𑁨𑁩. 𑀢𑁂𑀯𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄

𑀓𑀺𑀮𑁂𑀲𑀧𑁆𑀧𑀳𑀸𑀦𑀓𑀣𑀸𑀯𑀡𑁆𑀡𑀦𑀸

𑁧𑁩𑁭𑁫. 𑀇𑀤𑀸𑀦𑀺 𑀇𑀫𑀺𑀲𑁆𑀲𑀸𑀬𑁂𑀯 𑀘𑀢𑀼𑀢𑁆𑀣𑀜𑀸𑀡𑀸𑀬 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀬𑀸 𑀆𑀦𑀼𑀪𑀸𑀯𑀯𑀺𑀚𑀸𑀦𑀦𑀢𑁆𑀣𑀁 𑀬𑁂𑀦 𑀬𑁂 𑀥𑀫𑁆𑀫𑀸 𑀧𑀳𑀸𑀢𑀩𑁆𑀩𑀸, 𑀢𑁂𑀲𑀁 𑀧𑀳𑀸𑀦𑀜𑁆𑀘 𑀅𑀪𑀺𑀲𑀫𑀬𑀓𑀸𑀮𑁂 𑀧𑀭𑀺𑀜𑁆𑀜𑀸𑀤𑀺𑀓𑀺𑀘𑁆𑀘𑀸𑀦𑀺 𑀘 𑀤𑀲𑁆𑀲𑁂𑀢𑀼𑀁 ‘‘𑀏𑀢𑁂𑀲𑀼 𑀬𑁂𑀦 𑀬𑁂 𑀥𑀫𑁆𑀫𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀬𑁂 𑀥𑀫𑁆𑀫𑀸𑀢𑀺 𑀬𑁂 𑀲𑀁𑀓𑀺𑀮𑁂𑀲𑀥𑀫𑁆𑀫𑀸. 𑀲𑀁𑀬𑁄𑀚𑀦𑀸𑀤𑀻𑀲𑀼 𑀔𑀦𑁆𑀥𑁂𑀳𑀺 𑀔𑀦𑁆𑀥𑀸𑀦𑀁, 𑀨𑀮𑁂𑀦 𑀓𑀫𑁆𑀫𑀲𑁆𑀲, 𑀤𑀼𑀓𑁆𑀔𑁂𑀦 𑀯𑀸 𑀲𑀢𑁆𑀢𑀸𑀦𑀁 𑀲𑀁𑀬𑁄𑀚𑀦𑀝𑁆𑀞𑁂𑀦 𑀩𑀦𑁆𑀥𑀦𑀝𑁆𑀞𑁂𑀦 𑀲𑀁𑀬𑁄𑀚𑀦𑀸𑀦𑀺. 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀯𑀺𑀩𑀸𑀥𑀦𑀝𑁆𑀞𑁂𑀦, 𑀉𑀧𑀢𑀸𑀧𑀦𑀝𑁆𑀞𑁂𑀦, 𑀲𑀁𑀓𑀺𑀮𑀺𑀝𑁆𑀞𑀢𑀸𑀬 𑀘 𑀓𑀺𑀮𑁂𑀲𑀸. 𑀅𑀪𑀺𑀦𑀺𑀯𑁂𑀲𑀸𑀤𑀺𑀯𑀲𑁂𑀦 𑀫𑀺𑀘𑁆𑀙𑀸𑀯𑀺𑀧𑀭𑀻𑀢𑀁 𑀧𑀯𑀢𑁆𑀢𑀦𑀢𑁄 𑀫𑀺𑀘𑁆𑀙𑀸𑀲𑀪𑀸𑀯𑀸𑀢𑀺 𑀫𑀺𑀘𑁆𑀙𑀢𑁆𑀢𑀸. 𑀮𑁄𑀓𑁂 𑀥𑀫𑁆𑀫𑀸, 𑀮𑁄𑀓𑀧𑀭𑀺𑀬𑀸𑀧𑀦𑁆𑀦𑀸 𑀥𑀫𑁆𑀫𑀸, 𑀮𑁄𑀓𑀧𑁆𑀧𑀯𑀢𑁆𑀢𑀺𑀬𑀁 𑀲𑀢𑀺 𑀅𑀦𑀼𑀧𑀭𑀫𑀥𑀫𑁆𑀫𑀢𑁆𑀢𑀸 𑀯𑀸𑀢𑀺 𑀮𑁄𑀓𑀥𑀫𑁆𑀫𑀸. 𑀫𑀘𑁆𑀙𑁂𑀭𑀲𑁆𑀲 𑀪𑀸𑀯𑁄, 𑀓𑀫𑁆𑀫𑀁 𑀯𑀸𑀢𑀺 𑀫𑀘𑁆𑀙𑀭𑀺𑀬𑀁. 𑀯𑀺𑀧𑀭𑀻𑀢𑀝𑁆𑀞𑁂𑀦 𑀯𑀺𑀧𑀮𑁆𑀮𑀸𑀲𑀸. 𑀦𑀸𑀫𑀓𑀸𑀬𑀲𑁆𑀲 𑀘 𑀭𑀽𑀧𑀓𑀸𑀬𑀲𑁆𑀲 𑀘 𑀕𑀦𑁆𑀣𑀦𑀢𑁄 𑀕𑀦𑁆𑀣𑀸. 𑀅𑀭𑀺𑀬𑁂𑀳𑀺 𑀅𑀕𑀦𑁆𑀢𑀩𑁆𑀩𑀸, 𑀅𑀬𑀼𑀢𑁆𑀢𑀸 𑀕𑀢𑀻𑀢𑀺 𑀯𑀸 𑀅𑀕𑀢𑀺. 𑀆𑀲𑀯𑀦𑁆𑀢𑀻𑀢𑀺 𑀆𑀲𑀯𑀸, 𑀆𑀪𑀯𑀕𑁆𑀕𑀢𑁄 𑀲𑀩𑁆𑀩𑀫𑁄𑀓𑀸𑀲𑀮𑁄𑀓𑀁, 𑀆𑀕𑁄𑀢𑁆𑀭𑀪𑀼𑀢𑁄 𑀲𑀩𑁆𑀩𑁂 𑀥𑀫𑁆𑀫𑁂 𑀩𑁆𑀬𑀸𑀧𑁂𑀢𑁆𑀯𑀸 𑀧𑀯𑀢𑁆𑀢𑀦𑁆𑀢𑀻𑀢𑀺 𑀅𑀢𑁆𑀣𑁄, 𑀆𑀲𑀯𑀦𑁆𑀢𑀺 𑀲𑀁𑀲𑀸𑀭𑀤𑀼𑀓𑁆𑀔𑀦𑁆𑀢𑀺 𑀯𑀸 𑀆𑀲𑀯𑀸, 𑀘𑀓𑁆𑀔𑀸𑀤𑀻𑀳𑀺 𑀯𑀸 𑀲𑀁𑀯𑀭𑀸𑀲𑀁𑀯𑀭𑀤𑁆𑀯𑀸𑀭𑁂𑀳𑀺 𑀲𑀢𑁆𑀢𑀲𑀦𑁆𑀢𑀸𑀦𑁂 𑀆𑀲𑀯𑀦𑁆𑀢𑀺 𑀯𑀡𑀢𑁄 𑀬𑀽𑀲𑀸𑀦𑀺 𑀲𑀦𑁆𑀤𑀦𑁆𑀢𑀺 𑀯𑀺𑀬𑀸𑀢𑀺 𑀆𑀲𑀯𑀸, 𑀆𑀲𑀯𑀦𑁆𑀢𑀺 𑀯𑀸 𑀏𑀢𑁂𑀳𑀺 𑀘𑀺𑀢𑁆𑀢𑀸𑀦𑀺 𑀯𑀺𑀲𑀬𑁂𑀲𑀽𑀢𑀺 𑀆𑀲𑀯𑀸. 𑀲𑀁𑀲𑀸𑀭𑀫𑀳𑀸𑀲𑀸𑀕𑀭𑀧𑁆𑀧𑀢𑁆𑀢𑀺𑀳𑀦𑀦𑀢𑁄 𑀑𑀖𑀸 𑀯𑀺𑀬𑀸𑀢𑀺 𑀑𑀖𑀸. 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀬𑁄𑀚𑀦𑀢𑁄 𑀬𑁄𑀕𑀸. 𑀦𑀺𑀯𑀸𑀭𑁂𑀦𑁆𑀢𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀕𑀼𑀡𑀯𑀺𑀲𑁂𑀲𑀸𑀥𑀺𑀕𑀫𑀦𑁆𑀢𑀺 𑀦𑀻𑀯𑀭𑀡𑀸𑀦𑀺. 𑀅𑀦𑀺𑀘𑁆𑀘𑀸𑀤𑀺𑀥𑀫𑁆𑀫𑀲𑀪𑀸𑀯𑀁 𑀅𑀢𑀺𑀓𑁆𑀓𑀫𑁆𑀫 𑀧𑀭𑀢𑁄 𑀅𑀲𑀪𑀸𑀯𑀢𑁄 𑀆𑀫𑀲𑀦𑁆𑀢𑀻𑀢𑀺 𑀧𑀭𑀸𑀫𑀸𑀲𑀸. 𑀫𑀡𑁆𑀟𑀽𑀓𑀁 𑀧𑀦𑁆𑀦𑀕𑁄 𑀯𑀺𑀬 𑀆𑀭𑀫𑁆𑀫𑀡𑀁 𑀪𑀼𑀲𑀁 𑀆𑀤𑀺𑀬𑀦𑁆𑀢𑀻𑀢𑀺 𑀉𑀧𑀸𑀤𑀸𑀦𑀸𑀦𑀺. 𑀅𑀧𑁆𑀧𑀳𑀻𑀦𑀪𑀸𑀯𑁂𑀦 𑀲𑀢𑁆𑀢𑀲𑀦𑁆𑀢𑀸𑀦𑁂 𑀅𑀦𑀼𑀲𑁂𑀦𑁆𑀢𑀺 𑀫𑀽𑀲𑀺𑀓𑀯𑀺𑀲𑀁 𑀯𑀺𑀬 𑀅𑀦𑀼𑀭𑀽𑀧𑀓𑀸𑀭𑀡𑀁 𑀮𑀪𑀺𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀅𑀦𑀼𑀲𑀬𑀸. 𑀘𑀺𑀢𑁆𑀢𑀲𑁆𑀲 𑀫𑀮𑀻𑀦𑀪𑀸𑀯𑀓𑀭𑀡𑀝𑁆𑀞𑁂𑀦 𑀫𑀮𑀸. 𑀅𑀓𑀼𑀲𑀮𑀓𑀫𑁆𑀫𑀸𑀦𑀺 𑀘 𑀢𑀸𑀦𑀺 𑀤𑀼𑀕𑁆𑀕𑀢𑀻𑀦𑀁 𑀧𑀣𑀸 𑀘𑀸𑀢𑀺 𑀅𑀓𑀼𑀲𑀮𑀓𑀫𑁆𑀫𑀧𑀣𑀸. 𑀇𑀥 𑀧𑀦 𑀓𑀫𑁆𑀫𑀧𑀣𑀪𑀸𑀯𑀁 𑀅𑀧𑁆𑀧𑀢𑁆𑀢𑀸𑀦𑀁 𑀢𑀁𑀲𑀪𑀸𑀯𑀢𑁄 𑀕𑀳𑀡𑀁 𑀤𑀝𑁆𑀞𑀩𑁆𑀩𑀁. 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺 𑀏𑀢𑁆𑀣𑀸𑀢𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑁄, 𑀘𑁂𑀢𑀲𑀺𑀓𑀭𑀸𑀲𑀺, 𑀅𑀓𑀼𑀲𑀮𑁄 𑀘 𑀲𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀘𑀸𑀢𑀺 𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑁄.

𑀓𑀸𑀫𑀪𑀯𑀢𑁄 𑀉𑀧𑀭𑀺𑀓𑁄𑀝𑁆𑀞𑀸𑀲𑀪𑀸𑀯𑀢𑁄 𑀢𑀢𑀺𑀬𑀫𑀕𑁆𑀕𑀧𑁆𑀧𑀢𑁆𑀢𑀺𑀬𑀸 𑀉𑀤𑁆𑀥𑀁 𑀪𑀚𑀺𑀢𑀩𑁆𑀩𑀢𑁄, 𑀲𑁂𑀯𑀺𑀢𑀩𑁆𑀩𑀢𑁄 𑀘𑀸𑀢𑀺 𑀉𑀤𑁆𑀥𑀫𑁆𑀪𑀸𑀕𑀸, 𑀭𑀽𑀧𑀸𑀭𑀽𑀧𑀪𑀯𑀸, 𑀢𑁂𑀲𑀁 𑀳𑀺𑀢𑀸𑀦𑀺 𑀢𑀢𑁆𑀣𑀼𑀧𑁆𑀧𑀚𑁆𑀚𑀦𑀔𑀦𑁆𑀥𑀸𑀤𑀺𑀬𑁄𑀚𑀦𑀢𑁄𑀢𑀺 𑀉𑀤𑁆𑀥𑀫𑁆𑀪𑀸𑀕𑀺𑀬𑀸𑀦𑀺, 𑀢𑀸𑀦𑀺𑀬𑁂𑀯 𑀲𑀁𑀬𑁄𑀚𑀦𑀸𑀦𑀻𑀢𑀺 𑀉𑀤𑁆𑀥𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀸𑀦𑀺. 𑀭𑀽𑀧𑀸𑀭𑀽𑀧𑀪𑀯𑀢𑁄 𑀳𑁂𑀝𑁆𑀞𑀺𑀫𑀓𑁄𑀝𑁆𑀞𑀸𑀲𑀪𑀸𑀯𑀢𑁄 𑀢𑀢𑁆𑀣𑀼𑀧𑁆𑀧𑀸𑀤𑀓𑀺𑀮𑁂𑀲𑀸𑀦𑀁 𑀅𑀧𑁆𑀧𑀳𑀻𑀦𑀪𑀸𑀯𑁂𑀦 𑀢𑀢𑀺𑀬𑀫𑀕𑁆𑀕𑀧𑁆𑀧𑀢𑁆𑀢𑀺𑀬𑀸 𑀳𑁂𑀝𑁆𑀞𑀸 𑀪𑀚𑀺𑀢𑀩𑁆𑀩𑀢𑁄 𑀯𑀸 𑀅𑀥𑁄𑀪𑀸𑀕𑀸, 𑀓𑀸𑀫𑀪𑀯𑀸, 𑀢𑁂𑀲𑀁 𑀳𑀺𑀢𑀸𑀦𑀺 𑀲𑀁𑀬𑁄𑀚𑀦𑀸𑀦𑀻𑀢𑀺 𑀅𑀥𑁄𑀪𑀸𑀕𑀺𑀬𑀲𑀁𑀬𑁄𑀚𑀦𑀸𑀦𑀻𑀢𑀺.

𑀇𑀫𑁂𑀲𑀼 𑀧𑀦 𑀤𑀲𑀲𑀼 𑀭𑀽𑀧𑀪𑀯𑀲𑀁𑀬𑁄𑀚𑀦𑀁, 𑀅𑀭𑀽𑀧𑀪𑀯𑀲𑀁𑀬𑁄𑀚𑀦𑀁, 𑀓𑀸𑀫𑀪𑀯𑀲𑀁𑀬𑁄𑀚𑀦𑀜𑁆𑀘 𑀅𑀢𑁆𑀣𑀢𑁄 𑀮𑁄𑀪𑁄𑀯, 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀸𑀧𑀺 𑀤𑀺𑀝𑁆𑀞𑀺𑀬𑁂𑀯, 𑀢𑀲𑁆𑀫𑀸 𑀥𑀫𑁆𑀫𑀢𑁄 𑀲𑀢𑁆𑀢 𑀲𑀁𑀬𑁄𑀚𑀦𑀸𑀦𑀺.

𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑁄 𑀫𑀺𑀘𑁆𑀙𑀸𑀯𑀸𑀬𑀸𑀫𑁄 𑀫𑀺𑀘𑁆𑀙𑀸𑀲𑀫𑀸𑀥𑀻𑀢𑀺 𑀢𑀣𑀸 𑀧𑀯𑀢𑁆𑀢𑀸𑀦𑀁 𑀯𑀺𑀢𑀓𑁆𑀓𑀯𑀻𑀭𑀺𑀬𑀲𑀫𑀸𑀥𑀻𑀦𑀫𑀥𑀺𑀯𑀘𑀦𑀁. 𑀫𑀺𑀘𑁆𑀙𑀸𑀯𑀸𑀘𑀸𑀤𑀬𑁄 𑀢𑀬𑁄 𑀢𑀣𑀸 𑀧𑀯𑀢𑁆𑀢𑀸 𑀘𑁂𑀢𑀦𑀸. 𑀫𑀺𑀘𑁆𑀙𑀸𑀲𑀢𑀺 𑀧𑀦 𑀘𑀺𑀢𑁆𑀢𑀼𑀧𑁆𑀧𑀸𑀤𑁄. 𑀫𑀺𑀘𑁆𑀙𑀸𑀜𑀸𑀡𑀁 𑀢𑀣𑀸 𑀧𑀯𑀢𑁆𑀢𑁄 𑀫𑁄𑀳𑁄. 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺 𑀮𑁄𑀓𑀣𑀽𑀧𑀺𑀓𑀸𑀤𑀻𑀲𑀼 𑀫𑁄𑀓𑁆𑀔𑁄𑀢𑀺 𑀧𑀯𑀢𑁆𑀢𑀫𑀺𑀘𑁆𑀙𑀸𑀕𑀸𑀳𑁄.

𑀓𑀸𑀭𑀡𑀽𑀧𑀘𑀸𑀭𑁂𑀦𑀸𑀢𑀺 𑀮𑀸𑀪𑀳𑁂𑀢𑀼𑀓𑁄 𑀮𑀸𑀪𑁄, 𑀅𑀮𑀸𑀪𑀳𑁂𑀢𑀼𑀓𑁄 𑀅𑀮𑀸𑀪𑁄𑀢𑀺𑀆𑀤𑀺𑀦𑀸 𑀓𑀸𑀭𑀺𑀬𑀲𑁆𑀲 𑀓𑀸𑀭𑀡𑀯𑀲𑁂𑀦 𑀉𑀧𑀘𑀭𑀡𑁂𑀦. 𑀮𑁄𑀓𑀥𑀫𑁆𑀫𑀕𑁆𑀕𑀳𑀡𑀦𑁆𑀢𑀺 𑀮𑁄𑀓𑀥𑀫𑁆𑀫𑀕𑁆𑀕𑀳𑀡𑁂𑀦 𑀕𑀳𑀡𑀁.

𑀆𑀯𑀸𑀲𑁂 𑀫𑀘𑁆𑀙𑀭𑀺𑀬𑀁, 𑀆𑀯𑀸𑀲𑀳𑁂𑀢𑀼𑀓𑀁 𑀯𑀸 𑀫𑀘𑁆𑀙𑀭𑀺𑀬𑀦𑁆𑀢𑀺 𑀆𑀯𑀸𑀲𑀫𑀘𑁆𑀙𑀭𑀺𑀬𑀁. 𑀏𑀯𑀁 𑀓𑀼𑀮𑀫𑀘𑁆𑀙𑀭𑀺𑀬𑀸𑀤𑀻𑀦𑀺𑀧𑀺. 𑀢𑀢𑁆𑀣 𑀆𑀯𑀸𑀲𑁄𑀢𑀺 𑀯𑀺𑀳𑀸𑀭𑀸𑀤𑀺. 𑀓𑀼𑀮𑀦𑁆𑀢𑀺 𑀉𑀧𑀝𑁆𑀞𑀸𑀓𑀓𑀼𑀮𑀁, 𑀜𑀸𑀢𑀺𑀓𑀼𑀮𑀜𑁆𑀘. 𑀮𑀸𑀪𑁄𑀢𑀺 𑀧𑀘𑁆𑀘𑀬𑀮𑀸𑀪𑁄𑀬𑁂𑀯. 𑀯𑀡𑁆𑀡𑁄𑀢𑀺 𑀲𑀭𑀻𑀭𑀯𑀡𑁆𑀡𑁄 𑀘 𑀕𑀼𑀡𑀯𑀡𑁆𑀡𑁄 𑀘. 𑀥𑀫𑁆𑀫𑁄𑀢𑀺 𑀆𑀕𑀫𑁄, 𑀅𑀥𑀺𑀕𑀫𑁄 𑀘.

‘‘𑀢𑀬𑁄’’𑀢𑀺 𑀯𑀢𑁆𑀣𑀼𑀁 𑀅𑀪𑀺𑀦𑁆𑀤𑀺𑀢𑁆𑀯𑀸 𑀯𑀼𑀢𑁆𑀢𑀁, 𑀪𑀺𑀦𑁆𑀤𑀺𑀢𑁆𑀯𑀸 𑀘 𑀧𑀦 𑀯𑀼𑀘𑁆𑀘𑀫𑀸𑀦𑁂 𑀤𑁆𑀯𑀸𑀤𑀲 𑀳𑁄𑀦𑁆𑀢𑀺.

𑀅𑀪𑀺𑀲𑀚𑁆𑀚𑀦𑀽𑀧𑀦𑀬𑁆𑀳𑀦𑀯𑀲𑁂𑀦 𑀧𑀯𑀢𑁆𑀢𑀦𑀢𑁄 𑀅𑀪𑀺𑀚𑁆𑀛𑀸𑀩𑁆𑀬𑀸𑀧𑀸𑀤𑀸𑀦𑀁 𑀓𑀸𑀬𑀕𑀦𑁆𑀣𑀢𑀸 𑀤𑀝𑁆𑀞𑀩𑁆𑀩𑀸. ‘‘𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀏𑀯𑀁 𑀅𑀯𑀢𑁆𑀣𑀼𑀫𑁆𑀳𑀺 𑀧𑀯𑀢𑁆𑀢𑁄 𑀅𑀪𑀺𑀦𑀺𑀯𑁂𑀲𑁄 𑀇𑀤𑀁𑀲𑀘𑁆𑀘𑀸𑀪𑀺𑀦𑀺𑀯𑁂𑀲𑁄. 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀇𑀤𑀁𑀲𑀘𑁆𑀘𑀸𑀪𑀺𑀦𑀺𑀯𑁂𑀲𑀓𑀸𑀬𑀕𑀦𑁆𑀣𑀸 𑀘𑁂𑀢𑁆𑀣 𑀅𑀢𑁆𑀣𑀢𑁄 𑀤𑀺𑀝𑁆𑀞𑀺𑀬𑁂𑀯, 𑀢𑀲𑁆𑀫𑀸 𑀥𑀫𑁆𑀫𑀢𑁄 𑀢𑀬𑁄 𑀓𑀸𑀬𑀕𑀦𑁆𑀣𑀸.

‘‘𑀙𑀦𑁆𑀤𑀤𑁄𑀲𑀫𑁄𑀳𑀪𑀬𑀸𑀦𑀻’’𑀢𑀺 𑀅𑀕𑀢𑀺𑀓𑀸𑀭𑀡𑀢𑁆𑀢𑀸 𑀯𑀼𑀢𑁆𑀢𑀁, 𑀙𑀦𑁆𑀤𑀸𑀤𑀻𑀳𑀺 𑀧𑀦 𑀅𑀓𑀢𑁆𑀢𑀩𑁆𑀩𑀓𑀭𑀡𑀁, 𑀓𑀢𑁆𑀢𑀩𑁆𑀩𑀸𑀓𑀭𑀡𑀜𑁆𑀘 𑀅𑀕𑀢𑀺 𑀦𑀸𑀫.

𑀆𑀲𑀯𑁂𑀲𑀼 𑀓𑀸𑀫𑀭𑀸𑀕𑀪𑀯𑀭𑀸𑀕𑀸 𑀅𑀢𑁆𑀣𑀢𑁄 𑀮𑁄𑀪𑁄𑀢𑀺 𑀥𑀫𑁆𑀫𑀢𑁄 𑀢𑀬𑁄 𑀆𑀲𑀯𑀸.

𑀢𑁂𑀲𑀫𑁂𑀯𑀸𑀢𑀺 𑀓𑀸𑀫𑀭𑀸𑀕𑀸𑀤𑀻𑀦𑀫𑁂𑀯. 𑀢𑁂 𑀳𑀺 𑀑𑀖𑁄 𑀯𑀺𑀬 𑀅𑀢𑁆𑀢𑀦𑀺 𑀧𑀢𑀺𑀢𑁂 𑀅𑀧𑀸𑀬𑀲𑀫𑀼𑀤𑁆𑀤𑀁 𑀧𑀸𑀧𑁂𑀦𑁆𑀢𑀺, 𑀲𑀁𑀲𑀸𑀭𑀤𑀼𑀓𑁆𑀔𑀢𑁄 𑀘 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑀼𑀁 𑀦 𑀤𑁂𑀦𑁆𑀢𑀺, 𑀔𑀦𑁆𑀥𑀸𑀤𑀻𑀦𑀺 𑀘 𑀔𑀦𑁆𑀥𑀸𑀤𑀻𑀳𑀺 𑀬𑁄𑀚𑁂𑀦𑁆𑀢𑀺.

𑀓𑀸𑀫𑀼𑀧𑀸𑀤𑀸𑀦𑀸𑀤𑀻𑀦𑀻𑀢𑀺 𑀓𑀸𑀫𑀼𑀧𑀸𑀤𑀸𑀦𑀤𑀺𑀝𑁆𑀞𑀼𑀧𑀸𑀤𑀸𑀦𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀸𑀦𑀺. 𑀤𑀺𑀝𑁆𑀞𑀼𑀧𑀸𑀤𑀸𑀦𑀸𑀤𑀻𑀦𑀺 𑀘𑁂𑀢𑁆𑀣 𑀢𑀣𑀸 𑀧𑀯𑀢𑁆𑀢𑀸 𑀤𑀺𑀝𑁆𑀞𑀺𑀬𑁂𑀯, 𑀓𑀸𑀫𑀼𑀧𑀸𑀤𑀸𑀦𑀁 𑀮𑁄𑀪𑁄𑀢𑀺 𑀥𑀫𑁆𑀫𑀢𑁄 𑀤𑁆𑀯𑁂 𑀉𑀧𑀸𑀤𑀸𑀦𑀸𑀦𑀺.

𑀲𑀢𑁆𑀢𑀸𑀦𑀼𑀲𑀬𑀸𑀢𑀺 𑀏𑀢𑁆𑀣 𑀬𑀤𑀺 𑀅𑀧𑁆𑀧𑀳𑀻𑀦𑀝𑁆𑀞𑁂𑀦 𑀲𑀢𑁆𑀢𑀲𑀦𑁆𑀢𑀸𑀦𑁂 𑀅𑀦𑀼𑀲𑁂𑀦𑁆𑀢𑀻𑀢𑀺 𑀅𑀦𑀼𑀲𑀬𑀸. 𑀓𑀲𑁆𑀫𑀸 𑀲𑀢𑁆𑀢𑁂𑀯 𑀯𑀼𑀢𑁆𑀢𑀸, 𑀦𑀦𑀼 𑀅𑀜𑁆𑀜𑁂𑀲𑀫𑁆𑀧𑀺 𑀓𑀺𑀮𑁂𑀲𑀸𑀦𑀁 𑀅𑀧𑁆𑀧𑀳𑀻𑀦𑀪𑀸𑀯𑁄 𑀯𑀺𑀚𑁆𑀚𑀢𑀻𑀢𑀺? 𑀦 𑀫𑀬𑀁 𑀅𑀧𑁆𑀧𑀳𑀻𑀦𑀫𑀢𑁆𑀢𑁂𑀦 𑀅𑀦𑀼𑀲𑀬𑀁 𑀯𑀤𑀸𑀫, 𑀓𑀺𑀦𑁆𑀢𑀼 𑀅𑀧𑁆𑀧𑀳𑀻𑀦𑀪𑀸𑀯𑁂𑀦 𑀣𑀸𑀫𑀕𑀢𑀓𑀺𑀮𑁂𑀲𑀸 𑀅𑀦𑀼𑀲𑀬𑀸𑀢𑀺, 𑀣𑀸𑀫𑀕𑀫𑀦𑀜𑁆𑀘 𑀦𑁂𑀲𑀁 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑁄 𑀲𑀪𑀸𑀯𑁄 𑀤𑀝𑁆𑀞𑀩𑁆𑀩𑁄. 𑀢𑀣𑀸 𑀳𑀺 𑀥𑀫𑁆𑀫𑀲𑀪𑀸𑀯𑀯𑁂𑀤𑀺𑀦𑀸 𑀢𑀣𑀸𑀕𑀢𑁂𑀦 𑀇𑀫𑁂𑀬𑁂𑀯 𑀅𑀦𑀼𑀲𑀬𑀸 𑀯𑀼𑀢𑁆𑀢𑀸, 𑀓𑀸𑀫𑀭𑀸𑀕𑁄𑀬𑁂𑀯 𑀅𑀦𑀼𑀲𑀬𑁄 𑀓𑀸𑀫𑀭𑀸𑀕𑀸𑀦𑀼𑀲𑀬𑁄. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀅𑀧𑀭𑁂 𑀧𑀦 ‘‘𑀓𑀸𑀫𑀭𑀸𑀕𑀲𑁆𑀲 𑀅𑀦𑀼𑀲𑀬𑁄’’𑀢𑀺𑀆𑀤𑀺𑀦𑀺𑀩𑁆𑀩𑀘𑀦𑀁 𑀯𑀢𑁆𑀯𑀸 𑀓𑀸𑀫𑀭𑀸𑀕𑀸𑀤𑀻𑀦𑀁 𑀩𑀻𑀚𑀪𑀽𑀢𑀸 𑀅𑀢𑁆𑀢𑀪𑀸𑀯𑀲𑁆𑀲 𑀓𑀺𑀮𑁂𑀲𑀲𑀫𑁆𑀪𑀽𑀢𑀸 𑀓𑀺𑀮𑁂𑀲𑀼𑀧𑁆𑀧𑀸𑀤𑀦𑀲𑀢𑁆𑀢𑀺 𑀅𑀦𑀼𑀲𑀬𑀸𑀢𑀺 𑀯𑀡𑁆𑀡𑁂𑀦𑁆𑀢𑀺, 𑀢𑁂𑀲𑀁 𑀫𑀢𑀧𑀝𑀺𑀓𑁆𑀔𑁂𑀧𑁄 𑀇𑀥 𑀧𑀧𑀜𑁆𑀘𑀸𑀯𑀳𑀢𑁆𑀢𑀸 𑀅𑀦𑀸𑀳𑀝𑁄.

𑀧𑀸𑀡𑀲𑁆𑀲 𑀅𑀢𑀺𑀧𑀸𑀢𑁄 𑀧𑀸𑀡𑀸𑀢𑀺𑀧𑀸𑀢𑁄, 𑀧𑀸𑀡𑁄𑀢𑀺 𑀯𑁄𑀳𑀸𑀭𑀢𑁄 𑀲𑀢𑁆𑀢𑁄, 𑀧𑀭𑀫𑀢𑁆𑀣𑀢𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁. 𑀢𑀲𑁆𑀫𑀺𑀁 𑀧𑀸𑀡𑁂 𑀧𑀸𑀡𑀲𑀜𑁆𑀜𑀺𑀦𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀼𑀧𑀘𑁆𑀙𑁂𑀤𑀓𑀧𑁆𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀺𑀓𑀸 𑀯𑀥𑀓𑀘𑁂𑀢𑀦𑀸 𑀧𑀸𑀡𑀸𑀢𑀺𑀧𑀸𑀢𑁄. 𑀧𑀭𑀪𑀡𑁆𑀟𑁂 𑀢𑀣𑀸𑀲𑀜𑁆𑀜𑀺𑀦𑁄 𑀢𑀤𑀸𑀤𑀸𑀬𑀓𑀧𑁆𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀺𑀓𑀸 𑀣𑁂𑀬𑁆𑀬𑀘𑁂𑀢𑀦𑀸 𑀅𑀤𑀺𑀦𑁆𑀦𑀸𑀤𑀸𑀦𑀁. 𑀅𑀲𑀤𑁆𑀥𑀫𑁆𑀫𑀓𑀸𑀫𑀢𑀸𑀬 𑀓𑀸𑀬𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀸 𑀅𑀕𑀦𑁆𑀢𑀩𑁆𑀩𑀝𑁆𑀞𑀸𑀦𑀯𑀻𑀢𑀺𑀓𑁆𑀓𑀫𑀘𑁂𑀢𑀦𑀸 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑁄. 𑀅𑀪𑀽𑀢𑀁 𑀯𑀢𑁆𑀣𑀼𑀁 𑀪𑀽𑀢𑀢𑁄 𑀧𑀭𑀁 𑀯𑀺𑀜𑁆𑀜𑀸𑀧𑁂𑀢𑀼𑀓𑀸𑀫𑀲𑁆𑀲 𑀢𑀣𑀸 𑀯𑀺𑀜𑁆𑀜𑀸𑀧𑀦𑀧𑁆𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀺𑀓𑀸 𑀘𑁂𑀢𑀦𑀸 𑀫𑀼𑀲𑀸𑀯𑀸𑀤𑁄. 𑀲𑁄 𑀧𑀦 𑀧𑀭𑀲𑁆𑀲 𑀅𑀢𑁆𑀣𑀪𑁂𑀤𑀓𑀭𑁄𑀯 𑀓𑀫𑁆𑀫𑀧𑀣𑁄, 𑀇𑀢𑀭𑁄 𑀓𑀫𑁆𑀫𑀫𑁂𑀯. 𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑀲𑁆𑀲 𑀧𑀭𑀪𑁂𑀤𑀦𑀓𑀸𑀫𑀢𑀸𑀬, 𑀅𑀢𑁆𑀢𑀧𑀺𑀬𑀓𑀫𑁆𑀬𑀢𑀸𑀬 𑀯𑀸 𑀧𑀭𑀪𑁂𑀤𑀓𑀧𑁆𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀺𑀓𑀸 𑀘𑁂𑀢𑀦𑀸 𑀧𑀺𑀲𑀼𑀡𑀯𑀸𑀘𑀸. 𑀲𑀸𑀧𑀺 𑀤𑁆𑀯𑀻𑀲𑀼 𑀪𑀺𑀦𑁆𑀦𑁂𑀲𑀼𑀬𑁂𑀯 𑀓𑀫𑁆𑀫𑀧𑀣𑁄. 𑀧𑀭𑀫𑀫𑁆𑀫𑀘𑁆𑀙𑁂𑀤𑀓𑀧𑁆𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀺𑀓𑀸 𑀏𑀓𑀦𑁆𑀢𑀨𑀭𑀼𑀲𑀘𑁂𑀢𑀦𑀸 𑀨𑀭𑀼𑀲𑀯𑀸𑀘𑀸. 𑀅𑀦𑀢𑁆𑀣𑀯𑀺𑀜𑁆𑀜𑀸𑀧𑀦𑀧𑁆𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀺𑀓𑀸 𑀲𑀁𑀓𑀺𑀮𑀺𑀝𑁆𑀞𑀘𑁂𑀢𑀦𑀸 𑀲𑀫𑁆𑀨𑀧𑁆𑀧𑀮𑀸𑀧𑁄 𑀦𑀸𑀫. 𑀲𑁄 𑀧𑀦 𑀧𑀭𑁂𑀳𑀺 𑀕𑀳𑀺𑀢𑁂𑀬𑁂𑀯 𑀓𑀫𑁆𑀫𑀧𑀣𑁄 𑀳𑁄𑀢𑀺. ‘‘𑀅𑀳𑁄 𑀯𑀢𑁂𑀤𑀁 𑀫𑀫 𑀳𑁄𑀢𑀽’’𑀢𑀺 𑀏𑀯𑀁 𑀧𑀭𑀪𑀡𑁆𑀟𑀸𑀪𑀺𑀚𑁆𑀛𑀸𑀬𑀦𑀮𑀓𑁆𑀔𑀡𑀸 𑀅𑀪𑀺𑀚𑁆𑀛𑀸. ‘‘𑀅𑀳𑁄 𑀯𑀢𑀸𑀬𑀁 𑀲𑀢𑁆𑀢𑁄 𑀯𑀺𑀦𑀲𑁆𑀲𑁂𑀬𑁆𑀬𑀸’’𑀢𑀺 𑀏𑀯𑀁 𑀫𑀦𑁄𑀧𑀤𑁄𑀲𑀮𑀓𑁆𑀔𑀡𑁄 𑀩𑁆𑀬𑀸𑀧𑀸𑀤𑁄. ‘‘𑀦𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀺𑀧𑀭𑀻𑀢𑀤𑀲𑁆𑀲𑀦𑀮𑀓𑁆𑀔𑀡𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺. 𑀏𑀢𑁆𑀣 𑀘 𑀦𑀢𑁆𑀣𑀺𑀓𑀅𑀳𑁂𑀢𑀼𑀓𑀅𑀓𑀺𑀭𑀺𑀬𑀤𑀺𑀝𑁆𑀞𑀻𑀳𑀺𑀬𑁂𑀯 𑀓𑀫𑁆𑀫𑀧𑀣𑀪𑁂𑀤𑁄.

𑀇𑀫𑁂𑀲𑀼 𑀘 𑀧𑀸𑀡𑀸𑀢𑀺𑀧𑀸𑀢𑀸𑀤𑀺 𑀢𑀺𑀯𑀺𑀥𑀁 𑀓𑀸𑀬𑀓𑀫𑁆𑀫𑀫𑁂𑀯. 𑀢𑀁 𑀓𑀸𑀬𑀯𑀘𑀻𑀤𑁆𑀯𑀸𑀭𑁂𑀲𑀼𑀬𑁂𑀯 𑀉𑀧𑁆𑀧𑀚𑁆𑀚𑀢𑀺, 𑀦 𑀫𑀦𑁄𑀤𑁆𑀯𑀸𑀭𑁂. 𑀢𑀣𑀸 𑀫𑀼𑀲𑀸𑀯𑀸𑀤𑀸𑀤𑀺 𑀘𑀢𑀼𑀩𑁆𑀩𑀺𑀥𑀁 𑀯𑀘𑀻𑀓𑀫𑁆𑀫𑀫𑁂𑀯. 𑀅𑀪𑀺𑀚𑁆𑀛𑀸𑀤𑀺𑀓𑀁 𑀧𑀦 𑀢𑀺𑀯𑀺𑀥𑀁 𑀫𑀦𑁄𑀓𑀫𑁆𑀫𑀫𑁂𑀯. 𑀢𑀁 𑀢𑀻𑀲𑀼𑀧𑀺 𑀤𑁆𑀯𑀸𑀭𑁂𑀲𑀼 𑀧𑀯𑀢𑁆𑀢𑀢𑀺. 𑀤𑁆𑀯𑀸𑀭𑀦𑁆𑀢𑀭𑁂𑀲𑀼𑀧𑀺 𑀧𑀯𑀢𑁆𑀢𑀫𑀸𑀦𑀲𑁆𑀲 𑀲𑀓𑀲𑀓𑀦𑀸𑀫𑀸𑀧𑀭𑀺𑀘𑁆𑀘𑀸𑀕𑁄 𑀯𑀼𑀢𑁆𑀢𑁄𑀬𑁂𑀯. 𑀥𑀫𑁆𑀫𑀢𑁄 𑀘𑁂𑀢𑁆𑀣 𑀆𑀤𑀺𑀢𑁄 𑀲𑀢𑁆𑀢 𑀘𑁂𑀢𑀦𑀸𑀲𑀪𑀸𑀯𑀸, 𑀇𑀢𑀭𑁂 𑀢𑀬𑁄 𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀫𑀳𑀸𑀲𑀸𑀯𑀚𑁆𑀚𑀅𑀧𑁆𑀧𑀲𑀸𑀯𑀚𑁆𑀚𑀧𑁆𑀧𑀬𑁄𑀕𑀸𑀤𑀺𑀪𑁂𑀤𑁄 𑀧𑀦 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄.

𑀏𑀢𑀸𑀦𑀻𑀢𑀺 𑀇𑀫𑀸𑀦𑀺 𑀫𑀕𑁆𑀕𑀜𑀸𑀡𑀸𑀦𑀺. 𑀬𑀣𑀸𑀲𑀫𑁆𑀪𑀯𑀦𑁆𑀢𑀺 𑀢𑀁𑀢𑀁𑀫𑀕𑁆𑀕𑀸𑀦𑀼𑀭𑀽𑀧𑀁.

𑀅𑀧𑀸𑀬𑀁 𑀕𑀘𑁆𑀙𑀦𑁆𑀢𑀺 𑀏𑀢𑁂𑀳𑀻𑀢𑀺 𑀅𑀧𑀸𑀬𑀕𑀫𑀦𑀻𑀬𑀸. 𑀲𑁂𑀲𑀸𑀢𑀺 𑀦 𑀅𑀧𑀸𑀬𑀕𑀫𑀦𑀻𑀬𑀸. 𑀑𑀴𑀸𑀭𑀺𑀓𑀸𑀢𑀺 𑀢𑀢𑀺𑀬𑀫𑀕𑁆𑀕𑁂𑀦 𑀧𑀳𑀸𑀢𑀩𑁆𑀩𑀸𑀯𑀢𑁆𑀣𑀁 𑀉𑀧𑀸𑀤𑀸𑀬 𑀑𑀴𑀸𑀭𑀺𑀓𑀸. 𑀢𑁂𑀦𑀸𑀳 ‘‘𑀲𑀼𑀔𑀼𑀫𑀸 𑀢𑀢𑀺𑀬𑀫𑀕𑁆𑀕𑀜𑀸𑀡𑀯𑀚𑁆𑀛𑀸’’𑀢𑀺. 𑀲𑀼𑀔𑀼𑀫𑀸 𑀓𑀸𑀫𑀭𑀸𑀕𑀧𑀝𑀺𑀖𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀘𑀢𑀼𑀢𑁆𑀣𑀫𑀕𑁆𑀕𑀜𑀸𑀡𑀯𑀚𑁆𑀛𑀸 𑀏𑀯𑀸𑀢𑀺 𑀅𑀯𑀥𑀸𑀭𑀡𑁂𑀦 𑀧𑀞𑀫𑀫𑀕𑁆𑀕𑀸𑀤𑀺𑀯𑀚𑁆𑀛𑀢𑀁 𑀦𑀺𑀯𑀢𑁆𑀢𑁂𑀢𑀺. 𑀦 𑀳𑀺 𑀭𑀽𑀧𑀭𑀸𑀕𑀸𑀤𑀻𑀦𑀁 𑀅𑀧𑀸𑀬𑀕𑀸𑀫𑀺𑀦𑀺𑀬𑀸𑀯𑀢𑁆𑀣𑀸𑀧𑀺 𑀅𑀢𑁆𑀣𑀺, 𑀬𑀢𑁄 𑀢𑁂 𑀧𑀞𑀫𑀜𑀸𑀡𑀯𑀚𑁆𑀛𑀸𑀧𑀺 𑀲𑀺𑀬𑀼𑀦𑁆𑀢𑀺.

𑀬𑀢𑁆𑀣 𑀬𑀢𑁆𑀣 𑀧𑀦 𑀏𑀯-𑀲𑀤𑁆𑀤𑁂𑀦 𑀅𑀯𑀥𑀸𑀭𑀡𑀁 𑀅𑀓𑀢𑁆𑀯𑀸 𑀬𑀁 𑀬𑀁 𑀤𑀼𑀢𑀺𑀬𑀜𑀸𑀡𑀯𑀚𑁆𑀛𑀦𑁆𑀢𑀺 𑀯𑀸 𑀢𑀢𑀺𑀬𑀜𑀸𑀡𑀯𑀚𑁆𑀛𑀦𑁆𑀢𑀺 𑀯𑀸 𑀘𑀢𑀼𑀢𑁆𑀣𑀜𑀸𑀡𑀯𑀚𑁆𑀛𑀦𑁆𑀢𑀺 𑀯𑀸 𑀯𑀓𑁆𑀔𑀢𑀺, 𑀢𑀢𑁆𑀣 𑀢𑀢𑁆𑀣 𑀲𑁄 𑀲𑁄 𑀧𑀼𑀭𑀺𑀫𑀜𑀸𑀡𑁂𑀳𑀺 𑀳𑀢𑀸𑀧𑀸𑀬𑀕𑀫𑀦𑀻𑀬𑀸𑀤𑀺𑀪𑀸𑀯𑁄𑀯 𑀳𑀼𑀢𑁆𑀯𑀸 𑀉𑀧𑀭𑀺𑀜𑀸𑀡𑀯𑀚𑁆𑀛𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀦 𑀮𑁄𑀪…𑀧𑁂… 𑀘𑀢𑀼𑀢𑁆𑀣𑀜𑀸𑀡𑀯𑀚𑁆𑀛𑀸𑀦𑀻𑀢𑀺 𑀏𑀢𑁆𑀣 𑀮𑁄𑀪𑀸𑀤𑀬𑁄 𑀳𑁂𑀝𑁆𑀞𑀺𑀫𑀫𑀕𑁆𑀕𑀯𑀚𑁆𑀛𑀸𑀧𑀺 𑀳𑁄𑀦𑁆𑀢𑁂𑀯.

𑀬𑀲𑁂𑀢𑀺 𑀧𑀭𑀺𑀯𑀸𑀭𑁂.

𑀤𑀼𑀓𑁆𑀔𑁂 𑀲𑀼𑀔𑀦𑁆𑀢𑀺 𑀲𑀜𑁆𑀜𑀸𑀘𑀺𑀢𑁆𑀢𑀯𑀺𑀧𑀮𑁆𑀮𑀸𑀲𑀸𑀢𑀺 𑀲𑀫𑁆𑀩𑀦𑁆𑀥𑁄.

𑀅𑀕𑀢𑀺𑀬𑁄 𑀧𑀞𑀫𑀫𑀕𑁆𑀕𑀜𑀸𑀡𑀯𑀚𑁆𑀛𑀸𑀢𑀺 𑀓𑀺𑀜𑁆𑀘𑀸𑀧𑀺 𑀙𑀦𑁆𑀤𑀸𑀤𑀬𑁄 𑀢𑀡𑁆𑀳𑀸𑀤𑀺𑀲𑀪𑀸𑀯𑀸 𑀉𑀧𑀭𑀺𑀫𑀕𑁆𑀕𑀯𑀚𑁆𑀛𑀸, 𑀢𑀣𑀸𑀧𑀺 𑀢𑀫𑁆𑀫𑀽𑀮𑀓𑀲𑁆𑀲 𑀅𑀓𑀢𑁆𑀢𑀩𑁆𑀩𑀓𑀭𑀡𑀲𑁆𑀲, 𑀓𑀢𑁆𑀢𑀩𑁆𑀩𑀸𑀓𑀭𑀡𑀲𑁆𑀲 𑀘 𑀅𑀧𑀸𑀬𑀕𑀫𑀦𑀻𑀬𑀢𑀸𑀬 𑀧𑀞𑀫𑀫𑀕𑁆𑀕𑀜𑀸𑀡𑀯𑀚𑁆𑀛𑀸.

𑀓𑀢𑀸𑀓𑀢𑀓𑀼𑀲𑀮𑀸𑀓𑀼𑀲𑀮𑀯𑀺𑀲𑀬𑀁 𑀬𑀁 𑀯𑀺𑀧𑁆𑀧𑀝𑀺𑀲𑀸𑀭𑀪𑀽𑀢𑀁 𑀓𑀼𑀓𑁆𑀓𑀼𑀘𑁆𑀘𑀁, 𑀢𑀁 𑀇𑀥 𑀢𑀢𑀺𑀬𑀜𑀸𑀡𑀯𑀚𑁆𑀛𑀁 𑀯𑀼𑀢𑁆𑀢𑀁. 𑀬𑀁 𑀧𑀦 ‘‘𑀓𑀼𑀓𑁆𑀓𑀼𑀘𑁆𑀘𑀧𑀓𑀢𑀢𑀸𑀬 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀁 𑀓𑀼𑀓𑁆𑀓𑀼𑀘𑁆𑀘𑀁, 𑀢𑀁 𑀲𑀦𑁆𑀥𑀸𑀬 ‘‘𑀓𑀼𑀓𑁆𑀓𑀼𑀘𑁆𑀘𑀯𑀺𑀘𑀺𑀓𑀺𑀘𑁆𑀙𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀧𑀳𑀻𑀬𑀦𑁆𑀢𑀻’’𑀢𑀺 (𑀥. 𑀲. 𑀅𑀝𑁆𑀞. 𑁧𑁧𑁭𑁬) 𑀥𑀫𑁆𑀫𑀲𑀗𑁆𑀕𑀡𑀻𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀤𑁆𑀯𑀺𑀦𑁆𑀦𑀁 𑀯𑀘𑀦𑀸𑀦𑀁 𑀅𑀬𑀁 𑀅𑀥𑀺𑀧𑁆𑀧𑀸𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀜𑁆𑀜𑁂𑀲𑀼𑀧𑀺 𑀏𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀅𑀥𑀺𑀧𑁆𑀧𑀸𑀬𑁄𑀯 𑀧𑀭𑀺𑀬𑁂𑀲𑀺𑀢𑀩𑁆𑀩𑁄, 𑀦 𑀯𑀺𑀭𑁄𑀥𑀢𑁄 𑀧𑀘𑁆𑀘𑁂𑀢𑀩𑁆𑀩𑀁. 𑀑𑀴𑀸𑀭𑀺𑀓𑀸𑀦𑀯𑀲𑁂𑀲𑀧𑁆𑀧𑀳𑀸𑀦𑀁 𑀯𑀸 𑀲𑀦𑁆𑀥𑀸𑀬 𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀧𑀞𑀫𑀢𑀢𑀺𑀬𑀜𑀸𑀡𑀯𑀚𑁆𑀛𑀢𑀸 𑀯𑀼𑀢𑁆𑀢𑀸. 𑀬𑀁 𑀧𑀦 𑀅𑀭𑀳𑀢𑁄 𑀉𑀧𑁆𑀧𑀚𑁆𑀚𑀫𑀸𑀦𑀁 ‘‘𑀪𑀕𑀯𑀢𑀸 𑀧𑀝𑀺𑀓𑁆𑀔𑀺𑀢𑁆𑀢𑀁 𑀅𑀦𑀼𑀯𑀲𑀺𑀢𑁆𑀯𑀸 𑀅𑀦𑀼𑀯𑀲𑀺𑀢𑁆𑀯𑀸 𑀆𑀯𑀲𑀣𑀧𑀺𑀡𑁆𑀟𑀁 𑀪𑀼𑀜𑁆𑀚𑀺𑀢𑀼𑀦𑁆𑀢𑀺 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑁄 𑀦 𑀧𑀝𑀺𑀕𑁆𑀕𑀳𑁂𑀲𑀻’’𑀢𑀺 (𑀧𑀸𑀘𑀺. 𑁨𑁦𑁪) 𑀆𑀕𑀢𑀁 𑀓𑀼𑀓𑁆𑀓𑀼𑀘𑁆𑀘𑀁, 𑀦 𑀢𑀁 𑀦𑀻𑀯𑀭𑀡𑀁. 𑀦 𑀳𑀺 𑀦𑀻𑀯𑀭𑀡𑀁 𑀅𑀭𑀳𑀢𑁄 𑀉𑀧𑁆𑀧𑀚𑁆𑀚𑀢𑀺, 𑀦𑀻𑀯𑀭𑀡𑀧𑀢𑀺𑀭𑀽𑀧𑀓𑀁 𑀧𑀦 𑀓𑀧𑁆𑀧𑀢𑀻𑀢𑀺 𑀯𑀻𑀫𑀁𑀲𑀦𑀪𑀽𑀢𑀁 𑀯𑀺𑀦𑀬𑀓𑀼𑀓𑁆𑀓𑀼𑀘𑁆𑀘𑀁 𑀦𑀸𑀫, 𑀢𑀁 𑀢𑀣𑀸𑀧𑀯𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑁄𑀯.

𑀓𑀸𑀫𑀭𑀸𑀕𑀧𑀝𑀺𑀖𑀸𑀦𑀼𑀲𑀬𑀸 𑀅𑀦𑀼𑀲𑀳𑀕𑀢𑀸 𑀢𑀢𑀺𑀬𑀜𑀸𑀡𑀯𑀚𑁆𑀛𑀸, 𑀑𑀴𑀸𑀭𑀺𑀓𑀸𑀦𑀁 𑀧𑀦 𑀤𑀼𑀢𑀺𑀬𑀜𑀸𑀡𑀯𑀚𑁆𑀛𑀢𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀸𑀯.

𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤-𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀫𑀓𑁆𑀔𑀧𑀮𑀸𑀲𑀫𑀸𑀬𑀸𑀲𑀸𑀞𑁂𑀬𑁆𑀬𑀣𑀫𑁆𑀪𑀲𑀸𑀭𑀫𑁆𑀪𑀸𑀤𑀻𑀦𑀁 𑀲𑀗𑁆𑀕𑀳𑁄 𑀓𑀢𑁄𑀢𑀺 𑀤𑀝𑁆𑀞𑀩𑁆𑀩𑀁.

𑁧𑁩𑁭𑁬. 𑀢𑁂𑀦 𑀢𑁂𑀦𑀸𑀢𑀺 𑀢𑁂𑀦 𑀢𑁂𑀦 𑀖𑀸𑀢𑀓𑁂𑀦 𑀲𑀤𑁆𑀥𑀺𑀁. 𑀓𑀺𑀁 𑀧𑀦𑁂𑀢𑀸𑀦𑀺 𑀏𑀢𑁂 𑀥𑀫𑁆𑀫𑁂 𑀖𑀸𑀢𑁂𑀦𑁆𑀢𑀸𑀦𑀺 𑀅𑀢𑀻𑀢𑀸𑀦𑀸𑀕𑀢𑁂 𑀖𑀸𑀢𑁂𑀦𑁆𑀢𑀺, 𑀉𑀤𑀸𑀳𑀼 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀢𑀺. 𑀓𑀺𑀁 𑀧𑀦𑁂𑀢𑁆𑀣, 𑀬𑀤𑀺 𑀢𑀸𑀯 𑀅𑀢𑀻𑀢𑀸𑀦𑀸𑀕𑀢𑁂, 𑀅𑀨𑀮𑁄 𑀯𑀸𑀬𑀸𑀫𑁄 𑀆𑀧𑀚𑁆𑀚𑀢𑀺. 𑀓𑀲𑁆𑀫𑀸? 𑀧𑀳𑀸𑀢𑀩𑁆𑀩𑀸𑀦𑀁 𑀢𑀤𑀸 𑀦𑀢𑁆𑀣𑀺𑀢𑀸𑀬. 𑀅𑀣 𑀧𑀘𑁆𑀘𑀼𑀧𑁆𑀧𑀦𑁆𑀦𑁂, 𑀢𑀣𑀸𑀧𑀺 𑀅𑀨𑀮𑁄 𑀯𑀸𑀬𑀸𑀫𑁂𑀦 𑀲𑀤𑁆𑀥𑀺𑀁 𑀧𑀳𑀸𑀢𑀩𑁆𑀩𑀸𑀦𑀁 𑀅𑀢𑁆𑀣𑀺𑀢𑀸𑀬. 𑀅𑀣𑀸𑀧𑀺 𑀓𑀣𑀜𑁆𑀘𑀺 𑀧𑀳𑀸𑀦𑀁 𑀲𑀺𑀬𑀸, 𑀲𑀁𑀓𑀺𑀮𑁂𑀲𑀺𑀓𑀸 𑀫𑀕𑁆𑀕𑀪𑀸𑀯𑀦𑀸 𑀆𑀧𑀚𑁆𑀚𑀢𑀺 𑀧𑀳𑀸𑀢𑀩𑁆𑀩𑀧𑁆𑀧𑀳𑀸𑀬𑀓𑀸𑀦𑀁 𑀲𑀳𑀸𑀯𑀝𑁆𑀞𑀸𑀦𑀢𑁄? 𑀲𑀘𑁆𑀘𑀫𑁂𑀢𑀁, 𑀬𑁂 𑀧𑀦 𑀫𑀕𑁆𑀕𑁂𑀦 𑀅𑀲𑀫𑀼𑀕𑁆𑀖𑀸𑀝𑀺𑀢𑀢𑁆𑀢𑀸 𑀓𑀸𑀭𑀡𑀮𑀸𑀪𑁂 𑀲𑀢𑀺 𑀅𑀯𑀲𑁆𑀲𑀁 𑀉𑀧𑁆𑀧𑀚𑁆𑀚𑀦𑀸𑀭𑀳𑀸 𑀓𑀺𑀮𑁂𑀲𑀸, 𑀢𑁂 𑀅𑀢𑁆𑀢𑀦𑁄 𑀉𑀧𑁆𑀧𑀢𑁆𑀢𑀺𑀬𑀸 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀁 𑀆𑀧𑀸𑀤𑁂𑀦𑁆𑀢𑀸𑀦𑀺 𑀏𑀢𑀸𑀦𑀺 𑀢𑁂 𑀅𑀦𑀸𑀕𑀢𑁂 𑀖𑀸𑀢𑁂𑀦𑁆𑀢𑀺 𑀦𑀸𑀫.

𑁧𑁩𑁭𑁭-𑁮𑁨. 𑀧𑀭𑀺𑀜𑁆𑀜𑀸𑀤𑀻𑀦𑀺 𑀓𑀺𑀘𑁆𑀘𑀸𑀦𑀻𑀢𑀺 𑀧𑀭𑀺𑀜𑁆𑀜𑀸𑀧𑀳𑀸𑀦𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀸𑀯𑀦𑀸𑀯𑀲𑁂𑀦 𑀘𑀢𑁆𑀢𑀸𑀭𑀺 𑀓𑀺𑀘𑁆𑀘𑀸𑀦𑀺. 𑀯𑀼𑀢𑁆𑀢𑀸𑀦𑀻𑀢𑀺 ‘‘𑀤𑀼𑀓𑁆𑀔𑀁 𑀧𑀭𑀺𑀜𑁆𑀜𑁂𑀬𑁆𑀬’’𑀦𑁆𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁫.𑁧𑁦𑁯𑁯), ‘‘𑀬𑁄, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀁 𑀧𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁫.𑁧𑁧𑁦𑁦) 𑀘 𑀯𑀼𑀢𑁆𑀢𑀸𑀦𑀺. 𑀲𑀘𑁆𑀘𑀸𑀪𑀺𑀲𑀫𑀬𑁂𑀢𑀺 𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀁 𑀧𑀝𑀺𑀯𑀺𑀚𑁆𑀛𑀦𑀓𑁆𑀔𑀡𑁂.

𑀬𑀣𑀸𑀲𑀪𑀸𑀯𑀢𑁄𑀢𑀺 𑀅𑀯𑀺𑀧𑀭𑀻𑀢𑀲𑀪𑀸𑀯𑁂𑀦. ‘‘𑀚𑀸𑀦𑀺𑀢𑀩𑁆𑀩𑀸𑀦𑀻’’𑀢𑀺 𑀯𑀢𑁆𑀯𑀸 𑀓𑀣𑀁 𑀧𑀦𑁂𑀢𑀁 𑀚𑀸𑀦𑀺𑀢𑀩𑁆𑀩𑀁, 𑀓𑀣𑀁 𑀦𑀸𑀫 𑀏𑀓𑁂𑀓𑀲𑁆𑀲 𑀜𑀸𑀡𑀲𑁆𑀲 𑀏𑀓𑀓𑁆𑀔𑀡𑁂 𑀘𑀢𑁆𑀢𑀸𑀭𑀺 𑀓𑀺𑀘𑁆𑀘𑀸𑀦𑀺 𑀲𑀫𑁆𑀪𑀯𑀦𑁆𑀢𑀺. 𑀦 𑀳𑀺 𑀢𑀸𑀤𑀺𑀲𑀁 𑀓𑀺𑀜𑁆𑀘𑀺 𑀮𑁄𑀓𑁂 𑀤𑀺𑀝𑁆𑀞𑀁 𑀅𑀢𑁆𑀣𑀺, 𑀦 𑀘 𑀯𑀘𑀦𑀁 𑀮𑀩𑁆𑀪𑀢𑀻𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀦𑀺𑀥𑀸𑀬 𑀢𑁂𑀲𑀁 𑀚𑀸𑀦𑀦𑀯𑀺𑀥𑀺𑀁 𑀉𑀧𑀫𑀸𑀯𑀲𑁂𑀦 𑀢𑀸𑀯 𑀤𑀲𑁆𑀲𑁂𑀢𑀼𑀁 ‘‘𑀧𑀤𑀻𑀧𑁄 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑀺𑀤𑀁𑀲𑁂𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀧𑀭𑀺𑀬𑀸𑀤𑀺𑀬𑀢𑀻𑀢𑀺 𑀔𑁂𑀧𑁂𑀢𑀺.

𑁧𑁩𑁮𑁩-𑁪. 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑁂𑀦𑀸𑀢𑀺 𑀅𑀦𑀯𑀲𑁂𑀲𑀢𑁄 𑀧𑀭𑀺𑀘𑁆𑀙𑀺𑀚𑁆𑀚 𑀚𑀸𑀦𑀦𑀲𑀗𑁆𑀔𑀸𑀢𑁂𑀦 𑀧𑀝𑀺𑀯𑀺𑀚𑁆𑀛𑀦𑁂𑀦. 𑀅𑀪𑀺𑀲𑀫𑁂𑀢𑀻𑀢𑀺 𑀅𑀲𑀫𑁆𑀫𑁄𑀳𑀯𑀲𑁂𑀦 𑀧𑀝𑀺𑀯𑀺𑀚𑁆𑀛𑀢𑀺. 𑀧𑀳𑀸𑀦𑀸𑀪𑀺𑀲𑀫𑀬𑁂𑀦𑁂𑀯𑀸𑀢𑀺 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀲𑀗𑁆𑀔𑀸𑀢𑁂𑀦 𑀧𑀝𑀺𑀯𑀺𑀚𑁆𑀛𑀦𑁂𑀦 𑀅𑀲𑀫𑁆𑀫𑁄𑀳𑀢𑁄𑀯 𑀅𑀪𑀺𑀲𑀫𑁂𑀢𑀺. 𑀪𑀸𑀯𑀦𑀸𑀯𑀺𑀥𑀺𑀦𑀸𑀢𑀺 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀢𑀸𑀯𑀲𑁂𑀦 𑀪𑀸𑀯𑀦𑀸𑀪𑀺𑀲𑀫𑀬𑀯𑀺𑀥𑀺𑀦𑀸. 𑀫𑀕𑁆𑀕𑀜𑀸𑀡𑀜𑁆𑀳𑀺 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀸𑀤𑀺𑀯𑀲𑁂𑀦 𑀫𑀕𑁆𑀕𑀧𑀼𑀩𑁆𑀩𑀪𑀸𑀕𑀪𑀸𑀯𑀦𑀸𑀲𑀫𑁆𑀪𑀽𑀢𑁂𑀦 𑀅𑀭𑀺𑀬𑀫𑀕𑁆𑀕𑀪𑀸𑀯𑀦𑀸𑀲𑀗𑁆𑀔𑀸𑀢𑁂𑀦 𑀧𑀝𑀺𑀯𑀺𑀚𑁆𑀛𑀦𑁂𑀦 𑀅𑀪𑀺𑀲𑀫𑁂𑀢𑀻𑀢𑀺 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀅𑀲𑀫𑁆𑀫𑁄𑀳𑀢𑁄 𑀧𑀝𑀺𑀯𑀺𑀚𑁆𑀛𑀢𑀺. 𑀢𑀜𑁆𑀳𑀺 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀲𑀼 𑀲𑀫𑁆𑀫𑁄𑀳𑀁 𑀯𑀺𑀤𑁆𑀥𑀁𑀲𑁂𑀦𑁆𑀢𑀁 𑀅𑀢𑁆𑀢𑀦𑀺𑀧𑀺 𑀲𑀫𑁆𑀫𑁄𑀳𑀁 𑀯𑀺𑀤𑁆𑀥𑀁𑀲𑁂𑀢𑀺𑀬𑁂𑀯. 𑀦𑀺𑀭𑁄𑀥𑀦𑁆𑀢𑀺 𑀦𑀺𑀩𑁆𑀩𑀸𑀦𑀁. 𑀲𑀘𑁆𑀙𑀺𑀓𑀭𑁄𑀢𑀻𑀢𑀺 𑀧𑀘𑁆𑀘𑀓𑁆𑀔𑀓𑀭𑀡𑀯𑀲𑁂𑀦 𑀧𑀝𑀺𑀯𑀺𑀚𑁆𑀛𑀢𑀺. ‘‘𑀦𑀺𑀭𑁄𑀥𑀁 𑀲𑀘𑁆𑀙𑀺𑀓𑀭𑁄𑀢𑀻’’𑀢𑀺 𑀦𑀺𑀭𑁄𑀥𑀲𑀘𑁆𑀘𑀫𑁂𑀓𑀁 𑀆𑀭𑀫𑁆𑀫𑀡𑀧𑀝𑀺𑀯𑁂𑀥𑁂𑀦 𑀘𑀢𑁆𑀢𑀸𑀭𑀺𑀧𑀺 𑀲𑀘𑁆𑀘𑀸𑀦𑀺 𑀅𑀲𑀫𑁆𑀫𑁄𑀳𑀧𑀝𑀺𑀯𑁂𑀥𑁂𑀦 𑀫𑀕𑁆𑀕𑀜𑀸𑀡𑀁 𑀧𑀝𑀺𑀯𑀺𑀚𑁆𑀛𑀢𑀺.

𑀏𑀯𑀁 𑀬𑀼𑀢𑁆𑀢𑀺𑀯𑀲𑁂𑀦 𑀯𑀺𑀪𑀸𑀯𑀺𑀢𑀁 𑀏𑀓𑀧𑀝𑀺𑀯𑁂𑀥𑀁 𑀆𑀕𑀫𑁂𑀦𑀧𑀺 𑀲𑀸𑀥𑁂𑀢𑀼𑀁 ‘‘𑀯𑀼𑀢𑁆𑀢𑀫𑁆𑀧𑀺 𑀘𑁂𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀫𑀕𑁆𑀕𑀲𑀫𑀗𑁆𑀕𑀺𑀲𑁆𑀲 𑀜𑀸𑀡𑀦𑁆𑀢𑀺 𑀳𑀺 ‘‘𑀬𑁄 𑀦𑀼 𑀔𑁄, 𑀆𑀯𑀼𑀲𑁄, 𑀤𑀼𑀓𑁆𑀔𑀁 𑀧𑀲𑁆𑀲𑀢𑀺, 𑀤𑀼𑀓𑁆𑀔𑀲𑀫𑀼𑀤𑀬𑀫𑁆𑀧𑀺 𑀲𑁄 𑀧𑀲𑁆𑀲𑀢𑀺, 𑀤𑀼𑀓𑁆𑀔𑀦𑀺𑀭𑁄𑀥𑀫𑁆𑀧𑀺, 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀧𑀝𑀺𑀧𑀤𑀫𑁆𑀧𑀺 𑀲𑁄 𑀧𑀲𑁆𑀲𑀢𑀻’’𑀢𑀺 (𑀲𑀁. 𑀦𑀺. 𑁫.𑁧𑁧𑁦𑁦) 𑀏𑀓𑀲𑀘𑁆𑀘𑀤𑀲𑁆𑀲𑀦𑀲𑀫𑀗𑁆𑀕𑀺𑀦𑁄 𑀅𑀜𑁆𑀜𑀲𑀘𑁆𑀘𑀤𑀲𑁆𑀲𑀦𑀲𑀫𑀗𑁆𑀕𑀺𑀪𑀸𑀯𑀯𑀺𑀘𑀸𑀭𑀡𑀸𑀬𑀁 𑀢𑀫𑀢𑁆𑀣𑀁 𑀲𑀸𑀥𑁂𑀢𑀼𑀁 𑀆𑀬𑀲𑁆𑀫𑀢𑀸 𑀕𑀯𑀫𑁆𑀧𑀢𑀺𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀁. 𑀅𑀜𑁆𑀜𑀣𑀸 𑀓𑀫𑀸𑀪𑀺𑀲𑀫𑀬𑁂 𑀲𑀢𑀺 𑀧𑀼𑀭𑀺𑀫𑀤𑀺𑀝𑁆𑀞𑀲𑁆𑀲 𑀧𑀼𑀦 𑀅𑀤𑀲𑁆𑀲𑀦𑀢𑁄 𑀲𑀫𑀼𑀤𑀬𑀸𑀤𑀺𑀧𑀲𑁆𑀲𑀢𑁄 𑀤𑀼𑀓𑁆𑀔𑀸𑀤𑀺𑀤𑀲𑁆𑀲𑀦𑀁 𑀧𑀼𑀦 𑀅𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀇𑀤𑀸𑀦𑀺 𑀧𑀦𑁂𑀢𑁆𑀣 𑀉𑀧𑀫𑀸𑀲𑀁𑀲𑀦𑁆𑀤𑀦𑀁 𑀓𑀭𑁄𑀦𑁆𑀢𑁄 𑀆𑀳 ‘‘𑀧𑀤𑀻𑀧𑁄’’𑀢𑀺𑀆𑀤𑀺. 𑀦𑀺𑀲𑁆𑀲𑀬𑀸𑀪𑀸𑀯𑀳𑁂𑀢𑀼𑀢𑀸𑀬 𑀤𑀼𑀓𑁆𑀔𑀧𑀭𑀺𑀜𑁆𑀜𑀸𑀬 𑀯𑀝𑁆𑀝𑀺𑀚𑁆𑀛𑀸𑀧𑀦𑀲𑀤𑀺𑀲𑀢𑀸, 𑀧𑀝𑀺𑀧𑀓𑁆𑀔𑀯𑀺𑀤𑁆𑀥𑀁𑀲𑀦𑀢𑀸𑀬 𑀲𑀫𑀼𑀤𑀬𑀧𑁆𑀧𑀳𑀸𑀦𑀲𑁆𑀲 𑀅𑀦𑁆𑀥𑀓𑀸𑀭𑀯𑀺𑀦𑀸𑀲𑀦𑀲𑀤𑀺𑀲𑀢𑀸, 𑀜𑀸𑀡𑀸𑀮𑁄𑀓𑀧𑀭𑀺𑀩𑁆𑀭𑀽𑀳𑀦𑀢𑀸𑀬 𑀫𑀕𑁆𑀕𑀪𑀸𑀯𑀦𑀸𑀬 𑀆𑀮𑁄𑀓𑀯𑀺𑀤𑀁𑀲𑀦𑀲𑀤𑀺𑀲𑀢𑀸, 𑀢𑁂𑀦 𑀢𑁂𑀦 𑀫𑀕𑁆𑀕𑁂𑀦 𑀬𑀣𑀸 𑀬𑀣𑀸 𑀦𑀺𑀭𑁄𑀥𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸, 𑀢𑀣𑀸 𑀢𑀣𑀸 𑀓𑀺𑀮𑁂𑀲𑀲𑁆𑀦𑁂𑀳𑀧𑀭𑀺𑀬𑀸𑀤𑀸𑀦𑀁 𑀳𑁄𑀢𑀻𑀢𑀺 𑀦𑀺𑀭𑁄𑀥𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀲𑁆𑀦𑁂𑀳𑀧𑀭𑀺𑀬𑀸𑀤𑀸𑀦𑀲𑀤𑀺𑀲𑀢𑀸 𑀓𑀸𑀭𑀡𑀽𑀧𑀘𑀸𑀭𑁂𑀦 𑀯𑀼𑀢𑁆𑀢𑀸.

𑁧𑁩𑁮𑁫-𑁬. 𑀅𑀧𑀭𑀸𑀬𑀧𑀺 𑀉𑀧𑀫𑀸𑀬 𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀉𑀕𑁆𑀕𑀘𑁆𑀙𑀦𑁆𑀢𑁄’’𑀢𑀺𑀆𑀤𑀺. 𑀑𑀪𑀸𑀲𑁂𑀢𑀻𑀢𑀺 𑀧𑀓𑀸𑀲𑁂𑀢𑀺. 𑀧𑀝𑀺𑀳𑀜𑁆𑀜𑀢𑀻𑀢𑀺 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀺. 𑀏𑀢𑁆𑀣𑀸𑀧𑀺 𑀬𑀣𑀸 𑀲𑀽𑀭𑀺𑀬𑁄 𑀭𑀽𑀧𑀕𑀢𑀸𑀦𑀺 𑀑𑀪𑀸𑀲𑁂𑀢𑀺, 𑀏𑀯𑀁 𑀫𑀕𑁆𑀕𑀜𑀸𑀡𑀁 𑀤𑀼𑀓𑁆𑀔𑀁 𑀧𑀭𑀺𑀚𑀸𑀦𑀸𑀢𑀺. 𑀬𑀣𑀸 𑀅𑀦𑁆𑀥𑀓𑀸𑀭𑀁 𑀯𑀺𑀦𑀸𑀲𑁂𑀢𑀺, 𑀏𑀯𑀁 𑀲𑀫𑀼𑀤𑀬𑀁 𑀧𑀚𑀳𑀢𑀺. 𑀬𑀣𑀸 𑀆𑀮𑁄𑀓𑀁 𑀤𑀲𑁆𑀲𑁂𑀢𑀺, 𑀏𑀯𑀁 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀢𑀸𑀬 𑀫𑀕𑁆𑀕𑀁 𑀪𑀸𑀯𑁂𑀢𑀺. 𑀬𑀣𑀸 𑀲𑀻𑀢𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀺, 𑀏𑀯𑀁 𑀲𑀩𑁆𑀩𑀓𑀺𑀮𑁂𑀲𑀤𑀭𑀣𑀧𑀭𑀺𑀴𑀸𑀳𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀪𑀽𑀢𑀁 𑀦𑀺𑀭𑁄𑀥𑀁 𑀲𑀘𑁆𑀙𑀺𑀓𑀭𑁄𑀢𑀻𑀢𑀺 𑀉𑀧𑀫𑀸𑀲𑀁𑀲𑀦𑁆𑀤𑀦𑀁 𑀤𑀝𑁆𑀞𑀩𑁆𑀩𑀁.

𑁧𑁩𑁮𑁮. 𑀅𑀧𑁆𑀧𑁂𑀢𑀻𑀢𑀺 𑀧𑀧𑁆𑀧𑁄𑀢𑀺. 𑀤𑀼𑀓𑁆𑀔𑀧𑀭𑀺𑀜𑁆𑀜𑀸𑀬 𑀲𑀓𑁆𑀓𑀸𑀬𑀢𑀻𑀭𑀲𑀫𑀢𑀺𑀓𑁆𑀓𑀫𑀪𑀸𑀯𑀢𑁄 𑀑𑀭𑀺𑀫𑀢𑀻𑀭𑀧𑁆𑀧𑀚𑀳𑀦𑀲𑀤𑀺𑀲𑀢𑀸, 𑀫𑀕𑁆𑀕𑀪𑀸𑀯𑀦𑀸𑀬 𑀲𑀢𑁆𑀢𑀢𑀺𑀁𑀲𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀯𑀳𑀦𑀢𑀸𑀬 𑀪𑀡𑁆𑀟𑀯𑀳𑀦𑀲𑀤𑀺𑀲𑀢𑀸, 𑀏𑀢𑁆𑀢𑀸𑀯𑀢𑀸 𑀧𑀜𑁆𑀜𑀸𑀪𑀸𑀯𑀦𑀸𑀬 𑀦𑀸𑀦𑀸𑀓𑀺𑀮𑁂𑀲𑀯𑀺𑀤𑁆𑀥𑀁𑀲𑀦𑀯𑀲𑀧𑁆𑀧𑀯𑀢𑁆𑀢𑁄 𑀆𑀦𑀺𑀲𑀁𑀲𑁄 𑀤𑀲𑁆𑀲𑀺𑀢𑁄 𑀳𑁄𑀢𑀻𑀢𑀺.

𑀅𑀭𑀺𑀬𑀨𑀮𑀲𑀫𑀸𑀧𑀢𑁆𑀢𑀺𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑁄𑀧𑀺 𑀧𑀦𑀲𑁆𑀲𑀸 𑀆𑀦𑀺𑀲𑀁𑀲𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀸 𑀧𑀦 𑀲𑀗𑁆𑀔𑁂𑀧𑀢𑁄 𑀏𑀯𑀁 𑀤𑀝𑁆𑀞𑀩𑁆𑀩𑀸 𑁋 ‘‘𑀅𑀭𑀺𑀬𑀨𑀮𑀲𑀫𑀸𑀧𑀢𑁆𑀢𑀻’’𑀢𑀺 𑀳𑀺 𑀘𑀢𑀼𑀦𑁆𑀦𑀫𑁆𑀧𑀺 𑀨𑀮𑀝𑁆𑀞𑀸𑀦𑀁 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀅𑀭𑀺𑀬𑀨𑀮𑀲𑁆𑀲 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀢𑁆𑀣𑀁 𑀦𑀺𑀭𑁄𑀥𑁂 𑀅𑀧𑁆𑀧𑀦𑀸. 𑀘𑀢𑁆𑀢𑀸𑀭𑁄𑀧𑀺 𑀳𑀺 𑀅𑀭𑀺𑀬𑀧𑀼𑀕𑁆𑀕𑀮𑀸 𑀲𑀓𑀁 𑀲𑀓𑀁 𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀦𑁆𑀢𑀺. 𑀓𑁂𑀘𑀺 𑀧𑀦 ‘‘𑀅𑀦𑀸𑀕𑀸𑀫𑀺𑀅𑀭𑀳𑀦𑁆𑀢𑁄𑀯 𑀲𑀫𑀸𑀧𑀚𑁆𑀚𑀦𑁆𑀢𑀺 𑀲𑀫𑀸𑀥𑀺𑀲𑁆𑀫𑀺𑀁 𑀧𑀭𑀺𑀧𑀽𑀭𑀓𑀸𑀭𑀺𑀢𑀸𑀬𑀸’’𑀢𑀺 𑀯𑀤𑀦𑁆𑀢𑀺, 𑀢𑀁 𑀅𑀓𑀸𑀭𑀡𑀁 𑀅𑀢𑁆𑀢𑀦𑀸 𑀧𑀝𑀺𑀮𑀤𑁆𑀥𑀲𑀫𑀸𑀧𑀢𑁆𑀢𑀺𑀲𑀫𑀸𑀧𑀚𑁆𑀚𑀦𑁂 𑀲𑀫𑀸𑀥𑀺𑀲𑁆𑀫𑀺𑀁 𑀧𑀭𑀺𑀧𑀽𑀭𑀓𑀸𑀭𑀺𑀢𑀸𑀬 𑀓𑀸𑀢𑀩𑁆𑀩𑀸𑀪𑀸𑀯𑀢𑁄. 𑀲𑀩𑁆𑀩𑀲𑁄 𑀅𑀲𑀫𑀼𑀘𑁆𑀙𑀺𑀦𑁆𑀦𑀓𑀺𑀮𑁂𑀲𑀲𑁆𑀲 𑀳𑀺 𑀧𑀼𑀣𑀼𑀚𑁆𑀚𑀦𑀲𑁆𑀲𑀸𑀧𑀺 𑀅𑀢𑁆𑀢𑀦𑀸 𑀧𑀝𑀺𑀮𑀤𑁆𑀥𑀮𑁄𑀓𑀺𑀬𑀲𑀫𑀸𑀧𑀢𑁆𑀢𑀺𑀲𑀫𑀸𑀧𑀚𑁆𑀚𑀦𑀁 𑀮𑀩𑁆𑀪𑀢𑀺, 𑀓𑀺𑀫𑀗𑁆𑀕𑀁 𑀧𑀦 𑀲𑀫𑀼𑀘𑁆𑀙𑀺𑀦𑁆𑀦𑁂𑀓𑀘𑁆𑀘𑀓𑀺𑀮𑁂𑀲𑀸𑀦𑀁 𑀅𑀭𑀺𑀬𑀸𑀦𑀁. 𑀉𑀧𑀭𑀺𑀫𑀸 𑀧𑀦 𑀳𑁂𑀝𑁆𑀞𑀺𑀫𑀁 𑀧𑀼𑀩𑁆𑀩𑁂 𑀧𑀝𑀺𑀮𑀤𑁆𑀥𑀫𑁆𑀧𑀺 𑀦 𑀲𑀫𑀸𑀧𑀚𑁆𑀚𑀦𑁆𑀢𑀺 𑀧𑀼𑀕𑁆𑀕𑀮𑀦𑁆𑀢𑀭𑀪𑀸𑀯𑀁 𑀉𑀧𑀕𑀢𑀢𑁆𑀢𑀸. 𑀲𑀫𑀼𑀕𑁆𑀖𑀸𑀝𑀺𑀢𑀓𑀫𑁆𑀫𑀓𑀺𑀮𑁂𑀲𑀦𑀺𑀭𑁄𑀥𑀦𑁂𑀦 𑀳𑀺 𑀧𑀼𑀣𑀼𑀚𑁆𑀚𑀦𑁂𑀳𑀺 𑀯𑀺𑀬 𑀲𑁄𑀢𑀸𑀧𑀦𑁆𑀦𑀲𑁆𑀲, 𑀲𑁄𑀢𑀸𑀧𑀦𑁆𑀦𑀸𑀤𑀻𑀳𑀺 𑀲𑀓𑀤𑀸𑀕𑀸𑀫𑀺𑀆𑀤𑀻𑀦𑀁 𑀧𑀼𑀕𑁆𑀕𑀮𑀦𑁆𑀢𑀭𑀪𑀸𑀯𑀽𑀧𑀕𑀫𑀦𑀁 𑀅𑀢𑁆𑀣𑀺, 𑀅𑀦𑀦𑁆𑀢𑀭𑀨𑀮𑀢𑁆𑀢𑀸 𑀘 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀸𑀦𑀁 𑀳𑁂𑀝𑁆𑀞𑀺𑀫𑀢𑁄 𑀉𑀧𑀭𑀺𑀫𑁄 𑀪𑀯𑀦𑁆𑀢𑀭𑀕𑀢𑁄 𑀯𑀺𑀬 𑀳𑁄𑀢𑀻𑀢𑀺 𑀢𑀲𑁆𑀲 𑀢𑀲𑁆𑀲 𑀅𑀭𑀺𑀬𑀲𑁆𑀲 𑀢𑀁 𑀢𑀁 𑀨𑀮𑀁 𑀪𑀯𑀗𑁆𑀕𑀲𑀤𑀺𑀲𑀁 𑀳𑁄𑀢𑀺, 𑀢𑀲𑁆𑀫𑀸 𑀧𑀼𑀕𑁆𑀕𑀮𑀦𑁆𑀢𑀭𑀪𑀸𑀯𑀽𑀧𑀕𑀫𑀦𑁂𑀦 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀢𑁆𑀢𑀸 𑀦𑀢𑁆𑀣𑀺 𑀉𑀧𑀭𑀺𑀫𑀲𑁆𑀲 𑀳𑁂𑀝𑁆𑀞𑀺𑀫𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀲𑀫𑀸𑀧𑀚𑁆𑀚𑀦𑀁, 𑀳𑁂𑀝𑁆𑀞𑀺𑀫𑁄 𑀧𑀦 𑀉𑀧𑀭𑀺𑀫𑀁 𑀦 𑀲𑀫𑀸𑀧𑀚𑁆𑀚𑀢𑀺 𑀅𑀦𑀥𑀺𑀕𑀢𑀢𑁆𑀢𑀸𑀢𑀺 𑀘𑀢𑁆𑀢𑀸𑀭𑁄𑀧𑀺 𑀧𑀼𑀕𑁆𑀕𑀮𑀸 𑀲𑀓𑀲𑀓𑀨𑀮𑀫𑁂𑀯 𑀲𑀫𑀸𑀧𑀚𑁆𑀚𑀦𑁆𑀢𑀺. 𑀢𑀁 𑀧𑀦 𑀲𑀫𑀸𑀧𑀚𑁆𑀚𑀺𑀢𑀼𑀓𑀸𑀫𑁂𑀦 𑀅𑀭𑀺𑀬𑀲𑀸𑀯𑀓𑁂𑀦 𑀭𑀳𑁄𑀕𑀢𑁂𑀦 𑀧𑀝𑀺𑀲𑀮𑁆𑀮𑀻𑀦𑁂𑀦 𑀉𑀤𑀬𑀩𑁆𑀩𑀬𑀸𑀤𑀺𑀯𑀲𑁂𑀦 𑀲𑀗𑁆𑀔𑀸𑀭𑀸 𑀯𑀺𑀧𑀲𑁆𑀲𑀺𑀢𑀩𑁆𑀩𑀸. 𑀢𑀲𑁆𑀲 𑀧𑀯𑀢𑁆𑀢𑀸𑀦𑀼𑀧𑀼𑀩𑁆𑀩𑀯𑀺𑀧𑀲𑁆𑀲𑀦𑀲𑁆𑀲 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀕𑁄𑀢𑁆𑀭𑀪𑀼𑀜𑀸𑀡𑀸𑀦𑀦𑁆𑀢𑀭𑀁 𑀨𑀮𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀦𑀺𑀭𑁄𑀥𑁂 𑀘𑀺𑀢𑁆𑀢𑀁 𑀅𑀧𑁆𑀧𑁂𑀢𑀺. 𑀨𑀮𑀲𑀫𑀸𑀧𑀢𑁆𑀢𑀺𑀦𑀺𑀦𑁆𑀦𑀘𑀺𑀢𑁆𑀢𑀢𑀸𑀬 𑀘𑁂𑀢𑁆𑀣 𑀲𑁂𑀔𑀲𑁆𑀲 𑀨𑀮𑀫𑁂𑀯 𑀉𑀧𑁆𑀧𑀚𑁆𑀚𑀢𑀺, 𑀦 𑀫𑀕𑁆𑀕𑁄. 𑀅𑀜𑁆𑀜𑁄 𑀏𑀯 𑀳𑀺 𑀯𑀺𑀧𑀲𑁆𑀲𑀦𑀸𑀘𑀸𑀭𑁄 𑀅𑀭𑀺𑀬𑀫𑀕𑁆𑀕𑀸𑀯𑀳𑁄, 𑀅𑀜𑁆𑀜𑁄 𑀨𑀮𑀲𑀫𑀸𑀧𑀢𑁆𑀢𑀺𑀆𑀯𑀳𑁄.

𑀢𑀣𑀸 𑀳𑀺 𑀅𑀭𑀺𑀬𑀫𑀕𑁆𑀕𑀯𑀻𑀣𑀺𑀬𑀁 𑀅𑀦𑀼𑀮𑁄𑀫𑀜𑀸𑀡𑀸𑀦𑀺 𑀅𑀦𑀺𑀩𑁆𑀩𑀺𑀤𑁆𑀥𑀧𑀼𑀩𑁆𑀩𑀸𑀦𑀁 𑀣𑀽𑀮𑀣𑀽𑀮𑀮𑁄𑀪𑀓𑁆𑀔𑀦𑁆𑀥𑀸𑀤𑀻𑀦𑀁 𑀲𑀸𑀢𑀺𑀲𑀬𑀁 𑀧𑀤𑀸𑀮𑀦𑁂𑀦 𑀮𑁄𑀓𑀺𑀬𑀜𑀸𑀡𑁂𑀲𑀼 𑀉𑀓𑁆𑀓𑀁𑀲𑀧𑀸𑀭𑀫𑀺𑀧𑁆𑀧𑀢𑁆𑀢𑀸𑀦𑀺 𑀫𑀕𑁆𑀕𑀸𑀦𑀼𑀓𑀽𑀮𑀸𑀦𑀺 𑀳𑀼𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀨𑀮𑀲𑀫𑀸𑀧𑀢𑁆𑀢𑀺𑀯𑀻𑀣𑀺𑀬𑀁 𑀧𑀦 𑀢𑀸𑀦𑀺 𑀢𑁂𑀦 𑀢𑁂𑀦 𑀫𑀕𑁆𑀕𑁂𑀦 𑀢𑁂𑀲𑀁 𑀢𑁂𑀲𑀁 𑀓𑀺𑀮𑁂𑀲𑀸𑀦𑀁 𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸 𑀓𑀺𑀮𑁂𑀲𑀯𑀺𑀓𑁆𑀔𑀫𑁆𑀪𑀦𑁂 𑀦𑀺𑀭𑀼𑀲𑁆𑀲𑀼𑀓𑁆𑀓𑀸𑀦𑀺 𑀓𑁂𑀯𑀮𑀁 𑀅𑀭𑀺𑀬𑀸𑀦𑀁 𑀨𑀮𑀲𑀫𑀸𑀧𑀢𑁆𑀢𑀺𑀲𑀼𑀔𑀲𑀫𑀗𑁆𑀕𑀺𑀪𑀸𑀯𑀲𑁆𑀲 𑀧𑀭𑀺𑀓𑀫𑁆𑀫𑀧𑁆𑀧𑀢𑁆𑀢𑀸𑀦𑀺 𑀳𑀼𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀦 𑀢𑁂𑀲𑀁 𑀓𑀼𑀢𑁄𑀘𑀺 𑀯𑀼𑀝𑁆𑀞𑀸𑀦𑀲𑀫𑁆𑀪𑀯𑁄. 𑀬𑀢𑁄 𑀦𑁂𑀲𑀁 𑀧𑀘𑁆𑀙𑀺𑀫𑁄 𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀢𑁄 𑀯𑀼𑀝𑁆𑀞𑀳𑀺𑀢𑁆𑀯𑀸 𑀫𑀕𑁆𑀕𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁄 𑀪𑀯𑁂𑀬𑁆𑀬, 𑀢𑁂𑀦𑁂𑀯 𑀘 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀅𑀦𑀦𑁆𑀢𑀭𑀧𑀘𑁆𑀘𑀬𑀪𑀽𑀢𑀁 𑀜𑀸𑀡𑀁 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀫𑁂𑀯 𑀳𑁄𑀢𑀺, 𑀦 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑀘𑀲𑁆𑀲𑀸 𑀧𑀩𑀦𑁆𑀥𑀯𑀲𑁂𑀦 𑀧𑀯𑀢𑁆𑀢𑀺𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀸𑀧𑀕𑀫𑁂 𑀪𑀯𑀗𑁆𑀕𑀯𑀲𑁂𑀦 𑀢𑀢𑁄 𑀯𑀼𑀝𑁆𑀞𑀸𑀦𑀜𑁆𑀘 𑀯𑁂𑀤𑀺𑀢𑀩𑁆𑀩𑀁.

𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺 𑀧𑀦 𑀢𑀢𑀺𑀬𑀘𑀢𑀼𑀢𑁆𑀣𑀨𑀮𑀝𑁆𑀞𑀸𑀦𑀁 𑀅𑀦𑀼𑀧𑀼𑀩𑁆𑀩𑀦𑀺𑀭𑁄𑀥𑀯𑀲𑁂𑀦 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀥𑀫𑁆𑀫𑀸𑀦𑀁 𑀅𑀧𑁆𑀧𑀯𑀢𑁆𑀢𑀺. 𑀅𑀦𑀸𑀕𑀸𑀫𑀺𑀅𑀭𑀳𑀦𑁆𑀢𑁄𑀬𑁂𑀯 𑀳𑀺 𑀓𑀸𑀫𑀘𑁆𑀙𑀦𑁆𑀤𑀸𑀤𑀺𑀲𑀫𑀼𑀘𑁆𑀙𑀺𑀦𑁆𑀤𑀦𑁂𑀦 𑀲𑀫𑀸𑀥𑀺𑀲𑁆𑀫𑀺𑀁 𑀧𑀭𑀺𑀧𑀽𑀭𑀓𑀸𑀭𑀺𑀢𑀸𑀬 𑀲𑀫𑀣𑀨𑀮𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀦𑀺𑀭𑁄𑀥𑀁 𑀲𑀫𑀸𑀧𑀚𑁆𑀚𑀦𑁆𑀢𑀺. 𑀢𑀣𑀸 𑀳𑁂𑀢𑀁 𑀲𑀫𑀣𑀯𑀺𑀧𑀲𑁆𑀲𑀦𑀸𑀦𑀁 𑀬𑀼𑀕𑀦𑀦𑁆𑀥𑀪𑀸𑀯𑀧𑁆𑀧𑀯𑀢𑁆𑀢𑀦𑀯𑀲𑁂𑀦 𑀤𑁆𑀯𑀻𑀳𑀺 𑀩𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲𑁂𑀯 𑀲𑀫𑁆𑀪𑀯𑀢𑀺, 𑀢𑀲𑁆𑀫𑀸 𑀢𑀁 𑀲𑀫𑀸𑀧𑀚𑁆𑀚𑀺𑀢𑀼𑀓𑀸𑀫𑁂𑀦 𑀅𑀦𑀸𑀕𑀸𑀫𑀺𑀦𑀸, 𑀔𑀻𑀡𑀸𑀲𑀯𑁂𑀦 𑀯𑀸 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑀸 𑀭𑀳𑁄𑀕𑀢𑁂𑀦 𑀧𑀝𑀺𑀲𑀮𑁆𑀮𑀻𑀦𑁂𑀦 𑀧𑀞𑀫𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀢𑀢𑁆𑀣 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀢𑁄 𑀤𑀼𑀓𑁆𑀔𑀢𑁄 𑀅𑀦𑀢𑁆𑀢𑀢𑁄 𑀯𑀺𑀧𑀲𑁆𑀲𑀺𑀢𑀩𑁆𑀩𑀸, 𑀢𑀢𑁄 𑀤𑀼𑀢𑀺𑀬𑀁 𑀢𑀢𑀺𑀬𑀁 𑀘𑀢𑀼𑀢𑁆𑀣𑀁 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀢𑀣𑁂𑀯 𑀢𑀢𑁆𑀣 𑀲𑀗𑁆𑀔𑀸𑀭𑀸 𑀲𑀫𑁆𑀫𑀲𑀺𑀢𑀩𑁆𑀩𑀸, 𑀅𑀣 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀦𑀸𑀦𑀸𑀩𑀤𑁆𑀥𑀸𑀯𑀺𑀓𑁄𑀧𑀦𑀁 𑀲𑀗𑁆𑀖𑀧𑀝𑀺𑀫𑀸𑀦𑀦𑀁 𑀲𑀢𑁆𑀣𑀼𑀧𑀓𑁆𑀓𑁄𑀲𑀦𑀁 𑀅𑀤𑁆𑀥𑀸𑀦𑀧𑀭𑀺𑀘𑁆𑀙𑁂𑀤𑁄𑀢𑀺 𑀘𑀢𑀼𑀩𑁆𑀩𑀺𑀥𑀁 𑀧𑀼𑀩𑁆𑀩𑀓𑀺𑀘𑁆𑀘𑀁 𑀓𑀸𑀢𑀩𑁆𑀩𑀁.

𑀢𑀢𑁆𑀣 𑀲𑀭𑀻𑀭𑀢𑁄 𑀯𑀺𑀲𑀁𑀬𑀼𑀢𑁆𑀢𑀸 𑀫𑀜𑁆𑀘𑀧𑀻𑀞𑀸𑀤𑀬𑁄 𑀲𑀢𑁆𑀢𑀸𑀳𑀩𑁆𑀪𑀦𑁆𑀢𑀭𑁂 𑀬𑀣𑀸 𑀦 𑀦𑀲𑁆𑀲𑀦𑁆𑀢𑀺, 𑀢𑀣𑀸 𑀅𑀥𑀺𑀝𑁆𑀞𑀸𑀦𑀁 𑀦𑀸𑀦𑀸𑀩𑀤𑁆𑀥𑀸𑀯𑀺𑀓𑁄𑀧𑀦𑀁. 𑀲𑀭𑀻𑀭𑀲𑀁𑀬𑀼𑀢𑁆𑀢𑁂 𑀯𑀺𑀲𑀼𑀁 𑀅𑀥𑀺𑀝𑁆𑀞𑀸𑀦𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀲𑀗𑁆𑀖𑁄 𑀧𑀦 𑀜𑀢𑁆𑀢𑀺𑀓𑀫𑁆𑀫𑀸𑀤𑀻𑀲𑀼 𑀓𑀺𑀜𑁆𑀘𑀺𑀤𑁂𑀯 𑀓𑀫𑁆𑀫𑀁 𑀓𑀢𑁆𑀢𑀼𑀓𑀸𑀫𑁄 ‘‘𑀬𑀸𑀯 𑀫𑀁 𑀦 𑀧𑀓𑁆𑀓𑁄𑀲𑀢𑀺, 𑀢𑀸𑀯𑀤𑁂𑀯 𑀯𑀼𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀧𑀼𑀩𑁆𑀩𑀸𑀪𑁄𑀕𑀓𑀭𑀡𑀁 𑀲𑀗𑁆𑀖𑀧𑀝𑀺𑀫𑀸𑀦𑀦𑀁. 𑀲𑀢𑁆𑀣𑀸 𑀘 ‘‘𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀸𑀧𑀦𑀸𑀤𑀻𑀲𑀼 𑀬𑀸𑀯 𑀫𑀁 𑀦 𑀧𑀓𑁆𑀓𑁄𑀲𑀢𑀺, 𑀢𑀸𑀯𑀤𑁂𑀯 𑀯𑀼𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀧𑀼𑀩𑁆𑀩𑀸𑀪𑁄𑀕𑀓𑀭𑀡𑀁 𑀲𑀢𑁆𑀣𑀼𑀧𑀓𑁆𑀓𑁄𑀲𑀦𑀁. 𑀲𑀢𑁆𑀢𑀸𑀳𑀩𑁆𑀪𑀦𑁆𑀢𑀭𑁂 𑀅𑀢𑁆𑀢𑀦𑁄 𑀆𑀬𑀼𑀲𑀗𑁆𑀔𑀸𑀭𑀲𑁆𑀲 𑀧𑀯𑀢𑁆𑀢𑀦𑀲𑀫𑀢𑁆𑀣𑀢𑀸𑀯𑀮𑁄𑀓𑀦𑀁 𑀅𑀤𑁆𑀥𑀸𑀦𑀧𑀭𑀺𑀘𑁆𑀙𑁂𑀤𑁄. 𑀏𑀯𑀁 𑀓𑀢𑀧𑀼𑀩𑁆𑀩𑀓𑀺𑀘𑁆𑀘𑁂𑀦 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀁. 𑀅𑀣𑁂𑀓𑀁 𑀯𑀸 𑀤𑁆𑀯𑁂 𑀯𑀸 𑀘𑀺𑀢𑁆𑀢𑀯𑀸𑀭𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀘𑀺𑀢𑁆𑀢𑀓𑁄 𑀳𑁄𑀢𑀺, 𑀦𑀺𑀭𑁄𑀥𑀁 𑀨𑀼𑀲𑀢𑀺, 𑀢𑀢𑁄 𑀬𑀣𑀸𑀧𑀭𑀺𑀘𑁆𑀙𑁂𑀤𑀁 𑀢𑀢𑀺𑀬𑀘𑀢𑀼𑀢𑁆𑀣𑀨𑀮𑀸𑀦𑀁 𑀅𑀜𑁆𑀜𑀢𑀭𑁂𑀦 𑀦𑀺𑀭𑁄𑀥𑀸 𑀯𑀼𑀝𑁆𑀞𑀳𑀺𑀲𑁆𑀲𑀢𑀻𑀢𑀺. 𑀏𑀯𑀫𑀬𑀁 𑀤𑀼𑀯𑀺𑀥𑀸 𑀲𑀫𑀸𑀧𑀢𑁆𑀢𑀺 𑀮𑁄𑀓𑀼𑀢𑁆𑀢𑀭𑀧𑀜𑁆𑀜𑀸𑀬 𑀆𑀦𑀺𑀲𑀁𑀲𑁄.

𑁧𑁩𑁯𑁨-𑁪. 𑀲𑀤𑁂𑀯𑀓𑀮𑁄𑀓𑀢𑁄 𑀉𑀢𑁆𑀢𑀺𑀡𑁆𑀡𑁂𑀦, 𑀉𑀢𑁆𑀢𑀭𑀺𑀢𑀭𑁂𑀦 𑀯𑀸𑀢𑀺 𑀮𑁄𑀓𑀼𑀢𑁆𑀢𑀭𑁂𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦. 𑀧𑀜𑁆𑀜𑀸𑀬 𑀪𑀸𑀯𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀳𑀺𑀢𑀪𑀸𑀯𑀦𑀦𑁆𑀢𑀺 𑀇𑀥𑀮𑁄𑀓𑀧𑀭𑀮𑁄𑀓𑀳𑀺𑀢𑀯𑀺𑀪𑀸𑀯𑀦𑀁 𑀇𑀫𑀁 𑀧𑀜𑁆𑀜𑀸𑀪𑀸𑀯𑀦𑀁. 𑀲𑀼𑀔𑀲𑀁𑀳𑀺𑀢𑀦𑁆𑀢𑀺 𑀲𑀺𑀦𑀺𑀤𑁆𑀥𑀘𑁆𑀙𑀸𑀬𑀼𑀤𑀓𑀯𑀦𑁆𑀢𑀢𑀸𑀤𑀺𑀦𑀸 𑀲𑀼𑀔𑀲𑀳𑀺𑀢𑀁. 𑀳𑀺𑀢𑀦𑁆𑀢𑀺 𑀬𑁄𑀕𑀓𑀫𑁆𑀫𑀲𑁆𑀲 𑀳𑀺𑀢𑀁. 𑀉𑀢𑁆𑀢𑀫𑀦𑁆𑀢𑀺 𑀉𑀕𑁆𑀕𑀢𑀢𑀫𑀁, 𑀅𑀘𑁆𑀘𑀼𑀕𑁆𑀕𑀢𑀁 𑀩𑀮𑀯𑀦𑁆𑀢𑀫𑁆𑀧𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀯𑀺𑀕𑁆𑀕𑀳𑀓𑀫𑁆𑀧𑀤𑀦𑁆𑀢𑀺 𑀯𑀺𑀕𑁆𑀕𑀳𑀜𑁆𑀘 𑀓𑀫𑁆𑀧𑀜𑁆𑀘 𑀦 𑀤𑁂𑀢𑀻𑀢𑀺 𑀅𑀯𑀺𑀕𑁆𑀕𑀳𑀓𑀫𑁆𑀧𑀤𑀦𑁆𑀢𑀺 𑀅𑀢𑁆𑀣𑁄.

𑀇𑀢𑀺 𑀅𑀪𑀺𑀥𑀫𑁆𑀫𑀢𑁆𑀣𑀯𑀺𑀓𑀸𑀲𑀺𑀦𑀺𑀬𑀸 𑀦𑀸𑀫

𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑀲𑀁𑀯𑀡𑁆𑀡𑀦𑀸𑀬

𑀓𑀺𑀮𑁂𑀲𑀧𑁆𑀧𑀳𑀸𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.