𑀗𑁆𑀔𑀸𑀭𑀲𑀲𑀗𑁆𑀔𑀸𑀭𑀯𑀺𑀥𑀸𑀦𑀁 𑀧𑀦 𑀧𑀼𑀜𑁆𑀜𑀢𑁄 𑀯𑀺𑀧𑀸𑀓𑁂𑀲𑀼 𑀅𑀲𑀗𑁆𑀔𑀸𑀭𑀲𑀲𑀗𑁆𑀔𑀸𑀭𑀯𑀺𑀥𑀸𑀦𑀁 𑀧𑀼𑀜𑁆𑀜𑀢𑁄 𑀓𑀼𑀲𑀮𑀢𑁄 𑀆𑀕𑀫𑀦𑀯𑀲𑁂𑀦 𑀜𑁂𑀬𑁆𑀬𑀁. 𑀢𑀢𑁆𑀣 𑀏𑀓𑀘𑁆𑀘𑀸𑀦𑀁 𑀆𑀘𑀭𑀺𑀬𑀸𑀦𑀁 𑀫𑀢𑁂𑀦 𑀫𑀼𑀔𑁂 𑀘𑀮𑀺𑀢𑁂 𑀆𑀤𑀸𑀲𑀢𑀮𑁂 𑀫𑀼𑀔𑀦𑀺𑀫𑀺𑀢𑁆𑀢𑀘𑀮𑀦𑀁 𑀯𑀺𑀬 𑀅𑀲𑀗𑁆𑀔𑀸𑀭𑀲𑁆𑀲 𑀓𑀼𑀲𑀮𑀲𑁆𑀲 𑀯𑀺𑀧𑀸𑀓𑁄 𑀅𑀲𑀗𑁆𑀔𑀸𑀭𑁄 𑀳𑁄𑀢𑀺, 𑀲𑀲𑀗𑁆𑀔𑀸𑀭𑀲𑁆𑀲 𑀓𑀼𑀲𑀮𑀲𑁆𑀲 𑀯𑀺𑀧𑀸𑀓𑁄 𑀲𑀲𑀗𑁆𑀔𑀸𑀭𑁄 𑀳𑁄𑀢𑀺, 𑀏𑀯𑀁 𑀆𑀕𑀫𑀦𑀯𑀲𑁂𑀦 𑀜𑁂𑀬𑁆𑀬𑀁. 𑀧𑀘𑁆𑀘𑀬𑀢𑁄 𑀘𑁂𑀯 𑀜𑁂𑀬𑁆𑀬𑀁 𑀢𑀢𑁆𑀣 𑀏𑀓𑀘𑁆𑀘𑀸𑀦𑀁 𑀆𑀘𑀭𑀺𑀬𑀸𑀦𑀁 𑀫𑀢𑁂𑀦 𑀩𑀮𑀯𑀦𑁆𑀢𑁂𑀳𑀺 𑀯𑀺𑀪𑀽𑀢𑁂𑀳𑀺 𑀧𑀘𑁆𑀘𑀬𑁂𑀳𑀺 𑀓𑀫𑁆𑀫𑀸𑀤𑀻𑀳𑀺 𑀉𑀧𑁆𑀧𑀦𑁆𑀦𑁄 𑀅𑀲𑀗𑁆𑀔𑀸𑀭𑁄 𑀤𑀼𑀩𑁆𑀩𑀮𑁂𑀳𑀺 𑀲𑀲𑀗𑁆𑀔𑀸𑀭𑁄𑀢𑀺 𑀏𑀯𑀁 𑀧𑀘𑁆𑀘𑀬𑀯𑀲𑁂𑀦 𑀯𑀺𑀜𑁆𑀜𑁂𑀬𑁆𑀬𑀁 𑀚𑀸𑀦𑀺𑀢𑀩𑁆𑀩𑀁.

𑁪𑁧-𑁨. 𑀳𑀻𑀦𑀸𑀤𑀻𑀦𑀁 𑀧𑀼𑀜𑁆𑀜𑀸𑀦𑀁 𑀯𑀺𑀧𑀸𑀓𑀢𑁆𑀢𑀸 𑀳𑀻𑀦𑀸𑀤𑀬𑁄 𑀯𑀺𑀧𑀸𑀓𑀸 𑀧𑀼𑀜𑁆𑀜𑀯𑀸𑀤𑀺𑀦𑀸 𑀚𑀺𑀦𑁂𑀦 𑀧𑀭𑀺𑀤𑀻𑀧𑀺𑀢𑀸 𑀪𑀯𑀦𑁆𑀢𑀺, 𑀇𑀢𑀺 𑀏𑀯𑀁 𑀇𑀫𑀺𑀦𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀧𑀯𑀢𑁆𑀢𑀁 𑀇𑀤𑀁 𑀅𑀝𑁆𑀞𑀯𑀺𑀥𑀁 𑀘𑀺𑀢𑁆𑀢𑀁 𑀏𑀓𑀦𑁆𑀢𑁂𑀦 𑀲𑀯𑀢𑁆𑀣𑀼𑀓𑀁 𑀓𑀸𑀫𑀮𑁄𑀓𑀲𑁆𑀫𑀺𑀁 𑀚𑀸𑀬𑀢𑁂, 𑀅𑀜𑁆𑀜𑀢𑁆𑀣 𑀧𑀦 𑀅𑀜𑁆𑀜𑀸𑀲𑀼 𑀪𑀽𑀫𑀻𑀲𑀼 𑀦 𑀚𑀸𑀬𑀢𑁂.

𑀯𑀺𑀜𑁆𑀜𑀸𑀡𑀧𑀜𑁆𑀘𑀓𑀁 𑀦𑀺𑀬𑀢𑀸𑀭𑀫𑁆𑀫𑀡𑀦𑁆𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀭𑀽𑀧𑀫𑁂𑀯 𑀆𑀭𑀫𑁆𑀫𑀡𑀁, 𑀦 𑀲𑀤𑁆𑀤𑀸𑀤𑀬𑁄. 𑀲𑁂𑀲𑀢𑁆𑀢𑀬𑀁 𑀬𑀤𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀕𑀳𑀺𑀢𑀁 𑀆𑀭𑀫𑁆𑀫𑀡𑀁 𑀓𑀭𑁄𑀢𑀺, 𑀢𑀤𑀸𑀲𑁆𑀲 𑀭𑀽𑀧𑀁 𑀆𑀭𑀫𑁆𑀫𑀡𑀁 𑀳𑁄𑀢𑀺. 𑀬𑀤𑀸 𑀲𑁄𑀢𑀯𑀺𑀜𑁆𑀜𑀸𑀡𑁂𑀦 𑀕𑀳𑀺𑀢𑀁, 𑀢𑀤𑀸𑀲𑁆𑀲 𑀲𑀤𑁆𑀤𑁄 𑀆𑀭𑀫𑁆𑀫𑀡𑁄 𑀳𑁄𑀢𑀺. 𑀬𑀤𑀸 𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀯𑀺𑀜𑁆𑀜𑀸𑀡𑁂𑀳𑀺 𑀕𑀳𑀺𑀢𑀸𑀦𑀺 𑀆𑀭𑀫𑁆𑀫𑀡𑀸𑀦𑀺 𑀓𑀭𑁄𑀦𑁆𑀢𑀺, 𑀢𑀤𑀸𑀲𑁆𑀲 𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀸𑀭𑀫𑁆𑀫𑀡𑀸𑀦𑀺 𑀳𑁄𑀦𑁆𑀢𑀺. 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀤𑁆𑀯𑀬𑀁 𑀬𑀤𑀸 𑀢𑀤𑀸𑀭𑀫𑁆𑀫𑀡𑀁 𑀳𑁄𑀢𑀺, 𑀢𑀤𑀸 𑀙𑀆𑀭𑀫𑁆𑀫𑀡𑀁 𑀳𑁄𑀢𑀺, 𑀏𑀯𑀁 𑀅𑀦𑀺𑀬𑀢𑀸𑀭𑀫𑁆𑀫𑀡𑀁 𑀳𑁄𑀢𑀺.

𑀭𑀽𑀧𑀸𑀭𑀫𑁆𑀫𑀡𑀸𑀬 𑀓𑀺𑀭𑀺𑀬𑀸𑀫𑀦𑁄𑀥𑀸𑀢𑀼𑀬𑀸 𑀅𑀧𑀕𑀫𑁄 𑀧𑀤𑀝𑁆𑀞𑀸𑀦𑀁 𑀆𑀲𑀦𑁆𑀦𑀓𑀸𑀭𑀡𑀁 𑀏𑀢𑀲𑁆𑀲𑀸𑀢𑀺 𑀅𑀧𑀕𑀫𑀧𑀤𑀝𑁆𑀞𑀸𑀦𑀁, 𑀢𑀸𑀬 𑀆𑀯𑀚𑁆𑀚𑀦𑀁 𑀓𑀢𑁆𑀯𑀸 𑀞𑀺𑀢𑀸𑀬 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀤𑀲𑁆𑀲𑀦𑀓𑀺𑀘𑁆𑀘𑀁 𑀓𑀭𑀻𑀬𑀢𑀻𑀢𑀺 𑀅𑀢𑁆𑀣𑁄. 𑀢𑀣𑀸𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀁 𑀲𑀫𑁆𑀧𑀝𑀺𑀘𑁆𑀙𑀦𑀪𑀸𑀯𑁂𑀦 𑀕𑀬𑁆𑀳𑀸𑀓𑀸𑀭𑀁. 𑀲𑀦𑁆𑀢𑀻𑀭𑀡𑀸𑀤𑀺𑀭𑀲𑀸 𑀲𑁄𑀫𑀦𑀲𑁆𑀲𑀬𑀼𑀢𑁆𑀢𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀦𑁆𑀢𑀻𑀭𑀡𑀢𑀤𑀸𑀭𑀫𑁆𑀫𑀡𑀭𑀲𑀸, 𑀉𑀧𑁂𑀓𑁆𑀔𑀸𑀬𑀼𑀢𑁆𑀢𑀸 𑀧𑀦 𑀲𑀦𑁆𑀢𑀻𑀭𑀡𑀢𑀤𑀸𑀭𑀫𑁆𑀫𑀡𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀘𑀼𑀢𑀺𑀭𑀲𑀸, 𑀢𑀣𑀸𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀲𑀦𑁆𑀢𑀻𑀭𑀡𑀸𑀤𑀺𑀪𑀸𑀯𑁂𑀦 𑀕𑀬𑁆𑀳𑀸𑀓𑀸𑀭𑀁.

𑁪𑁩. 𑀓𑀸𑀫𑀸𑀯𑀘𑀭𑀧𑀼𑀜𑁆𑀜𑀲𑁆𑀲 𑀓𑀸𑀫𑀸𑀯𑀘𑀭𑀓𑀼𑀲𑀮𑀲𑁆𑀲 𑀲𑁄𑀴𑀲 𑀯𑀺𑀧𑀸𑀓𑀸 𑀳𑁄𑀦𑁆𑀢𑀺. 𑀇𑀢𑀺 𑀬𑀁 𑀯𑀘𑀦𑀁 𑀯𑀼𑀢𑁆𑀢𑀁, 𑀢𑀁 𑀯𑀘𑀦𑀁 𑀢𑀺𑀳𑁂𑀢𑀼𑀓𑀧𑀼𑀜𑁆𑀜𑀲𑁆𑀲 𑀉𑀓𑁆𑀓𑀝𑁆𑀞𑀲𑁆𑀲 𑀯𑀲𑁂𑀦 𑀆𑀘𑀭𑀺𑀬𑁄 𑀧𑀭𑀺𑀤𑀻𑀧𑀬𑁂. 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄 𑁋 𑀙𑀦𑁆𑀤𑀸𑀥𑀺𑀧𑀢𑁂𑀬𑁆𑀬𑀸𑀤𑀻𑀦𑀁 𑀯𑀲𑁂𑀦 𑀉𑀓𑁆𑀓𑀝𑁆𑀞𑀢𑀺𑀳𑁂𑀢𑀼𑀓𑀓𑀼𑀲𑀮𑀁 𑀓𑀸𑀫𑀲𑀼𑀕𑀢𑀺𑀬𑀁 𑀢𑀺𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀁 𑀤𑀢𑁆𑀯𑀸 𑀧𑀯𑀢𑁆𑀢𑁂 𑀅𑀝𑁆𑀞 𑀅𑀳𑁂𑀢𑀼𑀓𑀓𑀼𑀲𑀮𑀯𑀺𑀧𑀸𑀓𑀸𑀦𑀺, 𑀅𑀝𑁆𑀞 𑀫𑀳𑀸𑀓𑀼𑀲𑀮𑀯𑀺𑀧𑀸𑀓𑀸𑀦𑀻𑀢𑀺 𑀲𑁄𑀴𑀲 𑀧𑀸𑀓𑀸𑀦𑀺 𑀦𑀺𑀧𑁆𑀨𑀸𑀤𑁂𑀢𑀺.

𑁪𑁪. 𑀓𑀼𑀲𑀮𑀸𑀦𑀼𑀕𑀢𑀁 𑀓𑀢𑁆𑀯𑀸 𑀪𑀸𑀚𑀺𑀢𑀁 𑀓𑀺𑀁 𑀫𑀳𑀕𑁆𑀕𑀢𑀁 𑀯𑀺𑀧𑀸𑀓𑀘𑀺𑀢𑁆𑀢𑀁 𑀓𑀼𑀲𑀮𑀸𑀦𑀼𑀕𑀢𑀁 𑀓𑀼𑀲𑀮𑀁 𑀅𑀦𑀼𑀕𑀢𑀁 𑀓𑀢𑁆𑀯𑀸 𑀫𑀳𑀕𑁆𑀕𑀢𑀓𑀼𑀲𑀮𑀘𑀺𑀢𑁆𑀢𑁂𑀦 𑀲𑀫𑀸𑀦𑀁 𑀓𑀢𑁆𑀯𑀸 𑀪𑀕𑀯𑀢𑀸 𑀪𑀸𑀚𑀺𑀢𑀁 𑀤𑁂𑀲𑀺𑀢𑀁. 𑀓𑀺𑀁 𑀓𑁂𑀦 𑀓𑀸𑀭𑀡𑁂𑀦? 𑀓𑀸𑀫𑀸𑀯𑀘𑀭𑀧𑀼𑀜𑁆𑀜𑀁𑀯 𑀓𑀸𑀫𑀸𑀯𑀘𑀭𑀓𑀼𑀲𑀮𑀁 𑀇𑀯 𑀅𑀲𑀫𑀸𑀦𑀨𑀮𑀁 𑀦𑀢𑁆𑀣𑀺 𑀬𑀢𑁄 𑀬𑀲𑁆𑀫𑀸 𑀓𑀸𑀭𑀡𑀸, 𑀢𑀲𑁆𑀫𑀸 𑀯𑀺𑀧𑀸𑀓𑀁 𑀓𑀼𑀲𑀮𑀸𑀦𑀼𑀕𑀢𑀁 𑀓𑀢𑁆𑀯𑀸 𑀪𑀕𑀯𑀢𑀸 𑀪𑀸𑀚𑀺𑀢𑀁 𑀤𑁂𑀲𑀺𑀢𑀁. 𑀓𑀸𑀫𑀸𑀯𑀘𑀭𑀧𑀼𑀜𑁆𑀜𑀁𑀯𑀸𑀢𑀺 𑀬𑀣𑀸 𑀅𑀝𑁆𑀞𑀯𑀺𑀥𑁂𑀲𑀼 𑀓𑀸𑀫𑀸𑀯𑀘𑀭𑀓𑀼𑀲𑀮𑁂𑀲𑀼 𑀉𑀓𑁆𑀓𑀝𑁆𑀞𑀢𑀺𑀳𑁂𑀢𑀼𑀓𑀓𑀼𑀲𑀮𑀁 𑀓𑀸𑀫𑀲𑀼𑀕𑀢𑀺𑀬𑀁 𑀢𑀺𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀁 𑀤𑀢𑁆𑀯𑀸 𑀧𑀯𑀢𑁆𑀢𑁂 𑀲𑁄𑀴𑀲 𑀓𑀼𑀲𑀮𑀯𑀺𑀧𑀸𑀓𑀸𑀦𑀺 𑀦𑀺𑀧𑁆𑀨𑀸𑀤𑁂𑀢𑀺, 𑀢𑀺𑀳𑁂𑀢𑀼𑀓𑀑𑀫𑀓𑀜𑁆𑀘 𑀤𑀼𑀳𑁂𑀢𑀼𑀓𑀉𑀓𑁆𑀓𑀝𑁆𑀞𑀜𑁆𑀘 𑀓𑀸𑀫𑀲𑀼𑀕𑀢𑀺𑀬𑀁 𑀤𑀼𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀁 𑀤𑀢𑁆𑀯𑀸 𑀧𑀯𑀢𑁆𑀢𑁂 𑀢𑀺𑀳𑁂𑀢𑀼𑀓𑀯𑀺𑀭𑀳𑀺𑀢𑀸𑀦𑀺 𑀅𑀳𑁂𑀢𑀼𑀓𑀤𑀼𑀳𑁂𑀢𑀼𑀓𑀲𑀗𑁆𑀔𑀸𑀢𑀸𑀦𑀺 𑀯𑀺𑀧𑀸𑀓𑀸𑀦𑀺 𑀦𑀺𑀧𑁆𑀨𑀸𑀤𑁂𑀢𑀺, 𑀤𑀼𑀳𑁂𑀢𑀼𑀓𑀑𑀫𑀓𑀁 𑀧𑀦 𑀓𑀸𑀫𑀲𑀼𑀕𑀢𑀺𑀬𑀁 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀁 𑀤𑀢𑁆𑀯𑀸 𑀧𑀯𑀢𑁆𑀢𑁂 𑀅𑀝𑁆𑀞 𑀅𑀳𑁂𑀢𑀼𑀓𑀯𑀺𑀧𑀸𑀓𑀸𑀦𑀺 𑀦𑀺𑀧𑁆𑀨𑀸𑀤𑁂𑀢𑀺, 𑀏𑀯𑀁 𑀓𑀸𑀫𑀸𑀯𑀘𑀭𑀧𑀼𑀜𑁆𑀜𑀁 𑀅𑀲𑀫𑀸𑀦𑀨𑀮𑀁𑀯 𑀳𑁄𑀢𑀺.

𑁪𑁫. 𑀕𑀚𑀸𑀤𑀻𑀦𑀁 𑀙𑀸𑀬𑀸 𑀕𑀚𑀸𑀤𑀺𑀲𑀤𑀺𑀲𑀸 𑀳𑁄𑀢𑀺 𑀬𑀣𑀸, 𑀏𑀯𑀁 𑀫𑀳𑀕𑁆𑀕𑀢𑀯𑀺𑀧𑀸𑀓𑀁 𑀲𑀩𑁆𑀩𑀣𑀸 𑀲𑀩𑁆𑀩𑀧𑀓𑀸𑀭𑁂𑀦 𑀅𑀢𑁆𑀢𑀦𑁄 𑀓𑀼𑀲𑀮𑁂𑀳𑁂𑀯 𑀲𑀫𑀸𑀦𑀁 𑀳𑁄𑀢𑀺.

𑁪𑁬-𑁭. 𑀓𑀸𑀫𑀸𑀯𑀘𑀭𑀧𑀼𑀜𑁆𑀜𑀁𑀯 𑀦𑀸𑀧𑀭𑀸𑀧𑀭𑀺𑀬𑀯𑁂𑀤𑀦𑀁 𑀇𑀤𑀁 𑀫𑀳𑀕𑁆𑀕𑀢𑀓𑀼𑀲𑀮𑀁 𑀓𑀸𑀫𑀸𑀯𑀘𑀭𑀧𑀼𑀜𑁆𑀜𑀁𑀯 𑀅𑀧𑀭𑀸𑀧𑀭𑀺𑀬𑀯𑁂𑀤𑀦𑀁 𑀅𑀧𑀭𑀲𑁆𑀫𑀺𑀁 𑀪𑀯𑁂 𑀨𑀮𑀤𑀸𑀬𑀓𑀁 𑀦 𑀳𑁄𑀢𑀺, 𑀛𑀸𑀦𑀸 𑀅𑀧𑀭𑀺𑀳𑀻𑀦𑀲𑁆𑀲 𑀪𑀯𑀕𑀸𑀫𑀺𑀦𑁄 𑀧𑀝𑀺𑀲𑀦𑁆𑀥𑀺𑀕𑀸𑀫𑀺𑀦𑁄 𑀲𑀢𑁆𑀢𑀲𑁆𑀲 𑀓𑀼𑀲𑀮𑀸𑀦𑀦𑁆𑀢𑀭𑀁𑀬𑁂𑀯 𑀨𑀮𑀁 𑀉𑀧𑁆𑀧𑀚𑁆𑀚𑀢𑀺, 𑀇𑀢𑀺 𑀘 𑀜𑀸𑀧𑀦𑀢𑁆𑀣𑀁 𑀏𑀢𑀲𑁆𑀲 𑀫𑀳𑀕𑁆𑀕𑀢𑀯𑀺𑀧𑀸𑀓𑀲𑁆𑀲 𑀓𑀼𑀲𑀮𑀸𑀦𑀼𑀕𑀢𑀁 𑀓𑀼𑀲𑀮𑀸𑀦𑀼𑀕𑀫𑀦𑀁 𑀪𑀕𑀯𑀢𑀸 𑀓𑀢𑀁.

𑁪𑁮. 𑀏𑀢𑁆𑀣 𑀏𑀢𑀲𑁆𑀫𑀺𑀁 𑀫𑀳𑀕𑁆𑀕𑀢𑀯𑀺𑀧𑀸𑀓𑁂 𑀧𑀝𑀺𑀧𑀤𑀸𑀓𑁆𑀓𑀫𑁄 𑀢𑁂𑀲𑀜𑁆𑀘 𑀳𑀻𑀦𑀸𑀤𑀻𑀦𑀁 𑀪𑁂𑀤𑀢𑁄 𑀛𑀸𑀦𑀸𑀕𑀫𑀦𑀢𑁄 𑀫𑀳𑀕𑁆𑀕𑀢𑀓𑀼𑀲𑀮𑀛𑀸𑀦𑀲𑁆𑀲 𑀆𑀕𑀫𑀦𑀯𑀲𑁂𑀦 𑀯𑀺𑀪𑀸𑀯𑀺𑀦𑀸 𑀧𑀡𑁆𑀟𑀺𑀢𑁂𑀦 𑀯𑁂𑀤𑀺𑀢𑀩𑁆𑀩𑁄.

𑁪𑁯. 𑀏𑀢𑁆𑀣 𑀯𑀺𑀧𑀸𑀓𑁂 𑀙𑀦𑁆𑀤𑀸𑀤𑀺𑀅𑀥𑀺𑀧𑀢𑀻𑀦𑀁 𑀅𑀪𑀸𑀯𑁄, 𑀅𑀬𑀫𑁂𑀯 𑀯𑀺𑀲𑁂𑀲𑀢𑁄 𑀓𑀼𑀲𑀮𑀢𑁄 𑀅𑀬𑀁 𑀏𑀯 𑀯𑀺𑀲𑁂𑀲𑁄, 𑀲𑁂𑀲𑀁 𑀲𑀩𑁆𑀩𑀧𑀓𑀸𑀭𑀁 𑀅𑀯𑀺𑀲𑁂𑀲𑁂𑀦 𑀓𑀼𑀲𑀮𑁂𑀦 𑀲𑀫𑀁 𑀫𑀢𑀁 𑀓𑀣𑀺𑀢𑀁 𑀪𑀕𑀯𑀢𑀸.

𑁫𑁦. 𑀲𑀼𑀜𑁆𑀜𑀢𑀁 𑀅𑀦𑀺𑀫𑀺𑀢𑁆𑀢𑀦𑁆𑀢𑀺, 𑀢𑀣𑀸𑀧𑀡𑀺𑀳𑀺𑀢𑀦𑁆𑀢𑀺𑀧𑀺 𑀲𑀼𑀜𑁆𑀜𑀢𑀁 𑀅𑀦𑀢𑁆𑀢𑀸, 𑀅𑀦𑀺𑀫𑀺𑀢𑁆𑀢𑀁 𑀅𑀦𑀺𑀘𑁆𑀘𑀁, 𑀅𑀧𑁆𑀧𑀡𑀺𑀳𑀺𑀢𑀁 𑀤𑀼𑀓𑁆𑀔𑀁 𑀇𑀢𑀺 𑀏𑀢𑀸𑀦𑀺 𑀢𑀻𑀡𑀺 𑀦𑀸𑀫𑀸𑀦𑀺 𑀫𑀕𑁆𑀕𑀲𑁆𑀲 𑀅𑀦𑀦𑁆𑀢𑀭𑁂 𑀘𑀢𑀼𑀩𑁆𑀩𑀺𑀥𑀲𑁆𑀲 𑀫𑀕𑁆𑀕𑀲𑁆𑀲 𑀅𑀦𑀦𑁆𑀢𑀭𑁂 𑀘𑀢𑀼𑀩𑁆𑀩𑀺𑀥𑁂 𑀨𑀮𑁂 𑀳𑁄𑀦𑁆𑀢𑀺.

𑁫𑁧. 𑀮𑀩𑁆𑀪𑀦𑁆𑀢𑀺 𑀧𑀭𑀪𑀸𑀕𑀲𑁆𑀫𑀺𑀁 𑀫𑀕𑁆𑀕𑀸𑀦𑀦𑁆𑀢𑀭𑁂 𑀧𑀯𑀢𑁆𑀢𑀨𑀮𑀢𑁄 𑀅𑀜𑁆𑀜𑀲𑁆𑀫𑀺𑀁 𑀓𑀸𑀮𑁂 𑀯𑀴𑀜𑁆𑀚𑀦𑀨𑀮𑁂𑀲𑀼 𑀨𑀮𑀲𑀫𑀸𑀧𑀢𑁆𑀢𑀺𑀲𑀫𑀸𑀧𑀚𑁆𑀚𑀦𑀓𑀸𑀮𑁂𑀲𑀼 𑀏𑀢𑀸𑀦𑀺 𑀢𑀻𑀡𑀺 𑀦𑀸𑀫𑀸𑀦𑀺 𑀦 𑀮𑀩𑁆𑀪𑀦𑁆𑀢𑁂, 𑀨𑀮𑁂𑀳𑀺 𑀯𑀺𑀧𑀲𑁆𑀲𑀦𑀸𑀯𑀲𑁂𑀦𑁂𑀯 𑀅𑀦𑀢𑁆𑀢𑀅𑀦𑀺𑀘𑁆𑀘𑀤𑀼𑀓𑁆𑀔𑀲𑀗𑁆𑀔𑀸𑀢𑀸𑀦𑀁 𑀢𑀺𑀡𑁆𑀡𑀁 𑀯𑀺𑀧𑀲𑁆𑀲𑀦𑀸𑀦𑀁 𑀯𑀲𑁂𑀦 𑀏𑀯 𑀢𑀸𑀦𑀺 𑀢𑀻𑀡𑀺 𑀦𑀸𑀫𑀸𑀦𑀺 𑀮𑀩𑁆𑀪𑀭𑁂 𑀨𑀮𑁂𑀳𑀺 𑀮𑀩𑁆𑀪𑀦𑁆𑀢𑁂.

𑁫𑁨. 𑀳𑁄𑀦𑁆𑀢𑀺 𑀲𑀸𑀥𑀺𑀧𑀢𑀻𑀦𑁂𑀯 𑀮𑁄𑀓𑀼𑀢𑁆𑀢𑀭𑀨𑀮𑀸𑀦𑀺 𑀢𑀼 𑀏𑀓𑀦𑁆𑀢𑀢𑁄 𑀲𑀸𑀥𑀺𑀧𑀢𑀻𑀦𑀺 𑀏𑀯 𑀳𑁄𑀦𑁆𑀢𑀺, 𑀮𑁄𑀓𑀼𑀢𑁆𑀢𑀭𑀨𑀮𑀸𑀦𑀺 𑀞𑀧𑁂𑀢𑁆𑀯𑀸 𑀅𑀜𑁆𑀜𑀲𑁆𑀫𑀺𑀁 𑀯𑀺𑀧𑀸𑀓𑁂 𑀅𑀥𑀺𑀧𑀢𑀻 𑀦𑀢𑁆𑀣𑀺.

𑁫𑁩. 𑀫𑀕𑁆𑀕𑁄 𑀅𑀢𑁆𑀢𑀦𑁄 𑀫𑀕𑁆𑀕𑀪𑀸𑀯𑁂𑀦 𑀫𑀕𑁆𑀕𑁄 𑀦𑀸𑀫 𑀯𑀼𑀘𑁆𑀘𑀢𑁂 𑀪𑀕𑀯𑀢𑀸. 𑀨𑀮𑀁 𑀫𑀕𑁆𑀕𑀁 𑀉𑀧𑀸𑀤𑀸𑀬 𑀅𑀝𑁆𑀞𑀗𑁆𑀕𑀺𑀓𑀫𑀕𑁆𑀕𑀁 𑀦𑀺𑀲𑁆𑀲𑀬𑀁 𑀓𑀢𑁆𑀯𑀸 𑀫𑀕𑁆𑀕𑁄 𑀦𑀸𑀫 𑀇𑀢𑀺 𑀯𑀘𑀦𑀁 𑀯𑀼𑀘𑁆𑀘𑀢𑁂 𑀪𑀕𑀯𑀢𑀸.

𑁫𑁪. 𑀇𑀫𑁂 𑀲𑀢𑁆𑀢 𑀅𑀓𑀼𑀲𑀮𑀯𑀺𑀧𑀸𑀓𑀸. 𑀕𑀸𑀯𑁄 𑀘𑀭𑀦𑁆𑀢𑀺 𑀏𑀢𑁆𑀣𑀸𑀢𑀺 𑀕𑁄𑀘𑀭𑁄, 𑀢𑀲𑁆𑀲𑀤𑀺𑀲𑀢𑁆𑀢𑀸 𑀕𑁄𑀘𑀭𑁄 𑀆𑀭𑀫𑁆𑀫𑀡𑀦𑁆𑀢𑀺 𑀅𑀢𑁆𑀣𑁄, 𑀅𑀦𑀺𑀝𑁆𑀞𑁄 𑀘 𑀅𑀦𑀺𑀝𑁆𑀞𑀫𑀚𑁆𑀛𑀢𑁆𑀢𑁄 𑀘 𑀅𑀦𑀺𑀝𑁆𑀞𑀸𑀦𑀺𑀝𑁆𑀞𑀫𑀚𑁆𑀛𑀢𑁆𑀢𑀸, 𑀢𑁂𑀬𑁂𑀯 𑀕𑁄𑀘𑀭𑁄 𑀅𑀦𑀺𑀝𑁆𑀞𑀸𑀦𑀺𑀝𑁆𑀞𑀫𑀚𑁆𑀛𑀢𑁆𑀢𑀕𑁄𑀘𑀭𑁄, 𑀢𑀲𑁆𑀫𑀺𑀁 𑀅𑀦𑀺𑀝𑁆𑀞𑀸𑀦𑀺𑀝𑁆𑀞𑀫𑀚𑁆𑀛𑀢𑁆𑀢𑀕𑁄𑀘𑀭𑁂 𑀯𑀢𑁆𑀢𑀭𑁂 𑀯𑀢𑁆𑀢𑀦𑁆𑀢𑀺. 𑀲𑀼𑀔𑀸𑀤𑀺𑀢𑁆𑀢𑀬𑀬𑀼𑀢𑁆𑀢𑀸 𑀢𑁂 𑀢𑁂 𑀅𑀝𑁆𑀞 𑀅𑀳𑁂𑀢𑀼𑀓𑀓𑀼𑀲𑀮𑀯𑀺𑀧𑀸𑀓𑀸 𑀲𑀼𑀔𑀸𑀤𑀺𑀢𑁆𑀢𑀬𑀬𑀼𑀢𑁆𑀢𑀸 𑀲𑀼𑀔𑀲𑁄𑀫𑀦𑀲𑁆𑀲𑀉𑀧𑁂𑀓𑁆𑀔𑀸𑀯𑁂𑀤𑀦𑀸𑀳𑀺 𑀲𑀳𑀕𑀢𑀸. 𑀤𑀼𑀓𑁆𑀔𑀼𑀧𑁂𑀓𑁆𑀔𑀸𑀬𑀼𑀢𑀸 𑀇𑀫𑁂 𑀇𑀫𑁂 𑀲𑀢𑁆𑀢 𑀅𑀳𑁂𑀢𑀼𑀓𑀅𑀓𑀼𑀲𑀮𑀯𑀺𑀧𑀸𑀓𑀸 𑀤𑀼𑀓𑁆𑀔𑀼𑀧𑁂𑀓𑁆𑀔𑀸𑀯𑁂𑀤𑀦𑀸𑀳𑀺 𑀲𑀳𑀕𑀢𑀸.

𑁫𑁫. 𑀏𑀯𑀁 𑀙𑀢𑁆𑀢𑀺𑀁𑀲𑀥𑀸 𑀧𑀸𑀓𑀁 𑀧𑀸𑀓𑀲𑀸𑀲𑀦𑀧𑀽𑀚𑀺𑀢𑁄 𑀲𑀼𑀕𑀢𑁄. 𑀓𑀺𑀁 𑀯𑀺𑀲𑀺𑀝𑁆𑀞𑁄? 𑀧𑀸𑀓𑀁 𑀦𑀸𑀫 𑀅𑀲𑀼𑀭𑀁, 𑀢𑀁 𑀲𑀸𑀲𑀢𑀺, 𑀧𑀸𑀓𑁂𑀦 𑀅𑀢𑁆𑀢𑀦𑁄 𑀧𑀼𑀜𑁆𑀜𑀨𑀮𑁂𑀦 𑀤𑁂𑀯𑁂 𑀅𑀦𑀼𑀲𑀸𑀲𑀢𑀻𑀢𑀺 𑀯𑀸 𑀧𑀸𑀓𑀲𑀸𑀲𑀦𑁄, 𑀓𑁄 𑀲𑁄? 𑀲𑀓𑁆𑀓𑁄. 𑀢𑁂𑀦 𑀧𑀸𑀓𑀲𑀸𑀲𑀦𑁂𑀦 𑀧𑀽𑀚𑀺𑀢𑁄 𑀲𑀯𑀺𑀧𑀸𑀓𑀸𑀯𑀺𑀧𑀸𑀓𑁂𑀲𑀼 𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑁂𑀲𑀼 𑀓𑀼𑀲𑀮𑁄 𑀙𑁂𑀓𑁄 𑀏𑀯𑀁 𑀇𑀫𑀺𑀦𑀸 𑀫𑀬𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀧𑀸𑀓𑀁 𑀘𑀺𑀢𑁆𑀢𑀁 𑀙𑀢𑁆𑀢𑀺𑀁𑀲𑀧𑁆𑀧𑀓𑀸𑀭𑀁 𑀅𑀩𑁆𑀭𑁆𑀯𑀺 𑀅𑀯𑁄𑀘.

𑀅𑀦𑀼𑀴𑀸𑀭𑁂𑀲𑀽𑀢𑀺 𑀔𑀼𑀤𑁆𑀤𑀓𑁂𑀲𑀼. 𑀢𑀣𑀸𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀙𑀴𑀸𑀭𑀫𑁆𑀫𑀡𑀯𑀺𑀚𑀸𑀦𑀦𑀕𑀬𑁆𑀳𑀸𑀓𑀸𑀭𑀸. 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀕𑀢𑀺 𑀯𑀺𑀬 𑀕𑀢𑀺 𑀏𑀢𑀺𑀲𑁆𑀲𑀸𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀕𑀢𑀺𑀓𑀸.

𑁫𑁬. 𑀲𑁄𑀫𑀦𑀲𑁆𑀲𑀬𑀼𑀢𑁆𑀢𑀸𑀦𑀝𑁆𑀞, 𑀓𑀼𑀲𑀮𑀸𑀓𑀼𑀲𑀮𑀸𑀦𑀺 𑀘 𑀲𑁄𑀫𑀦𑀲𑁆𑀲𑀬𑀼𑀢𑁆𑀢𑀸𑀦𑀺 𑀅𑀝𑁆𑀞 𑀓𑀼𑀲𑀮𑀸𑀓𑀼𑀲𑀮𑀸𑀦𑀺 𑀘, 𑀓𑁆𑀭𑀺𑀬𑀢𑁄 𑀧𑀦 𑀧𑀜𑁆𑀘 𑀏𑀯𑀁 𑀇𑀫𑀺𑀦𑀸 𑀫𑀬𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀳𑀸𑀲𑀘𑀺𑀢𑁆𑀢𑀸𑀦𑀺 𑀢𑁂𑀭𑀲.

𑁫𑁭. 𑀧𑀼𑀣𑀼𑀚𑁆𑀚𑀦𑀸 𑀳𑀲𑀦𑁆𑀢𑁂𑀢𑁆𑀣 𑀏𑀢𑁆𑀣 𑀏𑀢𑁂𑀲𑀼 𑀢𑁂𑀭𑀲𑀘𑀺𑀢𑁆𑀢𑁂𑀲𑀼 𑀧𑀼𑀣𑀼𑀚𑁆𑀚𑀦𑀸 𑀧𑀦 𑀅𑀝𑁆𑀞𑀳𑀺 𑀘𑀺𑀢𑁆𑀢𑁂𑀳𑀺 𑀳𑀲𑀦𑁆𑀢𑀺. 𑀲𑁂𑀔𑀸 𑀲𑀢𑁆𑀢 𑀅𑀭𑀺𑀬𑀸 𑀙𑀳𑀺 𑀘𑀺𑀢𑁆𑀢𑁂𑀳𑀺 𑀳𑀲𑀦𑁆𑀢𑀺. 𑀅𑀲𑁂𑀔𑀸 𑀔𑀻𑀡𑀸𑀲𑀯𑀸 𑀧𑀜𑁆𑀘𑀳𑀺 𑀘𑀺𑀢𑁆𑀢𑁂𑀳𑀺 𑀳𑀲𑀦𑁆𑀢𑀺.

𑀓𑀼𑀲𑀮𑀸𑀦𑀺 𑀧𑀦 𑀭𑀽𑀧𑀸𑀭𑀽𑀧𑀓𑀼𑀲𑀮𑀸𑀦𑀺 𑀲𑁂𑀔𑀧𑀼𑀣𑀼𑀚𑁆𑀚𑀦𑀸𑀦𑀁 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀇𑀫𑀸𑀦𑀺 𑀭𑀽𑀧𑀸𑀭𑀽𑀧𑀓𑀺𑀭𑀺𑀬𑀸𑀦𑀺 𑀔𑀻𑀡𑀸𑀲𑀯𑀸𑀦𑀁 𑀪𑀸𑀯𑀦𑀸𑀬𑁂𑀯 𑀓𑀸𑀭𑁄 𑀪𑀸𑀯𑀦𑀸𑀓𑀸𑀭𑁄, 𑀢𑀲𑁆𑀲 𑀯𑀲𑁄 𑀪𑀸𑀯𑀦𑀸𑀓𑀸𑀭𑀯𑀲𑁄, 𑀢𑁂𑀦 𑀧𑀯𑀢𑁆𑀢𑀸𑀦𑀺. 𑀢𑀸𑀦𑀺 𑀭𑀽𑀧𑀸𑀭𑀽𑀧𑀓𑀼𑀲𑀮𑀸𑀦𑀺 𑀪𑀸𑀯𑀦𑀸𑀧𑀼𑀜𑁆𑀜𑀯𑀲𑀧𑁆𑀧𑀯𑀢𑁆𑀢𑀸𑀦𑀺 𑀪𑀸𑀯𑀦𑀸𑀓𑀼𑀲𑀮𑀯𑀲𑁂𑀦 𑀧𑀯𑀢𑁆𑀢𑀸𑀦𑀺. 𑀇𑀫𑁂𑀲𑀁 𑀭𑀽𑀧𑀸𑀭𑀽𑀧𑀓𑀺𑀭𑀺𑀬𑀸𑀦𑀁 𑀢𑁂𑀲𑀜𑁆𑀘 𑀭𑀽𑀧𑀸𑀭𑀽𑀧𑀓𑀼𑀲𑀮𑀸𑀦𑀁 𑀅𑀬𑀫𑁂𑀯 𑀯𑀺𑀲𑁂𑀲𑁄.

𑁫𑁮-𑁯. 𑀬𑀸 𑀧𑀼𑀣𑀼𑀚𑁆𑀚𑀦𑀓𑀸𑀮𑀲𑁆𑀫𑀺𑀁, 𑀅𑀪𑀺𑀦𑀺𑀩𑁆𑀩𑀢𑁆𑀢𑀺𑀢𑀸 𑀧𑀦 𑀧𑀼𑀣𑀼𑀚𑁆𑀚𑀦𑀓𑀸𑀮𑀲𑁆𑀫𑀺𑀁 𑀧𑀼𑀣𑀼𑀚𑁆𑀚𑀦𑀪𑀸𑀯𑀝𑁆𑀞𑀺𑀢𑁂𑀦 𑀬𑁄𑀕𑀺𑀦𑀸 𑀅𑀪𑀺𑀦𑀺𑀩𑁆𑀩𑀢𑁆𑀢𑀺𑀢𑀸 𑀬𑀸 𑀭𑀽𑀧𑀸𑀭𑀽𑀧𑀲𑀫𑀸𑀧𑀢𑁆𑀢𑀺, 𑀲𑀸 𑀭𑀽𑀧𑀸𑀭𑀽𑀧𑀲𑀫𑀸𑀧𑀢𑁆𑀢𑀺 𑀲𑁄 𑀬𑁄𑀕𑀻 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀳𑀼𑀢𑁆𑀯𑀸 𑀦𑀁 𑀭𑀽𑀧𑀸𑀭𑀽𑀧𑀲𑀫𑀸𑀧𑀢𑁆𑀢𑀺𑀁 𑀬𑀸𑀯 𑀬𑀢𑁆𑀢𑀓𑀁 𑀓𑀸𑀮𑀁 𑀦 𑀲𑀫𑀸𑀧𑀚𑁆𑀚𑀢𑁂, 𑀢𑀸𑀯 𑀢𑀢𑁆𑀢𑀓𑁂𑀦 𑀓𑀸𑀮𑁂𑀦 𑀢𑀲𑁆𑀲 𑀔𑀻𑀡𑀸𑀲𑀯𑀪𑀺𑀓𑁆𑀔𑀼𑀦𑁄 𑀓𑀼𑀲𑀮𑀸 𑀏𑀯 𑀭𑀽𑀧𑀸𑀭𑀽𑀧𑀓𑀼𑀲𑀮𑀸 𑀏𑀯 𑀳𑁄𑀢𑀺. 𑀔𑀻𑀡𑀸𑀲𑀯𑁂𑀦 𑀲𑀸 𑀭𑀽𑀧𑀸𑀭𑀽𑀧𑀲𑀫𑀸𑀧𑀢𑁆𑀢𑀺 𑀲𑀘𑁂 𑀬𑀤𑀺 𑀲𑀫𑀸𑀧𑀦𑁆𑀦𑀸 𑀲𑀫𑀸𑀧𑀚𑁆𑀚𑀺𑀢𑀸, 𑀓𑁆𑀭𑀺𑀬𑀸 𑀭𑀽𑀧𑀸𑀭𑀽𑀧𑀓𑀺𑀭𑀺𑀬𑀸 𑀳𑁄𑀢𑀺.

𑁬𑁦. 𑀏𑀓𑀸𑀤𑀲𑀯𑀺𑀥𑀁 𑀓𑀸𑀫𑁂 𑀓𑀸𑀫𑀸𑀯𑀘𑀭𑁂 𑀓𑀺𑀭𑀺𑀬𑀘𑀺𑀢𑁆𑀢𑀁 𑀏𑀓𑀸𑀤𑀲𑀯𑀺𑀥𑀁, 𑀭𑀽𑀧𑁂 𑀭𑀽𑀧𑀸𑀯𑀘𑀭𑁂 𑀧𑀜𑁆𑀘, 𑀅𑀭𑀽𑀧𑀺𑀲𑀼 𑀘𑀢𑁆𑀢𑀸𑀭𑀺 𑀇𑀢𑀺 𑀲𑀩𑁆𑀩𑀸𑀦𑀺 𑀓𑁆𑀭𑀺𑀬𑀘𑀺𑀢𑁆𑀢𑀸𑀦𑀺 𑀯𑀻𑀲𑀢𑀺.

𑁬𑁧. 𑀮𑁄𑀓𑀼𑀢𑁆𑀢𑀭𑀓𑁆𑀭𑀺𑀬𑀘𑀺𑀢𑁆𑀢𑀁, 𑀧𑀦 𑀓𑀲𑁆𑀫𑀸 𑀦 𑀯𑀺𑀚𑁆𑀚𑀢𑀺? 𑀫𑀕𑁆𑀕𑀲𑁆𑀲 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀢𑁆𑀢𑀸 𑀦 𑀯𑀺𑀚𑁆𑀚𑀢𑀺. 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀘𑀢𑀼𑀫𑀕𑁆𑀕𑀝𑁆𑀞𑁄 𑀔𑀻𑀡𑀸𑀲𑀯𑁄 𑀦𑀸𑀫 𑀦 𑀳𑁄𑀢𑀺, 𑀫𑀕𑁆𑀕𑀸𑀦𑀦𑁆𑀢𑀭𑀫𑁂𑀯 𑀨𑀮𑀁 𑀉𑀧𑁆𑀧𑀚𑁆𑀚𑀢𑀺, 𑀫𑀕𑁆𑀕𑁄𑀧𑀺 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑁄 𑀬𑀤𑀺 𑀘𑀺𑀢𑁆𑀢𑀁 𑀩𑀳𑀼𑀘𑀺𑀢𑁆𑀢𑀓𑁆𑀔𑀡𑀺𑀓𑀁, 𑀨𑀮𑀲𑀫𑀗𑁆𑀕𑀺𑀦𑁄 𑀔𑀻𑀡𑀸𑀲𑀯𑀲𑁆𑀲𑀧𑀺 𑀫𑀕𑁆𑀕𑀘𑀺𑀢𑁆𑀢𑀁 𑀪𑀯𑁂𑀬𑁆𑀬, 𑀏𑀯𑀁 𑀲𑀢𑀺 𑀮𑁄𑀓𑀼𑀢𑁆𑀢𑀭𑀓𑀺𑀭𑀺𑀬𑀘𑀺𑀢𑁆𑀢𑀁 𑀪𑀯𑁂𑀬𑁆𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁬𑁨. 𑀓𑁆𑀭𑀺𑀬𑀸𑀓𑁆𑀭𑀺𑀬𑀸𑀧𑀢𑁆𑀢𑀺𑀯𑀺𑀪𑀸𑀕𑀤𑁂𑀲𑀓𑁄 𑀓𑀭𑀡𑀁 𑀓𑁆𑀭𑀺𑀬𑀁, 𑀓𑁆𑀭𑀺𑀬𑀁 𑀦𑀸𑀫 𑀯𑀺𑀦𑀬𑀧𑀭𑀺𑀬𑀸𑀬𑁂𑀦 𑀅𑀓𑀢𑁆𑀢𑀩𑁆𑀩𑀲𑁆𑀲 𑀓𑀭𑀡𑀁, 𑀦 𑀓𑀭𑀡𑀁 𑀅𑀓𑁆𑀭𑀺𑀬𑀁, 𑀅𑀓𑁆𑀭𑀺𑀬𑀁 𑀦𑀸𑀫 𑀯𑀺𑀦𑀬𑀧𑀭𑀺𑀬𑀸𑀬𑁂𑀦 𑀓𑀢𑁆𑀢𑀩𑁆𑀩𑀲𑁆𑀲 𑀅𑀓𑀭𑀡𑀁, 𑀆𑀧𑀚𑁆𑀚𑀦𑀁 𑀆𑀧𑀢𑁆𑀢𑀺, 𑀓𑁆𑀭𑀺𑀬𑀸𑀬 𑀓𑀭𑀡𑁂𑀦 𑀆𑀧𑀢𑁆𑀢𑀺 𑀓𑁆𑀭𑀺𑀬𑀸𑀧𑀢𑁆𑀢𑀺, 𑀅𑀓𑁆𑀭𑀺𑀬𑀸𑀬 𑀅𑀓𑀭𑀡𑁂𑀦 𑀆𑀧𑀢𑁆𑀢𑀺 𑀅𑀓𑁆𑀭𑀺𑀬𑀸𑀧𑀢𑁆𑀢𑀺, 𑀓𑁆𑀭𑀺𑀬𑀸𑀧𑀢𑁆𑀢𑀺 𑀘 𑀅𑀓𑁆𑀭𑀺𑀬𑀸𑀧𑀢𑁆𑀢𑀺 𑀘 𑀓𑁆𑀭𑀺𑀬𑀸𑀧𑀢𑁆𑀬𑀸𑀓𑁆𑀭𑀺𑀬𑀸𑀧𑀢𑁆𑀢𑀺𑀬𑁄, 𑀏𑀓𑀲𑁆𑀲 𑀆𑀧𑀢𑁆𑀢𑀺-𑀲𑀤𑁆𑀤𑀲𑁆𑀲 𑀮𑁄𑀧𑀁 𑀓𑀢𑁆𑀯𑀸 ‘‘𑀓𑁆𑀭𑀺𑀬𑀸𑀓𑁆𑀭𑀺𑀬𑀸𑀧𑀢𑁆𑀢𑀺𑀬𑁄’’𑀢𑀺 𑀯𑀼𑀢𑁆𑀢𑀁, 𑀢𑀸𑀲𑀁 𑀯𑀺𑀪𑀸𑀕𑁄 𑀓𑁆𑀭𑀺𑀬𑀸𑀓𑁆𑀭𑀺𑀬𑀸𑀧𑀢𑁆𑀢𑀺𑀯𑀺𑀪𑀸𑀕𑁄, 𑀤𑁂𑀲𑁂𑀢𑀻𑀢𑀺 𑀤𑁂𑀲𑀓𑁄, 𑀢𑀲𑁆𑀲 𑀤𑁂𑀲𑀓𑁄 𑀓𑁆𑀭𑀺𑀬𑀸𑀓𑁆𑀭𑀺𑀬𑀸𑀧𑀢𑁆𑀢𑀺𑀯𑀺𑀪𑀸𑀕𑀤𑁂𑀲𑀓𑁄. 𑀡𑁆𑀯𑀼-𑀢𑀼-𑀧𑀘𑁆𑀘𑀬𑁂𑀲𑀼 𑀧𑀭𑁂𑀲𑀼 𑀓𑀫𑁆𑀫𑀢𑁆𑀣𑁂 𑀙𑀝𑁆𑀞𑀻 𑀳𑁄𑀢𑀻𑀢𑀺 𑀯𑀤𑀦𑁆𑀢𑀺. 𑀚𑀺𑀦𑁄 𑀓𑀺𑀁 𑀯𑀺𑀲𑀺𑀝𑁆𑀞𑁄? 𑀓𑁆𑀭𑀺𑀬𑀸𑀓𑁆𑀭𑀺𑀬𑀸𑀧𑀢𑁆𑀢𑀺𑀯𑀺𑀪𑀸𑀕𑀤𑁂𑀲𑀓𑁄 𑀳𑀺𑀢𑀸𑀳𑀺𑀢𑀸𑀦𑀁 𑀲𑀓𑁆𑀭𑀺𑀬𑀸𑀓𑁆𑀭𑀺𑀬𑀸𑀭𑀢𑁄 𑀳𑀺𑀢𑀲𑁆𑀲 𑀲𑀓𑁆𑀭𑀺𑀬𑀸𑀬 𑀭𑀢𑁄, 𑀅𑀳𑀺𑀢𑀲𑁆𑀲 𑀅𑀓𑁆𑀭𑀺𑀬𑀸𑀬 𑀭𑀢𑁄, 𑀬𑀁 𑀓𑁆𑀭𑀺𑀬𑀸𑀓𑁆𑀭𑀺𑀬𑀁, 𑀓𑁆𑀭𑀺𑀬𑀁 𑀦𑀸𑀫 𑀓𑁆𑀭𑀺𑀬𑀘𑀺𑀢𑁆𑀢𑀁, 𑀅𑀓𑁆𑀭𑀺𑀬𑀁 𑀦𑀸𑀫 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀘𑀺𑀢𑁆𑀢𑀁 𑀇𑀘𑁆𑀙𑀦𑁆𑀢𑀺 𑀏𑀓𑁂. 𑀢𑀁 𑀦. 𑀓𑀲𑁆𑀫𑀸? 𑀓𑀼𑀲𑀮𑀸𑀥𑀺𑀓𑀸𑀭𑁂 ‘‘𑀓𑀼𑀲𑀮𑀁 𑀫𑀼𑀦𑀺𑀦𑀸 𑀮𑀧𑀺𑀢𑀁’’ 𑀅𑀓𑀼𑀲𑀮𑀸𑀥𑀺𑀓𑀸𑀭𑁂 ‘‘𑀧𑀸𑀧𑀫𑀸𑀦𑀲𑀁 𑀧𑀸𑀧𑀸𑀧𑀸𑀧𑁂𑀲𑁆𑀯𑀧𑀸𑀧𑁂𑀦 𑀯𑀼𑀢𑁆𑀢𑀁’’ 𑀯𑀺𑀧𑀸𑀓𑀸𑀥𑀺𑀓𑀸𑀭𑁂 ‘‘𑀧𑀸𑀓𑀁 𑀲𑀼𑀕𑀢𑁄 𑀅𑀩𑁆𑀭𑀯𑀻’’𑀢𑀺 𑀯𑀢𑁆𑀯𑀸 𑀧𑀼𑀦 𑀓𑁆𑀭𑀺𑀬𑀸𑀥𑀺𑀓𑀸𑀭𑁂 ‘‘𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀸𑀦𑀺 𑀅𑀯𑁄𑀘𑀸’’𑀢𑀺 𑀯𑀘𑀦𑀲𑁆𑀲 𑀯𑀢𑁆𑀢𑀩𑁆𑀩𑀸𑀪𑀸𑀯𑀢𑁄. 𑀢𑁂𑀦 𑀯𑀸𑀲𑁆𑀲 𑀓𑁆𑀭𑀺𑀬𑀸𑀓𑁆𑀭𑀺𑀬𑀁 𑀏𑀢𑀲𑁆𑀲𑀸𑀢𑀺 𑀓𑁆𑀭𑀺𑀬𑀸𑀓𑁆𑀭𑀺𑀬𑀁, 𑀓𑁆𑀭𑀺𑀬𑀸𑀓𑁆𑀭𑀺𑀬𑀲𑀪𑀸𑀯𑀦𑁆𑀢𑀺 𑀅𑀢𑁆𑀣𑁄. 𑀅𑀬𑀫𑁂𑀯 𑀲𑀸𑀭𑀢𑁄 𑀧𑀘𑁆𑀘𑁂𑀢𑀩𑁆𑀩𑁄. 𑀬𑀁 𑀓𑁆𑀭𑀺𑀬𑀸𑀓𑁆𑀭𑀺𑀬𑀁 𑀘𑀺𑀢𑁆𑀢𑀁 𑀓𑁆𑀭𑀺𑀬𑀸𑀓𑁆𑀭𑀺𑀬𑀸𑀲𑀪𑀸𑀯𑀁 𑀅𑀯𑁄𑀘 𑀤𑁂𑀲𑁂𑀲𑀺, 𑀢𑀁 𑀓𑁆𑀭𑀺𑀬𑀸𑀓𑁆𑀭𑀺𑀬𑀁 𑀓𑁆𑀭𑀺𑀬𑀸𑀓𑁆𑀭𑀺𑀬𑀲𑀪𑀸𑀯𑀁 𑀫𑀬𑀸 𑀲𑀫𑀻𑀭𑀺𑀢𑀁, 𑀲𑀫𑁆𑀫𑀸 𑀧𑀓𑀸𑀭𑁂𑀦 𑀈𑀭𑀺𑀢𑀁 𑀓𑀣𑀺𑀢𑀁.

𑁬𑁪. 𑀏𑀓𑀽𑀦𑀦𑀯𑀼𑀢𑀺 𑀲𑀩𑁆𑀩𑁂, 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀫𑀳𑁂𑀲𑀺𑀦𑀸 𑀮𑁄𑀓𑀼𑀢𑁆𑀢𑀭𑁂 𑀅𑀝𑁆𑀞 𑀓𑀢𑁆𑀯𑀸 𑀏𑀓𑀽𑀦𑀦𑀯𑀼𑀢𑀺 𑀲𑀩𑁆𑀩𑁂 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀫𑀳𑁂𑀲𑀺𑀦𑀸 𑀢𑀣𑀸𑀕𑀢𑁂𑀦 𑀲𑀫𑀸𑀲𑀢𑁄 𑀲𑀗𑁆𑀔𑁂𑀧𑀢𑁄 𑀦𑀺𑀤𑁆𑀤𑀺𑀝𑁆𑀞𑀸.

𑁬𑁫. 𑀧𑀺𑀝𑀓𑁂 𑀅𑀪𑀺𑀥𑀫𑁆𑀫𑀲𑁆𑀫𑀺𑀁, 𑀬𑁂 𑀪𑀺𑀓𑁆𑀔𑀽 𑀧𑀸𑀝𑀯𑀢𑁆𑀣𑀺𑀦𑁄 𑀅𑀪𑀺𑀥𑀫𑁆𑀫𑀧𑀺𑀝𑀓𑁂 𑀧𑀝𑀼𑀦𑁄 𑀪𑀸𑀯𑁄 𑀧𑀸𑀝𑀯𑀁, 𑀢𑁂𑀦 𑀅𑀢𑁆𑀣𑁄 𑀧𑀸𑀝𑀯𑀢𑁆𑀣𑁄, 𑀲𑁄 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀧𑀸𑀝𑀯𑀢𑁆𑀣𑀺𑀦𑁄, 𑀙𑁂𑀓𑀪𑀸𑀯𑀢𑁆𑀣𑀺𑀓𑀸 𑀬𑁂 𑀪𑀺𑀓𑁆𑀔𑀽, 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀅𑀬𑀁 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑁄 𑀉𑀕𑁆𑀕𑀳𑁂𑀢𑀩𑁆𑀩𑁄 𑀲𑀺𑀓𑁆𑀔𑀺𑀢𑀩𑁆𑀩𑁄 𑀧𑀼𑀦𑀧𑁆𑀧𑀼𑀦𑀁 𑀘𑀺𑀦𑁆𑀢𑀺𑀢𑀩𑁆𑀩𑁄.

𑁬𑁬. 𑀬𑁂 𑀚𑀦𑀸 𑀢𑀲𑁆𑀲𑀗𑁆𑀓𑀸𑀲𑁂𑀦 𑀢𑀁𑀲𑀦𑁆𑀦𑀺𑀪𑁂𑀦 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑁂𑀦 𑀅𑀪𑀺𑀥𑀫𑁆𑀫𑀫𑀳𑁄𑀤𑀥𑀺𑀁 𑀫𑀳𑀸𑀲𑀸𑀕𑀭𑀲𑀦𑁆𑀦𑀺𑀪𑀁 𑀅𑀪𑀺𑀥𑀫𑁆𑀫𑀁 𑀢𑀭𑀦𑁆𑀢𑀺, 𑀢𑁂 𑀇𑀫𑀁 𑀮𑁄𑀓𑀁 𑀧𑀭𑀮𑁄𑀓𑀜𑁆𑀘 𑀢𑀭𑀦𑁆𑀢𑀺. 𑀇𑀢𑀻𑀢𑀺 𑀧𑀭𑀺𑀲𑀫𑀸𑀧𑀦𑁂.

𑀇𑀢𑀺 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑀝𑀻𑀓𑀸𑀬

𑀘𑀺𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀞𑀫𑁄 𑀧𑀭𑀺𑀘𑁆𑀙𑁂𑀤𑁄.

𑁨. 𑀤𑀼𑀢𑀺𑀬𑁄 𑀧𑀭𑀺𑀘𑁆𑀙𑁂𑀤𑁄

𑀘𑁂𑀢𑀲𑀺𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁬𑁭. 𑀘𑀺𑀢𑁆𑀢𑀸𑀦𑀦𑁆𑀢𑀭𑀫𑀼𑀤𑁆𑀤𑀺𑀝𑁆𑀞𑀸, 𑀬𑁂 𑀘 𑀘𑁂𑀢𑀲𑀺𑀓𑀸 𑀫𑀬𑀸 𑀬𑁂 𑀘 𑀘𑁂𑀢𑀲𑀺𑀓𑀸 𑀘𑀺𑀢𑁆𑀢𑀸𑀦𑀦𑁆𑀢𑀭𑀁 𑀫𑀬𑀸 𑀉𑀤𑁆𑀤𑀺𑀝𑁆𑀞𑀸, 𑀇𑀢𑁄 𑀧𑀭𑀁 𑀇𑀤𑀸𑀦𑀺 𑀢𑁂𑀲𑀁 𑀘𑁂𑀢𑀲𑀺𑀓𑀸𑀦𑀁 𑀯𑀺𑀪𑀸𑀚𑀦𑀁 𑀓𑀭𑀺𑀲𑁆𑀲𑀸𑀫𑀺 𑀅𑀳𑀁.

𑀇𑀫𑁂𑀲𑀼 𑀧𑀦 𑀓𑀭𑀼𑀡𑀸𑀫𑀼𑀤𑀺𑀢𑀸𑀯𑀲𑁂𑀦 𑀪𑀸𑀯𑀦𑀸𑀓𑀸𑀮𑁂 𑀓𑀭𑀼𑀡𑀸𑀧𑀼𑀩𑁆𑀩𑀪𑀸𑀕𑁄 𑀯𑀸, 𑀅𑀧𑁆𑀧𑀦𑀸𑀧𑀢𑁆𑀢𑀸𑀬 𑀓𑀭𑀼𑀡𑀸𑀬 𑀧𑀼𑀩𑁆𑀩𑀪𑀸𑀕𑁄, 𑀢𑀲𑁆𑀫𑀺𑀁 𑀧𑀼𑀩𑁆𑀩𑀪𑀸𑀕𑁂, 𑀓𑀭𑀼𑀡𑀸𑀢𑁄 𑀧𑀼𑀩𑁆𑀩𑀪𑀸𑀕𑁂 𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑁂𑀢𑀺 𑀅𑀢𑁆𑀣𑁄. 𑀏𑀓𑀸 𑀓𑀭𑀼𑀡𑀸 𑀉𑀧𑁆𑀧𑀚𑁆𑀚𑀢𑀺. 𑀫𑀼𑀤𑀺𑀢𑀸𑀧𑀼𑀩𑁆𑀩𑀪𑀸𑀕𑁂 𑀯𑀸 𑀅𑀧𑁆𑀧𑀦𑀸𑀧𑀢𑁆𑀢𑀸𑀬 𑀫𑀼𑀤𑀺𑀢𑀸𑀬 𑀧𑀼𑀩𑁆𑀩𑀪𑀸𑀕𑁂 𑀏𑀓𑀸 𑀫𑀼𑀤𑀺𑀢𑀸 𑀉𑀧𑁆𑀧𑀚𑁆𑀚𑀢𑀺. 𑀇𑀫𑀺𑀦𑀸 𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑁂𑀦 𑀬𑁄𑀕𑀻 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑀸𑀤𑀻𑀳𑀺 𑀥𑀫𑁆𑀫𑁂𑀳𑀺 𑀯𑀺𑀭𑀫𑀢𑀺. 𑀭𑀫𑀼-𑀥𑀸𑀢𑀼 𑀓𑀻𑀴𑀸𑀬𑀁, 𑀯𑀺-𑀲𑀤𑁆𑀤𑁄 𑀯𑀺𑀭𑀫𑀡𑀢𑁆𑀣𑁄.

𑁬𑁮. 𑀆𑀤𑀺𑀦𑀸 𑀧𑀼𑀜𑁆𑀜𑀘𑀺𑀢𑁆𑀢𑁂𑀦, 𑀢𑁂𑀢𑁆𑀢𑀺𑀁𑀲 𑀦𑀺𑀬𑀢𑀸 𑀫𑀢𑀸 𑀆𑀤𑀺𑀦𑀸 𑀧𑀼𑀜𑁆𑀜𑀘𑀺𑀢𑁆𑀢𑁂𑀦 𑀧𑀞𑀫𑀫𑀳𑀸𑀓𑀼𑀲𑀮𑀘𑀺𑀢𑁆𑀢𑁂𑀦 𑀲𑀳 𑀦𑀺𑀬𑀢𑀸 𑀢𑁂𑀢𑁆𑀢𑀺𑀁𑀲 𑀘𑁂𑀢𑀲𑀺𑀓𑀸 𑀪𑀕𑀯𑀢𑀸 𑀫𑀢𑀸𑀢𑀺, 𑀅𑀣 𑀯𑀸 𑀓𑀭𑀼𑀡𑀸𑀫𑀼𑀤𑀺𑀢𑀸 𑀅𑀦𑀺𑀬𑀢𑀸 𑀏𑀓𑁂𑀦 𑀥𑀫𑁆𑀫𑁂𑀦 𑀲𑀳 𑀘𑀢𑀼𑀢𑁆𑀢𑀺𑀁𑀲 𑀥𑀫𑁆𑀫𑀸 𑀪𑀯𑀦𑁆𑀢𑀺.

𑁬𑁯. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀫𑁂𑀢𑁆𑀢𑀸 𑀘, 𑀉𑀧𑁂𑀓𑁆𑀔𑀸 𑀘 𑀦 𑀉𑀤𑁆𑀥𑀝𑀸 𑀏𑀢𑁆𑀣 𑀏𑀢𑁂𑀲𑀼 𑀬𑁂𑀯𑀸𑀧𑀦𑀓𑀥𑀫𑁆𑀫𑁂𑀲𑀼, 𑀦𑀺𑀤𑁆𑀥𑀸𑀭𑀡𑀁, 𑀫𑁂𑀢𑁆𑀢𑀸 𑀘 𑀉𑀧𑁂𑀓𑁆𑀔𑀸 𑀘 𑀥𑀫𑁆𑀫𑀭𑀸𑀚𑁂𑀦 𑀲𑀢𑁆𑀣𑀼𑀦𑀸 𑀦 𑀉𑀤𑁆𑀥𑀝𑀸 𑀦 𑀯𑀼𑀢𑁆𑀢𑀸 𑀓𑀲𑁆𑀫𑀸 𑀓𑀸𑀭𑀡𑀸.

𑁭𑁦. 𑀅𑀩𑁆𑀬𑀸𑀧𑀸𑀤𑁂𑀦 𑀫𑁂𑀢𑁆𑀢𑀸𑀧𑀺 𑀅𑀩𑁆𑀬𑀸𑀧𑀸𑀤𑁂𑀦 𑀫𑁂𑀢𑁆𑀢𑀸 𑀕𑀳𑀺𑀢𑀸, 𑀉𑀧𑁂𑀓𑁆𑀔𑀸𑀢𑀺 𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸𑀬 𑀘 𑀕𑀳𑀺𑀢𑀸 𑀬𑀲𑁆𑀫𑀸 𑀓𑀸𑀭𑀡𑀸, 𑀢𑀲𑁆𑀫𑀸 𑀉𑀪𑁄𑀧𑁂𑀢𑀸 𑀪𑀕𑀯𑀢𑀸 𑀦 𑀕𑀳𑀺𑀢𑀸.

𑁭𑁧. 𑀓𑀲𑁆𑀫𑀸 𑀬𑁂𑀯𑀸𑀧𑀦𑀸 𑀥𑀫𑁆𑀫𑀸, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸 𑀲𑀩𑁆𑀩𑁂 𑀢𑁂 𑀬𑁂𑀯𑀸𑀧𑀦𑀸 𑀥𑀫𑁆𑀫𑀸 𑀬𑁂𑀯𑀸𑀧𑀦𑀦𑀸𑀫𑀓𑀸 𑀧𑀸𑀴𑀺𑀬𑀁 𑀲𑀭𑀽𑀧𑁂𑀦 𑀏𑀯. 𑀩𑀦𑁆𑀥𑀢𑀺 𑀲𑁆𑀦𑁂𑀳𑁂𑀦 𑀏𑀢𑀲𑁆𑀫𑀺𑀦𑁆𑀢𑀺 𑀩𑀦𑁆𑀥𑀼, 𑀆𑀤𑀺𑀘𑁆𑀘𑀲𑁆𑀲 𑀩𑀦𑁆𑀥𑀼 𑀆𑀤𑀺𑀘𑁆𑀘𑀩𑀦𑁆𑀥𑀼, 𑀢𑁂𑀦 𑀆𑀤𑀺𑀘𑁆𑀘𑀩𑀦𑁆𑀥𑀼𑀦𑀸 𑀩𑀼𑀤𑁆𑀥𑁂𑀦 𑀦 𑀘 𑀉𑀤𑁆𑀥𑀝𑀸 𑀦 𑀤𑁂𑀲𑀺𑀢𑀸.

𑁭𑁨. 𑀓𑀲𑁆𑀫𑀸 𑀓𑀸𑀭𑀡𑀸? 𑀬𑀲𑁆𑀫𑀸 𑀅𑀦𑀺𑀬𑀢𑀸 𑀓𑁂𑀘𑀺 𑀬𑁂𑀯𑀸𑀧𑀦𑀓𑀸 𑀅𑀦𑀺𑀬𑀢𑀸, 𑀬𑀲𑁆𑀫𑀸 𑀓𑀸𑀭𑀡𑀸 𑀭𑀸𑀲𑀺𑀁 𑀤𑀼𑀓𑀯𑀕𑁆𑀕𑀸𑀤𑀺𑀭𑀸𑀲𑀺𑀁 𑀦 𑀪𑀚𑀦𑁆𑀢𑀺 𑀦 𑀲𑁂𑀯𑀦𑁆𑀢𑀺, 𑀬𑀲𑁆𑀫𑀸 𑀓𑀸𑀭𑀡𑀸 𑀓𑁂𑀘𑀺 𑀬𑁂𑀯𑀸𑀧𑀦𑀓𑀸 𑀤𑀼𑀩𑁆𑀩𑀮𑀸, 𑀢𑀲𑁆𑀫𑀸 𑀧𑀸𑀴𑀺𑀬𑀁 𑀪𑀕𑀯𑀢𑀸 𑀦 𑀯𑀼𑀢𑁆𑀢𑀸.

𑁭𑁩. 𑀙𑀦𑁆𑀤𑀸𑀥𑀺𑀫𑁄𑀓𑁆𑀔𑀫𑀼𑀤𑀺𑀢𑀸 𑀫𑀦𑀲𑀺 𑀘 𑀓𑀸𑀭𑁄,

𑀫𑀚𑁆𑀛𑀢𑁆𑀢𑀢𑀸 𑀘 𑀓𑀭𑀼𑀡𑀸 𑀯𑀺𑀭𑀢𑀺𑀢𑁆𑀢𑀬𑀜𑁆𑀘;

𑀧𑀼𑀜𑁆𑀜𑁂𑀲𑀼 𑀢𑁂𑀦 𑀦𑀺𑀬𑀢𑀸𑀦𑀺𑀬𑀢𑀸 𑀘 𑀲𑀩𑁆𑀩𑁂,

𑀬𑁂𑀯𑀸𑀧𑀦𑀸 𑀫𑀼𑀦𑀺𑀯𑀭𑁂𑀦 𑀦 𑀘𑁂𑀯 𑀯𑀼𑀢𑁆𑀢𑀸.

𑀙𑀦𑁆𑀤𑀸𑀥𑀺𑀫𑁄𑀓𑁆𑀔𑁄 𑀫𑀼𑀤𑀺𑀢𑀸 𑀫𑀦𑀲𑀺𑀓𑀸𑀭𑁄 𑀫𑀚𑁆𑀛𑀢𑁆𑀢𑀢𑀸 𑀓𑀭𑀼𑀡𑀸 𑀯𑀺𑀭𑀢𑀺𑀢𑁆𑀢𑀬𑀜𑁆𑀘 𑀧𑀼𑀜𑁆𑀜𑁂𑀲𑀼𑀓𑀼𑀲𑀮𑁂𑀲𑀼 𑀦𑀺𑀬𑀢𑀸 𑀘𑀢𑁆𑀢𑀸𑀭𑁄 𑀅𑀦𑀺𑀬𑀢𑀸 𑀧𑀜𑁆𑀘 𑀲𑀩𑁆𑀩𑁂 𑀬𑁂𑀯𑀸𑀧𑀦𑀸 𑀦 𑀘 𑀏𑀯 𑀢𑁂𑀦 𑀫𑀼𑀦𑀺𑀯𑀭𑁂𑀦 𑀯𑀼𑀢𑁆𑀢𑀸.

𑁭𑁪-𑁮𑁦. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀨𑀲𑁆𑀲𑁄𑀯, 𑀧𑀞𑀫𑀁 𑀲𑀫𑀼𑀤𑀻𑀭𑀺𑀢𑁄 𑀏𑀢𑁆𑀣 𑀏𑀢𑁂𑀲𑀼 𑀘𑁂𑀢𑀲𑀺𑀓𑁂𑀲𑀼, 𑀚𑀸𑀢𑀺𑀦𑀺𑀤𑁆𑀥𑀸𑀭𑀡𑀁, 𑀨𑀲𑁆𑀲𑁄𑀯 𑀧𑀞𑀫𑀁 𑀲𑀫𑀼𑀤𑀻𑀭𑀺𑀢𑁄 𑀓𑀣𑀺𑀢𑁄. 𑀓𑀲𑁆𑀫𑀸 𑀓𑀸𑀭𑀡𑀸? 𑀓𑀺𑀭 𑀫𑀬𑀸 𑀲𑀼𑀢𑀁, 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀲𑁆𑀲 𑀧𑀞𑀫𑀁 𑀅𑀪𑀺𑀦𑀺𑀧𑀸𑀢𑀢𑁆𑀢𑀸 𑀨𑀲𑁆𑀲𑁄 𑀧𑀞𑀫𑀁 𑀲𑀫𑀼𑀤𑀻𑀭𑀺𑀢𑁄, 𑀨𑀼𑀲𑀺𑀢𑁆𑀯𑀸 𑀧𑀦 𑀨𑀲𑁆𑀲𑁂𑀦 𑀨𑀲𑁆𑀲𑁂𑀦 𑀆𑀭𑀫𑁆𑀫𑀡𑀁 𑀨𑀼𑀲𑀺𑀢𑁆𑀯𑀸 𑀬𑁄𑀕𑀺𑀦𑁄 𑀯𑁂𑀤𑀦𑀸𑀬 𑀆𑀭𑀫𑁆𑀫𑀡𑀁 𑀯𑁂𑀤𑀬𑁂, 𑀲𑀜𑁆𑀜𑀸𑀬 𑀲𑀜𑁆𑀚𑀸𑀦𑀸𑀢𑀺, 𑀘𑁂𑀢𑀦𑀸𑀬 𑀆𑀭𑀫𑁆𑀫𑀡𑀁 𑀘𑁂𑀢𑀬𑁂. 𑀲𑀳𑀚𑀸𑀢𑀸𑀦𑀁 𑀘𑁂𑀢𑀲𑀺𑀓𑀸𑀦𑀁 𑀨𑀲𑁆𑀲𑁄𑀯 𑀇𑀥 𑀇𑀫𑀲𑁆𑀫𑀺𑀁 𑀘𑀺𑀢𑁆𑀢𑁂 𑀫𑀳𑁂𑀲𑀺𑀦𑀸 𑀧𑀞𑀫𑀁 𑀯𑀼𑀢𑁆𑀢𑁄. 𑀳𑀺 𑀓𑀲𑁆𑀫𑀸 𑀓𑀸𑀭𑀡𑀸? 𑀬𑀲𑁆𑀫𑀸 𑀩𑀮𑀯𑀧𑀘𑁆𑀘𑀬𑀢𑁆𑀢𑀸, 𑀢𑀲𑁆𑀫𑀸 𑀯𑀼𑀢𑁆𑀢𑁄. 𑀅𑀓𑀸𑀭𑀡𑀫𑀺𑀤𑀁 𑀲𑀩𑁆𑀩𑀁, 𑀘𑀺𑀢𑁆𑀢𑀸𑀦𑀁 𑀢𑀼 𑀲𑀳𑁂𑀯 𑀘 ‘‘𑀧𑀞𑀫𑀸𑀪𑀺𑀦𑀺𑀧𑀸𑀢𑀢𑁆𑀢𑀸’’𑀢𑀺 𑀘 ‘‘𑀩𑀮𑀯𑀧𑀘𑁆𑀘𑀬𑀢𑁆𑀢𑀸’’𑀢𑀺 𑀘 𑀇𑀤𑀁 𑀲𑀩𑁆𑀩𑀁 𑀯𑀘𑀦𑀁 𑀅𑀓𑀸𑀭𑀡𑀁 𑀅𑀳𑁂𑀢𑀼𑀓𑀁 𑀅𑀬𑀼𑀢𑁆𑀢𑀁, 𑀓𑀲𑁆𑀫𑀸 𑀓𑀸𑀭𑀡𑀸? 𑀘𑀺𑀢𑁆𑀢𑀚𑀸𑀦𑀁 𑀘𑀺𑀢𑁆𑀢𑁂𑀳𑀺 𑀲𑀳𑀧𑁆𑀧𑀯𑀢𑁆𑀢𑀸𑀦𑀁 𑀘𑁂𑀢𑀲𑀺𑀓𑀸𑀦𑀁 𑀏𑀓𑀼𑀧𑁆𑀧𑀸𑀤𑀸𑀤𑀺𑀪𑀸𑀯𑁂𑀦 𑀲𑀫𑀸𑀦𑀼𑀧𑁆𑀧𑀸𑀤𑀲𑀫𑀸𑀦𑀦𑀺𑀭𑁄𑀥𑀲𑀫𑀸𑀦𑀸𑀮𑀫𑁆𑀩𑀡𑀲𑀫𑀸𑀦𑀯𑀢𑁆𑀣𑀼𑀓𑀪𑀸𑀯𑁂𑀦 𑀧𑀯𑀢𑁆𑀢𑀺𑀢𑁄 𑀅𑀓𑀸𑀭𑀡𑀁 𑀅𑀬𑀼𑀢𑁆𑀢𑀁. 𑀅𑀬𑀁 𑀢𑀼 𑀧𑀞𑀫𑀼𑀧𑁆𑀧𑀦𑁆𑀦𑁄, 𑀅𑀬𑀁 𑀧𑀘𑁆𑀙𑀸𑀢𑀺 𑀦𑀢𑁆𑀣𑀺𑀤𑀁 𑀅𑀬𑀁 𑀥𑀫𑁆𑀫𑁄 𑀧𑀞𑀫𑀼𑀧𑁆𑀧𑀦𑁆𑀦𑁄, 𑀅𑀬𑀁 𑀥𑀫𑁆𑀫𑁄 𑀧𑀘𑁆𑀙𑀸𑀓𑀸𑀮𑁂 𑀉𑀧𑁆𑀧𑀦𑁆𑀦𑁄 𑀇𑀢𑀺 𑀇𑀤𑀁 𑀯𑀘𑀦𑀁 𑀦𑀢𑁆𑀣𑀺. 𑀩𑀮𑀯𑀧𑀘𑁆𑀘𑀬𑀢𑁆𑀢𑁂𑀧𑀺 𑀓𑀸𑀭𑀡𑀁 𑀦 𑀘 𑀤𑀺𑀲𑁆𑀲𑀢𑀺. 𑀤𑁂𑀲𑀦𑀸𑀓𑁆𑀓𑀫𑀢𑁄 𑀘𑁂𑀯 𑀧𑀞𑀫𑀁 𑀲𑀫𑀼𑀤𑀻𑀭𑀺𑀢𑁄 𑀇𑀘𑁆𑀘𑁂𑀯𑀁 𑀇𑀢𑀺 𑀏𑀯𑀁 𑀇𑀢𑀺 𑀇𑀫𑀺𑀦𑀸 𑀫𑀬𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀨𑀲𑁆𑀲𑀲𑁆𑀲 𑀧𑀞𑀫𑀁 𑀲𑀫𑀼𑀤𑀻𑀭𑀺𑀢𑀢𑀁 𑀯𑀺𑀜𑁆𑀜𑀼𑀦𑀸 𑀯𑀺𑀪𑀸𑀯𑀺𑀦𑀸 𑀯𑀺𑀜𑁆𑀜𑁂𑀬𑁆𑀬𑀁, 𑀯𑀺𑀲𑁂𑀲𑀢𑁄 𑀯𑀺𑀲𑁂𑀲𑁂𑀦 𑀅𑀜𑁆𑀜𑀣𑀸 𑀦 𑀯𑀺𑀜𑁆𑀜𑁂𑀬𑁆𑀬𑀁. 𑀦 𑀘 𑀧𑀭𑀺𑀬𑁂𑀲𑀺𑀢𑀩𑁆𑀩𑁄𑀬𑀁, 𑀢𑀲𑁆𑀫𑀸 𑀧𑀼𑀩𑁆𑀩𑀸𑀧𑀭𑀓𑁆𑀓𑀫𑁄 𑀬𑀲𑁆𑀫𑀸 𑀓𑀸𑀭𑀡𑀸 𑀅𑀬𑀁 𑀧𑀼𑀩𑁆𑀩𑀸𑀧𑀭𑀓𑁆𑀓𑀫𑁄 𑀯𑀺𑀜𑁆𑀜𑀼𑀦𑀸 𑀦 𑀘 𑀧𑀭𑀺𑀬𑁂𑀲𑀺𑀢𑀩𑁆𑀩𑁄 𑀦 𑀕𑀯𑁂𑀲𑀺𑀢𑀩𑁆𑀩𑁄, 𑀥𑀫𑁆𑀫𑀸 𑀏𑀯 𑀯𑀘𑀦𑀢𑁆𑀣𑀮𑀓𑁆𑀔𑀡𑀸𑀤𑀻𑀳𑀺 𑀯𑀺𑀚𑀸𑀦𑀢𑀸 𑀧𑀡𑁆𑀟𑀺𑀢𑁂𑀦 𑀧𑀭𑀺𑀬𑁂𑀲𑀺𑀢𑀩𑁆𑀩𑀸.

𑀇𑀝𑁆𑀞𑀸𑀓𑀸𑀭𑀸𑀦𑀼𑀪𑀯𑀦𑀭𑀲𑀸 𑀇𑀝𑁆𑀞𑀸𑀭𑀫𑁆𑀫𑀡𑀸𑀦𑀼𑀪𑀯𑀦𑀓𑀺𑀘𑁆𑀘𑀸 𑀲𑀼𑀪𑁄𑀚𑀦𑀭𑀲𑀁 𑀅𑀦𑀼𑀪𑀯𑀦𑁆𑀢𑁄 𑀭𑀸𑀚𑀸 𑀯𑀺𑀬. 𑀘𑁂𑀢𑀲𑀺𑀓𑀅𑀲𑁆𑀲𑀸𑀤𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀘𑁂𑀢𑀲𑀺𑀓𑀧𑀲𑁆𑀲𑀤𑁆𑀥𑀺𑀧𑀤𑀝𑁆𑀞𑀸𑀦𑀸.

𑀧𑀘𑁆𑀘𑀸𑀪𑀺𑀜𑁆𑀜𑀸𑀡𑀓𑀭𑀡𑀭𑀲𑀸 𑀧𑀝𑀺𑀚𑀸𑀦𑀦𑀓𑀺𑀘𑁆𑀘𑀸 𑀯𑀟𑁆𑀠𑀓𑀺𑀲𑁆𑀲 𑀅𑀪𑀺𑀜𑁆𑀜𑀸𑀡𑀓𑀭𑀡𑀫𑀺𑀯 𑀯𑀟𑁆𑀠𑀓𑀺𑀦𑁄 𑀲𑀓𑀺𑀁 𑀲𑀜𑁆𑀚𑀸𑀦𑀺𑀢𑁆𑀯𑀸𑀧𑀺 𑀤𑀸𑀭𑀼𑀳𑀭𑁂𑀲𑀼 𑀲𑀼𑀢𑁆𑀢𑀲𑁆𑀲 𑀧𑀝𑀺𑀧𑀲𑀸𑀭𑀡𑀁 𑀯𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀣𑀸𑀕𑀳𑀺𑀢𑀦𑀺𑀫𑀺𑀢𑁆𑀢𑀯𑀲𑁂𑀦𑀸𑀢𑀺 𑀬𑀣𑀸𑀧𑀯𑀢𑁆𑀢𑀺𑀢𑀦𑀺𑀫𑀺𑀢𑁆𑀢𑀲𑁆𑀲 𑀯𑀲𑁂𑀦. 𑀫𑀦𑀲𑀺 𑀅𑀪𑀺𑀦𑀺𑀯𑁂𑀲𑀓𑀭𑀡𑀁 𑀕𑀬𑁆𑀳𑀸𑀓𑀸𑀭𑀸.

𑀆𑀬𑀽𑀳𑀦𑀭𑀲𑀸 𑀧𑀯𑀢𑁆𑀢𑀦𑀓𑀺𑀘𑁆𑀘𑀲𑀸𑀥𑀓𑀸. 𑀫𑀳𑀸𑀯𑀟𑁆𑀠𑀓𑀺𑀆𑀤𑀬𑁄 𑀯𑀺𑀬 𑀬𑀣𑀸 𑀫𑀳𑀸𑀯𑀟𑁆𑀠𑀓𑀻 𑀲𑀬𑀫𑁆𑀧𑀺 𑀤𑀸𑀭𑀼𑀁 𑀢𑀘𑁆𑀙𑀢𑀺, 𑀧𑀭𑁂𑀧𑀺 𑀤𑀸𑀭𑀼𑀁 𑀢𑀘𑁆𑀙𑀸𑀧𑁂𑀢𑀺, 𑀏𑀯𑀁 𑀲𑀬𑀫𑁆𑀧𑀺 𑀆𑀭𑀫𑁆𑀫𑀡𑁂 𑀲𑀦𑁆𑀤𑀳𑀢𑀺, 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀧𑀺 𑀅𑀪𑀺𑀲𑀦𑁆𑀤𑀳𑀸𑀧𑁂𑀢𑀺.

𑀆𑀳𑀦𑀦𑀁 𑀪𑀼𑀲𑁄 𑀳𑀦𑀦𑀁, 𑀧𑀭𑀺𑀬𑀸𑀳𑀦𑀦𑀁 𑀲𑀫𑀦𑁆𑀢𑀸 𑀳𑀦𑀦𑀁, 𑀢𑀁 𑀭𑀲𑁄 𑀏𑀢𑀲𑁆𑀲𑀸𑀢𑀺 𑀆𑀳𑀦𑀦𑀧𑀭𑀺𑀬𑀸𑀳𑀦𑀦𑀭𑀲𑁄.

𑀆𑀭𑀫𑁆𑀫𑀡𑀸𑀦𑀼𑀫𑀚𑁆𑀚𑀦𑀮𑀓𑁆𑀔𑀡𑁄 𑀆𑀭𑀫𑁆𑀫𑀡𑀧𑀭𑀺𑀫𑀤𑁆𑀤𑀦𑀮𑀓𑁆𑀔𑀡𑁄.

𑀧𑀺𑀦𑀬𑀢𑀻𑀢𑀺 𑀧𑀻𑀢𑀺, 𑀲𑀳𑀚𑀸𑀢𑀥𑀫𑁆𑀫𑁂 𑀆𑀭𑀫𑁆𑀫𑀡𑁂 𑀧𑀺𑀦𑀬𑀢𑀻𑀢𑀺 𑀅𑀢𑁆𑀣𑁄. 𑀓𑀸𑀬𑀘𑀺𑀢𑁆𑀢𑀨𑀭𑀡𑀭𑀲𑀸. 𑀉𑀤𑀕𑁆𑀕𑀲𑁆𑀲 𑀘𑀺𑀢𑁆𑀢𑀲𑁆𑀲 𑀪𑀸𑀯𑁄 𑀑𑀤𑀕𑁆𑀬𑀁, 𑀢𑀁 𑀧𑀘𑁆𑀘𑀼𑀧𑀝𑁆𑀞𑀸𑀦𑀁 𑀏𑀢𑀲𑁆𑀲𑀸𑀢𑀺 𑀑𑀤𑀕𑁆𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑀸.

𑀲𑀤𑁆𑀤𑀳𑀦𑁆𑀢𑀺 𑀯𑀢𑁆𑀣𑀼𑀢𑁆𑀢𑀬𑀁 𑀲𑀤𑁆𑀤𑀳𑀦𑁆𑀢𑀺. 𑀅𑀓𑀸𑀮𑀼𑀲𑀺𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀅𑀦𑀸𑀯𑀺𑀮𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀲𑀤𑁆𑀥𑁂𑀬𑁆𑀬𑀯𑀢𑁆𑀣𑀼𑀧𑀤𑀝𑁆𑀞𑀸𑀦𑀸 𑀲𑀤𑁆𑀤𑀳𑀺𑀢𑀩𑁆𑀩𑀯𑀢𑁆𑀣𑀼𑀢𑁆𑀢𑀬𑀸𑀲𑀦𑁆𑀦𑀓𑀸𑀭𑀡𑀸.

𑀅𑀭𑀜𑁆𑀜𑀕𑀢𑀲𑀼𑀤𑁂𑀲𑀓𑁄 𑀯𑀺𑀬 𑀅𑀭𑀜𑁆𑀜𑁂 𑀕𑀢𑁄 𑀫𑀕𑁆𑀕𑀲𑀼𑀤𑁂𑀲𑀓𑁄 𑀯𑀺𑀬.

𑀅𑀢𑁆𑀢𑀦𑀸 𑀅𑀯𑀺𑀦𑀺𑀩𑁆𑀪𑀼𑀢𑁆𑀢𑀸𑀦𑀁 𑀥𑀫𑁆𑀫𑀸𑀦𑀦𑁆𑀢𑀺 𑀅𑀯𑀺𑀕𑀢𑀸𑀦𑀁 𑀘𑁂𑀢𑀲𑀺𑀓𑀸𑀦𑀁. 𑀢𑁂𑀲𑀦𑁆𑀢𑀺 𑀢𑁂𑀲𑀁 𑀘𑁂𑀢𑀲𑀺𑀓𑀸𑀦𑀁 𑀥𑀫𑁆𑀫𑀸𑀦𑀁. 𑀲𑀦𑁆𑀢𑁂𑀧𑀺 𑀘 𑀢𑁂𑀲𑀁 𑀘𑁂𑀢𑀲𑀺𑀓𑀸𑀦𑀁 𑀅𑀦𑀼𑀧𑀸𑀮𑀦𑀮𑀓𑁆𑀔𑀡𑀸𑀤𑀺𑀫𑁆𑀳𑀺 𑀯𑀺𑀥𑀸𑀦𑁂 𑀅𑀢𑁆𑀣𑀺𑀓𑁆𑀔𑀡𑁂𑀬𑁂𑀯 𑀢𑀁 𑀢𑁂𑀲𑀁 𑀧𑀸𑀮𑁂𑀢𑀩𑁆𑀩𑀸𑀦𑀁 𑀘𑁂𑀢𑀲𑀺𑀓𑀸𑀦𑀁 𑀧𑀯𑀢𑁆𑀢𑀓𑁆𑀔𑀡𑁂𑀬𑁂𑀯 𑀢𑀁 𑀚𑀻𑀯𑀺𑀢𑀁 𑀢𑁂 𑀥𑀫𑁆𑀫𑁂 𑀧𑀸𑀮𑁂𑀢𑀩𑁆𑀩𑁂 𑀘𑁂𑀢𑀲𑀺𑀓𑁂 𑀅𑀦𑀼𑀧𑀸𑀮𑁂𑀢𑀺. 𑀉𑀤𑀓𑀁 𑀯𑀺𑀬𑀸𑀢𑀺 𑀬𑀣𑀸 𑀉𑀤𑀓𑀁 𑀅𑀢𑁆𑀢𑀦𑀺 𑀉𑀧𑁆𑀧𑀮𑀸𑀤𑀻𑀦𑀺 𑀅𑀦𑀼𑀧𑀸𑀮𑁂𑀢𑀺, 𑀢𑀣𑀸 𑀅𑀦𑀼𑀧𑀸𑀮𑀦𑀮𑀓𑁆𑀔𑀡𑀸𑀤𑀺𑀫𑁆𑀳𑀺 𑀯𑀺𑀥𑀸𑀦𑁂 𑀲𑀦𑁆𑀢𑁂𑀧𑀺 𑀢𑁂𑀲𑀁 𑀅𑀢𑁆𑀣𑀺𑀓𑁆𑀔𑀡𑁂𑀬𑁂𑀯 𑀅𑀦𑀼𑀧𑀸𑀮𑁂𑀢𑀺, 𑀯𑀺𑀚𑁆𑀚𑀫𑀸𑀦𑀓𑁆𑀔𑀡𑁂𑀯 𑀅𑀦𑀼𑀧𑀸𑀮𑁂𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁂𑀧𑀺 𑀘 𑀥𑀫𑁆𑀫𑁂 𑀅𑀦𑀼𑀧𑀸𑀮𑁂𑀢𑀺, 𑀥𑀸𑀢𑀺 𑀯𑀺𑀬 𑀓𑀼𑀫𑀸𑀭𑀁 𑀅𑀜𑁆𑀜𑀸𑀬 𑀚𑀦𑀺𑀢𑀁 𑀓𑀼𑀫𑀸𑀭𑀁 𑀭𑀓𑁆𑀔𑀦𑁆𑀢𑀻 𑀥𑀸𑀢𑀺 𑀯𑀺𑀬, 𑀧𑀭𑀲𑁆𑀲 𑀧𑀼𑀢𑁆𑀢𑀁 𑀅𑀗𑁆𑀓𑀸𑀤𑀺𑀦𑀸 𑀥𑀸𑀭𑁂𑀢𑀻𑀢𑀺 𑀥𑀸𑀢𑀺. 𑀲𑀬𑀁𑀧𑀯𑀢𑁆𑀢𑀺𑀢𑀥𑀫𑁆𑀫𑀲𑀫𑁆𑀩𑀦𑁆𑀥𑁂𑀦𑁂𑀯 𑀧𑀯𑀢𑁆𑀢𑀢𑀺 𑀅𑀢𑁆𑀢𑀦𑀸 𑀧𑀯𑀢𑁆𑀢𑀺𑀢𑁂𑀳𑀺 𑀥𑀫𑁆𑀫𑁂𑀳𑀺 𑀲𑀫𑁆𑀧𑀯𑀢𑁆𑀢𑀢𑀺. 𑀦𑀺𑀬𑀸𑀫𑀓𑁄 𑀯𑀺𑀬 𑀬𑀣𑀸 𑀦𑀺𑀬𑀸𑀫𑀓𑁄 𑀏𑀓𑀦𑀸𑀯𑀸𑀬 𑀯𑀼𑀢𑁆𑀣𑁂𑀳𑀺 𑀚𑀦𑁂𑀳𑀺 𑀲𑀳 𑀧𑀯𑀢𑁆𑀢𑀢𑀺, 𑀪𑀗𑁆𑀕𑀢𑁄 𑀉𑀤𑁆𑀥𑀁 𑀢𑀁 𑀚𑀻𑀯𑀺𑀢𑀁 𑀦 𑀧𑀯𑀢𑁆𑀢𑀬𑀢𑀺, 𑀅𑀢𑁆𑀢𑀦𑁄 𑀘 𑀅𑀪𑀸𑀯𑀸 𑀞𑀧𑀬𑀺𑀢𑀩𑁆𑀩𑀸𑀦𑀁 𑀘𑁂𑀢𑀲𑀺𑀓𑀸𑀦𑀜𑁆𑀘 𑀅𑀪𑀸𑀯𑀸, 𑀪𑀗𑁆𑀕𑀓𑁆𑀔𑀡𑁂 𑀘𑁂𑀢𑀲𑀺𑀓𑁂 𑀦 𑀞𑀧𑁂𑀢𑀺 𑀲𑀬𑀁 𑀪𑀺𑀚𑁆𑀚𑀫𑀸𑀦𑀢𑁆𑀢𑀸, 𑀯𑀝𑁆𑀝𑀺𑀲𑁆𑀦𑁂𑀳𑁄 𑀔𑀻𑀬𑀫𑀸𑀦𑁄 𑀧𑀤𑀻𑀧𑀲𑀺𑀔𑀁 𑀦 𑀓𑀭𑁄𑀢𑀺 𑀬𑀣𑀸.

𑀲𑁄𑀫𑁆𑀫𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑁄𑀢𑀺 𑀫𑀼𑀤𑀼𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑁄, 𑀲𑀻𑀢𑀮𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑁄 𑀯𑀸.

𑀓𑀸𑀬𑁄𑀢𑀺 𑀘𑁂𑀢𑁆𑀣 𑀯𑁂𑀤𑀦𑀸𑀤𑀬𑁄 𑀢𑀬𑁄 𑀔𑀦𑁆𑀥𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀲𑀜𑁆𑀜𑀸𑀓𑁆𑀔𑀦𑁆𑀥𑁄 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀇𑀫𑁂 𑀔𑀦𑁆𑀥𑀸 𑀕𑀳𑀺𑀢𑀸.

𑀦𑀺𑀫𑁆𑀫𑀤𑁆𑀤𑀦𑀭𑀲𑀸𑀢𑀺 𑀦𑀺𑀫𑁆𑀫𑀤𑁆𑀤𑀦𑀓𑀺𑀘𑁆𑀘𑀸. 𑀓𑀸𑀬𑀘𑀺𑀢𑁆𑀢𑀸𑀦𑀁 𑀅𑀯𑀽𑀧𑀲𑀫𑀢𑀸𑀉𑀤𑁆𑀥𑀘𑁆𑀘𑀸𑀤𑀺𑀓𑀺𑀮𑁂𑀲𑀧𑀝𑀺𑀧𑀓𑁆𑀔𑀪𑀽𑀢𑀸𑀢𑀺 𑀆𑀤𑀺𑀕𑁆𑀕𑀳𑀡𑁂𑀦 𑀓𑀼𑀓𑁆𑀓𑀼𑀘𑁆𑀘𑀁 𑀕𑀳𑁂𑀢𑀩𑁆𑀩𑀁.

𑀇𑀢𑀺 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑀝𑀻𑀓𑀸𑀬

𑀘𑁂𑀢𑀲𑀺𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀢𑀺𑀬𑁄 𑀧𑀭𑀺𑀘𑁆𑀙𑁂𑀤𑁄.

𑁩. 𑀢𑀢𑀺𑀬𑁄 𑀧𑀭𑀺𑀘𑁆𑀙𑁂𑀤𑁄

𑀘𑁂𑀢𑀲𑀺𑀓𑀯𑀺𑀪𑀸𑀕𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁮𑁯. 𑀲𑀩𑁆𑀩𑁂 𑀘𑁂𑀢𑀲𑀺𑀓𑀸 𑀯𑀼𑀢𑁆𑀢𑀸, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸 𑀬𑁂 𑀲𑀩𑁆𑀩𑁂 𑀘𑁂𑀢𑀲𑀺𑀓𑀸 𑀆𑀤𑀺𑀘𑁆𑀘𑀩𑀦𑁆𑀥𑀼𑀦𑀸 𑀩𑀼𑀤𑁆𑀥𑁂𑀦 𑀯𑀼𑀢𑁆𑀢𑀸, 𑀢𑁂 𑀲𑀩𑁆𑀩𑁂 𑀘𑁂𑀢𑀲𑀺𑀓𑀸 𑀦𑀸𑀫𑀲𑀸𑀫𑀜𑁆𑀜𑀢𑁄 𑀦𑀸𑀫𑀲𑀫𑀸𑀦𑀪𑀸𑀯𑁂𑀦 𑀤𑁆𑀯𑁂𑀧𑀜𑁆𑀜𑀸𑀲𑀪𑀯𑀦𑁆𑀢𑀺 𑀢𑁂, 𑀅𑀦𑁄𑀢𑁆𑀢𑀧𑁆𑀧𑀧𑀭𑀺𑀬𑁄𑀲𑀸𑀦𑀸 𑀤𑁆𑀯𑀺𑀧𑀜𑁆𑀜𑀸𑀲 𑀪𑀯𑀦𑁆𑀢𑀺.

𑁯𑁦-𑁯𑁨. 𑀘𑀢𑀼𑀧𑀜𑁆𑀜𑀸𑀲𑀥𑀸 𑀓𑀸𑀫𑁂, 𑀭𑀽𑀧𑁂 𑀧𑀜𑁆𑀘𑀤𑀲𑁂𑀭𑀺𑀢𑀸 𑀓𑀸𑀫𑁂 𑀓𑀸𑀫𑀸𑀯𑀘𑀭𑁂 𑀘𑀢𑀼𑀧𑀜𑁆𑀜𑀸𑀲 𑀘𑀺𑀢𑁆𑀢𑀸𑀦𑀺 𑀈𑀭𑀺𑀢𑀸. 𑀭𑀽𑀧𑁂 𑀭𑀽𑀧𑀸𑀯𑀘𑀭𑁂 𑀧𑀜𑁆𑀘𑀤𑀲 𑀘𑀺𑀢𑁆𑀢𑀸𑀦𑀺 𑀈𑀭𑀺𑀢𑀸 𑀪𑀯𑀦𑁆𑀢𑀺. 𑀤𑁆𑀯𑀸𑀤𑀲𑀸𑀭𑀽𑀧𑁂 𑀅𑀭𑀽𑀧𑀸𑀯𑀘𑀭𑁂 𑀤𑁆𑀯𑀸𑀤𑀲 𑀘𑀺𑀢𑁆𑀢𑀸𑀦𑀺 𑀪𑀯𑀦𑁆𑀢𑀺. 𑀘𑀢𑁆𑀢𑀸𑀮𑀻𑀲 𑀫𑀦𑀸𑀲𑀯𑀸 𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑀸𑀦𑀺 𑀘𑀢𑁆𑀢𑀸𑀮𑀻𑀲 𑀪𑀯𑀦𑁆𑀢𑀺, 𑀏𑀓𑀯𑀻𑀲𑀲𑀢𑀁 𑀲𑀩𑁆𑀩𑁂 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀲𑀫𑀸𑀲𑀢𑁄 𑀲𑀗𑁆𑀔𑁂𑀧𑀢𑁄 𑀏𑀓𑀯𑀻𑀲𑀲𑀢𑀁 𑀳𑁄𑀢𑀺. 𑀏𑀢𑁂𑀲𑀼 𑀢𑁂𑀲𑀫𑀼𑀧𑁆𑀧𑀢𑁆𑀢𑀺𑀁 𑀇𑀢𑁄 𑀧𑀭𑀁 𑀏𑀢𑁂𑀲𑀼 𑀫𑀬𑀸 𑀯𑀼𑀢𑁆𑀢𑁂𑀲𑀼 𑀘𑀺𑀢𑁆𑀢𑁂𑀲𑀼 𑀢𑁂𑀲𑀁 𑀨𑀲𑁆𑀲𑀸𑀤𑀻𑀦𑀁 𑀥𑀫𑁆𑀫𑀸𑀦𑀁 𑀉𑀧𑁆𑀧𑀢𑁆𑀢𑀺𑀁 𑀏𑀓𑀁 𑀏𑀓𑀁 𑀉𑀤𑁆𑀥𑀭𑀺𑀢𑁆𑀯𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑁂𑀲𑀼 𑀪𑀺𑀓𑁆𑀔𑀽𑀦𑀁 𑀧𑀸𑀝𑀯𑀢𑁆𑀣𑀸𑀬 𑀅𑀳𑀁 𑀧𑀯𑀓𑁆𑀔𑀸𑀫𑀺 𑀤𑁂𑀲𑀺𑀲𑁆𑀲𑀸𑀫𑀺.

𑁯𑁩. 𑀏𑀓𑀕𑁆𑀕𑀢𑀸 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀫𑀦𑀓𑁆𑀓𑀸𑀭𑁄 𑀫𑀦𑀲𑀺𑀓𑀸𑀭𑁄 𑀚𑀻𑀯𑀺𑀢𑀁 𑀨𑀲𑁆𑀲𑀧𑀜𑁆𑀘𑀓𑀁 𑀏𑀢𑁂 𑀅𑀝𑁆𑀞 𑀘𑁂𑀢𑀲𑀺𑀓𑀸 𑀅𑀯𑀺𑀦𑀺𑀩𑁆𑀪𑁄𑀕𑀸 𑀅𑀜𑁆𑀜𑀫𑀜𑁆𑀜𑀢𑁄 𑀅𑀯𑀺𑀕𑀢𑀸 𑀏𑀓𑀼𑀧𑁆𑀧𑀸𑀤𑀸 𑀲𑀫𑀸𑀦𑀼𑀧𑁆𑀧𑀸𑀤𑀸 𑀲𑀳𑀓𑁆𑀔𑀬𑀸 𑀲𑀳𑀯𑀬𑀸.

𑁯𑁪. 𑀨𑀲𑁆𑀲𑁄 𑀘 𑀯𑁂𑀤𑀦𑀸 𑀲𑀜𑁆𑀜𑀸, 𑀘𑁂𑀢𑀦𑀸 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀏𑀓𑀕𑁆𑀕𑀢𑀸 𑀫𑀦𑀓𑁆𑀓𑀸𑀭𑁄 𑀇𑀫𑁂 𑀘𑁂𑀢𑀲𑀺𑀓𑀸 𑀲𑀩𑁆𑀩𑀲𑀸𑀥𑀸𑀭𑀡𑀸 𑀲𑀩𑁆𑀩𑀘𑀺𑀢𑁆𑀢𑁂𑀳𑀺 𑀲𑀸𑀥𑀸𑀭𑀡𑀸, 𑀲𑀩𑁆𑀩𑀘𑀺𑀢𑁆𑀢𑀸𑀦𑀁 𑀲𑀸𑀥𑀸𑀭𑀡𑀸 𑀯𑀸.

𑁯𑁫. 𑀯𑀺𑀢𑀓𑁆𑀓𑁄 𑀧𑀜𑁆𑀘𑀧𑀜𑁆𑀜𑀸𑀲-𑀘𑀺𑀢𑁆𑀢𑁂𑀲𑀼 𑀲𑀫𑀼𑀤𑀻𑀭𑀺𑀢𑁄. 𑀘𑀸𑀭𑁄 𑀙𑀲𑀝𑁆𑀞𑀺𑀘𑀺𑀢𑁆𑀢𑁂𑀲𑀼 𑀯𑀺𑀢𑀓𑁆𑀓𑁄 𑀢𑀸𑀯 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀯𑀚𑁆𑀚𑀺𑀢𑀓𑀸𑀫𑀸𑀯𑀘𑀭𑁂𑀲𑀼 𑀘𑁂𑀯 𑀏𑀓𑀸𑀤𑀲𑀲𑀼 𑀧𑀞𑀫𑀚𑁆𑀛𑀸𑀦𑀘𑀺𑀢𑁆𑀢𑁂𑀲𑀼 𑀘𑀸𑀢𑀺 𑀧𑀜𑁆𑀘𑀧𑀜𑁆𑀜𑀸𑀲𑀘𑀺𑀢𑁆𑀢𑁂𑀲𑀼 𑀪𑀕𑀯𑀢𑀸 𑀲𑀫𑀼𑀤𑀻𑀭𑀺𑀢𑁄. 𑀯𑀺𑀘𑀸𑀭𑁄 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀯𑀚𑁆𑀚𑀺𑀢𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑁂𑀲𑀼 𑀏𑀓𑀸𑀤𑀲𑀲𑀼 𑀧𑀞𑀫𑀚𑁆𑀛𑀸𑀦𑀘𑀺𑀢𑁆𑀢𑁂𑀲𑀼 𑀘 𑀏𑀓𑀸𑀤𑀲𑀲𑀼 𑀤𑀼𑀢𑀺𑀬𑀚𑁆𑀛𑀸𑀦𑀘𑀺𑀢𑁆𑀢𑁂𑀲𑀼 𑀘𑀸𑀢𑀺 𑀙𑀲𑀝𑁆𑀞𑀺𑀘𑀺𑀢𑁆𑀢𑁂𑀲𑀼 𑀚𑀸𑀬𑀢𑀺. 𑀏𑀢𑁆𑀣 𑀏𑀢𑀲𑁆𑀫𑀺𑀁 𑀯𑀘𑀦𑁂 𑀲𑀁𑀲𑀬𑁄 𑀦𑀢𑁆𑀣𑀺.

𑁯𑁬. 𑀏𑀓𑀧𑀜𑁆𑀜𑀸𑀲𑀘𑀺𑀢𑁆𑀢𑁂𑀲𑀼, 𑀧𑀻𑀢𑀺 𑀢𑁂𑀲𑀝𑁆𑀞𑀺𑀬𑀸 𑀲𑀼𑀔𑀁 𑀧𑀻𑀢𑀺𑀤𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸𑀲𑀳𑀕𑀢𑀓𑀸𑀬𑀯𑀺𑀜𑁆𑀜𑀸𑀡𑀘𑀢𑀼𑀢𑁆𑀣𑀚𑁆𑀛𑀸𑀦𑀯𑀚𑁆𑀚𑀺𑀢𑁂𑀲𑀼 𑀏𑀓𑀧𑀜𑁆𑀜𑀸𑀲𑀘𑀺𑀢𑁆𑀢𑁂𑀲𑀼 𑀚𑀸𑀬𑀢𑀺. 𑀲𑀼𑀔𑀁 𑀤𑁄𑀫𑀦𑀲𑁆𑀲𑀤𑀼𑀓𑁆𑀔𑀼𑀧𑁂𑀓𑁆𑀔𑀸𑀲𑀳𑀕𑀢𑀯𑀚𑁆𑀚𑀺𑀢𑁂𑀲𑀼 𑀢𑁂𑀲𑀝𑁆𑀞𑀺𑀘𑀺𑀢𑁆𑀢𑁂𑀲𑀼 𑀚𑀸𑀬𑀢𑀺. 𑀉𑀧𑁂𑀓𑁆𑀔𑀸 𑀲𑁄𑀫𑀦𑀲𑁆𑀲𑀲𑀼𑀔𑀤𑀼𑀓𑁆𑀔𑀲𑀳𑀕𑀢𑀯𑀚𑁆𑀚𑀺𑀢𑁂𑀲𑀼 𑀧𑀜𑁆𑀘𑀧𑀜𑁆𑀜𑀸𑀲𑀘𑀺𑀢𑁆𑀢𑁂𑀲𑀼 𑀚𑀸𑀬𑀢𑀺. 𑀤𑀼𑀓𑁆𑀔𑀁 𑀅𑀓𑀼𑀲𑀮𑀯𑀺𑀧𑀸𑀓𑀓𑀸𑀬𑀯𑀺𑀜𑁆𑀜𑀸𑀡𑀧𑀝𑀺𑀖𑀲𑀳𑀕𑀢𑁂𑀲𑀼 𑀢𑀻𑀲𑀼 𑀘𑀺𑀢𑁆𑀢𑁂𑀲𑀼 𑀚𑀸𑀬𑀢𑀺.

𑁯𑁭. 𑀳𑁄𑀢𑀺 𑀤𑁆𑀯𑀸𑀲𑀝𑁆𑀞𑀺𑀘𑀺𑀢𑁆𑀢𑁂𑀲𑀼, 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀧𑀦 𑀤𑁄𑀫𑀦𑀲𑁆𑀲𑀤𑀼𑀓𑁆𑀔𑀲𑀼𑀔𑀼𑀧𑁂𑀓𑁆𑀔𑀸𑀲𑀳𑀕𑀢𑀯𑀚𑁆𑀚𑀺𑀢𑁂𑀲𑀼 𑀤𑁆𑀯𑀸𑀲𑀝𑁆𑀞𑀺𑀘𑀺𑀢𑁆𑀢𑁂𑀲𑀼 𑀚𑀸𑀬𑀢𑀺. 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀧𑀦𑁂𑀓𑀲𑁆𑀫𑀺𑀁 𑀅𑀓𑀼𑀲𑀮𑀯𑀺𑀧𑀸𑀓𑁂 𑀓𑀸𑀬𑀯𑀺𑀜𑁆𑀜𑀸𑀡𑁂 𑀚𑀸𑀬𑀢𑀺. 𑀢𑀣𑁂𑀓𑀫𑁆𑀳𑀺 𑀲𑀼𑀔𑀺𑀦𑁆𑀤𑁆𑀭𑀺𑀬𑀁 𑀢𑀣𑀸 𑀏𑀓𑀲𑁆𑀫𑀺𑀁 𑀧𑀼𑀜𑁆𑀜𑀧𑀸𑀓𑁂 𑀓𑀸𑀬𑀯𑀺𑀜𑁆𑀜𑀸𑀡𑁂 𑀳𑁄𑀢𑀺.

𑁯𑁮. 𑀧𑀜𑁆𑀘𑀼𑀢𑁆𑀢𑀭𑀲𑀢𑁂 𑀘𑀺𑀢𑁆𑀢𑁂, 𑀯𑀻𑀭𑀺𑀬𑀁 𑀆𑀳 𑀦𑀸𑀬𑀓𑁄 𑀚𑀺𑀦𑁄 𑀧𑀜𑁆𑀘𑀤𑁆𑀯𑀸𑀭𑀸𑀯𑀚𑁆𑀚𑀦𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑀫𑁆𑀧𑀝𑀺𑀘𑁆𑀙𑀦𑀲𑀦𑁆𑀢𑀻𑀭𑀡𑀯𑀚𑁆𑀚𑀺𑀢𑁂 𑀧𑀜𑁆𑀘𑀼𑀢𑁆𑀢𑀭𑀲𑀢𑁂 𑀘𑀺𑀢𑁆𑀢𑁂 𑀯𑀻𑀭𑀺𑀬𑀁 𑀆𑀳 𑀓𑀣𑁂𑀲𑀺. 𑀘𑀢𑀼𑀢𑁆𑀢𑀭𑀲𑀢𑁂 𑀘𑀺𑀢𑁆𑀢𑁂, 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀫𑀩𑁆𑀭𑁆𑀯𑀺 𑀯𑀺𑀘𑀺𑀓𑀺𑀘𑁆𑀙𑀸𑀲𑀳𑀕𑀢𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑀫𑁆𑀧𑀝𑀺𑀘𑁆𑀙𑀦𑀲𑀦𑁆𑀢𑀻𑀭𑀡𑀧𑀜𑁆𑀘𑀤𑁆𑀯𑀸𑀭𑀸𑀯𑀚𑁆𑀚𑀦𑀯𑀚𑁆𑀚𑀺𑀢𑁂 𑀘𑀢𑀼𑀢𑁆𑀢𑀭𑀲𑀢𑁂 𑀘𑀺𑀢𑁆𑀢𑁂 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀅𑀯𑁄𑀘.

𑁯𑁯. 𑀲𑀩𑁆𑀩𑀸𑀳𑁂𑀢𑀼𑀓𑀘𑀺𑀢𑁆𑀢𑀸𑀦𑀺, 𑀞𑀧𑁂𑀢𑁆𑀯𑀸 𑀘𑁂𑀓𑀳𑁂𑀢𑀼𑀓𑁂 𑀲𑀩𑁆𑀩𑀸𑀦𑀺 𑀅𑀝𑁆𑀞𑀸𑀭𑀲 𑀅𑀳𑁂𑀢𑀼𑀓𑀘𑀺𑀢𑁆𑀢𑀸𑀦𑀺 𑀏𑀓𑀳𑁂𑀢𑀼𑀓𑀘𑀺𑀢𑁆𑀢𑀤𑁆𑀯𑀬𑀜𑁆𑀘 𑀞𑀧𑁂𑀢𑁆𑀯𑀸 𑀲𑁂𑀲𑀲𑁆𑀫𑀺𑀁 𑀏𑀓𑀼𑀢𑁆𑀢𑀭𑀲𑀢𑁂 𑀘𑀺𑀢𑁆𑀢𑁂 𑀙𑀦𑁆𑀤𑀲𑁆𑀲 𑀉𑀧𑁆𑀧𑀢𑁆𑀢𑀺𑀁 𑀉𑀤𑁆𑀤𑀺𑀲𑁂 𑀧𑀡𑁆𑀟𑀺𑀢𑁄 𑀓𑀣𑁂𑀬𑁆𑀬.

𑁧𑁦𑁦. 𑀞𑀧𑁂𑀢𑁆𑀯𑀸 𑀤𑀲 𑀯𑀺𑀜𑁆𑀜𑀸𑀡𑁂 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀓𑁂 𑀤𑀲 𑀯𑀺𑀜𑁆𑀜𑀸𑀡𑁂 𑀘 𑀯𑀺𑀘𑀺𑀓𑀺𑀘𑁆𑀙𑀸𑀬𑀼𑀢𑀫𑁆𑀧𑀺 𑀘𑀺𑀢𑁆𑀢𑀁 𑀞𑀧𑁂𑀢𑁆𑀯𑀸 𑀲𑁂𑀲𑀲𑁆𑀫𑀺𑀁 𑀤𑀲𑀼𑀢𑁆𑀢𑀭𑀲𑀢𑁂 𑀘𑀺𑀢𑁆𑀢𑁂 𑀅𑀥𑀺𑀫𑁄𑀓𑁆𑀔𑁄 𑀪𑀕𑀯𑀢𑀸 𑀉𑀤𑀻𑀭𑀺𑀢𑁄.

𑁧𑁦𑁧-𑁨. 𑀲𑀤𑁆𑀥𑀸 𑀲𑀢𑀺 𑀳𑀺𑀭𑀻 𑀑𑀢𑁆𑀢𑀧𑁆𑀧𑀁 𑀅𑀮𑁄𑀪𑁄 𑀅𑀤𑁄𑀲𑁄 𑀢𑀢𑁆𑀭𑀫𑀚𑁆𑀛𑀢𑁆𑀢𑀁 𑀙 𑀬𑀼𑀕𑀴𑀸 𑀘 𑀇𑀢𑀺 𑀇𑀫𑁂 𑀏𑀓𑀽𑀦𑀯𑀻𑀲𑀢𑀺 𑀥𑀫𑁆𑀫𑀸 𑀦𑀺𑀬𑀢𑀸 𑀳𑀼𑀢𑁆𑀯𑀸 𑀏𑀓𑀦𑀯𑀼𑀢𑀺𑀬𑀸 𑀘𑀺𑀢𑁆𑀢𑁂 𑀚𑀸𑀬𑀦𑁆𑀢𑀺. 𑀏𑀓𑀽𑀦𑀯𑀻𑀲𑀢𑀺 𑀥𑀫𑁆𑀫𑀸 𑀅𑀳𑁂𑀢𑀼𑀓𑁂𑀲𑀼 𑀅𑀝𑁆𑀞𑀸𑀭𑀲𑀲𑀼 𑀅𑀧𑀼𑀜𑁆𑀜𑁂𑀲𑀼 𑀤𑁆𑀯𑀸𑀤𑀲𑀲𑀼 𑀅𑀓𑀼𑀲𑀮𑁂𑀲𑀼 𑀦 𑀚𑀸𑀬𑀭𑁂 𑀦 𑀚𑀸𑀬𑀦𑁆𑀢𑀺.

𑁧𑁦𑁩. 𑀏𑀓𑀽𑀦𑀸𑀲𑀻𑀢𑀺𑀬𑀸 𑀘𑀺𑀢𑁆𑀢𑁂, 𑀧𑀜𑁆𑀜𑀸 𑀚𑀸𑀬𑀢𑀺 𑀲𑀩𑁆𑀩𑀤𑀸 𑀧𑀜𑁆𑀜𑀸 𑀤𑁆𑀯𑀸𑀤𑀲𑀅𑀓𑀼𑀲𑀮𑀅𑀝𑁆𑀞𑀸𑀭𑀲𑀅𑀳𑁂𑀢𑀼𑀓𑀫𑀳𑀸𑀓𑀼𑀲𑀮𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀫𑀳𑀸𑀯𑀺𑀧𑀸𑀓𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀫𑀳𑀸𑀓𑀺𑀭𑀺𑀬𑀸𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀯𑀚𑁆𑀚𑀺𑀢𑁂 𑀏𑀓𑀽𑀦𑀸𑀲𑀻𑀢𑀺𑀬𑀸 𑀘𑀺𑀢𑁆𑀢𑁂 𑀚𑀸𑀬𑀢𑀺. 𑀅𑀝𑁆𑀞𑀯𑀻𑀲𑀢𑀺𑀬𑀸 𑀘𑀺𑀢𑁆𑀢𑁂, 𑀓𑀭𑀼𑀡𑀸𑀫𑀼𑀤𑀺𑀢𑀸 𑀲𑀺𑀬𑀼𑀁 𑀓𑀭𑀼𑀡𑀸𑀫𑀼𑀤𑀺𑀢𑀸 𑀅𑀝𑁆𑀞𑀲𑀼 𑀫𑀳𑀸𑀓𑀼𑀲𑀮𑁂𑀲𑀼, 𑀅𑀝𑁆𑀞𑀲𑀼 𑀫𑀳𑀸𑀓𑀺𑀭𑀺𑀬𑀸𑀲𑀼, 𑀭𑀽𑀧𑀸𑀯𑀘𑀭𑀧𑀜𑁆𑀘𑀫𑀚𑁆𑀛𑀸𑀦𑀯𑀚𑁆𑀚𑀺𑀢𑁂𑀲𑀼 𑀤𑁆𑀯𑀸𑀤𑀲𑀭𑀽𑀧𑀸𑀯𑀘𑀭𑁂𑀲𑀼 𑀘𑀸𑀢𑀺 𑀅𑀝𑁆𑀞𑀯𑀻𑀲𑀢𑀺𑀬𑀸 𑀘𑀺𑀢𑁆𑀢𑁂𑀲𑀼 𑀲𑀺𑀬𑀼𑀁 𑀪𑀯𑁂𑀬𑁆𑀬𑀼𑀁.

𑁧𑁦𑁪. 𑀓𑀸𑀫𑀸𑀯𑀘𑀭𑀧𑀼𑀜𑁆𑀜𑁂𑀲𑀼, 𑀲𑀩𑁆𑀩𑀮𑁄𑀓𑀼𑀢𑁆𑀢𑀭𑁂𑀲𑀼 𑀘 𑀓𑀸𑀫𑀸𑀯𑀘𑀭𑀫𑀳𑀸𑀓𑀼𑀲𑀮𑁂𑀲𑀼 𑀘𑀺𑀢𑁆𑀢𑁂𑀲𑀼 𑀲𑀩𑁆𑀩𑁂𑀲𑀼 𑀮𑁄𑀓𑀼𑀢𑁆𑀢𑀭𑁂𑀲𑀼 𑀘𑀸𑀢𑀺 𑀲𑀳 𑀅𑀝𑁆𑀞𑀓𑁂 𑀘𑀢𑁆𑀢𑀸𑀮𑀻𑀲𑀯𑀺𑀥𑁂 𑀘𑀺𑀢𑁆𑀢𑁂 𑀯𑀺𑀭𑀢𑀺𑀢𑁆𑀢𑀬𑀁 𑀳𑁄𑀢𑀺.

𑁧𑁦𑁫. 𑀲𑀤𑁆𑀥𑀸 𑀲𑀢𑀺 𑀳𑀺𑀭𑁄𑀢𑁆𑀢𑀧𑁆𑀧𑀁 𑀅𑀮𑁄𑀪𑀸𑀤𑀺𑀢𑁆𑀢𑀬𑀫𑁆𑀧𑀺 𑀘 𑀬𑀼𑀕𑀴𑀸𑀦𑀺 𑀙 𑀘 𑀫𑀚𑁆𑀛𑀢𑁆𑀢𑀁 𑀓𑀭𑀼𑀡𑀸𑀫𑀼𑀤𑀺𑀢𑀸𑀧𑀺 𑀘.

𑁧𑁦𑁬. 𑀢𑀣𑀸 𑀢𑀺𑀲𑁆𑀲𑁄 𑀯𑀺𑀭𑀢𑀺𑀬𑁄 𑀲𑀩𑁆𑀩𑁂 𑀢𑁂 𑀧𑀜𑁆𑀘𑀯𑀻𑀲𑀢𑀺 𑀥𑀫𑁆𑀫𑀸 𑀫𑀳𑀸𑀓𑀼𑀲𑀮𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀅𑀩𑁆𑀬𑀸𑀓𑀢𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸𑀢𑀺 𑀓𑀼𑀲𑀮𑁂𑀦 𑀲𑀩𑁆𑀩𑁂𑀲𑀼𑀬𑁂𑀯 𑀥𑀫𑁆𑀫𑁂𑀲𑀼 𑀙𑁂𑀓𑁂𑀦 𑀯𑀺𑀚𑀺𑀢𑀗𑁆𑀕𑀡𑁂𑀦 𑀧𑀓𑀸𑀲𑀺𑀢𑀸.

𑁧𑁦𑁭. 𑀅𑀳𑀺𑀭𑀻𑀓𑀁 𑀅𑀦𑁄𑀢𑁆𑀢𑀧𑁆𑀧𑀁, 𑀫𑁄𑀳𑁄 𑀉𑀤𑁆𑀥𑀘𑁆𑀘𑀫𑁂𑀯 𑀘𑀸𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀦𑀺𑀬𑀢𑀸 𑀳𑀼𑀢𑁆𑀯𑀸 𑀤𑁆𑀯𑀸𑀤𑀲𑀸𑀧𑀼𑀜𑁆𑀜𑀘𑀺𑀢𑁆𑀢𑁂𑀲𑀼𑀬𑁂𑀯 𑀤𑁆𑀯𑀸𑀤𑀲𑀅𑀓𑀼𑀲𑀮𑀘𑀺𑀢𑁆𑀢𑁂𑀲𑀼𑀬𑁂𑀯 𑀚𑀸𑀬𑀭𑁂 𑀚𑀸𑀬𑀦𑁆𑀢𑀺.

𑁧𑁦𑁮-𑁯. 𑀮𑁄𑀪𑁄 𑀤𑁄𑀲𑁄 𑀘 𑀫𑁄𑀳𑁄 𑀘, 𑀫𑀸𑀦𑁄 𑀤𑀺𑀝𑁆𑀞𑀺 𑀘 𑀲𑀁𑀲𑀬𑁄 𑀯𑀺𑀘𑀺𑀓𑀺𑀘𑁆𑀙𑀸 𑀫𑀺𑀤𑁆𑀥𑀁 𑀉𑀤𑁆𑀥𑀘𑁆𑀘𑀁 𑀓𑀼𑀓𑁆𑀓𑀼𑀘𑁆𑀘𑀁 𑀣𑀺𑀦𑀁 𑀫𑀘𑁆𑀙𑀭𑀺𑀬𑀫𑁆𑀧𑀺 𑀘 𑀅𑀳𑀺𑀭𑀺𑀓𑀁 𑀅𑀦𑁄𑀢𑁆𑀢𑀧𑁆𑀧𑀁 𑀇𑀲𑁆𑀲𑀸 𑀘 𑀤𑁄𑀫𑀦𑀲𑁆𑀲𑀓𑀁 𑀏𑀢𑁂 𑀥𑀫𑁆𑀫𑀸 𑀅𑀓𑀼𑀲𑀮𑀸 𑀅𑀓𑀼𑀲𑀮𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀏𑀓𑀦𑁆𑀢𑁂𑀦 𑀫𑀳𑁂𑀲𑀺𑀦𑀸 𑀯𑀺𑀚𑀺𑀢𑀗𑁆𑀕𑀡𑀯𑀺𑀕𑀢𑀫𑀮𑁂𑀦 𑀯𑀼𑀢𑁆𑀢𑀸.

𑁧𑁧𑁦. 𑀮𑁄𑀪𑁄 𑀅𑀝𑁆𑀞𑀲𑀼 𑀮𑁄𑀪𑀫𑀽𑀮𑁂𑀲𑀼 𑀘𑀺𑀢𑁆𑀢𑁂𑀲𑀼 𑀪𑀕𑀯𑀢𑀸 𑀦𑀺𑀤𑁆𑀤𑀺𑀝𑁆𑀞𑁄 𑀤𑀲𑁆𑀲𑀺𑀢𑁄. 𑀤𑀺𑀝𑁆𑀞𑀺 𑀘𑀢𑀽𑀲𑀼 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀘𑀺𑀢𑁆𑀢𑁂𑀲𑀼 𑀯𑀼𑀢𑁆𑀢𑀸. 𑀫𑀸𑀦𑁄 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑁂𑀲𑀼 𑀘𑀢𑀽𑀲𑀼 𑀕𑀸𑀳𑀽𑀧𑀯𑀸𑀤𑀧𑁆𑀧𑀪𑀺𑀦𑁆𑀤𑀦𑁂𑀦 𑀯𑀼𑀢𑁆𑀢𑁄. 𑀤𑁄𑀲𑁄 𑀤𑁆𑀯𑀻𑀲𑀼 𑀏𑀯 𑀧𑀝𑀺𑀖𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀘𑀺𑀢𑁆𑀢𑁂𑀲𑀼 𑀫𑀼𑀦𑀺𑀦𑁆𑀤𑁂𑀦 𑀯𑀼𑀢𑁆𑀢𑁄.

𑁧𑁧𑁧. 𑀇𑀲𑁆𑀲𑀸𑀫𑀘𑁆𑀙𑁂𑀭𑀓𑀼𑀓𑁆𑀓𑀼𑀘𑁆𑀘𑀸 𑀤𑁆𑀯𑀻𑀲𑀼 𑀤𑁄𑀲𑀫𑀽𑀮𑁂𑀲𑀼 𑀘𑀺𑀢𑁆𑀢𑁂𑀲𑀼 𑀚𑀸𑀬𑀦𑁆𑀢𑀺, 𑀦𑁄 𑀲𑀳 𑀲𑀳 𑀦𑁄 𑀚𑀸𑀬𑀦𑁆𑀢𑀺, 𑀏𑀓𑁂𑀓𑁄𑀯 𑀚𑀸𑀬𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀯𑀺𑀘𑀺𑀓𑀺𑀘𑁆𑀙𑀸 𑀧𑀦𑁂𑀓𑀲𑁆𑀫𑀺𑀁 𑀯𑀺𑀘𑀺𑀓𑀺𑀘𑁆𑀙𑀸 𑀧𑀦 𑀏𑀓𑀲𑁆𑀫𑀺𑀁 𑀯𑀺𑀘𑀺𑀓𑀺𑀘𑁆𑀙𑀸𑀲𑀳𑀕𑀢𑀘𑀺𑀢𑁆𑀢𑁂 𑀚𑀸𑀬𑀢𑀺. 𑀣𑀺𑀦𑀫𑀺𑀤𑁆𑀥𑀁 𑀧𑀜𑁆𑀘𑀲𑀼 𑀲𑀲𑀗𑁆𑀔𑀸𑀭𑀺𑀓𑀅𑀓𑀼𑀲𑀮𑀘𑀺𑀢𑁆𑀢𑁂𑀲𑀼 𑀚𑀸𑀬𑀢𑀺.

𑁧𑁧𑁨-𑁩. 𑀨𑀲𑁆𑀲𑁄 𑀘 𑀯𑁂𑀤𑀦𑀸 𑀲𑀜𑁆𑀜𑀸, 𑀘𑁂𑀢𑀦𑀸 𑀚𑀻𑀯𑀺𑀢𑀁 𑀫𑀦𑁄 𑀯𑀺𑀢𑀓𑁆𑀓𑁄 𑀘 𑀯𑀺𑀘𑀸𑀭𑁄 𑀘 𑀧𑀻𑀢𑀺 𑀯𑀻𑀭𑀺𑀬𑀁 𑀲𑀫𑀸𑀥𑀺 𑀘 𑀙𑀦𑁆𑀤𑁄 𑀘𑁂𑀯𑀸𑀥𑀺𑀫𑁄𑀓𑁆𑀔𑁄 𑀘 𑀫𑀦𑀲𑀺𑀓𑀸𑀭𑁄 𑀘 𑀘𑀼𑀤𑁆𑀤𑀲 𑀥𑀫𑁆𑀫𑀸 𑀓𑀼𑀲𑀮𑀸 𑀘 𑀓𑀼𑀲𑀮𑀘𑁂𑀢𑀲𑀺𑀓𑀸 𑀘 𑀳𑁄𑀦𑁆𑀢𑀺. 𑀅𑀓𑀼𑀲𑀮𑀸 𑀘𑁂𑀯 𑀅𑀓𑀼𑀲𑀮𑀘𑁂𑀢𑀲𑀺𑀓𑀸 𑀘𑁂𑀯 𑀅𑀩𑁆𑀬𑀸𑀓𑀢𑀸𑀧𑀺 𑀘 𑀅𑀩𑁆𑀬𑀸𑀓𑀢𑀘𑁂𑀢𑀲𑀺𑀓𑀸 𑀘 𑀳𑁄𑀦𑁆𑀢𑀺.

𑁧𑁧𑁪. 𑀏𑀓𑀽𑀦𑀢𑀺𑀁𑀲𑀘𑀺𑀢𑁆𑀢𑁂𑀲𑀼, 𑀛𑀸𑀦𑀁 𑀧𑀜𑁆𑀘𑀗𑁆𑀕𑀺𑀓𑀁 𑀫𑀢𑀁 𑀘𑀢𑀽𑀲𑀼 𑀲𑁄𑀫𑀦𑀲𑁆𑀲𑀲𑀳𑀕𑀢𑀸𑀓𑀼𑀲𑀮𑁂𑀲𑀼, 𑀤𑁆𑀯𑀸𑀤𑀲𑀲𑀼 𑀲𑁄𑀫𑀦𑀲𑁆𑀲𑀲𑀳𑀕𑀢𑀫𑀳𑀸𑀓𑀼𑀲𑀮𑀫𑀳𑀸𑀯𑀺𑀧𑀸𑀓𑀫𑀳𑀸𑀓𑀺𑀭𑀺𑀬𑀘𑀺𑀢𑁆𑀢𑁂𑀲𑀼, 𑀲𑀼𑀔𑀲𑀦𑁆𑀢𑀻𑀭𑀡𑀳𑀲𑀺𑀢𑀼𑀧𑁆𑀧𑀸𑀤𑀘𑀺𑀢𑁆𑀢𑁂𑀲𑀼, 𑀢𑀻𑀲𑀼 𑀭𑀽𑀧𑀧𑀞𑀫𑀚𑁆𑀛𑀸𑀦𑀘𑀺𑀢𑁆𑀢𑁂𑀲𑀼, 𑀅𑀝𑁆𑀞𑀲𑀼 𑀮𑁄𑀓𑀼𑀢𑁆𑀢𑀭𑀧𑀞𑀫𑀚𑁆𑀛𑀸𑀦𑀘𑀺𑀢𑁆𑀢𑁂𑀲𑀼 𑀘𑀸𑀢𑀺 𑀏𑀓𑀽𑀦𑀢𑀺𑀁𑀲𑀘𑀺𑀢𑁆𑀢𑁂𑀲𑀼 𑀧𑀜𑁆𑀘𑀗𑁆𑀕𑀺𑀓𑀁 𑀧𑀜𑁆𑀘𑀸𑀯𑀬𑀯𑀛𑀸𑀦𑀬𑀼𑀢𑁆𑀢𑀁 𑀛𑀸𑀦𑀁 𑀲𑀼𑀕𑀢𑁂𑀦 𑀫𑀢𑀁. 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀦𑀺 𑀘𑀢𑁆𑀢𑀸𑀭𑀺 𑀮𑁄𑀪𑀫𑀽𑀮𑀸𑀦𑀺 𑀘 𑀤𑁆𑀯𑁂 𑀤𑁄𑀲𑀫𑀽𑀮𑀸𑀦𑀺 𑀘 𑀤𑁆𑀯𑁂 𑀫𑁄𑀳𑀫𑀽𑀮𑀸𑀦𑀺 𑀘 𑀫𑀦𑁄𑀥𑀸𑀢𑀼𑀢𑁆𑀢𑀺𑀓𑀜𑁆𑀘 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀢𑀺𑀲𑁆𑀲𑁄 𑀅𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄 𑀘 𑀤𑁆𑀯𑀸𑀤𑀲𑀼𑀧𑁂𑀓𑁆𑀔𑀸𑀲𑀳𑀕𑀢𑀸𑀦𑀺 𑀫𑀳𑀸𑀓𑀼𑀲𑀮𑀫𑀳𑀸𑀯𑀺𑀧𑀸𑀓𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀺 𑀢𑀻𑀡𑀺 𑀭𑀽𑀧𑀤𑀼𑀢𑀺𑀬𑀚𑁆𑀛𑀸𑀦𑀘𑀺𑀢𑁆𑀢𑀸𑀦𑀺 𑀅𑀝𑁆𑀞 𑀮𑁄𑀓𑀼𑀢𑁆𑀢𑀭𑀤𑀼𑀢𑀺𑀬𑀚𑁆𑀛𑀸𑀦𑀘𑀺𑀢𑁆𑀢𑀸𑀦𑀺 𑀘𑀸𑀢𑀺 𑀲𑀢𑁆𑀢𑀢𑀺𑀁𑀲 𑀘𑀺𑀢𑁆𑀢𑀸𑀦𑀺 𑀘𑀢𑀼𑀛𑀸𑀦𑀗𑁆𑀕𑀬𑀼𑀢𑁆𑀢𑀸𑀦𑀺 𑀘𑀢𑀼𑀛𑀸𑀦𑀸𑀯𑀬𑀯𑀬𑀼𑀢𑁆𑀢𑀸𑀦𑀺 𑀇𑀢𑀺 𑀏𑀯𑀁 𑀦𑀺𑀤𑁆𑀤𑀺𑀲𑁂 𑀓𑀣𑁂𑀬𑁆𑀬.

𑁧𑁧𑁫. 𑀏𑀓𑀸𑀤𑀲𑀯𑀺𑀥𑀁 𑀘𑀺𑀢𑁆𑀢𑀁, 𑀢𑀺𑀯𑀗𑁆𑀕𑀺𑀓𑀫𑀼𑀤𑀻𑀭𑀺𑀢𑀁 𑀢𑀻𑀡𑀺 𑀭𑀽𑀧𑀸𑀯𑀘𑀭𑀢𑀢𑀺𑀬𑀚𑁆𑀛𑀸𑀦𑀘𑀺𑀢𑁆𑀢𑀸𑀦𑀺, 𑀅𑀝𑁆𑀞𑀮𑁄𑀓𑀼𑀢𑁆𑀢𑀭𑀢𑀢𑀺𑀬𑀚𑁆𑀛𑀸𑀦𑀘𑀺𑀢𑁆𑀢𑀸𑀦𑀺 𑀘𑀸𑀢𑀺 𑀏𑀓𑀸𑀤𑀲𑀯𑀺𑀥𑀁 𑀘𑀺𑀢𑁆𑀢𑀁 𑀢𑀺𑀯𑀗𑁆𑀕𑀺𑀓𑀁 𑀢𑀺𑀅𑀯𑀬𑀯𑀛𑀸𑀦𑀬𑀼𑀢𑁆𑀢𑀁, 𑀙 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀧𑀜𑁆𑀘𑀫𑀚𑁆𑀛𑀸𑀦𑀘𑀺𑀢𑁆𑀢𑀸𑀦𑀺, 𑀤𑁆𑀯𑀸𑀤𑀲𑀸𑀭𑀽𑀧𑀸𑀯𑀘𑀭𑀘𑀺𑀢𑁆𑀢𑀸𑀦𑀺, 𑀲𑁄𑀴𑀲 𑀮𑁄𑀓𑀼𑀢𑁆𑀢𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀧𑀜𑁆𑀘𑀫𑀚𑁆𑀛𑀸𑀦𑀘𑀺𑀢𑁆𑀢𑀸𑀦𑀺 𑀘𑀸𑀢𑀺 𑀘𑀢𑀼𑀢𑀺𑀁𑀲𑀯𑀺𑀥𑀁 𑀘𑀺𑀢𑁆𑀢𑀁 𑀤𑀼𑀯𑀗𑁆𑀕𑀺𑀓𑀁 𑀤𑁆𑀯𑀺𑀅𑀯𑀬𑀯𑀛𑀸𑀦𑀬𑀼𑀢𑁆𑀢𑀁 𑀉𑀤𑀻𑀭𑀺𑀢𑀁 𑀚𑀺𑀦𑁂𑀦 𑀈𑀭𑀺𑀢𑀁.

𑁧𑁧𑁬. 𑀲𑀪𑀸𑀯𑁂𑀦𑀸𑀯𑀺𑀢𑀓𑁆𑀓𑁂𑀲𑀼, 𑀛𑀸𑀦𑀗𑁆𑀕𑀸𑀦𑀺 𑀦 𑀉𑀤𑁆𑀥𑀭𑁂 𑀲𑀪𑀸𑀯𑁂𑀦 𑀧𑀓𑀢𑀺𑀬𑀸 𑀅𑀯𑀺𑀢𑀓𑁆𑀓𑁂𑀲𑀼 𑀯𑀺𑀢𑀓𑁆𑀓𑀯𑀺𑀭𑀳𑀺𑀢𑁂𑀲𑀼 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑁂𑀲𑀼 𑀛𑀸𑀦𑀗𑁆𑀕𑀸𑀦𑀺 𑀛𑀸𑀦𑀸𑀯𑀬𑀯𑀸𑀦𑀺 𑀚𑀺𑀦𑁄 𑀦 𑀉𑀤𑁆𑀥𑀭𑁂. 𑀅𑀬𑀫𑁂𑀢𑁆𑀣𑀸𑀥𑀺𑀧𑁆𑀧𑀸𑀬𑁄 𑁋 𑀅𑀜𑁆𑀜𑀢𑁆𑀣 𑀯𑀺𑀢𑀓𑁆𑀓𑁄 𑀛𑀸𑀦𑀘𑀺𑀢𑁆𑀢𑁂𑀦 𑀯𑀺𑀧𑁆𑀧𑀳𑀻𑀦𑁄 𑀪𑀸𑀲𑀺𑀢𑁄, 𑀇𑀫𑁂𑀲𑀼 𑀧𑀦 𑀦𑁂𑀯 𑀛𑀸𑀦𑀘𑀺𑀢𑁆𑀢𑁂𑀦 𑀧𑀳𑀻𑀦𑀸, 𑀧𑀓𑀢𑀺𑀬𑀸 𑀯𑀺𑀢𑀓𑁆𑀓𑀯𑀺𑀭𑀳𑀺𑀢𑀸𑀦𑀺 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀺 𑀲𑀩𑁆𑀩𑀸𑀳𑁂𑀢𑀼𑀓𑀘𑀺𑀢𑁆𑀢𑁂𑀲𑀼 𑀫𑀕𑁆𑀕𑀗𑁆𑀕𑀸𑀦𑀺 𑀫𑀕𑁆𑀕𑀸𑀯𑀬𑀯𑀸𑀦𑀺 𑀚𑀺𑀦𑁄 𑀦 𑀉𑀤𑁆𑀥𑀭𑁂 𑀦 𑀤𑁂𑀲𑁂𑀬𑁆𑀬.

𑁧𑁧𑁭. 𑀩𑀼𑀥𑁄 𑀚𑀺𑀦𑁄 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑁂𑀲𑀼 𑀫𑀦𑁄𑀥𑀸𑀢𑀼𑀢𑁆𑀢𑀺𑀓𑁂 𑀘 𑀢𑀻𑀲𑀼 𑀲𑀦𑁆𑀢𑀻𑀭𑀡𑁂𑀲𑀼 𑀘𑀸𑀢𑀺 𑀲𑁄𑀴𑀲𑀘𑀺𑀢𑁆𑀢𑁂𑀲𑀼 𑀢𑀻𑀡𑀺𑀦𑁆𑀤𑁆𑀭𑀺𑀬𑀸𑀦𑀺 𑀯𑀤𑁂 𑀓𑀣𑁂𑀬𑁆𑀬. 𑀏𑀓𑀲𑁆𑀫𑀺𑀁 𑀧𑀦 𑀘𑀢𑁆𑀢𑀸𑀭𑀺 𑀏𑀓𑀲𑁆𑀫𑀺𑀁 𑀯𑀺𑀘𑀺𑀓𑀺𑀘𑁆𑀙𑀸𑀲𑀳𑀕𑀢𑀘𑀺𑀢𑁆𑀢𑁂 𑀘𑀢𑁆𑀢𑀸𑀭𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀳𑁄𑀦𑁆𑀢𑀺, 𑀏𑀓𑀸𑀤𑀲𑀲𑀼 𑀅𑀓𑀼𑀲𑀮𑀘𑀺𑀢𑁆𑀢𑁂𑀲𑀼 𑀯𑀺𑀘𑀺𑀓𑀺𑀘𑁆𑀙𑀸𑀬𑀼𑀢𑁆𑀢𑀘𑀺𑀢𑁆𑀢𑀯𑀚𑁆𑀚𑀺𑀢𑁂𑀲𑀼 𑀳𑀲𑀺𑀢𑀼𑀧𑁆𑀧𑀸𑀤𑁂 𑀘𑁂𑀯 𑀯𑁄𑀝𑁆𑀞𑀩𑁆𑀩𑀦𑀘𑀺𑀢𑁆𑀢𑁂 𑀘𑀸𑀢𑀺 𑀢𑁂𑀭𑀲𑀲𑀼 𑀘𑀺𑀢𑁆𑀢𑁂𑀲𑀼 𑀧𑀜𑁆𑀘 𑀇𑀦𑁆𑀤𑁆𑀭𑀺𑀬𑀸𑀦𑀺 𑀩𑀼𑀥𑁄 𑀪𑀕𑀯𑀸 𑀉𑀤𑁆𑀥𑀭𑁂 𑀉𑀤𑁆𑀥𑀭𑁂𑀬𑁆𑀬.

𑁧𑁧𑁮. 𑀲𑀢𑁆𑀢 𑀤𑁆𑀯𑀸𑀤𑀲𑀘𑀺𑀢𑁆𑀢𑁂𑀲𑀼, 𑀇𑀦𑁆𑀤𑁆𑀭𑀺𑀬𑀸𑀦𑀺 𑀚𑀺𑀦𑁄𑀩𑁆𑀭𑁆𑀯𑀺 𑀚𑀺𑀦𑁄 𑀩𑀼𑀤𑁆𑀥𑁄 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀫𑀳𑀸𑀓𑀼𑀲𑀮𑀫𑀳𑀸𑀯𑀺𑀧𑀸𑀓𑀫𑀳𑀸𑀓𑀺𑀭𑀺𑀬𑀸𑀲𑀗𑁆𑀔𑀸𑀢𑁂𑀲𑀼 𑀤𑁆𑀯𑀸𑀤𑀲𑀘𑀺𑀢𑁆𑀢𑁂𑀲𑀼 𑀲𑀢𑁆𑀢 𑀇𑀦𑁆𑀤𑁆𑀭𑀺𑀬𑀸𑀦𑀺 𑀅𑀩𑁆𑀭𑁆𑀯𑀺 𑀓𑀣𑁂𑀲𑀺, 𑀏𑀓𑁂𑀦𑀽𑀦𑁂𑀲𑀼 𑀅𑀝𑁆𑀞𑁂𑀯, 𑀘𑀢𑁆𑀢𑀸𑀮𑀻𑀲𑀫𑀦𑁂𑀲𑀼 𑀘 𑀚𑀺𑀦𑁄 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀫𑀳𑀸𑀓𑀼𑀲𑀮𑀫𑀳𑀸𑀯𑀺𑀧𑀸𑀓𑀫𑀳𑀸𑀓𑀺𑀭𑀺𑀬𑀸𑀲𑀗𑁆𑀔𑀸𑀢𑁂𑀲𑀼 𑀤𑁆𑀯𑀸𑀤𑀲𑀲𑀼 𑀘𑀺𑀢𑁆𑀢𑁂𑀲𑀼, 𑀧𑀜𑁆𑀘𑀤𑀲𑀲𑀼 𑀭𑀽𑀧𑁂𑀲𑀼, 𑀤𑁆𑀯𑀸𑀤𑀲𑀲𑀼 𑀅𑀭𑀽𑀧𑁂𑀲𑀼 𑀘𑀸𑀢𑀺 𑀏𑀓𑁂𑀦𑀽𑀦𑁂𑀲𑀼 𑀘𑀢𑁆𑀢𑀸𑀮𑀻𑀲𑀫𑀦𑁂𑀲𑀼 𑀅𑀝𑁆𑀞𑁂𑀯 𑀇𑀦𑁆𑀤𑁆𑀭𑀺𑀬𑀸𑀦𑀺 𑀅𑀩𑁆𑀭𑁆𑀯𑀺.

𑁧𑁧𑁯. 𑀘𑀢𑁆𑀢𑀸𑀮𑀻𑀲𑀸𑀬 𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑁂𑀲𑀼 𑀦𑀯𑀓𑀁 𑀇𑀦𑁆𑀤𑁆𑀭𑀺𑀬𑀦𑀯𑀓𑀁 𑀦𑀸𑀬𑀓𑁄 𑀅𑀩𑁆𑀭𑁆𑀯𑀺 𑀓𑀣𑁂𑀲𑀺. 𑀏𑀯𑀁 𑀇𑀦𑁆𑀤𑁆𑀭𑀺𑀬𑀬𑁄𑀕𑁄𑀧𑀺, 𑀯𑁂𑀤𑀺𑀢𑀩𑁆𑀩𑁄 𑀯𑀺𑀪𑀸𑀯𑀺𑀦𑀸 𑀏𑀯𑀁 𑀇𑀫𑀺𑀦𑀸 𑀫𑀬𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀘𑀺𑀢𑁆𑀢𑁂𑀲𑀼 𑀇𑀦𑁆𑀤𑁆𑀭𑀺𑀬𑀬𑁄𑀕𑁄 𑀯𑀺𑀪𑀸𑀯𑀺𑀦𑀸 𑀯𑀺𑀲𑁂𑀲𑁂𑀦 𑀧𑀜𑁆𑀜𑀁 𑀪𑀸𑀯𑁂𑀢𑀼𑀁 𑀧𑀓𑀸𑀲𑁂𑀢𑀼𑀁 𑀲𑀻𑀮𑀫𑁂𑀢𑀲𑁆𑀲𑀸𑀢𑀺 𑀯𑀺𑀪𑀸𑀯𑀻, 𑀢𑁂𑀦 𑀯𑁂𑀤𑀺𑀢𑀩𑁆𑀩𑁄.

𑁧𑁨𑁦. 𑀅𑀫𑀕𑁆𑀕𑀗𑁆𑀕𑀸𑀦𑀺 𑀦𑀸𑀫𑁂𑀢𑁆𑀣, 𑀅𑀝𑁆𑀞𑀸𑀭𑀲 𑀅𑀳𑁂𑀢𑀼𑀓𑀸 𑀏𑀢𑁆𑀣 𑀏𑀢𑁂𑀲𑀼 𑀘𑀺𑀢𑁆𑀢𑁂𑀲𑀼 𑀅𑀝𑁆𑀞𑀸𑀭𑀲 𑀅𑀳𑁂𑀢𑀼𑀓𑀸 𑀦𑀢𑁆𑀣𑀺 𑀫𑀕𑁆𑀕𑁄 𑀏𑀢𑁂𑀲𑀽𑀢𑀺 𑀅𑀫𑀕𑁆𑀕𑀗𑁆𑀕𑀸𑀦𑀺 𑀦𑀸𑀫, 𑀛𑀸𑀦𑀗𑁆𑀕𑀸𑀦𑀺 𑀦 𑀯𑀺𑀚𑁆𑀚𑀦𑁆𑀢𑀺, 𑀯𑀺𑀜𑁆𑀜𑀸𑀡𑁂𑀲𑀼 𑀤𑁆𑀯𑀺𑀧𑀜𑁆𑀘𑀲𑀼 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑁂𑀲𑀼 𑀛𑀸𑀦𑀗𑁆𑀕𑀸𑀦𑀺𑀧𑀺 𑀦 𑀲𑀁𑀯𑀺𑀚𑁆𑀚𑀦𑁆𑀢𑀺.

𑁧𑁨𑁧. 𑀏𑀓𑀁 𑀘𑀺𑀢𑁆𑀢𑀁 𑀤𑀼𑀫𑀕𑁆𑀕𑀗𑁆𑀕𑀁 𑀏𑀓𑀁 𑀯𑀺𑀘𑀺𑀓𑀺𑀘𑁆𑀙𑀸𑀲𑀳𑀕𑀢𑀘𑀺𑀢𑁆𑀢𑀁 𑀤𑀼𑀫𑀕𑁆𑀕𑀗𑁆𑀕𑀁 𑀤𑀼𑀫𑀕𑁆𑀕𑀸𑀯𑀬𑀯𑀁, 𑀘𑀢𑀽𑀲𑀼 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑀸𑀓𑀼𑀲𑀮𑀘𑀺𑀢𑁆𑀢𑁂𑀲𑀼 𑀘 𑀤𑁆𑀯𑀻𑀲𑀼 𑀧𑀝𑀺𑀖𑀬𑀼𑀢𑁆𑀢𑁂𑀲𑀼 𑀘 𑀉𑀤𑁆𑀥𑀘𑁆𑀘𑀬𑀼𑀢𑁆𑀢𑁂𑀲𑀼 𑀘𑀸𑀢𑀺 𑀲𑀢𑁆𑀢𑀲𑀼 𑀘𑀺𑀢𑁆𑀢𑁂𑀲𑀼 𑀘 𑀢𑀺𑀫𑀕𑁆𑀕𑀗𑁆𑀕𑀸𑀦𑀺 𑀢𑀺𑀫𑀕𑁆𑀕𑀸𑀯𑀬𑀯𑀸𑀦𑀺 𑀳𑁄𑀦𑁆𑀢𑀺. 𑀘𑀢𑁆𑀢𑀸𑀮𑀻𑀲𑀸𑀬𑀘𑀺𑀢𑁆𑀢𑁂𑀲𑀼, 𑀫𑀕𑁆𑀕𑁄 𑀲𑁄 𑀘𑀢𑀼𑀭𑀗𑁆𑀕𑀺𑀓𑁄 𑀘𑀢𑀽𑀲𑀼 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑀸𑀓𑀼𑀲𑀮𑁂𑀲𑀼 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀫𑀳𑀸𑀓𑀼𑀲𑀮𑀫𑀳𑀸𑀯𑀺𑀧𑀸𑀓𑀫𑀳𑀸𑀓𑀺𑀭𑀺𑀬𑀸𑀲𑀗𑁆𑀔𑀸𑀢𑁂𑀲𑀼 𑀤𑁆𑀯𑀸𑀤𑀲𑀲𑀼 𑀘𑀺𑀢𑁆𑀢𑁂𑀲𑀼 𑀘 𑀭𑀽𑀧𑀸𑀯𑀘𑀭𑀤𑀼𑀢𑀺𑀬𑀢𑀢𑀺𑀬𑀘𑀢𑀼𑀢𑁆𑀣𑀧𑀜𑁆𑀘𑀫𑀚𑁆𑀛𑀸𑀦𑀲𑀗𑁆𑀔𑀸𑀢𑁂𑀲𑀼 𑀤𑁆𑀯𑀸𑀤𑀲𑀲𑀼 𑀭𑀽𑀧𑀸𑀯𑀘𑀭𑁂𑀲𑀼, 𑀤𑁆𑀯𑀸𑀤𑀲𑀲𑀼 𑀅𑀭𑀽𑀧𑀸𑀯𑀘𑀭𑁂𑀲𑀼 𑀘𑀸𑀢𑀺 𑀘𑀢𑁆𑀢𑀸𑀮𑀻𑀲𑀸𑀬 𑀘𑀺𑀢𑁆𑀢𑁂𑀲𑀼 𑀘𑀢𑀼𑀭𑀗𑁆𑀕𑀺𑀓𑁄 𑀫𑀕𑁆𑀕𑁄 𑀘𑀢𑀼𑀭𑀸𑀯𑀬𑀯𑁄 𑀫𑀕𑁆𑀕𑁄 𑀳𑁄𑀢𑀺.

𑁧𑁨𑁨. 𑀧𑀜𑁆𑀘𑀤𑁆𑀤𑀲𑀲𑀼 𑀘𑀺𑀢𑁆𑀢𑁂𑀲𑀼, 𑀫𑀕𑁆𑀕𑁄 𑀧𑀜𑁆𑀘𑀗𑁆𑀕𑀺𑀓𑁄 𑀫𑀢𑁄 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀫𑀳𑀸𑀓𑀼𑀲𑀮𑀫𑀳𑀸𑀯𑀺𑀧𑀸𑀓𑀫𑀳𑀸𑀓𑀺𑀭𑀺𑀬𑀸𑀲𑀗𑁆𑀔𑀸𑀢𑁂𑀲𑀼 𑀤𑁆𑀯𑀸𑀤𑀲𑀲𑀼, 𑀢𑀻𑀲𑀼 𑀭𑀽𑀧𑀧𑀞𑀫𑀚𑁆𑀛𑀸𑀦𑀘𑀺𑀢𑁆𑀢𑁂𑀲𑀼 𑀘𑀸𑀢𑀺 𑀧𑀜𑁆𑀘𑀤𑁆𑀤𑀲𑀲𑀼 𑀘𑀺𑀢𑁆𑀢𑁂𑀲𑀼 𑀧𑀜𑁆𑀘𑀗𑁆𑀕𑀺𑀓𑁄 𑀧𑀜𑁆𑀘𑀸𑀯𑀬𑀯𑁄 𑀫𑀕𑁆𑀕𑁄 𑀪𑀕𑀯𑀢𑀸 𑀫𑀢𑁄. 𑀤𑁆𑀯𑀢𑁆𑀢𑀺𑀁𑀲𑀘𑀺𑀢𑁆𑀢𑁂𑀲𑀼 𑀫𑀕𑁆𑀕𑁄 𑀲𑀢𑁆𑀢𑀗𑁆𑀕𑀺𑀓𑁄𑀧𑀺 𑀘 𑀮𑁄𑀓𑀼𑀢𑁆𑀢𑀭𑀤𑀼𑀢𑀺𑀬𑀢𑀢𑀺𑀬𑀘𑀢𑀼𑀢𑁆𑀣𑀧𑀜𑁆𑀘𑀫𑀚𑁆𑀛𑀸𑀦𑀲𑀗𑁆𑀔𑀸𑀢𑁂𑀲𑀼 𑀤𑁆𑀯𑀢𑁆𑀢𑀺𑀁𑀲𑀘𑀺𑀢𑁆𑀢𑁂𑀲𑀼 𑀫𑀕𑁆𑀕𑁄 𑀲𑀢𑁆𑀢𑀗𑁆𑀕𑀺𑀓𑁄 𑀲𑀢𑁆𑀢𑀸𑀯𑀬𑀯𑁄 𑀳𑁄𑀢𑀺.

𑁧𑁨𑁩. 𑀫𑀕𑁆𑀕𑁄 𑀅𑀝𑁆𑀞𑀲𑀼 𑀘𑀺𑀢𑁆𑀢𑁂𑀲𑀼 𑀫𑀕𑁆𑀕𑀨𑀮𑀯𑀲𑁂𑀦 𑀅𑀝𑁆𑀞𑀲𑀼 𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑁂𑀲𑀼 𑀫𑀕𑁆𑀕𑁄 𑀅𑀝𑁆𑀞𑀗𑁆𑀕𑀺𑀓𑁄 𑀅𑀝𑁆𑀞𑀸𑀯𑀬𑀯𑁄 𑀳𑁄𑀢𑀺. 𑀇𑀢𑀺 𑀧𑀭𑀺𑀲𑀫𑀸𑀧𑀦𑁂. 𑀢𑀼 𑀧𑀤𑀧𑀽𑀭𑀡𑁂. 𑀏𑀯𑀁 𑀇𑀫𑀺𑀦𑀸 𑀫𑀬𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀲𑀩𑁆𑀩𑀘𑀺𑀢𑁆𑀢𑁂𑀲𑀼 𑀫𑀕𑁆𑀕𑀗𑁆𑀕𑀸𑀦𑀺 𑀫𑀕𑁆𑀕𑀸𑀯𑀬𑀯𑀸𑀦𑀺 𑀥𑀻𑀭𑁄 𑀉𑀤𑁆𑀥𑀭𑁂𑀬𑁆𑀬, 𑀤𑁂𑀲𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑁧𑁨𑁪. 𑀩𑀮𑀸𑀦𑀺 𑀤𑁆𑀯𑁂 𑀤𑁆𑀯𑀺𑀘𑀺𑀢𑁆𑀢𑁂𑀲𑀼 𑀳𑀲𑀺𑀢𑀼𑀧𑁆𑀧𑀸𑀤𑀯𑁄𑀝𑁆𑀞𑀩𑁆𑀩𑀦𑀲𑀗𑁆𑀔𑀸𑀢𑁂𑀲𑀼 𑀤𑁆𑀯𑀻𑀲𑀼 𑀘𑀺𑀢𑁆𑀢𑁂𑀲𑀼 𑀤𑁆𑀯𑁂 𑀩𑀮𑀸𑀦𑀺 𑀳𑁄𑀦𑁆𑀢𑀺. 𑀏𑀓𑀲𑁆𑀫𑀺𑀁 𑀢𑀻𑀡𑀺 𑀤𑀻𑀧𑀬𑁂 𑀏𑀓𑀲𑁆𑀫𑀺𑀁 𑀯𑀺𑀘𑀺𑀓𑀺𑀘𑁆𑀙𑀸𑀬𑀼𑀢𑁆𑀢𑁂 𑀢𑀻𑀡𑀺 𑀩𑀮𑀸𑀦𑀺 𑀥𑀻𑀭𑁄 𑀤𑀻𑀧𑀬𑁂 𑀧𑀓𑀸𑀲𑁂𑀬𑁆𑀬. 𑀯𑀺𑀘𑀺𑀓𑀺𑀘𑁆𑀙𑀸𑀬𑀼𑀢𑁆𑀢𑀢𑁄 𑀲𑁂𑀲𑁂𑀲𑀼 𑀏𑀓𑀸𑀤𑀲𑀲𑀼 𑀅𑀓𑀼𑀲𑀮𑁂𑀲𑀼 𑀘𑀢𑁆𑀢𑀸𑀭𑀺 𑀩𑀮𑀸𑀦𑀺 𑀳𑁄𑀦𑁆𑀢𑀺. 𑀙 𑀤𑁆𑀯𑀸𑀤𑀲𑀲𑀼 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀫𑀳𑀸𑀓𑀼𑀲𑀮𑀫𑀳𑀸𑀯𑀺𑀧𑀸𑀓𑀫𑀳𑀸𑀓𑀺𑀭𑀺𑀬𑀸𑀲𑀗𑁆𑀔𑀸𑀢𑁂𑀲𑀼 𑀤𑁆𑀯𑀸𑀤𑀲𑀲𑀼 𑀘𑀺𑀢𑁆𑀢𑁂𑀲𑀼 𑀙 𑀩𑀮𑀸𑀦𑀺 𑀳𑁄𑀦𑁆𑀢𑀻𑀢𑀺 𑀥𑀻𑀭𑁄 𑀦𑀺𑀤𑁆𑀤𑀺𑀲𑁂 𑀓𑀣𑁂𑀬𑁆𑀬.

𑁧𑁨𑁫. 𑀏𑀓𑀽𑀦𑀸𑀲𑀻𑀢𑀺𑀬𑀸 𑀲𑀢𑁆𑀢 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀫𑀳𑀸𑀓𑀼𑀲𑀮𑀫𑀳𑀸𑀯𑀺𑀧𑀸𑀓𑀫𑀳𑀸𑀓𑀺𑀭𑀺𑀬𑀸𑀲𑀗𑁆𑀔𑀸𑀢𑁂𑀲𑀼 𑀤𑁆𑀯𑀸𑀤𑀲𑀲𑀼 𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑁂𑀲𑀼, 𑀲𑀢𑁆𑀢𑀯𑀻𑀲𑀢𑀺𑀬𑀸 𑀫𑀳𑀕𑁆𑀕𑀢𑀘𑀺𑀢𑁆𑀢𑁂𑀲𑀼, 𑀘𑀢𑁆𑀢𑀸𑀮𑀻𑀲𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑁂𑀲𑀼 𑀘𑀸𑀢𑀺 𑀏𑀓𑀽𑀦𑀸𑀲𑀻𑀢𑀺𑀬𑀸 𑀘𑀺𑀢𑁆𑀢𑁂𑀲𑀼 𑀲𑀢𑁆𑀢 𑀩𑀮𑀸𑀦𑀺 𑀳𑁄𑀦𑁆𑀢𑀺. 𑀲𑁄𑀴𑀲𑁂𑀯𑀸𑀩𑀮𑀸𑀦𑀺 𑀢𑀼 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀺 𑀘 𑀢𑀺𑀲𑁆𑀲𑁄 𑀫𑀦𑁄𑀥𑀸𑀢𑀼𑀬𑁄 𑀘 𑀢𑀻𑀡𑀺 𑀲𑀦𑁆𑀢𑀻𑀭𑀡𑀸𑀦𑀺 𑀘𑀸𑀢𑀺 𑀲𑁄𑀴𑀲 𑀏𑀯 𑀘𑀺𑀢𑁆𑀢𑀸𑀦𑀺 𑀅𑀩𑀮𑀸𑀦𑀺 𑀩𑀮𑀯𑀺𑀭𑀳𑀺𑀢𑀸𑀦𑀺 𑀳𑁄𑀦𑁆𑀢𑀺, 𑀏𑀯𑀁 𑀇𑀫𑀺𑀦𑀸 𑀫𑀬𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀘𑀺𑀢𑁆𑀢𑀁 𑀲𑀩𑀮𑀁 𑀩𑀮𑁂𑀦 𑀲𑀳𑀕𑀢𑀁 𑀅𑀩𑀮𑀫𑁆𑀧𑀺 𑀘 𑀩𑀮𑀯𑀺𑀭𑀳𑀺𑀢𑀜𑁆𑀘𑀸𑀧𑀺 𑀘𑀺𑀢𑁆𑀢𑀁 𑀯𑀺𑀜𑁆𑀜𑁂𑀬𑁆𑀬𑀁 𑀥𑀻𑀭𑁂𑀦 𑀯𑀺𑀚𑀸𑀦𑀺𑀢𑀩𑁆𑀩𑀁.

𑁧𑁨𑁬. 𑀛𑀸𑀦𑀗𑁆𑀕𑀫𑀕𑁆𑀕𑀗𑁆𑀕𑀩𑀮𑀺𑀦𑁆𑀤𑁆𑀭𑀺𑀬𑀸𑀦𑀺, 𑀘𑀺𑀢𑁆𑀢𑁂𑀲𑀼 𑀚𑀸𑀬𑀦𑁆𑀢𑀺 𑀳𑀺 𑀬𑁂𑀲𑀼 𑀬𑀸𑀦𑀺 𑀬𑁂𑀲𑀼 𑀘𑀺𑀢𑁆𑀢𑁂𑀲𑀼 𑀬𑀸𑀦𑀺 𑀛𑀸𑀦𑀗𑁆𑀕𑀫𑀕𑁆𑀕𑀗𑁆𑀕𑀩𑀮𑀇𑀦𑁆𑀤𑁆𑀭𑀺𑀬𑀸𑀦𑀺 𑀚𑀸𑀬𑀦𑁆𑀢𑀺, 𑀫𑀬𑀸 𑀲𑀫𑀸𑀲𑁂𑀦 𑀲𑀫𑀼𑀤𑁆𑀥𑀭𑀺𑀢𑁆𑀯𑀸 𑀅𑀲𑀁𑀲𑀝𑁆𑀞𑀁 𑀉𑀤𑁆𑀥𑀭𑀺𑀢𑁆𑀯𑀸 𑀢𑁂𑀲𑀼 𑀘𑀺𑀢𑁆𑀢𑁂𑀲𑀼 𑀲𑀩𑁆𑀩𑀸𑀦𑀺𑀧𑀺 𑀢𑀸𑀦𑀺 𑀛𑀸𑀦𑀗𑁆𑀕𑀫𑀕𑁆𑀕𑀗𑁆𑀕𑀩𑀮𑀇𑀦𑁆𑀤𑁆𑀭𑀺𑀬𑀸𑀦𑀺 𑀲𑀫𑀸𑀲𑁂𑀦 𑀲𑀗𑁆𑀔𑁂𑀧𑁂𑀦 𑀫𑀬𑀸 𑀩𑀼𑀤𑁆𑀥𑀤𑀢𑁆𑀢𑀸𑀘𑀭𑀺𑀬𑁂𑀦 𑀯𑀼𑀢𑁆𑀢𑀸𑀦𑀺 𑀓𑀣𑀺𑀢𑀸𑀦𑀺.

𑀇𑀢𑀺 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑀝𑀻𑀓𑀸𑀬

𑀘𑁂𑀢𑀲𑀺𑀓𑀯𑀺𑀪𑀸𑀕𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀢𑀺𑀬𑁄 𑀧𑀭𑀺𑀘𑁆𑀙𑁂𑀤𑁄.