𑁬. 𑀙𑀝𑁆𑀞𑁄 𑀧𑀭𑀺𑀘𑁆𑀙𑁂𑀤𑁄

𑀆𑀭𑀫𑁆𑀫𑀡𑀯𑀺𑀪𑀸𑀕𑀯𑀡𑁆𑀡𑀦𑀸

𑁨𑁯𑁧. 𑀏𑀢𑁂𑀲𑀁 𑀧𑀦 𑀘𑀺𑀢𑁆𑀢𑀸𑀦𑀁, 𑀆𑀭𑀫𑁆𑀫𑀡𑀫𑀺𑀢𑁄 𑀧𑀭𑀁;

𑀤𑀲𑁆𑀲𑀬𑀺𑀲𑁆𑀲𑀸𑀫𑀳𑀁 𑀢𑁂𑀦, 𑀯𑀺𑀦𑀸 𑀦𑀢𑁆𑀣𑀺 𑀳𑀺 𑀲𑀫𑁆𑀪𑀯𑁄.

𑀇𑀢𑁄 𑀧𑀭𑀁 𑀇𑀢𑁄 𑀧𑀭𑀺𑀘𑁆𑀙𑁂𑀤𑀢𑁄 𑀧𑀭𑀁 𑀅𑀳𑀁 𑀏𑀢𑁂𑀲𑀁 𑀧𑀦 𑀘𑀺𑀢𑁆𑀢𑀸𑀦𑀁 𑀆𑀭𑀫𑁆𑀫𑀡𑀁 𑀤𑀲𑁆𑀲𑀬𑀺𑀲𑁆𑀲𑀸𑀫𑀺. 𑀳𑀺 𑀓𑀲𑁆𑀫𑀸? 𑀢𑁂𑀦 𑀯𑀺𑀦𑀸 𑀢𑀁 𑀆𑀭𑀫𑁆𑀫𑀡𑀁 𑀯𑀚𑁆𑀚𑁂𑀢𑁆𑀯𑀸 𑀘𑀺𑀢𑁆𑀢𑀸𑀦𑀁 𑀲𑀫𑁆𑀪𑀯𑁄 𑀦𑀢𑁆𑀣𑀺 𑀬𑀲𑁆𑀫𑀸 𑀓𑀸𑀭𑀡𑀸, 𑀢𑀲𑁆𑀫𑀸 𑀓𑀸𑀭𑀡𑀸 𑀤𑀲𑁆𑀲𑀬𑀺𑀲𑁆𑀲𑀸𑀫𑀺.

𑁨𑁯𑁨. 𑀭𑀽𑀧𑀁 𑀲𑀤𑁆𑀤𑀁 𑀕𑀦𑁆𑀥𑀁 𑀭𑀲𑀁, 𑀨𑁄𑀝𑁆𑀞𑀩𑁆𑀩𑀁 𑀥𑀫𑁆𑀫𑀫𑁂𑀯 𑀘;

𑀙𑀥𑀸 𑀆𑀭𑀫𑁆𑀫𑀡𑀁 𑀆𑀳𑀼, 𑀙𑀴𑀸𑀭𑀫𑁆𑀫𑀡𑀓𑁄𑀯𑀺𑀤𑀸.

𑀙𑀴𑀸𑀭𑀫𑁆𑀫𑀡𑁂𑀲𑀼 𑀙𑁂𑀓𑀸 𑀧𑀡𑁆𑀟𑀺𑀢𑀸 𑀆𑀭𑀫𑁆𑀫𑀡𑀁 𑀙𑀥𑀸 𑀙𑀧𑁆𑀧𑀓𑀸𑀭𑀁 𑀆𑀳𑀼 𑀓𑀣𑁂𑀲𑀼𑀁.

𑁨𑁯𑁩. 𑀢𑀢𑁆𑀣 𑀪𑀽𑀢𑁂 𑀉𑀧𑀸𑀤𑀸𑀬. 𑀢𑀢𑁆𑀣 𑀢𑁂𑀲𑀼 𑀆𑀭𑀫𑁆𑀫𑀡𑁂𑀲𑀼 𑀪𑀽𑀢𑁂 𑀉𑀧𑀸𑀤𑀸𑀬 𑀪𑀽𑀢𑁂 𑀧𑀝𑀺𑀘𑁆𑀘 𑀯𑀡𑁆𑀡𑁄 𑀘𑀢𑀼𑀲𑀫𑀼𑀝𑁆𑀞𑀺𑀢𑁄 𑀓𑀫𑁆𑀫𑀘𑀺𑀢𑁆𑀢𑀉𑀢𑀼𑀆𑀳𑀸𑀭𑀲𑀗𑁆𑀔𑀸𑀢𑁂𑀳𑀺 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀲𑀫𑀼𑀝𑁆𑀞𑀺𑀢𑁄 𑀦𑀺𑀩𑁆𑀩𑀢𑁆𑀢𑁄 𑀦𑀺𑀤𑀲𑁆𑀲𑀦𑁂𑀦 𑀲𑀳 𑀧𑀯𑀢𑁆𑀢𑁄 𑀧𑀝𑀺𑀖𑁂𑀦 𑀲𑀳 𑀧𑀯𑀢𑁆𑀢𑁄 𑀭𑀽𑀧𑀸𑀭𑀫𑁆𑀫𑀡𑀲𑀜𑁆𑀜𑀺𑀢𑁄.

𑁨𑁯𑁪. 𑀤𑀼𑀯𑀺𑀥𑁄𑀧𑀺 𑀲𑀫𑀼𑀤𑁆𑀤𑀺𑀝𑁆𑀞𑁄, 𑀲𑀤𑁆𑀤𑁄 𑀘𑀺𑀢𑁆𑀢𑁄𑀢𑀼𑀲𑀫𑁆𑀪𑀯𑁄 𑀲𑀤𑁆𑀤𑁄 𑀤𑀼𑀯𑀺𑀥𑁄𑀧𑀺 𑀫𑀼𑀦𑀺𑀦𑀸 𑀲𑀫𑀼𑀤𑁆𑀤𑀺𑀝𑁆𑀞𑁄 𑀘𑀺𑀢𑁆𑀢𑁄𑀢𑀼𑀲𑀫𑁆𑀪𑀯𑁄, 𑀲𑀯𑀺𑀜𑁆𑀜𑀸𑀡𑀓𑀲𑀤𑁆𑀤𑁄𑀯 𑀘𑀺𑀢𑁆𑀢𑀲𑀫𑀼𑀝𑁆𑀞𑀺𑀢𑁄 𑀳𑁄𑀢𑀺. 𑀓𑀣𑀁? 𑀯𑀘𑀻𑀪𑁂𑀤𑀓𑀘𑀺𑀢𑁆𑀢𑁂𑀦 𑀪𑀽𑀢𑀸𑀬 𑀚𑀸𑀢𑀸𑀬 𑀪𑀽𑀫𑀺𑀬𑀸 𑀧𑀣𑀯𑀻𑀥𑀸𑀢𑀼𑀬𑀸 𑀯𑀺𑀓𑀸𑀭𑀢𑀸 𑀧𑀣𑀯𑀻𑀮𑀓𑁆𑀔𑀡𑀪𑀸𑀯𑀢𑁄 𑀅𑀢𑀺𑀣𑀤𑁆𑀥𑀮𑀓𑁆𑀔𑀡𑀢𑀸 𑀯𑀺𑀓𑀸𑀭𑀢𑀸 𑀦𑀸𑀫. 𑀲𑀸 𑀯𑀘𑀻𑀯𑀺𑀜𑁆𑀜𑀢𑁆𑀢𑀺 𑀯𑀺𑀜𑁆𑀜𑀸𑀬𑀢𑀻𑀢𑀺 𑀯𑀺𑀜𑁆𑀜𑀢𑁆𑀢𑀺𑀬𑀸 𑀉𑀧𑀸𑀤𑀺𑀡𑁆𑀡𑀖𑀝𑁆𑀝𑀦𑀲𑁆𑀲 𑀓𑀫𑁆𑀫𑀚𑀧𑀣𑀯𑀻𑀥𑀸𑀢𑀼𑀬𑀸 𑀖𑀝𑁆𑀝𑀦𑀲𑁆𑀲 𑀓𑀸𑀭𑀡𑀁 𑀘𑀺𑀢𑁆𑀢𑀚𑀧𑀣𑀯𑀻𑀥𑀸𑀢𑀼𑀬𑀸 𑀓𑀫𑁆𑀫𑀚𑀧𑀣𑀯𑀻𑀥𑀸𑀢𑀼𑀬𑀸 𑀖𑀝𑁆𑀝𑀦𑀜𑁆𑀘 𑀲𑀤𑁆𑀤𑁄 𑀘 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀳𑁄𑀢𑀺.

𑁨𑁯𑁫. 𑀅𑀯𑀺𑀜𑁆𑀜𑀸𑀡𑀓𑀲𑀤𑁆𑀤𑁄 𑀬𑁄 𑀲𑁄 𑀅𑀯𑀺𑀜𑁆𑀜𑀸𑀡𑀓𑀲𑀤𑁆𑀤𑁄 𑀉𑀢𑀼𑀲𑀫𑀼𑀝𑁆𑀞𑀺𑀢𑁄 𑀳𑁄𑀢𑀺. 𑀅𑀬𑀁 𑀤𑀼𑀯𑀺𑀥𑁄𑀧𑀺 𑀲𑀤𑁆𑀤𑁄 𑀲𑀤𑁆𑀤𑀸𑀭𑀫𑁆𑀫𑀡𑀢𑀁 𑀕𑀢𑁄 𑀲𑀤𑁆𑀤𑀸𑀭𑀫𑁆𑀫𑀡𑀪𑀸𑀯𑀁 𑀧𑀢𑁆𑀢𑁄.

𑁨𑁯𑁬. 𑀥𑀭𑀻𑀬𑀢𑀻𑀢𑀺 𑀕𑀘𑁆𑀙𑀦𑁆𑀢𑁄 𑀕𑀘𑁆𑀙𑀦𑁆𑀢𑁄 𑀚𑀦𑁂𑀳𑀺 𑀥𑀭𑀻𑀬𑀢𑁂𑀢𑀺 𑀕𑀦𑁆𑀥𑁄. 𑀕𑀫𑀼 𑀲𑀧𑁆𑀧 𑀕𑀢𑀺𑀫𑁆𑀳𑀺, 𑀥𑀭 𑀥𑀸𑀭𑀡𑁂. 𑀲𑀽𑀘𑀦𑀢𑁄 𑀅𑀢𑁆𑀢𑀦𑁄 𑀲𑀸𑀥𑀸𑀭𑀡𑀲𑁆𑀲 𑀧𑀼𑀧𑁆𑀨𑀸𑀤𑀺𑀦𑁄 𑀯𑀢𑁆𑀣𑀼𑀲𑁆𑀲 𑀧𑀓𑀸𑀲𑀦𑀢𑁄𑀧𑀺 𑀯𑀸 𑀕𑀦𑁆𑀥𑁄 𑀦𑀸𑀫. 𑀕𑀦𑁆𑀥 𑀲𑀽𑀘𑀦𑁂. 𑀅𑀬𑀁 𑀕𑀦𑁆𑀥𑁄 𑀘𑀢𑀽𑀳𑀺 𑀲𑀫𑀼𑀝𑁆𑀞𑀸𑀦𑀁 𑀏𑀢𑀲𑁆𑀲𑀸𑀢𑀺 𑀘𑀢𑀼𑀲𑀫𑀼𑀝𑁆𑀞𑀸𑀦𑁄. 𑀕𑀦𑁆𑀥𑀸𑀭𑀫𑁆𑀫𑀡𑀲𑀫𑁆𑀫𑀢𑁄.

𑁨𑁯𑁭. 𑀭𑀲𑀫𑀸𑀦𑀸 𑀭𑀲𑀦𑁆𑀢𑀻𑀢𑀺, 𑀭𑀲𑁄𑀢𑀺 𑀧𑀭𑀺𑀓𑀺𑀢𑁆𑀢𑀺𑀢𑁄 𑀚𑀦𑀸 𑀭𑀲𑀫𑀸𑀦𑀸 𑀬𑀁 𑀥𑀫𑁆𑀫𑀚𑀸𑀢𑀁 𑀭𑀲𑀦𑁆𑀢𑀺 𑀅𑀦𑀼𑀪𑀯𑀦𑁆𑀢𑀺, 𑀇𑀢𑀺 𑀬𑀲𑁆𑀫𑀸 𑀓𑀸𑀭𑀡𑀸, 𑀢𑀲𑁆𑀫𑀸 𑀓𑀸𑀭𑀡𑀸 𑀭𑀲𑁄 𑀇𑀢𑀺 𑀭𑀲𑁄 𑀦𑀸𑀫 𑀧𑀡𑁆𑀟𑀺𑀢𑁂𑀳𑀺 𑀧𑀭𑀺𑀓𑀺𑀢𑁆𑀢𑀺𑀢𑁄, 𑀲𑁄 𑀭𑀲𑁄 𑀘𑀢𑀼𑀲𑀫𑁆𑀪𑀽𑀢𑁄 𑀭𑀲𑀸𑀭𑀫𑁆𑀫𑀡𑀦𑀸𑀫𑀓𑁄.

𑁨𑁯𑁮. 𑀨𑀼𑀲𑀻𑀬𑀢𑀻𑀢𑀺 𑀨𑁄𑀝𑁆𑀞𑀩𑁆𑀩𑀁 𑀬𑀁 𑀥𑀫𑁆𑀫𑀚𑀸𑀢𑀁 𑀚𑀦𑁂𑀳𑀺 𑀨𑀼𑀲𑀻𑀬𑀢𑀻𑀢𑀺 𑀢𑀲𑁆𑀫𑀸 𑀨𑁄𑀝𑁆𑀞𑀩𑁆𑀩𑀁, 𑀧𑀣𑀯𑀻𑀢𑁂𑀚𑀯𑀸𑀬𑀯𑁄. 𑀢𑀁 𑀨𑁄𑀝𑁆𑀞𑀩𑁆𑀩𑀁 𑀘𑀢𑀼𑀲𑀫𑁆𑀪𑀽𑀢𑀁 𑀨𑁄𑀝𑁆𑀞𑀩𑁆𑀩𑀸𑀭𑀫𑁆𑀫𑀡𑀁 𑀫𑀢𑀁.

𑁨𑁯𑁯. 𑀲𑀩𑁆𑀩𑀁 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘, 𑀳𑀺𑀢𑁆𑀯𑀸 𑀭𑀽𑀧𑀸𑀤𑀺𑀧𑀜𑁆𑀘𑀓𑀁 𑀭𑀽𑀧𑀸𑀤𑀺𑀧𑀜𑁆𑀘𑀓𑀁 𑀳𑀺𑀢𑁆𑀯𑀸 𑀲𑀩𑁆𑀩𑀁 𑀦𑀸𑀫𑀜𑁆𑀘 𑀘𑀺𑀢𑁆𑀢𑀘𑁂𑀢𑀲𑀺𑀓𑀦𑀺𑀩𑁆𑀩𑀸𑀦𑀦𑀸𑀫𑀜𑁆𑀘 𑀭𑀽𑀧𑀜𑁆𑀘 𑀧𑀜𑁆𑀘𑀧𑀲𑀸𑀤𑀲𑀼𑀔𑀼𑀫𑀭𑀽𑀧𑀜𑁆𑀘 𑀮𑀓𑁆𑀔𑀡𑀸𑀦𑀺 𑀘 𑀅𑀦𑀺𑀘𑁆𑀘𑀤𑀼𑀓𑁆𑀔𑀅𑀦𑀢𑁆𑀢𑀮𑀓𑁆𑀔𑀡𑀸𑀦𑀺 𑀘 𑀧𑀜𑁆𑀜𑀢𑁆𑀢𑀺 𑀘 𑀥𑀫𑁆𑀫𑀸𑀭𑀫𑁆𑀫𑀡𑀲𑀜𑁆𑀜𑀺𑀢𑀁.

𑁩𑁦𑁦. 𑀙𑀸𑀭𑀫𑁆𑀫𑀡𑀸𑀦𑀺 𑀮𑀩𑁆𑀪𑀦𑁆𑀢𑀺, 𑀓𑀸𑀫𑀸𑀯𑀘𑀭𑀪𑀽𑀫𑀺𑀬𑀁 𑀓𑀸𑀫𑀸𑀯𑀘𑀭𑀪𑀽𑀫𑀺𑀬𑀁 𑀙𑀸𑀭𑀫𑁆𑀫𑀡𑀸𑀦𑀺 𑀮𑀩𑁆𑀪𑀦𑁆𑀢𑀺. 𑀢𑀻𑀡𑀺 𑀭𑀽𑀧𑀸𑀯𑀘𑀭𑁂 𑀭𑀽𑀧𑀲𑀤𑁆𑀤𑀥𑀫𑁆𑀫𑀸𑀭𑀫𑁆𑀫𑀡𑀯𑀲𑁂𑀦 𑀮𑀩𑁆𑀪𑀦𑁆𑀢𑀺. 𑀅𑀭𑀽𑀧𑁂 𑀧𑀦 𑀏𑀓𑁂𑀓𑀁 𑀥𑀫𑁆𑀫𑀸𑀭𑀫𑁆𑀫𑀡𑀁 𑀮𑀩𑁆𑀪𑀢𑀺.

𑁩𑁦𑁧-𑁩. 𑀔𑀡𑀯𑀢𑁆𑀣𑀼𑀧𑀭𑀺𑀢𑁆𑀢𑀢𑁆𑀢𑀸, 𑀆𑀧𑀸𑀣𑀁 𑀦 𑀯𑀚𑀦𑁆𑀢𑀺 𑀬𑁂 𑀬𑁂 𑀭𑀽𑀧𑀸𑀤𑀬𑁄 𑀧𑀜𑁆𑀘 𑀯𑀺𑀲𑀬𑀸 𑀔𑀡𑀯𑀢𑁆𑀣𑀼𑀧𑀭𑀺𑀢𑁆𑀢𑀢𑁆𑀢𑀸 𑀧𑀜𑁆𑀘𑀸𑀭𑀫𑁆𑀫𑀡𑀸𑀦𑀁 𑀔𑀡𑀲𑁆𑀲 𑀧𑀭𑀺𑀢𑁆𑀢𑀢𑁆𑀢𑀸 𑀫𑀦𑁆𑀤𑀢𑁆𑀢𑀸 𑀢𑁂𑀲𑀁 𑀅𑀧𑁆𑀧𑀸𑀬𑀼𑀓𑀢𑁆𑀢𑀸 𑀯𑀢𑁆𑀣𑀼𑀧𑀭𑀺𑀢𑁆𑀢𑀢𑁆𑀢𑀸 𑀧𑀜𑁆𑀘𑀸𑀭𑀫𑁆𑀫𑀡𑀸𑀦𑀁 𑀅𑀢𑀺𑀔𑀼𑀤𑁆𑀤𑀓𑀯𑀢𑁆𑀣𑀼𑀓𑀢𑁆𑀢𑀸 𑀆𑀧𑀸𑀣𑀁 𑀧𑀜𑁆𑀘𑀤𑁆𑀯𑀸𑀭𑁂𑀲𑀼 𑀧𑀸𑀓𑀝𑀪𑀸𑀯𑀁 𑀦 𑀯𑀚𑀦𑁆𑀢𑀺, 𑀧𑀜𑁆𑀘𑀧𑀲𑀸𑀤𑁂𑀲𑀼 𑀖𑀝𑁆𑀝𑀦𑀓𑀺𑀘𑁆𑀘𑀁 𑀦 𑀲𑀸𑀥𑁂𑀦𑁆𑀢𑀺, 𑀢𑁂 𑀭𑀽𑀧𑀸𑀤𑀬𑁄 𑀧𑀜𑁆𑀘 𑀯𑀺𑀲𑀬𑀸 𑀥𑀫𑁆𑀫𑀸𑀭𑀫𑁆𑀫𑀡𑀁 𑀳𑁄𑀦𑁆𑀢𑀺. 𑀇𑀢𑀺 𑀬𑁂𑀲𑀁 𑀏𑀓𑀘𑁆𑀘𑀸𑀦𑀁 𑀆𑀘𑀭𑀺𑀬𑀸𑀦𑀁 𑀫𑀢𑀁 𑀳𑁄𑀢𑀺. 𑀓𑀺𑀭𑀸𑀢𑀺 𑀅𑀦𑀼𑀲𑁆𑀲𑀯𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀢𑁂 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀸𑀯 𑀢𑁂 𑀏𑀯𑀁 𑀯𑀸𑀤𑀺𑀦𑁄 𑀏𑀓𑀘𑁆𑀘𑁂 𑀆𑀘𑀭𑀺𑀬𑀸 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀸, 𑀫𑀬𑀸 𑀧𑀝𑀺𑀲𑁂𑀥𑀺𑀢𑀩𑁆𑀩𑀸. 𑀓𑀲𑁆𑀫𑀸? 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀲𑁄𑀢𑀯𑀺𑀜𑁆𑀜𑀸𑀡𑀲𑁆𑀲 𑀕𑁄𑀘𑀭𑀪𑀽𑀢𑀁 𑀲𑀤𑁆𑀤𑀁 𑀦 𑀧𑀝𑀺𑀅𑀦𑀼𑀪𑁄𑀢𑀺, 𑀲𑁄𑀢𑀯𑀺𑀜𑁆𑀜𑀸𑀡𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀕𑁄𑀘𑀭𑀪𑀽𑀢𑀁 𑀭𑀽𑀧𑀁 𑀦 𑀧𑀝𑀺𑀅𑀦𑀼𑀪𑁄𑀢𑀺. 𑀇𑀢𑀺 𑀅𑀜𑁆𑀜𑀫𑀜𑁆𑀜𑀲𑁆𑀲 𑀕𑁄𑀘𑀭𑀁 𑀦𑁂𑀯 𑀧𑀘𑁆𑀘𑀦𑀼𑀪𑁄𑀦𑁆𑀢𑀸𑀦𑀁 𑀢𑁂𑀲𑀁 𑀧𑀜𑁆𑀘𑀦𑁆𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀯𑀺𑀜𑁆𑀜𑀸𑀡𑀸𑀦𑀁 𑀢𑀜𑁆𑀘 𑀕𑁄𑀘𑀭𑀁 𑀫𑀦𑁄𑀥𑀸𑀢𑀼𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀗𑁆𑀔𑀸𑀢𑀁 𑀚𑀯𑀦𑀁 𑀧𑀦 𑀧𑀘𑁆𑀘𑀦𑀼𑀪𑁄𑀢𑀺. 𑀇𑀢𑀺 𑀯𑀘𑀦𑀲𑁆𑀲 𑀪𑀕𑀯𑀢𑀸 𑀯𑀼𑀢𑁆𑀢𑀢𑁆𑀢𑀸 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀸. 𑀭𑀽𑀧𑀸𑀤𑀬𑁄 𑀧𑀦 𑀯𑀺𑀲𑀬𑀸 𑀭𑀽𑀧𑀸𑀤𑀺𑀧𑀜𑁆𑀘𑀸𑀭𑀫𑁆𑀫𑀡𑀸𑀦𑀺 𑀏𑀯 𑀳𑁄𑀦𑁆𑀢𑀺.

𑁩𑁦𑁪-𑁬. 𑀤𑀺𑀩𑁆𑀩𑀘𑀓𑁆𑀔𑀸𑀤𑀺𑀜𑀸𑀡𑀸𑀦𑀁, 𑀭𑀽𑀧𑀸𑀤𑀻𑀦𑁂𑀯 𑀕𑁄𑀘𑀭𑀸 𑀢𑀸𑀦𑀺 𑀭𑀽𑀧𑀸𑀤𑀻𑀦𑀺 𑀏𑀯 𑀕𑁄𑀘𑀭𑀸 𑀤𑀺𑀩𑁆𑀩𑀘𑀓𑁆𑀔𑀸𑀤𑀺𑀜𑀸𑀡𑀸𑀦𑀁 𑀅𑀦𑀸𑀧𑀸𑀣𑀕𑀢𑀸𑀦𑀁 𑀏𑀯 𑀧𑀸𑀓𑀝𑀪𑀸𑀯𑀁 𑀅𑀧𑁆𑀧𑀢𑁆𑀢𑀸𑀦𑁂𑀯. 𑀇𑀢𑀺𑀧𑀺 𑀯𑀘𑀦𑀁 𑀯𑀼𑀢𑁆𑀢𑀁 𑀦 𑀬𑀼𑀚𑁆𑀚𑀢𑀺. 𑀬𑀁 𑀥𑀫𑁆𑀫𑀚𑀸𑀢𑀁 𑀭𑀽𑀧𑀸𑀭𑀫𑁆𑀫𑀡𑀁 𑀪𑀯𑀦𑁆𑀢𑀁, 𑀢𑀁 𑀥𑀫𑁆𑀫𑀚𑀸𑀢𑀁 𑀓𑀣𑀁 𑀓𑁂𑀦 𑀧𑀓𑀸𑀭𑁂𑀦 𑀥𑀫𑁆𑀫𑀸𑀭𑀫𑁆𑀫𑀡𑀁 𑀪𑀯𑁂𑀬𑁆𑀬? 𑀏𑀯𑀁 𑀲𑀢𑀺 𑀭𑀽𑀧𑀸𑀭𑀫𑁆𑀫𑀡𑀲𑁆𑀲 𑀥𑀫𑁆𑀫𑀸𑀭𑀫𑁆𑀫𑀡𑀢𑁆𑀢𑁂 𑀲𑀢𑀺 𑀏𑀢𑁂𑀲𑀁 𑀭𑀽𑀧𑀸𑀭𑀫𑁆𑀫𑀡𑀥𑀫𑁆𑀫𑀸𑀭𑀫𑁆𑀫𑀡𑀸𑀦𑀁 𑀦𑀺𑀬𑀫𑁄𑀧𑀺 𑀓𑀣𑀁 𑀪𑀯𑁂 𑀓𑁂𑀦 𑀧𑀓𑀸𑀭𑁂𑀦 𑀪𑀯𑁂𑀬𑁆𑀬? 𑀲𑀩𑁆𑀩𑀁 𑀆𑀭𑀫𑁆𑀫𑀡𑀁 𑀏𑀢𑀁 𑀏𑀢𑀁 𑀲𑀩𑁆𑀩𑀁 𑀆𑀭𑀫𑁆𑀫𑀡𑀁 𑀙𑀩𑁆𑀩𑀺𑀥𑀁 𑀙𑀧𑁆𑀧𑀓𑀸𑀭𑀁 𑀪𑀕𑀯𑀢𑀸 𑀲𑀫𑀼𑀤𑀻𑀭𑀺𑀢𑀁. 𑀢𑀁 𑀧𑀭𑀺𑀢𑁆𑀢𑀢𑁆𑀢𑀺𑀓𑀸𑀤𑀻𑀦𑀁 𑀯𑀲𑁂𑀦 𑀩𑀳𑀼𑀧𑁆𑀧𑀓𑀸𑀭𑁂𑀳𑀺 𑀫𑀢𑀁.

𑁩𑁦𑁭. 𑀲𑀩𑁆𑀩𑁄 𑀓𑀸𑀫𑀯𑀺𑀧𑀸𑀓𑁄 𑀘 𑀲𑀩𑁆𑀩𑁄 𑀢𑁂𑀯𑀻𑀲𑀢𑀺𑀓𑀸𑀫𑀯𑀺𑀧𑀸𑀓𑁄 𑀘 𑀓𑁆𑀭𑀺𑀬𑀸𑀳𑁂𑀢𑀼𑀤𑁆𑀯𑀬𑀫𑁆𑀧𑀺 𑀘 𑀫𑀦𑁄𑀥𑀸𑀢𑀼𑀳𑀲𑀺𑀢𑀼𑀧𑁆𑀧𑀸𑀤𑀯𑀲𑁂𑀦 𑀓𑀺𑀭𑀺𑀬𑀸𑀳𑁂𑀢𑀼𑀤𑁆𑀯𑀬𑀫𑁆𑀧𑀺 𑀘𑀸𑀢𑀺 𑀧𑀜𑁆𑀘𑀯𑀻𑀲𑀢𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀏𑀓𑀦𑁆𑀢𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸 𑀏𑀓𑀦𑁆𑀢𑀓𑀸𑀫𑀸𑀯𑀘𑀭𑀸𑀭𑀫𑁆𑀫𑀡𑀸 𑀲𑀺𑀬𑀼𑀁 𑀪𑀯𑁂𑀬𑁆𑀬𑀼𑀁.

𑁩𑁦𑁮-𑁧𑁦. 𑀇𑀝𑁆𑀞𑀸𑀤𑀺𑀪𑁂𑀤𑀸 𑀧𑀜𑁆𑀘𑁂𑀯, 𑀭𑀽𑀧𑀲𑀤𑁆𑀤𑀸𑀤𑀬𑁄 𑀧𑀦 𑀤𑁆𑀯𑀺𑀧𑀜𑁆𑀘𑀦𑁆𑀦𑀁 𑀯𑀺𑀜𑁆𑀜𑀸𑀡𑀸𑀦𑀁 𑀧𑀝𑀺𑀧𑀸𑀝𑀺𑀬𑀸 𑀅𑀦𑀼𑀓𑁆𑀓𑀫𑁂𑀦 𑀕𑁄𑀘𑀭𑀸 𑀳𑁄𑀦𑁆𑀢𑀺. 𑀭𑀽𑀧𑀸𑀤𑀺𑀧𑀜𑁆𑀘𑀓𑀁 𑀲𑀩𑁆𑀩𑀁, 𑀫𑀦𑁄𑀥𑀸𑀢𑀼𑀢𑁆𑀢𑀬𑀲𑁆𑀲 𑀢𑀼 𑀫𑀦𑁄𑀥𑀸𑀢𑀼𑀢𑁆𑀢𑀬𑀲𑁆𑀲 𑀧𑀦 𑀲𑀩𑁆𑀩𑀁 𑀭𑀽𑀧𑀸𑀤𑀺𑀧𑀜𑁆𑀘𑀓𑀁 𑀆𑀭𑀫𑁆𑀫𑀡𑀁 𑀳𑁄𑀢𑀺, 𑀏𑀢𑁂𑀲𑀁 𑀢𑁂𑀭𑀲𑀦𑁆𑀦𑀁 𑀧𑀦 𑀘𑀺𑀢𑁆𑀢𑀸𑀦𑀁 𑀭𑀽𑀧𑀓𑁆𑀔𑀦𑁆𑀥𑁄𑀯 𑀕𑁄𑀘𑀭𑁄 𑀆𑀭𑀫𑁆𑀫𑀡𑀁 𑀳𑁄𑀢𑀺. 𑀦𑀸𑀭𑀽𑀧𑀁 𑀦𑀸𑀫𑀁 𑀆𑀭𑀫𑁆𑀫𑀡𑀁 𑀦 𑀓𑀭𑁄𑀦𑁆𑀢𑀺. 𑀦 𑀘 𑀧𑀜𑁆𑀜𑀢𑁆𑀢𑀺𑀁 𑀧𑀜𑁆𑀜𑀢𑁆𑀢𑀺𑀁 𑀆𑀭𑀫𑁆𑀫𑀡𑀁 𑀦 𑀓𑀭𑁄𑀦𑁆𑀢𑀺. 𑀦𑀸𑀢𑀻𑀢𑀁 𑀅𑀢𑀻𑀢𑀁 𑀆𑀭𑀫𑁆𑀫𑀡𑀁 𑀦 𑀓𑀭𑁄𑀦𑁆𑀢𑀺. 𑀦 𑀘𑀦𑀸𑀕𑀢𑀁 𑀅𑀦𑀸𑀕𑀢𑀁 𑀆𑀭𑀫𑁆𑀫𑀡𑀁 𑀦 𑀓𑀭𑁄𑀦𑁆𑀢𑀺 𑀏𑀯. 𑀳𑀺 𑀲𑀘𑁆𑀘𑀁 𑀯𑀢𑁆𑀢𑀫𑀸𑀦𑁄 𑀕𑁄𑀘𑀭𑁄 𑀏𑀢𑁂𑀲𑀁 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀁, 𑀫𑀦𑁄𑀥𑀸𑀢𑀼𑀢𑁆𑀢𑀬𑀲𑁆𑀲 𑀘𑀸𑀢𑀺 𑀢𑁂𑀭𑀲𑀦𑁆𑀦𑀁 𑀘𑀺𑀢𑁆𑀢𑀸𑀦𑀁 𑀢𑀁 𑀆𑀭𑀫𑁆𑀫𑀡𑀁 𑀯𑀢𑁆𑀢𑀫𑀸𑀦𑀁 𑀏𑀯 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀏𑀯.

𑁩𑁧𑁧. 𑀢𑁂𑀭𑀲𑁂𑀢𑀸𑀦𑀺 𑀘𑀺𑀢𑁆𑀢𑀸𑀦𑀺, 𑀚𑀸𑀬𑀦𑁆𑀢𑁂 𑀓𑀸𑀫𑀥𑀸𑀢𑀼𑀬𑀁 𑀏𑀢𑀸𑀦𑀺 𑀢𑁂𑀭𑀲 𑀘𑀺𑀢𑁆𑀢𑀸𑀦𑀺 𑀓𑀸𑀫𑀥𑀸𑀢𑀼𑀬𑀁 𑀚𑀸𑀬𑀦𑁆𑀢𑀺, 𑀭𑀽𑀧𑀸𑀯𑀘𑀭𑁂 𑀧𑀼𑀜𑁆𑀜𑀚𑀸𑀦𑀺 𑀘𑀓𑁆𑀔𑀼𑀲𑁄𑀢𑀯𑀺𑀜𑁆𑀜𑀸𑀡𑀲𑀫𑁆𑀧𑀝𑀺𑀘𑁆𑀙𑀦𑀸𑀦𑀺, 𑀓𑀺𑀭𑀺𑀬𑀸𑀫𑀦𑁄𑀥𑀸𑀢𑀼 𑀘𑀸𑀢𑀺 𑀘𑀢𑁆𑀢𑀸𑀭𑀺 𑀘𑀺𑀢𑁆𑀢𑀸𑀦𑀺 𑀚𑀸𑀬𑀦𑁆𑀢𑀺. 𑀅𑀭𑀽𑀧𑀺𑀲𑀼 𑀅𑀭𑀽𑀧𑀪𑀽𑀫𑀻𑀲𑀼 𑀦𑁂𑀯 𑀓𑀺𑀜𑁆𑀘𑀺𑀧𑀺 𑀏𑀓𑀫𑁆𑀧𑀺 𑀘𑀺𑀢𑁆𑀢𑀁 𑀦𑁂𑀯 𑀚𑀸𑀬𑀢𑀺.

𑁩𑁧𑁨-𑁩. 𑀫𑀳𑀸𑀧𑀸𑀓𑀸𑀦𑀫𑀝𑁆𑀞𑀦𑁆𑀦𑀁 𑀅𑀝𑁆𑀞𑀦𑁆𑀦𑀁 𑀫𑀳𑀸𑀯𑀺𑀧𑀸𑀓𑀸𑀦𑀁 𑀧𑀯𑀢𑁆𑀢𑀺𑀬𑀁 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀢𑀤𑀸𑀭𑀫𑁆𑀫𑀡𑀓𑀺𑀘𑁆𑀘𑀸𑀦𑀁 𑀭𑀽𑀧𑀸𑀤𑀺𑀙𑀧𑀭𑀺𑀢𑁆𑀢𑀸𑀦𑀺 𑀕𑁄𑀘𑀭𑀸. 𑀲𑀦𑁆𑀢𑀻𑀭𑀡𑀢𑁆𑀢𑀬𑀲𑁆𑀲𑀧𑀺 𑀧𑀯𑀢𑁆𑀢𑀺𑀬𑀁 𑀧𑀜𑁆𑀘𑀤𑁆𑀯𑀸𑀭𑁂 𑀲𑀦𑁆𑀢𑀻𑀭𑀡𑀢𑁆𑀢𑀬𑀓𑀺𑀘𑁆𑀘𑀲𑁆𑀲, 𑀙𑀤𑁆𑀯𑀸𑀭𑁂𑀲𑀼 𑀢𑀤𑀸𑀮𑀫𑁆𑀩𑀡𑀓𑀺𑀘𑁆𑀘𑀲𑁆𑀲 𑀘 𑀭𑀽𑀧𑀸𑀤𑀺𑀙𑀧𑀭𑀺𑀢𑁆𑀢𑀸𑀦𑀺 𑀕𑁄𑀘𑀭𑀸. 𑀭𑀽𑀧𑀸𑀤𑀬𑁄 𑀧𑀭𑀺𑀢𑁆𑀢𑀸 𑀙, 𑀳𑀲𑀺𑀢𑀼𑀧𑁆𑀧𑀸𑀤𑀕𑁄𑀘𑀭𑀸 𑀳𑀲𑀺𑀢𑀼𑀧𑁆𑀧𑀸𑀤𑀲𑁆𑀲 𑀭𑀽𑀧𑀸𑀤𑀬𑁄 𑀙 𑀧𑀭𑀺𑀢𑁆𑀢𑀸 𑀕𑁄𑀘𑀭𑀸 𑀳𑁄𑀦𑁆𑀢𑀺. 𑀧𑀜𑁆𑀘𑀤𑁆𑀯𑀸𑀭𑁂 𑀧𑀝𑀼𑀧𑁆𑀧𑀦𑁆𑀦𑀸 𑀧𑀜𑁆𑀘𑀲𑀼 𑀤𑁆𑀯𑀸𑀭𑁂𑀲𑀼 𑀬𑁂 𑀕𑁄𑀘𑀭𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸, 𑀫𑀦𑁄𑀤𑁆𑀯𑀸𑀭𑁂 𑀢𑀺𑀓𑀸𑀮𑀺𑀓𑀸 𑀬𑁂 𑀕𑁄𑀘𑀭𑀸 𑀢𑀺𑀓𑀸𑀮𑀺𑀓𑀸 𑀢𑀻𑀲𑀼 𑀓𑀸𑀮𑁂𑀲𑀼 𑀦𑀺𑀬𑀼𑀢𑁆𑀢𑀸.

𑁩𑁧𑁪-𑁫. 𑀤𑀼𑀢𑀺𑀬𑀸𑀭𑀼𑀧𑁆𑀧𑀘𑀺𑀢𑁆𑀢𑀜𑁆𑀘, 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀫𑀸𑀦𑀲𑀁 𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀸𑀯𑀲𑁂𑀦 𑀙𑀩𑁆𑀩𑀺𑀥𑀁 𑀘𑀺𑀢𑁆𑀢𑀁 𑀫𑀳𑀕𑁆𑀕𑀢𑀕𑁄𑀘𑀭𑀁 𑀦𑀺𑀬𑀢𑀁 𑀦𑀺𑀬𑀢𑀸𑀭𑀫𑁆𑀫𑀡𑀁 𑀳𑁄𑀢𑀺, 𑀢𑀁 𑀙𑀩𑁆𑀩𑀺𑀥𑀁 𑀘𑀺𑀢𑁆𑀢𑀁 𑀫𑀳𑀕𑁆𑀕𑀢𑀕𑁄𑀘𑀭𑀁 𑀧𑀼𑀩𑁆𑀩𑁂 𑀅𑀢𑁆𑀢𑀦𑀸 𑀅𑀥𑀺𑀕𑀢𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀓𑀼𑀲𑀮𑀸𑀭𑀫𑁆𑀫𑀡𑀁, 𑀢𑁂𑀲𑀼 𑀤𑁆𑀯𑁂 𑀤𑀼𑀢𑀺𑀬𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀧𑀸𑀓𑀸 ‘‘𑀬𑀲𑁆𑀲 𑀬𑀲𑁆𑀲 𑀓𑀼𑀲𑀮𑀛𑀸𑀦𑀲𑁆𑀲 𑀬𑀁 𑀬𑀁 𑀆𑀭𑀫𑁆𑀫𑀡𑀁 𑀕𑀳𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑁂 𑀧𑀝𑀺𑀲𑀦𑁆𑀥𑀺 𑀳𑁄𑀢𑀻’’𑀢𑀺 𑀯𑀘𑀦𑀢𑁄 𑀲𑀓𑀲𑀓𑀓𑀼𑀲𑀮𑀲𑁆𑀲 𑀆𑀭𑀫𑁆𑀫𑀡𑀁 𑀏𑀯 𑀢𑁂𑀲𑀁 𑀯𑀺𑀧𑀸𑀓𑀸𑀦𑀁 𑀆𑀭𑀫𑁆𑀫𑀡𑀁 𑀳𑁄𑀢𑀺. 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀢𑁆𑀢𑀸 𑀳𑀺, 𑀏𑀓𑀦𑁆𑀢𑁂𑀦 𑀅𑀦𑀜𑁆𑀜𑀢𑁄 𑀅𑀝𑁆𑀞𑀸𑀦𑀸𑀲𑀯𑀘𑀺𑀢𑁆𑀢𑀸𑀦𑀁 𑀅𑀧𑁆𑀧𑀫𑀸𑀡𑁄𑀯 𑀦𑀺𑀩𑁆𑀩𑀸𑀦𑀁 𑀏𑀯 𑀕𑁄𑀘𑀭𑀁 𑀆𑀭𑀫𑁆𑀫𑀡𑀁 𑀳𑁄𑀢𑀺. 𑀳𑀺 𑀓𑀲𑁆𑀫𑀸 𑀓𑀸𑀭𑀡𑀸? 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀢𑁆𑀢𑀸, 𑀦 𑀅𑀜𑁆𑀜𑀢𑁄 𑀆𑀭𑀫𑁆𑀫𑀡𑀢𑁄.

𑁩𑁧𑁬-𑁩𑁨𑁦. 𑀘𑀢𑁆𑀢𑀸𑀭𑁄 𑀜𑀸𑀡𑀳𑀻𑀦𑀸 𑀘, 𑀓𑀸𑀫𑀸𑀯𑀘𑀭𑀧𑀼𑀜𑁆𑀜𑀢𑁄 𑀓𑀸𑀫𑀸𑀯𑀘𑀭𑀓𑀼𑀲𑀮𑀯𑀲𑁂𑀦 𑀘𑀢𑁆𑀢𑀸𑀭𑁄 𑀜𑀸𑀡𑀳𑀻𑀦𑀸 𑀘 𑀓𑁆𑀭𑀺𑀬𑀢𑁄 𑀓𑀺𑀭𑀺𑀬𑀯𑀲𑁂𑀦 𑀘𑀢𑁆𑀢𑀸𑀭𑁄 𑀜𑀸𑀡𑀳𑀻𑀦𑀸 𑀘 𑀤𑁆𑀯𑀸𑀤𑀲𑀸𑀓𑀼𑀲𑀮𑀸𑀦𑀺 𑀘 𑀢𑁂 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸 𑀘𑁂𑀯 𑀫𑀳𑀕𑁆𑀕𑀢𑀕𑁄𑀘𑀭𑀸 𑀘, 𑀢𑁂 𑀦 𑀯𑀢𑁆𑀢𑀩𑁆𑀩𑀸 𑀘 𑀳𑁄𑀦𑁆𑀢𑀺. 𑀓𑀲𑁆𑀫𑀸? 𑀧𑀜𑁆𑀜𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸. 𑀘𑀢𑁆𑀢𑀸𑀭𑁄 𑀜𑀸𑀡𑀲𑀁𑀬𑀼𑀢𑁆𑀢𑀸, 𑀧𑀼𑀜𑁆𑀜𑀢𑁄 𑀓𑀼𑀲𑀮𑀯𑀲𑁂𑀦 𑀘𑀢𑁆𑀢𑀸𑀭𑁄 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸, 𑀓𑁆𑀭𑀺𑀬𑀢𑁄 𑀓𑀺𑀭𑀺𑀬𑀯𑀲𑁂𑀦 𑀘𑀢𑁆𑀢𑀸𑀭𑁄 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸 𑀘 𑀢𑀣𑀸 𑀅𑀪𑀺𑀜𑁆𑀜𑀸𑀤𑁆𑀯𑀬𑀜𑁆𑀘 𑀓𑀺𑀭𑀺𑀬𑀸𑀯𑁄𑀝𑁆𑀞𑀩𑁆𑀩𑀦𑀫𑁆𑀧𑀺 𑀘 𑀏𑀓𑀸𑀤𑀲𑀦𑁆𑀦𑀁 𑀏𑀢𑁂𑀲𑀁 𑀘𑀺𑀢𑁆𑀢𑀸𑀦𑀁 𑀕𑁄𑀘𑀭𑁄 𑀧𑀭𑀺𑀢𑁆𑀢𑀫𑀳𑀕𑁆𑀕𑀢𑀅𑀧𑁆𑀧𑀫𑀸𑀡𑀯𑀲𑁂𑀦 𑀢𑀺𑀯𑀺𑀥𑁄 𑀳𑁄𑀢𑀺. 𑀇𑀫𑁂 𑀏𑀓𑀸𑀤𑀲 𑀦 𑀯𑀢𑁆𑀢𑀩𑁆𑀩𑀸𑀧𑀺 𑀳𑁄𑀦𑁆𑀢𑀺. 𑀓𑀲𑁆𑀫𑀸? 𑀧𑀜𑁆𑀜𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸. 𑀬𑀸𑀦𑀺 𑀯𑀼𑀢𑁆𑀢𑀸𑀯𑀲𑁂𑀲𑀸𑀦𑀺 𑀯𑀼𑀢𑁆𑀢𑀢𑁄 𑀘𑀺𑀢𑁆𑀢𑀢𑁄 𑀲𑁂𑀲𑀸𑀦𑀺 𑀬𑀸𑀦𑀺 𑀘𑀺𑀢𑁆𑀢𑀸𑀦𑀺, 𑀢𑀸𑀦𑀺 𑀦 𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀸𑀦𑀻𑀢𑀺 𑀯𑀺𑀪𑀸𑀯𑀺𑀦𑀸 𑀯𑀺𑀜𑁆𑀜𑁂𑀬𑁆𑀬𑀸𑀦𑀺.

𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀺𑀓𑀁 𑀲𑀫𑀢𑁆𑀢𑀁.

𑁩𑁨𑁧. 𑀤𑀼𑀢𑀺𑀬𑀸𑀭𑀼𑀧𑁆𑀧𑀘𑀺𑀢𑁆𑀢𑀜𑁆𑀘, 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀫𑀸𑀦𑀲𑀁;

𑀙𑀩𑁆𑀩𑀺𑀥𑀁 𑀧𑀦 𑀏𑀓𑀦𑁆𑀢𑀅𑀢𑀻𑀢𑀸𑀭𑀫𑁆𑀫𑀡𑀁 𑀲𑀺𑀬𑀸.

𑁩𑁨𑁨-𑁬. 𑀯𑀺𑀜𑁆𑀜𑀸𑀡𑀸𑀦𑀁 𑀤𑁆𑀯𑀺𑀧𑀜𑁆𑀘𑀦𑁆𑀦𑀁 𑀤𑁆𑀯𑀺𑀦𑁆𑀦𑀁 𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀁, 𑀫𑀦𑁄𑀥𑀸𑀢𑀼𑀢𑁆𑀢𑀬𑀲𑁆𑀲 𑀘 𑀢𑁂𑀭𑀲𑀦𑁆𑀦𑀁 𑀘𑀺𑀢𑁆𑀢𑀸𑀦𑀁 𑀕𑁄𑀘𑀭𑀸 𑀭𑀽𑀧𑀸𑀤𑀬𑁄 𑀧𑀜𑁆𑀘 𑀥𑀫𑁆𑀫𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀯, 𑀅𑀝𑁆𑀞 𑀓𑀸𑀫𑀫𑀳𑀸𑀯𑀺𑀧𑀸𑀓𑀸 𑀢𑀤𑀸𑀭𑀫𑁆𑀫𑀡𑀓𑀺𑀘𑁆𑀘𑀯𑀲𑁂𑀦 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀕𑁄𑀘𑀭𑀸, 𑀘𑀼𑀢𑀺𑀓𑀺𑀘𑁆𑀘𑀯𑀲𑁂𑀦 𑀅𑀢𑀻𑀢𑀸𑀭𑀫𑁆𑀫𑀡𑀸, 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀓𑀺𑀘𑁆𑀘𑀯𑀲𑁂𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀢𑀻𑀢𑀸𑀭𑀫𑁆𑀫𑀡𑀸. 𑀲𑁄𑀫𑀦𑀲𑁆𑀲𑀲𑀦𑁆𑀢𑀻𑀭𑀡𑀁 𑀲𑀦𑁆𑀢𑀻𑀭𑀡𑀓𑀺𑀘𑁆𑀘𑀯𑀲𑁂𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀁. 𑀢𑀤𑀸𑀭𑀫𑁆𑀫𑀡𑀓𑀺𑀘𑁆𑀘𑀯𑀲𑁂𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀸𑀕𑀢𑀸𑀢𑀻𑀢𑀸𑀭𑀫𑁆𑀫𑀡𑀁. 𑀲𑁂𑀲𑀲𑀦𑁆𑀢𑀻𑀭𑀡𑀤𑁆𑀯𑀬𑀁 𑀲𑀦𑁆𑀢𑀻𑀭𑀡𑀓𑀺𑀘𑁆𑀘𑀯𑀲𑁂𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀁, 𑀢𑀤𑀸𑀭𑀫𑁆𑀫𑀡𑀓𑀺𑀘𑁆𑀘𑀯𑀲𑁂𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀸𑀕𑀢𑀸𑀢𑀻𑀢𑀸𑀭𑀫𑁆𑀫𑀡𑀁, 𑀘𑀼𑀢𑀺𑀓𑀺𑀘𑁆𑀘𑀯𑀲𑁂𑀦 𑀅𑀢𑀻𑀢𑀸𑀭𑀫𑁆𑀫𑀡𑀁, 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀓𑀺𑀘𑁆𑀘𑀯𑀲𑁂𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀢𑀻𑀢𑀸𑀭𑀫𑁆𑀫𑀡𑀁. 𑀳𑀲𑀺𑀢𑀼𑀧𑁆𑀧𑀸𑀤𑀘𑀺𑀢𑁆𑀢𑀁 𑀚𑀯𑀦𑀓𑀺𑀘𑁆𑀘𑀯𑀲𑁂𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀢𑀻𑀢𑀸𑀦𑀸𑀕𑀢𑀕𑁄𑀘𑀭𑀁. 𑀇𑀢𑀺 𑀏𑀢𑁂 𑀤𑁆𑀯𑀸𑀤𑀲 𑀫𑀸𑀦𑀲𑀸 𑀧𑀦 𑀲𑀺𑀬𑀸𑀢𑀻𑀢𑀸𑀭𑀫𑁆𑀫𑀡𑀸 𑀅𑀢𑀻𑀢𑀸𑀭𑀫𑁆𑀫𑀡𑀸 𑀲𑀺𑀬𑀼𑀁. 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀸𑀕𑀢𑀕𑁄𑀘𑀭𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸 𑀅𑀦𑀸𑀕𑀢𑀸𑀭𑀫𑁆𑀫𑀡𑀸 𑀲𑀺𑀬𑀼𑀁. 𑀓𑀸𑀫𑁂 𑀯𑀻𑀲𑀢𑀺 𑀓𑀼𑀲𑀮𑀸𑀓𑀼𑀲𑀮𑀸 𑀓𑁆𑀭𑀺𑀬𑀢𑁄 𑀓𑀺𑀭𑀺𑀬𑀯𑀲𑁂𑀦 𑀓𑀸𑀫𑁂 𑀦𑀯 𑀫𑀸𑀦𑀲𑀸, 𑀯𑁄𑀝𑁆𑀞𑀩𑁆𑀩𑀁 𑀯𑁄𑀝𑁆𑀞𑀩𑁆𑀩𑀦𑀓𑀺𑀘𑁆𑀘𑀯𑀲𑁂𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀁, 𑀆𑀯𑀚𑁆𑀚𑀦𑀓𑀺𑀘𑁆𑀘𑀯𑀲𑁂𑀦 𑀢𑀺𑀓𑀸𑀮𑀸𑀭𑀫𑁆𑀫𑀡𑀁. 𑀫𑀳𑀸𑀓𑀺𑀭𑀺𑀬𑀫𑀸𑀦𑀲𑀸 𑀚𑀯𑀦𑀓𑀺𑀘𑁆𑀘𑀯𑀲𑁂𑀦 𑀢𑀺𑀓𑀸𑀮𑀸𑀭𑀫𑁆𑀫𑀡𑀸, 𑀲𑀦𑁆𑀢𑁂 𑀧𑀜𑁆𑀜𑀢𑁆𑀢𑀺𑀓𑀸𑀮𑁂 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀸. 𑀤𑁆𑀯𑁂 𑀅𑀪𑀺𑀜𑁆𑀜𑀸𑀫𑀸𑀦𑀲𑀸𑀧𑀺 𑀅𑀪𑀺𑀜𑁆𑀜𑀸𑀓𑀺𑀘𑁆𑀘𑀯𑀲𑁂𑀦 𑀅𑀢𑀻𑀢𑀸𑀤𑀺𑀕𑁄𑀘𑀭𑀸 𑀲𑀺𑀬𑀼𑀁. 𑀇𑀫𑁂 𑀫𑀸𑀦𑀲𑀸 𑀧𑀜𑁆𑀜𑀢𑁆𑀢𑀺𑀓𑀸𑀮𑁂𑀧𑀺 𑀲𑀦𑁆𑀢𑁂 𑀦𑀯𑀢𑁆𑀢𑀩𑁆𑀩𑀸 𑀪𑀯𑀦𑁆𑀢𑀺. 𑀭𑀽𑀧𑀸𑀭𑀽𑀧𑀪𑀯𑁂𑀲𑀼 𑀫𑀬𑀸 𑀯𑀼𑀢𑁆𑀢𑀢𑁄 𑀲𑁂𑀲𑀸𑀦𑀺 𑀲𑀩𑁆𑀩𑀸𑀦𑀺 𑀘𑀺𑀢𑁆𑀢𑀸𑀦𑀺 𑀅𑀢𑀻𑀢𑀸𑀭𑀫𑁆𑀫𑀡𑀸𑀤𑀺𑀦𑀸 𑀅𑀢𑀻𑀢𑀸𑀭𑀫𑁆𑀫𑀡𑀸𑀤𑀺𑀯𑀲𑁂𑀦 𑀧𑀡𑁆𑀟𑀺𑀢𑁂𑀦 𑀦 𑀯𑀢𑁆𑀢𑀩𑁆𑀩𑀸𑀦𑀺 𑀦 𑀓𑀣𑀺𑀢𑀩𑁆𑀩𑀸𑀦𑀺 𑀳𑁄𑀦𑁆𑀢𑀺 𑀏𑀯, 𑀧𑀜𑁆𑀜𑀢𑁆𑀢𑀸𑀭𑀫𑁆𑀫𑀡𑀸𑀦𑀺 𑀏𑀯 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁩𑁨𑁭. 𑀓𑀸𑀫𑀢𑁄 𑀘 𑀓𑁆𑀭𑀺𑀬𑀸 𑀧𑀜𑁆𑀘 𑀓𑀸𑀫𑀸𑀯𑀘𑀭𑀯𑀲𑁂𑀦 𑀧𑀜𑁆𑀘 𑀓𑀺𑀭𑀺𑀬𑀸, 𑀭𑀽𑀧𑀢𑁄 𑀭𑀽𑀧𑀸𑀯𑀘𑀭𑀯𑀲𑁂𑀦 𑀧𑀜𑁆𑀘𑀫𑀻 𑀓𑁆𑀭𑀺𑀬𑀸 𑀅𑀪𑀺𑀜𑁆𑀜𑀸𑀘𑀺𑀢𑁆𑀢𑀁, 𑀏𑀢𑁂𑀲𑀁 𑀙𑀦𑁆𑀦𑀁 𑀘𑀺𑀢𑁆𑀢𑀸𑀦𑀁 𑀦𑀢𑁆𑀣𑀺 𑀓𑀺𑀜𑁆𑀘𑀺 𑀏𑀓𑀫𑁆𑀧𑀺 𑀅𑀕𑁄𑀘𑀭𑀁 𑀅𑀦𑀸𑀭𑀫𑁆𑀫𑀡𑀁, 𑀲𑀩𑁆𑀩𑀸𑀭𑀫𑁆𑀫𑀡𑀦𑁆𑀢𑀺 𑀅𑀢𑁆𑀣𑁄. ‘‘𑀧𑀜𑁆𑀘𑀫𑀻 𑀓𑁆𑀭𑀺𑀬𑀸’’𑀢𑀺 𑀯𑀘𑀦𑀁 𑀅𑀪𑀺𑀜𑁆𑀜𑀸𑀘𑀺𑀢𑁆𑀢𑀯𑀲𑁂𑀦 𑀯𑀼𑀢𑁆𑀢𑀁. 𑀲𑀼𑀤𑁆𑀥𑀛𑀸𑀦𑀲𑁆𑀲 𑀧𑀜𑁆𑀘𑀫𑀭𑀽𑀧𑀓𑀺𑀭𑀺𑀬𑀲𑁆𑀲 𑀧𑀜𑁆𑀜𑀢𑁆𑀢𑀸𑀭𑀫𑁆𑀫𑀡𑀁 𑀏𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁩𑁨𑁮. 𑀦𑀺𑀩𑁆𑀩𑀸𑀦𑀜𑁆𑀘 𑀘𑀢𑀼𑀩𑁆𑀩𑀺𑀥𑀁 𑀨𑀮𑀁, 𑀫𑀕𑁆𑀕𑀁 𑀭𑀽𑀧𑀜𑁆𑀘 𑀅𑀭𑀽𑀧𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀲𑀗𑁆𑀔𑀸𑀢𑀁 𑀦𑀸𑀫𑀜𑁆𑀘 𑀕𑁄𑀘𑀭𑀁 𑀓𑀸𑀢𑀼𑀁 𑀬𑀸𑀦𑀺 𑀘𑀺𑀢𑁆𑀢𑀸𑀦𑀺 𑀲𑀓𑁆𑀓𑁄𑀦𑁆𑀢𑀺, 𑀢𑀸𑀦𑀺 𑀘𑀺𑀢𑁆𑀢𑀸𑀦𑀺 𑀫𑁂 𑀯𑀤, 𑀆𑀘𑀭𑀺𑀬, 𑀢𑀸𑀦𑀺 𑀫𑀬𑁆𑀳𑀁 𑀓𑀣𑁂𑀳𑀺.

𑁩𑁨𑁯-𑁩𑁦. 𑀘𑀢𑁆𑀢𑀸𑀭𑁄 𑀜𑀸𑀡𑀲𑀁𑀬𑀼𑀢𑁆𑀢𑀸, 𑀧𑀼𑀜𑁆𑀜𑀢𑁄 𑀧𑀼𑀜𑁆𑀜𑀯𑀲𑁂𑀦 𑀘𑀢𑁆𑀢𑀸𑀭𑁄 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸, 𑀓𑁆𑀭𑀺𑀬𑀢𑁄 𑀢𑀣𑀸 𑀓𑀺𑀭𑀺𑀬𑀯𑀲𑁂𑀦 𑀘𑀢𑁆𑀢𑀸𑀭𑁄 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸, 𑀤𑁆𑀯𑁂 𑀅𑀪𑀺𑀜𑁆𑀜𑀸𑀫𑀸𑀦𑀲𑀸, 𑀓𑀺𑀭𑀺𑀬𑀸𑀯𑁄𑀝𑁆𑀞𑀩𑁆𑀩𑀦𑀫𑁆𑀧𑀺 𑀘𑀸𑀢𑀺 𑀏𑀓𑀸𑀤𑀲 𑀘𑀺𑀢𑁆𑀢𑀸𑀦𑀺 𑀦𑀺𑀩𑁆𑀩𑀸𑀦𑀜𑁆𑀘 𑀨𑀮𑀜𑁆𑀘 𑀫𑀕𑁆𑀕𑀜𑁆𑀘 𑀭𑀽𑀧𑀜𑁆𑀘 𑀅𑀭𑀽𑀧𑀁 𑀦𑀸𑀫𑀜𑁆𑀘 𑀕𑁄𑀘𑀭𑀁 𑀓𑀸𑀢𑀼𑀁 𑀲𑀓𑁆𑀓𑁄𑀦𑁆𑀢𑀺.

𑁩𑁩𑁧-𑁪. 𑀘𑀺𑀢𑁆𑀢𑁂𑀲𑀼 𑀧𑀦 𑀲𑀩𑁆𑀩𑁂𑀲𑀼 𑀬𑀸𑀦𑀺 𑀘𑀺𑀢𑁆𑀢𑀸𑀦𑀺 𑀅𑀭𑀳𑀢𑁆𑀢𑀨𑀮𑀁 𑀅𑀭𑀳𑀢𑁆𑀢𑀫𑀕𑁆𑀕𑀁 𑀕𑁄𑀘𑀭𑀁 𑀓𑀸𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀢𑀸𑀦𑀺 𑀓𑀢𑀺 𑀘𑀺𑀢𑁆𑀢𑀸𑀦𑀺 𑀫𑁂 𑀯𑀤 𑀢𑀸𑀦𑀺 𑀫𑀬𑁆𑀳𑀁 𑀢𑁆𑀯𑀁 𑀓𑀣𑁂𑀳𑀺. 𑀲𑀩𑁆𑀩𑁂𑀲𑀼 𑀧𑀦 𑀘𑀺𑀢𑁆𑀢𑁂𑀲𑀼, 𑀙 𑀘 𑀘𑀺𑀢𑁆𑀢𑀸𑀦𑀺 𑀫𑁂 𑀲𑀼𑀡, 𑀪𑁄 𑀪𑀤𑁆𑀤𑀫𑀼𑀔, 𑀢𑁆𑀯𑀁 𑀫𑀬𑁆𑀳𑀁 𑀯𑀘𑀦𑀁 𑀲𑀼𑀡𑁄𑀳𑀺, 𑀲𑀩𑁆𑀩𑁂𑀲𑀼 𑀧𑀦 𑀘𑀺𑀢𑁆𑀢𑁂𑀲𑀼 𑀙 𑀘𑀺𑀢𑁆𑀢𑀸𑀦𑀺 𑀅𑀭𑀳𑀢𑁆𑀢𑀨𑀮𑀁 𑀅𑀭𑀳𑀢𑁆𑀢𑀫𑀕𑁆𑀕𑀁 𑀕𑁄𑀘𑀭𑀁 𑀓𑀸𑀢𑀼𑀁 𑀲𑀓𑁆𑀓𑁄𑀦𑁆𑀢𑀺. 𑀘𑀢𑁆𑀢𑀸𑀭𑁄 𑀜𑀸𑀡𑀲𑀁𑀬𑀼𑀢𑁆𑀢𑀸, 𑀓𑀺𑀭𑀺𑀬𑀸 𑀘 𑀯𑁄𑀝𑁆𑀞𑀩𑁆𑀩𑀦𑀫𑁆𑀧𑀺 𑀘 𑀓𑀺𑀭𑀺𑀬𑀸𑀪𑀺𑀜𑁆𑀜𑀸𑀫𑀦𑁄 𑀘𑀸𑀢𑀺 𑀙 𑀘 𑀘𑀺𑀢𑁆𑀢𑀸𑀦𑀺 𑀕𑁄𑀘𑀭𑀁 𑀓𑀸𑀢𑀼𑀁 𑀲𑀓𑁆𑀓𑁄𑀦𑁆𑀢𑀺. 𑀧𑀼𑀜𑁆𑀜𑀢𑁄 𑀧𑀼𑀜𑁆𑀜𑀯𑀲𑁂𑀦 𑀘𑀢𑁆𑀢𑀸𑀭𑁄 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸, 𑀧𑀼𑀜𑁆𑀜𑀢𑁄 𑀧𑀼𑀜𑁆𑀜𑀯𑀲𑁂𑀦 𑀅𑀪𑀺𑀜𑁆𑀜𑀸𑀘𑀺𑀢𑁆𑀢𑀜𑁆𑀘 𑀅𑀭𑀳𑀢𑁆𑀢𑀨𑀮𑀁 𑀫𑀕𑁆𑀕𑀁 𑀕𑁄𑀘𑀭𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺.

𑁩𑁩𑁫-𑁮. 𑀅𑀭𑀳𑀢𑁄 𑀔𑀻𑀡𑀸𑀲𑀯𑀲𑁆𑀲 𑀫𑀕𑁆𑀕𑀘𑀺𑀢𑁆𑀢𑀁 𑀨𑀮𑀫𑀸𑀦𑀲𑀁 𑀯𑀸 𑀧𑀼𑀣𑀼𑀚𑁆𑀚𑀦𑀸 𑀯𑀸 𑀲𑁂𑀓𑁆𑀔𑀸 𑀯𑀸 𑀯𑀺𑀚𑀸𑀦𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀓𑀲𑁆𑀫𑀸 𑀓𑀸𑀭𑀡𑀸? 𑀧𑀼𑀣𑀼𑀚𑁆𑀚𑀦𑁄 𑀲𑁄𑀢𑀸𑀧𑀦𑁆𑀦𑀲𑁆𑀲 𑀫𑀸𑀦𑀲𑀁 𑀦 𑀚𑀸𑀦𑀸𑀢𑀺, 𑀲𑁄𑀢𑀸𑀧𑀦𑁆𑀦𑁄 𑀲𑀓𑀤𑀸𑀕𑀸𑀫𑀺𑀲𑁆𑀲 𑀫𑀸𑀦𑀲𑀁 𑀦 𑀚𑀸𑀦𑀸𑀢𑀺, 𑀲𑀓𑀤𑀸𑀕𑀸𑀫𑀻 𑀅𑀦𑀸𑀕𑀸𑀫𑀺𑀲𑁆𑀲 𑀫𑀸𑀦𑀲𑀁 𑀦 𑀚𑀸𑀦𑀸𑀢𑀺, 𑀅𑀦𑀸𑀕𑀸𑀫𑀻 𑀅𑀭𑀳𑀦𑁆𑀢𑀲𑁆𑀲 𑀫𑀸𑀦𑀲𑀁 𑀦 𑀚𑀸𑀦𑀸𑀢𑀺. 𑀳𑁂𑀝𑁆𑀞𑀺𑀫𑁄 𑀳𑁂𑀝𑁆𑀞𑀺𑀫𑁄 𑀧𑀼𑀕𑁆𑀕𑀮𑁄 𑀉𑀧𑀭𑀽𑀧𑀭𑀺 𑀞𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀫𑀸𑀦𑀲𑀁 𑀦𑁂𑀯 𑀚𑀸𑀦𑀸𑀢𑀺, 𑀉𑀧𑀭𑀽𑀧𑀭𑀺 𑀞𑀺𑀢𑁄 𑀧𑀼𑀕𑁆𑀕𑀮𑁄𑀧𑀺 𑀳𑁂𑀝𑁆𑀞𑀺𑀫𑀲𑁆𑀲 𑀳𑁂𑀝𑁆𑀞𑀺𑀫𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀫𑀸𑀦𑀲𑀁 𑀚𑀸𑀦𑀸𑀢𑀺.

𑁩𑁩𑁯-𑁩𑁪𑁨. 𑀬𑁄 𑀥𑀫𑁆𑀫𑁄 𑀬𑀲𑁆𑀲 𑀥𑀫𑁆𑀫𑀲𑁆𑀲 𑀆𑀭𑀫𑁆𑀫𑀡𑀁 𑀳𑁄𑀢𑀺, 𑀢𑀁 𑀆𑀭𑀫𑁆𑀫𑀡𑀁 𑀏𑀓𑀁 𑀏𑀓𑀁 𑀉𑀤𑁆𑀥𑀭𑀺𑀢𑁆𑀯𑀸 𑀇𑀢𑁄 𑀧𑀭𑀁 𑀧𑀯𑀓𑁆𑀔𑀸𑀫𑀺. 𑀓𑀼𑀲𑀮𑀸𑀭𑀫𑁆𑀫𑀡𑀁 𑀓𑀸𑀫𑁂 𑀓𑀸𑀫𑁂 𑀅𑀝𑁆𑀞𑀯𑀺𑀥𑀁 𑀓𑀼𑀲𑀮𑀁 𑀅𑀝𑁆𑀞𑀯𑀺𑀥𑀲𑁆𑀲 𑀓𑀸𑀫𑀸𑀯𑀘𑀭𑀓𑀼𑀲𑀮𑀲𑁆𑀲 𑀆𑀭𑀫𑁆𑀫𑀡𑀁 𑀳𑁄𑀢𑀺. 𑀓𑀣𑀁? 𑀧𑀼𑀩𑁆𑀩𑁂𑀯 𑀓𑀢𑀁 𑀅𑀝𑁆𑀞𑀯𑀺𑀥𑀁 𑀫𑀳𑀸𑀓𑀼𑀲𑀮𑀁 𑀧𑀘𑁆𑀙𑀸 𑀲𑁄𑀫𑀦𑀲𑁆𑀲𑀲𑀳𑀕𑀢𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀤𑁆𑀯𑀬𑁂𑀦 𑀯𑀸 𑀲𑁄𑀫𑀦𑀲𑁆𑀲𑀲𑀳𑀕𑀢𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀤𑁆𑀯𑀬𑁂𑀦 𑀯𑀸 𑀉𑀧𑁂𑀓𑁆𑀔𑀸𑀲𑀳𑀕𑀢𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀤𑁆𑀯𑀬𑁂𑀦 𑀯𑀸 𑀉𑀧𑁂𑀓𑁆𑀔𑀸𑀲𑀳𑀕𑀢𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀤𑁆𑀯𑀬𑁂𑀦 𑀯𑀸 𑀅𑀦𑀼𑀲𑁆𑀲𑀭𑀡𑀓𑀆𑀮𑀸𑀤𑀻𑀲𑀼 𑀢𑀲𑁆𑀲 𑀅𑀝𑁆𑀞𑀯𑀺𑀥𑀲𑁆𑀲 𑀓𑀼𑀲𑀮𑀲𑁆𑀲 𑀚𑀯𑀦𑀓𑀺𑀘𑁆𑀘𑀯𑀲𑁂𑀦 𑀆𑀭𑀫𑁆𑀫𑀡𑀁 𑀳𑁄𑀢𑀺, 𑀯𑀺𑀧𑁆𑀧𑀝𑀺𑀲𑀸𑀭𑀓𑀸𑀮𑀸𑀤𑀻𑀲𑀼 𑀤𑁆𑀯𑀸𑀤𑀲𑀯𑀺𑀥𑀲𑁆𑀲 𑀅𑀓𑀼𑀲𑀮𑀲𑁆𑀲 𑀆𑀭𑀫𑁆𑀫𑀡𑀁 𑀳𑁄𑀢𑀺, 𑀓𑀼𑀲𑀮𑀲𑁆𑀲 𑀅𑀪𑀺𑀜𑁆𑀜𑀸𑀫𑀸𑀦𑀲𑀲𑁆𑀲 𑀘 𑀓𑀺𑀭𑀺𑀬𑀲𑁆𑀲 𑀅𑀪𑀺𑀜𑁆𑀜𑀸𑀫𑀸𑀦𑀲𑀲𑁆𑀲 𑀘 𑀆𑀭𑀫𑁆𑀫𑀡𑀁 𑀳𑁄𑀢𑀺, 𑀏𑀓𑀸𑀤𑀲𑀯𑀺𑀥𑀲𑁆𑀲 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀲𑁆𑀲 𑀢𑀤𑀸𑀭𑀫𑁆𑀫𑀡𑀯𑀲𑁂𑀦 𑀆𑀭𑀫𑁆𑀫𑀡𑀁 𑀳𑁄𑀢𑀺. 𑀢𑀣𑀸 𑀓𑀸𑀫𑀓𑁆𑀭𑀺𑀬𑀲𑁆𑀲𑀸𑀢𑀺 𑀚𑀯𑀦𑀓𑀺𑀘𑁆𑀘𑀯𑀲𑁂𑀦 𑀳𑀲𑀦𑀲𑁆𑀲 𑀆𑀯𑀚𑁆𑀚𑀦𑀓𑀺𑀘𑁆𑀘𑀯𑀲𑁂𑀦 𑀯𑁄𑀝𑁆𑀞𑀩𑁆𑀩𑀦𑀲𑁆𑀲 𑀚𑀯𑀦𑀓𑀺𑀘𑁆𑀘𑀯𑀲𑁂𑀦 𑀫𑀳𑀸𑀓𑀺𑀭𑀺𑀬𑀲𑁆𑀲 𑀆𑀭𑀫𑁆𑀫𑀡𑀁 𑀳𑁄𑀢𑀺, 𑀏𑀢𑁂𑀲𑀁 𑀙𑀦𑁆𑀦𑀁 𑀭𑀸𑀲𑀻𑀦𑀁 𑀆𑀭𑀫𑁆𑀫𑀡𑀁 𑀲𑀺𑀬𑀸 𑀪𑀯𑁂𑀬𑁆𑀬. 𑀭𑀽𑀧𑀸𑀯𑀘𑀭𑀧𑀼𑀜𑁆𑀜𑀸𑀦𑀺 𑀧𑀜𑁆𑀘 𑀢𑀢𑁄 𑀙𑀭𑀸𑀲𑀺𑀢𑁄 𑀓𑀸𑀫𑀯𑀺𑀧𑀸𑀓𑀁 𑀯𑀚𑁆𑀚𑁂𑀢𑁆𑀯𑀸 𑀧𑀜𑁆𑀘𑀦𑁆𑀦𑀁 𑀭𑀸𑀲𑀻𑀦𑀁 𑀆𑀭𑀫𑁆𑀫𑀡𑀸𑀦𑀺 𑀳𑁄𑀦𑁆𑀢𑀺. 𑀢𑀤𑀸 𑀮𑁄𑀪𑀫𑀽𑀮𑀫𑁄𑀳𑀫𑀽𑀮𑀯𑀲𑁂𑀦 𑀅𑀢𑁆𑀢𑀦𑀸 𑀧𑀝𑀺𑀮𑀤𑁆𑀥𑀛𑀸𑀦𑀸𑀦𑀁 𑀅𑀦𑀼𑀲𑁆𑀲𑀭𑀡𑀓𑀸𑀮𑁂 𑀢𑀲𑁆𑀲 𑀤𑀲𑀯𑀺𑀥𑀲𑁆𑀲 𑀅𑀓𑀼𑀲𑀮𑀲𑁆𑀲 𑀆𑀭𑀫𑁆𑀫𑀡𑀁 𑀳𑁄𑀢𑀺, 𑀢𑀺𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀦𑁄 𑀲𑀢𑁆𑀢𑀲𑁆𑀲 𑀛𑀸𑀦𑀢𑁄 𑀧𑀭𑀺𑀳𑀻𑀦𑀲𑁆𑀲 𑀛𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀢𑁄 𑀛𑀸𑀦𑀸𑀭𑀫𑁆𑀫𑀡𑀁 𑀤𑁄𑀫𑀦𑀲𑁆𑀲𑀬𑀼𑀢𑁆𑀢𑀁 𑀳𑁄𑀢𑀺, 𑀢𑀤𑀸 𑀢𑀲𑁆𑀲 𑀧𑀝𑀺𑀖𑀤𑁆𑀯𑀬𑀲𑁆𑀲 𑀆𑀭𑀫𑁆𑀫𑀡𑀁 𑀳𑁄𑀢𑀺. 𑀓𑀸𑀫𑀓𑁆𑀭𑀺𑀬𑀲𑁆𑀲𑀸𑀢𑀺 𑀏𑀓𑀦𑁆𑀢𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸𑀦𑀺 𑀓𑀺𑀭𑀺𑀬𑀸𑀫𑀦𑁄𑀥𑀸𑀢𑀼𑀳𑀲𑀦𑀸𑀦𑀺 𑀯𑀚𑁆𑀚𑁂𑀢𑁆𑀯𑀸 𑀆𑀯𑀚𑁆𑀚𑀦𑀓𑀺𑀘𑁆𑀘𑀯𑀲𑁂𑀦 𑀯𑁄𑀝𑁆𑀞𑀩𑁆𑀩𑀦𑀲𑁆𑀲, 𑀚𑀯𑀦𑀓𑀺𑀘𑁆𑀘𑀯𑀲𑁂𑀦 𑀫𑀳𑀸𑀓𑀺𑀭𑀺𑀬𑀲𑁆𑀲 𑀘 𑀆𑀭𑀫𑁆𑀫𑀡𑀁 𑀳𑁄𑀢𑀺.

𑁩𑁪𑁩. 𑀆𑀭𑀼𑀧𑁆𑀧𑀓𑀼𑀲𑀮𑀜𑁆𑀘𑀸𑀧𑀺, 𑀢𑁂𑀪𑀽𑀫𑀓𑀼𑀲𑀮𑀲𑁆𑀲 𑀘 𑀫𑀳𑀸𑀓𑀼𑀲𑀮𑀲𑁆𑀲 𑀘 𑀅𑀪𑀺𑀜𑁆𑀜𑀸𑀓𑀺𑀘𑁆𑀘𑀯𑀲𑁂𑀦 𑀧𑀜𑁆𑀘𑀫𑀭𑀽𑀧𑀓𑀼𑀲𑀮𑀲𑁆𑀲 𑀘 𑀤𑀼𑀢𑀺𑀬𑀘𑀢𑀼𑀢𑁆𑀣𑀅𑀭𑀽𑀧𑀓𑀼𑀲𑀮𑀲𑁆𑀲 𑀘 𑀢𑁂𑀪𑀽𑀫𑀓𑀓𑁆𑀭𑀺𑀬𑀲𑁆𑀲𑀸𑀧𑀺 𑀯𑁄𑀝𑁆𑀞𑀩𑁆𑀩𑀦𑀲𑁆𑀲 𑀫𑀳𑀸𑀓𑀺𑀭𑀺𑀬𑀲𑁆𑀲 𑀘 𑀅𑀪𑀺𑀜𑁆𑀜𑀸𑀓𑀺𑀘𑁆𑀘𑀯𑀲𑁂𑀦 𑀧𑀜𑁆𑀘𑀫𑀭𑀽𑀧𑀓𑀺𑀭𑀺𑀬𑀲𑁆𑀲 𑀘 𑀤𑀼𑀢𑀺𑀬𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀓𑀺𑀭𑀺𑀬𑀲𑁆𑀲 𑀘 𑀆𑀭𑀫𑁆𑀫𑀡𑀁 𑀳𑁄𑀢𑀺, 𑀤𑀼𑀢𑀺𑀬𑀸𑀭𑀼𑀧𑁆𑀧𑀓𑀺𑀭𑀺𑀬𑀲𑁆𑀲 𑀘 𑀧𑀞𑀫𑀸𑀭𑀼𑀧𑁆𑀧𑀓𑀺𑀭𑀺𑀬𑀸𑀬 𑀆𑀭𑀫𑁆𑀫𑀡𑁂𑀦 𑀪𑀯𑀺𑀢𑀩𑁆𑀩𑀁, 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀓𑀺𑀭𑀺𑀬𑀲𑁆𑀲 𑀘 𑀢𑀢𑀺𑀬𑀸𑀭𑀼𑀧𑁆𑀧𑀓𑀺𑀭𑀺𑀬𑀸𑀬 𑀆𑀭𑀫𑁆𑀫𑀡𑁂𑀦 𑀪𑀯𑀺𑀢𑀩𑁆𑀩𑀁, 𑀏𑀯𑀜𑁆𑀘 𑀲𑀢𑀺 𑀓𑀣𑀁 𑀧𑀞𑀫𑀸𑀭𑀼𑀧𑁆𑀧𑀓𑀼𑀲𑀮𑀁 𑀤𑀼𑀢𑀺𑀬𑀸𑀭𑀼𑀧𑁆𑀧𑀓𑀺𑀭𑀺𑀬𑀲𑁆𑀲 𑀆𑀭𑀫𑁆𑀫𑀡𑀁 𑀳𑁄𑀢𑀺, 𑀢𑀢𑀺𑀬𑀸𑀭𑀼𑀧𑁆𑀧𑀓𑀼𑀲𑀮𑀜𑁆𑀘 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀓𑀺𑀭𑀺𑀬𑀲𑁆𑀲 𑀆𑀭𑀫𑁆𑀫𑀡𑀁 𑀳𑁄𑀢𑀻𑀢𑀺 𑀘𑁂 𑀯𑀢𑁆𑀢𑀩𑁆𑀩𑀁, 𑀬𑀤𑀸 𑀧𑀼𑀣𑀼𑀚𑁆𑀚𑀦𑀬𑁄𑀕𑀻 𑀯𑀸 𑀲𑁂𑀓𑁆𑀔𑁄 𑀯𑀸 𑀬𑁄𑀕𑀻 𑀭𑀽𑀧𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀳𑀺𑀢𑁆𑀯𑀸 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀗𑁆𑀔𑀸𑀢𑀁 𑀧𑀞𑀫𑀸𑀭𑀼𑀧𑁆𑀧𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀻𑀢𑀭𑀸𑀕𑁄 𑀳𑀼𑀢𑁆𑀯𑀸 𑀅𑀢𑁆𑀢𑀦𑀸 𑀅𑀥𑀺𑀕𑀢𑀸 𑀲𑀫𑀸𑀧𑀢𑁆𑀢𑀺𑀬𑁄 𑀕𑀳𑁂𑀢𑁆𑀯𑀸 𑀧𑀼𑀣𑀼𑀚𑁆𑀚𑀦𑀲𑁂𑀓𑁆𑀔𑀓𑀸𑀮𑁂 𑀅𑀢𑁆𑀢𑀦𑀸 𑀅𑀦𑀥𑀺𑀕𑀢𑀁 𑀤𑀼𑀢𑀺𑀬𑀁 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺, 𑀢𑀤𑀸 𑀔𑀻𑀡𑀸𑀲𑀯𑀓𑀸𑀮𑁂 𑀲𑀫𑀸𑀧𑀚𑁆𑀚𑀺𑀢𑀁 𑀤𑀼𑀢𑀺𑀬𑀁 𑀅𑀭𑀽𑀧𑀓𑀺𑀭𑀺𑀬𑀁 𑀧𑀞𑀫𑀸𑀭𑀼𑀧𑁆𑀧𑀓𑀼𑀲𑀮𑀁 𑀆𑀭𑀫𑁆𑀫𑀡𑀁 𑀓𑀭𑁄𑀢𑀺, 𑀏𑀯𑀁 𑀧𑀞𑀫𑀸𑀭𑀼𑀧𑁆𑀧𑀓𑀼𑀲𑀮𑀁 𑀤𑀼𑀢𑀺𑀬𑀸𑀭𑀼𑀧𑁆𑀧𑀓𑀺𑀭𑀺𑀬𑀲𑁆𑀲 𑀆𑀭𑀫𑁆𑀫𑀡𑀁 𑀳𑁄𑀢𑀺.

𑀬𑀤𑀸 𑀬𑁄𑀕𑀻 𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑁄 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀳𑀺𑀢𑁆𑀯𑀸 𑀧𑀞𑀫𑀸𑀭𑀼𑀧𑁆𑀧𑀓𑀼𑀲𑀮𑀁 𑀤𑀼𑀢𑀺𑀬𑀸𑀭𑀼𑀧𑁆𑀧𑀓𑀼𑀲𑀮𑀁 𑀢𑀢𑀺𑀬𑀸𑀭𑀼𑀧𑁆𑀧𑀓𑀼𑀲𑀮𑀜𑁆𑀘 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀔𑀻𑀡𑀸𑀲𑀯𑁄 𑀳𑀼𑀢𑁆𑀯𑀸 𑀅𑀢𑁆𑀢𑀦𑀸 𑀅𑀥𑀺𑀕𑀢𑀸 𑀲𑀫𑀸𑀧𑀢𑁆𑀢𑀺𑀬𑁄 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑀸 𑀅𑀦𑀥𑀺𑀕𑀢𑀁 𑀘𑀢𑀼𑀢𑁆𑀣𑀁 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺, 𑀢𑀤𑀸 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀓𑀺𑀭𑀺𑀬𑀸 𑀢𑀢𑀺𑀬𑀸𑀭𑀼𑀧𑁆𑀧𑀓𑀼𑀲𑀮𑀁 𑀆𑀭𑀫𑁆𑀫𑀡𑀁 𑀓𑀭𑁄𑀢𑀺, 𑀏𑀯𑀁 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀓𑀺𑀭𑀺𑀬𑀲𑁆𑀲 𑀢𑀢𑀺𑀬𑀸𑀭𑀼𑀧𑁆𑀧𑀓𑀼𑀲𑀮𑀁 𑀆𑀭𑀫𑁆𑀫𑀡𑀁 𑀳𑁄𑀢𑀺, 𑀧𑀘𑁆𑀙𑀸 𑀔𑀻𑀡𑀸𑀲𑀯𑀓𑀸𑀮𑁂 𑀲𑀫𑀸𑀧𑀚𑁆𑀚𑀺𑀢𑀸 𑀭𑀽𑀧𑀸𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑁄 𑀳𑁄𑀦𑁆𑀢𑀺. 𑀬𑀣𑀸 𑀳𑁄𑀢𑀺, 𑀢𑀣𑀸 𑀏𑀯 𑀅𑀓𑀼𑀲𑀮𑀲𑁆𑀲𑀧𑀺 𑀆𑀭𑀫𑁆𑀫𑀡𑀁 𑀳𑁄𑀢𑀺.

𑁩𑁪𑁪-𑁭. 𑀅𑀭𑀽𑀧𑀸𑀯𑀘𑀭𑀧𑀸𑀓𑀸𑀦𑀦𑁆𑀢𑀺 𑀚𑀸𑀢𑀺𑀦𑀺𑀤𑁆𑀥𑀸𑀭𑀡𑀁, 𑀘𑀢𑀼𑀢𑁆𑀣𑀤𑀼𑀢𑀺𑀬𑀸𑀦𑀁 𑀅𑀭𑀽𑀧𑀧𑀸𑀓𑀸𑀦𑀫𑁆𑀧𑀺 𑀆𑀭𑀫𑁆𑀫𑀡𑀁 𑀳𑁄𑀢𑀺, ‘‘𑀘𑀢𑀼𑀢𑁆𑀣𑀤𑀼𑀢𑀺𑀬𑀸𑀦’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀢𑀺𑀬𑀸𑀦𑀁-𑀲𑀤𑁆𑀤𑀲𑁆𑀲 𑀮𑁄𑀧𑀁 𑀓𑀢𑁆𑀯𑀸 ‘‘𑀘𑀢𑀼𑀢𑁆𑀣𑀤𑀽’’𑀢𑀺 𑀯𑀼𑀢𑁆𑀢𑀁, 𑀢𑀤𑀸 𑀤𑁆𑀯𑀺𑀦𑁆𑀦𑀁 𑀅𑀭𑀽𑀧𑀧𑀸𑀓𑀸𑀦𑀁 𑀧𑀞𑀫𑀸𑀭𑀼𑀧𑁆𑀧𑀢𑀢𑀺𑀬𑀸𑀭𑀼𑀧𑁆𑀧𑀚𑀯𑀦𑀸𑀦𑀺 𑀆𑀭𑀫𑁆𑀫𑀡𑀸𑀦𑀺 𑀳𑁄𑀦𑁆𑀢𑀺, ‘‘𑀬𑀲𑁆𑀲 𑀓𑀼𑀲𑀮𑀲𑁆𑀲 𑀛𑀸𑀦𑀲𑁆𑀲 𑀬𑀁 𑀆𑀭𑀫𑁆𑀫𑀡𑀁 𑀕𑀳𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑁂 𑀧𑀝𑀺𑀲𑀦𑁆𑀥𑀺 𑀳𑁄𑀢𑀻’’𑀢𑀺 𑀯𑀘𑀦𑀢𑁄 𑀲𑀓𑀲𑀓𑀓𑀼𑀲𑀮𑀸𑀦𑀁 𑀆𑀭𑀫𑁆𑀫𑀡𑀪𑀽𑀢𑀸𑀦𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀸𑀦𑀺 𑀢𑁂𑀲𑀁 𑀤𑀼𑀢𑀺𑀬𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀧𑀸𑀓𑀸𑀦𑀁 𑀆𑀭𑀫𑁆𑀫𑀡𑀸𑀦𑀺 𑀳𑁄𑀦𑁆𑀢𑀺, 𑀏𑀯𑀁 𑀅𑀭𑀽𑀧𑀓𑀼𑀲𑀮𑀁 𑀇𑀫𑁂𑀲𑀁 𑀅𑀝𑁆𑀞𑀭𑀸𑀲𑀻𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀧𑀭𑀺𑀬𑀸𑀧𑀦𑁆𑀦𑀧𑀼𑀜𑁆𑀜𑀫𑁆𑀧𑀺 𑀘𑀢𑀼𑀩𑁆𑀩𑀺𑀥𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀫𑁆𑀧𑀺 𑀓𑀸𑀫𑀸𑀯𑀘𑀭𑀢𑁄 𑀓𑀸𑀫𑀸𑀯𑀘𑀭𑀯𑀲𑁂𑀦 𑀓𑀼𑀲𑀮𑀲𑁆𑀲 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀫𑀳𑀸𑀓𑀼𑀲𑀮𑀲𑁆𑀲 𑀘 𑀓𑁆𑀭𑀺𑀬𑀲𑁆𑀲 𑀯𑁄𑀝𑁆𑀞𑀩𑁆𑀩𑀦𑀲𑁆𑀲, 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀢𑁄 𑀓𑀺𑀭𑀺𑀬𑀲𑁆𑀲 𑀘 𑀭𑀽𑀧𑀢𑁄 𑀭𑀽𑀧𑀸𑀯𑀘𑀭𑀯𑀲𑁂𑀦 𑀧𑀜𑁆𑀘𑀫𑀲𑁆𑀲 𑀭𑀽𑀧𑀓𑀼𑀲𑀮𑀲𑁆𑀲 𑀘 𑀧𑀜𑁆𑀘𑀫𑀲𑁆𑀲 𑀭𑀽𑀧𑀓𑀺𑀭𑀺𑀬𑀲𑁆𑀲 𑀘𑀸𑀢𑀺 𑀘𑀢𑀼𑀦𑁆𑀦𑀁 𑀭𑀸𑀲𑀻𑀦𑀁 𑀆𑀭𑀫𑁆𑀫𑀡𑀁 𑀲𑀤𑀸 𑀳𑁄𑀢𑀺, 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀲𑁂𑀓𑁆𑀔𑀸𑀦𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀫𑀳𑀸𑀓𑀼𑀲𑀮𑀲𑁆𑀲, 𑀯𑁄𑀝𑁆𑀞𑀩𑁆𑀩𑀦𑀲𑁆𑀲, 𑀧𑀜𑁆𑀘𑀫𑀲𑁆𑀲 𑀭𑀽𑀧𑀓𑀼𑀲𑀮𑀲𑁆𑀲 𑀘 𑀢𑀺𑀯𑀺𑀥𑀁 𑀮𑁄𑀓𑀼𑀢𑁆𑀢𑀭𑀧𑀼𑀜𑁆𑀜𑀁 𑀆𑀭𑀫𑁆𑀫𑀡𑀁 𑀳𑁄𑀢𑀺. 𑀔𑀻𑀡𑀸𑀲𑀯𑀲𑁆𑀲 𑀯𑁄𑀝𑁆𑀞𑀩𑁆𑀩𑀦𑀲𑁆𑀲, 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀫𑀳𑀸𑀓𑀺𑀭𑀺𑀬𑀲𑁆𑀲, 𑀧𑀜𑁆𑀘𑀫𑀲𑁆𑀲 𑀭𑀽𑀧𑀓𑀺𑀭𑀺𑀬𑀲𑁆𑀲 𑀘 𑀅𑀭𑀳𑀢𑁆𑀢𑀧𑀼𑀜𑁆𑀜𑀁 𑀆𑀭𑀫𑁆𑀫𑀡𑀁 𑀳𑁄𑀢𑀺. 𑀬𑀣𑀸 𑀢𑀣𑀸 𑀏𑀯 𑀲𑀩𑁆𑀩𑀁 𑀅𑀓𑀼𑀲𑀮𑀁 𑀓𑀸𑀫𑀸𑀯𑀘𑀭𑀢𑁄 𑀓𑀸𑀫𑀸𑀯𑀘𑀭𑀯𑀲𑁂𑀦 𑀓𑀼𑀲𑀮𑀲𑁆𑀲 𑀫𑀳𑀸𑀓𑀼𑀲𑀮𑀲𑁆𑀲, 𑀓𑁆𑀭𑀺𑀬𑀲𑁆𑀲 𑀳𑀲𑀦𑀯𑁄𑀝𑁆𑀞𑀩𑁆𑀩𑀦𑀫𑀳𑀸𑀓𑀺𑀭𑀺𑀬𑀲𑁆𑀲 𑀘 𑀭𑀽𑀧𑀸𑀯𑀘𑀭𑀢𑁄 𑀧𑀦 𑀭𑀽𑀧𑀸𑀯𑀘𑀭𑀯𑀲𑁂𑀦 𑀧𑀜𑁆𑀘𑀫𑀲𑁆𑀲 𑀭𑀽𑀧𑀓𑀼𑀲𑀮𑀲𑁆𑀲, 𑀧𑀜𑁆𑀘𑀫𑀲𑁆𑀲 𑀭𑀽𑀧𑀓𑀺𑀭𑀺𑀬𑀲𑁆𑀲 𑀘 𑀆𑀭𑀫𑁆𑀫𑀡𑀁 𑀳𑁄𑀢𑀺, 𑀬𑀣𑀸 𑀢𑀣𑀸 𑀏𑀯 𑀲𑀩𑁆𑀩𑀲𑁆𑀲 𑀅𑀓𑀼𑀲𑀮𑀲𑁆𑀲 𑀘 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀸𑀦𑀁 𑀢𑀤𑀸𑀭𑀫𑁆𑀫𑀡𑀓𑀺𑀘𑁆𑀘𑀯𑀲𑁂𑀦 𑀏𑀓𑀸𑀤𑀲𑀦𑁆𑀦𑀜𑁆𑀘𑀸𑀢𑀺 𑀙𑀦𑁆𑀦𑀁 𑀭𑀸𑀲𑀻𑀦𑀁 𑀆𑀭𑀫𑁆𑀫𑀡𑀁 𑀪𑀕𑀯𑀢𑀸 𑀈𑀭𑀺𑀢𑀁.

𑁩𑁪𑁮-𑁩𑁫𑁨. 𑀯𑀺𑀧𑀸𑀓𑀸𑀭𑀫𑁆𑀫𑀡𑀁 𑀓𑀸𑀫𑁂 𑀲𑀩𑁆𑀩𑀁 𑀯𑀺𑀧𑀸𑀓𑀸𑀭𑀫𑁆𑀫𑀡𑀁 𑀓𑀸𑀫𑀸𑀯𑀘𑀭𑀢𑁄𑀧𑀺 𑀓𑀸𑀫𑀸𑀯𑀘𑀭𑀯𑀲𑁂𑀦𑀧𑀺 𑀓𑀼𑀲𑀮𑀲𑁆𑀲 𑀫𑀳𑀸𑀓𑀼𑀲𑀮𑀲𑁆𑀲, 𑀓𑁆𑀭𑀺𑀬𑀲𑁆𑀲 𑀳𑀲𑀦𑀯𑁄𑀝𑁆𑀞𑀩𑁆𑀩𑀦𑀫𑀳𑀸𑀓𑀺𑀭𑀺𑀬𑀲𑁆𑀲 𑀘 𑀭𑀽𑀧𑀸𑀯𑀘𑀭𑀢𑁄 𑀘𑁂𑀯 𑀭𑀽𑀧𑀸𑀯𑀘𑀭𑀯𑀲𑁂𑀦 𑀘 𑀏𑀯 𑀧𑀜𑁆𑀘𑀫𑀲𑁆𑀲 𑀭𑀽𑀧𑀓𑀼𑀲𑀮𑀲𑁆𑀲, 𑀧𑀜𑁆𑀘𑀫𑀲𑁆𑀲 𑀭𑀽𑀧𑀓𑀺𑀭𑀺𑀬𑀲𑁆𑀲 𑀘 𑀓𑀸𑀫𑀸𑀯𑀘𑀭𑀧𑀸𑀓𑀸𑀦𑀁 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀸𑀦𑀁 𑀏𑀓𑀸𑀤𑀲𑀦𑁆𑀦𑀜𑁆𑀘 𑀢𑀣𑁂𑀯 𑀅𑀓𑀼𑀲𑀮𑀲𑁆𑀲 𑀘 𑀙𑀦𑁆𑀦𑀁 𑀭𑀸𑀲𑀻𑀦𑀁 𑀆𑀭𑀫𑁆𑀫𑀡𑀁 𑀳𑁄𑀢𑀺. 𑀭𑀽𑀧𑁂 𑀯𑀺𑀧𑀸𑀓𑀸𑀭𑀫𑁆𑀫𑀡𑀁 𑀓𑀸𑀫𑀸𑀯𑀘𑀭𑀢𑁄𑀧𑀺 𑀘 𑀓𑀸𑀫𑀸𑀯𑀘𑀭𑀯𑀲𑁂𑀦𑀧𑀺 𑀘 𑀓𑀼𑀲𑀮𑀲𑁆𑀲 𑀫𑀳𑀸𑀓𑀼𑀲𑀮𑀲𑁆𑀲, 𑀓𑁆𑀭𑀺𑀬𑀲𑁆𑀲 𑀘 𑀯𑁄𑀝𑁆𑀞𑀩𑁆𑀩𑀦𑀫𑀳𑀸𑀓𑀺𑀭𑀺𑀬𑀲𑁆𑀲 𑀘 𑀭𑀽𑀧𑀸𑀯𑀘𑀭𑀢𑁄 𑀘𑁂𑀯 𑀭𑀽𑀧𑀸𑀯𑀘𑀭𑀯𑀲𑁂𑀦 𑀘 𑀏𑀯 𑀓𑀼𑀲𑀮𑀲𑁆𑀲 𑀘 𑀅𑀧𑀼𑀜𑁆𑀜𑀲𑁆𑀲 𑀘𑀸𑀢𑀺 𑀧𑀜𑁆𑀘𑀦𑁆𑀦𑀁 𑀭𑀸𑀲𑀻𑀦𑀁 𑀕𑁄𑀘𑀭𑁄 𑀳𑁄𑀢𑀺, 𑀅𑀭𑀽𑀧𑀸𑀯𑀘𑀭𑀧𑀸𑀓𑁂𑀲𑀼 𑀅𑀬𑀁 𑀦𑀬𑁄 𑀪𑀕𑀯𑀢𑀸 𑀫𑀢𑁄. 𑀯𑀝𑁆𑀝𑁂 𑀦 𑀧𑀭𑀺𑀬𑀸𑀧𑀦𑁆𑀦𑀸 𑀦𑀧𑁆𑀧𑀯𑀺𑀝𑁆𑀞𑀸𑀢𑀺 𑀅𑀧𑀭𑀺𑀬𑀸𑀧𑀦𑁆𑀦𑀸, 𑀢𑁂𑀲𑀁 𑀧𑀼𑀕𑁆𑀕𑀮𑀸𑀦𑀁 𑀧𑀸𑀓𑀸𑀧𑀺 𑀓𑀸𑀫𑀢𑁄 𑀓𑀸𑀫𑀸𑀯𑀘𑀭𑀯𑀲𑁂𑀦 𑀓𑀼𑀲𑀮𑀲𑁆𑀲 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀫𑀳𑀸𑀓𑀼𑀲𑀮𑀲𑁆𑀲, 𑀓𑁆𑀭𑀺𑀬𑀲𑁆𑀲 𑀘 𑀯𑁄𑀝𑁆𑀞𑀩𑁆𑀩𑀦𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀫𑀳𑀸𑀓𑀺𑀭𑀺𑀬𑀲𑁆𑀲 𑀘 𑀭𑀽𑀧𑀢𑁄𑀧𑀺 𑀭𑀽𑀧𑀸𑀯𑀘𑀭𑀯𑀲𑁂𑀦𑀧𑀺 𑀓𑀼𑀲𑀮𑀲𑁆𑀲 𑀧𑀜𑁆𑀘𑀫𑀲𑁆𑀲 𑀭𑀽𑀧𑀓𑀼𑀲𑀮𑀲𑁆𑀲, 𑀓𑁆𑀭𑀺𑀬𑀲𑁆𑀲 𑀘 𑀧𑀜𑁆𑀘𑀫𑀲𑁆𑀲 𑀭𑀽𑀧𑀓𑀺𑀭𑀺𑀬𑀲𑁆𑀲 𑀘 𑀏𑀯𑀁 𑀆𑀭𑀫𑁆𑀫𑀡𑀁 𑀳𑁄𑀢𑀻𑀢𑀺. 𑀏𑀢𑁆𑀣𑀸𑀬𑀫𑀥𑀺𑀧𑁆𑀧𑀸𑀬𑁄 𑀅𑀧𑀭𑀺𑀬𑀸𑀧𑀦𑁆𑀦𑀧𑀼𑀜𑁆𑀜𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑁩𑁫𑁩-𑁬. 𑀓𑀸𑀫𑁂 𑀇𑀤𑀁 𑀲𑀩𑁆𑀩𑀓𑀺𑀭𑀺𑀬𑀘𑀺𑀢𑁆𑀢𑀁 𑀓𑀸𑀫𑀸𑀯𑀘𑀭𑀢𑁄𑀧𑀺 𑀘 𑀓𑀸𑀫𑀸𑀯𑀘𑀭𑀯𑀲𑁂𑀦𑀧𑀺 𑀘 𑀓𑀼𑀲𑀮𑀲𑁆𑀲 𑀫𑀳𑀸𑀓𑀼𑀲𑀮𑀲𑁆𑀲, 𑀓𑁆𑀭𑀺𑀬𑀲𑁆𑀲 𑀘 𑀳𑀲𑀦𑀯𑁄𑀝𑁆𑀞𑀩𑁆𑀩𑀦𑀫𑀳𑀸𑀓𑀺𑀭𑀺𑀬𑀲𑁆𑀲 𑀘 𑀭𑀽𑀧𑀸𑀯𑀘𑀭𑀢𑁄 𑀘𑁂𑀯 𑀭𑀽𑀧𑀸𑀯𑀘𑀭𑀯𑀲𑁂𑀦 𑀘 𑀏𑀯 𑀓𑀼𑀲𑀮𑀲𑁆𑀲 𑀧𑀜𑁆𑀘𑀫𑀲𑁆𑀲 𑀭𑀽𑀧𑀓𑀼𑀲𑀮𑀲𑁆𑀲, 𑀓𑁆𑀭𑀺𑀬𑀲𑁆𑀲 𑀘 𑀧𑀜𑁆𑀘𑀫𑀲𑁆𑀲 𑀭𑀽𑀧𑀓𑀺𑀭𑀺𑀬𑀲𑁆𑀲 𑀘 𑀏𑀓𑀸𑀤𑀲𑀓𑀸𑀫𑀸𑀯𑀘𑀭𑀧𑀸𑀓𑀲𑁆𑀲 𑀘 𑀢𑀣𑁂𑀯 𑀅𑀓𑀼𑀲𑀮𑀲𑁆𑀲 𑀘 𑀏𑀢𑁂𑀲𑀁 𑀙𑀦𑁆𑀦𑀁 𑀭𑀸𑀲𑀻𑀦𑀁 𑀆𑀭𑀫𑁆𑀫𑀡𑀁 𑀳𑁄𑀢𑀺. 𑀬𑀁 𑀓𑁆𑀭𑀺𑀬𑀸𑀫𑀸𑀦𑀲𑀁 𑀭𑀽𑀧𑁂 𑀭𑀽𑀧𑀸𑀯𑀘𑀭𑁂 𑀬𑀁 𑀓𑀺𑀭𑀺𑀬𑀸𑀫𑀸𑀦𑀲𑀁, 𑀓𑀸𑀫𑀧𑀸𑀓𑀁 𑀢𑀢𑁄 𑀯𑀺𑀦𑀸 𑀢𑀢𑁄 𑀭𑀸𑀲𑀺𑀢𑁄 𑀓𑀸𑀫𑀧𑀸𑀓𑀁 𑀯𑀺𑀦𑀸 𑀯𑀚𑁆𑀚𑁂𑀢𑁆𑀯𑀸 𑀧𑀜𑁆𑀘𑀦𑁆𑀦𑀁 𑀧𑀦 𑀭𑀸𑀲𑀻𑀦𑀁 𑀆𑀭𑀫𑁆𑀫𑀡𑀁 𑀳𑁄𑀢𑀺. 𑀓𑀸𑀫𑀸𑀯𑀘𑀭𑀢𑁄 𑀓𑀸𑀫𑀸𑀯𑀘𑀭𑀯𑀲𑁂𑀦 𑀓𑀺𑀭𑀺𑀬𑀲𑁆𑀲 𑀯𑁄𑀝𑁆𑀞𑀩𑁆𑀩𑀦𑀫𑀳𑀸𑀓𑀺𑀭𑀺𑀬𑀲𑁆𑀲 𑀆𑀭𑀫𑁆𑀫𑀡𑀁 𑀳𑁄𑀢𑀺, 𑀳𑀲𑀦𑀁 𑀏𑀓𑀦𑁆𑀢𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸 𑀭𑀽𑀧𑀓𑀺𑀭𑀺𑀬𑀁 𑀆𑀭𑀫𑁆𑀫𑀡𑀁 𑀦 𑀓𑀭𑁄𑀢𑀺. 𑀓𑁆𑀭𑀺𑀬𑀸𑀘𑀺𑀢𑁆𑀢𑀁 𑀧𑀦𑀸𑀭𑀼𑀧𑁆𑀧𑁂 𑀅𑀭𑀽𑀧𑀓𑀺𑀭𑀺𑀬𑀸𑀘𑀺𑀢𑁆𑀢𑀁 𑀧𑀦 𑀢𑁂𑀲𑀁 𑀧𑀜𑁆𑀘𑀦𑁆𑀦𑀁 𑀏𑀯 𑀘 𑀭𑀸𑀲𑀻𑀦𑀁 𑀆𑀭𑀼𑀧𑁆𑀧𑀓𑁆𑀭𑀺𑀬𑀲𑁆𑀲𑀸𑀧𑀺 𑀧𑀞𑀫𑀸𑀭𑀼𑀧𑁆𑀧𑀓𑀺𑀭𑀺𑀬𑀁 𑀤𑀼𑀢𑀺𑀬𑀸𑀭𑀼𑀧𑁆𑀧𑀓𑀺𑀭𑀺𑀬𑀲𑁆𑀲 𑀆𑀭𑀫𑁆𑀫𑀡𑀁 𑀳𑁄𑀢𑀺, 𑀢𑀢𑀺𑀬𑀸𑀭𑀼𑀧𑁆𑀧𑀓𑀺𑀭𑀺𑀬𑀁 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀓𑀺𑀭𑀺𑀬𑀲𑁆𑀲 𑀆𑀭𑀫𑁆𑀫𑀡𑀁 𑀳𑁄𑀢𑀺. 𑀇𑀢𑀺 𑀙𑀦𑁆𑀦𑀁 𑀭𑀸𑀲𑀻𑀦𑀁 𑀕𑁄𑀘𑀭𑁄 𑀳𑁄𑀢𑀺𑀬𑁂𑀯.

𑁩𑁫𑁭-𑁮. 𑀭𑀽𑀧𑀁 𑀘𑀢𑀼𑀲𑀫𑀼𑀝𑁆𑀞𑀸𑀦𑀁, 𑀭𑀽𑀧𑀸𑀭𑀫𑁆𑀫𑀡𑀲𑀜𑁆𑀜𑀺𑀢𑀁;

𑀓𑀸𑀫𑀸𑀯𑀘𑀭𑀧𑀼𑀜𑁆𑀜𑀲𑁆𑀲, 𑀢𑀣𑁂𑀯 𑀓𑀼𑀲𑀮𑀲𑁆𑀲 𑀘;

𑀅𑀪𑀺𑀜𑁆𑀜𑀸𑀤𑁆𑀯𑀬𑀘𑀺𑀢𑁆𑀢𑀲𑁆𑀲, 𑀓𑀸𑀫𑀧𑀸𑀓𑀓𑁆𑀭𑀺𑀬𑀲𑁆𑀲 𑀘.

𑀤𑁆𑀯𑀺𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀫𑀦𑁄𑀥𑀸𑀢𑀼𑀤𑁆𑀯𑀬𑀲𑀦𑁆𑀢𑀻𑀭𑀡𑀢𑁆𑀢𑀬𑀫𑀳𑀸𑀧𑀸𑀓𑀲𑁆𑀲 𑀘 𑀓𑀸𑀫𑀓𑀺𑀭𑀺𑀬𑀲𑁆𑀲 𑀘𑀸𑀢𑀺 𑀏𑀓𑀸𑀤𑀲𑀯𑀺𑀥𑀲𑁆𑀲 𑀓𑀸𑀫𑀓𑀺𑀭𑀺𑀬𑀲𑁆𑀲 𑀘 𑀙𑀦𑁆𑀦𑀁 𑀏𑀢𑁂𑀲𑀁 𑀭𑀸𑀲𑀻𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀳𑁄𑀢𑀺.

𑁩𑁫𑁯-𑁩𑁬𑁦. 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀁 𑀓𑀸𑀫𑀭𑀽𑀧𑀸𑀯𑀘𑀭𑀢𑁄 𑀓𑀸𑀫𑀭𑀽𑀧𑀸𑀯𑀘𑀭𑀯𑀲𑁂𑀦 𑀲𑁂𑀓𑁆𑀔𑀸𑀦𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀫𑀳𑀸𑀓𑀼𑀲𑀮𑀲𑁆𑀲, 𑀭𑀽𑀧𑀸𑀯𑀘𑀭𑀯𑀲𑁂𑀦 𑀧𑀜𑁆𑀘𑀫𑀲𑁆𑀲 𑀭𑀽𑀧𑀓𑀼𑀲𑀮𑀲𑁆𑀲 𑀘 𑀓𑀸𑀫𑀭𑀽𑀧𑀓𑀺𑀭𑀺𑀬𑀲𑁆𑀲 𑀘 𑀔𑀻𑀡𑀸𑀲𑀯𑀸𑀦𑀁 𑀯𑁄𑀝𑁆𑀞𑀩𑁆𑀩𑀦𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀫𑀳𑀸𑀓𑀺𑀭𑀺𑀬𑀲𑁆𑀲 𑀘 𑀧𑀜𑁆𑀘𑀫𑀭𑀽𑀧𑀓𑀺𑀭𑀺𑀬𑀲𑁆𑀲 𑀘 𑀉𑀪𑀬𑀲𑁆𑀲𑀸𑀧𑀺 𑀘𑀺𑀢𑁆𑀢𑀲𑁆𑀲 𑀆𑀭𑀫𑁆𑀫𑀡𑀁 𑀳𑁄𑀢𑀺. 𑀅𑀧𑀭𑀺𑀬𑀸𑀧𑀦𑁆𑀦𑀢𑁄 𑀘𑁂𑀯 𑀮𑁄𑀓𑀼𑀢𑁆𑀢𑀭𑀯𑀲𑁂𑀦 𑀘 𑀏𑀯 𑀨𑀮𑀲𑁆𑀲, 𑀓𑀼𑀲𑀮𑀲𑁆𑀲 𑀘 𑀏𑀢𑁂𑀲𑀁 𑀙𑀦𑁆𑀦𑀁 𑀭𑀸𑀲𑀻𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀳𑁄𑀢𑀺.

𑁩𑁬𑁧-𑁨. 𑀦𑀸𑀦𑀧𑁆𑀧𑀓𑀸𑀭𑀓𑀁 𑀲𑀩𑁆𑀩𑀁, 𑀧𑀜𑁆𑀜𑀢𑁆𑀢𑀸𑀭𑀫𑁆𑀫𑀡𑀁 𑀧𑀦 𑀢𑁂𑀪𑀽𑀫𑀓𑀲𑁆𑀲 𑀧𑀼𑀜𑁆𑀜𑀲𑁆𑀲 𑀫𑀳𑀸𑀓𑀼𑀲𑀮𑀲𑁆𑀲, 𑀲𑀼𑀤𑁆𑀥𑀛𑀸𑀦𑀲𑁆𑀲 𑀧𑀜𑁆𑀘𑀯𑀺𑀥𑀲𑁆𑀲 𑀭𑀽𑀧𑀓𑀼𑀲𑀮𑀲𑁆𑀲, 𑀧𑀞𑀫𑀸𑀭𑀼𑀧𑁆𑀧𑀢𑀢𑀺𑀬𑀸𑀭𑀼𑀧𑁆𑀧𑀓𑀼𑀲𑀮𑀲𑁆𑀲 𑀘 𑀢𑀣𑁂𑀯 𑀅𑀓𑀼𑀲𑀮𑀲𑁆𑀲 𑀘 𑀭𑀽𑀧𑀸𑀭𑀽𑀧𑀯𑀺𑀧𑀸𑀓𑀲𑁆𑀲 𑀲𑀩𑁆𑀩𑀲𑁆𑀲 𑀭𑀽𑀧𑀯𑀺𑀧𑀸𑀓𑀲𑁆𑀲, 𑀧𑀞𑀫𑀸𑀭𑀼𑀧𑁆𑀧𑀢𑀢𑀺𑀬𑀸𑀭𑀼𑀧𑁆𑀧𑀯𑀺𑀧𑀸𑀓𑀲𑁆𑀲 𑀘 𑀢𑁂𑀪𑀽𑀫𑀓𑀓𑁆𑀭𑀺𑀬𑀲𑁆𑀲 𑀘 𑀳𑀲𑀦𑀯𑁄𑀝𑁆𑀞𑀩𑁆𑀩𑀦𑀫𑀳𑀸𑀓𑀺𑀭𑀺𑀬𑀲𑁆𑀲 𑀲𑀩𑁆𑀩𑀲𑁆𑀲 𑀭𑀽𑀧𑀓𑀺𑀭𑀺𑀬𑀲𑁆𑀲, 𑀧𑀞𑀫𑀸𑀭𑀼𑀧𑁆𑀧𑀢𑀢𑀺𑀬𑀸𑀭𑀼𑀧𑁆𑀧𑀓𑀺𑀭𑀺𑀬𑀲𑁆𑀲 𑀘𑀸𑀢𑀺 𑀦𑀯𑀦𑁆𑀦𑀁 𑀧𑀦 𑀭𑀸𑀲𑀻𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀳𑁄𑀢𑀺.

𑁩𑁬𑁩-𑁪. 𑀭𑀽𑀧𑀸𑀭𑀫𑁆𑀫𑀡𑀺𑀓𑀸 𑀤𑁆𑀯𑁂 𑀢𑀼 𑀤𑁆𑀯𑁂 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀭𑀽𑀧𑀸𑀭𑀫𑁆𑀫𑀡𑀺𑀓𑀸, 𑀤𑁆𑀯𑁂 𑀤𑁆𑀯𑁂 𑀲𑀤𑁆𑀤𑀸𑀤𑀺𑀕𑁄𑀘𑀭𑀸 𑀤𑁆𑀯𑁂 𑀤𑁆𑀯𑁂 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀲𑀤𑁆𑀤𑀸𑀭𑀫𑁆𑀫𑀡𑀸𑀤𑀺𑀕𑁄𑀘𑀭𑀸, 𑀢𑀬𑁄 𑀫𑀦𑁄𑀥𑀸𑀢𑀼𑀲𑀗𑁆𑀔𑀸𑀢𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀧𑀜𑁆𑀘𑀸𑀭𑀫𑁆𑀫𑀡𑀺𑀓𑀸 𑀦𑀸𑀫 𑀫𑀢𑀸 𑀪𑀕𑀯𑀢𑀸. 𑀇𑀥 𑀇𑀫𑀲𑁆𑀫𑀺𑀁 𑀓𑀸𑀫𑀸𑀯𑀘𑀭𑀸𑀥𑀺𑀓𑀸𑀭𑁂 𑀏𑀓𑀘𑀢𑁆𑀢𑀸𑀮𑀻𑀲𑁂𑀯 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀙𑀴𑀸𑀭𑀫𑁆𑀫𑀡𑀺𑀓𑀸 𑀫𑀢𑀸. 𑀅𑀬𑀁 𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑀸𑀦𑀁 𑀆𑀭𑀫𑁆𑀫𑀡𑀓𑁆𑀓𑀫𑁄.

𑁩𑁬𑁫-𑁯. 𑀧𑀜𑁆𑀘𑀸𑀪𑀺𑀜𑁆𑀜𑀸 𑀯𑀺𑀯𑀚𑁆𑀚𑁂𑀢𑁆𑀯𑀸, 𑀭𑀽𑀧𑀸𑀭𑀽𑀧𑀸 𑀅𑀦𑀸𑀲𑀯𑀸 𑀇𑀫𑁂 𑀲𑀩𑁆𑀩𑁂 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀥𑀫𑁆𑀫𑀸𑀭𑀫𑁆𑀫𑀡𑀕𑁄𑀘𑀭𑀸 𑀳𑁄𑀦𑁆𑀢𑀺. 𑀧𑀞𑀫𑀸𑀭𑀼𑀧𑁆𑀧𑀓𑀼𑀲𑀮𑀁 𑀤𑀼𑀢𑀺𑀬𑀸𑀭𑀼𑀧𑁆𑀧𑀘𑁂𑀢𑀲𑁄 𑀓𑀼𑀲𑀮𑀲𑁆𑀲 𑀆𑀭𑀫𑁆𑀫𑀡𑀁 𑀳𑁄𑀢𑀺, 𑀤𑀼𑀢𑀺𑀬𑀸𑀭𑀼𑀧𑁆𑀧𑀘𑁂𑀢𑀲𑁄 𑀯𑀺𑀧𑀸𑀓𑀲𑁆𑀲 𑀘 𑀆𑀭𑀫𑁆𑀫𑀡𑀁 𑀳𑁄𑀢𑀺, 𑀤𑀼𑀢𑀺𑀬𑀸𑀭𑀼𑀧𑁆𑀧𑀘𑁂𑀢𑀲𑁄 𑀓𑀺𑀭𑀺𑀬𑀲𑁆𑀲 𑀘 𑀆𑀭𑀫𑁆𑀫𑀡𑀁 𑀳𑁄𑀢𑀺. 𑀤𑀼𑀢𑀺𑀬𑀸𑀭𑀼𑀧𑁆𑀧𑀘𑁂𑀢𑀲𑁄 𑀓𑀺𑀭𑀺𑀬𑀲𑁆𑀲 𑀧𑀞𑀫𑀸𑀭𑀼𑀧𑁆𑀧𑀓𑀼𑀲𑀮𑀸𑀭𑀫𑁆𑀫𑀡𑀪𑀸𑀯𑁂 𑀓𑀸𑀭𑀡𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯. 𑀧𑀞𑀫𑀸𑀭𑀼𑀧𑁆𑀧𑀧𑀸𑀓𑁄𑀬𑀁, 𑀤𑀼𑀢𑀺𑀬𑀸𑀭𑀼𑀧𑁆𑀧𑀘𑁂𑀢𑀲𑁄 𑀓𑀼𑀲𑀮𑀲𑁆𑀲 𑀘 𑀤𑀼𑀢𑀺𑀬𑀸𑀭𑀼𑀧𑁆𑀧𑀘𑁂𑀢𑀲𑁄 𑀯𑀺𑀧𑀸𑀓𑀲𑁆𑀲 𑀘 𑀤𑀼𑀢𑀺𑀬𑀸𑀭𑀼𑀧𑁆𑀧𑀘𑁂𑀢𑀲𑁄 𑀓𑀺𑀭𑀺𑀬𑀲𑁆𑀲 𑀘 𑀆𑀭𑀫𑁆𑀫𑀡𑀁 𑀦 𑀳𑁄𑀢𑀺. 𑀳𑀺 𑀓𑀲𑁆𑀫𑀸? 𑀢𑁂𑀲𑀁 𑀤𑀼𑀢𑀺𑀬𑀸𑀭𑀼𑀧𑁆𑀧𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀸𑀦𑀁 𑀧𑀞𑀫𑀸𑀭𑀼𑀧𑁆𑀧𑀓𑀼𑀲𑀮𑀸𑀭𑀫𑁆𑀫𑀡𑀢𑁆𑀢𑀸. 𑀧𑀞𑀫𑀁 𑀢𑀼 𑀓𑁆𑀭𑀺𑀬𑀸𑀘𑀺𑀢𑁆𑀢𑀁 𑀧𑀞𑀫𑀁 𑀓𑀺𑀭𑀺𑀬𑀸𑀘𑀺𑀢𑁆𑀢𑀁 𑀧𑀦 𑀤𑀼𑀢𑀺𑀬𑀸𑀭𑀼𑀧𑁆𑀧𑀘𑁂𑀢𑀲𑁄 𑀧𑀼𑀜𑁆𑀜𑀲𑁆𑀲 𑀆𑀭𑀫𑁆𑀫𑀡𑀁 𑀦 𑀳𑁄𑀢𑀺. 𑀤𑀼𑀢𑀺𑀬𑀸𑀭𑀼𑀧𑁆𑀧𑀘𑁂𑀢𑀲𑁄 𑀯𑀺𑀧𑀸𑀓𑀲𑁆𑀲 𑀆𑀭𑀫𑁆𑀫𑀡𑀁 𑀦 𑀳𑁄𑀢𑀺. 𑀭𑀽𑀧𑀸𑀭𑀽𑀧𑀪𑀯𑁂𑀲𑀼 𑀳𑀺 𑀔𑀻𑀡𑀸𑀲𑀯𑀸 𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺 𑀘𑀼𑀢𑀺𑀯𑀲𑁂𑀦 𑀲𑀓𑀲𑀓𑀓𑀼𑀲𑀮𑀸𑀦𑀁 𑀆𑀭𑀫𑁆𑀫𑀡𑀁 𑀓𑀭𑁄𑀦𑁆𑀢𑀺. 𑀧𑀞𑀫𑀁 𑀢𑀼 𑀓𑁆𑀭𑀺𑀬𑀸𑀘𑀺𑀢𑁆𑀢𑀁 𑀧𑀦 𑀤𑀼𑀢𑀺𑀬𑀸𑀭𑀼𑀧𑁆𑀧𑀘𑁂𑀢𑀲𑁄 𑀓𑀺𑀭𑀺𑀬𑀲𑁆𑀲 𑀆𑀭𑀫𑁆𑀫𑀡𑀁 𑀳𑁄𑀢𑀺. 𑀇𑀢𑀺 𑀏𑀯𑀁 𑀇𑀫𑀺𑀦𑀸 𑀫𑀬𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀘𑀺𑀢𑁆𑀢𑀸𑀦𑀁 𑀆𑀭𑀫𑁆𑀫𑀡𑀼𑀧𑁆𑀧𑀢𑁆𑀢𑀺 𑀯𑀺𑀪𑀸𑀯𑀺𑀦𑀸 𑀥𑀻𑀭𑁂𑀦 𑀜𑁂𑀬𑁆𑀬𑀸.

𑁩𑁭𑁦-𑁩. 𑀧𑀼𑀣𑀼𑀚𑁆𑀚𑀦𑀲𑁆𑀲 𑀲𑁂𑀓𑁆𑀔𑀲𑁆𑀲, 𑀅𑀭𑀽𑀧𑀸𑀭𑀫𑁆𑀫𑀡𑀁 𑀤𑁆𑀯𑀺𑀥𑀸 𑀤𑁆𑀯𑀺𑀧𑁆𑀧𑀓𑀸𑀭𑀁 𑀓𑀼𑀲𑀮𑀁 𑀓𑀼𑀲𑀮𑀲𑁆𑀲 𑀤𑀼𑀢𑀺𑀬𑀸𑀭𑀼𑀧𑁆𑀧𑀓𑀼𑀲𑀮𑀲𑁆𑀲 𑀆𑀭𑀫𑁆𑀫𑀡𑀁 𑀳𑁄𑀢𑀺, 𑀢𑀁 𑀧𑀞𑀫𑀸𑀭𑀼𑀧𑁆𑀧𑀓𑀼𑀲𑀮𑀁 𑀤𑀼𑀢𑀺𑀬𑀸𑀭𑀼𑀧𑁆𑀧𑀯𑀺𑀧𑀸𑀓𑀲𑁆𑀲 𑀆𑀭𑀫𑁆𑀫𑀡𑀁 𑀲𑀺𑀬𑀸 𑀪𑀯𑁂𑀬𑁆𑀬. 𑀔𑀻𑀡𑀸𑀲𑀯𑀲𑁆𑀲 𑀪𑀺𑀓𑁆𑀔𑀼𑀲𑁆𑀲, 𑀧𑀞𑀫𑀸𑀭𑀼𑀧𑁆𑀧𑀫𑀸𑀦𑀲𑀁 𑀆𑀭𑀫𑁆𑀫𑀡𑀁 𑀢𑀺𑀥𑀸 𑀢𑀺𑀧𑁆𑀧𑀓𑀸𑀭𑀁 𑀳𑁄𑀢𑀺. 𑀇𑀢𑀺 𑀯𑀘𑀦𑀁 𑀫𑀳𑁂𑀲𑀺𑀦𑀸 𑀯𑀼𑀢𑁆𑀢𑀁. 𑀓𑁆𑀭𑀺𑀬𑀲𑁆𑀲𑀸𑀧𑀺 𑀤𑀼𑀢𑀺𑀬𑀸𑀭𑀼𑀧𑁆𑀧𑀓𑀺𑀭𑀺𑀬𑀲𑁆𑀲𑀸𑀧𑀺 𑀧𑀞𑀫𑀸𑀭𑀼𑀧𑁆𑀧𑀓𑀺𑀭𑀺𑀬𑀸 𑀆𑀭𑀫𑁆𑀫𑀡𑀁 𑀳𑁄𑀢𑀺. 𑀓𑀼𑀲𑀮𑀫𑁆𑀧𑀺 𑀧𑀞𑀫𑀸𑀭𑀼𑀧𑁆𑀧𑀓𑀼𑀲𑀮𑀫𑁆𑀧𑀺 𑀤𑀼𑀢𑀺𑀬𑀸𑀭𑀼𑀧𑁆𑀧𑀓𑀺𑀭𑀺𑀬𑀲𑁆𑀲 𑀘 𑀆𑀭𑀫𑁆𑀫𑀡𑀁 𑀳𑁄𑀢𑀺. 𑀓𑀼𑀲𑀮𑀁 𑀧𑀞𑀫𑀸𑀭𑀼𑀧𑁆𑀧𑀓𑀼𑀲𑀮𑀁 𑀤𑀼𑀢𑀺𑀬𑀸𑀭𑀼𑀧𑁆𑀧𑀯𑀺𑀧𑀸𑀓𑀲𑁆𑀲 𑀆𑀭𑀫𑁆𑀫𑀡𑀁 𑀳𑁄𑀢𑀺. 𑀏𑀯𑀁 𑀇𑀫𑀺𑀦𑀸 𑀫𑀬𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀧𑀞𑀫𑀸𑀭𑀼𑀧𑁆𑀧𑀫𑀸𑀦𑀲𑀁 𑀆𑀭𑀫𑁆𑀫𑀡𑀁 𑀢𑀺𑀥𑀸 𑀳𑁄𑀢𑀺. 𑀢𑀢𑀺𑀬𑀸𑀭𑀼𑀧𑁆𑀧𑀘𑀺𑀢𑁆𑀢𑀫𑁆𑀧𑀺 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀘𑁂𑀢𑀲𑁄 𑀓𑀼𑀲𑀮𑀲𑁆𑀲 𑀆𑀭𑀫𑁆𑀫𑀡𑀁 𑀳𑁄𑀢𑀺, 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀘𑁂𑀢𑀲𑁄 𑀯𑀺𑀧𑀸𑀓𑀲𑁆𑀲 𑀘 𑀢𑀁 𑀆𑀭𑀫𑁆𑀫𑀡𑀁 𑀳𑁄𑀢𑀺. 𑀏𑀯𑀫𑁂𑀯 𑀬𑀣𑀸 𑀧𑀞𑀫𑀸𑀭𑀼𑀧𑁆𑀧𑀫𑀸𑀦𑀲𑀁 𑀆𑀭𑀫𑁆𑀫𑀡𑀁 𑀤𑁆𑀯𑀺𑀥𑀸 𑀳𑁄𑀢𑀺, 𑀏𑀯𑀫𑁂𑀯 𑀢𑀣𑀸 𑀢𑀢𑀺𑀬𑀸𑀭𑀼𑀧𑁆𑀧𑀘𑀺𑀢𑁆𑀢𑀁 𑀆𑀭𑀫𑁆𑀫𑀡𑀁 𑀤𑁆𑀯𑀺𑀥𑀸 𑀳𑁄𑀢𑀺. 𑀬𑀣𑀸 𑀧𑀞𑀫𑀸𑀭𑀼𑀧𑁆𑀧𑀫𑀸𑀦𑀲𑀁 𑀆𑀭𑀫𑁆𑀫𑀡𑀁 𑀢𑀺𑀥𑀸 𑀳𑁄𑀢𑀺, 𑀏𑀯𑀫𑁂𑀯 𑀢𑀣𑀸 𑀢𑀢𑀺𑀬𑀸𑀭𑀼𑀧𑁆𑀧𑀘𑀺𑀢𑁆𑀢𑀁 𑀆𑀭𑀫𑁆𑀫𑀡𑀁 𑀢𑀺𑀥𑀸 𑀲𑀺𑀬𑀸.

𑁩𑁭𑁪. 𑀬𑀁 𑀬𑀁 𑀧𑀦 𑀇𑀥𑀸𑀭𑀩𑁆𑀪 𑀇𑀥 𑀇𑀫𑀲𑁆𑀫𑀺𑀁 𑀅𑀥𑀺𑀓𑀸𑀭𑁂 𑀬𑀁 𑀬𑀁 𑀕𑁄𑀘𑀭𑀁 𑀆𑀭𑀩𑁆𑀪 𑀧𑀝𑀺𑀘𑁆𑀘 𑀬𑁂 𑀬𑁂 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀚𑀸𑀬𑀦𑁆𑀢𑀺, 𑀲𑁄 𑀲𑁄 𑀕𑁄𑀘𑀭𑁄 𑀢𑁂𑀲𑀜𑁆𑀘 𑀢𑁂𑀲𑀜𑁆𑀘 𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀳𑁄𑀢𑀺.

𑁩𑁭𑁫. 𑀬𑁄 𑀧𑀦 𑀦𑀭𑁄 𑀇𑀫𑀲𑁆𑀲 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑀲𑁆𑀲 𑀓𑀺𑀭 𑀧𑀸𑀭𑀁 𑀤𑀼𑀢𑁆𑀢𑀭𑀁 𑀇𑀥 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀉𑀢𑁆𑀢𑀭𑀢𑀺, 𑀲𑁄 𑀦𑀭𑁄 𑀅𑀪𑀺𑀥𑀫𑁆𑀫𑀫𑀳𑀡𑁆𑀡𑀯𑁂 𑀧𑀸𑀭𑀁 𑀤𑀼𑀢𑁆𑀢𑀭𑀁 𑀉𑀢𑁆𑀢𑀭𑀁 𑀉𑀢𑁆𑀢𑀭𑀢𑀺 𑀏𑀯.

𑀇𑀢𑀺 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑀝𑀻𑀓𑀸𑀬

𑀆𑀭𑀫𑁆𑀫𑀡𑀯𑀺𑀪𑀸𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀙𑀝𑁆𑀞𑁄 𑀧𑀭𑀺𑀘𑁆𑀙𑁂𑀤𑁄.