𑁭. 𑀲𑀢𑁆𑀢𑀫𑁄 𑀧𑀭𑀺𑀘𑁆𑀙𑁂𑀤𑁄

𑀯𑀺𑀧𑀸𑀓𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁩𑁭𑁬. 𑀅𑀦𑀦𑁆𑀢𑀜𑀸𑀡𑁂𑀦 𑀦𑀺𑀭𑀗𑁆𑀕𑀡𑁂𑀦,

𑀕𑀼𑀡𑁂𑀲𑀺𑀦𑀸 𑀓𑀸𑀭𑀼𑀡𑀺𑀓𑁂𑀦 𑀢𑁂𑀦;

𑀯𑀼𑀢𑁆𑀢𑁂 𑀯𑀺𑀧𑀸𑀓𑁂 𑀫𑀢𑀺𑀧𑀸𑀝𑀯𑀢𑁆𑀣𑀁,

𑀯𑀺𑀧𑀸𑀓𑀘𑀺𑀢𑁆𑀢𑀧𑁆𑀧𑀪𑀯𑀁 𑀲𑀼𑀡𑀸𑀣.

𑀬𑁂𑀦 𑀚𑀺𑀦𑁂𑀦 𑀅𑀦𑀦𑁆𑀢𑀜𑀸𑀡𑁂𑀦 𑀦𑀺𑀓𑁆𑀓𑀺𑀮𑁂𑀲𑁂𑀦 𑀕𑀼𑀡𑁂𑀲𑀺𑀦𑀸 𑀓𑀸𑀭𑀼𑀡𑀺𑀓𑁂𑀦 𑀢𑁂𑀦 𑀚𑀺𑀦𑁂𑀦 𑀯𑀼𑀢𑁆𑀢𑁂 𑀯𑀺𑀧𑀸𑀓𑀲𑁆𑀫𑀺𑀁 𑀫𑀢𑀺𑀧𑀸𑀝𑀯𑀢𑁆𑀣𑀁 𑀫𑀢𑀺𑀙𑁂𑀓𑀪𑀸𑀯𑀢𑁆𑀣𑀸𑀬 𑀯𑀺𑀧𑀸𑀓𑀘𑀺𑀢𑁆𑀢𑀧𑁆𑀧𑀪𑀯𑀁 𑀫𑀬𑀸 𑀪𑀡𑀫𑀸𑀦𑀁 𑀯𑀺𑀧𑀸𑀓𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀁 𑀢𑀼𑀫𑁆𑀳𑁂 𑀲𑀼𑀡𑀸𑀣.

𑁩𑁭𑁭. 𑀏𑀓𑀽𑀦𑀢𑀺𑀁𑀲 𑀓𑀫𑁆𑀫𑀸𑀦𑀺, 𑀧𑀸𑀓𑀸 𑀤𑁆𑀯𑀢𑁆𑀢𑀺𑀁𑀲 𑀪𑀕𑀯𑀢𑀸 𑀤𑀲𑁆𑀲𑀺𑀢𑀸, 𑀓𑀫𑁆𑀫𑀸𑀦𑀺 𑀢𑀻𑀲𑀼 𑀤𑁆𑀯𑀸𑀭𑁂𑀲𑀼 𑀤𑀺𑀲𑁆𑀲𑀭𑁂, 𑀯𑀺𑀧𑀸𑀓𑀸 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀤𑀺𑀲𑁆𑀲𑀦𑁆𑀢𑀺.

𑁩𑁭𑁮-𑁯. 𑀓𑀼𑀲𑀮𑀁 𑀓𑀸𑀫𑀮𑁄𑀓𑀲𑁆𑀫𑀺𑀁 𑀓𑀸𑀫𑀮𑁄𑀓𑀫𑁆𑀳𑀺 𑀓𑀼𑀲𑀮𑀁 𑀧𑀯𑀢𑁆𑀢𑁂, 𑀧𑀝𑀺𑀲𑀦𑁆𑀥𑀺𑀬𑀜𑁆𑀘 𑀢𑀁𑀢𑀁𑀧𑀘𑁆𑀘𑀬𑀫𑀸𑀕𑀫𑁆𑀫 𑀢𑀁𑀢𑀁𑀧𑀘𑁆𑀘𑀬𑀁 𑀧𑀝𑀺𑀘𑁆𑀘. 𑀲𑁄 𑀲𑁄 𑀧𑀘𑁆𑀘𑀬𑁄 𑀢𑀁𑀢𑀁𑀧𑀘𑁆𑀘𑀬𑁄, ‘‘𑀢𑀢𑀧𑀘𑁆𑀘𑀬𑁄’’𑀢𑀺 𑀯𑀢𑁆𑀢𑀩𑁆𑀩𑁂 𑀦𑀺𑀕𑁆𑀕𑀳𑀻𑀢𑀸𑀕𑀫𑀯𑀲𑁂𑀦 ‘‘𑀢𑀁𑀢𑀁𑀧𑀘𑁆𑀘𑀬𑁄’’𑀢𑀺 𑀯𑀼𑀢𑁆𑀢𑀁. 𑀯𑀺𑀘𑁆𑀙𑀸𑀓𑀫𑁆𑀫𑀥𑀸𑀭𑀬𑀲𑀫𑀸𑀲𑁄𑀬𑀁. 𑀯𑀺𑀯𑀺𑀥𑀁 𑀨𑀮𑀁 𑀤𑀤𑀸𑀢𑀺. 𑀏𑀓𑀸𑀬 𑀘𑁂𑀢𑀦𑀸𑀬 𑀏𑀓𑀸 𑀧𑀝𑀺𑀲𑀦𑁆𑀥𑀺 𑀪𑀕𑀯𑀢𑀸 𑀧𑀓𑀸𑀲𑀺𑀢𑀸. 𑀦𑀸𑀦𑀸𑀓𑀫𑁆𑀫𑁂𑀳𑀺 𑀦𑀸𑀦𑀸 𑀧𑀝𑀺𑀲𑀦𑁆𑀥𑀺𑀬𑁄 𑀘 𑀪𑀯𑀦𑁆𑀢𑀺.

𑁩𑁮𑁦-𑁧. 𑀢𑀺𑀳𑁂𑀢𑀼𑀓𑀁 𑀢𑀼 𑀬𑀁 𑀓𑀫𑁆𑀫𑀁 𑀢𑀺𑀳𑁂𑀢𑀼𑀓𑀁 𑀬𑀁 𑀓𑀫𑁆𑀫𑀁 𑀧𑀦 𑀓𑀸𑀫𑀸𑀯𑀘𑀭𑀲𑀜𑁆𑀜𑀺𑀢𑀁 𑀢𑀺𑀳𑁂𑀢𑀼𑀓𑀁 𑀯𑀺𑀧𑀸𑀓𑀁 𑀤𑀼𑀳𑁂𑀢𑀼𑀜𑁆𑀘 𑀯𑀺𑀧𑀸𑀓𑀁 𑀅𑀳𑁂𑀢𑀼𑀜𑁆𑀘 𑀯𑀺𑀧𑀸𑀓𑀁 𑀤𑁂𑀢𑀺. 𑀤𑀼𑀳𑁂𑀢𑀼𑀓𑀁 𑀢𑀼 𑀬𑀁 𑀓𑀫𑁆𑀫𑀁 𑀤𑀼𑀳𑁂𑀢𑀼𑀓𑀁 𑀬𑀁 𑀓𑀫𑁆𑀫𑀁 𑀧𑀦, 𑀢𑀁 𑀓𑀫𑁆𑀫𑀁 𑀢𑀺𑀳𑁂𑀢𑀼𑀓𑀁 𑀯𑀺𑀧𑀸𑀓𑀁 𑀦 𑀤𑁂𑀢𑀺, 𑀅𑀢𑁆𑀢𑀦𑁄 𑀯𑀺𑀧𑀸𑀓𑀁 𑀤𑀼𑀳𑁂𑀢𑀼𑀜𑁆𑀘 𑀅𑀳𑁂𑀢𑀼𑀜𑁆𑀘 𑀤𑁂𑀢𑀺.

𑁩𑁮𑁨-𑁩. 𑀢𑀺𑀳𑁂𑀢𑀼𑀓𑁂𑀦 𑀓𑀫𑁆𑀫𑁂𑀦, 𑀧𑀝𑀺𑀲𑀦𑁆𑀥𑀺 𑀢𑀺𑀳𑁂𑀢𑀼𑀓𑀸 𑀳𑁄𑀢𑀺, 𑀤𑀼𑀳𑁂𑀢𑀼𑀓𑀸𑀧𑀺 𑀧𑀝𑀺𑀲𑀦𑁆𑀥𑀺 𑀳𑁄𑀢𑁂𑀯, 𑀅𑀳𑁂𑀢𑀼𑀓𑀸 𑀧𑀝𑀺𑀲𑀦𑁆𑀥𑀺 𑀦𑁂𑀯 𑀳𑁄𑀢𑀺, 𑀉𑀓𑁆𑀓𑀝𑁆𑀞𑀢𑀺𑀳𑁂𑀢𑀼𑀓𑀓𑀫𑁆𑀫𑁂𑀦 𑀢𑀺𑀳𑁂𑀢𑀼𑀓𑀸 𑀧𑀝𑀺𑀲𑀦𑁆𑀥𑀺, 𑀑𑀫𑀓𑀢𑀺𑀳𑁂𑀢𑀼𑀓𑀓𑀫𑁆𑀫𑁂𑀦 𑀤𑀼𑀳𑁂𑀢𑀼𑀓𑀸 𑀧𑀝𑀺𑀲𑀦𑁆𑀥𑀺 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀤𑀼𑀳𑁂𑀢𑀼𑀓𑁂𑀦 𑀓𑀫𑁆𑀫𑁂𑀦 𑀤𑀼𑀳𑁂𑀢𑀼𑀓𑀸 𑀧𑀝𑀺𑀲𑀦𑁆𑀥𑀺, 𑀅𑀳𑁂𑀢𑀼𑀓𑀸𑀧𑀺 𑀧𑀝𑀺𑀲𑀦𑁆𑀥𑀺 𑀳𑁄𑀢𑁂𑀯, 𑀢𑀺𑀳𑁂𑀢𑀼𑀓𑀸 𑀧𑀝𑀺𑀲𑀦𑁆𑀥𑀺 𑀦𑁂𑀯 𑀳𑁄𑀢𑀺. 𑀉𑀓𑁆𑀓𑀝𑁆𑀞𑀤𑀼𑀳𑁂𑀢𑀼𑀓𑀓𑀫𑁆𑀫𑁂𑀦 𑀤𑀼𑀳𑁂𑀢𑀼𑀓𑀸 𑀧𑀝𑀺𑀲𑀦𑁆𑀥𑀺, 𑀑𑀫𑀓𑀤𑀼𑀳𑁂𑀢𑀼𑀓𑀓𑀫𑁆𑀫𑁂𑀦 𑀅𑀳𑁂𑀢𑀼𑀓𑀸 𑀧𑀝𑀺𑀲𑀦𑁆𑀥𑀺 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁩𑁮𑁪. 𑀅𑀲𑀗𑁆𑀔𑀸𑀭𑀓𑀫𑁆𑀫𑀁 𑀅𑀲𑀗𑁆𑀔𑀸𑀭𑀯𑀺𑀧𑀸𑀓𑀁 𑀤𑁂𑀢𑀺, 𑀲𑀲𑀗𑁆𑀔𑀸𑀭𑀯𑀺𑀧𑀸𑀓𑀫𑁆𑀧𑀺 𑀤𑁂𑀢𑀺, 𑀲𑀲𑀗𑁆𑀔𑀸𑀭𑀓𑀫𑁆𑀫𑀁 𑀲𑀲𑀗𑁆𑀔𑀸𑀭𑀨𑀮𑀁, 𑀢𑀣𑀸 𑀅𑀲𑀗𑁆𑀔𑀸𑀭𑀨𑀮𑀁 𑀤𑁂𑀢𑀺.

𑁩𑁮𑁫. 𑀏𑀓𑀸𑀬 𑀘𑁂𑀢𑀦𑀸𑀬𑁂𑀢𑁆𑀣 𑀏𑀢𑁆𑀣 𑀏𑀢𑀸𑀲𑀼 𑀘𑁂𑀢𑀦𑀸𑀲𑀼 𑀏𑀓𑀸𑀬 𑀓𑀼𑀲𑀮𑀸𑀬 𑀘𑁂𑀢𑀦𑀸𑀬 𑀲𑁄𑀴𑀲𑀯𑀺𑀥𑀸 𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺 𑀪𑀯𑀦𑁆𑀢𑀺. 𑀇𑀢𑀺 𑀯𑀘𑀦𑀁 𑀚𑀺𑀦𑁄 𑀧𑀓𑀸𑀲𑀬𑁂.

𑁩𑁮𑁬-𑁯𑁨. 𑀯𑁂𑀤𑀦𑀸𑀧𑀭𑀺𑀯𑀢𑁆𑀢𑀦𑀁 𑀆𑀭𑀫𑁆𑀫𑀡𑁂𑀦 𑀳𑁄𑀢𑁂𑀯, 𑀢𑀤𑀸𑀭𑀫𑁆𑀫𑀡𑀘𑀺𑀢𑁆𑀢𑀫𑁆𑀧𑀺 𑀚𑀯𑀦𑁂𑀦 𑀦𑀺𑀬𑀸𑀫𑀺𑀢𑀁, 𑀲𑁄𑀫𑀦𑀲𑁆𑀲𑀬𑀼𑀢𑁆𑀢𑁂 𑀓𑀼𑀲𑀮𑁂 𑀚𑀯𑀦𑁂 𑀚𑀯𑀺𑀢𑁂 𑀢𑀤𑀸𑀭𑀫𑁆𑀫𑀡𑀫𑁆𑀧𑀺 𑀲𑁄𑀫𑀦𑀲𑁆𑀲𑀬𑀼𑀢𑁆𑀢𑀫𑁂𑀯 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀉𑀧𑁂𑀓𑁆𑀔𑀸𑀬𑀼𑀢𑁆𑀢𑀓𑀼𑀲𑀮𑁂𑀧𑀺 𑀏𑀲𑁂𑀯 𑀦𑀬𑁄. 𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑁂𑀦 𑀓𑀼𑀲𑀮𑁂𑀦𑀸𑀤𑀺𑀦𑀸 𑀧𑀞𑀫𑁂𑀦 𑀓𑀼𑀲𑀮𑁂𑀦 𑀢𑀼𑀮𑁆𑀬𑁂𑀦 𑀯𑀺𑀧𑀸𑀓𑀘𑀺𑀢𑁆𑀢𑁂𑀦. 𑀢𑀢𑀺𑀬𑀸𑀯𑀺𑀲𑁂𑀲𑀦𑀁. 𑀬𑁂𑀦 𑀲𑀢𑁆𑀢𑁂𑀦 𑀕𑀳𑀺𑀢𑀸 𑀧𑀝𑀺𑀲𑀦𑁆𑀥𑀺 𑀘𑁂 𑀬𑀤𑀺, 𑀇𑀝𑁆𑀞𑁂 𑀩𑀮𑀯𑀸𑀭𑀫𑁆𑀫𑀡𑁂 𑀫𑀦𑀸𑀧𑁂 𑀅𑀢𑀺𑀫𑀳𑀦𑁆𑀢𑀸𑀭𑀫𑁆𑀫𑀡𑁂 𑀢𑀲𑁆𑀲 𑀲𑀢𑁆𑀢𑀲𑁆𑀲 𑀘𑀓𑁆𑀔𑀼𑀲𑁆𑀲 𑀘𑀓𑁆𑀔𑀼𑀧𑀲𑀸𑀤𑀲𑁆𑀲 𑀆𑀧𑀸𑀣𑀁 𑀧𑀸𑀓𑀝𑀪𑀸𑀯𑀁 𑀆𑀕𑀢𑁂 𑀲𑀢𑀺 𑀫𑀦𑁄𑀥𑀸𑀢𑀼𑀬𑀸 𑀢𑀸𑀬 𑀪𑀯𑀗𑁆𑀕𑀲𑁆𑀫𑀺𑀁 𑀆𑀯𑀝𑁆𑀝𑀺𑀢𑁂 𑀪𑀯𑀗𑁆𑀕𑀲𑁄𑀢𑁂 𑀙𑀺𑀦𑁆𑀤𑀺𑀢𑁂 𑀲𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀓𑀸𑀤𑀻𑀲𑀼 𑀯𑀻𑀣𑀺𑀘𑀺𑀢𑁆𑀢𑁂𑀲𑀼 𑀚𑀸𑀢𑁂𑀲𑀼 𑀧𑀞𑀫𑀁 𑀓𑀼𑀲𑀮𑀁 𑀓𑀸𑀫𑀫𑀸𑀦𑀲𑀁 𑀚𑀯𑀦𑀁 𑀳𑀼𑀢𑁆𑀯𑀸 𑀚𑀸𑀬𑀢𑁂. 𑀲𑀢𑁆𑀢𑀓𑁆𑀔𑀢𑁆𑀢𑀼𑀯𑀸𑀭𑀸𑀦𑀺 𑀚𑀯𑀺𑀢𑁆𑀯𑀸𑀦 𑀧𑀞𑀫𑁂 𑀫𑀳𑀸𑀓𑀼𑀲𑀮𑁂 𑀕𑀢𑁂 𑀢𑀤𑁂𑀯 𑀢𑀁 𑀏𑀯 𑀇𑀝𑁆𑀞𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀢𑁂𑀦𑁂𑀯 𑀧𑀞𑀫𑀫𑀳𑀸𑀓𑀼𑀲𑀮𑁂𑀦 𑀲𑀤𑀺𑀲𑀁 𑀢𑀤𑀸𑀭𑀫𑁆𑀫𑀡𑀯𑀺𑀧𑀸𑀓𑀘𑀺𑀢𑁆𑀢𑀁. 𑀲𑀦𑁆𑀥𑀺𑀬𑀸 𑀢𑀼𑀮𑁆𑀬𑀢𑁄 𑀧𑀝𑀺𑀲𑀦𑁆𑀥𑀺𑀬𑀸 𑀢𑀼𑀮𑁆𑀬𑀪𑀸𑀯𑁂𑀦 𑀫𑀽𑀮𑀪𑀯𑀗𑁆𑀕𑀦𑁆𑀢𑀺 𑀫𑀽𑀮𑀪𑀯𑀗𑁆𑀕𑀁 𑀦𑀸𑀫 𑀪𑀕𑀯𑀢𑀸 𑀧𑀯𑀼𑀘𑁆𑀘𑀢𑁂. 𑀢𑀜𑁆𑀘 𑀢𑀤𑀸𑀭𑀫𑁆𑀫𑀡𑀘𑀺𑀢𑁆𑀢𑀁 𑀲𑀦𑁆𑀢𑀻𑀭𑀡𑀁 𑀲𑁄𑀫𑀦𑀲𑁆𑀲𑀬𑀼𑀢𑁆𑀢𑀁 𑀲𑀦𑁆𑀢𑀻𑀭𑀡𑀁 𑀤𑀲𑁆𑀲𑀦𑀁 𑀲𑀫𑁆𑀧𑀝𑀺𑀘𑁆𑀙𑀦𑀁 𑀏𑀢𑁆𑀣 𑀏𑀢𑀲𑁆𑀫𑀺𑀁 𑀯𑀻𑀣𑀺𑀘𑀺𑀢𑁆𑀢𑁂 𑀕𑀡𑀦𑀽𑀧𑀕𑀘𑀺𑀢𑁆𑀢𑀸𑀦𑀺 𑀕𑀡𑀦𑀁 𑀉𑀧𑀕𑀢𑀸𑀦𑀺 𑀘𑀺𑀢𑁆𑀢𑀸𑀦𑀺 𑀘𑀢𑁆𑀢𑀸𑀭𑀺 𑀏𑀯 𑀪𑀯𑀦𑁆𑀢𑀺.

𑁩𑁯𑁩-𑁪. 𑀬𑀤𑀸 𑀳𑀺 𑀤𑀼𑀢𑀺𑀬𑀁 𑀘𑀺𑀢𑁆𑀢𑀁, 𑀓𑀼𑀲𑀮𑀁 𑀚𑀯𑀦𑀁 𑀬𑀤𑀸 𑀬𑀲𑁆𑀫𑀺𑀁 𑀓𑀸𑀮𑁂 𑀢𑀲𑁆𑀲𑁂𑀯 𑀲𑁄𑀫𑀦𑀲𑁆𑀲𑀢𑀺𑀳𑁂𑀢𑀼𑀦𑁄 𑀧𑀼𑀕𑁆𑀕𑀮𑀲𑁆𑀲 𑀤𑀼𑀢𑀺𑀬𑀁 𑀓𑀼𑀲𑀮𑀁 𑀘𑀺𑀢𑁆𑀢𑀁 𑀚𑀯𑀦𑀁 𑀳𑁄𑀢𑀺, 𑀢𑀤𑀸 𑀢𑀲𑁆𑀫𑀺𑀁 𑀓𑀸𑀮𑁂 𑀢𑁂𑀦 𑀚𑀯𑀦𑁂𑀦 𑀢𑀼𑀮𑁆𑀬𑀯𑀺𑀧𑀸𑀓𑀁 𑀢𑀤𑀸𑀭𑀫𑁆𑀫𑀡𑀁. 𑀢𑀲𑁆𑀲 𑀲𑀦𑁆𑀥𑀺𑀬𑀸 𑀅𑀲𑀫𑀸𑀦𑀢𑁆𑀢𑀸 𑀢𑀲𑁆𑀲 𑀢𑀤𑀸𑀭𑀫𑁆𑀫𑀡𑀘𑀺𑀢𑁆𑀢𑀲𑁆𑀲 𑀲𑀦𑁆𑀥𑀺𑀬𑀸 𑀅𑀲𑀫𑀸𑀦𑀢𑁆𑀢𑀸 𑀤𑁆𑀯𑁂 𑀦𑀸𑀫𑀸𑀦𑀺 𑀅𑀲𑁆𑀲 𑀯𑀺𑀧𑀸𑀓𑀘𑀺𑀢𑁆𑀢𑀲𑁆𑀲 𑀅𑀦𑁂𑀦 𑀯𑀺𑀧𑀸𑀓𑀘𑀺𑀢𑁆𑀢𑁂𑀦 𑀮𑀩𑁆𑀪𑀭𑁂 𑀮𑀩𑁆𑀪𑀦𑁆𑀢𑀺, ‘‘𑀆𑀕𑀦𑁆𑀢𑀼𑀓𑀪𑀯𑀗𑁆𑀕’’𑀦𑁆𑀢𑀺 𑀦𑀸𑀫𑀁 ‘‘𑀢𑀤𑀸𑀭𑀫𑁆𑀫𑀡𑀓’’𑀦𑁆𑀢𑀺 𑀘 𑀦𑀸𑀫𑀁 𑀇𑀢𑀺 𑀤𑁆𑀯𑁂 𑀦𑀸𑀫𑀸𑀦𑀺 𑀮𑀩𑁆𑀪𑀦𑁆𑀢𑀺.

𑁩𑁯𑁫-𑁬. 𑀬𑀤𑀸 𑀢𑀲𑁆𑀲𑁂𑀯 𑀧𑀼𑀕𑁆𑀕𑀮𑀲𑁆𑀲 𑀢𑀢𑀺𑀬𑀁 𑀧𑀼𑀜𑁆𑀜𑀁 𑀚𑀯𑀦𑀁 𑀳𑁄𑀢𑀺, 𑀢𑀤𑀸 𑀢𑁂𑀦 𑀚𑀯𑀦𑁂𑀦 𑀲𑀤𑀺𑀲𑀁 𑀢𑀢𑀺𑀬𑀁 𑀧𑀸𑀓𑀁 𑀢𑀤𑀸𑀭𑀫𑁆𑀫𑀡𑀺𑀓𑀁 𑀲𑀺𑀬𑀸. 𑀇𑀤𑀁 𑀯𑀺𑀧𑀸𑀓𑀘𑀺𑀢𑁆𑀢𑀁 𑀆𑀕𑀦𑁆𑀢𑀼𑀓𑀪𑀯𑀗𑁆𑀕𑀦𑁆𑀢𑀺 𑀆𑀕𑀦𑁆𑀢𑀼𑀪𑀯𑀗𑁆𑀕𑀁 𑀦𑀸𑀫 𑀪𑀕𑀯𑀢𑀸 𑀯𑀼𑀘𑁆𑀘𑀢𑁂, 𑀧𑀼𑀭𑀺𑀫𑀸𑀦𑀺 𑀘 𑀧𑀜𑁆𑀘 𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺 𑀇𑀫𑀺𑀦𑀸 𑀧𑀦 𑀢𑀢𑀺𑀬𑀯𑀺𑀧𑀸𑀓𑁂𑀦 𑀧𑀦 𑀲𑀤𑁆𑀥𑀺𑀁 𑀙 𑀘𑀺𑀢𑁆𑀢𑀸𑀦𑀺 𑀳𑁄𑀦𑁆𑀢𑀺.

𑁩𑁯𑁭-𑁮. 𑀬𑀤𑀸 𑀘𑀢𑀼𑀢𑁆𑀣𑀁 𑀓𑀼𑀲𑀮𑀁 𑀚𑀯𑀦𑀁 𑀳𑁄𑀢𑀺, 𑀢𑀤𑀸 𑀢𑁂𑀦 𑀚𑀯𑀦𑁂𑀦 𑀢𑀼𑀮𑁆𑀬𑀁 𑀘𑀢𑀼𑀢𑁆𑀣𑀯𑀺𑀧𑀸𑀓𑀁 𑀢𑀤𑀸𑀭𑀫𑁆𑀫𑀡𑀪𑀸𑀯𑀁 𑀯𑀚𑁂 𑀕𑀘𑁆𑀙𑁂𑀬𑁆𑀬. 𑀘𑀢𑀼𑀢𑁆𑀣𑀯𑀺𑀧𑀸𑀓𑀁 𑀆𑀕𑀦𑁆𑀢𑀼𑀓𑀪𑀯𑀗𑁆𑀕𑀁 𑀢𑀤𑀸𑀭𑀫𑁆𑀫𑀡𑀦𑀸𑀫𑀓𑀁 𑀳𑁄𑀢𑀺, 𑀧𑀼𑀭𑀺𑀫𑀸𑀦𑀺 𑀙 𑀧𑀸𑀓𑀸𑀦𑀺 𑀇𑀫𑀺𑀦𑀸 𑀲𑀳 𑀘𑀢𑀼𑀢𑁆𑀣𑀧𑀸𑀓𑁂𑀦 𑀲𑀢𑁆𑀢 𑀘𑀺𑀢𑁆𑀢𑀸𑀦𑀺 𑀳𑁄𑀦𑁆𑀢𑀺.

𑁩𑁯𑁯-𑁪𑁦𑁩. 𑀬𑀤𑀸 𑀬𑀲𑁆𑀫𑀺𑀁 𑀓𑀸𑀮𑁂 𑀢𑀲𑁆𑀫𑀺𑀁 𑀘𑀓𑁆𑀔𑀼𑀤𑁆𑀯𑀸𑀭𑁂 𑀇𑀝𑁆𑀞𑀫𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀁 𑀧𑀦 𑀢𑀣𑀸 𑀆𑀧𑀸𑀣𑀁 𑀆𑀕𑀘𑁆𑀙𑀢𑀺 𑀘, 𑀢𑀤𑀸 𑀯𑀼𑀢𑁆𑀢𑀦𑀬𑁂𑀦 𑀆𑀯𑀚𑁆𑀚𑀦𑀤𑀲𑁆𑀲𑀦𑀲𑀫𑁆𑀧𑀝𑀺𑀘𑁆𑀙𑀦𑀘𑀺𑀢𑁆𑀢𑁂𑀲𑀼 𑀚𑀸𑀢𑁂𑀲𑀼 𑀇𑀥 𑀇𑀫𑀲𑁆𑀫𑀺𑀁 𑀫𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑁂 𑀆𑀭𑀫𑁆𑀫𑀡𑀯𑀲𑁂𑀦 𑀯𑁂𑀤𑀦𑀸 𑀧𑀭𑀺𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀲𑀦𑁆𑀢𑀻𑀭𑀡𑀁 𑀫𑀦𑁄 𑀳𑁄𑀢𑀺. 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀲𑀼 𑀏𑀯 𑀘𑀢𑀽𑀲𑀼𑀧𑀺 𑀚𑀯𑀦𑁂𑀲𑀼 𑀚𑀯𑀺𑀢𑁂𑀲𑀼 𑀢𑁂𑀳𑀺 𑀚𑀯𑀦𑁂𑀳𑀺 𑀢𑀼𑀮𑁆𑀬𑀸𑀦𑀺 𑀘𑀢𑁆𑀢𑀸𑀭𑀺 𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺 𑀚𑀸𑀬𑀭𑁂. 𑀅𑀘𑁆𑀘𑀦𑁆𑀢𑀁 𑀏𑀓𑀦𑁆𑀢𑁂𑀦 𑀯𑁂𑀤𑀦𑀸𑀬 𑀉𑀧𑁂𑀓𑁆𑀔𑀸𑀯𑁂𑀤𑀦𑀸𑀬 𑀧𑀼𑀭𑀺𑀫𑁂𑀳𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑁂𑀳𑀺 𑀘𑀺𑀢𑁆𑀢𑁂𑀳𑀺 𑀅𑀲𑀫𑀸𑀦𑀢𑁆𑀢𑀸 𑀘𑀢𑁆𑀢𑀸𑀭𑀺 𑀘𑀺𑀢𑁆𑀢𑀸𑀦𑀺 𑀦𑀸𑀫𑀢𑁄 𑀧𑀺𑀝𑁆𑀞𑀺𑀪𑀯𑀗𑁆𑀕𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺, 𑀧𑀺𑀝𑁆𑀞𑀺𑀪𑀯𑀗𑁆𑀕𑀸𑀦𑀺 𑀲𑁄𑀫𑀦𑀲𑁆𑀲𑀯𑀺𑀧𑀸𑀓𑀸𑀦𑀁 𑀧𑀘𑁆𑀙𑀸𑀪𑀸𑀕𑁂 𑀪𑀯𑀗𑁆𑀕𑀸𑀦𑀻𑀢𑀺 𑀅𑀢𑁆𑀣𑁄. 𑀇𑀫𑀸𑀦𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀦𑀺 𑀧𑀜𑁆𑀘 𑀯𑀺𑀧𑀸𑀓𑀸𑀦𑀺 𑀧𑀼𑀭𑀺𑀫𑁂𑀳𑀺 𑀲𑀢𑁆𑀢𑀳𑀺 𑀯𑀺𑀧𑀸𑀓𑁂𑀳𑀺 𑀲𑀤𑁆𑀥𑀺𑀁 𑀤𑁆𑀯𑀸𑀤𑀲 𑀯𑀺𑀧𑀸𑀓𑀸𑀦𑀺 𑀪𑀯𑀦𑁆𑀢𑀺. 𑀇𑀢𑀺 𑀯𑀘𑀦𑀁 𑀥𑀻𑀭𑁄 𑀯𑀺𑀦𑀺𑀤𑁆𑀤𑀺𑀲𑁂.

𑁪𑁦𑁪-𑁬. 𑀬𑀣𑀸 𑀘𑀓𑁆𑀔𑀼𑀤𑁆𑀯𑀸𑀭𑁂 𑀤𑁆𑀯𑀸𑀤𑀲 𑀯𑀺𑀧𑀸𑀓𑀸𑀦𑀺 𑀳𑁄𑀦𑁆𑀢𑀺, 𑀢𑀣𑀸 𑀏𑀯𑀁 𑀲𑁄𑀢𑀸𑀤𑀻𑀲𑀼 𑀤𑁆𑀯𑀸𑀭𑁂𑀲𑀼𑀧𑀺 𑀤𑁆𑀯𑀸𑀤𑀲 𑀧𑀸𑀓𑀸𑀦𑀺 𑀳𑁄𑀦𑁆𑀢𑀺. 𑀇𑀢𑀺 𑀯𑀘𑀦𑀁 𑀥𑀻𑀭𑁄 𑀦𑀺𑀤𑁆𑀤𑀺𑀲𑁂, 𑀇𑀫𑁂 𑀫𑀬𑀸 𑀯𑀼𑀢𑁆𑀢𑀸 𑀯𑀺𑀧𑀸𑀓𑀸 𑀲𑀫𑀲𑀝𑁆𑀞𑀺 𑀪𑀯𑀦𑁆𑀢𑀺. 𑀏𑀯𑀁 𑀇𑀫𑀺𑀦𑀸 𑀫𑀬𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀏𑀓𑀸𑀬 𑀘𑁂𑀢𑀦𑀸𑀬 𑀓𑀫𑁆𑀫𑁂 𑀆𑀬𑀽𑀳𑀺𑀢𑁂 𑀧𑀯𑀢𑁆𑀢𑀺𑀢𑁂 𑀲𑀫𑀲𑀝𑁆𑀞𑀺 𑀯𑀺𑀧𑀸𑀓𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀇𑀫𑀲𑁆𑀫𑀺𑀁 𑀯𑀘𑀦𑁂 𑀲𑀁𑀲𑀬𑁄 𑀦𑀢𑁆𑀣𑀺. 𑀕𑀳𑀺𑀢𑀸𑀕𑁆𑀕𑀳𑀡𑁂𑀦𑁂𑀢𑁆𑀣 𑀏𑀢𑁆𑀣 𑀏𑀢𑁂𑀲𑀼 𑀯𑀺𑀧𑀸𑀓𑁂𑀲𑀼 𑀕𑀳𑀺𑀢𑀸𑀦𑀁 𑀯𑀺𑀧𑀸𑀓𑀸𑀦𑀁 𑀅𑀕𑁆𑀕𑀳𑀡𑁂𑀦 𑀘𑀓𑁆𑀔𑀼𑀤𑁆𑀯𑀸𑀭𑁂 𑀤𑁆𑀯𑀸𑀤𑀲 𑀧𑀸𑀓𑀸, 𑀲𑁄𑀢𑀯𑀺𑀜𑁆𑀜𑀸𑀡𑀓𑀸𑀤𑀻𑀦𑀺 𑀘𑀢𑁆𑀢𑀸𑀭𑀺 𑀘𑀸𑀢𑀺 𑀲𑁄𑀴𑀲 𑀧𑀸𑀓𑀸𑀦𑀺 𑀳𑁄𑀦𑁆𑀢𑀺.

𑁪𑁦𑁭-𑁧𑁧. 𑀏𑀓𑁂𑀦 𑀢𑀺𑀳𑁂𑀢𑀼𑀓𑀓𑀼𑀲𑀮𑁂𑀦 𑀅𑀲𑀗𑁆𑀔𑀸𑀭𑀺𑀓𑁂𑀦 𑀓𑀫𑁆𑀫𑁂𑀦 𑀆𑀬𑀽𑀳𑀺𑀢𑁂 𑀬𑀣𑀸, 𑀏𑀯𑀫𑁂𑀯 𑀲𑀲𑀗𑁆𑀔𑀸𑀭𑀢𑀺𑀳𑁂𑀢𑀼𑀓𑀓𑀼𑀲𑀮𑁂𑀦𑀸𑀧𑀺 𑀅𑀲𑀗𑁆𑀔𑀸𑀭𑀲𑀲𑀗𑁆𑀔𑀸𑀭𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀳𑀺𑀧𑀺 𑀓𑀼𑀲𑀮𑁂𑀳𑀺 𑀓𑀫𑁆𑀫𑁂 𑀆𑀬𑀽𑀳𑀺𑀢𑁂 𑀧𑀯𑀢𑁆𑀢𑀺𑀢𑁂 𑀢𑁂𑀲𑀁 𑀢𑀺𑀡𑁆𑀡𑀁 𑀓𑀼𑀲𑀮𑀸𑀦𑀁 𑀯𑀺𑀧𑀸𑀓𑁂𑀳𑀺 𑀢𑀻𑀳𑀺𑀧𑀺 𑀤𑀺𑀦𑁆𑀦𑀸𑀬 𑀧𑀝𑀺𑀲𑀦𑁆𑀥𑀺𑀬𑀸 𑀏𑀲𑁂𑀯 𑀦𑀬𑁄 𑀧𑀡𑁆𑀟𑀺𑀢𑁂𑀦 𑀚𑀸𑀦𑀺𑀢𑀩𑁆𑀩𑁄. 𑀇𑀥 𑀇𑀫𑀲𑁆𑀫𑀺𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑀤𑁆𑀯𑀬𑁂 𑀇𑀝𑁆𑀞𑀫𑀚𑁆𑀛𑀢𑁆𑀢𑀕𑁄𑀘𑀭𑀲𑁆𑀲 𑀯𑀲𑁂𑀦 𑀯𑀺𑀧𑀸𑀓𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀁 𑀧𑀞𑀫𑀁 𑀤𑀲𑁆𑀲𑁂𑀢𑁆𑀯𑀸 𑀤𑀲𑁆𑀲𑁂𑀢𑀩𑁆𑀩𑀸𑀣 𑀧𑀘𑁆𑀙𑀸 𑀢𑀼, 𑀇𑀝𑁆𑀞𑀲𑁆𑀫𑀺𑀁 𑀕𑁄𑀘𑀭𑁂 𑀇𑀥 𑀅𑀣 𑀧𑀘𑁆𑀙𑀸 𑀫𑀬𑀸 𑀯𑀼𑀢𑁆𑀢𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀢𑁄 𑀧𑀘𑁆𑀙𑀸𑀓𑀸𑀮𑁂 𑀧𑀦 𑀇𑀥 𑀇𑀫𑀲𑁆𑀫𑀺𑀁 𑀇𑀝𑁆𑀞𑀕𑁄𑀘𑀭𑁂 𑀏𑀓𑁂𑀓𑀲𑁆𑀫𑀺𑀁 𑀧𑀦 𑀤𑁆𑀯𑀸𑀤𑀲 𑀤𑁆𑀯𑀸𑀤𑀲 𑀧𑀸𑀓𑀸 𑀧𑀡𑁆𑀟𑀺𑀢𑁂𑀦 𑀤𑀲𑁆𑀲𑁂𑀢𑀩𑁆𑀩𑀸. 𑀕𑀳𑀺𑀢𑀸𑀕𑁆𑀕𑀳𑀡𑁂𑀦𑁂𑀢𑁆𑀣 𑀏𑀢𑁆𑀣 𑀏𑀢𑁂𑀲𑀼 𑀯𑀺𑀧𑀸𑀓𑁂𑀲𑀼 𑀕𑀳𑀺𑀢𑀸𑀦𑀁 𑀯𑀺𑀧𑀸𑀓𑀸𑀦𑀁 𑀅𑀕𑁆𑀕𑀳𑀡𑁂𑀦 𑀲𑁄𑀴𑀲 𑀧𑀸𑀓𑀘𑀺𑀢𑁆𑀢𑀸𑀦𑀺 𑀳𑁄𑀦𑁆𑀢𑀺. 𑀧𑀼𑀩𑁆𑀩𑁂 𑀓𑀸𑀮𑁂 𑀫𑀬𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀩𑁆𑀩𑀁 𑀯𑀘𑀦𑀁 𑀅𑀲𑁂𑀲𑀢𑁄 𑀅𑀲𑁂𑀲𑀪𑀸𑀯𑁂𑀦 𑀧𑀡𑁆𑀟𑀺𑀢𑁂𑀦 𑀜𑁂𑀬𑁆𑀬𑀁.

𑁪𑁧𑁨-𑁪. 𑀢𑀺𑀳𑁂𑀢𑀼𑀓𑁂𑀦 𑀓𑀫𑁆𑀫𑁂𑀦, 𑀧𑀝𑀺𑀲𑀦𑁆𑀥𑀺 𑀢𑀺𑀳𑁂𑀢𑀼𑀓𑀸 𑀪𑀯𑀢𑀺, 𑀇𑀢𑀺 𑀅𑀬𑀁 𑀯𑀸𑀭𑁄 𑀏𑀢𑁆𑀢𑀸𑀯𑀢𑀸 𑀏𑀢𑁆𑀢𑀓𑁂𑀦 𑀯𑀘𑀦𑁂𑀦 𑀫𑀬𑀸 𑀯𑀼𑀢𑁆𑀢𑁄. 𑀏𑀓𑀁 𑀓𑀫𑁆𑀫𑀁 𑀏𑀓𑀲𑁆𑀫𑀺𑀁 𑀪𑀯𑁂 𑀏𑀓𑀁 𑀧𑀝𑀺𑀲𑀦𑁆𑀥𑀺𑀁 𑀚𑀦𑁂𑀢𑀺, 𑀢𑀢𑁄 𑀧𑀝𑀺𑀲𑀦𑁆𑀥𑀺𑀢𑁄 𑀅𑀧𑀭𑀁 𑀅𑀜𑁆𑀜𑀁 𑀤𑀼𑀢𑀺𑀬𑀁 𑀧𑀝𑀺𑀲𑀦𑁆𑀥𑀺𑀁 𑀦 𑀚𑀦𑁂𑀢𑀺, 𑀧𑀯𑀢𑁆𑀢𑀺𑀬𑀁 𑀅𑀦𑁂𑀓𑀸𑀦𑀺 𑀯𑀺𑀧𑀸𑀓𑀸𑀦𑀺 𑀲𑀜𑁆𑀚𑀦𑁂𑀢𑀺. 𑀳𑀺 𑀲𑀘𑁆𑀘𑀁 ‘‘𑀏𑀓𑀁 𑀓𑀫𑁆𑀫’’𑀦𑁆𑀢𑀺𑀆𑀤𑀺𑀓𑀁 𑀯𑀘𑀦𑀁. 𑀏𑀓𑀲𑁆𑀫𑀸 𑀩𑀻𑀚𑀸 𑀏𑀓𑀢𑁄 𑀩𑀻𑀚𑀢𑁄 𑀏𑀓𑀁 𑀅𑀗𑁆𑀓𑀼𑀭𑀁 𑀚𑀸𑀬𑀢𑀺, 𑀅𑀲𑁆𑀲 𑀩𑀻𑀚𑀲𑁆𑀲 𑀩𑀳𑀽𑀦𑀺 𑀨𑀮𑀸𑀦𑀺 𑀳𑁂𑀢𑀼𑀧𑁆𑀧𑀯𑀢𑁆𑀢𑀺𑀢𑁄 𑀲𑀮𑀺𑀮𑀸𑀤𑀺𑀳𑁂𑀢𑀼𑀧𑁆𑀧𑀢𑁆𑀢𑀺𑀬𑀸 𑀳𑁄𑀦𑁆𑀢𑀺.

𑁪𑁧𑁫-𑁨𑁧. 𑀤𑀼𑀳𑁂𑀢𑀼𑀓𑁂𑀦 𑀓𑀫𑁆𑀫𑁂𑀦, 𑀧𑀝𑀺𑀲𑀦𑁆𑀥𑀺 𑀤𑀼𑀳𑁂𑀢𑀼𑀓𑀸 𑀳𑁄𑀢𑀺, 𑀇𑀢𑀺 𑀯𑀘𑀦𑀁 𑀅𑀬𑀁 𑀯𑀸𑀭𑁄 𑀅𑀦𑀼𑀧𑀼𑀩𑁆𑀩𑁂𑀦 𑀅𑀦𑀼𑀧𑀝𑀺𑀧𑀸𑀝𑀺𑀬𑀸 𑀆𑀕𑀢𑁄. 𑀇𑀥 𑀇𑀫𑀲𑁆𑀫𑀺𑀁 𑀅𑀥𑀺𑀓𑀸𑀭𑁂 𑀤𑀼𑀳𑁂𑀢𑀼𑀓𑁂𑀦 𑀧𑀼𑀜𑁆𑀜𑁂𑀦 𑀲𑁄𑀫𑀦𑀲𑁆𑀲𑀬𑀼𑀢𑁆𑀢𑁂𑀦 𑀅𑀲𑀗𑁆𑀔𑀸𑀭𑀺𑀓𑁂𑀦 𑀘𑀺𑀢𑁆𑀢𑁂𑀦 𑀓𑀫𑁆𑀫𑁂 𑀆𑀬𑀽𑀳𑀺𑀢𑁂 𑀧𑀦 𑀤𑀼𑀳𑁂𑀢𑀼𑀓𑁂𑀦 𑀲𑁄𑀫𑀦𑀲𑁆𑀲𑀬𑀼𑀢𑁆𑀢𑀓𑀼𑀲𑀮𑁂𑀦 𑀢𑀼𑀮𑁆𑀬𑁂𑀦 𑀧𑀸𑀓𑁂𑀦 𑀬𑁂𑀦 𑀲𑀢𑁆𑀢𑁂𑀦 𑀕𑀳𑀺𑀢𑀸 𑀧𑀝𑀺𑀲𑀦𑁆𑀥𑀺 𑀘𑁂, 𑀇𑀝𑁆𑀞𑁂 𑀆𑀭𑀫𑁆𑀫𑀡𑁂 𑀢𑀲𑁆𑀲 𑀲𑀢𑁆𑀢𑀲𑁆𑀲 𑀘𑀓𑁆𑀔𑀼𑀤𑁆𑀯𑀸𑀭𑁂 𑀆𑀧𑀸𑀣𑀁 𑀆𑀕𑀢𑁂 𑀲𑁄𑀫𑀦𑀲𑁆𑀲𑀬𑀼𑀢𑁆𑀢𑁂 𑀜𑀸𑀡𑀳𑀻𑀦𑁂 𑀓𑀼𑀲𑀮𑀫𑀸𑀦𑀲𑁂 𑀢𑀲𑁆𑀫𑀺𑀁 𑀤𑀼𑀳𑁂𑀢𑀼𑀓𑁂 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀚𑀯𑀺𑀢𑁆𑀯𑀸𑀦 𑀕𑀢𑁂 𑀢𑀁 𑀏𑀯 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀢𑀤𑀦𑀦𑁆𑀢𑀭𑀁 𑀢𑀲𑁆𑀲 𑀚𑀯𑀦𑀲𑁆𑀲 𑀅𑀦𑀦𑁆𑀢𑀭𑀁 𑀢𑀁𑀲𑀭𑀺𑀓𑁆𑀔𑀓𑀁 𑀢𑁂𑀦 𑀚𑀯𑀦𑁂𑀦 𑀲𑀤𑀺𑀲𑀁 𑀏𑀓𑀦𑁆𑀢𑀁 𑀅𑀲𑀗𑁆𑀔𑀸𑀭𑀺𑀓𑀫𑀸𑀦𑀲𑀁 𑀚𑀸𑀬𑀢𑀺. 𑀢𑀦𑁆𑀢𑀺 𑀢𑀁 𑀘𑀺𑀢𑁆𑀢𑀁 𑀫𑀽𑀮𑀪𑀯𑀗𑁆𑀕𑀦𑁆𑀢𑀺 𑀫𑀽𑀮𑀪𑀯𑀗𑁆𑀕𑀁 𑀦𑀸𑀫 𑀢𑀤𑀸𑀭𑀫𑁆𑀫𑀡𑀫𑀺𑀘𑁆𑀘𑀧𑀺 𑀢𑀤𑀸𑀭𑀫𑁆𑀫𑀡𑀁 𑀦𑀸𑀫 𑀉𑀪𑀬𑀫𑁆𑀧𑀺 𑀦𑀸𑀫𑀁 𑀢𑀲𑁆𑀲𑁂𑀯 𑀦𑀸𑀫𑀁 𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀏𑀯 𑀦𑀸𑀫𑀁. 𑀇𑀢𑀺 𑀏𑀯𑀁 𑀇𑀫𑀺𑀦𑀸 𑀧𑀓𑀸𑀭𑁂𑀦 𑀪𑀕𑀯𑀢𑀸 𑀧𑀭𑀺𑀤𑀻𑀧𑀺𑀢𑀁. 𑀤𑀼𑀳𑁂𑀢𑀼𑀓𑁂 𑀲𑀲𑀗𑁆𑀔𑀸𑀭𑁂 𑀓𑀼𑀲𑀮𑁂 𑀚𑀯𑀦𑁂 𑀚𑀯𑀺𑀢𑁂𑀧𑀺 𑀘 𑀢𑀁𑀲𑀫𑀁 𑀢𑁂𑀦 𑀘𑀺𑀢𑁆𑀢𑁂𑀦 𑀲𑀤𑀺𑀲𑀁 𑀆𑀕𑀦𑁆𑀢𑀼𑀓𑀲𑀗𑁆𑀔𑀸𑀢𑀁 𑀢𑀤𑀸𑀭𑀫𑁆𑀫𑀡𑀫𑀸𑀦𑀲𑀁 𑀳𑁄𑀢𑀺.

𑁪𑁨𑁨-𑁯. 𑀢𑀣𑁂𑀯 𑀘 𑀢𑀣𑀸 𑀏𑀯 𑀘 𑀇𑀝𑁆𑀞𑀫𑀚𑁆𑀛𑀢𑁆𑀢𑀕𑁄𑀘𑀭𑁂 𑀤𑀼𑀳𑁂𑀢𑀽𑀦𑀁 𑀤𑁆𑀯𑀺𑀦𑁆𑀦𑀁 𑀉𑀧𑁂𑀓𑁆𑀔𑀸𑀬𑀼𑀢𑁆𑀢𑀸𑀦𑀁 𑀚𑀯𑀦𑀸𑀦𑀁 𑀅𑀦𑀦𑁆𑀢𑀭𑀁 𑀢𑀸𑀤𑀺𑀲𑀸𑀦𑀺 𑀢𑁂𑀳𑀺 𑀚𑀯𑀦𑁂𑀳𑀺 𑀲𑀤𑀺𑀲𑀸𑀦𑀺 𑀤𑁆𑀯𑁂 𑀢𑀤𑀸𑀭𑀫𑁆𑀫𑀡𑀫𑀸𑀦𑀲𑀸𑀦𑀺 𑀚𑀸𑀬𑀦𑁆𑀢𑁂, 𑀢𑁂𑀲𑀁 𑀢𑀤𑀸𑀭𑀫𑁆𑀫𑀡𑀫𑀸𑀦𑀲𑀸𑀦𑀁 ‘‘𑀧𑀺𑀝𑁆𑀞𑀺𑀪𑀯𑀗𑁆𑀕’’𑀦𑁆𑀢𑀺 𑀦𑀸𑀫𑀁, ‘‘𑀆𑀕𑀦𑁆𑀢𑀼𑀓𑀪𑀯𑀗𑁆𑀕’’𑀦𑁆𑀢𑀺 𑀘 𑀦𑀸𑀫𑀁 𑀳𑁄𑀢𑀺. 𑀲𑀦𑁆𑀢𑀻𑀭𑀡𑀤𑁆𑀯𑀬𑀜𑁆𑀘𑁂𑀯 𑀤𑀲𑁆𑀲𑀦𑀁 𑀲𑀫𑁆𑀧𑀝𑀺𑀘𑁆𑀙𑀦𑀁 𑀇𑀫𑀸𑀦𑀺 𑀤𑁆𑀯𑁂 𑀪𑀯𑀗𑁆𑀕𑀸𑀦𑀺 𑀘𑀸𑀢𑀺 𑀅𑀝𑁆𑀞 𑀯𑀺𑀧𑀸𑀓𑀸 𑀘𑀓𑁆𑀔𑀼𑀤𑁆𑀯𑀸𑀭𑁂 𑀳𑁄𑀦𑁆𑀢𑀺. 𑀏𑀯𑀁 𑀇𑀫𑀺𑀦𑀸 𑀫𑀬𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀧𑀜𑁆𑀘𑀲𑀼 𑀤𑁆𑀯𑀸𑀭𑁂𑀲𑀼𑀧𑀺 𑀘 𑀅𑀝𑁆𑀞 𑀅𑀝𑁆𑀞 𑀯𑀺𑀧𑀸𑀓𑁂 𑀓𑀢𑁆𑀯𑀸 𑀧𑀯𑀢𑁆𑀢𑀺𑀬𑀁 𑀘𑀢𑁆𑀢𑀸𑀮𑀻𑀲 𑀯𑀺𑀧𑀸𑀓𑀸𑀦𑀺 𑀪𑀯𑀦𑁆𑀢𑀺. 𑀕𑀳𑀺𑀢𑀸𑀕𑁆𑀕𑀳𑀡𑁂𑀦𑁂𑀢𑁆𑀣, 𑀘𑀓𑁆𑀔𑀼𑀤𑁆𑀯𑀸𑀭𑁂 𑀧𑀦𑀝𑁆𑀞 𑀘 𑀏𑀢𑁆𑀣 𑀏𑀢𑁂𑀲𑀼 𑀯𑀺𑀧𑀸𑀓𑁂𑀲𑀼 𑀕𑀳𑀺𑀢𑀸𑀦𑀁 𑀯𑀺𑀧𑀸𑀓𑀸𑀦𑀁 𑀅𑀕𑁆𑀕𑀳𑀡𑁂𑀦 𑀘𑀓𑁆𑀔𑀼𑀤𑁆𑀯𑀸𑀭𑁂 𑀅𑀝𑁆𑀞 𑀘 𑀯𑀺𑀧𑀸𑀓𑀸 𑀲𑁄𑀢𑀖𑀸𑀦𑀸𑀤𑀺𑀦𑀸 𑀯𑀺𑀧𑀸𑀓𑁂𑀦 𑀲𑀤𑁆𑀥𑀺𑀁 𑀤𑁆𑀯𑀸𑀤𑀲 𑀏𑀯 𑀯𑀺𑀧𑀸𑀓𑀸𑀦𑀺 𑀪𑀯𑀦𑁆𑀢𑀺. 𑀏𑀓𑀸𑀬 𑀘𑁂𑀢𑀦𑀸𑀬𑁂𑀯𑀁 𑀏𑀯𑀁 𑀇𑀫𑀺𑀦𑀸 𑀫𑀬𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀏𑀓𑀸𑀬 𑀘𑁂𑀢𑀦𑀸𑀬 𑀓𑀫𑁆𑀫𑁂 𑀆𑀬𑀽𑀳𑀺𑀢𑁂 𑀧𑀯𑀢𑁆𑀢𑀺𑀢𑁂 𑀧𑀦 𑀲𑀢𑀺 𑀤𑁆𑀯𑀸𑀤𑀲𑁂𑀯 𑀯𑀺𑀧𑀸𑀓𑀸𑀦𑀺 𑀪𑀯𑀦𑁆𑀢𑀺. 𑀇𑀢𑀺 𑀯𑀘𑀦𑀁 𑀯𑀺𑀚𑀺𑀢𑀓𑀼𑀲𑀮𑀬𑀼𑀤𑁆𑀥𑀲𑀗𑁆𑀕𑀸𑀫𑁂𑀦 𑀧𑀓𑀸𑀲𑀺𑀢𑀁 𑀤𑁂𑀲𑀺𑀢𑀁. 𑀤𑀼𑀳𑁂𑀢𑀼𑀓𑀢𑁆𑀢𑀬𑁂𑀦𑀸𑀧𑀺, 𑀲𑁂𑀲𑁂𑀦 𑀲𑀤𑀺𑀲𑁂𑀦 𑀢𑀼 𑀫𑀬𑀸 𑀯𑀼𑀢𑁆𑀢𑀢𑁄 𑀤𑀼𑀳𑁂𑀢𑀼𑀢𑁄 𑀲𑁂𑀲𑁂𑀦 𑀤𑀼𑀳𑁂𑀢𑀼𑀓𑀢𑁆𑀢𑀬𑁂𑀦𑀸𑀧𑀺 𑀲𑀤𑀺𑀲𑁂𑀦 𑀧𑀸𑀓𑁂𑀦 𑀆𑀤𑀺𑀦𑁆𑀦𑀲𑀦𑁆𑀥𑀺𑀦𑁄 𑀕𑀳𑀺𑀢𑀧𑀝𑀺𑀲𑀦𑁆𑀥𑀺𑀓𑀲𑁆𑀲 𑀲𑀢𑁆𑀢𑀲𑁆𑀲 𑀏𑀯𑀁 𑀦𑀬𑁄 𑀫𑀢𑁄 𑀓𑀣𑀺𑀢𑁄 𑀦𑀺𑀭𑀗𑁆𑀕𑀡𑁂𑀦. 𑀤𑀼𑀳𑁂𑀢𑀼𑀓𑁂𑀦 𑀓𑀫𑁆𑀫𑁂𑀦 𑀤𑀼𑀳𑁂𑀢𑀼𑀓𑀸 𑀧𑀝𑀺𑀲𑀦𑁆𑀥𑀺 𑀳𑁄𑀢𑀺. 𑀇𑀢𑀺 𑀅𑀬𑀁 𑀯𑀸𑀭𑁄 𑀘 𑀏𑀢𑁆𑀢𑀸𑀯𑀢𑀸 𑀏𑀢𑁆𑀢𑀓𑁂𑀦 𑀯𑀘𑀦𑁂𑀦 𑀫𑀬𑀸 𑀯𑀼𑀢𑁆𑀢𑁄.

𑁪𑁩𑁦-𑁮. 𑀤𑀼𑀳𑁂𑀢𑀼𑀓𑁂𑀦 𑀓𑀫𑁆𑀫𑁂𑀦 𑀅𑀳𑁂𑀢𑀼𑀓𑀸 𑀧𑀝𑀺𑀲𑀦𑁆𑀥𑀺 𑀳𑁄𑀢𑀺, 𑀇𑀢𑀺 𑀅𑀬𑀁 𑀯𑀸𑀭𑁄 𑀅𑀦𑀼𑀧𑀼𑀩𑁆𑀩𑁂𑀦 𑀧𑀝𑀺𑀧𑀸𑀝𑀺𑀬𑀸 𑀆𑀕𑀢𑁄. 𑀢𑁂𑀲𑀼 𑀘𑀢𑀽𑀲𑀼𑀧𑀺 𑀤𑀼𑀳𑁂𑀢𑀼𑀓𑁂𑀲𑀼 𑀓𑀼𑀲𑀮𑁂𑀲𑀼 𑀘𑀺𑀢𑁆𑀢𑁂𑀲𑀼 𑀅𑀜𑁆𑀜𑀢𑀭𑁂𑀦𑁂𑀯 𑀳𑁂𑀢𑀼𑀓𑁂𑀦 𑀓𑀫𑁆𑀫𑁂 𑀆𑀬𑀽𑀳𑀺𑀢𑁂 𑀧𑀯𑀢𑁆𑀢𑀺𑀢𑁂 𑀲𑀢𑀺 𑀢𑀲𑁆𑀲𑁂𑀯 𑀤𑀼𑀳𑁂𑀢𑀼𑀓𑀲𑁆𑀲 𑀓𑀼𑀲𑀮𑀚𑀯𑀦𑀲𑁆𑀲 𑀧𑀸𑀓𑀪𑀽𑀢𑀸𑀬 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀳𑁂𑀢𑀼𑀓𑀸𑀬 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀆𑀤𑀺𑀦𑁆𑀦𑀧𑀝𑀺𑀲𑀦𑁆𑀥𑀺𑀦𑁄 𑀲𑀢𑁆𑀢𑀲𑁆𑀲 𑀲𑀸 𑀧𑀝𑀺𑀲𑀦𑁆𑀥𑀺 𑀓𑀫𑁆𑀫𑀲𑀤𑀺𑀲𑀸 𑀦𑀸𑀫 𑀦 𑀯𑀢𑁆𑀢𑀩𑁆𑀩𑀸 𑀧𑀡𑁆𑀟𑀺𑀢𑁂𑀳𑀺. 𑀳𑀺 𑀲𑀘𑁆𑀘𑀁 ‘‘𑀧𑀝𑀺𑀲𑀦𑁆𑀥𑀺 𑀦 𑀯𑀢𑁆𑀢𑀩𑁆𑀩𑀸’’𑀢𑀺𑀆𑀤𑀺𑀓𑀁 𑀯𑀘𑀦𑀁. 𑀓𑀫𑁆𑀫𑀁 𑀤𑀼𑀳𑁂𑀢𑀼𑀓𑀁 𑀳𑁄𑀢𑀺, 𑀧𑀝𑀺𑀲𑀦𑁆𑀥𑀺 𑀅𑀳𑁂𑀢𑀼𑀓𑀸 𑀳𑁄𑀢𑀺. 𑀢𑀲𑁆𑀲 𑀤𑁂𑀳𑀺𑀦𑁄 𑀲𑀢𑁆𑀢𑀲𑁆𑀲 𑀯𑀼𑀟𑁆𑀠𑀺𑀫𑀼𑀧𑁂𑀢𑀲𑁆𑀲 𑀯𑀼𑀟𑁆𑀠𑀺𑀁 𑀉𑀧𑀕𑀢𑀲𑁆𑀲 𑀘𑀓𑁆𑀔𑀼𑀤𑁆𑀯𑀸𑀭𑁂 𑀧𑀦 𑀇𑀝𑁆𑀞𑀫𑀚𑁆𑀛𑀢𑁆𑀢𑀕𑁄𑀘𑀭𑁂 𑀆𑀧𑀸𑀣𑀫𑀸𑀕𑀢𑁂 𑀲𑀢𑀺 𑀤𑀼𑀳𑁂𑀢𑀼𑀓𑀸𑀦𑀁 𑀘𑀢𑀼𑀦𑁆𑀦𑀁 𑀧𑀼𑀜𑁆𑀜𑀸𑀦𑀁 𑀬𑀲𑁆𑀲 𑀓𑀲𑁆𑀲𑀘𑀺 𑀚𑀯𑀦𑀲𑁆𑀲 𑀅𑀯𑀲𑀸𑀦𑀫𑁆𑀳𑀺 𑀇𑀤𑀁 𑀅𑀳𑁂𑀢𑀼𑀓𑀁 𑀫𑀦𑁄 𑀢𑀤𑀸𑀭𑀫𑁆𑀫𑀡𑀪𑀸𑀯𑁂𑀦 𑀚𑀸𑀬𑀢𑀺. 𑀏𑀢𑁆𑀣 𑀏𑀢𑀲𑁆𑀫𑀺𑀁 𑀯𑀘𑀦𑁂 𑀲𑀁𑀲𑀬𑁄 𑀲𑀦𑁆𑀤𑁂𑀳𑁄 𑀦𑀢𑁆𑀣𑀺, 𑀢𑀁 𑀅𑀳𑁂𑀢𑀼𑀓𑀘𑀺𑀢𑁆𑀢𑀁 𑀫𑀽𑀮𑀪𑀯𑀗𑁆𑀕𑀜𑁆𑀘 𑀢𑀤𑀸𑀭𑀫𑁆𑀫𑀡𑀫𑁂𑀯 𑀘 𑀳𑁄𑀢𑀺. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀓𑀸𑀤𑀻𑀲𑀼𑀧𑀺 𑀯𑀻𑀣𑀺𑀘𑀺𑀢𑁆𑀢𑁂𑀲𑀼 𑀚𑀸𑀢𑁂𑀲𑀼 𑀉𑀧𑁂𑀓𑁆𑀔𑀸𑀲𑀳𑀕𑀢𑀁𑀬𑁂𑀯 𑀲𑀦𑁆𑀢𑀻𑀭𑀡𑀫𑁆𑀧𑀺 𑀘 𑀳𑁄𑀢𑀺. 𑀢𑁂𑀲𑀼 𑀏𑀓𑀁 𑀞𑀧𑁂𑀢𑁆𑀯𑀸𑀦, 𑀕𑀳𑀺𑀢𑀸𑀕𑁆𑀕𑀳𑀡𑁂𑀦𑀺𑀥 𑀢𑁂𑀲𑀼 𑀤𑁆𑀯𑀻𑀲𑀼 𑀲𑀦𑁆𑀢𑀻𑀭𑀡𑀢𑀤𑀸𑀭𑀫𑁆𑀫𑀡𑀓𑀺𑀘𑁆𑀘𑁂𑀲𑀼 𑀯𑀺𑀧𑀸𑀓𑁂𑀲𑀼 𑀏𑀓𑀁 𑀲𑀦𑁆𑀢𑀻𑀭𑀡𑀓𑀺𑀘𑁆𑀘𑀁 𑀢𑀤𑀸𑀭𑀫𑁆𑀫𑀡𑀓𑀺𑀘𑁆𑀘𑀁 𑀢𑀁 𑀘𑀺𑀢𑁆𑀢𑀁 𑀞𑀧𑁂𑀢𑁆𑀯𑀸 𑀕𑀳𑀺𑀢𑀸𑀦𑀁 𑀯𑀺𑀧𑀸𑀓𑀸𑀦𑀁 𑀅𑀕𑁆𑀕𑀳𑀡𑁂𑀦 𑀇𑀥 𑀇𑀝𑁆𑀞𑀫𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑁂 𑀕𑀡𑀦𑀽𑀧𑀕𑀘𑀺𑀢𑁆𑀢𑀸𑀦𑀺 𑀢𑀻𑀡𑀺𑀬𑁂𑀯 𑀪𑀯𑀦𑁆𑀢𑀺.

𑁪𑁩𑁯-𑁪𑁧. 𑀇𑀝𑁆𑀞𑁂 𑀆𑀭𑀫𑁆𑀫𑀡𑁂 𑀘𑀓𑁆𑀔𑀼-𑀤𑁆𑀯𑀸𑀭𑁂 𑀆𑀧𑀸𑀣𑀫𑀸𑀕𑀢𑁂 𑀢𑀤𑀸 𑀲𑀦𑁆𑀢𑀻𑀭𑀡𑀜𑁆𑀘𑁂𑀯 𑀲𑁄𑀫𑀦𑀲𑁆𑀲𑀬𑀼𑀢𑁆𑀢𑀁𑀬𑁂𑀯 𑀳𑁄𑀢𑀺, 𑀢𑀤𑀸𑀭𑀫𑁆𑀫𑀡𑀫𑀸𑀦𑀲𑀜𑁆𑀘 𑀲𑁄𑀫𑀦𑀲𑁆𑀲𑀬𑀼𑀢𑁆𑀢𑀁𑀬𑁂𑀯 𑀳𑁄𑀢𑀺, 𑀢𑁂𑀲𑀼 𑀲𑀦𑁆𑀢𑀻𑀭𑀡𑀢𑀤𑀸𑀭𑀫𑁆𑀫𑀡𑀓𑀺𑀘𑁆𑀘𑁂𑀲𑀼 𑀯𑀺𑀧𑀸𑀓𑁂𑀲𑀼 𑀏𑀓𑁂𑀓𑀁 𑀲𑀦𑁆𑀢𑀻𑀭𑀡𑀓𑀺𑀘𑁆𑀘𑀁, 𑀢𑀤𑀸𑀭𑀫𑁆𑀫𑀡𑀓𑀺𑀘𑁆𑀘𑀁 𑀯𑀸 𑀘𑀺𑀢𑁆𑀢𑀁 𑀕𑀳𑁂𑀢𑁆𑀯𑀸 𑀧𑀼𑀭𑀺𑀫𑀸𑀦𑀺 𑀘 𑀢𑀻𑀡𑀺 𑀘𑀢𑁆𑀢𑀸𑀭𑀺 𑀏𑀯 𑀯𑀺𑀧𑀸𑀓𑀸𑀦𑀺 𑀪𑀯𑀦𑁆𑀢𑀺. 𑀏𑀯𑀁 𑀇𑀫𑀺𑀦𑀸 𑀫𑀬𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀧𑀜𑁆𑀘𑀲𑀼 𑀤𑁆𑀯𑀸𑀭𑁂𑀲𑀼𑀧𑀺 𑀘𑀢𑁆𑀢𑀸𑀭𑀺 𑀘𑀢𑁆𑀢𑀸𑀭𑀺 𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀻𑀢𑀺 𑀧𑀯𑀢𑁆𑀢𑀺𑀬𑀁 𑀯𑀺𑀧𑀸𑀓𑀸𑀦𑀺 𑀯𑀻𑀲𑀢𑀺 𑀘𑀺𑀢𑁆𑀢𑀸𑀦𑀺 𑀳𑁄𑀦𑁆𑀢𑀺.

𑁪𑁪𑁨-𑁮. 𑀘𑀓𑁆𑀔𑀼𑀤𑁆𑀯𑀸𑀭𑁂 𑀢𑀼 𑀘𑀢𑁆𑀢𑀸𑀭𑀺, 𑀕𑀳𑀺𑀢𑀸𑀕𑁆𑀕𑀳𑀡𑁂𑀦𑀺𑀥 𑀕𑀳𑀺𑀢𑀸𑀦𑀁 𑀯𑀺𑀧𑀸𑀓𑀸𑀦𑀁 𑀅𑀕𑁆𑀕𑀳𑀡𑁂𑀦 𑀘𑀓𑁆𑀔𑀼𑀤𑁆𑀯𑀸𑀭𑁂 𑀧𑀦 𑀘𑀢𑁆𑀢𑀸𑀭𑀺 𑀯𑀺𑀧𑀸𑀓𑀸𑀦𑀺 𑀇𑀥 𑀇𑀫𑀲𑁆𑀫𑀺𑀁 𑀇𑀝𑁆𑀞𑀸𑀭𑀫𑁆𑀫𑀡𑁂 𑀲𑁄𑀢𑀖𑀸𑀦𑀸𑀤𑀺𑀦𑀸 𑀯𑀺𑀧𑀸𑀓𑁂𑀦 𑀲𑀤𑁆𑀥𑀺𑀁 𑀅𑀳𑁂𑀢𑀼𑀓𑀁 𑀅𑀝𑁆𑀞𑀓𑀁 𑀳𑁄𑀢𑀺 𑀏𑀯. 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀲𑁆𑀲 𑀲𑀢𑁆𑀢𑀲𑁆𑀲 𑀤𑀼𑀳𑁂𑀢𑀼𑀓𑀁, 𑀢𑀺𑀳𑁂𑀢𑀼𑀓𑀁 𑀯𑀸 𑀢𑀤𑀸𑀭𑀫𑁆𑀫𑀡𑀁 𑀦 𑀪𑀯𑁂 𑀦 𑀪𑀯𑁂𑀬𑁆𑀬, 𑀤𑀼𑀳𑁂𑀢𑀼𑀧𑀝𑀺𑀲𑀦𑁆𑀥𑀺𑀦𑁄 𑀲𑀢𑁆𑀢𑀲𑁆𑀲 𑀢𑀺𑀳𑁂𑀢𑀼𑀓𑀁 𑀢𑀤𑀸𑀭𑀫𑁆𑀫𑀡𑀁 𑀦 𑀪𑀯𑁂. 𑀚𑀸𑀢𑀸 𑀲𑀼𑀕𑀢𑀺𑀬𑀁 𑀬𑁂𑀦, 𑀧𑀸𑀓𑁂𑀦 𑀧𑀝𑀺𑀲𑀦𑁆𑀥𑀺 𑀢𑀼 𑀲𑀼𑀕𑀢𑀺𑀬𑀁 𑀬𑁂𑀦 𑀧𑀸𑀓𑁂𑀦 𑀧𑀝𑀺𑀲𑀦𑁆𑀥𑀺 𑀚𑀸𑀢𑀸, 𑀢𑁂𑀦 𑀯𑀺𑀧𑀸𑀓𑁂𑀦 𑀢𑀼𑀮𑁆𑀬𑀫𑁆𑀧𑀺, 𑀳𑀻𑀦𑀁 𑀯𑀸 𑀢𑁂𑀲𑀁 𑀢𑀤𑀸𑀭𑀫𑁆𑀫𑀡𑀁 𑀪𑀯𑁂𑀬𑁆𑀬. 𑀫𑀦𑀼𑀲𑁆𑀲𑀮𑁄𑀓𑀁 𑀲𑀦𑁆𑀥𑀸𑀬, 𑀯𑀼𑀢𑁆𑀢𑀜𑁆𑀘𑀸𑀳𑁂𑀢𑀼𑀓𑀝𑁆𑀞𑀓𑀁 𑀲𑀼𑀕𑀢𑀺𑀬𑀁 𑀅𑀳𑁂𑀢𑀼𑀓𑀝𑁆𑀞𑀓𑀜𑁆𑀘 𑀫𑀦𑀼𑀲𑁆𑀲𑀮𑁄𑀓𑀜𑁆𑀘 𑀲𑀦𑁆𑀥𑀸𑀬 𑀧𑀝𑀺𑀘𑁆𑀘 𑀓𑀸𑀭𑀡𑀁 𑀓𑀢𑁆𑀯𑀸 𑀫𑀬𑀸 𑀯𑀼𑀢𑁆𑀢𑀁. 𑀘𑀢𑀽𑀲𑀼𑀧𑀺 𑀅𑀧𑀸𑀬𑁂𑀲𑀼 𑀧𑀦 𑀅𑀧𑁂𑀢𑁄 𑀅𑀬𑁄 𑀧𑀢𑀺𑀝𑁆𑀞𑀸 𑀏𑀢𑁂𑀳𑀻𑀢𑀺 𑀅𑀧𑀸𑀬𑁄, 𑀢𑁂𑀲𑀼. 𑀧𑀯𑀢𑁆𑀢𑁂 𑀅𑀳𑁂𑀢𑀼𑀓𑀁 𑀅𑀝𑁆𑀞𑀓𑀁 𑀆𑀧𑀸𑀬𑀺𑀓𑁂𑀳𑀺 𑀮𑀩𑁆𑀪𑀢𑀺. 𑀣𑁂𑀭𑁄 𑀦𑁂𑀭𑀬𑀺𑀓𑀸𑀦𑀁 𑀢𑀼, 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀯𑀲𑁆𑀲𑀢𑀺 𑀣𑀺𑀭𑁄 𑀣𑀺𑀭𑀓𑀸𑀭𑀥𑀫𑁆𑀫𑁄 𑀬𑀲𑁆𑀫𑀺𑀁 𑀅𑀢𑁆𑀣𑀻𑀢𑀺 𑀣𑁂𑀭𑁄, 𑀤𑀼𑀢𑀺𑀬𑀅𑀕𑁆𑀕𑀲𑀸𑀯𑀓𑀪𑀽𑀢𑁄 𑀇𑀤𑁆𑀥𑀺𑀫𑀸 𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄 𑀦𑁂𑀭𑀬𑀺𑀓𑀸𑀦𑀁 𑀦𑀺𑀭𑀬𑁂 𑀚𑀸𑀢𑀸𑀦𑀁 𑀲𑀢𑁆𑀢𑀸𑀦𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀯𑀲𑁆𑀲𑀢𑀺, ‘‘𑀉𑀘𑁆𑀙𑀗𑁆𑀕𑁂 𑀫𑀁 𑀦𑀺𑀲𑀻𑀤𑀺𑀢𑁆𑀯𑀸’’𑀢𑀺𑀆𑀤𑀻𑀲𑀼 𑀯𑀺𑀬 𑀤𑁂𑀯𑀁 𑀯𑀲𑁆𑀲𑀸𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀕𑀦𑁆𑀥𑀁 𑀯𑀸𑀬𑀼𑀜𑁆𑀘 𑀫𑀸𑀧𑁂𑀢𑀺 𑀬𑀤𑀸, 𑀢𑀤𑀸 𑀧𑀦 𑀢𑁂𑀲𑀁 𑀦𑁂𑀭𑀬𑀺𑀓𑀸𑀦𑀁 𑀲𑀢𑁆𑀢𑀸𑀦𑀁 𑀢𑁂𑀳𑀺 𑀦𑁂𑀭𑀬𑀺𑀓𑀲𑀢𑁆𑀢𑁂𑀳𑀺 𑀣𑁂𑀭𑀁 𑀤𑀺𑀲𑁆𑀯𑀸, 𑀥𑀫𑁆𑀫𑀜𑁆𑀘 𑀲𑀼𑀢𑁆𑀯𑀸, 𑀕𑀦𑁆𑀥𑀜𑁆𑀘 𑀖𑀸𑀬𑀺𑀢𑁆𑀯𑀸 𑀚𑀮𑀁 𑀉𑀤𑀓𑀜𑁆𑀘 𑀧𑀺𑀯𑀢𑀁 𑀧𑀺𑀯𑀦𑁆𑀢𑀸𑀦𑀁 𑀫𑀼𑀤𑀼𑀁 𑀯𑀸𑀬𑀼𑀜𑁆𑀘 𑀢𑁂𑀳𑀺 𑀨𑀼𑀲𑀢𑀁 𑀨𑀼𑀲𑀦𑁆𑀢𑀸𑀦𑀁 𑀢𑁂𑀲𑀁 𑀦𑁂𑀭𑀬𑀺𑀓𑀲𑀢𑁆𑀢𑀸𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀓𑀸𑀤𑀻𑀦𑀺 𑀧𑀜𑁆𑀘𑀧𑀺 𑀧𑀼𑀜𑁆𑀜𑀚𑀸𑀦𑀺 𑀏𑀯 𑀓𑀼𑀲𑀮𑀯𑀺𑀧𑀸𑀓𑀸𑀦𑀺 𑀏𑀯 𑀲𑀦𑁆𑀢𑀻𑀭𑀡𑀤𑁆𑀯𑀬𑀁 𑀧𑀼𑀜𑁆𑀜𑀚𑀁 𑀏𑀯 𑀓𑀼𑀲𑀮𑀯𑀺𑀧𑀸𑀓𑀁 𑀏𑀯 𑀧𑀼𑀜𑁆𑀜𑀚𑀸 𑀏𑀯 𑀏𑀓𑀸 𑀫𑀦𑁄𑀥𑀸𑀢𑀼 𑀇𑀢𑀺 𑀅𑀝𑁆𑀞𑀓𑀁 𑀳𑁄𑀢𑀺.

𑁪𑁪𑁯-𑁫𑁦. 𑀅𑀬𑀁 𑀢𑀸𑀯 𑀓𑀣𑀸 ‘‘𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀓𑀸𑀤𑀻𑀦𑀺 𑀧𑀼𑀜𑁆𑀜𑀚𑀸𑀦𑁂𑀯𑀸’’𑀢𑀺𑀆𑀤𑀺𑀓𑀸 𑀅𑀬𑀁 𑀓𑀣𑀸 𑀇𑀝𑁆𑀞𑀇𑀝𑁆𑀞𑀫𑀚𑁆𑀛𑀢𑁆𑀢𑀕𑁄𑀘𑀭𑁂 𑀓𑀸𑀫𑀸𑀯𑀘𑀭𑁂 𑀧𑀼𑀜𑁆𑀜𑀸𑀦𑀁 𑀚𑀯𑀦𑀸𑀦𑀁 𑀯𑀲𑁂𑀦 𑀫𑀬𑀸 𑀯𑀼𑀢𑁆𑀢𑀸. 𑀢𑀤𑀸𑀭𑀫𑁆𑀫𑀡𑀘𑁂𑀢𑀲𑁄 𑀢𑀤𑀸𑀭𑀫𑁆𑀫𑀡𑀘𑀺𑀢𑁆𑀢𑀲𑁆𑀲 𑀬𑀁 𑀦𑀺𑀬𑀫𑀢𑁆𑀢𑀁 ‘‘𑀢𑀤𑀸𑀭𑀫𑁆𑀫𑀡𑀫𑀸𑀦𑀲𑀁 𑀚𑀯𑀦𑁂𑀦 𑀦𑀺𑀬𑀸𑀫𑀺𑀢’’𑀦𑁆𑀢𑀺𑀆𑀤𑀺𑀯𑀘𑀦𑁂𑀦 𑀫𑀬𑀸 𑀯𑀼𑀢𑁆𑀢𑀁, 𑀢𑀁 𑀦𑀺𑀬𑀫𑀢𑁆𑀢𑀁 𑀓𑀼𑀲𑀮𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑁄𑀫𑀦𑀲𑁆𑀲𑀬𑀼𑀢𑁆𑀢𑁂 𑀓𑀸𑀫𑀸𑀯𑀘𑀭𑀓𑀼𑀲𑀮𑁂 𑀚𑀯𑀺𑀢𑁂 𑀢𑀤𑀸𑀭𑀫𑁆𑀫𑀡𑀫𑁆𑀧𑀺 𑀲𑁄𑀫𑀦𑀲𑁆𑀲𑀬𑀼𑀢𑁆𑀢𑀫𑁂𑀯 𑀳𑁄𑀢𑀺, 𑀉𑀧𑁂𑀓𑁆𑀔𑀸𑀬𑀼𑀢𑁆𑀢𑁂 𑀓𑀸𑀫𑀸𑀯𑀘𑀭𑀓𑀼𑀲𑀮𑁂 𑀚𑀯𑀺𑀢𑁂 𑀢𑀤𑀸𑀭𑀫𑁆𑀫𑀡𑀫𑁆𑀧𑀺 𑀉𑀧𑁂𑀓𑁆𑀔𑀸𑀬𑀼𑀢𑁆𑀢𑀫𑁂𑀯 𑀳𑁄𑀢𑀺, 𑀦𑁂𑀢𑀁 𑀅𑀓𑀼𑀲𑀮𑁂 𑀉𑀧𑁂𑀓𑁆𑀔𑀸𑀬𑀼𑀢𑁆𑀢𑁂 𑀯𑀺𑀘𑀺𑀓𑀺𑀘𑁆𑀙𑀸𑀤𑀺𑀓𑁂 𑀅𑀓𑀼𑀲𑀮𑁂 𑀚𑀯𑀦𑁂 𑀧𑀦 𑀚𑀯𑀺𑀢𑁂 𑀲𑁄𑀫𑀦𑀲𑁆𑀲𑀬𑀼𑀢𑁆𑀢𑀫𑁆𑀧𑀺 𑀢𑀤𑀸𑀭𑀫𑁆𑀫𑀡𑀁 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀢𑀺𑀧𑀺 𑀯𑀘𑀦𑀁 𑀆𑀘𑀭𑀺𑀬𑁂𑀦 𑀤𑀻𑀧𑀺𑀢𑀁.

𑁪𑁫𑁧-𑁭. 𑀇𑀥 𑀇𑀫𑀲𑁆𑀫𑀺𑀁 𑀅𑀥𑀺𑀧𑁆𑀧𑀸𑀬𑁂 𑀅𑀓𑀼𑀲𑀮𑀘𑀺𑀢𑁆𑀢𑁂𑀲𑀼 𑀲𑁄𑀫𑀦𑀲𑁆𑀲𑀬𑀼𑀢𑁆𑀢𑁂𑀲𑀼 𑀘𑀢𑀽𑀲𑀼𑀧𑀺 𑀇𑀝𑁆𑀞𑁂 𑀆𑀭𑀫𑁆𑀫𑀡𑁂 𑀢𑁂𑀲𑀼 𑀘𑀺𑀢𑁆𑀢𑁂𑀲𑀼 𑀚𑀯𑀺𑀢𑁂𑀲𑀼 𑀲𑁄𑀫𑀦𑀲𑁆𑀲𑀬𑀼𑀢𑁆𑀢𑀸 𑀅𑀳𑁂𑀢𑀼𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀢𑀤𑀦𑀦𑁆𑀢𑀭𑀁 𑀢𑁂𑀲𑀁 𑀅𑀓𑀼𑀲𑀮𑀚𑀯𑀦𑀸𑀦𑀁 𑀅𑀦𑀦𑁆𑀢𑀭𑀁 𑀢𑀤𑀸𑀭𑀫𑁆𑀫𑀡𑀪𑀸𑀯𑁂𑀦 𑀚𑀸𑀬𑀢𑀺. 𑀉𑀧𑁂𑀓𑁆𑀔𑀸𑀬𑀼𑀢𑁆𑀢𑁂𑀲𑀼 𑀙𑀲𑀼 𑀅𑀓𑀼𑀲𑀮𑀘𑀺𑀢𑁆𑀢𑁂𑀲𑀼 𑀇𑀝𑁆𑀞𑀫𑀚𑁆𑀛𑀢𑁆𑀢𑁂 𑀕𑁄𑀘𑀭𑁂 𑀚𑀯𑀺𑀢𑁂𑀲𑀼 𑀧𑀼𑀜𑁆𑀜𑀚𑀸 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀅𑀳𑁂𑀢𑀼𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀏𑀯 𑀢𑀤𑀦𑀦𑁆𑀢𑀭𑀁 𑀯𑀸 𑀢𑁂𑀲𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀦𑀁 𑀙𑀦𑁆𑀦𑀁 𑀅𑀓𑀼𑀲𑀮𑀚𑀯𑀦𑀸𑀦𑀁 𑀅𑀦𑀦𑁆𑀢𑀭𑀁 𑀢𑀤𑀸𑀭𑀫𑁆𑀫𑀡𑀪𑀸𑀯𑁂𑀦 𑀚𑀸𑀬𑀢𑀺. 𑀇𑀝𑁆𑀞𑀸𑀭𑀫𑁆𑀫𑀡𑀬𑁄𑀕𑀲𑁆𑀫𑀺𑀁 𑀩𑀼𑀤𑁆𑀥𑀭𑀽𑀧𑀸𑀤𑀺𑀇𑀝𑁆𑀞𑀸𑀭𑀫𑁆𑀫𑀡𑀬𑁄𑀕𑀲𑁆𑀫𑀺𑀁 𑀓𑀗𑁆𑀔𑀢𑁄 ‘‘𑀩𑀼𑀤𑁆𑀥𑁄 𑀦𑀼 𑀔𑁄, 𑀦𑁄 𑀩𑀼𑀤𑁆𑀥𑁄’’𑀢𑀺 𑀓𑀗𑁆𑀔𑀦𑁆𑀢𑀲𑁆𑀲 𑀲𑀢𑁆𑀢𑀲𑁆𑀲 𑀉𑀤𑁆𑀥𑀢𑀲𑁆𑀲 𑀯𑀸 𑀲𑀢𑁆𑀢𑀲𑁆𑀲 𑀢𑀤𑀸𑀭𑀫𑁆𑀫𑀡𑀫𑀸𑀦𑀲𑀁 𑀲𑁄𑀫𑀦𑀲𑁆𑀲𑀬𑀼𑀢𑁆𑀢𑀁 𑀅𑀳𑁂𑀢𑀼𑀓𑀁 𑀯𑀺𑀧𑀸𑀓𑀁 𑀳𑁄𑀢𑀺 𑀧𑀺𑀝𑁆𑀞𑀺𑀪𑀯𑀗𑁆𑀕𑀁. 𑀲𑁄𑀫𑀦𑀲𑁆𑀲𑀬𑀼𑀢𑁂 𑀘𑀺𑀢𑁆𑀢𑁂, 𑀚𑀯𑀦𑁂 𑀚𑀯𑀺𑀢𑁂 𑀧𑀦 𑀲𑁄𑀫𑀦𑀲𑁆𑀲𑀬𑀼𑀢𑁆𑀢𑀸 𑀏𑀯 𑀧𑀜𑁆𑀘 𑀢𑀤𑀸𑀭𑀫𑁆𑀫𑀡𑀫𑀸𑀦𑀲𑀸 𑀧𑀡𑁆𑀟𑀺𑀢𑁂𑀦 𑀕𑀯𑁂𑀲𑀺𑀢𑀩𑁆𑀩𑀸. 𑀉𑀧𑁂𑀓𑁆𑀔𑀸𑀲𑀳𑀕𑀢𑁂 𑀘𑀺𑀢𑁆𑀢𑁂 𑀚𑀯𑀦𑁂 𑀧𑀦 𑀚𑀯𑀺𑀢𑁂 𑀲𑀢𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀙 𑀘 𑀢𑀤𑀸𑀭𑀫𑁆𑀫𑀡𑀫𑀸𑀦𑀲𑀸 𑀧𑀡𑁆𑀟𑀺𑀢𑁂𑀦 𑀕𑀯𑁂𑀲𑀺𑀢𑀩𑁆𑀩𑀸.

𑁪𑁫𑁮-𑁬𑁩. 𑀢𑀺𑀳𑁂𑀢𑀼𑀲𑁄𑀫𑀦𑀲𑁆𑀲𑁂𑀦, 𑀆𑀤𑀺𑀦𑁆𑀦𑀧𑀝𑀺𑀲𑀦𑁆𑀥𑀺𑀦𑁄 𑀲𑀢𑁆𑀢𑀲𑁆𑀲 𑀛𑀸𑀦𑀢𑁄 𑀧𑀭𑀺𑀳𑀻𑀦𑀲𑁆𑀲 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑁄 𑀢𑀁 𑀛𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀢𑁄 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀤𑁄𑀫𑀦𑀲𑁆𑀲𑀬𑀼𑀢𑁆𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺. 𑀢𑀲𑁆𑀲 𑀤𑁄𑀫𑀦𑀲𑁆𑀲𑀲𑁆𑀲 𑀅𑀦𑀦𑁆𑀢𑀭𑀁 𑀓𑀺𑀁 𑀫𑀸𑀦𑀲𑀁 𑀚𑀸𑀬𑀢𑁂, 𑀢𑁆𑀯𑀁 𑀤𑁄𑀫𑀦𑀲𑁆𑀲𑀬𑀼𑀢𑁆𑀢𑀚𑀯𑀦𑀲𑁆𑀲 𑀅𑀦𑀦𑁆𑀢𑀭𑀫𑀸𑀦𑀲𑀁 𑀩𑁆𑀭𑀽𑀳𑀺 𑀓𑀣𑁂𑀳𑀺. 𑀧𑀝𑁆𑀞𑀸𑀦𑁂 𑀧𑀝𑀺𑀲𑀺𑀤𑁆𑀥𑀸 𑀳𑀺 𑀤𑁄𑀫𑀦𑀲𑁆𑀲𑀲𑁆𑀲𑀸𑀦𑀦𑁆𑀢𑀭𑀁 𑀲𑁄𑀫𑀦𑀲𑁆𑀲𑀲𑁆𑀲 𑀉𑀧𑁆𑀧𑀢𑁆𑀢𑀺 𑀧𑀝𑁆𑀞𑀸𑀦𑁂 𑀧𑀝𑀺𑀲𑀺𑀤𑁆𑀥𑀸 𑀧𑀝𑁆𑀞𑀸𑀦𑀧𑁆𑀧𑀓𑀭𑀡𑁂 𑀪𑀕𑀯𑀢𑀸 𑀦𑀺𑀯𑀸𑀭𑀺𑀢𑀸, 𑀅𑀲𑁆𑀲 𑀲𑁄𑀫𑀦𑀲𑁆𑀲𑀲𑁆𑀲 𑀯𑀸 𑀅𑀦𑀦𑁆𑀢𑀭𑀁 𑀤𑁄𑀫𑀦𑀲𑁆𑀲𑀲𑁆𑀲 𑀉𑀧𑁆𑀧𑀢𑁆𑀢𑀺 𑀧𑀝𑁆𑀞𑀸𑀦𑁂 𑀧𑀝𑁆𑀞𑀸𑀦𑀧𑁆𑀧𑀓𑀭𑀡𑁂 𑀧𑀝𑀺𑀲𑀺𑀤𑁆𑀥𑀸 𑀪𑀕𑀯𑀢𑀸 𑀦𑀺𑀯𑀸𑀭𑀺𑀢𑀸. 𑀫𑀳𑀕𑁆𑀕𑀢𑀁 𑀧𑀦𑀸𑀭𑀩𑁆𑀪 𑀫𑀳𑀕𑁆𑀕𑀢𑀁 𑀧𑀝𑀺𑀘𑁆𑀘 𑀚𑀯𑀦𑁂 𑀚𑀯𑀺𑀢𑁂𑀧𑀺 𑀘 𑀢𑀤𑀸𑀭𑀫𑁆𑀫𑀡𑀫𑀸𑀦𑀲𑀁 𑀢𑀢𑁆𑀣𑁂𑀯 𑀢𑀲𑁆𑀫𑀺𑀁 𑀧𑀝𑁆𑀞𑀸𑀦𑁂 𑀏𑀯 𑀧𑀝𑀺𑀲𑀺𑀤𑁆𑀥𑀁 𑀪𑀕𑀯𑀢𑀸 𑀦𑀺𑀯𑀸𑀭𑀺𑀢𑀁. 𑀢𑀲𑁆𑀫𑀸 𑀓𑀸𑀭𑀡𑀸 𑀪𑀯𑀗𑁆𑀕𑀧𑀸𑀢𑁄 𑀯𑀸 𑀢𑀤𑀸𑀭𑀫𑁆𑀫𑀡𑀫𑁂𑀯 𑀯𑀸 𑀦 𑀳𑁄𑀢𑀺. 𑀓𑀺𑀁 𑀦𑀼 𑀓𑀸𑀢𑀩𑁆𑀩𑀁 𑀢𑁂𑀲𑀁 𑀪𑀯𑀗𑁆𑀕𑀢𑀤𑀸𑀭𑀫𑁆𑀫𑀡𑀸𑀦𑀁 𑀅𑀪𑀸𑀯𑁂 𑀓𑀸𑀭𑀡𑀁 𑀬𑀁 𑀓𑀸𑀢𑀩𑁆𑀩𑀁, 𑀅𑀫𑁆𑀳𑁂𑀳𑀺 𑀢𑀁 𑀓𑀸𑀭𑀡𑀁 𑀓𑀺𑀁 𑀦𑀼 𑀧𑀼𑀘𑁆𑀙𑀸𑀫, 𑀢𑀁 𑀢𑀤𑀢𑁆𑀣𑀁 𑀆𑀪𑀺𑀥𑀫𑁆𑀫𑀺𑀓𑀪𑀸𑀯𑁂𑀦 𑀆𑀪𑀺𑀥𑀫𑁆𑀫𑀺𑀓 𑀢𑀁 𑀓𑀸𑀭𑀡𑀁 𑀯𑀤 𑀯𑀤𑀸𑀳𑀺. 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀳𑁂𑀢𑀼𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀧𑀼𑀜𑁆𑀜𑀸𑀧𑀼𑀜𑁆𑀜𑀯𑀺𑀧𑀸𑀓𑀸 𑀢𑀤𑀸𑀭𑀫𑁆𑀫𑀡𑀺𑀓𑀸 𑀲𑀺𑀬𑀸 𑀪𑀯𑁂𑀬𑁆𑀬.

𑁪𑁬𑁪-𑁭. 𑀇𑀫𑀲𑁆𑀲 𑀢𑀤𑀸𑀭𑀫𑁆𑀫𑀡𑀲𑁆𑀲 𑀆𑀯𑀚𑁆𑀚𑀦𑀁 𑀓𑀺𑀁 𑀦𑀢𑁆𑀣𑀺? 𑀢𑀁 𑀢𑀤𑀸𑀭𑀫𑁆𑀫𑀡𑀫𑀸𑀦𑀲𑀁 𑀓𑀣𑀁 𑀓𑁂𑀦 𑀧𑀓𑀸𑀭𑁂𑀦 𑀚𑀸𑀬𑀢𑁂? 𑀪𑀯𑀗𑁆𑀕𑀆𑀯𑀚𑁆𑀚𑀦𑀸𑀦𑀁 𑀘𑀺𑀢𑁆𑀢𑀸𑀦𑀁 𑀓𑀺𑀁 𑀆𑀯𑀚𑁆𑀚𑀦𑀫𑀢𑁆𑀢𑀁? 𑀫𑀕𑁆𑀕𑀲𑁆𑀲 𑀅𑀦𑀦𑁆𑀢𑀭𑀲𑁆𑀲 𑀘 𑀨𑀮𑀲𑁆𑀲𑀸𑀧𑀺 𑀓𑀺𑀁 𑀆𑀯𑀚𑁆𑀚𑀦𑀁 𑀦𑀢𑁆𑀣𑀺? 𑀦𑀺𑀭𑁄𑀥𑀸 𑀘 𑀦𑀺𑀭𑁄𑀥𑀢𑁄 𑀯𑀼𑀝𑁆𑀞𑀳𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀨𑀮𑀘𑀺𑀢𑁆𑀢𑀲𑁆𑀲 𑀯𑀸𑀢𑀺 𑀫𑀬𑀸 𑀲𑀼𑀢𑀁, 𑀏𑀯𑀁 𑀇𑀫𑀺𑀦𑀸 𑀫𑀬𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀆𑀯𑀚𑁆𑀚𑀦𑀁 𑀦𑀢𑁆𑀣𑀺. 𑀯𑀺𑀦𑀸 𑀆𑀯𑀚𑁆𑀚𑀦𑁂𑀦𑀸𑀧𑀺, 𑀳𑁄𑀢𑀼 𑀚𑀸𑀬𑀢𑀼 𑀫𑀸𑀦𑀲𑀁 𑀘𑀺𑀢𑁆𑀢𑀁 𑀆𑀯𑀚𑁆𑀚𑀦𑁂𑀦 𑀯𑀺𑀦𑀸 𑀆𑀯𑀚𑁆𑀚𑀦𑀁 𑀯𑀚𑁆𑀚𑁂𑀢𑁆𑀯𑀸 𑀳𑁄𑀢𑀼 𑀚𑀸𑀬𑀢𑀼, 𑀓𑀺𑀫𑀲𑁆𑀲𑀸𑀭𑀫𑁆𑀫𑀡𑀁 𑀅𑀲𑁆𑀲 𑀢𑀤𑀸𑀭𑀫𑁆𑀫𑀡𑀫𑀸𑀦𑀲𑀲𑁆𑀲 𑀓𑀺𑀁 𑀆𑀭𑀫𑁆𑀫𑀡𑀁, 𑀧𑀡𑁆𑀟𑀺𑀢, 𑀢𑁆𑀯𑀁 𑀆𑀭𑀫𑁆𑀫𑀡𑀁 𑀬𑀤𑀺 𑀚𑀸𑀦𑀸𑀲𑀺, 𑀢𑀁 𑀆𑀭𑀫𑁆𑀫𑀡𑀁 𑀩𑁆𑀭𑀽𑀳𑀺 𑀫𑀬𑁆𑀳𑀁 𑀓𑀣𑁂𑀳𑀺. 𑀯𑀺𑀦𑀸 𑀆𑀭𑀫𑁆𑀫𑀡𑁂𑀦𑁂𑀢𑀁 𑀏𑀢𑀁 𑀫𑀸𑀦𑀲𑀁 𑀆𑀭𑀫𑁆𑀫𑀡𑁂𑀦 𑀯𑀺𑀦𑀸 𑀆𑀭𑀫𑁆𑀫𑀡𑀁 𑀯𑀚𑁆𑀚𑁂𑀢𑁆𑀯𑀸 𑀦 𑀚𑀸𑀬𑀢𑀺. 𑀳𑀺 𑀲𑀘𑁆𑀘𑀁 ‘‘𑀯𑀺𑀦𑀸 𑀆𑀭𑀫𑁆𑀫𑀡𑁂𑀦𑁂𑀢’’𑀦𑁆𑀢𑀺𑀆𑀤𑀺𑀓𑀁 𑀯𑀘𑀦𑀁, 𑀢𑀤𑀸𑀭𑀫𑁆𑀫𑀡𑀫𑀸𑀦𑀲𑀁 𑀬𑀤𑀸 𑀤𑁄𑀫𑀦𑀲𑁆𑀲𑀬𑀼𑀢𑁆𑀢𑀁 𑀚𑀯𑀦𑀁 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀁 𑀚𑀯𑀢𑀺, 𑀢𑀤𑀸 𑀢𑀲𑁆𑀫𑀺𑀁𑀬𑁂𑀯 𑀚𑀯𑀦𑀘𑀺𑀢𑁆𑀢𑀓𑁆𑀔𑀡𑁂 𑀧𑀭𑀺𑀢𑁆𑀢𑁂𑀲𑀼 𑀓𑀸𑀫𑀸𑀯𑀘𑀭𑀸𑀭𑀫𑁆𑀫𑀡𑁂𑀲𑀼 𑀬𑀁 𑀓𑀺𑀜𑁆𑀘𑀺 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁 𑀆𑀭𑀩𑁆𑀪 𑀧𑀝𑀺𑀘𑁆𑀘 𑀚𑀸𑀬𑀢𑀺.

𑁪𑁬𑁮-𑁭𑁩. 𑀉𑀢𑀼𑀩𑀻𑀚𑀦𑀺𑀬𑀸𑀫𑁄 𑀘 𑀉𑀢𑀼𑀦𑀺𑀬𑀸𑀫𑁄 𑀩𑀻𑀚𑀦𑀺𑀬𑀸𑀫𑁄 𑀘 𑀓𑀫𑁆𑀫𑀥𑀫𑁆𑀫𑀦𑀺𑀬𑀸𑀫𑀢𑀸 𑀘 𑀓𑀫𑁆𑀫𑀦𑀺𑀬𑀸𑀫𑀢𑀸 𑀘 𑀲𑀻𑀮𑀸𑀤𑀺𑀧𑀸𑀭𑀫𑀻𑀥𑀫𑁆𑀫𑀦𑀺𑀬𑀸𑀫𑀢𑀸 𑀘 𑀘𑀺𑀢𑁆𑀢𑀲𑁆𑀲 𑀦𑀺𑀬𑀸𑀫𑁄 𑀘𑀸𑀢𑀺 𑀧𑀜𑁆𑀘 𑀦𑀺𑀬𑀸𑀫𑀢𑀸 𑀧𑀡𑁆𑀟𑀺𑀢𑁂𑀦 𑀜𑁂𑀬𑁆𑀬𑀸. 𑀢𑀢𑁆𑀣 𑀢𑁂𑀲𑀼 𑀧𑀜𑁆𑀘𑀲𑀼 𑀦𑀺𑀬𑀸𑀫𑁂𑀲𑀼 𑀲𑀩𑁆𑀩𑁂𑀲𑀁 𑀧𑀦 𑀭𑀼𑀓𑁆𑀔𑀸𑀦𑀁 𑀏𑀓𑀧𑁆𑀧𑀳𑀸𑀭𑁂𑀦 𑀨𑀮𑀧𑀼𑀧𑁆𑀨𑀸𑀤𑀺𑀥𑀸𑀭𑀡𑀁 𑀉𑀢𑀼, 𑀅𑀬𑀁 𑀉𑀢𑀼𑀦𑀺𑀬𑀸𑀫𑀢𑀸. 𑀢𑁂𑀲𑀁 𑀢𑁂𑀲𑀁 𑀢𑀼 𑀩𑀻𑀚𑀸𑀦𑀁, 𑀢𑀁𑀢𑀁𑀢𑀼𑀮𑁆𑀬𑀨𑀮𑀼𑀩𑁆𑀪𑀯𑁄 𑀢𑁂𑀲𑀁 𑀢𑁂𑀲𑀁 𑀩𑀻𑀚𑀸𑀦𑀁 𑀧𑀦 𑀢𑁂𑀳𑀺 𑀢𑁂𑀳𑀺 𑀩𑀻𑀚𑁂𑀳𑀺 𑀢𑀼𑀮𑁆𑀬𑀸𑀦𑀫𑁆𑀧𑀺 𑀲𑀲𑁆𑀲𑀸𑀦𑀁 𑀨𑀮𑀸𑀦𑀁 𑀉𑀧𑁆𑀧𑀢𑁆𑀢𑀺, 𑀅𑀬𑀁 𑀩𑀻𑀚𑀦𑀺𑀬𑀸𑀫𑀢𑀸. 𑀫𑀢𑁆𑀣𑀓𑁂 𑀦𑀸𑀴𑀺𑀓𑁂𑀭𑀲𑁆𑀲 𑀦𑀸𑀴𑀺𑀓𑁂𑀭𑀨𑀮𑀲𑁆𑀲 𑀫𑀢𑁆𑀣𑀓𑁂 𑀙𑀺𑀤𑁆𑀤𑀢𑁆𑀢𑀁 𑀙𑀺𑀤𑁆𑀤𑀪𑀸𑀯𑁄, 𑀅𑀬𑀁 𑀩𑀻𑀚𑀚𑁄 𑀩𑀻𑀚𑀢𑁄 𑀚𑀸𑀢𑁄 𑀦𑀺𑀬𑀸𑀫𑁄. 𑀢𑀺𑀳𑁂𑀢𑀼𑀓𑀓𑀫𑁆𑀫𑀁 𑀢𑀺𑀳𑁂𑀢𑀼𑀓𑀜𑁆𑀘 𑀯𑀺𑀧𑀸𑀓𑀁 𑀤𑀼𑀳𑁂𑀢𑀼𑀓𑀜𑁆𑀘 𑀯𑀺𑀧𑀸𑀓𑀁 𑀅𑀳𑁂𑀢𑀼𑀓𑀜𑁆𑀘 𑀯𑀺𑀧𑀸𑀓𑀁 𑀬𑀢𑁄 𑀬𑀁 𑀓𑀫𑁆𑀫𑀁 𑀤𑁂𑀢𑀺, 𑀅𑀬𑀁 𑀓𑀫𑁆𑀫𑀦𑀺𑀬𑀸𑀫𑀢𑀸. 𑀩𑁄𑀥𑀺𑀲𑀢𑁆𑀢𑀲𑁆𑀲 𑀚𑀸𑀢𑀺𑀬𑀁 𑀚𑀺𑀦𑀗𑁆𑀓𑀼𑀭𑀲𑁆𑀲 𑀚𑀸𑀢𑀺𑀓𑁆𑀔𑀡𑁂 𑀫𑁂𑀤𑀦𑀻𑀓𑀫𑁆𑀧𑀦𑀸𑀤𑀺𑀓𑀁 𑀅𑀦𑁂𑀓𑀯𑀺𑀲𑁂𑀲𑀢𑁆𑀢𑀁, 𑀅𑀬𑀁 𑀲𑀻𑀮𑀸𑀤𑀺𑀧𑀸𑀭𑀫𑀻𑀥𑀫𑁆𑀫𑀦𑀺𑀬𑀸𑀫𑀢𑀸. 𑀢𑁂𑀦 𑀕𑁄𑀘𑀭𑁂𑀦 𑀧𑀲𑀸𑀤𑀲𑁆𑀫𑀺𑀁 𑀖𑀝𑁆𑀝𑀺𑀢𑁂 𑀲𑀢𑀺 𑀇𑀥 𑀇𑀫𑀲𑁆𑀫𑀺𑀁 𑀘𑀺𑀢𑁆𑀢𑀯𑀻𑀣𑀺𑀬𑀁 𑀆𑀯𑀚𑁆𑀚𑀦𑀸𑀤𑀻𑀦𑀁 𑀘𑀺𑀢𑁆𑀢𑀸𑀦𑀁 𑀉𑀧𑁆𑀧𑀢𑁆𑀢𑀺, 𑀅𑀬𑀁 𑀘𑀺𑀢𑁆𑀢𑀦𑀺𑀬𑀸𑀫𑀢𑀸.

𑁪𑁭𑁪. 𑀬𑁄 𑀧𑀼𑀕𑁆𑀕𑀮𑁄 𑀥𑀻𑀭𑁄 𑀥𑀻𑀭𑀲𑀫𑁆𑀧𑀦𑁆𑀦𑁄 𑀕𑀼𑀡𑀲𑀫𑁆𑀧𑀦𑁆𑀦𑁄 𑀯𑀺𑀓𑁆𑀔𑀺𑀢𑁆𑀢𑀧𑀸𑀧𑁄 𑀫𑁄𑀳𑀦𑁆𑀥𑀓𑀸𑀭𑀸𑀧𑀕𑀫𑀁 𑀅𑀦𑁆𑀥𑀓𑀸𑀭𑀫𑀦𑀺𑀲𑁆𑀲𑀸𑀬 𑀅𑀯𑀺𑀚𑁆𑀚𑀸𑀦𑀺𑀲𑁆𑀲𑀭𑀡𑀁 𑀬𑀤𑀺𑀘𑁆𑀙𑁂 𑀲𑀘𑁂 𑀇𑀘𑁆𑀙𑁂𑀬𑁆𑀬, 𑀲𑁄 𑀥𑀻𑀭𑁄 𑀇𑀫𑀁 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑀧𑁆𑀧𑀓𑀭𑀡𑀁 𑀅𑀦𑁆𑀥𑀚𑁆𑀚𑀦𑀸𑀦𑀁 𑀅𑀦𑁆𑀥𑀲𑀤𑀺𑀲𑀩𑀸𑀮𑀚𑀦𑀸𑀦𑀁 𑀳𑀤𑀬𑀦𑁆𑀥𑀓𑀸𑀭𑀁 𑀯𑀺𑀤𑁆𑀥𑀁𑀲𑀦𑀁 𑀅𑀦𑁆𑀥𑀓𑀸𑀭𑀲𑀦𑁆𑀦𑀺𑀲𑁆𑀲𑀺𑀢𑀲𑁆𑀲 𑀬𑀲𑁆𑀲 𑀳𑀤𑀬𑀲𑁆𑀲 𑀯𑀺𑀤𑁆𑀥𑀁𑀲𑀦𑀓𑀭𑀁 𑀚𑀮𑀦𑁆𑀢𑀁 𑀤𑀻𑀧𑀁 𑀚𑀮𑀫𑀸𑀦𑀁 𑀤𑀻𑀧𑀁. 𑀧𑀬𑀢𑁆𑀢𑁄𑀢𑀺 𑀧𑀓𑀸𑀭𑁂𑀦 𑀬𑀢𑀢𑀺 𑀯𑀻𑀭𑀺𑀬𑀁 𑀓𑀭𑁄𑀢𑀻𑀢𑀺 𑀧𑀬𑀢𑁆𑀢𑁄, 𑀲𑀢𑀢𑀁 𑀲𑀩𑁆𑀩𑀤𑀸 𑀲𑀺𑀓𑁆𑀔𑁂𑀣 𑀲𑀚𑁆𑀛𑀸𑀬𑀦𑀥𑀸𑀭𑀡𑀘𑀺𑀦𑁆𑀢𑀦𑀯𑀲𑁂𑀦 𑀲𑀺𑀓𑁆𑀔𑁂𑀬𑁆𑀬.

𑀇𑀢𑀺 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑀝𑀻𑀓𑀸𑀬

𑀯𑀺𑀧𑀸𑀓𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀢𑁆𑀢𑀫𑁄 𑀧𑀭𑀺𑀘𑁆𑀙𑁂𑀤𑁄.