𑁯. 𑀦𑀯𑀫𑁄 𑀧𑀭𑀺𑀘𑁆𑀙𑁂𑀤𑁄

𑀧𑀼𑀜𑁆𑀜𑀯𑀺𑀧𑀸𑀓𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁫𑁬𑁦-𑁨. 𑀩𑀸𑀢𑁆𑀢𑀺𑀁𑀲𑀧𑀸𑀓𑀘𑀺𑀢𑁆𑀢𑀸𑀦𑀺, 𑀮𑁄𑀓𑀺𑀓𑀸𑀦𑁂𑀯 𑀬𑀸𑀦𑀺 𑀳𑀺;

𑀏𑀢𑁂𑀲𑀁 𑀧𑀸𑀓𑀘𑀺𑀢𑁆𑀢𑀸𑀦𑀁, 𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑀺𑀲𑀼.

𑀬𑀸𑀦𑀺 𑀮𑁄𑀓𑀺𑀓𑀸𑀦𑀺 𑀏𑀯 𑀩𑀸𑀢𑁆𑀢𑀺𑀁𑀲 𑀧𑀸𑀓𑀘𑀺𑀢𑁆𑀢𑀸𑀦𑀺 𑀳𑁄𑀦𑁆𑀢𑀺, 𑀏𑀢𑁂𑀲𑀁 𑀧𑀸𑀓𑀘𑀺𑀢𑁆𑀢𑀸𑀦𑀁 𑀧𑀼𑀜𑁆𑀜𑀸𑀧𑀼𑀜𑁆𑀜𑀸𑀤𑀺𑀲𑀗𑁆𑀔𑀸𑀭𑀸 𑀪𑀯𑀸𑀤𑀻𑀲𑀼 𑀬𑁄𑀦𑀺𑀕𑀢𑀺𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀲𑀢𑁆𑀢𑀸𑀯𑀸𑀲𑁂𑀲𑀼 𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑀻𑀲𑀼 𑀬𑀣𑀸 𑀬𑁂𑀦 𑀧𑀓𑀸𑀭𑁂𑀦 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺 𑀏𑀯, 𑀇𑀫𑁂𑀲𑀁 𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀁 𑀢𑁂𑀧𑀺 𑀲𑀗𑁆𑀔𑀸𑀭𑀸 𑀪𑀯𑀸𑀤𑀻𑀲𑀼 𑀬𑁄𑀦𑀺𑀕𑀢𑀺𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀲𑀢𑁆𑀢𑀸𑀯𑀸𑀲𑁂𑀲𑀼 𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑀻𑀲𑀼 𑀢𑀣𑀸 𑀢𑁂𑀦 𑀧𑀓𑀸𑀭𑁂𑀦 𑀯𑀺𑀪𑀸𑀯𑀺𑀦𑀸 𑀧𑀡𑁆𑀟𑀺𑀢𑁂𑀦 𑀯𑀺𑀜𑁆𑀜𑀸𑀢𑀩𑁆𑀩𑀸. 𑀢𑀬𑁄 𑀪𑀯𑀸 𑀘𑀢𑀲𑁆𑀲𑁄 𑀘 𑀬𑁄𑀦𑀺𑀬𑁄 𑀓𑀸𑀫𑀪𑀯𑀭𑀽𑀧𑀪𑀯𑀅𑀭𑀽𑀧𑀪𑀯𑀯𑀲𑁂𑀦 𑀢𑀬𑁄 𑀪𑀯𑀸, 𑀅𑀡𑁆𑀟𑀚𑀚𑀮𑀸𑀩𑀼𑀚𑀲𑀁𑀲𑁂𑀤𑀚𑀑𑀧𑀧𑀸𑀢𑀺𑀓𑀬𑁄𑀦𑀺𑀯𑀲𑁂𑀦 𑀘𑀢𑀲𑁆𑀲𑁄 𑀘 𑀬𑁄𑀦𑀺𑀬𑁄, 𑀦𑀺𑀭𑀬𑀕𑀢𑀺𑀢𑀺𑀭𑀘𑁆𑀙𑀸𑀦𑀕𑀢𑀺𑀧𑁂𑀢𑀕𑀢𑀺𑀫𑀦𑀼𑀲𑁆𑀲𑀕𑀢𑀺𑀤𑁂𑀯𑀕𑀢𑀺𑀯𑀲𑁂𑀦 𑀕𑀢𑀺𑀧𑀜𑁆𑀘𑀓𑀁, 𑀲𑀦𑁆𑀥𑀺𑀲𑀜𑁆𑀜𑀸𑀬 𑀧𑀝𑀺𑀲𑀦𑁆𑀥𑀺𑀲𑀜𑁆𑀜𑀸𑀬 𑀦𑀸𑀦𑀢𑁆𑀢𑀸 𑀦𑀸𑀦𑀸𑀪𑀸𑀯𑀢𑁄, 𑀓𑀸𑀬𑀲𑁆𑀲𑀸𑀧𑀺 𑀘 𑀭𑀽𑀧𑀓𑀸𑀬𑀲𑁆𑀲𑀸𑀧𑀺 𑀘 𑀦𑀸𑀦𑀢𑁆𑀢𑀸 𑀦𑀸𑀦𑀸𑀪𑀸𑀯𑀢𑁄 𑀓𑀸𑀫𑀲𑀼𑀕𑀢𑀺𑀬𑁄, 𑀦𑀸𑀦𑀸 𑀅𑀢𑁆𑀢𑀸 𑀲𑀪𑀸𑀯𑁄 𑀏𑀢𑀲𑁆𑀲𑀸𑀢𑀺 𑀦𑀸𑀦𑀢𑁆𑀢𑀸, 𑀦𑀸𑀦𑀢𑁆𑀢𑁄 𑀭𑀽𑀧𑀓𑀸𑀬𑁄 𑀏𑀢𑁂𑀲𑀦𑁆𑀢𑀺 𑀦𑀸𑀦𑀢𑁆𑀢𑀓𑀸𑀬𑀸, 𑀦𑀸𑀦𑀸 𑀲𑀪𑀸𑀯𑁄 𑀏𑀢𑀲𑁆𑀲𑀸𑀢𑀺 𑀦𑀸𑀦𑀢𑁆𑀢𑀸, 𑀦𑀸𑀦𑀢𑁆𑀢𑀸𑀬𑁂𑀯 𑀲𑀜𑁆𑀜𑀸 𑀦𑀸𑀦𑀢𑁆𑀢𑀲𑀜𑁆𑀜𑀸, 𑀲𑀸 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀦𑀸𑀦𑀢𑁆𑀢𑀲𑀜𑁆𑀜𑀻 𑀦𑀸𑀫, 𑀧𑀞𑀫𑀚𑁆𑀛𑀸𑀦𑀪𑀽𑀫𑀺 𑀘 𑀘𑀢𑀼𑀭𑀸𑀧𑀸𑀬𑀪𑀽𑀫𑀺𑀬𑁄 𑀘 𑀦𑀸𑀦𑀢𑁆𑀢𑀓𑀸𑀬𑀏𑀓𑀢𑁆𑀢𑀲𑀜𑁆𑀜𑀻 𑀦𑀸𑀫, 𑀤𑀼𑀢𑀺𑀬𑀚𑁆𑀛𑀸𑀦𑀪𑀽𑀫𑀺 𑀏𑀓𑀢𑁆𑀢𑀓𑀸𑀬𑀦𑀸𑀦𑀢𑁆𑀢𑀲𑀜𑁆𑀜𑀻 𑀦𑀸𑀫, 𑀢𑀢𑀺𑀬𑀚𑁆𑀛𑀸𑀦𑀪𑀽𑀫𑀺𑀯𑁂𑀳𑀧𑁆𑀨𑀮𑀪𑀽𑀫𑀺𑀲𑀼𑀤𑁆𑀥𑀸𑀯𑀸𑀲𑀪𑀽𑀫𑀺𑀬𑁄 𑀏𑀓𑀢𑁆𑀢𑀓𑀸𑀬𑀏𑀓𑀢𑁆𑀢𑀲𑀜𑁆𑀜𑀻 𑀦𑀸𑀫, 𑀳𑁂𑀝𑁆𑀞𑀸 𑀞𑀺𑀢𑀸 𑀭𑀽𑀧𑁂𑀳𑀺 𑀲𑀤𑁆𑀥𑀺𑀁 𑀲𑀢𑁆𑀢𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄, 𑀢𑀺𑀝𑁆𑀞𑀦𑁆𑀢𑀺 𑀯𑀺𑀜𑁆𑀜𑀸𑀡𑀸𑀦𑀺 𑀏𑀢𑁆𑀣𑀸𑀢𑀺 𑀞𑀺𑀢𑀺𑀬𑁄, 𑀯𑀺𑀜𑁆𑀜𑀸𑀡𑀸𑀦𑀁 𑀞𑀺𑀢𑀺𑀬𑁄 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄, 𑀯𑀺𑀜𑁆𑀜𑀸𑀡𑀲𑁆𑀲 𑀅𑀪𑀸𑀯𑀢𑁄 𑀅𑀲𑀜𑁆𑀜𑀻𑀪𑀽𑀫𑀺 𑀦 𑀕𑀬𑁆𑀳𑀢𑁂, 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀪𑀽𑀫𑀺 𑀘 𑀧𑀝𑀼𑀯𑀺𑀜𑁆𑀜𑀸𑀡𑀸𑀪𑀸𑀯𑀢𑁄 𑀦 𑀕𑀬𑁆𑀳𑀢𑁂. 𑀲𑀢𑁆𑀢𑀸𑀯𑀸𑀲𑀯𑀲𑁂𑀦 𑀅𑀲𑀜𑁆𑀜𑀻𑀪𑀽𑀫𑀺𑀁, 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀪𑀽𑀫𑀺𑀜𑁆𑀘 𑀧𑀦 𑀕𑀳𑁂𑀢𑁆𑀯𑀸 𑀢𑁂 𑀲𑀢𑁆𑀢𑀸𑀯𑀸𑀲𑀸 𑀦𑀯 𑀏𑀯 𑀳𑁄𑀦𑁆𑀢𑀺.

𑁫𑁬𑁩-𑁮. 𑀓𑀸𑀫𑁂 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀲𑀜𑁆𑀜𑀺𑀢𑀸 𑀅𑀝𑁆𑀞 𑀘𑁂𑀢𑀦𑀸 𑀧𑀽𑀭𑁂𑀦𑁆𑀢𑀺 𑀅𑀢𑁆𑀢𑀦𑁄 𑀓𑀸𑀭𑀓𑀁 𑀧𑀽𑀭𑁂𑀦𑁆𑀢𑀺 𑀘, 𑀅𑀚𑁆𑀛𑀸𑀲𑀬𑀁 𑀧𑀼𑀚𑁆𑀚𑀜𑁆𑀘 𑀪𑀯𑀁 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀻𑀢𑀺 𑀧𑀼𑀜𑁆𑀜𑀸𑀦𑀺, 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑀺 𑀯𑀺𑀧𑀸𑀓𑀁, 𑀓𑀫𑁆𑀫𑀚𑀭𑀽𑀧𑀜𑁆𑀘𑀸𑀢𑀺 𑀅𑀪𑀺𑀲𑀗𑁆𑀔𑀸𑀭𑀸, 𑀧𑀼𑀜𑁆𑀜𑀸𑀦𑀺 𑀏𑀯 𑀅𑀪𑀺𑀲𑀗𑁆𑀔𑀸𑀭𑀸 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸, 𑀢𑁂𑀬𑁂𑀯 𑀲𑀜𑁆𑀜𑀺𑀢𑀸 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀲𑀜𑁆𑀜𑀺𑀢𑀸, 𑀓𑀸𑀫𑁂 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀲𑀜𑁆𑀜𑀺𑀢𑀸 𑀅𑀝𑁆𑀞 𑀘𑁂𑀢𑀦𑀸. 𑀦𑀯𑀦𑁆𑀦𑀁 𑀧𑀸𑀓𑀘𑀺𑀢𑁆𑀢𑀸𑀦𑀁 𑀉𑀧𑁂𑀓𑁆𑀔𑀸𑀬𑀼𑀢𑁆𑀢𑀸𑀳𑁂𑀢𑀼𑀓𑀫𑀳𑀸𑀯𑀺𑀧𑀸𑀓𑀯𑀲𑁂𑀦 𑀦𑀯𑀦𑁆𑀦𑀁 𑀧𑀸𑀓𑀘𑀺𑀢𑁆𑀢𑀸𑀦𑀁 𑀓𑀸𑀫𑀲𑀼𑀕𑀢𑀺𑀬𑀁 𑀧𑀦 𑀦𑀸𑀦𑀸 𑀯𑀢𑁆𑀢𑀫𑀸𑀦𑀘𑁂𑀢𑀦𑀸𑀔𑀡𑀢𑁄 𑀧𑀭𑀁 𑀔𑀡𑀁 𑀏𑀢𑀲𑁆𑀲𑀸𑀢𑀺 𑀦𑀸𑀦𑀸𑀔𑀡𑀁, 𑀢𑀁 𑀏𑀯 𑀦𑀸𑀦𑀓𑁆𑀔𑀡𑀺𑀓𑀁, 𑀢𑀫𑁂𑀯 𑀓𑀫𑁆𑀫𑀁 𑀦𑀸𑀦𑀓𑁆𑀔𑀡𑀺𑀓𑀓𑀫𑁆𑀫𑀁, 𑀯𑀢𑁆𑀢𑀫𑀸𑀦𑀘𑁂𑀢𑀦𑀸𑀢𑁄 𑀧𑀭𑀸 𑀅𑀢𑀻𑀢𑀘𑁂𑀢𑀦𑀸𑀢𑀺 𑀅𑀢𑁆𑀣𑁄. 𑀩𑀮𑀯𑀸 𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄, 𑀩𑀮𑀯𑀢𑁆𑀣𑁄 𑀘𑁂𑀢𑁆𑀣 𑀉𑀧-𑀲𑀤𑁆𑀤𑁄, 𑀩𑀮𑀯𑀧𑀘𑁆𑀘𑀬𑁄𑀢𑀺 𑀅𑀢𑁆𑀣𑁄, 𑀦𑀸𑀦𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑀯𑀲𑁂𑀦 𑀩𑀮𑀯𑀧𑀘𑁆𑀘𑀬𑀯𑀲𑁂𑀦 𑀘𑀸𑀢𑀺 𑀅𑀢𑁆𑀣𑁄. 𑀤𑁆𑀯𑁂𑀥𑀸 𑀤𑁆𑀯𑀻𑀳𑀺 𑀧𑀓𑀸𑀭𑁂𑀳𑀺 𑀢𑁂𑀲𑀁 𑀧𑀝𑀺𑀲𑀦𑁆𑀥𑀺𑀬𑀁 𑀧𑀘𑁆𑀘𑀬𑀸 𑀪𑀯𑀦𑁆𑀢𑀺, 𑀢𑀸 𑀅𑀝𑁆𑀞 𑀓𑀸𑀫𑀸𑀯𑀘𑀭𑀫𑀳𑀸𑀓𑀼𑀲𑀮𑀘𑁂𑀢𑀦𑀸 𑀉𑀧𑁂𑀓𑁆𑀔𑀸𑀲𑀳𑀺𑀢𑀸𑀳𑁂𑀢𑀼𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀯𑀺𑀦𑀸 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀳𑁂𑀢𑀼𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀁 𑀯𑀚𑁆𑀚𑁂𑀢𑁆𑀯𑀸 𑀧𑀭𑀺𑀢𑁆𑀢𑀧𑀸𑀓𑀸𑀦𑀁 𑀘𑀓𑁆𑀔𑀼𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀲𑀫𑁆𑀧𑀝𑀺𑀘𑁆𑀙𑀦𑀲𑁄𑀫𑀦𑀲𑁆𑀲𑀬𑀼𑀢𑁆𑀢𑀸𑀳𑁂𑀢𑀼𑀓𑀓𑀼𑀲𑀮𑀯𑀺𑀧𑀸𑀓𑀸𑀦𑀁 𑀤𑁆𑀯𑁂𑀥𑀸 𑀦𑀸𑀦𑀓𑁆𑀔𑀡𑀺𑀓𑀓𑀫𑁆𑀫𑀽𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀳𑀺 𑀧𑀯𑀢𑁆𑀢𑀺𑀬𑀁 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀢𑀸𑀬𑁂𑀯 𑀘𑁂𑀢𑀦𑀸 𑀢𑀸 𑀏𑀯 𑀅𑀝𑁆𑀞 𑀓𑀸𑀫𑀸𑀯𑀘𑀭𑀫𑀳𑀸𑀓𑀼𑀲𑀮𑀘𑁂𑀢𑀦𑀸 𑀭𑀽𑀧𑀪𑀯𑁂 𑀧𑀜𑁆𑀘𑀦𑁆𑀦𑀁 𑀧𑀸𑀓𑀘𑀺𑀢𑁆𑀢𑀸𑀦𑀁 𑀓𑀼𑀲𑀮𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀁 𑀘𑀓𑁆𑀔𑀼𑀲𑁄𑀢𑀲𑀫𑁆𑀧𑀝𑀺𑀘𑁆𑀙𑀦𑀲𑁄𑀫𑀦𑀲𑁆𑀲𑀬𑀼𑀢𑁆𑀢𑀉𑀧𑁂𑀓𑁆𑀔𑀸𑀬𑀼𑀢𑁆𑀢𑀲𑀦𑁆𑀢𑀻𑀭𑀡𑀸𑀦𑀁 𑀤𑁆𑀯𑁂𑀥𑀸 𑀦𑀸𑀦𑀓𑁆𑀔𑀡𑀺𑀓𑀓𑀫𑁆𑀫𑀽𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀳𑀺 𑀧𑀯𑀢𑁆𑀢𑀺𑀬𑀁 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀅𑀝𑁆𑀞𑀦𑁆𑀦𑀁 𑀢𑀼 𑀧𑀭𑀺𑀢𑁆𑀢𑀸𑀦𑀁, 𑀓𑀸𑀫𑁂 𑀤𑀼𑀕𑁆𑀕𑀢𑀺𑀬𑀁 𑀢𑀣𑀸 𑀅𑀝𑁆𑀞𑀦𑁆𑀦𑀁 𑀧𑀭𑀺𑀢𑁆𑀢𑀸𑀦𑀁 𑀓𑀼𑀲𑀮𑀯𑀺𑀧𑀸𑀓𑀸𑀦𑀁 𑀘𑀓𑁆𑀔𑀼𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀲𑀫𑁆𑀧𑀝𑀺𑀘𑁆𑀙𑀦𑀸𑀦𑀁, 𑀤𑁆𑀯𑀺𑀦𑁆𑀦𑀁 𑀲𑀦𑁆𑀢𑀻𑀭𑀡𑀸𑀦𑀜𑁆𑀘 𑀧𑀯𑀢𑁆𑀢𑁂 𑀧𑀯𑀢𑁆𑀢𑀺𑀓𑁆𑀔𑀡𑁂 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀧𑀝𑀺𑀲𑀦𑁆𑀥𑀺𑀬𑀁 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀧𑀦 𑀧𑀘𑁆𑀘𑀬𑀸 𑀦 𑀳𑁄𑀦𑁆𑀢𑀺. 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀯 𑀓𑀸𑀫𑁂 𑀲𑀼𑀕𑀢𑀺𑀬𑀁 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀯 𑀅𑀝𑁆𑀞 𑀓𑀸𑀫𑀸𑀯𑀘𑀭𑀫𑀳𑀸𑀓𑀼𑀲𑀮𑀘𑁂𑀢𑀦𑀸 𑀓𑀸𑀫𑀲𑀼𑀕𑀢𑀺𑀬𑀁 𑀢𑀣𑀸 𑀲𑁄𑀴𑀲𑀦𑁆𑀦𑀁 𑀓𑀼𑀲𑀮𑀯𑀺𑀧𑀸𑀓𑀸𑀦𑀁 𑀧𑀯𑀢𑁆𑀢𑁂 𑀧𑀯𑀢𑁆𑀢𑀺𑀓𑁆𑀔𑀡𑁂 𑀤𑁆𑀯𑁂𑀥𑀸 𑀦𑀸𑀦𑀓𑁆𑀔𑀡𑀺𑀓𑀓𑀫𑁆𑀫𑀽𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀳𑀺 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀧𑀯𑀢𑁆𑀢𑁂 𑀧𑀯𑀢𑁆𑀢𑀺𑀓𑁆𑀔𑀡𑁂 𑀲𑀢𑁆𑀢𑀦𑁆𑀦𑀁 𑀓𑀼𑀲𑀮𑀯𑀺𑀧𑀸𑀓𑀸𑀦𑀁 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀧𑀝𑀺𑀲𑀦𑁆𑀥𑀺𑀬𑀁 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀦𑀯𑀦𑁆𑀦𑀁 𑀓𑀼𑀲𑀮𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀁 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺.

𑁫𑁬𑁯-𑁭𑁪. 𑀭𑀽𑀧𑁂 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸, 𑀭𑀽𑀧𑀸𑀯𑀘𑀭𑀪𑀽𑀫𑀺𑀬𑀁 𑀧𑀜𑁆𑀘𑀦𑁆𑀦𑀁 𑀧𑀸𑀓𑀘𑀺𑀢𑁆𑀢𑀸𑀦𑀁 𑀧𑀝𑀺𑀲𑀦𑁆𑀥𑀺𑀬𑀁 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺𑀫𑀸𑀧𑀼𑀜𑁆𑀜𑀲𑀗𑁆𑀔𑀸𑀭𑀸, 𑀓𑀸𑀫𑁂 𑀤𑀼𑀕𑁆𑀕𑀢𑀺𑀬𑀁 𑀤𑁆𑀯𑀺𑀥𑀸 𑀇𑀫𑁂 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸, 𑀇𑀫𑀸 𑀓𑀼𑀲𑀮𑀧𑀝𑀺𑀧𑀓𑁆𑀔𑀸 𑀉𑀤𑁆𑀥𑀘𑁆𑀘𑀯𑀚𑁆𑀚𑀸 𑀏𑀓𑀸𑀤𑀲 𑀘𑁂𑀢𑀦𑀸 𑀓𑀸𑀫𑀤𑀼𑀕𑁆𑀕𑀢𑀺𑀬𑀁 𑀏𑀓𑀲𑁆𑀲 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀲𑁆𑀲 𑀧𑀝𑀺𑀲𑀦𑁆𑀥𑀺𑀬𑀁 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀤𑁆𑀯𑀺𑀥𑀸 𑀦𑀸𑀦𑀓𑁆𑀔𑀡𑀺𑀓𑀓𑀫𑁆𑀫𑀽𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀳𑀺 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀤𑁆𑀯𑀸𑀤𑀲 𑀅𑀓𑀼𑀲𑀮𑀘𑁂𑀢𑀦𑀸 𑀧𑀯𑀢𑁆𑀢𑁂 𑀧𑀯𑀢𑁆𑀢𑀺𑀓𑁆𑀔𑀡𑁂 𑀏𑀯 𑀙𑀦𑁆𑀦𑀁 𑀘𑀓𑁆𑀔𑀼𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀲𑀫𑁆𑀧𑀝𑀺𑀘𑁆𑀙𑀦𑀸𑀦𑀁 𑀅𑀓𑀼𑀲𑀮𑀯𑀺𑀧𑀸𑀓𑀸𑀦𑀁 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀧𑀝𑀺𑀲𑀦𑁆𑀥𑀺𑀬𑀁 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀧𑀘𑁆𑀘𑀬𑀸 𑀦𑁄 𑀳𑁄𑀦𑁆𑀢𑀺. 𑀲𑀢𑁆𑀢𑀦𑁆𑀦𑀫𑁆𑀧𑀺 𑀪𑀯𑀦𑁆𑀢𑁂𑀯 𑀧𑀯𑀢𑁆𑀢𑁂 𑀧𑀯𑀢𑁆𑀢𑀺𑀓𑁆𑀔𑀡𑁂 𑀧𑀝𑀺𑀲𑀦𑁆𑀥𑀺𑀬𑀁 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀅𑀓𑀼𑀲𑀮𑀯𑀺𑀧𑀸𑀓𑀸𑀦𑀺 𑀲𑀢𑁆𑀢𑀦𑁆𑀦𑀁 𑀘𑀓𑁆𑀔𑀼𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀲𑀫𑁆𑀧𑀝𑀺𑀘𑁆𑀙𑀦𑀲𑀦𑁆𑀢𑀻𑀭𑀡𑀸𑀦𑀁 𑀧𑀘𑁆𑀘𑀬𑀸 𑀪𑀯𑀦𑁆𑀢𑀺. 𑀓𑀸𑀫𑁂 𑀲𑀼𑀕𑀢𑀺𑀬𑀁 𑀢𑁂𑀲𑀁, 𑀲𑀢𑁆𑀢𑀦𑁆𑀦𑀫𑁆𑀧𑀺 𑀢𑀣𑁂𑀯 𑀘 𑀤𑁆𑀯𑀸𑀤𑀲𑀸𑀓𑀼𑀲𑀮𑀘𑁂𑀢𑀦𑀸 𑀓𑀸𑀫𑁂 𑀲𑀼𑀕𑀢𑀺𑀬𑀁 𑀢𑀣𑁂𑀯 𑀘 𑀢𑁂𑀲𑀁 𑀲𑀢𑁆𑀢𑀦𑁆𑀦𑀁 𑀅𑀓𑀼𑀲𑀮𑀯𑀺𑀧𑀸𑀓𑀸𑀦𑀁 𑀧𑀯𑀢𑁆𑀢𑁂 𑀧𑀯𑀢𑁆𑀢𑀺𑀓𑁆𑀔𑀡𑁂 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀧𑀝𑀺𑀲𑀦𑁆𑀥𑀺𑀬𑀁 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀧𑀘𑁆𑀘𑀬𑀸 𑀦 𑀳𑁄𑀦𑁆𑀢𑀺. 𑀯𑀺𑀜𑁆𑀜𑀸𑀡𑀸𑀦𑀁 𑀘𑀢𑀼𑀦𑁆𑀦𑀫𑁆𑀧𑀺, 𑀢𑁂𑀲𑀁 𑀭𑀽𑀧𑀪𑀯𑁂 𑀢𑀣𑀸 𑀢𑀸𑀬𑁂𑀯 𑀤𑁆𑀯𑀸𑀤𑀲𑀸𑀓𑀼𑀲𑀮𑀘𑁂𑀢𑀦𑀸 𑀭𑀽𑀧𑀪𑀯𑁂 𑀢𑁂𑀲𑀁 𑀘𑀢𑀼𑀦𑁆𑀦𑀁 𑀅𑀓𑀼𑀲𑀮𑀯𑀺𑀧𑀸𑀓𑀸𑀦𑀁 𑀘𑀓𑁆𑀔𑀼𑀲𑁄𑀢𑀲𑀫𑁆𑀧𑀝𑀺𑀘𑁆𑀙𑀦𑀲𑀦𑁆𑀢𑀻𑀭𑀡𑀲𑀗𑁆𑀔𑀸𑀢𑀸𑀦𑀁 𑀯𑀺𑀜𑁆𑀜𑀸𑀡𑀸𑀦𑀁 𑀢𑀣𑀸 𑀧𑀯𑀢𑁆𑀢𑁂 𑀧𑀯𑀢𑁆𑀢𑀺𑀓𑁆𑀔𑀡𑁂 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀧𑀝𑀺𑀲𑀦𑁆𑀥𑀺𑀬𑀁 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀧𑀘𑁆𑀘𑀬𑀸 𑀦 𑀳𑁄𑀦𑁆𑀢𑀺. 𑀲𑁄 𑀘 𑀓𑀸𑀫𑀪𑀯𑁂𑀦𑀺𑀝𑁆𑀞𑀭𑀽𑀧𑀸𑀤𑀺𑀉𑀧𑀮𑀤𑁆𑀥𑀺𑀬𑀁 𑀲𑁄 𑀘 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀓𑀸𑀫𑀪𑀯𑁂 𑀅𑀦𑀺𑀝𑁆𑀞𑀭𑀽𑀧𑀸𑀤𑀺𑀉𑀧𑀮𑀤𑁆𑀥𑀺𑀬𑀁 𑀅𑀫𑀦𑀸𑀧𑀭𑀽𑀧𑀸𑀤𑀻𑀦𑀺 𑀆𑀭𑀫𑁆𑀫𑀡𑀸𑀦𑀺 𑀉𑀧𑀮𑀤𑁆𑀥𑀺𑀬𑀁 𑀢𑁂𑀲𑀁 𑀘𑀢𑀼𑀦𑁆𑀦𑀁 𑀅𑀧𑀼𑀜𑁆𑀜𑀚𑀸𑀦𑀁 𑀯𑀺𑀜𑁆𑀜𑀸𑀡𑀸𑀦𑀁 𑀧𑀘𑁆𑀘𑀬𑁄 𑀳𑁄𑀢𑀺. 𑀳𑀺 𑀲𑀘𑁆𑀘𑀁 ‘‘𑀲𑁄 𑀘 𑀓𑀸𑀫𑀪𑀯𑁂𑀦𑀺𑀝𑁆𑀞-𑀭𑀽𑀧𑀸𑀤𑀺𑀉𑀧𑀮𑀤𑁆𑀥𑀺𑀬’’𑀦𑁆𑀢𑀺𑀆𑀤𑀺𑀓𑀁 𑀯𑀘𑀦𑀁. 𑀅𑀦𑀺𑀝𑁆𑀞𑀭𑀽𑀧𑀸𑀤𑀬𑁄 𑀦𑀸𑀫 𑀯𑀺𑀲𑀬𑀸 𑀩𑁆𑀭𑀳𑁆𑀫𑀮𑁄𑀓𑁂 𑀦 𑀯𑀺𑀚𑁆𑀚𑀭𑁂 𑀦 𑀯𑀺𑀚𑁆𑀚𑀦𑁆𑀢𑀺.

𑁫𑁭𑁫-𑁬. 𑀢𑀣𑁂𑀯𑀸𑀦𑁂𑀜𑁆𑀚𑀲𑀗𑁆𑀔𑀸𑀭𑁄 𑀦 𑀇𑀜𑁆𑀚𑀢𑀺 𑀦 𑀨𑀦𑁆𑀤𑀢𑀺 𑀦 𑀘𑀮𑀢𑀻𑀢𑀺 𑀆𑀦𑁂𑀜𑁆𑀚𑀁, 𑀆𑀦𑁂𑀜𑁆𑀚𑀜𑁆𑀘 𑀢𑀁 𑀲𑀗𑁆𑀔𑀸𑀭𑁄 𑀘𑀸𑀢𑀺 𑀆𑀦𑁂𑀜𑁆𑀚𑀲𑀗𑁆𑀔𑀸𑀭𑁄, 𑀢𑀣𑀸 𑀏𑀯 𑀆𑀦𑁂𑀜𑁆𑀚𑀲𑀗𑁆𑀔𑀸𑀭𑁄 𑀅𑀭𑀽𑀧𑀸𑀯𑀘𑀭𑀪𑀽𑀫𑀺𑀬𑀁 𑀘𑀢𑀼𑀦𑁆𑀦𑀁 𑀧𑀸𑀓𑀘𑀺𑀢𑁆𑀢𑀸𑀦𑀁 𑀧𑀯𑀢𑁆𑀢𑁂 𑀧𑀯𑀢𑁆𑀢𑀺𑀓𑁆𑀔𑀡𑁂 𑀧𑀝𑀺𑀲𑀦𑁆𑀥𑀺𑀬𑀁 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀧𑀘𑁆𑀘𑀬𑁄 𑀳𑁄𑀢𑀺. 𑀪𑀯𑁂𑀲𑁆𑀯𑁂𑀢𑁂 𑀪𑀯𑁂𑀲𑀼 𑀏𑀢𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀧𑀘𑁆𑀘𑀬𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑀻𑀲𑀼 𑀬𑀣𑀸 𑀘 𑀬𑁂𑀦 𑀬𑁂𑀦 𑀘 𑀧𑀓𑀸𑀭𑁂𑀦 𑀦𑀸𑀦𑀓𑁆𑀔𑀡𑀺𑀓𑀓𑀫𑁆𑀫𑀽𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀳𑀺 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀢𑁂𑀦 𑀧𑀘𑁆𑀘𑀬𑀸 𑀢𑀣𑀸 𑀢𑁂𑀦 𑀢𑁂𑀦 𑀧𑀓𑀸𑀭𑁂𑀦 𑀯𑀺𑀪𑀸𑀯𑀺𑀦𑀸 𑀯𑀺𑀚𑀸𑀦𑀦𑁆𑀢𑁂𑀦 𑀧𑀡𑁆𑀟𑀺𑀢𑁂𑀦 𑀜𑁂𑀬𑁆𑀬𑀸.

𑁫𑁭𑁭. 𑀏𑀲𑁂𑀯 𑀘 𑀦𑀬𑁄 𑀜𑁂𑀬𑁆𑀬𑁄, 𑀬𑁄𑀦𑀺𑀆𑀤𑀻𑀲𑀼 𑀬𑁄𑀦𑀺𑀕𑀢𑀺𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀲𑀢𑁆𑀢𑀸𑀯𑀸𑀲𑁂𑀲𑀼 𑀏𑀲𑁂𑀯 𑀘 𑀦𑀬𑁄 𑀪𑀯𑁂𑀲𑀼 𑀫𑀬𑀸 𑀯𑀼𑀢𑁆𑀢𑁄 𑀏𑀯 𑀦𑀬𑁄 𑀧𑀡𑁆𑀟𑀺𑀢𑁂𑀦 𑀜𑁂𑀬𑁆𑀬𑁄. 𑀢𑀢𑁆𑀭𑀺𑀤𑀁 𑀢𑀢𑁆𑀭 𑀪𑀯𑁂𑀲𑀼 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀯𑀼𑀢𑁆𑀢𑀁 𑀇𑀤𑀁 𑀯𑀘𑀦𑀁 𑀫𑀼𑀔𑀫𑀢𑁆𑀢𑀦𑀺𑀤𑀲𑁆𑀲𑀦𑀁 𑀉𑀧𑀸𑀬𑀫𑀢𑁆𑀢𑀤𑀻𑀧𑀦𑀁 𑀳𑁄𑀢𑀺.

𑁫𑁭𑁮-𑁮𑁧. 𑀅𑀯𑀺𑀲𑁂𑀲𑁂𑀦 𑀧𑀼𑀜𑁆𑀜𑀸𑀪𑀺-𑀲𑀗𑁆𑀔𑀸𑀭𑁄 𑀤𑁆𑀯𑀺𑀪𑀯𑁂𑀲𑀼𑀧𑀺 𑀓𑀸𑀫𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀯𑀲𑁂𑀦, 𑀭𑀽𑀧𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑀘 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀅𑀯𑀺𑀲𑁂𑀲𑁂𑀦 𑀲𑀫𑀸𑀦𑀪𑀸𑀯𑁂𑀦 𑀤𑁆𑀯𑀻𑀲𑀼 𑀪𑀯𑁂𑀲𑀼 𑀓𑀸𑀫𑀭𑀽𑀧𑀪𑀯𑁂𑀲𑀼 𑀧𑀝𑀺𑀲𑀦𑁆𑀥𑀺𑀁 𑀤𑀢𑁆𑀯𑀸 𑀲𑁄 𑀲𑀗𑁆𑀔𑀸𑀭𑁄 𑀲𑀩𑁆𑀩𑀧𑀸𑀓𑀁 𑀚𑀦𑁂𑀢𑀺 𑀦𑀺𑀩𑁆𑀩𑀢𑁆𑀢𑁂𑀢𑀺. 𑀢𑀣𑀸 𑀘𑀢𑀽𑀲𑀼 𑀯𑀺𑀜𑁆𑀜𑁂𑀬𑁆𑀬𑁄, 𑀅𑀡𑁆𑀟𑀚𑀸𑀤𑀻𑀲𑀼 𑀬𑁄𑀦𑀺𑀲𑀼 𑀤𑁆𑀯𑀺𑀪𑀯𑁂𑀲𑀼 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀯𑀺𑀬 𑀢𑀣𑀸 𑀘𑀢𑀽𑀲𑀼 𑀅𑀡𑁆𑀟𑀚𑀸𑀤𑀻𑀲𑀼 𑀲𑁄 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀧𑀡𑁆𑀟𑀺𑀢𑁂𑀦 𑀜𑁂𑀬𑁆𑀬𑁄. ‘‘𑀅𑀡𑁆𑀟𑀚𑀸𑀤𑀻𑀲𑀽’’𑀢𑀺 𑀯𑀘𑀦𑀁 𑀧𑀤𑀼𑀫𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀫𑀦𑀼𑀲𑁆𑀲𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀩𑀳𑀼𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀯𑀲𑁂𑀦 𑀤𑁆𑀯𑀻𑀲𑀼 𑀕𑀢𑀻𑀲𑀼 𑀏𑀯 𑀘 𑀢𑀣𑀸 𑀲𑁄 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀧𑀡𑁆𑀟𑀺𑀢𑁂𑀦 𑀜𑁂𑀬𑁆𑀬𑁄. 𑀢𑀣𑀸 𑀦𑀸𑀦𑀢𑁆𑀢𑀓𑀸𑀬𑀸𑀤𑀺-𑀯𑀺𑀜𑁆𑀜𑀸𑀡𑀸𑀦𑀁 𑀞𑀺𑀢𑀻𑀲𑀼𑀧𑀺 𑀦𑀸𑀦𑀢𑁆𑀢𑀓𑀸𑀬𑀦𑀸𑀦𑀢𑁆𑀢𑀲𑀜𑁆𑀜𑀻𑀦𑀸𑀦𑀢𑁆𑀢𑀓𑀆𑀬𑀏𑀓𑀢𑁆𑀢𑀲𑀜𑁆𑀜𑀻 𑀏𑀓𑀢𑁆𑀢𑀓𑀸𑀬𑀦𑀸𑀦𑀢𑁆𑀢𑀲𑀜𑁆𑀜𑀻 𑀏𑀓𑀢𑁆𑀢𑀓𑀸𑀬𑀏𑀓𑀢𑁆𑀢𑀲𑀜𑁆𑀜𑀻𑀦𑀁 𑀯𑀲𑁂𑀦 𑀘𑀢𑀽𑀲𑀼 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀻𑀲𑀼 𑀲𑁄 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀧𑀡𑁆𑀟𑀺𑀢𑁂𑀦 𑀜𑁂𑀬𑁆𑀬𑁄. 𑀦𑀸𑀦𑀢𑁆𑀢𑀓𑀸𑀬𑀦𑀸𑀦𑀢𑁆𑀢𑀲𑀜𑁆𑀜𑀻𑀦𑀸𑀦𑀢𑁆𑀢𑀓𑀸𑀬𑀏𑀓𑀢𑁆𑀢𑀲𑀜𑁆𑀜𑀻𑀏𑀓𑀢𑁆𑀢𑀓𑀸𑀬𑀦𑀸𑀦𑀢𑁆𑀢𑀲𑀜𑁆𑀜𑀻𑀏𑀓𑀢𑁆𑀢𑀓𑀸𑀬𑀏𑀓𑀢𑁆𑀢𑀲𑀜𑁆𑀜𑀻𑀦𑀁 𑀯𑀲𑁂𑀦 𑀯𑀼𑀢𑁆𑀢𑀧𑁆𑀧𑀓𑀸𑀭𑀲𑁆𑀫𑀺𑀁 𑀘𑀢𑀼𑀩𑁆𑀩𑀺𑀥𑁂 𑀲𑀢𑁆𑀢𑀸𑀯𑀸𑀲𑁂 𑀢𑀣𑀸 𑀲𑁄 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀧𑀡𑁆𑀟𑀺𑀢𑁂𑀦 𑀜𑁂𑀬𑁆𑀬𑁄. 𑀏𑀯𑀁 𑀇𑀫𑀺𑀦𑀸 𑀫𑀬𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀪𑀯𑀸𑀤𑀻𑀲𑀼 𑀪𑀯𑀬𑁄𑀦𑀺𑀕𑀢𑀺𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀲𑀢𑁆𑀢𑀸𑀯𑀸𑀲𑁂𑀲𑀼 𑀬𑀣𑀸𑀭𑀳𑀁 𑀲𑁄𑀴𑀲𑀦𑁆𑀦𑀁 𑀓𑀸𑀫𑀓𑀼𑀲𑀮𑀧𑀸𑀓𑀸𑀦𑀁, 𑀧𑀜𑁆𑀘𑀦𑁆𑀦𑀁 𑀭𑀽𑀧𑀧𑀸𑀓𑀸𑀦𑀜𑁆𑀘𑀸𑀢𑀺 𑀏𑀓𑀯𑀻𑀲𑀢𑀺𑀧𑀸𑀓𑀸𑀦𑀁 𑀤𑁆𑀯𑀺𑀥𑀸 𑀦𑀸𑀦𑀓𑁆𑀔𑀡𑀺𑀓𑀓𑀫𑁆𑀫𑀽𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺.

𑁫𑁮𑁨-𑁩. 𑀓𑀸𑀫𑁂 𑀅𑀧𑀼𑀜𑁆𑀜𑀲𑀗𑁆𑀔𑀸𑀭𑁄 𑀓𑀸𑀫𑀪𑀯𑁂 𑀅𑀡𑁆𑀟𑀚𑀚𑀮𑀸𑀩𑀼𑀚𑀲𑀁𑀲𑁂𑀤𑀚𑀑𑀧𑀧𑀸𑀢𑀺𑀓𑀬𑁄𑀦𑀺𑀯𑀲𑁂𑀦 𑀅𑀡𑁆𑀟𑀚𑀸𑀤𑀻𑀲𑀼 𑀬𑁄𑀦𑀻𑀲𑀼 𑀦𑀺𑀭𑀬𑀕𑀢𑀺𑀧𑁂𑀢𑀕𑀢𑀺𑀢𑀺𑀭𑀘𑁆𑀙𑀸𑀦𑀕𑀢𑀺𑀯𑀲𑁂𑀦 𑀢𑀻𑀲𑀼 𑀕𑀢𑀻𑀲𑀼 𑀦𑀸𑀦𑀢𑁆𑀢𑀓𑀸𑀬𑀏𑀓𑀢𑁆𑀢𑀲𑀜𑁆𑀜𑀻𑀯𑀲𑁂𑀦 𑀏𑀓𑀺𑀲𑁆𑀲𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑀸 𑀦𑀸𑀦𑀢𑁆𑀢𑀓𑀸𑀬𑀏𑀓𑀢𑁆𑀢𑀲𑀜𑁆𑀜𑀻𑀯𑀲𑁂𑀦 𑀘 𑀏𑀓𑀲𑁆𑀫𑀺𑀁 𑀧𑀦 𑀲𑀢𑁆𑀢𑀸𑀯𑀸𑀲𑁂 𑀤𑁆𑀯𑀺𑀥𑀸 𑀦𑀸𑀦𑀓𑁆𑀔𑀡𑀺𑀓𑀓𑀫𑁆𑀫𑀽𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀳𑀺 𑀧𑀯𑀢𑁆𑀢𑁂 𑀧𑀯𑀢𑁆𑀢𑀺𑀓𑁆𑀔𑀡𑁂 𑀧𑀝𑀺𑀲𑀦𑁆𑀥𑀺𑀬𑀁 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀲𑁄 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀧𑀘𑁆𑀘𑀬𑁄 𑀳𑁄𑀢𑀺.

𑁫𑁮𑁪-𑁬. 𑀢𑀣𑁂𑀯𑀸𑀦𑁂𑀜𑁆𑀚𑀲𑀗𑁆𑀔𑀸𑀭𑁄 𑀢𑀣𑀸 𑀏𑀯 𑀆𑀦𑁂𑀜𑁆𑀚𑀲𑀗𑁆𑀔𑀸𑀭𑁄, 𑀏𑀓𑀸𑀭𑀽𑀧𑀪𑀯𑁂 𑀏𑀓𑀲𑁆𑀫𑀺𑀁 𑀅𑀭𑀽𑀧𑀪𑀯𑁂 𑀏𑀓𑀺𑀲𑁆𑀲𑀸 𑀑𑀧𑀧𑀸𑀢𑀺𑀓𑀬𑁄𑀦𑀺𑀬𑀸 𑀘𑁂𑀯 𑀏𑀓𑀺𑀲𑁆𑀲𑀸 𑀤𑁂𑀯𑀕𑀢𑀺𑀬𑀸𑀧𑀺 𑀘 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀪𑀽𑀫𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀪𑀽𑀫𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀪𑀽𑀫𑀺𑀯𑀲𑁂𑀦 𑀢𑀻𑀲𑀼 𑀏𑀯 𑀘𑀺𑀢𑁆𑀢𑀝𑁆𑀞𑀺𑀢𑀻𑀲𑀼 𑀘𑀢𑀼𑀦𑁆𑀦𑀁 𑀅𑀭𑀽𑀧𑀪𑀽𑀫𑀻𑀦𑀁 𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑁂 𑀲𑀢𑁆𑀢𑀸𑀯𑀸𑀲𑁂 𑀘𑀢𑀼𑀦𑁆𑀦𑀁 𑀅𑀭𑀽𑀧𑀧𑀸𑀓𑀘𑀺𑀢𑁆𑀢𑀸𑀦𑀁 𑀤𑁆𑀯𑁂𑀥𑀸 𑀦𑀸𑀦𑀓𑁆𑀔𑀡𑀺𑀓𑀓𑀫𑁆𑀫𑁄𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀳𑀺 𑀲𑁄 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑁄 𑀧𑀘𑁆𑀘𑀬𑁄 𑀳𑁄𑀢𑀺. 𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑀻𑀦𑀁, 𑀯𑀲𑁂𑀦𑁂𑀯𑀁 𑀪𑀯𑀸𑀤𑀻𑀲𑀼 𑀏𑀯𑀁 𑀇𑀫𑀺𑀦𑀸 𑀫𑀬𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑀻𑀦𑀁 𑀯𑀲𑁂𑀦 𑀪𑀯𑀸𑀤𑀻𑀲𑀼 𑀬𑀣𑀸 𑀬𑁂 𑀲𑀗𑁆𑀔𑀸𑀭𑀸 𑀏𑀲𑀁 𑀧𑀸𑀓𑀘𑀺𑀢𑁆𑀢𑀸𑀦𑀁 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀢𑀣𑀸 𑀢𑁂 𑀲𑀗𑁆𑀔𑀸𑀭𑀸 𑀏𑀯𑀁 𑀇𑀫𑀺𑀦𑀸 𑀫𑀬𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀧𑀡𑁆𑀟𑀺𑀢𑁂𑀦 𑀯𑀺𑀚𑀸𑀦𑀺𑀢𑀩𑁆𑀩𑀸.

𑁫𑁮𑁭-𑁯𑁦. 𑀦 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁, 𑀲𑀗𑁆𑀓𑀦𑁆𑀢𑀺 𑀧𑀦 𑀯𑀺𑀚𑁆𑀚𑀢𑀺 𑀭𑀽𑀧𑀥𑀫𑁆𑀫𑀸𑀦𑀁, 𑀘𑀺𑀢𑁆𑀢𑀘𑁂𑀢𑀲𑀺𑀓𑀲𑀗𑁆𑀔𑀸𑀢𑀸𑀦𑀁 𑀦𑀸𑀫𑀥𑀫𑁆𑀫𑀸𑀦𑀜𑁆𑀘 𑀲𑀗𑁆𑀓𑀦𑁆𑀢𑀺 𑀧𑀦 𑀲𑀗𑁆𑀓𑀫𑀦𑀁 𑀧𑀦 𑀦 𑀯𑀺𑀚𑁆𑀚𑀢𑀺. 𑀲𑀗𑁆𑀓𑀦𑁆𑀢𑀺𑀪𑀸𑀯𑁂 𑀅𑀲𑀢𑀺 𑀅𑀢𑀻𑀢𑀪𑀯𑀢𑁄 𑀇𑀥 𑀇𑀫𑀲𑁆𑀫𑀺𑀁 𑀪𑀯𑁂 𑀭𑀽𑀧𑀥𑀫𑁆𑀫𑀸𑀦𑀁 𑀲𑀗𑁆𑀓𑀫𑀦𑀪𑀸𑀯𑁂 𑀅𑀲𑀢𑀺 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁 𑀓𑀣𑀁 𑀓𑁂𑀦 𑀧𑀓𑀸𑀭𑁂𑀦 𑀲𑀺𑀬𑀸 𑀪𑀯𑁂𑀬𑁆𑀬? 𑀦𑀢𑁆𑀣𑀺 𑀘𑀺𑀢𑁆𑀢𑀲𑁆𑀲 𑀲𑀗𑁆𑀓𑀦𑁆𑀢𑀺, 𑀅𑀢𑀻𑀢𑀪𑀯𑀢𑁄 𑀇𑀥 𑀇𑀫𑀲𑁆𑀫𑀺𑀁 𑀪𑀯𑁂 𑀘𑀺𑀢𑁆𑀢𑀲𑁆𑀲 𑀲𑀗𑁆𑀓𑀦𑁆𑀢𑀺 𑀲𑀗𑁆𑀓𑀫𑀦𑀁 𑀦𑀢𑁆𑀣𑀺, 𑀢𑀢𑁄 𑀅𑀢𑀻𑀢𑀪𑀯𑀢𑁄 𑀅𑀢𑀻𑀢𑀁 𑀳𑁂𑀢𑀼𑀁 𑀯𑀺𑀦𑀸 𑀯𑀚𑁆𑀚𑁂𑀢𑁆𑀯𑀸 𑀇𑀥 𑀇𑀫𑀲𑁆𑀫𑀺𑀁 𑀪𑀯𑁂 𑀘𑀺𑀢𑁆𑀢𑀲𑁆𑀲 𑀧𑀸𑀢𑀼𑀪𑀸𑀯𑁄 𑀦 𑀯𑀺𑀚𑁆𑀚𑀢𑀺. 𑀲𑀼𑀮𑀤𑁆𑀥𑀧𑀘𑁆𑀘𑀬𑀁 𑀭𑀽𑀧𑀸𑀭𑀽𑀧𑀫𑀢𑁆𑀢𑀁 𑀲𑀼𑀝𑁆𑀞𑀼 𑀮𑀤𑁆𑀥𑀧𑀘𑁆𑀘𑀬𑀁 𑀭𑀽𑀧𑀦𑀸𑀫𑀫𑀢𑁆𑀢𑀁 𑀚𑀸𑀬𑀢𑀺. 𑀏𑀯𑀁 𑀇𑀫𑀺𑀦𑀸 𑀫𑀬𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀧𑀘𑁆𑀘𑀬𑀁 𑀮𑀪𑀺𑀢𑁆𑀯𑀸 𑀉𑀧𑁆𑀧𑀚𑁆𑀚𑀫𑀸𑀦𑀁 𑀭𑀽𑀧𑀸𑀭𑀽𑀧𑀫𑀢𑁆𑀢𑀁 𑀭𑀽𑀧𑀦𑀸𑀫𑀫𑀢𑁆𑀢𑀁 𑀚𑀸𑀬𑀢𑀺. 𑀏𑀯𑀁 𑀇𑀫𑀺𑀦𑀸 𑀫𑀬𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀧𑀘𑁆𑀘𑀬𑀁 𑀮𑀪𑀺𑀢𑁆𑀯𑀸 𑀉𑀧𑁆𑀧𑀚𑁆𑀚𑀫𑀸𑀦𑀁 𑀭𑀽𑀧𑀸𑀭𑀽𑀧𑀫𑀢𑁆𑀢𑀁 𑀪𑀯𑀦𑁆𑀢𑀭𑀁 𑀅𑀜𑁆𑀜𑀪𑀯𑀁 𑀧𑀝𑀺𑀲𑀦𑁆𑀥𑀺𑀁 𑀉𑀧𑁂𑀢𑀺 𑀉𑀧𑀕𑀘𑁆𑀙𑀢𑀺. 𑀇𑀢𑀺 𑀯𑀘𑀦𑀁 𑀲𑀫𑀜𑁆𑀜𑀸𑀬 𑀮𑁄𑀓𑀺𑀬𑀯𑁄𑀳𑀸𑀭𑁂𑀦 𑀧𑀯𑀼𑀘𑁆𑀘𑀢𑁂, 𑀲𑀢𑁆𑀢𑁄 𑀯𑀸 𑀦𑀢𑁆𑀣𑀺, 𑀲𑀢𑁆𑀢𑁄 𑀚𑀻𑀯𑁄𑀢𑀺 𑀯𑁂𑀯𑀘𑀦𑀁, 𑀅𑀢𑁆𑀢𑀸 𑀯𑀸𑀧𑀺 𑀦 𑀯𑀺𑀚𑁆𑀚𑀢𑀺.

𑁫𑁯𑁧-𑁯. 𑀢𑀲𑁆𑀲𑀺𑀤𑀁 𑀧𑀸𑀓𑀝𑀁 𑀓𑀢𑁆𑀯𑀸, 𑀧𑀝𑀺𑀲𑀦𑁆𑀥𑀺𑀓𑁆𑀓𑀫𑀁 𑀧𑀦 𑀢𑀲𑁆𑀲 𑀲𑀢𑁆𑀢𑀲𑁆𑀲 𑀇𑀤𑀁 𑀧𑀝𑀺𑀲𑀦𑁆𑀥𑀺𑀓𑁆𑀓𑀫𑀁 𑀲𑀼𑀤𑀼𑀩𑁆𑀩𑀼𑀥𑀁 𑀅𑀢𑀺𑀤𑀼𑀩𑁆𑀩𑀺𑀚𑀸𑀦𑀁 𑀧𑀸𑀓𑀝𑀁 𑀓𑀢𑁆𑀯𑀸 𑀅𑀳𑀁 𑀤𑀲𑁆𑀲𑀬𑀺𑀲𑁆𑀲𑀸𑀫𑀺, 𑀢𑀫𑁂𑀢𑀁 𑀧𑀝𑀺𑀲𑀦𑁆𑀥𑀺𑀓𑁆𑀓𑀫𑀁 𑀲𑀸𑀥𑀼 𑀲𑀸𑀥𑀼𑀓𑀁 𑀦𑀺𑀩𑁄𑀥𑀣, 𑀲𑀸𑀥𑀼 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣, 𑀯𑀺𑀯𑀺𑀥𑁂𑀲𑀼 𑀆𑀭𑀫𑁆𑀫𑀡𑁂𑀲𑀼 𑀮𑁄𑀪𑀯𑀲𑁂𑀦 𑀘𑀺𑀢𑁆𑀢𑀁 𑀅𑀦𑀸𑀫𑁂𑀢𑁆𑀯𑀸 𑀯𑀚𑀺𑀭𑀫𑀜𑁆𑀚𑀽𑀲𑀸𑀬 𑀅𑀦𑀕𑁆𑀖𑀫𑀡𑀺𑀭𑀢𑀦𑀁 𑀧𑀓𑁆𑀔𑀺𑀧𑀦𑁆𑀢𑁄 𑀯𑀺𑀬 𑀘𑀺𑀢𑁆𑀢𑁂 𑀞𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀢𑀻𑀢𑀲𑁆𑀫𑀺𑀁 𑀪𑀯𑁂 𑀢𑀲𑁆𑀲, 𑀆𑀲𑀦𑁆𑀦𑀫𑀭𑀡𑀲𑁆𑀲 𑀳𑀺𑀇𑀢𑁄 𑀪𑀯𑀢𑁄 𑀅𑀢𑀻𑀢𑀲𑁆𑀫𑀺𑀁 𑀪𑀯𑁂 𑀆𑀲𑀦𑁆𑀦𑀫𑀭𑀡𑀲𑁆𑀲 𑀢𑀲𑁆𑀲 𑀲𑀭𑀻𑀭𑀲𑁆𑀫𑀺𑀁 𑀆𑀢𑀧𑁂 𑀧𑀓𑁆𑀔𑀺𑀢𑁆𑀢𑀁 𑀳𑀭𑀺𑀢𑀁 𑀢𑀸𑀮𑀧𑀡𑁆𑀡𑀁 𑀯𑀺𑀬 𑀲𑀼𑀲𑁆𑀲𑀫𑀸𑀦𑁂 𑀲𑀢𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀤𑀺𑀓𑁂 𑀇𑀦𑁆𑀤𑁆𑀭𑀺𑀬𑁂 𑀦𑀝𑁆𑀞𑁂 𑀳𑀤𑀬𑀯𑀢𑁆𑀣𑀼𑀫𑀢𑁆𑀢𑀲𑁆𑀫𑀺𑀁 𑀞𑀺𑀢𑁂 𑀓𑀸𑀬𑀧𑁆𑀧𑀲𑀸𑀤𑀺𑀓𑁂 𑀯𑀺𑀜𑁆𑀜𑀸𑀡𑁂 𑀢𑀲𑁆𑀫𑀺𑀁 𑀔𑀡𑁂 𑀯𑀢𑁆𑀣𑀼𑀲𑀦𑁆𑀦𑀺𑀲𑁆𑀲𑀺𑀢𑀁 𑀳𑀤𑀬𑀯𑀢𑁆𑀣𑀼𑀦𑀺𑀲𑁆𑀲𑀺𑀢𑀁. ‘‘𑀘𑀺𑀢𑁆𑀢’’𑀦𑁆𑀢𑀺 𑀯𑀘𑀦𑀁 𑀪𑀯𑀗𑁆𑀕𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀚𑀯𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀼𑀩𑁆𑀩𑀸𑀦𑀼𑀲𑁂𑀯𑀺𑀢𑀦𑁆𑀢𑀺 𑀇𑀢𑁄 𑀓𑀸𑀮𑀸 𑀧𑀼𑀩𑁆𑀩𑀓𑀸𑀮𑁂 𑀢𑁂𑀦 𑀧𑀦 𑀅𑀦𑀼𑀲𑁂𑀯𑀺𑀢𑀁 𑀅𑀦𑀼𑀘𑀺𑀡𑁆𑀡𑀁 𑀧𑀼𑀜𑁆𑀜𑀁 𑀓𑀫𑁆𑀫𑀁 𑀯𑀸 𑀅𑀧𑀼𑀜𑁆𑀜𑀁 𑀏𑀯 𑀯𑀸 𑀓𑀫𑁆𑀫𑀁 𑀓𑀫𑁆𑀫𑀦𑀺𑀫𑀺𑀢𑁆𑀢𑀁 𑀕𑀢𑀺𑀦𑀺𑀫𑀺𑀢𑁆𑀢𑀁 𑀯𑀸 𑀓𑀫𑁆𑀫𑀨𑀮𑁂𑀦 𑀤𑁆𑀯𑀸𑀭𑁂𑀲𑀼 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀆𑀮𑀫𑁆𑀩𑀺𑀢𑁆𑀯𑀸 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀚𑀯𑀦𑀯𑀲𑁂𑀦 𑀲𑁂𑀯𑀺𑀢𑀘𑀺𑀢𑁆𑀢𑀁 𑀧𑀯𑀢𑁆𑀢𑀢𑀺. 𑀏𑀯𑀁 𑀇𑀫𑀺𑀦𑀸 𑀫𑀬𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀧𑀯𑀢𑁆𑀢𑀫𑀸𑀦𑀁 𑀢𑀁 𑀯𑀺𑀜𑁆𑀜𑀸𑀡𑀁 𑀢𑀁 𑀚𑀯𑀦𑀘𑀺𑀢𑁆𑀢𑀁 𑀮𑀤𑁆𑀥𑀧𑀘𑁆𑀘𑀬𑀁 𑀮𑀤𑁆𑀥𑀸𑀭𑀫𑁆𑀫𑀡𑀧𑀘𑁆𑀘𑀬𑀁. 𑀅𑀯𑀺𑀚𑁆𑀚𑀸𑀬 𑀧𑀝𑀺𑀘𑁆𑀙𑀦𑁆𑀦𑀸𑀤𑀻𑀦𑀯𑁂 𑀯𑀺𑀲𑀬𑁂𑀢𑀺 𑀅𑀓𑀼𑀲𑀮𑀚𑀯𑀦𑁂 𑀚𑀯𑀺𑀢𑁂 𑀢𑀲𑁆𑀲 𑀚𑀯𑀦𑀲𑁆𑀲 𑀅𑀯𑀺𑀚𑁆𑀚𑀸𑀬 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀤𑁄𑀲𑁂 𑀢𑀲𑁆𑀫𑀺𑀁 𑀓𑀫𑁆𑀫𑀸𑀤𑀺𑀓𑁂 𑀆𑀭𑀫𑁆𑀫𑀡𑁂 𑀓𑀼𑀲𑀮𑀚𑀯𑀦𑁂 𑀚𑀯𑀺𑀢𑁂 𑀢𑀢𑁄 𑀘𑀺𑀢𑁆𑀢𑀯𑀻𑀣𑀺𑀢𑁄 𑀧𑀼𑀩𑁆𑀩𑀪𑀸𑀕𑁂 𑀧𑀯𑀢𑁆𑀢𑀸𑀬 𑀅𑀯𑀺𑀚𑁆𑀚𑀸𑀬 𑀧𑀝𑀺𑀘𑁆𑀙𑀦𑁆𑀦𑀤𑁄𑀲𑁂 𑀢𑀲𑁆𑀫𑀺𑀁 𑀓𑀫𑁆𑀫𑀸𑀤𑀺𑀓𑁂 𑀆𑀭𑀫𑁆𑀫𑀡𑁂. 𑀢𑀡𑁆𑀳𑀸𑀢𑀺 𑀅𑀓𑀼𑀲𑀮𑀚𑀯𑀦𑁂𑀦 𑀲𑀳𑀚𑁄 𑀮𑁄𑀪𑁄, 𑀅𑀓𑀼𑀲𑀮𑀚𑀯𑀦𑁂 𑀯𑀸 𑀚𑀯𑀺𑀢𑁂 𑀢𑀢𑁄 𑀯𑀻𑀣𑀺𑀘𑀺𑀢𑁆𑀢𑀢𑁄 𑀧𑀼𑀩𑁆𑀩𑀪𑀸𑀕𑁂 𑀧𑀯𑀢𑁆𑀢𑁄 𑀮𑁄𑀪𑁄 𑀢𑀡𑁆𑀳𑀸. 𑀦𑀫𑁂𑀢𑀻𑀢𑀺 𑀅𑀜𑁆𑀜𑀁 𑀆𑀭𑀫𑁆𑀫𑀡𑀁 𑀅𑀕𑁆𑀕𑀸𑀳𑀸𑀧𑁂𑀢𑁆𑀯𑀸 𑀤𑀴𑁆𑀳𑀕𑁆𑀕𑀸𑀳𑀯𑀲𑁂𑀦 𑀢𑀁 𑀏𑀯 𑀓𑀫𑁆𑀫𑀦𑀺𑀫𑀺𑀢𑁆𑀢𑀕𑀢𑀺𑀦𑀺𑀫𑀺𑀢𑁆𑀢𑀲𑀗𑁆𑀔𑀸𑀢𑀁 𑀆𑀭𑀫𑁆𑀫𑀡𑀁 𑀕𑀡𑁆𑀳𑀸𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀲𑀳𑀚𑀸 𑀲𑀗𑁆𑀔𑀸𑀭𑀸 𑀧𑀦 𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀲𑀳𑀚𑀸 𑀏𑀓𑀢𑁄 𑀚𑀸𑀢𑀸 𑀘𑁂𑀢𑀦𑀸 𑀧𑀦 𑀢𑀲𑁆𑀫𑀺𑀁 𑀬𑁂𑀯𑀸𑀭𑀫𑁆𑀫𑀡𑁂 𑀔𑀺𑀧𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀺. 𑀇𑀫𑀲𑁆𑀫𑀺𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀯𑁂 𑀏𑀓𑀲𑀦𑁆𑀢𑀢𑀺𑀯𑀲𑀸 𑀧𑀯𑀢𑁆𑀢𑀸𑀬 𑀢𑀡𑁆𑀳𑀸𑀬 𑀦𑀫𑀻𑀬𑀫𑀸𑀦𑀁 𑀢𑀁 𑀯𑀺𑀜𑁆𑀜𑀸𑀡𑀁 𑀑𑀭𑀺𑀫𑀸 𑀢𑀻𑀭𑀫𑁆𑀳𑀸 𑀭𑀚𑁆𑀚𑀼𑀓𑀁 𑀆𑀮𑀫𑁆𑀩𑀺𑀢𑁆𑀯𑀸 𑀫𑀸𑀢𑀺𑀓𑀸𑀢𑀺𑀓𑁆𑀓𑀫𑁄 𑀧𑀼𑀭𑀺𑀲𑁄 𑀯𑀺𑀬 𑀏𑀢𑀁 𑀧𑀼𑀭𑀺𑀫𑀁 𑀦𑀺𑀲𑁆𑀲𑀬𑀪𑀽𑀢𑀁 𑀳𑀤𑀬𑀯𑀢𑁆𑀣𑀼𑀁 𑀚𑀳𑀢𑀺 𑀙𑀟𑁆𑀟𑁂𑀢𑀺, 𑀘𑀼𑀢𑀺𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀢𑀻𑀢𑀺 𑀅𑀢𑁆𑀣𑁄. 𑀅𑀧𑀭𑀁 𑀓𑀫𑁆𑀫𑀲𑀫𑁆𑀪𑀽𑀢𑀁 𑀦𑀺𑀲𑁆𑀲𑀬𑀁 𑀅𑀧𑀭𑀁 𑀅𑀜𑁆𑀜𑀓𑀫𑁆𑀫𑀢𑁄 𑀲𑀫𑁆𑀪𑀽𑀢𑀁 𑀦𑀺𑀲𑁆𑀲𑀬𑀪𑀽𑀢𑀁 𑀳𑀤𑀬𑀯𑀢𑁆𑀣𑀼𑀁 𑀮𑀪𑀺𑀢𑁆𑀯𑀸 𑀯𑀸 𑀅𑀮𑀪𑀺𑀢𑁆𑀯𑀸𑀧𑀺 𑀯𑀸 𑀆𑀭𑀫𑁆𑀫𑀡𑀸𑀤𑀻𑀳𑀺 𑀧𑀘𑁆𑀘𑀬𑁂𑀳𑀺 𑀢𑀁 𑀧𑀝𑀺𑀲𑀦𑁆𑀥𑀺𑀲𑀗𑁆𑀔𑀸𑀢𑀁 𑀫𑀸𑀦𑀲𑀁 𑀧𑀯𑀢𑁆𑀢𑀢𑀺. ‘‘𑀮𑀪𑀺𑀢𑁆𑀯𑀸’’𑀢𑀺 𑀯𑀘𑀦𑀁 𑀓𑀸𑀫𑀭𑀽𑀧𑀪𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. ‘‘𑀅𑀮𑀪𑀺𑀢𑁆𑀯𑀸’’𑀢𑀺 𑀯𑀘𑀦𑀁 𑀅𑀭𑀽𑀧𑀪𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀏𑀢𑁆𑀣 𑀏𑀢𑁂𑀲𑀼 𑀘𑀺𑀢𑁆𑀢𑁂𑀲𑀼 𑀧𑀼𑀭𑀺𑀫𑀁 ‘‘𑀚𑀳𑀢𑀻’’𑀢𑀺 𑀯𑀘𑀦𑁂𑀦 𑀯𑀼𑀢𑁆𑀢𑀜𑁆𑀘𑁂𑀯 𑀘𑀺𑀢𑁆𑀢𑀁, 𑀘𑀼𑀢𑀺𑀘𑀺𑀢𑁆𑀢𑀁 𑀧𑀘𑁆𑀙𑀺𑀫𑀁 ‘‘𑀆𑀭𑀫𑁆𑀫𑀡𑀸𑀤𑀻𑀳𑀺 𑀧𑀘𑁆𑀘𑀬𑁂𑀳𑀺 𑀧𑀯𑀢𑁆𑀢𑀢𑀻’’𑀢𑀺 𑀯𑀘𑀦𑁂𑀦 𑀯𑀼𑀢𑁆𑀢𑀜𑁆𑀘𑁂𑀯 𑀘𑀺𑀢𑁆𑀢𑀁 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁 𑀧𑀡𑁆𑀟𑀺𑀢𑁂𑀦 𑀯𑁂𑀤𑀺𑀢𑀩𑁆𑀩𑀁.

𑁬𑁦𑁦-𑁬. 𑀢𑀤𑁂𑀢𑀁 𑀢𑀁 𑀏𑀢𑀁 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁 𑀧𑀼𑀭𑀺𑀫𑀸 𑀪𑀯𑀢𑁄 𑀇𑀥 𑀇𑀫𑀲𑁆𑀫𑀺𑀁 𑀧𑀘𑁆𑀙𑀺𑀫𑀪𑀯𑁂 𑀦𑀸𑀧𑀺 𑀆𑀕𑀢𑀁, 𑀓𑀫𑁆𑀫𑀸𑀤𑀺𑀜𑁆𑀘 𑀳𑁂𑀢𑀼𑀁 𑀯𑀺𑀦𑀸 𑀯𑀚𑁆𑀚𑁂𑀢𑁆𑀯𑀸 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁 𑀧𑀸𑀢𑀼𑀪𑀽𑀢𑀁 𑀦 𑀘𑁂𑀯 𑀢𑀁 𑀏𑀢𑁆𑀣 𑀏𑀢𑀲𑁆𑀫𑀺𑀁 𑀯𑀘𑀦𑁂 𑀏𑀢𑀲𑁆𑀲 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀲𑁆𑀲 𑀧𑀼𑀭𑀺𑀫𑀸 𑀪𑀯𑀢𑁄 𑀇𑀥 𑀇𑀫𑀲𑁆𑀫𑀺𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀯𑁂 𑀅𑀦𑀸𑀕𑀫𑀦𑁂 𑀅𑀢𑀻𑀢𑀪𑀯𑀳𑁂𑀢𑀽𑀳𑀺 𑀅𑀢𑀻𑀢𑀪𑀯𑁂 𑀓𑀫𑁆𑀫𑀸𑀤𑀺𑀧𑀘𑁆𑀘𑀬𑁂𑀳𑀺 𑀏𑀢𑀲𑁆𑀲 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀲𑁆𑀲 𑀲𑀫𑁆𑀪𑀯𑁂. 𑀧𑀝𑀺𑀖𑁄𑀲𑀤𑀻𑀧𑀫𑀼𑀤𑁆𑀤𑀸𑀤𑀻, 𑀪𑀯𑀦𑁆𑀢𑁂𑀢𑁆𑀣 𑀦𑀺𑀤𑀲𑁆𑀲𑀦𑀸 𑀏𑀢𑁆𑀣 𑀏𑀢𑀲𑁆𑀫𑀺𑀁 𑀢𑀲𑁆𑀲 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀲𑁆𑀲 𑀅𑀢𑀻𑀢𑀪𑀯𑀢𑁄 𑀅𑀦𑀸𑀕𑀫𑀦𑁂 𑀅𑀢𑀻𑀢𑀪𑀯𑁂 𑀳𑁂𑀢𑀽𑀳𑀺 𑀲𑀫𑁆𑀪𑀯𑁂 𑀧𑀝𑀺𑀖𑁄𑀲𑀤𑀻𑀧𑀫𑀼𑀤𑁆𑀤𑀸𑀤𑀺𑀅𑀢𑁆𑀣𑀦𑀺𑀤𑀲𑁆𑀲𑀦𑀸 𑀉𑀧𑀫𑀸 𑀪𑀯𑀦𑁆𑀢𑀺. 𑀅𑀜𑁆𑀜𑀢𑁆𑀭 𑀅𑀜𑁆𑀜𑀲𑁆𑀫𑀺𑀁 𑀧𑀝𑀺𑀖𑁄𑀲𑀸𑀤𑀻𑀦𑀁 𑀅𑀢𑁆𑀣𑀸𑀦𑀁 𑀧𑀯𑀢𑁆𑀢𑀺𑀝𑁆𑀞𑀸𑀦𑁂 𑀆𑀕𑀦𑁆𑀢𑁆𑀯𑀸 𑀲𑀤𑁆𑀤𑀸𑀤𑀺𑀳𑁂𑀢𑀼𑀓𑀸 𑀲𑀤𑁆𑀤𑀸𑀤𑀬𑁄 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺 𑀬𑀣𑀸. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀚𑀦𑁂𑀳𑀺 𑀧𑀯𑀢𑁆𑀢𑀸𑀧𑀺𑀢𑀸 𑀲𑀤𑁆𑀤𑀤𑀻𑀧𑀫𑀼𑀤𑁆𑀤𑀸𑀤𑀬𑁄 𑀅𑀢𑁆𑀣𑀸 𑀧𑀩𑁆𑀩𑀢𑀦𑁆𑀢𑀭𑀸𑀤𑀻𑀲𑀼 𑀅𑀜𑁆𑀜𑁂𑀲𑀼 𑀞𑀸𑀦𑁂𑀲𑀼 𑀧𑀯𑀢𑁆𑀢𑀸𑀦𑀁 𑀧𑀝𑀺𑀖𑁄𑀲𑀤𑀻𑀧𑀫𑀼𑀤𑁆𑀤𑀸𑀤𑀻𑀦𑀁 𑀅𑀢𑁆𑀣𑀸𑀦𑀁 𑀳𑁂𑀢𑀼𑀓𑀸 𑀳𑁄𑀦𑁆𑀢𑀺. 𑀢𑁂𑀲𑀼 𑀲𑀤𑁆𑀤𑀸𑀤𑀻𑀲𑀼 𑀧𑀘𑁆𑀘𑀬𑁂𑀲𑀼 𑀲𑀦𑁆𑀢𑁂𑀲𑀼 𑀬𑁂 𑀢𑁂 𑀧𑀝𑀺𑀖𑁄𑀲𑀸𑀤𑀬𑁄 𑀳𑁄𑀦𑁆𑀢𑀺, 𑀅𑀲𑀦𑁆𑀢𑁂𑀲𑀼 𑀦 𑀳𑁄𑀦𑁆𑀢𑀺 𑀬𑀣𑀸, 𑀏𑀯𑀫𑁂𑀯 𑀘 𑀯𑀺𑀜𑁆𑀜𑀸𑀡𑀁 𑀅𑀢𑀻𑀢𑀪𑀯𑀢𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀯𑀯𑀺𑀜𑁆𑀜𑀸𑀡𑀯𑀲𑁂𑀦 𑀧𑀯𑀢𑁆𑀢𑀁 𑀯𑀺𑀜𑁆𑀜𑀸𑀡𑀁 𑀯𑀺𑀪𑀸𑀯𑀺𑀦𑀸 𑀯𑁂𑀤𑀺𑀢𑀩𑁆𑀩𑀁. 𑀲𑀦𑁆𑀢𑀸𑀦𑀩𑀦𑁆𑀥𑀢𑁄 𑀲𑀦𑁆𑀢𑀸𑀦𑀩𑀦𑁆𑀥𑀯𑀲𑁂𑀦 𑀏𑀓𑀢𑀸 𑀅𑀢𑀻𑀢𑀪𑀯𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀯𑀯𑀺𑀜𑁆𑀜𑀸𑀡𑀯𑀲𑁂𑀦 𑀧𑀯𑀢𑁆𑀢𑀲𑁆𑀲 𑀯𑀺𑀜𑁆𑀜𑀸𑀡𑀲𑁆𑀲 𑀏𑀓𑀻𑀪𑀸𑀯𑁄 𑀦𑀢𑁆𑀣𑀺, 𑀦𑀸𑀦𑀢𑀸𑀧𑀺 𑀢𑀲𑁆𑀲 𑀯𑀺𑀜𑁆𑀜𑀸𑀡𑀲𑁆𑀲 𑀦𑀸𑀦𑀸𑀪𑀸𑀯𑁄𑀧𑀺 𑀧𑀘𑁆𑀘𑁂𑀓𑀪𑀸𑀯𑁄 𑀅𑀧𑀺. 𑀲𑀢𑀺 𑀲𑀦𑁆𑀢𑀸𑀦𑀩𑀦𑁆𑀥𑁂 𑀢𑀼, 𑀏𑀓𑀦𑁆𑀢𑁂𑀦𑁂𑀓𑀢𑀸 𑀲𑀺𑀬𑀸 𑀲𑀦𑁆𑀢𑀸𑀦𑀩𑀦𑁆𑀥𑁂 𑀲𑀢𑀺 𑀏𑀓𑀦𑁆𑀢𑁂𑀦 𑀢𑀲𑁆𑀲 𑀯𑀺𑀜𑁆𑀜𑀸𑀡𑀲𑁆𑀲 𑀏𑀓𑀢𑀸 𑀏𑀓𑀻𑀪𑀸𑀯𑁄 𑀲𑀺𑀬𑀸 𑀪𑀯𑁂𑀬𑁆𑀬, 𑀔𑀻𑀭𑀲𑀪𑀸𑀯𑀢𑁄 𑀧𑀕𑁆𑀖𑀭𑀡𑀲𑀪𑀸𑀯𑀢𑁄 𑀔𑀻𑀭𑀢𑁄 𑀲𑀫𑁆𑀪𑀽𑀢𑀁 𑀖𑀦𑀲𑀪𑀸𑀯𑀁 𑀓𑀤𑀸𑀘𑀺𑀧𑀺 𑀓𑀺𑀲𑁆𑀫𑀺𑀜𑁆𑀘𑀺𑀧𑀺 𑀓𑀸𑀮𑁂 𑀦 𑀪𑀯𑁂𑀬𑁆𑀬, 𑀲𑀩𑁆𑀩𑀤𑀸 𑀧𑀕𑁆𑀖𑀭𑀡𑀲𑀪𑀸𑀯𑀔𑀻𑀭𑀫𑁂𑀯 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀅𑀣𑀸𑀧𑀺 𑀅𑀧𑀭𑁄 𑀦𑀬𑁄𑀧𑀺 𑀲𑀸 𑀏𑀓𑀦𑁆𑀢𑀦𑀸𑀦𑀢𑀸 𑀢𑀲𑁆𑀲 𑀯𑀺𑀜𑁆𑀜𑀸𑀡𑀲𑁆𑀲 𑀲𑁄 𑀏𑀓𑀦𑁆𑀢𑀦𑀸𑀦𑀸𑀪𑀸𑀯𑁄 𑀬𑀤𑀺 𑀪𑀯𑁂𑀬𑁆𑀬, 𑀔𑀻𑀭𑀲𑀸𑀫𑀺𑀓𑁄 𑀲𑁄 𑀧𑀼𑀕𑁆𑀕𑀮𑁄 𑀤𑀥𑀺𑀲𑀸𑀫𑀺 𑀦 𑀪𑀯𑁂𑀬𑁆𑀬. 𑀔𑀻𑀭𑀓𑀸𑀮𑁂 𑀔𑀻𑀭𑀲𑁆𑀲 𑀇𑀲𑁆𑀲𑀭𑀪𑀽𑀢𑁄 𑀲𑀸𑀫𑀺𑀓𑁄 𑀧𑀕𑁆𑀖𑀭𑀡𑀲𑀪𑀸𑀯𑀁 𑀚𑀳𑀺𑀢𑁆𑀯𑀸 𑀤𑀥𑀺𑀲𑁆𑀲 𑀉𑀧𑁆𑀧𑀚𑁆𑀚𑀫𑀸𑀦𑀓𑀸𑀮𑁂 𑀢𑀲𑁆𑀲 𑀤𑀥𑀺𑀲𑁆𑀲 𑀇𑀲𑁆𑀲𑀭𑁄 𑀦 𑀪𑀯𑁂𑀬𑁆𑀬, 𑀢𑀢𑁄 𑀔𑀻𑀭𑀲𑀸𑀫𑀺𑀓𑁄 𑀅𑀜𑁆𑀜𑁄 𑀧𑀼𑀕𑁆𑀕𑀮𑁄 𑀢𑀲𑁆𑀲 𑀤𑀥𑀺𑀲𑁆𑀲 𑀅𑀦𑀺𑀲𑁆𑀲𑀭𑁄 𑀅𑀲𑀸𑀫𑀺𑀓𑁄 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀓𑀸𑀭𑀡𑀸 𑀏𑀢𑁆𑀣 𑀏𑀢𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀓𑁆𑀓𑀫𑀯𑀺𑀦𑀺𑀘𑁆𑀙𑀬𑁂 𑀏𑀓𑀦𑁆𑀢𑀏𑀓𑀢𑀸𑀧𑀺 𑀯𑀸 𑀏𑀓𑀦𑁆𑀢𑀦𑀸𑀦𑀢𑀸𑀧𑀺 𑀯𑀸 𑀲𑀫𑀬𑀜𑁆𑀜𑀼𑀦𑀸 𑀯𑀺𑀜𑁆𑀜𑀼𑀦𑀸 𑀦 𑀘𑁂𑀯 𑀉𑀧𑀕𑀦𑁆𑀢𑀩𑁆𑀩𑀸.

𑁬𑁦𑁭-𑁧𑁦. 𑀏𑀯𑀁 𑀇𑀫𑀺𑀦𑀸 𑀫𑀬𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀅𑀲𑀗𑁆𑀓𑀦𑁆𑀢𑀺𑀧𑀸𑀢𑀼𑀪𑀸𑀯𑁂 𑀲𑀗𑁆𑀓𑀦𑁆𑀢𑀺𑀧𑀸𑀢𑀼𑀪𑀸𑀯𑀭𑀳𑀺𑀢𑁂 𑀪𑀯𑁂 𑀲𑀢𑀺 𑀇𑀫𑀲𑁆𑀫𑀺𑀁 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑁂 𑀔𑀦𑁆𑀥𑀸𑀤𑀺𑀲𑀫𑀢𑀸 𑀅𑀪𑀺𑀲𑀫𑁆𑀪𑀽𑀢𑀸 𑀬𑁂 𑀔𑀦𑁆𑀥𑀸 𑀳𑁄𑀦𑁆𑀢𑀺, 𑀏𑀢𑁂𑀲𑀁 𑀇𑀥 𑀇𑀫𑀲𑁆𑀫𑀺𑀁 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑁂 𑀦𑀺𑀭𑀼𑀤𑁆𑀥𑀢𑁆𑀢𑀸 𑀇𑀥 𑀇𑀫𑀲𑁆𑀫𑀺𑀁 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑁂 𑀚𑀦𑁂𑀳𑀺 𑀓𑀢𑀲𑁆𑀲 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀨𑀮𑀳𑁂𑀢𑀼𑀦𑁄 𑀨𑀮𑀲𑁆𑀲 𑀧𑀘𑁆𑀘𑀬𑀪𑀽𑀢𑀲𑁆𑀲 𑀧𑀭𑀢𑁆𑀣 𑀧𑀭𑀲𑁆𑀫𑀺𑀁 𑀮𑁄𑀓𑁂 𑀆𑀕𑀫𑀢𑁄 𑀘𑁂𑀯 𑀏𑀯𑀁 𑀅𑀜𑁆𑀜𑀲𑁆𑀲 𑀲𑀢𑁆𑀢𑀲𑁆𑀲 𑀅𑀜𑁆𑀜𑀢𑁄 𑀓𑀫𑁆𑀫𑀢𑁄 𑀳𑀺 𑀢𑀢𑁄 𑀲𑀢𑁆𑀢𑀢𑁄 𑀅𑀜𑁆𑀜𑁂𑀦 𑀲𑀢𑁆𑀢𑁂𑀦 𑀓𑀢𑀢𑁄 𑀅𑀜𑁆𑀜𑀢𑁄 𑀘𑁂𑀯 𑀓𑀫𑁆𑀫𑀢𑁄 𑀢𑀁 𑀨𑀮𑀁 𑀲𑀺𑀬𑀸 𑀪𑀯𑁂𑀬𑁆𑀬, ‘‘𑀅𑀜𑁆𑀜𑀲𑁆𑀲 𑀲𑀢𑁆𑀢𑀲𑁆𑀲𑀸’’𑀢𑀺 𑀯𑀘𑀦𑁂𑀦 𑀢𑀺𑀢𑁆𑀣𑀺𑀬𑀲𑀢𑁆𑀢𑀲𑁆𑀲𑀧𑀺 𑀓𑀫𑁆𑀫𑀁 𑀅𑀜𑁆𑀜𑀲𑁆𑀲 𑀘 𑀨𑀮𑀁 𑀤𑀤𑁂𑀬𑁆𑀬𑀸𑀢𑀺 𑀅𑀢𑁆𑀣𑁄, 𑀢𑀲𑁆𑀫𑀸 𑀓𑀸𑀭𑀡𑀸 𑀏𑀢𑀁 𑀲𑀩𑁆𑀩𑀁 𑀏𑀯 𑀘 𑀢𑀼𑀫𑁆𑀳𑁂𑀳𑀺 𑀯𑀼𑀢𑁆𑀢𑀯𑀺𑀥𑀸𑀦𑀁 𑀦 𑀲𑀼𑀦𑁆𑀤𑀭𑀁. 𑀏𑀢𑁆𑀣𑀸𑀳𑀸𑀢𑀺 𑀏𑀢𑀲𑁆𑀫𑀺𑀁 𑀞𑀸𑀦𑁂 𑀞𑀢𑁆𑀯𑀸 𑀘𑁄𑀤𑀓𑁄 𑀆𑀳 𑁋 𑀦𑀦𑀼 𑀏𑀯𑀁 ‘‘𑀅𑀲𑀗𑁆𑀓𑀦𑁆𑀢𑀺𑀧𑀸𑀢𑀼𑀪𑀸𑀯𑁂 𑀪𑀯𑁂 𑀲𑀢𑀻’’𑀢𑀺𑀆𑀤𑀺𑀓𑀁 𑀯𑀘𑀦𑀁 𑀦𑀺𑀬𑀢𑀻𑀢𑀺? 𑀯𑀼𑀘𑁆𑀘𑀢𑁂 𑁋 𑀲𑀦𑁆𑀢𑀸𑀦𑁂 𑀬𑀁 𑀨𑀮𑀁 𑀏𑀢𑀁 𑀏𑀓𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀧𑀯𑀢𑁆𑀢𑀫𑀸𑀦𑀁 𑀬𑀁 𑀏𑀢𑀁 𑀨𑀮𑀁 𑀅𑀜𑁆𑀜𑀲𑁆𑀲 𑀲𑀢𑁆𑀢𑀲𑁆𑀲 𑀦 𑀳𑁄𑀢𑀺, 𑀅𑀜𑁆𑀜𑀢𑁄 𑀓𑀫𑁆𑀫𑀢𑁄 𑀦 𑀘 𑀳𑁄𑀢𑀺, 𑀩𑀻𑀚𑀸𑀦𑀁 𑀅𑀪𑀺𑀲𑀗𑁆𑀔𑀸𑀭𑁄 𑀏𑀢𑀲𑁆𑀲𑀢𑁆𑀣𑀲𑁆𑀲 ‘‘𑀏𑀓𑀲𑁆𑀫𑀺𑀁 𑀲𑀦𑁆𑀢𑀸𑀦𑁂’’𑀢𑀺𑀆𑀤𑀺𑀓𑀲𑁆𑀲 𑀏𑀢𑀲𑁆𑀲 𑀅𑀢𑁆𑀣𑀲𑁆𑀲 𑀲𑀸𑀥𑀓𑁄 𑀦𑀺𑀧𑁆𑀨𑀸𑀤𑀓𑁄 𑀳𑁄𑀢𑀺.

𑁬𑁧𑁧-𑁫. 𑀏𑀓𑀲𑁆𑀫𑀺𑀁 𑀧𑀦 𑀲𑀦𑁆𑀢𑀸𑀦𑁂, 𑀯𑀢𑁆𑀢𑀫𑀸𑀦𑀁 𑀨𑀮𑀁 𑀧𑀦 𑀅𑀜𑁆𑀜𑀲𑁆𑀲 𑀲𑀢𑁆𑀢𑀲𑁆𑀲𑀸𑀧𑀺 𑀯𑀸 𑀦 𑀳𑁄𑀢𑀺, 𑀢𑀁 𑀨𑀮𑀁 𑀅𑀜𑁆𑀜𑀢𑁄 𑀓𑀫𑁆𑀫𑀢𑁄 𑀦 𑀳𑁄𑀢𑀺. 𑀩𑀻𑀚𑀸𑀦𑀁 𑀅𑀪𑀺𑀲𑀗𑁆𑀔𑀸𑀭𑁄 𑀏𑀢𑀲𑁆𑀲𑀢𑁆𑀣𑀲𑁆𑀲 ‘‘𑀏𑀓𑀲𑁆𑀫𑀺𑀁 𑀧𑀦 𑀲𑀦𑁆𑀢𑀸𑀦𑁂’’𑀢𑀺𑀆𑀤𑀺𑀓𑀲𑁆𑀲 𑀏𑀢𑀲𑁆𑀲 𑀅𑀢𑁆𑀣𑀲𑁆𑀲 𑀲𑀸𑀥𑀓𑁄 𑀦𑀺𑀧𑁆𑀨𑀸𑀤𑀓𑁄 𑀳𑁄𑀢𑀺, 𑀩𑀻𑀚𑀸𑀦𑀁 𑀅𑀪𑀺𑀲𑀗𑁆𑀔𑀸𑀭𑁂 𑀫𑀥𑀼𑀆𑀤𑀺𑀦𑀸 𑀯𑀢𑁆𑀣𑀼𑀦𑀸 𑀚𑀦𑁂𑀳𑀺 𑀓𑀢𑁂 𑀢𑀲𑁆𑀲 𑀩𑀻𑀚𑀲𑁆𑀲 𑀲𑀦𑁆𑀢𑀸𑀦𑁂 𑀧𑀞𑀫𑀁 𑀮𑀤𑁆𑀥𑀧𑀘𑁆𑀘𑀬𑁄 𑀧𑀞𑀫𑀁 𑀮𑀤𑁆𑀥𑀫𑀥𑀼𑀆𑀤𑀺𑀧𑀘𑁆𑀘𑀬𑁄 𑀢𑀲𑁆𑀲 𑀩𑀻𑀚𑀲𑁆𑀲 𑀨𑀮𑀁 𑀓𑀸𑀮𑀦𑁆𑀢𑀭𑁂 𑀫𑀥𑀼𑀆𑀤𑀺𑀦𑀸 𑀩𑀻𑀚𑀸𑀪𑀺𑀲𑀗𑁆𑀔𑀭𑀡𑀢𑁄 𑀅𑀜𑁆𑀜𑀲𑁆𑀫𑀺𑀁 𑀓𑀸𑀮𑁂 𑀫𑀥𑀼𑀭𑁄 𑀳𑁄𑀢𑀺. 𑀳𑀺 𑀲𑀘𑁆𑀘𑀁 ‘‘𑀩𑀻𑀚𑀸𑀦𑀁 𑀅𑀪𑀺𑀲𑀗𑁆𑀔𑀸𑀭𑁂’’𑀢𑀺𑀆𑀤𑀺𑀓𑀁 𑀯𑀘𑀦𑀁. 𑀢𑀸𑀦𑀺 𑀳𑀺 𑀢𑀸𑀦𑀺 𑀏𑀯 𑀧𑀞𑀫𑀁 𑀫𑀥𑀼𑀆𑀤𑀺𑀦𑀸 𑀚𑀦𑁂𑀳𑀺 𑀭𑁄𑀧𑀺𑀢𑀸𑀦𑀺 𑀩𑀻𑀚𑀸𑀦𑀺 𑀅𑀪𑀺𑀲𑀗𑁆𑀔𑀭𑀡𑀢𑁄 𑀓𑀸𑀮𑀦𑁆𑀢𑀭𑁂 𑀫𑀥𑀼𑀭𑀪𑀸𑀯𑀁 𑀨𑀮𑀫𑁆𑀧𑀺 𑀯𑀸 𑀨𑀮𑀝𑁆𑀞𑀁 𑀯𑀸 𑀦 𑀧𑀸𑀧𑀼𑀡𑀦𑁆𑀢𑀺. 𑀏𑀯𑀁 𑀇𑀫𑀺𑀦𑀸 𑀧𑀓𑀸𑀭𑁂𑀦 𑀇𑀤𑀁 𑀫𑀬𑀸 𑀯𑀼𑀢𑁆𑀢𑀁 ‘‘𑀏𑀓𑀲𑁆𑀫𑀺𑀁 𑀧𑀦 𑀲𑀦𑁆𑀢𑀸𑀦𑁂’’𑀢𑀺𑀆𑀤𑀺𑀓𑀁 𑀯𑀘𑀦𑀁 𑀧𑀡𑁆𑀟𑀺𑀢𑁂𑀦 𑀜𑁂𑀬𑁆𑀬𑀁. 𑀅𑀧𑀺 𑀘 𑀅𑀧𑀭𑁄 𑀦𑀬𑁄. 𑀩𑀸𑀮𑀓𑀸𑀮𑁂 𑀢𑀭𑀼𑀡𑀓𑀸𑀮𑁂 𑀢𑁂𑀦 𑀢𑀭𑀼𑀡𑁂𑀦 𑀧𑀬𑀼𑀢𑁆𑀢𑁂𑀦 𑀯𑀺𑀚𑁆𑀚𑀸𑀲𑀺𑀧𑁆𑀧𑁄𑀲𑀥𑀸𑀤𑀺𑀦𑀸 𑀓𑀫𑁆𑀫𑁂𑀦𑀸𑀧𑀺 𑀢𑀲𑁆𑀲 𑀯𑀼𑀤𑁆𑀥𑀓𑀸𑀮𑀲𑁆𑀫𑀺𑀁 𑀨𑀮𑀤𑀸𑀦𑀲𑀻𑀮𑁂𑀦 𑀅𑀬𑀁 ‘‘𑀏𑀓𑀲𑁆𑀫𑀺𑀁 𑀧𑀦 𑀲𑀦𑁆𑀢𑀸𑀦𑁂’’𑀢𑀺𑀆𑀤𑀺𑀓𑁄 𑀅𑀢𑁆𑀣𑁄 𑀧𑀡𑁆𑀟𑀺𑀢𑁂𑀦 𑀤𑀻𑀧𑁂𑀢𑀩𑁆𑀩𑁄.

𑁬𑁧𑁬-𑁨𑁦. 𑀘𑁄𑀤𑀓𑁄 𑀧𑀼𑀦𑀸𑀳 𑁋 𑀏𑀯𑀁 𑀲𑀦𑁆𑀢𑁂𑀧𑀺 𑀢𑀁 𑀓𑀫𑁆𑀫𑀁 𑀏𑀯𑀁 𑀇𑀫𑀺𑀦𑀸 𑀫𑀬𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀓𑀫𑁆𑀫𑁂 𑀲𑀦𑁆𑀢𑁂𑀧𑀺 𑀲𑀁𑀯𑀺𑀚𑁆𑀚𑀫𑀸𑀦𑁂𑀧𑀺 𑀢𑀁 𑀓𑀫𑁆𑀫𑀁 𑀏𑀢𑀲𑁆𑀫𑀺𑀁𑀬𑁂𑀯 𑀔𑀡𑁂 𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀯𑀸 𑀨𑀮𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀣 𑀯𑀸𑀯𑀺𑀚𑁆𑀚𑀫𑀸𑀦𑀓𑀁 𑀧𑀘𑁆𑀘𑀬𑁄 𑀦 𑀪𑀯𑁂𑀬𑁆𑀬. 𑀏𑀢𑀲𑁆𑀫𑀺𑀁𑀬𑁂𑀯 𑀔𑀡𑁂 𑀅𑀯𑀺𑀚𑁆𑀚𑀫𑀸𑀦𑀓𑀁 𑀓𑀫𑁆𑀫𑀁 𑀯𑀸 𑀨𑀮𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺. 𑀲𑀘𑁂 𑀬𑀤𑀺 𑀯𑀺𑀚𑁆𑀚𑀫𑀸𑀦𑀁 𑀨𑀮𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀧𑁆𑀧𑀯𑀢𑁆𑀢𑀺𑀓𑁆𑀔𑀡𑁂𑀧𑀦 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀧𑀯𑀢𑁆𑀢𑀺𑀓𑁆𑀔𑀡𑁂 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀚𑁆𑀚𑀫𑀸𑀦𑀓𑀸𑀮𑁂 𑀧𑀦 𑀳𑁂𑀢𑀼𑀦𑀸 𑀓𑀫𑁆𑀫𑁂𑀦𑁂𑀯 𑀲𑀤𑁆𑀥𑀺𑀁 𑀧𑀸𑀓𑁂𑀦 𑀪𑀯𑀺𑀢𑀩𑁆𑀩𑀁. 𑀅𑀣 𑀯𑀸 𑀅𑀧𑀭𑁄 𑀦𑀬𑁄. 𑀯𑀺𑀚𑁆𑀚𑀫𑀸𑀦𑀁 𑀦𑀺𑀭𑀼𑀤𑁆𑀥𑀁 𑀓𑀫𑁆𑀫𑀁 𑀯𑀺𑀧𑀸𑀓𑀲𑁆𑀲 𑀧𑀘𑁆𑀘𑀬𑁄 𑀬𑀤𑀺 𑀪𑀯𑁂𑀬𑁆𑀬, 𑀧𑀯𑀢𑁆𑀢𑀺𑀓𑁆𑀔𑀡𑀢𑁄 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀧𑀯𑀢𑁆𑀢𑀺𑀓𑁆𑀔𑀡𑀢𑁄 𑀧𑀼𑀩𑁆𑀩𑁂 𑀯𑀸 𑀓𑀸𑀮𑁂, 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀧𑀯𑀢𑁆𑀢𑀺𑀓𑁆𑀔𑀡𑀢𑁄 𑀧𑀘𑁆𑀙𑀸 𑀯𑀸 𑀅𑀯𑀺𑀚𑁆𑀚𑀫𑀸𑀦𑀓𑀸𑀮𑁂𑀢𑀺 𑀅𑀢𑁆𑀣𑁄. 𑀦𑀺𑀘𑁆𑀘𑀨𑀮𑀁 𑀲𑀺𑀬𑀸𑀢𑀺 𑀲𑀩𑁆𑀩𑀤𑀸 𑀓𑀫𑁆𑀫𑀧𑀘𑁆𑀘𑀬𑀯𑀺𑀭𑀳𑀺𑀢𑀁 𑀨𑀮𑀁 𑀲𑀺𑀬𑀸𑀢𑀺 𑀅𑀢𑁆𑀣𑁄. 𑀆𑀘𑀭𑀺𑀬𑁂𑀦 𑀯𑀼𑀘𑁆𑀘𑀢𑁂 𑁋 ‘‘𑀮𑁄𑀪𑀁, 𑀪𑀺𑀓𑁆𑀔𑀯𑁂, 𑀧𑀚𑀳𑀣, 𑀲𑁄𑀢𑀸𑀧𑀢𑁆𑀢𑀺𑀧𑀝𑀺𑀮𑀸𑀪𑀸𑀬 𑀅𑀳𑀫𑁂𑀯 𑀧𑀸𑀝𑀺𑀪𑁄𑀕𑁄’’𑀢𑀺𑀆𑀤𑀻𑀲𑀼 𑀧𑀸𑀞𑁂𑀲𑀼 𑀧𑀸𑀝𑀺𑀪𑁄𑀕𑁄 𑀯𑀺𑀬 𑀓𑀫𑁆𑀫𑀁 𑀤𑀝𑁆𑀞𑀩𑁆𑀩𑀁. 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀯𑀺𑀬 𑀓𑀫𑁆𑀫𑀢𑁄 𑀲𑀫𑁆𑀪𑀽𑀢𑀁 𑀨𑀮𑀁 𑀤𑀝𑁆𑀞𑀩𑁆𑀩𑀁. 𑀓𑀝𑀢𑁆𑀢𑀸𑀬𑁂𑀯 𑀚𑀦𑁂𑀳𑀺 𑀓𑀝𑀢𑁆𑀢𑀸𑀬𑁂𑀯 𑀢𑀁 𑀓𑀫𑁆𑀫𑀁 𑀨𑀮𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺, 𑀅𑀲𑁆𑀲 𑀯𑀺𑀚𑁆𑀚𑀫𑀸𑀦𑀢𑁆𑀢𑀁 𑀦 𑀘 𑀳𑁄𑀢𑀺, 𑀢𑀲𑁆𑀲 𑀅𑀯𑀺𑀚𑁆𑀚𑀫𑀸𑀦𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀚𑁆𑀚𑀫𑀸𑀦𑀢𑀸 𑀯𑀸 𑀦 𑀘 𑀦𑁂𑀯 𑀳𑁄𑀢𑀺.

𑁬𑁨𑁧. 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑁄𑀬𑀁 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑁄 𑀅𑀬𑀁 𑀧𑀭𑀫𑀢𑁆𑀣𑀧𑁆𑀧𑀓𑀸𑀲𑀦𑁄 𑀪𑀽𑀢𑀢𑁆𑀣𑀤𑀻𑀧𑀦𑁄 𑀲𑁄𑀢𑀽𑀦𑀁 𑀧𑀼𑀕𑁆𑀕𑀮𑀸𑀦𑀁 𑀧𑀻𑀢𑀺𑀩𑀼𑀤𑁆𑀥𑀺𑀯𑀺𑀯𑀟𑁆𑀠𑀦𑁄 𑀧𑀡𑁆𑀟𑀺𑀢𑁂𑀳𑀺 𑀯𑀺𑀯𑀺𑀥𑁂𑀲𑀼 𑀆𑀭𑀫𑁆𑀫𑀡𑁂𑀲𑀼 𑀘𑀺𑀢𑁆𑀢𑀁 𑀅𑀦𑀸𑀫𑁂𑀢𑁆𑀯𑀸 𑀲𑀓𑁆𑀓𑀘𑁆𑀘𑁂𑀦 𑀫𑀦𑀲𑀺𑀓𑀸𑀭𑁂𑀦 𑀲𑁄𑀢𑀩𑁆𑀩𑁄.

𑀇𑀢𑀺 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑀝𑀻𑀓𑀸𑀬

𑀧𑀼𑀜𑁆𑀜𑀯𑀺𑀧𑀸𑀓𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀯𑀫𑁄 𑀧𑀭𑀺𑀘𑁆𑀙𑁂𑀤𑁄.